ಮ್ಹಾಕಾ ‘ಪೊಯೆಟಿಕಾ’ ಪಂಗ್ಡಾಚ್ಯಾ ಕೊಣಾಚೆರ್ ಯೀ ರಾಗ್ ದ್ವೇಶ್ ಕಾಂಯ್ಚ್ ನಾ. ಹಾಚೆಪ್ರಾಸ್ ಚಡ್ತಾವ್ ತಾಂತುಂ ಆಸ್ಚಿಂ ಮ್ಹಜೆ ಈಶ್ಟ್ ಇಶ್ಟಿಣ್ಯೊ ಆನಿ ಮೊಗಾಚಿಂಚ್. ಪುಣ್ ಆರ್ಸೊ ಪತ್ರಾರ್ (ಮಾರ್ಚ್ 2023 ಅಂಕೊ) ಪೊಯೆಟಿಕಾ ಕವಿಗೋಶ್ಟಿ – ಥೊಡೆ ವಿಚಾರ್ ಸಂಪಾದಕೀಯ್ ಲೇಖನ್ ಬರಯ್ಜೆ ಜಾಲ್ಲಿ ಗರ್ಜ್ ಉದೆಲ್ಲ್ಯಾನ್ ಬರಯ್ಜೆಚ್ ಪಡ್ಲೆಂ. ಆನಿ ಕೊಣೀ ವಿಚಾರುಂಕ್ ಪುರೊ – “ತಾಂಕಾಂ ಖಾಸ್ಗೆನ್ ಸಾಂಗ್ಯೆತ್ ಆಸ್ಲ್ಲೆಂ ನೆ?” ಮ್ಹಣ್. ಪುಣ್ ಹ್ಯೊ ಗಜಾಲಿ ಖಾಸ್ಗೆನ್ ಸಾಂಗ್ಚ್ಯೊ ಬಿಲ್ಕುಲ್ ನ್ಹಯ್. ಕಿತ್ಯಾಕ್ ಮ್ಹಳ್ಯಾರ್ ಹ್ಯಾ ಗ್ರೂಪಾಂತ್ಲ್ಯೊ ಥೊಡ್ಯೊ ಕವಿತಾ ಭಾಯ್ರ್ ವಚೊನ್ ಬರಯಿಲ್ಲ್ಯಾ ಕವಿಂಕ್‍ಚ್ ಜಾಯ್ತಿಂ ಜಣಾಂ ಟ್ರೋಲ್ ಕರ್ಚೆಂಯ್ ಮ್ಹಾಕಾ ಕಳಿತ್ ಆಸಾ. ಎಕಾಚ್ ಉತ್ರಾನ್ ಸಾಂಗ್ಚೆಂ ತರ್ ಲೊಕಾಮತಿಂತ್ ಕವಿತಾ ‘ಸೊವಾಯ್’ ಜಾವ್ನ್ ಗೆಲ್ಲೆಬರಿ ಜಾಲಾಂ. ಫಾಲ್ಯಾ ಅಶೆಂಚ್ ಮುಕಾರ್ ವಚತ್ ತರ್, ಫಾಲ್ಯಾಂ ಕೊಣೆಂ ಪುಣೀ ‘ಆಪುಣ್ ಕೊಂಕ್ಣಿ ಕವಿ’ ಮ್ಹಳ್ಯಾರ್ ಲೋಕ್ ಹಾಸೊಂಕ್ ಆಸಾ. ಹಾಚೊ ಫುಡಾರ್ ಕಿತೆಂ ಮ್ಹಣ್ ಗ್ರೂಪಾಚ್ಯಾ ಮುಕೆಲ್ಯಾಂನಿ ಚಿಂತಿಜೆ ಆಸ್ಲ್ಲೆಂ.
ಹಾಕಾ ಲೇಟೆಸ್ಟ್ ದಾಖ್ಲೊ ಮ್ಹಳ್ಯಾರ್ ಹೊ : ಪೊಯೆಟಿಕಾ-ದಿವೊ ಪತ್ರ್ ಸಾಂಗಾತಾ ಮೆಳೊನ್ ಆಸಾ ಕೆಲ್ಲ್ಯಾ ಕವಿತಾ ಸ್ಪರ್ಧ್ಯಾಚೆಂ ರಿಸಲ್ಟ್ ಭಾಯ್ರ್ ಪಡ್ಲಾಂ. ವರಯ್ಣಾರ್ ಕೋಣ್, ಹ್ಯಾ ಕವಿತೆಕ್ ಪಯ್ಲ್ಯಾ ಇನಾಮಾಕ್ ಕಿತ್ಯಾಖಾತಿರ್ ವಿಂಚ್ಲಾಂ ಕಾಂಯ್ ಖಬರ್ ನಾ. ವರಯ್ಣಾರಾಂಚೊ ಶರೊಯ್ ನಾ.
ಸೊಡ್ಯಾಂ, ಪುಣ್ ಅಸಲ್ಯೆ ಎಕೆ ಕವಿತೆಕ್ ಪಯ್ಲೆಂ ಇನಾಮ್ ಲಾಬ್ತಾ ತರ್, ಪಾಟ್ಲ್ಯಾ ವರ್ಸಾಚ್ಯಾಕೀ ಚಡ್ ಆವ್ದೆಥಾವ್ನ್ ಇತ್ಲ್ಯೊ ಗದ್ದಾಳಾಯೆಚ್ಯೊ ಕವಿಗೊಶ್ಟಿ ಕರ್ನ್ ಆಜೂನ್ ಪೊಯೆಟಿಕಾಚೆಂ ಮಟ್ಟ್ ಖಂಯ್ ಆಸಾ ಮ್ಹಣ್ ಗಂಭಿರ್ ಜಾವ್ನ್ ಚಿಂತಿಜೆ. ಹಾಚೆವರ್ನಿಂ ಗಂಭೀರ್ ಜಾವ್ನ್ ಚಿಂತಿಜೆ ಜಾಲ್ಲಿ ಗಜಾಲ್ ಮ್ಹಳ್ಯಾರ್ ಹಿ ಪಯ್ಲೆಂ ಇನಾಮ್ ಲಾಬ್‍ಲ್ಲಿ ಕವಿತಾಯ್ ದುಸ್ರ್ಯಾ ಭಾಶೆಂಚೆಂ ನಕ್ಕಲ್ ಮ್ಹಳ್ಳಿ!
ಪಯ್ಲೆಂ ಇನಾಮ್ ಜೊಡ್‌ಲ್ಲಿ ‘ನಕ್ಕಲ್’ ಕೆಲ್ಲಿ ಕವಿತಾ
ಮೂಳ್ ಕವಿತಾ
ನಾಂವ್‍ಯೀ ಆಸಾ ತಶೆಂ ದವರ್ನ್, ಮದೆಂ ಮದೆಂ ಥೊಡೆಂ ಬದ್ಲಿಲ್ಲೆಕೂಡ್ಲೆ ತಿ ಕವಿತಾ ಸ್ವಂತ್ ಜಾತಾ? (ತ್ಯಾ ಕವಿತೆಚೊ ವಿಡಿಯೊಚ್ ಹಾಂಗಾಸರ್ ವಯ್ರ್ ಆಸಾ. ತುಮಿಂಚ್ ಹ್ಯೊ ದೊನೀ ಕವಿತಾ ಸರ್ ಕರ್ನ್ ಪಳಯಾ). ಹಿ ತುವೆಂ ಕೊಪಿ ಕೆಲ್ಯಾಯ್ ಮ್ಹಣ್ ಕೊಣೆಂ ತರೀ ಸಾಂಗ್ಲ್ಯಾರೀ, ಇತ್ಲೆ ದಾಖ್ಲೆ ಆಸೊನ್ ಯೀ ನಾ ಹಿ ಆಪ್ಣಾಚಿಚ್ ಮ್ಹಣ್ತಾತ್ ತರ್ ಕಿತೆಂ ಮ್ಹಣ್ಚೆಂ?
ಖಂಯ್ಚೋಯ್ ಏಕ್ ಸಂಸ್ಥೊ, ಸಂಘಟನ್ ವಾ ಭಾಸ್-ಸಾಹಿತ್ಯ್ ಅಸಲ್ಯಾ ಗಜಾಲಿಂಚ್ಯಾ ಪಾಟ್ ಥಳಾರ್ ಆಸಾ ಕೆಲ್ಲ್ಯಾ ವಾಟ್ಸಾಪ್ ಗ್ರೂಪಾಚ್ಯಾ ಮುಕೆಲ್ಯಾಂಕ್ ಸಯ್ತ್ ಏಕ್ ದಿಶ್ಟಾವೊ ಆಸಜೆ. ಸಮಾಜೆಚೆಂ ಇಲ್ಲೆಶೆಂ ತರೀ ಗಿನ್ಯಾನ್ ಆಸಜೆ. ಖಂಯ್ಚೆಂ ಫಾವೊ, ಆನಿ ಖಂಯ್ಚೆಂ ನಾಫಾವೊ ಮ್ಹಳ್ಳ್ಯಾಚಿ ಇಲ್ಲಿಶಿ ತರೀ ಅಂದಾಜ್ ಆಸಜೆ. ಹಾಕಾ ಆರ್ಸೊ ಪತ್ರಾರ್, ಮಾರ್ಚ್ 2023 ಸಂಪಾದಕೀಯ್ ಲೇಖನಾಂತ್ ಸಾಂಗ್ ಲ್ಲೆಬರಿ ’ಧಾಂಕ್’ ಗರ್ಜೆಚೆಂ. (ಲೇಖನ್ ಹಾಂಗಾಸರ್ ಸಕಯ್ಲ್ ಆಸಾ ತಶೆಂ ದಿಲಾಂ) ನಾ ತರ್ ಆಪ್ಲಿ ಮರ್ಯಾದ್ ಆಪ್ಣೆಂಚ್ ಹೊಗ್ಡಾವ್ನ್ ಕಾಣ್ಘೆಜೆ ಪಡ್ತಾ.
ಕವಿತೆಚ್ಯಾ ಕಾರಣಾನ್ ವಾ ನಿಬಾನ್ ಥೊಡಿಂ ಕವಿ ಜಣಾಂ, ಕಾವ್ಯರಸಿಕಾಂ ಸಂಗಿ ಯೆಂವ್ಚ್ಯಾಂತ್, ಆಪ್ಲಿಂ ಬರ್ಪಾಂ, ಚಿಂತ್ಪಾಂ, ಆಲೋಚನ್ಯೊ ವಾಂಟುನ್ ಘೆಂವ್ಚ್ಯಾಂತ್ ಆನಿ ಥೊಡೊ ವೇಳ್ ಸಾಂಗಾತಾ ಖರ್ಚುಂಚ್ಯಾಂತ್ ಜಾಯ್ತೆಂ ಬರೆಪಣ್ ಆಸಾ. ಹೆಂ ಖುದ್ ಕುಡಿಸಮೇತ್ ಹಾಜಿರ್ ಆಸಜೆ ಮ್ಹಣ್ ನಾ, ಬಗಾರ್ ವ್ಹಾಟ್ಸಾಪ್ ಗ್ರೂಪಾಂನಿ ಆಸ್ಲ್ಯಾರೀ ಮನಾಂ ಸಾಂಗಾತಾ ಆಸ್ತಾತ್. ಇತ್ಲೆಂಚ್ ನ್ಹಯ್, ಜೊ ಸಾಹಿತ್ಯಾಕ್ ಗರ್ಜೆಚೊ ತಸಲೊ ಏಕ್ ಸಾಹಿತಿಕ್ ಭೊಂವಾರ್ ಸದಾಂ ಜಿವಾಳ್ ಆಸ್ತಾ. ಆಮಿಂಯ್ ಪೊಯೆಟಿಕ್ಸ್ ಮ್ಹಳ್ಳೊ ವಾಟ್ಸಾಪ್ ಗ್ರೂಪ್ ಕರುನ್ ಸಬಾರ್ ಕವಿಂಕ್ ಸಾಂಗಾತಾ ಹಾಡ್‌ಲ್ಲೆಂ, ಕವಿಗೋಶ್ಟಿ ಚಲಯಿಲ್ಲ್ಯೊ ಆನಿ ತಾಚೆಂ ತೀರ್ಲ್ ಜಾವ್ನ್ ತವಳ್ಚೊ ನಮಾನ್ ಬಾಳೊಕ್ ಜೆಜು ಸಂಪಾದಕ್ ಜಾವ್ನ್ ಆಸ್‌ಲ್ಲ್ಯಾ ಬಾ. ಸ್ಟೀವನ್ ಪಿರೇರಾ ಹಾಂಚ್ಯಾ ಆಲೋಚನೆನ್, ಧ್ಯಾನವನ ಪ್ರಕಾಶನಾಖಾಲ್ ಪಾಕ್ಳ್ಯೊ ಮ್ಹಳ್ಳೊ ಚುಟುಕಾಂಚೊ ಬೂಕ್‌ಯೀ ಪರ್ಗಟ್ ಕೆಲ್ಲೊ. ಫಾಲ್ಯಾಂ ಕೊಣೀ ತುಮಿ ಪೊಯೆಟಿಕ್ಸ್ ಗ್ರೂಪ್ ರಚುನ್ ಕೊಂಕ್ಣಿ ಕಾವ್ಯಶೆತಾಕ್ ಕಿತೆಂ ದೇಣ್ಗಿ ದಿಲಿ ಮ್ಹಣ್ ವಿಚಾರ‍್ಲ್ಯಾರ್ ದಾಕೊಂವ್ಕ್ ಹೊ ಬೂಕ್ ಆಸಾ. ಆತಾಂ ಪೊಯೆಟಿಕ್ಸ್ ಗ್ರೂಪ್ ಥಂಡ್ ಪಡ್ಲಾ. ಸದ್ದ್ಯಾಕ್ ಪೊಯೆಟಿಕಾ ನಾಂವಾಚೊ ಗ್ರೂಪ್ ಎಕ್ದಮ್ active ಆಸಾ. ಚಡಾವತ್ ಪೊಯೆಟಿಕ್ಸ್ ಗ್ರೂಪಾಂತ್ ಆಸ್ಚ್ಯಾ ಕವಿ-ಕವಯಿತ್ರಿಂ ಸಾಂಗಾತಾ ಜಾಯ್ತಿಂ ನವಿಂ ಕವಿತೆಥಂಯ್ ಉರ್ಬೆಸ್ತ್ ಆಸ್‌ಲ್ಲಿಂ ಹ್ಯಾ ಗ್ರೂಪಾಂತ್ ಆಸಾತ್, ಕವಿತಾ ಲಿಖ್ತಾತ್. ಹಾಚ್ಯಾಕೀ ಭಾಯ್ರ್ ವಚೊನ್ ಪೊಯೆಟಿಕಾ ಗ್ರೂಪ್ ಮ್ಹಯ್ನ್ಯಾಕ್ ಏಕ್ ಕವಿಗೋಶ್ಟಿ ಆಸಾ ಕರ್ತಾ. ಬೊವ್ಶಾ ಎಕಾ ವರ‍್ಸಾಥಾವ್ನ್ ಅಸಲ್ಯೊ ಕವಿಗೋಶ್ಟಿ ವೆವೆಗ್ಳ್ಯಾ ಗಾಂವಾಂನಿ, ವೆವೆಗ್ಳ್ಯಾ ಪೊದೊರ್ನೆಚ್ಯಾ ಗುಸ್ತಾರ್ ಚಲೊನ್‌ಚ್ ಆಯ್ಲ್ಯಾತ್. ಆತಾಂ ಏಕ್ ವರಸ್ ಸಂಪ್ಲ್ಯಾ ಉಪ್ರಾಂತ್ ಅಸಲ್ಯಾ ಕವಿಗೋಶ್ಟಿಂವಿಶಿಂ ಥೊಡೆ ವಿಚಾರ್ ಬರಯ್ಜೆ ಮ್ಹಣ್ ಭೊಗ್ತಾತ್.
