ಹ್ಯಾ ಧರ್ತೆರ್ ಮನ್ಶ್ಯಾಕ್ ಮರೊಂಕ್ ಆಸ್ಚೆಂ ಫಕತ್ ಏಕ್ ಪಾವ್ಟಿಂ, ಪೂಣ್ ಹರ್ ಖಿಣ್ ತಾಕಾ ಧರ್ತೆರ್ ಜಿಯೆಂವ್ಕ್ ಆಸಾ ಮ್ಹಣ್ ತತ್ವಗಿನ್ಯಾನಿ ಸಾಂಗ್ತಾತ್. ಪುಣ್ ಹಾಂಗಾ ಜಿಯೆತಾನಾ ಎಕಾ ಖಿಣಾಪರಿಂ ಅನ್ಯೇಕ್ ಆಸಾನಾ, ಖಿಣಾಥಾವ್ನ್ ಖಿಣಾಕ್ ಪ್ರಿತುಮೆಚೆಂ ಸಂಯ್ಭ್ ಬದಲ್ತಾ. ಬದ್ಲಾವಣೆಚ್ಯಾ ಉತ್ರೊಣೆಂತ್ಲ್ಯಾನ್ ಪಾಶಾರ್ ಜಾಂವ್ಚೆಂ ಹರ್ ಜಿವಿಕ್ ಅನಿವಾರ್ಯ್ ಕರ್ಮ್. ಆನಿ ಹ್ಯಾ ಕರ್ಮಾಂತ್ಲ್ಯಾನ್ ಪಾಶಾರ್ ಜಾತಾನಾ, ಆಪ್ಲ್ಯಾ ಖುಶಿ ಆನಿ ದುಕಿ ಸಾಂಗಾತಾ, ಸಹಪಯ್ಣ್ಯಾರ‍್ಯಾಂಚೋಯ್ ದುಕಿ ಆನಿ ಖುಶಿ ಪಳೆಂವ್ಚಿ ಮನ್ಶ್ಯಾಪಣಾಚಿ ‘ಪರೀಕ್ಷಾ’ ಫುಡ್ ಕರಿಜೆ ಪಡ್ತಾ. ಏಕ್ ‘ಪಯ್ಣಾರಿ’ ಜಾವ್ನ್, ಸಹಪಯ್ಣಾರ‍್ಯಾಚಾ ಖುಶಿ – ದುಕಿಂಕ್, ಸಪ್ಣಾಂ – ಆಕ್ಲಾಸಾಂಕ್ ಕಸೊ ಆನಿ ಕಿತ್ಲೊ ತುಂ ಆಪಡ್ತಾಯ್ – ಪಾವ್ತಾಯ್ ಮ್ಹಳ್ಳ್ಯಾಚೆರ್ ಮಾತ್ ಮನ್ಶ್ಯಾಪಣಾಚ್ಯಾ ಪರೀಕ್ಷೆಂತ್ ಉತೀರ್ಣ್ – ಅನುತ್ತೀರ್ಣ್ ಜಾಂವ್ಕ್ ಜಾತಾ.
ಆಪ್ಲ್ಯಾ ಚಡಾವತ್ ಕವಿತೆಂನಿ ಸಮಾಜಿಕ್ ಅನೀತೆಚಿಂ ವಿಡಂಬನಾ ಆನಿ ಬದ್ಲಾಪಾಚೊ ಬಾವ್ಟೊ ಉಬಂವ್ಚೊ ಕ್ರಾಂತಿಕಾರಿ ವಿಚಾರ್‌ಧಾರೆಚೊ ಕವಿ ವಲ್ಲಿ ಕ್ವಾಡ್ರಸ್, ಪ್ರಸ್ತುತ್ ಕವಿತೆಂತ್ ‘ಉಡಾಸಾ’ ಕ್ ರೂಪಕ್ ಜಾವ್ನ್ ಘೊಳವ್ನ್, ವಾಚ್ಪ್ಯಾಂಕ್ ಆತ್ಮ್‌ನಿರೀಕ್ಷಣಾಕ್ ‘ಆಹ್ವಾನ್’ ದಿತಾ. ವರ್ತಮಾನಾಂತ್ ಕವಿತೆಚ್ಯಾ ನಾಯಕಾಕ್ ಧೊಸ್ಚೆಂ ಆದ್ಲ್ಯಾ ತ್ಯಾ ‘ಉಡಾಸಾ’ ಚೆಂ ರುಪ್ಣೆಂ, ಫುಡಾರಾಚಿಂ ಫುಲಾಂ ಫುಲಂವ್ಚೊ ‘ಸಂಕೇತ್’ ಜಾವ್ನ್ ಬದಲ್ಚೆಂಚ್ – ಕವಿತೆಕ್ ‘ಅಸ್ತಿತ್ವವಾದಿ’ ಚಿಂತ್ಪಾಚಿ ಅನಿರಿಕ್ಷಿತ್ ಘುಂವ್ಡಿ ದಿತಾ ಮ್ಹಣ್ ಮ್ಹಾಕಾ ದಿಸ್ತಾ. ಅಭ್ಯಾಸಾಕ್ ಜೊಕ್ತಿ ಅಪ್ರೂಪ್ ಕವಿತಾ.
