ಈಸ್ಟರ್ ತಾಂತಿಯಾಂತ್ಲೆಂ ಭಾಯ್ರ್ ಯೆಂವ್ಚೆಂ ಕೆದಾಳಾ ?

91

ಪವಿತ್ ಆತ್ಮ್ಯಾನ್ ಗುರ್ವಾರ್ ಜಾವ್ನ್ , ಅಂಕ್ವಾರ್ ಮರಿಯೆನ್ ಅನ್ಯೆಕಾ ಗಾಂವಾಂಕ್ ವಚೊನ್ ಬಾಳಂತ್ ಜಾಂವ್ಚೆ ಥಾವ್ನ್ ಧರುನ್, ಖುರ್ಸಾರ್ ಮರೊನ್  ತೀನ್ ದಿಸಾ ಉಪ್ರಾಂತ್ ಜೀವಂತ್ ಜಾವ್ನ್ ಪಯ್ಲ್ಯಾನ್ ಪಯ್ಲೆಂ ಮಾಗ್ದಲೆಚ್ಯಾ ಮರಿಯೆಕ್ ದಿಶ್ಟಿಕ್ ಪಡ್ಚೆ ಪರ್ಯಾಂತ್ – ತೆತ್ತೀಸ್ ವರ್ಸಾಂಚಿ ಜೆಜುಚಿ ಜಿಣಿ ‘ಭಾವಾಡ್ತಾಚೊ ಘುಟ್’ ಮ್ಹಣ್ ಸಮಡ್ತ್ ಶಿಕಯ್ತಾ ತರೀ, ಬರ್ಪಾಂತ್ ದಾಖಲ್ ಜಾಲ್ಲಿ ಫಕತ್ ತೀನ್ ವರ್ಸಾಂಚಿಂ ಜೆಜುಚಿ ಪರ್ಗಟ್ ಜಿಣಿ – ಪ್ರಭುತ್ವಾ ವಿರೋದ್ ಮಾಂಡ್‌ಲ್ಲೆಂ ಸಮರ್ಪಿತ್ ಸುಟ್ಕೆ ಝುಜ್ ಮ್ಹಣ್ಚ್ಯಾಕ್ ವಿಶೇಸ್ ಪುರಾವ್ಯಾಂಚಿಂ ಗರ್ಜ್ ದಿಸಾನಾ. ಸಮಡ್ತೆಚೆ ವ್ಹಡಿಲ್ ವಿಗ್ಯಾನಾಚೊ ಬೆಪಾರ್ವೊ ಕರ‍್ತಾತ್ ತರೀ, ಭಾವಾಡ್ತಾಚೊ ಘುಟ್ ಪಾಚಾರುಂಕ್ ಇತಿಹಾಸಾಚೊ ಆದಾರ್ ಯತೇಶ್ಟ್ ಘೆತಾತ್. ನತಾಲಾಂಚ್ಯಾ ಆನಿ ಪಾಸ್ಕಾಂಚ್ಯಾ ಕಾಳಾರ್, ಜುದೆವ್ ಸಂಪ್ರದಾಯ್ ಆನಿ ರಿತಿರಿವಾಜಿ ಉಲ್ಲೇಕ್ ಕರುನ್ ಪುಲ್ಪತ್ರಿಥಾವ್ನ್ ಪುರ್ವಿತಾಂನಿ ದಿಂವ್ಚೆ ಘಣ್ಗಣಿತ್ ಶೆರ‍್ಮಾಂವ್‌ಚ್ ಹಾಕಾ ಸಾಕ್ಸ್.

