ಪುಸ್ತಕ್ : ಲೂಟ್  

‘ರಾಯ್ ಉಂದಿರ್’ ನಾಮ್ಣೆಚೊ ಲೇಕಕ್ ಶ್ರೀ ಸುನಂದ್ (ಜೋಸೆಫ್ ಡಿಮೆಲ್ಲೊ) ಹಾಚೊ ’ಲೂಟ್’ ಕಾದಂಬರಿ ಪೋಸ್ಟಾರ್ ಯೆತಾನಾ, ತಾಚೊ ಗಾತ್ರ್ (ಚಡುಣೆ 500 ಪಾನಾಂ) ಪಳೆವ್ನ್ ಹಾಂವ್ ಶಿರಿಂ ಚುಕ್ಲೊಂಚ್ ಮ್ಹಣ್ಯೆತ್! ಹೊ ಕೆದ್ನಾ ವಾಚುನ್ ಕಾಡ್ಚೊ ಮ್ಹಣೊನ್ ಹಾಂವ್ ಚಿಂತುಂಕ್ ಪಡ್ಲೊಂ.

ಭುರ್ಗ್ಯಾಂ ಥಾವ್ನ್ ಮ್ಹಾತಾರೆ ಪರ‍್ಯಾಂತ್ ಮೊಬೈಲಾಕ್ ಭುಲ್‌ಲ್ಲ್ಯಾ ಹ್ಯಾ ತೆಂಪಾರ್, ಅನಾಮಧೇಯ್ ವಾಚ್ಪ್ಯಾಂ ಖಾತಿರ್ ಎದೊ ವ್ಹಡ್ಲೊ ಬೂಕ್ ಬರಂವ್ಚೊ ಆನಿ ತೊ ಪ್ರಕಾಶಿತ್ ಕರ‍್ಚೊ, ಖಂಡಿತ್ ಜಾವ್ನ್ Royal Mail Train ಲೂಟ್ ಕರ‍್ಚೆಂ ತಿತ್ಲೆಂಚ್ ವ್ಹಡ್ ಸಾಹಸ್ ಮ್ಹಣ್ ಹಾಂವ್ ಚಿಂತಾ.

ಸುನಂದ್

ಸುನಂದಾಚೊ ಹ್ಯಾಚ್ ನಾಂವಾಚೊ ಇಂಗ್ಲಿಷ್ The Loot ಬೂಕ್ (ಪ್ರಕಾಶಕ್: Shield crest Publishing) ಆನಿ ಕೊಂಕಣಿ ಬೂಕ್ ಹ್ಯಾಚ್ ವರ‍್ಸಾ ಪ್ರಕಾಶಿತ್ ಜಾಲ್ಯಾತ್. ಹಾಚಿ hard copy ಅಮೆಜಾನಾರ್ out of stock ಮ್ಹಣ್ ದಾಕಯ್ತಾ ತರ್ ಕಿಂಡಲ್ ಕೊಪಿ (ಮೋಲ್ 499/-) ಲಭ್ಯ್ ಆಸಾ.

ಹ್ಯಾ ಪುಸ್ತಕಾಚಿ ಖೂಬಿ ಕಿತೆಂ ಮ್ಹಳ್ಯಾರ್, ಹಾಚೆ ಪಾಟ್ಲ್ಯಾನ್ ಸುನಂದಾನ್ ಕೆಲ್ಲೆಂ ರೀಸರ್ಚ್. ಹ್ಯಾ ಬೂಕಾಂತ್ಲೆ ನೊವೊದ್ ಆನಿ ನೋವ್ ಪ್ರತಿಶತ್ ಪಾತ್ರ್‌ಧಾರಿ ವಿವಿಧ್ ನಮುನ್ಯಾಂಚೆ ಚೋರ್ ಮ್ಹಣ್ಯೆತ್! ಹಿ ಲೂಟ್ ಚಲ್ಲೆಲ್ಯಾ ವಗ್ತಾ ಇಂಗ್ಲೆಂಡಾಚಾ under world ಚೆ who is who ಸಗ್ಳೆ ಹಾಂತು ಅಸಾತ್! ಹ್ಯಾ ಬೂಕಾಂತ್ ಇತ್ಲೆ ಚೋರ್ ಭೊರೊನ್ ಗೆಲ್ಯಾತ್ ಗೀ ತುಕಾ ತಾಂಚಿ ನಾಂವಾ ಉಡಾಸಾಂತ್ ಧವರ‍್ಚೆಂಚ್ ಕಷ್ಟ್ ಜಾತಾತ್. ಹೊ ಬೂಕ್ ಸಾಕಾರ್ ಕರುಂಕ್ ಸುನಂದಾನ್ ಇಂಗ್ಲೆಂಡ್, ಆಯರ‍್ಲೆಂಡ್, ಸ್ಕೊಟ್‌ಲೆಂಡ್ ಯಾರ್ಡ್, ಜೈಲಾಂ ಸಗ್ಳಿಂ ಮೊಡ್ಲ್ಯಾಂತ್ ಆಸ್ತೆಲಿಂ. ಹೊ, ಚಾರ್ ವೊಣದಿಂ ಭಿತೆರ್ ಬಸೊನ್ ಬರಯಿಲ್ಲೊ ಬೂಕ್ ಖಂಡಿತ್ ನ್ಹಯ್. ಹೊ ಬೂಕ್ ಲಿಖುಂಕ್ ಸುನಂದಾಕ್ ತೀನ್ ವರ‍್ಸಾಂ ಲಾಗ್ಲ್ಯಾಂತ್ ಮ್ಹಣ್ ತೊ ಆಪ್ಲ್ಯಾ ದೋನ್ ಉತ್ರಾಂ ಪ್ರಸ್ತಾವನಾಂತ್ ಸಾಂಗ್ತಾ ಆನಿ ನ್ಹಯ್’ಸ್ತಾಂ ಇಂಗ್ಲಿಷ್ ಬೂಕಾಚಾ ಪಾಟ್ಲ್ಯಾ ಪಾನಾರ್ ಹಿ ಲೂಟ್ ಗುಂತುನ್ ಎದೊ ವ್ಹಡ್ಲೊ ಜೆಲೊ ಬಾಂಧುಂಕ್ ಸುನಂದಾನ್ ರಾಯಾಳ್ ತಪ್ಪಾಲ್ ಟ್ರೇಯ್ನಾ ಲಗ್ತಿಂ ಸಾಕ್ಷ್ ಚಿತ್ರಾಂ ತಶೆಂ ಅನಾಮಿಕ್ ಮೂಳಾಂ ವಾಪಾರ‍್ಲ್ಯಾಂತ್ ಮ್ಹಣೊನ್ ಕಳೊನ್ ಯೆತಾ.

ಟ್ರೇಯ್ನಾಂಚಿ ಲೂಟ್ ಪಯ್ಲೆಂ ಥಾವ್ನ್ ಚಲೊನ್ ಆಸ್ಲಿ. ರೈಲಾಚೆಂ ಆವಿಷ್ಕಾರ್ ಜಾಂವ್ಚೆಂ ಪಯ್ಲೆಂ ಲೋಕ್ ಲಾಂಬ್ ಪಯ್ಣಾಂಕ್ ಚಾರ್ ರೋದಾಂಚಿ ’ಸ್ಟೇಜ್ ಕೋಚ್’ ಮ್ಹಳ್ಳೆಲಿ ಘೊಡ್ಯಾಂ ಗಾಡಿ ವಾಪಾರ‍್ತಾಲೆ. ಲುಟ್ಕಾರ್ ತ್ಯಾ ವಗ್ತಾ ಥಾವ್ನ್ ಯೀ ಸಕ್ರಿಯ್ ಆಸುಲ್ಲೆ!

1903 ತ್ ‘ದಿ ಗ್ರೇಟ್ ಟ್ರೇಯ್ನ್ ರೊಬ್ಬರಿ’ ಮ್ಹಳ್ಳೆಲೆಂ ಮೊನೆಂ ಫಿಲ್ಮ್ ಅಮೆರಿಕಾಚಾ ಎಡ್ವಿನ್ ಪೋರ್ಟರಾನ್ ನಿರ್ದೇಶನ್ ಕೆಲ್ಲೆಂ. ದೋನ್ ಲುಟ್ಕಾರ್ ಟ್ರೇಯ್ನಾಚಾ ಟೆಲಿಗ್ರಾಫ್ ಒಪರೇಟರಾಕ್ ಬಲಾತ್ಕಾರಾನ್ ಬಂಧಿ ಕರ‍್ನ್ ಟ್ರೇಯ್ನ್ ರಾವಾಯ್ತಾತ್ ಆನಿ ಚಾರ್ ಜಣ್ ಲುಟ್ಕಾರ್ ಟ್ರೇಯ್ನ್ ಇಂಜಿನಾ ಸಮೇತ್ ಲುಟ್ತಾತ್!

ರೈಲಾಂ ಲೂಟ್ ಭಾರತಾಂತ್‌ಯೀ ಕಾಂಯ್ ಉಣಿ ನಾಂತ್. ಹಿಂ ಚೊರ‍್ಪಾಣಾಂ ಚಡಾವತ್ ಧಾಕ್ಟ್ಯಾ ಧಾಕ್ಟ್ಯಾ ಗ್ಯಾಂಗಾಂಚಿ. ಡಬ್ಬ್ಯಾಂ ಭಿತೆರ್ ರಿಗೊನ್ ಪ್ರಯಾಣಿಕಾಂಕ್ ಲುಟ್ಚ್ಯೊ ವರ್ದಿ ತೆದ್ನಾ ತೆದ್ನಾ ಆಯ್ಕೊಂಕ್ ಮೆಳ್ತಾತ್.

ಭಾರತಾಂತ್ ‘ಗ್ರೇಟ್ ಇಂಡಿಯನ್ ಟ್ರೇಯ್ನ್ ರೊಬ್ಬರಿ’ ಮ್ಹಣ್ ಪರಿಗಣಿತ್ ಲೂಟ್ ಆಗಸ್ಟ್ 9, 2016 ವೆರ್ ತಮಿಳುನಾಡುಂತ್ ಜಾಲಿ. ಸೇಲಂ-ಚೆನ್ನೈ ಎಕ್ಸ್‌ಪ್ರೆಸ್ ರೈಲಾರ್ ಇಂಡಿಯನ್ ಓವರ್‌ಸೀಸ್ ಬ್ಯಾಂಕಾನ್, ಪಿಂಜ್‌ಲ್ಲೆ, ಮ್ಹೆಳ್‌ಲ್ಲೆ ನೋಟ್ ಚೆನ್ನೈಚಾ ರಿಸರ್ವ್ ಬೆಂಕಾಕ್ ಸಾಗ್ಸುಂಕ್ ಮ್ಹಣೊನ್ ವಯ್ಲ್ಯಾ ಟ್ರೇಯ್ನಾರ್ ಏಕ್ ಸ್ಪೆಶಲ್ ಡಬ್ಬೊ ಘೆತ್‌ಲ್ಲೊ. ಹಾಂತು 342 ಕೊರೊಡ್ ರುಪಯ್ ಭರ‍್ಲೆಲ್ಲೆ ನೋಟ್ ಆಸ್ಲೆಲೆ. ನೋಟ್ ರೂಕಾಂಚಾ ಪೆಟೆನಿಂ ಭರ್‌ಲ್ಲೆ. ಸಗ್ಳೆಂ ಬಂಧಬಸ್ತ್ ಕರುನ್ ಬೀಗಾಕ್ ಸೀಲ್ ಮಾರುನ್ ಅಧಿಕಾರಿ ನಿಶ್ಚಿಂತ್ ಜಾಲೆ.

ಟ್ರೇಯ್ನ್ ಸುಟ್ತಾನಾ ಟ್ರೇಯ್ನಾಚಾ ಪಾಕ್ಯಾರ್ ಪಾಂಚ್ ಜಣ್ ಚಡೊನ್ ಬಸ್‌ಲ್ಲೆ ಕೊಣಾಯ್ಚಾ ನದ್ರೆಕ್ ಗೆಲೆಂ ನಾ. ಸೇಲಂ ಥಾವ್ನ್ ವೃದ್ಧಾಚಲಂ ಮಧ್ಲ್ಯಾ ವಾಟೆರ್ ರೈಲ್ವೇ ಲೈನಿ ವಯ್ರ್ ವೀಜೆಚಿ (electric) ಸುವಿಧಾ ನಾತ್ಲಿ. ಹೆಂ ಜಣಾಸ್ಲೆ, ಪಯ್ಲೆಂಚ್ ಪಾಕ್ಯಾರ್ ಚಡೊನ್ ಬಸ್‌ಲ್ಲ್ಯಾ ಲುಟ್ಕಾರಾನಿಂ ನೋಟ್ ಭರ‍್ಲೆಲ್ಯಾ ಡಬ್ಬ್ಯಾಚಾ ಪಾಕ್ಯಾ ವಯ್ರ್ ಮ್ಹನ್ಶಾನ್ ಭಿತೆರ್ ರಿಗ್ಚೆ ತೆದೊ ಬುರಾಕ್ ಡ್ರಿಲ್ ಕರುನ್ ದೋಗ್ ಜಣ್ ಭಿತೆರ್ ರಿಗ್ತಾತ್. ತಾಂಚಾ ಲುಂಗೆನಿಂ ನೋಟ್ ಭರ‍್ನ್, ಭರ‍್ನ್ ವೃದ್ಧಾಚಲಂ ಸ್ಟೇಶನ್ ಪಾಂವ್ಚಾ ಚಿಕ್ಕೆ ಪಯ್ಲೆಂ ಪಾಟ್ಯಾಂ ದೆಗಾನಿಂ ರಾವ್ಲೆಲ್ಯಾ ತಾಂಚಾ ಸಾಂಗಾತ್ಯಾಂಕ್ ಹಸ್ತಾಂತರ್ ಕರ‍್ತಾತ್.

ರೈಲ್, ಎಗ್ಮೋರ್ ರೈಲ್ವೇ ಸ್ಟೇಶನಾಂತ್ ಯೇವ್ನ್ ಥಾಂಬ್ಲ್ಯಾ ನಂತರ್ ರೈಲ್ವೇ ಪೊಲಿಸಾಂಕ್ ವಿಶೇಸ್ ಡಬ್ಬ್ಯಾಚಾ ಪಾಕ್ಯಾ ವಯ್ಲ್ಯಾ ಬುರಾಕಾಚೆರ್ ದೀಶ್ಟ್ ಪಡ್ತಾ! ಅಧಿಕಾರಿ ಯೇವ್ನ್ ಪಳೆತಾನಾ 5.78 ಕೊರೊಡ್ ರುಪಯ್ ಲೂಟ್ ಜಾಲ್ಲಿ ಗಜಾಲ್ ಕಳ್ತಾ. ಬಾಂದ್ಪಾಂ ಕಾಮಾಚೆ ಕಾಮೆಲಿ ಮ್ಹಣೊನ್ ಆಯ್ಲೆಲೆ ಮಧ್ಯಪ್ರದೇಶಾಚೆ ಲುಟ್ಕಾರ್ ನಿಮಾಣೆ ಶಿರ್ಕೊನ್ ಪಡ್ತಾತ್. ವಿಪರ್ಯಾಸ್ ಕಿತೆಂ ಮ್ಹಳ್ಯಾರ್ ಲುಟ್ಕಾರಾಂಕ್ ತಾಣಿ ಲುಟ್‌ಲ್ಲೆ ಸಗ್ಳೆ ಪಯ್ಶೆ ಖರ್ಚುಂಕ್, ಮೋದಿಚಾ ನೋಟ್ ಬ್ಯಾನ್ ಧರ್ಮಾನ್ ವೇಳ್‌ಚ್ ಮೆಳಾನಾ! ಸುಮಾರ್ ದೋನ್ ಕೊರೊಡ್ ಚಿಲ್ಲರ್ ರುಪಯ್ ಲುಟ್ಕಾರಾನಿಂ ದುಸ್ರಿ ವಾಟ್ ನಾಸ್ತಾಂ ಹುಲ್ಪಾಯ್ಜೆ ಪಡ್ಲೊ ಖಂಯ್!

