ಬೆತ್ಲೆಹೆಮಾಚ್ಯಾ ಗರ್ದಾನಾಚ್ಯಾ ಗೊಟ್ಯಾಂತ್ ಜೆಜು ಜಲ್ಮಾಲೊ. ಆನಿ ಕ್ರೀಸ್ತ್ ರಾಯಾನ್ ಆಪ್ಲೊ ಉಜ್ವಾಡ್ ಸಂಸಾರ್ ಭರ್ ಫಾಂಕಯ್ಲೊ. ಗೊಟ್ಯಾಂತ್ ಪ್ರಕಾಸ್ಲೊಲೊ ಹೊ ಉಜ್ವಾಡ್ ಗೊವ್ಳ್ಯಾಂಕ್ ಜಾಗಯ್ತಾನಾ … ತೆ ಆಪ್ಲ್ಯಾ ಶೆಳಿಯಾಂಕ್ ಘೆವ್ನ್ ಜೆಜುಕ್ ನಮಸ್ಕಾರ್ ಕರುಂಕ್, ನಮಾನ್ ದೀಂವ್ಕ್ ಸಂತೊಸ್ ಉಲ್ಲಾಸಾನ್ ಗೊಟ್ಯಾ ಭಂವಾರಿ ಪಾವ್ತಾತ್. ಆನಿ ಚಂದ್ರ್ ನೆಕೆತ್ರಾಂ ಸಾವ್ಳೆಂತ್ ಜೆಜುಚೊ ಜಲ್ಮ್ ಸಂಭ್ರಮ್ತಾತ್.
ಆನಿ ಆಜ್ ಅಸಲ್ಲ್ಯಾಚ್ಚ್ ಸಂಭ್ರಾಮಾಚ್ಯಾ ತುದಿಯೆರ್ ಆಮಿ ಆಸಾಂವ್. ಅಸಲ್ಯಾ ಸಂಧರ್ಭಾರ್… ಪ್ರಪ್ರಥಮ್ ಜಾವ್ನ್ ಅತ್ಮೀಕ್ ಥರಾನ್ ಸಂಭ್ರಮುನ್ ಉಪ್ರಾಂತ್ ಲೌಕಿಕ್ ಸಂಭ್ರಮಾಂತ್ ಮಿಸ್ಳೊಂಕ್ ಫಾವೊ.
ಆನಿ ಆಮಿ … ಹ್ಯಾ ನತಲಾ ಫೆಸ್ತಾ ಆದಿಂ ಯೆದೊಳ್‌ಚ್ಚ್ ಅದ್ವೆಂತಾ ಕಾಳಾಚೊ ಉಗ್ಡಾಸ್ ಕಾಡುನ್… ಅಧ್ಯಾತ್ಮಿಕ್ ಆನಿ ಭಕ್ತಿ ಪಣಾಚೆಂ ಆಚರಣ್ ಕರುನ್, ಜೆಜುಚ್ಯಾ ಜಲ್ಮಾ ಫೆಸ್ತಾಚಿ ತಯಾರಾಯ್ ಕೆಲ್ಲ್ಯಾ.
ಅಸಲ್ಲ್ಯಾ ಅತ್ಮೀಕ್ ಆಚರಣೆವರ್ವಿಂ ಆಮ್ಚೆಂ ನತಾಲಾಂ ಫೆಸ್ತಾಚೆಂ ಆಚರಣ್ ಯೀ ಬೋವ್ ಅದ್ಯಾತ್ಮಿಕ್ ಥರಾನ್‌ಚ್ ಆರಂಭ್ ಜಾಲಾಂ. ಆನಿ ಆತಾಂ …ಕ್ರಿಸ್ಮಸ್ ಫೆಸ್ತ್ ಯೀ ಅಧ್ಯಾತ್ಮಿಕ್ ತಶೆಂ ಲೌಕಿಕ್ ಆಚರಣೆನ್ ಮಿಸ್ಳೊನ್ ಸಂಭ್ರಮ್ತೆಲೆಂ.