ಆಜ್ – ದೋನ್ ಹಜಾರ್ ವರ್ಸಾಂ ಉಪ್ರಾಂತೀ,  ‘ಸಿಂಗಲ್ ಮದರ್’ ವಾ ‘ಅಂಕ್ವಾರ್ ಆವಯ್ಪಣ್’ ಸ್ವೀಕಾರ್ ಕರುಂಕ್ ಸಮಾಜ್ ತಯಾರ್ ನಾ ಮ್ಹಣ್ತಕುಚ್, ಅಂಕ್ವಾರ್ ಮರಿಯೆಚ್ಯಾ ಉದರಿಂ ಜೆಜು ಪವಿತ್ರ್ ಆತ್ಮಾವರ್ವಿಂ ಜಲ್ಮಾಕ್ ಆಯ್ಲೊ ಮ್ಹಣ್ ಪಾತ್ಯೆಂವ್ಚ್ಯಾಂತ್ ವಿಶೇಸ್ ತಕ್ರಾರ್ ದಿಸಾನಾಂತ್. ಪೂಣ್ ಮಾಗ್ದಲಾಚ್ಯಾ ಮರಿಯೆನ್ ಸಿಮಾಂವ್ ಪೆದ್ರುಕ್ ಆನಿ ಜೆಜುಕ್ ಮೊಗಾಚೊ ಜಾವ್ನಾಸ್‌ಲ್ಲ್ಯಾ ಶಿಸಾಕ್  “ಸೊಮಿಯಾಕ್ ಫೊಂಡಾಂತ್ಲೊ ಕಾಡ್ನ್ ವ್ಹೆಲಾ. ಆನಿ ತಾಕಾ ಖಂಯ್ ದವರ್ಲಾ ಮ್ಹಣ್ ಆಮಿ ನೆಣಾಂವ್” (ಜುವಾಂವ್ 20 : 2 ) ಮ್ಹಣ್ಚೆಂ ವಕ್ತವ್ಯ್ ಕಿತ್ಯಾಕ್ ಸಮಾಜ್ ಅಜೂನ್ ಗಂಬೀರ್ಪಣಿ ಘೆತೇ ನಾ –  ಮ್ಹಳ್ಳೆ ವಿಶ್ಯಾಂತ್ ನಿಶ್ಚಿತ್ ಕುತೂಹಲ್ ಆಸಾ.

ಜೆಜುಚ್ಯಾ ಜಿವಂತ್ಪಣಾಚಿ ಪಯ್ಲಿ ಸಾಕ್ಸ್ ಮಾಗ್ದಲೆಚ್ಯಾ ಮರಿಯೆಚೆಂ ನಿವೇದನ್ ಶಿಸಾಂನಿ ಮಾತ್ ನಯ್, ವಾಂಜೆಲಿಸ್ತಾಂನೀಯ್ ಗಂಬೀರ‍್ಪಣಿ ಘೆತ್‌ಲ್ಲೆಂ ದಿಸಾನಾ. ಜುವಾಂವ್ಕ್ ಸೊಡ್ಲ್ಯಾರ್ ಹೆರ್ ವಾಂಜೆಲಿಸ್ತಾಂನಿ ತಿಚೆಂ ‘ನಿವೇದನ್’ ಸುವಾರ‍್ತೆಂತ್  ದಾಖಲ್  ಕೆಲ್ಲೇಂಯ್ ದಿಸೊನ್ ಯೇನಾ. ಬಗಾರ್ ತಿಕಾ ‘ವಾಯ್ಟ್ ಚಾಲಿಚಿ ಸ್ತ್ರೀ’ ಮ್ಹಣ್ ಪಿಂತ್ರಾಯಿಲ್ಲೆಂ ದಿಸ್ತಾ. ಲುಕಾಚ್ಯಾ ವಾಂಜೆಲಾಂತ್ (8:2)  ಮಾಗ್ದಲೆಚ್ಯಾ ಮರಿಯೆಕ್ ‘ಸಾತ್ ದೆಂವ್ಚಾರಾಂ ಥಾವ್ನ್ ಸುಟ್ಕಾ ಜೊಡ್ಲೆಲಿ ಸ್ತ್ರೀ’ ಮ್ಹಳಾಂ. (ಪಾಪಾ ಗ್ರೆಗೊರಿ ಪಯ್ಲ್ಯಾನ್  ಚಡುಣೆಂ ಸ ಶತಮಾನಾಂ ಉಪ್ರಾಂತ್  591  ವ್ಯಾ ವರ್ಸಾ ಮಾಗ್ದಲಾಚ್ಯಾ ಮರಿಯೆಕ್ ಲುಕಾಚ್ಯಾ ಸುವಾರ್ತೆಂತ್ ‘ಪಾತ್ಕಿ ಸ್ತೀ’ ಕೆಲೆಂ ಮ್ಹಣ್ ಇತಿಹಾಸ್ ಸಾಂಗ್ತಾ )  ಥಂಯ್ಚ್ ಮುಕಾರುನ್ ಲೂಕ್ ಮ್ಹಣ್ತಾ “ಖೂಜಾ ನಾಂವಾಚ್ಯಾ ಹೆರೊದಿಚ್ಯಾ ಕಾರ‍್ಬಾರ‍್ಯಾಚಿ ಬಾಯ್ಲ್ ಜುವಾನ್, ಸುಸಾನ್ನಾ ಆನಿ ಹೆರ್ ಸಬಾರ್ ಜಣಾಂ; ಹಿಂ ಆಪ್ಲ್ಯಾ ‘ದುಡ್ವಾಬದ್ಕಾ’ ನ್ ಜೆಜುಚ್ಯೊ ಆನಿ ತಾಚ್ಯಾ ಶಿಸಾಂಚ್ಯೊ ಗರ್ಜೊ ಸುಧಾರ‍್ಸಿತಾಲಿಂ”

