ಕವಿ ಗ್ಲ್ಯಾನಿಶ್ ಮಾರ್ಟಿಸ್ ಗಾಂವಾನ್ ಅಲಂಗಾರ್ಚೊ. ಅಲಂಗಾರ್ ಮ್ಹಣ್ತಾನಾ ಮ್ಹಜ್ಯಾ ಉಡಾಸಾಂತ್ ಕಾಂಟ್ಯಾಪರಿಂ ತೊಪ್ತಾ – ಟಿಬಿ ಸೆನೆಟೊರಿಯಾಂತ್ಲೆಂ ಸಂತಾನ್ ಮಾಯೆಚೆಂ ಘರ್. ಕಾಂಯ್  ಸಾತಾಟ್ ವರ್ಸಾಂ ಆದಿಂ ಹಾಂವ್ ಮಾಂವ್ಟ್ ರೋಜರಿ ಸಂಸ್ಥ್ಯಾಚೆರ್ ಡೊಕ್ಯುಮೆಂಟರಿ ಕರುಂಕ್ ಪಾವ್‌ಲ್ಲೊಂ. ತವಳ್ ಹಾಂವೆ ಥಂಯ್ ಪಳಯಿಲ್ಲೆಂ ‘ಅಂಕ್ವಾರ್ ಆವಯಾಂಚ್ಯಾ ಘರಾ’ ಚೆಂ ರುಪ್ಣೆಂ ಕವಿ ಗ್ಲ್ಯಾನಿಶಾಚಿ ಕವಿತಾ ವಾಚ್ತಾನಾ ಮ್ಹಾಕಾ ಧೊಸುಂಕ್ ಲಾಗ್‌ಲ್ಲೆಂ ಕವಿ ಅಲಂಗಾರ್ಚೊ ಮ್ಹಳ್ಳ್ಯಾಕ್ ಫಕತ್ ಆಕಸ್ಮಿಕ್ ಆಸುಂಕ್ ಸಾಧ್ಯ್ ನಾ.  ಕಾಳ್ ಕಸೊ ಬದಲ್ತಾ ಪಳಯಾ –  ಎಕಾ ಕಾಳಾರ್ ‘ಸೋಶಿಯಲ್ ಸ್ಟಿಗ್ಮಾ’ ಆಸ್‌ಲ್ಲಿ ಅಂಕ್ವಾರ್ ಆವಯ್ಪಣಾಚಿ ಗಜಾಲ್ ಆಜ್ ‘ಸೋಶಿಯಲ್ ಪ್ರೈಡ್’ ಜಾವ್ನ್ ಬದಲ್ಲ್ಯಾ ಮಾತ್ ನಯ್, ಅಂಕ್ವಾರ್ ಆವಯ್ ಮ್ಹಳ್ಳೊ ನಾಲಿಸಾಯೆಚೊ  ಸಬ್ದ್  ಆಜ್ ಸಿಂಗಲ್ ಮದರ್ ಜಾವ್ನ್ ಮರ್ಯಾದ್ ಜೊಡುನ್ ಘೆಂವ್ಕ್ ಪಾವ್ಲಾ.

ಸಂಸಾರಾರ್ ಆವಯ್ ವಿಶ್ಯಾಂತ್ ಬೋವ್ ಗಾಜ್ಲೆಲಿ ಕವಿತಾ ಆನ್ ಟೇಲರ್ ಹಿಚಿ ಮೈ ಮದರ್. ಸಿಲ್ವಿಯಾ ಫ್ಲಾತಾಚಿ Morning Song ಅಲಗ್‌ಪಣಾನ್ ಆವಯ್ಪಣಾವಿಶ್ಯಾಂತ್ ಚಿಂತೂಂಕ್ ಲಾಂವ್ಚಿ ಕವಿತಾ ಮ್ಹಣ್ಯೆತ್. ‘ನನ್ನವ್ವ ಫಲವತ್ತಾದ ಕಪ್ಪು ನೆಲ…’ ಮ್ಹಣ್ ಸುರು ಜಾಂವ್ಚಿ ಪಿ. ಲಂಕೇಶಾಚಿ ‘ಅವ್ವ’ ಕವಿತಾ ಕನ್ನಡ ಸಾಹಿತ್ಯ್ ಚರಿತ್ರೆಂತ್ ಆವಯ್ಚೇರ್ ಬರಯಿಲ್ಲ್ಯಾ ಕವಿತೆಂ ಪಯ್ಕಿ ಆತಾಂಯ್ ಪಯ್ಲ್ಯಾ ಸ್ಥಾನಾರ್ ಆಸಾ ಮ್ಹಣ್ ಮ್ಹಾಕಾ ಭೊಗ್ತಾ.

ಕೊಂಕ್ಣೆಚ್ಯಾ ಸಂದರ್ಭಾರ್ ವಿಲ್ಫಿಯಾಬಾನ್ ಆಪ್ಲ್ಯಾ ಗೀತ್‌ಸಾಹಿತ್ಯಾಂತ್ ಆವಯ್ ಆನಿ ಆವಯ್ಪಣಾಚಿಂ ವೆವೆಗ್ಳಿಂ ರುಪಾಂ ವಾಪಾರ್‌ಲ್ಲಿಂ ದಿಸುನ್ ಯೆತಾತ್. ವಿಲ್ಪಿಯಾಬಾಚೆಂ ಗೀತ್ ಸಾಹಿತ್ಯ್ ಸುರು ಜಾಂವ್ಚೆಂಚ್ ನಮಾನ್ ತುಕಾ ಏ ಭಾಗಿ ಆವಯ್‌ಪಣಾ ಥಾವ್ನ್ (ಪ್ರಥಮ್ ಕೊವ್ಳಿ, ಪ್ರಥಮ್ ಪದ್) ವಿಲ್ಫಿಯಾಬಾಚ್ಯಾ ಗೀತ್‌ಸಾಹಿತ್ಯಾಂತ್ ಬಾಪಯ್ನ್ ಆವಯ್ಚೇರ್, ಭುರ್ಗ್ಯಾಂನಿ ಮಾಮ್ಮಿಚೆರ್ ಆನಿ ನಾತ್ರಾಂನಿ ಮಾಮ್ಮಾಚೆರ್ ಘಡ್ಲೆಲಿಂ ಜಾಯ್ತಿಂ ಗಿತಾಂ ಆಸಾತ್. ಮ್ಹಳ್ಯಾರ್ ತೀನ್ ತಕ್ಲ್ಯಾಂಚೊಂ ಆವಯೊ ಆನಿ ತಾಂಚಿಂ ಆವಯ್ಪಣಾಂ! ಹೊ ಏಕ್ ಅಧ್ಯಯನಾಚೊ ವಿಶಯ್‌ಚ್ ಮ್ಹಣ್ಯೆತ್. ಇತ್ಲೆಂ ಮಾತ್ ನಯ್, ತೆ ಭಾಯ್ರ್ ದವ್ಲತಿ ಬಾಹ್ರೇಯ್ನ್‌ಗಾರ್ ಪುತಾಚಿ ರಸ್ತ್ಯಾರ್ ಪಡ್‌ಲ್ಲಿ ಆವಯ್ ಆಸಾ, ಆವಯ್ಚ್ಯಾ ಮಾಗ್ಣ್ಯಾನ್ ಸದ್ದಾಮಾಚ್ಯಾ ದಾವ್ಲೆಥಾವ್ನ್ ವಾಂಚ್‌ಲ್ಲೊ ಕುವೆಯ್ಟ್‌ಗಾರ್ ಪೂತ್‌ಯ್ ಆಸಾ. ಕೊಂಕ್ಣಿ ಸಾಹಿತ್ಯಾಂತ್ ಆವಯ್ ಆನಿ ಆವಯ್ಪಣಾಚೆರ್ ಜರ್ ಕೊಣೆಂಯ್ ದರಬಸ್ತ್ ಸಾಹಿತ್ಯ್ ರಚ್ಲಾಂ ಜಾಲ್ಯಾರ್ ತೆಂ ವಿಲ್ಪಿಯಾಬಾನ್ ಮ್ಹಣ್ ಮ್ಹಾಕಾ ಭೊಗ್ತಾ. ತರೀ ತಾಣೆ ಆವಯ್ಚೇರ್ ಬರಯಿಲ್ಲ್ಯಾ ಸರ್ವ್ ಗಿತಾಂಮಧೆಂ ಮ್ಹಾಕಾ ಉಂಚ್ಲೆಂ ಮ್ಹಣ್ ಭೊಗ್ಚೆಂ ಗೀತ್ ಆಸಾ –  ದುದಾಂತ್ ಧುತೊಂ ತುಜೆ ಪಾಯ್.

