ವಿಗ್ಯಾನಾನ್ ಮನ್ಶ್ಯಾಚಿ ಜಿಣಿ ಸಭಾರ್ ರಿತಿನಿ ಬದ್ಲಿಲ್ಯಾ ಮ್ಹಳ್ಯಾರ್ ಚೂಕ್ ನ್ಹಯ್. 21 ವ್ಯಾ ಶೆಕ್ಡ್ಯಾಂತ್ ಹೆಂ ಧರ್ ಧರ್ ಮ್ಹಣ್ ದಿಸೊನ್ ಆಸಾ. ವಿಗ್ಯಾನ್ ಇತ್ಲೆಂ ಮುಖಾರ್ ಪಾವ್ಲ್ಯಾರೀ, ದೇವ್, ಧರ್ಮ್, ಸಾಂತ್, ದೆವಾಚೆ ಮನಿಸ್, ಪಾತಕ್, ಭೊಗ್ಸಾಣೆಂ, ಸರ್ಗ್ ಆನಿ ಯೆಮ್ಕೊಂಡ್ ಇತ್ಯಾದಿಂಕ್ ಬದ್ಲುಕ್ ಸಕ್ಲೆಂನಾ ಮ್ಹಳ್ಯಾರೀ ಚೂಕ್ ಜಾಯ್ನಾ. ಕ್ರಿಸ್ತಾಂವ್ ಧರ್ಮ್ ಅದ್ಭುತ್ ದಾವೊ ಮಾಂಡ್ಚಾಂತ್ ಹುಶಾರ್. ಹರ್ಯೆಕಾ ಆಯ್ತಾರಾ ಕ್ರಿಸ್ತಾಂವ್ ಲೋಕ್ ಶೆಳೊ, ನಿರಾಶೆಚೊ ತಸೆಂ ಲಾಂಬ್ ಶೆರ್ಮಾಂವ್ ಜಾಲ್ಯಾ ಮಾಗಿರ್ ಯಾಂತ್ರಿಕ್ಪಣಿ “ತಿಸ್ರ್ಯಾ ದಿಸಾ ತೊ ಮೆಲ್ಲ್ಯಾಂತ್ಲೊ ಜಿವಂತ್ ಜಾಲೊ” ಮ್ಹಣ್ ಉಚಾರ್ತಾತ್. ಪೂಣ್ ಹೆಂ ಕಿತ್ಲೆಂ ನೀಜ್? ವಿಗ್ಯಾನ್ ಯಾ ವಿಜ್ಞಾನಿ ಹೆಂ ಪಾತ್ಯೆತಾ? ಹೆಂ ಏಕ್ ಮಹತ್ವಾಚೆಂ ಸವಾಲ್ ಜಾವ್ನಾಸಾ. ಏಕಾದವೆಳಾ ಹೆಂ ಸತ್ ಜಾಲ್ಯಾರ್ ತಾಚೊ ಪರಿಣಾಮ್ ಕ್ರಿಸ್ತೀ ಲೊಕಾಂಕ್ ತಾಂಚ್ಯಾ ಜಿವಿತಾ ವಿಶಿಂ, ಮರ್ಣಾವಿಶಿಂ ಆನಿ ಮರ್ಣಾ ಉಪ್ರಾಂತ್ಲ್ಯಾ ಜಿಣ್ಯೆ ವಿಶಿಂ ಜಾತಾ.
ವಿಗ್ಯಾನ್ ತಾತ್ವಿಕ್ ನದ್ರೆನ್ ಪುನರ್ಜಿವಂತ್ಪಣಾ ವಿಶಿಂ ಆಸ್ಚೆಂ ಲೋಕಾಚೆಂ ಕಲ್ಪನ್ ಪಾತ್ಯೆನಾ. ವಿಗ್ಯಾನ್ ಮೆಲ್ಲ್ಯಾ ಉಪ್ರಾಂತ್ ಮೆಲ್ಲಿ ಕೂಡ್ ಕಿತೆಂ ಜಾತಾ ಮ್ಹಣ್ ಸಾಂಗ್ತಾ. ಆನಿ ಹೆಂ ಸತ್. ವಿಜ್ಞಾನಿ ಆಪ್ಲ್ಯಾ ಪ್ರಯೋಗಾದ್ವಾರಿಂ ಸತ್ ಯಾ ಫಟ್ ಮ್ಹಣ್ ಸಾಂಗ್ತಾತ್. ಆಸೆಂ ಆಸ್ಲ್ಯಾರೀ, ಅತ್ಯಂತ್ ಪರಿಣಾಮ್‌ಕಾರಿ, ಅಸಮಾನ್ಯ್ ಘಡಿತಾಕ್ ಸತ್ ಯಾ ಫಟ್ ಮ್ಹಣ್ ಸಾಂಗೊಂಕ್ ಸಕ್ಲೆನಾಂತ್ ಮ್ಹಳ್ಳೆಂಯ್ ಸತ್. ಹೆಂ ಜಾಂವ್ಕ್ ವಿಗ್ಯಾನಾನ್ ವಿಶಾಲ್ ಮನೋಭಾವಾನ್ “ಖಂಚೆ ಪುರಾವೆ ಆಸಾತ್?” ಮ್ಹಣ್ ವಿಚಾರ್ಚೆಂ ಗರ್ಜೆಚೆಂ.
