ಅಸ್ಮಿತಾಯ್ : ವಳ್ಕೆಚೆ ಸೊಧ್ನೆರ್

238

ವಿಪ್ರೀತ್ ಸರಾಯೆರ್ ತಂತ್ರಗ್ಯಾನ್ ವಾಡೊನ್ ಯೆಂವ್ಚ್ಯಾ ಹ್ಯಾ ಕಾಳಾರ್, ಸಗ್ಳೊ ಸಂಸಾರ್ ಪಯ್ಲೆಂ ಕೆನ್ನಾಂಯ್ ನಾತ್‌ಲ್ಲೆಬರಿ ಎಕಾಮೆಕಾ ಜುಳುನ್ ಗೆಲಾ ಆಸ್ತಾಂ, ಮನ್ಶ್ಯಾಕುಳಾಕ್ ಆದಿಂ ಥಾವ್ನ್ ಧೊಸುನ್ ಆಸಲ್ಲಿಂ ಹಿಂ ಸವಾಲಾಂ ಇಲ್ಲಿಂ ಚಡ್‌ಚ್ ಧೊಸ್ತಾತ್‌ಶಿಂ ದಿಸ್ತಾತ್. ತವಳ್ ಆಮ್ಚಿ ನೀಜ್ ವಳಕ್, ಸಾಂಸ್ಕೃತಿಕ್ ಸಾಳಾಂಮುಳಾಂ ಮ್ಹಾಲ್ಘಡ್ಯಾಂ ಥಾವ್ನ್ ಆಯಿಲ್ಲಿ ಭಾಸ್ ಹ್ಯಾ ಸರ‍್ವಾಂಚ್ಯಾ ಸೊಧ್ನೆರ್ ಭಾಯ್ರ್ ಸರ‍್ತಾಂವ್. ಆಪ್ಲ್ಯಾ ಚಾರಿತ್ರಿಕ್ ಮುಳಾಂವಿಶಿಂ ಸೊಧುನ್ ವೆಚಿ ಹಿ ವೋಡ್ ಬಿಲ್ಕುಲ್ ನೆಗಾರ್ ಕರ‍್ಚಿ ನಂಯ್. ಹ್ಯಾ ದಿಸಾಂನಿಂ ಸಗ್ಳ್ಯಾಂಕ್ ಆಸ್ಚ್ಯಾ ಹ್ಯಾ ವೊಡಿಚೊ ಫಾಯ್ದೊ ಉಟಂವ್ಚಿಂ ಹರ್ ಪ್ರೇತನಾಂ ಹ್ಯಾ ದೇಸಾಂತ್ ಮಾತ್ ನಂಯ್, ಸಗ್ಳ್ಯಾ ಸಂಸಾರಾರ್ ಏಕ್ ಫ್ಯಾಶನ್ ಕಶೆಂ ಜಾಲಾಂ. ಬೊಡ್ಚಾಂಬೊ ಆಸ್ತಾಂಚ್ ಭುಂಯ್ ದೆಂವೊವ್ನ್, ಕೊಣೀಂಯ್ ಥೊಡ್ಯಾ ತುಂಡುರಾಯಾನಿಂ ಆಪ್ಣೆಂ ಪಾತ್ಯೆಲ್ಲೆಂಚ್ ಹೆರಾಂಚೆರ್ ಜಬರ‍್ದಸ್ತಿ ಥಾಪ್ಚ್ಯಾ ಪ್ರೇತನಾಂಕ್‌ಚ್ ಎಕ್ಲ್ಯಾಚಿಂ ಮುಳಾಂ ಮ್ಹಣ್ ಪಾಚಾರ‍್ನ್, ಏಕ್ ಅಮ್ಕ್ಯಾ ಪರ‍್ಜೆನ್ ಮಾನುನ್ ಘೇಜಾಯ್‌ಚ್ ಮ್ಹಣ್ಚಿಂ ’ಫತ್ವಾ’ ಫರ‍್ಮಾಂವ್ಚ್ಯಾ ಪರ‍್ಯಾಂತ್ ಪಾವ್‌ಲ್ಲ್ಯಾ ಆಯ್ಚ್ಯಾ ಪರಿಗತೆಂತ್ ಹಿಂ ಅಸ್ಮಿತಾಯೆಚಿಂ ಸೊಧ್ನಾಂ ನಿಜಾಯ್ಕೀ ಗರ‍್ಜೆಚೆಂಗೀ? ಅಸ್ಮಿತಾಯ್ ಕೊಣಾಚಿ ಆನಿ ಕಿತ್ತುನ್ ಪರ‍್ಯಾಂತ್? ಅಸಲ್ಯಾ ಸೊಧ್ನಾಂಚ್ಯಾ ಮುಳಾಕ್ ಪಾವೊಂಕ್ ಏಕ್ ಪ್ರೇತನ್ ಆಮಿಂಯ್ ಕರ‍್ಯಾಂ.

ದಿಸಾಂದೀಸ್ ಬದ್ಲೊನ್ ಯೆಂವ್ಚಿ ಜಿಣ್ಯೆರೀತ್, ಅದಿಂ ಕೆನ್ನಾಂಯ್ ನಾತ್‌ಲ್ಲ್ಯಾ ಸರಾಯೆರ್ ಜಾಂವ್ಚ್ಯಾ ವಿಗ್ಯಾನಿಕ್ ವಾಡಾವಳಿಚ್ಯಾ ಆಯ್ಚ್ಯಾ ಸಂಸಾರಾಂತ್ ಅಸಲಿಂ ಪ್ರೇತನಾಂ ಕಿತ್ಲಿಂ ನಿರ‍್ಫಳ್ ಆನಿ ಗರ‍್ಜ್ ನಾತ್‌ಲ್ಲಿಂ ಮ್ಹಳ್ಳೆಂ, ಏಕ್ ಅಮ್ಕಿಚ್ ಮ್ಹಳ್ಳಿ ಚಾರಿತ್ರಿಕ್ ವಳಕ್ ನಾಸ್ಚ್ಯಾ, ನಿರಂತರಿ ಬದ್ಲೊನ್ ಆಯಿಲ್ಲ್ಯಾ ಸಂಸ್ಕೃತಿ ಆನಿ ಭಾಶೆಚ್ಯಾ, ಸಂಸಾರಾರ್ ವಾಡೊನ್ ಆಯಿಲ್ಲ್ಯಾ ವೆವೆಗ್ಳ್ಯಾ ಧರ‍್ಮಾಂಚ್ಯಾ ಆನಿ ವಿಗ್ಯಾನಿಕ್ ಆನಿ ತಂತ್ರಗ್ಯಾನಿಕ್ ವಾಡಾವಳೆಂತ್ ವಳ್ಕೊಂಕ್ ಜಾಯ್ನಾತ್‌ಲ್ಲೆಬರಿಂ ಬದ್ಲುಂಚ್ಯಾ ಸಂಸಾರಾಚ್ಯಾ ಪಾಟ್‌ಥಳಾರ್ ಇಲ್ಲೆಂ ಪಳೆವ್ಯಾಂ ಆನಿ ಚಿಂತ್ಯಾಂ.

