ಮ್ಹಜೊ ‘ಫ್ಯೂರ್- ವೆಜ್’ ಕರೆಜ್ಮ್ !

109

ಕರೆಜ್ಮಾಚ್ಯಾ ಕಾಳಾರ್ ವೆಜ್ ಮಾತ್ರ್ ಖಾತಾಂ ಆನಿ ತಾಂತಿಂ, ಮಾಸ್ಳಿ ಲೆಗುನ್ ನೊನ್ ವೆಜ್ ಕಿತೆಂಚ್ ಖಾಯ್ನಾ ಮ್ಹಣ್ ನಿರ್ಧಾರ್ ಘೆಂವ್ಚೆಂ ಹರ್ಯೆಕಾ ವರ್ಸಾಚ್ಯಾ ಪಯ್ಲ್ಯಾ ದಿಸಾ ನವ್ಯಾ ವರ್ಸಾಕ್ ಡಯಟ್ ಸುರು ಕರ್ತಾಂ, ಜಿಮ್ಮಾಕ್ ಯೆತಾಂ ಮ್ಹಣ್ ನಿರ್ಧಾರ್ ಘೆಂವ್ಚ್ಯಾ ತಶೆಂ ಮ್ಹಣ್ ಸಾಂಗ್ಲ್ಯಾರ್ ಚೂಕ್ ನಾಂ. ಕಶೆಂ ಡಯಟ್, ಜಿಮ್ ಮ್ಹಣ್ ಚ್ಯಾರ್ ದೀಸ್ ಜಾತಾನಾ ಹೊರ್ಬೊಸ್ ಸುಟ್ತಾಗೀ ತಶೆಂಚ್ ವೆಜ್ ಮಾತ್ರ್ ಖಾತಾಂ ಮ್ಹಣ್ಚೆಂ ಪಾಳುಂಕ್ ಜಾಂವ್ಚೆ ತ್ರಾಸ್ ತಿತ್ಲೆಚ್ ಕಶ್ಟಾಂಚೆಂ.

ಪುಣ್ ಹ್ಯಾ ವರ್ಸಾಚೆಂ ಕರೆಜ್ಮ್ ಸರ್ವಾನುಮತೆನ್ ಘೆತ್ಲೆಲ್ಯಾ ನಿರ್ಧಾರಾ ಪರ್ಮಾಣೆಂ ವೆಜ್ ಮಾತ್ರ್ ಖಾಂವ್ಚೆಂ ಆನಿ ಜೆಂವ್ಚೆಂ ಮ್ಹಣ್ ಥಿರಾಯ್ಲೊ. ಫೆಬ್ರೆರಾಚ್ಯಾ ಚವ್ದಾ ತಾರ್ಕೆರ್ ಶಿಂಜಿಚೊ ಬುದ್ವಾರ್ ಆನಿ ಪ್ರೇಮಿಕಾಂಚೊ ದೀಸ್ ಸಾಂಗಾತಾ ಆಯಿಲ್ಲೊ ಜಾಲ್ಲ್ಯಾನ್, ಫೆಬ್ರೆರಾಚ್ಯಾ ತೆರಾ ತಾರ್ಕೆರ್ ರಾತಿಂ ಪಿಜ್ಜಾ, ಕೆ‌ಎಫ್‌ಸಿ, ಆಯ್ತಾರಾಚೆಂ ದುಕ್ರಾ ಮಾಸ್ ಆನಿ ಮಸಾಲೊ ಲಾವ್ನ್ ಫಿಡ್ಜಾಂತ್ ದವರ್ಲೆಲೆ ತಾರ್ಲೆ ಅವ್ಮರಿ ಜಾಲ್ಲ್ಯಾ ಉಪ್ರಾಂತ್ ರಾತ್ಚ್ಯಾ ಜೆವ್ಣಾರ್ ಮುಗ್ದುಂಚೊ ಮ್ಹಣ್ ನಿಚೆವ್ ಜಾಲೊ. ಪುಣ್ ಮುಂಗ್ಳಾರಾ ದನ್ಪರಾಂಕ್ ಕುಟ್ಮಾಚೊ ಎಕ್ಲೊ ಮಾನೆಸ್ತ್ ಕಾಜಾರಾಚೆ ಇನ್ವಿಟೇಶನ್ ದೀಂವ್ಕ್ ಆಯಿಲ್ಲ್ಯಾನ್ ಆನಿ ದನ್ಪರಾಂಚೊ ವೇಳ್ ಜಾಲ್ಲ್ಯಾನ್ ಆನಿ ರಾಂವ್ಚೊನಾ ಕೊಣ್ಣಾ ಮ್ಹಣ್ ಚಿಂತುನ್ ತೊಂಡಾ ಉತ್ರಾಕ್ “ಆನಿ ಜೆವಾಣ್ ಕರ್ನ್‌ಚ್ ವೆಚೆಂ” ಮ್ಹಣ್ ಸಾಂಗ್ಲೆಲ್ಯಾ ಉತ್ರಾಕ್ ಸಯ್ ಮ್ಹಣ್ ತೊ ಮಾನೆಸ್ತ್ ಜೆವ್ಣಾಕ್ ಬಸ್ತಾನಾ, ದುಕ್ರಾಮಾಸ್ ಹುನ್ ಕರಿಜೆಚ್ ಪಡ್ಲೆಂ. “ಛೆ… ಹೊ ಯೆತಾ ಮ್ಹಣ್ ಪಯ್ಲೆಂಚ್ ಗೊತ್ತಾಸ್‌ಲ್ಲೆಂ ಜಾಲ್ಯಾರ್ ತಾರ್ಲೆ ಮ್ಹಣೀ ಭಾಜ್ಯೆತೆ, ಕಶೆಂಯ್ ಸುಮಾರ್ ಆಸ್‌ಲ್ಲೆ. ಸಾಂಜೆಕ್ ದುಕ್ರಾಮಾಸ್ ಆಮ್ಕಾಂ ಶಿತಾಕ್ ಪಾವ್ತೆಂ” ಮ್ಹಣ್ ಮಾಮ್ಮಿ ಮ್ಹಣಾಲಿ ತರೀ ದುಕ್ರಾಮಾಸ್ ದನ್ಪರಾಂಕ್ ಆಮೆನ್ ಜಾಲ್ಲೆಂ.

ಹ್ಯಾ ಪಾವ್ಟಿಂಚ್ಯಾ ಶಿಂಜಿಚ್ಯಾ ಬುದ್ವಾರಾಕ್ ಉಪಾಸ್ ಪಾಳ್ನ್, ಮಿಸಾಕ್ ವಚೊನ್, ರಾತಿಂ ಮಾತ್ರ್ ಜೆವಾಣ್ ಮ್ಹಣ್ ಸಾಂಗ್ಲೆಲ್ಯಾ ಘರ್ಚ್ಯಾ ವ್ಹಡಿಲ್ಣೆಚ್ಯಾ ಉತ್ರಾಂಕ್ ಖಾಲ್ತಿಮಾನ್ ಘಾಲ್ನ್ ಹಾವೆಂ ಸಕಾಳಿಂ ನಾಶ್ಟೊ ತ್ಯಾಗ್ ಕರ್ನ್ ಕೇವಲ್ ಫುಟಿ ಕಾಪ್ಯೆರ್ ದೀಸ್ ಸುರ್ವಾತ್ಲೊ. ಹಾಂವ್ ಚಿಂತಾಂ, ಕಿತೆಂ ಕರಿನಜೊ ಮ್ಹಣ್ ಚಿಂತ್ತಾಂವ್ ತೆಂಚ್ ಚಡ್ ನಾಡ್ತಾ ತಶೆಂ ದನ್ಪರಾಂ ಪೊಟಾಂತ್ ಕಿಡಿಯೊ ಬೋಬ್ ಮಾರ್ಚೆಂ ಸೊಸುಂಕ್ ಜಾಲೆನಾಂ. ಮ್ಹಜ್ಯಾ ಪ್ರಾಜಿತಾಖಾತಿರ್ ಪೊಟಾಂತ್ ಆಸ್ಲೆಲ್ಯಾ ಕಿಡಿಂಕ್ ಕಿತ್ಯಾಕ್ ಉಪಾಶಿಂ ಘಾಲ್ಚೆಂ ಮ್ಹಳ್ಳೊ ವಾದ್ ಬಳಿಶ್ಟ್ ಜಾವ್ನ್ ಮನಾಕ್ ಆಪ್ಟತಾನಾ ಹಾವೆಂ ಘಳಾಯ್ ಕೆಲಿ ನಾಂ. ಮೊಡ್ಕೆಂತ್ಲಿ ಪೇಜ್ ಘೆವ್ನ್, ಗೊಸಾಳ್ಯಾಚ್ಯಾ ನಿಸ್ತ್ಯಾನ್ ದನ್ಪಾರಾಂ ಏಕ್ ವ್ಹರಾ ಪಯ್ಲೆಂ ಕರೆಜ್ಮಾಚ್ಯಾ ಕಾಳಾಚೆಂ ಪಯ್ಲೆಂ ಜೆವಾಣ್ ಸುರ್ವಾತ್ಲೆಂ.

