ವಾಣೆಂ ದವರ್ಚೆಕಡೆ ಅಶೆಂ ಚುಟುಕ್ ಆಸ್‍ಲ್ಲೆಂ –

‘ಭಿತರ್ ಆಸಾ
ಸಾಹಿತಿ ವ್ಹಡ್
ವ್ಹಾಣೆಂ ತುಜೆ
ಹಾಂಗಾಚ್ ಸೊಡ್’

ದಾರಾಚ್ಯಾ ಹಾತಾಳ್ಯಾರ್ ಅಶೆಂ ಚುಟುಕ್ ಉಮ್ಕಾಳಾಯಿಲ್ಲೆಂ –

‘ಸಿಗ್ರೆಟ್ ವೊಡ್ಲ್ಯಾರ್
ಉಟ್ತಾ ಧುರೊ
ಹೆಂ ದಾರ್ ಉಘಡೊಂಕ್
ಲೊಟ್ಲ್ಯಾರ್ ಪುರೊ’

ಹೆಂ ಪೂರಾ ವಾಚ್ಲ್ಯಾರ್ ಹಾಂವೆಂ ಹಾಂಗಾಚ್ ತಕ್ಲಿ ಘುಂವೊನ್ ಪಡಜೆ ಕೊಣ್ಣಾ ಮ್ಹಣ್ ದೊಳೆ ಧಂಪುನ್ ದಾರ್ ಭಿತರ್ ಲೊಟ್ಲೆಂ.

“ಚುಟುಕ್ ಚಾರ್ಲಿ…”

“ಯೇ ಯೇ ಭಿತರ್ ಯೇ. ಹಾಂವ್ಚ್ ಚುಟುಕ್ ಚಾರ್ಲಿ” ಮ್ಹಣ್ ಹಾಸೊನ್ ಹಾಸೊನ್ ಯೆವ್ಕಾರ್ ಮಾಗ್ಲೊ ತಾಣೆಂ.

ಹಾಕಾ ಏಕ್ ಪಾವ್ಟಿಂ ಧರ್ನ್ ಹಾಲಯ್ಲೊ ತರ್, ರೊಸಾಳ್ ಪೊಣ್ಸಾಚೆ ಘರೆ ಪಡ್ಚೆಬರಿ ದಬದಬ ಕರ್ನ್ ಚುಟುಕಾಂಚ್ ಪಡ್ತಿತ್ ಕೊಣ್ಣಾ, ತಿತ್ಲೊಯ್ ಚುಟುಕಾಂನಿ ಪಿಕ್‍ಲ್ಲೊ  ಹೊ. ತಾಣೆಂ ಉಲೊಂಕ್ ಸುರು ಕೆಲೆಂ.

“ಮ್ಹಜೆಂ ಒರಿಜಿನಲ್ ನಾಂವ್ ಚಾರ್ಲಿ ನ್ಹಯ್. ಹಾಂವ್ ಚಾರ್ ಚಾರ್ ವೊಳಿಂಚಿಂಚ್ ಚುಟುಕಾಂ ಬರಯ್ತಾಂ ಜಾಲ್ಲ್ಯಾನ್ ಚಾರ್-ಲೀ ಮ್ಹಣ್ ಹಾಂವೆಂ ಮ್ಹಾಕಾಚ್ ದವರ್ನ್ ಘೆತ್‍ಲ್ಲೆಂ ಲಿಖ್ಣೆನಾಂವ್ ತೆಂ… “

ಹಾಂವೆಂ ತಕ್ಲಿ ಹಾಲಯ್ಲಿ. ಬಗ್ಲೆನ್ ಆಸ್ ಲ್ಲ್ಯಾ ಕಚ್ರ್ಯಾ ಡಬ್ಬ್ಯಾಂತ್ ಮುದೊ ಕರ್ನ್ ಉಡಯಿಲ್ಲಿಂ ಏಕ್ ರಾಸ್ ಕಾಗ್ದಾಂ ಆಸ್‍ಲ್ಲಿಂ…

‘ಕಿತ್ಲ್ಯಾ ಬುಕಾಂಚೊ ಅತ್ಯಾಚಾರ್ ಕೆಲಾಗಾಯ್ ಹಾಣೆಂ’ ಮತಿಂತ್ ಚ್ ಚಿಂತ್ಲೆಂ ಹಾಂವೆಂ.

“ಸಾಂಗ್ ಲ್ಲೆಬರಿ ತುಜ್ಯಾ ಮೊಬಾಯ್ಲಾಕ್ ಸದಾಂಯ್ ಮ್ಹಜಿಂ ಚುಟುಕಾಂ ಯೆತಾತ್ ಮೂ?” ತಾಚೆಂ ಆತುರಾಯೆಚೆಂ ಸವಾಲ್.

“ವ್ಹಯ್” ಮ್ಹಣ್ ತಕ್ಲಿ ಹಾಲಯ್ತಾನಾ ಗೊಮ್ಟಿ ಮಾತ್ಶಿ ದುಕ್ಲಿ ಮ್ಹಜಿ. ತಾಚ್ಯಾ ಮೆಜಾರ್ ಏಕ್ ಮೊಡ್ತೆಲ್ ಆಸ್‌ಲ್ಲೆಂ ಪಳೆವ್ನ್ ಅಜ್ಯಾಪ್ ಪಾವ್ಲೊಂ ಹಾಂವ್.

“ಸಾಹಿತಿಂಚ್ಯಾ ಮೆಜಾವಯ್ರ್ ಲಿಖ್ಣಿ ಆಸ್ತಾ. ಮೊಡ್ತೆಲ್ ಪಯ್ಲೆಪಾವ್ಟಿಂ ಪಳೆಂವ್ಚೆಂ ಹಾಂವೆಂ…”

“ತುಜಿ ದೀಶ್ಟ್ ಭಾರಿ ಸೂಕ್ಶೀಮ್ ಸಾಯ್ಬಾ. ವೊಣದೆಚೆಂ ಕ್ಯಾಲೆಂಡರ್ ಖಿಳ್ಯಾಸಮೇತ್ ಸಕ್ಲಾ ಪಡ್‍ಲ್ಲೆಂ. ತೊ ಖಿಳೊ ಪರತ್ ಮಾರುಂಕ್ ಮ್ಹಣ್ ಮೊಡ್ತೆಲ್ ಹಾಡ್‍ಲ್ಲೆಂ ಹಾಂವೆಂ”

“ಹೋ ತಶೆಂಗೀ.. ಹಾಂವೆಂ ಕಾಂಯ್ ಚುಟುಕಾಂ ಬರಯ್ತಾನಾ ಸಬ್ದಾಂಕ್ ಮಾರ್ನ್ ಬಡೊವ್ನ್ ಬಡೊವ್ನ್ ಏಕ್ ರೂಪ್ ದೀಂವ್ಕ್ ಮೊಡ್ತೆಲ್ ಹಾಂಗಾಸರ್ ದವರ್ಲಾಂ ಮ್ಹಣ್ ಚಿಂತ್ಲೆಂ”

“ಹಹಹ ತುಂ ಭಾರೀ ಜ್ಯೋಕ್ ಕರ್ತಾಯ್ ಸಾಯ್ಬಾ! ಸಾಂಗ್‍ಲ್ಲೆಬರಿ ತುಂ ಕಿತ್ಯಾಕ್ ಆಯಿಲ್ಲೊಯ್? ಚುಟುಕಾಂ ಪುಣೀ ಜಾಯ್ ಆಸ್ಲಿಂಗೀ?”

“ಚುಟುಕಾಂ ವಿಚಾರುನ್ ಮನ್ಶಾಂ ಯೆತಾತ್‍ಗೀ ಹಾಂಗಾ?”

“ವ್ಹಯ್! ಸಬಾರ್ ಎಮ್ಸಿ ತಾಂಚ್ಯಾ ಕಾರ್ಯಾವೆಳಿಂ ಉಲ್ಲೇಖ್ ಕರುಂಕ್ ಮ್ಹಜಿಂ ಚುಟುಕಾಂ ಘೆವ್ನ್ ವೆತಾತ್. ತಾಚೆಂ ಮೋಲ್‍ಯೀ ದಿತಾತ್”

“ಹೋ.. ಗ್ರೇಟ್ ತುಮಿ. ಅಳೆ.. ಬೆಜಾರ್ ಪಾವನಾಕಾತ್. ತುಮ್ಚೆಥಾವ್ನ್ ಏಕ್ ಹೆಲ್ಪ್ ಜಾಯ್ ಮ್ಹಾಕಾ”

“ಕಿತೆಂ ಜಾಯ್ ಸಾಂಗ್. ಕಿತ್ಲಿಂ ಚುಟುಕಾಂ ಜಾಲ್ಯಾರೀ ಆಸಾತ್.  ದೋನ್ ಲೋಡ್ ಸ್ಟೋಕ್ ಆಸಾತ್ ಘರ್ಚ್ಯಾ ಗೋಡಾವ್ನಾಂತ್!”

“ಹೊ! ತಿತ್ಲಿಂ ನಾಕಾತ್ ಮ್ಹಾಕಾ…” ಮ್ಹಣ್ತಚ್ ಹಾಂವೆಂ ಹಾತಾಂತ್ಲಿ ಚೀಟ್ ಮುಕಾರ್ ಧರ್ಲಿ. “ಧರಾ, ಹ್ಯೆ ಚಿಟಿರ್ ಏಕ್ ಮೊಬಾಯ್ಲ್ ನಂಬರ್ ಆಸಾ. ಹ್ಯಾ ನಂಬ್ರಾಕ್ ತುಮಿ ಸದಾಂಯ್ ತಿತೀನ್ ಚುಟುಕಾಂ ಧಾಡಿಜೆ. ಎಕೇಕಾ ಚುಟುಕಾಕ್ 10 ರುಪಯಾಲೆಕಾರ್ ಎಕಾ ಮ್ಹಯ್ನ್ಯಾಚೆ ಪಯ್ಶೆ ಎಡ್ವಾನ್ಸ್ ದೀಂವ್ಕ್ ಆಯ್ಲಾಂ ಹಾಂವ್’

ಚುಟುಕ್ ಚಾರ್ಲಿಕ್ ಹೆಂ ಆಯ್ಕೊನ್ ಸಂತೊಸ್ ಆನಿ ವಿಜ್ಮಿತ್ಕಾಯ್ ಭೊಗ್ತಾನಾ, ಚಾರ್ ಚುಟುಕಾಂ ಎಕಾಚ್ಚಾಣೆಂ ತೊಂಡಾಂತ್ಲ್ಯಾನ್ ಉಸ್ವಾಸಾಸಾಂಗಾತಾ ಭಾಯ್ರ್ ಉಸಳ್ಳಿಂ!

“ಭಾರಿಚ್ ಸಂತೊಸ್. ಕೊಣಾಚೆಂ ಹೆಂ ನಂಬರ್?”

‘ಪಳಯಾ ಸಾಹಿತಿಂನೊ.. ತುಮ್ಚಿಂ ಚುಟುಕಾಂ ಮ್ಹಾಕಾ ಸದಾಂಯ್ ಯೆತಾತ್. ಬರೀಂ ಜಾತಾತ್ ವಾಚುಂಕ್. ಥೊಡೆ ಸಬ್ದ್ ಸಮ್ಜನಾಂತ್ ತರೀ ವಾಚ್ತಾಂ. ಮ್ಹಜೊ ಈಶ್ಟ್ ಎಕ್ಲೊ ರೀಣ್ ಘೆವ್ನ್ ಗೆಲ್ಲೊ, ಪಾಟಿಂ ವಿಚಾರ್ತಾನಾ ಗಣ್ಣೆಂ ಕರಿನಾತ್ಲೊ. ಕಿತ್ಲ್ಯೊ ಮೆಸೇಜಿ ಘಾಲ್ಯಾರೀ ವಾಚುನ್ ವೊಗೆಚ್ ಬಸ್ತಾಲೊ. ವಿಚಾರ್ನ್ ವಿಚಾರ್ನ್ ಪುರೊ ಜಾಲೆಂ. ದೆಕುನ್ ಪೋರ್ ಏಕ್ ಐಡಿಯಾ ಆಯ್ಲಿ. ಪಟಾಪಾಟ್ ಚಾರ್ ದೀಸ್ ತುಮ್ಚಿಂ ಚುಟುಕಾಂ ತಾಕಾ ಫಾರ್ವರ್ಡ್ ಕೆಲಿಂ. ಎಕಾಚ್ಚಾಣೆಂ ತಾಚಿ ರಿಪ್ಲೈ ಆಯ್ಲಿ ಆನಿ ಪಯ್ಶೆ ಪಾಟಿಂ ದಿಲೆ. ’ಆನಿ ಮುಕಾರ್ ಚುಟುಕಾಂ ಧಾಡಿನಾಕಾ’ ಮ್ಹಣ್ ಆಡ್ದೊಸ್ ಮಾಗೊನ್ ಗೆಲೊ. ಆತಾಂ ಹೆಂ ನಂಬರ್ ಆನ್ಯೆಕಾ ಇಶ್ಟಾಚೆಂ. ತಾಣೆಂ ಇಲ್ಲೆಶೆ ಚಡ್ ಪಯ್ಶೆ ದೀಂವ್ಕ್ ಆಸಾತ್. ಮ್ಹಾಕಾ ಚುಟುಕಾಂ ಫಾರ್ವರ್ಡ್ ಕರ್ಚೆತಿತ್ಲಿ ಪುರ್ಸೊತ್ ನಾ. ದೆಕುನ್ ಹೆಂ ಕಾಮ್ ತುಮ್ಕಾಂಚ್ ವ್ಹಯ್ಸಿಯಾಂ ಮ್ಹಣ್ ಆಯ್ಲೊಂ…”

ಚುಟುಕ್ ಚಾರ್ಲಿ ಆಯ್ಕೊನ್ ಕಿತೆಂಗೀ ಚಿಂತ್ಚ್ಯಾರ್ ಪಡ್‍ಲ್ಲೊ.

“ಬೆಜಾರ್ ಪಾವನಾಕಾತ್” ಹಾಂವೆಂಚ್ ನಾರ್ಗೊನ್‍ಶೆಂ ಮ್ಹಳೆಂ.

“ಬೆಜಾರ್ ಕಿತ್ಯಾಕ್. ಹೆಂ ಕಾಂಯ್ ಮ್ಹಾಕಾ ಪಯಿಲ್ಲೆಪಾವ್ಟಿಂ ನ್ಹಯ್. ಪೋರ್ ಎಕ್ಲೊ ಅಸೊಚ್ ಆಯಿಲ್ಲೊ… ತಾಚ್ಯಾ ಘರಾಕಡ್ಚೊ ಎಕ್ಲೊ ಸದಾಂಯ್ ಸೊರೊ ಪಿಯೆವ್ನ್ ಯೇವ್ನ್ ಹಾಕಾ ನಾಕಾ ಜಾಲ್ಲೆಂ ಯೆಟ್ತಾಲೊ ಕಂಯ್. ತಾಣೆಂಯ್ ಮ್ಹಜೆಕಡ್ಚಿಂ ದೋನ್ ಚುಟುಕಾಂ ವ್ಹೆಲ್ಲಿಂ. ದುಸ್ರೆ ದಿಸಾ ತೊ ಗಾಳಿ ಯೆಟ್ತಾನಾ ಹಾಣೆಂ ವ್ಹಡ್ಲ್ಯಾನ್ ಮ್ಹಜಿಂ ಚುಟುಕಾಂ ವಾಚ್ಲಿಂ ಕಂಯ್. ತೆಂ ಆಯ್ಕೊನ್ ಗೆಲ್ಲೊ ತೊ ಪಿಂವ್ಡೊ ಆತಾಂ ಘರಾ ಯೇನಾಶೆಂ ಬಾರಾಂತ್‍ಚ್ ನಿದ್ತಾ ಕಂಯ್!”

“ವಾವ್ ಗ್ರೇಟ್. ತುಮಿ ಚುಟುಕಾಂನಿ ಕರ್ಚಿ ಸಮಾಜ್ ಸೆವಾ ಹಿ.”

“ಇತ್ಲೆಂಚ್ ನ್ಹಯ್, ಕೊಂಕ್ಣಿ ಯೇನಾತ್ಲೊ ಲೋಕ್ ಸಯ್ತ್ ಮ್ಹಜಿಂ ಚುಟುಕಾಂ ವ್ಹರ್ತಾ. ಶೇಖರಾಚ್ಯಾ ಘರಾ ಸದಾಂ ರಾತಿಂ ಏಕ್ ವ್ಹಡ್ ಸಯ್ತ್ ಕುಳಿಂದ್ರ್ ಯೆತಾಲೊ ಕಂಯ್. ಕಿತ್ಲೆಂ ಎಲಿಪಾಶಾಣ್ ದವರ್ಲ್ಯಾರೀ ಕಾಂಯ್ ಜಾಂವ್ಕ್ ನಾ ಕಂಯ್ ತಾಕಾ. ಪೋರ್ ರಾತಿಂ ಮ್ಹಜ್ಯಾ ಚುಟುಕಾಚ್ಯಾ ಪಾನಾಂತ್ ಖಂಯ್ಚೆಂಗೀ  ವೀಕ್ ಭರ್ಸುನ್ ದವರ್‌ಲ್ಲೆಂ ಕಂಯ್. ಕುಳಿಂದ್ರ್ ಖಾವ್ನ್ ಥಂಯ್ಚ್ ಪಡ್ಚಾ! ತಾಚ್ಯಾ ವೊಂಟಾರ್ ಫೆಂಡಾಸಾಂಗತಾ ಮ್ಹಜ್ಯಾ ಚುಟುಕಾಚಿಂ ಉತ್ರಾಂಯ್ ಭಾಯ್ರ್ ಪಡ್‌ಲ್ಲಿಂ ಮ್ಹಣ್ ಹೆಂ ರೂಪ್ ರೂಪ್ ಪಳಯಿಲ್ಲ್ಯಾ ಶೇಖರಾನ್‍ಚ್ ಮ್ಹಾಕಾ ಸಾಂಗ್‌ಲ್ಲೆಂ”

“ಓಹ್.. ತುಮ್ಚಿಂ ಚುಟುಕಾಂ ಎಕ್ದಮ್ ಸ್ಟ್ರೋಂಗ್! ತುಮಿ ಆತಾಂ ಭಾರಿಚ್ ಲೊಕಾಮೊಗಾಳ್ ಜಾಲ್ಯಾತ್. ಕೊಣಾಯ್ಚ್ಯಾ ಮೊಬಾಯ್ಲಾರ್ ಪಳಯ್ಲ್ಯಾರೀ ತುಮ್ಚೆಂ ಚುಟುಕ್ ಆಸ್ತಾ. ಹಾಚೆಪಾಟ್ಲೊ ಘುಟ್ ಕಸಲೊ?”

“ತಶೆಂ ಸರ್ವಾಂಚ್ಯಾ ಮೊಬಾಯ್ಲಾಕ್ ಪಾವೊಂಕ್ ಇಲ್ಲಿ ತಕ್ಲಿ ಖರ್ಚಿಜೆ ಪಡ್ತಾ. ಪೋರ್ ಸಾಂತ್ ಅಂತೊನಿಚ್ಯಾ ಫೆಸ್ತಾ ದಿಸಾ ಅಶೆಂ ಏಕ್ ಚುಟುಕ್ ಬರಯ್ಲೆಂ

ಫೆಸ್ತ್ ತುಜೆಂ ಸಾಂತ್ ಅಂತೊನಿ
ಚುಟುಕ್ ಲಿಖ್ತಾ ತುಕಾ ಚಿಂತುನಿ
ಬೆಸಾಂವ್ ಘಾಲ್ ಆನಿ
ಭೊಗ್ಶಿ ಜಾಲ್ಯಾರ್ ಚಡುಣಿ’

ಸಕಲ್ ಮ್ಹಜೆಂ ನಾಂವ್ ಘಾಲ್ನ್ ‘ಹೆಂ ಚುಟುಕ್ ಧಾ ಜಣಾಂಕ್ ಧಾಡ್ಲ್ಯಾರ್ ಸಾಂತ್ ಅಂತೊನಿಚೆಂ ಬೆಸಾಂವ್ ಮೆಳ್ತಾ’. ಮ್ಹಣ್ ಕುಡ್ಸಿಲೆಂ. ಎಕೆ ಘಡಿಯೆನ್ ಹೆಂ ಗಾಂವಾಥಾವ್ನ್ ಗಲ್ಫ್, ಕೆನಡಾ, ಆಸ್ಟ್ರೇಲಿಯಾ, ಇಂಗ್ಲೆಂಡ್, ಇಸ್ರಾಯೆಲಾಪರ್ಯಾಂತ್ ಪಾವ್ಲೆಂ. ಸಾಂತ್ ಅಂತೋನಿಕಡೆ ಮೊಬಾಯ್ಲ್ ಪುಣೀ ಆಸ್ಲ್ಯಾರ್ ತಾಕಾಯ್ ಪಾವ್ಲಾಂ ಆಸ್ತಲೆಂ…” ಮ್ಹಣೊನ್ ಚುಟುಕ್ ಚಾರ್ಲಿ ವ್ಹಡ್ಲ್ಯಾನ್ ಹಾಸ್ಲೊ.

‘ತಾಕಾ ಪಾವ್ಲಾಂ ತರ್ ಪಯ್ಲೊ ಶಿರಾಪ್ ಹೆಂ ಬರಯಿಲ್ಲ್ಯಾಕ್ ಚ್ ಘಾಲ್ತೊ ಕೊಣ್ಣಾ’ ಮತಿಂತ್ ಚ್ ಚಿಂತ್ಲೆಂ ಹಾಂವೆಂ.

“ಕೊಂಕ್ಣೆಂತ್ ’ಚಡುಣೆಂ’ ಮ್ಹಳ್ಳೊ ಸಬ್ದ್ ವಾಪಾರ್ತಾತ್ ನೆ..ಪುಣ್ ತುಮಿ ’ಚಡುಣಿ’ ಮ್ಹಣ್ ಕಿತ್ಯಾಕ್ ಲಿಖ್ಲಾಂ?” ಮ್ಹಜೊ ದುಬಾವ್ ಉಚಾರ್ಲೊ ಹಾಂವೆಂ..

“ಪ್ರಾಸ್ ಜಾಯ್ ನೆ ಸಾಯ್ಬಾ! ಮ್ಹಜ್ಯಾ ಚುಟುಕಾಂಕ್ ಭಾಸ್ ನಾತ್ಲ್ಯಾರೀ ವ್ಹಡ್ ನಾ ಪ್ರಾಸ್ ಜಾಯ್ಜೆ. ಪೆಟ್ಯಾಚಿ ಶಿಮ್ಟಿ ನಳಿಯೆಂತ್ ಘಾಲ್ಯಾರ್ ನೀಟ್ ಜಾಯ್ನಾ ಮ್ಹಣ್ತಾತ್. ಪುಣ್ ಮ್ಹಜ್ಯಾ ಹಾತಾಕ್ ಸಾಂಪ್ಡಲ್ಲ್ಯಾ ಅಕ್ಶರಾಂಚಿ ಶಿಮ್ಟಿ, ಸೊಂಡಿ, ಸುಕರ್ನಳಿ ಸಯ್ತ್ ಜಾಯ್ ತಶೆಂ ವೊಳಾವ್ನ್ ಕೊಬಾಚೊ ರೋಸ್ ಕಾಡ್ಚೆಬರಿ ಪ್ರಾಸ್ ಕಾಡುಂಕ್ ಮ್ಹಾಕಾ ಕಳಿತ್ ಆಸಾ!” ಎಕಾಚ್ ದಂಬಾನ್ ಸಾಂಗ್ಲೆಂ ತಾಣೆಂ.

“ತುಮ್ಗೆರ್ ಘರಾ  ತುಮ್ಚಿಂ ಚುಟುಕಾಂ ವಾಚ್ತಾತ್ ಗೀ..”

“ವಾಚ್ಚೆಂ ಕಾಲೆಂ ಸಾಯ್ಬಾ. ಘರಾ ಹಾಂವೆಂ ಆನಿ ಬಾಯ್ಲೆನ್ ಚುಟುಕಾಂನಿಂಚ್ ಉಲೊಂವ್ಚೆಂ ಕಂಯ್! ಪೋರ್ ಜಾಲ್ಲೆಂ ಏಕ್ ಘಡಿತ್ ಸಾಂಗ್ತಾಂ ಆಯ್ಕ್. ಬಾಯ್ಲೆನ್ ರಾಂದ್‍ಲ್ಲ್ಯಾ ಮಾಸ್ಳೆಚ್ಯೆ ಕಡಿಯೆಕ್ ಮೀಟ್ ಚಡ್ ಜಾಲ್ಲೆಂ. ಶೀದಾ ಸಾಂಗ್ಲ್ಯಾರ್ ಬಾಯ್ಲ್ ಬೆಜಾರ್ ಜಾಯ್ತ್ ಮ್ಹಣ್ ಹಾಂವೆಂ ಅಶೆಂ ಚುಟುಕಾನ್ ಸಾಂಗ್ಲೆಂ –

ಅಗೆ ಮ್ಹಜೆ ಬಾಯ್ಲೆ
ರಾವ್ ತುಂ ನೀಟ್
ಆಜ್ ಕೆಲ್ಲ್ಯಾ ನಿಸ್ತ್ಯಾಕ್
ಚಡ್ ಜಾಲಾಂ ಮೀಟ್

“ಹಹಹ ಹಿ ಐಡಿಯಾ ಬರೀ ಆಸಾ ತುಮ್ಚಿ. ದೆಕುನ್ ಬಾಯ್ಲೆನ್ ಕಿತೆಂ ಜಾಪ್ ದಿಲಿ?”

“ಬಾಯ್ಲೆನ್ ಯೀ ಚುಟುಕಾಂತ್‍ಚ್ ಜಾಪ್ ದಿಲಿ. ಬೊವ್ಶಾ ಮ್ಹಜೆಂ ತಾಲೆಂತ್ ತಿಕಾಯ್ ಲಾಗ್ಲಾಂ ಆಸ್ತಲೆಂ… ತಿಣೆಂ ಅಶೆಂ ಮ್ಹಳೆಂ –

“ತುಜಿಂ ದೋನ್ ಚುಟುಕಾಂ
ಚುಕೊನ್ ಕುಂಡ್ಲ್ಯಾಂತ್ ಪಡ್ಲಿಂ
ಬೊವ್ಶಾಂ ತೆಂ ವಾಚುನ್
ನಿಸ್ತ್ಯಾಂತ್ಲಿ ಮಾಸ್ಳಿ ರಡ್ಲಿ”

ತಿತ್ಲ್ಯಾರ್ ಎಕ್ಲಿ ಬಾಯ್ಲ್ ಮನಿಸ್ ಯೇವ್ನ್ ಹಾತಾಂತ್ ಧಾ ರುಪಯ್ ದೀವ್ನ್ “ಧರಾ ಮ್ಹಾಕಾ ಚಾರ್ ಕಾಗ್ದಾಂ… ಸ್ಸೋರಿ ಚಾರ್ ಚುಟುಕಾಂ ದಿಯಾ” ಮ್ಹಣಾಲಿ. ಚುಟುಕ್ ಚಾರ್ಲಿನ್ ಧಾ ರುಪಯ್ ಘೆವ್ನ್ ಚಾರ್ ಚುಟುಕಾಂ ದಿಲಿಂ. ಮ್ಹಾಕಾ ಅಜ್ಯಾಪ್! ಉದ್ಗಾರ್ಲೊಂ ಹಾಂವ್ .

‘ಹಾಂಗಾಸರ್ ಯೇವ್ನ್ ಪಯ್ಶೆ ದೀವ್ನ್ ಚುಟುಕಾಂ ವ್ಹರ್ಚಿಂಯ್ ಆಸಾತ್ ಗೀ!’. ದೆಕ್ತಾಂ ದೆಕ್ತಾಂಚ್ ತಿ ಬಾಯ್ಲ್  ಆಫ್ಲ್ಯೆ ಸ್ಕೂಟಿರ್ ಸುಕ್ಣ್ಯಾನ್ ಕೆಲ್ಲೆಂ ಮ್ಹೆಳೆಂ ಪುಸುನ್ ಕಾಗ್ದಾಂ.. ಸೋರ್ರಿ ಚುಟುಕಾಂ ರಸ್ತ್ಯಾದೆಗೆಲ್ಯಾ ಚರಂಡೆಂತ್ ಉಡೊನ್ ಗೆಲಿ…

“ಅಜ್ಯಾಪ್ ಜಾಲೆಂಗೀ.. ಹೆಂ ಮ್ಹಜೆಂ ನವೆಂ ಯೋಜನ್ ಟಿಸ್ಸ್ಯೂ ಚುಟುಕ್ ಅಭಿಯಾನ್’. ಮ್ಹಳ್ಯಾರ್ ಟಿಸ್ಯೂ ಪತ್ರಾರ್ ಚುಟುಕಾಂ ಪ್ರಿಂಟ್ ಕೆಲ್ಯಾಂತ್ ಹಾಂವೆಂ. ಮ್ಹಜಿಂ ಚುಟುಕಾಂ ಆತಾಂ ಸಲೀಸಾಯೆನ್ ಲೊಕಾಚ್ಯಾ ಹಾತಾಕ್ ಪಾವ್ತಾತ್. ’ಲೊಕಾಚ್ಯಾ ಹಾತಾಕ್ ಪಾವ್‍ಲ್ಲಿಂ ಟಿಸ್ಸ್ಯೂ ಪೇಪರಾಂ… ಸ್ಸೋರಿ ಚುಟುಕಾಂ ಆನಿ ಖಂಯ್ ಖಂಯ್ ಪಾವ್ತಾತ್ ಗೀ ಮ್ಹಣ್ ಚಿಂತುನ್ ಹಾಂವ್ ಕಂಗಾಲ್ ಜಾಲೊಂ.

ತಿತ್ಲ್ಯಾರ್ ಮ್ಹಜಿ ದೀಶ್ಟ್ ವೊಣದೆರ್ ಗೆಲಿ. ಥಂಯ್ ಮುಕೇಲ್ ಮಂತ್ರಿ ಕೋಯ್ರ್ ವಿಂಚ್ಚೊ ವ್ಹಡ್ ಜಯ್ತ್ ಫೋಟೊ ಆಸ್ ಲ್ಲೊ… ತೆಂಚ್ ಪಳಂವ್ಚ್ಯಾರ್ ಪಡ್‍ಲ್ಲ್ಯಾ ಮ್ಹಾಕಾ ತಾಣೆಂ ಸವಾಲ್ ಕೆಲೆಂ –

“ತ್ಯಾ ಫೊಟ್ಯಾಂತ್ ಏಕ್ ವಿಶೇಸ್ ಆಸಾ. ಕಿತೆಂ ಸಾಂಗ್ ಪಳಯಾಂ”.

ಮ್ಹಾಕಾ ಕಾಂಯ್ ಕಳೊಂಕ್ ನಾ. ಉಪ್ರಾಂತ್ ತಾಣೆಂಚ್ ಸಾಂಗ್ಲೆಂ.

“ಸ್ವಚ್ ಭಾರತ್ ಅಭಿಯಾನಾಚೊ ವಾಂಟೊ ಜಾವ್ನ್ ಆಮ್ಚ್ಯಾ ಗಾಂವಾಂತ್ ಕೋಯ್ರ್ ವಿಂಚ್‍ಲ್ಲ್ಯಾ ಮುಕೇಲ್ ಮಂತ್ರಿಚೊ ಫೊಟೊ ತೊ. ತಾಚ್ಯೆ ಮುಟಿಂತ್ ಕೊಯ್ರಾಬರಿ ಕಾಗತ್ ಆಸಾ ಪಳೆ.. ತ್ಯಾ ಕಾಗ್ದಾಂತ್ ಮ್ಹಜೆಂ ಚುಟುಕ್ ಆಸಾ! ದೆಕುನ್ ತೊ ಫೊಟೊ ಹಾಂವೆಂ ಫ್ರೇಮ್ ಘಾಲ್ನ್ ದವರ್ಲಾ. ಆಮಿ ಬರಯಿಲ್ಲೆಂ ಥೊಡೆಪಾವ್ಟಿಂ ಖಂಯ್ ಖಂಯ್ ಪಾವ್ತಾ ಮ್ಹಣ್ ಚಿಂತ್ತಾನಾ ವಿಜ್ಮಿತ್ ಜಾತಾ”

ಚುಟುಕ್ ಚಾರ್ಲಿನ್ ಸಾಂಗ್ತಾನಾ ಮ್ಹಾಕಾ ಟಿಸ್ಸ್ಯೂ ಪೇಪರಾವಯ್ಲ್ಯಾ ಚುಟುಕಾಚ್ಯಾ ಉತ್ರಾಂಚಿ ಬಿರ್ಮತ್ ದಿಸ್ಲಿ.

“ಜಾಯ್ತ್ ತರ್ ಸಾಹಿತಿಂನೊ.. ಹಾಂವ್ ಭಾಯ್ರ್ ಸರ್ತಾಂ. ಹಾಂವೆಂ ದಿಲ್ಲ್ಯಾ ಮೊಬಾಯ್ಲಾಕ್ ಚುಟುಕ್ ಧಾಡುಂಕ್ ಉಡಾಸ್…”

“ಹಾಂ ಖಂಡಿತ್. ಹಾಂವ್ ಪೊಟಾಕ್ ಘೆಂವ್ಕ್ ತರೀ ವಿಸ್ರನ್ ಪುಣ್ ಚುಟುಕ್ ಧಾಡುಂಕ್ ಬಿಲ್ಕುಲ್ ವಿಸ್ರನಾ!”

ಹಾಂವ್ ಥಂಯ್ಚೊ ಉಟೊನ್ ಹಳೂ ಬೊಲ್ಸಾಂತ್ಲೆ ಪಾಂಯ್ಶಾಂಚೆ ಚಾರ್ ನೋಟ್ ಕಾಡ್ನ್ ತಾಚ್ಯಾ ಹಾತಾಂತ್ ದಿಲೆ.

“ಹೆ ಪಯ್ಶೆ ಖಂಯ್ಚ್ಯಾಕ್?” ಚುಟುಕ್ ಚಾರ್ಲಿನ್ ಅಜ್ಯಾಪೊನ್ ವಿಚಾರ್ಲೆಂ.

“ಪತ್ರಾಂಕ್ ಜಿಣಿಯೆ ಸಾಂದೊ ಮ್ಹಣ್ ಆಸ್ತಾ ಪಳಯಾ, ತಶೆಂ ಮ್ಹಣ್ ಚಿಂತಾ ಆನಿ ಹಾಂವ್ ಜಿವಂತ್ ಆಸ್ತಾ ಪರ್ಯಾಂತ್ ಮ್ಹಜ್ಯಾ ಮೊಬಾಯ್ಲಾಕ್…”

“ಚುಟುಕ್ ನೆ… ಖಂಡಿತ್ ಧಾಡ್ತಾಂ. ಏಕ್ ದೀಸ್ ಯೀ ಚುಕ್ಚೊಂನಾ”

“ನ್ಹಯ್ ನ್ಹಯ್ ಸಾಹಿತಿಂನೊ.. ಹಾಂವ್ ಜಿವಂತ್ ಆಸ್ತಾಪರ್ಯಾಂತ್ ಮ್ಹಜ್ಯಾ ಮೊಬಾಯ್ಲಾಕ್ ತುಮಿ ಚುಟುಕಾಂ ಧಾಡಿನಾಸ್ತಾಂ ರಾಂವ್ಚೆಖಾತಿರ್ ಹೆ ಪಯ್ಶೆ!”

ಚುಟುಕ್ ಚಾರ್ಲಿ ಥಟಕ್ಕ್ ಜಾಲ್ಲೊ!

► ವಿಲ್ಸನ್ ಕಟೀಲ್

“ಕೋಣ್ ತುಂ? ಹಾಂಗಾ ಕಿತ್ಯಾಕ್ ಆಯ್ಲಾಯ್?” ವಿಚಾರ್ಲೆಂ ಮುಕೆಲ್ಯಾನ್.

“ಮ್ಹಜೆಂ ನಾಂವ್ ಸಿಲಾ..”

“ಸಿಲಾ? ತುಜಿ ಸ್ಟಯ್ಲ್ ಪಳೆತಾನಾ ಸಿಲ್ವೆಸ್ಟರ್ ಸ್ಟಾಲೋನ್ ತಸಲೆಂ ಇಂಗ್ಲಿಶ್ ನಾಂವ್ ಆಸೊಂಕ್ ಪುರೊ ಮ್ಹಣ್ ಚಿಂತ್ಲೆಂ ಹಾಂವೆಂ. ಪುಣ್ ನಾಂವ್ ಪನ್ನಾಸ್ ವರ್ಸಾಂ ಆದ್ಲೆಂಗಿ?” ಮ್ಹಣ್ ಜ್ಯೊರಾನ್ ಹಾಸ್ಲೊ ಆನ್ಯೆಕ್ಲೊ ಜೂರಿ. ಸಿಲಾಕ್ ಬೆಚ್ಚ ಜಾಲೆಂ.

“ಅಳೆ ಸಾಯ್ಬಾ.. ತುಮಿ ಸಿನೆಮಾಂನಿ ಪನ್ನಾಸ್ ವರ್ಸಾಂಥಾವ್ನ್ ಪೇಂಯ್ಟ್ ಕಾಡಿನಾತ್ಲ್ಯಾ ಪಾಡ್ ಪಡ್ ಲ್ಲ್ಯಾ ಇಸ್ಕೊಲಾಚ್ಯಾ ಮಾತಿ ಖೆಲ್ಲ್ಯೆ ಗೆಟಿಕ್ “ಸೇಂಯ್ಟ್ ಕ್ಸೇವಿಯರ್ ಕೊಲೆಜ್ ಮುಂಬಯ್’ ಮ್ಹಣ್ ಫ್ಲೆಕ್ಸ್ ಬಾಂದುನ್ ಪ್ರೇಕ್ಶಕಾಂಕ್ ಮಾಂಕೊಡ್ ಕರ್ಯೆತ್ ಖಂಯ್… ಪುಣ್ ಮ್ಹಾಕಾ ಮಾತ್ರ್ ಮೋಡರ್ನ್ ಡ್ರೆಸ್ ಆಸೊನ್ ಸಿಲಾ ಮ್ಹಣ್ ನಾಂವ್ ಆಸೊಂಕ್ ನುಜೊಗಿ? ಅಳೆ. ಮ್ಹಜೆಂ ಪುರ್ತೆಂ ನಾಂವ್ ಸಿಲ್ವರ್ ಸಿಲಾ!”

“ಸಿಲ್ವರ್ ಸಿಲಾ? ತೆಂ ಕಾಲೆಂ ಸಿಲ್ವರ್?”