1.ಏಕ್ ಅಮ್ಕಿಚ್ ಮ್ಹಳ್ಳಿ ಚಾರಿತ್ರಿಕ್ ವಳಕ್‌ಚ್ ನಾ’ಸ್ಚಿ ಪರಿಗತ್

ಎಕ್ಲ್ಯಾನ್ ಆಪ್ಲ್ಯಾ ‘ಖರ‍್ಯಾ’ ವಳ್ಕೆಚೆ ಸೊಧ್ನೆರ್ ಚರಿತ್ರೆಂತ್ ಕಿತ್ಲ್ಯಾ ಪಾಟಿಂ ವಚ್ಯೆತ್? ಆಮ್ಚ್ಯಾ ಸಂಸಾರಾಚಿ ಚರಿತ್ರಾ ಕರೋಡೊಂ ವರ‍್ಸಾಂಚಿ. ಜೇಮ್ಸ್ ವೆಬ್ ಟೆಲೆಸ್ಕೋಪ್ ತಸಲ್ಯಾ ಆತಾಂತಾಚ್ಯಾ ಸೊಧಾಂನಿ ಆಮಿ ಎದೋಳ್ ಮ್ಹಣಾಸರ್ ಪಾತ್ಯೆವ್ನ್ ಆಯಿಲ್ಲಿ ಸಂಸಾರಾಚಿ 14 ಬಿಲಿಯನ್ ವರ‍್ಸಾಂಚಿ ಪ್ರಾಯ್ ಮ್ಹಳ್ಳಿ ಪಾತ್ಯೆವ್ಣಿ ಅಲ್ಕಂದಾವ್ನ್ ಸೊಡ್ನ್, ಕಾಂಯ್ ತಾಚೆವರ‍್ನಿ ದೊಡ್ತಿ ಜಾವ್ನಾಸ್ಯೆತ್ ಮ್ಹಳ್ಳೊ ಅಂದಾಜ್ ದಿಲಾ. ಆಮ್ಚ್ಯಾ ಭುಂಯ್ಕ್ ಸುಮಾರ್ ಚಾರ‍್ಶಿಂ ಕರೋಡ್ (4 ಬಿಲಿಯನ್) ವರ‍್ಸಾಂ. ಆನಿ ಹಾಂಗಾ ಸ್ವತಾಚಿ ವಳೊಕ್ ಆಸ್‌ಲ್ಲ್ಯಾ ಮ್ಹನ್ಶ್ಯಾತಸಲ್ಯಾಂಚೊ ನಿವಾಸ್ ಫಕತ್ 70,000 ವರ‍್ಸಾಂ ಹೆವ್ಶಿಲೊ. ಆನಿ ಚಾರ‍್ಶಿಂ ಕರೋಡ್ ವರ‍್ಸಾಂ ಮುಕಾರ್ ಚಿಲ್ಲರ್ 70,000 ವರ‍್ಸಾಂ ಥಾವ್ನ್ ಜಿಯೆಲ್ಲೆ ಆಮ್ಚೆ ಪುರ‍್ವಜ್ ಸಗ್ಳ್ಯಾ ಸಂಸಾರಾರ್ ವಿಸ್ತಾರ‍್ಲೆ, ಒಳ್ಸಾಲೆ, ಮಿಸ್ಳಾಲೆ ಆನಿ ಹ್ಯಾ ಭುಂಯ್ಚೆರ್ ರಾಜ್ ಕರುಂಕ್ ಪಾವ್ಲೆ. ವಿಸ್ತಾರ‍್ಣಿ, ವಳ್ಸುಣಿ ಆನಿ ಮಿಸ್ಳೊಣೆಚಿ ಕಾಣಿ ಆಮಾ ಮ್ಹನ್ಶ್ಯಾಕುಳಾಚಿ. ಆಮ್ಚೆ ಪುರ‍್ವಜ್ ವಿಸ್ತಾರೂನ್ ಭುಂಯ್ಥಳಾಚ್ಯಾ ಕೊನ್ಶ್ಯಾಂ ಕೊನ್ಶ್ಯಾಂನಿ ಪಾವ್ಲೆ, ವೆವೆಗ್ಳ್ಯಾ ಸಂಸ್ಕೃತ್ಯಾಂಸವೆಂ ಮಿಸ್ಳಾಲೆ ಆನಿ ವೆವೆಗ್ಳ್ಯಾ ಭಂವಾಂರಾಂಕ್ ಒಳ್ಸಾಲೆ. ಅಶೆಂ ಆಸ್ತಾಂ, ಆಮಿ ಕೋಣ್ ಆನಿ ಖಂಯ್ಚೆ ಮ್ಹಣ್ ಬದ್ಲಾನಾತ್‌ಲ್ಲ್ಯಾ ಏಕ್ ನಿರ‍್ದಿಶ್ಟ್ ಮೂಳಾಕ್ ಬೋಟ್ ಜೊಕ್ಚೆಂ ಬಿಲ್ಕುಲ್ ಸಾಧ್ ನಾಂ.

