ರಾತಿಚೆಂ ಮಾಗ್ಣೆಂ ರಜಾರ್ ಜಾಲ್ಲೆಂ. ಮಂಗ್ಳಾರಾಚೊ ದೀಸ್ ಜಾಲ್ಲ್ಯಾನ್ ಹಿಲ್ಡಾಕ್ ಸಾಂತ್ ಆಂತೊನಿಚೆರ್ ಭಾರಿಚ್ಚ್ ಪಾತ್ಯೆಣಿ ಆನಿ ಮೋಗ್ ಆಸ್‌ಲ್ಲ್ಯಾನ್ ಸಾಂತ್ ಆಂತೊನಿಚೆಂ ನೊವೆನ್ ತಾಣಿ ಕೆಲ್ಲೆಂ. ಚಡಾವತ್ ಜೆಜುಚ್ಯಾ ಪವಿತ್ರ್ ಕಾಳ್ಜಾಚೊ ತೇರ‍್ಸ್ ತಿಂ ಕರ‍್ತಾತ್ ತರ್‌ಯ್ ಆಜ್ ಧುವಾಂನಿ ಮಾಗ್ಣೆಂ ಚಡ್ ಜಾಲೆಂ ಮ್ಹಣ್ ತೋಂಡ್ ವಾಂಕ್ಡೆ ಕೆಲ್ಲ್ಯಾನ್ ’ತೊ ತೇರ‍್ಸ್ ನಾಕಾ’ ಮ್ಹಣ್ ಚಿಕ್ಕೆ ಮಟ್ವೆಂ ರಜಾರ್ ಕರ‍್ನ್ ಮಾಗ್ಣೆಂ ಸಂಪಯಿಲ್ಲೆಂ ಹಿಲ್ಡಾನ್.

ಜೆವ್ಣಾಚಿ ತಯರಾಯ್ ಕರ‍್ಚ್ಯಾ ಖಾತಿರ್ ಮಾಸ್ಳಿ ಭಾಜುಂಕ್ ಕುಜ್ನಾಕ್ ಗೆಲ್ಲಿ ಹಿಲ್ಡಾ ಘೊವಾಚಿ ಬೊಬಾಟ್ ಆಯ್ಕೊನ್ ತಶಿಚ್ಚ್ ಘುಂವ್ಲಿ ಆನಿ ಭಾಯ್ರ್ ಆಯ್ಲಿ. ಮೆಲಿಸ್ಸಾ ಘರ‍್ಚ್ಯಾ ಪಯ್ಲ್ಯಾ ಮಾಳಿಯೆರ್ ಆಸ್ಚ್ಯಾ ಆಪ್ಲ್ಯಾ ಖಾಸ್ಗಿ ಕುಡಾಚ್ಯಾ ಬಾಗ್ಲಾಚೆರ್ ಪಾವ್‌ಲ್ಲೆಂ, ಬಾಪಾಯ್ಚೊ ತಾಳೊ ಆಯ್ಕೊನ್ ತೆಂಯ್ ಘುಂವ್ಲೆಂ ಆನಿ ಸರಾರಾಂ ಮೆಟಾಂ ಕಾಡ್ನ್ ದೆವೊನ್ ಸಕಯ್ಲ್ ಆಯ್ಲೆಂ.

ಮಸ್ಕತಾಂತ್ ಎಕಾ ಬರ‍್ಯಾ ಕಂಫ್ಣೆಂತ್ ಬರ‍್ಯಾ ಕಾಮಾರ್ ಆಸ್ಚೊ ದೊಮಿನಿಕ್ ಕಾಡ್ದೊಸ್ ವರ‍್ಸಾಚ್ಯಾ ರಜೆರ್ ಗಾವಾಕ್ ಆಯಿಲ್ಲೊ. ತೇರ‍್ಸ್-ರಜಾರ್ ಕರ‍್ತಾನಾ ಸಾಲಾಂತ್ಲ್ಯಾ ಸೊಫಾಚೆರ್ ತೊ ಬಸೊನ್ ಅಸ್‌ಲ್ಲೊ. ಮಾಗ್ಣೆಂ ಜಾತಚ್ಚ್ ಥಂಯ್ಚ್ ಬಸೊನ್ ಆಪ್ಲೆಂ ಮೊಬಾಯ್ಲ್ ಘೆವ್ನ್ ಆಯಿಲ್ಲೆ ಸಂದೇಶ್ ಪಳವ್ನ್ ಆಸ್‌ಲ್ಲೊ. ತೊ ಬಸೊನ್ ಆಸ್‌ಲ್ಲ್ಯಾ ದೆಗೆಚ್ಯಾ ಸೊಫಾಚೆರ್ ತಾಚಿ ದುಸ್ರಿ ಧು ಮೇಘನ್ ಬಸೊನ್ ಆಸ್‌ಲ್ಲೆಂ.

ಟೆರೆಸಾಚೆಂ ವ್ಹಡ್ ಘರ್ ತಾಂಚೆ. ಸಕಯ್ಲ್ ಸಾದಾರ‍್ನ್ ಬರೆಂ ರೂಂದ್ ಸಾಲ್, ಕುಸಿನ್ ಕುಜ್ನ್ ಆನಿ ಸಾಲಾಕ್ ಲಾಗೊನ್‍ಂಚ್ಚ್ ಆಯಿಲ್ಲ್ಯಾ ಸಯ್ರ್ಯಾಂ ಖಾತಿರ್ ಏಕ್ ನಿದ್ಚೆಂ ಕೂಡ್ ತರ್ ಪಯ್ಲ್ಯಾ ಮಾಳಿಯೆರ್ ತೀನ್ ನಿದ್ಚಿಂ ಕುಡಾಂ ಆನಿ ಏಕ್ ಕುಟ್ಮಾ-ಸಾಲ್. ದೊಮಿನಿಕ್ ಕಾಡ್ದೊಸಾಕ್ ಬರಿ ಜೋಡ್ ಆಸ್‌ಲ್ಲ್ಯಾನ್ ಘರ್ ಬರೆಂಚ್ಚ್ ನಾಜೂಕಾಯೆನ್ ಮಾಂಡುನ್ ದವರ್‌ಲ್ಲೆಂ. ಘರಾ ಭಾಯ್ಲ್ಯಾನ್ ಆಸ್‌ಲ್ಲ್ಯಾ ತೀನ್ ಎಕ್ರ್ಯಾ ವಿಸ್ತಾರ್ ಜಾಗ್ಯಾರ್ ಫುಲಾಂ ತೊಟಾಂ ತಶೆಂಚ್ಚ್ ಥೊಡೆ ಮಾಡ್, ಆಂಬೆ-ಪೊಣ್ಸಾಚೆ ರೂಕ್ ಮಾತ್ರ್ ನ್ಹಯ್ ಜಾಯ್ತ್ಯಾ ನಮೂನ್ಯಾವಾರ್ ಫಳಾಂಚೆ ರೂಕ್ ಆಸ್‌ಲ್ಲೆ. ಜಾಗ್ಯಾಚ್ಯಾ ಪೊಂತಾರ್ ರೂಂದ್ ಬಾಂಯ್ ಆಸ್‌ಲ್ಲಿ.

” ಹಾಂವೆ ಹಾಕಾ ಪಯ್ಲೆಂಚ್ಚ್ ಸಾಂಗ್ಲಾಂ….” ದೊಮಿನಿಕ್ ಕಾಡ್ದೊಸ್ ಪರತ್ ಘರಾಜ್ಲೊ. ಹ್ಯಾ ವೆಳಿಂ ಆಪ್ಲ್ಯಾ ಪತಿಣ್ ಹಿಲ್ಡಾಚ್ಯಾ ಆನಿ ಮಾಲ್ಘಡಿ ಧು, ಮೆಲಿಸ್ಸಾಚ್ಯಾ ತೊಂಡಾಂಕ್ ರಾಗಾನ್ ತೊ ಪಳಯ್ತಾಲೊ. “ತ್ಯಾ ಫೆರ‍್ನಾಂದಾಗೆಲ್ಯಾ ಕುಟ್ಮಾ ಲಾಗಿಂ ಆಮ್ಕಾಂ ಸಂಬಂಧ್ ನಾಕಾ ಆನಿ ಸಂಬಂಧ್ ದವರುಂಕ್‍ಯ್ ಹಾಂವ್ ಆಶೆನಾ…..ಅಶೆಂ ಆಸ್ತಾನಾ ಹೆಂ ಮೇಘನ್ ಡೆನ್ಜಿಲಾಚ್ಯಾ ಮೊಗಾರ್ ಪಡ್ಲಾಂ ಕಂಯ್ ಆನಿ ತಾಚ್ಯಾಚ್ಚ್ ಲಾಗಿಂ ಕಾಜಾರ್ ಜಾತಾ ಮ್ಹಣ್ತಾ……. ಹೆಂ ಅಸಾಧ್ಯ್…. ಆಮ್ಚ್ಯಾ ಕುಟ್ಮಾಚ್ಯಾ ಮರ‍್ಯಾದೆ ಖಾತಿರ್ ಪುಣಿ ತಾಣೆ ಹೊ ಸಂಬಂಧ್ ತುಟಯ್ಜಯ್….. ಆಮ್ಚ್ಯಾ ಕುಟ್ಮಾಚ್ಯಾ ಬರೆಂಪಣಾಖಾತಿರ್…. ತಾಣೆ ಡೆನ್ಜಿಲಾಕ್ ಸಾಂಡಿಜಯ್….”

ಹಿಲ್ಡಾನ್ ಯಾ ಮೆಲಿಸ್ಸಾನ್ ಕಿತೆಂಚ್ಚ್ ವಿಚಾರ‍್ಚ್ಯಾ ಪಯ್ಲೆಂಚ್ಚ್ ದೊಮಿನಿಕ್ ಕಾಡ್ದೊಸ್ ಪಟಾಫಟ್ ಉಲಯ್ಲೊ.

ಮೆಘನಾನ್ ಡೆನ್ಜಿಲಾ ಲಾಗಿಂ ಮೋಗ್ ಕರ‍್ನ್ ಕಾಜಾರ್ ಜಾಂವ್ಕ್ ಆಶೆಂವ್ಚ್ಯಾ ವಿಶ್ಯಾಂತ್ ಹಿಲ್ಡಾಕ್ ಆನಿ ತಶೆಂಚ್ಚ್ ಮೆಲಿಸ್ಸಾಕ್  ಪಯ್ಲೆಂಚ್ಚ್ ಕಳಿತ್ ಆಸ್‌ಲ್ಲೆಂ. ದೋನ್ ಮ್ಹಹಿನ್ಯಾಂ ಪಯ್ಲೆಂ ಬೆಂಗ್ಳುರ್ ಥಾವ್ನ್ ಗಾವಾಕ್ ಆಯಿಲ್ಲ್ಯಾ ವೆಳಿಂ ಮೆಘನಾನ್ ಆವಯ್ಕ್ ಆನಿ ವಡ್ಲ್ಯಾ ಭಯ್ಣಿಕ್ ಹ್ಯಾ ವಿಶ್ಯಾಂತ್ ಕಳಯಿಲ್ಲೆಂ. ಮೆಘನಾಕ್ ಸಮಧಾನೆನ್ ಸಮ್ಜೊಂವ್ಕ್ ತಾಣಿಂ ದೊಗಾಂಯ್ನಿ ಪ್ರೇತನ್ ಕೆಲ್ಲೆಂ ತರ್‌ಯ್ ತೆಂ ಆಯ್ಕಾಲ್ಲೆಂ ನಾ.

ಹ್ಯಾ ವಿಶಿಂ ದೊಮಿನಿಕ್ ಮಸ್ಕತಾಂತ್ ಕಾಮಾರ್ ಆಸ್ತಾನಾ ತಾಣಿ ತಾಕಾ ಕಿತೆಂಚ್ಚ್ ಸಾಂಗ್‌ಲ್ಲೆಂ ನಾ. ಸಾಂಗ್ಲ್ಯಾರ್ ತೊ ಕಶೆಂ ಕಾಣ್ಘೆತಲೊ ಕೊಣ್ಣಾ ಮ್ಹಣ್ ತಿಂ ಭಿಯೆಲ್ಲಿಂ.

ಸರ‍್ವಾಂಚ್ಯಾ ಮತಿಂನಿ ಉದೆಲ್ಲಿಂ ವಾದಾಳಾಂ ಆತಾಂ ಚಡ್ ಜಾವ್ನ್ ಉಂಚಾಂಬಳ್ ಜಾಲಿಂ…. ಎಕಾಮೆಕಾಕ್ ಪಳವ್ನ್‌ಂಚ್ಚ್ ತಿಂ ಬಸ್ಲಿಂ…..

ದೊಮಿನಿಕ್ ಕಾಡ್ದೊಸ್ ಮಸ್ಕತಾಂತ್ ಜಾಯ್ತ್ಯಾ ವರ‍್ಸಾಂ ಥಾವ್ನ್ ಬರ‍್ಯಾ ಕಂಫ್ಣೆಂತ್ ಕಾಮ್ ಕರುನ್ ಆಸ್‍ಲ್ಲೊ. ಬರ‍್ಯಾ ಹುದ್ಧ್ಯಾರ್ ಆಸ್‌ಲ್ಲ್ಯಾನ್ ಬರೊ ಸಾಂಬಾಳ್ ಆನಿ ಸವ್ಲತ್ಯೊಯ್ ತಾಕಾ ಆಸ್‌ಲ್ಲ್ಯೊ. ತಾಂಕಾ, ಮ್ಹಳ್ಯಾರ್ ದೊಮಿನಿಕ್ ಆನಿ ಹಿಲ್ಡಾಕ್ ದೊಗಾಂ ಚೆಡ್ವಾಂ ಭುರ‍್ಗಿಂ ದೆವಾನ್ ಫಾವೊ ಕೆಲ್ಲಿಂ. ಮಾಲ್ಗಡೆಂ ಮೆಲಿಸ್ಸಾ ಆನಿ ದುಸ್ರೆಂ ಮೇಘನ್.

ಬಾರಾವ್ಯಾ ವರ‍್ಗಾಂತ್ ಶಿಕ್ತಾ ವರೇಗ್ ದೊಗಾಂಯ್ ಭುರ‍್ಗಿಂ ಮಸ್ಕತಾಂತ್ ಶಿಕ್‌ಲ್ಲಿಂ ತರ್ ಉಪ್ರಾಂತ್ ತಾಂಚೆ ಶಿಕಾಪ್ ಕೊಡ್ಯಾಳಾಂತ್ ಮುಂದರ‍್ಸುನ್ ವರ‍್ಚ್ಯಾಕ್ ಹಿಲ್ಡಾ ಭುರ‍್ಗ್ಯಾಂಕ್ ಘೆವ್ನ್ ಗಾವಾಕ್ ಆಯಿಲ್ಲಿ. ಹಿಲ್ಡಾನ್‌ಂಚ್ಚ್ ಖುಶೆನ್ ಮಸ್ಕತಾಕ್ ಆದೇವ್ಸ್ ಮಾಗ್‌ಲ್ಲೊ – ಭುರ‍್ಗ್ಯಾಂಚ್ಯಾ ಬರೆಂಪಣಾ ಖಾತಿರ್. ಕುಟ್ಮಾ ವಿಸಾ ಆಸ್‍ಲ್ಲ್ಯಾನ್ ತಿ ನವೀಕ್ರತ್ ಕರುಂಕ್ ದೋನ್ ವರ‍್ಸಾಂಕ್ ಏಕ್ ಪಾವ್ಟಿಂ ತಿಂ ಸರ‍್ವಾಂ ಮಸ್ಕತಾಕ್ ವೆತಾಲಿಂ. ಎಕ್ವೀಸ್ – ಬಾವೀಸ್ ವರ‍್ಸಾಂ ಜಾಲ್ಯಾ ಉಪ್ರಾಂತ್ ಭುರ‍್ಗ್ಯಾಂಕ್ ಕುಟ್ಮಾ ವಿಸಾ ಮೆಳಾನಾತ್‌ಲ್ಲ್ಯಾನ್ ತಿತ್ಲಿ ಪ್ರಾಯ್ ಜಾಲ್ಲಿಚ್ಚ್ ಮೆಲಿಸ್ಸಾ ಆನಿ ಮೇಘನ್ ಭೆಟೆ ವಿಸಾಚೆರ್ ಮಸ್ಕತಾಕ್ ವೆತಾಲಿಂ. ಮೆಲಿಸ್ಸಾ ದಾಂತಾಚೆಂ ದಾಕ್ತೆರ‍್ನ್ ಜಾಲ್ಲೆಂ ತರ್ ಮೆಘನಾನ್ ಮಣಿಪಾಲ್ ಶ್ಹೆರಾಂತ್ಲ್ಯಾ ಖ್ಯಾತ್ ಶಿಕ್ಪಾ-ಸಂಸ್ಥ್ಯಾಂತ್ ಎಲೆಕ್ಟ್ರೊನಿಕ್ ಇಂಜಿನಿಯರಿಂಗ್ ಶಿಕಾಪ್ ಕಾಬಾರ್ ಕೆಲ್ಲೆಂ.  ಕೊಡ್ಯಾಳ್ ಶ್ಹೆರಾ ಥಾವ್ನ್ ಭಾಯ್ರ್ ಒಮ್ಜೂರಾಂತ್ ತೀನ್ ಎಕ್ರೆ ಜಾಗೊ ಘೆವ್ನ್ ತಾಂತು ಟೆರೆಸಾಚೆಂ ಬರೆಂ ಘರ್ ಬಾಂಧುನ್ ದೊಮಿನಿಕ್ ಕಾಡ್ದೊಸಾಚೆಂ ಕುಟಾಂಬ್ ಆಸ್‌ಲ್ಲೆಂ.

ಮೆಲಿಸ್ಸಾ ದಾಂತಾಚೆಂ ದಾಕ್ತೆರ‍್ನ್ ಜಾಲ್ಲ್ಯಾನ್ ತಾಕಾ ಬೆಂಗ್ಳುರಾಂತ್ ಬರ‍್ಯಾ ಖಾಸ್ಗಿ ಆಸ್ಪತ್ರೆಂತ್ ಕಾಮ್ ಮೆಳ್ಳೆಂ ಆನಿ ತಶೆಂಚ್ಚ್ ಮೆಘನಾಕ್ ಎಲೆಕ್ಟ್ರೊನಿಕ್ ಸಿಟಿಂತ್ ನಾಂವಾಡ್ದಿಕ್ ಅಂತರಾಷ್ಟ್ರೀಯ್ ಕಂಪ್ಣೆಂತ್ ಕಾಮ್. ಧುವಾಂಕ್ ರಾವೊಂಕ್ ಮ್ಹಣ್ ಬೆಂಗ್ಳುರಾಂತ್ ಬರೆಂಚ್ಚ್ ದೋನ್ ನಿದ್ಚ್ಯಾ ಕುಡಾಂಚೆ ಪ್ಲ್ಯಾಟ್ ದೊಮಿನಿಕಾನ್ ಕಾಣ್ಘೆಲ್ಲೆಂ.

ವಾಡೊನ್ ಆಯಿಲ್ಲ್ಯಾ ಧುವಾಂಕ್ ಕಾಜಾರ್ ಕರಿಜಯ್ ಮ್ಹಳ್ಳ್ಯಾ ಆಶೆನ್ ಆಸ್‌ಲ್ಲ್ಯಾ ದೊಮಿನಿಕಾನ್ ಆಪ್ಲ್ಯಾ ಮಿತ್ರಾಂ ಲಾಗಿಂ ಆನಿ ವಳ್ಕಿಚ್ಯಾಂ ಲಾಗಿಂ ಸಾಂಗ್ತಾನಾ ಎಕಾ ವಳ್ಕಿಚ್ಯಾ ಪಾದ್ರಿ ಮುಕಾಂತ್ರ್ ಕ್ಲಿಫರ‍್ಡ್ ಆನಿ ಡೊರತಿ ಫೆರ‍್ನಾಂದಾಚ್ಯಾ ಮಾಲ್ಘಡ್ಯಾ ಪುತಾಚಿ, ಡೆಲ್‌ರೊಯಾಚಿ ಸೈರಿಕ್ ಆಯ್ಲಿ.

ಅಬುದಾಬಿಂತ್ ವ್ಹಡ್ ತೆಲಾ ಕಂಪ್ಣೆಂತ್ ಬರ‍್ಯಾ ಹುದ್ದ್ಯಾರ್ ಆಸ್‌ಲ್ಲ್ಯಾ ಕ್ಲಿಫರ‍್ಡ್ ಫೆರ‍್ನಾಂದಾಕ್ ದೋಗ್ ಜಣ್ ಚೆರ‍್ಕೆ ಭುರ‍್ಗೆ. ಮಾಲ್ಘಡೊ ಡೆಲ್‌ರೊಯ್ ತರ್ ದುಸ್ರೊ – ಡೆನ್ಜಿಲ್.  ತಾಂಚೆ ಬಿಡಾರ್, ಮ್ಹಳ್ಯಾರ್ ಬಂಗ್ಲೊ, ಬೆಂಗ್ಳುರ‍್ಚ್ಯಾ ನಾಂವಾಡ್ದಿಕ್ ವಸ್ತೆ ಜಾಗ್ಯಾಂಚ್ಯಾ ಎಕಾ ವಾಂಟ್ಯಾಂತ್ ಆಸ್‌ಲ್ಲೆಂ.  ದೋಗೀ ಪೂತ್ ಬೆಂಗ್ಳುರಾಂತ್ ಶಿಕ್‌ಲ್ಲೆ ಆನಿ ಬೆಂಗ್ಳುರ್‌ಚ್ಚ್ ಕಾಮಾರ್ ಆಸ್‌ಲ್ಲೆ.

ಮೆಲಿಸ್ಸಾಕ್ ಡೆಲ್‌ರೊಯ್‌ಚಿ ಸೈರಿಕ್ ಆಯ್ಲ್ಯಾ ಉಪ್ರಾಂತ್ ದೋನಿಂ ಕುಟ್ಮಾಂ ಎಕಾಮೆಕಾ ಭೆಟ್ ದೀವ್ನ್ ಕುಟ್ಮಾಂ ಪಸಂಧ್ ಜಾವ್ನ್ ತಾಂಚ್ಯಾ ಕಾಜಾರಾಕ್ ವೊಪ್ವಾಲಿಂ. ಖರಾರ್ ಜಾಲೆಂ.

ಕಾಜಾರ್ ಎಕಾ ವರ‍್ಸಾ ಉಪ್ರಾಂತ್ ಬೆಂಗ್ಳುರಾಂತ್ ಜಾಂವ್ಚೆಂ ಮ್ಹಣ್ ಜಾಯ್ ಜಾಲ್ಲಿ ತಯರಾಯ್ ಸುರು ಜಾಲಿ. ದೋನಿ ಕುಟ್ಮಾಂ ಅನ್ಕುಲ್‍ವಂತ್ ಜಾಲ್ಲ್ಯಾನ್ ಲಗ್ನ್ ಗಡ್ದ್ ಜಾಯ್ಜಯ್, ಮಸ್ಕತ್ ತಶೆಂ ಅಬುದಾಭಿಂತ್ ಆಸ್ಚ್ಯಾ ತಾಂಚ್ಯಾ ತಾಂಚ್ಯಾ ವಳ್ಕಿಂಚ್ಯಾಂಕ್ ಆನಿ ಇಷ್ಟಾಂ-ಮಂತ್ರಾಂಕ್ ಆಪವ್ಣೆಂ ದೀಜಯ್ ಮ್ಹಳ್ಳಿ ತಾಂಚಿ ಆಶಾ ಜಾವ್ನಾಸ್‌ಲ್ಲಿ.

ತಯರಾಯೆಚ್ಯಾ ಸಂಗ್ತಿಂತ್ ದೊಮಿನಿಕ್ ಕಾಡ್ಡೊಸ್ ತಶೆಂ ಕ್ಲಿಫರ‍್ಡ್ ಫೆರ‍್ನಾಂದ್ ವರ‍್ಸಾ ಮಧೆಂ ಗಾವಾಕ್ ಆಯಿಲ್ಲ್ಯಾ ವೆಳಿಂ ದೊನಿಂ ಕುಟ್ಮಾಂ ಭಾರಿಚ್ಚ್ ಮೊಗಾನ್ ಸಾಂಗಾತಾ ಮೆಳ್ಳಿಂ. ತ್ಯಾ ವೆಳಿಂ, ಕ್ಲಿಫರ‍್ಡ್ ಫೆರ‍್ನಾಂದ್ ಖುಶಲಾಯೆನ್ ಆನಿ ತಶೆಂಚ್ಚ್ ಬರ‍್ಯಾ ಮನಾನ್ ಸಾಂಗ್ತಾಲೊ – “ತುಮ್ಚ್ಯಾ ಮಾಲ್ಘಡ್ಯಾ ಧುವೆಕ್ ಆಮ್ಚ್ಯಾ ಮಾಲ್ಘಡ್ಯಾ ಪುತಾಕ್ ದಿತಾಂವ್ ಆನಿ ದೆವಾನ್ ಬರೆಂ ಮ್ಹಳೆಂ ತರ್ ದುಸ್ರ್ಯಾ ಪುತಾಕ್ ತುಮ್ಚ್ಯಾ ದುಸ್ರ್ಯಾ ಧುವೆಕ್ ದಿಲ್ಯಾರ್ ಬರೆಂಚ್ಚ್…. ಆಮ್ಚ್ಯಾ ಕುಟ್ಮಾಂ ಮಧ್ಲೊ ಬಾಂಧ್ ಆನಿ ಸಂಬಂಧ್ ಬಾರಿಚ್ಚ್ ಬಳ್ವಂತ್ ಜಾತಲೊ…. ಡೆನ್ಜಿಲ್ ಆನಿ ಮೇಘನ್ ಭಾರಿಚ್ಚ್ ಅಪುರ‍್ಭಾಯೆಚಿಂ ಭುರ‍್ಗಿಂ…..”

ದೊಮಿನಿಕ್ ಆನಿ ಹಿಲ್ಡಾ ಕಾಡ್ದೊಸಾನ್ ಹೊ ವಿಶಯ್ ಕಾಂಯಿಂಚ್ಚ್ ಗಂಭೀರಾಯೆನ್ ಕಾಣ್ಘೆಂವ್ಕ್ ನಾತ್‌ಲ್ಲೊ ತರಿಪುಣ್ ತಶೆಂ ಜಾಲ್ಯಾರ್ ಬರೆಂಚ್ಚ್ ಮ್ಹಣ್ ತಾಂಚ್ಯಾ ಮತಿಂತ್ ಆಸ್‌ಲ್ಲೆಂ. ಅಸಲೆಂ ಘನೆಸ್ತ್ ಕುಟಾಂಬ್ ಸೊದುನ್ ಗೆಲ್ಯಾರ್‌ಯ್ ಖಂಯ್ ಮೆಳ್ತಾ ಮ್ಹಳ್ಳೆಂ ತಾಂಚೆ ಚಿಂತಾಪ್.

ತಯರಾಯ್ ಜಾವ್ನ್ ಆಸ್ತಾನಾಂಚ್ಚ್, ಎಕಾ ದಿಸಾ ಮೆಲಿಸ್ಸಾ ಆಚಾನಕ್ ಬೆಂಗ್ಳುರ್ ಥಾವ್ನ್ ಗಾವಾಕ್ ಘರಾ ಆಯ್ಲೆಂ. ಆಪ್ಣಾಕ್ ಡೆಲ್‌ರೋಯ್ ಲಾಗಿಂ ಕಾಜಾರ್ ಜಾಂವ್ಕ್ ಮನ್ ನಾ ಮ್ಹಣ್ ತಿಳ್ಸಿಲಾಗ್ಲೆಂ ಆನಿ ಹ್ಯಾ ವಿಶಿಂ ಡೆಲ್‌ರೋಯ್ ತಿಳ್ಸಿಲಾಂ ಆನಿ ತಾಣೆ ತಾಚ್ಯಾ ಕುಟ್ಮಾಕ್.

ಘರಾಂತ್ ಘಡ್ಘಡೊ ಪುಟ್ಲೊ. ಶಾಂತ್ ಆಸ್‌ಲ್ಲ್ಯಾ ತಾಂಚ್ಯಾ ಘರಾಂತ್ ವಾದಾಳಾಂ ಉದೆಲಿಂ.

ದೊಮಿನಿಕ್ ತಕ್ಷಣ್ ಗಾವಾಕ್ ಆಯ್ಲೊ. ತಶೆಂಚ್ಚ್, ಅಬುದಾಬಿ ಥಾವ್ನ್ ಕ್ಲಿಫರ‍್ಡ್ ಫೆರ‍್ನಾಂದ್ ಬೆಂಗ್ಳುರಾಕ್ ಪಾವ್ಲೊ.

ದೋನಿಂ ಕುಟ್ಮಾಂ ಸಾಂಗಾತಾ ಮೆಳ್ಳಿಂ ನಾಂತ್ ಪುಣ್ ತಾಂಚ್ಯಾ ಮಧೆಂ ಉಲವ್ಣ್ಯಾಂತ್ ಉಜೊಚ್ಚ್ ಪೆಟ್ಲೊ. ಫೊನಾಂಚೆರ್ ಖಜ್ನೆ ಪುಟ್ಲೆ.

ಕ್ಲಿಫರ‍್ಡ್ ಫೆರ‍್ನಾಂದ್ ವಾಗ್‌ಚ್ಚ್ ಜಾಲ್ಲೊ. ಮೆಲಿಸ್ಸಾ ಕಿತ್ಯಾಕ್ ಕಾಜಾರ್ ಜಾಂವ್ಕ್ ಆಶೆನಾ ಮ್ಹಣ್ ಕಡಾಕಡ್ ಕಳಿತ್ ಜಾಯ್ಜಯ್ ಮ್ಹಣ್ ತಾಣೆಂ ವಿಚಾರ‍್ಲೆಂ. “ಮ್ಹಾಕಾ ಸಗ್ಳ್ಯಾ ಅಬುದಾಬಿಂತ್ ಇತ್ಲೊ ಮಾನ್ ಆಸಾ….  ಕೊಂಕ್ಣಿ ಸಮಾಜ್ ತಶೆಂ ಕಂಪ್ಣೆಂತ್ ಮ್ಹಾಕಾ ವಳ್ಕಾತಾತ್….ಮಾನ್ ಬಾಗಾಯ್ತಾತ್…. ಪುತಾಚೆಂ ಕಾಜಾರ್ ಮ್ಹಣ್ ಹಾಂವೆ ಸರ‍್ವಾಂಕ್ ಸಾಂಗ್ಲಾಂ…. ಜಾಯ್ತೆ ಜಣ್ ಕಾಜಾರಾಕ್ ಯೆಂವ್ಚ್ಯಾ ತಯರಾಯೆರ್ ಸಯ್ತ್ ಆಸಾತ್ ಆನಿ ಆತಾಂ ಹೆಂ ಲಗ್ನ್‌ಚ್ಚ್ ಜಾಯ್ನಾ ಮ್ಹಳ್ಯಾರ್ ಮ್ಹಜ್ಯಾ ತೊಂಡಾಕ್ ಘಸ್ ಪುಸ್‌ಲ್ಲ್ಯಾ ಬರಿ….”

ಕಾರಣ್ ಇತ್ಲೆಂಚ್ಚ್… ಭಾರಿಚ್ಚ್ ಸಾದೆಂ ಆನಿ ಸಂಪೆಂ…. ಮೆಲಿಸ್ಸಾಕ್ ತೆಂ ಕಾಮ್ ಕರ‍್ಚ್ಯಾ ಆಸ್ಪತ್ರೆಂತ್ಲ್ಯಾ ಎಕಾ ದಾಕ್ತೆರಾಚಿ ವಳಕ್ ಜಾಲ್ಲಿ ಆನಿ ಎಕಾಮೆಕಾ ಪಸಂಧ್ ಜಾವ್ನ್ ತಾಣಿ ತಾಂಚಿ ಜಿಣಿ ಸಾಂಗಾತಾ ಜಿಯೆಂವ್ಕ್ ನಿರ‍್ಧಾರ್ ಕೆಲ್ಲೊ. ದಾಕ್ತೆರಾಕ್ ದಾಕ್ತೆರ್ ಪಸಂಧ್ ಜಾಂವ್ಚ್ಯಾಕ್ ಕಾಂಯ್ ನವಾಲ್ ನಾ ನ್ಹಯ್‌ಂಗೀ? ತಿಂ ಕಾಜಾರ್ ಜಾಂವ್ಕ್ ಆಶೆತಾಲಿಂ. ಅಶೆಂ ಜಾಂವ್ಕ್ ನಜೊ ಆಸ್‌ಲ್ಲೆಂ ಪುಣ್ ವಿಧಿನ್ ಕಿತೆಂಯ್ ಬರಯ್ಲಾಂ ತರ್ ತೆಂ ನಿಸ್ರಾಂವ್ಕ್ ಆಮ್ಕಾಂ ಸಾಧ್ಯ್ ಆಸಾ?? ಬಿಲ್ಕುಲ್ ನಾ…!!!

ಹೆಂ ಕಾರಣ್ ಆಯ್ಕೊನ್ ಕ್ಲಿಫರ‍್ಡ್ ಫೆರ‍್ನಾಂದ್ ವಾಗಾ ನಾಚ್ ನಾಚ್ಲೊ. ಆಪ್ಣಾಚ್ಯಾ ಆನಿ ಕುಟ್ಮಾಚ್ಯಾ ಮಾನಾಚ್ಯಾ ಪಡ್ದ್ಯಾಕ್ ಕಾಳಿ ಘಸ್ ಪುಸುಲ್ಲ್ಯಾ ಆಕ್ಮಾನಾಕ್ ಫಾರಿಕ್ಪಣ್ ಕಾಣ್ಘೆತಾಂ ಮ್ಹಣ್ ಬೊಬಾಟಿಲಾಗ್ಲೊ. ಕಾಡ್ದೊಸ್ ಕುಟ್ಮಾಚೆಂ ಸತ್ತ್ಯಾನಾಸ್ ಕರ‍್ತಲೊಂ ಆನಿ ಆಪ್ಲ್ಯಾ ಪುತಾಕ್ ಘಾತ್ ಕೆಲ್ಲ್ಯಾ ಮೆಲಿಸ್ಸಾಕ್ ಬೆಂಗ್ಳುರಾಂತ್ ಜಿಯೆಂವ್ಕ್ ದಿಂವ್ಚೊ ನಾ ಮ್ಹಣ್ ಸೊಪುತ್ ಘಾಲಿ ಲಾಗ್ಲೊ. ಅಪುಣ್, ಜಯ್ಲಾಕ್ ಗೆಲ್ಯಾರ್‌ಯ್ ವ್ಹಡ್ ನ್ಹಯ್, ಮೆಲಿಸ್ಸಾಕ್ ಬೂದ್ ಶಿಕಯ್ತಲೊಂ ಮ್ಹಣ್ ಬೊಬಾಟೊಂಕ್ ಲಾಗ್ಲೊ.

ಕಾಡ್ದೊಸ್ ಕುಟಾಂಬ್ ಸಗ್ಳೆಂ ಕಂಗಾಲ್ ಜಾಲೆಂ. ದೊಮಿನಿಕ್ ಕಾಡ್ದೊಸಾನ್ ಧುವೆಕ್ ಪರಾತ್ಲೆಂ. ರಡ್ಲೊ. ಡೆಲ್‌ರೊಯ್ ತಸಲೊ ಚೆಡೊ ಹೆರ್ ಮೆಳ್ಚೊ ನಾ ಮ್ಹಣ್ ಸಾಂಗಾಲಾಗ್ಲೊ. ಆಪ್ಲಿ ಮರ‍್ಯಾದ್ ಉರಯ್ ಮ್ಹಣ್ ಆಡ್ದೊಸ್ ಘಾಲಿಲಾಗ್ಲೊ

ಕಿತ್ಲೆಂ ಸಾಂಗ್ಲೆಂ ತರ್‌ಯ್ ಮೆಲಿಸ್ಸಾ ಆಯ್ಕಾಲೆಂಚ್ಚ್ ನಾ. ಡೆಲ್‌ರೊಯ್ ಲಾಗಿಂ ಕಾಜಾರ್ ಜಾಂವ್ಚ್ಯಾಕ್ ಕಬೂಲ್ ಜಾಲೆಂಚ್ಚ್ ನಾ.

ಆವಯ್ನ್ ಧುವೆಕ್ ವಿಚಾರ‍್ಲೆಂ – “ತುಕಾ ದುಸ್ರ್ಯಾಚ್ಚ್ ಚಲ್ಯಾ ಲಾಗಿಂ ಮೊಗಾರ್ ಪಡೊನ್ ಕಾಜಾರ್ ಜಾಯ್ಜಯ್‌ಚ್ಚ್ ಆಸ್‌ಲ್ಲೆಂ ತರ್ ಸೈರಿಕ್ ಕರ‍್ತಾನಾ ಆನಿ ಖರಾರ್ ಜಾತಾ ಮ್ಹಣಾಸರ್ ಕಿತ್ಯಾಕ್ ವೊಗೆಚ್ಚ್ ರಾವ್ಲೆಂಯ್ ಪುತಾ ? ಆಮ್ಚಿ ಮರ‍್ಯಾದ್ ವಾಟೆರ್ ಘಾಲುಂಕ್ ತುಂವೆ ಅಶೆಂ ಕೆಲೆಂಯ್ ??”

ಆವಯ್ಚಿಂ ಉತ್ರಾಂ ಆಯ್ಕೊನ್ ಮೆಲಿಸ್ಸಾ ರಡ್ಲೆಂ ಪುಣ್ ಜವಾಬ್ ದೀಂವ್ಕ್ ಸಕ್ಲೆಂ ನಾ. ತಾಚ್ಯಾ ಲಾಗಿಂ ಎಕ್‌ಚ್ಚ್ ಜವಾಬ್ ಆಸ್‌ಲ್ಲಿ – ಡೆಲ್‌ರೊಯ್ ಲಾಗಿಂ ಕಾಜಾರ್ ಜಾಯ್ನಾಸ್ತಾನಾ ರಾಂವ್ಚಿ.

ಆಪ್ಣಾಕ್ ಲಜ್ ಜಾವ್ನ್ ಉಂಚಾಬಳ್ ಜಾಲ್ಲೊ ಕ್ಲಿಫರ‍್ಡ್ ಫೆರ‍್ನಾಂದ್ ಕಿತೆಂಯ್ ಕರುಂಕ್ ಸಕ್ತಾ ಮ್ಹಣ್ ಮೆಲಿಸ್ಸಾಕ್ ಬೆಂಗ್ಳುರ್ ಥಾವ್ನ್ ಮಂಗ್ಳುರಾಕ್ ಹಾಡ್ನ್ ಶ್ಹೆರಾಂತ್ಲ್ಯಾ ಎಕಾ ದಾಂತಾಂಚ್ಯಾ ಕ್ಲಿನಿಕಾಂತ್ ಕಾಮಾಕ್ ಲಾಗಯ್ಲೆಂ ದೊಮಿನಿಕಾನ್.

ಮೇಘನ್ ಮಾತ್ರ್ ಬೆಂಗ್ಳುರಾಂತ್ ಉರ‍್ಲೆಂ.

ಡೆಲ್‌ರೊಯ್ ಆನಿ ಮೆಲಿಸ್ಸಾಚ್ಯಾ ಸೈರಿಕೆ ಉಪ್ರಾಂತ್, ಎಕಾಮೆಕಾಕ್ ಪಳವ್ನ್, ಉಲವ್ನ್ ಆನಿ ಸಂದೇಶ್ ಧಾಡ್ನ್ ಆಸ್‌ಲ್ಲಿಂ ಡೆನ್ಜಿಲ್ ಆನಿ ಮೇಘನ್ ಎಕಾಮೆಕಾಕ್ ಲಾಗ್ಗಿಂ ಆಯಿಲ್ಲಿಂ ಆನಿ ಖರೆಂಚ್ಚ್ ಸಾಂಗ್ಚೆಂ ತರ್ ಮೊಗಾರ್ ಪಡ್‌ಲ್ಲಿಂ.

ಎಕಾ ಕುಶಿನ್, ಡೆಲ್‌ರೊಯ್ ಆನಿ ಮೆಲಿಸ್ಸಾಚೆಂ ಕಾಜಾರ್ ತುಟ್ಲೆಂ ತರ್ ಅನ್ಯೆಕಾ ಕುಶಿನ್, ಡೆನ್ಜಿಲ್ ಅನಿ ಮೆಘನಾಚೊ ಮೋಗ್ ವಾಡೊನ್ ಆಯ್ಲೊ. ಮೋಗ್ ಕರ‍್ಣಾರಾಂನಿ ಆಪ್ಲಿಂ ಕಾಳ್ಜಾಂ ಎಕಾಮೆಕಾ ದಿಲ್ಯಾ ಉಪ್ರಾಂತ್ ತಾಂಕಾ ಹೆರ್ ಕಿತೆಂಚ್ಚ್ ಪಡೊನ್ ವಚೊಂಕ್ ನಾ ಮ್ಹಣ್ ಜಾಣ್ತ್ಯಾಂನಿ ಸಾಂಗ್ಚ್ಯಾ ಪ್ರಮಾಣೆಂಚ್ಚ್ ಹಾಂಗಾಸರ್ ಜಾಲೆಂ.

ಕಾಜಾರ್ ತುಟೊನ್,  ಸುಮಾರ್ ಎಕಾ ವರ‍್ಸಾ ಉಪ್ರಾಂತ್ ದೊಮಿನಿಕ್ ವರ‍್ಸಾಚ್ಯಾ ರಜೆರ್ ಆಯಿಲ್ಲ್ಯಾ ವೆಳಿಂ ಬಾಪಾಯ್ಕ್ ಮೆಳೊಂಕ್ ಮ್ಹಣ್ ಬೆಂಗ್ಳುರಾಂತ್ ಆಸ್ಚ್ಯಾ ದಫ್ತರಾಕ್ ರಜಾ ಘಾಲ್ನ್ ಮೇಘನ್ ಮಂಗ್ಳುರ್ ಆಯಿಲ್ಲೆಂ ಆನಿ ತ್ಯಾ ದೀಸ್ ಸಾಂಜೆರ್ ಮಾಗ್ಣೆಂ ಆನಿ ರಜಾರ್ ಜಾಲ್ಯಾ ಉಪ್ರಾಂತ್ ಹಾಳ್ವಾಯೆನ್ ಹೊ ಡೆನ್ಜಿಲಾ ಲಾಗಿಂ ಕಾಜಾರ್ ಜಾಂವ್ಚೊ ವಿಶಯ್ ಬಾಪಯ್ ಮುಕಾರ್ ಸಾಂಗ್‍ಲ್ಲೊ.

“ಪುತಾ…” ಹಿಲ್ಡಾ ಆತಾಂ ಹಾಳ್ವಾಯೆನ್ ಧುವೆಲಾಗಿಂ ಉಲಯ್ಲಿ. ” ಹಾಚ್ಯಾ ಆದಿಂಯ್ ಹಾಂವೆ ತುಕಾ ಸಾಂಗ್ಲಾಂ ಪುತಾ…ತೊ ಕ್ಲಿಫರ‍್ಡ್ ಫೆರ‍್ನಾಂದ್ ಮನಿಸ್ ರಾಕ್ಸಾ ಖಾಸ್ತಾಚೊ ಆನಿ ಆಮ್ಕಾಂ ತಾಚ್ಯಾ ಘರಾಲಾಗಿಂ ಯೆಂವ್ಕ್ ಸೊಡ್ಚೊಚ್ಚ್ ನಾ…..ಆತಾಂ ಪುಣಿ ತುಂವೆ ಸಮ್ಜಜಯ್ ಪುತಾ… ಆನಿ ತುಂಯೀ ತಾಚ್ಯಾಚ್ಚ್ ಪುತಾಚ್ಯಾ ಮೊಗಾರ್ ಪಡ್ಲಾಂಯ್ ಮ್ಹಳ್ಯಾರ್ ಮ್ಹಾಕಾ ಪಾತ್ಯೆಂವ್ಕ್ ಜಾಯ್ನಾ…… ಪುತಾ…. ಹೆಂ ಸಾರ‍್ಕೆಂ ನ್ಹಯ್….. ತುಂ ಚೀಂತ್ ….. ಹಾಂವೆ ತುಕಾ ಪಯ್ಲೆಂಚ್ಚ್ ತಿಳ್ಸಿಲಾಂ….”

“ತರ್ ತುಮ್ಕಾಂ ಹ್ಯಾ ವಿಶ್ಯಾಂತ್ ಪಯ್ಲೆಂಚ್ಚ್ ಕಳಿತ್ ಆಸ್‌ಲ್ಲೆಂ ಆನಿ ತುಮಿಂ ಮ್ಹಾಕಾ ಕಾಳೊಕಾಂತ್ ದವರ‍್ಲಾಂ…..ಕಿತೆಂಚ್ಚ್ ಕಳಂವ್ಕ್ ನಾ…. ಹಾಂವ್ ಏಕ್ ಬೆಕೂಫ್ ಮ್ಹಣ್ ತುಮಿಂ ಚಿಂತ್ತಾತ್….ಸುರ‍್ವೆರ್ ಡೆನ್ಜಿಲ್ ಆನಿ ಮೆಘನಾ ವಿಶ್ಯಾಂತ್ ಮ್ಹಾಕಾ ಕಳಿತ್ ಆಸ್‌ಲ್ಲೆಂ ತರ್ ಖಂಡಿತ್ ಜಾವ್ನ್ ಹಾಂವ್ ಹೆಂ ಕಾಜಾರ್ ಜಾಂವ್ಚೆಂ ಆಡಾಯ್ತೊಂ…..ಆತಾಂ ಶಿತ್ ವೊತೊನ್ ಪೇಜ್ ಜಾಲ್ಯಾ….. ಆತಾಂ ಕಿತೆಂ ಕರ‍್ಯೆತಾ….. ??” ದೊಮಿನಿಕ್ ಕಾಡ್ದೊಸ್ ಹಿಲ್ಡಾಚಿಂ ಉತ್ರಾಂ ಅರ‍್ಧ್ಯಾರ್ ತುಟವ್ನ್ ಪರತ್ ಉಂಚಾಂಬಳ್ ಜಾಲೊ

” ಆತಾಂ…” ತೊ ಮುಂದರ‍್ಸುನ್ ಉಲಯ್ಲೊ. ” ಧುವೆಚೆಂ ಕಾಜಾರ್ ಕರ‍್ತಾಂವ್ ಮ್ಹಣ್ ತುಮಿಂಚ್ಚ್ ತಾಂಚ್ಯಾ ಘರಾ ವಚಾ ಆನಿ ಡೆನ್ಜಿಲಾಚೊ ಹಾತ್ ವಿಚಾರ‍್ನ್ ಭಿಕ್ ಮಾಗಾ….. ತುಮ್ಕಾಂ ತೀನ್ ಕಾಸಾಂಚೆ ಮೋಲ್ ದಿನಾಸ್ತಾನಾ ತೊ ಖೊಟಾಂವ್ಕ್ ಆಸಾ…. ತೆದಾಳಾ, ತಾಚೆ ಪಾಂಯ್ ಧರಾ…. ಚೂಕ್ ಮಾಗಾ…. ಕಿತ್ಯಾಕ್ ಆಮ್ಚ್ಯಾ ಧುವೆನ್ ತ್ಯಾ ಫಟಿಂಗಾಚ್ಯಾ ಪುತಾಲಾಗಿಂ ಕಾಜಾರ್ ಜಾಯ್ಜಯ್ ನ್ಹಯ್‌ಂಗೀ?  ಹಾಂವ್ ಮಾತ್ರ್ ಕಾಜಾರಾಕೀ ಯೆಂವ್ಚೊ ನಾ…. ತಾಂಚ್ಯಾ ಘರಾಚ್ಯಾ ಲಾಗಿಂಚ್ಚ್ ಯೆಂವ್ಚೊ ನಾ….”

ವಾದಾಳ್ ಉಟೊನ್ ಜಾಲ್ಲೆಂ. ಪುಣ್, ಖರಿಂ ಮೋಗ್ ಕರ‍್ಣಾರಾಂ ಕಸಲಿಂ ವಾದಾಳಾಂಯ್ ಫುಡ್ ಕರುಂಕ್ ಸಕ್ತಾತ್ ಮ್ಹಳ್ಳ್ಯಾ ಬರಿ ಮೇಘನ್ ಉಬೆಂ ಜಾಲೆಂ.

“ಡ್ಯಾಡ್… ಡೆನ್ಜಿಲಾಚೊ ಮೋಗ್ ಕರ‍್ನ್ ಹಾಂವೆ ಕಾಂಯ್ ವಾಯ್ಟ್ ಕೆಲಾಂ ಮ್ಹಣ್ ಮ್ಹಾಕಾ ಭಗಾನಾ… ಡೆಲ್‌ರೋಯ್ ಆನಿ ಮೆಲಿಸ್ಸಾಚಿ ಸೈರಿಕ್ ಜಾವ್ನ್ ಖರಾರ್ ಜಾವ್ನ್ ತಾಂಚೊ ಸಂಬಂಧ್ ತುಟ್ತಾ ವರೇಗ್ ಹಾಂವೆ ಡೆನ್ಜಿಲಾ ಲಾಗಿಂ ಕಾಜಾರ್ ಜಾಂವ್ಕ್ ತುಮ್ಕಾಂ ಮನ್ ಆಸ್‌ಲ್ಲೆಂ…… ಆತಾಂ ನಾ ಕಿತ್ಯಾಕ್ ಮೆಲಿಸ್ಸಾ ಕಾಜಾರಾಕ್ ವಪ್ವಾನಾ….ತೆಂ ತಾಚ್ಯಾ ಖುಶೆ ಪ್ರಮಾಣೆ ದುಸ್ರ್ಯಾಚ್ಚ್ ಲಾಗಿಂ, ಮ್ಹಳ್ಯಾರ್ ತಾಕಾ ಪಸಂಧ್ ಆಸ್‌ಲ್ಲ್ಯಾ ಲಾಗಿಂ ಕಾಜಾರ್ ಜಾತಾ… ಆಶೆಂ ಜಾಲ್ಲ್ಯಾಂತ್ ಮ್ಹಜಿ ಕಸಲಿ ಚೂಕ್???” ಮೇಘನ್ ಹಾಳ್ವಾಯೆನ್ ಉಲಯ್ಲೆಂ

“ನಾ…. ತುಂವೆ ಕಾಂಯಿಂಚ್ಚ್ ವಾಯ್ಟ್ ಕರುಂಕ್ ನಾಂಯ್…. ಚೂಕ್ ಪುರಾ ಮ್ಹಜಿ…..ಹರ‍್ಯೇಕ್ ಚೂಕ್ ಮ್ಹಜಿ…. ಮೆಲಿಸ್ಸಾಕ್ ಸೈರಿಕ್ ಸೊದ್‍ಲ್ಲಿ…. ತಾಕಾ ಡೆಲ್‌ರೋಯ್ ಪಸಂಧ್ ಜಾಲ್ಲಿ…. ಖರಾರ್ ಜಾಲ್ಲಿ….. ಕಾಜಾರಾಚಿ ತಯರಾಯ್ ಜಾಲ್ಲಿ …. ಪಯ್ಶೆ ಖರ‍್ಸಿಲ್ಲಿ …. ಲೊಕಾಕ್ ಸಾಂಗ್‍ಲ್ಲಿ…. ಆನಿ ಉಪ್ರಾಂತ್,  ತುಜೆಂ ಭಯ್ಣ್ ಕಾಜಾರ್ ಜಾಯ್ನಾ ಮ್ಹಣಾಲೆಂ…. ತಾಕಾ ತಾಚ್ಯಾಚ್ಚ್ ಆಸ್ಪತ್ರೆಂತ್ಲೊ ದಾಕ್ತೆರ್ ಪಸಂಧ್ ಜಾಲೊ…. ಕಾಜಾರ್ ತುಟೊನ್ ತೆಂ ಕುಟಾಂಬ್ ದುಸ್ಮಾನ್ ಜಾತಾನಾ ತುಂ ತಾಂಚ್ಯಾಚ್ಚ್ ಘರಾಂತ್ ತಾಂಚಿ ಸುನ್ ಜಾವ್ನ್ ವಚೊಂಕ್ ಭಾಯ್ರ್ ಸರ‍್ಲಾಂಯ್…. ಭಾರಿ ಅಪುರ‍್ಬಾಯ್….. ಹ್ಯೊ ಸರ‍್ವ್ ಮ್ಹಜ್ಯೊಚ್ಚ್ ಚುಕಿ…. ಆನಿ ತುಂಮಿ ವಚಾ….. ತೊ ವಾಗ್ ಫೆರ‍್ನಾಂದ್ ಆಮ್ಕಾಂ ಪೊಟ್ಲುನ್ ಧರ‍್ನ್ ಸ್ವಾಗತ್ ಕರ‍್ತಲೊ…. ಆಮಿಂ ಬೆಂಡಾಂ ವಾಜ್ಪಾನ್ ತಾಂಚ್ಯಾ ಘರಾ ಯಾ…. ಫಾಲ್ಯಾಂಚ್ಚ್ ಯಾ….”

ಮೆಘನಾಕ್ ಬಾಪಾಯ್ಚಿ ಆವಸ್ತಾ ಸಮ್ಜಲಿ. ತೊ ದೆದೆಸ್ಪಾರ್ ಜಾಲ್ಲೊ. ಕಿತೆಂ ಉಲಯ್ತಾ ಮ್ಹಣ್ ಬಾಪಾಯ್ಕ್‌ಚ್ಚ್ ಕಳಿತ್ ನಾತ್‌ಲ್ಲೆಂ…  ಖಂಚಾಯ್ ಬಾಪಾಯ್ಕ್ ಜಾಂವ್ಚಿ ಸ್ವಾಭಾವಿಕ್ ಅವಸ್ತಾ ತಿ….

“ನಾ ಡ್ಯಾಡ್…. ತುಕಾ ಲಜೆರ್ ಘಾಲುಂಕ್ ಆಮಿಂ ತಯಾರ್ ನಾಂವ್….. ಡೆನ್ಜಿಲಾನ್ ಮ್ಹಜ್ಯಾ ಲಾಗಿಂ ಕಾಜಾರ್ ಜಾಂವ್ಚ್ಯಾ ವಿಶ್ಯಾಂತ್ ತಾಂಚ್ಯಾ ಘರ‍್ಚ್ಯಾಂಕ್ ಸಂಪೂರ‍್ಣ್ ವಿರೋಧ್ ಆಸಾ…. ತೆಂ ಆಮಿಂ ಜಾಣಾಂವ್…. ಡೆನ್ಜಿಲ್‌ಯ್ ಜಾಣಾ….”

“ದೆಕುನ್….ಆಮಿಂ ಕಿತೆಂ ಕರಿಜಯ್ ಮ್ಹಣ್ ತುಂ ಖುಶಿ ವರ‍್ತಾಯ್…..??” ದೊಮಿನಿಕ್ ಪರತ್ ಬೊಬಾಟ್ಲೊ.

“ದೆಕುನ್ ತುಮಿಂ ಕಾಂಯಿಂಚ್ಚ್ ಕರ‍್ಚೆಂ ನಾಕಾ…..ಆಮಿಂಚ್ಚ್ ಭಾರತ್ ಸಾಂಡುನ್ ಕೆನಡಾಕ್ ವೆಚೆಂ ಮ್ಹಣ್ ಚಿಂತ್ಲಾಂ…. ಆಮ್ಕಾಂ ಕೆನಡಾ ದೆಶಾಚಿ ವಿಧ್ಯಾರ‍್ಥಿಚಿಂ ವಿಸಾ ಮೆಳ್ಳ್ಯಾ….. ವೆಗಿಂಚ್ಚ್ ಆಮಿಂ ಕೆನಡಾಕ್ ವೆತೆಲ್ಯಾಂವ್ ಆನಿ ಥಂಯ್ಸರ್ ಆಮ್ಕಾಂ ಸಾಂಗಾತಾ ಜಿಯೆಂವ್ಕ್ ಕೊಣಾಯ್ಚಿ ಕಾಂಯ್‌ಚ್ಚ್ ಆಡ್ಕಳ್ ಆಸ್ಚಿನಾ…”

ಸಾಲಾಂತ್ ಕಟಿಣಾಯೆಚೆಂ ಮೌನ್‍ಪಣ್ ಭರ‍್ಲೆಂ. ಸರ‍್ವಾಂ ಆಜಾಪೊನ್ ಮೆಘನಾಚಿಂ ಉತ್ರಾಂ ಆಯ್ಕಾತಾಲಿಂ…

“ಆನಿ ಏಕ್ ಮಾತ್ರ್ ವಿನಂತಿ…..” ಮೇಘನ್ ಮುಂದರ‍್ಸುನ್ ಉಲಯ್ಲೆಂ. ” ಡೆನ್ಜಿಲ್ ಭಾರತ್ ಸಾಂಡುನ್ ಕೆನಡಾಕ್ ವೆತಾ ಮ್ಹಣ್ ಆಮಿಂ ಭಾರತ್ ಸಾಂಡ್ತಾ ಮ್ಹಣಾಸರ್ ತಾಚ್ಯಾ ಕುಟ್ಮಾಕ್ ಕಳೊಂಕ್ ನಜೊ…. ಹಿಚ್ಚ್ ಮ್ಹಜಿ ವಿನವ್ಣಿ ತುಮ್ಚ್ಯಾ ಲಾಗಿಂ…..”

ಕೊಣಾಯ್ ಥಾವ್ನ್ ಜವಾಬ್ ಆಯ್ಕೊಂಕ್ ಆಶೆನಾಸ್ತಾನಾ ಘರ‍್ಚ್ಯಾ ಮಾಳಿಯೆಚಿಂ ಮೆಟಾಂ ಚಡೊನ್ ಆಪ್ಲ್ಯಾ ಕುಡಾಕ್ ಗೆಲೆಂ ಮೇಘನ್

ಥಟಕ್ಕ್ ಜಾವ್ನ್ ಮೌನ್‌ಪಣಾಂತ್ ಸರ‍್ವಾಂ ಮೆಘನಾಕ್ ಪಳವ್ನ್ಂಚ್ಚ್ ಬಸ್‍ಲ್ಲಿಂ….

■ ಕ್ಲೆರೆನ್ಸ್, ಕೈಕಂಬ

ಪಾಯ್ಜಾಂಣಾಂ ಚೊ ಕಿಣ್ಕುಳೊ ಆವಾಜ್ ಕಾನಾಂಚೆರ್ ಪಡ್ತೆಚ್ ಹಾಂವೆಂ ದೀಷ್ಟ್ ದಿಸಾಳ್ಯಾ ವಯ್ಲಿ ವಯ್ರ್ ಉಕಲ್ಲಿ ಆನಿ ಆಂಗಣಾ ತೆವ್ಶಿನ್ ಪಳೆಲೆಂ.  ತೆಂ ಕಸಲೆಂಗೀ ಪದ್ ಗುಣ್ಗುಣೊನ್ ಸದಾಂಚೆಬರಿ ಆಮ್ಚ್ಯಾ ಆಂಗಣಾಕ್ ಲಾಗಿಂ ಸರ್ತಾಲೆಂ!  ಆಟ್ ವರ್ಸಾಂಚೆಂ ನೆಣ್ತೆಂ ಮಾಣ್ಕುಲೆಂ ನಿರ್ಮಲಾ.

ಫಾಂತ್ಯಾರ್ ಪಾಂಚ್ ವರಾಂಚೆರ್ ಆಮಿ ಸದಾಂಚ್ ಉಟ್ತಾಲ್ಯಾಂವ್; ಆಮಿ ಮ್ಹಳ್ಯಾರ್ ಹಾಂವ್ ಆನಿ ಮ್ಹಜಿ ಆವಯ್.  ನಿತಳಾಯ್ ಆನಿ ಮಾಗ್ಣೆ ಜಾತೆಚ್ ಏಕ್ ಕೊಪ್ ಚಾ ಪಿಯೆವ್ನ್ ಆಮಿ ಆಮ್ಚಾ ವೊಡ್ತಾಂತ್ಲಿಂ ಫುಲಾಂ ಕುಂಟ್ತಾಲ್ಯಾಂವ್ – ಮೊಗ್ರೆ ಕಳೆ, ಆಬೊಲಿಂ ಆನಿ ಗುಲಭ್.  ಸುಮಾರ್ ದೇಡ್ ವೊರ್‍ಭರ್ ತೆಂ ಕಾಮ್ ಜಾತೆಚ್ ವೊಡ್ತಾಕ್ ಉದಾಕ್ ಶಿಂವ್ರಾಯ್ಲ್ಯಾ ಉಪ್ರಾಂತ್ ಆಮಿ ಆಮ್ಚ್ಯಾ ವಿವಿಂಗಡ್ ಕಾಮಾಂಕ್ ಲಾಗ್ತಾಲ್ಯಾಂವ್ – ಮಾಂಯ್ ಫುಲಾಂ ಗುಂತಾಲಿ ಆನಿ ಹಾಂವ್ ದಿಸಾಳ್ಯಾಂತ್ಲ್ಯೊ ಮುಖ್ಯ ಸಂಗ್ತಿ ವಾಚುನ್ ಜಾತೆಚ್ ಶಾಳಾಚೆ ಪಾಠ್ ತಯಾರ್ ಕರ್ಚಾಂತ್ ಮಗ್ನ್ ಜಾತಾಲೊಂ. ಮ್ಹಜೊ ಬಾಪುಯ್, ಜಾಚೆಂ ನಾಂವ್ ಮನ್ವೆಲ್ ಸೊಜ್, ಭಾರತಾಚೆ ಫವ್ಜಿಂತ್ ಆಸೊನ್ 1962 ಇಸ್ವೆಂತ್ ಭಾರತ್ ಚೀನಾ ಮ್ಹಧೆಂ ಜಾಲೆಲ್ಯಾ ಝುಜಾಂತ್ ಧಯ್ರಾನ್ ಝುಜೊನ್ ಮರಣ್ ಪಾವುಲ್ಲೊ. ಹಾಂವ್ ತೆದ್ನಾ ಚಾರ್ ವರ್ಸಾಂಚೊ ಭುರ್ಗೊ. ಮಾಂಯ್ಚೆಂ ದೂಕ್ ಆನಿ ವಿಳಾಪ್  ತೆದ್ನಾ ಹಾಂವ್ ಗುಂಡಾಯೆನ್ ಸಮ್ಜೊಂಕ್ ಸಕ್ಲೊಂ ನಾ ತರಿ, ತೆಂ ದ್ರಶ್ಯ್ ಮ್ಹಜ್ಯೆ ಮತಿಂತ್ ಖಂಚೊನ್ ಉರ್ಲೆಂ.  ಮ್ಹಜ್ಯಾ ಆನಾಚ್ಯಾ ಮರಣಾ ವಿಧಿ ಉಪ್ರಾಂತ್ ಸಬಾರಾಂನಿ ಮ್ಹಜ್ಯೆ ಆವಯ್ಕ್ ಭುಜಯಿಲ್ಲೆಂ ಆನಿ ಕುಮಕ್ ಭಾಸಾಯಿಲ್ಲಿ, ಪುಣ್ ವೇಳ್ ಪಾಶಾರ್ ಜಾತಾನಾ ತಿಂ ಭಾಸಾವ್ಣಿಂ ವಾರ್‍ಯಾರ್ ಉಭೊನ್ ಗೆಲಿಂ.  ಸರ್ಕಾರಾ ಥಾವ್ನ್ ಮೆಳ್ಚೆಂ ಅನುದಾನ್ ಭೋವ್ ಲ್ಹಾನ್ ಜಾವ್ನ್ ಆಸ್‍ಲ್ಲೆಂ.  ತರಿ ಮ್ಹಜ್ಯೆ ಆವಯ್ನ್ ಧಯ್ರ್ ಸಾಂಡ್ಲೆಂ ನಾ. ಆಮ್ಚ್ಯಾ ಘರಾ ಮುಖಾರ್ ಆಸ್ಲೆಲ್ಯಾ ಜಾಗ್ಯಾರ್ ತಿಣೆ ಫುಲಾಂಚಿ ಕೃಷಿ ಕರುನ್ ಖುಧ್ ವಿಕ್ರಾಪಾಕ್ ಘಾಲಿಂ. ತಶೆಂ ಮ್ಹಜಿ ಆವಯ್ ಫುಲಾ ಆಸ್ಲೆಲಿ ಫುಲ್ಕಾರ್ನ್ ಫುಲಾಬಾಯ್ ಜಾಲಿ.

