ಸಂಪೂರ್ಣ್ ಸ್ವರಾಜಾಚೊ ದೇಶ್ ಆತಾಂ ಸಂಪೂರ್ಣ್ ಸರ್ವಾಧಿಕಾರಾಚೊ ದೇಶ್ ಜಾವ್ನ್ ಬದ್ಲೊನ್ ಜಾಲಾ ಮ್ಹಣ್ಚ್ಯಾಕ್ ಕರಾವಳೆಂತ್ ಘಡೊನ್ ಆಸ್ಚಿಂ ಘಡಿತಾಂಚ್ ಸಾಕ್ಸ್. ಎಲಿಸಾಂವ್ ಜಾಹಿರ್ ಜಾಲ್ಲೆಂಚ್ ಕರಾವಳೆಚೆ ಚಡವತ್ ಶಾಸಕ್ ಉಟಾಉಟಿಂ ಕೊಡ್ತಿಕ್ ಧಾಂವ್ಲೆ ಆನಿ ಗೂಗಲ್, ವಾಟ್ಸಾಪ್, ಯೂಟ್ಯೂಬ್ ಧರುನ್ ಕಾಂಯ್ ಶೆಂಭೊರಾಂಲಾಗಿಂ ಮಾದ್ಯಮಾಂಚೆರ್ ಕೊಡ್ತಿಥಾವ್ನ್ ಸ್ಟೇ ಹಾಡ್ಲಿ. ಎಕಾದಾವೆಳಾ ಹ್ಯಾ ಶಾಸಕಾಂನಿ ಕಾಂಯ್ ಪಾಡ್ ಕಾಮ್ ಕರುಂಕ್ ನಾ ಜಾಲ್ಯಾರ್ ಹಾಂಕಾಂ ಭಿರಾಂತ್ ಕಸ್ಲಿ? ಮಾದ್ಯಮಾಂಚೆರ್ ಸ್ಟೇ ದಿಂವ್ಚೆಪಯ್ಲೆಂ ಪಯ್ಲ್ಯೆ ನದ್ರೆಕ್ ಕೊಡ್ತಿಕ್ ತರೀ ಹಾಂಚೆವಿಶ್ಯಾಂತ್ ಫಾಯ್ಸ್ ಜಾಲ್ಲೆಂ ಕಿತೆಂ ಸಾಂಪಡ್ಲೆಂ ಖಬರ್ ನಾ. ಮ್ಹಜ್ಯೆ ಸಮ್ಜಣೆಪರ್ಮಾಣೆಂ ಅಸಲ್ಯಾ ಗಜಾಲಿಂನಿ ಚಡಾವತ್ ಜಾವ್ನ್ ಕೋಡ್ತ್ ದಾಖ್ಲೆ ಪಳಯ್ನಾಸ್ತಾನಾ ಸ್ಟೇ ದೀನಾ. ಪುತ್ತೂರ‍್ಚ್ಯಾ ಶಾಸಕಾಚೆ ವೈರಲ್ ಜಾಲ್ಲೆ ಫೊಟೆ ತರೀ ಆಸ್ಲೆ. ಪುಣ್ ಮೂಡಬಿದ್ರಿ, ಮಂಗ್ಳುರ್ ಶಾಸಕ್ ಆನಿ ಜಿಲ್ಲಾಧ್ಯಕ್ಶಾಂನಿ ಕೊಡ್ತಿನ್ ಸ್ಟೇ ದಿಂವ್ಚೆಬರಿ ‘ಕನ್ವಿನ್ಸ್’ ಕರ‍್ಚೆತಸಲೆ ಕಸ್ಲೆ ದಾಖ್ಲೆ ದಿಲೆಗಾಯ್ ಮ್ಹಳ್ಳೊ ಕುತೂಹಲ್ ಆಸಾ. ಆಸೊಂ – ಕಾನೂನಾಚಿ ಗಜಾಲ್ ಕಾನೂನಾಚೆ ಪಂಡಿತ್ ಪಳೆವ್ನ್ ಘೆತೆಲೆ.