ಜೆಜುಚ್ಯಾ ಜಿವಂತ್ಪಣಾ ವಿಶಿಂ ಭಾವಡ್ತ್ಯಾಂಕ್ ನವ್ಯಾ ಸೊಲ್ಲ್ಯಾಂತ್ಲೆ ಚಾರ್ ವಾಂಜೆಲ್ ಆನಿ ಪಾವ್ಲುನ್ ಬರಯಿಲ್ಲ್ಯಾ ಪತ್ರಾ ದ್ವಾರಿಂ ಕಳ್ತಾ. ಜಾಣಾರ‍್ಯಾಂನಿ ಸಾಂಗ್ಚ್ಯಾ ಪ್ರಕಾರ್ ಹೆಂ ಸಕ್ಕಡ್ ಬರಯಿಲ್ಲೆಂ 60 ಆನಿ 90 AD ಆವ್ದೆಂತ್. ಜೆಜು ಮೆಲ್ಲೊ ಬಹುಶ್ಯಾ 33 AD ಎಪ್ರಿಲಾಂತ್ ಮ್ಹಣ್ತಾತ್. ಮದ್ಲಿ ಅವ್ದಿ ಪಳೆಲ್ಯಾರ್ ಮೊಸ್ತು ಉಣಿ. ದೆಕುನ್ ಜಿವಂತ್ಪಣಾ ವಿಶಿಂ ಬರಂವ್ಚಾ ವಗ್ತಾ ಜೆಜು ಜಿವಂತ್ ಆಸ್ತಾನಾ ಅಸ್ಲಲೊ ಲೋಕ್ ಅನಿಕೀ ವಾಂಚೊನ್ ಆಸ್‌ಲ್ಲೊ ಮಣ್ ಕಳೊನ್ ಯೆತಾ.
ವಾಂಜೆಲಾಂತ್ ಸಾಂಗ್ಲೆಲ್ಯಾ ಘಡಿತಾಂಕ್ ಪುರಾವೊ ದೀಂವ್ಕ್ ದೋನ್ ಅಂಶ್ ಆಸಾತ್- ಏಕ್, ಜುದೆವಾಂಚ್ಯಾ ಫಾಸ್ಕಾ ಫೆಸ್ತಾ ವೆಳಾ ಜೆಜುಕ್ ನಿಕೆಪಿಲ್ಲೊ ಫೊಂಡ್ ರಿತೊ ಆಸ್ ಲ್ಲೊ, ಆನಿ ದುಸ್ರೆಂ, ಮೆಲ್ಲ್ಯಾ ಉಪ್ರಾಂತ್ ತೊ ಜಾಯಿತ್ತ್ಯಾ ಜಣಾಂಕ್ ಜಿವೊಚ್ ದಿಸ್‌ಲ್ಲೊ. ವಾಂಜೆಲಾಂ ಮಧೆಂ ಲ್ಹಾನ್ ಲ್ಹಾನ್ ಸಂಗ್ತಿ ವಿಶಿಂ ಮತ್ ಬೇದ್ ಆಸಾ ವ್ಹಯ್. ಪೂಣ್, ಹೊ ಬೇಧ್ ಹರ್ಯೆಕ್ ವಾಂಜೆಲ್ ವಿವಿಂಗಡ್ ಕಾಳಾರ್, ಸ್ವತಂತ್ರ್ ಜಾವ್ನ್ ಬರಯಿಲ್ಲೆ ಆನಿ ಫಕತ್ತ್ ಕಲ್ಪನ್ ಕರ್ನ್, ಫಟಿ ಬರಂವ್ಕ್ ನಾ ಮ್ಹಣ್ ಸಯ್ತ್ ಕಳ್ತಾ.