ಇತ್ಲೆಂ ಮ್ಹಣ್ಟಕೂಚ್, ಸವ್ಕಾಸ್ ಕೊಂಕ್ಣಿ ಕಾವ್ಯಾಂತ್ ಮಾಂಯ್ ಆಸ್‌ಲ್ಲಿ ಕಶಿ ಮಮ್ಮಿ ಜಾಲಿ ಆನಿ ಬಾ ( ಮ್ಹಳ್ಯಾರ್ ಆಜಿ ) ಕಶಿ ಮಾಂಯ್ ಜಾಲಿ ಮ್ಹಣ್ಚ್ಯಾಕ್ ಕವಿ ವಿಲ್ಸನಾಚಿ ಕವಿತಾ ‘ಮಾಂಯ್ಚೆಂ ಕಾಪಡ್’ ಪ್ರಾತಿನಿಧಿಕ್ ಜಾವ್ನ್ ಘೆವ್ಯೆತ್ ಮ್ಹಣ್ ಮ್ಹಾಕಾ ಭೊಗ್ತಾ. ಬಾಪಯ್ಕ್ ಪಪ್ಪಾ ಮ್ಹಣೊನ್ ಆಪ್ಲ್ಯಾ ಕಾವ್ಯಾಂತ್ ಘೊಳಯಿಲ್ಲೆಂ ತಿತ್ಲೆಂ ಕವಿ ವಿಲ್ಸನಾನ್  ಎದೊಳ್ಚ್ಯಾಕ್ ಮಮ್ಮಿಕ್ ಘೊಳಂವ್ಕ್ ನಾ. ಪೂಣ್ ಆಜಿಯೆಕ್ ಮಾಂಯ್ ಮ್ಹಣೊನ್ ಆವಯ್ಪಣಾಚ್ಯಾ ಪಾಟಾರ್ ಚಡಂವ್ಕ್  ತೋ ವಿಸ್ರೊಂಕ್ ನಾ.

ಹ್ಯಾ ಪಾಟಿಥಳಾರ್ ಗ್ಲ್ಯಾನಿಶಾಚಿ ಪ್ರಸ್ತುತ್ ಕವಿತಾ – ಮರಣ್ ಆನಿ ಜಿವಂತ್ಪಣಾ ಮಧೆಂ ಆವಯ್ಚಿ ಖರಿ ಅಸ್ಮಿತಾಯ್ ಸೊಧುಂಕ್ ಭಾಯ್ರ್ ಸರ್ತಾ. ಆನಿ ತಾಚಿಂ ಹಿಂ ಸೊಧ್ನಾಂ ಆಸ್ಪತ್ರೆಚ್ಯಾ ಖಟ್ಲ್ಯಾಥಾವ್ನ್ ಸುರು ಜಾವ್ನ್ ಆಸ್ರಾಚ್ಯಾ ಖಟ್ಲ್ಯಾ ಪರ್ಯಾಂತ್ ವಚೊನ್ ರಾವ್ತಾತ್ ಆನಿ ಮೂರ್ತ್ ಮರಣ್ ಆನಿ  ಅಮೂರ್ತ್ ಜಿವಂತ್ಪಣಾಚ್ಯಾ ಸಾಕ್ಷಾತ್ಕಾರಾಂತ್ ಅಕೇರ್ ಜಾತಾತ್.

ಮ್ಹಜಿ ಮಾಂಯ್ ಕೆದಾಳಾಯ್ ಮ್ಹಣ್ತಾಲಿ – ಏಕ್ ಪಾವ್ಟಿಂ ಬಾಳಾಂತ್ ಜಾಂವ್ಚೆಂ ಮ್ಹಳ್ಯಾರ್ ಏಕ್ ಪಾವ್ಟಿಂ ಮರೊನ್ ಜೀವ್ ಜಾಂವ್ಚೆಂ ಮ್ಹಣ್! ತವಳ್ಚೊ ಕಾಳ್ ಆಸ್ಲೊ  ಘರಾಚ್ ‘ಮೆಡಿಬಾಯೆ’ ಕ್ ಆಪವ್ನ್ ಬಾಳಂತ್ ಜಾಂವ್ಚೊ. ಆಯ್ಚೊ ಕಾಳ್ ಆಸ್ಪತ್ರೆಂತ್ ದಾಖಲ್ ಜಾವ್ನ್ ಪೇಯ್ನ್‌ಲೆಸ್ ಡೆಲಿವರಿ ಕರ್ನ್ ಘೆಂವ್ಚೊ. ತವಳ್ಚೊ ಕಾಳ್ ಆಸ್ಲೊ ಮುಸ್ಳಾಕ್ ಕಾಂಬಳ್ ಬಾಂದುನ್ ಮಾಂಯ್ಕ್ ಆಸ್ಪತ್ರೆಕ್ ವಾವಯಿಲ್ಲೊ. ಆಯ್ಚೊ ಕಾಳ್ ಮಮ್ಮಿಕ್  ಎಸಿಸ್ಟೆಡ್ ಲಿವಿಂಗ್ ಹೋಮಾಂತ್ ದಾಖಲ್ ಕರ್ಚೊ. ಮನ್ಶ್ಯಾಜಿವಿತಾಂತ್ಲ್ಯಾ ಹ್ಯಾ ಸೂಕ್ಷ್ಮ್ ಪರಿಸ್ಥಿತೆಂನಿ ಆವಯ್ ಆನಿ ಆವಯ್ಪಣ್ ಉತ್ರೊನ್ ಆಯಿಲ್ಲ್ಯಾ ಸಂಕೀರ್ಣ್ ಸಂದರ್ಭಾಂಕ್  ಕವಿ ಗ್ಲ್ಯಾನಿಶಾಚಿ  ಪ್ರಸ್ತುತ್ ಕವಿತಾ ವಾಚ್ಪ್ಯಾಕ್ ಉಗ್ತಿ ಕರ್ತಾ.

► ಎಚ್ಚೆಮ್

ಕೋಣ್‌‌ ಸಾಂಗಿತ್ ತೆಂ ‘ಮರಣ್’
ಯೇತ್ ಮ್ಹಣ್ ಏಕ್‌ಚ್ ಪಾವ್ಟಿಂ ?
ಆವಯ್ ತರೀ ಮ್ಹಣ್ತೆಲಿ –
‘ತಿಣೆಂ ಪಳಯ್ಲೆಲ್ಯಾ ಮರ್ಣಾಕ್
ಖಂಯ್ಚೊಯ್ ದಾದ್ಲೊ ಪಳೆಂವ್ಚೊ ನಾ,
ಎಕಾ ದಾಕ್ತೆರಾ ಶಿವಾಯ್’.