ತರ್ನಾಟ್ಪಣಾರ್ ಘೊವ್ ಮರಣ್ ಪಾವ್ಲ್ಯಾರ್ ತಸಲ್ಯೆ ಸ್ತ್ರೀಯೆಚೆ ಕಷ್ಟ್ ಭೊಗ್ಲೆಲ್ಯಾಂಕ್ ಮಾತ್ರ್ ಕಳಿತ್. ಎಕ್ಯೆ ವಾಟೆನ್ ಭುಕೆಲ್ಲ್ಯಾ ಅಸ್ವೆಲಾಂ ಥಾವ್ನ್ ಆಪ್ಣಾಕ್‍ಚ್ ಸಾಂಬಾಳಿಜೆ, ಲೊಕಾಚ್ಯೊ ಹುಳ್ವುಳ್ಚ್ಯೊ ಜಿಭೊ ಫುಡ್ ಕರಿಜೆ ಆನಿ ಲ್ಹಾನ್ ಬಾಳಾಂ ಆಸ್ಲ್ಯಾರ್ ತಾಂಕಾಂ ಸಾಂಬಾಳುನ್ ವ್ಹಡ್ ಕರಿಜೆ. ರಡೊಂಕ್ ಆಯ್ಲ್ಯಾರ್ ನಾಣ್ಯೆಕ್ ವಚುನ್ ಗುಪಿತ್ ರಡಾಜೆ, ನಾ ತರ್ ‘ಕಿತ್ಯಾಕ್ ರಡ್ತಾಯ್ ಮಾಂಯ್?’ ಮ್ಹಣ್ ಭುರ್ಗಿಂ ವಿಚಾರ್ತಾತ್ ನಹಿಂ! ತಿಣೆ ಕಾಳೆಂ ಕಾಪಾಡ್ ನ್ಹೆಸಾಜೆ, ಕೇಸ್ ತಾಸುನ್ ಬೊಡ್ಕೆಂ ಜಾಯ್ಜೆ ಆನಿ ಕಾಜ಼ಾರಾಂ ಸೊಭಾಣಾಂ ವೆಳಿಂ ಪಯ್ಸ್ ರಾವಾಜೆ. ತಿಚಿಂ ಭೊಗ್ಣಾಂ ಮರ್ತಾತ್ ವ ತಿಂ ಮೊರಾಶೆಂ ಕರ್ತಾತ್! ಅಸಲ್ಯಾ ಪೊಳ್ಕುರ್‍ಯಾ ಸಂಸಾರಾ ಥಾವ್ನ್ ತಿಕಾ ಸುಟ್ಕಾ ಕೊಣ್ ದೀತ್?!

ಮ್ಹಜ್ಯೆ ಆವಯ್ನ್ ಎಕಾ ಶಿಪಾಯಾಚೆ ಸ್ತ್ರೀಯೆಪರಿಂ ಜಿಣ್ಯೆಚೆರ್ ಝುಜ್ ಮಾಂಡ್ಲೆಂ ಆನಿ ಯಶಸ್ವಿ ಜೊಡ್ಲಿ.  ಮ್ಹಾಕಾ ತಿಣೆ ಮೆಟ್ರಿಕ್ ಪರ್ಯಾಂತ್ ಶಿಕಾಪ್ ದೀವ್ನ್ ಶಿಕ್ಶಕ್ ಜಾಂವ್ಚಾಕ್ ತರ್ಬೆತಿ ದಿಲಿ ಕಿತ್ಯಾಕ್ ಮ್ಹಳ್ಯಾರ್ ತಿಚೆ ಸಮ್ಜೊಣೆ ಪ್ರಮಾಣೆ ಶಿಕ್ಶಕಾಚೆಂ ಕಾಮ್ ಉಂಚ್ಲೆಂ.

– 2 –

ಮ್ಹ್ಜಜಿ ಆವಯ್ ಫಕತ್ ಸಾತ್ವೆ ಪರ್ಯಾಂತ್ ಶಿಕ್ಲೆಲಿ ತರಿ ತಿಚಿ ವಾಸ್ತವಿಕ್ ಜಾಣ್ವಾಯ್ ಮ್ಹಾಕಾ ಕೆದ್ನಾಂಯ್ ವಿಜ್ಮಿತ್ ಕರ್ತಾಲಿ. ಹಾಂವೆಂ ತರ್ನಾಟ್ಪಣಾಕ್ ಪಾಂಯ್ ತೆಂಕ್ಚಾ ವಗ್ತಾ ಏಕ್ ಪಾವ್ಟಿ ತಿಣೆ ಮ್ಹಾಕಾ ಸಾಂಗ್ಲೆಲೆಂ ಮ್ಹಜ್ಯೆ ಮತಿಂತ್ ಖಂಚೊನ್ ಮ್ಹಳ್ಳೆ ಪರಿಂ ಉರ್‍ಲೆಂ.  ತಿಣೆ ಮ್ಹಳ್ಳೆಂ: “ಅಳೆ ಪುತಾ, ಸಾಲು, ಚಲಿ ಎಕಾ ಫುಲಾಬರಿ.  ತೆಂ ಫುಲ್ ಫಿಸ್ಡುನ್ ಪಾಕ್ಳ್ಯೊ ಕೆಲ್ಯೊ ತರ್, ಸರ್ವ್ ಪಾಕ್ಳ್ಯೊ ಒಟ್ಟುಕ್ ಮೆಳಯ್ಲ್ಯಾರೀ ಪರ್ತ್ಯಾನ್ ಫುಲ್ ಜಾಯ್ನಾ. ದೆಕುನ್ ಚಲಿಯಾಂ ಥಂಯ್ ಮಾಣ್ಸುಗೆನ್ ಚಲ್ ಆನಿ ತಾಂಕಾಂ ವಾಯ್ಟ್ ದಿಷ್ಟಿನ್ ಕೆದ್ನಾಂಯ್ ಪಳೆನಾಕಾ.”

ನಿರ್ಮಲಾ ಮ್ಹಜ್ಯಾ ಸಾಮ್ಖಾರ್ ಆತಾಂ ಉಭೆಂ ಜಾಲ್ಲೆಂ ತಾಚ್ಯಾ ನಿರ್ಮಳ್ ಹಾಸ್ಯಾ ಸಂಗಿಂ.

“ಹಾಂವ್ ಥೊಡಿಂ ಫುಲಾಂ ಕಾಡುಂ?” ವಿಚಾರ್ಲೆಂ ತಾಣೆ ನಮೃತೆನ್. “ಥೊಡಿಂ ದೆವಾಕ್ ಚಡಂವ್ಕ್ ಆನಿ ಥೊಡಿಂ ಮಾತ್ಯಾಕ್ ಮಾಳುಂಕ್”.

“ಕಾಡ್‍ಗೊ, ತುಕಾ ಕೊಣೆ ಆಡಾಯ್ಲಾಂ?” ಮ್ಹಳೆಂ ಮ್ಹಜೆ ಆವಯ್ನ್. ದೆವಾಕ್ ಭೆಟಂವ್ಕ್ ಕೊಣ್‍ಯೀ ಫುಲಾಂ ವಿಚಾರ್‍ತಾ ಜಾಲ್ಯಾರ್ ತಿ ಸಂತೊಸಾನ್ ದಿತಾಲಿ.  ಮೊಂತಿ ಫೆಸ್ತಾ ವೆಳಾರ್ ಸೆಜಾರ್ಚಾ ಭುರ್ಗ್ಯಾಂಕ್ ತಿ ಫುಲಾಂ ಖುಂಟುನ್ ದಿತಾಲಿ. ತಿಚೊ ಹಾತ್ ಗುಣ್ ವ ತಿಚ್ಯಾ ಉದಾರ್ ಮನಾಕ್ ಇನಾಮ್ ಜಾವ್ನ್ ಮ್ಹಳ್ಳೆಬರಿ ತಿಣೆ ಆಪಡ್‍ಲ್ಲಿ ಮಾತಿ ಭಾಂಗಾರ್ ಜಾತಾಲಿ ಆನಿ ತಿಣೆ ರುತಾ ಕೆಲ್ಲ್ಯಾ ಝಡಾಂನಿ ಘೊಸ್ ಘೊಸ್ ಫುಲಾಂ ಜಾತಾಲಿಂ.

ನಿರ್ಮಲಾಚಿಂ ಆವಯ್ ಬಾಪುಯ್ ಆಮ್ಚಾ ಸೆಜಾರಾ ಬಾಡ್ಯಾಚಾ ಘರಾಂತ್ ರಾವ್ತಾಲಿಂ.  ತಾಚೊ ಬಾಪುಯ್ ಚಿರೆ ಫಾತರ್ ಕಾತರ್ಚೆಂ ಕಾಮ್ ಕರ್ತಾಲೊ. ಸುರ್ವೆರ್ ಪುರಾಸಾಣ್ ಕಾಡುಂಕ್ ಮ್ಹಣ್ ಪಿಯೆಂವ್ಕ್ ಸುರು ಕರುನ್ ಆತಾಂ ತೊ ಸೊರ್‍ಯಾಚೊ ಗುಲಾಮ್ ಜಾಲ್ಲೊ. ನಿರ್ಮಲಾ ಮಾಲ್ಘಡೆಂ ಆನಿ ತಾಚೆ ಪಾಟ್ಲ್ಯಾನ್ ತೆಗಾಂ ಆಸ್‍ಲ್ಲಿಂ ಜಾಲ್ಲ್ಯಾನ್ ದಿಸ್ಪಡ್ತೊ ಖರ್ಚ್ ಸಾಂಬಾಳುಂಕ್ ದುಸ್ರೊ ಉಪಾವ್ ನಾಸ್ತಾಂ ಆವಯ್ ಬಿಡಿಯೊ ಬಾಂಧ್ತಾಲಿ.

ನಿರ್ಮಲಾ ಘರಾ ಆಯ್ಲ್ಯಾರ್ ಮ್ಹಜಿ ಆವಯ್ ಖಾಲಿ ಹಾತಾಂನಿ ತಾಕಾ ಪಾಟಿಂ ಧಾಡಿನಾತ್ಲ್ಲಿ. ಘರಾ ಕೆಲ್ಲಿ ಪೊಳಿ ವ ಕಿತೆಂ ಪುಣಿ ತಾಕಾ ಖಾಂವ್ಕ್ ದಿತಾಲಿ. ದೆಕುನ್ ನಿರ್ಮಲಾಕ್ ಆಮ್ಗೆರ್ ಯೇಂವ್ಕ್ ಚಾರ್ ಭುಜಾಂ!

“ನಿರ್ಮಲಾಕ್ ತುಂ ಶಿಕ್ಪಾಕ್ ಮಜತ್ ದೀರೆ ಸಾಲು,” ಎಕಾ ದಿಸಾ ಮಾಂಯ್ನ್ ಮ್ಹಾಕಾ ಸಾಂಗ್ಲೆಂ. “ತಾಚೊ ಬಾಪುಯ್ ಮೋನು ಪಾಂಚ್ವೆ ಉಪ್ರಾಂತ್ ತಾಚೆಂ ಇಸ್ಕಾಲ್ ಸೊಡಂವ್ಕ್ ಚಿಂತಾ.  ತುಂ ಕಸೊಯೀ ಆಂಕ್ವಾರ್ ರಾವ್ಲಾಯ್. ಲೊಕಾಚ್ಯಾ ಭುರ್ಗ್ಯಾಂಚೆಂ ಪುಣಿ ಬರೆಂ ಜಾಂವ್.”

ಮಾಂಯ್ನ್ ನಿಶಾನಿ ಪಳೆವ್ನ್ಂಚ್ ತೀರ್ ಮಾರ್‌ಲ್ಲೊ! ಹಾಂವೆಂ ಕಾಜಾರ್ ಜಾಯ್ಜೆ ಮ್ಹಣ್ ವತ್ತಾಯ್ ಕರುನ್ ತಿ ಸಲ್ವೊನ್ ಗೆಲ್ಲಿ!

“ಹಾಂವೆಂ ದೊಳೆ ಧಾಂಪ್ಲ್ಯಾರ್ ತುಜಿ ಗತ್ ಕಿತೆಂರೆ, ಸಾಲು?” ತಿಣೆ ಮ್ಹಣ್ಚೆಂ ಆಸ್‍ಲ್ಲೆಂ. ಫುಣ್ ಆತಾಂ ಮ್ಹಾಕಾ ಚಾಳೀಸ್ ವರ್ಸಾಂ ಪಿರಾಯ್ ಜಾಲ್ಯಾ ಉಪ್ರಾಂತ್ ತಿಣೆ ಸಾಂಗ್ಚೆಂ ಬಂಧ್ ಕೆಲ್ಲೆಂ.

ಭುರ್ಗ್ಯಾಪಣಾರ್ ಥಾವ್ನ್ ತಿಚೆ ಕಷ್ಟ್ ಪಳೆಲ್ಲೊ ಹಾಂವ್ ತಿಕಾ ತಾಂಕಿ ಭಿತರ್ಲೆಂ ಸರ್ವ್ ಸುಖ್ ದೀಂವ್ಕ್ ಆಶೆತಾಲೊಂ. ಹಾಂವ್ ಕಿತ್ಯಾ ಖಾತಿರ್ ಆಂಕ್ವಾರ್ ರಾವ್ಲಾಂ ಮ್ಹಣ್ ತಿಕಾ ಕಶೆಂ ಸಾಂಗುಂ?!

– 3 –

ನಿರ್ಮಲಾಚ್ಯಾ ಬಾಪಾಯ್ಕ್ ಸಮ್ಜಾವ್ನ್ ನಿರ್ಮಲಾನ್ ಶಿಕಾಪ್ ಮುಖಾರ್ಸುನ್ ವ್ಹರುಂಕ್ ಹಾಂವೆಂ ವ್ಯವಸ್ಥಾ ಕೆಲಿ. ಮಹಿನ್ಯಾಕ್ ಶೆಂಭೊರ್ ರುಪಯ್ ದಿತಾಂ ಮ್ಹಣ್ ಹಾಂವೆಂ ತಾಕಾ ಭಾಸಾಯ್ಲೆಂ.

ಅಶೆಂ ತೀನ್ ವರ್ಸಾಂ ಪಾಶಾರ್ ಜಾಲಿಂ.  ನಿರ್ಮಲಾ ಆತಾಂ ನೊವೆಂತ್ ಆಸ್ಲೆಂ. ಸದಾಂಯ್ ಸಕಾಳಿಂ ಶಾಳೆಕ್ ವೆಚಾ ಪಯ್ಲೆಂ ಫುಲಾಂ ವ್ಹರುಂಕ್ ಯೆತಾಲೆಂ. ಆಮ್ಚಿ ಪರ್ವಣ್ಕಿ ಘೆತ್ಲ್ಯಾ ಶಿವಾಯ್ ಫುಲಾಂಕ್ ಬಿಲ್ಕುಲ್ ಹಾತ್ ಲಾಯ್ನಾತ್ಲೆಂ. ದೆವಾಚಿ ಪೂಜಾ ಕರುನ್ ಆವಯ್ಕ್ ಬಿಡಿಯೊ ಬಾಂಧುಂಕ್ ಜಾಯ್ ತಿತ್ಲೆ ಖೊಲೆ ಕಾತರ್ನ್ ದವರ್ಲ್ಯಾ ಉಪ್ರಾಂತ್ ಶಾಳೆಕ್ ವೆತಾಲೆಂ.

ತ್ಯಾ ಎಕಾ ದಿಸಾ ನಿರ್ಮಲಾನ್ ಫುಲಾಂ ಕಾಡುಂಕ್ ವಿಚಾರ್ತಾನಾ ಹಾಂವೆಂ ತಾಕಾ ಚಿಡಾಯ್ಲೆಂ.

“ತುಜಿ ಲದಿನ್ ಮ್ಹಣ್‍ಗೊ ಬಾಯೆ. ಥೊಡಿಂ ದೆವಾಕ್ ದೀಂವ್ಕ್, ಥೊಡಿಂ ಮಾತ್ಯಾಕ್ ಮಾಳುಂಕ್ ಆನಿ ಥೊಡಿಂ ಘೊವಾಕ್ ದೀಂವ್ಕ್!”

“ಅಮ್ಮಾ!” ತೆಂ ಕೃತಕ್ ರಾಗ್ ದಾಕವ್ನ್ ಬೊಬಾಟ್ಲೆಂ. ಮ್ಹಜ್ಯೆ ಆವಯ್ಕ್ ತೆಂ ‘ಅಮ್ಮಾ’ ಮ್ಹಣ್‍ಂಚ್ ಆಪಯ್ತಾಲೆಂ. “ಅಮ್ಮಾ, ಸರ್ ಕಿತೆಂ ಮ್ಹಣ್ತಾ ಪಳೆ!”

“ತಾಕಾ ಕಿತ್ಯಾಕ್ ಚಿಡಾಯ್ತಾಯ್‍ರೆ, ಸಾಲು?” ಮಾಂಯ್ ಹಾಸೊನ್ ಮ್ಹಣಾಲಿ. “ತಶೆಂ ತಮಾಶೆ ಕೆಲ್ಯಾರ್ ತೆಂ ಫಾಲ್ಯಾಂ ಥಾವ್ನ್ ಯೆಂವ್ಚೆಂ ನಾ”.

ಆನಿ ತಶೆಂಚ್ ಜಾಲೆಂ. ಥೊಡ್ಯಾ ದಿಸಾಂ ಉಪ್ರಾಂತ್ ನಿರ್ಮಲಾನ್ ಫುಲಾಂ ವ್ಹರುಂಕ್ ಯೆಂವ್ಚೆಂ ಬಂಧ್ ಕೆಲೆಂ, ಬದ್ಲಾಕ್ ತಾಚ್ಯಾ ಭಾವಾಕ್ ಧಾಡುಂಕ್ ಸುರು ಕೆಲೆಂ.

“ಹಾಂವೆಂ ಮ್ಹಳ್ಳೆಂ ತಾಕಾ ಬರೆಂ ಲಾಗೊಂಕ್ ನಾ ಆಸ್ತೆಲೆಂ, ಮಾಂಯ್” ಹಾಂವೆಂ ಮಾಂಯ್ ಲಾಗಿಂ ಮ್ಹಜೊ ದುಭಾವ್ ಉಚಾರ್ಲೊ.

“ತಶೆಂ ಕಾಂಯ್ ನಾ ರೆ ಪುತಾ,” ಮಾಂಯ್ನ್ ಅನ್ಭೊಗಾನ್‍ಶೆಂ ಜಾಪ್ ದಿಲಿ. “ತಾಣೆ ಸ್ತ್ರೀಪಣಾಕ್ ಪಾಂಯ್ ದವರ್ಲಾ ಆಸ್ತಲೊ. ದೆಕುನ್ ಆತಾಂ ಭಾವಾಕ್ ಧಾಡ್ತಾ ಆಸ್ತಲೆಂ”.

ವೆಳಾಚಿಂ ರೊದಾಂ ಘುಂವೊನ್ ಆನ್ಯೇಕ್ ವರಸ್ ಸಂಪ್ಲೆಂ. ನಿರ್ಮಲಾ ಆತಾಂ ಧಾವೆ ವರ್ಗಾಂತ್ ಶಿಕ್ತಾಲೆಂ. ಚೆಡ್ವಾನ್ ಬರೆಂ ಶಿಕೊನ್ ತಾಚ್ಯಾ ಪಾಯಾಂನಿ ಉಭೆಂ ರಾವೊಂಕ್ ಸಮರ್ಥ್ ಜಾಯ್ಜೆ ಮ್ಹಣ್ ಮ್ಹಜಿ ಆಶಾ ಜಾವ್ನಾಸ್‍ಲ್ಲಿ. ಧಾವೆ ವರ್ಗಾಚೆ ಪಾಠ್ ಸಂಪೊನ್ ನಿಮ್ಣೆ ಪರೀಕ್ಶೆಕ್ ತಯಾರಾಯ್ ಕರುಂಕ್ ವಿದ್ಯಾರ್ಥಿಂಕ್ ರಜಾ ಮೆಳ್ಳ್ಯಾ ಮ್ಹಣ್ ಎಕಾ ಸಕಾಳಿಂ ಫುಲಾಂ ವ್ಹರುಂಕ್ ಆಯಿಲ್ಲ್ಯಾ ತಾಚಾ ಭಾವಾನ್ ಮ್ಹಾಕಾ ಸಾಂಗ್ಲೆಂ.

ಪರೀಕ್ಶೆಕ್ ಬಾಂಧುಂಕ್ ಆಸ್‍ಲ್ಲೆಂ ತೆಂ ರುಸುಮ್ ಹಾಂವೆಂ ಎದೊಳ್‍ಚ್ ತಾಚಾ ವ್ಹಡಿಲಾಂಕ್ ಪಾವಿತ್ ಕೆಲ್ಲೆಂ.

ಶಾಳೆಚಾ ಕಾಮಾಂ ನಿಮ್ತಿಂ ಹಾಂವ್‍ಯೀ ಹ್ಯಾ ದಿಸಾಂನಿ ಭೋವ್ ಮಗ್ನ್ ಆಸ್‍ಲ್ಲೊಂ. ಆನಿ ತಶೆಂ ಆಸ್ತಾಂ ಥೊಡ್ಯಾಚ್ ದಿಸಾಂ ಭಿತರ್ ಮ್ಹಜ್ಯಾಚ್ ಘರಾ ವ್ಹಡ್ ಆಕಾಂತಾಚಿ ಆನಿ ದುಖಾಚೆಂ ಘಡಿತ್ ಘಡೊನ್ ಗೆಲೆಂ. ತ್ಯಾ ಎಕಾ ದಿಸಾ ಮ್ಹಜಿ ಮೊಗಾಚಿ ಮಾಂಯ್ ರಾತಿ ನಿದ್ಲೆಲಿ ಸಕಾಳಿಂ ಉಠ್ಲಿಚ್ ನಾ.  ವೆಳಾರ್ ಉಠ್ಚಿ

–  4 –

ತಿ ತ್ಯಾ ದಿಸಾ ವೊರಾಂ ಸಾತ್ ಜಾಲ್ಯಾರ್‍‍ಯಿ ಉಠಾನಾಸ್ಲಿ ಮ್ಹಣ್ ಹಾಂವೆಂ ಲಾಗಿಂ ವಚುನ್ ತಿಕಾ ಹಾಲಯ್ತಾನಾ ತಿ ಥಂಡ್‍ಗಾರ್ ಜಾಲ್ಲಿ.

ಉಠಾಉಠಿಂ ದಾಕ್ತೆರಾಕ್ ಹಾಡವ್ನ್ ತಿಕಾ ತಪಾಸಿತಾನಾ ತಿ ನಿದೆಂತ್‍ಚ್ ಕಾಳ್ಜಾಘಾತ್ ಜಾವ್ನ್ ಅಂತರ್ಲ್ಯಾ ಮ್ಹಣ್ ಕಳೊನ್ ಆಯ್ಲೆಂ.

ಮ್ಹಜಿ ಮಾಂಯ್ ಪಿಡೆಸ್ಥ್ ನಾಸ್ಲಿ, ವರ್ಸಾಕ್ ಏಕ್ ಪಾವ್ಟಿಂ ಶೆಳ್ ಜಾಂವ್ಚಿ ಸೊಡ್ಲ್ಯಾರ್ ತಿ ಪಿಡೆನ್ ನಿದ್‍ಲ್ಲಿ ಮ್ಹಣ್ ನಾ. ತಿಚಿ ಸತ್ತರ್ ವರ್ಸಾಂಚಿ ಪಿರಾಯ್ ಲ್ಹಾನ್ ನಹಿಂ ತರಿ ಚಡ್ ಉತರ್‍‍ಯೀ ನಹಿಂ. ವಯ್ಜಾಂಕಡೆ ವಚುನ್ ಚಾರ್ ಪಯ್ಸ್ಯಾಂಚೆಂ ವಕತ್ ತಿಣೆ ಕೆದ್ನಾಂಯೀ ಹಾಡ್‍ಲ್ಲೆಂ ನಾ. ಆಲ್ಯಾಪಾಲ್ಯಾಂಚೆಂ ವಕತ್ ಕರುನ್‍ಂಚ್ ಪಿಯತಾಲಿ. ಗರ್ಜೆ ಭಾಯ್ರ್ ವಯ್ಜಾಂಚ್ಯಾ ಆನಿ ವಕಿಲಾಂಚ್ಯಾ ಬಾಗ್ಲಾರ್ ವೆಚೆಂ ನಹಿಂ ಮ್ಹಣ್ ಮ್ಹಾಕಾ ಕೆದ್ನಾಂಯೀ ಸಾಂಗ್ತಾಲಿ. ತಿಚ್ಯಾ ಮರಣಾ ವರ್ವಿಂ ಮ್ಹಜೆಂ ಘರ್ ಆನಿ ಜಿವಿತ್ ಶೂನ್ಯ್ ಜಾಲೆಂ. ಎಕ್ಸುರ್ಪಣ್ ಮ್ಹಾಕಾ ಖಾಂವ್ಕ್ ಲಾಗ್ಲೆಂ. ಮಾಂಯ್ಚಾ ಉತ್ರಾಂಚೊ ಗಿರೊಪ್ ಆತಾಂ ಸವ್ಕಾಸ್ ಸಮ್ಜೊಂಕ್ ಲಾಗ್ಲೊ!

ಮಾಂಯ್ಚೆ ನಿರ್ಜೀವ್ ಕುಡಿಚೆರ್ ಏಕ್ ದೀಷ್ಟ್ ಲಾಂವ್ಕ್ ನಿರ್ಮಲಾಚಾ ಘರ್ಚಿಂ ಕೊಣ್‍ಯೀ ಆಯ್ಲಿಂ ನಾಂತ್. ಪುಣ್ ತಾಂಚೆ ಆಚಾರ್ ವಿಚಾರ್ ಹಾಂವ್ ಜಾಣಾ ಆಸ್ಲೆಲ್ಯಾನ್ ಹಾಂವೆಂ ತೆಂ ತಕ್ಲೆಂತ್ ಘೆತ್ಲೆಂ ನಾ. ತರಿ ಮತಿಚ್ಯಾ ಕೊನ್ಸ್ಯಾಂತ್ ಏಕ್ ಚಿಂತಾಪ್ – ತಾಂಣಿ ಯೆವ್ಯೆತೆಂ ಆಸ್‍ಲ್ಲೆಂ!

ಮ್ಹಜಿ ಆವಯ್ ಸ್ವರ್ಗಸ್ತ್ ಜಾವ್ನ್ ಏಕ್ ಮಹಿನೊ ಸಂಪ್ತಾಲೊ ತಿತ್ಲೊಚ್.  ನಿರ್ಮಲಾಚೊ ಬಾಪುಯ್ ಎಕ್ಯೆ ಸಾಂಜೆರ್ ಕಾಳೊಕಾರ್‍‍ಶೆಂ ಮ್ಹಜೆ ಘರ್ಚಿಂ ಮೆಟಾಂ ಚಡ್ಲೊ.

“ಆಜ್ ಕಿತೆಂ ಹಾಂಗಾ ಪಾವ್ಲೊಯ್?” ವಿಚಾರ್ಲೆಂ ಹಾಂವೆಂ.

“ನಿರ್ಮಲಾಚೆಂ ಲಗ್ನ್ ಠರಾಯ್ಲಾಂ,” ಮ್ಹಣಾಲೊ ತೊ. ತಾಚ್ಯಾ ತೊಂಡಾಂತೂನ್ ಸೊರ್‍ಯಾಚೊ ವಾಸ್ ಘಮ್ ಘಮ್ ಯೆತಾಲೊ. ಜೀಬ್ ಸಾರ್ಕಿ ಘೊಳಾನಾಸ್ಲಿ.

“ತೆಂ ಫುಡೆಂ ಶಿಕ್ತೆಂ ಆಸ್‍ಲ್ಲೆಂ ನ್ಹಂಯ್ವೇ?”

“ಶಿಕ್‍ಲ್ಲೆಂ ಪುರೊ. ಲೊಕಾಚ್ಯಾ ರಾಂದ್ನಿಂತ್ಲೊ ಗೊಬೊರ್ ಕಾಡ್ತೆಲ್ಯಾಂಕ್ ಚಡ್ ಶಿಕಾಪ್ ಕಿತ್ಯಾಕ್?” – ತಾಚೆಂ ಒಕ್ಕಾಣೆ!

ಸೊರ್‍ಯಾಚಾ ಆಮಾಲಾರ್ ಆಸ್‍ಲ್ಲ್ಯಾ ತಾಚೆಲಾಗಿಂ ತರ್ಕ್ ಕರ್ಚೆಂ ಖಡ್ಪಾ ಫಾತ್ರಾರ್ ಉದಕ್ ವೊತ್‍ಲ್ಲ್ಯಾಬರಿ ಮ್ಹಣ್ ಹಾಂವೆಂ ಚಿಂತ್ಲೆಂ ಆನಿ ಫುಡೆಂ ವಿಚಾರ್ಲೆಂ:

“ತಾಚೊ ಮುಖ್ಲೊ ನೊವ್ರೊ ಕೊಣ್ ಆನಿ ಕಸಲಿ ವ್ಯಾಪ್ತ್ ಕರ್ತಾ?”

“ತಾಚೆಂ ನಾಂವ್ ಶೀನಾ. ತೊ ಲೊರಿ ಚಾಲಕ್ ಆನಿ ಬರೆಂ ಜೊಡ್ತಾ.  ಪೊಯ್ರ್‍‍ಚ್ ತಾಣೆ ಬೈಕಂಪಾಡಿ ಲಾಗ್ಸಾರ್ ನವೆಂ ಘರ್ ಬಾಡ್ಯಾಕ್ ಘೆತ್ಲಾಂ.”

ಹಾಂವ್ ಫುಡೆಂ ಉಲಯ್ಲೊ ನಾ. ಲಗ್ನಾ ಸಮಾರಂಭಾಕ್ ಯೆತಾಂ ಮ್ಹಣ್ ಸಾಂಗುನ್ ಥೊಡೆ ಶೆಂಬೊರ್ ರುಪ್ಯಾಂಚೆ ನೋಟ್ ಹಾಂವೆಂ ತಾಚಾ ಹಾತಾರ್ ಘಾಲೆ ಆನಿ ತಾಕಾ ಧಾಡ್ಲೊ.

– 5 –

ಬಾವೀಸ್ ದಿಸಾಂ ಉಪ್ರಾಂತ್ ಲ್ಹಾನ್ ಮಟ್ಟಾರ್ ಉಭೆಂ ಕೆಲ್ಲ್ಯಾ ಲಗ್ನಾ ಕಾರ್ಯಾಕ್ ಹಾಂವ್ ಜರೂರ್ ಪಾವ್ಲೊಂ.  ನಿರ್ಮಲಾಚಾ ತೊಂಡಾರ್ ಖುಶೆಚಿ ಛಾಯಾ ಮ್ಹಾಕಾ ಝಳ್ಕಲಿ ನಾ. ತಾಕಾ ಬರೆಂ ಮಾಗೊನ್ ಶುಭಾಶಯ್ ದಿಂವ್ಚಾ ವಗ್ತಾ ತಾಚಾ ದೊಳ್ಯಾಂಚಾ ಕೊನ್ಸ್ಯಾಂನಿ ಉದೆಲ್ಲಿಂ ದುಕಾಂ ಮ್ಹಾಕಾ ದಿಸ್ಲಿಂ. ತೆಂ ಕಿತೆಂಗೀ ಸಾಂಗುಂಕ್ ಸೊಧ್ತಾಲೆಂ!

ನಿರ್ಮಲಾಚಾ ದುಕಾಂಚೊ ಮತ್ಲಬ್ ಮ್ಹಾಕಾ ಸುಸ್ತಾಲೊ ನಾ. ಮ್ಹಜೊ ಬಾಬ್ ಅಂತರ್ಲೆಲ್ಯಾ ವೆಳಿಂ ಮ್ಹಜಿ ಮಾಂಯ್ ಜಾಯ್ತೆಂ ರಡ್‍ಲ್ಲಿ – ವಿರಾಸಾಚಿಂ ಆನಿ ವೆಗ್ಳಾಚಾರಾಚಿಂ ದುಕಾಂ.  ಹಾಂವೆಂ ಮೆಟ್ರಿಕಾಚಿ ಆನಿ ತಾಚೆ ಉಪ್ರಾಂತ್ ಹರ್ ಪರೀಕ್ಶೆಂತ್ ಉತ್ತೀರ್ಣ್ ಜಾಲ್ಲೆ ವೆಳಿಂ ತಿ ರಡ್‍ಲ್ಲಿ – ಸಂತೊಸಾಚಿಂ ದುಕಾಂ. ತರ್ ನಿರ್ಮಲಾಚಾ ದುಕಾಂ ಪಾಟ್ಲೊ ಅರ್ಥ್? ಮ್ಹಜೊ ಉಪ್ಕಾರ್ ಬಾವುಡ್ಚಿಂ ವ ನಿರಾಶೆಚಿಂ?!

ಘಡಿಯಾಳಾಚೆ ಕಾಂಟೆ ಕೊಣಾಯ್ಚಿ ಪರ್ವಾ ಕರಿನಾಸ್ತಾಂ ಘುಂವೊನ್ ರಾವ್ಲೆ ಆನಿ ಮ್ಹಜೆ ದೀಸ್ ರೋಸ್ ಕಾಡುನ್ ಉಡಯಿಲ್ಲ್ಯಾ ಚಿಂವ್ಡಾ ಪರಿಂ ಕಾಂಯ್ ಸಾರ್ ನಾಸ್ತಾಂ ಪಾಶಾರ್ ಜಾತಾಲೆ.  ಫುಲಾಂಚಾ ವೊಡ್ತಾಚೊ ಪೋಸ್ ಹಾಂವ್ ಕರ್ತಾಲೊಂ ಫಕತ್ ಮಾಂಯ್ಚೊ ಉಗ್ಡಾಸ್ ಜಿವೊ ದವರುಂಕ್. ನಿರ್ಮಲಾಚ್ಯಾ ಘರ್ಚಿಂ ಆತಾಂ ಫುಲಾಂ ವ್ಹರುಂಕ್ ಯೇನಾಸ್ಲಿಂ. ಲಗ್ನ್ ಜಾವ್ನ್ ಗೆಲ್ಲೆಂ ನಿರ್ಮಲಾ ವರಸ್ ಪಾಶಾರ್ ಜಾಲ್ಯಾರ್‍‍ಯೀ ಮ್ಹಜೆ ಝಳ್ಕೆಕ್ ಪಡ್ಲೆಂ ನಾ.

ಆನಿ ಆವ್ಚಿತ್ ಎಕಾ ದಿಸಾ ತಾಚಿ ಆವಯ್ ಖರ್ಶೆವ್ನ್ ಮ್ಹಜ್ಯಾ ಬಾಗ್ಲಾರ್ ಉಭಿ ಜಾಲಿ!

“ನಿರ್ಮಲಾ ಗಡೀಸ್ ಆಸಾ…ಎ.ಜೆ. ಆಸ್ಪತ್ರೆಂತ್ …ತುಕಾ ಪಳೆಜೆ ಮ್ಹಣ್ತಾ!”

“ಏ ಸಾಯ್ಬಾ! ತಾಕಾ ಕಿತೆಂ ಜಾಲೆಂ?” ಹಾಂವ್ ಉದ್ಗಾರ್ಲೊಂ.

“ಚೆಡ್ವಾನ್ ಆಮ್ಚೆ ಮರ್ಯಾದಿಕ್ ಘಸ್ ಪುಸ್ಲಿ…ತಾಣೆ ಆಂಗಾರ್ ಚಿಮ್ಣೆ ತೇಲ್ ವೊತುನ್ ಆಪ್ಣಾಕ್‍ಚ್ ಹುಲ್ಪಾಯ್ಲಾಂ!” ತಿ ರಡೊನ್ ಮ್ಹಣಾಲಿ.

“ಜಾಯ್ತ್, ಹಾಂವ್ ಫಾಲ್ಯಾಂ ಶಾಳೆ ಥಾವ್ನ್ ಸೀದಾ ಥಂಯ್ ವೆತಾಂ.”

ದುಸ್ರ್ಯಾ ದಿಸಾ ಸಾಂಜೆರ್ ಶಾಳೆಚೆಂ ಕಾಮ್ ಜಾತೆಚ್ ಹಾಂವ್ ಬಸ್ಸ್ ಧರುನ್ ಸೀದಾ ಎ.ಜೆ. ಆಸ್ಪತ್ರೆಕ್ ಪಾವ್ಲೊಂ. ನಿರ್ಮಲಾ ವಿಶೇಸ್ ಸೆವಾ ಮೆಳ್ಚಾ ಕುಡಾಂತ್ ಆಸಾ ಮ್ಹಣ್ ಆಸ್ಪತ್ರೆಚಾ ಸಿಬಂಧೆ ಥಾವ್ನ್ ಕಳ್ಳೆಂ. ಹಾಂವ್ ಥಂಯ್ ಪಾವ್ತಾನಾ ತಾಚೊ ಬಾಪುಯ್ ಆನಿ ತಾಚೊ ಪತಿ ಶೀನಾ ಕುಡಾ ಭಾಯ್ರ್ ಬಸುನ್ ಆಸ್‍ಲ್ಲೆ. ಫಕತ್ ಎ‍ಎಕ್ಲ್ಯಾಕ್ ಭಿತರ್ ಸೊಡ್ತಾಲೆ ಜಾಲ್ಲ್ಯಾನ್ ಮ್ಹಜಿ ಸರ್ತಿ ಯೆತೆಚ್ ಹಾಂವ್ ಭಿತರ್ ಗೆಲೊಂ. ತಾಚಿ ಹುಲ್ಪಾಲ್ಲಿ ಸ್ಥಿತಿ ಪಳೆತಾನಾ ತೆಂ ವಾಂಚೊಕ್ ಸಕಾತ್ ಮ್ಹಳ್ಳೊ ಭರ್ವಸೊ ಮ್ಹಾಕಾ ಮೆಳ್ಳೊ ನಾ.  ಪುಣ್ ತೆಂ ಕಷ್ಟಾಂನಿ ಉಲಂವ್ಕ್ ಸಕ್ತಾಲೆಂ. ತೆಂ ಮ್ಹಾಕಾಚ್ ರಾಕ್ತಾಲೆಂ ಮ್ಹಣ್ ದಿಸ್ತಾ!

“ಹಾಂವ್ ಸಲ್ವಾಲಿಂ ಸರ್” ತೆಂ ಮ್ಹಣಾಲೆಂ ಪಿಂರ್ಗೊನ್.

“ಅಸೆಂ ಕಿತ್ಯಾಕ್ ಕೆಲೆಂಯ್ ನಿರ್ಮಲಾ?” ಹಾಂವೆಂ ಹಾಳ್ವಾಯೆನ್ ವಿಚಾರ್ಲೆಂ.

“ದುಸ್ರಿ ವಾಟ್ ದಿಸ್ಲಿ ನಾ ಸರ್,” ತಾಣೆ ಕುಡ್ಕ್ಯಾ ಉತ್ರಾಂನಿ ಜಾಪ್ ದಿಲಿ. ” ಶೀನಾಕ್ ಆನಿ ಮ್ಹಜ್ಯಾ ಬಾಪಾಯ್ಕ್ ಸೊರ್‍ಯಾಚ್ಯಾ ಗಡಂಗಾಂತ್ಲಿ ಒಳಕ್ … ಹಾಂವ್ ಪರೀಕ್ಶೆಕ್ ತಯಾರಾಯ್ ಕರುನ್ ಘರಾ ಎಕಾ ದಿಸಾ ಎಕ್ಸುರಿಂ ಆಸ್‍ಲ್ಲ್ಯಾ ವೆಳಾರ್ ಘರಾ ಯೇವ್ನ್ ಮ್ಹಜೆಂ ನಿಸ್ಕಳ್ಪಣ್ ಶೀನಾನ್ ಲುಟ್ಲೆಂ … ಮರ್ಯಾದ್ ಸಾಂಬಾಳುಂಕ್ ಮ್ಹಣ್ ತಾಚೆಲಾಗಿಂಚ್ ಮ್ಹಜೆಂ ಲಗ್ನ್ … ಪುಣ್ ತೊ ಕಾಮುಕಿ ಆನಿ ಕರ್ಮಿ ಮ್ಹನಿಸ್ ಸರ್ … ಲಗ್ನಾ ಉಪ್ರಾಂತ್ ಮ್ಹಜೆ ತಾಣೆ ಬಾರಾ ಬ್ರೆಸ್ತಾರ್ ಕೆಲೆ… ನಿಮಾಣೆ ಥೊಡ್ಯಾ ದಿಸಾಂ ಆದಿಂ ಆಪ್ಲ್ಯಾ ಇಷ್ಟಾ ಸಂಗಿಂ ತಾಣೆ ಮಾಕಾ ವಾಂಟುನ್ ಘೆತ್ಲೆಂ…”

ನಿರ್ಮಲಾನ್ ಫುಡೆಂ ಸಾಂಗ್ಲೆಂ ನಾ, ಪುಣ್ ವೊಳಿಂ ಮಧ್ಲೊ ಅರ್ಥ್ ಹಾಂವೆಂ ಸಮ್ಜೊನ್ ಘೆತ್ಲೊ.

“ಪೊಲಿಸಾಂನಿ ತುಜೆಂ ವಾಕ್ಮೂಲ್ ಘೆಂವ್ಕ್ ನಾ?” ಹಾಂವೆಂ ವಿಚಾರ್ಲೆಂ.

“ಘೆತ್ಲೆಂ ಸರ್, ಹಾಂವೆಂ ಕೊಣಾಯ್ಚೆರ್‍‍ಯೀ ಗುನ್ಯಾಂವ್ ಮಾಂಡುಂಕ್ ನಾ … ಗೂಣ್ ಜಾಯ್ನಾಸ್ಲಿ ಪಿಡಾ ತಾಣೆ ಮ್ಹಾಕಾ ದಿಲ್ಯಾ ಮ್ಹಣ್ತೆಚ್ ತೊಯೀ ಆನಿ ಚಡ್ ಕಾಳ್ ವಾಂಚೊ ನಾ. ಮೆಲ್ಲ್ಯಾ ವಾಘಾಕ್ ಮಾರುನ್ ಕಿತೆಂ ಮೆಳಾತ್?”

“ಗೂಣ್ ಜಾಯ್ನಾಸ್ಲಿ ಪಿಡಾ ಮ್ಹಣ್ ಕಿತ್ಯಾಕ್ ಮ್ಹಣ್ತಾಯ್?”

“ಪೊಯ್ರ್ ತಾಪ್ ರಾವೊನ್ ರಾವೊನ್ ಯೆತಾಲೊ ದೆಕುನ್ ದಾಕ್ತೆರಾನ್ ರಗತ್ ಪರೀಕ್ಷಾ ಕರಯ್ಲಿ ಸರ್…ಏಡ್ಸ್ ಪಿಡಾ ಮ್ಹಣ್ ತಾಂಣಿ ಸಾಂಗ್ಲೆಂ … ತುಮಿ ಮ್ಹಾಕಾ ಕೆಲ್ಲ್ಯಾ ಸರ್ವ್ ಉಪ್ಕಾರಾಂಕ್ ದೇವ್ ಬರೆಂ ಕರುಂ ಸರ್…”

ನಿರ್ಮಲಾನ್ ಸವ್ಕಾಸ್ ದೊಳೆ ಧಾಂಪ್ಲೆ. ಪರತ್ ತೆ ಉಗ್ತೆ ಜಾಲೆ ನಾಂತ್.

ಘರಾ ಯೇವ್ನ್ ವೊಡ್ತಾಂತ್ಲೊ ಏಕ್ ಗುಲಭ್ ಖುಂಟುನ್ ಆಲ್ತಾರಿರ್ ಹಾಂವೆಂ ದವರ್ಲೊ ನಿರ್ಮಲಾಚ್ಯಾ ನಾಂವಾನ್. ಮಾಂಯ್ನ್ ಸಾಂಗ್ಲೆಲ್ಯಾ ಉತ್ರಾಂಚೊ ಮ್ಹಾಕಾ ತೆದ್ನಾ ಉಗ್ಡಾಸ್ ಆಯ್ಲೊ:

‘ಚಲಿ ಫುಲಾಬರಿ ರೆ ಸಾಲು, ತಾಚ್ಯೊ ಪಾಕ್ಳ್ಯೊ ಫಿಸ್ಡುನ್ ತ್ಯೊ ಪರತ್ ಒಟ್ಟುಕ್ ಮೆಳಯ್ಲ್ಯಾರ್ ತೆಂ ಫುಲ್ ಜಾಯ್ನಾ.’

■ ಎಮ್.ಪಿ. ರೊಡ್ರಿಗಸ್ 

ಫಾತಿಮಾ ರಲಿಯಾ ಕನ್ನಡಾಂತ್ ಕವಿತಾ, ಕಥಾ, ಪ್ರಬಂದ್, ಲೇಖನಾಂ  ಬರಯ್ತಾ. ಆಜ್ ಮೆರೆನ್ ತಿಚಿಂ ತೀನ್ ಪುಸ್ತಕಾಂ ಫಾಯ್ಸ್ ಜಾಲ್ಯಾಂತ್. ‘ಕಡಲು ನೋಡಲು ಹೋದವಳು’ (ಪ್ರಬಂದ್) ‘ಒಡೆಯಲಾರದ ಒಡಪು’ (ಕಾಣಿಯೊ) ಆನಿ ‘ಅವಳ ಕಾಲು ಸೋಲದಿರಲಿ’ (ಕವಿತಾ) ಜಾಯ್ತ್ಯಾ ಸಾಹಿತ್ಯ್ ಸ್ಪರ್ಧ್ಯಾಂನಿ ತಿಣೆ ಇನಾಮಾಂ ಜೊಡ್ಲ್ಯಾಂತ್. ಗಾಂವಾನ್ ಪೆರ್ನೆಚಿ ಪ್ರಸ್ತುತ್ ಲಗ್ನಾ ಉಪ್ರಾಂತ್ ಉಡುಪಿಚ್ಯಾ ಹೆಜಮಾಡಿಂತ್ ವಸ್ತಿ ಕರುನ್ ಆಸಾ. ಮಾಹೆತ್ ತಂತ್ರಜ್ಞಾನಾಂತ್ ಎಂಬಿಎ ಪದ್ವೆದಾರ್. ಪ್ರಸ್ತುತ್ ಕಾಣಿ ‘ಉಮ್ಮನ ಅಲಿಕತ್’ ತಿಚ್ಯಾ ‘ಒಡೆಯಲಾರದ ಒಡಪು’ ಸಂಗ್ರಹಾಥಾವ್ನ್ ವಿಂಚ್ಲ್ಯಾ

“ತುಜೊ ಘೊವ್ ಜಿವಾಂತ್ ಆಸ್ತಾ ವರೇಗ್ ತುಕಾ ಜಾಗ್ಯಾಚೊ ವಾಂಟೊ ದೀಂವ್ಕ್ ಜಾಯ್ನಾ, ಎಕಾದಾವೆಳಾ ದಿಲ್ಯಾರೀ ತೊ ಕಿತೆಂ ದವರ್ತಲೋ? ತೊ ಮೆಲ್ಯಾ ಉಪ್ರಾಂತ್ ಮಾತ್ರ್ ತುಕಾ ಕಾಂಯ್ ಇಲ್ಲೊ ಲ್ಹಾನ್ ಕುಡ್ಕೊ ದಿವ್ಯೆತ್ ಕೊಣ್ಣಾ”. ತಶೆಂ ಸಾಂಗ್‍ಲ್ಲ್ಯಾ ದೆರಾಚ್ಯಾ ತಾಳ್ಯಾಂತ್ ತಮಾಶೆಗೀ ವ್ಹಾ ಖರೆಂ ಸತ್‍ಗೀ ಮ್ಹಣ್ ಆರ್ಥ್ ಜಾಂವ್ಕ್ ನಾ ಖತೀಜಾಕ್. ಪುಣ್ ತಾಚಿಂ ಉತ್ರಾಂ ಆಯ್ಕೊನ್ ತಿಚ್ಯೆ ಮತಿಕ್ ಕೊಡು ಅನ್ಭೋಗ್ ಜಾಲೊ. ಕಠೀಣ್ ಪಿಯೊಣ್ಯಾಕ್ ಬಲಿ ಜಾಲ್ಲ್ಯಾ ಮ್ಹಜ್ಯಾ ಘೊವಾಥಾವ್ನ್ ಇತ್ಲೆ ಕಶ್ಟ್ ಆಯ್ಲ್ಯಾರೀ, ತೊ ಮರೊನ್ ವಚೊಂದಿ ಮ್ಹಣ್ ತಾಚ್ಯಾಚ್ ಧಾಕ್ಟ್ಯಾ ಭಾವಾನ್ ಸಾಂಗ್ತಾನಾ ತಿಕಾ ಮ್ಹಸ್ತ್ ಬೆಜಾರ್ ಜಾಲೆಂ. ಕೆದಿಂಕ್‍ಚ್ ಕೊಣಾ ಮುಕಾರೀ ಹಾತ್ ಒಡ್ಡಾಯ್ನಾತ್ಲ್ಯಾ ತಿಕಾ ಆಜ್ ಗಾಂವ್ಚ್ಯಾ ಧಾರ್ವಾಟ್ಯಾಲಾಗಿಂ ನಾಗ್ಡೆಂ ರಾವ್‍ಲ್ಲೆಬರಿ ಭೊಗ್ಲೆಂ . ತಾಕಾ ಪೂರಕ್ ಜಾವ್ನ್, ಥಂಯ್ಚ್ ಲಾಗಿಂ ನಾರ್ಲ್ ಸೊಲ್ಚೊ ಚೆಡೊ ತಿಕಾ ಖಾಂವ್ಚೆಬರಿ ವಯ್ರ್ ಥಾವ್ನ್ ಸಕಯ್ಲ್ ವರೇಗ್ ಪಳೆತಾಲೊ. ದಾ ಬಾರಾ ಪತ್ತೆಂ ಪಡ್‍ಲ್ಲ್ಯಾ ಬುರ್ಖಾವಯ್ರ್ ಘಾಲ್ಲ್ಯಾ ದುಪಟ್ಟಾಕ್ ತಿಣೆಂ ತಿಚ್ಯಾ ಹರ್ದ್ಯಾರ್ ವೋಡ್ನ್ ಆಪ್ಣಾಚ್ಯಾ ಘೊವಾಚೆಂ ಘರ್ ಮ್ಹಣ್ ಆಸ್‍ಲ್ಲ್ಯಾ ಘರ್ಚ್ಯಾ ಆಂಗ್ಣಾಂಥಾವ್ನ್ ತಿ ಬಾಯ್ರ್ ಸರ್ಲಿ.

ತಿಣೆಂ ಚಡ್ತಿಕ್ ಕಾಂಯ್ ವಿಚಾರುಂಕ್ ನಾ. ಸದಾಂಚ್ ಬಿಡಿ ಬಾಂದುನ್, ಲೊಕಾಚ್ಯಾ ಘರಾಂಚೊ ಘಶ್ಟೊ ಕಾಡ್ನ್, ಆಯ್ದಾನಾಂ ಧುವ್ನ್ ಕಶ್ಟಾಂನಿ ಘೊಳ್ಚ್ಯಾ ಖತೀಜಾನ್ ಆಜ್ ವರೇಗ್ ಕೊಣಾಯ್ ಮುಕಾರ್ ಹಾತ್ ಒಡ್ಡಾಯಿಲ್ಲೊ ನಾ. ಆಜ್ ಕಾಲ್ ತಿ ಇಲ್ಲೆ ಚಡ್ ಪಯ್ಶೆ ಮೆಳ್ತಾತ್ ಮ್ಹಣ್ ಬಾಂಳ್ಟಿಕ್ ಪೊಸುಂಕ್ ಸಯ್ತ್ ವೆತಾಲಿ, ಆಪ್ಣೆ ಜೊಡ್‍ಲ್ಲೆ ಪಯ್ಶೆ ಪೂರಾ ಸೊರ‍್ಯಾಕ್ ವಿಬಾಡ್ ಕರ್ಚೊ ತಿಚೊ ದಾದ್ಲೊ, ತಿಣೆಂ ಕಾಂಯ್ ಇಲ್ಲೆ ಕಾಸ್ ಕುಜ್ನಾಂತ್ ಡಬ್ಬ್ಯಾಂತ್ ಲಿಪಯಿಲ್ಲೆ ಸಯ್ತ್ ಕಶೆಗೀ ಮಾಯಾಗ್ ಜಾತಾಲೆ. ಘರಾಂತ್ ಏಕ್ ನಯಾ ಪಯ್ಸೊ ಉರನಾ ತೆಂ ಜಾಣಾ ಜಾಲ್ಲ್ಯಾ ತಿಣೆಂ ‘ಚಿಟಿ ಸ್ಕೀಮಾಂ’ತ್ ಪಯ್ಶಿ ಜಮೊ ಕರುಂಕ್ ಪ್ರಯತ್ನ್ ಕೆಲೆಂ. ಪುಣ್ ತೆ ಪಯ್ಶೆಯ್ ತಿಚ್ಯಾ ಘೊವಾನ್ ಮ್ಹಣ್ಜೆ ಖಾದರಾನ್ ಗುಳುಮ್ ಕೆಲೆ. ತ್ಯಾ ಉಪ್ರಾಂತ್ ತಿಣೆಂ ಪಯ್ಶೆ ಉರೊಂವ್ಚಿ ಆಶಾ ಸೊಡ್ನ್ ಸೊಡ್ಲಿ ಆನಿ ದೆವಾನ್ ಕೆಲ್ಲೆಬರಿ ಜಾತಾ ಮ್ಹಣ್ ವೊಗೊಚ್ ಬಸ್ಲಿ.

ಪುಣ್ ಆಪ್ಲ್ಯೆ ಧುವೆನ್ ಹೈಸ್ಕೂಲಾಕ್ ಭರ್ತಿ ಜಾಂವ್ಕ್ ದೋನ್ ಹಜಾರ್ ರುಪಯ್ ಜಾಯ್ ಮ್ಹಳ್ಯಾ ಉಪ್ರಾಂತ್ ದುಸ್ರಿ ಕಾಂಯ್ ವಾಟ್ ದಿಸನಾತ್ಲ್ಯಾ ವಗ್ತಾ ಖಾದರಾಚ್ಯಾ ಮಾಲ್ಘಡ್ಯಾ ಘರಾ ವಚೊನ್ “ಖಾದರ್ ಏಕ್ ನಯಾ ಪಯ್ಸೊ ಘರಾ ಖರ್ಚಾಕ್ ದೀನಾ, ಹಾಂವೆಂ ಜೊಡ್‍ಲ್ಲೆ ಪಯ್ಶೆ ಸಯ್ತ್ ತೊ ಕಾಡ್ನ್ ವರ್ತಾ. ಮ್ಹಜ್ಯೆ ಧುವೆಕ್ ಮುಕಾರ್ ಶಿಕೊಂಕ್ ಆಸಾ, ತ್ಯಾ ದೆಕುನ್ ಕಾಂಯ್ ಇಲ್ಲಿ ಕುಮೊಕ್ ಕರ್ ವಾ ತಾಚ್ಯಾ ವಾಂಟ್ಯಾಚೊ ಜಾಗೊ ತರೀ ಆಮ್ಕಾ ಸೊಡ್ನ್ ದೀ” ಮ್ಹಣ್ ತಿಣೆಂ ವಿನೊವ್ಣಿ ಕೆಲಿ ದೆರಾಲಾಗಿಂ. ಪುಣ್ ತೊ ತಿತ್ಲೊ ಉದಾರಿ ಜಾಲ್ಲೊ ತರ್ ತಿಣೆಂ ಇತ್ಲೆ ಪೂರಾ ಕಶ್ಟ್ ಕಾಡಿಜೆ ಮ್ಹಣ್ ಗರ್ಜ್ ನಾತ್ಲಿ ಮ್ಹಣ್ ತಿಕಾ ತ್ಯಾ ವೆಳಾ ಆರ್ಥ್ ಜಾಂವ್ಕ್ ನಾ.

ಪುಣ್ ಆರ್ಥ್ ಜಾಲ್ಲೆಬರಿ ಖತೀಜಾ ಪಾಟಿಂ ಘರಾ ಆಯ್ಲಿ. ಬಾಗ್ಲಾರ್ ಉಬೆಂ ಆಸ್ಚ್ಯಾ ಹಸೀನಾಕ್, ಆಪ್ಲ್ಯೆ ಆವಯ್ಚೆಂ ಮುಕಮಳ್ ಪಳೆವ್ನ್ ಪರಿಸ್ಥಿತಿ ಸಮ್ಜಲಿ. ಮ್ಹಜ್ಯಾ ಮುಕ್ಲ್ಯಾ ಶಿಕ್ಪಾಚ್ಯೆ ಆಶೆಕ್ ಶೆಳೆಂ ಉದಕ್ ವೊತ್‍ಲ್ಲೆಬರಿ ಜಾಲೆಂ ಮ್ಹಣ್ ಚಿಂತುನ್ ಆವಯ್ ಕಡೆ ಕಾಂಯ್ಚ್ ಸವಾಲ್ ವಿಚಾರುಂಕ್ ನಾ. ” ಹಮೀದ್ ಆನಿ ಜಮೀಲಾ ಯೇಂವ್ಕ್ ಜಾಲಿ ನೆ ಆಮ್ಮಿ? ಚಾಯೆಕ್ ಉದಕ್ ದವರ್ಚೆಂ ಗೀ?” ಮ್ಹಣ್ ವಿಚಾರ್ಲೆಂ ತಿತ್ಲ್ಯಾರ್ ತಿಂ ಪಾವ್‍ಲ್ಲಿಂಚ್ ದೂದ್ ನಾತ್ಲಿ ಚಾ ಆಮಿ ಪಿಯೆನಾಂವ್ ಮ್ಹಣ್ ಹಟಾಕ್ ಲಾಗ್ಲಿಂ. ಹಸೀನಾನ್ ದೊಗಾಂಕೀ ಲಾಗಿಂ ಕರುನ್ “ತಶೆಂ ಪೂರಾ ಗಲಾಟೊ ಕರುಂಕ್ ನ್ಹಜೊ, ಆನ್ಯೇಕ್ ಪಾವ್ಟಿಂ ದೂದ್ ಹಾಡ್ಲ್ಯಾ ಉಪ್ರಾಂತ್ ತುಮ್ಕಾಂ ದೊಗಾಂಕೀ ವ್ಹಡ್ಲ್ಯಾ ಲೊಟ್ಯಾಂತ್ ಚಾ ಕರ್ನ್ ದಿತಾಂ. ಆತಾಂ ಆಮಿ ತೆಗಾಂಯ್ ‘ಪುಟಿ’ ಚಾ ಪಿಯೆಂಯಾಂ” ಮ್ಹಣ್ ತಾಂಕಾಂ ಸಮ್ಜಯ್ಲೆಂ. ಹೆಂ ಸಗ್ಳೆಂ ಆಡ್ ದೊಳ್ಯಾಂನಿ ಪಳೆವ್ನ್ ಆಸ್‍ಲ್ಲ್ಯಾ ಖತೀಜಾಚ್ಯಾ ಕಾಳ್ಜಾಂತ್ ಘಸಕ್ಕ್ ಜಾಲೆಂ. ಆಪ್ಲ್ಯೆ ಧಾಕ್ಟ್ಯೆ ಭಯ್ಣಿಕ್ ಆವಯ್ ಬರಿ ಪಳೆಂವ್ಚ್ಯಾ ಹಸೀನಾಚಿ ಏಕ್ ಶಿಕ್ಚಿ ಆಶಾ ಮ್ಹಜ್ಯಾನ್ ತಿರ್ಸುಂಕ್ ಜಾಯ್ನಾ ನೇ ಮ್ಹಣ್ ಚಿಂತುನ್ ತಿಕಾ ವಿರಾರ್ ಜಾಲೆಂ.