ಆಮ್ಚೆ, ಮ್ಹಳ್ಯಾರ್ ಆಜ್ ಸಂಸಾರ್‌ಭರ್ ವಿಸ್ತಾರುನ್ ಆಸ್ಚ್ಯಾ ಮ್ಹನ್ಶ್ಯಾಕುಳಾಚೆ ಮೂಳ್ ಪುರ‍್ವಜ್ ಆಫ್ರಿಕಾ ಥಾವ್ನ್ ಮ್ಹಣ್ಚೆಂ ಆಮ್ಚಾ ವಿಕಾಸಾಚರಿತ್ರೆಚೊ ಮುಲ್ಯಾಫಾತರ್. ಆಧುನಿಕ್ ಕುಡಿಚೆ ಹೋಮೊ ಸೇಪಿಯನ್ ಆಫ್ರಿಕಾ ಖಂಡಾಥಾವ್ನ್ ಉದೆಲ್ಲೆ ಮ್ಹಣ್ ‘ಔಟ್ ಒಫ್ ಆಫ್ರಿಕಾ’ ವಾದ್ ದಾಂಬುನ್ ಸಾಂಗ್ತಾ. ಆಮ್ಚೆ ಪುರ‍್ವಜ್ ಭಂವಾರಾಂತ್ಲ್ಯಾ ಬದ್ಲಾವಣೆಂಕ್ ಲಾಗುನ್ ಸಂಪನ್ಮೂಳಾಂಚ್ಯಾ ಸೊಧ್ನೆರ್ ಭಾಯ್ರ್ ಸರ್‌ಲ್ಲೆ, ಕ್ರಮೇಣ್ ಭೂಂಯ್ಗೋಳಾಚ್ಯಾ ಹೆರ್ ಖಂಡಾಂಕೀ ಪಾವ್ಲೆ. ಅಸಲ್ಯಾ ಸ್ಥಳಾಂತರಾಚೆ ಸಾಧಾರಣ್ 70,000 ವರ‍್ಸಾಂ ಪಯ್ಲೆಚೆಂ ಪಯ್ಲೆಂ ಲ್ಹಾರ್ ಆಮ್ಚ್ಯಾ ಭುಂಯ್ಗೋಳಿಕ್ ವಿಸ್ತಾರ‍್ಣೆಚಿ ಸುರ‍್ವಾತ್. ಹ್ಯಾ ವಾದಾಕ್ ಆತಾಂಚ್ಯಾ ಸಗ್ಳ್ಯಾ ಮ್ಹನ್ಶ್ಯಾಕುಳಾಂತ್ ಆಸ್ಚೆ ಆಫ್ರಿಕನ್ ಮುಳಾಚೆ ಸಾಧಾರಣ್ ಎಕಾಚ್ ರಿತಿಚೆ ಜೆನಿಟಿಕ್ ಮಾರ‍್ಕರ‍್ಸ್ ಗವಾಯ್ ದಿತಾತ್. ಅಸಲ್ಯೊ ವಿಸ್ತಾರ‍್ಣ್ಯೊ ಲೊಕಾಂನಿಂ ವಾಂಟುನ್ ವಚುಂಕ್ ಕಾರಣ್ ಜಾಲ್ಯೊ ಮಾತ್ ನಂಯ್ ಆಸ್ತಾಂ ವೆವೆಗ್ಳ್ಯಾ ಸಾಂಸ್ಕೃತಿಕ್ ಬದ್ಲಾಪಾಂಕ್, ಥಳೀಯ್ ಭಂವಾರಾಂಸವೆಂ ಒಳ್ಸಾಪಾಕ್ ಬುನ್ಯಾದ್ ಘಾಲುಂಕ್ ಪಾವ್ಲ್ಯೊ. ಆನಿ ಹ್ಯಾಚ್ ವರ‍್ವಿಂ ಆಮಿಂ ಆಜ್ ಸಂಸಾರ್‌ಭರ್ ಮ್ಹನ್ಶ್ಯಾಕುಳಾಚೆಂ ಏಕ್ ಗಿರೇಸ್ತ್ ವೆವೆಗ್ಳೆಪಣ್ ದೆಕುಂಕ್ ಪಾವ್ತಾಂವ್. ಹೆಂ ಆಫ್ರಿಕನ್ ಮೂಳ್ ಆನಿ ಆಮ್ಚ್ಯಾ ಪುರ‍್ವಜಾಂಚಿಂ ವಿಸ್ತಾರ‍್ಣಿ ಸಮ್ಜೊನ್ ಘೆತ್ಲ್ಯಾರ್ ಸಂಸಾರ್‌ಭರ್ ವಿಸ್ತಾರೊನ್ ಆಸ್‌ಲ್ಲೆಂ ಆಯ್ಚೆಂ ಮ್ಹನ್ಶ್ಯಾಕುಳ್ ಎಕಾಮುಳಾಚೆಂ ಆನಿ ಎಕಾಮೆಕಾ ಜುಳುನ್ ಘೆತ್‌ಲ್ಲೆಂ ಮ್ಹಣ್ ಮಾನುನ್ ಘೆಂವ್ಕ್ ಜಾತಾ. ಅಶೆಂ ಆಮಿಂ ವೆವೆಗ್ಳ್ಯಾ ಪ್ರಭಾವಾಂಚೊ ಪರಿಣಾಮ್ ಜಾಲ್ಲ್ಯಾನ್, ಬದ್ಲೊಂಕ್ ನಾತ್‌ಲ್ಲಿ ಆಮ್ಚಿ ಏಕ್ ಮುಳಾಚಿ ಅಸ್ಮಿತಾಯ್ ಸೊಧುನ್ ವೆಚೊ ವಿಚಾರ್‌ಚ್ ಏಕ್ ಭಿರ‍್ಮೆಂತ್!

2. ವೆಳಾಕಾಳಾಕ್ ಆನಿ ಥಳಾಕ್ ಸರಿ ಜಾಲ್ಲಿ ಸಂಸ್ಕೃತಿ

ಸಂಸ್ಕೃತಿ ಕೆನ್ನಾಂಯ್ ಏಕಚ್ ಥರ್ ಉರಲ್ಲಿ ಧಾಕ್ಲೊ ನಾಂ, ತಿ ವೆಳಾಕಾಳಾಕ್ ಸರಿ ಜಾವ್ನ್ ಬದಲ್ಲ್ಯಾ ಆನಿ ಒಳ್ಸಾಲ್ಯಾ. ಹಜಾರೊಂ ವರ‍್ಸಾಂಚ್ಯಾ ಚರಿತ್ರೆಂತ್ ಸಾಮಾಜಿಕ್ ವಾಡಾವಳ್ ಆನಿ ವೈಗ್ಯಾನಿಕ್ ಸುದ್ರಾವ್ಣೆಂ ಸಂಗಿ ಬದ್ಲುನ್ ಆಯಿಲ್ಲ್ಯೊ ವೆವೆಗ್ಳ್ಯೊ ಸಂಸ್ಕೃತ್ಯೊಚ್ ಹಾಕಾ ಸಾಕ್ಸ್. ಆಮಿ ಆಜ್ ಸಂಸ್ಕೃತಿ ಮ್ಹಣ್ ಮಾನುನ್ ಘೆಂವ್ಚ್ಯೊ ಫಾಲ್ಯಾಂ ವೆಳಾಸವೆಂ ಖಂಡಿತ್ ಬದಲ್ತಾತ್. ಆಚಾರ್, ವಿಚಾರ್, ರಿವಾಜಿ, ಸಾಮಾಜಿಕ್ ವಾಡಾವಳ್, ತಂತ್ರಗ್ಯಾನಿಕ್ ಸುಧ್ರಾವ್ಣ್ಯೊ ಆನಿ ಲೊಕಾಂಚ್ಯಾ ಜಮ್ಯಾ ಮನಾಸ್ಥಿತೆಪ್ರಕಾರ್ ರೂಪ್ ಘೆತಾತ್. ಸಂಸ್ಕೃತಿ ಹ್ಯಾಚ್ ಕಾಳಾಚೊ ಪಡ್‌ಬಿಂಬ್, ಆದ್ಲ್ಯೊ ರೆಲಿಕೊ ನಂಯ್!

ಆಂತ್ರೊಪೋಲಜಿಸ್ಟ್ ಆಲ್ಫ್ರೆಡ್ ಎಲ್. ಕ್ರೋಬರ್ ಆನಿ ಕ್ಲಾಯ್ಡ್ ಕ್ಲಕ್‌ಹೋನ್ ತಾಂಚ್ಯಾ ಸಾಂಸ್ಕೃತಿಕ್ ಮ್ಹನ್ಶ್ಯಾಶಾಸ್ತಿರಾಚ್ಯಾ ಶಿಕವ್ಣ್ಯಾಂನಿಂ ಸಂಸ್ಕೃತಿ ಸದಾಂನೀತ್ ಬದ್ಲುಂಚಿ ಗಜಾಲ್ ಮ್ಹಣ್ ದಾಂಬುನ್ ಸಾಂಗ್ತಾತ್. ತಾಣಿಂ ಪ್ರಸ್ತುತ್ ಕೆಲ್ಲ್ಯೊ ಗಜಾಲಿ, ಸಾಂಸ್ಕೃತಿಕ್ ಅಸ್ಮಿತಾಯೆಚ್ಯಾ, ಭಾಂಗಾರ್ ಯಾ ರುಪ್ಯಾಬರಿಂ ತುಟಾನಾಸ್ತಾಂಚ್ ಎಕಾ ರೂಪಾಥಾವ್ನ್ ಆನ್ಯೇಕ್ ರೂಪಾಕ್ ಬದ್ಲೊಂಚ್ಯಾ ಗೂಣಾಂಕ್ ಏಕ್ ತೆಸ್ತಾಮೆಂತ್.

