ಪಾಟ್ಲ್ಯಾ ತೆರಾ ವರ್ಸಾಂನಿ ಸತ್ ಉಚಾರ್ಚ್ಯಾ ಆನಿ ನೀತ್ ಪಾಚಾರ್ಚ್ಯಾ ಮಾದ್ಯಮ್ ಧರ್ಮಾಂತ್ ಖಂಯ್ಸರೀ ರಾಜಿ ಜಾಂವ್ಕ್ ನಾಂವ್. ಚುಕೊನ್ ಪಡೊಂಕ್ ನಾಂವ್. ಸಮಾಜೆಂತ್ ಚುಕಿ – ಅನ್ಯಾಯ್ ಜಾತಾನಾ ನಿಶ್ಟುರ್‌ಪಣಿ ಸಾಂಗ್ಚ್ಯಾಂತ್ ಆನಿ ಸತಾಚ್ಯಾ ಪಾಡ್ತಿನ್ ಘಟ್ ರಾಂವ್ಚ್ಯಾಂತ್ ಕಸಲಿಚ್ ಸೊಡ್-ದೊಡ್ ಕರುಂಕ್ ನಾ. ದುಡ್ವಾಚ್ಯಾ ದಬಾವಾಕ್ , ಧರ್ಮಾಚ್ಯಾ ಪ್ರಭಾವಾಕ್ ಪಡೊಂಕ್ ನಾಂವ್.

ಪಾಟ್ಲ್ಯಾ ತೆರಾ ವರ್ಸಾಂ ಪಾಸುನ್, ನಿರಂತರ್ (Non Stop) ವೊಳಾನಾಸ್ತಾನಾ ಆನಿ ಖಳನಾಸ್ತಾನಾ ಕೊಂಕ್ಣಿ ಸಾಹಿತ್ಯಾಂತ್, ಸರ್ವ್ ಪ್ರಕಾರಾಚೆಂ ಸಾಹಿತ್ಯ್ (ಕಾಣಿ, ಕವಿತಾ, ಪ್ರಬಂದ್, ಸಾಂಕಳ್ ಕಾಣಿ, ಲೇಖನಾಂ, ಖಬ್ರೊ, ವಿಶೇಸ್ ವರ್ದ್ಯೊ, ಸಂದರ್ಶನಾಂ, ವಿಡಿಯೊ … ) ಫಾಯ್ಸ್ ಕೆಲ್ಲೊ ಆನಿ ಕೊಂಕ್ಣಿ ಸಮಾಜೆಚೊ ತಾಳೊ ಜಾವ್ನ್ ಕಾಮ್ ಕೆಲ್ಲೊ ಏಕ್ ಜಾಳಿಜಾಗೊ ಕೊಂಕ್ಣೆಂತ್ ಆಸಾ ಜಾಲ್ಯಾರ್ ತೋ ಫಕತ್ ಕಿಟಾಳ್ ಮಾತ್.  ಹೊ ಏಕ್ ದಾಕ್ಲೊ. ಅಶೆಂ ಮ್ಹಣ್ತಾನಾ ಥೊಡ್ಯಾಂಕ್ ಪೀಂತ್ ಚಾಳ್ವೊಂಕೀ  ಪುರೊ. ಪೂಣ್ ಪಾಟ್ಲ್ಯಾ ತೆರಾ ವರ್ಸಾಂನಿ,  2018 ವ್ಯಾ ವರ್ಸಾ  ಏಕ್ ಪಾವ್ಟಿಂ ಡೆಂಗ್ಯೂ ಜಾವ್ನ್ ಹಾಂವ್ ಆಸ್ಪತ್ರೆಕ್ ದಾಕಲ್ ಜಾಲ್ಲೆ ತವಳ್ ಆನಿ 2020 ವ್ಯಾ ವರ್ಸಾ ಮ್ಹಜಿ ಸರ್ಜರಿ ಜಾಲ್ಲೆ ತವಳ್ ಕಾಂಯ್ ಎಕಾ ಹಫ್ತ್ಯಾಚಿ ಹಾಂವೆ ರಜಾ ಘೆತ್‌ಲ್ಲಿ ಸೊಡ್ಲ್ಯಾರ್, ಎಕಾ ಭುರ್ಗ್ಯಾಪರಿಂ ಹಾಂವೆ ಕಿಟಾಳಾಚೊ ಪೋಸ್ ಕೆಲಾ ದೆಕುನ್ ಆಜ್ ಕಿಟಾಳ್ ತರ್ನಾಟ್ಪಣಾಚ್ಯಾ ಹುಂಬ್ರಾರ್ ಪಾರಿಜಾತಾಚ್ಯಾ ಫುಲಾಂಪರಿಂ ಫುಲೊನ್ ರಾವ್ಲಾಂ.

ಕಿಟಾಳಾ ಆದಿಂಯ್ ಕೊಂಕ್ಣೆಂತ್ ಥೊಡೆ ಜಾಳಿಜಾಗೆ ಆಸ್ಲೆ, ಕಶ್ಟಾಂನಿ ತೀನ್ – ಚಾರ್ ವರ್ಸಾಂ ಚಲೊನ್ ಬಂದ್ ಪಡ್‌ಲ್ಲೆ. ಕಿಟಾಳಾ ಉಪ್ರಾಂತ್‌ಯೀ ಜಾಯ್ತೆ ಉದೆಲೆ, ಆದ್ಲೆ  ಥೊಡೆ ಪುನರ್‌ಜೀವಂತ್ ಜಾಲೆ. ಪರ್ತ್ಯಾನ್ ದೋನ್ – ತೀನ್ ವರ್ಸಾಂ ಚಲ್ಲೆ, ಪರತ್ ಬಂದ್ ಪಡ್ಲೆ.  ಪೂಣ್ ತೆರಾ ವರ್ಸಾಂ ಸರಾಗ್ (consistency ದವರ್ನ್ )  ಫಾಯ್ಸ್ ಜಾಲ್ಲೊ, ಕೊಂಕ್ಣಿ ಸಾಹಿತ್ಯಾಚಾ ಸರ್ವ್ ಪ್ರಕಾರಾಂಕ್ ಸಮಾನ್ ಅವ್ಕಾಸ್ ದಿಲ್ಲ್ಲೊ ಕೊಂಕ್ಣೆಚೊ  ಜಾಳಿಜಾಗೊ ‘ಕಿಟಾಳ್’ ಸೊಡ್ಲ್ಯಾರ್ ದುಸ್ರೊ ನಾ! ( ಕವಿತಾ ಟ್ರಸ್ಟಾಚೊ ಫಕತ್ ಕೊಂಕ್ಣಿ ಕವಿತೆಕ್ ಸಮರ್ಪಿತ್ ಜಾಳಿಜಾಗೊ ಕವಿತಾ ಡೊಟ್ ಕೊಮ್ ಅಜೂನ್ ನಿರಂತರತಾ ಸಾಂಬಾಳುನ್ ಆಸಾ – ಹೆಂ ಮಾನುನ್ ಘೆವ್ನ್ )

ಹಿ ಗಜಾಲ್ ಆಜ್ ವ್ಹಡಾ ತಾಳ್ಯಾನ್ ಆವಾಜ್ ಕರುನ್ ಸಾಂಗಾಜಾಯ್ ಮ್ಹಣ್ ಭೊಗ್ತಾ ಕಿತ್ಯಾಕ್ ಮ್ಹಳ್ಯಾರ್ – ಆಜ್ ಕಿಟಾಳಾನ್ / ಆರ್ಸೊ ಪತ್ರಾನ್ ಪ್ರಾಮಾಣಿಕ್ಪಣಿ  ಕೆಲ್ಲೆಂ ಕೊಂಕ್ಣೆಚೆಂ ಕಾಮ್  ವೆವಸ್ಥಿತ್ ಪುಸುನ್ ಉಡಂವ್ಚೆ ತಸಲಿಂ ಕೀಳ್ ಕಾಮಾಂ ಜಾತೇ ಆಸಾತ್.  ಖಂಯ್ ಥಾವ್ನ್‌ಗೀ ಕೋಣ್‌ಗೀ ಎಕ್ಲೊ ಯೆತಾ ಆನಿ ಆಮಿಂಚ್  ಪಯ್ಲೆ, ಹ್ಯಾ ಆದಿಂ ಕೊಣೆಂಯ್ ಕಾಂಯ್ ಕೆಲ್ಲೆಂ ನಾ ಮ್ಹಣ್ ವೆದಿಚೆರ್ ಸಾಂಗೊನ್ ವೆತಾ. ಪಾಟ್ಲ್ಯಾ ಪಾಂತ್ತೀಸ್ ವರ್ಸಾಂ ಪಾಸುನ್ ಹಾಂವೆ ಕೆಲ್ಲೆಂ ಕೊಂಕ್ಣೆಚೆಂ ಬರಪ್, ಪ್ರಕಾಶನಾಚೊ ವಾವ್ರ್ , ಪತ್ರ್‌ಕಾರಿಕಾ,  ತೆರಾ ವರ್ಸಾಂ ಕಿಟಾಳಾಕ್ ಜೀವ್ ದಿಲ್ಲೆಂ –  ನಗಣ್ಯ್ ಕರ್ತಾನಾ ಮಾವ್ನ್ ರಾವೊಂಕ್ ಜಾತಾ ? ಬರಯ್ಜೆಚ್ ಪಡ್ತಾ.

2010 – ಕವಿಗೋಷ್ಠಿ, ಸಂಮೇಳ್. 2013 – ಡೊ। ನಾ. ಡಿ ಸೊಜಾ ಹಾಂಚ್ಯಾ ಹಸ್ತುಕಿಂ ಆರ್ಸೊ ಲೊಕಾರ್ಪಣ್.

ಆತಾಂ ಪಾಟ್ಲ್ಯಾ ದಿಸಾಂನಿ ಘಡ್‌ಲ್ಲಿ ಏಕ್ ಗಜಾಲ್ ಪಳಯಾ – ಎಕಾ ಮಂಡಳಾಚ್ಯಾ ಉತ್ಸವಾಂತ್ ಯುವಪುರಸ್ಕಾರ್ ದಿತಾನಾ – ರಾಜ್ಯಾಚಾ ಕೊಂಕಣಿ ಸಾಹಿತ್ಯ ಅಕಾಡೆಮಿನ್ ಎಕಾ ವರ್ಸಾ ದಿಲ್ಲೊ ಸೊಡ್ಲ್ಯಾರ್, ಕೊಂಕ್ಣೆಂತ್ ಯುವ ಪುರಸ್ಕಾರ್ ಕೊಣೀ ದೀನಾಂತ್.  ದಿಂವ್ಚೊ ಆಮಿ ಮಾತ್ ಮ್ಹಣ್ ಆಯೋಜಕ್ ಐಲಾನ್ ಕರಿಲಾಗ್ಲೊ. ಹ್ಯಾ ಮನ್ಶ್ಯಾಕ್ ಕಿಟಾಳಾನ್ ಹರ್ ವರ್ಸಾ ರುಪಯ್ 25,000 ಐವಜಾ ಸಾಂಗಾತಾ ದಿಂವ್ಚ್ಯಾ ಲಿಯೊ ರೊಡ್ರಿಗಸ್ ಕುಟಮ್ ಕಿಟಾಳ್  ಯುವಪುರಸ್ಕಾರಾ ವಿಶ್ಯಾಂತ್ ಬರ‍್ಯಾನ್  ಕಳಿತ್ ಆಸಾ. ಹರ್ ವರ್ಸಾ ಪುರಸ್ಕಾರ್ ಪ್ರದಾನ್ ಕಾರ್ಯಾಕ್ ಹೊ ಮನಿಸ್ ಹಾಜರ್ ಜಾವ್ನ್ ದಾದೋಶಿ ಜೇವ್ನ್ ವೆತಾ. ಪೂಣ್ ಆಮಿ ಕೆಲ್ಲೆಂ ಕಾಮ್ ಕಶೆಂ ಸಭೆರ್ ಪುಸುನ್ ಉಡಯ್ತಾ ಪಳಯಾ ?

2012 ಪಾಸುನ್ ಕಿಟಾಳ್ ಯುವ ಪುರಸ್ಕಾರ್ … 

ಕಿಟಾಳಾಚ್ಯಾ ನಾಂವಾನ್ ಕೊಂಕ್ಣಿ ಸಮಾಜಂತ್ಲ್ಯಾ  ಬರ‍್ಯಾ  ಮನಾಚ್ಯಾ ಮನ್ಶ್ಯಾಂಕ್ ವಚೊನ್ ಮೆಳೊನ್, ತಾಂಚೆಲಾಗಿಂ “ಸರ್ … ಯುವ ಬರವ್ಪ್ಯಾಂಕ್ ಉತ್ತೇಜನ್ ದಿವ್ಯಾಂ. ಕಾಂಯ್ ಕುಮಕ್ ಕರಾ. ಯುವ ಪುರಸ್ಕಾರ್ ದಿವ್ಯಾಂ” ಮ್ಹಣ್ ಮಾಗ್ತಾಂ. ಆನಿ ಬರ‍್ಯಾ ಮನಾಚೆ ಮನಿಸ್ ಉದಾರ್ ಮನಾನ್ ದಿತಾತ್. ಹ್ಯಾ ದುಡ್ವಾಂತ್ ಏಕ್ ರುವಿ ಹಾಂವ್ ಕಾಂಯ್ ಘರಾ ವ್ಹರಿನಾ. ಏಕ್ ಬರೆಂ ಕಾರ್ಯಕ್ರಮ್ ಮಾಂಡುನ್ ಹಾಡ್ತಾಂ, ಎಕಾ ತರ್ನ್ಯಾ ಬರವ್ಪ್ಯಾಕ್ ವೆದಿರ್ ಬಸವ್ನ್, ಮಾಲ್ಘಡ್ಯಾಂ ಕರ್ನಾಂ ಮಾನ್ ಕರ್ತಾಂ. ಆಯಿಲ್ಲ್ಯಾ ಸಯ್ರ್ಯಾಂಚೋಯ್ ಸತ್ಕಾರ್ ಕರ್ತಾಂ. ಮಾದ್ಯಮಾಂನಿ ಹಿ ಖಬರ್ ಫಾಯ್ಸ್ ಜಾತಾ, ಕೊಂಕ್ಣಿ ಸಾಹಿತ್ಯಾಕ್ ಕಿತೆಂ ತರೀ ಬರೆಂ ಜಾತಾ. 2012 ಥಾವ್ನ್ ಕಿಟಾಳ್ ಯುವಪುರಸ್ಕಾರ್ ಪಾಟವ್ನ್ ಆಯ್ಲಾಂ. ಸುರ್ವಿಲ್ಯಾ ವರ್ಸಾಂನಿ ರುಪಯ್ ಧಾ ಹಜಾರ್ ಆಸ್‌ಲ್ಲೊ ಪುರಾಸ್ಕಾರಾಚೊ ಐವಜ್ ಪೋಶಕಾಂನಿ 25,000 ಕೆಲಾ. ಆದ್ಲ್ಯಾ ವರ್ಸಾ ಪಾಸುನ್ ಆಸ್ಟಿನ್ ಪ್ರಭು ಕುಟಮ್  ಆರ್ಸೊ ಪತ್ರಿಕೋದ್ಯಮ್ ಪುರಸ್ಕಾರ್ ಸುರು ಕೆಲಾ. ಹ್ಯಾ ಪುರಾಸ್ಕಾರಾಂತೀ ರುಪಯ್ 25,000 ಐವಜ್ ಆಸಾ. ಆಮಿ ಫಕತ್ ಏಕ್ ಶೊಲ್ ಆನಿ ದೋನ್ ಕೆಳಿಂ ದೀವ್ನ್ ಫೊಟೊ ಕಾಡ್ನ್ ನ್ಯೂಸ್ ಕರಿನಾಂವ್. ಸ್ಮರಣಿಕಾ, ಫುಲ್ – ಫಳಾಂಚೊಂ ಮಾನ್ ಆನಿ  ಸಾಂಗಾತಾ ಐವಜ್‌‌‌ಯೀ ದಿತಾಂವ್.  ಆನಿ ಆಮಿ ಕೆಲ್ಲಿಂ ಕಾಮಾಂ ಆಮ್ಚ್ಯಾ ದೊಳ್ಯಾಂ ಮುಕಾರ್ ಪುಸುನ್ ಉಡಂವ್ಚಿ ಅನ್ನಾಡ್ಪಣಾಂ ಚಲ್ತಾನಾ  – ಆಮ್ಚ್ಯಾ ಕಾಮಾ ವಿಶ್ಯಾಂತ್ ಆಮಿ ಉಲಯ್ಜೆಚ್ ಪಡ್ತಾ.  ಹಿ ಕೊಂಕ್ಣೆಚಿ ದುರ್ದಶಾ.

ಯುವ ಪುರಸ್ಕಾರ್ , ಪತ್ರಿಕೋದ್ಯಮ್ ಪುರಸ್ಕಾರಾಚ್ಯಾ ಗಜಾಲಿಂತ್ ಮಾತ್ ನಯ್, ಕಿಟಾಳಾರ್ ಪಾಯ್ಸ್ ಜಾಂವ್ಚಿಂ ಬರ್ಪಾಂ , ವರ್ದ್ಯೊ ಕಟ್ – ಪೇಸ್ಟ್  ಕರ್ನ್, ಆಪ್ಲ್ಯಾ  ಪತ್ರಾಂನಿ ಛಾಪ್ಚೆಂ ಕಾಮ್‌ಯೀ ಖೂಬ್ ಚಲ್ಲಾಂ. ಸಾಹಿತ್ಯ್ ವಾಡಾಜೇ, ಕೊಂಕ್ಣಿ ಫುಲಜೆ ಮ್ಹಣ್ ಪಯ್ಲೆಂ ಚಡಾವತ್ ಕೊಂಕ್ಣಿ ಕಾರ್ಯಕ್ರಮಾಂಕ್ ಹಾಜರ್ ಜಾವ್ನ್ ನೋಟ್ಸ್ ಕರುನ್ ತಯಾರ್ ಹಾಂವ್ ವಿಶೇಸ್ ವರ್ದ್ಯೊ ಕಿಟಾಳಾರ್ ಫಾಯ್ಸ್ ಕರ್ತಾಲೊಂ. ಹಾಂವೆ ಕೆಲ್ಲ್ಯೊ ವರ್ದ್ಯೊ ಕಟ್ ಪೇಸ್ಟ್ ಕರ್ನ್ ಆಪ್ಲ್ಯಾ  ಪತ್ರಾಂನಿ ಛಾಪುನ್ ಥೊಡೆ ದೀಸ್ ಕಾಡ್ತಾಲೆ. ಪೂಣ್ ಹಾಂಕಾ ಏಕ್ ಉತರ್ ವಿಚಾರ್ಯೆತ್ ನ್ಹಯ್ ? ಕೊನ್ಶ್ಯಾರ್ ತರೀ  ಕುರ್ಪಾ : ಕಿಟಾಳ್ ಮ್ಹಣ್ ಏಕ್ ಬೈ ಲೈನ್ ದಿಂವ್ಚೆಂ ಬರೆಂ ಮನ್  ದಾಕವ್ಯೆತ್ ನಯ್ ? ವಿಚಾರ್ಲ್ಯಾರ್ ವರ್ದ್ಯೊ ಆಮಿಂಚ್ ಧಾಡುನ್ ದಿತಾಂವ್. ಆಮಿ ಕೊಣಾಯ್ಕೀ ಎದೊಳ್ಚ್ಯಾಕ್ ನಾ ಮ್ಹಳ್ಳೆಂ ನಾ. ಹಿ ಕೊಂಕ್ಣೆಂತ್ ಚಲೊನ್ ಆಸ್ಚಿ ದಗಲ್ಬಾಜಿ.

ಆದ್ಲ್ಯಾ ವರ್ಸಾ ವರ್ಸಾಕ್ ತೀನ್ ಬರೆ ಕೊಂಕ್ಣಿ ಬೂಕ್ ಫಾಯ್ಸ್ ಕರ್ಚೆ ವಿಶ್ಯಾಂತ್ ಎಕ್ ಆಲೊಚೆನ್ ಕೆಲಿ ಆನಿ ಮಹಾದಾನಿ ಶ್ರೀ ಮೈಕಲ್ ಡಿ ಸೊಜಾ ಹಾಣಿ ಅನುದಾನ್ ದಿತಾಂ ಮ್ಹಣ್ ಭಾಸಾಯ್ಲೆಂ. ಹ್ಯಾ ಯೆವ್ಜಣೆಖಾಲ್ ಪಯ್ಲೊ ಬೂಕ್ ಫ್ಲೋರಿನ್ ರೋಚ್ ಹಾಂಚೊ ‘ಜಪಾನ್’ ಫಾಯ್ಸ್ ಕೆಲೊ. ಮಾದ್ಯಮಾಂನಿ ಖಬರ್ ಫಾಯ್ಸ್ ಜಾಲ್ಲಿಚ್ ಥೊಡ್ಯಾ  ಸಾಹಿತಿ ಆನಿ ಸಂಘಟಕಾಂಕ್ ಸುರು ಜಾಲಿ ಪೊಡ್ಕಾಣಿ.  ಹಾಂವೆ ಅನುದಾನ್ ಮಾಗ್‌ಲ್ಲೆಂ  ಪುಸ್ತಕಾಚ್ಯಾ ಛಾಪ್ಯಾಚ್ಯಾ ಖರ್ಚಾ ಖಾತಿರ್, ಅನುದಾನಾಚೊ ಫಾಯ್ದೊ ಜಾಂವ್ಚೊ ಬುಕಾಚ್ಯಾ ಬರಯ್ಣಾರಾಂಕ್ ಆನಿ ಎಕ್ ಬರೊ ಬೂಕ್ ಪ್ರಾಪ್ತ್ ಜಾಂವ್ಚೊ ಕೊಂಕ್ಣಿ ಸಾಹಿತ್ಯಾಕ್ – ಅನುದಾನಾಂತ್ಲಿ ಏಕ್ ರುವಿ ಹಾಂವ್ ಘರಾ ವ್ಹರಿನಾ, ಮ್ಹಾಕಾ ಪುರಾಸಣ್ ಜಾಲ್ಯಾರ್ ಏಕ್ ಚಾ ಸಯ್ತ್ ಹಾಂವ್ ಅನುದಾನಾಚ್ಯಾ ಪಯ್ಶ್ಯಾಂ ಥಾವ್ನ್ ಪಿಯೆನಾ ಮ್ಹಳ್ಯಾ ಉಪ್ರಾಂತ್  – ಹ್ಯಾ ಕೊಂಕ್ಣಿ ಸಾಹಿತಿ ಆನಿ ಸಂಘಟನಾಚ್ಯಾ  ಪೊಟಾಜಾಳಾಕ್  ಕಿತೆಂ ಮ್ಹಣ್ಯೆತ್ ? ಹಿ ಕೊಂಕ್ಣೆಚಿ ಖ್ಯಾಸ್ತ್!

ಮೈಕಲ್ ಡಿ ಸೊಜಾ ‘ವಿಶನ್ ಕೊಂಕಣಿ’ ಪ್ರಥಮ್ ಪುಸ್ತಕ್ 

ಸಾಹಿತಿ – ಸಂಘಟಕ್, ಸಂಪಾದಕ್ – ಪ್ರಕಾಶಕ್ ;  ಯೆತಾತ್ ವೆತಾತ್. ಕೊಂಕಣಿ ಭಾಸ್ ಆನಿ ಸಾಹಿತ್ಯ್ ನೇತ್ರಾವತಿ ನಂಯ್‌ಪರಿಂ ವಾಳೊನ್‌ಚ್ ಆಸ್ತಾ. ಲ್ಹಾನ್ – ವ್ಹಡ್ ಝರಿ ನ್ಹಂಯ್ತ್ ಜೀವ್ ಭರ್ಚೆಂ ಕಾಮ್ ಕರ್ನ್ ಅಸಾತ್. ಅಶೆಂ ಅಸ್ತಾನಾ ಹಾಂವೆ ಕೆಲ್ಲೆಂ, ಕರ್ಚೆಂ ಮಾತ್ ಕೊಂಕ್ಣೆಚೆಂ ಕಾಮ್. ಕಿಟಾಳಾನ್ – ಆರ್ಸೊ ಪತ್ರಾನ್, ಎಚ್ಚೆಮಾನ್ –  ವಿಲ್ಸನಾನ್  ಕರ್ಚೆಂ ನ್ಹಯ್ ಮ್ಹಣ್ಚೊ ಮನೋಭಾವ್‌ಚ್ ಆಜ್ ಕೊಂಕ್ಣಿ ಭಾಸ್ ಆನಿ ಸಾಹಿತ್ಯಾಚಾ ವಾಡಾವಳೆಚ್ಯಾ ವಾಟೆರ್ ಕಾಂಟಿ ಜಾಲಾ.

ಪಾಟ್ಲ್ಯಾ 13 ವರ್ಸಾಂನಿ ಕಿಟಾಳಾರ್ ಹಜಾರೊಂ ಪಾನಾಂನಿ ಗುಣಾಮೊಲಾಚೆಂ ಸಾಹಿತ್ಯ್ ಫಾಯ್ಸ್ ಜಾಲಾಂ. ಕಿಟಾಳಾರ್ ಫಾಯ್ಸ್ ಜಾಲ್ಲೆಂ ಸಾಹಿತ್ಯ್ ಕೊಂಕ್ಣಿ ಶಿಕ್ತೆಲ್ಯಾಂಕ್, ಶಿಕಯ್ತೆಲ್ಯಾಂಕ್ ಉಪ್ಕಾರಾಕ್ ಪಡ್ಲಾಂ. ವಿಶ್ವವಿದ್ಯಾಲಯಾಂನಿ, ಸಂಮೇಳಾಂನಿ, ವಿಚಾರ್ ಸಾತ್ಯಾಂನಿ  ಪತ್ರಾಂ ಮಂಡನ್ ಕರ್ತೆಲ್ಯಾಂಕ್ ಕಾಮ್ ಆಯ್ಲಾಂ. ಕಿಟಾಳಾ ಥಾವ್ನ್ ಜಾಯ್ತ್ಯಾ ನವ್ಯಾ ಬರವ್ಪ್ಯಾಂನಿ ಉಮೆದ್ ಘೆವ್ನ್ ಬರಂವ್ಕ್ ಧರ್ನ್ ಆಜ್ ಕೊಂಕ್ಣೆಂತ್ ತೆ ನಾಮ್ನೆಚೆ ಬರವ್ಪಿ ಜಾಲ್ಯಾತ್. ಪುರಸ್ಕಾರ್ ಜೊಡುಂಕ್ ಪಾವ್ಲ್ಯಾತ್.   ಕಾಂಯ್ ವರ್ಸಾಂ ಆದಿಂ ಬರಂವ್ಚೆಂಚ್ ರಾವಯಿಲ್ಲ್ಯಾ ಕಾಂಯ್ ಬರಯ್ಣಾರಾಂನಿ ಕಿಟಾಳ್ ವಾಚುನ್ ಉತ್ತೇಜನ್ ಜೊಡುನ್ ಪರ್ತ್ಯಾನ್ ಬರಂವ್ಕ್ ಧರ್ಲಾಂ. ನಾಂವಾಂ ಉಲ್ಲೇಕ್  ಕರುನ್ ಗೆಲ್ಯಾರ್ ಪಟ್ಟಿ ಲಾಂಬ್ ಜಾಯ್ತ್.

ಆಜ್ ಕಿಟಾಳಾಕ್ ತಾಚೆಚ್ ಮ್ಹಳ್ಳೆ ವಾಚ್ಪಿ ಆಸಾತ್, ವಿಂಚ್ಣಾರ್ ಬರಯ್ಣಾರ್ ಆಸಾತ್ ಆನಿ ಥೊಡಿಂಚ್ ತರೀ ಜಾಯ್ರಾತಾಂ ದೀವ್ನ್ ಖರ್ಚಾಬಾಬ್ತಿನ್ ಸುಧಾರ್ಸುಂಚೆಂ ಹಿತಯ್ಶಿ ಮಿತ್ರ್ ಆಸಾತ್. ಆಜ್, ಪ್ರಕಾಶನಾಚಿಂ ತೆರಾ ವರ್ಸಾಂ ಸಂಪವ್ನ್ ಚೊವ್ದಾವ್ಯಾ ವರ್ಸಾಕ್ ಪಾಂಯ್ ತೆಂಕ್ತಾನಾ ಆಮ್ಚ್ಯಾ ವಾಚ್ಪ್ಯಾಂಚೊಂ, ಬರಯ್ಣಾರಾಂಚೊಂ ಆನಿ ಹಿತಯ್ಶಿಂಚೊಂ ಮನಾ ಕಾಳ್ಜಾ ಪಾಸುನ್ ಉಪ್ಕಾರ್ ಬಾವುಡ್ತಾಂ. ಫುಡಾರಾಂತೀ ಕಿಟಾಳಾಕ್ ತುಮ್ಚೊ ಮೋಗ್ ಲಾಭೊಂ ಮ್ಹಣ್ ಆಂವ್ಡೆತಾಂ.

ದೋನ್‌‌ಚ್ ದಿಸಾಂ ಆದಿಂ, ಕರ್ನಾಟಕಾಚೊ ಮುಕೆಲ್ ಮಂತ್ರಿ ಸಿದ್ದರಾಮಯ್ಯಾನ್ ಮ್ಹಳಾಂ ” ಪತ್ರ್‌ಕರ್ತಾಂನಿ ಸತ್ ಸಾಂಗ್ಚೆಂ ಧಯ್ರ್ ಘೆಜಾಯ್”  ಕಿಟಾಳ್ ಪಾಟ್ಲ್ಯಾ ತೆರಾ ವರ್ಸಾಂನಿ ಸತ್ ಸಾಂಗೊನ್ ಆಯ್ಲಾಂ. ಬೆಜಾರಾಯೆಚಿ ಗಜಾಲ್ ಮ್ಹಳ್ಯಾರ್ ಮುಕೆಲ್ ಮಂತ್ರಿ –  ಪ್ರದಾನ್ ಮಂತ್ರಿ, ಮಂತ್ರಿ – ಸಂತ್ರಿ ಸಗ್ಳೆ ‘ಪತ್ರ್‌ಕರ್ತಾಂನಿ ಸತ್ ಸಾಂಗ್ಚೆಂ ಧಯ್ರ್ ಘೆಜಾಯ್’ ಮ್ಹಣ್ ವೆದಿರ್ ಸಾಂಗ್ತಾತ್.  ಫೂಣ್ ಹ್ಯಾ ದೇಶಾಂತ್ ಆನಿ ಪ್ರದೇಶಾಂತ್  ಸತ್ ಉಲಯಿಲ್ಲ್ಯಾ ಪತ್ರ್‌ಕರ್ತಾಂಚಿಂ ಗತ್ ಕಿತೆಂ ಜಾಲ್ಯಾ ತೆಂ ಸಕ್ಕಡ್ ಜಾಣಾಂತ್. ಆಜ್ ಕಿತ್ಲ್ಯಾಗೀ ಜಣಾಂನಿ ದಿಸಾಳಿಂ ವಾಚ್ಚೆಂ, ಟಿ.ವಿ. ಪಳಂವ್ಚೆಂಚ್ ರಾವಯ್ಲಾಂ. ಹಾತಾಂತ್ ಸ್ಮಾರ್ಟ್ ಫೋನ್ ಆಸ್‌ಲ್ಲೆ ಸಗ್ಳೆ ಆಜ್ ಪತ್ರ್‌ಕಾರ್ ಜಾಲ್ಯಾತ್. ವಾಟ್ಸಾಪಾರ್ ಆಯಿಲ್ಲ್ಯಾಂತ್ ಸತ್ ಕಿತ್ಲೆಂ ಆಸಾ ಮ್ಹಣ್  ಚಿಂತೂಂಕ್ ಕೋಣ್ ವಚಾನಾಂತ್, ದೊಳೆ ದಾಂಪುನ್ ಮುಕಾರ್ ಧಾಡ್ತಾತ್. ಅಸಲ್ಯಾ ಎಕಾ ಸಂದಿಗ್ದ್ ಪರಿಸ್ಥಿತೆಂತ್ ಎಕಾ ಮಾದ್ಯಮಾನ್ ಸತಾಚ್ಯಾ ಪಾಡ್ತಿನ್ ರಾಂವ್ಚೆಂ ಸುಲಭ್ ನಯ್. ಫಟಿಂಚ್ಯಾ ಖೆಟಿಂತ್ ಸತ್ ಸಾಂಬಾಳ್ಚೆಂ ಆನಿ ಉಕಲ್ನ್ ಧರ್ಚೆಂ ಸಯ್ರಾಣ್ ಆನಿ ಶಾತಿ ಆಸೊಂಕ್  ಜಾಯ್. ಆನಿ ಸರ್ಕಾರಾನ್ ಸತಾಚ್ಯಾ ಪಾಡ್ತಿನ್ ಥಿರ್ ರಾಂವ್ಚ್ಯಾ ಮಾದ್ಯಮಾಂಕ್ ಪ್ರೋತ್ಸಾವ್ ದೀಂವ್ಕ್ ಜಾಯ್.

2011 ಫೆಬ್ರೆರ್ 5 ವೆರ್ ಕಿಟಾಳ್ ಲೊಕಾರ್ಪಣ್ 

ಸತಾಚ್ಯಾ ಪಾಡ್ತಿನ್ ರಾಂವ್ಚೆಂ ಧಯ್ರ್ ಕಿಟಾಳಾಕ್ 2011  ವರ್ಸಾ ಜಾಳಿಜಾಗೊ ಸುರ್ವಾತ್ತಾನಾಂಚ್ ಆಸ್ಲೆಂ. ದೆಕುನ್ ಉಜ್ಯಾಕ್ ನಾ ದಾಕ್ಷೆಣ್ ನಾರೊ ಜಾವ್ನ್ ಘೆತ್‌ಲ್ಲೊ. ಪೂಣ್ ಫಟಿಂಚ್ಯಾ ಖೆಟಿಂತ್ ಸತ್ ಸಾಂಬಾಳುನ್, ಗರ್ಜ್ ಪಡ್ಲ್ಯಾರ್ ಸಾಬೀತ್ ಕರ್ನ್ ದಾಕಂವ್ಚಿ ಶಾಥಿ ಜೊಡುಂಕ್ ಕಾಂಯ್ ವರ್ಸಾಂ ಲಾಗ್ಲಿಂ. ಸತ್ ಸಾಬೀತ್  ಕರ್ಚೆಂ ಕಶೆಂ ಮ್ಹಳ್ಳೆಂ ಹಾಂವ್ ಶಿಕ್ಲೊಂ ಮ್ಹಣ್ಚೇ ಪ್ರಾಸ್, ಮ್ಹಜೆರ್ ಬೆನಾಮಿ ಫಟ್ಕಿರೆ ಫಿರ್ಯಾದಿ ಮಾಂಡುನ್ ಮ್ಹಾಕಾ ಶಿಕಯ್ಲೆಂ ಮ್ಹಳ್ಯಾರ್‌ಚ್ ಸಾರ್ಕೆಂ!  ಕಿಟಾಳ್ ಸುರು ಕರ್ತಾನಾ, ಕಾನುನ್ – ಕಾಯ್ದ್ಯಾ ವಿಶ್ಯಾಂತ್ ಮ್ಹಾಕಾ ಕಾಂಯ್ ವಿಶೇಸ್ ಮಾಹೆತ್ ನಾತ್ಲಿ. ಪೂಣ್ ಆಜ್ ಚಡಾವತ್ ಕಾನುನಾಚೆ ಕಲಂ ತೊಂಡ್ಪಾಟ್ ಜಾಲ್ಯಾತ್. ಲಿಸಾಂವ್  ಶಿಕೊಂಕ್  ಜಿಣ್ಯೆ ಅನ್ಬೊಗಾ ವರ್ತೆಂ ಇಸ್ಕೊಲ್ ದುಸ್ರೆಂ ನಾ.   Necessity is the mother of invention ಮ್ಹಜ್ಯಾ ಜಾಣ್ವಾಯೆಕ್ ಶಾಭಾಸ್ಕಿ ದಿತಾನಾ, ಆದ್ಲ್ಯಾ ಪೊಲಿಸ್ ಕಮಿಶನರಾನ್ ಮ್ಹಾಕಾ ಮ್ಹಳ್ಳೆಂ ಆಸಾ. ಆತಾಂ ಪಾಟಿಂ ಪಳೆತಾನಾ ಭೊಗ್ತಾ –  ಜರಿ ಮ್ಹಾಕಾ ಥೊಡ್ಯಾಂನಿ ಅಶೆಂಯೀ ಧೊಶಿನಾತ್ಲೆಂ ಜಾಲ್ಯಾರ್ ಆಜ್ ಹಾಂವ್ ಹ್ಯಾ ಹಂತಾಕ್ ಪಾವ್ತೊಂ ? 

ದೆಕುನ್ ಕಿತ್ಲ್ಯಾ ಜಣಾಂನಿ ಮ್ಹಾಕಾ ನಿರಂತರ್ ಧೊಸ್ಲಾಂ ಆನಿ ಆತಾಂಯ್ ಧೊಸುನ್ ಆಸಾತ್ – ತಾಂಚೋಯ್ ಹಾಂವ್ ಉಪ್ಕಾರ್ ಭಾವುಡ್ತಾಂ. ತಾಣಿ ಮ್ಹಾಕಾ ಜಿಯೊಂಕ್ ಶಿಕಯ್ಲಾಂ. Negative publicity is the best publicity ಮ್ಹಣ್ತಾತ್.  ಹೊ ಅನ್ಭೊಗ್ ಮ್ಹಾಕಾ ಬರೊಚ್ ಜಾಲಾ.  ಕಿಟಾಳಾ ವಿಶ್ಯಾಂತ್, ಎಚ್ಚೆಮ್ ಪೆರ್ನಾಲಾ ವಿಶ್ಯಾಂತ್ ಮಾಧ್ಯಮಾಂನಿ ತಸ್ವಿರೆಸವೆಂ ಕೆಲ್ಲ್ಯಾ ಅಪಪ್ರಚಾರಾನ್ ಕೊಣಾಕ್ ಫಾಯ್ದೊ ಜಾಲಾ ವಾ ನಾ ಮ್ಹಾಕಾ ಖಬರ್ ನಾ, ಪೂಣ್ ಮ್ಹಾಕಾ ಮಾತ್ರ್ ಭರ್ಪೂರ್ ಫಾಯ್ದೊ ಜಾಲಾ. ಕಿತ್ಲೊಸೊ ಲೋಕ್ ಗೂಗಲಾರ್ ಕಿಟಾಳಾಚೊ ಪಾತ್ತೊ ಸೊಧುನ್ ಯೇವ್ನ್ ಕಿಟಾಳಾಚೆ ವಾಚ್ಪಿ ಜಾಲ್ಯಾತ್, ಕಿಟಾಳಾಚೆ ಪೋಶಕ್ ಜಾಲ್ಯಾತ್, ಅಭಿಮಾನಿ – ಅಂಕಣ್‌ಕಾರ್ ಸಯ್ತ್  ಜಾಲ್ಯಾತ್. ದೆಕುನ್ ಹರ್ ವರ್ಸಾ,  ಕಿಟಾಳಾಚ್ಯಾ ಜಲ್ಮಾದಿಸಾಕ್ ಧೊಸ್ತೆಲ್ಯಾಂಕೀ ಕಾಯ್ದ್ಯಾನ್ ದೇವ್ ಬರೆಂ ಕರುಂ ಮ್ಹಣೊಂಕ್ ಹಾಂವ್ ವಿಸ್ರಾನಾ.

ಪಾಟ್ಲ್ಯಾ ದಿಸಾಂನಿ ಕಿಟಾಳಾರ್ ಫಾಯ್ಸ್ ಕರ್ಚ್ಯಾ ಖಬ್ರಾಂ ಬಾಬ್ತಿನ್ ಥೊಡಿಶಿ ಬದ್ಲಾವಣ್ ಕೆಲ್ಯಾ. ಆಮ್ಕಾಂ ಕೊಂಕ್ಣಿ ಕಾರ್ಯಾಂಚ್ಯೋಯ್ ಖಬ್ರೊ ಇಂಗ್ಲಿಶ್ ವಾ ಕನ್ನಡ ಭಾಶೆನ್‌ಚ್ ದಾಡುನ್ ದಿತಾತ್. ‘ಖಬರ್ ಕೊಂಕ್ಣೆಂತ್ ಆಸಾಗೀ ?’ ಮ್ಹಣ್ ವಿಚಾರ್ಲ್ಯಾರ್ ‘ತುಂ ಕರ್ ಆನಿ ಘಾಲ್ ಸಾಯ್ಭಾ’ ಮ್ಹಳ್ಳಿ ಜಾಪ್ ಯೆತಾ. ‘ತರ್ಜುಮೊ ಕರ್ನ್ ಘಾಲ್ಯೆತ್, ವೇಳ್ ಲಾಗ್ತಾ ಇಲ್ಲಿಶಿ ಕೂಲ್ ದಿವ್ಯೆತ್‌ಗೀ ?’ ಮ್ಹಳ್ಯಾರ್ ‘ಆಮಿ ಕರ್ಚಿ ಕೊಂಕ್ಣಿ ಸೆವಾ – ತುಂ ಆಮ್ಚೆಲಾಗಿಂ ಕೂಲ್  ವಿಚಾರ್ತಾಯ್ ?’ ಮ್ಹಣ್ತಾತ್. ಖಬ್ರೆಂತ್ ಲಾಕಾಂನಿ ಸ್ಪೊನ್ಸರ್ ದಿಲ್ಲ್ಯಾಂಚಿಂ ನಾಂವಾ ವಾಚ್ತಾನಾ ಆಮ್ಕಾಂ ತಾಣಿ ಕರ್ಚ್ಯಾ ಕೊಂಕ್ಣಿ ಸೆವೆಚೊ ಫರ್ಮಳ್ ಯೆತಾ. ಹಿ ಆಮ್ಚ್ಯಾ  ಕೊಂಕ್ಣಿ  ಸಂಘ್ ಸಂಸ್ಥ್ಯಾಂಚಿಂ ಮಿಜಾಸ್ಕಿ. ದೆಕುನ್ ಆತಾಂ ಕಿಟಾಳಾರ್ ಖಬ್ರೊ ಆಯಿಲ್ಲ್ಯಾ ಭಾಶೆಂತ್ ಫಾಯ್ಸ್ ಕರ್ತಾಂವ್. ಕನ್ನಡ – ಇಂಗ್ಲಿಶಾಂತ್ ಆಸ್ಲ್ಯಾರ್ ತರ್ಜಣ್ ಕರುನ್ ಬಸಾನಾಂವ್.  ಹಿ ಏಕ್ ಗಜಾಲ್ ಸೊಡ್ಲ್ಯಾರ್ ಹೆರ್ ಕಸಲೀಚ್ ಬದ್ಲಾವಣ್ ನಾ. ಕಿಟಾಳ್ ಆಪ್ಲ್ಯಾ ಸಿದ್ದಾಂತಾಂತ್  ಥಿರ್ ಆಸಾ.

