ಆಮ್ಚ್ಯಾ ದೇಶಾಚಿ ಪ್ರಸ್ತುತ್ ಪರಿಸ್ಥಿತಿ ಪಳೆತಾನಾ ಆತಂಕ್ ತಸೆಂ ಭೆಂ ದಿಸ್ತಾ. ಸಂವಿಧಾನಾನ್ ದಿಲ್ಲಿಂ ಮೌಲ್ಯಾಂ, , ತತ್ವಾಂ ಕಶೆಂ ಪಿಳುನ್, ಸ್ವಾರ್ಥ್, ಅನ್ಯಾಯ್, ಅನೀತ್, ದಗ್ದವ್ಣಿ ಇತ್ಯಾದಿ ಚಲಂವ್ಕ್ ರಾಜಕೀಯ್ ಅಧಿಕಾರಾನ್, ಧರ್ಮಾಚ್ಯಾ ನಾಂವಿ ಲೋಕಾಚಿಂ ಮನಾಂ ಸಂಕುಚಿತ್ ಮನೋಭಾವಾನ್ ಹಗೆಂ ಆಪ್ಣಾಂವ್ಕ್ ಪ್ರೇತನ್ ಜಾತೇ ಆಸ್ಚೆಂ ಆಮಿ ಪಳೆತಾಂವ್. ಲೋಕ್ ಅಸಹಾಯಕ್ ಜಾಲಾ. ಮೊಲಾಂ ಮೊಲ್ಬಾಕ್ ಚಡ್ಲ್ಯಾಂತ್. ಕಾಮ್ ಧಂದೊ ನಾಸ್ತಾಂ ಲಾಖೊಂ ಲೋಕ್ ದುಬ್ಳೊ ಜಾಲಾ. ಆತಾಂಚಿ ಬದ್ಲಾವಣ್ ಲೊಕಾಚ್ಯಾ ಯಾ ದೇಶಾಚ್ಯೆ ಪ್ರಗತೆಕ್ ವೆಚಾ ವಾಟೆರ್ ನಾ ತಸೆಂ ಭಗ್ತಾ. ಆಸೆಂ ಆಸ್ತಾಂ ಎಕಾ ಬದ್ಲಾವಣೆಚಿ ಗರ್ಜ್ ಆಸಾ- ಸಂವಿಧಾನಾಕ್ ರಾಕುನ್, ಪ್ರಜಾತಂತ್ರಾಕ್ ಉಕಲ್ನ್ ಧರ್ನ್, ಧರ್ಮಾಂಧ್ ಕುಡ್ಡೆಂಪಣಾಕ್ ನಿವ್ರಾಂವ್ಕ್, ಧರ್ಮಾಚ್ಯಾ ನಾವಿಂ ದರಬಸ್ತ್ ಜಾಗೊ, ಆಸ್ತ್, ಕೊರೊಡಾಂನಿ ದುಡು ಜಮಂವ್ಚೆಂ ರಾವಂವ್ಕ್, ಜಾತ್ ಮ್ಹಳ್ಳಿ ಪಿಡಾ ಗೂಣ್ ಕರ್ಚ್ಯಾಕ್, ಸಾಮಾಜಿಕ್ ಹುಸ್ಕೊ ಭಾಂದುಂಕ್ ಆನಿ ಚಡ್ ಜಾವ್ನ್ ಲೊಕಾಕ್ ಅನ್ಕೂಲ್ ಹಾಡಂವ್ಚಿ ಬದ್ಲಾವಣ್.
ಮ್ಯಾಕ್ಸಿಂ ಗಾರ್ಕಿ – https://en.wikipedia.org/wiki/Maxim_Gorky
ಅಶೆಂ ಬರಯ್ತಾನಾ ಮ್ಹಾಕಾ ರಶಿಯಾಚೊ ಫಾಮಾದ್ ಬರವ್ಪಿ ಮ್ಯಾಕ್ಸಿಂ ಗಾರ್ಕಿಚಿ ‘ಆವಯ್’ ಕಾದಂಬರಿ ಉಗ್ಡಾಸ್ ಯೆತಾ.
ಆವಯ್ಕ್ ಆತಾಂ ಶೆಂಭರಾಚಿ ಪ್ರಾಯ್. ಸಾಹಿತ್ಯ್ ಸಂಸ್ರಾಂತ್ ಏಕ್ ಅಪೂರ್ವ್ ತಸೆಂ ವಿಶಿಸ್ಟ್ ಕಾದಂಬರಿ ಹಿ. ಹ್ಯಾ ಕಾದಂಬರೆನ್ ಭಾರಿಚ್ ಪ್ರಭಾವ್ ಘಾಲ್ಲೊ. ಆಜೂನ್ ಹಿ ಕಾದಂಬರಿ ಪ್ರಸ್ತುತ್ ಜಾತಾ. ಗಾರ್ಕಿನ್ ಹಿ ಕಾದಂಬರಿ ಬರಂವ್ಕ್ ಸುರು ಕೆಲ್ಲಿ 1902 ವ್ಯಾಂತ್. ಸೊಮೊರ್ವೋ ಮ್ಹಳ್ಳ್ಯಾ ಗಾವಾಂತ್ ಮೇ ದಿಸಾ ಏಕಾ ಬಾವ್ಟೊ ಪ್ರದರ್ಶಾನಾ ವೆಳಿಂ ಜಾಲ್ಲೊ ಗಲಾಟೊ, ತ್ಯಾ ನಂತರ್ ತಾಂತು ಮೆತೆರ್ ಜಾಲ್ಲ್ಯಾಂಚಿ ಝಡ್ತಿ ಜಾವ್ನ್ ಸೈಬೀರಿಯಾಕ್ ಗಡೀಪಾರ್ ಕೆಲ್ಲ್ಯಾ ವಿಶಿಂ ರಶಿಯಾಂತ್ ಭಾರಿಚ್ ಪ್ರತಿಕ್ರಿಯಾ ದಾಖವ್ನ್ ವಿವಾದಾತ್ಮಕ್ ಜಾಲ್ಲೆಂ ಘಡಿತ್ ಧರ್ನ್ ಹಿ ಕಾದಂಬರಿ ಬರಯ್ಲ್ಯಾ.