ಪುಣ್, ಆಗಸ್ಟ್ 8, 1963 ವೆರ್ ಗ್ಲಾಸ್ಗೊ ಥಾವ್ನ್ ಲಂಡನಾಚಾ ಯೂಸ್ಟನ್ ರೈಲ್ವೇ ಸ್ಟೇಶನಾಕ್ ಭಾಯ್ರ್ ಸರ‍್ಲೆಲ್ಯಾ ‘ರೊಯಲ್ ಮೇಯ್ಲ್ ಟ್ರೇಯ್ನ್’ ಹಿಕಾ ಆಡಾವ್ನ್ ಕೆಲ್ಲಿ ಲೂಟ್ ಎದೊಳ್ ವರೆಗ್ ಚಲ್ಲೆಲ್ಯಾ ಸಕ್ಕಡ್ ಟ್ರೇಯ್ನ್ ಲೂಟಿಂ ಪಯ್ಕಿ ವ್ಹಡ್ ಜಾವ್ನಾಸಾ. ಹಾಂಗಾ ಲುಟ್ಕಾರಾನಿಂ ಕೆಲ್ಲಿ ಲೂಟ್ ಜಾವ್ನಾಸ್ಲಿ 2.6 ಮಿಲಿಯನ್ ಪೌಂಡಾಂಚಿ ಜಾವ್ನಾಸ್ಲಿ. (ಆತಾಂಚಾ ಹಿಸ್ಪಾರ್ 69 ಮಿಲಿಯನ್ ಪೌಂಡಾಂ).

ಎದೊ ವ್ಹಡ್ ರಖಂ ಆನಿ ಸಂಸಾರಾರ್‌ಚ್ ಅತ್ಯಂತ್ ಸುರಕ್ಷಿತ್ ರೈಲ್ವೇ ಲೈನ್ ಮ್ಹಣ್ ನಾಂವಾಡ್ಲೆಲ್ಲ್ಯಾ ಇಂಗ್ಲೆಂಡಾಂತ್ ಹಿ ಚೊರಿ ಜಾಲ್ಲಿ ಸಾರ್ವಜನಿಕ್ ಜಾವ್ನ್ ಮಸ್ತು ಚರ್ಚೆಕ್ ವಳಗ್ ಜಾಲಿ. ಪೋಸ್ಟಲ್ ಪೊಲಿಸ್, ನಂತರ್ ಸ್ಕೊಟ್‌ಲೆಂಡ್ ಯಾರ್ಡ್ ಮ್ಹಣ್ತಾನಾ ಹಿ ಚೊರಿ ಮಾಂಡುನ್ ಹಾಡುಂಕ್ ಬೋವ್ ವ್ಯವಸ್ಥಿತ್ ಯೋಜನ್ ರಚ್‌ಲ್ಲೊ ಎಕ್ಲೊ master mind ಜರೂರ್ ಆಸ್ತೊಲೊ ಮ್ಹಣೊನ್ ಕಳೊನ್ ಯೆತಾ.

ಬ್ರೂಸ್ ರೆನೊಲ್ಡ್ಸ್ ಮ್ಹಳ್ಳೆಲೊ ಎಕ್ಲೊ ಸಾಮಾನ್ಯ್ ಪಿಕ್ ಪೊಕೆಟ್ ಚೋರ್ ಅಸಲ್ಯಾ ಲ್ಹಾನ್ ಲ್ಹಾನ್ ಕಾಮಾಂನಿ ತೃಪ್ತಿ ಪಾವಾನಾಸ್ತಾಂ ಏಕ್ ಬೋವ್ ವ್ಹಡ್, ಕೊಣೆಂಚ್ ಎದೊಳ್ ಕರಿನಾಸ್ಚೆ ತಸಲಿ ಲೂಟ್ ಕರ‍್ಚೆ ತಸಲಿಂ ಸ್ವಪ್ನಾಂ ದೆಕೊನ್ ಆಸ್ತಾ. ಭೋವ್ ಮಹತ್ವಾಕಾಂಕ್ಷಿ ತೊ. ತಾಕಾ ನೆಪೊಲಿಯನ್ ನಾಂವಾನ್ಂಚ್ ಸಕ್ಕಡ್ ವಳ್ಕಾತಾತ್. ಏಕ್ ಪಾವ್ಟಿಂ ಭೂಗತ್ ಲೊಕಾಚೊ ಮಾಜಿ ಲುಟ್ಕಾರ್ ಹೆರಿ ಬೂತ್ ಮ್ಹಳ್ಳೆಲ್ಯಾಚಾ ಬಾಯ್ಲೆಚಿ ಪರ‍್ಸ್ ಮಾರುನ್ ತ್ಯಾಚ್ ಮ್ಹನ್ಶಾಚಿ ಇಷ್ಟಾಗತ್ ಜೊಡ್ತಾ ರೆನೊಲ್ಡ್ಸ್. ಹೆರಿ ಬೂತ್, ಥೊಡ್ಯಾ ತೆಂಪಾ ಆಧಿಂ ಬಿಲ್ಲಿ ಹಿಲ್ಲ್ ಮಳ್ಳೆಲ್ಯಾ ಕುಖ್ಯಾತ್ ಭೂಗತ್ ಲೀಡರಾಚೊ ಪಾಟ್ಲಾವಿ ಜಾವ್ನಾಸೊನ್ ಎಕಾ ಚೊರಿಯೆಂತ್ ಶಿರ್ಕೊನ್ ಜೈಲ್ ಶಿಕ್ಷಾ ಭಗುನ್ ಪಾಟಿಂ ಆಯಿಲ್ಲೊ ಅಸ್ತಾ.

ಪರ‍್ಸ್ ಚೊರ್‌ಲ್ಲಿ ರೆನೊಲ್ಡ್ಸಾನ್ಂಚ್ ಮ್ಹಣ್ ಕಳಿತ್ ಆಸ್ಲ್ಯಾರೀ ತಾಚೆರ್ ಮುಕೆಲ್ಯಾಚಿಂ ಲಕ್ಷಣಾಂ ಪಾರ್ಕುನ್ ತೊ ರೆನೊಲ್ಡ್ಸಾಕ್ ಮಾರ್ಗ್‌ದರ್ಶನ್ ದೀವ್ನ್ ಅಪ್ಣೆ ಬಿಲ್ಲಿ ಹಿಲ್ಲಾ ಬರಿಂ ರಂಗ್ ಮಂಚಾರ್ ಯೇ ನಾಸ್ಚೆ ಬರಿಂ ಲೂಟ್ ಕೆಲ್ಲ್ಯಾಂತ್ಲೊ ವಾಂಟೊ ಕಮಾಂವ್ಚಿ ಮಾಂಡಾವಳ್ ಕರ‍್ತಾ. ಹೆರಿ ಬೂತಾಚಾ ಮಾರ್ಗ್‌ದರ್ಶನಾನ್ ಮಹತ್ವಾಕಾಂಕ್ಷಿ ರೆನೊಲ್ಡ್ಸ್ ಗ್ಯಾಂಗ್ ಬಾಂಧುನ್ ಲಂಡನಾಚಾ ಹೀತ್ರೊ ಏರ್ಪೋಟಾಂತ್ಲ್ಯಾ ಬಾರ್ಕ್‌ಲೇಸ್ ಬ್ಯಾಂಕಾಕ್ ಯೆಂವ್ಚಾ ದುಡ್ವಾಚಾ ಪೇಟೆಂಚೆ ಅಪಹರಣ್ ಕರ‍್ಚೆಂ ಯೋಜನ್ ಮಾಂಡುನ್ ಹಾಡ್ತಾ. ರೆನೊಲ್ಡ್ಸಾಚೆಂ ಯೋಜನ್ ಯಶಸ್ವಿ ಜಾತಾ ತರೀ ತಾಂತು ಮೆಳ್‌ಲ್ಲೊ ಫೆರ್ಗೊ ಮಾತ್ರ್ ತಾಣಿ ನಿರೀಕ್ಷಾ ಕೆಲ್ಲೆ ವರ‍್ನಿ ಉಣೊ ಆಸ್ತಾ. ತಾಚಾ ಗ್ಯಾಂಗಾಚಾ ಸ ಜಣಾ ಪೈಕಿ ಎಕ್ಲೊ ಶಿರ್ಕೊನ್ ಪಡ್ತಾ ತರೀ ಉರ್‌ಲ್ಲೆ ಶಾಬಿತ್ ಉರ‍್ತಾತ್.

ಲ್ಯಾನ್ ತರೀ ಮಹತ್ವ್‌ಪೂರ್ಣ್ ಯಶಸ್ವಿ ಜೊಡ್‌ಲ್ಲೊ ಬ್ರೂಸ್ ರೇನೋಲ್ಡ್ಸ್ ಹ್ಯಾ ಪಾವ್ಟಿಂ ವ್ಹಡ್ಲೊ ಫೆರ್ಗೊ ಮಾರಿಜಾಯಿಚ್ ಮ್ಹಳ್ಳ್ಯಾ ಹಟಾನ್ ದುಸ್ರೆಂ ಯೋಜನ್ ಮಾಂಡುನ್ ಹಾಡ್ತಾ. ಎಕಾ ಭಿತೆರ‍್ಲ್ಯಾ ಅನಾಮಿಕ್ ಮ್ಹನ್ಶಾಚಾ ಮಜತೆನ್ ಫಲಾಣ್ಯಾ ವಗ್ತಾ ಗ್ಲಾಸ್ಗೊ-ಲಂಡನ್ ತಪ್ಪಾಲ್ ರೈಲಾರ್ ವ್ಹಡ್ ಐವಾಜ್ ಭರ‍್ಲೆಲಿಂ ತಪ್ಪಾಲ್ ಬೇಗಾಂ ಯೇಂವ್ಕ್ ಆಸಾತ್ ಮ್ಹಳ್ಳಿ ಖಬರ್ ಮೆಳ್ತಾನಾ ರೆನೊಲ್ಡ್ಸ್ ಕಾರ್ಯ್‌ತತ್ಪರ್ ಜಾತಾ. ಹಾಂಗಾ ಥಾವ್ನ್ ಸುರು ಜಾತಾ ತಯಾರಾಯ್. ಕಸಲ್ಯಾ ಮಿಲಿಟರಿ ಕಾರ್ಯಾಚರಣಾಕ್‌ಯೀ ಲಜೆಕ್ ಘಾಲ್ಚೆ ತಸಲೆಂ ಕಾರ್ಯವಿಧಾನ್ ರೆನೊಲ್ಡ್ಸ್ ತಯಾರ್ ಕರ‍್ತಾ. ರೈಲಾಕ್ ಕಶೆಂ, ಖಂಚಾ ಜಾಗ್ಯಾರ್ ಸಿಗ್ನಲಾಂ, ಆಲಾರಾಮಾಂ ನಿಷ್ಕ್ರಿಯ್ ಕರ‍್ನ್ ಆಡಾಯ್ಜೆ ಆನಿ ಹ್ಯಾ ಕಾಮಾಂಕ್ ಕಸಲ್ಯಾ ಕಸಲ್ಯಾ ಮ್ಹನ್ಶಾಂಕ್ ವಾಪ್ರಿಜೆ, ಕಿತ್ಲ್ಯಾ ಮಿನುಟಾಂ ಭಿತೆರ್ ಲೂಟ್ ರೈಲಾರ್ ಥಾವ್ನ್ ಖಾಲಿ ಕರಿಜೆ, ಲುಟ್‌ಲ್ಲೆಂ ದಿರ್ವೆಂ ಖೈಂ ಲಿಪಯ್ಜೆ ಇತ್ಯಾದಿ.. ಹ್ಯಾ ಕಾಮಾಕ್ ಲಾಗೊನ್ ಬ್ರೂಸ್ ರೆನೊಲ್ಡ್ಸ್ ಭೂಗತ್ ಲೊಕಾಚಾ ವಿವಿಧ್ ಕಾಮಾಂನಿ ಹೆಳ್ಳೆಲ್ಯಾ 15 ಜಣಾಂಕ್ ವಿಂಚುನ್ ತಯಾರ್ ಕರ‍್ತಾ.

ಸಗ್ಳೆಂ ರೆನೊಲ್ಡ್ಸಾನ್ ಮಾಂಡುನ್ ಹಾಡ್ಲೆಲ್ಯಾ ಬರಿಂಚ್ ಚಲ್ತಾ. ರೈಲ್ವೇ ಸಿಗ್ನಲಾಂ ಬಂಧ್ ಕರುನ್, ಪಾಟ್ಯಾಂ ದೆಗೆಂಚೆ ಎಮರ್ಜೆನ್ಸಿ ಟೆಲಿಫೋನ್ ವಯರಾಂ ಕಾತ್ರುನ್ ರೆನೊಲ್ಡ್ಸಾಚೆ ಮ್ಹನಿಸ್ ರೈಲ್ ಲೂಟ್ ಯೋಜನಾ ಫರ್ಮಾಣೆ ಬ್ರಾಯ್ಡೆಗೊ ಸಾಂಕ್ಯಾ ಲಾಗ್ಗಿಂ ಟ್ರೇಯ್ನ್ ವ್ಹರುಂಕ್ ಲುಟ್ಕಾರ್ ಯಶಸ್ವಿ ಜಾತಾತ್ ಆನಿ ತಪ್ಪಾಲ್ ರೈಲಾಂತ್ ಭರ‍್ಲೆಲ್ಯೊ HVP (high value packets) ಪೆಕೆಟಿಂಚಿ ಲೂಟ್ ಯಶಸ್ವಿ ಜಾತಾ! ಇತ್ಲ್ಯಾ ಮಿನುಟಾಂ ಭಿತೆರ್ ಲೂಟ್ ಜಾವ್ನಾಸಾಜೆ ಮ್ಹಳ್ಳ್ಯಾ ಪ್ಲ್ಯಾನಾ ಫರ್ಮಾಣೆ ತಾಂಕಾ ಡಬ್ಬ್ಯಾ ಭಿತೆರ‍್ಲ್ಯೊ ಸಕ್ಕಡ್ ಪೆಕೆಟಿ ಖಾಲಿ ಕರುಂಕ್ ಜಾಯ್ನಾಂತ್. ನಿಮಾಣೆ, ಸಗ್ಳ್ಯಾನಿಂ ಘಡೊಂಕ್ ಆಸ್ಲೆ ಬರಿಂಚ್ ಪೊಲಿಸ್ ಪ್ರವೇಸ್ ಜಾತಾತ್. ಥೈಂ ಥಾವ್ನ್ ಸ್ಕೊಟ್‌ಲೆಂಡ್ ಯಾರ್ಡ್, ನಂತರ್ ಸ್ಕೊಟ್‌ಲೆಂಡ್‌ಯಾರ್ಡಾಚೆಂ ಫ್ಲೈಯಿಂಗ್ ಸ್ಕ್ವಾಡ್ ಕೇಸ್ ಹಾತಿಂ ಘೆತಾ. ಹಾಚೊ ಬೊಸ್ಸ್ ಜಾವ್ನಾಸಾ ಟೊಮ್ ಬಟ್ಲರ್.

ಕಿತ್ಲ್ಯಾ ಶಾಣ್ಯಾಪಣಾನ್ ಚೊರಿ ವ ಅಪ್ರಾಧ್ ಆಧಾರ‍್ಲ್ಯಾರೀ ಅಪ್ರಾಧಿ, ಶಿರ್ಕೊನ್ ಪಡೊಂಕ್ ಕಸಲಿ ಪುಣಿ ನಿಶಾನಿ ಸೊಡುನ್ ಆಸ್ತಾತ್ ಮ್ಹಳ್ಳಿ ಪಾತ್ಯೆಣಿ ಆಸಾ. ಅಸಲ್ಯೊ ರುಜ್ವಾತಿ ಸೊಧುನ್ ಕಾಡ್ಚೆಂಚ್ ಪೊಲಿಸಾಂಚಿ ಚತುರತಾ ದಾಕಾಯ್ತಾ. ರೆನೊಲ್ಡ್ಸಾಚಾ ಗ್ಯಾಂಗಾಂತ್ ಚಡುಣೆ ಪಂದ್ರಾ ಸೊಳಾ ಜಣ್ ಆಸುಲ್ಲೆ. ಎದೊ ವ್ಹಡ್ ಫೆರ್ಗೊ ದೆಕೊನ್ ಸಗ್ಳೆ ಉನ್ಮಾದಾನ್ ಭರೊನ್ ಆಸೊನ್, ತಾಣಿ ತಾತ್ಕಾಲಿಕ್ ಅಸ್ರೊ ಸೊದ್‌ಲ್ಲ್ಯಾ ಲೆದರ‍್ಸ್‌ಡೇಲ್ ಫಾರ್ಮ್ ಹೌಸಾಂತ್ ಸಬಾರ್ ರುಜ್ವಾತಿ ಸೊಡ್ತಾತ್! ರೆನೊಲ್ಡ್ಸಾನ್ ದಿಲ್ಲ್ಯಾ ಚತ್ರಾಯೆಚಿ ಪರ್ವಾ ತಾಂಕಾ ಆಸಾನಾ.

ಲೂಟ್ ಕರುನ್ ಯಶಸ್ವಿ ಜಾಲ್ಲೊ ರೆನೊಲ್ಡ್ಸ್ ನಂತರ್ ಕಿತೆಂ ಕರ‍್ತಾ? ಟೊಮ್ ಬಟ್ಲರಾಕ್ ಕಿತ್ಲೆ ಜಣ್, ಕಶೆಂ ಶಿರ್ಕೊನ್ ಪಡ್ತಾತ್, ತಾಂಕಾ ಕಿತ್ಲ್ಯಾ ವರ್ಸಾಂಚೆ ಜೈಲ್ ಪ್ರಾಪ್ತ್ ಜಾತಾ? ಚೊರಾಂಚಾ ಬಾಯ್ಲ್ ಭುರ್ಗ್ಯಾಂಚಿ ಗತ್ ಕಿತೆಂ?

ಕಳ್ಳನ ಹೆಂಡತಿ ಯಾವತ್ತೂ ಮುಂಡೆ. ಮ್ಹಳ್ಳಿ ಗಾದ್ ಸತ್ ವ ಫಟ್?  ಖಂಡಿತ್ ಜಾವ್ನ್ ‘ಲೂಟ್’ ಕಾದಂಬರಿ ಕೊಂಕ್ಣೆಚಿ ಥ್ರಿಲ್ಲರ್ ಮ್ಹಣ್ಚಾಂತ್ ಕಾಂಯ್ಚ್ ದುಬಾವ್ ನಾ.

■  ಜೆ.ವಿ.ಕಾರ್ಲೊ

Anton Chekhov

ಜಿಲ್ಲಾ ಪ್ರಾಥಮಿಕ್ ಶಾಳಾಂಚೊ ನಿರ್ದೇಶಕ್ ಫ್ಯೋದರ್ ಪೆಟ್ರೊವಿಚ್ ನ್ಯಾಯ್ ನೀತಿಚೊ ಮ್ಹನಿಸ್ ಮ್ಹಣೊನ್ ಸಕ್ಕಡ್ ಪಾತ್ಯೆಲ್ಲೆ. ತ್ಯಾ ಎಕಾ ದಿಸಾ ತಾಂಚಾ ಒಫಿಸಾಂತ್ ಎಕಾ ಕದೆಲಾರ್ ಕಾಂಟಿಯೆ ವಯ್ರ್ ಬಸೊನ್ ಆಸ್ಲೆ ಬರಿಂ ರೆಮೆನಿಸ್ಕಿ ಮ್ಹಳ್ಳೊ ಶಿಕ್ಷಕ್ ಬಸೊನ್ ಆಸ್ಲೊ. ತೊ ಬೋವ್ ಉದ್ವಿಘ್ನ್ ಸ್ಥಿತೆರ್ ಆಸುಲ್ಲೊ.

“ಮ್ಹಾಕಾ ಭಗ್ಸಿ ರೆಮೆನಿಸ್ಕಿ,” ಫ್ಯೋದರ್ ಪೆಟ್ರೊವಿಚಾನ್ ತಕ್ಲಿ ಉಕಲ್ನ್ ದುಕಿಚಾ  ತಾಳ್ಯಾನ್ ರೆಮೆನಿಸ್ಕಿಕ್ ಉದ್ದೇಶುನ್ ಮ್ಹಳೆಂ, “ತುಕಾ ಬಿಲ್ಕುಲ್ ತಾಳೊಚ್ ನಾ! ಅಶೆಂ ಆಸ್ತಾಂ ತುಂವೆ ಭುರ್ಗ್ಯಾಂಕ್ ಲಿಸಾಂವ್ ತರೀ ಕಶೆಂ ಶಿಕಂವ್ಚೆಂ? ಮ್ಹಾಕಾ ಅರ್ಥ್ ಜಾತೆತ್ ನಾ. ಎಕಾಚ್ಛಾಣೆ ತುಜೊ ತಾಳೊ ಕಸೊ ಬಂಧ್ ಪಡ್ಲೊ?”

“ಘಾಮೆವ್ನ್ ಆಸ್ತಾಂ ಥಂಡ್ ಬಿಯರ್ ಪಿಯೆಲ್ಲಿಚ್ ನೀಬ್ ಸರ್!’ ವಿಚಿತ್ರ್ ತಾಳ್ಯಾನ್ ರೆಮೆನಿಸ್ಕಿ ಪುಸ್ಪುಸ್ಲೊ

“ಛೆ..ಛೆ.. ಕಸಲಿ ಲಜ್ ರೆಮೆನಿಸ್ಕಿ! ಚೊವ್ದಾ ವರ್ಸಾಂಚಿ ಸೆವಾ ಅಶೆಂ ಸಮಾಪ್ತ್ ಜಾಂವ್ಚಿ ಮ್ಹಳ್ಯಾರ್?! ಆತಾಂ ಕಿತೆಂ ಕರುಂಕ್ ಚಿಂತ್ಲಾಂಯ್ ರೆಮೆನಿಸ್ಕಿ?”

ರೆಮೆನಿಸ್ಕಿ ಕಾಂಯ್ಚ್ ಉಲಯ್ಲೊ ನಾ. ತಕ್ಲಿ ಪಂದಾ ಘಾಲ್ನ್ ಬಸ್ಲೊ.

“ತುಜಾ ಘರಾ ಕೋಣ್, ಕೋಣ್ ಆಸಾತ್ ರೆಮೆನಿಸ್ಕಿ?”

“ಮ್ಹಜಿ ಬಾಯ್ಲ್ ಆನಿ ದೊಗಾಂ ಧಾಕ್ಟುಲಿಂ ಭುರ್ಗಿಂ ಸರ್.” ರೆಮೆನಿಸ್ಕಿನ್ ಕಷ್ಟಾಂನಿ ಜಾಪ್ ದಿಲಿ.

“ತುಕಾ ಕಿತೆಂ ಮ್ಹಣ್ಚೆಂ ಮ್ಹಳ್ಳೆಂಚ್ ಮ್ಹಾಕಾ ಸಮ್ಜತೆತ್ ನಾ ರೆಮೆನಿಸ್ಕಿ. ಶಿಕ್ಷಕ್ ಜಾವ್ನ್ ಮುಕಾರುಂಕ್ ತುಜಾನ್ ಬಿಲ್ಕುಲ್ ಜಾಂವ್ಚೆಂ ನಾ.. ಪೆನ್ಶನ್ ಘೆಂವ್ಚೆಂ ತಿತ್ಲೆಂ ಸರ್ವಿಸ್ ತುಕಾ ಜಾಂವ್ಕ್ ನಾ.. ತುಜೆಂ ಅದೃಷ್ಟ್‌ಚ್ ಸಮಾ ನಾ ಮ್ಹಣೊನ್‌ಯೀ ಸೊಡುಂಕ್ ಮ್ಹಜೆಂ ಕೊಶೆಡ್ದ್ ಆಯ್ಕಾನಾ. ಚೊವ್ದಾಂ ವರ್ಸಾಂಚಿ ಸೆವಾ ಮ್ಹಳ್ಯಾರೀ ಉಣಿ ನ್ಹಯ್. ತುಂ ಆಮ್ಚೆ ಭಿತೆರ‍್ಲೊಚ್ ನ್ಹಯ್‌ವೇ?…… ಹ್ಯಾ ವಗ್ತಾ ಕಸಲಿ ಪುಣಿ ಕುಮಕ್ ಕರ‍್ಚೆಂ ಮ್ಹಜೆಂ ಕರ್ತವ್ಯ್. ತರೀ, ಕಶೆಂ ಮ್ಹಣೊನ್ ಕಳ್ತೆತ್ ನಾ. ಮ್ಹಜಾ ಬಸ್ಕೆರ್ ಬಸೊನ್ ಥೊಡೊ ವೇಳ್ ಚಿಂತುನ್ ಸಾಂಗ್ ರೆಮೆನಿಸ್ಕಿ. ತುಂ ಕಿತೆಂ ಕರುಂಕ್ ಸಕ್ತೊಯ್?

ಪರ್ತ್ಯಾನ್ ಗೂಂಡ್ ಮೌನ್ ಥೈಂ ರಾಜ್ಲೆಂ.

ನಿರ್ದೇಶಕ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟೊನ್ ಒಫಿಸಾ ಭಿತೆರ್‌ಚ್ ಪಾಸಾಯೊ ಮಾರಿಲಾಗ್ಲೊ. ರೆಮೆನಿಸ್ಕಿ ಆಪ್ಲೆಂ ಅದೃಷ್ಟ್ ಚಿಂತುನ್ ಫಾತ್ರಾ ಬರಿಂ ಬಸೊನ್ ಆಸ್ಲೊ.

ಎಕಾಚ್ಛಾಣೆ ಪೆಟ್ರೋವಿಚ್ ರಾವ್ಲೊ. ತಾಚೆಂ ತೋಂಡ್ ಪ್ರಸನ್ನ್ ಜಾಲೆಂ. ದೊನೀ ಹಾತಾಂಚಿಂ ಬೊಟಾಂ ಸಾಂಗಾತಾ ಮೆಳವ್ನ್, ಉಸಯಿತ್ತ್ ತಾಣೆ ನಿಟ್ಟ್ಯೊ ಕಾಡ್ಲ್ಯೊ.

“ಹಿ ಅಲೋಚನ್ ಮ್ಹಾಕಾ ಪಯ್ಲೆಂಚ್ ಕಿತ್ಯಾಕ್ ಝಳ್ಕಾಲಿ ನಾ?!.. ಹಾಂಗಾ ಆಯ್ಕ್ ರೆಮೆನಿಸ್ಕಿ. ಆಮ್ಚಾ ಅನಾಥ್ ವಿದ್ಯಾರ್ಥಿ ನಿಲಯಾಚೊ ಸೆಕ್ರೆಟರಿ ನಿವೃತ್ತ್ ಜಾಂವ್ಚಾರ್ ಆಸಾ. ತುಕಾ ಮನ್ ಆಸಾ ತರ್ ತ್ಯಾ ಜಾಗ್ಯಾಕ್ ತುಂ ಏಕ್ ಅರ್ಜಿ ಘಾಲ್.”

ಆಪ್ಲೆಂ ಅದೃಷ್ಟ್ ಹ್ಯಾ ನಮುನ್ಯಾರ್ ಉಗ್ತೆಂ ಜಾಯ್ತ್ ಮ್ಹಣೊನ್ ರೆಮೆನಿಸ್ಕಿನ್ ಸಪ್ಣಾಂತೀ ಚಿಂತುಂಕ್ ನಾತ್ಲೆಂ. ತಾಚಾ ಬಾವೊನ್ ಗೆಲ್ಲ್ಯಾ ತೊಂಡಾ ವಯ್ರ್ ಜಿವ್ಸಾಣ್ ಭರೊನ್ ಆಯ್ಲಿ. ವೋಂಟ್ ರೂಂದಾಲೆ.

ಮಾನೆಸ್ತ್ ಪೆಟ್ರೋವಿಚಾಕ್‌ಯೀ ಖುಶಿ ಜಾಲಿ. ಶಿಕ್ಷಕ್ ಜಾಂವ್ ಅನರ್ಹ್ ಜಾಲ್ಲ್ಯಾ ರೆಮೆನಿಸ್ಕಿಕ್ ತಾಣೆ ದುಸ್ರಿ ವಾಟ್ ದಾಕಾಯಿಲ್ಲಿ. ತಾಚಿ ತಕ್ಲಿ ಹಾಳೂ ಜಾಲಿ. ತಾಣೆ ಖುಶೇನ್ ಘರಾ ಕುಶಿಕ್ ಮೆಟಾಂ ಕಾಡ್ಲಿಂ. ಪುಣ್ ತಾಚಿ ಖುಶಿ ಚಡ್ ವೇಳ್ ಬಾಳ್ವಾಲಿ ನಾ. ತೊ ರಾತಿಕ್ ಜ್ಹೆವ್ಣಾಕ್ ಬಸ್ಲೆಲ್ಯಾ ವಗ್ತಾ ತಾಚಾ ಬಾಯ್ಲೆನ್ ಸಂಭ್ರಮಾನ್ ಸಾಂಗ್ಲೆಂ: “ಆಜ್ ಘರಾ ಕೋಣ್ ಆಯ್ಲಿಂ ಜಣಾಂತ್ವೇ ತುಮಿಂ?…” ಪೆಟ್ರೋವಿಚಾನ್ ಶ್ರೀಮತಿಚೆಂ ತೊಂಡ್ ಪಳೆಲೆಂ. “ಶ್ರೀಮತಿ ಸರ್ಗೆಯ್ ನೈನಾ ಯೆವ್ನಾ!!.. ಭಾಯ್ರ್ ಸರ್ತಾನಾ ಏಕ್ ವಿಷಯ್ ತುಮ್ಚಾ ಕಾನಾಂಕ್ ಘಾಲುಂಕ್ ತಿಣೆ ಉಪ್ಕಾರ್ ಮಾಗ್ಲೊ. ತಿ ಕೋಣ್‌ಗೀ ಎಕಾ ತರ್ನಾಟ್ಯಾ ವಿಶಿಂ ಸಾಂಗ್ತೆತ್ ಆಸ್ಲಿ. ತುಮ್ಚಾ ಒಫಿಸಾಂತ್ ಏಕ್ ಹುದ್ದೊ ಖಾಲಿ ಜಾಂವ್ಚಾರ್ ಆಸಾ ಹಿಂ?”

“ತೆಂ ನೀಜ್. ಪುಣ್ ತೊ ಹುದ್ದೊ ಎದೊಳ್‌ಚ್ ಭರ್ತಿ ಜಾಲಾ!.. ನೈಂ’ಸ್ತಾಂ ನತಾಶಾ ತುಂ ಬರೆಂ ಕರ‍್ನ್ ಜಣಾಂಯ್, ಶಿಫಾರಾಸ್ ಘೆವ್ನ್ ಆಯ್ಲೆಲ್ಯಾಂಕ್ ಹಾಂವ್ ಕೆದಿಂಚ್ ಲಾಗ್ಗಿಂ ಘೆ ನಾ!”

“ಹಾಂವ್ ಜಣಾ ಸಾಯ್ಬಾ! ಪುಣ್ ನೈನಾ ಮ್ಹಣ್ತಾನಾ ತುಮಿಂ ಚಿಕ್ಕೆ ಸೊಡ್‌ದೊಡ್ ಕರ‍್ಚೆಂ ಬರೆಂ. ತಾಂಚೆ ಕುಟಾಮ್ ಆಮ್ಕಾಂ ಬೋವ್ ಲಾಗ್ಶಿಲೆಂ. ಎದೊಳ್ ಪರ್ಯಾಂತ್ ತಾಣಿ ಆಮ್ಚೆ ಲಾಗ್ಗಿಂ ಕಸಲೊಚ್ ಉಪ್ಕಾರ್ ಮಾಗೊಂಕ್ ನಾ. ತುಮಿಂ ಜಾಯ್ನಾ ಮ್ಹಳ್ಯಾರ್ ತಿಚೆಂ ಮನ್ ಕ್ಹೊಡು ಜಾಂವ್ಕಾಸಾ!”

“ತಿಣೆ ಶಿಫಾರಾಸ್ ಕೆಲ್ಲೊ ತರ್ನಾಟೊ ಕೋಣ್ ಖೈಂ?”

“ತಾಚೆಂ ನಾಂವ್ ಪೊಲ್ಝುಯಿನ್ ಖಂಯ್.”

“ಕೋಣ್, ಪೊಲ್ಝುಯಿನ್?!… ನವ್ಯಾ ವರ್ಸಾಚಾ ಪಾರ್ಟೆಂತ್ ಗಾಯ್ತಾಲೊ ತರ್ನಾಟೊ?.. ತೊಚ್ ಜಾಲ್ಯಾರ್ ಖಂಡಿತ್ ಸಾಧ್ಯ್ ನಾ!” ಪೆಟ್ರೋವಿಚ್ ಜ್ಹೆವಾಣ್ ಅರ್ಧ್ಯಾಕ್‌ಚ್ ಸೊಡ್ನ್ ಉಟೊನ್ ಹೊಲಾಕ್ ಗೆಲೊ. ತಾಚಿ ಮತ್ ಕದ್ವಳ್‌ಲ್ಲಿ.