ತಿ ಉಟೊನ್ ಘರಾ ಭಿತರ್ ಗೆಲಿ, ಖಂಯ್ಚ್ಯಾ ಪುಣೀ ಡಬ್ಬ್ಯಾಂತ್ ಕಾಂಯ್ ಪುಡಿ ಕಾಸ್ ಮೆಳ್ತಾತ್ ಗೀ ಮ್ಹಣ್ ಡಬ್ಬೆ ಹಾಲೊಂಕ್ ಲಾಗ್ಲಿ. ಪುಣ್ ಕಾಂಯ್ ಫಾಯ್ದೊ ನಾ, ಪಕ್ಕರ್ನ್ ತಿಕಾ ಆಪ್ಲಿ ಆವಯ್ ಸರ್ಚ್ಯಾ ಪಯ್ಲೆಂ ತಿಣೆಂ ಖತೀಜಾಚ್ಯಾ ಹಾತಾಂತ್ ಆಪ್ಲಿಂ ಕಾಜಾರಾಕ್ ಘಾಲ್ಲಿಂ ಕುಡ್ಕಾಂ ತಿಚ್ಯಾ ಹಾತಾಂತ್ ದಿಲ್ಲೊ ತಿಕಾ ಉಡಾಸ್ ಆಯ್ಲೊ. ಹಸೀನಾಕ್ ಏಕ್ ಬರೆಂ ಕಾನಾಚೆಂ ಕರ್ನ್ ಘಾಲಿಜೆ ಮ್ಹಣ್ ತಿಣೆಂ ಬೊವ್ ಜಾಗ್ರುತಾಯೆನ್ ದವರ್‌ಲ್ಲಿಂ. ತಿಂಚ್ ವಿಕುನ್ ಆತಾಂ ತಾಚ್ಯಾ ಶಿಕ್ಪಾಕ್ ಪಯ್ಶೆ ದಿಲ್ಯಾರ್ ಜಾಲೆ ಮ್ಹಣ್ ಚಿಂತುನ್ ” ಬಾಗಿಲ್ ಧಾಂಪ್ ಹಸೀನಾ, ಆತ್ತಾಂ ಆಯ್ಲಿಂ” ಮ್ಹಣ್ ಕುಡ್ಕಾಂ ಜಾಗ್ರುತಾಯೆನ್ ದೊದೋನ್ ಪ್ಲಾಸ್ಟಿಕಾಂನಿ ಬಾಂದುನ್ ಭಾಂಗಾರಾಚ್ಯಾ ದುಕಾನಾಂತ್ ವಿಕ್ಲಿಂ. ತಾಣೆಂ ದಿಲ್ಲೆ ದೋನ್ ಹಜಾರ್ ಆನಿ ಪನ್ನಾಸ್ ರುಪಯ್ ಸಾಂಬಾಳ್ನ್, ಹ್ಯಾ ದುಡ್ವಾಚೆರ್ ಘೊವಾಚಿ ದೀಶ್ಟ್ ಪಡನಾ ಜಾಂವ್ದಿ ಮ್ಹಣ್ ಮಾಗೊನ್ ತಿ ಘರಾ ಪಾವ್ಲಿ. ಫಾಲ್ಯಾಂ ವರೇಗ್ ಸಾಂಬಾಳ್ನ್ ದವರ್ಲ್ಯಾರ್ ಜಾಲೆಂ. ಸೊಮಾರಾ ಸಕಾಳಿಂ ಹಸೀನಾಚ್ಯಾ ಹಾತಾಂತ್ ದೀವ್ನ್ ತಾಚ್ಯಾ ಮೆಡಾಮೆಕ್ ಪವಿತ್ ಕರಿಜೆ ಮ್ಹಣ್ ಚಿಂತ್ಲೆಂ ತಿಣೆಂ. ತ್ಯಾ ವರೇಗ್ ಆಪ್ಲ್ಯಾ ಘೊವಾಕ್ ಘರಾಂತ್ ಪಯ್ಶೆ ಆಸಾತ್ ಮ್ಹಣ್ ಕಳನಾ ಜಾಂವ್ದಿ ಮ್ಹಣ್ ಮಾಗೊನ್ ತಾಂತ್ಲೊ ಏಕ್ ರುಪಯ್ ದೆಗೆಕ್ ಕಾಡ್ನ್ ಗಾಂವ್ಚ್ಯಾ ದರ್ಗಾಕ್ ಆಂಗೊವ್ಣ್ ಕೆಲಿ ತಿಣೆಂ.

ದುಸ್ರ್ಯಾ ದೀಸ್ ವೆಗ್ಗಿಂ ಉಟೊನ್ ಸಾಯ್ಬಾಚ್ಯಾ ತೊಟಾಂತ್ ಕಾಡ್‍ಲ್ಲಿಂ ಪೊಪ್ಳಾಂ ವಿಂಚುಂಕ್ ವೆಚ್ಯಾ ಪಯ್ಲೆಂ ತೊ ದೋನ್ ಹಜಾರಾಂಚೊ ಕಾಟ್ ಪರ್ತ್ಯಾನ್ ಆಪ್ಲ್ಯಾ ಪಾಲ್ವಾಂತ್ ಘಟ್ಟ್ ಕರ್ನ್ ಬಾಂದುನ್ “ಹಸೀನಾ ಜಾಗ್ರುತ್” ಮ್ಹಣ್ ಎದೊಳ್‍ಚ್ ಮೊಡೊನ್ ಪಡೊಂಕ್ ಜಾಲ್ಲೆಂ ಬಾಗಿಲ್ ವೋಡ್ನ್ ಭಾರ್ಯ್ ಪಡ್ಲಿ ತಿ. ತೆದ್ನಾಂಚ್ ತಿಚೊ ನಿಮಾಣೊ ಪೂತ್ ಆಡ್ಡೊಸ್ ಮಾಗೊನ್ “ಅಮ್ಮಿ, ಆಜ್ ಸಾಂಜೆರ್ ಯೆತಾನಾ ದೂದ್ ಹಾಡ್” ಮ್ಹಣ್ ತಾಕೀದ್ ದೀಲಾಗ್ಲೊ. ಆಪ್ಣಾಚಿ ಆಸಹಾಯಕತಾ ಗಿಳುನ್ ತಿಣೆಂ ಜಾಯ್ತ್ ಮ್ಹಣ್ ತಕ್ಲಿ ಹಾಲಯ್ಲಿ. ತಿತ್ಲ್ಯಾರ್ ಖುಶಿ ಪಾವ್‍ಲ್ಲೊ ಹಮೀದ್ “ಆಜ್ ಸಾಂಜೆರ್ ದುದಾಚಿ ಚಾ” ಮ್ಹಣ್ ನಾಚೊನ್ ಆಪ್ಲ್ಯೆ ಭಯ್ಣಿಕ್ ಘೆವ್ನ್ ಖೆಳೊಂಕ್ ಗೆಲೊ.

ತೊಟಾಕ್ ಕಾಮಾಕ್ ಗೆಲ್ಲ್ಯಾ ಖತೀಜಾಚಿ ಮತ್ ಥಿರಾರ್ ನಾಸ್ಲಿ. ಘಡಿಯೆಕ್ ಏಕ್ ಪಾವ್ಟಿಂ ತಿಚಿ ದೀಶ್ಟ್ ಪಾಲ್ವಾಚ್ಯಾ ಕೊನ್ಶ್ಯಾಕ್ ಬಾಂದ್‍ಲ್ಲ್ಯಾ ಪಯ್ಶಾಂಚ್ಯೆ ಪೊಟ್ಲೆರ್ ಆಸ್ಲಿ. ಮಿನಿಟಾಕ್ ಪಾಂಚ್ ಪಾವ್ಟಿಂ ತಿ ಪೊಟ್ಲಿ ದಾಂಬುನ್ ಪಳೆವ್ನ್, ಪಯ್ಶೆ ಸುರಕ್ಶಿತ್ ಆಸಾತ್ ನೆ ಮ್ಹಣ್ ತಪಾಸಿತಾಲಿ. ತಿಚಿ ಆವಸ್ಥಾ ಪಳೆವ್ನ್ ವಿರಾರ್ ಜಾಲ್ಲೊ ಧನಿ “ಕಿತೆಂ ಕಜ್ಜಾ, ತುಕಾಯ್ ತುಜ್ಯಾ ಘೊವಾಚಿ ಪಿಡಾ ಲಾಗ್ಲ್ಯಾಗೀ? ನಿದೆಂತ್ ಆಸ್‍ಲ್ಲೆಬರಿ ಕರ್ತಾಯ್ ನೆ, ಪಾಟ್ ಬಾಗಾವ್ನ್ ಕಾಮ್ ಕರುಂಕ್ ಜಾಯ್ನಾ ತರ್ ಕಾಮಾಕ್ ಕಿತ್ಯಾಕ್ ಆಯ್ಲೆಂಯ್? ಮ್ಹಣ್ ತಿಕಾ ಜ್ಯೋರ್ ಕರಿಲಾಗ್ಲೊ. ಪಟ್ಟ್ ಕರ್ನ್ ದೆವ್‍ಲ್ಲಿಂ ದುಕಾಂ ಪುಸುನ್ “ಕಿತೆಂಗೀ ಭಲಾಯ್ಕಿ ಬರಿ ನಾ ಹಾಜಾರಾ, ಫಾಲ್ಯಾಂ ಯೆತಾಂ” ಮ್ಹಣ್ ತಾಚ್ಯೆ ಜಾಪಿಕ್ ಸಯ್ತ್ ರಾಕನಾಸ್ತಾಂ ಸಟ್ಟ್ ಕರ್ನ್ ಉಟೊನ್ ವೆತೆಚ್ ರಾವ್ಲಿ.

ಘರಾ ಪಾವ್‍ಲ್ಲಿಚ್ ಮಾಂದ್ರಿ ಸೊಡೊವ್ನ್ ಆಡ್ ಪಡ್ಲಿ ಖತೀಜಾ. ಪಾಲ್ವಾಂತ್ ಬಾಂದ್‍ಲ್ಲೆ ಪಯ್ಶೆ ಮ್ಹಜಿ ಭಲಾಯ್ಕಿ ಭಿಗ್ಡೊಂಕ್ ಕಾರಣ್ ಗೀ? ಆಂಗ್ ಹುನ್ ಜಾಲಾಂ ಗೀ ನಾ ತೆಂ ತಿಕಾ ಸಮ್ಜೊಂಕ್ ನಾ. ಅರ್ಧ್ಯೆ ನಿದೆಂತ್ ಲೊಳ್ಚ್ಯಾ ತಿಕಾ ದೆರಾನ್ ಸಾಂಗ್‍ಲ್ಲಿಂ ಉತ್ರಾಂ ಘಡಿಯೆ ಘಡಿಯೆ ಮತಿ ಪಡ್ದ್ಯಾರ್ ಝಳ್ಕತಾಲಿಂ. ತ್ಯಾಚ್ ವೆಳಾರ್ ಘರಾ ಮುಕಾರ್ ವ್ಹಡ್ಲೊ ಗಲಾಟೊ ಜಾಲ್ಲೆಬರಿ ಆವಾಜ್. ಘೊವ್ ಪರ್ತ್ಯಾನ್ ನಾಕ್ ಭರ್ ಪಿಯೆವ್ನ್ ಯೇವ್ನ್ ಗಲಾಟೊ ಕರ್ತಾ ಕೊಣ್ಣಾ ಮ್ಹಣ್ ತಿ ಸಟ್ಟ್ ಕರ್ನ್ ಉಟ್ಲಿ. ತೆದ್ನಾ ತಿಕಾ ಪೂತ್ ಹಮೀದ್ ಆನಿ ಜಮೀಲಾಚೆಂ ಜ್ಯೋರ್ ರಡ್ಣೆಂ ಆಯ್ಕಲೆಂ. ಉಟ್‍ಲ್ಲಿ ತಿ ಎಕಾಚ್ ಬಾಕ್ಕಾರಾನ್ ಬಾಗ್ಲಾಲಾಗಿಂ ಯೇವ್ನ್ ಪಾವ್ಲಿ.

ಪೂತ್ ಹಮೀದಾಚ್ಯಾ ಮಾತ್ಯಾರ್ ಥಾವ್ನ್ ರಗ್ತಾಚೆಂ ವ್ಹಾಳ್. ರಸ್ತ್ಯಾ ದೆಗೆರ್ ಖೆಳೊನ್ ಆಸ್ತಾಂ ತಾಕಾ ವಾಟೆರ್ ಚರೊನ್ ಆಸ್ಚ್ಯಾ ಗಾಯ್ನ್ ಹಾಂಡುನ್ ಲೊಟುನ್ ಘಾಲೆಂ. ತಾಚಿ ತಕ್ಲಿ ಎಕಾ ಚೂಪ್ ಫಾತ್ರಾಚೆರ್ ಪಡ್‍ಲ್ಲ್ಯಾನ್ ವ್ಹಡ್ಲೊ ಘಾಯ್ ಜಾವ್ನ್ ದರಬಸ್ತ್ ರಗತ್ ವ್ಹಾಳೊಂಕ್ ಲಾಗ್ಲೆಂ. ತಕ್ಶಣ್ ತಿ ಪುತಾಕ್ ಘೆವ್ನ್ ಆಸ್ಪತ್ರೆಕ್ ಧಾಂವ್ಲಿ. ತಿಚ್ಯಾ ಪಾಟ್ಲ್ಯಾನ್ ಹಸೀನಾಯ್…

ಆಸ್ಪತ್ರೆಂತ್ ಪರೀಕ್ಶಾ ಕೆಲ್ಲೊ ದಾಕ್ತೆರ್, “ಮಾತ್ಯಾಚ್ಯಾ ಪಾಟ್ಲ್ಯಾನ್ ಕಠೀಣ್ ಮಾರ್ ಜಾಲಾ, ತೀನ್ ಕೋಟ್ ಘಾಲಿಜೆ. ರಿಸೆಪ್ಶನಾಂತ್ ಪಯ್ಶೆ ಭರ್ನ್ ರಸೀದ್ ಹಾಡಾ” ಮ್ಹಣಾಲೊ. ಕಾಲ್ ಥಾವ್ನ್ ಆವಯ್ಚೆ ಹಾಲ್-ಚಾಲ್ ಗಮನ್ ಕರ್ನ್ ಆಸ್‍ಲ್ಲ್ಯಾ ಹಸೀನಾನ್ ಏಕ್‍ಯೀ ಉತರ್ ಉಲಯ್ನಾಸ್ತಾಂ ಆವಯ್ಚ್ಯಾ ಪಾಲ್ವಾಚ್ಯಾ ಪೊಂತಾಕ್ ಬಾಂದ್‍ಲ್ಲಿ ಪೊಟ್ಲಿ ಸೊಡೊವ್ನ್, ರಿಸೆಪ್ಶನಾಂತ್ ಪಯ್ಶೆ ಫಾರೀಕ್ ಕರ್ನ್ ರಸೀದ್ ಹಾಡ್ನ್ ಧಾಕ್ತೆರಾಕ್ ದಿಲಿ. ತಕ್ಲೆಕ್ ಘಾಲ್ಲ್ಯಾ ಕೊಟಾಚ್ಯೆ ದುಕಿಕ್‍ಯೀ, ಮಾರ್ ಜಾಲ್ಲ್ಯೆ ದುಕಿಕ್‍ಯೀ ರಡ್ಚ್ಯಾ ಹಮೀದಾಕ್ ಹಾಂಡಿಯೆರ್ ಘೆವ್ನ್ ಆನಿ ಎಕಾ ಹಾತಾಂತ್ ಹಸೀನಾಚೊ ಹಾತ್ ಧರ್ನ್ ತ್ಯಾ ಕಠೀಣ್ ತಾಪ್ಚ್ಯಾ ವೊತಾಕ್ ಸರ ಸರ್ ಕರ್ನ್ ಘರಾ ಖುಶಿನ್ ಖತೀಜಾನ್ ಪಾಂಯ್ ಘಾಲೆ. ಆವಯ್ಚೆ ಹಾತ್ ಇತ್ಲೆ ಕಿತ್ಯಾಕ್ ಘಾಮೆಲ್ಯಾತ್ ಮ್ಹಣ್ ಅರ್ಥ್ ಜಾಯ್ನಾತ್ಲೆಂ ಹಸೀನಾ ತಿಚ್ಯಾ ವೆಗಾಕ್ ಚಲೊಂಕ್ ಜಾಯ್ನಾಸ್ತಾಂ ” ಉಮ್ಮಾ ಇಲ್ಲೆಂ ಹಲ್ಟಾನ್ ಚಲ್” ಮ್ಹಣಾಲೆಂ. ಹಾಂಡಿಯೆರ್ ಆಸ್‍ಲ್ಲ್ಯಾ ಹಮೀದಾಕ್ ಸಕಯ್ಲ್ ದವರ್ನ್ ರಸ್ತ್ಯಾ ಮದೆಗಾತ್ ಹಸೀನಾಕ್ ಪೊಟ್ಲುನ್ ಧರ್ನ್ “ಮ್ಹಜ್ಯಾ ಭಾಂಗಾರಾ” ಮ್ಹಣ್ ಜ್ಯೋರ್ ರಡ್ಲಿ. ಆವಯ್ಚಿಂ ದುಕಾಂ ಪಳೆವ್ನ್ ಹಮೀದ್‍ಯೀ ಜ್ಯೋರ್ ರಡ್ಲೊ. ಹಸೀನಾಚ್ಯಾ ದೊಳ್ಯಾಂತ್‍ಯೀ ದುಕಾಂ ದೆಂವ್ಲಿಂ. ತೀನ್ ಅಸಹಾಯಕ್ ಜೀವ್ ಮದೆಂ ರಸ್ತ್ಯಾರ್ ದುಕಾಂ ಗಳಯ್ತಾನಾ ಲಾಸ್ಚೊ ಸುರ್ಯೊ ಆನಿಕೀ ಉಜೊ ಜಾಲೊ.

ಘರಾ ಗೆಲ್ಯಾ ಉಪ್ರಾಂತ್ ಹಮೀದಾಕ್ ಲಾಗಿಂ ಬಸೊವ್ನ್ ತಾಚಿ ಭಲಾಯ್ಕಿ ಸಾಂಬಾಳ್ನ್ ಆಸ್ತಾಂ ತರೀ ತಿ ಎಕ್ದಮ್ ಮಾವ್ನ್ ಆಸ್ಲಿ. ಧುವೆಚೆಂ ಮುಸ್ಕಾರ್ ಸಯ್ತ್ ಪಳೆಂವ್ಕ್ ತಿಕಾ ಭ್ಯೆಂ ದಿಸ್ತಾಲೆಂ. ಆನಿ ಕಾಂಯ್ ತೆಂ ವಿಚಾರ್ತಾ ಕೊಣ್ಣಾ ಮ್ಹಣ್ ಖಂತಿನ್ ಆಸ್ತಾಂ ಕಶಿಯ್ ಸಾಂಜ್ ಜಾಲಿ. ರಾತಿಂ ನಿದ್ಚ್ಯಾ ಪಯ್ಲೆಂ ಧುವೆಲಾಗಿಂ ಬಸೊನ್ “ದುಡ್ವಾಕ್ ಕಿತೆಂ ಕರ್ಚೆಂ ಪುತಾ” ಮ್ಹಣ್ ಮೊಗಾನ್ ವಿಚಾರ್ಲೆಂ. ಹಸೀನಾ ಜಾಣ್ತ್ಯಾ ಭುರ್ಗ್ಯಾಬರಿ “ಖಂಯ್ಚೇಂಯ್ ಏಕ್ ಜಾಂವ್ದಿ. ಸದ್ದ್ಯಾಕ್ ಹಮೀದ್ ಬರೊ ಜಾಂವ್ದಿ” ಮ್ಹಣ್ ತಾಣೆಂ ವೋಲ್ ವೊಡ್ಲಿ.

ಖತೀಜಾಕ್ ಪರ್ತ್ಯಾನ್ ದೆರಾಚಿಂ ಉತ್ರಾಂ ಉಡಾಸಾಕ್ ಆಯ್ಲಿಂ. ಖಾದರ್ ಮೆಲ್ಯಾರ್ ಸರ್ವ್ ಸಾರ್ಕೆಂ ಜಾತಾಲೆಂಗೀ? ತಾಚೆಥಾವ್ನ್ ಭೊಗ್‍ಲ್ಲೆ ಕಶ್ಟ್ ಕಾಂಯ್ ಉಣೆ ನ್ಹಯ್. ತಾಚ್ಯಾ ಪಿಯೆವ್ಣ್ಯಾ ಧರ್ಮಾನ್ ಸಗ್ಳ್ಯಾ ಗಾಂವಾನ್ ಆಮ್ಕಾ ಬಹಿಶ್ಕಾರ್ ಘಾಲುಂಕ್ ಉಲೊ ದಿಲ್ಲೊ. ಜರ್ ತರ್ ತ್ಯಾ ದೀಸ್ ಹುಸೇನ್ ಹಾಜಿ ನಾತ್‍ಲ್ಲೊ ತರ್ ಆಮ್ಕಾಂ ಬಹಿಶ್ಕಾರ್ ಖಂಡಿತ್ ಘಾಲ್ತೆ ಕೊಣ್ಣಾ. ಕಾಮಾಚ್ಯಾ ವಿಶಯಾಂತ್ ವಾ ಸಾಂಬಾಳಾಚ್ಯಾ ವಿಶಾಯಾಂತ್ ತೊ ಇಲ್ಲೊ ಜ್ಯೋರ್ ಜಾಲ್ಯಾರೀ, ಕೆದಿಂಕ್‍ಚ್ ನ್ಯಾಯಾಕ್ ಚುಕ್‍ಲ್ಲೊ ನಾ, ಖಾದರಾನ್ ಗಾಂವ್ಚ್ಯಾ ಫುಡಾರಿ ಅಬ್ದುಲ್ಲಾ ಥಾವ್ನ್ ಲೋನ್ ಘೆತ್‍ಲ್ಲ್ಯಾ ವೆಳಾ ಅಬ್ದುಲ್ಲಾ ಘರಾ ಮುಕಾರ್ ಯೇವ್ನ್ “ಹಸೀನಾಕ್ ಮ್ಹಜ್ಯಾ ಘರಾ ಕಾಮಾಕ್ ಧಾಡಾ ಲೋನ್ ಮಾಫ್ ಕರ್ತಾಂ” ಮ್ಹಣ್ ರಂಪಾಟ್ ಕೆಲ್ಲ್ಯಾ ವಗ್ತಾ ಆಮ್ಚಿ ಪಾಡ್ತ್ ಘೆವ್ನ್ ಉಲಯಿಲ್ಲೆಂ ಹಾಜರಾನ್ ನೇ? ಪಿಯೆಂವ್ಚೆ ಹರಾಮ್ಂಚ್ ನೆ, ತಶೆಂ ಮ್ಹಣ್ ನ್ಯಾಯ್ ಸಾಂಗೊಂಕ್, ತಾಕ್ಡಿ ಹಾಲೊಂಕ್ ಆಯಿಲ್ಲೆ ತೆ ಸಗ್ಳೆ ಕಿತ್ಲೆ ನಿತಿವಂತ್ ಮ್ಹಣ್ ಹಾಂವ್ ಜಾಣಾಸ್ಲಿಂ. ಆತಾಂಯ್ ಮ್ಹಾಕಾ ಭೊಗ್ತಾ, ಪುಣ್ ತೋಂಡ್ ಸೊಡ್ನ್ ಸಾಂಗೊಂಕ್ ಮ್ಹಾಕಾ ಧಯ್ರ್ ಪಾವನಾ.

ದುಸ್ರೆದೀಸ್ ಅರ್ಧ್ಯಾ ಮನಾನ್ ಹಸೀನಾ ಇಸ್ಕೊಲಾಕ್ ಗೆಲ್ಲೆಂ. ಕಿತ್ಲಿ ಬೆಜಾರಾಯ್ ತೆಂ ಭೊಗುನ್ ಆಸ್‍ಲ್ಲೆಂಗೀ ನೆಣಾ ಹಾಂವ್. ಏಕ್ ದೋನ್ ಉಂಡಿ ಚಡ್ ಜೆವ್‍ಲ್ಲೆಂ ತೆಂ. ಪೊಂತಾಕ್ ಪಾವನಾತ್ಲಿ ಖಂತ್ ತಾಚ್ಯಾ ನೆಣ್ತ್ಯಾ ಕಾಳ್ಜಾಂತ್ ರೊಂಬ್ಲ್ಯಾ ಮ್ಹಣ್ ಹಸೀನಾ ತೋಂಡ್ ಸೊಡ್ನ್ ಸಾಂಗನಾತ್ಲ್ಯಾರೀ ಖತೀಜಾಕ್ ಸಮ್ಜಲ್ಲೆಂ. ಕೆದಿಂಕ್‍ಚ್ ಆಪ್ಲ್ಯಾ ಭಾವಾ-ಭಯ್ಣಿಕ್ ಆನಿ ಆವಯ್ಕ್ ಜಾಯ್ ತಿತ್ಲಿ ಪೇಜ್ ಮೊಡ್ಕೆಂತ್ ಆಸಾಗೀ ಮ್ಹಣ್ ಬಾಗ್ಗೊನ್ ಪಳೆನಾಸ್ತಾಂ ರಾವನಾತ್ಲೆಂ ಚೆಡುಂ ತೆಂ. ತ್ಯೆಚ್ ದುಕಿನ್ ಬಾಗ್ಲಾಕ್ ಶಿರ್ಕಾಯಿಲ್ಲೊ ಬುರ್ಖಾ ನ್ಹೆಸೊನ್ ಪುತಾ ಹಮೀದಾಕ್ ಶೆಂಭೊರ್ ಪಾವ್ಟಿಂ ಜಾಗ್ರುತ್ ಸಾಂಗೊನ್ ಖತೀಜಾ ಹಾಜರಾಚ್ಯಾ ತೊಟಾಕ್ ಕಾಮಾಕ್ ಗೆಲಿ.

ಥಂಯ್ ಪರ್ತ್ಯಾನ್ ಹಸೀನಾಚಿಚ್ ಖಂತ್. ಪೋರ್ ಮದ್ರಸಾಂತ್ ಶಿಕ್ಪಾ ವಯ್ರ್ ಥೊಡ್ಯಾ ಚೆಡ್ಯಾಂನಿ ತಾಕಾ ಚಿಡಾಯಿಲ್ಲ್ಯಾ ತೆದ್ನಾ ” ಶಿಕಪ್ ಶಿಕೊಂಕ್ ಚೀನಾಕ್ ಸಯ್ತ್ ವಚ್ಯೆತ್ ಮ್ಹಣ್ ಪ್ರವಾದಿನ್ ಖುದ್ದ್ ಸಾಂಗ್ಲಾಂ ನೆ, ತ್ಯಾ ಭಾಯ್ರ್ ತುಮ್ಚೆ ಕಾಲೆಂ ಸವಾಲ್?” ಮ್ಹಣ್ ಸಾಂಗೊನ್ ತಾಂಚೆಂ ತೋಂಡ್ ಧಾಂಪಯಿಲ್ಲೆಂ ತಾಣೆಂ. ತ್ಯಾ ವೆಳಾ ತಾಚ್ಯಾ ಉಸ್ತಾದಾನ್ ಶಹಬ್ಬಾಸ್ ಮ್ಹಣ್ ತಾಚಿ ಪಾಟ್ ತಾಪ್ಡಿಲ್ಲಿ. ಹಿ ಖಬರ್ ಖತೀಜಾಕ್ ಮೆಳೊನ್ ತಿಕಾ ಆಪ್ಲ್ಯೆ ಧುವೆಚೆರ್ ವರ್ತೊ ಅಭಿಮಾನ್ ಭೊಗ್‍ಲ್ಲೊ. ಪುಣ್ ಆತಾಂ ತ್ಯೆಚ್ ಧುವೆಚೆಂ ಶಿಕಪ್ ಅರ್ಧ್ಯಾರ್ ರಾವ್ತಾ ನೇ ಮ್ಹಣ್ ಸಮ್ಜಲ್ಲೆಂಚ್ ತಿಚ್ಯಾ ಕಾಳ್ಜಾಕ್ ತೊಪ್‍ಲ್ಲೆಬರಿ ಜಾಲೆಂ.

ಕಿತೆಂಯ್ ಜಾಂವ್, ಕಶೆಂ ಪುಣೀ ಕರ್ನ್ ದುಡು ಜಮೊ ಕರಿಜೆ ಮ್ಹಣ್ ಚಿಂತುನ್ ಆಸ್ತಾಂ ಖತೀಜಾಕ್ ಉಡಾಸ್ ಆಯ್ಲೊ ಹಾಜರಾಚಿ ಬಾಯ್ಲ್ ಐಸಮ್ಮ. ಜೀವ್ ಮುದೊ ಕರ್ನ್ ತಿಚೆಸರ್ಶಿಂ ಗೆಲ್ಲಿ ಖತೀಜಾ, “ಹಜ್ಜುಮ್ಮಾ ಹಸೀನಾಕ್ ಇಸ್ಕೊಲಾಕ್ ಭರ್ತಿ ಕರುಂಕ್ ದೋನ್ ಹಜಾರ್ ರುಪಯಾಂಚಿ ಗರ್ಜ್ ಆಸಾ, ಸವ್ಕಾಸ್ ಪಾಟಿಂ ದಿತಾಂ” ಮ್ಹಣ್ ಸಾಂಗ್ಲೆ ತಿಣೆಂ. ಐಸಮ್ಮ ಬಸ್‍ಲ್ಲೆಥಂಯ್ ಥಾವ್ನ್ ಉಟೊನ್ ಶೀದಾ ಭಿತರ್ ಗೆಲಿ. ಥಂಯ್ಚ್ ಲಾಗ್ಸಾರ್ ಪಡೊನ್ ಆಸ್ಲೊ ನೊಟಾಂಚೊ ಕಾಟ್ ತಿಕಾ ಪಳೆವ್ನ್ ಚಿಡಾಯ್ತಾ ಮ್ಹಳ್ಳೆಬರಿ ವಾರ‍್ಯಾಕ್ ಪಟ ಪಟ್ ಹಾಲ್ತಾಲೊ. ಖತೀಜಾನ್ ವಿಚಾರ್‌ಲ್ಲೆಂ ತಿಕಾ ಆಯ್ಕಲೆಂಗೀ ನಾ ಮ್ಹಣ್ ದುಬಾವ್ ಜಾಲೊ, ಪುಣ್ ಪರ್ತ್ಯಾನ್ ವಿಚಾರುಂಕ್ ತಿಕಾ ಸ್ವಾಭಿಮಾನ್ ಸುಟೊಂಕ್ ನಾ.

ಪುಣ್ ಹಸೀನಾಚೆಂ ಇಸ್ಕೊಲ್? ಕಾತ್ರಿಂತ್ ಶಿರ್ಕಲ್ಲೆಬಬರಿ ಭೊಗ್ಲೆಂ ತಿಕಾ. ವಾರ‍್ಯಾಕ್ ಪಟ ಪಟ ಪಾಕಾಟೆ ಮಾರ್ಚೆಬರಿ ದಿಸ್ಚ್ಯಾ, ಕಾಂಯ್ ಸೊಡ್ಲ್ಯಾರ್ ಆಕಾಸಾಕ್ ಖಂಡಿತ್ ಉಬೊನ್ ವೆತಾತ್ ಮ್ಹಳ್ಳೆಬರಿ, ಕಾಟಾಂತ್ಲೆ ಪಟ್ಟ್ ಕರ್ನ್ ತೀನ್ ಜಾರ್ ನೋಟ್ ಕಾಡ್ನ್ ಪಾಲ್ವಾಂತ್ ಬಾಂದುನ್ ಥಂಯ್ ಥಾವ್ನ್ ನಿಕಳ್ಳಿ. ಘಾಮೆಂವ್ಚೊ ಜೀವ್, ಸುಕ್‍ಲ್ಲೆ ವೋಂಟ್, ಹಾತ್-ಪಾಂಯಾಂನಿ ಕಾಂಪ್… ಘರಾ ಯೇವ್ನ್ ಪಾವ್‍ಲ್ಲಿಚ್ ಪುರಾಸಾಣೆನ್ ಆಪುಣ್ ಸಟ್ಟ್ ಕರ್ನ್ ಪಡ್ತಾಂ ಕೊಣ್ಣಾ ಮ್ಹಣ್ ತಿಕಾ ಭಾಸ್ ಜಾಲೆಂ. ಮ್ಹಾಕಾ ಕಿತ್ಯಾಕ್ ಆಯ್ಲಿ ಹಿ ವಾಯ್ಟ್ ಸವಯ್? ಏಕ್ ಪಾವ್ಟಿಂ ಚೊರ್ಲ್ಯಾರ್, ಮುಕಾರ್ ತಿಚ್ಚ್ ಸವಯ್ ಜಾಲ್ಯಾರ್? ಕೊಣಾಕ್ ತರೀ ಕಳ್ಳ್ಯಾರ್ ಮ್ಹಜ್ಯಾ ಘರಾ ಭಿತರ್ ಬಂದಿತ್ ರಾವೊಂಕ್ ಜಾಯ್ತ್? ಕಾಮ್ ಕರಿನಾ ತರ್ ಪೊಟಾಕ್ ಶಿತ್ ಖಂಯ್ ಥಾವ್ನ್? ತಶೆಂ ಸಬಾರ್ ಚಿಂತ್ನಾಂ ತಿಚ್ಯೆ ಮತಿಂತ್ ಧೊಸುನ್ ಹಲ್ಟಾರ್ ತಿಚ್ಯಾ ದೊಳ್ಯಾಂನಿ ದುಕಾಂ ಭರ್ಲಿಂ. ಕುಶಿನ್ ಆಸ್‍ಲ್ಲೊ ಪೂತ್ ” ಉಮ್ಮಾ ಕಿತ್ಯಾಕ್ ರಡ್ತಾಯ್? ಮ್ಹಜಿ ಮಾತ್ಯಾಚಿ ದೂಕ್ ಪೂರಾ ರಾವ್ಲ್ಯಾ ಆತಾಂ, ಆಳೆ ಉಮ್ಮಾ, ಹಾಂಗಾ ಪಳೆ” ಮ್ಹಣಾಲೊ. ತಾಚ್ಯಾ ಖಂಯ್ಚ್ಯಾಯ್ ಸವಾಲಾಕ್ ಜಾಪ್ ದೀನಾಸ್ತಾಂ ಖತೀಜಾ ಪರ್ತ್ಯಾನ್ ಜ್ಯೋರ್ ರಡ್ಲಿ. ತಿತ್ಲ್ಯಾರ್ ಆಂಗ್ಣಾಂತ್ ಕಾರ್ ರಾವೊನ್ ದೆಂವೊನ್ ಆಯಿಲ್ಲಿ ಐಸಮ್ಮಾ “ಕಜ್ಜಾ, ತುವೆಂ ದೋನ್ ಹಜಾರ್ ವಿಚಾರ್‌ಲ್ಲೆಯ್ ನೇ, ಧರ್ ಘೆ, ತುಂ ಆಮ್ಚ್ಯಾ ಘರಾ ಥಾವ್ನ್ ಗೆಲ್ಲೆಂ ಮ್ಹಾಕಾ ಕಳೋಂಕ್‍ಚ್ ನಾ. ಯೆತಾನಾ ಸಾಂಗೊಂಕ್ ಜಾಯ್ನಾ ಗೀ? ಲೋನ್ ಫಾರೀಕ್ ಕರ್ಚ್ಯಾಕ್ ಫಾಲ್ಯಾಂ ಥಾವ್ನ್ ಯೇಕ್ ವೋರ್ ಚಡ್ ಕಾಮ್ ಕರ್” ಮ್ಹಣ್ ಆರ್ಧೆಂ ಆಕ್ಶೇಪಾನ್ ಆನಿ ಅರ್ಧೆಂ ಅಧಿಕಾರಾನ್ ಮ್ಹಳ್ಳೆಬರಿ ಸಾಂಗಲಾಗ್ಲಿ. ಖತೀಜಾ ಆನಿಕೀ ಜ್ಯೋರ್ ರಡೊನ್ “ಮ್ಹಾಕಾ ಮಾಫ್ ಕರ್ ಹಜ್ಜುಮ್ಮಾ. ಧುವೆಚ್ಯಾ ಶಿಕ್ಪಾಚ್ಯೆ ಆಶೆಕ್ ಪಡೊನ್ ಚೂಕ್ ಕೆಲಿ” ಮ್ಹಣ್ ಪಾಲ್ವಾಂತ್ ಬಾಂದ್‍ಲ್ಲೆ ಪಯ್ಶೆ ಕಾಡ್ನ್ ತಿಚ್ಯಾ ಹಾತಾಂತ್ ದಿಲೆ. ಐಸಮ್ಮಾನ್ ಮೆಟಾ ವಯ್ರ್ ಬಸ್‍ಲ್ಲ್ಯಾ ತಿಕಾ ಉಟೊವ್ನ್, “ಅಶೆಂ ಕಿತ್ಯಾಕ್ ಭುರ್ಗ್ಯಾಂಬರಿ ರಡ್ತಾಯ್? ಹಾಂತುಂ ಮ್ಹಜಿಯ್ ಚೂಕ್ ಆಸಾ, ತುವೆಂ ವಿಚಾರ್‌ಲ್ಲ್ಯಾ ತಕ್ಶಣ್ ದಿಲ್ಲೆ ತರ್ ವಾ ದಿತಾಂ ಮ್ಹಣ್ ಸಾಂಗ್‍ಲ್ಲೆಂ ತರ್ ಪುರೊ ಆಸ್ತೆಂ. ತುಂ ಹಿ ಕರ್ನಿ ಬಿಲ್ಕುಲ್ ಕರ್ತೆಂನಾಯ್. ಚೆಡುಂ ಭುರ್ಗ್ಯಾಂಚಿ ಹಿಚ್ ಪರಿಸ್ಥಿತಿ, ಆಪ್ಣಾಕ್ ಕಳಿತ್ ನಾಸ್ತಾಂ ಕುಟ್ಮಾಚ್ಯೆ ಏಳ್ಗೆಖಾತಿರ್ ಅಸಲ್ಯೊ ಚುಕಿ ಕರ್ತಾತ್. ಪುಣ್ ಆನಿ ಮುಕಾರ್ ಬಿಲ್ಕುಲ್ ಅಶೆಂ ಕರುಂಕ್ ವಚನಾಕಾ” ಮ್ಹಣಾಲಿ. ಲಜೆನ್ ವಾ ಚೂಕ್ ಕೆಲ್ಯಾ ಮ್ಹಣ್ ಚುರ್ಚುರೆ ಭೊಗುನ್ ತಕ್ಲಿ ಪಂದಾ ಘಾಲ್ಲ್ಯಾ ಖತೀಜಾನ್ ವಯ್ರ್ ಪಳೆಲೆಂ. ಸರ್‌ಲ್ಲಿ ಆವಯ್ ಉಟೊನ್ ಯೇವ್ನ್ ಪರ್ತ್ಯಾನ್ ಕುಡ್ಕಾಂ ದಿಲ್ಲೆಬರಿ ತಿಕಾ ಭಾಸ್ ಜಾಲೆಂ. ದೊಳೆ ಉಗಡ್ನ್ ಪಳೆತಾನಾ ಇಸ್ಕೊಲಾ ಥಾವ್ನ್ ಆಯಿಲ್ಲೆಂ ಹಸೀನಾ, ಶಿಕ್ಪಾಚ್ಯಾ ವಾರ‍್ಯಾಕ್ ದಾರ್ ಉಘಡುಂಕ್ ಆಯಿಲ್ಲ್ಯಾ ಐಸಮ್ಮಾಕ್ ವಿಜ್ಮಿತಾಯೆನ್ ಪಳೆವ್ನ್ ಚ್ ರಾವ್ಲೆಂ.

■  ಕೊಂಕ್ಣೆಕ್ : ಅಲ್ಪೋನ್ಸ್ ಮೆಂಡೋನ್ಸಾ, ಪಾಂಗ್ಳಾ

“ಇಕ್ಕು… ಹೆಲ್ಮೆಟ್ ಕಿತ್ಯಾಕ್ ಸೊಡ್ಲಾಂಯ್ ರೇ…” ಬೈಕ್ ಸ್ಟಾರ್ಟ್ ಜಾವ್ನ್ ಗಿಯರ್ ಶಿಫ್ಟ್ ಕರ್ತಾನಾ ಭಿತರ್ ಥಾವ್ನ್ ಅಮ್ಮಿ ಹೆಲ್ಮೆಟಾ ಸವೆಂ ಭಾಯ್ರ್ ಪಾವುಲ್ಲಿ.

“ಫ್ರೀಡಂ ಪಾರ್ಕ್ ಮ್ಹಣಾಸರ್ ವೆತಾಂ ಆಮ್ಮೀ… ಹೆಲ್ಮೆಟ್ ನಾಕಾ. ಪೊಲೀಸ್ ಆಸ್ಚೆ ನಾಂತ್. ಪಾವಾನಾತ್ಲ್ಯಾಕ್ ಜೆಲ್ಲ್ ಘಾಲ್ನ್ ಕೇಸ್ ಉಬೆ ಕೆಲ್ಲೆಂ ದಿಸಾನಾಂಗೀ…?” ಇಕ್ಬಾಲಾನ್ ಬೈಕ್ ಮೂವ್ ಕೆಲೆಂ.

ಇಕ್ಬಾಲ್ ಅತಾಂ ಅಪ್ಲಿ ಘರ್ಚಿ ಗೇಟ್ ಉತ್ರೊನ್ ಮುಖೆಲ್ ರಸ್ತ್ಯಾ ವಯ್ರ್ಲ್ಯಾನ್ ವೆತೆ ಆಸಾ. ಬೈಕ್ ವ್ಹಡ್ಲಿ ಸ್ಲೀಡ್ ಕಾಂಯ್ ನಾ. ಪುಣ್ ಮೊನಾಂ ಭಿತರ್ ಕಿತೆಂಗೀ ಏಕ್ ವೇಗ್ ಆಸಾ.

“ಮೇಘಾಕ್ ಪ್ರೊಪೋಸ್ ಕರ್ಚೆಂ ಸಗ್ಳೆಂ ಸಾರ್ಕೆಂ. ಪುಣ್ ತೆಂ ಯಸ್ಸ್ ಮ್ಹಣಾತ್ ಮೂ…? ನೊ ಮ್ಹಳ್ಯಾರ್ ಉಪ್ರಾಂತ್ ತಾಕಾ ಫೇಸ್ ಕರ್ಚೆಂ ಬರಿಂ ನಾ. ತೀನ್ ವರ್ಸಾಂಚೆ ಫ್ರೆಂಡ್ ಶಿಪ್ಪ್ ಎಕಾಚ್ ಸೆಂಟೆನ್ಸಾಂತ್ ಕಬಾರ್ ಜಾಂವ್ಕ್ ಆಸಾ…..” ಇಕ್ಬಾಲಾನ್ ದೋನ್ ಗಿಯರಾಂ ಫಟಾಫಟ್ ಶಿಫ್ಟ್ ಕೆಲಿಂ.

“ನಾ ತೆಂ ಯೆಸ್ಸ್ ಮ್ಹಣ್ತಾಲೆಂ. ತಿ ಗ್ಯಾರೆಂಟಿ ಆಸಾ. ಪುಣ್ ತಾಚೆಂ ಯೆಸ್ಸ್ ಮೆಳ್ಳ್ಯಾ ಉಪ್ರಾಂತ್  ತಾಚಾ ಪೇರೆಂಟ್ಸಾಂಚೆ ಯೆಸ್ಸ್ ಮೆಳಾಜೆ ತರ್ ಕಿತ್ಲೆಂ ಸರ್ಕಸ್ ಕರಿಜೆ ಪಡಾತ್ ಕೊಣ್ಣಾ… ವ್ಹಡ್ಲೊ ಏಕ್ ಝುಜ್ ಚ್ ಜಾಂವ್ಕ್ ಆಸಾ. ಅಖ್ರೇಕ್ ಸಗ್ಳ್ಯಾ ಗಾಂವಾಂತ್ ಧರ್ಮ್ ದಂಗಲ್ ಜಾಲ್ಯಾರೀ ಜಾಲೆಂ. ಹೊ ದೇವ್, ಧರ್ಮ್, ಜಾತ್ , ಮ್ಹಳ್ಳೆಂ ನಾತ್ಲೆಂ ತರ್ ಕಿತ್ಲೆಂ ಬರೆಂ ಅಸ್ ಲ್ಲೆಂ…” ಚಿಂತ್ನಾಂಚೊ ವೇಗ್ ಅರಯಿತ್ತ್ ದೋನ್ ಸಿಗ್ನಲಾಂ, ಚಾರ್ ರೌಂಡ್ ಎಬೌಂಟ್ ಅನಿ ಏಕ್  ಯು ಟರ್ನ್ ಉತ್ರೊನ್ ಇಕ್ಬಾಲ್ ಫ್ರೀಡಂ ಪಾರ್ಕಚಾ ಗೆಟಿ ಮುಕಾರ್ ಪಾವುಲ್ಲೊ.

” ಮೇಘಾ ಖಂಯ್ ಅಸಾಯ್…” ಎಕಾ ಹಾತಾಂತ್ ಮೊಬೈಲ್ ಧರಿತ್ತ್  ಇಕ್ಬಾಲಾನ್ ಬೈಕಾಕ್ ಸ್ಟ್ಯಾಂಡ್ ಮಾರ್ಲೆಂ.

“ಹಾಂವ್ ಪಾರ್ಕಾ ಭಿತರ್ ಗಾಂಧಿ ಸ್ಟ್ಯಾಚುಚಾ ಪಾಟ್ಲ್ಯಾನ್ ಆಸ್ಚ್ಯಾ ಬಾಂಕಾರ್ ಬಸ್ಲ್ಯಾಂ. ಶೀದಾ ಯೇ…” ಮೇಘಚಿ ಜಾಪ್ ಅಯ್ಕೊನ್ ಇಕ್ಬಾಲ್ ಬೈಕಾಥಾವ್ನ್ ಉಟ್ಲೊ.

“ಬ್ರೋ… ಪಾರ್ಕಾಕ್ ಅಯ್ಲೊಯ್ ಕೊಣ್ಣಾ….” ಬಗ್ಲೆನ್ ಸ್ಟ್ಯಾಂಡ್ ಮಾರ್ ಲ್ಲ್ಯಾ ಅನ್ಯೇಕಾ ಬೈಕಾಕ್ ಕುಲೆ ತೆಂಕುನ್ ಉಬೆಂ ರಾವ್ಲ್ಯಾ ದೊಗಾಂ ಪಯ್ಕಿಂ ಎಕ್ಲ್ಯಾನ್ ವಿಚಾರ್ಲೆಂ.

“ವ್ಹಯ್…” ಜಾಪಿ ಸಂಗಿ ಇಕ್ಬಾಲಾನ್ ದೋನ್ ಪಾವ್ಲಾಂ ಮುಕಾರ್ ಕಾಡ್ಲಿಂ.

“ಬ್ರೋ… ಎಕ್ಲೊಚ್ ಗೀ…” ಅನ್ಯೇಕ್ಲ್ಯಾನ್ ತಕ್ಷಣ್ ಸವಾಲ್ ಕೆಲೆಂ..

” ಫ್ರೆಂಡ್… ಫ್ರೆಂಡ್… ಫ್ರೆಂಡಾಕ್ ಮೆಳೊಂಕ್…” ಇಕ್ಬಾಲ್ ಮಾತ್ಶೆಂ ಪಾದ್ದೆಲೊ.

“ಫ್ರೆಂಡ್ ಮ್ಹಳ್ಯಾರ್..? ಗರ್ಲ್ ಫ್ರೆಂಡ್ ಕೊಣ್ಣಾ…” ಪಯ್ಲ್ಯಾನ್ ಪಾಟಿಂ ಸವಾಲ್ ಕೆಲೆಂ.

“ಫ್ರೆಂಡ್ ಮ್ಹಳ್ಯಾರ್… ಫ್ರೆಂಡ್… ಗರ್ಲ್ ಜಾಲ್ಯಾರ್ ಕಿತೆಂ ಬೋಯ್ ಜಾಲ್ಯಾರ್ ಕಿತೆಂ…” ಇಕ್ಬಾಲಾನ್ ವೇಗ್ ಅರಾಯ್ಲೊ. ತಾಚಿ ಕೂಡ್ ಭಾರೀಕ್ ಕಾಂಪೊಂಕ್ ಸುರು ಜಾಲ್ಲಿ.

“ಕಿತೆಂ ಇತ್ಲೊಯ್ ಘಾಮೆಲಾಯ್…” ಮೇಘನ್ ವಿಚಾರ್ತಾನಾಂಚ್ ಇಕ್ಬಾಲಾಕ್ ಅಪುಣ್ ಗಾಂಧಿ ಸ್ಟ್ಯಾಚುಚಾ ಪಾಟ್ಲ್ಯಾ ಬಾಂಕಾ ಕುಶಿನ್ ಪಾವ್ಲಾಂ ಮ್ಹಣ್ ಸಮ್ಜಲ್ಲೆಂ.

“ತೆಂ ಕಾಂಯ್ ನಾ… ನಾಂವ್ ಫ್ರೀಡಂ ಪಾರ್ಕ್ ತರೀ ಹಾಂಗಾ ಮೋರಲ್ ಪೊಲಿಸಿಂಗ್ ಇಲ್ಲೆಂ ಚಡ್ ಆಸಾ ಮೇಘಾ. ಇಶ್ಟ್-ಇಶ್ಟಿನ್, ಘೊವ್-ಬಾಯ್ಲ್, ಭಾವ್-ಭಯ್ಣಿ, ಮೋಗ್ ಕರ್ನಾರಾಂ  ಮ್ಹಣೊನ್ ಜೊಡಿಂ ಜಾವ್ನ್ ಯೆಂವ್ಚ್ಯಾಂಕ್ ಹೊ ಜಾಗೊ ತಿತ್ಲೊ ಸೇಫ್ ನ್ಹಂಯ್…” ಇಕ್ಬಾಲಾಕ್ ಕಳಿತ್ ನಾಸ್ತಾನಾಂಚ್ ತಾಚಾ ತೊಂಡಾಥಾವ್ನ್ ಉತ್ರಾಂ ಭಾಯ್ರ್ ಪಡ್ಲಿಂ.

“ಹಾಂಗಾ ಮ್ಹಣ್ ಕಿತೆಂ ? ಸಗ್ಳೆಂ ಇಂಡಿಯಾಚ್  ಕಿತ್ಲೆಂ ಸೇಫ್ ಅಸಾ ಮ್ಹಣ್ ಜಾಯ್ಜೆ ನೇ..?  ಹಾಂಗಾಸರ್ ಸ್ತ್ರೀ, ದಲಿತ್, ಟ್ರೈಬ್ಸ್, ಪ್ರಗತಿಪರ್ ಚಿಂತ್ಪಿ ಮ್ಹಣೊನ್ ವಿವಿಧ್ ವರ್ಗಾಚಾ ಲೊಕಾಚೆರ್ ಜಾಂವ್ಚಿಂ ಆಕ್ರಮಣಾಂ ತುಂ ವಾಚಿನಾಂಯ್ಗೀ… ಹಾಂಗಾಚಾ ವರ್ಕಿಂಗ್ ಕ್ಲಾಸ್ , ಅನಿಂ ದುಬ್ಳ್ಯಾಂಕ್ ಕ್ಯಾರ್ ಕರ್ಚೆ ಕೊಣೀ ಪುಣೀ ಅಸಾತ್ ಗೀ… ಹರ್ಯೇಕ್ ದೀಸ್ ಏಕ್ ನಾ ಏಕಾ ರಿತಿಚೆಂ ಮೋರಲ್ ಪೊಲೀಸಿಂಗ್ ಹಾಂಚೆರ್ ಚಲ್ನಾಂಗೀ…? ಪೊಲಿಟಿಕಲ್  ಸಯನ್ಸ್ ಸ್ಟುಡೆಂಟ್ ಜಾಲ್ಲ್ಯಾ ತುಕಾ ಹೆಂ ಸಗ್ಳೆಂ ಹಾಂವೆ ಸಾಂಗೊನ್ ಜಾಯ್ಜೆಗೀ…” ಸೋಶಿಯೋಲಜಿ ಶಿಕ್ಚ್ಯಾ ಮೇಘಾನ್ ಇಕ್ಬಲಾಚಾ ಭುಜಾಂಕ್ ಭಾರೀಕ್ ಚಿಮ್ಟೊ ಕಾಡ್ಲೊ.

“ಹಾಂವೆ ಜೆಸ್ಟ್ ಸಾಂಗ್ ಲ್ಲೆಂ ಮಾತ್ರ್… ತೆಂ ಸೊಡ್. ಅತಾಂ ಏಕ್ ಇಂಪೋರ್ಟೆಂತ್ ಗಜಾಲ್ ಅಸಾ…ತುಂ ಆಯ್ಕೊಂಕ್ ತಯಾರ್ ಅಸಾಯ್ ಮೂ…” ಇಕ್ಬಾಲಾನ್ ಉಲಂವ್ಚೆ ಬರಾಬರ್ ಪಾರ್ಕಾಚಾ ಚಾರ್ ಕೊನ್ಶಾಂಕ್ ಏಕ್ ಪಾವ್ಟಿಂ ನದರ್ ಘಾಲಿ.

“ಶರ್ಟ್ ಬರೆಂ ಅಸಾಂ… ಪರ್ಫೂಮ್ ಯೀ ನವೊಚ್ ಮ್ಹಣ್ ದಿಸ್ತಾ…” ಮೇಘಾನ್ ಇಕ್ಬಾಲಾಕ್ ಲಾಗಿಂ ವೊಡ್ಲೆಂ.

“ಮೇಘಾ… ಹಾಂವ್ ತುಜೊ ಮೋಗ್ ಕರ್ತಾಂ… ತುಕಾ ಮ್ಹಜಿ ಜಿಣ್ಯೆಸಾಂಗಾತಿಣ್ ಜಾವ್ನ್ ಕರ್ನ್ ಘೆಂವ್ಕ್ ಅಶೆತಾಂ… ತಯಾರ್ ಅಸಾಯ್ಗೀ” ಇಕ್ಬಾಲಾನ್ ಮೇಘಾಚೆಂ ಹಾತ್ ಧರ್ನ್ ಎಕಾಚ್ ಉಸ್ವಾಸಾನ್ ಸಾಂಗೊನ್ ಸೊಡ್ಲೆಂ.

ಮೇಘನ್ ಕಿತೆಂಚ್ ಜಾಪ್ ದಿಲಿ ನಾ. ತಾಣೆಂ ಇಕ್ಬಾಲಾಚೆ ಹಾತ್ ವ್ಹಾಳೂ ಅಪ್ಲ್ಯಾ ಹಾತಾಥಾವ್ನ್ ಮೆಕ್ಳೆ ಕೆಲೆ. ಇಕ್ಬಾಲಾಚಾ ಕಾಳ್ಜಾಂತ್ ಭಾರೀಕ್ ಕಾಂಪ್ ಉಟೊಂಕ್ ಆರಂಭ್ ಜಾಲಿ.  ತಿತ್ಲ್ಯಾರ್  ಮೇಘಚಾ ಸಾರ್ಕ್ಯಾ ಪಾಟ್ಲ್ಯಾನ್ ದುಸ್ರ್ಯಾ ಎಕಾ ಬಾಂಕಾರ್ ಗೆಟಿಲಾಗಿಂ ಮೆಳ್ ಲ್ಲೆ ತೆ ದೋಗ್ ಜಣ್ ಹೆಲ್ಮೆಟಾಂ ಸಂಗಿ ದೊಳೆ ವಾಟರಾವ್ನ್ ಅಪ್ಣಾಕ್ ಚ್ ಪಳೆಂವ್ಚೆಂ ತಾಚಾ ಗುಮಾನಾಕ್ ಗೆಲೆಂ. ಇಕ್ಬಾಲಾಚಾ ಕಾಳ್ಜಾಚೆ ದದ್ದಡೆ ಚಡ್ಲೆ.

“ಐ ಲವ್ ಯೂ ಇಕ್ಕು…” ಮೇಘಾನ್ ಏಕ್ ಚ್ಚ್ ಪಾವ್ಟಿಂ ಇಕ್ಬಾಲಾಕ್ ಪೊಟ್ಲುನ್ ಧರ್ಲೆಂ. ಸಂಪೂರ್ಣ್ ಏಕ್ ಮಿನುಟಾಚೆಂ ಆಲಿಂಗನ್. ” ಹಾಂವ್ ತಯಾರ್ ಆಸಾಂ…” ಮೇಘಾನ್ ವೇಂಗ್ ಸದಿಳ್ ಕೆಲಿ.

“ಥ್ಯಾಂಕ್ಯು ಮೇಘಾ…ಹಾಂವ್ ಭಾಗಿ” ಇಕ್ಬಾಲಾನ್ ಪರತ್ ಮೇಘಾಚೊ ಹಾತ್ ಧರ್ಲೊ.

“ಆನಿಂ ಮುಕಾರ್ ಜೀಣ್ ಭರ್ ಮೋಗ್ ನ್ಹಂಯ್ಗೀ..?” ಪಯ್ಸ್ ಅಸ್ ಲ್ಲೆ ತೆ ದೋಗ್ ಇಕ್ಬಾಲ್ ಆನಿ ಮೇಘಾ ಸರ್ಶಿಂ ಪಾವ್ ಲ್ಲೆಂ.

“ಪ್ಲೀಸ್… ತುಮಿಂ ಚಿಂತ್ಚೆಂ ಬರಿ ನ್ಹಂಯ್…” ಮೋರಲ್ ಪೊಲೀಸಿಂಗ್ ಕರ್ಚೆ ಮ್ಹಣ್ ಸಮ್ಜಲ್ಲ್ಯಾ ಇಕ್ಬಾಲಾನ್ ತಾಂಚೆಥಾವ್ನ್ ಚುಕಾರಿ ಮಾರ್ಚೆಂ ಪ್ರೇತನ್ ಕೆಲೆಂ.

“ತುಂ ಪಾದ್ದೆತಾಯ್ ಕಿತ್ಯಾಕ್ ಸಾಯ್ಭಾ… ಲವ್ವರಾ ಸಂಗಿ ಅಸ್ತಾನಾ ಸ್ಟ್ರೋಂಗ್ ಅಸೊಂಕ್ ಜಾಯ್…” ತಾಂಚೆ ಪಯ್ಕಿಂ ಎಕ್ಲೊ ಏಕ್ ಮೇಟ್ ಮುಕಾರ್ ಆಯ್ಲೊ.

“ಬ್ರದರ್ಸ್, ಆಮಿಂ ಮೇಜರ್ ಆನಿಂ ಕಾಜಾರ್ ಜಾಂವ್ಚಿ ಮನ್ಶ್ಯಾಂ… ಆಮ್ಚ್ಯಾ ಸ್ವತಂತ್ರಾಕ್ ಅಡ್ಕಳ್ ಯೇನಾಕಾತ್. ಆಮ್ಕಾ ವಚೊಂಕ್ ಸೊಡಾ…” ಶೀದಾ ಉತ್ರಾಂ ಬರಾಬರ್ ಮೇಘಾನ್ ಇಕ್ಬಾಲಾಚೊ ಹಾತ್ ಧರ್ಲೊ ಆನಿ ವೇಗಾನ್ ಚಲೊಂಕ್ ಲಾಯ್ಲೆಂ.

“ಮೇಘಾ… ಕಾಜಾರ್ ಜಾಂವ್ಚಿಂ ಮ್ಹಣ್ ಕಿತ್ಯಾಕ್ ಸಾಂಗ್ಲೆಂಯ್..? ಪಳೆ ತೆ ಆಮ್ಚಿ ಪಾಟ್ ಧರ್ನ್ ಯೆತೆ ಅಸಾತ್. ಇಂಟರ್ ಕಾಸ್ಟ್ ಮ್ಹಣ್ ಕಳ್ಳಾಂ ಅಸ್ತೆಲೆಂ…” ಇಕ್ಬಾಲಾನ್  ವೇಗ್ ಚಡಯ್ಲೊ. ದೋನ್ ಮಿನುಟಾನಿಂ ದೋಗಾಂಯ್ ಪಾರ್ಕಾ ಭಾಯ್ರ್ ಪಾರ್ಕ್ ಕೆಲ್ಲ್ಯಾ  ಬೈಕಾ ಲಾಗಿಂ ಪಾವ್ಲಿಂ.

“ಜಾತಾ ತಿತ್ಲೆಂ ವೆಗ್ಗಿಂ ಹಾಂಗಾಥಾವ್ನ್ ಯಾ…ತುಕಾ ಬಸ್ ಸ್ಟೋಪಾಲಾಗಿಂ ಸೊಡ್ತಾಂ ” ಇಕ್ಬಾಲಾನ್ ಬೈಕ್ ಸ್ಟಾರ್ಟ್ ಕೆಲೆಂ.

“ಬ್ರೋ…” ತೊಚ್ ಮೊಟೊ ಆನಿ ಗಂಭೀರ್ ಉಲೊ.

ತೆ ಥಂಯ್ ಪಾವುಲ್ಲೆ. ತಾಂಚೆಪಯ್ಕಿಂ ಎಕ್ಲ್ಯಾನ್ ಬೈಕಾಚಿ ಚಾವಿ ಘುಂವ್ಡಾವ್ನ್ ಇಕ್ಬಾಲಾಚೆಂ ಬೈಕ್ ಆಫ್  ಕೆಲೆಂ.

“ದಯಾಕರ್ನ್ ಅಮ್ಕಾಂ ಉಪದ್ರ್ ದೀನಾಕಾತ್… ಆಮಿಂ ತುಮಿಂ ಚಿಂತ್ಚೆ ಬರಿ ನ್ಹಂಯ್… ಆಮ್ಕಾಂ ಅಮ್ಚೆಚ್ ಮ್ಹಳ್ಳೆಂ ಜಿವಿತ್ ಆಸಾ. ಆಮ್ಕಾಂ ಸೋಡ್ನ್ ಸೊಡಾ…” ಇಕ್ಬಾಲಾನ್ ಹಾತ್ ಜೊಡ್ಲೆ.