ಮ್ಹಳ್ಯಾರ್ – ಪ್ರಭುತ್ವಾ ವಿರೋದ್ ಜೆಜುಚ್ಯಾ  ಸಮರ್ಪಿತ್ ಸುಟ್ಕೆಝುಜಾಂತ್ ದಾದ್ಲ್ಯಾಂ ತಿತ್ಲೊಚ್ ವಾ ಚಡ್‌ಚ್ ಮ್ಹಣ್ಚೆತಸಲೊ  ಸ್ತ್ರ‍ಿಯಾಂಚೊಂಯ್ ವಾಂಟೊ ಆಸ್ಲೊ  ಮ್ಹಳ್ಳೆಂ ನಿಶ್ಚಿತ್. ಆನಿ ಹ್ಯಾ ಸಬಾರ್ ಸ್ತ್ರೀಯಾಂ ಪಯ್ಕಿ ಹೆರೊದಿಚ್ಯಾ ಕಾರ‍್ಬಾರ‍್ಯಾಚಿ ಬಾಯ್ಲ್ ‘ಜುವಾನ್’ ಶಾಮೀಲ್ ಆಸ್ಲಿ ಮ್ಹಳ್ಯಾರ್ – ತ್ಯಾ ಕಾಳಾಚೊ ಪ್ರಭುತ್ವ್ ಖಂಯ್ಚ್ಯಾ ಮಟ್ಟಾಕ್ ಪರ್ಜೆಚೆರ್ ಜುಲುಮ್ ಚಲಯ್ತಾಲೊ ಮ್ಹಳ್ಳೆವಿಶ್ಯಾಂತ್ ಅಂದಾಜ್ ಲಾವ್ಯೆತ್.

ಆತಾಂ ಪ್ರಶ್ನ್ ಉರ‍್ತಾ – ಮರಿ, ಅಂಕ್ವಾರ್ ಆವಯ್ ಜಾವ್ನ್ ಜೆಜುಕ್ ಜಲ್ಮ್ ದೀವ್ನ್ ಆನಿ ಜೆಜು, ಖುದ್ ಖುರ್ಸಾರ್ ಮರೊನ್ – ಪ್ರಭುತ್ವಾಚ್ಯಾ ಪಾಸಾಂತ್ಲೆ ಪರ್ಜೆಕ್ ಸುಟ್ಕಾ ದೀಂವ್ಕ್ ಸಕ್ಲಿಂ ?

