ರಾತಿಚೆಂ ಮಾಗ್ಣೆಂ ರಜಾರ್ ಜಾಲ್ಲೆಂ. ಮಂಗ್ಳಾರಾಚೊ ದೀಸ್ ಜಾಲ್ಲ್ಯಾನ್ ಹಿಲ್ಡಾಕ್ ಸಾಂತ್ ಆಂತೊನಿಚೆರ್ ಭಾರಿಚ್ಚ್ ಪಾತ್ಯೆಣಿ ಆನಿ ಮೋಗ್ ಆಸ್ಲ್ಲ್ಯಾನ್ ಸಾಂತ್ ಆಂತೊನಿಚೆಂ ನೊವೆನ್ ತಾಣಿ ಕೆಲ್ಲೆಂ. ಚಡಾವತ್ ಜೆಜುಚ್ಯಾ ಪವಿತ್ರ್ ಕಾಳ್ಜಾಚೊ ತೇರ್ಸ್ ತಿಂ ಕರ‍್ತಾತ್ ತರ್ಯ್ ಆಜ್ ಧುವಾಂನಿ ಮಾಗ್ಣೆಂ ಚಡ್ ಜಾಲೆಂ ಮ್ಹಣ್ ತೋಂಡ್ ವಾಂಕ್ಡೆ ಕೆಲ್ಲ್ಯಾನ್ ’ತೊ ತೇರ್ಸ್ ನಾಕಾ’ ಮ್ಹಣ್ ಚಿಕ್ಕೆ ಮಟ್ವೆಂ ರಜಾರ್ ಕರ್ನ್ ಮಾಗ್ಣೆಂ ಸಂಪಯಿಲ್ಲೆಂ ಹಿಲ್ಡಾನ್.
ಜೆವ್ಣಾಚಿ ತಯರಾಯ್ ಕರ್ಚ್ಯಾ ಖಾತಿರ್ ಮಾಸ್ಳಿ ಭಾಜುಂಕ್ ಕುಜ್ನಾಕ್ ಗೆಲ್ಲಿ ಹಿಲ್ಡಾ ಘೊವಾಚಿ ಬೊಬಾಟ್ ಆಯ್ಕೊನ್ ತಶಿಚ್ಚ್ ಘುಂವ್ಲಿ ಆನಿ ಭಾಯ್ರ್ ಆಯ್ಲಿ. ಮೆಲಿಸ್ಸಾ ಘರ‍್ಚ್ಯಾ ಪಯ್ಲ್ಯಾ ಮಾಳಿಯೆರ್ ಆಸ್ಚ್ಯಾ ಆಪ್ಲ್ಯಾ ಖಾಸ್ಗಿ ಕುಡಾಚ್ಯಾ ಬಾಗ್ಲಾಚೆರ್ ಪಾವ್ಲ್ಲೆಂ, ಬಾಪಾಯ್ಚೊ ತಾಳೊ ಆಯ್ಕೊನ್ ತೆಂಯ್ ಘುಂವ್ಲೆಂ ಆನಿ ಸರಾರಾಂ ಮೆಟಾಂ ಕಾಡ್ನ್ ದೆವೊನ್ ಸಕಯ್ಲ್ ಆಯ್ಲೆಂ.
ಮಸ್ಕತಾಂತ್ ಎಕಾ ಬರ್ಯಾ ಕಂಫ್ಣೆಂತ್ ಬರ್ಯಾ ಕಾಮಾರ್ ಆಸ್ಚೊ ದೊಮಿನಿಕ್ ಕಾಡ್ದೊಸ್ ವರ‍್ಸಾಚ್ಯಾ ರಜೆರ್ ಗಾವಾಕ್ ಆಯಿಲ್ಲೊ. ತೇರ್ಸ್-ರಜಾರ್ ಕರ್ತಾನಾ ಸಾಲಾಂತ್ಲ್ಯಾ ಸೊಫಾಚೆರ್ ತೊ ಬಸೊನ್ ಅಸ್‌ಲ್ಲೊ. ಮಾಗ್ಣೆಂ ಜಾತಚ್ಚ್ ಥಂಯ್ಚ್ ಬಸೊನ್ ಆಪ್ಲೆಂ ಮೊಬಾಯ್ಲ್ ಘೆವ್ನ್ ಆಯಿಲ್ಲೆ ಸಂದೇಶ್ ಪಳವ್ನ್ ಆಸ್ಲ್ಲೊ. ತೊ ಬಸೊನ್ ಆಸ್ಲ್ಲ್ಯಾ ದೆಗೆಚ್ಯಾ ಸೊಫಾಚೆರ್ ತಾಚಿ ದುಸ್ರಿ ಧು ಮೇಘನ್ ಬಸೊನ್ ಆಸ್ಲ್ಲೆಂ.
ಟೆರೆಸಾಚೆಂ ವ್ಹಡ್ ಘರ್ ತಾಂಚೆ. ಸಕಯ್ಲ್ ಸಾದಾರ‍್ನ್ ಬರೆಂ ರೂಂದ್ ಸಾಲ್, ಕುಸಿನ್ ಕುಜ್ನ್ ಆನಿ ಸಾಲಾಕ್ ಲಾಗೊನ್ಂಚ್ಚ್ ಆಯಿಲ್ಲ್ಯಾ ಸಯ್ರ್ಯಾಂ ಖಾತಿರ್ ಏಕ್ ನಿದ್ಚೆಂ ಕೂಡ್ ತರ್ ಪಯ್ಲ್ಯಾ ಮಾಳಿಯೆರ್ ತೀನ್ ನಿದ್ಚಿಂ ಕುಡಾಂ ಆನಿ ಏಕ್ ಕುಟ್ಮಾ-ಸಾಲ್. ದೊಮಿನಿಕ್ ಕಾಡ್ದೊಸಾಕ್ ಬರಿ ಜೋಡ್ ಆಸ್ಲ್ಲ್ಯಾನ್ ಘರ್ ಬರೆಂಚ್ಚ್ ನಾಜೂಕಾಯೆನ್ ಮಾಂಡುನ್ ದವರ್‌ಲ್ಲೆಂ. ಘರಾ ಭಾಯ್ಲ್ಯಾನ್ ಆಸ್ಲ್ಲ್ಯಾ ತೀನ್ ಎಕ್ರ್ಯಾ ವಿಸ್ತಾರ್ ಜಾಗ್ಯಾರ್ ಫುಲಾಂ ತೊಟಾಂ ತಶೆಂಚ್ಚ್ ಥೊಡೆ ಮಾಡ್, ಆಂಬೆ-ಪೊಣ್ಸಾಚೆ ರೂಕ್ ಮಾತ್ರ್ ನ್ಹಯ್ ಜಾಯ್ತ್ಯಾ ನಮೂನ್ಯಾವಾರ್ ಫಳಾಂಚೆ ರೂಕ್ ಆಸ್ಲ್ಲೆ. ಜಾಗ್ಯಾಚ್ಯಾ ಪೊಂತಾರ್ ರೂಂದ್ ಬಾಂಯ್ ಆಸ್ಲ್ಲಿ.
” ಹಾಂವೆ ಹಾಕಾ ಪಯ್ಲೆಂಚ್ಚ್ ಸಾಂಗ್ಲಾಂ….” ದೊಮಿನಿಕ್ ಕಾಡ್ದೊಸ್ ಪರತ್ ಘರಾಜ್ಲೊ. ಹ್ಯಾ ವೆಳಿಂ ಆಪ್ಲ್ಯಾ ಪತಿಣ್ ಹಿಲ್ಡಾಚ್ಯಾ ಆನಿ ಮಾಲ್ಘಡಿ ಧು, ಮೆಲಿಸ್ಸಾಚ್ಯಾ ತೊಂಡಾಂಕ್ ರಾಗಾನ್ ತೊ ಪಳಯ್ತಾಲೊ. “ತ್ಯಾ ಫೆರ‍್ನಾಂದಾಗೆಲ್ಯಾ ಕುಟ್ಮಾ ಲಾಗಿಂ ಆಮ್ಕಾಂ ಸಂಬಂಧ್ ನಾಕಾ ಆನಿ ಸಂಬಂಧ್ ದವರುಂಕ್‍ಯ್ ಹಾಂವ್ ಆಶೆನಾ…..ಅಶೆಂ ಆಸ್ತಾನಾ ಹೆಂ ಮೇಘನ್ ಡೆನ್ಜಿಲಾಚ್ಯಾ ಮೊಗಾರ್ ಪಡ್ಲಾಂ ಕಂಯ್ ಆನಿ ತಾಚ್ಯಾಚ್ಚ್ ಲಾಗಿಂ ಕಾಜಾರ್ ಜಾತಾ ಮ್ಹಣ್ತಾ……. ಹೆಂ ಅಸಾಧ್ಯ್…. ಆಮ್ಚ್ಯಾ ಕುಟ್ಮಾಚ್ಯಾ ಮರ‍್ಯಾದೆ ಖಾತಿರ್ ಪುಣಿ ತಾಣೆ ಹೊ ಸಂಬಂಧ್ ತುಟಯ್ಜಯ್….. ಆಮ್ಚ್ಯಾ ಕುಟ್ಮಾಚ್ಯಾ ಬರೆಂಪಣಾಖಾತಿರ್…. ತಾಣೆ ಡೆನ್ಜಿಲಾಕ್ ಸಾಂಡಿಜಯ್….”
ಹಿಲ್ಡಾನ್ ಯಾ ಮೆಲಿಸ್ಸಾನ್ ಕಿತೆಂಚ್ಚ್ ವಿಚಾರ‍್ಚ್ಯಾ ಪಯ್ಲೆಂಚ್ಚ್ ದೊಮಿನಿಕ್ ಕಾಡ್ದೊಸ್ ಪಟಾಫಟ್ ಉಲಯ್ಲೊ.
ಮೆಘನಾನ್ ಡೆನ್ಜಿಲಾ ಲಾಗಿಂ ಮೋಗ್ ಕರ್ನ್ ಕಾಜಾರ್ ಜಾಂವ್ಕ್ ಆಶೆಂವ್ಚ್ಯಾ ವಿಶ್ಯಾಂತ್ ಹಿಲ್ಡಾಕ್ ಆನಿ ತಶೆಂಚ್ಚ್ ಮೆಲಿಸ್ಸಾಕ್ ಪಯ್ಲೆಂಚ್ಚ್ ಕಳಿತ್ ಆಸ್ಲ್ಲೆಂ. ದೋನ್ ಮ್ಹಹಿನ್ಯಾಂ ಪಯ್ಲೆಂ ಬೆಂಗ್ಳುರ್ ಥಾವ್ನ್ ಗಾವಾಕ್ ಆಯಿಲ್ಲ್ಯಾ ವೆಳಿಂ ಮೆಘನಾನ್ ಆವಯ್ಕ್ ಆನಿ ವಡ್ಲ್ಯಾ ಭಯ್ಣಿಕ್ ಹ್ಯಾ ವಿಶ್ಯಾಂತ್ ಕಳಯಿಲ್ಲೆಂ. ಮೆಘನಾಕ್ ಸಮಧಾನೆನ್ ಸಮ್ಜೊಂವ್ಕ್ ತಾಣಿಂ ದೊಗಾಂಯ್ನಿ ಪ್ರೇತನ್ ಕೆಲ್ಲೆಂ ತರ್ಯ್ ತೆಂ ಆಯ್ಕಾಲ್ಲೆಂ ನಾ.
ಹ್ಯಾ ವಿಶಿಂ ದೊಮಿನಿಕ್ ಮಸ್ಕತಾಂತ್ ಕಾಮಾರ್ ಆಸ್ತಾನಾ ತಾಣಿ ತಾಕಾ ಕಿತೆಂಚ್ಚ್ ಸಾಂಗ್ಲ್ಲೆಂ ನಾ. ಸಾಂಗ್ಲ್ಯಾರ್ ತೊ ಕಶೆಂ ಕಾಣ್ಘೆತಲೊ ಕೊಣ್ಣಾ ಮ್ಹಣ್ ತಿಂ ಭಿಯೆಲ್ಲಿಂ.
ಸರ‍್ವಾಂಚ್ಯಾ ಮತಿಂನಿ ಉದೆಲ್ಲಿಂ ವಾದಾಳಾಂ ಆತಾಂ ಚಡ್ ಜಾವ್ನ್ ಉಂಚಾಂಬಳ್ ಜಾಲಿಂ…. ಎಕಾಮೆಕಾಕ್ ಪಳವ್ನ್ಂಚ್ಚ್ ತಿಂ ಬಸ್ಲಿಂ…..
ದೊಮಿನಿಕ್ ಕಾಡ್ದೊಸ್ ಮಸ್ಕತಾಂತ್ ಜಾಯ್ತ್ಯಾ ವರ್ಸಾಂ ಥಾವ್ನ್ ಬರ್ಯಾ ಕಂಫ್ಣೆಂತ್ ಕಾಮ್ ಕರುನ್ ಆಸ್ಲ್ಲೊ. ಬರ್ಯಾ ಹುದ್ಧ್ಯಾರ್ ಆಸ್ಲ್ಲ್ಯಾನ್ ಬರೊ ಸಾಂಬಾಳ್ ಆನಿ ಸವ್ಲತ್ಯೊಯ್ ತಾಕಾ ಆಸ್ಲ್ಲ್ಯೊ. ತಾಂಕಾ, ಮ್ಹಳ್ಯಾರ್ ದೊಮಿನಿಕ್ ಆನಿ ಹಿಲ್ಡಾಕ್ ದೊಗಾಂ ಚೆಡ್ವಾಂ ಭುರ್ಗಿಂ ದೆವಾನ್ ಫಾವೊ ಕೆಲ್ಲಿಂ. ಮಾಲ್ಗಡೆಂ ಮೆಲಿಸ್ಸಾ ಆನಿ ದುಸ್ರೆಂ ಮೇಘನ್.
ಬಾರಾವ್ಯಾ ವರ‍್ಗಾಂತ್ ಶಿಕ್ತಾ ವರೇಗ್ ದೊಗಾಂಯ್ ಭುರ್ಗಿಂ ಮಸ್ಕತಾಂತ್ ಶಿಕ್‌ಲ್ಲಿಂ ತರ್ ಉಪ್ರಾಂತ್ ತಾಂಚೆ ಶಿಕಾಪ್ ಕೊಡ್ಯಾಳಾಂತ್ ಮುಂದರ‍್ಸುನ್ ವರ‍್ಚ್ಯಾಕ್ ಹಿಲ್ಡಾ ಭುರ‍್ಗ್ಯಾಂಕ್ ಘೆವ್ನ್ ಗಾವಾಕ್ ಆಯಿಲ್ಲಿ. ಹಿಲ್ಡಾನ್‌ಂಚ್ಚ್ ಖುಶೆನ್ ಮಸ್ಕತಾಕ್ ಆದೇವ್ಸ್ ಮಾಗ್‌ಲ್ಲೊ – ಭುರ‍್ಗ್ಯಾಂಚ್ಯಾ ಬರೆಂಪಣಾ ಖಾತಿರ್. ಕುಟ್ಮಾ ವಿಸಾ ಆಸ್ಲ್ಲ್ಯಾನ್ ತಿ ನವೀಕ್ರತ್ ಕರುಂಕ್ ದೋನ್ ವರ‍್ಸಾಂಕ್ ಏಕ್ ಪಾವ್ಟಿಂ ತಿಂ ಸರ‍್ವಾಂ ಮಸ್ಕತಾಕ್ ವೆತಾಲಿಂ. ಎಕ್ವೀಸ್ – ಬಾವೀಸ್ ವರ್ಸಾಂ ಜಾಲ್ಯಾ ಉಪ್ರಾಂತ್ ಭುರ‍್ಗ್ಯಾಂಕ್ ಕುಟ್ಮಾ ವಿಸಾ ಮೆಳಾನಾತ್‌ಲ್ಲ್ಯಾನ್ ತಿತ್ಲಿ ಪ್ರಾಯ್ ಜಾಲ್ಲಿಚ್ಚ್ ಮೆಲಿಸ್ಸಾ ಆನಿ ಮೇಘನ್ ಭೆಟೆ ವಿಸಾಚೆರ್ ಮಸ್ಕತಾಕ್ ವೆತಾಲಿಂ. ಮೆಲಿಸ್ಸಾ ದಾಂತಾಚೆಂ ದಾಕ್ತೆರ‍್ನ್ ಜಾಲ್ಲೆಂ ತರ್ ಮೆಘನಾನ್ ಮಣಿಪಾಲ್ ಶ್ಹೆರಾಂತ್ಲ್ಯಾ ಖ್ಯಾತ್ ಶಿಕ್ಪಾ-ಸಂಸ್ಥ್ಯಾಂತ್ ಎಲೆಕ್ಟ್ರೊನಿಕ್ ಇಂಜಿನಿಯರಿಂಗ್ ಶಿಕಾಪ್ ಕಾಬಾರ್ ಕೆಲ್ಲೆಂ. ಕೊಡ್ಯಾಳ್ ಶ್ಹೆರಾ ಥಾವ್ನ್ ಭಾಯ್ರ್ ಒಮ್ಜೂರಾಂತ್ ತೀನ್ ಎಕ್ರೆ ಜಾಗೊ ಘೆವ್ನ್ ತಾಂತು ಟೆರೆಸಾಚೆಂ ಬರೆಂ ಘರ್ ಬಾಂಧುನ್ ದೊಮಿನಿಕ್ ಕಾಡ್ದೊಸಾಚೆಂ ಕುಟಾಂಬ್ ಆಸ್ಲ್ಲೆಂ.
ಮೆಲಿಸ್ಸಾ ದಾಂತಾಚೆಂ ದಾಕ್ತೆರ‍್ನ್ ಜಾಲ್ಲ್ಯಾನ್ ತಾಕಾ ಬೆಂಗ್ಳುರಾಂತ್ ಬರ್ಯಾ ಖಾಸ್ಗಿ ಆಸ್ಪತ್ರೆಂತ್ ಕಾಮ್ ಮೆಳ್ಳೆಂ ಆನಿ ತಶೆಂಚ್ಚ್ ಮೆಘನಾಕ್ ಎಲೆಕ್ಟ್ರೊನಿಕ್ ಸಿಟಿಂತ್ ನಾಂವಾಡ್ದಿಕ್ ಅಂತರಾಷ್ಟ್ರೀಯ್ ಕಂಪ್ಣೆಂತ್ ಕಾಮ್. ಧುವಾಂಕ್ ರಾವೊಂಕ್ ಮ್ಹಣ್ ಬೆಂಗ್ಳುರಾಂತ್ ಬರೆಂಚ್ಚ್ ದೋನ್ ನಿದ್ಚ್ಯಾ ಕುಡಾಂಚೆ ಪ್ಲ್ಯಾಟ್ ದೊಮಿನಿಕಾನ್ ಕಾಣ್ಘೆಲ್ಲೆಂ.
ವಾಡೊನ್ ಆಯಿಲ್ಲ್ಯಾ ಧುವಾಂಕ್ ಕಾಜಾರ್ ಕರಿಜಯ್ ಮ್ಹಳ್ಳ್ಯಾ ಆಶೆನ್ ಆಸ್ಲ್ಲ್ಯಾ ದೊಮಿನಿಕಾನ್ ಆಪ್ಲ್ಯಾ ಮಿತ್ರಾಂ ಲಾಗಿಂ ಆನಿ ವಳ್ಕಿಚ್ಯಾಂ ಲಾಗಿಂ ಸಾಂಗ್ತಾನಾ ಎಕಾ ವಳ್ಕಿಚ್ಯಾ ಪಾದ್ರಿ ಮುಕಾಂತ್ರ್ ಕ್ಲಿಫರ‍್ಡ್ ಆನಿ ಡೊರತಿ ಫೆರ‍್ನಾಂದಾಚ್ಯಾ ಮಾಲ್ಘಡ್ಯಾ ಪುತಾಚಿ, ಡೆಲ್‌ರೊಯಾಚಿ ಸೈರಿಕ್ ಆಯ್ಲಿ.
ಅಬುದಾಬಿಂತ್ ವ್ಹಡ್ ತೆಲಾ ಕಂಪ್ಣೆಂತ್ ಬರ್ಯಾ ಹುದ್ದ್ಯಾರ್ ಆಸ್ಲ್ಲ್ಯಾ ಕ್ಲಿಫರ‍್ಡ್ ಫೆರ‍್ನಾಂದಾಕ್ ದೋಗ್ ಜಣ್ ಚೆರ‍್ಕೆ ಭುರ‍್ಗೆ. ಮಾಲ್ಘಡೊ ಡೆಲ್‌ರೊಯ್ ತರ್ ದುಸ್ರೊ – ಡೆನ್ಜಿಲ್. ತಾಂಚೆ ಬಿಡಾರ್, ಮ್ಹಳ್ಯಾರ್ ಬಂಗ್ಲೊ, ಬೆಂಗ್ಳುರ‍್ಚ್ಯಾ ನಾಂವಾಡ್ದಿಕ್ ವಸ್ತೆ ಜಾಗ್ಯಾಂಚ್ಯಾ ಎಕಾ ವಾಂಟ್ಯಾಂತ್ ಆಸ್ಲ್ಲೆಂ. ದೋಗೀ ಪೂತ್ ಬೆಂಗ್ಳುರಾಂತ್ ಶಿಕ್‌ಲ್ಲೆ ಆನಿ ಬೆಂಗ್ಳುರ್‌ಚ್ಚ್ ಕಾಮಾರ್ ಆಸ್ಲ್ಲೆ.
ಮೆಲಿಸ್ಸಾಕ್ ಡೆಲ್‌ರೊಯ್‌ಚಿ ಸೈರಿಕ್ ಆಯ್ಲ್ಯಾ ಉಪ್ರಾಂತ್ ದೋನಿಂ ಕುಟ್ಮಾಂ ಎಕಾಮೆಕಾ ಭೆಟ್ ದೀವ್ನ್ ಕುಟ್ಮಾಂ ಪಸಂಧ್ ಜಾವ್ನ್ ತಾಂಚ್ಯಾ ಕಾಜಾರಾಕ್ ವೊಪ್ವಾಲಿಂ. ಖರಾರ್ ಜಾಲೆಂ.
ಕಾಜಾರ್ ಎಕಾ ವರ್ಸಾ ಉಪ್ರಾಂತ್ ಬೆಂಗ್ಳುರಾಂತ್ ಜಾಂವ್ಚೆಂ ಮ್ಹಣ್ ಜಾಯ್ ಜಾಲ್ಲಿ ತಯರಾಯ್ ಸುರು ಜಾಲಿ. ದೋನಿ ಕುಟ್ಮಾಂ ಅನ್ಕುಲ್‍ವಂತ್ ಜಾಲ್ಲ್ಯಾನ್ ಲಗ್ನ್ ಗಡ್ದ್ ಜಾಯ್ಜಯ್, ಮಸ್ಕತ್ ತಶೆಂ ಅಬುದಾಭಿಂತ್ ಆಸ್ಚ್ಯಾ ತಾಂಚ್ಯಾ ತಾಂಚ್ಯಾ ವಳ್ಕಿಂಚ್ಯಾಂಕ್ ಆನಿ ಇಷ್ಟಾಂ-ಮಂತ್ರಾಂಕ್ ಆಪವ್ಣೆಂ ದೀಜಯ್ ಮ್ಹಳ್ಳಿ ತಾಂಚಿ ಆಶಾ ಜಾವ್ನಾಸ್‌ಲ್ಲಿ.
ತಯರಾಯೆಚ್ಯಾ ಸಂಗ್ತಿಂತ್ ದೊಮಿನಿಕ್ ಕಾಡ್ಡೊಸ್ ತಶೆಂ ಕ್ಲಿಫರ‍್ಡ್ ಫೆರ‍್ನಾಂದ್ ವರ್ಸಾ ಮಧೆಂ ಗಾವಾಕ್ ಆಯಿಲ್ಲ್ಯಾ ವೆಳಿಂ ದೊನಿಂ ಕುಟ್ಮಾಂ ಭಾರಿಚ್ಚ್ ಮೊಗಾನ್ ಸಾಂಗಾತಾ ಮೆಳ್ಳಿಂ. ತ್ಯಾ ವೆಳಿಂ, ಕ್ಲಿಫರ‍್ಡ್ ಫೆರ‍್ನಾಂದ್ ಖುಶಲಾಯೆನ್ ಆನಿ ತಶೆಂಚ್ಚ್ ಬರ್ಯಾ ಮನಾನ್ ಸಾಂಗ್ತಾಲೊ – “ತುಮ್ಚ್ಯಾ ಮಾಲ್ಘಡ್ಯಾ ಧುವೆಕ್ ಆಮ್ಚ್ಯಾ ಮಾಲ್ಘಡ್ಯಾ ಪುತಾಕ್ ದಿತಾಂವ್ ಆನಿ ದೆವಾನ್ ಬರೆಂ ಮ್ಹಳೆಂ ತರ್ ದುಸ್ರ್ಯಾ ಪುತಾಕ್ ತುಮ್ಚ್ಯಾ ದುಸ್ರ್ಯಾ ಧುವೆಕ್ ದಿಲ್ಯಾರ್ ಬರೆಂಚ್ಚ್…. ಆಮ್ಚ್ಯಾ ಕುಟ್ಮಾಂ ಮಧ್ಲೊ ಬಾಂಧ್ ಆನಿ ಸಂಬಂಧ್ ಬಾರಿಚ್ಚ್ ಬಳ್ವಂತ್ ಜಾತಲೊ…. ಡೆನ್ಜಿಲ್ ಆನಿ ಮೇಘನ್ ಭಾರಿಚ್ಚ್ ಅಪುರ‍್ಭಾಯೆಚಿಂ ಭುರ್ಗಿಂ…..”
ದೊಮಿನಿಕ್ ಆನಿ ಹಿಲ್ಡಾ ಕಾಡ್ದೊಸಾನ್ ಹೊ ವಿಶಯ್ ಕಾಂಯಿಂಚ್ಚ್ ಗಂಭೀರಾಯೆನ್ ಕಾಣ್ಘೆಂವ್ಕ್ ನಾತ್ಲ್ಲೊ ತರಿಪುಣ್ ತಶೆಂ ಜಾಲ್ಯಾರ್ ಬರೆಂಚ್ಚ್ ಮ್ಹಣ್ ತಾಂಚ್ಯಾ ಮತಿಂತ್ ಆಸ್ಲ್ಲೆಂ. ಅಸಲೆಂ ಘನೆಸ್ತ್ ಕುಟಾಂಬ್ ಸೊದುನ್ ಗೆಲ್ಯಾರ್‌ಯ್ ಖಂಯ್ ಮೆಳ್ತಾ ಮ್ಹಳ್ಳೆಂ ತಾಂಚೆ ಚಿಂತಾಪ್.
ತಯರಾಯ್ ಜಾವ್ನ್ ಆಸ್ತಾನಾಂಚ್ಚ್, ಎಕಾ ದಿಸಾ ಮೆಲಿಸ್ಸಾ ಆಚಾನಕ್ ಬೆಂಗ್ಳುರ್ ಥಾವ್ನ್ ಗಾವಾಕ್ ಘರಾ ಆಯ್ಲೆಂ. ಆಪ್ಣಾಕ್ ಡೆಲ್‌ರೋಯ್ ಲಾಗಿಂ ಕಾಜಾರ್ ಜಾಂವ್ಕ್ ಮನ್ ನಾ ಮ್ಹಣ್ ತಿಳ್ಸಿಲಾಗ್ಲೆಂ ಆನಿ ಹ್ಯಾ ವಿಶಿಂ ಡೆಲ್‌ರೋಯ್ ತಿಳ್ಸಿಲಾಂ ಆನಿ ತಾಣೆ ತಾಚ್ಯಾ ಕುಟ್ಮಾಕ್.
ಘರಾಂತ್ ಘಡ್ಘಡೊ ಪುಟ್ಲೊ. ಶಾಂತ್ ಆಸ್ಲ್ಲ್ಯಾ ತಾಂಚ್ಯಾ ಘರಾಂತ್ ವಾದಾಳಾಂ ಉದೆಲಿಂ.
ದೊಮಿನಿಕ್ ತಕ್ಷಣ್ ಗಾವಾಕ್ ಆಯ್ಲೊ. ತಶೆಂಚ್ಚ್, ಅಬುದಾಬಿ ಥಾವ್ನ್ ಕ್ಲಿಫರ‍್ಡ್ ಫೆರ‍್ನಾಂದ್ ಬೆಂಗ್ಳುರಾಕ್ ಪಾವ್ಲೊ.
ದೋನಿಂ ಕುಟ್ಮಾಂ ಸಾಂಗಾತಾ ಮೆಳ್ಳಿಂ ನಾಂತ್ ಪುಣ್ ತಾಂಚ್ಯಾ ಮಧೆಂ ಉಲವ್ಣ್ಯಾಂತ್ ಉಜೊಚ್ಚ್ ಪೆಟ್ಲೊ. ಫೊನಾಂಚೆರ್ ಖಜ್ನೆ ಪುಟ್ಲೆ.
ಕ್ಲಿಫರ‍್ಡ್ ಫೆರ‍್ನಾಂದ್ ವಾಗ್‌ಚ್ಚ್ ಜಾಲ್ಲೊ. ಮೆಲಿಸ್ಸಾ ಕಿತ್ಯಾಕ್ ಕಾಜಾರ್ ಜಾಂವ್ಕ್ ಆಶೆನಾ ಮ್ಹಣ್ ಕಡಾಕಡ್ ಕಳಿತ್ ಜಾಯ್ಜಯ್ ಮ್ಹಣ್ ತಾಣೆಂ ವಿಚಾರ‍್ಲೆಂ. “ಮ್ಹಾಕಾ ಸಗ್ಳ್ಯಾ ಅಬುದಾಬಿಂತ್ ಇತ್ಲೊ ಮಾನ್ ಆಸಾ…. ಕೊಂಕ್ಣಿ ಸಮಾಜ್ ತಶೆಂ ಕಂಪ್ಣೆಂತ್ ಮ್ಹಾಕಾ ವಳ್ಕಾತಾತ್….ಮಾನ್ ಬಾಗಾಯ್ತಾತ್…. ಪುತಾಚೆಂ ಕಾಜಾರ್ ಮ್ಹಣ್ ಹಾಂವೆ ಸರ್ವಾಂಕ್ ಸಾಂಗ್ಲಾಂ…. ಜಾಯ್ತೆ ಜಣ್ ಕಾಜಾರಾಕ್ ಯೆಂವ್ಚ್ಯಾ ತಯರಾಯೆರ್ ಸಯ್ತ್ ಆಸಾತ್ ಆನಿ ಆತಾಂ ಹೆಂ ಲಗ್ನ್‌ಚ್ಚ್ ಜಾಯ್ನಾ ಮ್ಹಳ್ಯಾರ್ ಮ್ಹಜ್ಯಾ ತೊಂಡಾಕ್ ಘಸ್ ಪುಸ್‌ಲ್ಲ್ಯಾ ಬರಿ….”
ಕಾರಣ್ ಇತ್ಲೆಂಚ್ಚ್… ಭಾರಿಚ್ಚ್ ಸಾದೆಂ ಆನಿ ಸಂಪೆಂ…. ಮೆಲಿಸ್ಸಾಕ್ ತೆಂ ಕಾಮ್ ಕರ್ಚ್ಯಾ ಆಸ್ಪತ್ರೆಂತ್ಲ್ಯಾ ಎಕಾ ದಾಕ್ತೆರಾಚಿ ವಳಕ್ ಜಾಲ್ಲಿ ಆನಿ ಎಕಾಮೆಕಾ ಪಸಂಧ್ ಜಾವ್ನ್ ತಾಣಿ ತಾಂಚಿ ಜಿಣಿ ಸಾಂಗಾತಾ ಜಿಯೆಂವ್ಕ್ ನಿರ್ಧಾರ್ ಕೆಲ್ಲೊ. ದಾಕ್ತೆರಾಕ್ ದಾಕ್ತೆರ್ ಪಸಂಧ್ ಜಾಂವ್ಚ್ಯಾಕ್ ಕಾಂಯ್ ನವಾಲ್ ನಾ ನ್ಹಯ್‌ಂಗೀ? ತಿಂ ಕಾಜಾರ್ ಜಾಂವ್ಕ್ ಆಶೆತಾಲಿಂ. ಅಶೆಂ ಜಾಂವ್ಕ್ ನಜೊ ಆಸ್ಲ್ಲೆಂ ಪುಣ್ ವಿಧಿನ್ ಕಿತೆಂಯ್ ಬರಯ್ಲಾಂ ತರ್ ತೆಂ ನಿಸ್ರಾಂವ್ಕ್ ಆಮ್ಕಾಂ ಸಾಧ್ಯ್ ಆಸಾ?? ಬಿಲ್ಕುಲ್ ನಾ…!!!
ಹೆಂ ಕಾರಣ್ ಆಯ್ಕೊನ್ ಕ್ಲಿಫರ‍್ಡ್ ಫೆರ‍್ನಾಂದ್ ವಾಗಾ ನಾಚ್ ನಾಚ್ಲೊ. ಆಪ್ಣಾಚ್ಯಾ ಆನಿ ಕುಟ್ಮಾಚ್ಯಾ ಮಾನಾಚ್ಯಾ ಪಡ್ದ್ಯಾಕ್ ಕಾಳಿ ಘಸ್ ಪುಸುಲ್ಲ್ಯಾ ಆಕ್ಮಾನಾಕ್ ಫಾರಿಕ್ಪಣ್ ಕಾಣ್ಘೆತಾಂ ಮ್ಹಣ್ ಬೊಬಾಟಿಲಾಗ್ಲೊ. ಕಾಡ್ದೊಸ್ ಕುಟ್ಮಾಚೆಂ ಸತ್ತ್ಯಾನಾಸ್ ಕರ‍್ತಲೊಂ ಆನಿ ಆಪ್ಲ್ಯಾ ಪುತಾಕ್ ಘಾತ್ ಕೆಲ್ಲ್ಯಾ ಮೆಲಿಸ್ಸಾಕ್ ಬೆಂಗ್ಳುರಾಂತ್ ಜಿಯೆಂವ್ಕ್ ದಿಂವ್ಚೊ ನಾ ಮ್ಹಣ್ ಸೊಪುತ್ ಘಾಲಿ ಲಾಗ್ಲೊ. ಅಪುಣ್, ಜಯ್ಲಾಕ್ ಗೆಲ್ಯಾರ್‌ಯ್ ವ್ಹಡ್ ನ್ಹಯ್, ಮೆಲಿಸ್ಸಾಕ್ ಬೂದ್ ಶಿಕಯ್ತಲೊಂ ಮ್ಹಣ್ ಬೊಬಾಟೊಂಕ್ ಲಾಗ್ಲೊ.