ಸತಾಚ್ಯಾ ಪಾಡ್ತಿನ್ ತೆರಾ ವರ್ಸಾಂ ಸಂಪವ್ನ್ ಚೊವ್ದಾವ್ಯಾ ವರ್ಸಾಂತ್ ಪ್ರವೇಶ್ ಜಾತಾನಾ ತುಮ್ಚೆ ಥಾವ್ನ್ ಜೊ ಸಾಧ್ಯ್ ತೊ ಸಹಕಾರ್ ದಿಯಾ ಮ್ಹಣ್ ಮಾಗ್ತಾಂವ್.  ನಿರಂತರ್ ಅಪಪ್ರಚಾರ್ ಕರುನ್, ಫಟಿ ಫಯ್ಲಾವ್ನ್, ದಾನಿಂಕ್, ಜಾಹೀರಾತ್‌ದಾರಾಂಕ್ ಆಡಾವ್ನ್ ಆಮಿ ಸತಾಚಿ ಪಾಡ್ತ್ ಘೆನಾಶೆಂ ಕರ್ಚ್ಯಾ ಪ್ರೇತನಾಂನಿ ಎದೊಳ್ಚ್ಯಾಕ್ ಕೊಣೀ ಜಿಕೊಂಕ್ ನಾಂತ್. ಸತಾಕ್ ಸಾಂಗಾತ್ ದಿಲ್ಯಾರ್, ಸತ್‌ಚ್ ಆಮ್ಕಾಂ ಸಾಂಬಾಳ್ತಾ. ಹೊ ಮ್ಹಜೊ ತೆರಾ ವರ್ಸಾಂಚೊಂ ಅನ್ಭೊಗ್. ಸತಾಚೆಂ ಬಳ್ ಸಾಂಗಾತಾ ಆಸ್ತಾ ಪರ್ಯಾಂತ್ ಆಮಿ ಸಲ್ವೊಂಚೆಂ ನಾಂವ್ ಮ್ಹಳ್ಳೊ ದೃಡ್ ವಿಶ್ವಾಸ್ ಆಸಾ. ಆಮ್ಚ್ಯಾ ವಾಚ್ಪ್ಯಾಂಚ್ಯಾ, ಬರಯ್ಣಾರಾಂಚ್ಯಾ, ದಾನಿಂಚ್ಯಾ, ಬರ‍್ಯಾ ಮನಾಕ್ ಆನಿ ಸಹಕಾರಾಕ್ ದೇವ್ ಬರೆಂ ಕರುಂ.

ಮೊಗಾಸವೆಂ,

■ ಎಚ್ಚೆಮ್ ಪೆರ್ನಾಲ್ 
ಸಂಪಾದಕ್ 

ಅಶೆಂ ವಿಚಾರ್‌ಲ್ಲೆ ಕೂಡ್ಲೆ ಜಾಯ್ತೆ ಜಣ್ ಮ್ಹಜೆರ್ ತಾಪ್ತಿತ್. ಕ್ರಿಸ್ತಾಂವಾಂನಿ ಇತ್ಲೆಂ ಸಾಹಿತ್ಯ್ ಬರೊಂವ್ಕ್ ನಾ ಗೀ, ತಿತ್ಲೆಂ ಸಾಹಿತ್ಯ್ ಬರೊಂವ್ಕ್ ನಾ ಗೀ ಅಶೆಂ ತಶೆಂ ಮ್ಹಣ್ ಧಾಕ್ಡ್ಯಾಂ ಆದಿಂ ಜಾವ್ನ್ ಗೆಲ್ಲ್ಯಾ ಸಾಂಕಳ್ ಕಾಣಿಯಾಂಕ್, ಕಾದಂಬರಿಂಕ್ ಉಲ್ಲೇಖ್ ಕರ‍್ತಿತ್. ಪುಣ್ ಹೆಂ ಸಾಹಿತ್ಯ್ ಕೊಂಕ್ಣಿ ಭೊಂವಾರ್ ಉತ್ರೊನ್ ಕಿತ್ಲೆಂ ಭಾಯ್ರ್ ಗೆಲಾಂ? ಸಾಹಿತಿ ಕಾಳಾಸವೆಂ ಜಿಯೆತಾ ಆನಿ ಆಪ್ಲ್ಯೆ ಮಾಂಯ್‌ಭಾಶೆಂತ್ ವಾ ಆಪ್ಣಾಕ್ ವರ್ಗಲ್ಲ್ಯೆ ಭಾಶೆಂತ್ ಆಪ್ಲಿ ಅಭಿವೆಕ್ತಿ ಕರ‍್ತಾ. ಪುಣ್ ಬರ‍್ಯಾ ಸಾಹಿತಿಚಿ ಅಭಿವೆಕ್ತಿ ಫಕತ್ ತಾಚ್ಯಾ ಸಮುದಾಯಾಚ್ಯಾ ಲೊಕಾಚಿ ಜಾವ್ನ್ ಮಾತ್ರ್ ಉರನಾಸ್ತಾಂ, ತಾಣೆಂ ಜಿಯೆಂವ್ಚ್ಯಾ ಸಮಾಜೆಚಿ ಅಭಿವೆಕ್ತಿ ಜಾತಾ. ಹ್ಯೆ ಸಮಾಜೆಂತ್ ಜಾಯ್ತ್ಯಾ ಸಮುದಾಯಾಚೊ ಲೋಕ್ ಆಸ್ತಾ. ಧಣ್ಸವ್ಣಿ ಮ್ಹಳ್ಳಿ ಹರ್ ಸಮುದಾಯಾಂತ್ ಆಸಾ. ಅಸಲೆಂ ಸಾಹಿತ್ಯ್ ಅನುವಾದ್ ಜಾವ್ನ್ ಸರ್ವಾಂಚೆಂ ಜಾತಾ. ಅಸಲ್ಯೆ ಎಕೆ ವ್ಯಾಪ್ತೆಕ್ ಕಿತ್ಲೆಂ ಮಂಗ್ಳುರಿ ಸಾಹಿತ್ಯ್ ಪಾವ್ಲಾಂ?

ಥೊಡ್ಯಾ ತೆಂಪಾ ಆದಿಂ ಪರ್ಯಾಂತ್ ಕನ್ನಡ ಸಾಹಿತ್ಯಾಂತ್ ಕೊಂಕ್ಣಿ ಭಾಶೆಚಿ ಕವಿತಾ, ಕಾಣಿ ಅನುವಾದ್ ಜಾಯ್ಜೆ ತರ್ ಗೊಂಯ್ಚಿಂ ನಾಂವಾಂ ಮಾತ್ರ್ ಝಳ್ಕತಾಲಿಂ. ಆಮ್ಚ್ಯಾಚ್ ರಾಜ್ಯಾಚ್ಯೆ ಕರಾವಳೆಂತ್ ಕೊಂಕ್ಣಿ ಸಾಹಿತ್ಯ್ ಆಸಾ ಮ್ಹಣ್ ಕನ್ನಡಾಚ್ಯಾ ಸಂಪಾದಕಾಂಕ್ ವಾ ಪರ್ಗಟ್ಣಾರಾಂಕ್ ಕಶಿ ಖಬರ್ ನಾ ಜಾಲಿ? ಹಿ ಏಕ್ ಆಮಿ ಸರ್ವಾಂನಿ ಚಿಂತುನ್ ಆನಿ ಆಮ್ಚೆಯಿತ್ಲ್ಯಾಕ್ ವಿಮರ್ಸೊ ಕರಿಜೆ ಜಾಲ್ಲಿ ಗಜಾಲ್. ಫಕತ್ ಕನ್ನಡ ಲಿಪಿಂತ್ ಸಾಹಿತ್ಯ್ ಆಸಾ, ತಾಕಾ ದೇವ್‌ನಾಗಿರಿ ಲಿಪಿಚೆ ಅನ್ನ್ಯಾಯ್ ಕರ‍್ತಾತ್ ಮ್ಹಣ್ ಝಗ್ಡೆಂ ಕರ‍್ಚ್ಯಾ ಪಯ್ಲೆಂ ಕರ್ನಾಟಕಾಂತ್‌ಚ್ ಆಮ್ಚೆ ಲೇಖಕ್ ಕಿತ್ಲ್ಯಾ ಒಳ್ಕಿಚೆ ಜಾಲ್ಯಾತ್ ಮ್ಹಳ್ಳೆಂ ಏಕ್ ಪಾವ್ಟಿಂ ಚಿಂತುನ್ ಪಳಯ್ಜೆ. ತಶೆಂ ಮ್ಹಣ್ತಚ್ ಕೊಂಕಣಿ ಭಾಸ್ ದುಸ್ರಿ, ಕನ್ನಡ ಸಾಹಿತಿಂಕ್ ಕಶಿ ಕೊಂಕಣಿ ಸಾಹಿತಿಂಚಿ ಒಳೊಕ್ ಆಸ್ಚಿ ಮ್ಹಣ್ ಸವಾಲಾಂ ಉಟ್ತಿತ್. ಬೊವ್ಶಾ ಭಾರತೀಯ್ ಭಾಶೆಂಪಯ್ಕಿಚ್ ಸಂಸಾರಾಚೆಂ ಸಾಹಿತ್ಯ್, ತೆಂಯ್ ಪೂರಾಯ್ ಪ್ರಕಾರಾಚೆಂ ದರಬಸ್ತ್ ರಿತಿನ್ ಕನ್ನಡಾಕ್ ಅನುವಾದ್ ಜಾಲಾಂ. ಕುವೆಂಪು, ಬೇಂದ್ರೆ ತಸಲೆ ಕವಿ ಕಿತ್ಲೆ ಕನ್ನಡ ಸಾಹಿತ್ಯಾಕ್ ಒಳ್ಕಿಚೆಗೀ ಬ್ರೆಕ್ಟ್, ನೆರೂಡಾ. ಯೇಟ್ಸ್, ಏಲಿಯಟ್ ತಸಲೆ ಕವಿಯ್ ಕನ್ನಡಾಕ್ ತಿತ್ಲೆಚ್ ಒಳ್ಕಿಚೆ. ಹಿಂ ಚಾರ್ ನಾಂವಾಂ ಫಕತ್ ದಾಖ್ಲ್ಯಾಕ್ ಮಾತ್ರ್.

ತಶೆಂ ಮ್ಹಣ್ ಕೊಂಕ್ಣಿ ಲೇಖಕ್ ಕನ್ನಡಾಕ್ ಪಾವೊಂಕ್‌ಚ್ ನಾಂತ್ ಮ್ಹಣ್ ನ್ಹಯ್. ಗೀತಾ ಶೆಣೈ, ಶಾ.ಮಂ. ಕೃಷ್ಣರಾಯ ತಸಲ್ಯಾ ಅನುವಾದಕಾಂನಿ ಕನ್ನಡಾಕ್ ಥೊಡೆಂ ಸಾಹಿತ್ಯ್ ಅನುವಾದ್ ಕೆಲಾಂ. ಪುಣ್ ಜೆಂ ಕಿತೆಂ ಆಮಿ ಆಮ್ಚೆಥಂಯ್ ಇತ್ಲೆಂ ಆಸಾ ತಿತ್ಲೆಂ ಆಸಾ, ಚಡ್ ಕರುನ್ ಲಿಪಿಚೊ ವಾದ್ ಯೆತಾನಾ ದಾಂಗ್ರೊ ಫೆರಯ್ತಾಂವ್ ತಿತ್ಲ್ಯಾ ಮಟ್ಟಾಕ್ ಜಾಂವ್ಕ್ ನಾ ಮ್ಹಣ್ ಭೊಗ್ತಾ. ಹಾಕಾ ಕಾರಣ್ ತರ್ಜಣ್‌ದಾರ್ ಬಿಲ್ಕುಲ್ ನ್ಹಯ್. ಆಮ್ಚೆಂ ಸಾಹಿತ್ಯ್‌ಚ್. ಆಮಿ ಆನಿಕೀ ಧರ್ಮಾಚ್ಯೆ ದಿಶ್ಟಿನ್‌ಚ್ ಸಂಸಾರ್ ದೆಕ್ತಾಂವ್‌ಗೀ ಮ್ಹಳ್ಳೊ ದುಬಾವ್ ಮ್ಹಾಕಾ ಧೊಸ್ತಾ. ಆಮಿ ಕಿತ್ಲೆಂ ಸಮಾಜಿಕ್ ಘಡಿತಾಂಕ್ ಸ್ಪಂದನ್ ಕರ‍್ತೇ ಆಸಾಂವ್? ಸಮಾಜಿಕ್ ಜಾವ್ನ್ ಕಿತ್ಲೆಂ ಆಮಿ vocal ಆಸಾಂವ್. ಸದ್ದ್ಯಾಚ್ಯಾ ಸಮಾಜೆಚ್ಯಾ ಸಮಸ್ಸ್ಯಾಂಕ್ ಕಿತ್ಲ್ಯಾ ಮಾಪಾನ್ ಸಾಹಿತ್ಯಾಂತ್ ಹಾಡ್ತಾಂವ್? ಆನಿ ಚಡ್ ಕರುನ್ ಆಮ್ಚೆಥಂಯ್ ಸಮಾಜ್ ಪಾರ್ಕುಂಚಿ ದೀಶ್ಟ್ ಕಿತ್ಲಿ ಚಿಕಿತ್ಸಕ್ ಆಸಾ ಮ್ಹಣ್ಚಿಂ ಸವಾಲಾಂ ಉದೆತಾತ್.

SUBSCRIBE ARSO 

ವಿಚಾರ್ – ವಿಜ್ಞಾನ್ – ಸಾಹಿತ್ಯ್ ಆಶಯಾಖಾಲ್ ಪಾಟ್ಲ್ಯಾ ಧಾ ವರ್ಸಾಂ ಪಾಸುನ್ ಕೊಂಕ್ಣೆಂತ್ ಫಾಯ್ಸ್ ಜಾವ್ನ್ ಆಸ್ಚೆಂ ಪತ್ರ್ ಆರ್ಸೊ. ವೈಚಾರಿಕ್ ನದ್ರೆಚ್ಯಾ ಆನಿ  ವೈಜ್ಞಾನಿಕ್ ಮನೋಭಾವಾಚ್ಯಾ ವಿಂಚ್ಣಾರ್ ಬರ್ಪಾಂ ಸಾಂಗಾತಾ ಆರ್ಸೊ ಪತ್ರಾರ್ ಕೊಂಕ್ಣಿ ತಶೆಂ ಹೆರ್ ಭಾಸಾಂ ಥಾವ್ನ್ ಅನುವಾದ್ ಕೆಲ್ಲ್ಯೊವಿಂಚ್ಣಾರ್ ಮಟ್ವ್ಯೊ ಕಾಣಿಯೊ, ಕವಿತಾ ಫಾಯ್ಸ್ ಜಾತಾತ್. ವಾಚ್ಪ್ಯಾಂಚ್ಯಾ ವರ್ಗಣೆಚ್ಯಾ ಬಳಾನ್ ಬರೆಂ ವಾಚಪ್ ದಿಂವ್ಚೆಂ ಪ್ರೇತನ್ ಕರುನ್ ಆಸಾಂವ್. ಪರ್ಗಾಂವಾಂತ್ ಆಸ್ಚ್ಯಾ ವಾಚ್ಪ್ಯಾಂನಿ ವರ್ಗಣ್ದಾರ್ ಜಾಲ್ಯಾರ್ ಭಾರತಾಂತ್ ತಾಂಚ್ಯಾ ಘರಾ ಪತ್ರ್ ಆನಿ ವಾಟ್ಸಾಪಾಚೆರ್ ತಾಂಕಾ ಇ – ಪತ್ರ್ ಧಾಡುನ್ ದಿತಾಂವ್. ವರ್ಸಾಚಿ ವರ್ಗಣಿ : ರು. 500/- ದೋನ್ ವರ್ಸಾಂಕ್ : ರು.1,000/- .  ಆರ್ಸೊ ಪತ್ರಾಚ್ಯಾ ವೈಚಾಕ್ – ವೆಗ್ಯಾನಿಕ್  ಸಾಹಿತ್ಯಾಚಾ ಮಿಸಾಂವಾಂತ್ ರು.10,000/- ಪಾವಿತ್ ಕರುನ್ ಭಾಗಿದಾರ್ ಜಾವ್ಯೆತ್.  ಚಡಿತ್ ವಿವರಾಕ್ ವಾಟ್ಸಾಪಾಚೆರ್ +91 9449 77 0629 ಹ್ಯಾ ನಂಬ್ರಾಚೆರ್ ಸಂಪರ್ಕ್ ಕರ್ಯೆತ್.  ವರ್ಗಣಿ / ಪಾತ್ರೊನ್ ಆಯ್ವಜ್ ಧಾಡುಂಕ್  ಕ್ಯು ಆರ್ ಕೋಡ್  ಹಾಂಗಾಸರ್ ದಿಲಾ.

ಕಿತ್ಲ್ಯಾಗೀ ವರ‍್ಸಾಂಥಾವ್ನ್ ಜಾಯ್ತೆಕಡೆ ಶಿಬಿರಾಂ ಜಾತಾತ್. ಥೊಡೆಕಡೆ ಯುವಕಾಂಕ್ ಸರ್ಕಾರಿ ಹುದ್ದೆ ಆಪ್ಣಾಂವ್ಚೆ ಕಶೆ? ಉಂಚ್ಲೆಂ ಶಿಕಪ್ ಜೊಡುನ್ ಬರೇಂ ಕಾಮ್ ಆಪ್ಣಾಂವ್ಚೆಂ ಕಶೆಂ? ಕಾಜಾರ್ ಜಾವ್ನ್ ಜಿಣಿ ಬರೀ ಥರಾನ್ ಸಾರ‍್ಚಿ ಕಶಿ? ಅಸಲ್ಯಾ ವಿಶಯಾಂಚೆರ್ ಹಿಂ ಶಿಬಿರಾಂ ಆಸ್ತಾತ್. ಪುಣ್ ಹೆ ಸರ್ಕಾರಿ ಹುದ್ದೆ, ಬರೇಂ ಕಾಮ್ ಹಾಚೆಸವೆಂ ಸಾಹಿತ್ಯಾಂತ್‌ಯೀ ಅಸ್ಮಿತಾಯ್ ದಾಕೊಂವ್ಚಿ ತುರ್ತ್ ಗರ್ಜ್ ಕ್ರಿಸ್ತಾಂವ್ ಸಮುದಾಯಾಕ್ ಆಸಾ. ಕ್ರಿಸ್ತಾಂವ್ ಸಮುದಾಯಾಕ್ ವೈಚಾರಿಕ್ ಆನಿ ವೈಜ್ಞಾನಿಕ್ ಜಾವ್ನ್ ಬಳಿಶ್ಟ್ ಜಾಯ್ನಾತ್ಲ್ಯಾರ್ ಫುಡೆಂ ಏಕ್ ವ್ಹಡ್ ಆನ್ವಾರ್ ಯೆಂವ್ಚಿ ಸಾಧ್ಯತಾಯ್ ಆಸಾ. ಕಿತ್ಯಾಕ್ ಮ್ಹಳ್ಯಾರ್ ಉಣ್ಯಾಸಂಖ್ಯಾಂತಾಚೆರ್ ದಾಢ್ ಘಾಲುಂಕ್ ರಾಕೊನ್ ಆಸ್ಚ್ಯಾ ಫ್ಯಾಸಿಸ್ಟ್ ಸಕ್ತೆಂಕ್ ಕ್ರಿಸ್ತಾಂವ್ ಸಮುದಾಯಾಚೆ ಮುಕೆಲಿಚ್ ಆಯ್ದಾಂ ತಯಾರ್ ಕರ‍್ನ್ ದಿತೇ ಆಸಾತ್. ಹಾಚೆವಿಶಿಂ ಜಾಗ್ರುತ್ ಆಸಜೆ ತರ್ ಸಮಾಜ್ ಪಾರ್ಕುಂಚಿ ದೀಶ್ಟ್ ಆಸಜೆ. ಇತಿಹಾಸಾಂತ್ ಜಾವ್ನ್ ಗೆಲ್ಲ್ಯಾ ಘಡಿತಾಂಚಿ ಇಲ್ಲಿಶಿ ತರೀ ಜಾಣ್ವಾಯ್ ಆಸಜೆ. ಫಕತ್ ಕ್ರಿಸ್ತಾಂವ್ ಲೊಕಾಕ್ ಟಿಪ್ಪುನ್ ಕಶೆಂ ಆಂಬುಡ್ನ್ ವ್ಹೆಲೆಂ ಮ್ಹಣ್ ಆನಿಕೀ ರಡೊನ್ ಬಸ್ಲ್ಯಾರ್ ಆತಾಂ ಸಮುದಾಯಾಭಿತರ‍್ಲೆಚ್ ಖಂಯ್ ಆಂಬುಡ್ನ್ ವ್ಹರ‍್ತೇ ಆಸಾತ್ ಮ್ಹಳ್ಳೆಂ ಝಳ್ಕೊಂಚೆಂನಾ.

ಹೆರ್ ಸಮುದಾಯಾಚೊ ಲೋಕ್ ಕಸೊ ಸಾಹಿತ್ಯ್ ಶೆತಾಂತ್ ಆಪ್ಲಿ ಅಸ್ಮಿತಾಯ್ ಘಟ್ ಕರ‍್ತೇ ಆಸಾ ಮ್ಹಣ್ ಫಕತ್ ಸಮಾಜಿಕ್ ಜಾಳಿಜಾಗ್ಯಾಂನಿ ದೀಶ್ಟ್ ಘಾಲ್ಯಾರ್ ಕಳ್ತಾ. ಅನ್ನ್ಯಾಯಾಕ್ ವೊಳಗ್ ಜಾಲ್ಲೆ, ಧರ್ಮಾಚ್ಯಾ ನಾಂವಾನ್ ಹಿಂಸಾಕ್ ವೊಳೊಗ್ ಜಾಲ್ಲೆ ಸಮುದಾಯ್ ಬಳಿಶ್ಟ್ ಥರಾನ್ ಸಾಹಿತ್ಯಾಂತ್ ಫ್ಯಾಸಿಸ್ಟ್ ಸಕ್ತೆಂಕ್ ಫುಡ್ ಕರುನ್ ಆಸಾ. ಹಾಂತುಂ ಕ್ರಿಸ್ತಾಂವ್ ಸಮುದಾಯ್‌ಚ್ ಆಳ್ಸಾಯ್ ಕರ‍್ತೇ ಆಸಾ. ಕ್ರಿಸ್ತಾಂವ್ ಸಮುದಾಯ್ ಫಕತ್ ಧರ್ಮಿಕ್ ವಾಚಪ್ ಮಾತ್ರ್ ವಾಚಿನಾಸ್ತಾಂ, ಹೆರ್ ವಾಚ್ಪಾಂಕ್‌ಯೀ ಆಪ್ಲಿಂ ಮನಾಂ ಉಗ್ತಿಂ ಕರುಂ. ಫಕತ್ ಬೈಬಲ್ ಮಾತ್ರ್ ನ್ಹಯ್ ಆಸ್ತಾಂ, ಹೆರ್ ಬುಕಾಂಕ್‌ಯೀ ಘರಾ ಜಾಗೊ ದೀಂವ್. ನಾ ತರ್ ಫಾಲ್ಯಾಂ ಸಮಾಜೆಂತ್ ಆಮ್ಕಾಂ ಜಾಗೊ ಆಸ್ಚೊನಾ.

■ ವಿಲ್ಸನ್, ಕಟೀಲ್

1684 ವರ್ಸಾ ಕೊಂಕ್ಣಿಚೆರ್ ಪುರ್ತುಗೆಜ್ ಸರ್ಕಾರಾನ್ ಅಧಿಕೃತ್ ಬಂದಿ ಘಾಲಿ. ಪರತ್ ಎಕುಣಿಸಾವ್ಯಾ ಶೆಕ್ಡ್ಯಾಚ್ಯಾ ದುಸ್ರ್ಯಾ ಅರ್ದಾಂತ್, 1892 ವರ್ಸಾ ಪುಣ್ಯಾಂತ್ ಕೊಂಕ್ಣಿ ಭಾಸ್ ಪರ್ತುನ್ ಎಕಾ ನವ್ಯಾಚ್ ರುಪಾರ್ ಫುಲುಂಕ್ ಸುರು ಜಾಲಿ. ಎದುವಾರ್ದ್ ಬ್ರೂನ್ ದ ಸೌಜಾಚ್ಯಾ “ಉದೆಂತೆಚೆಂ ಸಾಳಕ್” ನೆಮಾಳ್ಯಾ ವರ್ವಿಂ ಆಧುನಿಕ್ ಕೊಂಕ್ಣಿ ಬರ್ಪಾವಳ್ ಸುರು ಜಾತಾ. ಹಿ ಚಡ್ ಕರುನ್ ಬಾರ್ದೆಶಿ ಬೊಲಿಯೆಂತ್ ಆಸ್ಲಲಿ. ಮಾಗಿರ್ ಶಣೈ ಗೊಂಯ್‌ಬಾಬ್ ತಸಲ್ಯಾ ಕೊಂಕ್ಣಿ ವೀರಾನ್ ಖೊಲಾಯೆನ್ ಕೊಂಕ್ಣಿಚೆರ್ ಅಭ್ಯಾಸ್ ಕರುನ್ ಅಂತ್ರುಜಿ ಕೊಂಕ್ಣಿಂತ್ ಆನಿ ಮುಂಬಯ್ ರಾಬಿತೊ/ ವಸ್ತಿ ಕರ್ತಲ್ಯಾ ಮಂಗ್ಳುರ್‌ಗಾರಾಂನಿ ಮಂಗ್ಳುರಿ ಕೊಂಕ್ಣಿಂತ್ ಸಾಹಿತ್ಯ್ ರಚುಂಕ್ ಸುರು ಕೆಲೆಂ. ಅಶೆಂ ಆಧುನಿಕ್ ಕೊಂಕ್ಣಿ ವಿಸ್ತಾರ್ಲಿ. ಹ್ಯಾ ಲೆಖನಾಂತ್ ಫಕತ್ ಪೊರ್ನೆ ಕೊಂಕ್ಣಿಚೆರ್ ಗಮನ್ ದಿಲಾಂ.

▌  ಪುರ್ತುಗೆಜಾಂ ಆದ್ಲಿ ಕೊಂಕ್ಣಿ ಬರ್ಪಾವಳ್

ಕೊಂಕ್ಣಿ ಭಾಸ್ ಸುಮಾರ್ ಅಟ್ವ್ಯಾ ಶೆಕ್ಡ್ಯಾಂತ್ ಮಹಾರಾಷ್ಟ್ರಿ ಪ್ರಕೃತಾ ಥಾವ್ನ್ ಏಕ್ ಸ್ವತಂತ್ರ್ ಭಾಸ್ ಮ್ಹಣ್ ಜಲ್ಮಾಕ್ ಆಯ್ಲಿ. ಇಕ್ರಾವ್ಯಾ ಶೆಕ್ಡ್ಯಾ ಥಾವ್ನ್ ತಿಚಿಂ ತೊಂಡ್ಪಾಶಿಂ ರುಪಾಂ ತಿಚ್ಯೆ ಖಾಶೆಲ್ಯೆ ಉತ್ರಾವಳಿಂತ್, ಸಾಂಗ್ಣ್ಯಾಂನಿ, ವಾಕ್ಪ್ರಚಾರಾಂತ್ ದಿಸುನ್ ಯೆತಾಲಿಂ. ಇಕ್ರಾವ್ಯಾ ಶೆಕ್ಡ್ಯಾಂತ್ ಕರ್ನಾಟಕಾಚ್ಯಾ ಹಾಸನ್ ಜಿಲ್ಲ್ಯಾಂತ್ ಆಸ್ಚ್ಯಾ ಶ್ರಾವಣಬೆಲಗೋಳಾಚ್ಯಾ ಜೈನ್ ಗೋಮಟೇಶ್ವರ್ ಬಾಹುಬಳಿಚ್ಯಾ ಪಾಂಯಾಂ ಮುಳಾಂತ್ ತಮಿಳ್ ಆನಿ ಕನ್ನಡ್ ಭಾಶೆ ಸಾಂಗಾತಾ ಕೊಂಕ್ಣಿಂತ್ ಆಸ್ಚ್ಯೊ ದೋನ್ ವಳಿ ಆಮ್ಕಾಂ ತ್ಯಾ ಕಾಳಾಚ್ಯೆ ಕೊಂಕ್ಣಿ ಭಾಶೆಂತ್ ಮೆಳ್ತಾತ್.

ಕೊಂಕ್ಣಿಚಿ ಖಾಶೆಲಿ ಪರಂಪರಾ ವಾಪ್ರುನ್ ತೆರಾವ್ಯಾ ಶೆಕ್ಡ್ಯಾಂತ್ ಆಸ್ಲಲ್ಯಾ ಮರಾಠಿ ಬರೊವ್ಪ್ಯಾಂನಿ ಜ್ಞಾನೇಶ್ವರಿ ಆನಿ ಲೀಳಾಚರಿತ್ರ್ ತಸ್ಲೆ ಗ್ರಂಥ್ ರಚ್ಲೆ. ಪೊರ್ನೆ ಮರಾಠಿ ಭಾಶೆಚಿಂ ಕಾಂಯ್ ರುಪಾಂ ಆಜುನ್‌ಯೀ ಕೊಂಕ್ಣಿ ಭಾಶೆಚ್ಯಾ ಹೆರ್ ಬೊಲಿಯಾಂನಿ ಆಮ್ಕಾಂ ಮೆಳ್ತಾತ್. ಹಿಂ ರುಪಾಂ ಆಧುನಿಕ್ ಮರಾಠಿ ಭಾಶೆಂತ್ಲ್ಯಾನ್ ನಪಂಯ್ಚ್ ಜಾಲ್ಯಾಂತ್. ಆನಂದ್ ನಾಡ್ಕರ್ಣಿಚ್ಯಾ “ಜ್ಞಾನೇಶ್ವರಿತಿಲ್ ಶಬ್ದಾಂಚಾ ಕೊಂಕ್ಣಿ ಬೊಲಿತ್ ಶೋಧ್” ಹ್ಯಾ ಪುಸ್ತಕಾಂತ್ ಅಸ್ಲೆ ಜಾಯ್ತೆ ಪುರಾವೆ ಆಮ್ಕಾಂ ಮೆಳ್ತಾತ್.

ಜುಜೆ ಪಿರೆರಾಚ್ಯಾ ಸಂಶೊಧನಾ ಪರ್ಮಾಣೆಂ ಕೊಂಕ್ಣಿ ಲೋಕ್ ವೆದಾಂತ್ಲಿಂ ಗಿತಾಂ ಬಾರಾವ್ಯಾ ಶೆಕ್ಡ್ಯಾಂತ್ಲ್ಯಾ ಕಲ್ಯಾಣಿ ಚಾಲುಕ್ಯಾಚ್ಯಾ ಸೋಮಶೇಕರ್ ತಿಸ್ರ್ಯಾಚ್ಯೆ ರಾಜ್ವಟೆ ವೆಳಾರ್ ಘಡಿಲ್ಲ್ಯಾ “ಅಭಿಲಾಶಿತಾರ್ಥ ಚಿಂತಮಣಿ” ಕೃತ್ಯೆಂತ್ ಮೆಳ್ತಾತ್. ಹಾಚೊ ಆಸ್ಪಾವ್ ಹಾಲಾಚ್ಯಾ ಗತಸಪ್ತಸತಿಂತ್ ಜಾಲೊ. ತೆರಾವ್ಯಾ ಆನಿ ಚೊವ್ದಾವ್ಯಾ ಶೆಕ್ಡ್ಯಾಚ್ಯೆ ಮದೆಗತ್ ನಾಮದೇವಾಚ್ಯೆ ಕೃತ್ಯೆಂತ್ ಎಕ್ಯೆ ಗೊವ್ಳಣಿನ್ ಕೊಂಕ್ಣಿಂತ್ ಸಾಂಗ್ಲಲಿಂ ಉತ್ರಾಂ ಆಮ್ಕಾಂ ಮೆಳ್ತಾತ್. ರಾಮಾಯಣಾಚ್ಯೊ ಆನಿ ಮಹಾಭಾರತಾಚ್ಯೊ ಕಾಣಿಯೊ ಸಯ್ತ್ ಹ್ಯಾಚ್ ಶೆಕ್ಡ್ಯಾ ಉಪ್ರಾಂತ್ ಕೊಂಕ್ಣಿ ಪಂಡಿತಾಂನಿ ರಚ್ಲಲ್ಯೊ ಆಸತ್.

▌  ಪುರ್ತುಗೆಜಾಂಚ್ಯಾ ಕಾಳಾರ್ ಕೊಂಕ್ಣಿ ಬರ್ಪಾವಳ್

1510 ವರ್ಸಾ ಗೊಂಯ್ ಪುರ್ತುಗೆಜಾಂಚ್ಯಾ ಶೆಕಾ (ಆಡಳ್ತೆಂ) ಖಾಲ್ ಆಯ್ಲೆಂ. ಪಯ್ಲೆಂ ತಾಣಿಂ ಥಳಾವ್ಯಾ ಮುಖೆಲ್ಯಾಂಚ್ಯಾ ಆದಾರಾನ್ ಗೊಂಯ್ ಶಾರ್ ಜಿಕ್ಲೆಂ ಆನಿ ಮಾಗಿರ್ 1543 ವರ್ಸಾ ಬಿಜಾಪೂರಾಚ್ಯಾ ಸುಲ್ತಾನಾನ್ ಬಾರ್ದೆಸ್ ಮ್ಹಾಲ್ (ತಾಲುಕ್) ಆನಿ ಸಾಶ್ಟಿ ಮ್ಹಾಲ್ ಪುರ್ತುಗೆಜಾಂಕ್ ಶಾಂತಿ ಕರಾರಾ ಪರ್ಮಾಣೆಂ ದಿಲೆ. ಅಶೆಂ ತೀಸ್ವಾಡಿಂತ್, ಬಾರ್ದೆಸಾಂತ್ ಆನಿ ಸಾಶ್ಟಿಂತ್ ಪುರ್ತುಗೆಜಾಂಚಿ ರಾಜ್ವಟ್ ಸುರು ಜಾಲಿ.

ತ್ಯಾ ಕಾಳಾರ್ ಕಿತ್ಲೆಂ ಕೊಂಕ್ಣಿ ಸಾಹಿತ್ಯ್ ಆಸ್ಲೆಂ ತೆಂ ಸಾಂಗುಂಕ್ ಆಮ್ಚ್ಯೆ ಲಾಗಿಂ ಘಟ್ ಪುರಾವೆ ನಾಂತ್. ಕ್ರಿಸ್ತಿ ಧರ್ಮ್ ಪರ್ಗಟ್ಣಾರಾಂನಿ ತಿ ಭಾಸ್ ಶಿಕ್ಚ್ಯೆ ಖಾತಿರ್ ಸಾಶ್ಟಿಚ್ಯಾ ಕೊಂಕ್ಣಿ ಪಂಡಿತಾಂಚೊ ಆದಾರ್ ಘೆತ್ಲೊ. ತ್ಯಾ ಪಂಡಿತಾಂನಿ ರಾಮಾಯಣ್ ಆನಿ ಮಹಾಭಾರತಾಚ್ಯೊ ಕಾಣಿಯೊ ಸಾಂಗ್ಲ್ಯೊ, ಜ್ಯೊ ತಾಣಿಂ ರೊಮಿ ಲಿಪಿಯೆಂತ್ ಬರೊವ್ನ್ ಕಾಡ್ಲ್ಯೊ. 1556 ವರ್ಸಾ ಗೊಂಯಾಂತ್ ಆಶಿಯಾ ಖಂಡಾಚೊ ಪಯ್ಲೊ ಛಾಪ್ಖಾನೊ ತಾಣಿಂ ಸ್ಥಾಪ್ಲೊ ಆನಿ ಕೊಂಕ್ಣಿ ಪುಸ್ತಕಾಂ ಉಜ್ವಾಡಾಕ್ ಹಾಡ್ಲಿಂ. ಹಾಂತುಂ ವಿದೆಶಿ ತಶೆಂಚ್ ದೆಶಿ ಕೊಂಕ್ಣಿ ಪಂಡಿತಾಂಚೊ ಆಸ್ಪಾವ್ ಆಸಾ. ಆಂದ್ರೆ ವಾಜ್ ನಾಂವಾಚ್ಯಾ ಎಕಾ ಗೊಂಯ್ಕಾರ್ ತರ್ನಾಟ್ಯಾನ್ ವಿದೆಶಿ ಧರ್ಮ್ ಪರ್ಗಟ್ಣಾರಾಂಕ್ ಕೊಂಕ್ಣಿ ಶಿಕೊಂವ್ಚ್ಯೆ ಖಾತಿರ್ ಕೊಂಕ್ಣಿಚೆಂ ಪಯ್ಲೆಂ ವ್ಯಾಕರಣ್ ತಯಾರ್ ಕೆಲೆಂ. ಹಾಚೆರ್ ಆದಾರುನ್ ಮಾಗಿರ್ ತೊಮಾಸ್ ಸ್ಟೀವನ್ಸ್ ನಾಂವಾಚ್ಯಾ ಜೆಜ್ವಿತ್ ಪಾದ್ರಿನ್ ದುಸ್ರೆಂ ಕೊಂಕ್ಣಿ ವ್ಯಾಕರಣ್ ಪುಸ್ತಕ್ ರಚ್ಲೆಂ, ಜೆಂ 1640 ವರ್ಸಾ ತಾಚ್ಯಾ ಮರ್ಣಾ ಉಪ್ರಾಂತ್ ಮಿಶನರಿಂನಿ ಛಾಪುನ್ ಕಾಡ್ಲೆಂ.

ಹ್ಯಾ ವಾವ್ರಾಂತ್ ಹೆನ್ರಿಕ್ ಹೆನ್ರಿಕಿಶ್, ಜುವಾಂವ್ ದ ಸಾಂ ಮಾತಿಯಾಶ್, ಕಾರೆಲ್ ಪ್ರಿಕ್ರಿಲ್ ಆನಿ ಗೊಂಯ್ಚ್ಯಾ ಸಿಮಾಂವ್ ಆಲ್ವಾರಿಶ್ ತಶೆಂಚ್ ಗೊಂಯಾಂತ್ ಜಲ್ಮಲ್ಲ್ಯಾ ಫಿಂರ್ಗಿ ಮನಿಸ್ ಗಾಶ್ಪಾರ್ ದ ಸಾಂ ಮಿಗೆಲ್ ಹಾಣಿಂ ಕೊಂಕ್ಣಿಂತ್ ಸಾಹಿತ್ಯ್ ರಚ್ಲೆಂ. ತಾಚ್ಯೆ ಉಪ್ರಾಂತ್ ಜೆಜ್ವಿತ್, ಫ್ರಾನ್ಸಿಸ್ಕಾನ್ ಆನಿ ದೊಮಿನಿಕಾನ್ ಮಠ್ವಾಶಿ ಪಾದ್ರಿಂನಿ ಸಬಾರ್ ಕೊಂಕ್ಣಿ ಕೋಶ್, ಗ್ರಂಥ್ ಆನಿ ಸಾಹಿತ್ಯ್ ರಚ್ಲೆಂ. ತ್ಯಾ ಕಾಳಾಚ್ಯೆ ಕೊಂಕ್ಣಿಚೆ ಸುಮಾರ್ ಸಾತ್ ಶಬ್ದ್‌ಕೋಶ್ ಆಸಾತ್. ಸಂಸಾರಾಂತ್ಲ್ಯಾ ವಿಂಗಡ್ ವಿಂಗಡ್ ಗ್ರಂಥಾಲಯಾಂತ್ ತೆ ಆಸಾತ್. ತೆ ಭಾಯ್ರ್ ಮಿಶನರಿ ಬರ್ಪಾಂ ಚಡ್ ಕರುನ್ ದೊತೊರ್ನಿಚಿಂ ಪುಸ್ತಕಾಂ ಪ್ರಶ್ನೋತ್ತರಿ (ಸವಾಲಾಂ-ಜಾಪಿ) ರುಪಾರ್, ಸಾಂತಾಂ ಭಕ್ತಾಂಚೆಂ ಜಿವಿತ್, ವಾಂಜೆಲಾಂಚಿಂ ಥೊಡಿಂ ಭಾಶಾಂತರಾಂ, ಭಕ್ತಿ ಪ್ರಬಂದಾಂ ಆನಿ ಶೆರ್ಮಾಂವ್ ವಾ ಧರ್ಮೋಪದೆಶ್ ಹಾಂತುಂ ಆಟಾಪ್ತಾತ್. ತಾಣಿಂ ಹೆ ಗ್ರಂಥ್ ಚಡ್ ಕರುನ್ ರೊಮಿ ಲಿಪಿಯೆಂತ್ ರಚ್ಲಲೆ. ಹಾಕಾ ಏಕ್‌ಚ್ ಆಡ್ವಾದ್ – ಫ್ಲೊಸ್ ಸಾಂಕ್ತೊರುಮ್. ಹೊ ಗ್ರಂಥ್ ಹಳೆಕನ್ನಡ್ ವಾ ತ್ಯಾ ಕಾಳಾಚ್ಯೆ ಗೊಂಯ್ಕಾನಡಿ ಲಿಪಿಯೆಂತ್ ಆಸಾ.

ಗೊಂಯಾ ಭಾಯ್ರ್ ಕೊಚಿಂತ್ ತೀನ್ ಕೊಂಕ್ಣಿ ಪಂಡಿತಾಂನಿ ಪ್ರಮಾಣಿಕೃತ್ ಕೆಲ್ಲೆಂ “ಹೊರ್ಟಸ್ ಇಂಡಿಕಸ್ ಮಲಾಬಾರಿಕಸ್” ಜೆಂ ಎಕಾ ಡಚ್ ಜಾಣಾರ್ ಹೆನ್ರಿಕುಸ್ ಫಾನ್ ರೆಡಾನ್ 1678 ಆನಿ 1693 ವರ್ಸಾ ಛಾಪುನ್ ಕಾಡ್ಲಲೆಂ. ಮಂಗ್ಳುರಾಂತ್ ಆಸ್ಲಲ್ಯಾ ಎಕಾ ಗೊಂಯ್ಕಾರ್ ಪಾದ್ರಿನ್ ಜೊಕಿಂ ದೆ ಮಿರಾಂದಾನ್, “ರಿಗ್ಲೊ ಜೆಜು ಮಳ್ಯಾಂತ್” ಮ್ಹಳ್ಳೆಂ ಏಕ್ ಕೊಂಕ್ಣಿ ಕಾವ್ಯ್ ಸುಮಾರ್ 1780 ವರ್ಸಾ ರಚ್ಲೆಂ. ದೊ. ಜುಜೆ ಪಿರೆರಾ ಪರ್ಮಾಣೆಂ ಇತ್ಲ್ಯಾನ್ “ಪೊರ್ನೆ ಪ್ರಮಾಣ್ ಕೊಂಕ್ಣಿಚೊ” (Old Standard Konkani) ಕಾಳ್ ಸೊಂಪ್ತಾ.

ಹಾಂಗಾ ಏಕ್ ಖಾಶೆಲಿ ಗಜಾಲ್ ಮ್ಹಳ್ಯಾರ್ ತೀನ್‌ಯೀ ಶೆಕ್ಡ್ಯಾಂನಿ, ಮ್ಹಣ್ಜೆ ಸೊಳಾವ್ಯಾ ಶೆಕ್ಡ್ಯಾ ಥಾವ್ನ್ ಅಟ್ರಾವ್ಯಾ ಶೆಕ್ಡ್ಯಾ ಮ್ಹಣಸರ್ ಆಸ್ಚ್ಯೆ ಕೊಂಕ್ಣಿ ಭಾಶೆಚೆಂ ವ್ಯಾಕರಣ್ ಸರಿ ಸುಮಾರ್ ಏಕ್ ಸಾರ್ಕೆಂಚ್ ಆಸಾ. ಹಾಚಿ ತುಳಾ ಕೊಂಕ್ಣಿಕ್ ಲಾಗಿಂ ಆಸ್ಚ್ಯೆ ಮರಾಠಿ ಭಾಶೆ ಕಡೆ ಕರುನ್ ಕೊಂಕ್ಣಿಚೆಂ ಖಾಶೆಲೆಪಣ್ ಸಮ್ಜುಂಕ್ ಜಾತಾ.