3. ಭಾಶೆಂಚೆ ವ್ಹಾಳ್ತೆಂರೂಪ್

ಸಂಸಾರಾಚ್ಯಾ ಚರಿತ್ರೆಂತ್ ಮೆಜುಂಕ್ ಜಾಯ್ನಾತ್‌ಲ್ಲೆ ತಿತ್ಲೊ ಭಾಸೊ ವಾಡುನ್ ಆಯ್ಲ್ಯೊ ಆನಿ ತಾಂತ್ಲ್ಯೊ ಕಿತ್ಲೆಶ್ಯೋಗಿ ಬುಡುನ್ ಗೆಲ್ಯೊ ಆನಿ ಥೊಡ್ಯೊ ತಿ ಭಾಸ್ ವಾಪಾರ‍್ಚ್ಯಾ ಲೋಕಾಂಚ್ಯಾ ಸಂಖ್ಯಾಕ್ ಲೆಗುನ್ ಚಡುನ್ ಆಯ್ಲ್ಯೊ. ಲಿಖ್ತ್ಯೊ ಭಾಸೊ ಫಕತ್ 5,000 ವರ‍್ಸಾಂ ಆರ‍್ವಿಲ್ಯೊ ಯಾ ತಾಚೆ ಪ್ರಾಸ್ ಉಣ್ಯಾಪ್ರಾಯೆಚ್ಯೊ. ಆಜ್ ಇಂಗ್ಲೀಶ್, ಮ್ಯಾಂಡಾರಿನ್ (ಚೀನಿ) ಆನಿ ಹಿಂದಿ ಉರ‍್ಲ್ಯಾತ್ ತರ್ ತ್ಯೊ ಭಾಸೊ ಉಲಂವ್ಚ್ಯಾ ಲೊಕಾಂಮಾರಿಫಾತ್. ಇಂಗ್ಲೀಶಾ ತಸಲಿ ಭಾಸ್ ಆಜ್ ಭುಂಯ್ಗೋಳಿಕ್ ಭಾಸ್ ಜಾವ್ನ್ ಉದೆಲ್ಯಾ ತರ್, ತಿ ಬದ್ಲುಂಚ್ಯಾ ಸಂಸಾರಾಕ್ ಒಳ್ಸುನ್ ಘೆಂವ್‌ಚಿ ತ್ಯಾ ಭಾಶೆಚಿ ತಾಂಕ್. ವೆವೆಗ್ಳ್ಯೊ ಭಾಸೊ ದುಬಾವಾವೀಣ್ ಆಮ್ಚ್ಯಾ ಸಾಂಸ್ಕೃತಿಕ್ ಪರಂಪರೆಚೊ ವಾಂಟೊ, ಪೂಣ್ ತಾಂಚಿ ವಾಡಾವಳ್ ಏಕ್ ಸಂಯ್ಭಿಕ್ ಪ್ರಕ್ರಿಯಾ.

ಡೇವಿಡ್ ಕ್ರಿಸ್ಟಲಾಚ್ಯಾ Language Death ಬುಕಾಂತ್ ಭಾಶೆಂಚಿ ವಾಡಾವಾಳ್ ಆನಿ ಆಡಾಂವ್ಕ್ ಜಾಯ್ನಾತ್‌ಲ್ಲ್ಯಾ ಬದ್ಲಾಪಾವಿಶಿಂ ಸುಢಾಳ್ ವಿವ್ರಾಯ್ಲಾಂ.

4. ಧಾರ‍್ಮಿಕ್ ದಿಸ್ಟಿಕೋಣಾಂತ್…

ಮ್ಹನ್ಶ್ಯಾಕುಳಾಚ್ಯಾ ಅಸ್ತಿತ್ವಾಚಿ ಪ್ರಾಯ್ ಪಳೆಲ್ಯಾರ್ ಆಧುನಿಕ್ ಧರ‍್ಮ್ ಬೋವ್ ಆಯ್ಲೆವಾರ‍್ಚಿ ವಾಡಾವಳ್. ಧಾರ‍್ಮಿಕ್ ಅಸ್ಮಿತಾಯೆಕ್ ರೂಪ್ ದಿಂವ್ಚ್ಯೊ ಕಾಣಿಯೊ ಆನಿ ಪಾತ್ಯೆಣ್ಯೊ ಲಾಂಬ್ ಕಾಳಾರ್ ಸವ್ಕಾಸ್ ಬದ್ಲುನ್ ಆಯ್ಲ್ಯಾತ್. ಸಾಮಾಜಿಕ್ ಮೊಲಾಂಚ್ಯಾ ಬದ್ಲುನ್ ಯೆಂವ್ಚ್ಯಾ ಗರ‍್ಜಾಂತೆಕೀತ್ ಧರ‍್ಮ್‌ಯ್ ಒಳ್ಸುನ್ ಆಯ್ಲ್ಯಾತ್. ಸುರ‍್ವಿಲಿಂ ಕಿತ್ಲಿಶಿಂಗೀ ವರ‍್ಸಾಂ ಏಕ್ ಪಂಗ್ಡಾಂಚ್ಯಾ ಮ್ಹನ್ಶ್ಯಾಂಕ್ ಆಪ್ಲ್ಯಾ ಸುತ್ತೂರಾಂತ್ಲ್ಯಾ ಥೊಡ್ಯಾಚ್ ಮಯ್ಲಾಂ ಭಾಯ್ಲ್ಯಾ ಸಂಸಾರಾವಿಶಿಂ ಕಾಂಯ್ ಮ್ಹಾಯೆತ್ ನಾತ್‌ಲ್ಲಿ. ತಾಂಚೊ ಸಂಸಾರ್ ಫಕತ್ ತ್ಯಾ ಥೊಡ್ಯಾ ಮಯ್ಲಾಂಕ್‌ಚ್ ಸೀಮಿತ್ ಆಸ್‌ಲ್ಲೊ. ತಿಂ, ತಾಂಚಿ ಭಾಸ್ ಆನಿ ತಾಂಚೆ ದೇವ್ ಮಾತ್ ಮ್ಹಣ್ ತಾಂಚಿ ಪಾತ್ಯೆಣಿ. ಪಾಟ್ಲ್ಯಾ ಸುಮಾರ್ 12,000 ವರ‍್ಸಾಂಪರ‍್ಯಾಂತ್ ಸಯ್ತ್ ತಿಂ ಭಂವೊನ್, ಶಿಕಾರಿ ಕರ‍್ನ್ ಜಿಯೆತಾಲಿಂ. ಖಂಯ್ಸರೀ ಏಕ್ ಜಾಗ್ಯಾರ್ ಠಿಕಾನಾತ್‌ಲ್ಲಿಂ. ಉಪ್ರಾಂತ್ ಸವ್ಕಾಸ್ ತಾಣಿಂ ಕ್ರಿಶಿ ಕರುಂಕ್ ಶಿಕ್‌ಲ್ಲೆ ಉಪ್ರಾಂತ್ ಎಕಾ ಜಾಗ್ಯಾರ್ ಠಿಕಾಣೊ ಜಾಲೊ, ಜಮ್ಯಾಪ್ರೇತನಾಂತ್ ತಾಣಿಂ ಸಮುದಾಯ್ ಸುರ‍್ವಾತ್ಲೆ, ಆನಿ ಎಕಾಮೆಕಾಚ್ಯಾ ಸಹಕಾರಾನ್ ರಾಜ್ ಆನಿ ರಾಯ್ಪಾಟ್ ಬಾಂದ್ಲೆ. ಅಡೇಜ್ ಹಜಾರ್ ವರ‍್ಸಾಂ ಆದಿಂ ಜಯ್ನ್ ಆನಿ ಬುದ್ಧಿಶ್ಟ್ ಧರ‍್ಮ್ ಅಸ್ಥಿತ್ವಾಕ್ ಆಯ್ಲೆ. ಉರ್‌ಲ್ಲೆ ದೋನ್ ಹಜಾರ್ ವರ‍್ಸಾಂ ಪ್ರಾಸ್ ಆರ‍್ವಿಲೆ.

