2023 ಮಾಯ್ 3-ವ್ಯೆರ್, ಆಮ್ಚ್ಯಾ ಬಡ್ಗಾ-ಉದೆಂತಿಚ್ಯಾ ಮಣಿಪುರ್ ರಾಜ್ಯಾಂತ್ ಮೈಟೆ ಜನಾಂಗ್ ಆನಿ ಕುಕಿ ಆದಿವಾಸಿ ಮಧೆಂ ಜಾತೀಯ್-ಧಾರ್ಮಿಕ್ ಯಾದವಿ ಝುಜ್ ಸುರ್ವಾತ್ಲೆಂ. 88 ದೀಸಾಂ ಉಪ್ರಾಂತ್ ಹೆಂ ಬರಯ್ತಾನಾ, ಮಣಿಪುರ್ ಅಜೂನ್ ಜಳ್ತಾ. ಆಮ್ಕಾಂ ಪರ್ವಾಚ್ ನಾಂ!

ಹಫ್ತ್ಯಾ ಪೈಲೆಂ, ಕೊಣಾಕ್‌ಯೀ ಕಿತೆಂಚ್ ಪಡೊನ್ ಗೆಲ್ಲೆಂ ನಾಂ ತಶೆಂ ಭಗ್ತೆಲೆಂ. ತೆದ್ನಾಂ, ಜುಲೈ 19-ವ್ಯೆರ್, ದೊಗಾಂ ಕುಕಿ ಸ್ತ್ರೀಯಾಂಚೊ ಏಕ್ ವಿಡಿಯೊ ವಾಯ್ರಲ್ ಜಾಲೊ. ತರುಣ್ ಆದಿವಾಸಿ ಬಾಯ್ಲಾಂಕ್ ನಿರ್ವಸ್ತ್ರ್ ಕರೂನ್, ರಸ್ತ್ಯಾಂ ವಯ್ರ್ ಪೆರೆಡ್ ಕೆಲೆಂ. ತಾಪ್ಡಾಂ ಮಾರಿತ್ತ್ ತಾಂಕಾಂ ವೆಲೆಂ. ಲೈಂಗಿಕ್ ಅತ್ತ್ಯಾಚಾರ್ ಜಾಲೊ. ಮೈಟೆ ದಾದ್ಲ್ಯಾಂನಿಂ ಅಶೆಂ ಕೆಲೆಂ ಮ್ಹಣ್ ಥಳೀಯ್ ಲೋಕಾಕ್ ಕಳ್ಳೆಂ.

ಗುಂಡಾ ಜಮ್ಯಾ ಥಾವ್ನ್ ಪೊಳೊನ್ ತ್ಯಾ ಬಾಯ್ಲಾಂನಿಂ ಪೋಲಿಸ್ ಠಾಣ್ಯಾಂತ್ ಆಸ್ರೊ ಘೆತ್ಲಲೊ. ಜಬರ್ದಸ್ತೆನ್ ತಾಂಕಾಂ ಠಾಣ್ಯಾ ಥಾವ್ನ್ ನಿಕ್ಳಾವ್ನ್, ಹೊ ಅತ್ತ್ಯಾಚಾರ್ ಚಲ್ಲೊ. ತಾಂಚ್ಯಾ ಪೈಕಿಂ ವಿಸಾವಿ ಪ್ರಾಯೆಚ್ಯೆ ತರ್ನೆ ಚಲಿಯೆ ವಯ್ರ್ ಸಾಮೂಹಿಕ್ ಬಲತ್ಕಾರ್ ಜಾಲೊ. ಅನ್ಯೆಕ್ಲೆಚ್ಯಾ, ಕುಮ್ಕೆಕ್ ಆಯಿಲ್ಲ್ಯಾ ಬಾಪೈಕ್ ಆನಿ ದಾಕ್ಟ್ಯಾ ಭಾವಾಕ್ ಜಿವ್ಶಿಂ ಮಾರ್ಲೆಂ. ಹೆಂ ಘಡ್ಲೆಂ ವಿಡಿಯೊ ವಾಯ್ರಲ್ ಜಾಂವ್ಚ್ಯಾ ದೋನ್ ಮಹಿನ್ಯಾಂ ಪೈಲೆಂ. ದೋನ್ ಮಹಿನ್ಯಾಂನಿಂ ಪೋಲಿಸಾಂನಿಂ ಕಸ್ಸಲೆಂ ಕ್ರಮ್ ಘೆತ್ಲೆಲೆಂ ನಾಂ. ಸ್ಪಷ್ಟ್‌ಪಣಾನ್ ಸಾಂಗ್ಯೆತ್, ಪೋಲಿಸ್ ಮೈಟೆಂ ಸಂಗಾತಾ ಸಾಂಠ್-ಗಾಂಠ್ ಕರ್ತಾಲೆ.

ದೇಸ್ ವಿದೇಸಾಂತ್ ಹೊ ವಿಡಿಯೊ ಪಳೆವ್ನ್ ಲೋಕ್ ಶೆರ್ಮೆಲೊ. ಅಸ್ತಮ್ತಿಚ್ಯಾ ಖಾಸ್ಗಿ ಮಾಧ್ಯಮಾಂನಿಂ, ಟಿವಿ ಚೆನೆಲಾಂ ಧರುನ್, ಹ್ಯಾ ಅತ್ತ್ಯಾಚಾರಾಚೊ ಖೂಬ್ ಪ್ರಚಾರ್ ಕೆಲೊ.  ಮೋದಿ ಸರ್ಕಾರಾಚ್ಯೆರ್ ದಬಾವ್ ಪಡ್ಲೊ. ಮೊನೊ ರಾವ್ಲೆಲೊ ಮೋದಿ ಆಖ್ರೆಕ್ ಜಾಗೊ ಜಾಲೊ ಆನಿ ಉಲಯ್ಲೊ. ಪೂಣ್, ಪಾರ್ಲಮೆಂಟಾಂತ್ ನಹಿಂ!

ಮಣಿಪುರಾಚಿ ಓಳೊಕ್:

ಆಮ್ಚ್ಯಾ ಮಧೆಂ ಜಾಯಿತ್ತ್ಯಾಂಕ್ ಮಣಿಪುರ್ ರಾಜ್ಯ್ ಖಂಯ್ ಆಸಾ ತೆಂ ಖಳಿತ್ ನಾಂ. ಬಡ್ಗಾ-ಉದೆಂತಿಚ್ಯಾ ಸಾತ್ ರಾಜ್ಯಾಂ ವಿಷಿಂ ಮಾಹೆತ್ ಆಮ್ಕಾಂ ನಾಂ ದೆಕುನ್ ನಕ್ಶಾ ದೀತಾಂ. ಮುಖ್ಯ್ ಭೂಮಿಚ್ಯಾ ಭಾರತೀಯಾಂಕ್ ಬಡ್ಗಾ-ಉದೆಂತಿಚೊ ಲೋಕ್ ಪರ್ಕೊ ದಿಸ್ತಾ. ತಾಂಕಾಂ ಚೀನಿ ಮ್ಹಣ್ಚೆಂ ಆಸಾ. ಪ್ರತ್ಯೇಕ್ ಜಾವ್ನ್ ತಾಂಚ್ಯಾಂ ದೊಳ್ಯಾಂಚೊ ಆಕಾರ್ ಪಳೆವ್ನ್ ತಮಾಶೆ ಕರ್ತಾಂವ್. ತೊ ಲೋಕ್‌ಯೀ, ಆಮ್ಚ್ಯಾಭಾಶೆನ್, ದೇಸಾಚೆ ನಾಗ್ರಿಕ್ ಮ್ಹಣ್ ಆಮಿ ವಿಸರ್ತಾಂವ್. 

2011 ಇಸ್ವೆಂತ್ ರಾಷ್ಟ್ರೀಯ್ ಖಾನೆಸ್ಮಾರಿ ಜಾಲ್ಲಿ. ಉಪ್ರಾಂತ್ 2021 ಇಸ್ವೆಂತ್ ಜಾಯ್ಜೆ ಆಸ್ಲಿ. ಕೊರೊನಾ ಖಾತಿರ್ ಹಿ ಪಾಟಿಂ ಲೊಟ್ಲ್ಯಾ. ತ್ಯಾ ಲೇಕಾ ಪರ್ಮಾಣೆಂ, ಮಣಿಪುರಾಚಿ ಲೋಕ್‍ಸಂಖ್ಯಾ 28 ಲಾಖ್ 56 ಹಜಾರ್ ಆಸ್ಲಿ. ಹಾಂತುಂ ಲಗ್ಬಗ್ 53% ಮೈಟೆ, 24% ನಾಗಾ ಆನಿ 16% ಕುಕಿ. ಹ್ಯೊ ತೀನ್ ಮಣಿಪುರಾಚ್ಯೊ ಮುಖ್ಯ್ ಕುಳಿಯೊ. ಮೈಟೆ ಕುಳಿಯೆಚ್ಯೆ ಆಪ್ಣಾಕ್ ‘ದೇಶಿ’ ಆನಿಂ ಹೆರಾಂಕ್ ‘ವಿದೇಶಿ’ ಮ್ಹಣ್ ಲೆಕ್ತಾತ್. ಪ್ರಸ್ತುತ್, 2023 ಇಸ್ವೆಂತ್, 33 ಲಾಖ್ ಲೋಕ್ ಆಸಾ ಮ್ಹಣ್ ಅಂದಾಜ್. ಕುಳಿಯೆಂಚ್ಯೆ ಆನಿ ಧರ್ಮಾಂಚ್ಯೆ ಆಂಕ್ಡೆ ಮೆಳ್ತನಾಂ, 12 ವ್ಹರ್ಸಾಂನಿಂ ಹ್ಯಾ ಅಂಕ್ಡ್ಯಾಂನಿಂ ಕಿತೆಂ ಬದ್ಲಾವಣ್ ಜಾಲ್ಯಾ ತೆಂ ಕಳ್ತೆಲೆಂ.

Imphal East, Imphal West, Thoubal ಆನಿ Bishnupur ಜಿಲ್ಲ್ಯಾಂನಿಂ ಮೈಟೆ ಲೋಕ್ ದಾಟ್ ಲೋಕ್‍ಸಂಖ್ಯಾತ್ ಆನಿ ಬಳಿಸ್ಟ್ ಜಾವ್ನಾಸಾ. ಹೆ ಪ್ರದೇಸ್ ಇಂಪಾಲಾ ಕಣ್ವ್ಯಾಂತ್ಲೆ. ಮೈಟೆ ಲೋಕ್ ಚಡ್ತಾವ್ ಹಿಂದು. ಥೊಡೆ ಸನಾಮಹಿ (animist) ಆನಿ ಇಸ್ಲಾಮ್ ಧರ್ಮ್ ಪಾಳ್ತಾತ್. 85% ಮೈಟೆ ವೈಷ್ಣವಾ ಹಿಂದು. ದೆಕುನ್, ವಯ್ಲ್ಯೆ ಜಾತಿಚ್ಯೆ ಮ್ಹಣ್ಯೆತ್ ಆನಿ ಅತಾತಾಂ RSS ಹಿಂದುತ್ವಾ ವಿಚಾರಾಂಚ್ಯೆಂ ಸಮರ್ಥಕ್.

ಭೊಂವಾರಿಂಚ್ಯಾಂ ಹೆರ್ ಸರ್ವ್ ಜಿಲ್ಲ್ಯಾಂನಿಂ ನಾಗಾ ಆನಿ ಕುಕಿ ಜನಾಂಗ್ ವಸ್ತಿ ಕರ್ತಾ. ಹೆ ಪ್ರದೇಸ್ ದೊಂಗ್ರಾಳೆ. ಹಾಂಗಾಸರ್ ಲೋಕಾಚಿ ವಸ್ತಿ ವಿರಳ್, ಭುಂಯ್ ಚಡ್, ಲೋಕ್ ಉಣೊ. ಹ್ಯಾ ದೊಂಗ್ರಾಳ್ಯಾಂ ವಠಾರಾಂನಿಂ, ಬಡ್ಗಾಚ್ಯಾ ಜಿಲ್ಲ್ಯಾಂನಿಂ ಮ್ಹಳ್ಯಾರ್ ನಾಗಾಲೇಂಡ್ ರಾಜ್ಯಾಕ್ ಲಾಗೊನ್, ನಾಗಾ ಲೋಕ್ ವಸ್ತಿ ಕರ್ತಾ. ತೆನ್ಕಾಚ್ಯಾ ಜಿಲ್ಲಾಂನಿಂ ಕುಕಿ ಲೋಕ್ ಆಸಾ. ನಾಗಾ ಆನಿಂ ಕುಕಿ ಆದಿವಾಸಿ ಆನಿಂ ವನವಾಸಿ ಮ್ಹಣ್ತಚ್ ಪರಿಶಿಸ್ಟ್ ಪಂಗಡ್ (Scheduled Tribe, ST) ಪಟ್ಟೆಂತ್ ಯೆತಾತ್. 98% ನಾಗಾ ಆನಿ ಕುಕಿ ಲೋಕ್ ಕ್ರಿಸ್ತಾಂವ್. ದೆಕುನ್ ಮಣಿಪುರಾಚ್ಯಾ ಅಂತರಿಕ್ ಝುಜಾಕ್ ಜಾತಿಚ್ಯೆಂ ಆನಿ ಧರ್ಮಾಚ್ಯೆಂ ದ್ರುವೀಕರಣ್ ಏಕ್ ವ್ಹಡ್ ಕಾರಣ್ ಜಾವ್ನಾಸಾ. ಅಯ್ಲೆವಾರ್, ಭಾಜಪಾ ಸರ್ಕಾರಾಂನಿಂ ಹೆಂ ದ್ರುವೀಕರಣ್ ವಾಡೊಂಕ್ ಪ್ರೇತನ್ ಕೆಲಾಂ ಶಿವಾಯ್ ಎಕ್ವಟಾಂವ್ಕ್ ಮಿನತ್ ಘೆವ್ನಾಂ.

ಹ್ಯಾಂ ತೀನ್ ಪ್ರಮುಖ್ ಕುಳಿಯಾಂ ಶಿವಾಯ್, ಪಾಂಗಳ್ ಮ್ಹಳ್ಳಿ ಅನ್ಯೆಕ್ ಆದಿವಾಸಿ  ಕುಳಿ ಆಸಾ. ಹ್ಯಾಂ ಚಾರ್ ಕುಳಿಯಾಂ ಭಿತರ್ ಧಾರಾಳ್ ಅಂತರ್-ಕುಳಿಯೊ ಆಸಾತ್.

ಮಣಿಪುರ್ ಲೋಕಾಚ್ಯೆಂ ಧಾರ್ಮಿಕ್ ಲೇಕ್‍ಪಾಕ್:

2011 ಖಾನೆಸ್ಮಾರಿ ಪ್ರಮಾಣೆಂ, ಮಣಿಪುರಿ ಜಣ್-ಅಂಕ್ಡ್ಯಾಂತ್ 41.39% ಹಿಂದು, 41.29% ಕ್ರಿಸ್ತಾಂವ್, 8.40% ಮುಸ್ಲಿಂ, 7.78‍% ಸನಾಮಹಿ, 0.25% ಬುದ್ಧಿಸ್ತ್, ಉರ್ಲೆಲೆ 0.89% ಹೆರ್. ಸನಾಮಹಿ ಮ್ಹಳ್ಯಾರ್ ಪುರ್ವಜಾಂಚಿ ಪೂಜಾ ಕರ್ತೆಲ್ಯಾಂಚ್ಯೆಂ ಥಳೀಯ್ ಧರ್ಮ್. ಹೆ ಮೈಟೆ ಆದಿವಾಸಿ ದೆಕುನ್ ಹಿಂದ್ವಾಂಚ್ಯಾ ಲೇಕಾಂತ್ ಮೆಳಯ್ತಾತ್. ಮೈಟೆ ಸನಾಮಹಿ ಸಮುದಾಯಾಚ್ಯೆಂ ಎಕ್ ನಾಂವಾಡ್ದಿಕ್ ದೇವುಳ್, ಜೆಂ ಇಂಪಾಲಾಂತ್ ಆಸಾ, ತಾಚಿ ತಸ್ವೀರ್ ಸಕಯ್ಲ್ ಚಿಟ್ಕಾಯ್ಲ್ಯಾ.

2011 ಖಾನೆಸ್ಮಾರಿ ಪ್ರಮಾಣೆಂ, ಸಗ್ಳ್ಯಾ ಇಂಡಿಯಾಂತ್ ಸತ್ರಾ ಲಾಖ್ ಏಕ್-ಸಾಟ್ ಹಜಾರ್ ಮೈಟೆ ಲೋಕ್ ಆಸ್ಲೊ. ತಾಂತುಂ ಪಂದ್ರಾ ಲಾಖ್ ಬಾವೀಸ್ ಹಜಾರ್ ಜಣ್ (87.5%) ಮಣಿಪುರ್ ರಾಜ್ಯಾಂತ್ ಜಿಯೆತೆಲೆ. ಹ್ಯಾಂ ಪೈಕಿಂ ಮೈಟೆ ಕ್ರಿಸ್ತಾಂವ್ ಲಗ್ಬಗ್ 15% ಮ್ಹಣ್ಜೆ 2+ ಲಾಖ್ ಮ್ಹಣ್ ಅಂದಾಜ್.

ಗುಮಾನ್ ಕರ್ಚೊ ವಿಷಯ್ ಮ್ಹಳ್ಯಾರ್, 1961 ಆನಿಂ 2011 ಖಾನೆಸ್ಮಾರಿ ಲೇಕಾಂ ಪ್ರಮಾಣೆಂ, ಮಣಿಪುರಾಂತ್ ಹಿಂದು ಆಂಕ್ಡೆ 62% ಥಾವ್ನ್ ದೆಂವೊನ್ 41%ಕ್ ರಾವ್ಲೆ. ಕ್ರಿಸ್ತಾಂವ್ ಆಂಕ್ಡೆ 19% ಥಾವ್ನ್ ಚಡೊನ್ 41%ಕ್ ರಾವ್ಲೆ. ನಾಗಾ ಆನಿಂ ಕುಕಿ ಜನಾಂಗಾಂನಿಂ 98% ಕ್ರಿಸ್ತಾಂವ್. ಚಡಾವತ್ ಕ್ರಿಸ್ತಾಂವ್ ಬಾಪ್ತಿಸ್ತ್ ಪಂಗ್ಡಾಚ್ಯೆ, ಕತೊಲಿಕ್ ಭಾರಿ ಉಣೆ. ಹೊ ಲೋಕ್ ಏಕೊಣಿವಿಸಾವ್ಯಾ ಶೆಕ್ಡ್ಯಾಂತ್ ಕನ್ವೆಡ್ತರ್ ಜಾಲ್ಲೊ ಮ್ಹಣ್ ಕ್ರಿಸ್ತಾಂವ್ ಮಿಶನರಿ ಸಾಂಗ್ತಾತ್. ತರ್, ಕ್ರಿಸ್ತಾಂವಾಚ್ಯೆಂ ಅಂಕ್ಡೆ ಕಿತ್ಯಾಕ್ ಅಶೆ ವಾಡತ್ತ್ ಗೆಲ್ಯಾತ್? ಹೆಂ ಮೈಟೆಂಚ್ಯೆಂ ಸವಾಲ್!

ದೇಸ್ ವಿದೇಸಾಂತ್ ನಾಂವಾಡ್ದಿಕ್, ಬೊಕ್ಸಿಂಗ್ ಚಾಂಪಿಯನ್, ಮೇರಿ ಕೊಮ್ ಕುಕಿ-ಝೊ ಸಮುದಾಯಾಚಿ; ತಿ ಬಾಪ್ತಿಸ್ತ್ ಕ್ರಿಸ್ತಾಂವ್. ತಿಚ್ಯೆ ಜಿಣ್ಯೆ ಕಾಣಿಯೆಚ್ಯೆಂ ಬೊಲ್ಲಿವುಡ್ ಫಿಲ್ಮ್ ಆಸಾ. ಪ್ರಿಯಂಕಾ ಚೋಪ್ರಾನ್ ಭಾರಿ ಆಪುರ್ಬಾಯೆನ್ ಮೇರಿ ಕೊಮಾಚೊ ಪಾತ್ರ್ ವಹ್ಸಿಲಾ.

ನಾಗಾ ಕ್ರಿಸ್ತಾಂವ್ ತರ್‌ಯೀ, ತಾಂಚಿ ಆದಿವಾಸಿ ಸಂಸ್ಕ್ರತಿ ವಿಸ್ರೊಂಕ್ನಾಂತ್. ಸಕಯ್ಲೆಂ ಪಿಂತುರ್ ನಾಗಾ ಸಮುದಾಯಾಚ್ಯೆಂ ಸಾಂಪ್ರದಾಯಿಕ್ ನೆಸಣ್ ಆನಿ ನಾಚ್ ದಾಖಯ್ತಾ.

ಮಣಿಪುರಾಂತ್ ಮಾನವಿ ಹಕ್ಕಾಂಚ್ಯಾ ಉಲ್ಲಂಘನಾ ಚರಿತ್ರಾ:

ಮಾನವಿ ಹಕ್ಕಾಂಚ್ಯೆ ಉಲ್ಲಂಘನ್ ಮಣಿಪುರ್ ಫುಟೀರತಾವಾದಾಚ್ಚೊ ಪರಿಣಾಮ್ ಜಾವ್ನ್ 1960 ದಾಕ್ಟ್ಯಾ ಥಾವ್ನ್ ಸುರ್ವಾತ್ಲಾಂ. ಆಮ್ಚಿ ಆರ್ಮಿ, ಪಾರಾ-ಮಿಲಿಟರಿ ಶಿಬಂದಿ ಆನಿಂ ಪೋಲಿಸ್ ಕರ್ಮಚಾರಿ ಮಣಿಪುರ್ ಫುಟೀರತಾಂಕ್ ಬಂಧಿ ಕರುಂಕ್ ಬಂದುಕೆ-ರಾಜ್ ಲಾಗು ಕರ್ತಾತ್. ಹ್ಯಾಂ ಪ್ರೇತನಾಂನಿಂ ಜಾಯಿತ್ತೆ ಜೀವ್ ಗೆಲ್ಯಾತ್. ಜಾಯಿತ್ತ್ಯಾಂಕ್ ಚಿತ್ರ-ಹಿಂಸಾ ಪ್ರಕ್ರಿಯೆಂತ್ ಅಟ್ಕಾಂವ್ಕ್ Armed Forces Special Powers Act of 1958 (AFSPA) ವಾಪರ್ಲಾಂ. 1942 ಇಸ್ವೆಂತ್ ಬ್ರಿಟಿಶ್ ಸರ್ಕಾರಾನ್ ಹೊ ಕಾಯ್ದೊ ‘ಕ್ವೀಟ್ ಇಂಡಿಯಾ’ ಸತ್ಯಾಗ್ರಹಿಂಕ್ ಜಯ್ಲಾಂತ್ ಕುಡಾಂವ್ಚ್ಯಾ ಖಾತಿರ್ ಜ್ಯಾರಿ ಕೆಲ್ಲೊ. 1958 ಇಸ್ವೆಂತ್ ಸ್ವತಂತ್ರ್ ಭಾರತಾಚ್ಯಾ ಪಾರ್ಲಮೆಂಟಾನ್ ಹೊ ಕಾಯ್ದೊ ಪರತ್ ಮಂಜೂರ್ ಕೆಲೊ. ಜಮ್ಮು-ಕಾಶ್ಮಿರ್ ಮೆಳೊನ್ ಬಡ್ಗಾ-ಉದೆಂತಿಚ್ಯಾ ಸಾತ್ ರಾಜ್ಯಾಂನಿಂ ಹೊ ಕಾಯ್ದೊ ಲಾಗು ಕೆಲೊ. ಹ್ಯಾ ಕಾಯ್ದ್ಯಾ ಪ್ರಮಾಣೆಂ, ವೊರಂಟ್ ನಾಸ್ತಾನಾಂ ಕೊಣಾಕ್‌ಯೀ ದುಬಾವಾನ್ ಬಂಧಿ ಕರ್ಯೆತ್. ಕೊಡ್ತಿ ಮುಖಾರ್ ಹಾಜರ್ ಕರಿಜೆ ಮ್ಹಣ್ ನಾಂ. FIR ನೊಂದಿತ್ ಕರಿಜೆ ಮ್ಹಣ್ ನಾಂ. ಕೈದ್ ಕೆಲ್ಲ್ಯಾಂಕ್, ಸಮಕಾಲೀನ್ ಅಂತರ್ರಾಷ್ಟ್ರೀಯ್ ಮಾನವಿ ಹಕ್ಕಾಂಚ್ಯೆ ಸ್ಟೆಂಡರ್ಡ್ ನೀತಿ-ನ್ಯಾಯ್ ಲಾಗು ಜಾಯ್ನಾಂತ್. ವ್ಹರ್ಸಾನ್ ವ್ಹರ್ಸಾಂ, ಹೆ ಬಂಧಿ ಜಯ್ಲಾಂತ್ ಕುಸ್ತಾತ್!

ಸಂಯುಕ್ತ್ ರಾಷ್ಟ್ರ್ ಸಂಘಟನಾನ್ (UNO) ಹ್ಯಾ ಕಾಯ್ದ್ಯಾಚ್ಯೆಂ ಖಂಡನ್ ಕೆಲಾಂ. ಹೊ ಕಾಯ್ದೊ ಆಮಾನುಷ್ ಆನಿ ಆಧುನಿಕ್ ಅಂತರಾಷ್ಟ್ರೀಯ್ ಕಾನೂನಾಂಚೆಂ ಉಲ್ಲಂಘನ್ ಕರ್ತಾ, ಅಶೆಂ ಮ್ಹಣ್ತಾ UNO.  ಹೊ ಕಾಯ್ದೊ ರದ್ದ್ ಕರಿಜೆ ಮ್ಹಣ್ ಮಣಿಪುರ್ ಮಾನವಿ ಹಕ್ಕಾಂಚಿ ಝುಜಾರಿ, ಇರೊಮ್ ಚಾರು ಶರ್ಮಿಳಾನ್ 5 ನವೆಂಬ್ರ್ 2004 ಥಾವ್ನ್ 9 ಅಗೋಸ್ತ್ 2016 ಪರ‍್ಯಾಂತ್ ಸೊಳಾ ವ್ಹರ್ಸಾಂಚೊ ಉಪ್ವಾಸ್ ಕೆಲೊ. ಸಕಯ್ಲಿ ತಸ್ವೀರ್ ಚಾರು ಶರ್ಮಿಳಾಚಿ. ಪೋಲಿಸಾಂನಿಂ ತಿಕಾ ಕೈದ್ ಕರ್ನ್, ನಾಕಾ ಮುಖಾಂತ್ರ್ ಪೋಶಕ್ ದ್ರವ್ಯಾಂ ದೀವ್ನ್ ಜೀವ್ ದವರ್ಲೆಲೆಂ.

ಮಣಿಪುರಾಚ್ಯೆಂ ಪ್ರಸ್ತುತ್ ರಾಜ್‍ಕಾರಣ್:

ಸೆಂಟ್ರಲ್ ಇಂಪಾಲ್ ಕಣ್ವ್ಯಾ ವಠಾರಾಚ್ಯೆಂ ಕ್ಶೇತ್ರ್ ಕೇವಲ್ 10%. ಪೂಣ್, 57% ಮಣಿಪುರಿ ಲೋಕ್ ಹಾಂಗಾ ವಸ್ತಿ ಕರ್ತಾ. ಮಣಿಪುರ್ ಎಸೆಂಬ್ಲಿಂತ್ 60 ಬಸ್ಕಾ. ತಾಂತುಂ, ಹ್ಯಾ ಕಣ್ವ್ಯಾ ವಠಾರಾಂತ್ 40 ಎಸೆಂಬ್ಲಿ ಶೆತಾಂ ಆಸಾತ್. ಮೈಟೆ ಲೋಕ್ ಜೆರಾಲ್ ವರ್ಗಾಂತ್ಲೊ ದೆಕುನ್ ಹಿಂ ಅನಾರಕ್ಶಿತ್ ಶೆತಾಂ. 2022 ಫೆಬ್ರೆರ್- ಮಾರ್ಚ್ ಎಸೆಂಬ್ಲಿ ಚುನಾವೆಂತ್, 40 ಬಸ್ಕಾ ಪೈಕಿಂ ಮೈಟೆಂಕ್ 39 ಬಸ್ಕಾ ಲಾಭ್ಲ್ಯೊ. ಎಸೆಂಬ್ಲಿಂತ್ 31 ಬಸ್ಕಾ ಲಾಭ್ಲ್ಯಾರ್ ರಾಜ್ಯ್ ಸರ್ಕಾರ್ ಘಡ್ಯೆತ್. ದೆಕುನ್, ಸರ್ಕಾರಿ ಪದ್ವಿ ಮೈಟೆಂಚ್ಯಾ ಹಾತಾಂತ್ ಆಸಾ.

ಹ್ಯಾ ಕಣ್ವ್ಯಾ ವಠಾರಾಚ್ಯಾಂ ಬೊಂವಾರಿಂ, ದೊಂಗ್ರಾಳಿ ಸುವಾತ್ ಆಸಾ. ಮಣಿಪುರಾಚಿ 90% ಜಮೀನ್ ಹಿ. ಹಾಂಗಾಸರ್ 43% ಜನಾಂಗ್  ಜಿಯೆತಾ.  ತಾಂಕಾಂ ST ಸವ್ಲತ್ಯೊ ಆರಕ್ಶಿತ್ ಕೆಲ್ಯಾತ್. ಹಾಂಚ್ಯೆ ಖಾತಿರ್ ರಾಜ್ಯ್ ಎಸೆಂಬ್ಲಿಂತ್ 19 ಶೆತಾಂ ಆರಕ್ಶಿತ್ ಕೆಲ್ಯಾಂತ್. ನಾಗಾ ಆನಿಂ ಕುಕಿ ಜನಾಂಹಗಾಂಚ್ಯೊ  ಆಪ್ಲ್ಯೊಚ್ ಪ್ರಾದೇಶಿಕ್ ರಾಜಕೀಯ್ ಪಾಡ್ತಿ ಆಸಾತ್.

ಪ್ರಸ್ತುತ್ ಎಸೆಂಬ್ಲಿಂತ್ ಭಾಜಪಾ 32 ಬಸ್ಕಾ ಜಿಕೊನ್ ಪರತ್ ಪದ್ವೆರ್ ಆಯ್ಲಿ. ಭಾಜಪಾ ಮುಕೆಲಿ ಬಿರೆನ್ ಸಿಂಘ್ ಪರತ್ ಮುಖ್ಯ್‌‌‌‌‌ಮಂತ್ರಿ ಜಾಲೊ. ಹ್ಯಾ ಎಲಿಸಾಂವಾಂತ್ ಗುಮಾನಾಂತ್ ಘೆಜೆ ತಸ್ಲೊ ವಿಷಯ್  ಮ್ಹಳ್ಯಾರ್ ಚುನಾವಿ ಪ್ರಚಾರಾಂತ್ ಆಪುಣ್ AFSPA ರದ್ದ್ ಕರ್ತಾಂ ಮ್ಹಣ್ ಭಾಜಪಾನ್ ಮಾತ್ರ್ ಭಾಸವ್ಣಿ ದೀವ್ನಾ. ಹೆರ್ ಸರ್ವ್ ಪಾಡ್ತಿಂನಿಂ ತಶೆಂ ಭಾಸವ್ಣಿ ಕೆಲ್ಲಿ. ಭಾಜಪಾ ಮೈಟೆಂ ವರ್ವಿಂ ಜಿಕ್ಲಿ ದೆಕುನ್ ಮ್ಹಣ್ಯೆತ್ AFSPA ಕುಕಿ ಆನಿ ನಾಗಾ ವಿರುದ್ಧ್ ಜಾಲ್ಲ್ಯಾನ್ ಆಪ್ಣಾಚ್ಯಾ ಹಿತಾಚ್ಯೆಂ ಮ್ಹಣ್ ಮೈಟೆಂಕ್ ಭಗ್ತಾ.

2017 ಇಸ್ವೆ ಪೈಲೆಂ, ಮಣಿಪುರಾಂತ್ ಕೊಂಗ್ರೆಸ್ ರಾಜ್ಯ್ ಸರ್ಕಾರ್ ಆಸ್ಲೊ. ತವಳ್, ಮಣಿಪುರಾಚ್ಯಾ ಸಾತ್ ಎಸೆಂಬ್ಲಿ ಶೆತಾಂನಿಂ AFSPA ರದ್ದ್ ಕೆಲ್ಲೊ. 2022 ಚುನಾವೆಂತ್ ಜಿಕೊನ್ ಆಪ್ಲೊ ಸರ್ಕಾರ್ ಪದ್ವೆರ್ ಆಯ್ಲೊ ತರ್ ಸಗ್ಳ್ಯಾ ರಾಜ್ಯಾಂತ್ ಹೊ ಕರಾಳ್ ಕಾಯ್ದೊ ರದ್ದ್ ಕರ್ತೆಲ್ಯಾಂವ್. ಪೈಲ್ಯಾ ಕೆಬಿನೆಟ್ ಮೀಟಿಂಗಾಂತ್ ತುರಂತ್ ಆನಿ ಸಂಪೂರ್ಣ್ ರದ್ದ್ ಕರ್ಚೊ ನಿರ್ಧಾರ್ ಮಂಜೂರ್ ಕರ್ತೆಲ್ಯಾಂವ್. ಅಶೆಂ ಕೊಂಗ್ರೆಸ್ ಪಾಡ್ತಿನ್ ಭಾಸಯಿಲ್ಲೆಂ. ಹಿ ‘ಭಾಸವ್ಣಿ’ ಮೈಟೆಂಕ್ ರುಚೊಂಕ್ನಾಂ ಮ್ಹಣ್ ಚುನಾವಿ ಫಲಿತಾಂಶಾಂತ್ ಕಳ್ತಾ.

ಮಾನವಿ ಹಕ್ಕಾಂ ರಕ್ಶಣ್ ಸಂಘಟಣಾಂಚ್ಯೆ ಸಾಂದೆ AFSPA ರದ್ದ್ ಕರಿಜೆ ಮ್ಹಣ್ ಮಾಗ್ಣಿ ಕರೂನ್ ಪುರ್ಶಾಂವ್ ಕಾಡ್ತಾತ್ ತಿ ತಸ್ವೀರ್ ಸಕಯ್ಲ್ ಚಿಟ್ಕಾಯ್ಲ್ಯಾ.

2023 ಮಣಿಪುರ್ ಜಾತೀಯ್-ಧಾರ್ಮಿಕ್ ದಂಗೆ ಆನಿಂ ಹಿಂಸಾ:

2023 ಜುಲೈ 4 ಪರ‍್ಯಾಂತ್, ಹ್ಯಾಂ ದಂಗ್ಯಾಂನಿಂ 142 ಜಣಾಂಚೊ ಜೀವ್ ಗೆಲಾ. ತಿನ್ಶ್ಯಾಂ ವಯ್ರ್ ಜಣ್ ಘಾಯೆಲ್ಯಾತ್. 54,488 ಜಣ್ ಆಪ್ಲೆ ವಸ್ತೆ ಥಾವ್ನ್ ವಿಸ್ಕಳೀತ್ ಜಾಲ್ಯಾತ್. ಲಗ್ಬಗ್ ತೀನ್ ಮಹಿನ್ಯಾಂ ಥಾವ್ನ್ ಮಣಿಪುರ್ ಜಳ್ತಾ. ಮೋದಿಚೊ ಕೇಂದ್ರ್ ಸರ್ಕಾರ್ ಹೆ ದಂಗೆ ಥಾಂಬಂವ್ಕ್ ಅಸಫಳ್ ಜಾಲಾ. ಪ್ರತ್ಯೇಕ್ ಜಾವ್ನ್ ಪ್ರಧಾನಿ ಮೋದಿ ಉಲಯಿಚ್ ನಾಂ. ತೊ ಬಿಲ್ಕುಲ್ ಮೊನೊ ಜಾಲಾ. ಪರ್ಗಾಂವಾಂನಿಂ ಭೊಂವ್ತಾ, ಪೂಣ್, ಮಣಿಪುರಾಕ್ ವಚೊನ್ ಜಖ್ಮಾಂ ಭರುಂಕ್ ತಾಚ್ಯೆ ಕಡೆ ವೇಳ್ ನಾಂ.

