2023 ಅಕ್ತೋಬರಾಚ್ಯಾ 26 ವೆರ್ ಆಯ್ಕೊಂಕ್ ನಾಕಾ ಜಾಲ್ಲಿ, ಆಯ್ಕೊಂಕ್ ಸಖಾತ್ಲೆಲಿ ಖಬರ್ ಆಯ್ಕೊನ್ ಖಿಣಾನ್ ಹಾಂವ್ ಥಂಯ್ಚ್ ಆಮ್ಚ್ಯಾ ಘರ್ಚ್ಯಾ ಸೊಫಾಚೆರ್ ಗಳ್ಳೊಂ. ತ್ಯಾಚ್ಚ್ ಸೋಫಾಚೆರ್ ಆಮಿ, ಹಾಂವೆ ಆನಿ ಎಡ್ವಿನಾನ್ ಸಾಂಗಾತಾ ಬೊಸ್ಚೆಂ ಆಸ್‌ಲ್ಲೆಂ.
ಉಪ್ರಾಂತ್ಲ್ಯಾ ಏಕ್-ದೇಡ್ ವರಾನ್ ಹಾಂವ್ ಎಡ್ವಿನಾಚ್ಯಾ ಘರಾ ಪಾವ್ಲೊಂ. ತ್ಯಾ ದೀಸ್ ಬಾಗ್ಲಾರ್ ರಾವೊನ್ ‘ರೋನ್…’ ಮ್ಹಣ್ ಆರಾವ್ನ್ ಯೆವ್ಕಾರ್ ಕರ್ಚೊ ಎಡ್ವಿನ್ ಥಂಯ್ಸರ್ ನಾತ್‍ಲ್ಲೊ! ಕಾಂಪ್ಚ್ಯಾ ಪಾಂಯಾನಿಂ ಭಿತರ್ ಮೆಟಾಂ ಘಾಲ್ತಾಸ್ತಾನಾಂ … ತೊ ಮ್ಹಜ್ಯಾ ಮುಕಾರ್‌ಚ್ಚ್ ಆಸ್‌‌‌‌‌ಲ್ಲೊದಿಸ್ಲೊ. ಪೂಣ್ ತೊ ಮಾಕಾ ಆರಾಂವ್ಕ್ ಆಯ್ಲೊನಾಂ. ಫಕತ್ ಅಮೃಕೊ ಹಾಸೊ ದಿವುನ್ ಆಸ್‌ಲ್ಲೊ, ತಸ್ವಿರೆಂತ್ಲ್ಯಾನ್.
ಹರ್ಶೆಂ ಎಡ್ವಿನ್ ಬಸುನ್ ಆಸ್ಚ್ಯಾ ಜಾಗ್ಯಾರ್, ತ್ಯಾ ದೀಸ್ ತಾಚಿ ಪತಿಣ್ ಜೇನ್ ಬಾಯ್ ಬಸುನ್ ಆಸ್‌ಲ್ಲಿ, ಆನಿ ಹಾಂವ್ ಥಂಯ್ಚ್ ಆಸ್ಲೆಲ್ಯಾ ಸೋಫಾಚೆರ್ ಬಸ್ತಾಸ್ತಾಂ ಎಡ್ವಿನ್ ತಸ್ವೀರೆಂತ್ಲ್ಯಾನ್ ಆಮ್ಕಾಂ ಅಮೃಕೊ ಹಾಸೊ ದೀವ್ನ್ ಆಸುಲ್ಲೊ. ಮ್ಹಜ್ಯಾ ಸಂಗಿಂ ಆಯ್ಲೆಲೆ ಮಾಚ್ಚಾ ಆನಿ ಜೊಕಿ ಮ್ಹಜ್ಯಾ ಬಗ್ಲೆಕ್ ಬಸ್ತಾಸ್ತಾನಾಂ … ಥಂಯ್ಸರ್ ಎಡ್ವಿನಾಚ್ಯಾ ತಸ್ವಿರೆ ಭಂವ್ತಿ ಬಸ್ಲೆಲ್ಯಾ ತಾಚ್ಯಾ ಕುಟ್ಮಾದಾರಾಲಾಗಿಂ ಜೇನ್ ಬಾಯ್ ಮ್ಹಣಾಲಾಗ್ಲಿ ‘ಹೆ ಎಡ್ವಿನಾ ಸಂಗಿ ಮಹಿನ್ಯಾಕ್ ಏಕ್ ಪಾವ್ಟಿಂ ಮೆಳ್ಚೆ ತಾಚೆ ಖಾಸ್ ಸಾಂಗಾತಿ ಮಿತ್ರ್’
ಹೆಂ ಅಯ್ಕೊನ್ ‘ಆನಿ ತೊ ಮಾಕಾ ನಾಂ…!’ ಮ್ಹಳ್ಳೆಂ ಮತಿಂ ಜಗ್ಲಾತಾನಾಂ…ಮ್ಹಜೆ ಸಂಗಿ ತವಳ್ ತವಳ್ ಪೊನಾರ್ ತಶೆಂ ಮುಖಾಮುಖಿ ಉಲವ್ನ್ ಆಸ್ಚೊ ಎಡ್ವಿನ್ ಆನಿ ಮಾಕಾ ನಾಂ… ಮ್ಹಳ್ಳೆಂ ಚಿಂತುನ್ ಕಾಳ್ಜಾಂತ್ ಬರೊಚ್ಚ್ ರಡ್ಲೊಂ ಹಾಂವ್!