ಕೋಣ್ ಸಾಂಗಿತ್ ತೆಂ ‘ಜಿವಿತ್’
ಲಾಭ್ಚೆಂ‌ ಮ್ಹಣ್ ಏಕ್‌ಚ್ ಪಾವ್ಟಿಂ ?
ಏಕ್ ಆವಯ್ ತರೀ ಚಿಂತಿತ್ –
‘ಅನ್ಯೇಕಾ ಜಿವಾಕ್ ಜೀವ್ ದೀಂವ್ಕ್,
ಪುನರ್‌ಜಿವಂತ್ಪಣ್ ತಿ ದೆಕ್ಚಿನಾ,
‘ಬಾಂಳ್ತೆರ್’ ಜಾಲ್ಲೆ ಶಿವಾಯ್’.

ಅಸಲ್ಯಾಚ್ ಜಲ್ಮಾ-ಮರ್ಣಾಂ ಮದೆಂ
ಅಥ್ವೆಚ್ ತೆ ನೋವ್ ಮಹಿನೆ
‘ನೊರ್ಮಲ್’ ಜಾವ್ನ್ ಬದಲ್ತಲೆ
ಪೂಣ್ ಆಜ್ ‘ಸಿಜರಿಯನ್’ ಜಾಲ್ಲ್ಯಾನ್
ತೆಂ ‘ಮರಣ್’ ನಿದೆಂತ್ ಮಿಸ್ಳತಾ,
‘ನೊರ್ಮಲ್’ ಜಾಯ್ನಾತ್ಲ್ಯಾ ಶಿವಾಯ್.

ಸುಮಾರ್ ಜಿವಂತ್ ಮರ್ಣಾಂ
ನವ್ಯಾಂಕ್ ಸಂಸಾರಿ‌‌ ಹಾಡ್ತಲಿಂ,
‘ನಾಕಾ’ ಮ್ಹಣುನ್ ನೆಗಾರ್ನ್ ಲೊಟ್ಲೆಲ್ಯಾಂಕ್
ತ್ಯೊ ಸ್ತ್ರೀಯೊ ವೆಂಗುನ್ ಧರ್ತೆಲಿಂ
‘ಆವಯ್ಪಣಾಚೆಂ ಭಾಗ್ ನಾ’ ಮ್ಹಳ್ಳೆಂ
ಸಮ್ಜಲ್ಲೆ ಶಿವಾಯ್.

ಘರ್‌ಭರ್ ಶಿಂಪ್‌ಲ್ಲೆಂ ‘ಆವಯ್ಪಣ್’
ಸಮಾಜೆಂತ್ ಪಾಜ್ರೊಂಕ್ ಲಾಗ್ಲಾಂ
ಆಸ್ರ್ಯಾಂತ್ಲ್ಯಾ ಖಟ್ಲ್ಯಾಂನಿ,
ರಡೊಂಕ್‌ ಲಾಗ್ಲಾಂ ಮುಲ್ಯಾಂನಿ
ಸಂತೊಸಾ ಪಾಟ್ಲಿ ಹಿ ಕೂಸ್ ದಿಸ್ಚಿನಾ
‘ಆವಯ್ಪಣ್’ ಭೊಗ್‌ಲ್ಲ್ಯಾ ಶಿವಾಯ್.

ಪ್ರಾಯ್ ಉತರ್ಲೆಲ್ಯಾ ಆವಯ್ಚಿ
ಮತ್ ಜಿವಿಚ್ ದವ್ರುನ್
ಸ್ವಂತ್ ಭುರ್ಗ್ಯಾಂನಿಂಚ್ ಚಿರ್ತಾನಾ
ಚಲ್ತಾ ತಿಚ್ಯಾ ಜಿವಿತಾಚೆಂ ‘ಸಿಜರಿಯನ್’
ಜೆಂ ತಿಚೆಂ ಆಕ್ರೆಚೆಂ‌ ಮರಣ್ ಹ್ಯೆ ಸಂಸಾರಿ
ಆವಯ್ಪಣಾಚಿ ಖುನಿ‌ ಕೆಲ್ಲ್ಯೆ ಶಿವಾಯ್!

 ಗ್ಲ್ಯಾನಿಶ್ ಮಾರ್ಟಿಸ್,‌ಅಲಂಗಾರ್.

ಹರ್ ಮನ್ಶ್ಯಾಥಂಯ್ ಅಸಲೆ ಭಿತರ್ಲೆ ಘಾಯ್ ಲಿಪೊನ್ ಆಸ್ತಾತ್. ಅಪ್ರೂಪ್ ಸಂದರ್ಭಾಂನಿ ಹೆ ಘಾಯ್ ಭಾಯ್ರ್ ದಿಸ್ತಾತ್, ವಿಪರ್ಯಾಸ್ ಮ್ಹಳ್ಯಾರ್ ಚಡಾವತ್ ಸಂದರ್ಭಾಂನಿ ಘಾಯಾಕ್ ಮುಲಾಮ್ ಲಾಂವ್ಚ್ಯಾ ನಿಬಾನ್ ಗೆಲ್ಲೆಯ್ ಘಾಯಾಚಿ ದೂಕ್ ವಾಡಯ್ತಾತ್. ಹಿಂದಿ ಸಿನೆಕಥಾ ಬರಯ್ಣಾರ್ ಸಲೀಮ್ ಖಾನ್ ಹಾಣೆ ಮ್ಹಣ್ಚೆಂ ಆಸಾ ” ದುಕಾಂ ಧೆಂವೊನ್ ಆಯ್ಲ್ಯಾರ್ ಖುದ್ ಪುಸಾ, ದುಕಾಂ ಪುಸುಂಕ್ ಆಯಿಲ್ಲೆ ಸೊಲ್ಲೊ ಕರ್ತಿತ್” आंसू निकल आये तो खुद पोंछना, लोग पोंछने आएंगे तो सौदा करेंगे #SalimKhan

ಭಿತರ್ಲ್ಯಾ ಘಾಯಾಂಚೊಂ ಸಂಪರ್ಕ್ ಶೀದಾ ದುಕಾಂಸಾಂಗಾತಾ ಆಸಾ, ಥೊಡಿಂ ದುಕಾಂ ಪ್ರಕಟ್ ಜಾತಾತ್, ಥೊಡಿಂ ದುಕಾಂ ಖಬ್ರೆಶಿವಾಯ್ ಘೆಟೆ ಜಾತಾತ್.

ತರ್ನ್ಯಾ ಕವಿನ್, ವಿಚಾರ್ ಆನಿ ಭೊಗ್ಣಾಂನಿ ಶಿಜೊನ್ ವಾಡ್‌ಲ್ಲಿ ಆಪುರ್ಬಾಯೆಚಿ ಕವಿತಾ.

► ಎಚ್ಚೆಮ್

ಕಾತಿ ಭಿತರ್ಲೆಂ ರಗತ್
ಜೆನ್ನಾ ಭಾಯ್ರ್ ವ್ಹಾಳ್ತಾ
ಕಾತ್ ಫುಟ್ತಾ ಖರೆಂ
ಅಶೆಂ ಫುಟ್ಲೆಲ್ಯಾ ಕಾತಿಕ್
ಶಿಂವಣ್ ಮಾರ್ತಾ ಪರ್ಯಾನ್
ಕಾಳ್ಜಾಕ್ ಸುಶೆಗ್ ಮ್ಹಳ್ಳಿ ನಾ

ವ್ಹಾಳ್ಚೊ ರಗ್ತಾ ಥೆಂಬೊ
ಲ್ಹೊಂವಾಂ ಭಿತರ್ ರಿಗ್ತಾನಾ
ಘಾಯ್ ಜಿವಾಳ್ತಾ ಖರೆಂ
ಅಶೆಂ ಕಾತಿಕ್ ಜಾಲ್ಲ್ಯೆ ಫುಟೆಕ್
ಕವಂಚ್ ಭರ್ತಾ ಪರ್ಯಾನ್
ಘಾಯಾಕ್ ಫಿಕಿರ್ ನಾ