ಚರಿತ್ರೆಂತ್ ಕಿತ್ಲೆಶ್ಯೊ ಭಾಸೊ, ಧರ‍್ಮ್ ಆನಿ ದೇವ್ ಆಯ್ಲೆ ಆನಿ ಗೆಲೆ. ವ್ಹಡ್ಲೆ ವ್ಹಡ್ಲೆ ರಾಯ್ ಆನಿ ರಾಯ್ಪಾಟಾಂನಿಂ ರಾಜ್ ಕೆಲೆಂ ಆನಿ ಧುಳಿಸಮಾ ಜಾಲೆ. ಚರಿತ್ರೆಂತ್ ಬೋವ್ ತಾಕ್ತೆವಂತ್ ರಾಯ್‌ಪಾಟ್ ಗ್ರೀಕ್ ಆನಿ ಎಜಿಪ್ತಾಚೆ ಆನಿ ತಾಂಚೆಪರಾಸ್ ಸಕ್ತೆವಂತ್ ತಾಂಚೆ ದೇವ್. ತಾಂಕಾ ಹರ‍್ಯೇಕ್ ಸಂಗ್ತಿಂಕ್ ಎಕೇಕ್ ಯಾ ಚಡಿತ್ ದೇವ್ ಆಸ್‌ಲ್ಲೆ. ಪೂಣ್ ಆಜ್ ತುಟೊನ್ ಪಡ್‌ಲ್ಲಿಂ ತಾಂಚಿಂ ಥೊಡಿಂ ದಿವ್ಳಾಂ ಆನಿ ತೆಂಪ್ಲಾ ಸೊಡ್ಲ್ಯಾರ್ ತಾಂತ್ಲೊ ಖಂಯ್ಚೋಯ್ ದೇವ್ ಅಸ್ತಿತ್ವಾರ್ ಉರುಂಕ್ ನಾ. ಆನಿ ಹ್ಯಾ ಸಕ್ತಿವಂತ್ ದೆವಾಂಕ್ ಪಾತ್ಯೆಂವ್ಚೊ ಆನಿ ಆರಾಧಾನ್ ಕರ‍್ಚೊ ಏಕ್ ನರ್‌ಮ್ಹನಿಸ್ ಹ್ಯಾ ಸಂಸಾರಾಂತ್ ಆಜ್ ನಾಂತ್.

ದೆಕುನ್ ಆದ್ಲ್ಯಾಕಾಳಾಂಚ್ಯಾ ಧಾರ‍್ಮಿಕ್ ರಿವಾಜಾಂನಿಂ ಆಮ್ಚಿ ಅಸ್ಮಿತಾಯ್ ಸೊಧುನ್ ವೆಚೆಂ ಏಕ್ ವೆರ‍್ತ್ ಪ್ರೇತನ್.

ಕರೆನ್ ಆಮ್ಸ್ಟ್ರೊಂಗ್ ಸಂಸಾರಾಚ್ಯಾ ಮುಖೇಲ್ ಧರ‍್ಮಾಂಚ್ಯಾ ಚರಿತ್ರೆಚ್ಯಾ ಆಪ್ಲ್ಯಾ ಕಾಮಾಂತ್ ಧಾರ‍್ಮಿಕ್ ರಿವಾಜಿಂಚ್ಯಾ ಥಾಂಬಾನಾತ್‌ಲ್ಲ್ಯಾ ವಾಡಾವಳಿ ಆನಿ ಒಳ್ಸುಣೆವಿಶಿಂ ಉಜ್ವಾಡ್ ಫಾಂಕ್ತಾ,

5. ಅವ್ಕಾಸಾಂಚೊ ಪ್ರಭಾವ್

ದೇಶ್ ಧರ‍್ಮ್ ಭಾಸ್, ಖಾಣಾಜೆವ್ಣಾಂಚಿ ಸಂವಯ್ ಎಕ್ಲ್ಯಾಕ್ ಆಪುಣ್ ಜಲ್ಮೊನ್ ವಾಡೊನ್ ಆಯಿಲ್ಲ್ಯಾ ಕುಟ್ಮಾಥಾಚ್ನ್ ಲಾಭ್ತಾ. ಥಂಯ್ಸರ್ ಕೊಣಾಂಯ್ಕೀ ವಿಂಚವ್ಣ್ ಮೆಳಾನಾ. ಕಾಂಯ್ ಇಲ್ಲ್ಯಾ ದುಸ್ರ್ಯಾ ಪರಿಗತೆಂತ್ ದುಸ್ರ್ಯಾಚ್ ಧರ‍್ಮಾಚ್ಯಾ, ವೆಗ್ಳ್ಯಾಚ್ ಭಾಶೆಚಿ ಅಲಗ್‌ಚ್ ಸಂಸ್ಕೃತಿ ಆಪ್ಣಾಂವ್ಚಿ ಗಜಾಲ್ ನೆಗಾರುಂಕ್ ಜಾಯ್ನಾ. ಅಸಲ್ಯಾ ಪರಿಗತೆಂತ್, ಆಪ್ಣಾಚ್ಯಾ ವಳ್ಕೆವಿಶಿಂ ಜಾಣಾ ಜಾಂವ್ಚಿ ವೋಡ್ ಆಸ್ಯೆತ್, ಭಾಸ್, ಸಂಸ್ಕೃತೆವಿಶಿಂ ಅಭಿಮಾನ್ ಭೊಗ್ಯೆತ್ ಶಿವಾಯ್, ತೆಂಚ್ ಆಮ್ಚೆಂ ಸರ‍್ವಸ್ವ್ ಮ್ಹಣ್ ಮಾನುನ್, ಆಂಗಾರ್ ವೊಡುನ್ ಘೇವ್ನ್, ಹೆರಾಂನಿಂಯ್ ತಶೆಂಚ್ ಕರಿಜೆ ಮ್ಹಣ್ ಝುಜೊಂಕ್ ದೆಂವ್ಚೆಂ ಪಿಶೆಂಪಣ್.