▌ ಪೊರ್ನಿ ಕೊಂಕ್ಣಿ ಆನಿ ಪೊರ್ನಿ ಮರಾಠಿ – ಏಕ್ ತುಳಾ

ಕೊಂಕ್ಣಿ ಭಾಶೆಚೊ ಜಲ್ಮ್ ಆಟ್ವ್ಯಾ ಶೆಕ್ಡ್ಯಾಂತ್ ಮಹಾರಾಷ್ಟ್ರಿ ಪ್ರಕೃತಾಚ್ಯಾ ಎಕಾ ಫಾಂಟ್ಯಾ ಥಾವ್ನ್ ಜಾಲೊ ಜಾಲ್ಯಾರ್, ದುಸ್ರ್ಯಾ ಫಾಂಟ್ಯಾ ಥಾವ್ನ್ ಮರಾಠಿ ಜಲ್ಮಾಕ್ ಆಯ್ಲಿ. ಉತ್ತರ್ ಭಾರತಾ ಥಾವ್ನ್ ಆಯ್ಲಲ್ಯಾ ಜಮಾತಿ (ಸವ್ರಾಶೆಣಿ ಪ್ರಕೃತ್ ಉಲೊವ್ಪಿ) ಆನಿ ಕೊಂಕ್ಣಾಂತ್ ಆಸ್ಲಲ್ಯಾ ಲೊಕಾಂಚ್ಯೆ ಜಿಬೆರ್ ಘೊಳ್ಚ್ಯೆ ಭಾಶೆ ಥಾವ್ನ್ ಕೊಂಕ್ಣಿ ಭಾಸ್ ಉಪ್ಜಲಿ. ಆಪ್ಲ್ಯಾ ಜಲ್ಮಾ ಥಾವ್ನ್ಚ್ ತಿ ದ್ರಾವಿಡಿ ಭಾಸಾಂಚ್ಯಾ (ಚಡ್ ಕರುನ್ ಕನ್ನಡ್) ಸಂಪರ್ಕಾಂತ್ ಆಯ್ಲಿ ಆನಿ ಮಾಗಿರ್ ಫಾರ್ಶಿ, ಅರ್ಬಿ ಆನಿ ತುರ್ಕಿ ಭಾಸಾಂ ಕಡೆ ತಿಚೊ ಸಂಪರ್ಕ್ ಜಾಲೊ. ಮರಾಠಿ ಭಾಶೆಚೆಂ ಪಯ್ಲೆಂ ಗ್ರಾಂಥಿಕ್ ರೂಪ್ ಆಮ್ಕಾಂ ಜ್ಞಾನೇಶ್ವರಿಂತ್ ಮೆಳ್ತಾ. ಮರಾಠಿ ಭಾಶೆಚ್ಯಾ ಸಂತ್ ಜ್ಞಾನೇಶ್ವರಾನ್ ಭಗವತ್‌ಗೀತೆಚೊ  ಸಾರ್ ಆಪ್ಲ್ಯಾ ಹ್ಯಾ ಗ್ರಂಥಾಂತ್ ದಿಲಾ. ರಾಜಕೀ ಆಸ್ರೊ ಮೆಳ್ಳ್ಯೆ ವರ್ವಿಂ ಆನಿ ಆಪ್ಲ್ಯೆಚ್ ಭುಯೆಂತ್ ತಿಚಿ ವಾಡಾವಳ್ ಜಾಂವ್ಕ್ ಲಾಗ್ಲ್ಯಾನ್ ಮರಾಠಿ ಭಾಸ್ ಚಡ್ ವೆಗಾನ್ ಫುಲ್ಲಿ. ಜ್ಞಾನೇಶ್ವರಿಚ್ಯಾ ಸಬ್ದಾಂ ಭಂಡಾರಾಚಿ ತುಳಾ ದಿಯೆಗ್ ರಿಬೈರಾಚ್ಯಾ ಕೊಂಕ್ಣಿ ಕೊಶಾ ಕಡೆ ಹಾಂಗಾ ಕೆಲ್ಯಾ.

ಹಾಂಗಾ ಗಮನ್ ದಿಂವ್ಚ್ಯೊ ತಸ್ಲ್ಯೊ ಕಾಂಯ್ ಗಜಾಲಿ ದಿಸ್ತಾತ್. ಪೊರ್ನೆ ಕೊಂಕ್ಣಿ ಆನಿ ಪೊರ್ನೆ ಮರಾಠಿಚ್ಯೆ ಉತ್ರಾವಳಿಂತ್ ಚಡ್‌ಸೊ ಫರಕ್ ನಾ. ಕಾಂಯ್ ಕೊಂಕ್ಣಿ ಆನಿ ಮರಾಠಿ ಉತ್ರಾಂ ಜಿಂ ಆಧುನಿಕ್ ಕೊಂಕ್ಣಿ ಆನಿ ಮರಾಠಿ ಭಾಶೆಂತ್ ಮೆಳನಾಂತ್ ತಿಂ ಉತ್ರಾಂ ಹ್ಯಾ ದೋನ್ಯಿ ಕೊಶಾಂನಿ ಆಸಾತ್. ತಸಲ್ಯಾ ಸಮಾನ್ ಉತ್ರಾಂಚ್ಯೊ ಕಾಂಯ್ ದೆಕಿ ಹಾಂಗಾ ಪಳೆಯಾತ್. ಅಂತ್ (end), ಅಂಧಾರ್ (darkness), ಅವ್ಕಾಳ್ (untimely), ಅಖರ್ (letter), ಉದರ್ (womb), ಖಾಂಡೆಂ (sword), ಚಾಂಗ್ (good), ತಂವ್ (that time), ದ್ರವೆಂ (treasure, wealth), ನಿರ್ಲೆಪ್ (pure), ಪೆಂಟ್ (market), ಭಾಕ್ (speech), ಶಿಂಸ್ (head), ಸೊಮ್ (moon), ಇತ್ಯಾದಿ.

ತಶೆಂಚ್ ಕಾಂಯ್ ಉತ್ರಾಂ ಜಿಂ ಆದಿಂ ಕೊಂಕ್ಣಿಂತ್ ಆನಿ ಮರಾಠಿಂತ್ ಸಾಮಾನ್ಯ್ ಉತ್ರಾಂ ಮ್ಹಣ್ ಘೊಳ್ತಾಲಿಂ ಆಜ್ ತಿಂ ಎಕಾಂತ್ ಆಸಾತ್, ದುಸ್ರ್ಯಾಂತ್ ನಾಂತ್. ದೆಕಿಕ್, ಕೊಂಕ್ಣಿಂತ್ ಹೆರ್ (other) ಗರ್ಬು (womb), ಘಾಂಸು (mouthful), ಜಗು (world), ದಾದುಲೊ (man, husband), ಬೊಲು (word), ಪರಿಮಳು (fragrance), ಮುಕುಟು (crown), ಉದಕ (water) ಅಸ್ಲಿಂ ಉತ್ರಾಂ ಆಜುನ್‌ಯೀ ಸಾಮಾನ್ಯ್ ರಿತಿನ್ ಆಪ್ಲ್ಯಾ ಆಧುನಿಕ್ ರುಪಾರ್ ಕೊಂಕ್ಣಿಂತ್ ಘೊಳ್ತಾತ್. ಪೂಣ್ ಮರಾಠಿಂತ್ ತಿಂ ಫಕತ್ ಗ್ರಾಂಥಿಕ್ ರುಪಾರ್ ವಾಪರ್ತಾತ್. ದೊ. ವಿ. ಪಿ ಚವ್ಹಾಣಾ ಪರ್ಮಾಣೆಂ ಜ್ಞಾನೇಶ್ವರಾನ್ ತ್ಯಾ ಕಾಳಾಚ್ಯೆ ಕೊಂಕ್ಣಿ ಭಾಶೆಚಿಂ ಜಾಯ್ತಿಂ ಉತ್ರಾಂ ವಾಪರ್ಲಲಿಂ, ಜಾಂಚೊ ಉಪೇಗ್ ಆಜ್ ಆಧುನಿಕ್ ಮರಾಠಿಂತ್ ಜಾಯ್ನಾ. ಜ್ಞಾನೇಶ್ವರಾಚ್ಯೆ ಕೃತಿಯೆ ಉಪ್ರಾಂತ್ ಸುಮಾರ್ ತೀನ್ ಶೆಕ್ಡ್ಯಾ ಉಪ್ರಾಂತ್ ರಿಬೈರಾನ್ ಆಪ್ಲೊ ಕೊಂಕ್ಣಿ ಕೋಶ್ ರಚ್ಲೊ. ತರಿ ಆಮ್ಕಾಂ ದೋನ್‌ಯೀ ಉತ್ರಾವಳಿಂನಿ ಜಾಯ್ತೆಂ ಸಾರ್ಕೆಪಣ್ ದಿಸ್ತಾ. ತ್ಯಾ ಕಾಳಾಚಿ ಮರಾಠಿ ಆನಿ ಕೊಂಕ್ಣಿ ಭಾಶೆಚಿ ತುಳಾ ಕರುನ್ ಪ್ರೊ. ಲುರ್ದಿನ್ ತೀನ್ ಸಾಧ್ಯತಾಯೊ (possibilities) ಮಾಂಡ್ತಾ. ಪಯ್ಲಿ, ಕೊಂಕ್ಣಿ ಆನಿ ಮರಾಠಿ ದೋನ್ ವಿಂಗಡ್ ಪ್ರಕೃತಾಂತ್ಲ್ಯಾನ್ ಉಬ್ಜಲ್ಯಾತ್. ಪಯ್ಲಿ ಕೊಂಕ್ಣಿ ಉಬ್ಜಲಿ ಆನಿ ಮಾಗಿರ್ ತೀನ್ ಶೆಕ್ಡ್ಯಾ ಉಪ್ರಾಂತ್ ಮರಾಠಿ ಉಬ್ಜಲಿ. ದುಸ್ರಿ, ಕೊಂಕ್ಣಿ ಆನಿ ಮರಾಠಿ ಎಕಾಚ್ ಪ್ರಕೃತಾಂತ್ಲ್ಯಾನ್ ಉಬ್ಜಲ್ಯಾತ್, ಪೂಣ್ ದೋನ್ ವೆಗ್ಳ್ಯಾ ಪಾಂವ್ಡ್ಯಾರ್. ತಿಸ್ರಿ, ಮರಾಠಿ ಭಾಸ್ ಕೊಂಕ್ಣಿ ಭಾಶೆ ಥಾವ್ನ್ ಜಲ್ಮಾಕ್ ಆಯ್ಲಿ.

▌  ಕೊಂಕ್ಣಿ ಕೋಶ್ ಆನಿ ಮರಾಠಿ ಕೋಶ್

ಸತ್ರಾವ್ಯಾ ಶೆಕ್ಡ್ಯಾಚಿ ಕೊಂಕ್ಣಿ ಆನಿ ಮರಾಠಿ ಜಾಣಾ ಜಾಂವ್ಕ್ ರಿಬೈರಾಚೊ ಕೋಶ್ ಆನಿ ಪುರ್ತುಗೆಜಾಂನಿ ಆತಾಂಚ್ಯಾ ತಮಿಳ್ ನಾಡುಂತ್ಲ್ಯಾ ತಾಂಜಾವೂರ್ ಗಾಂವಾಂತ್ ರಚ್ಲಲ್ಯಾ ತಾಂಜಾವರಿ ಕೊಶಾ ಕಡೆ ಸರ್ ಕರುಂಕ್ ಜಾತಾ. ಮರಾಠಿ ಭಾಶೆಚೊ ಹೊ ಪಯ್ಲೊ ಕೋಶ್. ಅಶೆಂ, ಪಯ್ಲೊ ಸಗ್ಳೊ ಕೊಂಕ್ಣಿ ಕೋಶ್ 1570 ವರ್ಸಾ ಪುರ್ತುಗೆಜಾಂನಿ ರಚ್ಲೊ, ಆನಿ ಮಾಗಿರ್ ಮರಾಠಿ ಭಾಶೆಂತ್ ತಸ್ಲೊ ಕೋಶ್ ತಾಣಿಂ 1670 ವರ್ಸಾ ರಚ್ಲೊ. ರಿಬೈರಾಚ್ಯಾ ಕೊಂಕ್ಣಿ ಕೊಶಾಂತ್ ಪಂದ್ರಾ ಹಜಾರಾಂ ವಯ್ರ್ ಉತ್ರಾಂ ಆಸಾತ್. ತಾಂಜಾವರಿ ಮರಾಠಿ ಕೊಶಾಂತ್ ಸುಮಾರ್ ಧಾ ಹಜಾರ್ ಉತ್ರಾಂ ಆಸಾತ್. ಹ್ಯಾ ದೋನ್ಯಿ ಕೊಶಾಂನಿ ಫಕತ್ ದೇಡ್ ಹಜಾರ್ ಕೊಂಕ್ಣಿ-ಮರಾಠಿ ಸಮಾನ್ ಉತ್ರಾಂ ಆಸಾತ್. ಮ್ಹಣ್ತಚ್ ತ್ಯಾ ಕಾಳಾ ಥಾವ್ನ್ ಕೊಂಕ್ಣಿ ಆನಿ ಮರಾಠಿ ಭಾಸೊ ಆಪ್ಲ್ಯೆ ವೆಗ್ಳ್ಯೆಚ್ ದಿಶೆನ್ ವೆಚ್ಯೆ ವಾಟೆರ್ ಆಸ್ಲಲ್ಯೊ ದೋನ್ ವೆಗ್ಳ್ಯೊ ಭಾಸೊ ಮ್ಹಣ್ ಹಾಂಗಾ ದಿಸುನ್ ಯೆತಾ. ತ್ಯಾ ಕಾಳಾಂತ್ ಕೊಂಕ್ಣಿಂತ್ ಆನಿ ಮರಾಠಿಂತ್ ಜಾಯ್ತಿಂ ಸಮಾನ್ ಉತ್ರಾಂ ಮೆಳ್ತಾತ್. ದೆಕಿಕ್, ಆಜಿ (grandmother), ಅಳ್ಣಿ (saltless), ಕಟಕ್ (army), ಕಾಂಕಣ್ (bangle), ಕಿರ್ಡುಂ (snake), ಗುಫಾ (cave), ಘಾವ್ (wound), ಕೋಡ್ (leprosy), ಜಾಣಿವ್ (knowledge), ತಾಕ್ (buttermilk), ಧಂಯ್ (curd), ಬಿಡಾರ್ (lodging), ರುಪ್ಡೆಂ (mask), ಮೊತಿಂ (pearl), ಶಿಂಗುರು (little ass), ಸಯ್ತ್ (also), ಸಮೊರ್ (in front of), ಸೊಯ್ರಿಕ್ (relative, kinship), ಇತ್ಯಾದಿ.

ತೊಚ್ ತಾಂಜಾವೂರ್ ಕೋಶ್ ಬಾರಿಕ್ಸಾಣೆನ್ ಪಳೆತಾನಾ ಮಾಗಿರ್ ಕೊಂಕ್ಣಿ ಆನಿ ಮರಾಠಿ ಭಾಶೆಂತ್ ಸಮಾನ್ ಉತ್ರಾಂಚಿಂ ದೋನ್ ವೆಗ್ಳಿಂ ರುಪಾಂ ಜಾಲ್ಲಿಂ ದಿಸುನ್ ಯೆತಾತ್. ಹಾಂಗಾ ಪಯ್ಲೆಂ ಕೊಂಕ್ಣಿ ಉತರ್ ದಿಲಾಂ ಆನಿ ಮಾಗಿರ್ ಮರಾಠಿ ಉತರ್. ದೆಕಿಕ್, ಆಜೊ ಆನಿ ಆಜಾ (grandfather), ಅಜ್ಞಾನು ಆನಿ ಅಜ್ಞಾನ್ (ignorance), ಆಮೊಲಿಕು ಆನಿ ಆಮೊಲಿಕ್ (precious), ಉಣಾವ್ ಆನಿ ಉಣಿವ್ (scarcity), ಅಂತು ಆನಿ ಅಂತ್ (end), ಕಾಳು ಆನಿ ಕಾಳ್ (time), ಕಾಯ್ಳೊ/ ಕಾವ್ಳೊ ಆನಿ ಕಾವ್ಳಾ (crow), ಕೆಂಸು ಆನಿ ಕೇಸ್ (hair), ಕೊಂಪ್ರು ಆನಿ ಕೊಪರ್ (elbow), ಗಡು ಆನಿ ಗಡ್ (boundary), ಗೊಂವ್ಳೊ ಆನಿ ಗೌಳಿ (shepherd), ಘಟ್ಟಿ ಆನಿ ಘಟ್ (strong), ಜಗು ಆನಿ ಜಗ್ (universe), ತಾಪು ಆನಿ ತಾಪ್ (fever), ದಾಟು ಆನಿ ದಾಟ್ (thick), ಪಾಉಸು ಆನಿ ಪಾಊಸ್ (rain), ಪಾಡುವೊ ಆನಿ ಪಾಡ್ವೊ (first day after new moon), ಪಣಸು ಆನಿ ಫಣಸ್ (jackfruit), ಮೆಕ್ಳೊ ಆನಿ ಮೊಕ್ಳಾ (free), ಲಾಂಬು ಆನಿ ಲಾಂಬ್ (long), ಲೊಂಚು ಆನಿ ಲಂಚ್ (bribe), ಹಿಶೆಬು ಆನಿ ಹಿಶೊಬ್ (account), ಹುಶಾರು ಆನಿ ಹುಶಾರ್ (vigilant, alert), ಇತ್ಯಾದಿ.

ಜಿಂ ನಾಮಾಂ ಮೊಟ್ವ್ಯಾ ಇ, ಉ ಆನಿ ಒ-ಕಾರಾಂತ್ ಸೊಂಪ್ತಾತ್, ತಾಂತ್ಲ್ಯಾನ್ ಕೊಂಕ್ಣಿ ನಾಮಾಂಚೆಂ ಲಿಂಗ್ ವಳ್ಕುಂಕ್ ಜಾತಾ. ಪೊರ್ನೆ ಕೊಂಕ್ಣಿ ಭಾಶೆಚೆಂ ಹೆಂ ಏಕ್ ಖಾಶೆಲೆಪಣ್. ದೆಕಿಕ್ ಹಿಂ ಪೊರ್ನಿ ಕೊಂಕ್ಣಿ ಉತ್ರಾಂ ಪಳೆಯಾತ್ – ಆಜಿ (today), ಇತುಲೆಂ/ ಇತುಕೆಂ (this much), ಕೊಣು (who), ಕಾತರಿ (scissors), ದೊನಿ (two), ಕೆಳಿ (banana plant), ಚಿಟಿ (letter), ಜಣಿ (feminine people), ದೂಖಿ (pain), ಭಿತರಿ (inside), ರಾಶಿ (collection), ರಾತಿ (night), ಬಂದಡಿ (jail), ವಾತಿ (candle), ವಳಕಿ (acquaintance), ಶಿಂವಣಿ (needle work) ಇತ್ಯಾದಿ. ಸಾಶ್ಟಿಂತ್, ಕೊಡಿಯಾಳಿ ಆನಿ ಕೊಚಿಚ್ಯಾ ಕೊಂಕ್ಣಿ ಬೊಲಿಯಾಂನಿ ಹಿಂ ರುಪಾಂ ಆಜುನ್‌ಯೀ ಆಸಾತ್.

▌  ಸೊಂಪ್ಣಿ

ತೆರಾವ್ಯಾ ಶೆಕ್ಡ್ಯಾಚ್ಯೆ ಮರಾಠಿಂತ್ ಆನಿ ಸೊಳಾವ್ಯಾ ಶೆಕ್ಡ್ಯಾಚ್ಯೆ ಕೊಂಕ್ಣಿಂತ್ ಚಾರ್ ಶೆಕ್ಡ್ಯಾಂಚೊ ಅಂತರ್ ಆಸಾ. ಪೂಣ್ ಉತ್ರಾವಳ್ ಲಾಗಿಂ ಲಾಗಿಂ ಜುಳ್ತಾ (matching) ಆನಿ ರೂಪ್‌ವಿನ್ಯಾಸಾಂತ್ ಹಿಂ ಪ್ರಾಚಿನ್ ರುಪಾಂ ಆಜುನ್‌ಯೀ ಆಸಾತ್. ಮ್ಹಣ್ತಚ್ ಜ್ಞಾನೇಶ್ವರಾನ್ ತೆರಾವ್ಯಾ ಶೆಕ್ಡ್ಯಾಂತ್ ಜೆದ್ನಾಂ ಜ್ಞಾನೇಶ್ವರಿ ರಚ್ಲಿ, ಕೊಂಕ್ಣಿ ಭಾಶೆಕ್ ಜಲ್ಮುನ್ ತೀನ್ ಶೆಕ್ಡೆ ತರಿ ಜಾಲ್ಲೆ. ತಶೆಂಚ್ ಸಾತ್ ಶೆಕ್ಡ್ಯಾಂಚ್ಯಾ ಕಾಳಾ ಉಪ್ರಾಂತ್ ಪುರ್ತುಗೆಜಾಂನಿ ಜೆದ್ನಾಂ ಆಪ್ಲೆ ಕೊಶ್ ರಚ್ಲೆ ತಾಂಕಾಂ ಕೊಂಕ್ಣಿ ಭಾಶೆಚೆಂ ರೂಪ್‌ವಿನ್ಯಾಸ್ ಆಸಾ ತಶೆಂಚ್ ಮೆಳ್ಳೆಂ. ಹಾಂತ್ಲ್ಯಾನ್ ಕೊಂಕ್ಣಿ ಭಾಶೆಚಿ ಗಿರೆಸ್ತ್ಕಾಯ್ ಆನಿ ಖಾಶೆಲೆಪಣ್ ಝಳ್ಕತಾ. ಅಶೆಂ ಜರಿ ಮರಾಠಿ ಆನಿ ಕೊಂಕ್ಣಿ ಸಮಗೊತ್ರಿ ಭಾಸೊ, ತಾಂಚ್ಯೆ ಮದೆಂ ಜಾಯ್ತೆಂ ವೆಗ್ಳೆಪಣ್ ಆಸಾ. ದೆಕುನ್ ದುಬಾವಾ ವೀಣ್ ತ್ಯೊ ದೋನ್ ವೆಗ್ಳ್ಯೊ ಭಾಸೊ.

■  ಜೇಸನ್ ಪೀಂತ್, ಉದ್ಯಾವರ್

ಮ್ಹಜ್ಯಾ ಸ್ಟಡಿ-ಕಮ್-ಕಂಪ್ಯೂಟರ್ ರೂಮಾಂತ್ ಸುಶೆಗಾತ್ ಬಸೊನ್, ಸಮಾನ್ ನಾಗರಿ ಸಂಹಿತಾ ಬಾಬ್ತಿಂ ಇಂಗ್ಲೆಸಾಂತ್ ಏಕ್ ಲೇಖ್ ಜಮಂವ್ಚಾ ಕಾಮಾಂತ್ ಹಾಂವ್ ವ್ಯಸ್ತ್ ಆಸ್ಲೊಂ. ಯೆಜ್ಮಾನ್ ಹೊಲಾಂತ್ ಟಿವಿ ಪಳೆವ್ನ್ ಬಸೊನ್ ಆಸ್ಲಿ. ಚಡಾವತ್ತ್ ಮರಾಠಿ ಸೀರಿಯಲಾಂ.  ವ Food Food ರಾಂದ್ಪಾಚಿಂ ಪ್ರೊಗ್ರೇಮಾಂ. ಟಿವಿ ನ್ಯುಸ್ ಭಾರಿ ಪೈಸ್. ಆನಿಂ, ಪೊಲಿಟಿಕ್ಸ್? ನಾಂ ಬಾಬಾ ನಾಂ. ತಿ ಆನಿಂ ಪೊಲಿಟಿಕ್ಸ್ ಮ್ಹಳ್ಯಾರ್ ಮಾಜರ್ ಆನಿಂ ನ್ಹಾಣ್ ಆಸ್ಲೆಲ್ಯಾ ಪರಿಂ.

“ಓ ಹೆಲ್ಲೊ! ಕಾನಾಂತ್ಲಿ ಗುಡ್ದಿ ಕಾಡ್ ಆನಿಂ ಹಾಂಗಾ ಯೇ ಪಳೆಯಾಂ” ಬಸ್‍ಲ್ಲ್ಯಾ ಕಡೆಂ ಥಾವ್ನ್ಂಚ್ ಕಿಂಕ್ರಾಟ್ಲಿ ಮ್ಹಜಿ ಏವ್. ತೀಸ್ ವ್ಹರ್ಸಾಂ ಹಾಂವ್ ಘೊಳ್ಳಾಂ ಲೊಂಕಾಡ್ ಆನಿಂ ಮಿಲಾವ್ ಫೆಕ್ಟರೆಂತ್. ಮ್ಹಜ್ಯಾ (ಅನಿಂ ಏವೆಚ್ಯಾ) ಪೊಟಾಚೊ ಗ್ರಾಸ್ ಜೊಡುಂಕ್ 100 ಡೆಸಿಬಲ್ ಪಾಂವ್ಡ್ಯಾಂಕ್ ಮಿಕ್ವೊನ್ ಆವಾಜ್ ಕರ್ಚಿಂ ಮಿಶಿನಾಂಚೊ ದಿಸಾಳೊ ಸಾಂಗತ್ ಮ್ಹಜೊ. ವಯ್ಲ್ಯಾನ್, ಕ್ವಾಲಿಟಿ ಕಾನ್ ಪ್ಲಗ್ ದೀಂವ್ಕ್ ಕಂಪ್ಣೆಕ್ ಸುರಾತ್. ದೆಕುನ್ ಮ್ಹಾಕಾ ಇಲ್ಲೆಂ ’”ವಯ್ರ್” ಆಯ್ಕಾತಾ. ತಶೆಂ ಮ್ಹಜಿ ಮದಾಮ್ 140 ಡೆಸಿಬಲಾಚಿ ಗರ್ಜಣ್ ಘಾಲುಂಕ್ ಹುಶಾರ್. ಜಶೆಂ ಏರೋಪ್ಲೇನ್ ಲೇಂಡಿಂಗ್ ಜಾತಾನಾಂ ಆವಾಜ್ ಜಾತಾ ತಶೆಂ.

ಹೊಲಾಂತ್ ಯೇವ್ನ್ ಪಳೆತಾಂ ಕಿತೆಂ? ಮದಾಮ್ ರಿಪಬ್ಲಿಕ್ ಟಿವಿ ಚೆನೆಲ್ ಪಳೆತಾ. ಹೆಂ ಚೆನೆಲ್ ಆನಿಂ ಅರ್ನಾಬ್ ಗೋಸ್ವಾಮಿ ಮ್ಹಳ್ಯಾರ್ ಮ್ಹಾಕಾ ಎಲರ್ಜಿ. ಹಾಂವ್ ದೀಸಾಕ್ ಕೇವಲ್ ಅರ್ಧೆಂ ತಾಸ್ ಟಿವಿ ನ್ಯುಸ್ ಪಳೆತಾಂ. ತೆಂಯೀ WION ಚೆನೆಲ್ ಮಾತ್ರ್. ಅದಾನಿನ್ NDTV ಮಾಧ್ಯಮಾಂ ಆಪ್ಲೆ ತಾಬೆಂತ್ ಘೆಂವ್ಚ್ಯಾ ಪೈಲೆಂ NDTV ನ್ಯುಸ್ ಪಳೆತಲೊಂ. ಪ್ರತ್ಯೇಕ್ ಜಾವ್ನ್, ರವಿಶ್ ಕುಮಾರ್ ಪ್ರೈಮ್ ಟಾಯ್ಮ್ ಚುಕಾನಾತ್ಲೊಂ. ಅಸೊಂ, ತೆ ಬರೆ ದೀಸ್ ಪರತ್ ಯೇನಾಂತ್.

“ಆಮ್ಚೆಂ ಜೆರಾಲ್ ಚುನಾವ್ ಕೆದಾಳಾ ಮ್ಹಣ್ ಕಿತ್ಯಾಕ್ ವಿಚಾರ್ತಾಯ್? ವೋಟ್ ಘಾಲಿಜೆ ಮ್ಹಣ್ ಕೊರೊಜ್ ಉಠ್ಲಿಗೀ ತುಕಾ ಕಿತೆಂ? ಆದ್ಲ್ಯಾ ಪಾವ್ಟಿಂ ಮೋದಿಚ್ಯಾ ನಾಂವಾರ್ ಭಾಜಪಾಚೊ ಬುತಾಂವ್ ದಾಂಬುನ್ ಆಯಿಲ್ಲೆಂಯ್‌ನೇ?” ಚಿಡಾಯ್ಲೆಂ ಹಾಂವೆಂ.

“ಹಾಂವ್ ಆತಾಂ ಕನ್ವೆಡ್ತರ್ ಜಾಲ್ಯಾಂ. ಜಶೆಂ ಅರ್ನಾಬ್ ಗೋಸ್ವಾಮಿ. ತಾಚಿ #TomatoConspiracy ಡಿಬೇಟ್ ಆತಾಂ ಲೈವ್ ಚಲ್ತಾ. ಹಾಂಗಾ ಬಸ್ ಆನಿಂ ಆಯ್ಕ್. ಗೋದಿ ಮೀಡಿಯಾಚೊ ಗೋಸ್ವಾಮಿ ಲವ್ ಜಿಹಾದ್, ಹಿಜಬ್, ಹಲಾಲ್, ಆಜಾನ್, ರಾಮ್ ಮಂದಿರ್, ಅಡ್ತಿಗ್ 370, ಅಸ್ಸಾಮಾಂತ್ NRC ಆನಿಂ CAA, ಅಸ್ತಮ್ತಿ ಬೆಂಗಾಲಾಂತ್ ಮಮತಾಚಿ ಗುಂಡಾಗಿರಿ, ವಿಶ್ವಗುರು ಮೋದಿ ಅಸಲ್ಯಾಂ ವಿಷಯಾಂಚ್ಯೆರ್ hashtag ಲಾವ್ನ್ ಬೋಬೊ ಘಾಲ್ಚೊ ಮನಿಸ್ ಆಜ್ ಟೊಮೇಟೊ ಮೋಲಾಂ ತಸ್ಲಿಂ चोटि मॊटि बातें ಕರ್ತಾ! ತೇಂಯಿ ರಾತಿಂ 9 ವ್ಹರಾರ್ ಪೈಮ್ ಟಾಯ್ಮ್!”

“ಬಹುಶಾ ಬಾಯ್ಲೆನ್ ಟೊಮೇಟೊವಿಣೆಂ ರಾಂದ್ಲೆಲೆಂ ನಿಸ್ತೆಂ ವಾಡ್ಲೆಂ ಆಸ್ತೆಲೆಂ. ಬಜಾರಾಂತ್ ಟೊಮೇಟೊಚ್ಯೆಂ ಮೋಲ್ ಕಿಲ್ಯಾಕ್ 160-200 ರುಪೈ. ಟೊಮೇಟೊ ಕಿಲ್ಯಾಕ್ 20-30 ರುಪಿಯಾಂಕ್ ಮೆಳ್ತಾನಾಂ, ತಾಚ್ಯಾ ರುಚಿಚಿ ಬೆಂಗಾಲಿ ಫಿಶ್ ಕರಿ ಸದಾಂಯೀ ಭರ್ಪೂರ್ ವಾಡ್ತೆಲಿ ದಿಸ್ತಾ. ಟೊಮೇಟೊಚ್ಯೆಂ ಮೋಲ್ ಮಾತ್ರ್ ನಹಿಂ, ಹೆರ್ ಸರ್ವ್ ತರ್ಕಾರಿಂಚಿಂ ಮೋಲಾಂ ಆಕಾಸಾಕ್ ತೆಂಕ್ಲ್ಯಾಂತ್. ಆಲೆಂ ಕಿಲ್ಯಾಕ್ 160 ರುಪೈ, ಲಸೂಣ್ ಕಿಲ್ಯಾಕ್ 200 ರುಪೈ, ತರ್ನಿ ಮಿರ್ಸಾಂಗ್ ಕಿಲ್ಯಾಕ್ 200 ರುಪೈ, ಹೆರ್ ಸಾಮಾನ್ಯ್ ತರ್ಕಾರಿ ಕಿಲ್ಯಾಕ್ 80-100 ರುಪೈ”. ಕಾಲ್ ದನ್ಪರಾಂ ತರ್ಕಾರಿ ಬಜಾರಾಂತ್ ದಿಲ್ಲ್ಯಾಂ ಮೋಲಾಂಚಿ ಪಟ್ಟಿ ವಾಚುನ್ ಸಾಂಗ್ಲಿಂ ಹಾಂವೆಂ.

ಆಮ್ಗೆರ್ ಬಾಜರ್ ಹಾಡ್ಚೆಂ ಕಾಮ್ ಮ್ಹಜ್ಯೆಂ. ರಾಂದ್ಚೆಂ ಏವೆಚ್ಯೆಂ. ಜೆಂವ್ಚೆಂ ಧುವೆಚ್ಯೆಂ. ಸರ್ವ್ ಖರ್ಚಾಚಿಂ ಬಿಲ್ಲಾಂ ಫಾರಿಕ್ ಕರ್ಚಿ ಆನಿಂ ಲೇಕ್‌ಪಾಕ್ ದವರ್ಚಿ ಜವಾಬ್ದಾರಿ ಮ್ಹಜಿ. ಇಲ್ಲೆಶಿ ಕಂಜೂಸಿ ಕರಿಜೆ, ಅನಾವಶ್ಯಾಕ್ ಟಿವಿ ಓನ್ ದವರ್ನ್ ಸೊಫಾಚ್ಯೆರ್ ಜೆಮೆಂವ್ಕ್ ನಜೊ, ಶಿಂದಪ್ ಕೆಲ್ಯಾ ಉಪ್ರಾಂತ್ ಮಾತ್ರ್ ಗ್ಯೇಸ್-ಶ್ಟವ್ ಪೆಟಯ್ಜೆ, ರಾತಿಂ ಏಕ್-ದೋನ್ ವ್ಹರಾ ಪರ‍್ಯಾಂತ್ ಸೀರಿಯಲಾಂ ಪಳೆಂವ್ಕ್ ನಜೊ, ರಾತಿಂ ಧಾ ಇಕ್ರಾ ವ್ಹರಾಂ ಭಿತರ್ ವೇಳಾರ್ ನಿದಾಜೆ ಇತ್ಯಾದಿ ಇತ್ಯಾದಿ ಹಫ್ತ್ಯಾಳೆ ಶೆರ್ಮಾಂವ್ ಹಾಂವೆಂ ದಿಂವ್ಚೆ. ಉಪ್ರಾಂತ್, ತುಂವೆಂ ಚಡ್ ಜೋಡ್ನ್ ಹಾಡಿಜೆ ಮ್ಹಣ್ ಬಾಯ್ಲೆಚಿ ಲದಿನ್ ಹಾಂವೆಂಚ್ ಆಯ್ಕೊಂಚಿ. ಆಸೊಂ.

“ತರ್ಕಾರಿ ಪರ್ವಡ್ನಾಂ ತರ್ ಮಾಸ್ ಮಾಸ್ಳಿ ರಾಂದ್ಯಾಂ. ಗ್ರಿಲ್ ಕೆಲ್ಯಾರ್ ಜಾಲೆಂ. ಗ್ಯೆಸ್ ನಾಕಾ. ತೇಲ್ ಉಣೆಂ ಕಾಪ್ತಾ. ಟೊಮೇಟೊ, ಆಲೆಂ, ಲಸೂಣ್, ಮಿರ್ಸಾಂಗ್ ನಾಕಾ. ಅಶೆಂಯೀ, ಸಂಜೀವ್ ಕಪೂರಾಚ್ಯೆಂ Food Food ಚೆನೆಲ್ ಸದ್ದಾಂ ಪಳೆತಾಂ. ಹಾಂವ್ ಸಗ್ಳೆಂ ಮೇನೆಜ್ ಕರ್ತಾಂ. ತುಂ ಫಿಕಿರ್ ಕರಿನಾಕಾ.”

“ಮಾಸ್ ಮಾಸ್ಳೆಚಿಂ ಮೋಲಾಂ ಕಳಿತ್ ಆಸಾತ್‌ವೇ ತುಕಾ? ಕಸಲಿ ಮಾರ್ಗಿ ಸಲಹಾ ದಿತಾಯ್ ಕಳ್ತಾಯೇ ತುಕಾ? ಅರ್ನಾಬ್ ಗೋಸ್ವಾಮಿನ್ #FishConspiracy ಆನಿಂ #MeatConspiracy ಡಿಬೇಟ್ ಕರಿಜೆ ಕೊಣ್ಣಾಂ ತುಕಾ ಹೆಂ ಸಮ್ಜೊಂಕ್” ತುಕ್ಲಾಯ್ಲೆಂ ಹಾಂವೆಂ. “ಮೋದಿ ಕಾಳಾ ಪೈಲೆಂ ಬ್ರೊಯ್ಲರ್ ಕುಂಕಡ್ ಕಿಲ್ಯಾಕ್ 80-90 ರುಪೈ ಆಸ್ಲೆಂ ಆತಾಂ 170-180 ರುಪೈ. ಮಟ್ಟನ್ ಕಿಲ್ಯಾಕ್ 400-420 ರುಪೈ ಆಸ್‍ಲ್ಲೆಂ ಆತಾಂ 740-760 ರುಪೈ. ಕಿಲ್ಯಾಕ್ 600-700 ರುಪೈ ಸುರ‍್ಮಾಯ್ ಮಾಸ್ಳಿ ಆತಾಂ 1,300-1500 ರುಪಿಯಾ ಸಕಯ್ಲ್ ನಾಂ”.

ಮಾರ್ಗಾಯ್ ಅಶಿ ವಾಡ್ಲ್ಯಾಗಿ ದೀಸ್ ಕಾಡುಂಕ್ ಕಷ್ಟ್ ಜಾಲ್ಯಾತ್ ಆಮ್ಕಾಂ. 2013 ಇಸ್ವೆಂತ್ ಆಮಿಂ ಗಲ್ಫ್ ಗಾಂವ್ ಸೊಡ್ನ್ ಆಯ್ಲ್ಯಾಂವ್ ಆನಿಂ ಬೊಂಬೈ ಶೆರಾಂತ್ ಭಿಡಾರ್ ಕರ್ನ್ ರಾವ್ಲ್ಯಾಂವ್ ತವಳ್ ಚಿಂತುಂಕ್ ನಾತ್ಲೆಂ ಅಶೆಂ ಜಾಯ್ತ್ ಮ್ಹಣ್. ಆಮ್ ಆದ್ಮಿಚ್ಯೆ “ಬುರೆ ದಿನ್” ಹೆ ಮ್ಹಣ್ಯೆತ್.

2014 ಜೆರಾಲ್ ಚುನಾವೆ ವೇಳಾ, ಮೋದಿನ್ “ಅಚ್ಚೆ ದಿನ್” ಭಾಸಯ್ಲೆ. ಪರ್ಗಾಂವಾಂತ್ ಲಿಪವ್ನ್ ದಾಳ್ಳೆಲೊ ಕಾಳೊ ದುಡು ಶೆಂಭೊರ್ ದಿಸಾಂ ಭಿತರ್ ಪಾಟಿಂ ಹಾಡ್ತಾಂ. ಆಮ್ ಆದ್ಮಿಚ್ಯಾ ಬ್ಯೆಂಕ್ ಎಕೌಂಟಾಂತ್ ಪಂದ್ರಾ ಲಾಖ್ ಜಮೊ ಕರ್ತಾಂ. LPG ಸಿಲಿಂಡರಾಚ್ಯೆಂ ಮೋಲ್ 200 ರುಪೈ ತಿತ್ಲೆಂ ದೆಂವಯ್ತಾಂ. ಅಶೆಂ ಕರುಂಕ್ ಭಾರಿ ಸೊಂಪೆಂ. ಏಕಾ ಅಮೆರಿಕನ್ ಡೋಲರಾಕ್ 35 ರುಪೈ ರೇಟ್ ಫಿಕ್ಸ್ ಕೆಲ್ಯಾರ್ ಜಾಲೆಂ.

“ನೋವ್ ವ್ಹರ್ಸಾಂಚ್ಯೆ ಮೋದಿ ರಾಜ್ವಟ್ಕೆ ವರ್ವಿಂ ಜಾಲ್ಲಿ ಹಾಲತ್ ಪಳೆ. 2014 ಇಸ್ವೆಂತ್ 325 ರುಪೈ ಆಸ್ಲೆಲೆಂ ಸಿಲಿಂಡರ್ ಆಜ್ 1,250 ರುಪೈ. ತವಳ್ 80 ರುಪೈ ಆಸ್ಲೆಲಿ ತೂರ್ ದಾಳ್ ಆಜ್ 150 ರುಪೈ. ತವಳ್ ಮ್ಹಜ್ಯಾ ಬಾಯ್ಕಾಚಿ ಟಾಂಕಿ ಫುಲ್ಲ್ ಕರುಂಕ್ 450 ರುಪೈ ಲಾಗ್ತೆಲೆ ಆಜ್ 800 ರುಪೈ ಜಾಯ್. ಧುವೆಚಿ ಟ್ಯೂಶನ್ ಫೀ ದೊಡಿ ಜಾಲ್ಯಾ. ವಯ್ಲ್ಯಾನ್, exam fees, online classes fees. ಘರಾಚ್ಯೆಂ ಬಾಡೆಂ ತವಳ್ ಮಹಿನ್ಯಾಳೆಂ 18,000 ರುಪೈ ಆತಾಂ 28,000 ರುಪೈ. ವೀಜ್ ಬಿಲ್ಲ್ ತವಳ್ ಮಹಿನ್ಯಾಳೆಂ 1,600 ರುಪೈ ಆತಾಂ 3,500 ರುಪೈ. ಆನಿಂ ಸರ್ಕಾರ್ ಮ್ಹಣ್ತಾ ಮಾರ್ಗಾಯೆಚಿ ರೇಟ್ ಕೇವಲ್ 4 ಠಕ್ಕೆ, ಹಿಶಿನ್ ತಿಶಿನ್ 2%!”

“ಮೋದಿ ಭಕ್ತ್ ಆಸ್ಲಿಂ ಹಾಂವ್. ಆತಾಂ ಮ್ಹಕಾ ಕಳ್ತಾ ಮೋದಿಕ್ ಕಾಂಯ್‍ಚ್ ಆರ್ಥಿಕ್ ಸಮ್ಜಣಿ ನಾಂ. ಬರೋಬರ್ ಶಿಕಪ್ ನಾತ್ಲೆಲ್ಯಾ ಮನ್ಷ್ಯಾಕ್ ಗಾದಿಯೆರ್ ಬಸವ್ನ್ ಮ್ಹಜ್ಯಾ ತಸ್ಲ್ಯಾ ಸಾಧ್ಯಾ ಮತ್‍ದಾರಾಂನಿಂ ವ್ಹಡ್ ಚೂಕ್ ಕೆಲ್ಯಾ. ಮೋದಿ ಕಡೆಂ ಆಮ್ಚ್ಯಾ ಸಮಸ್ಸ್ಯಾಂಕ್ ಪರ‍್ಯಾರ್ ನಾಂತ್. ಆಮಿಂ ಮೋಲಾಂ ವಾಡ್ಲ್ಯಾಂತ್, ಭಾವ್-ವಾಡ್ ಜಾಲಾ ಮ್ಹಣ್ತಾಂವ್; ತೊ ಮ್ಹಣ್ತಾ हिम्दु खत्रे में हे! ಕೇರಳ ಸ್ಟೋರಿ ಪಳೆಯಾ. ಅಮಿಂ ಮ್ಹಣ್ತಾಂವ್ ತಾಚ್ಯಾಯೀ ಆಡಳ್ತ್ಯಾಂತ್ ಭ್ರಶ್ಟಾಚಾರ್ ವಾಡ್ಲಾ; ತೊ ಮ್ಹಣ್ತಾ ರಾಮ್ ಮಂದಿರ್ ಬಾಂದ್ತಾಂ. ಆಮಿಂ ಮ್ಹಣ್ತಾಂವ್ ಬೇರೋಜ್‍ದಾರಿ ವಾಡ್ಲ್ಯಾ; ತೊ ಮ್ಹಣ್ತಾ ಅದ್ತಿಗ್ 370 ಕಾಡ್ನ್ ಕಾಶ್ಮೀರಾಂತ್ ಶಾಂತಿ ಆಸಾ ಕೆಲ್ಯಾ.  ಆಮಿಂ ಮ್ಹಣ್ತಾಂ ಶಿಕ್ಪಾಚೊ ಖರ್ಚ್ ವಾಡ್ಲಾ; ತೊ ಮ್ಹಣ್ತಾ ಹಿಜಬ್ ಕಾಡಾ ಆನಿಂ ಸಂಸ್ಕ್ರತ್ ಶಿಕಾ. ಆಮಿಂ ಮ್ಹಣ್ತಾಂ ವಕ್ತಾಂ ಮಾರಗ್ ಜಾಲ್ಯಾಂತ್; ತೊ ಮ್ಹಣ್ತಾ ಯೋಗಾ ಕರಾ. ಆಮಿಂ ಮ್ಹಣ್ತಾಂ ತುಜ್ಯಾ ರಾಜ್ವಟ್ಕೆಂತ್ ಆದಾನಿಚಿ ಗಿರೆಸ್ತ್‍ಕಾಯ್ ಮಾತ್ರ್ ಮೊಳ್ಬಾಕ್ ತೆಂಕ್ಲ್ಯಾ; ತೊ ಮೊನೊ ರಾವ್ತಾ, ಜಶೆಂ ತೊ ಮನ್‍ಮೋಹನ್ ಸಿಂಗ್ ಆಸ್ಲೊ ಮ್ಹಣ್ ತೆದ್ನಾಂ ತುಕ್ಲಾಯ್ತಲೊ!”