“ಬ್ರೋ… ಅತಾಂ ಆಮಿಂಯ್ ತುಮಿಂ ಚಿಂತ್ಚೆ ಬರಿ ನ್ಹಂಯ್…” ತಾಣಿಂ ಸಾಂಗಾತಾ ಇಕ್ಬಾಲಾಚಾ ಭುಜಾಂ ವಯ್ರ್ ಹಾತ್ ದವರ್ಲೆ.

“ಅನಿಂ ಕಾಲೆಂ… ವಸೂಲ್ ಕರ್ಚೆ ಗೀ… ಕಿತೆಂ ಜಾಯ್ ಸಾಂಗಾ. ಹಾಂವ್ ದಿತಾಂ” ಇಕ್ಬಾಲಾಚೊ ತಾಳೊ ಕುಸ್ಕಲೊ.

“ಧರಾ ಹೆಂ ಹೆಲ್ಮೆಟ್” ಅನ್ಯೇಕ್ಲ್ಯಾನ್ ಅಪ್ಲ್ಯಾ ಹಾತಾಂತ್ಲೆಂ ಹೆಲ್ಮೆಟ್ ಇಕ್ಬಾಲಾ ಮುಕಾರ್ ವೊಡ್ಡಾಯ್ಲೆಂ.

“ಜೀಣ್ ಭರ್ ಸಾಂಗಾತಾ ಜಿಯೆಂವ್ಕ್ ಅಶೆತಾತ್ ನೇ. ಪುಣ್ ಕಾಂಯ್ ತರಿ ಗ್ಯಾರೆಂಟಿ ಅಸಾಗೀ? ಆಸ್ಚಿ ನಾ. ರಸ್ತ್ಯಾರ್  ಜಿವಾಕ್ ಗ್ಯಾರೆಂಟಿ ಮೆಳಾಜೆ ತರ್  ತಕ್ಲೆಕ್ ಹೆಲ್ಮೆಟ್  ಅತೀ ಗರ್ಜೆಚೆಂ. ಆನಿಂ ಜೀವ್ ಅಸ್ಲ್ಯಾರ್ ಮಾತ್ರ್ ಜಿಣಿ ಆಸ್ತಾ ”  ಉತ್ರಾಂ ಬರಾಬರ್ ತೆ ಎಕ್ದಮ್ ಗಂಭೀರ್ ಜಾಲೆ.

ಧಾ ಸೆಕುಂಡಾಚೆಂ ಮೌನ್… ತಡ್ವುಂಕ್ ಜಾಯ್ನಾಸ್ತಾಂ ಮೇಘಾ ಕಿಸ್ಸ್ಸ್ ಕರ್ನ್ ಹಾಸ್ಲೆಂ. ತಾಚಾ ಉಪ್ರಾಂತ್ ತೆ ದೋಗ್ ಹಾಸ್ಲೆ. ಅತಾಂ ಇಕ್ಬಾಲ್ ಯೀ ಹಾಸ್ತೆ ಆಸಾ…..

■ ಸ್ಟ್ಯಾನಿ ಬೆಳಾ

“ಬಾಯೆ, ಮ್ಹಾಕಾ ಗೊಬ್ಳ್ಯಾಂತ್ ಇಲ್ಲೆಂ ಉದಕ್ ಹಾಡ್ನ್ ದಿ” ಮ್ಹಣ್ ಬಾಬಾನ್ ಮ್ಹಣ್ಜೆ ಮ್ಹಜ್ಯಾ ಮಾಂವಾನ್ ಮ್ಹಾಕಾ ಉಲೊ ದಿತಾನಾ ಮ್ಹಜಿ ಸಾಸು ಚಾಳ್ವಾಲಿ.

“ಕಿತ್ಯಾ? ಹಾಂವೆ ಹಾಡ್ನ್ ದಿಲ್ಯಾರ್ ತುಜ್ಯಾ ತಾಳ್ಯಾಂತ್ ತೆಂ ಉದಕ್ ದೆಂವಾನಾಂಗಿ? ಯಾ ಹಾಂವ್ ಕಾಂಯ್ ತಾಂತುಂ ವೀಕ್ ಖಿರವ್ನ್ ದಿತಾಂ ಮ್ಹಣ್ ಭಿಯೆತಾಯ್?”

‘ಖೊಕ್ಕ್….. ಖೊಕ್ಕ್….’ ಕರ‍್ನ್ ಬಾಬಾನ್ ಸೊಪ್ಯಾಚ್ಯಾ ಪೊಂತಾ ವಯ್ಲ್ಯಾ ತ್ಯಾ ಕಸ್ರೊ ಆನಿ ಗುಜಿರಿ ಭರ‍್ನ್ ದವರ್‌ಲ್ಲ್ಯಾ ಅಶೀರ್, ಭುರ್ಶ್ಯಾ ಕುಡಾಂತ್ ಕೊನ್ಶ್ಯಾಕ್ ನಿದುನ್ ಖೊಂಕ್ಲಿ ಕಾಡ್ತಾನಾ ಮ್ಹಾಕಾ ತಾಚಿ ಭಿರ‍್ಮೊತ್ ದಿಸ್ಲಿ.

ಧನ್ಪಾರಾಚಿಂ ವೊರಾಂ ದೋನ್ ಉತರ‍್ಲ್ಯಾಂತ್. ಆಮ್ಚೆಂ ಸಕ್ಡಾಂಚೆಂ ಜೆವಣ್ ಜಾವ್ನ್ ತೆಂ ಜಿರುಂಕ್ ಲಾಗ್ಲಾಂ. ಪುಣ್ ಬಾಬಾಚ್ಯಾ ಪೊಟಾಂತ್ಲೆ ದಂತ್ ಆಜೂನ್ ಭುಖೆನ್ ಉಚಾಂಬಳ್ ಆಸಾತ್ ಮ್ಹಳ್ಳೆಂ ತಾಚಿ ತಿ ಉಪಾಸಾಚಿ ಖೊಂಕ್ಲಿ ಸಾಂಗುನ್ ಆಸಾ. ಮ್ಹಜ್ಯೆ ಸಾಸುಚೆ ಕಾನ್ ಕೆಪ್ಪೆ ಜಾಂವ್ಕ್‌ನಾಂತ್ ತರೀ ತಿಚೆಂ ಕಾಳಿಜ್ ತಿಚ್ಯಾ ಪತಿಥಂಯ್ ಆಜೂನ್ ಕಿತ್ಯಾಕ್‌ಗಿ ಮೊವ್ ಪಡುಂಕ್ ನಾ. ತ್ಯಾಚ್ ದೆಕುನ್ ತಾಕಾ ತಿಣೆ ಆತಾಂ ಪರ‍್ಯಾಂತ್ ಉಪಾಶಿಂಚ್ ದವರ‍್ಲಾ.

ಮ್ಹಾಕಾ ಬಾಬಾಚಿ ಭಿರ‍್ಮೊತ್ ದಿಸ್ತಾ ತರೀ ಹಾಂವ್ ಅಸಹಾಯಕ್ ಜಾಲ್ಯಾಂ. ಕಾಂಯ್ ಹಾಂವ್ ತಾಕಾ ಖಂಚ್ಯೆಯ್ ರಿತಿಚಿ ಕುಮೊಕ್ ಕರುಂಕ್ ಗೆಲಿಂ ತರ್ ತಿ ಮ್ಹಾಕಾ ಆನಿ ಮಾಂವಾಕ್ ಬಾಂಧುನ್ ದಿತಾ. ತಿಚ್ಯೆ ಜಿಬೆಥಾವ್ನ್ ಉಸಾಳ್ಚಿಂ ತಿಂ ಜಳ್ತ್ಯಾ ಕೆಂಡಾಂ ತಸಲಿಂ ಉತ್ರಾಂ ಮ್ಹಜೆಂ ಕಾಳಿಜ್ ಮಾತ್ರ್ ನ್ಹಯ್ ಶಿಂತಿದ್‌ಯಿ ಹುಲ್ಪಾಯ್ತಾತ್, ಉದ್ಕಾಕ್‌ಯೀ ಉಜೊ ಲಾಯ್ತಾತ್.

ಬಾಬ್ ಪರತ್ ತಾನೆನ್ ಪಿಂರ‍್ಗಾತಾನಾ ಹಾಂವೆ ಮ್ಹಜ್ಯೆ ಸಾಸು ಕುಶಿನ್ ಪಳೆಲೆಂ. ತಿಕಾ ಹಾಚಿ ಪರ‍್ವಾಚ್ ನಾ ಮ್ಹಳ್ಳ್ಯೆಪರಿಂ ಸೊಪ್ಯಾಚ್ಯಾ ಆನ್ಯೇಕಾ ಪೊಂತಾರ್ ಬಸುನ್ ತೊಂಡಾಂತ್ಲಿ ಪಾನ್-ಫೊಡ್ ಚಾಬುನ್, ಕಂರ್ಗಟಾವ್ನ್ ಆಸಾ.

ಮ್ಹಜೆಂ ಕಾಳಿಜ್ ಆಜ್ ಕಿತ್ಯಾಕ್‌ಗಿ ಆಯ್ಕಾನಾ. ಮಾಂವಾಚಿ ಮ್ಹಾಕಾ ಅಧಿಕ್ ಭಿರ‍್ಮೊತ್ ದಿಸ್ತಾ. ಸಟಕ್ಕ್ ಕರ‍್ನ್ ಉಠುನ್ ರಾಂದ್ಪಾ ಕುಡಾಕ್ ಧಾಂವ್ತಾಂ. ಘಡ್ಯೆನ್ ಭಾಯ್ರ್ ಯೆತಾನಾ ಮ್ಹಜ್ಯಾ ಉಜ್ವ್ಯಾ ಹಾತಾಂತ್ ಬಾಬಾಚೊ ರಂಗ್ ಹೊಗ್ಡಾಯಿಲ್ಲೊ ಪರ‍್ನೊ ಸ್ಟೀಲಾಚೊ ಗೊಬ್ಳೊ ಉದ್ಕಾನ್ ಭರುನ್ ಆಸ್ಚೊ ಪಳೆವ್ನ್ ಮ್ಹಜ್ಯೆ ಸಾಸುಚ್ಯೆ ಕುಡಿ ಭಿತರ್ ಪಂಜುರ‍್ಲಿ ಭುತ್ ರಿಗ್ಲೊಚ್.

“ಹಾಂಗಾ ಹಾಡ್ ತೊ ಗೊಬ್ಳೊ ಆಲಿಸಾ” ತಿಣೆ ಮ್ಹಾಕಾ ಖಡಕ್ಕ್ ತಾಕಿದ್ ದಿಲಿ. ತಿಚಿ ತಿ ಆಜ್ಞಾ ಪಾಳುಂಕ್ ಹಾಂವ್ ಕಬೂಲ್ ನಾ ಜಾಲಿಂ ದೆಕುನ್ ಆಯ್ಕಾನಾತ್‌ಲ್ಲ್ಯೆಪರಿಂ ಕರುನ್ ಶೀದಾ ಗೊಬ್ಳೊ ವ್ಹರ‍್ನ್ ಬಾಬಾಚ್ಯಾ ಹಾತಾಂತ್ ಹಾಂವೆ ದಿಲಾ ಯಾ ನಾ ಮ್ಹಳ್ಳೆಂ ಮ್ಹಾಕಾ ಕಳ್ಚ್ಯಾ ಪಯ್ಲೆಂಚ್ ಘೊಣಿಪರಿಂ ಯೆವ್ನ್ ತಿಣೆ ಉದ್ಕಾಚೊ ತೊ ಗೊಬ್ಳೊ ಜೊಂಪಯ್ ಮಾರ‍್ನ್ ಅಸೊ ವೊಡ್ನ್ ಘೆತ್ಲೊ ಕಿ, ಗೊಬ್ಳ್ಯಾಂತ್ಲೆಂ ಉದಕ್ ಸಗ್ಳೆಂ ನಿದುನ್ ಆಸ್ಲೆಲ್ಯಾ ಬಾಬಾಚ್ಯಾ ಆಂಗಾರ್ ಪಡ್ಲೆಂ.

ಸುಕ್‌ಲ್ಲ್ಯೆ ಕಾತಿಕ್ ರೆವ್ಡಾಯಿಲ್ಲೊ ಹಾಡಾಂಚೊ ಘುಡ್ ಜಾವ್ನ್ ಉಸ್ವಾಸ್ ಸೊಡ್ನ್ ಆಸ್ಚ್ಯಾ ಬಾಬಾನ್ ಏಕ್ ಅಸ್ಕತ್ ಖಿಳಂಚ್ ಮಾರ‍್ಲಿ. ತ್ಯಾ ವೆಳಾರ್ ರಾಗಾನ್ ದಾಡಾಮಾಂ ಅಡ್ಚುನ್ ಧರ‍್ನ್ ನಾಕಾ ತೊಂಡಾಂತ್ಲ್ಯಾನ್ ಹುನೊನಿ ವಾರೆಂ ಸೊಡ್ಚ್ಯಾ ಮಾಂಯ್ಚೆಂ ವಿದ್ರೂಪ್ ಆನಿ ಹರಾಮಿಪಣ್ ಉಸ್ಪುನ್ ಯೆಂವ್ಚೆಂ ತೆಂ ತೋಂಡ್ ಪಳೆಂವ್ಚ್ಯಾಕ್ ಮ್ಹಾಕಾಚ್ ಕಾಂಠಾಳೊ ಯೆವ್ನ್ ಭಿರಾಂತ್ ದಿಸ್ಲಿ.

“ಆತಾಂ ಜೆವ್ಣಾಚ್ಯಾ ವೆಳಾರ್ ತುಂ ಇತ್ಲೆಂ ಉದಕ್ ಘೊಟ್ಶಿ ತರ್ ಥಂಯ್ ಹುನ್ ಕರ‍್ನ್ ದವರ‍್ಲೆಲಿ ತಿ ಪೇಜ್ ಕೊಣೆ ಭೊಕಾಂವ್ಚಿ ಲುಸಿಫೆರಾ?” ಮಾಂಯ್ ಫುಟ್ಲಿಚ್.

ಬಾಬ್ ಭಾವ್ಡೊ ಆಂಗಾರ್ ಪಡ್ಲೆಲ್ಯಾ ಉದ್ಕಾ ನಿಮ್ತಿಂ ಹಿಂವಾನ್ ಆಂಕುಡ್ತಾಲೊ ಏಕ್ ಸಾರ‍್ಕೊ. ಥೊಡ್ಯಾ ದಿಸಾಂಥಾವ್ನ್ ತೊ ತಾಪಾನ್ ಅಸೊ ತಾಪ್ತಾಲೊ ಕಿ, ತಾಚ್ಯಾ ತೊಂಡಾಚೆಂ ರೂಪ್‌ಚ್ ಬದ್ಲಾಲ್ಲೆಂ. ತಾಚಿ ಹಿ ಪರಿಸ್ಥಿತಿ ಪಳೆತಾನಾ ತೊ ಆನಿ ಚಡ್ ದಿಸಾಂಕ್ ಜಿವಂತ್ ಉರ‍್ಚೊನಾ ಮ್ಹಳ್ಳೆಂ ಮ್ಹಾಕಾ ಸ್ಪಷ್ಟ್ ಭಗ್ತಾಲೆಂ.

“ತುಂ ಕಿತ್ಯಾ ಮ್ಹಾಕಾ ಹ್ಯಾ ನಮೂನ್ಯಾರ್ ಕಷ್ಟಿತಾಯ್ ಎಲಿಜಾ? ಮ್ಹಾಕಾ ತುಂ ಮೊರುಂಕ್‌ಯಿ ಸೊಡಿನಾಂಯ್, ವಾಂಚುಂಕ್‌ಯಿ ದಿನಾಂಯ್. ಹಾಂವೆ ತುಕಾ ಕಿತೆಂ ಅನ್ಯಾಯ್ ಕೆಲಾ?”

ಉತ್ರಾಂ ತಾಚಿಂ ಸ್ಪಷ್ಟ್ ಆಸ್‌ಲ್ಲಿಂ ತರೀ ಅಸ್ಕತ್, ಕಾಂಪೆರಿಂ ಆನಿ ಪೊಕ್ಳಿಂ ಜಾವ್ನ್ ಆಯ್ಕಾಲಿಂ ಮ್ಹಾಕಾ. ಬಾಬಾಚಿ ಖರಸ್ ಆನಿ ಖೊಂಕ್ಲಿ ಚಡ್ ಜಾವ್ನ್ ಆಯ್ಲಿ. ಲಾಗಿಂಚ್ ಉಭಿಂ ಆಸ್‌ಲ್ಲ್ಯಾ ಹಾಂವೆ ಬಾಬಾಕ್ ‘ಉಲಯ್ನಾಕಾ’ ಮ್ಹಣ್ ದೊಳೊ ಮೊಡ್ಲೊ. ತಿತ್ಲ್ಯಾರ್ ತಾಚ್ಯೆ ಖೊಂಕ್ಲೆನ್ ತಾಕಾ ವೊಳಾಂವ್ಕ್ ಸುರು ಕೆಲೆಂ. ಹರ‍್ದ್ಯಾ ಭಿತರ‍್ಲ್ಯೆ ದುಖಿನ್ ಆನಿ ಹುಲೊಪಾನ್ ಗಾಂಯ್ದೊಳ್ ಹುಳ್ವುಳ್ಚ್ಯೆಪರಿಂ ದೊಳೆ ಜಾತಾ ತಿತ್ಲೆ ಭಾಯ್ರ್ ಕಾಡುನ್ ಉಸ್ವಾಸ್ ಸೊಡ್ಚ್ಯಾಕ್ ತೊ ಕಷ್ಟಾಲೊ.

ತಾಚಿ ತಿ ದುರ್ಗತ್ ಪಳೆವ್ನ್ ಮ್ಹಜ್ಯಾ ದೊಳ್ಯಾಂನಿ ದುಃಖಾಂ ಭರುನ್ ಆಯ್ಲಿಂ. ಕಿತೆಂ ಕರ‍್ಚೆಂ ಮ್ಹಳ್ಳೆಂ ಸುಸ್ತಾನಾಸ್ತಾಂ ಹಾಂವ್ ಸಂತಾಪಾನ್ ತ್ಯಾ ಕುಡಾ ಥಾವ್ನ್ ಭಾಯ್ರ್ ಆಯ್ಲಿಂ, ಮಾಂಯ್ಕ್ ಆಂಬಾಡ್ಯಾ ದೊಳ್ಯಾಂನಿ ಪಳೆವ್ನ್.

“ತುಕಾ ಮ್ಹಜೆರ್ ರಾಗ್ ಯೆತಲೊಚ್ ಆಲಿಸಾ. ಹಾಣೆ ಮ್ಹಾಕಾ ಕಷ್ಟಿತಾನಾ ತುಂ ಮ್ಹಜ್ಯೆ ಸಾಂಗಾತಾ ಹ್ಯಾ ಘರಾಂತ್ ನಾತ್‌ಲ್ಲೆಂಯ್ ನ್ಹಯ್‌ಗಿ? ಹಾಣೆ ಆಧಾರ್‌ಲ್ಲ್ಯಾ ಕರ್ಮಾಂಕ್ ಘರಾಂತ್ ನ್ಹಯ್ ತ್ಯಾ ಗೊಟ್ಯಾಂತ್ ಲೆಗುನ್ ಹಾಕಾ ಜಾಗೊ ಹಾಂವೆ ದಿಂವ್ಕ್ ಫಾವೊ ನ್ಹಯ್. ಆಜ್ ಹಾಂವೆ ಹಾಕಾ ಫಕತ್ ಉದಕ್ ಪಿಯೆಂವ್ಕ್ ಸೊಡ್ಲೆಂನಾ. ಹಾಣೆ ಮ್ಹಜ್ಯಾ ತೊಂಡಾಂತ್ಲಿ ಶಿತಾ ಉಂಡಿ ಸಯ್ತ್ ಬಲಾತ್ಕಾರಾನ್ ಭಾಯ್ರ್ ವೊಡ್ನ್ ಜಾಲಾಂತ್ ಬಸುನ್ ಆಸ್‌ಲ್ಲ್ಯಾ ಸುಣ್ಯಾಕ್ ಉಡಯ್ಲ್ಯಾ. ಗೊತ್ತಾಸಾಯೇ ತುಕಾ? ತಿತ್ಲೊ ಕಸಾಪ್ಪಿ, ದೊಳ್ಯಾಂತ್ ರಗತ್ ನಾತ್‌ಲ್ಲೊ ಹರಾಮಿ, ಯಮ್ಕುಳೊ ಹೊ.”

“ತುಂ ಕಿತ್ಯಾ ನಾಕಾ ಜಾಲ್ಲೆಂ ಘಡುನ್ ಸಾಂಗುನ್ ತ್ಯಾ ನೆಣಾರ‍್ಯಾ ಚೆಡ್ವಾಚಿ ಮತ್ ವಿಕಾರ್ ಕರ‍್ತಾಯ್ ಎಲಿಜಾ? ತುಕಾ ಹ್ಯಾ ಫಟಿಂಚೆಂ ಸಗ್ಳೆಂ ಲೇಕ್ ದೆವಾಕ್ ದಿಂವ್ಕ್ ಆಸ್ತಲೆಂ” ಉಲಂವ್ಚ್ಯಾಕ್ ತ್ರಾಣ್ ಆನಿ ಆಸ್ಪವ್ ನಾ ತರೀ ಮ್ಹಜೊ ಮಾಂವ್ ಕಷ್ಟಾಂನಿ ಬಡ್ಬಡ್ಲೊ ಕಾಂಪೆರ‍್ಯಾ ತಾಳ್ಯಾನ್.

“ಹಾಂ….ಹಾಂ….. ತಿತ್ಲೆಂ ತುಂ ಮ್ಹಾಕಾ ಭೆಷ್ಟಾಯ್ನಾಕಾ ಹಾಂ, ಘಾತ್ಕಿ ಜುದಾಸಾ. ತ್ಯಾ ದೆವಾಚೆ ದೊಳೆ ಕಾಂಯ್ ಫುಟುಂಕ್‌ನಾತ್‌ಲ್ಲೆ ತುಂವೆ ಮ್ಹಜ್ಯೆ ಥಂಯ್ ಅನ್ನಾಡಿ ಅತುರ‍್ವಣಾಂ ಕರ‍್ತಾನಾ. ತಾಣೆ ಮ್ಹಜೆಂ ಕಸಲೆಂ ಲೇಕ್ ಘೆಂವ್ಚೆಂ? ಅಳೆ, ತುಂಚ್ ನ್ಹಯ್‌ಗಿ ಆತಾಂ ಜರ್ಕಟುನ್ ಆಸಾಯ್ ತುಜ್ಯಾ ಅನ್ನಾಡ್‌ಪಣಾಚ್ಯಾ ಹರ‍್ಯೆಕ್ ಕರ‍್ತುಬಾಚೆಂ ಲೇಖ್ ದಿಂವ್ಕ್.”

“ಏ ಮ್ಹಜ್ಯಾ ಪೊರಾಸ್ಕ್ ಸಾಯ್ಬಾ, ಏಕ್ ಪಾವ್ಟಿಂ ಹ್ಯಾ ದಳ್ದಿರ್ ಸೈತಾನಾಚ್ಯಾ ಹಾತಾ ಥಾವ್ನ್ ಮ್ಹಾಕಾ ಸುಟ್ಕಾ ದಿ. ಆನಿ ಮ್ಹಜ್ಯಾನ್ ಹಿ ಇಝಾ ಸೊಸುಂಕ್ ಜಾಯ್ನಾ” ಗರ್ಗರ‍್ಯಾ ಆವಾಜಾನ್ ಬಾಬ್ ನಿಧಾನ್ ಕುಡ್ಕ್ಯಾ ಕುಡ್ಕ್ಯಾ ಉತ್ರಾಂನಿ ಅಲ್ಕಂದ್ಲೊ ಉಸ್ಪುನ್ ಯೆಂವ್ಚಿ ಖೊಂಕ್ಲಿ ಬಲಾತ್ಕಾರಾನ್ ಧಾಂಬುನ್ ಧರುನ್.

“ತಿತ್ಲ್ಯಾ ವೆಗಿಂ ದೆವಾನ್ ತುಕಾ ಕಶೆಂ ವ್ಹರ‍್ಚೆಂ-ಯಾ? ಹಾಂಗಾಚೆಂ ಸಗ್ಳೆಂ ಕಾಬಾರ್ ಕರ‍್ನ್‌ಚ್ ವ್ಹಚಾಜಯ್ ನ್ಹಯ್‌ಗಿ? ತುಂ ತಿತ್ಲೊ ಬರೊ ಮನಿಸ್ ಜಾಲ್ಲೊಯ್ ತರ್ ತುಂವೆ ಅಶೆಂ ವಳ್ವಳಾಜಯ್ ಮ್ಹಣ್ ಆಸ್‌ಲ್ಲೆಂಗಿ? ತೊ ಬರೊ ದೇವ್ ಕಿತೆಂ ಮ್ಹಾಕಾ ಅನ್ಯಾಯ್ ಕರಿತ್ ಮ್ಹಣ್ ಚಿಂತಾಯ್‌ಗಿ ತುಂ ಲುಸಿಫೆರಾ?”

ಬಾಬಾನ್ ಜಾಪ್ ದಿನಾಸ್ತಾಂ ಫಕತ್ ಸುಸ್ಕಾರ್ ಸೊಡ್ಲೊ ಧೊವ್ಯಾ ಖಾಡಾಚ್ಯಾ ತಾಡಾಂನಿ ಭರ‍್ಲಲಿಂ ದಾಡಾಮಾಚಿಂ ಸುಕಿಂ ಹಾಡಾಂ ಹಾಲವ್ನ್. ಆಡೊಸಾಕ್ ರಾವುನ್ ಆಯ್ಕುಂಚ್ಯಾ ಮ್ಹಜ್ಯಾ ಕಾನಾಂಕ್ ತಾಚೆ ಆಟೆವಿಟೆ ಆಜ್ ಚಿಕ್ಕೆ ಚಡ್‌ಚ್ ದಿಸುಂಕ್ ಲಾಗ್ಲ್ಯಾತ್. ಪುಣ್ ಮಾಂಯ್ ಮಾತ್ರ್ ಆಜ್ ಆನಿಕಿ ಚಡ್ ಧಾರುಣ್ ಜಾಲ್ಲ್ಯೆಪರಿಂ ಮ್ಹಾಕಾ ದಿಸ್ತಾ.

ಕಾಜಾರ್ ಜಾವ್ನ್ ಹ್ಯಾ ಘರಾಂತ್ ಹಾಂವೆ ಪಾಂಯ್ ದವರ‍್ನ್ ಪಾಂಚ್ ವರ‍್ಸಾಂ ಉತರ‍್ಲ್ಯಾಂತ್. ಆಯಿಲ್ಲ್ಯೆ ಸುರ‍್ವೆರ್ ಮಾಂಯ್ ಆನಿ ಬಾಬಾಚೊ ತೊ ಕಾಜಾರಿ ಮೋಗ್ ಪಳೆತಾನಾ ಮ್ಹಜೊ ಘೊವ್ ಜೆರಿಚೊಚ್ ಮೋಗ್ ಅಸ್ಕತ್ ಕಸೊ ಮ್ಹಾಕಾ ದಿಸ್ತಾಲೊ. ಸಕಾಳಿಂ ಗುಡ್ಯಾಕ್ ಪಾಲೊ ಯಾ ಲಾಂಕುಡ್ ಹಾಡುಂಕ್ ತಿಂ ದೊಗಾಂಯ್ ಸಾಂಗಾತಾ ವ್ಹೆತಿತ್ ತರ್ ಧನ್ಪಾರಾಂ ಜೆವ್ಣಾಚ್ಯಾ ವೆಳಾರ್ ಮಾತ್ಯಾರ್ ಏಕ್ ವ್ಹಡ್ ಸುಕ್ಯಾ ಆಡಾರಾಂಚೊ ಭೊರೊ ದವರುನ್ ಘರಾ ಪಾಟಿಂ ಯೆತಾಲಿಂ ಮೊಗಾಚೆಂ ತುಪೆಂ ಭರುನ್.

ಭಾರೀ ಏಕ್ ಮೋಗ್, ಎಕ್ವಟ್ ಆನಿ ಸಾಂಗಾತ್ ತಾಂಚೊ. ಆನಿ ಮ್ಹಜೊ ಎಕ್ಲೊ ಘೊವ್ ಆಸಾ ಪಳೆ, ತೊ ಕಾಸಾಕ್ ಪ್ರಯೋಜನಾಕ್ ಪಡಾನಾತ್‌ಲ್ಲೊ ಬಜೀ ಚಾಪ್ಪೊ ಮನಿಸ್. ಕಾಜಾರ್ ಜಾವ್ನ್ ಪಾಂಚ್ ವರ‍್ಸಾಂನಿ ಮ್ಹಜ್ಯೆ ಸಾಸುಮಾಂಯ್ಕ್ ತೆಗಾಂ ಭುರ‍್ಗಿಂ ಜಾಲ್ಲಿಂ ಕಂಯ್. ಮ್ಹಜೆಂ ಕಾಜಾರ್ ಜಾವ್ನ್ ಪಾಂಚ್ ವರ‍್ಸಾಂ ಉತರ‍್ಲ್ಯಾರಿ ಪಾಂಚ್ ಮಹಿನ್ಯಾಂಚೊ ಗರ್ಭ್ ಸಯ್ತ್ ಮ್ಹಜ್ಯಾ ಕುಸ್ವ್ಯಾಂತ್ ರಾವುಂಕ್ ನಾ. ತಿತ್ಲೊ ಪೊಕೊಳ್ ದಾದ್ಲೊ ಮ್ಹಜೊ ಜೆರಿ.

ಮ್ಹಜ್ಯಾ ಉಪ್ರಾಂತ್ ಕಾಜಾರ್ ಜಾಲ್ಲಿಂ ಮ್ಹಜ್ಯಾ ಸಾಂಗಾತಾಚಿಂ ಸರ‍್ವಾಂ ಎಕಾ-ದೊಗಾಂ ಭುರ‍್ಗ್ಯಾಂಚ್ಯೊ ಆವಯೊ ಜಾಲ್ಯಾಂತ್. ಮ್ಹಾಕಾ ಮಾತ್ರ್ ದೆವಾನ್ ತಸಲೆಂ ಭಾಗ್ ಆಜೂನ್ ದಿಂವ್ಕ್‌ಚ್ ನಾ. ದೆವಾಕ್ ಕಿತ್ಯಾ ದುರ‍್ಸಾಜಯ್? ತಾಣೆ ದಿತಾನಾ ಘೆಂವ್ಕ್ ಮ್ಹಜ್ಯಾ ಘೊವಾಕ್ ತಾಂಕ್ ಆಸಾಜಯ್ ನ್ಹಯ್‌ಗಿ? ಹಿತ್ಲಾಂತ್ಲೆಂ ತಾಚೆಂ ಕಾಮ್‌ಚ್ ಮುಗ್ದಾನಾ. ರಾತಿಂ ಪುರಾಸಣೆನ್ ಯೆವ್ನ್, ನ್ಹಾವ್ನ್, ತೇರ‍್ಸ್ ಕರುನ್ ಮಾಂಯ್ನ್ ದಿಲ್ಲೆಂ ಇಲ್ಲೆಂ ಕೊಪಾಚೆಂ ಘೊಟುನ್ ಜೆವಾಣ್ ಕರ‍್ತಾನಾಂಚ್ ತಾಕಾ ಕುಂಭಕರ‍್ಣಾಚಿ ನೀದ್ ಲಾಗ್ತಾ, ವ್ಹೆಚ್ಯಾ ಕಾಳಾಚಿ. ಮ್ಹಜ್ಯೆ ಕುಡಿಂತ್ಲ್ಯಾ ತಳ್ಮಳ್ಯಾಂಚಿ, ಆಟೆವಿಟ್ಯಾಂಚಿ ತಾಕಾ ಖಬರ್ ನಾ ದೆಕುನ್ ಮ್ಹಜೆ ದೊಳೆ ನಿದೆಕ್ ವೆಂಗುಂಕ್ ಬಿಲ್ಕುಲ್ ಕಬೂಲ್ ಜಾಯ್ನಾಂತ್.

ಮ್ಹಜಿ ಆವಯ್ ಹರ‍್ಯೆಕಾ ಮಹಿನ್ಯಾಂತ್ ‘ಕಾಂಯ್ ಬರಿ ಖಬರ್ ಆಸಾಯೆಗೊ?’ ಮ್ಹಣ್ ವಿಚಾರ‍್ತಾನಾ ಖರಿ ಗಜಾಲ್ ಸಾಂಗ್ಲ್ಯಾರ್ ತಿಕಾ ಬೆಜಾರ್ ಜಾಂವ್ಚೆಂನಾ? ಹೊ ಖೊಡು ಘೊಟ್ ಹಾಂವ್ ಮ್ಹಜ್ಯಾ ಪಾತ್ಕಾಂಚೆಂ ಪ್ರಾಚಿತ್ ಮ್ಹಣ್ ಸದಾಂ ಘೊಟುನ್ ಆಸಾಂ. ಜೆರಿಕ್ ಮಾತ್ರ್ ಹ್ಯೆವಿಶಿಂ ಕಾಂಯ್ ಖಬರ್, ಇಚ್ಛಾ, ಅತ್ರೆಗ್ ಯಾ ಖಂತ್ ಆಸ್‌ಲ್ಲಿ ಮ್ಹಾಕಾ ಆಜೂನ್ ದಿಸುಂಕ್ ನಾ. ತಾಚೆಂ ಸೈಂಭ್ ಆನಿ ಕಾಸ್ತ್‌ಚ್ ಥಂಡ್, ಗಾರ್ ಮ್ಹಣ್ ದಿಸ್ತಾ.

ಸಾಧಾರಣ್ ಚ್ಯಾರ್, ಪಾಂಚ್ ಮಹಿನ್ಯಾಂ ಆದಿಂ ಗುಡ್ಯಾಕ್ ಬಾಬಾ ಸಾಂಗಾತಾ ಸೊಪ್ ಹಾಡುಂಕ್ ಗೆಲ್ಲಿ ಮ್ಹಜಿ ಸಾಸು ಆವ್ಚಿತ್ ಹರ್ಶೆಂಚ್ಯಾ ವೆಳಾ ಬದ್ಲಾಕ್ ವೊತಾಚಿಂ ಸಾಡೆ ಇಕ್ರಾ ವಾಜ್ಚ್ಯಾ ಆದಿಂಚ್ ರಾಗಾಚೊ ಗೋಲ್ ಜಾವ್ನ್ ಘರಾಂತ್ ಭಿತರ್ ಸರ್‌ಲ್ಲಿ ಪಳೆವ್ನ್ ಹಾಂವೆ ಸತ್ತ್ಯಾನ್ ಬಾಬ್ ಖಂಯ್ ಆಸಾ ಮ್ಹಣ್ ವಿಚಾರ್‌ಲ್ಲೆಂ. ತಿತ್ಲೆಂಚ್, ಹಾತಾಂತ್ಲಿ ಕೊಯ್ತಿ ಕಾಡ್ನ್ ಭಾಯ್ಲ್ಯೆ ನ್ಹಾಣಿಯೆಚ್ಯಾ ಸೊಪ್ಯಾಚ್ಯಾ ಕೊನ್ಶ್ಯಾಕ್ ಉಡವ್ನ್, ಉಜ್ಯಾಚಿಂ ಕಿಟಾಳಾಂ ಉಡವ್ನ್ ತಿ ‘ಶಿವ ತಾಂಡವ’ ನಾಚ್ ಕರುಂಕ್ ಲಾಗ್‌ಲ್ಲಿ. ತಿ ಕಿತೆಂ ಕರ‍್ತಾ ಆನಿ ಕಿತೆಂ ಉಲಯ್ತಾ ಮ್ಹಳ್ಳೆಂ ಏಕ್‌ಯಿ ಮ್ಹಾಕಾ ಸಮ್ಜಾನಾ ಜಾಲ್ಲೆಂ.

ಹಾಂಚ್ಯಾ, ಘೊವ್-ಬಾಯ್ಲೆಚ್ಯಾ ಜೆಂಬಾರಾಂತ್ ಮಧೆಂ ಪಡ್ಲ್ಯಾರ್ ಮ್ಹಾಕಾಚ್ ಸಂಚಿಕಾರ್ ಮ್ಹಣ್ ಚಿಂತುನ್ ಹಾಂವ್ ರಾಂದ್ಪಾಂತ್ ಮಗ್ನ್ ಜಾಲಿಂ. ಪುಣ್ ಮಾಂಯ್ ಪರ‍್ತ್ಯಾನ್ ಖಂಚ್ಯಾನ್ ಮಾಯಾಗ್ ಜಾಲಿ ಮ್ಹಳ್ಳೆಂ ಮ್ಹಾಕಾ ಕಳ್ಳೆಂ ನಾ. ಹಾಂವೆಂಯ್ ತ್ಯೆ ದಿಶಿಂ ಚಡಿತ್ ಗುಮಾನ್ ಕೆಲೆಂನಾ.

ಉಪ್ರಾಂತ್ ಮ್ಹಾಕಾ ಕಳ್ಳೆಂ ಕಿ, ತ್ಯಾ ದೀಸ್ ಮಾಂಯ್ ಖಂಚ್ಯಾನ್ ಭಾಯ್ರಿ ಜಾಲಿ ಮ್ಹಣ್ ಬಾಬ್ ತಿಕಾ ಸೊಧುನ್ ಗೆಲ್ಲ್ಯಾ ತವಳ್ ಮ್ಹಜಿ ಸಾಸು ಆನಿ ಸೆಜಾರ‍್ಚೊ ನಿಕಾಮ್ ಸಾಂಗಾತಾಚ್ ಪಯ್ಸ್ ಥಾವ್ನ್ ಹಾಸುನ್-ಉಲವ್ನ್ ಯೆತಾನಾ ತಾಣೆ ಪಳೆಲೆಂ ಕಂಯ್. ಮ್ಹಜ್ಯೆ ಸಾಸುಮಾಂಯ್ಚೊ ಪುರಾಸಣೆಚೊ ಜಿನೊಸ್ ಆನಿ ಘಾಮಾನ್ ಭಿಜ್‌ಲ್ಲಿ ಕೂಡ್ ಪಳೆವ್ನ್ ಬಾಬಾನ್ ದುಬಾವಾಚಿ ದಿಷ್ಟ್ ಮಾಂಯ್ಚೆರ್ ಘಾಲ್ಲಿಚ್ ತಿ ಬೊಲ್ಚೆಲಿ ಕಂಯ್. ಹಿಚ್ ಆಮ್ಚ್ಯಾ ಬಾಬಾನ್ ಕೆಲ್ಲಿ ಮಹಾ ಚೂಕ್ ಕಂಯ್. ಹಿ ಗಜಾಲ್ ಮ್ಹಾಕಾ ಬಾಬಾನ್‌ಚ್ ಘುಟಾನ್ ಸಾಂಗ್‌ಲ್ಲಿ.

ತಿತ್ಲೆಂಚ್…ಆಪ್ಣಾಚ್ಯಾ ಘೊವಾಕ್ ಮ್ಹಳ್ಯಾರ್ ಮ್ಹಜ್ಯಾ ಮಾಂವಾಕ್ ಬುರ್ಬುರ‍್ಯಾಂ ವೊಡ್ನ್‌ಚ್ ಆಯಿಲ್ಲಿ ಕಂಯ್ ಮ್ಹಜಿ ಮಾಂಯ್ ತಿಚ್ಯೆ ಜಿಬೆಚ್ಯಾ ಪೊಂತಾಥಾವ್ನ್ ಉಸಾಳ್ಚ್ಯಾ ಗಾಳಿ-ಸೊವ್ಯಾಂಚ್ಯೆ ಸಾಂಕ್ಳಿನ್ ಬಾಂಧುನ್. ತ್ಯಾ ಉಪ್ರಾಂತ್ ಹಾಂಚೊ ಮೋಗ್ ಕರ್ಪುನ್ ಪಡ್ಚಾ ಜಾಲೊಗಿ ಯಾ ಗಾಂವ್ ಸೊಡ್ನ್ ಪಿಡ್ಚೊ ಜಾಲೊಗಿ ಕೊಣ್ ಜಾಣಾ? ಮಾಂಯ್ ತಿಂಗಾ ತರ್ ಬಾಬ್ ಹಿಂಗಾ. ಹಾಂಚೊ ಸಾಂಗಾತ್, ಮೋಗ್, ಸಂಬಂಧ್ ತೀರ್ ತಿರ‍್ಕುಟ್ ಜಾಲ್ಲೊ. ಮ್ಹಾಕಾ ಮಾತ್ರ್ ಹ್ಯಾ ಘಡಿತಾ ಪಾಟ್ಲೊ ಮಿಸ್ತೆರ್ ಆಜೂನ್ ಸಾರ‍್ಕೊ ಸುಸ್ತೊಂಕ್ನಾ.

ಪುಣ್ ಹ್ಯಾ ಉಪ್ರಾಂತ್ ಮ್ಹಜೊ ಘೊವ್ ಜೆರಿ ಸಾಂಜೆಚೆಂ ಘರಾ ವೆಗಿಂ ಯೆತಾ. ಘರಾಂತ್ಲೆಂ ತೆಂ, ಹೆಂ ಕಾಮ್ ಕರ‍್ನ್ ಆಸ್ತಾ. ಮ್ಹಜ್ಯೆಲಾಗಿಂ ಏಕ್ ಸಬ್ದ್ ಮೊಗಾಚೊ ಉಲಂವ್ಚ್ಯಾಕ್ ತಾಕಾ ಭಿರಾಂತ್ ಯಾ ಲಜ್‌ಗಿ ಯಾ ಆನಿ ಕಿತೆಂ ಮಾತ್ತಿಗಿ. ಮ್ಹಜಿ ಆಂತರಿಕ್ ಆಶೆಚಿ ತಾನ್ ಭಾಗಂವ್ಚ್ಯಾಕ್ ತಾಕಾ ಮನ್‌ಚ್ ನಾ ಕಶೆಂ ದಿಸ್ತಾ. ಸಾಂಜೆರ್ ಚಿಕ್ಕೆ ವೆಗಿಂ ಹಿತ್ಲಾಂತ್ಲೊ ಪಾಟಿಂ ಆಯ್ಲೊ ತರ್ ಶೀದಾ ಮಾಂಯ್ಚ್ಯಾ ಕುಡಾಂತ್ ರಿಗ್ತಾ. ತೇರ‍್ಸ್ ಸುರು ಕರ‍್ತಾನಾ ಭಾಯ್ರ್ ಯೆತಾ. ಪೂತ್ ಆನಿ ಆವಯ್ ಕಿತೆಂ ಉಲಯ್ತಾತ್ ಯಾ ಘುಟ್ಮಳ್ ಕರ‍್ತಾತ್ ಮ್ಹಳ್ಳೆಂ ಮ್ಹಾಕಾ ಏಕ್‌ಯಿ ಸಮ್ಜಾನಾ.

ದೋನ್ ದೀಸ್ ಜಾಯ್ಜಯ್ ತರ್ ರಾತಿಂ ನೀಸ್-ಪೇಜ್ ಜೇವ್ನ್ ನಿದ್‌ಲ್ಲೊ ಆಮ್ಚೊ ಬಾಬ್ ಸಕಾಳಿಂ ಹಾಂವ್ ಉಠ್ತಾನಾ ಗೊಮ್ಟಿ ಕುಶಿಕ್ ಕರುನ್ ದೊಳೆ ಉಗ್ತೆಚ್ ದವರುನ್ ಅರ್ಧಿ ಜೀಬ್ ಭಾಯ್ರ್ ಘಾಲುನ್ ಪಡ್ಚಾ ಜಾಲ್ಲೊ. ಜೀವ್ ವ್ಹೆಚ್ಯಾ ಪಯ್ಲೆಂ ಬರೊಚ್ ದಡ್ಬಡ್ಲಾ ಯಾ ಹುಳ್ವುಳ್ಳಾ ಮ್ಹಳ್ಳ್ಯೆಪರಿಂ ದಿಸ್ತಾಲೆಂ.

ಹಾಂವ್ ಮ್ಹಜಿಂ ಸಕಾಳಿಂಚಿಂ ಕಾಮಾಂ ಸಗ್ಳಿಂ ಕರ‍್ನ್ ಮಾಂಯ್ ಸರ‍್ಶಿನ್ ವ್ಹೆತಾಂ ತರ್ ತಿ ಮ್ಹಾಕಾ ತಿಚ್ಯೆ ಮಾಂದ್ರೆರ್ ದಿಸ್ಲಿನಾ. ಹರ್ಶೆಂ ಹಾಂವೆ ವ್ಹಚುನ್ ತಿಕಾ ಉಠಯ್ಲ್ಯಾ ಶಿವಾಯ್ ತಿ ಮಾಂದ್ರಿ ಸೊಡಿನಾತ್‌ಲ್ಲಿ. ತಿಣೆ ಉಠುನ್ ನ್ಹಾಣ್ಯೆಕ್ ವ್ಹೆತಾನಾ ತಿಚಿ ಮಾಂದ್ರಿ ಆನಿ ವೋಲ್ ಹಾಂವೆ ಫಾಪುಡ್ನ್ ಕೊವುಳ್ನ್ ದವರಿಜಯ್ ಆಸ್‌ಲ್ಲಿ. ತಿಚಿಂ ಸಕಾಳಿಂಚಿಂ ಸಗ್ಳಿಂ ಕಾಮಾಂ ಕರ‍್ನ್ ತಿಣೆ ತಿಚ್ಯಾ ಕುಡಾ ಭಿತರ್ ರಿಗ್ತಾನಾ ತಿಚಿ ಕಾಫಿ ಆನಿ ನಾಷ್ಟೊ ಹಾಂವೆ ಥಂಯ್ಸರ್ ತಯಾರ್ ದವರಿಜಯ್.

ಪುಣ್ ಆಯ್ಚಿಂ ತಿಚಿಂ ಕಾಮಾಂ ಸಗ್ಳಿಂ ಉಳ್ಟಿಂ ಜಾಲ್ಲಿಂ. ತಿಚೊ ಪೂತ್, ಮ್ಹಜೊ ಪತಿ ಜೆರಿ ಮ್ಹಾಕಾ ಜಾಗ್ ಜಾತಾಸ್ತಾನಾ ಘರಾಂತ್ ನಾ ಮ್ಹಳ್ಳೆಂ ಮ್ಹಾಕಾ ಕಳ್‌ಲ್ಲೆಂ. ಆನಿ ಮ್ಹಜಿ ಸಾಸು ಕಸಲ್ಯೆಗಿ ಘಡ್ಬಡೆಂತ್ ಮಿಸ್ಳಾಲ್ಯಾ ಕಶೆಂ ಮ್ಹಾಕಾ ದಿಸ್ತಾಲೆಂ.

ತಿತ್ಲ್ಯಾರ್ ಎಕಾಚ್‌ಫರಾ ಮಾಂಯ್ಚ್ಯೊ ಆರಾಬಾಯೊ ಆಯ್ಕುಂಕ್ ಲಾಗ್ಲ್ಯೊ. ಹಾಂವ್ ಭಾಯ್ರ್ ಸೊಪ್ಯಾಕ್ ಧಾಂವ್ಲಿಂ ಕಿತೆಂ ಜಾಲೆಂ ತೆಂ ಪಳೆಂವ್ಚ್ಯಾಕ್.

ಬಾಬಾಚಿ ಮೆಲ್ಲಿ ಕೂಡ್ ಆಪ್ಲ್ಯಾ ಉಸ್ಕ್ಯಾರ್ ದವರುನ್, ದಾವೊ ಹಾತ್ ಬಾಬಾಚ್ಯೆ ತಕ್ಲೆ ಪಂದಾ ಉಶ್ಯಾಪರಿಂ ಪಾತ್ಳಾವ್ನ್ ಉಜ್ವೊ ಹಾತ್ ಆಪ್ಲ್ಯಾ ಹರ್ದ್ಯಾಕ್ ಬಡವ್ನ್, ದೊಳ್ಯಾಂನಿ ಕಣ್ಕಟ್ ಸಿಸ್ರಿಚಿಂ ದುಃಖಾಂ ಗಳವ್ನ್ ಹಾಕ್-ಬೊಬ್ ತಿ ಮಾರ‍್ತಾಲಿ. ಜಾಲಾಂತ್ ದೋಗ್ ದಾದ್ಲೆ ಉಭೆ ಆಸ್ಚೆ ಮ್ಹಾಕಾ ದಿಸ್ಲೆ. ಆಜ್ ವರೇಗ್ ತಾಂಕಾಂ ಹಾಂವೆ ಆಮ್ಚ್ಯಾ ವಠಾರಾಂತ್ ಯಾ ಸುತ್ತುರಾಂತ್ ಪಳೆಲ್ಲೆಂಚ್ ನಾ.

“ಏ ಆಲಿಸಾ, ತುಜೊ ಬಾಬ್ ಆಮ್ಕಾಂ ಸಕ್ಟಾಂಕ್ ಸೊಡ್ನ್ ಗೆಲೊ ನ್ಹಯೆಗೊ… ಮ್ಹಜೆಂ ಆಯಾಪಣ್ ಹಾಂವೆ ಹೊಗ್ಡಾಯ್ಲೆಂ. ಏ ಮ್ಹಜ್ಯೆ ಮಾಯ್, ಕಾಲ್ ರಾತಿಂ ಇತ್ಲ್ಯೆ ಆಪುರ‍್ಬಾಯೆನ್ ಜೆವ್ಲಾ, ಮ್ಹಜ್ಯೆಲಾಗಿಂ ಉಲಯ್ಲಾ. ಅಳೆ, ಸಕಾಳಿಂ ಉಠ್ತಾನಾ ಅಶೆಂ ಜಾಲಾಂ ನ್ಹಯ್‌ಗಿ? ಏ ದೆವಾ, ಹಾಂವ್ ಆತಾಂ ಕಿತೆಂ ಕರುಂ? ಜೆರಿ ಖಂಯ್ ಗೆಲಾ ಆಲಿಸಾ?”

ತಿಣೆ ಮ್ಹಜ್ಯೆಲಾಗಿಂ ಎಕಾಚ್‌ಫರಾ ಹೆಂ ಸವಾಲ್ ಕರ‍್ತಾನಾ ಹಾಂವ್ ಕಾಲುಬುಲಿಂ ಜಾಲಿಂ. ಮಧ್ಯಾನ್ ರಾತಿಂ ಮ್ಹಜ್ಯಾಚ್ ಕುಡಾಂತ್ ನಿದ್ಲಲೊ, ಹಳೂ ಉಠುನ್ ಭಾಯ್ರ್ ಗೆಲ್ಲೊ ಜೆರಿ ಉಪ್ರಾಂತ್ ಥೊಡ್ಯಾ ವೆಳಾನ್ ಭಿತರ್ ಯೆವ್ನ್ ಮ್ಹಜ್ಯೆ ಸರ‍್ಶಿನ್ ತಿತ್ಲ್ಯಾ ಲಾಗ್ಸಾರ್ ಯೆವ್ನ್ ನಿದ್ತಾನಾ ಸಗ್ಳೊ ಭಿಜುನ್ ವೊಲೊ ಜಾಲ್ಲೊ ಮಾತ್ರ್ ನ್ಹಯ್, ಬಾರೀಕ್ ಕಾಂಪ್ತಾಲೊ.

ಹಾಚೊ ಹೊ ಅಥ್ವೊ ಜಿನೊಸ್ ಪಳೆವ್ನ್ ಮ್ಹಾಕಾ ಭಿರಾಂತ್ ದಿಸ್ಲಿ. ಬಾಬಾಚಿ ಪಿಡಾ ಹಾಕಾಯ್ ಲಾಗ್ಲಿಗಾಯ್ ಮ್ಹಣ್ ಚಿಂತುನ್ ಹಾಂವ್ ತಾಚ್ಯೆಥಾವ್ನ್ ಪಯ್ಸ್ ಸರುನ್ ವೊಣದಿಕ್ ಅಡ್ಚುನ್ ನಿದ್ಲಿಂ, ದೊಳ್ಯಾಂಕ್ ಆಜೂನ್ ಜಾಗೆ ದವರುನ್.

ಹ್ಯಾ ಪರ‍್ಯಾಂತ್ ಮ್ಹಜೊ ಜೆರಿ ಕೆದ್ನಾಂ ಮ್ಹಜ್ಯೆ ಸರ‍್ಶಿನ್ ಯೆತಲೊ ಮ್ಹಣ್ ಹಾಂವ್ ಆಶೆವ್ನ್ ಆಸ್‌ಲ್ಲಿಂ. ಪುಣ್ ಆಜ್ ತಾಣೆ ಮ್ಹಜಿ ಸಮೀಪಾಯ್ ಜೊಡ್ತಾನಾ ನಿಜಾವ್ನ್ ಹಾಂವ್ ಭಿಯಾನ್ ಫಾಂಟ್ರೆಲ್ಲಿಂ.

ಪುಣ್ ಸದಾಂಚ್ಯಾ ವೆಳಾರ್ ಮ್ಹಾಕಾ ನಿದೆಂತ್ಲಿ ಜಾಗ್ ಜಾತಾನಾ ಜೆರಿ ಮ್ಹಜ್ಯಾ ಲಾಗ್ಸಾರ್ ನಾತ್‌ಲ್ಲೊ! ತಸೊ ಮ್ಹಾಕಾ ಚುಕುನ್ ಗೆಲ್ಲೊ ತೊ ಆಜೂನ್ ಕಿತ್ಯಾ ಪಾಟಿಂ ಆಯ್ಲೊನಾ ಮ್ಹಳ್ಳೊ ಮಿಸ್ತೆರ್ ಮ್ಹಾಕಾಯ್ ಸತಾಯ್ತಾಲೊ.

ತ್ಯಾ ಉಪ್ರಾಂತ್, ಥೊಡ್ಯಾ ವೆಳಾನ್ ಸಗ್ಳಿಂ ಕಾಮಾಂ ಜಾಲಿಂ. ಜೆರಿಯೀ ಘರಾ ಪಾಟಿಂ ಆಯಿಲ್ಲೊ ಪುರಾಸಣೆನ್ ಬಾವೊನ್ ಆನಿ ಘಾಮಾನ್ ಭಿಜೊನ್.

ಸಾಂಜೆಚ್ಯಾ ಪಾಂಚ್ ವೊರಾರ್ ಬಾಬಾಚೆಂ ಮೊರ‍್ನ್ ಘರಾಥಾವ್ನ್ ಕಾಡ್ಲೆಂ. ರಾತಿಂ ದುಖಿಚ್ಯೆ ಪೆಜೆ-ಜೆವ್ಣಾಕ್ ವಾಡ್ಯಾಂತ್ಲಿಂ ಆನಿ ಸೈರಿಂ-ಧೈರಿಂ ಮ್ಹಣುನ್ ಪನ್ನಾಸ್ ಜಣಾಂ ಆಸ್‌ಲ್ಲಿಂ. ಬಾಬಾಚ್ಯಾ ಆವ್ಚಿತ್ ಮರ‍್ಣಾ ನಿಮ್ತಿಂ ಘರಾಂತ್ಲೆಂ ಕಾಮ್ ಕರ‍್ನ್ ಮ್ಹಜೆಂ ನಪ್ಪಟ್-ನಾರ್ ಜಾಲ್ಲೆಂ. ಗುರ್ಕಾರಾ ಸಾಂಗಾತಾ ಸವಯ್ ಆಸ್‌ಲ್ಲ್ಯಾ ದಾದ್ಲ್ಯಾಂಕ್, ತರ‍್ನಾಟ್ಯಾಂಕ್ ತಶೆಂ ಥೊಡ್ಯಾ ಸ್ತ್ರೀಯಾಂಕ್ ಜೆರಿನ್ ಸೊರ‍್ಯಾಚೊ ಗ್ಲಾಸ್ ದಿಲ್ಲೊ.

ಬಾಬಾಚ್ಯಾ ಮರ‍್ಣಾದಿಸಾ ಮಾಂಯ್ ರಡ್‌ಲ್ಲಿ ತಿ ಆಜೂನ್ ಬಾರಾ ದೀಸ್ ಜಾಲ್ಯಾರಿ ರಡುನ್‌ಚ್ ಆಸಾ, ಕೊಣ್ ಘರಾ ಯೆವ್ನ್ ತಿಕಾ ಭುಜಯ್ತಾನಾ. ಹೆರ್ ವೆಳಾರ್ ತಿ ತಿಚಿಂ ಸದಾಂಚಿಂ ಕಾಮಾಂ ಜಿವ್ದಾಳಿಪರಿಂ ಸರಸರ ಕರ‍್ನ್ ಹರ್ಕತ್ ನಾಸ್ತಾಂ ಕರ‍್ತಾ ಆಪ್ಲ್ಯಾ ದೊಳ್ಯಾಂನಿ ದುಃಖಾಂಚಿ ಲಂಯ್ ಸಯ್ತ್ ದಾಖಯ್ನಾಸ್ತಾನಾ.

ಮ್ಹಜೊ ಜೆರಿ ಆತಾ’ತಾಂ ತಿಕಾ ಆನಿಕೀ ಚಡ್ ಖಾಲ್ತೊ ಜಾವ್ನ್ ಚಲುಂಕ್ ಲಾಗ್ಲಾ. ತಾಚ್ಯಾ ಹಾತಾಂತ್ ಕಸಲಿಂಗಿ ದಸ್ತವೇಜಾಂ ದಿವ್ನ್ ಮಾಂಯ್ ತಾಕಾ ಖಂಯ್‌ಗಿ ಸದಾಂಯ್ ಧಾಡುನ್ ಆಸಾ. ಸಾಂಗಾತಾಚ್ ನೊಟಾಂಚಿ ಕೊವ್ಳಿಯ್ ತವಳ್ತವಳ್ ದಿತಾ.

ಕಾಲ್ಚ್ಯೆ ರಾತಿಂ ಹಾಂವ್ ಬೊರ‍್ಯೆ ನಿದೆಂತ್ ಆಸ್ತಾಂ ಜೆರಿ ಯೆವ್ನ್ ಮ್ಹಾಕಾ ಉಠಯ್‌ಲಾಗ್ಲೊ. ಹಾಂವೆ ನಿದೆಚ್ಯಾ ಆಮಾಲಾನ್ ತಶೆಂಚ್ ಭಿರಾಂತೆನ್ ಸುಜ್‌ಲ್ಲ್ಯಾ ದೊಳ್ಯಾಂನಿ ಮ್ಹಜ್ಯಾ ಪತಿರಾಯಾಕ್ ತಿತ್ಲ್ಯಾ ಲಾಗ್ಸಾರ್ ಥಾವ್ನ್ ಪಯಿಲ್ಲ್ಯೆ ಪಾವ್ಟಿಂ ಪಳೆಲ್ಲೊ.

“ಆಲಿಸಾ…. ತುಂ ಕಾಂಯ್ ಖಂತ್ ಕರಿನಾಕಾ. ಬಾಬ್ ಮೊರುನ್ ಆಮ್ಕಾಂ ಕಾಂಯ್ ಲುಕ್ಸಾಣ್ ಜಾಂವ್ಕ್ ನಾ. ಮಾಂಯ್ನ್ ಸಗ್ಳಿ ಆಸ್ತ್ ಮ್ಹಜ್ಯಾ ನಾಂವಾರ್ ಕರ‍್ತಾಂ ಮ್ಹಳಾಂ. ತುಂವೆ ಮಾತ್ರ್ ಸಯ್ ಘಾಲಿಜಯ್.”

ಹಾಂವ್ ತಾಕಾಚ್ ಆಜ್ಯಾಪ್ ಪಾವ್ಲೆಲ್ಯಾ ದೊಳ್ಯಾಂನಿ ಆತಾಂ ಪಳೆಂವ್ಕ್ ಪಡ್ಲಿಂ. ಹೊ ಕಿತೆಂ ಉಲಯ್ತಾ ತೆಂ ಮ್ಹಾಕಾ ಕಿತೆಂಚ್ ಸಮ್ಜಾನಾ ಜಾಲ್ಲೆಂ.

“ತುಂವೆ ಕಿತೆಂಚ್ ಕರ‍್ಚಿ ಗರ‍್ಜ್ ನಾ ಆಲಿಸಾ. ಥೊಡ್ಯಾ ತೆಂಪಾಕ್ ತುಂವೆ ತುಜ್ಯೆ ಆವಯ್ ಸಾಂಗಾತಾ ತುಮ್ಗೆರ್ ರಾವ್ಲ್ಯಾರ್ ಪುರೊ. ಹಾಂಗಾಚಿಂ ಸಗ್ಳಿಂ ಕಾಮಾಂ ಜಾತಚ್ ಹಾಂವ್ ತುಕಾ ಪಾಟಿಂ ಆಮ್ಗೆರ್ ಆಪವ್ನ್ ಹಾಡ್ತಾಂ. ತುಂವೆ ಕಸಲಿಚ್ ಖಂತ್ ಯಾ ಬೆಜಾರಾಯ್ ಕರ‍್ಚಿ ಗರ‍್ಜ್ ನಾ.”

ಜೆರಿ ಖಂಯ್‌ಗಿ ನೋಟ್ ದವರುನ್ ಕಿತೆಂಗಿ ಮ್ಹಜ್ಯೆಲಾಗಿಂ ಸಾಂಗ್ತಾಲೊ. ತಾಚೊ ಇರಾದೊ ಯಾ ಹೇತು ಕಿತೆಂ ಮ್ಹಳ್ಳೊ ತೊ ಉಗ್ತ್ಯಾನ್ ಸಾಂಗುಂಕ್ ತಯಾರ್ ನಾತ್‌ಲ್ಲೊ.

“ಹಾಂವೆ ಘರಾ ಗೆಲಿಂ ತರ್ ಹಾಂಗಾ ಘರ‍್ಚೆಂ ಕಾಮ್ ಸಗ್ಳೆಂ ಕೊಣ್ ಕರ‍್ತಾ? ಮಾಂಯ್ಕ್….”