ಪ್ರಭುತ್ವಾ ವಿರೋದ್ ಜೆಜುನ್ ಝುಜ್ಲೆಲ್ಯಾ ಸಮರ್ಪಿತ್ ಸುಟ್ಕೆಝುಜಾಚ್ಯಾ ಸಂದರ್ಬಾರ್ ಪಳಯ್ಲ್ಯಾರ್ – ಜೆಜುಚೊ ಜಲ್ಮ್ ಆನಿ ಮರಣ್; ಮರಿಯೆಚೆಂ ಎಜಿಪ್ತಾಕ್ ಪಲಾಯನ್ ಆನಿ ಜಿವಂತ್ ಜೆಜುಚೆಂ ಸರ್ಗಿಂವ್ಹರಣ್ – ಪ್ರಭುತ್ವಾಚ್ಯಾ ದಾವ್ಲೆಥಾವ್ನ್ ಪರ್ಜೆಕ್ ಸುಟ್ಕಾ ದಿಂವ್ಚ್ಯಾಕ್ ಕಾಡ್ಲೆಲಿಂ ಪ್ರಮಾಣಿತ್ ಪರಿಣಾಮಾಚಿಂ ಪಾವ್ಲಾಂ ಮ್ಹಣ್ಚ್ಯಾಕ್  ದುಬಾವ್ ನಾ.  ಮರಿಯೆಕ್ ಬಾಳ್ಶ್ಯಾ ಜೆಜುಕ್ ಘೆವ್ನ್ ಎಜಿಪ್ತಾಕ್ ಪೋಳ್ನ್ ವೆಚಿ ವಾಟ್  ತರೀ ಉಗ್ತಿ  ಆಸ್ಲಿ . . . ಪೂಣ್ ಜೆಜುಕ್  ಖುರ್ಸಾರ್ ಮರ್ಚೆಂ ಸೊಡ್ಲ್ಯಾರ್ ದುಸ್ರೊ ಪರ್ಯಾಯ್ ಕಾಂಯ್ ಆಸ್ಲೊ? ಸತಾಕ್ ಪಾಟ್ ಕೆಲ್ಲಿ ತರ್ ಬೋವ್‌ಶಾ ಜೆಜು ಬಚಾವ್ ಜಾತೊ. ಪೂಣ್ ತಾಣೆ ತಶೆಂ ಕೆಲೆಂ ನಾ, ತೋ ಸತಾ ಸಾಂಗಾತಾ ರಾವ್ಲೊ, ಜಶೆಂ ಜೆಜುಕ್ ದೀಕ್ಶಾ ದಿಲ್ಲೊ ಸ್ನಾನ್‌ದಾತಾರ್ ಜುವಾಂವ್ ಸತಾ ಸಾಂಗಾತಾ ಘಟ್ ರಾವ್‌‌‌‌‌ಲ್ಲೊ. ಹೆರೊದಿನ್ ಆಪ್ಲ್ಯಾ ಭಾವಾ ಫಿಲಿಪಾಚೇ ಬಾಯ್ಲೇ ಹೆರೊದಿಯಸಾಕ್ ಲಾಗುನ್ ಜುವಾಂವ್ಕ್  ಕಯ್ದ್ ಕರ್ನ್ ಬಂದೆಂತ್ ಘಾಲ್ಲೊ. ಕಾರಣ್ “ತುವೆಂ ತಿಕಾ ದವರ್ನ್ ಘೆಂವ್ಚೆಂ ಸಾರ್ಕೆಂ ನ್ಹಯ್”  ಮ್ಹಣುನ್ ಜುವಾಂವ್ನ್ ತಾಕಾ ಸಾಂಗ್‌ಲ್ಲೆಂ. (ಮಾತೆವ್ 14 : 3 – 4)