“ತೆಂ ಮ್ಹಳ್ಯಾರ್ ಮ್ಹಾಕಾ ಸಿನೆಮಾ ಪಳೆಂವ್ಚೆಂ ಪಿಶೆಂ. ಸಿನೆಮಾ ಧಾಂವ್ಚೆಂ ಸಿಲ್ವರ್ ಸ್ಕ್ರೀನಾರ್ ನೆ. ತಶೆಂ ಮ್ಹಾಕಾ ಸಿಲ್ವರ್ ಸಿಲಾ ಮ್ಹಣ್ತಾತ್”

“ತೆಂ ಆಸೊಂದಿ. ಆತಾಂ ತುಂ ಹಾಂಗಾ ಕಿತ್ಯಾಕ್ ಆಯ್ಲಾಯ್ ತೆಂ ಸಾಂಗ್” ಆನ್ಯೆಕಾ ಜೂರಿನ್ ಸವಾಲ್ ಕೆಲೆಂ.

“ಅಳೆ.. ತುಮಿ ಸಿನೆಮಾಂಕ್ ಎವಾರ್ಡ್ ದಿತಾತ್ ಖಂಯ್ ನೆ. ಬೆಸ್ಟ್ ಸಿನೆಮಾ, ಬೆಸ್ಟ್ ಡೈರೆಕ್ಟರ್ ಇತ್ಯಾದಿ, ತುಮ್ಚಿ ಕೆಟಗರಿಚ್ ಸಮಾ ನಾಯಾ. ದೆಕುನ್ ತ್ಯೊ ಕೆಟಗರಿ ಕ್ಯಾನ್ಸಲ್ ಕರುನ್ ಏಕ್ ನವೊಚ್ ಎವಾರ್ಡ್ ದೀಜೆ””

“ಖಾಂಯ್ಚೊ ತೊ ನವೊ ಅವಾರ್ಡ್?”

“ಬೆಸ್ಟ್ ಪ್ರೇಕ್ಶಕ್ ಎವಾರ್ಡ್!”

“ಬೆಸ್ಟ್ ಪ್ರೇಕ್ಶಕ್ ಎವಾರ್ಡ್?” ಪೂರಾಯ್ ಜೂರಿ ಎಕಾಚ್ ಫರಾ ಉದ್ಗಾರ್ಲೆ.

“ವ್ಹಯ್. ಸಿನೆಮಾ ಕಾಡ್ತಾಲೆ ಕಾಡ್ನ್ ಚ್ ವೆತಾತ್. ಪುಣ್ ತಿ ಪಳೆವ್ನ್ ಭಲಾಯ್ಕಿ ಹೊಗ್ಡಾಯಿಲ್ಲಿ ಮ್ಹಜೆತಸಲ್ಯಾ ಪ್ರೇಕ್ಶಕಾಂನಿ. ತುಕಾ ಕಳೀತ್ ಆಸಾಯೆ, ಹ್ಯಾ ಸಿನೆಮಾ ಧರ್ಮಾನ್ ಏಕ್ ಪ್ರೇಕ್ಶಕ್ ಜಾವ್ನ್ ಹಾಂವೆಂ ಕಿತ್ಲೊ ತ್ಯಾಗ್ ಕೆಲಾ ಮ್ಹಣ್?”

“ಸಾಂಗ್ಲ್ಯಾರ್ ನೆ ಕಳ್ಚೆಂ.. ಹಾಂ ಸಾಂಗ್ ಲ್ಲೆಬರಿ ತುಂ ತುಜ್ಯಾ ದೊಳ್ಯಾಚೆಂ ಕೂಲಿಂಗ್ ಗ್ಲಾಸ್ ಆನಿ ಪುಣೀ ಕಾಡ್ ಸಾಯ್ಬಾ. ಹೆಂ ಎ.ಸಿ ಕೂಡ್. ಹಾಂಗಾ ವೋತ್ ಆಸಾಯೆ?”

ಸಿಲಾನ್ ಹಳೂ ಆಪ್ಲೆಂ ಕೂಲಿಂಗ್ ಗ್ಲಾಸ್ ಕಾಡ್ಲೆಂ. ತಿತ್ಲೆಂಚ್! ಜೂರಿನ್ ಸುರ್ಯಾಕ್ ದೆಕ್ ಲ್ಲೆಬರಿ ದೊಳ್ಯಾಂಕ್ ಹಾತ್ ಆಡ್ ಧರ್ಲೊ! “ಹೆಂ ಕಾಲೆಂ ಸಾಯ್ಬಾ ತುಜೆ ದೊಳೆ ತಾಂಬ್ಡೆ ತಾಂಬ್ಡೆ ಕೆಂಡಾಂಬರಿ ಜಾಲ್ಯಾತ್?”

“ಪೂರಾ ಸಿನೆಮಾಂಚ್ಯಾ  ದ್ಗರ್ಮಾನ್! ಸಿನೆಮಾ ಪಳೆವ್ನ್ ಮ್ಹಜೆ ದೊಳೆ ಅಶೆ ಜಾಲ್ಯಾತ್!” ಮ್ಹಣ್ ಪರತ್ ತಾಣೆಂ ಚಸ್ಮಾ ಲಾಯ್ಲೆಂ.

“ಅರೆ! ಹೆಂ ಕಿತೆಂ ಸಾಯ್ಬಾ! ಕೊಂಕ್ಣೆಂತ್ ಆಯಿಲ್ಲಿಂಚ್ ಚಾರ್ ಪಾಂಚ್ ಫಿಲ್ಮಾಂ ಆನಿ ತುಂ ಏಕ್ ಹಜಾರ್ ಫಿಲ್ಮಾಂ ಪಳೆಲ್ಲೆಬರಿ ದೊಳೆ ತಾಂಬ್ಡೆ ಜಾಂವ್ಕ್ ಸಿನೆಮಾ ಕಾರಣ್ ಮ್ಹಣ್ತಾಯ್?!”

“ತಿತ್ಲಿಂಚ್ ಪುರೊ ಮ್ಹಜ್ಯಾ ದೊಳ್ಯಾಂಕ್ ಉಜೊ ದೀಂವ್ಕ್! ಹಾಂವ್ ಸಿನೆಮಾ ಪಳೆಯ್ತಾನಾ ಮೆಜೂನ್ ಧಾ ಮಾಂಡೆ ಆಸ್ಲೆ ಥಿಯೇಟರಾಂತ್. ಪುಣ್ ಫೇಸ್ ಬುಕಾರ್ ಪಳಯ್ತಾನಾ ’ಹೌಸ್ ಫುಲ್ ಹೌಸ್ ಫುಲ್’ ಮ್ಹಣ್ ಪೋಸ್ಟ್ ಘಾಲ್ತಾಲೆ. ತಶೆಂ ಕಿತ್ಲೊ ಲೋಕ್ ಆಸಾ ಮ್ಹಣ್ ಜಸ್ಟ್ ಏಕ್ ದೀಶ್ಟ್ ಘಾಲುಂಕ್ ಪೋರ್ ಥಿಯೇಟರಾಚ್ಯಾ ಗೆಟಿಕಡೆ ಗೆಲ್ಲೊಂ. ಪುಣ್ ಸಿನೆಮಾಕ್ ಸಂಬಂಧ್ ಜಾಲ್ಲ್ಯಾ ಕೋಣ್ ಗೀ ಚಾರ್ ಪಾಂಚ್ ಜಣಾಂನಿ ಮ್ಹಾಕಾ ಧರ್ನ್ ಟೆರರಿಸ್ಟಾಕ್ ಎರೆಸ್ಟ್ ಕೆಲ್ಲೆಬರಿ ವೋಡ್ಣ್ ವ್ಹರ್ನ್ ಥಿಯೇಟರಾಭಿತರ್ ಬಸಯ್ಲೆಂ.. ಹಾಂವೆಂ ಪಳೆಲಾಂ ಮ್ಹಳ್ಯಾರೀ ಆಯ್ಕನಾಸ್ತಾಂ ಟಿಕೆಟ್ ದೀನಾಕಾ ಆಮಿ ಪಯ್ಶೆ ದಿತಾಂವ್ ಮ್ಹಣಾಲೆ. ಅಶೆಂ ಸಕಾಳಿಂಚೆಂ ಶೋ ಜಾವ್ನ್ ಉಸ್ವಾಸ್ ಕಾಡ್ಯಾಂ ಮ್ಹಣ್ ಭಾಯ್ರ್ ವೆತಾನಾ ಪರತ್ ಮ್ಹಾಕಾ ಭಿತರ್ ಲೊಟ್ಲೆಂ. ಅಶೆಂ ಎಕಾ ದಿಸಾ ಚಾರ್ ಶೋ ಪಳೆವ್ನ್ ಮ್ಹಜೆ ದೊಳೆ ಸತ್ತ್ಯಾನಾಸ್ ಜಾಲೆ! ಆತಾಂ ಮ್ಹಜ್ಯಾ ಘರ್ಚ್ಯಾ ಬೆಡ್ ರುಮಾಂತ್ ಬಾಯ್ಲೆನ್ ಲಾಯ್ಟ್ ಬಂದ್ ಕರ್ತಾನಾಂಯ್ ಥಿಯೇಟರಾಚೊ ಉಡಾಸ್ ಯೇವ್ನ್ ಭೊಲ್ಚೆತಾಂ ಹಾಂವ್!”

ಜೂರಿಕ್ ಹಾಸೊ ಆಯ್ಲ್ಯೊ ತರೀ ವೊಟಾಂರ್ ದಾಕಯ್ಲ್ಯಾರ್ ಆಪ್ಲ್ಯಾ ದೊಳ್ಯಾ ಉಜ್ಯಾಂನಿ ಹೊ ಮನಿಸ್ ಗೊಬೊರ್ ಕರಿತ್ ಮ್ಹಣ್ ಭಿಯೆಲೆ.

“ಜಾಲ್ಯಾರೀ ಕೊಂಕ್ಣಿ ಸಿನೆಮಾ ಕುಟ್ಮಾಸಮೇತ್ ಪಳೆಂವ್ಚಿಂಚ್ ಆಸ್ತಾತ್ ನೆ. ತಾಂತ್ಲ್ಯಾ ತಾಂತುಂಯ್ ಥೊಡ್ಯಾಂಚಿಂ ನಾಂವಾಯ್ ಸಯ್ರ್ಯಾಂಬರಿಂಚ್ ಆಸ್ತಾತ್. ಸಯ್ರ್ಯಾಂಗೆರ್ ವೆಚೆಂ ಮ್ಹಣ್ ಚಿಂತುನ್ ಥಿಯೇಟರಾಕ್ ಗೆಲ್ಯಾರ್ ಜಾಲೆಂ!”

“ಕಾಲೆಂ ಕುಟ್ಮಾಸಮೇತ್ ಪಳೆಂವ್ಚಿಂ ಯಾ? ಹ್ಯಾ ಸಿನೆಮಾ ಧರ್ಮಾನ್ ಮ್ಹಜೆಂ ಕುಟಮ್ ಚ್ ದೆಸ್ವಾಟ್ ಜಾಂವ್ಚ್ಯಾ ಮಟ್ಟಾಕ್ ಪಾವ್ ಲ್ಲೆಂ ಗೊತ್ತಾಯೆ ತುಮ್ಕಾಂ? ಬಾಯ್ಲೆಕ್ ಆನಿ ಮ್ಹಾಕಾ ಖಂಡಾಪಟ್ಟೆ ಗಲಾಟೊ ಜಾಲ್ಲೊ”

“ಕಿತ್ಯಾಕ್? ತಿಕಾ ಸಿನೆಮಾಕ್ ಆಪೊನ್ ವ್ಹರುಂಕ್ ನಾಂಯ್ ಮ್ಹಣ್ ಗಿ?”

“ಆಪೊನ್ ವ್ಹರುಂಕ್ ನಾ ಮ್ಹಣ್ ನ್ಹಯ್, ಕಿತ್ಯಾಕ್ ಆಪೊನ್ ವ್ಹೆಲೆಂಯ್ ಮ್ಹಣ್! ’ಮ್ಹಜಿಂ ಸೀರಿಯಲಾಂ ಚುಕವ್ನ್ ಅಸಲ್ಯಾ  ಸಿನೆಮಾಂಕ್ ಆಪೊನ್ ಹಾಡ್ಲಾಂಯ್… ಸೀರಿಯಲಾಂತ್ ಎಕೆಕೆ ಬಾಯ್ಲೆಚ್ಯಾ ಆಂಗಾರ್ ಆಸ್ಚ್ಯಾ ಕಾಪ್ಡಾಚೆಂ ಮೋಲ್ ಗೊತ್ತಾಯೆ ತುಕಾ? ವರ್ಸಾಕ್ ಏಕ್ ಪುಣೀ ಕಾಪಡ್ ಕಶೇಂಯ್ ಹಾಡ್ನ್ ದೀನಾಂಯ್. ಸೀರಿಯಲಾಂತ್ ಪುಣೀ ಪಳೆವ್ನ್ ಖುಶಿ ಪಾವ್ತಾನಾ ತೆಂಯ್ ಆಡಾವ್ನ್ ತುವಾಲೊ ನ್ಹೆಸ್ಚ್ಯಾ ಚೆಡ್ವಾಂಕ್ ಪಳೆಂವ್ಕ್ ಹ್ಯಾ ಸಿನೆಮಾಂಕ್ ಆಪೊನ್ ಹಾಡ್ಲಾಂಯ್ ಗಿ?’ ಮ್ಹಣ್ ಮ್ಹಾಕಾ ಜ್ಯೋರ್ ಚ್ ಜ್ಯೋರ್. ಮಾತ್ರ್ ನ್ಹಯ್, ಆನಿ ಹಾಂವೆಂಯ್ ಅಸಲ್ಯಾ ಸಿನೆಮಾಂಕ್ ವಚೊಂಕ್ ನಜೊ ಮ್ಹಣ್ ಖುದ್ ತಾಕೀದ್ ದಿಲ್ಲಿ”

“ವ್ಹಯ್ ಗೀ ಕಿತೆಂ. ಬಿರ್ಮತ್ ಸಾಯ್ಬಾ ತುಜಿ…” ಎಕ್ಲ್ಯಾ ಜೂರಿಕ್ ಬಿರ್ಮತ್ ದಿಸ್ಲಿ.

“ಪುಣ್ ಮ್ಹಾಕಾ ಕೊಂಕ್ಣಿ ಮ್ಹಳ್ಯಾರ್ ಮೊಸ್ತು ಮೋಗ್ ಯಾ. ಹಾಂವೆಂ ಆತಾಂ ಫಟಿ ಮಾರ್ನ್ ಸಿನೆಮಾಕ್ ವೆಚೆಂ. ಲಾನ್ ಆಸ್ತಾನಾ ಸ್ಪೆಶಲ್ ಕ್ಲಾಸ್ ಮ್ಹಣ್ ಸಿನೆಮಾಂಕ್ ವೆತಾಲೊಂ. ಆತಾಂ ರೆತಿರೆಕ್ ಮ್ಹಣ್ ಸಿನೆಮಾಂಕ್ ವೆತಾಂ…”

“ರೆತಿರೆಕ್ ಮ್ಹಣ್ ಸಿನೆಮಾಕ್ ವೆಚೆಂ ದೆವಾಕ್ ಮೋಸ್ ಕೆಲ್ಲೆಬರಿ ಜಾಯ್ನಾಯೆ?” ಜೂರಿಂತ್ ಎಕ್ಲೊ ಪಾದ್ರ್ಯಾಪ್ ಯೀ ಆಸ್ಲೊ.

“ತಶೆಂ ಕಾಂಯ್ ಪಾತಕ್ ಜಾಂವ್ಚೆನಾ. ಕಿತ್ಯಾಕ್ ಮ್ಹಳ್ಯಾರ್, ಥಿಯೇಟರಾಂತ್ ಎಕಾ ರಿತಿಚೆಂ ರೆತಿರೆಚೆಂಚ್ ಫೀಲ್ ಆಸ್ತಾ. ’ಭಾವಾಚಿ ಧುವ್ ಹೀರೋಯಿನ್’ ಮ್ಹಣ್ ದಾಕ್ಶೆಣೆಕ್ ಆಯಿಲ್ಲಿಂ ಸಿಸ್ಟರಾಂ ಥೊಡಿಂ ರೊಮ್ಯಾಂಟಿಕ್ ದೃಶ್ಯಾಂ ಯೆತಾನಾ ದೊಳೆ ಧಾಂಪುನ್ ಧ್ಯಾನ್ ಕೆಲ್ಲೆಬರಿಚ್ ದಿಸ್ತಾತ್. ’ಪ್ರೊಡ್ಯೂಸರಾನ್ ಇಗರ್ಜೆಕ್ ದಾನ್ ದಿಲಾಂ’ ಮ್ಹಳ್ಳ್ಯಾಕ್ ಥಿಯೇಟರಾಕ್ ಆಯಿಲ್ಲೆ ಥೊಡೆ ಪಾದ್ರಿ ಐಟಮ್ ಡ್ಯಾನ್ಸ್ ಜಾತಾನಾ ಖುರ್ಸಾಚೊ ಉಮೊ ಘೆತಾತ್! ’ಆಮ್ಚ್ಯಾ ಇಗರ್ಜೆಚ್ಯಾ ಗ್ರೊಟ್ಟ್ಯಾಕಡೆ ಶೂಟಿಂಗ್ ಕೆಲಾಂ’ ಮ್ಹಣ್ ಜಿಣಿಯೆಂತ್ ಪಯಿಲ್ಲೆಪಾವ್ಟಿಂ ಸಿನೆಮಾಂತ್ ಯೆಂವ್ಚಿಂ ದೇವ್ ಭಿರಾಂತೆಚಿಂ ಮಾಲ್ಘಡಿಂ ಮನ್ಶಾಂ, ಸ್ಕ್ರೀನಾರ್ ಇಗರ್ಜ್ ಪಳೆಲ್ಲಿಚ್ ಆನಂದ್ ಬಾಪಾ ಕಾಡ್ತಾತ್. ಅಶೆಂ ಜಾಲ್ಲ್ಯಾನ್ ಥಿಯೇಟರಾಂತ್ ಬಸ್ಲ್ಯಾರೀ ರೆತಿರೆಂತ್ ಆಸ್ ಲ್ಲೆಬರಿಚ್ ಭೊಗ್ತಾ…”

“ಹಹ.. ಜಾವ್ಯೆತ್ ಸಾಯ್ಬಾ ತುಂ, ಕಶೇಂಯ್ ಬಾಯ್ಲೆಕ್ ಮಾಂಕೊಡ್ ಕರ್ತಾಯ್” ಜೂರಿಂತ್ಲೊ ಕೋ ಪ್ರೊಡ್ಯೂಸರ್ ಹಾಸ್ಲೊ.

“ಪುಣ್ ತಾಂತುಂಯ್ ಏಕ್ ಪಾವ್ಟಿಂ ಶಿರ್ಕೊನ್ ಪಡ್ಲೊಂ ಹಾಂವ್. ಹ್ಯಾ ಸಿನೆಮಾ ಮನ್ಶಾಂನಿ ತಾಂತುಂಯ್ ಬರ್ಕತ್ ಜಾಂವ್ಕ್ ಸೊಡುನಾ ಮ್ಹಾಕಾ!”

“ಕಾಲೆಂ ಜಾಲೆಂ?”

“ಜಾಂವ್ಚೆಂ ಕಾಲೆಂ? ಏಕ್ ಪಾವ್ಟಿಂ ಅಶೆಂಚ್ ರೆತಿರೆಕ್ ವೆತಾಂ ಮ್ಹಣ್ ಬಾಯ್ಲೆಕಡೆ ಫಟಿ ಮಾರ್ನ್ ಸಿನೆಮಾ ಪಳೆವ್ನ್ ಘರಾ ಯೆತಾನಾ ಬಾಯ್ಲ್, ತುಜೆಂ ಸಿನೆಮಾಂಚೆಂ ಪಿಶೆಂ ಸುಟೊಂಕ್ ನಾ ಗಿ ಮ್ಹಣ್ ಮ್ಹಜ್ಯಾ ದೊಳ್ಯಾಂಕ್ ಮಿರ್ಸಾಂಗೆಪಿಟೊ ಉಡೊಂಕ್ ಆಯಿಲ್ಲಿ..”

“ತಿಕಾ ಕಶೆಂ ಕಳ್ಳೆಂ ಖಂಯ್?”

“ಪೂರಾ ಹ್ಯಾ ಸಿನೆಮಾವಾಲ್ಯಾಂಚಿಂ ಕರ್ಮಾಂ ಮ್ಹಣ್ತಾಂ! ಹಾಂವ್ ಸಿನೆಮಾ ಪಳೆವ್ನ್ ಭಾಯ್ರ್ ಯೆತಾನಾ ಹೌಸ್ ಫುಲ್ ಮ್ಹಣ್ ದಾಕಂವ್ಕ್ ದಾರಾಕಡೆ ಕೋಣ್ ಗೀ ಮೊಬಾಯ್ಲ್ ಘೆವ್ನ್ ಫೇಸ್ ಬುಕ್ ಲೈವ್ ದಿತಾಲೊ ಖಂಯ್. ತಾಣೆಂ ವಾಟ್ಸಾಪಾರ್ ಮ್ಹಜ್ಯಾ ಬಾಯ್ಲೆಕೀ ಲಿಂಕ್ ಧಾಡ್ಲಾಂ! ಹ್ಯಾ ಮನ್ಶಾಂನಿ ಫೇಸ್ ಬುಕ್ ಲೈವಾಕ್ ದಿಂವ್ಚಿ ಉರ್ಬಾ ಸಿನೆಮಾ ಶೂಟಿಂಗಾಂತ್ ದಾಕಯಿಲ್ಲಿ ತರ್ ಆಮ್ಚ್ಯಾ ದೊಳ್ಯಾಂಕ್ ದಿಂವ್ಚಿ ಶಿಕ್ಶಾ ಇಲ್ಲಿ ತರೀ ಆಡಾವ್ಯೆತಿ!”

“ಕಿತೇಂಯ್ ಜಾಂವ್, ತುಜೆ ತಸಲೊ ಪ್ರೇಕ್ಶಕ್ ನಿಜಾಯ್ಕಿ ಕೊಂಕ್ಣಿ ಸಿನೆಮಾಂಕ್ ಏಕ್ ಬೆಸಾಂವ್.”

“ಕಾಲೆಂ ಬೆಸಾಂವ್ ಯಾ? ಸಿನೆಮಾಚ್ಯಾ ಪಯ್ಲೆಂ ಥೊಡಿಂ ಭಾಶಣಾಂ ಕರ್ತಾತ್ ಪಳೆಯ್ಲ್ಯಾರ್ ಎಬ್ಬೆ! ಸಿನೆಮಾಚಿ ಎಬಿಸಿಡಿ ಕಳಿತ್ ನಾತ್ಲ್ಯಾಂಕ್ ಆಪೊನ್ ಎಕೇಕ್ ವೋರ್ ಭಾಶಣ್! ಕೊಣಾಕ್ ಜಾಯ್ ಕರಂದಾಯ್? ಪಾವನಾತ್ಲ್ಯಾಕ್ ಪಾದ್ರಿಂಚೆ ಶೆರ್ಮಾಂವ್! ಹೆ ಶೆರ್ಮಾಂವ್ ಆಯ್ಕೊನ್ ಆಯ್ಕೊನ್ ಸಿನೆಮಾ ಥಿಯೇಟರ್ ಇಗರ್ಜ್ ಜಾವ್ನ್ ಮತಾಂತರ್ ಜಾಯ್ನಾತ್ಲೆಂ ವ್ಹಡ್!”

“ಹಹಹ.. ಹಿ ಸಿನೆಮಾಚಿ ಭಾಯ್ಲಿ ಗಜಾಲ್. ಪುಣ್ ಸಿನೆಮಾ ಮ್ಹಳ್ಯಾರ್ ಏಕ್ ಮನಾರಂಜನ್ ನ್ಹಯ್ ಗಿ..”

“ಕಾಲೆಂ ಮನೋರಂಜನ್? ಹಾಂವೆಂ ಭೊಗ್ ಲ್ಲ್ಯಾ ಮಾನಸಿಕ್ ಹಿಂಸಾವಿಶಿಂ ಖಬರ್ ಆಸಾಯೆ ತುಕಾ? ಸತ್ತ್ ಸಾಂಗ್ತಾಂ. ಮ್ಹಜೆ ಈಶ್ಟ್ ಪೂರಾ ತಮಿಳ್ ಮಲಯಾಳಮ್ ಮರಾಠಿ ಸಿನೆಮಾ ಪಳೆವ್ನ್ ಎಕಾಮೆಕಾ ಡಿಸ್ಕಸ್ ಕರ್ತಾನಾ ಹಾಂವೆಂ ಪಳೆಲ್ಲ್ಯಾ ಕೊಂಕ್ಣಿ ಸಿನೆಮಾವಿಶಿಂ ವಿಚಾರ್ತಾನಾ ಮ್ಹಾಕಾ ಕಾಲೆಂ ಮ್ಹಣ್ಚೆಂ ಮ್ಹಣ್ ಕಳಾನಾ. ದೆಕುನ್ ಹಾಂವೆಂ ಇಂಟರ್ ವೆಲ್ಲಾ ವೆಳಾ ವಾಟ್ಸಾಪಾರ್ ವಾಚ್ ಲ್ಲೆ ಜ್ಯೋಕ್ ಸಾಂಗೊನ್ ತಾಂಕಾಂ ಹಾಸಂವ್ಚೆಂ ಗೊತ್ತಾಯೆ…”

“ಆತಾಂ ಆಮಿ ಕಾಲೆಂ ಕರಿಜೆ ಮ್ಹಣ್ತಾಯ್?” ಜ್ಯೂರಿ ಸಮಿತೆನ್ ವಿಚಾರ್ಲೆಂ.

“ಕಾಲೆಂಯ್ ಕರಾ ಪುಣ್ ಬೆಸ್ಟ್ ಪ್ರೇಕ್ಶಕ್ ಎವಾರ್ಡ್ ಜಾಯ್!”

“ಆತಾಂ ತಸಲೆಂ ಏಕ್ ಎವಾರ್ಡ್ ದವರ್ಲೆಂಚ್ ಮ್ಹಣ್ಯಾಂ, ಖಂಯ್ಚ್ಯಾ ಆಧಾರಾಚೆರ್ ತುಂ ಹ್ಯಾ ಅವಾರ್ಡಾಕ್ ಫಾವೊ ಮ್ಹಣ್ತಾಯ್?” ಮುಕೆಲ್ಯಾನ್ ಸವಾಲ್ ಕೆಲೆಂ. ಹಾಕಾಚ್ ರಾಕೊನ್ ಆಸ್ ಲ್ಲೆಬರಿ ಸಿಲಾ ಮ್ಹಣಾಲೊ-

“ಹಾಂ! ಹೆಂ ಜಾಲ್ಯಾರ್ ಸವಾಲ್. ಸಾಂಗ್ತಾಂ ಆಯ್ಕಾ. ಪೋಂಯ್ಟ್ ಟು ಪೋಂಯ್ಟ್ ಸಾಂಗ್ತಾಂ:

  ಮ್ಹಜ್ಯಾ ಸಪ್ಣಾಂತ್ ಪಯ್ಲೆಂ ಮಾಧುರಿ ದೀಕ್ಶಿತ್, ಜೂಹಿ ಚಾವ್ಲಾ ಯೆತಾಲಿಂ. ಕೊಂಕ್ಣಿ ಸಿನೆಮಾ ಪಳೆಂವ್ಕ್ ಸುರ್ವಾತ್ಲ್ಯಾ ಉಪ್ರಾಂತ್ ಲಿಪ್ ಸ್ಟಿಕ್ ಸಾರಯಿಲ್ಲೆ, ಪೌಡರ್ ಪುಸ್ ಲ್ಲೆ ಕೊಂಕ್ಣಿ ಹೀರೋಚ್ ಯೆತಾತ್. ದೆಕುನ್ ಹ್ಯಾ ಸಿನೆಮಾಧರ್ಮಾನ್ ಮ್ಹಜ್ಯಾ ಸಪ್ಣಾಂಚೆಂ ಕೌಟುಂಬಿಕ್ ಜಿವಿತ್ ಪಿಡ್ಡ್ಯಾರ್ ಜಾಲಾಂ”

ಘರಾ ನಿಸ್ತ್ಯಾಕ್ ಇಲ್ಲೆಶೆಂ ಮೀಟ್ ಚಡ್ ಜಾಲ್ಯಾರೀ ಖೊಡ್ ಕಾಡ್ಚೊಂ ಹಾಂವ್ ಥಿಯೇಟರಾಂತ್ ರಾಂದ್ಚ್ಯಾ ಕುಡಾಂತ್ಲೆ ಬೆಳ್ಶೆಲ್ಲೆ ಜ್ಯೋಕ್ ಪಳೆವ್ನ್ ವೊಂಕಾರೆಂ ಆಯ್ಲ್ಯಾರೀ ರಡನಾಸ್ತಾಂ ಹಾಂವೆಂ ಮ್ಹಾಕಾಚ್ ಕಂಟ್ರೋಲ್ ಕೆಲಾಂ.

ಎಕಾ ಫಯ್ಟ್ ಸೀನಾಂತ್ ಹೀರೋಚ್ಯಾ ಹರ್ದ್ಯಾಕ್ ಮಾರ್ ಪಡ್ತಾನಾ ಉಸ್ಳಲ್ಲ್ಯಾ ತಾಂಬ್ಡ್ಯಾ ಉದ್ಕಾಂತ್ ಬಿಂರ್ಡಾಂಚಿಂ ಬಿ ದಿಶ್ಟಿಕ್ ಪಡ್ಲ್ಯಾರೀ ವಿಮರ್ಸೊ ಬರೊಂಕ್ ನಾ. ಮಾತ್ರ್ ನ್ಹಯ್, ಹೀರೋಚ್ಯಾ ಆಂಗಾರ್ ವ್ಹಾಳ್ ಲ್ಲ್ಯಾ ಬಿಂರ್ಡಾರೊಸಾಕ್ ರಗತ್ ಮ್ಹಣ್ ಚ್ ಮಾಂದ್ಲಾಂ.

ಇಶ್ಟಾಂನಿ ಅನ್ ಫ್ರೆಂಡ್ ಕರ್ತಾಪರ್ಯಾಂತ್ ತಾಂಚ್ಯಾ ಫೇಸ್ ಬುಕ್ ವಾಲಾರ್ ಸಿನೆಮಾಚಿಂ ಹೌಸ್ ಫುಲ್ಲ್ ಹೌಸ್ ಫುಲ್ಲ್ ಮ್ಹಳ್ಳೆ ಪೋಸ್ಟ್ ಟ್ಯಾಗ್ ಕೆಲ್ಯಾತ್.

ಥೊಡ್ಯಾಂನಿ ಕೊಂಕ್ಣೀ ಸಿನೆಮಾಂವಿಶಿಂ ಬರಯಿಲ್ಲ್ಯಾ ಖಡಕ್ಕ್ ವಿಮರ್ಶಾಂತ್ ಕಿತ್ಲೆಂ ಸತ್ ಆಸ್ಲ್ಯಾರೀ ವಾಚುನ್ ಲೈಕ್ ಸಯ್ತ್ ದಾಂಬಿನಾಸ್ತಾಂ ಕೊಂಕ್ಣಿ ಸಿನೆಮಾಂಕ್ ಹಾಂವೆಂ ಸಪೋರ್ಟ್ ಕೆಲಾ…”

ಸಿನೆಮಾವಾಲ್ಯಾಂನಿ ಆಪ್ಣಾಚಿ ಇಂಟರ್ ವ್ಯೂ ಮ್ಹಣ್ ಧಾಡ್ ಲ್ಲ್ಯಾ ಲಿಂಕಾಂತ್ ಇಂಟರ್ ವ್ಯೂ ಘೆತೆಲ್ಯಾ ಜರ್ನಲಿಸ್ಟಾಚೆಂ ಜಿಂಗ್ರಿಬಿಸಾಂವ್ ವಾಚುನ್ ಮತಿಚೆಂ ಸಮಾದಾನ್ ಹೊಗ್ಡಾಯ್ಲಾಂ…”

ಸಿಲಾ ಸಾಂಗೊನ್ ಆಸ್ತಾನಾಂಚ್ ಧವೊ ದೊಗ್ಲೊ ಪಾಂಗ್ರುಲ್ಲೊ ಕೋಣ್ ಗೀ ಎಕ್ಲೊ ಭಿತರ್ ರಿಗ್ಲೊ, ಆಯಿಲ್ಲೊಚ್ ಪರಾತ್ತುಂಕ್ ಲಾಗ್ಲೊ-

“ಆಳೆ ಮಾನೆಸ್ತಾಂನೊ.. ಹಾಂವ್ ಏಕ್ ಬರೋ ಏಕ್ಟರ್. ಪುಣ್ ಮ್ಹಾಕಾ ಎಕಾ ಸಿನೆಮಾಂತ್ ಮೊಡ್ಯಾಚೊ ಪಾತ್ರ್ ಮೆಳ್ ಲ್ಲೊ. ಮೊಡ್ಯಾಕೀ ಏಕ್ಟಿಂಗ್ ಕರ್ಚೊ ಸ್ಕೋಪ್ ಆಸ್ ಲ್ಲೊ ತರ್ ಹೀರೋಪ್ರಾಸ್ ಹಾಂವ್ಚ್ ಬರೇಂ ಕರ್ನ್ ಡ್ಯಾನ್ಸ್ ಕರ್ತೊಂ. ಕೊಮಿಡಿಯನಾಪ್ರಾಸ್ ಚಡ್ ಹಾಸಯ್ತೊಂ. ತಶೆಂ ಮ್ಹಜೊ ಪಾತ್ರ್ ಯೀ ಆಜ್ ನೂಮಿನೇಶನಾಕ್ ಪಾವ್ತೊ. ಪುಣ್ ಮೊಡ್ಯಾಚ್ಯಾ ಪಾತ್ರಾಂತ್ ತಾಲೆಂತಾಕ್ ಸ್ಕೋಪ್ ಖಂಯ್ ಆಸಾ ತುಮಿಂಚ್ ಸಾಂಗಾ. ಹೊ ಮ್ಹಜ್ಯಾ ತಾಲೆಂತಾಕ್ ಜಾಲ್ಲೊ ಅನ್ಯಾಯ್ ನ್ಹಯ್ ಗೀ.. ದೆಕುನ್ ತುಮಿ ಏಕ್ ಬೆಸ್ಟ್ ಡೆಡ್ ಬಾಡಿ ಎವಾರ್ಡ್ ಮ್ಹಣ್  ಎಕ್ಸ್ ಟ್ರಾ ಎವಾರ್ಡ್ ರಚುನ್ ತೊ ಮ್ಹಾಕಾಚ್ ದೀಜೆ.. ಪ್ಲೀಜ್…”

ಇತ್ಲೆಂ ಆಯ್ಕಲ್ಲೆಂಚ್ ಸಿಲಾಕ್ ರಾಗ್ ತಳ್ಮಟ್ಯಾಕ್ ಚಡ್ಲೊ.

“ತೀನ್ ಚ್ ತೀನ್ ದಿಸಾಂನಿ ಥಿಯೇಟರಾಕ್ ಘಾಣ್ ಪಡಾನಾಶೆಂ ತುಮ್ಚೆಂ ಮೊಡೆಂ ರಾಕೊನ್ ವೆಲ್ಲೆಂ ಮ್ಹಜೆತಸಲ್ಯಾ ಪ್ರೇಕ್ಶಕಾಂನಿ. ಕಾಲೆಂ ಮ್ಹಳೆಂಯ್?- ಮೊಡ್ಯಾಕ್ ಹಾಸೊಂಕ್ – ರಡೊಂಕ್ ನಾ. ಪುಣ್ ತುಮ್ಚೆಂ ಸಿನೆಮಾ ಪಳೆವ್ನ್ ಹಾಸೊಂಕ್ ಆಯ್ಲ್ಯಾರೀ ಹಾಸನಾಸ್ತಾಂ, ರಡೊಂಕ್ ಆಯ್ಲ್ಯಾರೀ ರಡಾನಾಸ್ತಾಂ ರಾವೊಂಕ್ ಮ್ಹಾಕಾ ಜೀವ್ ಆಸ್ ಲ್ಲ್ಯಾ  ಪ್ರೇಕ್ಶಕಾಕ್ ಕಿತ್ಲೆ ಕಶ್ಟ್ ಜಾಲ್ಯಾತ್ ಜಾಣಾಂಯ್ ತುಂ? ಆತಾಂ ಡೆಡ್ ಬಾಡಿ ಎವಾರ್ಡ್ ದೀಜೆ ಗೀ ತುಕಾ? ಧರ್ ಎವಾರ್ಡ್. ಕಾಣ್ಘೆವ್ನ್ ಸಾಸ್ಣಾಕ್ ಡೆಡ್ ಬಾಡಿ ಜಾ!” ಮ್ಹಣ್ ಥಂಯ್ಚ್ ಆಸ್ ಲ್ಲೊ ಏಕ್ ಲೊಂಕ್ಡಾಚೊ ಮೆಮೆಂಟೊ ಘೆವ್ನ್ ಆಯಿಲ್ಲ್ಯಾಚ್ಯಾ ಮಾಂಡ್ಯಾಕ್ ಉಬ್ರಾಯ್ಲೊ.

“ಆಯ್ಯೋ ಮೆಲ್ಲೆಂ ಆಯ್ಲಾಂ, ಮೆಲ್ಲೆಂ ಆಯ್ಲಾಂ” ಮ್ಹಣ್ ಭೊಲ್ಚೆಲ್ಲೊ ಡೆಡ್ ಬಾಡಿ ಏಕ್ಟರ್ ಎಕಾಚ್ಚಾಣೆಂ ಭಾಯ್ರ್ ಧಾಂವಲಾಗ್ಲೊ. ತಾಚೆಪಾಟ್ಲ್ಯಾನ್ ಸಿಲಾ ಮೆಮೆಂಟೊ ಉಬ್ರಾಯಿತ್ತ್ ಧಾಂವ್ಲೊ.

“ತಕ್ಲಿ ಪಿಸಾಂತುರ್ ಕರ್ನ್ ಆಮಿ ವರವ್ಣಿ ಕೆಲ್ಲೆಖಾತಿರ್ ಮೆಳ್ಚೊ ಮ್ಹಳ್ಯಾರ್ ಹೊ ಮೆಮೆಂಟೊ ಮಾತ್ರ್. ತೋಯ್ ಕಾಣ್ಗೆವ್ನ್ ಧಾಂವ್ತಾಯ್ ಗೀ?” ಮ್ಹಣ್ ಪಾಟ್ಲ್ಯಾನ್ ಜ್ಯೂರಿ ಕಮಿಟಿಚೆ ಸಾಂದೆಯ್ ರಸ್ತ್ಯಾಕ್ ದೆಂವ್ಲೆ.

ಹೆಂ ಪಳೆವ್ನ್ ಆಸ್ ಲ್ಲೆ ದೋಗ್ ವಾಟ್ಸುರೆ ಉಲಯ್ತಾಲೆ –

“ಖಂಯ್ಚ್ಯಾ ಸಿನೆಮಾಚೆಂ ಶೂಟಿಂಗ್ ಹೆಂ?”

“ಮ್ಹಾಕಾ ಗೊತ್ತುನಾ”

“ಓಹ್ ನಾಂವ್  ಭಾರಿ ಬರೆಂ ಆಸಾ!”