“ತಿ ಸಗ್ಳಿ ರಾಟಾವಳ್ ತುಕಾ ನಾಕಾ. ತೆಂ ಸಗ್ಳೆಂ ಆಮಿ ಪಳೆವ್ನ್ ಘೆತಾಂವ್. ಚಡ್ ನಾಕಾ, ಥೊಡ್ಯಾ ಮಹಿನ್ಯಾಂಕ್ ಯಾ ಎಕಾ ವರ‍್ಸಾಕ್ ತುಂವೆ ಕುಳಾರಾ ರಾವ್ಲ್ಯಾರ್ ಪುರೊ.”

“ಏಕ್ ವರ‍್ಸಾಕ್!?”

“ವ್ಹಯ್.. ತಿತ್ಲ್ಯಾ ಭಿತರ್ ಆಮ್ಚಿಂ ಸಗ್ಳಿಂ ಹಾಂಗಾಚಿಂ ಕಾಮಾಂ ಆಮಿ ಕರ‍್ನ್ ಮುಗ್ದಿತಾಂವ್. ಉಪ್ರಾಂತ್ ತುಕಾ ಹಾಂಗಾ ಆಪಡ್ನ್ ಹಾಡ್ತಲ್ಯಾಂವ್. ತುಂ ಕಾಂಯ್ ಭಿಯೆನಾಕಾ. ತುಕಾ ಧಯ್ರಾಕ್ ಹಾಂವ್ ಆಸಾಂ ನ್ಹಯ್‌ಗಿ?”

ಜೆರಿ ಕಿತೆಂಗಿ ಉಲಯ್ತಾಲೊ ಕೊಣೆಂಗಿ ಸಾಂಗುನ್ ದಿಲ್ಲ್ಯೆ ಭಾಶೆನ್. ಮ್ಹಜೆಂ ತೋಡ್ ಶೀದಾ ಪಳೆವ್ನ್ ಉಲಂವ್ಚ್ಯಾ ತಿತ್ಲೆಂ ಧಯ್ರ್ ಸಯ್ತ್ ತಾಕಾ ನಾತ್‌ಲ್ಲೆಂ.

“ಕಸಲಿಂ ಕಾಮಾಂ ಕರುಂಕ್ ಆಸಾತ್ ತುಮ್ಕಾಂ ಹಾಂವ್ ಹಾಂಗಾಸರ್ ನಾತ್‌ಲ್ಲ್ಯಾ ವೆಳಾರ್?”

“ತೆಂ ಸಗ್ಳೆಂ ಮಾಯ್ ಕರ‍್ತಾ ಕಂಯ್. ತುಂ ಹಾಂಗಾಸರ್ ಆಸ್ಲ್ಯಾರ್ ತಿಕಾ ಧಯ್ರ್ ಪಾವಾನಾ ಕಂಯ್. ತುಂ ಹುಶ್ಯಾರ್ ಆಸಾಯ್ ಕಂಯ್. ತಶೆಂ…ತಶೆಂ……”

ಮ್ಹಾಕಾ ಪಿಂತೆಗ್ ನಿಧಾನ್ ಚಡುನ್ ಯೆತಾಲೊ. ನೀದ್ ಮ್ಹಜಿ ಖಂಚ್ಯಾನ್‌ಗಿ ಧಾಂವ್‌ಲ್ಲಿ. ಹಾಂವೆ ತ್ಯೆಚ್ ರಾಗಾಚ್ಯೆ ನದ್ರೆನ್ ಜೆರಿಕ್ ಪಳೆಲೊ, ಪಯಿಲ್ಲ್ಯೆ ಪಾವ್ಟಿಂ ಥೊಡ್ಯಾ ವೆಳಾಕ್. ತೊವಿ ಮ್ಹಾಕಾ ಪಳೆಲಾಗ್ಲೊ ಬೋರೊ ಭಿಯೆವ್ನ್.

“ಹಾಂವ್ ಹಾಂಗಾ ಥಾವ್ನ್ ವ್ಹಚಾನಾ ಜೆರಿ. ತುಂವೀ ಮ್ಹಜ್ಯೆ ಸಾಂಗಾತಾ ಯೆಶಿ ತರ್ ಮಾತ್ರ್…”

“ತಶೆಂ ಮ್ಹಣಾನಾಕಾ ಆಲಿಸಾ. ಮಾಗಿರ್ ಹಾಂವೆ ಮಾಂಯ್ನ್ ಸಾಂಗ್‌ಲ್ಲ್ಯೆಪರಿಂಚ್ ತುಕಾಯ್ ಕರಿಜಯ್ ಪಡಾತ್.”

“ಮ್ಹಳ್ಯಾರ್…?”

“ನಾಕಾ. ತುಕಾ ನಾಕಾ ತಿ ಗಜಾಲ್. ತುಂ ಹಾಂವೆ ಸಾಂಗ್‌ಲ್ಲ್ಯಾಪರಿಂ ಕರ್. ಚಡಿತ್ ಸವಾಲಾಂ ಕರಿನಾಸ್ತಾಂ ತುಮ್ಗೆರ್ ವ್ಹಚ್ ತುಂ” ಜೆರಿ ಕಿತ್ಯಾಕ್‌ಗಿ ದಿಷ್ಟ್ ಧರ್ಣಿಕ್ ಲಾವ್ನ್ ಚಿಕ್ಕೆ ಪಾದ್ದೆವ್ನ್ ಉಲಂವ್ಕ್ ಲಾಗ್ಲೊ.

ಮ್ಹಜೊ ದುಬಾವ್ ಆತಾಂ ಥಿರ್ ಜಾಲೊ. ತರ್ ಬಾಬಾಕ್ ಹ್ಯಾಚ್ ತಾಚ್ಯಾ ಪುತಾನ್ ಆವಯ್ನ್ ಸಾಂಗ್‌ಲ್ಲ್ಯೆಪರಿಂ ಜಿವೆಶಿಂ ಮಾರ‍್ಲಾ!!

‘ಅಸಲ್ಯಾ ಖುನಿಗಾರಾಂ ಸಾಂಗಾತಾ ಹಾಂವೆ ಕಶೆಂ ರಾಂವ್ಚೆಂಗೆ ಏ ಮ್ಹಜ್ಯೆ ಆವಯ್?’ ಮ್ಹಜೆಂ ಕಾಳಿಜ್ ಭಿಯಾನ್ ಖಿಳಂಚ್ ಮಾರುಂಕ್ ಲಾಗ್ಲೆಂ.

ಪುಣ್ ಮ್ಹಾಕಾ ಕಿತ್ಯಾ ಹಿಂ ಆವಯ್ ಆನಿ ಪೂತ್ ಘರಾ ಥಾವ್ನ್ ಕುಳಾರಾ ಧಾಡ್ತಾತ್ ಮ್ಹಳ್ಳ್ಯಾ ಸವಾಲಾಕ್ ಜಾಪ್ ಮೆಳಾನಾಮೂ? ಮ್ಹಜಿ ಸಾಸು ಕಸಲಿ ಶಿರಿಗುಂಡಿ ರಚುನ್ ಆಸಾಗಾಯ್? ತಿಕಾ ಇಸ್ಕೊಲಾಚೆಂ ಕಾಂಯ್ ಶಿಕಪ್ ನಾ ಜಾಲ್ಯಾರಿ ಅಸಲಿಂ ಕುತಂತ್ರಾಂ ತಿ ಕಶಿಂ ಜಾರ‍್ಯೆಕ್ ಹಾಡ್ತಾ?

* * *

ಆತಾಂ ಹಾಂವ್ ಕುಳಾರಾ ಆಸಾಂ. ಮ್ಹಜ್ಯೆ ಆವಯ್ಕ್ ಹಾಂವೆ ಸಗ್ಳಿ ಗಜಾಲ್ ಸುಟಾವೆಂ ಸಾಂಗ್ಲ್ಯಾ ಉಪ್ರಾಂತ್ ತಿ ಮ್ಹಾಕಾ ಮಾಂವಾಡ್ಯಾ ವ್ಹೆಚೆಂಚ್ ನಾಕಾ ಮ್ಹಣ್ತಾ. ಕೊಣೆಂಗಿ ಸಾಂಗ್‌ಲ್ಲೆಂ ಆಯ್ಕಾಲೆಂ ಹಾಂವೆ, ಮ್ಹಜ್ಯಾ ಸಾಸುನ್ ಘರಾಚಿ ಅಡಿ ಏಕ್ ದವರ‍್ನ್ ಉರ್‌ಲ್ಲೆಂ ಭುಂಯ್-ಭಾಟ್ ಸಗ್ಳೆಂ ವಿಕ್ಲಾಂ ಕಂಯ್. ಕಿತ್ಯಾ ಮ್ಹಳ್ಳೆಂ ಕೊಣ್‌ಯಿ ನೆಣಾ. ಆವಯ್ ಆನಿ ಪೂತ್ ಮಾತ್ರ್ ಸಾಂಗಾತಾ ಜಿಯೆತಾತ್. ಜೆರಿ ಸದಾಂಚ್ ಸೊರೊ ಪಿಯೆವ್ನ್ ಯೆವ್ನ್ ಆವಯ್‌ಲಾಗಿಂ ಜಗಡ್ತಾ ಕಂಯ್. ತಿ ಭಾವ್ಡಿ ದುಃಖಾಂ ಗಳವ್ನ್ ಪುತಾ ಮುಖಾರ್ ಆಪ್ಲೆ ಹಾತ್ ಉದಾರೆ ಕರುನ್ ಆಪ್ಣಾಕ್ ನಿಕಾಮಾನ್ ಘಾತಾನ್ ಭುಲವ್ನ್, ಫಸವ್ನ್, ಘರ್-ಜಾಗೊ ವಿಕವ್ನ್, ನಾಗವ್ನ್ ವಾಟೆಕ್ ಲಾಯಿಲ್ಲ್ಯಾಕ್ ತಾಕಾ ಏಕ್‌ಸಾರ‍್ಕೊ ಶಿರಾಪ್ ದಿತಾ ಕಂಯ್.

ಮ್ಹಾಕಾ ಆಪವ್ನ್ ವ್ಹರುಂಕ್ ಜೆರಿ ದೋನ್ ಪಾವ್ಟಿಂ ಆಯಿಲ್ಲೊ. ಹ್ಯಾ ಪಾಶಾರ್ ಜಾಲ್ಲ್ಯಾ ಚವ್ದಾ ಮಹಿನ್ಯಾಂನಿ. ಆಯಿಲ್ಲೊ ತೊ ರಾತ್ ಮ್ಹಜ್ಯೆ ಸಂಗಿಂ ಪಾಶಾರ್ ಕರ‍್ನ್ ಗೆಲ್ಲೊ. ಹಾಂವ್ ಸಂತುಷ್ಟ್ ಜಾಲಿಂ. ಹಾಂವ್ ತಾಚ್ಯೆ ಸಾಂಗಾತಾ ಪಾಟಿಂ ಮಾಂವಾಡ್ಯಾ ವ್ಹಚುಂಕ್‌ಚ್ ನಾ.

ಪುಣ್ ಹ್ಯಾ ದಿಸಾಂನಿ ಹಾಂವ್ ಖೂಬ್ ಸಂತೊಸಾನ್ ಆಸಾಂ.

ವೆಗಿಂಚ್ ಹಾಂವ್ ಆವಯ್ ಜಾಂವ್ಚ್ಯಾರ್ ಆಸಾಂ!!

■  ಡೊಲ್ಫಿ, ಕಾಸ್ಸಿಯಾ 

ಥಂಯ್-ಥಂಯ್ ಎಕೇಕ್ ಪಾತಳ್ ಧವಿಂ ಮೊಡಾಂ ಸೊಡ್ಲ್ಯಾರ್, ಇತ್ಲೆಂ ನಿತಳ್ ಅಂತ್ರಳ್ ಪಳೆಂವ್ಕ್ ಮೆಳ್ಚೆಂ ಭಾರಿಚ್ಚ್ ಆಪ್ರೂಪ್ ಮ್ಹಣ್ಯೆತ್.

ತ್ಯಾ ನಿಳ್ಶ್ಯಾ ಅಂತ್ರಳಾ ಮಧೆಂ, ಕಲಾಕಾರಾನ್ ಚಿತ್ರ್ ಸೊಡಯಿಲ್ಲ್ಯಾ ಜಿನ್ಸಾರ್, ವೀಸ್ ಮಾಳಿಯಾಂಚೆಂ ತೆಂ ಜಯ್ತ್ ಬಾಂಧಾಪ್ ಉಬೆಂ ಆಸ್‌ಲ್ಲೆಂ. ತ್ಯಾ ಬಾಂಧ್ಪಾ ಭೊಂವ್ತಿಚೆ ರೂಕ್, ಚಿಕ್ಕೆ ಪಯ್ಸ್ ವ್ಹಾಳ್ಚಿ ಅಶೀರ್ ನ್ಹಂಯ್, ಪಾಟ್ಲೆಂ ನಿಳ್ಶೆಂ ಅಂತ್ರಳ್ – ಒಟ್ಟಾರೆ, ಪಳೆತಲ್ಯಾಂಚಾ ದೊಳ್ಯಾಂಕ್ ಏಕ್ ಅಪೂರ್ವ್ ಫೆಸ್ತ್ ದಿತಾಲೆಂ ಮ್ಹಣ್ಯೆತ್.

ತ್ಯಾ ಬಾಂಧ್ಪಾಂತ್ ವಿವಿಧ್ ಸಂಸ್ಥ್ಯಾಂಚಿಂ ದಫ್ತರಾಂ ಆಸ್‌ಲ್ಲಿಂ. ಭಿತರ್ ಕೆದ್ನಾಂಯ್ ಲೊಕಾಚಿ ಖಾತಡ್‌ಚ್ಚ್- ಖಾತಡ್.

ತ್ಯಾ ಬಾಂದ್ಪಾಕ್ ಸ ಲಿಫ್ಟಿ ಆಸ್‌ಲ್ಲ್ಯೊ.

ತಾಂತ್ಲ್ಯಾ ಎಕಾ ಲಿಫ್ಟಾಂತ್, ಜೆಮ್ಮಾ ಲಿಫ್ಟ್ ಒಪೆರೇಟರ್ ಜಾವ್ನ್ ಆಸ್‌ಲ್ಲೊ.

ಸಕಾಳಿಂ ಫುಡೆ ದಫ್ತರಾಂ ಉಗ್ತಿಂ ಜಾತಾನಾ ಆಸ್ಚಿ ಗಡ್ದಿ ಸದ್ದ್ಯಾಕ್ ರಾವ್‌ಲ್ಲಿ.

ಚೊವೀಸ್ ವ್ಹರಾಂಯೀ ಉಗ್ತೆಂ ಆಸ್ಚಾ ತ್ಯಾ ಬಾಂಧ್ಪಾಂತ್, ಜೆಮ್ಮಾಚೆಂ ಕಾಮ್ ಸಕಾಳಿಂ 6 ಥಾವ್ನ್ ದನ್ಪರಾಂ 2 ಪರ್ಯಾಂತ್. ತ್ಯಾ ಮಧೆಂ ಚಡ್ ಭರಾಚೊ ವೇಳ್ ಮ್ಹಳ್ಯಾರ್ 8  ಥಾವ್ನ್ 11.  ಆನಿ ಆತಾಂ ವ್ಹರಾಂ ಸಾಡೆ-ಇಕ್ರಾ ಜಾಲ್ಲಿಂ.

ಲಿಫ್ಟಾ ಭಿತರ್ಲ್ಯಾ ಸ್ಟೂಲಾರ್ ಬಸೊನ್ ಸಪ್ಣೆತಾಲೊ ತೊ!

ಸಕ್ಡಾಂಬರಿ ತಾಕಾಯೀ ಸಪ್ಣಾಂ ಪಡ್ತಾಲಿಂ – ತ್ಯಾ ತರ್ನಾಟ್ಯಾ ಪ್ರಾಯೆಕ್ ಸಹಜ್ ಜಾಲ್ಲಿಂ! ಸಪ್ಣಾಂ ಭಿಯಾಚಿಂ, ಸಪ್ಣಾಂ ಮಾರಾಮಾರೆಚಿಂ, ಸಪ್ಣಾಂ ಪಯ್ಶಾಂಚಿಂ ಆನಿ ಸಪ್ಣಾಂ – ಚೆಡ್ವಾಂಚಿಂ.

ಒಳೊಕ್ ನಾತ್‌ಲ್ಲೊ ಕೊಣೀ ಜೆಮ್ಮಾಕ್ ಪಳೆತ್ ತರ್, ತೊ ಏಕ್ ಲಿಫ್ಟ್ ಒಪರೇಟರ್ ಮ್ಹಣೊನ್ ಸಾಂಗೊಂಕ್ ಸಾಧ್ಯ್‌ಚ್ ನಾ. ತಾಣೆ ಸದಾಂ ಘಾಲ್ಚೆಂ ಖಡಕ್ಕ್ ಇಸ್ತ್ರೆಚೆಂ ವಸ್ತುರ್, ಥಳ್ಥಳ್ಚೆ ಮೊಚೆ, ನಾಜೂಕಾಯೆನ್ ಉಗಯಿಲ್ಲೆ ಕೇಸ್ – ಪಳೆಯಿಲ್ಲೊ ಕೊಣ್‌ಯೀ, ತೊ ಏಕ್ ಗುಮಾಸ್ತ್ ಮ್ಹಣೊಂಕ್ ಆಸಾ.

ಲಿಫ್ಟಾಂತ್ ಚಡಾವತ್ ಸದಾಂಚಿಂಚ್ ಮನ್ಶಾಂ ಯೆತಾತ್. ತಾಂಕಾಂ ಕಂಪೆನಿಚಾ ರುಲಿಂ ಪ್ರಕಾರ್, ಜೆಮ್ಮಾ, “ಗುಡ್ ಮೊರ್ನಿಂಗ್ ಸರ್” ವಾ “ಗುಡ್ ಮೊರ್ನಿಂಗ್ ಮೇಡಮ್” ಮ್ಹಣ್ತಾ. ಏಕ್ ಸಲೀಸ್ ಹಾಸೊಯೀ ದಿತಾ ಮಾತ್ರ್ ನ್ಹಯ್, ತ್ಯಾ ಲಿಫ್ಟಾಂತ್ ವಯ್ರ್ ಸಕಯ್ಲ್ ವೆಚಾ ಹರ್ಯೆಕ್ಲ್ಯಾಕ್ ಖುಶ್ ದವರ್ತಾ.‌

ಸ್ಟೂಲಾರ್ ಬಸೊನ್ ಸಪ್ಣೆಂವ್ಚಾ ಜೆಮ್ಮಾಕ್ ಫಕತ್ ತೆಂ ಚೆಡುಂಚ್ ದಿಸ್ತಾ – ತಾಂಬ್ಡ್ಯಾ ಆಂಗ್ಲ್ಯಾಚೆಂ ಚೆಡುಂ.

ಸಕಾಳಿಂ ತ್ಯಾ ಚೆಡ್ವಾಕ್ ಪಳೆಲ್ಲೆ ತವಳ್ ಥಾವ್ನ್ ತಾಚೊ ಮೆಂದು ಥಾರ‍್ಯಾರ್ ನಾ. ಎದೊಳ್ ತೆಂ ಹ್ಯಾ ಲಿಫ್ಟಿಂತ್ ಆಯಿಲ್ಲೆಂ ನಾ. ಆಜ್‌ಚ್ಚ್ ನವೆಂ ಸೆರ್ವಲಾಂ ಜಾಂವ್ಕ್‌ಯೀ ಪುರೊ. ಪುಣ್ ತಾಚಾ ದರ್ಶನಾನ್ ಜೆಮ್ಮಾ ಸಗ್ಳೊಚ್ ಘುಸ್ಪಡೊನ್ ಗೆಲಾ. ನಾ ಮ್ಹಣ್ಚಾಕ್, ಫಿಲ್ಮಾಂನಿ  ಸುಂದರ್ ಚೆಡ್ವಾಂಕ್ ಪಳೆಲಾಂ ತಾಣೆ. ಪುಣ್ ನೀಜ್ ಜಿಣ್ಯೆಂತ್‌ಯೀ ಇತ್ಲಿಂ ಸುಂದರ್ ಚೆಡ್ವಾಂ ಆಸಾತ್ ಮ್ಹಳ್ಳೆಂ ಪಾತ್ಯೆಂವ್ಕ್ ಕಷ್ಟ್ ಮಾರ್ತಾತ್ ತಾಕಾ.

ಸದಾಂಚಾ ಸವಯೆರ್, “ಮೊರ್ನಿಂಗ್ ಮೇಡಮ್” ಮ್ಹಳ್ಳೆಂ ಜೆಮ್ಮಾನ್, ಪುಣ್ ತ್ಯಾ ತಾಂಬ್ಡ್ಯಾ ಆಂಗ್ಲ್ಯಾಚಾ ಚೆಡ್ವಾ ಥಾವ್ನ್ ಜಾಪ್ ಕಾಂಯ್ ಯೇಂವ್ಕ್ ನಾತ್‌ಲ್ಲಿ. ಚಡಾವತ್ ಜಾವ್ನ್ ಅಶೆಂಚ್, ಸ್ತ್ರೀಯಾಂ ಥಾವ್ನ್ ತಾಕಾ ಜಾಪ್ ಮೆಳ್ಚಿ ಉಣಿಂಚ್. ಪುಣ್ ತೊ ಕಾಂಯ್ ಉಬ್ಗಲ್ಲೊ ನಾ ವಾ ತಾಣೆ ಜಾಪ್ ಅಪೆಕ್ಶಿಲ್ಲಿ‌ಯೀ ನಾ. ಪುಣ್ ಆಜ್ ಮಾತ್ರ್……ತ್ಯಾ ತಾಂಬ್ಡ್ಯಾ ಆಂಗ್ಲ್ಯಾಚಾ ಚೆಡ್ವಾನ್ ಉಲಯಿಲ್ಲೆಂ ತರ್ ಕಿತ್ಲೆಂ ಬರೆ ಆಸ್‌ಲ್ಲೆಂ – ಚಿಂತಿಲಾಗ್ಲೊ ತೊ. ಫಾಲ್ಯಾ ಕಶೆಂ ಪುಣಿ ತಾಚೆಂ ಏಕ್ ಉತರ್ ಆಯ್ಕಾಜಾಯ್ – ಮತಿಂತ್ ಏಕ್ ಲ್ಹಾನ್ಸೊ ನಿರ್ಧಾರ್. ಫಾಲ್ಯಾಂ ಬರೆಂ ವಸ್ತುರ್ ಘಾಲ್ನ್ ಯೇಜಾಯ್, ಖಾಡ್ ಫರ್ಸ್ಟ್-ಕ್ಲಾಸ್ ಕರ್ನ್ ತಾಸುನ್, ಕೇಸ್ ಆಧುನಿಕ್ ರಿತಿರ್ “ಸೆಟ್” ಕರವ್ನ್, ಆಂಗಾರ್ ಇಲ್ಲೆಂ “ಸೆಂಟ್” ಸಾರವ್ನ್ ಆಯ್ಲ್ಯಾರ್, ತ್ಯಾ ಚೆಡ್ವಾನ್ ಆಪ್ಣಾಕ್‌ಚ್ಚ್ ಪಳೆಜಾಯ್ – ಹ್ಞಾ! ತಿತ್ಲೆಂ ಕರಿನಾ ತರ್ ಹಾಂವ್ ಜೆಮ್ಮಾಂಚ್ಚ್ ನ್ಹಯ್!

ತೆಂ ಖಂಚಾ ಜಾತಿಚೆಂ ಆಸ್ಯೆತ್? ಜಾತ್ ಖಂಚಿ ಜಾಲ್ಯಾರ್ ಕಿತೆಂ? ಮೊಗಾಕ್ ದೊಳೆ ನಾಂತ್ ಖಂಯ್, ತರ್ ಜಾತ್ ಖಂಚಿ ಆಸ್ಚಿ? ಹಾಂವ್ ಏಕ್ ಚೆಡೊ ಆನಿ ತೆಂ ಏಕ್ ಚೆಡುಂ. ತಿತ್ಲೆಂಚ್ ನ್ಹಯ್, ಹ್ಯಾ ಬಾಂದ್ಪಾಂತ್ ಯೆಂವ್ಚಾ-ವೆಚಾ ಚೆಡ್ವಾಂ ಪಯ್ಕಿ, ಹೆಂ ಏಕ್ ವಿಶೇಸ್ ಚೆಡುಂ. ಅಸಲ್ಯಾ ಚೆಡ್ವಾಚೊ ಸಾಂಗಾತ್ ಮೆಳ್ಳ್ಯಾರ್, ಸಂಸಾರಾಂತ್ ಚಡಿತ್ ಜಾಯ್ ತರಿ ಕಿತೆಂ?

ಅಶೆಂ ಜೆಮ್ಮಾಚಿ ಪಿಶಿ ಮತ್, ನಾನಾಂತಿಂ ಚಿಂತ್ನಾಂ ಚಿಂತ್ತಾ. ಮತಿಚೊ ವಿಕಾಸ್ ಜಾಂವ್ಕ್ ನಾತ್‌ಲ್ಲ್ಯಾ ಸಾಧ್ಯಾ ಮನ್ಶ್ಯಾಕ್, ಉದ್ರೇಕಿತ್ ಪಿಂತುರಾಂ, ಚಲ್ಯಾ – ಚಲಿಯೆ ಮಧ್ಲ್ಯಾ ಸಂಬಂಧಾಂತ್, ಲೈಂಗಿಕತೆ ಶಿವಾಯ್ ಹೆರ್ ಕಿತೆಂಚ್ ದಾಕಯ್ನಾಂತ್. ಅಸಲಿಂ ಪಿಂತುರಾಂ ಜೆಮ್ಮಾನ್ ಜಾಯ್ತಿಂ ಪಳೆಲ್ಯಾಂತ್. ತ್ಯಾ ಅಲ್ಪ್ಯಾ ಸಮ್ಜಣೆಕ್ ಲಾಗೊನ್, ಹ್ಯಾ ತಾಂಬ್ಡ್ಯಾ ಆಂಗ್ಲ್ಯಾಚಾ ಚಲಿಯೆ ಸಂಗಿಂ ಮೋಗ್ ಕರ್ಚಿಂ ಅಪೂರ್ವ್ ಸಪ್ಣಾಂ ತೊ ಸಪ್ಣೆತಾ – ಗೊಡ್ಶಿಂ-ಗೊಡ್ಶಿಂ ಸಪ್ಣಾಂ!

“ಒಹೋಯ್! ನಿದ್ಲಾಯ್‌ಗಿ ಕಿತೆಂ?” ಕೊಣಾಚೊಗಿ ತಾಳೊ.

“ಕೊ-ಕೋಣ್?” ಮಾರ್ನ್ ಉಟಯಿಲ್ಲೆಬರಿ ದೊಳೆ ಸೊಡ್ಲೆ ತಾಣೆ.

“ತಿಸ್ರ್ಯಾ ಮಾಳಿಯೆಕ್.” ಭಿತರ್ ಆಯಿಲ್ಲೊ ಮಾನೆಸ್ತ್ ದೊಳೆ ವ್ಹಡ್ ಕರುನ್ ಮ್ಹಣಾಲೊ.

ಮತಿಂತ್‌ಚ್ಚ್ ಪುರ್ಪುರೊನ್ ಉಟ್ಲೊ ಜೆಮ್ಮಾ. “ಗುಡ್ ಮೊರ್ನಿಂಗ್ ಸರ್” ಮ್ಹಣ್ಚಿ ಸಭ್ಯತಾಯೀ ವಿಸ್ರಲೊ ತೊ. ವೋ ತ್ಯಾ ತಿಸ್ರ್ಯಾ ಮಾಳಿಯೆಕ್ ವಚೊಂಕ್ ಹ್ಯಾ ಮನ್ಶ್ಯಾಕ್, ಚಿಕ್ಕೆ ಮೆಟಾಂ ಚಡೊನ್ ವಚೊಂಕ್ ಕಿತೆಂ ಮಾರ್‌ಗೀ? ಬೆಕುಫ್ ಖಂಯ್ಚೊ – ಮತಿಂತ್‌ಚ್ಚ್ ಗಾಳಿ ದಿಲ್ಯೊ ತಾಣೆ. ತ್ಯಾ ರಾಗಾನ್, ಉದ್ದೇಶ್‌ಪೂರ್ವಕಿಂ ಧಾವ್ಯಾ ಮಾಳಿಯೆಚೊ ಬುತಾಂವ್ ದಾಂಬುನ್, ಥಂಯ್ ಪರ್ಯಾಂತ್ ವಚೊನ್, ಪರತ್ ಪಾಟಿಂ ತಿಸ್ರ್ಯಾ ಮಾಳಿಯೆಕ್ ಯೇವ್ನ್, ತ್ಯಾ ಮಾನೆಸ್ತಾಕ್ ಥೊಡಿ ಪುಣಿ ಕರಂದಾಯ್ ದೀವ್ನ್, ಮತಿಂತ್‌ಚ್ಚ್ ಸಂತೊಸ್ ಪಾವ್ಲೊ.

ತೆಂ ಚೆಡುಂ ದನ್ಪರಾಂ ಜೆವ್ಣಾಕ್ ಪುಣಿ ಸಕಯ್ಲ್ ಯೇತ್‌ಗೀ? ಚಡಾವತ್ ಜಣ್, ಜೇಂವ್ಕ್ ವಾ ಜೆವಣ್ ಜಾತಚ್ಚ್ ಕೆಳಿಂ ನಾ ತರ್ ಬೀಡಾ ಖಾಂವ್ಕ್ ಸಕಯ್ಲ್ ಯೆತಾತ್. ಥೊಡ್ಯಾ ಒಫಿಸರಾನಿ, ತಾಂಚಾ ರೊಸಾಳ್ ಸೆಕ್ರೆಟರಿಂಕ್, ದನ್ಪರಾಂ ಜೆವ್ಣಾಕ್ ಭಾಯ್ರ್ ಆಪವ್ನ್ ವ್ಹರ್ಚೆ ಸಂದರ್ಭ್‌ಯೀ ಕಾಂಯ್ ಉಣೆ ನಾಂತ್. ತಶೆಂಚ್…..ಎಕಾ ಘಡ್ಯೆಕ್ ನಿರಾಸ್ಲೊ ತೊ – ತಶೆಂಚ್ ಹೆಂ ಚೆಡುಂಯೀ ತಾಚಾ ಬೊಸಾ ಸಾಂಗಾತಾ…….ಛೆ! ಛೆ! ದೇವ್ ತಶೆಂ ಜಾಂವ್ಕ್ ಸೊಡ್ಚೊನಾ – ಆಪ್ಣಾಕ್‌ಚ್ಚ್ ಸಮಧಾನ್ ಕೆಲೆಂ ತಾಣೆ. ದೋನ್ ವ್ಹರಾಂಕ್ ಜೆಮ್ಮಾಚಿ ಶಿಫ್ಟ್ ಮುಗ್ದಾತಾ. ಪೂಣ್ ದಫ್ತರಾಂ ಸಾಂಜೆರ್ ಪಾಂಚಾಂ ಉಪ್ರಾಂತ್‌ಚ್ ಸೊಡ್ಚಿಂ. ದನ್ಪರಾಂ ಜೆವ್ಣಾಚಾ ವೆಳಾರ್ ತೆಂ ಸಕಯ್ಲ್ ಆಯ್ಲೆಂನಾ ತರ್, ಸಾಂಜ್ ಪರ್ಯಾಂತ್ ರಾಕೊನ್ ರಾವೊಂಕ್ ಅಸಾಧ್ಯ್. ತಾಚಾ ಭುಕೆಲ್ಲ್ಯಾ ಮತಿನ್ ಗುಣಾಕಾರ್ ಘಾಲೆ.

ಜಾಲ್ಲೆಂ ಜಾತಾ – ಚಿಂತ್ಲೆಂ ತೊ. ಎಕಾ ವ್ಹರಾರ್ ಜೆವ್ಣಾಚೊ ವೇಳ್. ಸಕಾಳಿಂ ತೆಂ ಚೆಡುಂ ಆಟ್ವ್ಯಾ ಮಾಳಿಯೆರ್ ದೆಂವ್ಲಾಂ. ಜೆವ್ಣಾಚಾ ವೆಳಾರ್ ಲಿಫ್ಟ್ ವ್ಹರುನ್ ಆಟ್ವ್ಯಾ ಮಾಳಿಯೆರ್ ರಾವಂವ್ಚಿ. ತ್ಯಾ ವೆಳಾರ್ ಹೆರ್ ಕೊಣಾಯ್ಕಿ ಲಿಫ್ಟ್ ಗರ್ಜ್ ಪಡ್ಲ್ಯಾರ್, ಪಾಡ್ ಜಾಲ್ಯಾ ಮ್ಹಣ್ ನೀಬ್ ದಿಂವ್ಚೆಂ. ಗರ್ಜೆಚೆ ಮನಿಸ್ ಕಾಟಾಂತ್ ಪಡೊಂದಿತ್. ಆಜ್ ಮಾತ್ರ್ ಸಾಧನ್ ಸೊಡ್ಚೆಂ ನ್ಹಯ್.

ಏಕ್ ವ್ಹರ್ ಜಾತಾನಾ, ಜೆಮ್ಮಾಚಿ ಲಿಫ್ಟ್ ಆಟ್ವ್ಯಾ ಮಾಳಿಯೆರ್ ರಾವ್ಲಿ. ಹಳ್ತಾಚಿ ಶಿಳೊಣಿ ಘಾಲಿ ತಾಣೆ. ತಿತ್ಲ್ಯಾರ್ ಶನಿ-ಶನಿ ಮ್ಹಳ್ಳ್ಯಾಬರಿ, ಆಟ್ವ್ಯಾ ಮಾಳಿಯೆರ್ ಆಸ್ಚಾ ಇನ್ಶೂರೆನ್ಸ್ ಕಂಪೆನಿಂತ್ಲೊ ಪಿಯೊನ್, ಜೊನಿ ಭಿತರ್ ರಿಗ್ಲೊ.

“ಕಿತೆಂರೆ ಜೆಮ್ಮಾ! ಭಾರಿ ಖುಶೆನ್ ಆಸ್ಲೆಲ್ಯಾಬರಿ ದಿಸ್ತಾಯ್?” ಜೊನಿ ಮತ್ಲಬಿ ಹಾಸೊ ದೀವ್ನ್ ಮ್ಹಣಾಲೊ.

“ಕಾಂಯ್ ನಾ-ಯಿಸ್ತಾ” ಜೆಮ್ಮಾನ್ ನೆಣಾರ‍್ಯಾಚೆಂ ನಟನ್ ಕೆಲೆಂ.

“ವಚೊನ್-ವಚೊನ್ ಮ್ಹಜೆಲಾಗಿಂ ಬಂಡಲಾಂ ಮಾರ್ತಾಯ್‌ರೆ? ಸಾಂಗ್‌ರೆ ಸಾಂಗ್, ಕೊಣಾಕ್ ಧಖ್ಖೊ ಮಾರ್ಲೊಯ್ ಲಿಫ್ಟಾಂತ್ ಆಜ್? ವಾ ಕೊಣೆ ಪುಣಿ ಕೀಸ್ ದಿಲೊ!?”

“ಜೊನಿ ತುಂ ಚಿಕ್ಕೆ ವೊಗೊ ರಾವ್ ಹಾಂ, ಮ್ಹಾಕಾ ಚಿಡಾಯ್ನಾಕಾ.” ಜೆಮ್ಮಾನ್ ನಕ್ಲಿ ಶಿಣ್ ದಾಕಯ್ಲೊ.

“ಅರೆ ಬೆಪ್ಪಾ, ತುಜಿ ಗಜಾಲ್ ನೆಣಾಂಗಿ ಹಾಂವ್! ಕೋಣ್ ತರಿ ಭೆಟ್ಲಾಂ ತರ್, ಮ್ಹಾಕಾಯ್ ಒಳೊಕ್ ಕರ್ನ್ ದೀರೆ!” ಅಸಲ್ಯಾ ಸಂಗ್ತಿನಿ ಜೊನಿ ಭಾರಿಚ್ಚ್ ಹುಶಾರ್. ತಾಚಿ ಜೀಬ್ ಕಿತೆಂ, ತಾಚ್ಯೊ ಐಡಿಯಾ ಕಿತೆಂ ಆನಿ ತಾಚಿ ಚಲಾಕಿ ಕಿತೆಂ! ತ್ಯಾ ಶಿವಾಯ್ ನಾಟಕಾನಿ ಪಾತ್ರ್‌ಯೀ ಖೆಳ್ತಾ ತೊ. ಜೆಮ್ಮಾಕ್ ಕಾಮ್ ಮೆಳೊಂಕ್ ಜೊನಿಂಚ್ ಕಾರಾಣ್ ಜಾಲ್ಲ್ಯಾನ್, ತಾಂಕಾಂ ಬರಿಚ್ಚ್ ಇಷ್ಟಾಗತ್ ಆಸಾ ತರೀ, ಆಜ್ ಮಾತ್ರ್ ಕಿತೆಂಚ್ ಸಾಂಗೊಂಕ್ ಜೆಮ್ಮಾ ತಯಾರ್ ನಾ.

“ಲಿಫ್ಟ್ ಪಾಡ್ ಜಾಲ್ಯಾ ಜೊನಿ…….” ಪಿಂರ್ಗಾಲೊ ಜೆಮ್ಮಾ.

“ಲಿಫ್ಟ್ ನ್ಹಯ್, ತುಜಿ ತಕ್ಲಿ ಪಾಡ್ ಜಾಲ್ಯಾ” ಜೊನಿ ಪರತ್ ತ್ಯೊ ಮತ್ಲಬಿ ಹಾಸೊ ಹಾಸ್ಲೊ. “ವ್ಹಯ್-ರೆ, ಆತ್ತಾಂಚಾ ಆತ್ತಾಂ ವಯ್ರ್ ಯೆತಾನಾ ಸಾರ್ಕಿ ಆಸ್‌ಲ್ಲಿ ಲಿಫ್ಟ್, ಕಶಿರೆ ತಿ ಆಪಾಪಿಂ ಪಾಡ್ ಜಾಂವ್ಚಿ? ತುಜಿಂ ರಯ್ಲಾಂ ಸೊಡುಂಕ್ ಕೊಣಿ ಭೆರೆ ಮೆಳ್ತಾತ್ಗೀ ಪಳೆ! ಹುಂ, ಸ್ಟಾರ್ಟ್ ಕರ್ ವೆಗಿಂ”

ಜೆಮ್ಮಾ ಸಲ್ವಲೊ. ಹಿ ಏಕ್ ಶನಿ ಖಂಯ್ ಥಾವ್ನ್ ಉದೆಲಿಗಾಯ್ ಮ್ಹಣ್ ಮತಿಂತ್‌ಚ್ ಪುರ್ಪುರೊನ್ ತಾಣೆಂ ಲಿಫ್ಟ್ ಸಕಯ್ಲ್ ವ್ಹೆಲಿ.

“ತುವೆಂ ಶಿಳೊಣಿ ಘಾಲ್ಚಾಕ್ ಆನಿ ಇಟ್ಟೆರಿನ್ ಬೊಬಾಟ್ಚಾಕ್, ಕಾರಾಣಾಂ ನಾಸ್ತಾನಾ ನಾಂತ್‌ರೆ ಜೆಮ್ಮಾ! ಆಸೊಂ, ತುಂ ಸಾಂಗಾನಾ ತರ್ ಕಿತೆಂ ಕರ್ಯೆತಾ? ಬರೆಂ, ಪೊರ್ವಾಂ ಅಟ್ರಾ ತಾರ್ಕೆರ್ ಆಮ್ಚೊ ನವೊ ನಾಟಕ್ ಆಸಾ. ಕೊಂಪ್ಲಿಮೆಂಟರಿ ಪಾಸ್ ದಿತಾಂ, ಯೆತಾಯ್ ಜಾಲ್ಯಾರ್ ಯೇ.”

ಪಿಯೊನ್ ಜೊನಿಚಾ ಬರ‍್ಯಾ ಮನಾಕ್ ಜೆಮ್ಮಾಯಿ ಚಿಕ್ಕೆ ಸುಡಾಳ್ ಜಾಲೊ. ನಾಟಕಾಕ್ ಗೆಲ್ಲೆಕಡೆನ್‌ಯೀ ತಾಚೊ ಉದ್ದೇಶ್ ಚೆಡ್ವಾಂಕ್ ಪಳೆಂವ್ಚೊಚ್ ಮ್ಹಳ್ಳೆಂ ತೆಂ, ತೆ ದೊಗೀ ಜಾಣಾಂತ್.

“ಆಜ್ ಸಕಾಳಿಂ ಏಕ್ ಆಂಜ್ ಪಳೆಲೊ ಜೊನಿ!” ತೊ ಮ್ಹಣಾಲೊ ಪಾದ್ದೆವ್ನ್‌ಸೊ.

“ಸಾಂಗ್ತಾಯ್ ಜಾಲ್ಯಾರ್ ಸುಡಾಳ್ ಸಾಂಗ್, ಕೋಣ್‌ರೆ ತೆಂ?”

“ಕೋಣ್ ಮ್ಹಳ್ಳೆಂ ಕಳಿತ್ ನಾ. ತಾಂಬ್ಡೆಂ ಆಂಗ್ಲೆಂ ಘಾಲಾಂ. ಸಕಾಳಿಂ ತುಜಾ ಆಟ್ವ್ಯಾ ಮಾಳಿಯೆರ್ ದೆಂವ್ಲೆಂ ತೆಂ.”

ಎಕಾಚ್ಚಾಣೆ ಜೊನಿ ತಕ್ಲೆಕ್ ಹಾತ್ ಮಾರ್ನ್ ಹಾಸ್ಲೊ.

“ಕಿತ್ಯಾಕ್ ಹಾಸ್ತಾಯ್ ಜೊನಿ?” ವಿಜ್ಮಿತ್ ಜಾವ್ನ್ ವಿಚಾರಿ ಜೆಮ್ಮಾ.

ಥೊಡೊ ವೇಳ್ ಹಾಸೊನ್ ಜೆಮ್ಮಾಚಿ ಪಾಟ್ ಥಾಪುಡ್ಲಿ ಜೊನಿನ್. “ಆಮ್ಚಾ ನಾಟಕಾಚೆಂ ನಾಂವ್‌, ʼಆರ್ಸ್ಯಾಂತ್ಲೆಂ ರೂಪ್‌ʼ ಆನಿ ತುಜಿಂ ಉತ್ರಾಂ ಆಯ್ಕತಾನಾ, ಆಮ್ಚಾ ನಾಟಕಾಂತ್ಲೆಂ ಏಕ್ ದೃಶ್ಯ್ ಉಡಾಸ್ ಯೆತಾರೆ ಜೆಮ್ಮಾ ಮ್ಹಾಕಾ! ಆರ್ಸ್ಯಾಂತ್ಲೆಂ ರೂಪ್ ಆಪ್ಡುಂಕ್ ಪ್ರಯತ್ನ್ ಕೆಲ್ಲೆಂ ಆಸಾಯೆರೆ ತುಂವೆಂ?”

ಜೆಮ್ಮಾ ತಾಳ್-ಮೂಳ್ ಸಮ್ಜಾನಾಸ್ತಾಂ ಜೊನಿಕ್‌ಚ್ಚ್ ಪಳೆಲಾಗ್ಲೊ.

“ಆರ್ಸ್ಯಾಂತ್ಲೆಂ ರೂಪ್ ಕಿತ್ಲೆಂ ಸಾಧನ್ ಕೆಲ್ಯಾರಿ ಆಪ್ಡುಂಕ್ ಜಾಯ್ನಾ. ತಶೆಂಚ್ ತ್ಯಾ ತಾಂಬ್ಡ್ಯಾ ಆಂಗ್ಲ್ಯಾಚಾ ಚೆಡ್ವಾಚಿ ಗಜಾಲ್. ತುಕಾ ಕಾಮ್ ಕರವ್ನ್ ದಿಲ್ಲೆಂ, ಮ್ಹಜಾ ಬೊಸಾನ್ ಮ್ಹಳ್ಳೊ ಉಡಾಸ್ ಆಸಾಮೂರೆ ತುಕಾ?”

“ಉಡಾಸ್ ವಿಸ್ರೊಂಚೆ ತಿತ್ಲೊ ಅನುಪ್ಕಾರಿ ನ್ಹಂಯ್ ಹಾಂವ್, ಕಿತ್ಯಾಕ್‌ಮ್ಹಳೆಂಯ್?”

“ತೆಂ ತಾಂಬ್ಡ್ಯಾ ಆಂಗ್ಲ್ಯಾಚೆಂ ಚೆಡುಂ, ಮ್ಹಜಾ ಬೊಸಾಚಿ ಧುವ್! ತೆಂ ಅಮೆರಿಕಾಂತ್ ಶಿಕ್ತಾ. ರಜೆರ್ ಹಾಂಗಾ ಆಯ್ಲಾಂ. ತೆಂ ಸಕಾಳಿಂಚ್ ಘರಾ ಗೆಲಾಂ‌ – ಕಾಂಯ್ ದುಸ್ರ್ಯಾ ಲಿಫ್ಟಿಂತ್ ಗೆಲೆಂ ಜಾಂವ್ಕ್ ಪುರೊ. ಫಾಲ್ಯಾಂ ತೆಂ ಆಯ್ಲೆಂ ತರ್, ಚುಕೊನ್ ತರೀ ತಾಚೆಲಾಗಿಂ ಉಲಂವ್ಕ್ ವಚನಾಕಾ, ಕಾಮ್ ಹೊಗ್ಡಾಯ್ಶಿ!” ಹಾಸೊನ್ಂಚ್ ಮ್ಹಣಾಲೊ ಜೊನಿ.

ಜೆಮ್ಮಾಚಿ ಭರ್ಮಿದ್ ಪುರ್ತಿ ಸುಟ್ಲಿ!

ಆಪ್ಣೆಂ ಬಾಂದ್‍ಲ್ಲ್ಯಾ ವಾರ‍್ಯಾ ವಯ್ಲ್ಯಾ ರಾವ್ಳೆರಾ ವಿಶ್ಯಾಂತ್ ಚಿಂತುನ್, ಜೆಮ್ಮಾಕ್‌ಹಾಸೊಂಕ್‌ಆಯ್ಲೆಂ. ತಾಕಾ ಘಾಮ್‌ಯೀ ಸುಟ್ಲೊ.

ತಿತ್ಲ್ಯಾರ್‌ ಲಿಫ್ಟ್‌ ರಾವ್ಲಿ ಆನಿ ಘಾಮೆಲ್ಲ್ಯಾ ಜೆಮ್ಮಾಕ್‌ ಥಂಯ್ಚ್‌ ಸೊಡುನ್‌, ಭಿತರ್‌ ರಿಗೊಂಕ್‌ ರಾಕೊನ್‌ ರಾವ್‌ಲ್ಲ್ಯಾ ಲೊಕಾ ಮದ್ಲ್ಯಾನ್ ಜೊನಿ ನಪಂಯ್ಚ್‌ಜಾಲೊ.

■  ಸುನಂದ್

“ಆಮ್ಚ್ಯಾ ಕೊಂಬ್ಯಾಕ್ ತುಮ್ಚ್ಯಾ ಪೆಟ್ಯಾನ್ ಧರ‍್ನ್ ಫಾಪ್ಸಿಲಾ…. ಆಮ್ಚೊ ಕೊಂಬೊ ಅಲಕ್ಕಾ ಮೆಲೊಚ್ಚ್ ನ್ಹಯ್‌ಂಗೀ……?? ಆನಿ ತುಮಿಂ ಜಾಯ್ ಜಾಯ್ ಮ್ಹಣ್ಂಚ್ಚ್ ಅಸೆಂ ಕರ‍್ನ್ ಘರಾ ಭಿತರ್ ಲಿಪೊನ್ ರಾವ್ಲ್ಯಾತ್……..”

ಲಿಗೋರ್ ಸಿಕೆರಿನ್ ಮಾರ್‌ಲ್ಲಿ ಬೊಬಾಟ್ ಆಯ್ಕೊನ್ ಘರಾ ಭಿತರ್ ಸನ್ವಾರಾಚ್ಯಾ ಸಾಂಜೆಚ್ಯಾ ಮಿಸಾಕ್ ವಚೊಂಕ್ ತಯಾರ್ ಜಾಂವ್ಚೊ ಚಾರ‍್ಲಿ ಫೆರ‍್ನಾಂದ್ ಸಟ್ಟ್ ಕರ‍್ನ್ ಭಾಯ್ರ್ ಆಯ್ಲೊಚ್ಚ್ ಆನಿ ತಾಚ್ಯಾ ಪಾಟ್ಲ್ಯಾನ್ ತಾಚಿ ಬಾಯ್ಲ್ ರೊಜ್ಲಿನ್ ಫೆರ‍್ನಾಂದ್. ತಿಯ್ ಮಿಸಾಕ್ ವಚೊಂಕ್ ಭಾಯ್ರ್ ಸರ‍್ತಾಲಿ. ಲಿಗೊರ್ ಸಿಕೆರಿನ್ ತಿತ್ಲ್ಯಾ ವ್ಹಡಾ ಆವಾಜಾನ್ ಬೊಬಾಟ್ ಮಾರ‍್ಚ್ಯಾಕ್ ಥಂಯ್ಸರ್ ಕಿತೆಂ ಜಾಲೆಂ ಮ್ಹಣ್ ದೊಗಾಂಯ್ಕಿ ಖರೆಂಚ್ಚ್ ಕಳಿತ್ ನಾತ್‌ಲ್ಲೆಂ.

“ಕಿತೆಂ ಜಾಲೆಂ ಕುಂಪಾದ್ರೆ ?” ಚಾರ‍್ಲಿ ಫೆರ‍್ನಾಂದಾನ್ ಚಿಕ್ಕೆ ವ್ಹಡಾ ತಾಳ್ಯಾನ್ ವಿಚಾರ‍್ಲೆಂ.

” ಕುಂಪಾದ್ರೆಕ್ ಲಾಯ್ ಉಜೊ….. ಕಿತೆಂ ಜಾಲೆಂ ಮ್ಹಣ್ತಾಯ್ ??? ಆಮ್ಚ್ಯಾ ಇತ್ಲ್ಯಾ ಅಪುರ‍್ಬಾಯೆಚ್ಯಾ ಕಾಟ್ಯಾಚ್ಯಾ ಹುರಿಯಾ ಕೊಂಬ್ಯಾಕ್ ತುಮ್ಚ್ಯಾ ದಳ್ದಿರ‍್ಯಾ ಪೆಟ್ಯಾನ್ ಫಾಪ್ಸುನ್ ಘಾಲಾಂ ತೆಂ ದಿಸ್ತಾ ತುಮ್ಕಾಂ ? ಆಮ್ಚ್ಯಾ ಕೊಂಬ್ಯಾಚಿ ಹಾಕ್-ಬೋಬ್ ಆಮ್ಕಾಂ ಘರಾ ಭಿತರ್ ಸಯ್ತ್ ಆಯ್ಕಾಲಿ. ತುಮ್ಚ್ಯಾ ಝಾಲಾಂತ್‌ಚ್ಚ್ ಕೊಂಬೊ ಹುಳ್ವಳೊಂಕ್ ಲಾಗ್ಲೊ ಆನಿ ತುಮ್ಕಾಂ ಕಾಂಯಿಂಚ್ಚ್ ಆಯ್ಕೊಂಕ್ ನಾತ್‌ಲ್ಲ್ಯಾ ಬರಿಚ್ಚ್ ಕರ‍್ತಾತ್‌ಮೂ ತುಮಿಂ????”

ಚಾರ‍್ಲಿ ಆನಿ ರೊಜ್ಲಿನ್ ಫೆರ‍್ನಾಂದ್ ದೊಗಾಂಯ್ ತಾಂಚೊ ಪೆಟೊ ‘ಟೈಗರ್’ ಬಾಂಧುನ್ ಘಾಲ್ಲ್ಯಾ ಕಡೆ ಸರಾರಾಂ ಗೆಲಿಂ. ಟೈಗರಾಕ್ ಬಾಂಧುನ್ ಘಾಲ್ಚೊ ಜಾಗೊ ಲಿಗೊರ್ ಸಿಕೆರಿಚ್ಯಾ ಘರಾ ಕುಶಿನ್ ಆಸ್‌ಲ್ಲ್ಯಾನ್ ತಾಂಕಾ ಪಟ್ಟ್‌ಕರ‍್ನ್ ಕೊಂಬ್ಯಾಚಿ ಬೋಬ್ ಆಯ್ಕಾಲ್ಲಿ ಆಸ್ತೆಲಿ. ಟೈಗರ್ ತಾಂಕಾ ಪಳವ್ನ್ ಶಿಮ್ಟಿ ಹಾಲಯ್ಲಾಗ್ಲೊ ಕಿತೆಂಗೀ ವೊರ‍್ತೆಂ ಕಾಮ್ ಆಪ್ಣೆಂ ಕೆಲ್ಲ್ಯಾ ಬಾಶೆನ್. ಟೈಗರಾಚ್ಯಾ ಕುಶಿನ್ ಧರ‍್ನಿರ್ ಲಿಗೊರಿ ಸಿಕೆರಿಚೊ ನೊವ್ರ್ಯಾ ತಸಲೊ ದಾಟೊ ಮೊಟೊ ಕೊಂಬೊ ರಗ್ತಾಚ್ಯಾ ಕೊಂಡಾಂತ್ ಪಡೊನ್ ಆಸ್‌ಲ್ಲೊ. ಖರೊಚ್ಚ್ ಮೆಲ್ಲೊ ತೊ. ರೊಜ್ಲಿನ್ ಫೆರ‍್ನಾಂದಾನ್ ಕೊಂಬ್ಯಾಕ್ ಉಕಲ್ಲೊ. “ಅಳೆ … ಥಂಯ್ಚೆ ಇಲ್ಲೆಂ ಉದಕ್ ಹಾಡ್ ಪಳೆಯಾಂ…” ಘೊವಾಕ್ ಬೋಬ್ ಮಾರುನ್ ಸಾಂಗ್ಲೆಂ.

ರೊಜ್ಲಿನಾಚ್ಯಾ ಪಾಟ್ಲ್ಯಾನ್‌ಂಚ್ಚ್ ಆಸ್‌ಲ್ಲೊ ಚಾರ‍್ಲಿ ಫೆರ‍್ನಾಂದ್ ದಾವೊನ್ ವಚೊನ್ ವಾಳ್ಚೆ ಬಾಜಿಯೆಚ್ಯಾ ಮಾಟ್ವಾಲಾಗಿಂ ಆಸ್‌ಲ್ಲ್ಯಾ ಮಾತಿಯೆಚ್ಯಾ ಚಾಟ್ಟೆಂತ್ಲೆ ಕಟ್ಟೆಂತ್ ಉದಕ್ ಘೆವ್ನ್ ಪಾಟಿಂ ಆಯ್ಲೊ. ದೊಗಾಂಯ್ನಿ ಮೆಳೊನ್ ಕೊಂಬ್ಯಾಚಿ ಬೊಂಚ್ ಉಗ್ತಿ ಕರ‍್ನ್ ಉದಕ್ ಸೊಡುಂಕ್ ಪ್ರೆತನ್ ಕೆಲೆಂ ತರ್‌ಯ್ ವ್ಯರ‍್ತ್. ಕೊಂಬ್ಯಾನ್ ಯೆದೊಳ್‌ಚ್ಚ್ ಜೀವ್ ಸೊಡ್ನ್ ಜಾಲ್ಲೊ.

ಆನಿ ದುಸ್ರೆಂ ಕಾಂಯ್ ಕರುಂಕ್ ಉಪಾಯ್ ನಾ ಮ್ಹಣ್ ರೊಜ್ಲಿನ್ ಕೊಂಬ್ಯಾಕ್ ಉಕೊಲ್ನ್ ತಾಂಚ್ಯಾ ಕಂಪೌಂಡಾಚ್ಯಾ ದೊರ‍್ಯಾ ಮಧೆಂ ಆಸ್ಚ್ಯಾ ಅಕ್ಕಾಡ್ಯಾಕ್ ಉತ್ರೊನ್ ಲಿಗೊರ್ ಸಿಕೆರಿಚ್ಯಾ ಝಲಾ ಕುಶಿನ್ ಗೆಲಿ.

” ಥಂಯ್ಸ್ ರಾವ್ ಕುಮಾದ್ರೆ ……” ಲಿಗೊರ್ ಸಿಕೆರಿನ್ ಪರತ್ ಬೊಬಾಟ್‌ಲ್ಲೆಂ ಆಯ್ಕೊನ್ ರೊಜ್ಲಿನ್ ಥಂಯ್ಚ್ ಥಟಕ್ಕ್ ಜಾವ್ನ್ ಉಬಿ ಜಾಲಿ.

ಲಿಗೋರ್ ಸಿಕೆರ್ ಮುಖಾರ‍ುನ್ ಉಲಯ್ಲೊ – “ತ್ಯಾ ಕೊಂಬ್ಯಾಕ್ ಪುಣಿ ಆಮ್ಚ್ಯಾ ಘರಾ ಲಾಗಿಂ ಹಾಡಿನಾಕಾ… .. ಮ್ಹಜ್ಯಾ ಜಿವಾಚೊ ಜೀವ್ ತೊ ಕೊಂಬೊ…. ಕಿತ್ಲ್ಯಾ ಕಾಟಾಚ್ಯಾ ಕೊಂಬ್ಯಾಂಕ್ ಸಲ್ವುನ್ ಆಮ್ಕಾಂ ನಾಂವ್ ಹಾಡ್‌ಲ್ಲೊ… ಆಜ್ ತುಮ್ಚ್ಯಾ ಹರ‍್ಧ್ಯಾರ್ ಘಾಲೊ ನ್ಹಯ್ ?”

ಲಿಗೊರ್ ಸಿಕೆರ್ ಆನಿ ಚಾರ‍್ಲಿ ಫೆರ‍್ನಾಂದಾಚಿಂ ಕಂಪೌಂಡಾಂ ಎಕಾಮೆಕಾಕ್ ಲಾಗೊನ್‌ಂಚ್ಚ್ ಆಸ್‌ಲ್ಲಿಂ. ಪಕತ್ತ್ ದೊರೊ ಮಾತ್ರ್ ಮಧೆಂ. ತ್ಯಾ ದೊರ‍್ಯಾ ಮಧೆಂಚ್ಚ್ ಏಕ್ ಆಕ್ಕಾಡೊ. ತ್ಯಾ ಅಕ್ಕಾಡಾಂತ್ಲ್ಯಾನ್ ತಾಣಿ ಎಕಾಮೆಕಾಚ್ಯಾ ಘರಾ ವಚೊಂಕ್ ಆಶಾರ್ – ಪಾಶಾರ್ ಜಾಂವ್ಚೆಂ.

ಚಾರ‍್ಲಿ ಫೆರ‍್ನಾಂದಾಕ್ ಸುಮಾರ್ ಸ ಎಕ್ರೆ ಜಾಗೊ ಆಸ್‌ಲ್ಲೊ ತರ್ ಲಿಗೋರ್ ಸಿಕೆರಿಕ್ ತಾಚ್ಯಾ ಬಾಪಾಯ್ಚ್ಯಾ ವಾಂಟ್ಯಾ ಥಾವ್ನ್ ಮೆಳ್‌ಲ್ಲೊ ಆಟ್ ಎಕ್ರೆ ಜಾಗೊ ಆಸ್‌ಲ್ಲೊ. ತಾಂಚ್ಯಾ ತಾಂಚ್ಯಾ ಜಾಗ್ಯಾರ್ ಕ್ರಷಿ ಕರುನ್ ದೋನಿಂ ಕುಟ್ಮಾಂ ಭಾರಿಚ್ಚ್ ಖುಶೆನ್ ಆನಿ ಸಮದಾನಾನ್ ಜಿಯೆತಾಲಿಂ.

ಚಾರ‍್ಲಿ ಫೆರ‍್ನಾಂದಾಚ್ಯಾ ಮಾಲ್ಘಡ್ಯಾ ಧುವೆಚೆಂ, ಶಾಲಿನಿಚೆಂ, ಫಿಲ್ಯಾದ್ ಲಿಗೊರ್ ಆನಿ ಲೀನಾ ಸಿಕೆರಿನ್ ಜೊಡ್‌ಲ್ಲೆಂ ಜಾಲ್ಲ್ಯಾನ್ ಸಂಬಂಧ್ ದೆವಾಚ್ಯಾ ಆಂಗ್ಣಾ ಮ್ಹಣಾಸರ್ ಪಾವ್‌ಲ್ಲೊ ಮ್ಹಣ್ಯೆತ್. ತಸೆಂ, ಹರ‍್ಯೆಕಾ ಲ್ಹಾನ್ ವ್ಹಡ್ ಕಾರ‍್ಯಾಂನಿ ಜಾಂವ್, ಘರಾಂತ್ ಕಿತೆಂಯ್ ಬರೆಂ ರಾಂದಪ್ ಕೆಲ್ಲೆಂ ಜಾಂವ್ ತಿಂ ಎಕಾಮೆಕಾಕ್ ವಾಂಟುನ್ ಘೆತಾಲಿಂ. ದೋನಿಂ ಕುಟ್ಮಾಂ ಎಕಾಚ್ಚ್ ವಾಟ್ಲೆಂತ್ ಜೆಂವ್ಚ್ಯಾಬರಿ ಆಸ್‌ಲ್ಲಿಂ.