ತ್ಯಾ ಘಡಿತಾಂತ್ ವಾಂಟೆಲಿ ಜಾಲ್ಲ್ಯಾ ಪೈಕಿ ಬಾವ್ಟೊ ಉಕಲ್ನ್ ಚಲ್ಲಲೊ ‘ಸೋಶಲ್ ಡೆಮೊಕ್ರೇಟಿಕ್’ ಸಂಘಟಾನಾಚ್ಯಾ ಮುಖೆಲ್ಯಾಂ ಪೈಕಿ ಏಕ್ಲೊ ಪ್ಯೋತ್ರ್ ಜಲೋಮೊವ್ ಆನಿ ತಾಚಿ ಆವಯ್ ಅನ್ನ ಕಿರೀಲ್ಲೊವ್ನ ಜಲೋಮೊವ್ ಹಾಂಕಾ ವಯಕ್ತಿನ್ ಥರಾನ್ ಗಾರ್ಕಿ ವಳ್ಕಾತಾಲೊ. ಹಿಂಚ್ ಆವಯ್ ಪೂತ್ ಹ್ಯಾ ಕಾದಂಬರಿಂತ್ ಮ್ರಮುಖ್ ವ್ಯಕ್ತಿ- ಪಾವೆಲ್ ವ್ಲಾಸೊವ್ ಆನಿ ಪೆಲಗೇಯ್ ನೀಲೊವ್ನ ವ್ಲಾಸೋವ್. ತಿಚ್ಯಾ ವಿಶಿಂ ತೊ ಆಸೆಂ ಬರಯ್ತಾ” ತಿ ಕಿತೆಂ ಸಾಧಾರ್ಣಾಚಿ ಸ್ತ್ರೀ ನ್ಹಯ್. ರಾಕ್ವಾಲ್ಯಾಚೆಂ ದೊಳೆ ಚುಕವ್ನ್ ಏಕ್ ಬಾಂಬ್ ಜೈಲಾ ಭಿತರ್ ವರ್ನ್ ಗೆಲ್ಲಿ ಮ್ಹಣ್ ತಿಚೆರ್ ಆರೋಪ್ ಮಾಂಡುನ್ ತನ್ಖಿ ಸುರು ಜಾಲ್ಲಿ. ಹೊ ಬಾಂಬ್ ವಾಪಾರ್ನ್ ಕ್ರಾಂತಿಕಾರಿ ಕಾಮೆಲಿ ಜೈಲಾ ಥಾವ್ನ್ ಪೋಳ್ನ್ ಧಾಂವ್ಲೆಲೆ. ಆಸೆಂ ಅಪ್ಲ್ಯಾ ಭುರ್ಗ್ಯಾಂ ಸಾಂಗಾತಾಚ್ ತನ್ಖೆಕ್ ವಳಗ್ ಜಾಲ್ಲ್ಯಾ ಧಾ ಬಾರಾ ಆವಯ್ಚಿಂ ನಾಂವಾಂ ಹಾಂವ್ ದೀಂವ್ಕ್ ಸಕ್ತಾಂ.”
ಮದರ್ – ಕೃತಿ
ಸುರ್ವೆರ್ ಇಂಗ್ಲಿಶಾಂತ್ 1906 ವ್ಯಾ ಡಿಸೆಂಬ್ರಾಂತ್ ಏಕಾ ಪತ್ರಾರ್ ಪ್ರಗಟ್ಲಿ. ಭಾರಿಚ್ ಲೊಕಾಮೊಗಾಳ್ ಜಾಲಿ. ದೋನ್ ವರ್ಸಾಂಚ್ಯೆ ಆವ್ದೆಂತ್ ಆಮೆರಿಕಾ, ಸ್ಪೇಯ್ನ್, ಬ್ರಿಟನ್,ಜರ್ಮನಿ,ಹಾಲೆಂಡ್,ಇಟೆಲಿ,ಫಿನ್ಲೆಂಡ್,ಸ್ವೀಡನ್ ,ಬಲ್ಗೆರಿಯಾ ಇತ್ಯಾದಿ ದೇಶಾನಿ ಪ್ರಗಟ್ಲಿ. ಇಂಗ್ಲಿಶಾಂತ್ ಚಾರ್ ಪಾವ್ಟಿಂ ವಿವಿಂಗಣ್ ತರ್ಜುಮೊಗಾರಾಂನಿ ತರ್ಜಣ್ ಕೆಲ್ಯಾ (1906,1947,1949,2016). ಹಿಂದಿಂತ್ ‘ಮಾಂ’, ಕನ್ನಡಾಂತ್ ‘ತಾಯಿ’, ತೆಲುಗಾಂತ್ ‘ಅಮ್ಮ’, ತಮಿಳಾಂತ್ ‘ಇಲೈಗ್ನಾನನ್’ ನಾಂವಾನಿ ಹಿ ಕೃತಿ ತರ್ಜುಮೊ ಜಾಲ್ಯಾ. ಹ್ಯಾ ಕಾದಂಬರಿಚೆರ್ ದೋನ್ ಹಾಲಿವುಡ್ ಸಿನೆಮಾಂ ಸಯ್ತ್ ಜಾಲ್ಯಾಂತ್ (1955,1990).
‘ಆವಯ್’ ಕಾಮೆಲ್ಯಾಂಚಿ ಜಿಣಿ, ಸರ್ವಾಧಿಕಾರಿ ಝಾರಾಚೆಂ ಆಡಳ್ತೆಂ, ತಸೆಂಚ್ ಬೂರ್ಜ್ವಾ ಸಂಸ್ಕ್ರತಿಚ್ಯೆ ವಿರೋಧ್ ಕರ್ಚ್ಯಾ ಆಂದೋಲನಾ ವಿಶಿಂ ಆಸಾ ಜಾಲ್ಯಾರೀ ಥೊಡಿಂ ಸವಾಲಾಂ ಧೊಸ್ತಾತ್. ಕಾಮೆಲ್ಯಾಂಚೆಂ ಆಂದೋಲನ್ ಪಿಂತ್ರಾಂವ್ಚ್ಯಾ ಹಾಂತು ಏಕ್ಲ್ಯಾ ಕ್ರಾಂತಿಕಾರಿಚೆಂ ಸಯ್ತ್ ಚಿತ್ರಣ್ ನಾ. ಖಾರ್ಕಾನ್ಯಾಚೆಂ ನಾಂವ್ ಸಯ್ತ್ ನಾ. ಖಾರ್ಕಾನ್ಯಾಚೊ ಡೈರೆಕ್ಟರ್, ಥಂಯ್ಚೊ ಟೈಂ ಕೀಪರ್ ಜಾವ್ನಾಚ್ಚೆ ಥೊಡೆ ಪೊಲಿಸಾಂಚೆ ಖಾಸ್ ಏಜೆಂಟ್ ಜಾವ್ನ್ ಕಾಮ್ ಕರ್ಚೆಂ, ಪೊಲಿಸ್, ಸೈನಿಕ್ ಆನಿ ನ್ಯಾಯಧೀಶಾಂಕ್ ಸಯ್ತ್ ನಾಂವಾಂ ನಾಂತ್. ನಾಯಕ್ ಪಾವೆಲ್ ವ್ಲಾಸೊವಾಕ್ ಚಡ್ ಒತ್ತು ದೀನಾಸ್ತಾಂ ತಾಚ್ಯೆ ಆವಯ್ಚ್ಯಾ ಭಂವ್ತಿಂ ಹಿ ಕಾದಂಬರಿ ಘುಂವ್ತಾ ಕಿತ್ಯಾಕ್?
ಫಕತ್ ಕ್ರಾಂತಿಕಾರಿ ಪ್ರತಿಭಟನ್ ಮಾತ್ರ್ ಪಿಂತ್ರಾಯ್ನಾಸ್ತಾಂ, ‘ಆವಯ್’ ತ್ಯಾ ಪ್ರತಿಭಟನಾ ವೆಳಾರ್ ಎಕಾ ವ್ಯಕ್ತಿ ಥಂಯ್ ಜಾಂವ್ಚಿ ಭಿತರ್ಲಿ ಬದ್ಲಾವಣ್ ಸಯ್ತ್ ದಾಖಯ್ತಾ. ಆವಯ್ ನಿಲೊವ್ನಕ್ ಚಾಳಿಸಾಂಚಿ ಪ್ರಾಯ್. ತರೀ, ತಿ ಅಪುಣ್ ಮ್ಹಾತಾರಿ ಮ್ಹಣ್ ಚಿಂತ್ತಾ. ತಿಕಾ ಖರ‍್ಯಾ ಆರ್ಥಾರ್ ಲ್ಹಾನ್ಪಾಣಾಚೆಂ ಯಾ ತರ್ನಾಟ್ಪಾಣಾಂತ್ಲೆಂ ಸುಖ್ ಮೆಳ್ಳೆಂ ನಾ. ಘೊವ್ ತಿಕಾ ಏಕ್ ಮನ್ಜಾತ್. ತಾಚ್ಯೆ ವಿಶಿಂ ಭೆಂ. ಘೊವಾ ಥಾವ್ನ್ ಮಾರ್ ಖಾವ್ನ್ ಸದಾಂಚ್ ಭಿಯಾನ್ಂಚ್ ಜಿಯೆಲ್ಲಿ ತಿ. ಪೂತಾಚ್ಯಾ ಕ್ರಾಂತಿಕಾರಿ ಚಿಂತ್ಪಾಂನಿ ಪ್ರಭಾವಿತ್ ಜಾತಾ. ದಾದ್ಲ್ಯಾಂಚ್ಯಾಕೀ ಚಡ್ ಧಯ್ರಾನ್ ಪುತಾಚೆಂ ಮಿಸಾಂವ್ ತಿ ಮುಕಾರ್ಸುನ್ ವರ್ತಾ. ಕ್ರಾಂತಿಕಾರಿ ಜಾತಾ. ಪೂಣ್, ಹರ್ಯೆಕ್ ಘಡಿತಾಂ ಘಡ್ತಾನಾ, ತಿ ‘ಅವಯ್ಪಣಾಚಿಂ’ – ಆತಂಕ್, ಅತಂತ್ರ್, ಹುಸ್ಕೊ, ಮೋಗ್, ಭಕ್ತ್, ಮಾಗ್ಣೆಂ, ರಡ್ನೆಂ ಇತ್ಯಾದಿ ಲಕ್ಷಣಾಂಚ್ ದಾಖಯ್ತಾ. “ಏಕ್ ಮನಿಸ್ ಊವೊ ಭರುನ್ ಮೆಳೊ ಜಾತಾನಾ, ತಾಕಾ ನಾಂವ್ಚಾ ಕೂಡಾಕ್ ವೋಡ್ನ್ ವರ್ನ್, ಬರಿಚ್ ಆಂಗ್ ಘಸ್ಟುನ್, ನ್ಹಾಣವ್ನ್, ನಿತಳ್ ವಸ್ತುರ್ ಘಾಲಿಜಾಯ್. ತೆದಾಳಾ ತಾಕಾ ಪಳೆಂವ್ಚಾ ಬರಿ ಜಾತಾ, ನ್ಹಯ್ವೇ?” ಮ್ಹಳ್ಳಿಂ ತಿಚಿಂ ಉತ್ರಾಂ ಅಸಲ್ಯಾ ಆವಯ್ಪಣಾಕ್ ದಾಖಯ್ತಾತ್.
ಮದರ್ – ಸಿನೆಮಾಚೆಂ ದೃಶ್ಯ್
“ಪೊಲಿಸ್ ಲೋಕಾಕ್ ದಗ್ದವ್ಣಿ ದೀವ್ನ್ ಹಿಂಸಾ ದಿತಾತ್ ತೆಂ ನೀಜ್‌ಗೀ? ತಾಂಚಿಂ ಹಾಡಾಂ ಮೊಡ್ತಾತ್ಗೀ? ಹೆಂ ಚಿಂತ್ತಾನಾ ಆಯ್ಹ್ಯೋ, ಕಿತ್ಲೆಂ ಭಯಾನಕ್, ಪಾವೆಲ್!” ಮ್ಹಣ್ ಆವಯ್ ಪೂತಾಲಾಗಿಂ ಸಾಂಗ್ತಾನಾ, ಪೂತ್ ಮ್ಹಣ್ತಾ:
“ತೆ ವ್ಯಕ್ತಿತ್ವಾಕ್ ಮೊಡ್ತಾತ್ ಮಾಂಯ್. ವ್ಯಕ್ತಿತ್ವಾ ವಯ್ರ್ ತಾಂಚೊ ಮೆಳೊ ಹಾತ್ ದವರ್ತಾನಾ ಚಡ್ ದುಖ್ತಾ.”
ಕಾದಂಬರಿಂತ್ ರೊಮ್ಯಾಂಟಿಕ್ ಶೈಲಿ ಆನಿ ವಾಸ್ತವ್ ಶಯ್ಲಿ ಸಾಂಗಾತಾ ಮೆಳಯ್ಲ್ಯಾ. ಹ್ಯಾ ವರ್ವಿಂ ಕಾದಂಬರಿ ಅನಿಕೀ ಪ್ರಸ್ತುತ್ ಜಾತಾ. ‘ಆವಯ್’ ಏಕ್ ನವ್ಯಾ ಮಾದರಿಚಿ ಕೃತಿ. ಸ್ವ ಖುಶೆನ್ ಪ್ರತಿಭಟನ್ ಕರ್ಚಾ ಕ್ರಾಂತಿಕಾರಿಂ ಥಂಯ್ ಮನ್ಶ್ಯಾಪಣಾಚೆಂ ವಿಕಾಸ್ ಜಾಂವ್ಚ್ಯಾ ವಿಶಿಂ ಸಾಂಗ್ತಾ. ನೀಜ್ ಮನ್ಶ್ಯಾಪಣಾಚೆಂ ಸವಾಲ್ ಗಾರ್ಕಿ ಉಕಲ್ನ್ ದವರ್ತಾ. ಹಿಂಸಾ ಬಲಾತ್ಕಾರಾನ್ ಕರಿಜಾಯ್ ಪಡ್ತಾನಾ, ತಿ ತಾತ್ಕಾಲಿಕ್ ಜಾತಾ. ಖಂಯ್ಚೀಯ್ ಹಿಂಸಾ ಗರ್ಜೆಚಿ ನ್ಹಯ್, ಪೂಣ್ ಅಸಾಧ್ಯ್ ಜಾವ್ನಾಸ್ಚಿ ನವಿ ಸಮಾಜ್ ರಚುಂಕ್ ಗರ್ಜೆಚಿ ಮ್ಹಳ್ಳೊ ಮನೋಭಾವ್ ಆಸಾ. ಕ್ರಾಂತಿಕಾರಿ ಪ್ರತಿಭಟನ್ , ಮನ್ಶ್ಯಾಚ್ಯೊ ಪಾಡ್, ಬುರ್ಶ್ಯೊ ಸವಯೊ, ತಾಂಚ್ಯೆ ಭಿತರ್ಲ್ಯಾ ಮನ್ಜಾತಿಕ್ ಉಟಯ್ತಾತ್ ಮ್ಹಣ್ ಹೆರ್ ‘ಭೂರ್ಜ್ವಾ’ ಲೇಖಕ್ ಬರಂವ್ಚಾ ವಗ್ತಾ, ಗಾರ್ಕಿ ‘ಆವಯ್’ ಕಾದಂಬರಿ ಮನ್ಶ್ಯಾಕ್ ನಿಜಾಯ್ಕೀ ಮನಿಸ್ ಕರ್ಚಾಕ್, ಹೆಂ ಕ್ರಾಂತಿಕಾರಿ ಪ್ರತಿಭಟನ್ ಮಾತ್ರ್, ಎಕ್‌ಚ್ ಹಾತೆರ್ ಮ್ಹಣ್ ದಾಖವ್ನ್ ದಿತಾ.