► ವಿಲ್ಸನ್ ಕಟೀಲ್

ಸುರ್ಯಾಕಿರ್ಣಾಂಕ್ ಯೀ

ದೋನ್ ಮೆಟಾಂ ಕಾಡ್ನ್ ಮುಕಾರ್ ಪಳಯಿಲ್ಲೊ ಮಿಂಗೆಲಿ ರಾವ್ ಲ್ಲೆಕಡೆಚ್ ರೂಕ್ ಜಾಲೊ! ಕೆದಿ ವ್ಹಡ್ ಮ್ಹೊಸ್! ರಾನ್ ಮ್ಹೊಸ್!

“ಕೋಣ್ ತುಂ? ಮ್ಹಜೆಮುಕಾರ್ ದೋನ್ ಪಾಯಾಂನಿ ಚಲೊಂಕ್ ಕಿತ್ಲೆಂ ಧಯ್ರ್ ತುಕಾ? ಹಾಂ?” ಮ್ಹೊಶಿನ್ ಸುಂಯ್ಪಿಲೆಂ.

“ಹಾಂವ್ ಮನಿಸ್.. ವಾಟ್ ಚುಕೊನ್ ಆಯ್ಲಾಂ…”

“ಮನಿಸ್?” ಮೊಶಿಚೊ ಛಾರೊಚ್ ಬದ್ಲಾಲೊ. ದೊಳೆ ತೀಕ್ಷ್ಣ್ ಜಾಲೆ. ಪಾಟ್ಲ್ಯಾ ಪಾಂಯಾಂಚೆ ಮಾಸಾಖಂಡ್ ಘಟ್ ಜಾವ್ನ್ ಆಯ್ಲೆ. ಪಾಟ್ ಬಾವ್ ಕೆಲಿ. ಶಿಮ್ಟಿ ತಲ್ವಾರೆಬರಿ ವಾರ್ಯಾರ್ ಉಕಲ್ಲಿ. ಶಿಂಗಾಂಯ್ ನೀಟ್ ಜಾಲ್ಲೆಬರಿ ಭೊಗ್ಲೆಂ ಮಿಂಗೆಲಿಕ್. ’ಹಿ ಮ್ಹೊಸ್ ಆತಾಂ ಖಂಡಿತ್ ಮ್ಹಜ್ಯಾ ಆಂಗಾರ್ ಉಡೊನ್ ಕುಸಾಳಾಂನಿ ಶಿಂಗಾ ರಿಗಯ್ತೆಲಿ’ ಮಿಂಗೆಲಿ ಆಪ್ಣಾಯಿತ್ಲ್ಯಾಕ್ ಚಿಂತುನ್, ತಿಚ್ಯಾ ಹಾಂಡ್ಣೆಕ್ ಫುಡ್ ಕರುಂಕ್ ದೊಳೆ ಧಾಂಪುನ್ ಆಪ್ಣಾಯಿತ್ಲ್ಯಾಕ್ ತಯಾರ್ ಜಾಲೊ.
ತಿತ್ಲ್ಯಾರ್ ’ದಬ ದಬ ದಬ’ ಆವಾಜ್!

ದೊಳೆ ಉಗ್ತೆ ಕರ್ನ್ ಪಳಯ್ತಾ ಮಿಂಗೆಲಿ- ಮ್ಹೊಶಿಚ್ಯಾ ಪಾಟ್ಲ್ಯಾ ಪಾಂಯಾಲಾಗಿಂ ಏಕ್ ರಾಸ್ ಶೆಣ್! ಕಸಲಿ ಘಾಣ್! ಮಿಂಗೆಲಿನ್ ಹಾತ್ ನಾಕಾಕ್ ವ್ಹೆಲೊ. ತಕ್ಷಣ್ ಮ್ಹೊಸ್ ಹಾಂಬೆಲಿ –

“ತುಂ ಮನಿಸ್ ನ್ಹಯ್! ಹಾಂವೆಂ ಆಯ್ಕಾಲಾಂ ಮನಿಸ್ ಶೆಣಾಕ್ ಮಾನ್ ದಿತಾ ಮ್ಹಣ್. ತುಂ ಘಾಣ್ ಮ್ಹಣ್ತಾಯ್! ತುಂ ಮನಿಸ್ ನ್ಹಯ್! ರಾವ್ ತುಕಾ ರಾಯಾಕಡೆ ದೂರ್ ದಿತಾಂ!” ಮ್ಹಣೊನ್ ಘುಂವೊನ್ ಧಾಂವ್ಲಿಚ್.

ಅಬ್ಬಾ ಎಕಾ ಮನ್ಜಾತಿಥಾವ್ನ್ ವಾಂಚ್ಲೊಂ ಆನಿ ಕಿತೆಂ ಪೂರಾ ಫುಡ್ ಕರುಂಕ್ ಆಸಾಗಿ ಮ್ಹಣ್ ಚಿಂತಾನಾಂಚ್ ಮಿಂಗೆಲಿಕ್ ಘಾಮ್ ಸುಟ್ಲೊ.

ಜ್ಯೋರ್ ಭುಕ್ ಲಾಗ್ ಲ್ಲ್ಯಾ ಮಿಂಗೆಲಿನ್ ಕಾಂಯ್ ತರೀ ಖಾಂವ್ಕ್ ಮೆಳತ್ ಗಾಯ್ ಮ್ಹಣ್ ತಕ್ಲಿ ಉಬಾರ್ತಾನಾ ರುಕಾರ್ ಏಕ್ ಫಳಾಂಚೊ ಘೊಸ್ ಝಳ್ಕಾಲೊ! ವ್ಹಾವ್ ತ್ಯಾ ಆಕಾಂತಾಮದೆಂಯ್ ಮಿಂಗೆಲಿಚ್ಯಾ ತೊಂಡಾರ್ ಖುಶೆಚಿಂ ಲಕ್ಶಣಾಂ ಖೆಳ್ಳಿಂ. ಹಿಂ ಫಳಾಂ ವಿಕಾಚಿಂ ಜಾಲ್ಯಾರೀ ವ್ಹಡ್ ನಾ, ಮನ್ಜಾತಿಂಚ್ಯಾ ಘಾಸಾಕ್ ಸಾಂಪ್ಡೊನ್ ಮರ್ಚ್ಯಾಕೀ ಹಿಂ ಖಾವ್ನ್ ಮರ್ಚೆಂ ಬರೆಂ’ ಮ್ಹಣ್ ಚಿಂತುನ್ ಮಿಂಗೆಲಿ ಫಾಂಟ್ಯಾರ್ ಚಡ್ಲೊಚ್. ಏಕ್ ಫಳ್ ವೊಳಾಂವ್ಕ್ ಮ್ಹಣ್ ಹಾತ್ ಘಾಲಾ ಮಾತ್ರ್, ತಕ್ಶಣ್ ಆಯ್ಕಾಲಿ ಕಿಂಕ್ರಾಟ್! ಮಾಕ್ಡಾಂಚಿ ರಾಸ್! ಮಿಂಗೆಲಿಕ್ ಅಟ್ಯಾಕ್ ಕರುಂಕ್ ಸುರು!

“ಕೋಣ್ ತುಂ? ಆಮಿ ಇತ್ಲ್ಯಾ ವರ್ಸಾಂಥಾವ್ನ್ ಫುಲ್ ಫಳಾಖಾತಿರ್ ಜೀವ್ ಸೊಡ್ತೇ ಆಸಾಂವ್! ಪಾವನಾತ್ಲ್ಯಾಕ್ ಹೆಂ ರಾನ್ ಸೊಡ್ನ್ ಥೊಡೆಪಾವ್ಟಿಂ ತುಮ್ಚ್ಯಾ ಹಿತ್ಲಾಕೀ ಪಾವ್ತಾಂವ್. ತುಂ ಪಳಯ್ಲ್ಯಾರ್ ಹಾಂಗಾಚ್ ಯೇವ್ನ್ ಫಳಾಂಕ್ ಹಾತ್ ಘಾಲ್ತಾಯ್? ಕಿತ್ಲೊ ಹಂಕಾರ್ ತುಕಾ?” ಮಾಂಕ್ಡಾಮುಕೆಲ್ಯಾನ್ ಸರ್ಸರಿತ್ ಯೆಟುನ್ ಮಿಂಗೆಲಿಕ್ ಸಕ್ಲಾ ಲೊಟುನ್ ಘಾಲೆಂ. ತಾಂತ್ಲೊ ಏಕ್ ಮಾಲ್ಘಡೊ ಮಾಂಕೊಡ್ ಮಿಂಗೆಲಿಮುಕಾರ್ ಯೇವ್ನ್ ಹಳೂ ಮಿಂಗೆಲಿಚ್ಯಾ ಖಾದಾಂರ್ ಆಸ್ ಲ್ಲೆಂ ಭಯ್ರಾಸ್ ಘೆವ್ನ್ ತೆಂ ಶೊಲಾಬರಿ ಪಾಂಗ್ರುನ್ ಫಾಂಟ್ಯಾರ್ ಚಡೊನ್ ಬಸ್ಲೊ. ಸರ್ವ್ ಮಾಂಕ್ಡಾಂನಿ ತಾಳಿಯೊ ಪೆಟ್ಚೊ ಆವಾಜ್ ಆಯ್ಕಾಲೊ. ಮೊಬಾಯ್ಲ್ ಆಸ್ ಲ್ಲೆಂ ತರ್, ಶಾಲ್ ಪಾಂಗ್ರುನ್ ಫಳಾಂ ಘೆವ್ನ್ ಬಸ್ ಲ್ಲ್ಯಾ ಮಾಂಕ್ಡಾಚಿ ತಸ್ವೀರ್ ಕಾಡ್ಯೆತಿ ಮ್ಹಣ್ ಚಿಂತುನ್ ಮಿಂಗೆಲಿ ಹಾಸ್ಲೊ.

“ಹಾಸ್ತಾಯ್? ಆಮ್ಕಾಂ ಇನ್ಸಲ್ಟ್ ಕರ್ತಾಯ್ ತುಂ? ರಾವ್ ತುಕಾ ಗುರ್ಕಾರಾಕಡೆ ದೂರ್ ದಿತಾಂ!” ಮ್ಹಣ್ ದೋನ್ ಮಾಂಕೊಡ್ ಫಾಂಟೊ ಉತ್ರೊನ್ ಗೆಲೆ.

ಮಿಂಗೆಲಿನ್ ಫುಡ್ಲಿಂ ಮೆಟಾಂ ವಿಂಚ್ಲಿಂ.

‘ಹ್ಯಾ ರಾನಾಂತ್ ಭಿರಾಂಕುಳ್ ಮನ್ಜಾತಿ ಆಸಾತ್. ಏಕ್ ಪಾವ್ಟಿಂ ಘಾಸಾಕ್ ಸಾಂಪಡ್ಲ್ಯಾರ್ ಮಾಗಿರ್ ಕಾಣಿ ಖಲಾಸ್’ ಮ್ಹಣ್ ಮ್ಹೊಂವ್ ಸೊಧುಂಕ್ ವಚೊನ್, ಮನ್ಜಾತಿಂಚ್ಯಾ ಘಾಸಾಥಾವ್ನ್ ಬಚಾವ್ ಜಾವ್ನ್ ಭಾಯ್ರ್ ಧಾಂವೊನ್ ಆಯಿಲ್ಲ್ಯಾ ಥೊಡ್ಯಾ ಮನ್ಶ್ಯಾಂನಿ ಸಾಂಗ್ ಲ್ಲೆಂ ಮಿಂಗೆಲಿಕ್ ಉಡಾಸಾಕ್ ಆಯ್ಲೆಂ. ’ತಾಂಚೆಂ ಉತರ್ ಆಯ್ಕೊನ್ ನೀಸ್ ಪೇಜ್ ಜೇವ್ನ್ ಘರಾ ಸುಶೆಗಾತ್ ಆಸ್ಯೆತೆಂ. ಕೊಣಾಕ್ ಜಾಯ್ ಆಸ್ ಲ್ಲೆಂ ಹೆಂ ಮ್ಹೊಂವ್?’ ಮ್ಹಣ್ ಮಿಂಗೆಲಿಕ್ ಭೊಗನಾಸ್ತಾಂ ರಾವ್ಲೆಂನಾ. ಬಾಯ್ಲೆಭುರ್ಗ್ಯಾಚಿ ಯಾದ್ ಕಠೀಣ್ ಧೊಸುಂಕ್ ಲಾಗ್ಲಿ ಮಿಂಗೆಲಿಕ್. ಹಾಂಗಾ ಮನ್ಜಾತಿಚ್ಯಾ ಘಾಸಾಕ್ ಸಾಂಪ್ಡೊನ್ ಮೆಲ್ಯಾರ್ ಆಪ್ಣಾಚೆಂ ಮೊಡೆಂಯ್ ಮೆಳ್ಚೆಂನಾ ಮ್ಹಣ್ ಚಿಂತಾನಾ ದೊಳ್ಯಾಂಖಾಂಚಿಂನಿ ದೂಕ್ ಫುಟ್ಲೆಂ.

ಹಳೂ ಎಕಾ ರುಕಾಮುಳಾಂತ್ ಬಸ್ಯಾಂ ಮ್ಹಣ್ ಜಾಗೊ ಸೊಧ್ತಾನಾ ದಿಸ್ಲೆಂ ಮುಕ್ಲೆಂ ದೃಶ್ಯ್- ಏಕ್ ವ್ಹಡ್ ಕರೊಡಿ! ದಾಟ್ ಕಾಳ್ಯಾ ಲೊಂವೆಚಿ ಕರೊಡಿ! ಮಾರ್ನೆಮಿಚ್ಯಾ ದಿಸಾಂನಿ ಮಿಂಗೆಲಿನ್ ಕರೊಡಿಚೊ ವೇಸ್ ಪಳಯಿಲ್ಲೊ, ಝೂವಾಂತೀ ಪಳಯಿಲ್ಲೆಂ. ಪುಣ್ ಇತ್ಲಿ ವ್ಹಡ್ ಎದೊಳ್ ಪಳೆಂವ್ಕ್ ನಾ ತಾಣೆಂ. ಅರೆ! ಹಾತಾಂತ್ ತಿಚ್ಯಾ ಏಕ್ ಮ್ಹೊಂವಾಚಿ ಪೊಳಿ! ಪಳೆವ್ನ್ ಮಿಂಗೆಲಿಚ್ಯಾ ತೊಂಡಾಂತ್ ಉದಕ್ ಆಯ್ಲೆಂ. ತಡ್ವನಾಸ್ತಾಂ, ಧಯ್ರ್ ಕರುನ್ ವಿಚಾರ್ನ್ ಸೊಡ್ಲೆಂಚ್- “ಮ್ಹಾಕಾ ಏಕ್ ಕುಡ್ಕೊ ಮ್ಹೊಂವಾಚಿ ಪೊಳಿ ದಿತಾಯೆಗೆ?”

ಬೋವ್ಶ್ಯಾ ಆವಯ್ ಕಾಳ್ಜಾಚಿ ಕರೊಡಿ ತಿ, ಏಕ್ ಕುಡ್ಕೊ ಮಿಂಗೆಲಿಕ್ ದಿಲೊ. ತಾಕಾ ಖಂಯ್ ನಾತ್ಲಿ ಖುಶಿ. ಆನಿ ಕಿತೆಂ ತೊಂಡಾಂತ್ ಘಾಲ್ನ್ ಚಿಂವ್ತಾ ಮ್ಹಣ್ತಾನಾ-

“ಹೇಯ್ ಮನ್ಶ್ಯಾಪಿಲಾ! ಕಿತೆಂ ಕರ್ತಾಯ್. ಮ್ಹೊಂವ್ ಅಶೆಂ ಖಾಯ್ಜೆ” ಮ್ಹಣೊನ್ ತಿಣೆಂ ಬೊಟಾನ್ ಇಲ್ಲೆಂ ಮ್ಹೊಂವ್ ಮಿಂಗೆಲಿಚ್ಯಾ ಕೊಂಪ್ರಾಕ್ ಲಾಯ್ಲೆಂ ಆನಿ ಮ್ಹಣಾಲಿ-“ಆತಾಂ ಜಿಬೆನ್ ಲೇಂವ್, ಪಳೆ ಹಾಂವ್ ಕಶೆಂ ಖಾತಾಂ”. ಮಿಂಗೆಲಿ ಪಳಾಯ್ತಾ- ಮ್ಹೊಂವ್ ಶೀದಾ ಖಾಂವ್ಚೆಬದ್ಲಾಕ್ ಕರೊಡಿ ತಿಚ್ಯಾ ಕೊಂಪ್ರಾಕ್ ಲಾವ್ನ್ ಮಾಗಿರ್ ಕಶ್ಟಾಂನಿ ಎದ್ದಿ ವ್ಹಡ್ ಜೀಬ್ ಭಾಯ್ರ್ ಘಾಲ್ನ್ ಲೆಂವ್ತೇ ಆಸಾ! ಹಿ ಕಸಲಿ ಮೂರ್ಖ್ ಕರೊಡಿಗಾಯ್ ಚಿಂತ್ಲೆಂ ಮಿಂಗೆಲಿನ್, ಸವಾಲ್ ಕೆಲೆಂಚ್- “ಮ್ಹೊಂವ್ ಶೀದಾ ಖಾಂವ್ಚೆಂ ಸಲೀಸ್ ನೆ ಗೆ?”

“ಅಳೆ ಮನ್ಶ್ಯಾ, ಹಿ ಹ್ಯಾ ರಾನಾಚಿ ಸಂಸ್ಕೃತಿ! ತಿ ಸೊಡುನ್ ತುಜ್ಯಾ ಖುಶೆಬರಿ ಕೆಲ್ಯಾರ್ ರಾಯಾಕ್ ರಾಗ್ ಯೆತಾ!”

ಮಿಂಗೆಲಿನ್ ವ್ಯರ್ಥ್ ಪ್ರೇತನ್ ಕೆಲೆಂ ತರೀ ಕರೊಡಿತಿತ್ಲಿ ಜೀಬ್ ಲಾಂಬ್ ಮಿಂಗೆಲಿಚಿ ನಾತ್ಲಿ ಜಾಲ್ಲ್ಯಾನ್ ಲೆಂವೊಂಕ್ ಜಾಯ್ನಾಸ್ತಾಂ “ತುಮಿಗೀ ತುಮ್ಚಿ ಸಂಸ್ಕೃತಿಗೀ” ಮ್ಹಣ್ ರಾಗಾನ್ ಮ್ಹೊಂವಾಪೊಳೀ ಥಂಯ್ಚ್ ಸೊಡ್ನ್ ಮುಕಾರ್ ಗೆಲೊ.

ಪುರಾಸಾಣೆನ್ ರುಕಾಪಂದಾ ಆಡ್ ಪಡ್ ಲ್ಲೊ ಮಿಂಗೆಲಿ, ದಡಬಡ ಆವಾಜಾಕ್ ಜಾಗ್ಲೊ. ಚಿತಳ್ ಏಕ್ ಮಿಂಗೆಲಿಚ್ಯಾ ಮಾತ್ಯಾವಯ್ಲ್ಯಾನ್ ಚ್ ಧಾಂವ್ಲೆಂ. ಅರೆ ಹ್ಯೊ ಮನ್ಜಾತ್ಯೊ ಪೂರಾ ಖಂಯ್ ಧಾಂವ್ತೇ ಆಸಾತ್? ರಾನಾಕ್ ಉಜೊ ಪಡ್ಲಾಗಾಯ್ ಕಿತೆಂ? ಎಕಾ ಬೊಲ್ಪ್ಯಾಕ್ ರಾವವ್ನ್ ವಿಚಾರ್ ಕೆಲೊ ಮಿಂಗೆಲಿನ್.

“ರಾಯಾನ್ ತುರ್ತ್ ಜಮಾತ್ ಆಪಯ್ಲ್ಯಾ. ಹ್ಯಾ ರಾನಾಕ್ ಆಪಾಯ್ ಆಯ್ಲಾ ಖಂಯ್. ಜಮಾತೆಕ್ ಯೇನಾತ್ಲ್ಯಾರ್ ಆಮಿ ಪೂರಾ ಮರ್ತಾಂವ್ ಖಂಯ್” ಮ್ಹಣೊನ್ ತೊ ಬೊಲ್ಪೊ ಧಾಂವ್ಲೊ.

ಕೋಣ್ ಹೊ ರಾಯ್? ಕಾಂಯ್ ಭಾರಿ ವ್ಹಡ್ ಮನಿಸ್ ಗೀ.. ಸ್ಸೋರಿ ಮನ್ಜಾತ್ ಗಿ? ಚಿಂತ್ಲೆಂ ಮಿಂಗೆಲಿನ್, ಹ್ಯಾ ರಾನಾಚಿ ಹರ್ಯೇಕ್ ಜಿವಿ ಹ್ಯಾ ರಾಯಾಕ್ ಮರ್ಯಾದ್ ದಿತಾ ತರ್ ತೊ ರಾಯ್ ಭಾರಿ ವ್ಹಡ್ ಆಸಜೆ. ಮಿಂಗೆಲಿ ಕೀ ಪಳೆಂವ್ಕ್ ಆಶಾ ಜಾಲಿ. ಎಕೆ ಜಿವ್ದಾಳೆಪಾಟ್ಲ್ಯಾನ್ ಚಲ್ತೇ ರಾವ್ಲೊ ಮಿಂಗೆಲಿ ಧಯ್ರ್ ಕರುನ್.

ತ್ಯಾ ಜಾಗ್ಯಾಕ್ ಪಾವೊನ್ ಎಕಾ ರುಕಾ ಆಡೊಸಾಕ್ ರಾವೊನ್ ಪಳಯ್ಲಾಗ್ಲೊ ಮಿಂಗೆಲಿ- ತೊ ಏಕ್ ಉಂಚಾಯೆಚೊ ಸಮಾತಟ್ಟ್ ಜಾಗೊ. ಪೂರಾಯ್ ಮನ್ಜಾತಿ ಶಿಸ್ತೆನ್ ಬಸ್ಲ್ಯಾತ್. ಮುಕ್ಲ್ಯಾನ್ ಏಕ್ ವ್ಹಡ್ ಖಡಪ್. ಬೋವ್ಶ್ಯಾ ತೆಂ ರಾಯಾಚೆಂ ಶಿಂಯಾಸಣ್ ಜಾಯ್ಜೆ. ತಾಚೆ ಬಗ್ಲೆನ್ ದೋನ್ ಮೊರಾಂ, ಪಾಕಾಂಚೆ ಆಯ್ಣೆ ಹಾಲಯ್ತೇ ಆಸಾತ್. ಥೊಡೆ ಸೊಂವ್ಶೆ ಭಾರಿಚ್ ಸುಡ್ಸುಡಾಯೆನ್ ಹೆಣೆಂ ತೆಣೆಂ ಧಾಂವ್ತೇ ಆಸಾತ್.

ತಿತ್ಲ್ಯಾರ್ ಸೊರ್ಪಾನ್ ಜಿಡೆಂ ಕೆಲೆಂ! ಖಡ್ಪಾರ್ ಏಕ್ ಭಾರಿಚ್ ವಿಚಿತ್ರ್ ಆನಿ ವಿಶೇಸ್ ಮನ್ಜಾತ್ ದಿಶ್ಟಿಕ್ ಪಡ್ಲಿ. ರಂಗ್ ರಂಗೀನ್ ಶಿಮ್ಟಿ. ಗರ್ಗಸಾಬರಿ ದಾಂತ್. ಕುಳಿಂದ್ರಾಚ್ಯಾ ಮಾಟ್ಯಾಬರಿ ನಾಕ್. ಆಂಗಾಪಾಂಗಾರ್ ಸಾಳಿಚ್ಯಾ ಕಾಂಟ್ಯಾಬರಿ ಸ್ಟ್ರೈಟನಿಂಗ್ ಕೆಲ್ಲಿ ಲೋಂವ್. ಗಳ್ಯಾರ್ ಏಕ್ ಬೆಲ್ಟ್ ಯೀ ಆಸ್ ಲ್ಲೆಂ. ಅಸಲಿ ಮನ್ಜಾತ್ ಎದೊಳ್ ಮಿಂಗೆಲಿನ್ ಚಿತ್ರಾಂತ್ ಯೀ ಪಳಯಿಲ್ಲಿ ನಾ!

“ಪಳೆ ಪಳೆ.. ರಾಯಾಚಿ ಶಿಮ್ಟಿ ಪಯ್ಲಿ ಆಯ್ಲಿ… ರಾಯಾನ್ ಆನಿ ಯೇಜೆ” ರುಕಾರ್ ದೋನ್ ಶಿರ್ಲೆ ಗುಸುಗುಸು ಉಲವ್ನ್ ಕಿಸ್ಕ್ ಕರ್ನ್ ಹಾಸ್ಲೆ!

“ತಿ ಖಂಯ್ಚಿ ಮನ್ಜಾತ್?” ಮಿಂಗೆಲಿಚ್ಯಾ ಸವಾಲಾಕ್ ಶಿರ್ಲ್ಯಾನ್ ಜಾಪ್ ದಿಲಿ- “ಶ್ಶ್ಯ್… ಲೋವ್ ಉಲಯ್. ತಾಚೆಂ ನಾಂವ್ ಮಾಣ್ಕುಲೊ. ತೊ ರಾಯಾಚೊ ಮಂತ್ರಿ ಆನಿ ‘ಸ್ಪೋಕ್ಸ್ ಅನಿಮಲ್’. ರಾಯಾನ್ ಆಪ್ಲೊ ಸಂದೇಶ್ ತ್ಯಾಚ್ ಮಾಣ್ಕುಲ್ಯಾಮಾರಿಫಾತ್ ದಿಂವ್ಚೊ”

“ರಾಯಾಕ್ ಜಾಂವ್ ಅರ್ಗಾಂ ಆನಿ ಹೊಗ್ಳಿಕ್!” ಮಾಣ್ಕುಲ್ಯಾನ್ ಪೆಂಪಾರೆಂ ಸುರು ಕೆಲೆಂ.’ ಹೊ ತಾಳೊ ಖಂಯ್ಗೀ ಆಯ್ಕಲ್ಲೆಬರಿ ಆಸಾ ಮು…’ ಮಿಂಗೆಲಿನ್ ಉಡಾಸ್ ಕರುಂಕ್ ಪ್ರೇತನ್ ಕೆಲೆಂ.

ತಕ್ಷಣ್ ಕೊಲ್ಯಾಂನಿ ಕೋಂಬ್ ಫುಂಕ್ಲೊ. ಬೆಬ್ಯಾಂನಿ ತಾಳಿಯೊ ಪೆಟ್ಲ್ಯೊ ಆನಿ ಹ್ಯಾ ರಾಯಾಳ್ ಆವಾಜಾಮದೆಂ ಆಯ್ಲೊ ರಾಯ್! ಮಿಂಗೆಲಿನ್ ದೊಳೆ ವ್ಹಡ್ ಕೆಲೆ. ‘ಅರೆ ಕಿತ್ಲೊ ಭಿರಾಂಕುಳ್ ವಾಗ್’ ಮಿಂಗೆಲ್ ಉದ್ಗಾರ್ಲೊ.

“ಡಿಯರ್ ಎನಿಮಲ್ಸ್ ಓಫ್ ದಿಸ್ ಜಂಗಲ್..ವಿ ಆರ್ ಇನ್ ಟ್ರಬಲ್.” ರಾಯಾಚಿ ಘೊರೊಜ್ ಸುರು.

“ಕೊಂಕ್ಣೆಂತ್ ಉಲಯ್ ರಾಯಾ ಮ್ಹಾಕಾ ಇಂಗ್ಲಿಶ್ ಯೇನಾ” ಕೊಗುಳೆನ್ ಪರಾತಿಲ್ಲ್ಯಾಕ್ ವಾಗಾನ್ ಮುಕಾರಿಲೆಂ-

“ಆಜ್ ಹಾಂವೆಂ ತುರ್ತ್ ಜಮಾತ್ ಆಪ್ಣಾಂವ್ಕ್ ಕಾರಣ್ ಆಮ್ಚ್ಯಾ ರಾನಾಕ್ ವ್ಹಡ್ ಗಂಡಾಂತರ್ ಆಯ್ಲಾಂ. ಕೋಣ್ ಗೀ ಮನ್ಶ್ಯಾಪಿಲೊ ಆಮ್ಚ್ಯಾ ರಾನಾಕ್ ರಿಗ್ಲಾ- ಆಮ್ಕಾಂ ಆಪಾಯ್ ಆಸಾ!”

“ವ್ಹಯ್ ಮ್ಹಜೆಮುಕಾರ್ ದೋನ್ ಪಾಂಯಾಂನಿ ಚಲ್ತಾಲೊ, ಹಾಂವೆಂ ಕಶ್ಟಾಂನಿ ಘಾಲ್ಲ್ಯಾ ಶೆಣಾಕ್ ಶೀ ಮ್ಹಳ್ಳೆಂ ತಾಣೆಂ” ಮ್ಹೊಶಿನ್ ಸುಂಯ್ಪಿಲೆಂ!

“ಆಮ್ಕಾಂ ಮೆಳ್ಚ್ಯಾ ಫಳಾಂಕ್ ಹಾತ್ ಘಾಲ್ಲೊ ತಾಣೆಂ, ಆಂಗಾಚಿ ಲೋಂವ್ ಫುಲ್ಲ್ ಶೇವ್ ಕರ್ನ್ ಆಮ್ಚ್ಯಾ ಚೆಡ್ವಾಂಮುಕಾರ್ ಸ್ಟಾಯ್ಲ್ ಮಾರ್ತಾಲೊ” ಮಾಲ್ಘಡೊ ಮಾಂಕೊಡ್ ಕಿಂಕ್ರಾಟ್ಲೊ!

“ಕೊಂಪ್ರಾಕ್ ಲಾಯ್ನಾಸ್ತಾಂ ಶೀದಾ ತೊಂಡಾಕ್ ಲಾವ್ನ್ ಮ್ಹೊಂವ್ ಖಾವ್ಯೆತ್ ನೆ ಮ್ಹಣ್ ಆಮ್ಚ್ಯಾ ಸಂಸ್ಕೃತೆಕ್ ಚ್ ಅಕ್ಮಾನ್ ಕೆಲಾಂ” ಕರೊಡಿ ಪುರ್ಪುರ್ಲಿ.

“ಹ್ಯಾ ಬುರ್ನಾಸ್, ನಂಜೆಲ್ಯಾ, ವಿಕೃತ್ ಜಾತಿಕ್ ಚಾಬೊನ್ ತಾಚೆಂ ರಗತ್ ಪಿಯೆಜೆ” ಮಾಣ್ಕುಲ್ಯಾನ್ ಫೊಣ್ಣ್ ಘಾಲೆಂ.

ತಾಚೆ ದಾಂತ್.. ತಾಚೆಂ ಬೆಲ್ಟ್.. ತೊ ತಾಳೊ.. ಓಹ್! ಪಾನಾ ಇಡ್ಯಾಂತ್ ರಾವೊನ್ ತಿಳ್ತಲ್ಯಾ ಮಿಂಗೆಲಿಕ್ ಆತಾಂ ಉಡಾಸ್ ಆಯ್ಲೊಚ್! ಆಸ್ ಲ್ಲೆಂ ಧಯ್ರ್ ಪೂರಾ ಎಕ್ಟಾವ್ನ್ ಮುಕಾರ್ ಆಯ್ಲೊ ಮಿಂಗೆಲ್ –

“ರಾಯಾ, ಹಾಂವ್ ವಾಟ್ ಚುಕೊನ್ ಹ್ಯಾ ರಾನಾಕ್ ಆಯಿಲ್ಲೊಂ. ಮ್ಹಜೆಥಾವ್ನ್ ತುಮ್ಕಾಂ ಆಪಾಯ್ ನಾ. ಮ್ಹಾಕಾ ಭಾಯ್ರ್ ವೆಚಿ ವಾಟ್ ದಾಕಯಾ. ಹಾಂವ್ ಪಾಟಿಂ ವೆಚೊಚ್. ಮ್ಹಾಕಾ ಘರ್ ಕುಟಮ್ ಆಸಾ. ಪುಣ್ ವೆಚೆಪಯ್ಲೆಂ ತುಜ್ಯಾ ಮಾಣ್ಕುಲ್ಯಾವಿಶಿಂ ದೋನ್ ಉತ್ರಾಂ ಉಲೊಂಕ್ ಆಸಾತ್!”

“ಮಾಣ್ಕುಲ್ಯಾವಿಶಿಂ ತುವೆಂ ಕಿತೆಂಯ್ ಸಾಂಗ್ಚಿ ಗರ್ಜ್ ನಾ ಗಾ ಮನ್ಶ್ಯಾಪಿಲ್ಕಾಟ್ಯಾ! ತಾಚೆಂಚ್ ಹಾಡ್ ಮೋಡ್ನ್ ಹಾಂವೆಂ ತ್ಯಾಚ್ ಹಾಡಾಚೆಂ ಸೂಪ್ ಕರ್ನ್ ದಿಲ್ಯಾರೀ ಪಿಯೆಂವ್ಚೊತಿತ್ಲಿ ಪಾತ್ಯೆಣೆಚೊ ಮ್ಹಜೊ ಮಾಣ್ಖುಲೊ ತೊ!”

“ವ್ಹಯ್ ಪಾತ್ಯೆಣೆಕ್ ನಾಂವ್ ವ್ಹೆಲ್ಲ್ಯಾ ತುಜ್ಯಾ ಮಾಣ್ಕುಲ್ಯಾಚೆಂ ಒರಿಜಿನಲ್ ನಾಂವ್ ಟೊಮಿ ರಾಯಾ!”

“ಟೊಮಿ?”

“ವ್ಹಯ್, ಆಮ್ಚ್ಯಾ ವಾಡ್ಯಾಚ್ಯಾ ಗುರ್ಕಾರಾನ್ ಪೊಸ್ ಲ್ಲೆಂ ಸುಣೆಂ ಹೆಂ. ಏಕ್ ದೀಸ್ ಕ್ರಿಸ್ಮಸಾದಿಸಾ ಧನಿಯಾಚಿ ಬಿರಿಯಾನಿಚಿ ಬೊಶಿಚ್ ತೊಂಡಾಂತ್ ಚಾಬೊನ್ ಪಿಡ್ಚ್ಯೊ ಜಾಲ್ಲೆಂ. ಆತಾಂ ಪಳೆಯ್ತಾನಾ ಹ್ಯಾ ರಾನಾಂತ್ ಕೊಣಾಚಿಂಗೀ ಪಾಕಾಂ, ಆನಿ ಕೊಣಾಚೆಗೀ ಕಾಂಟೆ ಆಂಗಾಪಾಂಗಾಕ್ ಖೊವವ್ನ್,ಮೇಕಪ್ ಕರ್ನ್ ಮಾಣ್ಕುಲೊ ಮ್ಹಣ್ ಹಾಂಗಾ ಸೆಟಲ್ ಜಾಲಾಂ!”

“ಅಳೆ ಮನ್ಶ್ಯಾ ಫಟ್ ಮಾರಿನಾಕಾ. ಹಾಂವ್ ಬೊಶಿ ಘೆವ್ನ್ ಯೇಂವ್ಕ್ ನಾ. ತ್ಯಾ ಬೊಶಿಯೆಂತ್ ಧನಿಯಾನ್ ಅರ್ಧೊ ಖಾವ್ನ್ ದವರ್ ಲ್ಲೊ ಏಕ್ ಲೆಗ್ ಪೀಸ್ ಮಾತ್ರ್ ಚಾಬೊನ್ ಧರ್ನ್ ಆಯಿಲ್ಲೊಂ.”

ಸಗ್ಳ್ಯಾನ್ ಶಾಂತ್! ರಾಯ್ ತಟಕ್ಕ್! ಸರ್ವ್ ಮನ್ಜಾತಿಂನಿ ಮಾಣ್ಕುಲ್ಯಾಚಿ ಸತ್ ಗಜಾಲ್ ಕಳೊನ್ ಎಕಾಮೆಕಾ ತೋಂಡ್ ಪಳಯ್ಲೆಂ!

“ಯೂ ಬಾಸ್ಟಾರ್ಡ್” ವಾಗಾನ್ ಘೊರೊಜ್ ಘಾಲಿಚ್. ಪುಣ್ ಸುಣ್ಯಾಕ್ ನ್ಹಯ್ ಮನ್ಶ್ಯಾಕ್, ಮಿಂಗೆಲಿಕ್! ಮಿಂಗೆಲಿಕ್ ಅಜ್ಯಾಪ್!

“ಮ್ಹಾಕಾ ಅಸಲ್ಯೊ ಮನ್ಜಾತಿಚ್ ಗರ್ಜ್ ಶಿವಾಯ್ ತುಜೆತಸಲೆ ಮನಿಸ್ ನ್ಹಯ್! ಗೆಟ್ ಔಟ್ ಓಫ್ ಮೈ ಜಂಗಲ್, ಯೂ ಡರ್ಟಿ ಹ್ಯೂಮನ್!” ಹಿಂ ಉತ್ರಾಂ ನ್ಹಯ್, ಚಾಬೊನ್ ಚಾಬೊನ್ ಉಡಯಿಲ್ಲ್ಯಾ ಹಾಡಾಂಬರಿ ಭೊಗ್ಲಿಂ ಮಿಂಗೆಲಿಕ್.

ವಾಗಾನ್ ಗಾಂವ್ಚಿ ವಾಟ್ ದಾಕಂವ್ಕ್ ಎಕಾ ಗಾರಿಕ್ ನಮೊಯಾರ್ನ್ ಮಿಂಗೆಲಿಕ್ ತಾಚೆಪಾಟ್ಲ್ಯಾನ್ ವಚೊಂಕ್ ಫರ್ಮಾಯ್ಲೆಂ. ಮಿಂಗೆಲಿಕ್ ಖುಶೇನ್ ಥಂಯ್ಚೊ ನಿಕಳ್ಳೊ. ಪುಣ್ ತಾಕಾ ನಿಜಾಕೀ ಹ್ಯಾ ರಾನಾಚ್ಯಾ ಸಾದ್ಯಾ ಮನ್ಜಾಂತಿಚೆರ್ ಬಿರ್ಮತ್ ಆಯ್ಲಿ.

ಕಶೇಂಯ್ ರಾನಾಥಾವ್ನ್ ಭಾಯ್ರ್ ಪಡೊನ್ ಘರಾಲಾಗಿಂ ವೆತಾನಾ ದೊರ್‍ಯಾರ್ ಚಾನಿಯೆಚಿಂ ‘ಚೀಂವ್’ ಚೀಂವ್’ ಆನಿ ಕಾವ್ಳ್ಯಾಚಿಂ ‘ಖಾ ಖಾ’ ಉತ್ರಾಂ ಕಾನಾರ್ ಪಡ್ಲಿಂ.