ಕಾಡ್ದೊಸ್ ಕುಟಾಂಬ್ ಸಗ್ಳೆಂ ಕಂಗಾಲ್ ಜಾಲೆಂ. ದೊಮಿನಿಕ್ ಕಾಡ್ದೊಸಾನ್ ಧುವೆಕ್ ಪರಾತ್ಲೆಂ. ರಡ್ಲೊ. ಡೆಲ್‌ರೊಯ್ ತಸಲೊ ಚೆಡೊ ಹೆರ್ ಮೆಳ್ಚೊ ನಾ ಮ್ಹಣ್ ಸಾಂಗಾಲಾಗ್ಲೊ. ಆಪ್ಲಿ ಮರ‍್ಯಾದ್ ಉರಯ್ ಮ್ಹಣ್ ಆಡ್ದೊಸ್ ಘಾಲಿಲಾಗ್ಲೊ
ಕಿತ್ಲೆಂ ಸಾಂಗ್ಲೆಂ ತರ್ಯ್ ಮೆಲಿಸ್ಸಾ ಆಯ್ಕಾಲೆಂಚ್ಚ್ ನಾ. ಡೆಲ್‌ರೊಯ್ ಲಾಗಿಂ ಕಾಜಾರ್ ಜಾಂವ್ಚ್ಯಾಕ್ ಕಬೂಲ್ ಜಾಲೆಂಚ್ಚ್ ನಾ.
ಆವಯ್ನ್ ಧುವೆಕ್ ವಿಚಾರ‍್ಲೆಂ – “ತುಕಾ ದುಸ್ರ್ಯಾಚ್ಚ್ ಚಲ್ಯಾ ಲಾಗಿಂ ಮೊಗಾರ್ ಪಡೊನ್ ಕಾಜಾರ್ ಜಾಯ್ಜಯ್‌ಚ್ಚ್ ಆಸ್ಲ್ಲೆಂ ತರ್ ಸೈರಿಕ್ ಕರ್ತಾನಾ ಆನಿ ಖರಾರ್ ಜಾತಾ ಮ್ಹಣಾಸರ್ ಕಿತ್ಯಾಕ್ ವೊಗೆಚ್ಚ್ ರಾವ್ಲೆಂಯ್ ಪುತಾ ? ಆಮ್ಚಿ ಮರ‍್ಯಾದ್ ವಾಟೆರ್ ಘಾಲುಂಕ್ ತುಂವೆ ಅಶೆಂ ಕೆಲೆಂಯ್ ??”
ಆವಯ್ಚಿಂ ಉತ್ರಾಂ ಆಯ್ಕೊನ್ ಮೆಲಿಸ್ಸಾ ರಡ್ಲೆಂ ಪುಣ್ ಜವಾಬ್ ದೀಂವ್ಕ್ ಸಕ್ಲೆಂ ನಾ. ತಾಚ್ಯಾ ಲಾಗಿಂ ಎಕ್‌ಚ್ಚ್ ಜವಾಬ್ ಆಸ್ಲ್ಲಿ – ಡೆಲ್‌ರೊಯ್ ಲಾಗಿಂ ಕಾಜಾರ್ ಜಾಯ್ನಾಸ್ತಾನಾ ರಾಂವ್ಚಿ.
ಆಪ್ಣಾಕ್ ಲಜ್ ಜಾವ್ನ್ ಉಂಚಾಬಳ್ ಜಾಲ್ಲೊ ಕ್ಲಿಫರ‍್ಡ್ ಫೆರ‍್ನಾಂದ್ ಕಿತೆಂಯ್ ಕರುಂಕ್ ಸಕ್ತಾ ಮ್ಹಣ್ ಮೆಲಿಸ್ಸಾಕ್ ಬೆಂಗ್ಳುರ್ ಥಾವ್ನ್ ಮಂಗ್ಳುರಾಕ್ ಹಾಡ್ನ್ ಶ್ಹೆರಾಂತ್ಲ್ಯಾ ಎಕಾ ದಾಂತಾಂಚ್ಯಾ ಕ್ಲಿನಿಕಾಂತ್ ಕಾಮಾಕ್ ಲಾಗಯ್ಲೆಂ ದೊಮಿನಿಕಾನ್.
ಮೇಘನ್ ಮಾತ್ರ್ ಬೆಂಗ್ಳುರಾಂತ್ ಉರ‍್ಲೆಂ.
ಡೆಲ್‌ರೊಯ್ ಆನಿ ಮೆಲಿಸ್ಸಾಚ್ಯಾ ಸೈರಿಕೆ ಉಪ್ರಾಂತ್, ಎಕಾಮೆಕಾಕ್ ಪಳವ್ನ್, ಉಲವ್ನ್ ಆನಿ ಸಂದೇಶ್ ಧಾಡ್ನ್ ಆಸ್ಲ್ಲಿಂ ಡೆನ್ಜಿಲ್ ಆನಿ ಮೇಘನ್ ಎಕಾಮೆಕಾಕ್ ಲಾಗ್ಗಿಂ ಆಯಿಲ್ಲಿಂ ಆನಿ ಖರೆಂಚ್ಚ್ ಸಾಂಗ್ಚೆಂ ತರ್ ಮೊಗಾರ್ ಪಡ್ಲ್ಲಿಂ.
ಎಕಾ ಕುಶಿನ್, ಡೆಲ್‌ರೊಯ್ ಆನಿ ಮೆಲಿಸ್ಸಾಚೆಂ ಕಾಜಾರ್ ತುಟ್ಲೆಂ ತರ್ ಅನ್ಯೆಕಾ ಕುಶಿನ್, ಡೆನ್ಜಿಲ್ ಅನಿ ಮೆಘನಾಚೊ ಮೋಗ್ ವಾಡೊನ್ ಆಯ್ಲೊ. ಮೋಗ್ ಕರ‍್ಣಾರಾಂನಿ ಆಪ್ಲಿಂ ಕಾಳ್ಜಾಂ ಎಕಾಮೆಕಾ ದಿಲ್ಯಾ ಉಪ್ರಾಂತ್ ತಾಂಕಾ ಹೆರ್ ಕಿತೆಂಚ್ಚ್ ಪಡೊನ್ ವಚೊಂಕ್ ನಾ ಮ್ಹಣ್ ಜಾಣ್ತ್ಯಾಂನಿ ಸಾಂಗ್ಚ್ಯಾ ಪ್ರಮಾಣೆಂಚ್ಚ್ ಹಾಂಗಾಸರ್ ಜಾಲೆಂ.
ಕಾಜಾರ್ ತುಟೊನ್, ಸುಮಾರ್ ಎಕಾ ವರ್ಸಾ ಉಪ್ರಾಂತ್ ದೊಮಿನಿಕ್ ವರ‍್ಸಾಚ್ಯಾ ರಜೆರ್ ಆಯಿಲ್ಲ್ಯಾ ವೆಳಿಂ ಬಾಪಾಯ್ಕ್ ಮೆಳೊಂಕ್ ಮ್ಹಣ್ ಬೆಂಗ್ಳುರಾಂತ್ ಆಸ್ಚ್ಯಾ ದಫ್ತರಾಕ್ ರಜಾ ಘಾಲ್ನ್ ಮೇಘನ್ ಮಂಗ್ಳುರ್ ಆಯಿಲ್ಲೆಂ ಆನಿ ತ್ಯಾ ದೀಸ್ ಸಾಂಜೆರ್ ಮಾಗ್ಣೆಂ ಆನಿ ರಜಾರ್ ಜಾಲ್ಯಾ ಉಪ್ರಾಂತ್ ಹಾಳ್ವಾಯೆನ್ ಹೊ ಡೆನ್ಜಿಲಾ ಲಾಗಿಂ ಕಾಜಾರ್ ಜಾಂವ್ಚೊ ವಿಶಯ್ ಬಾಪಯ್ ಮುಕಾರ್ ಸಾಂಗ್‍ಲ್ಲೊ.
“ಪುತಾ…” ಹಿಲ್ಡಾ ಆತಾಂ ಹಾಳ್ವಾಯೆನ್ ಧುವೆಲಾಗಿಂ ಉಲಯ್ಲಿ. ” ಹಾಚ್ಯಾ ಆದಿಂಯ್ ಹಾಂವೆ ತುಕಾ ಸಾಂಗ್ಲಾಂ ಪುತಾ…ತೊ ಕ್ಲಿಫರ‍್ಡ್ ಫೆರ‍್ನಾಂದ್ ಮನಿಸ್ ರಾಕ್ಸಾ ಖಾಸ್ತಾಚೊ ಆನಿ ಆಮ್ಕಾಂ ತಾಚ್ಯಾ ಘರಾಲಾಗಿಂ ಯೆಂವ್ಕ್ ಸೊಡ್ಚೊಚ್ಚ್ ನಾ…..ಆತಾಂ ಪುಣಿ ತುಂವೆ ಸಮ್ಜಜಯ್ ಪುತಾ… ಆನಿ ತುಂಯೀ ತಾಚ್ಯಾಚ್ಚ್ ಪುತಾಚ್ಯಾ ಮೊಗಾರ್ ಪಡ್ಲಾಂಯ್ ಮ್ಹಳ್ಯಾರ್ ಮ್ಹಾಕಾ ಪಾತ್ಯೆಂವ್ಕ್ ಜಾಯ್ನಾ…… ಪುತಾ…. ಹೆಂ ಸಾರ್ಕೆಂ ನ್ಹಯ್….. ತುಂ ಚೀಂತ್ ….. ಹಾಂವೆ ತುಕಾ ಪಯ್ಲೆಂಚ್ಚ್ ತಿಳ್ಸಿಲಾಂ….”
“ತರ್ ತುಮ್ಕಾಂ ಹ್ಯಾ ವಿಶ್ಯಾಂತ್ ಪಯ್ಲೆಂಚ್ಚ್ ಕಳಿತ್ ಆಸ್ಲ್ಲೆಂ ಆನಿ ತುಮಿಂ ಮ್ಹಾಕಾ ಕಾಳೊಕಾಂತ್ ದವರ‍್ಲಾಂ…..ಕಿತೆಂಚ್ಚ್ ಕಳಂವ್ಕ್ ನಾ…. ಹಾಂವ್ ಏಕ್ ಬೆಕೂಫ್ ಮ್ಹಣ್ ತುಮಿಂ ಚಿಂತ್ತಾತ್….ಸುರ‍್ವೆರ್ ಡೆನ್ಜಿಲ್ ಆನಿ ಮೆಘನಾ ವಿಶ್ಯಾಂತ್ ಮ್ಹಾಕಾ ಕಳಿತ್ ಆಸ್ಲ್ಲೆಂ ತರ್ ಖಂಡಿತ್ ಜಾವ್ನ್ ಹಾಂವ್ ಹೆಂ ಕಾಜಾರ್ ಜಾಂವ್ಚೆಂ ಆಡಾಯ್ತೊಂ…..ಆತಾಂ ಶಿತ್ ವೊತೊನ್ ಪೇಜ್ ಜಾಲ್ಯಾ….. ಆತಾಂ ಕಿತೆಂ ಕರ‍್ಯೆತಾ….. ??” ದೊಮಿನಿಕ್ ಕಾಡ್ದೊಸ್ ಹಿಲ್ಡಾಚಿಂ ಉತ್ರಾಂ ಅರ್ಧ್ಯಾರ್ ತುಟವ್ನ್ ಪರತ್ ಉಂಚಾಂಬಳ್ ಜಾಲೊ
” ಆತಾಂ…” ತೊ ಮುಂದರ‍್ಸುನ್ ಉಲಯ್ಲೊ. ” ಧುವೆಚೆಂ ಕಾಜಾರ್ ಕರ್ತಾಂವ್ ಮ್ಹಣ್ ತುಮಿಂಚ್ಚ್ ತಾಂಚ್ಯಾ ಘರಾ ವಚಾ ಆನಿ ಡೆನ್ಜಿಲಾಚೊ ಹಾತ್ ವಿಚಾರ‍್ನ್ ಭಿಕ್ ಮಾಗಾ….. ತುಮ್ಕಾಂ ತೀನ್ ಕಾಸಾಂಚೆ ಮೋಲ್ ದಿನಾಸ್ತಾನಾ ತೊ ಖೊಟಾಂವ್ಕ್ ಆಸಾ…. ತೆದಾಳಾ, ತಾಚೆ ಪಾಂಯ್ ಧರಾ…. ಚೂಕ್ ಮಾಗಾ…. ಕಿತ್ಯಾಕ್ ಆಮ್ಚ್ಯಾ ಧುವೆನ್ ತ್ಯಾ ಫಟಿಂಗಾಚ್ಯಾ ಪುತಾಲಾಗಿಂ ಕಾಜಾರ್ ಜಾಯ್ಜಯ್ ನ್ಹಯ್‌ಂಗೀ? ಹಾಂವ್ ಮಾತ್ರ್ ಕಾಜಾರಾಕೀ ಯೆಂವ್ಚೊ ನಾ…. ತಾಂಚ್ಯಾ ಘರಾಚ್ಯಾ ಲಾಗಿಂಚ್ಚ್ ಯೆಂವ್ಚೊ ನಾ….”
ವಾದಾಳ್ ಉಟೊನ್ ಜಾಲ್ಲೆಂ. ಪುಣ್, ಖರಿಂ ಮೋಗ್ ಕರ‍್ಣಾರಾಂ ಕಸಲಿಂ ವಾದಾಳಾಂಯ್ ಫುಡ್ ಕರುಂಕ್ ಸಕ್ತಾತ್ ಮ್ಹಳ್ಳ್ಯಾ ಬರಿ ಮೇಘನ್ ಉಬೆಂ ಜಾಲೆಂ.
“ಡ್ಯಾಡ್… ಡೆನ್ಜಿಲಾಚೊ ಮೋಗ್ ಕರ್ನ್ ಹಾಂವೆ ಕಾಂಯ್ ವಾಯ್ಟ್ ಕೆಲಾಂ ಮ್ಹಣ್ ಮ್ಹಾಕಾ ಭಗಾನಾ… ಡೆಲ್‌ರೋಯ್ ಆನಿ ಮೆಲಿಸ್ಸಾಚಿ ಸೈರಿಕ್ ಜಾವ್ನ್ ಖರಾರ್ ಜಾವ್ನ್ ತಾಂಚೊ ಸಂಬಂಧ್ ತುಟ್ತಾ ವರೇಗ್ ಹಾಂವೆ ಡೆನ್ಜಿಲಾ ಲಾಗಿಂ ಕಾಜಾರ್ ಜಾಂವ್ಕ್ ತುಮ್ಕಾಂ ಮನ್ ಆಸ್ಲ್ಲೆಂ…… ಆತಾಂ ನಾ ಕಿತ್ಯಾಕ್ ಮೆಲಿಸ್ಸಾ ಕಾಜಾರಾಕ್ ವಪ್ವಾನಾ….ತೆಂ ತಾಚ್ಯಾ ಖುಶೆ ಪ್ರಮಾಣೆ ದುಸ್ರ್ಯಾಚ್ಚ್ ಲಾಗಿಂ, ಮ್ಹಳ್ಯಾರ್ ತಾಕಾ ಪಸಂಧ್ ಆಸ್ಲ್ಲ್ಯಾ ಲಾಗಿಂ ಕಾಜಾರ್ ಜಾತಾ… ಆಶೆಂ ಜಾಲ್ಲ್ಯಾಂತ್ ಮ್ಹಜಿ ಕಸಲಿ ಚೂಕ್???” ಮೇಘನ್ ಹಾಳ್ವಾಯೆನ್ ಉಲಯ್ಲೆಂ
“ನಾ…. ತುಂವೆ ಕಾಂಯಿಂಚ್ಚ್ ವಾಯ್ಟ್ ಕರುಂಕ್ ನಾಂಯ್…. ಚೂಕ್ ಪುರಾ ಮ್ಹಜಿ…..ಹರ್ಯೇಕ್ ಚೂಕ್ ಮ್ಹಜಿ…. ಮೆಲಿಸ್ಸಾಕ್ ಸೈರಿಕ್ ಸೊದ್‍ಲ್ಲಿ…. ತಾಕಾ ಡೆಲ್‌ರೋಯ್ ಪಸಂಧ್ ಜಾಲ್ಲಿ…. ಖರಾರ್ ಜಾಲ್ಲಿ….. ಕಾಜಾರಾಚಿ ತಯರಾಯ್ ಜಾಲ್ಲಿ …. ಪಯ್ಶೆ ಖರ‍್ಸಿಲ್ಲಿ …. ಲೊಕಾಕ್ ಸಾಂಗ್‍ಲ್ಲಿ…. ಆನಿ ಉಪ್ರಾಂತ್, ತುಜೆಂ ಭಯ್ಣ್ ಕಾಜಾರ್ ಜಾಯ್ನಾ ಮ್ಹಣಾಲೆಂ…. ತಾಕಾ ತಾಚ್ಯಾಚ್ಚ್ ಆಸ್ಪತ್ರೆಂತ್ಲೊ ದಾಕ್ತೆರ್ ಪಸಂಧ್ ಜಾಲೊ…. ಕಾಜಾರ್ ತುಟೊನ್ ತೆಂ ಕುಟಾಂಬ್ ದುಸ್ಮಾನ್ ಜಾತಾನಾ ತುಂ ತಾಂಚ್ಯಾಚ್ಚ್ ಘರಾಂತ್ ತಾಂಚಿ ಸುನ್ ಜಾವ್ನ್ ವಚೊಂಕ್ ಭಾಯ್ರ್ ಸರ‍್ಲಾಂಯ್…. ಭಾರಿ ಅಪುರ‍್ಬಾಯ್….. ಹ್ಯೊ ಸರ್ವ್ ಮ್ಹಜ್ಯೊಚ್ಚ್ ಚುಕಿ…. ಆನಿ ತುಂಮಿ ವಚಾ….. ತೊ ವಾಗ್ ಫೆರ‍್ನಾಂದ್ ಆಮ್ಕಾಂ ಪೊಟ್ಲುನ್ ಧರ‍್ನ್ ಸ್ವಾಗತ್ ಕರ‍್ತಲೊ…. ಆಮಿಂ ಬೆಂಡಾಂ ವಾಜ್ಪಾನ್ ತಾಂಚ್ಯಾ ಘರಾ ಯಾ…. ಫಾಲ್ಯಾಂಚ್ಚ್ ಯಾ….”
ಮೆಘನಾಕ್ ಬಾಪಾಯ್ಚಿ ಆವಸ್ತಾ ಸಮ್ಜಲಿ. ತೊ ದೆದೆಸ್ಪಾರ್ ಜಾಲ್ಲೊ. ಕಿತೆಂ ಉಲಯ್ತಾ ಮ್ಹಣ್ ಬಾಪಾಯ್ಕ್‌ಚ್ಚ್ ಕಳಿತ್ ನಾತ್ಲ್ಲೆಂ… ಖಂಚಾಯ್ ಬಾಪಾಯ್ಕ್ ಜಾಂವ್ಚಿ ಸ್ವಾಭಾವಿಕ್ ಅವಸ್ತಾ ತಿ….
“ನಾ ಡ್ಯಾಡ್…. ತುಕಾ ಲಜೆರ್ ಘಾಲುಂಕ್ ಆಮಿಂ ತಯಾರ್ ನಾಂವ್….. ಡೆನ್ಜಿಲಾನ್ ಮ್ಹಜ್ಯಾ ಲಾಗಿಂ ಕಾಜಾರ್ ಜಾಂವ್ಚ್ಯಾ ವಿಶ್ಯಾಂತ್ ತಾಂಚ್ಯಾ ಘರ‍್ಚ್ಯಾಂಕ್ ಸಂಪೂರ್ಣ್ ವಿರೋಧ್ ಆಸಾ…. ತೆಂ ಆಮಿಂ ಜಾಣಾಂವ್…. ಡೆನ್ಜಿಲ್‌ಯ್ ಜಾಣಾ….”
“ದೆಕುನ್….ಆಮಿಂ ಕಿತೆಂ ಕರಿಜಯ್ ಮ್ಹಣ್ ತುಂ ಖುಶಿ ವರ‍್ತಾಯ್…..??” ದೊಮಿನಿಕ್ ಪರತ್ ಬೊಬಾಟ್ಲೊ.
“ದೆಕುನ್ ತುಮಿಂ ಕಾಂಯಿಂಚ್ಚ್ ಕರ್ಚೆಂ ನಾಕಾ…..ಆಮಿಂಚ್ಚ್ ಭಾರತ್ ಸಾಂಡುನ್ ಕೆನಡಾಕ್ ವೆಚೆಂ ಮ್ಹಣ್ ಚಿಂತ್ಲಾಂ…. ಆಮ್ಕಾಂ ಕೆನಡಾ ದೆಶಾಚಿ ವಿಧ್ಯಾರ‍್ಥಿಚಿಂ ವಿಸಾ ಮೆಳ್ಳ್ಯಾ….. ವೆಗಿಂಚ್ಚ್ ಆಮಿಂ ಕೆನಡಾಕ್ ವೆತೆಲ್ಯಾಂವ್ ಆನಿ ಥಂಯ್ಸರ್ ಆಮ್ಕಾಂ ಸಾಂಗಾತಾ ಜಿಯೆಂವ್ಕ್ ಕೊಣಾಯ್ಚಿ ಕಾಂಯ್ಚ್ಚ್ ಆಡ್ಕಳ್ ಆಸ್ಚಿನಾ…”
ಸಾಲಾಂತ್ ಕಟಿಣಾಯೆಚೆಂ ಮೌನ್ಪಣ್ ಭರ‍್ಲೆಂ. ಸರ‍್ವಾಂ ಆಜಾಪೊನ್ ಮೆಘನಾಚಿಂ ಉತ್ರಾಂ ಆಯ್ಕಾತಾಲಿಂ…
“ಆನಿ ಏಕ್ ಮಾತ್ರ್ ವಿನಂತಿ…..” ಮೇಘನ್ ಮುಂದರ‍್ಸುನ್ ಉಲಯ್ಲೆಂ. ” ಡೆನ್ಜಿಲ್ ಭಾರತ್ ಸಾಂಡುನ್ ಕೆನಡಾಕ್ ವೆತಾ ಮ್ಹಣ್ ಆಮಿಂ ಭಾರತ್ ಸಾಂಡ್ತಾ ಮ್ಹಣಾಸರ್ ತಾಚ್ಯಾ ಕುಟ್ಮಾಕ್ ಕಳೊಂಕ್ ನಜೊ…. ಹಿಚ್ಚ್ ಮ್ಹಜಿ ವಿನವ್ಣಿ ತುಮ್ಚ್ಯಾ ಲಾಗಿಂ…..”
ಕೊಣಾಯ್ ಥಾವ್ನ್ ಜವಾಬ್ ಆಯ್ಕೊಂಕ್ ಆಶೆನಾಸ್ತಾನಾ ಘರ‍್ಚ್ಯಾ ಮಾಳಿಯೆಚಿಂ ಮೆಟಾಂ ಚಡೊನ್ ಆಪ್ಲ್ಯಾ ಕುಡಾಕ್ ಗೆಲೆಂ ಮೇಘನ್
ಥಟಕ್ಕ್ ಜಾವ್ನ್ ಮೌನ್‌ಪಣಾಂತ್ ಸರ‍್ವಾಂ ಮೆಘನಾಕ್ ಪಳವ್ನ್ಂಚ್ಚ್ ಬಸ್‍ಲ್ಲಿಂ….
■ ಕ್ಲೆರೆನ್ಸ್, ಕೈಕಂಬ
- ತುಟ್‍ಲ್ಲ್ಯಾ ಸಂಬಂಧಾಂತ್ಲಿ ಏಕ್ ಸೈರಿಕ್
- ಎಕ್ ಝುಜ್ ; ಚಾರ್ ಅವಸ್ವರ್
- ನಿನೆವ್ಹೆ ಶ್ಹೆರಾಂತ್ಲೊ ಏಕ್ಲೊಚ್ಚ್ ಭಾಗೆವಂತ್ ಮನಿಸ್
- ಮಿರ‍್ಣ್ಯಾಮ್ ಆನಿ ಘಾಂಟ್
- ತಾಂಬ್ಡ್ಯಾ ರಗ್ತಾಚೊ ಕಾಳೊಚ್ಚ್ ಆವ್ಗುಣ್
- ತೀನ್ ಮುಟಿ ಮಾತಿ
- ಏಕ್ ಕೂಡ್; ದೋನ್ ಸ್ವಾಸ್
- ಆಶೆಚೊ ಆಕಾಸ್ ಧರ್ಣಿಚೆರ್
- ಅನ್ಯೇಕ್ ದೀಸ್ ಜಿಯೆಂವ್ಕ್ ಸೊಡಾ
- ಮನಿಸ್ ಜಾಲ್ಲಿ ಏಕ್ ಮೂಟ್ ಮಾತಿ …
- ಚಿಂತ್ನಾಂ, ಸಬ್ದ್ ಆನಿ ಏಕ್ ಕರ‍್ನಿ
- ವೊತಾಂತ್ ಉಬೊ ಫಾರಿಜೆವ್
- ನವ್ಯಾ ಸಂಸಾರಾಂತ್ಲೊ ಪರ್ನೊ ಮನಿಸ್
- ರಗ್ತಾಚೊ ವಾಂಟೊ
ಏಕ್ ಬರೊ ಶಿಕ್ಷಕ್ ಹಜಾರೊಂ ವಿದ್ಯಾರ‍್ತಿಂಚೆಂ ಭವಿಶ್ಯ್ ರೂಪಿತ್ ಕರ್ತಾ; ತಸೆಂ ಮ್ಹಳ್ಯಾರ್ ಎಕ್ಲೊ ಬರೊ ಶಿಕ್ಷಕ್ ಸಮಾಜ್‌ಚ್ಚ್ ಬದ್ಲೊಂಕ್ ಸಕ್ತಾ… ಸಂಸಾರ್‌ಚ್ಚ್ ಬದ್ಲೊಂಕ್ ಸಕ್ತಾ… ಆದರ‍್ಶ್ ಶಿಕ್ಷಕಾಚೊ ಪ್ರಭಾವ್ ಮನ್ಶಾಜಿಣಿಯೆಚ್ಯಾ ಆಖೇರಿ ಪರ್ಯಾಂತ್ ಆಸ್ತಾ…
ಆಮ್ಚ್ಯಾ ಗುರ‍್ಪುರ್ ಕೈಕಂಬಚ್ಯಾ ಪೊಂಪೈ ಇಗರ‍್ಜೆಕ್ ವೆವೆಗ್ಳ್ಯಾ ನಾಂವಾನಿಂ ಉಲೊ ಕರ‍್ಚಿ ಯಾ ವಳ್ಕೊಂಚಿ ರಿವಾಜ್ ಆದಿಂ ಮಾಗಾಂ ಥಾವ್ನ್ ಚಲೊನ್ ಆಯ್ಲ್ಯಾ. ಥೊಡೆ ಜಣ್ ‘ಕೌಡುರ್ ಇಗರ‍್ಜ್’ ಮ್ಹಣ್ತಾತ್ ತರ್ ಥೊಡೆ ‘ಗುರ‍್ಪುರ್ ಇಗರ‍್ಜ್’ ಮ್ಹಣ್ ಆಪಯ್ತಾತ್. ಥೊಡೆ ಜಣ್ ‘ಪೊಂಪೈ ಇಗರ‍್ಜ್’ ಮ್ಹಣ್ಂಚ್ಚ್ ವಳ್ಕಾತಾತ್. ಹ್ಯಾ ಇಗರ‍್ಜಿಚ್ಯಾ ಪಾಟ್ಲ್ಯಾನ್ ಏಕ್ ವಿಸ್ತಾರ್ ಖೆಳ್ಚೆಂ ಮಯ್ದಾನ್ (ಆಟದ ಬಯಲು) ಆಸಾ. ತಾಚ್ಯಾ ಮಧೆಂಚ್ಚ್ ಕಾರಾಂ ಆನಿ ವಾಹನಾಂ ವಚೊನ್ ವಾಟ್‌ಯ್ ಜಾಲ್ಯಾ. ಸಾಂಜೆಚೆಂ ಥಂಯ್ಸರ್ ತರ‍್ನಾಟೆ ಭುರ‍್ಗೆ ಖೆಳೊನ್ ಆಸ್ತಾತ್. ಹಾಂವ್ ಲ್ಹಾನ್ ಆಸ್ತಾನಾ ಆಸ್‌ಲ್ಲ್ಯಾಬರಿಚ್ಚ್ ಆತಾಂಯ್ ತೆಂ ಮಯ್ದಾನ್ ಆಸಾ. ಹಾಂವ್ ರಜೆರ್ ಗಾಂವಾಕ್ ಗೆಲ್ಲ್ಯಾ ವೆಳಿಂ, ತ್ಯಾ ಮಯ್ದಾನಾಚೆರ್ ಪಾಸಾಯೊ ಮಾರುಂಕ್ ಗೆಲ್ಲೊಂ. ತ್ಯಾಚ್ಚ್ ವೆಳಿಂ, ಮತಿಚ್ಯಾ ಭ್ರಮಿದೆಂತ್ ಪಾಸಾಯ್ಯೊ ಮಾರ್‌ಲ್ಲ್ಯಾ ಬರಿ ಜಾಲ್ಲೆಂ. ಎಕ್ಲೊ ಬಳ್ವಂತ್ ಶಿಕ್ಷಕ್, ಜಿವಾನ್ ಚಿಕ್ಕೆ ದಾಟೊ ಮೊಟೊ, ದವೊಚ್ಚ್ ಕಡಕ್ಕ್ ಮುಂಡು ನೆಸೊನ್, ದವೆಂಚ್ಚ್ ಕಡಕ್ಕ್ ಖೊಮಿಸ್ ಘಾಲ್ನ್ ಹಾತಿಂ ವ್ಹಡ್ ಸತ್ರಿ ಘೆವ್ನ್, ಘಡ್ಯೆಕ್ ಏಕ್ ಪಾವ್ಟಿಂ ಕೊಂಕ್ಲಿ ಕಾಡ್ನ್ ಚಲೊನ್ ಯೆಂವ್ಚೊ ದಿಸ್‌ಲ್ಲ್ಯಾ ಬರಿ ಜಾಲ್ಲೆಂ. ತೆಂ ಏಕ್, ಮತಿ ಪಾಗೊರಾಂತ್ಲೆಂ ಚಿಂತ್ಪಾ ಸಾಗೊರಾಂತ್ಲೆ ಖಿಣಾಚೆಂ ಘಡಿತ್…. ನೀಜ್ ನ್ಹಯ್…. ಪುಣ್, ಹ್ಯಾ ಮ್ಹಜ್ಯಾ ಪ್ರಾಯೆರ್ ಜಾಲ್ಯಾರ್‌ಯ್ ಜರ್ತರ್ ತೊ ಶಿಕ್ಷಕ್ ನೀಜ್ ಜಾವ್ನ್ ಮುಕಾರ್ ದಿಸ್‌ಲ್ಲೊ, ಆತಾಂಯ್ ಭಿಯಾನ್ ಹಾತ್ ಜೊಡುನ್ ‘ನಮಸ್ತೆ ಸರ್’ ಮ್ಹಣ್ತೊಂ ಕೊಣ್ಣಾ… ತಿತ್ಲೊ ವ್ಹರ‍್ತೊ ಪ್ರಭಾವ್ ಮ್ಹಜ್ಯಾ ಜಿವಿತಾಂತ್, ತ್ಯಾ ಎಕಾ ಬಳ್ವಂತ್, ಪ್ರಭಾವಿಕ್, ಸಾದ್ಯಾ ಆನಿ ನಿಷ್ಟ್ ಶಿಕ್ಷಕಾಚೊ. ಮ್ಹಜೆರ್ ಮಾತ್ರ್ ನ್ಹಯ್ ತಾಣೆ ಶಿಕಯಿಲ್ಲ್ಯಾ ಸರ್ವಾಂಕ್ ತಸಲೊಚ್ಚ್ ಆನ್ಭೋಗ್ ಜಾಲಾ ತೆಂ ಸಹಜ್…
ತ್ಯಾ ಪ್ರತಿಷ್ಟಿತ್ ಶಿಕ್ಷಕಾಚೆಂ ನಾಂವ್ ಜಾವ್ನಾಸಾ ಜೋನ್ ರಿಚ್ಚರ‍್ಡ್ ರೊಡ್ರಿಗಸ್. ಪೊಂಪೈ ಇಗರ‍್ಜೆಚ್ಯಾ ಸುತ್ತುರಾಚ್ಯಾ ಲೊಕಾನ್ ಆನಿ ಆಮಾ ಸರ‍್ವಾಂನಿ ಮೊಗಾನ್ ವಳ್ಕೊಂಚೊ ರಿಚ್ಚ ಮಾಸ್ಟೆರ್.
