ಖಂಚಿಯ್ ಗಜಾಲ್ ಆಮಿ ಖರಿ, ವಾಸ್ತಾವಿಕ್ ವಾ ಜಾಣ್ವಾಯೆಕ್ ಸಂಬಂಧಿ ಮ್ಹಣ್ ಮಾನುಂಕ್ ಜಾಯ್ ತರ್ ತ್ಯಾ ಗಜಾಲಿನ್ ವಿಶ್ಲೇಶಣಾಚಿ ತಶೆಂಚ್ ವಿಮರ‍್ಶ್ಯಾಚಿ ಪರೀಕ್ಷಾ ಉತ್ರುಂಕ್‌ಚ್ ಜಾಯ್. ‘ಹಾಂವ್ ಕಿತೆಂಯ್ ಮ್ಹಜ್ಯಾ ಮತಿಕ್ ಆಯಿಲ್ಲೆಂ ಸಾಂಗ್ತಾಂ ಆನಿ ಲೊಕಾಕ್ ಮನೋರಂಜನ್ ದಿತಾಂ ತರ್’ ತೇಂಯ್ ಚಲ್ತಾ. ಪೂಣ್ ತಾಕಾ ಸೃಜನಾತ್ಮಕ್ ಸಾಹಿತ್ ಮ್ಹಣ್ತಾತ್, ಕಾಲ್ಪನಿಕ್ ದೆಕುನ್ ಕಾಣಿ ಮ್ಹಣ್ತಾತ್, ಮನೋರಂಜನ್ ದಿಂವ್ಚೊ ನಾಟಕ್ ಮ್ಹಣ್ತಾತ್. ತ್ಯಾ ಸಂರಚನಾಂನಿ ಬರವ್ಪ್ಯಾಕ್ ಆಪ್ಲ್ಯಾ ಕಲ್ಪನಾವಿಹಾರಾಂತ್ ಭೊಂವ್ಚ್ಯಾಕ್ ಆವ್ಕಾಸ್ ಆಸಾ ತಶೆಂತರೀ ತ್ಯಾ ಸೃಜನಾತ್ಮಕ್ ಸಾಹಿತಾನ್ ವಿಮರ‍್ಶ್ಯಾಕ್ ಉಗ್ತೆಂ ಪಡಾಜೆ. ಆನಿ ತ್ಯಾಚ್ ನಾಟಕಾಂತ್, ಕಾಣಿಯೆಂತ್, ಕಾದಂಬರಿಂತ್ ಖಂಚ್ಯೊಯ್ ಅಧ್ಯಯನಾತ್ಮಕ್ ಖರ‍್ಯೊ ಗಜಾಲಿ (ಅರ‍್ಥ್‌ಶಾಸ್ತ್ರ್, ಇತಿಹಾಸ್, ವಿಜ್ಞಾನ್ ಹ್ಯಾ ಮೆರೆಚ್ಯೊ) ವಾಪರ‍್ಚ್ಯೊ ತರ್ ತಾಂಕಾಂಯ್ ವಿಶ್ಲೇಶಣಾಕ್ ವಳಗ್ ಜಾಂವ್ಚಿ ಗರ‍್ಜ್ ಆಸಾ. ಮುಘಲ್ ರಾಯ್ ಜಹಾಂಗೀರಾಚೊ ಬಾಪುಯ್ ಆಕ್ಬರ್ ಮ್ಹಣ್ಂಚ್ ಸಾಂಗಿಜೆ ಶಿವಾಯ್ ಮ್ಹಜೊ ನಾಟಕ್ ಹಾಂವೆಂ ಬರಯಿಲ್ಲೊ ದೆಕುನ್ ಮುಘಲ್ ಚಕ್ರವರ‍್ತಿ ಆಕ್ಬರ್ ಜಹಾಂಗೀರಾಚೊ ಪುತ್ ಮ್ಹಣುಂಕ್ ಜಾಯ್ನಾಂ.
ಖಂಚ್ಯಾಯ್ ಎಕಾ ಅಧ್ಯಯನಾಂತ್ ಏಕ್ ಪ್ರಶ್ನ್ ಆಸ್ತಾ ಆನಿ ತೆಂ ಪ್ರಶ್ನ್ ಸುಟೊಂವ್ಕ್ ಎಕ್ ಪ್ರಮೇಯ್ (ಹಯ್‌ಪೊಥೆಸಿಸ್) ಧರ್‌ಲ್ಲೊ ಆಸ್ತಾ. ತ್ಯಾ ಪ್ರಶ್ನಾಚೆರ್ ಆನಿ ಪ್ರಮೇಯಾಚೆರ್ ಹೊಂದುನ್ ಅಧ್ಯಯನ್ ಚಲಂವ್ಚ್ಯಾಕ್ ಆಕರ್ (ಸೋರ‍್ಸಸ್) ರಾಸ್ ಘಾಲ್ಚೆ ಪಡ್ತಾತ್ ಆನಿ ಆಕರ್ ರಾಸ್ ಘಾಲ್ಲೆ ತೇ ವರ‍್ಗೀಕರಣ್ ಕರ‍್ನ್ ಜೊಕ್ತಿ ವಿಂಚೊವ್ಣ್ ಕರಿಜೆ. ತ್ಯಾ ಉಪ್ರಾಂತ್ ವಿಂಚುನ್ ಕಾಡ್‌ಲ್ಲ್ಯಾ ಆಕರಾಂಚೆಂ ಗೂಂಡ್ ವಿಶ್ಲೇಶಣ್ ಕರ‍್ನ್ ಅದ್ಯಯನಾಚಿಂ ಮುಕ್ಲಿಂ ಮೆಟಾಂ ಕಾಡುಂಕ್ ಆಸಾತ್. ಹೆಂ ಕಿತೆಂಚ್ ಕರ‍್ನಾಶೆಂ ಎಕ್ದಮ್ ‘ಪೊಪುಲರ್’ ಜಾಂವ್ಚ್ಯಾಕ್ ಮಾಗಿರ್ ಕಿತೆಂಯ್ ಕರ‍್ಯೆತಾ, ಪೂಣ್ ತಾಕಾ ಕೆದಿಂಚ್ ಅಧ್ಯಯನ್, ಇತಿಹಾಸ್ ಮ್ಹಣ್ಚೆಂ ನ್ಹಂಯ್. ಆಪ್ಲೊ ಪ್ರಮೇಯ್ ಪರೀಕ್ಷೆಕ್ ವಳಗ್ ಕರ‍್ನ್ ಆಯಿಲೆಂ ಫಲಿತಾಂಶ್ ತೆಂ ಆಪ್ಣಾಚ್ಯಾ ಪ್ರಮೇಯ ಪರ‍್ಮಾಣೆಂ ಆಸುಂ ವಾ ನಾ’ಆಸುಂ ಸತ್ ಪ್ರಾಮಾಣಿಕ್‌ಪಣಿ ಮಾನುನ್ ಘೆಂವ್ಚೆಂ ಅಧ್ಯಯನಿಚೆಂ ಲಕ್ಷಣ್.
