ಬೊಲ್ಕಾಂವ್ – ಏಕ್ ಸುರ್ವಾತ್

69

ಕೊಂಕ್ಣಿ ಸಾಹಿತ್ಯಾಚೆರ್ ಮುಕ್ತ್ ಸಂವಾದ್ ಆನಿ ಉಗ್ತ್ಯಾ ಉಲೊಣ್ಯಾಕ್ ಸುವಾತ್ ಕ್ಷೀಣ್ ಜಾವ್ನ್ ಯೆಂವ್ಚ್ಯಾ ನಿರ್ಣಾಯಕ್ ಕಾಳಾರ್, ಮಂಗ್ಳುರಾಂತ್ ಫಾ| ಆಂಜೆಲೊ ಮಾಫೇಯ್ ಕಾಳಾಪಾಸುನ್ ಕೊಂಕ್ಣಿ ಭಾಸ್ ಆನಿ ಸಾಹಿತ್ಯಾ ಪಾಸತ್  ಎಕೀನ್ಪಣಿ ವಾವುರ್ಚ್ಯಾ ಸಾಂ. ಲುವಿಸ್ ಕೊಲೆಜ್, ಆತಾಂ ಪರಿಗಣಿತ್ ವಿಶ್ವವಿದ್ಯಾಲಯ್,   ಕೊಂಕ್ಣಿ  ಸಂಸ್ಥ್ಯಾನ್ – ಅಪ್ವಂತ್ ಸಾಹಿತ್ಯ್ ಆಸ್ವಾದನಾಕ್‌ಚ್ ಮ್ಹಣೊನ್ ಏಕ್ ಲ್ಹಾನ್ ತರೀ ಖೆರೀತ್  ಸುವಾತ್ ಉಬಿ ಕೆಲ್ಯಾ.

ಮಂಗ್ಳುರಾಂತ್ ಕೊಂಕ್ಣಿ ಭಾಸ್ ಆನಿ ಸಾಹಿತ್ಯಾಚೆಂ ಏಕ್ ಅನೊಖೆಂ ರುಪ್ಣೆಂ ಕಶೆಂ ಸಾಂ. ಲುವಿಸ್ ವಿಶ್ವವಿದ್ಯಾಲಯಾಚ್ಯಾ ಆವರಣಾಚ್ಯಾ ನಿಶ್ಯಬ್ದ್ ಕೊನ್ಯಾಂತ್ ಉಭೆಂ ಆಸ್ಚ್ಯಾ ರೆಡ್ ಬಿಲ್ಡಿಂಗಾಂತ್ ಕೊಂಕ್ಣಿ ಸಂಸ್ಥ್ಯಾಚ್ಯಾ ಬಾಲ್ಕನಿಂತ್ ತೀಸ್ ತೆ ಚಾಳಿಸ್ ಜಣಾಂನಿ ಸಾಂಗಾತಾ ಮೆಳೊನ್ ಫಕತ್ ಆನಿ ಫಕತ್ ಕೊಂಕ್ಣಿ ಸಾಹಿತ್ಯ್ ಆಸ್ವಾದನ್ ಆನಿ ವಿಚಾರ್ – ವಿನಿಮಯ್ ಕರುಂಕ್ ಏಕ್ ಲ್ಹಾನ್ ಸೊಪೊ ತಯಾರ್ ಜಾಲಾ. ಹೊ ಸೊಪೊ ಕೊಂಕ್ಣಿ ಸಂಸ್ಥ್ಯಾ ಭಾಯ್ಲ್ಯಾ ಬಾಲ್ಕನಿಂತ್ ಆಸಾ ದೆಕುನ್ ಬೊಲ್ಕಾಂವ್ ಮ್ಹಣ್ ಹ್ಯಾ ಸುವಾತೆಕ್ ನಾಂವ್ ದಿಲಾಂ.

ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಚೊ ಕುಲಗುರು, ನವ್ಯಾ ಕೊಂಕ್ಣಿ ಪ್ರಯೋಗಾಂಕ್ ಸದಾಂಚ್ ಪ್ರೋತ್ಸಾವ್ ದಿಂವ್ಚೊ, ಮಾ| ದೊ| ಪ್ರವೀಣ್ ಮಾರ್ಟಿಸ್, ಸನ್ವಾರಾ, ಸಪ್ತೆಂಬರ್ 7 ವೆರ್ ಸಕಾಳಿಂಚ್ಯಾ 10  ವ್ಹರಾಂಚೇರ್ ಹಿ ಸುವಾತ್ ಉಗ್ತಾಯ್ತೆಲೆ ಆನಿ ಬೊಲ್ಕಾಂವಾಂತ್ ಪಯ್ಲೆಂ ಸಾಹಿತೀಕ್ ಕಾರ್ಯಕ್ರಮ್ ಸಾದರ್ ಜಾತೆಲೆಂ.

ಬೊಲ್ಕಾಂವ್ ಪ್ರಾಯೋಗಿಕ್ ಅಂಕೊ ಜಾವ್ನ್ ಸಮಕಾಲೀನ್ ಕೊಂಕ್ಣಿ ಕಥಾಕಾರ್, ಪ್ರಸ್ತುತ್ ಸಾಂ. ಲುವಿಸ್ ಕೊಂಕ್ಣಿ ಸಂಸ್ಥ್ಯಾಚೊ ದಿರೆಕ್ತೊರ್‌, ಮಾ| ದೊ| ಮೆಲ್ವಿನ್ ಪಿಂಟೊ, ನೀರುಡೆ  “ಹಾಂವ್ ಆನಿ ಮಟ್ವ್ಯೊ ಕಥಾ” ಹ್ಯಾ ವಿಶಯಾಚೆರ್ ಏಕ್ ಕಥಾಕಾರ್ ಜಾವ್ನ್ ತಾಚ್ಯಾ ಸಾಹಿತೀಕ್ ಪಯ್ಣಾಚಿ ಸುರ್ವಾತ್,   ತಾಚ್ಯಾ ಮಟ್ವ್ಯಾ ಕಾಣಿಯಾಂಕ್ ಪ್ರಭಾವಿತ್ ಕರ್ಚೆ ಗಜಾಲಿ, ತಾಚ್ಯಾಚ್  ಥೊಡ್ಯಾ ವಿಂಚ್ಣಾರ್ ಕಾಣಿಯಾಂತ್ಲಿಂ ಸನ್ನಿವೇಶಾಂ ಆನಿ ಸಂದರ್ಭ್ ವಾಚನಾಸವೆಂ ಸಾದರ್ ಕರ್ತಲೆ.

ಬೊಲ್ಕಾಂವ್ ಪರಿಕಲ್ಪನಾಂತ್ ಯೆವ್ಕಾರ್, ದಿನ್ವಾಸ್, ಒಳಕ್ ಕರುನ್ ದಿಂವ್ಚೆಂ, ನಿರೂಪಣ್, ಸೂತ್ರ್ – ಸಂಚಾಲನ್, ವೆದಿ ಕಾರ್ಯೆಂ ಮ್ಹಳ್ಳ್ಯೊ ಶಿಷ್ಠಾಚಾರಾಚ್ಯೊ ಗಜಾಲಿಚ್ ಆಸ್ಚೆನಾಂತ್.  ನಮಿಯಾರ್ಲೆಲ್ಯಾ ವೆಳಾರ್ ನಮಿಯಾರ್ಲೊಲೊ ಸಾಹಿತಿ ವಾ ಕಲಾಕಾರ್ ಸೊಪ್ಯಾಚೆರ್ ಬಸೊನ್ ಪ್ರಸ್ತುತಿ ಸುರ್ವಾತ್ತಾಲೊ ಆನಿ ಆಯ್ಕೊವ್ಪ್ಯಾಂಲಾಗಿಂ ಉಲಯ್ತಾಲೊ.  ವಾಚನ್ ವಾ ಪ್ರಸ್ತುತಿ ಫಕತ್ ಅರ್ಧ್ಯಾ ವೊರಾಕ್ ಸೀಮಿತ್ ಜಾಲ್ಲ್ಯಾನ್ ತಿತ್ಲಿಚ್ ಆವ್ಧಿ ಸಂವಾದಾಕೀ ಲಾಭ್ತೆಲಿ. ಬೊಲ್ಕಾಂವಾಂಚೆಂ ಸಗ್ಳೆಂ ಕಾರ್ಯಕ್ರಮ್ ಫಕತ್ ಎಕಾ ವೊರಾಚೆಂ ಜಾವ್ನಾಸ್ತೆಲೆಂ.

