To subscribe ARSO please click : https://pages.razorpay.com/SubscribeARSO
ಆದ್ಲ್ಯಾ ಮ್ಹಯ್ನ್ಯಾಂತ್ ಏಕ್ ಗಜಾಲ್ ಭಾರಿಚ್ ಚರ್ಚೆಕ್ ವೊಳೊಗ್ ಜಾಲಿ. ಕ್ರಿಸ್ತಾಂವ್ ಮುಕೆಲಿ ಮ್ಹಳ್ಳೊ ಪಾಟ್ ಮಾತ್ಯಾರ್ ವ್ಹಾವಯಿಲ್ಲೆ ಥೊಡೆ ಬಿಜ್ನೆಸ್‌ಮೆನ್ ಚೊವ್ತೆವೆಳಾ ಗಣ್ಪತೆಕ್ ಫುಲಾಂ ಫಳಾಂ ವ್ಹರ‍್ನ್ ಗೆಲ್ಲಿ ಗಜಾಲ್ ತಿ. ಹಿ ಗಜಾಲ್ ದೋನ್ ತೀನ್ ಕೊನ್ಯಾಂನಿ ಪಳೆವ್ಯೆತ್ ಕೊಣ್ಣಾ. ಏಕ್ ‘ಕ್ರಿಸ್ತಾಂವ್ ಧರ್ಮ್ ಆನಿ ತಾಚಿ ಪಾತ್ಯೆಣಿ’ ಮ್ಹಳ್ಳ್ಯಾ ಎಕಾ ಚೊವ್ಕಟ್ಟಾಭಿತರ್ ಥಾವ್ನ್ ಪಳೆಂವ್ಚೊ ಕೊನೊ. ಹ್ಯಾ ಕೊನ್ಯಾಂತ್ ಕ್ರಿಸ್ತಾಂವ್ ಧರ್ಮ್ ಬೊಂಬ್ಯಾಪುಜಾಂಕ್ ಮಾಂದಿನಾ ಮ್ಹಳ್ಳಿ ಗಜಾಲ್ ಮುಕಾರ್ ಪಡ್ತಾ. ಪುಣ್ ಕ್ರಿಸ್ತಾಂವ್ ಧರ್ಮಾನ್ ‘ಬೊಂಬಿಂ’ ಮ್ಹಣ್ ಮಾಂದ್ಚ್ಯೊ ಪುತ್ಳ್ಯೊ ಕಸಲ್ಯೊ? ಅಮ್ಕ್ಯಾ ಪುತ್ಳ್ಯಾಂಕ್ ಕಿತ್ಯಾಕ್ ದೆಂವ್ಸಾರ್, ಸಯ್ತಾನ್ ಮ್ಹಣ್ ಕ್ರಿಸ್ತಾಂವ್ ಧರ್ಮಾಚೆ ಲೆಕ್ತಾತ್? ಹಾಚೆಪಾಟ್ಲ್ಯಾನ್ ಸೊಧ್ನಾಂ ಕೆಲ್ಯಾರ್ ಆನ್ಯೇಕ್ ಸಂಸಾರ್ ಉಗ್ತೊ ಜಾಯ್ತ್ ಕೊಣ್ಣಾ!
ಆಜ್ ಸಗ್ಳ್ಯಾ ಸಂಸಾರಾರ್ ಆಪುಣ್ ಕ್ರಿಸ್ತಾಂವ್ ಮ್ಹಣ್ ಮಾಂದ್ಚ್ಯಾ ಆನಿ ಆಪ್ಣಾಚೊ ದೇವ್ ಮಾತ್ರ್ ಶೇಶ್ಟ್ ಮ್ಹಣ್ ಭಿತರ‍್ಲ್ಯಾ ಭಿತರ್ ಹೆಮ್ಮ್ಯಾನ್ ಫುಲ್ಚ್ಯಾ ಮನ್ಶಾಂಚೆ ಪುರ್ವಜ್ ಕಿತ್ಲ್ಯಾಗೀ ವರ‍್ಸಾಂ ಆದಿಂ ಪಂಗಡ್-ಪಂಗ್ಡಾಂನಿ ತಾಂತಾಂಚ್ಯಾ ಪಾತ್ಯೆಣೆಂ ಪರ್ಮಾಣೆಂ ಪುಜಾ ಕರ‍್ನ್ ಆಯಿಲ್ಲೆ. ತ್ಯಾ ತ್ಯಾ ಗಾಂವ್ಚ್ಯಾ ಭೊಂವಾರಾಕ್, ರಾನಾಕ್, ಪ್ರಕೃತೆಕ್ ಲಾಗೊನ್ ಕಿತೆಂ ತರೀ ಪಾತ್ಯೆವ್ನ್ ಆಸ್‌ಲ್ಲೆ. ಪ್ರಕೃತೆಕ್ ಸಂಬಂದ್ ಜಾಲ್ಲ್ಯಾ ಗಜಾಲೆಂಥಾವ್ನ್, ಆನ್ವಾರಾಂಥಾವ್ನ್ ರಾಕೊನ್ ವ್ಹರ‍್ಚೆಖಾತಿರ್ ದೆವಾಕ್ ಆರೋಪ್ ಕರುನ್‌ಗೀ ವಾ ಆಪಾಪ್ಲ್ಯೆ ರಿತಿ-ರಿವಾಜೆಪರ್ಮಾಣೆಂ ಕಾಂಯ್ ತರೀ ಬೊಂಬ್ಯಾಂಕ್ ಸಂಕೇತ್ ಜಾವ್ನ್ ವಾಪಾರುನ್ ಪುಜಾ ಕರುನ್ ಆಸ್‌ಲ್ಲೆ. ಪುಣ್ ಜೆನ್ನಾ ಕ್ರಿಸ್ತಾಂವ್ ಧರ್ಮ್ ವಿಸ್ತಾರುಂಕ್ ಸುರು ಜಾಲೊ, ಹ್ಯಾ ಧರ್ಮಾಚ್ಯಾ ಪ್ರಚಾರಕಾಂನಿ ತಾಂಚ್ಯಾ ಇಮಾಜೆಂಕ್ ಮಾತ್ರ್ ಪಾತ್ಯೆಂವ್ಚೊ ದಬಾವ್ ಘಾಲೊ ಆನಿ ಸಂಸಾರಾಚ್ಯಾ ಹರ್ ಖಂಡಾಂನಿ, ದೆಶಾಂನಿ ಆಸ್‌ಲ್ಲ್ಯೊ ವೊರೆವಿಂಗಡ್ ಪಾತ್ಯೆಣ್ಯೊ, ತಾಂಕಾಂ ಸಂಬಂದ್ ಜಾಲ್ಲಿಂ ಬೊಂಬಿಂ ಮ್ಹಳ್ಳೆ ಸಂಕೇತ್ ಪೂರಾಯ್ ಹ್ಯಾ ಕ್ರಿಸ್ತಾಂವ್ ಧರ್ಮಾಚ್ಯಾಂಕ್ ಫಿತಿಸ್ಪಣಾಂ ಮ್ಹಣ್ ದಿಸ್ಲಿಂ ಜಾವ್ಯೆತ್. ಜಾಂವ್ಕ್ ಪುರೊ ಲೊಕಾಚ್ಯಾ ಪಾತ್ಯೆಣೆಂಚಿಂ ಆನಿ ತಾಣಿಂ ಪುಜಾ ಕರ‍್ಚಿಂ ಬೊಂಬಿಂ ಲಾಂಬ್ ಜೀಬ್ ಭಾಯ್ರ್ ಘಾಲ್ಲಿಂ, ವ್ಹಡ್ ದೊಳ್ಯಾಂಚಿಂ – ಅಸಲಿಂ ವಿಚಿತ್ರ್ ರುಪಾಚಿಂ ಆಸೊನ್, ತಿಂ ಕ್ರಿಸ್ತಾಂವ್ ಇಮಾಜೆತಿತ್ಲಿಂ ನಾಜೂಕ್ ನಾತ್‌ಲ್ಲಿಂ. ವ್ಹಯ್ ಇಜಿಪ್ಟ್, ಇನ್ಕಾ ತಸಲ್ಯಾ ನಾಗರಿಕತೆಂನಿ ಫಿತಿಸ್ಪಣಾಂ, ಹಿಂಸಾ ಆಸ್‌ಲ್ಲಿಚ್. ವಿಜ್ಞಾನ್, ಶಿಕಪ್, ಸ್ವತಂತ್ರ್ ಚಿಂತಪ್, ವಿಚಾರ್ ಹೆಂ ಪುರಾಯ್ ಆಯ್ಚೆತಿತ್ಲೆಂ ವಾಡೊಂಕ್ ನಾತ್‌ಲ್ಲೊ ಕಾಳ್ ತೊ. ಜರ್ ಕ್ರಿಸ್ತಾಂವ್ ಧರ್ಮಾಚೆ ಫಿತಿಸ್ಪಣಾಕ್ ಲಾಗೊನ್ ತಸಲೆಂ ಇನ್ಕಾರ್ ಕರ‍್ತಾತ್ ತರ್ ತಾಂತುಂ ಏಕ್ ವಿಚಾರ್ ಆಸಾ ಮ್ಹಣ್ ಮಾಂದ್ಯೆತ್. ಪುಣ್ ಆಜ್ ಆಯ್ಚ್ಯಾ ಕಾಳಾರ್ ಇತ್ಲೆಂಯ್ ಶಿಕಪ್ ಆಸೊನ್ ರಾಸ್ ರಾಸ್ ಲೊಕಾಮುಕಾರ್ ರಾವೊನ್, ಆಪುಣ್ ಕ್ಯಾನ್ಸರ್ ಗೂಣ್ ಕರ‍್ತಾಂ, ಭುರ್ಗಿಂ ನಾತ್‌ಲ್ಲ್ಯಾಂಕ್ ಭುರ್ಗಿಂ ಜಾಂವ್ಚೆಬರಿ ಕರ‍್ತಾಂ, ಮೆಲ್ಲೆಂ ಧಾಂವ್ಡಾಯ್ತಾಂ ಮ್ಹಣ್ ವೆದಿರ್ ಉಗ್ತ್ಯಾನ್ ಪಾಚಾರ‍್ಚ್ಯಾ ಆನಿ ಗುಪಿತ್ ಥರಾನ್‌ಯೀ ಕರ‍್ಚ್ಯಾ ಥೊಡ್ಯಾ ಪಾದ್ರ್ಯಾಬಾಂಚೆಂ, ರೆತಿರಿಸ್ತಾಂಚೆಂ ತೆಂತೆಸಾಂವ್ ಫಿತಿಸ್ಪಣ್ ನಾಸ್ತಾನಾ ಆನಿ ಕಿತೆಂ? ಆಸೊಂ, ಪುಣ್ ಬೊಂಬಿಂ ಮ್ಹಳ್ಳೆಫರಾ ಫಿತಿಸ್ಪಣ್ ಜಾಯ್ಜೆಚ್ ಮ್ಹಣ್ ನಾ. ತಿ ಸಂಸ್ಕೃತೆಕ್ ಸಂಬಂದ್ ಜಾಲ್ಲಿ ಗಜಾಲ್ ಜಾವ್ನ್ ಆಸೊಂಕ್‌ಯೀ ಪುರೊ. ಕ್ರಿಸ್ತಾಂವ್ ಧರ್ಮಾನ್ ಆಪ್ಲ್ಯೆ ವಿಸ್ತಾರ‍್ಚ್ಯೆ ಪ್ರಕ್ರಿಯೆಂತ್ ಕಿತ್ಲ್ಯೊಗೀ ಸಂಸ್ಕೃತ್ಯೊ, ವೆಗ್ಳ್ಯೊ ಪಾತ್ಯೆಣ್ಯೊ ಗುಳುಮ್ ಕೆಲ್ಯಾತ್ ಮ್ಹಣ್ಚ್ಯಾಂತ್ ಕಾಂಯ್ ದುಬಾವ್ ನಾ. ದೆಕುನ್ ಫಕತ್ ಎಕಾ ಗಣ್ಪತೆಕ್ ಫುಲಾಂ-ಫಳಾಂ ವ್ಹರ‍್ನ್ ಗೆಲ್ಲೆಖಾತಿರ್ ಬೊಂಬ್ಯಾಪುಜಾ ಕರ‍್ತಾತ್ ಮ್ಹಣ್ ಠಿಕಾ ಕರ‍್ಚಿ ಸಾರ್ಕಿ ನ್ಹಯ್. ಹಿ ಏಕ್ ಗಜಾಲ್. (ಹಿಂದೂ ಲೊಕಾಭಿತರ್‌ಯೀ ಎಕಾ ಸಮುದಾಯಾಚೊ ಲೋಕ್ ಬಾಕಿಚ್ಯಾ ಸರ್ವ್ ಸಮುದಾಯಾಚ್ಯಾ ಲೊಕಾಕ್ ಆಪ್ಲ್ಯೆ ಮುಟಿಂತ್ ಘೆಂವ್ಕ್ ಮುರ್ತೆಂಕ್ ಕಶೆಂ ವಾಪಾರ‍್ತಾ ಮ್ಹಳ್ಳಿ ಆನ್ಯೇಕ್ ದುಸ್ರಿಚ್ ಗಜಾಲ್. ಹೊ ಆನ್ಯೆಕಾ ಲೇಖನಾಕ್ ಜಾಂವ್ಚೊ ವಿಶಯ್.)
ಆತಾಂ ವಯ್ಲಿ ಗಜಾಲ್ ಆನ್ಯೆಕಾ ಕೊನ್ಯಾಂತ್ ಪಳಂವ್ಚಿ ತರ್, ಫುಲಾಂ-ಫಳಾಂ ವ್ಹರ‍್ನ್ ಗೆಲ್ಲ್ಯಾ ಹ್ಯಾ ಕ್ರಿಸ್ತಾಂವ್ ಮುಕೆಲಿ ಮ್ಹಳ್ಳ್ಯಾ ಮನ್ಶಾಂಪಾಟ್ಲೊ ಇರಾದೊ ಕಸಲೊ ಮ್ಹಣ್ ಆಮಿ ಚಿಂತಿಜೆ. ಹೊ ಚರ್ಚೆಕ್ ವೊಳೊಗ್ ಜಾಯ್ಜೆ ಜಾಲ್ಲೊ ವಿಶಯ್.