ಕಾಳ್ ಬದ್ಲುನ್ ಯೆತಾಸ್ತಾಂ … ಸಂಸ್ಕೃತಿ, ಲೌಕಿಕ್ ತಶೆಂ ಅಧ್ಯಾತ್ಮಿಕ್ ಆಚರಣ್, ಬದ್ಲುನ್ ವೆತಾ. ಆನಿ ಬದ್ಲಾಲಾಂ. ಹೆಂ ಸಹಜ್ ಆನಿ ಸ್ವಾಭಾವಿಕ್ . ತ್ಯಾ ತ್ಯಾ ಕಾಲಾರ್ ಬದ್ಲುನ್ ಯೆಂವ್ಚಾ ಸಂಸ್ಕೃತಿ, ಸವಲತ್ತ್ಯಾ ಪರ್ಮಾಣೆಂ ತ್ಯಾ ತ್ಯಾ ಕಾಲಾಕ್ ತಿ ತಿ ಸಂಸ್ಕೃತಿ, ಆಚರಣ್ ಬದ್ಲುನ್ ಆಸ್ತಾ. ತ್ಯಾವರ್ವಿಂ ತ್ಯಾ ತ್ಯಾ ಕಾಲಾಕ್ ತೆಂ-ತೆಂ ಆಚರಣ್ ಸ್ವಾಭಾವಿಕ್.
ಸುಮಾರ್ ದೋನ್ ಹಜಾರ್ ವರ್ಸಾಂ ಆದಿಂ … ಕ್ರೀಸ್ತೀ ಯೆಣ್ಯಾಕ್ ಜುವಾಂವ್ ಬಾವ್ತಿಸಾನ್ ಅರಣ್ಯಾಂತ್ ಭಕ್ತಿ ಪಣಾಚಿ ಕಶ್ಟಾಂಚಿ ಜಿಣಿಂ ಜಿಯೆವ್ನ್… ‘ಪಾತ್ಕಿ ಜಿಣಿಂ ಸಾಂಡುನ್ ಜಿಣಿಂ ಬದ್ಲಿಯಾ ’ ಮ್ಹಳ್ಳ್ಯಾಶಿಕೊವ್ಣೆದ್ವಾರಿಂ … ಕ್ರೀಸ್ತಾಚ್ಯಾ ಯೆಣ್ಯಾಕ್ ವಾಟ್ ತಯಾರ್ ಕೆಲ್ಲಿ.
ಜೆಜು ಕ್ರಿಸ್ತ್ ಉಜ್ವಾಡ್ ಜಾವ್ನ್ ಸಂಸಾರಿ ಯೆತೊಲೊ ಮ್ಹಣ್ ಸಾಕ್ಸ್ ಜಾಲ್ಲ್ಯಾ ಜುವಾಂವ್ ಬಾವ್ತಿಸ್ತಾಚ್ಯಾ ಪ್ರೇರಣಾನ್…ಕ್ರೀಸ್ತೀ ಯೆಣ್ಯಾಕ್ ತಯಾರಾಯ್ ಜಾವ್ನ್, ಪ್ರಮಾಣಿಕ್ ಖಾಲ್ತೆಪಣಾನ್ ಜಿಯೆವ್ನ್, ಎಕಾಮೆಕಾ ಸಹಕಾರ್ ದಿಂವ್ಚಿ, ದುಬ್ಳ್ಯಾ ಧಾಕ್ಟ್ಯಾಂಚಿ ಸೆವಾ ಕರುನ್ ತಾಂಕಾ ಸಹಕಾರ್ ದಿಂವ್ಚಿ ದಯಾಳ್ ಜಿಣಿ ಜಿಯೆಂವ್ಯಾ.
