ಪೆನ್ ಡ್ರೈವ್ ಲೀಕ್ಸ್!

165

ಕೊಂಕ್ಣಿ ಪತ್ರಾಚ್ಯಾ ಹ್ಯಾ ದಫ್ತರಾಚ್ಯಾ ಬಾಗ್ಲಾರ್ ಪಾವ್ತಾನಾ ಇಲ್ಲೊಸೊಂ ನರ್ವಸ್ ಜಾಲ್ಲೊಂ ಹಾಂವ್. ಭಿತರ್ಲೆ ಭಿತರ್ ಇಲ್ಲೆಶೆಂ ಭ್ಯೆಂಯ್ ಆಸ್‌ಲ್ಲೆಂ. ಹೊ ಸಂಪಾದಕ್ ಖಂಯ್ಚ್ಯಾ ಮೂಡಾರ್ ಆಸಾ ಗೀ ಕೋಣ್ ಜಾಣಾಂ? ಜಾಲ್ಯಾರೀ ದಾರ್ ಠೊಕುಂಕ್ ಮ್ಹಣ್ ಹಾತ್ ದಾರಾಸರ್ಶಿಂ ವ್ಹೆಲಾ ಮಾತ್ರ್. ವಿಪ್ರೀತ್ ಕಾಂಪ್ಚಿಂ ಮ್ಹಜಿಂ ಬೊಟಾಂ ದಾರಾಕ್ ಲಾಗೊನ್ ಆಪಾಪಿಂಚ್ ‘ಟಕ್ ಟಕ್ ಟಕ್’  ಆವಾಜ್ ಜಾಲೊಚ್.

“ಹಾಂ ಭಿತರ್ ಯೆವ್ಯೆತ್” ಸಂಪಾದಕಾಚೊ ಘಮಂಡ್ ಭರಿತ್ ತಾಳೊ.

ಹಾಂವ್ ಕಾವ್ಜೆಣೆನ್ ಶೆಂ ಭಿತರ್ ಸರ್ಲೊಂ. ತೊ ಕಂಪ್ಯೂಟರಾರ್ ಕಿತೆಂಗೀ ಪಳೆವ್ನ್ ಆಸ್ಲೊ. ಕೊಣೆಂಗೀ ಗಿಚ್ಚುನ್ ಉಪ್ರಾಂತ್ ಕಾಂಟಾಳೊನ್, ಆಳ್ವಯಿಲ್ಲ್ಯಾ ಕವಿತೆಚ್ಯಾ ವೊಳಿಚ್ಯಾ ಮಾಜ್ವನಾತ್ಲ್ಯಾ ಕುರುಃಬರಿ  ತಾಚ್ಯಾ ಕಪಾಲಾರ್ ಮಿರಿಯೊ ಆಸ್‌ಲ್ಲ್ಯೊ. ಮ್ಹಜೆಂ ತೋಂಡ್ ಸಯ್ತ್ ಪಳಯ್ನಾಸ್ತಾಂ ಹಾತ್ ಭಾಶೆನ್ ಬಸ್ ಮ್ಹಣಾಲೊ. ‘ಅರೆ! ಕೊಂಕ್ಣಿ ಸಾಹಿತಿ ಇತ್ಲೆಯ್ ಸಸಾರ್ ಜಾಲ್ಯಾತ್ ಗಾಯ್?’ ಮ್ಹಣ್ ಮ್ಹಜೆ ಇತ್ಲ್ಯಾಕ್ ಚಿಂತುಂಕ್ ಪಡ್ಲೊಂ. ಹ್ಯಾ ಕೊಂಕ್ಣಿ ಸಾಹಿತಿಂನಿ ಸಂಭ್ರಮ್ಚೆಂ ಪಳಯ್ತಾನಾ, ಪತ್ರಾರ್ ಫಾಯ್ಸ್ ಜಾಲ್ಲ್ಯಾ ಬರ್ಪಾಚೆ ಫೊಟೆ ಕಾಡ್ನ್ ಸ್ಟೇಟಸ್ ಘಾಲ್ಚೆಂ ಪಳಯ್ತಾನಾ ಕೊಂಕ್ಣಿ ಸಾಹಿತಿಂಚೆಂ ಸ್ಟೇಟಸ್ ಬರೇಂ ಆಸಾ ಮ್ಹಣ್ ಚಿಂತುನ್ ಫಸ್ಲೊಂಗೀ ಕಿತೆಂ ಹಾಂವ್? ಮ್ಹಜೆಯಿತ್ಲ್ಯಾಕ್ ದುಬಾವ್ ಪಾವ್ಲೊಂ.

ಆನಿ ತಡೊವ್ ಕೆಲ್ಯಾರ್ ಜಾಯ್ನಾ ಮ್ಹಣೊನ್ ಹಾಂವೆಂ ಹಳೂ ಬೊಲ್ಸಾಂತ್ಲಿ ಪೆನ್ ಡ್ರೈನ್ ಕಾಡ್ಲಿ ಆನಿ ತಾಚೆ ಮುಕಾರ್ ಧರ್ಲಿ.

“ಸರ್ ಪೆನ್ ಡ್ರೈವ್…”

‘ಪೆನ್ ಡ್ರೈವ್’ ಉತರ್ ಆಯ್ಕಲ್ಲೆಂಚ್ ಎಕಾಚ್ಚಾಣೆಂ ತಾಚೊ ಛಾರೊ ಬದ್ಲಲೊ. ಬೊವ್ ಖುಶೇನ್ ಧಾಯ್ ಬೊಟಾಂನಿ ರಪಕ್ಕ ತಿ ಆರಾವ್ನ್ ಘೆತ್ಲಿ ಆನಿ ಆಪ್ಲ್ಯಾ ಕಂಪ್ಯೂಟರಾಕ್ ಶಿರ್ಕಾಂವ್ಕ್ ಮ್ಹಣ್ ಬಾಗ್ವಲೊ.