ಅಧ್ಯಯನ್ ಆಕರ್ ಹೆಚ್ ಮ್ಹಣುನ್ ನಿರ‍್ಧಿಷ್ಟ್ ಕೆಲ್ಲೆ ತಕ್ಷಣ್ ಸ (6) ಮುಳಾಂವಿಂ ಸವಾಲಾಂ ಘಾಲ್ನ್ ತಾಂಕಾಂ ಜಾಪಿ ಜೊಡ್ಲ್ಯಾ ಉಪ್ರಾಂತ್ ವಿಶ್ಲೇಶಣಾಕ್ ಆನಿ ವಿಮರ‍್ಶ್ಯಾಕ್ ಮುಕಾರ್ ಸರಾಜೆ ಮ್ಹಣ್ ಗಿಲ್ಬರ‍್ಟ್ ಜೆ ಗರ್ರಘಾನ್ ಆನಿ ಜೀನ್ ಡೆಲಾಂಗ್ಲೆಜ್ ಸಾಂಗ್ತಾತ್ (ಎ ಗಯ್ಡ್ ಟು ಹಿಸ್ಟಾರಿಕಲ್ ಮೆಥಡ್ – 1946) ತಿ ಕೃತಿ (ವಾ ಹೆರ್ ಆಕರ್) ಖಂಯ್ ರುಪಿತ್ ಜಾಲಿ? ಕೊಣೆಂ ರುಪಿತ್ ಕೆಲಿ? ಕೆದಾಳಾ ರುಪಿತ್ ಜಾಲಿ? ಖಂಚ್ಯಾ ಮೂಳ್ ರುಪಾಂತ್ ರುಪಿತ್ ಜಾಲಿ? ಖಂಚ್ಯಾ ಮುಳಾಂಚೆರ್ ಹೊಂದ್ವುನ್ ರುಪಿತ್ ಜಾಲಿ? ಆನಿ ಥಂಯ್ಸರ್ ವಿವರಿತ್ ಜಾಲ್ಲ್ಯೊ ಗಜಾಲಿ ಕಿತ್ಲ್ಯೊ ಪಾತ್ಯೆಣೆಕ್ ಫಾವೊ? ಹ್ಯಾ ಮುಳಾವ್ಯಾ ಸವಾಲಾಂಕ್ ಜವಾಬ್ ಘೆವ್ನ್ ಉಪ್ರಾಂತ್ ವಿಶ್ಲೇಶಣಾಕ್ ದೆಂವ್ಚೆಂ ಬರೆಂ.
ವಿಶ್ಲೇಶಣ್ ಚಡ್‌ಶೆಂ ದೋನ್ ರಿತಿಂಚೆಂ; ಅಂತರಿಕ್ ವಿಶ್ಲೇಶಣ್ ಆನಿ ಬಾಹ್ಯ್ ವಿಶ್ಲೇಶಣ್.
