ಮಾಂಯ್ ಮ್ಹಳ್ಯಾರ್ ತ್ಯಾಗ್, ಮಾಂಯ್ ಮ್ಹಳ್ಯಾರ್ ಮೋಗ್

158

“ಅಚಲ್ ಆನಿ ಶರ್ತಾಂವೀಣ್” ಮ್ಹಳ್ಳ್ಯಾ ವಿಶೇಷಣಾಕ್ ಏಕ್ ಸಬ್ಧ್ ಉಲ್ಲೇಕ್ ಕರ್ಚೊ ತರ್ ತೊ ಸಬ್ದ್ ಜಾವ್ನಾಸಾ “ಮಾಂಯ್”. ತಿಚಿಂ ಉತ್ರಾಂ, ಕರ್ನ್ಯೊ, ಚಿಂತ್ನಾ ಆನಿ ಭೊಗ್ಣಾಂ ಆಮ್ಚಿ ಅಸ್ಮಿತಾಯ್. ಅವಯ್ ವಿಶ್ಯಾಂತ್ ಬರೊಂವ್ಕ್ ಯಾ ಸಾಂಗೊಂಕ್ ಕಿತೆಂಚ್ ನಾಂ ಮ್ಹಣ್ಚೊ ವ್ಯಕ್ತಿ ಹ್ಯಾ ಸಂಸಾರಾಂತ್ ಕೊಣೀ ಅಸ್ಚೊನಾ. ಜಲ್ಮಾತಾನಾ ಅವಯ್ಚೆಂ ಮುಖಮಳ್ ಪಳೆನಾತ್ಲೊ ಮನಿಸ್ ಸಯ್ತ್ ಅವಯ್ಚಿಂ ಸ್ವಪ್ಣಾಂ ಘೆವ್ನ್ ಜಿಯೆತಾ. ಅಮ್ಚ್ಯಾ ದೊಳ್ಯಾಂನಿ ಆಮಿ ಸಂಸಾರ್ ದೆಖ್ಚ್ಯಾ ಪಯ್ಲೆಂಚ್ ತಿಚೊ ಗರ್ಭ್ ಮ್ಹಳ್ಯಾ ಸಂಸಾರಾಂತ್ ಆಮ್ಚೆ ಸಂರಕ್ಷಣ್ ಕರುನ್ ಮೊಗಾಚೆಂ ಪಯ್ಲೆಂ ವ್ಯಾಖ್ಯಾನ್ ಬರಯ್ಲೆಲೆಂ ಮಾಂಯ್ನ್.

ಮಾಂಯ್ ನಾತ್ಲೆಲೆ ದೀಸ್ ನಾಕಾತ್ ತರ್ ಫೆಸ್ತಾಂ ಕಶಿ ಅಸ್ಚಿಂ?

ಉಗ್ತ್ಯಾ ಪಾಳ್ಣ್ಯಾಂತ್ ಧಲೊವ್ನ್, ಶಿತಾ ಉಂಡಿ ಖಾವಾಯ್ಲೆಲ್ಯಾ ಹಾತಾಂಚ್ಯೊ ಯಾದಿ ಜಾಗೊಂವ್ಕ್ ಉಸ್ವಾಸಾಚೆಂ ವಾದಾಳ್ ಘೆವ್ನ್ ಜೊಯೆಲ್ ಡಿಸೋಜಾ ನಕ್ರೆ ಹಾಚ್ಯಾ YouTube ಚಾನೆಲಾದ್ವಾರಿಂ ಪದಾಂ ರೂಪಿ “ಮಾಂಯ್” ಫೆಸ್ತಾ ದಿಸಾಚ್ ಆಯ್ಲ್ಯಾ.

ಗೊಂಯ್ಚೊ ಫಾಮಾದ್ ಗಾವ್ಪಿ ಮಾರ್ಕ್ ರೆವ್ಲೊನಾನ್ ಹೆಂ ಪದ್ ಗಾಯ್ಲಾಂ ಆನಿ ಹ್ಯಾ ಪದಾಕ್ ತಾಳೊ ರಚ್ಲಾ ರಾಲ್ಫ್ ರೋಶನ್ ಆನಿ ವನಿಲ್ ವೇಗಸ್ ಹಾಣೆ ಸಂಗೀತ್ ಸಂಯೋಜನ್ ಕೆಲಾ. ಹ್ಯಾ ವೃತ್ತೆಕ್ ನವೊಚ್ ಜಾಲ್ಯಾ ವಿಕಾಸ್ ಕಲಾಕುಲ್ ಹಾಣೆ ವಿಡೀಯೊ ಪದಾಚಿ ಕಾಣಿ ಬರಯ್ಲ್ಯಾ. ಹಾಚ್ಯಾ ಪೊತಿಯೆಂತ್ಲಿ ಪರಿಕಲ್ಪನಾಂ ಕಾಣ್ಯೆ ರುಪಿಂ  ಗುಂತುನ್ ಮುಕ್ಲ್ಯಾ ದಿಸಾಂನಿ ವೀಕ್ಷಕಾಂಕ್ ಸಂತೃಪ್ತ್ ಕರ್ಚಿ ಶಾಥಿ ತಾಕಾ ಆಸಾ ಮ್ಹಣ್ ಭರ್ವಾಸ್ತಾಂ.