ದುಬ್ಳ್ಯಾ ಧಾಕ್ಟ್ಯಾಂಚಿ ಸೆವಾ ಸಹಕಾರ್ ಮ್ಹಣ್ತಾಂ…ಮಾಕಾ ಕಾರ್ಖಾನೊ ಆಸ್ಲೆಲ್ಯಾ ವೆಳಾ… ಘಡ್ಲೆಲೆಂ ಏಕ್ ಘಡಿತ್ ಉಗ್ಡಾಸಾಕ್ ಯೆತಾ. ತ್ಯಾಎಕಾ ದಿಸಾ ಹಾಂವ್ ಮ್ಹಜ್ಯಾಚ್ಚ್ ಕಾಮೆಲಿಚ್ಯಾ ಮರ್ಣಾಕ್ ಹಾಜರ್ ಜಾಲ್ಲೊಂ. ಮರ್ಣಾಂ ರೀತ್ ಸಗ್ಳೆಂ ಸಂಪೊನ್ ಸಿಮೆತ್ರೆ ಭಾಯ್ರ್ ವಚೊಂಕ್ ಮೆಟಾಂ ಘಾಲುನ್ ಆಸ್ತಾಂ, ಪಾಟ್ಲ್ಯಾನ್ ಥಾವ್ನ್ ಮ್ಹಾಕಾ ಆಪೊಂವ್ಚೊ ತಾಳೊ ಆಯ್ಕಾಲೊ.
“ಮಿ.ರೋಚ್…”
ಹಾಂವೆಂ ಪಾಟಿಂ ಪಳೆಲೆಂ. ಪಳೆತಾಸ್ತಾಂ ಕಾಮೆಲಿಚೆಂ ಮರಣ್ ಕಾರ್ಯೆಂ ಸಂಪೈಲೊಲ್ಲೊ ತಾಚ್ಯಾಚ್ಚ್ ಫಿರ್ಗೆಜೆಚೊ ವಿಗಾರ್. ಘಡ್ಯೆನ್ ಹಾಂವ್ ತಾಚೆಲಾಗಿಂ ಗೆಲೊಂ. ತ್ಯಾವೆಳಾ ತಾಣೆಂ ಇತ್ಲೆಂಚ್ಚ್ ಮ್ಹಳೆಂ. “ತೊ ಬೋವ್ ದುಬ್ಳೊ. ತಾಚ್ಯಾ ಬಾಯ್ಲೆ ಭುರ್ಗ್ಯಾಂಕ್, ಆನಿ ಗತ್ ನಾಂ. ತಿಂ ಕಾಂಯ್ ಹ್ಯಾವಿಶಿಂ ಸಾಂಗೊಂಕ್ ಮ್ಹಜೆ ಲಾಗಿಂ ಯೇಂವ್ಕ್ ನಾಂತ್. ಪೂಣ್ ತಾಂಚೆಂ ಕಶ್ಟ್ ದುಬ್ಳಿಕಾಯ್ ತಾಂಚ್ಯಾ ಘರಾ ಭೆಟ್ ದೀವ್ನ್ ಆಸ್ಲೆಲ್ಯಾನ್, ಹಾಂವ್ ತೆಂ ಜಾಣಾಂ.”
“ದೆಕುನ್ ಹಾಂವೆ ತುಜೆಲಾಗಿಂ ವಿನಂತಿ ಕರ್ಚಿ. ದಯಕರುನ್ ತಾಂಕಾ ಜೆಂ ಕಿತೆಂ ಸರ್ಕಾರಾ ಥಾವ್ನ್ ಮೆಳಾಜಾಯ್ ಆಸ್ಚ್ಯೊ ಸರ್ಕಾರಿ ಸವಲತ್ತ್ಯೊ… ತಾಚ್ಯಾ ಕುಟ್ಮಾಚ್ಯಾಂಕ್ ಜಾತಾ ತಿತ್ಲೆಂ ವೆಗ್ಗಿಂ ಮೆಳಾಶೆಂ ಪ್ರೇತನ್ ಕರ್ಶಿ ತರ್ ಬೋವ್ ಉಪ್ಕಾರ್ ಜಾತೊ.”