ಆಂತರಿಕ್ ವಿಶ್ಲೇಶಣಾಂತ್ ಆಮಿ ಹಾತಿಂ ಆಸ್ಚ್ಯಾ ಆಕರಾಚೆರ್ ಹೊಂದ್ವೊನ್, ತಾಂತ್ಲೆ ವಿವರ್ ಸಮ್ಜುನ್ ಖಂಚ್ಯಾಯ್ ಸಂಗ್ತಿಂಚಿ ಮೊಲ್ ಮಾಪ್ಣಿ ಕರ‍್ಯೆತಾ. ದಾಕ್ಲ್ಯಾಕ್ ಚಾಣಕ್ಯಾಚೊ ಅರ‍್ಥ್‌ಶಾಸ್ತ್ರ್ ಘೆವ್ಯಾಂ. ಆಂತರಿಕ್ ವಿಶ್ಲೇಶಣ್ ಕರ್ತಾ ತೊ ಹೊ ಸಗ್ಳೊ ಪುಸ್ತಕ್ ಕಿತೆಂ ಸಾಂಗುನ್ ಆಸಾ, ತಾಂತುಂ ದಿಲ್ಯಾತ್ ತೆ ವಿವರ್ ಎಕಾಮೆಕಾಕ್ ತಾಳ್ ಪಡ್ತಾತ್‌ಗೀ? ತಾಂತುಂ ವಾಪರ‍್ಲಲಿ ಭಾಸ್ ಖಂಚ್ಯಾ ಸ್ವರೂಪಾಚಿ? ಎಕಾ ನಿರ‍್ದಿಷ್ಟ್ ಬರವ್ಪ್ಯಾಚಿ ಮ್ಹಣ್ ಆಮಿ ಮಾನ್ಚಿ ಭಾಶೆವಾಪರ‍್ಣಿ ಸಗ್ಳ್ಯಾ ಪುಸ್ತಕಾಂತ್ ಎಕಾಚ್‌ಸಾರ‍್ಕಿ ಆಸಾಗೀ? ತಾಂತುಂ ಉಲ್ಲೇಕಿತ್ ಜಾಲ್ಲೆ ವೆಕ್ತಿ ವಿಷಯ್ ಸರ‍್ವ್ ಸಂದರ‍್ಭಾಂನಿ ಏಕ್‌ತಾನಿತ್ ಆಸಾತ್‌ಗೀ ಮ್ಹಳ್ಳೆಂ ಸಮ್ಜುನ್ ಘೆತಾ. ಮುಕ್ಲ್ಯಾ ಹಂತಾರ್ ಬಾಹ್ಯ್ ವಿಶ್ಲೇಶಣ್ ಕರ‍್ತಾನಾಂ ತ್ಯಾ ಪುಸ್ತಕಾಂತ್ ಕೆಲ್ಲೆ ಉಲ್ಲೇಕ್ ತ್ಯಾ ಕಾಳಾಚ್ಯಾ ಆನಿ ತ್ಯಾ ಥಳಾಚ್ಯಾ ಹೆರ್ ಸಂಗ್ತಿಂ ಸವೆಂ ತಾಳ್ ಪಡ್ಚೆಗೀ? ಪುಸ್ತಕಾಂತ್ ಉಲ್ಲೇಕ್ ಕೆಲ್ಲೆ ವಿವರ್ ಸಮಕಾಲೀನ್‌ಗೀ? ಸಮ್ಜುನ್ ಘೆಂವ್ಕ್ ಅಧ್ಯಯನಿನ್ ಪೆಚಾಡಿಜೆ.
ಪಾಶ್ಚಾತ್ಯ್ ಸಂಸಾರಾಂತ್ ಹರ‍್ಮೆನ್ಯೂಟಿಕ್ಸ್ ಆನಿ ಹ್ಯೂರಿಸ್ಟಿಕ್ಸ್ ಮ್ಹಣ್ಚ್ಯಾ ದೋನ್ ರಿತಿಂನಿ ಜಾಣ್ವಾಯ್ ಸಮ್ಜುನ್ ಘೆಂವ್ಕ್ ಪ್ರೇತನ್ ಕರ‍್ಚೆಂ ಆಸಾ. ಚಡ್‌ಶೆಂ ಪವಿತ್ರ್‌ಪುಸ್ತಕ್ ಸಮ್ಜುನ್ ಘೆಂವ್ಚ್ಯಾಕ್ ಹ್ಯಾ ದೋನ್ ವಿಧಾನಾಂಚೊ ವಾಪರ್ ಜಾತಾ. ಹ್ಯಾ ದೋನ್ ಅಧ್ಯಯನ್ ವಿಧಾನಾಂಕ್ ವಿಸ್ತಾರಾಯೆನ್ ಸಮ್ಜುನ್ ಘೆತಾತ್ ತರೀ ಮೊಟ್ವ್ಯಾನ್ ಹ್ಯೂರಿಸ್ಟಿಕ್ಸ್ ಮ್ಹಳ್ಯಾರ್ ಜೆಂ ಕಿತೆಂ ಕೃತಿಯೆಂತ್ ಎದೊಳ್‌ಚ್ ಪ್ರಸ್ತುತ್ ಆಸಾ ತಾಚ್ಯಾ ವಿಶ್ಲೇಶಣಾಚ್ಯಾ ಆಧಾರಾರ್ ಚಲಂವ್ಚೆಂ ಅಧ್ಯಯನ್ ತರ್ ಹರ‍್ಮೆನ್ಯೂಟಿಕ್ಸ್ ಮ್ಹಳ್ಯಾರ್ ಕೃತಿಯೆಂತ್ ಎದೊಳ್‌ಚ್ ಲಭ್ಯ್ ಮಾಹೆತಿಚ್ಯಾ ಆಧಾರಾರ್ ತ್ಯಾ ಕೃತಿಯೆ ಕಾಳಾಚೊ ಸಂಸಾರ್ ಸಂರಚಿತ್ ಕರ‍್ನ್ ತ್ಯಾ ಸಂಸಾರಾಭಿತರ್ ಅಧ್ಯಯನಾತ್ಮಕ್ ಪ್ರವೇಶ್ ಕರ‍್ನ್ ಚಲಂವ್ಚೆಂ ಅದ್ಯಯನ್. ಹ್ಯಾ ದೋನ್ಂಯ್ ವಿಶ್ಲೇಶಣಾಂತ್ ವಿಮರ‍್ಶಾತ್ಮಕ್ ಜಾಗ್ರುತ್ಕಾಯ್ ಗರ‍್ಜೆಚಿ.