ಹ್ಯಾಂ ದಂಗ್ಳಿಂಚಿ ಪಾರ್ಶ್ವ-ಭೂಮಿ ಕಿತೆಂ? ಕಿತ್ಯಾಕ್ ಹೆ ದಂಗೆ ಸುರ್ವಾತ್ಲೆ?

2023 ಅಪ್ರೆಲ್ 14ವ್ಯೆರ್, ಮಣಿಪುರ್ ಹೈ-ಕೊಡ್ತಿನ್ ಕಣ್ವ್ಯಾಂತ್ಲ್ಯಾಂ ಮೈಟೆಂಕ್ ಅನುಸೂಚಿತ್ ಜಮಾತಿಂಚ್ಯೆ (ಪರಿಶಿಷ್ಟ್ ಪಂಗ್ಡಾಂಚ್ಯೆ) ಮ್ಹಣ್ ರಾಜ್ಯ್ ಸರ್ಕಾರಾನ್ ಮಾಂದುನ್ ಘೆಜೆ ಮ್ಹಳ್ಳೆಂ ತೀರ್ಪ್ ದಿಲ್ಲೆಂ. ಸುಪ್ರೀಮ್ ಕೊಡ್ತಿನ್ ಹೈ-ಕೊಡ್ತಿಚ್ಯೆಂ ಹೆಂ ತೀರ್ಪ್ ಚುಕಿಚ್ಯೆಂ ಮ್ಹಣ್ ತೀರ್ಪ್ ದಿಲೆಂ. ಹೈ-ಕೊಡ್ತಿಚ್ಯಾ ತೀರ್ಪಾ ವಿರುದ್ಧ್, All Tribal Students’ Union Manipur ಹಾಣಿಂ 2023 ಮಾಯ್ 3ವ್ಯೆರ್ ಶಾಂತತಾಯೆನ್ ಅಂದೋಲನ್ ಕರುಂಕ್ ಉಲೊ ದಿಲೊ. ಪುಡ್ಲ್ಯಾ ದೀಸಾ, ಮೈಟೆ ಗ್ರೂಪಾಂನಿಂ ಕುಕಿ ಹಳ್ಳೆಂಕ್ ವೆಚ್ಯೆ ಸರ್ವ್ ರಸ್ತೆ ಬಂಧ್ ಕೆಲೆ. ಶಾಂತಿಪೂರ್ಣ್ All Tribal Students ಪ್ರತಿರೋದ್ ಚಲ್ತಾನಾ, ಮೈಟೆ ಗುಂಡಾಂನಿಂ Anglo-Kuki Centenary Gate ಜಳಯ್ಲಿ. ಕುಕಿ ಘರಾಂಕ್ ಉಜೊ ಲಾಯ್ಲೊ. ಭಾಜಪಾಚ್ಯಾ ರಾಜ್ಯ್ ಸರ್ಕರಾನ್ ರಾನಾಂಚಿ ಸರ್ವೇ ಕರಯ್ಲಿ. ಕುಕಿ ಲೋಕ್ ರಾನಾಂನಿ ಕಸ್‍ಕಸ್ (ಪೊಪ್ಪಿ)ಚಿ ಕೃಶಿ ಕರ್ತಾ ಮ್ಹಣ್ ಆರೋಪ್ ಲಾಯ್ಲೊ. ಮಾಧಕ್ ದ್ರವ್ಯಾಂ ವಿರುದ್ಧ್ ಹೆಂ ಸರ್ಕಾರಿ ಕ್ರಮ್ ಮ್ಹಣ್ ಪ್ರಚಾರ್ ಕೆಲೊ.

The Manipur Land Revenue and Reforms Act – 1960 ಪ್ರಮಾಣೆಂ, ಆದಿವಾಸಿ ಜಮೀನ್ ಅನ್-ಆದಿವಾಸಿಂಕ್ ಹಸ್ತಾಂತರಣ್ ಅಡ್ವರ್ಲಾಂ ದೆಕುನ್ ಮೈಟೆಂಕ್ ಕಣ್ವೊ ಸೊಡ್ನ್ ದೊಂಗ್ರಾಳ್ಯೆ ಜಮೀನೆರ್ ಆಸ್ತ್ ಘೆಂವ್ಕ್ ಜಾಯ್ನಾ. ಆದಿವಾಸಿ ಲೋಕಾಕ್, ಕುಕಿ ಆನಿ ನಾಗಾ, ವಸ್ತಿ ಕರುಂಕ್ ಇಸ್ಕಳ್ ಜಮೀನ್ ಆಸಾ. ಕಣ್ವ್ಯಾಂತ್ ಆಸ್ತ್ ಘೆವ್ನ್ ಥೈಂಸರ್ ಘರ್-ವಸ್ತಿ ಕರುಂಕ್ ನಾಗಾ ಆನಿ ಕುಕಿ ಲೊಕಾಕ್ ಸ್ವತಂತ್ರ್ ಆಸಾ. ಕುಕಿ ಆಪ್ಣಾಕ್ ಕಣ್ವ್ಯಾಂತ್ ಯೇಂವ್ಕ್ ನಾಕಾ ಮ್ಹಣ್ತಾತ್ ತರ್‌ಯೀ ದೊಂಗ್ರಾಳ್ಯಾ ವಠಾರಾಂತ್ ಬರೆ ರಸ್ತೆ ನಾಂತ್, ಇಸ್ಕೊಲಾಂ ಆನಿ ಅಸ್ಪತ್ರ್ಯೊ ನಾಂತ್ ದೆಕುನ್ ಯೇಜೆಚ್ ಪಡ್ತಾ. ವಯ್ಲ್ಯಾನ್ ರಾಜಕೀಯ್ ಅಧಿಕಾರ್ ಮೈಟೆ ಲೊಕಾಚ್ಯಾ ಹಾತಾಂತ್ ಆಸಾ ದೆಕುನ್ ಅಭಿವೃದ್ಧಿ ಖಾತಿರ್ ಸರ್ಕಾರಿ ಖರ್ಚ್ ಕಣ್ವ್ಯಾ ಸುವಾತೆರ್ ಜಾತಾ. ದೊಂಗ್ರಾಳ್ಯಾಂ ವಠಾರಾಂನಿಂ ಅಭಿವೃದ್ಧಿ ಜಾಯ್ನಾಂ ಮ್ಹಣ್ಚೆಂಯೀ ಆದಿವಾಸಿ ಜನಾಂಗಾಚ್ಯೆಂ ಏಕ್ ದೂರ್.

ಮಣಿಪುರಾಂತ್ ಕ್ರಿಸ್ತಾಂವ್ ವಿರೋಧಿ ಚಳ್‍ವಳ್:

ಕುಕಿ ಲೋಕ್ ಕ್ರಿಸ್ತಾಂವ್ ದೆಕುನ್ ಮಣಿಪುರಾಚ್ಯೆಂ ಅಂತರಿಕ್ ಝುಜ್ ದೋನ್ ಜಾತಿಂ ಮಧ್ಲೆಂ ಮಾತ್ರ್ ನಹಿಂ, ಬಗಾರ್ ಕ್ರಿಸ್ತಾಂವ್-ವಿರುದ್ಧ್ ಧಾರ್ಮಿಕ್ ದ್ರುವೀಕರಣಾಕ್ ಕಾರಣ್ ಜಾವ್ನಾಸಾ. ಅಯ್ಲೆವಾರ್, ಭಾಜಪಾ ಸರ್ಕಾರಾಂನಿಂ ಹೆಂ ದ್ರುವೀಕರಣ್ ವಾಡೊಂಕ್ ಪ್ರೇತನ್ ಕೆಲಾಂ ಶಿವಾಯ್ ಎಕ್ವಟಾಂವ್ಕ್ ಮಿನತ್ ಘೆವ್ನಾಂ.

Manipur Public Premises (Eviction of Unauthorised Occupants) Act – 1978 ಹೊ ಕಾಯ್ದೊ ವಾಪ್ರುನ್, ಕುಕಿ ವಠಾರಾಂನಿಂ ಬಾಂದ್ಲೆಲ್ಯೊ ಇಗರ್ಜ್ಯೊ ಗೈರ್-ಕಾನೂನಿ ಮ್ಹಣ್ ಆಯ್ಲೆವಾರ್ ಭಾಜಪಾ ಸರ್ಕಾರಾನ್ ನೋಟಿಸಾಂ ದಿಲಿಂ. 2011 ಇಸ್ವೆಂತ್ 188 ಘೈರ್ ಕಾನೂನಿ ಹಿಂದು ದಿವ್ಳಾಂ ನಿಯಮಿತ್ ಕೆಲಿಂ ತರ್‌ಯೀ ಏಕ್‍ಚ್ ಏಕ್ ಇಗರ್ಜ್ ನಿಯಮಿತ್ ಕೆಲಿನಾಂ ಮ್ಹಣ್ ಕ್ರಿಸ್ತಾಂವಾಂಚಿ ಬೆಜಾರಾಯ್.

2023 ಫೆಬ್ರೆರಾಂತ್, ಹಿಂದುತ್ವಾವಾದಿ ಭಾಜಪಾ ರಾಜ್ಯ್ ಸರ್ಕಾರಾನ್ ಕ್ರಿಸ್ತಾಂವ್ ಆನಿ ಇಗರ್ಜಿಂಚಿ ನವಿ ಸರ್ವೇ ಸುರು ಕೆಲಿ. ಹೆ ಅಂಕ್ಡೆ ಜಮಯ್ತಚ್, ಮಾರ್ಚ್ 9ವ್ಯೆರ್ ಜಾಯಿತ್ತ್ಯಾಂ ಮಿಶನರಿಂಕ್ ಕೈದ್ ಕೆಲೆಂ. ಸಕ್ಟಾಂಕ್ ಭೆಸ್ಟಾಯ್ಲೆಂ. ಹಿಂದು ಗುಂಪು ರಚ್ಲೆ ಆನಿ ಕ್ರಿಸ್ತಾಂವಾಂ ವಿರುದ್ಧ್ ಹಲ್ಲೆ ಕರುಂಕ್ ಯೆವ್ಜಣ್ ಕೆಲಿ. Arambai Tenggol ಮ್ಹಳ್ಳೊ ಹಿಂದುತ್ವಾ ಹಿಂಡ್ ಹ್ಯಾಂ ಪೈಕಿಂ ಸಕ್ಟಾಂ ಪ್ರಾಸ್ ಮುಖಾರ್.

ಹೈ-ಕೊಡ್ತಿಚ್ಯೆಂ ತೀರ್ಪ್ ಆಯಿಲ್ಲೆಂಚ್, ದೊಂಗ್ರಾಳ್ಯಾಂ ವಠಾರಾಂನಿಂ ‘ಸರ್ಕಾರಿ ರಾನಾಂ ಜಮೀನ್’ ಮ್ಹಣ್ ಸರ್ವೇ ಸುರ್ವಾತ್ಲಿ. ಶೆಕ್ಡ್ಯಾಂ ಪೈಲೆಂಚ್ಯಾ ಪುರ್ವಜಾಂ ಥಾವ್ನ್ ಕುಕಿ ಜನಾಂಗ್ ಜಿಯೊನ್ ಆಸ್ಲೆಲಿ ಜಮೀನ್ ತಾಂಚಿ ನಹಿಂ ಬಗಾರ್ ಸರ್ಕಾರಿ ಅರಕ್ಶಿತ್ ರಾನಾಂ ಮ್ಹಣ್ ಫರ್ಮಾಣ್ ದಿಲೆಂ. ಹಜಾರಾಂನಿಂ ಕುಕಿ ಘರಾಂ ವಿಭಾಡ್ಲಿಂ. ಲಗ್ಬಗ್ 230 ಇಗರ್ಜ್ಯೊ ಮೊಡ್ಲ್ಯೊ. 1000 ಕ್ರಿಸ್ತಾಂವ್ ಘರಾಂ ಜಳಯ್ಲಿಂ. ಪ್ರತಿರೋದ್ ಕೆಲ್ಲ್ಯಾಂ 60 ಕ್ರಿಸ್ತಾಂವಾಂಚ್ಯೆ ಜೀವ್ ಗೆಲೆ. ಧಾ ಹಜಾರ್ ಕ್ರಿಸ್ತಾಂವ್ ಆಪ್ಲ್ಯಾಂ ಘರಾಂ ಥಾವ್ನ್ ಮೆಕ್ಳೆ ಜಾಲೆ.  ಕಣ್ವ್ಯಾಂ ಥಾವ್ನ್ ಕ್ರಿಸ್ತಾಂವಾಂಕ್ ಧಾಂವ್ಡಾಂವ್ಚ್ಯೆಂ ಪ್ರೇತನ್ ಹ್ಯಾಂ ಹಿಂದುತ್ವಾವಾದಿ ಸಂಘಟನಾಂಚ್ಯೆಂ.

ಭಾಜಪಾ ರಾಜ್ಯ್ ಸರ್ಕಾರಾಚಿ ಬೆಕಾಯ್ದಾ ಸ್ಥಳಾಂತರಿತಾಂಕ್ ಭಾಯ್ರ್ ಲೊಟ್ಚಿ ನೀತ್:

Churachandpur, Kangpokpi ಆನಿಂ Tengnoupal ಜಿಲ್ಲ್ಯಾಂನಿಂ ಮ್ಯಾನ್‍ಮಾರ್ ನಾಗ್ರಿಕ್ ಯೇವ್ನ್ ಘುಸ್-ಬೈಟ್ ಜಾಲ್ಯಾತ್ ಮ್ಹಣ್ 2022 ಎಲಿಸಾಂವಾಂ ಉಪ್ರಾಂತ್ ಪರತ್ ಪದ್ವೆರ್ ಆಯಿಲ್ಲ್ಯಾ ಭಾಜಪಾ ಸರ್ಕಾರಾನ್ ರಾನಾಂನಿ ವಸ್ತಿ ಕೆಲ್ಲ್ಯಾ ಅದಿವಾಸಿಂಕ್ ಬಂಧಿ ಕರುಂಕ್ ಸುರ್ವಾತ್ಲೆಂ. ಹಿ ಮೈಟೆ ಲೊಕಾಚಿ ಘುಟ್ಮೊಳ್  ಮ್ಹಣ್ ಆದಿವಾಸಿಂನಿಂ ವಾದ್ ಮಾಂಡ್ಲೊ. ಮಣಿಪುರಾಂತ್ ಅಸ್ಸಮಾ ಭಾಶೆನ್ NRC ಪಟ್ಟಿ ಕರಿಜೆ. 1951 ಇಸ್ವೆ ಉಪ್ರಾಂತ್ ದೊಂಗ್ರಾಳ್ಯೆ ಸುವಾತೆಂನಿಂ ವಸ್ತಿ ಕರುಂಕ್ ಆಯಿಲ್ಲೆ ಬೆಕಾಯ್ದಾ ಸ್ಥಳಾಂತರಿತ್ ಜಣ್ ಮ್ಹಣ್ ಓಳ್ಕಾಜೆ. ತಾಂಕಾಂ ರಾಜ್ಯಾ ಥಾವ್ನ್ ಭಾಯ್ರ್ ಕಾಡಿಜೆ. ಹ್ಯಾ ಲೋಕಾಚ್ಯಾ ಹಾತಾಂ ಥಾವ್ನ್ ಸರ್ಕಾರಿ ರಾನಾಂಚಿ ಸೊಡ್ವಣ್ ಕರಿಜೆ. ಕಸ್‍ಕಸ್ ಕೃಶಿ ಬಂಧ್ ಕರಿಜೆ. ಅಶೆಂ ಪ್ರಚಾರ್ ಜಾಲೊ. ಹ್ಯಾಚ್ ನೀತಿ ಪ್ರಮಾಣೆಂ, 2023 ಅಪ್ರೆಲ್ 11ವ್ಯೆರ್ ತೀನ್ ಇಗರ್ಜ್ಯೊ ಬೆಕಾಯ್ದಾ ಬಾಂದ್ಪಾಂ ಮ್ಹಣೊನ್ ಮೊಡ್ಲ್ಯೊ.

2023 ಅಪ್ರೆಲ್ 20 ತಾರಿಕೆರ್ ಮಣಿಪುರ್ ಹೈ-ಕೊಡ್ತಿಚ್ಯೆಂ ಫರ್ಮಾಣ್ ಆಯ್ಲೆಂ: ಮೈಟೆ ಲೋಕಾಕ್ ಪರಿಶಿಷ್ಟ್ ಪಂಗಡ್ ಪಟ್ಟೆಂತ್ ಘಾಲಿಜೆ ಮ್ಹಣ್. ಅಶೆಂ ಜಾಲ್ಯಾರ್, ಮೈಟೆ ಲೋಕ್ ದೊಂಗ್ರಾಳ್ಯೆ  ಸುವಾತೆಂನಿಂ ಭುಂಯ್ ಘೆವ್ನ್ ವಸ್ತಿ ಕರ್ತೆಲೆ ಮ್ಹಣ್ ಕುಕಿ ಭಿಂಯೆಲೆ. ಹ್ಯಾ ಫರ್ಮಾಣಾ ವಿರುದ್ಧ್, 2023 ಅಪ್ರೆಲ್ 28ವ್ಯೆರ್ ಆದಿವಾಸಿ ಪಂಗ್ಡಾಂನಿಂ ‘ಮಣಿಪುರ್ ಬಂಧ್’ ಕರುಂಕ್ ಉಲೊ ದಿಲೊ. ಹ್ಯಾ ದೀಸಾ, ಮುಖ್ಯ್ ಮಂತ್ರಿ ಬಿರೆನ್ ಸಿಂಘ್ ಚುರಾಚಂದ್‍ಪುರಾಂತ್ ಏಕ್ ಜಿಮ್ ಉದ್ಗಾಟನ್ ಕರುಂಕ್ ಆಸ್ಲೊ. ಪುಡ್ಲ್ಯಾ ದೀಸಾ, ತೆಂ ಜಿಮ್ ಜಳಯ್ಲೆಂ. ವಠಾರಾಂತ್ ಸೆಕ್ಶನ್ 144 ಕರ್ಫ್ಯು ಘಾಲೊ. ಪಾಂಚ್  ದೀಸ್ ಇಂಟರ‍್ನೆಟ್ ಬಂಧ್ ದವರ್ಲೆಂ. ಬಿರೆನ್ ಸಿಂಘಾನ್ ಕುಕಿಂಕ್ ‘ಆತಂಕ್‍ವಾದಿ’ ಮ್ಹಣ್ ಬಿಲ್ಲೊ ದಿಲೊ. ಟ್ವಿಟ್ಟರ್ ಆನಿ ಟಿವಿ ಮಾಧ್ಯಾಮಾಂನಿಂ ಕುಕಿಂಕ್ ‘ಬೂದ್ ಶಿಕಯ್ತಲೊಂ’ ಮ್ಹಣ್ ಭೆಸ್ಟಾವ್ಣೆಂ ಸಯ್ತ್ ತಾಣೆಂ ದಿಲೆಂ. ತಾಚ್ಯಾ ಅಪ-ಪ್ರಚಾರಾ ವರ್ವಿಂ ರಾಜ್ಯಾಂತ್ ಸಮಧಾನ್ ಅನಿಕೀ ಬಿಗಡ್ಲೆಂ.

ಕುಕಿ ಜನಾಂಗಾಚಿ ಪ್ರತಿಕ್ರಿಯಾ: 

All Tribal Student Union Manipur (ATSUM) ಹಾಣಿಂ 2023 ಮಾಯ್ 3-ವ್ಯೆರ್ ‘Tribal Solidarity March’ ಮ್ಹಳ್ಳೊ ಪುರ್ಶಾಂವ್ ಕಾಡ್ಲೊ, ಹೈ-ಕೊಡ್ತಿಚ್ಯಾ ಫರ್ಮಾಣಾ ವಿರುದ್ಧ್. ಸಾಟ್ ಹಜಾರಾಂಕ್ ಮಿಕ್ವೊನ್ ಕುಕಿನಿಂ ಭಾಗ್ ಘೆತ್ಲೊ. ಚುರಾಚಂದ್‍ಪುರಾಂತ್ ಹಿಂಸಾ ಜಾಲಿ. ಹ್ಯಾ ಹಿಂಸಾ-ನಡ್ತ್ಯಾಂತ್ ಕುಕಿ ಘರಾಂ ಆನಿ ಇಗರ್ಜ್ಯೊ ಜಳಯ್ಲ್ಯೊ. ಇಂಪಾಲಾಂತ್ 500 ಕುಕಿ ಲೋಕ್ ಭಿಂಯೆವ್ನ್ ಲಂಪೆಲ್‍ಪಟ್ ಶೆರಾಕ್ ಪೊಳೊನ್ ಗೆಲೊ. ಬಿಶ್ಣುಪುರ್, ಕಾಂಗ್ಪೊಕ್ಪಿ, ಚುರಾಚಂದ್‍ಪುರ್, ಕಾಕ್ಚಿಂಗ್, ಕಾಂಚಿಪುರ್, ಸೊಯ್ಬಮ್ ಲೇಯ್ಕಾಯ್, ತೆಂಗ್‍ನೌಪಲ್, ಲಂಗೊಲ್, ಆನಿಂ ಹೆರ್ ಲ್ಹಾನ್ ವಠಾರಾಂನಿಂ ಹಿಂಸಾ ಜಾಲಿ. ಘರಾಂಕ್ ಉಜೊ ಲಾಯ್ಲೊ. ಇಗರ್ಜ್ಯೊ ಆನಿ ದೇವುಳಾಂ ಜಳಯ್ಲ್ಯೊ.

2023 ಮಾಯ್ 4ವ್ಯೆರ್, ಪೋಲಿಸಾಂನಿಂ ಲೋಕಾ-ಜಮ್ಯಾಂ ವಯ್ರ್ ಗೋಳಿಬಾರ್ ಕರಿಜೆ ಪಡ್ಲೆಂ. ಚುರಾಚಂದ್ಪುರ್ ಶಾಸಕಾಚ್ಯಾ ಕಾರಾಚ್ಯೆರ್ ಹಲ್ಲೊ ಜಾಲೊ. ತಾಚೊ ಏಕ್ಲೊ ಸಾಂಗಾತಿ ಮೆಲೊ. ಶಾಸಕ್ ಘಾಯಾಳ್ ಜಾಲೊ. ಹ್ಯಾ ಹಿಂಸಾತ್ಮಕ್ ನಡ್ತ್ಯಾಂ ವರ್ವಿಂ 1700 ಘರಾಂ, ಹಜಾರೊಂ ವಾಹನಾಂ ಆನಿಂ ಮಾಗ್ಣ್ಯಾಂ-ಘರಾಂ ನಾಸ್ ಜಾಲಿಂ ಮ್ಹಣ್ ಸರ್ಕಾರಿ ಹಿಸೊಪ್ ದಿಲಾ.

ಮಾಯ್ 29-ವ್ಯೆರ್, ಹಜಾರೊಂ ಕುಕಿ, ಮಿಝೊ ಅನಿ ಝೊಮಿ ಕುಳಿಯೆಚ್ಯಾ ಸ್ತ್ರೀಯಾಂನಿಂ ದಿಲ್ಲಿಂತ್ ಜಂತರ್ ಮಂತರ್ ಸುವಾತೆರ್ ಮೋರ್ಚಾ ಕಾಡ್ಲೊ. ರಾಜ್ಯ್ ಸರ್ಕಾರಾನ್ ಕುಕಿ ಗಾಂವ್‍ಕಾರಾಂಕ್ ತಾಂಚ್ಯಾಂ ರಾನಾಂ -ಜಮೀನೆ ಥಾವ್ನ್ ನಿಕ್ಳಾವ್ನ್ ಕುಳಿಯಾಂ ಮಧೆಂ ತಾಣ್ ವಾಡಯ್ಲೆಂ ಮ್ಹಣ್ ಆರೋಪ್ ಮಾಂಡ್ಲೊ. ಕೇಂದ್ರ್ ಸರ್ಕಾರಾನ್ ಫಾವೊತಿಂ ಮೇಟಾಂ ಘೆಜೆ ಮ್ಹಣ್ ಪೊರಾತ್ಲೆಂ.

ತವಳ್‍ಚ್, 21 ವ್ಹರ್ಸಾಂಚ್ಯಾ ಏಕಾ ಕುಕಿ ತರ್ನಟ್ಯಾಕ್ ಪೋಲಿಸ್ ಕಸ್ಟಡಿಂತ್ ಆಸ್ತಾನಾಂಚ್ ಮೈಟೆ ಗುಂಡಾಂನಿಂ ಲಿಂಚಿಂಗ್ ಕೆಲೆಂ ಮ್ಹಣ್ ಕುಕಿ ಪೋಲಿಸಾಂ ವಿರುದ್ಧ್ ಆರೋಪ್ ಕರ್ತಾತ್. ಹ್ಯಾ ತರ್ನಾಟ್ಯಾನ್ ಮುಖ್ಯ್ ಮಂತ್ರಿ ಬಿರೆನ್ ಸಿಂಘಾ ವಿರುದ್ಧ್ ಏಕ್ ಸಮಾಜಿಕ್ ಪೊಸ್ಟ್ ‘ಶೇರ್’ ಕೆಲಾ ಮ್ಹಣ್ ಆರೋಪ್ ಲಾವ್ನ್ ಕೈದ್ ಕೆಲ್ಲೊ. ಜೂನ್ 17ವ್ಯೆರ್, ಇಂಪಲಾ ಆರ್ಚ್-ಬಿಸ್ಪಾನ್ 249 ಇಗರ್ಜ್ಯೊ ಜಳಯ್ಲ್ಯಾತ್ ಮ್ಹಣ್ ವರ್ಧಿ ದಿಲಿ. ಹ್ಯಾಂ ಘಡಿತಾಂ ವರ್ವಿಂ, ಕುಕಿ ಲೋಕ್ ಚಾಳ್ವಲೊ. ಪರಿಣಾಮ್ ಜಾವ್ನ್, ಜುಲೈ 27ವ್ಯೆರ್ ದೋನ್ ಪಂಗ್ಡಾಂ ಮಧೆಂ ಗೋಳಿಬಾರ್ ಚಲ್ಲೆಂ.

ಆರ್ಮಿ ತೈನಾತಿ ಆನಿ ಜಮ್ಯಾಂಚ್ಯೆಂ ಸ್ಥಳಾಂತರ್: 

ಅನ್-ಅದಿವಾಸಿ ಜಿಲ್ಲ್ಯಾಂನಿಂ –  Imphal West, Kakching, Thoubal, Jiribam, ಆನಿಂ Bishnupur – ತಶೆಂಚ್, ಆದಿವಾಸಿ ಜಿಲ್ಲ್ಯಾಂನಿಂ – Churachandpur, Kangpokpi, ಆನಿಂ Tengnoupal – ಹ್ಯಾ ಆಟ್ ಜಿಲ್ಲ್ಯಾಂನಿಂ ಇಂಡಿಯನ್ ಆರ್ಮಿನ್ ಕರ್ಫ್ಯು ಜ್ಯಾರಿ ಕೆಲೊ. ಮಾಯ್ 4-ವ್ಯೆರ್, ‘shoot at sight order’ ಆಯ್ಲೆಂ. 9 ಹಜಾರ್ ಲೋಕಾಕ್ ಸುರಕ್ಶಿತ್ ಥಳಾಂಕ್ ಸ್ಥಳಾಂತರ್ ಕೆಲೆಂ. ಉಪ್ರಾಂತ್ಲ್ಯಾಂ ದೋನ್ ದಿಸಾಂನಿಂ 43 ಹಜಾರ್ ಲೋಕಾಕ್ ಸ್ಥಳಾಂತರ್ ಕರಿಜೆ ಪಡ್ಲೆಂ. ಸಗ್ಳ್ಯಾ ರಾಜ್ಯಾಂತ್ ಧಾ ಹಜಾರ್ ಆರ್ಮಿ, ಪಾರಾ-ಮಿಲಿಟರಿ ಆನಿ ಸೆಂಟ್ರಲ್ ಆರ್ಮ್‍ಡ್ ಪೋಲಿಸ್ ಫೊರ್ಸ್ ಕಾನೂನ್ ಆನಿ ಸುವ್ಯವಸ್ಥಾ ಸಾಂಭಾಳ್ಚ್ಯಾ ಡ್ಯೂಟೆರ್ ಲಾಗಯ್ಲೆಂ.

ಕುಕಿ ಸ್ತ್ರೀಯಾಂಕ್ ನಾಗ್ಡೆ ಪೆರೇಡ್ ಕೆಲ್ಲೊ ವಿಡಿಯೊ ವಾಯ್ರಲ್ ಜಾಲ್ಲ್ಯಾ ತಕ್ಶಣ್ ಸುಪ್ರಿಂ ಕೊಡ್ತಿನ್ ಕೇಂದ್ರ್ ಸರ್ಕಾರಾಕ್ ಚೆತಾವ್ಣಿ ದಿಲಿ. ಸರ್ಕಾರಿ ಕ್ರಮ್ ಘೆತ್ಲೆಂ ನಾಂ ತರ್ ಕೊಡ್ತ್ ಕ್ರಮ್ ಘೆತೆಲಿ ಮ್ಹಳೆಂ. ದೆಕುನ್, 80 ದೀಸ್ ಮೊನೊ ರಾವ್ಲಲ್ಯಾ ಮೋದಿನ್ ಆಖ್ರೆಕ್ ತೊಂಡ್ ಉಗ್ತೆಂ ಕೆಲೆಂ, ಥೈಂಯೀ ಥೊಡ್ಯಾ ಸೆಕುಂದಾಂಕ್.

ಜುಲೈ 20-ವ್ಯೆರ್, ಹ್ಯಾ ಸ್ತ್ರೀಯೆಂಚ್ಯೆರ್ ಅತ್ತ್ಯಾಚಾರ್ ಕೆಲ್ಲ್ಯಾ ಗುನ್ಯಾಂವಾ ಖಾತಿರ್ ಚಾರ್ ಜಣಾಂಕ್ ಬಂಧಿ ಕೆಲಾಂ ಮ್ಹಣ್ ಮಣಿಪುರ್ ಪೋಲಿಸಾಂನಿಂ ಮಾಧ್ಯಾಮಾಂಕ್ ಕಳಯ್ಲೆಂ. 22ವ್ಯೆರ್ ಏಕ್ಲ್ಯಾಕ್ ಆನಿ 23ವ್ಯೆರ್ ಅನ್ಯೆಕ್ಲ್ಯಾ ನಾ-ಬಾಲಿಕ್ ಅಫ್ರಾದ್ಯಾಕ್ ಬಂದಿ ಕೆಲೆಂ.

ರಾಹುಲ್ ಗಾಂಧಿಚಿ ಮಣಿಪುರ್ ಭೆಟ್:

ಜೂನ್ 29-ವ್ಯೆರ್ ರಾಹುಲ್ ಗಾಂಧಿ ಮಣಿಪುರ್ ಭೆಟೆರ್ ಗೆಲೊ. ಚುರಾಚಂದ್‍ಪುರ್ ವಠಾರಾಂನಿಂ ಪೀಡಿತ್ ಲೋಕಾಕ್ ತೊ ಮೆಳ್ಳೊ. ತಾಂಕಾಂ ಭುಜ್ವಣ್ ತಾಣೆಂ ದಿಲಿ. ಜರ್ ರಾಹುಲ್ ಮಣಿಪುರ್ ವಚೊಂಕ್ ಸಕ್ತಾ ತರ್ ಮೋದಿ ಕಿತ್ಯಾಕ್ ವಚಾನಾಂ ಮ್ಹಳ್ಳಿಂ ಸವಲಾಂ ಹ್ಯೆ ಭೆಟೆ ವರ್ವಿಂ ಉಠ್ಲಿಂ. ಹ್ಯೆ ಭೆಟೆ ವಿಷಿಂ ಕೊಂಗ್ರೆಸ್ ಪಾಡ್ತ್ ಆನಿ ಭಾಜಪಾ ಮಧೆಂ  तु तु मे मे  ಶಿವಾಯ್ ವ್ಹಡ್ ಫಾಯ್ದೊ ಜಾಲೊ ನಾಂ. ಕಿತ್ಯಾಕ್ ವಿರುದ್ಧ್ ಪಾಡ್ತಿಂಚ್ಯೆಂ ಆಯ್ಕೊಂಚ್ಯೆ ತಿತ್ಲಿ ನಮ್ರತಾ ಮೋದಿಕ್ ಆನಿ ತಾಚ್ಯಾ ಸರ್ಕಾರಾಕ್ ನಾಂ.

ಮಣಿಪುರ್ ಕೆದಾಳಾ ಪರ‍್ಯಾಂತ್ ಜಳ್ತಲೆಂ?

ವಯ್ರ್ ವರ್ಣನ್ ಕೆಲ್ಲ್ಯಾ ಸರ್ಕಾರಿ ಫವ್ಜೆಂನಿಂ ಮಣಿಪುರಾಂತ್ ಹಿಂಸಾ ಥೊಡ್ಯಾ ಮಟ್ಟಾಕ್ ರಾವಯ್ಲ್ಯಾ. ತರ್‌ಯೀ, ಹೆಣೆಂ ತೆಣೆಂ, ತವಳ್ ತವಳ್ ಝುಜಾಂ ಚಲ್ತಾತ್. ಮೈಟೆ ಆನಿ ಕುಕಿ ಜನಾಂಗಾಂ ಕಡೆ ಜಾಯಿತ್ತಿಂ ಆಧುನಿಕ್ ಹಾತೆರಾಂ ಆಸಾತ್, ಓಟೊಮೇಟಿಕ್ ಬಂದುಕೊ ಸಯ್ತ್.  ತಶೆಂ ಬರ್ಮಾ ಥಾವ್ನ್ ಝುಜಾರಿ ಆನಿ ಹಾತೆರಾಂ ತಸ್ಕರಿ ಗ್ರೂಪ್ ಘೆವ್ನ್ ಯೆತಾತ್, ತೆಂ ರಾವೊಂಕ್ ಸರ್ಕಾರ್ ಸಫಳ್ ಜಾವ್ನಾ. ಕುಕಿ ತಶೆಂ ಮೈಟೆ ಪ್ರತಿನಿಧಿ ಯೆದೊಳ್ಚ್ಯಾಕ್ ಕೇಂದ್ರ್ ಸರ್ಕಾರಾನ್ ಆಯೊಜಿತ್ ಕೆಲೆಲ್ಯಾ ಶಾಂತಿ ಶಿಬಿರಾಂತ್ ವಾಟೆಲಿ ಜಾಂವ್ಕ್ ತಯಾರ್ ನಾಂತ್!

ಹೊ ವಿಷಯ್ ಆತಾಂ ಅಂತರ್-ರಾಷ್ಟ್ರೀಯ್ ಹಂತಾರ್ ಗಾಜ್ಲಾ. UNO ಜೆರಾಲ್ ಸೆಕ್ರೆಟರಿನ್ ವೆಗಿಂಚ್ ಫಾವೊತಿಂ ಕ್ರಮಾಂ ಘೆವ್ನ್ ಶಾಂತಿ ರುತಾ ಕರಿಜೆ ಮ್ಹಣ್ ಮೋದಿ ಸರ್ಕಾರಾಕ್ ಮನವಿ ಕೆಲ್ಯಾ. ಅಂತರ್-ರಾಷ್ಟ್ರೀಯ್ ಮಾಧ್ಯಮಾಂ ಹೊ ವಿಷಯ್ ಸದಾಂ ಉಕಲ್ನ್ ದಾಖಯ್ತಾತ್. ಪ್ರತ್ಯೇಕ್ ಜಾವ್ನ್ ಬಿಬಿಸಿರ್ ಸದಾಂ ಹಿ ಖಬರ್ ಆಸಾ. ದೆಕುನ್, ವೆಗಿಂಚ್ ಮಣಿಪುರಾಂತ್ ಶಾಂತಿ ಸಮಾಧಾನ್ ರಚುಂಕ್ ಜಾಯ್. ಹೆಂ ಇಂಡಿಯಾಚ್ಯಾ ಹಿತಾಚ್ಯೆಂ ಆನಿ ಫಾಯ್ದ್ಯಾಚ್ಯೆಂ.