ಘರಾಭಿತರ್ ರಿಗ್ತಚ್ ತಾಚ್ಯಾ ಲ್ಹಾನ್ ಭುರ್ಗ್ಯಾನ್ “ಖಂಯ್ ಗೆಲ್ಲೊಯ್ ಡಾಡಾ” ಮ್ಹಣೊನ್ ಮಿಂಗೆಲಿಕ್ ಪೊಟ್ಲುನ್ ಧರ್ನ್ ತೊಂಡಾರ್ ಲೊಚ ಲೊಚ ಉಮೆ ವೊತ್ಲೆ. ‘ವ್ಹಾಹ್! ಹಾಚೆಪ್ರಾಸ್ ರುಚಿಕ್ ಗೋಡ್ ಮ್ಹೊಂವ್ ಆಸತ್ ಗೀ? ಹೆಂ ಸೊಡ್ನ್ ಮ್ಹೊಂವ್ ಸೊಧುನ್ ರಾನಾಕ್ ಗೆಲ್ಲೊಂ ಹಾಂವ್ ನಿಜಾಕೀ ಪಿಸೊ’ ಮ್ಹಣ್ ಭೊಗ್ಲೆಂ ಮಿಂಗೆಲಿಕ್.

ಜನೆಲಾಥಾವ್ನ್ ಭಾಯ್ರ್ ತಿಳ್ತಾ, ದೆಕ್ತಾ ತರೀ ಕಿತೆಂ- ಟೆರೆಸಾಕ್ ಚ್ ಉಮ್ಕೊಳೊನ್ ಆಸಾ ವ್ಹಡ್ ಸಯ್ತ್ ಮ್ಹೊಂವಾಚಿ ಪೊಳಿ! ಸ್ಸುಂಯ್ಯ್ ಕರ್ನ್ ಯೇವ್ನ್, ಜನೆಲಾಚ್ಯಾ ಸೊರೊಳಾರ್ ಬಸೊನ್ ಸೊಂಡಿ ಘಶ್ಟುಂಚ್ಯಾ ಮುಸಾಲಾಗಿಂ ಮಿಂಗೆಲಿನ್ ವಿಚಾರ್ಲೆಂ- “ತುಮಿಯ್ ರಾನ್ ಸಾಂಡುನ್ ಶೆರಾಕ್ ಪಾವ್ಲ್ಯಾತ್ ಗೀ?”

“ವ್ಹಯ್ ಮಿಂಗೆಲಿ.. ತ್ಯಾ ರಾನಾಂತ್ ರಾಯಾಚ್ಯಾ ಆನಿ ತಾಚ್ಯಾ ಪಾಟ್ಲಾಮಾಚ್ಯೊ ಧೊಶಿ ಕೊಣಾಕ್ ಜಾಯ್! ಆಮ್ಕಾಂ ಮ್ಹೊಂವ್ ಕಾಡ್ಚೆಂ ಟ್ರಯ್ನಿಂಗ್ ದಿತಾಂ ಮ್ಹಣ್ ನಾಕಾ ಜಾಲ್ಲೆಂ ಯೋಗ ಕರಯ್ತಾತ್. ಮ್ಹೊಶಿಂಚ್ಯಾ ಶೆಣಾಂತ್ ಯೀ ಕಾಂಯ್ ತರೀ ಮ್ಹೊಂವ್ ಕಾಡುಂಕ್ ಜಾತಾಗೀ ಮ್ಹಳ್ಳೊ ಪ್ರಯೋಗ್ ಕರಾ ಮ್ಹಣ್ ಮ್ಹೆಳೆಂ ಖಾವಯ್ತಾತ್! ರಗ್ಳೆ ನಾಕಾತ್ ತಾಂಚೆ” ಮ್ಹಣೊನ್ ಉಬೊನ್, ಮುಸಾನ್ ಎಕಾ ಫುಲಾಪಾಕ್ಳೆಂತ್ ಮಿಶಿ ರಿಗಯ್ಲಿ!

ಮಿಂಗೆಲಿನ್ ಆಪ್ಲ್ಯಾ ಭುರ್ಗ್ಯಾಚ್ಯಾ ಪೊಲ್ಯಾರ್ ವೋಂಟ್ ದಾಂಬ್ಲೆ.

► ವಿಲ್ಸನ್ ಕಟೀಲ್ (ರುಡ್ಯಾರ್ಡ್ ಕಿಪ್ಲಿಂಗಾಚಿ ಮಾಫ್ ಮಾಗೊನ್)

ನಿಮಾಣ್ಯಾ

ಅರ್ಧೆ ಫರ್ಲಾಂಗ್ ಚಮ್ಕಲಾಂ ಮಾತ್ರ್- ಎಕಾಚ್ಚಾಣೆಂ ರಾವ್ಲೊಂ! ಅರೆ ದೊಳ್ಯಾಂಫುಡೆ ಜೆಜು!

“ಅರೆ ಜೆಜು… ತುಕಾ ಪಳೆಂವ್ಕ್ ಸರ್ವಾಂ ಇಗರ್ಜೆಕ್ ಗೆಲ್ಯಾಂತ್ ಪುಣ್ ತುಂ ಹಾಂಗಾ? ತೇಂಯ್ ನಿಮಾಣ್ಯಾ ಸುಕ್ರಾರಾ…?” ವಿಚಾರ್ನ್ ಸೊಡ್ಲೆಂಚ್ ಹಾಂವೆಂ.

ಜೆಜು ಖಂತಿನ್ ಆನಿ ಇಲ್ಲ್ಯಾ ಆಕ್ರೋಶಾನ್ ಮ್ಹಣಾಲೊ- “ವರ್ಸಾಂ ವರ್ಸಾಂ ಥಾವ್ನ್ ಖುರ್ಸಾರ್ ಉಮ್ಕಳ್ಚ್ಯಾ ಮ್ಹಾಕಾ ಪಳೆವ್ನ್ ಪಳೆವ್ನ್ ಲೊಕಾಕ್ ಬೋರ್ ಜಾಂವ್ಕ್ ಸುರು ಜಾಲಾಂ ರೆ… ದೆಕುನ್ ತಾಂಚೆಪಯ್ಕಿಚ್ ಕೊಣಾಕ್ ತರೀ ಸೊಭಿತ್ ಆಸ್ ಲ್ಲ್ಯಾಕ್ ವಿಂಚುನ್ ಖುರ್ಸಾವಾಟೆಚೊ ನಾಟಕ್ ಕರ್ತಾತ್. ಸೊಭಿತ್ ಆಸ್ ಲ್ಲ್ಯಾಕ್ ವಿಂಚ್ ಲ್ಲ್ಯಾ ಖಾತಿರ್ ಮ್ಹಣ್ ನ್ಹಯ್, ಬರೇಂ ನಟನ್ ಕರ್ಚ್ಯಾಕ್ ವಿಂಚ್ತಾತ್ ನೆ… ಹೆಂ ಮ್ಹಾಕಾ ಕರ್ಚೆಂ ಇನ್ಸಲ್ಟ್ ನ್ಹಯ್ ಗೀ? ಹೆಂ ಪೂರಾ ಹಾಂವೆಂ ಪಳೆಂವ್ಚೆಂ ಕಶೆಂ?”

“ವ್ಹಡ್ ನಾ ಜೆಜು… ತುಂ ಬಸ್. ವಿಶೆವ್ ಘೆ, ಹಾಂವ್ ಮ್ಹಜೆಂ ವಾಕಿಂಗ್ ಮುಕಾರಿತಾಂ..” ಮ್ಹಣೊನ್ ಫುಡ್ಲೆಂ ಮೇಟ್ ಕಾಡ್ತಾನಾ, ಜೆಜು ಮ್ಹಣಾಲೊ –

“ರಾವ್ ರೆ ಹಾಂವ್ ಯೀ ಯೆತಾಂ ವಾಕಿಂಗಾಕ್. ಹೊ ಜಾಗೊ ಬರೋ ಆಸಾ. ಜೆಜು ಮ್ಹಳ್ಯಾರ್ ತುವೆಂ ಖುರ್ಸಾವಾಟೆಕ್ ಮಾತ್ರ್ ಲಾಯೆಕ್ ಮ್ಹಣ್ ಚಿಂತ್ಲಾಂಯ್ ಗೀ ಕಿತೆಂ…”

“ನಾ ಜೆಜು ತೂಂಯ್ ಯೆ ..” ಮ್ಹಣ್ತಚ್ ಆಮಿ ಸಾಂಗಾತಾ ಸಾಂಗಾತಾ ಮೆಟಾಂ ಕಾಡುಂಕ್ ಸುರು ಕೆಲಿಂ. ವಾಟೆರ್ ಏಕ್ ಕಾಜ್ ಪಿಕೊನ್ ಪಡ್ಲಲಿ ವಿಂಚ್ಲಿ ಜೆಜುನ್ ಆನಿ ಏಕ್ ಘಾಸ್ ಘಾಲುನ್ ರೋಸ್ ಚಿಂವೊಂಕ್ ಧರ್ಲೊ. ದೋನ್ ಥೆಂಬೆ ರೋಸ್ ಹಳೂ ತಾಚ್ಯಾ ವೊಂಟಾಖಾಂಚಿಂನಿ ಗಳ್ಯಾಕಡೆ ದೆಂವ್ಚೊ ಹಾಂವೆಂ ಪಾರ್ಕಿಲೊ.

“ಜೆಜು…. ಹಿ ವಾಟೆರ್ ಪಡ್ ಲ್ಲಿ ಕಾಜ್….”

“ವ್ಹಾವ್! ಭಾರಿ ಬರಿ ಆಸಾ. ಕೆದಾಳಾ ಖೆಲ್ಲಿಂಗೀ ಹಾಂವೆಂ ಅಸಲಿಂ ಫಳಾಂ. ತಿಂ ಕಾಣಿಕೊ ಆಯಿಲ್ಲಿಂ ಮಾರ್ಕೆಟಿಂತ್ಲಿಂ ಎಪ್ಪಲಾಂ, ದ್ರಾಕ್ಶಿ ಪಳೆವ್ನ್ ಚ್ ಕಾಂಟಾಳೊ ಆಯ್ಲಾ ಮ್ಹಾಕಾ.. ಮ್ಹಾಕಾಯ್ ಅಸಲಿಂಚ್ ಫಳಾಂ ಪಸಂದ್ ರೆ… ಹ್ಯಾ ರಾನಾ ಫಳಾಂನಿ ಆಸ್ಚಿ ರೂಚ್ ಕಾಣಿಕೆಂತ್ಲ್ಯಾ ಪರ್ಜಳಿತ್ ಫಳಾಂಕ್ ಖಂಯ್ ಆಸತ್? ತೇಂಯ್ ಕಾಣಿಕೊ ಹಾಡ್ತಲಿಂ ಕಿತ್ಲೆಂ ಪುರ್ಪುರೊನ್ ದಿತಾತ್ ಗೀ ಕೋಣ್ ಜಾಣಾಂ?” ಮ್ಹಣ್ತಚ್ ತಾಣೆಂ ಚಿಂವೊಡ್ ಬಗ್ಲೆಕ್ ಕಾಡ್ನ್ ಉಡಯ್ಲೆಂ. ಹಾಂವ್ ಅಜ್ಯಾಪ್ಲೊಂ.

ಮುಕಾರ್ ವೆತಾನಾ ಥಂಯ್ಸರ್ ಪಾಂಯ್ ವಾಟೆಚ್ಯಾ ಘುಂವ್ಡೆರ್ ಏಕ್ ಕಂರ್ಟಾಂಝಡ್ ದಿಸ್ಲೆಂ. ಆಂಗಾಪಾಂಗಾಕ್ ಮೊತಿಯಾಂ ಫುಟ್ ಲ್ಲೆಬರಿ ಕಂರ್ಟಾಂ ಆಸ್ ಲ್ಲಿಂ ತರೀ ಕಾಂಟೆಯ್ ಉಣೆ ನಾತ್ಲೆ.  ಜೆಜು ಹಾತ್ ಘಾಲುಂಕ್ ಮುಕಾರ್ ಸರ್ಲೊಚ್.

“ಜೆಜು.. ಚತ್ರಾಯ್…. ಕಾಂಟೆ ಘಾರ್ಪತಿತ್ ” ಮ್ಹಳೆಂ ಹಾಂವೆಂ.

“ಕಾಂಟೆ..? ಖಿಳೆ.. ಖಿಳೆ ತೊಪ್ ಲ್ಲೆ ಹಾತ್ ರೆ ಹೆ… ತುಂ ಕಾಂಟೆ ಮ್ಹಣ್ತಾಯ್. ಕಾಂಟ್ಯಾಂಚೊ ಮುಕುಟ್ ಚ್ ಮ್ಹಜ್ಯಾ ಮಾತ್ಯಾಕ್ ಮಾಳುಂಕ್ ನಾಯೆ… ಹಾಂ ಆನ್ಯೇಕ್ ಗಜಾಲ್ ಕಳಿತ್ ಆಸಾಯೆ.. ಕಾಂಟೆ ಜಾಂವ್ ಖಿಳೆ, ತಾಂಚೆಥಾವ್ನ್ ಕಾಂಯ್ ಆಪಾಯ್ ನಾ ರೆ. ಫುಲಾಂಬರಿಚ್ ಶಾಂತ್ ತೆ. ಪುಣ್ ಆಪಾಯ್ ಯೆಂವ್ಚೊ ತೆ ಮನ್ಶ್ಯಾಂಚ್ಯಾ ಹಾತಿಂ ಪಾವ್ತಾನಾ ಮಾತ್ರ್”

“ತುಕಾ ಜಿಣಿಯೆಚೊ ಅನ್ಭೋಗ್ ಮೊಸ್ತ್ ಆಸಾ ಜೆಜೂ” ಮ್ಹಳೆಂ ಹಾಂವೆಂ ತಕ್ಲಿ ಹಾಲವ್ನ್.

ಜೆಜುನ್ ಜಾಪ್ ದಿಲಿ –

“ಜಿಣಿಯೆಚೊ ಮಾತ್ರ್ ನ್ಹಯ್, ಮ್ಹಾಕಾ ಮರ್ಣಾಚೊಯ್ ಅನ್ಭೋಗ್ ಆಸಾ”! ಮ್ಹಣ್ ವ್ಹಡ್ಲ್ಯಾನ್ ಹಾಸ್ಲೊ ತೊ.

“ಆಂಬೊಟ್ ಆಸ್ತಾಲಿಂ ಜೆಜು… ಪುರ್ತಿಂ ಪಿಕೊಂಕ್ ನಾಂತ್ ತಿಂ” ಕಂರ್ಟಾಂ ತೊಂಡಾಕ್ ಘಾಲ್ಚ್ಯಾ ಜೆಜುಕ್ ಮ್ಹಳೆಂ ಹಾಂವೆಂ.

“ಕಿತ್ಲಿಂ ಆಂಬೊಟ್ ಆಸ್ಲ್ಯಾರೀ ಶಿಪಾಯಾಂಚ್ಯಾ ಭಾಲಿಯೆತಕ್ಲೆಕ್ ಚಿಡ್ಕಲ್ಲ್ಯಾ ಆಳ್ಮ್ಯಾತಿತ್ಲಿಂ ಆಸೊಂಕ್ ಸಾಧ್ಯ್ ನಾ ನ್ಹಯ್ ಗೀ…” ಮ್ಹಣ್ ದೊಳೊ ಮೊಡ್ಲೊ ತಾಣೆಂ.. ಮುಕಾರುನ್- “ಸಾರ್ಕೆಂ ಪಳೆ- ರಾನಾಕ್ ಸೊಭಾಯ್ ದಿಂವ್ಚಿ ಅಸಲ್ಯಾ ಬೊಲ್ಯಾಂನಿ ಮಾತ್ರ್. ರೂಕ್ ಆಸ್ತಾತ್ ಪುಣ್ ರಾನ್ ಭರ್ಚೆಂ ಅಸಲ್ಯಾ ಬೊಲ್ಯಾಂನಿ. ಎಕಾ ತಣಾಪಾಕ್ಳೆಕ್ ಯೀ ಹ್ಯೆ ಪ್ರತ್ವೆಂತ್ ತಾಚೆಂಚ್ ಮ್ಹಳ್ಳೆಂ ಮಿಸಾಂವ್ ಆಸಾ… ತುಂ ಹ್ಯಾ ವಾಟೆನ್ ಏಕ್ ಮ್ಹಯ್ನೊ ಚಲ್ಚೆಂ ರಾವಯ್… ತುಜ್ಯೊ ಇತ್ಲ್ಯಾ ವರ್ಸಾಂಚೊ ಖೊಟೊಯ್ ವಿಸ್ರೊನ್ ವೆಚೆಬರಿ ಕಶೆಂ ತಣ್ ತಕ್ಲಿ ಉಕಲ್ತಾ ಪಳೆ ಹಾಂಗಾ..”

“ಜೆಜು ತುಂ ನಿಜಾಯ್ಕಿ ದಾರ್ಶನಿಕ್. ಇತ್ಲ್ಯಾ ಲ್ಹಾನ್ ವಸ್ತುಂತ್ ಯೀ ಮಿಸಾಂವ್ ಪಾರ್ಕಿಲ್ಲೊ ತುಂ ನಿಜಾಯ್ಕಿ ದಾರ್ಶನಿಕ್ ಜೆಜು..” ಉದ್ಗಾರ್ಲೊಂ ಹಾಂವ್.

“ಹೆಂ ದರ್ಶನ್ ಜಿಣಿಯೆಚ್ಯಾ ಅನ್ಭೊಗಾಂತ್ ಮಾತ್ರ್ ಯೆತಾ ರೆ… ತುಂ ಜಾಣಾಂಯ್? ವಾಟೆಚೆಂ ಕಾಳಿಜ್ ಹಾಂವೆಂ ಪಾರ್ಕಿಲ್ಲೆಂ ಖುರ್ಸಾವಾಟೆರ್ ಚ್. ಖಾಂದಾವಯ್ಲ್ಯಾ ಖುರ್ಸಾಜಡಾಯೆನ್ ಮ್ಹಾಕಾ ವಾಟೆಕ್ ಚಡ್ ಲಾಗಿಂ ಕೆಲ್ಲೆಂ… ವ್ಹಯ್, ಹಾಂವ್ ಖುರ್ಸಾವಾಟೆರ್ ಪಡ್ತಾನಾ ಮ್ಹಜ್ಯಾ ಆಂಗಾಪಂದಾ ಅಡ್ಚಲ್ಲ್ಯಾ ತಣಾಪಾಕ್ಳೆಂಕ್ ಹಾಂವ್ ಚ್ ಖುರಿಸ್ ಜಾಲ್ಲೊಂಯ್ ಪಾರ್ಕಿಲ್ಲೆಂ ಹಾಂವೆಂ….”

ಮ್ಹಣ್ತಚ್ ಜೆಜು “ರಾವ್ ಚೂರ್.. ಹ್ಯಾ ಬೆಣ್ಶಿಫಾಂಟ್ಯಾಕ್ ಏಕ್ ಪಾವ್ಟಿಂ ಉಮ್ಕೊಳ್ ಘೆತಾಂ” ಮ್ಹಣಾಲೊ ಆಶೆನ್. ಹಾಂವ್ ಜೆಜುಕ್ ಚ್ ಪಳೆಂವ್ಚ್ಯಾಕ್ ಪಡ್ಲೊಂ.

ವ್ಹಾವ್! ಕಿತೆಂ ಖುಶಿ ಜೆಜುಕ್! ಲ್ಹಾನ್ ಭುರ್ಗ್ಯಾಬರಿ ಬೆಣ್ಶಿಚ್ಯಾ ಫಾಂಟ್ಯಾರ್ ಖೆಳ್ಳೊ. ಹಾಕಾ ಪಳಯ್ಲ್ಯಾರ್ ಆಜ್ ನಿಮಾಣೊ ಸುಕ್ರಾರ್ ಮ್ಹಣ್ ಕೊಣೀ ಸಾಂಗ್ತಿತ್?

“ಕಿತೆಂ ಚಿಂತಾಯ್ ತುಂ? ಹಾಂವ್ ಹ್ಯಾ ಫಾಂಟ್ಯಾಕ್ ಉಮ್ಕೊಳೊನ್ ಆಸಾಂ ಮ್ಹಣ್ ಗೀ? ಖುರ್ಸಾರ್ ಪಳಯಿಲ್ಲ್ಯಾ ಮ್ಹಾಕಾ ಹ್ಯಾ ಆವ್ತಾರಾರ್ ಪಳೆವ್ನ್ ಅಜ್ಯಾಪ್ ಜಾಲೆಂಗೀ ಕಿತೆಂ? ಮ್ಹಜೆಂ ಲ್ಹಾನ್ ಪಣ್ ಯೀ ಅಶೆಂಚ್ ಖರ್ಚಿಲ್ಲೆಂ ಹಾಂವೆಂ. ರುಕಾಫಾಂಟ್ಯಾಂನಿ ಚಡ್ತಾಲೊಂ. ಬೊಲ್ಯಾಂನಿ ಲಿಪೊನ್ ಬಸ್ತಾಲೊಂ. ಫಾಂಟ್ಯಾರ್ ಬಸೊನ್ ಫಳಾಂ ಖಾತಾಲೊಂ. ಪುಣ್ ಸರ್ವಾಂಕ್ ಮ್ಹಜೊ ಖುರಿಸ್ ಮಾತ್ರ್ ದಿಸ್ತಾ”.

ಉಲಯ್ತಾಂ ಉಲಯ್ತಾಂ ಮ್ಹಜ್ಯಾ ಗಳ್ಯಾಕ್ ದೆಕ್ಲೆಂ ತಾಣೆಂ. “ಅರೆ ಹೆಂ ಕಿತೆಂ? ಮಣಿಯೊ ನಾತ್ಲ್ಯಾ ಕೊಂತಾಬರಿ ದೋನ್ ಸುತಾಂ ಉಮ್ಕಳ್ತಾತ್?”

“ತೆಂ ಇಯರ್ ಫೊನ್ ಜೆಜು. ಆಜ್ ತುಂ ಮೆಳ್ಳೊಯ್ ಮ್ಹಣ್ ತುಜೆಲಾಗಿಂ ಉಲಯ್ಲೊಂ. ನಾ ತರ್ ಹಾಂತುಂ ಮ್ಹಜ್ಯಾ ವಾಕಿಂಗಾಕ್ ಸಾಂಗಾತ್ ದಿಂವ್ಚೊ ಹ್ಯಾ ಪದಾಂನಿ” ಮ್ಹಳೆಂ ಹಾಂವೆಂ.

“ಪಳಯಾಂ ಹಾಂವ್ ಯೀ ಇಲ್ಲೆಂ ಆಯ್ಕಾತಾಂ” ಮ್ಹಣ್ ಕಾನ್ ದಿಲೊ ತಾಣೆಂ. ಹಾಂವೆಂ ತಾಚ್ಯಾ ಕಾನಾಕ್ ಶಿರ್ಕಾವ್ನ್ ಪ್ಲೇ ಕೆಲೆಂ. ಇಳಯರಾಜಾಚೆಂ ಪದ್ ವ್ಹಾಜೊಂಕ್ ಸುರು ಜಾಲೆಂ. “ವಾವ್. ಕಿತ್ಲೆಂ ಮಧುರ್ ಪದ್…” ಮ್ಹಣ್ ಉದ್ಗಾರುನ್ ಥೊಡೊ ವೇಳ್ ಆಯ್ಕತಚ್, “ಆಮ್ಚ್ಯಾ ಕೊಯೆರಾಂತ್ ಗಾಯ್ತಾತ್ ಪಳಯ್ಲ್ಯಾರ್… ಮ್ಹಾಕಾ ಥೊಡೆಪಾವ್ಟಿಂ ಕೊಯೆರಾಂತ್ಲಿಂ ಪದಾಂ ಆಯ್ಕೊನ್ ಖಂಯ್ ಪುಣೀ ಮ್ಹಜೆ ಆಪೊಸ್ತಲ್ ಡಿಸ್ಕೋ ಡ್ಯಾನ್ಸ್ ಸುರು ಕರ್ತಿತ್ ಗಾಯ್ ಮ್ಹಳ್ಳಿ ಭಿರಾಂತ್ ದಿಸ್ತಾ” ಮ್ಹಣ್ ವ್ಹಡ್ಲ್ಯಾನ್ ಹಾಸ್ಲೊ. ಹಾಂವ್ ಯೀ ಹಾಸ್ಲೊಂ.

ಏಕ್ ವೋರ್ ಕಶೆಂ ಗೆಲೆಂ ಮ್ಹಣ್ ಚ್ ಕಳಿತ್ ನಾ. ಮ್ಹಜೆಂ ಆಂಗ್ ಘಾಮಾನ್ ಭಿಜ್ ಲ್ಲೆಂ. ಹಳೂ ದೊಗೀ ಎಕಾ ಖಡ್ಪಾಫಾತ್ರಾರ್ ಬಸ್ಲ್ಯಾಂವ್.

“ವ್ಹಾವ್ ಬರೀ ಸೀನರಿ. ಸಾಂಗ್ ಲ್ಲ್ಯಾಬರಿ ತುವೆಂ ಪದಾಂ ಕವಿತಾ ಹಾಂಗಾಚ್ ಬಸೊನ್ ಬರಂವ್ಚಿಂ ಕೊಣ್ಣಾ ನೆ… ಛೆ ಹಾಂವೆಂ ಜಿಣಿಯೆಂತ್ ಕೆಲ್ಲಿ ವ್ಹಡ್ಲಿ ಚೂಕ್ ಮ್ಹಳ್ಯಾರ್ ಏಕ್ ಆಟೋ ಬಯಾಗ್ರಫಿ ಬರಯ್ನಾತ್ಲಿ. ಕೊಣೆಂ ಕೊಣೆಂ ತಾಂಕಾಂ ಸಮ್ಜಲ್ಲ್ಯಾಬರಿ ಮ್ಹಾಕಾ ಸಮ್ಜೊನ್ ಕಸಲ್ಯೊ ಪೂರಾ ಕಾಣಿಯೊ ರಚ್ಲ್ಯಾತ್… ಹಾಂವ್ ಆನಿ ಮ್ಹಜೆಂ ಜಿವಿತ್- ಮ್ಹಾಕಾ ಮಾತ್ರ್ ಕಳಿತ್…” ಏಕ್ ಥೆಂಬೊ ದೂಕ್ ಜೆಜುಚೆಂ ಖಡ್ಪಾರ್ ಪಡೊನ್ ಫುಟ್ಚೆಂ ಹಾಂವೆಂ ದೆಕ್ಲೆಂ. ಜೆಜು ಉಲವ್ನ್ ಚ್ ಆಸ್ಲೊ –

“ಕಿತ್ಲಿ ಬರಿ ಪ್ರಕೃತಿ ನ್ಹಯ್ ಗೀ… ಕಿತ್ಲೆಂ ಬರೆಂ ವಾರೆಂ. ಇಗರ್ಜೆಂತ್ ಗೀ ಕೊರೊಡಾಂಚೊ ಘುಡ್ ರಚ್ತಾತ್ ಥಂಯ್. ಆನಿ ಇತ್ಲ್ಯಾ ಬರ‍್ಯಾ ಪಾಚ್ವ್ಯಾ ರುಕಾಂಕ್ ಕಾತರ್ನ್ ದಿಂಬಿಯೆರ್ ಪಡ್ಲ್ಯಾರೀ ಧೊಂಪ್ರಾ ಗಾಂಟಿಕ್ ಧುಳ್ ಸಯ್ತ್ ಲಾಗನಾಶೆಂ ಕಾಪೂಸ್ ಚಿಡ್ಕಾಯಿಲ್ಲೆ ಬಾಂಕ್ ರಚ್ತಾತ್. ಉಬೆ ರಾವ್ ಲ್ಲ್ಯಾ ರುಕಾಂಕ್ ಆಡ್ ಘಾಲ್ನ್ ಹಾಣಿಂ ದಿಂಬಿಯೆರ್ ಪಡನಾತ್ಲ್ಯಾರ್ ಕಿತೆಂ ಜಾತಾ ಹ್ಯಾ ಮನ್ಶ್ಯಾಂಕ್?”

ವ್ಹಯ್ ಜೆಜು ಖರೊಚ್ ಕ್ರಾಂತಿಕಾರಿ, ಚಿಂತ್ಲೆಂ ಹಾಂವೆಂ.

“ಹೆಂ ಪೂರಾ ತುವೆಂ ಕಿತ್ಯಾಕ್ ವಿಚಾರುನಾಂಯ್ ಜೆಜು..?” ವಿಚಾರ್ ಲ್ಲ್ಯಾಕ್ ಹಾಂವೆಂ ಜಾಪ್ ದಿಲಿ ಜೆಜುನ್  –

“ಪಾದ್ರಿಚೊ ಶೆರ್ಮಾಂವ್ ಆನಿ ಇತ್ಲೊ ಖರ್ಚ್ ತಿತ್ಲೊ ಖಾರ್ಚ್ ಮ್ಹಣ್ ಲೆಕಾಂಪಾಕಾಂಚ್ಯಾ ಕಳವ್ಣೆಮದೆಂ ಮ್ಹಜೊ ತಾಳೊ ಆಯ್ಕಾತಾ ತರೀ ಕೋಣ್?”

ತಿತ್ಲ್ಯಾರ್ ಪಯ್ಶಿಲ್ಯಾನ್ ಗುಸುಗುಸು ಉಲವ್ಣೆಂ ಆಯ್ಕಾಲೆಂ.

“ಓಹ್ ಇಗರ್ಜೆಕ್ ಗೆಲ್ಲಿಂ ಆಯ್ಲಿಂ ಕೊಣ್ಣಾ” ಮ್ಹಳೆಂ ಹಾಂವೆಂ.

“ತರ್ ಹಾಂವ್ ವೆತಾಂ. ತಾಂಚೆಮುಕಾರ್ ರಾವನಾ” ಮ್ಹಣ್ ಆಮ್ಸೊರ್ಲೊ ಜೆಜು.

“ರಾವ್ ಜೆಜು, ತಾಂಕಾಂಯ್ ತುಜೆಂ ದರ್ಶನ್ ದೀವ್ನ್ ವಚ್” ಮ್ಹಳ್ಳ್ಯಾಕ್ ಜೆಜು ಎಕಾಚ್ಚಾಣೆಂ “ನಾಕಾ ನಾಕಾ, ತಾಣಿಂ ಆತಾಂ ಹಾಂಗಾ ಮ್ಹಾಕಾ ಪಳಯ್ಲ್ಯಾರ್ ಸಗ್ಳ್ಯಾ ಗಾಂವಾರ್ ಖಬರ್ ಜಾತೆಲಿ. ತುಜ್ಯಾ ಫೆಸ್ ಬುಕ್ ವಾಟ್ಸಾಪಾರ್ ಪಿಸಾಂತುರ್ ಮೆಸೆಜ್ಯೊ ಪಾಶಾರ್ ಜಾತೆಲ್ಯೊ. ಹಾರಿಹಾರಿಂನಿ ಲೋಕ್ ಹಾಂಗಾ ಯೇವ್ನ್ ಖಾತಡ್ ಕರ್ತೊಲೊ. ದೊಳೆ ಧಾಂಪುನ್ ತೇರ್ಸ್ ಕರ್ತೊಲೊ. ಹ್ಯಾ ಇತ್ಲ್ಯಾ ಸೊಭಿತ್ ಪ್ರಕೃತಿಚೆಂ ನಿಸ್ಸಂತಾನ್ ಕರ್ನ್ ಹಾಂಗಾಯ್ ಏಕ್ ಕೊರೊಡಾಂಚಿ ಇಗರ್ಜ್ ಬಾಂದ್ತೆಲೆ.. ಮಾಗಿರ್ ಮ್ಹಜಿ ಏಕ್ ಇಮಾಜ್ ಕರ್ನ್ ವ್ಹಡ್ ಕಾಣಿಕೊ ಕೊಂರ್ಡೊ ದವರ್ತೆಲೆ. ಆನಿ ತುವೆಂ ಇತ್ಲ್ಯಾ ಖುಶೆನ್ ವಾಕಿಂಗ್ ವೆಚ್ಯಾ ಹ್ಯಾ ಸೊಭಿತ್ ವಾಟೆಕ್ ಇಂಟರ್ಲೊಕಾಂಚೆ ಫೊಂಡ್ ಬಾಂದ್ತೆಲೆ ಆನಿ ತಾಚೆರ್ ಖುರ್ಸಾವಾಟ್ ಕರ್ತೆಲೆ…”

ಜೆಜು ಉಲಯ್ತಾ ಉಲಯ್ತಾನಾಂಚ್ ಮಿಸಾಂಚಿಂ ಲಾಗಿಂ ಆಯಿಲ್ಲಿಂ. ಜೆಜು ಬಾಯ್ ಕರುನ್ ಗೆಲೊ. ಹಾಂವ್ ಖಡ್ಪಾರ್ ಚ್ ಆಸ್ಲೊಂ.

ತಿತ್ಲ್ಯಾರ್ ಇಗರ್ಜೆಥಾವ್ನ್ ಪಾಟಿಂ ಯೆಂವ್ಚಿ ಮಿಸಾವೆಳಾರ್ ಕುಮ್ಗಾರ್ ವಾಂಟ್ಚಿ ಬಿಜ್ಜುಬಾಯ್ ಮ್ಹಾಕಾ ಪಳೆವ್ನ್ ಪುರ್ಪುರಿಲಾಗ್ಲಿ  –

“ಅರೆ ಚೆಡ್ಯಾ! ತುಂ ಹಾಂಗಾ ಬಸ್ಲಾಯ್ ಗಿ? ತುವೆಂ ಮಿಸಾಕ್ ಯೇವ್ನ್ ಕಿತ್ಲೊ ತೇಂಪ್ ಜಾಲೊ ರೆ? ಕುಮ್ಗಾರಾಚಿ ರೂಚ್ ಪುಣೀ ಉಡಾಸ್ ಆಸಾಗೀ? ಕುಮ್ಸಾರ್ ಜಾವ್ನ್ ವರ್ಸಾಂ ಕಿತ್ಲಿಂ ಜಾತಿತ್? ಆಜ್ ನಿಮಾಣೊ ಸುಕ್ರಾರ್ ಜಾವ್ನ್ ಯೀ ಇಗರ್ಜೆಕ್ ಯೇಂವ್ಕ್ ನಾಂಯ್ ರೆ ತುಂ ಅನ್ನಾಡ್ಯಾ…”

ಹಾಂವೆಂ ತಡ್ವನಾಸ್ತಾಂ ಸಾಂಗೊನ್ ಸೊಡ್ಲೆಂಚ್-

“ಆಮಿ ಕಿತ್ಯಾಕ್ ಗೇ? ತುಂ ಎಕ್ಲಿಚ್ ಪುರೊ ಜೆಜುಕ್ ಖುರ್ಸಾರ್ ಮಾರುಂಕ್”

ತಿಣೆಂ ರಾಗ್ ತಳ್ಮಟ್ಯಾಕ್ ಚಡೊನ್, ಮ್ಹಾಕಾ ಉಬ್ರಾಂವ್ಚ್ಯಾಕ್ ವಾಟೆದೆಗೆಲೊ ಫಾತರ್ ವಿಂಚ್ಲೊಚ್… ಥೊಡ್ಯಾಚ್ ವೆಳಾ ಆದಿಂ ತಿಚ್ಯಾ ಹಾತಾಂತ್ ಕುಮ್ಗಾರ್ ಆಸ್ ಲ್ಲೊ!

► ವಿಲ್ಸನ್ ಕಟೀಲ್

ಹೆಂ ಏಕ್ ವಿಚಿತ್ರ್ ಘಡಿತ್. ಆಪ್ಲ್ಯಾ ಜಿಣಿಯೆಂತ್ ಅಸಲೆಂ ಏಕ್ ಘಡಿತ್ ಘಡತ್ ಮ್ಹಣ್ ಹ್ಯಾ ಮಾನೆಸ್ತಾನ್ ಸಪ್ಣಾಂತ್ ಯೀ ಚಿಂತುಂಕ್ ನಾ. ಸಪ್ಣಾಂತ್ ಚಿಂತ್ಚೆಂ ತರ್ ಯೀ ಕಶೆಂ? ಆಡ್ ಪಡೊನ್ ವೋರ್ ಸಯ್ತ್ ಉತ್ರೊಂಕ್ ನಾ ಖಂಯ್! ತಿತ್ಲೆ ಭಿತರ್ ತೇಗ್ ದಡಂಗ್ ಜಿವಾಚೆ ಭಿತರ್ ಸರ್ಲೆಚ್ ಆನಿ ನಾಕಾಕ್ ಏಕ್ ಕಸ್ಲ್ಯಾಗೀ ಘಾಣಿಚೊ ತುವಾಲೊ ಆಡ್ ಧರ್ಲೊಚ್! ಘಾಣ್ ಕಾಂಯ್ ನವಿ ನ್ಹಯ್ ತಾಕಾ. ಆಪ್ಲ್ಯಾ ಲೋಬಿಖಾತಿರ್ ಕೊಣಾಕೊಣಾಚ್ಯಾ ಪಾಟ್ಲ್ಯಾನ್ ಭೊಂವ್ತಾನಾ ಹಾಚೆಪ್ರಾಸ್ ಘಾಣ್ಕುಟಿ ಘಾಣ್ ಹುಂಕ್ಲ್ಯಾ ತಾಣೆಂ. ಪುಣ್ ಹಿ ಕಸಲಿಗೀ ಕೆಮಿಕಲಾಚಿ ಘಾಣ್. ತಾಣಿಂ ನಾಕಾಕ್ ದಾಂಬುನ್ ಧರ್ ಲ್ಲ್ಯಾ ತುವಾಲ್ಯಾಂತ್ ಹುಂಕ್ ಲ್ಲಿ ಮಾತ್ರ್ ಕಳೀತ್. ಉಪ್ರಾಂತ್ ಕಿತೆಂಯ್ ಉಡಾಸ್ ನಾ.

ಮತಿರ್ ಯೆತಾನಾ ತೋಂಡ್ ಭರ್ ರಗತ್ ಆಸ್ ಲ್ಲೆಂ! ಆಪ್ಲೆಂ ಏಕ್ ಮಾತ್ರ್ ಹಾತೆರ್ ಜಾವ್ನ್ ಆಸ್ಚಿ ಅರ್ದಿ ಜೀಬ್ ಚ್ ನಾ! ಸಗ್ಳೊ ಸಂಸಾರ್ ಕೊಸ್ಳೊನ್ ಪಡ್ ಲ್ಲೊ ಅನ್ಭೋಗ್.

