ಸಭಾ ಶೆಳೆಲ್ಯಾ ?

43

ಬದ್ಲಾವಣ್ ಪ್ರಕೃತೆಚೆಂ ನಿಯಮ್ ಮ್ಹಳಾಂ ಜಾಣಾರ‍್ಯಾಂನಿಂ. ವೆಳಾ ಕಾಳಾಕ್ ಸರಿ ಜಾವ್ನ್ ಸಗ್ಳೆಂಯ್ ಬದ್ಲಾತಾ ಆನಿ ಬದ್ಲಜೆಚ್. ಬದ್ಲಾವಣ್ ನಾ ಜಾಲ್ಯಾರ್ ವಾಡಾವಾಳ್ ನಾ. ದೆಕುನ್ ಅಭಿವೃದ್ದೆಚ್ಯಾ ಮೆಟಾಂಕ್ ಬದ್ಲಾವಣ್ ಅತೀ ಗರ್ಜೆಚಿ. ಆತಾಂ ಕರ್ನಾಟಕಾಂತ್ ಎಲಿಸಾಂವ್ ಮಾತ್ಯಾರ್ ಆಸಾ ಮ್ಹಣ್ತಾನಾ ದಿಸಾಕ್ ಎಕ್ ’ಬದ್ಲಾವಣ್ಯೊ’ ಜಾಂವ್ಚೆ ದಿಶ್ಟಿಕ್ ಪಡ್ತಾತ್. ಹಾಂತ್ಲ್ಯೊ ಕಿತ್ಲ್ಯೊ ಆಮ್ಚ್ಯಾ ಸಮುದಾಯಾಕ್ ಆನಿ ಸಮಾಜಾಕ್ ಪೂರಕ್ ಆನಿ ಕಿತ್ಲ್ಯೊ ಮಾರಕ್ ಮ್ಹಳ್ಳೆ ವಿಶ್ಯಾಂತ್ ಚರ್ಚೆಕ್ ಚಾಲನ್ ದಿಂವ್ಚೆಂ ಏಕ್ ಪ್ರೇತನ್ ಹ್ಯಾ ಲೇಖನಾಂತ್ ಕರ್ತಾಂ.