■ ಫಿಲಿಪ್ ಮುದಾರ್ಥ್

ಮ್ಹಜ್ಯಾ ಸ್ಟಡಿ-ಕಮ್-ಕಂಪ್ಯೂಟರ್ ರೂಮಾಂತ್ ಸುಶೆಗಾತ್ ಬಸೊನ್, ಸಮಾನ್ ನಾಗರಿ ಸಂಹಿತಾ ಬಾಬ್ತಿಂ ಇಂಗ್ಲೆಸಾಂತ್ ಏಕ್ ಲೇಖ್ ಜಮಂವ್ಚಾ ಕಾಮಾಂತ್ ಹಾಂವ್ ವ್ಯಸ್ತ್ ಆಸ್ಲೊಂ. ಯೆಜ್ಮಾನ್ ಹೊಲಾಂತ್ ಟಿವಿ ಪಳೆವ್ನ್ ಬಸೊನ್ ಆಸ್ಲಿ. ಚಡಾವತ್ತ್ ಮರಾಠಿ ಸೀರಿಯಲಾಂ.  ವ Food Food ರಾಂದ್ಪಾಚಿಂ ಪ್ರೊಗ್ರೇಮಾಂ. ಟಿವಿ ನ್ಯುಸ್ ಭಾರಿ ಪೈಸ್. ಆನಿಂ, ಪೊಲಿಟಿಕ್ಸ್? ನಾಂ ಬಾಬಾ ನಾಂ. ತಿ ಆನಿಂ ಪೊಲಿಟಿಕ್ಸ್ ಮ್ಹಳ್ಯಾರ್ ಮಾಜರ್ ಆನಿಂ ನ್ಹಾಣ್ ಆಸ್ಲೆಲ್ಯಾ ಪರಿಂ.

“ಓ ಹೆಲ್ಲೊ! ಕಾನಾಂತ್ಲಿ ಗುಡ್ದಿ ಕಾಡ್ ಆನಿಂ ಹಾಂಗಾ ಯೇ ಪಳೆಯಾಂ” ಬಸ್‍ಲ್ಲ್ಯಾ ಕಡೆಂ ಥಾವ್ನ್ಂಚ್ ಕಿಂಕ್ರಾಟ್ಲಿ ಮ್ಹಜಿ ಏವ್. ತೀಸ್ ವ್ಹರ್ಸಾಂ ಹಾಂವ್ ಘೊಳ್ಳಾಂ ಲೊಂಕಾಡ್ ಆನಿಂ ಮಿಲಾವ್ ಫೆಕ್ಟರೆಂತ್. ಮ್ಹಜ್ಯಾ (ಅನಿಂ ಏವೆಚ್ಯಾ) ಪೊಟಾಚೊ ಗ್ರಾಸ್ ಜೊಡುಂಕ್ 100 ಡೆಸಿಬಲ್ ಪಾಂವ್ಡ್ಯಾಂಕ್ ಮಿಕ್ವೊನ್ ಆವಾಜ್ ಕರ್ಚಿಂ ಮಿಶಿನಾಂಚೊ ದಿಸಾಳೊ ಸಾಂಗತ್ ಮ್ಹಜೊ. ವಯ್ಲ್ಯಾನ್, ಕ್ವಾಲಿಟಿ ಕಾನ್ ಪ್ಲಗ್ ದೀಂವ್ಕ್ ಕಂಪ್ಣೆಕ್ ಸುರಾತ್. ದೆಕುನ್ ಮ್ಹಾಕಾ ಇಲ್ಲೆಂ ’”ವಯ್ರ್” ಆಯ್ಕಾತಾ. ತಶೆಂ ಮ್ಹಜಿ ಮದಾಮ್ 140 ಡೆಸಿಬಲಾಚಿ ಗರ್ಜಣ್ ಘಾಲುಂಕ್ ಹುಶಾರ್. ಜಶೆಂ ಏರೋಪ್ಲೇನ್ ಲೇಂಡಿಂಗ್ ಜಾತಾನಾಂ ಆವಾಜ್ ಜಾತಾ ತಶೆಂ.

ಹೊಲಾಂತ್ ಯೇವ್ನ್ ಪಳೆತಾಂ ಕಿತೆಂ? ಮದಾಮ್ ರಿಪಬ್ಲಿಕ್ ಟಿವಿ ಚೆನೆಲ್ ಪಳೆತಾ. ಹೆಂ ಚೆನೆಲ್ ಆನಿಂ ಅರ್ನಾಬ್ ಗೋಸ್ವಾಮಿ ಮ್ಹಳ್ಯಾರ್ ಮ್ಹಾಕಾ ಎಲರ್ಜಿ. ಹಾಂವ್ ದೀಸಾಕ್ ಕೇವಲ್ ಅರ್ಧೆಂ ತಾಸ್ ಟಿವಿ ನ್ಯುಸ್ ಪಳೆತಾಂ. ತೆಂಯೀ WION ಚೆನೆಲ್ ಮಾತ್ರ್. ಅದಾನಿನ್ NDTV ಮಾಧ್ಯಮಾಂ ಆಪ್ಲೆ ತಾಬೆಂತ್ ಘೆಂವ್ಚ್ಯಾ ಪೈಲೆಂ NDTV ನ್ಯುಸ್ ಪಳೆತಲೊಂ. ಪ್ರತ್ಯೇಕ್ ಜಾವ್ನ್, ರವಿಶ್ ಕುಮಾರ್ ಪ್ರೈಮ್ ಟಾಯ್ಮ್ ಚುಕಾನಾತ್ಲೊಂ. ಅಸೊಂ, ತೆ ಬರೆ ದೀಸ್ ಪರತ್ ಯೇನಾಂತ್.

“ಆಮ್ಚೆಂ ಜೆರಾಲ್ ಚುನಾವ್ ಕೆದಾಳಾ ಮ್ಹಣ್ ಕಿತ್ಯಾಕ್ ವಿಚಾರ್ತಾಯ್? ವೋಟ್ ಘಾಲಿಜೆ ಮ್ಹಣ್ ಕೊರೊಜ್ ಉಠ್ಲಿಗೀ ತುಕಾ ಕಿತೆಂ? ಆದ್ಲ್ಯಾ ಪಾವ್ಟಿಂ ಮೋದಿಚ್ಯಾ ನಾಂವಾರ್ ಭಾಜಪಾಚೊ ಬುತಾಂವ್ ದಾಂಬುನ್ ಆಯಿಲ್ಲೆಂಯ್‌ನೇ?” ಚಿಡಾಯ್ಲೆಂ ಹಾಂವೆಂ.

“ಹಾಂವ್ ಆತಾಂ ಕನ್ವೆಡ್ತರ್ ಜಾಲ್ಯಾಂ. ಜಶೆಂ ಅರ್ನಾಬ್ ಗೋಸ್ವಾಮಿ. ತಾಚಿ #TomatoConspiracy ಡಿಬೇಟ್ ಆತಾಂ ಲೈವ್ ಚಲ್ತಾ. ಹಾಂಗಾ ಬಸ್ ಆನಿಂ ಆಯ್ಕ್. ಗೋದಿ ಮೀಡಿಯಾಚೊ ಗೋಸ್ವಾಮಿ ಲವ್ ಜಿಹಾದ್, ಹಿಜಬ್, ಹಲಾಲ್, ಆಜಾನ್, ರಾಮ್ ಮಂದಿರ್, ಅಡ್ತಿಗ್ 370, ಅಸ್ಸಾಮಾಂತ್ NRC ಆನಿಂ CAA, ಅಸ್ತಮ್ತಿ ಬೆಂಗಾಲಾಂತ್ ಮಮತಾಚಿ ಗುಂಡಾಗಿರಿ, ವಿಶ್ವಗುರು ಮೋದಿ ಅಸಲ್ಯಾಂ ವಿಷಯಾಂಚ್ಯೆರ್ hashtag ಲಾವ್ನ್ ಬೋಬೊ ಘಾಲ್ಚೊ ಮನಿಸ್ ಆಜ್ ಟೊಮೇಟೊ ಮೋಲಾಂ ತಸ್ಲಿಂ चोटि मॊटि बातें ಕರ್ತಾ! ತೇಂಯಿ ರಾತಿಂ 9 ವ್ಹರಾರ್ ಪೈಮ್ ಟಾಯ್ಮ್!”

“ಬಹುಶಾ ಬಾಯ್ಲೆನ್ ಟೊಮೇಟೊವಿಣೆಂ ರಾಂದ್ಲೆಲೆಂ ನಿಸ್ತೆಂ ವಾಡ್ಲೆಂ ಆಸ್ತೆಲೆಂ. ಬಜಾರಾಂತ್ ಟೊಮೇಟೊಚ್ಯೆಂ ಮೋಲ್ ಕಿಲ್ಯಾಕ್ 160-200 ರುಪೈ. ಟೊಮೇಟೊ ಕಿಲ್ಯಾಕ್ 20-30 ರುಪಿಯಾಂಕ್ ಮೆಳ್ತಾನಾಂ, ತಾಚ್ಯಾ ರುಚಿಚಿ ಬೆಂಗಾಲಿ ಫಿಶ್ ಕರಿ ಸದಾಂಯೀ ಭರ್ಪೂರ್ ವಾಡ್ತೆಲಿ ದಿಸ್ತಾ. ಟೊಮೇಟೊಚ್ಯೆಂ ಮೋಲ್ ಮಾತ್ರ್ ನಹಿಂ, ಹೆರ್ ಸರ್ವ್ ತರ್ಕಾರಿಂಚಿಂ ಮೋಲಾಂ ಆಕಾಸಾಕ್ ತೆಂಕ್ಲ್ಯಾಂತ್. ಆಲೆಂ ಕಿಲ್ಯಾಕ್ 160 ರುಪೈ, ಲಸೂಣ್ ಕಿಲ್ಯಾಕ್ 200 ರುಪೈ, ತರ್ನಿ ಮಿರ್ಸಾಂಗ್ ಕಿಲ್ಯಾಕ್ 200 ರುಪೈ, ಹೆರ್ ಸಾಮಾನ್ಯ್ ತರ್ಕಾರಿ ಕಿಲ್ಯಾಕ್ 80-100 ರುಪೈ”. ಕಾಲ್ ದನ್ಪರಾಂ ತರ್ಕಾರಿ ಬಜಾರಾಂತ್ ದಿಲ್ಲ್ಯಾಂ ಮೋಲಾಂಚಿ ಪಟ್ಟಿ ವಾಚುನ್ ಸಾಂಗ್ಲಿಂ ಹಾಂವೆಂ.

ಆಮ್ಗೆರ್ ಬಾಜರ್ ಹಾಡ್ಚೆಂ ಕಾಮ್ ಮ್ಹಜ್ಯೆಂ. ರಾಂದ್ಚೆಂ ಏವೆಚ್ಯೆಂ. ಜೆಂವ್ಚೆಂ ಧುವೆಚ್ಯೆಂ. ಸರ್ವ್ ಖರ್ಚಾಚಿಂ ಬಿಲ್ಲಾಂ ಫಾರಿಕ್ ಕರ್ಚಿ ಆನಿಂ ಲೇಕ್‌ಪಾಕ್ ದವರ್ಚಿ ಜವಾಬ್ದಾರಿ ಮ್ಹಜಿ. ಇಲ್ಲೆಶಿ ಕಂಜೂಸಿ ಕರಿಜೆ, ಅನಾವಶ್ಯಾಕ್ ಟಿವಿ ಓನ್ ದವರ್ನ್ ಸೊಫಾಚ್ಯೆರ್ ಜೆಮೆಂವ್ಕ್ ನಜೊ, ಶಿಂದಪ್ ಕೆಲ್ಯಾ ಉಪ್ರಾಂತ್ ಮಾತ್ರ್ ಗ್ಯೇಸ್-ಶ್ಟವ್ ಪೆಟಯ್ಜೆ, ರಾತಿಂ ಏಕ್-ದೋನ್ ವ್ಹರಾ ಪರ‍್ಯಾಂತ್ ಸೀರಿಯಲಾಂ ಪಳೆಂವ್ಕ್ ನಜೊ, ರಾತಿಂ ಧಾ ಇಕ್ರಾ ವ್ಹರಾಂ ಭಿತರ್ ವೇಳಾರ್ ನಿದಾಜೆ ಇತ್ಯಾದಿ ಇತ್ಯಾದಿ ಹಫ್ತ್ಯಾಳೆ ಶೆರ್ಮಾಂವ್ ಹಾಂವೆಂ ದಿಂವ್ಚೆ. ಉಪ್ರಾಂತ್, ತುಂವೆಂ ಚಡ್ ಜೋಡ್ನ್ ಹಾಡಿಜೆ ಮ್ಹಣ್ ಬಾಯ್ಲೆಚಿ ಲದಿನ್ ಹಾಂವೆಂಚ್ ಆಯ್ಕೊಂಚಿ. ಆಸೊಂ.

“ತರ್ಕಾರಿ ಪರ್ವಡ್ನಾಂ ತರ್ ಮಾಸ್ ಮಾಸ್ಳಿ ರಾಂದ್ಯಾಂ. ಗ್ರಿಲ್ ಕೆಲ್ಯಾರ್ ಜಾಲೆಂ. ಗ್ಯೆಸ್ ನಾಕಾ. ತೇಲ್ ಉಣೆಂ ಕಾಪ್ತಾ. ಟೊಮೇಟೊ, ಆಲೆಂ, ಲಸೂಣ್, ಮಿರ್ಸಾಂಗ್ ನಾಕಾ. ಅಶೆಂಯೀ, ಸಂಜೀವ್ ಕಪೂರಾಚ್ಯೆಂ Food Food ಚೆನೆಲ್ ಸದ್ದಾಂ ಪಳೆತಾಂ. ಹಾಂವ್ ಸಗ್ಳೆಂ ಮೇನೆಜ್ ಕರ್ತಾಂ. ತುಂ ಫಿಕಿರ್ ಕರಿನಾಕಾ.”

“ಮಾಸ್ ಮಾಸ್ಳೆಚಿಂ ಮೋಲಾಂ ಕಳಿತ್ ಆಸಾತ್‌ವೇ ತುಕಾ? ಕಸಲಿ ಮಾರ್ಗಿ ಸಲಹಾ ದಿತಾಯ್ ಕಳ್ತಾಯೇ ತುಕಾ? ಅರ್ನಾಬ್ ಗೋಸ್ವಾಮಿನ್ #FishConspiracy ಆನಿಂ #MeatConspiracy ಡಿಬೇಟ್ ಕರಿಜೆ ಕೊಣ್ಣಾಂ ತುಕಾ ಹೆಂ ಸಮ್ಜೊಂಕ್” ತುಕ್ಲಾಯ್ಲೆಂ ಹಾಂವೆಂ. “ಮೋದಿ ಕಾಳಾ ಪೈಲೆಂ ಬ್ರೊಯ್ಲರ್ ಕುಂಕಡ್ ಕಿಲ್ಯಾಕ್ 80-90 ರುಪೈ ಆಸ್ಲೆಂ ಆತಾಂ 170-180 ರುಪೈ. ಮಟ್ಟನ್ ಕಿಲ್ಯಾಕ್ 400-420 ರುಪೈ ಆಸ್‍ಲ್ಲೆಂ ಆತಾಂ 740-760 ರುಪೈ. ಕಿಲ್ಯಾಕ್ 600-700 ರುಪೈ ಸುರ‍್ಮಾಯ್ ಮಾಸ್ಳಿ ಆತಾಂ 1,300-1500 ರುಪಿಯಾ ಸಕಯ್ಲ್ ನಾಂ”.

ಮಾರ್ಗಾಯ್ ಅಶಿ ವಾಡ್ಲ್ಯಾಗಿ ದೀಸ್ ಕಾಡುಂಕ್ ಕಷ್ಟ್ ಜಾಲ್ಯಾತ್ ಆಮ್ಕಾಂ. 2013 ಇಸ್ವೆಂತ್ ಆಮಿಂ ಗಲ್ಫ್ ಗಾಂವ್ ಸೊಡ್ನ್ ಆಯ್ಲ್ಯಾಂವ್ ಆನಿಂ ಬೊಂಬೈ ಶೆರಾಂತ್ ಭಿಡಾರ್ ಕರ್ನ್ ರಾವ್ಲ್ಯಾಂವ್ ತವಳ್ ಚಿಂತುಂಕ್ ನಾತ್ಲೆಂ ಅಶೆಂ ಜಾಯ್ತ್ ಮ್ಹಣ್. ಆಮ್ ಆದ್ಮಿಚ್ಯೆ “ಬುರೆ ದಿನ್” ಹೆ ಮ್ಹಣ್ಯೆತ್.

2014 ಜೆರಾಲ್ ಚುನಾವೆ ವೇಳಾ, ಮೋದಿನ್ “ಅಚ್ಚೆ ದಿನ್” ಭಾಸಯ್ಲೆ. ಪರ್ಗಾಂವಾಂತ್ ಲಿಪವ್ನ್ ದಾಳ್ಳೆಲೊ ಕಾಳೊ ದುಡು ಶೆಂಭೊರ್ ದಿಸಾಂ ಭಿತರ್ ಪಾಟಿಂ ಹಾಡ್ತಾಂ. ಆಮ್ ಆದ್ಮಿಚ್ಯಾ ಬ್ಯೆಂಕ್ ಎಕೌಂಟಾಂತ್ ಪಂದ್ರಾ ಲಾಖ್ ಜಮೊ ಕರ್ತಾಂ. LPG ಸಿಲಿಂಡರಾಚ್ಯೆಂ ಮೋಲ್ 200 ರುಪೈ ತಿತ್ಲೆಂ ದೆಂವಯ್ತಾಂ. ಅಶೆಂ ಕರುಂಕ್ ಭಾರಿ ಸೊಂಪೆಂ. ಏಕಾ ಅಮೆರಿಕನ್ ಡೋಲರಾಕ್ 35 ರುಪೈ ರೇಟ್ ಫಿಕ್ಸ್ ಕೆಲ್ಯಾರ್ ಜಾಲೆಂ.

“ನೋವ್ ವ್ಹರ್ಸಾಂಚ್ಯೆ ಮೋದಿ ರಾಜ್ವಟ್ಕೆ ವರ್ವಿಂ ಜಾಲ್ಲಿ ಹಾಲತ್ ಪಳೆ. 2014 ಇಸ್ವೆಂತ್ 325 ರುಪೈ ಆಸ್ಲೆಲೆಂ ಸಿಲಿಂಡರ್ ಆಜ್ 1,250 ರುಪೈ. ತವಳ್ 80 ರುಪೈ ಆಸ್ಲೆಲಿ ತೂರ್ ದಾಳ್ ಆಜ್ 150 ರುಪೈ. ತವಳ್ ಮ್ಹಜ್ಯಾ ಬಾಯ್ಕಾಚಿ ಟಾಂಕಿ ಫುಲ್ಲ್ ಕರುಂಕ್ 450 ರುಪೈ ಲಾಗ್ತೆಲೆ ಆಜ್ 800 ರುಪೈ ಜಾಯ್. ಧುವೆಚಿ ಟ್ಯೂಶನ್ ಫೀ ದೊಡಿ ಜಾಲ್ಯಾ. ವಯ್ಲ್ಯಾನ್, exam fees, online classes fees. ಘರಾಚ್ಯೆಂ ಬಾಡೆಂ ತವಳ್ ಮಹಿನ್ಯಾಳೆಂ 18,000 ರುಪೈ ಆತಾಂ 28,000 ರುಪೈ. ವೀಜ್ ಬಿಲ್ಲ್ ತವಳ್ ಮಹಿನ್ಯಾಳೆಂ 1,600 ರುಪೈ ಆತಾಂ 3,500 ರುಪೈ. ಆನಿಂ ಸರ್ಕಾರ್ ಮ್ಹಣ್ತಾ ಮಾರ್ಗಾಯೆಚಿ ರೇಟ್ ಕೇವಲ್ 4 ಠಕ್ಕೆ, ಹಿಶಿನ್ ತಿಶಿನ್ 2%!”

“ಮೋದಿ ಭಕ್ತ್ ಆಸ್ಲಿಂ ಹಾಂವ್. ಆತಾಂ ಮ್ಹಕಾ ಕಳ್ತಾ ಮೋದಿಕ್ ಕಾಂಯ್‍ಚ್ ಆರ್ಥಿಕ್ ಸಮ್ಜಣಿ ನಾಂ. ಬರೋಬರ್ ಶಿಕಪ್ ನಾತ್ಲೆಲ್ಯಾ ಮನ್ಷ್ಯಾಕ್ ಗಾದಿಯೆರ್ ಬಸವ್ನ್ ಮ್ಹಜ್ಯಾ ತಸ್ಲ್ಯಾ ಸಾಧ್ಯಾ ಮತ್‍ದಾರಾಂನಿಂ ವ್ಹಡ್ ಚೂಕ್ ಕೆಲ್ಯಾ. ಮೋದಿ ಕಡೆಂ ಆಮ್ಚ್ಯಾ ಸಮಸ್ಸ್ಯಾಂಕ್ ಪರ‍್ಯಾರ್ ನಾಂತ್. ಆಮಿಂ ಮೋಲಾಂ ವಾಡ್ಲ್ಯಾಂತ್, ಭಾವ್-ವಾಡ್ ಜಾಲಾ ಮ್ಹಣ್ತಾಂವ್; ತೊ ಮ್ಹಣ್ತಾ हिम्दु खत्रे में हे! ಕೇರಳ ಸ್ಟೋರಿ ಪಳೆಯಾ. ಅಮಿಂ ಮ್ಹಣ್ತಾಂವ್ ತಾಚ್ಯಾಯೀ ಆಡಳ್ತ್ಯಾಂತ್ ಭ್ರಶ್ಟಾಚಾರ್ ವಾಡ್ಲಾ; ತೊ ಮ್ಹಣ್ತಾ ರಾಮ್ ಮಂದಿರ್ ಬಾಂದ್ತಾಂ. ಆಮಿಂ ಮ್ಹಣ್ತಾಂವ್ ಬೇರೋಜ್‍ದಾರಿ ವಾಡ್ಲ್ಯಾ; ತೊ ಮ್ಹಣ್ತಾ ಅದ್ತಿಗ್ 370 ಕಾಡ್ನ್ ಕಾಶ್ಮೀರಾಂತ್ ಶಾಂತಿ ಆಸಾ ಕೆಲ್ಯಾ.  ಆಮಿಂ ಮ್ಹಣ್ತಾಂ ಶಿಕ್ಪಾಚೊ ಖರ್ಚ್ ವಾಡ್ಲಾ; ತೊ ಮ್ಹಣ್ತಾ ಹಿಜಬ್ ಕಾಡಾ ಆನಿಂ ಸಂಸ್ಕ್ರತ್ ಶಿಕಾ. ಆಮಿಂ ಮ್ಹಣ್ತಾಂ ವಕ್ತಾಂ ಮಾರಗ್ ಜಾಲ್ಯಾಂತ್; ತೊ ಮ್ಹಣ್ತಾ ಯೋಗಾ ಕರಾ. ಆಮಿಂ ಮ್ಹಣ್ತಾಂ ತುಜ್ಯಾ ರಾಜ್ವಟ್ಕೆಂತ್ ಆದಾನಿಚಿ ಗಿರೆಸ್ತ್‍ಕಾಯ್ ಮಾತ್ರ್ ಮೊಳ್ಬಾಕ್ ತೆಂಕ್ಲ್ಯಾ; ತೊ ಮೊನೊ ರಾವ್ತಾ, ಜಶೆಂ ತೊ ಮನ್‍ಮೋಹನ್ ಸಿಂಗ್ ಆಸ್ಲೊ ಮ್ಹಣ್ ತೆದ್ನಾಂ ತುಕ್ಲಾಯ್ತಲೊ!”

“दॆर आये दुरुस्त आये! ದೆಕುನ್‌ಗೀ ತುಕಾ ಮುಕ್ಲೆಂ ಚುನಾವ್ ಕೆದ್ನಾಂ ಮ್ಹಣ್ ಕಳೊಂಕ್ ಜಾಯ್? ತಾಕಾ ತುಜೊ ವೋಟ್ ದೀನಾಸ್ತಾನಾಂ, ತುಜೊ ರಾಗ್ ಕಾಡ್. revenge is sweet. ಮತಿಕ್ ಸಮಧಾನ್ ಜಾತೆಲೆಂ. ಪೂಣ್, ನೋವ್ ಮಹಿನೆ ರಾಕಜೆ ತುಂವೆಂ!” ಇತ್ಲೆಂ ಸಾಂಗೊನ್ ಹಾಂವ್ ಪಾಟಿಂ ಮ್ಹಜ್ಯಾ ರೂಮಾಕ್ ವಚೊಂಕ್ ಉಠ್ಲೊಂ.

“ನೋವ್ ವ್ಹರ್ಸಾಂ ಸೊಸ್ಲೆಂ. ಆನಿಂ ನೋವ್ ಮಹಿನೆ ಸೊಸಿಯೆತ್. ದೀಸ್ ಗೆಲ್ಲೆ ಕಳಾನಾಂತ್” ಅಕೇಯ್ರ್ ಕೆಲೆಂ ಯೆಜ್ಮಾನಿನ್.

ಮೋದಿಚ್ಯಾ ಶಸ್ತ್ರಾಘರಾಂತ್ ಕಿತ್ಲಿಂ ಹಾತೆರಾಂ ಆಸಾತ್ ತೆಂ ತಿ ನೆಣಾಂ. ದೆಕುನ್ ಹಾಂವ್ ಸಮಾನ್ ನಾಗರಿ ಸಂಹಿತಾ ಬಾಬ್ತಿಂ ಲೇಖ್ ಬರಯ್ತಾಂ.

► ಫಿಲಿಪ್ ಮುದಾರ್ಥ್

]]> https://kittall.in/26627/feed/ 6 https://kittall.in/24974/ https://kittall.in/24974/#comments Sat, 03 Jun 2023 22:03:23 +0000 https://www.kittall.com/?p=24974 ಮುಸಲ್ಮಾನ್ ಚೆಡೆ ಹಿಂದು ಚಲಿಯಾಂಕ್ ಆಪ್ಲ್ಯಾ ಮೋಗಾಚ್ಯಾ ಜಾಳಾಂತ್ ಸಾಂಪ್ಡಯ್ತಾತ್. ಹಿ ಎಕ್ ‘ಲವ್ ಜಿಹಾದ್’ ಫಿತೂರಿ ಮ್ಹಣ್ 2005 ಇಸ್ವೆಂತ್ ಸುರು ಕರ್ನ್ ಆಜ್ ಪರ‍್ಯಾಂತ್ ದಕ್ಶಿಣ್ ಕನ್ನಡಾಂತ್ ಸಂಘಾಚ್ಯಾ ಸರಿ-ಸುಮಾರ್ ಹರ್ಯೇಕಾ ಮೀಟಿಂಗಾಂತ್ ಭಾಸಾಭಾಸ್ ಕರ್ಚೊ ವಿಷಯ್ ಜಾಲಾ. 2008 ಮಾಯ್ ಮಹಿನ್ಯಾಂತ್ ಜಾಲ್ಲ್ಯಾ ಕರ್ನಾಟಕ ಎಸೆಂಬ್ಲಿ ಚುನಾವ್ಯೆಂತ್ ಭಾಜಪ ಜಿಕೊನ್ ಅಧಿರಾರಾರ್ ಆಯ್ಲಿ. ತವಳ್ ಥಾವ್ನ್ ಹ್ಯಾ ಪಿತೂರಿ ಆರೋಪಾಕ್ ಚಡ್ ಈಠ್ ಮೆಳ್ಳಾ.

‘ಹಿಂದು ಚಲಿಯಾಂಕ್ ಚಿಡಯ್ತಾತ್ ವ ಆಪ್ಣಾಕುಶಿನ್ ಲುಭಾಯ್ತಾತ್’ ಅಸಲೊ ಆರೋಪ್ ಹಿಂದು ಲೋಕಾಚ್ಯಾ ಮತಿಂತ್ ಸದಾಂ, ಖಳಾನಾಸ್ತನಾಂ,  ಪರತ್ ಪರತ್ ರಿಗಂವ್ಚ್ಯಾಂತ್ ಕರಾವಳಿ ಕರ್ನಾಟಕಾಂತ್ ಹಿಂದು ಸಂಘಟಣಾಂ ಭಾರಿಚ್ ಯಶಸ್ವಿ ಜಾಲ್ಯಾಂತ್. ಹಾಚೊ ಪರಿಣಾಮ್ ಮ್ಹಣ್ಯಾಂ, ನೈತಿಕ್ ಪೊಲೀಸ್‍ಗಿರಿ ಸದಾಂಚಿ ಜಾಲ್ಯಾ. ಧರ್ಮಾ ಭಾಯ್ಲ್ಯಾಂ ಯುವಕಾಂ-ಯುವತಿಂ ಮಧೆಂ ಎಕಾಮೇಕಾಚೊ ಸಾಂಗತ್ ದಿಸ್ಲೊ ತರ್ vigilante ಟೀಮಾಂ ತಕ್ಶಣ್ ಆಪ್ಲಿ ದಾದಾಗಿರಿ ದಾಕಯ್ತಾತ್. ಕುಟ್ಮಾ ಭಿತರ್, ಕೊಲೆಜ್-ಯುನಿವರ್ಸಿಟಿ ತಶೆಂ ಪಬ್ಲಿಕ್ ಜಾಗ್ಯಾಂನಿಂ ಅಸಲೆಂ ನಡ್ತೆಂ ವಾಡೊನ್ಂಚ್ ಯೆತಾ.

ಅಂತರ್-ಧಾರ್ಮಿಕ್ ಮೋಗ್ ಜಾಯ್ನಾ ಮ್ಹಣ್ ನಾಂ. ಆಪ್ರೂಪ್ ಏಕ್ ಜೊಡೆಂ ಏಕಾಮೆಕಾ ಥೈಂ ಆಕರ್ಶಿತ್ ಜಾತಾ ಆನಿಂ ಕಾಜಾರ್ ಜಾಂವ್ಕ್ ಮುಕಾರ್ ಸರ್ತಾ. ತವಳ್ ದೋನಿ ಕುಟ್ಮಾಂ ತಾಂಚ್ಯೆ ವಿರುದ್ಧ್ ರಾವ್ತಾತ್. ದೋನಿ ಪಾಡ್ತಿಂಚ್ಯೆ ಆಪಾಪ್ಲ್ಯಾ ಸಾಮಾಜಿಕ್-ಸಾಂಸ್ಕ್ರತಿಕ್-ರಾಜಕೀಯ್ ಪಂಗ್ಡಾಂಚಿ ಮಜತ್ ಘೆತಾತ್. ಹೆ ಪಂಗಡ್ ತೀವ್ರಗಾಮಿ ಮ್ಹಣ್ಯೆತ್. ಹ್ಯಾ ಝುಜಾಂತ್, ಜೋಡ್ಯಾಚೊ ಜೀವ್ ಘೆಲ್ಲೆ ದಾಕ್ಲೆ ಆಸಾತ್. ಏಕ್ ಅಂತರ್-ಧಾರ್ಮಿಕ್ (ಮ್ಹಣ್ಜೆ ಹಿಂದು-ಮುಸ್ಲಿಂ) ಜೊಡೆಂ ನೇತ್ರಾವತಿ ನಂಯ್ತ್ ಬುಡೊನ್ ಮರಣ್ ಪಾವ್ಲೆಲಿ ಖಬರ್ ಪ್ರದೇಸಾಚ್ಯಾ ಮಾಧ್ಯಮಾಂನಿಂ ಪ್ರಸಾರ್ ಜಾಲ್ಲಿ. ಹಿಂದು ಪಂಗ್ಡಾಂಚ್ಯಾ ಕಾರ್ಯಕರ್ತಾಂ ಥಾವ್ನ್ ಚುಕಾರಿ ಮಾರುಂಕ್ ತ್ಯಾ ಜೊಡ್ಯಾನ್ ಆಪ್ಲೆಂ ಕಾರ್ ವೇಗಾನ್ ಚಲಯ್ಲೆಲೆಂ ಆನಿಂ ಸಾಂಕ್ಯಾರ್ ನಿಯಂತ್ರಣ್ ಚುಕೊನ್ ನಂಯ್ತ್ ಪಡೊನ್ ವೊಳೊನ್ ತಿಂ ಬುಡ್ಲೆಲಿಂ.

***

2009 ಜೂನ್ 17-ವ್ಯೆರ್ ಬಂಟ್ವಾಳ್ ತಾಲುಕಾಚ್ಯಾ ಬಾರಿಮಾರು ಹಳ್ಳೆಂತ್, ಅನಿತಾ ಬಂಗೇರಾ ಮ್ಹಳ್ಳಿ 22 ವ್ಹರ್ಸಾಂಚಿ ತರುಣ್ ಚಲಿ ಇಷ್ಟಿಣ್ಯೆಕ್ ಮೆಳ್ತಾಂ ಮ್ಹಣ್ ಸಾಂಗೊನ್ ಘೆಲ್ಲಿ ಘರಾ ಪಾಟಿಂ ಯೇಂವ್ಕ್ ನಾಂ. ಪೊಲೀಸಾಂಕ್ ದೂರ್ ದಿತಚ್, ಖಬರ್ ಜಾಲಿ ಕಿ ತೆಂ ಕೋಣ್ ಏಕಾ ಮುಸ್ಲಿಮ್ ಚೆಡ್ಯಾ ಸಾಂಗಾತಾ ಪೊಳೊನ್ ಘೆಲಾಂ ಆಸ್ತೆಲೆಂ. ‘ಲವ್ ಜಿಹಾದ್’ ಕೇಜ್ ಮ್ಹಣ್ ಪೊಲೀಸಾಂನಿಂ ಹೆಂ ಪ್ರಕರಣ್ ದಾಕಲ್ ಕೆಲೆಂ. ಘಳಾಯ್ ಕರಿನಾಸ್ತಾನಾಂ, ಹಿಂದು ಕೇಸರಿ ಸಂಘಟಣಾಂನಿಂ ಮುಸ್ಲಿಮಾಂಚ್ಯಾ ‘ಲವ್ ಜಿಹಾದ್’ ಫಿತೂರ‍್ಯೆ ವಿರುದ್ಧ್ ಪೆಂಟೆಂನಿಂ ಪುರ್ಶಾಂವ್ ಕಾಡ್ಲೆ.

ಥೊಡ್ಯಾಂ ಮಹಿನ್ಯಾಂ ನಂತರ್, ಪೊಲೀಸಾಂಕ್ ಅನಿತಾಚ್ಯಾ ಮೊಬಾಯ್ಲ್ ಫೊನಾಚೊ ಪತ್ತೊ ಮೆಳ್ಳೊ. ತ್ಯಾ ಫೊನಾ ಥಾವ್ನ್ ಅನ್ಯೇಕ್ಯೆ ಚಲಿಯೆಕ್ ಫೊನಾಂ ಗೆಲ್ಲಿಂ. ತಿ ಚಲಿ ಸಯ್ತ್ ‘ಲಾಪತಾ’ ಜಾಲ್ಲಿ. ಅಶೆಂ ಲಾಪತಾ ಚಲಿಯಾಂಚ್ಯಾ ಮೊಬಾಯ್ಲ್ ಫೊನಾಂ ಶಿಂಕಳೆ ಮುಕಾಂತ್ರ್ ಪೊಲೀಸ್ ದೇರಳಕಟ್ಟೆಂತ್ ವಸ್ತಿ ಕರ್ತೆಲ್ಯಾ ಮೋಹನ್ ಕುಮಾರಾಚ್ಯಾ ಘರಾ ಪಾವ್ಲೆ. ಹೊ ಏಕ್ಲೊ ಮಧ್ಯಮ್ ಪ್ರಾಯೆಚೊ ನಿವೃತ್ತ್ ಪ್ರಾಧ್ಯಾಪಕ್. ದೇರಳಕಟ್ಟೆಂತ್ ಆಪ್ಲ್ಯೆ ತಿಸ್ರೆ ಬಾಯ್ಲೆ ಸಾಂಗಾತಾ ರಾವ್ತಲೊ. ಬಂಧಿ ಕರ್ತನಾಂ, ತಾಚ್ಯಾ ಸ್ವಾದೀನಾಂತ್ ಆಸ್ಲೆಲ್ಯೊ ಆಟ್ ಸಾಯನಾಯ್ಡ್ ಗುಳಿಯೊ, ಚ್ಯಾರ್ ಮೊಬಾಯ್ಲ್ ಫೊನಾಂ ಆನಿಂ ಅನಿತಾಚ್ಯೆಂ ಬಾಂಗಾರ್ ಜಪ್ತ್ ಕೆಲೆಂ.