ಪುಣ್ – ರಾಜಕೀಯ್ ನಯ್ತಿಕತಾ, ಸಮಾಜಿಕ್ ಬದ್ದತಾ ಆನಿ ಪ್ರಾಮಾಣಿಕ್ಪಣಾಚ್ಯೆ ನದ್ರೆನ್ ಪಳಯ್ಲ್ಯಾರ್ ಆಪ್ಣಾವಿಶ್ಯಾಂತ್ ಕೊಣೆಂಯ್, ಗೂಗಲ್, ವಾಟ್ಸಾಪ್, ಫೇಸ್‌ಬುಕ್ ಸಮಾಜಿಕ್ ಮಾದ್ಯಮಾಂ ಧರುನ್, ಖಂಯ್ಚ್ಯಾಯ್ ಮನ್ಶಾನ್, ಮಾದ್ಯಮಾನ್ ಉಲೊಂವ್ಕ್ ನ್ಹಜೊ, ಬರೊಂವ್ಕ್ ನ್ಹಜೊ ಮ್ಹಳ್ಯಾರ್ – ತಿ ಸರ್ವಾಧಿಕಾರಾಚಿ ಪರಮಾವ್ದಿ ಜಾಯ್ನಾ?
ಇತಿಹಾಸಾಚೊ ಪ್ರಾಧ್ಯಾಪಕ್ ಆನಿ ಲೇಖಕ್ ಸ್ಟೀಫನ್ ಕ್ವಾಡ್ರಸ್, ಪೆರ್ಮುದೆನ್ ಕೆದಾಳಾಯ್ ಸಾಂಗ್ಚೆಂ ಆಸಾ, ’ಮಾಸ್ಳಿ ತಕ್ಲೆಥಾವ್ನ್ ಕುಸೊಂಕ್ ಸುರು ಜಾತಾ’. ದೆಶಾಚೆಂ ಸುಂಕಾಣ್ ಹಾತಿಂ ಘೆವ್ನ್ ಬಸ್ಲಲ್ಯಾಂವಿಶ್ಯಾಂತ್ ಉಲಯ್ಲ್ಯಾರ್ ದೇಶ್‌ದ್ರೋಹಾಚಿಂ ಪ್ರಕರಣಾಂ ದಾಖಲ್ ಜಾತಾತ್ ಮಾತ್ ನ್ಹಯ್, ಪತ್ರ್‌ಕರ್ತಾಂಕ್, ವಿಚಾರ್‌ವಾದಿಂಕ್ ಧರ‍್ನ್ ಜಯ್ಲಾಂತ್ ಘಾಲ್ತಾತ್. ಸ್ಟ್ಯಾನ್ ಸ್ವಾಮಿ ತಸಲ್ಯಾ ಯಾಜಕಾಕ್ ಲಗಡ್‌ಚ್ ಕಾಡ್ತಾತ್. ಆನಂದ್ ತೇಲ್ತುಂಬ್ಡೆ, ಕಪ್ಪನ್, ಜುಬೇರ್ ಹೆರ್ ಥೊಡಿಂ ನಿದರ್ಶನಾಂ.
ಎಲಿಸಾಂವ್ ಮಾತ್ಯಾರ್ ಆಸ್ತಾನಾ – ಕರಾವಳೆಚ್ಯಾ ಶಾಸಕಾಂಕ್ ಕೇಜಿ ಘಾಲುಂಕ್, ಜಯ್ಲಾಕ್ ಧಾಡುಂಕ್ ಸಾಧ್ ನಾ. ಕಿತ್ಯಾಕ್ ಮ್ಹಳ್ಯಾರ್ ತೆಂ ತಾಂಕಾಂಚ್ ಉಳ್ಟೆಂ ಮಾರ‍್ತಾ ಮ್ಹಣ್ ತೆ ಬರ‍್ಯಾನ್ ಜಾಣಾಂತ್. ತಾಂಚೆ ಫೊಟೆ, ಸಿ.ಡಿ. ಆಸ್ಚೆ ತಾಂಚ್ಯಾಚ್ ಕಾರ್ಯಕರ್ತಾಂಲಾಗಿಂ ಸೊಡ್ನ್ ಭಾಯ್ಲ್ಯಾ ಕೊಣಾಯ್‌ಲಾಗಿಂ ವಾ ಮಾದ್ಯಮಾಲಾಗಿಂ ಖಂಡಿತ್ ನ್ಹಯ್. ತಾಣಿ ಜರಿ ಆಪ್ಲ್ಯಾಚ್ ಕಾರ್ಯಕರ್ತಾಂಚೆರ್ ಕೇಜ್ ದಾಖಲ್ ಕೆಲಿ ವಾ ತಾಂಕಾಂ ಜಯ್ಲಾಕ್ ಧಾಡ್ಲೆಂ ಜಾಲ್ಯಾರ್ ಎಲಿಸಾಂವಾಂತ್ ಕಾರ್ಯಕರ್ತ್‌ಚ್ ಹಾಂಕಾಂ ಸಲ್ವಯ್ತಾತ್. ದೆಕುನ್ ಮಾದ್ಯಮಾಂ, ಗೂಗಲ್, ಫೇಸ್‌ಬುಕ್, ವಾಟ್ಸಾಪ್ – ಬಲಿಯೆಚೆ ಬೊಕ್ರೆ. ಸಾದ್ಯಾ ಲೊಕಾಚಿ ಗಜಾಲ್ ಸೊಡ್ಯಾಂ, ಮಾದ್ಯಮಾಂಚ್ಯಾ ಪಂಡಿತಾಂಕ್‌ಯೀ ಕೊಡ್ತಿಥಾವ್ನ್ ನೊಟಿಸಾಂ ಯೆತಾನಾ – ಬೊಕ್ರೆ ಜಾಲ್ಯಾಂವ್ ಮ್ಹಳ್ಳಿ ಗಜಾಲ್ ಸಮ್ಜನಾ ವಾ ತೆಯ್ ಲೊಕಾಕ್ ಬೊಕ್ರೆ ಕರುನ್ ಆಸಾತ್?
ಸ್ಟ್ಯಾನ್ ಸ್ವಾಮಿ, ಜುಬೇರ್, ಕಪ್ಪನ್ ಆನಿ ಆಯ್ಲೆವಾರ್ ಸತ್ಯಪಾಲ್ ಮಲಿಕ್ ಅಶೆಂ ಉಲಯ್ತಲ್ಯಾಂಚೊ ಆವಾಜ್ ಬಂದ್ ಕರ‍್ಚೆಂ ಕಾಮ್, ಖಂಯ್‌ಗೀ ಪಯ್ಸ್ ಉತ್ತರ್ ಭಾರತಾಂತ್ ಜಾತಾ ಆನಿ ಆಮಿ ಕರ್ನಾಟಕಾಚೆ, ತಾಂತ್ಲ್ಯಾ ತಾಂತುಂ ಕರಾವಳೆಚೆ ಶಾಬಿತ್ ಮ್ಹಣ್ ದೊಳೆ ಧಾಂಪುನ್ ಬಸ್ಲ್ಯಾರ್ – ಸರ್ವಾಧಿಕಾರ್ ಆಮ್ಚ್ಯಾ ದಾರಾರ್ ಪಾವ್ಲಾ ಮ್ಹಣ್ಚ್ಯಾಕ್ ಶಾಸಕಾಂನಿ ಹಾಡ್‌ಲ್ಲಿ ಸ್ಟೇ ಏಕ್ ಟ್ರೇಲರ್! ಜರೀ ಕರಾವಳೆಚೊ ಲೋಕ್ ಆನಿ ಮಾದ್ಯಮಾಂ ಆತಾಂಯ್ ನೀದ್ ಪಾಪುಡ್ನ್ ಉಟಾನಾ ಜಾಲ್ಯಾರ್ ಭುರ್ಗ್ಯಾ-ಬಾಳಾಂಚೆಂ ಸೊಡಾ ಆಮ್ಚೆಂ ಫಾಲೆಂ ಕಿತ್ಲೆಂ ಸುರಕ್ಶಿತ್ ಸಾಂಗೊಂಕ್ ಜಾಯ್ನಾ.