ಅಭಿಮಾನಿಂಕ್ ಸದಾಂಚ್ ಸಂಗೀತಾಚ್ಯಾ ಗಡ್ದ್ ಜೆವ್ಣಾನ್ ವಾಡ್ಚ್ಯಾ ಜೊಯೆಲ್ ಅತ್ತೂರ್ ಹಾಣೆ ಹ್ಯಾ ಸಗ್ಳ್ಯಾ ಯೋಜನಾಚೆಂ ಪರಿಕಲ್ಪನ್ ಆನಿ ಕಾರ್ಯಾಕಾರಿ ನಿರ್ಮಾಪಕ್ ಜಾವ್ನ್ ಆಪುರ್ಬಾಯೆಚೆಂ ಕಾಮ್ ಕೆಲಾಂ. ಸಿನಿಮಾಟೊಗ್ರಾಫಿ ಭೊವ್ ಸೊಭಿತ್. ರಾಹುಲಾನ್ ಕಾಣಿ ಪಿಂತ್ರಾಂವ್ಕ್ ಘೆತ್ಲೆಲಿ ಜಾಗ್ರುತ್ಕಾಯ್ ಆನಿ ವಾವ್ರ್ ನಿಜಾಯ್ಕಿ ಮೆಚ್ವಾಜಾಯ್. ಸಿಮಿಸ್ತ್ರ್ , ಪೇಟ್, ಮೊರ್ನಾ ಲುಗಾಟ್…. ಹರ್ಯೇಕಿ ನೀಜ್ ಮ್ಹಳ್ಳೆಬರಿ ದಿಸ್ತಾ.

ಉತ್ರಾಂಕ್ ಪ್ರಕೃತೆ ಸಂಗಿ ಸೈರಿಕ್ ಕರುನ್ ಮೊಗಾ ಕಂತಾರಾಂ ಘಡ್ಚ್ಯಾ ಕವಿಮಿತ್ರ್ ವಿಲ್ಸನ್ ಕಟೀಲಾಚ್ಯಾ ಲಿಖ್ಣೆಂನ್ ಉದೆಲ್ಲೊ ವೊಳಿ ಮ್ಹಾಕಾ ಮ್ಹಜ್ಯಾ ಮಾಮ್ಮಿಚೊ ತ್ಯಾಗ್, ಮೊಗ್ ಆನಿ ಸಾಕ್ರಿಫಿಸ್ ಉಡಾಸ್ ಹಾಡಿಲಾಗ್ಲ್ಯೊ. ವಿಲ್ಸನ್ ಕಟೀಲಾಚಿ ಉತ್ರಾಂಚಿಂ ತಾಂಕ್ ತಶಿಚ್.

ಮಾಂಯ್ಚೊ ಯಾದಿ ಆಮ್ಚಿಂ ದುಕಾಂ ಅಗ್ಮೆಂತ್ ಜಾವ್ನ್ ಪೊಲೆ ಬೆಜ್ಮೆಂತ್ ಕರ್ತಾತ್ ತರ್ ಮಾಂಯ್ ಕಿತ್ಲಿ ಪವಿತ್ರ್! ದೆಖುನ್ಂಚ್ ದೆವಾನೀ ಮನ್ಶ್ಯಾರೂಪಿ೦ ಸಂಸಾರಾಕ್ ಯೇಂವ್ಕ್ ಮಾಂಯ್ಕ್ ವಿಂಚ್ಲೆಂ ಜಾಂವ್ಕಿ ಪುರೊ. ಮಾಂಯ್ಚ್ಯಾಕೀ ವರ್ತೆಂ ಪವಿತ್ಪಣ್ ಮ್ಹಾಕಾ ದುಸ್ರೆ೦ ದಿಸಾನಾ೦. ಮಾಂಯ್ಕ್ ಭಿಯೆನಾತ್ಲೆ ಸಂಸಾರಾಂತ್ ಕಿತೆಂಚ್ ನಾಂ. ಬೂದ್ ಶಿಕಂವ್ಕ್ ಯಾ ಚೂಕಿ ದಾಖವ್ನ್ ಸಾರ್ಕೆ ವಾಟೆಚಿ ದಿಶಾ ದಾಖಂವ್ಕ್ ಮಾಂಯ್ಚ್ಯಾ ಬೊಟಾಂ ಮುಖಾರ್ ಬೆತಾಂಯಿ ಭಿಯೆತಾಲಿ೦. ಅಂಗಾಚಿ ಊಬ್ ನಿಂವ್ತಾಸಾರ್ ತಿಚ್ಯಾ ವೊಂಟಾನಿ ಅಪ್ಲ್ಯಾ ಭುರ್ಗ್ಯಾಂ ಖಾತಿರ್ ಕರ್ಚ್ಯಾ ಮಾಗ್ಣ್ಯಾ ಮುಕಾರ್ ಸಂಸಾರಾಂತ್ ಜೊಕ್ತೆಂ ಮಾಗ್ಣೆಂ ಮೆಳ್ಚೆನಾಂ.