ಎಕ್ಲೊ ತರ್ನಾಟೊ ಸ್ತ್ರೀಯಾಂಚಿ ಶಿಫಾರಾಸ್ ಘೆವ್ನ್ ಕಾಮಾಕ್ ಅರ್ಜಿ ಘಾಲ್ತಾ ಮ್ಹಳ್ಯಾರ್ ತೊ ಖಂಡಿತ್ ಜಾವ್ನ್ ನಾಲಾಯೆಕ್. ತಾಕಾ ಸ್ವತಃ ಯೇವ್ನ್ ಕಾಮ್ ವಿಚಾರುಂಕ್ ಕಿತೆಂ ಸಂಕಟ್? ತೊ ಆನೀಕೀ ಉಸ್ಮೊಡುನ್ಂಚ್ ಆಸುಲ್ಲೊ. ತ್ಯಾಚ್ ವಗ್ತಾ ತಾಚಿ ದೀಶ್ಟ್ ಟೀಪೊಯ್‌ಚೆರ್ ಆಸ್ಲೆಲ್ಯಾ ಪತ್ರಾಚೆರ್ ಗೆಲಿ. ತಾಣೆ ಲೊಕಾಟೊ ಪಿಂಜುನ್ ಭಿತೆರ್‌ಲೆಂ ಕಾಗತ್ ಭಾಯ್ರ್ ವೊಡುನ್ ವಾಚುಂಕ್ ಸುರು ಕೆಲೆಂ.

“ಡಿಯರ್ ಪೆಟ್ರೋವಿಚ್,…” ಮೆಯರಾಚಾ ಪತ್ನೆನ್ ಲಿಖ್‌ಲ್ಲೆಂ. “… ತುಮಿಂ ಏಕ್ ಪಾವ್ಟಿಂ ಮ್ಹಳ್ಳೆಂ: ಮ್ಹನ್ಶಾಂಕ್ ವಳ್ಕೊಂಚಾಕ್ ತುಂ ಬೋವ್ ಚತುರ್! ಹೆಂ ಮ್ಹಾಕಾ ಅಜೂನ್ ಉಡಾಸ್ ಆಸಾ.! ಹ್ಯಾ ತುಜಾ ಆಭಿಪ್ರಾಯೆಚಿ ಪರೀಕ್ಷಾ ಕರುಂಕ್ ತುಕಾ ಏಕ್ ಅವ್ಕಾಸ್ ಉದೆಲಾ. ದೋನ್ ದಿಸಾಂ ಭಿತೆರ್ ಪೊಲ್ಝುಯಿನ್ ಮ್ಹಳ್ಳೊ ತರ್ನಾಟೊ ಕಾಮ್ ವಿಚಾರುನ್ ತುಜೆ ಲಾಗ್ಗಿಂ ಯೆತಾ. ತುಮ್ಚಾ ಇಸ್ಕೊಲಾಂತ್ ಸೆಕ್ರೆಟರಿಚೊ ಹುದ್ದೊ ಖಾಲಿ ಜಾಂವ್ಚಾರ್ ಆಸಾ ಖಂಯ್. ತ್ಯಾ ಜಾಗ್ಯಾಕ್ ಹಾಂವೆ ಸಾಂಗ್ಲೊಲೊ ತರ್ನಾಟೊ ಎಕ್ದಂ ಲಾಯೆಕ್ ಜಾವ್ನಾಸಾ. ತ್ಯಾ ತರ್ನಾಟ್ಯಾಕ್ ಏಕ್ ಅವ್ಕಾಸ್ ದೀವ್ನ್ ಪಳೆ. ತುಂ ಖಂಡಿತ್ ಚುರ್ಚುರ‍್ಚೊ ನಾಂಯ್..”

“ಸಾಧ್ಯ್ ನಾ, ಸಾಧ್ಯ್ ನಾ!.. ಪೆಟ್ರೋವಿಚ್ ದಾಂತ್ ಚಾಬೊನ್ ಬೊಬಾಟ್ಲೊ.

ತ್ಯಾ ದಿಸಾ ಥಾವ್ನ್  ಪೆಟ್ರೋವಿಚಾಕ್ ಟಪಾಲಾರ್ ಪೊಲ್ಝುಯಿನಾಕ್ ಶಿಫಾರಾಸ್ ಕರುನ್ ಪತ್ರಾಂಚಿ ರಾಸ್‌ಚ್ ಯೇವ್ನ್ ಪಡ್ಲಿ. ನಿಮಾಣೆ ಎಕಾ ದಿಸಾ ಕಾಳ್ಯಾ ಸೂಟಾರ್ ಸೊಭೊನ್ ಪೊಲ್ಝುಯಿನ್ಂಚ್ ಆಯ್ಲೊ. ತಾಕಾ ನವ್ಕರಿ ಕರ‍್ಚಿ ಗರ್ಜ್ ತಾಚಾ ತೊಂಡಾರ್ ಬಿಲ್ಕುಲ್ ದಿಸಾನಾತ್ಲಿ.

“ಕಾಮ್ ವಿಚಾರ‍್ನ್ ಯೆತೆಲ್ಯಾಂಕ್ ಹಾಂವ್ ಖಂಡಿತ್ ಘರಾ ಭೆಟಾನಾ.” ಫ್ಯೋದರ್ ಪೆಟ್ರೋವಿಚ್ ರಾಗಾನ್ ಮ್ಹಣಾಲೊ.

“ಆಮ್ಚಾ ದೊಗಾಂಯ್ಚಾ ವಳ್ಕಿಚ್ಯಾನಿಂ ಘರಾಚ್ ವಚೊನ್ ತುಮ್ಕಾಂ ಮೆಳೊಂಕ್ ಸಾಂಗ್ಲಾಂ ಸರ್.”

“ಹೂಂ..” ತಾಚೆ ಪರ್ಜಳ್ಚೆ ಕಾಳೆ ಮೊಚೆ ದೆಕೊನ್ ಪೆಟ್ರೋವಿಚಾನ್ ಮ್ಹಳೆಂ.. “ಹಾಂವ್ ಜಣಾಸ್ಚೆ ಬರಿಂ ತುಜೊ ಬಾಪುಯ್ ಅನ್ಕೂಲ್‌ವಂತ್. ತುಕಾ ಹ್ಯಾ ಪುಚ್ಚಟ್ ಸಾಂಬಾಳಾಚಿ ಗರ್ಜ್‌ಚ್ ಆಸ್ಚಿ ನಾ!”

“ಹಾಂವ್ ಸಾಂಬಾಳಾಚಾ ಅಬ್ಳಾಯೆಕ್ ಲಾಗೊನ್ ಹ್ಯಾ ಕಾಮಾಕ್ ಯೇಂವ್ಕ್ ನಾ ಸರ್. ಹೆಂ ಏಕ್ ಸರ್ಕಾರಿ ಕಾಮ್ ಮ್ಹಳ್ಳೆಲ್ಯಾ ಪ್ರತಿಷ್ಠೆಕ್ ಲಾಗೊನ್ ಸರ್, ಇತ್ಲೆಂಚ್.”

“ತುಕಾ ಎಕಾಚ್ ಹಫ್ತ್ಯಾನ್ ಹ್ಯಾ ಕಾಮಾಚಿ ಉಬ್ಗೊಣ್ ಯೆವ್ನ್ ರಾಜಿನಾಮೊ ದೀವ್ನ್ ವೆತೊಲೊಯ್. ಕಿತ್ಲೇಶ್ಯಾ ಲೊಕಾಕ್ ಹಿ ನವ್ಕರಿ ಜೀವನ್ ಮರ್ಣಾಚಾ ಸಮಸ್ಯಾಂ ಥಾವ್ನ್ ಸುಟೊಂಕ್ ಉಪ್ಕಾರ್ತಾ. ಕಿತ್ಲೇಶೆ ದುಬ್ಳೆ…”

“ಹಾಂವ್ ಖಂಡಿತ್ ಜಾವ್ನ್ ರಾಜಿನಾಮೊ ದೀನಾ ಸರ್, ಮ್ಹಜೆರ್ ಭರ್ವಸೊ ಧವರಾ.”

ಫ್ಯೋದರ್ ಪೆಟ್ರೋವಿಚಾಚೆ ದೊಳೆ ಉಜೊ ವೊಂಕಿ ಲಾಗ್ಲೆ. “ತರ್ ತುಂ ಕೊಣಾಚಿಚ್ ಶಿಫಾರಾಸ್ ಘೆನಾಸ್ತಾಂ ಕಿತ್ಯಾಕ್ ಶೀದಾ ಸಂದರ್ಶನಾಕ್ ಆಯ್ಲೊ ನಾಂಯ್? ತೆಂ ವೀ ಸ್ತ್ರೀಯಾಂಚಿ ಶಿಫಾರಾಸ್ ಘೆವ್ನ್”

“ಸರ್ ಶಿಪಾರಾಸ್ ಪತ್ರ್ ತುಮ್ಚೆರ್ ಪ್ರಭಾವ್ ಘಾಲುಂಕ್ ಸಕ್ತಾ ಮ್ಹಣ್ ಹಾಂವ್ ಪಾತ್ಯೆಲ್ಲೊಂ. ಸ್ತ್ರೀಯಾಂಚಿ ಶಿಫಾರಾಸ್ ತುಮ್ಕಾಂ ಬರಿ ಲಾಗ್ಲಿ ನಾ ತರ್ ಹಾಂಗಾ…” ತಾಣೆ ಕೊಟಾ ಭಿತೆರ‍್ಲ್ಯಾ ಬೊಲ್ಸಾ ಥಾವ್ನ್ ಏಕ್ ಪತ್ರ್ ಕಾಡ್ನ್ ಪೆಟ್ರೋವಿಚಾಕ್ ದಿಲೆಂ. “ಹೆಂ ಚಿಕ್ಕೆ ವಾಚಾ ಸರ್…”

ಸರ್ಕಾರಿ ಶೈಲೆರ್ ಆಸ್ಲೆಲ್ಯಾ ತ್ಯಾ ಪತ್ರಾ ಸಕಯ್ಲ್ ಪ್ರಾಂತೀಯ್ ಗವರ್ನರಾಚಿ ದಸ್ಕತ್ ಆಸುಲ್ಲಿ! ’ಬೋವ್ಶಾ ಕೊಣೆಂಗಿ ಸ್ತ್ರೀಯೆನ್ ಕೆಲ್ಲ್ಯಾ ಶಿಫಾರಾಸೆಕ್ ಲಾಗೊನ್ ಗವರ್ನರಾನ್ ವಾಚಿನಾಸ್ತಾಂಚ್ ದೊಳೆ ಧಾಂಪುನ್ ದಸ್ಕತ್ ಘಾಲ್ಯಾ!’ ತಾಣೆ ಚಿಂತ್ಲೆಂ.

“ಜಾಯ್ತ್. ಫಾಲ್ಯಾಂ ಸಾಕಾಳಿಂ ಅರ್ಜಿ ಘೆವ್ನ್ ಒಫಿಸಾಕ್ ಯೇ. ಘರಾ ನ್ಹಯ್.”

ತೊ ಗೆಲ್ಯಾ ನಂತರ್ ಫ್ಯೋದರ್ ಪೆಟ್ರೋವಿಚಾನ್ ದಾಂತ್ ಕಿರ್ಲುನ್ ಧರ‍್ಣಿಕ್ ಖೊಟ್ ಮಾರ‍್ಲಿ. ತೊ ಗೆಲ್ಲ್ಯಾ ವಾಟೆಕ್ ಥುಕುನ್ , “ಲಜ್ಮಾಂಡೊ! ನಾಲಾಯೆಕ್ ಗಟಾರಾಚೊ ಕಿಡೊ!… ಹಾಂವ್ ಮಾತ್ರ್ ಮೂರ್ಖ್ ಜಾಲೊಂ!” ಮ್ಹಣೊನ್ ಜೋರಾನ್ ಬೊಬಾಟ್ಲೊ.

ಪೊಲ್ಝುಯಿನ್ ತೆವ್ಶಿನ್ ಗೆಲ್ಲೆ ಬರಿಂಚ್ ಏಕ್ ಸ್ತ್ರೀ ಭಿತೆರ್ ಘುಸ್ಲಿ. ತಿ, ತಾಚಾ ಕೇಂದ್ರಿಯ್ ಒಫಿಸಾಚಾ ಮುಕೆಲ್ ಲೆಖಾಂ ತಪಸ್ಣಾರಾಚಿ ಪತಿಣ್ ಜಾವ್ನಾಸ್ಲಿ. ಪೆಟ್ರೋವಿಚ್ ಲಜೆನ್ ತಾಂಬ್ಶೆಲೊ.

“ತುಜೆ ಥಾವ್ನ್ ಏಕ್ ಲ್ಹಾ…..ನ್ಶೆಂ ಕಾಮ್ ಜಾಯ್ಜೆ ಆಸುಲ್ಲೆಂ ನೆ ಪೆಟ್ರೋವಿಚ್..?” ಏಕ್ ಅಪೂರ್ವ್ ಹಾಸೊ ಪಾಟಾಯಿತ್ತ್ ತಿ ಮ್ಹಣಾಲಿ, “ಹಾಂವೆ ಸಾಂಗ್ಚೆಂ ಚೀತ್ ದೀವ್ನ್ ಆಯ್ಕ್ ಪೆಟ್ರೋವಿಚ್, ತುಜಾ ಡಿಪಾರ್ಟ್‌ಮೆಂಟಾಂತ್ ಏಕ್ ಹುದ್ದೊ ಖಾಲಿ ಆಸಾ ಖಂಯ್. ಫಾಲ್ಯಾಂ ನಾ ಪೊರ್ವಾಂ ಎಕ್ಲೊ ಪೊಲ್ಝುಯಿನ್ ನಾಂವಾಚೊ ಚೆರ್ಕೊ ತುಜೆ ಸರ್ಶಿಂ ಯೆತೊಲೊ… ತಿ ಉಲವ್ನ್ಂಚ್ ಆಸುಲ್ಲಿ. ಪೆಟ್ರೋವಿಚ್ ಇಮಾಜಿ ಬರಿಂ ನಿಶ್ಚಲ್ ಬಸ್‌ಲ್ಲೊ. ತಾಚೆ ದೊಳೆ ಪಯ್ಸ್ ಶೂನ್ಯಾಂತ್ ಖಂಚ್‌ಲ್ಲೆ. ಶಿಷ್ಟಾಚಾರಾಕ್ ಲಾಗೊನ್ ತಾಚಾ ತೊಂಡಾರ್ ಕೃತಕ್ ಹಾಸೊ ದಿಸ್ತಾಲೊ.