ಎಡ್ವಿನ್ ಅಂತರೊನ್ ವರಸ್ ಸಂಪ್ಲೆಂ. ವರ್ಸಾ ಆದಿಂ ತೊ ಸಂಸಾರಾಕ್ ಸರ್ಲೊ ತರೀ, ಕೊಂಕ್ಣಿ ಸಾಹಿತ್ಯಾಂತ್ ಜೀವ್ ಆಸಾ ಆನಿ ಕೊಂಕಣಿ ಸಾಹಿತ್ಯ್ ಆಸ್ತಾ ಪರ್ಯಾಂತ್ ತೋ ಅಮರ್ ಆಸ್ತಲೊಚ್. ತಾಚೆಂ ತೆಂ ಗೂಂಡ್ ಚಿಂತ್ಪಾಚೆಂ ಉಂಚ್ಲೆಂ ಕೊಂಕ್ಣಿಂ ಸಾಹಿತ್ಯ್, ವರ್ಸಾಂ ವರ್ಸಾಂ ಪರ್ಯಾಂತ್ ಉರ್ತೆಲೆಂ. ಆನಿ ತೊ ತಾಚ್ಯಾ ತ್ಯಾ ಉಂಚ್ಲ್ಯಾ ಪ್ರಬುದ್ದ್ ಜಾಣ್ವಾಯಾಚ್ಯಾ ಚಿಂತ್ಪಾಕ್ ಈಟ್ ದಿಂವ್ಚ್ಯಾ ಸಾಹಿತ್ಯಾ ಮುಖಾಂತ್ರ್ ಆಮ್ಚೆ ಸಂಗಿ ಉಲಯ್ತ್, ಸಂವಾದ್ ಚಲಯ್ತ್ ಆಸ್ತೊಲೊ!
ತಾಚ್ಯೊ, ಪಿಲಾತೆಚೆಂ ಫರ್ಮಾಣ್, ಹಾಂವ್ ಜಿಯೆತೊಲೊಂ, ಉಣ್ಯಾ ಭಾವಾಡ್ತಾಚೆ, ಜೊವ್ಳಿಂ ವಜ್ರಾಂ, ರೆಂವೆಂತ್ಲೆ ಫಾತೊರ್, ಬ್ಲೋಂಡಿ ಇತ್ಯಾದಿ ಕಾದಂಬರಿ, ತಶೆಂಚ್ಚ್ ಮಟ್ವಿ ಕಾಣಿಯೊ ಚೊಕ್ಲೆಟಾಂ, ಕಾಗ್ದಾಚಿ ಸ್ತ್ರೀ ಇತ್ಯಾದಿ, ಆನಿ ತ್ಯಾಚ್ಚ್ ಪರ್ಮಾಣೆಂ ತಾಚಿಂ ಸಬಾರ್ ವಿವಿದ್ ಥರಾಚಿಂ ಲೇಖನಾಂ, ಮುಕ್ಲೆಂ ಜನಾಂಗ್ ಖಂಡಿತ್ ಜಾವ್ನ್, ಸೊಧುನ್ ಉಸ್ತುನ್ ವಾಚ್ತೆಲೆಂ ತೆಂ ಖಂಡಿತ್.
ಜಶೆಂ ಮ್ಹಜ್ಯಾ ಕಾಳ್ಜಾ ಮನಾಂತ್ ಸದಾಂಚ್ಚ್ ತಾಚಿ ಯಾದ್ ಧೊಸುನ್ ಆಸ್ಲೆಲೆಪರಿಂ, ತಾಚೊ ತೊ ‘ರೋನ್…’ ಮ್ಹಣ್ ಆಪಂವ್ಚೊ ತಾಳೊ ಸದಾಂ ಮ್ಹಜ್ಯಾ ಕಾನಿಂ ಘುಣ್ಘುಣುನ್ ಆಸ್ತೊಲೊ. ಮ್ಹಜ್ಯಾ ಲಿಖ್ಣೆವಿಶಿಂ ಮ್ಹಾಕಾ ತೊ ಜಾಗೊವ್ನ್‌ಚ್ ಆಸ್ತೊಲೊ, ಜಶೆಂ ತೊ ತೆನ್ನಾಂ ತೆನ್ನಾಂ ಮ್ಹಜ್ಯಾ ಬರ್ಪಾಂಚೇರ್ ಮ್ಹಾಕಾ ಸಲಹಾ ಹಿಶಾರೆ ದೀವ್ನ್ ಆಸ್‌ಲ್ಲೊ.