“ಖಂಡಿತ್ ಫಾದರ್. ಹಾಂವ್ ತುಮ್ಕಾ ಹ್ಯಾವಿಶಿಂ ಭಾಸ್ ದಿತಾಂ. ಆನಿ ಫಾದರ್ ಹೆಂ ತುಮಿಂ ಸಾಂಗ್ಲೆಲೆ ಖಾತಿರ್ ನ್ಹಹಿಂ, ಹಾವೆಂಯೀ ಹೆಂ ಯೆದೊಳ್-ಚ್ಚ್ ಚಿಂತ್ಲಾಂ ಫಾದರ್.”
“ಮಿ. ರೋಚ್…ತೊ ಕೆನ್ನಾಂಯೀ ಇಗರ್ಜೆಂತ್ ಮಾಕಾ ಭೆಟ್ಲೆಲ್ಯಾವೆಳಾ ತುಜ್ಯಾ ಬರ‍್ಯಾ ಮನಾವಿಶಿಂ ಸಾಂಗಿತ್ತ್ ಆಸ್‌ಲ್ಲೊ. ಆಜ್ ತೊ ನಾಂ ತ್ಯಾದೆಕುನ್ ತಾಚೆ ಖಾತಿರ್ ಹಾಂವೆಂ ತುಜೆಲಾಗಿಂ ವಿನಂತಿ ಕರ್ಚಿ. ಬೆಜಾರ್ ಕರಿನಾಕಾ.”
“ನಾಂ ಫಾದರ್. ಖಂಡಿತ್ ಜಾವ್ನ್ ತುಮ್ಕಾಂ ದಿಲ್ಲಿ ಭಾಸ್ ಹಾಂವ್ ಪಾಳ್ತಾಂ ಫಾದರ್.”.
ನೀಜ್ ಜಾವ್ನ್ ಹೊ ಯಾಜಕ್ ಏಕ್ ಘಂಭೀರ್ ಆನಿ ಶಿಸ್ತೆಚೊ ಯಾಜಕ್. ಆನಿ ತಸಲ್ಯಾ ತಾಚ್ಯಾ ವೆಕ್ತಿತ್ವಾಕ್… ಲೋಕ್ ತಾಚೆಲಾಗಿಂ ಉಲಂವ್ಕ್ ಭಿಯೆತಾಲೊ. ಪೂಣ್ ತೊ… ತೊಜಾವ್ನ್ ದುಬ್ಳ್ಯಾ ಧಾಕ್ಟ್ಯಾಂಲಾಗಿಂ ಸಂವಾದ್ ಕರ್ತಾಲೊ. ಸುಖ್-ದುಖ್ ಉಲೊವ್ನ್…ತಾಂಚ್ಯಾ ಘರಾಂನಿ ಭೆಟ್ ದಿತಾಲೊ. ಆನಿ ತಾಂಕಾ ಆಪ್ಲ್ಯಾ ತಾಂಕಿ ಪರ್ಮಾಣೆಂ ಕುಮೊಕ್ ದೀವ್ನ್ ಕ್ರೀಸ್ತೀ ಸೆವಾ ತೊ ಕರ್ತಾಲೊ. ಅಸಲ್ಲ್ಯಾ ಸಂಧರ್ಭಾಂನಿಂ…ಕುಟ್ಮಾಂತ್ ರುತಾ ಕರಿಜಾಯ್ ಜಾಲ್ಲ್ಯಾ, ಸದಾಂ ರಜಾರ್ ಮಾಗ್ಣ್ಯಾವಿಶಿಂ, ಪ್ರಮಾಣಿಕ್ ಜಿಣಿ ಜಿಯೆಂವ್ಚ್ಯಾ ವಿಶಿಂ ಸೆವಾಸಹಕಾರಾವಿಶಿಂ ಶಿಕೊವ್ಣ್ ದೀವ್ನ್, ತಾಂಕಾ ತೊ ಜಾಗೈತ್ತ್ ಆಸ್ತಾಲೊ.