ದುಸ್ರೆ ದಿಸಾ ರೆಮಿನಿಸ್ಕಿ ಅರ್ಜಿ ಘೆವ್ನ್ ಯೆತಾನಾ ಪೆಟ್ರೋವಿಚಾಕ್ ಕಿತೆಂ ಕರ‍್ಚೆಂ ಮ್ಹಣೊನ್ ಸಮ್ಜಲೆಂ ನಾ. ತಾಣೆ ಅಶೆಂಚ್ ಆಪ್ಲ್ಯಾ ಗೊವೆತಾಂತ್ ಕಿತೆಂಗಿ ಸೊದುನ್ ಆಸ್ಚೆ ಬರಿಂ ವೇಳ್ ಪಾಶಾರ್ ಕೆಲೊ. ತ್ಯಾ ಎಕಾ ದಿಸಾ ಕಿತೆಂ ಸರ್ವ್ ಘಡ್ಲೆಂ ಮ್ಹಣೊನ್ ತೊ ವಿವರುಂಕ್ ತಯಾರ್ ಜಾಲೊ ತರೀ ತಾಚಾ ಜೀಬೆನ್ ಸಹಕಾರ್ ದಿಲೊ ನಾ. ತಾಕಾ ರೆಮಿನಿಸ್ಕಿಚೆಂ ಭಗ್ಸಾಣೆ ಮಾಗೊಂಕ್ ಯೀ ಜಾಲೆಂ ನಾ. ತಾಚಿಂ ಕಾನಾಂ ಫುಡಾಂ ಹುನ್ ಜಾಲ್ಲಿಂ. ಅಸಹಾಯಕತೆನ್, ತಾಚಾಚ್ ಒಫಿಸಾಂತ್, ತಾಚಾಚ್ ನವ್ಕರಾ ಮುಕಾರ್!!.. ತಾಕಾ ರಾಗ್ ಚಡೊನ್ ಆಯ್ಲೊ. ತೊ ಅಮಾಲಾರ್ ಆಸ್ಲೆಲ್ಯಾ ಬರಿಂ ತೊಂಡಾಕ್ ಆಯಿಲ್ಲೆಂ ಬಡ್ಬಡೊಂಕ್ ಲಾಗ್ಲೊ. ಮಾನೆಸ್ತ್ ಫ್ಯೋದರ್ ಪೆಟ್ರೊವಿಚ್ ಎಕಾಚ್ಛಾಣೆ ಉಭಿ ರಾವ್ಲೊ. ತೊ ರಾಗಾನ್ ಆಂಕುಡ್ತಾಲೊ. ಮೆಜಾಚೆರ್ ಬಳಾನ್ ಮೂಟ್ ಮಾರ‍್ನ್ ರೆಮೆನಿಸ್ಕಿ ಕುಶಿಕ್ ಘುಂವ್ಲೊ. ತಾಕಾ ಮಧ್ಲೆಂ ಬೋಟ್ ಜೊಕುನ್,

“ನಿಕಾಳ್ ಹಾಂಗಾಚೊ ದಳ್ದಿರ‍್ಯಾ! ಮ್ಹಜೊ ಮೆಂದು ಖಾಯ್ನಾಕಾ!! ದಳ್ಚಿರ‍್ಯಾ, ತುಕಾ ಮ್ಹಜೆ ಲಾಗ್ಗಿಂ ಕಸಲೆಂಚ್ ಕಾಮ್ ನಾ!!!” ಅಶೆಂ ಗರ್ಜಾಲೊ.

ರೆಮೆನಿಸ್ಕಿ ಕಾಲುಬುಲೊ ಜಾಲೊ.

ಕಾಂಯ್ಚ್ ಉಲಯ್ನಾಸ್ತಾಂ ತಕ್ಲಿ ಬಾಗಾವ್ನ್ ಶೀದಾ ಉಟೊನ್ ಗೆಲೊ.

****

{ Anton Chekov ಹಾಚಾ Ladies ಕಾಣ್ಯೆಚೊ ತರ್ಜುಮೊ }

ಹೆರೊಲ್ಪಿಯುಸ್ 1970ವ್ಯಾ ಇಸ್ವೆ ಥಾವ್ನ್ ಸರಾಗ್ ಬರಯ್ತೇ ಆಸಾ. ತಾಚಿಂ ಲಿಖಿತಾಂ ಪ್ರಕಟ್ ಕರಿನಾತ್ಲೆಂ ಪತ್ರ್ ಬೋವ್‌ಶಾ ಕೊಂಕ್ಣೆಂತ್ ನಾ, ಆನಿ ತಾಣೆ ಬರಂವ್ಚೆ ತಿತ್ಲೆಂ ಫಾಯ್ಸ್ ಕರ್ತೆಲಿಂ ಪತ್ರಾಂಯ್ ನಾಂತ್! ಮ್ಹಳ್ಯಾರ್ ಖಂಡಿತ್ ಚೂಕ್ ಜಾಂವ್ಚೆಂ ನಾ. ತೊ ಮೊಸ್ತು ಶಿಸ್ತೆಚೊ ಮ್ಹನಿಸ್. ತಾಚಾ ಹರ್ ಪ್ರಕಟಿತ್, ಅಪ್ರಕಟಿತ್ ಬರವ್ಪಾಚೊ ದಾಕ್ಲೊ ತಾಣೆ ಸಾಂಬಾಳ್ಳಾ. ಕಾಣ್ಯೊ, ಕಾದಂಬರಿ, ಲೇಕನಾಂ, ವಿನೋದ್, ನಾಟಕ್, ವಿಡಂಬನ್ ಅಶೆಂ. . . ತಾಣೆ ಸಾಂಬಾಳ್ನ್ ದವರ್ಲೆಲ್ಯಾ ಪ್ರಕಟಿತ್, ತಶೆಂ ಅಪ್ರಕಟಿತ್ (ಪತ್ರಾಂಕ್ ಧಾಡ್ಲ್ಯಾರೀ) ಬರವ್ಪಾಂಚೊ ದಾಳೊ ಪಳೆವ್ನ್ ಹಾಂವ್ ಶಿರಿಂ ಚುಕ್ಲೊಂ. 35 – 40 ವರ್ಸಾಮ್ ಆದಿಂ ಮುದ್ರಿತ್ ಜಾಲ್ಲ್ಯಾ ಪತ್ರಾಂಚ್ಯೊ ಪ್ರತಿ ಹಳ್ದುವ್ಯಾ ರಂಗಾಕ್ ಬದ್ಲಾಲ್ಲ್ಯೊ. ಹ್ಯಾ ಪ್ರತಿಯಾಂಚೆ ಆವ್ಕ್ ಕಿತ್ಲೆಂ ಹಾಂವ್ ನೆಣಾ. ಹೆರೊಲ್ಪಿಯುಸ್ ಮ್ಹಜಾಕೀ ದೋನ್ ವರ್ಸಾಂ (ಪ್ರಾಯೆನ್) ಆಧುನಿಕ್. ಹೆಂ ಸಕ್ಕಡ್ Scan  ಕರ್ನ್ ಸಿ.ಡಿ.ನಿಂ ಸಾಂಬಾಳ್ನ್ ಧವರ್ ಮ್ಹಣೊನ್ ಹಾಂವೆ ತಾಕಾ ಸಲಹಾ ದಿಲಿ! ದಯಾಕರ್ನ್ ಹಾಚಾಕೀ ಸವಾಯ್ ಆನಿ ಬರಿ ಸಲಹಾ ಕಂಪ್ಯೂಟರ್ Savvy ಪರಿಣಿತಾನಿಂ ತಾಕಾ ದಿಲ್ಯಾರ್ ಬರೆಂ.

ಹೆರೊಲ್ಪಿಯುಸಾನ್ ಕಸಲ್ಯಾ ವಿಶ್ಯಾಂತ್ ಬರಂವ್ಕ್ ನಾ? ತೊ ಏಕ್ all rounder. ತೊ ಮೊಸ್ತು ವಾಚ್ತಾ. ತಾಚಾ ಅಭಿರುಚೆಚೆಂ ಕಾತರ್ನ್ ಧವರ್ತಾ. ತಾಚಾ ಲೇಖನಾನಿಂ ವಾಪಾರ್ತಾ. ಆಯ್ಚಾ ಲೇಕಕಾಂ ಮದೆಂ ಇತ್ಲೆಂ home work ಹ್ಯಾ ದಿಸಾಂನಿ ಪಳೆಂವ್ಕ್ ಮೆಳ್ಚೆಂಚ್ ಅಪ್ರೂಬ್.

ಹಾಂವೆ ತಾಕಾ ವಿಚಾರ್ಲೆಂ:

ದಾಯ್ಜಿ ದುಬಾಯ್ ಪುರಸ್ಕಾರ್ ಜೊಡ್ಲೆಲ್ಯಾ ಸಂದರ್ಬಿಂ ತುಕಾ ಕಸೆಂ ಭಗ್ತಾ? ಪುರಸ್ಕಾರ್ ಎಕಾ ಸಾಹಿತಿಕ್ ಕಿತ್ಲ್ಯಾ ಮಹತ್ವಾಚೊ?

ಮ್ಹಜ್ಯಾ ಚಾರ್ ದಶಕಾಂಚಾ ಕೊಂಕ್ಣಿ ಶೆತಾಂತ್ಲ್ಯಾ ವಾವ್ರಾಕ್ ವೇಳ್ ಕರುನ್ ತರೀ ಮಾನ್ಯತಾ ಲಾಬ್ಲಿ ಮ್ಹಳ್ಳೊ ಭರ್ಪೂರ್ ಆನಂದ್ ಭಗ್ತಾ. ‘ದಾಯ್ಜಿ ದುಬಾಯ್’ಚಾ ಹರ್ ಹುದ್ದೆದಾರಾಂಕ್ ಹಾಂವ್ ಧನ್ಯವಾದ್ ಅರ್ಪಿತಾಂ. ಪುರಸ್ಕಾರಾ ಖಾತಿರ್ ಹಾಂವ್ ಬರಯ್ನಾತ್‌ಲ್ಲೊಂ. ನಾಂವ್ ಜೊಡ್ಚಿ ವ ಪಯ್ಶೆ ಕಮಾಂವ್ಚಿ ಆಶಾಯ್ ಮ್ಹಾಕಾ ನಾತ್ಲಿ. ಸಾಹಿತಾಂತ್ ಎಕಾ ಅಂತಸ್ತಾಕ್ ಪಾವ್‌ಲ್ಲಿ ತೃಪ್ತಿ ಆಸ್‌ಲ್ಲೆ ವರ್ವಿಂ ಹೆರಾಂ ಲೇಕಕಾಂ-ಕವಿಂಕ್ ಅವ್ಕಾಸ್ ಕರುನ್ ದಿಂವ್ಚೆ ಖಾತಿರ್ ಹಾಂವೆಂ ಕಥಾ-ಕವಿತಾ ಸ್ಪರ್ಧ್ಯಾಂನಿಂ ಭಾಗ್ ಘೆಂವ್ಚೆಂಯ್ ರಾವಯಿಲ್ಲೆಂ. ಅಚಾನಕ್ ಯೆದೊ ವ್ಹಡ್ ಪುರಸ್ಕಾರ್ ಮೆಳ್‌ಲ್ಲೆ ಧಾದೊಸ್ಕಾಯೆ ವರ್ವಿಂ ಹುರುಪ್ ಚಡ್ಲಾ. ಹುಮೆದ್ ವಾಡ್ಲ್ಯಾ. ಮ್ಹಾಕಾ ದಾಯ್ಜಿ ದುಬಾಯ್ ಪ್ರಶಸ್ತಿ ಫಾವೊ ಜಾಲ್ಯಾ ಮ್ಹಳ್ಳಿ ಖಬರ್ ರಾತಿಕ್ ಮೊಬಾಯ್ಲಾರ್ ಪಾವಿತ್ ಜಾಲ್ಲಿ. ಉತ್ತೇಜನ್ ಲಾಬ್ಲೆಂ ಆನಿ ತ್ಯಾ ಸಂತೊಸಾನ್ ಹಾಂವೆಂ ಮುಕ್ಲ್ಯಾ ತೀನ್ ದಿಸಾಂನಿ ಏಕ್ ಕಥಾ ಆನಿ ಏಕ್ ಲೇಕನ್ ಬರಯ್ಲೆಂ. ( ಕಥಾ ಎಚ್ಚೆಮಾಚ್ಯಾ ಕಿಟಾಳಾರ್ ಎದೊಳ್‌ಚ್ ಫಾಯ್ಸ್ ಜಾಲ್ಯಾ)  ಖರೊ ಸಾಹಿತಿ ಪುರಸ್ಕಾರಾ ಖಾತಿರ್ ಕೆದಿಂಚ್ ಬರಯ್ನಾ.

ಧಾ ಕಾದಂಬರಿ, ದೊನ್ಶ್ಯಾಂ ಲಾಗ್ಗಿಂ ಮಟ್ವ್ಯೊ ಕತಾ, ದೊನ್ಶ್ಯಾಂ ವರ್ವಿಂ ಚಡ್ ಕವಿತಾ, ನಾಟಕ್… ತುಕಾ ತೃಪ್ತಿ ಜಾಲ್ಲಿ ಖಂಚಾ ಶೆತಾಂತ್?

ತಣಾ ಮುಳಾಂತ್ ಹಾಂವ್ ಕಾಣಿಯಾಂಗಾರ್. ಕಥಾ ಬರಂವ್ಚೊ ಹವ್ಯಾಸ್ ಜಾವ್ನ್ ಘೆತ್‌ಲ್ಲೊ ತೊ ಉಪ್ರಾಂತ್ ಕವಿತಾ, ಕಾದಂಬರಿ, ನಾಟ್ಕುಳೆ, ಹಾಸ್ಕುಳೆ ಆನಿ ಲೇಕನಾಂ ಬರಂವ್ಚಾಂತ್ ತಸೆಂ ಸಬ್ದಾಂ-ಗೊಂದೊಳ್ ರಚ್ಚಾಂತ್ ಮುಂದರುನ್ ಗೆಲೊ. ಆತಾಂ ಚಡ್ತಾವ್ ಸಕಾಲಿಕ್, ಮಾಹೆತ್‌ಭರಿತ್, ಜಾಣ್ವಾಯೆಚಾ ಲೇಕನಾಂಚೆರ್ ಚಡಿತ್ ಧ್ಯಾನ್ ದಿತೇ ಆಸಾಂ.

ತುಜ್ಯಾ  ಕಾದಂಬರಿ ವ ಇತರ್ ಪ್ರಕಾರಾಂತ್ ತುಕಾ ಮಹತ್ವಾಚಿ ಮ್ಹಣ್ ದಿಸ್ಚಿ ಕೃತಿ ಖಂಚಿ, ಕಿತ್ಯಾಕ್?

‘ದೋನ್ ಥೆಂಬೆ ದುಕಾಂ’ ಕಾದಂಬರಿ ಕಾನಡಿಂತ್ ತಸೆಂ ದೋನ್ ವರ್ಸಾಂ ಉಪ್ರಾಂತ್ ದೇವ್‌ನಾಗರಿ ಲಿಪಿಂತ್ ಫಾಯ್ಸ್ ಜಾವ್ನ್ ಮ್ಹಾಕಾ 20 ವರ್ಸಾಂಚೆ ಪ್ರಾಯೆರ್‌ಚ್ ಗೊಂಯ್ಚಿ ಪ್ರಶಸ್ತಿ ಲಾಬಂವ್ಕ್ ಪಾವ್‌ಲ್ಲಿ. ಪೂಣ್ ಬೋವ್ ಬೆಜಾರಾಯ್ ಭಗ್ತಾ ಕೀ ‘ಸಾಳಕ್’ ಪ್ರಕಾಶನಾಚಾ ಹ್ಯಾ ಪುಸ್ತಕಾಚಿ ಏಕ್ ಸಯ್ತ್ ಪ್ರತಿ ಮಜೆ ಲಾಗಿಂ ನಾ. ತೆಚ್ ಪರಿಂ ಸಾಳಕಾನ್ ಪ್ರಗಟ್ ಕೆಲ್ಲಿ ‘ಮೊಜಾ ಸಪ್ಣಾಚಿ ರಾಣಿ’ ಕಾದಂಬರಿಯೀ ಮ್ಹಜೆ ಥಾವ್ನ್ ಕೊಣೆಂಗಿ ವಾಚುಂಕ್ ವ್ಹೆಲ್ಲಿ  ಚುಕಾಮುಕಿಂ ಪಾಟಿಂ ಪಾವಿತ್ ಕರುಂಕ್ ನಾಸ್ತಾಂ ಮ್ಹಜೆ ಲಾಗ್ಗಿಂ ನಾ ಜಾಲ್ಯಾ. ಮ್ಹಜ್ಯಾ ಕಾಣ್ಯಾಂ ಪಯ್ಕಿ ಮ್ಹಾಕಾ ಮಹತ್ವಾಚ್ಯೊ ಮ್ಹಣ್ ದಿಸ್ಚ್ಯೊ ಕಥಾ ಕಾಂಯ್ ಪಂಚೀಸಾಂ ವಯ್ರ್ ಆಸ್ತಿತ್. ಜ್ಯೊ ಸತ್ ಘಡಿತಾಂಚೆರ್ ಹೊಂದ್ವೊನ್ ಬರಯಿಲ್ಲ್ಯೊ. ದೆಕುನ್ ಹಾಂವ್ ಖಂಚಾಯ್ ಎಕಾಕ್ ಮೆಕ್ಳೆಂ ಕರಿನಾಂ.

ತುಕಾ ಬರಂವ್ಕ್ ಪ್ರೇರಣ್ ಆನಿ ತುಜ್ಯಾ ಬರ್ಪಾಚೊ ಉದ್ದೇಶ್ ಕಿತೆಂ?