ಆತಾಂ ಎಲಿಸಾಂವಾಂತ್ ಎಕಾ ಟಿಕೆಟಿ ಖಾತಿರ್ ಸಭಾರ್ ಝಗಡ್ತೇ ಆಸಾತ್.  ರಾಜಾಂವ್ – ತೀ ಕ್ರಿಸ್ತಾವಾಂಚಿ ಸೀಟ್! ಆತಾಂ ಆಮ್ಚ್ಯಾ ಹ್ಯಾ ಝಗ್ಡ್ಯಾವರ್ವಿಂ ತೀಯ್ ಆಮ್ಚ್ಯಾ ಹಾತಾಂತ್ಲಿ ಚುಕ್ತಾಗೀ ಮ್ಹಣ್ಚೆ ತಸಲೊ ಆಕಾಂತ್ ಸಾದ್ಯಾ ಲೊಕಾಕ್ ಧೊಸುನ್ ಆಸಾ. ಆದ್ಲ್ಯಾ ಚುನಾವಾಂತ್ ಆಮಿ ಸಲ್ವಾಲ್ಯಾಂವ್ … ಸಲ್ವಾಲ್ಯಾಂವ್ ಮ್ಹಣ್ಚ್ಯಾಕೀ ಸಬಾರಾಂನಿ ಸಾಂಗಾತಾ ಮೆಳೊನ್ ಆಮ್ಚ್ಯಾ ಅಭ್ಯರ್ಥಿಕ್ ಸಲ್ವಯ್ಲೆಂ ಮ್ಹಣ್ಚೆಂ ಉತರ್ ಚಡ್ ಬರೆಂ ಕೊಣ್ಣಾ. ಜೆ.ಆರ್.ಲೋಬೊನ್ ಮಾಡುಬಿದ್ರಿಂತ್ ಕಥೊಲಿಕ್ ಸಭೆನ್ ಮಾಂಡುನ್ ಹಾಡ್ಲೆಲ್ಯಾ ಕಥೊಲಿಕ್ ಕ್ರೀಸ್ತಾಂವಾಚ್ಯಾ ಸಮ್ಮೇಳನಾಂತ್ ಕೆಲ್ಲೆಂ ಏಕ್ ಭಾಷಣ್ ಆನಿ ಸಾಂ ಲುವಿಜ್ ಕೊಲೆಜಿಚೊ ರಸ್ತೊ – ಹಿಂ ದೋನ್ ಪ್ರಮುಖ್ ಕಾರಣಾಂ, ಲೋಬೊ ಸಲ್ವಾಲ್ಲ್ಯಾಕ್ ದೊಳ್ಯಾಂಕ್ ದಿಸ್ಚಿಂ. ಲೋಬೊಚೆಂ ಭಾಷಣ್ ಮ್ಹಜೆ ತಸಲ್ಯಾ ಬಂಡಾಯ್‌ವಾದಿಂಕ್ ಬರೆಂ ಲಾಗ್ಲೆಂ ತರ್ ಪುರ್ವಿತಾಂಚ್ಯಾ ಕಾನಾಂಕ್ ತಾಪ್ಲೆಲೆಂ ಶಿಸೆಂ ವೊತುಲ್ಲೆಬರಿಂ ಜಾಲೆಂ. ಸಾಂ. ಲುವಿಸ್ ಕೊಲೆಜ್ ರಸ್ತ್ಯಾ ವಿಶ್ಯಾಂತ್ ಆಮ್ಚ್ಯಾ ಸೋ ಕೋಲ್ಡ್ ಲೀಡರ್ಸಾಂನಿಂಚ್ ಮುಕ್ಲ್ಯಾ ಸಮುದಾಯಾಚ್ಯಾಂಕ್ ಉಕೊಲ್ನ್ ಬಾಂದ್ಲೆಂ ಆನಿ ಸೊಭಾಯ್ ಚಾಕ್ಲಿ.

ಆತಾಂ ಹೊ ಇತಿಹಾಸ್. ಪೂಣ್ ಇತಿಹಾಸಾಂತ್ ಘಡೊನ್ ಗೆಲ್ಲ್ಯಾ ಹ್ಯಾ ಚುಕಿಥಾವ್ನ್ ಪುಣೀ ಆಮಿ ಬೂದ್ ಶಿಕ್ಲ್ಯಾಂವ್‌ಗೀ? ಕಾಂಯ್ ಬದ್ಲಾವಣ್ ಆಪ್ಣಾವ್ನ್ ಘೆತ್ಲಿಗೀ ? ಮ್ಹಣ್ ಸವಾಲ್ ಕೆಲ್ಯಾರ್ – ಜಾಪ್ – ನಾ! ಖಂಡಿತ್ ನಾ!! ಆತಾಂ , ಮುಕ್ಲ್ಯಾ ಎಲಿಸಾಂವಾಂಕ್ ಕೆಲ್ಲಿ ತಯಾರಾಯ್ ಕಸಲಿ ಮ್ಹಳ್ಯಾರ್ ದೊಳ್ಯಾಂ ಮುಕಾರ್ ದಿಸ್ಚೆಂ ಏಕ್ ವ್ಹಡ್ಲೆಂ ‘ಸೊನ್ನೆಂ’ ಮಾತ್ರ್! ಓಸ್ಕರಾಕ್ ತಯಾರ್ ಕೆಲ್ಲಿ ಕೀರ್ತ್ ಆಮ್ಚಿ ಮ್ಹಣೊನ್ ಬಡಾಯ್ ಉಲೊಂವ್ಚೆಂ ಆಮ್ಚೆ ಕಥೊಲಿಕ್ ಸಭೆಚ್ಯಾ ಮುಖೆಲ್ಯಾಂಕ್ ಕಳಿತ್ ನಾ . . . ಓಸ್ಕರ್ ಮೊರೊನ್ ಸಬಾರ್ ಕಾಳ್ ಸಂಪ್ಲಾ … ತೊಚ್ ಪಯ್ಲೊ ಆನಿ ನಿಮಾಣೊ ಜಾಲಾ. ಆನಿ ಹಾಣಿ ತಯಾರ್ ಕೆಲ್ಲ್ಯಾ ತ್ಯಾ ಓಸ್ಕರಾನ್ ಕೊಣೀ ಕ್ರೀಸ್ತಾಂವ್ ಲೀಡರಾಕ್ ಕ್ರಿಯೇಟ್ ಕೆಲಾಂಗೀ ? ಮ್ಹಳ್ಯಾರ್ ಜಾಪ್ – ಅನ್ಯೇಕ್ ‘ದೊಡ್ದ ಸೊನ್ನೆ’.