ಹ್ಯಾ ಕಾದಂಬರಿ ವಿಶ್ಯಾಂತ್ ವಿ.ಐ. ಲೆನಿನ್ ಆಸೆಂ ಬರಯ್ತಾ: “ಜಿಣಿ ಕಿತ್ಲಿ ವಿಪ್ರೀತ್ ಥರಾನ್ ಅಡ್ಕಳಿಚಿ ಮ್ಹಳ್ಯಾರ್, ಮೊಸೊರ್ ಪಾವುಂಕ್ ಜಾಯ್ನಾಸ್ತಾಂ ಕೊಣ್ಂಚ್ ಪ್ರಾಮಾಣಿಕ್ಪಣಿ ಮೋಗ್ ಕರುಂಕೀ ಸಕಾನಾಂತ್. ಹೆಂಚ್ ಮನ್ಶ್ಯಾಚ್ಯಾ ಆತ್ಮ್ಯಾಕ್ ವಿಂಗಡ್ ಕರ್ಚಿ ಗರ್ಜ್, ಮೊಸೊರ್ ಕರ್ನ್ಂಚ್ ಮೋಗ್ ಕರ್ಚಿ ಅನಿವಾರ್ಯತಾ- ಮನ್ಶ್ಯಾಕ್ ಸಗ್ಳೊ ಜಾವ್ನ್ ವಿರೂಪ್ ಕರ್ಚಿ ಗರ್ಜ್, ಆಯ್ಚ್ಯಾ ಜಿಣ್ಯೆಚ್ಯಾ ಪರಿಸ್ಥಿಂತ್ ನಾಸ್ ಕರುನ್ ಸೊಡ್ತಾ. ಮನ್ಶ್ಯಾಚಾ ಆತ್ಮ್ಯಾಕ್ ವಿಂಗಡ್ ಕರ್ಚಾ ಸಂಸ್ರಾಕ್ ನಾಸ್ ಕರ್ನ್ಂಚ್ ಸಮಾಜ್‌ವಾದಿ ಕ್ರಾಂತಿ ಜಾತಾ. ಮನ್ಶ್ಯಾಪಣಾಕ್ ಕ್ರಾಂತಿ ಥಾವ್ನ್ ವಿಂಗಡ್ ಕೆಲ್ಯಾರ್ ತೆಂ ಖರೆಂ ಮನ್ಶ್ಯಾಪಣ್ ಜಾಯ್ನಾ. ತಸೆಂಚ್ ಕ್ರಾಂತಿಕ್ ಮನ್ಹ್ಯಾಪಣಾ ಥಾವ್ನ್ ವಿಂಗಡ್ ಕೆಲ್ಯಾರ್ ತಿ ಖರಿ ಕ್ರಾಂತಿ ಜಾಯ್ನಾ.”
ಹ್ಯಾ ಕಾದಂಬರಿ ದ್ವಾರಿO ಗಾರ್ಕಿ ದೋನ್ ಸಗ್ತಿ ಸಾಂಗ್ತಾ- ‘ವ್ಯಕ್ತಿತ್ವ್ ನಾಸ್’ ಆನಿ ‘ಆತ್ಮ್ಯಾಚೆಂ ಪುನರ್ ಜೀವಂತ್ಪಣ್’. ಲೋಕಾ ಥಾವ್ನ್, ಸಮಾಜಿ ಥಾವ್ನ್ ವಿಂಗಡ್ ರಾಂವ್ಚೊ ಮನಿಸ್ ಆಪ್ಲೆಂ ವ್ಯಕ್ತಿತ್ವ್ ಖಾಲಿ ಕರ್ತಾ. ನಾಸ್ ಕರ್ತಾ. ಕೂಡಿನ್ ನಾಸ್ ಜಾಂವ್ಚಾ ಪಯ್ಲೆಂಚ್ ನೈತಿಕ್ ಥರಾನ್ ನಾಸ್ ಜಾತಾ.
