ಹರ್ ಮೆಸ್ತ್ರಿಕ್ ಅಸಲೊ ಏಕ್ ಶಿಸಾಂಚೊಂ ವರ್ಗ್ ಆಸ್ತಾಚ್, ಜೊ ಕೆದಾಳಾಯ್ ಉಲಯ್ನಾ. ಜುದಾಸಾಪರಿಂ ಉಮೊ ದೀವ್ನ್ ಮೆಸ್ತ್ರಿಕ್ ಉಗ್ತ್ಯಾನ್ ವಿಕ್ಚೆಂ ಧಯ್ರ್ ಜಾಂವ್, ಸಿಮಾಂವ್ ಪೆದ್ರುಪರಿಂ ಮೆಸ್ತ್ರಿಕ್ ಪಾಟ್ಲ್ಯಾನ್ ನೆಗಾರ್ಚಿ ಭಿರಾಂತ್ ಜಾಂವ್ ಹ್ಯಾ ವರ್ಗಾಕ್ ಆಸಾನಾ. ಧಯ್ರ್ ಆನಿ ಭಿರಾಂತ್ ದೊನೀ ನಾಂ ದೆಕುನ್, ಹ್ಯಾ ವರ್ಗಾ ಥಂಯ್ ಪಶ್ಚಾತ್ತಾಪಾಚಿ ಶಿರ್‌ಯೀ ನಾ. ದೆಕುನ್ ಹ್ಯಾ ವರ್ಗಾಚ್ಯಾ ಶಿಸಾಂಪಯ್ಕಿ ಕೊಣೀ ಗಳ್ಪಾಸ್ ಘೆನಾ, ಗಳ್‌ಗಳ್ಯಾಂ ರಡಾನಾ.
ಪಿಲಾತಾಕ್ ಪದ್ವಿ ಆಸ್ಲಿ, ಪೂಣ್ ತಾಚೆಥಂಯ್ ಧಯ್ರ್ ನಾತ್ಲೆಂ. ಪಿಲಾತ್ ಸತಾ – ನಿತಿಕ್ ಪ್ರಾಸ್ ಚಡ್ ಲೊಕಾಜಮ್ಯಾಕ್ ಭಿಯೆತಾಲೊ ದೆಕುನ್ ತಾಣೆ ಹಾತ್ ಧುವ್ನ್ ಜೆಜುಚೆರ್ ಮೊರ್ನಾಚೆಂ ಫರ್ಮಾಣ್ ವಾಚ್ಲೆಂ. ಪಿಲಾತ್ ಸತ್ ಕಿತೆಂ ಜಾಣಾಸ್ಲೊ ತರೀ, ಸತಾಚ್ಯಾ ಪಾಡ್ತಿನ್ ತೊ ರಾವೊಂಕ್ ಭಿಯೆಲೊ.
ಆಜ್‌ಯೀ – ಪದ್ವೆಚೊ ಜುಲುಮ್ ಶಿಮೆಕ್ ಪಾವೊನ್, ಪ್ರಭುತ್ವಾಚ್ಯೆ ಹಾತಿಂ ಪರ್ಜಾ ವಳ್ವಳ್ತಾನಾ – ಸುಟ್ಕೆಚೊ ಆವಾಜ್ ಉಟಯ್ತೆಲ್ಯಾ ಮೆಸ್ತ್ರಿಕ್ ಖುರ್ಸಾರ್ ಜೊಡುಂಕ್ ಉಲಯ್ನಾತ್ಲ್ಯಾ ಶಿಸಾಂಚೊಂ ಏಕ್ ವರ್ಗ್ ಆಸ್ಲ್ಯಾರ್ ಪುರೊ ಮ್ಹಣ್ಚ್ಯಾಕ್ ಹಿ ಕವಿತಾ ಬರಯ್ಲ್ಯಾ.