ಪಯ್ಲೆ ದೋನ್ ದೀಸ್ ರಾಂದ್ವಯೆಚ್ಯಾ ಜೆವ್ಣಾಂತ್ ಬರ‍್ಯಾನ್ ಗೆಲೆ. ಕಾಮ್ ಪಾಡ್ ಜಾಲೆಂ ಸುಕ್ರಾರಾ ದಿಸಾ. ತ್ಯಾ ದಿಸಾ ಕೋಣ್‌ಗೀ ಬಾವ್ಡ್ಯಾನ್ ವಾಟ್ಸಾಪಾರ್ ಪಾಪ್ ಸಾಯ್ಭಾನ್ ಮಾಸ್ ಖೆಲ್ಯಾರ್ ವ್ಹಡ್ ನಾಂ, ಉಪಾಸ್ ಕರಿನಾತ್ಲ್ಯಾರ್ ಪರ್ವಾ ನಾಂ ಪುಣ್ ದುಸ್ರ್ಯಾಂಕ್ ಕಶ್ಟಾರ್ ಘಾಲಿನಾಕಾತ್ ಮ್ಹಣ್ ಕಿತೆಂಗೀ ಸಾಂಗ್ಲಾಂ ಮ್ಹಣ್ ಸಂದೇಶ್ ಧಾಡ್‍‌ಲ್ಲೊ ಪಳೆತಾನಾ ಭೋವ್ ಬೆಜಾರಾಯ್ ಭೊಗ್ಲಿ. ಹೊ ಸಂದೇಶ್ ಮುಂಗ್ಳಾರಾ ಪುಣೀ ಆಯಿಲ್ಲೊ ಜಾಲ್ಯಾರ್ ಹ್ಯಾ ಕರೆಜ್ಮಾಂತ್ ವೆಜ್ ಖಾಂವ್ಚ್ಯಾ ನಿರ್ಧಾರಾವಿಶಿಂ ಪರತ್ ಚಿಂತ್ಯೆತೆಂ ಆಸ್‌ಲ್ಲೆಂ. ಪುಣ್ ಆತಾಂ ನಿರ್ಧಾರ್ ಘೆವ್ನ್ ಜಾಲಾ, ಆನಿ ವ್ಹಳ್ಕಿಂಚ್ಯಾ ಥೊಡ್ಯಾಂಕಡೆ ಹ್ಯಾ ವಿಶಿಂ ಪೆಂಪಾರೆಂ ಫುಂಕುನ್ ಜಾಲಾಂ. ಆತಾಂ ಪಾಪ್ ಸಾಯ್ಭಾನ್ ಸಾಂಗ್ಲೆಂ ಮ್ಹಣ್ ನೊನ್ ವೆಜ್ ಖಾತಾಂ ಮ್ಹಳ್ಯಾರ್, ತುಕಾ ಕಾಲೆಂ ಪಾಪ್ ಸಾಯ್ಭಾನ್‌ಚ್ ತಿ ಮೆಸೆಜ್ ಧಾಡ್ಲ್ಯಾಗೀ ವಾ ಪಾಪ್ ಸಾಯ್ಭಾಕ್ ಫೋನ್ ಕರ್ನ್ ತುಮಿಂಚ್ ಹಿ ಮೆಸೆಜ್ ಧಾಡ್‌ಲ್ಲಿಗೀ ಮ್ಹಣ್ ವಿಚಾರ್ಲೆಂಯ್‌ಗೀ ಮ್ಹಣ್ ಖೆಳ್ಕುಳಾಂ ಕರ್ತಿತ್ ಮ್ಹಳ್ಳ್ಯಾ ಕರ್ಮಾಕ್ ವೆಜ್ ಪಾಳ್ಚ್ಯಾ ನಿರ್ಧಾರಾ ಥಾವ್ನ್ ಪಾಟಿಂ ಯೇಂವ್ಕ್ ಚಿಂತುಂಕ್ ನಾಂ. ರೊಮಾ ಥಾವ್ನ್ ಸಂದೇಶ್ ಉದೆಂತಿಚ್ಯಾ ರೊಮಾಕ್ ಪಾವೊಂಕ್ ಚ್ಯಾರ್ ದೀಸ್ ಪುಣೀ ಜಾಯ್ ನೈಂ ದೆಕುನ್ ಘಳಾಯ್ ಜಾವ್ನ್ ಸುಕ್ರಾರಾ ಪಾಪ್ ಸಾಯ್ಭಾಚೊ ಸಂದೇಶ್ ಪಾವ್ಲೊ ಕೊಣ್ಣಾ ಮ್ಹಣ್ ಮಾಕಾಚ್ ಸಮಾಧಾನ್ ಕೆಲೆಂ ಹಾವೆಂ.

ಆಜ್ ಸನ್ವಾರಾಚೊ ದೀಸ್. ಆಯ್ತಾರಾಕ್ ಕಿತೆಂ ರಾಂದ್ಚೆಂ ಮ್ಹಣ್ ಚರ್ಚಾ ಚಲೊನ್ ಆಸ್ತಾನಾ, ಆಮ್ಚ್ಯಾ ಘರಾಂತ್ ಫೇಸ್‌ಬುಕಾರ್ ಆನಿ ಇನ್ಸ್ಟಾಗ್ರಾಮಾಚೆ ರೀಲ್ಸ್ ಪಳೆಂವ್ಚ್ಯಾಂತ್ ಸನದ್ ಜೋಡ್ನ್ ಆಸ್ಚ್ಯಾ ಮ್ಹಜ್ಯಾ ಬಾಯೆನ್ ಹೊ ಕರೆಜ್ಮಾಚೊ ಮಹಿನೊ ಡಯಟ್ ಪಾಳುಂಕ್ ಏಕ್ ಬರೊ ಆವ್ಕಾಸ್ ಮ್ಹಣ್ ಸುಚಾಯ್ಲೆಂ. ಎದೊಳ್‌ಚ್ ಕರೆಜ್ಮಾಚೆ ಪಾಂಚ್ ದೀಸ್ ಜಾಲೆ ಆನಿ ಕಾಲೆಂ ಪಾಂತ್ತೀಸ್ ದಿಸಾಂಕ್ ತುಜೆಂ ಡಯಟ್ ಮ್ಹಣ್ ಮಮ್ಮಿ ಸಾಂಗ್ತಾನಾ, ಮ್ಹಜ್ಯಾ ಭಿತರ್ಲೊ ಆರ್ಯಭಟ ಜಾಗೊ ಜಾಲೊ ಆನಿ ಹಾವೆಂ ಕರೆಜ್ಮಾಚೆಂ ಕ್ಯಾಲೆಂಡರ್ ಉಗ್ತೆಂ ಕೆಲೆಂ. ಕಿತೆಂ ಮ್ಹಣ್ಚೆಂ? ಹ್ಯಾ ಪಾವ್ಟಿಂಚ್ಯಾ ಕರೆಜ್ಮಾಂತ್, ಶಿಂಜಿಚ್ಯಾ ಬುದ್ವಾರಾಥಾವ್ನ್ ನಿಮಾಣ್ಯಾ ಸುಕ್ರಾರಾ ಮುಣಾಸರ್ ಭರ್ತಿ 45 ದೀಸ್. ಮ್ಹಳ್ಯಾರ್ ಪಾಂಚ್ ದೀಸ್ ಚಡ್. ಅಯ್ಯೋ ದೇವಾ ಮ್ಹಣ್ ಬೋಳಾರಾಚ್ಯಾ ತಾಳ್ಯಾನ್ ಕಾಳ್ಜಾನ್ ಉದ್ಗಾರ್ ಕಾಡ್ಲೊ ತರೀ ಅವಾಜ್ ಭಾಯ್ರ್ ಆಯ್ಲೊನಾಂ. ಆಶೆಂ ಆಯ್ತಾರಾಥಾವ್ನ್ ಆಮ್ಗೆರ್ ಕಾರ್ಬ್ ಉಣೆಂ ಕರ್ನ್, ಪ್ರೋಟೀನ್ ಆನಿ ಫೈಬರ್ ಚಡ್ ಖಾಂವ್ಚೆಂ ಮ್ಹಣ್ ವ್ಹಡಿಲಾಂಚಿ ಅನುಮತಿ ಘೆನಾಸ್ತಾಂ ಭುರ್ಗ್ಯಾಂನಿ ನಿರ್ಧಾರ್ ಕೆಲೊ.

ಸೊಮಾರಾ ಸಕಾಳಿಂ ಪ್ರೋಟೀನ್ ರಿಚ್ ಡಯಟ್ ಫುಡ್ ಸೊಧುನ್ ಕುಜ್ನಾಕ್ ಪಾವಾಜಯ್ ತರ್, ಮಾಮ್ಮಿ ಪಾಣ್ಪಳೆ ಭಾಜ್ತಾಲಿ. ಓಹ್ ಗೋಡ್… ಕಾರ್ಬ್ಸ್ ಮ್ಹಣ್ ಡಯಟಾಚ್ಯಾ ತಾಳ್ಯಾನ್ ಉದ್ಗಾರ್ ಕಾಡ್ಲೊ ತರೀ ಘರಾಂತ್ ಪ್ರೋಟಿನ್ ರಿಚ್ ಮ್ಹಣ್ ಸಾಂಗ್ಚ್ಯಾ ತಸಲೆಂ ಕಾಲ್ಚ್ಯಾ ರಾತಿಚೆಂ ಗುಜ್ಜೊ ಆನಿ ಚಣೆ ಘಾಲ್ನ್ ರಾಂದ್ಲೆಲೆಂ ನಿಸ್ತೆಂ ಮಾತ್ರ್ ಆಸ್‌ಲ್ಲೆಂ ಜಾಲ್ಲ್ಯಾನ್, ಇಲ್ಲೆ ಕಾರ್ಬ್ಸ್ ಬರೆ ಮಣ್ ಪಾಂಚ್ ಪಾನ್ಪಾಳೆ ಖಾವ್ನ್ ಡಯಟಾಚೊ ದೀಸ್ ಸುರ್ವಾತ್ಲೊ.