ಆನಿ ಅಸಲ್ಯಾ ತಾಚ್ಯಾ ಮಿಸಾಂವಾದ್ವಾರಿಂ ತೊ ಕ್ರೀಸ್ತಾವಾಂಕ್ ತಶೆಂ ಅಕ್ರಿಸ್ತಾವಾಂಕ್ ದೇಕ್ ಜಾವ್ನ್ ಆಪ್ಲಿ ಜಿಣಿಂ ಜಿಯೆತಾಲೊ.
ಆತಾಂ ತೊ ಯಾಜಕ್…ಆಪ್ಲ್ಯಾ ಉತರ್ ಪ್ರಾಯೆರ್-ಯೀ ಆಫ್ರಿಕಾಚ್ಯಾ ‘ಸಾಮೆ’ ದಿಯೆಸಿಜೆಂತ್ ಕ್ರೀಸ್ತೀ ಭವಾರ್ಥಾನ್ ಆಪ್ಲೊ ಕ್ರೀಸ್ತೀ ಮಿಶನರಿ ವಾವ್ರ್ ಕರುನ್ ಆಸಾ. ಅಸಲ್ಯಾ ತಾಚ್ಯಾ ಕ್ರೀಸ್ತೀ ಭಾವಾರ್ಥಿ ಜಿವಿತಾದ್ವಾರಿಂ …‘ಆಮಿಂ ಫಕತ್ತ್ ಜೆಜುಚ್ಯಾ ಭಂವಾರಿ ಆಸ್ಚೆಂ ನ್ಹಂಹಿ. ಬಗಾರ್ ಕ್ರೀಸ್ತಾಚೆರ್ ಭಾವಾರ್ಥ್ ದವರುನ್ ಜಿಯೆಂವ್ಕ್ ಜಾಯ್’ ಮ್ಹಣ್ ಆಮ್ಕಾಂ ಶಿಕಯ್ತಾ.
ಆನಿ ಆತಾಂಯೀ ತಾಚೊ ಉಗ್ಡಾಸ್ ಮಾಕಾ…ಭಕ್ತಿಪಣಿಂ ಜಿಯೆಂವ್ಕ್, ತಶೆಂ ಪೆಲ್ಯಾಚ್ಯಾ ಅತ್ಮೀಕ್ ತಶೆಂ ಲೌಕಿಕ್ ಸಹಕಾರಾಕ್ ಪಾವೊಂಕ್ ಪ್ರೇರಿತ್ ಕರಿತ್ತ್ ಆಸಾ.
ಆತಾಂ ಆಮಿ ಪರತ್ ಅದ್ವೆಂತ್ ಆನಿ ನತಲಾಂ ಫೆಸ್ತಾವಿಶಿಂ ಪರ್ತಲ್ಯಾಂವ್ ತರ್…ಅದ್ವೆಂತಾ ವೆಳಾ ಪಾಳಿಜಾಯ್ ಜಾಲ್ಲೆ ಸಮಡ್ತೆಚೆ ಕಾಯ್ದೆ… ಆಚರಣ್, ಅತ್ಮೀಕ್ ಶಿಕೊವ್ಣ್, ತ್ಯಾ ತ್ಯಾ ಕಾಲಾಕ್ ಸಹಜ್ ಜಾವ್ನ್ ಭಕ್ತಿಪಣಿ ಉರ್ಬೆನ್ ಪಾಳ್ಳ್ಯಾಂವ್ ತರ್…ಆಮ್ಚೆಂ ನತಲಾಂ ಫೆಸ್ತ್ ಏಕ್ ಯೋಗ್ಯ್ ತಯಾರಾಯೆಚೆಂ ಫೆಸ್ತ್ ಜಾವ್ನ್ ಸಂಭ್ರಮ್ತೆಲೆಂ.