ಪೊಯೆಟಿಕಾ ವಾಟ್ಸಾಪ್ ಪಂಗ್ಡಾಂತ್ ಜಾಯ್ತಿಂ ಜಣಾಂ ಕವಿತಾ ಲಿಖ್ತಾತ್ ಮ್ಹಣ್ ಖಬರ್ ಆಸಾ. ಥೊಡ್ಯಾಂನಿ ಹ್ಯಾ ಗ್ರೂಪಾಕ್ ಮೆಳ್ಳ್ಯಾ ಉಪ್ರಾಂತ್ ಬರೊಂವ್ಕ್ ಸುರು ಕೆಲಾಂ ಮ್ಹಳ್ಳೆಂಯ್ ಕಳಿತ್ ಆಸಾ. ಥೊಡೆಂ ಬರೆಂಯ್ ಆಸಾ, ತಾಚೆಸವೆಂ ಉತಳ್‌ಯೀ ಆಸ್ತಾ. ಹೆಂ ಸಹಜ್‌ಚ್ ಮ್ಹಣ್ಯಾಂ, ಎಕಾ ಗ್ರೂಪಾಭಿತರ್ ಆಸ್ತಾನಾ ಹೆಂ ತಿದ್ವುಂಕ್ ಆವ್ಕಾಸ್ ಆಸಾ. ಪೊಯೆಟಿಕಾ ಯೆಜ್ಮಾನ್ಯಾಂನಿ ಸಾಂಗ್ಚೆಬರಿ ಹೊ ನವ್ಯಾ ಕವಿಂಕ್ ಹುಮೆದ್ ದೀಂವ್ಕ್ ರಚ್‌ಲ್ಲೊ ಗ್ರೂಪ್. ಪುಣ್ ಅಶೆಂ ಆಸ್ಲ್ಯಾರೀ ಥಂಯ್ಸರ್ ತಿದ್ವಣ್ ಗರ್ಜೆಚಿ ಆನಿ ತಿ ತಿದ್ವಣ್ ಕಾಣ್ಗೆಂವ್ಚೆಂ ಬರೆಂ ಮನ್‌ಯೀ ಗರ್ಜೆಚೆಂ. ಹುಮೆದ್ ಭರ‍್ಚೆಸವೆಂ ಮಾರ್ಗದರ್ಶನ್ ದಿಂವ್ಚೆಂಯ್ ಗರ್ಜೆಚೆಂ. ಹಿ ಗ್ರೂಪಾಕ್ ಸಂಬಂದ್ ಜಾಲ್ಲಿ ಗಜಾಲ್. ಪುಣ್ ದಬಾಜಿಕ್ ಕಾರ್ಯೆಂ ಮಾಂಡುನ್, ಲೊಕಾಕ್ ಆಪೊವ್ನ್, ದೋನ್ ತೀನ್ ವೊರಾಂ ಲೊಕಾಮುಕಾರ್ ಕವಿತಾ ಸಾದರ್ ಕರ್ತಾತ್ ಮ್ಹಣ್ತಾನಾ ಹಿ ಎಕಾ ಗ್ರೂಪಾಚಿ ಗಜಾಲ್ ನ್ಹಯ್ ಬಗಾರ್ ಸಮಾಜೆಚಿ ಗಜಾಲ್ ಜಾತಾ. ಹಾಂಗಾಸರ್ ಕಾಂಯ್ ಲೊಕಾಚೆರ್ ವಾಯ್ಟ್ ಪ್ರಭಾವ್ ಪಡ್ತಾ ತರ್ ತ್ಯೊ ಗಜಾಲಿ ವಿಮರ್ಸೊ ಕರಿಜೆ ಪಡ್ತಾತ್. ಫಕತ್ ಕವಿಂಕ್ ಮಾತ್ರ್ ನ್ಹಯ್ ಜಮ್ಲಲ್ಯಾ ಲೊಕಾವಿಶಿಂಯ್ ಚಿಂತಿಜೆ ಪಡ್ತಾ.
ಪೊಯೆಟಿಕಾ ಕವಿಗೋಶ್ಟಿ ವಿಶ್ಯಾಂತ್ ಪೊಯೆಟಿಕಾ ಕವಿಗೋಶ್ಟಿಂನಿ ಹಾಜರ್ ಜಾವ್ನ್ ಕವಿತಾ ವಾಚ್‌ಲ್ಲ್ಯಾ ಚಡ್ತಾವಾಂನಿ ಮ್ಹಜೆಕಡೆ ಸಾಂಗ್‌ಲ್ಲೆಂ ಆಸಾ ಕೀ – ಕವಿಗೋಶ್ಟಿ ಒಟ್ರಾಶಿ ಜಾತಾತ್. ಕಾಂಯ್ ತರೀ ಸುಧ್ರಾಪ್ ಹಾಡಿಜೆ ಮ್ಹಣ್ ಸಲಹಾ ದಿಲ್ಯಾರೀ ತಿ ಗಂಭೀರ್ ರಿತಿನ್ ಘೆಂವ್ಚಿಂ ಕೊಣೀ ನಾಂತ್ ತಶೆಂ ಅಶೆಂ ಮ್ಹಣ್. ಪೊಯೆಟಿಕಾಚ್ಯೊ ಥೊಡ್ಯೊ ಕವಿಗೋಶ್ಟಿ ಹಾಂವೆಂ ಒನ್‌ಲಾಯ್ನ್ ಪಳಯ್ಲ್ಯಾತ್ ತರೀ ಖುದ್ ಹಾಜಿರ್ ಜಾಲ್ಲೊಂ ಎಕೆಚ್ ಕವಿಗೋಶ್ಟಿಕ್, ತೆಂಯ್ ಆಮ್ಚ್ಯಾ ಗಾಂವಾಂತ್ ಜಾಲ್ಲೆತವಳ್. ಹ್ಯೆ ಕವಿಗೋಶ್ಟಿಕ್ ಗಾಂವ್ಚೊ ಥೊಡೊ ಲೋಕ್‌ಯೀ ಆಸ್‌ಲ್ಲೊ. ಥೊಡ್ಯೊ ಕವಿತಾ ಬರ‍್ಯೊಯ್ ಆಸ್‌ಲ್ಲ್ಯೊ.. ಪುಣ್ ಅಸಲ್ಯಾ ಏಕ್ ದೋನ್ ಕವಿತಾಂಖಾತಿರ್ ವೀಸ್ ಪಂಚ್ವೀಸ್ ಕವಿತಾ ಸೊಸುಂಕ್ ಲೊಕಾಕ್ ಜಾತಾ? ಹೆಂ ಚಿಂತಪ್ ಮ್ಹಜೆಭಿತರ್ ಧೊಸ್ತಾಲೆಂ. ಪುಣ್ ತ್ಯಾಚ್ ಮಾಟ್ವಾಂತ್ ಹಾಜಿರ್ ಜಾಲ್ಲ್ಯಾ ಆನಿ ಪಯ್ಲೆಪಾವ್ಟಿಂ ಕವಿಗೋಶ್ಟಿಕ್ ಕವಿತಾ ಆಯ್ಕೊಂಕ್ ಆಯಿಲ್ಲ್ಯಾ ದೊಗಾಂನಿ ಮ್ಹಜೆಕಡೆ ಸಾಂಗ್‌ಲ್ಲಿಂ ಉತ್ರಾಂ ಅಶಿಂ – ಹಾಂವೆಂ ಕಿತೆಂ ಪಳಯಾಂ ಮ್ಹಣ್ ಪಯ್ಲೆಪಾವ್ಟಿಂ ಯೆಂವ್ಚೆಂ ಕವಿತಾ ಆಯ್ಕೊಂಕ್. ಆನಿ ಮುಕಾರ್ ಹ್ಯಾ ಕವಿಗೋಶ್ಟಿಂಚೊ ಸಹವಾಸ್ ನಾಕಾ. ಜರ್ ಲೊಕಾಕ್ ದೋನ್ ತೀನ್ ವೊರಾಂ ಬಸೊವ್ನ್ ಆನಿ ಎಕಾ ಕೊಂಕ್ಣಿ ಮೊಗಿಕರ‍್ನಾ ಎಕೆಕೆ ಕವಿಗೋಶ್ಟಿಕ್ ತೀಸ್ ಪಾಂತ್ತೀಸ್ ಹಜಾರ್ ಖರ್ಚ್ ಕರೊವ್ನ್ ಗದ್ದಳಾಯೆನ್ ಜಾಂವ್ಚ್ಯೊ ಕವಿಗೋಶ್ಟಿ ಜರ್ ಲೊಕಾಕ್ ಕವಿತಾ ಶೆತಾಥಾವ್ನ್ ಪಯ್ಸ್ ಲೊಟಿಶೆಂ ಕರ್ತಾತ್ ತರ್ ಅಸಲ್ಯಾ ಕಾರ್ಯಾಂಕ್ ಆನಿ ಖರ್ಚಿಲ್ಲ್ಯಾ ದುಡ್ವಾಕ್ ಕಸಲಿ ಮರ್ಯಾದ್ ಉರ‍್ಲಿ? ಹಿ ಗಂಭೀರ್ ಜಾವ್ನ್ ಚಿಂತಿಜೆ ಜಾಲ್ಲಿ ಗಜಾಲ್.
ಎಕಾ ಕವಿಚ್ಯಾಚ್ ಗ್ರೂಪಾಭಿತರ್ ಕಿತೆಂಯ್ ಲಿಖ್ಯೆತ್ ವಾ ಕವಿಂಚ್ಯಾ ಭಿತರ್‌ಚ್ ಏಕ್ ಗೋಶ್ಟಿ ಕರ್ನ್ ಬರ‍್ಯೊ-ವಾಯ್ಟ್ ಕವಿತಾ ವಾಚುನ್ ಚೂಕ್ ಆಸ್ಲ್ಯಾರ್ ತಿದ್ವುಂಚಿಂ ಪ್ರೇತನಾಂ ಕರ‍್ಯೆತ್. ಅಸಲ್ಯಾ ಸಾಹಿತ್ಯಾಕ್ ಲೊಕಾಮುಕಾರ್ ವಚ್ಯೆತ್ ತಿತ್ಲೆಂ ಮಟ್ಟ್ ವಾ ತಿತ್ಲೆಂ stuff ಆಸ್ತಾನಾ ಮಾತ್ರ್ ಲೊಕಾಮುಕಾರ್ ವಚಜೆ. ದಾಖ್ಲ್ಯಾಕ್ ನಾಟಕ್ ಪ್ರ್ಯಾಕ್ಟೀಸ್ ಜಾತಾ. ತೊ ನಾಟಕ್ ಪರಿಪೂರ್ಣ್ ಥರಾನ್ ತಯಾರ್ ಜಾಲ್ಯಾ ಉಪ್ರಾಂತ್‌ಚ್ ವೆದಿರ್ ಚಡ್ಚೊ. ಹ್ಯಾ ಹಂತಾರ್ ಲೊಕಾಕ್ ಆಪಯ್ತಾತ್ ಸೊಡ್ಲ್ಯಾರ್ ಪ್ರ್ಯಾಕ್ಟೀಸ್ ಪಳೆಂವ್ಕ್ ಕೊಣೀ ಲೊಕಾಕ್ ಆಪಯ್ನಾಂತ್, ಆಪಯ್ಲ್ಯಾರೀ ತೆಂ ಹಾಸ್ಯಾಸ್ಪದ್ ಜಾತಾ. ಹೊಚ್ ದಾಖ್ಲೊ ಪೊಯೆಟಿಕಾ ಕವಿಗೋಶ್ಟಿಕ್ ಸರ್ ಕರ‍್ಯೆತ್. ಪಯ್ಲೆಂ ಕವಿಂಮದೆಂ ಎಕಾಮೆಕಾ ತಿದ್ವುಂಚೆಂ ಪ್ರೇತನ್ ಜಾಯ್ಜೆ. ಕವಿತಾ ಲೊಕಾಕ್ ದಾದೊಸ್ ಕರ್ತಾ ಮ್ಹಣ್ಚೆಪ್ರಾಸ್ at least ಧೊಸ್ ದಿಂವ್ಚಿನಾ ಮ್ಹಳ್ಳೆಂ ಖಾತ್ರಿ ಜಾಲ್ಯಾ ಉಪ್ರಾಂತ್‌ಚ್ ಲೊಕಾಮುಕಾರ್ ಸಾದರ್ ಕರಿಜೆ ಆನಿ ತ್ಯಾ ದೆಕುನ್ ಕೊಣಾಚೊಯ್ ಹಜಾರಾಂನಿ ದುಡು ಖರ್ಚಿಜೆ. ನಾ ತರ್ ಕಾಂಯ್ ಇಲ್ಲೆಶ್ಯಾ ಉರ್ಬೆನ್ ಲೋಕ್ ಆಯ್ಲ್ಯಾರ್ ಹಿಂಸಾ ಭೊಗುನ್ ಕವಿತಾ ಶೆತಾವಯ್ರ್‌ಚ್ ಕಾಂಟಾಳೊ ಯೆತಾ. ಆನಿ ತುಮಿ ಜರ್ ಆಮಿ ನವ್ಯಾಂಕ್ ಪ್ರೋತ್ಸವ್ ದೀಂವ್ಕ್ ಗೋಶ್ಟಿ ಕರ‍್ಚ್ಯೊ ಮ್ಹಣ್ ಸಾಂಗ್ತಾತ್ ತರ್ ಮ್ಹಜಿಂ ಸವಾಲಾಂ ಅಶಿಂ ಆಸಾತ್ : ತುಮಿ ನವ್ಯಾಂಕ್ stage ದಾಕೊವ್ನ್ ಕವಿತಾ ಬರೊಂವ್ಕ್ ಪುಸ್ಲಾಂವ್ಚೆಂ? ಫಕತ್ ಪ್ರೋತ್ಸವ್ ದಿಂವ್ಚೆಖಾತಿರ್ ಕೊಣಾಕರ‍್ನಾ ತೀಸ್ ಪಾಂತ್ತೀಸ್ ಹಜಾರ್ ಖರ್ಚುಂಚಿ ಗರ್ಜ್ ಆಸಾ? ಲಿಖ್ತಲ್ಯಾಂಕ್ ಆವ್ಕಾಸ್ ದೀನಾತ್ಲ್ಯಾರ್ ಬೆಜಾರ್ ಜಾತಾ ತರ್ ಆಯ್ಕತಲ್ಯಾ ಲೊಕಾಕ್ ಜಾಂವ್ಚಿ ಬೆಜಾರಾಯ್ ಲೆಕಾಕ್ ನಾ?