ಕಾದಂಬರಿಚ್ಯೆ ಅಖ್ರೇಕ್- ದುರಂತ್ ಘಡಿತಾನಿ ಅಖೇರ್ ಜಾತಾನಾ, “ತೆ ಜಿವ್ಯಾ ಆತ್ಮ್ಯಾಕ್ ಜಿವೆಶಿಂ ಮಾರಿನಾಂತ್!” ಮ್ಹಳ್ಳಿಂ ಅದ್ಭುತ್ ಉತ್ರಾಂ ಆವಯ್ ಥಾವ್ನ್ ಯೆತಾತ್. ಮನ್ಶ್ಯಾ ಥೈಂ, ತಾಚ್ಯಾ ಫುಡಾರಾಂತೀ ಸಂಪೂರ್ಣ್ ಭರ್ವಸೊ ಉಚಾರ್ಚಿಂ ಉತ್ರಾಂ ಹಿಂ ಜಾವ್ನಾಸಾತ್.
‘ಆವಯ್’ ಕ್ರಾಂತಿಕಾರಿ ಕಾಮೆಲ್ಯಾಂಚೆಂ ಪ್ರತಿಭಟನ್ ಪಿಂತ್ರಾಂವ್ಚಿ ಕೃತಿ, ಪೂಣ್ ವಾಸ್ತವಿಕ್ ಥಾವ್ನ್ ಪಯ್ಸ್ ನಾ. ಕಶ್ಟಾಂ ಮಧೆಂಯ್ ಮನ್ಶ್ಯಾಚೊ ಮೋಗ್, ಹುಸ್ಕೊ, ಪಿಯೊವ್ಣೆಂ,ಕಾಮುಕ್ಪಣ್,ಮೊಸೊರ್, ಹಗೆಂ, ಇಗರ್ಜ್, ಮಾಗ್ಣೆಂ ರಜಾರ್, ಪಾದ್ರಿ,ಘಾಮ್, ಮೆಳೆಂ ಹಾಂಗಾಸರ್ ಆಸಾ. ಹ್ಯಾ ಕಾದಂಬರಿಂತ್ ಜಾಂವ್ಚೆಂ ಉಲವ್ಣೆಂ ಬೊಬಾಟಿನಾ, ಕಿಂಕ್ರಾಟ್ ಮಾರಿನಾ, ಖುನಿ ಕರಿನಾ. ಪೂಣ್ ವಾಸ್ತವಿಕ್ , ಸಕಾಲಿಕ್ ಜಾವ್ನಾಸಾ.
- “ವಾಸ್ತವಿಕ್ ರಿತಿನ್ ಪಳೆಲ್ಯಾರ್, ಆಮ್ಚೆ ಧನಿ ಜಾವ್ನಾಸ್ಚೆ- ಝಾರ್ ರಾಯ್, ಸರ್ಕಾರಿ ಅಧಿಕಾರಿ,ಪೊಲಿಸ್ ಸರ್ವ್ ಆಮ್ಚಾಕೀ ಚಡ್ ಗುಲಾಮ್ ಜಾವ್ನಾಸಾತ್. ಹೆ ಸಕ್ಕಡ್ ಮಾನಸಿಕ್ ಥರಾನ್ ಬಂಧೆಂತ್ ಆಸಾತ್. ಆಮಿ ಕೂಡಿನ್ ಮಾತ್ರ್. ತುಮಿಂಚ್ ಪಳೆಯಾ, ನೈತಿಕ್ಪಣಿ ತುಮ್ಚ್ಯಾ ವರ್ಗಾಂತ್ಲ್ಯಾಂಕ್ ರಾಕುಂಕ್ ಸಕತ್ ಆಸ್ಚೊ ಕೊಣ್ಂಚ್ ತುಮ್ಚೆ ಮಧೆಂ ನಾ. ಆಧ್ಯಾತ್ಮಿಕ್ಪಣಿ ತುಮಿ ಸುಕೊನ್ ಗೆಲ್ಯಾತ್. ತುಮ್ಚ್ಯಾ ಅಧಿಕಾರಾಚೊ ಅಂಗಲಾಪ್, ದುಡ್ವಾಚೊ ಹೊರ್ಬೊಸ್ ಸಕ್ಕಡ್ ತುಮ್ಕಾಂ ವಿವಿಂಗಡ್ ಪಂಗಡ್ ಜಾವ್ನ್ ಫುಟಯ್ತಾ. ಏಕ್ ಪಂಗಡ್ ಆನ್ಯೆಕಾಕ್ ಗಿಳ್ತಾ.” ಹಿಂ ಪಾವೆಲಾಚಿಂ ಉತ್ರಾಂ.