“ಸಂಪಾದಕ್ ಸರ್… ಹಾಂವೆಂ ಪಯ್ಲೆಪಾವ್ಟಿಂ ಬರೊಂವ್ಚೆಂ. ಏಕ್ ಮ್ಹಯ್ನೊಯ್ ಜಾಂವ್ಕ್ ನಾ ಹಾಂವೆಂ ಬರೊಂವ್ಕ್ ಸುರು ಕರ್ನ್. ಹ್ಯೆ ಆವ್ದೆಭಿತರ್ ಬರಯಿಲ್ಲ್ಯೊ ಪನ್ನಾಸ್ ಕವಿತಾ ಹಾಂತುಂ ಆಸಾತ್. ಟಾಯ್ಪ್ ಕರೊವ್ನ್ ಹ್ಯಾ ಪೆನ್ ಡ್ರೈವಾಂತ್ ಘಾಲ್ನ್ ಹಾಡ್ಲ್ಯಾತ್. ದಯಾ ಕರುನ್ ತಾಂತ್ಲ್ಯೊ ಏಕ್ ದೋನ್ ಪುಣೀ ಫಾಯ್ಸ್ ಕರಾ..” ಮ್ಹಜಿ ವಿನತಿ ಸಾಂಗ್ತಾ ಸಾಂಗ್ತಾನಾಂಚ್  ಕಂಪ್ಯೂಟರಾರ್ ಮ್ಹಜಿ ಪೆನ್ ಡ್ರೈವ್ ರೀಡ್ ಜಾಲ್ಲೊ ‘ಟುಂಯ್’  ಮ್ಹಳ್ಳೊ ಆವಾಜ್ ಮ್ಹಜ್ಯಾ ಉತ್ರಾಂಕ್  ಬ್ಯಾಕ್ ಗ್ರಾಂವ್ಡ್  ಮ್ಯೂಜಿಕ್ ಮ್ಹಳ್ಳೆಬರಿ ಆಯ್ಕಲೊ! ಹೆಂ ಆಯ್ಕಲ್ಲೆಂಚ್ ಸಂಪಾದಕಾಚೆಂ ಮುಕಮಳ್‌ಚ್ ಪುರ್ತೆಂ ಬದ್ಲಲೆಂ! ಪರ್ನ್ಯಾ ಬುಕಾಂಚೆರ್ ವ್ಹಾಳಯ್ ಚರ್‌ಲ್ಲೆಬರಿ ತಾಚ್ಯಾ ತೊಂಡಾರ್ ರಾಗಾನ್ ರಗ್ತಾಚ್ಯೊ ಶಿರೊ ಧಾಂವ್ಚ್ಯೊ ದೆಕ್ಲ್ಯೊ ಹಾಂವೆಂ!

“ಕಿತೆಂ ಮ್ಹಳೆಂಯ್? ಕವಿತಾ! ಆತಾಂ ಕವಿತೆಂಚಿ ಪೆನ್ ಡ್ರೈವ್ ಗೀ ಹಿ?” ಮ್ಹಣ್ ರಾಗಾನ್ ಕಂಪ್ಯೂಟರಾಸವೆಂ ನವ್ಯಾನ್  ಸಂಬಂದ್ ಜೊಡ್ಲಲ್ಯಾ ಮ್ಹಜ್ಯಾ  ಪೆನ್ ಡ್ರೈವಾಕ್ ಬಳಾನ್ ವೋಡ್ನ್ ಮೆಜಾಕ್ ಧಾಡಾಯ್ಲಿ ಸಂಪಾದಕಾನ್! ಹಾಚೆ ಆವ್ತಾರ್ ಪಳೆವ್ನ್ ಹಾಂವ್ ಉರ್ಲಾಂಗಿ! ಕವಿತಾ ಬರೊಂವ್ಚೆಂ ಮ್ಹಳ್ಯಾರ್ ತೆದೆಂಯ್ ವ್ಹಡ್ ಮಾನ್ ಮರ್ಯಾದ್ ನಾತ್‌ಲ್ಲೆಂ ಕಾಮ್ ಗೀ? ಮಾಗಿರ್ ಕಿತ್ಯಾಕ್  ಕವಿ ಆಪುಣ್ ಎದೊ ವ್ಹಡ್ ಮಾನೆಸ್ತ್ ಮ್ಹಣ್ ಚಿಂತ್ತಾತ್?

“ವ್ಹಯ್ ಸರ್. ತುಮ್ಚೆಂ ಪತ್ರ್ ಆಸಾ ನೆ. ದೆಕುನ್ ಫಾಯ್ಸ್ ಕರುಂಕ್ ಮ್ಹಣ್ ಹಾಡ್ಲೆಂ. ಹಾಂವೆಂ ನವ್ಯಾನ್ ಬರೊಂವ್ಚೆಂ ಆನಿ ಪಯ್ಲೆಪಾವ್ಟಿಂ ಎಕಾ ಪತ್ರಾಚ್ಯಾ ದಫ್ತರಾಕ್ ಯೆಂವ್ಚೆಂ. ಹಾಂವೆಂ  ಸಂಪಾದಕ್ ಮ್ಹಳ್ಳ್ಯಾ ಹುದ್ದ್ಯಾರ್ ಆಸ್ಚ್ಯಾ ಎಕಾ ವೆಕ್ತಿಕ್ ಭೆಟ್ಚೆಂಯ್ ಹೆಂಚ್ ಪಯ್ಲೆಪಾವ್ಟಿಂ ಸರ್… ಕಾಂಯ್ ಮ್ಹಜೆಥಾವ್ನ್ ಚೂಕ್ ಜಾಲಿಗೀ?”