ಮ್ಹಜ್ಯಾ ಲಾನ್ಪಣಾ ಥಾವ್ನ್ ಶಿಕಾಪ್ ದಿಲ್ಲ್ಯಾ ಜಾಯ್ತ್ಯಾ ಜಾಣ್ತ್ಯಾ ಆನಿ ಉಂಚ್ಲ್ಯಾ ಮೆಸ್ತ್ರಿಂ ಪಯ್ಕಿ ಆಮ್ಚೊ ರಿಚ್ಚ ಮಾಸ್ಟೆರ್ ಪಯ್ಲ್ಯಾ ಸ್ಥಾನಾರ್ ಯೆತಾ ಮ್ಹಣ್ಯೆತ್. ಕೈಕಂಬ ಗುರ‍್ಪುರ್ ಯಾ ಕೌಡುರ್ ಪೊಂಪೈ ಸಾಯ್ಭಿಣಿಕ್ ಸಮರ‍್ಪಿಲ್ಲ್ಯಾ ಇಸ್ಕಾಲಾಂತ್ ಶಿಕ್‌ಲ್ಲ್ಯಾ ಆಮ್ಕಾಂ ತಿಸ್ರ್ಯಾ ಕ್ಲಾಸಿ ಮ್ಹಣಾಸರ್ ಇಗರ‍್ಜಿಚ್ಯಾ ಪಾಟ್ಲ್ಯಾನ್ ಆಸ್ಚೆಂ ಪರ‍್ನೆಂ ಇಸ್ಕಾಲ್ ಆಸ್ಲ್ಲೆಂ. ತ್ಯಾ ಇಸ್ಕಾಲಾಂತ್ ಬಸೊಂಕ್ ಬಾಂಕ್ ಮಾತ್ರ್. ಪಯ್ಲ್ಯಾ ವರ‍್ಗಾಂಚ್ಯಾಂಕ್ ಧರ‍್ಣಿಚೆರ್‌ಚ್ಚ್ ಬಸೊಂಕ್. ಥೊಡ್ಯಾ ಪಾವ್ಟಿಂ ರುಕಾ ಮುಳಾಂತ್ ಆಮ್ಕಾಂ ಲಿಸಾಂವ್ ಶಿಕಂವ್ಚೆಂಯ್ ಆಸ್ಲ್ಲೆಂ. ಬೆಥನಿ ಮಾದ್ರಿಚ್ಚ್ ಚಡ್ ಜಾವ್ನ್ ಆಸ್ಚ್ಯಾ ತ್ಯಾ ಇಸ್ಕಾಲಾಂತ್ ಚವ್ತ್ಯಾ ಕ್ಲಾಸಿಕ್ ಭಡ್ತಿ ಜಾತಾನಾ ನವ್ಯಾ ಇಸ್ಕಾಲಾಕ್ ಆಮಿಂ ಗೆಲ್ಲ್ಯಾಂವ್. ತೆದ್ನಾಂ ರಿಚ್ಚ ಮಾಸ್ಟೆರಾಕ್ ಸಾರ್ಕೆಂ ಪಳಯಿಲ್ಲೆಂ. ‘ಅಳೆ, ತುಮಿಂ ಬರೆಂ ಕರ್ನ್ ಶಿಕಾನಾ ತರ್ ರಿಚ್ಚ ಮಾಸ್ಟೆರ್ ಬೊಡಿ ಹಾಡ್ನ್ ತುಮ್ಚ್ಯಾ ಪಾಟಿಚಿ ಖಾತ್ ಕಾಡ್ತಾ ಪಳೆ…’ ತಿಸ್ರ್ಯಾ ವರ‍್ಗಾಂತ್ ಶಿಕಯಿಲ್ಲ್ಯಾ ಎಸ್ತೆಲ್ ಟಿಚೆರಿನ್ ಆಮ್ಕಾಂ ಸಾಂಗ್ಲ್ಲೆಂ ಆತಾಂಯ್ ಉಡಾಸಾಂತ್ ಆಸಾ. ತೆದ್ನಾಂಚ್ಚ್, ರಿಚ್ಚ ಮಾಸ್ಟೆರ್ ಆಮ್ಕಾಂ ಭುರ‍್ಗ್ಯಾಂಕ್ ಭಿಯೆಂವ್ಕ್ ಕರ್ಚೊ ಮನಿಸ್ ಜಾವ್ನಾಸ್ಲ್ಲೊ. ಕಡಕ್ಕ್ ಮೆಸ್ತ್ರಿ!!
ದೊವೊ ಮುಂಡು ಘಾಲ್ನ್ ಖಾಕೆಕ್ ಸತ್ರಿ ಮಾರುನ್ ತೊ ಯೇತ್ ಜಾಲ್ಯಾರ್ ಆಮಿ ಭುರ‍್ಗೆ ತಾಚ್ಯಾ ಮುಕಾರ್ ಬಿಲ್ಕುಲ್ ದಿಸಾನಾತ್‌ಲ್ಲ್ಯಾಂವ್. ಸಾತ್ವೆಂತ್ ಹಾಂವ್ ಪಾವ್ತಾನಾ ಇಸ್ಕಾಲಾಚೊ ಮುಖೆಲಿ ಜಾಂವ್ಚೆಂ ಭಾಗ್ ಮ್ಹಾಕಾ ಮೆಳ್ಲ್ಲೆಂ. ತೆದ್ನಾಂ, ಇಸ್ಕಾಲಾಚಿ ಆನಿ ಇಸ್ಕಾಲಾಚ್ಯಾ ಕಂಪೌಂಡಾಚಿ ನಿತಳಾಯ್ ಕರುಂಕ್ ಆಮ್ಕಾಂ ಭುರ‍್ಗ್ಯಾಂಕ್‌ಚ್ಚ್. ನಿತಳಾಯ್ ಕೆಲ್ಯಾಗೀ ಮ್ಹಣ್ ಪಳಂವ್ಕ್, ಭುರ‍್ಗ್ಯಾಂಚೆ ಮೌನ್ಪಣ್ ಸಾಂಬಾಳುಂಕ್ ಆಮ್ಕಾಂ ಮುಖೆಲ್ಯಾಂಕ್. ಪಿಯೆಂವ್ಚೆಂ ಉದಕ್ ಪಾದ್ರ್ಯಾಬಾಚ್ಯಾ ಘರಾ ಲಾಗಿಂ ಆಸ್ಚ್ಯಾ ಚಟ್ಟ್ಯಾಂನಿ ಭರುಂಕ್ ಆಮ್ಕಾಂಚ್ಚ್. ಹರ‍್ಯೆಕಾ ಕ್ಲಾಸಿಚಿ ಆವ್ದಿ (ಪಿರೀಯೆಡ್) ಜಾತಾನಾ ಬೆಲ್ ಮಾರುಂಕ್ ಆನಿ ಸಾಂಜೆರ್ ಇಸ್ಕಾಲ್ ಜಾಲ್ಯಾ ಉಪ್ರಾಂತ್ ಇಸ್ಕಾಲಾಚಿಂ ಸಗ್ಳಿಂ ಜನೆಲಾಂ ಬಾಗ್ಲಾಂ ದಾಂಪುನ್, ಚಾವಿ ವಿಗಾರಾ ಲಾಗಿಂ ದವರ್ನ್ ಇಸ್ಕಾಲಾಚೊ ಮುಖೆಲಿ ಜಾಲ್ಲ್ಯಾ ಮ್ಹಾಕಾ ಘರಾ ವಚೊಂಕ್.
ಸಾಂಜೆರ್ ಘರಾ ಗೆಲ್ಯಾ ಉಪ್ರಾಂತ್ ತಣ್ ಯಾ ರಾಂದಯ್ ಮಾತ್ಯಾರ್ ಘೆವ್ನ್ ಗುರ‍್ಪುರ್ ಪೆಂಟೆಕ್ ವಚೊಂಕ್ ಆಸ್ತಾಲೆಂಚ್ಚ್. ತೆದ್ನಾಂ, ತಣ್ ಯಾ ರಾಂದಯ್ ಮಾತ್ಯಾರ್ ವಾವವ್ನ್ ವೆತಾನಾ, ಲಜ್ ದಿಸ್ತಾಲಿ. ಆನಿ ಏಕ್ ದೀಸ್, ಆಮ್ಚೊ ಮುಖೆಲ್-ಮೆಸ್ತ್ರಿ ರಿಚ್ಚ ಮಾಸ್ಟೆರ್ ಮಾತ್ಯಾರ್ ಸಾರೆಂ ವಾವವ್ನ್ ಸಾಲ್ಮಾರ‍್ಗ ಆಸ್ಚ್ಯಾ ತಾಂಚ್ಯಾ ಗಾದ್ಯಾಕ್ ವೆಚೊ ಹಾಂವೆ ಪಳಯಿಲ್ಲೊ. ಮತಿಂತ್ ಆಯಿಲ್ಲೆಂ ಎಕ್‌ಚ್ಚ್ ಚಿಂತಾಪ್ – ‘ಜರ್ತರ್ ಆಮ್ಚೊ ಮುಕೆಲ್ ಮೆಸ್ತ್ರಿ ಸಾರೆಂ ವಾವವ್ನ್ ಗಾದ್ಯಾಕ್ ಯಾ ಕುಮೆರಿಕ್ ವೆತಾ, ಮ್ಹಾಕಾ ಕಸಲಿ ಲಜ್?’ ತಸೆಂ ರಿಚ್ಚ ಮಾಸ್ಟೆರಾಚೆಂ ಸಾದೆಂಪಣ್ ಪಳವ್ನ್ ಮ್ಹಜ್ಯಾ ಥಂಯ್ ಆಸ್ಲ್ಲೊ ಲಜೆಚೊ ಅವ್ಗುಣ್ ಉಣೊ ಜಾಲೊ ಮ್ಹಣ್ಯೆತ್. ಆಮ್ಚ್ಯಾ ಗೊಟ್ಯಾ ಥಾವ್ನ್ ಗೇಣಿಕ್ ಕಾಣ್ಘೆಲ್ಲ್ಯಾ ಅಬುಟ್ ದಾಟ್ಟುಚ್ಯಾ ಜಾಗ್ಯಾಕ್ ವೆತಾನಾ ಕಿತ್ಲೆಶ್ಯಾ ಪಾವ್ಟಿಂ ತಾಂಚ್ಯಾ ಗಾದ್ಯಾಂತ್ ಕಾಮ್ ಕರ್ಚೊ ರಿಚ್ಚ ಮಾಸ್ಟೆರ್ ಮೆಳ್ಳಾ… ಆನಿ ತಾಣೆಂ ಏಕ್ ಪಾವ್ಟಿಂ ಸಾಂಗ್‍ಲ್ಲೆಂಯ್ ಆಸಾ ” ಕಸಲೆಂಯ್ ಕಾಮ್ ಕರುಂಕ್ ಮನ್ಶಾಕ್ ಲಜ್ ಬಿಲ್ಕುಲ್ ದಿಸೊಂಕ್ ನಜೊ … ಕಷ್ಟ್ ಕಾಡ್ನ್ ಜಿವಿತಾಂತ್ ಮುಖಾರ್ ಆಯ್ಲ್ಯಾರ್ ದೇವ್‌ಯ್ ಆಮ್ಕಾಂ ಸಾಂಬಾಳ್ತಾ” ಉಂಚ್ಲ್ಯಾ ಚಿಂತ್ಪಾಚ್ಯಾ ಮೆಸ್ತ್ರಿಚೆಂ ಉಂಚ್ಲೆ ಚಿಂತಾಪ್ ತೆಂ.
ಸಾತ್ವೆಂತ್ ರಿಚ್ಚ ಮಾಸ್ಟೆರ್ ಆಮ್ಕಾಂ ಗಣಿತ್ ಶಿಕಯ್ತಾಲೊ. ಹಾಂವ್ ಇಸ್ಕಾಲಾಚೊ ಭುರ‍್ಗ್ಯಾಂಚೊ ಮುಖೆಲಿ ಜಾಲ್ಲ್ಯಾನ್ ಮ್ಹಾಕಾ ಪಾಟ್ಲ್ಯಾ ಬಾಂಕಾರ್ ಬಸೊಂಕ್. ಆಮ್ಚೆಂ ಇಸ್ಕಾಲ್ ಲಾಂಬ್ ಸಭಾಸಾಲ್‌ಚ್ಚ್. ಮಧೆಂ ಮಧೆಂ ರುಕಾಡಾಚಿಂ ಫಾಳಿಂ ಆಡ್ ದವರ್ನ್ ಎಕಾ ಕ್ಲಾಸಿ ಥಾವ್ನ್ ಆನ್ಯೇಕಾ ಕ್ಲಾಸಿಕ್ ವಿಂಗಡ್ ಕರ್ಚೆಂ ಆಸ್ಲ್ಲೆಂ. ಸಾಲಾಚ್ಯಾ ಮಧೆಂಚ್ಚ್, ಮ್ಹಳ್ಯಾರ್ ಪಾಂಚ್ವ್ಯಾ ಕ್ಲಾಸಿಂತ್ ಗಡಿಯಾಳ್ ಉಮ್ಕಾಳಾಯಿಲ್ಲೆಂ. ತೆದಾಳಾ ಆಮ್ಚ್ಯಾ ಹಾತಾಂತ್ ಗಡಿಯಾಳ್ ನಾತ್ಲ್ಲೆಂ. ತೆಂ ಗಡಿಯಾಳ್ ಪಳವ್ನ್ ಹಾಂವೆಂ ಇಸ್ಕಾಲಾಚಿ ಬೆಲ್ಲ್ ಮಾರುಂಕ್. ತಸೆಂ ಬೆಲ್ಲ್ ಮಾರುಂಕ್ ಪಾಂಚ್ ಮಿನುಟಾಂ ವೇಳ್ ಜಾಲೊ ತರ್ ರಿಚ್ಚ ಮಾಸ್ಟೆರಾಚ್ಯೊ ಖುಟಿ ಪಡ್ತಾಲ್ಯೊಚ್ಚ್ ಆನಿ ತೊ ಮ್ಹಣ್ತಾಲೊ – ‘ಬೇಲಿಯೆ ಹೊಲವನ್ನು ಮೇದರೆ, ಮೇವೆಲ್ಲಿ ?’ (ವೋಂಯ್‌ಚ್ಚ್ ಚರೊವ್ ಖಾಯ್ತ್ ತರ್ ಚರೊವ್ ಕಸೊ ಉರ‍್ಚೊ??) ತಸೆಂ ಜಾವ್ನ್ ಜಾವ್ಯೆತ್ ಆತಾಂಯ್ ಹಾಂವ್ ವೆಳಾಂತ್ ಪಕ್ಕಾ ಶಿಸ್ತ್ ಸಾಂಬಾಳ್ತಾಂ. ರಿಚ್ಚ ಮಾಸ್ಟೆರಾಚೆಂ ಪ್ರೇರಣ್ !
ರಿಚ್ಚ ಮಾಸ್ಟೆರಾಚಿ ಎಕ್ಲಿಚ್ ಧುವ್ ಫ್ಲೇವಿ
ಪೊಂಪೈ ಯಂಗ್‌ಸ್ಟರ‍್ಸ್ ಕ್ಲಬಾಚೊ ಕಾರ್ಯದರ್ಶಿ ಜಾವ್ನ್ ಸೆವಾ ದಿತಾನಾ ಆಮ್ಚೊ ಅಧ್ಯಕ್ಷ್ ಜಾವ್ನಾಸ್ಲ್ಲೊ ತಾಲೆಂತ್‌ವಂತ್ ತರ್ನಾಟೊ ಆನಿ ಮ್ಹಜೊ ಮಿತ್ರ್ ವಲೇರಿಯನ್ ಗ್ರೆಶಿಯನ್ ಪೇರಿಸ್. ಆಮಿ ಹಳ್ಳೆಂತ್ ಜಿಯೆವ್ನ್ ಆಸ್ಲ್ಲ್ಯಾನ್, ಆಮಿ ಹುದ್ದೆದಾರ್ ಜಾಂವ್ಚ್ಯಾ ಪಯ್ಲೆಂ ನಾಟಕ್ ಸಾದರ್ ಕೆಲ್ಲೆ ತರ್ ಚೆಡ್ವಾಂಚೊ ಪಾತ್ರ್ ಚೆರ‍್ಕ್ಯಾಂನಿ ಕರ್ಚೊ. ಪುಣ್, ಆಮ್ಚ್ಯಾ ಥಂಯ್ ಆಯಿಲ್ಲಿ ಏಕ್ ನವಿ ಆಲೋಚನ್, ಚಲಿಯಾಂಚೊ ಪಾತ್ರ್ ಚಲಿಯಾಂನಿಂಚ್ಚ್ ಸಾದರ್ ಕರಿಜಯ್ ಮ್ಹಣ್. ತ್ಯಾ ವೆಳಾರ್ ಮಾನಾಧಿಕ್ ಬಾಪ್ ರೋಶನ್ ಕಾಪುಚಿನ್ ಹಾಂಚ್ಯಾ ಮುಖೇಲ್ಪಣಾರ್ ಯುವಜಣಾಂಚೆಂ ಶಿಬಿರ್ ಆಮ್ಚ್ಯಾ ತರ‍್ನ್ಯಾಟ್ಯಾಂಕ್ ಪಯ್ಲೆ ಪಾವ್ಟಿಂ ಆಸಾ ಕೆಲ್ಲೆಂ. ಹ್ಯಾ ಶಿಬಿರಾಂತ್ ಚಲಿಯಾಂನಿ ಹಾಜರ್ ಜಾಯ್ಜಯ್ ಮ್ಹಣ್ ಆಮ್ಚೆಂ ಚಿಂತಾಪ್. ಶಿಬಿರಾ ಉಪ್ರಾಂತ್ ಚಲಿಯಾಂನಿ ಚಲ್ಯಾಂ ಸಾಂಗಾತಾ ನಟನ್ ಕರಿಜಯ್ ಮ್ಹಳ್ಳೆಂ ಯೋಜನ್. ಪುಣ್, ಚಲಿಯ್ಯೊ ನಾಟಕ್ ಅಭ್ಯಾಸಾಕ್ ಯೆಂವ್ಕ್ ಆಯ್ಕಾಚ್ಚ್ ನಾಂತ್… ಕಿತ್ಯಾಕ್ ತಸೆಂ ಅಭ್ಯಾಸಾಕ್ ಯೇವ್ನ್ ತಾಂಕಾ ಸವಯ್‌ಚ್ಚ್ ನಾ. ತ್ಯಾ ಶಿವಾಯ್ ತೆದ್ನಾಂ ಆಸ್ಲ್ಲ್ಯಾ ಫಿರ‍್ಗಜೆಚ್ಯಾ ಮಾಲ್ಘಡ್ಯಾಚೆಂ ವಿರೋಧ್ಪಣ್ ದರಬಸ್ತ್ ಆಸ್ಲ್ಲೆಂ. ಆಮ್ಕಾಂ ದಿಸ್‌ಲ್ಲಿ ವಾಟ್ ರಿಚ್ಚ ಮಾಸ್ಟೆರಾಚ್ಯಾ ಘರಾಚಿ.
ಆಮಿಂ, ಹಾಂವ್ ಆನಿ ಬಾಪ್ ರೋಶನ್, ತಾಚ್ಯಾ ಘರಾ ಗೆಲ್ಲ್ಯಾಂವ್. ಚಲಿಯಾಂನಿ ಶಿಬಿರಾಂತ್ ಪಾತ್ರ್ ಘೆಂವ್ಚೊ ಆನಿ ಚಲ್ಯಾ ಚಲಿಯಾಂನಿ ಸಾಂಗಾತಾ ನಟನ್ ಕರ್ಚೊ ಪ್ರಸ್ತಾಪ್ ಮುಖಾರ್ ದವರ್‌ಲ್ಲೊ. ರಿಚ್ಚ ಮಾಸ್ಟೆರ್ ಕಾಂಯ್ ಆಕ್ಷೇಪ್ ನಾಸ್ತಾನಾ ಮ್ಹಾಕಾ ಉದ್ದೇಸುನ್ ಮ್ಹಣಾಲೊ – “ಹ್ಯಾ ಪಿರ‍್ಗಜೆಚ್ಯೊ ಚಲಿಯ್ಯೊ ತುಮ್ಚ್ಯೊ ಭಯ್ಣಿಂ ಆನಿ ತಾಂಕಾ ಸಾಂಬಾಳ್ಚೆಂ ತುಮ್ಚೆಂ ಕರ‍್ತವ್ಯ್. ಆಮ್ಚ್ಯಾ ಧುವೆನ್, ಪ್ಲೇವಿನ್ ತುಮ್ಚ್ಯಾ ಸಾಂಗಾತಾ ನಟನ್ ಕರ‍್ಚ್ಯಾಕ್ ಮ್ಹಜಿ ಕಾಂಯ್ ಅಡ್ಡಿ ನಾ.” ರಿಚ್ಚ ಮಾಸ್ಟೆರಾಚ್ಯಾ ಹ್ಯಾ ಉತ್ರಾಂ ವೊರ‍್ವಿಂ, ಪೊಂಪೈಚ್ಯಾ ನಾಟಕ್ ವೆದಿಚೆರ್ ಪಯ್ಲ್ಯಾ ಪಾವ್ಟಿಂ ಚಲ್ಯಾ ಚಲಿಯಾಂನಿ ಸಾಂಗಾತಾ ನಟನ್ ಕೆಲ್ಲೆಂ ಆನಿ ಆಜೂನ್ ತಸೆಂಚ್ಚ್ ಜಾವ್ನ್ ಆಸಾ. ರಿಚ್ಚ ಮಾಸ್ಟೆರಾಚಿ ಧುವ್ ಪ್ಲೇವಿ ಆಯಿಲ್ಲೆಂಚ್ಚ್, ವಿನ್ನಿ ಪೇರಿಸ್, ಒಲಿವಿಯಾ ಪೆರ‍್ನಾಂಡಿಸ್ ಆನಿ ಹೆರ್ ಚಲಿಯ್ಯೊ ನಟನಾಕ್ ಮುಖಾರ್ ಆಯಿಲ್ಲಿಂ. ರಿಚ್ಚ ಮಾಸ್ಟೆರ್ ವಿಸ್ತಾರ್ ಮನೋಬಾವಾಚೊ ಮ್ಹಣ್ ಆಮ್ಕಾಂ ತ್ಯಾಚ್ಚ್ ವೆಳಾರ್ ಖಾತ್ರಿ ಜಾಲ್ಲೆಂ.
ರಿಚ್ಚ ಮಾಸ್ಟೆರಾಚೊ ಜಲ್ಮ್ ಆನಿ ಶಿಕಾಪ್ :
ಪಯ್ಲೆಂಚೊ ಪಡುಚೆ ಗಾಂವ್ ಆತಾಂಚೊ ಮೇರೆ ಮಜಲ್. ಥಂಡ್ ವಾರೆಂ ಆನಿ ಈಟಾಳ್ ಪಾಚ್ವಿ ಧರ‍್ತಿ. ಹ್ಯಾಚ್ಚ್ ಗಾವಾಂತ್ ಜಿಯೆವ್ನ್ ಆಸ್ಲ್ಲೆಂ ಭಾರಿಚ್ಚ್ ದೆವಾಸ್ಪಣಾಚೆಂ ಜೊಡೆಂ ಲುವಿಸ್ ರೊಡ್ರಿಗಸ್ ಆನಿ ಬ್ರಿಜಿತ್ ಪಿಂಟೊ ಹಾಂಚೆ. ಸಾಗೊಳಿಚ್ಯಾ ವಾವ್ರಾಂತ್ ದೀಸ್ ಸಾರ‍್ನ್ ಆಸ್ಲ್ಲಿಂ ತಿಂ ಕೌಡುರ್ ಗಾವಾಂತ್ ಯೇವ್ನ್ ರಾವ್ಲ್ಯಾ ಉಪ್ರಾಂತ್ ಜೋನ್ ರಿಚ್ಚರ‍್ಡ್ 27.03.1916 ವೆರ್ ಮಾಲ್ಘಡೊ ಪೂತ್ ಜಾವ್ನ್ ಜಲ್ಮಾಲ್ಲೊ. ತೆದ್ನಾಂ ತಾಂಚೆ ಘರ್ ಲ್ಹಾನ್ ಆನಿ ಕೊಲ್ವಾಚೆಂ ಜಾವ್ನಾಸ್ಲ್ಲೆಂ. ಜೋನ್ ರಿಚ್ಚರ‍್ಡಾ ಪಾಟ್ಲ್ಯಾನ್ ದೆವಾನ್ ಫಾವೊ ಕೆಲ್ಲಿಂ ಚವ್ಗಾಂ ಜಣಾಂ ಭುರ್ಗಿಂ ಆನಿ ತಿಂ ಜಾವ್ನಾಸಾತ್ – ಪ್ರೆಡ್ರಿಕ್, ಆಂಬ್ರೊಜ್, ಮಾರ‍್ಗರೆಟ್ ಆನಿ ಸಿರಿಲ್.
ಜೋನ್ ರಿಚ್ಚರ‍್ಡಾನ್ ಆಪ್ಲೆಂ ಪ್ರಾಥಮಿಕ್ ಶಿಕಾಪ್ ಪಯ್ಲ್ಯಾ ವರ‍್ಗಾಥಾವ್ನ್ ಸವ್ಯಾ ವರ‍್ಗಾ ಮ್ಹಣಾಸರ್ ಕಿನ್ನಿಕಂಬ್ಳ ಸರ್ಕಾರಿ ಪ್ರಾಥಮಿಕ್ ಇಸ್ಕಾಲಾಂತ್ ಕೆಲ್ಲೆಂ. ಉಪ್ರಾಂತ್ ಸಾತ್ವಿ ಆನಿ ಆಟ್ವ್ಯಾ ವರ‍್ಗಾಚೆಂ ಶಿಕಾಪ್ ತಾಣೆ ಬಜ್ಪ್ಯಾಂತ್ ಸಾಂತ್ ಜುಜೆಚ್ಯಾ ಇಸ್ಕಾಲಾಂತ್ ಕಾಬಾರ್ ಕೆಲ್ಲೆಂ. ತೆದಾಳಾಚೆಂ ಆಟ್ವಿ ಕ್ಲಾಸ್ ಶಿಕ್ಚೆಂ ಮ್ಹಳ್ಯಾರ್ ಆತಾಂ ಕೊಲೆಜಿಚ್ಯಾ ಸನದೆಚ್ಯಾ ಶಿಕ್ಪಾಕ್ ಬರಾಬರ್ ಜಾಂವ್ಕ್ ಪುರೊ. ಕೌಡುರ್ ಥಾವ್ನ್ ಬಜ್ಪ್ಯಾಂ ವಚೊಂಕ್ ವಾಟ್ ಲಾಂಬ್ ಆಸ್ಲ್ಲ್ಯಾನ್ ಸಾತ್ವಿ ಆನಿ ಆಟ್ವ್ಯಾ ವರ‍್ಗಾಂತ್ ಶಿಕ್ತಾನಾ ತೊ ಸಾಯ್ಕಲಾರ್ ಇಸ್ಕಾಲಾಕ್ ವೆತಾಲೊ.
ಪ್ರಕೃತೆಚ್ಯಾ ಸೊಭಾಯೆನ್ ವಿಣ್‌ಲ್ಲ್ಯಾ ಪಾಚ್ವ್ಯಾ ಸಾಡಿಯೆನ್ ನೆಸ್‌ಲ್ಲ್ಯಾ ಕೌಡುರ‍್ಚ್ಯಾ ರೊಸಾಳ್ ಆನಿ ಈಟಾಳ್ ಗಾವಾಂತ್ ತಾಚಿ ವಾಡಾವಳ್ ಜಾಲಿ. ಕಾಜುಚಿ ಪಾಡ್ ಆಸೊನ್ ಮಧೆಂಚ್ಚ್ ಲ್ಹಾನ್‌ಶಿ ಘಾಟಿ ದೆಂವೊನ್ ಸಕಯ್ಲ್ ಗೆಲ್ಯಾರ್ ಮಾಡಾ ಮಾಡಿಯಾಂನಿ ಭರ್ಲ್ಲೆಂ ಹಿತಾಲ್ ಮೆಳ್ತಾ. ಹ್ಯಾ ಜಾಗ್ಯಾಕ್ ಭೆಟ್ ದಿಲ್ಯಾರ್ ಚವೀಸ್ ವರಾಂಯ್ ಥಂಡ್ ಆನಿ ನಿತಳ್ ವಾರೆಂ. ಚಾರಾಂಯ್ ಕುಶಿಂನಿ ದೀಷ್ಟ್ ಭಂವ್ಡಾ ಯ್ಲ್ಯಾರ್ ಪಾಚ್ವಿ ಸೃಷ್ಟಿ ಪಳಂವ್ಕ್ ಮೆಳ್ತಾ.
ರಿಚ್ಚ ಮಾಸ್ಟೆರ್ ಆನಿ ಪತಿಣ್ ರೋಜಾ ಬೆನೆಡಿಕ್ಟಾ
1947 ಇಸ್ವೆಚ್ಯಾ ಎಪ್ರಿಲಾಚ್ಯಾ 29 ತಾರಿಕೆರ್ ತಾಚೆಂ ಕಾಜಾರ್ ಬೆಳ್ಳೂರ್ ಗಾಂವ್ಚ್ಯಾ ರೋಜಾ ಬೆನೆಡಿಕ್ಟಾ ನೊರೊನ್ಹಾ ಲಾಗಿಂ ಜಾಲ್ಲೆಂ. ದೆವಾಚ್ಯಾ ವರ‍್ತ್ಯಾ ದಯೆನ್ ತಾಂಕಾ ಸ ಜಣಾಂ ತಾಲೆಂತ್‌ವಂತ್ ಭುರ್ಗಿಂ ಫಾವೊ ಜಾಲ್ಲಿಂ. ತಿಂ ಜಾವ್ನಾಸಾತ್ ಪ್ರಾಂಕ್, ಹೆರಾಲ್ಡ್, ಕ್ಲಿಫರ‍್ಡ್, ಒಸ್ವಳ್ಡ್, ಪ್ಲೇವಿ ಆನಿ ಮೆಲ್ವಿನ್. ಆಪ್ಲ್ಯಾ ಭುರ‍್ಗ್ಯಾಂಕ್ ಭಾರಿಚ್ಚ್ ಶಿಸ್ತೆನ್ ಆನಿ ಬರ್ಯಾ ಗೂಣಾಂನಿ ವಾಡಯಿಲ್ಲ್ಯಾನ್ ತಿಂ ಸರ‍್ವಾಂ ಉಂಚ್ಲ್ಯಾ ಹುದ್ದ್ಯಾರ್ ಪಾವ್ಲ್ಯಾಂತ್ ಆನಿ ಜಿವಿತಾಂತ್ ಜಯ್ತ್ ತಾಂಕಾ ಫಾವೊ ಜಾಲಾಂ.
ಪಾಂಚ್ ಜಣಾಂ ಚೆರ‍್ಕ್ಯಾಂ ಮಧೆಂ ಪ್ಲೇವಿ ಎಕ್ಲೆಂಚ್ಚ್ ಚೆಡುಂ ಭುರ‍್ಗೆಂ ಜಾಲ್ಲ್ಯಾನ್ ರಿಚ್ಚ ಮಾಸ್ಟೆರಾಕ್ ಚೆಡ್ವಾಂ ಭುರ‍್ಗ್ಯಾಂ ಥಂಯ್ ವಿಶೇಸ್ ಮಾನ್ ಆನಿ ಮಯ್ಪಾಸ್ ಮ್ಹಣ್ ಜಾಯ್ತೊ ಲೋಕ್ ಉಲಯ್ತಾಲೊ.
1957 ಇಸ್ವೆ ಮ್ಹಣಾಸರ್ ಕೊಲ್ವಾಚೆಂ ಆಸ್ಲ್ಲ್ಯಾ ಘರಾಕ್ ಜೋನ್ ರಿಚ್ಚರ‍್ಡಾನ್ ನಳ್ಯಾಚೆಂ ಘರ್ ಬಾಂಧಯ್ಲೆಂ ಆನಿ ಆಪ್ಲ್ಯಾ ಕುಟ್ಮಾ ಸಾಂಗಾತಾ ಸುಖಾ ಸಂತೊಸಾನ್ ಜಿಯೆಲ್ಲೊ.
ರಿಚ್ಚ ಮಾಸ್ಟೆರ್ … ಕುಟ್ಮಾಚೊ ಮನಿಸ್
ಸಾದೊ ಆನಿ ಖುಶಾಲಿ ಕುಟ್ಮಾಚೊ ಮನಿಸ್ ಜಾಲ್ಲ್ಯಾ ವೊರ‍್ವಿಂ ಆಪ್ಲ್ಯಾ ಕುಟ್ಮಾಕ್ ಆನಿ ಸೆಜಾರ‍್ಯಾಂ ಥಂಯ್ ಭಾರಿಚ್ಚ್ ಮೊಗಾನ್ ಆನಿ ಸಮ್ಜಣೆನ್ ಜಿಯೆಲ್ಲಿ ಕೀರ‍್ತ್ ತಾಚಿ. ಸಮಾಜೆಂತ್, ಕುಟ್ಮಾಂದಾರಾಂ ಮಧೆಂ, ಫಿರ‍್ಗಜ್‌ಗಾರಾಂ ಥಂಯ್ ಭಾರಿ ಬರೊ ಸಂಬಂಧ್ ತಾಣೆ ದವರ್‌ಲ್ಲೊ. ಜೀವನಾಂತ್ ಕಷ್ಟ್ ಕಿತೆಂ ಮ್ಹಣ್ ಕಳಿತ್ ಆಸ್ಲ್ಲ್ಯಾನ್, ಆಪ್ಲ್ಯಾ ಶಿಕ್ಷಕ್ ವೃತ್ತೆನ್ ಮೆಳ್ಲ್ಲೊ ಸಾಂಬಾಳ್ ಕುಟಾಂಬ್ ಪೊಸುಂಕ್ ಪಾವಾನಾತ್‌ಲ್ಲ್ಯಾನ್ ಸಕಾಳಿಂ ವೆಗ್ಗಿಂ ಉಟೊನ್ ಹಿತ್ಲಾಂತ್ಲಿ ಕಸ್ರಿ ಪಾನಾಂ ಖುಂಟುನ್, ಹಿತ್ಲಾಂತ್ ಉದಕ್ ಶಿಂಪ್ಚೆಂ ಕಾಮ್ ಕರ್ನ್ ಉಪ್ರಾಂತ್ ಸಕಾಳಿಂಚಿ ಪೇಜ್ ಜೇವ್ನ್ ಇಸ್ಕಾಲಾಕ್ ದಾಂವ್ತಾಲೊ. ಸಾಂಜೆರ್ ಇಸ್ಕಾಲ್ ಜಾಲ್ಯಾ ಉಪ್ರಾಂತ್ ಪರತ್ ಘರಾ ಯೇವ್ನ್, ಸಾಗೊಳೆಚ್ಯಾ ಕಾಮಾಂತ್ ಆಪ್ಲ್ಯಾ ಯೆಜ್ಮಾನೆಕ್ ಕುಮಕ್ ಕರ‍್ತಾಲೊ. ಘರಾಚಿ ಇತ್ಲಿ ಜವಾಬ್ದಾರಿ ತಾಣೆ ಘೆತ್‌ಲ್ಲಿ ತರ್ಯ್ ಇಸ್ಕಾಲಾಕ್ ಕೆದ್ನಾಂಯ್ ತೊ ವೇಳ್ ಕರುನ್ ಗೆಲ್ಲೊ ನಾ. ಇಸ್ಕಾಲಾಚ್ಯಾ ಜವಾಬ್ದಾರೆಚ್ಯಾ ಕಾಮಾಕ್ ತಾಣೆಂ ಪಯ್ಲೆಂ ಸ್ಥಾನ್ ದಿಲ್ಲೆಂ. ಜಿವಿತಾಂತ್ ಮೆಳ್ಲ್ಲೊ ವೇಳ್ ಅಮೂಲ್ಯ್ ಮ್ಹಣ್ ತಾಣೆ ವೇಳ್ ಕೆದ್ನಾಂಯ್ ವಿಭಾಡ್‍ಲ್ಲೊ ನಾ.