ಅಧ್ಯಯನ್ ಖರೆಂ ಜಾಯ್ಜೆ ತರ್ ತೆಂ ಗುಂಡಾಯೆಚೆಂ ಜಾಯ್ಜೆ ಶಿವಾಯ್ ಗರ‍್ಜೆಭಾಯ್ಲ್ಯಾ ಲಾಂಬಾಯ್ ರುಂದಾಯೆಚೆಂ ನ್ಹಂಯ್. ಉಣ್ಯಾ’ಉಣ್ಯಾ ಸಂಗ್ತಿಂವಿಶಿಂ ಚಡ್’ಚಡ್ ಸಮ್ಜುಂಕ್ ಪ್ರೇತನ್ ಹಾಂಗಾಸರ್ ಆಸಾಜೆ ಶಿವಾಯ್ ಚಡ್ ಆನಿ ಚಡ್ ಸಂಗ್ತಿಂವಿಶಿಂ ಉಣೆಂಉಣೆಂ ಕಳಿತ್ ಆಸ್ಚೆಂ ಉಂಚ್ಲ್ಯಾ ಅಧ್ಯಯನಾಚೆಂ ಲಕ್ಷಣ್ ನ್ಹಂಯ್. ತ್ಯಾ ಥಳಾರ್ ರಾವುನ್ ಬರಯಿಲ್ಲಿ ಕಾದಂಬರಿ ಸಯ್ತ್ ಯಶಸ್ವಿ ಜಾಯ್ನಾಂ ಆನಿ ಅಧ್ಯಯನ್ ಕಶೆಂ ಫಾಯ್ದ್ಯಾಚೆಂ ಜಾಯ್ತ್ ? ತಶೆಂಚ್ ಅಧ್ಯಯನಿ ಮ್ಹಣ್ತಾಲ್ಯಾನ್ ಹಜಾರ್ ಸಂಗ್ತಿಂನಿ ನಾಕ್ ರಿಗಂವ್ಕ್ ವೆಚೆಂ ನ್ಹಂಯ್ ತಾಚ್ಯಾ ಶಿಕ್ಪಾಶೆತಾಚೆ ವಿಶಿಂ ಮನ್ ಕೇಂದ್ರೀಕ್ರತ್ ಜಾವ್ನಾಸಾಜೆ. ಅಧ್ಯಯನಿ ವಾಪರ‍್ತಾ ತಿ ಭಾಸ್ ಭಾವುಕ್ ಜಾಯ್ನಾಂಯೆ ಬಗಾರ್ ಶಾಥಿವಂತ್ ಆನಿ ಸ್ಪಷ್ಟ್ ಜಾಯ್ಜೆ. ತಿ ಸೊಂಪಿ ತಶಿಚ್ ಅಸಂದಿಗ್ದ್ ಜಾಯ್ಜೆ. ಅಧ್ಯಯನಿ ಆನಿ ಸಂಶೋಧಕಾಂನಿ ಖಂಚ್ಯಾಯ್ ಸ್ವಂತ್ ಸಿದ್ಧಾಂತಾಚೆ ಗುಲಾಮ್ ಜಾಯ್ನಾಶೆಂ ಅಧ್ಯಯನ್ ಪಕ್ಷಪಾತಿ ಜಾವ್ನಾಸಾಜೆ.
ಇತಿಹಾಸ್ ಸಂಬಂಧಿ ಸಾಹಿತ್ ರಚುಂಕ್ ಆಶೆಂವ್ಚ್ಯಾಂನಿ ಮಹಾನ್ ಚಿತ್ರಣ್ ಸಾಹಿತ್ ಲಿಕ್ಲಲ್ಯಾ ಡೊಮಿನಿಕ್ ಲೇಫಿಯರ್ ಆನಿ ಲ್ಯಾರಿ ಕೊಲಿನ್ಸ್ ಹಾಂಚೆಥಾವ್ನ್ ಶಿಕ್ಚೆಂ ಸಭಾರ್ ಆಸಾ. ‘ಈಜ್ ಪ್ಯಾರಿಸ್ ಬರ‍್ನಿಂಗ್’, ‘ಫ್ರೀಡಮ್ ಎಟ್ ಮಿಡ್ ನಾಯ್ಟ್’, ‘ಓ ಜೆರುಸಲೇಮ್’ ಅಸಲ್ಯೊ ಆಪ್ಲ್ಯೊ ಕೃತಿಯೊ ಫಕತ್ ‘ಫಿಕ್ಷನ್’ ಮ್ಹಣ್ ತೆ ವೊಲಾಯ್ತಾತ್ ತರೀ ತ್ಯಾ ಪಾಟ್ಲೆಂ ಅಧ್ಯಯನ್ ಆನಿ ತ್ಯಾ ಅಧ್ಯಯನಾಚಿ ಪ್ರಸ್ತುತಿ ಎಕ್ದಮ್ ಗೂಂಡ್ ಜಾಣ್ವಾಯೆಚಿ ಆನಿ ಜವಾಬ್ಧಾರೆಚಿ. ಸಂಸೊಧ್ ಬಾರ‍್ಕಾಯೆಚೊ ಆನಿ ಖೊಲಾಯೆಚೊ. ಆಮ್ಸೊರ್, ಮಾಹೆತ್ ನಾಂ ಆಸ್ತಾನಾಂ ಆಸಪ್, ಮಾಹೆತ್ ಜೊಡುಂಕ್ ತಾಂಕ್ ನಾಸ್ತಾನಾಂ ಆಸಪ್, ಸಂಸೊಧ್ ವಿಧಾನಾಂ (ರಿಸರ‍್ಚ್ ಮೆಥಡಾಲಜಿ) ಕಳಿತ್ ನಾಂ, ಆಕರ್ ಎಕ್ಟಾಂಯ್ ಕರುಂಕ್ ಕಳಿತ್ ನಾಂ, ಎಕ್ಟಾಂಯ್ ಕೆಲ್ಲೆ ಆಕರ್ ವಿಶ್ಲೇಶಣ್ ಕರುಂಕ್ ಕಳಿತ್ ನಾಂ ಆಸ್ಚೆಂ, ಆಪ್ಲಿ ಸಮ್ಜಣಿಂಚ್ ಸಾರ‍್ಕಿ ಮ್ಹಣ್ಚೆಂ ಸಳ್, ಆಪ್ಲೆಂ ಸಿದ್ಧಾಂತ್ ಹೆರಾಂಚೆರ್ ಥಾಪ್ಚ್ಯಾಕ್ ಆಕರ್ ಸೊಧಪ್, ಆನಿ ಪ್ರಮುಕ್ ಜಾವ್ನ್ ಶಯ್‌ಕ್ಷಣಿಕ್ ನ್ಹಂಯ್ ಜಾಲ್ಲ್ಯಾ ಆನಿ ಅಪ್ರಾಮಾಣಿಕ್ ಉದ್ದೇಶಾಂಖಾತಿರ್ ಅಧ್ಯಯನ್ ಚಲಂವ್ಚೆಂ ಹೆಂ ಸರ‍್ವ್ ಅಧ್ಯಯನಾಕ್, ಜಾಣ್ವಾಯೆ ಶೆತಾಕ್ ಆನಿ ಜೆರಾಲ್ ಸಮಾಜೆಕ್ ಎಕ್ದಮ್ ಮಾರೆಕಾರ್.
ಇತಿಹಾಸ್ ಅಧ್ಯಯನ್ ಕರುಂಕ್ ದೆಂವ್ತಾ ತಾಣೆಂ ವ್ಹರ‍್ತ್ಯಾ ಜವಾಬ್ಧಾರೆನ್ ಮುಂದರ‍್ಚಿ ಗರ‍್ಜ್ ಆಸಾ. ತಾಕಾ ಮೂಳ್ ಆಕರ್ ಸಾರ‍್ಕೆಂ ಸಮ್ಜುನ್ ಘೆಂವ್ಚಿ ತಾಂಕ್ ಆಸಾಜೆ. ಮೂಳ್ ಆಕರ್ ಮ್ಹಳ್ಯಾರ್ ಖಂಚ್ಯಾಯ್ ಘಡಿತಾಕ್ ವಾ ಕಾಳಾಕ್ ಸಂಬಂಧಿತ್ ಸಮಕಾಲೀನ್ ಆಕರ್ ದಾಕ್ಲ್ಯಾಕ್ ಮವ್ರ್ಯ್ ಕುಳಿಯೆ ವಿಶಿಂ ಶಿಕ್ತಾನಾಂ ವಿಷ್ಣುಗುಪ್ತಾಚೊ (ಚಾಣಕ್ಯ, ಕವ್ಟಿಲ್ಯ) ಅರ‍್ಥಶಾಸ್ತ್ರ, ಮೇಘಸ್ಥಾನಿಸಾಚೊ ಇಂಡಿಕಾ, ಅಶೋಕಾಚಿಂ ಶಾಸನಾಂ, ತ್ಯಾ ಕಾಳಾಚಿಂ ಬಾಂದ್ಪಾಂ ಮೂಳ್ ಆಕರ್ ಜಾತಾತ್ (Original Sources). ತ್ಯಾ ಹಂತಾಚ್ಯಾ ಥೊಡ್ಯಾಚ್ ತೆಂಪಾನ್, ಮೂಳ್ ಆಕರ್ ವಿಶ್ಲೇಶಿತ್ ಕರ‍್ನ್ ಲಿಕ್ಲಲೆಂ ಸಾಹಿತ್ ಪ್ರಾಥಮಿಕ್ ಆಕರ್ ಜಾತಾ (Primary Sources). (ಥೊಡೆ ತಜ್ಞ್ ಮೂಳ್ ಆನಿ ಪ್ರಾಥಮಿಕ್ ಆಕರ್ ಎಕ್‌ಚ್ ಮ್ಹಣ್ ಮಾನ್ತಾತ್). ಪ್ರಾಥಮಿಕ್ ಆಕರಾಚೆರ್ ಹೊಂದ್ವುನ್ ಲಿಕ್ಲಲೆ ಗ್ರಂಥ್ ದ್ವಿತೀಯ್ ಸ್ಥರ್ (ಸೆಕೆಂಡರಿ) ಆಕರ್. (ಮವ್ರ್ಯ್ ಕುಳಿಯೆವಿಶಿಂ ವಿ ಎ ಸ್ಮಿತ್ತ್, ರೋಮಿಲಾ ಥಾಪರ್ ಅಸಲ್ಯಾಂನಿ ಲಿಕ್ಲಲೆ ಗ್ರಂಥ್) ಆನಿ ಹ್ಯಾ ಸೆಕೆಂಡರಿ ಸೋರ‍್ಸಾಂಚೆರ್ ಹೊಂದ್ವುನ್ ಕೆಲ್ಲೆಂ ಅಧ್ಯಯನ್ ತಿಸ್ರ್ಯಾ (ಟೆರ‍್ಶಿಯರಿ) ಸ್ಥರಾಚ್ಯಾ ಜಾಣ್ವಾಯೆಕ್ ಆಸಾ ಕರ್ತಾ.