ಮ್ಹಾಕಾ ವಿಶೇಸ್ ಭೊಗ್ಲೆಲೆಂ ಆಮ್ಚ್ಯಾ ಕೊಡ್ಯಾಳ್ಚ್ಯಾ ಶೆರಾಂತ್ ಕಿತ್ಲಿಂ ವೆಜ್ ಹೊಟ್ಲಾಂ ಆಸಾತ್ ಮ್ಹಳ್ಳೆಂ ಮ್ಹಾಕಾ ಆತಾಂ ದಿಸೊನ್ ಆಯಿಲ್ಲೆಂ. ಗಲ್ಲೆಕ್ ಏಕ್ ಮ್ಹಳ್ಳ್ಯಾಪರಿ ವೆಜ್ ಹೊಟ್ಲಾಂ ಆನಿ ಮ್ಹಾಕಾ ಹಾಂಚಿ ವಳಕ್ ಸಯ್ತ್ ನಾತ್‌ಲ್ಲಿ ಮ್ಹಳ್ಳಿ ಗಜಾಲ್ ವ್ಹಡಾ ನಾಲಿಸಾಯೆಚಿ ಜಾಂವ್ಕ್ ಪಾವ್ಲಿ. ವ್ಹಡಾ ಅಭಿಮಾನಾನ್ ಆನಿ ಗತ್ತಾನ್ ಹ್ಯಾ ವೆಜ್ ರೆಸ್ಟೋರೆಂಟಾಂಚ್ಯಾ ಭಿತರ್ ರಿಗ್ಲೆಲ್ಯಾ ಮ್ಹಾಕಾ ಹೊಟ್ಲಾಚ್ಯಾ ಮೆನ್ಯುನ್ ಕಂಗಾಲ್ ಕರ್ಚೆಂ ಮಾತ್ರ್ ಬಾಕಿ. ಪನೀರ್, ಮಶ್ರೂಮ್ ಆನಿ ಗೋಬಿ. ಇತ್ಲ್ಯಾರ್ ಮೆನು ಖತಂ. ಪಯ್ಲ್ಯಾ ದಿಸಾ ಗೋಬಿ ಚಿಲ್ಲಿ, ಮಶ್ರೂಮ್ ಮಸಾಲಾ ಆನಿ ಪನೀರ್ ಟಿಕ್ಕಾ ಮ್ಹಣ್ ಖುಶೆನ್ ಜೆವ್ಲೆಲ್ಯಾ ಆಮ್ಕಾಂ ದುಸ್ರ್ಯಾ ತಿಸ್ರ್ಯಾ ಪಾವ್ಟಿಂಚಿ ಹೊಟ್ಲಾಚಿ ಭೆಟ್ ಬೊಟಾಟೊ, ದಾಳ್, ವಾಂಯ್ಗೆಂ, ದುದಿಂ ಪಳೆವ್ನ್ ಹೊಟೆಲ್ ಆನಿ ನಾಕಾ ಕೊಣ್ಣಾ ಮ್ಹಣ್ ಭೊಗ್ಲೆಲ್ಯಾಂತ್ ನವಾಲ್ ನಾಂ. ಅನ್ಯೇಕ್ ಗಮ್ಲೆಲೊ ವಿಶಯ್ ಕಿತೆಂಗೀ ಮ್ಹಳ್ಯಾರ್, ಸಾಮಾನ್ಯ್ ಜಾವ್ನ್ ಸಕ್ದಾಂಚ್ಯಾ ಮತಿಂತ್ ಆಸ್ಚೆಂ ಕೀ ವೆಜ್ ಜೆವ್ಣಾಚೊ ಖರ್ಚ್ ಹೊಟ್ಲಾಂತ್ ಉಣೊ ಮ್ಹಣ್. ಹೆಂ ಬಿಲ್ಕುಲ್ ಚೂಕ್. ಕೊಡ್ಯಾಳಾಂತ್ಲ್ಯಾ ಥೋಡ್ಯಾ ಹೊಟ್ಲಾನಿಂ ಮಾಸಾಚಿಂ ಪಕ್ವನಾಂ ವೆಜ್ಜಾಚ್ಯಾಕೀ ಉಣ್ಯಾ ದರಿರ್ ಮೆಳ್ಚೆಂ ಆನಿ ಸಾಮಾನ್ಯ್ ಜಾವ್ನ್ ಇತರ್ ಹೊಟ್ಲಾನಿಂ ವೆಜ್ ಆನಿ ನಾನ್ ವೆಜ್ ಜೆವ್ಣಾಚೆಂ ಮೊಲ್ ಎಕಾಚ್ ದರಿರ್ ಆಸಾ ಮ್ಹಳ್ಳೆಂ ಸತ್ ಸಯ್ತ್ ಹ್ಯಾ ಕರೆಜ್ಮಾಂತ್ ಉಗ್ಡಾಪೆಂ ಜಾಲೆಂ.