ವ್ಹಯ್, ಪಯ್ಲೆಂ ಕೊಣೆಂ ಪುಣೀ ಏಕ್ ಕವಿತಾ ಬರಯ್ಲ್ಯಾ. ಸಕ್ಡಾಂ ವಾಚ್ತಾನಾ ತಾಕಾ ಭಾಯ್ರ್ ದವರ‍್ಲ್ಯಾರ್ ಬೆಜಾರ್ ಜಾತಾ ದೆಕುನ್ ವಾಚುಂಕ್ ದಿಂವ್ಚಿ ವಾ ಹಿ ವರ‍್ಸಾಂಥಾವ್ನ್ ಆಮ್ಚ್ಯಾ ಗ್ರೂಪಾಂತ್ ಎಕ್ಟಿವ್ ಆಸಾ. ಕಾಲ್ ಪೋರ್ ಬರೊಂವ್ಕ್ ಸುರು ಕೆಲ್ಲ್ಯಾಂಕ್ ವೆದಿ ದೀವ್ನ್ ಹಿಕಾ ಸೊಡ್ಲ್ಯಾರ್ ಹಿಕಾ ಬೆಜಾರ್ ಜಾಯ್ತ್ – ಅಸಲ್ಯೊ ಸಲೀಸ್ ಜಾಪ್ ಯೆತಿತ್. ಪುಣ್ ಹಾಂಗಾಸರ್ ಕೊಣೆಂ ಪಯ್ಲೆಪಾವ್ಟಿಂ ಬರಯ್ಲಾಂ ಆನಿ ಕೋಣ್ ಇತ್ಲ್ಯಾ ವರ‍್ಸಾಂಥಾವ್ನ್ ಬರೊವ್ನ್ ಆಸಾ – ಹೆಂ ಲೆಕಾಕ್ ಧರ‍್ಚೆಂ ನ್ಹಯ್, ಬಗಾರ್ ಕವಿತಾ ಲೊಕಾಮುಕಾರ್ ವಾಚುನ್ ಸಾಂಗೊಂಕ್ ಫಾವೊಗೀ ಮ್ಹಣ್ ಪಾರ್ಕುಂಚೆಂಚ್ ಸಾರ್ಕೆಂ. ಥೊಡ್ಯಾಂನಿ ಪಯ್ಲೆಂ ಬರಯಿಲ್ಲಿ ಕವಿತಾಯ್ ಬರೀ ಆಸ್ತಾ, ಆನಿ ಥೊಡ್ಯಾಂನಿ ವರ‍್ಸಾಂಥಾವ್ನ್ ಬರೊವ್ನ್ ಆಸ್ಲ್ಯಾರೀ ತಾಂಚೆಂ ಮಟ್ಟ್ ಲೊಕಾಮುಕಾರ್ ವೆಚೆತಿತ್ಲೆಂ ಆಸನಾ. (ಹ್ಯಾ ಅಂಕ್ಯಾರ್ ತ್ಯಾಚ್ ಗ್ರೂಪಾಂತ್ ಆಸೊನ್ ಮ್ಹಯ್ನ್ಯಾ ಆದಿಂ ಬರೊಂವ್ಕ್ ಧರ್‌ಲ್ಲ್ಯೆ ತರ್ನಾಟ್ಯೆ ಕವಯಿತ್ರಿಚ್ಯೊ ಕವಿತಾ ಪರ್ಗಟ್ ಕೆಲ್ಯಾತ್) ಹಾಂಗಾಸರ್ ಕೊಣೀ ಪಯ್ಲೆಂ ಬರಯಿಲ್ಲಿ ಆಸೊಂ ವಾ ವರ‍್ಸಾಂಥಾವ್ನ್ ಬರಯಿಲ್ಲ್ಯಾಚಿ ಆಸೊಂ, ಲೊಕಾಮುಕಾರ್ ಸಾದರ್ ಕರ‍್ಚೆಂ ಮಟ್ಟ್ ಆಸ್ಚ್ಯೊ ಕವಿತಾ ವಿಂಚ್ಚ್ಯೊ ಗರ್ಜೆಚ್ಯೊ. ಹಿ ವಿಂಚೊವ್ಣ್ ನಾ ತರ್ ಫಕತ್ ಕಸ್ತಳ್ ಆನಿ ಭೊಂಗೊಸ್ತಳ್ ಜಾತಾ. ಮಟ್ಟಾಚ್ಯೊ ಮ್ಹಣ್ತಚ್ ಭಯಂಕರ್ ಗಂಭೀರ್ ಕವಿತಾ, ಕೊಣಾಕೀ ಸಮ್ಜನಾತ್ಲ್ಯೊ, ಪರತ್ ಪರತ್ ವಾಚ್ಲ್ಯಾರ್ ಮಾತ್ರ್ ಕಳ್ಚ್ಯೊ – ಅಸಲಿಂ ಕಾವ್ಯಾಳ್ ಫಿತಿಸ್ಪಣಾಂಚ್ಯೊ ನ್ಹಯ್, ಬಗಾರ್ ಸಾದ್ಯೊ, ಬರ‍್ಯೊ ತಾಚ್ಯಾಕೀ ವರ್ತ್ಯಾನ್ ಲೊಕಾಕ್ ವಿರಾರ್ ಕರಿನಾತ್ಲ್ಯೊ ಕವಿತಾ ತಿತ್ಲೆಂಚ್.
ಮಂಗ್ಳುರಿ ಕೊಂಕ್ಣಿ ಸಾಹಿತ್ಯಾಂತ್ ಏಕ್ ನದರ್ ಘಾಲಿ ತರ್ ಹಾಂಗಾಸರ್ ಸಾಂಕಳ್ ಕಾಣಿಯಾಂಥಾವ್ನ್ ಧರ‍್ನ್ ಮಟ್ವ್ಯಾ ಕಾಣಿಯಾಂ ಪರ್ಯಾಂತ್ ಜಾಯ್ತೆಂ ಉತಳ್ ಸಾಹಿತ್ಯ್ ಆಸಾ. ಪುಣ್ ಹಾಂಚೆಮದೆಂ ಕವಿತಾ ಶೆತಾನ್ ಆಪ್ಲೆಂ ಘಮಂಡ್ ಸಾಂಬಾಳ್‌ಲ್ಲೆಂ. ಜಾಂವ್ಕ್ ಪುರೊ ಚಾಫ್ರಾ ತಸಲ್ಯಾಂನಿ ಘಾಲ್ಲಿ ಬುನ್ಯಾದ್ ಘಟ್ ಆಸ್‌ಲ್ಲಿ. ಉಪ್ರಾಂತ್ ಆಯಿಲ್ಲ್ಯಾ ಕವಿಂನಿಯ್ ಹೆಂ ಮಟ್ಟ್ ಸಾಂಬಾಳುನ್ ವ್ಹೆಲ್ಲೆಂ. ಹೆರ್ ಗದ್ಯ್ ಸಾಹಿತ್ಯಾಕ್ ಸರ್ ಕೆಲ್ಯಾರ್ ಕವಿಂಚೆಂ ವಾಚಪ್ ಆನಿ ಸಂವೇದನ್‌ಯೀ ಬರೆಂಚ್ ಆಸ್ಲ್ಲೆಂ. ಜಾಯ್ ತರ್ ಕೊಂಕ್ಣಿ ಕವಿಂನಿ ಬರಯಿಲ್ಲ್ಯೊ ಮಟ್ವ್ಯೊ ಕಾಣಿಯೊ ಆನಿ ಕವಿ ನ್ಹಯ್ ಆಸ್‌ಲ್ಲ್ಯಾಂನಿ ಬರಯಿಲ್ಲ್ಯೊ ಕಾಣಿಯೊ ಎಕಾಮೆಕಾ ಸರ್ ಕೆಲ್ಯಾರ್ ಹೊ ಫರಕ್ ಕಳ್ತಾ. ಪುಣ್ ಆಜ್‌ಕಾಲ್ ಹ್ಯಾ ಉತಳ್ ಸಾಹಿತ್ಯಾಚೆಂ ವಾರೆಂ ಕವಿತಾ ಶೆತಾಕ್‌ಯೀ ಪಾವ್ಲಾಂ ಮ್ಹಳ್ಳೆಬರಿ ಭೊಗ್ತಾ. ಫಕತ್ ಪೋತ್ಸವ್, ಉರ್ಬಾ, ಹುಮೆದ್, ಬೆಜಾರ್ ಮ್ಹಳ್ಳ್ಯಾ ಸಬ್ದಾಪಾಟ್ಲ್ಯಾನ್ ಗೆಲ್ಯಾರ್ ಕೊಂಕ್ಣಿ ಕವಿತಾ ಶೆತಾಚಿ ವೀದ್‌ವಾವ್ಳಿ ಜಾಂವ್ಚಿ ಸೊಡ್ಯಾಂ, ಖುದ್ ಕವಿಕ್‌ಚ್ ವಾಡೊಂಕ್ ಸಾಧ್ ನಾ.
ಪುರ‍್ತೆಂ ಪಿಕ್ಚೆಪಯ್ಲೆಂಚ್ ವೆದಿ ಲಾಬೊನ್, ತಿಚ್ ವೆದಿ ಸರ್ಗ್ ಮ್ಹಣ್ ಚಿಂತ್ತಲ್ಯಾಂಚೊ ಆನ್ಯೇಕ್ ಸಮಸ್ಸೊ ಆಸಾ. ತಸಲ್ಯಾಂನಿ ಪತ್ರಾಂಕ್ ಕವಿತಾ ಬರೊವ್ನ್ ಧಾಡ್ಲ್ಯಾರ್ ಆನಿ ಸಂಪಾದಕಾನ್ ತಿ ಫಾಯ್ಸ್ ಕರುಂಕ್ ಫಾವೊ ನಾ, ಇಲ್ಲಿಶಿ ತಿದ್ವುನ್ ದೀ ಮ್ಹಳ್ಯಾರ್, ಆಮ್ಕಾಂ ಕೊಣೀ ಪ್ರೋತ್ಸವ್ ದೀನಾ ಮ್ಹಣ್ ಚಿಂತ್ಚೆಂ, ತುಮ್ಕಾಂ ಫಾಯ್ಸ್ ಕರುಂಕ್ ಜಾತಾಗೀ ನಾಂಗೀ ಸಾಂಗಾ, ವೆಬ್ ಪತ್ರಾಚೆ ತಯಾರ್ ಆಸಾತ್ ಫಾಯ್ಸ್ ಕರುಂಕ್ ಮ್ಹಣ್ ಸಾಂಗ್ಚೆಂ – ಅಸಲೆಂ ಪೂರಾಯ್ ಚಲ್ತಾ. ಜಾಯ್ತ್ಯಾಂಕ್ ಪುರ‍್ತಿ ಕವಿತಾ ಪಿಕ್ತಾಪರ್ಯಾಂತ್ ರಾಕೊಂಕ್ ಸಯ್ರಾಣ್ ನಾ ಮ್ಹಣ್ಚೆತಸಲಿ ಗತ್ ಜಾಲ್ಯಾ.
ಆತಾಂ ಆನ್ಯೇಕ್ ಗಜಾಲ್. – ಎಕಾ ಕವಿಗೋಶ್ಟಿ ಪಾಟ್ಲ್ಯಾನ್ ಕೊಣಾಕ್ ತರೀ ತೀಸ್ ಪಾಂತ್ತೀಸ್ ಹಜಾರ್ ರುಪಯ್ ಖರ್ಚ್ ಪಡ್ತಾ. ತರ್ ಇತ್ಲೆಂ ಖರ್ಚುನ್ ಪಾಟ್ಲ್ಯಾ ಎಕಾ ವರ್ಸಾಚ್ಯಾಕೀ ಚಡ್ ಆವ್ದೆಂತ್ ಪೊಯೆಟಿಕಾ ಪಂಗ್ಡಾನ್ ಕಿತೆಂ ಜೊಡ್ಲೆಂ? ಕೊಣಾಚೆಂಯ್ ಮಟ್ಟ್ ಸುಧ್ರಾಲೆಂ? ಕಾಂಯ್ ಫಾಲ್ಯಾಂಕ್ ಉರ‍್ಚೆತಸಲೆಂ ಸಾಹಿತ್ಯ್ ರಚನ್ ಜಾಲೆಂ? ತರ್ ಇತ್ಲೊ ಆಡಂಬರಾಚ್ಯೊ ಕವಿಗೋಶ್ಟಿ ಕರ್ನ್, ಕೊಂಕ್ಣಿ ಮೊಗಿಂಚೊ ದುಡು ಖರ್ಚುನ್ ಆನಿ ಇತ್ಲೆಂ ಜಾವ್ನ್‌ಯೀ ಲೊಕಾಕ್ ಕಾಂಟಾಳೊ ಹಾಡಯ್ತಾ ತರ್ ಹ್ಯಾ ಕವಿಗೋಶ್ಟಿಂಚೊ ಉದ್ದೇಶ್ ಕಿತೆಂ? ಧಾ ಕವಿತೆಂತ್ ಏಕ್ ದೋನ್ ಉತಳ್ ಆಸ್ತಾತ್‌ಚ್. ಪುಣ್ ವೀಸ್ ಕವಿತಾ ಉತಳ್ ಆಸೊನ್ ಫಕತ್ ದೋನ್ ಬರ‍್ಯೊ ಆಸ್ಚ್ಯೊ ತರ್ ತ್ಯೊ ದೋನ್ ಕವಿತಾ ಲಿಪೊನ್ ವೆತಾತ್ ಆನಿ ತಾಚೆಸವೆಂ ಅಸಲೆಂ ಕಸ್ತಳ್ ಚಾರ್ ಜಣಾಂಮುಕಾರ್ ವಾಚುಂಕ್ ತೀಸ್ ಹಜಾರ್ ಖರ್ಚ್ ಕರ‍್ಚಿ ಗರ್ಜ್ ಆಸಾ? ಆಮ್ಕಾಂ ಪತ್ರಾಂನಿ ಫಾಯ್ಸ್ ಕರುಂಕ್ ಯೋಗ್ಯ್ ಆಸ್ಚ್ಯೊ ದೋನ್ ವಿಂಚ್ಣಾರ್ ಕವಿತಾ ಸಯ್ತ್ ಮೆಳ್ಚ್ಯೆ ಸ್ಥಿತೆರ್ ನಾಂತ್.