ಕಾಲ್‌ಚ್ ಹಾಂವೆಂ ಏಕ್ ವೀಡಿಯೊ ಪಳಯ್ಲೊ. ಉಡುಪಿಂತ್ ದೆಶಾಚೊ ಘರ್‌ಮಂತ್ರಿ ಅಮಿತ್ ಶಾಚ್ಯಾ ರೋಡ್ ಶೋಚೊ. ವಾಹನಾರ್ ಮದ್ಗಾತ್ ಅಮಿತ್ ಶಾ ಮಾಯ್ಕ್ ಘೆವ್ನ್ ಉಲಯ್ತಾ. ಗೆಲ್ಲೆ ಗೆಲ್ಲೆ ಕಡೆ ಘರ್‌ಮಂತ್ರಿ ಶಾ ಸ್ತ್ರೀಯಾಂಕ್ ಮಾತಾಂವೋ ಮ್ಹಣ್ತಾ (ಮ್ಹಳ್ಯಾರ್ ಆವಯಾಂನೋ. ಪುಣ್ ಹಾಂತುಂ ಲಂಯ್ಗಿಕ್ ಶೋಶಣಾಕ್ ವೊಳಗ್ ಜಾಲ್ಲ್ಯೊ ಧರಣಾ ಬಸ್‌ಲ್ಲ್ಯೊ ಕುಸ್ತಿ ಖೆಳ್ಗಾಡಿ ಸ್ತ್ರೀಯೊ ನಾಂತ್) ಆನಿ ತರ್ನಾಟ್ಯಾಂಕ್ ಮೆರೆ ಜಿಗರ್ ಕೆ ತುಕ್ಡೆ ಮ್ಹಣ್ತಾ (ಹಾಂತುಂ ಜಯ್ಲಾಂತ್ ಆಸ್ಚೆ ತುಕ್ಡೆ ತುಕ್ಡೆ ಗ್ಯಾಂಗಾಚೆ ತರ್ನಾಟೆ ನಾಂತ್). ತಾಚ್ಯಾ ಉಜ್ವ್ಯಾಕ್ ಕರಾವಳೆಚೊ ಶಾಸಕ್ ಕೋಟ ಶ್ರೀನಿವಾಸ ಪೂಜಾರಿ ಆಸಾ. ದಾವ್ಯಾಕ್ ಆನ್ಯೇಕ್ ಮಾಲ್ಘಡೊ ಭಾಜಪಾ ಮುಕೆಲಿ ಅಮಿತ್ ಶಾಚೆಂ ಭಾಶಣ್ ಭಾಶಾಂತರ್ ಕರುಂಕ್ ರಾವ್ಲಾ. ಅಮಿತ್ ಶಾನ್ ತುಕ್ಡೆ ತುಕ್ಡೆ ಮ್ಹಣ್ತಾನಾ ಲೊಕಾಚಿ ಬೋಬ್ ಜಾತಾ ಆನಿ ಭಾಶಾಂತರ್‌ಕಾರ್ ಅಮಿತ್ ಶಾಕ್ ಕಿತೆಂಗೀ ಸಾಂಗೊಂಕ್ ಸೊಧ್ತಾ. ಅಮಿತ್ ಶಾ ತಾಚೆಂ ತೋಂಡ್ ಧಾಂಪಯ್ತಾ ಆನಿ ಮ್ಹಣ್ತಾ ತುಂ ಭಾಶಾಂತರ್ ಕರ್. ಅಮಿತ್ ಶಾಚಿ ಆಂಗಿಕ್ ಭಾಸ್ ಆನಿ ಭಾಶಾಂತರ್‌ಕಾರಾಚೆಂ ಬಾವ್‌ಲ್ಲೆಂ ತೋಂಡ್ ಪಳಯ್ತಾನಾ ಭಾಶಾಂತರ್‌ಕಾರಾಚೆರ್ ಬಿರ್ಮತ್ ಉಮಾಳೊನ್ ಯೆತಾ. ತಿತ್ಲ್ಯಾರ್ ಕೋಟ ಶ್ರೀನಿವಾಸ ಪೂಜಾರಿ ಅಮಿತ್ ಶಾಕ್ ಕಿತೆಂಗೀ ಸಾಂಗ್ಚೆಂ ಪ್ರೇತನ್ ಕರ್ತಾ. ಕೋಟ ಶ್ರೀನಿವಾಸ ಪೂಜಾರಿಕ್ ಅಮಿತ್ ಶಾ ಅಶೆಂ ಗೊವ್ಜಿ ಕರ‍್ನ್ ತಾಚೆಂ ತೋಂಡ್ ಧಾಂಪಯ್ತಾಗೀ, ಕೋಟಾಚೆಂಯ್ ತೋಂಡ್ ಬಾವ್ತಾ. ತರೀ ಬಾವ್ಡೊ ಹಾಸೊನ್ ಆಪ್ಲೆಂ ದೂಕ್ ಲಿಪಯ್ತಾ.