ಮೋಹನ್ ಕುಮಾರಾಚಿ ಕೇಜ್ ‘ಸಾಯನಾಯ್ಡ್ ಆನಂದ್’, ‘ಸಾಯನಾಯ್ಡ್ ಮೋಹನ್’ ಮ್ಹಣ್ ನಾಂವಾಡ್ದಿಕ್ ಜಾಲ್ಯಾ. ತಾಣೆಂ ಆಪ್ಲೆ ಕು-ತಂತ್ರ್ ವಾಪ್ರುನ್ 22-35 ವ್ಹರ್ಸಾಂ ಪ್ರಾಯೆಚ್ಯಾಂ ವೀಸ್ ಜಣಾಂ ಚಲಿಯಾಂಚಿ ಖುನಿ ಕೆಲ್ಯಾ ಮ್ಹಣ್ ಕಳೊನ್ ಆಯ್ಲೆಂ. ಆಪ್ಣೆಂ ವಿಂಚ್ಲೆಲೆ ಹರ್ಯೇಕ್ಯೆ ಚಲಿಯೆಕ್ ಮೋಗಾರ್ ಪಡ್ಲಾಂ ಆನಿಂ ದೋತ್ ಘೆನಾಸ್ತಾನಾಂ ಕಾಜರ್ ಜಾತಾಂ ಮ್ಹಣ್ ತೊ ಭುಲಯ್ತಲೊ.

ಘರಾ ಥಾವ್ನ್ ಪೊಳೊನ್ ವಚೊನ್ ದಿವ್ಳಾಂನಿಂ ಕಾಜರ್ ಜಾವ್ಯಾಂ ಮ್ಹಣ್ ಮೈಸೂರು, ಮಡಿಕೇರಿ, ಹಾಸನ್, ಬೆಂಗಳೂರು, ಕೊಲ್ಲೂರ್, ಕಾಸರಗೋಡ್ ಶೆರಾಂನಿಂ ಸವಾಯೆಚ್ಯಾ ಲೊಡ್ಜಾಂನಿಂ ರಾತ್ ಪಾಶಾರ್ ಕರ್ತಲೊ. ಲೈಂಗಿಕ್ ಸಂಭೋಗ್ ಕೆಲೊ ದೆಕುನ್ ಗರ್ಭ್ ರಾವತ್ ಮ್ಹಣ್ ಭ್ಯೆಂ ಉಟವ್ನ್, ಗರ್ಭ್-ನಿರೋಧ್ ಗುಳಿ ಘೆಜೆ ಮ್ಹಣ್ ಫಟಯ್ತಲೊ. ಹಿ ಗುಳಿ ಸಾಯನಾಯ್ಡ್ ಮಿಸ್ಳಾಯ್ಲೆಲಿ ಜಾವ್ನಾಸ್ಲಿ. ಚಲಿಯೆಕ್ ಬಸ್-ಸ್ಟೇಂಡಾಂಚ್ಯಾ ಪಬ್ಲಿಕ್ ಟೊಯ್ಲೆಟಾಂತ್ ಸೊಡ್ನ್ ತಾಂಚ್ಯೆಂ ಫೊನ್ ಆನಿಂ ಭಾಂಗಾರ್ ಘೆವ್ನ್ ತೊ ಪೊಳ್ತಲೊ ಆಪ್ಲಿ ದುಸ್ರಿ ಶಿಕಾರಿ ಕರುಂಕ್.

2006 ಥಾವ್ನ್ 2009 ಚ್ಯಾರ್ ವರ್ಸಾಂಚ್ಯೆ ಆವ್ಧೆಂತ್ ವೀಸ್ ಖುನಿಯೊ ಕೆಲ್ಲೊ ಗಂಬೀರ್ ಆರೋಪ್ ತಾಚ್ಯೆರ್ ಮಾಂಡ್ಲೊ. ಕೊಡ್ತಿನ್ ತಾಕಾ ಫಾಸಿಯೆಚಿ ಶಿಕ್ಶಾ ದಿಲಿ. ಹೈ-ಕೊಡಿಂತ್ ಆಪೀಲ್ ಕೆಲ್ಲ್ಯಾ ವೆಳಾ, ತಾಚಿ ಫಾಸಿಯೆಚಿ ಶಿಕ್ಶಾ ಮಾಫ್ ಕರ್ನ್, ಜಿಣ್ಯೆ-ಶಿಕ್ಶಾ ಜಾವ್ನ್ ತಿದ್ವಿಲಿ. ಹೊ psychopath serial killer ಆತಾಂ ಬೆಳ್‍ಗಾಂವ್ ಜಯ್ಲಾಂತ್ ಕಯ್ದ್ ಆಸಾ.

ಅನಿತಾ ಬಂಗೇರಾಚ್ಯೆ ಪೈಲೆಂ, ಹರ್ಯೇಕ್ಲೆಂ ಚೆಡುಂ ಲಾಪತಾ ಜಾತನಾಂ, ಹಿ ‘ಲವ್ ಜಿಹಾದ್’ ಕೇಜ್, ಮುಸಲ್ಮಾನ್ ಚೆಡೊ ಭೊಳ್ಯಾ ಹಿಂದು ಚಲಿಯೆಕ್ ಘೆವ್ನ್ ಫರಾರ್ ಜಾಲಾ ಮ್ಹಣ್ ಪ್ರಾದೇಶಿಕ್ ಮಾಧ್ಯಮಾಂನಿಂ ಗಾಜಯಿಲ್ಲೆಂ. ತಶೆಂಚ್, ಹರ್ಯೇಕ್ ಕೇಜ್ ಹಿಂದು ಸಂಘಟಣಾಂನಿಂ ಆಪ್ಲೆ ಸಿದ್ಧಾಂತ್ ಪಾಚಾರುಂಕ್ ವಾಪ್ರಿಲ್ಲಿ.

ಆಜ್-ಕಾಲ್, ವಾಟ್ಸಪ್ ತಸ್ಲಿಂ ಡಿಜಿಟಲ್ ಸಂಪರ್ಕ್ ಸಾಧನಾಂ ಸವಾಯೆಕ್ ಆನಿಂ ಸುಲಭಾಯೆನ್ ಲಾಬ್ಲ್ಯಾಂತ್ ದೆಕುನ್ ಅಸಲೊ ಪ್ರಚಾರ್ ಕರುಂಕ್ ಆತಾಂ ಭಾರೀಚ್ ಸಲೀಸ್ ಜಾಲಾ. ತಸೆಂಚ್, ಜಾಯಿತ್ತೆ You-Tube ವೀಡಿಯೊ ಪಳೆಂವ್ಕ್ ಮೆಳ್ತಾತ್.

***

ಹ್ಯಾ ಹಫ್ತ್ಯಾಂತ್, ‘ದಹಾಡ್’ ವೆಬ್ ಸಾಂಕಳ್ ವಿಡಿಯೊ ಪಳೆಂವ್ಕ್ ಸುಮಾರ್ ಆಟ್ ವ್ಹರಾಂಚೊ ವೇಳ್ ಹಾಂವೆಂ ಘೆತ್ಲೊ. ಹಿ ಏಕ್ ಆಟ್ ಆವಸ್ವರಾಂಚಿ ಸಾಂಕಳ್ ಕಾಣಿ ಅಮಜೊನ್ ಪ್ರಾಯ್ಮ್ ವಿಡಿಯೊ ಮಾಧ್ಯಮಾರ್ ಪಳೆವ್ಯೆತಾ.

ರೀಮಾ ಕಾಗ್ಟಿ ಆನಿಂ ಜೊಯಾ ಅಖ್ತರ್ ಹಾಣಿಂ ರಚ್ಲೆಲಿ ಹಿ ಎಕ್ ಕಾಲ್ಪನಿಕ್ ಕಾಣಿ. ಕೇವಲ್ ಮನೋರಂಜನಾ ಖಾತಿರ್ ಶಿವಾಯ್ ಕೋಣಿ ವ್ಯಕ್ತಿಕ್, ಧರ್ಮಾಕ್, ಸಮೂದಾಯಾಕ್ ವ ಜಾತ್-ಕಾತಿಕ್  ಹಲ್ಕ್ ಕರುಂಕ್ ವ ಅಕ್ಮಾನ್ ಕರುಂಕ್ ಹ್ಯಾ ಕಾಣಿಯೆಚೊ ಉದ್ದೇಸ್ ನಹಿಂ. ಅಶೆಂ, ಲಾಂಬ್-ರೂಂದ್ disclaimer ಹರ್ಯೇಕಾ ಅವಸ್ವರಾಚ್ಯಾ ಸುರ್ವಾತೆರ್ ದಿಲಾಂ. ಹರ‍್ಯೇಕ್ ಅವಸ್ವರ್ ಲಗ್ಬಗ್ ಏಕ್ ವ್ಹರ್ ಲಾಂಬ್ ಆಸಾ. ರಾಜಸ್ತಾನಾಚ್ಯಾ ಮಣ್ಡಾವಾ ಪೊಲೀಸ್ ಠಾಣ್ಯಾಚ್ಯಾ ಇಲಾಕ್ಯಾಂತ್ ಹೆಂ crime thriller ಪಿಂತ್ರಾಯ್ಲಾಂ.

ರಜನಿ ಠಾಕುರ್ ಮ್ಹಳ್ಳಿ ಏಕ್ಲಿ ಠಾಕುರ್ ಸಮೂದಾಯಾಚಿ, ಊಂಚ್ಲ್ಯಾ ಘರಾಣ್ಯಾಚಿ, ತರ್ನಾಟಿ ಚಲಿ ಅಲ್ತಾಫ್ ನಾಂವಾಚ್ಯಾ ಆಪ್ಲ್ಯಾ ಮುಸ್ಲಿಮ್ ಪ್ರೇಮಿ ಸಾಂಗಾತಾ ಪೊಳೊನ್ ವೆತಾ. ಹ್ಯಾ ವಠಾರಾಂತ್ ಉಜ್ವ್ಯಾ ಪಂಥಿಚ್ಯೆ ಹಿಂದು ರಾಜಕಾರಣಿ ವ್ಹಡ್ ಪ್ರಭಾವಶಾಲಿ ಆಸಾತ್. ಹ್ಯಾ ರಾಜಕೀಯ್ ಪಾಡ್ತಿಚ್ಯಾ ‘ಯುವ ಮಂಡಳ್’ ಸಂಘಟಣಾಚೊ ಸ್ಥಳೀಯ್ ಮುಖೆಲಿ ಮಹಿಪಾಲ್. ಯುವ ಮಂಡಳ್ ಹೆಂ ಘಡಿತ್ ‘ಲವ್ ಜಿಹಾದ್’ ಫಿತೂರಿ ಮ್ಹಣ್ತಾ. ಮುಸ್ಲಿಮಾಂ ವಿರುದ್ಧ್ ನಾರೆ ಲಾಯ್ತಾ ಆನಿಂ ಪುರ್ಶಾಂವ್ ಕಾಡ್ತಾ.

ಅಲ್ತಾಫ್ ವಿರುದ್ಧ್ FIR ನೋಂದಣ್ ಕರುಂಕ್, ಠಾಣ್ಯಾಚೊ SHO ದೇವಿಲಾಲ್ ಸಿಂಘ್ ಹಾಚ್ಯೆ ವಯ್ರ್ ಮಹಿಪಾಲ್ ರಾಜಕೀಯ್ ದಬಾವ್ ಘಾಲ್ತಾ. ವಯ್ಲ್ಯಾನ್, SPಕ್ ಫೋನ್ ಕರ್ನ್ ತಾಚ್ಯೆ ಮುಕಾಂತ್ರ್ ದಬಾವ್ ಘಾಲ್ತಾ. ತಕ್ಶಣ್, ಪೊಳೊನ್ ಗೆಲ್ಲ್ಯಾ ಜೊಡ್ಯಾಕ್ ಧರ್ನ್ ಹಾಡಿಜೆ ಆನಿಂ ಮುಸ್ಲಿಮ್ ಚೆಡ್ಯಾಚ್ಯೆರ್ ಅಪಹರಣಾಚಿ ಕೇಜ್ ಥೊಪಿಜೆ ಮ್ಹಣ್ ಮಹಿಪಾಲ್ ಆನಿಂ SP ಹುಕುಮ್ ದಿತಾತ್.

ರಜನಿ ಠಾಕುರ್ ಘರ್ ಸೊಡ್ನ್ ಧಾಂವೊನ್ ವೆಚ್ಯಾ ಥೊಡ್ಯಾಂ ಮಹಿನ್ಯಾಂ ಪೈಲೆಂ, ಶಿವ್ಣೆಚ್ಯೆಂ ಕಾಮ್ ಕರ್ಚ್ಯೆಂ ಕೃಶ್ಣಾ ಮಳ್ಳೆಂ ಎಕ್ಲೆಂ ಪರಿಶಿಸ್ಟ್ ಜಾತಿಚ್ಯೆಂ ತರ್ನಾಟೆಂ ಚೆಡುಂ ಮಾಯಾಗ್ ಜಾತಾ. ತಾಚೊ ಭಾವ್ ಮಣ್ಡಾವಾ ಪೊಲೀಸ್ ಠಾಣ್ಯಾಂತ್ ದೂರ್ ದಿತಾ. ತೊ ಸಕಯ್ಲ್ಯೆ ಜಾತಿಚೊ ದೆಕುನ್ ಪೊಲೀಸ್ ತಾಚಿ ಪರ್ವಾ ಕರಿನಾಂತ್. ಮಹಿಪಾಲ್ ಆನಿಂ ತಾಚ್ಯೆ ತೀವ್ರಗಾಮಿ ಕಶೆಂ ಅಲ್ತಾಫಾ ವಿರುದ್ಧ್ ನಾರೆ ಲಾವ್ನ್ ಪೋಲಿಸಾಂಕ್ ದಬಾವ್ ಘಾಲ್ತಾತ್ ತೆಂ ತೊ ಪಳೆತಾ. ತಾಂಚ್ಯಾ ಪುರ್ಶಾಂವಾಂತ್ ವಿಲೀನ್ ತೊ ಜಾತಾ. ಕೃಶ್ಣಾಕ್ ಇಮ್ರಾನ್ ಮ್ಹಳ್ಳೊ ಮುಸ್ಲಿಮ್ ಚೆಡೊ ಘೆವ್ನ್ ದಾಂವ್ಲಾ ಮ್ಹಣ್ ತೊ ಮಹಿಪಾಲಾಕ್ ಫಟ್ ಸಾಂಗ್ತಾ. ಮುಸ್ಲಿಮ್ ಚೆಡೊ ಮ್ಹಣ್ ಆಯ್ಕಲ್ಲೆಂ‍ಚ್, ಯುವ ಮಂಡಳ್ ತಾಚ್ಯೆ ತರ್ಫೆನ್ ಪೊಲೀಸಾಂಚ್ಯೆರ್ ದಬಾವ್ ಘಾಲ್ತಾತ್ ಆನಿ FIR ನೊಂದ್ಣಿ ಜಾತಾ.

ಪೊಲೀಸ್ ತನ್ಕೆಂತ್ ಕಳೊನ್ ಯೆತಾ ಕಿ ಕೃಶ್ಣಾ, ವಿಜಯ್ ಮ್ಹಳ್ಳ್ಯಾಹಿಂದು ಚೆಡ್ಯಾಚ್ಯಾ ಮೋಗಾರ್ ಆಸ್ಲೆಂ. ಆಪ್ಲಿ ಕೇಜ್ ದಾಕಲ್ ಕರಿಜೆ ಮ್ಹಣ್ ಪೊಲೀಸಾಂಕ್ ದಾಂವ್ಡಾವ್ನ್ ವೆಲ್ಲೊ ಚೆಡೊ ಮುಸ್ಲಿಮ್ ಮ್ಹಣ್ ಫಟ್ ಸಾಕ್ಸ್ ದಿಲಿ ಮ್ಹಣ್ ತೊ ಸತ್ ಸಾಂಗ್ತಾ. ಹೊ ವಿಜಯ್ ಕೋಣ್ ಮ್ಹಣ್ ಪೊಲಿಸಾಂಕ್ ಕಳಿತ್ ಆಸಾನಾಂ. ಕೃಶ್ಣಾ ಲಾ-ಪತಾ ಜಾಲಾಂ ಮ್ಹಣ್ ತಾಚಿ ತಸ್ವೀರ್ ಠಾಣ್ಯಾಂತ್ missing ಬೊರ್ಡಾರ್ ಉಮ್ಕಳಾಯ್ತಾತ್.

ಮಣ್ಡಾವಾ ಗರ್ಲ್ಸ್ ಕೊಲೆಜಿಂತ್ ಆನಂದ್ ಸ್ವರ್ಣಾಕರ್ ಮ್ಹಳ್ಳೊ ಉಂಚಿ ಶೈಲಿಚೊ ಹಿಂದಿ ಪ್ರೊಫೆಸೊರ್. ತಾಚಿ ಉಲಂವ್ಚಿ ಆನಿಂ ಶಿಕಂವ್ಚಿ ರೀತ್  ಪಳೆವ್ನ್ ವಿಧ್ಯಾರ್ತಿ ತಾಚ್ಯಾ ಮೋಗಾರ್ ಪಡ್ತಾತ್. ಹೊ ಕಾಜಾರಿ ಆನಿಂ ಎಕಾ ಪುತಾಚೊ ಬಾಪೈ. ಪೂಣ್, ಹೊ ಆನಂದ್ ಸಕಯ್ಲ್ಯಾ ಜಾತಿಂಚ್ಯಾ ಅಂಕ್ವಾರ್ ಚೆಡ್ವಾಂಕ್ ಆಪ್ಲ್ಯಾ ಮೋಗಾಚ್ಯಾ ಜಾಳಾಂತ್ ಶಿರ್ಕಾಯ್ತಾ. ಕೃಶ್ಣಾಚೊ ಪ್ರೇಮಿ ವಿಜಯ್ ಹೊಚ್ ಆನಂದ್ ಮ್ಹಣ್ ಆಮ್ಕಾಂ ಕಳಿತ್ ಜಾತಾ, ಪೊಲೀಸಾಂಕ್ ನಹಿಂ. ಪೊಲೀಸಾಂಕ್, ಕೃಶ್ಣಾಚಿ ನಿರ್ಜೀವ್ ಕೂಡ್ ಎಕಾ ಬಸ್ ಸ್ಟೆಂಡಾಂತ್ ಟೊಯ್ಲೆಟಾಂತ್ ಮೆಳ್ತಾ. ವೀಕ್ ಖಾವ್ನ್ ಜಿವ್ಘಾತ್ ಕೆಲಾ ಮ್ಹಣ್ ಕೇಜ್ ದಾಕಲ್ ಜಾತಾ.

ದಹಾಡ್ ಸೀರಿಯಲಾಚಿ ಸಗ್ಳಿ ಕಾಣಿ ವಿವರುಂಚೊ ಇರಾದೊ ಮ್ಹಜೊ ನಹಿಂ. ನಾಂ, ಹಿ ಕಾಣಿ ಪಿಂತ್ರಾಂವ್ಚ್ಯೆ ಶೈಲೆಚೊ ವಿಮರ್ಸೊ ಹಾಂವ್ ಕರಿನಾಂ. ಸುರ್ವೆರ್ ಥಾವ್ನ್ ಆಮ್ಕಾಂ ಕಳಿತ್ ಆಸ್ತಾ ಕಿ ಆನಂದ್ ಸ್ವರ್ಣಾಕರ್ ಎಕ್ಲೊ psychopath serial killer. ಹಾಕಾ ಧರುಂಕ್ ಜಾಯಿತ್ತ್ಯಾಂ twists and turns ಉಪ್ರಾಂತ್ ಪೊಲೀಸಾಂಕ್ ಜಯ್ತ್  ಮೆಳ್ತಾ.

ಆನಂದ್ ಸ್ವರ್ಣಾಕರ್ 29 ಚಲಿಯಾಂಕ್ ಕಾಜರ್ ಜಾತಾಂ ಮ್ಹಣ್ ಆಪ್ಲ್ಯಾ ಮೋಗಾಚ್ಯಾ ಜಾಳಾಂತ್ ಶಿರ್ಕಯ್ತಾ. ಪೊಳೊನ್ ವಚೊನ್, ಹೊಟ್ಲಾಂತ್ ರಾತ್ ಫಾಲಿ ಕರ್ತಾ ಆನಿಂ ತಾಂಚ್ಯೆ ಕಡೆಂ ಶಾರಿರಿಕ್ ಸಂಬಂಧ್ ಕರ್ತಾ. ಗರ್ಭೆಸ್ತ್ ಜಾತೆಲೆಂಯ್ ದೆಕುನ್ ಗರ್ಬ್-ನಿರೋದ್ ಗುಳಿ ಘೆ ಮ್ಹಣ್ ಫುಸ್ಲಾಯ್ತಾ. ಹ್ಯೆ ಗುಳಿಯೆಂನಿಂ ಸಾಯನಾಯ್ಡ್ ವೀಕ್ ಮೆಳಯಿಲ್ಲೆಂ ಆಸ್ತಾ. ಬಸ್ ಸ್ಟೇಂಡಾಂತ್ಲೆಂ ಲೇಡಿಸ್ ಟೊಯಟಾ ಭಿತರ್ ವೀಕಾಳ್ ಗುಳಿ ಘೆವ್ನ್ ಹಿಂ ಚೆಡ್ವಾಂ ಆಪ್ಲೊ ಜೀವ್ ಹೊಗ್ಡಾಯ್ತಾತ್.

ಹ್ಯಾ ಆನಂದ್ ಸ್ವರ್ಣಾಕರ್ ಆನಿಂ ಮಂಗಳೂರು ಜಿಲ್ಲ್ಯಾಚ್ಯಾ ಸಾಯನಾಯ್ಡ್ ಮೋಹನ್ ಕುಮಾರಾಕ್ ಸಂಬಂಧ್ ಕಸಲೊ?

ಹೆಂ ಯೆದೊಳ್‍ಚ ಸಾಂಗ್ಲೆಲ್ಯೆ ಕಾಣಿಯೆ ಥಾವ್ನ್ ಸಮ್ಜಾತಾ. ಪೈಲೆಂ ಸಾಂಗ್ಲೆಲ್ಯಾ, ಬಾರಿಮಾರು ಅನಿತಾ ಬಂಗೇರಾ ಆನಿಂ ದಹಾಡ್ ವಿಡಿಯೊಚ್ಯೆಂ ಕೃಶ್ಣಾ ದೊಗಾಂಯೀ, psychopath serial killer ಚಿಂ ಶಿಕಾರ್. ದೋನೀ ಕೇಜಿಂನಿಂ ಉಜ್ವ್ಯಾ ಪಂಥಿಚ್ಯಾ ತೀವ್ರಗಾಮಿ ಹಿಂದು ಸಂಘಟಣಾಂನಿಂ ‘ಲವ್ ಜಿಹಾದ್’ ಫಿತೂರಿ ಆಸಾ ಮ್ಹಣ್ ಮುಸ್ಲಿಮ್ ತರ್ನಾಟ್ಯಾಂ ವಿರುದ್ಧ್ ಕಸ್ಸಲಿ ಸಾಕ್ಸ್ ನಾಸ್ತಾನಾಂ ಆರೋಪ್ ಮಾಂಡ್ಲೆಲೆಂ ಆಸ್ತಾ.

ದೆಕುನ್, ಹಿ ರಾಜಾಸ್ತಾನಾಂತ್ ಪಿಂತ್ರಾಯ್ಲೆಲಿ ‘ದಹಾಡ್’ ಏಕ್ ಕಾಲ್ಪನಿಕ್ ಕಾಣಿ ನಹಿಂ ಬಗಾರ್ ‘ದ ಮಂಗಳೂರು  ಸ್ಟೋರಿ’ ಮ್ಹಣ್ಯೆತಾ. ಸಾಯನಾಯ್ಡ್ ಆನಂದ್ ಮೋಹನ್ ಕುಮಾರಾಚ್ಯಾ ಜಿಣ್ಯೆ-ಕತೆಚ್ಯಾ ಅಧಾರಾರ್ ‘ದಹಾಡ್’  ನಿರ್ಮಾತಾಂನಿಂ ಹಿ ಕಾಣಿ ಗುಂತುನ್ ಹಾಡ್ಲ್ಯಾ.

‘ಲವ್ ಜಿಹಾದ್’ ಪಿತೂರಿಚೊ ಉಲ್ಲೇಕ್ ದೋನಿ ಕಾಣಿಯೆಂನಿಂ ಆಸಾ. ಕಸ್ಸಲೊ ಪ್ರೊಪಗಾಂದಾ ಕರ್ಚೊ ಇರಾದೊ ನಾಸ್ತಾನಾಂ, ಅಪೂರ್ಬಾಯೆನ್ ದಹಾಡ್ ಪಿಂತುರ್ ವಾಸ್ತವಿಕ್ ರೂಪಾನ್ psychopath serial killer ಆನಿಂ ತಾಚ್ಯಾ ಪರಿಸರಾಚಿ ಕಾಣಿ ಸಾಂಗ್ತಾ.

ಜರೂರ್ ಪಳೆಯಾ.

► ಫಿಲಿಪ್ ಮುದಾರ್ಥ್

“ಹಾಂವೆಂ ಟೀಜರ್ ಆನಿಂ ಟ್ರೈಲರ್ ಪಳೆಲಾಂ. ಜಶೆಂ ಗೋದಿ ಮಾಧ್ಯಮಾಂ ಆಸಾತ್ ತಶೆಂ ಹೆಂಯೀ. ಕಲೆಕ್ ಏಕ್ ಪ್ರೊಪಗಾಂಡ ಸಾಧನ್ ಜಾವ್ನ್ ವಾಪ್ರುಂಕ್. ಭಾಜಪಾಕ್ ಆನಿಂ ಕೇಸರಿ ಪಂಗ್ಡಾಂಕ್ ಭಾಜ್ಲೆಲೆಂ ಮೆಳ್ಳೆಂ. ಮುಸ್ಲಿಮಾಂ ವಿರುದ್ಧ್ ಲವ್ ಜಿಹಾದ್ ಲವ್ ಜಿಹಾದ್ ಮ್ಹಣ್ ಬೊಬೊ ಘಾಲುಂಕ್. ಹಾಂವ್ ಯೇನಾ. ತುಕಾ ಜಾಯ್ ತರ್ ವಚ್. ಪಯ್ಲೆಂಚ್ ಸಾಂಗ್ತಾಂ. ತುಕಾ ಹಿಂಸಾ, ವಾಳ್ಚೆಂ ರಗತ್, AK-47 ಬಂದೂಕೊ, ಫುಟ್ಚೆ ಬೋಂಬ್ ಅಸಲೆಂ ಪೂರಾ ಪಳೆಂವ್ಕ್ ಸೊಸಾನಾಂ. ಕಿತ್ಯಾಕ್ ಇತ್ಲಿ ಅಸಕ್ತ್ ಹ್ಯಾ ಫಿಲ್ಮಾಂತ್ ತುಕಾ? ಮ್ಹಾಕಾ ಸಮ್ಜನಾಂ.”

“ತುಜೆಂ ರಾಜಾಂವ್ ಸಮ್ಜಲೆಂ ಮ್ಹಾಕಾ. ಪೂಣ್…” ಜಾಪ್ ದಿಲಿ ಹಾಂವೆಂ. ಮುಕಾರುನ್, “ಖುದ್ದ್ ಪಳೆತಾಂ ಹಾಂವ್. ಜಶೆಂ ಗೋದಿ ಮಾಧ್ಯಮಾಂ ಆಸಾತ್ ತಶೆಂ ಮುಸ್ಲಿಮ್ ಸಮರ್ಥಕ್ ಆಸಾತ್. ದಾವ್ಯಾ ಪಂಥಿಚೆಂ ರಾಜಕಾರಣ್ ಕರ್ತೆಲೆ ಹಿಂದು ವಿರೋಧಿ ಪ್ರಚಾರ್ ಕರ್ತಾತ್. ನಾಣ್ಯಾಕ್ ದೋನ್ ಕುಶಿ ಆಸಾತ್. ತಶೆಂ, ಹರ್ಯೆಕಾ ವಿಷಯಾ ವಯ್ರ್ ವಿವಾದ್ ಆಸಾಜೆಚ್.”

ಹ್ಯಾಚ್ ಮಾಯ್ 5 ವ್ಯೆರ್, first day first show ಹಾಂವ್ ಪಳೆವ್ನ್ ಆಯ್ಲೊಂ. ಖಾಸ್ ಆನಿಂ ಜಬರ್ದಸ್ತ್ ಫಿಲ್ಮ್ ನಹಿಂ ಹೆಂ. ಬಸ್, ಏಕ್ ಪಾವ್ಟಿಂ ಪಳೆ ಆನಿಂ ವಿಸ್ರೊನ್ ವಚ್. ಕಿತ್ಯಾಕ್, ಸಂವಾದ್ ಬರೊ ನಾಂ, ನಿರ್ದೇಶನಾಂತ್ ಹೊಗ್ಳುಂಚ್ಯೆ ತಸಲೆಂ ಕಾಂಯ್ ನಾಂ. ನಟನ್ ಓಕೆ ಓಕೆ. ಕಾಣಿ ಕೇರಳಾಚ್ಯಾ ಚ್ಯಾರ್ ನರ್ಸಿಂಗ್ ಸ್ಟೂಡೆಂಟಾಚಿ ದೆಕುನ್ ಚವ್ಗಾಂ ನಟಿಂನಿಂ ಮಲಯಾಳಮ್ ಉಚ್ಚಾರಣ್ ವಾಪ್ರುನ್ ಹಿಂದಿ ಉಲಯ್ಜೆ ಮ್ಹಣ್ ಭಗ್ಚೆಂ ಸಹಜ್. ಏಕ್ಲ್ಯಾ ದೋಗಾಂನಿಂ ನಾಕಾಂತ್ ಥಾವ್ನ್ (nasal) ಉಲಂವ್ಕ್ ಪ್ರೇತನ್ ಕೆಲಾಂ ಮ್ಹಣ್ಯಾಂ. ಮಲಯಾಳಮ್ ಸಿನೆಮಾಂತ್ ಇತ್ಲಿಂ ಬರಿಂ ನಟಿ ಆಸಾತ್. ಮಲಯಾಳಮ್ ಮಾಯ್-ಭಾಸೆಚ್ಯಾ ನಟಿಂಕ್ ಘೆತ್ಲೆಲೆಂ ತರ್, ಸಂವಾದ್ ಡಿಲಿವರಿ ಸ್ವಾಭಾವಿಕ್ ಜಾತಿ. ಹ್ಯೊ ಚಲಿಯೊ ಅಸ್ಲಿ ಮಲಯಾಳಿ ಮ್ಹಣ್ ಭಗ್ತೆಂ. ಆಸೊಂ.

“ಸಮಾಧಾನ್ ಜಾಲೆಂಮೂ ತುಕಾ, ಖುದ್ದ್ ಫಿಲ್ಮ್ ಪಳೆವ್ನ್? ಆತಾಂ ಕಿತೆಂ ಮ್ಹಣ್ತಾಯ್ ತುಂ?” ಹಾಂವ್ ಘರಾ ಪಾವ್‍ಲ್ಲೆಂಚ್ ವಿಚಾರಿ ಯೆಜ್ಮಾನ್.

“ಸಗ್ಳಿ ಕಾಣಿ ಪೈಲೆಂ ಆಯ್ಕ್. ಮಟ್ವ್ಯಾನ್ ಸಾಂಗ್ತಾಂ. ಶಾಲಿನಿ ಉನ್ನಿಕ್ರಶ್ಣನ್ ತಿರುವನಂತಪುರ ಜಿಲ್ಲೆಚ್ಯೆ ಎಕ್ಯೆ ಸೊಭಿತ್ ಹಳ್ಳೆಂತ್ಲೆಂ, ಕಸ್ಸಲೆಂ ಕಪಟ್ ನಾತ್ಲೆಲೆಂ ಭೊಳೆಂ ಚೆಡುಂ. ಸಾದೆಂ, ಮೊಗಾಳ್ ಆನಿಂ ಆಪೂಟ್ ಹಿಂದು ಘರಾಣೆಂ ತಾಚೆಂ. ತೆಂ ಕಾಸರಗೋಡ್ ಏಕ್ಯೆ ನರ್ಸಿಂಗ್ ಕೊಲೆಜಿಂತ್ ಭರ್ತಿ ಜಾಲೆಂ. ತಾಚ್ಯಾ ಹೊಶ್ಟೆಲ್ ರೂಮಾಂತ್ ತಿಂ ಚವ್ಗಾಂ: ಆಸಿಫಾ ಬಾ ಮುಸ್ಲಿಮ್, ನಿಮಾ ಮೆಥ್ಯು ಕತೊಲಿಕ್, ಆನಿಂ ಗೀತಾಂಜಲಿ ಮೆನನ್ ಆಪ್ಲೆಂ ಮೂಳಾವೆಂ ಹಿಂದು ಧರ್ಮ್ ಪಾಳಿನಾತ್ಲೆಲ್ಯಾ ಕಮುನಿಸ್ತ್ ಕುಟ್ಮಾಂತ್ಲೆಂ ನಾಸ್ತಿಕ್.”

“ಅಸಿಫಾ ಬಾ ಶೆಳಿಯೆಚ್ಯಾ ವೇಸಾರ್ ದುಷ್ಟ್ ಭೆಡಿಯಾ (wolf). ಇಸ್ಲಾಮಿ ಸಲಫಿ ತೀವ್ರವಾದಿ ಪಂಗ್ಡಾಚ್ಯಾ ಸ್ಲೀಪರ್ ಸೆಲ್ಲಾಚೆಂ ಕಾರ್ಯಕರ್ತಾ. ಆಪ್ಲಿಂ ಶಿಕ್ಣಾಂ ಭಾರಿಚ್ ಬುದ್ವಂತ್ಕಾಯೆನ್ ವಾಪ್ರುನ್, ಶಾಲಿನಿಕ್ ಆನಿಂ ಗೀತಾಂಜಲಿಕ್ ಇಸ್ಲಾಮಿ ದೊತೊರ್ನ್ ಶಿಕಯ್ತಾ. ಮುಸ್ಲಿಮ್ ಚಲ್ಯಾಂಚಿ ವೊಳೊಕ್ ಕರುನ್ ದಿತಾ ಆನಿಂ ತಾಂಚ್ಯಾ ಮೋಗಾರ್ ತಿಂ ಪಡ್ತಾತ್. ಲಗ್ನಾ-ಪೈಲೊ ಲೈಂಗಿಕ್ ಸಂಭೋಗ್ ತಿಂ ಕರ್ತಾತ್. ಶಾಲಿನಿ ಉರ್ಫ್ ಫಾತಿಮಾ ಬಾ ಗರ್ಭೆಸ್ತ್ ಜಾತಾ. ತವಳ್ ತಾಚೊ ಪ್ರೇಮಿ ಮಾಯಾಗ್ ಜಾತಾ. ಮಜ್ಬೂರ್ ಜಾವ್ನ್ ಸಲಫಿ ಅತಂಕ್ವಾದಿ ಸಂಗಿ ನಿಕಾ ಕರಿಜೆ ಪಡ್ತಾ. ಹೊ ಅತಂಕ್ವಾದಿ ಭುಲವ್ನ್, ಪುಸ್ಲಾವ್ನ್, brainwash ಕರ್ನ್, ಫಾತಿಮಾಕ್ ಅಫಾನಿಸ್ತಾನಾಂತ್ಲ್ಯಾ ISIS ಲಿಪ್ಕೊರ್ (hide-out) ರೆಗಿಸ್ತಾನಿ ಘರಾಂನಿಂ ವರ್ತಾ. ISIS ಝುಜಾರ‍್ಯಾಂಚೆಂ sex slave ಕೆಲೆಂ ದೆಕುನ್ ತೆಂ ಪೊಳೊನ್ ವೆತಾ. ISIS ವಿರುದ್ಧ್ ಕಾರ‍್ವಾಯ್ ಕರ್ಚೆಂ UN ಮಿಲಿಟರಿ ದಳ್ ತಾಕಾ “ಟೆರರಿಸ್ಟ್” ಮ್ಹಣ್ ಬಂಧಿ ಕರ್ತಾ. ತಾಚೆಂ ವಿಚಾರಣ್ ಚಲ್ತಾ.”