ಮತಿಂತ್  ಕಥೆಚೆಂ ರೂಪ್ ಮಾಂಡುನ್ ಯೆತಾನಾ ತೆಂ ರಫ್ ಕಾಗ್ದಾಚೆರ್ ಗಿಚ್ಚುನ್ ಸೊಡ್ತಾಂ ಆನಿ ದೀಸ್-ರಾತ್ ತಾಚೆಂ ಪೊಸಾಪ್ ಕರುನ್ ಜಿವಾಳ್ ಕರ್ನ್ ಫಾಂಟೆ ಹಾಡಂವ್ಕ್ ಪಳೆತಾಂ. ತೃಪ್ತಿ ಭಗ್ಲಿ ತರ್, ಕರಡ್ ಪ್ರತಿ ತಯಾರ್ ಕರ್ತಾಂ. ಏಕ್ ಕಥಾ ತೀನ್-ಚಾರ್ ಪಾವ್ಟಿಂ ತಿದ್ವುನ್ ಬರಂವ್ಚೆಂಚ್ ಚಡ್. ಬರಂವ್ಚಾಕ್ ಕಾಂಯ್ ಉದ್ದೇಶ್ ನಾ. ದೆವಾನ್ ದಿಲ್ಲೆಂ ದೆಣೆ ಗಳ್ಸಿತಾಂ. ವಾಚ್ಪ್ಯಾಂಕ್ ಪಸಂದ್ ಜಾತಾ ಮ್ಹಣ್ ಆನಂದ್ ಭಗ್ತಾಂ. ನಾಂವ್-ಪ್ರಚಾರ್-ಮುನಾಪೊ ಖಂಡಿತ್ ಆಶೆನಾಂ. ಮೊಜಾ ಲೇಕನಾಂ ಧ್ವಾರಿಂ ವಾಚ್ಪ್ಯಾಂಕ್ ಮಾಹೆತ್-ಜಾಣ್ವಾಯ್ ಲಾಬೊಂದಿ ಮ್ಹಣ್ ಮ್ಹಜಿ ಆಶಾ.

ಚಾರ್ ಧಾಕ್ಡ್ಯಾಂ ಥಾವ್ನ್ ತುಂ ಬರಯ್ತೇ ಆಸಾಯ್. ತೆದ್ನಾಂಚೊ ಆನಿ ಆತಾಂಚೊ ಸಂದರ್ಭ್ ಕಸೊ ಆಸಾ?

ಹಾಂವೆ ಬರಂವ್ಕ್ ಪ್ರಾರಂಭ್ ಕೆಲ್ಲೆ ವೆಳಾರ್ ಬರವ್ಪ್ಯಾಂಕ್ ಸಂಪಾದಕಾಂ ಥಾವ್ನ್ ಹುಮೆದ್, ಪಾಟಿಂಬೊ ಮೆಳ್ತಾಲೊ, ಬರವ್ಪ್ಯಾಂಕ್ ಉತ್ತೇಜನ್ ದಿತಾಲೆ, ತಿದ್ವುನ್ ಸಾಂಗ್ತಾಲೆ. ದೆಕುನ್ಂಚ್ ಎಡಿ ನೆಟ್ಟೊ ಜೊ.ಸಾ.ಕ್ ಆನಿ ಹಾಂವ್ ಸಿರಿವಂತಾಕ್ ‘ಗುರು’ ಮ್ಹಣ್ ಮಾಂದ್ತಾಂವ್. ಪಯ್ಲೆಂ ಬರವ್ಪಿ ವಿರಳ್ ಆಸುಲ್ಲೆ. ಪತ್ರಾಂನಿ ಬರಂವ್ಕ್ ಅವ್ಕಾಸ್ ಉಣೆ ಆಸ್‌ಲ್ಲೆ. ಆತಾಂ ನವೆ ಬರವ್ಪಿ ಚಡ್ಲ್ಯಾತ್. ಪತ್ರಾಂ ಉಣಿ ಆಸಾತ್ ಆನಿ ಚಡೊನ್ ಯೆಂವ್ಚಾ ಜಾಯ್ರಾತಾಂ ವರ್ವಿಂ ಜಾಗ್ಯಾಚೊ ಅಬಾವ್ ಜಾಲಾಸೊ ದಿಸ್ತಾ. ಪಯ್ಲೆಂ ಪೆನ್ನ್ ಘೆವ್ನ್ ಬರಯ್ತಾಲೊಂ. ಬರಯಿಲ್ಲೆಂ ದೋನ್ ತೀನ್ ಪಾವ್ಟಿಂ ತಿದ್ವುನ್ ‘ರಫ್’ ಆನಿ ‘ಫೇರ್’ ಕರುಂಕ್ ಪಡ್ತಾಲೆಂ. ಆತಾಂ ಕಂಪ್ಯೂಟರಾ ವರ್ವಿಂ ತಿದ್ವುಂಚೆ ಸಲೀಸ್ ಜಾತಾ. ವೇಳ್ ಉರ್ತಾ.

ತುಜಾ ಸಮಕಾಳೀನ್ ಬರವ್ಪ್ಯಾನಿಂ ಬರಂವ್ಚೆಂ ರಾವಾಯ್ಲಾಂ. ಕಿತ್ಯಾಕ್ ಮ್ಹಣ್ತಾಯ್?

ಫಟ್. ಜೆರಿ ಕುಲ್ಶೇಕರ್, ಎಡಿ ನೆಟ್ಟೊ, ಎಡ್ವಿನ್ ಜೆ.ಎಫ್.ಡಿಸೋಜ, ಜೆಫ್ರಿ ಜೆ.ಎಫ್ ಡಿಸೋಜ, ಸಿಜ್ಯೆಸ್ ತಾಕೊಡೆ, ಗ್ಲೇಡಿಸ್ ರೇಗೊ, ರೋನ್ ರೋಚ್, ಡೊಲ್ಫಿ ಕಾಸ್ಸಿಯಾ, ಲ್ಯಾನ್ಸಿ ಪಿಂಟೊ ನಾಯಕ್, ಹೇಮಾಚಾರ್ಯ, ಶಾಲಿನಿ ವಾಲೆನ್ಸಿಯಾ, ಮಾಚ್ಚಾ ಮಿಲಾರ್, ದೊ.ಜೆರಿ ನಿಡ್ಡೊಡಿ, ದೊ. ಎಡ್ವರ್ಡ್ ನಜ್ರೆತ್, ಜೆಮ್ಮಾ ಪಡಿಲ್, ಜೆ.ಬಿ.ಮೊರಾಯಸ್, ಜೆ.ಬಿ.ಸಿಕ್ವೆರಾ, ಗೇಬ್ರಿಯೆಲ್ ವಾಜ್, ಶ್ರೀ ಮನು, ನವೀನ್ ಕುಲ್ಶೇಕರ್ ರಿಚ್ಚಿ ಸೆರಾಂವ್, ವಲ್ಲಿ ವಗ್ಗ, ರೊನಾಲ್ಡ್ ಪಿರೆರಾ, ಲಿಲ್ಲಿ ಮಿರಾಂದಾ, ವಿ.ಡಿ.ಸಿಲ್ವಾ, ಪಾವ್ಲ್ ಮೊರಾಸ್, ಸ್ಟೇನ್ ಅಗೇರಾ, ವಲ್ಲಿ ಕ್ವಾಡ್ರಸ್, ವೊಲ್ಟರ್ ಲಸ್ರಾದೊ. ಇತರ್ ಸಬಾರ್ ಆತಾಂಯ್ ಸರಾಗ್ ಬರವ್ನ್ ಆಸಾತ್. ಬೋವ್ ಥೊಡ್ಯಾನಿಂ ಆಪಾಪ್ಲ್ಯಾ ಖಾಸ್ಗಿ ಕಾರಣಾಂ ಖಾತಿರ್ ಬರಂವ್ಚೆ ರಾವಾಯ್ಲಾಂ.

ಬರವ್ಪಿ ಆನಿ ಪತ್ರಾಂ ಮದ್ಲೊ ಸಂಬಂದ್ ಎಕಾಮೆಕಾ ಪೂರಕ್ ಜಾವ್ನಾಸಾ. ತೆದ್ನಾಂಚಾ ಆನಿ ಆತಾಂಚಾ ಎಕಾ ಬರವ್ಪ್ಯಾಕ್ ಪತ್ರಾಂಚೆ ಮಟ್ಟ್ ತುಲನ್ ಕೆಲ್ಯಾರ್ ಕಿತೆಂ ಫರಕ್ ದಿಸ್ತಾ?

ಖಂಡಿತ್. ಸಂಪಾದಕ್ ಪೋನ್ ವ ಮೊಬಾಯ್ಲ್ ಮೆಸೆಜ್ ಧಾಡುನ್ ಸಂಬಂದ್ ಧವರುನ್ ಆಸಾತ್. ಪಯ್ಲೆಂ ಲೇಕಕಾಂಕ್ ಸಂಭಾವನ್ ಮೆಳಾ ನಾತ್ಲೆಂ. ಹಾಂವೆ ಬರಯಿಲ್ಲ್ಯಾ ಕಾಂಯ್ 80% ಕತಾ, ಲೇಕನಾಂಕ್ ಮ್ಹಾಕಾ ಎಕಾ ರುಪ್ಯಾಚೆಂ ಸಂಭಾವನ್ ಮೆಳ್‌ಲ್ಲೆಂ ನಾ. ‘ರಾಕ್ಣೊ’ನ್ ತಿ ಸುರ್ವಾತ್ ಕರುನ್ ಉತ್ತೇಜನ್ ದಿಲ್ಲೆಂ. ಆತಾಂಚಾ ಪತ್ರಾಂಚೆ ಮಟ್ಟ್ ಬೋವ್ ಸುದ್ರಾಲಾಂ. ಭಾಸೆಂತ್ ಅಪುಟ್ಟ್ ಕೊಂಕ್ಣಿ ಸಬ್ದ್ ಚಡ್ ಜಾವ್ನ್ ಝಳ್ಕಾತಾತ್. ಥೊಡ್ಯಾ ನವ್ಯಾ ಲೇಕಕಾಂ/ಕವಿನಿಂ ಕಾಳ್ಜಾ ಥಾವ್ನ್ ಬರಂವ್ಚೆಂ ದಿಸ್ತಾ. ಕವಿತಾಂನಿ ನವೆಸಾಂವ್ ಪಳೆಂವ್ಕ್ ದಿಸ್ತಾ. ಮಾಹೆತ್ ಭರ್‌ಲ್ಲಿಂ ಲೇಕನಾಂ ವಾಚುಂಕ್ ಮೆಳ್ತಾತ್. ಛಾಪ್ಯಾಂತೀ ಸುಧಾರಣ್ ಜಾಲಾಂ.

ಕೊಂಕ್ಣೆಂತ್ ಕಾದಂಬರಿ ಉಣ್ಯೊ ಜಾಲ್ಯಾತ್ ತಸೆಂ ದಿಸ್ತಾ. ಕಿತ್ಯಾಕ್?

ಕಾದಂಬರಿ ಉಣ್ಯೊ ಜಾಂವ್ಚ್ಯಾಕ್ ಪ್ರಮುಖ್ ಕಾರಣ್ ಪಾಯ್ಸ್ ಕರ್ತೆಲಿಂ ಪ್ರಕಾಶನಾಂ ನಾಂತ್. ಪಯ್ಲೆಂ ಕೊಂಕ್ಣಿ ಸ್ವತಂತ್ರ್ ಪ್ರಕಾಶನ್, ಸಾಳಕ್ ಪ್ರಕಾಶನ್, ಪುನವ್ ಪ್ರಕಾಶನ್ ಇತ್ಯಾದಿ ಕಾದಂಬರಿ ಪಾಯ್ಸ್ ಕರ್ತಾಲಿಂ. ಆತಾಂ ಲೇಕಕಾನ್ ಖುದ್ ಪ್ರಕಾಶಕ್ ಜಾಯ್ಜೆ ಪಡ್ತಾ. ಛಾಪ್ಯಾ ಖರ್ಚ್, ಪ್ರತಿಯೊ ವಿಕೊನ್ ವಚಾನಾಸ್ತಾಂ ಭಗ್ಚೆಂ ಲುಕ್ಸಾಣ್ ಕಾದಂಬರಿ ಬರಯ್ತೆಲ್ಯಾಕ್ ಅಪಧಯ್ರ್ ಹಾಡಾಯ್ತಾ. ಇತ್ಲಿ ಲಾಂಬ್ ಬರಯ್ಲಿ ತಿ ಪತ್ರಾಚೆ ಸಂಪಾದಕ್ ಫಾಯ್ಸ್ ಕರ್ತಾತ್ ವ ನಾ ತೋಯ್ ದುಬಾವ್. ಫಾಯ್ಸ್ ಕರಿನಾಂತ್ ತರ್ ಮಾಳ್ಯಾರ್ ಉಡಯ್ಜೆ ಪಡ್ತಾ. ಬರಯಿಲ್ಲೆಂ ಕಿತೆಂ ಕರ್ಚೆಂ ಮ್ಹಳ್ಳೆಂ ಸವಾಲ್ ಮುಕಾರ್ ಯೆತಾ. ತರೀ ಚಡ್ತಾವ್ ಪತ್ರಾಂನಿ ಕಾದಂಬರಿ ವ ಸಾಂಕಳ್ ಕಾಣ್ಯೊ ಪ್ರಕಟ್ ಜಾತೇ ಆಸಾತ್. ಎಕಾ ಪತ್ರಾರ್ ದೋನ್ ಸಾಂಗಾತಾ ಫಾಯ್ಸ್ ಕರುಂಕ್ ಜಾಯ್ನಾಂತ್. ತೆ ಭಾಯ್ರ್ ಪತ್ರಾಂ ಆಸ್ಚಿಂಯ್ ಬೊಟಾಂನಿ ಮೆಜ್ಚೆ ತಿತ್ಲಿಂ ನೈಂಗೀ ?

ತುಜಿ ನಿಮಾಣಿ ಕಾದಂಬರಿ ಪ್ರಕಟ್ ಜಾವ್ನ್ ಕಿತ್ಲಿಂ ವರ್ಸಾಂ ಜಾಲಿಂ?

‘ಮೊಜ್ಯಾ ಸಪ್ಣಾಚಿ ರಾಣಿ’ ಕಾದಂಬರಿ ಸಾಳಕ್ ಪ್ರಕಾಶನಾನ್ 1982 ವರ್ಸಾ ಪ್ರಕಟ್ ಕೆಲ್ಲಿ. ತೆಚ್ ವರ್ಸಾ ಹಾಂವೆಂ ಆನಿ ಸಿಜ್ಯೆಸ್ ತಾಕೊಡೆನ್ ಸಾಂಗಾತಾ ಮೆಳೊನ್ ಬರಯಿಲ್ಲಿ ‘ಸಿಸ್ಟರ್ ಶೋಭಾ’ ಕಾದಂಬರಿಯೀ ಫಾಯ್ಸ್ ಜಾಲ್ಲಿ. ಮೊಜಿ ‘ಲಗ್ನಾಚಿ ಪಯ್ಲಿ ರಾತ್’ 1984 ವರ್ಸಾ ಪ್ರಕಟ್ ಜಾಂವ್ಚಾರ್ ಆಸುಲ್ಲಿ. ಜಾಯ್ರಾತ್‌ಯೀ ದಿಲ್ಲೆಂ. ಪುಣ್ ಸಿರಿವಂತಾಚಾ ಅಜಾಗ್ರೂತ್ಕಾಯೆ ನಿಮ್ತಿಂ ಕರಡ್ ಪ್ರತಿ ಭಾಯ್ರ್ ಪಡ್‌ಲ್ಲ್ಯಾನ್ ತಿ ಸಾಂಡುನ್ ಗೆಲಿ. ಭುರಗ್ಯಾಂ ಖಾತಿರ್ ಬರಯಿಲ್ಲಿ ಕಾದಂಬರಿ ‘ಪಸುನ್ ಘಾಲ್ಲೊ ಪೊಳೊ’ ರಾಕ್ಣೊಚೆರ್ 1991 ವರ್ಸಾ 14 ಅಂಕ್ಯಾನಿಂ ಆನಿ ‘ಶಿಮ್ಟಿ ಪಳೆ ವಾಂಕ್ಡಿ’ ಸಾಂಕಳ್ ಕತಾ 2001 – 02 ವರ್ಸಾಂನಿ ‘ಕೊರ್ಡೆಲ್ಚೆಂ ಜಯ್ತ್’ ಪತ್ರಾರ್, ಉಪ್ರಾಂತ್ ತಿಚ್ 25 ಅಂಕ್ಡ್ಯಾನಿಂ ‘ಕುಟಾಮ್’ ಪತ್ರಾರ್ 2004 ವರ್ಸಾ ಫಾಯ್ಸ್ ಜಾಲ್ಯಾ.