ಚಡ್ ಲಾಗ್ಸಿಲೊ ಪುರಾವೊ ಪಾವ್ಲಾನ್ ಕೊರಿಂಥ್ ಗಾರಾಂಕ್ ಬರಯಿಲ್ಲ್ಯಾ ಪಂದ್ರಾವ್ಯಾ ಅವಸ್ವರಾಂತ್ ಬರಯಿಲ್ಲ್ಯಾ ಪತ್ರಾಂತ್ ಮೆಳ್ತಾ. ಹೆಂ ತಾಣೆಂ ಬರಯಿಲ್ಲೆಂ ಸುಮಾರ್ 55Oತ್. ತೊ ಸಕಯ್ಲೆ ಪುರಾವೆ ದಿತಾ:
1. ಥೊಡ್ಯೊ ಸ್ತ್ರೀಯೊ (ಮರಿ ಮಾಗ್ದಲೆನ್ ಹಾಂಚೆ ಪಯ್ಕಿ ಏಕ್ಲಿ) ಫೊಂಡಾಲಾಗಿಂ ಗೆಲ್ಲ್ಯಾ ವಗ್ತಾ ತಾಂಕಾಂ ಭಿತರ್ ಜೆಜುಚಿ ಕೂಡ್ ದಿಸ್ಲಿ ನಾ. ತಾಣಿಂ ವಚುನ್ ಹಿ ಖಬಾರ್ ಶಿಸಾಂಕ್ ಸಾಂಗ್ಲಿ ಆನಿ ತೆ ತೊ ಜಿವಂತ್ ಜಾಲಾ ಮ್ಹಣ್ ಪಾತ್ಯೆಲೆ. ಪೂಣ್ ಖರಿ ಗಜಾಲ್ ಕಸಲಿಗಿ ಮ್ಹಳ್ಯಾರ್, ತ್ಯಾ ಕಾಳಾರ್ ಸ್ತ್ರೀಯಾನಿ ಸಾಂಗ್ಲೆಲೆಂ ಸತಾಕ್ ಪಯ್ಸ್ ಆನಿ ತಾಂಕಾಂ ಸಾಕ್ಸ್ ದಿಂವ್ಚಾಕ್ ಅವ್ಕಾಸ್ ನಾತ್ ಲ್ಲೊ. ತರ್, ಶಿಸ್ ಕಸೆ ಪಾತ್ಯೆಲೆ?
2. ಜೆಜು ಪಾಂಯ್ಶಿ ಲೊಕಾಂಕ್ ಏಕಾಚ್ ಸಾಂಗಾತಾ ದಿಶ್ಟಿಕ್ ಪಡ್ಲೊ. ಹಾಂತ್ಲೆ ಸಭಾರ್ ಜಣ್ ಜೆಜು ಜಿವಂತ್ ಆಸ್ತಾನಾ ಅಸ್ಲೆಲೆ ತೊ 22 ವರ್ಸಾಂ ಉಪ್ರಾಂತ್ ಮ್ಹಳ್ಳೆಲೆಂ ತೊ ಸಾಂಗ್ತಾ.
3. ಜುದಾಸಾಕ್ ಸೊಡ್ನ್ ಹೆರಾಂ ಶಿಸಾಂಕ್ ತೊ ದಿಶ್ಟಿಕ್ ಪಡ್ಲೊ. ಜುದಾಸಾಚ್ಯಾ ಜಾಗ್ಯಾರ್ ನಮಿಯಾರ್ಲೆಲೊ ಮಥಿಯಾಸ್ ಸಯ್ತ್ ಹಾಕಾ ಸಾಕ್ಸ್.
4. ಅಖ್ರೇಚಿ ಸಾಕ್ಸ್ ಜಾವ್ನ್ ಅಪುಣ್ ಸೊಮ್ಯಾಕ್ ದಾಮಾಸ್ಕಾಚ್ಯಾ ವಾಟೆರ್ ಮೆಳೊನ್ ಕನ್ವಡ್ತರ್ ಜಾವ್ನ್ ಜೆಜುಕ್ ವಿರೋಧಿ ಜಾವ್ನಾಸ್ಲಲೊ ಅಪುಣ್ ತಾಚೊ ಖರೊ ಶಿಸ್ ಜಾಲೊಂ.