ಮುಲಾಮಾ ಸ್ಪರ್ಶಾ ಸಂಗಿಂ
ಕಾಪ್ಸಾ ವೆಡೊ ಬಾಂದ್ತಾನಾ
ಘಾಯಾಕ್ ತಾಂಬ್ಸಾಣ್ ಭೊಗ್ತಾ ಖರೆಂ
ಅಶೆಂ ವಕ್ತಾ ಸಕತ್
ರಗ್ತಾಂತ್ ಭರ್ತಾ ಪರ್ಯಾನ್
ಮನಾಕ್ ಧಾದೊಸ್ಕಾಯ್ ನಾ

ರಾಸಾಯನಿಕ್ ಗುಳಿಯೊ
ತೊಂಡಾಂತ್ಲ್ಯಾನ್ ಪೊಟಾಕ್ ವಚುನ್
ಘಾಯಾಕ್ ಧೊಸ್ತಾತ್ ಖರೆಂ
ಅಶೆಂ ಕಾತಿ ವಯ್ಲೆಂ ಕವಂಚ್
ಕಿಮ್ಸುನ್ ನಿಕ್ಳಾಯ್ತಾ ಪರ್ಯಾನ್
ಬೊಟಾಂಚಿ‌ ಖೊರೊಜ್ ನಿವಾನಾ

ಘಾಯಾಂಚಿ ಅವ್ದಿ ಸಂಪ್ತಾನಾ
ಗೂಣ್ ಜಾತಾತ್ ಖರೆಂ
ಪೂಣ್ ದೂಕ್ ತಶಿಚ್ ಧೊಸ್ತಾ
ಹಿ ದೂಕ್ ಮತಿಂತ್ ಆಸ್ತಾ
ಅಶೆಂ ಜಿವಾಂತ್ಲೊ ಜೀವ್ ಚಲ್ತಾ ಪರ್ಯಾನ್
ಮತಿಂತ್ಲ್ಯಾ ಘಾಯಾಂಕ್ ಸುಖ್‌ಚ್ ನಾ

???? ಗ್ಲ್ಯಾನಿಶ್ ಮಾರ್ಟಿಸ್, ಅಲಂಗಾರ್.

ಕಾರ‍್ಯಾಚಿಂ ಆಮಂತ್ರಣ್ ಪತ್ರಾಂ ಪಯ್ಲಿಂಚ್ ಛಾಪ್ಲೆಲಿಂ ಜಾಲ್ಲ್ಯಾನ್ ತಿಂ ವಾಂಟ್ಚೆ ಕಾಮ್ ಮಾತ್ರ್ ಉರ್‌ಲ್ಲೆಂ. ಉಪಾಧ್ಯಕ್ಷ್ ದುಬ್ಳೊ ಪೂಣ್ ಕಾರ‍್ಯದರ್ಶಿ ಗ್ರೇಸ್ತ್! ಉಪಾಧ್ಯಕ್ಷಾಚಿ ಸವಾರಿ ಸೈಕಲಾರ್ ತರ್ ಕಾರ‍್ಯದರ್ಶಿಚಿ ಬಿಎಂಡಬ್ಲ್ಯೂರ್. ಉಪಾಧ್ಯಕ್ಷ್ ನಾಂವಾಕ್ ಮಾತ್ರ್ ಆನಿ ತಾಚೆಂ ನಿಯಂತ್ರಣ್ ಕಾರ‍್ಯದರ್ಶಿಚ್ಯಾ ಹಾತಾಂತ್ ಆಸ್‌ಲ್ಲೆಂ ಮ್ಹಣ್ ಸರ‍್ವಾಂಕ್ ಕಳಿತ್ ಆಸ್ಚಿ ಗಜಾಲ್. ಕಾರ‍್ಯದರ್ಶಿ ಗ್ರೇಸ್ತ್ ಜಾವ್ನ್ ಇಲ್ಲೊ ಕಂಜೂಸ್ ಜಾಲ್ಲ್ಯಾನ್, ಆಮಂತ್ರಣ್ ಪತ್ರಾಂ ಉಪಾಧ್ಯಕ್ಷಾಚ್ಯಾ ಸೈಕಲಾರ್‌ಚ್ ವಚುನ್ ವಾಂಟ್ಯಾಂ ಮ್ಹಣ್ ಚಿಂತ್ಲೆಂ. ಹಿ ಆಲೋಚನ್ ಉಪಾಧ್ಯಕ್ಷಾಕ್ ಪಯ್ಲಿಚ್ ಕಳಿತ್ ಆಸ್‌ಲ್ಲಿ ಜಾಲ್ಲ್ಯಾನ್ ಮ್ಹಜ್ಯಾ ಸೈಕಲಾಚೆಂ ಟಾಯರ್ ಪಂಚರ್ ಜಾಲಾಂ ಮ್ಹಣ್ ಕಾರ‍್ಯದರ್ಶಿಕ್ ಕಳಯ್ಲೆಂ. ಕಾಂಯ್ ದುಸ್ರೊ ಉಪಾಯ್ ನಾಸ್ತಾಂ ಕಾರ‍್ಯದರ್ಶಿನ್ ತಾಕಾ ಆಪ್ಲ್ಯೆ ಗಾಡಿಯೆರ್ ವ್ಹರ‍್ನ್ ಪತ್ರಾಂ ವಾಂಟ್ಚ್ಯಾಕ್ ಒಪ್ಲೊ.