ಮ್ಹಾಕಾ ಕ್ರಿಸ್ತಾಂವಾಂನಿ ದಿವ್ಳಾಕ್ ವಚೊನ್ ತಾಂಚ್ಯಾ ಮುರ್ತೆಂಕ್ ಹಾತ್ ಜೊಡ್ಚ್ಯಾಂತ್ ಕಾಂಯ್ ಚೂಕ್ ದಿಸನಾ. ಕಾರ್ಕೊಳ್ ತಸಲ್ಯಾ ಪೂನ್‌ಶೆತಾಂತ್ ಹೆರ್ ಧರ್ಮಾಚ್ಯಾಂನಿ ಕೆಲ್ಲೆಂ ಮಾಗ್ಣೆಂ ಜಾತಾ, ತಾಣಿಂ ಘಾಲ್ಲಿ ಆಂಗೊವ್ಣ್ ಇಗರ್ಜೆಚ್ಯಾ ಕಂರ್ಡ್ಯಾಂನಿ ಜಿರ‍್ತಾ ತರ್, ಕ್ರಿಸ್ತಾಂವ್ ಲೊಕಾನ್ ದಿವ್ಳಾಕ್ ವಚೊನ್ ಹಾತ್ ಜೊಡುನ್ ರಾಂವ್ಚ್ಯಾಂತ್ ಕಾಂಯ್ ವಾಯ್ಟ್ ನಾ. ಎಕೆ ರಿತಿನ್ ತೆಂ ಬರೆಂಚ್. ಕಿತ್ಯಾಕ್ ಮ್ಹಳ್ಯಾರ್ ಹಿಂದೂ (ಹಿಂದುತ್ವ ನ್ಹಯ್) ಲೋಕ್ ಇಗರ್ಜಾಂಕ್ ವೆಚೆತಿತ್ಲೆ ಭಕ್ತಿಪಣಾನ್ ಕ್ರಿಸ್ತಾಂವ್ ಲೊಕಾಕ್ ದಿವ್ಳಾಕ್ ವಚೊಂಕ್ ಪುಟ್ವನಾ. ಚಡ್ತಾವ್ ಕ್ರಿಸ್ತಾಂವ್ ಧರ್ಮಾಚ್ಯಾಂಕ್ ಆಪ್ಣಾಚೊ ಧರ್ಮ್ ಹೆರ್ ಧರ್ಮಾಂಪ್ರಾಸ್ ಊಂಚ್ ಮ್ಹಳ್ಳೆಂ ಮತಿಂತ್ ಖಂಚೊನ್ ಗೆಲಾಂ. ತಶೆಂ ಆಸ್ತಾನಾ ಕ್ರಿಸ್ತಾಂವಾಂನಿ ದಿವ್ಳಾಂಕ್ ವೆಚೆಂ, ಹಿಂದ್ವಾಂನಿ ಇಗರ್ಜೆಂಕ್ ವೆಚೆಂ – ಅಸಲ್ಯಾ ಪ್ರಕ್ರಿಯೆಂನಿಚ್ ಭಾರತೀಯತಾ ವಾಂಚೊನ್ ಉರ‍್ಲ್ಯಾ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ. ಅಶೆಂ ಆಸ್ಲ್ಯಾರ್‌ಚ್ ಧರ್ಮಾಂಮದೆಂ ಆಸ್‌ಲ್ಲ್ಯೊ ವೊಣೊದ್ಯೊ ಕೊಸ್ಳಾವ್ನ್ ಸಾಂಕೊವ್ ರಚುಂಕ್ ಸಾಧ್. ದಾಖ್ಲ್ಯಾಕ್ ಸಾಂಗ್ಚೆಂ ತರ್ ಥೊಡ್ಯಾ ವರ‍್ಸಾಂ ಆದಿಂ ಕಟೀಲ್ ದಿವ್ಳಾಂತ್ ಬ್ರಹ್ಮಕಲಶ ಜಾಲ್ಲೆಂ. ತವಳ್ ಗಾಂವಾ-ಗಾಂವಾಂಥಾವ್ನ್ ಆಯಿಲ್ಲ್ಯಾ ವೊಜ್ಯಾಂಚಿ ರಾಸ್ ಪಳೆಂವ್ಚಿಂಚ್ ದೊಳ್ಯಾಂಕ್ ಏಕ್ ಫೆಸ್ತ್. ಆಮಿಯ್ ತೆಂ ಪಳೆಂವ್ಕ್ ಗೆಲ್ಲ್ಯಾಂವ್. ಭೊಂವ್ತಿಂಚೊ ಥೊಡೊಸೊ ಕ್ರಿಸ್ತಾಂವ್ ಲೋಕ್ ಥಂಯ್ ದಿವ್ಳಾಭೊಂವ್ತಿಂ ಆಸೊನ್ ವೊಜ್ಯಾಚಿ ರಾಸ್ ಪಳೆವ್ನ್ ಆಸ್‌ಲ್ಲೊ. ಥೊಡೊ ಕ್ರಿಸ್ತಾಂವ್ ಲೋಕ್ ದಿವ್ಳಾಭಿತರ್ ವಚೊನ್ ಹಾತ್ ಜೊಡ್ತಾ, ಆಂಗೊಣ್‌ಯೀ ಘಾಲ್ತಾ, ತೆಂಯ್ ಹಾಂವ್ ಜಾಣಾಂ. ಪುಣ್ ಪೋರ್ ಗಣ್ಪತೆಕ್ ಉಲ್ಲಾಸ್ ಪಾಟೊಂವ್ಕ್ ಗೆಲ್ಲೆ ಕ್ರಿಸ್ತಾಂವ್ ಮುಕೆಲಿ ಅಶೆಂ ಫಕತ್ ತಾಂಚ್ಯಾ ಮೊಗಾನ್ ಗೆಲ್ಲೆಗೀ ವಾ ಹಾಚೆಪಾಟ್ಲ್ಯಾನ್ ದುಸ್ರೊ ಸ್ವಾರ್ಥಿ ಇರಾದೊ ಆಸ್‌ಲ್ಲೊ? ಹಾಚೆಂ ಮೂಳ್ ಉಸ್ತಿತಾನಾ ಮೆಳ್ಚಿಂ ಕುಸ್‌ಲ್ಲಿಂಚ್ ಪಾಳಾಂ!