ತಾಣೆಂ ಮಾಕಾ ಪಯ್ಲೆಂ ಫೋನ್ ಕೆಲ್ಲೆಂ, ಸುಮಾರ್ ಬಾರಾ ತೆರಾ ವರ್ಸಾಂ ಆದಿಂ. ತ್ಯಾದೀಸ್, “ರೋನ್ ಆಮ್ಗರ್ ಹಾಂವೆ ಏಕ್ ಗೆಟ್ಟ್ ಟು ಗೆದರ್ ದವರ್ಲಾಂ. ತಾಕಾ ತುಂವೆ ಯೇಂವ್ಕ್ ಜಾಯ್”
“ಶುವರ್… ಖಂಡಿತ್ ಜಾವ್ನ್ ಯೆತಾಂ…” ಮ್ಹಳೆಂ ಹಾಂವ್ ಬೋವ್ ಸಂತೋಸಾನ್. ಕಿತ್ಯಾಕ್ ಮ್ಹಳ್ಯಾರ್ ಗಂಭೀರ್ ಸ್ವಭಾವಾಚ್ಯಾ ಎಡ್ವಿನಾ ಲಾಗಿಂ ಉಲೊಂವ್ಚೆಂ ಮ್ಹಳ್ಯಾರ್ ಏಕಾ ಥರಾಚಿ ಕಸಲಿಗೀ ಅವೆಕ್ತ್ ಭಿರಾಂತ್, ಮ್ಹಜೆ ಥಂಯ್ ರೊಂಬುನ್ ಆಸ್‌ಲ್ಲಿ. ಏಕ್ ಪಾವ್ಟಿಂ ಎಕಾ ಫಿಲಂ ಥಿಯೆಟರಾಂತ್ ಆಮಿ ಪಯ್ಸ್ ಥಾವ್ನ್‌ಚ್ ಎಕಾಮೆಕಾ ಹಾತ್ ಹಾಲಯಿಲ್ಲೆ ಸೊಡ್ಲ್ಯಾರ್ ತಾಚೆಲಾಗಿಂ ಬೋವ್ ಲಾಗ್ಶಿಲಿ ಸಳಾವಳ್ ಮ್ಹಾಕಾ ನಾತ್‌ಲ್ಲಿ.
ಖಂಯ್ಚ್ಯಾಗೀ ಎಕಾ ಸಾಹಿತ್ಯ್ ಎಕಾ ಸಾಹಿತ್ಯ್ ಸಮ್ಮೇಳನಾವೆಳಾ, “ಎಡ್ವಿನ್ ತುಂ ಬೆಂಗ್ಳುರ್ ಗೆಲ್ಲೊಯ್ ದಿಸ್ತಾ.” ಮ್ಹಣ್ ವಿಚಾರ್ತಾನಾ, “ವ್ಹಯ್ ಕಿತ್ಯಾ ವಚೊಂಕ್ ನೊಜೊಗೀ?!” ಮ್ಹಳ್ಳಿ ಜಾಪ್ ತಾಣೆ ಮ್ಹಾಕಾ ದಿಲ್ಲಿ ಆಯ್ಕೊನ್ … ಹಾಂವ್ ಹಾಚೆಲಾಗಿಂ ಉಲೊವ್ನ್ ಸಾಪೊಡ್ಲೊಂ ಮ್ಹಣ್ ಥಂಯ್ ಥಾವ್ನ್ ಹಳೂ ನಿಕಾಳ್ಳೊಲೊಂ. ಪೂಣ್ ತ್ಯಾಚ್ಚ್ ಎಡ್ವಿನಾನ್ ಅನ್ಯೆಕ್ ಪಾವ್ಟಿಂ, ಎಕಾ ಸಮ್ಮೇಳನಾಂತ್ ಮ್ಹಾಕಾ ತಾಣೆಂಚ್ ಆಪವ್ನ್ ತಾಚ್ಯಾ ದೆಗೆನ್‌ಚ್ ಬಸಯಿಲ್ಲೆಂ. ಎಡ್ವಿನ್ ಮ್ಹಳ್ಯಾರ್ ಕಿತೆಂ ಆನಿ ಕಸೊ ? – ತಾಚೊ ಸ್ವಭಾವ್ ಪಾರ್ಕುಂಕ್‌ಚ್ ಮ್ಹಾಕಾ ಬೋವ್ ಕಶ್ಟ್ ಮಾರ್ತಾಲೆ.
ಆನಿ ತಸಲ್ಯಾ ಎಡ್ವಿನಾನ್ ಮಾಕಾ ಅಚಾನಕ್ ತಾಚೆ ಘರಾ ಆಪಯ್ತಾನಾಂ ಹಾಂವ್ ಥಟಕ್ಕ್ ಜಾಲ್ಲೊಂ. ತ್ಯಾ ದೀಸ್ ತಾಂಗೆರ್ ಗೆಟ್-ಟುಗೆದರ್ ಪಾರ್ಟಿಕ್ ವೆತಾಸ್ತಾನಾಂ, ಥಂಯ್ಸರ್ ಎಚ್. ಎಮ್. ಪೆರ್ನಾಲ್, ಪಾವ್ಲು ಮೊರಾಸ್, ಸಿಜ್ಯೆಸ್ ತಾಕೊಡೆ, ಜೆಎಫ್. ಡಿಸೋಜಾ ಅತ್ತಾವರ್, ಮಾಚ್ಚಾ ಮಿಲಾರ್, ಎಡಿ ನೆಟ್ಟೊ ಆಸ್‌ಲ್ಲೆ. ಆನಿ ಹಾಂವ್ ಆನಿ ಎಡ್ವಿನ್ ಮೆಳುನ್ ಆಮಿ ಆಟ್ ಜಣ್ ಆಸ್‌ಲ್ಲ್ಯಾಂವ್.