“ಹ್ಯಾ ವಿಚಾರಣಾ ಥಾವ್ನ್ ಫಿಲ್ಮ್ ಸುರು ಜಾತಾ. ಸಗ್ಳಿ ಕಾಣಿ ಶಾಲಿನಿಚ್ಯಾ ಸಂದರ್ಶಾನಾ ದ್ವಾರಿಂ ಉಗ್ತಿ ಜಾತಾ. ಗೀತಾಂಜಲಿಕ್ ಕಿತೆಂ ಜಾಲೆಂ? ತಾಣೆಂ ಕಿತ್ಯಾಕ್ ಜಿವ್ಘಾತ್ ಕೆಲೊ? ನಿಮಾ ಮೆಥ್ಯು ಕನ್ವೆಡ್ತರ್ ಜಾಲೆಂ-ನಾಂ ಮ್ಹಣ್ ತಾಕಾ ಶಿಕ್ಶಾ ದೀಂವ್ಕ್ ತೀವ್ರವಾದಿ ಇಸ್ಲಾಮಿ ಜಣಾಂನಿಂ ತಾಚ್ಯೆರ್ ಲಗಾತರ್ ಸಾಮೂಹಿಕ್ ಬಲಾತ್ಕಾರ್ ಕೆಲೊ. ಹೆಂ ದೂರ್ ಪೊಲಿಸಾಂಕ್ ದಿತಾನಾಂ ಕಿತ್ಯಾಕ್ ತಾಚ್ಯೆ ಥಾವ್ನ್ ರುಜ್ವಾತ್ ಮಾಗ್ಲಿ? ಅಧಿಕೃತ್ ಲೆಕಾ ಪ್ರಮಾಣೆಂ 32 ಹಜಾರ್ ಆನಿಂ ಅನಧಿಕೃತ್ ಸೂತ್ರಾಂ ಪ್ರಮಾಣೆಂ 50 ಹಜಾರ್ ಹಿಂದು ಆನಿಂ ಕ್ರಿಸ್ತಾಂವ್ ಚಲಿಯಾಂಕ್ ‘ಲವ್ ಜಿಹಾದ್’ ಝಾಳಾಂತ್ ಶಿರ್ಕಾಯ್ಲಾಂ ಮ್ಹಣ್ ನಿಮಾನ್ ಕಶೆಂ ಸಾಂಗ್ಲೆಂ? ಕೇರಳ ಪೊಲಿಸ್ ಆನಿಂ ಕೇರಳ ಸರ್ಕಾರ್ ಮೊನೆ ಕಿತ್ಯಾಕ್? ಹ್ಯಾಂ ಖಡಾಖಡ್ ಸವಲಾಂಚಿ ಜಾಪ್ ಜಾಯ್ ಮ್ಹಣ್ ನಿಮಾ ಮೆಥ್ಯುಚೊ ಏಕಾಲಾಪ್ (monologue) ಲಾಂಬ್ ದ್ರಶ್ಯಾ ಮುಖಾಂತ್ರ್ ಪಿಂತ್ರಾಯ್ಲಾ. ಕಿತ್ಯಾಕ್? ಹೆಂ ಸಗ್ಳೆಂ ಸಮ್ಜೊಂಕ್ ತುಂವೆಂ ಆನಿಂ ಪಬ್ಲಿಕ್ ಲೋಕಾನ್ ಹೆಂ ಫಿಲ್ಮ್ ಪಳೆಜೆ ಮ್ಹಣ್ ಮ್ಹಜಿ ಅಭಿಪ್ರಾಯ್”.

ಸೊಸ್ಣಿಕಾಯೆನ್ ಹಿ ಕಾಣಿ ಆಯ್ಕೊನ್, ಮ್ಹಜಿ ಮದಾಮ್ ಉಲಯ್ಲಿ:

“ವಾದ್ ವಿವಾದ್ ಉಟ್ಲೆಲ್ಯಾ ಉಪ್ರಾಂತ್, ಫಿಲ್ಮ್ ನಿರ್ಮಾತಾಂನಿಂ ಅಂಕ್ಡ್ಯಾಂಚಿ ತಿದ್ವಣ್ ಕೆಲ್ಯಾ ಮ್ಹಣ್ ಹಾಂವೆಂ ವಾಚ್ಲಾಂ. ಕೇರಳಾ ಥಾವ್ನ್ ಕೇವಲ್ 3 ಚಲಿಯೊ ಮಾಯಾಗ್ ಜಾಲ್ಯಾತ್. ಕನ್ವೆಡ್ತರ್ ಜಾವ್ನ್, ತೀವ್ರಗಾಮಿಂಚ್ಯಾ ಝಾಳಾಂತ್ ತಿಂ ಶಿರ್ಕಲಿಂ. ISIS ಝುಜಾರ‍್ಯಾಂನಿಂ ತಾಂಕಾಂ ಲೈಂಗಿಕ್ ಗುಲಾಮ್ ಕೆಲಾಂ. ಹೆಂ ನೀಜ್ ವ್ಹಯ್. ಪೂಣ್, ತೀನ್ ನೀಜ್ ಕಾಣಿಯೆಂಚ್ಯಾ ಆಧಾರಾರ್ ಏಕ್ ಕಾಲ್ಪನಿಕ್ ಫಿಲ್ಮ್ ಕೆಲೆಂ ಆನಿಂ ತಾಕಾ ದ ಕೇರಳ ಸ್ಟೊರಿ ಮ್ಹಣ್ಚೆಂ ಸಾರ್ಕೆಂ ನಹಿಂ. ಏ ಕೇರಳ ಸ್ಟೋರಿ ಮ್ಹಣ್ಯೆತ್. ಕೇರಳಾಂತ್ ಅತಂಕ್-ವಾದಿ ಇಸ್ಲಾಮಿ ಶರಿಯಾ ಕಾನುನಾಚೊ ಟಾಯ್ಮ್ ಬೊಂಬ್ ಆಸಾ ಮ್ಹಣ್ ಸಂವಾದ್ ಬರಯ್ಲಾ. ಹೆಂ-ಯೀ ಪ್ರಚಾರ್ ಶಿವಾಯ್, ಸತ್ ನಹಿಂ. ವೆಗಿಂಚ್, God’s Own Country ಕೇರಳಾಂತ್ ಹಿಂದು ಧರ್ಮ್ ಪಾಳ್ತೆಲ್ಯಾಂಕ್ ಯೆಮ್ಕೊಂಡ್ ಜಾತೆಲೆಂ ಮ್ಹಣ್ಚೆಂ ಆನ್ಯೇಕ್ ಫಟ್ಕಿರೊ ಪ್ರಚಾರ್. ದೆಕುನ್, ಮ್ಹಕಾ ಹೆಂ ಫಿಲ್ಮ್ ಕೇರಳಾಚೆಂ ನಾಂವ್ ಪಾಡ್ ಕರಿಜೆ ಮ್ಹಳ್ಳ್ಯಾ ಇರಾದ್ಯಾನ್ ಫಿಲ್ಮಾಯ್ಲಾಂ ಮ್ಹಣ್ ಭಗ್ತಾ. ಅಪ-ಪ್ರಚಾರ್ ಹೆಂ ಫಿಲ್ಮ್ ಕರ್ತೆಲ್ಯಾಂಚೊ ಎಜೆಂಡಾ. ಹೆಂಚ್ ಸತ್ ಮ್ಹಣ್ತಾಂ ಹಾಂವ್!”

ಮುಕಾರುನ್ ತಿ ಮ್ಹಣಾಲಿ:

“ಆಯ್ಲೆವಾರ್, ಏರ್ ಇಂಡಿಯಾ ಫ್ಲಯ್ಟಾರ್ ಸೊರೊ ಪಿಯೆವ್ನ್ ಆಮಾಲ್ ಜಾಲ್ಲ್ಯಾ ಎಕಾ ಪಯ್ಣಾರ‍್ಯಾನ್, ಬಗ್ಲೆನ್ ಬಸ್ಲೆಲ್ಯಾ ಸಹ-ಪಯ್ಣಾರಿ ಸ್ತ್ರೀಯೆಚ್ಯಾ ಆಂಗಾರ್ ಮುತ್ಲೆಲಿ ಗಜಾಲ್ ವಾಯ್ರಲ್ ಜಾಲಿ. ಹ್ಯೆ ಎಕ್ಯೆ ವಾಸ್ತವಿಕ್ ಘಡಿತಾಚ್ಯಾ ಆಧಾರಾರ್ ಜರ್ ಅಮೆರಿಕಾ ವ ಯುರೋಪಾಚ್ಯಾ ಕೋಣ್ ಎಕಾ ಫಿಲ್ಮ್ ನಿರ್ಮಾತಾನ್ ‘ದ ಇಂಡಿಯನ್ ಸ್ಟೋರಿ’ ಮ್ಹಣೊನ್ ಏಕ್ ಫಿಲ್ಮ್ ಕೆಲೆಂ ಆನಿಂ ಹಜಾರೊಂ ಇಂಡಿಯನ್ ಅಶೆಂ ಮುತ್ತಾತ್ ಮ್ಹಣ್ ಫಿಲ್ಮಾಚ್ಯಾ ಸುರ್ವೆರ್ ಉಲ್ಲೇಕ್ ಕೆಲೊ. ತರ್, ಆಮ್ಕಾಂ ಹಲ್ಕ್ ಜಾಂವ್ಚೆಂ ಸ್ವಾಭಾವಿಕ್ ನಹಿಂ-ಗೀ? ತಶೆಂ, ಬಿಬಿಸಿನ್ ‘ದ ಮೋದಿ ಕ್ವೆಸ್ಚನ್’ ಡೊಕ್ಯುಮೆಂಟರಿ ಬ್ರಿಟನಾ ಭಿತರ್ ಮಾತ್ರ್ ಪ್ರಸಾರ್ ಕೆಲ್ಲ್ಯಾ ವೆಳಾ, ಆಮ್ಕಾಂ ಗಳ್ಯಾಂತ್ ಲಾಸ್ಲೆಂ-ಮೂ? ಕಿತ್ಯಾಕ್ ಆಮಿಂ ತಿ ಡೊಕ್ಯುಮೆಂಟರಿ ಬ್ಯೇನ್ ಕೆಲಿ? ಅತಾಂ, ಕೇರಳ ಸರ್ಕಾರಾನ್ ಜರ್ ಹೆಂ ಫಿಲ್ಮ್ ಬ್ಯೇನ್ ಕರಿಜೆ ಮ್ಹಣ್ ನಿರ್ಧಾರ್ ಕೆಲೊ ತೆಂ ತಾಂಚ್ಯೆಂ ಹಕ್ಕ್. “

ಯೆಜ್ಮಾನಿಚ್ಯೆಂ ರಾಜಾಂವ್ ಆಯ್ಕೊನ್, ಮ್ಹಕಾಯೀ ಭಗ್ಲೆಂ: ತಿಚ್ಯಾ ವಾದಾಂತ್ ತೀರ್ಲ್ ಆಸಾ. ತರಿಪುಣ್, ಕೊಣಾಕ್ ಫಿಲ್ಮ್ ಪಳೆಂವ್ಕ್ ಮನ್ ಆಸಾ, ತಿಂ ಪಳೆಂವ್ದಿ. ಹರ್ಯೇಕ್ಲ್ಯಾಕ್ ಆಪ್ಲಿಚ್ ಚಿಂತ್ಚಿ ಶ್ಯಾಥಿ ಆಸಾ. ತಶೆಂ ಸೆನ್ಸರ್ ಬೊರ್ಡಾನ್ A ಸರ್ಟಿಫಿಕೇಟ್ ದಿಲ್ಯಾ. 18 ವ್ಹರ್ಸಾಂಚಿ ಪ್ರಾಯ್ ಭರ್ಲೆಲಿಂ ಮಾತ್ರ್ ಫಿಲ್ಮ್ ಪಳೆತೆಲಿಂ. ಪಳೆನಾಸ್ತನಾಂ, ಫಿಲ್ಮಾಚ್ಯೆಂ ಖಂಡನ್ ಕರ್ಚೆಂ ಸಾರ್ಖೆಂ ನಹಿಂ.

ಕಿತ್ಲೆಂ ಆನಿಂ ಕಶೆಂ ಸಾಂಗ್ಲ್ಯಾರ್-ಯೀ, ಯೆಜ್ಮಾನಿಚ್ಯೆಂ ಮನ್ ಮಾತ್ರ್ ಬದ್ಲಿ ಕರುಂಕ್ ಹಾಂವ್ ಸಫಳ್ ಜಾವ್ನಾ. ಹೆಂ ಕಾಂಯ್ ನವೆಂ ನಹಿಂ. ಮ್ಹಕಾ ಚಾಳಿಸ್ ಆನಿಂ ಚ್ಯಾರ್ ವ್ಹರ್ಸಾಂಚೊ ಅನ್ಭೋಗ್ ಆಸಾ. ರೆಸ್ಫೆರ್ ಜಾಲ್ಲ್ಯಾ ದಿಸಾ ಥಾವ್ನ್, right or wrong ತಿಚ್ಯೆಂಚ್ last word. ತಿಣೆಂ ಸಾಂಗ್ಲೆಲೆಂಚ್ ಜಾಯ್ಜೆ, ಸಾಯ್ಬಾ ಭೊಗೊಸ್ ಮ್ಹಣ್ತಾಂ! ಹಾಚ್ಯೆ ವಯ್ರ್ ಏಕ್ ಫಿಲ್ಮ್ ಕೆಲ್ಯಾರ್ ಬರೆಂ. ದ ಮೆನ್ಸ್ ಸ್ಟೋರಿ ಮ್ಹಣ್ ಶೀರ್ಷಕ್ ದೀವ್ನ್!

► ಫಿಲಿಪ್ ಮುದಾರ್ಥ್

“ಹರ ಹರ ಮಹಾದೇವ್…ಏಕ್‌ಚ್ ಖುದ್ದ್ ಮೊರೊಂಕ್ ತಯಾರ್ ರಾವಾ ವ ಮಾರುಂಕ್. ದುಸ್ರೊ ಕಸ್ಲೊಚ್ ವಿಕಲ್ಪ್ ನಾಂ. ಹೆ ಕೊಯ್ತೆ ಪಳೆಯಾ. ಅನ್-ಭಾವಾಡ್ತ್ಯಾಂಚೆ ಗಳೆ ಕಾತ್ರುಂಕ್. ಹರ ಹರ ಮಹಾದೇವ್”. ಅಶೆಂ ಸುರ್ವೆರ್ ಆಯ್ಕೊಂಕ್ ಮೆಳ್ಳೆಂ.

“ಆಯ್ಕಲೆಂಯ್-ಮೂ? ಮೋದಿ ಲೆಗುನ್ ಆಪ್ಲಿಂ ಥೊಡಿಂ ಭಾಶಣಾಂ ಹರ ಹರ ಮಹಾದೇವ್ ಮ್ಹಣ್ ಸುರ್ವಾತ್ ಕರ್ತಾ. ದೆಕುನ್, ತೊ ಮುಸ್ಲಿಮಾಂಚೊ ನರ-ಸಂಹಾರ್ ಕರುಂಕ್ ಉಲೊ ದೀತಾ ಮ್ಹಣ್ ಸಮ್ಜೊನ್ ಕೇಸರಿ ದಳಾಂಚ್ಯೆ ಪುಡಾರಿ ದ್ವೇಷ್ ಭಾಶಣಾಂ ದೀತಾತ್. ದೇಸಾಂತ್ ದ್ವೇಷ್ ಅಪ್ರಾಧ್ ವಾಡೊನ್ ಆಯ್ಲ್ಯಾತ್. ಪ್ರಧಾನಿ ಶ್ರೀ ನರೆಂದ್ರ ಮೋದಿನ್ ಹಾಚ್ಯಾ ವಿರುದ್ಧ್ ಉಲಯ್ಜೆ ಆಸ್ಲೆಂ. ಪೂಣ್, ತೊ ಮೊನೊ ಜಾಲಾ”.  ಹಾಂವೆಂ ಮ್ಹಜಿ ಕೊಮೆಂಟ್ರಿ ಚಾಲು ದವರ್ಲಿ.

“ತುಜಿ ಕೊಮೆಂಟ್ರಿ ಬಂಧ್ ಕರ್, ಅತಾಂ. ವೊಗೆಂ ರಾವೊನ್, ಪಳೆವ್ಯಾಂ.” ಯೆಜ್ಮಾನಿನ್ ಮ್ಹಕಾ ದಾರಾಯ್ಲೆಂ.

“ಪಯ್ಲೊ ಭಾಗ್ ತುವೆಂ ಫುಲ್ಲ್ ಪಳೆಂವ್ಕ್ ನಾಂ ನೇ? ದೆಕುನ್ ಸಾಂಗ್ತಾಂ: ಗುಜರಾತ್ 2002 ಕೋಮು ದೊಂಬಿಕ್ ನರೆಂದ್ರಾ ಮೋದಿ ಶೀದಾ ಜವಾಬ್ದಾರ್ ಮ್ಹಳಾಂ.”

“ಸುಪ್ರೀಮ್ ಕೊಡ್ತಿನ್ ನೆಮ್ಲೆಲ್ಯಾ SIT ನ್ ದಾಕಲ್ ಕೆಲ್ಲ್ಯಾ closure report ಪ್ರಮಾಣೆಂ, ನರೆಂದ್ರಾ ಮೋದಿನ್ ಕ್ರಿಮಿನಲ್ ಪಿತೂಳ್ ರಚ್ಲೆಲಿ ಮ್ಹಣ್ ರುಜು ಕರುಂಕ್ ಆನಿಂ ಕಾನುನಿ ಕ್ರಮ್ ಘೆಂವ್ಕ್ ಘರ್ಜ್ಯೆಚ್ಯೆ ಪುರಾವೆ ನಾಂತ್. ಮುಕದ್ದಮ್ ಚಲಂವ್ಕ್ ಗವಯ್ ದಿತೆಲೆ ಜಾಯ್. ಬಿಬಿಸಿಚ್ಯಾ ಪತ್ರ್‌ಕರ್ತಾಂನಿಂ ಜಮಯಿಲ್ಲ್ಯಾಂ ಆನಿಂ ಪ್ರಸಾರ್ ಕೆಲ್ಲ್ಯಾಂ ವೀಡಿಯೊ ಆನಿ ಸಂದರ್ಶನಾಂಕ್ ಕೊಡ್ತಿಂತ್ ಮೋಲ್ ನಾಂ”.

“ಗವಯ್ ದಿತೆಲ್ಯಾಂಕ್ ಭೆಸ್ಟಾಂವ್ನ್ ದವರ್ಲೆಲೆಂ ನೇ? ಚಸ್ಮಾದೀತ್ ಗವಹ್ ಆಸ್ಲೊ. ತಾಚೊ ಗ್ರಹ್ ಮಂತ್ರಿ, ಹರೆನ್ ಪಾಂಡ್ಯಾ. ತಾಕಾ ಜಿವ್ಶಿಂ ಮಾರ್ಲೆಂ. ತೊ ಜರ್ ಜಿವಿತ್ ಆಸ್ಲೊ, ನರೆಂದ್ರಾ ಮೋದಿ ಜಯ್ಲಾಚ್ಯೆಂ ಶಿತ್ ಖಾತೊ!” ಎಕಾ ವಿಮಾನ್ ಪಯ್ಣಾ ವೆಳಾ ಜೆಸ್ವಿತ್ ಯಾಜಕ್ ಸೆಡ್ರಿಕ್ ಪ್ರಕಾಶ್ ಲೋಬೊಕ್ ಹರೆನ್ ಪಾಂಡ್ಯಾ ಮೆಳ್ಳೊ. ಸೆಡ್ರಿಕ್ ಪ್ರಕಾಶ್ Concerned Citizens Tribunal ತನ್ಕಿ ಗ್ರುಪಾಚೊ ಸಾಂದೊ. ’ಹಿಂದು ಜಮೆ ಮುಸ್ಲಿಮಾಂ ವಿರುದ್ದ್ ಫಾರಿಕ್ಪಣ್ ಘೆತೆಲೆ. ಪೊಲಿಸಾಂನಿಂ ತಾಂಕಾ ಆಡಂವ್ಕ್ ನಜೊ. ಅಶೆಂ ಮೋದಿನ್  2002 ಫೆಬ್ರೆರ್ 27 ರಾತಿಚ್ಯಾ ಗುಪ್ತ್ ಮೀಟಿಂಗಾಂತ್ ಒರ್ಡರ್ ದಿಲ್ಲೆಂ. ತ್ಯಾ ಮೀಟಿಂಗಾಂತ್ ಆಪುಣ್ ಆಸ್ಲೊಂ ಮ್ಹಳೆಂ ಹರೆನ್ ಪಾಂಡ್ಯಾನ್’. ಉಪ್ರಾಂತ್, ತಸಲೆಂ ವಾಕ್ಮೂಲ್ ತಾಣೆಂ ಟ್ರಿಬೂನಲಾಕ್ ದಿಲಾಂ ಮ್ಹಳ್ಳಿ ಖಬರ್ ಲೀಕ್ ಜಾಲಿ. ತಶೆಂ ತಾಚೊ ಜೀವ್ ಗೆಲೊ.”

“ಡೊಕ್ಯುಮೆಂಟರಿಂತ್ ಬಿಜೆಪಿ ಮುಕೆಲಿ ಸ್ವಪನ್ ದಾಸ್ ಗುಪ್ತಾ ಉಲಯ್ಲಾ ಮೂ? ’ಎಜೆಂಡಾ ಸ್ಪಷ್ಟ್ ಆಸ್ಲೊ. ರಾಜಕೀಯ್ ಎಜೆಂಡಾ. ಮೋದಿಚ್ಯೆಂ ರಾಜಕೀಯ್ ಜೀವನ್ ನಾಸ್ ಕರ್ಚೊ ಎಜೆಂಡಾ’. ತುಂವೆಂ ಹಿಂ ಉತ್ರಾಂ ಆಯ್ಕಲ್ಯಾಂತ್ ಮೂ ಪಯ್ಲ್ಯಾ ಭಾಗಾಂತ್?” ಉಗ್ಡಾಸ್ ಕರಿ ಮದಾಮ್.

“ನರೆಂದ್ರಾ ಮೋದಿನ್ ಏಕ್ ನವೆಂ ಭಾರತ್ ನಿರ್ಮಾಣ್ ಕರ್ತಾಂ ಮ್ಹಣ್ ಭಾಸಯ್ಲಾಂ. ತಾಚ್ಯಾ ಹ್ಯಾ ನವ್ಯಾ ಭಾರತಾಂತ್, ಮುಸ್ಲಿಮ್ ಅಲ್ಪ್-ಸಂಕ್ಯಾತ್ ಸಮೂದಾಯಾಕ್ ಕಸಲೊ ಜಾಗೊ ಆಸಾ? ತಾಂಚ್ಯೆಂ ಅಸ್ತಿತ್ವ್ ಕಿತೆಂ? ಹಿಂ ಫಾವೊತಿಂ ಸವಲಾಂ ನೇ? ಮೋದಿಚ್ಯೆಂ ಆಡಳ್ತೆಂ ಮುಸ್ಲಿಮಾಂಚ್ಯೆಂ ಮತ್-ದಾನ್ ಹಕ್ಕ್ ಕಾಡ್ನ್ ಉಡವ್ನ್ ತಾಂಕಾ ಸೆಕಂಡ್ ಕ್ಲಾಸ್ ನಾಗ್ರಿಕ್ ಕರುಂಕ್ ಪೆಚಾಡ್ತಾ ಮ್ಹಣ್ತಾ ಲೇಕಿಕಾ ಅರುಂಧತಿ ರೋಯ್. ತಿಚಿ ಸ್ಪಷ್ಟ್ ಅಭಿಪ್ರಾಯ್ ಡೊಕ್ಯುಮೆಂಟರಿ ಪಿಂತ್ರಾಯ್ತಾ. ಮ್ಹಜಿಯೀ ಅಭಿಪ್ರಾಯ್ ತಶಿಚ್”

“ಅರುಂಧತಿ ರೋಯ್ ಟುಕ್ಡೆ ಟುಕ್ಡೆ ಗ್ಯೇಂಗ್-ವಾಲಿ. ತಿಕಾ ಕೋಣ್ ಕ್ಯೇರ್ ಕರ್ತಾ?” ಉಳ್ಟಿ ಅಭಿಪ್ರಾಯ್ ಯೆಜ್ಮಾನಿಚಿ.

ಹರ ಹರ ಮಹದೇವ್. ಹ್ಯಾ ನಾರ‍್ಯಾಂ ಮಧೆಂ, ಕೆಮರಾ ಆಮ್ಕಾಂ 2007 ಇಸ್ವೆಕ್ ಝಾರ್ಕಾಂಡ್ ರಾಜ್ಯಾಕ್ ವರ್ತಾ. ಬೊಕ್ರ್ಯಾ-ಮಾಸಾಚೊ ವ್ಯಾಪಾರಿ ಅಲಿಮುದ್ದಿನ್ ಅನ್ಸಾರಿ ವಯ್ರ್ ತೊ ಬೀಫ್ ಸಾಗ್ಸಿತಾ ಮ್ಹಳ್ಳೊ ಫಟ್ಕಿರೊ ಆರೋಪ್ ಮಾಂಡುನ್, ತಾಚ್ಯೆರ್ ಪಂಗ್ಡಾ-ಜುಲ್ಮ್ ಚಲ್ಲೊಲೊ ತಿಂ ದ್ರಶ್ಯಾಂ ಆಸಾ ತಶಿಂ ದಾಕಯ್ತಾ. ಅಲಿಮುದ್ದಿನಾಚಿ ವಿಧವ್ ಪತಿಣ್ ತಿಚಿ ದುಕಾಂ-ಭರಿತ್ ಕಾಣಿ ವಿವರಿತಾ. ಅಲಿಮುದ್ದಿನ್ ಮುಸ್ಲಿಮ್. ಬೀಫ್ ವಿಕ್ತಾ ಮ್ಹಣ್ ಫಟ್ಕಿರೊ ಆರೋಪ್ ಕರ್ನ್ ಹಿಂದು ಗೌ-ರಕ್ಶಕ್ ಜಮ್ಯಾನ್ ತಾಚಿ ಖುನಿ ಕೆಲ್ಲಿ.

“’ಹೊ ಅಪ್ರಾಧ್ ಮೋದಿಚ್ಯಾ ಭಾಶಣಾಚೊ ಶೀದಾ ಪರಿಣಾಮ್’ ಮ್ಹಣ್ತಾ ಆಕಾರ್ ಪಟೆಲ್. ತುಂ ನೆಣಾಂಯ್ ತರ್, ಸಾಂಗ್ತಾಂ. ತೊ ಏಮ್ನೆಸ್ಟಿ ಇಂಟರ್-ನೇಶನಲ್ ಇಂಡಿಯಾಚೊ ಮುಕೆಲಿ. ಪತ್ರ್-ಕರ್ತ್, ಬರವ್ಪಿ ಆನಿ ಮನ್ಷ್ಯಾಂ-ಹಕ್ಕಾಂಚೊ ರಾಕ್ವಲಿ. ’ಪಿಂಕ್ ರಿವೊಲುಸಾಂವಾಚ್ಯಾ ನಾವಾರ್, ಆಮ್ಚಿ ಪಶು-ಸಂಪತ್ತಿ ನಾಸ್ ಜಾತಾ.’  ಅಶೆಂ ಮೋದಿನ್ ಪರ್ಗಟ್ ಭಾಶಣ್ ದಿಲ್ಲ್ಯಾ ಉಪ್ರಾಂತ್, ಬೀಫ್ ಸಾಗ್ಸಿತಾತ್ ಆನಿ ವಿಕ್ತಾತ್ ಮ್ಹಳ್ಳೊ ಫಟ್ಕಿರೊ ಆರೊಪ್ ಘಾಲ್ನ್ ಮುಕ್ಲ್ಯಾ ಸಾಡೆ-ತೀನ್ ವರ್ಸಾಂನಿಂ 44 ಮುಸ್ಲಿಮಾಂಕ್ ಪಂಗ್ಡಾ-ಜುಲ್ಮ್ ಪ್ರಕರಣಾಂನಿಂ ಜಿವ್ಶಿಂ ಮಾರ್ಲಾಂ. 280 ಜಣಾಂಕ್ ಜಕ್ಮಿ ಕೆಲಾಂ. ಅಕ್ರಮಣ್ ಕೆಲ್ಲ್ಯಾಂ ವಿರುದ್ದ್ ಝಡ್ತೆಚ್ಯೆಂ ನ್ಯಾಯ್-ಕ್ರಮ್ ಜಾವ್ನಾ. ಡೊಕ್ಯುಮೆಂಟರಿಚ್ಯಾ ದುಸ್ರ್ಯಾ ಭಾಗಾಂತ್ ಆಮಿಂ ಆಯ್ಕಲೆಂ ನೇ? ಹೆಂ ಖರೆಂಚ್ ಮ್ಹಣ್ತಾಂ ಹಾಂವ್.” ಇಂಟರ್-ನೆಟ್ ಕನೆಕ್ಶನ್ ಅಸ್ಕತ್ ಜಾವ್ನ್ streaming ರಾವ್‍ಲ್ಲ್ಯಾ ಆವ್ಧೆಂತ್ ಹಾಂವೆಂ ವಿಮರ್ಸೊ ಕೆಲೊ. ಮದಾಮೆನ್ ಜಾಪ್ ದೀಂವ್ಕ್ ತೊಂಡ್ ಉಗ್ತೆಂ ಕರ್ಚ್ಯಾ ಪಯ್ಲೆಂ streaming ಪರತ್ ಚಲ್ಲೆಂ.

“ಹ್ಯಾ ಅನ್ನ್ಯಾಯಾಚ್ಯೆಂ ಖಂಡನ್ ಕರಿಜೆ ಮ್ಹಣ್ ಮೋದಿಚ್ಯೆರ್ ದಬಾವ್ ಪಡ್ಲೊ. ಪೂಣ್, ತಾಣೆಂ ತೊಂಡ್ ಉಗ್ತೆಂ ಕೆಲೆನಾಂ. ಗೌ-ರಕ್ಶಕಾಂನಿಂ ತಾಚ್ಯಾ ಮೊನ್ಯಾಪಣಾಚೊ ಅರ್ಥ್ ಕಾಡ್ಲೊ ಕಿ ಕಿತೆಂ ಕರುಂಕ್ ಆಸಾ ತೆಂ ಕರಾ. ಕಾನುನ್ ತುಮ್ಕಾಂ ಕಾಂಯ್-ಚ್ ಕರ್ಚ್ಯೆಂ ನಾಂ.’ ಡೊಕ್ಯುಮೆಂಟರಿಂತ್ ಉಲವ್ನ್ ಪತ್ರ್-ಕರ್ತ್ ನಿಲಂಜನ್ ಮುಖ್ಯೋಪಾದ್ಯಾಯಾ ಸಾಂಗ್ತಾ”. ಮುಕಾರ್ ಸಾಂಗ್ಲೆಂ ಹಾಂವೆಂ.

ಅಖ್ರೇಕ್ ಮೋದಿಕ್ ಉಲಯ್ಜೆ ಪಡ್ಲೆಂ. ಕಡಕ್ಕ್ ಉತ್ರಾಂನಿಂ ಗೌ-ರಕ್ಶಕಾಂಚ್ಯೆಂ ಖಂಡನ್ ಕರ್ನ್ ತಾಣೆಂ ಮ್ಹಳೆಂ: “ಅಶೆಂ-ಗೀ ಗೌ-ರಕ್ಶಣ್ ಕರ್ಚ್ಯೆಂ?..”. ತಕ್ಶಣ್, ಪಂಗ್ಡಾ-ಜುಲ್ಮ್ (ಲಿಂಚಿಂಗ್) ರಾವ್ಲೊ. ಥೊಡ್ಯಾಂಕ್ ಪೊಲಿಸಾಂನಿಂ ಕುಡಾಯ್ಲೆಂ. ಪೂಣ್, ಬಿಜೆಪಿ ಲೋಕಲ್ ಮುಕೆಲ್ಯಾಂನಿಂ ತಾಂಕಾಂ ಜಾಮೀನ್ಯೇರ್ ಸೊಡಯ್ಲೆಂ. ಸಾಢೆ ಚ್ಯಾರ್ ವ್ಹರ್ಸಾಂ ಗೆಲ್ಯಾಂತ್. ಅಪ್ರಾಧಿ ಅಜೂನ್ ಸ್ವತಂತ್ರ್ ಆಸಾತ್. ಹಾಚೊ ಅರ್ಥ್ ಕಿ ಆಮ್ಚೊ ಹಿಂದು ರಾಷ್ಟ್ರ. ಮುಸ್ಲಿಮಾಂ ವಿರುದ್ಧ್ ಆನ್ನ್ಯಾಯ್ ಕೆಲ್ಯಾರ್, ಝಡ್ತಿ ಜಾಂವ್ಚಿ ನಾಂ. ಭಿಯೆನಾಕಾತ್! ಹರ ಹರ ಮಹಾದೇವ್. ಡೊಕ್ಯುಮೆಂಟರಿ ಹೆಂ ಕಥನ್ ಕ್ಲಿನಿಕಲ್ ವಿವರಾ ಸಂಗಿಂ ದರ್ಶಕಾಂ ಮುಕಾಂತ್ರ್ ದವರ್ತಾ.

“ಮೋದಿ 2019 ಎಲಿಸಾಂವಾಂತ್ ಪ್ರಚಂಡ್ ಬಹುಮತಾನ್ ಜಿಕೊನ್ ಆಯ್ಲೊ ನೇ? ಪಯ್ಲೆಂ ಜಿಕೊಂಕ್ ನಾತ್ಲೆಲ್ಯಾಂ ಶೆತಾಂನಿಂ ಲೆಗುನ್ ತಾಚ್ಯೆ ಪಾಡ್ತಿಚ್ಯೆ ಉಮೇದ್ವಾರ್ ಭಾರಿಚ್ ಬಹುಮತಾನ್ ಜಿಕ್ಲ್ಯಾತ್ ನೆ?” ಮ್ಹಣಾಲಿ ಮ್ಹಜಿ ಯೆಜ್ಮಾನ್. ಪ್ರಜಾ-ತಂತ್ರಾಂತ್, ಲೋಕಾನ್ ಮತ್ ದೀವ್ನ್ ಜಿಕಯ್ಲ್ಯಾರ್ ಜಾಲೆಂ. ತಾಚ್ಯಾ ಪ್ರಾಸ್ ವ್ಹಡ್ಲಿ ಕೊಡ್ತ್ ನಾಂ. ಅಶಿ ಯೆಜ್ಮಾನಿಚಿ ಅಭಿಪ್ರಾಯ್.

“ವ್ಹಯ್. ಅಧಿಕಾರಾಚ್ಯಾ ದುಸ್ರ್ಯಾ ಪಾಂವ್ಡ್ಯಾಕ್ ಚುನಾವ್ ಝುಜ್ತಾನಾಂ, ಮೋದಿಚ್ಯೆಂ ಹಿಂದುತ್ವಾ ಬ್ರೇಂಡ್ ಹಿಂದು ಸಮೂದಾಯಾಂತ್ ಲೋಕಮೋಗಾಳ್ ಜಾಲ್ಲೆಂ.  ಹಾಕಾ ಕಾಂಯ್ ದುಬಾವ್ ನಾಂ. ಮೋದಿಚ್ಯಾ ಪಾಟ್ಲಾವ್ದಾರಾಂಕ್ ತೊ ಅಖಿಲ್ ಭಾರತೀಯ್, pan-India, ರಾಜನೀತಿಜ್ಞ್ ಜಾಲೊ. ನಿಸ್-ಪಕ್ಶ್ ತಜ್ಞಾಂಕ್ ತಾಚ್ಯೆಂ ಜಯ್ತ್ ಬಳಶಾಹಿ ರಾಷ್ಟ್ರವಾದಾಚಿ ಜೀಕ್ ಮ್ಹಣ್ ದಿಸ್ಲಿ. ಕಿತೇಂಯೀ ಜಾಂವ್, ಆಮ್ಚ್ಯೆ ಆಯ್ಲೆವಾರ್ಚ್ಯೆ ಚರಿತ್ರೆಂತ್ ತೊ ಅಧಿಕ್ ಬಳಾಧಿಕ್ ಮುಕೆಲಿ ಜಾಲಾಚ್.” ಡೊಕ್ಯುಮೆಂಟರಿಚಿ ನಾಡ್ ಹಾಂವೆಂ ಪಾರ್ಕಿಲ್ಲಿ.