ಜಿಬೆಚೊ ಕುಡ್ಕೊ ಕಾಂಯ್ ಸಕಯ್ಲ್ ಪಡ್ಲಾ ಗಾಯ್ ಮ್ಹಣ್ ಸೊಧ್ತಾನಾ ಖಂಯ್ ಯೀ ನಾ! ವೆಲಾಗಾಯ್ ತಾಣಿಂ? ಕೋಣ್ ತೆ ಹಲ್ಕಟ್ ಮನಿಸ್. ಮನ್ ದಾದೊಸ್ ಕರ್ತಾಮ್ಹಣಾಸರ್ ಗಾಳಿ ದಿವ್ಯಾಂ ಮ್ಹಳ್ಯಾರ್ ಯೀ ಸಾಧ್ಯ್ ನಾ ಮು! ಇತ್ಲೆ ಪೂರಾ ವಿಶ್ವೆ ಆಪ್ಲ್ಯಾ ಕುಡಿಂತ್ ಕಾಮ್ ನಾಸ್ತಾನಾ ಬೆಕಾರ್ ಆಸ್ತಾನಾ ಅಕ್ಟಿವ್ ಆಸ್ ಲ್ಲಿ ಮ್ಹಳ್ಯಾರ್ ಹಿ ಜೀಬ್ ಮಾತ್ರ್. ತಿಚ್ ಕಾತರ್ಲ್ಯಾ ಮಾತ್ರ್ ನ್ಹಯ್ ಕಾತರ್ನ್ ಕುಡ್ಕೊ ವ್ಹೆಲಾ ಮ್ಹಳ್ಯಾರ್? ಮಾನೆಸ್ತಾಚ್ಯಾ ಭಿತರ್ ವೀಕ್ ಭರೊನ್ ವೆತಾಲೆಂ ತರ್ ಯೀ ಖೊಂಚಾಂವ್ಕ್ ಜೀಬ್ ಚ್ ನಾತ್ಲಿ! ಬಿರ್ಮತ್. ಕಶೆಂಯ್ ಆಸ್ಪತ್ರೆಕ್ ವ್ಹೆಲೆಂ ಮ್ಹಣ್ಯಾಂ. ತೆವ್ಶಿಲ್ಯಾನ್ ಪೊಲಿಸಾಂಕ್ ಯೀ ದೂರ್ ದಿಲೆಂ.

ತಿತ್ಲ್ಯಾರ್ ಖಬರ್ ಕಳೋನ್ ಉಡ್ಲೊಂಗೀ ಪಡ್ಲೊಂಗೀ ಮ್ಹಣ್ ಆಸ್ಪತ್ರೆಕ್ ಧಾಂವೊನ್ ಆಯಿಲ್ಲೊ ತಾಚೊ ಎಸಿಸ್ಟೆಂಟ್, ವೆದಿರ್ ಭಾಶಣ್ ಕರ್ತಾನಾ ವೆದಿಚ್ ಕೊಸ್ಳೊನ್ ಪಡ್ ಲ್ಲೆಬರಿ ಪಾಂಯಾಂಮುಳಾ ಕೊಸ್ಳೊನ್ ಪಡ್ಲೊ. ಆಪ್ಲ್ಯಾ ಧನಿಯಾಚಿ ಜೀಬ್ ಚ್ ಕಾತರ್ನ್ ವ್ಹೆಲ್ಯಾ ಮ್ಹಳ್ಯಾರ್? ಜೀಬ್ ನಾತ್ಲ್ಯಾ ಧನಿಯಾಕ್ ಚಿಂತುಂಕ್ ಯೀ ಸಾಧ್ಯ್ ಜಾಲೆಂ ನಾ ತಾಚ್ಯಾನ್. ಕೆದಿಂ ಕೆದಿಂ ವ್ಹಡ್ ಭಾಶಣಾಂ ದಿಲ್ಲಿಂ ಆಸಾತ್ ತಾಣೆಂ ವೆದಿರ್ ರಾವೊನ್! ತಾಚೆಂ ಭಾಶಣ್ ಮ್ಹಳ್ಯಾರ್ ಮೈಕ್ ಸೆಟ್ಟಾಚ್ಯಾಂನಿ ಸೌಂಡ್ ಬೋಕ್ಸ್ ರಾಜು ವಾಪಾರ್ನ್ ಬಾಂದಿಜೆ ಪಡ್ತಾಲೆ. ತ್ಯಾ ನಮ್ಣೆರ್ ಕಾಂಪ್ತಾಲೆ ತೆ. ಲೊಕಾಚ್ಯಾ ತಾಳಿಯಾಂಚೊ ಆವಾಜ್ ಮಯ್ಲಾಪಯ್ಸ್ ಆಯ್ಕಾತಾಲೊ. ತೊ ತಲ್ಲೀನ್ ಜಾವ್ನ್ ಭಾಶಣ್ ಕರ್ತಾನಾ ತಾಚೆಮುಕಾರ್ ರಾವ್ ಲ್ಲ್ಯಾಂಕ್ ನಯಾಗರಾ ಫಾಲ್ಸಾಮುಕಾರ್ ಶೆಳೆರಾಕ್ ರಾವ್ ಲ್ಲೊ ಅನ್ಭೋಗ್ ಜಾತಾಲೊ… ತ್ಯಾ ನಮ್ಣೆರ್ ಥಿಂಪಿ ಉಸಳ್ತಾಲಿ ತಾಚಿ! ಹ್ಯಾ ವರ್ಸಾ ಇಲೆಕ್ಶನಾಚಿ ಟಿಕೆಟ್ ಖಂಡಿತ್ ತಾಕಾಚ್ ಮೆಳ್ತಿ ಆಸ್ ಲ್ಲಿ. ಇತ್ಲ್ಯಾರ್ ಖಂಯ್ಚ್ಯಾ ಹಡ್ಬ್ಯಾಂನಿ ಜೀಬ್ ಕಾತರ್ನ್ ವ್ಹೆಲಿ! ಫುಡಾರಿ ಜಾಂವ್ಕ್ ಚಿಂತ್ ಲ್ಲ್ಯಾ ಧನಿಯಾಚೊ ಫುಡಾರ್ ಕಸೊಲೊ, ಆಪ್ಣಾಚೊ ಫುಡಾರ್ ಕಸೊಲೊ?

ಅಸಿಸ್ಟೆಂಟಾಕ್ ಅಶೆಂ ಭೊಗುನ್ ಧರ್ಣಿಕ್ ಗಳೊಂಕ್ ಕಾರಣ್ ಜರೂರ್ ಆಸ್ ಲ್ಲೆಂ. ಕಿತ್ಯಾಕ್ ಮ್ಹಳ್ಯಾರ್ ಧನಿಯಾಕ್ ವೆದಿರ್ ಭಾಶಣ್ ಕರುಂಕ್ ಮಾತ್ರ್ ಕಳಿತ್, ತೆಂ ಭಾಶಣ್ ಬರವ್ನ್ ದಿಂವ್ಚೆಂ ಹ್ಯಾಚ್ ಎಸಿಸ್ಟೆಂಟಾನ್. ಅಶೆಂ ಭಾಶಣ್ ಬರವ್ನ್ ದೀಂವ್ಕ್ ಮ್ಹಣ್ ಚ್ ಧನಿಯಾನ್ ಹಾಕಾ ಕಾಮಾಕ್ ದವರ್ ಲ್ಲೆಂ. ಆನಿ ಆತಾಂ ಧನಿಚ್ ಅಸೊ ಜೀಬ್ ಹಿಗ್ಡಾವ್ನ್ ’ಜೀಬ್ ಲೆಸ್’ ಜಾಲ್ಯಾರ್ ಆಪುಣ್ ’ಜೋಬ್ ಲೆಸ್ಸ್’ ನ್ಹಯ್ ಗಿ ಮ್ಹಳ್ಳಿ ಖಂತ್!

ಧನಿಯಾಚೆರ್ ಏಕ್ ದೀಶ್ಟ್ ಘಾಲಿ ತಾಣೆಂ. ತೊ ಬಾವ್ಡೊ – ತೊಂಡಾಕ್ ಧವೆಂ ಬ್ಯಾಂಡೇಜ್ ಘಾಲ್ನ್ ಹಿಮಕರಡಿ ಬರಿ ದಿಸ್ತಾಲೊ. ನ್ಹಯ್ ಅಶೆಂ ಜೀಬ್ ಕಾತ್ರುಂಕ್ ಕೊಣಾಕ್ ಮನ್ ಯೇತ್? ಕಾತರ್ಲಿಚ್ ಮ್ಹಣ್ಯಾಂ ತಿ ವ್ಹರಿಜೆ ಗೀ? ಕಿತೆಂ ತಾಚಿ ಪೋಡಿ ಕರ್ನ್ ಚಾಯೆತೊಂಡಾಕ್ ಖಾಂವ್ಕ್ ಗಿ. ತಶೆಂಯ್ ಕಾಂಯ್ ಪೋಡಿ ಕರುಂಕ್ ಮ್ಹಣ್ ಚಣ್ಯಾಪಿಟಾಂತ್ ಲೊಳವ್ನ್ ತೆಲಾಂತ್ ಸೊಡ್ಲ್ಯಾರ್, ತಿ ಜೀಬ್ ಹುಳ್ವುಳೊನ್ ಸಗ್ಳ್ಯಾ ಗಾಂವಾಕ್ ಚ್ ಖತ್ಕತ್ಯಾ ತೆಲಾಂತ್ ನ್ಹಾಣಯ್ತ್! ತಿತ್ಲಿ ಹುಳ್ವುಳ್ಚಿ ಜೀಬ್ ತಿ!

ತಿತ್ಲ್ಯಾರ್ ಪೊಲಿಸ್ ಆಯ್ಲೆ. ತಾಚೆಪಾಟ್ಲ್ಯಾನ್ ಚೇಲಾಯ್ ಆಯ್ಲೊ. “ತುಮ್ಕಾಂ ಕೊಣಾಚೆರೀ ಕಾಂಯ್ ದುಬಾವ್ ಆಸಾಗೀ?” ಮ್ಹಣ್ ವಿಚಾರ್ಲೆಂ. ಚೇಲಾನ್ ಜಾಪ್ ದಿಲಿ – “ಕೊಣಾಚೆರ್ ದುಬಾವ್ ಕರ್ಚೊ ಸರ್. ಎಕ್ಲ್ಯಾಚೆರ್ ದುಬಾವ್ ಆಸಾ. ಆದ್ಲೆಪಾವ್ಟೀಂ ಎಕಾ ಸಾಹಿತಿಕ್ ಫುಂಕ್ಶನಾವೆಳಾರ್ ಮುಖೆಲ್ ಸಯ್ರೊ ಜಾವ್ನ್ ಧನಿಯಾಕ್ ಎಕಾ ಕಾರ್ಯಾಕ್ ಆಪಯಿಲ್ಲೆಂ. ಆಮ್ಚೊ ಧನಿ ವೀರಾವೆಸಾಂತ್ ಭಾಶಣ್ ಕರ್ತಾನಾ ಸಗ್ಳೊ ಲೋಕ್ ತಾಳಿಯೊ ಪೆಟ್ಲ್ಯಾರೀ ಎಕ್ಲೊ ಮಾತ್ರ್ ಮುಕ್ಲ್ಯಾನ್ ಬಸ್ ಲ್ಲೊ ತಾಳಿಯೊಚ್ ಪೆಟಿನಾತ್ಲೊ. ಮ್ಹಾಕಾ ರಾಗ್ ಆಯ್ಲೊ. ಧನಿ ತಿತ್ಲ್ಯಾ ಫೊರ್ಸಾನ್ ಭಾಶಣ್ ಕರ್ತಾನಾ ತೊ ಮನಿಸ್ ತಾಳಿಯೊಚ್ ಪೆಟಿನಾ ಮ್ಹಣ್ತಾಂ. ಹಾಂವ್ ತಡ್ವನಾಸ್ತಾಂ ವೆದಿ ಸಕಯ್ಲ್ ದೆಂವೊನ್ ತಾಚೆಂ ಕೊಲರ್ ಧರ್ನ್ ಉಕಲ್ಲೆಂಚ್. ತೆನ್ನಾಚ್ ಕಳಿತ್ ಸರ್ ತಾಕಾ ಏಕ್ ಹಾತ್ ನಾತ್ಲೊ ಮ್ಹಣ್. ತ್ಯಾ ವಿಶಿಂ ಥಂಯ್ ವ್ಹಡ್ಲೊ ಗಲಾಟೊ ಜಾಲ್ಲೊ. ಎಕ್ಲ್ಯಾನ್ ಮುಕಾರ್ ಯೇವ್ನ್ ಧಮ್ಕಿ ದಿಲ್ಲಿ- ’ತುಜ್ಯಾ ಧನಿಯಾಚಿ ಜೀಬ್ ಖೊರ್ಜುತಾ ತರ್ ಫಾತ್ರಾಕ್ ಘಶ್ಟುಂಕ್ ಸಾಂಗ್. ಹಾಂಗಾ ಯೇವ್ನ್ ಕಾಲೆಂ ವೊಂಕ್ಚೆಂ?” ದೋಗ್ ತೇಗ್ ಸಾಹಿತಿಂನಿ ಆಮ್ಚೆವಿರೋಧ್ ಪ್ರತಿಭಟನ್ ಕೆಲ್ಲೆಂ. ಮ್ಹಾಕಾ ತಾಂಚೆರ್ ಚ್ ದುಬಾವ್ ಸರ್”. ಪೊಲಿಸಾಂನಿ ಥೊಡೆಂ ಬರವ್ನ್ ಘೆತ್ಲೆಂ. ಗರ್ಜ್ ಪಡ್ಲ್ಯಾರ್ ಪರತ್ ಯೆತಾಂ ಮ್ಹಣ್ತಾನಾ ಚೇಲಾ ಹಳೂ ಧಾಂವೊನ್ ವಚೊನ್ ಪೊಲಿಸಾಲಾಗಿಂ ವಿಚಾರ್ಲೆಂ- “ಸರ್ ತುಮಿ ತ್ಯಾ ಜೀಬ್ ವ್ಹರ್ನ್ ಗೆಲ್ಲ್ಯಾ ಚೊರಾಂಕ್ ಧರುಂಕ್ ಪೊಲಿಸ್ ಪೆಟ್ಯಾಂಕ್ ವಾಪಾರ್ನಾಂತ್ ಗಿ?”

“ಗರ್ಜ್ ಪಡ್ಲ್ಯಾರ್ ತಾಂಕಾಂಯ್ ವಾಪಾರ್ತಾಂವ್. ಕಿತ್ಯಾಕ್?”

“ನ್ಹಯ್ ಸರ್. ಏಕ್ ರಿಕ್ವೆಸ್ಟ್, ಪೊಲಿಸ್ ಪೆಟ್ಯಾಂಕ್ ವಾಪಾರುನ್ ಸೊಧ್ತಾನಾ ಎಕಾ ವೆಳಾ ಮ್ಹಜ್ಯಾ ಧನಿಯಾಚಿ ಜೀಬ್ ದಿಸ್ಲಿ ತರ್, ತ್ಯಾ ಪೆಟ್ಲ್ಯಾಂನಿ ಲೆಂವನಾಶೆಂ ಚತ್ರಾಯ್ ಕರಾ ಸರ್ ಪ್ಲೀಜ್” ಮ್ಹಣ್ ಗಳ್ಗಳ್ಯಾಂ ರಡ್ಲೊಚ್. ಪೊಲಿಸಾಂಕ್ ಹಾಸ್ಚೆಂ ಗೀ ರಡ್ಚೆಂಗೀ ಕಳನಾಸ್ತಾನಾ ಥಂಯ್ ಥಾವ್ನ್ ನಿಕಳ್ಳೆ! ತಾಂಚೆಪಾಟ್ಲ್ಯಾನ್ ಚೇಲಾಯ್ ಗೆಲೊ. ತಾಕಾ ಖಾಕಿ ಆನಿ ಕಾದಿ ನ್ಹೆಸ್ ಲ್ಲ್ಯಾಂಚೊ ಪಾಟ್ಲಾವ್ ಕರ್ನ್ ಚ್ ಸವಯ್. ದೆಕುನ್ ತಾಕಾ ಧನಿಯಾಚಿ ಶಿಮ್ಟಿ ಮ್ಹಣ್ತಾಲೆ.

ಹೆವ್ಶಿಲ್ಯನ್ ಎಸಿಸ್ಟೆಂಟಾಕ್ ಆಪ್ಲ್ಯಾ ಧನಿಯಾಚೆಂ ಮಾವ್ನ್ ಪಣ್ ಚ್ ಸೊಸಾನಾ ಜಾಲೆಂ. ನಿದೆಂತ್ ಯೀ ವೊಗೊ ನಿದ್ ಲ್ಲೊ ಮನಿಸ್ ನ್ಹಯ್ ತೊ. ಕಿತ್ಲೊ ಬರೊ ಭಾಶಣ್ ಗಾರ್. ಆಪ್ಣೆಂ ಬರವ್ನ್ ದಿಲ್ಲೆಂ ಫುಲ್ ಸ್ಟೋಪ್, ಕೊಮಾ ಸಯ್ತ್ ಯೀ ಸೊಡಿನಾಸ್ತಾನಾ ವಾಚುನ್ ಸಾಂಗ್ತಾಲೊ. ಬಿರ್ಮತ್ ಆಜ್ ತಾಚ್ಯಾ ಉಲವ್ಣ್ಯಾಕ್ ಚ್ ಫುಲ್ ಸ್ಟೋಪ್ ಪಡೊನ್ ತೊ ಕೋಮಾಕ್ ಗೆಲ್ಲೆಬರಿ ನಿದ್ಲಾ ನೆ. ಬಿರ್ಮತ್ ದಿಸ್ಲಿ ಆಪ್ಲ್ಯಾ ಧನಿಯಾಚೆರ್. ತಾಚಿ ಉಬ್ಗೊಣ್ ಪಯ್ಸ್ ಕರುಂಕ್. ರೇಡಿಯೋ ಚಾಲು ಕೆಲೊ.. ತಾಂತುಂ ಪದ್ ವಾಜ್ತಾಲೆಂ “ಅಜೀಬ್ ದಾಸ್ತಾನ್ ಹೆ…”. ಧನಿ ರಾಗಾನ್ ಕಡ್ಕಡ್ಲೊ, ಎಕ್ ಚ್ ಏಕ್ ಖೊಟ್, ರೇಡಿಯೋ ಔಟ್! ಉಪ್ರಾಂತ್ ಅಸಿಸ್ಟೆಂಟಾನ್ ಥಂಯ್ಚ್ ಆಸ್ಲೊ ಏಕ್ ಕವಿತಾ ಜಮೊ ಉಗ್ತೊ ಕೆಲೊ… ತೊ ಧನಿಯಾನ್ ಚ್ ಉಗ್ತಾವಣ್ ಕೆಲ್ಲೊ. ತಾಂತ್ಲಿ ಏಕ್ ಕವಿತಾ ವಾಚುಂಕ್ ಸುರ್ವಾತ್ಲಿ ಎಸಿಸ್ಟೆಂಟಾನ್ –

“ಪೆನ್ನಾಕ್ ಏಕ್ ನಿಬ್ಬ್
ಮನ್ಶ್ಯಾಕ್ ಏಕ್ ಜೀಬ್
ನಿಬ್ಬ್ ಮೊಡ್ಲ್ಯಾರ್ ತೀಂತ್ ವೇಸ್ಟ್
ಜೀಬ್ ಪಡ್ಲ್ಯಾರ್ ಉಲವ್ಕ್ ಕಶ್ಟ್“

ಧನಿಯಾಕ್ ರಾಗಾನ್ ಸಂಕಡ್. ಬೂಕ್ ಪಿಂಜುನ್ ಉಡಯ್ಲೊ ತೆವ್ಶಿನ್!

ಎಸಿಸ್ಟೆಂಟಾಕ್ ತಕ್ಲಿ ಪಾಡ್ ಜಾಲಿ.. ಧನಿಯಾಕ್ ಆತಾಂ ಜೀಬ್ ನಾತ್ ಲ್ಲ್ಯಾನ್ ತಾಣೆಂ ಹಾತ್ ಪಾಂಯಾನ್ ಉಲಂವ್ಕ್ ಸುರು ಕೆಲಾಂ. ಕಶೆಂ ಪುಣಿ ತಾಚಿ ಜೀಬ್ ಸಾರ್ಕಿ ಕರಿಜೆ ಮ್ಹಣ್ ಚಿಂತಾನಾ ದಾಕ್ತೆರ್ ಭಿತರ್ ರಿಗ್ಲೊಚ್. “ದಾಕ್ತೆರಾಬಾ, ತ್ಯಾ ಅನ್ನಾಡಿಂನಿ ಜೀಬ್ ಲುಂವ್ತಾನಾ, ಖಂಯ್ಚ್ಯಾ ಮಾತಿ ಖೆಲ್ಲ್ಯಾ ಕೊಯ್ತೆನ್ ಲುಂವ್ಲ್ಯಾ ಗಿ ಕೋಣ್ ಜಾಣಾಂ.. ನಂಜಿ ಜಾಯ್ನಾಶೆಂ ಇಂಜೆಕ್ಶನ್ ದಿಲಾಂ ಮು?”. ದಾಕ್ತೆರಾನ್ ರಾಗಾನ್ ಜಾಪ್ ದಿಲಿ- “ನಂಜಿ ಜಾಲ್ಯಾರ್ ಕಾಂಯ್ ವ್ಹಡ್ ನಾ. ತೊಂಡಾಕ್ ಬ್ಯಾಂಡೇಜ್ ಘಾಲಾಂ. ಹೆರಾಂಕ್ ಚಾಬ್ಚೊ ನಾ!”.

ತಪಾಸುನ್ ಆಸ್ತಾನಾಂಚ್ ಎಸಿಸ್ಟೆಂಟಾನ್ ಪರತ್ ವಿಚಾರ್ಲೆಂ- “ಸರ್ ಆಮ್ಚ್ಯಾ ಧನಿಯಾಕ್ ದುಸ್ರ್ಯಾಂಚಿ ಜೀಬ್ ’ಕಸಿ’ ಕರುಂಕ್ ಜಾಯ್ನಾಯೆ?”

ದಾಕ್ತೆರಾನ್ ತಾಚ್ಯಾ ತೊಂಡಾಕ್ ಚ್ ಪಳಯ್ಲೆಂ. “ಕರ್ಯೆತ್ ಪುಣ್, ಜೀಬ್ ದಿಂವ್ಚೊ ಕೋಣ್ ಆಸಾ?” ಮ್ಹಣ್ ದಾಕ್ತೆರ್ ಕಸಲಿಂಗೀ ವೊಕ್ತಾಂ ಬರವ್ನ್ ದೀವ್ನ್ ಗೆಲೊ.

ಎಸಿಸ್ಟೆಂಟಾಕ್ ನವೊ ಜೀವ್ ಆಯಿಲ್ಲೆಬರಿ ಭೊಗುನ್. “ಧನಿಯಾ ತುಂ ಕಾಂಯ್ ಭಿಯೆನಾಕಾ. ಜೀಬ್ ಹಾಂವ್ ರೆಡಿ ಕರ್ತಾಂ ತುಮ್ಕಾಂ. ಆಮ್ಚ್ಯಾಂತ್ ಎಕ್ಲೊ ಸಾಹಿತಿ ಆಸಾ ನೆ. ತೊ ಸಂಸಾರ್ ವೊಮ್ತೊ ಉದಾರೊ ಜಾಲ್ಯಾರೀ ಉಲಯ್ನಾ. ತಸಲ್ಯಾಕ್ ಜೀಬ್ ಕಿತ್ಯಾಕ್. ತುಮಿ ಆದ್ಲೆಪಾವ್ಟಿಂ ಇಂಫ್ಲುಯೆನ್ಸ್ ಕರ್ನ್ ಪ್ರಶಸ್ತಿಯ್ ದಿವಯಿಲ್ಲಿ ತಾಕಾ. ತುಮ್ಚೆರ್ ಮಸ್ತು ಅಬಿಮಾನ್ ಆಸಾ ತಾಕಾ. ತೊ ಜಾಯ್ ತರ್ ಜೀಬ್ ಮಾತ್ರ್ ನ್ಹಯ್ ಜೀವ್ ಯೀ ದೀಂವ್ಕ್ ಆಸಾ. ಹಾಂವ್ ತಾಕಾ ಸಮ್ಜವ್ನ್ ಯೆತಾಂ” ಮ್ಹಣ್ ಚಲ್ತಚ್ ರಾವ್ಲೊ.

ಸಾಹಿತಿಚ್ಯಾ ಘರಾ ಪಾವೊನ್ ಪರಿಸ್ಥಿತಿ ವರ್ಣಿಲಿ ಎಸಿಸ್ಟೆಂಟಾನ್. ಸಾಹಿತಿಕ್ ಗಜಾಲ್ ಆಯ್ಕೊನ್ ಶೊಕ್! “ನ್ಹಯ್ ಸಾಯ್ಬಾಂನೊ ಭಾಶಾಣಾಚೆಂ ಕಾಗತ್ ಭಾಯ್ರ್ ಪಡ್ಚೆಂ ಪಳಯ್ಲಾಂ, ಹೆಂ ಭಾಶಣ್ ಕರಿಜೆ ಜಾಲ್ಲಿ ಜೀಬ್ ಚ್ ಭಾಯ್ರ್ ಪಡ್ಚಿ ಮ್ಹಳ್ಯಾರ್!” ಸಾಹಿತಿಚೊ ಉದ್ಗಾರ್. ಎಸಿಸ್ಟೆಂಟ್ ಸವ್ಕಾಸ್ ವಿಶಯಾಕ್ ಆಯ್ಲೊ.

“ತುಮಿ ಬರಂವ್ಚ್ಯಾಂತ್ ಮುಕಾರ್. ಉಲಂವ್ಚ್ಯಾಂತ್ ಪಾಟಿಂ. ತುಮಿ ಮನ್ ಕೆಲ್ಯಾರ್ ಆಮ್ಚ್ಯಾ ಧನಿಯಾನ್ ಉಲಯ್ಶೆಂ ಕರ್ಯೆತ್. ಕಶಿಯ್ ತುಮ್ಕಾಂ ಜೀಬ್ ಉಪ್ಕಾರಾನಾ. ತುಮಿ ತುಮ್ಚಿ ಜೀಬ್ ದಾನ್ ದಿಲ್ಯಾರ್ ಜಿಣಿಭರ್ ತುಮ್ಚ್ಯಾ ಪೆನ್ನಾಚೊ, ಕಾಗ್ದಾಂಚೊ, ಬೂಕ್ ಪರ್ಗಟ್ ಕರ್ಚೊ ಖರ್ಚ್ ಆಮಿ ಪಳಯ್ತಾಂವ್. ಸ್ಪೋನ್ಸರಾಖಾತಿರ್ ಕೊಣಾಕೊಣಾಚೆ ಪಾಂಯ್ ಧರ್ಚೆ ಚುಕ್ತಾತ್”

 ಹೆಂ ಆಯ್ಕಲ್ಲೆಂಚ್ ಸಾಹಿತಿಚೊ ರಾಗ್ ತಳ್ಮಟ್ಯಾಕ್ ಚಡ್ಲೊ!

“ಕಿತೆಂ ಉಲಯ್ತಾತ್. ಜೀಬ್ ಉಲಂವ್ಕ್ ಮಾತ್ರ್ ಉಪ್ಕಾರ್ತಾ ಮ್ಹಣ್ ತುಕಾ ಕೊಣೆಂ ಸಾಂಗ್ಲೆಂ ಯಾ?. ಜೀಬ್ ಮ್ಹಜ್ಯಾ ಬಾಯ್ಲೆಚ್ಯಾ ರಾಂದ್ಪಾಚಿ ರೂಚ್ ಪಳಂವ್ಕ್ ಯೀ ಜಾಯ್. ದಾಂತಾಮದೆಂ ಮಾಸಾಕಿಸರ್ ಶಿರ್ಕಲ್ಯಾರ್ ಕಾಡುಂಕ್ ಯೀ ಜಾಯ್. ಕಿತ್ಯಾಕ್ ಲೇಖನಾಂ ಬರವ್ನ್ ಪೋಸ್ಟ್ ಕರ್ತಾನಾ ಸ್ಟೇಂಪ್ ಚಿಡ್ಕಾಂವ್ಕ್ ಯೀ ಜೀಬ್ ಜಾಯ್. ಉಲಯ್ನಾ ಜಾಂವ್ಕ್ ಪುರೊ ಹಾಂವ್. ಪುಣ್ ಮ್ಹಜ್ಯಾ ಜಿಬೆನ್ ಕಾಮಾಂ ಮಸ್ತುಂ ಜಾತಾತ್. ಮ್ಹಜ್ಯಾ ಜಿಬೆಕ್ ಬೋಟ್ ಲಾಂವ್ಕ್ ಯೇನಾಕಾ ತುಂ. ಕಳ್ಳೆಂ ಮು!”. ಸಾಹಿತಿಚಿಂ ಉತ್ರಾಂ ಆಯ್ಕೊನ್ ಎಸಿಸ್ಟೆಂಟ್ ಅಕ್ಮನಾನ್ ದಾರಾಭಾಯ್ರ್ ಪಡ್ತಾನಾ ಘುಡಾಂತ್ಲೊ ವ್ಹಡ್ ಸಯ್ತ್ ಪೆಟೊ, ಏಕ್ ಕೋಲ್ ಜೀಬ್ ಭಾಯ್ರ್ ಘಾಲ್ನ್ ಭೊಂಕ್ತಾಲೊ. ಹೊಯ್ ಬೋವ್ಶ್ಯಾ ಸಾಹಿತಿ ಉಲಯ್ತಾನಾ ಮಾತ್ರ್ ಭೊಂಕ್ತಾ ಜಾಯ್ಜೆ ಚಿಂತ್ಲೆಂ ತಾಣೆಂ. ಹ್ಯಾ ಸುಣ್ಯಾಚಿ ಜೀಬ್ ಪುಣ್ ಯೀ ವಿಚಾರ್ಯಾಂ ಮ್ಹಣ್ ಭೊಗ್ಲೆಂ ತರ್ ಯೀ ಸಾಹಿತಿ ಕಾಂಯ್ “ಸುಣ್ಯಾಚಿ ಜೀಬ್ ದಿಲ್ಯಾರ್ ಆಮ್ಗೆರ್ ಯೇವ್ನ್ ಕೋಣ್ ತುಜೊ ಧನಿ ಭೊಂಕ್ತಾ ಗೀ” ಮ್ಹಣ್ ವಿಚಾರಿತ್ ಮ್ಹಳ್ಳ್ಯಾ ಭಿಯಾನ್ ತೊ ಥಂಯ್ಚೊ ನಿಕಳ್ಳೊ.

ಆಸ್ಪತ್ರೆಕ್ ಪಾವ್ತಾನಾ ಆನ್ಯೆಕ್ಲೊ ಮನಿಸ್ ಧನಿಯಾಚಿ ಭೆಟ್ ಕರುಂಕ್ ಆಯಿಲ್ಲೊ. ಹೊ ನಾಂವಾಡ್ದಿಕ್ ಪತ್ರ್ ಕಾರ್. ಹಾಣೆಂ ನಾಂವ್ ಕೆಲ್ಲೆಂಚ್ ಧನಿಯಾಚಿ ಇಂಟರ್ ವೀವ್ ಫಾಯ್ಸ್ ಕರುನ್. ಆನಿ ಹ್ಯಾ ಪತ್ರಾಚೊ ವಿಶೇಸ್ ಅಂಕೊ ಧನಿಯಾನ್ ಚ್ ಮೊಕ್ಳಿಕ್ ಕೆಲ್ಲೊ. ತವಳ್ ಧನಿಯಾನ್ ಕೆಲ್ಲೆಂ ಭಾಶಣ್ ಅದ್ಭುತ್! ಹೆಂ ಭಾಶಣ್ ಅಂತರ್ಜಾಳಿರ್ ವರ್ದೆಂತ್ ಆಸಾತಶೆಂಚ್ ಫಾಯ್ಸ್ ಜಾಲ್ಲೆಂ:”ತುಜೆಂ ಪತ್ರ್ ಸಮಾಜೆಚಿ ಜೀಬ್. ತೆಂ ಸಮಾಜೆಖಾತಿರ್ ಉಲಯ್ತಾ, ಗರ್ಜ್ ಪಡ್ಲ್ಯಾರ್ ಪುಗಾರ್ತಾ, ಚೂಕ್ ದಿಸ್ಲ್ಯಾರ್ ಗಾಳಿ ಯೆಟ್ತಾ”

“ಗರ್ಜ್ ಪಡ್ಲ್ಯಾರ್ ಲೆಂವೊಂಕ್ ಯೀ ಲೆಂವ್ತಾ” ಅಶೆಂ ಕೊಣೆಂಗೀ ಅನ್ನಡ್ಯಾನ್ ಕಮೆಂಟ್ ಘಾಲ್ಲೊ ತರೀ ಉಪ್ರಾಂತ್ ಇಂಫ್ಲುಯೆನ್ಸ್ ವಾಪಾರ್ನ್ ತೊ ಕಾಡಯಿಲ್ಲೊ. ಅಸಲೊ ಹೊ ಪತ್ರ್ ಕಾರ್ ಖಂಡಿತ್ ಧನಿಯಾಕ್ ಜೀಬ್ ದಿತೊಲೊಚ್ ಮ್ಹಣ್ ಚಿಂತುನ್ ವಿಚಾರ್ಲೆಂಚ್ ಎಸಿಸ್ಟೆಂಟಾನ್. ತೊಂಡಾರ್ ಖಂಯ್ ನಾತ್ಲೆಂ ಖಾಲ್ತೆಪಣ್ ಹಾಡುನ್ ಪತ್ರ್ ಕಾರ್ ಮ್ಹಣಾಲೊ- “ಆಸ್ ಲ್ಲಿ ಏಕ್ ಜೀಬ್ ತುಮ್ಕಾಂ ದಿಲ್ಯಾರ್ ಹಾಂವೆಂ ಮ್ಹಜ್ಯಾ ಪೊಟಾಕ್ ಕಾಲೆಂ ಕರ್ಚೆಂ ಸರ್. ಜಾಯ್ ತರ್ ದುಸ್ರೆಂ ಕಿತೆಂಯ್ ವಿಚಾರಾ. ಕಿಡ್ಣಿ, ಲಿವರ್, ಕಾಳಿಜ್ ಮೆಂದು.. ಹಾಂವ್ ದಿತಾಂ. ಪುಣ್ ಮ್ಹಾಜ್ಯಾ ವೃತ್ತೆಕ್ ಜೀಬ್ ನಾಸ್ತಾನಾ ಜಾಯ್ನಾ. ಪ್ಲೀಜ್ ಬೆಜಾರ್ ಕರಿನಾಕಾತ್”. ಮ್ಹಣ್ ಪತ್ರ್ ಕಾರ್ ಆನಿ ಕೊಣಾಚಿಗೀ ಇಂಟರ್ ವೀವ್ ಕರುಂಕ್ ಗೆಲೊ.

ಪೂರಾ ಜಾಲ್ಲೆಂ ಹ್ಯಾ ಪತ್ರ್ ಕಾರಾಚ್ಯಾ ಧರ್ಮಾನ್. ಹಾಕಾ ಇಂಟರ್ ವ್ಯೂವ್ ದಿಲ್ಯಾ ಉಪ್ರಾಂತ್ ನಶೀಬ್ ಚ್ ಸಮಾ ನಾ. ಎಕ್ಕಾಡೆ ಭಾಶಣ್ ಕರ್ತಾನಾ ಮ್ಹೊಂವಾಚೆ ಮೂಸ್ ಧಾಂವ್ಡಾವ್ನ್ ಆಯ್ಲೆ. ಆನ್ಯೇಕ್ಕಾಡೆ ಕುಂಡೆಲ್ ಚಾಬ್ಲೆ. ಆತಾಂ ಜೀಬ್ ಚ್ ಗೆಲ್ಯಾ. ಧನಿ ಮನಾಂತ್ ಚ್ ಚಿಂತಿಲಾಗ್ಲೊ.

ಅಸಿಸ್ಟೆಂಟಾಚ್ಯಾ ಮನಾಂತ್ ಮಾತ್ರ್ ಸಾಹಿತಿಚ್ಯಾ ಸುಣ್ಯಾಚಿ ಏಕ್ ಕೋಲ್ ಜೀಬ್ ಚ್ ಖೆಳ್ತಾಲಿ. ದಾಕ್ತೆರ್ ಆಯಿಲ್ಲೊಚ್ ವಿಚಾರ್ನ್ ಸೊಡ್ಲೆಂ- “ದಾಕ್ತೆರಾಬಾ.. ಆಮ್ಚ್ಯಾ ಧನಿಯಾಕ್ ಮನ್ಶ್ಯಾಚಿಚ್ ಜೀಬ್ ಜಾಯ್ಜೆ ಗೀ.. ಮನ್ಜಾತಿಚಿ ಹಾಡ್ಲ್ಯಾರ್ ತಿ ಬಸವ್ಯೆತ್ ಗೀ?” ಅಸಿಸ್ಟೆಂಟಾಂಚೆಂ ಸವಾಲ್ ಸಂಪ್ಚೆಫುಡೆಚ್ ಧನಿಯಾಚೊ ಮಾರ್ ತಾಚ್ಯಾ ಕಾನ್ಪಾಟ್ಯಾಕ್ ದಡಾಲ್ಲ್ ಕರ್ನ್ ಆಪ್ಟಾಲೊ. ತೊಂಡಾಂತ್ಲ್ಯಾನ್ ರಗತ್ ಪಾಜ್ರೊಂಕ್ ಸುರು ಜಾಲೆಂ. ಧನಿಯಾಕ್ ಸಮಾದಾನ್ ಕೆಲ್ಲ್ಯಾ ದಾಕ್ತೆರಾನ್ ಮ್ಹಳೆಂ “ಆಳೆ ಮಾನೆಸ್ತಾಂನೊ. ಮನ್ಶ್ಯಾಕ್ ಮುಖ್ಯ್ ಜೀಬ್ ನ್ಹಯ್ ಸಮ್ಜಣಿ. ಜೀಬ್ ಆಸಾ ಮ್ಹಣ್ ವಾರ‍್ಯಾರ್ ಸೊಡ್ಚಿ ನ್ಹಯ್. ಎಕಾ ಫುಡಾರ‍್ಯಾಕ್ ಜಾಂವ್ ಸಾಹಿತಿಕ್ ಜಾಂವ್ ಉತರ್ ಚ್ ಹಾತೆರ್. ಜೀಬ್ ನ್ಹಯ್. ಆನಿ ಉತ್ರಾಂ ಭಾಯ್ರ್ ಪಡೊಂಕ್ ಹೆರ್ ವಾಟೊ ಆಸಾತ್. ತಾಂತ್ಲ್ಯಾ ತಾಂತುಂಯ್ ಫುಡಾರ‍್ಯಾಂನಿ ಕರ್ಣೆಂನಿ ಉಲಯ್ಜೆ ಶಿವಾಯ್ ಭಾಶಣಾಂನಿ ನ್ಹಯ್” ಮ್ಹಣೊನ್ ದಾಕ್ತೆರ್ ಚಲ್ತಚ್ ರಾವ್ಲೊ.

ಎಸಿಸ್ಟೆಂಟ್ ಮಾತ್ರ್ ಧನಿಯಾಚ್ಯಾ ಮಾರಾಕ್ ಉಸ್ಳಲ್ಲೆ ಆಪ್ಲೆ ದೋನ್ ದಾಂತ್ ಖಂಯ್ ಪಡ್ಲೆಗಾಯ್ ಮ್ಹಣ್ ಸೊಧುನ್ ಆಸ್ಲೊ.