ಆತ್ಮಾವಲೋಕನ್ ಕೆಲಾಂ ?

ಕರಾವಳೆಂತ್ ಏಕ್ ದೀಶ್ಟ್ ಆಮ್ಚ್ಯಾ ಸಮಾಜೆಚೆರ್ ಭಂವ್ಡಾಯ್ಲ್ಯಾರ್ – ದ.ಕ ಜಿಲ್ಯಾಂತ್ ಬೊಣ್ಕ್ಯಾಂ ವರ್ನಿ ಸಂಕ್ಯಾನ್ ಆಮಿ ಚಡ್ ಆಸಾಂವ್. ಆದ್ಲ್ಯಾ ಎಲಿಸಾಂವಾಂತ್ ಕೊಂಗ್ರೆಸಾಂತ್ 2 ಬಿಜೆಪಿಂತ್ 4 ಟಿಕೆಟಿ ಬೊಣ್ಕ್ಯಾಂಕ್, ಫೂಣ್ ಆಮ್ಕಾಂ ? (ತಾಂಚೊ ವೋಟ್ 50 / 50 ದೊನೀ ಪಾಡ್ತಿನಿಂ ವಾಂಟೆ ಜಾಲೊ ತರ್ 100% ವೋಟ್ ಆಪ್ಣಾಂವ್ಚ್ಯಾ ಕೊಂಗ್ರೆಸಾನ್ ಆಮ್ಕಾಂ ದಿಲ್ಲಿ ಟಿಕೆಟ್ – ಏಕ್‌ಚ್) ಕೊಂಗ್ರೆಸಾಂತ್ ಬೊಣ್ಕ್ಯಾಂಕ್ ದಿಲ್ಲ್ಯಾ ಟಿಕೆಟಿಂನಿ ದೊನೀ ಸಲ್ವಾಲ್ಯೊ ತರ್ ಬಿಜೆಪಿಂತ್ ತೀನ್ ಜಿಕ್ಲೆ! ಕಿತೆಂಯ್ ಜಾಂವ್ ತಾಂಚ್ಯಾ ಸಮುದಾಯಾಚೆ ತೇಗ್ ಎಮ್.ಎಲ್.ಎ. ಜಾಲೆ! ತಾಂಚೆ ವರ್ನಿ ಚಡ್ ಜಣಾಸಂಕೊ ಆಸ್ಲೆಲ್ಯಾ ಆಮ್ಚೆಂ ಸಾಧನ್ ಮಾತ್ರ್ ಶೂನ್ಯ್! ಹ್ಯಾ ಪಾವ್ಟಿಂಚ್ಯಾಂತ್ ಬಿಜೆಪಿಂತ್ 4 ಕೊಂಗ್ರೆಸಾಂತ್ 3 ಆನಿ ಜುಮ್ಲಾ 7 ಮ್ಹಣ್ ಖಬರ್ ಆಸಾ ಆನಿ ಆಮ್ಕಾಂ ತಿಚ್ ಏಕ್ ! ಆನಿ ತ್ಯಾ ಎಕಾ ಖಾತಿರ್ ಝಗ್ಡೆಂ – ಲಡಾಯ್!