ಪುಣ್ ಪಾಟ್ಲ್ಯಾ ದಿಸಾಂನಿ ರಾಹುಲ್, ಪ್ರಿಯಾಂಕಾ ಗಾಂದಿ ಥಾವ್ನ್ ಧರುನ್ ಕೊಂಗ್ರೆಸ್ ಪಾಡ್ತಿಚ್ಯಾ ಖಂಯ್ಚ್ಯಾಯ್ ರಾಶ್ಟ್ರೀಯ್ ಮುಕೆಲ್ಯಾಂನಿ ಆಪ್ಲಿಂ ಭಾಶಣಾಂ ಭಾಶಾಂತರ್ ಕರ‍್ತಲ್ಯಾಂಲಾಗಿಂ ಜಾಂವ್, ಮಂತ್ರಿ-ಶಾಸಕಾಂಲಾಗಿಂ ಹ್ಯಾ ಮಟ್ಟಾಚಿ ’ಬತ್ತಮೀಜಿ’ ದಾಕಯಿಲ್ಲಿ ಮ್ಹಜ್ಯಾ ಗುಮಾನಾಕ್ ಯೇಂವ್ಕ್ ನಾ. ಮೈಸೂರಾಂತ್ ಪೋರ್ ಪ್ರಿಯಾಂಕ ಭಾಶಣ್ ಕರ‍್ತಾನಾ ಯತೀಂದ್ರಲಾಗಿಂ ತಿಚ್ಯೊ ಹಾಸೊ ಆನಿ ಉಲೊಣೆಂ ನಿಜಾಯ್ಕೀ ಮಾಯ್ಪಾಸಾನ್ ಭರ‍್ಲಲೆಂ ದಿಸ್ಲೆಂ.
ಆತಾಂ ಅಮಿತ್ ಶಾಚ್ಯಾ ಉಜ್ವ್ಯಾಕ್ ಆನಿ ದಾವ್ಯಾಕ್ ಉಬೆ ಕರಾವಳೆಚೆ ಹೆ ದೊಗೀ ಮುಕೆಲಿ ಅಮಿತ್ ಶಾಕ್ ಪ್ರಾಯೆನ್ ಮಾಲ್ಘಡೆ ಮಾತ್ರ್ ನ್ಹಯ್, ಕರಾವಳೆಂತ್ ಥಳಾಮಟ್ಟಾಥಾವ್ನ್ ಪಾಡ್ತ್ ಬಾಂದುನ್ ಹಾಡ್‌ಲ್ಲೆ ವಿಶ್ವಾಸಿ ಕಾರ್ಯಕರ್ತ್. ಪಾಡ್ತ್ ಲೊಕಾಚಿ, ಎಕ್ಲ್ಯಾ ದೊಗಾಚಿಂ ಖಾಸ್ಗಿ ಆಸ್ತ್ ನ್ಹಯ್. ಖಂಯ್ಚ್ಯಾಯ್ ಪಾಡ್ತಿಂತ್ ಆಸೊಂ – ಕರಾವಳೆಚೆ ಮನಿಸ್ ಆಮ್ಚೆ ಮನಿಸ್. ತಾಂಕಾಂ ತಾಂಚೊಚ್ ಭರ್ಮ್ ಆಸಾ, ಸ್ವಾಭಿಮಾನ್ ಆಸಾ. ಹ್ಯಾ ಗಾಂವಾಂತ್ ತಾಂಕಾಂ ತಾಂಚೆಚ್ ಮ್ಹಳ್ಳೆ ಅಭಿಮಾನಿ ಆಸಾತ್. ತಾಣಿಂ ದೀಸ್‌ರಾತ್ ಕಾಮ್ ಕೆಲ್ಲ್ಯಾನ್ ತುಮಿ ಪಾಡ್ತಿಚ್ಯಾ ನಾಂವಾನ್ ಆಜ್ ದೆಶಾಚ್ಯೆ ಗಾದಿಯೆರ್ ಬಸ್ಲ್ಯಾತ್ ಆನಿ ತಾಂಕಾಂಚ್ ಅಕ್ಮಾನ್ ಕೆಲ್ಯಾರ್ ಕಶೆಂ? ಹ್ಯಾ ಮಾಲ್ಘಡ್ಯಾ ಮುಕೆಲ್ಯಾಂಚಿ ಕೆಲ್ಲಿ ಬೆಇಜ್ಜದೀ, ಸ್ವಾಭಿಮಾನ್ ಆಸ್ಚ್ಯಾ ಕರಾವಳೆಚ್ಯಾ ಖಂಯ್ಚ್ಯಾಯ್ ನಿವಾಸಿಕ್ ಸಾರ್ಕಿ ದಿಸೊಂಕ್ ಸಾಧ್‌ಚ್ ನಾ.