■ ಎಚ್ಚೆಮ್
ಹಾಂವ್ ಜಿಯೆಲಾಂ
ಹ್ಯಾ ಧರ್ತೆರ್ ಮನಿಸ್ ಜಾವ್ನ್
ವೇಳ್ ತೆದ್ನಾಂಯ್ ನಾತ್ಲೊ
ಕೆದಿಂಕ್‌ಚ್ ಸಮ್ಜನಾಸ್ಚ್ಯಾ ದರ್ವಡೆಂತ್
ಏಕ್ ದೋನ್ ಪಾವ್ಟಿಂ
ಕಸೊಗಿ ಹಾಂವ್ ಜಿಯೆಲಾಂ
ಉಡಾಸ್ ಆಸಾ
ಖರೊಚ್ ಮ್ಹಾಕಾ
ಅಜೂನ್ ಉಡಾಸ್ ಆಸಾ
ಮಡಿಂ ರಾಸ್ ಪಡ್ಲೆಲಿಂ!
ಝುಜಾಥಳ್ ಉತ್ರೊನ್ ಆಯ್ಲಾಂ
ಮಾರ್ಲೆಂ ಕೊಣೆ ಮೆಲಿಂ ಕೊಣ್
ಮ್ಹಾಕಾ ಕಿತೆಂ ಪಡೊನ್ ಗೆಲಾಂ
ಕೊಣ್ ಮಾರ್ತೆಲ್ಯಾಂ ಪಯ್ಕಿಚೊ
ಕೊಣ್ ಮೊರ್ತೆಲ್ಯಾಂತ್ಲೊ
ದಾಟೆಲ್ಲ್ಯಾ ತಾಂಬ್ಡ್ಯಾ ರಗ್ತಾಕ್
ವಾಂಕ್ಡ್ಯಾ ನದ್ರೆನ್ ಪುಣಿಂ
ಪಳೆತ್ ಆಯ್ಲಾಂ
ಖರೊಚ್ ಮ್ಹಾಕಾ
ಅಜೂನ್ ಉಡಾಸ್ ಆಸಾ
ದೆವಾಳಾಕ್ ರಿಗ್ಚ್ಯಾದಿಂ
ಮ್ಹಜ್ಯಾ ಕೊಟಾಕ್ ಪಳೆವ್ನ್
ರಿತ್ಯಾ ಪೊಟಾರ್ ಮಾಗ್ತೆಲ್ಯಾಕ್
ಹಾಂವೆಂ ಆಯ್ಕಲಾಂ
‘ಅಯ್ಯಾ ಕಿತೆಂ ತರೀ ದೀ’
ತಾಂಚ್ಯಾ ಉತ್ರಾಂಚೊ
ಮ್ಹಜಿ ಭಕ್ತ್‌ಚ್ ಮ್ಹಜಿ ಸಕತ್
ದೊಳೆ ದಾಂಪುನ್ ಹಾತ್ ಉಭಾರುನ್
ಕೆಲ್ಲ್ಯಾ ಮಾಗ್ಣ್ಯಾಂಚೊ
ಅಜೂನ್ ಉಡಾಸ್ ಆಸಾ
ಹಾತಿಂ ಪೆನ್ ಘೆವ್ನ್
ಸುರ್ಯಾಕ್ ದರ್ಯಾಕ್ ಪಳೆವ್ನ್
ಭುಕ್-ಬೆಕಾರ್ಪಣ್ ಚಿಂತುನ್
ರಚ್ಲೆಲ್ಯಾ ಕವಿತೆಂಚೊ
ಉತ್ರಾಂ ಗುಂತ್ಚ್ಯಾ ಖೆಳಾಂತ್
ಹೈಕು-ಗಝಲ್-ಸೊನೆಟಾಂನಿ
ಪ್ರಾಸಾಚೊ ಲೇಪ್ ಸಾರಂವ್ಚೊ
ಉಡಾಸ್ ಆಸಾ ಮ್ಹಾಕಾ
ಆತಾಂಯ್ ಕಿತೆಂ ಬದಲ್ಲಾಂ
ತಿಚ್ ಧರ್ತಿ ತಿಚ್ ಭುಕ್
ತೆಂಚ್ ಬೆಕಾರ್ಪಣ್ ತಿಂಚ್ ಝುಜಾಂ
ವ್ಹಾಳ್ಚೆಂ ಅಮಾಯಕಾಂಚೆ
ತೆಂಚ್ ತಾಂಬ್ಶೆಂ ರಗತ್
ಉಡಾಸ್ ಆಸಾ ಮ್ಹಾಕಾ
ಕಿತೆಂಚ್ ಕರಿನಾಸ್ಚೊ ಹಾಂವ್
ತೆದ್ನಾಂ ತಶೆಂ ಆತಾಂ
ಅಜೂನ್ ಉಡಾಸ್ ಆಸಾ
■ ವಲ್ಲಿ ಕ್ವಾಡ್ರಸ್, ಆಜೆಕಾರ್
3 comments
Incredible! Truly moved by your words.
Beautiful and very meaningful poetry… Final stanza mind blowing…
Nice one Vally Sir,
Unique thinking, memories will remain as ‘MEMORIES’ for the future, unless there is a radical shift in thinking towards betterment/humanity, backed by essential support. Sadly, it is not the case at the moment.
Introduction by HM, adds another dimension for the thinking.
Thank you for the poem.