“दॆर आये दुरुस्त आये! ದೆಕುನ್‌ಗೀ ತುಕಾ ಮುಕ್ಲೆಂ ಚುನಾವ್ ಕೆದ್ನಾಂ ಮ್ಹಣ್ ಕಳೊಂಕ್ ಜಾಯ್? ತಾಕಾ ತುಜೊ ವೋಟ್ ದೀನಾಸ್ತಾನಾಂ, ತುಜೊ ರಾಗ್ ಕಾಡ್. revenge is sweet. ಮತಿಕ್ ಸಮಧಾನ್ ಜಾತೆಲೆಂ. ಪೂಣ್, ನೋವ್ ಮಹಿನೆ ರಾಕಜೆ ತುಂವೆಂ!” ಇತ್ಲೆಂ ಸಾಂಗೊನ್ ಹಾಂವ್ ಪಾಟಿಂ ಮ್ಹಜ್ಯಾ ರೂಮಾಕ್ ವಚೊಂಕ್ ಉಠ್ಲೊಂ.

“ನೋವ್ ವ್ಹರ್ಸಾಂ ಸೊಸ್ಲೆಂ. ಆನಿಂ ನೋವ್ ಮಹಿನೆ ಸೊಸಿಯೆತ್. ದೀಸ್ ಗೆಲ್ಲೆ ಕಳಾನಾಂತ್” ಅಕೇಯ್ರ್ ಕೆಲೆಂ ಯೆಜ್ಮಾನಿನ್.

ಮೋದಿಚ್ಯಾ ಶಸ್ತ್ರಾಘರಾಂತ್ ಕಿತ್ಲಿಂ ಹಾತೆರಾಂ ಆಸಾತ್ ತೆಂ ತಿ ನೆಣಾಂ. ದೆಕುನ್ ಹಾಂವ್ ಸಮಾನ್ ನಾಗರಿ ಸಂಹಿತಾ ಬಾಬ್ತಿಂ ಲೇಖ್ ಬರಯ್ತಾಂ.

► ಫಿಲಿಪ್ ಮುದಾರ್ಥ್

]]> https://kittall.in/26627/feed/ 6 https://kittall.in/25557/ https://kittall.in/25557/#comments Sun, 09 Jul 2023 00:43:29 +0000 https://www.kittall.com/?p=25557 ಸೊಳಾವ್ಯಾ ಶೆಕ್ಡ್ಯಾಂತ್ ಗೊಂಯಾಂತ್ ಸುರು ಜಾಲ್ಲ್ಯಾ ಇನ್ಕ್ವಿಜಿಸಾಂವಾಕ್ (Holy Office of the Inquisition) ಲಾಗುನ್ ಆನಿ ತಾಕಾ ಸಂಬಂದಿತ್ ಧರ್ಮಾಂತರಾಂ, ದೆವಾಳಾಂಚಿ ದೆಸ್ವಾಟ್, ಥಳಾಚ್ಯಾ ಕೊಂಕ್ಣಿ ಲೊಕಾಚೆರ್ ಚೆಪ್ಣಿ (suppression) ಆನಿ ಅಸಲ್ಯಾಚ್ ಹೆರ್ ಕಾರಣಾಂಕ್ ಲಾಗುನ್ ಕೊಂಕ್ಣಿ ಲೋಕ್ ಗೊಂಯ್ ಸೊಡುನ್ ಗೊಂಯ್ಚ್ಯೆ ಉತ್ತರೆಕ್, ಆತಾಂಚ್ಯಾ ಮಹಾರಾಷ್ಟ್ರಾಂತ್ ಆಸ್ಚೆ ಸಿಂಧುದುರ್ಗ್ ಆನಿ ಕೊಲ್ಹಾಪುರ್ ಜಿಲ್ಲೆ ಆನಿ ಗೊಂಯ್ಚ್ಯೆ ದಕ್ಷಿಣೆಕ್ ಕಾರ್‍ವಾರ್, ಉಡ್ಪಿ, ಮಂಗ್ಳುರ್, ಕೊಚ್ಚಿ ಹ್ಯಾ ವಠಾರಾಂನಿ ಪಾವ್ಲಲೊ ಮ್ಹಳ್ಳಿ ಏಕ್ ಜೆರಾಲ್ ಸಮ್ಜಣಿ ಆಸಾ. ಪೂಣ್ ಆಯ್ಲೆವಾರ್ ಅಂಕಿಕೃತ್ (digitalized) ಜಾಲ್ಲ್ಯಾ ಪುರ್ತುಗೆಜಾಂಚ್ಯಾ ಕಾಳಾರ್ ಆಸ್ಲಲೆ ದಸ್ತಾವೆಜ್ ಪಳೆತಾನಾ ಆಮ್ಕಾಂ ಏಕ್ ವೆಗ್ಳೆಂಚ್ ಚಿತ್ರ್ ಮೆಳ್ತಾ. ಇನ್ಕ್ವಿಜಿಸಾಂವ್ ನಿಜಾಯ್ಕಿ ತಿತ್ಲೆಂ ಮಾರೆಕಾರ್ ಆಸ್ಲಲೆಂಗಿ? ಕಾಳೆ ದಂತ್‍ಕಥೆನ್ (Black Legend) ಇನ್ಕ್ವಿಜಿಸಾಂವಾ ವಿಶಿಂ ಜೆಂ ಚಿತ್ರಣ್ ಆಮ್ಕಾಂ ದಿಲಾಂ ತಾಚೊ ಪ್ರಭಾವ್ ಆಮ್ಚೆರ್ ಕಿತ್ಲೊ ಪಡ್ಲಾ? ಅನಂತ್ ಕಾಕಬಾ ಪ್ರಿಯೋಳ್ಕಾರಾಚೆಂ The Goa Inquisition ಹೆಂ ಪುಸ್ತಕ್ ಕಶೆಂ ಘಡ್ಲೆಂ ಆನಿ ತೆಂ ಆಮ್ಕಾಂ ಆಜುನ್‍ಯಿ ಕಿತ್ಯಾಕ್ ಪ್ರಭಾವಿತ್ ಕರ‍್ತಾ?

ಇನ್ಕ್ವಿಜಿಸಾಂವಾಚಿ ಸ್ಥಾಪ್ನಾ

ಪಯ್ಲೆಂ ಸ್ಪೆಯ್ನ್ ಆನಿ ಪುರ್ತುಗಾಲಾಂತ್ ಸುರು ಜಾಲ್ಲೆಂ ಹೆಂ ಇನ್ಕ್ವಿಜಿಸಾಂವ್, 1560 ವರ್‍ಸಾ ದೆಶಂಬರ್ ಮ್ಹಯ್ನ್ಯಾಂತ್ ಗೊಂಯಾ ಶೆರಾಕ್ (ಆತಾಂಚೆಂ ಓಲ್ಡ್ ಗೊವಾ) ಪಾವ್ಲೆಂ. 252 ವರ್‍ಸಾಂ ತೆಂ ಗೊಂಯಾಂತ್ ಕ್ರಿಯಾಳ್ ಆಸ್ಲಲೆಂ. ತೆದ್ನಾಂಚ್ಯಾ ಸಬಯೊ ರಾವ್ಳೆರಾಂತ್ ತಾಂಚೆಂ ದಫ್ತರ್ ಆಸ್ಲೆಂ. ಆತಾಂಚ್ಯಾ ಸೆ ಕಾತೆದ್ರಾಲಾ ಬಗ್ಲೆನ್ ತೆಂ ಆಸ್ಲಲೆಂ. ಹೆಂ ರಾವ್ಳೆರ್ ಥಂಯ್ಚ್ಯಾ ಆದ್ಲ್ಯಾ ರಾಯಾನ್, ಬಿಜಾಪುರ್‍ಚ್ಯಾ ಅದಿಲ್ ಶಾಹಾನ್ ಬಾಂದ್ಲಲೆಂ. 1510 ವರ್‍ಸಾ ಮ್ಹಾಲ್ ಪೈ ಆನಿ ತಿಮ್ಮಯ ನಾಯ್ಕಾಚ್ಯಾ ಆಧಾರಾನ್ ಆಫೊನ್ಸ್ ಆಲ್ಬುಕೆರ್ಕಾನ್ ಗೊಂಯ್ (Old Goa) ಜಿಕ್ಲಲ್ಯೆ ಉಪ್ರಾಂತ್ ತೆಂ ಪುರ್ತುಗೆಜಾಂಚ್ಯಾ ತಾಬ್ಯಾಂತ್ ಆಯ್ಲೆಂ. ಮಾಗಿರ್ ಬಾರ್ದೆಸ್ ಆನಿ ಸಾಶ್ಟಿ ಪ್ರದೇಶ್ ತಾಣಿಂ ಅದಿಲ್ ಶಾಹಾ ಥಾವ್ನ್ ಜಿಕ್ಲೆ. ಪುರ್ತುಗೆಜ್ ಆನಿ ಥಳಾವ್ಯಾ ಲೊಕಾಂಚೊ ಸಂಬಂದ್ ವಾಡ್ಲೊ. 1560 ವರ್‍ಸಾ ಸುರು ಜಾಲ್ಲೆಂ ಇನ್ಕ್ವಿಜಿಸಾಂವ್ 1774 ವರ್‍ಸಾ ಬಂದ್ ಜಾಲೆಂ. ಪೂಣ್ ಪರತ್ 1778 ವರ್‍ಸಾ ಆಪ್ರಿಲಾಂತ್ ತೆಂ ಸುರ್‍ವಾತ್ಲೆಂ ಆನಿ ಶೆಕಿಂ 1812 ವರ್‍ಸಾ ತೆಂ ಸಾಸ್ಣಾಕ್ ಬಂದ್ ಜಾಲೆಂ.

ಇನ್ಕ್ವಿಜಿಸಾಂವ್ ಮ್ಹಳ್ಯಾರ್ ವಿಚಾರಣ್ ವಾ ತಪಾಸ್ಣಿ (inquiry). ನಿಯಮಾಂ ಪರ್ಮಾಣೆಂ ಆರೋಪಿ/ ಗುನ್ಯಾಂವ್ಕಾರ್ ಜಿಯೆಲಾ ವಾ ನಾ, ತ್ಯೆ ವಿಶಿಂ ವಿಚಾರಣ್ ಜಾತಾಲೆಂ. ಸರ್ಕಾರಿ ಕಾಯ್ದ್ಯಾ ಪರ್ಮಾಣೆಂ ಹರೆಕಾ ಆರೊಪಿಚೆಂ ವಿಚಾರಣ್ ತೆ ಬರೊವ್ನ್ ಎಕಾ ಗುಪಿತ್ ಕುಡಾಂತ್ (secreto-ಸೆಕ್ರೆತೊ) ದವರ್‍ತಾಲೆ. ಮರಾಠ್ಯಾಂನಿ ಗೊಂಯ್ಚೆರ್ ಘುರಿ ಘಾಲ್ತಾನಾ ಕಾಂಯ್ ದಸ್ತಾವೆಜ್ ನಶ್ಟ್ ಜಾಲ್ಲೆಯ್ ಆಸಾತ್. ತರಿ ಆಸ್ತಾಂ ವೆಳಾವೆಳಾರ್ ಲಿಸ್ಬನಾಕ್ ಇನ್ಕ್ವಿಸಿದಾದೊರ್ ವರ್ದಿ ಧಾಡ್ತಾಲೆ. ಆಜ್ ತೆಚ್ ದಾಕ್ಲೆ ಆಮ್ಕಾಂ ಇನ್ಕ್ವಿಜಿಸಾಂವಾ ವಿಶಿಂ ಸಮ್ಜುಂಕ್ ಆಧಾರ್ ದಿತಾತ್.

ಮುಳಾವ್ಯಾ ದಾಕ್ಲ್ಯಾಂಚೊ (primary sources) ಪುಂಜೊ

ಇನ್ಕ್ವಿಜಿಸಾಂವಾಂ ವಿಶಿಂ ಬರಯ್ತಾನಾ ಮುಳಾವ್ಯಾ ದಾಕ್ಲ್ಯಾಂನಿ ಜಶೆಂ ಆಮ್ಕಾಂ ಮೆಳ್ತಾ ತಾಚೆರ್ ಆಧಾರುನ್ ತೆಂ ಮಾರೆಕಾರ್ ವಾ ನಾ ಮ್ಹಣ್ ಆಮಿ ಥಾರಾಂವ್ಕ್ ಜಾತಾ. ಖರೆಂ ಮ್ಹಳ್ಯಾರ್, ಅಸಲ್ಯೆ ರಿತಿಚೊ ವಾವ್ರ್ ಭೊವ್ ಉಣ್ಯಾ ಪಾಂವ್ಡ್ಯಾರ್ ಜಾಲಾ. ಇನ್ಕ್ವಿಜಿಸಾಂವಾ ವಿಶಿಂ ಜಿಂ ಪುಸ್ತಕಾಂ ಆತಾಂ ಆಮ್ಚ್ಯೆ ಲಾಗಿಂ ಆಸಾತ್ ತಿಂ ಚಡ್ ಕರುನ್ ದ್ವಿತೀಯ್ ಮುಳಾಚಿಂ (secondary sources) ಆನಿ ಲೆಖಕಾಚೊ ಖಾಸ್ಗಿ ಮತ್ ಭರ್ಸಲ್ಲೊಯ್ ಆಮ್ಕಾಂ ಹಾಂಗಾ ದಿಸ್ತಾ. ಗೊಂಯ್ಚ್ಯಾ ಅನಂತ್ ಕಾಕಬಾ ಪ್ರಿಯೋಳ್ಕಾರಾಚೆಂ ಪುಸ್ತಕ್ The Goa Inquisition, ಹಾಂತ್ಲೆಂ ಏಕ್.

ಆಧುನಿಕ್ ಕಾಳಾರ್ ಸಂಶೋಧ್ ಕರ‍್ತಲ್ಯಾ ಎಕಾ ಸಂಶೊಧಕಾಕ್ ಆತಾಂ ಜಾಳಿಜಾಗ್ಯಾರ್ (internet) ವಚುನ್ ಅಂಕಿಕೃತ್ (digitalized) ಕೆಲ್ಲೆ ಮುಳಾವೆ ದಾಕ್ಲೆ ಪಳೆಂವ್ಕ್ ಜಾತಾತ್. ಲಿಸ್ಬನ್ಚ್ಯಾ Lisbon’s Arquivo Nacional da Torre do Tombo, ಪುರ್ತುಗಾಲ್ಚ್ಯಾ the Biblioteca Nacional de Portugal, ಆನಿ ಬ್ರಾಸಿಲಾಚ್ಯಾ the Biblioteca Nacional do Brasil (Rio de Janeiro) ಜಾಳಿಜಾಗ್ಯಾರ್ ಆಮ್ಕಾಂ ತೆ ವಾಚುಂಕ್ ಮೆಳ್ತಾತ್. ಹಾಚೊ ವಾಪರ್ ಕರುನ್ ಎಲನ್ ಮಚಾಡೊ ಪ್ರಭುನ್ ಹಾಲಿಂಚ್ Goa’s Inquisition: Facts, fiction, factoids ಹೆಂ ಪುಸ್ತಕ್ ಉಜ್ವಾಡಾಕ್ ಹಾಡ್ಲಾಂ.

ದಾಕ್ಲ್ಯಾಂ ಥಾವ್ನ್ ಮೆಳ್ಚಿ ಮಾಹಿತಿ

ಆಂಕ್ಡೆ – ಗೊಂಯ್ಚ್ಯಾ ಇನ್ಕ್ವಿಜಿಸಾಂವಾಚ್ಯಾ ಅಡೆಜ್ಶಿಂ ವರ‍್ಸಾಂಚ್ಯಾ ಹ್ಯಾ ಕಾಳಾರ್ 18,986 ಜಣಾಂಚಿ ತನ್ಕಿ ಜಾಲ್ಲಿ. ಎಕಾ ವರ‍್ಸಾ ಸುಮಾರ್ 76 ಜಣ್, ಎಕಾ ಮ್ಹಯ್ನ್ಯಾಕ್ ಸ್ ಜಣ್.

ಭೋವ್ ಮತ್ – ಚಡ್ ಕರುನ್ ಬಂಬಯ್ (ಆತಾಂಚೆಂ ಮುಂಬಯ್) ಪ್ರಾಂತಾಚ್ಯಾ (Provincia do Norte), ಸಕಯ್ಲ್ಯಾ ಜಾತಿಚ್ಯಾ ಲೊಕಾಚಿ ತನ್ಕಿ ಜಾಲ್ಲಿ. ಕ್ರಿಸ್ತಾಂವಾಂಚಿಯ್ ಜಾತ್ ತಾಂಚ್ಯಾ ದಾಕ್ಲ್ಯಾಂನಿ ಮೆಳ್ತಾ.

ಅಕ್ರಿಸ್ತಿ ಲೋಕ್ – ತನ್ಕಿ ಜಾಲ್ಲ್ಯೆ ಮಧೆಂ ಫಕತ್ 25% ಅಕ್ರಿಸ್ತಿ ಲೋಕ್ ಆಸ್ಲಲೊ. ಚಡ್ ಕರುನ್ ಮರಾಠ್ಯಾ ಸಂಗಿಂ ಪುರ್ತುಗೆಜ್ ಲಡಾಯ್ ಕರ‍್ತಾನಾ ಹೊ ಲೋಕ್ ವಿಚಾರಣೆಕ್ ಸಾಂಪಡ್ಲೊ.

ಶಿಕ್ಷಾ – ಜೆರ‍್ಬಂದ್ ಮಾರ್, ಕಾರ್ಕಾನ್ಯಾಂತ್ ಕಾಮ್, ದುಡ್ವಾಂಚೊ ದಂಡ್ (fine), ಅಧ್ಯಾತ್ಮಿಕ್ ಪ್ರಾಚಿತ್.

ಪಾದ್ರಿಂಕ್ ಶಿಕ್ಷಾ – 287 ಪಾದ್ರಿಂಚಿ ತನ್ಕಿ ಕರುನ್ ತಾಂಕಾಂ ಶಿಕ್ಷಾ ಫಾವೊ ಜಾಲ್ಲಿ.

ಶಾರಿರಿಕ್ ರಿತಿನ್ ಖ್ಯಾಸ್ತ್ – 177 ಜಣಾಂಕ್ ಮರ‍್ಣಾಚಿ ಖ್ಯಾಸ್ತ್ ಫಾವೊ ಜಾಲ್ಲಿ. 136 ಜಣಾಂಚಿ ಆಮ್ಕಾಂ ಮಾಹಿತಿ ಮೆಳ್ತಾ. 154 ಜಣಾಂಚೆ ಪುತ್ಳೆ ಕರುನ್ ತಾಂಕಾಂ ತಾಣಿಂ ಲಾಸ್ಲಲೆಂ. ಕಾರಣ್ ತನ್ಕೆ ವೆಳಾರ್ ತಿಂ ನಾಸ್ಲಲಿಂ ವಾ ಎದೊಳ್‍ಚ್ ಮರಣ್ ಪಾವ್ಲಲಿಂ. ಇನ್ಕ್ವಿಜಿಸಾಂವಾ ವಿಶಿಂ ಆಸ್ಲಲಿ ಕ್ರೂರತಾಯ್ ಕಿತ್ಲಿ ಖರಿ ಮ್ಹಳ್ಳೆಂ ಪಾರ್ಕುಂಕ್ ಆಮ್ಕಾಂ ಹಾಂಗಾ ಏಕ್ ಝಳಕ್ ಮೆಳ್ತಾ.

ಕಾಳಿ ದಂತ್ ಕಥಾ (Black Legend)

ಸೊಳಾವ್ಯಾ ಶೆಕ್ಡ್ಯಾಂತ್ ಸಂಸಾರಿಕ್ ಪಾಂವ್ಡ್ಯಾರ್ ಪ್ರೊತೆಸ್ತಾಂತ್ ಇಂಗ್ಲಿಶ್ ಸಾಹಿತ್ಯಾಂತ್ ಕಾಥೊಲಿಕ್ ಧರ್ಮ್ ಸಭೆಕ್ ಘಾಣಾಂವ್ಕ್ ಜಾಯ್ತ್ಯೊ ದಂತ್ ಕಥಾ/ ಕಥಾ ಪುಸ್ತಕಾಂ ಉಜ್ವಾಡಾಕ್ ಆಯ್ಲಲಿಂ. ಸ್ಪೆಯ್ನಾಚ್ಯಾ ರಾಯಾಂನಿ ನೆಥರ್‌ಲ್ಯಾಂಡಾಚೆರ್ (ಡಚ್) ಘುರಿ ಘಾಲ್ತಾನಾ ಇನ್ಕ್ವಿಜಿಸಾಂವಾ ವಿಶಿಂ ಏಕ್ ಕಾಳಿ ದಂತ್ ಕಥಾ ಚಾಲ್ತೆರ್ ಆಯ್ಲಿ. ಇಂಗ್ಲಿಶಾಂತ್ ತಾಕಾ ‘The Black Legend’ ಮ್ಹಣ್ ವೊಲಾಯ್ಲಾಂ. ಕಾಥೊಲಿಕ್ ಸಭೆಂತ್ ವಾಯ್ಟ್ ಜಾತಾ, ದೆಕುನ್, ತಿ ಸೊಡ್ಚಿ ಬರಿ ಮ್ಹಳ್ಳೊ ತಾಂಚೊ ಇರಾದೊ ಆಸ್ಲಲೊ. ಇಂಗ್ಲಿಶ್ ವಾಚ್ಪ್ಯಾಂ ಮಧೆಂ ತಾಚೊ ಖುಬ್ ಬರೊ ಪ್ರಸಾರ್ ಜಾಲೊ. ಇಂಗ್ಲಿಶ್ ಆನಿ ಡಚ್ ಪ್ರೊತೆಸ್ತಾಂತ್ ಬರಯ್ಣಾರಾಂನಿ ಇನ್ಕ್ವಿಜಿಸಾಂವಾಚ್ಯೆ ಕ್ರೂರತೆ ವಿಶಿಂ ಹಿಸ್ಪಾ ಭಾಯ್ರ್ ಪ್ರಚಾರ್ ಸುರು ಕೆಲೊ. ಸತ್ರಾವ್ಯಾ  ಶೆಕ್ಡ್ಯಾಂತ್ ಗೊಂಯ್ಚ್ಯಾ ಇನ್ಕ್ವಿಜಿಸಾಂವಾಕ್ ಸಯ್ತ್ ಹಿ ಕಾಳಿ ದಂತ್ ಕಥಾ ಚಿಡ್ಕಲಿ.

ಹಾಕಾ ಕಾರಣ್ ಚಾರ್ಲ್ಸ್ ದೆಲ್ಲೊನ್ ನಾಂವಾಚೊ ಏಕ್ ಫ್ರೆಂಚ್ ವಯ್ಜ್. 1687 ವರ್‍ಸಾ ತಾಣೆಂ “Relation de l’inquisition de Goa” ಮ್ಹಳ್ಳೆಂ ಪುಸ್ತಕ್ ಉಜ್ವಾಡಾಯ್ಲೆಂ. ಎಕಾಚ್ ಶೆಕ್ಡ್ಯಾ ಭಿತರ್ ತೆಂ ಪುಸ್ತಕ್ ಜರ್ಮನ್, ಇಂಗ್ಲಿಶ್ ಆನಿ ಡಚ್ ಭಾಶೆಂತ್ ಅನುವಾದ್ ಜಾಲೆಂ. ಹ್ಯಾ ಭಾಸಾಂಚೊ ಲೋಕ್ ಚಡಾವತ್ ಪ್ರೊತೆಸ್ತಾಂತ್ ಪಂಗ್ಡಾಚೊ ಆಸ್ಲೊ. 1672 ವರ್‍ಸಾ ತಾಚೆಂಚ್ ಪ್ರೇರಣ್ ಘೆವ್ನ್ ಲಿಂಬೊರ್ಕ್ ನಾಂವಾಚ್ಯಾ ಎಕಾ ಡಚ್ ರಾಜಾಂವ್‍ವಾದಿನ್ (rationalist) “ಆಖ್ಖ್ಯಾ ಮನ್ಶಾಕುಳಾಕ್ ಲಜೆಕ್ ಘಾಲ್ಚ್ಯಾ ಇನ್ಕ್ವಿಜಿಸಾಂವಾಂ ವಿಶಿಂ Historia Inquisitionis ಮ್ಹಳ್ಳ್ಯಾ ಪುಸ್ತಕಾಂತ್ ಬರಯ್ಲೆಂ. ಹಿಂ ದೋನ್ ಪುಸ್ತಕಾಂ ಗೊಂಯ್ಚ್ಯಾ ಇನ್ಕ್ವಿಜಿಸಾಂವಾ ವಿಶಿಂ ಮಾಹೆತ್ ದಿವ್ಪಿ ಪಯ್ಲಿಂ ದೋನ್ ಪುಸ್ತಕಾಂ ಮ್ಹಣ್ಯೆತ್.

ಬ್ರಿಟಿಶ್-ಭಾರತಾಂತ್ ವಿಸ್ತಾರ್

ತೆದ್ನಾಂಚ್ಯಾ ಭಾರತಾಂತ್ ಬ್ರಿಟಿಶಾಂಚೊ ಪ್ರವೇಶ್ ಜಾಲ್ಲೊ ಮಾತ್ರ್. ಆಪ್ಲೆಂ ಸಾಮ್ರಾಜ್ಯ್ ಭಾರತಾಂತ್ ವಿಸ್ತಾರುಂಕ್ ತೆ ಸೊದ್ತಾಲೆ. ಮಾನಾದಿಕ್ ಕ್ಲಾವ್ದಿಯುಸ್ ಬ್ಯುಕೆನೆನ್ ಏಕ್ ವರ್ತೊ ಪ್ರೊತೆಸ್ತಾಂತ್ ಮಿಶಿನೊರಿ ಜಾವ್ನ್ ಆಸ್ಲೊ. ಆಪ್ಲೊ ಅದ್ರೊಕುಟೊ ಅಭ್ಯಾಸ್ ಕರುನ್ ತಾಣೆಂ ಇಂಗ್ಲೆಂಡಾಚ್ಯಾ ರಾಯಾಕ್ ಇನ್ಕ್ವಿಜಿಸಾಂವಾಚೆರ್ ಬಂದಿ ಹಾಡುಂಕ್ ವಿನಯ್ಲೆಂ. ಹಾಂತುಂ ತಾಕಾಯ್ ಫಾಯ್ದೊ ಆಸ್ಲೊ. ಕಾಥೊಲಿಕ್ ಮಿಶಿನೊರಿಂಚೊ ವಾವ್ರ್ ಥಾಂಬ್ಲ್ಯಾರ್ ಹೆರ್ ಪ್ರೊತೆಸ್ತಾಂತ್ ಮಿಶಿನೊರಿಂಕ್ ಆಪ್ಲೊ ವಾವ್ರ್ ಸೊಂಪೆಪಣಿಂ ಕರುಂಯೆತಾ ಮ್ಹಣ್ ತಾಣೆಂ ಲೆಕ್ಲೆಂ.

ಬ್ರಿಟಿಶಾಂ ಥಾವ್ನ್ ಸುಟ್ಕಾ ಮೆಳ್ತಚ್ ಭಾರತಾಂತ್ ಗೊಂಯ್ಚ್ಯಾ ಇನ್ಕ್ವಿಜಿಸಾಂವಾ ವಿಶಿಂ ಮಾಹಿತಿ ದಿಂವ್ಚೆಂ ಪುಸ್ತಕ್, ಆನಂತ್ ಕಾಕಬಾ ಪ್ರಿಯೋಳ್ಕಾರಾಚೆಂ “The Goa Inquisition: The Terrible Tribunal for the East.” 1961 ವರ್‍ಸಾ ತೆಂ ಉಜ್ವಾಡಾಕ್ ಆಯ್ಲಲೆಂ. ಹಾಚ್ಯಾ ಏಕ್ ವರ್‍ಸಾ ಆದಿಂ ಗೊಂಯ್ ಪುರ್ತುಗೆಜಾಂಚ್ಯಾ ತಾಬ್ಯಾ ಥಾವ್ನ್ ಮೆಕ್ಳೆಂ ಜಾಲ್ಲೆಂ ಆನಿ ಥಂಯ್ಚ್ಯಾ ಥೊಡ್ಯಾ ಲೊಕಾನಿ ಗೊಂಯ್ ಮಹಾರಾಷ್ಟ್ರಾಂತ್ ವಿಲಿನ್ ಜಾಂವ್ಕ್ ಜಾಯ್ ಮ್ಹಳ್ಳಿ ಚಳ್ವಳ್ ಸುರು ಕೆಲ್ಲಿ.

ಅನಂತ್ ಗೊಂಯ್ಕಾರ್, ಪೂಣ್ ಏಕ್ ಮರಾಠಿವಾದಿ ಜಾವ್ನ್ ಆಸ್ಲೊ. ಹ್ಯಾಚ್ ಉದ್ದೇಶಾನ್ ತಾಣೆಂ ಫಕತ್ ವೆಂಚಿಕ್ ಬರ್‍ಪಾಂ ವಾಪ್ರುನ್, ತೆಂಯ್ ದ್ವಿತೀಯ್ ದಾಕ್ಲ್ಯಾಂತ್ಲಿಂ ತೆಂ ಪುಸ್ತಕ್ ಬರಯ್ಲೆಂ. ದೆಲ್ಲೊನ್ ಆನಿ ಬ್ಯುಕೆನೆನಾಚ್ಯಾ ಪುಸ್ತಕಾಂತ್ಲೆಂ ಜಾಯ್ತೆಂ ತಾಣೆಂ ಘೆತ್ಲಾಂ. ಹಾಂಗಾ ಏಕ್ ವಿಪರ್ಯಾಸ್ ಮ್ಹಳ್ಯಾರ್, ತಾಣೆಂ ಹೆಂ ಪುಸ್ತಕ್ ಜೊಕಿಂ ಕುಜ್ಞಾ ರಿವೆರಾಕ್ ಸಮರ್ಪಿಲಾಂ. ಪೂಣ್ ತಾಚಿ ತಾಕಿದ್ ಪಾಳುಂಕ್ ತೊ ಚುಕ್ಲೊ. ರಿವೆರಾನ್ ಇನ್ಕ್ವಿಜಿಸಾಂವಾ ವಿಶಿಂ ಖೊಲಾಯೆನ್ ಅಭ್ಯಾಸ್ ಕರುಂಕ್ ANTTಚೆ (Arquivo Nacional da Torre do Tombo, Lisbon) ದಾಕ್ಲೆ ವಾಪ್ರುಂಕ್ ಜಾಯ್ ಮ್ಹಣ್ ತಾಕಾ ಸಾಂಗ್ಲಲೆಂ. ಪೂಣ್ ಹಾಚ್ಯೆ ವಿಪ್ರೀತ್ ‘ಸಗ್ಳೆ ದಾಕ್ಲೆ ಪುರ್ತುಗೆಜಾಂನಿ ಲಾಸುನ್ ಉಡಯ್ಲ್ಯಾತ್’ ಮ್ಹಣ್ ತಾಣೆಂ ಆಧಾರ್ ನಾಸ್ತಾನಾ ಬರಯ್ಲಾಂ. ಹೆಚ್ ದಾಕ್ಲೆ digitalized ರುಪಾರ್ ಆಮ್ಕಾಂ ಆಜ್ ಮೆಳ್ತಾತ್.

ನವಿಂ ಕ್ರಿಸ್ತಾಂವಾಂ (Cristaos Novos)

ಯುರೊಪಾಂತ್ ಬಾರಾವ್ಯಾ ತೆರಾವ್ಯಾ ಶೆಕ್ಡ್ಯಾಂತ್ ಏಕ್ ರಾಜ್‍ಕೀಯ್ ನೀತಿ ಕಶಿ ಸಬಾರ್ ಜುದೆವಾಂನಿ ತಶೆಂಚ್ ಮುಸ್ಲಿಮಾನಾಂನಿ ವಯ್ಲ್ಯೆ ವಯ್ರ್ ಕ್ರಿಸ್ತಾಂವ್ ಧರ್ಮ್ ಆಪ್ಣಾಯ್ಲಲೊ. ತಿಂ ಭಾಯ್ಲ್ಯಾನ್ ಆಪುಣ್ ಕ್ರಿಸ್ತಾಂವ್ ಮ್ಹಣ್ ಪಾಚಾರ‍್ತಾಲಿಂ ಶಿವಾಯ್, ಭಿತರ‍್ಲ್ಯಾನ್ ತಾಂಚೊ ತೊಚ್ ಆದ್ಲೊ ಧರ್ಮ್ ತಿಂ ಪಾಳ್ತಾಲಿಂ. ತಾಂಚೆರ್ ಬಂದಿ ಘಾಲ್ತಾನಾ ಸಬಾರ್ ನವಿಂ ಕ್ರಿಸ್ತಾಂವಾಂ ಪುರ್ತುಗಾಲ್ ಆನಿ ಸ್ಪೆಯ್ನ್ ಸೊಡುನ್ ಆಶಿಯಾ ಖಂಡಾಂತ್ ವೆಪಾರಾಕ್ ಸ್ಥಳಾಂತರಿತ್ ಜಾಲಿಂ. ಪುರ್ತುಗೆಜ್ ಆನಿ ಸ್ಪೆಯ್ನಾಚ್ಯಾ ಥಳಾವ್ಯಾ ವೆಪಾರಿಂಕ್ ತಾಂಚಿ ಭಿರಾಂತ್ ದಿಸುಂಕ್ ಲಾಗ್ಲಿ.

1529 ಆನಿ 1532 ವರ‍್ಸಾ ಒಟ್ಟೊಮಾನ್ ಮುಸ್ಲಿಮ್ ಸಯ್ನಿಕಾಂನಿ ವಿಯೆನ್ನಾ ಶೆರಾಚೆರ್ ಘುರಿ ಘಾಲಿ. ಭಾರತಾಂತ್, ಗೊಂಯಾಂತ್ ಆನಿ ಕೊಚ್ಚಿಂತ್ ಹ್ಯಾ ನವ್ಯಾ ಕ್ರಿಸ್ತಾಂವಾಂಚೊ ಆಂಕ್ಡೊ ವಾಡ್ಲೊ. ಹಾಂಗಾ ತಾಂಚೊ ಕಾರ‍್ಬಾರ್ ಬರೊ ಚಲ್ತಾಲೊ. ಜಾಯ್ತ್ಯಾ ಭಾರತೀಯ್ ರಾಯಾಂನಿ ತಾಂಕಾಂ ಆಸ್ರೊ ದಿಲ್ಲೊ. ಪುರ್ತುಗೆಜ್ ಅಧಿಕಾರಿಂಕ್ ತಾಂಕಾಂ ಬೂದ್ ಶಿಕೊಂವ್ಕ್ ಫಕತ್ ಏಕ್‍ಚ್ ಉಪಾಯ್ ಝಳ್ಕಲೊ – ತಾಂಚೆರ್ ಧಾರ್ಮಿಕ್ ಪ್ರತಿಬಂದ್ ಘಾಲ್ಚೆಂ! ‘ಹೆರೆಸಿ’ ವಾ ‘ಶಿಕೊವ್ಣೆ ಆಡ್/ ಪಾಖಂಡಿ’ ಮ್ಹಣ್ ತಾಂಚೆರ್ ಅಪ್ರಾದ್/ ಗುನ್ಯಾಂವ್ ಥಾಪ್ಲ್ಯಾರ್ ಫಕತ್ ಇನ್ಕ್ವಿಜಿಸಾಂವಾ ಮಾರಿಫಾತ್ ತಾಂಕಾಂ ಶಿಕ್ಷಾ ದಿಂವ್ ಯೆತಾ.

1585 ಥಾವ್ನ್ 1654 ವರ‍್ಸಾ ಪರ್ಯಾನ್ ಇನ್ಕ್ವಿಜಿಸಾಂವಾಚ್ಯಾ ವಿಚಾರಣಾಂತ್ 431 ಜಣಾಂಕ್ ಧರ‍್ಲಲೆಂ. ತಾಂತ್ಲೆ 27%, 431 ಜಣ್ ಇಸ್ಲಾಮಿಕ್ ಚಾಲಿ ರಿತಿ ಪಾಳ್ಳ್ಯೆ ಖಾತಿರ್ ಆನಿ 18%, 284 ಜಣ್ ಜುದೆವಾಂಚ್ಯೊ ಚಾಲಿ ರಿತಿ ಪಾಳ್ಳ್ಯೆ ಖಾತಿರ್ ಬಂದಿಖಾನ್ಯಾಂತ್ ಆಸ್ಲೆ. ಸೊಳಾಚ್ಯಾ ಶೆಕ್ಡ್ಯಾ ಉಪ್ರಾಂತ್ ಇನ್ಕ್ವಿಜಿಸಾಂವಾಂತ್ ಇಲ್ಲೊ ಬದಲ್ ಜಾಲೊ. ತಾಂಚಿ ನದರ್ ಥಳಾಚ್ಯಾ ಕ್ರಿಸ್ತಾಂವಾಂಚೆರ್ (ಗೊಂಯ್ಕಾರ್/ ಕೊಂಕ್ಣಿ ಕ್ರಿಸ್ತಾಂವ್) ಪಡ್ಲಿ. ತಾಂಚ್ಯೊ ಚಾಲಿ ರಿತಿ ಬದ್ಲುನ್ ಯುರೊಪಿಯನ್ ಚಾಲಿ ರಿತಿ ಥಾಪುಂಕ್ ತಾಣಿಂ ಸುರ‍್ವಾತ್ಲೆಂ. ತಾಂಕಾಂ ಶಿಕ್ಷಾ ದಿಲಿ. ಶಿಕ್ಷಾ ಮ್ಹಳ್ಯಾರ್ ಫಕತ್ ಮಾಗ್ಣೆಂ ಆನಿ ಪ್ರಾಚಿತ್ ಕರುಂಕ್ ಆಸ್ಲೆಂ. ಕಠೀಣ್ ಶಿಕ್ಷಾ ದಿಲ್ಯಾರ್ ಹೆರ್ ಲೋಕ್ ಕ್ರಿಸ್ತಾಂವ್ ಜಾಂವ್ಚೊ ನಾ ಮ್ಹಳ್ಳಿ ಭಿರಾಂತ್ ತಾಂಕಾಂ ಸದಾಂಚ್ ಆಸ್ಲಿ. 1640 ಥಾವ್ನ್ 1773 ವರ‍್ಸಾ, 8075 ಜಣಾಂಚಿ ತಪಾಸ್ಣಿ ಜಾಲ್ಲಿ. ನವ್ವದ್ (90) ಜಣ್ ಕ್ರಿಸ್ತಾಂವಾಂಕ್  ತಾಣಿಂ ಲಾಸ್ಲೆಂ, ಲೊಕಾಕ್ ಭಿಯೆಂವ್ಚ್ಯೆ ಖಾತಿರ್ 113 ಜಣಾಂಚೆ ಪುತ್ಳೆ (effigy) ಕರುನ್ ತಾಣಿಂ ಲಾಸ್ಲೆ.

ಇನ್ಕ್ವಿಜಿಸಾಂವ್ – ಇತಿಹಾಸಿಕ್ ನದ್ರೆನ್

ಗೊಂಯಾಂತ್ ಜಾಲ್ಲೆಂ ಇನ್ಕ್ವಿಜಿಸಾಂವ್ ಇತಿಹಾಸಿಕ್ ನದ್ರೆನ್ ಪಳೆತಾನಾ, ತೆಂ ಏಕ್ ಸಾಮಾಜಿಕ್ ನಿಯಂತ್ರಣಾಚೆಂ ಹಾತೆರ್ ಮ್ಹಣ್ ಆಮ್ಕಾಂ ಹಾಂಗಾ ಸ್ಪಶ್ಟ್ ಜಾತಾ. ಆಪ್ಲ್ಯಾ ಫಾಯ್ದ್ಯಾ ಖಾತಿರ್ ಪುರ್ತುಗೆಜ್ ಅಧಿಕಾರಿಂನಿ ಧರ್ಮಾಚೊ ವಾಪರ್ ಕೆಲೊ. ಧರ್ಮಾಚೊ ಪ್ರಸಾರ್ ಹೆರಾಂನಿ (ಧರ್ಮ್ ಪರ್ಗಟ್ಣಾರಾಂನಿ) ಕೆಲ್ಲೊ. ಹಾಂತುಂ ಚಡಾಂತ್ ಚಡ್ ಗುನ್ಯಾಂವ್ಕಾರಿ ಗೊಂಯಾ ಭಾಯ್ಲೆ ನಿವಾಸಿ, ಜಿಂ ಕ್ರಿಸ್ತಾಂವ್ ಜಾವ್ನ್ ಸಯ್ತ್ ಜೆದೆವ್ ಆನಿ ಮುಸ್ಲಿಮ್ ಚಾಲಿ ರಿತಿ ಪಾಳ್ತಾಲಿಂ. ಕ್ರಿಸ್ತಾಂವ್ ಜಾಂವ್ಕ್ ನಾಸ್ಲಲ್ಯಾ ಥಳಾವ್ಯಾ ಲೊಕಾಂ ಮದೆಂ, ವಯ್ಲ್ಯೆ ಜಾತಿಚ್ಯಾ ಲೊಕಾನ್ ಪುರ್ತುಗೆಜಾಂ ಕಡೆ ವೆಪಾರ್ ಕೆಲೊ, ಪೂಣ್ ತಾಂಚೆಚ್ ಭಾವ್ ಭಯ್ಣಿ ಕಶ್ಟ್ ಸೊಸುನ್ ಆಸ್ತಾನಾ ತಾಂಚ್ಯೆ ಗರ್ಜೆ ಆಧಾರಾಕ್ ತೆ ಪಾವ್ಲೆ ನಾಂತ್. ಹಿಚ್ ಆಮ್ಕಾಂ ಬೆಜಾರಾಯೆಚಿ ಗಜಾಲ್!

► ಜೇಸನ್ ಪೀಂತ್, ಉದ್ಯಾವರ್.