ಅಶೆಂ ದಿವ್ಳಾಚ್ಯಾ, ಪಳ್ಳೆಚ್ಯಾ, ಬಸ್ದೆಚ್ಯಾ ಮುಕೆಲ್ಯಾಂಕ್ ಆನಿ ರಾಜ್ಕಾರ್ಣಿಂಕ್ ಆಪವ್ನ್ ಜಾತಚ್ ಉಪಾಧ್ಯಕ್ಷಾಚೆಂ ಸೈಕಲ್ ರಿಪೆರಿ ಜಾಲೆಂ ಆನಿ ದಶೆಂಬ್ರಾಚೊ ಎಕ್ವೀಸಾವೊ ದೀಸ್ ಉದೆಲೊ. ಇಗರ‍್ಜೆಂತ್ ನಶ್ಟೊ ಆಸಾ ಮ್ಹಣ್ ಚಿಂತುನ್ ಕಾರ‍್ಯದರ್ಶಿ ಘರ‍್ಚಿ ಏಕ್ ಗ್ಲಾಸ್ ಪುಟಿ ಚಾ ಪಿಯೆವ್ನ್ ಇಗರ‍್ಜೆಕ್ ಭಾಯ್ರ್ ಸರ‍್ಲೊ. ಸಕಾಳಿಂ ನೋವ್ ವರಾರ್ ಕುಸ್ವಾರಾಚಿ ಸರ್ಬರಾಯ್ ಸುರು ಕರ‍್ಚಿ ಯೆವ್ಜಣ್ ಗೊವ್ಳಿಕ್ ಮಂಡಳಿಂತ್ ಜಾಲ್ಲಿ ಆನಿ ಹಾಕಾ ಪೂರಕ್ ಜಾವ್ನ್ ಸಕಾಳಿಂಚ್ಯಾ ನಶ್ಟ್ಯಾಚಿ ಮಾಂಡಾವಳ್ ವಿಗಾರಾನ್ ಕೆಲ್ಲಿ. ಪೂಣ್ ಸಾಡೆ ನೋವ್ ಜಾಲ್ಯಾರಿ ಇಗರ‍್ಜೆ ವಠರಾಂತ್ ವಿಗಾರ್,ಉಪಾಧ್ಯಕ್ಷ್ ಆನಿ ಕಾರ‍್ಯದರ್ಶಿ ಸೊಡ್ಲ್ಯಾರ್ ಹೆರ್ ಕೊಣ್‌ಚ್ ತಾಂಚ್ಯೆ ಭೊಂವ್ತಿ ನಾ ಜಾಲೊ. ಅರ್ಧೆಂ ವರ್ ಜಾಲಾಂ ಮಾತ್ರ್ ಆನಿ ಥೊಡ್ಯಾಚ್ ವೆಳಾನ್ ವಠಾರ್ ಭರೊನ್ ವೊಮ್ತತಲೆಂ ಮ್ಹಣ್ ಉಪಾಧ್ಯಕ್ಷಾನ್ ಕುಶಿನ್ ಆಸ್‌ಲ್ಲ್ಯಾ ವಿಗಾರಾಕ್ ತಶೆಂಚ್ ಕಾರ‍್ಯದರ್ಶಿಕ್ ಧಯ್ರ್ ದಿಲೆಂ. ಧಯ್ರ್ ದಿತಾಂ ಮ್ಹಣ್ತಾನಾ ರಾಂದ್ಪಾ ಕುಡಾ ಥಾವ್ನ್ ಟಾನ್ನ್ ಮ್ಹಳ್ಳೊ ಆವಾಜ್ ಜಾಲೊ. ಹ್ಯಾ ಆವಾಜಾ ಪಾಟ್ಲ್ಯಾನ್ ಹೆ ತೇಗ್ ಜಣ್ ಫಿಲ್ಮ್ ಥಿಯೆಟರಾಚೆಂ ದಾರ್ ಉಗ್ತಾಯ್ತಾನಾ ಲೊಕಾನಿಂ ಧಾಂವ್ಚ್ಯೆ ಪರಿಂ ಆಪ್ಲ್ಯಾ ರಾಂದ್ಪಾ ಕುಡಾಕ್ ಧಾವ್ಲೆ. ಭಿತರ್ ಸರೊನ್ ಪಳಯ್ತಾನಾ, ಸಗ್ಳೆಂ ರಾಂದ್ಪಾ ಕೂಡ್ ದುದಾಂತ್ ಭರ್‌ಲ್ಲ್ಯಾ ಚಾಯೆ ಪಿಟ್ಯಾಂತ್ ಭಿಜ್‌ಲ್ಲೆಂ ಆನಿ ಬೊಟ್ಲೆರ್ ಆಮ್ಸೊರಾನ್ ಮ್ಹಳ್ಳೆ ಪರಿಂ ಬಾಣ್ಶಿರ‍್ಯಾನ್ ಧರ‍್ಣ್ ಪುಸುನ್ ನಿತಳ್ ಕರ‍್ತಲೊ. ಹೆಂ ದೃಶ್ಯ್ ಪಳಯ್ಲ್ಯಾ ವಿಗಾರಾನ್ ಆನಿ ಕಾರ‍್ಯದರ್ಶಿನ್, ಉಪಾಧ್ಯಕ್ಷಾ ತೆವ್ಶಿಂ ಘುಂವೊನ್ ಅರ್ಧೆಂ ವರ್ ಜಾಲ್ಲೆಂ ಮಾತ್ರ್, ಲೋಕ್ ಭರುನ್ ವೊಮ್ತೊನಾ ತರಿ ತಾಂಕಾಂ ಮ್ಹಣ್ ತಯಾರ್ ಕಲ್ಲಿ ಚಾ ಸಗ್ಳಿ ವೊಮ್ತಲಿ! ಮ್ಹಣ್ ಟೊಂಟ್ ದಿಲೆಂ. ಹೆಂ ಟೊಂಟ್ ಆಯ್ಕಲ್ಲೊ ಕಾರ‍್ಯದರ್ಶಿ ಆಪುಣ್ ಆತಾಂಚ್ ವಚುನ್ ದೂದ್ ಹಾಡ್ತಾಂ ಮ್ಹಣ್ತಾನಾ ವಿಗಾರಾನ್ ತಾಕಾ ಪಯ್ಲೆಂ ಲೋಕ್ ಯೆಂವ್ದಿ, ಉಪ್ರಾಂತ್ ದೂದ್ ಹಾಡ್ ಮ್ಹಣ್ ರಾವಯ್ಲೆಂ ಆನಿ ಆಪ್ಲೆಸ್ತಕಿಂ ಅಸಲೆ ದೋಗ್ ಮಹಾಬುದ್ವಂತ್ ಅಖ್ಖ್ಯಾ ಸಮಾಜೆಂತ್ ಆಸ್ಚೆ ನಾಂತ್ ಮ್ಹಣ್ ಚುರ್ಚುರ‍್ಲೊ. ದೊನ್ಪಾರ್ ಜಾಲ್ಯಾರಿ ಕೊಣಾಯ್ಚೆಂ ಯೆಣೆಂ ಜಾಂವ್ಕ್ ನಾತ್‌ಲ್ಲೆಂ ಪಳೆವ್ನ್ ವಿಗಾರಾನ್ ತಕ್ಷಣ್ ಆಪ್ಲ್ಯಾ ದಫ್ತರಾಕ್ ವಚುನ್ ಹಿಶಿನ್ ತಿಶಿನ್ ಆಸ್‌ಲ್ಲ್ಯಾ ಬೇಕ್ರಿ ದುಕಾಂನಾಂಕ್ ಫೋನ್ ಘುಂವ್ಡಾವ್ನ್, ನಮೂನೆ ನಮೂನೆಚೊ ಕುಸ್ವಾರ್ ಹಾಡಂವ್ಕ್ ಆಯ್ತೊ ಜಾಲೊ. ಅಶೆಂ ಫಾಲ್ಯಾಂ ದೊನ್ಪಾರಾ 3 ವರಾಂ ಭಿತರ್ ಕುಸ್ವಾರ್ ಪಾವ್ತಲೊ ಮ್ಹಳ್ಳಿ ಖಾತ್ರಿ ಬೇಕ್ರಿವಾಲ್ಯಾಂನಿ ದಿಲ್ಲಿ ಪಳೆವ್ನ್ ವಿಗಾರಾಕ್ ಚಿಕ್ಕೆ ಸುಶೇಗ್ ಭಗ್ಲೊ ಆನಿ ಹೆ ದೋಗ್ ಜಣ್, ಲೋಕ್ ಯೆತಾಗಿ ನಾ ಮ್ಹಣ್ ವಾಟ್ ರಾಕುನ್ ಬಸ್‌ಲ್ಲೆ. ಹಾಂಚಿ ಅವಸ್ತಾ ಪಳೆವ್ನ್ ವಿಗಾರ್ ತಾಂಚ್ಯೆಶಿ ಪಾವ್ತನಾ ಹೆ ದೊಗಿ ಧೃಡ್ ಮನ್ ಕರ‍್ನ್ ಲೋಕ್ ಯೆನಾತ್ಲ್ಯಾರ್ ವ್ಹಡ್ ನ್ಹಯ್, ಆಮಿ ತುಮಿ ಆನಿ ಬೊಟ್ಲೆರ್ ಮೆಳುನ್ ಇಲ್ಲೊ ಕುಸ್ವಾರ್ ಕರ‍್ಯಾಂ, ಫಾಲ್ಯಾಂ ಜಾಂವ್ಕ್ ಅನಿಕ್‌ಯಿ ಜಾಯ್ತೊ ವೇಳ್ ಆಸಾ ಮ್ಹಣಾಲೆ. ಹಾಂಚಿ ಅಭಿಪ್ರಾಯ್ ಆಯ್ಕುನ್ ವಿಗಾರಾಕ್ ರಾಗ್ ಚಡುನ್ ತುಮಿ ಆತಾಂ ಘರಾ ವಚಾ, ಕುಸ್ವಾರಾಚಿ ಮಾಂಡಾವಳ್ ಹಾಂವ್ ಕರ‍್ತಾಂ ಮ್ಹಣಾಲೊ.