ರೋಮಿಲಾ ಥಾಪರ್
ದುರಾದೃಷ್ಟ್ ಕಿತೆಂಗೀ ಮ್ಹಳ್ಯಾರ್ ಆಯ್ಚಿಂ ಚಡಾವತ್ ಸಂಶೋಧನಾಂ ತಿಸ್ರ್ಯಾ (ಟೆರ‍್ಶಿಯರಿ) ಆಕರಾಂಚೆರ್ ಆನಿ ಎಕ್ದಮ್ ಉತಳ್ ಸ್ಥರಾರ್ ಚಲ್ತಾತ್ ತಿ ಗಜಾಲ್ ಬೆಜಾರಾಯೆಚಿ. ದಾಕ್ಲ್ಯಾಕ್ ಪುಡ್ತುಗೆಝಾಂನಿ ಗೋಂಯಾಂತ್ ಚಲಯ್ಲಾಂ ಮ್ಹಣ್ಚ್ಯಾ ‘ಇನ್‌ಕ್ವಿಝೀಶನಾ’ ವಿಶಿಂ ಅಧ್ಯಯನ್ ಕರ‍್ತಾಂ ಮ್ಹಣ್ತಲ್ಯಾಂಕ್ ಮುಳಾವೆ ದಾಕ್ಲೆ ವಾಚುಂಕ್ ಜಾಯ್ ತಿ ಪುಡ್ತುಗೇಝ್ ಭಾಸ್‌ಚ್ ಕಳಿತ್ ನಾಂ ತಸಲ್ಯಾ ಸಂಶೋಧಕಾಂಥಾವ್ನ್ ಕಶೆಂ ಜೊಕ್ತೆಂ ಅಧ್ಯಯನ್ ಚಲಾತ್? ಗೋಂಯಾಂತ್ ಪುಡ್ತುಗೇಝಾಂನಿ ಚಲಯಿಲ್ಲ್ಯಾ ಆಡಳ್ತ್ಯಾಕ್ ಸಂಬಂಧಿ ದಾಕ್ಲ್ಯಾಂಚೆ 99% (ನೊವೊದ್ ಆನಿ ನೋವ್ ಠಕ್ಕೆ ದಾಕ್ಲೆ/ ರಿಕಾಟಾಂ ಪುಡ್ತುಗಲಾಂತ್ ಆಸಾತ್ ಆನಿ ತಾಂಕಾಂ ಮುಕ್ತ್ ಆವ್ಕಾಸ್ ಸೊಡಿನಾಂತ್ ತರ್ ಹ್ಯಾ ಬಾಬ್ತಿನ್ ಕಸಲೆಚ್ ಮೂಳ್ ದಾಕ್ಲೆ ವಿಸ್ತಾರಾಯೆನ್ ಸಮ್ಜನಾಶೆಂ ಆಮ್ಚಿ ಸಮ್ಜಣಿ ಫಕ್ತ್ ತಿಸ್ರ್ಯಾ ಸ್ಥರಾಚಿ ಮ್ಹಣುಂಯೆತಾ. ಆಜ್ ಮನ್ಶಾಸಂಸಾರಾಂತ್ ‘ಲೊಕಾ/ ಪೆಂಟೆ ಗರ‍್ಜೆಕ್ ಸಂತ್ರಪ್ತ್ ಕರ‍್ಚೊ ಇತಿಹಾಸ್ ಸಂರಚಿತ್ ಕರ‍್ಚಿ ವೆವಸ್ತಾಚ್’ ಆಸಾ. ತ್ಯಾ ವೆವಸ್ತ್ಯಾಚ್ಯಾ ಆಕರ‍್ಶಣಾಕ್ ಸಭಾರ್ ಜಣ್ ಸಲೀಸಾಯೆನ್ ಆಕರ‍್ಶಿತ್ ಜಾತಾತ್, ವ್ಹಡ್ ವ್ಹಡ್ ಪಯ್ಲೆಂ ಆಕರ‍್ಶಣಾಕ್ ಪಡ್ಲ್ಯಾರ್ ಮಾಗಿರ್ ಉರ‍್ಲಲ್ಯಾಂನಿ ’—- ಪರಿಂ ಮೆಂ’ಮೆಂ ಕರ‍್ನ್’ ಪಾಟ್ಲ್ಯಾನ್ ವೆಚಾಂತ್ ಕಾಂಯ್ ದುಬಾವ್ ನಾಂ.