►  ವಿಲ್ಸನ್ ಕಟೀಲ್

]]> https://kittall.in/2215/feed/ 0 https://kittall.in/5390/ https://kittall.in/5390/#respond Tue, 01 Mar 2016 11:55:25 +0000 http://kittall.online/?p=5390 ಎಕಾ ಕೊಂಕ್ಣಿ ಫಿಲ್ಮಾಚೆಂ ಮುಹೂರ್ತ್ ಕಾರ್ಯೆಂ ತೆಂ. ಆಮ್ಚ್ಯಾ ಭೊಂವ್ತಿಂಚ್ಯಾ ಭಾಶೆಂನಿ ಕಿತ್ಲಿಂ ಫಿಲ್ಮಾಂ ಯೆತಾತ್ ಪಳೆಯಾ…ಫಿಲ್ಮ್ ಪಳಂವ್ಕ್ ಥಿಯೇಟರಾಭಾಯ್ರ್ ಲೋಕ್ ಕ್ಯೂ ರಾವ್ತಾ ಗೀ ಕಳಿತ್ ನಾ… ಪುಣ್ ರಿಲೀಜ್ ಜಾಂವ್ಕ್ ಫಿಲ್ಮಾಂ ಮಾತ್ರ್ ಕ್ಯೂ ರಾವೊನ್ ಆಸ್ತಾತ್! ಅಶೆಂ ಆಸ್ತಾನಾ ಆಮ್ಚ್ಯಾ ಭಾಶೆಂತ್ ಕಿತ್ಯಾಕ್ ಏಕ್ ಫಿಲ್ಮ್ ಕಾಡುಂಕ್ ನಜೊ ಮ್ಹಣ್ ಥೊಡ್ಯಾ ತರ್ನಾಟ್ಯಾಂನಿ ತಕ್ಲಿ ಆಟಯಿಲ್ಲ್ಯಾಚೊ ಪ್ರತಿಫಳ್ ಜಾವ್ನ್ ಹೆಂ ಏಕ್ ಫಿಲ್ಮ್ ಸೆಟ್ ಜಾಲ್ಲೆಂ.

ಫಿಲ್ಮಾಚೆಂ ನಾಂವ್ ಚ್ “ನೀದ್”! ಹಾಸನಾಕಾತ್… ಹೆಂ ಎಕ್ದಮ್ ಸೀರಿಯಸ್ ಫಿಲ್ಮ್. ಹ್ಯಾ ಫಿಲ್ಮಾಚಿ ಕಾಣಿ ನಿದೆಭೊಂವ್ತಿಂಚ್ ಘುಂವ್ತಾ ಜಾಲ್ಲ್ಯಾನ್ ತಶೆಂ ನಾಂವ್ ದವರ್ ಲ್ಲೆಂ. ಮಾತ್ರ್ ನ್ಹಯ್, ನಿದೆಕ್ ಬೋವ್ ಅರ್ಥಾಭರಿತ್ ಥರಾನ್ ಪಿಂತ್ರಾಯ್ಲಾಂ ಹಾಂತುಂ. ನಿದೆಚೊ ಪಾತ್ರ್ ಕರುಂಕ್ ಕೊಂಕ್ಣಿ ಮುಳಾಚೊ ತರೀ ಹೆರ್ ಭಾಶೆನ್ ಭಾರಿಚ್ ನಾಂವ್ ಜೊಡ್‍ಲ್ಲ್ಯಾ ಎಕಾ ಫಾಮಾದ್ ಸ್ಟಾರ್ ನಟಾಕ್, ಲಾಕಾಂನಿ ಸಂಭಾವನ್ ಭಾಸಾವ್ನ್ ಆಪವ್ನ್ ಹಾಡ್‍ಲ್ಲೆಂ..

ಸಾಂಗ್‍ಲ್ಲೆಬರಿ ಆತಾಂ ಮುಹೂರ್ತಾಚೊ ವೇಳ್.

ಕ್ಲ್ಯಾಪ್ ದೀವ್ನ್ ಶೂಟಿಂಗ್ ಸುರ್ವಾತುಂಕ್ ಎಕಾ ಮ್ಹಾನ್ ಸಾಹಿತಿಕ್ ಆಪಯಿಲ್ಲೆಂ.

ನಿರ್ದೇಶಕಾನ್ ಮ್ಹಾನ್ ಸಾಹಿತಿಲಾಗಿಂ ಯೇವ್ನ್ ಕ್ಲ್ಯಾಪ್ ಮಾರುಂಕ್ ವಿನತಿ ಕೆಲಿ.

ಕಾಡ್ ಲ್ಲ್ಯಾ ಉತ್ರಾಕ್ ಸಾಹಿತಿಚೆಂ ಆಕ್ಲಾಸ್ ಭರಿತ್ ಸವಾಲ್ – “ಮ್ಹಾಕಾ ಭಾಶಣ್ ಕರುಂಕ್ ಆಪಯಿಲ್ಲೆಂ ನ್ಹಯ್ ಗಿ?” ಆಪ್ಣಾಕ್ ಉಲಂವ್ಕ್ ಆಸ್ಲ್ಯಾರ್ ಮಾತ್ರ್ ಕಾರ್ಯಾಕ್ ಹಾಜರ್ ಜಾಂವ್ಚ್ಯಾ ಹ್ಯಾ ಸಾಹಿತಿಕ್, ಎಮ್.ಸಿ.ಕರ್ನಾಂ ಲೊಕಾಕ್ ಪುಸ್ಲಾಂವ್ಕ್ ಲಾವ್ನ್ ಕ್ಲ್ಯಾಪಾಚೊ ಅವಾಜ್ ಆಯ್ಕೊನ್ ಕಳಿತ್ ಶಿವಾಯ್ ದೀವ್ನ್ ಕಳಿತ್ ನಾ.

“ತಶೆಂ ನ್ಹಯ್ ನಯ್ ಸರ್… ಕ್ಲ್ಯಾಪ್ ಮ್ಹಳ್ಯಾರ್ ಹೆಂ ಶೂಟಿಂಗಾಕ್ ವಾಪಾರ್ಚೆಂ ಫೊಳೆಂ. ತುಮಿ ತೆಂ ಟಪ್ ಕರ್ನ್ ಮಾರುನ್ ಶೂಟಿಂಗ್ ಉಗ್ತಾಯ್ಜೆ.. ಕ್ಲ್ಯಾಪ್ ಮ್ಹಳ್ಯಾರ್ ತಾಳಿಯೊ ನ್ಹಯ್… ಹೆಂ ಜಾತಚ್ ತುಮಿ ಭಾಶಣ್ ಕರುಂಕ್” ನಿರ್ದೇಶಕಾನ್ ಸಮ್ಜಾಯ್ಲೆಂ.

“ಓಹ್ ತಶೇಂ ಗೀ.. ಹಾಂವೆಂ ಕಾಂಯ್ ತಾಳಿಯೊ ಮ್ಹಣ್ ಚಿಂತ್ಲೆಂ!” ಮ್ಹಣ್ ವೀಸ್ ತೀಸ್ ವರ್ಸಾಂಥಾವ್ನ್ ಬೆಳ್ಶೆಲ್ಲ್ಯೊ ಹಾಸೊ ಪರತ್ ತೊಂಡಾರ್ ವೊಡ್ಲ್ಯೊ ತಾಣೆ.

ಕ್ಲ್ಯಾಪ್ ಮಾರ್ಚೆಂ ಕಾರ್ಯೆಂ ಸಂಪ್ಲೆಂ, “ಆತಾಂ ಸಾಹಿತಿಥಾವ್ನ್ ದೋನ್ ಉತ್ರಾಂ” ಮ್ಹಣ್ ಎನಾಂವ್ಸ್ ಜಾತಾನಾ ಉಟೊನ್ ಗೆಲ್ಲ್ಯಾ ಸಾಹಿತಿನ್, ನೆಂಟ್ಯಾ ಭುರ್ಗ್ಯಾಂನ್ ಐಸ್ ಕ್ಯಾಂಡಿ ಕಾಣ್ಗೆಲ್ಲೆಬರಿಬರಿ ಮಾಯ್ಕ್ ಹಾತಿಂ ಘೆತ್ಲೊ ಆನಿ ಆಪ್ಲೆಂ ಭಾಶಣ್ ಸುರು ಕೆಲೆಂ –

“ಆಮಿ ಪದಾಂಚ್ಯೊ ಸಿ.ಡಿ ಕಾಡ್ಚೆಸವೆಂ ಫಿಲ್ಮ್ ಯೀ ಕಾಡಿಜೆ. ಇಂಗ್ಲೆಜ್ ಭಾಶೆಂತ್ ತುಮಿ ಪಳಯ್ಲಾಂ ಜಾಂವ್ಕ್ ಪುರೊ… ಏಕ್ ಫಿಲ್ಮ್ ಆಯ್ಲ್ಯಾರ್ ಎಕಾ ವರ್ಸಾನ್ ತಾಚೊ ಮುಂದರಿಲ್ಲೊ ವಾಂಟೊ ಜಾವ್ನ್ ಪಾರ್ಟ್- ಟೂ ಯೆತಾ. ಫುಡೆ ಪಾರ್ಟ್ ತ್ರೀ, ಫೋರ್.. ಅಶೆಂ ಚಡ್ ಮ್ಹಳ್ಯಾರ್ ಪಾರ್ಟ್ ಧಾ ಪರ್ಯಾಂತ್ ವಚತ್. ಪುಣ್ ಕೊಂಕ್ಣೆಂತ್ ಪಾರ್ಟ್ -100 ಕರ್ಯೆತ್! ತಿತ್ಲ್ಯೊ ಲಾಂಬ್ ದೀಗ್ ಸಾಂಕಳ್ ಕಾಣಿಯೊ ಆಮ್ಚ್ಯಾ ಭಾಶೆಂತ್ ಆಸಾತ್! ಆನಿ ಫುಡೆಂ ಫಿಲ್ಮ್ ಕಾಡ್ತೆಲ್ಯಾಂನಿ ಹಾಚೊ ಭರ್ಪೂರ್ ಫಾಯ್ದೊ ಜೊಡಿಜೆ” ಮ್ಹಣ್ತಾನಾ ಕುಶಿನ್ ರಾವ್‍ಲ್ಲ್ಯಾ ಕೊಣೆಂ ಗೀ “ತ್ಯಾ ಕಾಣಿಯಾಂಚೊ ವಾಯ್ದೊ ಉತ್ರಾಲಾ” ಮ್ಹಣ್ ಪುಸ್ಪುಸ್ಚೆಂ ಆಯ್ಕಲೆಂ ತಾಕಾ. ಹೆಂ ಆಯ್ಕನಾತ್ಲ್ಯಾಬರಿ ಕೆಲ್ಲ್ಯಾ ಸಾಹಿತಿನ್ ಮುಂದರುನ್, “ಪುಣ್ ಕೊಂಕ್ಣಿ ಸಿನೆಮಾಪ್ರೇಮಿಂಲಾಗಿಂ ಏಕ್ ವಿನತಿ ಮ್ಹಜಿ.. ದಯಾಕರುನ್ ಹೆಂ ಫಿಲ್ಮ್ ಒರಿಜಿನಲ್ ಸಿ.ಡಿ. ಘೆವ್ನ್ ಚ್ ಪಳಯ್ಜೆ, mp3 ಕರಿನಾಕಾತ್.. ಆಮ್ಚ್ಯಾ ಸಿನೆಮಾಂಕ್ ಪ್ರೋತ್ಸಾಹ್ ದೀಜೆ” ಮ್ಹಣ್ಚೆಂಗೀ!

ಜಮ್‍ಲ್ಲೆ ಸಿನೆಮಾಮ್ಹನಿಸ್ ದಂಬು ಬಾಂದುನ್ ಹಾಸಲಾಗ್ಲೆ.

ಭಾಸ್ ಕಳಾನಾತ್ಲೆ ಥೊಡೆ ಭಾಯ್ಲ್ಯಾ ಭಾಶೆಚೆಂ ತಾಂತ್ರಿಕ್ ಕಾಮೆಲಿ, “ಆಪ್ಣಾಕ್ ಏಕ್ ಬರೊ ಜೋಕ್ ಮಿಸ್ ಜಾಲೊ” ಮ್ಹಳ್ಳ್ಯಾ ಸಂತಾಪಾನ್ ಹಾಸ್ತೆಲ್ಯಾಂಚೆಂ ಮುಕಮಳ್ ಪಳೇತ್ ರಾವ್ಲೆ.

ಆಸೊಂ, ಕಶೇಂಯ್ ಆಯ್ಚ್ಯಾ ಮುಖ್ಯ್ ಕಾರ್ಯಾಚೊ ವೇಳ್ ಉದೆಲೊ.

ಆತಾಂ ಪಯ್ಲೆಂಚೆಂ ದೃಶ್ಯ್ ಚಿತ್ರೀಕರಣ್. ಮನೋರಂಜನ್ ಭಾಶಣ್ ಕರ್ನ್ ಥಕ್‍ಲ್ಲ್ಯಾ ಸಾಹಿತಿಕ್ ಎಕಾ ಆರಾಮ್ ಕದೆಲಾರ್ ಥಂಡ್ ಪೀವನ್ ದೀವ್ನ್ ಬಸಯಿಲ್ಲೆಂ.

ಪಯ್ಲೊ ಶೊಟ್ ನಿದೆಚೊ. ನಿದೆಚೊ ಪಾತ್ರ್ ಖೆಳ್ತಲ್ಯಾ ಫಾಮಾದ್ ಕಲಾಕಾರಾನ್ ಮೇಕಪ್ ಕರ್ತಾನಾ, “ಆಮಿ ಆಮ್ಚ್ಯಾ ತೊಂಡಾರ್ ಕುರ್ಲ್ಯೊ ಚರ್ ಲ್ಲೆಬರಿ, ಆಂಗಾರ್ ಹುಂಬ್ಲೆ ಚಾಬ್‍ಲ್ಲೆಬರಿ ಎಕ್ಟಿಂಗ್ ಕೆಲ್ಯಾರೀ ಆಮ್ಕಾಂ ಮೆಳ್ಚೆ ಹಜಾರ್. ಹಾಕಾ ಪಳೆ ನಿದೆಚೆಂ ಏಕ್ಟ್ ಕರುಂಕ್ ಲಾಕ್ ದೀವ್ನ್ ಆಪೊನ್ ಹಾಡ್ಲಾಂ. ಹೊ ಅನ್ನ್ಯಾಯ್ ನ್ಹಯ್ ಗೀ” ಮ್ಹಣ್ ಗಾಂವ್ಟಿ ಕಲಾಕಾರಾಂನಿ ಎಕಾಮೆಕಾ ಉಲಂವ್ಚೆಂ ಆಯ್ಕಾಲೆಂ.

ಹೆಂ ಆಯ್ಕಲ್ಲೊ ಸ್ಟಾರ್ ನಟ್ ತಾಂಚೆಲಾಗಿಂ ವಚೊನ್, “ಅಳೆ ಭಾವಾಂನೊ… ನಿದೆಚೆಂ ಏಕ್ಟ್ ಕರ್ಚೆಂ ತಿತ್ಲೆಂ ಸಲೀಸ್ ನ್ಹಯ್. ನೀದ್ ಕಾಡುಂಕ್ ಸಲೀಸ್ ಜಾಂವ್ಕ್ ಪುರೊ. ಪುಣ್ ಜಾಗ್ರತ್ ಪ್ರಜ್ಞಾ ಆಸ್‍ಲ್ಲ್ಯಾಕ್ ನಿದೆಚೆಂ ಸೊಡ್ಯಾಂ… ಮೊಡ್ಯಾಚೆಂ ಎಕ್ಟ್ ಕರುಂಕೀ ಸಲೀಸ್ ನ್ಹಯ್” ಮ್ಹಣಾಲೊ.

ತೆ ಕಲಾಕಾರ್ ಹಾಚ್ಯಾ ಕಾನಾಂಚ್ಯಾ ಸಕ್ತೆಕ್ ವಿಜ್ಮಿತ್ ಪಾವ್ಲೆ.

ಮೇಕಪ್ ಜಾತಚ್ ಥಂಯ್ಸರ್ ಹಾಂತುಳ್ಳೆಲ್ಯಾ ಗಜ್ಡೆರ್ ಸ್ಟಾರ್ ನಟಾಕ್ ನಿದೊಂಕ್ ಲಾಯ್ಲೆಂ.

ಸಹ ನಿರ್ದೇಶಕಾನ್ ಆಮಿ ಶೋಟ್ ಒಕೆ ಮ್ಹಣ್ತಾಪರ್ಯಾಂತ್ ಉಟೊಂಕ್ ನಾ ಮ್ಹಣ್ ಸಲಹಾ ದಿಲಿ.

ತಯಾರಿ ಜಾತಚ್ ನಿರ್ದೇಶಕ್ ಬೊಬಾಟ್ಲೊ – ಸ್ಟಾರ್ಟ್ ಕೆಮೆರಾ… ರೋಲಿಂಗ್…ಏಕ್ಶನ್!

“ನಮಸ್ಕಾರ್ ಸಾಹಿತಿಂನೊ… ಹಾಂವ್ ತುಮ್ಚೊ ಅಭಿಮಾನಿ. ಹಾಕಾ ತುಮ್ಚೆಲಾಗಿಂ ಏಕ್ ವಿಚಾರುಂಕ್ ಆಸಾ” ಕೋಣ್ ಗೀ ಎಕ್ಲೊ ಯೇವ್ನ್ ಆರಾಮ್ ಕದೆಲಾರ್ ಬಸೊನ್ ಆಸ್ಚ್ಯಾ ಸಾಹಿತಿಚ್ಯಾ ಕಾನಾಂತ್ ಮ್ಹಣಾಲೊ- “ಅಳೆ ಸಾಹಿತಿಂನೊ ಕೊಂಕ್ಣೆಂತ್ ಪತ್ರೊಕೋದ್ಯಮ್ ಖಂಯ್ಚ್ಯಾ ಸ್ಥಿತೆಕ್ ಪಾವ್ಲಾಂ ತುಮ್ಕಾಂ ಕಳಿತ್ ನಾಂಗಿ.. ತುಮ್ಚೆವಿಶಿಂ ನಾಕಾ ಜಾಲ್ಲೆಂ ಬರಯ್ಲಾಂ ಎಕಾ ಪತ್ರಾನ್. ಮಾತ್ರ್ ನ್ಹಯ್ ತುಮ್ಚ್ಯಾ ಬಾಯ್ಲೆ ಭುರ್ಗ್ಯಾಂವಿಶಿಂಯ್ ಕಿತೆಂ ಕಿತೆಂ ಲಿಕ್ಲಾಂ… ತುಮ್ಕಾಂ ಏಕ್ ಖಡಕ್ಕ್ ರಿತಿನ್ ಜಾಪ್ ದೀಂವ್ಕ್ ಜಾಯ್ನಾಂಗೀ? ವಾಚುನ್ ಆಮ್ಕಾಂಚ್ ಕಾಂಟಾಳೊ ಯೆತಾ…” ಮ್ಹಣೊನ್ ಶಿಣ್ ಉಚಾರಿಲಾಗ್ಲೊ.

ಪುಣ್ ಸಾಹಿತಿ ಸಯ್ಲಾಪಾನ್, “ತೆಂ ಪೂರಾ ನಾಕಾ… ಹಾಂವ್ ಎಕ್ದಮ್ ಶಾಂತ್ ಮನಿಸ್. ಬರೊನ್ ಬರೊನ್ ವೊಳ್ತಾನಾ ವೊಗೊಚ್ ಬಸ್ತೆಲೆ… ಭಿರ್ಮತ್ ಮ್ಹಜ್ಯಾ ನಾಂವಾನ್ ತೊ ದೋನ್ ಕಾಸ್ ಜೊಡ್ತಾ ತರ್ ಜೊಡುಂದಿ… ಎಕಾ ಕಾಳಾರ್ ಪತ್ರಾರ್ ಮ್ಹಜೆಂ ನಾಂವ್ ಯೇಜೆ ತರ್ ಕಿತ್ಲೆ ಕಶ್ಟ್ ಮಾರ್ತಾಲೆ ಗೊತ್ತಾಯೆ… ಆತಾಂ ಪಳೆ. ತ್ಯಾ ನಿಬಾನ್ ಪುಣಿ ಮ್ಹಾಕಾ ಪಬ್ಲಿಸಿಟಿ ಮೆಳ್ತಾ ನೆ… ಜಾಂವ್ಚೆಂ ಪೂರಾ ಬರ‍್ಯಾಕ್‍ಚ್” ಮ್ಹಣ್ ಜಾಪ್ ದೀಲಾಗ್ಲೊ.

ಹೆಂ ಆಯ್ಕೊನ್ ನಿದೆಚೊ ಪಾತ್ರ್ ಕರುನ್ ಆಸ್‍ಲ್ಲೊ ನಟ್ ಉಟ್ಲೊ ಆನಿ ಉಟ್‍ಲ್ಲೊಚ್ ಸಾಹಿತಿಂಲಾಗಿ ಯೇವ್ನ್ “ನ್ಹಯ್ ಮಾನೆಸ್ತಾನೊ, ತುಮ್ಚೆ ವಿಶಿಂ ಅಶೆಂ ಪೂರಾ ಲಿಕ್ತಾನಾ ವೊಗೊ ಬಸ್ಚೆಂ ಗೀ ತುಮಿ? ಆಜ್ ತುಜಿಂ ಖೆಳ್ಕುಳಾಂ ಕೆಲ್ಲೊ ಫಾಲ್ಯಾ ಆನಿ ಕೊಣಾಚಿಂ ಕರಿತ್. ಸಾಹಿತಿಕ್ ಆನಿ ಪತ್ರಿಕೋದ್ಯಮಾಕ್ ತಾಚಿಚ್ ಮ್ಹಳ್ಳಿ ಮರ್ಯಾದ್ ಆಸಾ. ಅಶೆಂ ಜಾತಾನಾ ತುಮಿ ವ್ಹಡ್ ಆವಾಜ್ ಉಟಯ್ಜೆ…” ಬೂದ್ ಬಾಳ್ ಸಾಂಗ್ತಾನಾ ತೆಣೆಂ,

“ಕಟ್ ಕಟ್ ಕಟ್…” ಮ್ಹಣ್ ನಿರ್ದೇಶಕ್ ಖಾಂದಾವಯ್ಲೆಂ ಭಯ್ರಾಸ್ ಕುಡ್ಪುನ್ ಲಾಗಿಂ ಆಯಿಲ್ಲ್ಯಾ ನಿರ್ದೇಶಕಾನ್, “ತೆಂ ತಾಂಚೆ ತೆ ಪಳಯ್ತೆಲೆ ಸರ್. ತುಮಿ ನಿದಾ… ಆಮ್ಚೆಂ ಲೋ ಬಜೆಟ್ ಫಿಲ್ಮ್… ಆಮ್ಕಾಂ ವೆಳಾಚೊ ಅಭಾವ್ ಆಸಾ “ಮ್ಹಣ್ ಆಡ್ದೊಸ್ ಮಾಗ್‍ಲ್ಲ್ಯಾನ್ ತೊ ನಟ್ ಪರತ್ ಗಜ್ಡೆರ್ ಆಡ್ ಪಡ್ಲೊ.

ನಿರ್ದೇಶಕ್ ಪರತ್ ಬೊಬಾಟ್ಲೊ – ಸ್ಟಾರ್ಟ್ ಕೆಮೆರಾ… ರೋಲಿಂಗ್ … ಏಕ್ಶನ್!

“ಸಾಹಿತಿ ಸಾಯ್ಬಾಂನೊ… ನಮಸ್ತೇ…” ತಿತ್ಲ್ಯಾರ್ ಆನಿಯೆಕ್ಲೊ ಕೋಣ್ ಗೀ ಮಾನೆಸ್ತ್ ಯೇವ್ನ್, ತೊಂಡಾಂತ್ ಸ್ಟ್ರಾ ದವರ್ನ್ ಕೋಲ್ಡ್ ಡ್ರಿಂಕ್ಸ್ ಪಿಯೆಂವ್ಚ್ಯಾ ಸಾಹಿತಿಚ್ಯಾ ಕಾನಾಂತ್ ಪುಸ್ಪುಸ್ಲೊ – “ಅಮ್ಕ್ಯಾ ಸಂಘಾಕ್ ತುಜೆತಸಲೆ ಅಧ್ಯಕ್ಶ್ ಜಾಯ್ಜೆ ಆಸ್‍ಲ್ಲೆ ನೆ… ತೆಂ ಸೊಡ್ನ್ ಕೊಂಕ್ಣಿ ಉಲೊಂಕ್ ಸೊಡ್ಯಾಂ ಕೊಂಕ್ಣಿ ಮ್ಹಳ್ಳೊ ಸಬ್ದ್ ಬರಂವ್ಕ್ ಸಯ್ತ್ ಯೇನಾತ್ಲೆ ಪಾಟಾರ್ ಬಸ್ಲ್ಯಾತ್ ನೆ.. ಆನಿ ತುಮಿ ವಚೊನ್ ತಾಂಕಾಂ ಸಲಾಮ್ ಮಾರ್ತಾತ್ ನೆ.. ಹೆಂ ತುಮಿ ಕರ್ಚೆಂ ಸಾರ್ಕೆಂ ಗಿ?”.

ಲೊಕಾಕ್ ಮ್ಹಜೆವಯ್ರ್ ಕಿತ್ಲಿ ಬಿರ್ಮತ್ ಪಳೆ ಮ್ಹಣ್ ಹೆಮ್ಮೆ ಪಾವ್‍ಲ್ಲೊ ಸಾಹಿತಿ ಆಪ್ಲ್ಯಾಚ್ ಶಾಯ್ಲೆನ್ ಸಮಾಧಾನ್ ಕರಿಲಾಗ್ಲೊ- “ಸಾಹಿತಿಚೆಂ ಕಾಮ್ ಬರಂವ್ಚೆಂ ನೆ.. ಆಮ್ಕಾಂ ಕಾಲ್ಯಾಕ್ ಕದೆಲ್.. ಅಮ್ಕಾಂ ಬರೊಂಕ್ ಏಕ್ ಮೇಜ್ ಮೆಳ್ತಾ ತರ್ ಕದೆಲಾಚಿ ಗರ್ಜ್ ಕಿತ್ಯಾಕ್ ಭಾವಾ…”

ಹೆಂ ಆಯ್ಕೊನ್ ನಿದೆಚೊ ಪಾತ್ರ್ ಖೆಳ್ಚೊ ನಟ್ ಪರತ್ ಉಟೊನ್ ಎಕಾಚ್ ಬಕ್ಕರಾಕ್ ಸಾಹಿತಿಸರ್ಶಿಂ ಪಾವೊನ್, “ಅಗಾ ಮಾನೆಸ್ತಾ.. ಸಾಹಿತಿ ಮ್ಹಳ್ಯಾರ್ ಬರವ್ನ್ ಸಂಪಾದಕಾಂಕ್ ಪೋಸ್ಟ್ ಕರ್ಚೆಂ ಆನಿ ಪಾಟಿಂ ಆಯ್ಲ್ಯಾರ್ ದುಸ್ರ್ಯಾ ಸಂಪಾದಕಾಂಕ್ ಧಾಡ್ಚೆಂ ಮಾತ್ರ್ ಕಾಮ್ ನ್ಹಯ್.. ತಾಕಾಯ್ ಸಮಾಜೆಚೆ, ಸಂಸ್ಕೃತೆಚಿ ಜವಾಬ್ದಾರಿ ಬಾಂದ್ತಾ. ಆಪ್ಲ್ಯಾ ಖಾಸ್ಗಿ ಫಾಯ್ದ್ಯಾಕ್ ಕೊಣೀ ಖಂಯ್ಚೇಂಯ್ ಸಾಂಸ್ಕೃತಿಕ್ ಶೆತ್ ಬಲಿ ದೀತ್ ಜಾಲ್ಯಾರ್ ತಾಚೆವಿರೋದ್ ಆವಾಜ್ ಉಟಯ್ಜೆ…” ಮ್ಹಣ್ ವ್ಹಡಾ ತಾಳ್ಯಾನ್ ಉಲಯ್ಲಾಗ್ಲೊ.

“ಕಟ್ ಕಟ್ ಕಟ್…” ನಿರ್ದೇಶಕ್ ಪರತ್ ನಟಾಸರ್ಶಿಂ ಯೇವ್ನ್ “ಪ್ಲೀಜ್ ಸರ್.. ತಾಂಚೆ ತೆ ಪಳಯ್ತಾಲೆ ಆಮ್ಕಾಂ ನಾಕಾ… ಆಮ್ಕಾಂಚ್ ತಾಣಿಂ ಉಲಯಿಲ್ಲೊ ಆವಾಜ್ ಆಯ್ಕಾನಾ ತುಮ್ಕಾಂ ಕಶೆಂ ಆಯ್ಕಾತಾ..? ಪ್ಲೀಜ್ ನೆಗ್ಲೆಕ್ಟ್ ಇಟ್ ಸರ್..”

ಮ್ಹಣ್ತಾನಾ ನಟ್ “ನಿದ್‍ಲ್ಲ್ಯಾಕ್ ಭಾಯ್ಲೊ ಆವಾಜ್ ಆಯ್ಕಾನಾ ಜಾಂವ್ಕ್ ಪುರೊ. ಪುಣ್ ನಿದ್‍ಲ್ಲೆಬರಿ ನಟನ್ ಕರ್ಚ್ಯಾಕ್ ಪೂರಾ ಅಯ್ಕಾತಾ. ತಾಚೆ ಕಾನ್ ಬೋವ್ ಸೂಕ್ಶಿಮ್ ಆಸ್ತಾತ್ ಕಳಿತ್ ಆಸಾಯೆ?” ಮ್ಹಣಾಲೊ.

ತಾಕಾ ರಾಗ್ ಆಯ್ಲಾ ಮ್ಹಣ್ ತಾಚ್ಯಾ ಉಲವ್ಣ್ಯಾಂತ್ ಕಳ್ತಾಲೆಂ.

ನಿರ್ದೇಶಕ್ ತಾಚೊ ರಾಗ್ ನಿವೊಂಕ್ ವಾರೆಂ ಘಾಲಿಲಾಗ್ಲೊ – “ಆಮ್ಚೆಂ ಲೋ ಬಜೆಟ್ ಫಿಲ್ಮ್. ತುಮ್ಕಾಂ ನಿದೊಂಕ್ ಆಮಿ ಪಯ್ಶೆ ಖರ್ಚುನ್ ಆಪವ್ನ್ ಹಾಡ್‍ಲ್ಲೆಂ. ಹಾಂಗಾಸರ್ ಹಜಾರ್ ಸಂಬಾವನ್ ದಿಲ್ಯಾರ್ ಮರೊಂಕೀ ತಯಾರ್ ಆಸ್ಚೆ ಅಸಾತ್ ಸರ್. ತಶೆಂ ಆಸ್ತಾಂ ಆಮಿ ಲಾಕ್ ದೀವ್ನ್ ತುಮ್ಕಾಂ ನಿದೆಚೆಂ ಏಕ್ಟ್ ಕರುಂಕ್ ಆಪೊವ್ನ್ ಹಾಡ್ಲಾಂ. ಪ್ಲೀಜ್ ಅಂಡರ್ ಸ್ಟೇಂಡ್ ಮಿ. ಫಕತ್ ತೀನ್ ಮಿನುಟಾಂ ನಿದ್ಲ್ಯಾರ್ ಪುರೊ…”

ಅಕ್ರೇಕೀ ನಟ್ ವಚೊನ್ ನಿದ್ಲೊ ಮ್ಹಣ್ಯಾಂ.

ಪುಣ್ ತೊಂಡಾರ್ ಮಿರಿಯೊ ಆಸ್‍ಲ್ಲ್ಯೊ ಪಳೆವ್ನ್ ನಿರ್ದೇಶಕ್ ಪರತ್ ಮ್ಹಣಾಲೊ- “ಸರ್ ತುಮಿ ಟೆನ್ಶನಾರ್ ನಿದ್‍ಲ್ಲೆಬರಿ ಆಸಾ. ಶಾಂತ್ ಮನಾನ್ ನಿದಾ ಸರ್… ಫಕತ್ ತೀನ್ ಮಿನುಟಾಂ…”

“ಹೆಂ ಪೂರಾ ಆಯ್ಕೊನ್ ವೊಗೊ ರಾಂವ್ಚೆಂ ಕಶೆಂ… ಸ್ಕ್ರಿಪ್ಟ್ ಮಾತ್ಶಿ ಬದ್ಲುನ್, ಮ್ಹಾಕಾ ನಿದೆಂತ್ ಪುಣೀ ಉಲಂವ್ಚೆಬರಿ ಕರ್ಯೆತ್ ಗೀ…” ನಟಾಚಿ ಹಿ ಸಲಹಾ ನಿರ್ದೇಶಕಾನ್ ನಾಜೂಕಾಯೆನ್ ನೆಗಾರ್ಲಿ.

“ಒ ಕೆ ಪಳಯಾಂ” ಮ್ಹಣಾಲೊ ನಟ್ ಪಾತ್ರಾಂತ್ ತಲ್ಲೀನ್ ಜಾಲೊ.

ತೆದಾಳಾ ಸಹನಿರ್ದೇಶಕ್ ಯೇವ್ನ್, “ನಿರ್ದೇಶಕ್ ಬಾಬಾಂನೊ .. ಆಮಿ ಸಾಹಿತಿಕ್ ಚ್ ಪಯ್ಸ್ ಬಸಯ್ಲ್ಯಾರ್ ಕಶೆಂ?” ಮ್ಹಣ್ ವಿಚಾರ್ತಾನಾ, ನಿರ್ದೇಶಕ್- “ತೆಂ ಏಕ್ ಕಾಮ್ ನಾಕಾ ರೆ.. ಹ್ಯಾ ಸಾಹಿತಿಂಕ್ ಪಾತ್ಯೆಂವ್ಕ್ ನಜೊ. ಮಾಗಿರ್ ಪತ್ರಾಂತ್ಲ್ಯಾ ಆಪ್ಲ್ಯಾ ಖಾಸ್ಗಿ ಕೊಲಮಾಂನಿ ನಾಕಾ ಜಾಲ್ಲೆಂ ಬರವ್ನ್ ನಾಲಿಸಾಯ್ ಕರ್ತಿತ್. ಹೊ ನಟ್‍ಚ್ ಇಲ್ಲೊ ಸಮ್ಜಣೆಚೊ ದಿಸ್ತಾ. ತಾಕಾಚ್ ಸಮ್ಜಂವ್ಕ್ ಪ್ರೇತನ್ ಕರ್ಚೆಂ ಬರೆಂ” ಮ್ಹಣ್ ತಿಸ್ರೆ ಪಾವ್ಟಿಂ ಬೊಬಾಟ್ಲೊ – ಸ್ಟಾರ್ಟ್ ಕೆಮೆರಾ… ರೋಲಿಂಗ್… ಎಕ್ಶನ್!

“ಹಲೋ ಮಿಸ್ಟರ್… ಹಾಂವ್ ಅಮ್ಕ್ಯಾ ಸಂಘಟನಾಚೊ ಕಾರ್ಯಕರ್ತ್. ಯೆಂವ್ಚ್ಯಾ ಇಲೆಕ್ಶನಾಂತ್ ಮಾಕಾಚ್ ಸಪೋರ್ಟ್ ಕರಿಜೆ. ನಾ ತರ್ ತುಜೆಂ ಏಕ್‍ಚ್ ಏಕ್ ಲೇಖನ್ ಸೊಡ್ಯಾಂ, ತುವೆಂ ದಿಲ್ಲೆಂ ಎಡ್ವಟಾಯ್ಜ್ ಮೆಂಟ್ ಯೀ ಪಬ್ಲಿಶ್ ಜಾಯ್ನಾಶೆಂ ಪಳಯ್ತಾಂ. ಪೂರಾಯ್ ಸಂಪಾದಕ್ ಮ್ಹಜ್ಯಾ ಮುಟಿಂತ್ ಆಸಾತ್ ಕಳ್ಳೆಂ ಮು?” ಮ್ಹಣ್ ದೊಳೆ ವಾಟಾರ್ನ್ ಪಳೆಯ್ತಾನಾ, ಗೊಂವಾಪಿಟಾಚೊ ಗುಳೊ ಲಾಟ್ತಾನಾ ಚಾಪಾತಿ ಜಾವ್ನ್ ಪಾತಳ್ಚೆಬರಿ ಸಾಹಿತಿಚ್ಯಾ ತೊಂಡಾರ್ ಚಾಪ್ಪೆ ಹಾಸೊ ಪಾತ್ಳಾಲ್ಯೊ.

ನಿದೆಚೊ ಪಾತ್ರ್ ಕರ್ತೆಲ್ಯಾ ನಟಾಕ್ ಮಾತ್ರ್ ಆತಾಂ ತಡ್ವೊಂಕ್‍ಚ್ ಜಾಲೆಂ ನಾ, ದಿಡ್ಕ್ ಕರ್ನ್ ಉಟ್‍ಲ್ಲೊಚ್ “ಕಿತ್ಲೆಂ ಧಯ್ರ್ ಗಾ ತುಕಾ? ಮ್ಹಜೆಮುಕಾರ್ ಎಕಾ ಬರ್ಪಿ ಮನ್ಶ್ಯಾಕ್ ಧಮ್ಕಿ ದೀಂವ್ಕ್ ತುಂ ಕೋಣ್ ಗಾ?” ಮ್ಹಣ್ ಧಮ್ಕಿ ದಿತೆಲ್ಯಾಚೊ ಕೊಲರ್ ಧರುಂಕ್ ಗೆಲೊಚ್.

“ಕಟ್ ಕಟ್” ಮ್ಹಣ್ಚೆಕಡೆ “ಹಲ್ಕಟ್” ಮ್ಹಳ್ಳೆಂ ಉತರ್ ಹಳ್ಕೆವೀಣ್ ಭಾಯ್ರ್ ಪಡ್‍ಲ್ಲ್ಯಾ ನಿರ್ದೇಶಕಾನ್ ಕೊಣಾಕೀ ಆಯ್ಕೊಂಕ್ ನಾ ಮ್ಹಳ್ಳೆಂ ಖಾತ್ರಿ ಕರುನ್ ಧಾಂವೊನ್ ವಚೊನ್ ಪರಿಸ್ತಿತಿ ನಿತ್ಳಾಯ್ಲಿ.