ತುಜಾ ಸಾಹಿತಿಕ್ ವಾವ್ರಾಕ್ ಘರ‍್ಚಾಂಚೆ ಉತ್ತೇಜನ್ ಕಿತ್ಲೆಂ?

ಮ್ಹಜಿ ಪತಿಣ್ ಗ್ರೇಸ್ ಮರಿಯಾ ಭುರ್ಗ್ಯಾಂಚೆಂ ಸಾಹಿತ್ಯ್ ರಚ್ತಾಲಿ ಆನಿ ತಿಚ್ಯೊ ಕವಿತಾ ‘ರಾಕ್ಣೊ’ ತಸೆಂ ‘ಕಾಜುಲೊ’ ಪತ್ರಾರ್ ಫಾಯ್ಸ್ ಜಾತಾಲ್ಯೊ. ಮ್ಹಜ್ಯಾ ಬರ್ಪಾಂಕ್ ಬೋವ್‌ಚ್ ಖರೆ ರಿತಿರ್ ಸ್ಪಂದನ್ ಕರುನ್ ವಿಮರ್ಸೊ ಕರ್ತಾಲಿ. ಮ್ಹಾಕಾ ದಾಯ್ಜಿ ದುಬಾಯ್ ಪುರಸ್ಕಾರ್ ಲಾಬ್ಲಾ ತೆಂ ಆಯ್ಕೊನ್, ‘ಅಕ್ರೇಕ್ ತರೀ ತುಕಾ ವಳ್ಕಾಲೆ.’ ಮ್ಹಳ್ಳೊ ಉದ್ಗಾರ್ ತಿಣೆ ಸೊಡ್ಲೊ. ಮ್ಹಜೆ ಪೂತ್ ಗ್ಲೆನಿಶ್ ಆನಿ ಗ್ಲೆಸ್ಟರ್ ಸಂತೊಸಾನ್ ಉಮಾಳೊನ್ ಮ್ಹಜ್ಯಾ ವಾವ್ರಾ ಮದೆಂ ಸತತ್ ಮ್ಹಾಕಾ ವಾಚ್ಪ್ಯಾಂ ಥಾವ್ನ್ ಯೆಂವ್ಚಾ ಪ್ರತಿಕ್ರಿಯೆಂಚಿ, ತಾಣಿಂ ಧಾಡ್‌ಲ್ಲ್ಯಾ ಅಭಿನಂದನಾಂಚಿ ಖಬರ್ ಪಾವಿತ್ ಕರಿತ್ತ್ ಆಸಾತ್.

ಏಕ್ ಅಪ್ರೂಪಾಚಿ ತಸ್ವೀರ್

ಕಿಶೂಚೊ ಗಾಂವ್ ಬಾರ್ಕೂರಾಂತ್ ಜಾಲ್ಲ್ಯಾ 2010 –  ಕವಿತಾ ಫೆಸ್ತಾಂತ್ LUNCH BREAK

ಪ್ರಶಸ್ತಿ ವಿಜೇತ್ ಹೆರೊಲ್ಫಿಯುಸ್, ಮಯ್ಸೂರ್ಚೊ ವಲ್ಲಿ ವಗ್ಗ, ಕುವೆಯ್ಟ್‌ಚೊ ಲ್ಯಾನ್ಸಿ ಪಿಂಟೊ ನಾಯಕ್, ದಾಯ್ಜಿ ವಲ್ಡ್ ಪ್ರವೀಣ್ ತಾವ್ರೊ, ಕಿಟಾಳ್ ಸಂಪಾದಕ್ ಎಚ್ಚೆಮ್, ದಿರ್ವೆಂ ಸಹ ಸಂಪಾದಕ್ ವಿಲ್ಸನ್ ಕಟೀಲ್, ರಾಕ್ಣೊ ಸಹ ಸಂಪಾದಕ್ ಟೊನಿ ಫೆರೋಸ್, ಕಾದಂಬರಿಕಾರ್ ರೊನ್ ರೊಚ್ ಕಾಸ್ಸಿಯಾ ಆನಿ ವಿತೊರಿ ಕಾರ್ಕೊಳ್.

ಪಾಟ್ಲ್ಯಾನ್ ಉಬೊ ಆಸಾ : ದಾಯ್ಜಿ ದುಬಯ್ ಸಾಂದೊ ವಿನ್ಸಿ ಪಿಂಟೊ ಆಂಜೆಲೊರ್

ಹಿ ತಸ್ವೀರ್ ಕಾಡ್ಲ್ಯಾ : ಕಲಾಕಾರ್ ವಿಲ್ಸನ್ ಕಯ್ಯಾರ್ ಹಾಣೆ

ಹೆರೊಲ್ಪಿಯುಸ್ ಹಾಚಿ ನವಿಚ್ ಕಾಣಿ ವಾಚುಂಕ್ ಹಾಂಗಾ ಚಿಚಾಯಾ :

ಫುಲಾಂ ಆನಿ ದಿವೆ

ಹ್ಯಾ ಸರ‍್ವಾಕ್ ಕಾರಣ್ ಆಮಿಂಚ್ ಜಾವ್ನಾಸ್‌ಲ್ಲ್ಯಾಂವ್. ವಾಡ್‌ಲ್ಲೆ ಚಲಿಯೆ ಮುಕಾರ್ ಮೊಜೊ ಆನಿ ನೋರ‍್ಮನಾಚೊ ಮೊಗಾ-ಖೆಳ್ ತಾಚಾ ಮಾಸೂಮ್ ಮತಿರ್ ಕಸಲೊ ಪರಿಣಾಮ್ ಕರುಂಕ್ ಸಕಾತ್ ಮ್ಹಳ್ಳೆಂ ಆಮಿ ಚಿಂತುಂಕ್ ಗೆಲಿಂನಾಂವ್. ರಾತ್ಚೆಂ ತಾಕಾ ನೀದ್ ಪಡ್ಚೆ ಪಯ್ಲೆಂಚ್ ಆಮ್ಚಿಂ ಖಟ್ಲ್ಯಾವಯ್ಲಿಂ ಅತರ‍್ವಣಾಂ ಕುಜ್ನಾಂತ್ ನಿದ್‌ಲ್ಲ್ಯಾ ಪುಣ್ ಜಾಗ್ ಆಸ್ಚಾ ತಾಚಾ ಕುಡಿಂತ್ ಕಿತ್ಲಿ ಹುನಾಯ್ ಹಾಡಯ್ತಾತ್ ತೆಂ ಆಮ್ಕಾಂ ಮತಿಕ್ ಗೆಲೆಂನಾಂ. ನೋರ‍್ಮನಾನ್ ತಸೆಂ ಥೊಡೆ ಪಾವ್ಟಿಂ ಹಾಂವೆಂಯ್ ತಾಕಾ ’ಕಾಜಾರಾ’ ವಿಶಿಂ ಆನಿ ನವ್ರ್ಯಾ ವಿಶಿಂ ತಮಾಶೆ ಕರ‍್ತಾನಾ ತಾಕಾ ಕಿತೆಂ ಭಗ್ತಾ ತೆಂ ಆಮಿಂ ದೆಕೊಂಕ್ ಪ್ರೇತನ್ ಕೆಲೆಂನಾ. ಆಮಿಂ ದೊಗಾಂಯ್ ದಫ್ತರಾಕ್ ಗೆಲ್ಯಾ ನಂತರ್ ದೀಸ್‌ಭರ್ ಘರಾಂತ್ ಕಿತೆಂ ಸರ‍್ವ್ ಘಡೊನ್ ಆಸ್ತಾ ತೆಂ ಆಮಿಂ ಪಳೆಲೆಂ ನಾ. ದೂದ್ ವ ಹೆರ್ ಘರ್ ಖರ‍್ಚಾಚೊ ಸಾಮಾನ್ ಹಾಡುಂಕ್ ಬಾಜಾರಾಕ್-ದುಖಾನಾಂಕ್-ಮಾರ‍್ಕೆಟಿಕ್ ಗೆಲ್ಲೆಕಡೆನ್ ತೆಂ ಕೊಣಾ ಲಾಗಿಂ ಉಲಯ್ತಾ, ಕಿತೆಂ ಸರ‍್ವ್ ಕರ‍್ತಾ ತಾಚೊ ಆಮಿ ಕಿಂಚಿತ್ ವಿಚಾರ್ ಕೆಲೊನಾ.

ಸತ್ತರ್ ವರ್ಸಾಂಚ್ಯಾ ತೆವ್ಶಿಲ್ಯಾ ಪೊಂತಾಕ್ ಪಾವ್ಲೆಲ್ಯಾ ದೊ. ನಾ.ಡಿಸೋಜಾಚೊ ಭಾವಾಡ್ತ್ ಫಕತ್ ‘ಮ್ಹನ್ಶಾಪಣ್’ ಮ್ಹಣ್ತಾ. ತಾಕಾ ಚೆಪೆಂ ಉಕಲ್ಚೆ ಸವೆಂ ಮ್ಹಜಿಂ ಥೊಡಿಂ ಸವಾಲಾಂ ಆಸುಲ್ಲಿಂ. ತಾಚಿ ಜಾಪ್ ಹಾಂಗಾ ಆಸಾ. ಹೆ ಉಪ್ರಾಂತ್ ಕಿಟಾಳಾರ್ ಫಾಯ್ಸ್ ಜಾಂವ್ಚಿಂ ತಾಚಿಂ ವಯ್ಚಾರಿಕ್ ಲೇಕನಾಂ ಸಮ್ಜುಂಕ್ ಹ್ಯಾ ಸಂದರ್ಶನ್ ಉಪ್ಕಾರಾಕ್ ಪಡ್ಟೆಲೆಂ.

ತುಮ್ಚ್ಯಾ ‘ಓಡಿ ಹೋದ ಮತ್ತೊಬ್ಬ ದೇವರು’ ಲೇಖನಾಂತ್, ‘..ಇಗರ್ಜಿಕ್ ವಚಾನಾಸ್ತಾಂ ಸಬಾರ್ ತೇಂಪ್ ಜಾಲೊ..’ ಮ್ಹಣ್ತಾತ್. ತರ್, ಹ್ಯಾ ಪಯ್ಲೆಂ ತುಮಿ ಇಗರ್ಜಿಕ್ ವೆತೆಲ್ಯಾತ್. ವೆಚೆಂ ನಾಕಾ ಮ್ಹಣೊನ್ ಕಿತ್ಯಾಕ್ ಭಗ್ಲೆಂ?

≡ ಲ್ಹಾನ್‌ಥಾವ್ನ್ ಹಾಂವ್ ಇಗರ್ಜಿಂತ್‌ಚ್ ಲೊಳೊನ್ ಆಸ್ತಾಲೊಂ. ಆಲ್ತಾರ್ ಭುರ್ಗೊಯ್ ಜಾವ್ನಾಸ್ಲೊಂ. ಮ್ಹಾಕಾ ಎಕುಣೀಸ್ ವರ್ಸಾಂ ಪ್ರಾಯ್ ಜಾವ್ನ್ ವೈಚಾರಿಕತಾ ವ್ಹಾಡ್ಲೆಲೆ ಬರಿಂ ಹಾಂವ್ ಇಗರ್ಜಿ ಥಾವ್ನ್ ಪಯ್ಸ್ ಸರೊಂಕ್ ಲಾಗ್ಲೊಂ. ಥೈಂಚೆ ರಾಜಕೀಯ್, ಥೈಂ ಚಲೊನ್ ಆಸ್ಚಿ ದಗಲ್ಬಾಜ್ ಪಳೆಲ್ಲ್ಯಾ ಮ್ಹಜ್ಯಾ ಮತಿಚಿ ಶಾಂತಿ ಕದ್ವಳೊನ್ ಗೆಲಿ. ಹಾಂಗಾ ಉಗ್ತ್ಯಾನ್ ಸಾಂಗೊಂಕ್ ಜಾಯ್ನಾಸ್ಚೆ ತಸಲಿಂ ಕಾರಣಾಂಯ್ ಮಸ್ತು ಆಸಾತ್. ಇಗರ್ಜಿಕ್ ಗೆಲ್ಯಾರ್ ತೆಚ್ ಉಡಾಸ್ ಜಿವೆ ಜಾವ್ನ್ ಹಾಂವ್ ಅಸ್ವಸ್ತ್ ಜಾತಾಂ. ದೆಕುನ್ ಇಗರ್ಜ್ ಮ್ಹಾಕಾ ಪಯ್ಸ್.

ಮದರ್ ತೆರಸಾ ವಿಶಿಂ ಹಾಂವೆ ಬರಯಿಲ್ಲೊ ಬೂಕ್ ತುಮ್ಕೂರ‍್ಚಾ ಶ್ರೀ ಸಿದ್ದಗಂಗಾ ಮೊಠಾನ್ ಪ್ರಕಾಶಿತ್ ಕೆಲಾ. ತಶೆಂಚ್ ಜೆಜು ಕ್ರಿಸ್ತಾ ವಿಶಿಂ ಹಾಂವೆ ಬರಯಿಲ್ಲೊ ಬೂಕ್ ಕನ್ನಡ, ಇಂಗ್ಲಿಷಾಂತ್ ಸಬಾರ್ ಛಾಪೆ ದೆಕೊಂಕ್ ಪಾವ್ಲಾ. ಕ್ರೀಸ್ತ್, ಬುದ್ದ, ಬಸವ, ಅಂಬೇಡ್ಕರ್ ತಸಲೆ ಮ್ಹಾನ್ ಮ್ಹನಿಸ್ ಮ್ಹಾಕಾ ಮೊಗಾಚೆ. ದೇವ್, ಧರ್ಮ್ ಆನಿ ಜಾತಿಂ ವರ‍್ನಿ ಮ್ಹನ್ಶಾಪಣಾ ವಯ್ರ್ ಮ್ಹಾಕಾ ಪಾತ್ಯೆಣ್.

[ ಮಂಗ್ಳುರ್ಚ್ಯಾ ಸಂದೇಶ ಪ್ರತಿಷ್ಠಾನ ಪ್ರಶಸ್ತಿ ಪ್ರಧಾನ್ ಸಮಿತಿಚೊ ಅಧ್ಯಕ್ಷ್ ಮ್ಹಣ್ ಪತ್ರಿಕಾ ಗೋಷ್ಟಿಂತ್ ]

ತುಮಿ ‘ಜುದಾಸ್’ ಮ್ಹಳ್ಳೆಲ್ಯಾ ಲಿಖ್ಣೆ ನಾಂವಾನ್‌ಯೀ ಬರಯ್ತೆತ್ ಆಸ್ಲ್ಯಾತ್. ತುಮ್ಚಾ ಬರವ್ಪಾನ್ ಚಾಳ್ವಾಲ್ಲ್ಯಾ ಥೊಡ್ಯಾ ಕ್ರಿಸ್ತಾಂವಾನಿ ತುಮ್ಕಾಂ ‘ಜುದಾಸ್’ ಮ್ಹಣೊನ್ ನಾಂವ್ ದಿಲ್ಲೆಂ ಮ್ಹಣೊನ್ ಖಂಯ್‌ಗಿ ವಾಚ್‌ಲ್ಲೊ ಉಡಾಸ್. ಸತ್ ಕಿತೆಂ?

≡ ಜುದಾಸ್, ಥೊಡ್ಯಾ ಸಿಸ್ಟರಿನಿಂ ಮ್ಹಾಕಾ ಧವರ‍್ಲೆಲ್ಲೆಂ ನಾಂವ್. ತ್ಯಾಚ್ ನಾಂವಾನ್ ಹಾಂವೆ ಥೊಡ್ಯೊ ಕಾಣ್ಯೊ ಬರಯಿಲ್ಲ್ಯೊ.

ಮ್ಹಜ್ಯಾ ಪಾಟ್ಲ್ಯಾನ್ ಕೊಣೆಂ ಅಸೆಂ ಮ್ಹಳಾಂಯ್ ಆಸ್ತೆಲೆಂ. ತರೀ, ಚಡಾವತ್ ಲೊಕಾನ್ ಮ್ಹಾಕಾ ಮೋಗ್ ದಿಲಾ, ಗವ್ರವ್ ದಿಲಾ, ಪಾದ್ರಿ-ಮಾದ್ರಿನಿಂ ಮ್ಹಾಕಾ ಕಾಂಯ್ ಪಯ್ಸ್ ಕರುಂಕ್ ನಾ.