ಕವಿತಾ ಬರಯ್ತಲ್ಯಾಂಕ್ ವಾಚಪ್‌ಯೀ ಭಾರಿಚ್ ಗರ್ಜೆಚೆಂ. ಆಮ್ಚೆ ಕವಿ ಕವಯಿತ್ರಿ ಕಿತ್ಲೆಂ ಹೆರ್ ಭಾಶೆಚ್ಯೊ ಕವಿತಾ ವಾಚ್ತಾತ್? ಕವಿತಾಚ್ ವಾಚಿಜೆ ಮ್ಹಣ್ ನಾ ಕವಿತೆಕ್ ಸಂಬಂದ್ ಜಾಲ್ಲೆ ಬೂಕ್ ವಾಚ್ತಾತ್? ಹಾಂವೆಂ ಥೊಡ್ಯಾಂಕ್ ಥೊಡೆ ಬೂಕ್ ಘೆಯಾತ್ ಆನಿ ವಾಚ್ಯಾತ್ ಮ್ಹಣ್ ಸಲಹಾ ದಿಲ್ಲಿ. ಥೊಡ್ಯಾಂನಿ ಬೂಕ್ ಘೆತ್ಲ್ಯಾತ್ ಪುಣ್ ವಾಚ್ಪಾಚೊ ಪರಿಣಾಮ್ ಬರ‍್ಪಾಂನಿ ದಿಸೊನ್ ಯೇಂವ್ಕ್ ನಾ. ಹಾಚೊ ಅರ್ಥ್ ಇತ್ಲೊಚ್ ಕೀ ಎಕ್‌ಚ್ ತಾಣಿಂ ವಾಚುಂಕ್ ನಾ ವಾಚ್ಲ್ಯಾರೀ ತಾಂಕಾಂ ತೆಮ ಕಾಳ್ಜಾಮನಾಕ್ ಪಾವೊಂಕ್ ನಾ. ಕಾವ್ಯೆಂ ಭೊಗಜೆ ಜಾಲ್ಯಾರೀ ವಾಚ್ತಲ್ಯಾಚ್ಯಾ ಭಿತರ್ ಇಲ್ಲೆಶೆಂ ತರೀ ಸಂವೇದನ್ ಆಸಜೆ. ಹೆಂ ಸಂವೇದನ್ ನಾತ್‌ಲ್ಲ್ಯಾಂಚಿ ಆಜ್ ಚಡ್ ಲಿಖ್ತೇ ಆಸಾತ್ ಮ್ಹಣ್ ಭೊಗ್ತಾ. ವ್ಹಡ್ ನಾ, ಲಿಖುಂದಿ ಪುಣ್ ಅಸಲೆಂ ಸಂವೇದನ್ ವಾಡೊಂವ್ಚೆದಿಶೆನ್ ವಾ ವಾಚ್ಪಾಕ್ ಪ್ರೋತ್ಸವ್ ದಿಂವ್ಚೆದಿಶೆನ್ ಕಾಂಯ್ ಪ್ರೇತನಾಂ ಚಲ್ತಾತ್? ಅಸಲ್ಯಾಕ್ ಬುನ್ಯಾದ್ ಘಾಲ್ಚಿಂ ವಾ ಮಾರ್ಗದರ್ಶನ್ ದಿಂವ್ಚಿಂ ಕೊಣೀ ಆಸಾತ್ ತ್ಯಾ ವರ್ತುಲಾಂತ್?
ಕವಿ ಜಾಲ್ಲ್ಯಾಂನಿ ಕವಿತಾ ಆನಿ ಕವಿತೆಕ್ ಸಂಬಂದ್ ಜಾಲ್ಲೆ ಬೂಕ್ ಮಾತ್ರ್ ವಾಚ್ಚೆ ನ್ಹಯ್, ತಾಂಕಾಂ ವೈಚಾರಿಕ್ ಆವಿ ವೈಜ್ನಾನಿಕ್ ವಾಚಪ್‌ಯೀ ಚಡ್ ಗರ್ಜೆಚೆಂ. ವಿಚಾರ್ ಉಂಚ್ಲೊ ಜಾಯ್ನಾಸ್ತಾನಾ ಉಂಚ್ಲಿ ಕವಿತಾ ಬಿಲ್ಕುಲ್ ಬರೊಂವ್ಕ್ ಜಾಯ್ನಾ. ಆನಿ ಹಾಚ್ಯಾಕೀ ವರ್ತ್ಯಾನ್ ಸಮಾಜೆಕ್ ಸ್ಪಂದನ್ ಕರ‍್ಚೆತಸಲೆಂ ಕಾಂಯ್ ಚಲ್ತಾ? ಹಾಚೆಥಾವ್ನ್ ಪೊಳಾಪೊಳ್ ಘೆಂವ್ಚಿಚ್ ಮ್ಹಾಕಾ ದಿಸೊನ್ ಯೆತಾ. ಆದ್ಲೆಪಾವ್ಟಿಂ ಆಮ್ಚ್ಯೆ ಕರಾವಳೆಂತ್‌ಚ್ ಪ್ರಸ್ತುತ್ ಸಮಾಜೆಚ್ಯಾ ಸಮಸ್ಸ್ಯಾಂಕ್ ಸ್ಪಂದನ್ ಜಾವ್ನ್ ವ್ಹಡ್ ರಾಶ್ಟ್ರೀಯ್ ಮಟ್ಟಾಚೆಂ ಕಾರ್ಯೆಂ ಆಸ್ಲ್ಲೆಂ. ಹಾಕಾ ವೆವೆಗ್ಳ್ಯಾ ರಾಜ್ಯಾಂಥಾವ್ನ್ ಚಿಂತ್ಪಿ ಪೂರಾಯ್ ಆಮ್ಚ್ಯಾ ಗಾಂವಾಕ್ ಆಯಿಲ್ಲೆ. ಸಂವೇದನ್‌ಶೀಳ್ ಮನಾಚ್ಯಾಂನಿ ವಾ ಶೀದಾ ಸಾಂಗ್ಚೆಂ ತರ್ ಸಮಾಜೆವಿಶಿಂ ಪಡೊನ್ ಗೆಲ್ಲ್ಯಾಂನಿ ಯೇಜೆಚ್ ಜಾಲ್ಲೆಂ ಕಾರ್ಯೆಂ ಹೆಂ. ಎದೆಂ ವ್ಹಡ್ ಕಾರ್ಯೆಂ ಜಾತಾನಾ ಪೊಯೆಟಿಕಾ ಕವಿ ಗಾಂವಾಂತ್ ನಾತ್ಲ್ಲೆ ಆನಿ ತೆ ಬೆಂಗ್ಳೂರ್ ಕವಿಗೋಶ್ಟಿಕ್ ಗೆಲ್ಲೆ. ಹಾಚ್ಯಾಕೀ ವರ್ತ್ಯಾನ್ ಅಸಲೆಂ ಏಕ್ ಕಾರ್ಯೆಂ ಆಮ್ಚ್ಯಾ ಗಾಂವಾಂತ್ ಆಸಾ ಮ್ಹಣ್ ಜಾಯ್ತ್ಯಾಂಕ್ ಖಬರ್‌ಚ್ ನಾತ್ಲಿ! ತರ್ ಪ್ರಸ್ತುತ್ ಸಮಾಜೆಕ್ ಕುರ್ಡಿಂ ಆನಿ ಭೆರಿಂ ಜಾವ್ನ್ ಲಿಖ್ತಲ್ಯಾಂಚೆಂ ಸಾಹಿತ್ಯ್ ಕಾಳಾಚ್ಯಾ ಕಚ್ರ್ಯಾಡಬ್ಬ್ಯಾಂತ್ ಕೋಯ್ರ್ ಮಾತ್ರ್ ಜಾಂವ್ಕ್ ಫಾವೊ.
ಆತಾಂ ತುಮಿ ವಿಚಾರುಂಕ್ ಪುರೊ – ಕವಿ ಜಾಲ್ಲ್ಯಾಂನಿ ಕವಿತಾ ವಾಚನ್ ನಾತ್‌ಲ್ಲ್ಯಾ, ಕವಿತೆವಿಶಿಂ ಕಾಂಯ್ ಶಿಕೊಂಕ್ ಮೆಳನಾತ್‌ಲ್ಲ್ಯಾ ಅಸಲ್ಯಾ ಕಾರ್ಯಾಕ್ರಮಾಕ್ ವೆಚಿ ಗರ್ಜ್ ಕಿತೆಂ? ಕವಿ ಜಾಲ್ಲ್ಯಾಂನಿ ದುಸ್ರ್ಯಾ ಭಾಶೆಂಚೆಂ ಸಾಹಿತ್ಯ್ ವಾಚಿಜೆಚ್ ಮ್ಹಳ್ಳಿ ರೂಲ್ ಆಸಾಗಿ? ವಿಚಾರ್ ಸಿದ್ಧಾಂತಾಂ ಮಾತ್ತಿ ಗೊಬೊರ್ ಪೂರಾ ಕವಿಂಕ್ ಕಿತ್ಯಾಕ್? ಎಕಾದಾವೆಳಾ ಅಸಲಿಂ ಸವಾಲಾಂ ಕೊಣಾಭಿತರ್ ಉದೆತಿತ್ ತರ್ ತಾಂಚಿಂ ಆನಿ ತಸಲ್ಯಾಂವ್ನ್ ಉದೆಲ್ಲ್ಯಾ ಕವಿತಾಂಚಿ ಆಮಿ ಬಿರ್ಮತ್ ಪಾವಜೆ. ಅಸಲ್ಯಾ ವಿಚಾರ್ ನಾತ್‌ಲ್ಲ್ಯಾಂನಿ ಕರ‍್ಚೆಂ ಕಿತೆಮ ಮ್ಹಳ್ಯಾರ್, ಝಳ್ಕಲ್ಲಿ ಏಕ್ ಕವಿತಾ ಪುರ‍್ತಿ ಪಿಕ್ಚೆಪಯ್ಲೆಂಚ್ ಬರೊವ್ನ್ ಧಾ ಜಣಾಂಕ್ ಧಾಡ್ಚಿ. ತಾಣೆಂ ಸಾಂಗ್ಲೆಂ ಮ್ಹಣ್ ತೆಂ ತಿದ್ವುಂಚೆಂ, ಹಾಣೆಂ ಸಾಂಗ್ಲೆಂ ಮ್ಹಣ್ ಹೆಂ ತಿದ್ವುಂಚೆಂ ಆನಿ ಕೊಣೆಂಯ್ ಎಕ್ಲ್ಯಾನ್ ವಾವ್ ಮ್ಹಣ್ ಫುಗಾರ‍್ತಾಪರ್ಯಾಂತ್ ಥಾಂಚೆಕಡೆ ತಾಂಚೆಕಡೆ ವಿಚಾರ‍್ನ್‌ಚ್, ತಿದ್ವುನ್‌ಚ್ ರಾಂವ್ಚೆಂ. ಖುದ್ ಎಕ್ಲ್ಯಾಭಿತರ್ ಅಸಲಿ ಏಕ್ ವಿಮಾರ್ಶಾತ್ಮಕ್ ನದರ್ ನಾತ್ಲ್ಯಾರ್ ಅಸಲಿಂ ಅನಾಹುತಾಂ ಘಡ್ತಾತ್.
ಭಾಸ್ ಆಸ್ಚ್ಯಾ ಎಕಾ ಮನ್ಶಾಲಾಗಿಂ ಏಕ್ ರಾಸ್ ಉತ್ರಾಂ ಆಸ್ತಿತ್. ಪುಣ್ ತಿಂ ಉತ್ರಾಂ ಮೆಳೊನ್ ಏಕ್ ಅರ್ಥಾಭರಿತ್ ವೋಳ್ ಜಾಯ್ ತರ್ ಭಾಶೆಚೆಂ ವ್ಯಾಕರಣ್ ಕಳಿತ್ ಆಸಜೆ. ಆನಿ ವ್ಯಾಕರಣ್ ಬದ್ದ್ ಜಾವ್ನ್ ಬರಯಿಲ್ಲ್ಯೊ ವೊಳಿ ಪೂರಾಯ್ ಕವಿತಾ ಜಾತಾತ್? ನಾ, ಕವಿತಾ ಜಾಯ್ಜೆ ತರ್ ತಾಂತುಂ ಸಂವೇದನಾಂ ಆಸಜೆ. ತರ್ ಸಂವೇದನಾಂ ಆಸ್‌ಲ್ಲ್ಯೊ ಕವಿತಾ ಪೂರಾಯ್ ಉಂಚ್ಲ್ಯೊ ಜಾತಾತ್? ತೆಂಯ್ ನಾ.. ತಿಂ ಸಂವೇದನಾಂ ಜಿವಾತರ್ಫೆಚಿಂ ಆಸಜೆ, ಅನ್ನ್ಯಾಯಾಕ್ ಸವಾಲ್ ಉಟೊಂವ್ಚೆತಸಲಿಂ ಆಸಜೆ, ಪ್ರಸ್ತುತ್ ಕಾಳಾಕ್ ಸ್ಪಂದನ್ ಜಾಲ್ಲಿಂ ಆಸಜೆ. ಹೆಂ ಪೂರಾಯ್ ಉಗ್ತ್ಯಾ ದೊಳ್ಯಾಂನಿ ಸಮಾಜ್ ಪಾರ್ಕಿಲ್ಲೆತವಳ್ ಮಾತ್ರ್ ಕಳ್ತಾ. ಹಾಕಾ ಆಮ್ಚೆಂ ವಾಚಪ್, ಸಮಾಜ್ ಪಾರ್ಕುಂಚಿ ಚಿಕಿತ್ಸಕ್ ದೀಶ್ಟ್ ಗರ್ಜೆಚಿ. ಎಕಾ ಕವಿಕ್ ಅಸಲಿ ದೀಶ್ಟ್ ಆನಿ ವಿಚಾರ್ ಗರ್ಜ್. ಗೌರಿ ಲಂಕೇಶ್, ದಾಬೋಲ್ಕರ್, ಕಲ್ಬುರ್ಗಿ ಹಾಂಚ್ಯೊ ಖುನಿಯೊ ಜಾಲ್ಯೊ… ಫಕತ್ ಸಂವೇದನ್ ಆಸ್‌ಲ್ಲ್ಯಾ ಕೊಣೆಂಯ್ ಎಕೆ ಖುನಿಯೆಕ್ ವಿರೋಧ್ ಕರುನ್ ಕವಿತಾ ಲಿಖ್ಯೆತ್. ಪುಣ್ ಜೆನ್ನಾ ಕೊಣೆಂ ಗೌರಿಲಂಕೇಶ್, ದಾಬೋಲ್ಕರ್, ಕಲ್ಬುರ್ಗಿಕ್ ವಾಚ್ಲಾಂ ಆನಿ ಕಿತ್ಯಾಖಾತಿರ್ ತಾಂಚಿ ಖುನ್ ಜಾಲಿ, ಹಾಚೆಪಾಟ್ಲೆಂ ಸಿದ್ಧಾಂತ್ ಖಂಯ್ಚೆಂ – ಹೆಂ ಪೂರಾಯ್ ಪಾರ್ಕುಂಚಿ ಸಕತ್ ಆಸ್‌ಲ್ಲ್ಯಾನ್ ಲಿಖ್ಚ್ಯೆ ಕವಿತೆಕ್ ಚಡ್ ಆಯಾಮ್ ಆಸ್ತಾತ್. ಏಕ್ ಸಾದೊ ದಾಖ್ಲೊ ದಿಂವ್ಚೊ ತರ್ – ವಾಲಿಕ್ ವಯ್ರ್ ಚಡಜೆ ತರ್ ಧಾಂಕ್ ಜಾಯ್. ತೆಂ ಧಾಂಕ್ ಉಗ್ತ್ಯಾನ್ ಭಾಯ್ರ್ ದಿಸನಾ ಜಾಂವ್ಕ್ ಪುರೊ ಪುಣ್ ವಾಲಿಕ್ ಬಳ್ ದಿಂವ್ಚೆಂ ಧಾಂಕಾನ್. ಧಾಂಕ್ ನಾ ತರ್ ವಾಲ್ ದಿಕ್ಕ್-ದಿಶಾ ನಾಸ್ತಾಂ ಧರ‍್ಣಿರ್ ಚರೊನ್ ಕೊಣಾಕೊಣಾಚ್ಯಾ ಪಾಂಯಾಂಪಂದಾ ಪಡ್ತಾ ಶಿವಾಯ್ ವಯ್ರ್ ಚಡನಾ.. ಹಿಚ್ ಗಜಾಲ್ ವಿಚಾರ್ ಆನಿ ಕವಿತ್ವಾಕ್ ಲಾಗು ಕೆಲ್ಯಾರ್ ಪಾವ್ತಾ. ಕವಿತ್ವಾಕ್ ಘಟಾಯ್ ದಿಂವ್ಚಿ ಆನಿ ಊಂಚ್ ಉಬಾರ‍್ಚೆಂ ವಿಚಾರಾನ್.
ಕವಿತಾವಿಶಿಂ ಉಲಯ್ತಾನಾ ಪೊಯೆಟಿಕಾ ಯೆಜ್ಮಾನ್ಯಾಂನಿ ಚಡ್ತಾವ್ ಉಚಾರ‍್ಚೆ ದೋನ್ ಸಬ್ದ್ ಮ್ಹಳ್ಯಾರ್ – ವೆಕ್ತ್ ಆನಿ ಅವೆಕ್ತ್. ಹ್ಯಾ ದೊನೀ ಉತ್ರಾಂಕ್ ಬೊವ್ ವ್ಹಡ್ ವಿಸ್ತಾರಾಯ್ ಆಸಾ. ಪುಣ್ ಥೊಡ್ಯಾಂನಿ ಬೊವ್ ಅಶೀರ್ ಮಟ್ಟಾರ್ ಹ್ಯಾ ಉತ್ರಾಂಚೊ ಅರ್ಥ್ ಬಾಂದುನ್ ಘಾಲಾ. ತಾಂಚೆಪ್ರಕಾರ್ ವೆಕ್ತ್ ಮ್ಹಳ್ಯಾರ್ ಕವಿತೆಂತ್ ವರ್ಣಿಲ್ಲಿ ವಸ್ತ್, ಅವೆಕ್ತ್ ಮ್ಹಳ್ಯಾರ್ ಲಿಪಯಿಲ್ಲಿ ವಸ್ತ್ ಇತ್ಲೆಂಚ್. ದಾಖ್ಲ್ಯಾಕ್ ಹಾಂವ್ ಮತಿಂತ್ ಪೆನ್ನಾವಿಶ್ಯಾಂತ್ ಲಿಖುಂಕ್ ಚಿಂತ್ತಾಂ. ಪುಣ್ ಪೆನ್ನ್ ವಸ್ತ್ ಲಿಪೊವ್ನ್ ತಾಕಾ ಸರ್ ಕರುನ್ ಮ್ಹಜೆಂ ಬೋಟ್ ಮ್ಹಳ್ಳಿ ಕವಿತಾ ಲಿಖ್ತಾಂ. ಮ್ಹಜ್ಯಾ ಬೊಟಾಕ್ ಏಕ್ ನಾಕ್ಶಿ ಆಸಾ.. ಪೆನ್ನಾಚೆಂ ನಿಬ್ಬ್ ನಾಕ್ಶೆಕ್ ಸರ್ ಕರುನ್ ಏಕ್ ಕವಿತಾ ರಚ್ತಾಂ ಆನಿ ವಿಚಾರ‍್ತಾಂ – ಹ್ಯೆ ಕವಿತೆಂತ್ಲ್ಯೆ ವೆಕ್ತ್ ಮ್ಹಜೆಂ ಬೋಟ್. ತರ್ ಅವೆಕ್ತ್ ಕಿತೆಂ? ಅವೆಕ್ತ್ ಪೆನ್ನ್ ಮ್ಹಣ್ ಕೊಣೀ ಜಾಪ್ ದಿತಾ! ಪಯ್ಲೆಂಚ್ ಮತಿಂತ್ equation ಘಾಲ್ಚೆಂ ಕೀ ಪೆನ್ is equal to ಬೋಟ್ ಮ್ಹಣ್ ಆನಿ ತ್ಯಾ ಪ್ರಕಾರ್ ಲಿಖ್ಚೆಂ. ಹೆಂ ಎಕೆ ರಿತಿಚೆಂ puzzle ಜಾತಾ ಶಿವಾಂಯ್ ಕವಿತಾ ನ್ಹಯ್. ಫಕತ್ technical ಆನಿ mathematical ಪಾಟ್‌ಥಳಾರ್ ಹಾಂಗಾಸರ್ ವೆಕ್ತ್ ಆನಿ ಅವೆಕ್ತ್ ಅಡ್ಚತೇ ಆಸಾ. ಕವಿತಾ ಮ್ಹಳ್ಯಾರ್ ಅಶೆಂ calculations ಘಾಲುನ್, ಮಾಂಡ್ಡೊ ಖೊರ್ಪುನ್ ಬಸೊನ್ ತಿದ್ವುನ್ ತಿದ್ವುನ್ ತಕ್ಲಿ ವಿರಾರ್ ಕರ್ನ್ ಬಳಾತ್ಕಾರಾನ್ ಲಿಖುಂಕ್ ಗೆಲ್ಯಾರ್ ಉದೆನಾಂತ್. ಹಾಂತುಂ ಆಮ್ಚ್ಯೆ ಸುಪ್ತ್ ಮತಿಚೊಯ್ ವಾವ್ರ್ ಆಸ್ತಾ.
ಇತ್ಲೆಂ ಸಾಂಗೊನ್ ಬರೀ ಕವಿತಾ ಕಶಿ ಆಸಜೆ ಮ್ಹಣ್ ಕೊಣೀ ಮ್ಹಜೆಕಡೆ ವಿಚಾರ‍್ಲ್ಯಾರ್ ಅಶಿಚ್ ಆಸಜೆ ಮ್ಹಣ್ ದಾಕೊಂವ್ಚಿ ರೆಡಿಮೇಡ್ ಜಾಪ್ ನಾ. ಥೊಡ್ಯಾ ಕವಿತೆಂಕ್ ಕವಿಂಕ್ ರಚ್ಚಿ ಸಕತ್ ಆಸ್ತಾ. ಪುಣ್ ತಸಲ್ಯಾ ಕವಿತೆಂಕ್ ಕವಿ ಜಾಂವ್ಚ್ಯಾ ಖಿಣಾಕ್ ಆಮಿ ರಾಕೊನ್ ರಾವಜೆ ಪಡ್ತಾ. ಹಿ ಘಡಿ ಫಕತ್ ಚಿಂತುನ್ ಬಸ್ಲ್ಯಾರ್ ಯೇನಾ. ತೆಂ ಸುಪ್ತ್ ಮತಿಥಾವ್ನ್ ಎಕಾಚ್ಚಾಣೆಂ ದಿಸ್ಚೆಂ ಕಿಟಾಳ್. ಪುಣ್ ಅಸಲಿಂ ಕಿಟಾಳಾಂ ಪೆಟೊಂಕ್ ಆಮಿ ಜಾಯ್ತೊ ಉಜೊ ಸೊಶಿಜೆ. ಅಪ್ರೂಪ್ ಪುಣೀ ಖೊಲಿಯೊ ರಾಸ್ ಘಾಲುನ್ ಉಜೊ ದೀಜೆಚ್ ಪಡ್ತಾ. ಆಮಿ ಖೊಲಿಯಾಂಚೆರ್ ಬಿರ್ಮತ್ ಪಾವೊನ್ ಉಜೊ ನಾಕಾ ಮ್ಹಣ್ ಬಸ್ಲ್ಯಾರ್ ಕಿಟಾಳಾಂಯ್ ದಿಸನಾಂತ್ ಆನಿ ಉಜ್ವಾಡ್‌ಯೀ ಫಾಂಕನಾ. ಲೊಕಾಕ್ ಜಮೊವ್ನ್, ಹಜಾರಾಂಗಾಟ್ಲ್ಯಾನ್ ಖರ್ಚ್ ಕರೊವ್ನ್ ಕವಿಗೋಶ್ಟಿ ಮಾಡುನ್ ಹಾಡ್ತಲ್ಯಾಂನಿ ಇತ್ಲೆಂ ಸಮ್ಜಲ್ಯಾರ್ ಬೊವ್ ಬರೆಂ ಕೀ – ಅಶೆಂಚ್ ಮುಕಾರುನ್ ಗೆಲ್ಯಾರ್ ಆನಿ ಥೊಡೊ ತೇಂಪ್ ಕವಿಗೋಶ್ಟಿ ಚಲ್ತಿತ್; ಏಕ್ ಪಾವ್ಟಿಂ ಹಾಜರ್ ಜಾವ್ನ್ ಕಾಂಟಾಳೋ ಆಯಿಲ್ಲ್ಯಾಂನಿ ಚಾರ್ ಜಣಾಂಕಡೆ ಸಾಂಗೊನ್ ಸಗ್ಳ್ಯಾಂನಿ ಖಬರ್ ಪಾಚಾರ‍್ಲ್ಯಾರ್ ಮಾಗಿರ್ ತೀಸ್-ಪಾಂತ್ತೀಸ್ ಹಜಾರ್ ಸೊಡ್ಯಾಂ, ಏಕ್ ಲಾಖ್ ಖರ್ಚುನ್ ಕಾರ್ಯೆಂ ಕೆಲ್ಯಾರೀ ಎಕ್ಲೊ ಮನಿಸ್‌ಯೀ ಲಾಗಿಂ ಯೆಂವ್ಚೊನಾ.
ಹ್ಯಾ ಬರ‍್ಪಾಚೊ ಉದ್ದೇಶ್ ಖಂಯ್ಚ್ಯಾಯ್ ಕವಿತಾ ಗ್ರೂಪಾಕ್ ಅಕ್ಮಾನ್ ಕರ್ಚೊ, ಹುಮೆದಿಕ್ ಶೆಳೆಂ ವೊತ್ಚೊ, ಕೊಣಾಚೆಂಯ್ ಮನ್ ದುಕೊಂವ್ಚೊ ಬಿಲ್ಕುಲ್ ನ್ಹಯ್, ಬಗಾರ್ ಕವಿಗೋಶ್ಟಿಚ್ಯಾ ನಾಂವಾನ್ ಜಾಂವ್ಚಿ ವೀದ್‌ವಾವ್ಳಿ ಆಡಾಯ್ಜೆ ಆನಿ ಕವಿತಾಶೆತಾಚೆಂ ಮಟ್ಟ್ ಚಡೊಂವ್ಚೆದಿಶೆನ್ ಚಿಂತಪ್ ಆಟಯ್ಜೆ ಮ್ಹಳ್ಳ್ಯಾ ಇರಾದ್ಯಾನ್ ಇತ್ಲೆಂ ಲಿಖಿಜೆ ಪಡ್ಲೆಂ.
► ವಿಲ್ಸನ್ ಕಟೀಲ್
10 comments
ಕನ್ನಡಾಂತ್ಲಿ ಕವಿತಾ “ಅಪ್ಪ ಯಾಕೋ ಹಿಂದುಳಿದು ಬಿಟ್ಟ” ವಾಟ್ಸ್ಯಾಪಾಂತ್ ವ್ಹಾಳೊನ್ ಯೇವ್ನ್ ಮಹಿನೆಂಚ್ಚ್ ಜಾಲೆ. ಖಂಚೆಯೀ ವೈರಲ್ ಜಾಲ್ಲೆಂ ಪೋಸ್ಟ್ ಬಹುಮಾನಾಕ್ ವಿಂಚುನ್ ಕಾಡ್ಲೆಲ್ಯಾಂಚ ಗುಮಾನಾಕ್ ಯೇವ್ನಾ ತರ್ ಭಾರೀ ಖಂತಿಚಿ ಗಜಾಲ್. ಲೇಖನಾಂ ಚೊರಿ ಕರ್ಚೆ ಸಬಾರ್ ಮೊನಿಸ್ ಆಸಾತ್. ಕಶೆಂ ಪುಣಿ ನಾಂವ್ ಆಯ್ಲ್ಯಾರ್ ಪುರೊ. ಚೊರಿ ಕರ್ತಾನಾಂಯೀ ತಿಕ್ಕೆ ಬುದ್ವೊಂತ್ ಕಾಯ್ ದಾಖೈತಾತ್. ಹೆಂ ಹಗಲು ದರೋಡೆ. ಹಾಕಾಯೀ ಪೊಯ್ಲೆಂ ಇನಾಮ್ ಮೆಳ್ಳಾಂ ಮುಣ್ತಾನಾ ಕೊಂಕ್ಣೆ ಸಾಹಿತ್ಯಾಕ್ ಇತ್ಲಿ ದುಬ್ಲಿಕಾಯ್ ಆಯ್ಲ್ಯಾಗೀ ಬೊಗ್ಚೆಂ ವಾಜ್ಬಿ ಜಾವ್ನಾಸಾ
Very well said Wilson. Translating quotes and poems from other languages without mentioning the author’s name is not less than a crime. Few months ago, I took courage to inform self-praised young Konkani poet that he translated English quotes into Konkani with proof and author’s name. But he didn’t have courtesy to stop, correct or even acknowledge. Translation of four lines is easy but to understand and do justice to its meaning as in the original language is a Herculean task. When we let them know personally they just ignore. Society always doesn’t take what these puke, that too in this era of digitalisation.
Amchea konknni sahityant dusrea bhasam thaun chori zaunchi gozal novi noi. Adim thaun zaun ailea.Haka karonn ami her bhasanchem sahity vachunk vochananv. bhov thode sahiteachi ruch aslele vachtat. Atam smart phonam vorvim vividh bhas vachunk, video polleun zata Ani chori zalli kollta. Xikpi monxeannim oxem korchem sarkem noi. Sorv sampodak chori parkunk sokonant.
ನವೀನ್ ಸರ್…..
ತುಮಿಂಚ್ ಸಾಂಗ್ತಾತ್ ಸ್ಮಾರ್ಟ್ ಫೊನಾಂ ವರ್ವಿಂ ವಿವಿಧ್ ಭಾಸ್ ವಾಚುಂಕ್ , ವಿಡಿಯೊ ಪಳೆವ್ನ್ ಜಾತಾ ಆನಿ ಚೊರಿ ಜಾಲ್ಲಿ ಕಳ್ತಾ ಮುಣೊನ್ ಆನಿ ಮುಕಾರಿಂ ಸಾಂಗ್ತಾತ್ ಸರ್ವ್ ಸಂಪಾದಕ್ ಚೊರಿ ಪಾರ್ಕುಂಕ್ ಸಕಾನಾಂತ್.ಹಾಂವ್ ಆತಾಂ ಕಿತೆಂ ಸಮ್ಜೊಂ ???? ಹ್ಯಾ ಸಂಪಾದಕಾಲಾಗಿಂ ಸ್ಮಾರ್ಟ್ ಫೊನ್ ನಾ ????? ಹಾಂಗಾ ಪಾರ್ಕುಂಚ್ಯಾ ತಸಲೆಂ ಕಾಂಯಿಚ್ ನಾ ಕಿತ್ಯಾಕ್ ಮುಳ್ಳ್ಯಾರ್ This is a Open Hijack….
Timely reminder for those copy others poems and stories. This must be stopped.
Secondly as you said I have watched many episodes of Poetica Kavi Gostis through the links I get. It’s very sad that just for name sake some people write n recite on stage without any head and tail. I don’t know how the audience is taking this n listen patiently.
Some members say that since audiance don’t understand deep meaning of poetry, only simple n funny poems are encouraged. Just imagine the state of our poetry and so called poets. Just because some organizations wants to organize kavi gosti it’s not advisable in my opinion just go and recite any bullshit.
It is time that this exercise must be stopped for the sake of good poetry.