“ವ್ಹಡ್ ನಾ ಸೊಡ್. ಪೆನ್ ಡ್ರೈವ್ ಆತಾಂಚೆಂ ಲೇಟೆಸ್ಟ್ ಟ್ರೆಂಡ್ ನೆ… ತಶೆಂ ಆಯ್ಚ್ಯಾ ಕಾಳಾಕ್ ಸರ್ ಜಾಲ್ಲೆಂ ಕಾಂಯ್ ಹಾಡ್ಲಾಂಯ್ ಗೀ ಮ್ಹಣ್ ಚಿಂತ್ಲೆಂ… ತುಂ ನವೊ ನೆ… ತುಕಾ ಮಾಫ್ ಆಸಾ” ಸಂಪಾದಕಾಚೊ ಇಲ್ಲೊಸೊ ರಾಗ್ ಥಂಡ್ ಜಾಲೊ.

“ಏಕ್ ವಿಚಾರಿಜೆ ಮ್ಹಣ್ ಭೊಗ್ತಾ ಸರ್. ಬೆಜಾರ್ ಕರಿನಾಕಾತ್”

“ವಿಚಾರ್ ಸಾಯ್ಬಾ ಕಾಲೆಂ ಬೆಜಾರ್?”

“ತುಮ್ಕಾಂ ಪಳಯ್ತಾನಾ ಸಾಹಿತಿ-ಸಾಹಿತ್ಯಾವಿಶಿಂ ಭಾರಿಚ್ ಬೆಜಾರಾಯ್ ಆಸ್ಲೆಬರಿ ಭೊಗ್ತಾ. ಕಾರಣ್ ಕಿತೆಂ ಮ್ಹಣ್ ವಿಚಾರ್ಯೆತ್ ಗೀ ಸರ್? ಕಾಂಯ್ ಕೊಂಕ್ಣಿ ಸಾಹಿತಿಂನಿ ತುಮ್ಚೊ ಜಾಗೊ ಪುಣೀ  ಭಿತರ್ ಘಾಲಾ ಗೀ ಸರ್?”

“ಜಾಗೊ… ಯೇ ದಾಕಯ್ತಾಂ” ಮ್ಹಣ್ ಮ್ಹಜೊ ಹಾತ್ ಧರ್ನ್ ಗೋಡಾವ್ನಾಕ್ ವೋಡ್ನ್ ವ್ಹರ್ನ್ ಗೆಲೊ ತೊ. ಹಾಂವ್ ಆತಾಂ ನಿಜಾಯ್ಕಿ ಭಿಯೆಲೊಂ. ಭಿತರ್ ಏಕ್ ರೂಂದ್ ಕೂಡ್. ಆನಿ ತಾಂತುಂ ಪೂರಾಯ್ ಬುಕಾಂಚೆ ಕಾಟ್. ತ್ಯಾ ರಾಸ್ ಬುಕಾಂಚ್ಯಾ ಕಾಟಾತೆವ್ಶಿಂ ಬೋಟ್ ಜೊಕುನ್ ಮ್ಹಣಾಲೊ, “ಪಳೆ. ಹರ್ದ್ಯಾಕ್ ಖೊಟ್ ಸ್ಸೋರಿ… ಕೋಟ್ ಘಾಲ್ನ್ ದವರ್ಲಲೆ ಹೆ ಕಾಟ್ ಪಳೆ. ಹೆ ಕಾಟ್ ದಾಳ್ನ್ ದವರ್ ಲ್ಲೊ ಹೊ ಜಾಗೊ ಕಿತ್ಲೊ ಸ್ಕ್ವೇರ್ ಫಿಟ್ ಜಾಯ್ತ್? ಹೊ ಜಾಗೊ ಭಾಡ್ಯಾಕ್ ದಿಲ್ಲೊ ತರ್ ಮ್ಹಾಕಾ ಮ್ಹಯ್ನ್ಯಾಕ್ ಧಾ ಹಜಾರ್ ಮೆಳ್ತೆ. ಆತಾಂ ಸಾಂಗ್ ಮ್ಹಜೊ ಜಾಗೊ ಹ್ಯಾ ಬುಕಾರುಪಾರ್ ಸಾಹಿತಿಂನಿ ಭಿತರ್ ಘಾಲ್ಲೆಬರಿಚ್ ವ್ಹಯ್ ಗಿ ನ್ಹಯ್?!”