ವಿಶೇಸ್ ರಿತಿನ್ ಚಿಂತುನ್ ಪಳಯ್ಜೆ ಜಾಲ್ಲಿ ಗಜಾಲ್ ಮ್ಹಳ್ಯಾರ್ ದಿಯೆಸೆಜಿಚೊ ಪಿ.ಆರ್.ಒ ಆನಿ ಕ್ರಿಸ್ತಾಂವ್ ಮುಕೆಲ್ಯಾಂನಿ ಫುಲಾಂ ಫಳಾಂ ದೀವ್ನ್ ಫೊಟೊ ಕಾಡಯಿಲ್ಲೊ ಗಣ್ಪತಿ ‘ಸಂಘ್’ ನಿಕೇತನಾಚೊ ಮ್ಹಣ್ಚಿ ಗಜಾಲ್ ಪಯ್ಲೆಂ ಮತಿಕ್ ವ್ಹರಿಜೆ ಆನಿ ಹಾಚೆಪಾಟ್ಲೊ ಶೆವೊಟ್ ಇತ್ಲೊಚ್ ಕೀ, ರಾಜಕೀಯ್. ರಾಜಕೀಯ್ ಸ್ವಾರ್ಥಾಕ್ ಆಪ್ಲೊ ಧರ್ಮ್ ಮಾತ್ರ್ ವಾಪಾರಿಜೆ ಮ್ಹಣ್ ನಾ, ಆಪ್ಣೆಂ ಪುಜಾ ಕರ‍್ಚ್ಯೊ ಮುರ್ತ್ಯೊ ಮಾತ್ರ್ ವಾಪಾರಿಜೆ ಮ್ಹಣ್ ನಾಂತ್ ಬಗಾರ್ ಆನ್ಯೆಕಾ ಸಿದ್ಧಾಂತಿಂಚೊಯ್ ಧರ್ಮ್, ಮುರ್ತ್ಯೊ ವಾಪಾರ‍್ಯೆತ್ ಮ್ಹಳ್ಳ್ಯಾಕ್ ಏಕ್ ಜೊಕ್ತೊ ದಾಖ್ಲೊ ಹೊ – ಫುಲಾಂ ಫಳಾಂಚೊ ನಾಟಕ್. ಹಾಂಗಾಸರ್ ಜೊ ಕೋಣ್ ಫಲಾಣೊ ತ್ಯಾ ನಾಟಕಾಚೊ ಸೂತ್ರ್‌ದಾರ್ ತೊ ದಿಯೆಸೆಜಿಚೊ ಪಿ.ಆರ್.ಒ. ತಾಕಾ ಬೊವ್ಶಾ ಮತಿಭಿತರ್ ರಾಜಕೀಯ್ ಶೆವೊಟ್ ಆಸಾ ಆಸ್ತಲೊ. ಆತಾಂ ಸದ್ದ್ಯಾಕ್ ದೆಶಾಂಂತ್ ಉಜ್ವ್ಯಾ ಪಂಥೀಯ್ ಮನ್ಶಾಂಚೆಂ ರಾಜಕೀಯ್ ಚಲ್ತಾ. ಆಪ್ಣಾಚ್ಯಾ ರಾಜಕೀಯಾಕ್ ತ್ಯಾ ಸಿದ್ಧಾಂತಾಂಚ್ಯಾಕ್ ಬಾಲ್ದಿ ಧರಿಜೆ ದೆಕುನ್ ತಸಲ್ಯಾ ಸಿದ್ಧಾಂತಾಚ್ಯೆ ಸಾವ್ಳೆಂತ್ ಬಸ್‌ಲ್ಲ್ಯಾ ಗಣ್ಪತೆಕ್ ಫುಲಾಂ-ಫಳಾಂ ಅರ್ಪುಂಕ್ ಮನ್ ಕೆಲಾಂ ಶಿವಾಯ್ ಸಾದ್ಯಾ ಲೊಕಾನ್ ರಸ್ತ್ಯಾದೆಗೆನ್ ದವರ‍್ಲಲ್ಯಾ ಗಣ್ಪತೆಕ್ ಪಾಕ್ಳಿಯ್ ಆಸ್ಚಿನಾ. ಹಿ ತಾಚಿ ಭೆಟ್ ಖಾಸ್ಗಿ ಜಾಲ್ಯಾರ್ ದುಸ್ರಿ ಗಜಾಲ್. ಪುಣ್ ಕ್ರಿಸ್ತಾಂವ್ ಮುಕೆಲಿ ಮ್ಹಳ್ಳೊ ಪಾಟ್ ಆಸ್‌ಲ್ಲ್ಯಾನ್ ಸದ್ದ್ಯಾಕ್ ದೆಶಾಂತ್ ಆಕಾಂತಾಂತ್ ಆಸ್ಚ್ಯಾ ಉಣ್ಯಾಸಂಖ್ಯಾತಾಂನಿ ಹ್ಯಾ ಉಜ್ವ್ಯಾ ಪಂಥೀಯ್ ಧಣ್ಸಣೆಕ್ ಪ್ರತಿರೋಧ್ ದಾಕಯ್ತಾನಾ ಕ್ರಿಸ್ತಾಂವ್ ಮುಕೆಲಿ ಮ್ಹಳ್ಳೊ ಪಾಟ್ ಘೆವ್ನ್ ಅಶೆಂ ಕರ‍್ಚೆಂ ಲೊಕಾಕ್ ಕೆಲ್ಲೊ ಘಾತ್ ನ್ಹಯ್? ಕಶೆಂ ದಿಸ್ತಾ ತುಮ್ಕಾಂ? ಹ್ಯಾ ಸ್ವಾರ್ಥಿ ಮುಕೆಲ್ಯಾಂಕ್ ಫುಲಾಂ ಫಳಾಂ ಅರ್ಪುಂಕ್, ಕಶೆಂ ತ್ಯೊ ಮುರ್ತ್ಯೊ ಜಾಯ್‌ಗೀ, ತಶೆಂಚ್ ತ್ಯಾ ಸಿಂದ್ಧಾಂತಿಂಕ್‌ಯೀ ಆಪುಣ್ ಉಣ್ಯಾಸಂಖ್ಯಾತಾಂಕ್ ಧಣ್ಶಿತಾಂ ಮ್ಹಳ್ಳ್ಯಾ ಚಿಕ್ಲಾಥಾವ್ನ್ ಭಾಯ್ರ್ ಯೇಂವ್ಕ್ ಅಶೆಂ ತಾಂಚೆಸವೆಂ ರಾವೊನ್ ಹಾಸೊನ್ ಹಾಸೊನ್ ಫೊಟೊ ಕಾಡುಂಕ್ ಪಾಂವ್ಚ್ಯೊ ಜಿವಂತ್ ಮುರ್ತ್ಯೊ ಜಾಯ್! ಅಸಲ್ಯಾ ಮುರ್ತೆಂಕ್ ಖಂಯ್ಚೀಯ್ ವೆದಿ ಜಾತಾ. ಮದರ್ ತೆರೇಸಾಕ್ ಪಾವ್ಟ್ ಮೆಳ್ತಾನಾ ಹಿಣ್ಸುಂಚ್ಯಾ ಸಿದ್ಧಾಂತಾಚಿಯ್ ವೆದಿ ಜಾತಾ, ಮದರ್ ತೆರೇಸಾಚಿ ವ್ಹಡ್ವಿಕ್ ಗಾಜೊಂವ್ಚಿಯ್ ವೆದಿ ಜಾತಾ! ಕರಾವಳಿಂತ್ ಕೋಮು ಪ್ರಚೋದನಾಚಿಂ ಉತ್ರಾಂ ವೊಂಕ್ತಲ್ಯಾಂಚ್ಯಾ ಸವೆಂ ಪುರ್ಶಾಂವ್ ಕಾಡುಂಕ್‌ಯೀ ಜಾತಾ, ’ಕೋಮು ಸೌಹಾರ್ದವೇದಿಕೆ’ರ್ ರಾವೊಂಕ್‌ಯೀ ಜಾತಾ! ಕೊಂಗ್ರೆಸಾಚೊ ಹಾತ್‌ಯೀ ಧರ‍್ತಾತ್, ಬಿಜೆಪಿಚೆಂ ಫುಲ್‌ಯೀ ಮಾಳ್ತಾತ್, ಜೆಡಿಎಸ್‌ಚೊ ಭೊರೊಯ್ ವ್ಹಾವಯ್ತಾತ್! ಹೆ ಮುಕ್ಕೆಲಿ ಮುರ್ತೆಪ್ರಾಸ್ ಪಾಶ್ಟ್ ಜಾಲ್ಲಿ ಗಜಾಲ್ ಕೊಣಾಕ್‌ಯೀ ಕಳೊಂಕ್‌ಚ್ ಕಳನಾ.