ತವಳ್ಚೊ ಗೊಂಯ್ಚೊ ಕೊಂಕ್ಣಿ ಲೋಕ್

ಪುರ್ತುಗೆಜ್ ಗೊಂಯ್ ಯೆಂವ್ಚ್ಯೆ ಆದಿಂ ಥಾವ್ನ್ ಕೊಂಕ್ಣಿ ಭಾಸ್ ಉಲೊವ್ಪಿ ಲೋಕ್ ಕೊಂಕಣ್ ವಠಾರಾಂತ್ ಜಿಯೆವ್ನ್ ಆಸ್ಲೊ. ಸುಮಾರ್ ಆಟ್ವ್ಯಾ ಶೆಕ್ಡ್ಯಾಂತ್ ಮಹಾರಾಷ್ಟ್ರಿ ಪ್ರಕೃತಾ ಥಾವ್ನ್ ಕೊಂಕ್ಣಿ ಭಾಸ್ ಏಕ್ ಸ್ವಾತಂತ್ರ್ ಭಾಸ್ ಮ್ಹಣ್ ಫಾಂಟ್ಲಿ (Pereira, Literary Konkani). ಇತಿಹಾಸಾಚಿಂ ಪಾನಾಂ ಪರ್ತಿತಾನಾ ಆಮ್ಕಾಂ ಶೆಣ್ವಿ ಲೊಕಾಚೊ ಉಲ್ಲೇಖ್ ಮೆಳ್ತಾ. ‘ಶೆಣ್ವಿ-ಜಾತಿ-ಧರ್ಮ-ನಿರ್ಣಯ’ ಹ್ಯಾ ಮರಾಠಿ ಪುಸ್ತಕಾಂಕ್ ವಿಜಯನಗರಾ ಆನಿ ಬಹಮನಿ ರಾಯಾಂ ಖಾಲ್ ತಾಂಚೊ ಇತಿಹಾಸ್ ದಾಕಲ್ ಜಾಲ್ಲೊ ಆಸಾ. ವೆಪಾರಾಂತ್ ಆನಿ ಸಯ್ನ್ಯಾಂತ್ ತಾಂಚೊ ಪ್ರಭಾವ್ ಆಖ್ಖ್ಯಾ ಕೊಂಕ್ಣಾಂತ್ ಗಾಜ್ತಾಲೊ. ಚಡ್ ಕರುನ್ ತೆ ಸ್ಮಾರ್ಥ್ ಪಂಥಾಚೆ ಆಸ್ಲೆ. ಪೂಣ್ ಮಾಗಿರ್ ಮಧ್ವಚಾರ್ಯಾಚ್ಯಾ ಪ್ರಭಾವಾನ್ ಕಾಂಯ್ ಶೆಣ್ವಿ ಲೊಕಾನ್ ವೈಷ್ಣವ್ ಪಂಥ್ ಸಯ್ತ್ ಆಪ್ಣಾಯ್ಲೊ. ತಾಂಕಾಂ ಗೊಂಯಾಂತ್ ಆಡ್ವೆ (ಆಡ್ವೆಂ ನಾಮ ಘಾಲ್ಚೆ ಶೈವ್)  ಆನಿ ಉಬೆ (ಉಬೆಂ ನಾಮ ಘಾಲ್ಚೆ ವೈಷ್ಣವ್) ಮ್ಹಣ್ ಆಜ್‍ಯಿ ವಳ್ಕತಾತ್. ಶೆಣೈ ಗೊಂಯ್‍ಬಾಬಾ ಪರ್ಮಾಣೆಂ ತಾಂಚೆಂ ಮೂಳ್ ಲೊಟ್ಲೆಂ ಗಾಂವ್, ಜೆಂ ಆತಾಂ ಗೊಂಯ್ಚ್ಯಾ ಸಾಶ್ಟಿ ತಾಲುಕ್ಯಾಂತ್ ಆಸಾ.

ಪುರ್ತುಗೆಜಾಂಕ್ ಗೊಂಯಾಂತ್ (ಆತಾಂಚೆಂ ಓಲ್ಡ್ ಗೊವಾ) ಆಪೊವ್ಣೆಂ ದಿಲ್ಲೆ ದೊಗ್ ಶೆಣ್ವಿ – ವೆರ್ಣೆಚೊ ಮ್ಹಾಲ್ ಪೈ ಆನಿ ಹೊನ್ನಾವರಾಂತ್ ಸುಭೆದಾರ್ ಜಾವ್ನ್ ಆಸ್ಲಲೊ ತಿಮೋಯ್ಯ ನಾಯ್ಕ್ (Pissulencar, Agents of Portuguese Diplomacy). ಪೂಣ್ ಪುರ್ತುಗೆಜಾಂ ಆದಿಂ ಫಕತ್ ಕೊಂಕ್ಣಿ ಲೋಕ್ ಆನಿ ತೆಂಯ್ ಶೆಣ್ವಿ ಸಮಾಜಾಚೊ ಲೋಕ್ ಗೊಂಯಾಂತ್ ಜಿಯೆತಾಲೊ ಮ್ಹಳ್ಯಾರ್ ಚೂಕ್ ಜಾತಾ. ಓಲ್ಡ್ ಗೊವಾ ವಾ ಗೋವೆಪುರಿ ವೆಪಾರಾಚೆಂ ಏಕ್ ಮುಖೆಲ್ ಕೇಂದ್ರ್ ಜಾಲ್ಲ್ಯಾನ್ ಸಂಸಾರ್‌ಭರ್‌ಚೊ ಲೋಕ್ ಹಾಂಗಾ ಜಿಯೆತಾಲೊ. ತಾಂತುಂ ಯುರೊಪಾಂತ್ಲೆ ಜುದೆವ್, ಭಾರತಾಂತ್ಲೆ ಪಾರ್ಸಿ, ಗುಜರಾತಿ, ಆಫ್ರಿಕಾ ಖಂಡಾಂತ್ಲೆ ಮೊರೊಕ್ಕೊ, ಎಜಿಪ್ತ್ ಆನಿ ಹೆರ್ ದೆಸಾಂಚೊ ಲೋಕ್ ಆಸ್ಲೊ. ಪ್ರಶಾಸನ್ ಬಿಜಾಪುರ್‌ಚ್ಯಾ ಸುಲ್ತಾನಾಂಚೆಂ ಆಸ್ಲೆಂ. ಮುಸ್ಲಿಮ್ ಸಮಾಜಾಂತ್ ತುರ್ಕಿ, ಅರ್ಬಿ ಆನಿ ಫಾರ್ಸಿ ಮುಸ್ಲಿಮ್ ತಶೆಂಚ್ ತೆದ್ನಾಂಚ್ಯಾ ಭಾರತಾಚ್ಯಾ ಉತ್ತರೆಕ್ ಆಸ್ಲಲೆ ಮುಘಲ್ ಗೊಂಯಾಂತ್ ವೆಪಾರ್ ಕರ್‍ತಾಲೆ ಆನಿ ರಾವ್ತಾಲೆ. ತಾಂಚೆಂ ವಿಶಿಂ ಬಿಜಾಪುರ್ ಸುಲ್ತಾನಾಂಚ್ಯಾ ಇತಿಹಾಸಾಚ್ಯಾ ಪುಸ್ತಕಾಂನಿ ಆಮ್ಕಾಂ ವಾಚುಂಕ್ ಮೆಳ್ತಾ.

ಗೊಂಯ್ಚೊ ಹಿಂದು ಸಮಾಜ್

ಹಿಂದು ಸಮಾಜಾಂತ್ ಉಂಚ್ಲ್ಯೆ ಜಾತಿಚೆ ಭಟ್, ಚಾರೊಡಿ, ಶೆಣ್ವಿ, ಬಾಮಣ್, ಗುಜರಾತ್ ಥಾವ್ನ್ ಆಯ್ಲಲೆ ವಾಣಿ, ಶೆಟ್ಯೆ/ ಶೇಟ್ ಆನಿ ಸಕಯ್ಲ್ಯೆ ಜಾತಿಚೆ ಗಾವ್ಡಿ, ಕುಣ್ಬಿ, ವೆಳಿಪ್, ರೆಂದೆರ್, ಖಾರ್ವಿ, ಸುದಿರ್, ಗಾಬಿತ್, ಧಂಗರ್-ಗೊಂವ್ಳಿ ಆಪಾಪ್ಲ್ಯೆ ಪರಂಪರೆ ಪರ್ಮಾಣೆಂ ಜಿಯೆತಾಲೆ. ಪುರ್ತುಗೆಜ್ ಗೊಂಯ್ ಯೆಂವ್ಚ್ಯೆ ಆದಿಂ ಥಾವ್ನ್ ಆತಾಂಚ್ಯಾ ಕರ್ನಾಟಕಾಂತ್ಲ್ಯಾ ಬಂದ್ರಾಂನಿ ಆನಿ ಕೆರಳಾಚ್ಯಾ ಕೊಚ್ಚಿ ಬಂದ್ರಾರ್ ಶೆಣ್ವಿ ಪಾವ್ಲಲೆ. ತಾಂಕಾಂಯ್ ಬಾಮಣ್ ಮ್ಹಣ್ ಲೆಕ್ತಾಲೆ. 1540 ವರ‍್ಸಾ ಕೊಚ್ಚಿಚ್ಯಾ ಹ್ಯಾ ಬಾಮ್ಣಾಂನಿ ಕಾಶಿ ಮಠ್ ಸ್ಥಾಪ್ಲೊ. ಹ್ಯಾಚ್ ವರ‍್ಸಾ ಲಿಸ್ಬನಾಂತ್ ಕೃಷ್ಣ್ ಶೆಣೈಕ್ (ಶೆಣ್ವಿ ಬಾಮಣ್) ಸರ್ದಾರ್ಕಿ (knighthood) ಪದ್ವಿ ಫಾವೊ ಜಾಲ್ಲಿ. 1545 ವರ‍್ಸಾ ಪುರ್ತುಗೆಜಾಂನಿ ಕ್ರಿಸ್ತಿ ಧರ್ಮ್-ಪ್ರಚಾರಕಾಂ ಸಾಂಗಾತಾ ಮೆಳುನ್ ಥಳಾವ್ಯಾ ಲೊಕಾಂಕ್ ಕ್ರಿಸ್ತಾಂವ್ ಕರುಂಕ್ ಸುರ್ವಾತ್ ಕೆಲಿ. ತಾಣಿಂ ತೀಸ್‍ವಾಡಿ, ಬಾರ್ದೆಸ್ ಆನಿ ಸಾಶ್ಟಿ ಮ್ಹಾಲ್ (taluka) ಸಾಂಗಾತಾ ಘಾಲುನ್ Estado da Goa Portugesa ಮ್ಹಣ್ ಪುರ್ತುಗೆಜಿ ಪ್ರಶಾಸನ್ ಗೊಂಯಾಂತ್ ಸ್ಥಾಪ್ಲೆಂ. ಹಾಕಾ ಆದ್ಲೆ ಕಾಬಿಜ್ ವಾ Old conquests ಮ್ಹಣ್ತಾತ್. ಹಾಚೊ ಪರಿಣಾಮ್ ತ್ಯಾ ಕಾಳಾಚ್ಯಾ ಸಮಾಜಿಕ್ ವೆವಸ್ಥೆಚೆರ್ ಪಡ್ಲೊ. ದೇವಸ್ಥಾನ್ ಕೆಂದ್ರಿತ್ ಅರ್ಥ್‌ವೆವಸ್ಥೆಂತ್ ಬದಲ್ ಜಾಲೊ. ಪುರ್ತುಗೆಜಾಂಕ್ ಲಾಗುನ್ ತವಳ್ಚ್ಯಾ ಸಮಾಜಾಂತ್ ಜಾಯ್ತೊ ಬದಲ್ ಜಾಲೊ. ಸಕಯ್ಲ್ಯೆ ಜಾತಿಚ್ಯಾಂಕ್ ಶಿಕಪ್ ಮೆಳುಂಕ್ ಲಾಗ್ಲೆಂ. ಸಾರ್ವಜನಿಕ್ ಪಾಂವ್ಡ್ಯಾರ್ ರೊಮಿ ರಿತಿಚ್ಯಾ (Roman Rite) ಕ್ರಿಸ್ತಿ ಸಭೆ ಆಡ್ ಕಿತೆಂಚ್ ಪಾಳುಂಕ್ ಆಡ್ವರ್‍ಲಲೆಂ. ಅಶೆಂ ಥಳಾಚ್ಯಾ ಜುದೆವ್, ಮುಸಲ್ಮಾನ್, ಸಿರಿಯನ್ ಕ್ರಿಸ್ತಾಂವ್, ಪಾರ್ಸಿ ಆನಿ ಹಿಂದ್ವಾಂಕ್ ತಾಂಚೊ ಧರ್ಮ್ ಉಗ್ತ್ಯಾನ್ ಪಾಳುಂಕ್ ಜಾಲೆಂ ನಾ. ಸುಮಾರ್ ತಿನ್ಶಿಂ ಕ್ರಿಸ್ತಾಂವ್ ಪಾದ್ರಿ ಆನಿ ಧಾರ್ಮಿಕಾಂಕ್ ಶಿಕ್ಷಾ ಫಾವೊ ಜಾಲ್ಲಿ.

ಗೊಂಯ್ಚೊ ಕ್ರಿಸ್ತಾಂವ್ ಸಮಾಜ್

ಗೊಂಯಾಂತ್ ಪುರ್ತುಗೆಜಾಂಚ್ಯಾ ಸುರ್ವಿಲ್ಲ್ಯಾ ಕಾಳಾರ್ ಕ್ರಿಸ್ತಾಂವ್ ಸಮಾಜಾಂತ್ ವೆವೆಗ್ಳೆ ಉಪ್‍ಸಮಾಜ್ ಆಸ್ಲೆ – ಕೇರಳಾ ಆನಿ ಅರ್ಬಿಸ್ಥಾನಾ ಥಾವ್ನ್ ಆಯ್ಲಲೆ ನಸ್ರಾನಿ ಸಿರಿಯನ್ ಕ್ರಿಸ್ತಾಂವ್, ಜುದೆವ್ ಆನಿ ಮುಸ್ಲಿಮ್ ಮುಳಾಚೆ ಯುರೊಪಾ ಥಾವ್ನ್ ಗೊಂಯಾಂತ್ ವೆಪಾರ್ ಕರ‍್ಪಿ ನವೆ ಕ್ರಿಸ್ತಾಂವ್ (cristaos novos) ಆನಿ ಮೆಸ್ತೊಸ್, ಜೆ ಪುರ್ತುಗೆಜ್ ಸೊಜೆರ್ ಆನಿ ಮುಸಲ್ಮಾನ್ ವಿದ್ವೆಂಚ್ಯಾ ಲಗ್ನಾಂ ವರ್ವಿಂ ಜಲ್ಮಾಕ್ ಆಯ್ಲಲೆ. ಮಾಗಿರ್ “ಕಾನಾರಿಂ ಕ್ರಿಸ್ತಾಂವ್” ಜೆ ಥಳಾವೆ, ಬಾಮಣ್, ಚಾರೊಡಿ ಆನಿ ವಾಣಿ ಸಮಾಜಾಚೆ ಆಸ್ಲೆ. ತಾಣಿಂ ಉಲೊಂವ್ಚಿ ಭಾಸ್ ಕೊಂಕ್ಣಿ ಆಸ್ಲಿ. ಪೂಣ್ ತಿಂ ಕಾನಡಿ ಲಿಪಿಯೆಚೊ ವಾಪರ್ ಕರ‍್ತಾಲಿಂ (ಮರಾಠಿ, ಕನ್ನಡ ಆನಿ ಕೊಂಕ್ಣಿ ಬರೊಂವ್ಕ್). ದೆಕುನ್, ತಾಂಚ್ಯೆ ಭಾಶೆಕ್ ‘ಲಿಂಗ್ವಾ ಕಾನಾರಿಂ’ ಆನಿ ಲೊಕಾಕ್ ‘ಕಾನಾರಿಂ’ ಮ್ಹಣ್ ಪುರ್ತುಗೆಜ್ ಆಪಯ್ತಾಲೆ (Prabhu, Slaves of Sultan). ಧರ್ಮಾಂತರಾಚಿ ಪದ್ದತ್ ತರೆಕ್ವಾರ್ ಆಸ್ಲಿ. ಜೆ ಬಾಮಣ್ ಪುರ್ತುಗೆಜಾಂ ಸಾಂಗಾತಾ ಖಾಂವ್ಕ್ ಪಿಯೆಂವ್ಕ್ ಲಾಗ್ಲೆ, ತಾಂಕಾಂ ತಾಂಚ್ಯಾಚ್ ಬಾಮಣ್ ಭಾವಾಂನಿ ಭಾಯ್ರಾಯ್ಲೆ. ತಾಂಕಾಂ ಭಶ್ಟ್ ವಾ ಬಾಟ್ಲಲೆ ಮ್ಹಣುಂಕ್ ಲಾಗ್ಲೆ. ಥೊಡೊ ಲೋಕ್ ಭಾಟಾಂ-ಭೆಸಾಂ ಸಾಂಬಾಳುಂಕ್ ಕ್ರಿಸ್ತಾಂವ್ ಜಾಲೊ. ಥೊಡೆ ಜಾತಿ ವೆವಸ್ಥೆ ಥಾವ್ನ್ ಭಾಯ್ರ್ ಸರುಂಕ್ ಕ್ರಿಸ್ತಾಂವ್ ಜಾಲೆ. ಥೊಡೆ ಬರೆಂ ಕಾಮ್ ಆನಿ ಸ್ಥಾನ್ ಮೆಳ್ಚ್ಯೆ ಖಾತಿರ್ ಕ್ರಿಸ್ತಾಂವ್ ಜಾಲೆ.

ತರ್‌ಯಿ ಹ್ಯಾ ಥಳಾಚ್ಯಾ ಕ್ರಿಸ್ತಾಂವಾಂನಿ ಆಪ್ಲಿ ಜಾತ್ ಮಾತ್ರ್ ಸೊಡುಂಕ್ ನಾ. ಕ್ರಿಸ್ತಾಂವ್ ಬಾಮ್ಣಾಂನಿ ಗೊಂಯ್ಚ್ಯೆ ಇಗರ್ಜೆಚೆರ್ ಆಪ್ಲೊ ಅಧಿಕಾರ್ ಸ್ಥಾಪುಂಕ್ ಪ್ರಯತ್ನ್ ಕೆಲ್ಲೊ. ಸುರ್ವಿಲ್ಲೆ ಪಾದ್ರಿ ಆನಿ ಬಿಸ್ಪ್ ತ್ಯಾಚ್ ಸಮಾಜಾಚೆ ಆಸ್ಲೆ. ತಾಂತ್ಲೆ ಕಾಂಯ್ ಜಣ್ ಪುರ್ತುಗೆಜಾಂ ಕಡೆ ಝುಜ್ಲೆ, ಜಶೆ ಕಾಂದೊಳೆಚೆ ಪೀಂತ್. ಕಾಂಯ್ ಜಣ್ ಮಠ್ವಾಶಿ ಮೇಳ್ ಸ್ಥಾಪುನ್ ಭಾಯ್ಲ್ಯಾ ಗಾಂವಾಂನಿ ಮಿಶಿನೊರಿ ಜಾಲೆ, ಜಶೆ ಸಾಂಕ್ವಾಳೆಚೊ ಸಾಂ ಜೆಜು ವಾಜ್ (Empire of Eloquence, Stuart Mc. Manus). ಕ್ರಿಸ್ತಾಂವ್ ಚಾರೊಡಿ ಮರಾಠಾ, ಪುರ್ತುಗೆಜ್, ಹೈದರ್ ಅಲಿ ಆನಿ ಕೆಲಡಿ ರಾಯಾಂಚ್ಯಾ ಸಯ್ನ್ಯಾಂನಿ ರಿಗ್ಲೆ. ಅಶೆಂ ಬಾಮಣ್ ಆನಿ ಚಾರೊಡಿ ಲೊಕಾಂನಿ ವೆವೆಗ್ಳ್ಯಾ ಕಾರಣಾಂಕ್ ಲಾಗುನ್ ಕ್ರಿಸ್ತಿ ಧರ್ಮ್ ಸ್ವಿಕಾರ್ ಕೆಲೊ. ಇನ್ಕ್ವಿಜಿಶನಾಕ್ ಲಾಗುನ್ ಧರ್ಮಾಂತರಾಂ ಜಾಲಿಂ ಹೆಂ ಚೂಕ್(D’Costa, Christianization of the Goan Islands, 1510-1567).

ಹಿಂದು ಜಾಂವ್, ಕ್ರಿಸ್ತಾಂವ್ ಜಾಂವ್ ತೆ ಕಾಮಾ ಖಾತಿರ್ ಆನಿ ವೆಪಾರಾ ಖಾತಿರ್ ಹೆರಾಂ ಕಡೆ ಭರ‍್ಸಲೆ. ಜಾತ್ ಧರ್ಮ್, ದೆಶಿ ವಿದೆಶಿ ಅಸಲ್ಯೊ ಗಡಿ ತಾಣಿಂ ದೆಕ್ಲ್ಯೊ ನಾಂತ್ (A. B. de Bragança Pereira, “Òs Ranés, os quetris, os oixos, os Charddos, e o bramanes de Goa,” O Oriente Português XVI.).

ಆದ್ಲ್ಯಾ ಕಾಬಿಜಾಂತ್ ದೆವ್ಳಾಂ ಮೊಡ್ಲಿಂ?

ಪೂಣ್ ತ್ಯಾ ಕಾಳಾಚ್ಯಾ ಖಂಯ್ಚ್ಯಾಯ್ ದಸ್ತಾವೆಜಾಂನಿ ಪುರ್ತುಗೆಜಾಂನಿ ಬಳಾನ್ ಧರ್ಮಾಂತರಾಂ ಕೆಲ್ಲ್ಯೆ ವಿಶಿಂ ಆಮ್ಕಾಂ ಮೆಳನಾ, ಶಿವಾಯ್ ಏಕ್ – ಬ್ರದರ್ ಗೊಮೆಶ್ ವಾಜಾಚಿ ಚೀಟ್ (1566). ಹೆರ್ ಉಲ್ಲೇಖ್ ಆಮ್ಕಾಂ 1850 ಉಪ್ರಾಂತ್‍ಚ್ ಮೆಳ್ತಾತ್. ಜಾಯ್ತ್ಯಾ ದೆವ್ಳಾಂಚೊ (pagodas/ tempio) ನಾಸ್ ಜಾಲಾ ಆನಿ ತಾಂಚಿಂ ಪವಿತ್ರ್ ಪುಸ್ತಕಾಂ ತಾಣಿಂ ಘೆತ್ಲ್ಯಾಂತ್ ಮ್ಹಣ್ ಬ್ರದರಾಚ್ಯೆ ಚಿಟಿಂತ್ ತೊ ಆಪ್ಲ್ಯಾ ವ್ಹಡಿಲಾಂಕ್ ಸಾಂಗ್ತಾಂ. ತಿಂ ಪವಿತ್ರ್ ಪುಸ್ತಕಾಂ ಅಭ್ಯಾಸಾ ಖಾತಿರ್ ಘೆತ್ಲಿಂಯ್ ಆಸುಂ ಯೆತಾತ್. ಕಾರಣ್ ಕ್ರಿಸ್ತಪುರಾಣ ಆನಿ ಹೆರ್ ಕೊಂಕ್ಣಿ ಗ್ರಂಥ್ ಪುರ್ತುಗೆಜ್ ಮಿಶಿನೊರಿಂನಿ ಹ್ಯಾ ಕಾಳಾ ಉಪ್ರಾಂತ್‍ಚ್ ರಚ್ಲಲೆ. ಭಾಶೆಚೆರ್ ಬಂದಿ 1684 ವರ್‍ಸಾ ಉಪ್ರಾಂತ್‍ಚ್ ಆಯ್ಲಲಿ. ದೆವ್ಳಾ ವಾ ರೊಯ್ಣ್ (anthill), ಜಿಂ ಸಾಂತೆರಿ ದೆವಿಕ್ ಭೆಟಯ್ಲಲಿಂ ಆಸ್ಲಿಂ, ತಾಂಚೊ ನಾಸ್ ಜಾಲೊ/ಕೆಲೊ. ಕಾರಣ್ ಆಖ್ಖ್ಯಾ ಗಾಂವಾನ್ ಕ್ರಿಸ್ತಾಂವ್ ಧರ್ಮ್ ಆಪ್ಣಾಯ್ಲೊ. ಸಾಂತೆರಿಚೆಂ ಶಾಂತಾದುರ್ಗಾ ಮಾಗಿರ್ ಜಾಲೆಂ (Dr. Cibele Aldrovandi, Goddess Santeri). ಮ್ಹಣ್ತಚ್ ಜಶೆಂ ಆಮಿ ಚಿಂತ್ತಾಂವ್, ಭವ್ಯ್ ದೇವಸ್ಥಾನಾಂ ಆಸ್ಲಲಿಂ, ಜಿಂ ಪುರ್ತುಗೆಜಾಂನಿ ಎಕಾಚ್ ಫಾರಾನ್ ನಾಸ್ ಕೆಲ್ಲಿಂ ಆನಿ ದೆಕುನ್ ಆಮ್ಕಾಂ ಮುರ್ತ್ಯೊ ಘೆವ್ನ್ ಪಳುನ್ ವೆಚೆಂ ಪಡ್ಲೆಂ, ಅಸಲ್ಯಾ ವಿಧಾನಾಂಕ್ ಕಸಲೆಚ್ ಮುಳಾವೆ ಪುರಾವೆ ನಾಂತ್. ಪಳುನ್ ಗೆಲ್ಲ್ಯಾ ಗಾಂವಾಂನಿ ಲೆಗುನ್ ಪುರ್ತುಗೆಜ್ (ಮಂಗ್ಳುರ್ ಆನಿ ಕೊಚ್ಚಿ) ಆನಿ ಬಿಜಾಪೂರ್ (ಫೊಂಡಾ) ಮುಸಲ್ಮಾನ್ ಆಸ್ಲೆ!

ಚಡಾಂತ್ ಚಡ್ ಲೋಕ್ ಆಪ್-ಖುಶ್ಯೆನ್ ಕ್ರಿಸ್ತಾಂವ್ ಜಾಲೊ. ಜೆ ಜಾಂವ್ಕ್ ನಾಂತ್ ತಾಂಕಾಂ ಉಗ್ತ್ಯಾನ್ ತಾಂಚೊ ಧರ್ಮ್ ಪಾಳುಂಕ್ ಆಡ್ವರ‍್ಲಲೆಂ. ಪೂಣ್ ಪ್ರಶಾಸನ್ ಆನಿ ವೆಪಾರಾಂತ್ ತಾಂಕಾಂ ಕಿತೆಂಚ್ ಉಣೆಂ ಕೆಲೆಂ ನಾ. ತ್ಯಾ ಕಾಳಾಚೆ ಮುಖೆಲ್ ಅಧಿಕಾರಿ ಆನಿ ವೆಪಾರಿ ತೆ ಜಾಲೆ. ಹಾಂಚಿಂ ನಾಂವಾ ಪಾಂಡುರಂಗ್ ಪಿಸುರ್ಲೆಂಕಾರ್ ಆಮ್ಕಾಂ ದಿತಾ. ತಾಣಿಂ ಲೆಗುನ್ ಪುರ್ತುಗೆಜಾಂಕ್ ತೆಂಕೊ ದಿಲೊ. ಇನ್ಕ್ವಿಜಿಶನಾ ವೆಳಾರ್ ಸಯ್ತ್ ತಾಂಕಾಂ ವೆಪಾರ್ ಕರುಂಕ್ ಆನಿ ಕುಡಾಂ ಭಾಡ್ಯಾಂಕ್ ದಿಂವ್ಕ್ ತಾಂಕಾಂ ಪರ್ವಣ್ಗಿ ಆಸ್ಲಿ.

ನವ್ಯಾ ಕಾಬಿಜಾಂತ್ ದೆವ್ಳಾಂ?

ಪಯ್ಲೆಂ ಪುರ್ತುಗೆಜಾಂನಿ ಓಲ್ಡ್ ಗೊವಾ ಆನಿ ಶೆಜಾರ್‍ಚೆ ಜುಂವೆಂ/ ಕುದ್ರೆ ಕಾಬಿಜ್ (ಕಬ್ಜಾ) ಕೆಲೆ. ಮಾಗಿರ್ ಅಟ್ರಾವ್ಯಾ ಶೆಕ್ಡ್ಯಾಚ್ಯಾ ದುಸ್ರ್ಯಾ ಅರ್ದಾಂತ್ ಖೇಮ್‍ಸಾವಂತಾಚ್ಯಾ ಹಾತಾ ಖಾಲ್ ಆಸ್ಲೆ ಗಾಂವ್ (1783) ಆನಿ ದಕ್ಷಿಣೆಕ್ ಸೊಂಡೆಕಾರ್ ರಾಯಾಚ್ಯಾ ಹಾತಾ ಖಾಲ್ ಆಸ್ಲಲೆ ಗಾಂವ್ (1788) ಪುರ್ತುಗೆಜಾಂಕ್ ಮೆಳ್ಳೆ. ಹಾಂಗಾ ವಿಚಿತ್ರ್ ಕಿತೆಂಗಿ ಮ್ಹಳ್ಯಾರ್, ತಾಣಿಂಚ್ ಹೆ ಜಾಗೆ ಪುರ್ತುಗೆಜಾಂಕ್ ದಿಲ್ಲೆ. ಆದ್ಲ್ಯಾ ಕಾಬಿಜಾಂತ್ (ಬಾರ್ದೆಸ್, ಸಾಶ್ಟಿ ಆನಿ ತೀಸ್‍ವಾಡಿ) ವೆಪಾರಾಂತ್ ಆನಿ ಪ್ರಶಾಸನಾಂತ್ ಉಂಚ್ಲ್ಯೆ ಜಾತಿಚ್ಯಾ ಹಿಂದು ಆನಿ ಕ್ರಿಸ್ತಾಂವ್ ಸಮಾಜಾಚೊ ಬರೊಚ್ ತಾಬೊ ಆಸ್ಲೊ.

ಮರಾಠಾಂಚ್ಯಾ ರಾಜ್ಯಾಂತ್ ಗೊಂಯ್ಚ್ಯಾ ಹಿಂದು ಬಾಮ್ಣಾಂಚ್ಯಾ ಬಾಮಣ್ಪಣಾಚೆರ್ ಥಂಯ್ಚ್ಯಾ ಲೊಕಾಂನಿ ದುಬಾವ್ ಉಚಾರ್‍ಲೊ. ಅಶೆಂ ತಾಂಚೆಂ ಮೂಳ್ ದಾಕೊಂವ್ಕ್ ತಾಣಿಂ ನವ್ಯಾ ಕಾಬಿಜಾಂತ್ ದೆವ್ಳಾಂ ಬಾಂದುಂಕ್ ದಾನ್ ದಿಲೆಂ. ಎಕ್ಯೆ ರಿತಿಚಿ ಸಂಸ್ಕೃತಿಕರಣ್ (sanskritization) ಪ್ರಕ್ರಿಯಾ ನವೆ ಕಾಬಿಜ್ ಗೊಂಯಾಂತ್ ವಿಲಿನ್ ಜಾತಾನಾ ಪಳೆಂವ್ಕ್ ಮೆಳ್ತಾ. ಪುರ್ತುಗೆಜಾಂಚ್ಯಾ ಪ್ರಶಾಸನಾಂತ್ ಆಸ್ಲಲ್ಯಾ ಬಾಮ್ಣಾಂನಿ ಥಂಯ್ಚ್ಯಾ ಥಳಾವ್ಯಾ ಲೊಕಾಂಚೆ ಜಾಗೆ ಭಿತರ್ ಘಾಲೆ ಆನಿ ಆಪ್ಲಿಂ ದೆವ್ಳಾಂ ಬಾಂದ್ಲಿಂ. ದೆಕುನ್, ಫೊಂಡ್ಯಾ ತಾಲುಕ್ಯಾಂತ್ ಆಮ್ಕಾಂ ಸಾರಸ್ವತಾಂಚಿಂ ಜಾಯ್ತಿಂ ದೆವ್ಳಾಂ ದಿಸ್ತಾತ್. ತಿಂ ದೆವ್ಳಾಂ ಆದಿಂ ಆದ್ಲ್ಯಾ ಕಾಬಿಜಾಂತ್ ಆಸ್ಲಿಂ ಜಿಂ ಪುರ್ತುಗೆಜಾಂನಿ ನಶ್ಟ್ ಕೆಲಿಂ ಮ್ಹಳ್ಳ್ಯೊ ದಂತ್ ಕಥಾ ಹ್ಯಾಚ್ ಕಾಳಾಂತ್ ಪ್ರಸಾರ್ ಜಾಂವ್ಕ್ ಲಾಗ್ಲ್ಯೊ. ಹಾಲಿಂಚ್ ಗೊಂಯ್ ವಿದ್ಯಾಪಿಠಾಂತ್ ಛಾಪ್ಲಲ್ಯಾ ಆಪ್ಲ್ಯಾ ಪ್ರಬಂದಾಂತ್ ಪರಾಗ್ ಪರ್ಬೊ ಹ್ಯೆ ವಿಶಿಂ ಸವಿಸ್ತಾರ್ ಮ್ಹಾಯ್ತಿ ದಿತಾ. (Construction of the Bahujan Samaj: Consciousness, Contestations and Assertions from the nineteenth century to post–Liberation Goa, Goa University). ಶೆಣ್ವಿ ಆನಿ ತಾಂಕಾಂ ಲಾಗ್ಶಿಲೆ ಆಸ್ಲಲೆ ಕೊಂಕಣ್ ವಠಾರಾಂತ್ಲ್ಯಾ ಬಾಮ್ಣಾಂನಿ ಸಾಂಗಾತಾ  ಯೆವ್ನ್ ‘ಎಕಿ’ ಘಡ್ಲಿ ಆನಿ ಅಶೆಂ ಗೌಡ ಸಾರಸ್ವತ್ ಬ್ರಾಹ್ಮಣ್ ಸಮಾಜ್ ಎಕುಣಿಸಾವ್ಯಾ ಶೆಕ್ಡ್ಯಾಚ್ಯಾ ಪಯ್ಲ್ಯಾ ಅರ್ದಾಂತ್ ಜಲ್ಮಾಕ್ ಆಯ್ಲೊ (Conlon, the Gauda Saraswat Unification Movement, 1974). ಕುಡಾಲ್ ಮಠಾಚ್ಯಾ ಬಾಮ್ಣಾಂಕ್ ಕುಡಾಲ್ ದೇಶಸ್ಥ, ಚಿತ್ರಾಪೂರಾಚ್ಯಾ ಬಾಮ್ಣಾಂಕ್ ಚಿತ್ರಾಪೂರ್ ಸಾರಸ್ವತ್, ರಾಜಾಪೂರ್ ಮಠಾಚ್ಯಾ ಬಾಮ್ಣಾಂಕ್ ರಾಜಾಪೂರ್ ಸಾರಸ್ವತ್ ಆನಿ ಸೊನಾರ್ ಸಮಾಜಾನ್ ಸಾಯ್ತ್ ಆಪ್ಣಾಕ್ ದೈವಜ್ಞ ಬ್ರಾಹ್ಮನ್ ಮ್ಹಣ್ ನಾಂವ್ ಘೆತ್ಲೆಂ.

ಸೊಂಪ್ಣಿ

ಜಾತ್ ಆನಿ ಧರ್ಮಾಚ್ಯೆ ನದ್ರೆನ್ ಆಮ್ಚ್ಯಾನ್ ಇತಿಹಾಸ್ ಪಳೆಂವ್ಕ್ ಜಾಯ್ನಾ. ಹಾಚೆಂ ಜಿವೆಂ ಉಧಾರಣ್ ಆಮ್ಚೊಚ್ ಕೊಂಕ್ಣಿ ಸಮಾಜ್. 1725 ವರ‍್ಸಾ ಪುರ್ತುಗಾಲಾಚ್ಯಾ ರಾಯಾಕ್ ಕಾಂಯ್ ವೈಷ್ಣವ್ ಪಂಥಾಚ್ಯಾ ಬಾಮ್ಣಾಂನಿ ಕುಠ್ಠಾಳೆಂ (Cortalim) ಆನಿ ಕೆಳ್ಶಿಚ್ಯಾ (Quelossim) ಸ್ಮಾರ್ಥ್ ಬಾಮ್ಣಾ ಆಡ್ ಏಕ್ ಫಿರ್ಯಾದ್ ಮಾಂಡ್ಲಲಿ (Rivara, Archivo Portugues Oriental fascículo–6, supplement 2, 376). ಶೆಜಾರಿ ಆಸ್ಲಲ್ಯಾ ಮರಾಠಾ ರಾಯಾಂ ಕಡೆ ನ್ಹಯ್! ಭಾಟ್ಕಾರ್ ಆಸ್ಲಲ್ಯಾ ಬಾಮಣ್ ಆನಿ ಚಾರೊಡಿ ಕ್ರಿಸ್ತಾಂವಾಂನಿ ಆಪ್ಲ್ಯಾಚ್ ಕ್ರಿಸ್ತಾಂವ್ ಭಾವಾಂಕ್ ಕಶ್ಟ್ ದಿಲೆ. ತಶೆಂಚ್ ಆಜ್‍ಯಿ ಫೊಂಡ್ಯಾ ತಾಲುಕ್ಯಾಂತ್ ಆಸ್ಚಿಂ ದೆವ್ಳಾಂ ಗೊಥಿಕ್ ಶಯ್ಲೆಂತ್ (Gothic style) ಆಸ್ಲಲ್ಯಾ ಇಗರ್ಜಾಂ ಪರಿಂ ದಿಸ್ತಾತ್. Regulamento das Mazanias, ಪುರ್ತುಗೆಜಾಂಚ್ಯಾ ಆಧಾರಾನ್‍ಚ್ ಉಂಚ್ಲ್ಯೆ ಜಾತಿಚೆ ಹಿಂದು ಆಧಿವಾಶಿ ಜಾಗೆ ಘೆವ್ನ್ ಥಂಯ್ಚೆ ಮಾಹಾಜನ್ ಜಾಲೆ. ಹ್ಯಾ ಪ್ರಮುಖ್ ದೋನ್‍ಯಿ ಪಂಗ್ಡಾಂನಿ ದಿವಪ್ ಆನಿ ಘೆವಪ್, ಸ್ವಾರ್ಥ್ ಆನಿ ಅಬ್ಲೆಸ್ಪಣ್ ಆಸ್ಲೆಂ ಮ್ಹಳ್ಯಾರ್ ಚೂಕ್ ಜಾಂವ್ಚಿ ನಾ. ದೆಕುನ್, ಇತ್ಲೊ ಸಂಕೀರ್ಣ್ ಆನಿ ವಿಚಿತ್ರ್ ಆಮ್ಚೊ ಕೊಂಕ್ಣಿ ಲೊಕಾಂಚೊ ಇತಿಹಾಸ್ ಫಕತ್ ಧರ್ಮಾಂತರಾಂ ಆನಿ ಸ್ಥಳಾಂತರಾಂ ಮ್ಹಣುನ್ ವೊಲಾಂವ್ಕ್ ಜಾಂವ್ಚೊ ನಾ.

► ಜೇಸನ್ ಪೀಂತ್, SDB, ಉದ್ಯಾವರ್, ಉಡ್ಪಿ

“ಹಾಂವೆಂ ಟೀಜರ್ ಆನಿಂ ಟ್ರೈಲರ್ ಪಳೆಲಾಂ. ಜಶೆಂ ಗೋದಿ ಮಾಧ್ಯಮಾಂ ಆಸಾತ್ ತಶೆಂ ಹೆಂಯೀ. ಕಲೆಕ್ ಏಕ್ ಪ್ರೊಪಗಾಂಡ ಸಾಧನ್ ಜಾವ್ನ್ ವಾಪ್ರುಂಕ್. ಭಾಜಪಾಕ್ ಆನಿಂ ಕೇಸರಿ ಪಂಗ್ಡಾಂಕ್ ಭಾಜ್ಲೆಲೆಂ ಮೆಳ್ಳೆಂ. ಮುಸ್ಲಿಮಾಂ ವಿರುದ್ಧ್ ಲವ್ ಜಿಹಾದ್ ಲವ್ ಜಿಹಾದ್ ಮ್ಹಣ್ ಬೊಬೊ ಘಾಲುಂಕ್. ಹಾಂವ್ ಯೇನಾ. ತುಕಾ ಜಾಯ್ ತರ್ ವಚ್. ಪಯ್ಲೆಂಚ್ ಸಾಂಗ್ತಾಂ. ತುಕಾ ಹಿಂಸಾ, ವಾಳ್ಚೆಂ ರಗತ್, AK-47 ಬಂದೂಕೊ, ಫುಟ್ಚೆ ಬೋಂಬ್ ಅಸಲೆಂ ಪೂರಾ ಪಳೆಂವ್ಕ್ ಸೊಸಾನಾಂ. ಕಿತ್ಯಾಕ್ ಇತ್ಲಿ ಅಸಕ್ತ್ ಹ್ಯಾ ಫಿಲ್ಮಾಂತ್ ತುಕಾ? ಮ್ಹಾಕಾ ಸಮ್ಜನಾಂ.”

“ತುಜೆಂ ರಾಜಾಂವ್ ಸಮ್ಜಲೆಂ ಮ್ಹಾಕಾ. ಪೂಣ್…” ಜಾಪ್ ದಿಲಿ ಹಾಂವೆಂ. ಮುಕಾರುನ್, “ಖುದ್ದ್ ಪಳೆತಾಂ ಹಾಂವ್. ಜಶೆಂ ಗೋದಿ ಮಾಧ್ಯಮಾಂ ಆಸಾತ್ ತಶೆಂ ಮುಸ್ಲಿಮ್ ಸಮರ್ಥಕ್ ಆಸಾತ್. ದಾವ್ಯಾ ಪಂಥಿಚೆಂ ರಾಜಕಾರಣ್ ಕರ್ತೆಲೆ ಹಿಂದು ವಿರೋಧಿ ಪ್ರಚಾರ್ ಕರ್ತಾತ್. ನಾಣ್ಯಾಕ್ ದೋನ್ ಕುಶಿ ಆಸಾತ್. ತಶೆಂ, ಹರ್ಯೆಕಾ ವಿಷಯಾ ವಯ್ರ್ ವಿವಾದ್ ಆಸಾಜೆಚ್.”

ಹ್ಯಾಚ್ ಮಾಯ್ 5 ವ್ಯೆರ್, first day first show ಹಾಂವ್ ಪಳೆವ್ನ್ ಆಯ್ಲೊಂ. ಖಾಸ್ ಆನಿಂ ಜಬರ್ದಸ್ತ್ ಫಿಲ್ಮ್ ನಹಿಂ ಹೆಂ. ಬಸ್, ಏಕ್ ಪಾವ್ಟಿಂ ಪಳೆ ಆನಿಂ ವಿಸ್ರೊನ್ ವಚ್. ಕಿತ್ಯಾಕ್, ಸಂವಾದ್ ಬರೊ ನಾಂ, ನಿರ್ದೇಶನಾಂತ್ ಹೊಗ್ಳುಂಚ್ಯೆ ತಸಲೆಂ ಕಾಂಯ್ ನಾಂ. ನಟನ್ ಓಕೆ ಓಕೆ. ಕಾಣಿ ಕೇರಳಾಚ್ಯಾ ಚ್ಯಾರ್ ನರ್ಸಿಂಗ್ ಸ್ಟೂಡೆಂಟಾಚಿ ದೆಕುನ್ ಚವ್ಗಾಂ ನಟಿಂನಿಂ ಮಲಯಾಳಮ್ ಉಚ್ಚಾರಣ್ ವಾಪ್ರುನ್ ಹಿಂದಿ ಉಲಯ್ಜೆ ಮ್ಹಣ್ ಭಗ್ಚೆಂ ಸಹಜ್. ಏಕ್ಲ್ಯಾ ದೋಗಾಂನಿಂ ನಾಕಾಂತ್ ಥಾವ್ನ್ (nasal) ಉಲಂವ್ಕ್ ಪ್ರೇತನ್ ಕೆಲಾಂ ಮ್ಹಣ್ಯಾಂ. ಮಲಯಾಳಮ್ ಸಿನೆಮಾಂತ್ ಇತ್ಲಿಂ ಬರಿಂ ನಟಿ ಆಸಾತ್. ಮಲಯಾಳಮ್ ಮಾಯ್-ಭಾಸೆಚ್ಯಾ ನಟಿಂಕ್ ಘೆತ್ಲೆಲೆಂ ತರ್, ಸಂವಾದ್ ಡಿಲಿವರಿ ಸ್ವಾಭಾವಿಕ್ ಜಾತಿ. ಹ್ಯೊ ಚಲಿಯೊ ಅಸ್ಲಿ ಮಲಯಾಳಿ ಮ್ಹಣ್ ಭಗ್ತೆಂ. ಆಸೊಂ.