ತ್ಯಾ ನಂತರ್ ಏಕ್ ದೋನ್ ಮಹಿನ್ಯಾನಿಂ ಪರತ್ ತಾಣೆಂ ಮ್ಹಾಕಾ ತಸಲ್ಯಾಚ್ಚ್ ಪಾರ್ಟಿಕ್ ಆಪೊವ್ಣೆಂ ದಿಲ್ಲೆಂ. ತವಳ್ ಆಮಿ ಫಕತ್ ಪಾಂಚ್ ಜಣ್ ಉರ್ಲ್ಯಾಂವ್. ಹಾಂವ್, ಎಡ್ವಿನ್ ಜೆ ಎಫ್, ಎಡಿನೆಟ್ಟೊ, ಮಾಚ್ಚಾ ಮಿಲಾರ್ ಆನಿ ಜೆ.ಎಫ್. ಅತ್ತಾವರ್. ಹಿ ಸುರ್ವಾತ್ – ತ್ಯಾ ದೀಸ್, ಥಂಯ್ಸರ್ ಹಾಜರ್ ಆಸ್ಲೆಲ್ಯಾ ಹರ್ಯೆಕಾ ಲೇಖಕಾಚ್ಯಾ ಘರಾ ಪ್ರತೀ ಮಹಿನ್ಯಾಚ್ಯಾ ಏಕ್ ದೀಸ್ ಗೆಟ್ ಟುಗೆದರ್ ಕರ್ಚೊ ಮ್ಹಳ್ಳೊ ನಿರ್ಣಯ್ ಆಮಿ ಕೆಲೊ. ಹೊ ನಿರ್ಧಾರ್ ಎಡ್ವಿನಾಚ್ಯಾ ಅಭಿಪ್ರಾಯೆ ಪರ್ಮಾಣೆಂಚ್ಚ್ ಘೆತ್‌ಲ್ಲೊ.
ಉಪ್ರಾಂತ್ಲ್ಯಾ ಮಹಿನ್ಯಾಂತ್ ಆಮ್ಗೆರ್‌ಚ್ಚ್ ಪಾಂಚ್ ಜಣಾಂಚಿ ಪಯ್ಲಿ ಜಮಾತ್ ಜಾಲ್ಲಿ. ನಂತರ್ ಹರ್ಯೆಕಾ ಮಹಿನ್ಯಾಂತ್ ಎಕೆಕ್ಲ್ಯಾಚ್ಯಾ ಘರಾ ಹಿ ಜಮಾತ್ ಚಲುನ್‌ಚ್ ಗೆಲಿ. ಅಶೆಂ ಆಮಿಂ ತವಳ್ ತವಳ್ ಮೆಳಾತ್ ಆಸ್ತಾಂ…ಸಾಹಿತ್ಯ್ ತಶೆಂ ಧಾರ್ಮಿಕ್ ಆನಿ ಹೆರ್ ಸಂಸಾರಿ ಗಜಾಲಿ ಭರ್ಫೂರ್ ಉಲೈತೆಲ್ಯಾಂವ್. ಚರ್ಚ್ಯಾ ಕರ್ತೆಲ್ಯಾಂವ್, ಆನಂದಾನ್ ತಶೆಂ ಹಾಸೊನ್ ಕರುನ್ ಹೊ ವೇಳ್ ಪಾಶಾರ್ ಕರ್ತೆಲ್ಯಾಂವ್. ಹ್ಯಾ ಜಮಾತೆಂನಿ ಆಮಿ ಎಕಾಮೆಕಾಕ್ ಲಾಗಿಂ ಜಾಲ್ಯಾಂವ್, ಎಕಾಮೆಕಾಕ್ ಸಮ್ಜೊಂಕ್ ಸಕ್ಲ್ಯಾಂವ್.
ಎಡ್ವಿನಾಕ್ ಸಕಾಳಿಂ ಫುಡೆಂ ವಾಕಿಂಗಾಕ್ ವೆಚಿ ಸವಯ್ ಆಸ್ಲಿ. ಹ್ಯಾ ಲಾಂಬ್ ವಾಕಿಂಗಾವೆಳಾ ಕಾಂಯ್ ತರೀ ಸಾಹಿತ್ಯಾಕ್ ಆವಡ್ಚಿಂ ಘಡಿತಾಂ ಮೆಳ್ತಾತ್‌ಗೀ ಮ್ಹಳ್ಳಿ ತಾಚಿ ದೀಶ್ಟ್ ತೆಣೆಂ ಹೆಣೆಂ ಭಂವ್ಡಾಂವ್‌ಚ್ ತೊ ಆಸ್ತಾಲೊ ಖಂಯ್. ಥೊಡೆ ಪಾವ್ಟಿಂ ಘಡಿತಾಂ ಥಂಯ್ ಇಲ್ಲೊ ವೇಳ್ ರಾವೊನ್ ಥೊಡೊ ವೇಳ್ ಪಾಶಾರ್ ಕರ್ನ್ ಆಸ್ಚೊ ತೆಂ, ಹಾಂವೆಂಚ್ ದೋನ್ – ತೀನ್ ಪಾವ್ಟಿಂ ಪಳೆಲ್ಲೆಂ ಆಸಾ. ತಸಲ್ಯಾ ಘಡಿತಾಚ್ಯಾ ಜಾಗ್ಯಾಂನಿ ತಾಚ್ಯಾ ಸಾಹಿತ್ಯಾಕ್ ಆವಡ್ಚಿಂ ಗಜಾಲಿ ತೊ ಆಪ್ಣಾ ಥಂಯ್ ಜಿರೊವ್ನ್ ಆಸ್ತಾಲೊ. ಆನಿ ತವಳ್ ತಾಚ್ಯಾ ಮತಿಂ ಸಾಹಿತ್ಯಾವಿಶಿಂ ಕಿತೆಂ ತರೀ ಶಿಜೊನ್ ಆಸ್ತಾಲೆಂ.