ಕರಾವಳೆಚೊ ಲೋಕ್ ಬುದ್ವಂತ್ ಆಸಾ. ಜ್ಯೆ ಪಾಡ್ತಿಂತ್ ಥಳೀಯ್ ಮಂತ್ರಿ ಆನಿ ಶಾಸಕಾಂಕ್‌ಚ್ ಉಲೊಂವ್ಚೆಂ ಸ್ವತ್ರಂತ್ರ್ ನಾ, ತಸಲಿ ಏಕ್ ಪಾಡ್ತ್ ಅಧಿಕಾರಾಕ್ ಆಯ್ಲ್ಯಾರ್ ಫಾಲ್ಯಾಂ ಲೊಕಾಕ್ ಕಿತ್ಲೆಂ ಸ್ವತಂತ್ರ್ ಮೆಳತ್? ಮ್ಹಳ್ಳೆವಿಶ್ಯಾಂತ್ ಚಿಂತಿನಾಸ್ತಾನಾ ರಾವನಾ.
ತಕ್ಲೆಥಾವ್ನ್ ಕುಸೊಂಕ್ ಸುರು ಜಾಲ್ಲೆ ಮಾಸ್ಳೆಚಿ ಆತಾಂ ಶಿಮ್ಟಿಯ್ ಕುಸ್ಲ್ಯಾ ಮ್ಹಣ್ಚ್ಯಾಕ್ ದುಬಾವ್ ನಾ.
► ಎಚ್ಚೆಮ್, ಪೆರ್ನಾಲ್
2 comments
This “Chup Raho ” attitude is causing heart burn to many of the leaders. The idea of use and throw existed in Congress and it has crept to BJP also. When congress did it people jumped to BJP and said Hindutava agenda. Now the people who are with the agenda cannot get to other parties. So when denied ticket will start fighting independantly. Because they have grown to such an extent they think they are rulers to themselves and not to party. The best example of today are Arun Puttila and Pramod Mutalik. Who are exposing the party which they were part of earlier and fighting election as independent. The expose the supporters of Puttilla are doing is significant in the medias. This means no partry or supreme leader is surmountable, he has his end beginning and end. These party started telling a lie that we will give ticket next time and that never happened. So rebellion started. Everything which is started has to come to an end in these days of online media. For congress it took 60 years to loose power but for BJP it may be just 15 years or less when rebellion starts rooting.
ಹರ್ಯೆಕ್ಲ್ಯಾಚ್ಯಾ ಬ್ಯೇಂಕ್ ಖಾತ್ಯಾಂತ್ ಪಂದ್ರಾ ಲಾಖ್ ಘಾಲ್ತೆಲ್ಯಾಂವ್ ಮ್ಹಳೆಂ. ತೆಂ ಕಶೆಂ ಏಕ್ ಜುಮ್ಲಾ ಗೀ ತಶೆಂಚ್ ಹೆಂ ನಾ ಖಾವುಂಗಾ, ನಾ ಖಾನೆ ದೂಂಗಾ ವ್ಹಡ್ ಎಕ್ ಜುಮ್ಲಾ. ಹ್ಯಾಂ ಜುಮ್ಲಾಂ ವಯ್ರ್ ಆಧಾರಿತ್ ಜಾವ್ನ್ ಪದ್ವೆರ್ ಅಯಿಲ್ಲೆ ಮೋದಿ-ಶಾ ಆತಾಂ ಸರ್ವಾಧಿಕಾರಿ ಜಾಲ್ಯಾತ್. ಜಶೆಂ, ಇಂದಿರಾ ಗಾಂಧಿ ಬಾಂಗಾದೇಶ್ ಝುಜಾ ಉಪ್ರಾಂತ್ ತಿಚ್ಯೆ ಲೋಕಪ್ರಿಯತೆಚ್ಯಾ ಅಮಾಲಾರ್ ಜಾಲ್ಲಿ. This arrogance is the beginning of the end.