ಆದಿಂ ಜೆಜುಚ್ಯಾ ಜಲ್ಮಾದಿಸಾಚೆಂ ಆಚರಣ್ …ಮಧ್ಯಾನೆ ರಾತಿಂ ಆರಂಭ್ ಜಾತೆಲೆಂ. ಕ್ರಿಸ್ಮಸಾಚ್ಯಾ ಮಧ್ಯಾನೆ ರಾತಿಂ, ಆತಾಂಚಾ ಪರಿಂ ವೀಜ್ ದಿವೆ ನಾತ್ಲೆಲ್ಯಾ ತ್ಯಾ ಕಾಲಾರ್, ಸೆಜಾರ್ಚಿಂ ಸರ್ವಾಂ ಸಾಂಗಾತಾ ಮೆಳುನ್, ಹಿಂಡ್ ಹಿಂಡಾಂ ಜಾವ್ನ್ ಚುಡೆತಿಚ್ಯೊ ವ್ಹಡ್ ವ್ಹಡ್ ದಂದ್ಯೊ ಪೆಟೊವ್ನ್, ಮಯ್ಲಾಂ ಮಯ್ಲಾಂಚಿ ವಾಟ್ ಚಲುನ್ ತೆ ಮಿಸಾಕ್ ಹಾಜರ್ ಜಾತಾಲೆ.
ಮಿಸಾ ನಂತರ್ ಫಾಂತ್ಯಾ ಫಾಂತ್ಯಾರ್ ಘರ್ಚಾ ವಾಟೆರ್, ಗುಮ್ಟಾಂ ಪೊದಾಂ ಗಾವ್ನ್ ಪರತ್ ಪಾಟಿಂ ಘರಾ ಪಾವ್ತಾಲೆ. ನಂತರ್ ಸರ್ವ್ ಸಾಂಗಾಂತಾ ಮೆಳುನ್ ಸುರ್ ಮಾರುನ್ ಮಾಸ್ಳಿ ಧರುಂಕ್ ವೆತಾಲೆ . ಆನಿಂ ದನ್ಪರಾಂ ಲಾಂಬ್ ಮಾಗ್ಣ್ಯಾ ಸಂವೆಂ ಸನ್ನಾ ಮಾಸ್ಳಿಚೆಂ ಗಡ್ದ್ ಜೆವಾಣ್. ಅಶೆಂ ತಾಂಚೆ ಕ್ರಿಸ್ಮಸ್ ಆಚರಣ್…ಏಕ್ ಅಧ್ಯಾತ್ಮಿಕ್ ತಶೆಂ ಸಂಭ್ರಮಿಕ್ ಲೌಕಿಕ್ ಮಿಸ್ಳೊಣೆಚ್ಯೆಂ ಜಾವ್ನ್ ಆಸ್ ಲ್ಲೆಂ.
ಪೂಣ್ ಕಾಳ್ ಬದ್ಲೊನ್ ಗೆಲ್ಯಾಪರಿಂ ಪ್ರಸ್ಥುತ್ ಪರಿಗತೆಕ್ ಲಾಗು ಜಾವ್ನ್ … ಆದುನಿಕ್ ಕಾಲಾರ್ ಕ್ರಿಸ್ಮಸಾವೆಳಾ ಅದ್ಯಾತ್ಮಿಕ್ ವಿಶಯಾಕ್ ಮಹತ್ವ್ ದಿಂವ್ಚೆಂ ಉಣೆಂ ಜಾಲಾಂ ಯಾ ದಿಸೊಂಕ್-ಚ್ಚ್ ದಿಸಾನಾಂ.
ತ್ಯಾಖಾತಿರ್ ಹ್ಯಾ ಆದುನಿಕ್ ಕಾಲಾರ್ ಲೊಕಾಕ್ ತ್ಯಾವಿಶಿಂ ಫಾವೊತಿ ಸಮ್ಜಣಿಂ ಪೆಟೊಂವ್ಚಿ ಅತೀ ಗರ್ಜೆಚೆಂ ಜಾವ್ನಾಸಾ. ಹ್ಯಾವರ್ವಿಂ ವರ್ಸಾಕ್ ಏಕ್ ಪಾವ್ಟಿಂ ಜಿಣಿ ಬದ್ಲಾಪಾಕ್ ಆವ್ಕಾಸ್ ಮೆಳುನ್, ಲೊಕಾಕ್ ತಾಂಚ್ಯಾ ಜಿಣ್ಯೆವಿಶಿಂ, ತಾಂಕಾಚ್ಚ್ ಮಾಹೆತ್ ಮೆಳ್ತೆಲಿ. ಆನಿ ಹ್ಯಾವರ್ವಿಂ ಆದುನಿಕ್ ಕ್ರೀಸ್ತೀ ಸಮಾಜ್ ಜಾಗೃತ್ ಜಾತೆಲಿ.