ಅಸಲೆ ‘ಮುಕ್ಕೆಲಿ’ ಕ್ರಿಸ್ತಾಂವ್ ಧರ್ಮಾಂತ್ ಮಾತ್ರ್ ಆಸಾತ್ ಮ್ಹಣ್ ಚಿಂತಿನಾಕಾತ್. ಆಯ್ಲೆವಾರ್ ಎಕಾ ಮುಸ್ಲಿಮ್ ಮುಕೆಲ್ಯಾನ್ ಆರ್.ಎಸ್.ಎಸ್ ಮುಕೆಲ್ಯಾಕ್ ‘ರಾಶ್ಟ್ರ್ ಪಿತ’ ಮ್ಹಳ್ಳೊ ಬಿರುದ್ ದೀವ್ನ್ ಜಾಲಾ. ಪುಣ್ ಹ್ಯಾ ಕ್ರಿಸ್ತಾಂವ್ ಮುಕೆಲ್ಯಾಂಕ್ ತಸಲೊ ಆವ್ಕಾಸ್ ಮೆಳೊಂಕ್ ನಾ. ಜಾಯ್ ತರ್ ಏಕ್ ಪಾವ್ಟಿಂ ಮೋದಿ ಆಸ್ಚ್ಯೆ ವೆದಿರ್ ಚಡೊನ್ ದೋನ್ ಸಬ್ದ್ ಉಲೊಂಕ್ ಸೊಡುಂದಿತ್ … ಮೋದಿನ್‌ಚ್ ಕ್ರಿಸ್ತಾಂವಾಂಕ್ ‘ಆಮ್ಚ್ಯಾ ಬಾಪಾ’ ಶಿಕಯಿಲ್ಲೆಂ, ಜೆಜುಚ್ ಮೋದಿಚ್ಯಾ ರುಪಾರ್ ಭಾರತಾಕ್ ಆಯ್ಲಾ’ ಮ್ಹಣೊಂಕ್‌ಯೀ ಪಾಟಿಂ ಸರ‍್ಚೆನಾಂತ್ ಹೆ!
ಆನಿ ಕೊಂಕ್ಣೆಚೆ ಥೊಡೆ ಮಹಾನ್ ಬರೊವ್ಪಿ ಹಿ ಭೆಟ್ ಸಮರ್ಥನ್ ಕರುನ್ ವಾಟ್ಸಾಪ್ ಗ್ರೂಪಾಂನಿ ಅಶೆಂ ಬರಯ್ಲಾಗ್ಲೆ – ‘ಕೊಂಗ್ರೆಸ್ ಆನಿ ಬುಡ್ತಾ. ಆಮಿ ಆನಿ ಆನ್ಯೆಕಾ ಸಿದ್ಧಾಂತಾಂಚ್ಯಾ ಸವೆಂ ಗೆಲ್ಲ್ಯಾಂತ್ ಕಾಂಯ್ ವಾಯ್ಟ್ ನಾ’. ಹೆ ಪೂರಾ ಪಾಟಿಚೊ ಕಣೊ ನಾತ್‌ಲ್ಲೆ ಆಯ್ಚ್ಯಾ ಕಾಳಾಚೆ ಮಹಾನ್ ಅವಾರ್ಡ್ ವಿನ್ನರ್ ಕೊಂಕ್ಣಿ ಬರೊವ್ಪಿ ಆನಿ ಹಾಚ್ಯಾಕೀ ವರ್ತ್ಯಾನ್ ಸಮಾಜಿಕ್ ನ್ಯಾಯಾಖಾತಿರ್ ರಾಜ್ವಟ್ಕೆಥಾವ್ನ್ ಖುರ‍್ಸಾಚ್ಯಾ ಮರ‍್ಣಾಚಿ ಶಿಕ್ಶಾ ಜಾಲ್ಯಾರೀ ಆಖೇರ್ ಪರ್ಯಾಂತ್ ರಾಜ್ವಟ್ಕೆಸವೆಂ ರಾಜಿ ಜಾಯ್ನಾಸ್ತಾಂ ಆಪ್ಲ್ಯಾ ವಿಚಾರಾಥಂಯ್ ಘಟ್ ಉರೊನ್, ಖುರ‍್ಸಾರ್ ಉಮ್ಕೊಳೊನ್ ಜೀವ್ ಸೊಡ್‌ಲ್ಲ್ಯಾ ಜೆಜುಕ್ ಭಾಂಗಾರಾಚ್ಯಾ ಚೆಯ್ನಿಂನಿ ಗಳ್ಯಾಕ್ ಉಮ್ಕಾಳಾಂವ್ಚೆಂ ಜೆಜುಚೆ ಪಾಟ್ಲಾವ್ದಾರ್! ಖುರಿಸ್ ಬೊವ್ ಆದ್ಲಿ ಶಿಕ್ಶಾ. ಪುಣ್ ಆತಾಂ ಜೆಜುಕ್ ಖುರ‍್ಸಾರ್ ಕಶೆಂ ಮಾರ‍್ಯೆತ್ ಮ್ಹಣ್ಚ್ಯಾಕ್ ಅಸಲೆ ದಾಖ್ಲೆ ಜಾಯ್ತೆ ಆಸಾತ್. ಅಸಲ್ಯಾ ಕ್ರಿಸ್ತಾಂವ್ ಮುಕ್ಕೆಲ್ಯಾಂಕ್ ಆನಿ ತಾಂತ್ಲ್ಯಾ ತಾಂತುಂಯ್ ಪಿ.ಆರ್.ಒ-ಕ್ ಕ್ರಿಸ್ತಾಂವ್ ಧರ್ಮಾಚೆ ಕಶೆ ಸೊಸ್ತಾತ್‌ಗೀ ಖುರ‍್ಸಾರ್ ಉಮ್ಕೊಳ್ಚೊ ಜೆಜುಚ್ ಜಾಣಾ.
ಆತಾಂ ಹಿ ಗಜಾಲ್ ಬೊವ್ ಥೊಡ್ಯಾಂನಿ ಸವಾಲ್ ಕೆಲಿ. ದುರಂತ್ ಮ್ಹಳ್ಯಾರ್ ಥೊಡ್ಯಾಂನಿ ‘ಹೆ ಕ್ರಿಸ್ತಾಂವ್ ಮುಕೆಲ್ಯಾಂಕ್‌ಚ್ ಠಿಕಾ ಕರ‍್ತಾತ್. ಕುರ‍್ಲೆ ಸ್ವಭಾವಾಚೆ ಹೆ’ ಮ್ಹಣ್ ಗಳ್ಗಳ್ಯಾಂ ರಡೊನ್ ಸವಾಲ್ ಕೆಲ್ಲ್ಯಾಂಕ್‌ಚ್ ಹಿಣ್ಶಿಲೆಂ.