“ಸಮಾಧಾನ್ ಜಾಲೆಂಮೂ ತುಕಾ, ಖುದ್ದ್ ಫಿಲ್ಮ್ ಪಳೆವ್ನ್? ಆತಾಂ ಕಿತೆಂ ಮ್ಹಣ್ತಾಯ್ ತುಂ?” ಹಾಂವ್ ಘರಾ ಪಾವ್‍ಲ್ಲೆಂಚ್ ವಿಚಾರಿ ಯೆಜ್ಮಾನ್.

“ಸಗ್ಳಿ ಕಾಣಿ ಪೈಲೆಂ ಆಯ್ಕ್. ಮಟ್ವ್ಯಾನ್ ಸಾಂಗ್ತಾಂ. ಶಾಲಿನಿ ಉನ್ನಿಕ್ರಶ್ಣನ್ ತಿರುವನಂತಪುರ ಜಿಲ್ಲೆಚ್ಯೆ ಎಕ್ಯೆ ಸೊಭಿತ್ ಹಳ್ಳೆಂತ್ಲೆಂ, ಕಸ್ಸಲೆಂ ಕಪಟ್ ನಾತ್ಲೆಲೆಂ ಭೊಳೆಂ ಚೆಡುಂ. ಸಾದೆಂ, ಮೊಗಾಳ್ ಆನಿಂ ಆಪೂಟ್ ಹಿಂದು ಘರಾಣೆಂ ತಾಚೆಂ. ತೆಂ ಕಾಸರಗೋಡ್ ಏಕ್ಯೆ ನರ್ಸಿಂಗ್ ಕೊಲೆಜಿಂತ್ ಭರ್ತಿ ಜಾಲೆಂ. ತಾಚ್ಯಾ ಹೊಶ್ಟೆಲ್ ರೂಮಾಂತ್ ತಿಂ ಚವ್ಗಾಂ: ಆಸಿಫಾ ಬಾ ಮುಸ್ಲಿಮ್, ನಿಮಾ ಮೆಥ್ಯು ಕತೊಲಿಕ್, ಆನಿಂ ಗೀತಾಂಜಲಿ ಮೆನನ್ ಆಪ್ಲೆಂ ಮೂಳಾವೆಂ ಹಿಂದು ಧರ್ಮ್ ಪಾಳಿನಾತ್ಲೆಲ್ಯಾ ಕಮುನಿಸ್ತ್ ಕುಟ್ಮಾಂತ್ಲೆಂ ನಾಸ್ತಿಕ್.”

“ಅಸಿಫಾ ಬಾ ಶೆಳಿಯೆಚ್ಯಾ ವೇಸಾರ್ ದುಷ್ಟ್ ಭೆಡಿಯಾ (wolf). ಇಸ್ಲಾಮಿ ಸಲಫಿ ತೀವ್ರವಾದಿ ಪಂಗ್ಡಾಚ್ಯಾ ಸ್ಲೀಪರ್ ಸೆಲ್ಲಾಚೆಂ ಕಾರ್ಯಕರ್ತಾ. ಆಪ್ಲಿಂ ಶಿಕ್ಣಾಂ ಭಾರಿಚ್ ಬುದ್ವಂತ್ಕಾಯೆನ್ ವಾಪ್ರುನ್, ಶಾಲಿನಿಕ್ ಆನಿಂ ಗೀತಾಂಜಲಿಕ್ ಇಸ್ಲಾಮಿ ದೊತೊರ್ನ್ ಶಿಕಯ್ತಾ. ಮುಸ್ಲಿಮ್ ಚಲ್ಯಾಂಚಿ ವೊಳೊಕ್ ಕರುನ್ ದಿತಾ ಆನಿಂ ತಾಂಚ್ಯಾ ಮೋಗಾರ್ ತಿಂ ಪಡ್ತಾತ್. ಲಗ್ನಾ-ಪೈಲೊ ಲೈಂಗಿಕ್ ಸಂಭೋಗ್ ತಿಂ ಕರ್ತಾತ್. ಶಾಲಿನಿ ಉರ್ಫ್ ಫಾತಿಮಾ ಬಾ ಗರ್ಭೆಸ್ತ್ ಜಾತಾ. ತವಳ್ ತಾಚೊ ಪ್ರೇಮಿ ಮಾಯಾಗ್ ಜಾತಾ. ಮಜ್ಬೂರ್ ಜಾವ್ನ್ ಸಲಫಿ ಅತಂಕ್ವಾದಿ ಸಂಗಿ ನಿಕಾ ಕರಿಜೆ ಪಡ್ತಾ. ಹೊ ಅತಂಕ್ವಾದಿ ಭುಲವ್ನ್, ಪುಸ್ಲಾವ್ನ್, brainwash ಕರ್ನ್, ಫಾತಿಮಾಕ್ ಅಫಾನಿಸ್ತಾನಾಂತ್ಲ್ಯಾ ISIS ಲಿಪ್ಕೊರ್ (hide-out) ರೆಗಿಸ್ತಾನಿ ಘರಾಂನಿಂ ವರ್ತಾ. ISIS ಝುಜಾರ‍್ಯಾಂಚೆಂ sex slave ಕೆಲೆಂ ದೆಕುನ್ ತೆಂ ಪೊಳೊನ್ ವೆತಾ. ISIS ವಿರುದ್ಧ್ ಕಾರ‍್ವಾಯ್ ಕರ್ಚೆಂ UN ಮಿಲಿಟರಿ ದಳ್ ತಾಕಾ “ಟೆರರಿಸ್ಟ್” ಮ್ಹಣ್ ಬಂಧಿ ಕರ್ತಾ. ತಾಚೆಂ ವಿಚಾರಣ್ ಚಲ್ತಾ.”

“ಹ್ಯಾ ವಿಚಾರಣಾ ಥಾವ್ನ್ ಫಿಲ್ಮ್ ಸುರು ಜಾತಾ. ಸಗ್ಳಿ ಕಾಣಿ ಶಾಲಿನಿಚ್ಯಾ ಸಂದರ್ಶಾನಾ ದ್ವಾರಿಂ ಉಗ್ತಿ ಜಾತಾ. ಗೀತಾಂಜಲಿಕ್ ಕಿತೆಂ ಜಾಲೆಂ? ತಾಣೆಂ ಕಿತ್ಯಾಕ್ ಜಿವ್ಘಾತ್ ಕೆಲೊ? ನಿಮಾ ಮೆಥ್ಯು ಕನ್ವೆಡ್ತರ್ ಜಾಲೆಂ-ನಾಂ ಮ್ಹಣ್ ತಾಕಾ ಶಿಕ್ಶಾ ದೀಂವ್ಕ್ ತೀವ್ರವಾದಿ ಇಸ್ಲಾಮಿ ಜಣಾಂನಿಂ ತಾಚ್ಯೆರ್ ಲಗಾತರ್ ಸಾಮೂಹಿಕ್ ಬಲಾತ್ಕಾರ್ ಕೆಲೊ. ಹೆಂ ದೂರ್ ಪೊಲಿಸಾಂಕ್ ದಿತಾನಾಂ ಕಿತ್ಯಾಕ್ ತಾಚ್ಯೆ ಥಾವ್ನ್ ರುಜ್ವಾತ್ ಮಾಗ್ಲಿ? ಅಧಿಕೃತ್ ಲೆಕಾ ಪ್ರಮಾಣೆಂ 32 ಹಜಾರ್ ಆನಿಂ ಅನಧಿಕೃತ್ ಸೂತ್ರಾಂ ಪ್ರಮಾಣೆಂ 50 ಹಜಾರ್ ಹಿಂದು ಆನಿಂ ಕ್ರಿಸ್ತಾಂವ್ ಚಲಿಯಾಂಕ್ ‘ಲವ್ ಜಿಹಾದ್’ ಝಾಳಾಂತ್ ಶಿರ್ಕಾಯ್ಲಾಂ ಮ್ಹಣ್ ನಿಮಾನ್ ಕಶೆಂ ಸಾಂಗ್ಲೆಂ? ಕೇರಳ ಪೊಲಿಸ್ ಆನಿಂ ಕೇರಳ ಸರ್ಕಾರ್ ಮೊನೆ ಕಿತ್ಯಾಕ್? ಹ್ಯಾಂ ಖಡಾಖಡ್ ಸವಲಾಂಚಿ ಜಾಪ್ ಜಾಯ್ ಮ್ಹಣ್ ನಿಮಾ ಮೆಥ್ಯುಚೊ ಏಕಾಲಾಪ್ (monologue) ಲಾಂಬ್ ದ್ರಶ್ಯಾ ಮುಖಾಂತ್ರ್ ಪಿಂತ್ರಾಯ್ಲಾ. ಕಿತ್ಯಾಕ್? ಹೆಂ ಸಗ್ಳೆಂ ಸಮ್ಜೊಂಕ್ ತುಂವೆಂ ಆನಿಂ ಪಬ್ಲಿಕ್ ಲೋಕಾನ್ ಹೆಂ ಫಿಲ್ಮ್ ಪಳೆಜೆ ಮ್ಹಣ್ ಮ್ಹಜಿ ಅಭಿಪ್ರಾಯ್”.

ಸೊಸ್ಣಿಕಾಯೆನ್ ಹಿ ಕಾಣಿ ಆಯ್ಕೊನ್, ಮ್ಹಜಿ ಮದಾಮ್ ಉಲಯ್ಲಿ:

“ವಾದ್ ವಿವಾದ್ ಉಟ್ಲೆಲ್ಯಾ ಉಪ್ರಾಂತ್, ಫಿಲ್ಮ್ ನಿರ್ಮಾತಾಂನಿಂ ಅಂಕ್ಡ್ಯಾಂಚಿ ತಿದ್ವಣ್ ಕೆಲ್ಯಾ ಮ್ಹಣ್ ಹಾಂವೆಂ ವಾಚ್ಲಾಂ. ಕೇರಳಾ ಥಾವ್ನ್ ಕೇವಲ್ 3 ಚಲಿಯೊ ಮಾಯಾಗ್ ಜಾಲ್ಯಾತ್. ಕನ್ವೆಡ್ತರ್ ಜಾವ್ನ್, ತೀವ್ರಗಾಮಿಂಚ್ಯಾ ಝಾಳಾಂತ್ ತಿಂ ಶಿರ್ಕಲಿಂ. ISIS ಝುಜಾರ‍್ಯಾಂನಿಂ ತಾಂಕಾಂ ಲೈಂಗಿಕ್ ಗುಲಾಮ್ ಕೆಲಾಂ. ಹೆಂ ನೀಜ್ ವ್ಹಯ್. ಪೂಣ್, ತೀನ್ ನೀಜ್ ಕಾಣಿಯೆಂಚ್ಯಾ ಆಧಾರಾರ್ ಏಕ್ ಕಾಲ್ಪನಿಕ್ ಫಿಲ್ಮ್ ಕೆಲೆಂ ಆನಿಂ ತಾಕಾ ದ ಕೇರಳ ಸ್ಟೊರಿ ಮ್ಹಣ್ಚೆಂ ಸಾರ್ಕೆಂ ನಹಿಂ. ಏ ಕೇರಳ ಸ್ಟೋರಿ ಮ್ಹಣ್ಯೆತ್. ಕೇರಳಾಂತ್ ಅತಂಕ್-ವಾದಿ ಇಸ್ಲಾಮಿ ಶರಿಯಾ ಕಾನುನಾಚೊ ಟಾಯ್ಮ್ ಬೊಂಬ್ ಆಸಾ ಮ್ಹಣ್ ಸಂವಾದ್ ಬರಯ್ಲಾ. ಹೆಂ-ಯೀ ಪ್ರಚಾರ್ ಶಿವಾಯ್, ಸತ್ ನಹಿಂ. ವೆಗಿಂಚ್, God’s Own Country ಕೇರಳಾಂತ್ ಹಿಂದು ಧರ್ಮ್ ಪಾಳ್ತೆಲ್ಯಾಂಕ್ ಯೆಮ್ಕೊಂಡ್ ಜಾತೆಲೆಂ ಮ್ಹಣ್ಚೆಂ ಆನ್ಯೇಕ್ ಫಟ್ಕಿರೊ ಪ್ರಚಾರ್. ದೆಕುನ್, ಮ್ಹಕಾ ಹೆಂ ಫಿಲ್ಮ್ ಕೇರಳಾಚೆಂ ನಾಂವ್ ಪಾಡ್ ಕರಿಜೆ ಮ್ಹಳ್ಳ್ಯಾ ಇರಾದ್ಯಾನ್ ಫಿಲ್ಮಾಯ್ಲಾಂ ಮ್ಹಣ್ ಭಗ್ತಾ. ಅಪ-ಪ್ರಚಾರ್ ಹೆಂ ಫಿಲ್ಮ್ ಕರ್ತೆಲ್ಯಾಂಚೊ ಎಜೆಂಡಾ. ಹೆಂಚ್ ಸತ್ ಮ್ಹಣ್ತಾಂ ಹಾಂವ್!”

ಮುಕಾರುನ್ ತಿ ಮ್ಹಣಾಲಿ:

“ಆಯ್ಲೆವಾರ್, ಏರ್ ಇಂಡಿಯಾ ಫ್ಲಯ್ಟಾರ್ ಸೊರೊ ಪಿಯೆವ್ನ್ ಆಮಾಲ್ ಜಾಲ್ಲ್ಯಾ ಎಕಾ ಪಯ್ಣಾರ‍್ಯಾನ್, ಬಗ್ಲೆನ್ ಬಸ್ಲೆಲ್ಯಾ ಸಹ-ಪಯ್ಣಾರಿ ಸ್ತ್ರೀಯೆಚ್ಯಾ ಆಂಗಾರ್ ಮುತ್ಲೆಲಿ ಗಜಾಲ್ ವಾಯ್ರಲ್ ಜಾಲಿ. ಹ್ಯೆ ಎಕ್ಯೆ ವಾಸ್ತವಿಕ್ ಘಡಿತಾಚ್ಯಾ ಆಧಾರಾರ್ ಜರ್ ಅಮೆರಿಕಾ ವ ಯುರೋಪಾಚ್ಯಾ ಕೋಣ್ ಎಕಾ ಫಿಲ್ಮ್ ನಿರ್ಮಾತಾನ್ ‘ದ ಇಂಡಿಯನ್ ಸ್ಟೋರಿ’ ಮ್ಹಣೊನ್ ಏಕ್ ಫಿಲ್ಮ್ ಕೆಲೆಂ ಆನಿಂ ಹಜಾರೊಂ ಇಂಡಿಯನ್ ಅಶೆಂ ಮುತ್ತಾತ್ ಮ್ಹಣ್ ಫಿಲ್ಮಾಚ್ಯಾ ಸುರ್ವೆರ್ ಉಲ್ಲೇಕ್ ಕೆಲೊ. ತರ್, ಆಮ್ಕಾಂ ಹಲ್ಕ್ ಜಾಂವ್ಚೆಂ ಸ್ವಾಭಾವಿಕ್ ನಹಿಂ-ಗೀ? ತಶೆಂ, ಬಿಬಿಸಿನ್ ‘ದ ಮೋದಿ ಕ್ವೆಸ್ಚನ್’ ಡೊಕ್ಯುಮೆಂಟರಿ ಬ್ರಿಟನಾ ಭಿತರ್ ಮಾತ್ರ್ ಪ್ರಸಾರ್ ಕೆಲ್ಲ್ಯಾ ವೆಳಾ, ಆಮ್ಕಾಂ ಗಳ್ಯಾಂತ್ ಲಾಸ್ಲೆಂ-ಮೂ? ಕಿತ್ಯಾಕ್ ಆಮಿಂ ತಿ ಡೊಕ್ಯುಮೆಂಟರಿ ಬ್ಯೇನ್ ಕೆಲಿ? ಅತಾಂ, ಕೇರಳ ಸರ್ಕಾರಾನ್ ಜರ್ ಹೆಂ ಫಿಲ್ಮ್ ಬ್ಯೇನ್ ಕರಿಜೆ ಮ್ಹಣ್ ನಿರ್ಧಾರ್ ಕೆಲೊ ತೆಂ ತಾಂಚ್ಯೆಂ ಹಕ್ಕ್. “

ಯೆಜ್ಮಾನಿಚ್ಯೆಂ ರಾಜಾಂವ್ ಆಯ್ಕೊನ್, ಮ್ಹಕಾಯೀ ಭಗ್ಲೆಂ: ತಿಚ್ಯಾ ವಾದಾಂತ್ ತೀರ್ಲ್ ಆಸಾ. ತರಿಪುಣ್, ಕೊಣಾಕ್ ಫಿಲ್ಮ್ ಪಳೆಂವ್ಕ್ ಮನ್ ಆಸಾ, ತಿಂ ಪಳೆಂವ್ದಿ. ಹರ್ಯೇಕ್ಲ್ಯಾಕ್ ಆಪ್ಲಿಚ್ ಚಿಂತ್ಚಿ ಶ್ಯಾಥಿ ಆಸಾ. ತಶೆಂ ಸೆನ್ಸರ್ ಬೊರ್ಡಾನ್ A ಸರ್ಟಿಫಿಕೇಟ್ ದಿಲ್ಯಾ. 18 ವ್ಹರ್ಸಾಂಚಿ ಪ್ರಾಯ್ ಭರ್ಲೆಲಿಂ ಮಾತ್ರ್ ಫಿಲ್ಮ್ ಪಳೆತೆಲಿಂ. ಪಳೆನಾಸ್ತನಾಂ, ಫಿಲ್ಮಾಚ್ಯೆಂ ಖಂಡನ್ ಕರ್ಚೆಂ ಸಾರ್ಖೆಂ ನಹಿಂ.

ಕಿತ್ಲೆಂ ಆನಿಂ ಕಶೆಂ ಸಾಂಗ್ಲ್ಯಾರ್-ಯೀ, ಯೆಜ್ಮಾನಿಚ್ಯೆಂ ಮನ್ ಮಾತ್ರ್ ಬದ್ಲಿ ಕರುಂಕ್ ಹಾಂವ್ ಸಫಳ್ ಜಾವ್ನಾ. ಹೆಂ ಕಾಂಯ್ ನವೆಂ ನಹಿಂ. ಮ್ಹಕಾ ಚಾಳಿಸ್ ಆನಿಂ ಚ್ಯಾರ್ ವ್ಹರ್ಸಾಂಚೊ ಅನ್ಭೋಗ್ ಆಸಾ. ರೆಸ್ಫೆರ್ ಜಾಲ್ಲ್ಯಾ ದಿಸಾ ಥಾವ್ನ್, right or wrong ತಿಚ್ಯೆಂಚ್ last word. ತಿಣೆಂ ಸಾಂಗ್ಲೆಲೆಂಚ್ ಜಾಯ್ಜೆ, ಸಾಯ್ಬಾ ಭೊಗೊಸ್ ಮ್ಹಣ್ತಾಂ! ಹಾಚ್ಯೆ ವಯ್ರ್ ಏಕ್ ಫಿಲ್ಮ್ ಕೆಲ್ಯಾರ್ ಬರೆಂ. ದ ಮೆನ್ಸ್ ಸ್ಟೋರಿ ಮ್ಹಣ್ ಶೀರ್ಷಕ್ ದೀವ್ನ್!

► ಫಿಲಿಪ್ ಮುದಾರ್ಥ್

ಹಾಲೀಂಚ್ ಮೆಕ್ಳಿಕ್ ಜಾಲ್ಲಿ ದೊ. ಮೋಹನ್ ಪೈ ಹಾಂಚಿ ಕೊಂಕ್ಣಿ ಕಾದಂಬರಿ ‘ಮಹಾಪ್ರಸ್ಥಾನ್’, ಉದಯ್ ಭೆಂಬ್ರೆಚಿ ‘ವ್ಹಡ್ಲೆಂ ಘರ್’, ವಿ. ಜೆ. ಪಿ ಸಾಲ್ದಾಞಾಚಿ ‘ಸಾಯ್ಬಾ ಭೊಗಸ್’ ‘ದೆವಾಚ್ಯೆ ಕುರ್ಪೆನ್’ ವಾ ಕನ್ನಡ ಭಾಶೆಂತ್ ಉಜ್ವಾಡಾಕ್ ಆಯಿಲ್ಲಿ ಗೋಪಾಲಕೃಷ್ಣ ಪೈಚಿ ‘ಸ್ವಪ್ನ ಸಾರ್ಸ್ವತ’ ಆನಿ ಅಸ್ಲ್ಯೊಚ್ ಜಾಯ್ತ್ಯೊ ಕಾದಂಬ್ರ್ಯೊ ಕೊಂಕ್ಣಿ ಲೊಕಾಂಕ್ ಅಸ್ಕತ್ ಆನಿ ದುಸ್ಮಾನಾಂಕ್ ಬಳಿಶ್ಟ್ ಮ್ಹಣ್ ಚಿತ್ರಾಯ್ತಾತ್. ಅಸ್ಲ್ಯಾ ಕಾಣಿಯಾಂನಿ ಇತಿಹಾಸಿಕ್ ದಾಖ್ಲ್ಯಾಂಚೊ/ ಸ್ತ್ರೊತಾಂಚೊ ಚಡ್ಸೊ ಉಪೇಗ್ ಕೆಲಾ ಜಾಯ್ತ್, ಪೂಣ್ ಇತಿಹಾಸಿಕ್ ನದ್ರೆನ್ ತೆ ಕಿತ್ಲೆ ಖರೆ ಆಸುಂಕ್ ಸಕ್ತಾತ್ ಹ್ಯೆ ವಿಶಿಂ ಕೊಣೆಂಯ್ ಸಂಶೋಧ್ ಕೆಲ್ಲೊ ದಿಸನಾ. ಭಾರತಾ ಭಾಯ್ರ್ ಹ್ಯೆ ವಿಶಿಂ ಜಾಯ್ತೊ ಸಂಶೋಧ್ ಜಾಲ್ಲೊ ಆಮ್ಕಾಂ ಮೆಳ್ತಾ. ಕಾಂಯ್ ಕೊಂಕ್ಣಿ ಲೊಕಾಂಕ್ ಹ್ಯೊ ಕಾಣಿಯೊಚ್ ಸತ್ ದಿಸ್ತಾತ್, ಆನಿ ಇತಿಹಾಸಿಕ್ ಪುರಾವೆ ಕಾಣಿಯೊ ಮ್ಹಣ್ ದಿಸ್ತಾತ್. ಮ್ಹಣ್ತಚ್ ಸಂಶೋಧನ್ ಕರ್‍ತಾನಾ ಆಮ್ಕಾಂ ಏಕ್ ವಿಜ್ಞಾನಿಕ್ ರೀತ್ ವಾಪರ್‍ಚಿ ಪಡ್ತಲಿ. ಜೆಂ ಆಮಿ ಇತಿಹಾಸ್ ಮ್ಹಣ್ ಲೆಕ್ತಾತ್, ತಾಚೆರ್ ಖೋಲ್/ ಗುಂಡ್ ಅಭ್ಯಾಸ್ ಕರ್‍ಚೊ ಪಡ್ತಲೊ. ಜಾಯ್ತ್ಯೊ ಗಜಾಲಿ/ ಸಾಧನ್-ಸಾಮಗ್ರಿ (resources) ಏಕ್ ದೋನ್ ದಶಕಾಂ ಆದಿಂ ಆಮ್ಚ್ಯೆ ಕಡೆ ನಾಸ್ಲ್ಯೊ. ತ್ಯೊ ಆತಾಂ ಆಮ್ಚ್ಯೆ ಲಾಗಿಂ ಆಸಾತ್, ಒನ್ ಲಾಯ್ನ್ ಸಯ್ತ್ ಮೆಳ್ತಾತ್.

ಸಂಶೋಧನ್ ಕರ್‍ಚಿ ರೀತ್

ಧಾರ್ಮಿಕ್ ಗ್ರಂಥಾಂಚೆರ್ ಸಂಶೊಧನಾ ಖಾತಿರ್ ‘ಇತಿಹಾಸಿಕ್ ಟಿಕಾ’ (Historical Critical Method) ಯುರೊಪಾಂತ್ ಪ್ರಚಲಿತ್ ಆಸಾ. ಭಾರತಾಂತ್ ವೇದ್ ಉಪನಿಷದಾಂಚೆರ್ ಭಾಶ್ಯ್ ಬರಯ್ತಾಲೆ ಆನಿ ತಾಚೊ ಅರ್ಥ್ ಸಾಂಗ್ಚಿ ಏಕ್ ಆಮ್ಚಿಚ್ ಪರಂಪರಾ ಆಸ್ಲಿ, ಆಜುನ್‍ಯಿ ಆಸಾ. ಹ್ಯೆ ರಿತಿಂತ್ ಜೆ ಮಜ್ಕುರ್ (text) ಆಮ್ಚ್ಯೆ ಲಾಗಿಂ ಆಸಾತ್ ತಾಂಚೆರ್ ಆಮಿ ನಿಯಾಳ್ತಾಂವ್. ಎಕಾ ಲೆಖಕಾನ್ ತಶೆಂ ಕಿತ್ಯಾಕ್ ಬರಯ್ಲಾಂ? ತಾಚೊ ಸಂದರ್ಭ್ ಕಿತೆಂ? ತ್ಯಾಚ್ ಕಾಳಾರ್ ಜಾಲ್ಲ್ಯೊ ಹೆರ್ ಗಜಾಲಿಂ ಕಡೆ ತಾಂಚೊ ಸಂಬಂದ್ ಕಸೊ ಆಸ್ಲೊ? ಹೆಂ ಸರ್ವ್ ಆಮಿ ಜೊಕುನ್ ಪಳೆತಾಂವ್. ಕೊಂಕ್ಣಿ ಕ್ರಿಸ್ತಾಂವಾಂ ಮದೆಂ ಟಿಪ್ಪು ಸುಲ್ತಾನಾಕ್ ಲಾಗುನ್ ಏಕ್ ಅಮ್ಕಿಚ್ ಸಮ್ಜಣಿ ಆಸಾ. ಚಡ್ ಕರುನ್ ತಾಣೆಂ ಬಳಾನ್ ಧರ್ಮಾಂತರ್ ಕೆಲ್ಲೆಂ ಮ್ಹಳ್ಳೆಂ ಚಿಂತಪ್ ಘೊಳ್ತಾ. ಅಸ್ಲೆಂಚ್ ಚಿಂತಪ್ ಸಾರ್ಸ್ವತ್ ಕೊಂಕ್ಣಿ ಸಮಾಜಾಂತ್ ಇಂಕ್ವಿಜಿಶನಾಚ್ಯಾ ಸಂದರ್ಭಾರ್ ಘೊಳ್ತಾ. ಕಾಂಯ್ ಇತಿಹಾಸ್ಕಾರಾಂನಿ (ದೆಶಿ ತಶೆಂಚ್ ವಿದೆಶಿ) ಅಸ್ಲೆಂಚ್ ಚಿಂತಪ್ ಆಮ್ಚ್ಯೆ ಮುಕಾರ್ ದವರ್‍ಲಾಂ. ಪೂಣ್ ಅಶೆಂ ಆಸ್ಲೆಂ ತರ್, ಮಂಗ್ಳುರಾಂತ್ ಇತ್ಲೆ ಕೊಂಕ್ಣಿ ಕ್ರಿಸ್ತಾಂವ್ ಆಜುನ್‍ಯಿ ಖಂಯ್ ಥಾವ್ನ್ ಆಯ್ಲೆ?

1500 ವರ್ಸಾ ಪುರ್ತುಗೆಜಾಂಚೆ ಖಾಸ್ ಇಶ್ಟ್ ವೆರ್ಣೆಚೊ ಮ್ಹಾಲ್ ಪೈ ಆನಿ ತಿಮಯ್ಯ ನಾಯ್ಕ್ ಆನಿ 1540 ವರ್ಸಾ ಲಿಸ್ಬನಾಂತ್ ಸರ್ದಾರಕಿ (knighthood) ಪದ್ವಿ ಜೊಡ್ಲಲೊ, ಪುರ್ತುಗೆಜಾಂಚೆ ಹೆ ಇಶ್ಟ್ ಕಿತೆಂ ಕರುನ್ ಆಸ್ಲೆ? ಮ್ಹಣ್ತಚ್ ಪುರ್ತುಗೆಜಾಂಚ್ಯಾ ಶೆಕಾ/ ಪ್ರಶಾಸನಾ ಖಾಲ್ ಆಸ್ಲಲ್ಯಾ ಕೊಂಕ್ಣಿ ಲೊಕಾಂಚೊ ಚಾರ್ಶಿಂ ವೀಸ್ ವರ್ಸಾಂಚೊ ಇತಿಹಾಸ್ ಸಮ್ಜುಂಕ್ ತಿತ್ಲೊ ಸೊಂಪೊ ನ್ಹಯ್.

https://en.wikipedia.org/wiki/Suniti_Kumar_Chatterji

ಸುನಿತಿ ಕುಮಾರ್ ಚೆಟರ್ಜಿ, ಜೊ ಕೊಂಕ್ಣಿ ಭಾಶೆಕ್ ಅಧಿಕೃತ್ ಮಾನ್ಯತಾಯ್ ಮೆಳ್ಚ್ಯೆ ಖಾತಿರ್ ಸಕ್ರೀಯ್ ಆಸ್ಲಲೊ, ತೊ ಆಮ್ಚ್ಯೆ ವಿಶಿಂ ಅಶೆಂ ಮ್ಹಣ್ತಾ – The Konkani people, particularly the Hindu Saraswats and the Christians, have been since the sixteenth century and again during the nineteenth and twentieth, in the forefront of Indian peoples, through their glorious intellectual and cultural attainments and their successful commercial and industrial enterprises, side by side with their invaluable services in preserving the ancient literary heritage of India in Sanskrit and in bringing to India the Latin culture of Portuguese Christianity. ಪೂಣ್ ಏಕ್ ವಿಪರ್ಯಾಸ್ ಮ್ಹಳ್ಯಾರ್ ಆಮಿಚ್ ಆಮ್ಚ್ಯೆ ಭಾಶೆ ವಿಶಿಂ ಆನಿ ಆಮ್ಚ್ಯಾ ಇತಿಹಾಸಾ ವಿಶಿಂ ಬಾರ್ಕಾಯೆನ್ ಸೋದ್ ಕೆಲ್ಲೊ ನಾ. ಅಸ್ಲ್ಯಾ ಸಂಶೊಧನಾಚೊ ಉದ್ದೇಶ್ ದೋನ್‍ಯಿ ಸಮಾಜಾ ಮದೆಂ ಎಕ್ವಟ್ ಆನಿ ಭಾವ್ಪಣ್ ನಿರ್ಮಾಣ್ ಕರುಂಕ್ ಸಕ್ತಾ.

ಪುರ್ತುಗೆಜಾಂ ಪುರ್ವಿಲೊ ಇತಿಹಾಸ್

ಪುರ್ತುಗೆಜಾಂ ಪುರ್ವಿಲೊ ಆಮ್ಚೊ ಇತಿಹಾಸ್ ಆಮ್ಕಾಂ ಕನ್ನಡ, ಫಾರ್ಸಿ ಆನಿ ತುರ್ಕಿ ಭಾಸಾಂನಿ ಮೆಳ್ತಾ. ಹಾಚೆಂ ಕಾರಣ್, ಕೊಂಕ್ಣಿ ಲೊಕಾಂಚೊ ಸಂಬಂದ್ ತಾಂಚ್ಯೆ ಕಡೆ ಆಸ್ಲೊ. ಧರ್ಮಾಚ್ಯೆ ನದ್ರೆನ್ ಪಳೆಲ್ಯಾರ್ ಧಾವ್ಯಾ ಇಕ್ರಾವ್ಯಾ ಶೆಕ್ಡ್ಯಾಂತ್ ಕೊಂಕಣಾಂತ್ ಬೌದ್ಧ್ ಆನಿ ಜೈನ್ ಧರ್ಮ್ ಚಡ್ ಪ್ರಚಲಿತ್ ಆಸ್ಲೊ. ಕದಂಬಾಂನಿ, ಜ್ಯೆ ಆದಿಂ ಜೈನ್ ಆಸ್ಲೆ, ತಾಂಣಿಂ ಹಿಂದು ಧರ್ಮಾಕ್ ತೆಂಕೊ/ ಪಾಟಿಂಬೊ ದಿಲೊ. ಸಪ್ತಕೋಟೇಶ್ವರ್ ದೆವ್ಳಾಂತ್ಲೊ ಶಿವ್ ತಾಂಚೊ ಕುಳದೆವತಾ ಜಾಲೊ. ತಾಂಚ್ಯಾ ಕಾಳಾ ವಯ್ಲ್ಯಾ ನಾಣ್ಯಾಂನಿ ಸಪ್ತಕೋಟೇಶ್ವರಲಬ್ಧ – ವರಪ್ರಸಾದ (ಸಪ್ತಕೋಟೆಶ್ವರಾಚ್ಯೆ ಕುರ್ಪೆನ್) ಮ್ಹಳ್ಳೆಂ ಬಿರುದ್ ಆಮ್ಕಾಂ ಮೆಳ್ತಾ. ಹ್ಯಾಚ್ ಪ್ರಭಾವಾನ್ ತೆದ್ನಾಂಚೆ ಚಡಾಂತ್ ಚಡ್ ಹಿಂದು ಲೋಕ್ ಸ್ಮಾರ್ತ, ಶೈವ ಪಂಥಾಚೊ ಆಸ್ಲೊ ಮ್ಹಣ್ ಸಾಂಗುಂಕ್ ಜಾತಾ. ವೈಷ್ಣವ್ ಪಂಥಾಚೊ ಪ್ರವೇಶ್ ತೆರಾವ್ಯಾ ಶೆಕ್ಡ್ಯಾಂತ್ ಮಧ್ವಚಾರ್ಯಾಚ್ಯಾ ಪ್ರವಚನಾನ್ ಜಾಲೊ (Moraes, The Kadambakula). ಅಶೆಂ ಪುರ್ತುಗೆಜ್ ಗೊಂಯಾಂತ್ ಪಾವ್ತಾನಾ ಹೆ ದೋನ್‍ಯಿ ಪಂಥ್ ಥಂಯ್ ಆಸ್ಲೆ. ಎಕಾಮೆಕಾ ಕಡೆ ಝುಜುನ್, ವರ್ಚಸ್ವ್ ದಾಕೊಂವ್ಚ್ಯಾಂತ್ ಮಗ್ನ್ ಆಸ್ಲೆ.

ಪಾಹ್ಲವಿ ಖುರಿಸ್

ಕೊಂಕಣಾಂತ್ ಕ್ರಿಸ್ತಾಂವ್ ಧರ್ಮ್ ಆಸ್ಲೊ ಮ್ಹಣ್ಚ್ಯಾಕ್ ಏಕ್‍ಚ್ ಪುರಾವೊ ಸದ್ಯಾ ಮೆಳ್ಳಾ. ಜುವಾರಿ ನ್ಹಂಯ್ಚ್ಯೆ ತಡಿರ್, ಆಗ್ಶಿಂ ಗಾಂವ್ಚೊ ಪಾಹ್ಲವಿ ಖುರಿಸ್. ತೊ ಸವ್ಯಾ ಶೆಕ್ಡ್ಯಾಚೊ ಮ್ಹಳ್ಳೊ ಅದ್ಮಾಸ್/ ಅಂದಾಜ್. ಇತಿಹಾಸ್ಕಾರಾಂ ಪ್ರಕಾರ್ ತೆ ವೆಪಾರಿ ಆಸ್ಲೆ ಆನಿ ಲ್ಹಾನ್ ಲ್ಹಾನ್ ಸಮುದಾಯಾಂನಿ ಜಿಯೆತಾಲೆ. ತಾಂಕಾಂ ಫಕತ್ ಕೆರಳಾಂತ್‍ಚ್ ಕ್ರಿಸ್ತಾಂವಾಂಚೊ ವ್ಹಡ್ ಸಮುದಾಯ್ ಆಸ್ಲಲೊ ಪುರಾವೊ ಪಳೆಂವ್ಕ್ ಮೆಳ್ಳೊ. ತ್ಯೆ ಭಾಯ್ರ್ ಸಬಾರ್ ಥಳಾವೊ ಲೋಕ್ ಥಂಯ್ಚೆ ಮೂಳ್ ನಿವಾಶಿ ರಾನಾಂತ್ ಆನಿ ಗಾಂವಾಂನಿ ರಾಬಿತೊ ಕರುನ್ ಆಸ್ಲೊ. ಆತಾಂ ತಾಂಕಾಂ ಕುಣ್ಬಿ, ವೆಳಿಪ್, ಧಂಗರ್, ಘುರವ್, ರೆಂದೆರ್, ಗಾವ್ಡಿ, ಖಾರ್ವಿ, ಗಬಿತ್ ಮ್ಹಣ್ ಆಮಿ ವಳ್ಕತಾಂವ್.

ಪುರ್ತುಗೆಜ್ ಆನಿ ಕೊಂಕ್ಣಿ ಲೊಕಾಚೆ ಸಂಬಂದ್

ಪುತುಗೆಜ್ ಆಯ್ಲೆ, ಧರ್ಮಾಂತರಾಂ ಸುರು ಜಾಲಿಂ, ಆಪ್ಲ್ಯಾ ದೆವಾಂಕ್ ಘೆವ್ನ್ ಲೋಕ್ ಪಳುನ್ ಗೆಲೊ – ಹಿ ಸಮ್ಜಣಿ ಕೊಂಕ್ಣಿ ಲೊಕಾಂ ಮದೆಂ ಚಡ್ ಪ್ರಚಲಿತ್ ಆಸಾ. ಪೂಣ್ ಹಾಕಾ ಆದಾರ್ ಕಿತೆಂ?

ಸಂಜಯ್ ಸುಬ್ರಹ್ಮನ್ಯಮಾಚ್ಯಾ The Portuguese Empire in Asia, 1500-1700: A Political And Economic History ಹ್ಯಾ ಪುಸ್ತಕಾಂತ್ ತೊ ಸಾಂಗ್ತಾ 80% ಪುರ್ತುಗೆಜಾಂಚೆ ಕರ್ ವಸುಲ್ದಾರ್ (ಸುಂಕಾಗಾರ್ – tax collector) ಸಾರ್ಸ್ವತ್ ಆಸ್ಲೆ. ತಾಂಕಾಂ ಪುರ್ತುಗೆಜಾಂತ್ ರೆಂದಾಸ್ (rendas) ಮ್ಹಣ್ತಾಲೆ. ತ್ಯಾಚ್ ಕಾಳಾರ್ ಗೋವಿಂದ್ ಪೈ, ಪಂಡ್ಯಾ, ಕಿಣಿ ಆನಿ ನಾಯ್ಕ್ ಘರಾಣ್ಯಾಚೆ ಸಾರ್ಸ್ವತ್ ವೆಪಾರಾಂತ್ ಅವ್ವಲ್ ಸ್ಥಾನಾರ್ ಆಸ್ಲೆ. ತೆ ಥಳಾವ್ಯಾ ಲೊಕಾ ಥಾವ್ನ್ ಪುರ್ತುಗೆಜ್ ಸರ್ಕಾರಾ ಖಾತಿರ್ ಮಿರ್ಯಾಂ, ಕಾಪುಸ್, ರೆಶ್ಮಿ ವಸ್ತುರಾಂ, ಖಾಣಾಂಚೆರ್ ಆನಿ ಭಾಂಗಾರಾಚೆರ್ ಕರ್ ವಸುಲ್ ಕರುನ್ ಆಸ್ಲೆ. ಇತ್ಲೆಂಚ್ ನ್ಹಯ್ ಎಕಾ ಸಾರ್ಸ್ವತ್ ನಾಯ್ಕ್ ಘರಾಣ್ಯಾಕ್ ಜರ್ ಅಡವ್ (guarantor)  ದವ್ರುಂಕ್ ಆಸ್ಲೊ ತರ್ ತೊ ತಾಚ್ಯಾಕ್ ಘರ್‍ಚ್ಯಾ ಲೊಕಾಕ್ ನೆಮ್ತಾಲೊ (Pearson, Michael, 101).

ಸತ್ರಾವ್ಯಾ ಅಟ್ರಾವ್ಯಾ ಶೆಂಕ್ಡ್ಯಾಂತ್ ತರ್ ಸಾರ್ಸ್ವತ್ ಘರಾಂಣಿ ಆಶಿಯಾ ಖಂಡಾಂತ್ ಆಸ್ಲಲ್ಯಾ ಹೆರ್ ಪುರ್ತುಗೆಜಿ ವಸ್ಣುಕಾಂನಿ (colonies) ವೆಪಾರ್ ಕರುನ್ ಆಸ್ಲೆ (Russel Wood, 148). ಎಕುಣಿಸಾವ್ಯಾ ಶೆಕ್ಡ್ಯಾಂತ್ ಫ್ರೆಂಚ್ ವೆಪಾರಿ ಪುರ್ತುಗೆಜ್ ಆನಿ ಸಾರ್ಸ್ವತ್ ವೆಪಾರಿಂ ಕಡೆ ಆಫ್ರಿಕನ್ ಗುಲಾಮ್ ವಿಕ್ತೆ ಘೆಂವ್ಕ್ ಯೆತಾಲೆ (Machado, Ocean of Trade, 253). ಆಶಿಯಾಂತ್ ವೆವೆಗ್ಳ್ಯಾ ದೆಸಾಂನಿ ಪುರ್ತುಗೆಜಾಂಚಿ ಹಾಜಿರಿ ಆಸ್ಲಿ. ತಾಚ್ಯೆ ವಿಶಿಂ ಜಾಯ್ತಿಂ ಪುಸ್ತಕಾಂ ಬರಯ್ಲ್ಯಾಂತ್. ಹಾಂತುಂ ಸಾರ್ಸ್ವತ್ ವೆಪಾರ‍್ಯಾಂಚೊಯ್ ಉಲ್ಲೇಖ್ ಆಸಾ. ಪುರ್ತುಗೆಜಾಂಚ್ಯಾ ಕಾಳಾರ್‌ಚ್ ವೆಪಾರಾಂತ್ ತಾಂಚೊ ಭಾಂಗ್ರಾಳೊ ಕಾಳ್ ಮ್ಹಳ್ಯಾರ್ ಚೂಕ್ ಜಾಂವ್ಚಿ ನಾ. ಅಶೆಂ ಆಸ್ತಾನಾ, ಮಂಗ್ಳುರ್‍ಚ್ಯಾ ಆನಿ ಕೊಚಿಚ್ಯಾ ಬಂದ್ರಾರ್, ಜಂಯ್ ಪುರ್ತುಗೆಜ್ ಆಸ್ಲೆ, ತೆಯ್ ಥಂಯ್ ಪಾವ್ಲೆ ಮ್ಹಣ್ಚ್ಯಾಂತ್ ಅಜಾಪ್ ನಾ. ಧರ್ಮಾಂತರಾಕ್ ಪಳುನ್ ಪರ್ತುನ್ ತೆ ಪುರ್ತುಗೆಜಾಂಚ್ಯಾ ತಾಂಬ್ಯಾಂತ್ ಆಯಿಲ್ಲೆ ಮ್ಹಣ್ ಪಾತ್ಯೆಂವ್ಕ್ ಕಶ್ಟ್ ಮಾರ್‍ತಾತ್.