ಕೊಂಕ್ಣಿ ಸಾಹಿತ್ಯಾಂತೀ ಹೆರ್ ಭಾರತೀಯ್ ಭಾಸಾಂಪರಿಂ ಗುಣಾಮೊಲಾಚೆಂ ಆನಿ ವೆವೆಗ್ಳ್ಯಾ ಪ್ರಕಾರಾಂಚೆಂ ಸಾಹಿತ್ಯ್ ಉಪಲಬ್ದ್ ಆಸಾ. ಆಜ್ ಕಾಲ್ ಸಮಾಜಿಕ್ ಮಾದ್ಯಮಾಂ ಆನಿ ಕಾರ್ಯಕ್ರಮಾಂನಿ ಫಕತ್ ಕವಿತಾ ಮಾತ್ ಆವಾಜ್ ಕರ್ತಾತ್. ಮಟ್ವ್ಯೊ ಕಾಣಿಯೊ, ಕಾದಂಬರಿ, ನಾಟಕ್ ಕೃತಿಯೊ, ಲಲಿತ್ ಪ್ರಬಂದ್  ಆನಿ ಪ್ರಮುಕ್ ಜಾವ್ನ್ ವೈಚಾರಿಕ್ ಸಾಹಿತ್ಯಾಚಾ ಆಸ್ವಾದನಾಕ್ ಚಡ್ ಕರುನ್ ಸುವಾತ್‌ ಮೆಳ್ತೇ ನಾ. ತಶೆಂ ಮ್ಹಣೊನ್ ಬೊಲ್ಕಾಂವ್ ಕವಿತೆಚೊ ದುಸ್ಮಾನ್ ನಯ್. ಬೊಲ್ಕಾಂವಾಂತ್ ಕವಿತಾಯ್ ಆಸಾತ್, ಪಾವ್ಟೀಂಚ್ಯಾಕ್  ಎಕಾ ಕವಿಚೆ  ಚಾರ್ – ಪಾಂಚ್ ಕವಿತಾ, ಲಗ್ತಿ ವಿಚಾರ್, ಅನ್ಭೊಗ್ ಆನಿ ಸಂವಾದ್ ಮಾತ್ರ್.

ಆಜ್ ಕಾಲ್  ಜಾಯ್ತೆ ಕೊಂಕ್ಣಿ ಬರಯ್ಣಾರ್ ಬೂಕ್ ಫಾಯ್ಸ್ ಕರ್ತಾತ್. ಬೂಕ್ ಉಗ್ತಾವಣ್ ಕಾರ್ಯಾಂತ್ ದೋನ್ ಸಬ್ದ್ ತಾಂಚ್ಯಾಚ್ ಬುಕಾ ವಿಶ್ಯಾಂತ್ ಉಲಂವ್ಕ್ ವಾ ಬುಕಾಂತ್ಲೆಂ ಥೊಡೆಂ ತರೀ ಸಾಹಿತ್ಯ್ ಪ್ರಸ್ತುತ್ ಕರುಂಕ್ ತಾಂಕಾ ಅವ್ಕಾಸ್ ಮೆಳಾನಾ. ತಿಸ್ರೊ ವೆಕ್ತಿ ಬುಕಾಚಿ ಒಳಕ್ ಕರುನ್ ದಿತಾ. ವೆದಿ ಕಾರ್ಯೆಂ, ನಿರೂಪಣ್, ಉಪ್ಕಾರ್ ಆಟವ್ಣಿ ಆನಿ ಗವ್ರವ್ ಪ್ರತಿ ವಾಂಟಪ್ ಮ್ಹಣ್ ಸಾಹಿತ್ಯಾಚೊ ಮೂಳ್ ಆಶಯ್ ವಾಂಟುನ್ ಘೆಂವ್ಕ್ ಬರಯ್ಣಾರಾಂಕ್ ಏಕ್ ಉಗ್ತೊ ಅವ್ಕಾಸ್ ಮೆಳಾನಾ.