ಲೊಕಾನ್ ಕೆಲ್ಲೊ ಬಾಯ್ಕೊಟ್ ಪಳೆವ್ನ್ ಕಾರ‍್ಯದರ್ಶಿ ಉಪಾಧ್ಯಕ್ಷಾಕ್ ಲೋಕ್ ಅಸೊ ಧಖೊ ದಿತಲೊ ಮ್ಹಣ್ ಹಾಂವೆಂ ಚಿಂತುಂಕ್ ನಾ ಮ್ಹಣ್ತಾನಾ ಉಪಾಧ್ಯಕ್ಷ್ ರಾಗಾನ್ ಆಪ್ಲೊ ಹುದ್ದೊ ಸೊಡ್ನ್ ದಿತಾಂ ಮ್ಹಣ್ ತೊಂಡ್ ಸೊಡ್ತಾ. ತವಳ್ ಕಾರ‍್ಯದರ್ಶಿ ತಾಕಾ ಗಾಂಧಿಜಿಚಿ ತಾಳ್ಮೆಯನ್ನು ಕಳೆದುಕೊಳ್ಳುವುದು ಯುದ್ಧವನ್ನು ಕಳೆದುಕೊಳ್ಳುವುದು ಮ್ಹಳ್ಳ್ಯೆ ಸಾಂಗ್ಣೆ ರುಪಾರ್ ಸಮ್ಜಂವ್ಚೆಂ ಪ್ರೇತನ್ ಕರ‍್ತಾ ಮಾತ್ರ್ ನ್ಹಯ್, ಹಾಂವ್ ತುಜೆ ಸವೆಂ ಆಸಾಂ ಮ್ಹಣ್ ಭಾಸಾಯ್ತಾ. ಅಶೆಂ ಶಾಂತ್ ಸ್ವಭಾವಾನ್ ಮೆಟಾಂ ಕಾಡ್ತಾಸ್ತಾನಾ ಕಾರ‍್ಯದರ್ಶಿ ಹಿ ಸಗ್ಳಿ ಆದ್ಲೊ ಉಪಾಧ್ಯಕ್ಷ್ ಬೆಜ್ಮಿಚಿ ಗುಟ್ಮಳ್ ತವಳ್ ಉಪಾಧ್ಯಕ್ಷಾನ್ ಆಮ್ಕಾಂ ಸಕ್ಲಾ ಘಾಲ್ಚ್ಯಾಕ್ ತಾಣೆಂಚ್ ಸರ‍್ವ್ ಗುರ್ಕಾರಾಚೆಂ ಕಾನ್ ಫುಂಕ್ಲ್ಯಾತ್ ಜಾಂವ್ಕ್ ಪುರೊ ಮ್ಹಳ್ಳೊ ಸಂದೇಹ್ ಉಚಾರ‍್ಲೊ. ಅಶೆಂ ಉಲಯ್ತಾಂ, ದೊಗಿ ಘರಾ ವಚುನ್ ಎಕ್ಲೊ ಸ್ವಾಗತ್ ಭಾಶಣ್ ಬರಂವ್ಕ್ ಲಾಗ್ಲೊ ತರ್ ದುಸ್ರೊ ಉಪ್ಕಾರ್ ಆಟೊವ್ಣೆ ಥಂಯ್ ಮಗ್ನ್ ಜಾಲೊ.

ಎಕ್ತಾರಾಚೊ ದೀಸ್ ಉದೆಲೊ. ಏಕ್ ಹಜಾರ್ ಬಸ್ಕೆಚಿ ಮಾಂಡಾವಳ್ ಘಾಲ್ಲಿ. ವಿಗಾರಾಚೊ ಕುಸ್ವಾರ್ ಬೇಕ್ರಿವಾಲ್ಯಾಂಚ್ಯೆ ಭಾಸಾವ್ಣೆ ಪ್ರಕಾರ್ ತೀನ್ ವರಾಂ ಪಯ್ಲೆಂಚ್ ಯೇವ್ನ್ ಪಾವ್‌ಲ್ಲೊ. ಸುರ‍್ಯಾಚಿಂ ಕಿರ್ಣಾಂ ಮುಖಮಳಾಕ್ ಆಪ್ಟೊಂಕ್ ಆಸಾತ್ ಮ್ಹಳ್ಳ್ಯಾಕ್ ತಕ್ಲೆ ವಯ್ರ್ ಶಾಮಿಯಾನಾಚೊ ಮಾಟೊವ್ ಸಯ್ತ್ ಘಾಲೊ. ಧ್ವನಿಯಂತ್ರಕ್, ವೆದಿಚಿ ಮಾಂಡಾವಳ್ ಭೊವ್ ಬರ‍್ಯಾ ರಿತಿನ್ ಸಜಯ್ಲಿ. ಹಿ ಪೂರಾ ಮಾಂಡಾವಳ್ ಭಾಡ್ಯಾಚ್ಯಾ ಬರ‍್ಯಾ ಮನಾಚ್ಯಾ ಮನ್ಶಾಂನಿ ಕೆಲ್ಲಿ ಶಿವಾಯ್ ಫಿರ‍್ಗಜ್‌ಗಾರಾಂನಿ ನ್ಹಯ್!. ಪೂಣ್ ಮುಕೆಲ್ಪಣ್ ಸ್ವಯಂ ವಿಗಾರಾನ್ ಹಾತಿಂ ಘೆತ್‌ಲ್ಲೆಂ.

ಜುಸ್ತ್ ಸಾಡೆ ತೀನ್ ವರಾರ್ ಕಾರ್ಯೆಂ ಆರಂಭ್ ಕರ‍್ಚೆಂ ಮ್ಹಣ್ ನಿರ್ಧಾರ್ ಘೆತ್‌ಲ್ಲೊ. ವೆಳಾ ಪುರ‍್ವಿಂಚ್ ಸರ‍್ವ್ ಸಯ್ರೆ ಕಾರ್ಯಾಕ್ ಪಾವ್‌ಲ್ಲೆ ಜಾಲ್ಲ್ಯಾನ್ ವೆಳಾರ್ ಕಾರ್ಯೆಂ ಸುರು ಕರುಂಕ್ ಕಾಂಯ್ ಅಡ್ಕಳ್ ಜಾಂವ್ಕ್ ನಾ. ಕುಸ್ವಾರಾಚ್ಯೆ ತಯಾರಾಯೆಕ್ ಕಿತ್ಲೊ ಲೋಕ್ ಯೆಂವ್ಕ್ ಆಸ್‌ಲ್ಲೊ ತಾಚ್ಯಾಕಿ ದೋನ್ ಮಾಪಾನ್ ಚಡಿತ್ ಲೋಕ್ ಸಯ್ರ್ಯಾಂ ಪರಿಂ ವೆಳಾರ್ ಯೇವ್ನ್ ಬಸ್‌ಲ್ಲೊ ಪಳೆವ್ನ್ ಉಪಾಧ್ಯಕ್ಷ್, ಕಾರ‍್ಯದರ್ಶಿ ಸವೆಂ ವಿಗಾರ್ ವಿಸ್ಮಿತ್ ಜಾಲೆ. ಮಾಟೊವ್ ಭರ್‌ಲ್ಲೊ ಪಳೆವ್ನ್ ದೊಗಾಂಯ್ಕಿ ಮಸರ್ ಜಾಲೊ ಪೂಣ್ ಆಪ್ಣಾ ದೊಗಾಂಚ್ಯಾ ಮುಕೆಲ್ಪಣಾ ವರ್ವಿಂ ಹೊ ಮಾಟೊವ್ ಭರ‍್ಲಾ ಮ್ಹಣ್ ಆಯಿಲ್ಲ್ಯಾ ಸಯ್ರ್ಯಾಂ ಥಂಯ್ ವ್ಹಡ್ಪಣ್ ದಾಕಯ್ತಲೆ. ಬೆಜ್ಮಿ ಆಪುಣ್‌ಚ್ ಪ್ರಸ್ತುತ್ ಉಪಾಧ್ಯಕ್ಷ್ ಮ್ಹಣ್ ಸೂಟ್ ಬುಟಾರ್ ಸೊಬ್ತಾಲೊ. ಕಾರ್ಯೆಂ ಆರಂಭ್ ಜಾಲೆಂ, ಉಪಾಧ್ಯಕ್ಷಾನ್ ಸ್ವಾಗತಾಚಿಂ ಉತ್ರಾಂ ರಾಜ್‌ಕಾರ‍್ಣಿನ್ ಉಲಯ್ಲೆಲ್ಯೆ ಪರಿಂ ಉಲವ್ನ್ ಫುಲಾಂ ತುರ‍್ಯಾಂ ಬರಾಬರ್ ವೆದಿರ್ ಆಸ್‌ಲ್ಲೆಲ್ಯಾಂಕ್ ಯೆವ್ಕಾರ್ ಪಾಠಯ್ಲೊ. ಸಯ್ರ್ಯಾಂನಿ ಅವ್ವಲ್ ಥರಾನ್ ಭಾಶಣಾಂ ದಿಲಿಂ ಪೂಣ್ ವಿಗಾರ್ ಮನಾ ಭಿತರ್‌ಚ್ ದೂಕ್ ಉಚಾರ‍್ತಲೊ. ಭಾಶಣಾಂ ಜಾತಾನಾ ದೊಗಿ ಉಪಾಧ್ಯಕ್ಷ್ ಆನಿ ಕಾರ‍್ಯದರ್ಶಿ ಜೆಮ್ ಕಾಡ್ನ್ ಆಸ್ಲೆ. ಕುಸ್ವಾರ್ ದರಬಸ್ತ್ ಬೇಕ್ರಿವಾಲ್ಯಾಂನಿ ತಯಾರ್ ಕೆಲ್ಲೊ ಜಾಲ್ಲ್ಯಾನ್ ಉಣೊ ಪಡ್ಚೊ ಸವಾಲ್ ನಾತ್‌ಲ್ಲೆಂ. ನಿದೆನ್ ಪಿಕ್‌ಲ್ಲ್ಯಾ ಕಾರ‍್ಯದರ್ಶಿನ್ ಆಪ್ಲೆ ದೊಳೆ ಘಶ್ಟುನ್ ಜಮ್ಲೆಲ್ಯಾ ಸರ‍್ವಾಂಚೊ ಉಪ್ಕಾರ್ ಭಾವುಡ್ಲೊ. ಕಾರ್ಯೆಂ ಬರ‍್ಯಾ ರಿತಿನ್ ಯಶಸ್ವಿ ಜಾಲೆಂ. ಪೂಣ್ ಬೆಜ್ಮಿಚೆಂ ತೊಂಡ್ ಬಾವ್‌ಲ್ಲೆಂ.