ಹೆ ಸೊಡ್ನ್ ಜೆಜುಚ್ಯಾ ಜಿವಂತ್ಪಣಾ ವಿಶಿಂ ಹೆರ್ ಪುರಾವೆ ಸಯ್ತ್ ಆಸಾತ್. ಹೆ ಪುರಾವೆ ಫಟಿಂಕ್ ರೆವ್ಡಾವ್ನ್ ಆಸ್ಚೆ. ಜೆಜುಚ್ಯಾ ಶಿಸಾಂನಿ ತಾಚಿ ಕೂಡ್ ಚೊರ್ಲಿ ಮ್ಹಣ್ ಫಟ್ಕಿರಿ ಖಬಾರ್ ಜುದೆವ್ ಮುಖೆಲ್ಯಾಂನಿ ಜಾಯ್ ಮ್ಹಣ್ ಪ್ರಚಾರ್ ಕೆಲ್ಲಿ ಆಸಾ. ಹ್ಯಾ ವರ್ವಿಂ ಶಿಸಾಂನಿ ಫಟಿ ಮಾರ್ಲೆಲಿ ಮ್ಹಣ್ ದಿಸೊನ್ ಯೆತಾ. ಅಸೆಂ ಜಾಲ್ಲೆಂ ನೀಜ್ ತರ್, ಮುಕ್ಲ್ಯಾ ವರ್ಸಾಂನಿ ತೆಚ್ ಶಿಸ್ ಮಾಡ್ತಿರಾಂಚೆ ಮರಣ್ ಮೊರ್ತೆನಾಂತ್. ಜಿವಾಚ್ಯಾ ಆಶೆನ್ ಪುಣಿ ಫಟ್ ಮಾರ್ಲೆಲಿ ಮ್ಹಣ್ ಸಾಂಗ್ತೆ. ಪೂಣ್ ತಾಣಿಂ ಜೆಜು ಜಿವಂತ್ ಜಾಲಾ ಮ್ಹಣ್ ಪರ್ತುನ್ ಪರ್ತುನ್ ಸಾಕ್ಸ್ ದಿಲಿ ಆನಿ ಮಾಡ್ತಿರಾಂಚೆ ಮರಣ್ ಆಪ್ಣಾಯ್ಲೆಂ.
ತ್ಯಾಚ್ ಜುದೆವಾಚ್ಯಾ ಮುಖೆಲ್ಯಾಂಕ್ ಸಯ್ತ್ ಶಿಸಾಂನಿ ಫಟ್ಕಿರೆ ಮ್ಹಣ್ ಸಾಬೀತ್ ಕರ್ಚಾಕ್ ಜಾಲೆಂನಾ ಮ್ಹಳ್ಳೆಂಯ್ ಸತ್. ವಿಗ್ಯಾನ್ ಸತ್ ಮಾಂದುನ್ ಘೆಂವ್ಕ್ ಪುರಾವೆ ಮಾಗ್ತಾ ಆನಿ ಮೆಳ್ಲೆಲ್ಯಾ ಪುರಾವೆಚ್ಯಾ ಆಧಾರಾಚೆರ್ ಆಪ್ಲೆ ಸಿದ್ಧಾಂತ್ ಮುಖಾರ್ ದವರ್ತಾತ್. ಜೆಜುಚ್ಯಾ ಜಿವಂತ್ಪಣಾ ವಿಶಿಂ ಸಭಾರ್ ಪುರಾವೆ ಮೆಳ್ತಾತ್. ಪೂಣ್ ಹೆ ಪಳೆಂವ್ಕ್ ಸಯ್ತ್ ವಿಗ್ಯಾನ್ ತಯಾರ್ ನಾ ಮ್ಹಣ್ತಾನಾ , ವಿಗ್ಯಾನಾಕ್ ಜೆಜು ಮರ್ಣಾಂತ್ಲೊ ಜಿವಂತ್ ಜಾಲಾ ಯಾ ನಾ ಮ್ಹಳ್ಲ್ಯಾ ವಿಶಿಂ ಫರಕ್ ಪಡನಾ. (ಸಭಾರ್ ವಿಜ್ಞಾನಿ ದೆವಾಕ್ ಮಾಂದ್ತಾತ್, ಪೂಜಾ ಕರ್ತಾತ್ ಮ್ಹಳ್ಲೆಂ ಸತ್ ವೆಗ್ಳೆಂಚ್).