ಆಶೆಂ ಮ್ಹಣ್ತಾನಾ, ವೆಜ್ ಜೆವ್ಣಾಂತ್ ಮಜಾ ಮೆಳೊಂಕ್ ನಾಂ ಮ್ಹಣ್ ಸಾಂಗ್ಲ್ಯಾರ್ ಚೂಕ್ ಜಾಯ್ತ್. ಹ್ಯಾ ಚಾಳೀಸ್ ಆನಿ ಪಾಂಚ್ ದಿಸಾಂಚ್ಯಾ ಪಯ್ಣಾರ್, ಕಾರೆಣ್ಯಾಚಿ ಚೆಟ್ನಿ, ಮಿಟಾಚೆ ಘರೆ, ಗುಜ್ಜೊ, ಕೆಂಳ್ಬ್ಯಾಚಿ ಬೊಂಡಿ ಆನಿ ಕಾಂಡಿ, ಮುಡ್ಲ್ಯೊ, ಆಂಬ್ಯಾಚಿ ಮೀಟ್ ಮಿರ್ಸಾಂಗ್ ಆಶೆಂ ಸಭಾರ್ ವರ್ಸಾಂ ಥಾವ್ನ್ ಜಿಬೆಕ್ ಲಾಂವ್ಕ್ ನಾತ್ಲೆಲೆಂ ರೂಚ್ ದೀಂವ್ಕ್ ಸಕ್ಲಾಂ.

ಘರಾಂತ್ ಆನಿ ಹಾವೆಂ ಭಾಯ್ರ್ ಹೊಟ್ಲಾಂತ್ ವಚೊನ್ ಜೆವ್ತಾನಾ ವೆಜ್ ವ್ಹಡ್ ಫರಕ್ ಪಡನಾ ತರೀ ಕರೆಜ್ಮಾಂತ್ ಸಯ್ರ್ಯಾಂಚ್ಯಾ ಘರಾ ವಾ ಆಫಿಸಾಚ್ಯಾ ಕಾಮಾಂತ್ ಭಾಯ್ರ್ ವಚೊನ್ ಜೆವಾಣ್ ವಾಂಟುನ್ ಜೆವ್ತಾನಾ ಥೊಡಿ ಘುಸ್ಪಡ್ ಜಾಲ್ಲೆಂ ಸತ್. ಮ್ಹಜಿ ಮೊದೊರ್ನ್ ಛೆಕ್ಕ್, ತುಂ ಮಾಸ್ ಖಾಯ್ನಾಂಯ್ ಮ್ಹಣ್ ಪಯ್ಲೆಂಚ್ ಸಾಂಗ್‌ಲ್ಲೆಂ ತರ್, ಸುಕೆಂ ನಿಸ್ತೆಂ ಪುಣೀ ಕರ್ತಿಂ ಆತಾಂ ತುಕಾ ಕಿತೆಂ ವಾಡ್ಚೆಂ ನೇ ಮ್ಹಣ್ ಖಂತ್ ಕರಿತ್ತ್ ಆದ್ಲ್ಯಾ ವರ್ಸಾಚೆಂ ಆಂಬ್ಯಾಚೆಂ ಲೊಣ್ಚೆಂ ತೊಂಡ್ಲಾವ್ನ್ ಜೆವಿಜೆ ಪಡ್ಲೆಂ. ಕುಂಕ್ಡಾಚಿ ಕಡಿ ಪುಣೀ ಇಲ್ಲಿ ಘೆ ಮ್ಹಣ್ ಪೊದೊರ್ನ್ ಸಾಂಗ್ತಾನಾ ಮ್ಹಜೊ ಭಾವಾಡ್ತ್ ರಾಜಿ ಜಾಂವ್ಕ್ ತಯಾರ್ ನಾತ್‌ಲ್ಲೊ, ದೆಕುನ್ ಲೊಣ್ಚೆಂ ಮಾತ್ರ್ ಉಪ್ಕಾರಾಚೆಂ ಜಾಲೆಂ.