ಪೂಣ್ ಪ್ರಸ್ತುತ್ ಟಿವಿ ಪ್ರೊಗ್ರಾಮಾಂ, ಮೊಬಾಯ್ಲ್ .ಇಂಟರ್ನೆಟ್ಟ್ ಸವಲತ್ತ್ಯೊ…ಅಸಲೆಂ ಸರ್ವ್ ಚಡೊನ್0ಚ್ಚ್ ಆಸ್ಚ್ಯಾ ಆಧುನಿಕ್ ಯಾಂತ್ರಿಕ್ ಸಂಸಾರಾಂತ್…ತಾಂಕಾ ಅತ್ಮೀಕ್ ಅಧ್ಯಾನಾಕ್, ವೇಳ್-ಚ್ಚ್ ಮೆಳಾನಾ ಜಾಲಾ. ಪ್ರಸ್ಥುತ್ ಕಾಳಾರ್ ಹೆಂ ಏಕ್ ವ್ಹಡ್ ಸಮಸ್ಯಾ ಜಾವ್ನ್ ಉಬಿ ಆಸಾ.
ಹ್ಯಾ ಆದುನಿಕ್ ಕಾಳಾರ್…ಥೊಡ್ಯಾಂ ಕುಟ್ಮಾಂತ್ ಭುರ್ಗ್ಯಾಂಕ್ ವ್ಹಡಿಲಾಂ ಲಾಗಿಂ ಉಲೊಂವ್ಕ್ ವೇಳ್ ನಾಂ. ಆನಿಥೊಡ್ಯಾ ಕುಟ್ಮಾಂನಿಂ ವ್ಹಡಿಲಾಂಕ್ ಭುರ್ಗ್ಯಾಂ ಸಂಗಿಂ ಮೆಳುಂಕ್ ತಾಂಚ್ಯಾ ಸಂಗಿಂ ವೇಳ್ ಖರ್ಚುಂಕ್ ಪುರ್ಸೊತ್ ನಾಂ!. ಅಸಲ್ಲ್ಯಾ ಸಮಾಜೆಂತ್, ಎಕಾಮೆಕಾ ಸಂವಾದ್ ಸಹಕಾರ್, ಸಮ್ಜಣಿಂ ಸೊಡ್ದೋಡ್, ಮೋಗ್ ಮಯ್ಪಾಸ್ ಮಾಗ್ಣೆಂ, ಹೆಂಸರ್ವ್ ಮಿಸ್ಳೊನ್ ಆಸ್ಚೆಂ ತರೀ ಕಶೆಂ?!.
ಕಿತೆಂಯೀ ಜಾಂವ್…ಜೆಜುಚಾ ಕಾಳಾರ್, ಜುಂವಾವ್ನ್…ಜಿಣಿ ಬದ್ಲುನ್, ಪಾತ್ಕಿ ಜಿಣಿಯೆಕ್ ಪಾಟ್ ಕರಾ ಮ್ಹಣ್ ಜೆಜುಚೆಂ ಯೆಣೆಂ ತಯಾರ್ ಕೆಲ್ಲೆಂ. ಹೆಂಚ್ಚ್ ಜಾವ್ನಾಸಾ ಜೆಜುಚ್ಯಾ ಯೆಣ್ಯಾಚೆಂ ತಯಾರಾಯ್.