Fact check

ಆತಾಂ ಸುರ್ವೆಕ್ ಸಾಂಗ್ಲಲ್ಯೊ ತ್ಯೊ ದಂತ್ ಕಥಾ (legends), ಇತಿಹಾಸಿಕ್ ಪುರಾವೆ ಸಯ್ತ್ ಪಳೆಂವ್ಯಾ. 1510 ಪುರ್ತುಗೆಜಾಂನಿ ಗೊಂಯ್ (Old Goa) ಜಿಕ್ಲೆಂ. 1545-1560 ಬಳಾನ್ ಧರ್ಮಾಂತರಾಂ ಜಾಲಿಂ ಆನಿ ತೆ ಮಂಗ್ಳುರ್ ಆನಿ ಕೊಚಿ ಪಳುನ್ ಗೆಲೆ. ಮಾಂಡವಿ ನ್ಹಂಯ್ಚ್ಯೆ ಪಲ್ತಡಿ ಬಹಾಮನಿ ಮುಸಲ್ಮಾನ್ ರಾಯ್ ಆಸ್ಲಲೆ (1565-1598). ಥಂಯ್ ತೆ ಕಶೆ ವತಲೆ? 1520-1583 ವರ್ಸಾ ಮಂಗ್ಳುರ್‍ಚ್ಯಾ ಬಂದ್ರಾರ್ ಪುರ್ತುಗೆಜ್ ಆಸ್ಲಲೆ. ಬೊಳಾರಾಂತ್ ತಾಂಚೊ ಏಕ್ ಕಾರ್ಖಾನೊ ಸಯ್ತ್ ಆಸ್ಲೊ (1988: Shyam Bhat, South Kanara). 1503-1663 ವರ್ಸಾ ಕೊಚಿಂತ್ ಪುರ್ತುಗೆಜ್ ಆಸ್ಲಲೆ. ಅಶೆಂ ಆಸ್ತಾನಾ ಧರ್ಮಾಂತರಾಕ್ ಲಾಗುನ್ ಪಳುನ್ ಹೆರ್ ಗಾಂವಾಂನಿ ಕೊಂಕ್ಣಿ ಲೋಕ್ ಗೆಲ್ಲೊ ಮ್ಹಳ್ಳೆಂ ಕಿತ್ಲೆಂ ಸತ್ ತೆಂ ಪಾರ್ಕುಂಕ್ ಜಾತಾ. ಕೊಚಿ ಆನಿ ಮಂಗ್ಳುರಾಂತ್ ಚಡಾಂತ್ ಚಡ್ ದೆವ್ಳಾಂ ವೆಂಕಟರಮಣಾಕ್ ಸಮರ್ಪಿತ್ ಆಸಾತ್. ಪೂಣ್ ಗೊಂಯಾಂತ್ ತ್ಯಾ ಕಾಳಾರ್ ವೆಂಕಟರಮಣಾಚೆಂ ಏಕ್‍ಯಿ ದೆವುಳ್ ಮೆಳನಾ (Gomes, Hindu temples and deities). ಇಂಕ್ವಿಜಿಶನಾಚೆ ಕಾಯ್ದೆ ನವ್ಯಾ ಕ್ರಿಸ್ತಾಂವಾಂಚೆರ್ ಲಾಗು ಜಾತಾಲೆ. ಇಂಕ್ವಿಜಿಶನಾಚ್ಯಾ ಕಾಯ್ದ್ಯಾ ಪರ್ಮಾಣೆಂ ಆಪ್ಲೊ ಗಾಂವ್ ಸೊಡುಂಕ್ ನಾ. ತರ್ ಕ್ರಿಸ್ತಾಂವ್ ಇಂಕ್ವಿಜಿಶನಾಕ್ ಲಾಗುನ್ ಕರ್ನಾಟಾಕಾಂಕ್ ಕಶೆ ಪಾವ್ಲೆ? ಇತ್ಲೆಂಚ್ ನ್ಹಯ್ ತರ್ ಹಾಂಗಾ ಯೆವ್ನ್ ತೆ ‘ಬರೆ ಕ್ರಿಸ್ತಾಂವ್’ ಕಶೆ ಜಾಲೆ?

ಧರ್ಮ್ ಆನಿ ರಾಜ್‍ಕರಣ್

ಸ್ಮಾರ್ತ್ ಆನಿ ವೈಷ್ಣವ್ ಸಾರ್ಸ್ವತಾಂಚೊ ಇತಿಹಾಸ್ ಆನಿ ಥಳಾವ್ಯಾ ಕ್ರಿಸ್ತಾಂವಾಂಚೊ ದಾಖಲ್ ಕೆಲ್ಲೊ ಇತಿಹಾಸ್ ಪಳೆತಾನಾ ಧರ್ಮ್ ಆನಿ ರಾಜ್‍ಕರಣಾಚೊ ವ್ಹಡ್ಲೊಸೊ ಸಂಬಂದ್ ದಿಸನಾ. ಪಾಂಡುರಂಗ್ ಪಿಸುರ್ಲೆಂಕಾರಾಚ್ಯಾ Agentes Da Diplomacia Portuguesa na India (Hindus, Muculmanos, Judeus e Parses) ಹ್ಯಾ ಇತಿಹಾಸಿಕ್ ಪುಸ್ತಕಾಂತ್ ಭೊವ್ ಉಂಚ್ಲ್ಯಾ ಸ್ಥಾನಾರ್ ಆಸ್ಲಲ್ಯಾ ಸಾರ್ಸ್ವತಾಂಚಿಂ ನಾಂವಾಂ ಮೆಳ್ತಾತ್. ತಾಂಚೆಂ ಆಡ್‍ನಾಂವ್ ಪಳೆವ್ನ್ ತೆ ಸಾರ್ಸ್ವತ್ ಮ್ಹಣ್ ಕಳ್ತಾ. ದೆಕಿಕ್, ಕೃಷ್ಣ ಶಣೈ (1540-46), ರಾಮ್ಜಿ ಶಣೈ ಕೊಠಾರಿ (1661, 1663), ಕೆಶವ ನಾಯ್ಕ್, ಕೆಶವ ಪ್ರಭು (1665), ವಿಠೋಜಿ ಶಣೈ ಭೆಂಡೊ (1667), ಬಾಬುಲ್ಯಾ ಶಣೈ ಸುಖಟಾಣ್ಕಾರ್ (1739), ವಿಠೋಜಿ ಶಣೈ ಧುಮೊ, ಬಗಾನ್ ಕಾಮ್ತಿ ವಾಗ್ (1740-46), ನಾರಾಯ್ಣ ಪ್ರಭು ರಾವ್ ದೆಸಾಯ್ (1739, 1740), ಮ್ಹಾಬಳಿ ಪೈ ಘೊಂಟೊ (1740) ಹಿಂ ನಾಂವಾಂ ಝಳ್ಕತಾತ್.

Video Link : https://youtu.be/OQzGSeHZBC8

ಪುರ್ತುಗೆಜಾಂಚ್ಯಾ ಇಂಕ್ವಿಜಿಶನ್ ಪಾಲೆಸಾಂತ್ ಸಾರ್ಸ್ವತ್ ವೆಪಾರಿಂಕ್ ಭಾಡ್ಯಾಕ್ ಕುಡಾಂ ದಿಲ್ಲಿಂ. ಹಾಚೆ ಉರ್ಫಾಟೆಂ ಥಳಾವ್ಯಾ ಕ್ರಿಸ್ತಾಂವಾಂನಿ ಪುರ್ತುಗೆಜಾಂಚೆರ್ ರಾಗಾರ್ ಜಾವ್ನ್ ಪಯ್ಲಿ ಚಳ್ವಳ್, ತೆಂಯ್ ಪಾದ್ರಿಂಚ್ಯಾ ಆದಾರಾನ್ ತಾಣಿಂ ಕೆಲ್ಲಿ. ಹಾಕಾ 1787ಚಿ ಪಿಂತಾಂಗೆಲಿ ಚಳ್ವಳ್ (Pinto Revolt) ಮ್ಹಣ್ ನಾಂವ್ ದಿಲಾಂ. ತರ್ ಧರ್ಮಾಚೊ ಹಾಂಗಾ ಖಂಯ್ ಸಂಬಂದ್ ಆಸಾ. ತ್ಯಾಚ್ ಧರ್ಮಾಚ್ಯಾ ಲೊಕಾನ್ ಆಪ್ಲ್ಯಾಚ್ ಧರ್ಮಾಚ್ಯಾ ಲೊಕಾಕ್ ದಗ್ದಿಲೆಂ/ ತ್ರಾಸ್ ದಿಲೆ ಆನಿ ಹೆರ್ ಧರ್ಮಾಚ್ಯಾ ಲೊಕಾನ್ ಆಪ್ಲ್ಯಾ ವೆಪಾರಾ ಖಾತಿರ್ ಆಪ್ಲ್ಯಾಚ್ ಭಾವಾಂಕ್ ಸಾಂಡ್ಲೆಂ. ಮ್ಹಣ್ತಚ್ ಇತಿಹಾಸ್ ಸಮಾಜಿಕ್, ಆರ್ಥಿಕ್ ಆನಿ ರಾಜ್‍ಕೀಯ್ ನದ್ರೆನ್ ಆಮಿ ಪಳೆಂವ್ಚೊ ಪಡ್ತಲೊ. ನಾ ಜಾಲ್ಯಾರ್ ಫಕತ್ ದಂತ್ ಕಥಾಂಕ್ ಆನಿ ಕಾಣಿಯಾಂಕ್ ಆಮಿ ಆಮ್ಚೊ ಇತಿಹಾಸ್ ಮ್ಹಣ್ ಮಾನುನ್ ಬಸ್ತಲೆ.

ಉದೆಂವ್ಚಿಂ ಸವಾಲಾಂ – ಸೊಂಪ್ಣಿ

ಅಸ್ಲೊ ಇತಿಹಾಸ್ ಪಳೆತಾನಾ ಕಾಂಯ್ ಸವಾಲಾಂ/ ಪ್ರಸ್ನ್ ಉದೆತಾತ್. ಇಂಕ್ವಿಜಿಶನ್ ಇತ್ಲೆಂ ಮಾರೆಕಾರ್ ಕಿತ್ಯಾಕ್? ಧರ್ಮಾಂತರಾಂ ಕಶಿಂ ಜಾಲಿಂ? ಸಾರ್ಸ್ವತ್ ವಾ ಕ್ರಿಸ್ತಾಂವ್ ಮ್ಹಳ್ಳಿ ಅಸ್ಮಿತಾಯ್ ಕಶಿ ಲಾಭ್ಲಿ? ಹೆ ವಿಶಿಂ ಮುಖ್ಲೆ ಶಿಂಕ್ಳೆಂತ್!

► ಜೇಸನ್ ಪೀಂತ್,SDB. ಉದ್ಯಾವರ್ 

ಪಯ್ಲ್ಯಾನ್ ಪಯ್ಲೆಂ ಖಂಯ್ಚ್ಯಾಯ್ ವಿಮರ್ಶಾಕ್ ಭೊಲ್ಚೆಂವ್ಚೆಂ ಆಪ್ಣಾಚ್ಯಾ ಸಾಹಿತ್ಯಾಚೆರ್ ಆಪ್ಣಾಕ್‌ಚ್ ಪಾತ್ಯೆಣಿ ನಾತ್‍ಲ್ಲ್ಯಾಂನಿ ವಾ ಅಪ್ಣಾಚ್ಯಾ ಬರ್ಪಾಕ್ ಫಕತ್ ಸಯ್ಲಾಪಾಚಿ ಹೊಗ್ಳಿಕ್ ಮಾತ್ರ್ ಆಯ್ಕೊನ್ ಸವಯೆರ್ ಪಡ್‍ಲ್ಲ್ಯಾಂನಿ. ಅಸಲಿಂ ಏಕ್ ವಿಮರ್ಸೊ ಆಯಿಲ್ಲೆಕೂಡ್ಲೆ ಶೀದಾ ಏಕ್ ಜಾಣ್ತಿಕಾಯೆಚಿ ಪ್ರತಿಕ್ರಿಯಾ ದೀಂವ್ಕ್ ಸಯ್ತ್ ಧಯ್ರ್ ಘೆನಾಂತ್. ಧಯ್ರ್ ಘೆನಾಂತ್ ಮ್ಹಣ್ಚ್ಯಾಕೀ ಕಿತೆಂ ಜಾಪ್ ದೀಜೆ ಮ್ಹಳ್ಳೆ ವಿಚಾರ್‌ಚ್ ತಾಂಚ್ಯೆ ಮತಿಂತ್ ಆಸನಾಂತ್ ಮ್ಹಣ್ಚೆಂ ಜೊಕ್ತೆಂ. ಖಂಯ್ಚ್ಯಾಯ್ ಉಗ್ತ್ಯಾ ಸಂವಾದಾಕ್ ತಸಲಿಂ ಯೇನಾಂತ್. ಖಂಯ್ ಉಲಯ್ಲ್ಯಾರ್ ಆಪ್ಣಾಚೆಂ ಪೊಕೊಳ್ಪಣ್ ಭಾಯ್ರ್ ಪಡ್ತಾಗೀ ಮ್ಹಣ್ ಭಿಯೆತಾತ್. ತಾಚೆಬದ್ಲಾಕ್ ವಿಮರ್ಸೊ ಕೆಲ್ಲ್ಯಾಂಕ್, ಫಾಯ್ಸ್ ಜಾಲ್ಲ್ಯಾ ಪತ್ರಾಂಕ್ ಆಪ್ಲೊಚ್ ಏಕ್ ಪಾಟ್ಲಾಮ್ ಬಾಂದುನ್ ತಮಾಶೆ ಕರುಂಕ್ ಸುರು ಕರ್ತಾತ್. ಮಾಗಿರ್ ಆಪ್ಣಾವಿಶ್ಯಾಂತ್‌ಚ್ ಆತ್ಮ್ಯಾರತಿ ಕರುನ್, ಸಿಂತಿಮೆಂತಾಂನಿ ಬುಡೊನ್ ಲೊಕಾಚಿಂ ಸಿಂತಿಮೆಂತಾಂ ಜಿಕೊಂಕ್ ಪಳಯ್ತಾತ್. ಆಪ್ಣಾಚೊ ಪಾಟ್ಲಾಮ್ ಖಂಯ್ ಪುಣೀ ಆಪ್ಣಾಕ್ ಸಾಂಡುನ್ ವಚತ್ ಮ್ಹಣ್ ಭಿಯೆವ್ನ್ ತಾಂಕಾಂ ತಾತ್ಕಾಳಾಕ್ ರಾಕೊನ್ ವ್ಹರ್ಚಿಂ ಯೋಜನಾಂ ಹಾತಿಂ ಘೆತಾತ್.

ಕೊಂಕ್ಣೆಚ್ಯಾ ಮಟ್ಟಾಕ್ ವಿಮರ್ಸೊ ಯೆತಾನಾ ಏಕ್ ರಡ್ಣೆಂ ಸದಾಂಚೆಂ ಆಸ್ತಾಂ. ತೆಂ ಮ್ಹಳ್ಯಾರ್ – ಆಮ್ಚೊ ಲ್ಹಾನ್ ಸಂಸಾರ್, ಆಮಿ ಭಾಶೆಚಿ ಸೆವಾ ಕರ್ಚಿ, ಠಿಕಾ ವಾ ವಿಮರ್ಸೊ ಕೆಲ್ಯಾರ್ ಬರೊಂವ್ಚೆಂ ರಾವಯ್ತಾತ್, ತಿದ್ವಣಿ ಆಸ್ಲ್ಯಾರ್ ಕಾನಾಂತ್ ಸಾಂಗಜೆ ಆನಿ ಬರೆಂ ಆಸ್ಲ್ಯಾರ್ ಚಾರ್ ಜಣಾಂಮುಕಾರ್ ಸಾಂಗಜೆ… ಮ್ಹಣ್ಚೆಂ ಜಾಯ್ತ್ಯಾಂಚೆಂ  ಚಿಂತಪ್.

ಸಿಂತಿಮೆಂತಾಳ್ ಕುತ್ತರೆಭಿತರ್ ರಾವೊನ್ ಅಶೆಂ ಚಿಂತ್ಲ್ಯಾರ್ ಭಾಸ್ ಸೊಡ್ಯಾಂ ತಸಲ್ಯಾಂಚೆಂಚ್ ಸಾಹಿತ್ಯ್ ವಾಡನಾ ಮ್ಹಳ್ಳೆಂ ನಿಶ್ಟುರ್ ಸತ್. ನ್ಹಯ್ ಮಾನೆಸ್ತಾಂನೋ – ತಿದ್ವಣ್, ಠಿಕಾ, ವಿಮರ್ಸೊ ಕಾನಾಂತ್ ಸಾಂಗೊನ್ ಬಸ್‌ಲ್ಲೆ ತರ್ ಎದೊಳ್ ಪರ್ಯಾಂತ್ ಸಂಸಾರಾಂತ್ ವಿಮರ್ಶಾ ಸಾಹಿತ್ಯಾಚ್ಯೊ ಮೊಲಾಧಿಕ್ ಕೃತಿಯೊ ಫಾಯ್ಸ್ ಕಶ್ಯೊ ಜಾತ್ಯೊ? ತುಮಿ ತಿದ್ವಣ್ ಕಾನಾಂತ್ ಸಾಂಗಜೆ ತರ್ ತುಮ್ಚೆಂ ಸಾಹಿತ್ಯ್‌ಯೀ ಖಾಸ್ಗೆನ್ ಜಾಯ್ ಜಾಲ್ಲ್ಯಾಂಚ್ಯಾ ಕಾನಾಂತ್ ಮಾತ್ರ್ ಕುಮ್ಸಾರ್ ಜಾಯ್ಜೆ ಶಿವಾಯ್ ಉಗ್ತ್ಯಾನ್ ಕಿತ್ಯಾಕ್ ಪರ್ಗಟ್ ಕರ್ಚೆಂ? ಖಂಯ್ಚೋಯ್ ಸಾಹಿತಿಕ್ ಉಗ್ತ್ಯಾನ್ ವಿಮರ್ಸೊ ಫುಡ್ ಕರುಂಕ್ ಪಾಟಿಂ ಸರ್ತಾ ತರ್ ತೊ ಭಿವ್ಕುರೊ ಆನಿ ತಾಚೆಂ ಸಾಹಿತ್ಯ್ ಪೊಕೊಳ್ ಮ್ಹಣ್ ತಾಕಾಚ್ ಕಳಿತ್ ಆಸಾ ಮ್ಹಣ್ ಜಾಲೆಂ.

ಥೊಡ್ಯಾಂಚೆಂ ಆನ್ಯೇಕ್  ಚಿಂತಪ್ ಆಸಾ ಕೀ – ‘ಅಮ್ಕ್ಯಾ ಸಂಪಾದಕಾನ್ ಆಪ್ಣೆಂ ಬರಯಿಲ್ಲೆಂ ಪಯಿಲ್ಲೆಂ (ಪರ್ಗಟ್ ಜಾಂವ್ಕ್ ನಾಫಾವೊ ಜಾಲ್ಲೆಂ) ಬರಪ್ ಫಾಯ್ಸ್ ಕೆಲ್ಲ್ಯಾನ್ ಆಜ್ ಆಪುಣ್ ಕವಿ ಜಾಲಾಂ’ ವಾ  ‘ಸಂಪಾದಕಾನ್ ಹಾಂವೆಂ ಬರಯಿಲ್ಲೆಂ ಪಯ್ಲೆಂ ಚುಟುಕ್ ಫಾಯ್ಸ್ ಕರಿನಾತ್ಲ್ಯಾನ್ ಮ್ಹಾಕಾ ಪ್ರೋತ್ಸಾವ್ ಮೆಳನಾಸ್ತಾನಾ ಹಾಂವೆಂ ಬರೊಂವ್ಚೆಂಚ್ ಸೊಡ್‌ಲ್ಲೆಂ’ ಅಶೆಂ ಚಿಂತ್ಚಿಂ ಜಾಯ್ತಿಂ ಆಸಾತ್. ಪಯ್ಲೆಂ ಬರಯಿಲ್ಲೆಂ ಬರಪ್ ಫಾಯ್ಸ್ ಕರಿನಾತ್ಲೊ ಸಂಪಾದಕ್ ಉದೆವ್ನ್ ಯೆಂವ್ಚ್ಯಾ ಫುಡೆಂ ನೊಬೆಲ್ ಮೆಳ್ಚೆತಸಲ್ಯಾ ಬರೊವ್ಪ್ಯಾಚೊ ಖುನಿಗಾರ್ ಮ್ಹಳ್ಳೆಬರಿ ಥೊಡ್ಯಾಂಚೆಂ ಚಿಂತಪ್. ಅಸಲ್ಯಾಂಕ್ ಏಕ್ ವಿಚಾರ್ತಾಂ – ಎಕಾದಾವೆಳಾ ತುಮ್ಚ್ಯಾ ಬರ್ಪಾಚೆಂ ಮೂಳ್ ಆನಿ ಸಾಹಿತಿಕ್ ಜಿಣಿಯೆಚೊ ಫುಡಾರ್ ಫಕತ್ ಎಕಾ ಸಂಪಾದಕಾಚ್ಯಾ ಫಾಯ್ಸ್ ಕರ್ಚ್ಯಾ ನಿರ್ಧಾರಾಚೆರ್ ಹೊಂದೊನ್ ಆಸಾ ತರ್ ತುಮಿ ಕಸಲೆ ಸಾಹಿತಿ ಸಾಯ್ಬಾ? ಸಂಪಾದಕಾಚ್ಯಾ ದಾಕ್ಶೆಣೆನ್, ಸಂಪಾದಕಾಚ್ಯಾ ಬಿರ್ಮತೆನ್ ಕಿತ್ಲೊ ತೇಂಪ್ ತುಮ್ಚೆಂ ಸಾಹಿತ್ಯ್ ಉರ್ತೆಲೆಂ ಆನಿ ಕಿತ್ಲೆಂ ತೆಂ ಬಾಳ್ತೆಲೆಂ? ಎಕಾದಾವೆಳಾ ಪಯಿಲ್ಲೆಂ ಬರಯಿಲ್ಲೆಂ ಬರಪ್ ಸಂಪಾದಕಾನ್ ಫಾಯ್ಸ್ ಕೆಲೆಂನಾ ತರ್ ‘ಹೆಂ ಫಾಯ್ಸ್ ಕರುಂಕ್ ಯೋಗ್ಯ್ ನಾ ಕೊಣ್ಣಾ, ಹಾಚೆಪ್ರಾಸ್ ಇಲ್ಲೆಂ ಬರೆಂ ಟ್ರೈ ಕರ್ಯಾಂ’ ಮ್ಹಣ್ಚೆತಸಲೆಂ ಸಾದೆಂ ಚಿಂತಪ್ ಸುರ್ವೇರ್‌ಚ್ ನಾತ್‌ಲ್ಲ್ಯಾನ್‌ಚ್ ಆನಿ ಸ್ವ ವಿಮರ್ಸೊ ನಾಸ್ತಾನಾ ಸವಯೆರ್ ಪಡ್ ಲ್ಲ್ಯಾನ್‌ಚ್ ಫುಡೆಂ ತಾಂಚ್ಯಾ ಬರ್ಪಾಚೆರ್ ಏಕ್ ವಿಮರ್ಸೊ ವಾ ಠಿಕಾ ಯೆತಾನಾ ಸಂಸಾರ್‌ಚ್ ಕೊಸ್ಳೊನ್ ಪಡ್‌ಲ್ಲೆಬರಿ ಭೊಲ್ಚೆವ್ನ್ ಬೊಬೊ ಮಾರುಂಕ್ ಲಾಗ್ಚೆಂ.

ಜಾಯ್ತ್ಯಾಂಕ್ ಆನ್ಯೇಕ್ ಭ್ರಮಿದ್ ಕಿತೆಂಗೀ ಮ್ಹಳ್ಯಾರ್ ಆಪುಣ್ ಕಿತೆಂಗೀ ಗಿಚ್ಚುನ್ ಕೊಂಕ್ಣಿ ಭಾಶೆಚಿ ಸೆವಾ ಕರ್ನ್ ಆಸಾಂ ಮ್ಹಣೊನ್! ಅಶೆಂ ಚಿಂತ್ಚ್ಯಾಂಕ್ ಸಾಹಿತ್ಯಾಚ್ಯಾ ಉದೆವಾಚೆಂ ಮೂಳ್‍ಚ್ ಕಳಿತ್ ನಾ. ಹಾಂವೆಂ ಬರೊಂವ್ಚೆಂ ಮ್ಹಜ್ಯೆ ಗರ್ಜೆಕ್. ಮ್ಹಜೆಭಿತರ್ ಖತ್ಕತೊ ತಡ್ವೊಂಕ್ ಜಾಯ್ನಾ ದೆಕುನ್ ಹಾಂವೆಂ ಲಿಖ್ಚೆಂ ಶಿವಾಯ್ ಹಾಂವೆಂ ಫೇಮಸ್ ಜಾಯ್ಜೆ, ಹಾಂವೆಂ ಭಾಶೆಚಿ ಸೆವಾ ಕರಿಜೆ ದೆಕುನ್ ಲಿಖ್ಚೆಂ ಮ್ಹಣ್ ಚಿಂತ್ಚೆಂ ಕಿತ್ಲೆಂ ಕಿರ್ಕೊಳ್ ಚಿಂತಪ್! ಹಾಕಾ ಏಕ್ ದಾಖ್ಲೊ ದಿಂವ್ಚೊ ತರ್, ಆಪುಣ್ ವೊಕತ್ ಘೆತಾಂ ತರ್ ತೆಂ ಮ್ಹಜ್ಯೆ ಪೀಡೆಕ್ ಶಿವಾಯ್ ಖಂಯ್ಚ್ಯಾಗೀ ವೊಕ್ತಾಂಚ್ಯಾ ಕಂಪೆನಿಚಿ ಸೆವಾ ಕರುಂಕ್ ನ್ಹಯ್. ಹಾಂವ್ ಲಿಖ್ತಾಂ ತರ್ ತೊ ಮ್ಹಜೆಂ ಸಂವೇದನ್ ತಡ್ವನಾಸ್ತಾಂ ಲಿಖ್ಚೆಂ. ಸಂವೇದನ್‍ಚ್ ಸಾಹಿತ್ಯಾಚೆಂ ಬಂಡ್ವಾಳ್. ಸಂವೇದನ್ ಫಕತ್ ಕವಿತೆಂತ್ ಮಾತ್ರ್ ನ್ಹಯ್, ತೆಂ ಆಮ್ಚೆಭಿತರ್ ಆಸಜೆ. ತವಳ್ ಮಾತ್ರ್ ಕವಿತಾ, ಉಲೊವ್ಪ್ ವಾ ಘಾಲ್ಚ್ಯಾ ಎಕಾ ಕಮೆಂಟಾಂತ್‍ಯೀ ತೆಂ ಭಾಯ್ರ್ ಯೆತಾ. ಎಕಾದಾವೆಳಾ ತೆಂ ಆಮ್ಚೆಭಿತರ್ ನಾ ತರ್ ಖಂಯ್ಚ್ಯಾಯ್ ಪ್ರಕಾರಾಂತ್ ತೆಂ ಭಾಯ್ರ್ ಯೇಂವ್ಕ್ ಸಾಧ್ಯ್ ನಾ.

ಸಾಹಿತಿ ಮ್ಹಳ್ಯಾರ್ ತಾಂಚ್ಯಾ ಬರ್ಪಾಂನಿ ಸಮಾಜೆಕ್ ತಿದ್ವಿಜೆ. ತಾಂಚ್ಯಾ ವೈಚಾರಿಕ್‌ಪಣಾನ್ ಸಮಾಜ್ ವಾಯ್ಟ್ ವಾಟೆಕ್ ಯೆತಾನಾ ನೀಟ್ ವಟೆಕ್ ವ್ಹರ್ಚೆಂ ಪ್ರೇತನ್ ಕರಿಜೆ. ‘ಎಕಾ ಪೊಲ್ಯಾಕ್ ಮಾರ್ಲ್ಯಾರ್ ಆನ್ಯೇಕ್ ದಾಕಯ್’ ಮ್ಹಳ್ಳೊ ಜೆಜುಚ್ ದೆವಾಳಾಂತ್ ವೆಪಾರ್ ಚಲ್ತಾನಾ ಹಾತಾಂತ್ ಚಾಟಿ ಧರುಂಕ್‌ಯೀ ಪಾಟಿಂ ಸರೊಂಕ್ ನಾ. ಥೊಡ್ಯಾಂಕ್ ತಿದ್ವಿಜೆ ಪಡ್ತಾ. ಥೊಡ್ಯಾಂಕ್ ಮೊವಾಳಾಯೆನ್ ಸಾಂಗಜೆ ಪಡ್ತಾ ಆನಿ ಗರ್ಜ್ ಪಡ್ತಾನಾ ನಿಶ್ಟುರ್ ಜಾವ್ನ್‌ಯೀ ಸಾಂಗಜೆ ಪಡ್ತಾ.

ದಾಖ್ಲ್ಯಾಕ್ ಜಾಯ್ತೆ ರಿಯಾಲಿಟಿ ಶೋ ಜಾತಾತ್. ಕೊಂಕ್ಣೆಂತ್‍ಯೀ ರಿಯಾಲಿಟಿ ಶೋ ಪ್ರಸಾರ್ ಕರ್ಚಿಂ ಮಾದ್ಯಮಾಂ ಆಸಾತ್. ತರ್ ಖಂಯ್ಚೇಂಯ್ ಏಕ್ ಚ್ಯಾನೆಲ್ ಫಕತ್  ‘ಪ್ರೋತ್ಸವ್, ಪಾಟಿಂಬೊ’ ಮ್ಹಣ್ ಎಕಾ ಸ್ಪರ್ಧ್ಯಾಕ್ ಅರ್ಜಿ ಘಾಲ್ಲ್ಯಾ ಸರ್ವಾಂಕ್ ಆವ್ಕಾಸ್ ದಿತಾ? ತರ್ ಕಿತ್ಯಾಕ್ ಚ್ಯಾನೆಲಾಂನಿ Audition Round ದವರುನ್ ಥೊಡ್ಯಾಂಕ್ ವಿಂಚುನ್ ಥೊಡ್ಯಾಂಕ್ ಪಾಟಿಂ ಧಾಡ್ಚೆಂ? ತರ್ ಪ್ರೋತ್ಸವ್ ಪಾಟಿಂಬೊ ಮ್ಹಣ್ ಆಯಿಲ್ಲ್ಯಾ ಗೆಲ್ಲ್ಯಾಂಕ್ ಆವ್ಕಾಸ್ ದಿಲ್ಯಾರ್ ತ್ಯಾ ರಿಯಾಲಿಟಿ ಶೋ’ಚಿ ಗತ್ ಕಿತೆಂ ಜಾಯ್ತ್? ಥೊಡ್ಯಾಂಕ್ ಆಸಕ್ತ್ ಆಸ್ತಾ ಪುಣ್ ತಾಲೆಂತ್ ಆಸಾ ನಾ. ದೆಕುನ್ ತಾಲೆಂತ್‍ವಂತಾಂಕ್ ಪಾರ್ಕುಂಕ್ Audition Round ದವರ್ಚೆಂ. ಇತ್ಲೆಂಚ್ ನ್ಹಯ್, ಚುಕಿ ಘುಟಾನ್ ದಿಯಾ ತರ್ ಅಸಲ್ಯಾ ರಿಯಾಲಿಟಿ ಶೋ’ ನಿ ವರಯ್ಣಾರಾಂಕ್ ಕಿತ್ಯಾಕ್ ಬಸಯ್ತಾತ್? ವರಯ್ಣಾರಾಂನಿ ಚುಕಿ ಸಾಂಗಜೆಚ್. ಅಸಲ್ಯಾ ವರಯ್ಣಾರಾಂನಿ ದಿಲ್ಲಿಂ ಸುಚನಾಂ, ದಾಕೊವ್ನ್ ದಿಲ್ಲ್ಯೊ ಚುಕಿ ಎಕಾ ಸ್ಪರ್ಧಿಕಾಕ್ ಮಾತ್ರ್ ನ್ಹಯ್, ತೆಂ ಪಳೆಂವ್ಚ್ಯಾ ಹೆರ್ ಗಾವ್ಪಿ / ನಾಚ್ಪಿ ವಾ ಮುಕ್ಲ್ಯಾ ಸ್ಪರ್ಧಿಕಾಂಕ್ ಉಪ್ಕಾರಾಕ್ ಪಡ್ತಾತ್. ಪುಣ್ ಆಮ್ಕಾಂ ಜಿಕುನ್ ಧರ್ಚಿ ಶ್ಯಾಥಿ ಆಸಜೆ ತಿತ್ಲೆಂಚ್.

ವಿಮರ್ಶಾವಿಶಿಂ ಸಿಂತಿಮೆಂತಾಳ್ ಜಾವ್ನ್ ಬರಯ್ತಲ್ಯಾಂನಿ ಎದೊಳ್ ಪರ್ಯಾಂತ್ ಸಾಹಿತ್ಯ್ ಗಂಭೀರ್ ಜಾವ್ನ್ ಘೆತ್‌ಲ್ಲೆಂ ದಿಸನಾ, ವಿಮರ್ಶೆಚಿ ಏಕ್ ಸಯ್ತ್ ಕೃತಿ ವಾಚ್‌ಲ್ಲೆಬರಿಯ್ ದಿಸನಾ. ವ್ಹಯ್, ಆಮ್ಚ್ಯಾ ಬರ್ಪಾಂತ್ ವೆಕ್ತಿತ್ವ್ ಪಾರ್ಕಿಯೆತಾ. ತ್ಯಾಚ್ ಬರ್ಪಾಂನಿ ಕೊಣಾಚೆಂ ಚಿಂತಪ್ ಉಂಚ್ಲೆಂ ಆನಿ ಕೊಣಾಚೆಂ ಕಿರ್ಕೊಳ್ ಮ್ಹಳ್ಳೆಂಯ್ ಕಳ್ತಾ. ಮಾತ್ರ್ ನ್ಹಯ್ ಸಂಸಾರಾಚ್ಯಾ ಸಾಹಿತ್ಯಾವಿಶಿಂ ಕಿತ್ಲಿಂ ಅನಕ್ಷರಿಸ್ತ್ ಮ್ಹಣೊನ್‍ಯೀ ಕಳ್ತಾ. ತಶೆಂ ಮ್ಹಣೊನ್ ಸಾಹಿತ್ಯ್ ವಾಚ್‌ಲ್ಲಿಂ ಮಾತ್ರ್ ಸಾಹಿತಿ ಜಾತಾತ್ ಮ್ಹಣ್ ನ್ಹಯ್. ಪುಣ್ ವಾಚಪ್ ಸಾಹಿತಿಕ್ ಸಾಹಿತ್ಯಾವಿಶಿಂ ಗಂಭೀರಾಯೆನ್ ಚಿಂತಿಶೆಂ ಕರ್ತಾ ಆನಿ ಹಾಚ್ಯಾಕೀ ವರ್ತ್ಯಾನ್ ಆಮಿ ಆಮ್ಕಾಂಚ್ ವಿಮರ್ಸೊ ಕರ್ಚಿ ಏಕ್ ದೀಶ್ಟ್ ದಿತಾ.’constructive ವಿಮರ್ಸೊ ಜಾಯ್ಜೆ, distructive ವಿಮರ್ಸೊ ನಾಕಾ’ ಮ್ಹಳ್ಳಿಂ ಉತ್ರಾಂ ಆಜ್ ಕೊಂಕ್ಣೆಂತ್ ಸಾಸಾರ್ ಜಾವ್ನ್ ಗೆಲ್ಯಾಂತ್.  ಪುಣ್ ಸಾದಿ ಸಲಹಾ ದಿಲ್ಲೆ ಕಮೆಂಟ್ಸ್ ಸಯ್ತ್ delete ಕರ್ತಾತ್ ಮ್ಹಣ್ತಾನಾ ಕಳ್ತಾ ಕೀ, ಹಾಂಚೆಪರ್ಮಾಣೆಂ ವಿಮರ್ಸೊ ಮ್ಹಳ್ಯಾರ್ ಫಕತ್ wow, fantastic, beautiful ಮ್ಹಳ್ಳೆ ಕಮೆಂಟ್ಸ್ ಮಾತ್ರ್!

ಹಾಚ್ಯಾಕೀ ಭಾಯ್ರ್ ಸಾಂಗ್ಚೆಂ ತರ್ ‘constructive ವಾ distructive ವಿಮರ್ಸೊ’ ಕರುಂಕ್‍ಯೀ ಏಕ್ ಕವಿತಾ ‘ಲಾಯೆಕ್’ ಆಸಜೆ. ದಾಖ್ಲ್ಯಾಕ್ ಜಿವಾವಿರೋಧಿ ಕವಿತಾ ಬರಯ್ಲ್ಯಾರ್ ತಾಚೊ  ‘constructive’ ವಿಮರ್ಸೊ ಕರ್ಚೊ ಕಸೊ? ತ್ಯೆ ಕವಿತೆಂತ್ಲೆಂ ಚಿಂತಪ್ ಶೀದಾ ನೆಗಾರಿಜೆ ಪಡ್ತಾ. ಆನಿ ಕುಸ್ಕುಟ್ ಕಾವ್ಯೆಂ ಜಾಂವ್, ವಿಚಾರ್ ಜಾಂವ್, ಆಖೇರಿಕ್ ಲೋಜಿಕ್ ಸಯ್ತ್ ನಾತ್‍ಲ್ಲ್ಯಾ, ಕವಿತಾ ಮ್ಹಣ್ ಫಾಯ್ಸ್ ಜಾಂವ್ಚ್ಯಾ ಬರ್ಪಾಂಚೊ ‘constructive’ ವಿಮರ್ಸೊ ಕಸೊ ಕರ್ಚೊ? ತವಳ್ ತಸಲಿಂ ಬರ್ಪಾಂ ಕವಿತಾಚ್ ನ್ಹಯ್ ಮ್ಹಣ್ ದಾಕ್ಶೆಣ್ ಸಾಂಡುನ್ ಸಾಂಗಜೆ ಪಡ್ತಾ. ಕೊಣೆಂಯ್ ಪಯ್ಲಿ ಕವಿತಾ ಬರೊವ್ನ್ ಹಾಡ್ಲ್ಯಾ ತರ್ ತಸಲ್ಯಾಂಕ್ ತಿದ್ವಣ್ ಗರ್ಜ್ ಆನಿ ಕವಿತಾ ಮ್ಹಳ್ಯಾರ್ ಕಿತೆಂ? ಆಧುನಿಕ್ ಕವಿತಾ ಕಶಿ ಅಭಿವೆಕ್ತಿ ಜಾತಾ ಮ್ಹಳ್ಳೆವಿಶಿಂ ಆಮ್ಚಿ ಜಾಣ್ವಾಯ್ ವಾಂಟುನ್ ಘೆಂವ್ಚಿ ಗರ್ಜ್. ಪುಣ್ ವರ್ಸಾಂಥಾವ್ನ್ ಲಿಖ್‍ಲ್ಲೆಂಚ್ ಲಿಖ್ತಲ್ಯಾಂಕ್, ರಾತ್ ಉಜ್ವಾಡ್ಚೆಭಿತರ್ ಫೇಮಸ್ ಜಾಯ್ಜೆ ಮ್ಹಣ್ ಚಿಂತುನ್ ಕವಿತಾ ಲಿಖ್ತಲ್ಯಾಂಕ್, ಆನಿಕೀ ಕಾನಾಂತ್ ಸಾಂಗಾ, ಉಗ್ತ್ಯಾನ್ ಸಾಂಗನಾಕಾತ್ ಮ್ಹಳ್ಯಾರ್ ಕಶೆಂ? ವಿಮರ್ಸೊ ವಾ ವಿಶ್ಲೆಶಣಾಕ್ ಶೀದಾ ಪ್ರತಿಕ್ರಿಯಾ ದೀನಾಸ್ತಾಂ ಲಿಪೊನ್ ಬಸೊನ್, ವಿಮರ್ಸೊ ಫಾಯ್ಸ್ ಜಾಲ್ಲ್ಯಾ ಪತ್ರಾಕ್ ತಮಾಶೆ ಕರುನ್ ಕವಿತಾ ಲಿಖುನ್ ಆತಾಂ ವಿಮರ್ಶಾವಿಶಿಂ ಲೆಕ್ಚರ್ ದಿಂವ್ಚಿಂ ಹಿಂ ಲಂಕೇಶ್ ತಸಲ್ಯಾಕ್ ಕಶೆಂ ಫುಡ್ ಕರ್ತಿಂ?

ಪಿ. ಲಂಕೇಶ್ – ‘ಟೀಕೆ ಟಿಪ್ಪಣಿ’ ಬುಕಾಂತ್

ಸ್ಪಶ್ಟ್ ದಿಶ್ಟಾವೊ ನಾತ್‌ಲ್ಲ್ಯಾ, ಆಧುನಿಕ್ ಕಾವ್ಯಾಚಿ ಮಾಹೆತ್ ನಾತ್‌ಲ್ಲ್ಯಾ, ಆನಿ ಆಪ್ಣಾಕ್ ಸಲಹಾ ಸುಚನಾಂ ದಿಲ್ಲ್ಯಾಂಕ್ ಭಾಯ್ರ್ ದವರ್ತಲ್ಯಾಂಚ್ಯಾ ಮುಕೇಲ್ಪಣಾರ್ ಖಂಯ್ಚೋಯ್ ಪಂಗಡ್ ಕಿತ್ತೂನ್ ಪರ್ಯಾಂತ್ ಪಾವತ್?  ಸವಯೆರ್ ಪಡೊನ್ ಗಿಚ್ಚುಚಾಂಕ್ ಹಾಚೊ ಕಾಂಯ್ ಫರಕ್ ಪಡನಾ. ಪುಣ್ ಕಾವ್ಯೆಂ ಗಂಭಿರ್ ಜಾವ್ನ್ ಘೆವ್ನ್, ಫುಡೆಂ ಕಾವ್ಯಾ ಶೆತಾಂತ್ ಉಂಚ್ಲ್ಯಾ ಮಟ್ಟಾಕ್ ಪಾವಜೆ ಮ್ಹಳ್ಳೊ ಇರಾದೊ ಆಸ್ಲಲ್ಯಾ ಕಾಂಯ್ ಎಕಾ ದೊಗಾಂಕ್ ಅಸಲ್ಯಾಂಚ್ಯಾ ಮುಕೇಲ್ಪಣಾರ್ ಆಮಿ ಖಂಯ್ಚ್ಯೆ ಗುಂಡಿಯೆಕ್ ವಚೊನ್ ಆಸಾಂವ್ ಮ್ಹಳ್ಳ್ಯಾಚಿ ಅಂದಾಜ್ ಜಾತಾತಿತ್ಲೆವೆಗ್ಗಿಂ ಜಾಲ್ಯಾರ್ ತಾಂಕಾಂ ಆನಿ ತಾಂಚ್ಯಾ ಕಾವ್ಯಾಚ್ಯಾ ಫುಡಾರಾಕ್ ಬರೆಂ.