ಘರಾಂತ್ ಮೊಸ್ತು ಸೈರಿಂ ಆಯ್ಲಿಂ ತರ್ ತಾಕಾ ಭಾರಿಚ್ಚ್ ಖುಶಿ. ನವೆಂಬರ್ ಮಹಿನ್ಯಾಂತ್ ಜಾಂವ್ಚೆಂ ಪೊಂಪೈ ಮಾಯೆಚೆಂ ವ್ಹಡ್ಲೆಂ ಫೆಸ್ತ್ ಮ್ಹಳ್ಯಾರ್ ತಾಕಾ ಭಾರಿಚ್ಚ್ ದಾದೊಸ್ಕಾಯ್.
ಘರಾಂತ್, ಇಸ್ಕಾಲಾಂತ್ ಆನಿ ಸೆಜಾರಾ ಶಿಸ್ತೆಚೊ ಶಿಪಾಯ್ ಮ್ಹಣ್ ನಾಂವ್ ವೆಲ್ಲೊ ತೊ, ನಿತಳಾಯೆಕ್ ಭಾರಿಚ್ಚ್ ಮಹತ್ವ್ ದಿತಾಲೊ. ನೀಳ್ ಘಾಲ್ನ್ ಉಂಬೊಳ್‌ಲ್ಲೆಂ, ಕಡಕ್ಕ್ ಘಡಿ ಕೆಲ್ಲೆಂ ಖೊಮಿಸ್ ಆನಿ ಮುಂಡು ತಾಚೆಂ ನೆಸಾಣ್. ಚಾಮ್ಕಾರಾನ್ ಶಿಂವ್‌ಲ್ಲ್ಯೊ ವ್ಹಾಣೊ ತಾಚ್ಯೊ. ತ್ಯಾ ವ್ಹಾಣಾಂ ಪಂದಾಕ್ ಘೊಡ್ಯಾಚಿ ಲ್ಹಾಳ್ ತಾಣೆ ಬಸಂವ್ಚಿ ಆನಿ ತ್ಯಾ ವೊರ‍್ವಿಂ ವ್ಹಾಣೊ ಜಾಯ್ತ್ಯಾ ಕಾಳಾಕ್ ಬಾಳ್ವಿ ಯೆತಾಲ್ಯೊ.
ರಿಚ್ಚ ಮಾಸ್ಟೆರಾಚಿಂ ಭುರ್ಗಿಂ, ಜಿಣ್ಯೆ ಸಾಂಗಾತ್ಯಾಂ ಸವೆಂ
ಹಿತಾಲ್, ಗಾದೆ ಆನಿ ಜಾಗೊ ಕೌಡುರಾಂತ್ ಮಾತ್ರ್ ನ್ಹಯ್ ಕೈಕಂಬ ಲಾಗಿಂ ಸಾಲ್ಮಾರಾಂತ್ ತಾಂಕಾ ಜಾಗೊ ಆಸ್ಲ್ಲೊ ಆನಿ ಆತಾಂಯ್ ತಾಚ್ಯಾ ಕುಟ್ಮಾಕ್ ಆಸಾ. ಸಾಲ್ಮಾರಾಂತ್ ಕುಮೆರ್ ಆಸ್ಲ್ಲಿ. ಗಾದೆಯ್ ಆಸ್ಲ್ಲೆ. ತ್ಯಾ ಜಾಗ್ಯಾಂನಿ ಬರಿ ಕರ್ನ್ ಕ್ರಷಿ ತಾಚೆಂ ಕುಟಾಂಬ್ ಕರ‍್ತಾಲೆಂ. ರಜೆಚ್ಯಾ ದಿಸಾನಿಂ ತಸೆಂಚ್ಚ್ ಪುರ‍್ಸತ್ ಆಸ್ತಾನಾ ಇಸ್ಕಾಲಾಚ್ಯಾ ದಿಸಾನ್‌ಂಯ್ ಆಪ್ಲ್ಯಾ ಭುರ‍್ಗ್ಯಾಂ ಕರ‍್ನಾ ಹಿತ್ಲಾಚೆಂ, ತೊಟಾಚೆಂ, ಗಾದ್ಯಾಂಚೆಂ ಆನಿ ಕುಮೆರಿಂತ್ ಕಾಮ್ ಕರವ್ನ್ ತಾಂಕಾ ಕಾಮಾಚೆಂ ಮಹತ್ವ್ ತಾಣೆಂ ಶಿಕಯಿಲ್ಲೆಂ. ತೊಚ್ಚ್ ಸ್ವತಹ ಚಡ್ ವಾಂಟೊ ಕಾಮ್ ಕೆಲ್ಲ್ಯಾನ್ ಭುರ‍್ಗ್ಯಾಂಕ್‌ಯ್ ಕಾಮ್ ಕರುಂಕ್ ಹುಮೆದ್ ಯೆತಾಲಿ ತೆಂ ಖರೆಂ… ತಾಚಿ ಪತಿಣ್ ಮಾನೆಸ್ತಿಣ್ ಬೆನೆಡಿಕ್ಟಾ ಮಾತ್ರ್ ಆಪ್ಲೊ ಪತಿ ಕಾಮಾಕ್ ಗೆಲ್ಲ್ಯಾ ವೆಳಿಂ ಸಗ್ಳೊ ದೀಸ್ ಭಾರಿ ಮ್ಹಿನತೆನ್ ಆಪ್ಲ್ಯಾ ಜಾಗ್ಯಾಂನಿ ಆನಿ ಘರಾಂತ್ ಕಾಮ್ ಕರ್ನ್ ಕುಟಾಂಬ್ ಸಾಂಬಾಳ್ತಾಲಿ. ಆಮ್ಚ್ಯಾ ಘರಾ ಲಾಗಿಂ ಸಾಲ್ಮಾರಾಂತ್ ತಿಕಾ ಸಕಾಳಿಂ ಥಾವ್ನ್ ಸಾಂಜ್ ವರೇಗ್ ಕಾಮ್ ಕರ್ಚೆಂ ಹಾಂವೆ, ಲ್ಹಾನ್ ಆಸ್ತಾನಾ ಪಳಯ್ಲಾಂ. ಹಾಂವ್, ಪಾಂಚ್ವಿ ವರ‍್ಗಾ ಥಾವ್ನ್ ಕೊಲೆಜಿಚೆಂ ಶಿಕಾಪ್ ಸಂಪ್ತಾ ಮ್ಹಣಾಸರ್, ಮ್ಹಜ್ಯಾ ಮಮ್ಮ ಸಾಂಗಾತಾ ತೆಣೆಚ್ಯಾ ಕುಮೆರಿಂತ್ ಕಣ್ಗಿ ಆನಿ ರೊಂಪೊ ಲಾಂವ್ಚ್ಯೆ ಕಾಮ್ ಕರ‍್ತಾಲೊಂ. ಸಾರೆಂ ವಾವಯ್ತಾಲೊಂ.
ಚಡಾವತ್ ಸಾದೆಂ ಜೆವಾಣ್ ತೊ ಪಸಂಧ್ ಕರ‍್ತಾಲೊ. ಶಿತ್ ಆನಿ ಮಾಸ್ಳೆಚಿ ಕಡಿ ಮ್ಹಳ್ಯಾರ್ ತಾಕಾ ಭಾರಿ ಖುಶಿ. ದುಕ್ರಾಮಾಸ್ ಆನಿ ತಾಂದ್ಳಾಚ್ಯೊ ಭಾಕ್ರ್ಯೊ ಮ್ಹಳ್ಯಾರ್ ತಾಕಾ ಭಾರಿಚ್ಚ್ ಮೋಗ್.
ಶಿಕ್ಷಕ್ ಜಾವ್ನ್ ವೃತ್ತಿಪರ್ ಜೀವನಾಚಿ ಸುರ‍್ವಾತ್
ಬೋಬ್ ತಾಲ್‍ಬರ‍್ಟ್ ಮ್ಹಳ್ಳೊ ತತ್ವ್‌‌ಗಿನ್ಯಾನಿನ್ ಮ್ಹಳ್ಳ್ಯಾ ಬರಿ – ವಿಧ್ಯಾರ್ಥಿಂಕ್ ಮೆಜುಂಕ್ ಶಿಕಂವ್ಚೆಂ ಬರೆಂಚ್ಚ್; ಪುಣ್, ಖಂಚೆ ಮೆಜಾಪ್ ಉಂಚ್ಲೆಂ ಮ್ಹಳ್ಳಿ ಸಮ್ಜಣಿ ದಿಂವ್ಚೆಂ ಭಾರಿಚ್ಚ್ ಉಂಚಾಯೆಚೆಂ ಶಿಕಾಪ್ ಜಾವ್ನಾಸಾ.
ಲೇಖನಾಚ್ಯಾ ಹ್ಯಾ ಹಂತಾ ಥಾವ್ನ್ ಜೋನ್ ರಿಚ್ಚರ‍್ಡಾಚಿ ವೃತ್ತಿಪರ್ ಜೀಣ್ ಸುರು ಜಾತಾ ಜಾಲ್ಲ್ಯಾನ್ ಪರತ್ ಏಕ್ ಪಾವ್ಟಿಂ ‘ರಿಚ್ಚ ಮಾಸ್ಟೆರ್’ ಮ್ಹಣ್ಂಚ್ಚ್ ಉಲ್ಲೇಕ್ ಕರುಂಕ್ ಸುರು ಕರ್ತಾಂ.
ರಿಚ್ಚ ಮಾಸ್ಟೆರಾ ಥಂಯ್ ವಯ್ರ್ ಬೋಬ್ ತಾಲ್‍ಬರ‍್ಟಾನ್ ಸಾಂಗ್‌ಲ್ಲೆ ಎಕಾ ಉಂಚ್ಲ್ಯಾ ಮೆಸ್ತ್ರಿಚೆ ಗೂಣ್ ಜಾಯ್ತ್ಯಾ ಮಟ್ಟಾರ್ ಆಸ್‌ಲ್ಲೆಚ್ಚ್ ಮ್ಹಣ್ಯೆತ್. ಪೊಂಪೈಂ ಇಸ್ಕಾಲಾಂತ್ ಆಪ್ಣಾ ಲಾಗಿಂ ಶಿಕ್‌ಲ್ಲ್ಯಾ ಭುರ‍್ಗ್ಯಾಂನಿ ತಾಂಚ್ಯಾ ಜಿವಿತಾಂತ್ ಯಶಸ್ವಿ ಜೊಡ್ಚ್ಯಾ ಖಾತಿರ್ ಕಿತೆಂ ಕರಿಜಯ್ ಮ್ಹಣ್ ತಾಕಾ ಕಳಿತ್ ಆಸ್ಲ್ಲೆಂ ಆನಿ ಸೂಕ್ಷ್ಮಾಯೆನ್ ಚಿಂತುನ್ ತಾಂಕಾ ತಾಣೆ ವಾಗಯಿಲ್ಲೆಂ ಜಾವ್ನಾಸಾ.
ಪೊಂಪೈ ಮಾಯೆಕ್ ಸಮರ‍್ಪಿಲ್ಲಿ ಇಗರ‍್ಜ್ 1921 ಇಸ್ವೆಂತ್ ಭಕ್ತಿಕಾಂ ಖಾತಿರ್ ಸುರು ಜಾಲ್ಲಿ. ಲ್ಹಾನ್ಸೊ ಕೊಲ್ವಾಚೊ ಗೊವೊಳ್ ಘಾಲ್ನ್ ಮೀಸ್ ಆನಿ ಮಾಗ್ಣೆಂ ರಜಾರ್ ಕರ‍್ತಾಲಿಂ. ಹ್ಯಾ ವರ್ಸಾ ಉಪ್ರಾಂತ್ ಫಿರ‍್ಗಜೆಂತ್ ಭಕ್ತಿಕಾಂಚಿಂ ಕುಟ್ಮಾಂ ಸವ್ಕಾಸ್ ಚಡೊನ್ ವೆತಾಲಿಂ.
ರಿಚ್ಚ ಮಾಸ್ಟೆರಾನ್ ಆಪ್ಲ್ಯಾ ಪಂದ್ರಾ ವರ‍್ಸಾಂಚ್ಯಾ ಪ್ರಾಯೆರ್ ಮ್ಹಣ್ಜೆ 1931 ಇಸ್ವೆಂತ್ ಮಾನಾಧಿಕ್ ಬಾಪ್ ರೆಬೆಲ್ ಪೊಂಪೈ ಇಗರ‍್ಜಿಚೊ ವಿಗಾರ್ ಜಾವ್ನ್ ಆಸ್ತಾನಾ ಪೊಂಪೈ ಇಸ್ಕಾಲಾಂತ್ ಶಿಕ್ಷಕ್ ಜಾವ್ನ್ ವಾವ್ರ್ ಕರುಂಕ್ ಸುರು ಕೆಲ್ಲೊ. ಇಸ್ಕಾಲಾಂತ್ ಮಾಸ್ಟೆರ್ ಜಾವ್ನಾಸ್ಲ್ಲೊ ತರ್ಯ್ ಇಗರ‍್ಜಿಚೆಂ ಲೇಕ್-ಪಾಕ್ ಪಳಂವ್ಚೆಂ, ಮಿರ‍್ನ್ಯಾಮ್ ಜಾವ್ನ್ ಸೆವಾ, ಘಾಂಟಿ ವೊಡ್ಚ್ಯೊ ಆನಿ ಸಾಂಗಾತಾಚ್ಚ್ ಮಾಸ್ಟೆರಾಚೆಂ ಕಾಮ್‌ಯ್ ಕರ‍್ತಾಲೊ. ಆನಿ ಹ್ಯಾ ಸರ್ವ್ ಕಾಮಾಕ್ ತಾಕಾ ಮೆಳ್ಚೊ ಸಾಂಬಾಳ್ ಮಹಿನ್ಯಾಕ್ ಪಕತ್ತ್ ಪಾಂಚ್ ರುಪಯ್.
1954 ಇಸ್ವೆ ಥಾವ್ನ್ ಸೆಕೆಂಡರ್ ಗ್ರೇಡ್ ಶಿಕ್ಷಕ್ ಆನಿ ಹೆಡ್ ಮಾಸ್ಟೆರಾಚೆಂ ಭಾರಾಧಿಕ್ ವ್ಹೊಜೆಂಯ್ ಆಪ್ಲ್ಯಾ ಖಾಂದ್ಯಾರ್ ಘೆತ್‍ಲ್ಲೆಂ. ಭುರ‍್ಗ್ಯಾಂಕ್ ಬಾಪಾಯ್ ಸಾರ‍್ಕ್ಯಾ ಮೊಗಾನ್ ಪಳಂವ್ಚೊ ತೊ ತಾಂಚ್ಯಾ ಶಿಕ್ಪಾಕ್ ಭಾರಿಚ್ಚ್ ವೊರ‍್ತಿ ಆಧ್ಯತಾ ದಿತಾಲೊ. ತ್ಯಾಚ್ಚ್ ವೊರ‍್ವಿಂ ಇಸ್ಕಾಲಾಂತ್ ಶೆಂಬರ್ ಠಕ್ಕೆ ಭುರ್ಗಿಂ ಉತ್ತೀರ‍್ಣ್ ಜಾತಾಲಿಂ. ಶೆಂಬರಾಕ್ ಶೆಂಬರ್ ಠಕ್ಕೆ ಪಲಿತಾಂಶ್ ಮೆಳ್ತಾಲೆಂ.
ಆದರ‍್ಶ್ ಶಿಕ್ಷಕ್: ಖಡಕ್ಕ್ ಮಾಸ್ಟೆರ್
ಪೊಂಪೈ ಇಗರ‍್ಜೆಚ್ಯಾ ವಠಾರಾಂತ್ಲೊ ಚಡಾವತ್ ಲೋಕ್, ಹಿಂದು, ಕ್ರಿಸ್ತಾಂವ್ ಯಾ ಮುಸ್ಲಿಂ, ರಿಚ್ಚ ಮಾಸ್ಟೆರಾಚೊ ಉಡಾಸ್ ಮಾನಾನ್ ಆನಿ ಮೊಗಾನ್ ಆತಾಂಯ್ ಕಾಡ್ತಾತ್‌ಚ್ಚ್. ಜಾತ್, ಧರ‍್ಮ್ ಯಾ ಊಂಚ್ ನೀಚ್ ವರ‍್ಗಾಚೊ ಮ್ಹಳ್ಳೊ ತಫಾವತ್ ದೆಖಾನಾಸ್ತಾನಾ ಸರ್ವ್ ಭುರ‍್ಗ್ಯಾಂಕ್ ಎಕಾಚ್ಚ್ ಥರಾನ್ ಪಳವ್ನ್, ತಾಂಚ್ಯಾ ಉದರ‍್ಗತೆ ಖಾತಿರ್ ಖಳ್ಮಿತ್ ನಾಸ್ತಾನಾ ವಾವ್ರ್ ಕೆಲ್ಲೊ ತೊ ಜಾವ್ನಾಸಾ.
ಪೊಂಪೈ ಇಗರ‍್ಜೆಚ್ಯಾ ಸುತ್ತುರಾಂತ್ ‘ಮೆಸ್ತ್ರಿ’ ಯಾ ‘ರಿಚ್ಚ ಮಾಸ್ಟೆರ್’ ಮ್ಹಣ್ಂಚ್ಚ್ ಲ್ಹಾನಾಂಕ್ ತಸೆಂ ವ್ಹಡಾಂಕ್ ಮೊಗಾಚೊ ಆನಿ ವಳ್ಕಿಚೊ ತೊ. ತಾಚ್ಯಾ ಹಾತಾ ಖಾಲ್ ಶಿಕ್‌ಲ್ಲೆ ವಿಧ್ಯಾರ‍್ಥಿ ಆತಾಂ ದೇಶ್ – ವಿದೇಶಾಂತ್ ಬರ್ಯಾ ಹುದ್ದ್ಯಾರ್ ಆಸಾತ್. ರಿಚ್ಚ ಮಾಸ್ಟೆರಾನ್ ಶಿಕಯಿಲ್ಲಿಂ ಉಂಚ್ಲಿಂ ಮೌಲ್ಯಾಂ ಆನಿ ದಿಲ್ಲಿ ಹುಮೆದ್, ತಾಲೆಂತಾಂ ಊರ‍್ಜಿತ್ ಕರುಂಕ್ ದಿಲ್ಲೆಂ ಪ್ರೇರಣ್ ಆತಾಂಯ್ ಉಡಾಸ್ ಕಾಡ್ತಾತ್.
ರಿಚ್ಚ ಮಾಸ್ಟೆರಾನ್ ಲೆಕ್ಕಾಂ ಶಿಕಯ್ಲಿಂ ತರ್ ತಿಂ ಸಾರ‍್ಕಿ ಮೆಂದ್ವಾಂತ್ ರಿಗ್ತಾಲಿಂಚ್ಚ್. ತಾಣೆ ಕ್ಲಾಸ್ ಸುರು ಕರ್ತಾನಾ ಮಗ್ಗಿ ಆಯ್ಲಿ ತರ್ ಬಚಾವ್; ನಾ ತರ್ ತಾಚೆಂ ಮಟ್ವೆಂ ಆನಿ ಚಿಕ್ಕೆ ಮೊಟೆಂ ನಾಗು ಬೇತ್ ತಯಾರ್ ಆಸ್ತಾಲೆಂಚ್ಚ್. ತಾಚ್ಯಾ ನಾಗು ಬೆತಾಚ್ಯಾ ಭಿಯಾನ್‌ಂಚ್ಚ್ ಭುರ್ಗಿಂ ಮಗ್ಗಿ ಶಿಕೊನ್ ಯೆತಾಲಿಂ.
ಭುರ‍್ಗ್ಯಾಂಕ್ ಖೆಳಾಂತ್ ತೊ ಭಾರಿಚ್ಚ್ ಹುಮೆದ್ ದಿತಾಲೊ. ಭುರ‍್ಗ್ಯಾಂ ಸಾಂಗಾತಾ ಖೆಳಾ-ಪಂದ್ಯಾಟಾಚ್ಯಾ ಆಂಗ್ಣಾಂತ್ ವಚೊನ್ ತಾಂಕಾ ಹುಮೆದ್ ದಿಂವ್ಚಿ ಮ್ಹಳ್ಯಾರ್ ತಾಕಾ ಭಾರಿಚ್ಚ್ ಖುಶಿ. ತಾಣೆ ದಿಲ್ಲ್ಯಾ ಪ್ರೊತ್ಸಾಹಾ ವೊರ‍್ವಿಂ ಜಾವ್ಯೆತ್ – ಪೊಂಪೈ ಇಸ್ಕಾಲಾಕ್ ಹರ‍್ಯೆಕಾ ವರ್ಸಾ ವಿಜೇತಾಂಚಿ ಯಾದಿಸ್ತಿಕಾ ಮೆಳ್ತಾಲಿಚ್ಚ್. ಭುರ್ಗಿಂ ಪಂದ್ಯಾಟ್ ಖೆಳ್ತಾನಾ ತೊ ಇತ್ಲೊ ಮೆತೆರ್ ಜಾತಾಲೊಗೀ, ಭುರ್ಗಿಂ ಉಡ್ತಾನಾ ತೊಯ್ ಉಡ್‌ಲ್ಲ್ಯಾ ಬರಿ ಕರ‍್ತಾಲೊ. ಬೊಲ್ ಧರುಂಕ್ ವೆತಾನಾ ತೊಯ್ ಹಾತ್ ವಯ್ರ್ ಕರ್ನ್ ಧರುಂಕ್ ವೆತಾಲೊ. ಪಂದ್ಯಾಟಾ ವೆಳಾರ್ ರಿಚ್ಚ ಮಾಸ್ಟೆರಾಕ್ ಅಸೆಂ ಕರ್ಚೆಂ ಪಳಂವ್ಚೆಂಚ್ಚ್ ವೊರ‍್ತ್ಯಾ ದಾದೊಸ್ಕಾಯೆಚೆಂ ಜಾವ್ನಾಸ್ತಾಲೆಂ.
ಭುರ‍್ಗ್ಯಾಂಕ್ ಮಾತ್ರ್ ನ್ಹಯ್ ಇಸ್ಕಾಲಾಂತ್ ಸರ್ವ್ ಸಹ-ಶಿಕ್ಷಕಾಂಕ್, ಸಹ-ಶಿಕ್ಷಕಿಂಕ್ ಆನಿ ಭೆಥನಿ ಭಯ್ಣಿಂಕ್ ಭಾರಿಚ್ಚ್ ಮಾನಾನ್ ತೊ ಲೆಖ್ತಾಲೊ ಆನಿ ಸರ್ವಾಂಕ್ ಸಮಾನ್ ಜಾವ್ನ್ ಸಾಂಬಾಳ್ಚೆಂ ತಾಚೆಂ ವೊರ‍್ತೆಂಪಣ್ ಜಾವ್ನಾಸ್ಲ್ಲೆಂ..
ತೊ ಮೆಸ್ತ್ರಿ ಜಾವ್ನ್ ಕಾಮ್ ಸುರು ಕರ್ತಾನಾ ಲ್ಹಾನ್‌ಶೆಂ ಆನಿ ಇಲ್ಲಿಶಿಂ ಭುರ್ಗಿಂ ಆಸ್ಲ್ಲ್ಯಾ ಪೊಂಪೈ ಇಸ್ಕಾಲಾಂತ್ ರಿಚ್ಚ ಮಾಸ್ಟೆರಾಚ್ಯಾ ಮುಖೆಲ್ಪಣಾ ಖಾಲ್ ಕ್ಲಾಸಿಚೆ ವಾಂಟೆ (ಡಿವಿಜನ್) ಕರುನ್ ಚಾರ‍್ಶ್ಯಾಂ ವಯ್ರ್ ಭುರ್ಗಿಂ ಆಸ್ಲ್ಲಿಂ. ಇತ್ಲಿಂ ಭುರ್ಗಿಂ ಆಸ್ಲ್ಲಿಂ ತರ್ಯ್ ಸಾತ್ವ್ಯಾ ವರ‍್ಗಾಚ್ಯಾ ಸರ್ಕಾರಿ ಪರಿಕ್ಷೆಂತ್ ಶೆಂಬರಾಂತ್ ಶೆಂಬರ್ ಠಕ್ಕೆ ಫಲಿತಾಂಶ್ ಯೆಂವ್ಚ್ಯಾ ಬರಿ ತೊ ಪಳಯ್ತಾಲೊ.
ಭಾರತಾಚೊ ಸ್ವಾತಂತ್ರೋತ್ಸವ್ ಆಗೊಸ್ತ್ ಪಂದ್ರಾ ರಿಚ್ಚ ಮಾಸ್ಟೆರಾಕ್ ಭಾರಿಚ್ಚ್ ಉತ್ಸಾಹಾಚೊ ದೀಸ್. ಹೊ ದೀಸ್ ಇಸ್ಕಾಲಾಚ್ಯಾ ಆಖ್ಖ್ಯಾ ಭುರ‍್ಗ್ಯಾಂಕ್ ಸಂಭ್ರಮಿಕ್ ರಿತಿನ್ ಆಚರಣ್ ಕರ್ಚ್ಯಾ ಖಾತಿರ್ ಜಾಯ್ ಜಾಲ್ಲಿ ಸರ್ವ್ ತಯರಾಯ್ ಕರ‍್ತಾಲೊ. ದ್ವಜಾರೋಹಣಾ ಜಾಲ್ಯಾ ಉಪ್ರಾಂತ್ ಭುರ‍್ಗ್ಯಾಂ ಥಾವ್ನ್ ಇಸ್ಕಾಲಾಚ್ಯಾ ಸಭಾಸಾಲಾಂತ್ ಸಾಂಸ್ಕ್ರತಿಕ್ ಕಾರ್ಯೆಂ ಕರವ್ನ್, ಉಪ್ರಾಂತ್ ಸರ್ವ್ ಭುರ‍್ಗ್ಯಾಂಕ್ ಗೋಡ್-ಚೂನ್ ಘಾಲ್ನ್ ಖಾಲಯಿಲ್ಲೊ ಪೋವ್ ವಾಂಟ್ಚೊ ಮ್ಹಳ್ಯಾರ್ ತಾಕಾ ಭಾರಿಚ್ಚ್ ಉರ‍್ಭಾ.
ತೊ ಮಾಸ್ಟೆರ್ ಜಾವ್ನ್ ಆಸ್ತಾನಾ ಹರ‍್ಯೆಕಾ ವರ್ಸಾ ಆಪ್ಲ್ಯಾ ಪೊಂಪೈ ಇಸ್ಕಾಲಾಚ್ಯಾ ಭುರ‍್ಗ್ಯಾಂಕ್ ವಾರ‍್ಷಿಕ್ ಭಂವ್ಡೆಕ್ ವರ‍್ಚೆಂ ಮ್ಹಳ್ಯಾರ್ ತಾಕಾ ಭಾರಿಚ್ಚ್ ಸಂತೊಸ್. ಬಿದ್ರ್ಯಾಂಚಿ ಸಾವಿರ ಕಂಬದ ಬಸದಿ, ಆಣ್ಸಾಂಚಿ ಪೆಕ್ಟರಿ, ಕಾರ‍್ಕೊಳ್ಚೊ ಗುಮ್ಟೊ, ಮಣಿಪಾಲ್, ಉಡುಪಿಚಿಂ ಪಾಮಾಧ್ ದಿವ್ಳಾಂ, ಮಲ್ಪೆ ದರ‍್ಯಾ ತಡ್, ಮಾಸ್ಳೆಚಿ ಪೆಕ್ಟರಿ – ಹೆ ಜಾಗೆ ಹರ‍್ಯೆಕಾ ವರ್ಸಾ ಭುರ‍್ಗ್ಯಾಂಕ್ ವರ‍್ಚೆ ಜಾವ್ನಾಸ್‌ಲ್ಲೆ. ತಸೆಂ ಮ್ಹಳ್ಯಾರ್ ಜಾಯ್ತ್ಯಾ ಪಾವ್ಟಿಂ, ರಿಚ್ಚ ಮಾಸ್ಟೆರಾಚ್ಯಾ ಇಸ್ಕಾಲಾಚ್ಯಾ ಭಂವ್ಡೆಂತ್ ಫಿರ‍್ಗಜೆಚೊ ಲೋಕ್‌ಯ್ ಆಸ್ತಾಲೊ.
ರಿಚ್ಚ ಮಾಸ್ಟೆರ್ – ಸಾಮಾಜಿಕ್ ಸೆವಾ
ಪೊಂಪೈ ಇಗರ‍್ಜೆ ಇಸ್ಕಾಲಾಚೊ ಮುಖೆಲ್ ಮೆಸ್ತ್ರಿ ಮ್ಹಳ್ಯಾರ್ ಫಿರ‍್ಗಜ್‌ಗಾರಾಂಕ್ ವಿಗಾರಾ ಉಪ್ರಾಂತ್ ತೊಚ್ಚ್ ವಿಂಚುನ್ ಕಾಡ್‌ಲ್ಲೊ ವ್ಯಕ್ತಿ. ಜಾಯ್ತ್ಯಾಂನಿ ಚಿಂತ್ಚೆಂ ಆಸ್ಲ್ಲೆಂ, ರಿಚ್ಚ ಮಾಸ್ಟೆರಾನ್‌ಂಚ್ಚ್ ಇಸ್ಕಾಲಾಚ್ಯೊ ರೆಗ್ರೊ ಆನಿ ರೂಲಿ ಮಾಂಡುನ್ ಹಾಡ್ಚ್ಯೊ ಮ್ಹಣ್. ಜೆದ್ನಾಂ ಭುರ‍್ಗ್ಯಾಂಕ್ ಸರ‍್ಕಾರಾ ಥಾವ್ನ್ ಆದೇಶ್ ಯೇವ್ನ್ ರಜಾ ಮೆಳ್ಳ್ಯಾರ್ ಜಾಯ್ತ್ಯಾಂನಿ ತಾಕಾ ಪುರ‍್ಪುರ್‌ಲ್ಲೆಂಯ್ ಆಸಾ ಕೀ ತೊಚ್ಚ್ ಭುರ‍್ಗ್ಯಾಂಕ್ ಚಡ್ ರಜಾ ದಿತಾ ಮ್ಹಣ್. ರಜಾ ರದ್ದ್ ಕರಿಜಯ್ ಮ್ಹಣ್ ತಾಚೆಲಾಗಿಂ ದೂರ್ ಹಾಡ್ನ್ ಆಯಿಲ್ಲಿಂ ವ್ಹಡಿಲಾಂಯ್ ಆಸ್ಲ್ಲಿಂ.
ಪೊಂಪೈ ಫಿರ‍್ಗಜೆಂತ್ ಜಾಯ್ತಿಂ ವರ್ಸಾಂ ಆಡಳ್ತೆದಾರ್ ಜಾವ್ನ್ ತಾಣೆ ಸೆವಾ ದಿಲ್ಯಾ. ಪ್ರತ್ಯೇಕ್ ಜಾವ್ನ್ ಮಾನಾಧಿಕ್ ಬಾಪ್ ಗ್ರೇಶಿಯನ್ ಸೋಜ್ ವಿಗಾರ್ ಜಾವ್ನ್ ಆಸ್ತಾನಾ. ಸಿಒಡಿಪಿ ಸಂಸ್ಥ್ಯಾಥಾವ್ನ್ ಕುಮಕ್ ಹಾಡವ್ನ್, ಫಿರ‍್ಗಜೆಚ್ಯಾ ದುಬ್ಳ್ಯಾ ಕುಟ್ಮಾಂಚ್ಯಾಂಕ್ ಘರಾಂ ಬಾಂಧಾವ್ನ್ ದಿಂವ್ಚಿ, ಬಾಂಯ್ಯೊ ಖೊಂಡಂವ್ಚ್ಯೊ, ತಳ್ಯಾಚೊ ಉಬಿರ್ ಕಾಡ್ಚೊ, ದೊರೆ ಉಬಾರ‍್ಚೆ, ವಾಳ್ಚ್ಯಾ ಉದ್ಕಾಕ್ ಕಾಟ್ ಬಾಂದ್ಚೊ – ಅಸಲಿಂ ಜಾಯ್ತಿಂ ಲೊಕಾಕ್ ಆಧಾರ್ ಜಾಂವ್ಚಿ ಕಾಮಾಂ ತಾಣೆ ಕೆಲ್ಯಾಂತ್. ಫಿರ‍್ಗಜೆಚ್ಯಾ ದುಬ್ಳ್ಯಾ ಲೊಕಾಕ್ ಗೋಂವ್ ಆನಿ ತೇಲ್ ದೀವ್ನ್ ಆದಾರ್ ತೊ ದಿತಾಲೊ. ಸಿಒಡಿಪಿ ಸಂಸ್ಥ್ಯಾಚೆಂ ಮಹಿನ್ಯಾವಾರ್ ಲೇಖ್-ಪಾಕ್ ಹಾತ್-ಬರ‍್ಪಾನ್‌ಂಚ್ಚ್ ಬರವ್ನ್ ತಾಂಚ್ಯಾ ದಫ್ತರಾಕ್ ಪಾವಿತ್ ಕರ‍್ತಾಲೊ .