ಆಯ್ಕೊನ್ ಬಿರ್ಮತ್ ದಿಸ್ಲಿ ಹ್ಯಾ ಸಂಪಾದಕಾಚಿ… ಆತಾಂ ಕಶೆಂ ಪುಣೀ ಸಮಾಧಾನ್ ಕರಿಜೆ ನೆ…

“ಸ್ಸೋರಿ ಸರ್. ತುಮ್ಚ್ಯಾ ಜಾಗ್ಯಾರ್ ಹಾಂವ್ ಆಸ್ಲೊಂ ತರೀ ತಶೆಂಚ್ ಕರ್ತೊಂ. ಭೊಗ್ಶಿಯಾ ದೆಕುನ್ ತುಮ್ಕಾಂ ಬೊರ‍್ಯಾವಯ್ರ್ ಭೊರ್ಕುಟಿ ಕಿತ್ಯಾಕ್ ಮ್ಹಣ್ ಮ್ಹಜ್ಯೊ ಕವಿತಾ ಪತ್ರಾರ್ ಬರೊವ್ನ್ ಹಾಡಿನಾಸ್ತಾಂ ಪೆನ್ ಡ್ರೈವಾಂತ್ ಘಾಲ್ನ್ ಹಾಡ್ಲ್ಯಾತ್…”

ತಾಣೆಂ ಹಳೂ ಮ್ಹಾಕಾ ಪರತ್ ಭಾಯ್ರ್ ಆಪೊವ್ನ್ ಹಾಡ್ನ್ ಬಸಯ್ಲೆಂ ಆನಿ ಆನಿ ತೊಯ್ ಬಸ್ಲೊ.

“ಊಫ್… ” ಏಕ್ ಲಾಂಬ್ ಉಸ್ವಾಸ್ ಸೊಡ್ಲೊ ತಾಣೆಂ ಆನಿ ಏಕ್ ಘೊಟ್ ಉದಕ್ ಪಿಯೆವ್ನ್ ಸವ್ಕಾಸ್ ಸುರು ಕೆಲೆಂ –

“ಒಟ್ಟಾರೆ ಕೊಂಕ್ಣಿ ಪತ್ರ್‌ಕಾರ್ ಜಾಲ್ಲೆಂ ಮ್ಹಜಿಂ ಕರ್ಮಾ ಸಾಯ್ಬಾ”

“ಕಿತ್ಯಾಕ್ ಸರ್ ತಶೆಂ ಮ್ಹಣ್ತಾತ್? ಕೊಂಕ್ಣೆಂತ್ ಕಿತೆಂ ಬರೇಂ ಸಾಹಿತ್ಯ್ ನಾಂಗೀ? ಕೊಂಕ್ಣೆಂತ್ ಕಿತ್ಲೆ ಮೊವಾಳ್ ಗುಣೇಸ್ತ್ ಸಾಹಿತಿ ಆಸ್ಚೆ. ತಾಂಚೆಂ ಬರಪ್ ಕಾಂಯ್ ವಾಚಿನಾತ್ಲ್ಯಾರೀ  ತಾಂಚೆವಿಶ್ಯಾಂತ್ ಆಯ್ಕಲಾಂ ಹಾಂವೆಂ.”

“ತೊಚ್ ಸಮಸ್ಸೊ ಸಾಯ್ಬಾ…”

“ಮ್ಹಾಕಾ ಸಮ್ಜೊಂಕ್ ನಾ ಸರ್”

“ಹಾಂಗಾ ಆಸ್ಚೆ ಪೂರಾಯ್ ಸಾಂತ್ ಚ್. ಆಮಿ ಹ್ಯಾ ಸಾಂತಾಂನಿ ಲಿಖ್‍ಲ್ಲೆಂ  ಭಾಗೆವಂತ್ ಪವಿತ್ರ್ ಸಾಹಿತ್ಯ್ ಛಾಪಿಜೆ. ದೆಕುನ್ ಆಮ್ಚ್ಯಾ ಕೊಂಕ್ಣೀ ಪತ್ರಿಕೋದ್ಯಮಾಂತ್ ಕಾಂಯ್ ಥ್ರಿಲ್ಲ್ ನಾ ಜಾಲಾಂ. ಪಳೆ ದುಸ್ರ್ಯಾ ಭಾಶೆಂತ್. ಥಂಯ್ಚ್ಯಾ ಪತ್ರಿಕೋದ್ಯಮಾಕ್ ಕಸಲಿಂ ಪೂರಾ ಪೊಕ್ರಿ ಪೊಕ್ರಿ ಘಡಿತಾಂ ಮೆಳ್ತಾತ್.. ಹೆರ್ ಭಾಶೆಂನಿ ಪಳೆ. ಆದಿಂ ಫೊಟೆ ಲೀಕ್ ಜಾತಾಲೆ. ಆತಾಂ ವೀಡಿಯೋ ಲೀಕ್ ಜಾತಾತ್. ಆದಿಂ ಸಿಡಿ ಲೀಕ್ ಜಾತಾಲಿ. ಆತಾಂ ಪೆನ್ ಡ್ರೈವ್ ಚ್ ಲೀಕ್ ಜಾತಾ. ಹೆರ್ ಭಾಶೆಂಚೆ ಕಿತ್ಲೆ ಅಪ್ಡೇಟ್ ಆಸಾತ್ ಪಳೆ. ಆಮ್ಚ್ಯೆ ಕೊಂಕ್ಣೆಂತ್ ತಶೆಂ ಥ್ರಿಲ್ಲ್ ದಿಂವ್ಚೆಂ ಕಾಂಯ್ ಆಸಾ? ಹಾಂಗಾ ಸಿಡಿ, ಪೆನ್ ಡ್ರೈವ್, ವೀಡಿಯೋ ಸೊಡ್ಯಾಂ… ಏಕ್ ಲವ್ ಲೆಟರ್ ಸಯ್ತ್ ಲೀಕ್ ಜಾಲಾಂ ಎದೊಳ್?”