ಸುತ್ತೂರಾಂತ್ ಚಲ್ಚ್ಯಾ ಚಡಾವತ್ ಕವಿಗೋಶ್ಟಿಂನಿ ಎಕಾ ಕವೀಕ್ ಕವಿತಾ ವಾಚುಂಕ್‌ಚ್ ಕಶ್ಟಾಂನಿ ಮೆಳ್ಚಿಂ ದೋನ್ ತೆ ತೀನ್ ಮಿನುಟಾಂ. ಸಾಹಿತ್ಯ ಅಕಾಡೆಮಿಚ್ಯಾ ಕಥಾ ಸಂಧಿ, ಕವಿ ಸಂಧಿ ತಸಲ್ಯಾ ಕಾರ್ಯಕ್ರಮಾಂನಿ  ಚಡ್ ಕರುನ್ ಮಾಲ್ಗಡ್ಯಾ ಬರಯ್ಣಾಂಕ್ ಮಾತ್ ಅವ್ಕಾಸ್ ಆನಿ ವೆಳಾಚಿ ಬಂದಡ್ ವೆಗ್ಳಿ ಆಸ್ತಾ.

ಅಸಲ್ಯಾ ಪಾಟಿಥಳಾರ್ ಚಿಂತ್ತಾನಾ ಬೊಲ್ಕಾಂವ್ ತಸಲ್ಯಾ ಎಕಾ ಮುಕ್ತ್ ಸುವಾತೆಚಿ ಗರ್ಜ್ ದಿಸ್ತಾ.

ಬೊಲ್ಕಾಂವಾಂತ್  ಖಂಯ್ಚೋಯ್ ಶಿಷ್ಟಾಚಾರ್ ನಾತ್ಲೆಲ್ಯಾನ್ ಕಸಲಿಚ್ ಬಂದಡ್ ನಾ. ಫಕತ್ ಕವಿತಾ,  ಕಥಾ ಮಾತ್ ನಯ್ ಹರ್ ಪ್ರಕಾರಾಚೆಂ ಸಾಹಿತ್ಯ್ ರಚ್ತೆಲ್ಯಾಕ್ ಉಗ್ತ್ಯಾನ್ ಆಪ್ಣಾಕ್ ಆಂವಡ್ತಿ ವಿಂಚ್ಣಾರ್  ಕೃತಿ ವಾ ಕೃತಿಯೊ ಪ್ರಸ್ತುತ್ ಕರುಂಕ್ ಮುಕ್ತ್ ಅವ್ಕಾಸ್ ಆಸಾ.  ಸಾಂಗಾತಾ ವಾಚ್ಪ್ಯಾಂಲಾಗಿಂ ಉಲಂವ್ಕ್, ಆಪ್ಲೆ ವಿಚಾರ್ ವಾಂಟುನ್ ಘೆಂವ್ಕ್ ಏಕ್ ಸಂದಿ ಆಸಾ.

ವಿನೋದಿಕ್ ಸಾಹಿತ್ಯ್, ಕಾದಂಬರಿಚೊ ಏಕ್ ಅವಸ್ವರ್, ನಾಟಕಾಂತ್ಲಿಂ ಥೊಡಿಂ ಸಂಭಾಶಣಾಂ, ವೈಚಾರಿಕ್ ಬರವ್ಪಾಂತ್ಲೆಂ ಥೊಡೆ ವಿಚಾರ್, ಸಾಹಿತ್ಯ್ ಸಮೀಕ್ಶೆಂತ್ಲೆ ಕಾಂಯ್ ಗಜಾಲಿ, ಪಯ್ಣಾ ಸಾಹಿತ್ಯಾಚೆಂ ಏಕ್ ಪಾನ್ . . . ಅಶೆಂ ಸಾಹಿತ್ಯಾಚಾ ಹರ್ ಪ್ರಕಾರಾಕ್ ಬೊಲ್ಕಾಂವಾಂತ್ ಜಾಗೊ ಆಸಾ. ಗೀತಾಂ ಬರಯಿಲ್ಲ್ಯಾಂನಿ ಆನಿ ಆತಾಂ ಗೀತಾಂಕ್ ತಾಳೆ ಬಸಯಿಲ್ಲ್ಯಾಂನೀಯ್  ಗೀತ್ – ಸಂಗೀತಾ ಪಾಟ್ಲ್ಯೊ ಗಜಾಲಿ ಬೊಲ್ಕಾಂವಾಂತ್ ವಾಂಟುನ್ ಘೆವ್ಯೆತ್.