ರಿಚ್ಚ ಮಾಸ್ಟೆರ್ – ದೆಣ್ಯಾಂಚೊ ಪುಂಜೊ
ರಿಚ್ಚ ಮಾಸ್ಟೆರಾ ಥಂಯ್ ಜಾಯ್ತಿಂ ದೆಣಿಂ ಆಸ್ಲ್ಲಿಂ. ತೊ ಏಕ್ ಉತ್ತೀಮ್ ವಾಗ್ಮಿ ಜಾವ್ನಾಸ್ಲ್ಲೊ. ಖಂಚೊಯ್ ಸಮ್ಜೊಣೆಕ್ ಯೆಂವ್ಕ್ ಸಕಾನಾತ್‌ಲ್ಲೊ ವಿಷಯ್ ಭಾರಿಚ್ಚ್ ಸುಲಭಾಯೆನ್ ತೊ ಲೊಕಾಕ್ ಸಮ್ಜಯ್ತಾಲೊ. ಕಾಜಾರಾಂ ಸೊಬಾಣಾಂ, ಯಾ ಹೆರ್ ಕಸಲಿಂಯ್ ಸಮಾಜಿಕ್ ಕಾರ‍್ಯಿಂ ಜಾಲಿಂ ತರ್ ಭಲಾಯ್ಕಿ ಮಾಗೊಂಕ್ ಆತಾಂಚ್ಯಾ ಬರಿ ತಯರಾಯ್ ಕರ್ನ್ ಯೆಂವ್ಚಿ ರಿವಾಜ್ ನಾತ್‌ಲ್ಲಿಚ್ಚ್. ರಿಚ್ಚ ಮಾಸ್ಟೆರ್ ಗ್ಲಾಸ್ ಘೆವ್ನ್ ಆಯ್ಲೊ ತರ್ ಮಟ್ವ್ಯಾನ್ ಆನಿ ನಾಜೂಕಾಯೆನ್ ತೊ ಭಲಾಯ್ಕಿ ಮಾಗ್ತಾಲೊ. ಸರ್ವಾಂಕ್ ಖುಶ್ ಕರ‍್ತಾಲೊ.
ರಿಚ್ಚ ಮಾಸ್ಟೆರ್ . . . ಭಲಾಯ್ಕೆ ಮೆಸ್ತ್ರಿ
ಏಕ್ ಪಾವ್ಟಿಂ ದೆವಾಧಿನ್ ಜೆ ಎಸ್ ಟಿ ಲುದ್ರಿಗ್ ಬಾಪಾಂನಿ ಬಾಷಣ್ ಸ್ಪರ‍್ದೊ ಆಸಾ ಕೆಲ್ಲೊ. ತ್ಯಾ ವೆಳಿಂ ಪೊಂಪೈ ಪಿರ‍್ಗಜೆಂತ್ ದೋಗ್ ಮಾನಾಯ್ ಬಾರಿಚ್ಚ್ ಉಂಚ್ಲೆ ಉಲವ್ಪಿ ಜಾವ್ನಾಸ್‌ಲ್ಲೆ – ಎಕ್ಲೊ ರಿಚ್ಚ ಮಾಸ್ಟೆರ್ ಆನಿ ಎಕ್ಲೊ ಕಂದಾರ್ ವಾಡ್ಯಾಚೊ ರುಜಾರ್ ಮೆಂದೊಸ್. ದೋಗೀ ಪಯ್ಲೆಂ ಇನಾಮ್ ಮೆಳಾಜಯ್ ಭಾರಿಚ್ಚ್ ಉರ‍್ಡಾತಾಲೆ. ತಾಲೆಂತ್‌ವಂತ್ ರಿಚ್ಚ ಮಾಸ್ಟೆರಾಕ್ ಪಯ್ಲೆಂ ಇನಾಮ್ ಮೆಳ್ಲ್ಲೆಂ!!
ನಾಟಕಾಚಿ ಕಲಾ ತಾಚ್ಯಾ ಥಂಯ್ ರೊಂಬೊನ್ ಗೆಲ್ಲಿ ಮ್ಹಳ್ಯಾರ್ ಕಾಂಯ್ ಚೂಕ್ ಜಾಂವ್ಚಿ ನಾ. ಹರ‍್ಯೆಕಾ ವರ್ಸಾ ನವೆ ನವೆ ನಾಟಕ್ ಕೊಂಕ್ಣಿ, ತುಳು ಯಾ ಕನ್ನಡಾಂತ್ ಬರವ್ನ್, ಇಸ್ಕಾಲಾಚ್ಯಾ ಭುರ‍್ಗ್ಯಾಂಕ್ ತರ‍್ಭೆತಿ ದೀವ್ನ್, ತಾಂಚ್ಯಾ ಥಾವ್ನ್ ಪದರ‍್ಶಿತ್ ಜಾಂವ್ಚ್ಯಾ ಬರಿ ಪಳಯ್ತಾಲೊ. ಹಾಂವ್ ಸಾತ್ವೆಂತ್ ಆಸ್ತಾನಾ ತಾಣೆ ಬರಯಿಲ್ಲ್ಯಾ ನಾಟಕಾಂತ್ ಹಾಂವೆ ಮುಖೆಲ್ ಪಾತ್ರ್ ಕೆಲ್ಲೊ ಮ್ಹಾಕಾ ಆತಾಂಯ್ ಉಡಾಸ್ ಆಸಾ.
ನಿವೃತ್ತಿ ಆನಿ ಆದೇವ್ಸ್
ಆಪ್ಲ್ಯಾ ಸಾಟ್ ವರ‍್ಸಾಂಚ್ಯಾ ಪ್ರಾಯೆರ್ ಮ್ಹಳ್ಯಾರ್ 26.11.1975, ವೆರ್ ರಿಚ್ಚ ಮಾಸ್ಟೆರ್ ನಿವೃತ್ತ್ ಜಾಲ್ಲೊ. ತೊ ನಿವೃತ್ತ್ ಜಾಲ್ಲ್ಯಾ ವೆಳಾರ್ ಜಾಯ್ತ್ಯಾಂನಿ ದೂಕ್ ಉಚಾರ್‌ಲ್ಲೆಂಯ್ ಆಸಾ. ತಾಚ್ಯಾ ತಸಲೊ ಏಕ್ ಬರೊ ಆನಿ ಧ್ರಡ್ ಮನಾಚೊ ಶಿಕ್ಷಕ್ ಇಸ್ಕಾಲಾಚಿಂ ಮೆಟಾಂ ದೆಂವೊನ್, ಇಸ್ಕಾಲ್ ಶಾಶ್ವತ್ ಸೊಡ್ನ್ ವೆತಾನಾ ಥಂಯ್ಚ್ಯಾ ಸಹ-ಶಿಕ್ಷಕಾಂಕ್ ಆನಿ ವಿದ್ಯಾರ‍್ಥಿಂಕ್ ದೂಕ್ ಭಗ್ಚೆಂ ಸಹಜ್ ಜಾವ್ನಾಸ್ಲ್ಲೆಂ.
ರಿಚ್ಚ ಮಾಸ್ಟೆರಾಚ್ಯಾ ಆಖ್ರೇಚ್ಯಾ ದಿಸಾನಿ ತಾಕಾ ಕಿಡ್ನಿಂ ಫಾತರ್ ಜಾಂವ್ಚೆ ತೊಂದ್ರೆ ಆಸ್ಲ್ಲೆ. ಆಸ್ಪತ್ರೆಕ್ ದಾಖಲ್ ಕೆಲ್ಯಾ ಉಪ್ರಾಂತ್ ಮುತಾಚೆ ಸಮಸ್ಯೆ ಸುರು ಜಾಲ್ಲೆ. ತ್ಯಾ ಪಿಡೆಕ್ ದಿಲ್ಲಿ ಚಿಕಿತ್ಸಾ ಸಾರ‍್ಕಿ ಜಾಲಿ ನಾ ಆನಿ 11.12.1986 ವೆರ್ ಆಪ್ಲ್ಯಾ ಸತ್ತರ್ ವರ‍್ಸಾಂಚ್ಯಾ ಪ್ರಾಯೆರ್ ಕಾಳ್ಜಾಘಾತ್ ಜಾವ್ನ್ ತೊ ಮರಣ್ ಪಾವ್ಲೊ.
ರಿಚ್ಚ ಮಾಸ್ಟೆರ್ ಪೊಂಪೈ ಇಗರ‍್ಜೆಕ್ ಏಕ್ ವೊರ‍್ತೆಂ ದಾಯ್ಜ್ ಜಾವ್ನಾಸ್ಲ್ಲೊ. ಪೊಂಪೈ ಇಸ್ಕಾಲಾಕ್ ಮಾತ್ರ್ ನ್ಹಯ್ ಆಖ್ಖ್ಯಾ ಫಿರ‍್ಗಜೆಕ್ ತಾಣೆ ಸುದಾರ‍್ಶಿಲಾಂ, ಆದಾರ‍್ಶಿಲಾಂ.
ರಿಚ್ಚ ಮಾಸ್ಟೆರಾಚಿ ಮೊಗಾಚಿ ಆನಿ ಎಕ್ಲಿಚ್ಚ್ ಧುವ್ ಪ್ಲಾವಿಯಾ ಡಿ ಕುನಾ (ರೊಡ್ರಿಗಸ್) ಮ್ಹಣ್ತಾ – ” ಆಮ್ಚೊ ಪಪ್ಪಾ ಭಾರಿ ಮೊಗಾಳಿ ಆನಿ ಘರಾಂತ್ ಸರ್ವಾಂಕ್ ಸಮಧಾನೆನ್ ಸುಧಾರ‍್ಸುಂಚ್ಯಾಂತ್ ಭಾರಿಚ್ಚ್ ಹುಶಾರ್. ಆಮ್ಕಾಂ ಪಯ್ಶಾಂನಿ ಕಷ್ಟ್ ಆಸ್ಲ್ಲೆ ತರ್ಯ್ ತ್ಯಾ ವಿಶಿಂ ಭುರ‍್ಗ್ಯಾಂಕ್ ಕಳಾನಾತ್‌ಲ್ಲ್ಯಾ ಬರಿ ತೊ ಸುದಾರ್ಸುನ್ ವರ‍್ತಾಲೊ. ಆಮ್ಕಾಂ, ತಾಚ್ಯಾ ಭುರ‍್ಗ್ಯಾಂಕ್ ತಾಣೆ ಜೊಕ್ತೆಂ ಶಿಕಾಪ್ ದಿಲಾಂ ಆನಿ ಸಾರ‍್ಕ್ಯಾ ವಾಟೆರ್ ಚಮ್ಕೊಂಕ್ ಬೂದ್ ಸಾಂಗ್ಲ್ಯಾ. ಬಾಯ್ಲ್ಯಾನ್ ಯಾ ಬಾಯ್ಲ್ಯಾ ಮನ್ಶಾಂಕ್ ತೊ ಖಡಕ್ಕ್ ಆನಿ ಜಬ್ಬೊರ್ ಮೆಸ್ತ್ರಿ ಮ್ಹಣ್ ದಿಸ್ತಾಲೊ ತರ್ಯ್ ಘರಾಂತ್ ಭಾರಿಚ್ಚ್ ಮೊವಾಳಿ. ಖುಶಾಲಿ ಆನಿ ದಾದೊಶಿ. ಕಾಳ್ಜಾಂತ್ ಮೊಗಾಳಿ. ತಾಕಾ ಹಾಂವ್ ಎಕ್ಲಿಂಚ್ಚ್ ಧುವ್ ಆನಿ ಹೆರ್ ಪಾಂಚ್ ಜಣ್ ಚೆರ‍್ಕೆಚ್ಚ್ ಜಾಲ್ಲ್ಯಾನ್ ಮ್ಹಜೆರ್ ತಾಕಾ ಭಾರಿಚ್ಚ್ ಮೋಗ್. ಘರಾಂತ್ ಚೆರ‍್ಕ್ಯಾಂಕ್ ಮಾರ‍್ಲ್ಯಾರೀ, ಮ್ಹಾಕಾ ಮಾರಿನಾತ್‌ಲ್ಲೊ. ಮ್ಹಜೆಂ ಕಾಜಾರ್ ಜಾವ್ನ್ ಹಾಂವ್ ನೊವ್ರ್ಯಾಗೆರ್ ವೆತಾನಾ ಪಪ್ಪ ಮೊಸ್ತು ರಡ್‌ಲ್ಲೊ. ಆಮ್ಚೊ ಪಪ್ಪ ಮ್ಹಣ್ ಹಾಂವೆ ಮ್ಹಣ್ಚೆಂ ನ್ಹಯ್, ಪುಣ್ ಅಸಲೊ ಮನಿಸ್ ಮೆಳೊಂಕ್ ಭಾರಿಚ್ಚ್ ಕಷ್ಟ್….”
[ಆಮ್ಚ್ಯಾ ಮೊಗಾಳ್ ರಿಚ್ಚ ಮಾಸ್ಟೆರಾ ವಿಶ್ಯಾಂತ್ ಹೆಂ ಸವಿಸ್ತಾರ್ ಲೇಖನ್ ತಯರ್ ಕರುಂಕ್ ಕುಮಕ್ ಕೆಲ್ಲ್ಯಾ ಮಾನೆಸ್ತ್ ಜೆರಾಲ್ಡ್ ರಸ್ಕಿನಾ, ಮಾನೆಸ್ತ್ ಎಮ್. ಪಿ. ರೊಡ್ರಿಗಸ್ (ಕೊಂಕ್ಣೆಂತ್ಲೊ ನಾಂವಾಡ್ದಿಕ್ ಬರಯ್ಣಾರ್), ಮಾನೆಸ್ತಿಣ್ ರೆನ್ನಿ ಲೋಬೊ (ರೊಡ್ರಿಗಸ್), ಮಾನೆಸ್ತ್ ಮೆಲ್ವಿನ್ ಪೆರಿಸ್ – ಕೈಕಂಬ, ಮಾನೆಸ್ತ್ ಒಸ್ವಳ್ಡ್ ರೊಡ್ರಿಗಸ್ (ರಿಚ್ಚ ಮಾಸ್ಟೆರಾಚೊ ಪೂತ್), ಮಾನೆಸ್ತಿಣ್ ಪ್ಲೇವಿ ಡಿ ಕುನಾ (ರೊಡ್ರಿಗಸ್) (ರಿಚ್ಚ ಮಾಸ್ಟೆರಾಚಿ ಧುವ್) ಆನಿ ಪ್ರೊಪೆಸರ್ ರೋಸ್ ವೀರಾ ರೊಡ್ರಿಗಸ್ ಹಾಂಕಾ ಹಾಂವ್ ದಿನ್ವಾಸ್ ಪಾಟಯ್ತಾಂ]
► ಕ್ಲೆರೆನ್ಸ್, ಕೈಕಂಬ
]]>“ಆಮ್ಚ್ಯಾ ಕೊಂಬ್ಯಾಕ್ ತುಮ್ಚ್ಯಾ ಪೆಟ್ಯಾನ್ ಧರ‍್ನ್ ಫಾಪ್ಸಿಲಾ…. ಆಮ್ಚೊ ಕೊಂಬೊ ಅಲಕ್ಕಾ ಮೆಲೊಚ್ಚ್ ನ್ಹಯ್‌ಂಗೀ……?? ಆನಿ ತುಮಿಂ ಜಾಯ್ ಜಾಯ್ ಮ್ಹಣ್ಂಚ್ಚ್ ಅಸೆಂ ಕರ್ನ್ ಘರಾ ಭಿತರ್ ಲಿಪೊನ್ ರಾವ್ಲ್ಯಾತ್……..”
ಲಿಗೋರ್ ಸಿಕೆರಿನ್ ಮಾರ್‌ಲ್ಲಿ ಬೊಬಾಟ್ ಆಯ್ಕೊನ್ ಘರಾ ಭಿತರ್ ಸನ್ವಾರಾಚ್ಯಾ ಸಾಂಜೆಚ್ಯಾ ಮಿಸಾಕ್ ವಚೊಂಕ್ ತಯಾರ್ ಜಾಂವ್ಚೊ ಚಾರ‍್ಲಿ ಫೆರ‍್ನಾಂದ್ ಸಟ್ಟ್ ಕರ್ನ್ ಭಾಯ್ರ್ ಆಯ್ಲೊಚ್ಚ್ ಆನಿ ತಾಚ್ಯಾ ಪಾಟ್ಲ್ಯಾನ್ ತಾಚಿ ಬಾಯ್ಲ್ ರೊಜ್ಲಿನ್ ಫೆರ‍್ನಾಂದ್. ತಿಯ್ ಮಿಸಾಕ್ ವಚೊಂಕ್ ಭಾಯ್ರ್ ಸರ‍್ತಾಲಿ. ಲಿಗೊರ್ ಸಿಕೆರಿನ್ ತಿತ್ಲ್ಯಾ ವ್ಹಡಾ ಆವಾಜಾನ್ ಬೊಬಾಟ್ ಮಾರ‍್ಚ್ಯಾಕ್ ಥಂಯ್ಸರ್ ಕಿತೆಂ ಜಾಲೆಂ ಮ್ಹಣ್ ದೊಗಾಂಯ್ಕಿ ಖರೆಂಚ್ಚ್ ಕಳಿತ್ ನಾತ್ಲ್ಲೆಂ.
“ಕಿತೆಂ ಜಾಲೆಂ ಕುಂಪಾದ್ರೆ ?” ಚಾರ‍್ಲಿ ಫೆರ‍್ನಾಂದಾನ್ ಚಿಕ್ಕೆ ವ್ಹಡಾ ತಾಳ್ಯಾನ್ ವಿಚಾರ‍್ಲೆಂ.
” ಕುಂಪಾದ್ರೆಕ್ ಲಾಯ್ ಉಜೊ….. ಕಿತೆಂ ಜಾಲೆಂ ಮ್ಹಣ್ತಾಯ್ ??? ಆಮ್ಚ್ಯಾ ಇತ್ಲ್ಯಾ ಅಪುರ‍್ಬಾಯೆಚ್ಯಾ ಕಾಟ್ಯಾಚ್ಯಾ ಹುರಿಯಾ ಕೊಂಬ್ಯಾಕ್ ತುಮ್ಚ್ಯಾ ದಳ್ದಿರ‍್ಯಾ ಪೆಟ್ಯಾನ್ ಫಾಪ್ಸುನ್ ಘಾಲಾಂ ತೆಂ ದಿಸ್ತಾ ತುಮ್ಕಾಂ ? ಆಮ್ಚ್ಯಾ ಕೊಂಬ್ಯಾಚಿ ಹಾಕ್-ಬೋಬ್ ಆಮ್ಕಾಂ ಘರಾ ಭಿತರ್ ಸಯ್ತ್ ಆಯ್ಕಾಲಿ. ತುಮ್ಚ್ಯಾ ಝಾಲಾಂತ್‌ಚ್ಚ್ ಕೊಂಬೊ ಹುಳ್ವಳೊಂಕ್ ಲಾಗ್ಲೊ ಆನಿ ತುಮ್ಕಾಂ ಕಾಂಯಿಂಚ್ಚ್ ಆಯ್ಕೊಂಕ್ ನಾತ್ಲ್ಲ್ಯಾ ಬರಿಚ್ಚ್ ಕರ‍್ತಾತ್‌ಮೂ ತುಮಿಂ????”
ಚಾರ‍್ಲಿ ಆನಿ ರೊಜ್ಲಿನ್ ಫೆರ‍್ನಾಂದ್ ದೊಗಾಂಯ್ ತಾಂಚೊ ಪೆಟೊ ‘ಟೈಗರ್’ ಬಾಂಧುನ್ ಘಾಲ್ಲ್ಯಾ ಕಡೆ ಸರಾರಾಂ ಗೆಲಿಂ. ಟೈಗರಾಕ್ ಬಾಂಧುನ್ ಘಾಲ್ಚೊ ಜಾಗೊ ಲಿಗೊರ್ ಸಿಕೆರಿಚ್ಯಾ ಘರಾ ಕುಶಿನ್ ಆಸ್ಲ್ಲ್ಯಾನ್ ತಾಂಕಾ ಪಟ್ಟ್‌ಕರ‍್ನ್ ಕೊಂಬ್ಯಾಚಿ ಬೋಬ್ ಆಯ್ಕಾಲ್ಲಿ ಆಸ್ತೆಲಿ. ಟೈಗರ್ ತಾಂಕಾ ಪಳವ್ನ್ ಶಿಮ್ಟಿ ಹಾಲಯ್ಲಾಗ್ಲೊ ಕಿತೆಂಗೀ ವೊರ‍್ತೆಂ ಕಾಮ್ ಆಪ್ಣೆಂ ಕೆಲ್ಲ್ಯಾ ಬಾಶೆನ್. ಟೈಗರಾಚ್ಯಾ ಕುಶಿನ್ ಧರ‍್ನಿರ್ ಲಿಗೊರಿ ಸಿಕೆರಿಚೊ ನೊವ್ರ್ಯಾ ತಸಲೊ ದಾಟೊ ಮೊಟೊ ಕೊಂಬೊ ರಗ್ತಾಚ್ಯಾ ಕೊಂಡಾಂತ್ ಪಡೊನ್ ಆಸ್ಲ್ಲೊ. ಖರೊಚ್ಚ್ ಮೆಲ್ಲೊ ತೊ. ರೊಜ್ಲಿನ್ ಫೆರ‍್ನಾಂದಾನ್ ಕೊಂಬ್ಯಾಕ್ ಉಕಲ್ಲೊ. “ಅಳೆ … ಥಂಯ್ಚೆ ಇಲ್ಲೆಂ ಉದಕ್ ಹಾಡ್ ಪಳೆಯಾಂ…” ಘೊವಾಕ್ ಬೋಬ್ ಮಾರುನ್ ಸಾಂಗ್ಲೆಂ.
ರೊಜ್ಲಿನಾಚ್ಯಾ ಪಾಟ್ಲ್ಯಾನ್‌ಂಚ್ಚ್ ಆಸ್ಲ್ಲೊ ಚಾರ‍್ಲಿ ಫೆರ‍್ನಾಂದ್ ದಾವೊನ್ ವಚೊನ್ ವಾಳ್ಚೆ ಬಾಜಿಯೆಚ್ಯಾ ಮಾಟ್ವಾಲಾಗಿಂ ಆಸ್ಲ್ಲ್ಯಾ ಮಾತಿಯೆಚ್ಯಾ ಚಾಟ್ಟೆಂತ್ಲೆ ಕಟ್ಟೆಂತ್ ಉದಕ್ ಘೆವ್ನ್ ಪಾಟಿಂ ಆಯ್ಲೊ. ದೊಗಾಂಯ್ನಿ ಮೆಳೊನ್ ಕೊಂಬ್ಯಾಚಿ ಬೊಂಚ್ ಉಗ್ತಿ ಕರ್ನ್ ಉದಕ್ ಸೊಡುಂಕ್ ಪ್ರೆತನ್ ಕೆಲೆಂ ತರ್ಯ್ ವ್ಯರ‍್ತ್. ಕೊಂಬ್ಯಾನ್ ಯೆದೊಳ್ಚ್ಚ್ ಜೀವ್ ಸೊಡ್ನ್ ಜಾಲ್ಲೊ.
ಆನಿ ದುಸ್ರೆಂ ಕಾಂಯ್ ಕರುಂಕ್ ಉಪಾಯ್ ನಾ ಮ್ಹಣ್ ರೊಜ್ಲಿನ್ ಕೊಂಬ್ಯಾಕ್ ಉಕೊಲ್ನ್ ತಾಂಚ್ಯಾ ಕಂಪೌಂಡಾಚ್ಯಾ ದೊರ‍್ಯಾ ಮಧೆಂ ಆಸ್ಚ್ಯಾ ಅಕ್ಕಾಡ್ಯಾಕ್ ಉತ್ರೊನ್ ಲಿಗೊರ್ ಸಿಕೆರಿಚ್ಯಾ ಝಲಾ ಕುಶಿನ್ ಗೆಲಿ.
” ಥಂಯ್ಸ್ ರಾವ್ ಕುಮಾದ್ರೆ ……” ಲಿಗೊರ್ ಸಿಕೆರಿನ್ ಪರತ್ ಬೊಬಾಟ್‌ಲ್ಲೆಂ ಆಯ್ಕೊನ್ ರೊಜ್ಲಿನ್ ಥಂಯ್ಚ್ ಥಟಕ್ಕ್ ಜಾವ್ನ್ ಉಬಿ ಜಾಲಿ.
ಲಿಗೋರ್ ಸಿಕೆರ್ ಮುಖಾರ‍ುನ್ ಉಲಯ್ಲೊ – “ತ್ಯಾ ಕೊಂಬ್ಯಾಕ್ ಪುಣಿ ಆಮ್ಚ್ಯಾ ಘರಾ ಲಾಗಿಂ ಹಾಡಿನಾಕಾ… .. ಮ್ಹಜ್ಯಾ ಜಿವಾಚೊ ಜೀವ್ ತೊ ಕೊಂಬೊ…. ಕಿತ್ಲ್ಯಾ ಕಾಟಾಚ್ಯಾ ಕೊಂಬ್ಯಾಂಕ್ ಸಲ್ವುನ್ ಆಮ್ಕಾಂ ನಾಂವ್ ಹಾಡ್ಲ್ಲೊ… ಆಜ್ ತುಮ್ಚ್ಯಾ ಹರ‍್ಧ್ಯಾರ್ ಘಾಲೊ ನ್ಹಯ್ ?”
ಲಿಗೊರ್ ಸಿಕೆರ್ ಆನಿ ಚಾರ‍್ಲಿ ಫೆರ‍್ನಾಂದಾಚಿಂ ಕಂಪೌಂಡಾಂ ಎಕಾಮೆಕಾಕ್ ಲಾಗೊನ್ಂಚ್ಚ್ ಆಸ್ಲ್ಲಿಂ. ಪಕತ್ತ್ ದೊರೊ ಮಾತ್ರ್ ಮಧೆಂ. ತ್ಯಾ ದೊರ‍್ಯಾ ಮಧೆಂಚ್ಚ್ ಏಕ್ ಆಕ್ಕಾಡೊ. ತ್ಯಾ ಅಕ್ಕಾಡಾಂತ್ಲ್ಯಾನ್ ತಾಣಿ ಎಕಾಮೆಕಾಚ್ಯಾ ಘರಾ ವಚೊಂಕ್ ಆಶಾರ್ – ಪಾಶಾರ್ ಜಾಂವ್ಚೆಂ.
ಚಾರ‍್ಲಿ ಫೆರ‍್ನಾಂದಾಕ್ ಸುಮಾರ್ ಸ ಎಕ್ರೆ ಜಾಗೊ ಆಸ್ಲ್ಲೊ ತರ್ ಲಿಗೋರ್ ಸಿಕೆರಿಕ್ ತಾಚ್ಯಾ ಬಾಪಾಯ್ಚ್ಯಾ ವಾಂಟ್ಯಾ ಥಾವ್ನ್ ಮೆಳ್ಲ್ಲೊ ಆಟ್ ಎಕ್ರೆ ಜಾಗೊ ಆಸ್ಲ್ಲೊ. ತಾಂಚ್ಯಾ ತಾಂಚ್ಯಾ ಜಾಗ್ಯಾರ್ ಕ್ರಷಿ ಕರುನ್ ದೋನಿಂ ಕುಟ್ಮಾಂ ಭಾರಿಚ್ಚ್ ಖುಶೆನ್ ಆನಿ ಸಮದಾನಾನ್ ಜಿಯೆತಾಲಿಂ.
ಚಾರ‍್ಲಿ ಫೆರ‍್ನಾಂದಾಚ್ಯಾ ಮಾಲ್ಘಡ್ಯಾ ಧುವೆಚೆಂ, ಶಾಲಿನಿಚೆಂ, ಫಿಲ್ಯಾದ್ ಲಿಗೊರ್ ಆನಿ ಲೀನಾ ಸಿಕೆರಿನ್ ಜೊಡ್‌ಲ್ಲೆಂ ಜಾಲ್ಲ್ಯಾನ್ ಸಂಬಂಧ್ ದೆವಾಚ್ಯಾ ಆಂಗ್ಣಾ ಮ್ಹಣಾಸರ್ ಪಾವ್‌ಲ್ಲೊ ಮ್ಹಣ್ಯೆತ್. ತಸೆಂ, ಹರ‍್ಯೆಕಾ ಲ್ಹಾನ್ ವ್ಹಡ್ ಕಾರ‍್ಯಾಂನಿ ಜಾಂವ್, ಘರಾಂತ್ ಕಿತೆಂಯ್ ಬರೆಂ ರಾಂದಪ್ ಕೆಲ್ಲೆಂ ಜಾಂವ್ ತಿಂ ಎಕಾಮೆಕಾಕ್ ವಾಂಟುನ್ ಘೆತಾಲಿಂ. ದೋನಿಂ ಕುಟ್ಮಾಂ ಎಕಾಚ್ಚ್ ವಾಟ್ಲೆಂತ್ ಜೆಂವ್ಚ್ಯಾಬರಿ ಆಸ್ಲ್ಲಿಂ.
ಚಾರ‍್ಲಿ ಫೆರ‍್ನಾಂದಾನ್ ಮಾತ್ರ್ ಘರ್ ರಾಕೊಂಕ್ ಮ್ಹಣ್ ಆಲ್ಸೆಶಿಯನ್ ಪೆಟೊ ಪೊಸ್ಲ್ಲೊ. ಪಳಂವ್ಕ್ ವಾಗಾಬರಿ ದಿಸ್ತಾಲೊ ಜಾಲ್ಲ್ಯಾನ್ ‘ಟೈಗರ್’ ಮ್ಹಣ್ ತಾಕಾ ಮೊಗಾನ್ ಆಪಂವ್ಚೆಂ. ಘರಾಂತ್ ಮನ್ಶಾಂಕ್ ಖಾಣ್ ಜೆವಾಣ್ ನಾ ತರ್ಯ್ ಟೈಗರಾಕ್ ಸಾರ್ಕೆಂ ಆನಿ ವೆಳಾರ್ ಖಾಣ್ ಮೆಳ್ತಾಲೆಂ. ಟೈಗರಾಕ್ ದಿಸಾಕ್ ಮೊಟ್ಯಾ ಸಾಂಕ್ಳಿನ್ ಬಾಂದ್ತಾಲೆ ಆನಿ ರಾತಿಕ್ ಝಾಲಾಂತ್ ಸೊಡ್ತಾಲೆ.
ಲಿಗೊರ್ ಸಿಕೆರಿಚ್ಯಾ ಝಾಲಾಕ್ ಇಲ್ಲೆಂ ಪಯ್ಸ್ ರಾವೊನ್, ರೊಜ್ಲಿನ್ ದೋನಿಂ ಹಾತಾಂನಿ ಕೊಂಬ್ಯಾಕ್ ಧರ‍್ನ್ ಏಕ್ ಪಾವ್ಟಿಂ ಆಪ್ಲ್ಯಾ ಘೊವಾಕ್ ಪಳಯ್ಲಾಗ್ಲಿ ತರ್ ಆನ್ಯೇಕ್ ಪಾವ್ಟಿಂ ಲಿಗೊರ್ ಸಿಕೆರಿಕ್. ದೋಗೀ ದಾದ್ಲೆ ತೊಂಡಾಕ್ ಆಯಿಲ್ಲ್ಯಾ ಬರಿ ಉಲಯ್ತಾಲೆ ತರ್ ರೊಜ್ಲಿನ್ ಫೆರ‍್ನಾಂದಾಕ್ ಕಿತೆಂಚ್ಚ್ ಆಯ್ಕಾನಾ ಜಾಲೆಂ.
“ತ್ಯಾ ಕೊಂಬ್ಯಾಕ್ ತಾಂಚ್ಯಾ ಝಾಲಾಂತ್ ಉಡಯ್ ರೊಜ್ಯೆ ಆನಿ ಯೆ ತುಂ….” ಆಪ್ಲ್ಯಾ ಘೊವಾನ್ ಜಾತಾ ತಿತ್ಲ್ಯಾ ವ್ಹಡಾ ತಾಳ್ಯಾನ್ ಸಾಂಗ್ತಾನಾ ರೊಜ್ಲಿನ್ ಫೆರ‍್ನಾಂದಾನ್ ಪಾಟಿಂ ಮುಕಾರ್ ಪಳಯ್ಲೆಂ ನಾ. ಕೊಂಬ್ಯಾಕ್ ಲಿಗೋರ್ ಸಿಕೆರಿಚ್ಯಾ ಝಾಲಾಚ್ಯಾ ಪೊಂತಾರ್ ಆಸ್ಚ್ಯಾ ಮಾಡಾ ಖಾಟ್ಯಾರ್ ದವರ್ನ್ ಪಾಟಿಂ ಘುವ್ಲಿ.
“ತೊ ಕೊಂಬೊ ತುಮಿಂಚ್ಚ್ ವರಾಜಯ್…… ಆಜ್ ರಾತಿಂ ರಾಂದುನ್ ಖಾಯಾ…..ಆಜ್ ದಾಧೊಶಿ ಫೆಸ್ತ್ ತುಮ್ಕಾಂ…..” ಲಿಗೊರ್ ಸಿಕೆರ್ ಬೊಬಾಟ್ಲೊ.