“ತಸಲೆಂ ಗಲೀಜ್ ಕೊಂಕ್ಣಿ ಪತ್ರಿಕೋದ್ಯಮಾಕ್ ಕಿತ್ಯಾಕ್ ಸರ್? ಪಾಪಾಚ್ಯಾ ಕೊಂಕ್ಣಿ ಸಾಹಿತಿಂಕ್ ತ್ಯಾ ರಾಜಕಾರಣಿಂಕ್ ಸರ್ ಕರ್ಚೆಂ ಸಾರ್ಕೆಂ ಕಿತ್ಲೆಂ ಸಾರ್ಕೆಂ ಸರ್? ಕೊಂಕ್ಣಿ ಮನಿಸ್ ತಸಲೆ ನ್ಹಯ್… ಆನಿ ಕೊಂಕ್ಣಿ ಸಾಹಿತ್ಯಾಂತ್ ತಶೆಂ ವಿಕೃತ್ ಮನಿಸ್ ಆಸೊಂಕ್ ಸಾಧ್ ಗೀ ಸರ್? ತ್ಯಾ ದೆಕುನ್ ಆಮಿ ಸಂತೊಸ್ ಪಾವಜೆ ನೆ”

“ಕಾಲೆಂ ಸಾಯ್ಬಾ? ಸಕ್ಡಾಂಚೆಂ ಭಿತರ್ಲ್ಯಾಭಿತರ್ ಚ್ ಚಲ್ತಾ. ಅಳೆ ಚಡಾವತ್ ಕಾಜಾರಾಂಕ್ ಭಲಾಯ್ಕಿ ಮಾಗ್ತಾನಾ, ‘ಎಕಾಮೆಕಾ ಪಾತ್ಯೆಣೆನ್ ಆಸಜೆ, ಮೋಸ್ ಕರುಂಕ್ ನ್ಹಜೊ ಮ್ಹಣ್ತಾ ನೇ ಎಕ್ಲೊ ಕವಿ.. ತೊಚ್ ಚಾರ್ ಪಾಂಚ್ ಜಣಾಂಕಡೆ ಫ್ಲರ್ಟ್ ಕರ್ತಾ ಮ್ಹಳ್ಳೆಂ  ಗುಸುಗುಸು ಆಸಾ. ಸುಫಳ್ ಕಾಜಾರಿ ಜಿವಿತಾಚೆ ಘುಟ್ ಮ್ಹಣ್ ಧಾರಾಳ್ ಲೇಖನಾಂ ಬರಯ್ತಾ ಪಳೆ ಎಕ್ಲಿ ಲೇಖಕಿ… ಹಿಚೆ ಘುಟ್ ಭಾಯ್ರ್ ಪಡ್ಲ್ಯಾರ್ ತಿಚ್ಯಾಚ್ ಕುಟ್ಮಾಂತ್‌ಚ್ ಫುಟ್ ಯೇಂವ್ಕ್ ಆಸಾ! “ದೆವಾನ್ ರಚ್ ಲ್ಲೆಂ ಆದಾಂವ್ ಆನಿ ಯೆವೆಕ್ ಮಾತ್ರ್. ದಾದ್ಲ್ಯಾಕ್ ಏಕ್ ಬಾಯ್ಲ್. ತೆಂ ಸೊಡ್ನ್ ದಾದ್ಲ್ಯಾನ್ ದಾದ್ಲ್ಯಾ ಕಡೆ ಕಾಜಾರ್ ಜಾಂವ್ಚೆಂ ಬಾಯ್ಲೆನ್ ಬಾಯ್ಲೆಕಡೆ ಕಾಜರ್ ಜಾಂವ್ಚೆಂ ಪ್ರಕೃತೆವಿರೋಧ್ ಮ್ಹಣ್ ಭಾಶಣಾಂ ದಿತಾ ಪಳೆ ಎಕ್ಲೊ ಮಾಲ್ಘಡೊ… ತೊ  ಖುದ್ ಏಕ್ ಗೇ ಮ್ಹಳ್ಳಿ ಗೇ ಖಬರ್ ಆಸಾ!

‘ಅಂತಸ್ಕರ್ನಾಭಿತರ್ ತೀಳ್’ ಮ್ಹಣ್ ಎಕಾ ಪತ್ರಾರ್ ಆದ್ಯಾತ್ಮಿಕ್ ಬರ್ಪಾಂ ಲಿಖ್ತಾ ಪಳೆ ಎಕ್ಲೊ ಅರ್ಧೊ ಪಾದ್ರಿ… ತೊ ಸೆಜಾರ‍್ಯಾಚ್ಯಾ ನ್ಹಾಣಿಯೆಕ್ ತಿಳುಂಕ್ ವಚೊನ್ ಶಿರ್ಕೊನ್ ಪಡ್‍ಲ್ಲಿ ಕಾಣಿ ಆಸಾ… ಅಸಲ್ಯೊ ಕಾಣಿಯೊ ಮ್ಹಸ್ತ್ ಆಸಾತ್. ಆಮ್ಕಾಂ ಎಕ್ಕೀ ಪ್ರೂಫಾಸವೆಂ ಮೆಳನಾ ಮ್ಹಣ್ಚೆಂ ಹಾಂವೆಂ, ಆಮ್ಕಾಂ ಪತ್ರ್‌ಕಾರಾಂಕ್ ಎಕ್‌ಚ್ ಏಕ್ ವೀಡಿಯೋ ಸೊಡ್ಯಾಂ ಏಕ್ ಸ್ಕ್ರೀನ್ ಶೊಟ್ ಸಯ್ತ್ ಮೆಳಾನಾ! ಮಾಗಿರ್ ಆಮ್ಚಿಂ ಪತ್ರಾಂ ಲೊಕಾನಿ ವಾಚ್ಚಿಂ ತರೀ ಕಶಿಂ? ಪತ್ರಿಕೋದ್ಯಮ್ ಉದ್ಯಮ್ ಜಾವ್ನ್ ವಾಡೊಂಕ್ ಫಕತ್ ಕಾಣಿ ಕವಿತಾ. ಲಲಿತ ಪ್ರಬಂಧ್ ಆಸ್ಲ್ಯಾರ್ ಪಾವನಾ… ಕೊಣಾಚೊಯ್ ವಯಕ್ತಿಕ್ ಖಬ್ರೊ, ಅನಯ್ತಿಕ್  ಸಂಬಂದ್, ಖಾಸ್ಗಿ ವೀಡಿಯೋ, ಆಡಿಯೋ, ಸಿಡಿ, ಪೆನ್ ಡ್ರೈವ್ ಮೆಳಜೆ. ಆಮ್ಕಾಂ ದೊಗಾಂನಿ ಶೇರ್ ಕೆಲ್ಲೊ ಏಕ್  ಬಪ್ಪರ್ ಜ್ಯೋಕ್ ಸಯ್ತ್ ಮೆಳಾನಾ ಸಾಯ್ಬಾ. ಹಾಂಗಾಸರ್ ಕಾಂಯ್ ಲೀಕ್ ಚ್ ಜಾಯ್ನಾ! Leakless weak literature!”