ಕ್ರಿಸ್ತಾಂವಾಂಚಿ ಇಗರ್ಜೆ ಕೇಂದ್ರಿತ್ ಜಿಣ್ಯೆ ರೀತ್ ಆಮ್ಕಾಂ ರಾಷ್ಟ್ರಿಯ್ ಮುಕೆಲ್ ವ್ಹಾಳಾಂತ್ ಭರ‍್ಸೊಂಕ್ ಆಡ್ಕಳ್ತಾ ಮ್ಹಣ್ ತುಮ್ಕಾಂ ಭಗ್ತಾಗಿ?

≡ ಖಂಡಿತ್ ವ್ಹಯ್. ಸುಟ್ಕೆ ಪಯ್ಲೆಂ ಆಮಿ ಬ್ರಿಟಿಶಾಂಚೆ ಆರಾಧನ್ ಕರ‍್ತೆಲಾಂವ್. ಹೊಚ್ ಮನೋಭಾವ್ ಆಮ್ಚೆ ಥೈಂ ಅಜೂನ್ ಆಸಾ. ಆಮ್ಕಾಂ ಹಾಂಗಾಚಿ ಕಲಾ, ಸಾಹಿತ್, ಸಂಗೀತ್ ನಾಕಾ. ಭರತನಾಟ್ಯ ಕರ‍್ತೆಲ್ಯಾ ಎಕಾ ಪಾದ್ರಿಚಿಂ ಆಮಿ ಖೆಳ್ಕುಳಾಂ ಕೆಲಿಂ. ಹಾಂಗಾಚಾ ಧರ್ಮಾಕ್ ಆಮಿ ಮಾನ್ ದೀನಾಂವ್. ‘ಅನ್‌ಭವಾಡ್ತಿ’ ಮ್ಹಣೊನ್ ದುಸ್ರ್ಯಾಂಕ್ ಹಿಣ್ಸುಂಚೆ ಆತಾಂಯ್ ಚಾಲ್ತೆರ್ ಆಸಾ. ಹಾಂಗಾಚೆಂ ಕಿತೆಂಚ್ ಆಮ್ಚೆಂ ನ್ಹಯ್ ಮ್ಹಳ್ಳೊ ಮನೋಭಾವ್ ಆಮ್ಕಾಂ ಆಸಾ. ಸಾಮಾಜಿಕ್ ಜಾವ್ನ್, ವ ದುಸ್ರ್ಯಾ ಶೆತಾಂನಿ ಆಮ್ಚಿ ದೇಣ್ಗಿ ಕಿತ್ಲಿ ಮ್ಹಣೊನ್ ಲೇಕ್ ಘಾಲ್ತಾನಾ ನಿರಾಸ್ ಜಾತಾ. ಆಮಿ ಇಗರ್ಜಿ ಕಾಂಪೌಂಡಾ ಥಾವ್ನ್ ಭಾಯ್ರ್ ಯೇಂವ್ಕ್‌ಚ್ ತಯಾರ್ ನಾಂವ್. ಕಿತ್ಯಾ?

ರಾಜಕೀಯ್ ಜಾವ್ನ್ ಸ್ವಾತಂತ್ರ್ ಅಪೇಕ್ಷುಂಚೆ ಆಮಿಂ ಧಾರ್ಮಿಕ್ ಜಾವ್ನ್ ಪುರೋಹಿತ್‌ಶಾಹಿಚಿ ವೇಂಗ್ ಸುಖಾಳ್ ಮ್ಹಣ್ ಚಿಂತಾಂವ್. ತಿ ಏಕ್ ಬಂಧಡ್ ಮ್ಹಳ್ಳೆಂಚ್ ಆಮಿ ನೆಣಾ’ಸ್ತಾಂವ್. ಕಿತ್ಯಾ?

≡ ಪುರೋಹಿತ್‌ಶಾಹಿ ಮ್ಹಣ್ಚಿ, ಆಂತರಿಕ್ ಜಾವ್ನ್ ಆಮ್ಕಾಂ ಬಾಂದುನ್ ಘಾಲ್ಚಿ ಸಾಂಕಳ್ ಜಾವ್ನಾಸಾ. ಪುರೋಹಿತ್‌ಶಾಹಿ ಫಕತ್ ದೆವಾಕ್ ಮುಕಾರ್ ಲೊಟುನ್ ಪಾಟಿಂ ರಾವೊನ್ ಆಸ್ತಾ ಮ್ಹಣ್ ಚಿಂತ್ಚೆಂ ನಾಕಾ. ಸಾಮಾಜಿಕ್ ಸ್ಥಾನ್-ಮಾನ್, ಕಾಜಾರ್, ವೋಲ್ ಆನಿ ನಿಮಾಣೆ ಮೋರ್ನ್- ಹೆಂ ಸರ್ವ್ ವಾಪಾರ‍್ತಾ ಜಾಲ್ಲ್ಯಾನ್ ಸಾದೊ ಲೋಕ್ ಪುರೋಹಿತ್‌ಶಾಹಿಕ್ ಭಿಂಯೆತಾ. ಹೆಂ ಭ್ಯೆಂ ಚ್ ಪುರೋಹಿತ್‌ಶಾಹಿಚೆಂ ಬಳ್.

ದೆವಾ ವಿಶಿಂ ತುಮ್ಚಾ ಅಭಿಪ್ರಾಯೆಂಕ್ ಘರ‍್ಚಾಂಚಿ ಪ್ರತಿಕ್ರಿಯಾ ಕಸಲಿ?

≡ ಹಾಂವ್ ಮ್ಹಜಾ ಘರ‍್ಚಾಂಚ್ಯಾ, ಇಷ್ಟಾಂಚ್ಯಾ ಪಾತ್ಯೆಣೆಂಕ್ ಆಡ್ ವಚಾನಾ. ಮ್ಹಜಿ ಬಾಯ್ಲ್, ಭುರ್ಗಿಂ ಆನಿ ಸುನೊ ಇಗರ್ಜಿಕ್ ವೆತಾತ್.

ತುಮ್ಚಾ ಕಾದಂಬರಿನಿಂ ಕೊಂಕ್ಣಿ ಕ್ರಿಸ್ತಾಂವಾಂ ಮಧೆಂ ಬಾಮುಣ್, ಸೂದ್ರ್ ಮ್ಹಳ್ಳೆಂ ವಿಭಜನ್ ಪಳೆಂವ್ಕ್ ದಿಸ್ತಾ. ಮಂಗ್ಳುರ‍್ಚೆ ಕೊಂಕ್ಣೆ ಕ್ರಿಸ್ತಾಂವ್ ಬಾಮಣ್ ಮ್ಹಳ್ಳೆಂ ಪೂರ್ವಾಗ್ರಹ್ ದಿಸ್ತಾ. ತುಮಿ ಕೊಂಕ್ಣೆಂತ್ ಬರಯಿಲ್ಲೆಂ ತರ್, ತುಮ್ಚಾ ಪ್ರದೇಶಾಚಾ (ಕಾರ‍್ವಾರ್, ಹೊನ್ನಾವರ್, ಭಟ್ಕಳ್ ಇತ್ಯಾದಿ..) ಕೊಂಕ್ಣ್ಯಾಂಕ್ ಸಮ್ಜೊಂಕ್ ಕುಮಕ್ ಜಾತೆಂ ಕೊಣ್ಣಾ?

≡ ಮ್ಹಜ್ಯಾ ‘ಬಾಮಣ್’ ಕಾದಂಬರಿಚಿ ಕತಾವಸ್ತ್ ಹಿಚ್. ಆಮ್ಚೆ ಥೈಂ ಬಾಮಣ್, ನೆಂದರ್ ಗೌಡಿ, ಸೂದ್ರ್, ಅತೀ ಸೂದ್ರ್ ತಸಲೆ ಭಿತರ‍್ಲೆ ಪಂಗಡ್ ಆಸಾತ್. ಚೆಡುಂ ಹಾಡ್ತಾನಾ ಹೆಂ ಪೂರಾ ಸೊಧ್ತಾತ್. ಆಮ್ಚೆ ತೆವ್ಶಿಲೆ ಬಾಮಣ್ ಅಜೂನೀ ಆಪುಣ್ಂಚ್ ಶ್ರೇಷ್ಟ್ ಮ್ಹಣ್ ಚಿಂತಾತ್. ಹೆಂ ಪೂರಾ ಸಕ್ಕಡ್ ಜಾಣಾಶ್ಚಿಚ್ ಗಜಾಲ್.

ಕೊಂಕಣಿ ಭಾಸ್ ನಿಜಾಕೀ ಮ್ಹಾಕಾ ಮೊಗಾಚಿಚ್. ಹಾಂವ್ ತೀನ್ ವರ್ಸಾಂ ಕೊಂಕಣಿ ಅಕಾದೆಮಿಚೊ ಸಾಂದೊ ಜಾವ್ನಾಸ್ಲೊಂ. ಆತಾಂಯ್ ಮಂಗ್ಳುರ‍್ಚಾ ಸಂದೇಶ್ ಪ್ರತಿಷ್ಠಾನಾಚೊ ಪ್ರಶಸ್ತಿ ಪ್ರಧಾನ್ ಸಮಿತೆಚೊ ಅಧ್ಯಕ್ಷ್ ಜಾವ್ನಾಸಾಂ. ಆಮ್ಚೆ ತೆವ್ಶಿನ್ ಕೊಂಕ್ಣಿ ಉಣೆ. ಘರಾಂನಿ, ಇಗರ್ಜಿಂತ್ ಕನ್ನಡ ಚಡ್. ಆಮ್ಚಿ ಕೊಂಕಣಿ ಹೊನ್ನಾವರ್, ಮುರುಡೇಶ್ವರ್ ಶಯ್ಲೆಚಿ. ಆಮ್ಚಾ ಕೊಂಕ್ಣೆಕ್ ಮಂಗ್ಳುರ್‌ಗಾರ್ ತಿರಸ್ಕಾರಾನ್ ಹಾಸ್ತಾತ್. ತಶೆಂ ಜಾವ್ನ್ ಹಾಂಗಾಚಾ ಕೊಂಕ್ಣಿ ಕ್ರಿಸ್ತಾಂವಾನಿಂ ಕನ್ನಡ ವೆಂಗ್ಲ್ಯಾ.

ನಿಮಾಣೆ, ತುಮಿ ಕೊಂಕಣಿ ಮಾಯ್ ಬಾಸೆಚೆ ಮ್ಹನಿಸ್. ಕನ್ನಡಾಂತ್ಲೆ ನಾಂವಾಡ್ದಿಕ್ ಬರವ್ಪಿ. ಕನ್ನಡಾಂತ್ ತುಮ್ಚ್ಯಾ ಸಾಧನಾಕ್ ‘ಡೊಕ್ಟರೇಟ್’ ಗವ್ರವ್ ಲಾಬ್ಲಾ. ತರೀ, ಎಕ್ಲೊ ವೆಕ್ತಿ ಆಪ್ಲ್ಯಾ ಖಾಸ್ ಸಮುದಾಯಾಂತ್ ಆಸ್ಮಿತಾಯ್ ಜೊಡುಂಕ್ ಪೆಚಾಡ್ತಾ. ಕನ್ನಡ ರಾಶ್ಟ್ರ್‌ಕವಿ ಕುವೆಂಪು ಇಂಗ್ಲಿಷಾಂತ್ ಬರಂವ್ಕ್ ಸುರು ಕರ್ನ್ ನಿಮಾಣೆ ಕನ್ನಡಾಂತ್‌ಚ್ ಬರಂವ್ಕ್ ಲಾಗ್ಲೊ. ತಶೆಂಚ್ ಆನಿಕೀ ಕಿತ್ಲೆಶ್ಯಾ ಕನ್ನಡ ಸಾಹಿತಿನಿಂ ಇಂಗ್ಲಿಷಾಂತ್ ಬರವ್ಯೆತೆಂ, ಕನ್ನಡಾಂತ್ ಬರಂವ್ಚೊ ಕೊಂಕ್ಣೊ ಜಾವ್ನ್ ತುಮ್ಕಾಂ ಕೆದಿಂಚ್ ಎಕ್ಸುರ‍್ಪಣ್ ಭಗೊಂಕ್ ನಾಂಗಿ? ಕನ್ನಡ ಕವಿ ಕೆ.ಎಸ್. ನಿಸಾರ್ ಅಹ್ಮದಾಕ್ ಭಗ್‌ಲ್ಲೆ ಬರಿಂ ತುಮ್ಕಾಂ ‘ನಿಮ್ಮೊಡನಿದ್ದೂ ನಿಮ್ಮಂತಾಗದೆ..’ ಅಸೆಂ ಭಗೊಂಕ್ ನಾಂಗಿ?

≡ ಮ್ಹಜ್ಯಾ ಮಾಂಯ್ನ್ ಮ್ಹಾಕಾ ಸಾಂಗ್‌ಲ್ಲ್ಯೊ ಕಾಣ್ಯೊ ಕೊಂಕ್ಣಿ ಭಾಸೆಂತ್‌ಚ್. ತಿಣೆ ವೊವ್ಯೊ, ವೇರ್ಸ್, ಜೊಂಪಾಯೊ ಮ್ಹಳ್ಳ್ಯೊಯ್ ಕೊಂಕ್ಣೆಂತ್‌ಚ್. ತರೀ, ಗೋವಿಂದ ಪೈನ್ ಸಾಂಗ್‌ಲ್ಲೆ ಬರಿಂ ಹಾಂಗಾ ಕೊಂಕ್ಣೆಕ್ ವಿಶೇಸ್ ಅವ್ಕಾಸ್ ನಾತ್ಲೆ ವರ್ವಿಂ ಅನಿವಾರ್ಯ್ ಜಾವ್ನ್ ಕನ್ನಡಾಂತ್ ಬರಯ್ಜೆ ಪಡ್ಲೆಂ. ಹಾಂತು ಮ್ಹಾಕಾ ಲಾಭ್ ಜಾಲಾ, ವ ನಷ್ಟ್ ತೆಂ ಹಾಂವ್ ನೆಣಾ. ಕರ್ನಾಟಕಾಂತ್ ಸಾಹಿತಿಕ್ ಜಾವ್ನ್ ವಾಪಾರ‍್ಚಿ ಮಂಗ್ಳುರಿ ಕೊಂಕ್ಣಿ. ತಿ ಕೊಂಕ್ಣಿ ಸುಡಾಳಾಯೆನ್ ವಾಪ್ರುಂಕ್ ಹಾಂವ್ ಸಕಾನಾ ದೆಕುನ್ ಕೊಂಕ್ಣೆಂತ್ ಹಾಂವ್ ಬರಯ್ನಾ. ಕನ್ನಡಾಂತ್ ಸಾಹಿತ್ ರಚುನ್ ಏಕ್ ಸ್ಥಾನ್ ಜೊಡ್ಲಾಂ. ಎಕ್ಸುರ‍್ಪಣ್ ಖಂಡಿತ್ ಭಗ್ಲಾಂ. ಹಾಕಾ ಕಾರಣ್‌ಯೀ ಆಮ್ಚೊಚ್ ಲೋಕ್ ಮ್ಹಣ್ಯೆತ್. ರಾಷ್ಟ್ರೀಯ್ ವ್ಹಾಳಾಂತ್ ದೆಂವೊಂಕ್ ಪಾಟಿಂ ಸರ್ಚ್ಯಾ ಲೊಕಾಕ್ ದುಸ್ರೆ ವಿಚಿತ್ರ್ ಥರಾನ್ ಪಳೆತಾತ್. ಹಾಂವೆ ಕನ್ನಡಾಂತ್ ಬರಂವ್ಚೆಂಚ್ ಕಿತ್ಲೆಶ್ಯಾ ಲೊಕಾಕ್ ಅಜ್ಯಾಪ್. ಕಿತೆಂ ಡಿಸೋಜ ತುಂ ಕನ್ನಡಾಂತ್ ಬರಯ್ತಾಯ್? ತೆ ವಿಚಾರ‍್ತಾತ್. ಅಸಲಿ ಪರಿಗತ್ ಖಂಡಿತ್ ಬದ್ಲಾಜೆ.

ಸಂದರ್ಶಕ್ : ಜೆ ವಿ ಕಾರ್ಲೊ , ಹಾಸನ್