ಏಕ್ ಕಾಳ್ ಆಸ್ಲೊ. ಅಮರ್ ಚಾ. ಫ್ರಾ ಸಂಗಿಂ ‘ಜಾಗೆಕವಿ’ ಹಾ್ತುಂ ವಾಂಟೆಲಿ ಜಾಲ್ಲೊ. ಮೆಲ್ವಿನ್ ಲದ್ರಿಗ್, ತಶೆಂ ಸರ್ವ್ ನವ್ಯಾ ಕವಿಂಕ್ ವೇದಿ. ಕಾಂಯ್ ಇಲ್ಲಿ ಸಲಹಾ.
ಹಾಂವ್ ಕವಿ ನ್ಹಯ್. ಹಾಂವ್ ಮಟ್ವಿ ಕಾಣಿ ಆನಿ ವಿನೋದಾಂತ್ ಸಂತೊಸ್ ಪಾಂವ್ಚೊ. ಜೆನ್ನಾಂ ಮೆ. ರೊ. ಮೆಳ್ಳೊ ತಾಣೆಂ ಕವಿತೆಕ್ ಪಿಳ್ಳೊ. ತಶೆಂ ‘ಪಯ್ಸ್ ರಾವೊನ್ ಪಳೆನಾಕಾ’ ‘ ಹಿಂ ಲ್ಹಾರಾಂ ಮ್ಹಜ್ಯಾ ಮೊಗಾಚಿಂ’ ಉದೆಲ್ಲಿಂ.
ಫಕತ್ತ್ ಮಾರಿ ಬಿಸ್ಕಿಟ್ ಆನಿ ಪೊಟ್ಟು ‘ಚಾ’ ಸಂಗಿಂ … ರುಚಿಕ್.. ಪುಣ್ ಆಮಿ ಚ್ಹಾ ಮ್ಹಣ್ತಾನಾ ವೆಚಿಕ್. ಕಾಂಯ್ ಖರ್ಚಾಕ್ ದೀಂವ್ಕ್ ನಾ. ಪುಣ್ ಆಶಾ ಆಸ್ಲಿ ಅನ್ಯೇಕ್ ಪಾವ್ಟಿಂ ಯೆಂವ್ಕ್ ಆಸಾ ನೆಂ.
ಅಸ್ಲಿ ಉಮೆದ್ ಕವಿಗೋಷ್ಟಿಂತ್ ಉದೆವ್ನ್ ಯೇಂವ್. ಹಿ ಮ್ಹಜಿ ಆಶಾ
ವೈಜ್ಞಾನಿಕತಾ ಇತ್ಲಿ ಮುಕಾರ್ ಪಾವ್ಲ್ಯಾ ಆನಿ ಕಿತೆಂಯ್ ಕೆಲ್ಯಾರೀ ಘಡ್ಯೇನ್ ತೆ ಪಾವ್ತಾ ಮುಣೊನ್ ಕಳಿತ್ ಆಸೊನೀ ಆಸಲಿಂ ಘಡಿತಾಂ ಘಡ್ತಾತ್ ತೆಂ ಖಂಡಿತ್ ಜಾವ್ನ್ ಕೊಂಕ್ಣಿ ಸಾಹಿತ್ಯ್ ಸಂಸಾರಾಕ್ ನಾಲಿಸಾಯೆಚೆಂ . ಆದಿಂ ಆಶೆಂ ಸಾಮಾಜಿಕ್ ಜಾಳಿ ಜಾಗೆ ನಾತ್ಲ್ಲೆ ಆನಿ ಹಾಚೊ ಫಾಯ್ದೊ ಉಟೊವ್ನ್ ಥೊಡ್ಯಾ ತರೀ ಆಮ್ಚ್ಯಾ ವಿದ್ಯಾವಂತ್ ಬರೊವ್ಪ್ಯಾಂನಿ ಹೆರ್ ಭಾಶೆಚೆಂ ಸಾಹಿತ್ಯ್ ಚೊರುನ್ ಆಪ್ಣಾಚೆಂಚ್ ಸಾಹಿತ್ಯ್ ಮುಣೊನ್ ಪೊದೊರ್ನ್‍ಪಣ್ ಘೆತ್‍ಲ್ಲೆ ದಾಖ್ಲೆ ಆಸಾತ್.ಪುಣ್ ಆತಾಂಚ್ಯಾ ಹ್ಯಾ ಕಾಳಾರ್ ಕವಿ/ಲೇಖಕಾಂನಿ ಜಾಯ್ತಿ ಜಾಗ್ರುತ್ ಘೆಜೆ ಪಡ್ತಾ.ಎಚ್ಚೆಮ್ ತುವೆಂ ಸಾಂಗ್‍ಲ್ಲ್ಯಾ ಪರಿ ದೋನ್ ಚಾರ್ ಉತ್ರಾಂ ಆಪ್ಲಿಂ ಘಾಲುನ್ , ಆಸಾ ತಶೆಂ ಬೊರಯ್ಲ್ಯಾರ್ ತಿ ಆಪ್ಲಿ ಕವಿತಾ ಜಾಯ್ನಾ.ಪಯ್ಲೆಂ ಹ್ಯಾಚ್ಚ್ ಕವಿತೆಚೊ ಹಿಂದಿ ತರ್ಜುಮೊ ಲಗ್ಭಗ್ ದೋನ್ ವರ್ಸಾಂ ಪಯ್ಲೆಂ ಪಾಯ್ಸ್ ಜಾಲ್ಲೊ.ಹಾಂತುಂ ತಿ ಕವಿತಾ ತರ್ಜುಮೊ ಕರುನ್ ತಾಚೆಂ ಮೂಳ್ ತೆಲುಗು ಆನಿ ತಾಚೊ ಕವಿ ಕೋಣ್ ಮುಣೊನ್ ಆಪ್ಣಾಕ್ ಕಳಿತ್ ನಾ ಮುಣೊನ್ ಉಗ್ತ್ಯಾನ್ ಸಾಂಗ್ಚಿ ಸೌಜನ್ಯತಾ ದಾಕಯ್ಲ್ಯಾ.ಆಮ್ಚ್ಯಾ ಕೊಂಕ್ಣಿ ಸಾಹಿತ್ಯಾಚೆಂ ದುರಾದ್ರಷ್ಟ್ ಮುಳ್ಳ್ಯಾರ್ ಚಡ್ತಾವ್ ಆಸಲಿಂ ಘಡಿತಾಂ ಉಜ್ವಾಡಾಕ್ ಹಾಡ್ಲ್ಯಾರ್ “ತೆ ಮೊಸ್ರಿ” “ಖೊಡಿ ಕಾಡ್ಚ್ಯೊಚ್ ಆಮ್ಚೊ ಉದ್ದೇಶ್” ಆಶೆಂ ಹಾತ್ ಧುವ್ನ್ ಘೆತಾತ್.
ಆಮ್ಚೆ ಮದೆಂ ಜಾಯ್ತೆ ವಿಷಯ್ ಆಸಾತ್ ಬೊರ‍್ಯಾಂತ್ಲ್ಯೊ ಬೊರ‍್ಯೊ ಕವಿತಾ ರಚುಂಕ್.ಚೊರಿ ಕರಿಜೆ ಮುಣೊನ್ ಕಿತೆಂಚ್ ಗರ್ಜ್ ನಾ.ಸಂಖ್ಯಾಂನಿ ಕವಿತಾ ತುಕ್ಚ್ಯೊ ನಾಕಾ ಬಗಾರ್ ಕವಿತಾಚ್ಯಾ ಉಂಚಿಪಣ್ ಆನಿ ಜಡಾಯೆಂತ್ ಪಾರ್ಕಿಯೆತ್.ಆಪ್ಣೆ ಹಜಾರಾಂಚ್ಯಾಕಿ ಚಡ್ತಿಕ್ ಕವಿತಾಂ ಲಿಖ್ಲ್ಯಾಂತ್ ಮುಣೊನ್ ಸಾಂಗೊನ್ ಭಂವ್ಚ್ಯಾಕಿ ತ್ಯಾ ಹಜಾರ್ ಕವಿತಾಂನಿ ಆಪ್ಣೆ ಕಿತೆಂ ದಿಲೆಂ ಮುಣೊನ್ ಸ್ವ-ವಿಮರ್ಸೊ ಕರ್ಚೊ ಘರ್ಜ್ ಆಸಾ.ಕಿತ್ಯಾಕ್ ಮುಳ್ಳ್ಯಾರ್ ಆಶೆಂ ಕವಿತಾ ಲಿಖ್‍ಲ್ಲ್ಯಾಂಚ್ಯೊ ಕವಿತಾ ವಾಚ್ತಾನಾ ಜಾಯ್ತ್ಯೊ ವ್ಹೊಳಿ ವಿಲ್ಫಿ ರೆಬಿಂಬಸ್ ಆನಿ ಹೆರ್ ಸಂಗೀತ್ ಘಡ್ಣಾರಾಂಚ್ಯಾ ಪದಾಂ ಥಾವ್ನ್ ಚೊರ್‌ಲ್ಲೆಂ ಸಯ್ತ್ ಉಜ್ವಾಡಾಕ್ ಆಯ್ಲಾಂ.
ಹಾಂಗಾ ಮ್ಹಾಕಾ ಕವಿಚ್ಯಾನಿ ಚಡ್ ಸ್ಪರ್ದ್ಯಾಚೆ ವರಯ್ಣಾರ್ ಆನಿ ಸಂಪಾದಕ್ ಹಾಂಚೆ ಜವಾಬ್ದಾರೆ ಥಂಯ್ ದುಭಾವ್ ಖಂಡಿತ್ ಆಸಾ.ಖಂಚ್ಯಾ ಆರ್ಥನ್ ಸಂಪಾದಕಾನ್ “ಕವಿತಾ ಬೊರ‍್ಯೊ ಆಸೊನ್ ಗುಂಡಾಯೆಚೆಂ ರಚನ್ ದಿಸೊನ್ ಯೆತಾ” ಮುಳ್ಳೆಂ ಫೈಸಲ್ ದಿಲಾಂ ತೆಂ ಕಳಾನಾ.ಕಾಂಯ್ ಕೊಂಕ್ಣೆಂತ್ ಬರೊವ್ಪಿ ಉಣೆ ಜಾಲ್ಯಾತ್ , ಬೊರಯ್ತೆಲ್ಯಾಂಕ್ ಉತ್ತೇಜನ್ ದಿವ್ಯಾಂ ಮುಳ್ಳ್ಯಾ ಉದ್ಡೇಶಾನ್‍ಗಾಯ್ ??????? ಪುಣ್ ಹಾಂಗಾ ಸಂಪಾದಕ್ ಮುಳ್ಳ್ಯಾ ಜವಾಬ್ದಾರೆಚ್ಯಾ ಹುದ್ದ್ಯಾರ್ ಆಸೊನ್ ಪಾಟ್ಲ್ಯಾ ಲಗ್ಭಗ್ 3 ದಶಕಾಂ ಥಾವ್ನ್ ಕೊಂಕ್ಣಿ ಸಾಹಿತ್ಯಾಚ್ಯಾ ಸುತ್ತುರಾಂತ್ ಆಸೊನ್ ಘೆಂವ್ಚೆ ಆಸ್ಲೆ ನಿರ್ಧಾರ್ ಖಂಡಿತ್ ಜಾವ್ನ್ ಜಾಯ್ತಿ ವಾಡವಾಳ್ ಜಾಂವ್ಕ್ ಆಸ್ಚ್ಯಾ ಕೊಂಕ್ಣಿ ಸಾಹಿತ್ಯ್ ಸಂಸಾರಾಕ್ ಭೊವ್‍ಚ್ ಮಾರೆಕಾರ್ ಮಾತ್ರ್ ನ್ಹಂಯ್ ಆಸ್ತಾಂ ವಾಡೊನ್ ಯೆಂವ್ಚ್ಯಾ ಕವಿಚೆಂ ಭವಿಶ್ಯ್‍ಚ್ ಆಸಲ್ಯಾ ನಿರ್ಧಾರಾಂ ವರ್ವಿಂ ಪಾಡ್ ಜಾಂವ್ಚಿ ಸಾಧ್ಯತಾ ಆಸ್ತಾ.
ಕೊಂಕ್ಣಿ ಸಾಹಿತ್ಯಾಚ್ಯಾ ಬೊರ್‍ಯಾ ಭವಿಶ್ಯಾಚ್ಯಾ ದ್ರಶ್ಟೆನ್ ವ್ಹಯ್ಲಿಂ ಘಡಿತಾಂ ಪರ್ತುನ್ ಘಡಾನಾತ್‍ಲ್ಲ್ಯಾ ಬರಿ ಜಾಗ್ರುತ್ಕಾಯ್ ಘೆಂವ್ಚಿ ಚಡ್ ಗರ್ಜೆಚಿ.
ಪೊಯೇಟಿಕಾ ಕೊಂಕ್ಣಿ ಕವಿತಾ ಶೆತಾಕ್ ಮಾರಕ್
ಮಾರ್ಚ್ ಮಹಿನ್ಯಾಚೊ “ಆರ್ಸೊ” ಹಾತಿಂ ಪಾವ್ಲೊ. ವೈವಿಧ್ಯ್, ಮಾಹೆತ್ಪೂರ್ಣ್ ಆನಿ ಪ್ರಭುದ್ದ್ ಬರ್ಪಾಂ ವಾಚುನ್ ತೃಪ್ತಿ ಜಾಲಿ. ವಿಲ್ಸನ್ ಕಟೀಲ್ ಹಾಂಚೆಂ ಸಂಪಾದಕೀಯ್ ವಾಚುನ್ ವಿಸ್ಮೀತ್ ಪಾವ್ಲೊಂ. ಸಾಹಿತ್ಯಾಚ್ಯಾ ನಾಂವಾನ್ ಹ್ಯಾ ಪಯ್ಲೆಂಯೀ ವ್ಯಾಪಾರೀಕರಣ್ ಜಾಲಾಂ ಆನಿ ಅತಾಂಯೀ ಫಾಯ್ದೊ ಜೊಡುಂಕ್, ನಾಂವ್ ಜೊಡುಂಕ್ ಆನಿ ಅಪುಣ್ ಕೊಂಕ್ಣೆಚೊ ರಾಕಣ್ ಭಡ್ವೊ ಮುಣ್ ಪೆಂಕಾಡ್ ಬಾಂದ್ಚ್ಯಾಂಕ್ ಕಾಂಯ್ ಉಣೆಂ ನಾಂ. ಸಂಪಾದಕೀಯಾಕ್ ಪೂರಕ್ ಜಾವ್ನ್ ಥೊಡ್ಯೊ ಸತ್ ಗಜಾಲಿ ಹಾಂಗಾಂ ದೀಂವ್ಕ್ ಬೆಜಾರ್ ಪಾವ್ತಾಂ.
⦁ ಪೊಯೆಟೆಕಾ ಪಂಗಡ್ ಸಾಹಿತ್ಯ್, ಕವಿಂಕ್ ಪ್ರೇರಣ್, ಪೂರಕ್ ಹ್ಯಾ ಕೊಂಕ್ಣೆಚ್ಯಾ ಮೊಗಾನ್ ಉಬ್ಜೊಲ್ಲೊ ಪಂಗಡ್ ನಂಯ್. ಎಕ್ ಖಾಸ್ಕಿ “ವಾಟ್ಸಪ್ ಗ್ರೂಪ್”. ಹ್ಯಾ ಪಂಗ್ಡಾಚೊ ಉಗಮ್ ಸುರತ್ಕಲ್ ಫಿರ್ಗಜ್ ಪತ್ರ್ “ವಾಳ್ಚಿ ಝ್ಹರ್” ಬಳಾಧಿಕ್ ಕರುಂಕ್ ಸುರ್ವಾತ್ ಕೆಲ್ಲೊ, ಉಪ್ರ್ರಾಂತ್ ಅತಾಂಚ್ಯಾ ಅದ್ಮೀನಾನ್ ತೊ “ಹೈಜಾಕ್” ಕೆಲಾ.