ತರ್ ಆತಾಂ ಮುಕೇಲ್ ಗಜಾಲೆಕ್ ಯೆವ್ಯಾಂ. ವಯ್ರ್ ಉಲ್ಲೇಖ್ ಕೆಲ್ಲೆಬರಿ ಆಪ್ಲ್ಯಾ ರಾಜಕೀಯ್ ಸ್ವಾರ್ಥಾಖಾತಿರ್ ‘ಸಂಘ್’ ನಿಕೇತನ್ ಗಣ್ಪತೆಕ್ ಫುಲಾಂ ವ್ಹರ‍್ಚೆ, ‘ಕ್ರಿಸ್ತಾಂವ್ ಮುಕೆಲಿ’ ಮ್ಹಳ್ಳ್ಯಾ ಪಾಟಾಚೊ ದುರುಪಯೋಗ್ ಕರ‍್ನ್ ಅಖ್ಖೊ ಕ್ರಿಸ್ತಾಂವ್ ಲೋಕ್‌ಚ್ ತುಮ್ಚೆಸವೆಂ ಆಸಾ ಮ್ಹಣ್ ಪಾಂತ್ಯೆಂವ್ಚೆಬರಿ ಕರ‍್ಚೆ ಮನಿಸ್; ಉಣ್ಯಾಸಂಖ್ಯಾತಾಂಚೆರ್ ಜಾಂವ್ಚ್ಯಾ ಅನ್ನ್ಯಾಯಾಂಕ್ ದೊಳೆ ಧಾಂಪುನ್, ಅನ್ನ್ಯಾಯ್ ಕರ‍್ತಲ್ಯಾಂಸವೆಂಚ್ ರಾಜಿ ಕರ‍್ಚೆಬರಿ ತಾಂಚ್ಯೆ ವೆದಿಕ್ ವೆಚ್ಯಾಂಕ್ ಪಿ.ಆರ್.ಒ ಕೆಲ್ಲಿ ದಿಯೆಸೆಜ್; ‘ಹಾಂಗಾಚೆಂ ಆನಿ ಬುಡ್ತಾಂ ಆಮಿ ಥಂಯ್ ಉಡ್ಯಾಂ’ ಮ್ಹಣ್ಚೆ ಆಬ್ಲೆಶಿ ಸೋ ಕಾಲ್ಡ್ ಲೊಕಾಮೊಗಾಳ್ ಸಾಹಿತಿ … – ಹೆ ಪೂರಾಯ್ ಮೆಳೊನ್ ಉಣ್ಯಾಸಂಖ್ಯಾತ್ ಲೊಕಾಕ್ ಖಂಯ್ ವ್ಹರ‍್ನ್ ಪಾವಯ್ತಿತ್? ಹಾಕಾ ಏಕ್ ದಾಖ್ಲೊ ಎದೊಳ್‌ಚ್ ಹ್ಯಾ ಗಾಂವಾಂತ್ ಜಾವ್ನ್ ಗೆಲಾ ಆನಿ ಹ್ಯೆ ಚುಕಿಕ್ ಆಮ್ಚ್ಯಾ ಮಾಲ್ಘಡ್ಯಾಂನಿ ಶಿಕ್ಶಾ ಭೊಗುನ್‌ಯೀ ಜಾಲ್ಯಾ! ಏಕ್ ಉಡಾಸ್ ಕಾಡಿಜೆ ಹಾಂಗಾಸರ್. ಇತ್ಲೆಂ ಶಿಕಪ್ ಆಸೊನ್, ಇತ್ಲೆಂ ಮಿಡಿಯಾ ಆಸೊನ್, ಜರ್ ಆಯ್ಚ್ಯಾ ಕಾಳಾರ್ ಮುಕೆಲಿ ಮ್ಹಳ್ಳ್ಯಾ ನಾಂವಾರ್ ಅಶೆಂ ಕರ‍್ಚೆ ಸ್ವಾರ್ಥಿ ಆಸಾತ್ ಆನಿ ಹಾಂಕಾಂ ಮಾಂದ್ಚಿ ಪರ್ಜಾ ಆಸಾ ತರ್ ಟಿಪ್ಪುಚ್ಯಾ ಕಾಳಾರ್ ‘ಟಿಪ್ಪು ಆನಿ ಸಲ್ವೊಂಕ್ ಪುರೊ. ಆಮಿ ಬ್ರಿಟಿಶಾಂಚ್ಯೆ ಪಾಡ್ತೆಕ್ ಉಡ್ಯಾಂ ಆನಿ ತಾಂಚಿ ಚಾಕ್ರಿ ಕರ‍್ಯಾಂ’ ಮ್ಹಳ್ಳೆ ಘಾತ್ಕಿ ತೆದಾಳಾ ನಾತ್‌ಲ್ಲೆ ಮ್ಹಣ್ಚೆಂ ಕಶೆಂ? ಆಜ್‌ಕಾಲ್ ಮುಕೆಲಿ ಮ್ಹಳ್ಳ್ಯಾ ನಾಂವಾರ್ ಕಾಂಯ್ ಅಸಲಿಂ ಫುಲಾಂ, ಫಳಾಂ ಬಾಲ್ದಿ ಧರ‍್ಚ್ಯೊ ಗಜಾಲಿ ಲೊಕಾಕ್ ದಿಸ್ತಾತ್ ಮ್ಹಣ್ಯಾಂ. ಪುಣ್ ಟಿಪ್ಪುಚ್ಯಾ ಕಾಳಾರ್ ಆಪುಣ್ ಕ್ರಿಸ್ತಾಂವ್ ಮ್ಹಳ್ಳ್ಯಾ ಮುಕೆಲ್ಯಾಂನಿ ಬ್ರಿಟಿಶಾಂಕ್ ಕೆದಿ ವ್ಹಡ್ ಸಿಂಟ್ಯಾಕ್ಸ್ ಟಾಂಕ್ ಧರ‍್ಲ್ಯಾ ಆಸ್ತಲಿ? ಹಿ ಖಬರ್ ಶಿಕ್ಶಾ ಭೊಗ್‌ಲ್ಲ್ಯಾ ಆಮ್ಚ್ಯಾ ಮಾಲ್ಘಡ್ಯಾಂಕ್ ಕಳಿತ್ ಆಸ್ಚಿನಾ. ಪುಣ್ ಟಿಪ್ಪುಕ್ ಕಳ್ಳ್ಯಾ ಆಸ್ತಲಿ. ದೆಕುನ್ ಟಿಪ್ಪುನ್, ಮಂಗ್ಳುರ‍್ಚೊ ಲೋಕ್ ಆಪ್ಣಾವಿರೋಧ್ ಬ್ರಿಟಿಶಾಂಕ್ ಸಸಾಯ್ ಕರ್ತಾ ಮ್ಹಳ್ಳ್ಯಾ ನಿಚೆವಾಕ್ ಯೇಂವ್ಕ್ ಬೊವ್ಶಾ ಅಸಲೆಚ್ ಮುಕೆಲಿ ಕಾರಣ್ ಜಾಲ್ಲೆ ಆಸ್ಯೆತ್ ನ್ಹಯ್‌ಗೀ? ಅಶೆಂ ಬೊವ್ ಥೊಡ್ಯಾ ಸ್ವಾರ್ಥಿ ಮುಕೆಲ್ಯಾಂಕ್ ಲಾಗೊನ್ ಆಮ್ಚ್ಯಾ ಥೊಡೆಶಾ ಲೊಕಾನ್ ಶಿಕ್ಶಾ ಭೊಗ್ಲ್ಯಾ ಆಸ್ತಲಿ ನ್ಹಯ್‌ಗೀ? ಆಯ್ಚ್ಯಾ ’ಕ್ರಿಸ್ತಾಂವ್ ಮುಕ್ಕೆಲಿ’ಂಚೆ ಆವ್ತಾರ್ ಪಳಯ್ತಾನಾ ತಶೆಂಚ್ ಭೊಗ್ತಾ! ಪುಣ್ ತ್ಯಾ ಬ್ರಿಟಿಶಾಂಕ್ ಆನಿ ಆಯ್ಚ್ಯೆ ಉಜ್ವ್ಯಾ ಪಂಥೀಯ್ ಸಿಂದ್ಧಾಂತಿಂಮದೆಂ ಏಕ್ ವ್ಹಡ್ ಫರಕ್ ಆಸಾ. ಟಿಪ್ಪು-ಬ್ರಿಟಿಶ್ ಗಜಾಲೆಂತ್ ಆಸ್‌ಲ್ಲೊ ವಿಶಯ್ ಫಕತ್ ರಾಜ್ವಟ್ಕೆಚೊ. ಥಂಯ್ಸರ್ ಕೋಮುವಾದ್ ನಾತ್‌ಲ್ಲೊ. ಪುಣ್ ಆತಾಂಚ್ಯಾ ಉಜ್ವ್ಯಾ ಪಂಥೀಯ್ ಸಿದ್ಧಾಂತಿಂಥಂಯ್ ಆಸ್ಚೊ ಜನಾಂಗೀಯ್ ದ್ವೇಶ್, ಕೋಮುವಾದ್. ಆತಾಂ ಜಾಗ್ ಜಾಯ್ನಾ ತರ್ ಫುಡೆಂ ಹಾಣಿಂ ಸರ್ವಾಂನಿ ಮೆಳೊನ್ ಲೊಕಾಕ್ ಹಿಟ್ಲರಾಚ್ಯಾ ಗ್ಯಾಸ್ ಚೇಂಬರಾಂ ಪರ್ಯಾಂತ್ ವ್ಹರ‍್ನ್ ಪಾವಯ್ಲ್ಯಾರೀ ಪಾವಯ್ಲೆಂ!