ಕಾರ್ಯೆಂ ಸಂಪ್ಲ್ಯಾ ಉಪ್ರಾಂತ್ ವಿಗಾರಾನ್, ಉಪಾಧ್ಯಕ್ಷಾಕ್ ಆನಿ ಕಾರ‍್ಯದರ್ಶಿಕ್ ಆಪವ್ನ್ ತುಮಿ ಕಿತೆಂ ಕಾರ್ಯಾ ವೆಳಾರ್ ಭಾರಿಚ್ ಜೇಮ್ ಕಾಡ್ನ್ ಆಸ್‌ಲ್ಲ್ಯಾತ್? ಮ್ಹಣುನ್ ವಿಚಾರ‍್ಲೆಂ. ತವಳ್ ಉಪಾಧ್ಯಕ್ಷ್ ಪಾಟ್ಲ್ಯಾ ಚಾರ್ ಪಾಂಚ್ ದಿಸಾಂ ಥಾವ್ನ್ ರಾತ್ಚ್ಯಾ ವೆಳಾರ್ ಮ್ಹಜ್ಯೆ ಬಾಯ್ಲೆಕ್ ಫೋನಾಂಚ್ ಫೋನಾಂ! ಮ್ಹಣ್ತಾನಾ ಕಾರ‍್ಯದರ್ಶಿನ್ ಅಜಾಪ್ ಪಾವುನ್ ಆಪ್ಣಾಚಿಯ್ ಹಿಚ್ ಗಜಾಲ್ ಮ್ಹಣ್ ವಿಗಾರಾಕ್ ಕಳಯ್ತಾನಾ ವಿಗಾರಾನ್ ತಾಂಕಾಂ ದೊಗಾಂಯ್ಕಿ ಪಯ್ಲೆಂ ವಚುನ್ ತಾಂಚ್ಯಾ ತಾಂಚ್ಯಾ ಬಾಯ್ಲಾಂಚಿಂ ಮೊಬಾಯ್ಲಾಂಚಿ ತಪಾಸ್ಣಿ ಕರ‍್ಚ್ಯಾಕ್ ಸೂಚನ್ ದಿಲೆಂ ಆನಿ ಹ್ಯಾ ವೆಳಾರ್ ದೊಗಾಂಯ್ಚ್ಯಾ ಮೆಂದ್ವಾಂತ್ಲೊ ದಿವೊ ಪೆಟ್ಲೊ.

ಘರಾ ಪಾವ್ತಚ್, ಕಾರ‍್ಯದರ್ಶಿನ್ ನ್ಹಾಂವ್ಕ್ ಗೆಲ್ಲ್ಯಾ ಆಪ್ಲ್ಯಾ ಬಾಯ್ಲೆಚೊ ಮೊಬಾಯ್ಲ್ ಪಳಯ್ಲೊ ತರ್ ತಾಕಾ ಉಪಾಧ್ಯಕ್ಷಾಚ್ಯೆ ಬಾಯ್ಲೆಚೆ ಸುಮಾರ್ ಕೊಲ್ಸ್ ಪಳೆಂವ್ಕ್ ಮೆಳ್ಳೆ ತರ್ ಉಪಾಧ್ಯಕ್ಷಾಚ್ಯಾ ಬಾಯ್ಲೆಕ್ ಕಾರ‍್ಯದರ್ಶಿಚ್ಯಾ ಬಾಯ್ಲೆಚೆ ಕೊಲ್ಸ್ ಆಸ್‌ಲೆ. ದೊಗಾಯ್ನಿ ಆಪ್ಲ್ಯಾ ಪತಿಣೆಂಕ್ ವಿಚಾರ್ ಕರ‍್ತಾನಾ ತಿಂ ಮ್ಹಣಾಲಿಂ. ದಶೆಂಬ್ರ್ ಯೆಂವ್ಚೊ ವರ‍್ಸಾಕ್ ಏಕ್ ಪಾವ್ಟಿಂ, ಅಶೆಂ ಹ್ಯಾ ಹಿವಾಳ್ಯಾ ದಿಸಾಂನಿ ಕನ್ಯಾಕುಮಾರಿ ಪಿಕ್ನಿಕಾಕ್ ಯಾ ಮ್ಹಣ್ ಕಿತ್ಲೆಂ ಪರಾತ್ಲ್ಯಾರಿ ತುಮಿ ತುಮ್ಚೊ ಎಕ್ತಾರ್ ಆಸಾ ಮ್ಹಣ್ ನಾಕಾರ‍್ಲೆಂ. ಅಶೆಂ ತುಮ್ಕಾಂ ಇಲ್ಲಿ ಬೂದ್ ಶಿಕವ್ಯಾಂ ಆನಿ ತುಮ್ಚೊ ಎಕ್ತಾರ್ ಜಿರವ್ಯಾಂ ಮ್ಹಣ್ ಆಮಿ ದೊಗಾಂಯ್ ಬಾಯ್ಲಾಂನಿ ಬೆಜ್ಮಿಯಾಮಾಕ್ ಸಾಂಗುನ್, ತಾಣೆಂ ಸರ‍್ವ್ ಗುರ‍್ಕಾರಾಂಚೆ ಆನಿ ಗುರ‍್ಕಾರಾಂನಿ ತಾಂಚ್ಯಾ ತಾಂಚ್ಯಾ ವಾಡ್ಯಾಗಾರಾಂಚೆ ಕಾನ್ ಫುಂಕುನ್ ಕೊಣೆಂಯ್ ಕುಸ್ವಾರ್ ತಯಾರ್ ಕರುಂಕ್ ವಚನಾತ್‌ಲ್ಲೆ ಪರಿಂ ಮಾಂಡಾವಳ್ ಕೆಲಿ ಆನಿ ಆಮಿ ಸುಫಳ್ ಜಾಲ್ಯಾಂವ್. ಇತ್ಲೆಂ ಆಯ್ಕಲ್ಲ್ಯಾ ಉಪಾಧ್ಯಕ್ಷಾ ಆನಿ ಕಾರ‍್ಯದರ್ಶಿ ಥಂಯ್ ಹಿಮಾಲಯಚೊ ಐಸ್ ಪಿಗ್ಳೊನ್ ಕನ್ಯಾಕುಮಾರಿ ಪರ್ಯಾನ್ ದೆಂವ್‌ಲ್ಲೆ ಪರಿಂ ಘಾಮ್ ದೆವ್ಲೊ ಆನಿ ಆಪಾಪ್ಲ್ಯಾ ಪತಿಣ್ಯಾಂಚಿ ಶಾತಿ ಪುರ‍್ತ್ಯಾ ರಿತಿನ್ ದಿಸೊನ್ ಆಯ್ಲಿ. ಉಪಾಧ್ಯಕ್ಷಾನ್ ಕಾರ‍್ಯದರ್ಶಿಕ್ ಫೋನ್ ಕರ‍್ನ್ ತಾಣೆಂ ಸಾಂಗ್‌ಲ್ಲಿ ಸಾಂಗ್ಣಿ ಚಿಕ್ಕೆ ಬದ್ಲುನ್ ಪತ್ನಿಯರು ತಾಳ್ಮೆಯನ್ನು ಕಳೆದುಕೊಳ್ಳುವುದು ಹಾಗೂ ಯುದ್ಧವನ್ನು ಗೆಲ್ಲುವುದು ಖಚಿತ ಮ್ಹಣಾಲೊ.ಅಶೆಂ ಇಗರ‍್ಜಿಚ್ಯಾ ತಶೆಂಚ್ ಉಪಾಧ್ಯಕ್ಷ್-ಕಾರ‍್ಯದರ್ಶಿಚ್ಯಾ ಎಕ್ತಾರಾ ಪ್ರಾಸ್ ಹ್ಯಾ ದೊಗಾಂ ಪತಿಣ್ಯಾಂ ಮಧ್ಲೊ ಎಕ್ತಾರ್ ಘಟ್ ಆಸ್‌ಲ್ಲೊ!.