ಹಾಂವ್ ಏಕ್ ಪಾವ್ಟಿಂ ತಾರ್ಲ್ಯಾಚ್ಯಾ ನಿಸ್ತ್ಯಾನ್ ಡಯರಿಯಾಕ್ ಸಾಂಪ್ಡೊನ್ ಆಸ್ಪತ್ರೆಕ್ ದಾಖಲ್ ಜಾಲ್ಲ್ಯಾ ತವಳ್, ಜನೆಲಾ ಥಾವ್ನ್ ಎಡ್ವಿನ್ ವಾಕಿಂಗ್ ಕರ್ನ್ ಆಸ್‌ಲ್ಲೊ ತೆಂ ಪಳೆಲೆಂ. ಉಪ್ರಾಂತ್ಲ್ಯಾ ಥೊಡ್ಯಾಚ್ಚ್ ಮಿನುಟಾಂನಿ ತೊ ಮ್ಹಜ್ಯಾ ಕುಡಾಚೆಂ ದಾರ್ ಬಡವ್ನ್ ಭಿತರ್ ರಿಗ್ಲೊ.
ತಸೊ ಆಯಿಲ್ಲೊ ತೊ ಥೊಡೊ ವೇಳ್ ಮ್ಹಜ್ಯಾ ಸಂಗಿ ಖರ್ಚಿಲಾಗ್ಲೊ. ಆನಿ ಪಾಟಿಂ ವೆತಾಸ್ತಾನಾಂ … “ರೋನ್, ಹಾಸ್ಪಿಟಲಾಂತ್ ಆಸ್ಚೊ ಹೊ ವೇಳ್ ತುಕಾ ಬರ್ಪಾಕ್ ಏಕ್ ಆವ್ಕಾಸ್ ಮ್ಹಳ್ಳೆಂ ಚೀಂತ್.” ಮ್ಹಣಾಲೊ ತೊ. ಆನಿ ಹ್ಯಾ ತಾಚ್ಯಾ ಪ್ರೇರಣಾನ್…
ಮ್ಹಾಕಾ ಆಸ್ಪತ್ರೆಕ್ ಭರ್ತಿ ಜಾಂವ್ಕ್ ಕಾರಣ್ ಜಾಲ್ಲ್ಯಾ ತ್ಯಾ ಪಿಡೆಕ್ ಹಾಸ್ಪಿಟಲ್ ಬಿಲ್ಲ್ ರುಪಯ್ ಪಂದ್ರಾ ಹಜಾರ್ ಜಾಲ್ಲ್ಯಾವೆಳಾ ಹಾಂವೆ ‘ಎಕಾ ತಾರ್ಲ್ಯಾಕ್ ಪಂದ್ರಾ ಹಜಾರ್’ ಮ್ಹಳ್ಳೆಂ ಲೇಕನ್ ಬರವ್ನ್ ‘ಕುಟಾಮ್’ ಪತ್ರಾರ್ ಫಾಯ್ಸ್ ಕೆಲ್ಲೆಂ.
ಅಶೆಂಚ್ಚ್ ಮ್ಹಜಿಂ ಸಬಾರ್ ಲೇಖನಾಂ ಎಡ್ವಿನಾಚ್ಯಾ ಪ್ರೇರಣಾ ವರ್ವಿಂಚ್ಚ್ ಜಲ್ಮಾಲ್ಲಿಂ ಆಸಾತ್. ತಶೆಂ ಮ್ಹಣ್ ಥೊಡ್ಯಾಪಾವ್ಟಿಂ ತೊ ತಾಕಾ ಸಾರ್ಕೆಂ ಮ್ಹಣ್ ದಿಸಾನಾತ್ಲೆಲ್ಯಾ ವೆಳಾ, ಹಾಂವೆ ಬರಯ್ತಾನಾ ವಾಪಾರ್ಚ್ಯಾ ಥೊಡ್ಯಾ ಸಬ್ದಾಂ ಖಾತಿರ್ ತೋ ಮ್ಹಾಕಾ ಬರೊಚ್ಚ್ ಯೆಟ್ತಾಲೊ. ತರೀ ಕಿಟಾಳಾರ್ ‘ಜರ್ ಹಾಂವ್ ಸಾಂಗಿನ್ ತರ್’ ಮ್ಹಜಿ ಸಾಂಕಳ್ ಕಾಣಿ ವಾಚುನ್, ತೊ ಏಕ್ ಪಾವ್ಟಿ ಮ್ಹಜೆಲಾಗಿಂ ಮ್ಹಣಾಲೊ… “ರೋನ್ ತುಜ್ಯಾ ಶೈಲೆರ್ ಮ್ಹಾಕಾ ಬರಂವ್ಕ್ ಜಾಯ್ನಾ. ಗುಡ್…” ಮ್ಹಣುನ್ ಮ್ಹಜಿ ಆನಿ ಮ್ಹಜ್ಯಾ ಲಿಖ್ಣೆಚಿ ತಾಣೆ ಪಾಟ್ ಥಾಪುಡ್‌ಲ್ಲಿ ಆಸಾ. ಹೆಂ ತಾಚೆಂ ಖಾಶೆಲೆಂಪಣ್.
