ʻಸಂಗೀತ್ ಘರ್ʼ ಬ್ಯಾನರಾಖಾಲ್ ತಯಾರ್ ಜಾಂವ್ಚೆಂ ಯೊಡೆಲಿಂಗ್ ಕಿಂಗ್ ಮೆಲ್ವಿನ್‍ ಪೆರಿಸ್ ಆನಿ ನಿರ್ದೇಶಕ್ ಜೋಯಲ್ ಪಿರೇರಾ ಹಾಂಚೆಂ ಪಯ್ಲೆಂ ಫಿಲ್ಮ್ ‘ಪಯಣ್’ ಹಾಚೆಂ ಚಿತ್ರೀಕರಣ್ ಸುಕ್ರಾರಾ, ಏಪ್ರಿಲ್ 19 ವೆರ್ ಮಂಗ್ಳುರ್ಚ್ಯಾ ʻವೈಟ್ ಡವ್ಸ್ʼ ಆಶ್ರ್ಯಾಂತ್ ಸುರ್ವಾತ್ಲೆಂ. ನೀಟಾ ಪೆರಿಸ್ ಹಿಣೆ ನಿರ್ಮಾಣ್ ಕರ್ಚೆಂ ಹೆಂ ಫಿಲ್ಮ್, ʻಸಂಗೀತ್ ಗುರುʼ ಮ್ಹಣ್ ಫಾಮಾದ್ ಜಾಲ್ಲೊ ಜೋಯಲ್ ಪಿರೇರಾ ನಿರ್ದೇಶನ್ ಕರ್ತಾ. ಫಿಲ್ಮಾಚಿ ಕಾಣಿ ತಶೆಂಚ್ ಸಂಭಾಷಣ್ ತಾಚೆಂಚ್. ಫಿಲ್ಮಾಚಿಂ ಪದಾಂ ಆನಿ ತಾಳೆ ಮೆಲ್ವಿನ್‍ ಪೆರಿಸಾಚೆ ಜಾವ್ನಾಸೊನ್ ಫಾಮಾದ್ ಸಂಗೀತ್ ನಿರ್ದೇಶಕ್ ರೋಶನ್ ಡಿಸೋಜಾ, ಆಂಜೆಲೋರ್ ಹಾಣೆಂ ಸಂಗೀತ್ ಸಂಯೋಜನ್ ಕೆಲಾಂ.
ಚಿತ್ರೀಕರಣಚ್ಯಾ ಪಯ್ಲೆಂ ಕೊರ್ಡೆಲ್ ಫಿರ್ಗಜಿಚೊ ವಿಗಾರ್ ಮಾ| ಬಾ| ಕ್ಲಿಫರ್ಡ್ ಫೆರ್ನಾಂಡಿಸ್ ಹಾಣೆ ಮಾಗ್ಣ್ಯಾವಿದಿ ಚಲವ್ನ್ ವ್ಹೆಲಿ. ವೈಟ್ ಡವ್ಸ್ ಹಾಚಿ ಸಂಸ್ಥಾಪಕಿ ಶ್ರೀಮತಿ ಕೊರಿನ್ ರಾಸ್ಕ್ವಿನ್ಹಾ ಹಿಣೆ ಕ್ಲಾಪ್ ಮಾರ್ಚೆ ಮಾರಿಫಾತ್ ಚಿತ್ರೀಕರಣಾಕ್ ಸುರ್ವಾತ್ ದಿಲಿ. ಹ್ಯಾ ಸಂದರ್ಭಾರ್ ಭಕ್ತಿಕ್ ಗಿತಾಂ ಆನಿ ಕೊಂಕಣಿ ಸಂಗೀತ್ ಶೆತಾಕ್ ಅಘಣಿತ್ ಸೆವಾ ದಿಲ್ಲ್ಯಾ ಮೆಲ್ವಿನ್‍ಪೆರಿಸ್ ಹಾಕಾ ಉಲ್ಲಾಸುನ್ ಉಲಯಿಲ್ಲ್ಯಾ ತಿಣೆ ʻಏಕ್ ಉತ್ತೀಮ್ ಪದಾಂ ಗಡ್ಪಿ, ಸಂಗೀತ್ ರಚ್ಪಿ ಆನಿ ಏಕ್ ಉತ್ತೀಮ್ ಸಂಗೀತ್ ನಿರ್ದೇಶಕ್ , ಹ್ಯಾ ಜೊಡಿಥಾವ್ನ್ ತಯಾರ್ ಜಾಂವ್ಚೆಂ- ಎಕಾ ಗಾವ್ಪ್ಯಾಚೆಂ ಜಿಣ್ಯೆ ಪಯಣ್ ಚಿತ್ರಿತ್ ಕರ್ಚೆಂ ʻಪಯಣ್ʼ ಫಿಲ್ಮ್ ಕೊಂಕಣಿ ಫಿಲ್ಮಾಚ್ಯಾ ಇತಿಹಾಸಾಂತ್ ಏಕ್ ನವೊ ದಾಖ್ಲೊ ರಚುಂದಿʼ ಮ್ಹಣ್ ಬರೆಂ ಮಾಗ್ಲೆಂ.
ʻಪಯಣ್ʼ ಫಿಲ್ಮಾಂತ್ ಬ್ರಾಯಾನ್ ಸಿಕ್ವೇರಾ, ಡಾ. ಜಾಸ್ಮಿನ್ ಡಿಸೋಜಾ ಆನಿ ಕೇಟ್ ಪಿರೇರಾ ಮುಖೆಲ್ ಪಾತ್ರಾಂತ್ ಆಸಾತ್ ತರ್, ಶೈನಾ ಡಿಸೋಜಾ, ರೈನೆಲ್ ಸಿಕ್ವೇರಾ, ಲೆಸ್ಲಿ ರೆಗೊ, ಜೆರಿ ರಸ್ಕಿನ್ಹಾ, ವಾಲ್ಟರ್ ನಂದಳಿಕೆ, ಆಲ್ಬರ್ಟ್ ಪೆರಿಸ್, ಜೀವನ್ ವಾಸ್, ಮೆಲಿಶಾ ಪಿಂಟೊ ಆನಿ ಜೋಸ್ಸಿ ರೇಗೊ, ಹೆರ್ ಪಾತ್ರ್ ಖೆಳ್ತಾತ್. ವಿ ರಾಮಾಂಜನೇಯ ಕ್ಯಾಮೆರಾಂತ್ ಆನಿ ಮೆವಿಲ್ ಜೋಯಲ್ ಪಿಂಟೊ ಸಂಕಲನ್/ ಸಹ-ನಿರ್ದೇಶಕ್ ಜಾವ್ನ್ ಕಾಮ್ ಕರ್ತಾತ್.