6. ಚಿಂತ್ಪಾತಾಂಕಿಚೆಂ ಬೆಸಾಂವ್

Cogito ergo sum ,  ಹಾಂವ್ ಚಿಂತಾಂ, ದೆಕುನ್ ಹಾಂವ್

ಕೆನ್ನಾಂ ಭಾಸ್, ಧರ‍್ಮ್, ಸಂಸ್ಕೃತಿ, ಗಾಂವ್ ತಸಲ್ಯಾ ಸಂಗ್ತಿಂ ವಿಶ್ಯಾಂತ್ಲಿ ಆಮ್ಚಿ ಭಗ್ಣಾಂ, ಮೋಗ್ ಒಬ್ಸೆಶನ್ ಜಾತಾತ್ ತೆನ್ನಾಂ ಚಿಂತ್ಪಾತಾಂಕ್ ಪಾಟಿಂ ಪಡ್ತಾ ಆನಿ ಆಮಿ ಮೆಂದು ನಾತ್‌ಲ್ಲಿಂ ಝೊಂಬಿ ಜಾಂವ್ಕ್ ಪಾವ್ತಾಂವ್. ಪೂಣ್ ಆಮ್ಚ್ಯಾ ತಕ್ಲೆಕಟ್ಟ್ಯಾಂತ್ ಹೆರ್ ಮನ್ಜಾತಿಂಪ್ರಾಸ್ ಇಲ್ಲೊ ಚಡ್ ಮೆಂದು ಥೊಡೊ ಗಣ್ಣ್ ಭರ‍್ಲಾ. ಆನಿಂ ಹ್ಯಾ ದಾಟ್, ಚಡಿತ್ ಮೆಂದ್ವಾಂತ್ ಚಡಿತ್ ಬಿಲಿಯನ್ ನ್ಯುರೋನ್ಸ್ ಅಸಾತ್ ಆನಿಂ ಹಿ ಚಡಿತ್ ನ್ಯೂರೋನ್ಸ್ ಎಕಾಮೆಕಾಸವೆಂ ಕರೋಡಾಂನಿ ಕರೋಡೊಂ (ಟ್ರಿಲಿಯನ್ಸ್) ವಿಜೆಚಿರ‍್ಪುಟಾಂನಿಂ ಜುಳುನ್ ಘೆಂವ್ಚೆಸವೆಂ ಆಮ್ಕಾಂ ಚಿಂತುಂಕ್ ಕರ‍್ತಾತ್. ಆನಿ ಹಿ ಚಿಂತ್ಪಾತಾಂಕ್ ಆಮ್ಕಾಂ ಹ್ಯಾ ಸಂಸಾರಾಂತ್ ಆಸ್ಚ್ಯಾ ಹೆರ್ ಹಜಾರ್ ಕರೋಡ್ ಮನ್ಜಾಂತಿಪ್ರಾಸ್ ಎಕ್ದಂ ವೆಗ್ಳೆ ಠರಾಯ್ತಾ…

ಚಿಂತ್ಪಾತಾಂಕ್ ಆಪ್ಣಾಯ್ತಾ ಪರ‍್ಯಾಂತ್, ಮಾಂಕೊಡ್, ವಾಗ್, ಹಸ್ತ್, ಶಿಂವಾಂ ತಸಲ್ಯಾ ಪಂಗ್ಡಾನಿಂ ಜಿಯೆಂವ್ಚ್ಯಾ ಹೆರ್ ಮನ್ಜಾಂತಿಪ್ರಾಸ್ ಮ್ಹನಿಸ್ ವೆಗ್ಳೆ ಕಾಂಯ್ ನಾತ್‌ಲ್ಲೆ ಬಗಾರ್ ತ್ಯಾ ಬಳಿಶ್ಟ್ ಮನ್ಜಾಂತಿಪ್ರಾಸ್ ಅಸ್ಕತ್ ಆಸ್‌ಲ್ಲೆ. ಪೂಣ್ ಹ್ಯಾ ಚಿಂತ್ಪಾತಾಂಕಿಚ್ಯಾ ಬೆಸಾಂವಾಥಾವ್ನ್, ಪ್ರಭಾವೀಕ್ ಸಂಪರ‍್ಕ್, ಯೆವ್ಜಣ್ ಆನಿಂ ಜಮ್ಯಾಂಪ್ರೇತನಾಂತ್ ತಾಂಕಾ ತಾಬೆಕ್ ಘೆಂವ್ಕ್ ಪಾವ್ಲೆ ಆನಿ ಸರ‍್ವ್ ಮನ್ಜಾಂತಿಪರಾಸ್ ಬಳಿಶ್ಟ್ ಮನ್ಜಾತ್ ಜಾವ್ನ್ ಉದೇವ್ನ್ ಭುಂಯ್ಗೋಳಾಚೆರ್ ರಾಜ್ ಕರುಂಕ್ ಪಾವ್ಲೆ.