“ಮೋದಿ ಬಹು-ಸಂಖ್ಯಾತ್-ವಾದಿ ಹಿಂದ್ವಾಂಚ್ಯೆ ವೋಟ್ ಮೆಳೊನ್ ಜಿಕ್ಲಾ. ತಾಚಿ ಪಾಡ್ತ್ ಹಿಂದು ಸಮರ್ತಕ್ ವ್ಹಯ್. ಮ್ಹಣ್ತಚ್ ಮುಸ್ಲಿಮಾಂ ವಿರುದ್ಧ್ ಮ್ಹಣೊಂಕ್ ಜಾಯ್ನಾ”. ಯೆಜ್ಮಾನಿನ್ ಮೋದಿಚಿ ವಕಾಲಾತ್ ಕೆಲಿ.

“ಸರ್ಕಾರಾ ಭಿತರ್ ಮೋದಿಚ್ಯೆಂ ಮಾತ್ರ್ ಚಲ್ತಾ ನೇ? ಮೋದಿ 2.0 ಸರ್ಕಾರ್ ರಚ್ತಚ್, ಮೋದಿಚಿ ಪ್ರಾಥಮಿಕತಾ ಕಳೊನ್ ಆಯ್ಲಿ. ಆಮ್ಚೊ ಮುಸ್ಲಿಮ್ ಬಹುಮತೆಚೊ ಏಕ್‌ಚ್ ರಾಜ್ಯ್, ಜಮ್ಮು ಆನಿ ಕಾಶ್ಮಿರ್. ಥಂಯ್ಸರ್, ಸಂವಿದಾನಾಚ್ಯೆ ಅಡ್ತಿಗ್ 370 ಪ್ರಕಾರ್ ರಾಜ್ಯ್ ಪ್ರಶಾಸನ್ ಚಲೊನ್ ಆಸ್ಲೆಂ. 2019 ಅಗೊಸ್ತಾಂತ್ ಹಿ ಅಡ್ತಿಗ್ 370 ಕಾಡ್ನ್ ಉಡಯ್ಲಿ. ರಾಷ್ಟ್ರಪತಿಚ್ಯಾ ನಾಂವಾರ್ ಓರ್ಡಿನೆನ್ಸ್ ಪರ್ಗಟುನ್. ಹೆಂ ಕ್ರಮ್ ಎಮೆರ್ಜೆನ್ಸಿ ರಾಜ್ವಟ್ಕೆ ತಸ್ಲೆಂ. ರಾಜ್ಯ್ ಆಡಳ್ತ್ಯಾ ಬದ್ಲೆಕ್ ದೋನ್ ಯೂನಿಯನ್ ಟೆರ್ರಿಟರಿ ರಚ್ಲೆ. ದಿಲ್ಲಿ ಕೇಂದ್ರ್ ಸರ್ಕಾರಾಚ್ಯಾ ಡಿರೆಕ್ಟ್ ಕಂಟ್ರೊಲಾರ್ ಲೂಟೆನೆಂಟ್ ಗವರ್ನರಾಂ ಮುಕಾಂತ್ರ್ ಅಡಳ್ತೆಂ ಚಲೊನ್ ಆಸಾ.” ಹಿ ಸಕ್ಟಾಂಕ್ ಕಳಿತ್ ಆಸ್ಲೆಲಿ ಗಜಾಲ್, ಜಿ ಡೊಕ್ಯುಮೆಂಟರಿಂತ್  ವಿವರಿಲ್ಯಾ, ಹಾಂವೆಂ ಉಗ್ಡಾಸ್ ಕೆಲಿ.

“ಹೆಂ ಮೇಟ್ ಸಗ್ಳ್ಯಾ ದೇಸಾಂತ್ ಭಾರಿಚ್ ಲೋಕಾಮೋಗಾಳ್ ಜಾಲಾಂ. ಆಖ್ರೆಕ್, ಜಮ್ಮು ಆನಿಂ ಕಾಶ್ಮಿರ್ ದೇಸಾಚೊ ಅಖಂಡ್ ವಾಂಟೊ ಮ್ಹಣ್ ಸರ್ವ್ ಪಾಡ್ತಿ ಓಪ್ತಾತ್. ತರ್, ಬಹುಮತ್ ಆಸ್ಲೆಲ್ಯಾ ಸರ್ಕಾರಾನ್ ಹ್ಯಾಂ ಪ್ರದೇಸಾಂನಿಂ ಆತಂಕವಾದ್ ನಾಸ್ ಕರುಂಕ್ ಫಾವೊತೆಂ ಮೇಟ್ ಘೆಂವ್ಚ್ಯೆಂ ಸಹಜ್ ನೇ?” ಯೆಜ್ಮಾನಿಚೊ ವಾದ್ ಬೊಲ್ತೊಚ್.

“ಕಾಶ್ಮಿರ್ ಕಣಿವೆಂತ್ ಕಸಲಿ ಪ್ರತಿಕ್ರಿಯಾ ಜಾಲಿ? ಕಾಶ್ಮೀರ್ ರಾಜ್ಯಾಚ್ಯಾ ಸರ್ವ್ ಪಾಡ್ತಿಂಚ್ಯಾಂ ರಾಜಕೀಯ್ ಮುಕೆಲ್ಯಾಂಕ್ ಘರ್-ಬಂಧಡೆಂತ್ ಫಿಚ್ಯಾರ್ ಕೆಲೆಂ. ತರ್-ಯೀ, ಕಣ್ವೆಚೊ ಲೋಕ್ ಉಚಾಂಬೊಳ್ ಜಾಲಾ. ಮಿಲಿಟರಿ ಭರೊನ್ ಆಸಾ. 24 ವ್ಹರಾಂ ಕರ್ಫ್ಯು ಘಾಲ್ಯಾ. ಮೆಟಾಂ ಮೆಟಾಂಕ್ ರಸ್ತ್ಯಾ ಬಂದಿ ಆಸಾ. ತರ್-ಯೀ, ನಾಗ್ರಿಕಾಂಚೊ ಹಿಂಡ್ ಸುಕ್ರಾರಾ ಮಾಗ್ಣ್ಯಾ ನಂತರ್ ರಸ್ತ್ಯಾಕ್ ದೆಂವ್ತಾ. ವಯ್ಲ್ಯಾನ್, ಪವರ್ ಕಟ್ಟ್. ಇಂಟರ್ನೇಟ್ ಕಟ್ಟ್, ಮೊಬಾಯ್ಲ್ ಫೊನ್ ಸಂಪರ್ಕ್ ಕಟ್ಟ್. ಅಸಲ್ಯೆ ಸಂದಿಗ್ದ್ ಪರಿಸ್ಥಿತಿಂತ್  ಜಿಯೊನ್ ಆಲ್ಯಾರೀ, ಲೋಕಪ್ರಿಯ್ ಪ್ರತಿರೋಧಾಂಚಿಂ ದ್ರಶ್ಯಾಂ ವಿದೇಶಿ ಮಾಧ್ಯಮಾಂನಿಂ ಪಳೆಂವ್ಕ್ ಮೆಳ್ಳ್ಯಾಂತ್. ಹಿಂ ದ್ರಶ್ಯಾಂ ಬಿಬಿಸಿಚ್ಯೆ ಹ್ಯೆ ಡೊಕ್ಯುಮೆಂಟರಿಂತ್ ಪಿಂತ್ರಾಯ್ಲ್ಯಾಂತ್ ತೆಂ ಆಮಿಂ ಪಳೆಲೆಂ-ಮೂ.”

ಯೆಜ್ಮಾನ್: “ಆಮ್ಚಿ ಮಿಲಿಟರಿ ಕಸ್ಸಲಿ ಗೈರ್-ಕಾನೂನಿ ಕ್ರಮಾಂ, ಹಿಂಸಾ ವ ದಗ್ದೊಣಿ ಕರುಂಕ್ ವಚೊಂಕ್ ನಾಂ. ಹ್ಯೆ ಡೊಕ್ಯುಮೆಂಟರಿಂತ್ ಭೆಸ್ಟೊ ಅಪಪ್ರಚಾರ್ ಕೆಲಾ. ಹಿ ಬಿಬಿಸಿನ್ ಆಮ್ಚ್ಯಾ ದುಸ್ಮನಾಂ ಸಾಂಗಾತಾ ಮೆಳೊನ್ ಕೆಲ್ಲಿ ಪಿತೂಳ್. ಮೋದಿಚ್ಯಾ ಆಡಳ್ತ್ಯಾ ನಿಮ್ತಿಂ ಆಮ್ಚೊ ದೇಸ್ ಪ್ರಗತಿ ಕರ್ನ್ ಆಸಾ ತೆಂ ಜಾಯಿತ್ತ್ಯಾಂಕ್ ಸೊಸಾನಾಂ. ದೆಕುನ್ ಇಂಡಿಯಾ ವಯ್ರ್ ವ್ಹಡ್ ಏಟ್ಟೇಕ್!”

ಹಾಂವ್: “ಕಾಶ್ಮೀರಿ ಮುಸ್ಲಿಮಾಂಕ್ ಕಂಟ್ರೊಲ್ ಕೆಲೆಂ. ಮುಸ್ಲಿಮಾಂಚೊ ಜಾಗೊ ಖಂಯ್ಚೊ ಮ್ಹಣ್ ದಾಕವ್ನ್ ದಿಲೆಂ. ಮೋದಿನ್ ಹಿಂದು ಹ್ರದಯ್ ಸಮ್ರಾಟ್ ಬಿಲ್ಲೊ ಜೊಡ್ಲೊ. ಪ್ರತ್ಯೆಕ್ ಜಾವ್ನ್ ಕೇಸರಿ ಆನಿಂ ಹಿಂದುತ್ವಾವಾದಿಂಚ್ಯೆಂ ಕಾಳ್ಜಾಥಾವ್ನ್ ಸಮರ್ಥನ್ ಜೊಡ್ಲೆಂ. ಹಾಕಾ ದೋನ್ ಅಭಿಪ್ರಾಯ್ ನಾಂತ್. ಮಿಲಿಟರಿ ಬಳ್ ವಾಪ್ರುನ್ ಆಪ್ಲ್ಯಾ ರಾಜಕೀಯ್ ಇರಾದ್ಯಾಂಕ್ ಪೂರ್ಣ್ ಕರ್ತೆಲಿ ರಾಜ್ವಟ್ಕಿ ಜುಲ್ಮ್ ನಾಸ್ತಾನಾಂ ಆನಿಂ ಕಿತೆಂ ಕರ್ತಾ? ಬಿಬಿಸಿಚ್ಯೆ ರಿಪೊರ್ಟರ್ ಸ್ವತಂತ್ರ್ ಚಿಂತ್ಪಿ. ಆಮ್ಚ್ಯಾ ಗೋದಿ ಮಾಧ್ಯಮಾಂಕ್ ಆಸ್ಲಲೊ ಪಕ್ಶಪಾತ್ ಆನಿಂ ಭ್ಯೆಂ ನಾಂ. ದೆಕುನ್ ತಾಣಿಂ ಹೆಂ ಲಿಪ್ಲೆಲೆಂ ನಾಗ್ಡೆಂ ಸತ್ ಸಂಸಾರಾಕ್ ದಾಕಯ್ಲಾಂ.”

ಡೊಕ್ಯುಮೇಂಟರಿ ಮುಕಾರ್ ವಚೊನ್ ಸಿಏಏ ಆನಿಂ ಏನ್.ಆರ್.ಸಿ ಹ್ಯಾ ದೋನ್ ಮೋದಿಚ್ಯೆ ರಾಜ್ವಟ್ಕೆಚಿಂ ಅಮೋಲಿಕ್ ಕಾಯ್ದ್ಯಾಂ ವಿಷ್ಯಾಂತ್ ವಿವರಿತಾ. ದಿಲ್ಲಿಂತ್ ಜಮ್ಲೆಲ್ಯಾ ಸಿಏಏ ವಿರುದ್ದ್ ಪ್ರತಿಭಟನಾಂತ್, ಪ್ರತ್ಯೆಕ್ ಜಾವ್ನ್ ಶಹೀನ್ ಬಾಘ್ ಬಾಯ್ಲಾಂಚ್ಯಾ ಜಮ್ಯಾ ವಯ್ರ್ ಪೊಲಿಸಾಂನಿಂ ಕೆಲ್ಲೊ ಅತ್ತ್ಯಾಚ್ಯಾರ್ ಸಕಾಳಿಕ್ ದ್ರಶ್ಯಾಂ ಸವೆಂ ದರ್ಶಕಾಂ ಮುಕಾರ್ ದವರ್ತಾ. ಕಾಶ್ಮೀರಿ ಮುಸ್ಲಿಮಾಂಚ್ಯೆರ್ ಕಂಟ್ರೊಲ್ ಹಾಡ್ಲೆಲ್ಯಾ ಉಪ್ರಾಂತ್, ದೇಸಾಂತ್  ಬಂಗ್ಲಾದೇಶಿ ಘುಸ್-ಬಯ್ಟ್ ಮುಸ್ಲಿಂ ಆಸಾತ್. ತಾಂಕಾಂ ಎನ್.ಅರ್.ಸಿ ಮುಕಾಂತ್ರ್ ಓಳೊಕ್ ಕರ್ನ್, ಫಟ್ಕಿರಿಂ ದಸ್ತಾವೇಜಾಂ ಕೆಲ್ಯಾಂತ್ ಮ್ಹಣೊನ್ ತಾಂಚ್ಯೆರ್ ಸಿಏಏ ಕಾನುನ್ ವಾಪ್ರುನ್ ಕುಡ್ಸಿಜೆ. ಕುಡ್ಸಿಲ್ಲ್ಯಾಂಕ್ ಗಡಿಪಾರ್ ಕ್ಯೇಂಪಾಂನಿಂ ಚಿಡ್ಡಾವ್ನ್, ದಗ್ದುನ್, ಖುದ್ದ್ ಬಂಗ್ಲಾದೇಸಾಕ್ ವಚೊಂಕ್ ತಯಾರ್ ಜಾತಾ ಪರ್ಯಾಂತ್ ಸರ್ಕಾರಿ ಜುಲ್ಮ್ ಚಲವ್ನ್ ವರ್ಚ್ಯೆಂ ಪ್ಲೇನ್. ಹೆಂ ಪ್ಲೇನ್ ಪ್ರತ್ಯೇಕ್ ಜಾವ್ನ್ ಅಸ್ಸಾಮ್ ರಾಜ್ಯಾಂತ್ ಲಾಗು ಜಾತೆಲೆಂ.

ಇತ್ತೂನ್ ಅವಾಜ್ ಕರಿನಾಸ್ತಾನಾಂ ಪಳೆವ್ನ್ ಅಸ್‍ಲ್ಲಿ ಯೆಜ್ಮಾನ್ ಆತಾಂ ಖುಬ್ಳಾಲಿ. ಪ್ರತ್ಯೇಕ್ ಜಾವ್ನ್ ಅಸ್ಸಾಮಾಚ್ಯಾ ರಿಕ್ಶವಾಲಾ ನೂರ್ ಹಾಸನಾಕ್ ಬಂಗ್ಲಾದೇಶಿ ಮ್ಹಣ್ ಏನ್.ಅರ್.ಸಿ ಕಾಯ್ದ್ಯಾಖಾಲ್ ಥೈಂಚೊ ರಾಜ್ಯ್ ಸರ್ಕಾರ್ ಕಸೊ ದಗ್ದಿತಾ ಮ್ಹಳ್ಳೊ ವಿವರ್ ತಿಕಾ ರುಚ್ಲೊನಾಂ: “ಆಮಿಂ ಖತಾರ್ ಆಸ್ತನಾಂ, ಜಾಯಿತ್ತ್ಯಾಂ ಬಂಗ್ಲಾದೇಶಿಂಚಿ ಸಳಾವಳ್ ಆಸ್ಲಿ. ತಾಣಿಂ ಆಮ್ಕಾಂ ಬಂಗ್ಲಾದೇಶಿ ಕಶೆಂ ಇಂಡಿಯಾ ಭಿತರ್ ಘುಸ್ತಾತ್ ಮ್ಹಣ್ ವಿವರ್ ದಿಲ್ಲೊ ನೇ? ತುಂ ವಿಸರ್ಲೊಯ್‌ಗೀ?”  ಉಗ್ಡಾಸ್ ಕೆಲೊ ತಿಣೆಂ.

“ಜಾಮಿಯಾ ಮಿಲಿಯಾಚಿ ಸಪೂರಾ ಝರ್ಗಾರ್ ಮ್ಹಳ್ಳ್ಯೆ ಗರ್ಬೆಸ್ತ್ ಸ್ತ್ರೀಯೆಕ್ ಸಿಏಏ ವಿರುದ್ಧ್ ದಿಲ್ಲಿ ದೊಂಬಿಂತ್ ಭಾಗ್ ಘೆತ್ಲಾ ಮ್ಹಣ್ ಆರೋಫ್ ಲಾವ್ನ್ ಕುಡಾಯ್ಲೆಂ. 74 ದೀಸ್ ತಿಹಾರ್ ಜಯ್ಲಾಂತ್ ಕೊಡ್ತಿಂತ್ ಹಾಜರ್ ಕರಿನಾಸ್ತಾನಾಂ ದವ್ರುನ್ ತಿಚ್ಯೆರ್ ಪೊಲಿಸ್ ಜುಲ್ಮ್ ಕೆಲ್ಲೊ. ದೇಸಾಚ್ಯಾ ಗೋದಿ ಮಾಧ್ಯಮಾಂನಿಂ ಹಿ ಖಬರ್ ನಾಂ. ಬಿಬಿಸಿಚ್ಯಾ ರಿಪೊರ್ಟರಾಂನಿಂ ಹ್ಯಾ ಪ್ರಕರಣಾಚಿ ತನ್ಕಿ ಕರ್ನ್ ಪ್ರಸಾರ್ ಕೆಲ್ಲ್ಯಾ ವೇಳಾ, ಇಂಡಿಯಾಚ್ಯಾ ಪರ್ಜ್ಯೆರಾಜಾಚ್ಯಾ ಪಡ್ದ್ಯಾ ಪಾಟ್ಲ್ಯಾನ್ ಲಿಪೊನ್ ಆಸ್ಲೆಲ್ಯಾ ಸರ್ವಾಧಿಕಾರಾ ವಿಷ್ಯಾಂತ್ ಸತ್ ಭಾಯ್ರ್ ಆಯ್ಲೆಂ. ಆನಿಂ ಸಗ್ಳ್ಯಾ ಸಂಸಾರಾನ್ ಪಳೆಲೆಂ. ಅಸೊ ಉಲ್ಲೇಕ್ ಡೊಕ್ಯುಮೆಟರಿಂತ್ ಕೆಲಾ ನೇ? ಹೆಂ ನಾಗ್ಡೆಂ ಸತ್ ಕಶೆಂ ಲಿಪಂವ್ಚ್ಯೆಂ?” ಉದ್ಗಾರ್ಲೊಂ ಹಾಂವ್.

“ಸಿಏಏಂತ್ ಕಿತೆಂ ಚೂಕ್ ಆಸಾ? ಬಂಗ್ಲಾದೇಸ್, ಪಾಕಿಸ್ತಾನ್ ಆನಿಂ ಅಫ್ಗಾನಿಸ್ತಾನ್ ತೀನೀ ಆಮ್ಚ್ಯೆ ಶೆಜಾರಿ. ಇಸ್ಲಾಮ್ ತಾಂಚ್ಯೆಂ ರಾಷ್ಟ್ ಧರ್ಮ್. ಹ್ಯಾಂ ದೆಸಾಂನಿಂ ಅಲ್ಪ್-ಸಂಕ್ಯಾತ್ ಧಾರ್ಮಿಕಾಂಕ್ ಮ್ಹಣ್ಜೆ ಹಿಂದು, ಸಿಖ್, ಕ್ರಿಸ್ತಾಂವ್, ಬುದ್ದಿಸ್ತ್, ಜೈನ್, ಫಾರ್ಸಿ ಲೊಕಾಕ್ ದಗ್ದಿತಾತ್. ದೆಕುನ್ ಹೊ ಲೋಕ್ ಪೊಳೊನ್ ವೆತಾ. ಜಾಯಿತ್ತೆ ಇಂಡಿಯಾಕ್ ಆಯಿಲ್ಯಾತ್. ಹಾಂಕಾಂ ಆಸ್ರೊ ದೀಜೆ. ನಾಗ್ರಿಕತೆಚ್ಯೆಂ ಹಕ್ಕ್ ದೀಜೆ. ಸಿಏಏಚೊ ಹೊ ಇರಾದೊ ಮಾತ್ರ್. ಹ್ಯಾಂ ದೇಸಾಂಚ್ಯಾ ಮುಸ್ಲಿಮ್ ನಾಗರಿಕಾಂಕ್ ಕಿತ್ಯಾಕ್ ಆಮಿಂ ಆಸ್ರೊ ದೀಜೆ? ಹಾಂತು ಅರ್ಥ್ ನಾಂ. ತಿತ್ಲೆಂಚ್ ನಹಿಂ ಹ್ಯಾ ಕಾಯ್ದ್ಯಾ ಖಾಲ್ ಅಮ್ಚ್ಯಾಮುಸ್ಲಿಮ್ ನಾಗರಿಕಾಂಕ್ ಗಡಿಪಾರ್ ಕರ್ತೆಲೆ ಮ್ಹಳ್ಳೊ ಫಟ್ಕಿರೊ ಆರೋಪ್. ಅಶೆಂ ಹಿ ಡೊಕ್ಯುಮೇಂಟರಿ ಕಿತ್ಯಾಕ್ ಸಾಂಗಾನಾಂ?” ವಿಚಾರಿ ಯೆಜ್ಮಾನ್.

ಹಾಂವ್ ವೊಗೊ ರಾವ್ಲೊಂ. ಮುಕಾರುನ್ ಯೆಜ್ಮಾನ್ ಮ್ಹಣಾಲಿ: “ಆಮ್ಚ್ಯೆ ಸಮಾಜಿ ಥಾವ್ನ್ ಇಸ್ಲಾಮ್ ಮ್ಹಳ್ಳೆಂ ವಾಯ್ಟ್ ಕಿಮ್ಚುನ್ ಉಡಯ್ಜೆ. ತಶೆಂ ಕರಿನಾಂ ಜಾಲ್ಯಾರ್ ಹಿಂದು ವಾಂಚ್ತೆಲೆ ಕಶೆಂ? ಅಶೆಂ ವಿಚಾರ್ಚ್ಯಾಂತ್ ಚೂಕ್ ಕಸಲಿ? ತವಳ್ಚೊ ಅಮೆರಿಕೀ ಫಿರ್ಜೆಂತ್ ಡೊನಾಲ್ಡ್ ಟ್ರಂಪ್ ಲೆಗುನ್ ಅಹ್ಮದಾಬಾದ್ ಆಯ್ಲೊ. ‘ನಮಸ್ತೆ ಟ್ರಂಪ್’  ಪ್ರೊಗ್ರೆಮಾಂತ್ ಉಲಯ್ಲೊ: ‘ಶೆಕ್ಡ್ಯಾಂ ಥಾವ್ನ್ ಇಂಡಿಯಾಂತ್ ಹಿಂದು ಆನಿಂ ಮುಸ್ಲಿಮ್  ಎಕಾಮೆಕಾ ಕುಶಿಂ ಕುಶಿಂ ಮಾಗ್ಣೆಂ ಕರ್ತಾತ್. ತಸ್ಲ್ಯಾ ದೇಸಾಚೊ ಮಹಾನ್ ಪ್ರಧಾನಿ, ಮ್ಹಜೊ ಖಾಸ್ ಇಷ್ಟ್, ಮೋದಿಕ್ ಮ್ಹಜೊ ಸಲಾಮ್’ ಮ್ಹಳೆಂ ನೇ. ಹ್ಯಾ ಸಿಏಏ ಅಪ-ಪ್ರಚಾರಾ ವರ್ವಿಂ ದೇಸಾಕ್ ಆನಿಂ ಮೋದಿಕ್ ಕಸ್ಸಲಿ ಲಜ್ ಭಗ್ಚಿ ಗರ್ಜ್ ನಾಂ.”

“ದಿಲ್ಲಿ ಕೋಮು ದಂಗ್ಯಾಂತ್ ಪತ್ರಾವ್ ಕೆಲೊ ಮ್ಹಣ್ ಮುಸ್ಲಿಮ್ ತರ್ನಟ್ಯಾಂಕ್ ಪೊಲಿಸಾಂನಿಂ ಮಾರ್ನ್ ಬಡಯಿಲ್ಲಿಂ ಹಿಂ ದ್ರಶ್ಯಾಂ ತವಳ್ ಬಿಬಿಸಿ ನ್ಯೂಸ್ ಚೆನೆಲಾರ್ ಪ್ರಚಾರ್ ಜಾಲ್ಲಿಂ. ಹ್ಯೆ ಲಡಾಯೆಂತ್, ಫೈಜಾನ್ ಮ್ಹಳ್ಳೊ 23 ವ್ಹರ್ಸಾಂಚೊ ಟೇಯ್ಲರ್ ಪೊಲಿಸ್ ದಗ್ಡವ್ಣಿಂತ್ ಮೆಲೊ. ದಂಗೆ ಸ ದೀಸ್ ಚಲ್ಲೆ. ಹ್ಯೆ ಅವ್ಧೆಂತ್ ದಿಲ್ಲಿ ಪೊಲಿಸಾಂನಿಂ ಉಚಾಂಬೊಳ್ ಹಿಂದು ಪಂಗ್ಡಾಂ ಸಾಂಗಾತಾ ಮೆಳೊನ್ ಮುಸ್ಲಿಮಾಂ ವಯ್ರ್ ಪತ್ರಾವ್ ಕೆಲ್ಲಿಂ ದ್ರಶ್ಯಾಂ ಕಿತ್ಲಿಂ ಕ್ರೂರ್ ದಿಸ್ತಾತ್ ನೇ? ಪಳೆ. ಫೈಜಾನಾಚಿ ಆವಯ್ ಆಪ್ಲ್ಯಾ ಪುತಾಚ್ಯಾ ಗಾಯಾಂಚಿ ಆನಿಂ ಮೊರ್ಣಾಚಿ ಕಾಣಿ ಸಾಂಗ್ತನಾಂ, ಅಯ್ಕೊನ್ ರಗತ್ ಮ್ಹಜೆಂ ತಾಪ್ತಾ. ತರ್ ಮುಸ್ಲಿಮ್ ಸಮೂದಾಯ್ ಕಿತೆಂ ಭಗ್ತಾ ಆಸ್ತಲೊ? ಆಮ್ಚೊ ದೇಸ್ ಅಶೆಂ ವಿಭಜಿತ್ ಜಾಂವ್ಚೊ ಹೆಂ ಪಯ್ಲೆ ಪಾವ್ಟಿಂ. ಹಿ ಗಜಾಲ್ ಖತಾರಿ ಸೆಟೆಲೈಟ್ ನ್ಯುಸ್ ಚೆನೆಲ್ ಅಲ್-ಜಜೀರಾನ್ ತವಳ್‌ಚ್ ಪ್ರಸಾರ್ಲೆಲಿ ಸರ್ವ್ ಮುಸ್ಲಿಮ್ ಲೋಕಾನ್ ಪಳೆಲ್ಯಾ.” ಮ್ಹಳೆಂ ಹಾಂವೆಂ ಅಕ್ರೆಕ್.

“ಅಲ್-ಜಜೀರಾಚಿ ಖಬರ್ ಕಾಡಿನಾಕಾ. ಖತಾರಿ ರಾಯಾಳ್ ಕುಟ್ಮಾ ವಿರುದ್ದ್ ಪ್ರೊಗ್ರೆಮ್ ಕರುಂಕ್ ವ ತಾಂಚಿ ಟೀಕಾ ಕರುಂಕ್ ಪೆಂಕ್ಟಾಂತ್ ಬಳ್ಆಸಾಗೀ ಅಲ್-ಜಜೀರಾಕ್?” ಹಿಣ್ಸಿಲೆಂ ಮದಾಮೆನ್. ಹಾಂವ್ ಹಾಸ್ಲೊಂ ಕಿತ್ಯಾಕ್ ಹೆಂ ಜಿವೆಂ ಸತ್.

“ಮೋದಿ 2.0 ಸರ್ಕಾರ್ ಪದ್ವೆರ್ ಆಯಿಲ್ಲೊಚ್, UAPA ಕಾನುನಾಂತ್ ತಿದ್ವಣ್ ಕೆಲ್ಲಿ. ಹ್ಯೆ ತಿದ್ವಣೆ ಸಕ್ಲಾ ಕೋಣಾಕ್-ಯೀ ಟೆರರಿಸ್ಟ್ ಮ್ಹಣ್ ಲೇಬಲ್ ದೀವ್ನ್ ಕುಡಾವ್ಯೆತೆಂ. ತಾಂಕಾ ಕೊಡ್ತಿಂತ್ ಮೆಜಿಸ್ಟ್ರೇಟಾ ಮುಕಾರ್ ಹಾಜರ್ ಕರ್ಚಿ ಗರ್ಜ್ ನಾಂ. ಬೈಲ್ ನಾಂ. ಅಸಲ್ಯಾ ಕ್ರೂರ್ ಕಾಯ್ದ್ಯಾಖಾಲ್ ಜಾಮಿಯಾ ಮಿಲಿಯಾ ವಿಧ್ಯಾರ್ಥಿ ಸಫೂರಾ ಝರ್ಗಾರ್ ಕಯ್ದ್ ಜಾಲಿ. ಸಫೂರಾ ತಸ್ಲಿಂ 18 ಮುಸ್ಲಿಮ್ ಕಾಯಕರ್ತಾಂಕ್ ಹ್ಯಾ ತಿದ್ವಣ್ ಕೆಲ್ಲ್ಯಾ UAPA ಕಾನುನ್ ಥಾಪುನ್ ಕಯ್ದ್ ಕೆಲ್ಲೆಂ. ತಾಂಚ್ಯೊ ಕೇಜಿ ಆಜೂನ್ ಚಲೊನ್ ಆಸಾತ್. ಸಫೂರಾಕ್ ಆಪ್ಲಿ ಕಾಣಿ ವಿವರುಂಕ್ ಹಿ ಡೊಕ್ಯುಮೆಂಟರಿ ಸಂದ್ರಾಪ್ ದಿತಾ”.

ಯೆಜ್ಮಾನ್: ಹಾಂವ್‌ಯೀ ಪಳೆತಾ ನೇ?

ಕೊರೊನಾ ಮ್ಹಾ-ಮಾರಿ ಇಂಡಿಯಾಂತ್-ಯೀ ಪಾಸಾರ್ಲಿ. ತರಿಪುಣ್ ಹಿಂದು-ಮುಸ್ಲಿಮ್ ದ್ವೇಷ್ ಉಣೊ ಜಾವ್ನಾ. ಹಿಂದುತ್ವಾ ಕಟ್ಟರ್-ಪಂಥಿ ಮುಕೆಲ್ಯಾಂನಿಂ ದ್ವೇಷ್ ಭಾಶಣಾಂ ಚಾಲು ದವರ್ಲಿಂ: “ಹರ ಹರ ಮಹಾದೇವ್…ಏಕ್‌ಚ್ ಖುದ್ದ್ ಮೊರೊಂಕ್ ತಯಾರ್ ರಾವಾ ವ ಮಾರುಂಕ್. ದುಸ್ರೊ ಕಸ್ಲೊಚ್ ವಿಕಲ್ಪ್ ನಾಂ. ಹೆ ಕೊಯ್ತೆ ಪಳೆಯಾ. ಅನ್-ಭಾವಾಡ್ತ್ಯಾಂಚೆ ಗಳೆ ಕಾತ್ರುಂಕ್. ಹಿಂದುಸ್ತಾನಾಕ್ ಹಿಂದು ರಾಷ್ಟ್ ಕರುಂಕ್ ಆಮಿಂ ಝುಜ್ತೆಲ್ಯಾಂವ್. ಗರ್ಜ್ ಪಡ್ಲ್ಯಾರ್ ಆಮಿಂ ತಾಂಕಾಂ ಕಾತರ್ತೆಲ್ಯಾಂವ್. ಹರ ಹರ ಮಹಾದೇವ್. ಭಾರತ್ ಮಾತಾ ಕಿ ಜೈ”.

ಡೊಕುಮೆಂಟರಿ ಪ್ರಮಾಣೆಂ ಏಕಾ ಹಫ್ತ್ಯಾಕ್ 10-12 ದ್ವೇಷ್ ಭಾಶಣಾಂಚೊ ವಿಡಿಯೊ ವಯ್ರಲ್ ಜಾತಾತ್. ಥೊಡ್ಯಾ ಪಾವ್ಟಿಂ ದೀಸಾಕ್ 19-12 ವಿಡಿಯೊ ವಯ್ರಲ್ ಜಾಲ್ಲೆ ಆಸಾತ್. ಸಕ್ಟಾಂತ್ ಏಕ್‍ಚ್ ಉಲೊ: ‘ತುಮಿ ಹಿಂದು ಚೆಡ್ವಾಂಕ್ ಚಿಡಾವ್ನ್ ಪಳೆಯಾ. ತುಮ್ಚ್ಯಾಘರಾ ಆಮಿಂ ಘುಸ್ತೆಲ್ಯಾಂವ್. ತುಮ್ಚ್ಯಾ ಅವಯ್-ಭಯ್ಣ್ಯಾಂಚ್ಯೆಂ ಅಪಹರಣ್ ಕರ್ನ್ ಬಲಾತ್ಕಾರ್ ಕರ್ತೆಲ್ಯಾಂವ್. ಮುಸ್ಲಿಮಾಂಕ್ ಸಾಫ್ ಚೆತಾವಣಿ ದಿತಾತ್: ಸರ್ಕಾರ್ ತಾಂಚಿ ರಾಕ್ವಳ್ ಕರ್ತಲೊ ಮ್ಹಣ್ ಆಶೆನಾಕಾತ್.’

ಏಕಾ ಟಿವಿ ರಿಯಾಲಿಟಿ ಚರ್ಚ್ಯೆಂತ್ ಬಿಜೆಪಿಚಿ ರಾಷ್ಟ್ರ ವಕ್ತಾರ್ ನುಪುರ್ ಶರ್ಮಾನ್ ಪ್ರೊಫೆತಾಕ್ ಲಗ್ತಿ ಥೊಡೆ ತಮಾಶೆ ಕೆಲೆ. ಹಿಂ ಉತ್ರಾಂ ಬ್ಲಸ್ಫೆಮಿ ಮ್ಹಣ್ ಸಂಸಾರ್-ಭರ್ ಮುಸ್ಲಿಮ್ ಉಚಾಂಬೊಳ್ ಜಾಲೆ. ತೀವ್ರಗಾಮಿ ಹಿಂದು ಚಾಳ್ವಲೆ ಆನಿಂ ಶರ್ಮಾಚಿ ಪಾಡ್ತ್ ಧರುಂಕ್ ಲಾಗ್ಲೆ. ದೊಗಾಂಚೊ ಜೀವ್ ಗೆಲೊ. ತಾಂಚ್ಯೆ ಖುನ್ಯೆಚ್ಯಾ ಆರೋಪಾಂತ್ ದೊಗಾಂ ಮುಸ್ಲಿಮಾಂಕ್ ಕಯ್ದ್ ಕೆಲೆಂ. ತಾಣಿಂ ಮೋದಿಚ್ಯಾ ಜಿವಾಕ್ ಧಮ್ಕಿ ದಿಲ್ಲಿ ಆನಿಂ ಖುನ್ಯೆಚೊ ವಿಡಿಯೊ ಪರ್ಗಟ್ಲಲೊ.