ಆಮ್ಕಾಂ ಚಂದ್ರ್ ದಾಖವ್ನ್ ಉಂಚಾಯೆಚಿಂ ಸ್ವಪ್ಣಾಂ ಶಿತಾಮುಟಿಂತ್ ಖಾವವ್ನ್ ತಿ ಮಾತ್ರ್ ಮಾತಿಯೆಂತ್ ಲಿಪ್ತಾ. ಮಾಂಯ್ಕ್ ಸರಿ ಕರುಂಕ್ ಕಿತ್ಲಿಯಿ ಉತ್ತೀಮ್ ಉತ್ರಾಂ ಅಸ್ತಿತ್ ಪುಣ್ ತಿಚೊ ತ್ಯಾಗ್ ಸಾಕ್ರಿಫಿಸಾಕ್ ಸರಿ ಕರುಂಕ್ ವಿಂಚ್ಲೆಲಿ ಹಿ ಉತ್ರಾಂ ಮಾತ್ರ್ ದಿಸಾರ್ ಗಾದ್ಯಾಂತ್ ನೇಜ್ ಲಾವ್ನ್ ಯೇವ್ನ್ ಆನಿಂ ರಾತಿಂ ಬಸೊನ್ ಬಿಡಿ ಬಾಂದ್ತೆಲ್ಯಾ ಮ್ಹಜ್ಯಾ ಅವಯ್ಚೆಂ ಪಿಂತುರ್ ಮ್ಹಜ್ಯಾ ದೊಳ್ಯಾಂನಿ ಅಗ್ಮೆಂತ್ ಜಾವ್ನ್ ಪೊಲೆ ಬೆಜ್ಮೆಂತ್ ಜಾಲೆ. ಉಪ್ರಾಂತ್ ಮಾಮ್ಮಿಕ್ ಫೋನ್ ಕರ್ತಾನಾ ತಿಚಿಂ ಪಯ್ಲಿಂ ಉತ್ರಾಂ “ಕಿತ್ಯಾಕ್ ಬೆಜಾರಾಯೆನ್ ಆಸಾಯ್ ಪುತಾ ಕಿತೆಂ ಜಾಲೆಂ?” ಹ್ಯಾ ಮಾಂಯ್ಕ್ ಸರಿ ಜಾಂವ್ಚೆ ವಯ್ಜ್, ವಿಜ್ಜಾನಿ, ಬೊಲ್ಮೆಂಗಾರ್ ಕೊಣೀ ಅಜೂನ್ ಜಲ್ಮೊಂಕ್ ನಾಂತ್.

ಮಾಂಯ್ಚಾ ಪಾಲ್ವಾ ಮುಖಾರ್ ವೊತಾಂಯ್ ಮೊವಾಳ್ತಾತ್, ತಿಣೆಂ ಪಾಂಯ್ ದವರ್ಲೆಲೆ ಕಡೆಂ ಭಾತಾಂ ಆನಿ ರಾದ್ವಾಂಯ್ ಕಿರ್ಲಾತಾಲಿ. ಗಿಮಾಂತ್ ಘಾಮಾಂ ಥೆಂಬ್ಯಾಸಂಗಿ, ಪಾವ್ಸಾಂತ್ ಪಾವ್ಳ್ಯಾ ಸಂಗಿ ಅದಾನ್ ಚಡೊವ್ನ್ ಶಿಜಾಯ್ಲೆಲ್ಯಾ ಶಿತಾಕ್ ಆಸ್ಚಿ ತಿ ರೂಚ್ ಮ್ಹಜ್ಯಾಚ್ ಮರ್ಜೆನ್ ಕುಕ್ಕಾರಾಂತ್ ಶಿಜ್ಲೆಲಿ ಶಿತಾಂ ದೀನಾಂತ್. ಕಷ್ಟ್ ಯೆತಾನಾ ಅಮಾಸೆಂತ್ ನೆಕೆತ್ರಾಂ, ಪುನ್ವೆಂತ್ ಚಂದ್ರೆಮ್ ದಾಕವ್ನ್ ಆಮ್ಚ್ಯಾ ಬರ‍್ಯಾ ದಿಸಾಕ್ ಸೊಸ್ಣಿಕಾಯೆನ್ ರಾಕೊನ್ ರಾಂವ್ಚ್ಯಾ ಪ್ರೇರಣಾಚ್ಯಾ ಉತ್ರಾಂ ಮುಖಾರ್ ಸಂಸಾರಾತ್ಲೆ ಸರ್ವ್ ಆಧ್ಯಾತ್ಮಿಕ್ ಬೂಕ್ ಅಪ್ಲಿ ತಕ್ಲಿ ಬಾಗಾಯ್ತಾತ್.