■ ಎಚ್ಚೆಮ್
ಜರಿ ಹಾಂವ್ ಜುದಾಸ್ ಜಾಲ್ಲೊಂ
ಕೆದಿಂಚ್ ತುಕಾ ವಿಕ್ರಿತ್ ಕರ್ತೊಂ ನಾಂ
ಜರಿ ಹಾಂವ್ ಕೈಫಾಸ್ ಜಾಲ್ಲೊಂ
ಪಿಲಾತಾ ಅದೀನ್ ತುಕಾ ಕರ್ತೊಂ ನಾಂ
ಜರಿ ಹಾಂವ್ ಸಿಮಾಂವ್ ಪೆದ್ರು ಜಾಲ್ಲೊಂ
ಫಾಂತ್ಯಾ ಫಾರಾರ್ ತುಕಾ ನೆಗಾರ್ತೊಂ ನಾಂ
ಜರಿ ಹಾಂವ್ ಪಿಲಾತ್‌ಚ್ ತರೀ ಜಾಲ್ಲೊಂ
ಮೊರ್ನಾ ಫರ್ಮಾಣ್ ತುಕಾ ದಿತೊಂಚ್ ನಾ
ಜುದಾಸ್ – ಕೈಫಾಸ್, ಪೆದ್ರು – ಪಿಲಾತ್
ಜಾಂವ್ಚೊ ಅವ್ಕಾಸ್ ಮ್ಹಾಕಾ ಲಾಬ್ಲೊ ನಾ
ದೆಕುನ್ ಮೆಸ್ತ್ರಿ – ತುಜೊ ಶಿಸ್ ಹಾಂವ್ ಜಾಲೊಂ
ತುಕಾ
ವಿಕ್ತಾನಾ, ನೆಗಾರ್ತಾನಾ, ಖುರ್ಸಾರ್ ಮಾರ್ತಾನಾ
ಮ್ಹಾಕಾ ಮಾತ್ರ್ ಉಲಂವ್ಕ್ ಜಾಲೆಂ ನಾಂ
ಆನಿ
ತಾಣಿ ಬಾರಾಬ್ಬಾಸಾಕ್ ಮಾಗ್ತಾನಾಂಯ್ !
■ ಎಚ್ಚೆಮ್
6 comments
Nice one.
Very meaningful poem. Speaks in volumes on the current situation in our society.
Nice poem with so many dimensions
ಜೆಜುಚೆ ಶಿಸ್ ಲೆಖಾನ್ ಬಾರಾ. ಹಾಂಚೆ ಪೈಕಿ ಜೆಜುಚಾ ಮಿಸಾಂವಾ ವಿಶ್ಯಾಂತ್ ಕೊಣಾಕ್ ಕಿತ್ಲಿ ಜಾಣ್ವಾಯ್, ಬದ್ಧತಾ ಆಸ್ಲಿ ದೆಖ್ತಾನಾ ಸಿಮಾಂವ್ ಪೆದ್ರುಯೀ ಥೊಡ್ಯಾ ಕಾಳಾಕ್ ಗಡ್ಬಡ್‌ಲ್ಲೊ ಪಳೆಂವ್ಕ್ ದಿಸ್ತಾ.
ಭಾರತಾಂತ್ ಪ್ರಜಾಪ್ರಭುತ್ವ್ ಮ್ಹಳ್ಳೆಲೆಂ ಆಶಯ್, ಶತಮಾನ್ ತಶೆಂ ಶತಮಾನಾಂ ಥಾವ್ನ್ ರಾಜ್ವೊಟ್ಕೆಂತ್ ಗುಲಾಮಾಂ ಬರಿಂ ಜಿಯೆವ್ನ್ ಆಯ್ಲೆಲ್ಯಾ ಲೊಕಾಕ್ ಎಕಾಚ್ಛಾಣೆ ಪ್ರಜಾಪ್ರಭುತ್ವ್ ಮ್ಹಳ್ಳೆಲೆಂ ಮಾಂಕ್ಡಾಂಚಾ
ಹಾತಿಂ ಮಾಣಿಕ್ ದಿಲ್ಲೆ ಬರಿಂ ಜಾಲಾಂ ಮ್ಹಣ್ ಮ್ಹಾಕಾ ಭಗ್ತಾ. ಅಜೂನ್‌ಯೀ ವ್ಯಕ್ತಿ ಪೂಜಾ, ಶಿಕ್ಪ್ಯಾಂ ಮಧೆಂಯ್ ಪಳೆತಾನಾ ಅಜ್ಯಾಪ್ ಭಗ್ತಾ. ಹಾಂವ್ ಫಕತ್ ರಾಜ್‌ಕೀಯಾ ವಿಶಿಂ ಉಲಯ್ತೆತ್ ನಾ. ಧಾರ್ಮಿಕ್ ಶೆತಾಂತ್‌ಯೀ ಹಿಚ್ ಅವಸ್ಥಾ! ಪ್ರಜಾಪ್ರಭುತ್ವ್ ಆಮ್ಕಾಂ ಸಾಂಗ್ಲೆಲೆಂ ಸಿದ್ಧಾಂತ್ ವ ಜೀವನ್ ಕ್ರಮ್ ನ್ಹಯ್. We love and adore dictators. ವಿರೋಧಿಂಕ್ ಖುರ್ಸಾಯಾ!
Very well said sir.. 100% you are right..
Nice one to think.