► ಗ್ಲ್ಯಾನಿಶ್ ಮಾರ್ಟಿಸ್, ಅಲಂಗಾರ್.

ತುವಾಲೊ ಮನ್ಶ್ಯಾಜಿಣ್ಯೆಚಾ ಸುರ್ವಾತೆಚೊ, ತಾಚ್ಯಾ ಜಿಣ್ಯೆಪಯ್ಣಾಚ್ಯಾ ಸಂಘರ್ಷಾಚೊ ಆನಿ ಅಕೆರಿಚೊ ಏಕ್ ಸಂಕೇತ್ ಕಶೆಂ ಜಾಲಾ ಆಸ್ತಾಂ, ಕವಿತೆಂತೀ ತುವಾಲೊ ಆಯಿಲ್ಲ್ಯಾಂತ್ ಅಜಾಪ್ ನಾ. ಹ್ಯಾ ಕವಿತೆಂತೀ ತುವಾಲೊ ಏಕ್ ಸಂಕೇತ್ ಜಾವ್ನ್ ವಾಚ್ಪ್ಯಾಸಮೊರ್ ಯೆತಾ. ಜಿವಿತಾಂತ್ ಸಲ್ವಲ್ಲೊ ಮನಿಸ್ ಹಾಂಗಾಸರ್ ತುವಾಲ್ಯಾಚ್ಯಾ ಗೊಪಾಂತ್ ಸುಶೆಗ್ ಜೊಡ್ಚೆಂ ಪ್ರೇತನ್ ಕರ್ತಾ. ಕಿಟಾಳಾರ್ ಗ್ಲ್ಯಾನಿಶ್ ಮಾರ್ಟಿಸಾಚಿ ಹಿ ಪಯ್ಲಿ ಕವಿತಾ. ಥಿರಾಸಾಣೆನ್ ಚಮ್ಕಲ್ಯಾರ್ ಕಾವ್ಯಾಶೆತಾಂತ್ ಗ್ಲ್ಯಾನಿಶಾಕ್ ಬರೊ ಫುಡಾರ್ ಆಸಾ.

► ಎಚ್ಚೆಮ್

ಜಿಣಿ ಕೆದಿಂಚ್ ಜಾಲಿ ನಾ
ಪಯ್ಶ್ಯಾಂನಿಂ ಭರ್ಲೆಲಿ
ತುಜೊ‌ ಸಾಂಗಾತ್ ತುಟೊನ್
ವರ್ಸಾಂ ಸಬಾರ್ ಉಬ್ಲಿಂ

ತುಜ್ಯಾ ನಿರ್ಗಮನಾಂತ್
ಲ್ಹೊವಾಂ ಉಬಿಂ ಜಾಲಿಂ
ದೀಸ್-ರಾತ್ ರಡೊನ್ ರಡೊನ್
ದುಃಖಾಂ ಸುಕೊನ್ ಗೆಲಿಂ

ಬೆಜಾರಾಯೆಚಿ ದೂಕ್
ಕಾಳ್ಜಾಂತ್ ಲಿಪೊಂವ್?
ಮೊಗಾನ್ ಭರ್ಲಲೊ ಸ್ವಾದ್
ತುವಾಲ್ಯಾ ಥಾವ್ನ್ ಹುಂಗು?

ತುಜ್ಯಾ ಕಷ್ಟಾಂಚೆಂ ಥೆಂಬೆ
ಹ್ಯಾ ತುವಾಲ್ಯಾಂತ್ ಲಿಪ್ಲ್ಯಾತ್
ಲೇಕ್ ನಾತ್‌ಲ್ಲೆ ವಿಶಯ್
ಹ್ಯಾ ತುವಾಲ್ಯಾಂತ್ ಭರ್ಲ್ಯಾತ್

ಮ್ಹಜ್ಯಾ ಇಶ್ಟಾ, ಹೆಂ ಸಗ್ಳೆಂ ಹಾಂವ್
ತುಕಾ ಸಾಂಗುನ್ ಆಸಾಂ
ಕಿತ್ಯಾಕ್, ಮ್ಹಜ್ಯಾ ಮೊರ್ನಾ ಪಯ್ಲೆಂ
ತುಕಾ ಏಕ್ ಕಾಮ್ ದಿತಾಂ

“ಜೆದ್ನಾ ಹಾಂವ್ ಮರ‍್ತಾಂ ತೆದ್ನಾ
ಹ್ಯಾಚ್ ತುವಾಲ್ಯಾಂತ್
ಮ್ಹಜೆಂ ಮುಖಮಳ್ ಗುಟ್ಲಾಯ್
ತವಳ್ ಅಶೆಂ ಮ್ಹಾಕಾ ಲಾಗುಂ ಕಿ –
ಹಾಂವ್ ಮೊರ್ನಾಚ್ಯಾ ತೊಂಡಾಂತ್ ನ್ಹಯ್,
ಆಪ್ಲ್ಯೆ ಆವಯ್ಚ್ಯಾ ಉಸ್ಕ್ಯಾರ್
ನಿದ್ಲಾಂ ಮ್ಹಣ್”

► ಗ್ಲ್ಯಾನಿಶ್ ಮಾರ್ಟಿಸ್, ಅಲಂಗಾರ್.