ಸಂಪಾದಕಾಚಿಂ ಉತ್ರಾಂ ಆಯ್ಕೊನ್ ಮ್ಹಜಿ ಸೊಸ್ಣಿಕಾಯ್ ಲೀಕ್ ಜಾಂವ್ಚ್ಯಾರ್ ಆಸ್ಲಿ! ಹಾಂವ್ ಚ್ ಲಜೆನ್ ತಕ್ಲಿ ಪಂದಾ ಘಾಲ್ನ್ ಆಯ್ಕತೇ ಆಸ್ಲೊಂ.

“ಆಮ್ಚ್ಯಾ ಭಾಗೆವಂತ್ ಬರ್ಪ್ಯಾಂಚ್ಯಾ ಕಾಣಿಯೆಂತ್ ಏಕ್ ಪಾತ್ರ್ ಸಯ್ತ್ ಸೆಕ್ಸಾಚೆಂ ಮಹತ್ವ್ ಸಾಂಗ್ಚೆಂ ಪಾರ್ಕಿಲಾಂಯೆ ತುವೆಂ? ಹಾಂಗಾ ಕಶೆಂಯ್ ನಾ ಮು… ಹೆರ್ ಭಾಶೆಂಥಾವ್ನ್ ಅನುವಾದಾಂತ್ ಕೆಲ್ಲ್ಯೆ ಕಾಣಿಯೆಂತ್ ಸೆಕ್ಸ್ ಆಯ್ಲ್ಯಾರೀ ಹಾಂಗಾಚೆ ಬರೊವ್ಪಿ, ‘ಆಪ್ಣೆಂ ತಿ ಅನುವಾದ್ ಕಾಣಿ ವಾಚುನ್ ಪಾತಕ್ ಕೆಲೆಂ’ ಮ್ಹಣ್ ಕುಮ್ಸಾರ್ ಜಾತಾತ್! ಹ್ಯಾ ಭಾಗೆವಂತ್ ಸಾಹಿತಿಂಕ್ ಸಾಂಗ್‌ಲ್ಲೆ ಥೊಡೆ ಭಾಗೆವಂತ್ ಸಂಪಾದಕ್‌ಯೀ ಆಸಾತ್. ಹೆ ಕಿತ್ಲೆ ನಿಸ್ಕಳ್ ಮ್ಹಳ್ಯಾರ್, ಕೊಣೆಂ ಪುಣೀ ‘ಚಿಕನ್ ಮೊಮೋಸ್’ ರೆಸಿಪಿ ಬರೊವ್ನ್ ಧಾಡ್ಲ್ಯಾರ್ ತಾಂತ್ಲೊಂ ‘ಮೊಮೊ’ ಬಪ್ಪರ್ ಜಾತಾ ಮ್ಹಣ್, ತೊ ಸಬ್ದ್ cut ಕರ್ನ್ ಫಾಯ್ಸ್ ಕರುಂಕ್ ಆಸಾತ್! ತಾನ್ ಭುಕ್ ಆಸ್ಲೆಬರಿ ಸೆಕ್ಸ್ ಮನ್ಶ್ಯಾಚಿ ಗರ್ಜ್ ಸಾಯ್ಬಾ! ಆಪ್ಣಾಚಿ ತಿ ಗರ್ಜ್ ಆನ್ಯೆಕ್ಲ್ಯಾಚೆರ್ ಬಲಾತ್ಕಾರಾನ್ ಥಾಪುಂಕ್ ನ್ಹಜೊ ಸೊಡ್ಲ್ಯಾರ್ ಸಕ್ಡಾಂನಿ ಗಲೀಜ್ ಪಾಂವ್ಚಿ ಗಜಾಲ್ ನ್ಹಯ್ ತಿ!”

ಹ್ಯಾ ಸಂಪಾದಕ್ ಸಾಯ್ಬಾಚಿ ಉತ್ರಾಂ ಆಯ್ಕೊನ್ ಹಾಂವ್ ಖಂಯ್ ಆಯ್ಲಾಂ ಮ್ಹಣ್  ಭ್ಯೆಂ ದಿಸ್ಲೆಂ… ಹ್ಯೆ ಸಂದಿಗ್ದ್ ಪರಿಸ್ಥಿತೆಂತ್ ನಾಕಾ ನಾಕಾ ಮ್ಹಳ್ಯಾರೀ ಮ್ಹಜ್ಯಾ ತರ್ನಾಟ್ ಪಣಾಚ್ಯಾ ದಿಸಾಂಚೆಂ ಏಕ್ ಘಡಿತ್ ಉಡಾಸ್ ಆಯ್ಲೆಂ.