ದಿಯೆಸೆಜಿಚ್ಯಾ ಲೀಡರ್ಸಾಂನೋಂ, ಸಭೆನ್ ವರ್ಸಾಂ ಪಾಸುನ್ – ಲೀಡರ್ಸ್ ತಯಾರ್ ಕರ್ತಾಂವ್, ರಾಜಕೀಯಾಂತ್ ಆಮ್ಚೆಂ ಬಳ್ ದಾಕಯ್ತಾಂವ್ ಮ್ಹಣ್ ಇತ್ಲ್ಯಾ ವರ್ಸಾಂ ಪಾಸುನ್ ಕೆಲ್ಲೆಂ ಕಿತೆಂ ? ಮ್ಹಾಕಾ ದಿಸ್ತಾತ್ ಫಕತ್  ಗೊಂಯ್ಟಾಂ !

ಆದ್ಲ್ಯಾ ಎಲಿಸಾಂವಾಂತ್ ಮೂಡುಬಿದ್ರಿಂತ್ ಎಲಿಸಾಂವಾಕ್ ರಾವ್‌ಲ್ಲೊ ಅಭಯಚಂದ್ರ ಸಲ್ವಾಲೊ. ತಾಚಿ ಪ್ರಾಯ್ ಜಾಲ್ಲಿ ಆನಿ ತೆಂ ತಾಚೆಂ ನಿಮಾಣೆಂ ಎಲಿಸಾಂವ್ ಆಸ್ಲೆಂ. ಆತಾಂ ಪಾಂಚ್ ವರ್ಸಾಂ ಜಾಲಿಂ ಎಕಾ ಕ್ರಿಸ್ತಾಂವ್ ಮುಕೆಲ್ಯಾಕ್ ಮೂಡುಬಿದ್ರಿಂತ್ ತಯಾರ್ ಕರುಂಕ್ ಆಮ್ಕಾಂ ಜಾಲೆಂಗೀ? ಸೊಡ್ಯಾಂ ಹಾಂಗಾಸಾರ್ ಲೀಡರ್ ನಾಂತ್ , ತರ್ ಮಂಗ್ಳುರ್ ಪಯ್ಸ್ ನಾ, ಮಂಗ್ಳುರ್ ಥಾವ್ನ್ ಕೊಣಾಕ್ ತರೀ ಹಾಂಗಾ ಪ್ರಮೋಟ್ ಕರ್ಯೆತೆಂ ನಂಯ್‌ಗೀ ? ಕ. ಸಭಾ ಮ್ಹಳ್ಳೆಂ ರಾಜಕೀಯ್ ಸಂಚಲನಾಚೆಂ ಸಾದನ್ ಎಕಾ ಬೊಣ್ಕ್ಯಾಕ್ ವೆದಿರ್ ರಾವವ್ನ್ ‘ಹೊ ಆಮ್ಚೊ ಮುಕ್ಲೊ ಲೀಡರ್’ ಮ್ಹಣ್ ದಾಕಂವ್ಚೆಂಗೀ ? ಲಜ್ ದಿಸಾನಾ ತುಮ್ಕಾಂ ? ಆಮ್ಚ್ಯಾ ಸಂಘಟನಾಚೊ ರಾಜಕೀಯ್ ಉದ್ದೇಶ್ ಖಂಯ್ ಪಾವ್ಲೊ ?

ಫುಡಾರಾಚೆಂ ಚಿಂತ್ಲಾಂ ?