“ತುಮ್ಚ್ಯಾ ಕೊಂಬ್ಯಾಕ್ ಬಾಂಧುನ್ ಘಾಲಿನಾಸ್ತಾನಾ ಅಸೊಚ್ಚ್ ಸೊಡ್ನ್ ತೊ ಆಮ್ಚ್ಯಾ ಪೆಟ್ಯಾ ಲಾಗಿಂ ಆಯಿಲ್ಲೊ ತರ್ ಆಮಿಂ ಕಿತೆಂ ಕರಿಜಯ್….ಕುಂಪಾದ್ರೆ…. ಆಮ್ಚೊ ಬುದಿಚೊ ಪೆಟೊ…. ತಾಚ್ಯಾ ಸರ್ಸಿನ್ ಕೊಂಬೊ ಯೆನಾ ತರ್ ತೊ ಆಪಡ್ಚೊ ಸಯ್ತ್ ನ್ಹಯ್…. ಆತಾಂ ತುಮಿಂಚ್ಚ್ ರಾಂದುನ್ ಖಾಯಾ….” ಚಾರ‍್ಲಿ ಫೆರ‍್ನಾಂದಾನ್ ಜವಾಬ್ ದಿಲಿಚ್ಚ್.
ಲಿಗೊರ್ ಸಿಕೆರಿಚೊ ರಾಗ್ ಮಸ್ತಕಾಕ್ ಚಡ್ಲೊ. ಮಾಡಾ ಕಾಟ್ಯಾಚ್ಯಾ ಫಾತ್ರಾರ್ ಆಸ್ಲ್ಲ್ಯಾ ಕೊಂಬ್ಯಾಕ್ ಉಕಲ್ನ್ ತೊ ಕಂಪೌಂಡಾಚ್ಯಾ ದೊರ‍್ಯಾ ಸರ್ಸಿನ್ ಸರಾರಾಂ ಆಯ್ಲೊ ಆನಿ ಜಾತಾ ತಿತ್ಲ್ಯಾ ಬಳಾನ್ ಚಾರ‍್ಲಿ ಫೆರ‍್ನಾಂದಾಚ್ಯಾ ಕಂಪೌಂಡಾಕ್ ಉಡಯ್ಲೊ.
ಚಾರ‍್ಲಿ ಫೆರ‍್ನಾಂದ್ ಕಿತೆಂ ದಾದ್ಲೊ ನ್ಹಯ್? ಆಪ್ಲ್ಯಾ ಬಾಯ್ಲೆ ಭುರ‍್ಗ್ಯಾಂ ಮುಕಾರ್ ಅಶಿ ಜಾಲ್ಲಿ ಲಜ್ ಸೊಸುಂಕ್ ತಾಕಾ ಜಾಲಿ ನಾ…. ಆಪ್ಲ್ಯಾ ಕಂಪೌಂಡಾಂತ್ ಉಡಯಿಲ್ಲೊ ಕೊಂಬೊ ಆರಾವ್ನ್ ಲಿಗೊರ್ ಸಿಕೆರಿಚ್ಯಾ ಜಾಗ್ಯಾಂತ್ ಉಡವ್ನ್ ಸೊಡ್ಲೊ.
ಅಸೆಂ ಆನಿ ದೋನ್ ಪಾವ್ಟಿಂ ಘಡ್ಲೆಂ. ಕೊಂಬ್ಯಾಚಿಂ ಪಾಕಾಂ ಅರ‍್ದಿಂ ಜಡೊನ್ ಗೆಲಿಂ. ತ್ಯಾ ವೆಳಿಂ ಲಿಗೊರ್ ಸಿಕೆರಿನ್ ಆಪ್ಲ್ಯಾ ರಾಗಾಂತ್‌ಯ್ ತಕ್ಲಿ ಖರ‍್ಚಿಲಿ. ಹೆಣೆ ತೆಣೆ ಉಡವ್ನ್ ಪಿಸ್ಡೊನ್ ಗೆಲ್ಲ್ಯಾ ಕೊಂಬ್ಯಾಕ್ ಆಕ್ರೇಕ್ ತಾಣೆ ದೊರ‍್ಯಾ ವಯ್ರ್ ದವರ‍್ಲೊ ಆನಿ ಆಪ್ಲ್ಯಾ ಘರಾ ಭಿತರ್ ಚಲ್ತಚ್ಚ್ ರಾವ್ಲೊ.
ದುಸ್ರ್ಯಾ ದಿಸಾ ಕಾವ್ಳ್ಯಾಂಕ್ ಮಾತ್ರ್ ಗಮ್ಮತಾಯೆಚೆಂ ಫೆಸ್ತ್‌ಚ್ಚ್ ಜಾಲೆಂ.
: : ದುಸ್ರೊ ಅವಸ್ವರ್ : :
ಹರ‍್ಯೆಕಾ ಮಹಿನ್ಯಾಂತ್ ಪಯ್ಲ್ಯಾ ಆಯ್ತಾರಾ ಸೊಡ್ಲ್ಯಾರ್ ಹೆರಾಂ ಹಫ್ತ್ಯಾಂನಿ ಸನ್ವಾರಾಚ್ಚ್ ಮಿಸಾಕ್ ವೆಚೆಂ ಚಾರ‍್ಲಿ ಆನಿ ರೊಜ್ಲಿನ್ ಫೆರ‍್ನಾಂದಾನ್. ಪಯ್ಲ್ಯಾ ಆಯ್ತಾರಾ ಸಕಾಳಿಂ ಭಾಗೆವಂತ್ ವೊರಾಚೆಂ ಭಕ್ತಿಪಣ್ ಆನಿ ತೇರ್ಸ್ ಆಸ್ತಾ. ತ್ಯಾ ಭಕ್ತಿಪಣಾಂತ್ ಭಾಗ್ ಘೆತ್ಲ್ಯಾರ್ ಮಹಿನ್ಯೊ ಸಗ್ಳೊ ಭಾರಿಚ್ಚ್ ಬರೊ ಜಾತಾ ಮ್ಹಣ್ ತಾಣಿಂ ಚಿಂತ್ಚೆಂ.
ಪೆಟ್ಯಾನ್ ಕೊಂಬ್ಯಾಕ್ ಫಾಪ್ಸಿಲ್ಲ್ಯಾ ಹಫ್ತ್ಯಾ ಉಪ್ರಾಂತ್ಲೊ ಆಯ್ತಾರ್, ಮಹಿನ್ಯಾಚೊ ಪಯ್ಲೊ ಆಯ್ತಾರ್. ಫಾಂತ್ಯಾರ್ ಉಟೊನ್ ಮಿಸಾಕ್ ವೆಚಿ ತಯರಾಯ್ ಕರ್ಚ್ಯಾ ಪಯ್ಲೆಂ ಗೊರ‍್ವಾಂಚೆಂ ಆನಿ ಮೊಸಿಚೆಂ ದೂದ್ ಕಾಡ್ನ್, ತಾಕಾ ಜಾಯ್ ತಿತ್ಲೆಂ ಉದಕ್ ಭರ‍್ಸುನ್ ಹಳ್ತ್ ಕರ್ನ್, ದಿಪ್ಯಾಕ್ ಆನಿ ಸದಾಂಚ್ಯಾ ಗ್ರಾಯ್ಕಾಂಕ್ ದಿಂವ್ಚ್ಯಾಕ್ ಬೊತ್ಲಿನಿಂ, ಚೆಂಬಾನಿಂ ಆನಿ ಕೊಳ್ಸುಲ್ಯಾನಿಂ ಘಾಲ್ನ್ ತಯಾರ್ ಕೆಲೆಂ. ಆಯ್ತಾರಾ ದೀಸ್ ಮಾತ್ರ್ ದೂದ್ ದಿಪ್ಯಾಕ್ ದಿಂವ್ಚೆಂ ಕಾಮ್ ತಾಂಚ್ಯಾ ಮಾಲ್ಘಡ್ಯಾ ಚೆಡ್ವಾಂಚೆಂ. ಉಪ್ರಾಂತ್ ಟೈಗರಾಕ್ ಸಾಂಕ್ಳಿಕ್ ಘಾಲ್ಯಾಂ ಮ್ಹಣ್ ಚಾರ‍್ಲಿ ಫೆರ‍್ನಾಂದ್ ‘ಟೈಗರ್ … ಟೈಗರ್’’ ಮ್ಹಣ್ ಆಪಂವ್ಕ್ ಲಾಗ್ಲೊ ತರ್ ಟೈಗರ್ ಆಯ್ಲೊ ನಾ. ಟೈಗರ್ ದಿಸಾತ್ತ್ ನಾ ಜಾಲೊ. ರೊಜ್ಲಿನ್ ಫೆರ‍್ನಾಂದ್ ಆನಿ ಭುರ್ಗಿಂ ಶಾಲಿನಿ, ಶಾನನ್ ಆನಿ ಶೋನ್ ಭಾಯ್ರ್ ಆಯ್ಲಿಂ ಆನಿ ತಾಣಿಂಯ್ ಟೈಗರಾಕ್ ಆಪಂವ್ಕ್ ಸುರು ಕೆಲೆಂ.
ಟೈಗರ್ ನಾ. ಟೈಗರ್ ದಿಸಾತ್ತ್ ನಾ.
ಚಾರ‍್ಲಿ ಫೆರ‍್ನಾಂದಾಚಿ ದೀಷ್ಟ್ ಲಿಗೊರಿ ಸಿಕೆರಿಚ್ಯಾ ಘರಾ ಕುಶಿನ್ ಗೆಲಿ. ಥಂಯ್ಸರ್ ಕೊಣ್ಂಚ್ಚ್ ದಿಸ್ಲೆ ನಾಂತ್. ಕಿತ್ಯಾಕ್‌ಗೀ ಕಳಿತ್ ನಾ, ತಾಚ್ಯಾ ಕಾಳ್ಜಾಂತ್ ದುಬಾವಾಚಿಂ ಕಿಟಾಳಾಂ ಪುಟ್ಲಿಂಚ್ಚ್….
ತಿತ್ಲ್ಯಾರ್ ಬಯ್ಲಾಂತ್ಲ್ಯಾ ಸ್ಟೇನಿ ತಾವ್ರಾಚಿ ಧುವ್ ದೂದ್ ವರೊಂಕ್ ಮ್ಹಣ್ ಆಯಿಲ್ಲೆಂ, ಗೆಟಿಚ್ಯಾ ಭಾಯ್ಲ್ಯಾನ್ ರಾವೊನ್ ಬೊಬಾಟುನ್ ಮ್ಹಣಾಲೆಂ. ” ಮಾಮಾ, ತುಮ್ಚೊ ಪೆಟೊ ಹಾಂಗಾ ಪಡ್ಲಾ….. “
ಚಾರ‍್ಲಿ ಫೆರ‍್ನಾಂದಾ ಸವೆಂ ಸಗ್ಳೆಂ ಕುಟಾಂಬ್‌ಚ್ಚ್ ಗೇಟಿ ಲಾಗಿಂ ದಾವ್ಲೆಂ ಆನಿ ಕಿತೆಂ ಪಳಯ್ತೆಲೆಂ..?? ಗೇಟಿ ಬಾಯ್ಲ್ಯಾನ್ ದೊರ‍್ಯಾ ಕುಶಿನ್ ಟೈಗರ್ ಪಡ್ಲಾ…..ಜೀವ್ ಹೊಗ್ಡಾಯ್ಲಾ ತಸೆಂಚ್ಚ್….. ನಿರ‍್ಜೀವ್…. ತೊಂಡಾಂತ್ ಪೇಂಡ್ ಭರೊನ್ ಗೆಲ್ಲೊ….
“ಯೆ ಮ್ಹಜ್ಯಾ ದೆವಾ….. ಆಮ್ಚ್ಯಾ ಟೈಗರಾಕ್ ವೀಕ್ ಘಾಲ್ನ್ ಕೊಣೆಂ ಮಾರ‍್ಲೊ….? ” ರೊಜ್ಲಿನ್ ಫೆರ‍್ನಾಂದ್ ಹರ‍್ಧೆಂ ಬಡವ್ನ್ ಬೊಬಾಟ್ಲಿ.
ಭುರ್ಗಿಂ ಕಳ್ವಳ್ಳಿಂಚ್ಚ್……
“ಆನಿ ಕೋಣೆ…. ” ಚಾರ‍್ಲಿ ಫೆರ‍್ನಾಂದಾನ್ ವ್ಹಡಾ ತಳ್ಮಾಳ್ಯಾನಿಂ ವ್ಹಡಾ ತಾಳ್ಯಾನ್ ಮ್ಹಳೆಂ. “ಆಮ್ಚ್ಯಾನಿಂಚ್ಚ್…… ಸೆಜಾರಾ ರಾಷ್ಟ್ರಾಂಚೆ ದುಸ್ಮಾನ್ ಕಾಂಯ್ ಯೇವ್ನ್ ಅಸೆಂ ಕೆಲ್ಲೆಂ ನ್ಹಯ್….ಸೆಜಾರ‍್ಚೆಚ್ಚ್ ಆಮ್ಚೆ ದುಸ್ಮಾನ್….. ಪಯ್ಲೆಂ ಆಮಿಂ ವಳ್ಕಾಲ್ಯಾ ನಾಂವ್; ಆತಾಂ ಕಳ್ತಾ….. ತಾಂಚ್ಯಾ ಕಾಳ್ಜಾಂತ್ ಕಿತ್ಲೆಂ ಕುಸ್ಡೆಪಣ್ ಆಸಾಗೀ ಮ್ಹಣ್ !!”
ಲಿಗೊರ್ ಸಿಕೆರಿಚ್ಯಾ ಘರಾಂತ್ ಮಾತ್ರ್ ಜಾಗ್‌ಮಾಗ್ ನಾತ್ಲ್ಲಿ. ಬಿಲ್ಕುಲ್ ಶಾಂತ್‌ಪಣ್…..ತಿಂ ಕಾಂಯ್ ಯೆದೊಳ್ಚ್ಚ್ ಮಿಸಾಕ್ ಗೆಲ್ಲಿಂ ಆಸ್ತೆಲಿಂ….
: : ತಿಸ್ರೊ ಅವಸ್ವರ್ : :
ಲಿಗೋರ್ ಸಿಕೆರಿಕ್ ಘರಾಂತ್ ಘುಟಾನ್ ಸೊರೊ ಕಾಡ್ಚಿ ಸವಯ್ ಜಾಯ್ತ್ಯಾ ವರ್ಸಾಂ ಥಾವ್ನ್ ಆಸ್ಲ್ಲಿ. ಕಾಜು ನಾತ್ಲ್ಲ್ಯಾ ವೆಳಾರ್ ಈಂದಾಚೊ, ಸುರೆಚೊ, ಆಣ್ಸಾಂಚೊ ಸೊರೊಯ್ ತೊ ಕಾಡ್ತಾಲೊ. ಆಪ್ಣಾಕ್ ಪಿಯೆಂವ್ಕ್ ಮ್ಹಣ್ ಕಾಡ್ತಾಲೊ ತರ್ ಕೊಣಾಯ್ಕಿ ಗರ‍್ಜೆಕ್ ಜಾಯ್ ತರ್ ವಿಕುಂಕ್‌ಯ್ ವಿಕ್ತಾಲೊ.
ಸೊರೊ ಉಕ್ಡುಂಕ್ ಜಾಯ್ ಜಾಲ್ಲಿಂ ಆಯ್ದಾನಾಂ ಗೊಟ್ಯಾಚ್ಯಾ ಮಾಳ್ಯಾರ್ ಪೊಂತಾರ್ ಜೊಗಸಾಣೆನ್ ದವರ‍್ಚಿಂ ತರ್ ಕಾಜು ಯಾ ಫಳಾಂ ಆಂಬ್ಟೆವ್ನ್ ಕುಸಂವ್ಚ್ಯೊ ಮೊಡ್ಕ್ಯೊ ತೊ ಇತ್ಲಾಂತ್ ಇರ‍್ವೊಳ್ಯಾಚ್ಯಾ ರುಕಾಮುಳಾಂತ್ ಪೂರ್ನ್ ದವರ‍್ತಾಲೊ. ತ್ಯಾ ಖಾತಿರ್ ಜೊಕ್ತೆ ಫೊಂಡ್ ಆಸಾ ಕೆಲ್ಲೆ ಆನಿ ಜೊಕ್ತೆಂ ದಾಂಕಾಣ್ ತಾಂಚೆರ್ ಬಸಯಿಲ್ಲೆಂ. ದಾಂಕಾಣ್ ಬಾಯ್ಲ್ಯಾಂಕ್ ದಿಸಾನಾತ್‌ಲ್ಲ್ಯಾ ಬರಿ ಭಾತೆಣ್ ಯಾ ಕರಾಡ್ ತೊ ದಾಂಪ್ತಾಲೊ.
ಹೆ ಘುಟ್ ಗಾಂವಾಕ್ ಕಳಿತ್ ಆಸ್ಲ್ಲೆಂ ಯಾ ನಾತ್ಲ್ಲೆಂ ತರ್ಯ್ ಚಾರ‍್ಲಿ ಫೆರ‍್ನಾಂದಾಚ್ಯಾ ಕುಟ್ಮಾಕ್ ಕಳಿತ್ ಆಸ್‌ಲ್ಲೆಚ್ಚ್.
ಲಿಗೊರ್ ಸಿಕೆರಿನ್ ಸೊರೊ ಉಕಡ್ಚೊ ಚಡಾವತ್ ಜಾವ್ನ್ ಸನ್ವಾರಾ ಸಾಂಜೆರ್. ಸೊರೊ ಉಕಡ್ತಾನಾ ಬಾಯ್ಲ್ಯಾಂಕ್ ದುಬಾವ್ ಯೇಂವ್ಕ್ ನಜೊ ಮ್ಹಣ್ ಲೀನಾ ಸಿಕೆರ್ ಆನಿ ಭುರ‍್ಗ್ಯಾಂನಿ ವ್ಹಡಾ ತಾಳ್ಯಾನ್ ಆಮೊರಿ – ತೇರ್ಸ್ ಭೆಟಂವ್ಚೊ. ಸನ್ವಾರಾ ದೀಸ್ ತಾಂಚ್ಯಾ ಘರಾ ಲಾಂಬ್ ತೇರ್ಸ್, ಮರಿಯಾಳ್ ನೊವೆನ್ ಆನಿ ತೀನ್ ಚಾರ್ ಕಂತಾರಾಂ. ಸೊರೊ ಕಾಡ್ಚೆಂ ಕಾಮ್ ಆಕೇರ್ ಜಾಂವ್ಕ್ ಇಲ್ಲೊ ಚಡ್ ವೇಳ್ ಜಾಯ್ ತರ್ ಕಂತಾರಾಂ ಆನಿಕ್ಯ್ ಲಾಂಬೊನ್ ವೆತಾಲಿಂ.
ಆಸೆಂ ಕೆಲ್ಲ್ಯಾನ್‌ಂಗಿ ಕಿತೆಂ ಕಳಿತ್ ನಾ, ತೊ ಸೊರೊ ಕಾಡ್ತಾ ಮ್ಹಣ್ ಕೊಣಾಯ್ಕಿ ದುಬಾವ್ ಜಾಲ್ಲೊಚ್ಚ್ ನಾ. ಜಾಲ್ಯಾರ್‌ಯ್ ಕೊಣೆಂಯ್ ಹೆರಾಂ ಸೆಜಾರ‍್ಚ್ಯಾಂನಿ ಹ್ಯಾ ವಿಶ್ಯಾಂತ್ ಧ್ಯಾನ್ ದಿಲ್ಲೆಂಯ್ ನಾ.
ಆನಿ ಹ್ಯಾ ಸನ್ವಾರಾ ಜಾಲೆಂ ವಿಂಗಡ್‌ಚ್ಚ್…
ಲೀನಾ ಸಿಕೆರಿನ್ ತೇರ್ಸ್ ಸುರು ಕರ್ನ್ ತಿಸ್ರೊ ಮಿಸ್ತೆರ್ ಜಾತಾನಾ ಗೇಟಿ ಭಾಯ್ರ್ ಪೊಲಿಸಾಂಚೆ ವ್ಯಾನ್ ರಾಂವ್ಲೆಂಚ್ಚ್. ಲೀನಾ ಸಿಕೆರ್ ನಮಾನ್ ಮರಿಯೆ ಮ್ಹಣೊನ್‌ಂಚ್ಚ್ ಭಿತರ್ ದಾಂವ್‌ಲ್ಲಿ ಮಾತ್ರ್ ಪೊಲಿಸ್ ಝಾಲಾಂತ್ ಪಾವ್ಲೆ ಆನಿ ಖಿಣಾನ್ ರಾಂದ್ಚ್ಯಾ ಕುಡಾಕ್. ಲಿಗೊರಿ ಸಿಕೆರಿಕ್ ಧರ‍್ರ‍್ಲೊಚ್ಚ್… ಪಾಟಿರ್ ಚಾರ್ ಮಾರ್ ಪಡ್ಲೆಚ್ಚ್.
ಪೊಲಿಸಾಂನಿ ತಾಚ್ಯಾ ಲಾಗಿಂ ಕಾಂಯ್ ವಿಚಾರಿನಾಸ್ತಾನಾ ಕಾಜು ಕುಸೊಂಕ್ ದವರ‍್ಚ್ಯಾ ಜಾಗ್ಯಾರ್‌ಯ್ ವೆಲೆಂ. ಕರಾಡ್ ಆನಿ ಭಾತೆಣ್ ಉಸ್ತುನ್, ತಿಂ ಆಯ್ದಾನಾಂ ಪುಟವ್ನ್ ಘಾಲಿಂ. ಥಂಯ್ಸರ್ ಫೊಂಡಾಂತ್ ಪಯ್ಲೆಂಚ್ಯೊ ಸೊರ್ಯಾಚೊ ಬೊತ್ಲಿಯ್ ಮೆಳ್ಳ್ಯೊ.
ಲೀನಾ ಸಿಕೆರಿನ್ ಪೊಲಿಸಾಂಚೆ ಪಾಯ್ ಧರ‍್ಲೆ. ಆಪ್ಲ್ಯಾ ಘೊವಾಕ್ ಸೊಡ್ಯಾ; ಪಯ್ಶೆ ದಿತಾಂ ಮ್ಹಣ್ ಪರಾತ್ಲೆಂ. ಕಿತೆಂ ಕೆಲ್ಯಾರ್‌ಯ್ ಜಾಲೆಂಚ್ಚ್ ನಾ. ಪೋಲಿಸ್ ಲಿಗೊರ್ ಸಿಕೆರಿಕ್ ಜೀಪಾರ್ ಘಾಲ್ನ್ ಗೆಲೆಚ್ಚ್….
ಸಿಕೆರಿಚ್ಯಾ ಕುಟ್ಮಾನ್ ಚಾರ‍್ಲಿ ಫೆರ‍್ನಾಂದಾಚ್ಯಾ ಘರಾ ಕುಶಿನ್ ಪಳಯ್ಲೆಂ. ಥಂಯ್ಸರ್ ಸಗ್ಳಿಂ ಯೆದೊಳ್ಚ್ಚ್ ನಿದ್‌ಲ್ಲಿಂ ಜಾಯ್ಜಯ್…. ಜಾಗ್‌ಮಾಗ್ ನಾತ್ಲ್ಲಿ…
ಉಪ್ರಾಂತ್ ಪಯ್ಶೆ ಖರ‍್ಚಾಲೆ. ಚಾರ್ ದಿಸಾನಿಂ ಲಿಗೊರ್ ಸಿಕೆರಿಕ್ ಪೋಲಿಸ್ ಸ್ಟೇಶನಾಂತ್ಲೊ ಭಾಯ್ರ್ ಕಾಡ್ಲೊ.
ಪಾಟಿಂ ಆಯಿಲ್ಲೊಚ್ಚ್ ಲಿಗೊರ್ ಸಿಕೆರ್ ಝಾಲಾಂತ್ ರಾವೊನ್ ಬೊಬಾಟ್ಲೊ – “ಪೊಲಿಸಾಂಕ್ ಆಮ್ಚ್ಯಾ ಘರ‍್ಚಿ ಸರ್ವ್ ಗಜಾಲ್ ಕೊಣೆಂ ಸಾಂಗ್ಲ್ಯಾ ಮ್ಹಣ್ ಮ್ಹಾಕಾ ಕಳಿತ್ ಜಾಲಾಂ….. ಹಾಂವ್ ಮಾತ್ರ್ ತಾಂಕಾ ಸೊಡ್ಚೊ ನಾ……”
: : ಚವ್ತೊ ಅವಸ್ವರ್ : :
ದೊಗಾಂಯ್ಚ್ಯಾ ಕಂಪೌಂಡಾಕ್ ವಿಂಗಡ್ ಕರ್ಚೊ ದೊರೊ ಆನಿ ಸಂಬಂಧ್ ದವರುಂಕ್ ಆಸ್ಲ್ಲೊ ಆಕ್ಕಾಡೊ. ತ್ಯಾ ಸನ್ವಾರಾ ದೊನ್ಪಾರಾಂ ಚಾರ‍್ಲಿ ಫೆರ‍್ನಾಂದಾನ್ ಚಿಂತ್ಲೆಂ – ‘ಆಮಿಂ ಸೆಜಾರಾಂತ್ ಆಸ್ಚಿಂ ದುಸ್ಮಾನಾಂ ಜಾಲ್ಯಾಂವ್ ಆನಿ ಹೊ ಆಕ್ಕಾಡೊ ಬಿಲ್ಕುಲ್ ನಾಕಾ’. ದೆಕುನ್ ರೊಜ್ಲಿನ್ ಆನಿ ಭುರ‍್ಗ್ಯಾಂಕ್ ಸಾಂಗಾತಾ ಹಾಡ್ನ್, ಸಕ್ಡಾಂಚ್ಯಾ ಕುಮ್ಕೆನ್ ಆಕ್ಕಾಡೊ ಬಂಧ್ ಕರ್ನ್ ಸೊಡ್ಲೊ.
ಲಿಗೊರ್ ಸಿಕೆರಿಚ್ಯಾ ಜಾಗ್ಯಾ ಮಧೆಂ ಪಾವ್ಸಾಚೆಂ ಉದಕ್ ವಾಳೊನ್ ವಚೊಂಕ್ ತೋಡ್ ಆಸ್ಲ್ಲೊ. ತೊ ತೋಡ್ ಮಾತ್ರ್ ಕಂಪೌಂಡಾಚ್ಯಾ ದೊರ‍್ಯಾ ಮಧ್ಲ್ಯಾನ್ ಆಸ್ಲ್ಲ್ಯಾ ತೂಂಬಾಂತ್ಲ್ಯಾನ್ ಮುಖಾರ್ಸುನ್ ಚಾರ‍್ಲಿ ಫೆರ‍್ನಾಂದಾಚ್ಯಾ ಜಾಗ್ಯಾಂತ್ಲ್ಯಾನ್ ಮುಖಾರ್ಸುನ್ ವೆತಾಲೊ ಆನಿ ಬಾಯ್ಲ್ಯಾ ರಸ್ತ್ಯಾ ವಯ್ಲ್ಯಾ ಚರಂಡೆಕ್ ಮೆಳ್ತಾಲೊ. ಆಕ್ಕಾಡೊ ಬಂಧ್ ಕರ್ಚ್ಯಾ ಕಾಮಾಕ್ ಲಾಗ್‌ಲ್ಲೊ ಚಾರ‍್ಲಿ ಫೆರ‍್ನಾಂದ್ ತ್ಯಾ ತೂಂಬಾಕ್‌ಯ್ ಫಾತರ್ ಸಾಣ್ಸುನ್ ಮಾತಿ ಘಾಲ್ನ್ ಬಂಧ್ ಕೆಲೊ.
ನಶೀಬ್ ಪಳೆಯಾ…
ತ್ಯಾಚ್ಚ್ ರಾತಿಂ, ಮೊಳಾಬ್ ಪುಟ್‌ಲ್ಲ್ಯಾ ಬರಿ ಶಿರಾಂದಾರಿಂಚೊ ಪಾವ್ನ್ ವೊತ್ಲೊಚ್ಚ್. ಆಯ್ತಾರಾ ಸಕಾಳಿಂ ಲಿಗೊರ್ ಸಿಕೆರ್ ಉಟ್ತಾನಾ ತೂಂಬಾಂತ್ಲ್ಯಾನ್ ಉದಕ್ ವಾಳೊನ್ ವಚಾನಾಸ್ತಾನಾ ತಾಂಚ್ಯಾ ಜಾಗ್ಯಾರ್ ಭರೊನ್ ಝಲಾಕ್ ಆಯಿಲ್ಲೆಂ. ಝಾಲಾ ಥಾವ್ನ್ ದೊರ‍್ಯಾ ಮ್ಹಣಾಸರ್ ಏಕ್ ತಳೆಂಚ್ಚ್ ಜಾಲ್ಲೆಂ.
ಉದ್ಕಾಂತ್ಲ್ಯಾನ್ ಕಷ್ಟಾಂನಿ ಚಲೊನ್ ವಚೊನ್ ಪಳಯ್ತಾ ತರ್ ಕಿತೆಂ ಪಳಂವ್ಚೆಂ. ದೊರ‍್ಯಾಕ್ ಆಸ್ಲ್ಲೊ ಉದಕ್ ವಾಳೊಂಕ್ ತೂಂಬ್ ಬಂಧ್ ಕೆಲಾ. ” ಹೊ ತೂಂಬ್ ಕೋಣೆ ಬಂಧ್ ಕೆಲಾ? ಆನಿ ಕೊಣೆಂ ಆಮ್ಚ್ಯಾ ಸೆಜಾರ‍್ಯಾಂನಿ….” ತೊ ಬೊಬಾಟ್ಲೊ.
ಆತಾಂ ರಾಗ್ ಲಿಗೊರ್ ಸಿಕೆರಿಚ್ಯಾ ಮಾತ್ಯಾಕ್ ಚಡ್ಲೊ. ಆಪ್ಲ್ಯಾ ಕುಡಿಂತ್ಲೆ ತ್ರಾಣ್ ಯೆಂಕ್ಟಾಯ್ ಕರ್ನ್ ತ್ಯಾ ದೊರ‍್ಯಾಕ್ ಖೊಟ್ ಘಾಲಿಚ್ಚ್…. ಏಕ್ ನ್ಹಯ್ ದೋನ್ ನ್ಹಯ್ ತೀನ್ ನ್ಹಯ್….. ತೊ ದೊರೊ ಖೊಸಾಳ್ತಾ ಮ್ಹಣಾಸರ್… ಮಾತಿಯೆಚೊ ದೊರೊ. ತ್ಯಾ ಶಿವಾಯ್ ರಾತ್‌ಭರ್ ಆಯಿಲ್ಲ್ಯಾ ಪಾವ್ಸಾಕ್ ಆನಿ ಭರ್‌ಲ್ಲ್ಯಾ ಉದ್ಕಾಂತ್ ಥಂಡ್ ಜಾವ್ನ್ ಅಳ್ಮೆಂಚ್ಚ್ ಜಾಲ್ಲೊ. ಪೊರ‍್ತಾಲೊ.
ಲಿಗೊರ್ ಸಿಕೆರಿಚ್ಯಾ ಜಾಗ್ಯಾ ವಯ್ಲೆಂ ಉದಾಕ್ ಚಾರ‍್ಲಿ ಫೆರ‍್ನಾಂದಾಚ್ಯಾ ಜಾಗ್ಯಾರ್ ಆವ್ರಾಬರಿ ವಾಳೊಂಕ್ ಲಾಗ್ಲೆಂ.
ಗೊಟ್ಯಾಂತ್ ಗೊರ‍್ವಾಂಕ್ ಆನಿ ಮೊಶಿಕ್ ಸೊಪ್ ಬೆಂಡುನ್ ಆಸ್ಲ್ಲೊ ತೊ ಲಿಗೊರ್ ಸಿಕೆರಿಚಿ ಬೊಬಾಟ್ ಆಯ್ಕೊನ್ ಹಾತಿಂ ಕೊಯ್ತೊ ಘೆವ್ನ್‌ಂಚ್ಚ್ ಭಾಯ್ರ್ ಆಯ್ಲೊ….ಆಪ್ಲ್ಯಾ ಜಾಗ್ಯಾ ಭಿತರ್ ಉದ್ಕಾಚೊ ವಾಳೊ ಆಯಿಲ್ಲೊ ಪಳವ್ನ್ ಚಾರ‍್ಲಿ ಫೆರ‍್ನಾಂದ್ ಉರ‍್ಲಾಗೀ ?
ಉದಾಕ್ ನ್ಹಂಯ್ಚ್ಯಾ ಆವ್ರಾಬರಿ ತಾಂಚ್ಯಾ ಕಂಪೌಡಾಂತ್ ವಾಳೊನ್ ವೆತಾಲೆಂ.
“ಆಕ್ಕಾಡೊ ತುಂವೆ ಬಂಧ್ ಕೆಲ್ಲೊಯ್…. ” ಲಿಗೊರ್ ಸಿಕೆರ್ ಬೊಬಾಟ್ಲೊ. ” ತುಂ ಸಂಸಾರಾಚೊ ಧನಿ ಜಾಲೊಯ್ ?? ಹೊ ಉದ್ಕಾಚೊ ತೂಂಬ್ ಬಂಧ್ ಕರ್ಚೆಂ ಹಕ್ಕ್ ತುಕಾ ಕೊಣೆ ದಿಲ್ಲೆಂ ಪೆಟ್ಯಾ …..”
ಚಾರ‍್ಲಿ ಫೆರ‍್ನಾಂದ್ ನಂಜಾಳಿ ಹಾಸೊ ಹಾಸ್ಲೊ. ಜಿವಾಂತ್ ರಾಗಾಚೊ ಉಜೊ ಪೆಟೊಂಕ್ ಲಿಗೊರ್ ಸಿಕೆರಿಚಿಂ ತಿತ್ಲಿಂಚ್ಚ್ ಉತ್ರಾಂ ಪುರೊ ಆಸ್ಲ್ಲಿಂ. ” ತುಜ್ಯಾ ಜಾಗ್ಯಾರ್ ವಾಳ್ಚೆಂ ಉದಕ್ ಮ್ಹಜ್ಯಾ ಜಾಗ್ಯಾರ್ ಯೆಂವ್ಚೆಂ ನಾಕಾ…. ತುಕಾ ಖಂಯ್ ಜಾಯ್ ಥಂಯ್ ತುಂ ವಾಳಾಶೆಂ ಕರ್…ತುಜೊ ಜಾಗೊ ಆನಿ ತುಜೆಂ ಉದಕ್….. ತೆಂ ತುಜೆಂ ಕಾಮ್ ಆನಿ ಹಾಂವ್ ನೆಣಾ…..”