ಆದಿಂ ಥಾವ್ನ್ ಹಾಂವ್ ಭಾರಿಚ್ ಪಾಪಾಚೊ ಭುರ್ಗೊ. ದೇವ್ ಧರ್ಮ್ ಮ್ಹಾಕಾ ಬೊವ್ ಲಾಗಿಂ. ಹ್ಯಾ ದೆಕುನ್ ಚ್ ಥೊಡೆ ಪೊಕ್ರಿ ಚೆಡೆ ಮ್ಹಾಕಾ ತಮಾಶೆ ಕರ್ತಾಲೆ. ಏಕ್ ದೀಸ್ ತಾಣಿಂ ಮ್ಹಾಕಾ ಮಾಂಕೊಡ್ ಕರ್ನ್ ಬರೇಂ ಸಿನೆಮಾ ಆಯ್ಲಾಂ ಯೇ ಮ್ಹಣ್ ಬಪ್ಪರ್ ಪಿಚ್ಚರಾಕ್ ಆಪೊವ್ನ್ ವ್ಹೆಲ್ಲೆಂ. ಥಂಯ್ ಕಿತೆಂ ಪಳೆಂವ್ಚೆಂ! ದಾದ್ಲೊ ಬಾಯ್ಲ್ ದೊಗಾಂಯ್ ನಾಗ್ಡಿಂ ನ್ಹಾತಾತ್.. ತೆಂಯ್ ಎಕೆಚ್ ನ್ಹಾಣಿಯೆಂತ್! ಹಾಂವ್ ಉರ್ಲಾಂ ಗೀ? ದೊಳೆ ಧಾಂಪುನ್ ಹರ್ದ್ಯಾಚ್ಯಾ ಕೊಂತಾಚೊ ಖುರಿಸ್ ಮುಟಿಂತ್ ದಾಂಬುನ್ನ್ ಧರ್ಲೊ. ಬೊವ್ಶ್ಯಾ ಮೂಟ್ ಚಡ್ ಅಂರ್ಧಲ್ಲಿ ಗೀ ಮ್ಹಣ್… ಪೆಂಕ್ಡಾಭೊಂವ್ತಿಂ ಕಿತೆಂ ಗೀ ವೊತುನ್ ಗೆಲ್ಲೊ ಅನ್ಭೋಗ್ ಜಾಲ್ಲೊ! ಮ್ಹಾಕಾ ಲಜೆನ್ ಕಾಂಯ್ ನ್ಹಜೊ. ತಾಚ್ಯಾ ಉಪ್ರಾಂತ್ ಏಕ್ ಸಿನೆಮಾ ಸೊಡ್ಯಾಂ, ಸಿನೆಮಾಚೆಂ ಪೋಸ್ಟರ್ ಸಯ್ತ್ ಪಳೆತಾನಾ ಭ್ಯೆಂ ದಿಸ್ತಾ ಮ್ಹಾಕಾ. ತಶೆಂ ಆಸ್ತಾಂ ಹೊ ಸಂಪಾದಕ್…

“ಅಳೆ ಮಾನೆಸ್ತಾ…” ಸಂಪಾದಕಾಚ್ಯಾ ಉಲ್ಯಾಕ್ ಹಾಂವ್ ಫ್ಲ್ಯಾಶ್ ಬ್ಯಾಕಾಂತ್ಲೊ ಭಾಯ್ರ್ ಆಯ್ಲೊಂ. “ತುವೆಂ ಕಾಂಯ್ ಭಿಯೆಜೆ ಮ್ಹಣ್ ನಾ.. ತುಕಾ ಬರೊ ಫುಡಾರ್ ರುತಾ ಕರ್ಯೆತಾ”

ತಾಚಿಂ ಉತ್ರಾಂ ಆಯ್ಕೊನ್ ಏಕ್ ಪಾವ್ಟಿಂ ಮ್ಹಜೆ ಕಾನ್ ನೀಟ್ ಜಾಲೆ. “ಸತ್ತ್ ಗೀ ಸರ್?”

“ಪುಣ್ ಹೆಂ ಏಕ್ ಗುಪಿತ್ ಮಿಸಾಂವ್. ಕೊಂಕ್ಣಿ ಪತ್ರಿಕೋದ್ಯಮ್ ಉಡಾಸಾಂತ್ ಉರ್ಚೆತಸಲೆಂ ಕಾಮ್ ತುಕಾ ವ್ಹಯ್ಸುನ್ ದಿತಾಂ ಕರ್ಶಿಗೀ ತುಂ?”

“ಕಿತೆಂ ಸರ್ ತೆಂ?” ಹಾಂವೆಂ ದುಬಾವಾನ್‌ಚ್ ವಿಚಾರ್ಲೆಂ.