ಚಾರ‍್ಲಿ ಫೆರ‍್ನಾಂದಾನ್ ಮಾತ್ರ್ ಘರ್ ರಾಕೊಂಕ್ ಮ್ಹಣ್ ಆಲ್ಸೆಶಿಯನ್ ಪೆಟೊ ಪೊಸ್‌ಲ್ಲೊ. ಪಳಂವ್ಕ್ ವಾಗಾಬರಿ ದಿಸ್ತಾಲೊ ಜಾಲ್ಲ್ಯಾನ್ ‘ಟೈಗರ್’ ಮ್ಹಣ್ ತಾಕಾ ಮೊಗಾನ್ ಆಪಂವ್ಚೆಂ. ಘರಾಂತ್ ಮನ್ಶಾಂಕ್ ಖಾಣ್ ಜೆವಾಣ್ ನಾ ತರ್‌ಯ್ ಟೈಗರಾಕ್ ಸಾರ‍್ಕೆಂ ಆನಿ ವೆಳಾರ್ ಖಾಣ್ ಮೆಳ್ತಾಲೆಂ. ಟೈಗರಾಕ್ ದಿಸಾಕ್ ಮೊಟ್ಯಾ ಸಾಂಕ್ಳಿನ್ ಬಾಂದ್ತಾಲೆ ಆನಿ ರಾತಿಕ್ ಝಾಲಾಂತ್ ಸೊಡ್ತಾಲೆ.

ಲಿಗೊರ್ ಸಿಕೆರಿಚ್ಯಾ ಝಾಲಾಕ್ ಇಲ್ಲೆಂ ಪಯ್ಸ್ ರಾವೊನ್, ರೊಜ್ಲಿನ್ ದೋನಿಂ ಹಾತಾಂನಿ ಕೊಂಬ್ಯಾಕ್ ಧರ‍್ನ್ ಏಕ್ ಪಾವ್ಟಿಂ ಆಪ್ಲ್ಯಾ ಘೊವಾಕ್ ಪಳಯ್ಲಾಗ್ಲಿ ತರ್ ಆನ್ಯೇಕ್ ಪಾವ್ಟಿಂ ಲಿಗೊರ್ ಸಿಕೆರಿಕ್. ದೋಗೀ ದಾದ್ಲೆ ತೊಂಡಾಕ್ ಆಯಿಲ್ಲ್ಯಾ ಬರಿ ಉಲಯ್ತಾಲೆ ತರ್ ರೊಜ್ಲಿನ್ ಫೆರ‍್ನಾಂದಾಕ್ ಕಿತೆಂಚ್ಚ್ ಆಯ್ಕಾನಾ ಜಾಲೆಂ.

“ತ್ಯಾ ಕೊಂಬ್ಯಾಕ್ ತಾಂಚ್ಯಾ ಝಾಲಾಂತ್ ಉಡಯ್ ರೊಜ್ಯೆ ಆನಿ ಯೆ ತುಂ….” ಆಪ್ಲ್ಯಾ ಘೊವಾನ್ ಜಾತಾ ತಿತ್ಲ್ಯಾ ವ್ಹಡಾ ತಾಳ್ಯಾನ್ ಸಾಂಗ್ತಾನಾ ರೊಜ್ಲಿನ್ ಫೆರ‍್ನಾಂದಾನ್ ಪಾಟಿಂ ಮುಕಾರ್ ಪಳಯ್ಲೆಂ ನಾ. ಕೊಂಬ್ಯಾಕ್ ಲಿಗೋರ್ ಸಿಕೆರಿಚ್ಯಾ ಝಾಲಾಚ್ಯಾ ಪೊಂತಾರ್ ಆಸ್ಚ್ಯಾ ಮಾಡಾ ಖಾಟ್ಯಾರ್ ದವರ‍್ನ್ ಪಾಟಿಂ ಘುವ್ಲಿ.

“ತೊ ಕೊಂಬೊ ತುಮಿಂಚ್ಚ್ ವರಾಜಯ್…… ಆಜ್ ರಾತಿಂ ರಾಂದುನ್ ಖಾಯಾ…..ಆಜ್ ದಾಧೊಶಿ ಫೆಸ್ತ್ ತುಮ್ಕಾಂ…..” ಲಿಗೊರ್ ಸಿಕೆರ್ ಬೊಬಾಟ್ಲೊ.

“ತುಮ್ಚ್ಯಾ ಕೊಂಬ್ಯಾಕ್ ಬಾಂಧುನ್ ಘಾಲಿನಾಸ್ತಾನಾ ಅಸೊಚ್ಚ್ ಸೊಡ್ನ್ ತೊ ಆಮ್ಚ್ಯಾ ಪೆಟ್ಯಾ ಲಾಗಿಂ ಆಯಿಲ್ಲೊ ತರ್ ಆಮಿಂ ಕಿತೆಂ ಕರಿಜಯ್….ಕುಂಪಾದ್ರೆ…. ಆಮ್ಚೊ ಬುದಿಚೊ ಪೆಟೊ…. ತಾಚ್ಯಾ ಸರ‍್ಸಿನ್ ಕೊಂಬೊ ಯೆನಾ ತರ್ ತೊ ಆಪಡ್ಚೊ ಸಯ್ತ್ ನ್ಹಯ್…. ಆತಾಂ ತುಮಿಂಚ್ಚ್ ರಾಂದುನ್ ಖಾಯಾ….” ಚಾರ‍್ಲಿ ಫೆರ‍್ನಾಂದಾನ್ ಜವಾಬ್ ದಿಲಿಚ್ಚ್.

ಲಿಗೊರ್ ಸಿಕೆರಿಚೊ ರಾಗ್ ಮಸ್ತಕಾಕ್ ಚಡ್ಲೊ. ಮಾಡಾ ಕಾಟ್ಯಾಚ್ಯಾ ಫಾತ್ರಾರ್ ಆಸ್‌ಲ್ಲ್ಯಾ ಕೊಂಬ್ಯಾಕ್ ಉಕಲ್ನ್ ತೊ ಕಂಪೌಂಡಾಚ್ಯಾ ದೊರ‍್ಯಾ ಸರ‍್ಸಿನ್ ಸರಾರಾಂ ಆಯ್ಲೊ ಆನಿ ಜಾತಾ ತಿತ್ಲ್ಯಾ ಬಳಾನ್ ಚಾರ‍್ಲಿ ಫೆರ‍್ನಾಂದಾಚ್ಯಾ ಕಂಪೌಂಡಾಕ್ ಉಡಯ್ಲೊ.

ಚಾರ‍್ಲಿ ಫೆರ‍್ನಾಂದ್ ಕಿತೆಂ ದಾದ್ಲೊ ನ್ಹಯ್? ಆಪ್ಲ್ಯಾ ಬಾಯ್ಲೆ ಭುರ‍್ಗ್ಯಾಂ ಮುಕಾರ್ ಅಶಿ ಜಾಲ್ಲಿ ಲಜ್ ಸೊಸುಂಕ್ ತಾಕಾ ಜಾಲಿ ನಾ…. ಆಪ್ಲ್ಯಾ ಕಂಪೌಂಡಾಂತ್ ಉಡಯಿಲ್ಲೊ ಕೊಂಬೊ ಆರಾವ್ನ್ ಲಿಗೊರ್ ಸಿಕೆರಿಚ್ಯಾ ಜಾಗ್ಯಾಂತ್ ಉಡವ್ನ್ ಸೊಡ್ಲೊ.

ಅಸೆಂ ಆನಿ ದೋನ್ ಪಾವ್ಟಿಂ ಘಡ್ಲೆಂ. ಕೊಂಬ್ಯಾಚಿಂ ಪಾಕಾಂ ಅರ‍್ದಿಂ ಜಡೊನ್ ಗೆಲಿಂ. ತ್ಯಾ ವೆಳಿಂ ಲಿಗೊರ್ ಸಿಕೆರಿನ್ ಆಪ್ಲ್ಯಾ ರಾಗಾಂತ್‌ಯ್ ತಕ್ಲಿ ಖರ‍್ಚಿಲಿ. ಹೆಣೆ ತೆಣೆ ಉಡವ್ನ್ ಪಿಸ್ಡೊನ್ ಗೆಲ್ಲ್ಯಾ ಕೊಂಬ್ಯಾಕ್ ಆಕ್ರೇಕ್ ತಾಣೆ ದೊರ‍್ಯಾ ವಯ್ರ್ ದವರ‍್ಲೊ ಆನಿ ಆಪ್ಲ್ಯಾ ಘರಾ ಭಿತರ್ ಚಲ್ತಚ್ಚ್ ರಾವ್ಲೊ.

ದುಸ್ರ್ಯಾ ದಿಸಾ ಕಾವ್ಳ್ಯಾಂಕ್ ಮಾತ್ರ್ ಗಮ್ಮತಾಯೆಚೆಂ ಫೆಸ್ತ್‌ಚ್ಚ್ ಜಾಲೆಂ.

: : ದುಸ್ರೊ ಅವಸ್ವರ್ : : 

ಹರ‍್ಯೆಕಾ ಮಹಿನ್ಯಾಂತ್ ಪಯ್ಲ್ಯಾ ಆಯ್ತಾರಾ ಸೊಡ್ಲ್ಯಾರ್ ಹೆರಾಂ ಹಫ್ತ್ಯಾಂನಿ ಸನ್ವಾರಾಚ್ಚ್ ಮಿಸಾಕ್ ವೆಚೆಂ ಚಾರ‍್ಲಿ ಆನಿ ರೊಜ್ಲಿನ್ ಫೆರ‍್ನಾಂದಾನ್. ಪಯ್ಲ್ಯಾ ಆಯ್ತಾರಾ ಸಕಾಳಿಂ ಭಾಗೆವಂತ್ ವೊರಾಚೆಂ ಭಕ್ತಿಪಣ್ ಆನಿ ತೇರ‍್ಸ್ ಆಸ್ತಾ. ತ್ಯಾ ಭಕ್ತಿಪಣಾಂತ್ ಭಾಗ್ ಘೆತ್ಲ್ಯಾರ್ ಮಹಿನ್ಯೊ ಸಗ್ಳೊ ಭಾರಿಚ್ಚ್ ಬರೊ ಜಾತಾ ಮ್ಹಣ್ ತಾಣಿಂ ಚಿಂತ್ಚೆಂ.

ಪೆಟ್ಯಾನ್ ಕೊಂಬ್ಯಾಕ್ ಫಾಪ್ಸಿಲ್ಲ್ಯಾ ಹಫ್ತ್ಯಾ ಉಪ್ರಾಂತ್ಲೊ ಆಯ್ತಾರ್, ಮಹಿನ್ಯಾಚೊ ಪಯ್ಲೊ ಆಯ್ತಾರ್. ಫಾಂತ್ಯಾರ್ ಉಟೊನ್ ಮಿಸಾಕ್ ವೆಚಿ ತಯರಾಯ್ ಕರ‍್ಚ್ಯಾ ಪಯ್ಲೆಂ ಗೊರ‍್ವಾಂಚೆಂ ಆನಿ ಮೊಸಿಚೆಂ ದೂದ್ ಕಾಡ್ನ್, ತಾಕಾ ಜಾಯ್ ತಿತ್ಲೆಂ ಉದಕ್ ಭರ‍್ಸುನ್ ಹಳ್ತ್ ಕರ‍್ನ್, ದಿಪ್ಯಾಕ್ ಆನಿ ಸದಾಂಚ್ಯಾ ಗ್ರಾಯ್ಕಾಂಕ್ ದಿಂವ್ಚ್ಯಾಕ್ ಬೊತ್ಲಿನಿಂ, ಚೆಂಬಾನಿಂ ಆನಿ ಕೊಳ್ಸುಲ್ಯಾನಿಂ ಘಾಲ್ನ್ ತಯಾರ್ ಕೆಲೆಂ. ಆಯ್ತಾರಾ ದೀಸ್ ಮಾತ್ರ್ ದೂದ್ ದಿಪ್ಯಾಕ್ ದಿಂವ್ಚೆಂ ಕಾಮ್ ತಾಂಚ್ಯಾ ಮಾಲ್ಘಡ್ಯಾ ಚೆಡ್ವಾಂಚೆಂ. ಉಪ್ರಾಂತ್ ಟೈಗರಾಕ್ ಸಾಂಕ್ಳಿಕ್ ಘಾಲ್ಯಾಂ ಮ್ಹಣ್ ಚಾರ‍್ಲಿ ಫೆರ‍್ನಾಂದ್ ‘ಟೈಗರ್ … ಟೈಗರ್’’ ಮ್ಹಣ್ ಆಪಂವ್ಕ್ ಲಾಗ್ಲೊ ತರ್ ಟೈಗರ್ ಆಯ್ಲೊ ನಾ. ಟೈಗರ್ ದಿಸಾತ್ತ್ ನಾ ಜಾಲೊ. ರೊಜ್ಲಿನ್ ಫೆರ‍್ನಾಂದ್ ಆನಿ ಭುರ‍್ಗಿಂ ಶಾಲಿನಿ, ಶಾನನ್ ಆನಿ ಶೋನ್ ಭಾಯ್ರ್ ಆಯ್ಲಿಂ ಆನಿ ತಾಣಿಂಯ್ ಟೈಗರಾಕ್ ಆಪಂವ್ಕ್ ಸುರು ಕೆಲೆಂ.

ಟೈಗರ್ ನಾ. ಟೈಗರ್ ದಿಸಾತ್ತ್ ನಾ.

ಚಾರ‍್ಲಿ ಫೆರ‍್ನಾಂದಾಚಿ ದೀಷ್ಟ್ ಲಿಗೊರಿ ಸಿಕೆರಿಚ್ಯಾ ಘರಾ ಕುಶಿನ್ ಗೆಲಿ. ಥಂಯ್ಸರ್ ಕೊಣ್‌ಂಚ್ಚ್ ದಿಸ್ಲೆ ನಾಂತ್. ಕಿತ್ಯಾಕ್‌ಗೀ ಕಳಿತ್ ನಾ, ತಾಚ್ಯಾ ಕಾಳ್ಜಾಂತ್ ದುಬಾವಾಚಿಂ ಕಿಟಾಳಾಂ ಪುಟ್ಲಿಂಚ್ಚ್….

ತಿತ್ಲ್ಯಾರ್ ಬಯ್ಲಾಂತ್ಲ್ಯಾ ಸ್ಟೇನಿ ತಾವ್ರಾಚಿ ಧುವ್ ದೂದ್ ವರೊಂಕ್ ಮ್ಹಣ್ ಆಯಿಲ್ಲೆಂ, ಗೆಟಿಚ್ಯಾ ಭಾಯ್ಲ್ಯಾನ್ ರಾವೊನ್ ಬೊಬಾಟುನ್ ಮ್ಹಣಾಲೆಂ. ” ಮಾಮಾ, ತುಮ್ಚೊ ಪೆಟೊ ಹಾಂಗಾ ಪಡ್ಲಾ….. “

ಚಾರ‍್ಲಿ ಫೆರ‍್ನಾಂದಾ ಸವೆಂ ಸಗ್ಳೆಂ ಕುಟಾಂಬ್‌ಚ್ಚ್ ಗೇಟಿ ಲಾಗಿಂ ದಾವ್ಲೆಂ ಆನಿ ಕಿತೆಂ ಪಳಯ್ತೆಲೆಂ..?? ಗೇಟಿ ಬಾಯ್ಲ್ಯಾನ್ ದೊರ‍್ಯಾ ಕುಶಿನ್ ಟೈಗರ್ ಪಡ್ಲಾ…..ಜೀವ್ ಹೊಗ್ಡಾಯ್ಲಾ ತಸೆಂಚ್ಚ್….. ನಿರ‍್ಜೀವ್…. ತೊಂಡಾಂತ್ ಪೇಂಡ್ ಭರೊನ್ ಗೆಲ್ಲೊ….

“ಯೆ ಮ್ಹಜ್ಯಾ ದೆವಾ….. ಆಮ್ಚ್ಯಾ ಟೈಗರಾಕ್ ವೀಕ್ ಘಾಲ್ನ್ ಕೊಣೆಂ ಮಾರ‍್ಲೊ….? ” ರೊಜ್ಲಿನ್ ಫೆರ‍್ನಾಂದ್ ಹರ‍್ಧೆಂ ಬಡವ್ನ್ ಬೊಬಾಟ್ಲಿ.

ಭುರ‍್ಗಿಂ ಕಳ್ವಳ್ಳಿಂಚ್ಚ್……

“ಆನಿ ಕೋಣೆ…. ” ಚಾರ‍್ಲಿ ಫೆರ‍್ನಾಂದಾನ್ ವ್ಹಡಾ ತಳ್ಮಾಳ್ಯಾನಿಂ ವ್ಹಡಾ ತಾಳ್ಯಾನ್ ಮ್ಹಳೆಂ. “ಆಮ್ಚ್ಯಾನಿಂಚ್ಚ್…… ಸೆಜಾರಾ ರಾಷ್ಟ್ರಾಂಚೆ ದುಸ್ಮಾನ್ ಕಾಂಯ್ ಯೇವ್ನ್ ಅಸೆಂ ಕೆಲ್ಲೆಂ ನ್ಹಯ್….ಸೆಜಾರ‍್ಚೆಚ್ಚ್ ಆಮ್ಚೆ ದುಸ್ಮಾನ್….. ಪಯ್ಲೆಂ ಆಮಿಂ ವಳ್ಕಾಲ್ಯಾ ನಾಂವ್; ಆತಾಂ ಕಳ್ತಾ….. ತಾಂಚ್ಯಾ ಕಾಳ್ಜಾಂತ್ ಕಿತ್ಲೆಂ ಕುಸ್ಡೆಪಣ್ ಆಸಾಗೀ ಮ್ಹಣ್ !!”

ಲಿಗೊರ್ ಸಿಕೆರಿಚ್ಯಾ ಘರಾಂತ್ ಮಾತ್ರ್ ಜಾಗ್‌ಮಾಗ್ ನಾತ್‌ಲ್ಲಿ. ಬಿಲ್ಕುಲ್ ಶಾಂತ್‌ಪಣ್…..ತಿಂ ಕಾಂಯ್ ಯೆದೊಳ್‌ಚ್ಚ್ ಮಿಸಾಕ್ ಗೆಲ್ಲಿಂ ಆಸ್ತೆಲಿಂ….

: : ತಿಸ್ರೊ ಅವಸ್ವರ್ : :

ಲಿಗೋರ್ ಸಿಕೆರಿಕ್ ಘರಾಂತ್ ಘುಟಾನ್ ಸೊರೊ ಕಾಡ್ಚಿ ಸವಯ್ ಜಾಯ್ತ್ಯಾ ವರ‍್ಸಾಂ ಥಾವ್ನ್ ಆಸ್‌ಲ್ಲಿ. ಕಾಜು ನಾತ್‌ಲ್ಲ್ಯಾ ವೆಳಾರ್ ಈಂದಾಚೊ, ಸುರೆಚೊ, ಆಣ್ಸಾಂಚೊ ಸೊರೊಯ್ ತೊ ಕಾಡ್ತಾಲೊ. ಆಪ್ಣಾಕ್ ಪಿಯೆಂವ್ಕ್ ಮ್ಹಣ್ ಕಾಡ್ತಾಲೊ ತರ್ ಕೊಣಾಯ್ಕಿ ಗರ‍್ಜೆಕ್ ಜಾಯ್ ತರ್ ವಿಕುಂಕ್‌ಯ್ ವಿಕ್ತಾಲೊ.

ಸೊರೊ ಉಕ್ಡುಂಕ್ ಜಾಯ್ ಜಾಲ್ಲಿಂ ಆಯ್ದಾನಾಂ ಗೊಟ್ಯಾಚ್ಯಾ ಮಾಳ್ಯಾರ್ ಪೊಂತಾರ್ ಜೊಗಸಾಣೆನ್ ದವರ‍್ಚಿಂ ತರ್ ಕಾಜು ಯಾ ಫಳಾಂ ಆಂಬ್ಟೆವ್ನ್ ಕುಸಂವ್ಚ್ಯೊ ಮೊಡ್ಕ್ಯೊ ತೊ ಇತ್ಲಾಂತ್ ಇರ‍್ವೊಳ್ಯಾಚ್ಯಾ ರುಕಾಮುಳಾಂತ್ ಪೂರ‍್ನ್ ದವರ‍್ತಾಲೊ. ತ್ಯಾ ಖಾತಿರ್ ಜೊಕ್ತೆ ಫೊಂಡ್ ಆಸಾ ಕೆಲ್ಲೆ ಆನಿ ಜೊಕ್ತೆಂ ದಾಂಕಾಣ್ ತಾಂಚೆರ್ ಬಸಯಿಲ್ಲೆಂ. ದಾಂಕಾಣ್ ಬಾಯ್ಲ್ಯಾಂಕ್ ದಿಸಾನಾತ್‌ಲ್ಲ್ಯಾ ಬರಿ ಭಾತೆಣ್ ಯಾ ಕರಾಡ್ ತೊ ದಾಂಪ್ತಾಲೊ.

ಹೆ ಘುಟ್ ಗಾಂವಾಕ್ ಕಳಿತ್ ಆಸ್‌ಲ್ಲೆಂ ಯಾ ನಾತ್‌ಲ್ಲೆಂ ತರ್‌ಯ್ ಚಾರ‍್ಲಿ ಫೆರ‍್ನಾಂದಾಚ್ಯಾ ಕುಟ್ಮಾಕ್ ಕಳಿತ್ ಆಸ್‌ಲ್ಲೆಚ್ಚ್.

ಲಿಗೊರ್ ಸಿಕೆರಿನ್ ಸೊರೊ ಉಕಡ್ಚೊ ಚಡಾವತ್ ಜಾವ್ನ್ ಸನ್ವಾರಾ ಸಾಂಜೆರ್. ಸೊರೊ ಉಕಡ್ತಾನಾ ಬಾಯ್ಲ್ಯಾಂಕ್ ದುಬಾವ್ ಯೇಂವ್ಕ್ ನಜೊ ಮ್ಹಣ್ ಲೀನಾ ಸಿಕೆರ್ ಆನಿ ಭುರ‍್ಗ್ಯಾಂನಿ ವ್ಹಡಾ ತಾಳ್ಯಾನ್ ಆಮೊರಿ – ತೇರ‍್ಸ್ ಭೆಟಂವ್ಚೊ. ಸನ್ವಾರಾ ದೀಸ್ ತಾಂಚ್ಯಾ ಘರಾ ಲಾಂಬ್ ತೇರ‍್ಸ್, ಮರಿಯಾಳ್ ನೊವೆನ್ ಆನಿ ತೀನ್ ಚಾರ್ ಕಂತಾರಾಂ. ಸೊರೊ ಕಾಡ್ಚೆಂ ಕಾಮ್ ಆಕೇರ್ ಜಾಂವ್ಕ್ ಇಲ್ಲೊ ಚಡ್ ವೇಳ್ ಜಾಯ್ ತರ್ ಕಂತಾರಾಂ ಆನಿಕ್‌ಯ್ ಲಾಂಬೊನ್ ವೆತಾಲಿಂ.

ಆಸೆಂ ಕೆಲ್ಲ್ಯಾನ್‌ಂಗಿ ಕಿತೆಂ ಕಳಿತ್ ನಾ, ತೊ ಸೊರೊ ಕಾಡ್ತಾ ಮ್ಹಣ್ ಕೊಣಾಯ್ಕಿ ದುಬಾವ್ ಜಾಲ್ಲೊಚ್ಚ್ ನಾ. ಜಾಲ್ಯಾರ್‌ಯ್ ಕೊಣೆಂಯ್ ಹೆರಾಂ ಸೆಜಾರ‍್ಚ್ಯಾಂನಿ ಹ್ಯಾ ವಿಶ್ಯಾಂತ್ ಧ್ಯಾನ್ ದಿಲ್ಲೆಂಯ್ ನಾ.

ಆನಿ ಹ್ಯಾ ಸನ್ವಾರಾ ಜಾಲೆಂ ವಿಂಗಡ್‌ಚ್ಚ್…

ಲೀನಾ ಸಿಕೆರಿನ್ ತೇರ‍್ಸ್ ಸುರು ಕರ‍್ನ್ ತಿಸ್ರೊ ಮಿಸ್ತೆರ್ ಜಾತಾನಾ ಗೇಟಿ ಭಾಯ್ರ್ ಪೊಲಿಸಾಂಚೆ ವ್ಯಾನ್ ರಾಂವ್ಲೆಂಚ್ಚ್. ಲೀನಾ ಸಿಕೆರ್ ನಮಾನ್ ಮರಿಯೆ ಮ್ಹಣೊನ್‌ಂಚ್ಚ್ ಭಿತರ್ ದಾಂವ್‌ಲ್ಲಿ ಮಾತ್ರ್ ಪೊಲಿಸ್ ಝಾಲಾಂತ್ ಪಾವ್ಲೆ ಆನಿ ಖಿಣಾನ್ ರಾಂದ್ಚ್ಯಾ ಕುಡಾಕ್. ಲಿಗೊರಿ ಸಿಕೆರಿಕ್ ಧರ‍್ರ‍್ಲೊಚ್ಚ್… ಪಾಟಿರ್ ಚಾರ್ ಮಾರ್ ಪಡ್ಲೆಚ್ಚ್.

ಪೊಲಿಸಾಂನಿ ತಾಚ್ಯಾ ಲಾಗಿಂ ಕಾಂಯ್ ವಿಚಾರಿನಾಸ್ತಾನಾ ಕಾಜು ಕುಸೊಂಕ್ ದವರ‍್ಚ್ಯಾ ಜಾಗ್ಯಾರ್‌ಯ್ ವೆಲೆಂ. ಕರಾಡ್ ಆನಿ ಭಾತೆಣ್ ಉಸ್ತುನ್, ತಿಂ ಆಯ್ದಾನಾಂ ಪುಟವ್ನ್ ಘಾಲಿಂ. ಥಂಯ್ಸರ್ ಫೊಂಡಾಂತ್ ಪಯ್ಲೆಂಚ್ಯೊ ಸೊರ‍್ಯಾಚೊ ಬೊತ್ಲಿಯ್ ಮೆಳ್ಳ್ಯೊ.

ಲೀನಾ ಸಿಕೆರಿನ್ ಪೊಲಿಸಾಂಚೆ ಪಾಯ್ ಧರ‍್ಲೆ. ಆಪ್ಲ್ಯಾ ಘೊವಾಕ್ ಸೊಡ್ಯಾ; ಪಯ್ಶೆ ದಿತಾಂ ಮ್ಹಣ್ ಪರಾತ್ಲೆಂ. ಕಿತೆಂ ಕೆಲ್ಯಾರ್‌ಯ್ ಜಾಲೆಂಚ್ಚ್ ನಾ. ಪೋಲಿಸ್ ಲಿಗೊರ್ ಸಿಕೆರಿಕ್ ಜೀಪಾರ್ ಘಾಲ್ನ್ ಗೆಲೆಚ್ಚ್….

ಸಿಕೆರಿಚ್ಯಾ ಕುಟ್ಮಾನ್ ಚಾರ‍್ಲಿ ಫೆರ‍್ನಾಂದಾಚ್ಯಾ ಘರಾ ಕುಶಿನ್ ಪಳಯ್ಲೆಂ. ಥಂಯ್ಸರ್ ಸಗ್ಳಿಂ ಯೆದೊಳ್‌ಚ್ಚ್ ನಿದ್‌ಲ್ಲಿಂ ಜಾಯ್ಜಯ್…. ಜಾಗ್‌ಮಾಗ್ ನಾತ್‌ಲ್ಲಿ…

ಉಪ್ರಾಂತ್ ಪಯ್ಶೆ ಖರ‍್ಚಾಲೆ. ಚಾರ್ ದಿಸಾನಿಂ ಲಿಗೊರ್ ಸಿಕೆರಿಕ್ ಪೋಲಿಸ್ ಸ್ಟೇಶನಾಂತ್ಲೊ ಭಾಯ್ರ್ ಕಾಡ್ಲೊ.

ಪಾಟಿಂ ಆಯಿಲ್ಲೊಚ್ಚ್ ಲಿಗೊರ್ ಸಿಕೆರ್ ಝಾಲಾಂತ್ ರಾವೊನ್ ಬೊಬಾಟ್ಲೊ – “ಪೊಲಿಸಾಂಕ್ ಆಮ್ಚ್ಯಾ ಘರ‍್ಚಿ ಸರ‍್ವ್ ಗಜಾಲ್ ಕೊಣೆಂ ಸಾಂಗ್ಲ್ಯಾ ಮ್ಹಣ್ ಮ್ಹಾಕಾ ಕಳಿತ್ ಜಾಲಾಂ….. ಹಾಂವ್ ಮಾತ್ರ್ ತಾಂಕಾ ಸೊಡ್ಚೊ ನಾ……”

: : ಚವ್ತೊ ಅವಸ್ವರ್ : :

ದೊಗಾಂಯ್ಚ್ಯಾ ಕಂಪೌಂಡಾಕ್ ವಿಂಗಡ್ ಕರ‍್ಚೊ ದೊರೊ ಆನಿ ಸಂಬಂಧ್ ದವರುಂಕ್ ಆಸ್‌ಲ್ಲೊ ಆಕ್ಕಾಡೊ. ತ್ಯಾ ಸನ್ವಾರಾ ದೊನ್ಪಾರಾಂ ಚಾರ‍್ಲಿ ಫೆರ‍್ನಾಂದಾನ್ ಚಿಂತ್ಲೆಂ – ‘ಆಮಿಂ ಸೆಜಾರಾಂತ್ ಆಸ್ಚಿಂ ದುಸ್ಮಾನಾಂ ಜಾಲ್ಯಾಂವ್ ಆನಿ ಹೊ ಆಕ್ಕಾಡೊ ಬಿಲ್ಕುಲ್ ನಾಕಾ’. ದೆಕುನ್ ರೊಜ್ಲಿನ್ ಆನಿ ಭುರ‍್ಗ್ಯಾಂಕ್ ಸಾಂಗಾತಾ ಹಾಡ್ನ್, ಸಕ್ಡಾಂಚ್ಯಾ ಕುಮ್ಕೆನ್ ಆಕ್ಕಾಡೊ ಬಂಧ್ ಕರ‍್ನ್ ಸೊಡ್ಲೊ.

ಲಿಗೊರ್ ಸಿಕೆರಿಚ್ಯಾ ಜಾಗ್ಯಾ ಮಧೆಂ ಪಾವ್ಸಾಚೆಂ ಉದಕ್ ವಾಳೊನ್ ವಚೊಂಕ್ ತೋಡ್ ಆಸ್‌ಲ್ಲೊ. ತೊ ತೋಡ್ ಮಾತ್ರ್ ಕಂಪೌಂಡಾಚ್ಯಾ ದೊರ‍್ಯಾ ಮಧ್ಲ್ಯಾನ್ ಆಸ್‌ಲ್ಲ್ಯಾ ತೂಂಬಾಂತ್ಲ್ಯಾನ್ ಮುಖಾರ‍್ಸುನ್ ಚಾರ‍್ಲಿ ಫೆರ‍್ನಾಂದಾಚ್ಯಾ ಜಾಗ್ಯಾಂತ್ಲ್ಯಾನ್ ಮುಖಾರ‍್ಸುನ್ ವೆತಾಲೊ ಆನಿ ಬಾಯ್ಲ್ಯಾ ರಸ್ತ್ಯಾ ವಯ್ಲ್ಯಾ ಚರಂಡೆಕ್ ಮೆಳ್ತಾಲೊ. ಆಕ್ಕಾಡೊ ಬಂಧ್ ಕರ‍್ಚ್ಯಾ ಕಾಮಾಕ್ ಲಾಗ್‌ಲ್ಲೊ ಚಾರ‍್ಲಿ ಫೆರ‍್ನಾಂದ್ ತ್ಯಾ ತೂಂಬಾಕ್‌ಯ್ ಫಾತರ್ ಸಾಣ್ಸುನ್ ಮಾತಿ ಘಾಲ್ನ್ ಬಂಧ್ ಕೆಲೊ.

ನಶೀಬ್ ಪಳೆಯಾ…

ತ್ಯಾಚ್ಚ್ ರಾತಿಂ, ಮೊಳಾಬ್ ಪುಟ್‌ಲ್ಲ್ಯಾ ಬರಿ ಶಿರಾಂದಾರಿಂಚೊ ಪಾವ್ನ್ ವೊತ್ಲೊಚ್ಚ್. ಆಯ್ತಾರಾ ಸಕಾಳಿಂ ಲಿಗೊರ್ ಸಿಕೆರ್ ಉಟ್ತಾನಾ ತೂಂಬಾಂತ್ಲ್ಯಾನ್ ಉದಕ್ ವಾಳೊನ್ ವಚಾನಾಸ್ತಾನಾ ತಾಂಚ್ಯಾ ಜಾಗ್ಯಾರ್ ಭರೊನ್ ಝಲಾಕ್ ಆಯಿಲ್ಲೆಂ. ಝಾಲಾ ಥಾವ್ನ್ ದೊರ‍್ಯಾ ಮ್ಹಣಾಸರ್ ಏಕ್ ತಳೆಂಚ್ಚ್ ಜಾಲ್ಲೆಂ.

ಉದ್ಕಾಂತ್ಲ್ಯಾನ್ ಕಷ್ಟಾಂನಿ ಚಲೊನ್ ವಚೊನ್ ಪಳಯ್ತಾ ತರ್ ಕಿತೆಂ ಪಳಂವ್ಚೆಂ. ದೊರ‍್ಯಾಕ್ ಆಸ್‌ಲ್ಲೊ ಉದಕ್ ವಾಳೊಂಕ್ ತೂಂಬ್ ಬಂಧ್ ಕೆಲಾ. ” ಹೊ ತೂಂಬ್ ಕೋಣೆ ಬಂಧ್ ಕೆಲಾ? ಆನಿ ಕೊಣೆಂ ಆಮ್ಚ್ಯಾ ಸೆಜಾರ‍್ಯಾಂನಿ….” ತೊ ಬೊಬಾಟ್ಲೊ.

ಆತಾಂ ರಾಗ್ ಲಿಗೊರ್ ಸಿಕೆರಿಚ್ಯಾ ಮಾತ್ಯಾಕ್ ಚಡ್ಲೊ. ಆಪ್ಲ್ಯಾ ಕುಡಿಂತ್ಲೆ ತ್ರಾಣ್ ಯೆಂಕ್ಟಾಯ್ ಕರ‍್ನ್ ತ್ಯಾ ದೊರ‍್ಯಾಕ್ ಖೊಟ್ ಘಾಲಿಚ್ಚ್…. ಏಕ್ ನ್ಹಯ್ ದೋನ್ ನ್ಹಯ್ ತೀನ್ ನ್ಹಯ್….. ತೊ ದೊರೊ ಖೊಸಾಳ್ತಾ ಮ್ಹಣಾಸರ್… ಮಾತಿಯೆಚೊ ದೊರೊ. ತ್ಯಾ ಶಿವಾಯ್ ರಾತ್‌ಭರ್ ಆಯಿಲ್ಲ್ಯಾ ಪಾವ್ಸಾಕ್ ಆನಿ ಭರ್‌ಲ್ಲ್ಯಾ ಉದ್ಕಾಂತ್ ಥಂಡ್ ಜಾವ್ನ್ ಅಳ್ಮೆಂಚ್ಚ್ ಜಾಲ್ಲೊ. ಪೊರ‍್ತಾಲೊ.

ಲಿಗೊರ್ ಸಿಕೆರಿಚ್ಯಾ ಜಾಗ್ಯಾ ವಯ್ಲೆಂ ಉದಾಕ್ ಚಾರ‍್ಲಿ ಫೆರ‍್ನಾಂದಾಚ್ಯಾ ಜಾಗ್ಯಾರ್ ಆವ್ರಾಬರಿ ವಾಳೊಂಕ್ ಲಾಗ್ಲೆಂ.

ಗೊಟ್ಯಾಂತ್ ಗೊರ‍್ವಾಂಕ್ ಆನಿ ಮೊಶಿಕ್ ಸೊಪ್ ಬೆಂಡುನ್ ಆಸ್‌ಲ್ಲೊ ತೊ ಲಿಗೊರ್ ಸಿಕೆರಿಚಿ ಬೊಬಾಟ್ ಆಯ್ಕೊನ್ ಹಾತಿಂ ಕೊಯ್ತೊ ಘೆವ್ನ್‌ಂಚ್ಚ್ ಭಾಯ್ರ್ ಆಯ್ಲೊ….ಆಪ್ಲ್ಯಾ ಜಾಗ್ಯಾ ಭಿತರ್ ಉದ್ಕಾಚೊ ವಾಳೊ ಆಯಿಲ್ಲೊ ಪಳವ್ನ್ ಚಾರ‍್ಲಿ ಫೆರ‍್ನಾಂದ್ ಉರ‍್ಲಾಗೀ ?

ಉದಾಕ್ ನ್ಹಂಯ್ಚ್ಯಾ ಆವ್ರಾಬರಿ ತಾಂಚ್ಯಾ ಕಂಪೌಡಾಂತ್ ವಾಳೊನ್ ವೆತಾಲೆಂ.

“ಆಕ್ಕಾಡೊ ತುಂವೆ ಬಂಧ್ ಕೆಲ್ಲೊಯ್…. ” ಲಿಗೊರ್ ಸಿಕೆರ್ ಬೊಬಾಟ್ಲೊ. ” ತುಂ ಸಂಸಾರಾಚೊ ಧನಿ ಜಾಲೊಯ್ ?? ಹೊ ಉದ್ಕಾಚೊ ತೂಂಬ್ ಬಂಧ್ ಕರ‍್ಚೆಂ ಹಕ್ಕ್ ತುಕಾ ಕೊಣೆ ದಿಲ್ಲೆಂ ಪೆಟ್ಯಾ …..”

ಚಾರ‍್ಲಿ ಫೆರ‍್ನಾಂದ್ ನಂಜಾಳಿ ಹಾಸೊ ಹಾಸ್ಲೊ. ಜಿವಾಂತ್ ರಾಗಾಚೊ ಉಜೊ ಪೆಟೊಂಕ್ ಲಿಗೊರ್ ಸಿಕೆರಿಚಿಂ ತಿತ್ಲಿಂಚ್ಚ್ ಉತ್ರಾಂ ಪುರೊ ಆಸ್‌ಲ್ಲಿಂ. ” ತುಜ್ಯಾ ಜಾಗ್ಯಾರ್ ವಾಳ್ಚೆಂ ಉದಕ್ ಮ್ಹಜ್ಯಾ ಜಾಗ್ಯಾರ್ ಯೆಂವ್ಚೆಂ ನಾಕಾ…. ತುಕಾ ಖಂಯ್ ಜಾಯ್ ಥಂಯ್ ತುಂ ವಾಳಾಶೆಂ ಕರ್…ತುಜೊ ಜಾಗೊ ಆನಿ ತುಜೆಂ ಉದಕ್….. ತೆಂ ತುಜೆಂ ಕಾಮ್ ಆನಿ ಹಾಂವ್ ನೆಣಾ…..”

“ದೆಕುನ್‌ಂಚ್ಚ್ ಹೊ ದೊರೊ ಹಾಂವೆ ಲೊಟುನ್ ಘಾಲಾ…. ಉದಕ್ ತುಜ್ಯಾಚ್ಚ್ ಜಾಗ್ಯಾರ್ ಆಸ್ಚ್ಯಾ ತೊಡಾಂತ್ಲ್ಯಾನ್ ವಚಾಜಯ್…. ವರ‍್ಸಾಂ ವರ‍್ಸಾಂ ಥಾವ್ನ್ ಅಸೆಂಚ್ಚ್ ಆಸಾ….. ಹೆಂ ಬದ್ಲುಂಚೊ ತುಂ ಕೋಣ್ ಪೆಟೊ….?”

ಚಾರ‍್ಲಿ ಫೆರ‍್ನಾಂದಾಚ್ಯಾ ಹಾತಾಂತ್ ಸೊಪ್ ಬೆಂಡ್ಚೊ ಕೊಯ್ತೊ ಆಸ್‌ಲ್ಲೊ…. ರಾಗ್ ಮಾತ್ಯಾರ್ ಚಡ್‌ಲ್ಲೊ…. ಕಾಳ್ಜಾಂತ್ ಸಯ್ತಾನ್ ಘಡಿಭರ್ ಆಯ್ಲೊ ಕೊಣ್ಣಾ……. ಕಿತೆಂ ಕರ‍್ತಾ ಮ್ಹಣ್ ತಾಕಾ ಕಳಿತ್ ಜಾಲೆಂಚ್ಚ್ ನಾ….

ತೊ ಲಿಗೊರ್ ಸಿಕೆರಿಚ್ಯಾ ಲಾಗಿಂ ದಾವ್ಲೊ ಆನಿ ಗಳೊ ಕಾಪುನ್ ಜಾಲ್ಲೆಂ….

ಆನಿ ಆಪ್ಲ್ಯಾ ಘೊವಾಕ್ ಅಸೆಂ ಜಾಲ್ಲೆಂ ಪಳವ್ನ್, ಲೀನಾ ಸಿಕೆರ್ ದಾವೊನ್‌ಂಚ್ಚ್ ಆಯ್ಲಿ.

“ತೀನ್ ಕಾಸಾಂಚ್ಯಾ ಸುಣ್ಯಾ…… ಮ್ಹಜ್ಯಾ ಘೊವಾಕ್ ಕಿತೆಂ ಕೆಲೆಂಯ್…… ಹೆ ಮ್ಹಜ್ಯಾ ದೆವಾ…… ತುಕಾ ಹಾಂವ್ ಸೊಡ್ಚಿಂ ನಾ….

ಚಾರ‍್ಲಿ ಫೆರ‍್ನಾಂದಾಚ್ಯಾ ಕಾಳ್ಜಾಂತ್ಲೊ ಸಯ್ತಾನ್ ಆನಿಕ್‌ಯ್ ಆಸ್‌ಲ್ಲೊ….. ವಾಳ್‌ಲ್ಲ್ಯಾ ರಗ್ತಾನ್ ತಾಚೊ ರಾಗ್ ನಿವೊಂಕ್ ನಾತ್‌ಲ್ಲೊ…..

“ತುಂವೆ ಮ್ಹಾಕಾ ಕಿತೆಂ ಕರ‍್ಚೆಂ ???” ಹಾತಾಂತ್ ಆಸ್‌ಲ್ಲ್ಯಾ ಕೊಯ್ತ್ಯಾನ್ ಲೀನಾ ಸಿಕೆರಿಚ್ಯಾ ಗಳ್ಯಾಕ್ ಎಕಾಚ್ಚ್ ಮಾರಾನ್ ಕಾಪುನ್ ಸೊಡ್ಲೆಂ…

► ಕ್ಲೆರೆನ್ಸ್, ಕೈಕಂಬ

ಸಿಂತಿಯಾ ಆನಿ ಭುರ‍್ಗ್ಯಾಂನಿ ಪಯ್ಲೆ ಪಾವ್ಟಿಂ ಗಲ್ಫಾಕ್ ಯೆಂವ್ಚೆಂ; ಗಲ್ಫಾಕ್ ಕಿತ್ಯಾಕ್ ವಿಮಾನಾರ್ ಬಸ್ಚೆಂಚ್ಚ್ ತಾಣಿಂ ಪಯ್ಲೆ ಪಾವ್ಟಿಂ.

ವಿಸಾಚೆ ರೆಗ್ರೊ ಸಂಪವ್ನ್ ಭಾಯ್ರ್ ಯೆತಾನಾ ಆಮ್ಕಾಂ ಆಪವ್ನ್ ವೊರ‍್ಚ್ಯಾಕ್ ಬಾವೊಜಿ‌ಚ್ಚ್ ಆಯಿಲ್ಲೊ.

“ಕ್ರಿಸ್ತಾಚ್ಯಾ ಪವಿತ್ರ್ ರಗ್ತಾನ್ ಸ್ವಾಗತ್ ತುಮ್ಕಾಂ ….” ಏರ್‌ಪೊರ‍್ಟಾಚ್ಯಾ ಬಾಗ್ಲಾರ್‌ಚ್ಚ್ ತಾಣೆಂ ಆಮ್ಕಾಂ ಪೊಟ್ಲುನ್ ಧರ‍್ಲೆಂ. ಆಮ್ಚ್ಯಾ ಕಪಾಲಾರ್ ಖುರ‍್ಸಾಚೆ ಘುರ‍್ತ್ ಕಾಡ್ಲೆ.

” ಹ್ಯಾ ಮಸ್ಕತ್ಚ್ಯಾ ಭಾಂಗ್ರಾಳ್ಯಾ ಗಾವಾಂತ್ ತುಮ್ಚಿ ಜೀಣ್ ನಂದನ್ ಜಾಂವ್ದಿ… ಆನಿ ಹ್ಯಾಚ್ಚ್ ಖುರ‍್ಸಾಚ್ಯಾ ನಾಂವಾನ್, ತುಮ್ಕಾಂ ಪವಿತ್ರ್ ಕರ‍್ತಾಂ… ಬಳ್ವಂತ್ ಕರ‍್ತಾಂ…. “

ಬಾವೊಜಿಚ್ಯಾ ಹ್ಯಾ ಭಾಗೆವಂತ್ ಕರ‍್ನೆಚೊ ಕಾಳ್ಜಾಚ್ಯಾ ಗೂಂಡಾಯೆಂತ್ ಅನ್ಭೋಗ್ ಕೆಲ್ಲ್ಯಾ ಮ್ಹಜೆಂ ಮನ್ ಸಂತೊಸಾನ್ ಎಕ್ದಮ್ ಭರೊನ್ ಆಯ್ಲೆಂ.

“ದೇವ್ ತುಕಾ ವೊರ‍್ತೊ ಕರುಂ… ಬಾವೊಜೆ … ಆಮ್ಕಾಂ ನವೆಂ ಜಿವಿತ್ ದಿಂವ್ಚ್ಯಾಕ್ ಹಾಂಗಾಸರ್ ತುಂವೆ ಹಾಡ್ಲಾಂಯ್ ಮ್ಹಣ್ ಆಮಿಂ ಜಾಣಾಂವ್… ಆಮಿಂ ತುಕಾ ಋಣಿ…..” ಕೊಡ್ಯಾಳ್ ಥಾವ್ನ್ ಭಾಯ್ರ್ ಸರ‍್ತಾನಾಂಚ್ಚ್ ಹಾಂವೆ ಮತಿಂತ್ ಚಿಂತ್‌ಲ್ಲಿಂ ಉತ್ರಾಂ ತಿಂ. ಹಾಂವೆ ತಸೆಂ ಮ್ಹಣ್ತಾನಾಂಚ್ಚ್ ತಾಣೆ ಮ್ಹಜಿಂ ಉತ್ರಾಂ ಅರ‍್ಧ್ಯಾರ್ ರಾವಯ್ಲಿಂ……

“ಹಾಂವ್ ಕಾಂಯಿಂಚ್ಚ್ ನ್ಹಯ್… ಶೂನ್ಯ್ ಮನಿಸ್… ಹೆಂ ಸರ‍್ವ್ ಕ್ರಿಸ್ತಾನ್ ತುಮ್ಚ್ಯಾ ಜಿವಿತಾ ಖಾತಿರ್ ಕರ‍್ಚೆಂ ಮ್ಹಜ್ಯಾ ಮುಕಾಂತ್ರ್… ಕ್ರೀಸ್ತ್ ನ್ಹಯ್ ತರ್ ಹಾಂವ್ ಕಾಂಯಿಂಚ್ಚ್ ನ್ಹಯ್… ತುಮಿಂ ಕ್ರಿಸ್ತಾಕ್ ಹೊಗೊಳ್ಸಿಲ್ಯಾರ್ ಜಾಲೆಂ… ತಿತ್ಲೆಂಚ್ಚ್ ಪುರೊ ಮ್ಹಾಕಾ… ತಾಕಾಚ್ಚ್ ಮಹಿಮಾ ಆನಿ ತಾಕಾಚ್ಚ್ ಹೊಗ್ಳಾಪ್…”

ಆಮಿಂ ಕಾರ್‌ಪಾರ‍್ಕಾಕ್ ಚಲೊನ್ ಗೆಲ್ಯಾಂವ್. ಆಮ್ಚಿ ಸಮಾನ್ ಭರ್‌ಲ್ಲಿ ಏಕ್ ಟ್ರೊಲಿ ಬಾವೊಜಿನ್‌ಂಚ್ಚ್ ಲೊಟುನ್ ವೆಲಿ.

ತಾಚೆಂ ಕಾರ್ ಟಯೋಟಾ ಲ್ಯಾಂಡ್ ಕ್ರುಜರ್. ಆಡಂಬರಾಯೆಚೆಂ ಕಾರ್ ತೆಂ. ಆಮ್ಚೊ ಸಾಮಾನ್, ಸೂಟ್‌ಕೇಸಿ ಗಾಡಿಯೆಂತ್ ಘಾಲ್ತಾನಾ ತಾಣೆಂ ಆಮ್ಕಾಂ ಕುಮಕ್ ಕೆಲಿ. ಕಿತ್ಲೊ ಗ್ರೇಸ್ತ್ ತೊ ತರ್‌ಯ್ ತಿತ್ಲೊಚ್ಚ್ ಖಾಲ್ತೊ. ಸಾದೊ…

ಸಾಮಾನ್ ಕಾರಾರ್ ಘಾಲ್ನ್ ಜಾಲ್ಯಾ ಉಪ್ರಾಂತ್ ಆಮಿಂ ಸುಲ್ತಾನ್ ಖಬೂಸ್ ಮಾರ‍್ಗಾರ್ ಮುಖಾರ್ ವೆತಾನಾ ಮೆಳ್‌ಲ್ಲ್ಯಾ ಜಾಗ್ಯಾಂಚಿ ವಳಕ್ ಬಾವೊಜಿನ್ ಕರ‍್ನ್ ದಿಲಿ. ಗಾಲಾ, ಬವ್‍ಶಾರ್, ಆಲ್-ಕುವೆರ್, ಕುರುಮ್, ಪಿಡಿವೊಚೆ ದೊಂಗೊರ್, ರೂವಿ ಶ್ಹೆರ್ ಆನಿ ಆಖ್ರೇಕ್ ದೋನ್ ದೊಂಗ್ರಾಂ ಮಧೆಂ ಆಸ್ಚೆಂ ವಾದಿ ಕಬೀರ್. ಉಲವ್ಣ್ಯಾಂಚ್ಯಾ ಮಧೆಂ ಲಾಂಬ್ ವಾಟ್ ಸಾಗ್ಸಾಲ್ಲಿಚ್ಚ್ ಕಳ್ಳಿನಾ. ತ್ಯಾ ಮಧೆಂ, ಒಮಾನಾಕ್ ಆಯ್ಲ್ಯಾ ಉಪ್ರಾಂತ್ ತಾಣೆ ಕಾಡ್‌ಲ್ಲೆ ಕಷ್ಟ್ ಆನಿ ವಾಂವ್ಟ್ ಪರತ್ ಕಳಯ್ಲಿ. ಕಷ್ಟಾಂ ಆನ್ವಾರಾಂ ಮಧೆಂ ಕ್ರಿಸ್ತಾನ್ ಕಸೆಂ ವಾಂಚಯಿಲ್ಲೆಂ, ಕಾಂಯಿಂಚ್ಚ್ ನಾತ್‌ಲ್ಲ್ಯಾ ತಾಕಾ ಜಯ್ತಾಚ್ಯಾ ಶಿಖರಾಕ್ ಪಾವಯಿಲ್ಲ್ಯಾ ವಿಶ್ಯಾಂತ್ ವಿವರ‍್ಸಿಲೆಂ. ತ್ಯಾ ವಿಶ್ಯಾಂತ್ ಗಾವಾಂತ್ ಮೆಳ್‌ಲ್ಲ್ಯಾ ವೆಳಿಂಯ್ ತಾಣೆ ಆಮ್ಕಾಂ ಸಾಂಗ್‌ಲ್ಲೆಂ ಆಸಾ. ತ್ಯಾ ವಿಶ್ಯಾಂತ್ ಕಿತ್ಲ್ಯಾ ಪಾವ್ಟಿಂ ಸಾಂಗ್ಲೆಂ ತರ್‌ಯ್ ತಾಕಾ ಬಿಲ್ಕುಲ್ ಪುರೊ ಜಾಯ್ನಾತ್‌ಲ್ಲೆಂ ತೆಂಯ್ ಆಮಿಂ ಜಾಣಾಸ್‌ಲ್ಲ್ಯಾಂವ್…

ವಾದಿ ಕಬೀರ್ ಭಾರತೀಯ್ ಇಸ್ಕಾಲ್ ಉತ್ರೊನ್ ಮುಖಾರ್ ಗೆಲ್ಯಾ ಉಪ್ರಾಂತ್ ದಾವ್ಯಾಕ್ ಘುಂವ್ಲ್ಯಾರ್ ತಿಸ್ರ್ಯಾ ಗಲ್ಲೆಂತ್ ಉಜ್ವ್ಯಾಕ್ ತಾಚೆಂ ವ್ಹಡ್ ಘರ್. ಘರ್ ಮ್ಹಣ್ಚ್ಯಾಕೀ ಬಂಗ್ಲೊಚ್ಚ್ ಮ್ಹಣ್ಯೆತ್.

ತ್ಯಾ ವೆಳಾರ್ ಇಸ್ಕಾಲ್ ಸುರು ಜಾಲ್ಲೆಂ ಮಾತ್ರ್ ಆನಿ ಬಾವೊಜಿಚಿಂ ಭುರ‍್ಗಿಂ ಇಸ್ಕಾಲಾಕ್ ಗೆಲ್ಲಿಂ. ವಿಲ್ಮಾ ಕಾಮಾಕ್ ಗೆಲ್ಲೆಂ. ಹ್ಯಾ ವಿಶ್ಯಾಂತ್ ಎರ್‌ಪೊರ‍್ಟಾಂತ್‌ಂತ್ ಆಮ್ಕಾಂ ಬಾವೊಜಿನ್ ಸಾಂಗ್‌ಲ್ಲೆಂ.

ಸಾವ್ದಿಂತ್ ಏಕ್ ಸಾದೊ ಡ್ರೈವರ್ ಜಾವ್ನ್ ಕಾಮಾರ್ ಆಸ್‌ಲ್ಲ್ಯಾ ಮ್ಹಾಕಾ ಮಸ್ಕತಾಕ್ ಬಾವೊಜಿಚ್ಯಾ ಕಂಪ್ಣೆಂತ್ ಏಕ್ ಸುಪರ್‌ವೈಜರ್ ಜಾವ್ನ್ ಹಾಡ್‌ಲ್ಲೊ. ಸಾವ್ದಿಚೆಂ ಡ್ರೈವಿಂಗ್ ಲೈಸನ್ಸ್ ಹಾಂಗಾಸರ್ ಬದ್ಲಿ ಕರುಂಕ್ ಜಾತಾಲೆಂ ಆನಿ ತಸೆಂ ಜಾತಾ ತಿತ್ಲ್ಯಾ ವೆಗ್ಗಿಂ ತೆಂ ಒಮಾನ್ಚ್ಯಾ ಲೈಸನ್ಸಾಕ್ ಬದ್ಲಿ ಕರ‍್ನ್ ಕಾಮಾಚಿ ಜವಾಬ್ದಾರಿ ಕಾಣ್ಘೆಂವ್ಕ್ ಮ್ಹಾಕಾ ಕಳಿತ್ ಕೆಲ್ಲೆಂ.

” ಪ್ರೇಜ್ ದ ಲೋರ‍್ಡ್…” ಬಾವೊಜಿನ್ ಆಮ್ಕಾಂ ಘರಾಂತ್ ಭಿತರ್ ಆಪಯ್ಲೆಂ. “ಹೆಂ ಘರ್ ಆಜ್ ಥಾವ್ನ್ ಮ್ಹಜೆಂ ನ್ಹಯ್ ಬಗರ್ ತುಮ್ಚೆಂಚ್ಚ್… ತುಮಿಂಚ್ಚ್ ಹಾಚೆ ಧನಿ…”

ಪರತ್ ಕಸಲೆಂ ಸಾದೆಂಪಣ್… ವೊರ‍್ತ್ಯಾಪಣಾಂತೀ ಸಾದೆಂಪಣ್… ಆಪ್ಣಾಕ್ ಕಿತೆಂಚ್ಚ್ ನಾಕಾ ಮ್ಹಳ್ಳೆಂ ಬೊಳೆಂಪಣ್…

ಆಮಿಂ ಮುಖ್ಲ್ಯಾ ಸಾಲಾಂತ್ ಆಸ್‌ಲ್ಲ್ಯಾ ಸೊಫಾಚೆರ್ ಬಸ್ಲ್ಯಾಂವ್. ಬಾವೊಜಿನ್ ಆಮ್ಕಾಂ ಉದಾಕ್ ಹಾಡ್ನ್ ದಿಲೆಂ. ಉದಾಕ್ ಪಿಯೆವ್ನ್ ಜಾಲ್ಲೆಂಚ್ಚ್, ತೊ ಮ್ಹಣಾಲೊ, “ಹಾಂವೆ ಕಿತೆಂ ಕರ‍್ಚೆಂ ತರ್‌ಯ್ ಜೆಜುಚ್ಯಾಚ್ಚ್ ನಾಂವಾನ್ ಆನಿ ತ್ಯಾಚ್ಚ್ ಖಾತಿರ್ ಮ್ಹಾಕಾ ಇತ್ಲೆಂ ಸರ‍್ವ್ ಮೆಳ್ಳಾಂ… ಹಾಂವ್ ಪಯ್ಶಾಂಕ್ ಆಶೆಲ್ಲೊಂ ಮನಿಸ್ ನ್ಹಯ್… ಮ್ಹಾಕಾ ಪಯ್ಶೆ ನಾಕಾತ್… ಇತ್ಲೆಂ ಸರ‍್ವ್ ಹಾಂವ್ ಕರ‍್ತಾಂ ತರ್ ತುಮ್ಚೆಂ ಜಿವಿತ್‌ಯ್ ನಂದನ್ ಜಾಯ್ಜಯ್… ಪಕತ್ತ್ ತಾಚ್ಯಾಚ್ಚ್ ನಾಂವಾನ್… ಆಮಿಂ ಜೆಜುಕ್ ಆತಾಂ ಆರ‍್ಗಾಂ ದಿವ್ಯಾಂ… ಆಮಿಂ ಲ್ಹಾನ್ ಮಾಗ್ಣೆಂ ಮ್ಹಣ್ಯಾಂ ತುಮ್ಚೆಂ ಜಿವಿತ್ ನಂದನ್ ಜಾಂವ್ಚ್ಯಾ ಖಾತಿರ್…”

ಆಮಿಂ ಉಬೆ ರಾವ್ಲ್ಯಾಂವ್. ಆಜ್ ಫಾಂತ್ಯಾರ್ ಗಾವಾಂತ್ ಘರಾ ಥಾವ್ನ್ ಭಾಯ್ರ್ ಸರ್‌ಲ್ಲ್ಯಾಂವ್; ಹಾಂಗಾಸರ್ ಪಾವ್ತಾನಾ ದೊನ್ಪಾರ್ ಉತರ್‌ಲ್ಲೊ ಆನಿ ಖರಿಚ್ಚ್ ಆಮ್ಕಾಂ ಪುರಾಸಣ್ ಜಾಲ್ಲಿ ತರ್‌ಯ್ ಬಾವೊಜಿನ್ ಲ್ಹಾನ್ ಮಾಗ್ಣೆಂ ಮ್ಹಣ್ತಾನಾ ‘ನಾಕಾ’ ಮ್ಹಣೊಂಕ್ ಸಾಧ್ಯ್ ಜಾಲೆಂ ನಾ. ಬಾವೊಜಿನ್ ಮಾಗ್ಣೆಂ ಸುರು ಕೆಲೆಂ. ಮಟ್ವೆಂ ಮ್ಹಣ್ ಚಿಂತ್‌ಲ್ಲೆಂ ಪುಣ್ ಮಟ್ವೆಂ ಜಾಲೆಂ ನಾ… ಆರ‍್ಧೊ ಘಂಟೊ ಜಾಲೊ ತರ್‌ಯ್ ಮಾಗ್ಣೆಂ ರಾವ್ಲೆಂನಾ. ಮುಕ್ಕಾಲ್ ಘಂಟೊ ಕಾಬಾರ್ ಜಾತಾನಾ ಮಾಗ್ಣೆಂ ರಾವ್ಲೆಂ. ಆಮಿಂ ಉಸ್ವಾಸ್ ಸೊಡ್ಲೊ. ಭು‍ರ‍್ಗಿಂ ಜೆಮೆತಾಲಿಂ ಜಾಯ್ಜಯ್.

“ಹಾಂವ್ ಮಾಗ್ಣ್ಯಾಚೊ ಮನಿಸ್…” ಮಾಗ್ಣೆಂ ಜಾಲ್ಲೆಂಚ್ಚ್ ಬಾವೊಜಿ ಉಲಯ್ಲೊ. “ಜೆಜುಚಿಂ ಬೆಸಾಂವಾಂ ಆಮ್ಚೆರ್ ಇತ್ಲಿಂ ವೊತ್ಲ್ಯಾಂತ್ ತಾಕಾ ಆಮ್ಚೆಂ ಮಾಗ್ಣೆಂಚ್ಚ್ ಕಾರಣ್… ಮಾಗ್ಣೆಂ ನಾಸ್ತಾನಾ ಹಾಂವ್ ಖಂಚೆಂಯ್ ಕಾಮ್ ಕರಿನಾ…”

ಉಪ್ರಾಂತ್ ಬಾವೊಜಿನ್ ಆಮ್ಕಾಂ ಘರ್ ದಾಕಯ್ಲೆಂ.