“ದೆಕುನ್‌ಂಚ್ಚ್ ಹೊ ದೊರೊ ಹಾಂವೆ ಲೊಟುನ್ ಘಾಲಾ…. ಉದಕ್ ತುಜ್ಯಾಚ್ಚ್ ಜಾಗ್ಯಾರ್ ಆಸ್ಚ್ಯಾ ತೊಡಾಂತ್ಲ್ಯಾನ್ ವಚಾಜಯ್…. ವರ್ಸಾಂ ವರ್ಸಾಂ ಥಾವ್ನ್ ಅಸೆಂಚ್ಚ್ ಆಸಾ….. ಹೆಂ ಬದ್ಲುಂಚೊ ತುಂ ಕೋಣ್ ಪೆಟೊ….?”
ಚಾರ‍್ಲಿ ಫೆರ‍್ನಾಂದಾಚ್ಯಾ ಹಾತಾಂತ್ ಸೊಪ್ ಬೆಂಡ್ಚೊ ಕೊಯ್ತೊ ಆಸ್ಲ್ಲೊ…. ರಾಗ್ ಮಾತ್ಯಾರ್ ಚಡ್‌ಲ್ಲೊ…. ಕಾಳ್ಜಾಂತ್ ಸಯ್ತಾನ್ ಘಡಿಭರ್ ಆಯ್ಲೊ ಕೊಣ್ಣಾ……. ಕಿತೆಂ ಕರ್ತಾ ಮ್ಹಣ್ ತಾಕಾ ಕಳಿತ್ ಜಾಲೆಂಚ್ಚ್ ನಾ….
ತೊ ಲಿಗೊರ್ ಸಿಕೆರಿಚ್ಯಾ ಲಾಗಿಂ ದಾವ್ಲೊ ಆನಿ ಗಳೊ ಕಾಪುನ್ ಜಾಲ್ಲೆಂ….
ಆನಿ ಆಪ್ಲ್ಯಾ ಘೊವಾಕ್ ಅಸೆಂ ಜಾಲ್ಲೆಂ ಪಳವ್ನ್, ಲೀನಾ ಸಿಕೆರ್ ದಾವೊನ್‌ಂಚ್ಚ್ ಆಯ್ಲಿ.
“ತೀನ್ ಕಾಸಾಂಚ್ಯಾ ಸುಣ್ಯಾ…… ಮ್ಹಜ್ಯಾ ಘೊವಾಕ್ ಕಿತೆಂ ಕೆಲೆಂಯ್…… ಹೆ ಮ್ಹಜ್ಯಾ ದೆವಾ…… ತುಕಾ ಹಾಂವ್ ಸೊಡ್ಚಿಂ ನಾ….
ಚಾರ‍್ಲಿ ಫೆರ‍್ನಾಂದಾಚ್ಯಾ ಕಾಳ್ಜಾಂತ್ಲೊ ಸಯ್ತಾನ್ ಆನಿಕ್ಯ್ ಆಸ್ಲ್ಲೊ….. ವಾಳ್‌ಲ್ಲ್ಯಾ ರಗ್ತಾನ್ ತಾಚೊ ರಾಗ್ ನಿವೊಂಕ್ ನಾತ್ಲ್ಲೊ…..
“ತುಂವೆ ಮ್ಹಾಕಾ ಕಿತೆಂ ಕರ್ಚೆಂ ???” ಹಾತಾಂತ್ ಆಸ್ಲ್ಲ್ಯಾ ಕೊಯ್ತ್ಯಾನ್ ಲೀನಾ ಸಿಕೆರಿಚ್ಯಾ ಗಳ್ಯಾಕ್ ಎಕಾಚ್ಚ್ ಮಾರಾನ್ ಕಾಪುನ್ ಸೊಡ್ಲೆಂ…
► ಕ್ಲೆರೆನ್ಸ್, ಕೈಕಂಬ
- Posts not found
ಸಿಂತಿಯಾ ಆನಿ ಭುರ‍್ಗ್ಯಾಂನಿ ಪಯ್ಲೆ ಪಾವ್ಟಿಂ ಗಲ್ಫಾಕ್ ಯೆಂವ್ಚೆಂ; ಗಲ್ಫಾಕ್ ಕಿತ್ಯಾಕ್ ವಿಮಾನಾರ್ ಬಸ್ಚೆಂಚ್ಚ್ ತಾಣಿಂ ಪಯ್ಲೆ ಪಾವ್ಟಿಂ.
ವಿಸಾಚೆ ರೆಗ್ರೊ ಸಂಪವ್ನ್ ಭಾಯ್ರ್ ಯೆತಾನಾ ಆಮ್ಕಾಂ ಆಪವ್ನ್ ವೊರ‍್ಚ್ಯಾಕ್ ಬಾವೊಜಿ‌ಚ್ಚ್ ಆಯಿಲ್ಲೊ.
“ಕ್ರಿಸ್ತಾಚ್ಯಾ ಪವಿತ್ರ್ ರಗ್ತಾನ್ ಸ್ವಾಗತ್ ತುಮ್ಕಾಂ ….” ಏರ್‌ಪೊರ‍್ಟಾಚ್ಯಾ ಬಾಗ್ಲಾರ್‌ಚ್ಚ್ ತಾಣೆಂ ಆಮ್ಕಾಂ ಪೊಟ್ಲುನ್ ಧರ್ಲೆಂ. ಆಮ್ಚ್ಯಾ ಕಪಾಲಾರ್ ಖುರ‍್ಸಾಚೆ ಘುರ‍್ತ್ ಕಾಡ್ಲೆ.
” ಹ್ಯಾ ಮಸ್ಕತ್ಚ್ಯಾ ಭಾಂಗ್ರಾಳ್ಯಾ ಗಾವಾಂತ್ ತುಮ್ಚಿ ಜೀಣ್ ನಂದನ್ ಜಾಂವ್ದಿ… ಆನಿ ಹ್ಯಾಚ್ಚ್ ಖುರ‍್ಸಾಚ್ಯಾ ನಾಂವಾನ್, ತುಮ್ಕಾಂ ಪವಿತ್ರ್ ಕರ್ತಾಂ… ಬಳ್ವಂತ್ ಕರ್ತಾಂ…. “
ಬಾವೊಜಿಚ್ಯಾ ಹ್ಯಾ ಭಾಗೆವಂತ್ ಕರ‍್ನೆಚೊ ಕಾಳ್ಜಾಚ್ಯಾ ಗೂಂಡಾಯೆಂತ್ ಅನ್ಭೋಗ್ ಕೆಲ್ಲ್ಯಾ ಮ್ಹಜೆಂ ಮನ್ ಸಂತೊಸಾನ್ ಎಕ್ದಮ್ ಭರೊನ್ ಆಯ್ಲೆಂ.
“ದೇವ್ ತುಕಾ ವೊರ‍್ತೊ ಕರುಂ… ಬಾವೊಜೆ … ಆಮ್ಕಾಂ ನವೆಂ ಜಿವಿತ್ ದಿಂವ್ಚ್ಯಾಕ್ ಹಾಂಗಾಸರ್ ತುಂವೆ ಹಾಡ್ಲಾಂಯ್ ಮ್ಹಣ್ ಆಮಿಂ ಜಾಣಾಂವ್… ಆಮಿಂ ತುಕಾ ಋಣಿ…..” ಕೊಡ್ಯಾಳ್ ಥಾವ್ನ್ ಭಾಯ್ರ್ ಸರ‍್ತಾನಾಂಚ್ಚ್ ಹಾಂವೆ ಮತಿಂತ್ ಚಿಂತ್‌ಲ್ಲಿಂ ಉತ್ರಾಂ ತಿಂ. ಹಾಂವೆ ತಸೆಂ ಮ್ಹಣ್ತಾನಾಂಚ್ಚ್ ತಾಣೆ ಮ್ಹಜಿಂ ಉತ್ರಾಂ ಅರ್ಧ್ಯಾರ್ ರಾವಯ್ಲಿಂ……
“ಹಾಂವ್ ಕಾಂಯಿಂಚ್ಚ್ ನ್ಹಯ್… ಶೂನ್ಯ್ ಮನಿಸ್… ಹೆಂ ಸರ್ವ್ ಕ್ರಿಸ್ತಾನ್ ತುಮ್ಚ್ಯಾ ಜಿವಿತಾ ಖಾತಿರ್ ಕರ್ಚೆಂ ಮ್ಹಜ್ಯಾ ಮುಕಾಂತ್ರ್… ಕ್ರೀಸ್ತ್ ನ್ಹಯ್ ತರ್ ಹಾಂವ್ ಕಾಂಯಿಂಚ್ಚ್ ನ್ಹಯ್… ತುಮಿಂ ಕ್ರಿಸ್ತಾಕ್ ಹೊಗೊಳ್ಸಿಲ್ಯಾರ್ ಜಾಲೆಂ… ತಿತ್ಲೆಂಚ್ಚ್ ಪುರೊ ಮ್ಹಾಕಾ… ತಾಕಾಚ್ಚ್ ಮಹಿಮಾ ಆನಿ ತಾಕಾಚ್ಚ್ ಹೊಗ್ಳಾಪ್…”
ಆಮಿಂ ಕಾರ್‌ಪಾರ‍್ಕಾಕ್ ಚಲೊನ್ ಗೆಲ್ಯಾಂವ್. ಆಮ್ಚಿ ಸಮಾನ್ ಭರ್ಲ್ಲಿ ಏಕ್ ಟ್ರೊಲಿ ಬಾವೊಜಿನ್‌ಂಚ್ಚ್ ಲೊಟುನ್ ವೆಲಿ.
ತಾಚೆಂ ಕಾರ್ ಟಯೋಟಾ ಲ್ಯಾಂಡ್ ಕ್ರುಜರ್. ಆಡಂಬರಾಯೆಚೆಂ ಕಾರ್ ತೆಂ. ಆಮ್ಚೊ ಸಾಮಾನ್, ಸೂಟ್‌ಕೇಸಿ ಗಾಡಿಯೆಂತ್ ಘಾಲ್ತಾನಾ ತಾಣೆಂ ಆಮ್ಕಾಂ ಕುಮಕ್ ಕೆಲಿ. ಕಿತ್ಲೊ ಗ್ರೇಸ್ತ್ ತೊ ತರ್ಯ್ ತಿತ್ಲೊಚ್ಚ್ ಖಾಲ್ತೊ. ಸಾದೊ…
ಸಾಮಾನ್ ಕಾರಾರ್ ಘಾಲ್ನ್ ಜಾಲ್ಯಾ ಉಪ್ರಾಂತ್ ಆಮಿಂ ಸುಲ್ತಾನ್ ಖಬೂಸ್ ಮಾರ್ಗಾರ್ ಮುಖಾರ್ ವೆತಾನಾ ಮೆಳ್‌ಲ್ಲ್ಯಾ ಜಾಗ್ಯಾಂಚಿ ವಳಕ್ ಬಾವೊಜಿನ್ ಕರ್ನ್ ದಿಲಿ. ಗಾಲಾ, ಬವ್‍ಶಾರ್, ಆಲ್-ಕುವೆರ್, ಕುರುಮ್, ಪಿಡಿವೊಚೆ ದೊಂಗೊರ್, ರೂವಿ ಶ್ಹೆರ್ ಆನಿ ಆಖ್ರೇಕ್ ದೋನ್ ದೊಂಗ್ರಾಂ ಮಧೆಂ ಆಸ್ಚೆಂ ವಾದಿ ಕಬೀರ್. ಉಲವ್ಣ್ಯಾಂಚ್ಯಾ ಮಧೆಂ ಲಾಂಬ್ ವಾಟ್ ಸಾಗ್ಸಾಲ್ಲಿಚ್ಚ್ ಕಳ್ಳಿನಾ. ತ್ಯಾ ಮಧೆಂ, ಒಮಾನಾಕ್ ಆಯ್ಲ್ಯಾ ಉಪ್ರಾಂತ್ ತಾಣೆ ಕಾಡ್‌ಲ್ಲೆ ಕಷ್ಟ್ ಆನಿ ವಾಂವ್ಟ್ ಪರತ್ ಕಳಯ್ಲಿ. ಕಷ್ಟಾಂ ಆನ್ವಾರಾಂ ಮಧೆಂ ಕ್ರಿಸ್ತಾನ್ ಕಸೆಂ ವಾಂಚಯಿಲ್ಲೆಂ, ಕಾಂಯಿಂಚ್ಚ್ ನಾತ್ಲ್ಲ್ಯಾ ತಾಕಾ ಜಯ್ತಾಚ್ಯಾ ಶಿಖರಾಕ್ ಪಾವಯಿಲ್ಲ್ಯಾ ವಿಶ್ಯಾಂತ್ ವಿವರ‍್ಸಿಲೆಂ. ತ್ಯಾ ವಿಶ್ಯಾಂತ್ ಗಾವಾಂತ್ ಮೆಳ್‌ಲ್ಲ್ಯಾ ವೆಳಿಂಯ್ ತಾಣೆ ಆಮ್ಕಾಂ ಸಾಂಗ್ಲ್ಲೆಂ ಆಸಾ. ತ್ಯಾ ವಿಶ್ಯಾಂತ್ ಕಿತ್ಲ್ಯಾ ಪಾವ್ಟಿಂ ಸಾಂಗ್ಲೆಂ ತರ್ಯ್ ತಾಕಾ ಬಿಲ್ಕುಲ್ ಪುರೊ ಜಾಯ್ನಾತ್ಲ್ಲೆಂ ತೆಂಯ್ ಆಮಿಂ ಜಾಣಾಸ್‌ಲ್ಲ್ಯಾಂವ್…
ವಾದಿ ಕಬೀರ್ ಭಾರತೀಯ್ ಇಸ್ಕಾಲ್ ಉತ್ರೊನ್ ಮುಖಾರ್ ಗೆಲ್ಯಾ ಉಪ್ರಾಂತ್ ದಾವ್ಯಾಕ್ ಘುಂವ್ಲ್ಯಾರ್ ತಿಸ್ರ್ಯಾ ಗಲ್ಲೆಂತ್ ಉಜ್ವ್ಯಾಕ್ ತಾಚೆಂ ವ್ಹಡ್ ಘರ್. ಘರ್ ಮ್ಹಣ್ಚ್ಯಾಕೀ ಬಂಗ್ಲೊಚ್ಚ್ ಮ್ಹಣ್ಯೆತ್.
ತ್ಯಾ ವೆಳಾರ್ ಇಸ್ಕಾಲ್ ಸುರು ಜಾಲ್ಲೆಂ ಮಾತ್ರ್ ಆನಿ ಬಾವೊಜಿಚಿಂ ಭುರ್ಗಿಂ ಇಸ್ಕಾಲಾಕ್ ಗೆಲ್ಲಿಂ. ವಿಲ್ಮಾ ಕಾಮಾಕ್ ಗೆಲ್ಲೆಂ. ಹ್ಯಾ ವಿಶ್ಯಾಂತ್ ಎರ್‌ಪೊರ‍್ಟಾಂತ್‌ಂತ್ ಆಮ್ಕಾಂ ಬಾವೊಜಿನ್ ಸಾಂಗ್ಲ್ಲೆಂ.
ಸಾವ್ದಿಂತ್ ಏಕ್ ಸಾದೊ ಡ್ರೈವರ್ ಜಾವ್ನ್ ಕಾಮಾರ್ ಆಸ್ಲ್ಲ್ಯಾ ಮ್ಹಾಕಾ ಮಸ್ಕತಾಕ್ ಬಾವೊಜಿಚ್ಯಾ ಕಂಪ್ಣೆಂತ್ ಏಕ್ ಸುಪರ್‌ವೈಜರ್ ಜಾವ್ನ್ ಹಾಡ್ಲ್ಲೊ. ಸಾವ್ದಿಚೆಂ ಡ್ರೈವಿಂಗ್ ಲೈಸನ್ಸ್ ಹಾಂಗಾಸರ್ ಬದ್ಲಿ ಕರುಂಕ್ ಜಾತಾಲೆಂ ಆನಿ ತಸೆಂ ಜಾತಾ ತಿತ್ಲ್ಯಾ ವೆಗ್ಗಿಂ ತೆಂ ಒಮಾನ್ಚ್ಯಾ ಲೈಸನ್ಸಾಕ್ ಬದ್ಲಿ ಕರ್ನ್ ಕಾಮಾಚಿ ಜವಾಬ್ದಾರಿ ಕಾಣ್ಘೆಂವ್ಕ್ ಮ್ಹಾಕಾ ಕಳಿತ್ ಕೆಲ್ಲೆಂ.
” ಪ್ರೇಜ್ ದ ಲೋರ‍್ಡ್…” ಬಾವೊಜಿನ್ ಆಮ್ಕಾಂ ಘರಾಂತ್ ಭಿತರ್ ಆಪಯ್ಲೆಂ. “ಹೆಂ ಘರ್ ಆಜ್ ಥಾವ್ನ್ ಮ್ಹಜೆಂ ನ್ಹಯ್ ಬಗರ್ ತುಮ್ಚೆಂಚ್ಚ್… ತುಮಿಂಚ್ಚ್ ಹಾಚೆ ಧನಿ…”
ಪರತ್ ಕಸಲೆಂ ಸಾದೆಂಪಣ್… ವೊರ‍್ತ್ಯಾಪಣಾಂತೀ ಸಾದೆಂಪಣ್… ಆಪ್ಣಾಕ್ ಕಿತೆಂಚ್ಚ್ ನಾಕಾ ಮ್ಹಳ್ಳೆಂ ಬೊಳೆಂಪಣ್…
ಆಮಿಂ ಮುಖ್ಲ್ಯಾ ಸಾಲಾಂತ್ ಆಸ್ಲ್ಲ್ಯಾ ಸೊಫಾಚೆರ್ ಬಸ್ಲ್ಯಾಂವ್. ಬಾವೊಜಿನ್ ಆಮ್ಕಾಂ ಉದಾಕ್ ಹಾಡ್ನ್ ದಿಲೆಂ. ಉದಾಕ್ ಪಿಯೆವ್ನ್ ಜಾಲ್ಲೆಂಚ್ಚ್, ತೊ ಮ್ಹಣಾಲೊ, “ಹಾಂವೆ ಕಿತೆಂ ಕರ್ಚೆಂ ತರ್ಯ್ ಜೆಜುಚ್ಯಾಚ್ಚ್ ನಾಂವಾನ್ ಆನಿ ತ್ಯಾಚ್ಚ್ ಖಾತಿರ್ ಮ್ಹಾಕಾ ಇತ್ಲೆಂ ಸರ್ವ್ ಮೆಳ್ಳಾಂ… ಹಾಂವ್ ಪಯ್ಶಾಂಕ್ ಆಶೆಲ್ಲೊಂ ಮನಿಸ್ ನ್ಹಯ್… ಮ್ಹಾಕಾ ಪಯ್ಶೆ ನಾಕಾತ್… ಇತ್ಲೆಂ ಸರ್ವ್ ಹಾಂವ್ ಕರ್ತಾಂ ತರ್ ತುಮ್ಚೆಂ ಜಿವಿತ್‌ಯ್ ನಂದನ್ ಜಾಯ್ಜಯ್… ಪಕತ್ತ್ ತಾಚ್ಯಾಚ್ಚ್ ನಾಂವಾನ್… ಆಮಿಂ ಜೆಜುಕ್ ಆತಾಂ ಆರ‍್ಗಾಂ ದಿವ್ಯಾಂ… ಆಮಿಂ ಲ್ಹಾನ್ ಮಾಗ್ಣೆಂ ಮ್ಹಣ್ಯಾಂ ತುಮ್ಚೆಂ ಜಿವಿತ್ ನಂದನ್ ಜಾಂವ್ಚ್ಯಾ ಖಾತಿರ್…”
ಆಮಿಂ ಉಬೆ ರಾವ್ಲ್ಯಾಂವ್. ಆಜ್ ಫಾಂತ್ಯಾರ್ ಗಾವಾಂತ್ ಘರಾ ಥಾವ್ನ್ ಭಾಯ್ರ್ ಸರ್‌ಲ್ಲ್ಯಾಂವ್; ಹಾಂಗಾಸರ್ ಪಾವ್ತಾನಾ ದೊನ್ಪಾರ್ ಉತರ್‌ಲ್ಲೊ ಆನಿ ಖರಿಚ್ಚ್ ಆಮ್ಕಾಂ ಪುರಾಸಣ್ ಜಾಲ್ಲಿ ತರ್ಯ್ ಬಾವೊಜಿನ್ ಲ್ಹಾನ್ ಮಾಗ್ಣೆಂ ಮ್ಹಣ್ತಾನಾ ‘ನಾಕಾ’ ಮ್ಹಣೊಂಕ್ ಸಾಧ್ಯ್ ಜಾಲೆಂ ನಾ. ಬಾವೊಜಿನ್ ಮಾಗ್ಣೆಂ ಸುರು ಕೆಲೆಂ. ಮಟ್ವೆಂ ಮ್ಹಣ್ ಚಿಂತ್‌ಲ್ಲೆಂ ಪುಣ್ ಮಟ್ವೆಂ ಜಾಲೆಂ ನಾ… ಆರ‍್ಧೊ ಘಂಟೊ ಜಾಲೊ ತರ್ಯ್ ಮಾಗ್ಣೆಂ ರಾವ್ಲೆಂನಾ. ಮುಕ್ಕಾಲ್ ಘಂಟೊ ಕಾಬಾರ್ ಜಾತಾನಾ ಮಾಗ್ಣೆಂ ರಾವ್ಲೆಂ. ಆಮಿಂ ಉಸ್ವಾಸ್ ಸೊಡ್ಲೊ. ಭುರ್ಗಿಂ ಜೆಮೆತಾಲಿಂ ಜಾಯ್ಜಯ್.
“ಹಾಂವ್ ಮಾಗ್ಣ್ಯಾಚೊ ಮನಿಸ್…” ಮಾಗ್ಣೆಂ ಜಾಲ್ಲೆಂಚ್ಚ್ ಬಾವೊಜಿ ಉಲಯ್ಲೊ. “ಜೆಜುಚಿಂ ಬೆಸಾಂವಾಂ ಆಮ್ಚೆರ್ ಇತ್ಲಿಂ ವೊತ್ಲ್ಯಾಂತ್ ತಾಕಾ ಆಮ್ಚೆಂ ಮಾಗ್ಣೆಂಚ್ಚ್ ಕಾರಣ್… ಮಾಗ್ಣೆಂ ನಾಸ್ತಾನಾ ಹಾಂವ್ ಖಂಚೆಂಯ್ ಕಾಮ್ ಕರಿನಾ…”
ಉಪ್ರಾಂತ್ ಬಾವೊಜಿನ್ ಆಮ್ಕಾಂ ಘರ್ ದಾಕಯ್ಲೆಂ.
ಎಕಾ ಮಾಳಿಯೆಚೊ ವ್ಹಡ್ ಬಂಗ್ಲೊ ತೊ. ಧರ್ಣಿಚೆರ್ ವ್ಹಡ್ ಸಾಲ್. ತ್ಯಾಚ್ಚ್ ಸಾಲಾಂತ್ ಆಮಿಂ ಬಸ್‌ಲ್ಲ್ಯಾಂವ್. ಸಾಲಾಚ್ಯಾ ಬಗ್ಲೆನ್ ವ್ಹಡ್‌ಚ್ಚ್ ಮ್ಹಣ್ಯೆತ್ ತಸಲೆಂ ಕುಜ್ನ್. ಕುಜ್ನಾಂತ್ ಜಾಯ್ ತ್ಯೊ ವಸ್ತು ಬಾವೊಜಿಚಿ ಗ್ರೆಸ್ತ್‌ಕಾಯ್ ಉಗ್ತ್ಯಾನ್ ಸಾಂಗ್ತಾಲ್ಯೊ. ಕುಜ್ನಾಕ್ ಲಾಗೊನ್ಂಚ್ಚ್ ವ್ಹಡ್ ನ್ಹಾಣಿ. ಕುಜ್ನಾಚ್ಯಾ ಬಗ್ಲೆನ್ ಜೆಂವ್ಚೆಂ ಕೂಡ್. ಜೆಂವ್ಚೆಂ ಕೂಡ್ ಉತರ‍್ಲ್ಯಾರ್ ಆನ್ಯೇಕ್ ಕೂಡ್ ಆನಿ ತಾಂತು ಏಕ್ ದೊಡಿ ಖಾಟಿ, ಏಕ್ ಬಂಕ್ (ಎಕಾ ವಯ್ರ್ ಏಕ್ ಭಿಚಾಣೆಂ) ಬೆಡ್ಡ್, ದೋನ್ ಕಬಾಟಾಂ. “ಜೆಜುಚ್ಯಾ ನಾಂವಾನ್ ಆಮಿಂ ತುಮ್ಕಾಂ ಹಾಂಗಾಸರ್ ಸ್ವಾಗತ್ ಕೆಲಾ… ಆನಿ ತುಮಿಂ ಆಮ್ಚ್ಯಾಚ್ಚ್ ಸಾಂಗಾತಾ ಆಸಾಜಯ್ ಮ್ಹಣ್ಂಚ್ಚ್ ಮ್ಹಜಿ ಆಶಾ ಆನಿ ಆಮ್ಚಿ ಆಶಾ… ಆಮ್ಚ್ಯಾಚ್ಚ್ ಘರಾಂತ್ ಆಮ್ಚಿಂಚ್ಚ್ ಮನ್ಶಾಂ ಜಾವ್ನ್… ಹೆಂ ಕೂಡ್ ತುಮ್ಕಾಂ… ಹಾಂವ್ ಜಾಣಾಂ, ಹೆಂ ಕೂಡ್ ಚಿಕ್ಕೆ ಲ್ಹಾನ್ ಪುಣ್ ಕಿತೆಂ ಕರ್ಚೆಂ ಸುರ‍್ವೆರ್ ಚಿಕ್ಕೆ ಸುದಾರ‍್ಶಿಜಯ್ ಪಡ್ತಾ ಆನಿ ಉಪ್ರಾಂತ್ ಜೆಜುಚ್ಚ್ ಆಮ್ಕಾಂ ವಾಟ್ ದಾಕಯ್ತಲೊ…”
ತ್ಯಾಚ್ಚ್ ಕುಡಾಂತ್ ಆಮ್ಕಾಂ ಚವ್ಗಾಂ ಜಣಾಂನಿ ರಾವೊಂಕ್. ಎಕಾಚ್ಚ್ ಕುಟ್ಮಾ ಬರಿ ಜಿಯೆತಾನಾ ಆಮಿಂ ಸುದಾರ್ಸುನ್ ಜಿಯೆಜಯ್ ಮ್ಹಣ್ ಬಾವೊಜಿನ್ ಆಮ್ಕಾಂ ಕಳಯಿಲ್ಲೆಂ ಆನಿ ಆಮಿಂ ವೊಪ್ಪಾಲ್ಲ್ಯಾಂವ್.
ಬಾವೊಜಿನ್ ಆಮ್ಕಾಂ ಪಯ್ಲ್ಯಾ ಮಾಳಿಯೆಕ್ ಆಪವ್ನ್ ವೆಲೆಂ. ಥಂಯ್ಸರ್ ಚಾರ್ ಕುಡಾಂ ಆಸ್ಲ್ಲಿಂ. ಏಕ್ ಕೂಡ್ ಬಾವೊಜಿಕ್ ಆನಿ ವಿಲ್ಮಾಕ್. ಏಕ್ ಕೂಡ್ ತಾಂಚ್ಯಾ ಪುತಾಕ್, ಆರೊನಾಕ್ ಆನಿ ಏಕ್ ತಾಂಚ್ಯಾ ಧುವೆಕ್ ಅಭಿಗೆಲಾಕ್. ಚವ್ತೆಂ ಕೂಡ್ ಘರಾ ಆಯಿಲ್ಲ್ಯಾ ಸಯ್ರ್ಯಾಂಕ್. ಹರ‍್ಯೇಕಾ ಕುಡಾಕ್ ಎಕೇಕ್ ನ್ಹಾಣಿ. ತ್ಯಾ ಕುಡಾಂ ಮುಕಾರ್ ಸಾದಾರ‍್ನ್ ಮಟ್ಟಾಚೆಂ ಸಾಲ್ ಆನಿ ತಾಂತು ಸೊಫಾ ಆಸ್ಲ್ಲೆ. ಸೊಫಾ ಮುಕಾರ್ ಲ್ಹಾನ್ ಟಿಪೋಯ್ ಆನಿ ತಾಚೆರ್ ಫುಲಾಚೆಂ ವಾಜ್.
ಸಗ್ಳೆಂ ಘರ್ ದಾಕವ್ನ್ ಜಾಲ್ಯಾ ಉಪ್ರಾಂತ್ ಬಾಯ್ಲೆಂ ಆಂಗಣ್ ಆನಿ ಘರಾ ಪಾಟ್ಲಿಂ ಫುಲಾಂ ಝಡಾಂ, ರಾಂದ್ವಯೆಚಿಂ ಝಡಾಂ ದಾಕಯ್ಲಿಂ. ಗಾವಾಂತ್ ಜಾಂವ್ಚ್ಯಾ ಬರಿಚ್ಚ್ ವಿವಿಧ್ ರಾಂದ್ವಯ್ ತ್ಯಾ ತೊಟಾಂತ್ ಜಾತಾಲಿ. ಸಗ್ಳ್ಯಾ ಕಂಪೌಂಡಾಚಿ ಭಂವ್ಡಿ ಜಾಲ್ಲಿಚ್ಚ್, ಬಾವೊಜಿನ್ ಆಮ್ಕಾಂ ಮುಖ್ಲ್ಯಾ ಸಾಲಾಕ್ ಆಪವ್ನ್ ಹಾಡ್ಲೆಂ.
“ವಿನ್ಸಿ, ಮ್ಹಜ್ಯಾ ಕಂಪ್ಣೆಂತ್ ಏಕ್ ಸುಪರ್‌ವೈಸರಾಚೆ ಕಾಮ್ ಮಾತ್ರ್ ನ್ಹಯ್ ಹ್ಯಾ ಘರಾಕ್‌ಯ್ ತುಂವೆಂಚ್ಚ್ ಸಾಂಬಾಳಿಜಯ್… ಮ್ಹಾಕಾ ಘರ್ ಪಳಂವ್ಕ್ ಪುರ‍್ಸತ್‌ಯ್ ನಾ… ಆಸ್ಲ್ಲೊ ಇಲ್ಲೊ ವೇಳ್ ಮ್ಹಾಕಾ ದೆವಾಚ್ಯಾ ಸೆವೆಂತ್ ಖರ್ಚುಂಕ್ ಆಸಾ… ಇಗರ‍್ಜೆಂತ್ ಸೆವಾ ದಿಂವ್ಕ್ ಆಸಾ… ತ್ಯಾ ಖಾತಿರ್, ತುಕಾ ಸಾವ್ದಿಂತ್ ಕಿತ್ಲೊ ಸಾಂಬಾಳ್ ಮೆಳ್ತಾಲೊ ತಾಚ್ಯಾಕೀ ಚಡ್, ತುಂವೆ ವಿಚಾರ್‌ಲ್ಲೊ ಸಾಂಬಾಳ್ ದೀವ್ನ್ ತುಕಾ ಹಾಂಗಾಸರ್ ಹಾಡ್ಲಾ….”
“ಆನಿ ಸಿಂತಿಯಾಕ್‌ಯ್ ಆಮಿಂ ಘರ‍್ಚಿ ಜವಾಬ್ಧಾರಿ ದಿಂವ್ಕ್ ಚಿಂತ್ಲಾಂ… ಪುಣ್, ಧರ‍್ಮಾಕ್ ನ್ಹಯ್… ಧರ‍್ಮಾಕ್ ಆಮ್ಕಾಂ ಖಂಚೆಂಯ್ ನಾಕಾ… ಆನಿ ತಾಣೆಂಯ್ ಜೊಡಿಜಯ್ ಮ್ಹಣ್ ಆಮ್ಚಿ ಆಶಾ… ಮುಖ್ಲ್ಯಾ ಜಿವಿತಾ ಖಾತಿರ್ ಜೊಡಿಜಯ್… ಆಮಿಂ, ತಾಕಾ ಸಾಂಬಾಳ್ ದಿತೆಲ್ಯಾಂವ್… ಘರ್ ಸಾಂಬಾಳ್‌ಲ್ಲ್ಯಾಕ್ ಸಾಂಬಾಳ್… ರಾವೊಂಕ್ ಇಲ್ಲೆ ಪಯ್ಶೆ ದೀಂವ್ಕ್ ಆಸ್ತೆಲೆ ಪುಣ್, ಜೆಂವ್ಕ್ ಧರ‍್ಮಾಕ್… ಭುರ‍್ಗ್ಯಾಂಚ್ಯಾ ಶಿಕ್ಪಾಚೆಂ, ತಾಂಚೆ ಪೀಜ್ ಮಾತ್ರ್ ತುಮಿಂ ಪಳಂವ್ಕ್… ತುಮಿಂ ಮಸ್ಕತಾಕ್ ಆಯಿಲ್ಲಿ ವಿಮಾನಾಚಿ ಟಿಕೆಟ್ ಆನಿ ವಿಸಾಚೊ ಖರ್ಚ್ ತುಮ್ಚ್ಯಾ ಸಾಂಬಾಳಾ ಥಾವ್ನ್ ಮ್ಹಹಿನ್ಯಾಕ್ ಇತ್ಲೊಚ್ಚ್ ಮ್ಹಣ್ ಕಾಡುಂಕ್ ಆಸಾ ಆನಿ ತಿ ಆಮ್ಚ್ಯಾ ಕಂಪ್ಣೆಚೆಂ ಕಾನೂನ್… ಎಕಾ ಉತ್ರಾನ್, ಉರುಲ್ಲೆಂ ಜೆಂ ತುಮಿಂ ಕಿತೆಂ ಜೊಡ್ತಾತ್ ತೆಂ ಪೂರಾ ತುಮ್ಕಾಂ ಉರ‍್ತೆಲೆಂ… “
ಆಮಿಂ ಖುಶ್ ಜಾಲ್ಯಾಂವ್… ಆಮ್ಚ್ಯಾ ನಶಿಬಾಚೆರ್ ಫುಲಾಂಚೆ ವೊಡ್ತ್ ಪುಲ್‌ಲ್ಲ್ಯಾ ಬರಿ ಭಗ್ಲೆಂ…
***
ತ್ಯಾ ದಿಸಾ ಥಾವ್ನ್ ಮ್ಹಜೆಂ ಆನಿ ಸಿಂತಿಯಾಚೆಂ ಜಿವಿತ್ ಸಂಪೂರ್ಣ್ ಬದಾಲ್ಲೆಂ.