7. ವಿಗ್ಯಾನ್ ಆನಿ ತಂತ್ರಗ್ಯಾನಾಚ್ಯಾ ವಾಡಾವಳೆಚ್ಯಾ ಕುರ‍್ಪೆನ್ ದವ್ಲತೆಚೊ ಫುಡಾರ್

ಆಯ್ಚ್ಯಾ ಸಂಸಾರಾರ್ ವೈಗ್ಯಾನಿಕ್ ಆನಿ ತಂತ್ರಗ್ಯಾನಾಶೆತಾಂತ್ ಜಾಂವ್ಚ್ಯಾ ವಾಡಾವಳಿಚಿ ಸರಾಯ್ ಆಟಾಪುಂಕ್ ಜಾಯ್ನಾ. ಮ್ಹನ್ಶ್ಯಾಕೃತ್ ಬುದ್ವಂತ್ಕಾಯ್ (AI), ನ್ಯಾನೊ ತಂತ್ರಗ್ಯಾನ್, ಬಯೊಮೆಡಿಕಲ್, ರೊಬೋಟಿಕ್ಸ್ ತಸಲ್ಯಾ ಶೆತಾಂನಿ, ದಿಸಾಂದೀಸ್ ಜಾಂವ್ಚಿ ಉಂಚ್ಲಿ ವಾಡಾವಳ್ ರಾತೋಂರಾತ್ ಆಮಿಂ ಚಿಂತುಂಕ್ ಜಾಯ್ನಾತ್ಲ್ಯಾ ರಿತಿರ್ ಸಂಸಾರ್ ಆನಿ ಸಾಮಾಜಿಕ್ ಜಿಣ್ಯೆರೀತ್ ಬದ್ಲುನ್ ಆಸಾತ್. ಯುವಲ್ ನೋವಾ ಹಾರಿರಿ ತಸಲೆ ದಾರ‍್ಶನಿಕ್ ವಿಗ್ಯಾನ್ ಆನಿ ತಂತ್ರಗ್ಯಾನಾಚ್ಯಾ ವಾಡಾವಳಿಚ್ಯಾ ಕುಸ್ತಾರ್ ಮ್ಹನ್ಶ್ಯಾಕುಳಾಕ್ ಹೋಮೊ ಸೇಪಿಯನ್ಸ್ ಥಾವ್ನ್ ಹೋಮೊ ದೆಯುಸ್, ಮ್ಹಳ್ಯಾರ್ ದೆವಾಸಾರ‍್ಕೆ ಜಾಂವ್ಚ್ಯಾ ಉತ್ರಾವ್ಣೆಚ್ಯಾ ಎಕಾ ದವ್ಲತೆಚ್ಯಾ ಫಾಲ್ಯಾಂವಿಶಿಂ ನಕ್ಖಿ ಮ್ಹಳ್ಳೆಬರಿ ಉಲವ್ನ್ ಆಸಾತ್.

ರೇ ಕರ‍್ಝ್ವಯ್ಲಾಚ್ಯಾ ಸಿಂಗ್ಯುಲಾರಿಟಿ, ಆನಿ ಮ್ಹನ್ಶ್ಯಾಕುಳಾಚೆರ್ ತಾಚ್ಯಾ ಪರಿಣಾಮಾವಿಶ್ಯಾಂತ್ಲಿಂ ಬರ‍್ಪಾಂ ವಿಗ್ಯಾನ್ ಆನಿ ತಂತ್ರಗ್ಯಾನಾಚ್ಯಾ ಸಂಸಾರಾಂತ್ ವಾಡಾವಳೆವರ‍್ವಿಂ ಯೆಂವ್ಕ್ ಆಸ್ಚ್ಯಾ ಬದ್ಲಾಪಾವಿಶಿಂ ತಕ್ಲಿ ಆಟಂವ್ಕ್ ಘಾಲ್ಚಿಂ ನವಿಂಚ್ ದಿಶ್ಟಿಕೋಣಾಂ ದಿತಾತ್. ಮ್ಯಾಕ್ಸ್ ಟೆಗ್ಮಾರ‍್ಕ್ ತಾಚ್ಯಾ ಮ್ಹನ್ಶ್ಯಾಕೃತ್ ಬುದ್ವಂತ್ಕಾಯೆಚ್ಯಾ ಕಾಳಾರ್ ಮ್ಹನಿಸ್ ಜಾವ್ನ್ ಜಿಯೆಂವ್ಚೆಂ ಮ್ಹಳ್ಳಿ ಟ್ಯಾಗ್‌ಲಾಯ್ನ್ ಆಸ್ಚ್ಯಾ, ‘ಲಾಯ್ಫ್ 3.0’ ಬೂಕಾಂತ್ ಸಿಂಗ್ಯುಲಾರಿಟಿಚ್ಯಾ ಉಪ್ರಾಂತ್ಲಿಂ ಭವಿಶ್ಯಾಂತ್ಲ್ಯಾ 10,000 ವರ‍್ಸಾಂವಿಶಿಂ ಆಮ್ಕಾಂ ಸೊಂಪ್ಯಾನ್ ಚಿಂತುಂಕ್ ಸಯ್ತ್ ಜಾಯ್ನಾತ್‌ಲ್ಲ್ಯಾಬರಿಂ ಉಲಯ್ತಾ ಮಾತ್ ನಂಯ್, ತಾಚೆ ಉಪ್ರಾಂತ್ಲ್ಯಾ ಹಜಾರ್ ಕರೋಡ್ ವರ‍್ಸಾಂಚ್ಯಾ ಮ್ಹನ್ಶ್ಯಾಕುಳಾಚ್ಯಾ ಕೊಸ್ಮಿಕ್ ಎಂಡೊವ್ಮೆಂಟಾಚ್ಯಾ ವಯ್ರ್ ಸಯ್ತ್ ತೊ ಉಜ್ವಾಡ್ ಫಾಂಕಯ್ತಾ!

ತರ್…

ಫಕತ್ ಬದ್ಲಾಪ್ ಮಾತ್ ಥಿರ್ ಆಸ್ಚ್ಯಾ ಹ್ಯಾ ಸಂಸಾರಾಂತ್ ಏಕ್ ಬದ್ಲಾನಾತ್‌ಲ್ಲಿ ಸಂಸ್ಕೃತಿ, ಭಾಸ್ ಆನಿ ಅಸ್ಮಿತಾಯೆಪಾಸತ್ ಕರ‍್ಚಿಂ ಸೊಧ್ನಾಂ ವೆರ‍್ಥ್ ಆನಿ ನಿರ‍್ಫಳ್. ಹಾಚೆಪರಾಸ್ ಆಮ್ಚ್ಯಾ ಅಸ್ತಿತ್ವಾಚೆಂ ವ್ಹಾಳ್ತೆಂರೂಪ್ ಪಟ್ಲುನ್ ಧರ‍್ನ್, ಸದಾಂಬದ್ಲಾತ್ಯಾ ಸಂಸಾರಾಕ್ ಒಳ್ಸುನ್ ಘೆಂವ್ಚಿಚ್, ಸೊಂಪಿ ಆನಿ ಫಳ್ದಿವ್ಪಿ ವಾಟ್. ವಯುಕ್ತಿಕ್ ಆನಿ ಸಮುದಾಯ್ ಜಾವ್ನ್ ಆಮಿ ಕೋಣ್ ಮ್ಹಳ್ಳಿ ಗಜಾಲ್ ಹರ‍್ಯೆಕ್ ದೀಸ್ ಬದ್ಲುನ್ ಯೆಂವ್ಚಿ ಚರಿತ್ರಾ, ಸಂಸ್ಕೃತಿ, ಭಾಸ್ ಆನಿ ತಂತ್ರಗ್ಯಾನಾಂಚಾ ಬಳಾನ್ ರೂಪ್ ಘೆಂವ್ಚೆಂ ಏಕ್ ಕ್ರಿಯಾತ್ಮಕ್ ಘಟಕ್. ಆದ್ಲ್ಯಾ ಉಡಾಸಾನಿಂ ಉದಾಸ್ ಉರ‍್ಚೆಪ್ರಾಸ್, ಬಳಾನ್ ಮುಕಾರ್ ಸರ‍್ಚ್ಯಾ ಆನಿ ಬದ್ಲುಂಚ್ಯಾ ಆಯ್ಚ್ಯಾ ಆನಿ ಫುಡಾರಾಚ್ಯಾ ಸಂಸಾರಾಕ್ ಆಮಿ ಕಶೆಂ ಒಳ್ಸುನ್ ಘೆವ್ಯೆತ್ ಮ್ಹಳ್ಳೆವಿಶಿಂ ಆಮ್ಚೆಂ ಗುಮಾನ್ ಖಂಚಂವ್ಚೆಂ ಚಡೀತ್ ಫಳಾದಿಕ್.