ನಿರ್ದೇಶಕಾನ್ ಕಾಂಯ್ ಸಾಂಗ್ಚೆಫುಡೆಚ್ ನಿದೆಚೊ ಪಾತ್ರ್ ಕರ್ತಲೊ ಸ್ಟಾರ್ ನಟ್ ಮ್ಹಣಾಲಾಗ್ಲೊ –

“ಮ್ಹಾಕಾ ಮಾಫ್ ಕರಾ ನಿರ್ದೇಶಕ್ ಸಾಯ್ಬಾಂನೊ. ಹ್ಯಾ ಪರಿಸ್ಥಿತೆರ್ ಮ್ಹಾಕಾ ನಿದೆಚೆಂ ನಟನ್ ಕರುಂಕ್ ಜಾಯ್ನಾ. ಬರೆಂ ಕರುನ್ ನಿದೆಚೆಂ ನಟನ್ ಕರಿಜೆ ಮ್ಹಣ್ ಸಗ್ಳಿ ರಾತ್ ನಿದೊಂಕ್ ನಾ ಹಾಂವ್. ಪುಣ್ ಹ್ಯಾ ಪರಿಸ್ಥಿತೆರ್ ..ಊಹೂಂ.. ಬಿಲ್ಕುಲ್ ಮ್ಹಜ್ಯಾನ್ ಸಾಧ್ಯ್ ನಾ”

“ಸರ್ ಆಮ್ಚೆಂ ಲೋ ಬಜೆಟ್ ಫಿಲ್ಮ್.. ಚೂರ್ ಎಜೆಸ್ಟ್ ಕರಾ ಸರ್.,. ಜಾಯ್ ತರ್ ತ್ಯಾ ಸಾಹಿತಿಕ್ ಪಯ್ಸ್ ಬಸಯ್ತಾಂ” ಮ್ಹಣ್ತಾನಾ ನಟ್, ಆನಿ ತಿತ್ಲ್ಯಾ ವ್ಹಡ್ಲ್ಯಾ ಆವಾಜಾನ್ ಮ್ಹಣಾಲೊ – “ನಾಕಾ ನಾಕಾ… ತೊ ಸಾಹಿತಿ ಜಾಯ್. ಹೆಂ ಲೋ ಬಜೆಟ್ ಫಿಲ್ಮ್ ನೆ ಹಾಯ್ ಬಜೆಟ್ ಫಿಲ್ಮ್ ಕಾಡ್ಯಾಂ. ಹಾಂವ್‍ಚ್ ಪ್ರೊಡ್ಯೂಸ್ ಕರ್ತಾಂ. ಕೆಮೆರಾ ಹ್ಯಾ ಸಾಹಿತಿತೆವ್ಶಿಂ ಘುಂವ್ಡಾಯಾ… ಹೊ ಸಾಹಿತಿಚ್ ಹೀರೋ” ಮ್ಹಣ್ ಕ್ಲ್ಯಾಪ್ಸ್ ಮಾರ್ತಾನಾ ತೊ ಸಾಹಿತಿ ಉಟೊನ್ ಉಬೊ ರಾವ್ಲೊ. ಹಳೂ ಗತ್ತಾನ್ ಮುಕಾರ್ ಯೇವ್ನ್, “ತರ್ ಹಾಂವೆಂ ನಿದಜೆ ಗೀ..” ಮ್ಹಣ್ ಇಗರ್ಜೆಂತ್ ಶಾಂತಿ ದಿತಾನಾ ಬಾಗ್ವೊಂವ್ಚೆಬರಿ ಬಾಗ್ವೊನ್ ಖಾಲ್ತೆಪಣಾನ್ ವಿಚಾರಿಲಾಗ್ಲೊ.

ರಾಗ್ ತಕ್ಲೆಕ್ ಚಡ್ಲ್ಯಾರೀ ನಿಯಂತ್ರಣಾರ್ ದವರುನ್ ಸ್ಟಾರ್ ನಟ್ ನಿರ್ದೇಶಕಾಕ್ ಮ್ಹಣಾಲೊ..”ಹ್ಯಾ ಸಾಹಿತಿಚೆಂ ಚಲನ್ ವಲನ್ ಏಕ್ ದೀಸ್ ತಾಚ್ಯಾ ಪಾಟ್ಲ್ಯಾನ್ ಚ್ ರಾವೊನ್ ಶೂಟ್ ಕರಾ ಆನಿ ತೆಂಚ್ ಎಡಿಟ್ ಕರ್ನ್ ಆಮಿ ರಿಲೀಜ್ ಕರ್ಯಾಂ. ಹಾಚೆಪ್ರಾಸ್ ವರ್ತಿ ನೀದ್ ಖಂಯ್ಚ್ಯಾ ಮೊರ್ಚುವರಿಂತೀ ಮೆಳ್ಚಿ ನಾ! ವೆರಿ ನೇಚುರಲ್ ಮೂವಿ… ಫಿಲ್ಮಾಚೆಂ ನಾಂವ್ -ಜಾಗೋ ಸಾಹಿತಿ ಜಾಗೋ”!

ಸರ್ವಾಂನಿ ವಡ್ಲ್ಯಾನ್ ಕ್ಲ್ಯಾಪ್ಸ್ ಮಾರ್ಲೆ.

ಸಾಹಿತಿಲಾಗಿಂ ಆಯಿಲ್ಲೊ ಸ್ಟಾರ್ ನಟ್ ತಾಚ್ಯಾ ಕಾನಾಂತ್ ಪುಸ್ಪುಸ್ಲೊ- “ಆಮಿ ಹ್ಯಾ ಫಿಲ್ಮಾಚಿ ಸಿ.ಡಿ, ಕಾಡ್ಚಿ ನಾಕಾ, ಆದ್ಲ್ಯಾ ಕಾಳಾಚ್ಯಾ ರಿಲಾಚ್ಯಾ ಕೆಸೆಟಿರ್ ಕಾಡ್ಯಾಂ… ತೆದಾಳಾ mp3 ಕರುಂಕ್ ಜಾಯ್ನಾ ಪಳೆ..”!

ತೊ ಸಾಹಿತಿ ಮಾತ್ರ್ ಥಿಯೇಟಾರಾಮುಕ್ಲ್ಯಾ ಕಟ್-ಆವ್ಟಾಬರಿ ಪೆಂಕ್ಡಾಕ್ ಹಾತ್ ದವರ್ನ್ ನೀಟ್‍ಚ್ ರಾವ್‍ಲ್ಲೊ!

► ವಿಲ್ಸನ್ ಕಟೀಲ್

ಕೊಂಕ್ಣೆಚೆ ವಾವ್ರಾಡಿ ಚಡ್ತಾವ್ ಮಾಲ್ಘಡೆ ಆನಿ ಪಿರಾಯೆಚೆ ಚಡ್ ಆಸಾತ್. ಖೆಳಾಂತ್ ವಾಂಟೊ ಘೆತಾನಾ ಕಾಂಯ್ ಚಡ್ ಉಣೆಂ ಜಾಯ್ತ್ ಮ್ಹಳ್ಳ್ಯಾ ಪಯ್ಸಾದಿಶ್ಟೆನ್ ಖೆಳಾಸ್ಪರ್ದೊ ಯೆವ್ಜಿಲ್ಲ್ಯಾಂನಿ ಗೆಟಿಕಡೆ ಏಕ್ ಎಂಬುಲೆನ್ಸ್ ರೆಡಿ ರಾವಯಿಲ್ಲೆಂ. ಮನರಂಜನಾಚಿ ಜೊಕ್ತಿ ಘಡಿ ಉದೆಲಿಚ್. ಎಕೆಕ್ಲೆಚ್ ಕೊಂಕ್ಣಿ ಮನಿಸ್ ತ್ಯಾ ಮಯ್ದಾನಾರ್ ಜಮಂವ್ಕ್ ಲಾಗ್ಲೆ. ಭಿತರ್ ಸರ್ತಾಂ ಸರ್ತಾಂ, ಪಾದ್ರಿಚೊ ಶೆರ್ಮಾಂವ್ ಲಾಂಬ್ ಜಾಲೊ, ಕೊಯೆರಿಸ್ತಾಂಚೊ ಗಾಗ್ರೊ ಮಟ್ವೊ ಜಾಲೊ- ಅಶೆಂ ಇಗರ್ಜ್, ಮಿಸಾಂವಿಶಿಂ ವಾಚ್ಪ್ಯಾಂಚಿಂ ಪತ್ರಾಂ ಬರವ್ನ್‌ಚ್ ಫಾಮಾದ್ ಜಾಲ್ಲೊ ಎಕ್ಲೊ ಲೇಖಕ್ ಎಂಬುಲೆನ್ಸಾವಯ್ಲ್ಯಾ ತಾಂಬ್ಡ್ಯಾ ಮೆಡಿಕಲ್ ಗುರ್ತಾಕ್ ಖುರಿಸ್ ಮ್ಹಣ್‍ಚ್ ಚಿಂತುನ್ ಸಂತಾಖುರ್ಸಾಚಿ ಕುರ‍್ಹು ಕಾಡುನ್‌ಚ್ ಭಿತರ್ ರಿಗ್ಲೊ! ಹಾಂಚೊ ಖೆಳ್ ಪಳಂವ್ಕ್ ಮ್ಹಣ್‍ಚ್ ಆಯಿಲ್ಲೊ ಎಕ್ಲೊ, ಎಂಬುಲೆನ್ಸಾಚ್ಯಾ ಕಪಾಲಾರ್ ಮುಕ್ಲ್ಯಾ ಗಾಡಿಯಾಂಚ್ಯಾ ಸಾಯ್ಡ್ ಮಿರರಾರ್ ಸಾರ್ಕೆಂ ದಿಸಜೆ ಮ್ಹಣ್ ಮಿರರ್ ಇಫೆಕ್ಟಾರ್ ಬರಯಿಲ್ಲೆಂ “ಅಂಬುಲೆನ್ಸ್” ಅಕ್ಶರಾಂ ಪಳವ್ನ್ “ಹೆ ಕೆನ್ನಾಂಯ್ ಉಲ್ಟೆಚ್” ಮ್ಹಣ್ ಆಪ್ಣಾಯಿತ್ಲ್ಯಾಕ್ ಪುರ್ಪುರೊನ್‍ಚ್ ಭಿತರ್ ಸರ್ಲೊ! ಆನಿಯೆಕ್ಲೊ ಬಾವ್ಡೊ ಎಂಬುಲೆನ್ಸಾಚ್ಯಾ ಕಾಮೆಲ್ಯಾಕಡೆ “ಪ್ರಾಯ್ವಂತಾಂಚಿಂ ಭಾಲಯ್ಕಿ ಸಾಂಬಾಳ್ಚೆವಿಶಿಂ ಕಾಂಯ್ ಬೂಕ್ ಆಸಾತ್ ವೆ?” ಮ್ಹಣ್ ವಿಚಾರಿಲಾಗ್ಲೊ. “ತುಂ ಕಾಲೆಂ ಮಾನೆಸ್ತಾ ಎಂಬುಲೆನ್ಸಾಲಾಗಿಂ ಭಲಾಯ್ಕೆಚೆ ಬೂಕ್ ವಿಚಾರ್ತಾಯ್?” ಮ್ಹಣ್ತಾನಾ ತೊ ಬರ್ಪಿ ಮಾನೆಸ್ತ್ ” ಒಹ್..ಹೆಂ ಎಂಬುಲೆನ್ಸ್ ಗಿ.. ಹಾಂವೆಂ ಕಾಂಯ್ ಮೊಬಾಯ್ಲ್ ಬಜಾರಾಚಿ ಗಾಡಿ ಮ್ಹಣ್ ಚಿಂತ್ಲೆಂ” ಮ್ಹಣ್ ಸೋರಿ ಸಾಂಗೊನ್ ಭಿತರ್ ರಿಗ್ಲೊ. ಸಬಾರ್ ಸೀರಿಯಸ್ ಕೆಜಿ ಪಳವ್ನ್ ತ್ಯಾ ಗಂಬೀರ್‍ಪಣಾಂತ್ ವಿರಾರಾಯ್ ಭೊಗ್‍ಲ್ಲೊ ಎಂಬುಲೆನ್ಸಾಚೊ ಕಾಮೆಲಿ ಸಬಾರ್ ದಿಸಾ ಉಪ್ರಾಂತ್ ಪೋಟ್‍ಭರ್ ಹಾಸ್ಲೊ!

ಕಶೆಂಯ್ ಖೆಳಾ ಸ್ಪರ್ಧೊ ಸುರ್ವಾತ್ಲೊ…

ಪಯ್ಲೊ ಖೆಳಾಸ್ಪರ್ದೊ- ಲೇಖಕಾಂಕ್, ದೊರಿ ವೊಡ್ಚೊ ಸ್ಪರ್ದೊ:

ಅಪಾಪ್ಣಾಂ ಮದೆಂಚ್ ಹಜಾರ್ ಪಂಗಡ್ ರಚ್‍ಲ್ಲ್ಯಾ ಹ್ಯಾ ಲೇಖಕಾಂಕ್ ಸಾಂಗಾತಾ ಘಾಲುನ್ ಫಕತ್ ದೋನ್ ಪಂಗಡ್ ಕರಿಜೆ ತರ್ ಖೆಳ್ ಆಸಾ ಕೆಲ್ಲ್ಯಾ ಕಾರ್ಬಾರ‍್ಯಾಂಕ್ ಜಿವಾರ್ ಆಯ್ಲೆಂ. ಕಶೆಂಯ್ ಪುಣಿ ಸರ್ವ್ ಬರ್ಪ್ಯಾಂಕ್ ಸಂಗಾತಾ ಘಾಲುನ್ ದೋನ್ ಪಂಗಡ್ ಕರುನ್ ಯೆಂಟೊ ಹಾತಾಂತ್ ದಿಲೊ. ಸತ್ ಸಾಂಗ್ಚೆಂ ತರ್ ಕೊಂಕ್ಣಿ ಸಾಹಿತಿ ಜಿವಾನ್ ಬೋವ್ ಅಸ್ಕತ್ ಮ್ಹಣ್ ಲೇಕ್ ಘಾಲ್ಲ್ಯಾ ಖೆಳಾಚ್ಯಾ ಆಯೋಜಕಾಂನಿ- ಹ್ಯಾ ಖೆಳಾಕ್ ಡೆಕೊರೇಶನಾಕ್ ಫುಗ್ಗೆ ಬಾಂದುಂಕ್ ವಾಪಾರ್ಚೆಂ, ಮಾತ್ಶೆಂ ಘಟ್ ಸುತ್‍ಚ್ ಪುರೊ ಮ್ಹಣ್ ಚಿಂತ್‍ಲ್ಲೆಂ. ಪುಣ್ ಇನಾಮಾಂಚ್ಯಾ ಎಕಾ ಸ್ಪೋನ್ಸರ್‌ವಾಲ್ಯಾನ್ ಯೆಂಟೊ ಆಮ್ಚಿ ಸಂಸ್ಕೃತಿ ಮ್ಹಣ್ ಚೊರೆ ಕೆಲ್ಲ್ಯಾನ್ ಯೆಂಟೊ ದಿಲ್ಲೊ.

ಖೆಳ್ ಸುರ್ವಾತ್ಲೊ, ಬಿಗಿಲ್ ಫುಂಕ್ಲೆಂ.. ದೆಕ್ಚೆಂ ಕಿತೆಂ.. ಯೆಂಟೊ ಖಿಣಾನ್ ಚಿಪ್ಪುಡ್ ಚೀರ್!

ಹೆಂ ಪಳೆವ್ನ್ ಅಜ್ಯಾಪ್ ಜಾಲ್ಲೊ ಆಯೋಜಕಾಂಪಯ್ಕಿ ಎಕ್ಲೊ “ಏ ದೆವಾ ಹೆ ಬರ್ಪಿ ಪಳಂವ್ಕ್ ಅಸ್ಕತ್ ಪುಣ್ ದೊರಿ ವೊಡ್ಚ್ಯಾಂತ್ ಹಸ್ತಿಕೀ ಸೊಡ್ನ್ ದೀನಾಂತ್ ಮೂ…ಯೆಂಟೊ ದವರ್ಲೆಲ್ಯಾನ್ ಭಾತೆಣ್ಯಾಚೆ ಚುರೆ ಪಳಂವ್ಕ್ ತರಿ ಮೆಳ್ಳೆ ..ಸುತ್ ದಿಲ್ಲೆಂ ತರ್ ಮಾಯಾಗ್‍ಚ್ ಜಾತೆಂ!” ಮ್ಹಣ್ ಉದ್ಗಾರ್ಲೊ.

ಉಪ್ರಾಂತ್ ಕೊಣೆಂಗಿ ರಾಜು ದಿಲೊ.

ಆತಾಂ ರಾಜು ದೊನೀ ಪಂಗ್ಡಾಚ್ಯಾ ಹಾತಾಂತ್ ದೀವ್ನ್ ಬಿಗಿಲ್ ಫುಂಕ್ಲೆಂ. ಕಿತೆಂ ಉಡ್ಡಾಉಡ್ಡಿ! ದೊನೀ ಪಂಗ್ಡಾಚೆ ಜೀವ್ ಸೊಡ್ನ್ ವೊಡ್ತಾವೊಡ್ತಾನಾ ರಾಜುವಾಚೆಯ್ ಕಾತ್ಯಾತೀರ್ ಉಟೊಂಕ್ ಲಾಗ್‍ಲ್ಲ್ಯಾನ್ ಆನಿ ತೊ ರಾಜುಯ್ ಕುಡ್ಕೆ ಜಾವ್ನ್ ದೊನೀ ಪಂಗ್ಡಾಚೆ ಪಡೊನ್ ಪೆಂಕಡ್ ಮೊಡ್ಚೆಂ ನಾಕಾ ಮ್ಹಣ್ ಖೆಳ್ ಅರ್ದ್ಯಾರ್‌ಚ್ ರಾವವ್ನ್ “ಟೈ” ಮ್ಹಣ್ ಎನಾಂವ್ಸ್ ಕೆಲೆಂ.

ಪುಣ್ ದೊರಿ ಝೆಂಜ್ರೊನ್ ಜಾಯ್ತ್ಯಾ ಬರ್ಪ್ಯಾಂಚ್ಯಾ ಹಾತಾಚಿ ಕಾತ್ ಉಕ್ಲಲ್ಲಿ. ಹಾಂಚ್ಯಾ ಹಾತಾಂಕ್ ನಂಜಿ ಖಾಂವ್ಚಿ ನಾಕಾ ಮ್ಹಣ್ ಚಡ್ ರಗತ್ ಪಾಜ್ರಂವ್ಚ್ಯಾ ಚಾರ್ ಪಾಂಚ್ ಜಣಾಂಕ್ ಎಂಬುಲೆನ್ಸಾರ್ ಬಸವ್ನ್ ಚಿಕಿತ್ಸಾ ಕೆಲಿ. ಬಗ್ಲೆನ್ ಹೊ ಖೆಳ್ ಪಳೆತ್ ರಾವ್‍ಲ್ಲೊ ಪ್ರಗತಿಶೀಳ್ ವಾಚ್ಪಿ ಎಕ್ಲೊ ಆಪ್ಣಾಯಿತ್ಲ್ಯಾಕ್ ಬರೆಂ ಮಾಗಲಾಗ್ಲೊ-“ದೆವಾ ಹಾಂಚ್ಯಾ ಹಾತಾಂಚೆಂ ಬ್ಯಾಂಡೇಜ್ ಏಕ್ ದೋನ್ ಮ್ಹಯ್ನೆ ತರೀ ಕಾಡುಂಕ್ ದೀನಾಕಾ.. ಕೊಂಕ್ಣಿ ಸಾಹಿತ್ಯಾಚ್ಯಾ ಭಲಾಯ್ಕೆಚ್ಯಾ ನದ್ರೆರ್ ಇತ್ಲೆಂ ತರೀ ಕರ್ ದೆವಾ!”

ದುಸ್ರೊ ಖೆಳಾ ಸ್ಪರ್ದೊ- ಸಂಪಾದಕಾಂಕ್, ಮೊಡ್ಕಿ ಫುಟಂವ್ಚೊ ಸ್ಪರ್ದೊ

ಸಂಪಾದಕಾಂಚ್ಯಾ ದೊಳ್ಯಾಂಕ್ ವಸ್ತುರ್ ಬಾಂದುನ್ ಹಾತಾಂತ್ ಬಯ್ತಾಡ್ ದೀವ್ನ್, ಚಾರ್-ಪಾಂಚ್ ಸುತ್ತು ಘುಂವ್ಡಾವ್ನ್ ಧಾಡ್ಚೆಂ ಕಾಮ್ ಹೆಳ್‍ಲ್ಲ್ಯಾ ವಾಚ್ಪ್ಯಾಂಚಿಂ ಪತ್ರಾಂ ಬರಯ್ತೆಲ್ಯಾಂಕ್ ದಿಲ್ಲೆಂ.

ಸ್ಪರ್ದೊ ಸುರ್ವಾತ್ಲೊ. ಆಪ್ಣೆಂ ಧಾಡ್ನ್ ದಿಲ್ಲೆಂ ದೋನ್ ಪಾನಾಂಚೆಂ ಲೇಖನ್ ಸತ್ತ್ಯಾನಾಸ್ ಕರುನ್ ಫಕತ್ ಎಕ್ ಪಾರಾಗ್ರಾಫ್ ಕರ್ನ್ “ವಾಚ್ಪ್ಯಾಂಚಿಂ ಪತ್ರಾಂ” ವಿಭಾಗಾಂತ್ ಫಾಯ್ಸ್ ಕೆಲ್ಲ್ಯಾ ರಾಗಾನ್ ಎಕ್ಲ್ಯಾನ್ ತ್ಯಾ ಸಂಪಾದಕಾಕ್ ದೊಳ್ಯಾಂಕ್ ವಸ್ತುರ್ ಬಾಂದುನ್ ಬುಗುರಿ ಘುಂವ್ಡಾಯಿಲ್ಲೆಬರಿ ಚಡ್ ಸುತ್ತು ಘುಂವ್ಡಾಯಿಲ್ಲ್ಯಾನ್ ತೊ ಸಂಪಾದಕ್ ತಕ್ಲಿ ಘುಂವೊನ್ ಪಡ್ಲೊ. ಉಪ್ರಾಂತ್ ಕೊಣೆಂಗಿ ಮುಸ್ಕಾರಾಕ್ ಉದಕ್ ಮಾರ‍್ಲ್ಲ್ಯಾನ್ ಮತಿರ್ ಆಯ್ಲೊ ಮ್ಹಣ್ಯಾಂ.

ಆಯಿಲ್ಲಿಂ ಬರ್ಪಾಂ ಬೋವ್ ಸೂಕ್ಶಿಮ್ ರಿತಿನ್ ಪಾರ್ಕುಂಚ್ಯಾ ಆನಿಯೆಕ್ಲ್ಯಾ ಸಂಪಾದಕಾಚ್ಯಾ ದೊಳ್ಯಾಂಕ್ ವಸ್ತುರ್ ಬಾಂದ್ಚಿ ಗರ್ಜ್ ನಾತ್ಲಿ; ಫಕತ್ ತಾಚೆಂ ಓಕುಲ್ ನಿಕ್ಳಾಯ್ಲ್ಯಾರ್ ಪಾವ್ತೆಂ. ತಾಕಾ ಕಾಂಯ್ ದಿಸ್ತೆಂನಾ. ಪುಣ್ ರೂಲ್ ತಿ ರೂಲ್.. ಕುಡ್ಡ್ಯಾಕೀ ದೊಳ್ಯಾಂಕ್ ವಸ್ತುರ್ ಬಾಂದಿಜೆಚ್! ಪುಣ್ ಮೊಡ್ಕಿ ಫುಟ್ಲಿ ನಾ ಮ್ಹಣ್ಯಾಂ.

ಆನಿಯೆಕ್ಲೊ ಬಿರ್ಮತ್ ಸಂಪಾದಕ್ ಪೆನ್ ಉಕ್ಲುಂಕ್ ತಾಂಕ್ ನಾತ್ಲೊ. ತಾಚ್ಯಾ ಹಾತಾಂತ್ ಬಯ್ತಾಡ್ ದಿಲ್ಯಾರ್ ಜಾತಾವೆ? ತಾಣೆಂ ಸುರ್ವೆರ್‍ ಬಯ್ತಾಡ್ ಪೊಶೆವ್ನ್‌‌ಚ್ ಸೂಂಬೆ ಮ್ಹಳೆಂ.

ಆತಾಂ ಅಕ್ರೇಕ್ ಉರ‍್ಲ್ಲೊ ಸಂಪಾದಕ್- ಆಪ್ಲ್ಯಾ ಆಮ್ಶ್ಯಾ ತಿಕ್ಸ್ಯಾ ಸಂಪಾದಕೀಯಾಂನಿ ಬಾರಿಚ್ ಫಾಮಾದ್ ಜಾಲ್ಲೊ. ತಾಚ್ಯಾ ದೊಳ್ಯಾಂಕ್ ವಸ್ತುರ್ ಬಾಂದುನ್ ಹಾತಾಂತ್ ಬಯ್ತಾಡ್ ದೀವ್ನ್ ಧಾಡ್ಲೆಂಚ್. ಹಾಣೆಂ ಚಲ್ಚಿ ರೀತ್ ಪಳಯ್ತಾನಾ ಮಾತಿಯೆಚಿ ಮೊಡ್ಕಿ ಸೊಡ್ಯಾಂ ಹೊ ತಾಂಬ್ಯಾಚೆಂ ಭಾಣ್‍ಯೀ ಫುಟಯ್ತ್ ಮ್ಹಣ್ ಲೆಕಾಂ ಘಾಲ್ಲಿಂ ಥೊಡ್ಯಾಂನಿ. ಪುಣ್ ಸಾಸ್ಪೊನ್ ಸಾಸ್ಪೊನ್ ಮೊಡ್ಕೆಚ್ಯಾ ಲಾಗಿಂ ಪಾವ್‍ಲ್ಲ್ಯಾ ತಾಣೆಂ ಬಯ್ತಾಡ್ ವಾಂಕ್ಡೆಂ ಉಬ್ರಾಯಿಲ್ಲ್ಯಾನ್ ಬಗ್ಲೆನ್ ರಾವ್‍ಲ್ಲ್ಯಾ ವರ್ಗಣಿ ಜಮಯ್ತೆಲ್ಯಾ ಎಕಾ ಪಾಪ್ ಚೆಡ್ಯಾಚ್ಯಾ ಮಾಂಡ್ಯಾಕ್‍ಚ್ ಲಾಗ್ಲೆಂ. ಮಾರ್ ಸಾರ್ಕೊ ಲಾಗಾನಾತ್‍ಲ್ಲ್ಯಾನ್ ಬಚಾವ್. ತರಿಕೀ ಕಾತ್ ಫುಟೊನ್ ರಗತ್ ದೆಂವೊಂಕ್ ಲಾಗ್‍ಲ್ಲ್ಯಾ ತಾಕಾ ತಕ್ಶಣ್ ಅಂಬುಲೆನ್ಸಾರ್ ಆಸ್ಪತ್ರೆಕ್ ವರ್ಚಿ ವಿಲೆವಾರಿ ಕೆಲಿ. ಆನಿ ಎಂಬುಲೆನ್ಸಾಕ್ ಪರತ್ ಯೇಂವ್ಕ್ ಸಾಂಗ್ಲೆಂ. ತಿತ್ಲ್ಯಾಕ್ ಹೊ ಸ್ಪರ್ಧೊ ರದ್ ಕೆಲೊ.

ಯೆವ್ಶಿಲ್ಯಾನ್ ಬೊಬೆಕ್ ದೊಳ್ಯಾಂಚೆಂ ವಸ್ತುರ್ ಸುಟಯಿಲ್ಲ್ಯಾ ಸಂಪಾದಕಾಕ್ ಮಾತ್ರ್ ಅಜ್ಯಾಪ್ ಭೊಗ್‍ಲ್ಲೆಂ. ತೊ ಆಪ್ಣಾಯಿತ್ಲ್ಯಾಕ್ ಸ್ವವಿಮರ್ಸೊ ಕರಿಲಾಗ್ಲೊ- “ಪೂರಾಯ್ ಪತ್ರಾಂಕ್ ಜಾಯ್ರಾತಾಂ ದೀವ್ನ್, ಮ್ಹಜ್ಯಾ ಪತ್ರಾಕ್ ಮಾತ್ರ್ ದೀನಾತ್‌ಲ್ಲ್ಯಾ ತ್ಯಾ ಜಾಯ್ರಾತ್ ಕಂಪ್ಣೆಚ್ಯಾ ಮಾಲಿಚ್ಯಾ ಮಾಂಡ್ಯಾಕ್ ಮ್ಹಣ್ ನೆ ಹಾಂವೆಂ ಬಯ್ತಾಡ್ ಉಬ್ರಾಯಿಲ್ಲೆಂ. ಚುಕೊನ್ ಅಶೆ ಕಶೆಂ ಜಾಲೆಂಗಾಯ್?”

ಆತಾಂ ಅಕ್ರೇಕ್- ಸರ್ವ್ ಕೊಂಕ್ಣಿ ಸಂಗ್ ಸಂಸ್ತ್ಯಾಂಚ್ಯಾ ಹುದ್ದೆದಾರಾಂಕ್-ಮ್ಯೂಸಿಕಲ್ ಚೆಯರ್ ಸ್ಪರ್ದೊ:

ಕೊಂಕ್ಣಿ ಸಾಹಿತ್ಯ್, ಕಲಾ, ಸಂಸ್ಕೃತಿ ಹ್ಯಾ ಸರ್ವ್ ಸಂಗ್ ಸಂಸ್ತಾಂಚ್ಯಾ ಹುದ್ದೆದಾರಾಂಕ್, ಪದಾದಿಕಾರಿಂಕ್, ಸಂಚಾಲಕಾಂಕ್ ಹೊ ಸ್ಪರ್ದೊ ಮಾಂಡುನ್ ಹಾಡ್‍ಲ್ಲೊ. ಮ್ಯೂಸಿಕ್ ವಾಜ್ತಾನಾ ಸರ್ಕಲಾರುಪಾರ್ ಮಾಂಡ್‍ಲ್ಲ್ಯಾ ಕದೆಲಾಂಭೊಂವ್ತಿಂ ಹಾಣಿಂ ಸರ್ವಾಂನಿ ಧಾಂವ್ಚೆಂ, ಮ್ಯೂಸಿಕ್ ರಾವ್ತಾನಾ ಖಂಯ್ಚ್ಯಾ ತರೀ ಎಕಾ ಕದೆಲಾರ್ ಬಸ್ಚೆಂ. ಕದೆಲ್ ಮೆಳನಾತ್ಲೊ ಖೆಳಾಥಾವ್ನ್ ಭಾಯ್ರ್. ಎಕೆಕಾ ಸುತ್ತುಕ್ ಎಕೆಕ್ ಕದೆಲ್ ಉಣೆಂ ಜಾತಾ. ಹೊ ಸ್ಪರ್ದ್ಯಾಚೊ ನೇಮ್.

ಪುಣ್ ಸ್ಪರ್ದೊ ಸುರ್ವಾತ್ಚ್ಯಾ ಪಯ್ಲೆಂಚ್ ಏಕ್-ದೋಗ್ ಸಾಹಿತಿ “ಆಮಿಂಯ್ ಕೊಂಕ್ಣಿ ಲೇಖಕ್ ಆಮ್ಕಾಂಯ್ ಧರಾ ಲೆಕಾಕ್.. “ಮ್ಹಣ್ ಕೊಕ್ಕೆಂ ಉಲಯ್ಲಾಗ್ಲೆ. ಪುಣ್ ಸಂಗ್ ಸಂಸ್ತ್ಯಾಂಚಿಂ ಬ್ಯಾನೆರಾಂ ಬಾಂದುಂಕ್ ಖಾಂಬೆ ಪುರ್ಚ್ಯಾ ಎಕ್ಲ್ಯಾನ್ “ತುಮಿ ಲೇಖಕ್ ದೆಕುನ್ ದೊರಿ ದೀವ್ನಾಯೆ ಸುರುಚ್. ಆತಾಂ ಆಮ್ಚ್ಯಾ ಕದೆಲಾಕ್ ಸಂಚಿಕಾರ್ ಹಾಡುಂಕ್ ಆಯ್ಲ್ಯಾತ್ ಗಿ? ತುಮಿ ಕಿತೆಂ ಆಸ್ಲ್ಯಾರೀ ಬರಂವ್ಕ್ ಲಾಯೆಕ್. ಉಲಂವ್ಕ್ ನ್ಹಂಯ್. ತೋಂಡ್ ಧಾಂಪುನ್ ತಾಳಿಯೊ ಪೆಟಾ!” ಮ್ಹಣ್ ಧಮ್ಕಿ ಘಾಲ್ಲ್ಯಾನ್ ತೆ ಥಂಡ್ ಪಡ್ಲೆ.

ಸ್ಪರ್ಧೊ ಸುರ್ವಾತ್ಲೊ. ಕಿತೆಂ ಮಜೆದಾರ್ ಸ್ಪರ್ದೊ! ಕಿತೆಂ ತಾಳಿಯಾಂಚೊ ಆವಾಜ್! ಅಕ್ರೇಕ್ ತೇಗ್ ಹುದ್ದೆದಾರ್ ಆನಿ ದೋನ್ ಕದೆಲಾಂ ಉರ್ಲಿಂ. ಹ್ಯಾ ತೆಗಾಂನಿಯ್ ಖಂಯ್ಚ್ಯಾಯ್ ರಿತಿಚಿ ಲಾಬಿ ನಾಸ್ತಾನಾ ಆಪ್ಲಿಂ ಕದೆಲಾಂ ಸಾಂಬಾಳ್‍ಲ್ಲಿಂ ಹೆಂಚ್ ಪಯ್ಲೆಪಾವ್ಟಿಂ!

ಸಂಗೀತ್ ವಾಜ್ಲೆಂ.. ಹುದ್ದೆದಾರಾಂನಿ ಕದೆಲಾಭೊಂವ್ತಿಂ ಭೊಂವಾಡೊ ಕಾಡುಂಕ್ ಸುರ್ವಾತ್ಲೊ.

ಏಕ್.. ದೋನ್.. ತೀನ್… ಸಂಗೀತ್ ರಾವ್ಲೆಂಚ್!

ದೋಗ್ ಬಸ್ಲೆ ಎಕ್ಲೊ ಫಸ್ಲೊ!

ಹ್ಯಾ ಕದೆಲ್ ಮೆಳಾನಾತ್ಲ್ಯಾ ಮಾನೆಸ್ತಾಕ್ ರಾಗಾನ್ ಸಂಕಡ್. ಆಪುಣ್ ದೊ-ದೋನ್ ಸಂಸ್ತ್ಯಾಂಚೊ ಪರ್ಮನೆಂಟ್ ಹುದ್ದೆದಾರ್; ಮಾತ್ರ್ ನ್ಹಂಯ್ ಏಕ್ ಪಾವ್ಟಿಂ ಕಾರ್ಯದರ್ಶಿ ತರ್ ಆನಿಯೆಕಾ ಅವ್ದೆಕ್ ಅಧ್ಯಕ್ಶ್, ಪರತ್ ಆನಿಯೆಕಾ ಆವ್ದೆಕ್ ಕಾರ್ಯದರ್ಶಿ! ಅಶೆಂ ಆಸ್ತಾಂ ಅಪ್ಣಾಕ್‍ಚ್ ಕದೆಲ್ ಲಾಬ್ಲೆಂ ನಾ ಮ್ಹಳ್ಯಾರ್? ಬಸ್ಚೆಂ ಸೊಡ್ಯಾಂ, ಕದೆಲ್ ನಾಸ್ತಾನಾ ಉಬೊ ಸಯ್ತ್ ರಾವಾನಾತ್ಲೊ ಮ್ಹನಿಸ್ ತೊ. ವೊಗೊ ರಾವತ್ ಗಿ? ರಾಗಾನ್ ಬಗ್ಲೆಚೆಂ ಕದೆಲ್ ಕಾಡ್ನ್ ಅನಿಯೆಕ್ಲ್ಯಾಚ್ಯಾ ಹರ್ದ್ಯಾಕ್ ಮಾರ್ಲೆಂಚ್.

ಕದೆಲಾಚೊ ಏಕ್ ಪಾಂಯ್ ಬಳಾನ್ ಲಾಗೊನ್ ಮುಕ್ಲ್ಯಾಚೊ ಕಾನ್ ಪಿಂಜ್ಲೊ. ಥೊಡ್ಯಾಂನಿ ಯೇವ್ನ್ ಪರಿಗತ್ ನಿತ್ಳಾಯ್ಲಿ ಮ್ಹಣ್ಯಾಂ. ಕಾನ್ ಪಿಂಜ್‍ಲ್ಲ್ಯಾಕ್ ಎಂಬುಲೆನ್ಸಾರ್ ಘಾಲುನ್ ಪರತ್ ಅಸ್ಪತ್ರೆಕ್ ಧಾಡ್ಲೆಂ. ಹೊಯ್ ಸ್ಪರ್ದೊ ರದ್ದ್ ಜಾಲೊ.

ಪೆಂಕ್ಡಾಕ್ ಹಾತ್ ಧರುನ್ ಹೆಂ ಪೂರಾ ಪಳವ್ನ್ ಆಸ್‍ಲ್ಲೊ, ಸುರ್ವೆರ್ ಕೊಕ್ಕೆಂ ಉಲಯಿಲ್ಲೊ ಲೇಕಕ್ ಎಕ್ಲೊ ಆಪ್ಣಾಯಿತ್ಲ್ಯಾಕ್ ಕುಶ್ ಪಾವಾಲಾಗ್ಲೊ

“ಮ್ಹಜೆಂ ಉತರ್ ಆಯ್ಕನಾತ್ಲ್ಯಾ ಅಸಲ್ಯಾಂಕ್ ಕಾನ್ ಆಸ್ಲ್ಯಾರ್ ಕಿತೆಂ ನಾತ್ಲ್ಯಾರ್ ಕಿತೆಂ?” .

ಅಕ್ರೇಕ್ ಸಮಾರೋಪಾಲೆಕಾರ್ ಆಯ್ಚ್ಯಾ ಸ್ಪರ್ದ್ಯಾಚಿ ಸಮೀಕ್ಶ್ಯಾ ಕರುಂಕ್ ನಮಿಯಾರ್ಲೆಲ್ಯಾ ವಿಮರ್ಶಕಾಚೆಂ ಉಲವ್ಪ್ ಸುರು ಜಾಲೆಂ –

“ಮೊಗಾಳ್ ಲೇಖಕಾಂನೊ ತುಮಿ ದೊರಿ ವೊಡ್ಚ್ಯಾಂತ್ ಹುಶಾರ್. ತಶೆಂ ಮ್ಹಣ್ ಆಪ್ಲ್ಯಾ ಆನಿ ಕೊಂಕ್ಣಿ ಮಾಯೆಚ್ಯಾ ಭಲಾಯ್ಕೆವಿಶಿಂಯ್ ಇಲ್ಲಿ ಚಿಂತಾ ಕರಾ. ಆನಿ ಖೆಳಾಚ್ಯಾ ಆಯೋಜಕಾಂನೊ ಮುಕ್ಲ್ಯಾ ವರ್ಸಾ ಝೆಂಜ್ರೊಂವ್ಚ್ಯಾ ದೊರಿಯೆಬದ್ಲಾಕ್ ಲೇಖಕಾಂಕ್ ಕಬಡ್ಡಿ ಸ್ಪರ್ದೊ ದವರಾ.. ಕಿತ್ಯಾಕ್ ಮ್ಹಳ್ಯಾರ್ ಎಕಾಮೆಕಾ ಪಾಂಯ್ ವೊಡ್ಚ್ಯಾಂತೀ ತಾಂಚೆ ಉಕಲ್ಲಲೆ ಹಾತ್! ಆನಿಯೇಕ್ ವಿನತಿ, ಸ್ಪರ್ದ್ಯಾ ಪಯ್ಲೆಂ ಹಾತಾಂಚ್ಯೊ ನಾಕ್ಶ್ಯೊ ಕಾಡುಂಕ್ ಸಾಂಗಾ.