ಆಶೆಂ ಮ್ಹಣ್ತಾನಾ, ಚಾಳಿಸ್ ಆನಿ ಪಾಂಚ್ ದಿಸಾನಿಂ ನೊನ್ ವೆಜ್ ಖಾಂವ್ಕ್‌ಚ್ ನಾಂ ಗೀ ಮ್ಹಣ್ ತುಮಿ ವಿಚಾರ್ಲ್ಯಾರ್ ಸಾಂಗ್ತಾಂಗೀ, ಏಕ್ ದೀಸ್ ತಾಂತಿ ಘಾಲ್ಲೆಂ ಸ್ಪ್ರಿಂಗ್ ರೋಲ್ ಕಳಿತ್ ನಾಸ್ತಾನಾ ಖೆಲಾಂ. ಕಳಿತ್ ನಾತ್‌ಲ್ಲ್ಯಾ ಪಾತ್ಕಾಕ್ ಮಾಫಿ ಆಸಾ ತಶೆಂ ಹೆಂ ನೊನ್ ವೆಜ್ ಮ್ಹಜ್ಯಾ ವೆಜ್ ಪ್ರಾಜಿತಾಕ್ ಅಡ್ಕಳ್ ಹಾಡಿನಾ ಮ್ಹಳ್ಳಿ ಮ್ಹಜಿ ಧ್ರಡ್ ಪಾತ್ಯೆಣಿ.

ಕರೆಜ್ಮಾಚ್ಯಾ ನಿಮಾಣ್ಯಾ ಹಾಫ್ತ್ಯಾಂತ್ ಫಜಿಂತ್ ಜಾಲಿ. ಸಕಾಳಿಂ ಫುಡೆಂ ಮಾಸಾಚ್ಯಾ ಫಾರ್ಮಾಚ್ಯಾ ಮಾಪ್ಳ್ಯಾಚೆಂ ಫೋನ್. ಪೊರ್ಬುಲೆ, ಕಸೊ ಆಸಾಯ್? ಘರಾಂತ್ ಸಗ್ಳಿಂ ಬರಿ ಭಲಾಯ್ಕಿ ಮೂ? ಸುಮಾರ್ ದೀಸ್ ಜಾಲೆ ತುಮಿ ಫಾರ್ಮಾಕ್ ಯೇನಾಸ್ತಾಂ. ಪಯ್ಲೆಂ ಜಾಲ್ಯಾರ್ ಹಫ್ತ್ಯಾಕ್ ದೋನ್ ದೀಸ್ ತರಿ ಹೆವ್ಶಿನ್ ಪಾಶಾರ್ ಜಾತೆಲ್ಯಾತ್.  ಆತಾಂ ಪಳೆಯ್ನಾಸ್ತಾಂ ಸುಮಾರ್ ದೀಸ್ ಜಾಲೆ ದೆಕುನ್ ಕಿತೆಂ ಜಾಲೆಂ ಪಳೆಯಾಂ ಮ್ಹಣ್ ಫೋನ್ ಕೆಲೆಂ ಮ್ಹಣಾಲೊ.

ಹ್ಯಾ ಮತ್ಲಾಬಿ ಸಂಸಾರಾಂತ್ ಎಕಾ ಮ್ಹನ್ಶ್ಯಾಚ್ಯಾ ಗರ್ಜೆಕ್ ಅನ್ಯೆಕ್ಲ್ಯಾನ್ ಪಾಂವ್ಚೆಂ ಭಾರಿಚ್ ತ್ರಾಸಾಚೆಂ ಜಾಲಾಂ ಮ್ಹಣ್ ಸಕ್ಕಡ್ ಸಾಂಗ್ತಾನಾ, ಹೊ ಫಾರ್ಮಾಚೊ ಮಾಪ್ಳಿ ಆಪ್ಲ್ಯಾ ಮತ್ಲಾಬಾನ್ ಫೋನ್ ಕೆಲೆಂಗೀ ವಾ ಪೊರ್ಬು ವಯ್ಲ್ಯಾ ಮೊಗಾನ್ ವಿಚಾರ್ ಕೆಲೋಗೀ ಮ್ಹಳ್ಳ್ಯಾ ಜಾಪ್ ಮೆಳಾನಾತ್‌ಲ್ಲ್ಯಾ ಸವಾಲಾಕ್ ಮತಿಂತ್ ಆಟವ್ನ್ ಹ್ಯಾ ವರ್ಸಾಚೊ ಕರೆಜ್ಮಾಚೊ ಕಾಳ್ ಆಖೇರ್ ಕೆಲೊ.

■ ಕಿರಣ್ ನಿರ್ಕಾಣ್