ಹೆಂ ಬರಯ್ತಾನಾಂ, ಮ್ಹಜ್ಯೊ ಸುರ್ವೆಚ್ಯೊ ಕಾದಂಬರಿ ಕನ್ನಡಾಂತ್ ಬರಯ್ಲೆಲೆವೆಳಾ, ಎಡ್ವಿನಾಚಿ ‘ಪಿಲಾತಾಚೆಂ ಫರ್ಮಾಣ್’ ಕಾದಂಬರಿ ವಾಚುನ್ ಹಾಂವೆ ಕೊಂಕ್ಣೆಕ್ ಬರಂವ್ಕ್ ಸುರ್ವಾತ್ ಕೆಲ್ಲೆಂ ತೆಂ ಮ್ಹಾಕಾ ಉಗ್ಡಾಸಾಕ್ ಯೆತಾ. ಮ್ಹಾಕಾ ಉಡುಪಿಂತ್, ದಾಯ್ಜಿ ದುಬಾಯ್ ಪ್ರಶಸ್ತಿ ಪ್ರದಾನ್ ಜಾತಾನಾ ತೊ ಥಂಯ್ಸರ್ ಆಯಿಲ್ಲೊ ಆನಿ ಮ್ಹಜ್ಯಾ ದೆಗೆನ್‌ಚ್ ಬಸ್‌ಲ್ಲೊ. ತ್ಯಾ ಸಂಧರ್ಬಾರ್ ಮ್ಹಜೊ, ‘ಹಾಂವ್ ತಾಚೆ ಸೊದ್ನೆರ್’ ಬೂಕ್ ತ್ಯಾಚ್ ವೆದಿರ್ ಉಗ್ತಾವಣ್ ಜಾಲ್ಲೊ. ಆನಿ ಹಾಂವ್ ವೆದಿ ಥಾವ್ನ್ ದೆವ್ಲೊಂಚ್ಚ್ ಮ್ಹಜ್ಯಾ ಹಾತಿಂ ಆಸ್‌ಲ್ಲೊ ತೊ ಮ್ಹಜೊ ಬೂಕ್ ಹಾಂವೆ ಎಡ್ವಿನಾಚ್ಯಾ ಹಾತಿಂ ದಿಲ್ಲೊ. ತ್ಯಾ ವೆಳಾ ಮ್ಹಾಕಾ ಪಳೆವ್ನ್ ಆಸ್ಲೆಲ್ಯಾ ತಾಚ್ಯಾ ದೊಳ್ಯಾಂನಿ, ಮಾಯ್ಪಾಸಾಚಿಂ ದುಖಾಂ ಭರ್‌ಲ್ಲಿಂ! ಭಾಯ್ಲ್ಯಾನ್ ಖಡಕ್ ದಿಸ್ತಾಲೊ ತರೀ ಭಿತರ್ಲ್ಯಾನ್ ಎಡ್ವಿನ್ ಭಾರಿಚ್ ಸಿಂತಿಮೆಂತಾಳ್ ಮ್ಹಣ್ ಮ್ಹಾಕಾ ತ್ಯಾ ದೀಸ್ ಕಳ್‌ಲ್ಲೆಂ.
ಅಶೆಂ ಮ್ಹಜ್ಯಾ ಸಾಹಿತ್ಯಾಕ್, ಎಡ್ವಿನಾಚಿ ಏಕ್ ನಾಂ ಏಕ್ ರೀತಿಚಿ ದೆಣ್ಗಿ ಆನಿ ಪ್ರೇರಣ್ ಆಸ್‌ಲ್ಲೆಂ.
ಎಡ್ವಿನಾಚೆಂ, ಸಾಹಿತ್ಯ್ ರಚನಾಚೆಂ ಕೂಡ್ ತಾಚ್ಯಾ ಘರ್ಚ್ಯಾ ಮಾಳಿಯೆರ್ ಆಸ್‌ಲ್ಲೆಂ. ಮಾಳಿಯೆರ್ ತೊ ಆನಿ ತಾಚೆಂ ಕಂಪ್ಯೂಟರ್ ಆನಿ ಲ್ಯಾಪ್ ಟೋಪ್. ತೊ ಸಾಹಿತ್ಯ್ ರಚನೆಕ್ ಮಾಳಿಯೆಮೆಟಾಂ ಚಡ್ತೊಲೊ ಆನಿ ದೆಂವ್ತಾಲೊ. ಸಾಂಜ್ ಜಾತಾಸ್ತಾಂ ತೊ ಯೇವ್ನ್ ಟಿ.ವಿ.ಮುಕಾರ್ ಬಸ್ತಾಲೊ.