ತೀನ್ ವರ‍್ಸಾಂಚ್ಯಾ ಆಪ್ಲ್ಯಾ ಪರ್ಗಟ್ ಜಿಣ್ಯೆಂತ್ ಜೆಜು ಪರ್ತ್ಯಾನ್ ಆನಿ ಪರ್ತ್ಯಾನ್ ‘ಸುಟ್ಕೆ’ ವಿಶ್ಯಾಂತ್ ಉಲಯ್ತಾ ಆನಿ  ‘ಸತ್ ಮಾತ್ರ್ ಸುಟ್ಕಾ ದೀಂವ್ಕ್ ಸಕ್ತೆಲೆಂ’ ಮ್ಹಣ್ತಾ. “ತುಮಿ ಸತ್ ಜಾಣಾ ಜಾತೆಲ್ಯಾತ್ ಆನಿ ಸತ್ ತುಮ್ಕಾಂ ಸುಟ್ಕಾ ದಿತಲೆಂ” (ಜುವಾಂವ್ 8:32) ಫಕತ್ ಜುವಾಂವ್ಚ್ಯಾ ವಾಂಜೆಲಾಂತ್ ‘ಸತ್ ‘ ಮ್ಹಳ್ಳ್ಯಾ ಸಬ್ದಾಚೊ ವಾಪಾರ್ 25  ಪಾವ್ಟಿಂ ಜಾಲ್ಲೊ ದಿಸ್ತಾ.

ಜೆಜುಚೊ ಜಲ್ಮ್, ಪರ‍್ಗಟ್ ಜಿಣಿ ಆನಿ ಶಿಕೊವ್ಣ್ ಆಜ್ ಸಮಾಜ್ ವಿಗ್ಯಾನಾಚೆ ದಿಶ್ಟಿನ್ ಪಳಯ್ಜೆ ಜಾಲ್ಲಿ  ವ್ಹಡ್ ಗರ‍್ಜ್ ಆಸಾ. ದೋನ್ ಹಜಾರ್ ವರ‍್ಸಾಂ ಆದಿಂ ಜೆಜುನ್ ಪ್ರಭುತ್ವಾಚ್ಯಾ ದಾವ್ಲೆಥಾವ್ನ್ ಲೊಕಾಕ್ ಸುಟ್ಕಾ ದೀಂವ್ಕ್ ಕೆಲ್ಲ್ಯಾ ಸತಾಚೊಚ್ ಪ್ರಯೋಗ್‌ ಮೋಹನ ದಾಸ ಕರಮಚಂದ ಗಾಂದಿನ್ ಕೆಲೊ ಆನಿ ದೆಶಾಕ್ ಸುಟ್ಕಾ ದಿಲಿ. ಖಂಯ್ಚ್ಯಾ ಸಕ್ತೆಂನಿ ಸತಾಚ್ಯಾ ವಾಟೆರ್ ದೆಶಾಕ್ ಸುಟ್ಕಾ ಜೋಡ್ನ್ ದಿಲ್ಲ್ಯಾ ಗಾಂದಿಚಿ ಹತ್ಯಾ ಕೆಲಿಗೀ, ತ್ಯೊಚ್ ಸಕ್ತ್ಯೊ  ಆಜ್ ಪ್ರಭುತ್ವಾಚೆರ್ ಪಾವ್ಲ್ಯಾತ್.  ಆನಿ ಹ್ಯಾ ಪಾಟಿಥಳಾರ್ ಆಮಿ ಪಾಸ್ಕಾಚೆಂ ಆಚರಣ್ ಕರುನ್ ಆಸಾಂವ್.

ಆಜ್ – ಜೆಜುಚಿ ಶಿಕೊವ್ಣ್ ಸಮಾಜ್ ವಿಗ್ಯಾನಾಚ್ಯಾ ದಿಶ್ಟಿನ್ ಸಮ್ಜೊಂಚೆಂ ಪ್ರಾಮಾಣಿಕ್ ಪ್ರೇತನ್ ಕರಿನಾಂವ್ ಜಾಲ್ಯಾರ್ ಪಾಸ್ಕಾಂಚ್ಯಾ ಸಂಭ್ರಮಾಕ್ ಕಸಲೊಚ್ ಅರ್ಥ್ ನಾ. ದೋನ್ ಹಜಾರ್ ವರ್ಸಾಂ ಆದಿಂ, ಜೆಜುನ್ ಖುಶೆನ್ ಖುರ‍್ಸಾರ್ ಮರೊನ್, ತಾಚ್ಯಾ ಮರ‍್ಣಾ ಉಪ್ರಾಂತ್ ಪರ್ಜೆಕ್ ಸುಟ್ಕಾ ಜೊಡುನ್ ದಿಲಿ ತರ್, ದೇಶ್ ಸ್ವತಂತ್ರ್ ಕೆಲ್ಲ್ಯಾ ಕಾರಣಾಕ್ ಮಹಾತ್ಮ ಗಾಂದಿಚಿ ಹತ್ಯಾ ಜಾಲಿ. ಜೆಜು, ಗಾಂದಿ ತಸಲ್ಯಾಂನಿ ಸುಟ್ಕೆಕ್ ಸತಾಚ್ಯೆ  ವಾಟೆರ್ ಚಲೊನ್ ‘ವಾಟ್’ ತಯಾರ್ ಕರುನ್ ದವರ್‌ಲ್ಲಿ ಆಸ್ತಾಂ, ತ್ಯಾಚ್ ವಾಟೆರ್ ಚಲೊನ್ ಸುಟ್ಕಾ ಜೊಡುಂಕ್ ನೆಲ್ಸನ್ ಮಂಡೇಲಾಕ್ ಸಲೀಸ್ ಜಾಲೆಂ.