“ಪತ್ರ್-ಕರ್ತಾಂಚ್ಯೆಂ ಕಾಮ್ ಇಂಡಿಯಾಂತ್ ಭಾರಿಚ್ ಕಷ್ಟಾಂಚ್ಯೆಂ ಜಾಲಾಂ ಮ್ಹಣ್ತಾ ಪತ್ರ್-ಕರ್ತ್ ಸಿದ್ದಾರ್ಥ್ ವರದರಾಜನ್, ಡೊಕ್ಯುಮೆಂಟರಿಂತ್ ಉಲವ್ನ್. ಹೊ ಹಿಂದು ದಿಸಾಳ್ಯಾಚೊ ಮಾಜಿ ಸಂಪಾದಕ್. ಪ್ರಸ್ತುತ್, ಅಮೇರಿಕಾಂತ್ ವಸ್ತಿ ಕರ್ತಾ ಆನಿಂ The Wire  ಮ್ಹಳ್ಳೆಂ ಡಿಜಿಟಲ್ ಮೆಗಜಿನ್ ಪರ್ಗಟ್ತಾ. ಪತ್ರಿಕಾ ಸ್ವತಂತ್ರ್ ಕುಸ್ಕಲಾಂ ಮೋದಿ ಪದ್ವೆರ್ ಯೆತಚ್. ಆತಾಂ, ಪತ್ರ್-ಗಾರಿಕಾ ಸಂಕಟಾಂತ್ ಆಸಾ. ಭಿಯೆನಾಸ್ತಾನಾಂ, ಆಪ್ಲೆಂ ಕಾಮ್ ಕೆಲ್ಲ್ಯಾಂಕ್ ಕಯ್ದ್ ಲೆಗುನ್ ಕರ್ತಾತ್. ಮಾಧ್ಯಮಾಂಚ್ಯೆರ್ ಟೊಟಲ್ ಕಂಟ್ರೊಲ್ ಕರ್ಚಿ ಘರ್ಜ್ ತಾಕಾ ಆಸಾ. ತ್ಯಾ ಶಿವಾಯ್ ತಾಚ್ಯೆಂ ಹಿಂದು ರಾಷ್ಟ ಪ್ರೊಜೆಕ್ಟ್ ಸಾಧ್ಯ್ ಜಾಯ್ನಾ.

“ಎಮ್ನೆಸ್ಟಿ ಇಂಡಿಯಾಚೊ ಆಕಾರ್ ಪಟೆಲ್ ಉಲವ್ನ್ ಸಾಂಗ್ತಾ ಕಿ ದೆಸಾಂತ್ NGO ವಯ್ರ್ ದಬಾವ್ ಘಾಲಾ. ಸಿವಿಲ್ ಸಮಾಜಿಕ್ ಘಟಕಾಂ ಕುಸ್ಕಲ್ಯಾಂತ್. ಮೋದಿಚ್ಯೆ ರಾಜ್ವಟ್ಕೆಂತ್ ಇಂಡಿಯಾ ಖರೆಂ ಸ್ವತಂತ್ರ್ ನಾಂ.

“According to Freedom House, a US think-tank, India was a free country when Modi came to power in 2014. Now, it is only partly free. ಅಶೆಂ ಸಾಂಗ್ತಚ್, ನಿಮಾಣೆಂ ಉತರ್ ಬಿಜೆಪಿ ಮುಕೆಲಿ ಸ್ವಪನ್ ದಾಸಾಕ್ ದಿತಾ: Our democracy may not be perfect. But it keeps improving. There is room for everybody to express their views, rational or not!

“ಡೊಕ್ಯುಮೆಂಟರಿ ಸಮಾಪ್ತ್ ಕರ್ತನಾಂ ನಿರ್ಮಾಪಕ್ ಮ್ಹಣ್ತಾ: Modi reamins a hugely popular yet divisive figure. ತರ್-ಯಿ ಅಸ್ತಮ್ತಿ ಆನಿಂ ಉದೆಂತಿಚ್ಯಾ ಪ್ರಜಾತಂತ್ರಿಕ್ ರಾಷ್ಟ್ರಾಂಕ್ ಚೀನ್ ಏಕ್ ವ್ಹಡ್ ಸಮಸ್ಸೆಂ ಜಾಲಾಂ. ಚೀನಾ ವಿರುದ್ದ್ ಕಸ್ಸಲಿಂ ಕ್ರಮಾಂ ಘೆಂವ್ಕ್ ಇಂಡಿಯಾಚಿ ಮಜತ್ ಗರ್ಜ್ ಆಸಾ. ಹೆಂ ಮೋದಿ ಜಣಾಂ. ದೆಕುನ್, ಮನ್ಷ್ಯಾಂ-ಹಕ್ಕಾಂಕ್ ವ್ಗಡ್ ಮಹತ್ವ್ ನಾಂ. ಅಕ್ರೆಕ್, ಕೆಮರಾ ಕಪಲಾರ್ ಚ್ಯಾರ್ ಆಡ್ ನಾಮ್ ವೊಡ್ಲಲೊ ಮೋದಿ ರಾಮ್ ಮಂದಿರಾಚ್ಯೆಂ ಭೂಮಿ-ಪುಜನ್ ಕರ್ಚ್ಯೆಂ ದಾಕಯ್ತಾ. ತಾಚ್ಯೆಂ ಭಾಶಣ್ ಸುರು ಕರ್ತಾ ಮ್ಹಣೊನ್: ಹರ ಹರ ಮಹಾದೇವ್”.

ಚಡ್ತಾವ್, ಮಹಾರಾಷ್ಟ್ರಾಚಿ ಹಾಸ್ಯ್ ಜಾತ್ರಾ, ತಾರಕ್ ಮೆಹ್ತಾ ಕಾ ಉಳ್ಟಾ ಚಸ್ಮಾ, ಬಿಗ್ ಬೊಸ್, ಶಾರ್ಕ್ ಇಂಡಿಯಾ, ಮಾಸ್ಟರ್ ಶೆಫ್ ಇಂಡಿಯಾ ವ ವೆವೆಗ್ಳಿಂ ರಾಂದ್ಪಿ ಪ್ರೊಗ್ರೆಮಾಂ ದೀಸ್ ರಾತ್ ಪಳೆಂವ್ಚಿ ಯೆಜ್ಮಾನ್ 59 ಮಿನುಟಾಂ ಮ್ಹಜ್ಯೆ ಸಾಂಗಾತಾ ಬಸ್ಲಿ ಮ್ಹಳ್ಳೆಂ ವ್ಹಡ್ ಆಚಾರ್ಯೆಂ. ತುಮಿಂ ಕಿತೆಂ ಮ್ಹಣ್ತಾತ್?

ಅಕೇರ್ ಜಾತಚ್ ತಿಚಿ ಅಭಿಪ್ರಾಯ್ ಮಾತ್ರ್ ಬದ್ಲಲಿ ನಾಂ. ತಿಕಾ “ಮೋದಿ ಹೆ ತೊ ಮುಮ್ಕೀನ್ ಹೆ”. ತೆದ್ನಾಂ, ವ್ಹರಾಂ ಸಾಂಜೆಚಿಂ ಸಾಢೆ ಸ ಜಾಲಿಂ. 36 ಗುಣಿ ಜೋಡಿ ಸೀರಿಯಲ್ ಸುರು ಜಾಲೆಂ ಮ್ಹಣ್ ತಿ ಆಮ್ಸೊರಾನ್ ಟಿವಿ ಓನ್ ಕರುಂಕ್ ಹೊಲಾಕ್ ಗೆಲಿ.

► ಫಿಲಿಪ್ ಮುದಾರ್ಥ್

ಪ್ರಸ್ತುತ್, ದೇಸಾಂತ್ ದೋನ್ ಹಿಷ್ಯಾ ಬಜಾರ್ ಆಸಾತ್: BSE ಆನಿಂ NSE. ಹ್ಯಾಂ ದೋನೀ ಬಜಾರಾಂನಿಂ ಅದಾನಿ ಗ್ರುಪಾಚ್ಯೊ ಧಾ ಕಂಪ್ಣ್ಯೊಂ ನೊಂದಿತ್ ಆಸಾತ್. ಹ್ಯೊ ಅಶ್ಯೊ ಆಸಾತ್: ಅದಾನಿ ಎಂಟರ್-ಪ್ರೈಸಸ್ (ಹಿ ತಾಚಿ ಮೂಳಾವಿ ಕಂಪ್ಣಿ), ಅದಾನಿ ಪವರ್, ಅದಾನಿ ಟ್ರಾನ್ಸ್-ಮಿಶನ್, ಅದಾನಿ ಗ್ರೀನ್ ಎನರ್ಗಿ, ಅದಾನಿ ಪೊರ್ಟ್ಸ್ ಆನಿಂ ಸೆಜ್, ಅದಾನಿ ವಿಲ್ಮರ್, ಅದಾನಿ ಟೊಟಲ್ ಗ್ಯೇಸ್, ಏಸಿಸಿ , ಅಂಬುಜಾ ಸಿಮೆಂಟ್ಸ್ ಆನಿಂ ಎನ್.ಡಿ.ಟಿವಿ.

ಹ್ಯಾಂ ಪೈಕಿಂ, ನಿಮಾಣ್ಯೊಂ ತೀನ್ ಕಂಪ್ಣ್ಯೊಂ ತಾಣೆಂ 2022 ಇಸ್ವೆಂತ್ ಮೋಲಾಕ್ ಘೆತ್‍ಲ್ಲ್ಯೊ. ತ್ಯಾಂ ಪೈಕಿಂ ಅಂಬುಜಾ ಸಿಮೇಂಟ್ಸ್ ಆನಿಂ ಎಸಿಸಿ ಹ್ಯೊ ಸಿಮೇಂಟ್ ಉತ್ಪಾಧನ್ ಕರ್ತಾತ್. ಹೊಲ್ಸಿಮ್  ಮ್ಹಳ್ಳಿ ಸ್ವಿಸ್ ಕಂಪ್ಣಿ ಹ್ಯಾಂ ಕಂಪ್ಣೆಂಚ್ಯೆ ಮೆಜೋರಿಟಿ ಹಿಷ್ಯಾದಾರ್ ಜಾವ್ನಾಸ್ಲಿ. ಅದಾನಿನ್ ಹ್ಯೆ ಹಿಷೆ ಆಪ್ಲ್ಯಾ ಮೌರಿಸಿಯಸ್ ಕುದ್ರ್ಯಾರ್ ನೊಂದಿತ್ ಜಾಲ್ಲ್ಯಾಂ ಪೊಟ್ಟು ಕಂಪ್ಣೆಂ ಮುಕಾಂತ್ರ್ ಘೆತ್ಲೆ. ಹ್ಯೆ ದೋನ್‌ಯೀ ಕಂಪ್ಣ್ಯೊಂ ಬರ‍್ಯಾನ್ ಚಲೊನ್ ಆಸ್‍ಲ್ಲ್ಯೊ. ಸಾದಾರ್ಣ್ ಮುನಾಫೊ ಜೊಡ್ತಲ್ಯೊ. ದೆಕುನ್, ಹಿಷ್ಯಾಂಕ್ ಬಜಾರಾಂತ್ ಸಾದಾರ್ಣ್ ಖಾಯ್ಸ್ ಆಸ್ಲೊ. ಅದಾನಿಚೊ ಕಂಟ್ರೊಲ್ ಆಯಿಲ್ಲ್ಯಾ ಉಪ್ರಾಂತ್, ಅದಾನಿಚ್ಯೆಂ ಮೇನೆಜ್‌ಮೆಂಟ್ ಮ್ಹಳ್ಳ್ಯಾ ಏಕಾಚ್ ಕಾರಣಾಕ್ ಲಾಗೊನ್, ಹಾಂಚ್ಯಾಂ ಹಿಷ್ಯಾಂಚಿಂ ಮೋಲಾಂ ಆಕಾಸಾಕ್ ತೆಂಕ್ಲಿಂ. ತಸಲಿಂ ಪಿಸಾಯೆಚಿಂ ಆನಿಂ ಅತಿರೇಕ್ ಮೊಲಾಂ ಯೆಟುನ್ ಕೋಣ್ ಹ್ಯೆ ಹಿಷೆ ಘೆತೆಲೆ ತೆಂ ಮಾತ್ರ್ ಕಳಿತ್ ನಾಂ.

ಏನ್.ಡಿ.ಟಿವಿ ಏಕ್ ಮಾಧ್ಯಮ್ ಕಂಪ್ಣಿ. ಹಾಂಚಿಂ ಟವಿ ನ್ಯೂಸ್ ಆನಿಂ ಹೆರ್ ಸಕಾಳಿಕ್ ಪ್ರೊಗ್ರೆಮಾಂ ಸೆಟೆಲಾಯ್ಟ್ ಚೆನೆಲಾಂ ಮುಕಾಂತ್ರ್ ತಶೆಂಚ್ ಪ್ರಿಂಟ್ ಅವ್ರತ್ತಿಂ ಮುಕಾಂತ್ರ್ ಪ್ರಸಾರ್ ಜಾತಾತ್.  ಹಿ ಕಂಪ್ಣಿ ಪ್ರಾನ್ನೊಯ್ ರೊಯ್ ಆನಿಂ ತಾಚಿ ಪತಿಣ್ ರಾಧಿಕಾ ಹಾಣಿಂ ತೀನ್ ದಶಕಾಂ ಆದಿಂ ಸ್ಥಾಫಿತ್ ಕೆಲ್ಲಿ. ಹೆಂ ರೋಯ್ ಕುಟಾಮ್ ನಾಂವಡ್ದಿಕ್ ಪತ್ರ್‌ಕರ್ತಾಂ ಪೈಕಿಂ ಎಕ್. ಮಾತ್ಶೆಂ ಲೆಫ್ಟಿಸ್ಟ್. ತಶೆಂಚ್ ಲಿಬರಲ್ ಅನಿಂ ಸೆಕ್ಯುಲರ್. ದೆಕುನ್, ಹಿಂದುತ್ವಾವಾದಿ ಮೋದಿ ಸರ್ಕಾರಾಚ್ಯಾ ಗೋದಿ ಮಾಧ್ಯಮಾಂತ್ ಹಾಂಚೆಂ ನಾಂವ್ ನಾತ್ಲೆಂ. ಮೋದಿ ಸರ್ಕಾರಾಚ್ಯೆಂ ಗುಣ್-ಗಾಯನ್ ಕರಿನಾಂತ್ ಮ್ಹಣ್ತನಾಂ, ಕೇಂದ್ರ್ ಆನಿಂ ಬಿಜೆಪಿಚ್ಯೆ ರಾಜ್ಯ್ ಸರ್ಕಾರ್ ಹಾಂಕಾಂ ಇಸ್ತಿಹಾರಾಂ ದೀನಾತ್ಲಿಂ.

ಮೋದಿ ಆನಿಂ ಬಿಜೆಪಿ ರಾಜ್ಯ್ ಸರ್ಕಾರಾಂಚ್ಯಾಂ ನೀತಿಂ ವಿರುದ್ಧ್ ಜಾಯಿತ್ತಿಂ ಪ್ರೊಗ್ರೇಮಾಂ ಏನ್.ಡಿ.ಟಿವಿನ್ ಕೆಲ್ಲಿಂ ಆಸಾತ್. ದೆಕುನ್, ಏನ್.ಡಿ.ಟಿವಿ ಗ್ರುಪಾಚಿಂ ಮಾಧ್ಯಮಾಂ ಆಪ್ಲ್ಯಾಂ ಮಾತ್ಬಾರಿ ಇಶ್ಟಾಂಚ್ಯಾ ಕಂಟ್ರೊಲಾರ್ ಹಾಡುಂಕ್ ಲಾಂಬ್ ಕಾಳಾಚಿ ಘುಟ್ಮೊಳ್ ಚಾಲು ಆಸ್ಲಿ. ಅಖ್ರೆಕ್, ಗುಪಿತ್ ವಾಟ್ ವಾಪ್ರುನ್, ಎನ್.ಡಿ.ಟಿವಿಚ್ಯೆ ಮ್ಹಸ್ತ್ ಹಿಷೆ ಗೌತಮ್ ಅದಾನಿನ್ ಘೆತ್ಲೆ. ಹೆಂ ಕಾಮ್ ಅದಾನಿಚ್ಯಾ ಮೌರಿಸಿಯಸ್ ಮೂಳಾಚ್ಯಾಂ ಪೊಟ್ಟು ಕಂಪ್ಣ್ಯಾಂ ದ್ವಾರಿಂ ಜಾಲೆಂ. ತ್ಯಾ ನಂತರ್, 2022 ದಸೆಂಬ್ರ್ 30 ತಾರಿಕೆರ್ ರೋಯ್ ಕುಟ್ಮಾನ್ ಆಪ್ಲೆ ಉರ್ಲೆಲೆ ಹಿಷೆ ಅದಾನಿಕ್ ವಿಕ್ಲೆ. ಅಶೆಂ ಎನ್.ಡಿ.ಟಿವಿ ಸಂಪೂರ್ಣ್ ಥರಾನ್ ಗೌತಮ್ ಅದಾನಿಚ್ಯಾ ಕಂಟ್ರೊಲಾರ್ ಆಯ್ಲಿ.

ಮೋದಿಚಿ ಶಿಮ್ಟಿ ಅದಾನಿಚಿ ಅದ್ಭುತ್ ವಾಡವಳ್:

2103 ಸೆಪ್ತೆಂಬ್ರ್ 13 -ವ್ಯೆರ್ ತವಳ್ಚೊ ಗುಜರಾತ್ ಮುಖ್ಯ್ ಮಂತ್ರಿ ಶ್ರೀ ನರೆಂದ್ರಾ ಮೋದಿಕ್ ಬಿಜೆಪಿನ್ ಆಪ್ಲೊ ಪ್ರಧಾನ್ ಮಂತ್ರಿ ಅಭ್ಯರ್ಥಿ ಮ್ಹಣ್ ವಿಂಚ್ಲೆಂ. ತ್ಯಾ ದೀಸಾ, ಮೋದಿಚೊ ಮಿತ್ರ್ ಆನಿಂ ಗುಜರಾತಿ ವ್ಯಾಪರಿ ಗೌತಮ್ ಅದಾನಿಚಿ ಕಾಲ್ಪನಿಕ್ ಆಸ್ತ್ USD 1.9 Bn ಆಸ್ಲಿ. ತವಳ್ ಏಕ್ ಡೋಲರ್ ಮ್ಹಳ್ಯಾರ್ 54 ರುಪಯ್. ಮ್ಹಳ್ಯಾರ್ ಅದಾನಿಚ್ಯೆಂ ಮೋಲ್-ಮಾಪಣ್ ಲಗ್ಬಗ್ 10,260 ಕರೋಡ್ ರುಪಯ್. ಮೋದಿ ಖಂಡಿತ್ ಜಿಕೊನ್ ಯೆತಾ ಮ್ಹಳ್ಳಿ ಗಜಾಲ್ ಏಕ್ ಉಗ್ತೊ ಘುಟ್, ಸಕ್ಟಾಂಕ್ ಕಳಿತ್ ಆಸ್‍ಲ್ಲೊ. ದೆಕುನ್, 2014 ಚುನಾವಿ ರಿಸಲ್ಟ್ ಯೆಂವ್ಚ್ಯಾ ಪೈಲೆಂಚ್, ಮ್ಹಳ್ಯಾರ್ 2014 ಮಾಯ್ 2-ವ್ಯೆರ್ ಗೌತಮ್ ಅದಾನಿಚಿ ಕಾಲ್ಪನಿಕ್ ಆಸ್ತ್ USD 6.0 Bn ಜಾಲಿ. ಆಟ್ ಮಹಿನ್ಯಾಂನಿಂ ಆಸ್ತಿಚಿ ತ್ರಿಗುಣ್ ವಾಡವಳ್ ಜಾಲಿ ತಿ ಗಜಾಲ್ ಆಧುನಿಕ್ ಸಂಸಾರಾಚ್ಯೆಂ ಆಟ್ವೆಂ ನವಾಲ್ ಮ್ಹಣ್ಯೆತ್!

ಖರೆಂಚ್, 2001 ಇಸ್ವೆಂತ್ ಮೋದಿ ಗುಜರಾತ್ ಮುಖ್ಯ್ ಮಂತ್ರಿ ಜಾತನಾ ಅದಾನಿ ಎಂಟರ್‌ಪ್ರೈಸಸ್ ಹಿಷ್ಯಾಚ್ಯೆಂ ಬಜಾರಿ ಮೋಲ್ ರುಪಯ್ 1.67 ಆಸ್ಲೆಂ. ತೆರಾ ವ್ಹರ್ಸಾಂಚ್ಯಾ ಮೋದಿ ರಾಜ್ಯ್ ಸರ್ಕಾರಾಚ್ಯೆ ಆವ್ಧೆಂತ್ 85 ಗುಣಾಂ ಮೋಲಾಧಿಕ್ ಜಾಲೊ. ಮೋದಿ PM-designate ಜಾಲ್ಲ್ಯಾ ದೀಸಾ, ಹ್ಯಾ ಹಿಷ್ಯಾಚ್ಯೆಂ ಮೋಲ್ ರುಪಯ್ 142 ಜಾಲ್ಲೆಂ. ಮೋದಿ ಪ್ರಧಾನಿ ಪದ್ವೆರ್ ಆಸ್ತಾ ಪರ‍್ಯಾಂತ್ ಅದಾನಿ ಗ್ರುಪಾಚ್ಯಾಂ ಕಂಪ್ಣೆಂಕ್ ಸರ್ಕಾರಿ ಮಜತ್ ಮೆಳ್ತಲಿ ಮ್ಹಣ್ ಹಿಷ್ಯಾ ಬಜಾರ್ ಜಾಣಾಂ. ದೆಕುನ್, ತಾಚ್ಯಾ ಮೂಳಾವ್ಯಾ ಕಂಪ್ಣೆಚ್ಯೆ ಹಿಷೆ ‘ಪಿಸಾಂತುರ್’ ಮೂಲಂಕಣಾಕ್ ವಿಕೊನ್ ಘೆಲೆ.

2023 ಜನೆರ್ 21-ವ್ಯೆರ್, ಇಂಡಿಯಾ ಟಿವಿಚ್ಯಾ ರಜತ್ ಶರ್ಮಾನ್ ಗೌತಮ್ ಅದಾನಿಕ್ ಸಯ್ರೊ ಜಾವ್ನ್ ಆಪಯ್ಲೊ. ತಾಚ್ಯಾ ಪ್ರತಿಷ್ಟಿತ್ ‘ಆಪ್ ಕಿ ಅದಾಲತ್’ ಪ್ರೊಗ್ರೆಮಾರ್ ಉಲವ್ನ್ ಗೌತಮ್ ಅದಾನಿನ್ ಆಪ್ಲಿ ಜಿಣ್ಯೆ ಕತಾ ಉಗ್ತಾಯ್ಲಿ. ಧಾವಿ ಜಾತಚ್, ಕೊಲೆಜಿಚಿಂ ಮೆಟಾಂ ಚಡ್ಚ್ಯಾ ಬದ್ಲೆಕ್, ಕುಟ್ಮಾಚ್ಯಾ ಬಿಜ್ನೆಸಾಂತ್ ತಾಣೆಂ ಹಾತ್ ಘಾಲೊ. ವಿದೇಸಾಂ ಥಾವ್ನ್ ಸ್ಲಿಪ್ಪರಾಂ, ಬಾಲ್ದ್ಯೊ ಆನಿಂ ಗ್ರಹಸ್ತಿ ವಾಪ್ರಾಚೊ ಪ್ಲಾಸ್ಟಿಕ್ ಸಮಾನ್ ಹಾಡವ್ನ್ ಲ್ಹಾನ್ ಮಟ್ಟಾರ್ ದಂದೊ ತೊ ಕರ್ತಲೊ. ರಾಜೀವ್ ಗಾಂಧಿನ್ Excim ನೀತಿಂತ್ ನವೆಸಾಂವ್ ಕೆಲ್ಲೆಂಚ್, ಅದಾನಿನ್ ತಾಚೊ ಫಾಯ್ದೊ ಉಟಯ್ಲೊ. ತಶೆಂಚ್, ಗುಜರಾತಾಂತ್ ಮೋದಿಚ್ಯೆಂ ನಾಂವ್ ಲೆಗುನ್ ಆಯ್ಕೊಂಕ್ ನಾತ್‍ಲ್ಲ್ಯಾ ಕಾಳಾರ್, ಪೈಲೆಂ ಕೊಂಗ್ರೆಸ್ ಉಪ್ರಾಂತ್ ಬಿಜೆಪಿ ರಾಜ್ಯ್ ಸರ್ಕಾರ್ ಚಲಯ್ತನಾಂ ತಾಕಾ ಭರ್ಪೂರ್ ಆವ್ಕಾಸ್ ಮೆಳ್ಳೊ ಆಪ್ಲೊ ದಂಧೊ ವಾಡಂವ್ಕ್. ಉಪ್ರಾಂತ್, ಮುಂದ್ರಾ ಬಂದರ್ ತಾಣೆಂ ಆಪ್ಣಾಯ್ಲೆಂ. ಶೆಜಾರಾ mangroves ಜಾವ್ನ್ ಆಸ್‍ಲ್ಲಿ ಉದ್ಕಾ ಪಂದ್ಲಿ ಜಮೀನ್ ಸುಣ್ಯಾ ಸವಾಯ್ ತಾಕಾ ಮೆಳ್ಳಿ. ಥಂಯ್ಸರ್, ತಾಣೆಂ ಸೆಜ್ ಉಭೆಂ ಕೆಲೆಂ. ಹಾಚ್ಯಾ ಪಾಟ್ಲ್ಯಾನ್ ಕೊಂಗ್ರೆಸ್ ರಾಜ್ಯ್ ಸರ್ಕಾರಾಂಚೊ ವ್ಹಡ್ ಪಾಟಿಂಬೊ ಆಸ್ಲೊ ಮ್ಹಣಾಲೊ ತೊ.

ಮತ್ಲಬ್, ಸರ್ಕಾರ್ ಕೊಂಗ್ರೆಸಾಚೊ ಆಸೊಂ ವ ಬಿಜೆಪಿಚೊ, ಆಪ್ಲಿಂ ತಾಂತಿಯಾಂ ದೋನ್‌ಯೀ ಟೊಖ್ರೆಂನಿಂ ದವರ್ಲೆಲಿಂ ಮ್ಹಣ್ ತೊ ಒಪ್ತಾ. ಮೋದಿಚ್ಯೆಂ ನೆಕೆತ್ರ್ ಉದಯ್ತಚ್, ಅದಾನಿಕ್ ಭಾಜ್ಲೆಲೆಂ ಮೆಳ್ಳೆಂ. ತಾಚ್ಯೆಂ ಏಕ್ ವಿಮಾನ್ ಆನ್ಯೇಕ್ ಹೆಲಿಕೊಪ್ಟರ್ ಮೋದಿನ್ ಆಪ್ಲ್ಯಾ 2014 ಚುನಾವ್ ಪ್ರಚಾರಾಕ್ ತಶೆಂಚ್ ಜಿಕ್ತಚ್ ದಿಲ್ಲಿ ವೆಚ್ಯಾ ಪೈಣಾಕ್ ವಾಪರ್ಲ್ಯಾಂತ್ ಮ್ಹಣ್ ರುಜ್ವಾತ್ಯೊ ಆಸಾತ್. ಹಾಚೊ ಭರ್ಪೋರ್ ಫಾಯ್ದೊ ಉಟವ್ನ್, ಗೌತಮ್ ಅದಾನಿನ್ ಆಪ್ಲೆಂ ಸಾಮ್ರಾಜ್ಯ್ ಸಗ್ಳ್ಯಾ ಸಂಸರಾಂತ್ ಬಾಂಧುನ್ ಹಾಡ್ಲಾಂ. ಅಶೆಂ ತೊ ಸಂಸರಾಂತ್ ತಿಸ್ರೊ ಗ್ರೇಸ್ತ್ ಮನಿಸ್ ಜಾಂವ್ಕ್ ಪಾವ್ಲಾ.

ಚ್ಯಾ ಕೊಪಾಂತ್ ವಾದಳ್:

ಗೌತಮ್ ಅದಾನಿಚ್ಯಾ ರಾಜಾಂತ್ ಸಕ್ಕಡ್ ಬರ‍್ಯಾನ್ ಚಲೊನ್ ಆಸ್‍ಲ್ಲೆಂ. ಧೂಮ-ಕೇತು ಭಾಶೆನ್, ತೊ ಗ್ರೆಸ್ತಾಂಚ್ಯೆ ಪಟ್ಟೆಂತ್ ವಯ್ರ್ ವಚೊನ್ ಆಸ್ತಾನಾಂ, ಅದಾನಿಚೊ ಫುಗ್ಗೊ ಫುಟ್ತಲೊ ಮ್ಹಣ್ ರಾಹುಲ್ ಗಾಂಧಿ ಸಾಂಗೊನ್ಂ‍ಚ್ ಆಸ್ಲೊ. ತಾಚ್ಯೆಂ ‘ಹಮ್ ದೊ, ಹಮಾರೆ ದೊ’ ಶ್ಲೋಕ್ ಸಕ್ಟಾಂಕ್ ಕಳಿತ್ ಆಸಾ. ರಾಹುಲ್ ತುಜ್ಯೆ ವಿಷ್ಯಾಂತ್ ಅಶೆಂ ಉಲವ್ನ್ ಆಸಾ ಮ್ಹಣ್ ರಜತ್ ಶರ್ಮಾನ್ ವಿಚಾರ್ಲೆಂ. ಅದಾನಿ ಮ್ಹಣಾಲೊ: ರಾಹು-ಜಿ ಏಕ್ಲೊ ಭಾರೀ ಬುಧ್ವಂತ್, ಮಹತ್ವಾಚೊ ಆನಿಂ ಪರಿಬುದ್ಧ್ ಫುಡಾರಿ. ಆವೇಶಾನ್ ಯೇವ್ನ್ ಥೊಡಿಂ ರಾಜಕಾರಣಿ ವಾಕ್ಮೂಲಾಂ ತೊ ದಿತಾ ದೆಕುನ್ ಹಾಂವ್ ಶಿಣ್ ಕರಿನಾಂ.

ತೀನ್ಂಚ್ ದೀಸ್ ಪಾಶ್ಯಾರ್ ಜಾತಾತ್. 2023 ಜನೆರ್ 24-ವ್ಯೆರ್ ಅಮೆರಿಕೀ ಮುಳಾಚಿ ಹಿಂಡೆನ್‍ಬರ್ಗ್ ಮ್ಹಳ್ಳಿ ಏಕ್ ಕಂಪ್ಣಿ ಅದಾನಿ ಗ್ರುಪಾಚ್ಯೆರ್ ಅರೋಪ್ ಮಾಂಡ್ತಾ. ಹ್ಯಾ ಹಿಂಡೆನ್‍ಬರ್ಗ್ ರಿಸರ್ಚ್ ರಿಪೊರ್ಟಾ ವರ್ವಿಂ, ಅದಾನಿಚ್ಯಾ ಅನಿವಾಸಿ ಕುದ್ರ್ಯಾಂನಿಂ ನೊಂದಿತ್ ಜಾಲ್ಲ್ಯಾಂ ಲಗ್ಬಗ್ 600 ಪೊಟ್ಟು ಕಂಪ್ಣೆಂಚೊ ಘುಟ್ ಭಾಯ್ರ್ ಯೆತಾ. ಅಶೆಂ, ತಾಚ್ಯೆ ಗಿರೆಸ್ತ್ಕಾಯೆಚೊ ಪುಗ್ಗೊ ಫುಟ್ತಾ. ಹೆಂ ಏಕ್ ಚ್ಯಾ ಕೊಪಾಂತ್ ವಾದಳ್ ಮ್ಹಣ್ ಮೋದಿ ಸರ್ಕಾರ್ ಮ್ಹಣ್ತಾ. ಪುಣ್, ಅದಾನಿ 413 ಪಾನಾಂ ಅಪ್ಲೊ ವಾದ್ ಪರ್ಗಟ್ತಾ. ಹ್ಯಾ ಸ್ಪಷ್ಟೀಕರಣಾಂ ವರ್ವಿಂ, ಆರ್ಥಿಕ್ ತಶೆಂ ಹಿಷ್ಯಾ ಬಜಾರಾಂತ್ ಉಠ್ಲೆಲೆಂ ವ್ಹಡ್ ವಾದಳ್ ನಿವಾರಾನಾಂ. ತಾಚ್ಯಾಂ ಕಂಪ್ಣೆಂಚಿಂ ಬಜಾರಿ ಮೋಲಾಂ ದಿಡೀರ್ ಪಡೊನ್ ವೆತಾತ್. ಹೆಂ ಬರಯ್ತನಾಂ, ಫೆಬ್ರೆರ್ 7-ವ್ಯೆರ್, ತಾಚಿ ಕಾಲ್ಪಾನಿಕ್ ಆಸ್ತ್ 11 ಲಾಖ್ ಕರೋಡಾಂಕ್ ಮಿಕ್ವೊನ್ ಆಳ್ವಲ್ಯಾ. ಆತಾಂ, ತೊ ಗ್ರೇಸ್ತಾಂಚ್ಯೆ ಪಟ್ಟೆಂತ್ 21- ಸ್ಥಾನಾರ್ ಪಡ್ಲಾ. ವಯ್ರ್ ಹಾಂವೆಂ ತಾಚ್ಯಾಂ ಧಾ ಕಂಪ್ಣೆಚಿಂ ಸೂಚಿ ದಿಲ್ಯಾ. ತಿ ಪರತ್ ಪಳೆಯಾ.

ಹಿಂಡೆನ್-ಬರ್ಗ್ ರಿಸರ್ಚ್ ಕಂಪ್ಣಿ ಹಿಷೆ “ಶೊರ್ಟ್’ ಕರ್ತಾ ಆನಿಂ ಬಿಲಿಯನ್ ಡೊಲರ್ ಕಮಯ್ತಾ. ಶೊರ್ರ್ಟ್ ಕರುಂಕ್ ಜಾಯಿತ್ತಿ ಮಾಹೆತ್ ಜಮಯ್ಜೆ ಪಡ್ತಾ. ಸಾಮಾನ್ಯ್ ನಿವೇಷಿ ಬರ‍್ಯಾ ಬುನ್ಯಾದಿ ತತ್ವಾಂಚ್ಯೊ ಕಂಪ್ಣ್ಯೊ ವಿಂಚುಂಕ್ ಗರ್ಜೆಚಿ ಮಾಹೆತ್ ಸೊದ್ತಾ. ಶೊರ್ಟ್ ಕರ್ತಲೊ ತಾಚ್ಯಾ ಉಳ್ಟೆಂ ಚಲೊನ್ ವರ್ಚ್ಯೊ ಕಂಪ್ಣ್ಯೊ ಮ್ಹಣ್ಜೆ ತತ್ವಾಂ ಅಸ್ಕತ್ ಆಸ್ಚ್ಯೊ ಕಂಪ್ಣ್ಯೊಂ ಸೊದ್ತಾ. ಅಶೆಂ ಹಿಂಡೆನ್-ಬರ್ಗ್ ಶೊರ್ಟ್ ನಿವೇಷಿಚ್ಯೆ ದೊಳೆ ಗೌತಮ್ ಅದಾನಿಚ್ಯಾಂ ಕಂಪ್ಣ್ಯಾಂ ವಯ್ರ್ ಪಡ್ಲೆ. ಸುಮಾರ್ ದೋನ್ ವ್ಹರ್ಸಾಂ ಥಾವ್ನ್ ಅದಾನಿಚ್ಯಾ ಗ್ರೂಪ್ ಕಂಪ್ಣ್ಯಾಂಚ್ಯೆರ್ ಆಪ್ಲಿ ನದರ್ ದವರ್ನ್ ಆಸ್ಲಿ ಮ್ಹಣ್ತಾ ಹಿ ಕಂಪ್ಣಿ.

ಅತಾಂ, ಶೊರ್ಟ್ ಕರ್ಚ್ಯೆಂ ಮ್ಹಳ್ಯಾರ್ ಕಿತೆಂ? ಪೈಲೆಂ ಮೇಟ್ ಆಪ್ಣಾ ಕಢೆಂ ನಾತ್ಲೆಲೆ ಬ್ರೊಕರಾಂ ಕಢೆಂ ಥಾವ್ನ್ ಮಾರ್ಜಿನ್ ದಿವ್ನ್ ರೀಣ್ ಘೆಂವ್ಚ್ಯೆಂ ಆನಿಂ ತೆ ಹಿಷೆ ಪ್ರಸ್ತುತ್ ಬಜಾರಿ ಮೋಲಾಕ್ ವಿಕ್ಚ್ಯೆ. ಅಸಲಿ ಏಕ್ ಪ್ರಕಿಯಾ ಹಿಷ್ಯಾ ಬಜಾರಾಂತ್ ಆಸಾ. ಶೊರ್ಟ್ ಕರ್ಚ್ಯೆಂ ಕಾಂಯ್ ಗೈರ್-ಕಾನೂನಿ ನಹಿಂ. ದೀಸ್ ಸಂಪ್ತನಾಂ ವ ನಿಯಮಿತ್ ವಾಯ್ದ್ಯಾ ಭಿತರ್ ತೆ ಹಿಷೆ ಬ್ರೊಕರಾಕ್ ಪಾಟಿಂ ದೀಜೆ. ತ್ಯೆ ಆವ್ಧೆ ಭಿತರ್ ಹಿಷೆ ಖರಿದಿ ಕರಿಜೆ ದೆಕುನ್, ತ್ಯಾ ವೇಳಾ ಬಜರಾಂತ್ ಚಲ್ಚ್ಯೆಂ ಮೋಲ್ ದೀವ್ನ್ ಘೆಜೆ ಪಡ್ತಾ. ಅಶೆಂ ಲೇಕ್-ಪಾಕ್ ಸೆಟ್ಲ್ ಕರ್ತಾನಾ, ಮುನಾಫೊ ಜಾತಾ ತೊ ಶೊರ್ಟ್ ಕೆಲ್ಲ್ಯಾ ನಿವೇಷಿಚೊ. ಹಿಷ್ಯಾಂಚ್ಯೆಂ ಮೋಲ್ ವಯ್ರ್ ಘೆಲಾಂ ತರ್ ಮಾತ್ರ್ ಮುನಾಫೊ ಜಾತಾ. ಸಕಯ್ಲ್ ಘೆಲ್ಯಾರ್, ಲುಕ್ಸಾಣ್ ಸಯ್ತ್ ಜಾತಾ.