ಆಮಿ ಪಾಂಚ್ ಜಣ್ ಜಣ್ ತವಳ್ ತವಳ್ ಆಮ್ಚ್ಯಾಮ್ಚ್ಯಾ ಘರಾ ಭೆಟುನ್ ಆಸ್ಚ್ಯಾ ತ್ಯಾ ವೆಳಾರ್‌ಚ್ಚ್, ಎಕಾ ಅಚಾನಕ್ ಘಡ್ಯೆ ತೊ ಪಿಡೆ ವಾದಾಳಾಕ್ ಶಿರ್ಕಾಲೊ. ಥೊಡೆ ದೀಸ್ ಹಾಸ್ಪಿಟಲಾಂತ್ ತೊ ಕೋಮಾ ಸ್ಥಿತೆರ್‌ಶೆಂ ಆಸ್‌ಲ್ಲೊ. ಹಿ ಖಬರ್ ಆಯ್ಕೊನ್ ಸಬಾರ್ ಕೊಂಕ್ಣಿಂ ಮೊಗಿ ಖಂತಿನ್ ಬುಡ್ಲೆ. ತಾಚೆ ಖಾತಿರ್ ಮಾಗೊಂಕ್ ಲಾಗ್ಲೆ. ಹಾಂವ್ ತಾಕಾ ಹಾಸ್ಪಿಟಲಾಂತ್ ಪಳೆಂವ್ಕ್ ವೆತಾಸ್ತಾಂ ತಾಚಿ ಸ್ಥಿತಿ ಪಳೆವ್ನ್ ಹಾಂವ್‌ಯೀ ಧೆಧೆಸ್ಪೊರ್ ಜಾಲ್ಲೊಂ. ಮನಾಂತ್‌‌ಚ್ ರಡ್‌ಲ್ಲೊಂ.
ನಂತರ್ ತೊ ಭಲಾಯ್ಕೆಕ್ ಪಾಟಿಂ ಪರ್ತುನ್ ಘರಾ ಪಾಟಿಂ ಯೆತಾಸ್ತಾನಾಂ, ತಾಚ್ಯಾ ಸಾಹಿತ್ಯಾಕ್ ಬರೊಚ್ಚ್ ಮಾರ್ ಪಡ್‌ಲ್ಲೊ. ತೊ ಸಾಹಿತ್ಯ್ ರಚ್ಚೆವಿಶಿಂ ಮ್ಹಣ್ತಾಲೊ ‘ಮ್ಹಜ್ಯಾ ಮತಿಂತ್ ಆಸಾ, ಪೂಣ್ ಲ್ಯಾಪ್ ಟೋಪಾರ್ ಬರಂವ್ಕ್ ಜಾಯ್ನಾಂ.!’. ತ್ಯಾ ವೆಳಾ ಆಮಿ ತಾಕಾ ಉಮೆದ್ ದಿಂವ್ಚೆಂ ಪ್ರೇತನ್ ಕೆಲ್ಲೆಂ. ಪೂಣ್ ತೊ ಪರ್ತ್ಯಾನ್ ಬರಂವ್ಕ್ ಅಸಹಾಯಕ್‌ಚ್ ಉರ್ಲೊ. ಹೆಂ ಉಪ್ರಾಂತ್ ತಾಚ್ಯಾ ಮಾಳಿಯೆ ವಯ್ಲ್ಯಾ ಕುಡಚಿಂ ಮೆಟಾಂ ಚಡ್ಚೆಂ-ದೆಂವ್ಚೆಂ ತಾಣೆ ರಾವಯ್ಲೆಂ. ವಯ್ರ್ ಆಸ್ಲೆಲೆಂ ಲ್ಯಾಪ್ ಟೋಪ್ ಸಕ್ಲಾ ಆಯಿಲ್ಲೆಂ. ನಂತರ್ ತೆಂ ವಯ್ಲ್ಯಾ ಕುಡಾಕ್ ಚಡ್‌ಲ್ಲೆಂ ನಾಂ.
ತಾಚೆಂ ಕಾರ್ ಡ್ರೈವ್ ಕರುನ್, ಸಾಹಿತ್ಯ್ ಜಮಾತೆಂಕ್ ಯೆಂವ್ಚೊ ತೊ ಏಕ್ ದೀಸ್ ಮ್ಹಣಾಲೊ, ‘ರೋನ್, ಮಾಕಾ ಆನಿ ಡ್ರೈವ್ ಕರುಂಕ್ ಜಾಯ್ನಾಂ. ಹ್ಯಾಉಪ್ರಾಂತ್ ಮಾಕಾ ಖಂಯ್ಸರೀ ವಚುನ್ ಯೇಂವ್ಕ್ ಜಾಂವ್ಚೆಂನಾಂ. ತವಳ್ ಹಾಂವೆ ತಾಕಾ ಧೈರ್ ದೀವ್ನ್ ಮ್ಹಳ್ಳೆಂ ‘ಆಮಿಂ ತುಕಾ ಆಪವ್ನ್ ವರ್ತಾಂವ್.’ ತಶೆಂ ತ್ಯಾ ನಂತರ್ ಹಾಂವ್ ಆನಿಂ ಮಾಚ್ಚಾ ತಾಕಾ ತೆಣೆಂ ಹೆಣೆಂ ಆಪವ್ನ್ ವ್ಹರ್ತೆಲ್ಯಾಂವ್.