ವಿಮರ್ಶಾವಿಶಿಂ ವಯ್ಲ್ಯಾಬಾರ್ ಚಿಂತುನ್ ರಡ್ತಲ್ಯಾಂನಿ ಸಾಹಿತ್ಯ್ ಗಂಭೀರ್ ಜಾವ್ನ್ ಘೆಂವ್ಕ್ ನಾ. ಕೊಣೆಂಗೀ ಸಾಂಗೊನ್ ದಿಲ್ಲ್ಯೊ ವೊಳಿ quote ಕೆಲ್ಲ್ಯಾಂಕ್ ವಿಮರ್ಶಾಕ್ ಸಂಬಂಧಿತ್ ಏಕ್ ಕೃತಿ ಸಯ್ತ್ ವಾಚ್ಚೆಂ ಸಯ್ರಾಣ್ ನಾ. ಹಾಂಗಾಸರ್ ಬುಕಾಂಚಿ ಇಶ್ಟಾಗತ್ ಕೊಣಾಕೀ ನಾಕಾ. ಸಗ್ಳ್ಯೆ ಹ್ಯೆ ವಾಡಾವಳಿಂತ್ ಏಕ್ ಮಾತ್ರ್ ಖರೆಂ ಜಾಲಾಂ. ಬರೆಂ ಆನಿ ಸಾರೆಂ ಖಂಯ್ಚ್ಯೆ ಖಂಯ್ಚ್ಯೆ ಕುಶಿನ್ ವೊಂದಾಜೆಗೀ ಥಂಯ್ ವೊಂದೊನ್ ಆಸಾ. ಹಿ ಮಾತ್ರ್ ಖುಶೆಚಿ ಗಜಾಲ್.

: ಲಾಸ್ಟ್ ಪಂಚ್ :

“ಮ್ಹಾಕಾ ವ್ಹಾಳಯ್ ಖಾತಾ ಮ್ಹಾಕಾ ವ್ಹಾಳಯ್ ಖಾತಾ” ಮ್ಹಣ್ ರಡ್ಣೆಂ ರುದಾನ್ ಕರ್ತಲ್ಯಾಂನಿ, ಆಪುಣ್ ಕುಂಬು ಜಾಯ್ನಾಶೆಂ ಆಪ್ಣಾಕ್‍ಚ್ ರಾಕೊನ್ ವ್ಹೆಲ್ಲೆಂ ತರ್, ಆಜ್ ವ್ಹಾಳಯ್‍ಯೀ ಖಾತಿನಾ ಆನಿ ಅಶೆಂ ಬೊಬೊ ಘಾಲ್ಚೊ ಸಂದ್ರಾಪ್‍ಯೀ ಯೆತೊನಾ!

– ವಿಲ್ಸನ್ ಕಟೀಲ್

ಯೆಯಾ, ಬಸಾ… ಕಿತೆಂ ಭಾರೀ ಅಪ್ರೂಪ್? ಹ್ಯಾ ದಿಸಾಂನಿ ತುಮ್ಚೆಂ ಕಾಂಯ್ ವಾಚುಂಕ್ ಮೆಳನಾ…

ಇತ್ಲೆಂ ಸಾಂಗ್‌ಲ್ಲೆಂಚ್ ತೊ ಬಾವ್ಡೊ, “ಕೊಂಕ್ಣಿ ಮ್ಹಾಕಾ ಸಾಂಡುನ್ ಗೆಲಿ…” ಮ್ಹಣ್ ರಡ್ಲೊಚ್!

ಅರೆ ಕರ್ಮಾಂನೊ! ಪಯ್ಲೆಂಚ್ ಥಂಯ್ ಹಾಂಗಾ ವೆದಿಂನಿ ಕೊಂಕ್ಣಿ ಮರ‍್ತಾ, ಕೊಂಕ್ಣಿ ಮರ‍್ತಾ ಮ್ಹಣ್ ತಕ್ಲಿ ಖಾತಾತ್. ಹೆಂ ಆಯ್ಕಲ್ಲ್ಯಾ ಕೊಣೆಂ ತರೀ ಪುನೆಗೆಲ್ಲ್ಯಾನ್ ತಾಂಚೆಂ ತೆಂತೆಸಾಂವ್ ಆಯ್ಕೊಂಕ್ ಜಾಯ್ನಾಶೆಂ ಕೊಂಕ್ಣೆಕ್ ಸುರಿ ಘಾಲಿಗೀ ಆನಿ ಹೆಂ ಪಳೆವ್ನ್ ಆಘಾತ್ ಭೊಗ್‌ಲ್ಲೊ ಹೊ ಬಿರ್ಮತ್ ಬಾವ್ಡೊ ಹಾಂಗಾ ಪಾವ್ಲೊಗೀ ಮ್ಹಣ್ ದುಬಾವ್ ಜಾಲೊ ಮ್ಹಾಕಾ!

“ಸಮಾಧಾನ್ ಕಾಣ್ಘೆಯಾ… ಕಿತೆಂ ಜಾಲೆಂ ಸಾಂಗಾ…” ಹಾಂವೆಂ ಖಾಲ್ತೆಪಣಾನ್ ವಿಚಾರ‍್ಲೆಂ.

“ಏಕ್ ವರಸ್ ಥಾವ್ನ್ ಏಕ್ ಸಬ್ದ್ ಸಯ್ತ್ ಬರೊಂವ್ಕ್ ಜಾತೇ ನಾ.. ಸಕ್ಡಾಂ ವಿಚಾರ‍್ತಾತ್ ಕಿತ್ಯಾಕ್ ಬರಯ್ನಾಂಯ್, ಕಿತ್ಯಾಕ್ ಬರಯ್ನಾಂಯ್ ಮ್ಹಣ್. ಬರೊಂವ್ಕ್ ಬಸ್ತಾನಾ ಕಾಂಯ್ ಜಳ್ಕೊಂಕ್‌ಚ್ ಜಳ್ಕನಾ. ಉರ್ಬಾಚ್ ನಾ ಜಾಲ್ಯಾ.. ಬೊವ್ಶಾ ಕೊಂಕ್ಣಿ ಮಾಂಯ್ ಹ್ಯಾ ಆಪುಟ್ ಕೊಂಕ್ಣಿ ಪುತಾಕ್ ಸೊಡ್ನ್..”

“ಛೆ ಛೆ… ತಶೆಂ ಚಿಂತಿನಾಕಾತ್. ಥೊಡೆಪಾವ್ಟಿಂ ತಶೆಂ ಜಾತಾ. ಸರ್ವಾಂಕ್ ಹಾಚೊ ಅನ್ಭೋಗ್ ಆಸಾ. ಮಾಗಿರ್ ಸಮಾ ಜಾತಾ…”

ಹಾಂವೆಂ ಅಶೆಂ ಸಮಾಧಾನ್ ಕರ‍್ತಾನಾ, ತಾಣೆಂ ಬೊಲ್ಸಾಥಾವ್ನ್ ಲಿಖ್ಣಿ ಭಾಯ್ರ್ ಕಾಡ್ನ್ ತಾಚೆಂ ನಿಬ್ಬ್ ಮ್ಹಾಕಾ ದಾಕೊವ್ನ್ ಮ್ಹಣಾಲೊ, “ಪಳೆ ಸಂಪಾದಕಾ, ನಿಬ್ಬಾಕ್ ಮಾತಿ ಖೆಲ್ಯಾ ಪಳೆ. ಎಕಾ ಕಾಳಾರ್ ಹಾಂವೆಂ ಬರಯ್ತಾನಾ ಹ್ಯೆ ಜಿಬೆರ್ ಕಿಟಾಳಾಂ ಉಸಾಳ್ತಾಲಿಂ. ಏಕ್ ಪಾವ್ಟಿಂ ಪೆನ್ನಾಚೆಂ ಟೊಪ್ ಕಾಡ್ಲ್ಯಾರ್ ಕಿತ್ಲಿಂ ಪಾನಾಂ ಲಿಖುನ್ ಉಡಯ್ತಲೊಂ ಮ್ಹಣ್ ಮ್ಹಾಕಾ ಮಾತ್ರ್ ಕಳಿತ್… ಏಕ್ ಪಾವ್ಟಿಂ ಹಾಂವ್ ಸಾಂಕಳ್ ಕಾಣಿ ಬರೊಂವ್ಚ್ಯಾ ಮೂಡಾರ್ ಆಸ್‌ಲ್ಲೊಂ.. ಬರಯ್ತಾಂ ಬರಯ್ತಾಂ ಹ್ಯೆ ಲಿಖ್ಣೆಂತ್ಲೆಂ ತೀಂತ್ ಖಾಲಿ ಜಾಲ್ಲೆಂ ಕಳಿತ್‌ಚ್ ಜಾಲೆಂನಾ. ತೀಂತ್ ಖಾಲಿ ಜಾಲ್ಯಾ ಉಪ್ರಾಂತ್‌ಯೀ ಏಕ್ ಅವಸ್ವರ್ ಹಾಂವೆಂ ಬರೊವ್ನ್ ಕಾಡ್‌ಲ್ಲೆಂ! ಪುಣ್ ಆಜ್ ಪಳೆ… ತೀಂತ್ ಘೆಟೆ ಜಾಲಾಂ…”

ಬಿರ್ಮತ್ ದಿಸ್ಲಿ ಮ್ಹಾಕಾ. ಹಾಂವೆಂ ವಿಶಯ್ ಚುಕೊಂವ್ಚ್ಯಾಕ್ ದುಸ್ರಿ ವಿಶಯ್ ಕಾಡ್ಲಿ.

“ವ್ಹಯ್, ಸಾಂಕಳ್ ಕಾಣಿಯಾಂನಿ ತುಮ್ಚೊ ಉಕಲ್ಲಲೊ ಹಾತ್… ಸೋರ್ರಿ, ಬರೊಂವ್ಚ್ಯಾ ಮೆಜಾಕ್ ಚಿಡ್ಕಾಯ್ಲಲೊ ಹಾತ್! ಹಾಂವೆಂಯ್ ವಾಚ್ಲ್ಯಾತ್. ತುಮ್ಕಾಂ ಬರೊಂವ್ಕ್ ತವಳ್ ಪ್ರೇರಣ್ ಖಂಯ್ ಥಾವ್ನ್ ಮೆಳ್ತಾಲೆಂ?”

“ರಯ್ಲಾಂ!” ತಾಚಿ ಎಕಾಚ್ಚಾಣೆಂ ಜಾಪ್… “ರಯ್ಲಾಂ ಮ್ಹಳ್ಯಾರ್ ಬಂಡಲಾಂ ನ್ಹಯ್. ಹಾಂವ್ ತವಳ್ ಪಯ್ಶಿಲ್ಯಾ ಕಲ್ಕತ್ತಾಂತ್ ಕಾಮಾರ್ ಆಸ್‌ಲ್ಲೊಂ. ತಶೆಂ ರಯ್ಲಾರ್ ವೆತಾನಾ ಮ್ಹಾಕಾ ಭಾರಿಚ್ ಪ್ರೇರಣ್ ಲಾಬ್ತಾಲೆಂ. ಕಿತ್ಲ್ಯೊಗೀ ಸಾಂಕಳ್ ಕಾಣಿಯೊ ರಯ್ಲಾರ್‌ಚ್ ಹಾಂವೆಂ ಬರಯಿಲ್ಲ್ಯೊ”

“ಓಹ್.. ತರ್ ರಯ್ಲಾಂ ಮ್ಹಳ್ಯಾರ್ ತುಮ್ಕಾಂ ಪಸಂದ್ ನ್ಹಯ್‌ಗೀ?”

“ವ್ಹಯ್. ಮ್ಹಾಕಾ ಬಗ್ಲೆನ್ ಧಾಂವ್ಚಿಂ ರಯ್ಲಾಂ ಪೂರಾಯ್ ಅವಸ್ವರಾಂಚೆಂ ಡಬ್ಬೆ ಎಕಾಮೆಕಾ ಗುಂತುನ್ ಧಾಂವ್ಚ್ಯಾ ಸಾಂಕಳ್ ಕಾಣಿಯಾಂಬರಿಚ್ ದಿಸ್ತಾಲೆ. ಹಾಂವ್‌ಯೀ ಎಕಾ ಸಾಕಳ್ ಕಾಣಿಯೆಭಿತರ್ ಪಾತ್ರ್ ಜಾಲ್ಲೊ ಅನ್ಭೋಗ್ ಮ್ಹಾಕಾ ರಯ್ಲಾಭಿತರ್ ಲಾಬ್ತಾಲೊ. ಏಕ್ ಪಾವ್ಟಿಂ ಹಾಂವ್ ಆಸ್‌ಲ್ಲೆಂ ರಯ್ಲ್ ಎಕ್ಸಿಡೆಂಟ್ ಜಾಲ್ಲೆಂ… ತುವೆಂ ರಯ್ಲಾಂ ಎಕಾಮೆಕಾ ಆಪ್ಟೊನ್ ಎಕ್ಸಿಡೆಂಟ್ ಜಾಲ್ಲೆಂ ರೂಪ್ ರೂಪ್ ಪಳಯ್ಲಾಂಯ್‌ಗೀ?”

ತಾಚೊ ಮೂಡ್ ಇಲ್ಲೊ ಬದ್ಲಲ್ಲೊ ಪಾರ್ಕುನ್ ಹಾಂವೆಂ ಜಾಪ್ ದಿಲಿ –

“ನಾ ಹಾಂವೆಂ ರಯ್ಲಾಂ ಎಕಾಮೆಕಾ ಎಕ್ಸಿಡೆಂಟ್ ಜಾಂವ್ಚೆಂ ರೂಪ್ ರೂಪ್ ಪಳೆಂವ್ಕ್ ನಾ. ಪುಣ್ ಕೊಂಕ್ಣೆಂತ್ ಸಾಂಕಳ್ ಕಾಣಿಯೊ ಎಕಾಮೆಕಾ ಎಕ್ಸಿಡೆಂಟ್ ಜಾವ್ನ್ ಹಾಂತ್ಲೊ ಏಕ್ ಪಾತ್ರ್ ಥಂಯ್, ತಾಂತ್ಲೊ ಏಕ್ ಪಾತ್ರ್ ಹಾಂಗಾಚ್ಯಾಂನಿ ವೋಡ್ನ್ ತಾಕಾ ಸೊಂವ್ಚೆಂ ದೆಕ್ಲಾಂ ಹಾಂವೆಂ”

“ಹಹಹ.. ತುಂ ಭಾರೀ ಹುಶಾರ್ ಆಸಾಯ್. ಸತ್ತ್ ತುಜೆಲಾಗಿಂ ಉಲೊನ್ ಮ್ಹಜಿ ದೂಕ್ ಪಯ್ಸ್ ಜಾಲಿ.. ಹಾಂವ್ ಆಯಿಲ್ಲೊಂ ದೆಕುನ್‌ಚ್ ಸಂಪಾದಕಾ… ಮ್ಹಾಕಾ ಮ್ಹಜೊ ಬರ‍್ಪಾಚೊ ಸಂಸಾರ್ ಪರತ್ ಪಾಟಿಂ ಹಾಡುಂಕ್ ಜಾಯ್. ಕಾಂಯ್ ತರೀ ಟಿಪ್ಸ್ ಜಾಯ್ ತುಜೆಕಡ್ಚೆ”

ಹಾಂವೆಂ ಚಿಂತುನ್ ಏಕ್ ಉಪಾಯ್ ಸಾಂಗ್ಲೊ. ತಾಚ್ಯಾ ಹಾತಿಂ ಥೊಡಿಂ ನೀವ್ಜ್ ಪತ್ರಾಂಚಿಂ ಕಟ್ಟಿಂಗಾಂ ದಿಲಿಂ ಆನಿ ಮ್ಹಳೆಂ –

“ಅಳೆ ಪಳೆಯಾ, ಹೆಂ ಆಯ್ಲೆವಾರ್ ಆಮ್ಚ್ಯಾ ದೆಶಾಂತ್ ಘಡ್‌ಲ್ಲೆಂ ಘಡಿತ್. ಹೆಂ ಪಳಯ್ತಾನಾ ಪುಣೀ ಬರೊವ್ಪ್ಯಾಕ್ ಲಿಖ್ಣಿ ಹಾತಿಂ ಧರ‍್ನ್ ಕಾಂಯ್ ತರೀ ಲಿಖ್ಯಾಂ ಮ್ಹಣ್ ಭೊಗ್ತಾ… ತುಮಿ ಘರಾ ವಚೊನ್ ಹೆಂ ಬರೇಂ ಕರ‍್ನ್ ವಾಚಾ. ಉಪ್ರಾಂತ್ ಪಳೆಯಾ”

ತೊ ಹಾಕಾ ಒಪುನ್, ಚಾರ್ ದೀಸ್ ಸೊಡ್ನ್ ಯೆತಾಂ ಮ್ಹಣ್ ಗೆಲೊ…

***

ಚಾರ್ ದಿಸಾ ಉಪ್ರಾಂತ್ ಪರತ್ ತೊ ಮ್ಹಜೆಮುಕಾರ್ ಆಯ್ಲೊ.

“ನಮಸ್ಕಾರ್ ತುಮ್ಕಾಂ. ವಾಚ್ಲೆಂಗೀ… ಕಾಂಯ್ ಜಳ್ಕಲೆಂಗೀ…” ವಿಚಾರ‍್ಲೆಂ ಹಾಂವೆಂ ಆತುರಾಯೆನ್.

“ವಯ್ಲ್ಯಾಬಾರ್ ವಾಚ್ಲೆಂ. ಹಾಚೊ ಫೊಟೊ ಟಿವಿರ್ ಪಳಯಿಲ್ಲೊ ಹಾಂವೆಂ. ಹಾಂವ್ ತೆದಾಳಾ ಧುವೆಗೆರ್ ಭಾಯ್ರ್ ಗೆಲ್ಲೊಂ. ಸಮಾಕಟ್ಟ್ ಕಳನಾ. ಸ್ಟ್ಯಾನ್ ಸ್ವಾಮಿ ನೆ ನಾಂವ್ ಹಾಚೆಂ. ಪುಣ್ ಮ್ಹಾಕಾ ಹಾಂತುಂ ಕಾಂಯ್ ಬರೊಂವ್ಚೆತಸಲೆಂ ಜಳ್ಕೊಂಕ್ ನಾ. ತರೀ ಏಕ್ ಸವಾಲ್ ಧೊಸ್ಲೆಂ. ಆಮಿ ಲ್ಹಾನ್ ಆಸ್ತಾನಾ ಏಕ್ ಬೋತ್ಲ್ ಕೋಲ್ಡ್ ಡ್ರಿಂಕ್ ಘೆತ್ಲ್ಯಾರ್  ಸ್ಟ್ರಾ ದಿತಾಲೆ. ಆಜ್ ಕಾಳ್ ಖಂಯ್ ಪಾವ್ಲಾ ಮ್ಹಳ್ಯಾರ್ ಏಕ್ ಸ್ಟ್ರಾ ದೀಂವ್ಕ್ ಹ್ಯಾ ಆಂಗ್ಡಿವಾಲ್ಯಾಂಕ್ ಜಾಯ್ನಾ ಮ್ಹಳ್ಯಾರ್…”

“ತರ್ ತುಮ್ಚೆಪ್ರಕಾರ್ ಸ್ಟ್ಯಾನ್ ಸ್ವಾಮಿನ್ ಸ್ಟ್ರಾ ವಿಚಾರ್‌ಲ್ಲೆಂ ಜ್ಯೂಸಾಚ್ಯಾ ಆಂಗ್ಡಿವಾಲ್ಯಾಕಡೆ…”

“ನ್ಹಯ್‌ಗೀ? ಹಾಂವೆಂ ಸಮಾ ವಾಚುಂಕ್ ನಾ.. ಸ್ಟ್ರಾ ವಿಚಾರ್‌ಲ್ಲೆಂ ಮ್ಹಣ್ ಕಳಿತ್ ಆಸ್‌ಲ್ಲೆಂ ಮ್ಹಾಕಾ…”

“ತಾಣೆಂ ಸ್ಟ್ರಾ ವಿಚಾರ್‌ಲ್ಲೆಂ ಜ್ಯೂಸಾಚ್ಯಾ ಆಂಗ್ಡಿವಾಲ್ಯಾಕಡೆ ನ್ಹಯ್. ತಾಕಾ ಆದಿವಾಸಿ ಲೊಕಾಂಚ್ಯಾ ಹಕ್ಕಾಂಖಾತಿರ್ ಝುಜ್‌ಲ್ಲ್ಯಾಕ್ ಶಿಂತ್ರೆನ್ ಜಯ್ಲಾಕ್ ಘಾಲ್ಲೊ. ತಾಕಾ ಹಾತ್ ಕಾಂಪ್ಚಿ ಪಿಡಾ ಆಸ್‌ಲ್ಲಿ. ಕಾಂಯ್ ಪಿಯೆಂವ್ಕ್ ಜಾಯ್ನಾತ್‌ಲ್ಲೆಂ ದೆಕುನ್ ತಾಣೆಂ ಕೊಡ್ತಿಂತ್ ಸ್ಟ್ರಾ ದೀಜೆ ಮ್ಹಣ್ ವಿನತಿ ಕೆಲ್ಲಿ”

“ಹೊ! ತಶೆಂಗೀ…” ಮ್ಹಣ್ ಕಿತೆಂಗೀ ಚಿಂತ್ಚ್ಯಾರ್ ಪಡ್ಲೊ ತೊ. ಹಾಂವೆಂಚ್ ಮ್ಹಳೆಂ-

“ಆತಾಂ ತುಮಿ ಕಿತೆಂ ಚಿಂತುನ್ ಆಸಾತ್ ಮ್ಹಣ್ ಕಳ್ಳೆಂ ಮ್ಹಾಕಾ”

“ಕಿತೆಂ ಸಾಂಗ್ ಪಳೆಯಾಂ”

“ಸ್ಟ್ರಾ ಕೊಡ್ತಿಂತ್ ವಿಚಾರ‍್ಲ್ಯಾರ್ ಮೆಳ್ತಾಗೀ.. ಜಡ್ಜ್ ಕಿತೆಂ ಬೊಲ್ಸಾಂತ್ ಸ್ಟ್ರಾ ದವರ‍್ನ್ ಬಸ್ತಾಗೀ.. ಖಂಯ್ ಪುಣೀ ಕೊಡ್ತಿಚ್ಯಾ ಭಾಯ್ರ್ ಘುಡಾಂಗ್ಡಿ ವಿಚಾರ‍್ಲ್ಯಾರ್ ದಿತೆ ಆಸ್ಲೆ ಮ್ಹಣ್ ಚಿಂತುನ್ ಆಸಾತ್‌ಮು ತುಮಿ?”

“ಎಕ್ಸಾಕ್ಟ್‌ಲೀ” ತಾಚ್ಯೆ ಹಳ್ಕೆಭಾಯ್ರ್‌ಚ್ ಹೆಂ ಉತರ್ ಜಿಬೆಥಾವ್ನ್ ಭಾಯ್ರ್ ಪಡ್ಲೆಂ. ಕಶೆಂಯ್ ಸುಧಾರ‍್ಸುನ್ ಮ್ಹಣಾಲೊ, “ಮ್ಹಾಕಾ ಪರತ್ ಬರೊಂವ್ಚೆಬರಿ ಕರುಂಕ್ ದುಸ್ರೊ ಕಸಲೊಯ್ ಉಪಾಯ್ ಆಸ್ಲ್ಯಾರ್ ಸಾಂಗ್ ಪ್ಲೀಜ್”

ಹಾಂವೆಂ ಏಕ್ ಪೆನ್‌ಡ್ರೈವ್ ದಿಲಿ ಆನಿ ಮ್ಹಳೆಂ,

“ಪಳೆಯಾ ಹಾಂತುಂ ಏಕ್ ಅದ್ಭುತ್ ಸಿನೆಮಾ ಆಸಾ. ಸಂಸಾರಾರ್ ನಾಂವಾಡ್ಲಲೆಂ ಸಿನೆಮಾ ತೆಂ. ತುಮಿ ಘರಾ ಬಸೊನ್ ಪಳೆಯಾ. ಖಂಡಿತ್ ಹೆಂ ಸಿನೆಮಾ ಪಳೆವ್ನ್ ರಗ್ತಾಂತ್ ಊಬ್ ಚರೊನ್ ಪರತ್ ಬರೊಂವ್ಕ್ ಧರ‍್ತೆಲ್ಯಾತ್”

***

ಚಾರ್ ದೀಸ್ ಸೊಡ್ನ್ ಪರತ್ ತೊ ಮ್ಹಜೆಮುಕಾರ್ ಆಯ್ಲೊ. ದೋನ್ ಅರ್ಧಾಂ ಜಾಲ್ಲಿ ಪೆನ್‌ಡ್ರೈವ್ ಮ್ಹಜೆಮುಕಾರ್ ಧರ್ಲಿ.

“ಅರೆ ಪೆನ್‌ಡ್ರೈವ್ ಕಶಿ ಕುಡ್ಕೆ ಜಾಲಿ?” ವಿಚಾರ‍್ಲೆಂ ಹಾಂವೆಂ.

“ಏಕ್ ಫರಾಮಸ್ ಘಡ್ಲಿ ಸಂಪಾದಕಾ… ಮಾಫ್ ಕರ್”

“ವ್ಹಡ್ ನಾ. ಕಿತೆಂ ಜಾಲೆಂ ಸಾಂಗಾ”

“ಹಾಂವ್ ಸಾಲಾಂತ್ಲ್ಯಾ ವ್ಹಡ್ ಟಿವಿಕ್ ಪೆನ್‌ಡ್ರೈವ್ ಶಿರ್ಕಾವ್ನ್ ತುವೆಂ ದಿಲ್ಲೆಂ ಸಿನೆಮಾ ಪಳೆಂವ್ಕ್ ಬಸ್‌ಲ್ಲೊಂ. ಇಲ್ಲೊ ವೇಳ್ ಪಳೆಲಾಂ ಮಾತ್ರ್… ತಾಂತುಂ ಚಾರ್ ಬಾಯ್ಲಾಂ ನಾಗ್ಡಿಂ ಧಾಂವ್ತಾತ್ ನೆ… ತೆಂ ಪಳೆವ್ನ್ ಆಸ್‌ಲ್ಲೊಂ. ಜಾವ್ಯೆತ್ ತ್ಯಾ ಬ್ಲ್ಯಾಕ್ ಎನ್ ವೈಟ್ ಕಾಳಾರ್‌ಚ್ ಇತ್ಲೆಂ ಎಕ್ಸ್‌ಪೋಸ್ ಕರ‍್ತಾಲಿಂ ಮ್ಹಣ್ ಚಿಂತುನ್ ಆಸ್ತಾನಾಂಚ್ ಮ್ಹಜ್ಯೆ ತಕ್ಲೆಕ್ ಸತ್ರೆಚೊ ಏಕ್ ಮಾರ್ ಪಡೊನ್ ಸತ್ರೆಂಂತ್ಲೆ ಥೆಂಬೆ ಪೂರಾಯ್ ಮ್ಹಜ್ಯಾ ಗಾಲಾಂಚೆರ್ ದುಕಾಂ ಜಾವ್ನ್ ಪಡ್ಲೆ…”

“ಕಾಲೆಂ ಜಾಲೆಂ?”

“ತಿಂ ನಾಗ್ಡಿಂ ಬಾಯ್ಲಾಂ ಟಿವಿರ್ ಯೆತಾನಾಂಚ್ ನೊವೆನಾಕ್ ಗೆಲ್ಲಿ ಮ್ಹಜಿ ಬಾಯ್ಲ್ ಭಿತರ್ ಸರಜೆಗೀ! ಆಮ್ಚಿ ಟಿವಿ ಆಲ್ತಾರಿಮದೆಂಚ್ ಆಸಾ. ಟಿವಿಕ್‌ಯೀ ಆಲ್ತಾರಿಚೊ ಏಕ್ ವಾಂಟೊ ಮ್ಹಳ್ಳೆಬರಿಚ್ ಬಾಯ್ಲ್ ಲೆಕ್ತಾ. ಪಾವನಾತ್ಲ್ಯಾಕ್ ಟಿವಿಚ್ಯಾ ಬಗ್ಲೆನ್‌ಚ್ ಆಂಕ್ವಾರ್ ಮರಿಯೆಚಿ ವ್ಹಡ್ ಇಮಾಜ್ ಆಸಾ. ಅಶೆಂ ಆಸ್ತಾನಾ ಮ್ಹಜ್ಯೆ ಬಾಯ್ಲೆಕ್ ಟಿವಿರ್ ನಾಗ್ಡ್ಯಾ ಬಾಯ್ಲಾಂಕ್ ಪಳೆವ್ನ್ ಕಿತೆಂ ಜಾಯ್ಜೆ. ತೊ ರಾಗ್ ಪೂರಾ ಮ್ಹಜೆರ್ ಕಾಡ್ಲೊ. ಆನಿ ಪೆನ್‌ಡ್ರೈವ್ ಲೊಸುಣ್ ಧಾಡಾಂವ್ಚ್ಯಾ ಫಾತ್ರಾಂತ್ ಧಾಡಾವ್ನ್ ಸೊಡ್ಲಿ. ಸೀರಿಯಲಾಂ ಪುಣೀ ನಾತ್ಲಿಂ ತರ್ ಟಿವಿ ಚಪಾತಿ ಲಾಟ್‌ಲ್ಲೆಬರಿ ಲಾಟ್ಣ್ಯಾಂತ್ ಲಾಟುನ್ ಸೊಡ್ತಿಗೀ ಮ್ಹಣ್…”

ಆಯ್ಕೊನ್ ಮ್ಹಾಕಾ ಭಿರಾಂತ್ ದಿಸ್ಲಿ ತರೀ ಮ್ಹಳೆಂ – “ವ್ಹಡ್ ನಾ ಬೆಜಾರ್ ಪಾವನಾಕಾತ್.”

“ತುವೆಂ ತಸಲೆಂ ಸಿನೆಮಾ ದಿಂವ್ಚೆಂಗೀ ಮ್ಹಾಕಾ?”

“ಮಾನೆಸ್ತಾಂನೋ, ತೆಂ ಹಿಟ್ಲರಾಚ್ಯಾ ಕಾಳಾರ್ ನಾಝಿಂನಿ ಸ್ತ್ರೀಯಾಂಕ್ ಕಶೆಂ ದಗ್ದಿಲಾಂ ಮ್ಹಳ್ಳೆವಿಶ್ಯಾಂತ್ ಆಸ್‌ಲ್ಲೆಂ ಸಿನೆಮಾ. ತಾಂತುಂ ನಾಗ್ಡಿಂ ಧಾಂವ್ಚಿಂ ತಾಣಿಂ ಕೆಲ್ಲೊ ಎಕ್ಸ್‌ಪೋಸ್ ನ್ಹಯ್ ತಾಂಚೆರ್ ಜಾಲ್ಲೆಂ ಶೋಶಣ್ ತೆಂ”

“ಕಿತೆಂಯ್ ಜಾಂವ್, ಹ್ಯೆ ಪ್ರಾಯೆರ್ ಮ್ಹಾಕಾ ತಸಲ್ಯೊ ಕಾಣಿಯೊ ಬರೊಂವ್ಚಿ ಸೊಡ್ಯಾಂ ಪಳೆಂವ್ಚಿಯ್ ತಾಂಕ್ ನಾ. ದುಸ್ರೊ ಕಸಲೊ ಪುಣೀ ಉಪಾಯ್ ಕರ್ ಸಂಪಾದಕಾ…” ತಾಣೆಂ ತಕ್ಲಿ ಆಡ್ ಘಾಲ್ನ್ ವಿನತಿ ಕೆಲಿ.

“ತರ್ ಏಕ್ ಕಾಮ್ ಕರ‍್ಯಾಂ. ತುಮ್ಕಾಂ ಕಶೆಂಯ್ ಪಯ್ಲೆಂ ರಯ್ಲಾರ್ ಯೆತಾನಾ ಉರ್ಬಾ ಯೆತಾಲಿ ನೆ? ಮ್ಹಾಕಾ ಯೆಂವ್ಚ್ಯಾ ಹಫ್ತ್ಯಾಂತ್ ಎಕಾ ಕಾರ್ಯಕ್ರಮಾಕ್ ಗೊಂಯಾಂ ವಚೊಂಕ್ ಆಸಾ. ತುಮಿಯ್ ಯೆಯಾ. ಏಕ್ ದೀಸ್ ರಾವೊನ್ ಯೆಯಾಂ. ಜಾಗೊ ಬದಲ್ಲ್ಯಾರೀ ಥೊಡೆಪಾವ್ಟಿಂ ಪ್ರೇರಣ್ ಮೆಳ್ತಾ ಮ್ಹಣ್ತಾತ್”

ತಾಣೆಂ ಒಪ್ಪಿಗಿ ದಿಲಿ.

***

ಆಮಿ ರಯ್ಲಾರ್ ಗೆಲ್ಯಾಂವ್, ಥಂಯ್ ರಾವ್ಲ್ಯಾಂವ್. ಪಾಟಿಂ ಆಯ್ಲ್ಯಾರೀ ಆಮ್ಚ್ಯಾ ಸಾಹಿತಿಕ್ ಉರ್ಬಾ ಯೇಂವ್ಕ್ ನಾ. ಪುಣ್ ಥಂಯ್ಸರ್ ಎಕಾ ಬಾರಾಂತ್ ಸಾಂಜೆರ್ ಜೇಂವ್ಕ್ ಗೆಲ್ಲೆತವಳ್ ವಿಸ್ಕಿ ಮಾರ‍್ನ್ ಕೊಂಕ್ಣಿ ಲೇಖಕಾಂಕ್ ಯೆಟ್‌ಲ್ಲ್ಯಾ ಗಾಳಿಯಾಂನಿ ಮಾತ್ರ್ ಮ್ಹಜೆ ಕಾನ್ ಪಿಂಜುನ್ ಗೆಲೆ.

ತಾಣೆಂ ಗಾಳಿ ಯೆಟ್‌ಲ್ಲ್ಯಾಂಪಯ್ಕಿ ಅರ್ವಾಸ್ ಎದೊಳ್ ಫಾಯ್ಸ್ ಜಾಲ್ಲ್ಯಾ ತಾಚ್ಯಾ ಬುಕಾಂನಿ ಪಯ್ಲ್ಯಾ ಪಾನಾರ್ ಫೊಟೊ ಘಾಲ್ನ್ ಅರ್ಪಣ್ ಕೆಲ್ಲೆಚ್! ಹಾಂವ್ ಫಕತ್ ಏಕ್ ಗ್ಲಾಸ್ ಬಿಯರ್ ಪಿಯೆವ್ನ್ ಬಸ್‌ಲ್ಲೊಂ.

***

ಆಖೇರಿಕ್ ಮ್ಹಾಕಾ ಏಕ್ ಉಪಾವ್ ಮೆಳ್ಳೊ. ಹ್ಯಾ ಮಹಾನ್ ಸಾಹಿತಿಚ್ಯಾ ಎಕಾ ನಾಂವಾಡ್ದಿಕ್ ಕಾದಂಬರಿಯೆಂತ್ ಕಸೊ ತೊ ಪಾತ್ರಾಂಚ್ಯೆ ವಾಡವಳಿಂತ್ ಸಲ್ವಲಾ, ಕಶಿ ತಿ ಕಾದಂಬರಿ ಸಮಾಜೆಕ್ ವಾಯ್ಟ್ ಸಂದೇಶ್ ದಿತಾ ಮ್ಹಳ್ಳೆವಿಶಿಂ ಏಕ್ ವಿಶ್ಲೇಶಣ್ ಬರೊವ್ನ್ ಮ್ಹಜ್ಯಾ ಪತ್ರಾರ್ ಫಾಯ್ಸ್ ಕೆಲೆಂ.

ತಿತ್ಲೆಂಚ್!

ಪತ್ರ್ ಪೋಸ್ಟ್ ಜಾವ್ನ್ ಘರಾ ಪಾವ್‌ಲ್ಲ್ಯಾ ದುಸ್ರೆದಿಸಾಚ್ ಎಕಾ ವೆಬ್‌ಸಾಯ್ಟಿರ್ ತಾಚೆಂ ಲಾಂಬ್ ಬರಪ್ ಫಾಯ್ಸ್ ಜಾಲೆಂ, ತಾಚೆಂ ನಾಂವ್ ‘ಬಿಯರಿಂತ್ಲ್ಯಾ ಗ್ಲಾಸಾಂತ್ಲೊ ಮೂಸ್’. ದುಸ್ರೆದೀಸ್ ಆನ್ಯೆಕೆ ಸಾಯ್ಟಿರ್ ಲೇಖನ್ ಫಾಯ್ಸ್ ಜಾಲೆಂ – ‘ಪೊಜ್ಡಿಂ ಚಿತ್ರಾಂ ದೀವ್ನ್ ಮಾಲ್ಘಡ್ಯಾ ಲೇಖಕಾಂಚೆಂ ಪೀಂತ್ ಚಾಳ್ವೊಂವ್ಚೊ ಸಂಪಾದಕ್’. ಇತ್ಲೆಂಚ್ ನ್ಹಯ್, ಎಕಾ ಕವಿತೆಚ್ಯಾ ಗ್ರೂಪಾಂತ್ ಪಯ್ಲೆಪಾವ್ಟಿಂ ಏಕ್ ಚುಟುಕ್‌ಯೀ ಲಿಖ್ಲೆಂ –

ಹಾಣೆಂ ದಿಲ್ಲೆ ಬೂಕ್ 
ಮ್ಹಜ್ಯೆ ಆಲ್ಮಾರಿಕ್ ಜಡ್ 
ಹಾಣೆಂ ದಿಲ್ಲ್ಯಾ ಸಿನೆಮಾವರ್ವಿಂ 
ಮ್ಹಜಿ ಟಿವಿ ಉರ್‌ಲ್ಲಿ ವ್ಹಡ್!

ದೆಕ್ತಾಂ ದೆಕ್ತಾಂ ಎಕಾ ಪತ್ರಾರ್ ತಾಚಿ ನವಿಚ್ ಸಾಂಕಳ್ ಕಾಣಿ ಸುರು ಜಾಲಿ ತಾಚೆಂ ನಾಂವ್ – ’ಪರತ್ ದಿಶ್ಟಿಕ್ ಪಡ್‌ಲ್ಲೆಂ ಮೆಲ್ಲೆಂ!’

ವ್ಹಯ್ ಮ್ಹಜೆಂ ಚಿಂತಪ್ ಸಾರ್ಕೆಂ ಆಸ್‌ಲ್ಲೆಂ. ಜಾಯ್ತ್ಯಾ ಬರೊವ್ಪ್ಯಾಂಕ್ ಸಮಾಜೆಂತ್ ಘಡ್ಚ್ಯಾ ಘಡಿತಾಂಚೆಂ ಪಡೊನ್ ವಚೊಂಕ್ ನಾ. ಜರ್ ಕೊಣೆಂ ಪುಣೀ ಠಿಕಾ ಕೆಲಿ, ತವಳ್ ತಾಂಕಾಂ ಬರೊಂವ್ಕ್ ದೋನ್ ಹಾತ್ ಪಾವನಾಂತ್. ಸಂಸಾರಾಚೆಂ ವ್ಹಡ್ ಆನ್ವಾರ್ ಆಪ್ಣಾಚೆರ್‌ಚ್ ಆಯ್ಲಾಂ ಮ್ಹಣ್ ಬೊಬೊ ಘಾಲುಂಕ್ ಸುರು ಕರ‍್ತಾತ್. ಆದ್ಲಿಂ ಪತ್ರಾಂ ಉಸ್ತುನ್ ಪಳಯಾ, ಆತಾಂಚಿಂ ಘಡಿತಾಂಯ್ ಪಾರ್ಕುನ್ ಪಳೆಯಾ… ಹಿ ಐಡಿಯಾ ಹಾಂವೆಂ ಹಾಚೆಲಾಗಿಂ ವಾಪಾರ‍್ಲಿ. ಜಶೆಂ ರೊಕೆಟಿಚ್ಯಾ ಗಾಂಡಿಕ್ ಉಜೊ ದಿಲ್ಯಾರ್ ತಿ ಉಬ್ತಾಗೀ ತಶೆಂ, ಥೊಡ್ಯಾಂಕ್ ಏಕ್ ಠಿಕಾ ವಾ ವಿಮರ್ಸೊ ಪಾವ್ತಾ!. ಹಿಚ್ ಕೊಂಕ್ಣೆಚಿ ರೊಕೆಟ್ ಟೆಕ್ನಿಕ್!

ಆತಾಂ ಬೊವ್ಶಾ ತಾಚ್ಯೆ ಲಿಖ್ಣೆಂತ್ ತೀಂತ್ ರಾವೊಂಕ್ ಪುರ್ಸೊತ್ ನಾ ಕೊಣ್ಣಾ. ಬೊವ್ಶಾ ಆಸ್ಪತ್ರೆಂನಿ ಪಿಡೇಸ್ತಾಕ್ ಗ್ಲೂಕೋಸ್ ದಿಲ್ಲೆಬರಿ ತಾಚ್ಯೆ ಲಿಖ್ಣೆಕ್ ತೀಂತ್ ಸಪ್ಲಾಯ್ ಕರುಂಕ್ ಟ್ಯೂಬಾಚೆಂ ಕನೆಕ್ಶನ್ ದಿಲಾಂ ಆಸ್ತಲೆಂ! ಅಶೆಂ ಚಿಂತುನ್ ಮ್ಹಜೆಯಿತ್ಲ್ಯಾಕ್ ಹಾಸೊನ್ ಆಸ್ತಾನಾಂಚ್ ದಾರ್ ಠೊಕ್‌ಲ್ಲೊ ಆವಾಜ್! ಥಂಯ್ಸರ್ ಏಕ್ ಲಾಚಾರ್ ಜೀವ್ ಉಬೊ ಆಸ್‌ಲ್ಲೊ…

“ಕೋಣ್ ತುಂ? ಕಿತೆಂ ಜಾಯ್?” ವಿಚಾರ‍್ಲೆಂ ಹಾಂವೆಂ. ತಾಣೆಂ ಖಂತಿನ್ ಜಾಪ್ ದಿಲಿ…

“ಮ್ಹಜಿ ಬಾಯ್ಲ್ ಖಂಡಾಪಟ್ಟೆ ಬರಯ್ತಾ… ರಾತಿಂ ನಿದೆಂತ್‌ಯೀ ಬರಯ್ತಾ. ವೊಲಿರ್ ಉಶ್ಯಾರ್ ಮ್ಹಜ್ಯಾ ಆಂಗಾರ್ ಸಗ್ಳ್ಯಾನಿತ್ಲ್ಯಾನ್ ಬರೊಂವ್ಚೆಂಚ್ ಮ್ಹಣ್ ಲೇಕ್. ತಿಕಾ ಬರೊಂವ್ಚಿ ಪಿಡಾ ಲಾಗ್ಲ್ಯಾ ಸಂಪಾದಕಾ… ಥೊಡ್ಯಾ ಕಾಳಾಕ್ ಪುಣೀ ತಿಣೆಂ ಅಶೆಂ ಒಟ್ರಾಶಿ ಬರೊಂವ್ಚೆಂ ಬಂದ್ ಕರ‍್ಚೆಬರಿ ಕಾಂಯ್ ಉಪಾಯ್ ಆಸ್ಲ್ಯಾರ್ ಸಾಂಗ್…”

ಆತಾಂ ಹಾಂವೆಂ ಆನ್ಯೇಕ್ ಟೆಕ್ನಿಕ್ ಸೊಧುನ್ ಕಾಡಿಜೆ ಪಡ್ಲಿ!

(ಆನ್ಯೇಕ್ ಟೆಕ್ನಿಕ್ ಫುಡ್ಲ್ಯಾ ದಿಸಾಂನಿ . . . ರಾಕೊನ್ ರಾವಾ)

► ವಿಲ್ಸನ್, ಕಟೀಲ್

]]> https://kittall.in/24518/feed/ 2