ಆಜ್‌ಕಾಲ್ ಅಸಲ್ಯಾ ಮನ್ಶಾಂಕ್, ಅಸಲ್ಯಾಂಕ್ ಭಾತೆಣ್ ಘಾಲ್ಚ್ಯೆ ದಿಯೆಸೆಜಿಕ್ ಸವಾಲ್ ಘಾಲಿನಾ ತರ್ ಕ್ರಿಸ್ತಾಂವ್ ಲೋಕ್ ಪರತ್ ಆನ್ಯೆಕೆ ಆಂಬುಡ್ಣೆಕ್ ವೆಚೊ ಶೆಳಿಯಾಂಚೊ ಹಿಂಡ್ ಜಾತೊಲೊ. ಅಶೆಂ ಜಾಯ್ನಾಯೆ ತರ್ ಫಾಯ್ದೊ ಉಟೊಂವ್ಚ್ಯಾ, ‘ಮುಕೆಲಿ’ ಮ್ಹಳ್ಳ್ಯಾ ಪಾಟಾಚೊ ದುರುಪಯೋಗ್ ಕರ‍್ಚ್ಯಾ, ಲೊಕಾಚಿ ಪಾತ್ಯೆಣಿ, ವಿಚಾರ್ ಮುಕ್ಕುನ್ ಖಾಂವ್ಚ್ಯಾ ಮುಕ್ಕೆಲ್ಯಾಂಕ್, ತೀನ್ ದಿಸಾಂನಿ ಗಣ್ಪತೆಕ್ ಖಂಯ್ ವ್ಹರ‍್ನ್ ಪಾವಯ್ತಾತ್‌ಗೀ ಥಂಯ್ ಪಾವಯ್ನಾ ತರ್ ಬಾಂಯ್ಕ್ ಉಡೊಂಕ್ ಸರ್ವ್ ಲೊಕಾನ್ ಆತಾಂಚ್ ತಯಾರ್ ರಾವಜೆ ಪಡ್ತೆಲೆಂ!
► ವಿಲ್ಸನ್ ಕಟೀಲ್
ಮಂಗ್ಳುರ್ ಥಾವ್ನ್ ಕವಿ/ಗೀತ್‌ಕಾರ್ ವಿಲ್ಸನ್, ಕಟೀಲ್ ಸಂಪಾದಕ್ಪಣಾರ್ ವಿಚಾರ್ – ಸಾಹಿತ್ಯ್ – ವಿಜ್ಞಾನ್ ಧ್ಯೇಯ್ ಆನಿ ಧೋರಣಾಖಾಲ್ ಹರ್ ಮ್ಹಯ್ಚ್ಯಾಚ್ಯಾ ಪಯ್ಲ್ಯಾ ತಾರಿಕೆರ್ ಆರ್ಸೊ ಪತ್ರ್ ಫಾಯ್ಸ್ ಜಾತಾ ಆನಿ ಪಾಂಚ್ ತಾರಿಕೆರ್ ಪೋಸ್ಟ್ ಜಾತಾ. ವೈಚಾರಿಕ್ ಲೇಕನಾಂ, ವಿಶ್ಲೇಶಣಾತ್ಮಕ್ ಬರ್ಪಾಂ, ಅಂಕಣಾಂ, ಕಾಣಿ, ಕವಿತಾ, ಪ್ರಬಂದ್ ಆಟಾಪುನ್ ಆಸ್ಚ್ಯಾ ಆರ್ಸೊ ಪತ್ರಾಚಿ ವರ್ಸಾಚಿ ವರ್ಗಣಿ ಫಕತ್ : ರು.500/- ದೋನ್ ವರ್ಸಾಂಕ್ : ರು. 1,000/- ವರ್ಗಣಿ ನೆಟ್ ಬ್ಯಾಂಕಿಂಗ್, ಡೆಬಿಟ್/ ಕ್ರೆಡಿಟ್ ಕಾರ‍್ಡ್ / ಗೂಗಲ್ ಪೇ ವಾ ಹೆರ್ ಖಂಯ್ಚ್ಯಾಯ್ ಯುಪಿಐ ಥಾವ್ನ್ ಭರುಂಕ್ ಜಾತಾ. ವರ್ಗಣಿ ಭರುಂಕ್ ಸಕಯ್ಲೊ ಹೈಪರ್‌ಲಿಂಕ್ ದಾಂಬಾ.
0 comments
Who is that crazy mahan borovpi who has supported this foolish move?
ಸಕಾಳೀಕ್ ಜಾಗ್ವಣಿ ಹಿ. ಮುಖೆಲಿ ಆನಿಂ ಮುಕ್ಕೆಲಿ ಜಾಗೆ ಜಾಯಾ
ಕೊಂಕಣಿ ಕ್ರಿಸ್ತಾಂವ್ ಸಮಾಜೆಂತ್ ಪೊಯ್ಲೆ ಪಾವ್ಟಿಂ ಹಾಂವೆಂ ವಾಸ್ಚೆಂ ಅಸಲೆಂ ಲೇಖನ್. ಹಾಂಗಾಸರ್ ಶ್ರಿ ವಿಲ್ಸನ್ ಹಾಣಿಂ ಕಿತೆಂ ಬೊರೊಯ್ಲಾಂ ೧೦೦% ಖರೆಂ. ತ್ಯಾ ಖಾತಿರ್ ವಿಲ್ಸನ್ ಆನಿಂ ಪರ್ಗಟ್ ಕೆಲ್ಲ್ಯಾ ಆರ್ಸೊ ಹಾಂಕಾಂ ದೊಗಾಂಯ್ಕೀ ಶಾಭಾಸ್ಕಿ ಫಾವೊ.