ಆನಿ ತುಮಿ ಸಂಪಾದಕಾಂನೊ, ತುಮಿ ಪೆನ್ ಹಾತಿಂ ಘೆತ್ಲ್ಯಾರ್ ತೆಂ ಲೇಖನ್ ಲಗಡ್ ಕಾಡ್ಚಿ ಕಾತರ್ ಜಾತಾ ಆನಿ ಬಯ್ತಾಡ್ ದಿಲ್ಯಾರ್ ಮಾಂಡೊ ಮಾರ್ಚೆಂ ಹಾತೆರ್ ಜಾತಾ. ಫುಡೆ ಅಶೆಂ ಜಾಂವ್ಕ್ ನಜೊ. ಯೆಂವ್ಚ್ಯಾ ವರ್ಸಾ ಅಶೆಂ ದೊಳ್ಯಾಂಕ್ ವಸ್ತುರ್ ಬಾಂದುನ್ ಮಾಂಡೊ ಫುಟಂವ್ಕ್.. ಸ್ಸೊರಿ.. ಮೊಡ್ಕ್ಯೊ ಫುಟಂವ್ಕ್ ಧಾಡ್ಚ್ಯಾ ಖೆಳಾಬದ್ಲಾಕ್ ದೊಳೆ ಉಗ್ತಾಂವ್ಚ್ಯಾ ತಸಲೆ ಖೆಳ್ ಮಾಂಡುನ್ ಹಾಡ್ಲ್ಯಾರ್ ವರ್ಗಣಿದಾರ್ ದಾದೊಸ್ ಜಾತಿತ್.

ಆನಿ ತುಮಿ ಹುದ್ದೆದಾರಾಂನೊ, ಪದಾದಿಕಾರಿಂನೊ.. ಕದೆಲ್ ಮ್ಹನ್ಶ್ಯಾನ್ ಬಸೊಂಕ್ ವಾಪರ್ಚಿ ಎಕ್ ವಸ್ತ್. ತಿ ಕುಲ್ಯಾಪಂದಾ ಅಸಜೆ ಶಿವಾಯ್ ಆಪಾಪ್ಲ್ಯಾ ತಕ್ಲೆರ್ ವಾವಂವ್ಚಿ ನ್ಹಂಯ್. ಕದೆಲಾಚೊ ಹೊರ್ಬೊಸ್ ಅಸೊಚ್ ಮುಕಾರ್ ಗೆಲ್ಯಾರ್ ತುಮ್ಚಿ ಮುಕ್ಲಿ ಪಿಳ್ಗಿ ಜಲ್ಮಲ್ಲ್ಯಾ ಕೂಡ್ಲೆ ಆಪ್ಣಾಕ್ ಪಾಳ್ಣೆಂ ನಾಕಾ ಕದೆಲ್ ದಿಯಾ ಮ್ಹಣ್ ಉಪಾಸಾ ಹರ್ತಾಳ್ ಕರುಂಕ್ ಆಸಾ. ಕೊಂಕ್ಣಿ ಮಾನ್ಯಾತಾ ದೀಸ್ ಅಶೆಂ ಪೆರ್ಚಿಕಟ್ಟುನ್ ಕೊಂಕ್ಣೆಚೊ ಮಾನ್-ನಶ್ಟಾ ದೀಸ್ ಕರಿನಾಕಾತ್; ಬಗಾರ್ ಮಾನ್ ವಾಡಂವ್ಚಿಂ ಕಾಮಾಂ ಹಾತಿಂ ಘೆಯಾ.. ಹಾಂವೆಂ ಸಾಂಗ್‍ಲ್ಲ್ಯಾಂತ್ ಕೊಣಾಕೀ ಬೆಜಾರ್ ಜಾಲ್ಯಾರ್ ತ್ಯಾ ಖಾತಿರ್ ಹಾಂವ್ ಪಶ್ಚಾತ್ತಾಪ್ ಪಾವಾನಾ.” ಮ್ಹಣ್ ಆಪ್ಲೆಂ ಖಡಕ್ಕ್ ಉಲವ್ಪ್ ರಾವಯ್ತಾನಾ ತಾಳಿಯಾಂಚೊ ಆವಾಜ್.

ಅಕ್ರೇಕ್ ಏಕ್ “ಗ್ರೂಪ್ ಫೊಟೊ” ಕಾಡುಂಕ್ ಸರ್ವಾಂಕ್ ಲಾಗಿ ಆಪಯ್ಲೆಂ. ಥಂಯ್ ಥಂಯ್ ರಾವೊನ್ ತೆಂಡೆಲ್ ಮೀಟಿಂಗ್ ಕರ್ಚ್ಯಾ ಹಾಂಚೊ ಏಕ್ ಗ್ರೂಪ್ ಕರಿಜೆ ತರ್ ಬೊಬಾಟುನ್ ಬೊಬಾಟುನ್ ಆಯೋಜಕಾಚೊ ತಾಳೊ ಪಡ್ಲೊ. ಕಶೆಂಯ್ ಲಾಗಿಂ ಹಾಡ್ಲೆಂ. ಪುಣ್ ಎಕಾ ಫ್ರೇಮಾಭಿತರ್ ಹಾಡುಂಕ್ ಫೊಟೊಗ್ರಾಫರಾಕ್ ಬಾರಿಚ್ ಕಶ್ಟ್ ಮಾರ್ಲೆ. ಕಿತ್ಲೆಂ ಪಾಟಿಂ ಗೆಲ್ಯಾರೀ , ಲೆನ್ಸ್ ಎಜಸ್ಟ್ ಕೆಲ್ಯಾರೀ ಹೆ ಎಕಾ ಫ್ರೇಮಾಂತ್ ಯೇನಾಂತ್.. ಅಕ್ರೇಕ್ ತೊಯ್ ತಕ್ಲಿ ವಿರಾರ್ ಜಾವ್ನ್ ಬೋಬ್ ಮಾರಿಲಾಗ್ಲೊ. ತಾಚಿ ಬೋಬ್ ಭೊಂವ್ತಿಂಚ್ಯಾ ಗುಡ್ಯಾಕ್ ಆಪ್ಟೊನ್ ಪ್ರತಿಧ್ವನಿತ್ ಜಾವ್ನ್ ಅಶಿ ಆಯ್ಕಾಲಾಗ್ಲಿ-“ಇಲ್ಲೆಂ ಹಾಸಾ.. ಹಾಸಾ ಮಾನೆಸ್ತಾಂನೊ.. ಎಕಾಮೆಕಾ ಲಾಗಿಂ ಯೆಯಾ.. ಲಾಗಿಂ ಯೆಯಾ!!”

► ವಿಲ್ಸನ್ ಕಟೀಲ್

ಆಪ್ಲ್ಯಾ

“ಕಿತೆಂ ಜಾಯ್ ಆಸ್‌ಲ್ಲೆಂ ತುಕಾ?” ವಿಸಾರ್ಲೆಂ ಛಾಪ್ಕಾನ್ಯಾವಾಲ್ಯಾನ್. ಪ್ರೆಸ್ಸಾಚ್ಯಾ ಶೋಕೆಸಿಂತ್ ಆರ್ಶ್ಯಾಭಿತರ್ ಖಿಳಾಯಿಲ್ಲ್ಯಾ ವ್ಹಡ್ ವ್ಹಡ್ ಬುಕಾಂಚ್ಯಾ ತೋಂಡ್ಪಾನಾಂಚಿಂ ಸೊಭಾಯ್ ಚಾಕೊನ್‌ಚ್ ಜಾಪ್ ದಿಲಿ ಮಾನಾಯಾನ್-

“ಮ್ಹಾಕಾ ಸಾಹಿತಿ ಜಾಯ್ಜೆ… ತೇಂಯ್ ಕೊಂಕ್ಣಿ ಸಾಹಿತಿ ಜಾಯ್ಜೆ! ಕಿತ್ಯಾಕ್ ಮ್ಹಳ್ಯಾರ್ ಕೊಂಕ್ಣೆಚೊ ಫುಡಾರ್ ಬರೊ ಆಸಾ… ಎಕಾ ಕುಶಿನ್ ಶಾಳೆಂನಿ ಕೊಂಕ್ಣಿ “ಪಾಠ” ಜಾತೇ ಆಸಾ. ದುಸ್ರ್ಯಾ ಕುಶಿಂನ್ ಯುನಿವರ್ಸಿಟಿಂತ್ ಕೊಂಕ್ಣಿ “ಪೀಠ” ಜಾಲೆಂ…ದೆಕುನ್ ಮ್ಹಾಕಾ ಕೊಂಕ್ಣಿ ಸಾಹಿತಿ ಜಾಯ್ಜೆ!”

ಕೊಂಕ್ಣಿ ಸಾಹಿತಿ ಮ್ಹಳ್ಳೆಂ ಉತರ್ ಆಯ್ಕಲ್ಲೆಂಚ್ ಪ್ರೆಸ್ಸಾಚ್ಯಾ ಧನಿಯಾಕ್ ಕಾಂಟ್ಯಾಂಚ್ಯಾ ಕದೆಲಾರ್ ಬಸ್‌ಲ್ಲ್ಲೊ ಅನ್ಭೊಗ್ ಜಾಲೊ. ಪುಣ್ ಮಾನಾಯ್ ಮುಕಾರುನ್ ಉಲಯ್ಲೊ –

“ದೆಕುನ್ ಮ್ಹಜೊಚ್ ಏಕ್ ಬೂಕ್ ಛಾಪ್ಚ್ಯಾ ವಿಶ್ಯಾಂತ್ ಉಲಂವ್ಕ್ ಆಯ್ಲಾಂ…” ಮ್ಹಣೊನ್ ಆಪ್ಲ್ಯಾ ಚಾಮ್ಡ್ಯಾಚ್ಯಾ ಬೆಗಾಥಾವ್ನ್ ಏಕ್ ಲ್ಹಾನ್ ಪೇಟ್ ಮೆಜರ್ ದವರ್ಲಿ. ಹಳೂ ತಿ ಉಗ್ತಿ ಕರುನ್ ಭಿತರ್ಲೆಂ ಭಾಂಗ್ರಾವರ್ಣಾಚೆಂ ಪೆನ್ ಆಪ್ಲ್ಯಾ ಹಾತಿಂ ಘೆತ್ಲೆಂ… ಸಿನೆಮಾಂನಿ ಹೀರೋಕ್ ಜಿವೆಶಿಂ ಮಾರುಂಕ್ ನಮಿಯಾರ್‌ಲ್ಲ್ಯಾ ಶಾರ್ಪ್ ಶೂಟರಾನ್ ಆಪ್ಲ್ಯಾ ಬ್ರಿಫ್ ಕೆಜಿಥಾವ್ನ್ ಗನ್ ಭಾಯ್ರ್ ಕಾಡ್‌ಲ್ಲ್ಲ್ಲೆಬರಿ!

ಪ್ರೆಸ್ಸಾಚ್ಯಾ ಮಾಲಿಕ್ ಉತ್ರಾಂಚ್ ಸುಟ್ಲಿನಾಂತ್… ಪುಣ್ ಹ್ಯಾ ಸಾಹಿತಿಥಂಯ್ ಉತ್ರಾಂಕ್ ಬೊರ್ಗೊಳ್‌ವೆ? ತೊ ಉಲವ್ನ್‌ಚ್ ಗೆಲೊ –

“ಜಾಣಾಂಯ್ ತುಂ ಹ್ಯಾ ಪೆನ್ನಾಕ್ ಕಿತ್ಲೆ ಹಜಾರ್ ಮ್ಹಣ್? ಆಸೊಂ…ತಿ ಗಜಾಲ್ ಆತಾಂ ನಾಕಾ. ತಿ ಮ್ಹಜ್ಯಾ ಬುಕಾಚ್ಯಾ ಪ್ರಸ್ತಾವನಾಂತ್ ಕೊಣಾಕಡೆ ಪುಣಿ ಬರಂವ್ಕ್ ಲಾಯ್ತಾಂ. ಆತಾಂ ವಿಶಯಾಕ್ ಯೆವ್ಯಾಂ… ಮ್ಹಜೊ ಏಕ್ ಬೂಕ್ ಛಾಪುಂಕ್ ಆಸಾ. ಏಕ್ ವ್ಹಡ್ ಕಾರ್ಯಕ್ರಮ್ ದವರುನ್, ತ್ಯಾ ವೆದಿರ್ ಕೊಂಕ್ಣಿ ಸಾಹಿತ್ಯಾಕ್ ಮ್ಹಜೆಂ ಆರ್ರಂಗೇಟ್ರಂ ಜಾಂವ್ಕ್ ಆಸಾ. ಆನಿ ತ್ಯಾ ದಬಾಜಿಕ್ ಕಾರ್ಯಾವೆಳಿಂ ಮ್ಹಜೊ ಬೂಕ್ ಉಗ್ತಾವಣ್ ಕರಿಜೆ. ಹಾಂ… ಸಾಂಗ್‌ಲ್ಲ್ಲೆಬರಿ ಕವರ್ ಪೇಜಿರ್ ಮ್ಹಜಿ ಹಿ ತಸ್ವೀರ್ ಛಾಪುಂಕ್ ಆಸಾ…” ಮ್ಹಣ್ ಎಕಾ ಲೊಕಾಟ್ಯಾಂತ್ಲಿ ತಸ್ವೀರ್ ಭಾಯ್ರ್ ಕಾಡ್ಲಿ ಮಾನೆಸ್ತಾನ್. ಪೆಂಕಡ್ ಮೊಡ್ಚ್ಯಾ ಗತಿಕ್ ಪಾವ್‌ಲ್ಲ್ಯಾ ಘಡಾಯ್ ಘಾಲ್ಲ್ಯಾ ಕೆಂಳ್ಬ್ಯಾಕ್ ಊದ್ ದಿಲ್ಲೆಬರಿ ಹಾಚ್ಯಾ ಖಾಡ್ಕೆಕ್ ಲಿಕ್ಣೆಚೊ ಊದ್ ದೀವ್ನ್ ಕಾಡ್‌ಲ್ಲಿ ತಸ್ವೀರ್ ತಿ. ಗುಂಡಾಯೆನ್ ಕಿತೆಂಗೀ ಚಿಂತುನ್ ಆಸ್‌ಲ್ಲ್ಲೆಬರಿ ನಟನ್ ಕರ್ಚಿ ಪೋಸ್! ಅಶೆಂ ಗುಂಡಾಯೆನ್ ಚಿಂತ್ಚೆಬರಿ ನಟನಾಚೆಂ ಪೋಸ್ ದೀಂವ್ಕ್ ಆಮ್ಚೆ ಕೊಂಕ್ಣಿ ಸಾಹಿತಿ ಖಂಯ್ಚ್ಯಾ ಫಿಲ್ಮ್ ಇನ್ಸಿಟ್ಯೂಟಾಂತ್ ಶಿಕ್ತಾತ್‌ಗಾಯ್ ಮ್ಹಣ್ ಚಿಂತುಂಕ್ ಪಡ್‌ಲ್ಲ್ಯಾ ಪ್ರೆಸ್ಸಾಚ್ಯಾ ಧನಿಯಾನ್, ಆಪ್ಲೆಂ ಮಾವ್ನ್ ಮೊಡುನ್ ವಿಚಾರ್ಲೆಂ –

“ತುಜೆಂ ನಾಂವ್ ಕಿತೆಂ ಮಾನೆಸ್ತಾ..?”

“ಪೀಟರ್… ತೋಮಸ್ ಪೀಟರ್ ಡಿಸೋಜಾ, ಜಲ್ಮಲ್ಲೊ ಘಾಟಾರ್, ವಾಡ್‌ಲ್ಲೊಂ ಹಂಪನ್ ಕಾಟ್ಯಾರ್, ಆದಿಂ ಘಾಟ್ಕೋಪಾರ್ ಅತಾಂ ದೊಹಾಖಟಾರ್… ಅಶೆಂ ಮ್ಹಜೆಂ ನಾಂವ್ ಆನಿ ಗಾಂವಾಂಚೆಂ ನಾಂವ್ ಮ್ಹಜ್ಯಾ ಬುಕಾಚ್ಯಾ ಪಯ್ಲ್ಯಾ ಪಾನಾರ್ ಛಾಪುನ್ ಯೇಜೆ” ಮ್ಹಣಾಲೊ.

“ಹೆಂ ಕಾಲೆಂ ಸಾಯ್ಬಾ… ನಾಂವ್ ವಿಚಾರ್ಲ್ಯಾರ್ ಬಸ್ಸಾಚ್ಯಾ ಕಂಡಕ್ಟರಾಬರಿ ಗಾಂವಾಂಚಿಂ ನಾಂವಾಂಯ್ ಸಾಂಗ್ತಾಯ್ ಪ್ರೆಸ್ಸಾಚ್ಯಾ ಮಾಲಿನ್ ಎದೊಳ್‌ಚ್ ಹಾಚೆಂ ವ್ಯಕ್ತಿತ್ವ್ ಮೆಜುನ್ ಜಾಲ್ಲೆಂ.

“ಕೊಂಕ್ಣಿ ಸಾಹಿತಿಂಕ್ ನಾಂವಾಂಸಾಂಗಾತಾ ಗಾಂವೀ ಬಾರಿ ಗರ್ಜೆಚೆ. ತೂಂ ಕಾಲೆಂ ಮ್ಹಣ್ಟಾಯ್ ಧನಿಯಾ… ಏಕ್ ಘಡಿತ್ ಸಾಂಗ್ತಾಂ ಆಯ್ಕ್… ಮ್ಹಜೊ ಎಕ್ಲೊ ಒಳ್ಕಿಚೊ ಕೊಂಕ್ಣಿ ಸಾಹಿತಿ ಪಯ್ಣಾರ್ ಆಸ್ತಾನಾ ಟೆರರಿಸ್ಟಾಂನಿ ತೊ ಆಸ್‌ಲ್ಲೆಂ ವಿಮಾನ್ ಹೈಜಾಕ್ ಕರುನ್ ಖಂಯ್ಚ್ಯಾಗಿ ಗಾಂವಾಂತ್ ಏಕ್ ದೋನ್ ಗಂಟೆ ರಾವಯಿಲ್ಲೆಂ. ಹ್ಯಾ ಘಡಿತಾ ಉಪ್ರಾಂತ್ ತೊ ಆತಾಂ ತಾಚೆಂ ನಾಂವ್, ಗಾಂವಾಂಸಾಂಗಾತಾ ವಿಮಾನ್ ಹೈಜಾಕ್ ಜಾಲ್ಲ್ಯಾ ಗಾಂವಾಚೆಂಯ್ ನಾಂವ್ ಘಾಲ್ತಾ ಗೊತ್ತಾಯೆ ತುಕಾ.!”

ಮಾನಾಯಾಚಿ ಜಾಪ್ ಆಯ್ಕೊನ್ ಪ್ರೆಸ್ಸಾಚ್ಯಾ ಧನಿಯಾಕ್ ಹಾಸ್ಚೆಂಗೀ ರಡ್ಚೆಂಗೀ ಕಳೊಂಕ್ ನಾ. ಹಾಕಾ ವೆಗ್ಗಿಂ ಧಾಡ್ಚ್ಯಾ ಇರಾದ್ಯಾನ್ ವಿಚಾರ್ಲೆಂ ತಾಣೆಂ –

“ಸಾಂಗ್‌ಲ್ಲೆಬರಿ ಖಂಯ್ಚೊ ಬೂಕ್ ಛಾಪುಂಕ್ ಆಸಾ ತುಕಾ?…ಕವಿತಾಗಿ, ಕಾಣಿಯೊಗಿ, ಲೇಖನಾಂಗಿ?”

ತಕ್ಶಣ್ ಕಿತೆಂಗೀ ಉಡಾಸ್ ಆಯಿಲ್ಲೆಬರಿ ವಿಚಾರಿಲಾಗ್ಲೊ ಮಾನಾಯ್ –

“ಹಾಂ ಹೆಂಚ್ ವಿಚಾರುಂಕ್ ಜಾಯ್ ಆಸ್‌ಲ್ಲೆಂ ಮ್ಹಾಕಾ… ಖಂಯ್ಚೊ ಕಾಡ್ಲ್ಯಾರ್ ಬರೊ? ಖಂಯ್ಚೊ ಬೂಕ್ ಕಾಡ್ಲ್ಯಾರ್ ಚಡ್ ಲೊಕಾಮೊಗಾಳ್ ಜಾವ್ಯೆತ್?”

“ಮ್ಹಳ್ಯಾರ್ ತುವೆಂ ಎದೊಳ್ ಬೂಕ್ ಬರಂವ್ಕ್ ನಾಂಯ್ ಗಿ?” ಪ್ರೆಸ್ಸಾವಾಲ್ಯಾಕ್ ಅಜ್ಯಾಪ್.

“ನಾ ಧನಿಯಾ ಮಾರ್ಕೆಟ್ ಸ್ಟಡಿ ಕರಿನಾಸ್ತಾನಾ ಖಂಯ್ಚೊ ಮ್ಹಣ್ ಬರಂವ್ಚೊ?” ಮಾತ್ಶೆಂ ತೋಂಡ್ ಮುಕಾರ್ ಹಾಡ್ನ್ ಸಾಂಗಾಲಾಗ್ಲೊ ಮಾನಾಯ್. ಮುಸ್ಕಾರಾಕ್ ಥುಕ್ಚೆತಿತ್ಲೊ ರಾಗ್ ಆಯ್ಲೊ ಪ್ರೆಸ್ಸಾವಾಲ್ಯಾಕ್. ತರೀ ತೊ ದಾಕಯ್ನಾಶೆಂ ಮ್ಹಣಾಲೊ –

“ಅಳೆ ಸಾಯ್ಬಾ… ಕೊಂಕ್ಣೆಂತ್ ಎದೊಳ್ ಆಸ್‌ಲ್ಲ್ಯಾ ಸಾಹಿತಿಂಚಿ ಧೊಸ್‌ಚ್ ವಿಪ್ರೀತ್ ಜಾಲ್ಯಾ. ತೆ ಜಾವ್ನ್ ಬಿಜ್ನೆಸ್ ಕರಿನಾಂತ್, ಜಿಣಿಯೆಂತ್ ಉದ್ದಾರ್ ಜಾಯ್ನಾಂತ್. ಪುಣ್ ಕೊಂಕ್ಣೆಚ್ಯಾ ನಾಂವಾನ್ ದೋನ್ ಕಾಸ್ ಜೊಡ್ತೆಲ್ಯಾಂಕೀ ಆಡ್ ಪಾಂಯ್ ದಿತಾತ್.”

ಮೆಜಾವಯ್ಲ್ಯಾ ಬೊತ್ಲೆಂತ್ಲೆಂ ಏಕ್ ಘೊಟ್ ಉದಕ್ ಪಿಯೆವ್ನ್ ಪ್ರೆಸ್ಸಾವಾಲ್ಯಾನ್ ಮುಕಾರಿಲೆಂ –

“ನಾಕಾ ನಾಕಾ ಮ್ಹಳ್ಯಾರೀ ಆಪ್ಲ್ಯಾ ಬುಕಾಚೆ ಹಜಾರ್ ಕೊಪಿ ಪ್ರಿಂಟ್ ಕರ್ತಾತ್. ಇಲ್ಲೆ ಚಿಲ್ಲರ್ ಪಯ್ಶೆ ದೀವ್ನ್ ಪಾಂಯ್ಶಿಂ ಕೊಪಿ ವರ್ತಾತ್. ಆನಿ ಉರ್‌ಲ್ಲೆ ಪಯ್ಶೆ ಏಕ್ ದೋನ್ ದಿಸಾಂನಿ ಉರ್‌ಲ್ಲೆ ಕೊಪಿ ವರ್ತಾನಾ ದಿತಾಂ ಮ್ಹಣ್ ವೆತಾತ್. ಮಾಗಿರ್ ಪಾತ್ತೊಚ್ ಆಸಾನಾ ತಾಂಚೊ. ಅಶೆಂ ಕಿತ್ಲೆಗೀ ಕೊಪಿ ಹಾಂಗಾ ಗೊಡಾವ್ನಾಂತ್ ಕುಸ್ತಾತ್. ಹಾಣಿಂ ಪಯ್ಶೆ ದೀನಾತ್ಲ್ಯಾರೀ ವ್ಹಡ್ ನಾ. ತಾಂಚೆ ಬೂಕ್ ವೆಲ್ಯಾರ್ ಪುರೊ ಆಸ್‌ಲ್ಲೆಂ ಸಾಯ್ಬಾ… ಖಂಯ್ಚ್ಯಾ ಪುಣಿ ಕೊಂಕ್ಣಿ ಲಾಯ್ಭ್ರೆರಿಕ್ ಗೀ ವಾ ಮ್ಯೂಸಿಯಮ್ಮಾಕ್‌ಗೀ ದಾನ್ ದೀಂವ್ಕ್ ಮ್ಹಣ್ ವಿಚಾರ್ ಕೆಲ್ಯಾರ್ ತಾಂಕಾಂ ಬೂಕ್ ದಾನ್ ಘೆಜೆ ತರ್ ತೆ ಬೂಕ್ ದವರುಂಕ್ ಜಾಯ್ ಪಡ್ಚೆಂ ಬಿಲ್ಡಿಂಗ್ ಬಾಂದ್ಚೊ ಆಯ್ವಜ್ ಡೊನೇಶನ್ ದೀಜೆ ಖಂಯ್…!” ಭಿರ್ಮತ್ ತಾಣೆಂ ಕಪಾಲಾಚೊ ಘಾಮ್ ಪುಸ್ಲೊ. ತಕ್ಶಣ್ ತಾಕಾ ಸಮಾದಾನ್ ಕರ್ಚೆ ಬರಿ ಮಾನಾಯ್ ಉಲಯ್ಲೊ –

“ಅಳೆ ಧನಿಯಾ… ಹಾಂವ್ ಕಾಂಯ್ ತಸಲೊ ಕಾಂಜಿಪೀಂಜಿ ಮ್ಹನಿಸ್ ನ್ಹಂಯ್. ಪಯ್ಶ್ಯಾಂಕ್ ತುಂ ಖಂತ್ ಕರಿನಾಕಾ. ಆನಿ ಬರಂವ್ಚೀಯ್ ಮ್ಹಾಕಾ ಕಾಂಯ್ ಪಯ್ಶಿಲಿ ಗಜಾಲ್ ನ್ಹಂಯ್. ಭಾಯ್ಲ್ಯಾ ಗಾಂವಾಂತ್ ವ್ಹಡ್ ಕಾಮಾರ್ ಆಸಾಂ ಹಾಂವ್. ಮ್ಹಜ್ಯಾ ಹಾತಾಖಾಲ್ ಕಿತ್ಲೆಗೀ ಜಣ್ ರಾಯ್ಟರ್ಸ್ ಆಸಾತ್ ಗೊತ್ತಾಯೆ ತುಕಾ?”

“ಮ್ಹಳ್ಯಾರ್… ತುಂ ಭಾಯ್ಲ್ಯಾ ಗಾಂವಾಂತ್ ಖಂಯ್ಚ್ಯಾಯ್ ಸಾಹಿತ್ ಸಂಗಾಚೊ ಅಧ್ಯಕ್ಶ್‌ಗಿ?”

“ತಶೆಂ ನ್ಹಂಯ್ ಧನಿಯಾ… ರಾಯ್ಟರ್ಸ್ ಮ್ಹಳ್ಯಾರ್ ಲೇಕ್ ಪಾಕ್ ಬರವ್ನ್ ದವರ್ಚೆ..”

“ಅಳೆ ಮಾನೆಸ್ತಾ.. ತೆಂ ಲೇಕ್ ಪಾಕ್ ಬರಂವ್ಚೆಂ, ಬಸ್ಸಾರ್ ಗೇಟ್ ಪಾಸ್ ಬರಂವ್ಚೆಂ, ಪೊಲಿಸ್ ಸ್ಟೆಶನಾಂತ್ ಮುಚ್ಚಳಿಕೆ ಬರಂವ್ಚಿ.. ಹಾಂಕಾಂ ಆನಿ ಸಾಹಿತ್ಯಾಕ್ ಫರಕ್ ಆಸಾ ಸಾಯ್ಬಾ ತಾಪ್‌ಲ್ಲ್ಯಾ ಪ್ರೆಸ್ಸಾಚ್ಯಾ ದನಿಯಾಚಿಂ ಉತ್ರಾಂಯ್ ಮಾತ್ಶಿಂ ಹುನೊಂನಿ ಆಸ್‌ಲ್ಲಿಂ. ಪುಣ್ ಹೆಂ ಸಾಹಿತಿ ಜಾಂವ್ಚ್ಯಾ ಮೂಡಾರ್ ಆಸ್ಚ್ಯಾ ಮಾನಾಯಾಚ್ಯಾ ಬೊಡಾಕ್ ರಿಗಜೆ ನೆ.. ತೊ ತಾಚೆಂಚ್ ಪೆಂಪಾರೆಂ ವಾಜಯ್ಲಾಗ್ಲೊ –

“ಅಳೆ ಧನಿಯಾ…ತುಂ ಕಾಂಯ್ ಹೆಂ ಲೇಕ್ ಪಾಕ್ ಬರಂವ್ಚ್ಯಾಂಕ್ ಹಲ್ಕ್ ಕರಿನಾಕಾ. ಬರಂವ್ಚೆ ಪೂರಾಯ್ ಸಾಹಿತಿ ಮ್ಹಣ್ ಥೊಡ್ಯಾ ತೆಂಪಾ ಆದಿಂ ಎಕಾ ಅಕಾಡೆಮಿಚ್ಯಾ ಸಾಂದ್ಯಾನ್ ಸಾಂಗ್‌ಲ್ಲೆಂ ಆಯ್ಕೊಂಕ್ ನಾಯೆ ತುವೆಂ?”

ಭಿರ್ಮತ್ ಪ್ರೆಸಾಚ್ಯಾ ಮಾಲಿಚಿ. ತಾಣೆಂ ಆಪ್ಲೊ ಪುರಾಯ್ ರಾಗ್ ಲಿಪವ್ನ್ ಹ್ಯಾ ಮಾನೆಸ್ತಾಕ್ ಸಮ್ಜಂವ್ಕ್ ಪ್ರೇತನ್ ಕೆಲೆಂ –

“ಅಳೆ ಸಾಯ್ಬಾ… ಸಾಹಿತ್ ಮ್ಹಳ್ಯಾರ್ ಏಕ್ ಗಂಬೀರ್ ಕ್ರಶಿ. ತಾಕಾ ಸಾಮಾಜಿಕ್ ಜವಾಬ್ದಾರಿ ಆಸಾ. ಸಾಹಿತಿ ಜಾಲ್ಲ್ಯಾಂನಿ ಸುಕ್ಶಿಮ್ ರಿತಿನ್ ಪಾರ್ಕುಂಕ್ ಜಾಯ್. ಮಾತ್ರ್ ನ್ಹಂಯ್ ತಾಕಾ ವಾಚಪ್ ಗರ್ಜೆಚೆಂ..”

“ಆಸಾ… ಆಸಾ… ನಂಬರ್ ನೋಟ್ ಕರ್ ಧನಿಯಾ..” ಮಾನಾಯಾನ್ ಮಧೆಂಚ್ ಜೀಬ್ ಘಾಲಿ. ಕಿತೆಂ ಮ್ಹಣ್ ಕಳನಾಸ್ತಾಂ ವಿಚಾರ್ಲೆಂ ಪ್ರೆಸ್ಸಾವಾಲ್ಯಾನ್ –

“ಖಂಯ್ಚ್ಯಾಚೆಂ ನಂಬರ್?”

“ವಾಟ್ಸಾಪ್ ನೆ… ಆಸಾ… ಆಸಾ…”

“ಅರೆ ಓ ಸಾಯ್ಬಾ.. ವಾಟ್ಸಾಪ್ ನ್ಹಂಯ್… ವಾಚಪ್… ವಾಚಪ್ ಗರ್ಜೆಚೆಂ ಮ್ಹಳೆಂ ಹಾಂವೆಂ” ಪ್ರೆಸ್ಸಾವಾಲ್ಯಾಕ್ ಬಿ.ಪಿ. ಚಡ್ಲಿ.

“ಯೂ ಮೀನ್ ರೀಡಿಂಗ್..?” ಅಪುಟ್ ಕೊಂಕ್ಣಿ ಸಾಹಿತಿಬರಿ ಇಂಗ್ಲೆಜಾನ್ ವಿಚಾರ್ಲೆಂ ತಾಣೆಂ. ಪ್ರೆಸ್ಸಾವಾಲ್ಯಾನ್ ತಕ್ಲಿ ಹಾಲಯ್ಲಿ.

“ವಾಚ್ಪಾಂತ್ ಹಾಂವ್ ನಂಬರ್ ವನ್! ಹರ್ಯೆಕಾ ಆಯ್ತಾರಾ ಆಮ್ಚ್ಯಾ ಇಗರ್ಜೆಂತ್ ಪಯ್ಲೆಂ ವಾ ದುಸ್ರೆಂ, ದೊನಾಂತ್ ಏಕ್ ವಾಚಪ್ ಹಾಂವೆಂಚ್ ವಾಚ್ಚೆಂ!” ಮಾನಾಯಾನ್ ಗತ್ತಾನ್ ಮ್ಹಣ್ತಾನಾ ಪ್ರೆಸ್ಸಾವಾಲ್ಯಾನ್ ಮೆಜಾರ್ ಆಸ್‌ಲ್ಲೆಂ ಪೇಪರ್ ವೇಯ್ಟ್ ಕಾಡ್ನ್ ಹ್ಯಾ ಮಾನಾಯಾಚ್ಯಾ ತಕ್ಲೆಕ್ ಮಾರುಂಕ್ ಏಕ್ ಬಾಕಿ! ಹಾಕಾ ಭಾಯ್ರ್ ಧಾಡ್ಚ್ಯಾ ಉದ್ದೇಶಾನ್ ಮ್ಹಣಾಲಾಗ್ಲೊ ತೊ –

“ಸಾಯ್ಬಾಂನೊ… ಅಮ್ಚೆ ಪ್ರೆಸ್ಸಾಕ್ ಸದ್ದ್ಯಾಕ್ ಪುರ್ಸತ್ ನಾ… ಫಿರ್ಗಜ್ ಪತ್ರಾಂಚಿಂಚ್ ಎಕ್ ರಾಸ್ ಕಾಮಾಂ ಆಸಾತ್. ದುಸ್ರೆಂ ಖಂಯ್ಚೇಂಯ್ ಪ್ರೆಸ್ ಆಸ್ಲ್ಯಾರ್ ಪಳೆ.

ದಯಾಕರುನ್ ಬೆಜಾರ್ ಕರಿನಾಕಾ… ದೇವ್ ಬರೆಂ ಕರುಂ” ಮ್ಹಣೊನ್ ಉಟ್ಚೊ ಸಂದೇಶ್ ದೀಂವ್ಕ್ ಹಳ್ಟಾರ್ ಕುಲೆ ಉಕಲ್ಲೆ ತಾಣೆಂ. ಹೆಂ ಆಯ್ಕೊನ್ ಮಾನಾಯಾಕ್ ಕಾಂಯ್ ಅಕ್ಮಾನ್ ಭೊಗುಂಕ್ ನಾ. ‘ಕೊಂಕ್ಣಿ ಸಾಹಿತಿ ಜಾಂವ್ಚ್ಯಾಂನಿ ಅಕ್ಶರಾಂ ಬರಂವ್ಕ್ ಶಿಕ್ಚೆಪಯ್ಲೆಂ ಅಕ್ಮಾನ್ ಸೊಸುಂಕ್ ಶಿಕಜೆ’ ಮ್ಹಣ್ ಎಕಾ ಅವಾರ್ಡ್ ವಿನ್ನರ್ ಸಾಹಿತಿನ್ ಸಾಂಗ್‌ಲ್ಲ್ಯಾಚೊ ಉಡಾಸ್ ಆಯ್ಲೊ ತಾಕಾ. ತೊ ಹಾತ್ ದೀವ್ ಹಾಸೊನ್‌ಚ್ ಭಾಯ್ರ್ ಗೆಲೊ. ಹಾಂ… ವೆಚ್ಯಾ ಪಯ್ಲೆಂ “ಜೈ ಕೊಂಕಣಿ” ಮ್ಹಣೊಂಕ್ ವಿಸ್ರೊಂಕ್ ನಾ ತೊ.

ತೊ ಮಾನಾಯ್ ಭಾಯ್ರ್ ವೆತಚ್ ಎಕಾಚಾಣೆಂ ಆಪ್ಲ್ಯಾ ರಿಸೆಪ್ಶನಿಸ್ಟಾಕಡೆ ವಿಚಾರ್ಲೆಂ ಪ್ರೆಸ್ಸಾಚ್ಯಾ ಧನಿಯಾನ್ –

“ಕಿತೆಂ ಕರ್ನ್ ಆಸಾಯ್ ಬಾ?”

“ತೆಂಚ್ ಸರ್… ‘ದಯಾಕರುನ್ ವ್ಹಾಣೆ ಹಾಂಗಾಚ್ ಸೊಡಾ’ ಮ್ಹಣ್ ಪ್ರಿಂಟ್ ಕಾಡ್ನ್ ಭಾಯ್ಲ್ಯಾ ಅರ್ಶ್ಯಾಕ್ ಚಿಡ್ಕಾಂವ್ಕ್ ಸಾಂಗ್ಲೆಂ ನೆ.. ತೆಂ ಕಾಮ್ ಕರ್ನ್ ಆಸಾಂ ಸರ್ ಚೆಡ್ವಾನ್ ಜಾಪ್ ದಿಲಿ.

“ತೆ ವ್ಹಾಣೆ ಥಂಯ್ಚ್ ಅಸೊಂದಿತ್. ಆತಾಂ ತುರ್ತಾನ್ ಅಶೆಂ ಪ್ರಿಂಟ್ ಕಾಡ್ನ್ ಭಾಯ್ರ್ ಚಿಡ್ಕಾಯ್.. ಹಾಂ ಏಕ್ ಕೊಪಿ ಚಡ್ ಕಾಡ್ನ್ ಗೆಟಿಚ್ಯಾ ಕುಂದ್ಯಾಕೀ ಚಿಡ್ಕಾವ್ನ್ ಸೊಡ್!”

ಪ್ರೆಸ್ಸಾಚ್ಯಾ ಧನಿಯಾಚ್ಯಾ ಆವಾಜಾಂತ್ ಏಕ್ ನಿಚೆವ್ ಆಸ್‌ಲ್ಲೊ.

“ಕಿತೆಂ ಮ್ಹಣ್ ಪ್ರಿಂಟ್ ಕಾಡ್ನ್ ಚಿಡ್ಕಾಯ್ಜೆ ಸರ್?” ಚೆಡ್ವಾನ್ ನೆಣಾರ್ಪಣಿಂ ವಿಚಾರ್ಲೆಂ. ಪ್ರೆಸ್ಸಾವಾಲ್ಯಾನ್ ವ್ಹಡಾ ತಾಳ್ಯಾನ್ ಜಾಪ್ ದಿಲಿ –

“ಕೊಂಕ್ಣಿ ಸಾಹಿತಿಂಕ್ ಪ್ರವೇಸ್ ನಾ!”

► ವಿಲ್ಸನ್ ಕಟೀಲ್