- ಬಾಪುಯ್ ಮೊರೊನ್ ದೋನ್ ಹಫ್ತ್ಯಾ ಉಪ್ರಾಂತ್ ಏಕಾ ಆಯ್ತಾರಾ ಸಾಂಜೆರ್ ಪಾವೆಲ್ ವ್ಲಾಸೊವ್ ನಾಕ್ ಭರ್ ವೊಡ್ಕಾ ಪಿಯೆವ್ನ್ ಘರಾ ಯೆತಾನಾ, ಆವಯ್ಕ್ ತಿಚ್ಯಾ ಘೊವಾಚೊ ಉಗ್ಡಾಸ್ ಆಯ್ಲೊ. ತಿ ಭಿಯೆಲಿ. “ತುವೆಂ ಆಸೆಂ ಪಿಯೆಂವ್ಕ್ ಸುರು ಕೆಲ್ಯಾರ್, ತುಂ ಮ್ಹಜಿ ಜತನ್ ಘೆಂವ್ಕ್ ಸಕ್ತಾಯ್ವೆ?” ಮ್ಹಣ್ ವಿಚಾರ್ತಾ. “ಸಕ್ಕಡ್ ಪಿಯೆತಾತ್” ಮ್ಹಣ್ ದೊಳೆ ಧಾಂಪುನ್ ಪೂತಾಚಿ ಜಾಪ್.
- ಎಕಾ ದಿಸಾ ಪಾವೆಲ್ ಏಕ್ ಪಿಂತುರ್ ಹಾಡ್ನ್ ವೊಣ್ದಿರ್ ಉಮ್ಕಾಳಾಯ್ತಾ. ತ್ಯಾ ಪಿಂತುರಾಂತ್ ತೇಗ್ ಜಣ್ , ಉರ್ಭೇನ್ ತಸೆಂ ಗಂಭೀರ್ ಥರಾನ್ ಉಲವ್ನ್ ವಾಟೆರ್ ಚಲುನ್ ವೆತಾತ್. “ಪುನರ್ ಜಿವಂತ್ ಜಾಲ್ಲೊ ಜೆಜು ದೋಗ್ ಶಿಸಾಂ ಸಾಂಗಾತಾ ಎಮ್ಮಾಸಾಕ್ ವೆಚ್ಯಾ ವಾಟೆರ್ ಅಸಾ” ಮ್ಹಣ್ ಪೂತ್ ಪಿಂತುರಾ ವಿಶಿಂ ಸಾಂಗ್ತಾ. “ಜೆಜುಚೆರ್ ಇತ್ಲೊ ಮೋಗ್ ಆಸಾ ಜಾಲ್ಯಾರ್, ಹೊ ಇಗರ್ಜಿಕ್ ಕಿತ್ಯಾಕ್ ವಚಾನಾ?” ಮ್ಹಣ್ ಅವಯ್ ಮತಿಂತ್ ಚಿಂತ್ತಾ.
- “ತುಕಾ ಭೆಂ ದಿಸ್ತಾಗೀ?” ಮ್ಹಣ್ ಪಾವೆಲ್ ವಿಚಾರ್ತಾ.”ಹುಂ” ಮ್ಹಣ್ ಮಾಂಯ್ ಒಪ್ವಾತಾ. “ಆಮ್ಕಾಂ ಪಾಡ್ ಕರ್ಚೆಂಚ್ ಹೆಂ ಭೆಂ. ಆಮ್ಚೆರ್ ಅಧಿಕಾರ್ ಚಲಂವ್ಚೆ, ಹ್ಯಾ ಭಿಯಾಕ್‌ಚ್ ವಾಪಾರ್ನ್ ಫಾಯ್ದೊ ಜೊಡ್ತಾತ್. ಆಮ್ಕಾಂ ಅನಿಕೀ ಚಡ್ ಭೆಶ್ಟಾಯ್ತಾತ್.” ’ಭಿಯೆನಾಸ್ತಾಂ ಕಿತೆಂ ಕರುಂ? ಸಗ್ಳಿ ಜಿಣಿ ಭಿಯಾನ್ಂಚ್ ಹಾವೆಂ ಪಾಚಾರ್ಲಿ. ಭೆಂ ಭರು‌ನುಂಚ್ ಹೊ ಜೀವ್ ವಾಡ್ಲಾ.”
- “ಪವಿತ್ರ್ ಜಾಗೊ ಖಾಲಿ ಸೊಡುಂಕ್ ಜಾಯ್ನಾ. ಮನ್ಶ್ಯಾಚ್ಯಾ ಕಾಳ್ಜಾಂತ್ ದೆವಾನ್ ಭರ್ಲಲೊ ಜಾಗೊ ಮೊಸ್ತು ಸೂಕ್ಷ್ಮ್. ತಾಕಾ ಕಾತರ್ಲ್ಯಾರ್ ಥೈಂ ವ್ಹಡ್ ಘಾಯ್ ಉರ್ತಾ. ನವೊ ಧರ್ಮ್ ಸೊಧುನ್ ಕಾಡಿಜಾಯಿಚ್ ಪಡ್ತಾ ಪಾವೆಲ್. ಮನ್ಶ್ಯಾಚೊ ಇಶ್ಟ್ ಜಾವ್ನಾಸ್ಚೊ ಏಕ್ ದೇವ್ ಜಲ್ಮಾಜಾಯ್. ಹೆಂಚ್ ಜಾಯ್ಜಯ್!” “ಜೆಜು ಆಸಾನೇ?!” ಮ್ಹಣ್ ಪಾವೆಲ್ ಉದ್ಗಾರ್ತಾ.