⦁ ಅದ್ಮೀನಾಚಿಂ ಖಾಸ್ಗಿ 3 ಮೊಬೈಲ್ ನಂಬ್ರಾನಿಂ ತೋಚ್ಚ್ “ಎಕಾಮೇವಾ ಜಯತೆ” ಅಡ್ಮೀನ್. ಎಕಾ ಲೇಕಾನ್ ಹೊ ಎಕ್ “ಪ್ರೋಪ್ರೈಟರ್ ಕನ್ಸರ್ನ್”.
⦁ ಹ್ಯಾ ಪಂಗ್ಡಾ ಸವೆಂ, ತ್ಯಾಚ್ಚ್ ಸಾಂದ್ಯಾಕ್ ಮೆಳೊವ್ನ್ “ಬಿಜ್ನೇಜ್ ಗ್ರೂಪ್” ರಚ್ಲಾ ಅನಿ ಹಾಂಗಾಂ ಜಾಗ್ಯಾ ವ್ಯವಾಹಾರ್, ವ್ಯಾಪಾರ್ ಅನಿ ಬಿಜ್ನೇಸ್ ಪ್ರೋಮೋಶನ್ ಚಲ್ತಾ. ಅಸಲ್ಯಾ ಪಾಟ್ ಥಳಾರ್ “ಪೊಯೆಟಿಕಾ” ಕಶೆಂ ಸಾಹಿತ್ಯ್, ಕವಿತಾಂ ಅನಿ ಕೊಂಕ್ಣಿ ವಿಶಿಂ ಕಾಮ್ ಕರಿತ್?
⦁ ಸಂಪಾದಕೀಯಾಂತ್ ಸಾರ್ಕೆಂ ಸಾಂಗ್ಲಾಂಯ್. ಹಾಂಗಾ ನವ್ಯಾ ಕವಿಂಕ್ ಪ್ರೇರಣ್ ಮ್ಹಣ್. ಭೋವ್ ಲಾಗ್ಶಿಲ್ಯಾನ್ ಪಾಟ್ಲ್ಯಾ ದೋನ್ ವರ್ಸಾಂ ಹ್ಯಾ ಪಂಗ್ಡಾಂತ್ ಸಾಂದೊ ಜಾವ್ನ್ ಆಸ್ತಾಂ ಎಕ್‌ಚ್ಚ್ ಎಕ್ ತರ್ಭೆತಿ ಶಿಬಿರ್, ಎಕ್‌ಚ್ಚ್ ಎಕ್ ಕರೆಕ್ಶನ್, ಎಕ್‌ಚ್ಚ್ ಎಕ್ ಮೌಲ್ಯ್ ಮಾಪನ್ ಕೆಲ್ಲೆಂಚ್ಚ್ ನಾಂ. ಮುಖೆಲ್ಯಾಕ್ ಅನಿ ಪೊಯೆಟಿಕಾ ಪಂಗ್ಡಾಕ್ ಕಾಂಯ್ಚ್ ದೋರಣ್ ನಾಂ ಆನಿ ಕಶೆಂ ದಿಶ್ಟಾವೊ ಆಸ್ಚೊ?
⦁ ಎಕೆಕಾ ಕವಿಗೋಶ್ಟಿಂ ಪಾಟ್ಲ್ಯಾನ್ 30-40 ಹಜಾರ್ ಖರ್ಚ್ ಕರ್ಚೆ ಕೋಣೆಂಗೀ ಆನಿ ತ್ಯಾ ವೆದಿಂನಿಂ ನಾಂವ್ ಜೊಡ್ಚೆಂ ಕೋಣೆಂಗೀ? ದಾಕ್ಲ್ಯಾಕ್ : ಸಾಂ. ಲುವಿಸ್ ಕಾಲೆಜೀಂತ್ ಚಲ್ಲೆಲ್ಯಾ 13 ವ್ಯಾ ಕವಿಗೋಶ್ಟಿಕ್ ಬಾಬ್ ಅಸ್ಟಿನ್ ಪ್ರಭುನ್ ಖರ್ಚ್ ದಿಲ್ಲೊ. ತ್ಯಾ ವೆದಿರ್, ಕೋಣಾಚ್ಯೆಂಗೀ ಮ್ಹೆಳೆಂ ವಸ್ತುರ್ ದೊಭಿ ಉಂಬೊಳ್ಚ್ಯಾ ಫಾತ್ರಾರ್ ಘಾಸ್ಚೆಂ ಬರಿ – ಬೂಕ್ ಉಗ್ತಾವಣ್, ವಿಡಿಯೊ – ಆಡಿಯೋ ಉಗ್ತಾವಣ್ ಆನಿ ಪಯ್ಶೆ ದಿಲ್ಲ್ಯಾ ದಾನಿಕ್ ಎಕಾ ಕೊನ್ಶ್ಯಾರ್ ದವರ್ನ್ ಅಪ್ಲಾಪ್ಲೆಂ ವ್ಹಡ್ಪಣ್ ದಾಕಂವ್ಚೆಂ ಫೊಯೆಟಿಕಾಚ್ಯೆಂ “ಎಚೀವ್ಮೆಂಟ್”-ಸಾಧನ್ ?
⦁ ಹಾಂಚ್ಯಾ ಸಾಧನಾಚೆಂ ಎಕ್ ನಿದರ್ಶನ್ ಹಾಣಿ ಕೆಲ್ಲೊ ‘ಪೊಯೆಟಿಕಾ – ದಿವೊ’ ಸ್ಪರ್ಧೊ. ಇನಾಮ್ ದೀಂವ್ಕ್ ವರಯ್ಣಾರ್ ಪೋಯೆಟಿಕಾಚೊ ಆಡ್ಮೀನ್, ಅನಿ ಇನಾಮ್ ಜೊಡ್ಪಿ ಪೊಯೆಟಿಕಾಚೊ ಸಾಂದೊ. ವಿಶಯ್ ತೊ ನಂಯ್, ಏಕ್ ಜವಾಬ್ದಾರಿ ಅಸುಲ್ಲ್ಯಾ (ಕವಿಂಕ್ ರಚ್ಚೊ ಮ್ಹಣ್ ಅಪ್ಣಾಕ್‌ಚ್ಚ್ ವೊಲಾಂವ್ಚ್ಯಾ) ಮಾನೆಸ್ತಾಕ್, ಕೋಪಿ ಕರ್ನ್ ಕೃತಿ ಚೌರ್ಯ್ ಕೆಲ್ಲ್ಯಾ ಕವನಾಂಕ್ ಇನಾಮ್ ದಿತಾ ಮ್ಹಳ್ಯಾರ್ ಕಿತೆಂ ಮ್ಹಣ್ಯೆತ್? ಸಾಹಿತ್ಯಾ ವಿಶಿಂ “ಅವ್ಯಖ್ತ್” ಅನ್ಬೊಗ್ ಆಸ್ಚೊ, ಸಮಾಜೆಚೆಂ ಬರೆಪಣ್ ಅಶೆನಾ. ಹ್ಯಾ ಕವನಾಚೊ ಒರಿಜಿನಲ್, ಕನ್ನಡ, ಹಿಂದಿ ಅನಿ ಹೆರ್ ಭಾಶೆನಿಂ ಕೆಲ್ಲ್ಯೊ ಪ್ರಸ್ತುತಿ 2018 ಥಾವ್ನ್ ಯೂಟ್ಯೂಬಾರ್ ಅಸಾತ್.
⦁ ಹ್ಯಾ ಪಂಗ್ಡಾಂತ್ ಎದೊಳ್ ಕಸಲಿಯೀ ಸಲಹಾ ಸೂಚನಾಂ ಘೆಂವ್ಕ್ ಅಡ್ಮೀನಾಕ್ ಮನ್ ನಾಂ (ಯೋಗ್ಯಾತಾ ವಿಶಿಂ ಉಲಯ್ನಾ). ತಾಚ್ಯಾಚ್ಚ್ ಉತ್ರಾನಿಂ ಸಾಂಗ್ಚೆ ತರ್ ಹೊ ಪಂಗಡ್ “ಮ್ಹಜ್ಯಾ ಟೆನ್ಶಾನಾ ಥಾವ್ನ್ ಭಾಯ್ರ್ ಯೆಂವ್ಚ್ಯಾಕ್ ಹೊ ಗ್ರೂಪ್ ಹಾಂವೆಂ ಬಾಂದುನ್ ಹಾಡುಲ್ಲೊ ಮ್ಹಜ್ಯಾ ಚಿಂತ್ಪಾ ಪ್ರಕಾರ್.”
⦁ ಹ್ಯಾ ಪಂಗ್ಡಾಂತ್ ಬರಯ್ಲ್ಯಾರ್ ಜಾಲೆಂ ಕವಿತಾ ಜಾಯ್ ಮ್ಹಣ್ ನಾಂ ಶೆಣ್‌ಯೀ ಜಾತಾ. ಕೋಣ್ ಖಂಯ್ಚೇಂಯ್ ಏಕ್ ಪಿಂತುರ್ ಘಾಲ್ತಾ, ಪಳೆತಚ್ಚ್ ಮೊಯ್ಜೆನ್ ಬೆತ್ಕಾಟಿ ಮಾರ್‌ಲ್ಲ್ಯಾ ಬರಿ “ಕವಿತಾ” ಉಮಾಳ್ತಾತ್. ಅನಿ ಎಕಾಮೆಕಾ ಪಾಟ್ ಖೊರ್ಪುನ್ ಸಂತೊಸ್ ಪಾಂವ್ಚಿ ಎಕ್ ಪೊವ್ಜ್ ಆಸಾ. ತಾಕಾ ಹೆಂ ಕೊರ್ಪಿತಾ ಅನಿ ಹಾಕಾ ಆನಿ ಎಕ್ಲೊ. ಇಮೋಜಿ ಥಮ್ಸ್ ಅಪ್ ಆನಿ ಸ್ಮಾಯ್ಲಿ ಘಾಲ್ಯಾರ್ ತಿ ಅತ್ತುತ್ತಮ್ ಕವಿತಾ.
⦁ ಗತ್ ನಾತುಲ್ಲ್ಯಾ ಗಾಂವಾಕ್ ಮತ್ ನಾತುಲ್ಲೊ ರಾಯ್ ಅಸುಲ್ಲ್ಯಾ ಪರಿ ಕೊಂಕ್ಣಿ ಸಾಹಿತ್ಯ್, ಕವಿತಾ ಅನಿ ಕವಿ ಗೋಶ್ಟಿ ಮ್ಹಣ್ ಆಪಂವ್ಚೊ ಕವಿತಾ ವಾಚನ್ ಪ್ರೆಕ್ಟಿಸ್ ಸೆಶನಾಂ ಮುಖ್ಲ್ಯಾ ದಿಸಾಂನಿಂ ಎವಾರ್ಡಾಕ್ ಲೋಬಿ ಕರುಂಕೀ ಪುರೊ.
⦁ ಕಾಂಯ್ ಇಲ್ಲಿಶಿ ಮಾನ್-ಮರ್ಯಾದ್, ಗೌರವ್ ಅಸೊನ್, ಕೊಂಕ್ಣಿ ಭಾಸ್ ಅನಿ ಸಾಹಿತ್ಯಾ ವಯ್ರ್ ಅಭಿಮಾನ್, ಮೋಗ್ ಅಸುಲ್ಲಿಂ ಕೋಣೀಯೀ ಹ್ಯಾ ಪಂಗ್ಡಾಂತ್ ಅಜೂನ್ ಅಸಾತ್ ತರ್ ತಾಂಣಿ ದೊಳೆ ಉಘಡ್ಚೆ ದೀಸ್ ವೆಗ್ಗಿಂ ಯೆಂವ್ದಿತ್ ಮ್ಹಣ್ ಅಶೆತಾಂ.
⦁ ಹ್ಯಾ ಪಂಗ್ಡಾಕ್ ಯೆಜ್ಮಾನ್ ಮುಣೊನ್ ಎರಿಕ್ ಒಝೆರ್ ಬಾಬಾಕ್ ಆಪಯ್ತಾತ್. ತರ್ ಹ್ಯಾ ಪಂಗ್ಡಾಂತ್ ಜಾಂವ್ಚ್ಯೊ ಸಂಗ್ತಿ ಆನಿ ವಿಚಾರ್ ತಾಣಿಂಯೀ ಸಹಮತ್ ದಿಲ್ಲ್ಯಾ ಬರಿಂ ಮುಣ್ ಲೋಕಾಕ್ ಚುಕ್ ಸಮ್ಜಾಣಿಂ ದಿಲ್ಲ್ಯಾಪರಿಂ. ಕವಿ ನಂಯ್ ಆಸುಲ್ಲೆಂ, ಬರವ್ಪಿ ನಂಯ್ ಅಸುಲ್ಲೆಂ ಆನಿ ಫಕತ್ತ್ ವ್ಹಡ್ಲ್ಯಾ ಹುದ್ದ್ಯಾರ್ ಆಸುಲ್ಲ್ಯಾಂಕೀ ಹ್ಯಾ ಪಂಗ್ಡಾಂತ್ ಸೆರ್ವಾಯ್ಲಾಂ ತರ್ ಸಾಹಿತ್ಯಾಕ್ ಸಂಬಂದ್ ದೋರಣಾಂ ಹ್ಯಾ ಪಂಗ್ಡಾಕ್ ನಾಂತ್ ತೆಂ ರುಜು ಜಾತಾ. ಜರ್ ಹೊ ಪಂಗಡ್ ಸುದ್ರಾನಾ, ಹೆರಾಂಚಿಂ ಅಭಿಪ್ರಾಯ್ ಘೆನಾ ತರ್ ಪೊಯೇಟಿಕಾ ಕೊಂಕ್ಣಿ ಕವಿತಾ ಶೆತಾಕ್ ಮಾರಕ್ ಮ್ಹಣ್ ಮಜಿ ಅಭಿಪ್ರಾಯ್.