ದುಕಾಂನಿ ಭರುನ್ ತಾಂಬ್ಡೆ ಜಾಲ್ಲೆ ದೊಳೆ ಪುತಾನ್ ಅಪ್ಲ್ಯಾ ಅವಯ್ಕ್ ಹೊಗ್ಡಾವ್ನ್ ಅನಾಥ್ ಜಾಲ್ಲೆ ಶೋಕ್ ವ್ಯಕ್ತ್ ಕರ್ತಾತ್. ಮಾತ್ರ್ ನಂಯ್, “ಜರ್ ಹಾಂವ್ ಹೆಡ್ ಫೋನ್ ಘಾಲಿನಾಸ್ತಾ ಆಸ್ಲೊ ತರ್ ಮಾಂಯ್ ಮ್ಹಜೆಸಂಗಿ ಇಲ್ಲಿಂ ಚಡ್ ವರ್ಸಾಂ ಆಸ್ತಿ ಯಾ ಹಾಂವ್ ತಿಕಾ ವಾಚೊಂವ್ಕ್ ಸಕ್ತೊ ಕೊಣ್ಣಾ” ಮ್ಹಳ್ಳೆಂ  ತೆಂ ಪ್ರಾಚಿತ್ ಕ್ಲಾನ್ವಿನಾಚ್ಯಾ ನಟನಾಂತ್ ದಿಸ್ತಾ. ನಟನಾಂತ್ ಕ್ಲ್ಯಾನ್ವಿನ್ ತುಕಾ ತುಂಚ್ ಸರಿ. ಝೀನಾಚೆ ನಟನ್ ಆನಿ ಶಯ್ಲೆನ್ ಮಾಕಾ ಮಜ್ಯಾ ಮಾಮ್ಮಿಕ್ ಪಳೆಯ್ಲೆಲೆ ಬರಿ ಜಾಲೆ. ಮಾಂಯ್ಕ್ ವರ್ಣುಂಕ್ ಉತ್ರಾಂ ಭರ್ಪೂರ್ ಆಸ್ಲ್ಯಾರೀ ಅಮ್ಕಾಂ ಉಣಿಂಚ್.

ಮಾಂಯ್ಚಿ ಮೊಗಾ ಊಬ್ ಮಾತ್ರ್ ಆಮಿ ಖಂಯ್ ಘೆಲ್ಯಾರಿ, ಕಶೆಂ ಜಿಯೆಲ್ಯಾರಿ ವಾ ಹ್ಯಾ ಸಂಸಾರಾಕ್ ಅದೇವ್ಸ್ ಕೆಲ್ಯಾರೀ ವಚಾನಾ. ಪ್ರಕೃತೆಸಂಗಿ ಪರತ್ ಆಮಿ ಮಾಂಯ್ಚ್ಯಾ ಗರ್ಭಾಂತ್ ಲೀನ್ ಜಾತಾಂವ್.

ಜೊಯೆಲ್ ಡಿಸೋಜಾನ್ ಆಪ್ಲ್ಯಾ ಅವಯ್ಕ್ ಸಮರ್ಪಿತ್ ಕರುನ್ ನಿರ್ಮಾಣ್ ಕೆಲ್ಲೆಂ ಹೆಂ ಪದ್ ಆಮ್ಕಾಂ ಆಮ್ಚ್ಯಾ ಮಾಂಯ್ಚ್ಯಾ ತ್ಯಾಗಾಚಿ ಆನಿ ಮೊಗಾ ಊಬೆಚ್ಯೊ ಯಾದಿ ಮತಿಪಡ್ದ್ಯಾರ್ ಹಾಡುನ್ ದೊಳ್ಯಾಖಾಂಚಿನಿ ದುಕಾಂ ಹಾಡುಂಕ್ ಸಕ್ಲ್ಯಾ ತರ್ ಹಿ ತಾಚಿ ಜೀಕ್.