AI ಶೆತಾಂತ್ ಜಾವ್ನಾಸ್ಚಿ ಬೋವ್ ಸರಾಯೆಚಿ ವಾಡಾವಳ್ ಆನಿ ಲಾಗ್ಶಿಲ್ಯಾ ಫುಡಾರಾಂತ್ ‘ಸಿಂಗ್ಯುಲಾರಿಟಿ’ಕ್ ವರ‍್ನ್ ಪಾವ್ಯೆತ್ ಜಾಲ್ಲ್ಯಾ ಪಾಟ್‌ಥಳಾರ್, ಸಾರ‍್ಕ್ಯಾರಿತಿನ್ ಠರಾಯಿಲ್ಲೆ ಶೆವೊಟ್ ಆನಿ ಪ್ರಭಾವೀಕ್ ತಾಬೆಂತ್ ದವರ‍್ಚಿ ಮಾಂಡಾವಳ್ ನಾತ್‌ಲ್ಲ್ಯಾ ಪರಿಗತೆಂತ್, ಸ್ವವಳಕ್ ಆಪ್ಣಾಯಿಲ್ಲಿ ಮನ್ಶ್ಯಾಕೃತ್ ಮ್ಹಾಬುದ್ವಂತ್ಕಾಯ್ (Superintelligence), ಮ್ಹನ್ಶ್ಯಾಕುಳಾಕ್ ಮೂಂಯ್ ಯಾ ವಾಳಯೆಬರಿಂ ಲೆಕುಂಕ್ ಪುರೊ. ತವಳ್ ಹೊ ಆಮ್ಚೊ ಅಸ್ಮಿತಾಯೆಚೊ ಸೋಧ್ ಖಂಯ್ ರಾವಾತ್?

ಆಮ್ಚ್ಯಾಸವೆಂ ಆಸ್ಚ್ಯಾ ಹ್ಯಾ ಸರ‍್ವ್ ಸಂಪರ‍್ಕ್ ಸಾಧನಾಂನಿಂ ಆಮ್ಕಾಂ ಸರ‍್ವ್ ಥರಾಚಿ ಮ್ಹಾಯೆತ್, ಚೂಕ್ ವಾ ಸಾರ‍್ಕಿ, ಬೊಟಾಂಥಳಾರ್ ಮೆಳ್ತಾ. ಹ್ಯಾ ಡಿಜಿಟಲ್ ಕಾಳಾರ್ ಏಕ್ ಮೊಬಾಯ್ಲ್ ಆನಿ ಇಲ್ಲಿ ತಕ್ಲಿ ಆಸ್ಲ್ಯಾರ್ ಕೊಣೆಂಯ್ ವೆವೆಗ್ಳ್ಯಾ ರಿತಿಚಿ ಮ್ಹಾಯೆತ್, ವಾಟ್ಸ್ಯಾಪ್ ಸಂದೇಶ್, ರೀಲ್ಸ್, ಯುಟ್ಯೂಬ್ ವೀಡಿಯೊ ಥಾವ್ನ್ ಪುರ‍್ತ್ಯಾಲಾಂಬಾಯೆಚ್ಯಾ ಪ್ರೊಪಗಾಂಡಾ ಪಿಲ್ಮಾಪರ‍್ಯಾಂತ್, ಸ್ವಮತ್ಲಬಾನ್, ಅಪ್ಣಾಕ್ ಕಶಿ ಜಾಯ್ ತಶಿ ರಚುನ್ ಸಂಸಾರ್‌ಭರ್ ವಾಂಟುನ್ ಸೊಡ್ಯೆತ್. ಅಸಲ್ಯಾ ಪರಿಗತೆಂತ್ ಆಮ್ಕಾಂ ಆಯಿಲ್ಲ್ಯಾ ಅಸಲ್ಯಾ ಸರ‍್ವ್ ಮ್ಹಾಯೆತಿಂಕ್ ಸಾರ‍್ಕೆ ರಿತಿನ್ ಗಾಳುನ್, ಸಾರ‍್ಕ್ಯಾ ಮುಳಾಥಾವ್ನ್, ಸಾರ‍್ಕಿ ಮ್ಹಾಯೆತ್ ಮಾತ್ ನಕ್ಖಿ ಕರುನ್ ಘೆಂವ್ಚಿ ಜವಾಬ್ದಾರಿ ಆಮ್ಕಾಂ ಸರ‍್ವಾಂಕ್ ಹೆರ್ ಖಂಯ್ಚ್ಯಾಯ್ ತುಂಡುರಾಯಾಂಚ್ಯಾ ಕಾಯ್ದ್ಯಾವರ‍್ನಿಂ ಚಡ್ ಕಾಯ್ದ್ಯಾಖಾಲ್ ಬಾಂದ್ತಾ. ಆಮಿ ಸರ‍್ವಾನಿಂ ಜವಾಬ್ದಾರೆನ್ ಅಶೆಂ ಕೆಲ್ಯಾರ್, ಸವ್ಕಾಸ್ ಮ್ಹಾನ್ ಕೊಸ್ಮಿಕ್ ಎಂಡೋವ್ಮೆಂಟಾಕ್ ತಯಾರ್ ಆಸ್ಚ್ಯಾ ಹೋಮೊ ಸೇಪಿಯನ್ಸಾಚ್ಯಾ ಆನ್ಯೇಕಾ ಪಿಳ್ಗೆಚ್ಯಾ ಉತ್ರೊವ್ಣೆಕ್ ಆಯ್ತೊ, ಬದ್ಧತಾ ಆಸ್‌ಲ್ಲೊ ಏಕ್ ಬಳ್ವಂತ್ ಮ್ಹನ್ಶ್ಯಾಸಮುದಾಯ್ ಬಾಂದುನ್ ಹಾಡ್ಯೆತ್.

■ ಕಿಶೂ, ಬಾರ‍್ಕುರ್

References:
– Diamond, J. (1992). The Third Chimpanzee: The Evolution and Future of the Human Animal.
– Kroeber, A. L. & Kluckhohn, C. (1952). Culture: A Critical Review of Concepts and Definitions.
– Crystal, D. (2000). Language Death.
– Armstrong, K. (1993). A History of God: The 4,000-Year Quest of Judaism, Christianity, and Islam.
– Kurzweil, R. (2005). The Singularity Is Near: When Humans Transcend Biology.
– Max Tegmark, (2017). Life 3.0, Being Human in the Age of Artificial Intelligence-Alfred A. Knopf
– Nick Bostrom, (2014). Superintelligence: Paths, Dangers, Strategies
– Yuval Noah Harari. Sapiens (2011). Homo Deus (2017).
* Singularity : In technology, singularity describes a hypothetical future where technology growth is out of control and irreversible. These intelligent and powerful technologies will radically and unpredictably transform our reality.