ಆಮಿಂ ಅಧ್ಯಯನಾಂತ್ ಘೆತ್‌ಲ್ಲೆ ಆಕರ್ ಜೊಕ್ತ್ಯಾನ್ ಆನಿ ವಿಮರ‍್ಶ್ಯಾತ್ಮಕ್ ದಿಷ್ಟಿಂತ್ ವಿಶ್ಲೇಶಣ್ ಕೆಲ್ಯಾರ್ ಆಮಿ ಸತಾಕ್ ಸಮ್ಜುಂಕ್ ಚಡ್ ಸಲೀಸ್ ಜಾತಾ. ನಾಮ್ಣೆಚೊ ಇತಿಹಾಸ್ ತಜ್ಞ್ ಲಿಯೊನಾರ‍್ದ್ ವೊನ್ ರ‍್ಯಾಂಕೆ ಇತಿಹಾಸ್ ಅಧ್ಯಯನ್ ಪುರ‍್ತ್ಯಾನ್ ಖರ‍್ಯಾಪಣಾಚೆಂ, ಪ್ರಾಮಾಣಿಕ್ ಆನಿ ಕೆದಿಂಚ್ ವೆಕ್ತಿನಿಷ್ಟ್ ಜಾವ್ನಾಸಾನಾಂಯೆ ಬಗಾರ್ ವಸ್ತುನಿಷ್ಟ್ ಜಾವ್ನಾಸಾಜೆ ಮ್ಹಣ್ತಾ, ಅಶೆಂ ಜಾಯ್ಜೆ ತರ್ ತೆಂ ಪಾತ್ಯೆಣೆಕ್ ಫಾವೊಜಾಲ್ಲ್ಯಾ ನಿಖರ್ ಆಕರಾಂಚ್ಯಾ ಪ್ರಾಮಾಣಿಕ್ ವಿಮರ‍್ಶ್ಯಾಚ್ಯಾ ಆಧಾರಾರ್ ಪುನರ್ರಚಿತ್ ಜಾಯ್ಜೆ ಮ್ಹಣ್ ವಾದ್ ಮಾಂಡ್ತಾ. ಮಹಾತ್ಮ ಗಾಂಧೀಜಿ ’ಜಾಣ್ವಾಯ್ ಸತಾಚ್ಯಾ ಥಳಾರ್ ಬಾಂದುನ್ ಹಾಡ್‌ಲ್ಲಿ ಜಾಯ್ಜೆ, ಕೇವಲ್ ಸತ್ ಆನಿ ಸತ್ ಮಾತ್ರ್ ಸಮ್ಜುನ್ ಘೆವ್ನ್ ಪಾಸಾರ‍್ಚೊ ಉದ್ದೇಶ್ ಆಸಾಜೆ, ಸತ್ ಕಿತ್ಲೆಂಯ್ ತೆಂ ಆಡುಕ್ ಜಾಂವ್, ತೆಂ ಸ್ವೀಕಾರುಂಕ್ ಪಾಟಿಂಸರಾಂನಾಯೆ’ ಮ್ಹಣ್ ಸಾಂಗ್ತಾ.
ದುರಾದೃಷ್ಟಾನ್ ಆಜ್ ಆಪಾ’ಪ್ಲ್ಯಾ ಸಿದ್ಧಾಂತಾಕ್ ಸತಾಪ್ರಾಸ್ ಚಡ್ ಮಹತ್ವ್ ದಿಂವ್ಚಿ ಪರಿಗತ್ ವಾಡ್ಲ್ಯಾ. ಆಮ್ಚ್ಯಾ ಮತಿಂತ್ ಎದೊಳ್‌ಚ್ ರೊಂಬ್‌ಲ್ಲ್ಯಾ ಸಂಗ್ತಿಂಕ್, ಜ್ಯೊ ಖರ‍್ಯೊ ಗಜಾಲಿ ಜಾಂವ್ಕ್‌ಪುರೊ ವಾ ಆಮಿ ಕಸ್ಲಿಚ್ ಪರೀಕ್ಷಾ ಕರ‍್ನಾಶೆಂ ಸ್ವೀಕಾರ್ ಕೆಲ್ಲಿಂ ಸತಾಂ ಜಾಂವ್ಕ್‌ಪುರೊ, ಥಿರಾಂವ್ಚೆಂ ಕಿತೆಂಯ್ ಆಸ್ಲ್ಯಾರ್ ತಾಕಾ ಜೊಕ್ತಿಂ ಸತಾಂ ಸೊಧ್ತಾಂವ್. ನಿರ‍್ಧಿಷ್ಟ್ ರಾಯಾನ್ ಆಮ್ಕಾಂ ಕಷ್ಟಿಲೆಂ, ನಿರ‍್ಧಿಷ್ಟ್ ಆಡಳ್ತ್ಯಾನ್ ಆಮ್ಕಾಂ ಕನ್ವಡ್ತರ್ ಕೆಲೆಂ, ನಿರ‍್ಧಿಷ್ಟ್ ಕುಳಿ ವಾಯ್ಟ್, ನಿರ‍್ಧಿಷ್ಟ್ ಜನಾಂಗ್ ಉಂಚ್ಲೆಂ, ನಿರ‍್ಧಿಷ್ಟ್ ರಾಯಾನ್ ಆಮ್ಕಾಂ ದೆಶಾಂತರಾಕ್ ವೆಲೆಂ. ಹಿ ರಾಜಕೀಯ್ ಪಾಡ್ತ್ ಬರಿ, ತೆಂ ರಾಜಕೀಯ್ ಸಿದ್ಧಾಂತ್ ವಾಯ್ಟ್, ಹೊ ಮನಿಸ್ ವ್ಹರ‍್ತೊ ಮುಕೆಲಿ, ಅಸಲಿಂ ಸಕ್ಕಡ್ ’ಮತಿಂತ್ ರಿಗ್‌ಲ್ಲಿಂ ಖರಿಂ ನ್ಹಂಯ್ ಜಾಲ್ಲಿಂ ಕಲ್ಪನಾತ್ಮಕ್ ಸತಾಂ ವ್ಯಕ್ತಿಗತ್ ಹಂತಾಥಾವ್ನ್ ಜನಾಂಗೀಯ್ ಕಲ್ಪನಾಂ ಜಾವ್ನ್ ರುಪಿತ್ ಜಾತಾತ್ ಆನಿ ಹ್ಯಾ ಪೂರ‍್ವಾಗ್ರಹ್ ಲಾಗ್‌ಲ್ಲ್ಯಾ ಥಳಾರ್ ರಾವುನ್ ಅಧ್ಯಯನ್ ಚಲಯ್ತಾನಾಂ ತೆಂ ಅಧ್ಯಯನ್ ಜಾಯ್ನಾಂ ಬಗಾರ್ ಮ್ಹಜ್ಯಾ ಮತಿಂತ್ ರೊಂಬ್‌ಲ್ಲ್ಯಾ ಚಿಂತ್ಪಾಕ್ ಜಾಯ್ ತೆಂ ಆಕರ್ ಸೊಧ್ಚೆಂ ಪ್ರೇತನ್ ಜಾತಾ. ಅಸಲ್ಯಾ ಪ್ರೇತನಾ ನಿಮ್ತಿಂ ವಾಯ್ಟ್‌ಚ್ ಜಾತಾ.