ಸಾಂ. ಲುವಿಸ್ ಕೊಲೆಜಿಚ್ಯಾ ಕೊಂಕ್ಣಿ ಸಂಸ್ಥ್ಯಾಚಾ ಖಬಾಡ್ದಾರೆಚೆರ್ ಸುರು ಜಾಂವ್ಚ್ಯಾ ಬೊಲ್ಕಾಂವ್ ಉಪಕ್ರಮಾಂತ್ ಮಯ್ನ್ಯಾಕ್ ಏಕ್ ಪಾವ್ಟಿಂ ತರಿ ನಮಿಯಾರ್ಲೆಲ್ಯಾ ದಿಸಾ ಸಾಂಗಾತಾ ಮೆಳೊನ್ ಸಾಹಿತ್ಯಾಚೆಂ ಆಸ್ವಾದನ್ ಕರ್ಚಿ ಆಲೊಚೆನ್ ಸದ್ದ್ಯಾಕ್ ಆಸಾ.  ಪಯ್ಲ್ಯಾ ಪ್ರಾಯೋಗಿಕ್ ಅಂಕ್ಯಾ ಉಪ್ರಾಂತ್ ಹ್ಯಾ ಆಲೊಚೆನೆಕ್ ಏಕ್ ಸ್ಪಶ್ಟತಾ ಆನಿ  ದಿಶಾ ಮೆಳ್ಚಿ ಉಮೆದ್ ಆಸಾ. ಪ್ರಾಯೋಗಿಕ್ ಅಂಕ್ಯಾಂತ್ ಸಾಂಗಾತಾ ಮೆಳ್‌ಲ್ಲ್ಯಾ  ಪಯ್ಕಿಂ ಕೊಣೀ ಆಸಕ್ತಾಕ್ ಮುಕ್ಲೊ ಬೊಲ್ಕಾಂವ್ ಅಂಕ್ಯಾಂತ್  ಪ್ರಸ್ತುತಿ ಕರುಂಕ್ ಆಸಾ ತರ್ ತಾಣೆ ದೀಸ್ ಆನಿ ವೇಳ್ ಠರಾವ್ಯೆತಾ. ಹ್ಯಾ ಖಾತಿರ್ ಬೊಲ್ಕಾಂವ್ ಮ್ಹಳ್ಳ್ಯಾ  ನಾಂವಾನ್ ಏಕ್ ವಾಟ್ಸಪ್ ಗ್ರೂಪ್ ಘಡ್ಲಾ ಆಸುನ್, ಕಸಲಿಂಚ್ ಶರ್ತಾಂ ವಾ ಕಸಲ್ಯೊಚ್ ಬಂದಡ್ಯೊ ನಾಸ್ತಾನಾ ಮಯ್ನ್ಯಾಂತ್ ಏಕ್ ವೋರ್ ಫಕತ್ ಆನಿ ಫಕತ್ ಕೊಂಕ್ಣಿ ಸಾಹಿತ್ಯಾಚೆಂ ಆಸ್ವಾದನ್ ಕರುಂಕ್ ಆಶೆತೆಲ್ಯಾಂನಿ ಹ್ಯಾ ವಾಟ್ಸಪ್ ಗ್ರೂಪಾಕ್ ಸಕಯ್ಲ್ಯಾ ಗಾಂಚಾಚೆರ್ ಕ್ಲಿಕ್ ಕರುನ್ ಮೆಳ್ಯೆತ್. ಹೊ ಗ್ರೂಪ್ ಫಕತ್ ಸಾಹಿತ್ಯ್ ಆಸ್ವಾದನಾಕ್ ಮಾತ್ ಸೀಮಿತ್ ದವರ್ನ್, ಗ್ರೂಪಾಂತ್ ಶಿಷ್ಠಾಚಾರ್ ಸಾಂಬಾಳ್ಚೆಂ ಪ್ರೇತನ್ ಕರ್ಯಾಂ.

Click to Join ಬೊಲ್ಕಾಂವ್