1. ದ. ಕ.  ಜಿಲ್ಲ್ಯಾಚ್ಯಾ ಆನ್ಯೇಕಾ ವಿದಾನ್‌ಸಭಾ ಶೆತಾಂತ್ ಎಮ್.ಎಲ್.ಎ. ಅಭ್ಯರ್ಥಿಕ್ ಆತಾಂ ಪ್ರಾಯ್ ಜಾಲ್ಯಾ. ಮುಕಾರ್ ತಾಕಾ ಎಲಿಸಾಂವಾಕ್ ರಾವೊಂಕ್ ಸಾದ್ಯ್ ಜಾಂವ್ಚೆಂ ನಾಂ. ಹೆ ವಿಶಿಂ ಕಾಯ್ ತುಮ್ಚ್ಯಾ ಗುಮಾನಾಕ್ ಗೆಲಾಂಗೀ? ಥಂಯ್ಸರ್ ಪುಣೀ ಏಕ್ ಕ್ರೀಸ್ತಾಂವ್ ಲೀಡರ್ ತಯಾರ್ ಕರುಂಕ್ ಸಾದ್ಯ್ ಆಸಾಗೀ ?
2. ಬೊಣ್ಕ್ಯಾಂಕ್ ದೊನೀ ಪಾಡ್ತಿಂಕಡೆ ಬ್ಯಾಲೆನ್ಸ್ ಕರುನ್ 3 + 4 = 7 ಟಿಕೆಟ್ ಘೆಂವ್ಕ್ ಸಾಧ್ಯ್ ಜಾತಾ ತರ್, ಸಂಕ್ಯಾನ್ ತಾಂಚೆ ವರ್ನಿ ಚಡಿತ್ ಆಸ್ಚ್ಯಾ ಆಮ್ಕಾಂ ಹೆಂ ಕಿತ್ಯಾಕ್ ಸಾದ್ಯ್ ನಾ?
3. ಆಮಿ ಕಿತ್ಯಾಕ್ ಎಕಾಚ್ ರಾಜಕೀ ಪಾಡ್ತಿಚೆ ಗುಲಾಮ್ ಜಾವ್ನ್ ಉರಜೆ ? 99% ಓಟ್ ಘೆವ್ನ್‌ಯೀ ಆಮ್ಕಾಂ ಎದೊಳ್ ಮೆಳ್‌ಲ್ಲೆಂ ಕಿತೆಂ ?
4. ಶಿಕ್ಷಣ್ ಸಂಸ್ತೆ ಆಮ್ಚೆ, ಆಸ್ಪತ್ರ್ಯೊ ಆಮ್ಚ್ಯೊ, ಸಕ್ಕಡ್ ಆಮ್ಚ್ಯಾ ಶಿಕ್ಪಾ ಸಂಸ್ಥ್ಯಾಂನಿಂಚ್ ಶಿಕ್‌ಲ್ಲೆ, ತೆ ಆಜ್ ಆಮ್ಚೆ ಲೀಡರ್ಸ್ … ತರ್  ಖಂಯ್ ಗೆಲೆ ಆಮ್ಚೆ?
5. ಆಮ್ಚ್ಯಾ ಐಸಿವೈಎಮ್ಮಾಂತ್ ಉಬ್ಜಾಲ್ಲೆ ದಾಕ್ತೆರ್, ವಕೀಲ್, ಇಂಜಿನಿಯರ್, ಲೀಡರ್ ಖಂಯ್ ಪಾವ್ಲೆ? ತಾಂಕಾ ಕಾಯ್ ಗಾವಾಂತ್ ರಾವವ್ನ್ ಮುಕ್ಲೆ ಲೀಡರ್ ಕರ್ಚೆಂ ಪ್ಲ್ಯಾನ್ ಕೆಲಾಂಗೀ?
6. ಪೊಲಿಟಿಕ್ಸ್ ವಾಟುನ್ ಪಿಯೆಲ್ಲ್ಯಾಂನಿ ಹ್ಯಾ ಸಭೆಂತ್ ಆಸಜೆ. ತೆ ಕೊಣೀ ಸಭೆಂತ್ ದಿಸಾನಾಂತ್. ಆನಿ ತೆ ಅಸಲ್ಯಾ ಇಗರ್ಜೆಚ್ಯಾ ದೊರ‍್ಯಾ ಭಿತರ್ಲ್ಯಾ ಸಂಘಟನಾಕ್ ಯೇಂವ್ಕೀ ಯೇನಾಂತ್, ಹಾಚೆ ವಿಶಿಂ ಕಾಯ್ ಜಾಣಾಂತ್ ಗೀ ? ಹ್ಯಾ ಪರಿಸ್ಥಿತೆಂತ್ ಇಗರ್ಜೆಚ್ಯಾ ಭಾಯ್ರ್ ಫಕತ್ ರಾಜಕೀಯ್ ಸಂಬಂಧಿತ್ ಏಕ್ ಸಂಘಟನ್ ಬಾಂದ್ಯೆತ್ ನಂಯ್‌ಗೀ ?
7. ಎಕಾ ದಸ್ತಾವೆಜಾಕ್ ರುಜು ಕರುಂಕ್, ಏಕ್ ಪ್ರೆಸ್ ಮೀಟ್ ಕರುಂಕ್ ತಾಂಕ್ ನಾತ್‌ಲ್ಲ್ಯಾ ಸರ್ಕಾರಿ ನೌಕಾರಾಂಕ್ ಕಿತ್ಯಾಕ್ ಖಾತಿರ್ ಕ. ಸಭೆಂತ್ ಹುದ್ದೆ ? ಆಸಲ್ಯಾ ಲೀಡರಾಂ ಥಾವ್ನ್ ಸಂಘಟನಾಕ್ ಕಿತೆಂ ಉಪಯೋಗ್ ? ಸಂಘಟನಾಕ್ ಹೆ ಹುದ್ದೆದಾರ್ ಖಂಯ್ಚ್ಯಾ ಭರ್ತೆಕ್ ?