ಎಕಾ ಮಾಳಿಯೆಚೊ ವ್ಹಡ್ ಬಂಗ್ಲೊ ತೊ. ಧರ‍್ಣಿಚೆರ್ ವ್ಹಡ್ ಸಾಲ್. ತ್ಯಾಚ್ಚ್ ಸಾಲಾಂತ್ ಆಮಿಂ ಬಸ್‌ಲ್ಲ್ಯಾಂವ್. ಸಾಲಾಚ್ಯಾ ಬಗ್ಲೆನ್ ವ್ಹಡ್‌ಚ್ಚ್ ಮ್ಹಣ್ಯೆತ್ ತಸಲೆಂ ಕುಜ್ನ್. ಕುಜ್ನಾಂತ್ ಜಾಯ್ ತ್ಯೊ ವಸ್ತು ಬಾವೊಜಿಚಿ ಗ್ರೆಸ್ತ್‌ಕಾಯ್ ಉಗ್ತ್ಯಾನ್ ಸಾಂಗ್ತಾಲ್ಯೊ. ಕುಜ್ನಾಕ್ ಲಾಗೊನ್‌ಂಚ್ಚ್ ವ್ಹಡ್ ನ್ಹಾಣಿ. ಕುಜ್ನಾಚ್ಯಾ ಬಗ್ಲೆನ್ ಜೆಂವ್ಚೆಂ ಕೂಡ್. ಜೆಂವ್ಚೆಂ ಕೂಡ್ ಉತರ‍್ಲ್ಯಾರ್ ಆನ್ಯೇಕ್ ಕೂಡ್ ಆನಿ ತಾಂತು ಏಕ್ ದೊಡಿ ಖಾಟಿ, ಏಕ್ ಬಂಕ್ (ಎಕಾ ವಯ್ರ್ ಏಕ್ ಭಿಚಾಣೆಂ) ಬೆಡ್ಡ್, ದೋನ್ ಕಬಾಟಾಂ. “ಜೆಜುಚ್ಯಾ ನಾಂವಾನ್ ಆಮಿಂ ತುಮ್ಕಾಂ ಹಾಂಗಾಸರ್ ಸ್ವಾಗತ್ ಕೆಲಾ… ಆನಿ ತುಮಿಂ ಆಮ್ಚ್ಯಾಚ್ಚ್ ಸಾಂಗಾತಾ ಆಸಾಜಯ್ ಮ್ಹಣ್‌ಂಚ್ಚ್ ಮ್ಹಜಿ ಆಶಾ ಆನಿ ಆಮ್ಚಿ ಆಶಾ… ಆಮ್ಚ್ಯಾಚ್ಚ್ ಘರಾಂತ್ ಆಮ್ಚಿಂಚ್ಚ್ ಮನ್ಶಾಂ ಜಾವ್ನ್… ಹೆಂ ಕೂಡ್ ತುಮ್ಕಾಂ… ಹಾಂವ್ ಜಾಣಾಂ, ಹೆಂ ಕೂಡ್ ಚಿಕ್ಕೆ ಲ್ಹಾನ್ ಪುಣ್ ಕಿತೆಂ ಕರ‍್ಚೆಂ ಸುರ‍್ವೆರ್ ಚಿಕ್ಕೆ ಸುದಾರ‍್ಶಿಜಯ್ ಪಡ್ತಾ ಆನಿ ಉಪ್ರಾಂತ್ ಜೆಜುಚ್ಚ್ ಆಮ್ಕಾಂ ವಾಟ್ ದಾಕಯ್ತಲೊ…”

ತ್ಯಾಚ್ಚ್ ಕುಡಾಂತ್ ಆಮ್ಕಾಂ ಚವ್ಗಾಂ ಜಣಾಂನಿ ರಾವೊಂಕ್. ಎಕಾಚ್ಚ್ ಕುಟ್ಮಾ ಬರಿ ಜಿಯೆತಾನಾ ಆಮಿಂ ಸುದಾರ‍್ಸುನ್ ಜಿಯೆಜಯ್ ಮ್ಹಣ್ ಬಾವೊಜಿನ್ ಆಮ್ಕಾಂ ಕಳಯಿಲ್ಲೆಂ ಆನಿ ಆಮಿಂ ವೊಪ್ಪಾಲ್ಲ್ಯಾಂವ್.

ಬಾವೊಜಿನ್ ಆಮ್ಕಾಂ ಪಯ್ಲ್ಯಾ ಮಾಳಿಯೆಕ್ ಆಪವ್ನ್ ವೆಲೆಂ. ಥಂಯ್ಸರ್ ಚಾರ್ ಕುಡಾಂ ಆಸ್‌ಲ್ಲಿಂ. ಏಕ್ ಕೂಡ್ ಬಾವೊಜಿಕ್ ಆನಿ ವಿಲ್ಮಾಕ್. ಏಕ್ ಕೂಡ್ ತಾಂಚ್ಯಾ ಪುತಾಕ್, ಆರೊನಾಕ್ ಆನಿ ಏಕ್ ತಾಂಚ್ಯಾ ಧುವೆಕ್ ಅಭಿಗೆಲಾಕ್. ಚವ್ತೆಂ ಕೂಡ್ ಘರಾ ಆಯಿಲ್ಲ್ಯಾ ಸಯ್ರ್ಯಾಂಕ್. ಹರ‍್ಯೇಕಾ ಕುಡಾಕ್ ಎಕೇಕ್ ನ್ಹಾಣಿ. ತ್ಯಾ ಕುಡಾಂ ಮುಕಾರ್ ಸಾದಾರ‍್ನ್ ಮಟ್ಟಾಚೆಂ ಸಾಲ್ ಆನಿ ತಾಂತು ಸೊಫಾ ಆಸ್‌ಲ್ಲೆ. ಸೊಫಾ ಮುಕಾರ್ ಲ್ಹಾನ್ ಟಿಪೋಯ್ ಆನಿ ತಾಚೆರ್ ಫುಲಾಚೆಂ ವಾಜ್.

ಸಗ್ಳೆಂ ಘರ್ ದಾಕವ್ನ್ ಜಾಲ್ಯಾ ಉಪ್ರಾಂತ್ ಬಾಯ್ಲೆಂ ಆಂಗಣ್ ಆನಿ ಘರಾ ಪಾಟ್ಲಿಂ ಫುಲಾಂ ಝಡಾಂ, ರಾಂದ್ವಯೆಚಿಂ ಝಡಾಂ ದಾಕಯ್ಲಿಂ. ಗಾವಾಂತ್ ಜಾಂವ್ಚ್ಯಾ ಬರಿಚ್ಚ್ ವಿವಿಧ್ ರಾಂದ್ವಯ್ ತ್ಯಾ ತೊಟಾಂತ್ ಜಾತಾಲಿ. ಸಗ್ಳ್ಯಾ ಕಂಪೌಂಡಾಚಿ ಭಂವ್ಡಿ ಜಾಲ್ಲಿಚ್ಚ್, ಬಾವೊಜಿನ್ ಆಮ್ಕಾಂ ಮುಖ್ಲ್ಯಾ ಸಾಲಾಕ್ ಆಪವ್ನ್ ಹಾಡ್ಲೆಂ.

“ವಿನ್ಸಿ, ಮ್ಹಜ್ಯಾ ಕಂಪ್ಣೆಂತ್ ಏಕ್ ಸುಪರ್‌ವೈಸರಾಚೆ ಕಾಮ್ ಮಾತ್ರ್ ನ್ಹಯ್ ಹ್ಯಾ ಘರಾಕ್‌ಯ್ ತುಂವೆಂಚ್ಚ್ ಸಾಂಬಾಳಿಜಯ್… ಮ್ಹಾಕಾ ಘರ್ ಪಳಂವ್ಕ್ ಪುರ‍್ಸತ್‌ಯ್ ನಾ… ಆಸ್‌ಲ್ಲೊ ಇಲ್ಲೊ ವೇಳ್ ಮ್ಹಾಕಾ ದೆವಾಚ್ಯಾ ಸೆವೆಂತ್ ಖರ‍್ಚುಂಕ್ ಆಸಾ… ಇಗರ‍್ಜೆಂತ್ ಸೆವಾ ದಿಂವ್ಕ್ ಆಸಾ… ತ್ಯಾ ಖಾತಿರ್, ತುಕಾ ಸಾವ್ದಿಂತ್ ಕಿತ್ಲೊ ಸಾಂಬಾಳ್ ಮೆಳ್ತಾಲೊ ತಾಚ್ಯಾಕೀ ಚಡ್, ತುಂವೆ ವಿಚಾರ್‌ಲ್ಲೊ ಸಾಂಬಾಳ್ ದೀವ್ನ್ ತುಕಾ ಹಾಂಗಾಸರ್ ಹಾಡ್ಲಾ….”

“ಆನಿ ಸಿಂತಿಯಾಕ್‌ಯ್ ಆಮಿಂ ಘರ‍್ಚಿ ಜವಾಬ್ಧಾರಿ ದಿಂವ್ಕ್ ಚಿಂತ್ಲಾಂ… ಪುಣ್, ಧರ‍್ಮಾಕ್ ನ್ಹಯ್… ಧರ‍್ಮಾಕ್ ಆಮ್ಕಾಂ ಖಂಚೆಂಯ್ ನಾಕಾ… ಆನಿ ತಾಣೆಂಯ್ ಜೊಡಿಜಯ್ ಮ್ಹಣ್ ಆಮ್ಚಿ ಆಶಾ… ಮುಖ್ಲ್ಯಾ ಜಿವಿತಾ ಖಾತಿರ್ ಜೊಡಿಜಯ್… ಆಮಿಂ, ತಾಕಾ ಸಾಂಬಾಳ್ ದಿತೆಲ್ಯಾಂವ್… ಘರ್ ಸಾಂಬಾಳ್‌ಲ್ಲ್ಯಾಕ್ ಸಾಂಬಾಳ್… ರಾವೊಂಕ್ ಇಲ್ಲೆ ಪಯ್ಶೆ ದೀಂವ್ಕ್ ಆಸ್ತೆಲೆ ಪುಣ್, ಜೆಂವ್ಕ್ ಧರ‍್ಮಾಕ್… ಭುರ‍್ಗ್ಯಾಂಚ್ಯಾ ಶಿಕ್ಪಾಚೆಂ, ತಾಂಚೆ ಪೀಜ್ ಮಾತ್ರ್ ತುಮಿಂ ಪಳಂವ್ಕ್… ತುಮಿಂ ಮಸ್ಕತಾಕ್ ಆಯಿಲ್ಲಿ ವಿಮಾನಾಚಿ ಟಿಕೆಟ್ ಆನಿ ವಿಸಾಚೊ ಖರ‍್ಚ್ ತುಮ್ಚ್ಯಾ ಸಾಂಬಾಳಾ ಥಾವ್ನ್ ಮ್ಹಹಿನ್ಯಾಕ್ ಇತ್ಲೊಚ್ಚ್ ಮ್ಹಣ್ ಕಾಡುಂಕ್ ಆಸಾ ಆನಿ ತಿ ಆಮ್ಚ್ಯಾ ಕಂಪ್ಣೆಚೆಂ ಕಾನೂನ್… ಎಕಾ ಉತ್ರಾನ್, ಉರು‌ಲ್ಲೆಂ ಜೆಂ ತುಮಿಂ ಕಿತೆಂ ಜೊಡ್ತಾತ್ ತೆಂ ಪೂರಾ ತುಮ್ಕಾಂ ಉರ‍್ತೆಲೆಂ… “

ಆಮಿಂ ಖುಶ್ ಜಾಲ್ಯಾಂವ್… ಆಮ್ಚ್ಯಾ ನಶಿಬಾಚೆರ್ ಫುಲಾಂಚೆ ವೊಡ್ತ್ ಪುಲ್‌ಲ್ಲ್ಯಾ ಬರಿ ಭಗ್ಲೆಂ…

***

ತ್ಯಾ ದಿಸಾ ಥಾವ್ನ್ ಮ್ಹಜೆಂ ಆನಿ ಸಿಂತಿಯಾಚೆಂ ಜಿವಿತ್ ಸಂಪೂರ‍್ಣ್ ಬದಾಲ್ಲೆಂ.

ಇಂಗ್ಲಿಷ್ ವಾಚುಂಕ್ ಬರಂವ್ಕ್ ಯೆಂವ್ಚ್ಯಾ ಮ್ಹಾಕಾ ಸಾವ್ದಿಂತ್ ಏಕ್ ಡ್ರೈವರ್ ಜಾವ್ನ್ ಚಾರ್ ವೊರ‍್ಸಾಂ ಕಾಮ್ ಕೆಲ್ಲ್ಯಾಕ್ ಮೆಳ್ತಾಲೊ ಸಾವ್ದಿಚೆ ದೇಡ್ ಹಜಾರ್ ರಿಯಾಲ್ ಸಾಂಬಾಳ್. ತಾಂತುಂಚ್ಚ್ ರಾವೊಂಕ್ ಜೇಂವ್ಕ್ ಆನಿ ಹೆರ್ ಖರ‍್ಚ್ ಮ್ಹಣ್ತಾನಾ ಉರ‍್ತಲೊ ತರ್ ಕಿತೆಂ? ಆಟ್ಶಿಂ ನೊವ್ಶಿಂ ಸಾವ್ದಿ ರಿಯಲ್ ಉರಂವ್ಕ್ ಭಾರಿಚ್ಚ್ ಕಷ್ಟ್ ಜಾತಾಲೆಚ್ಚ್…. ತೆ ಪಯ್ಶೆ ಗಾವಾಂತ್ ಆಸ್‌ಲ್ಲ್ಯಾ ಸಿಂತಿಯಾಕ್ ದಾಡ್ಲೆ ತರ್ ತೆಂಯ್ ಪಾವಾನಾ ಮ್ಹಣ್ತಾಲೆಂ. ಪಾಂವ್ಚೆ ತರ್‌ಯ್ ಕಸೆ? ಘರಾಚೆಂ ಭಾಡೆಂ, ದೊಗಾಂ ಭುರ‍್ಗ್ಯಾಂಚೆ ಇಸ್ಕಾಲಾಚೆ ಫೀಸ್, ಜೆವಾಣ್ ಖಾಣ್ ಮ್ಹಣ್ತಾನಾ ತಕ್ಲೆರ್ ವೊಡ್ಲ್ಯಾರ್ ಪಾಯಾಂಕ್ ಆನಿ ಪಾಯಾಂಕ್ ಘಾಲ್ಯಾರ್ ತಕ್ಲೆರ್ ಯೆನಾತ್‌ಲ್ಲೆಂ. ತ್ಯಾಚ್ಚ್ ವೆಳಾರ್, ಹಿ ಗಜಾಲ್ ಸಿಂತಿಯಾನ್ ಬಾವೊಜಿಕ್ ಸಾಂಗ್‌ಲ್ಲ್ಯಾನ್ ಮ್ಹಾಕಾ ತಾಣೆ ತಾಚ್ಯಾ ಕಂಪ್ಣೆಂತ್ ಕಾಮಾಕ್ ಯೆವ್ಯೆತ್ ಆನಿ ತೆಂಯ್ ಸುಪರ್‌ವೈಜರಾಚೆಂ ಕಾಮ್ ಕರ‍್ಯೆತ್ ಮ್ಹಣ್ ಸಾಂಗ್ಲೆಂಚ್ಚ್. ಆನಿ ಹಾಂವ್ ಸಾವ್ದಿ ಸೊಡ್ನ್ ಗಾಂವಾಕ್ ಆಯ್ಲೊಂ ಆನಿ ಉಪ್ರಾಂತ್ ವೀಸಾ ಆಯಿಲ್ಲಿಚ್ಚ್ ಕುಟ್ಮಾ ಸಮೇತ್ ಮಸ್ಕತಾಕ್.

ಬಾವೊಜಿ ಆನಿ ವಿಲ್ಮಾಚ್ಯಾ ಘರಾಂತ್ ಆಮ್ಕಾಂ ರಾವೊಂಕ್ ಖರ‍್ಚ್ ನಾ… ಬಾಡ್ಯಾಚೊ ಮಾತ್ರ್ ಇಲ್ಲೊ ಖರ‍್ಚ್ … ಜೆವಾಣ್ ಧರ‍್ಮಾಕ್… ಉರ್‌ಲ್ಲೆ ಪೂರಾ ಬೆಂಕಾಕ್ ಆನಿ ತ್ಯಾಚ್ ವೊರ‍್ವಿಂ, ಎಕಾ – ದೋನ್ ವೊರ‍್ಸಾಂನಿ ಆಪ್ಲೆಂಚ್ಚ್ ಘರ್ ಉಬೆಂ ಜಾತೆಲೆಂ… ಭುರ‍್ಗ್ಯಾಂಚೆ ಜೀವನ್ ನಂದನ್ ಜಾತೆಲೆಂ ಮ್ಹಣ್ ಆಮ್ಚ್ಯಾ ಮತಿಂತ್ ಉದೆಲ್ಲಿ ಆಶಾ ಆನಿ ಆತಾಂ ತಿ ಸುಫಳ್ ಜಾಲ್ಲ್ಯಾ ಬರಿ ಭಗ್ತಾಲೆಂ…

ಬಾವೊಜಿನ್ ಆನಿ ವಿಲ್ಮಾನ್ ಆಮ್ಚೆಂ ಕಾಮ್ ಆಮ್ಕಾಂ ಪಯ್ಲ್ಯಾ ದಿಸಾಚ್ಚ್ ತಿಳ್ಸಿಲ್ಲೆಂ. ದೊಗಾಂ ಜಣಾಂ ಘರ‍್ಚ್ಯಾ ಕಾಮಾಕ್ ಆಸ್‌ಲ್ಲಿಂ. ಎಕ್ಲಿ ಆಂಧ್ರಾಚಿ ಬಾಯ್ಲ್ ಘರ‍್ಚೆಂ ಕಾಮ್ ಕರುಂಕ್ ಆನಿ ಎಕ್ಲೊ ಬಂಗಾಲಿ ಚೆಡೊ, ಬಾಯ್ಲೆಂ ವೊಡ್ತಾಚೆಂ ಆನಿ ಹೆರ್ ನಿತಳಾಯ್ ಕರುಂಕ್. ತಾಂಕಾ ದೊಗಾಂಯ್ಕಿ ಕಾಮಾಂತ್ಲೆ ಕಾಡ್ಲಾಂ ಮ್ಹಣ್ ಬಾವೊಜಿನ್ ಸಾಂಗ್ಲೆಂ.

ಸಿಂತಿಯಾ ಆಯಿಲ್ಲ್ಯಾನ್ ಎಕ್ಲ್ಯಾಚೊ ಸಾಂಬಾಳ್ ಉರ‍್ಲೊ ಮ್ಹಣ್‌ಂಯ್ ತಾಣೆ ಮ್ಹಳ್ಳೆಂ.

ಗಾಂವಾ ಥಾವ್ನ್ ಯೆತಾನಾಂಚ್ಚ್ ಆಮ್ಚ್ಯಾ ಭುರ‍್ಗ್ಯಾಂಚೆ ಇಸ್ಕಾಲ್ ಬದ್ಲುಂಕ್ ಜಾಯ್ ಜಾಲ್ಲಿಂ ದಸ್ತವೆಜಾಂ ಆಮಿಂ ಹಾಡ್‌ಲ್ಲಿಂ. ಆಮ್ಚ್ಯಾ ಭುರ‍್ಗ್ಯಾಂಕ್ ವಾದಿ ಕಬೀರ್ ಇಸ್ಕಾಲಾಂತ್ ಭರ‍್ತಿ ಕೆಲಿಂ. ತಾಂಚೆ ಫೀಸ್ ಬಾವೊಜಿನ್ ಭರ‍್ಲೆ ಆನಿ ಆಮ್ಚ್ಯಾ ಸಾಂಬಾಳಾಂತ್ಲೆ ಮುಖ್ಲ್ಯಾ ಮಹಿನ್ಯಾಂನಿ ಕಳ್ವಿತೆಲೆ ಮ್ಹಣ್ ತಿಳ್ಸಿಲೆಂ.

ಸಿಂತಿಯಾಕ್ ಸಾಂಬಾಳ್ ಆಸ್‍ಲ್ಲೊ. ತಾಣೆ ಸಗ್ಳೆಂ ಘರ್ ಸಾಂಬಾಳುಂಕ್. ರಾಂದಾಪ್ ಕರುಂಕ್. ಬಾಯ್ಲೆಂ ಆಂಗಣ್ ಆನಿ ತೋಟ್ ಸಾಂಬಾಳುಂಕ್. ಮ್ಹಾಕಾ ಘರ್ ಸಾಂಬಾಳುಂಕ್, ಘರಾಕ್ ಜಾಯ್ ಜಾಲ್ಲೆಂ ಹಾಡುಂಕ್ ಆನಿ ತಾಚೆ ಬಿಸ್‌ನೆಸ್ ಸಾಂಬಾಳುಂಕ್. ಆಮ್ಚೆಂಚ್ಚ್ ಘರ್ ಮ್ಹಳ್ಳ್ಯಾಬರಿ ಹಾಂವೆ ಆನಿ ಸಿಂತಿಯಾನ್ ಘರ್ ಸಾಂಬಾಳುಂಕ್. ಕಿತ್ಯಾಕ್ ಬಾವೊಜಿಕ್ ಆನಿ ವಿಲ್ಮಾಕ್ ತಾಂಚ್ಯಾ ಕಾಮಾ ವೊರ‍್ವಿಂ, ಭಾಗೆವಂತ್ಪಣಾಚ್ಯಾ ದೈವಿಕ್ ಕಾರ‍್ಯಾಂ ವೊರ‍್ವಿಂ ಪುರ‍್ಸತ್ ಬಿಲ್ಕುಲ್ ನಾತ್‌ಲ್ಲಿ.

ಬಾವೊಜಿಕ್ ಬಸ್ಸಾಂ ಆಸ್‌ಲ್ಲಿಂ. ಆತಾಂ ತೊ ಬಿಸ್‌ನೆಸ್ ವಾಡಂವ್ಕ್ ಚಿಂತ್ತಾಲೊ. ಬಾಂದ್ಪಾ ಬಾಂದ್ಚೆ ಬಿಸ್‌ನೆಸ್ ಆನಿ ತ್ಯಾ ಖಾತಿರ್ ತಾಚೆಂ ಬಸ್ಸಾಚೆಂ ಬಿಸ್‌ನೆಸ್ ಪಳಂವ್ಕ್ ಭಾರಿಚ್ಚ್ ಸಮ್ಜಣೆಚೊ ಆನಿ ವಿಸ್ವಾಸಿ ಮನಿಸ್ ಜಾಯ್ ಆಸ್‌ಲ್ಲೊ. ಹಾಚ್ಯಾ ಆದಿಂ ಕಿತ್ಲೆಶೆ ಜಣ್ ಆಯಿಲ್ಲೆ ಆನಿ ತಾಣಿ ತಾಕಾ ತೊಪಿಚ್ಚ್ ದವರ್‌ಲ್ಲಿ ಮ್ಹಣ್ ತಾಣೆ ಕೆದಾಳಾಯ್ ಸಾಂಗ್ಚೆಂ ಆಸ್‌ಲ್ಲೆಂ. “ಮ್ಹಜ್ಯಾ ತಸಲ್ಯಾ ಬರ‍್ಯಾ ಆನಿ ದೇವ್ ಭಿರಾಂತೆಚ್ಯಾ ಮನ್ಶಾಕ್ ಕೆದ್ನಾಂಯ್ ಫಟ್ಕಿರೆಚ್ಚ್ ಮನಿಸ್ ಕಾಮಾಚೆ ಮೆಳ್ತಾತ್… ಆತಾಂ ತರ್‌ಯ್ ತುಂ ಏಕ್ ನಿತಿವಂತ್ ಮನಿಸ್ ಮೆಳ್ಳೊಯ್…” ತಾಣೆ ಮ್ಹಜ್ಯಾ ಲಾಗಿಂ ಸಾಂಗ್‌ಲ್ಲೆಂ.

ಬಾವೊಜಿಚ್ಯಾ ಬಸ್ಸಾಂನಿ ವಾದಿ ಕಬೀರ್ ಭಾರತೀಯ್ ಇಸ್ಕಾಲಾಚ್ಯಾ ಭುರ‍್ರ‍್ಗ್ಯಾಂಕ್ ವೆವೆಗ್ಳ್ಯಾ ಜಾಗ್ಯಾಂ ಥಾವ್ನ್ ಸಕಾಳಿಂ ಇಸ್ಕಾಲಾಕ್ ಹಾಡುಂಕ್ ಆನಿ ದೊನ್ಪಾರಾಂ ತಾಂಚ್ಯಾ ತಾಂಚ್ಯಾ ಘರಾ ಬಾಗ್ಲಾರ್ ಸೊಡುಂಕ್. ದೊನ್ಪಾರಾಂಯ್ ಭುರ‍್ಗ್ಯಾಂಕ್ ಹಾಡುಂಕ್ ಆನಿ ಉಪ್ರಾಂತ್ ಸಾಂಜೆರ್ ಸೊಡುಂಕ್ ಆಸ್‌ಲ್ಲೆಂ. ಆಮ್ಚಿಂ ಬಸ್ಸಾಂ ವಾದಿ-ಕಬೀರ್, ದಾರ್‌ಸೈತ್, ಮಸ್ಕತ್ ಮಾತ್ರ್ ನ್ಹಯ್ ಕುರುಮ್, ಆಲ್-ಕುವೆರ್, ಸೀಬ್, ಗಾಲಾ ತೆವ್ಶಿನ್ ಸಯ್ತ್ ವೆತಾಲಿಂ. ತಿಂ ಬಸ್ಸಾಂ ಚಲಂವ್ಕ್ ಡ್ರೈವರ್ ಪುರಾ ಒಮಾನಿ. ಹರ‍್ಯೆಕಾ ಬಸ್ಸಾರ್ ಎಕ್ಲೊ ಭಾರತೀಯ್, ಕುಮ್ಕೆ-ಕಾಮೆಲಿ ಭುರ‍್ಗ್ಯಾಂಕ್ ಸಾಂಬಾಳುಂಕ್. ಒಮಾನಿ ಡ್ರೈವರಾಂಕ್ ಸಾಂಬಾಳ್ಚಿ ಜವಾಬ್ದಾರಿ ಮ್ಹಜಿ. ಸಾವ್ದಿ ಆಸ್‌ಲ್ಲೊಂ ಆನಿ ಡೈವರ್ ಜಾವ್ನ್ ಕಾಮ್ ಕೆಲ್ಲ್ಯಾನ್ ಮ್ಹಾಕಾ ಅರ‍್ಭಿ ಭಾಸ್ ಯೆತಾ ಆನಿ ಬಸ್ಸಾಂಚ್ಯಾ ಓಮಾನಿ ಡ್ರೈವರಾಂಕ್ ಸಾಂಬಾಳುಂಕ್ ಸುಲಭ್ ಮ್ಹಣ್ ಬಾವೊಜಿಕ್ ಕಳಿತ್ ಆಸ್‌ಲ್ಲೆಂ.

ಸಿಂತಿಯಾ ಸಕಾಳಿಂ ಚಾರ್ ವೊರಾರ್ ಉಟ್ತಾಲೆಂ ಆನಿ ಉಟಾಜಯ್‌ಚ್ಚ್ ಪಡ್ತಾಲೆಂ. ಬಾವೊಜಿ ಸಾಡೆ ಚಾರ್ ವೊರಾಂಕ್ ಉಟ್ತಾಲೊ. ಸಾದಾರ್ಣ್ ಊಬ್ ಜಾಲ್ಲ್ಯಾ ಉದ್ಕಾಚೊ ತಾಂಬ್ಲೆರ್ ಆನಿ ಗ್ಲಾಸ್ ಎಕಾ ಟ್ರೆಂತ್ ಮಾಂಡುನ್, ತಾಚ್ಯಾ ಸಾಂಗಾತಾ ವೊಡ್ತಾಂತ್ ಆಸ್‌ಲ್ಲಿಂ ತುಳ್ಸಿಚಿಂ ಪಾಂಚ್ ಜಿವಿಂ ಪಾನಾಂ ಬರಿಂ ಕರ‍್ನ್ ಧುವ್ನ್, ಪಿರಿಂತ್ ದವರ‍್ನ್ ತೊ ಕೂಡಾಥಾವ್ನ್ ಭಾಯ್ರ್ ಯೆತಾನಾ ಮೆಜಾರ್ ತಯಾರ್ ಆಸಾಜಯ್. ತುಳ್ಸಿಚಿಂ ಪಾನಾಂ ಚಾಬೊನ್ ಉದಾಕ್ ಪಿಯೆವ್ನ್ ತೊ ಮಾಗ್ಣ್ಯಾಕ್ ಬಸ್ತಾಲೊ. ಅರ‍್ಧ್ಯಾ ಘಂಟ್ಯಾಚೆಂ ಮಾಗ್ಣೆಂ ಜಾತಚ್ಚ್ ಬಾವೊಜಿ ಆನಿ ವಿಲ್ಮಾ ಭಾಯ್ರ್ ಸರೊನ್ ಮಿಸಾಕ್ ವೆತಾಲಿಂ.

ತಿಂ ಮಿಸಾಕ್ ಗೆಲ್ಲಿಂಚ್ಚ್ ತಾಂಚ್ಯಾ ಭುರ‍್ಗ್ಯಾಂಕ್ ಉಟಯ್ಜಯ್. ಪಂದ್ರಾ ವೀಸ್ ಪಾವ್ಟಿಂ ಉಲೊ ಕೆಲ್ಯಾ ಉಪ್ರಾಂತ್ ತಾಣಿ ಉಟೊನ್ ಭಾಯ್ರ್ ಯೆಂವ್ಚೆಂ. ನಾಣ್ಯೆಕ್ ವೆತಾನಾ ಬ್ರಶಾಕ್ ಪೇಸ್ಟ್ ಲಾವ್ನ್ ಹಾತಿಂ ದಿಜಯ್. ನಾಣ್ಯೆಂತ್ಲಿ ಭಾಯ್ರ್ ಯೆತಾನಾ ತೊಂಡ್ ಪುಸುಂಕ್ ತುವಾಲೊ ದೀಂವ್ಕ್ ಆಸಾ. ಉಪ್ರಾಂತ್ ತಿಂ ಮೆಜಾರ್ ಬಸ್ಲ್ಯಾರ್ ತಾಂಕಾ ಜಾಯ್ ಜಾಲ್ಲೊ ನಾಸ್ಟೊ ತಯಾರ್ ದವರುನ್ ತೊ ಖಾಂವ್ಚ್ಯಾಕ್ ಪರಾತ್ತಿಜಯ್. ಥೊಡ್ಯಾ ಪಾವ್ಟಿಂ ತೊಂಡಾಕ್‌ಯ್ ದೀಜಾಯ್. ತ್ಯಾ ಮಧೆಂ ತಾಣಿಂ ನಿದ್‌ಲ್ಲೆಂ ಬೆಡ್ಡ್ ಸಮಾ ಕರ‍್ನ್, ಇಸ್ತ್ರಿ ಕೆಲ್ಲೆಂ ತಾಂಚೆ ಯುನಿಫೊರ‍್ಮ್ ತಯಾರ್ ದವರಿಜಾಯ್. ತಾಂಚ್ಯಾ ಮೊಚ್ಯಾಂಕ್ ಪೊಲಿಶ್ ಕರ‍್ನ್, ಸೊಕ್ಸ್ ತಾಚೆ ವಯ್ರ್ ದವರಿಜಾಯ್. ಇಸ್ಕಾಲಾಂಚಿ ಪೊತಿಂ ಉಕಲ್ನ್, ಸಕಯ್ಲ್ ಹಾಡ್ನ್, ಕಾರಾರ್ ದವರಿಜಾಯ್. ತಾಂಕಾ ಇಸ್ಕಾಲಾಕ್ ಪಾವಂವ್ಚಿ ಜವಾಬ್ದಾರಿ ಮ್ಹಜಿ.

ಆಮ್ಚಿಂ ಭುರ್ಗಿಂ, ಲಿಯೊನಾರ‍್ಡ್ ಆನಿ ಲಿಯೋನಿ, ಬಾವೊಜಿ ಆನಿ ವಿಲ್ಮಾಚಿಂ ಭುರ‍್ಗಿಂ ಆರೋನ್ ಆನಿ ಅಭಿಗೇಲ್ ಹಾಂಚ್ಯಾ ವರ್ನಿ ಪ್ರಾಯೆನ್ ಲ್ಹಾನ್. ಪುಣ್, ಆಮಿಂ ತಾಂಕಾ ವೆಗ್ಳಿಚ್ಚ್ ಸವಯ್ ಕೆಲ್ಲಿ. ತಾಂಕಾ ಖಂಚೇಯ್ ಆಟ್‌ನೇಟ್ ಕರುಂಕ್ ಆಮ್ಚ್ಯಾ ಲಾಗಿಂ ಪುರ‍್ಸತ್‌ಯ್ ನಾತ್‌ಲ್ಲಿ. ಎಲಾರಮಾಚಿ ಕಾಂಪಿಣ್ ವಾಜ್ತಾನಾ ತಿಂ ಉಟೊನ್ ಬಸ್ತಾಲಿಂಚ್ಚ್. ಆಮ್ಕಾಂ ಆಸ್‌ಲ್ಲ್ಯಾ ಲ್ಹಾನ್ ನಾಣ್ಯೆಂತ್ ಎಕಾ ಪಾಟ್ಲ್ಯಾನ್ ಎಕ್ಲ್ಯಾನ್ ವಚೊಂಕ್. ನಿತಳಾಯ್ ಜಾಲ್ಲಿಚ್ಚ್ ಕುಜ್ನಾಕ್ ಯೇವ್ನ್ ಫ್ರಿಡ್ಜಾಂತ್ ಆಸ್‌ಲ್ಲೆಂ; ಯಾ ಮೆಜಾರ್ ಆಸ್‌ಲ್ಲೊ ಬ್ರೆಡ್ ಲೊಣಿ ಸಾರವ್ನ್ ಯಾ ಆದ್ಲ್ಯಾ ದಿಸಾ ತಯಾರ್ ಕೆಲ್ಲೆಂ ಕಿತೆಂಯ್ ಉರುಲ್ಲೆಂ ಆಸಾ ತರ್ ಖಾತಾಲಿಂ. ಫ್ರಿಡ್ಜಾಂತ್ಲೆ ದೂದ್ ಕಾಡ್ನ್, ಕುಸ್ಕುಟ್ ಹುನ್ ಕರ‍್ನ್ ಪಿಯೆತಾಲಿಂ. ತಾಂಚಿ ಜೆವ್‌ಲ್ಲಿಂ ಆಯ್ದಾನಾಂ ತಾಣಿಂಚ್ಚ್ ಧುವ್ನ್ ದವರುಂಕ್. ಆಪ್ಲಿಂ ವಸ್ತುರಾಂ ತಯರ್ ಕರ‍್ನ್ ಭಾಯ್ರ್ ಸರ‍್ನ್ ವಚೊಂಕ್.

ಹಾಂವ್‍ಯ್ ಫಾಂತ್ಯಾರ್ ಚಾರ್ ವೊರಾರ್ ಉಟ್ತಾಲೊಂ. ಹಾಂವ್ ಯೆತಾಂ ಮ್ಹಣಾಸರ್ ಕಾರಾಂ ಧುಂವ್ಕ್ ಬಾಯ್ಲೊ ಮನಿಸ್ ಯೆತಾಲೊ. ಹಾಂವ್ ಆಯಿಲ್ಲೊಂಚ್ಚ್ ಬಾವೊಜಿನ್ ತಾಕಾ ರದ್ದ್ ಕೆಲ್ಲೆಂ. ಬಾವೊಜಿಚೆಂ, ವಿಲ್ಮಾಚೆಂ ಆನಿ ಮ್ಹಜೆಂ ಕಂಪ್ಣೆಚೆಂ ಕಾರ್ ಧುಂವ್ಕ್ ಮ್ಹಾಕಾ. ಉಪ್ರಾಂತ್ ಬಸ್ಸಾಂ ಆಸ್ಚ್ಯಾ ಲಾಗಿಂ ವಚೊನ್ ಡ್ರೈವರ್ ಆನಿ ಕುಮ್ಕೆ ಮನಿಸ್ ಆಯ್ಲ್ಯಾತ್‌ಗೀ ಮ್ಹಣ್ ಪಳಂವ್ಕ್. ತಾಂಕಾ ಜೊಕ್ತ್ಯಾ ಕುಶಿನ್, ಜಾಗ್ಯಾಂಕ್ ದಾಡುಂಕ್. ಬಸ್ಸಾಂ ಗೆಲ್ಯಾ ಉಪ್ರಾಂತ್ ಪಾಟಿಂ ಘರಾ ಯೇವ್ನ್ ಆಮ್ಚ್ಯಾ ಆನಿ ಬಾವೊಜಿಚ್ಯಾ ಭುರ‍್ಗ್ಯಾಂಕ್ ಇಸ್ಕಾಲಾಕ್ ವೊರೊಂಕ್. ಬಸ್ಸಾಂಚೆ ಡ್ರೈವರ್ ಯೆನಾಸ್ತಾನಾ ಹಾಂವ್ ಯೆಂವ್ಕ್ ಇಲ್ಲೊ ತಡವ್ ಜಾಲೊ ತರ್ ಸೆಜಾರ‍್ಚ್ಯಾ ಮಲ್ಭಾರ‍್ಯಾಂಚ್ಯಾ ಭುರ‍್ಗ್ಯಾಂ ಸಾಂಗಾತಾ ಚವ್ಗಾಂ ಭುರ‍್ಗ್ಯಾಂಕ್ ದಾಡ್ಚಿ ಜವಾಬ್ದಾರಿ ಸಿಂತಿಯಾಚಿ.

ಬಾವೊಜಿ ಆನಿ ವಿಲ್ಮಾ ಮಿಸಾ ಥಾವ್ನ್ ಪಾಟಿಂ ಯೆತಾನಾ ತಾಂಚೊ ನಾಸ್ಟೊ ಸಿಂತಿಯಾನ್ ತಯಾರ್ ಕರ‍್ನ್ ದವರಿಜಯ್. ಬಾವೊಜಿಕ್ ಜಿವಾಚಿ ಆನಿ ಭಲಾಯ್ಕೆಚಿ ಭಿರಾಂತ್ ನಾತ್‌ಲ್ಲಿ ಕಿತ್ಯಾಕ್ ತೊ ದೆವಾಕ್‌ಚ್ಚ್ ಪಾತ್ಯೆಂವ್ಚೊ ಮನಿಸ್. ತಾಚೊ ಜೀವ್ ತಾಣೆ ಜೆಜುಕ್‌ಚ್ಚ್ ಸಮರ‍್ಪಿಲ್ಲೊ. ಪುಣ್, ಖಾಂವ್ಚ್ಯಾಂತ್ ಭಾರಿಚ್ಚ್ ನಾಜೂಕಾಯ್ ಸಾಂಬಾಳ್ತಾಲೊ. ಮಿಸಾ ಥಾವ್ನ್ ಆಯಿಲ್ಲ್ಯಾ ಫರಾ ಪಾಂಚ್ ಬದ್ಮಾಂ, ದೋನ್ ಖಾಜುರ್, ತೀನ್ ಕಾಜುಚೆ ಮೋಯ್, ಚಾರ್ ವಾಲ್‍ನಟ್, ಇಲ್ಲೆಶ್ಯೊ ಬಿಯೊ ತೊ ಖಾತಾಲೊ. ಹೆಂ ಖೆಲ್ಯಾ ಉಪ್ರಾಂತ್ ಇಲ್ಲಿಶಿ ಪೊರೆಜ್, ಯಾ ತೀನ್ ಚಾರ್ ಪಾನ್ಪಳೆ ಆನಿ ಚೆಟ್ಣಿ ಯಾ ಥೊಡ್ಯಾ ದಿಸಾಂನಿ ಪಾಂವ್ ಆನಿ ಚರಬ್ ನಾತ್‌ಲ್ಲಿ ಲೊಣಿ. ಹೆಂ ಜಾಲ್ಯಾ ಉಪ್ರಾಂತ್, ಅರ‍್ಧ್ಯಾ ಘಂಟ್ಯಾನ್ ಗ್ರೀನ್ ಟಿ ಯಾ ಉಣ್ಯಾ ಚರ‍್ಚೆಚೆಂ ದೂದ್ ಘಾಲ್ಲಿ ಚ್ಹಾ.

ವಿಲ್ಮಾಕ್ ಇಲ್ಲೊ ವೆಗ್ಳೊ ನಾಸ್ಟೊ. ಮೊಟಾಯ್ ವಾಡೊಂಕ್ ನಜೊ ಮ್ಹಣ್ ತಾಚೆಂ ಖಾಣ್ ವಿಂಗಡ್‌ಚ್ಚ್. ವಿಲ್ಮಾ ಕಾಮಾಕ್ ವೆತಾನಾ ತಾಕಾ ಜಾಯ್ ಜಾಲ್ಲಿ ಟಿಫಿನ್ ತಯಾರ್ ಕರ‍್ನ್ ದವರುಂಕ್. ಹಿ ಸರ‍್ವ್ ಜವಾಬ್ದಾರಿ ಸಿಂತಿಯಾಚಿ.

ಬಾವೊಜಿ ಆನಿ ವಿಲ್ಮಾ ಕಾಮಾಕ್ ಗೆಲ್ಯಾ ಉಪ್ರಾಂತ್ ಸಿಂತಿಯಾನ್ ಸಗ್ಳೆಂ ಘರ್ ನಿತಳ್ ಕರುಂಕ್, ವೊಡ್ತ್ ಸಮಾ ಕರುಂಕ್, ಝಾಡಾಂಕ್ ಉದಕ್ ಸೊಡುಂಕ್, ದೊನ್ಪಾರಾಂಚೆ ಜೆವಾಣ್ ತಯಾರ್ ಕರುಂಕ್ ಆನಿ ಉಪ್ರಾಂತ್ ಸಾಂಜೆಚಿ ತಯಾರಾಯ್.

ಅಶೆಂ ಸಕಾಳಿಂ ಥಾವ್ನ್ ರಾತ್ ಮ್ಹಣಾಸರ್ ಸಿಂತಿಯಾಕ್ ಜಾಂವ್ ಮ್ಹಾಕಾ ಜಾಂವ್ ಬಿಲ್ಕುಲ್ ಪುರ‍್ಸತ್ ನಾತ್‌ಲ್ಲಿ. ರಾತಿಕ್ ಬಾವೊಜಿ ಆನಿ ಭುರ‍್ಗ್ಯಾಂನಿ ಸಾಂಗಾತಾ ಜೆವ್ಲ್ಯಾ ಉಪ್ರಾಂತ್ ತಾಂಚ್ಯೊ ಬೊಶಿಯ್ಯೊ ಕಾಡ್ನ್, ಆಮಿಂ ಜೇಂವ್ಕ್.

ಹೆಂ ಪೂರಾ ಜಾತಾನಾ ಮಧ್ಯಾನ್ ಜಾತಾಲಿಚ್ಚ್….

***

ಆಮಿಂ ಯೇವ್ನ್ ದೋನ್ ವರ‍್ಸಾಂ ಜಾಲ್ಲಿಂ. ದೋನ್ ವರ‍್ಸಾಂ ಕಸಿಂ ಪಾಶಾರ್ ಜಾಲಿಂ ಮ್ಹಳ್ಳೆಂಚ್ಚ್ ಕಳ್ಳೆಂ ನಾ.

ಹ್ಯಾ ದೋನ್ ವೊರ‍್ಸಾಂನಿ ಆಮಿಂ ಘರಾ ಭಾಯ್ರ್ ಗೆಲ್ಲ್ಯಾಂವ್ ಮ್ಹಳ್ಯಾರ್ ಪಕತ್ತ್ ಸುಕ್ರಾರಾ ದಿಸಾ ಮಿಸಾಕ್ ಮಾತ್ರ್.

ಆಯ್ಲೆವಾರ್ ಸಾಂಜೆರ್ ಸಿಂತಿಯಾನ್ ರಡ್ಚೆಂ ಸದಾಂಚೆಂ ಜಾಲ್ಲೆಂ. ಹಾಂವ್ ಜಾಣಾಸ್‌ಲ್ಲೊಂ – ತೆಂ ಕಿತ್ಯಾಕ್ ರಡ್ತಾ ಮ್ಹಣ್.

ಬಾವೊಜಿನ್ ಆನಿ ವಿಲ್ಮಾನ್ ಆಮ್ಕಾಂ ಘಾಣ್ಯಾರ್ ಘಾಲ್ಲ್ಯಾ ಕೊಬಾ ಬರಿ ಪಿಳ್‌ಲ್ಲೆಂ.

ಸುಪರ್‌ವೈಜರ್ ಮ್ಹಣ್ ಮ್ಹಾಕಾ ಹಾಡ್ನ್, ಎಕಾ ಕುಲ್ಕಾರಾ ಬರಿ ಸಕಾಳಿಂ ಥಾವ್ನ್ ರಾತ್ ವರೇಗ್ ಘೊಳಯಿಲ್ಲೆಂ. ಸುಪರ್‌ವೈಜರ್ ಮ್ಹಳ್ಳೊ ಬಿಲ್ಲೊ, ಬೆಷ್ಟೆಂ ತರ್‌ಯ್ ದಿಲ್ಲೊ ಪಕತ್ತ್ ‘ಒವರ್ ಟಾಯ್ಮ್’ ದಿಂವ್ಕ್ ನಜೊ ಮ್ಹಳ್ಳ್ಯಾ ಖಾತಿರ್.

ಘರಾಂತ್ ಕಾಮಾಕ್ ಬಾಯ್ಲ್ಯಾ ಕಾಮಾಚ್ಯಾ ಮನ್ಶಾಕ್ ದವರ್‌ಲ್ಲ್ಯಾ ವೆಳಾರ್ ಸಿಂತಿಯಾ ತಿತ್ಲೆಂ ಕಾತ್ತ್ಯಾಬರಿ ಕಾಮ್ ಕರ‍್ಚೆಂ ಕೋಣ್ ಮೆಳಾತ್ ? ಹಾಂಚ್ಯಾ ಕಾಮಾಂಚ್ಯಾ ಅಡ್ಚಣೆಂತ್ ಮಹಿನ್ಯಾಕ್ ಏಕ್ ಕಾಮಾಚೆಂ ಮನಿಸ್ ಬದ್ಲಾಲ್ಲೆಂಯ್ ಆಸಾ… ಆಮಿಂ ಆಯ್ಲ್ಯಾ ಉಪ್ರಾಂತ್ ಮಾತ್ರ್ ದೋನ್ ವರ‍್ಸಾಂ ತಾಂಕಾ ಕಾಮಾಚಿ ಬಿಲ್ಕುಲ್ ಖಂತ್ ನಾತ್‌ಲ್ಲಿಚ್ಚ್…

“ಮ್ಹಾಕಾ ಆನಿ ಚಡ್ ಕಾಮ್ ಕರುಂಕ್ ಜಾಂವ್ಚೆಂ ನಾ…. ಹ್ಯಾ ಬಾವೊಜಿನ್ ಆಮ್ಕಾಂ ಹಾಂಗಾಸರ್ ಗುಲಾಮ್‌ಂಚ್ಚ್ ಕೆಲಾಂ… ತುಂ ಎಕ್‌ಚ್ಚ್ ದುಸ್ರ್ಯಾ ಕಡೆ ಕಾಮ್ ಸೊದ್ ಯಾ ವರಸ್ ಆಖೇರ್ ಜಾತಾನಾ ಆಮಿಂ ಪಾಟಿಂ ಗಾವಾಕ್ ಯಾ…”

ಸಿಂತಿಯಾಚೆಂ ದೂಕ್ ಆನಿ ಸಿಂತಿಮೆಂತಾಂ ಮ್ಹಾಕಾ ಖಂಡಿತ್ ಜಾವ್ನ್ ಸಮ್ಜತಾಲೆಂ.

ಪುಣ್, ಆಮ್ಚೆಂಚ್ಚ್ ಘರ್ ಜಾಯ್ಜಯ್ ಮ್ಹಣ್ ಆಮ್ಚೆ ಥಂಯ್ ಆಸ್‌ಲ್ಲಿ ಆಶಾ ಆನಿಕ್‌ಯ್ ಸುಫಳ್ ಜಾಂವ್ಕ್ ನಾತ್‌ಲ್ಲಿ.

ಬಾವೊಜಿನ್ ಆಮ್ಕಾಂ ರಾವೊಂಕ್ ಘರ್ ದಿಲ್ಲೆಂ ವ್ಹಯ್!! ಬಾಡ್ಯಾಚೆಂ ಐವಜ್ ಕಳ್ವಿತಾಲೊ. ಜೆವ್ಣಾಚೊ ಖರ‍್ಚ್ ನಾತ್‌ಲ್ಲೊ ಪುಣ್, ವೀಜ್ ಸಕ್ತೆಚೆಂ ಆನಿ ಉದ್ಕಾಚೊ ವಾಂಟೊ ಮ್ಹಣ್ ಸಾರ‍್ಕೊ ಕಳ್ವಿತಾಲೊ. ಹರ‍್ಯೆಕಾಕ್ ಬಾವೊಜಿನ್ ಉಲಂವ್ಚೆಂ ಕ್ರಿಸ್ತಾಕ್ ಸಾಕ್ಸ್ ದೀವ್ನ್!! ಮೊಸ್ತು ನ್ಹಯ್ ಇಲ್ಲೆಂ ತರ್‌ಯ್ ದೀಜಾಯ್ ಮ್ಹಣ್!!

ಆಮಿ ಆಯಿಲ್ಲ್ಯಾ ಎಕಾ ವೊರ‍್ಸಾನ್ ಗಾವಾಕ್ ವಚೊಂಕ್ ಸೊಡ್ಲೆಂ ಪುಣ್, ವಿಮಾನಾಚ್ಯಾ ಟಿಕೆಟಿಚೊ ಖರ‍್ಚ್ ಆಮಿಂಚ್ಚ್ ದೀಂವ್ಕ್. ತ್ಯಾ ರಜೆಚ್ಯಾ ವೆಳಾರ್ ಸಿಂತಿಯಾಕ್ ಸಾಂಬಾಳ್ ನಾತ್‌ಲ್ಲೊ.

ಆಮ್ಕಾಂ ಉರ‍್ಚೆ ಪಕತ್ತ್ ಮ್ಹಜೊ ಮಾತ್ರ್ ಸಾಂಬಾಳ್. ಸಿಂತಿಯಾಚ್ಯಾ ಸಾಂಬಾಳಾಂತ್ ಘರಾಚ್ಯಾ ಭಾಡ್ಯಾಚೊ ವಾಂಟೊ, ಭುರ‍್ಗ್ಯಾಂಚ್ಯಾ ಇಸ್ಕೊಲಾಚೆ ಫೀಜ್ ಮ್ಹಣ್ ಹಾತಾಕ್ ಕಾಂಯ್‌ಚ್ಚ್ ಮೆಳಾನಾತ್‌ಲ್ಲೆ

ಇತ್ಲ್ಯಾ ಕಾಮಾಂತ್ ಆಡ್ಚಣೆಂತ್ ಆಮ್ಚಿ ಭಲಾಯ್ಕಿ ಪಾಡ್ ಜಾಲಿಚ್ಚ್….. ದೆಕುನ್, ಹಾಂವ್ ದುಸ್ರ್ಯಾ ಕಂಪ್ಣೆಂತ್ ಕಾಮ್ ಸೊದ್ತಾಂ ಮ್ಹಣ್ ಪ್ರಸ್ತಾಪ್ ಬಾವೊಜಿಲಾಗಿಂ ಘಾಲ್ಲೊಚ್ಚ್ ಆಮ್ಕಾಂ ಕಟಿಣ್ ತ್ರಾಸಾಕ್ ಕಾರಣ್‌ ಜಾಲೆಂ.

“ಪಳೆಯಾ… ತುಮಿಂ ಬರೆಂ ಜಾಯ್ಜಯ್ ಆನಿ ತುಮ್ಚ್ಯಾ ಭುರ‍್ಗ್ಯಾಂಕ್ ಬರೆಂ ಜಾಯ್ಜಯ್ ಮ್ಹಣ್ ತುಮ್ಕಾಂ ಹಾಂಗಾ ಹಾಡ್‌ಲ್ಲೆಂ… ತುಮ್ಕಾಂ ಮ್ಹಿನತ್ ಕಾಡ್ನ್ ಕಾಮ್ ಕರುಂಕ್ ನಾಕಾ… ಧರ‍್ಮಾಕ್ ಕೋಣ್ ಸಾಂಬಾಳ್ ದಿತಾ? ಕೊಣ್‌ಂಚ್ಚ್ ದೀನಾ… ಆನಿ … ಆಮ್ಚ್ಯಾ ಕಂಪ್ಣೆಚ್ಯೊ ಥೊಡ್ಯೊ ರೆಗ್ರೊ ಆಸಾತ್ ಆನಿ ತುಕಾ ಕಳಿತ್ ಆಸಾ… ತ್ಯೊ ರೆಗ್ರೊ ತುಕಾ ಮ್ಹಣ್ ನ್ಹಯ್ ಪುಣ್ ಕಂಪ್ಣೆಂತ್ ಕಾಮ್ ಕರ‍್ಚ್ಯಾಕ್ ಸರ‍್ವಾಂಕ್ ಎಕ್‌ಚ್ಚ್. ಆಮ್ಚ್ಯಾ ಕಂಪ್ಣೆಂತ್ ಆಯ್ಲ್ಯಾ ಉಪ್ರಾಂತ್ ಕಾಮ್ ಸೊಡ್ಚೆಂ ತರ್ ‘ಎನ್.ಒ.ಸಿ’ ಮ್ಹಳ್ಯಾರ್ ದುಸ್ರ್ಯಾ ಕಂಪ್ಣೆಂತ್ ಕಾಮ್ ಕರ‍್ಚ್ಯಾಕ್ ಜಾಯ್ ಜಾಲ್ಲೆಂ ‘ಒಪ್ಪಿಗೆ ಪತ್ರ್’ ಮಾತ್ರ್ ಮೆಳ್ಚೆಂ ನಾ… ತುಮಿಂ ಪಾಟಿಂ ಗಾವಾಕ್‌ಚ್ಚ್ ವಚಾಜಯ್…”

ಭಾಗೆವಂತ್ ಮನಿಸ್… ಕ್ರಿಸ್ತಾಚೊ ಪಾಟ್ಲಾವ್ದಾರಿ… ಆಮ್ಚೆರ್ ದಯಾ ದವರ‍್ತಲೊ ಮ್ಹಣ್ ಆಮಿಂ ಚಿಂತುನ್ ಆಸ್‌ಲ್ಲ್ಯಾಂವ್… ಆಮಿಂ ಜಿಣಿ ನಂದನ್ ಜಾಂವ್ಚ್ಯಾ ಖಾತಿರ್ ದುಸ್ರ್ಯಾ ಕಂಪ್ಣೆಂತ್ ಕಾಮ್ ಕರ‍್ಚ್ಯಾ ಖಾತಿರ್ ಸಮ್ಮತಿ ಪತ್ರ್ ‘ಎನ್.ಒ.ಸಿ.’ ಖಂಡಿತ್ ಜಾವ್ನ್ ದಿತಲೊ ಮ್ಹಣ್ ಆಮಿಂ ಚಿಂತುನ್ ಆಸ್‌ಲ್ಲ್ಯಾಂವ್. ಪುಣ್, ಆಮ್ಚ್ಯಾ ಭರ‍್ವಸ್ಯಾಚ್ಯಾ ಚಿಂತ್ಪಾಕ್ ಉಜ್ಯಾರ್ ಲಾಸ್‌ಲ್ಲ್ಯಾಬರಿ ಜಾಲೆಂ. ಆಮಿಂ ಬಾವೊಜಿಚೆ ಪಾಯ್ ಧರುನ್ ಸಲ್ವಾಲ್ಲ್ಯಾಂವ್…

ತೊ ಒಪ್ಪಾಲೊಚ್ಚ್ ನಾ… ತಾಚೆಂ ಮನ್ ಕಳ್ವಳ್ಳೆಂ ನಾ…

ಆಮಿಂ ಪಾಟಿಂ ಗಾವಾಕ್‌ಚ್ಚ್ ವಚೊಂಕ್ ನಿರ‍್ಧಾರ್ ಕೆಲೊ…

***

ಪಾಟ್ಲ್ಯಾ ತೀನ್ ಹಫ್ತ್ಯಾಂನಿ ಆಮ್ಚೆಂ, ಮ್ಹಳ್ಯಾರ್ ಆಮ್ಚ್ಯಾ ಕುಟ್ಮಾ ಮಧ್ಲೆಂ ಆನಿ ಬಾವೊಜಿಚ್ಯಾ ಕುಟ್ಮಾ ಮಧ್ಲೆಂ, ಉಲವ್ಣೆಂ ಬಂಧ್ ಜಾಲ್ಲೆಂ.

ಆಮಿಂ ಪಾಟಿಂ ಗಾಂವಾಕ್ ವೆತಾಂ ಮ್ಹಳ್ಳ್ಯಾಕ್ ಬಾವೊಜಿ ದೆದೆಸ್ಪಾರ್ ಜಾಲ್ಲೊ. ತಾಚೆಂ ಕಾಮ್ ಕರ‍್ಚ್ಯಾಕ್ ಆಮ್ಚ್ಯಾ ತಸಲಿಂ ಹೆರಾಂ ಮನ್ಶಾಂ ಮೆಳ್ಚಿಂ ನಾಂತ್ ತೊ ಜಾಣಾಂಯ್ ಆಸ್‌ಲ್ಲೊ…

“ತುಮ್ಚೆಂ ಜಿವಿತ್ ಬರೆಂ ಜಾಯ್ಜಯ್ ಮ್ಹಣ್ ಇತ್ಲೊ ಖರ‍್ಚ್ ಕರ‍್ನ್ ತುಮ್ಕಾಂ ಹಾಡ್ಲೆಂ… ಏಕ್ ಮನ್ಶಾಕ್ ಹಾಂಗಾಸರ್ ಹಾಡಿಜಯ್ ತರ್ ಕಿತ್ಲೊ ಖರ‍್ಚ್ ಆಸಾ ತೆಂ ತುಂಮಿ ಬಿಲ್ಕುಲ್ ನೆಣಾಂತ್ ತರ್‌ಯ್ ಹಾಡ್ಲೆಂ… ತುಮಿಂ ಮಾತ್ರ್ ಅನುಪ್ಕಾರಿ ಮನ್ಶಾಂ… ಆತಾಂ ಮ್ಹಾಕಾ ಕಟಿಣಾಯೆನ್ ಲುಕ್ಸಾಣ್… ಪುಣ್ ಜೆಜುಚ್ಯಾ ನಾಂವಾನ್ ಹಾಂವ್ ತೆಂ ಸ್ವೀಕಾರ್ ಕರ‍್ತಾಂ…” ಬಾವೊಜಿ ಉಂಚಾಬಳ್ ಜಾಲೊ. ತಾಚ್ಯಾ ಸಾಂಗಾತಾ ವಿಲ್ಮಾಂಯ್…

“ತುಂವೆ ಆಮ್ಕಾಂ ಉದ್ದಾರ್ ಕರುಂಕ್ ಹಾಡ್‌ಲ್ಲೆಂಯ್ ನ್ಹಯ್ ಬಾವೊಜೆ…” ಹಾಂವ್ ಕಟಿಣಾಯೆನ್ ಉಲಯ್ಲೊಂ. “ತುಜೆಂ ಬಿಸ್‌ನೆಸ್ ವಾಡಯ್ಜಯ್… ತುಜ್ಯಾ ಕುಟ್ಮಾನ್ ಸುಖಾನ್ ಆಸಾಜಯ್ ಮ್ಹಣ್ ಆಮ್ಕಾಂ ಹಾಂಗಾಸರ್ ಹಾಡ್‌ಲ್ಲೆಂಯ್… ಕಸಲೆಂ ಚಿಂತಾಪ್ ತುಮ್ಚೆಂ??? ತುಮ್ಕಾಂ ಸದಾಂಯ್ ಮಾಗಾಜಯ್… ಕ್ರಿಸ್ತಾಕ್ ತುಮ್ಚ್ಯಾ ಖಾಕೆಂತ್ ದವರ‍್ಲಾ… ಕ್ರೀಸ್ತ್ ತುಮ್ಚೊ ಮಾತ್ರ್… ಆಮ್ಕಾಂ ಸುಕ್ರಾರಾ ಎಕಾ ಮಿಸಾಕ್ ವಚೊಂಕ್‌ಯ್ ಪುರ‍್ಸತ್ ನಾ… ಕಿತ್ಯಾಕ್ ತುಮ್ಚೆಂ ಮೊಡೆಂ ಆಮಿಂ ರಾಕೊಂಕ್ ಆಸಾ…”

ಉಲವ್ಣೆಂ ಬಳ್ವಂತ್ ಜಾತಾನಾ ಸಂಬಂಧಾಚೊ ಖಾಟ್ ತುಟ್‌ಲ್ಲೊ… ಆಮಿಂ ದುಸ್ಮಾನ್ ಜಾಲ್ಲ್ಯಾಂವ್… ಎಕಾಚ್ಚ್ ಪಾಕ್ಯಾ ಪಂದಾ ಜಿಯೆಂವ್ಚಿಂ ದೋನ್ ದುಸ್ಮಾನಾಂ ಸಾರ‍್ಕಿಂ ಕುಟ್ಮಾಂ…

“ತುಮಿಂ ಪಾಟಿಂ ವಚ್ಯೆತ್… ತುಮಿಂ ಮ್ಹಜ್ಯಾ ಖಾತಿರ್ ಯಾ ಆಮ್ಚ್ಯಾ ಕುಟ್ಮಾ ಖಾತಿರ್ ಮಸ್ಕತಾಕ್ ಆಯಿಲ್ಲ್ಯಾತ್ ನ್ಹಯ್… ಪುಣ್, ತುಮ್ಚ್ಯಾಚ್ಚ್ ಖಾತಿರ್…” ಬಾವೊಜಿನ್ ಸಾಂಗ್ತಾನಾ ಆಮ್ಚೆಂ ಮಸ್ಕತಾಂತ್ಲೆಂ ಜಿವಿತ್ ತುಟೊನ್ ಗೆಲೆಂ ತೆಂ ಖರೆಂ

ಆನಿ ಖರೆಂಚ್ಚ್ ಜಾವ್ನ್ ಆಮ್ಕಾಂ ಕಳಿತ್ ಆಸ್‌ಲ್ಲೆಂ…

ಬಾವೊಜಿನ್ ತಾಚ್ಯಾ ಕಂಪ್ಣೆಂತ್ ಹೆರಾಂ ಕಾಮೆಲ್ಯಾಂಕ್ ಕೆಲ್ಲ್ಯಾ ಬರಿಚ್ಚ್ ಆಮ್ಕಾಂ ಕರ‍್ತಲೊ ಮ್ಹಣ್… ಆನಿ ತಸೆಂಚ್ಚ್ ಕೆಲೆಂ…

ಆಮಿಂ ಪಾಟಿಂ ವೆತಾಂ ಮ್ಹಣಾಸರ್ ಆಮ್ಕಾಂ ಜಾತಾ ತಿತ್ಲಿ ಇಜಾ ತಾಣೆ ದಿಲಿ… ಚವ್ಗಾಂ ಜಣಾಂಕ್ ಎಕಾ ಕುಡಾಂತ್‌ಚ್ಚ್ ದವರ‍್ಲೆಂ… ಜೆವಾಣ್ ಸಯ್ತ್ ತಯಾರ್ ಕರುಂಕ್ ಆವ್ಕಾಸ್ ನಾ ಜಾಲೊ… ಆಮಿಂ ಸೊಸ್ಲೆಂ… ಕಿತ್ಯಾಕ್ ಆಮ್ಕಾಂ ಏಕ್ ಪಾವ್ಟಿಂ ಹಾಂಗಾ ಥಾವ್ನ್ ವಚಾಜಯ್ ಆಸ್‌ಲ್ಲೆಂ… ಸುಟ್ಕಾ ಜಾಯ್ ಆಸ್‌ಲ್ಲಿ… ಭುರ‍್ಗಿಂ ರಡ್ತಾಲಿಂ ಪುಣ್, ಆಮಿಂ ಸಮಧಾನೆನ್ ಜಿಯೆಲ್ಯಾಂವ್…

ಆಮ್ಚೆ ಪಯ್ಶೆ ಸಯ್ತ್ ಸಾರ‍್ಕೆ ದಿಲೆ ನಾಂತ್… ತಾಚೆಂ ಹಣೆಬರಫ್ ಹೆರಾಂ ಕಾಮೆಲ್ಯಾಂಕ್ ದಾಕಯಿಲ್ಲೆಂ ಆಮ್ಕಾಂಯ್ ಉಗ್ತ್ಯಾನ್ ದಾಕಯ್ಲೆಂ…

ಆನಿ ಆಮಿಂ ಮಸ್ಕತ್ ಸಾಂಡುನ್ ಪಾಟಿಂ ವೆತಾನಾ, ತಾಣೆ ಆಮ್ಕಾಂ ಪೊಟ್ಲುನ್ ಧರ‍್ಲೆಂ ನಾ… ಬಗರ್ ಉಲಯ್ಲೊ… ತೊಚ್ಚ್ ಸಾದೊ ಜಿನೊಸ್… ತಿಚ್ಚ್ ಸಾದಿ ಉಲವ್ಣ್ಯಾ ರೀತ್…

“ಕ್ರಿಸ್ತಾಚ್ಯಾಚ್ಚ್ ನಾಂವಾನ್ ಹಾಂವ್ ತುಮ್ಕಾಂ ಆದೇವ್ಸ್ ಮಾಗ್ತಾಂ… ಮ್ಹಜ್ಯಾ ಕಾಳ್ಜಾಂತ್ ತುಮ್ಚ್ಯಾ ವಿಶ್ಯಾಂತ್ ಕಾಂಯಿಂಚ್ಚ್ ಪಾಡ್ ನಾ… ದುಸ್ಮಾನ್ಕಾಯ್ ನಾ… ಆಮಿಂ ದುಸ್ರ್ಯಾಂಕ್ ಭಗ್ಸಿಜಯ್ ಮ್ಹಣ್‌ಂಚ್ಚ್ ಕ್ರಿಸ್ತಾನ್ ಶಿಕಯ್ಲಾಂ… ತುಮ್ಕಾಂ ಹಾಂವೆ ಭಗ್ಸಿಲಾಂ… ತುಮಿಂ ಬರೆ ಜಾಯಾ ಮ್ಹಣ್ ಆಮಿಂ ಆಶೆಂವ್ಚೆಂ…”

ಪಯ್ಸ್ ರಾವೊನ್ ಆಮ್ಚ್ಯಾ ಲಾಗಿಂ ಉಚಾರ್‌ಲ್ಲ್ಯಾ ಬಾವೊಜಿಚ್ಯಾ ಆಖ್ರೇಚ್ಯಾ ಉತ್ರಾಂಕ್ ಆಯ್ಕೊನ್ ಆಮ್ಚಿಂ ಕಾಳ್ಜಾಂ ಹಿವಾಳೊನ್ ಗೆಲಿಂ… ತ್ಯಾ ಉತ್ರಾಂನಿ ಹಿಮ್ಸಾಣ್ ಆಸ್‌ಲ್ಲಿಚ್ಚ್… ಗಲೀಜ್ ಹಿಮ್ಸಾಣ್…

” ಫೂಣ್, ಹಾಂವ್ ತುಕಾ ಭಗ್ಸಿನಾ… ಮಾನೆಸ್ತ್ ಲಾಜರಸ್ ಮೆಂಡೊನ್ಸಾ… ಆನಿ ಕ್ರಿಸ್ತ್‌ಯ್ ತುಕಾ ಭಗ್ಸಿನಾ ಜಾಂವ್… ” ಹಾಂವೆ ಪಯ್ಲೆ ಪಾವ್ಟಿಂ ತಾಚೆಂ ನಾಂವ್ ಕಾಡ್ಲೆಂ. ಕೊಡ್ಸಾಣೆನ್ ಆನಿ ಕಾಳ್ಜಾಂತ್ ಭರ್‌ಲ್ಲಿ ದೂಕ್ ಸೊಸುಂಕ್ ತಾಂಕಾ ನಾಸ್ತಾನಾ…

ಆನಿ ಆಮಿಂ ಮಸ್ಕತ್ ಥಾವ್ನ್ ಪಾಟಿಂ ವಚೊಂಕ್ ಭಾಯ್ರ್ ಸರ‍್ಲ್ಯಾಂವ್…..