- “ಜೆಜುಕ್ ಆಧ್ಯಾತ್ಮಿಕ್ ಧಯ್ರ್ ನಾತ್‌ಲ್ಲೆಂ. ತೊ ಭಿಯೆಲ್ಲೊ. ‘ಬೊಶಿ ಮುಖಾರ್ ವಚುಂದಿ’ ಮ್ಹಣಾಲೊ. ತಾಣೆಂ ಪಿಲಾತಾಕ್ ಪರ್ವಣ್ಗಿ ದಿಲಿ. ಆಪ್ಣೆಂ ರಚ್ಲೆಲ್ಯಾ ಮನ್ಶ್ಯಾಂಚೆರ್ ಅಧಿಕಾರ್ ದೇವ್ ಕಸೆಂ ಸೊಸ್ತಾ? ಹೆಂ ಮ್ಹಜೆಂ, ಹೆಂ ಮನ್ಶ್ಯಾಚೆಂ ಮ್ಹಣ್ ದೇವ್ ಆಪ್ಲೊ ಆತ್ಮೊ ವಿಂಗಡ್ಚಾಕ್ ಸಾಧ್ಯ್ ಜಾತಾ? ಪೂಣ್, ಜೆಜು ವ್ಯಾಪಾರ್ ಒಪ್ವಾಲೊ. ಕಾಜಾರ್ ಒಪ್ವಾಲೊ. ತಾಣೆಂ ಅಂಜೂರಾಚ್ಯಾ ರೂಕಾಕ್ ಶಿರಾಪ್ ದಿಲ್ಲೆಂ ಸಾರ್ಕೆಂ ನ್ಹಯ್. ಫಳ್ ದೀನಾತ್ಲಿ ತಿ ರೂಕಾಚಿ ಚೂಕ್‌ಗೀ? ಬರೆಂಪಣ್ ದಾಖಯ್ನಾ ಮ್ಹಣ್ ಮನ್ಶ್ಯಾಚೊ ಆತ್ಮೊ ದುರ್ಸೊಂವ್ಚೆಂ ಸಮಾ ನ್ಹಯ್. ಆಪ್ಲ್ಯಾ ಆತ್ಮ್ಯಾಂತ್ ಬುರ್ಸೆಂ ಜಲ್ಮಾಯಿಲ್ಲೆಂ ಮನ್ಶ್ಯಾನ್‌ಗೀ?”
- “ತ್ಯಾ ಪಾದ್ರಿಕ್ ಹಾವೆಂ ಸಾಂಗ್ಲೆಂ ಜಾಲ್ಯಾರೀ ಕಿತೆಂ? ಗಾಂವ್ ಭರ್ ಭಂವ್ಲ್ಯಾ ಉಪ್ರಾಂತ್, ಏಕಾ ಕಡೆ ರೈತಾಂ ಸಾಂಗಾತಾ ಉಲವ್ನ್ ಬಸ್‌ಲ್ಲೊ. ತಾಚಿಂ ಉತ್ರಾಂ ಕಸಲಿಂ ಮ್ಹಣ್ತಾಯ್? ತೆ ಪೂರಾ ಗೊವ್ಳ್ಯಾಚಿ ಗರ್ಜ್ ಆಸ್ಲೆಲ್ಯಾ ಶೆಳಿಯೆ, ಬಕ್ರ್ಯಾ ಬರಿ ತಸೆಂ ಉಲಯ್ತಾಲೊ. ಕೊಲ್ಯಾಕ್ ಮನ್ಜಾತಿಚೊ ರಾಯ್ ಕೆಲ್ಯಾರ್ ಸುಕ್ಣ್ಯಾಂಚಿಂ ಪಾಕಾಂಚ್ ವಾರ‍್ಯಾರ್ ಉಭ್ತೆಲಿಂ ಮ್ಹಣ್ ಹಾವೆಂ ಜಾಪ್ ದಿಲಿ. ತಾಕಾ ತೊ ಕಿತೆಂ ಮ್ಹಣಾಲೊ ಮ್ಹಳ್ಯಾರ್, ಮನ್ಶ್ಯಾನ್ ದೆವಾಲಾಗಿಂ ಮಾಗಿಜಾಯ್ ಮ್ಹಣ್. ಹಾವೆಂ ಮ್ಹಳೆಂ. ಲೋಕ್ ದೆವಾಲಾಗಿಂ ಮೊಸ್ತು ಮಾಗ್ತಾ ಪೂಣ್, ದೇವ್ ಕಾನ್ ಹಾಲಂವ್ಚೆಂ ಕಿತೆಂಚ್ ದಿಸಾನಾ.”
ಹಿ ಕಾದಂಬರಿ ವಾಚ್ತಾನಾ ಮ್ಹಾಕಾ ಭೊಗ್ತಾ – ಅಸಲಿ ಏಕ್ ಅವಯ್ ಹರ್ಯೆಕಾ ಘರಾ, ಸಮುದಾಯೆಂತ್, ಸಮಾಜೆಂತ್, ದೇಶಾಂತ್ ಜಾಯ್. ‘ಆವಯ್’ ವಾಚಿಜಾಯ್ ಜಾಲ್ಲಿ ಕಾದಂಬರಿ.
- ಉಬ್ಬ, ಮೂಡ್ ಬಿದ್ರಿ