ದಿಯೆಸಿಜೆಂತ್ ವ್ಹಡ್ಲೆಂ ಸಂಘಟನ್, ಆಮಿಂಚ್ ಶ್ರೇಷ್ಟ್ ಮ್ಹಳ್ಳ್ಯಾ ಭ್ರಮಿದೆಥಾವ್ನ್ ಭಾಯ್ರ್ ಯೇವ್ನ್ ಭಂವ್ತಣಿಚ್ಯಾ ಸಮಾಜೆಂತ್ ದೊಳೆ ಉಘಡ್ನ್ ಪಳಯಾ – ಭಾಷಣ್ ಸ್ಪರ್ಧೊ ಕರ್ಚೊ ಮಾತ್ರ್ ನಂಯ್, ತಾಣಿ ಕೆಲ್ಲ್ಯಾ ಭಾಷಾಣಾಂನಿ ತಾಂಕಾ ಸಮಾಜೆಂತ್ ಜಿಕೊಂಕ್ ಶಿಕಯಾ, ಖರೆ ಸಮಾಜೆಚೆ ಲೀಡರ್ ಕರಾ. ಅನಿಕೀ ವೇಳ್ ಉತ್ರೊಂಕ್ ನಾ … ವೆಳಾ ಕಾಳಾಕ್ ಬದ್ಲೊಂಕ್ ಶಿಕಾ.

► ವಿನೋದ್ ಪಿಂಟೊ ತಾಕೋಡೆ.

ಷರೊ :  ಹ್ಯಾ ಲೇಖನಾಂತ್ಲೆ ವಿಚಾರ್ ಲೇಖಕಾಚೆ ಸ್ವಂತ್ ಆನಿ ವಯಕ್ತಿಕ್ . ವಾಚ್ಪ್ಯಾಂಚ್ಯಾ ಪ್ರತಿಕ್ರಿಯೆಂಕ್ ಸ್ವಾಗತ್ ಆಸಾ.