ಹಿಂಡೆನ್-ಬರ್ಗ್ ರಿಸರ್ಚ್ ಶೊರ್ಟ್ ವಿಕ್ರೇತಾನ್ ಗೌತಮ್ ಅದಾನಿಚ್ಯಾಂ ಕಂಪ್ಣೆಂಚ್ಯೆ ಹಿಷೆ ಶೊರ್ಟ್ ಕೆಲ್ಲೆಂ ಮ್ಹಣ್ ತಾಣಿಂ ಕಳಯ್ಲಾಂ. ಸಾಂಗತಚ್, ಗೌತಮ್ ಅದಾನಿ ಆಪ್ಲ್ಯಾಂ ಕಂಪ್ಣೆಂಚ್ಯಾ  ಲೇಕ್-ಪಾಕಾಂತ್ ಹೆರಾಫೆರಿ ಕರ್ತಾ, ಚರಿತ್ರೆಂತ್ಲೊ ವ್ಹಡ್ಲೊ corporate fraudster ತೊ. ತಾಚೊ ಗ್ರೂಪ್ ಅವ್ವಲ್ ಒಡಿಟ್ ಕರಿನಾಂ ಮ್ಹಣ್ ವಾದ್ ಮಾಂಡ್ತಾ. ಚುಕಿಚ್ಯೆಂ ಎಕಾಂವ್ಟ್ ದಾಕವ್ನ್, ಆನಿಂ ಹೆರ್ ಫರ್ಜಿ ರಿತಿ ವಾಪ್ರುನ್ ಹಿಷ್ಯಾಂಚ್ಯೆಂ ಮೋಲ್ ಅಕಾಸಾಕ್ ಚಡಯ್ತಾ ಮ್ಹಳ್ಳೆಂ ವಿಷ್ಲೇಶಣ್  ಕರ್ತಾ. ಗೌತಮ್ ಅದಾನಿ ಹೊ ‘ವಾಯ್ಟ್ ಇರಾದ್ಯಾನ್’ ಪರ್ಗಟ್ಲಲೊ ಫಟ್ಕಿರೊ ಆರೋಪ್ ಮ್ಹಣ್ ಆಪ್ಲೊ ವಿವಾದ್ ನಿವೇಷಿಂ ಮುಕಾರ್ ದವರ್ತಾ. ಪೂಣ್, ನಿವೇಷಿ ತಾಚ್ಯಾಂ ಉತ್ರಾಂಕ್ ಗುಮಾನ್ ದೀನಾಂತ್. ತಾಚ್ಯೆ ಹಿಷೆ ಬಜಾರಾಂತ್ ಭಾರಿಚ್ ಮಾಫಾನ್ ಸಕ್ಲಾ ಪಡ್ತಾತ್.

ದಾಕ್ಲ್ಯಾಕ್, ತಾಚಿ ಮೂಳಾವಿ ಕಂಪ್ಣಿ ಅದಾನಿ ಎಂಟರ್‌ಪ್ರೈಸಸ್ ಘೆವ್ಯಾಂ. ಹ್ಯೆ ಕಂಪ್ಣೆನ್ ಬಜಾರಾ ಥಾವ್ನ್ ವೀಸ್ ಹಜಾರ್ ಕರೋಡ್ ರುಪಾಯ್ ಜಮಂವ್ಕ್ ಏಕ್ FPO ಕೆಲೊ. ತಶೆಂ ಮ್ಹಳ್ಯಾರ್, ನಿಯಮಿತ್ ಮೋಲಾಕ್ ನವೆ ಹಿಷೆ ರಚುನ್ ತೆ ನಿವೇಷಿಂಕ್ ವಿಕ್ಚ್ಯೆಂ. ಅದಾನಿನ್ ಹೊ FPO ಜನೆರ್ 27 ತಾರಿಕೆರ್ ಉಗ್ಡಾಯ್ಲೊ ಆನಿಂ ಜನೆರ್ 31 ಪರ‍್ಯಾಂತ್ ಉಗ್ತೊ ದವರ್ಲೊ. ಏಕಾ ಹಿಷ್ಯಾಕ್ ರುಪಯ್ 3, 276 ಮೋಲ್ ಠರಾಯ್ಲೆಂ. ಪೂಣ್, ಹ್ಯೆ ಅವ್ದೆಂತ್, ಹಿಂಡೆನ್-ಬರ್ಗ್ ರಿಪೊರ್ಟ್ ಚಡ್ತಾವ್ ನಿವೇಷಿಂಕ್ ಕಳಿತ್ ಜಾಲ್ಲೊ. ಮೋಲ್ ಪಡೊನ್ ಯೆಂವ್ಚೊ ಹಿಸೊ ಕೋಣ್ ಘೆಂವ್ಕ್ ತಯಾರ್ ಆಸಾ? ಹ್ಯೆ ಕಂಪ್ಣೆಚ್ಯೆ ಹಿಷೆ ರುಪಯ್ 4, 172 ಮ್ಹಣಾಸರ್ ಬಜಾರಾಂತ್ ಹಾತ್-ಪಾಶಾರ್ ಜಾತಾನಾಂ, FPO ಚ್ಯೆಂ ಮೋಲ್ ವಾಜ್ಬಿ ಆನಿಂ ಘೆವ್ಯಾಂ ಮ್ಹಣ್ ನಿವೇಷಿಂಕ್ ಭಗ್ಲೆಲೆಂ ಜಾಂವ್ಕ್ ಪುರೊ. ಹೆಂ ಮೋಲ್ 85% ಪಡ್ತೆಲೆಂ ಮ್ಹಣ್ ಹಿಂಡೆನ್-ಬರ್ಗ್ ಬಾತ್ಮಿ ಸಾಂಗ್ತಾ. ಯೆದೊಳ್‌ಚ್ ಬಜಾರಿ ಮೋಲ್ ಉಣ್ಯಾರ್ ರುಪಯ್ 1017-ಕ್ ಪಾವ್ಲಾಂ,  ಹೊ ಹಿಷೊ ಘೆಂವ್ಕ್ ನಿವೇಶಿ ಮುಕಾರ್ ಸರ್ಲೊ ನಾಂ. ದೆಕುನ್, ಗೌತಮ್ ಅದಾನಿನ್ ಹೊ FPO  ರದ್ದ್ ಕೆಲಾ.

ಅತಾಂ ಕಿತೆಂ ಕರ್ಚ್ಯೆಂ?

ಹಿಂಡೆನ್‍ಬರ್ಗ್ ಪ್ರಮಾಣೆಂ, ಹ್ಯಾ ಹಿಷ್ಯಾಚ್ಯೆಂ ವಾಜ್ಬಿ ಮೋಲ್ ರುಪಯ್ 600 ಖಂಯ್. ಅನ್ಯೆಕ್ಲೊ ಸ್ವತಂತ್ರ್ ಮೂಲಾಂಕಣ್ ವಿಶೇಷಜ್ಞ್ ಹ್ಯೆ ಕಂಫ್ಣೆಚ್ಯೆಂ ವಾಜ್ಬಿ ಮೋಲ್ ರುಪಯ್ 945 ಮ್ಹಣ್ತಾ. ಮ್ಹಜ್ಯಾ ಖಾಸ್ಗಿ ಮೂಲ್ಯಂಕಣಾಂ ಪ್ರಮಾಣೆಂ, ಅದಾನಿಚ್ಯೆ ಧಾ ಕಂಪ್ಣೆಂಚ್ಯೆಂ ಹಿಷೆ ಅಜೂನ್ ಮಾರ್ಗಿ ಜಾವ್ನಾಸಾತ್. ಮುಕ್ಲೆ 3-6 ಮಹಿನೆ ವಚೊಂದಿ. ಹಕೀಕತ್ ಕಳಿತ್ ಜಾತೆಲಿ. ತವಳ್ ಪರ್ಯಾಂತ್, ಜರ್ ಹಿಷೆ ಆಸಾತ್, ತೆ ವಿಕುನ್ ರಿಸ್ಕ್ ಉಣಿ ಕರ್ಯೆತ್. ಉಪ್ರಾಂತ್, ಬಜಾರಿ ಅಸ್ಠಿರತಾ ಉಣಿ ಜಾತಚ್, ಗರ್ಜ್ ಮ್ಹಣ್ ಭಗ್ಲ್ಯಾರ್, ಫಾವೊತೆಂ ಆನಿಂ ಸಾರ್ಕೆಂ ಪರಿಶೋದ್ ಕರ್ನ್ ನಿವೇಶ್ ಕರಿಯೆತ್.

► ಫಿಲಿಪ್ ಮುದಾರ್ಥ್

ಸರ್ಕಾರಿ ಪ್ರತಿಬಂಧ್ ಘಾಲ್ಲ್ಯಾನ್ ಮಾತ್ರ್ ವಿರೋದಿ ಪಾಡ್ತಿಂಚ್ಯಾಂ ಸಾಂಸದಾಂಕ್ ಏಕ್ ಚುನವ್ತಿ ಲಾಭ್ಲಿ. ಟಿ ಏಮ್ ಸಿ ಪಾಡ್ತಿಚ್ಯೆ ಸಾಂಸದ್ ಮೊಹುವಾ ಮೊಯ್ತ್ರಾ ಆನಿಂ ಡೆರೆಕ್ ಓ-ಬ್ರಾಯನ್ ತಸ್ಲ್ಯಾಂನಿಂ ಹ್ಯೆ ಡೊಕುಮೆಂಟರಿಚ್ಯೆಂ ಲಿಂಕ್ ತಾಂಚ್ಯಾ ಟ್ವಿಟ್ಟರ್ ಎಕಂವ್ಟಾರ್ ಪರ್ಗಟ್ಲೆಂ. ಕಿತ್ಲಾ ಪಾವ್ಟಿಂ ತೆಂ ಲಿಂಕ್ ಕಾಡ್ಲೆಂ ತಿತ್ಲ್ಯಾ ಪಾವ್ಟಿಂ ತಾಣಿಂ ಪರತ್ ಏಕ್ ನವೆಂ ಲಿಂಕ್ ಪರ್ಗಟ್ಲೆಂ. ದೇಸಾಂತರ್, ಜಾಯಿತ್ತ್ಯಾಂ ಯೂನಿವರ್ಸಿಟಿ ವಿಧ್ಯಾರ್ಥಿಂನಿ ಸಾರ್ವಜನಿಕ್ ಹಂತಾರ್ ಹಿ ಡೊಕುಮೆಂಟರಿ ವೀಕ್ಶಣ್ ಕರ್ಚ್ಯಿ ಮಾಂಡವಳ್ ಕೆಲಿ. ಕೊಂಗ್ರೆಸ್ ಪಾಡ್ತಿಚ್ಯಾ ರಾಹುಲ್ ಗಾಂಧಿನ್ ಪತ್ರ್‌ಕರ್ತಾಂ ಕಢೆಂ ಉಲವ್ನ್ ಮ್ಹಳೆಂ: ಬ್ಲೊಕ್ ಕರ್, ಬೇನ್ ಕರ್. ಸತ್ ಭಾಯ್ರ್ ಯೆತಾಚ್. ಸತಾಕ್ ತಸ್ಲಿ ವಾಯ್ಟ್ ಸವಯ್ ಆಸಾ, ಭಾಯ್ರ್ ಪಡ್ಚಿ. ಹ್ಯಾಂ ಉತ್ರಾಂ ಥಾವ್ನ್ ಧಯ್ರ್ ಘೆವ್ನ್, ಕೊಂಗ್ರೆಸ್ ಪಾಡ್ತಿನ್ ಸಯ್ತ್ “ಸರ್ಕಾರಿ  ಸೆನ್ಸರ್ಶಿಪಾಚೊ” ವಿರೋಧ್ ಕೆಲೊ ಆನಿಂ ಸಾಮೂಹಿಕ್ ವೀಕ್ಶಣ್ ಕಾರ್ಯಕ್ರಮಾಂ ದವರ್ಲಿಂ.

archive.org ಏಕ್ ನಾಂವಾಡ್ದಿಕ್ ವೆಬ್-ಸಾಯ್ಟ್ ಜಾವ್ನಾಸಾ. ಫುಕಟಾಕ್ ವ ವರ್ಗಣಿಂ ಭರುನ್ ಪ್ರಿಂಟ್-ಬೂಕ್, ಓಡಿಯೊ, ವೀಡಿಯೊ, ಫಿಲ್ಮಾಂ, ಟೆಕ್ಸ್ಟ್, ಇ-ಬೂಕ್ ಇತ್ಯಾದಿ ಹ್ಯಾ ಸಾಯ್ಟರ್ ಮೆಳ್ತಾತ್. ಹಿ ಏಕ್ ಅಮೇರಿಕನ್ ಮೂಳಾಚಿ ಡಿಜಿಟಲ್ ಪಬ್ಲಿಕ್ ಲಾಯ್ಬೈರಿ. ಹ್ಯಾ ವೆಬ್-ಸಾಯ್ಟಿರ್, ಬಿಬಿಸಿಚಿ ಮೋದಿ ಡೊಕುಮೆಂಟರಿ ಪಳೆಂವ್ಕ್ ಮೆಳ್ತಾ.

ಸಾಲಾಂತ್ ಥಾವ್ನ್ ವ್ಹಡ್ ಗರ್ನಾಳ್ ಫುಟ್ಲೆಲ್ಯಾ ಪರಿಂ ಆವಾಜ್ ಆಯ್ಲೊ ದೆಕುನ್ ಕಾನಾಂಕ್ ಲಾಯಿಲ್ಲೆಂ ಹೆಡ್-ಫೊನ್ ಕಾಡ್ನ್ ಬಸ್ಲೆಲ್ಯಾ ಕಢೆಂಚ್ ಥಾವ್ನ್ ಹಾಂವೆಂ ವಿಚಾರ್ಲೆಂ: “ಅತಾಂ, ಕಿತೆಂ ಜಾಲೆಂ?”

“ಕಾನ್ ಆಯ್ಕನಾಂತ್ ಮ್ಹಣ್, ಸಾಟ್ ಹಜಾರ್ ರುಪಯ್ ಯೆಟುನ್ ಮಿಶಿನ್ ಹಾಡ್ಲಾಂಯ್. ತೆಂ ಕಾಲ್ಯಾಕ್ ಕೊನ್ಶ್ಯಾಕ್ ಲೊಟ್ಲಾಂಯ್? ತುಜೆ ಗಣ್ಣೆಂ ಕಂಯ್ ಆಸ್ತಾ? ಕಿಂಕ್ರಾಟ್ ಮಾರಿನಾಸ್ತಾಂ, ಆನಿಂ ಕಿತೆಂ ಕರುಂ ಹಾಂವ್?”

“ಸಾಯ್ಬಿಣಿ, ಹೆಡ್-ಫೊನ್ ಆನಿ ಕಾನಾಂಚ್ಯೆ ಮಿಶಿನ್ ಸಾಂಗಾತಾ ವಚನಾಂತ್ ನೇ? ಭಾರಿಚ್ ಕುತೂಹಲಾಚ್ಯೆಂ ಫಿಲ್ಮ್ ಪಳೆವ್ನ್ ಆಸಾಂ ಹಾಂವ್.”

“ತಿತ್ಲೆಂ ಕುತೂಹಲಾಚ್ಯೆಂ ಕಿತೆಂ? ಪಥಾನ್ ಫಿಲ್ಮಾಚಿ ಚೊರಿಯಾಂ ಕೊಪಿಗೀ ವ ತೆಂ ಲಜ್ಮೊಡೆಂ ಪೋದ್ ಬೆಶರಮ್ ರಂಗ್ ಮ್ಹಣಿ ಎಕ್ಸುರೊ ಬಸೊನ್ ಪಳೆನಾಂಯ್-ಮೂ?”

“ಬೆಶರಮ್ ರಂಗ್ ಪದಾ ಪ್ರಾಸ್ ಚಡ್ ವಿವಾದಾಸ್ಪದ್ ಹೆಂ ಬಿಬಿಸಿಚ್ಯೆಂ ಏಕ್ ಡೊಕು-ಫಿಲ್ಮ್: ಇಂಡಿಯಾ: ದ ಮೋದಿ ಕ್ವೆಶ್ಚನ್ . ಆಮಿ ಇಂಡಿಯನಾಂನಿಂ ಹಿ ಡೊಕುಮೆಂಟರಿ ಪಳೆಂವ್ಕ್ ನಜೊ ಮ್ಹಣ್ ಸರ್ಕಾರಾನ್ ಹೆ ವಿಡಿಯೊ ಬ್ಲೊಕ್ ಕೆಲ್ಯಾತ್; IT rules ಖಾಲ್ ಎಮೆರ್ಜೆನ್ಸಿ ಪವರ್ ವಾಪ್ರುನ್.”

“ತರ್,  ಸರ್ಕಾರಿ ಕಾಯ್ದೊ ಕಿತ್ಯಾಕ್ ತುಂ ಮೊಡ್ತಾಯ್? ತುಕಾ ಮ್ಹಜೆ ಸಾಂಗಾತಾ ಸುಶೆಗಾತ್ ಬೊಸೊನ್ “ತಾರಕ್ ಮೆಹ್ತಾ ಕಾ ಉಳ್ಟಾ ಚಸ್ಮಾ” ಪಳೆವ್ಯೆತ್ ನೇ? ಚ್ಯಾರ್ ಘಡಿ ಹಾಸೊನ್ ಕಾಡಿ ಮ್ಹಣ್ತಾತ್. ಬದ್ಲೆಕ್ ಮೋದಿ ವಿಶ್ಯಾಂತ್ ನಾಕಾ ಜಾಲ್ಲೊ, ತೋಯಿ ಫಟ್ಕಿರೊ, ಪ್ರಚಾರ್ ಆಯ್ಕೊನ್ ತುಂವೆಂ ಕರ್ಚ್ಯೆಂ ಕಿತೆಂ? ಭೆಸ್ಟೆಂಚ್ ವೇಳ್ ಪಾಡ್ ಕರ್ತಾಯ್. ವಯ್ಲ್ಯಾನ್, ಮತಿಚಿ ವಿರಾರಾಯ್ ವಾಡಯ್ತಾಯ್. “

***

59 ಮಿನುಟಾಂಚೊ ಪಯ್ಲೊ ಭಾಗ್ 2002 ಗುಜರಾತ್ ದಂಗ್ಯಾಂ-ವಿಷಿಂ ಗೂಂಡಾಯೆನ್ ಸಮೀಕ್ಶಾ ಕರ್ತಾ. ಸ್ವತಂತ್ರ್ ಭಾರತಾಚ್ಯೆ ಚರಿತ್ರೆಂತ್ ಅಸಲಿ ಧಾರ್ಮಿಕ್ ಅಹಿಂಸಾ ಅತಿ ವಾಯ್ಟ್ ಆನಿ ಅಪ್ರುಪಾಚಿ. 2002 ಫೆಬ್ರೆರ್ 27-ವ್ಯೆರ್ ಸಬರ್ಮತಿ ಎಕ್ಸ್ಪ್ರೆಸ್ ರೇಯ್ಲ್-ಗಾಡಿಯೆರ್ ಅಯೊಧ್ಯಾ ಥಾವ್ನ್ ಪಾಟಿಂ ಆಪ್ಲ್ಯಾ ಗಾಂವಾಂಕ್ ಪಾಟಿಂ ಯೆತೆಲ್ಯಾಂ ಕರ್‌ಸೇವಕಾಂಚ್ಯೆರ್ ಹಲ್ಲೊ ಕರ್ನ್ ಏಕಾ ಡಬ್ಬ್ಯಾಕ್ ಗೋಧ್ರಾ ಸ್ಟೇಶನಾ ಭಾಯ್ರ್ ಉಜೊ ಲಾಯ್ಲೊ. 59 ಜಣಾಂಕ್ ಜಿವ್ಶಿಂ ಜಳಯಿಲ್ಲ್ಯಾ ನಂತರ್, ಹೊ ದಂಗೊ ಕಸೊ ಮುಸ್ಲಿಮಾಂ ವಿರುದ್ಧ್ ಹತ್ಯಾ-ಕಾಂಡ್ ಜಾಂವ್ಕ್ ಪಾವ್ಲೊ ಮ್ಹಳ್ಳಿ ಕಾಣಿ ಹಾಂತು ಪಿಂತ್ರಾಯ್ಲ್ಯಾ. ಮುಸ್ಲಿಮಾಂಕ್ ದೋಷಿ ಠರಾವ್ನ್, ಮುಕ್ಲ್ಯಾ ತೀನ್ ದೀಸಾಂನಿಂ ಹಿಂದು ಜಮ್ಯಾಂನಿಂ ಘೆತ್ಲೆಲ್ಯಾ ಫಾರಿಕ್ಪಣಾಂತ್ ಲಗ್ಬಗ್ 2, 000 ಜೀವ್ ಗೆಲ್ಲೆ. ಚಡ್ತಾವ್ ಮುಸ್ಲಿಮ್ ಜೀವ್.

ತವಳ್ ಶ್ರೀ ನರೆಂದ್ರಾ ಮೋದಿ ಗುಜರಾತಾಚೊ ಮುಖ್ಯ್ ಮಂತ್ರಿ ಜಾವ್ನಾಸ್ಲೊ ದೆಕುನ್ ತಾಚ್ಯೆ ಮುಟಿಪಂದಾ ಹೆ ದಂಗೆ ಚಲ್ಲೆ. ಹಿ ಹಿಂಸಾ ರಾವಂವ್ಕ್ ಆನಿ ಜೀವ್ ವಾಂಚವ್ಕ್ ಮೋದಿನ್ ಕಿತೆಂ ಕರಿಜೆ ಆಸ್ಲೆಂ ತೆಂ ತಾಣೆಂ ಕರುಂಕ್ ನಾಂ. ಬದ್ಲೆಕ್, 72 ವ್ಹರಾಂ ವಿಶ್ವಾ ಹಿಂದು ಪರಿಶದೆಚ್ಯಾ ಉಪ್ರಾಳಿ ತರ್ನಾಟ್ಯಾಂಕ್ ಮುಸ್ಲಿಮ್ ಕೇರಿಂನಿಂ ರಿಗೊನ್ ದಾದ್ಲ್ಯಾಂಕ್ ಜಿವ್ಶಿಂ ಮಾರುಂಕ್, ಬಾಯ್ಲಾಂಚೊ ಬಲಾತ್ಕಾರ್ ಕರುಂಕ್ ಆನಿಂ ಭುರ್ಗ್ಯಾಂ ವಯ್ರ್ ಸಯ್ತ್ ಜುಲ್ಮ್ ಚಲಂವ್ಕ್ ಸ್ವತಂತ್ರಾಚಿ ಪರ್ವಣ್ಗಿ ದಿಲ್ಲಿ. ಪೊಲಿಸಾಂಕ್ ಕಸಲೆಂಚ್ ಕ್ರಮ್ ಘೆಂವ್ಕ್ ನಜೊ ಮ್ಹಣ್ ಹುಕುಮ್ ದಿಲ್ಲಿ. ಮೋದಿನ್ ಜರ್ ಮನ್ ಕೆಲ್ಲೆಂ, ಹೆಂ ಕಾಂಡ್ ಜಾತೆನಾಂ. ದೆಕುನ್, ಹಿ ಡೊಕುಮೆಂಟರಿ ಮೋದಿಕ್ ಶೀದಾ ಜವಾಬ್ದಾರ್ ಠರಯ್ತಾ.

“ಹಾಂತು ಕಿತೆಂ ನವೆಸಾಂವ್ ಆಸಾ? 2002 ಥಾವ್ನ್ 2011 ಪರ್ಯಾಂತ್ ಕಿತ್ಲ್ಯೊ ತನ್ಕ್ಯೊ ಜಾಲ್ಯಾತ್! ಸರ್ಕಾರಿ ತಶೆಂ ಸಿವಿಲ್ ಟ್ರಿಬ್ಯುನಲಾಚ್ಯೊ. ಸುಪ್ರೀಮ್ ಕೊಡ್ತಿನ್ ನೇಮಕ್ ಕೆಲ್ಲ್ಯಾ SITನ್ ಲೆಗುನ್ ಮೋದಿಕ್ ‘ಕ್ಲೀನ್ ಚಿಟ್’ ದಿಲ್ಯಾ.  ತರೀ, ಮೋದಿಚ್ಯೆ ದುಶ್ಮಾನ್ ಅಜೂನ್ ತಾಂಚ್ಯೆಂ ಪರ್ನೆಂ ಗುಮಟ್ ವಾಜವ್ನ್ಂಚ್ ಆಸಾತ್. ಬಿಬಿಸಿಚಿ ಕಾಣಿಯೀ ತಸ್ಲಿಚ್. ಬಿಬಿಸಿಚಿ ’ವಸಾಹತ್-ಶಾಹಿ ಮನೋಸ್ತಿತಿ’. ಜಶೆಂ ಮೋದಿನ್ ಬಿಬಿಸಿಕ್ ಸಾಂಗ್ಲೆಲೆಂ: I don’t know from where you pick up such sort of garbage…You Britishers should not teach us human rights”. ಮ್ಹಣಾಲಿ ಯೆಜ್ಮಾನ್. ಜಾಪ್ ಜಾವ್ನ್ ಹಾಂವೆ ಮ್ಹಳೆಂ:

“ಹ್ಯೆ ಡೊಕುಮೆಂಟರಿಂತ್ ಭಾಯ್ರ್ ಆಯಿಲ್ಲಿ, ಯೆದೊಳ್ ಕಳಿತ್ ನಾತ್ಲೆಲಿ ಗಜಾಲ್ ಮ್ಹಳ್ಯಾರ್ 2002 ಕೋಮು ದಂಗೆ ಜಾಲ್ಲೆಚ್ ಬ್ರಿಟಿಶ್ ಸರ್ಕಾರಾನ್ ಏಕ್ ತನ್ಕಿ ಚಲಯ್ಲಿ. ಬ್ರಿಟಿಶ್ ವಿದೇಶಿ ಒಫಿಸಾಕ್ ಗುಪ್ತಿ ವರ್ದಿ ಪಾವ್ಲೆಲಿ. ತವಳ್ಚೊ ವಿದೇಶಿ ಮಂತ್ರಿ ಜೇಕ್ ಸ್ಟ್ರೋ ಉಲವ್ನ್ ಸಾಂಗ್ತಾ ಕಿ ಹ್ಯಾ ಕೋಮು-ದಂಗ್ಯಾಂಕ್ ಮೋದಿ ಶೀದಾ ಜವಾಬ್ದಾರ್ ಮ್ಹಣ್ ಬ್ರಿಟಿಶ್ ಸರ್ಕಾರ್ ಜಾಣಾಂ ಆಸ್ಲೊ. ಪುಣ್, ಕಿತೆಂ ಕರ್ಯೆತಾ? ಇಂಡಿಯಾ ಆಮ್ಚೊ ಮಹತ್ವಾಚೊ ಮಿತ್ರ್ ದೇಸ್. ತರ್-ಯೀ ಅಮಿಂ, ಯುರೊಪಿಯನ್ ಯುನಿಯನ್ ಆನಿಂ ಅಮೆರಿಕಾನ್ ಮೋದಿಚಿ ವೀಸಾ ರದ್ದ್ ಕೆಲ್ಲಿ. ಯುರೊಪಿಯನ್ ಯುನಿಯನ್ ಆನಿಂ ಅಮೆರಿಕನ್ ಸರ್ಕಾರಿ ಏಜೆನ್ಸಿಂನಿಂ ಆಪ್ಲಿಚ್ ತನ್ಕಿ ಕೆಲ್ಯಾ ಉಪ್ರಾಂತ್ ಮಾತ್ರ್ ತಾಚಿ ವೀಸಾ ರದ್ದ್ ಕೆಲ್ಲಿ”.

“ಬ್ರಿಟಿಶ್ ಸರ್ಕಾರಾನ್, ಯುರೊಪಿಯನ್ ಯುನಿಯನ್ ತಶೆಂ ಅಮೆರಿಕನಾನ್ ಮೊದಿಚ್ಯೆರ್ ಘಾಲ್ಲೆಂ travel ban ಪಾಟಿಂ ಕಾಡ್ನ್, ತಾಕಾ ವ್ಹಡ್ ಮಾನ್ ದಿಲಾ ನೇ? ಆತಾಂ ಪಾಟ್ಲೆ ಪೊರ್ನೆ ಘಾಯ್ ಉಗ್ತೆಂ ಕರ್ನ್ ಕಿತೆಂ ಫಾಯ್ದೊ? ದೆಕುನ್, ಆಮ್ಚ್ಯಾ ಸರ್ಕಾರಾನ್ ಹಿ ಡೊಕುಮೆಂಟರಿ ‘ನೀಚ್ ಪ್ರಚಾರ್, ಕೆಟ್ಟ ಪ್ರಚಾರ’ , ಭಾರತಾಚ್ಯಾ ಸಾರ್ವಭೌತ್ವ ಆನಿಂ ಅಖಂಡತಾ ವಯ್ರ್ ಹಲ್ಲೊ ತಶೆಂ ಭಾರತೀಯ್ ಸಮುದಾಯಾಂ ಮಧೆಂ ವಿಭಜನ್ ಕರುಂಕ್ ಪ್ರೇತನ್ ಮ್ಹಳಾಂ ತೆಂ ಹಾಂವ್ ಕಾಳ್ಜಾಚ್ಯೆ ಗೂಂಡಾಯೆ ಥಾವ್ನ್  ಮಾಂದ್ತಾಂ.” ಯೆಜ್ಮಾನ್ ಮ್ಹಜಿ ಮೋದಿಚಿ ಪಾಡ್ತ್ ಸೊಡುಂಕ್ ತಯಾರ್ ನಾತ್ಲಿ.

ಹಾಂವ್: “ತಶೆಂ ಆಮ್ಚ್ಯಾ ಸರ್ಕಾರಾನ್ ಹಿ ಡೊಕುಮೆಂಟರಿ ನಿಷೇದ್ ಕರುಂಕ್ ನಾತ್ಲಿ ತರ್, ಹಾಂವ್‌ಯೀ ಆಸಕ್ತ್ ದಾಕಯ್ತೊಂ ನಾಂ. ಕಾರವಾನ್ ಪತ್ರಿಕೆಚ್ಯಾ ಸಂಪಾದಕ್ ಶ್ರೀ ಹಾರ್ತೋಶ್ ಸಿಂಘ್ ಬಾಲನ್ ಸಾಂಗ್ಚ್ಯೆಂ ಸಾರ್ಕೆಂ. 2002 ಇಸ್ವೆಂತ್ ಜಲ್ಮೊಂಕ್ ನಾತ್ಲೆಲಿಂ ಭುರ್ಗಿಂ ಹೆಂ ಏಕ್ ವಾಯ್ಟ್ ಸಪಣ್, ಚರಿತ್ರೆಂತ್ಲೊ ಏಕ್ ವಿಸ್ರೊನ್ ಗೆಲ್ಲೊ ಅವಸ್ವರ್ ಮ್ಹಣ್ ಲೆಕ್ತಾತ್. ನರೇಂದ್ರಾ ಮೋದಿ ಕಟ್ಟ್ ರಾಶ್ಟ್ರವಾದಿ ಮ್ಹಣೊನ್ ಆಪ್ಲೊ ವೋಟ್ ತಿಂ ದಿತಾತ್. ಸರ್ಕಾರಿ ನಿಷೇದಾ ವಿರುದ್ಧ್ “ಪ್ರತಿರೋಧ್ ಮೇಟ್” ಮ್ಹಣ್ ಮಾತ್ರ್ ಹಿಂ ವಿಧ್ಯಾರ್ಥಿ ಡೊಕುಮೆಂಟರಿ ಪಳೆತಾತ್. ಹಿ ಡೊಕುಮೆಂಟರಿಚ್ಯೆ ದೋನ್‌ಯೀ ಭಾಗ್ ಪಳೆಲ್ಲ್ಯಾ ಮ್ಹಾಕಾಯೀ ಭಗ್ತಾ ಕಿ ಹಿ ವಸ್ತುನಿಷ್ಟ್ ಜಾವ್ನಾಸಾ. ಸರ್ವ್ ಅಭಿಪ್ರಾಯೆಂಕ್ ಜಾಗೊ ಹಾಂತು ದಿಲಾ. ಬಿಜೆಪಿಚ್ಯಾ ಮುಕೆಲ್ಯಾಂಚಿಂ ಸಾಂಗ್ಣಿಂ ಪಿಂತ್ರಾಯ್ಲ್ಯಾಂತ್. “

ಯೆಜ್ಮಾನ್: “ತುಂ ತಶೆಂ ಕಶೆಂ ಸಾಂಗ್ತಾಯ್? ಕಿತ್ಲಿ ಫಟ್ಕಿರಿ ಕಾಣಿ ಸಾಂಗೊಂದಿ; ಆಮ್ಚ್ಯಾ ಸುಪ್ರೀಮ್ ಕೊಡ್ತಿನ್ ಮೊದಿಕ್ ನಿರ್ದೊಷಿ ಮ್ಹಣ್ ಠರಾಯ್ಲಾಂ ನೇ? ವಯ್ಲ್ಯಾನ್, ದೋನ್ ಪಾವ್ಟಿಂ, 2014 ಆನಿಂ 2019 ಇಸ್ವೆಂತ್ ಭರ್ಜರಿ ಮತಾಂನಿಂ ತೊ ಜಿಕೊನ್ ಆಯ್ಲೊ. ದೇಸಾಚ್ಯಾ ಲೋಕಾನ್ ತಾಕಾ ಪ್ರಧಾನಿ ಕೆಲಾ. ಬ್ರಿಟನ್, ಯುರೋಪಿಯನ್ ಯೂನಿಯನ್ ಆನಿಂ ಅಮೆರಿಕಾ ತಾಚಿ ಇಸ್ಟಾಗತ್ ಜೊಡುಂಕ್ ‘ಲಾಯ್ನ್ ಲಾಗ್ಲೆಲೆಂ’ ಆಮಿಂ ಪಳೆತಾಂವ್ ನೆ? ತಾಕಾ ಸಾಕ್ಸ್ ಅಮೆರಿಕನ್ ಫಿರ್ಜೆಂತ್ ಡೊನಾಲ್ಡ್ ಟ್ರಂಪಾಚಿ ‘ನಮೋಸ್ತೆ ಟ್ರಂಪ್’ ಭೆಟ್. ಮೋದಿಚ್ಯಾ ಮುಕೆಲ್ಪಣಾರ್, ಇಂಡಿಯಾಕ್ ವ್ಹಡ್ ಸ್ತಾನ್-ಮಾನ್ ಲಾಭ್ಲಾಂ ನೇ? ಬಿಬಿಸಿ ಕಿತ್ಲೊಯೀ ಅಪ-ಪ್ರಚಾರ್ ಕರುಂದಿ. What matters is the ground reality. Under Modi, we have emerged as a super-power in our region!”

***

ಬಿಬಿಸಿಚ್ಯಾ ಡೊಕುಮೆಂಟರಿಚೊ ದುಸ್ರೊ ಭಾಗ್ ಹ್ಯಾ 2019 ಜಯ್ತಾ ಉಪ್ರಾಂತ್ಲಿ ಕಾಣಿ ಪಿಂತ್ರಾಯ್ತಾ. ತ್ಯಾ ವಿಷಿಂ ಮುಕ್ಲ್ಯಾ ಅವಸ್ವರಾಂತ್ ವಿವರಯ್ತಾಂ.

► ಫಿಲಿಪ್ ಮುದಾರ್ಥ್