ಕ್ರಿಸ್ತಾಂವ್ ಸಮಾಜೆಂತ್ ಲೋಕಾ ಮೊದ್ಗೆತಾವ್ನ್ ಉಬ್ಜಾಲ್ಲೆ ಮುಕೆಲಿ ಆಸಾತ್ ? ಆಸ್ಚೆ ಮುಖೆಲಿ ಪಾದ್ರಿಂಚೆ ಲೋಬ್ ದೊರುನ್, ಫಾಯ್ದೊ ಜೊಡುನ್ ವೊಯ್ರ್ ಆಯಿಲ್ಲೆ ಶಿವಾಯ್ ಸ್ವಂತ್ ಸಕ್ತೆಂತ್ ದಿಯೆಸೆಜೆಚಾ ನಿಯಂತ್ರಣಾ ಭಾಯ್ರ್ ರಾಜಕೀಯ್ ಮುಖೇಲ್ ಪಣ್ ದಾಕೈಲ್ಲೆ leaders ಕೊಣೀ ದೀಸಾನಾಂತ್. ನಾಂತ್ ಮುಣ್ ನಹಿಂ. ತಾಂಕಾ ಆಮ್ಚಿ ಕೊಂಕ್ಣಿ ಕ್ರಿಸ್ತಾಂವ್ ಸಮಾಜ್ ಮಾನ್ತಾ ?
ಕಂಯ್ ಪರ್ಯಾಂತ್ ಆಮ್ಚಿ ಸಮಾಜ್ ದಿಯೆಸೆಜಿಚಾ ಚಾವ್ಳೆತಾವ್ನ್ ಬಾಯ್ರ್ ಯೇಂವ್ಕ್ ಸಕಾನಾ ತವೊಳ್ ಮುಣಾಸರ್ ಆಮಿಂ ಪಾದ್ರಿಂಚೆ ಯಾ ಧಾರ್ಮಿಕ್ ಮೊಣ್ಯಾರಾಂಚೆ ಗುಲಾಮ್ ಜಾವ್ನ್ ಉರ್ತೆಲ್ಯಾಂವ್. ಸ್ವಾರ್ಥಿ ಬಿಸ್ನೆಸ್ ಮೊನಿಸ್ ಹಾಚೆ ಫಾಯ್ದೆ ಜೆೊಡ್ತೆಲೆ. ಸಕ್ಕಡ್ ಆಮ್ಚಾ ಕಷ್ಟಾಂಕ್ ಮಾಗ್ಣೆಂ ಮುಳ್ಳೆಂ ಮಾತ್ರ್ ಪರಿಹಾರ್ ಜಾತೆಲೆಂ.
ಆಮಿಂ ಲಾನ್ ಆಸ್ತಾನಾ ಪಾದ್ರ್ಯಾಬ್ ಆಮ್ಕಾಂ ಯಕ್ಷಗಾನ ಪೊಳೊಂವ್ಕ್ ವೊಚೊನೊಜೊ, ಕೋಲ ಪೊಳೊಂವ್ಕ್ ವೊಚೊನೊಜೊ ಮುಣ್ ತಾಕಿತ್ ದೀತಾಲೆ. ತೆಂ ಪುರಾ ದೆಂವ್ಚಾರಾಚೆ ಮುಣ್. ಕಸಲೆಂ ಆಶೀರ್ ಮನೋಭಾವ್. ಧರ್ಮಾಂದರು ಮುಣ್ ಹಾಂಕಾಚ್ಚ್ ಮುಣ್ಚೆಂ. ಆಮ್ಚಾ ಗಾಂವ್ಚಿ. ಆಮ್ಚಾ ಪುರ್ವೊಜಾಂಚಿ ಸಂಸ್ಕ್ರತಿ ಮುಣ್ ಹಾಂಚಾ communal ಮಾಂಡ್ಯಾಂಕ್ ಕಳ್ಚೆಂ ಮುಳ್ಳ್ಯಾರೀ ಕಶೆಂ?
ಹೆ ಮುಕ್ಕೆಲಿ ಆತಾಂ ಸಂಘನಿಕೇತನಾಂತ್ ಗಣಪತಿಕ್ ಮಾನ್ ದೀಂವ್ಕ್ ಯೇತಾತ್ ಕಿತ್ಯಾಕ್ ಮುಳ್ಳ್ಯಾರ್ ತೆಂ ಉಂಚ್ಲ್ಯಾ ಜಾತಿಚಾ ಹಿಂದ್ವಾಂಚೆಂ. ಆಮ್ಚಾ ಕೊಂಕ್ಣಿ ಕಥೋಲಿಕ್ ಸಮಾಜೆಂತ್ ವರ್ಣಾಶ್ರಮ ರಿವಾಜ್ ಜಾರಿ ದೊವೊರಿಲ್ಲಿ ಹ್ಯಾಚ್ಚ್ ಜಾತಿ ತಾವ್ನ್ ಉಬ್ಜಾಲ್ಯಾ ಪಾದ್ರಿನಿಂ ಆನಿಂ ಲಾಯ್ಕಾನಿಂ. ಕಶೆಂ ಹಿಂದು ಸಮಾಜೆಕ್ 5% ಆಸ್ಚಾ ಹಾಣಿಂ ಮುಟಿಂತ್ ದರ್ಲೊಗೀ ಕಥೆೊಲಿಕ್ ಸಮಾಜೆಂತೀ ತೆಂಚ್ಚ್ ಕೆಲೆಂ. ಆಸಲ್ಯಾ ಸಮಾಜೆಂತ್ ನೀಜ್ ಮುಕೆಲಿ ಉಬ್ಜೆೊಂಚೆ ಕಶೆಂ.
ಆರ್ಸ್ಯಾಂತ್ ಆಸಲಿಂ ಬೆೊರ್ಯಾ ಚಿಂತ್ಪಾಚಿ ಲೇಖನಾ ಮುಕಾರೀ ಯೇವ್ನ್ ಆಸೊಂದಿ. ತಶೆಂ ಪುಣಿ ಆಮ್ಚೆ ಯುವಜಣ್ ಕ್ರಿಸ್ತಾಂವ್ ಸಮಾಜೆಚೆ ನೀಜ್ ಮುಕೆಲಿ ಮಾತ್ರ್ ನಹಿಂ ಬಗಾರ್ ಆಖ್ಯಾ ಆಮ್ಚಾ ತುಳುನಾಡು ಸಮಾಜೆಚೆ ಮುಕೆಲಿ ಜಾವ್ನ್ ಮುಕಾರ್ ಯೇಂವ್ದಿತ್.
I agree with all of this. But I have a something to add to the first point. I have been to enough retreats where we have been preached not to “worship” the gods of other religion because that becomes Satan worship. Don’t eat their Prasad, don’t give offerings because if we do we break the first commandment about one true god. There have been so many instances in the past where I have refused their delicious Prasad because of these preachers. Now I don’t care.
There was even one who said we have so many problems maybe because we did this in the past and so we need to repent and all our problems will go away.
But at the same time when priests start going to those statues, give offerings, offer flowers, join their hands in front of them etc people are going to question it because they have been brainwashed to believe the above and suddenly this priest is doing the opposite.
I don’t blame lay people for questioning that move because of their blatant hypocrisy. They’ll talk about the people of other religions praying to our gods and saints but then order us to not do it to their statues and they they go in their white robes and do this.
We are fighting now who went were and whether it is correct or not. But during the same period a case was registered against a couple Maxim Joseph Noronha and Sunitha Marina Noronha who were made to wait for 4 days for getting signature from the Mangalore tashildarfor their childrens scholarship. The last date was submission was 30 Sep, but they could not get the papers signed. Finally they were arrested for asking their right. Did anyone of our christian leader /politician hear about this and go to police station to ask why they were arrested and kept in judicial custody. None did.Our christian lawyers also did not jump in. Advocate Mohandas Pai argued in favour of the accused and got them released. We write long sermons regarding who is right or wrong but nobody strongly writes about this unjust case. It is just a news item for us.