► ಕ್ಲೆರೆನ್ಸ್, ಕೈಕಂಬ

ಮಾಡಾಕಡೆ ಗಿಮಾಂತ್ ಆಸಾ ಕೆಲ್ಲ್ಯಾ ನಾಣ್ಯೆಂತ್ ತಾಂಬ್ಯಾಂಚ್ಯಾ ಮಾಂಡ್ಯಾಂತ್ಲೆ ಉದಕ್ ಚೆಂಬಾಂತ್ ಕಾಡ್ನ್, ಎಕೊಡೆಂ ತೊಂಡ್ ಧುವ್ನ್ ಮೊಡ್ಲಾಂಚ್ಯಾ ತಟ್ಟೆರ್ ಆಸ್‌ಲ್ಲೊ ಮುಂಡು ಕಾಡ್ನ್, ಪೆಂಕ್ಡಾಕ್ ಬಾಂಧುನ್ ಖೊಮಿಸ್ ಶಿರ‍್ಕಾವ್ನ್ ಸಕಾಳಿಂಚ್ಯಾ ಮಿಸಾಕ್ ಅಮ್ಸೊರಾನ್ ಭಾಯ್ರ್ ಸರ‍್ಚೊ ರುಜಾರ್ ಮೆಂದೊಸ್ ಆಪ್ಲ್ಯಾ ನಾತಿಲಾಗಿಂ ಬೊಬಾಟೊನ್ ವಿಚಾರಿಲಾಗ್ಲೊ.

ಘರಾ ಭಿತರ್ ಥಾವ್ನ್ ಕೊಣೆಂಯ್ ಜವಾಬ್ ದಿಲಿ ನಾ.

ಸೊಪ್ಯಾ ವಯ್ಲ್ಯಾ ವೊಣದಿಚೆರ್ ಉಮ್ಕಾಳ್ಚ್ಯಾ ಗಡಿಯಾಳಾರ್ ವೊರಾಂ ಸಾಡೆ ಸ ಜಾಲ್ಲಿಂ. ಸದಾಂಚ್ಯಾ ಮಿಸಾಕ್ ವೇಳ್ ಜಾಲ್ಲೊ.

ನಳ್ಯಾಂಚೆಂ ಘರ್ ತಾಂಚೆ. ಝಾಲ್ ಉತರ‍್ಲ್ಯಾರ್ ಮಾಡಿಯಾಂಚೆ ಲ್ಹಾನ್‌ಶೆಂ ತೋಟ್. ತೊಟಾಚಿ ಗೇಟ್ ಉತರ‍್ಲ್ಯಾರ್ ಮಾರೊಗ್. ಮಾರ‍್ಗಾರ್ ಸಾತ್ – ಆಟ್ ಮಿನುಟಾಂ ಸರಾರಾಂ ಚಲ್ಲ್ಯಾರ್ ಇಗರ‍್ಜ್ ಮೆಳ್ತಾ.

ಘರಾಂತ್ ಮುಖ್ಲ್ಯಾ ಸೊಪ್ಯಾಚ್ಯಾ ದೆಗೆನ್ ಆಸ್ಚ್ಯಾ ಕುಡಾಂತ್ ರುಜಾರ್ ಮೆಂದೊಸಾನ್ ನಿದ್ಚೆಂ. ಸದಾಂಯ್ ಮಿಸಾಚಿ ಘಾಂಟ್ ಜಾಂವ್ಚ್ಯಾ ಪಯ್ಲೆಂ ಉಟೊನ್ ತಾಚಿ ಸಕಾಳಿಂಚಿ ಆಮೊರಿ ಜಾತಾ. ಪಾನ್ಪೊಡ್ ಖಾಂವ್ಚಿ ಸವಯ್ ಆಸ್‌ಲ್ಲ್ಯಾನ್ ರಾತಿಕ್ ನಿದ್ಚ್ಯಾ ಪಯ್ಲೆಂ ಖಾಂವ್ಚ್ಯಾ ಪಾನ್ಪೊಡಿಚಿ ಪೀಕ್ ಘಾಲುಂಕ್ ಪಿಕ್ತಾಂಡಿ ಖಟ್ಲ್ಯಾ ಲಾಗಿಂಚ್ಚ್ ದವರ‍್ತಾ. ಸಕಾಳಿಂ ಪಿಕ್ತಾಂಡೆಂತ್ಲಿ ಪೀಕ್ ಮಾಡಾ ಮುಳಾಕ್ ಉಡವ್ನ್, ತಿ ಧುವ್ನ್ ಝಲಾಚ್ಯಾ ಪೊಂತಾರ್ ಚಿರ‍್ಯಾ ಫಾತ್ರಾರ್ ವೊಮ್ತಿ ಸುಕಾತ್ ಘಾಲ್ತಾ. ಕಾಕುಸ್ ಘರ‍್ಚ್ಯಾ ಬಾಯ್ಲ್ಯಾನ್ ಆಸ್‌ಲ್ಲ್ಯಾನ್ ಆತಾಂಯ್ ರಾತಿಂಚೆ ತೊ ತಸ್ತ್ ಖಟ್ಲ್ಯಾ ಲಾಗಿಂಚ್ಚ್ ದವರ‍್ತಾಲೊ ಆನಿ ರಾತಿಂ ಮುತೊಂಕ್ ಜಾಲೆಂ ತರ್ ತಾಂತುಂಚ್ಚ್ ಕರ‍್ತಾಲೊ. ತಸ್ತಾಂತ್ಲೆಂ ಮೂತ್ ತೊಟಾ ಬಗ್ಲೆನ್ ಮಾತಿಯೆಂತ್ ಪೂರ‍್ನ್ ದವರ್‌ಲ್ಲ್ಯಾ ಮೊಟ್ಕ್ಯಾಂತ್ ವೊತುನ್ ತಾಕಾ ಪರ‍್ನೆಂ ಆಯ್ದಾನ್ ತೊ ದಾಂಪ್ತಾಲೊ. ಸಾದಾರ‍್ನ್ ತ್ಯಾ ವೆಳಾರ್ ಮಿಸಾಚಿ ಘಾಂಟ್ ಜಾತಾಲಿ.

ಘಾಂಟ್ ಆಯ್ಕಾಲ್ಯಾ ಉಪ್ರಾಂತ್ ಮಾಂಡ್ಯಾ ಪಂದ್ಲಿ ಕರಿ ಬೊಟಾನ್ ವೋಡ್ನ್, ಆಮ್ಸೊರಾನ್ ದಾಂತ್ ಘಾಸುನ್, ತೊಂಡ್ ಧುವ್ನ್, ಖೊಮಿಸ್ ಶಿರ‍್ಕಾವ್ನ್, ಮುಂಡು ಬಾಂದುನ್ ತಾಣೆ ಇಗರ‍್ಜೆಕ್ ವೆಚೆಂ. ಇಗರ‍್ಜೆಕ್ ಪಾವ್ತಾನಾ ಸಾಡೆ ಸ ವೊರಾರ್ ಸುರು ಜಾಂವ್ಚಿ ಆಮೊರಿ ಆಕೇರ್ ಜಾತಾ. ತೊ ಪಾವ್ಲ್ಯಾ ಉಪ್ರಾಂತ್‌ಚ್ಚ್ ಮಿಸಾಚೆಂ ಕಾಂತಾರ್ ಮಿರೊಣ್ ಸುರು ಕರ‍್ತಾ ಮ್ಹಣ್ ತಾಣೆ ಕೆದ್ನಾಂಯ್ ಚಿಂತ್ಚೆಂ.

ಪುಣ್, ಆಜ್ ವೇಳ್ ಜಾಲ್ಲೊ. ಹ್ಯಾ ಮಿರ‍್ಣಿಚ್ಯಾ ಘಾಂಟಿಚ್ಯಾ ಆವಾಜಾಕ್ ರಾಕೊನ್ ರಾವೊಂಕ್ ನಜೊ ಮ್ಹಣ್ ತಾಣೆ ಕಿತ್ಲೆಶ್ಯಾ ಪಾವ್ಟಿಂ ಚಿಂತ್‌ಲ್ಲೆಂ ಆಸಾ. ವೊಣದಿರ್ ವೊಚ್ ಆಸಾ ಆನಿ ತಾಚೆರ್ ವೇಳ್ ಪಳವ್ನ್ ಭಾಯ್ರ್ ಸರಾಜಯ್ ಮ್ಹಣ್ ಚಿಂತ್ತಾಲೊ. ಪುಣ್, ತಸೆಂ ಕೆದಾಳಾಯ್ ಜಾಯ್ನಾತ್‌ಲ್ಲೆಂ. ಮಿಸಾಚ್ಯಾ ಘಾಂಟಿಕ್ ರಾಕೊನ್ ರಾಂವ್ಚಿ ಜಲ್ಮಾಚಿ ಸವಯ್ ಜಾಲ್ಲಿ … ಆನಿ ತ್ಯಾಚ್ಚ್ ಮಾರಿಚ್ಯಾ ಸವಯೆನ್ ಆಜ್ ಮಿಸಾಕ್ ವೇಳ್ ಜಾಲ್ಲೊಚ್ಚ್.

ಮಿಸಾಕ್ ವೇಳ್ ಜಾಲೊ ತರ್ ತೊ ದಿಸ್‌ಚ್ಚ್ ಪಾಡ್ ಜಾಲ್ಲ್ಯಾ ಬರಿಂ. ದೆವಾಚೆಂ ಬೆಸಾಂವ್ ನಾ ತರ್ ದೀಸ್ ಉದ್ದಾರ್ ಜಾತಾವೇ? ಆನಿ ಆಯ್ಚೊ ದೀಸ್ ಖಂಡಿತ್ ಜಾವ್ನ್ ಪಾಡ್‍ಚ್ಚ್…

ಆಜ್ ಕಾಂಯ್ ಮಿರೊಣ್ ಸಕಾಳಿಂ ಉಟೊಕ್‌ಚ್ಚ್ ನಾ ಆಸ್ತಲೊ … ಕಾಲ್ ಸಾಂಜೆರ್ ಪಿಯೆಲ್ಲೆಂ ಚಡ್ ಜಾಲ್ಲೆಂ ಆಸ್ತೆಲೆಂ ಕೊಣ್ಣಾ … ಪುಣ್, ಆಮ್ಚೊ ಮಿರೊಣ್ ಘಾಲ್ಚೊ ಮನಿಸ್ ನ್ಹಯ್. ಆಜ್ ಕಿತೆಂ ಜಾಲೆಂ …. ಹುಶಾರ್ ನಾ ಗಾಯ್? ಬಾಯ್ಲ್ ಹುಶಾರ್ ನಾಂಗೀ? ಘರಾಂತ್ ಕೋಣ್‌ಯ್ ಹುಶಾರ್ ನಾ ತರ್‌ಯ್ ಇಗರ‍್ಜೆಚೆ ಕಾಯ್ದೆ ತೊ ಬಿಲ್ಕುಲ್ ಚುಕಾನಾತ್‌ಲ್ಲೊ ತಸಲೊ ಮನಿಸ್.

ಬಾಗ್ಲಾ ಭಾಯ್ರ್ ವ್ಹಾಣೊ ದವರ‍್ನ್ ಇಗರ‍್ಜೆ ಭಿತರ್ ವೆತಾನಾ ವಾಚಪ್ ಕಾಬಾರ್ ಜಾವ್ನ್, ಪಾದ್ರ್ಯಾಬಾನ್ ವಾಂಜೆಲ್ ಸುರು ಕೆಲ್ಲೊ.

ತಾಚ್ಯಾ ಜಿಣ್ಯೆಂತ್ ಪಯ್ಲೆಪಾವ್ಟಿಂ ಆಸ್ತೆಲೆಂ, ತೊ ಮಿಸಾಕ್ ಇತ್ಲೊ ವೇಳ್ ಕರ‍್ನ್ ಯೆಂವ್ಚೊ.

ಮೀಸ್ ಮುಂದರ‍್ಸುನ್ ಗೆಲೆಂ. ಮಿರ‍್ಣಿಚೊ ತಾಳೊ ಆಯ್ಕಾನಾತ್‌ಲ್ಲೊ. ಮಿರೊಣ್ ಅಪ್ಪು ಮಿರಾಂದ್ ಯೆಂವ್ಕ್ ನಾ. ವಿಗಾರಾನ್‌ಂಚ್ಚ್ ಕಾಂತಾರ್ ಗಾಯ್ಲೆಂ. ಭಕ್ತಿಕಾಂನಿ ತಾಳೊ ಮೆಳಯ್ಲೊ. ರುಜಾರ್ ಮೆಂದೊಸಾಚಿ ಮತ್ ಮಿಸಾರ್ ನಾತ್‌ಲ್ಲಿ. ಮಿರ‍್ಣಿಚೊಚ್ಚ್ ಉಡಾಸ್.

ಮಿಸಾಕ್ ವೇಳ್ ಕರ‍್ನ್ ಆಯಿಲ್ಲ್ಯಾನ್ ಕುಮ್ಗಾರ್ ಸೆಂವ್ಕ್ ವೆಚ್ಯಾಕ್ ತಾಚೆಂ ಕೊಶೆಡ್ದ್ ಆಯ್ಕಾಲೆಂನಾ. ಬಸ್‌ಲ್ಲ್ಯಾ ಕಡೆಚ್ಚ್ ಮಾಗ್ಣೆಂ ಮ್ಹಣೊನ್ ಕ್ರಿಸ್ತಾಕ್ ಆರ‍್ಗಾಂ ದಿಲಿಂ ತಾಣೆ.

ಮಿಸಾಚೆಂ ಆಕ್ರೆಚೆಂ ಬೆಸಾಂವ್ ದಿಂವ್ಚ್ಯಾ ಪಯ್ಲೆಂ, ವಿಗಾರ್ ಏಕ್ ಘಡಿ ಮೌನ್ ಜಾಲೊ. ” ಆಜ್ ತುಮಿ ಮಿಸಾಚಿ ಘಾಂಟ್ ಆಯ್ಕೊಂಕ್ ನಾ ಜಾಂವ್ಕ್ ಪುರೊ…”

ಇಗರ‍್ಜೆಂತ್ ಆಸ್‌ಲ್ಲ್ಯಾ ಹೆರಾಂ ಜಾಯ್ತ್ಯಾಂನಿ ಸಾಂಗಾತಾ ತಕ್ಲಿ ಹಾಲಯ್ಲಿ ಆನಿ ಎಕಾಮೆಕಾಕ್ ಪಳಯ್ಲೆಂ.

“ಆಮ್ಚೊ ಮಿರೊಣ್ ಆಪ್ಪು ಮಿರಾಂದ್ ಕಾಲ್ ರಾತಿ ಮರಣ್ ಪಾವ್ಲಾ … ಭಾರಿಚ್ಚ್ ದುಕಾಚಿ ಗಜಾಲ್… ಆಮಿಂ ಉಬಿ ರಾವ್ಯಾಂ ಆನಿ ತಾಚ್ಯಾ ಅತ್ಮ್ಯಾಖಾತಿರ್ ಮಾಗ್ಯಾಂ…”  ಏಕ್ ಆಮ್ಚ್ಯಾ ಬಾಪಾ, ತೀನ್ ನಮಾನ್ ಮರಿಯೆ, ಆನಂದ್ ಬಾಪಾ, ಸಾಸ್ಣಾಚೊ ವಿಶೆವ್ ಆನಿ ಸರ್‌ಲ್ಲ್ಯಾ ಭಾವಾಡ್ತ್ಯಾಂಚೆ ಮಾಗ್ಣೆಂ ಬೆಟವ್ನ್ ವಿಗಾರಾನ್ ಅಂತಿಮ್ ಆಶೀರ‍್ವಾದ್ ದಿಲೆಂ.

ಮೀಸ್ ಜಾಲ್ಲೆಂಚ್ಚ್, ರುಜಾರ್ ಮೆಂದೊಸ್ ಸದಾಂಚ್ಯಾ ಸವಯೆ ಪ್ರಮಾಣೆ ತಾಚೆಂ ಹೆರ್ ಮಾಗ್ಣೆಂ ಕರ‍್ಚ್ಯಾಕ್ ಇಗರ‍್ಜೆ ಭಿತರ್ ರಾವ್ಲೊ ನಾ. ಮಿಸಾ ಉಪ್ರಾಂತ್ ತಾಕಾ ಜಾಯ್ತೆಂ ಮಾಗೊಂಕ್ ಆಸ್ತಾಲೆಂ. ಮೆಲ್ಲ್ಯಾ ಘರ‍್ಚ್ಯಾ ಅಲ್ಮಾಂವಾಂ ಥಾವ್ನ್ ಗರ‍್ಜೆವಂತಾಂಕ್ ಆನಿ ಆಖ್ರೇಕ್ ಸಗ್ಳ್ಯಾ ಸಂಸಾರಾ ಖಾತಿರ್ ತೊ ಮಾಗ್ತಾಲೊ. ಪುಣ್ ಆಜ್ ನ್ಹಯ್.

ತೊ ಭಾಯ್ರ್ ಯೆತಾನಾ, ಸದಾಂಚ್ಯಾ ಮಿಸಾಕ್ ಯೆಂವ್ಚೊ ಲೋಕ್ ಆಂಗ್ಣಾಂತ್ ಉಬೊ ಆಸ್‌ಲ್ಲೊ. ಮಿರ‍್ಣಿಕ್ ಕಿತೆಂ ಜಾಲೆಂ ? ಹುಶಾರ್ ನಾತ್‌ಲ್ಲೊಗೀ ? ಕೊಣೆ ಸವಾಲಾಂ ಕರ‍್ತಾನಾ ಥೊಡ್ಯಾಂನಿ ತಾಕಾ ಕಾಳ್ಜಾಚಿ ಪಿಡಾ ಆಸ್‌ಲ್ಲಿ; ಥೊಡೆ ಪಾವ್ಟಿಂ ಖರ‍್ಶೆತಾಲೊ… ಜಿವಾನ್ ಬಾರಿಕ್ ಜಾಲ್ಲೊ… ಗೋಡ್ ಮುತಾಚಿ ಪಿಡಾ ಆಸ್‌ಲ್ಲಿ ಮ್ಹಣ್ ಕೋಣ್ ಸಾಂಗ್ತಾಲೆ… ಅಶೆಂ ಉಲಂವ್ಕ್ ಸುರು ಕೆಲೆಂ ಪುಣ್ ಸಾರ‍್ಕೆಂ ಕಿತೆಂಯ್ ಕೊಣಾಯ್ಕಿ ಕಳಿತ್ ನಾತ್‌ಲ್ಲೆಂ….

ಮಿಸಾಚೆಂ ನ್ಹೆಸಣ್ ಬದ್ಲುನ್ ವಿಗಾರ್ ಥಂಯ್ಸರ್ ಪಾವ್ಲೊಚ್ಚ್… ಆನಿ ಮೀಸ್ ಜಾವ್ನ್ ಬಾಯ್ಲ್ಯಾ ಆಂಗ್ಣಾಂತ್ ಜಮ್‌ಲ್ಲ್ಯಾ ಲೊಕಾಚೆಂ ಗುಜು ಗುಜು ಉಲವ್ಣೆಂ ಬಂಧ್ ಜಾಲೆಂ.

” ಆಯ್ಕಾ … ಕೋಣ್ ಘಾಂಟ್ ಮಾರ‍್ತಾ … ಮಿರ‍್ಣಿ ಸರ‍್ಲಾ ಆನಿ ತಾಚ್ಯಾ ಮೊರ‍್ಣಾಕ್ ಘಾಂಟ್ ಕೋಣ್‌ಂಯ್ ಮಾರುಂಕ್ ಸಕ್ತಾ?”

ವಿಗಾರಾನ್ ತಾಳೊ ಉಬಾರುನ್ ವಿಚಾರ್‌ಲ್ಲೆಂ ಸರ‍್ವಾಂಕ್ ಆಯ್ಕಾಲೆಂ. ಸರ‍್ವ್ ಮ್ಹಳ್ಯಾರ್ ಕೋಣ್? ಸದಾಂ ಮಿಸಾಕ್ ಯೆಂವ್ಚಿ ಪ್ರಾಯೆಸ್ತ್ ಮಾತ್ರ್. ಹ್ಯಾ ಹಳ್ಳೆಚ್ಯಾ ಇಗರ‍್ಜೆಂತ್ ತರ‍್ನಾಟಿಂ ಯಾ ತರ‍್ನಾಟೆ ಝಳ್ಕೊನ್‌ಂಯ್ ಸದಾಂಚ್ಯಾ ಮಿಸಾಕ್ ಯೆನಾತ್‌ಲ್ಲೆ. ಮಿಸಾಕ್ ಯೆತಾಲಿಂ ತರ್‌ಯ್ ಜಿವಿತಾಚ್ಯಾ ಸಾಂಜೆಚ್ಯಾ ಪಂಗ್ತೆಕ್ ಪಾವ್‌ಲ್ಲಿಂ ಮಾತ್ರ್…ಕೊಣ್‌ಂಯ್ ಮುಕಾರ್ ಆಯ್ಲೆ ನಾಂತ್. ಘಾಂಟ್ ಮಾರ‍್ಚಿ ಭಾರಿಚ್ಚ್ ಸುಲಭ್ ಜಾಯ್ತ್ಯಾಂನಿ ಚಿಂತ್ಚೆಂ ಆಸ್‌ಲ್ಲೆಂ ತರ್‌ಯ್ ತಿ ಮಾರುಂಕ್ ಕಳಿತ್ ನಾತ್‌ಲ್ಲ್ಯಾಂಕ್ ಭಾರಿ ಕಷ್ಟಾಂಚಿ ಗಜಾಲ್‌ಚ್ಚ್ ನ್ಹಯ್‌ಗೀ?

“ಕೋಣ್‌ಂಯ್ ನಾಂತ್…..?” ಥೊಡೊ ವೇಳ್ ಲೊಕಾಕ್‌ಚ್ಚ್ ಪಳೆವ್ನ್ ಉಬೊ ಆಸ್‌ಲ್ಲೊ ವಿಗಾರ್ ಚಿಕ್ಕೆ ವ್ಹಡ್ಲ್ಯಾ ತಾಳ್ಯಾನ್‌ಚ್ ಮ್ಹಣಾಲೊ.” ಪಂಚ್ವೀಸ್ ವರ‍್ಸಾಂ ಥಾವ್ನ್ ಮಿರೊಣ್ ಅಪ್ಪು ಮಿರಾಂದಾನ್ ಆಮ್ಚ್ಯೊ, ಮ್ಹಳ್ಯಾರ್ ಆಮ್ಚ್ಯಾ ಫಿರ‍್ಗಜೆಂತ್ ಮೆಲ್ಲ್ಯಾಂ ಖಾತಿರ್ ಘಾಂಟಿ ಮಾರ‍್ಲ್ಯಾತ್ ಆನಿ ಆಜ್ ತೊ ನಾ …. ತಾಚ್ಯಾ ಮೊರ‍್ಣಾಚ್ಯೊ ಘಾಂಟಿ ಮಾರ‍್ತಲೊ ಆಮ್ಚ್ಯಾ ಮಧೆಂ ಎಕ್ಲೊ ಪುಣಿ ನಾಂಚ್ಚ್ ನ್ಹಯ್‌ಂಗೀ ?”

ವಿಗಾರ್ ದೆದೆಸ್ಪಾರ್ ಜಾಲ್ಲೊ ಪಳವ್ನ್, ರುಜಾರ್ ಮೆಂದೊಸಾಚ್ಯಾ ಕಾಳ್ಜಾಕ್ ಭಾಲಿ ತೊಪ್‌ಲ್ಲ್ಯಾ ಬರಿ ಜಾಲೆಂ. ತೊ ಮುಕಾರ್ ಆಯ್ಲೊ. ಧೈರ್ ಆರಾಯ್ಲೆಂ. ಮಿರ‍್ಣಿಚ್ಯಾ ಮೊರ‍್ಣಾಚಿ ಘಾಂಟ್ ಮಾರುಂಕ್. ಥೊರಿಚ್ಯಾ ಉಗ್ತ್ಯಾ ಬಾಗ್ಲಾಂತ್ಲ್ಯಾನ್ ಭಿತರ್ ವಚೊನ್ ವೊಣದಿಕ್ ಬಸಯಿಲ್ಲ್ಯಾ ಲೊಂಕ್ಡಾಚ್ಯಾ ಕೊಕ್ಕ್ಯಾಕ್ ಶಿರ‍್ಕಾಯಿಲ್ಲಿ ದೊರಿ ತಾಣೆ ಸುಟಯ್ಲಿ. ದೊನೀ ಹಾತಾಂನಿ ಬಳಾನ್ ಧರ‍್ನ್ ತಿ ವೊಡ್ಲಿಚ್ಚ್. ಏಕ್ ನ್ಹಯ್ ದೋನ್ ನ್ಹಯ್… ಪಾಟಾಪಟ್ ಪಾಂಚ್… ಸ ಆನಿ ಸಾತ್… ಫೆಸ್ತ್ ಮಿಸಾಕ್ ಘಾಂಟಿ ಮಾರ‍್ಚ್ಯಾ ಬರಿ…

ವಿಗಾರ್ ಪರತ್ ದೆದೆಸ್ಪಾರ್ ಜಾಲೊ. ರಾಗಾನ್ ಉಂಚಾಂಬಳ್ ಜಾಲೊ.

“ಹಿ ಕಸಲಿ ಘಾಂಟ್ ಮಾರ‍್ತಾಯ್ ತುಂ ರುಜಾರಿ… ಬಂಧ್ ಕರ್… ಬಂಧ್ ಕರ್… “

ರುಜಾರ್ ಮೆಂದೊಸಾಚೆ ಹಾತ್ ಪಾಯ್ ಕಾಂಪ್ಲೆಂಚ್ಚ್… ತೊ ಥಂಡ್‍ಚ್ಚ್ ಜಾಲೊ.. ದೊರಿ ತಾಣೆ ಸೊಡ್ನ್ ಸೊಡ್ಲಿ….

“ಆತಾಂ ತುಂಚ್ಚ್ ವಚ್…. ಮಿರ‍್ಣಿಚೊ ಪೂತ್ ಘರಾಚ್ಚ್ ಆಸ್ತಲೊ….” ಪರತ್ ವಿಗಾರ್ ಬೊಬಾಟ್ಲೊ. ” ತಾಕಾಚ್ಚ್ ಆಪಯ್….. ಪುತಾಕ್ ಘಾಂಟ್ ಮಾರುಂಕ್ ಶಿಕಯ್ಲಾಂ ಮಿರ‍್ಣಿನ್… ಆತಾಂ ಘಾಂಟ್ ಮಾರಿಜಯ್‌ಚ್ಚ್ ನ್ಹಯ್ ? ದೆವಾಧಿನ್ ಜಾಲ್ಲ್ಯಾ ಮಿರ‍್ಣಿಕ್ ಘಾಂಟ್ ಮಾರಿನಾ ತರ್ ಕಿತ್ಲಿ ಲಜ್ ಆಮ್ಕಾಂ…. ಕಸಲೆಂ ಉಣೆಂಪಣ್ ಪಳೆಯಾ….”

ರುಜಾರ್ ಮೆಂದೊಸ್ ಆಪ್ಲೊ ಮುಂಡು ವಯ್ರ್ ಬಾಂಧುನ್ ಮಿರ‍್ಣಿಚ್ಯಾ ಘರಾ ತೆವ್ಶಿನ್ ದಾವ್ಲೊಚ್ಚ್.

***

ಮಿರೊಣ್ ಅಪ್ಪು ಮಿರಾಂದ್ ಸರೊನ್ ದುಸ್ರ್ಯಾಚ್ಚ್ ಆಯ್ತಾರಾ ವಿಗಾರಾನ್ ಫಿರ‍್ಗಜೆಚ್ಯಾ ಲೊಕಾಚಿ ಜಮಾತ್ ಆಪಯಿಲ್ಲಿ. ತುರ‍್ತ್ ಜಮಾತ್. ಆಡಳ್ತ್ಯಾ ಸಮಿತಿಚಿ ಜಮಾತ್ ಜಾವ್ನ್ ಲೊಕಾಚಿ ಜಮಾತ್ ಆಪಂವ್ಚಿ ರಿವಾಜ್ ಆಜ್ ತಾಣೆ ಮೊಡ್‌ಲ್ಲಿ.

ಪಾಟ್ಲ್ಯಾ ಹಫ್ತ್ಯಾಂತ್ ಸಕಾಳಿಂ ಸಾಂಜೆರ್ ಭಾರಿಚ್ಚ್ ಕಷ್ಟಾಂನಿ ಘಾಂಟಿ ವಾಜ್‌ಲ್ಲ್ಯೊ. ಮಿರ‍್ಣಿಚ್ಯಾ ಪುತಾನ್‌‌ಚ್ ತಿ ಜವಾಬ್ದಾರಿ ಸಾಂಬಾಳ್‌ಲ್ಲಿ. ಮಿಸಾಚ್ಯಾ ಪವಿತ್ರ್ ವಸ್ತುರಾಚಿ ತಯಾರಾಯ್, ಆಲ್ತಾರಿಚಿ ತಯರಾಯ್ ಸಾಂ. ಮಿಂಗೆಲ್ ವಾಡ್ಯಾಚಿ ಅರ‍್ಧಿ ಮಾದ್ರ್ ಜೆನೆಟ್ ಮಿನೆಜಾನ್ ಕೆಲ್ಲಿ. ಕಾಲ್, ಇಗರ‍್ಜ್ ಝಾಡ್ಚೆಂ ಆನಿ ಬಾಂಕ್ ಪುಸ್ಚೆಂ ಕಾಮ್ ರುಜಾರ್ ಮೆಂದೊಸ್ ಆನಿ ಸಾಲು ಮಾಡ್ತಿಸಾನ್ ಕೆಲ್ಲೆಂ.

ಆಜ್, ಜಮಾತೆಂತ್ ರುಜಾರ್ ಮೆಂದೊಸ್ ಮುಖ್ಲ್ಯಾ ಸಾಲಿಂತ್ ಬಸ್‌ಲ್ಲೊ. ತಾಚ್ಯಾ ಬಗ್ಲೆನ್ ಸಾಲು ಮಾಡ್ತಿಸ್. ಮಿರೊಣ್ ನಾಸ್ತಾನಾ ಕಾಲ್ಚ್ಯಾ ದಿಸಾ ತಾಣಿ ಕೆಲ್ಲ್ಯಾ ಸೆವೆಕ್ ವಿಗಾರಾ ಥಾವ್ನ್ ಶಾಬಾಸ್ಕೆಚಿಂ ಉತ್ರಾಂ ಮೆಳ್ತೆಲಿಂ ಮ್ಹಣ್ ತಾಣಿ ಚಿಂತ್‌ಲ್ಲೆಂಚ್ಚ್.

ಪುಣ್, ವಿಗಾರಾನ್ ತ್ಯಾ ವಿಶ್ಯಾಂತ್ ದಂಬು-ಉಸ್ಕು ಕಾಡ್ಲೊನಾ.

“ಪಂಚ್ವೀಸ್ ವರ‍್ಸಾಂ ಆಮ್ಚ್ಯಾ ಇಗರ‍್ಜೆಂತ್ ಸೆವಾ ದಿಲ್ಲೊ ಮಿರೊಣ್ ಅಪ್ಪು ಮಿರಾಂದ್ ದೆವಾಧಿನ್ ಜಾಲಾ. ಸರ‍್ಗಾರ್ ಜೆಜುಚ್ಯಾ ಬಗ್ಲೆಕ್ ಬಸ್ಲಾ ತೆಂ ಖರೆಂ… ಭಾಗೆವಂತ್ ಮನಿಸ್ ತೊ….ತಾಚ್ಯಾ ಅತ್ಮ್ಯಾ ಖಾತಿರ್ ಉಬೆ ರಾವೊನ್ ಮಾಗ್ಯಾಂ…”

ಸರ‍್ವ್ ಉಬೆ ರಾವ್ಲೆ. ಭಾಗೆವಂತ್ ಮನ್ಶಾಚ್ಯಾ ಅತ್ಮ್ಯಾಕ್ ಮಾಗಾಜಯ್ ಮ್ಹಣ್ ನಾ ಮ್ಹಣ್ ಥೊಡ್ಯಾಂನಿ ಚಿಂತ್ಚೆಂಯ್ ಆಸ್‌ಲ್ಲೆಂ. ಪುಣ್, ಸರ‍್ವಾಂನಿ ಮಾಗ್ಲೆಂ.

ಪಾದ್ರ್ಯಾಬಾನ್ ಏಕ್ ಆಮ್ಚ್ಯಾ ಬಾಪಾ, ತೀನ್ ನಮಾನ್ ಮರಿಯೆ ಆನಿ ಏಕ್ ಅನಂದ್ ಬಾಪಾ ಶಿಕಯ್ಲೆಂ. ಸಾಸ್ಣಾಚೊ ವಿಶೆವ್ ಆನಿ ಸರ್‌ಲ್ಲ್ಯಾ ಭಾವಾಡ್ತ್ಯಾಂಚೆ ಮಾಗ್ಣೆಂಯ್ ಮ್ಹಳೆಂ. ಹೆಂ ಜಾತಚ್ಚ್ ಸರ‍್ವ್ ಬಸ್ಲೆ.

ವಿಗಾರಾನ್ ಮಿರೊಣ್ ಅಪ್ಪು ಮಿರಾಂದಾನ್ ಪಂಚ್ವೀಸ್ ವರ‍್ಸಾಂನಿ ಇಗರ‍್ಜೆಂತ್ ಕೆಲ್ಲಿ ಸೆವಾ ವಿವರುನ್ ಸಾಂಗ್ಲಿ.

ತಿನ್ಶಿಂ ಸಾಟ್ ಆನಿ ಪಾಂಚ್ ದೀಸ್ ಸೆವಾ ದಿಲ್ಲೊ ಮನಿಸ್ ಅಪ್ಪು ಮಿರಾಂದ್.

ದಿಸಾಚ್ಯೊ ಘಾಂಟಿ, ಮೊರ‍್ಣಾಚ್ಯೊ ಜಾಂವ್ ಮಿಸಾಚ್ಯೊ, ದೊನ್ಪಾರಾಂಚ್ಯಾ ಬಾರಾಂಚಿ ಯಾ ಸಾಂಜೆಚ್ಯಾ ಆಮೊರಿಚಿ ಆನಿ ಆಟ್ ವೊರಾಂಚಿ, ಗಿಮಾಂತ್ ಯಾ ಶಿರಾಂದಾರಿಂಚೊ ಪಾವ್ಸ್ ಯೆತಾನಾ ತೊ ಸಾರ‍್ಕೆಂಚ್ಚ್ ಮಾರ‍್ತಾಲೊ. ತ್ಯಾ ಫಿರ‍್ಗಜೆಂತ್ ಕೊವೆಂತ್ ಲಾಗಿಂ ನಾತ್‌ಲ್ಲ್ಯಾನ್ ಮಾದ್ರಿಂಚೊ ಗೊಂದೊಳ್ ನಾತ್‌ಲ್ಲೊ. ಸನ್ವಾರಾ ಆಲ್ತಾರ್ ಸೊಬಂವ್ಚಿ; ಆಯ್ತಾರಾಚ್ಯಾ ಮಿಸಾಕ್ ಜಾಯ್ ಜಾಲ್ಲಿ ಸಾರ‍್ಕ್ಯಾ ರಂಗಾಚಿ ಮುಸ್ತಾಯ್ಕಿ ಮಿಸಾ-ಗ್ರಂಥ್ ಪಳವ್ನ್ ತಯಾರ್ ದವರ‍್ಚಿ; ಆಲ್ತಾರ್ ಭುರ‍್ಗ್ಯಾಂಕ್ ತಯಾರ್ ಕರ‍್ಚೆಂ; ಆಲ್ತಾರ್ ಭುರ‍್ಗೆ ಯೆನಾಂತ್ ತರ್ ತಾಂಚೊ ಕಾಯ್ದೊ ತಾಣೆಂಚ್ಚ್ ಕರ‍್ಚೊ, ಆಲ್ತಾರ್ ಭುರ‍್ಗ್ಯಾಂಚೆ ಕಾಮ್ ಕರ‍್ತಾನಾ ಕಾಂತಾರ್ ಸುಡಾಳ್ ಆನಿ ಸಾರ‍್ಕೆಂ ಗಾಯನ್ ಕರ‍್ತಾಲೊ. ಸನ್ವಾರಾ ದೀಸ್ ಇಗರ‍್ಜ್ ಝಾಡುನ್ ಬಾಂಕ್ ಪುಸುನ್ ಸಾಂಜೆಚ್ಯಾ ಆನಿ ದುಸ್ರ್ಯಾ ದಿಸಾಚ್ಯಾ ಮಿಸಾಕ್ ತಯಾರಾಯ್ ಕರ‍್ಚಿ; ಕೊಯರ್ ಆಯ್ಲೆಂ ತರ್ ಮಿರ‍್ನ್ಯಾಮ್ ಥಂಡ್; ನಾ ತರ್ ತಾಚ್ಯಾ ಕಿಂದ್ರಿ ತಾಳ್ಯಾನ್ ಮಿಸಾಚಿಂ ಕಾಂತಾರಾಂ ಗಾವ್ನ್ ಲೊಕಾಚ್ಯಾ ಭಕ್ತಿಕ್ ವಾಡಂವ್ಚೆಂ ತಾಣೆ; ವೋಲ್ ಆಸೊಂದಿ ಯಾ ರೆಸ್ಪೆರ್, ಮೋರ್ನ್ ಯಾ ಕೊಣಾಯ್ಕಿ ಸಾಂತೆಸಾಂವ್ ಲಾಂವ್ಚೆಂ, ಗರ‍್ಜೆ ಪ್ರಮಾಣೆ ಮಿರ‍್ಣ್ಯಾಮ್ ಆಸಾಜಯ್ ಆನಿ ಅಪ್ಪು ಮಿರಾಂದ್ ಆಸ್ತಾಲೊಚ್ಚ್….

ಸಬಾರ್ ಕಾಳಾ ಪಯ್ಲೆಂ ಮೊರ‍್ಣಾಚ್ಯಾ ಮಿಸಾಂಕ್ ಒಫಿಸ್ ಮೀಸ್ ಆಸ್ತಾಲೆಂ. ಲಾತಿನ್ ಬಾಶೆನ್. ವ್ಹಡ್ಲ್ಯಾ ಫೆಸ್ತಾಚ್ಯಾ ಬೆಸ್ಪಾಕ್ ಲಾತಿನ್ ಬಾಶೆನ್ ಮಾಂಡಾವಳ್. ಖಂಚಾಯ್ ಲಾತಿನ್ ಉತ್ರಾಂಚೊ ಅರ‍್ತ್ ಕಳಿತ್ ಆಸ್‌ಲ್ಲೊ ವ ನಾ; ಜೆಂ ಪ್ರದಾನ್ ಯಾಜಕಾನ್ ಉಚಾರ್‌ಲ್ಲ್ಯಾ ಮಾಗ್ಣ್ಯಾಂವಿಧಿಂಕ್ ಮಿರ‍್ಣಿ ಮಾತ್ರ್ ಸುಡಾಳ್ ಜವಾಬ್ ದಿತಾಲೊ ಆನಿ ಲಾತಿನ್ ಬಾಶೆನ್ ಗಾಯನ್ ಕರ‍್ತಾಲೊ.

ಅಪ್ಪು ಮಿರಾಂದ್ ತರ‍್ನಾಟೊ ಆಸ್ತಾನಾ ಮಿರೊಣ್ ಜಾವ್ನ್ ಇಗರ‍್ಜೆಚಿ ಸೆವಾ ದೀಂವ್ಕ್ ಆಯಿಲ್ಲೊ. ಕಿತ್ಲೊ ಸಾಂಬಾಳ್…? ಮಹಿನ್ಯಾಕ್ ಪಾಂಯ್ಶಿ ರುಪಯ್… ತೊ ಬಿಲ್ಕುಲ್ ದುರ‍್ಸಾಲ್ಲೊ ನಾ…

ಮೆಲ್ಲ್ಯಾ ಮೊಶಿಕ್ ಬಾರಾ ಕುಟ್ಟಿಂ ದೂದ್ ಕಂಯ್…. ಗಾದ್ ರುಜಾರ್ ಮೆಂದೊಸಾಕ್ ಉಡಾಸಾಂತ್ ಆಯ್ಲಿ.

ವಿಗಾರಾನ್ ಸಾಂಗ್‌ಲ್ಲೆಂ ಆಯ್ಕಾಲ್ಲೆ ಹೆಚ್ಚ್ ಫಿರ‍್ಗಜ್‌ಗಾರ್ ಮಿರ‍್ಣ್ಯಾಮಾಕ್ ಕಿತ್ಲೆ ಪಾವ್ಟಿಂ ದುರ‍್ಸಾಲ್ಲೆ ನಾಂತ್? ಮಿಸಾಕ್ ಆಯಿಲ್ಲ್ಯೊ ಕಾಣಿಕೊ ತೆಂಯ್ ರಾಂದಯ್, ದೂದ್, ನಾರ‍್ಲ್ ಆನಿ ತಾಂದುಳ್ ಆಪ್ಲ್ಯಾ ಘರಾಚ್ಚ್ ವೊರ‍್ತಾ ಮ್ಹಣ್ ಸಾಂಗ್‌ಲ್ಲೆನಾಂತ್? ಇಗರ್ಜೆಚೊ ಪೊಂತಾಚೊ ಜಾಗೊ ತಾಕಾ ದೀವ್ನ್ ಫಿರ‍್ಗಜ್‌ಗಾರಾಂಚ್ಯಾ ಖರ‍್ಚಾರ್ ಘರ್ ಬಾಂಧುನ್ ದಿತಾನಾ ಉಂಚಾಬಳ್ ಜಾಲ್ಲೆ ಮನಿಸ್ ಆತಾಂ ಥಂಡ್ ಜಾಲ್ಲೆಚ್ಚ್. ಮಿರ‍್ಣ್ಯಾಮಾನ್ ಡಿಕ್ಲರೇಶನ್ ದೀವ್ನ್ ಕಾಲ್ದೊ ಎಕ್ರೊ ಜಾಗೊ ಭಿತರ್ ಘಾಲ್ಲ್ಯಾ ವೆಳಿಂ ಫಿರ‍್ಗಜ್‌ಚ್ಚ್ ಉಂಚಾಂಬಳ್ ಜಾಲ್ಲಿ. ಮಿರ‍್ಣಿಕ್ ಕಾಮಾಂತ್ಲೆ ಕಾಡಿಜಾಯ್ ಮ್ಹಣ್ ವಿಗಾರಾಕ್ ಆನಿ ಉಪ್ರಾಂತ್ ಭಿಸ್ಪಾಕ್ ದೂರ್ ಗೆಲ್ಲೆಂ. ಪುಣ್, ಮಿರ‍್ಣ್ಯಾಮಾಕ್ ಕೊಣಾಯ್ಕಿ ಹಾಲಂವ್ಕ್ ಜಾಂವ್ಕ್ ನಾ. ಹಾಲಯಿಲ್ಲೆಂಯ್ ನಾ….

ಮಾರ‍್ಗಾಯ್ ಚಡ್‍ಲ್ಲಿ ಆನಿ ಸಾಂಬಾಳ್ ಮಾತ್ರ್ ಚಡವ್ಯಾಂ ಮ್ಹಳ್ಯಾರ್ ಫಿರ‍್ಗಜೆಚೊ ಲೋಕ್ ಭಾರಿಚ್ಚ್ ಸುರಾತಿ ಮ್ಹಳ್ಳ್ಯಾ ಬರಿ ಕರ‍್ತಾಲೆ. ಆತಾಂ ತಾಚೊ ಸಾಂಬಾಳ್ ತರ್‌ಯ್ ಕಿತ್ಲೊ ? ಪೆಂಟೆಂತ್ ಪೊಸ್ಟ್ ಆಫಿಸಾಂತ್ ಝಡ್ಚ್ಯಾ ಚೆಡ್ಯಾಕ್ ಕಾಂಯ್ ತಾಚ್ಯಾಕೀ ಚಡ್ ಮೆಳ್ತಾ ಆಸ್ತಲೊ… ಪುಣ್, ಮಿರ‍್ಣ್ಯಾಮ್ ಮಾತ್ರ್ ಕಿತೆಂಚ್ಚ್ ಉಲಯಿಲ್ಲೊ ನಾ.

ತಾಚೆ ಭುರ‍್ಗೆ ಶಿಕ್‌ಲ್ಲೆ. ಇಂಜಿನಿಯರಿಂಗ್ ಕರ‍್ನ್ ಎಕ್ಲೊ ಪರ‍್ಧೆಶಾಕ್ ಗೆಲ್ಲೊ ತರ್ ಆನ್ಯೆಕ್ಲೊ ಆಖ್ರೆಚೆಂ ವರಸ್ ಶಿಕೊನ್ ಆಸ್‌ಲ್ಲೊ. ಪುತಾಂಕ್ ಇತ್ಲೆಂ ಶಿಕಯ್ಜಾಯ್ ತರ್ ಹಾಚ್ಯಾಲಾಗಿಂ ಪಯ್ಶೆ ಖಂಚೆ? ಲೋಕ್ ಉಲಯ್ತಾಲೊ ಆನಿ ಕಾಣಿಕಾಚ್ಯಾ ವಾಟ್ಲೆಕ್ ಕಿತ್ಲ್ಯಾ ಜಣಾಂನಿ ಬೋಟ್ ಜೊಕ್‌ಲ್ಲೆಂ ನಾ? ಭಿಸ್ಪಾಚಿ ಕುಮಕ್ ಯೆತಾ ಮ್ಹಣ್ ಕಿತ್ಲೆ ಜಣ್ ಉಲಯ್ನಾತ್‌ಲ್ಲೆ? ಪುಣ್, ಮಿರೊಣ್ ಕಿತೆಂಚ್ಚ್ ಜಾಯ್ನಾತ್‌ಲ್ಲ್ಯಾ ಬರಿಚ್ಚ್ ಜಿಯೆಲ್ಲೊ. ಸುಖಾನ್ ಜಿಯೆಲ್ಲೊ…

“ಆಮ್ಕಾಂ ಆತಾಂ ಮಿರ‍್ನ್ಯಾಮ್ ಜಾಯ್…” ವಿಗಾರ್ ಉಬ್ಯಾ ರಾವೊನ್ ಉಲಯ್ಲೊ. “ಆಮ್ಚ್ಯಾ ಭಿತರ್, ಹ್ಯಾ ಫಿರ‍್ಗಜೆಂತ್ ಕೋಣ್‌ಂಯ್ ಆಸಾ…”

ಮಿರ‍್ಣಿಚೆಂ ಕಾಮ್ ಕರುಂಕ್ ಕೋಣ್ ಆಸಾ ? ಇಗರ‍್ಜೆ ವಾಡ್ಯಾಚೊ ಅಬುಟ್ ಪಾಯ್ಸ್ ಜಾಯ್ತ್. ಪುಣ್ ದೊನ್ಪಾರಾಂಚಿ ಆನಿ ಸಾಂಜೆಚಿ ಘಾಂಟ್ ಮಾರುಂಕ್ ಜಾಂವ್ಚಿ ನಾ. ತಾಕಾ ಗಾದೆ ಬೆಸಾಯ್ ಆಸಾ. ದುಕ್ರಾಂಚೆ ಫಾರ‍್ಮ್ ಆಸಾ. ರುಜಾರ್ ಮೆಂದೊಸಾಕ್ ಗಿಮಾಂತ್ ಜಾಯ್ತ್ ಪುಣ್, ಪಾವ್ಸಾಂತ್ ಶೆಳಿಚಿ ಪೊವ್ಲಿಚ್ಚ್ ತೊ. ಟೀಚರ್ ಸೆಲ್ಲಿಚೊ ನೊವ್ರೊ ಜೋನ್ ಪಾಯ್ಸ್ ಜಾಯ್ತ್ ಮ್ಹಳ್ಯಾರ್ ತಾಕಾ ಪಿಯೆಂವ್ಚಿ ಸವಯ್ ಆಸಾ. ಜುಜೆ ಮೊರಾಸ್ ಜಾಯ್ತ್ ಮ್ಹಳ್ಯಾರ್ ಹಫ್ತ್ಯಾ ಮಧೆಂ ಕೋಣ್‌ಂಯ್ ಸರ‍್ಲೊ ತರ್ ತಾಕಾ ಹಿತ್ಲಾಚೆಂ ಕಾಮ್ ಸೊಡ್ನ್ ಯೇಂವ್ಕ್ ಜಾಂವ್ಚೆಂಚ್ಚ್ ನಾ.

ಆನಿಕ್‌ಯ್ ಸಬಾರಾಂಚಿ ನಾಂವಾಂ ಮುಖಾರ್ ಆಯ್ಲಿಂ. ಪುಣ್ ಎಕ್ಲೊಯ್ ಸಮಾಕಟ್ಟ್ ಮಿರ‍್ಣಿಚ್ಯಾ ಕಾಮಾಕ್ ಜಾಲೆಂಚ್ಚ್ ನಾ… ಕೊಣ್‌ಂಯ್ ಮುಖಾರ್ ಆಯ್ಲೆಚ್ಚ್ ನಾಂತ್…
ಫಿರ‍್ಗಜೆನ್ ದಿಂವ್ಚ್ಯಾ ಬಿಕಾಡ್ಡ್ಯಾ ಸಾಂಬಾಳಾಕ್ ತರ‍್ನಾಟೆ ಬಿಲ್ಕುಲ್ ಯೆಂವ್ಚೆ ನಾಂತ್ ಮ್ಹಣ್ ಸರ‍್ವಾಂನಿ ಸಾಂಗ್ಲೆಂಚ್ಚ್…

ಎಕಾ ಘಂಟ್ಯಾಚಿ ಚರ‍್ಚಾ ಆನಿ ತರ‍್ಕ್….

ಪುಣ್, ಫಿರ‍್ಗಜೆಂತ್ ಮಿರ‍್ನ್ಯಾಮ್ ಮೆಳ್ಳೊಚ್ಚ್ ನಾ…

ಜಮಾತ್ ಆಕೇರ್ ಜಾಲಿ…

***

ಎಕಾ ಮಹಿನ್ಯಾನ್ ವಿಗಾರಾನ್ ಪರತ್ ಫಿರ‍್ಗಜ್‌ಗಾರಾಂಚಿ ಜಮಾತ್ ಆಪಯ್ಲಿ.

ಫಿರ‍್ಗಜೆಂತ್ಲೊ ಲೋಕ್ ಮಿಸಾಕ್ ಆಯಿಲ್ಲೊ ಪುಣ್ ಜಮಾತೆಂತ್ ಕೊಣ್‌ಚ್ ನಾತ್‌ಲ್ಲಿಂ.

ಆಸ್‌ಲ್ಲ್ಯಾ ಚಾರ್ ಮಾಂಡ್ಡ್ಯಾಂಲಾಗಿಂ ವಿಗಾರ್ ಉಲಯ್ಲೊ…

ಸುರ‍್ವಿಲ್ಲೆಂ ಮಾಗ್ಣೆಂ ಜಾತಚ್ಚ್ ವಿಗಾರಾನ್ ಸಾಂಗ್ಲೆಂ. ” ಆಮ್ಕಾಂ ಮಿರ‍್ನ್ಯಾಮ್ ಜಾಯ್ ಆನಿ ಆಮ್ಚ್ಯಾ ಫಿರ‍್ಗಜೆಂತ್ ಎಕ್ಲೊ ಸಯ್ತ್ ಮುಕಾರ್ ಯೇನಾ… ಹಾಂವೆ ಹರ‍್ಯೇಕಾ ಕುಟ್ಮಾಕ್ ಫೋನ್ ಕರ‍್ನ್ ವಿಚಾರ‍್ಲೆಂ ಆನಿ ಹರ್‌ಎಕ್ಲ್ಯಾಚಿ ಎಕೇಕ್ ಕಥಾ… ತರ್… ತರ್ ಮಿರ‍್ಣಿ ನಾಸ್ತಾನಾ ಇಗರ‍್ಜ್ ಚಲ್ತಾ…? ಚಲಾನಾ…”

ಆಸ್‌ಲ್ಲೆ ಚಾರ್ ಜಣ್ ಥಂಡ್‌ಚ್ಚ್ ಆಸ್‌ಲ್ಲೆ…

“ಆತಾಂ ಮಿರ‍್ಣ್ಯಾಮಾಚಿ ಬಂದೊ‌ಬಸ್ತ್ ಜಾಲ್ಯಾ… ಆಜ್ ಸಕಾಳಿಂಚ್ಯಾ ಮಿಸಾಕ್ ಜಾಲ್ಲಿ ಘಾಂಟ್ ತುಮ್ಕಾಂ ಆಯ್ಕಾಲ್ಲಿಮೂ ? ಸಾರ‍್ಕಿ ಜಾಲ್ಯಾ ನ್ಹಯ್ …? ಬೀದರ‍್ಚೆಂ ನವೆಂ ಕ್ರಿಸ್ತಾಂವ್ ಕುಟಾಮ್ ಮೆಳ್ಳಾಂ… ನವೀನ್ ಕುಟ್ಟಿ ಆನಿ ತಾಚಿ ಬಾಯ್ಲ್ ಜ್ಯೋತಿ… ಯೆದೊಳ್ ತಾಂಕಾ ದೊಗಾಂ ಭುರ‍್ಗಿಂ ಆಸಾತ್… ಮಿರ‍್ಣ್ಯಾಮಾಚ್ಯಾ ಘರಾ ದೆಗೆನ್‌‌ಚ್ ಕಾಲ್ದ್ಯಾ ಎಕ್ರ್ಯಾ ಜಾಗ್ಯಾರ್ ಲ್ಹಾನ್ ಘರ್ ಬಾಂಧುನ್ ತಾಂಕಾ ರಾವೊಂಕ್ ದಿಂವ್ಚೆಂ ಮ್ಹಣ್ ಆಮಿಂ ಚಿಂತ್ಲಾಂ ಆನಿ ಭಿಸ್ಪಾನ್ ಜಾಯ್ತ್ ಮ್ಹಳಾಂ……. ಘಾಂಟ್ ಮಾರುಂಕ್ ಮಾತ್ರ್ ನ್ಹಯ್…. ಇಗರ‍್ಜೆಚೆಂ ಸರ‍್ವ್ ಕಾಮ್ ತೆ ಕರ‍್ತಾತ್…. ಬೊಟ್ಲೆರಾಚೆಂ ಕಾಮ್ ತಾಂಚ್ಯಾಚ್ಚ್ ಕರ‍್ನಾ ಕರಂವ್ಚೆಂ…. ಸಾಂಬಾಳ್‌ಯ್ ವಿಶೇಸ್ ನಾ…”

ಆಸ್‌ಲ್ಲೊ ಲೋಕ್ ಥಂಡ್ ಜಾಲೊ….

ಹಜಾರ್ ಫಿರ‍್ಗಜ್‌ಗಾರಾಂ ಮಧೆಂ ಎಕ್ಲೊ ಮಿರ‍್ಣ್ಯಾಮ್ ಜಾವ್ನ್ ಕಾಮ್ ಕರುಂಕ್ ಮೆಳೊಂಕ್ ನಾ ಮ್ಹಣ್ ತಾಂಕಾ ವಿರಾರಾಯ್ ಜಾಲ್ಲಿ ತೆಂ ಖರೆಂ…

ಪುಣ್, ಸತ್ ಗಜಾಲ್ ಲಿಪಂವ್ಕ್ ಜಾತಾ… ಮಿರ‍್ಣ್ಯಾಮ್ ಆಸ್ತಾನಾ ಉಲಂವ್ಕ್ ಸಕ್ಕಡ್ ಆಸಾತ್ ಪುಣ್, ಕಾಮ್ ಕರುಂಕ್ ನ್ಹಯ್…

ವಿಗಾರಾನ್ ಅಂತಿಮ್ ಬೆಸಾಂವ್ ದಿಲೆಂ…

ತೆದ್ನಾಂ, ಭುರ‍್ಗ್ಯಾಂಚ್ಯಾ ಮಿಸಾಚಿ ಘಾಂಟ್ ಜಾಲ್ಲಿ ಆಯ್ಕಾಲಿ…

ವಿಗಾರಾನ್ ಕಿತೆಂಚ್ಚ್ ಸಾಂಗ್ಚ್ಯಾ ಪಯ್ಲೆಂ, ಜಮ್‌ಲ್ಲೆ ಫಿರ‍್ಗಜ್‌ಗಾರ್ ಪುಸ್ಪುಸ್ಲೆ…

“ನವೀನ್ ಕುಟ್ಟಿ… ನವೊ ಮಿರ‍್ಣ್ಯಾಮ್…”

► ಕ್ಲೆರೆನ್ಸ್, ಕೈಕಂಬ