ಆಜ್, ಪ್ರಭುತ್ವಾಚ್ಯಾ ದಾವ್ಲೆಥಾವ್ನ್ ಪರ್ಜೆಕ್ ಸುಟ್ಕಾ ದೀಂವ್ಕ್ ಖುರ್ಸಾರ್ ಮರಜೆಚ್ ತಸಲಿ ಅನಿವಾರ್ಯ್ ಪರಿಸ್ಥಿತಿ ಕಾಂಯ್ ನಾ. ಗರ್ಜ್ ಆಸಾ – ಫಕತ್ ಸತಾಕ್ ಸಾಂಗಾತ್ ದಿಂವ್ಚಿ. ಸ್ನಾನ್‌ದಾತಾರ್ ಜುವಾಂವ್ ಪರಿಂ “ತುವೆಂ ಕರುನ್ ಆಸ್ಚೆಂ ಸಾರ್ಕೆಂ ನ್ಹಯ್” ಮ್ಹಣ್ ಸಾಂಗ್ಚಿ. ಹೆರೊದ್ ರಾಯ್  ಪಯ್ಸ್ ಆಸ್ಲ್ಯಾರ್ , ಬಗ್ಲೆನ್‌‌ಚ್ ಆಸ್ಚ್ಯಾ ಹೆರೊದಿಚ್ಯಾ ಪಾಟ್ಲಾವ್‌ದಾರಾಂಕ್ ತರೀ ಧಯ್ರಾನ್ ಸಾಂಗ್ಚಿ.

ದೋನ್ ಹಜಾರ್  ವರ್ಸಾಂ ಉಪ್ರಾಂತೀ . . . ಇತ್ಲೆಂಯ್ ಸಾದ್ಯ್  ಜಾಯ್ನಾ ಜಾಲ್ಯಾರ್ . . .  ಕ್ರೀಸ್ತಾಂವ್ ಸೊಂಶ್ಯಾಂನಿಂ ಇಗರ್ಜೆಚ್ಯಾ ‘ಈಸ್ಟರ್’ ತಾಂತಿಯಾಂತ್ಲೆಂ  ಭಾಯ್ರ್ ಯೆಂವ್ಚೆಂ ಕೆದಾಳಾ ?  ಸಮಡ್ತಿಚ್ಯಾ  ವ್ಹಡಿಲಾಂನಿ  ವಸಂತ್ ಋತು ಫೆಸ್ತಾ ದಬಾಜ್ಯಾಂತ್ಲೆಂ ಪಿಂಜ್ರ್ಯಾಂತ್ ಪೊಸುನ್ ದವರ್ಲೆಲ್ಯಾ  ಸೊಂಶ್ಯಾಂಕ್ ಸತಾಚ್ಯಾ ವಾಟೆರ್ ಸೊಡ್ವಣೆಚ್ಯಾ ಕುಶಿನ್ ಚಲುಂಕ್ ಶಿಕಂವ್ಚೆಂ ಕೆದಾಳಾ ?

► ಎಚ್ಚೆಮ್, ಪೆರ್ನಾಲ್