ವಲ್ಲಿ ಕ್ವಾಡ್ರಸ್ ಆಜೆಕಾರ್

ಪ್ರಸ್ತುತ್ ಮುಂಬಯ್ಚೊ ನಿವಾಸಿ ವಲೇರಿಯನ್ ಆಲ್ವಿನ್ ಕ್ವಾಡ್ರಸ್, ವಲ್ಲಿ ಕ್ವಾಡ್ರಸ್ ಅಜೆಕಾರ್ ಲಿಖ್ಣೆನಾಂವಾನ್ ಬರಯ್ತಾ. ಸಾಡೆ ತಿನ್ಶ್ಯಾಂಕ್ ಮಿಕ್ವೊನ್ ಕವಿತಾ, ಅಡೇಯ್ಶ್ಯಾಂಕ್ ಮಿಕ್ವೊನ್ ಮೊಟ್ವ್ಯೊ ಕಾಣಿಯೊ, ಸ ಕಾದಂಬರಿ, ಸಾತ್ ನಾಟ್ಕುಳೆ ಆನಿ ಜಾಯ್ತಿಂ ಲೇಕನಾಂ ಫಾಯ್ಸ್ ಜಾಲ್ಯಾಂತ್. ಆಶಾವಾದಿ (2001), ಖಿಳೊ (2003), ಸತಾಂ ಆನಿ ಖತಾಂ (2005), ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ (2005), ಬಂಧ್ (2017) ತಾಚೆ ಕಥಾಜಮೆ. ಚ್ಯಾರ್ ಮುಖಾಂ (2003), ಕಟ್‌ಪುತ್ಳಿ (2005), ದರ್ಭಾರಾಂತ್ಲಿ ಪಿಂರ್ಗೊಣ್ (2006), ಬಜಾರ್ (2017), ಭಿತರ್ಲೊ ಕವಿ (2020) ತಾಚೆ ಕವಿತಾಜಮೆ. ಕವಿತಾಪಾಠ್ (2004) ದರ್ಯಾಕ್ ಉದಕ್ (2005), ಕಾಳೊಕ್ ನಾತ್ಲೊ ಗಾಂವ್ (2006), ಮುಗ್ದನಾತ್ಲಿಂ ಗಿತಾಂ (2017), ಸುಕ್ತಿ ಭರ್ತಿ (2018) ಕವಿತಾ ಅಧ್ಯಯನ್ ಪುಸ್ತಕಾಂ. ’20 ವ್ಯಾ ಶೆಕ್ಡ್ಯಾಚ್ಯೊ ಕೊಂಕಣಿ ಕಾಣಿಯೊ (2006)’, ಸುರ‍್ಯೊ ಉದೆತಾ (2019) ಸಂಪಾದಿತ್ ಕಾಣಿಯಾಂ ಬೂಕ್. ಮೊತಿಯಾಂ ಆನಿ ತಾರಾಂ (2004), ತಿಂತೆರಾಂತ್ ಪಿಂತುರಾಂ (2006), ಶಿಂಪಡ್ಲೆಲಿಂ ಮೊತಿಯಾಂ (2006), ಮಯ್ಲಾ ಫಾತರ್ (2019) ಸಂಪಾದಿತ್ ಕವಿತಾ ಬೂಕ್. ಆಶಾವಾದಿ ಪ್ರಕಾಶನಾಚೊ ಸಂಪಾದಕ್ ಜಾವ್ನ್ ಪನ್ನಾಸ್ ಬೂಕ್ ಸಂಪಾದನ್ ಕರುನ್ ಪರ್ಗಟ್ಲ್ಯಾತ್. ಪ್ರಸ್ತುತ್ ಪಯ್ಣಾರಿ.ಕೊಮ್ ಚೊ ಸಂಪಾದಕ್. ದಿವೊ ಸಾಹಿತ್ಯಿಕ್ ಪುರಸ್ಕಾರ್ (2003) ತೀನ್ ಪಾವ್ಟಿಂ ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚೆಂ ಉತ್ತೀಮ್ ಪುಸ್ತಕ್ ಪುರಸ್ಕಾರ್ (ಕವಿತಾಪಾಠ್, 2005, ದರ್ಭಾರಾಂತ್ಲಿ ಪಿಂರ್ಗೊಣ್, 2006, ಬಂಧ್, 2018), ಕವಿತಾ ಟ್ರಸ್ಟಾಚೊ ಮಥಾಯಸ್ ಕುಟ್ಮಾಚೊ ಪುರಸ್ಕಾರ್ (2019), ವಿಶ್ವ್ ಕೊಂಕಣಿ ಕೇಂದ್ರಾಚೊ ವಿಮಲಾ ವಿ. ಪೈ. ಫೌಂಡೇಶನಾಚೊ ಪುರಸ್ಕಾರ್ (ಭಿತರ್ಲೊ ಕವಿ, 2022) ಆನಿ ದಾಯ್ಜಿದುಭಾಯ್ ಸಾಹಿತ್ಯಿಕ್ ಪುರಸ್ಕಾರ್ (2023) ತಾಕಾ ಲಾಭ್ಲ್ಯಾತ್.