“ಅಳೆ… ತುಕಾ ಹ್ಯಾ ಪೆನ್ನಾಂತ್ ಫುಡಾರ್ ನಾ.. ಬದ್ಲಾಕ್ ತುಕಾ ಹಾಂವ್ ಏಕ್ ಪೆನ್ ಕ್ಯಾಮೆರಾ ದಿತಾಂ. ತುವೆಂ ಇತ್ಲೆಂಚ್ ಕರ್ಚೆಂ ಗೀ  ಹಾಂವ್ ಥೊಡ್ಯಾ ಕೊಂಕ್ಣಿ ಸಾಹಿತಿ ಕವಿ. ಕಾಣಿಯೆಗಾರಾಂಚಿಂ ನಾಂವಾಂ ದಿತಾಂ.. ತುವೆಂ ಲೋವ್ ಹೆಂ ಪೆನ್ ತುಜ್ಯಾ ಬೊಲ್ಸಾಂತ್ ಶಿರ್ಕಾವ್ನ್ ತಾಂಚೊ ಗೂಡಾಚಾರ್ ಕರಿಜೆ. ತೆ ಕೊಣಾಕಡೆ ಕುಚು ಕುಚು ಕರ್ತಾತ್… ಕೊಣಾಲಾಗಿಂ ಪುಸುಪುಸು ಕರ್ತಾತ್… ಪೂರಾಯ್ ತುವೆಂ ರೆಕೋರ್ಡ್ ಕರಿಜೆ.  ಮಾಗಿರ್ ಜಾಯ್ ತರ್ ತುವೆಂ ರೆಕೋರ್ಡ್ ಕೆಲ್ಲೆಂ ಪೂರಾಯ್ ಎಕಾ ಪೆನ್ ಡ್ರೈವಾಂತ್ ಘಾಲ್ನ್ ಹಾಡ್…”

ಹಾಚಿಂ ಉತ್ರಾಂ ಆಯ್ಕೊನ್ ಉರ್ಲಾಂಗೀ ಹಾಂವ್! ಹಾಂವೆಂ ಬೋವ್ ಕಶ್ಟಾಂನಿ ಏಕ್ ಆನಂದ್ ಬಾಪಾ ಕಾಡ್ಲೊ. ಮ್ಹಾಕಾ ಆತಾಂ ಸಾಟ್ ಉತರ್ಲ್ಯಾಂತ್. ಆತಾಂ ಪೆನ್ ಧರ್ತಾನಾಂಚ್ ಹಾತ್ ಕಾಂಪ್ತಾತ್. ಬರಯ್ತಾನಾ ಎಕಾ ಅಕ್ಶರಾಚೊ ಹಾತ್ ಆನ್ಯೆಕಾ ಅಕ್ಶರಾಚ್ಯಾ ಪೆಂಕ್ಡಾಕ್ ಲಾಗ್ತಾ ಗೀ ಮ್ಹಣ್ ಭಿಯೆತಾಂ. ಪಾವನಾತ್ಲ್ಯಾಕ್  ಮ್ಹಜೊ ಎಕ್ಲೊ ಪೂತ್ ಪಾದ್ರಾಬ್. ಭಯ್ಣ್ ಎಕ್ಲಿ ಸಿಸ್ಟರ್… ಬಿಸ್ಪಾಚ್ಯಾ ವಿಶೇಸ್ ಬೆಸಾಂವಾಖಾಲ್ ಆಯ್ತಾರಾಚ್ಯಾ ಮಿಸಾಂಚೆರ್ ಕುಮ್ಗಾರ್ ವಾಂಟ್ಚೆ ಹಾತ್ ಹೆ . ಹ್ಯಾ ಹಾತಾಂಕ್ ಪೆನ್ ಕ್ಯಾಮೆರಾ ದೀವ್ನ್, ಪೊಜ್ಡೆಂ ರೆಕೋರ್ಡ್ ಕರ್ನ್ ಹಾಡ್ ಮ್ಹಣ್ತಾ ನೆ ಹೊ! ಮ್ಹಜ್ಯಾ ಬಾಯ್ಲೆಚ್ಯಾ ಭಾಜ್ವೆಚೊ ಬುತಾಂವ್ ಸಯ್ತ್ ಆಪುಡ್ತಾನಾ ಪಾಟಿಮುಕಾರ್ ಚಿಂತ್ಚ್ಯಾ ಮ್ಹಜೆ ಕರ್ನಾ ಆನ್ಯೆಕ್ಲ್ಯಾಚ್ಯಾ ನಿದ್ಚ್ಯಾ ಕುಡಾಚಿಂ ದೃಶ್ಯಾಂ ಶೂಟ್ ಕರುಂಕ್ ಸಾಂಗ್ತಾ ನೆ ಹೊ!!

ಹಾಚೊ ಸಹವಾಸ್ ನಾಕಾ ಮ್ಹಣ್ ಪೆನ್ ಡ್ರೈವ್ ಹಾತಿಂ ಘೆತ್ಲಿ. ರಾಗಾನ್ ಮ್ಹಜಿ ಮೂಟ್ ಅಂರ್ದತ್ ಆಯ್ಲಿ. ತರ್ನಾಟ್ಪಣಾರ್ ಥಿಯೇಟರಾಂತ್ ಜಾಲ್ಲೆಬರಿ ಮೂಟ್ ಆನಿಕೀ ಅಂರ್ದುನ್ ಪೆನ್ ಡ್ರೈವಾಂತ್ ಆಸ್‌ಲ್ಲ್ಯೊ ಮ್ಹಜ್ಯೊ ಕವಿತಾ ಪೂರಾಯ್ ಸಂಪಾದಕಾಚ್ಯಾ ಮೆಜಾರ್‌‌ಚ್ ಲೀಕ್ ಜಾಂವ್ಚೆಫುಡೆ ಹಾಂವ್ ಮ್ಹಜ್ಯೆ ಪೆನ್ ಡ್ರೈವಾಸವೆಂ ಥಂಯ್ಚೊ ಭಾಯ್ರ್ ಪಡ್ಲೊಂ!

■ ವಿಲ್ಸನ್ ಕಟೀಲ್