ಖಂಚೊಯ್ ವೆಕ್ತಿ ವಾ ಲೊಕಾವರ‍್ಗ್ ’ಆಪ್ಣಾಕ್ ವಾಯ್ಟ್ ಜಾಲಾಂ, ಆಪ್ಣಾಕ್ ಅನ್ಯಾಯ್ ಜಾಲಾ, ಆಪ್ಣೆಂ ಅನ್ಯಾಯ್ ಕೆಲಾ ಮ್ಹಣ್ಚ್ಯಾ ರುಣಾತ್ಮಕ್ ಚಿಂತ್ಪಾನ್ ಕರ‍್ಗುನ್ ಆಸ್ಲ್ಯಾರ್ ಆನಿ ತಸಲಿಂ ಪೂರ‍್ವಾಗ್ರಹ್‌ಪೀಡಿತ್ ಅಧ್ಯಯನಾಂಚ್ ಕರ‍್ನ್ ಆಸ್ಲ್ಯಾರ್ ತಾಚೆಥಾವ್ನ್ ಬರೆಂ ಯೇಂವ್ಕ್‌ಚ್ ಯೇನಾಂ’ ಆತಾಂ ಕೆನರಾ ಕೊಂಕ್ಣಿ ಕ್ರಿಸ್ತಾಂವ್ ಸಮುದಾಯ್‌ಚ್ ಪಳಯಾ, ’ಆಮ್ಕಾಂ ಕನ್ವಡ್ತರ್ ಕೆಲ್ಲೆಂ, ಆಮಿ ಪರ‍್ಪುನಕುಲು, ಆಮ್ಚ್ಯಾ ಪೊದೊರ‍್ನ್ ಪುಡ್ತುಗೇಝಾಂನಿ ಇನ್‌ಕ್ವಿಜೀಶನ್ ಚಲಯಿಲ್ಲೆಂ, ಆಮಿಂ ಧಾಂವುನ್ ಆಯಿಲ್ಲ್ಯಾಂವ್, ಆಮ್ಕಾಂ ಟಿಪ್ಪುನ್ ಕಷ್ಟಿಲ್ಲೆಂ ಆನಿ ಬಂಧಡೆಕ್ ವೆಲ್ಲೆಂ, ಆಮಿ ಬ್ರಿಟೀಶಾಂಕ್ ಸಪೋರ‍್ಟ್ ಕೆಲ್ಲೆ’ ಅಸಲೆಂಚ್ ನೆಗೆಟಿವ್ ಅಧ್ಯಯನ್ ಚಲವ್ನ್ ಆಸ್ಲ್ಯಾರ್ ಆನಿ ಹ್ಯಾ ಖಂಚ್ಯಾಕೀ ಮೂಳ್ ಇತಿಹಾಸಿಕ್ ಆಕರ್ ನಾಂತ್ ತರೀ ಕೊಣೇಂಗೀ ಸಾಂಗ್‌ಲ್ಲೆಂ ಆಯ್ಕುನ್ ತೆಂಚ್ ಪಾಸಾರ‍್ತೆ ಆಸ್ಲ್ಯಾರ್ ಕಶೆಂ ರಾವಾತ್? ವಿಶ್ಲೇಶಣಾತ್ಮಕ್ ವಿಮರ‍್ಸೊ ಆನಿ ವಿಮರ‍್ಶಾತ್ಮಕ್ ವಿಶ್ಲೇಶಣ್ ಹೆಂ ದೋನ್ಂಯ್ ನಾಸ್ತಾನಾಂ ಆಮ್ಚೆಂ ಅಧ್ಯಯನ್ ಸಾರ‍್ಕೆಂ ಆನಿ ಅರ‍್ಥಾಭರಿತ್ ಜಾಯ್ತ್ ಕಶೆಂ?
ಆಮ್ಚೆ ಮಧೆಂ ತಶೆಂ ಜಾಯ್ನಾಂ ಜಾಂವ್ದಿ ಆಮ್ಚಿ ಜಾಣ್ವಾಯ್ ಸತಾಚ್ಯಾ ನಿರ‍್ಮೊಳ್ಪಣಾಂತ್ ಪರ‍್ಗಟ್ ಜಾಂವ್ದಿ ಮ್ಹಣ್ಚಿಚ್ ಆಶಾ.
3 comments
super article
ಸಕಾಳಿಕ್
Scholarly and interesting article by Stephen Quadros Permude. Quite helpful to students intending to do research especially in History as he has explained the basic research method in simple language.
Steven-babacho lekh avøddlo. Søkallik ani ørthabhørit. Tannim børøyil’lim her pustøkam søyt tanchya gundd chintpak ek saks. Keep up the good work Steven sir…..