“ತೊ ಜಿವಂತ್ ಆನಿ ಮೆಲ್ಲ್ಯಾಂಚಿ ಝಡ್ತಿ ಕರುಂಕ್ ಪರ್ತುನ್ ಯೆತೊಲೊ” ಮ್ಹಣ್ ಭಾವಾಡ್ತಿ ಉಚಾರ್ತಾತ್ ಜಾಲ್ಯಾರ್ ತೊ ಏಕ್ ಪಾವ್ತಿಂ ಯೇವ್ನ್ , ಜಿಯೆವ್ನ್, ಮೊರೊನ್ ಜಿವಂತ್ ಜಾಲಾ ತರ್ ಪರ್ತುನ್ ಕಸೊ ಯೆತೊಲೊ? ಭಾಸಾಯ್ಲೆಲ್ಯಾ ಗಾವಾಂತ್ ಜಲ್ಮಾಲ್ಲ್ಯಾ ತಾಕಾ ಅಜೂನ್ ಜುದೆವಾಂನಿ ದೆವಾಚೊ ಪೂತ್ ಯಾ ಸೊಡ್ವಣ್ದಾರ್ ಮ್ಹಣ್ ಮಾಂದುಂಕ್ ನಾ. ಕೂಡ್ ಆನಿ ಆತ್ಮ್ಯಾ ಸಮೇತ್ ಜೆಜು ಸರ್ಗಾಕ್ ಗೆಲೊ ತರ್, ಪರ್ತುನ್ ಕಸೊ ಯೇಂವ್ಕ್ ಜಾತಾ? ( ಹೊ ಸರ್ಗ್ ಮ್ಹಳ್ಳೆಂ ಕಲ್ಪನ್ ಸಯ್ತ್ ಚರ್ಚಾಸ್ಪದ್ ಜಾವ್ನಾಸಾ). ಚರಿತ್ರೆಂತ್ (ಆಮಿ ಪಾತ್ಯೆಲ್ಯಾರ್ ಮಾತ್ರ್) ಏಕ್ ಸಯ್ತ್ ಮನಿಸ್, ಸ್ತ್ರೀಯೆ ಥಾವ್ನ್ ಜಲ್ಮಾಲ್ಲೊ (ಜೆಜು ಸಯ್ತ್ ಅಸೊಚ್ ಜಲ್ಮಾಲ್ಲೊ ನ್ಹಯ್ವೇ?) ಮೆಲ್ಲ್ಯಾ ಉಪ್ರಾಂತ್ ಪರ್ತುನ್ ದಿಸೊಂಕ್ ನಾ. ತರ್, ಜೆಜು ಕಸೊ ದಿಸ್ಲೊ? ( ಹೆಂಚ್ ಹೆರ್ ಧರ್ಮಾಂತ್ ಆಸ್ಚೆಂ ಇಗರ್ಜ್ ಮಾತಾ, ದೇವ್ ಪ್ರಜಾ ಒಪ್ವಾನಾ). ಮನ್ಶ್ಯಾನ್ ರಚ್ಲಲ್ಯಾ ಧರ್ಮಾನ್, ತಾಂತ್ಲ್ಯಾ ಧಾರ್ಮಿಕಾನಿ ಸಾಂಗ್ಲೆಲೆಂ ಯಾ ಫರ್ಮಾಯಿಲ್ಲೆಂ ಆಯ್ಕೊನ್, ತಾಣಿಂ ಬರಯಿಲ್ಲೆಂ ವಾಚುನ್ ಜೆಜು ಜಿವಂತ್ ಜಾಲಾ ಮ್ಹಣ್ ಪಾತ್ಯೆಂವ್ಕ್ ಜಾತಾವೇ? ಆತಾಂ ಸವಾಲ್ ತೆಂಚ್ ಉರ್ತಾ- ” ನೀಜ್ ಜಾವ್ನ್ ಜೆಜು ಮರ್ಣಾಂತ್ಲೊ ಉಟ್ಲಾವೇ?”
■ ಉಬ್ಬ, ಮೂಡ್ ಬಿದ್ರಿ
1 comment
Very interesting and informative article.. Happy Easter..