ಜಿಯೋ ಅಗ್ರಾರ್
ಆಮ್ಚೆ ಬರ್ಪಿ, ಕವಿ, ಕಾಣ್ಯೆಂಗಾರ್ ಕೊಂಕ್ಣೆ ಭಾಯ್ರ್ ದುಸ್ರ್ಯಾ ಖಂಚ್ಯಾಯ್ ಭಾಷೆಚೆಂ ಸಾಹಿತ್ಯ್ ವಾಚಿನಾಂತ್, ತಶೆಂ ಜಾಲ್ಲ್ಯಾನ್ ಆಮ್ಚ್ಯಾ ಥೊಡ್ಯಾಂಚ್ಯಾ ಬರ್ಪಾನಿಂ, ಕವಿತೆನಿಂ ವಾ ಕಾಣಿಯಾನಿಂ ಗುಂಡಾಯ್ ನಾಂ ಅಶೆಂ ಮ್ಹಣುನ್ ಆಮಿಂ ಆಯ್ಕೊನ್‍ಚ್ ಆಯ್ಲ್ಯಾಂವ್. ಪೂಣ್ ನೀಜ್ ಗಜಾಲ್ ಕಿತೆಂಗೀ ಮ್ಹಳ್ಳ್ಯಾರ್ ಅಮ್ಚೆ ಮಧ್ಲೆಂ ಚಡಾವತ್ ಬರ್ಪಿ, ಸಾಹಿತಿ ದುಸ್ರ್ಯಾ ಭಾಷೆಚೆಂ ಸಾಹಿತ್ಯ್ ಥಂಯ್-ಹಾಂಗಾ ಮ್ಹಣುನ್ ಇಲ್ಲೆಂ ವಾಚ್ತಾತ್, ಆಯ್ಕಾತಾತ್ ಆನಿಂ ಉಪ್ರಾಂತ್ ಹೆಂ ಹಾಂವೆ ಮಾತ್ರ್ ವಾಚ್ಲೆಲೆಂ, ಮ್ಹಾಕಾ ಮಾತ್ರ್ ಕಳಿತ್ ಆಸ್ಚೆಂ ಮ್ಹಣುನ್ ತೆಂಚ್ ಆಸಾತಶೆಂ ಕೊಂಕ್ಣೆಕ್ ತರ್ಜುಮೊ ಕರ್ತಾತ್ ಆನಿಂ ಅಪ್ಣಾಚಿಚ್ ಕೃತಿ ಮ್ಹಣ್ ದಾಖಯ್ತಾತ್. ಹೆಂ ಕಾಂಯ್ ನವೆಂ ನಂಯ್. ಪೂಣ್ ಎಕಾ ನಾಂವಾಡ್ದಿಕ್ ಕೊಂಕ್ಣಿ ಪತ್ರಾಚ್ಯಾ ಆನಿ ಕೊಂಕ್ಣಿ ಕವಿತೆ ಖಾತಿರ್ ಮ್ಹಣುನ್ ಉದೆಲ್ಲ್ಯಾ ವಾಟ್ಸಾಪ್ ಪಂಗ್ದಾಚ್ಯಾ ಜೋಡ್‍ಮೆಳಿಂತ್ ಚಲ್ಲೆಲ್ಲ್ಯಾ ಕವಿತಾ ಸ್ಪರ್ಧ್ಯಾಂತ್ ಚಾಳೀಸಾ ವರ್ನಿಂ ಚಡ್ ಕವಿತಾ ಅಸೊನೀ, ಏಕ್ ಚೊರ್ಲೆಲಿ ಕವಿತಾ ಪಯ್ಲೆಂ ಇನಾಮ್ ಅಪ್ಣಾಯ್ತಾ ತರ್, ತ್ಯಾ ಕವಿಚೆಂ ಮಟ್ಟ್ ನಂಯ್ ಬಗಾರ್ ಸ್ಪರ್ಧೊ ಅಸಾ ಕೆಲ್ಲ್ಯಾ ಕೊಂಕ್ಣಿ ಪತ್ರಾಚೆಂ, ವಾಟ್ಸಾಪ್ ಗ್ರೂಪಾಚೆಂ ಆನಿ ಹ್ಯಾ ಸ್ಪರ್ಧ್ಯಾಚೆ ವರಯ್ಣಾರ್ ಜಾವ್ನಾಸ್ಲೆಲ್ಯಾಂಚ್ಯಾ ವಾಚ್ಪಾವಿಶಿಂ ಸವಾಲ್ ಉಟ್ತಾ.
ಪಯ್ಲ್ಯಾನ್ ಪಯ್ಲೆಂ ಹಿ ಕವಿತಾ ಸ್ಪರ್ಧ್ಯಾಚ್ಯಾ ನಿಯಮಾ ಪ್ರಕಾರ್ ಶೀದಾ ಕಚ್ರ್ಯಾ ಡಬ್ಬ್ಯಾಂತ್ ಪೊಡಾಜೆ ಅಸ್ಲಿ. ಕಿತ್ಯಾಕ್ ತಿ ಮೂಳ್ ಕೃತಿ ನಂಯ್. ಸ್ಪರ್ಧೊ ಆಸಾ ಕೆಲ್ಲ್ಯಾನಿಂ ಸ್ಪರ್ಧ್ಯಾಚಿಂ ನಿಯಮಾಂ ಮ್ಹಣುನ್ ದಿತಾತ್ ಪಳೆ, ತಿಂ ಕೊಣಾ ಖಾತಿರ್? ಸ್ಪರ್ಧ್ಯಾಚಿ ನಿಯಾಮಾಂ ಆಸಾತಶಿಂ ಲಾಗು ಕೆಲ್ಯಾರ್ ಹಿ ಕವಿತಾ ಸ್ಪರ್ಧ್ಯಾ ಥಾವ್ನ್ ಭಾಯ್ರ್ ಪಡಾಜೆ ಆಸ್ಲಿ. ಭಾಯ್ರ್ ಪಡ್ಚಿ ಸೊಡ್ ತಿಚ್ಚ್ ಕವಿತಾ ಪಯ್ಲೆಂ ಸ್ಥಾನ್ ಅಪ್ಣಾಯ್ತಾ ತರ್ ಅಸಲ್ಯಾ ಸ್ಪರ್ಧ್ಯಾಕ್, ತೊ ಆಸಾ ಕೆಲ್ಲ್ಯಾಂಕ್, ತಾಚಿ ವರವ್ಣಿ ಕೆಲ್ಲ್ಯಾಂಕ್ ತಶೆಂಚ್ ತಿ ಕವಿತಾ ಚೋರ್ನ್ ಅಪ್ಣಾಚಿಚ್ ಮ್ಹಣುನ್ ದಾಖಲ್ ಕೆಲ್ಲ್ಯಾಂಕ್ ಕಿತೆಂ ಮ್ಹಣುನ್ ವೊಲಾಂವ್ಚೆ?
ಲಗ್ಬಗ್ ಧಾ ವರ್ಸಾಂ ಪಯ್ಲೆಂ ಕೊಣ್ಣಾ! ಎಕಾ ಗ್ರೇಸ್ತ್ ಕೊಂಕ್ಣಿ ‘ಕವಿ’ನ್ ಏಕ್ ಕವಿತಾ ಪುಂಜೊ ಪರ್ಗಟ್ ಕೆಲೊ. ಎಕಾ ಮ್ಹಾನ್ ತಶೆಂಚ್ ಫಾಕಿವಂತ್ ಆನಿಂ ಶಾತಿವಂತ್ ಕೊಂಕ್ಣಿ ಕವಿನ್ ತ್ಯಾ ಕವಿತಾ ಪುಂಜ್ಯಾಕ್ ಸುರ್ವಿಲಿಂ ಉತ್ರಾಂ ಗುಂತ್ಲೆಲಿಂಗೀ ವಾ ತೊ ಕವಿತಾ ಪುಂಜೊ ತಾಚ್ಯಾಚ್ ಪ್ರಕಾಶನಾ ಮುಕಾಂತ್ರ್ ಪರ್ಗಟ್ ಕೆಲ್ಲೊಗೀ ಮ್ಹಾಕಾ ಆತಾಂ ಸಾರ್ಕೆಂ ಉಗ್ಡಾಸ್ ನಾಂ. ಪೂಣ್ ಹ್ಯಾ ಕವಿತಾ ಪುಂಜ್ಯಾಂತ್ ಕೊಂಕಣ್ ಕೊಗುಳ್ ವಿಲ್ಫಿಯಾಬಾಚಿ ಏಕ್ ಲೊಕಾಮೊಗಾಳ್ ಪದ್/ಕವಿತಾ ಅಸಾ ತಶಿ ‘ಗ್ರೇಸ್ತ್ ಕವಿಚಿ’ ಕವಿತಾ ಮ್ಹಣುನ್ ಪರ್ಗಟ್ ಕೆಲ್ಲಿ. ಫಕತ್ತ್ ಏಕ್ ಫರಕ್ ಆಸ್ಲಲೊ. ತೊ ಕಿತೆಂಗೀ ಮ್ಹಳ್ಳ್ಯಾರ್ ವಿಲ್ಪಿಯಾಬಾಚಿ ಮೂಳ್ ಕವಿತಾ ಎಕಾ ಚಲ್ಯಾನ್ ಆಪ್ಲ್ಯಾ ಪ್ರೇಮಿಕಾ ಖಾತಿರ್ ಭೊಗ್ಚ್ಯಾ ಭೊಗ್ಣಾವಿಶಿಂ ಆಸ್ಲಿ ತರ್, ಆಮ್ಚ್ಯಾ ‘ಗ್ರೇಸ್ತ್ ಕವಿ’ಚಿ ಹಿಚ್ಚ್ ಕವಿತಾ ಎಕಾ ಚಲಿಯೆನ್ ಆಪ್ಲ್ಯಾ ಪ್ರೇಮಿ ಖಾತಿರ್ ಭೊಗ್ಚಿಂ ಭೊಗ್ಣಾ. ಫರಕ್ gender ಚೊ. ತರೀ ಹಿ ಕವಿತಾ ತ್ಯಾ ಫಾಕಿವಂತ್ ಕವಿಚ್ಯಾ ನಿಗ್ರಾಣೆಂತ್ ಫಾಯ್ಸ್ ಜಾಲ್ಲಿ. ಉಪ್ರಾಂತ್ ಗ್ರೇಸ್ತ್ ಕವಿಕ್ ಹ್ಯಾ ವಿಶಿಂ ವಿಚಾರ್ಲೆಲ್ಯಾ ವೆಳಾರ್ ತಾಣೆಂ ಖಾಸ್ಗೆನ್ ಚೂಕ್ ಮಾಂದ್ಲಿ. ಪೂಣ್ ತಾಚೊ ಕವಿತಾ ಪುಂಜೊ ಪರ್ಗಟ್ ಜಾಲ್ಲೊ ತಸೊಚ್ಚ್ ಆಸಾ ಆನಿ ತಿ ಕವಿತಾ ತ್ಯಾ ಪುಂಜ್ಯಾಂತ್ ತಶಿಚ್ಚ್ ಆಸಾ.
ಎಕಾ ಲೇಖನಾಂ ಥಾವ್ನ್, ಕವಿತೆ ಥಾವ್ನ್, ಕಾಣಿಯೆ ಥಾವ್ನ್ ಪ್ರೇರಣ್ ಜೊಡುನ್ ಬರಂವ್ಚೆ ಏಕ್ ಅಥ್ವೊಚ್ ವಿಷಯ್. ಪೂಣ್ ತೆಂ ಬರಪ್, ಕವಿತಾ ಆಸಾ ತಶಿ ತರ್ಜಣ್ ಕರುನ್ ಅಪ್ಣಾಚಿಚ್ ಮ್ಹಣುನ್ ದಾಕಂವ್ಚೆಂ ಚೂಕ್ ಮಾತ್ರ್ ನ್ಹಯ್ ಕಾಪಿರೈಟ್ ಕಾನೂನಾ ಪ್ರಕಾರ್ ಏಕ್ ಅಪ್ರಾಧ್ ಸಯ್ತ್. ಪೂಣ್ ಅಮ್ಚ್ಯಾಂತ್ ಚೊರ್ಲೊಲೊ ಚುಕಿದಾರ್ ಜಾಯ್ನಾ ಪೂಣ್ ಹಿ ಚೊರಿ ದಾಕಾವ್ನ್ ದಿಲ್ಲೊ ಚುಕಿದಾರ್, ಮೊಸ್ರಿ ಮ್ಹಳ್ಳೊ ಬಿಲ್ಲೊ ಅಪ್ಣಾಯ್ತಾ.
ಮ್ಹಾಕಾ ಹ್ಯಾ ಪೊಯೆಟಿಕಾಚ್ಯಾ ಸ್ಪರ್ಧ್ಯಾಚ್ಯಾ ಫಲಿತಾಂಶಾವಿಶಿಂ ಧೊಸ್ಲೆಲೆಂ ಏಕ್ ಸವಾಲ್ ಮ್ಹಳ್ಳ್ಯಾರ್ – ಪೊಯೆಟಿಕಾ ಪಂಗ್ದಾಂತ್ ಆಸ್ಚ್ಯಾ ಆಮ್ಚ್ಯಾ ಇತ್ಲ್ಯಾ ಶಾಥಿವಂತ್ ಕವಿಂಕ್, ಹ್ಯಾ ಕವಿತಾ ಸ್ಪರ್ಧ್ಯಾಂತ್ ಪಾತ್ರ್ ಘೆತ್ಲೆಲ್ಯಾ ಉರ್ಲೆಲ್ಯಾ ಚಾಳೀಸ್ ಕವಿಂಕ್ ಸಯ್ತ್, ಪಯ್ಲೆಂ ಇನಾಮ್ ಅಪ್ಣಾಯಿಲ್ಲಿ ಕವಿತಾ ಏಕ್ ಚೊರ್ಲೆಲಿ ಕವಿತಾ ಮ್ಹಣುನ್ ಕಳುಂಕ್‍ನಾಂಗೀ ವಾ ಕಳಿತ್ ಆಸೊನೀ ವಗೆ ರಾವ್ಲೆಗೀ ಮ್ಹಣುನ್.
ಕಳಿತ್ ನಾತ್ಲೆಲೆಂ ತರ್ ಕಿತೆಂಚ್ ಮ್ಹಣುಂಕ್ ಜಾಯ್ನಾ ಪೂಣ್ ಕಳಿತ್ ಆಸೊನೀ ವಗೆಚ್ಚ್ ರಾವ್ಲೆ ತರ್ ಏಕ್‍ಚ್ಚ್ ಪೊಯೆಟಿಕಾಚೊ ಆಡ್ಮಿನ್, ಕೊಂಕ್ಣಿ ಪತ್ರಾಚೊ ಸಂಪಾದಕ್ ಆನಿಂ ಸ್ಪರ್ಧ್ಯಾಚೆ ವರಯ್ಣಾರ್ ಆಪ್ಲೆಂ ಅಮಿಗ್ ಮ್ಹಳ್ಳಿ ದಾಕ್ಷೆಣ್ ಜಾಂವ್ಕ್ ಪುರೊ ವಾ ಪಾತಳ್ ಗೂವಾಕ್ ಫಾತರ್ ಮಾರುನ್ ಆಂಗ್ ಕಿತ್ಯಾಕ್ ಘಾಣೊನ್ ಘೆಜಾಯ್ ? ಮ್ಹಳ್ಳಿ ಭಿರಾಂತ್ ಜಾಂವ್ಕ್ ಪುರೊ.
ಕಾರಣ್ ಕಿತೆಂಯ್ ಜಾಂವ್ ಏಕ್ ನಾ ಫಾವೊ ಜಾಲ್ಲಿ ಕವಿತಾ ಸ್ಪರ್ಧ್ಯಾ ಭಿತರ್ ರಿಗ್ಲಿ ಮಾತ್ರ್ ನಂಯ್ ಪಯ್ಲೆಂ ಇನಾಮ್ ಜೊಡುಂಕ್ ಪಾವ್ಲಿ ಮ್ಹಳ್ಳೆಂ ‘ಸಾಧನ್’ ಪೊಯೆಟಿಕಾಚ್ಯಾ ಸಾಧನಾಂ ಸಂಗಿ ಸದಾಂಚ್ ಜೊಡುನ್ ಉರ್ತೆಲೆಂ ಮ್ಹಣ್ಚೆ ಮಾತ್ರ್ ಸತ್.
‘Oh Liberty, what crimes are committed in thy name’ – Madame Marie-Jeanne ‘Manon’ Roland de la Platière