ಗರ್ದಾನಾ ಗೊಟ್ಯಾಂತ್ ಜಲ್ಮಲ್ಲ್ಯಾ ಜೆಜುಚ್ಯಾ ಜಲ್ಮಾ ವೆಳಾ…ಗೊವ್ಳಿ ಜೆಜುಚ್ಯಾ ಭಂವಾರಿ ಭಕ್ತಿಪಣಿಂ ಜಮೊ ಜಾಲೆ ಮಾತ್ರ್ ನ್ಹಹಿಂ…ತೆ ತಾಂಚ್ಯಾ ಭಾವಾರ್ಥಾನ್ ಜೆಜುಲಾಗಿಂ ಏಕ್ ಜಾಲೆ. ಆನಿ ಹ್ಯಾವರ್ವಿಂ ತೆ ಕುರ್ಪೆನ್ ಭರ್ಲೆ.
ಆನಿ ಹ್ಯಾ ಕ್ರಿಸ್ಮಸಾವೆಳಾ ಆಮಿಂ ಆಮ್ಟಾ ಆತ್ಮಿಕ್ ತಶೆಂ ಲೌಕಿಕ್ ತಯಾರಾಯೆ ವರ್ವಿಂ, ಫಕತ್ ಕ್ರೀಸ್ತಾಚ್ಯಾ ಭಂವಾರಿ ಆಸ್ಚೆಂ ನಹಿಂ…ಬದ್ಲಾ ಭವಾರ್ಥಾನ್ ತಾಕಾ ವಳ್ಕುನ್ ಜಿಯೆವ್ಚೆಂ ಪ್ರೇತನ್ ಕರ್ಯಾಂ.
ಬಾಳೊಕ್ ಜೆಜು…ಮನ್ಶಾ ಉಣೆಂಪಣ್ ಫುಡ್ ಕರುನ್…ಪ್ರಮಾಣಿಕಾಂಕ್ ತಶೆಂ ಅಪ್ರಮಾಣಿಕಾಂಕ್, ಖೊಟ್ಯಾಂಕ್ ತಶೆಂ ಪಾತ್ಕ್ಯಾಂಕ್ ಆನಿ ಪಿಡೆಸ್ತಾಂಕ್ ಅಶೆಂ ಸರ್ವಾಂಕ್ ಆಪ್ಲೊ ಕುರ್ಪೆಚೊ ಉಜ್ವಾಡ್ ಫಾವೊ ಕರ್ತಾ.
ಅಸಲ್ಯಾ ಕುರ್ಪೆ ಉಜ್ವಾಡಾಚ್ಯಾ ಭಾವಾರ್ಥಾನ್ ಆಮಿ ಜಿಯೆವ್ನ್…ಜೆಜುನ್ ಆಮ್ಕಾಂ ಫಾವೊಕೆಲ್ಲೆಂ ತೆಂ ದೆಣೆಂ ಹೆರಾಂಕ್ ವಾಂಟುಂಕ್ ಪ್ರೇತನ್ ಕರ್ಯಾಂ. ಹ್ಯಾ ಮಾರಿಫಾತ್ ಪೆಲ್ಯಾಚ್ಯಾ ಸೆವಾ ಸಹಕಾರಾಚಿ ಜಿಣಿಂ ಜಿಯೆಂವ್ಕ್ ಆಮಿ ಕುರ್ಪಾ ಮಾಗೊನ್ ಘೆಂವ್ಯಾಂ.
ಜೆಜುಚ್ಯಾ ಹ್ಯಾ ಉಜ್ವಾಡಾ ಮಾರಿಫಾತ್…ಕ್ರಿಸ್ತಾಚಿ ವಳಕ್ ತಶೆಂ ಕ್ರೀಸ್ತೀ ಶಿಕೊವ್ಣ್ ಸಂಸಾರ್ ಭರ್ ವಾಡೊನ್ ವೆತೆಲಿ…ಪ್ರಸಾರೊನ್ ಆಸ್ತೆಲಿ. ಆನಿ ಹ್ಯಾ ನತಾಲಾಂ ವೆಳಾ ಹೆಂಚ್ಚ್ ಆಮ್ಚೆಂ ಮಾಗ್ಣೆಂ ಜಾಂವ್.
■ ರೋನ್ ರೋಚ್ ಕಾಸ್ಸಿಯಾ