ಅಸಲ್ಯಾ ಎಕಾ ದಿಸಾ…ಆಮ್ಚಿ ಪಾಂಚ್ ಜಣಾಂಚಿ ಭೆಟ್ ಮಾಚ್ಚಾಗೆರ್ ಆಸ್‌ಲ್ಲಿ. ತ್ಯಾ ದೀಸ್ ತೊ ಮಾಚ್ಚಾಗೆರ್ ಆಸ್ತಾಂ ಚಲೊಂಕ್ ಜಾಯ್ನಾಸ್ತಾಂ ಎಡ್ವಿನ್ ಕಾಂಪ್ತಾಲೊ. ಹ್ಯಾ ವೆಳಾ ತಾಕಾ ಪಳೆತಾಂ ಮ್ಹಜ್ಯಾ ಮತಿಂತ್ ಕಸಲೆಂಗೀ ಬಾರೀಕ್ ಭಿರಾಂತೆಚೆ ಮೋಡ್ ಉದೆಲಾಗ್ಲೆಂ. ಉಪ್ರಾಂತ್ ಆಮಿ ಆಮ್ಚಿ ಪಾಂಚ್ ಜಣಾಂಚಿ ಭೆಟ್ ಮ್ಹಹಿನ್ಯಾಕ್ ಏಕ್ಪಾವ್ಟಿಂ ಎಡ್ವಿನಾಚ್ಯಾ ಘರಾಚ್ಚ್ ಕರ್ಚೆಂ ಮ್ಹಣ್ ನಿರ್ಧಾರ್ ಕೆಲೊ. ತೊಡೊ ತೇಂಪ್ ಆಮಿ ಮೆಳ್ಳ್ಯಾಂವ್, ತೋಚ್ ಆಮ್ಚ್ಯಾ ಭೆಟೆವಿಶಿಂ ಆಮ್ಕಾಂ ಉಡಾಸ್ ಕರ್ತಾಲೊ!
ಕೆನ್ನಾಂಯೀ ಎಡ್ವಿನ್ ಧಾರ್ಮಿಕಾಂ ವಿಶಿಂ ಉಲಯ್ತಾನಾಂ, ವಿಚಾರ್ ವಾದಿ ಧೋರಣ್ ಧರ್ನ್ ಉಲೈತಾಲೊ. ಆನಿ ತ್ಯಾ ದಿಸಾ ಅಚಾನಕ್ ಜಾವ್ನ್ ತೊ ಗಂಬೀರ್ ಸ್ತಿತೆಕ್ ಪಾವ್ತಾನಾಂ, ಘರ್ಚಿಂ ತಾಕಾ ಆಸ್ಪತ್ರೆಕ್ ವ್ಹರ್ಚಿ ವಿಲೆವಾರಿ ಕರುನ್ ಆಸ್ತಾಂ, ಎಡ್ವಿನಾನ್ ಹಾತ್ ಉಬಾರ್ನ್ ಎವ್ಕರಿಸ್ತ್ ಘೆಂವ್ಚಿ ಜಬ್ಬೋರ್ ಆಶಾ ದಾಕಯಿಲ್ಲಿ. ತ್ಯಾ ಘಡ್ಯೆ ತೊ ನಿಮಾಣ್ಯಾ ಉಸ್ವಾಸಾ ಸಂಗಿ ಝಜೊನ್ ಆಸ್ತಾನಾಂ, ಎಡ್ವಿನಾನ್ ಕುಮ್ಗಾರ್ ಸೆವುನ್ ಥೊಡ್ಯಾಚ್ಚ್ ವೆಳಾನ್, ಆಪ್ಲೊ ಅತ್ಮೊ ದೆವಾಕ್ ಒಪ್ಸುನ್ ದಿಲೊ!
ಆನಿ ಕೊಂಕ್ಣಿ ಸಾಹಿತ್ಯಾಂತ್ ಯಶಸ್ವಿಚೆಂ ದೂರ್ ದೃಶ್ಟಿ ದವರುನ್ ಸಾಹಿತ್ಯಾಖಾತಿರ್ ಶೃಧ್ಧೆಂತ್ ವಾವುರ್ಲೊಲೊ ಏಕ್ ಶಿಸ್ತೆಚೊ ಲೇಖಕ್ ಕೊಂಕ್ಣೆಕ್ ನಾಂ ಜಾಲೊ! ಪೂಣ್ ತಾಣೆ ರಚ್ಲೆಲೆಂ ಉಂಚ್ಲೆಂ ಸಾಹಿತ್ಯ್ ತೋ ಆಮ್ಕಾಂ ಸೊಡುನ್ ಗೆಲಾ. ಆನಿ ತೆಂ ವರ್ಸಾಂ ವರ್ಸಾಂ ಪರ್ಯಾಂತ್, ಕೊಂಕ್ಣಿ ವಾಚ್ಪ್ಯಾಂ ಸಂಗಿ ಉರ್ತಲೆಂ, ಎಡ್ವಿನ್ ತಾಚ್ಯಾ ಸಾಹಿತ್ಯಾದ್ವಾರಿಂ ಆಮ್ಚೆಸವೆಂ ಜಿಯೆತಾಲೊ.
■ ರೋನ್ ರೋಚ್ ಕಾಸ್ಸಿಯಾ