ಇಂಗ್ಲಿಷ್ ವಾಚುಂಕ್ ಬರಂವ್ಕ್ ಯೆಂವ್ಚ್ಯಾ ಮ್ಹಾಕಾ ಸಾವ್ದಿಂತ್ ಏಕ್ ಡ್ರೈವರ್ ಜಾವ್ನ್ ಚಾರ್ ವೊರ‍್ಸಾಂ ಕಾಮ್ ಕೆಲ್ಲ್ಯಾಕ್ ಮೆಳ್ತಾಲೊ ಸಾವ್ದಿಚೆ ದೇಡ್ ಹಜಾರ್ ರಿಯಾಲ್ ಸಾಂಬಾಳ್. ತಾಂತುಂಚ್ಚ್ ರಾವೊಂಕ್ ಜೇಂವ್ಕ್ ಆನಿ ಹೆರ್ ಖರ್ಚ್ ಮ್ಹಣ್ತಾನಾ ಉರ‍್ತಲೊ ತರ್ ಕಿತೆಂ? ಆಟ್ಶಿಂ ನೊವ್ಶಿಂ ಸಾವ್ದಿ ರಿಯಲ್ ಉರಂವ್ಕ್ ಭಾರಿಚ್ಚ್ ಕಷ್ಟ್ ಜಾತಾಲೆಚ್ಚ್…. ತೆ ಪಯ್ಶೆ ಗಾವಾಂತ್ ಆಸ್ಲ್ಲ್ಯಾ ಸಿಂತಿಯಾಕ್ ದಾಡ್ಲೆ ತರ್ ತೆಂಯ್ ಪಾವಾನಾ ಮ್ಹಣ್ತಾಲೆಂ. ಪಾಂವ್ಚೆ ತರ್ಯ್ ಕಸೆ? ಘರಾಚೆಂ ಭಾಡೆಂ, ದೊಗಾಂ ಭುರ‍್ಗ್ಯಾಂಚೆ ಇಸ್ಕಾಲಾಚೆ ಫೀಸ್, ಜೆವಾಣ್ ಖಾಣ್ ಮ್ಹಣ್ತಾನಾ ತಕ್ಲೆರ್ ವೊಡ್ಲ್ಯಾರ್ ಪಾಯಾಂಕ್ ಆನಿ ಪಾಯಾಂಕ್ ಘಾಲ್ಯಾರ್ ತಕ್ಲೆರ್ ಯೆನಾತ್‌ಲ್ಲೆಂ. ತ್ಯಾಚ್ಚ್ ವೆಳಾರ್, ಹಿ ಗಜಾಲ್ ಸಿಂತಿಯಾನ್ ಬಾವೊಜಿಕ್ ಸಾಂಗ್‌ಲ್ಲ್ಯಾನ್ ಮ್ಹಾಕಾ ತಾಣೆ ತಾಚ್ಯಾ ಕಂಪ್ಣೆಂತ್ ಕಾಮಾಕ್ ಯೆವ್ಯೆತ್ ಆನಿ ತೆಂಯ್ ಸುಪರ್‌ವೈಜರಾಚೆಂ ಕಾಮ್ ಕರ‍್ಯೆತ್ ಮ್ಹಣ್ ಸಾಂಗ್ಲೆಂಚ್ಚ್. ಆನಿ ಹಾಂವ್ ಸಾವ್ದಿ ಸೊಡ್ನ್ ಗಾಂವಾಕ್ ಆಯ್ಲೊಂ ಆನಿ ಉಪ್ರಾಂತ್ ವೀಸಾ ಆಯಿಲ್ಲಿಚ್ಚ್ ಕುಟ್ಮಾ ಸಮೇತ್ ಮಸ್ಕತಾಕ್.
ಬಾವೊಜಿ ಆನಿ ವಿಲ್ಮಾಚ್ಯಾ ಘರಾಂತ್ ಆಮ್ಕಾಂ ರಾವೊಂಕ್ ಖರ್ಚ್ ನಾ… ಬಾಡ್ಯಾಚೊ ಮಾತ್ರ್ ಇಲ್ಲೊ ಖರ್ಚ್ … ಜೆವಾಣ್ ಧರ‍್ಮಾಕ್… ಉರ್‌ಲ್ಲೆ ಪೂರಾ ಬೆಂಕಾಕ್ ಆನಿ ತ್ಯಾಚ್ ವೊರ‍್ವಿಂ, ಎಕಾ – ದೋನ್ ವೊರ‍್ಸಾಂನಿ ಆಪ್ಲೆಂಚ್ಚ್ ಘರ್ ಉಬೆಂ ಜಾತೆಲೆಂ… ಭುರ‍್ಗ್ಯಾಂಚೆ ಜೀವನ್ ನಂದನ್ ಜಾತೆಲೆಂ ಮ್ಹಣ್ ಆಮ್ಚ್ಯಾ ಮತಿಂತ್ ಉದೆಲ್ಲಿ ಆಶಾ ಆನಿ ಆತಾಂ ತಿ ಸುಫಳ್ ಜಾಲ್ಲ್ಯಾ ಬರಿ ಭಗ್ತಾಲೆಂ…
ಬಾವೊಜಿನ್ ಆನಿ ವಿಲ್ಮಾನ್ ಆಮ್ಚೆಂ ಕಾಮ್ ಆಮ್ಕಾಂ ಪಯ್ಲ್ಯಾ ದಿಸಾಚ್ಚ್ ತಿಳ್ಸಿಲ್ಲೆಂ. ದೊಗಾಂ ಜಣಾಂ ಘರ‍್ಚ್ಯಾ ಕಾಮಾಕ್ ಆಸ್ಲ್ಲಿಂ. ಎಕ್ಲಿ ಆಂಧ್ರಾಚಿ ಬಾಯ್ಲ್ ಘರ‍್ಚೆಂ ಕಾಮ್ ಕರುಂಕ್ ಆನಿ ಎಕ್ಲೊ ಬಂಗಾಲಿ ಚೆಡೊ, ಬಾಯ್ಲೆಂ ವೊಡ್ತಾಚೆಂ ಆನಿ ಹೆರ್ ನಿತಳಾಯ್ ಕರುಂಕ್. ತಾಂಕಾ ದೊಗಾಂಯ್ಕಿ ಕಾಮಾಂತ್ಲೆ ಕಾಡ್ಲಾಂ ಮ್ಹಣ್ ಬಾವೊಜಿನ್ ಸಾಂಗ್ಲೆಂ.
ಸಿಂತಿಯಾ ಆಯಿಲ್ಲ್ಯಾನ್ ಎಕ್ಲ್ಯಾಚೊ ಸಾಂಬಾಳ್ ಉರ‍್ಲೊ ಮ್ಹಣ್ಂಯ್ ತಾಣೆ ಮ್ಹಳ್ಳೆಂ.
ಗಾಂವಾ ಥಾವ್ನ್ ಯೆತಾನಾಂಚ್ಚ್ ಆಮ್ಚ್ಯಾ ಭುರ‍್ಗ್ಯಾಂಚೆ ಇಸ್ಕಾಲ್ ಬದ್ಲುಂಕ್ ಜಾಯ್ ಜಾಲ್ಲಿಂ ದಸ್ತವೆಜಾಂ ಆಮಿಂ ಹಾಡ್‌ಲ್ಲಿಂ. ಆಮ್ಚ್ಯಾ ಭುರ‍್ಗ್ಯಾಂಕ್ ವಾದಿ ಕಬೀರ್ ಇಸ್ಕಾಲಾಂತ್ ಭರ್ತಿ ಕೆಲಿಂ. ತಾಂಚೆ ಫೀಸ್ ಬಾವೊಜಿನ್ ಭರ್ಲೆ ಆನಿ ಆಮ್ಚ್ಯಾ ಸಾಂಬಾಳಾಂತ್ಲೆ ಮುಖ್ಲ್ಯಾ ಮಹಿನ್ಯಾಂನಿ ಕಳ್ವಿತೆಲೆ ಮ್ಹಣ್ ತಿಳ್ಸಿಲೆಂ.
ಸಿಂತಿಯಾಕ್ ಸಾಂಬಾಳ್ ಆಸ್ಲ್ಲೊ. ತಾಣೆ ಸಗ್ಳೆಂ ಘರ್ ಸಾಂಬಾಳುಂಕ್. ರಾಂದಾಪ್ ಕರುಂಕ್. ಬಾಯ್ಲೆಂ ಆಂಗಣ್ ಆನಿ ತೋಟ್ ಸಾಂಬಾಳುಂಕ್. ಮ್ಹಾಕಾ ಘರ್ ಸಾಂಬಾಳುಂಕ್, ಘರಾಕ್ ಜಾಯ್ ಜಾಲ್ಲೆಂ ಹಾಡುಂಕ್ ಆನಿ ತಾಚೆ ಬಿಸ್‌ನೆಸ್ ಸಾಂಬಾಳುಂಕ್. ಆಮ್ಚೆಂಚ್ಚ್ ಘರ್ ಮ್ಹಳ್ಳ್ಯಾಬರಿ ಹಾಂವೆ ಆನಿ ಸಿಂತಿಯಾನ್ ಘರ್ ಸಾಂಬಾಳುಂಕ್. ಕಿತ್ಯಾಕ್ ಬಾವೊಜಿಕ್ ಆನಿ ವಿಲ್ಮಾಕ್ ತಾಂಚ್ಯಾ ಕಾಮಾ ವೊರ‍್ವಿಂ, ಭಾಗೆವಂತ್ಪಣಾಚ್ಯಾ ದೈವಿಕ್ ಕಾರ‍್ಯಾಂ ವೊರ‍್ವಿಂ ಪುರ‍್ಸತ್ ಬಿಲ್ಕುಲ್ ನಾತ್ಲ್ಲಿ.
ಬಾವೊಜಿಕ್ ಬಸ್ಸಾಂ ಆಸ್ಲ್ಲಿಂ. ಆತಾಂ ತೊ ಬಿಸ್‌ನೆಸ್ ವಾಡಂವ್ಕ್ ಚಿಂತ್ತಾಲೊ. ಬಾಂದ್ಪಾ ಬಾಂದ್ಚೆ ಬಿಸ್‌ನೆಸ್ ಆನಿ ತ್ಯಾ ಖಾತಿರ್ ತಾಚೆಂ ಬಸ್ಸಾಚೆಂ ಬಿಸ್‌ನೆಸ್ ಪಳಂವ್ಕ್ ಭಾರಿಚ್ಚ್ ಸಮ್ಜಣೆಚೊ ಆನಿ ವಿಸ್ವಾಸಿ ಮನಿಸ್ ಜಾಯ್ ಆಸ್ಲ್ಲೊ. ಹಾಚ್ಯಾ ಆದಿಂ ಕಿತ್ಲೆಶೆ ಜಣ್ ಆಯಿಲ್ಲೆ ಆನಿ ತಾಣಿ ತಾಕಾ ತೊಪಿಚ್ಚ್ ದವರ್‌ಲ್ಲಿ ಮ್ಹಣ್ ತಾಣೆ ಕೆದಾಳಾಯ್ ಸಾಂಗ್ಚೆಂ ಆಸ್ಲ್ಲೆಂ. “ಮ್ಹಜ್ಯಾ ತಸಲ್ಯಾ ಬರ್ಯಾ ಆನಿ ದೇವ್ ಭಿರಾಂತೆಚ್ಯಾ ಮನ್ಶಾಕ್ ಕೆದ್ನಾಂಯ್ ಫಟ್ಕಿರೆಚ್ಚ್ ಮನಿಸ್ ಕಾಮಾಚೆ ಮೆಳ್ತಾತ್… ಆತಾಂ ತರ್ಯ್ ತುಂ ಏಕ್ ನಿತಿವಂತ್ ಮನಿಸ್ ಮೆಳ್ಳೊಯ್…” ತಾಣೆ ಮ್ಹಜ್ಯಾ ಲಾಗಿಂ ಸಾಂಗ್ಲ್ಲೆಂ.
ಬಾವೊಜಿಚ್ಯಾ ಬಸ್ಸಾಂನಿ ವಾದಿ ಕಬೀರ್ ಭಾರತೀಯ್ ಇಸ್ಕಾಲಾಚ್ಯಾ ಭುರ‍್ರ‍್ಗ್ಯಾಂಕ್ ವೆವೆಗ್ಳ್ಯಾ ಜಾಗ್ಯಾಂ ಥಾವ್ನ್ ಸಕಾಳಿಂ ಇಸ್ಕಾಲಾಕ್ ಹಾಡುಂಕ್ ಆನಿ ದೊನ್ಪಾರಾಂ ತಾಂಚ್ಯಾ ತಾಂಚ್ಯಾ ಘರಾ ಬಾಗ್ಲಾರ್ ಸೊಡುಂಕ್. ದೊನ್ಪಾರಾಂಯ್ ಭುರ‍್ಗ್ಯಾಂಕ್ ಹಾಡುಂಕ್ ಆನಿ ಉಪ್ರಾಂತ್ ಸಾಂಜೆರ್ ಸೊಡುಂಕ್ ಆಸ್ಲ್ಲೆಂ. ಆಮ್ಚಿಂ ಬಸ್ಸಾಂ ವಾದಿ-ಕಬೀರ್, ದಾರ್‌ಸೈತ್, ಮಸ್ಕತ್ ಮಾತ್ರ್ ನ್ಹಯ್ ಕುರುಮ್, ಆಲ್-ಕುವೆರ್, ಸೀಬ್, ಗಾಲಾ ತೆವ್ಶಿನ್ ಸಯ್ತ್ ವೆತಾಲಿಂ. ತಿಂ ಬಸ್ಸಾಂ ಚಲಂವ್ಕ್ ಡ್ರೈವರ್ ಪುರಾ ಒಮಾನಿ. ಹರ‍್ಯೆಕಾ ಬಸ್ಸಾರ್ ಎಕ್ಲೊ ಭಾರತೀಯ್, ಕುಮ್ಕೆ-ಕಾಮೆಲಿ ಭುರ‍್ಗ್ಯಾಂಕ್ ಸಾಂಬಾಳುಂಕ್. ಒಮಾನಿ ಡ್ರೈವರಾಂಕ್ ಸಾಂಬಾಳ್ಚಿ ಜವಾಬ್ದಾರಿ ಮ್ಹಜಿ. ಸಾವ್ದಿ ಆಸ್‌ಲ್ಲೊಂ ಆನಿ ಡೈವರ್ ಜಾವ್ನ್ ಕಾಮ್ ಕೆಲ್ಲ್ಯಾನ್ ಮ್ಹಾಕಾ ಅರ‍್ಭಿ ಭಾಸ್ ಯೆತಾ ಆನಿ ಬಸ್ಸಾಂಚ್ಯಾ ಓಮಾನಿ ಡ್ರೈವರಾಂಕ್ ಸಾಂಬಾಳುಂಕ್ ಸುಲಭ್ ಮ್ಹಣ್ ಬಾವೊಜಿಕ್ ಕಳಿತ್ ಆಸ್ಲ್ಲೆಂ.
ಸಿಂತಿಯಾ ಸಕಾಳಿಂ ಚಾರ್ ವೊರಾರ್ ಉಟ್ತಾಲೆಂ ಆನಿ ಉಟಾಜಯ್‌ಚ್ಚ್ ಪಡ್ತಾಲೆಂ. ಬಾವೊಜಿ ಸಾಡೆ ಚಾರ್ ವೊರಾಂಕ್ ಉಟ್ತಾಲೊ. ಸಾದಾರ್ಣ್ ಊಬ್ ಜಾಲ್ಲ್ಯಾ ಉದ್ಕಾಚೊ ತಾಂಬ್ಲೆರ್ ಆನಿ ಗ್ಲಾಸ್ ಎಕಾ ಟ್ರೆಂತ್ ಮಾಂಡುನ್, ತಾಚ್ಯಾ ಸಾಂಗಾತಾ ವೊಡ್ತಾಂತ್ ಆಸ್ಲ್ಲಿಂ ತುಳ್ಸಿಚಿಂ ಪಾಂಚ್ ಜಿವಿಂ ಪಾನಾಂ ಬರಿಂ ಕರ್ನ್ ಧುವ್ನ್, ಪಿರಿಂತ್ ದವರ್ನ್ ತೊ ಕೂಡಾಥಾವ್ನ್ ಭಾಯ್ರ್ ಯೆತಾನಾ ಮೆಜಾರ್ ತಯಾರ್ ಆಸಾಜಯ್. ತುಳ್ಸಿಚಿಂ ಪಾನಾಂ ಚಾಬೊನ್ ಉದಾಕ್ ಪಿಯೆವ್ನ್ ತೊ ಮಾಗ್ಣ್ಯಾಕ್ ಬಸ್ತಾಲೊ. ಅರ್ಧ್ಯಾ ಘಂಟ್ಯಾಚೆಂ ಮಾಗ್ಣೆಂ ಜಾತಚ್ಚ್ ಬಾವೊಜಿ ಆನಿ ವಿಲ್ಮಾ ಭಾಯ್ರ್ ಸರೊನ್ ಮಿಸಾಕ್ ವೆತಾಲಿಂ.
ತಿಂ ಮಿಸಾಕ್ ಗೆಲ್ಲಿಂಚ್ಚ್ ತಾಂಚ್ಯಾ ಭುರ‍್ಗ್ಯಾಂಕ್ ಉಟಯ್ಜಯ್. ಪಂದ್ರಾ ವೀಸ್ ಪಾವ್ಟಿಂ ಉಲೊ ಕೆಲ್ಯಾ ಉಪ್ರಾಂತ್ ತಾಣಿ ಉಟೊನ್ ಭಾಯ್ರ್ ಯೆಂವ್ಚೆಂ. ನಾಣ್ಯೆಕ್ ವೆತಾನಾ ಬ್ರಶಾಕ್ ಪೇಸ್ಟ್ ಲಾವ್ನ್ ಹಾತಿಂ ದಿಜಯ್. ನಾಣ್ಯೆಂತ್ಲಿ ಭಾಯ್ರ್ ಯೆತಾನಾ ತೊಂಡ್ ಪುಸುಂಕ್ ತುವಾಲೊ ದೀಂವ್ಕ್ ಆಸಾ. ಉಪ್ರಾಂತ್ ತಿಂ ಮೆಜಾರ್ ಬಸ್ಲ್ಯಾರ್ ತಾಂಕಾ ಜಾಯ್ ಜಾಲ್ಲೊ ನಾಸ್ಟೊ ತಯಾರ್ ದವರುನ್ ತೊ ಖಾಂವ್ಚ್ಯಾಕ್ ಪರಾತ್ತಿಜಯ್. ಥೊಡ್ಯಾ ಪಾವ್ಟಿಂ ತೊಂಡಾಕ್‌ಯ್ ದೀಜಾಯ್. ತ್ಯಾ ಮಧೆಂ ತಾಣಿಂ ನಿದ್‌ಲ್ಲೆಂ ಬೆಡ್ಡ್ ಸಮಾ ಕರ್ನ್, ಇಸ್ತ್ರಿ ಕೆಲ್ಲೆಂ ತಾಂಚೆ ಯುನಿಫೊರ‍್ಮ್ ತಯಾರ್ ದವರಿಜಾಯ್. ತಾಂಚ್ಯಾ ಮೊಚ್ಯಾಂಕ್ ಪೊಲಿಶ್ ಕರ್ನ್, ಸೊಕ್ಸ್ ತಾಚೆ ವಯ್ರ್ ದವರಿಜಾಯ್. ಇಸ್ಕಾಲಾಂಚಿ ಪೊತಿಂ ಉಕಲ್ನ್, ಸಕಯ್ಲ್ ಹಾಡ್ನ್, ಕಾರಾರ್ ದವರಿಜಾಯ್. ತಾಂಕಾ ಇಸ್ಕಾಲಾಕ್ ಪಾವಂವ್ಚಿ ಜವಾಬ್ದಾರಿ ಮ್ಹಜಿ.
ಆಮ್ಚಿಂ ಭುರ್ಗಿಂ, ಲಿಯೊನಾರ‍್ಡ್ ಆನಿ ಲಿಯೋನಿ, ಬಾವೊಜಿ ಆನಿ ವಿಲ್ಮಾಚಿಂ ಭುರ್ಗಿಂ ಆರೋನ್ ಆನಿ ಅಭಿಗೇಲ್ ಹಾಂಚ್ಯಾ ವರ್ನಿ ಪ್ರಾಯೆನ್ ಲ್ಹಾನ್. ಪುಣ್, ಆಮಿಂ ತಾಂಕಾ ವೆಗ್ಳಿಚ್ಚ್ ಸವಯ್ ಕೆಲ್ಲಿ. ತಾಂಕಾ ಖಂಚೇಯ್ ಆಟ್‌ನೇಟ್ ಕರುಂಕ್ ಆಮ್ಚ್ಯಾ ಲಾಗಿಂ ಪುರ‍್ಸತ್‌ಯ್ ನಾತ್ಲ್ಲಿ. ಎಲಾರಮಾಚಿ ಕಾಂಪಿಣ್ ವಾಜ್ತಾನಾ ತಿಂ ಉಟೊನ್ ಬಸ್ತಾಲಿಂಚ್ಚ್. ಆಮ್ಕಾಂ ಆಸ್ಲ್ಲ್ಯಾ ಲ್ಹಾನ್ ನಾಣ್ಯೆಂತ್ ಎಕಾ ಪಾಟ್ಲ್ಯಾನ್ ಎಕ್ಲ್ಯಾನ್ ವಚೊಂಕ್. ನಿತಳಾಯ್ ಜಾಲ್ಲಿಚ್ಚ್ ಕುಜ್ನಾಕ್ ಯೇವ್ನ್ ಫ್ರಿಡ್ಜಾಂತ್ ಆಸ್ಲ್ಲೆಂ; ಯಾ ಮೆಜಾರ್ ಆಸ್ಲ್ಲೊ ಬ್ರೆಡ್ ಲೊಣಿ ಸಾರವ್ನ್ ಯಾ ಆದ್ಲ್ಯಾ ದಿಸಾ ತಯಾರ್ ಕೆಲ್ಲೆಂ ಕಿತೆಂಯ್ ಉರುಲ್ಲೆಂ ಆಸಾ ತರ್ ಖಾತಾಲಿಂ. ಫ್ರಿಡ್ಜಾಂತ್ಲೆ ದೂದ್ ಕಾಡ್ನ್, ಕುಸ್ಕುಟ್ ಹುನ್ ಕರ್ನ್ ಪಿಯೆತಾಲಿಂ. ತಾಂಚಿ ಜೆವ್‌ಲ್ಲಿಂ ಆಯ್ದಾನಾಂ ತಾಣಿಂಚ್ಚ್ ಧುವ್ನ್ ದವರುಂಕ್. ಆಪ್ಲಿಂ ವಸ್ತುರಾಂ ತಯರ್ ಕರ್ನ್ ಭಾಯ್ರ್ ಸರ‍್ನ್ ವಚೊಂಕ್.
ಹಾಂವ್‍ಯ್ ಫಾಂತ್ಯಾರ್ ಚಾರ್ ವೊರಾರ್ ಉಟ್ತಾಲೊಂ. ಹಾಂವ್ ಯೆತಾಂ ಮ್ಹಣಾಸರ್ ಕಾರಾಂ ಧುಂವ್ಕ್ ಬಾಯ್ಲೊ ಮನಿಸ್ ಯೆತಾಲೊ. ಹಾಂವ್ ಆಯಿಲ್ಲೊಂಚ್ಚ್ ಬಾವೊಜಿನ್ ತಾಕಾ ರದ್ದ್ ಕೆಲ್ಲೆಂ. ಬಾವೊಜಿಚೆಂ, ವಿಲ್ಮಾಚೆಂ ಆನಿ ಮ್ಹಜೆಂ ಕಂಪ್ಣೆಚೆಂ ಕಾರ್ ಧುಂವ್ಕ್ ಮ್ಹಾಕಾ. ಉಪ್ರಾಂತ್ ಬಸ್ಸಾಂ ಆಸ್ಚ್ಯಾ ಲಾಗಿಂ ವಚೊನ್ ಡ್ರೈವರ್ ಆನಿ ಕುಮ್ಕೆ ಮನಿಸ್ ಆಯ್ಲ್ಯಾತ್‌ಗೀ ಮ್ಹಣ್ ಪಳಂವ್ಕ್. ತಾಂಕಾ ಜೊಕ್ತ್ಯಾ ಕುಶಿನ್, ಜಾಗ್ಯಾಂಕ್ ದಾಡುಂಕ್. ಬಸ್ಸಾಂ ಗೆಲ್ಯಾ ಉಪ್ರಾಂತ್ ಪಾಟಿಂ ಘರಾ ಯೇವ್ನ್ ಆಮ್ಚ್ಯಾ ಆನಿ ಬಾವೊಜಿಚ್ಯಾ ಭುರ‍್ಗ್ಯಾಂಕ್ ಇಸ್ಕಾಲಾಕ್ ವೊರೊಂಕ್. ಬಸ್ಸಾಂಚೆ ಡ್ರೈವರ್ ಯೆನಾಸ್ತಾನಾ ಹಾಂವ್ ಯೆಂವ್ಕ್ ಇಲ್ಲೊ ತಡವ್ ಜಾಲೊ ತರ್ ಸೆಜಾರ‍್ಚ್ಯಾ ಮಲ್ಭಾರ‍್ಯಾಂಚ್ಯಾ ಭುರ‍್ಗ್ಯಾಂ ಸಾಂಗಾತಾ ಚವ್ಗಾಂ ಭುರ‍್ಗ್ಯಾಂಕ್ ದಾಡ್ಚಿ ಜವಾಬ್ದಾರಿ ಸಿಂತಿಯಾಚಿ.
ಬಾವೊಜಿ ಆನಿ ವಿಲ್ಮಾ ಮಿಸಾ ಥಾವ್ನ್ ಪಾಟಿಂ ಯೆತಾನಾ ತಾಂಚೊ ನಾಸ್ಟೊ ಸಿಂತಿಯಾನ್ ತಯಾರ್ ಕರ್ನ್ ದವರಿಜಯ್. ಬಾವೊಜಿಕ್ ಜಿವಾಚಿ ಆನಿ ಭಲಾಯ್ಕೆಚಿ ಭಿರಾಂತ್ ನಾತ್ಲ್ಲಿ ಕಿತ್ಯಾಕ್ ತೊ ದೆವಾಕ್‌ಚ್ಚ್ ಪಾತ್ಯೆಂವ್ಚೊ ಮನಿಸ್. ತಾಚೊ ಜೀವ್ ತಾಣೆ ಜೆಜುಕ್‌ಚ್ಚ್ ಸಮರ‍್ಪಿಲ್ಲೊ. ಪುಣ್, ಖಾಂವ್ಚ್ಯಾಂತ್ ಭಾರಿಚ್ಚ್ ನಾಜೂಕಾಯ್ ಸಾಂಬಾಳ್ತಾಲೊ. ಮಿಸಾ ಥಾವ್ನ್ ಆಯಿಲ್ಲ್ಯಾ ಫರಾ ಪಾಂಚ್ ಬದ್ಮಾಂ, ದೋನ್ ಖಾಜುರ್, ತೀನ್ ಕಾಜುಚೆ ಮೋಯ್, ಚಾರ್ ವಾಲ್‍ನಟ್, ಇಲ್ಲೆಶ್ಯೊ ಬಿಯೊ ತೊ ಖಾತಾಲೊ. ಹೆಂ ಖೆಲ್ಯಾ ಉಪ್ರಾಂತ್ ಇಲ್ಲಿಶಿ ಪೊರೆಜ್, ಯಾ ತೀನ್ ಚಾರ್ ಪಾನ್ಪಳೆ ಆನಿ ಚೆಟ್ಣಿ ಯಾ ಥೊಡ್ಯಾ ದಿಸಾಂನಿ ಪಾಂವ್ ಆನಿ ಚರಬ್ ನಾತ್ಲ್ಲಿ ಲೊಣಿ. ಹೆಂ ಜಾಲ್ಯಾ ಉಪ್ರಾಂತ್, ಅರ್ಧ್ಯಾ ಘಂಟ್ಯಾನ್ ಗ್ರೀನ್ ಟಿ ಯಾ ಉಣ್ಯಾ ಚರ‍್ಚೆಚೆಂ ದೂದ್ ಘಾಲ್ಲಿ ಚ್ಹಾ.
ವಿಲ್ಮಾಕ್ ಇಲ್ಲೊ ವೆಗ್ಳೊ ನಾಸ್ಟೊ. ಮೊಟಾಯ್ ವಾಡೊಂಕ್ ನಜೊ ಮ್ಹಣ್ ತಾಚೆಂ ಖಾಣ್ ವಿಂಗಡ್‌ಚ್ಚ್. ವಿಲ್ಮಾ ಕಾಮಾಕ್ ವೆತಾನಾ ತಾಕಾ ಜಾಯ್ ಜಾಲ್ಲಿ ಟಿಫಿನ್ ತಯಾರ್ ಕರ್ನ್ ದವರುಂಕ್. ಹಿ ಸರ್ವ್ ಜವಾಬ್ದಾರಿ ಸಿಂತಿಯಾಚಿ.
ಬಾವೊಜಿ ಆನಿ ವಿಲ್ಮಾ ಕಾಮಾಕ್ ಗೆಲ್ಯಾ ಉಪ್ರಾಂತ್ ಸಿಂತಿಯಾನ್ ಸಗ್ಳೆಂ ಘರ್ ನಿತಳ್ ಕರುಂಕ್, ವೊಡ್ತ್ ಸಮಾ ಕರುಂಕ್, ಝಾಡಾಂಕ್ ಉದಕ್ ಸೊಡುಂಕ್, ದೊನ್ಪಾರಾಂಚೆ ಜೆವಾಣ್ ತಯಾರ್ ಕರುಂಕ್ ಆನಿ ಉಪ್ರಾಂತ್ ಸಾಂಜೆಚಿ ತಯಾರಾಯ್.
ಅಶೆಂ ಸಕಾಳಿಂ ಥಾವ್ನ್ ರಾತ್ ಮ್ಹಣಾಸರ್ ಸಿಂತಿಯಾಕ್ ಜಾಂವ್ ಮ್ಹಾಕಾ ಜಾಂವ್ ಬಿಲ್ಕುಲ್ ಪುರ‍್ಸತ್ ನಾತ್ಲ್ಲಿ. ರಾತಿಕ್ ಬಾವೊಜಿ ಆನಿ ಭುರ‍್ಗ್ಯಾಂನಿ ಸಾಂಗಾತಾ ಜೆವ್ಲ್ಯಾ ಉಪ್ರಾಂತ್ ತಾಂಚ್ಯೊ ಬೊಶಿಯ್ಯೊ ಕಾಡ್ನ್, ಆಮಿಂ ಜೇಂವ್ಕ್.
ಹೆಂ ಪೂರಾ ಜಾತಾನಾ ಮಧ್ಯಾನ್ ಜಾತಾಲಿಚ್ಚ್….
***
ಆಮಿಂ ಯೇವ್ನ್ ದೋನ್ ವರ್ಸಾಂ ಜಾಲ್ಲಿಂ. ದೋನ್ ವರ್ಸಾಂ ಕಸಿಂ ಪಾಶಾರ್ ಜಾಲಿಂ ಮ್ಹಳ್ಳೆಂಚ್ಚ್ ಕಳ್ಳೆಂ ನಾ.
ಹ್ಯಾ ದೋನ್ ವೊರ‍್ಸಾಂನಿ ಆಮಿಂ ಘರಾ ಭಾಯ್ರ್ ಗೆಲ್ಲ್ಯಾಂವ್ ಮ್ಹಳ್ಯಾರ್ ಪಕತ್ತ್ ಸುಕ್ರಾರಾ ದಿಸಾ ಮಿಸಾಕ್ ಮಾತ್ರ್.
ಆಯ್ಲೆವಾರ್ ಸಾಂಜೆರ್ ಸಿಂತಿಯಾನ್ ರಡ್ಚೆಂ ಸದಾಂಚೆಂ ಜಾಲ್ಲೆಂ. ಹಾಂವ್ ಜಾಣಾಸ್‌ಲ್ಲೊಂ – ತೆಂ ಕಿತ್ಯಾಕ್ ರಡ್ತಾ ಮ್ಹಣ್.
ಬಾವೊಜಿನ್ ಆನಿ ವಿಲ್ಮಾನ್ ಆಮ್ಕಾಂ ಘಾಣ್ಯಾರ್ ಘಾಲ್ಲ್ಯಾ ಕೊಬಾ ಬರಿ ಪಿಳ್‌ಲ್ಲೆಂ.
ಸುಪರ್‌ವೈಜರ್ ಮ್ಹಣ್ ಮ್ಹಾಕಾ ಹಾಡ್ನ್, ಎಕಾ ಕುಲ್ಕಾರಾ ಬರಿ ಸಕಾಳಿಂ ಥಾವ್ನ್ ರಾತ್ ವರೇಗ್ ಘೊಳಯಿಲ್ಲೆಂ. ಸುಪರ್‌ವೈಜರ್ ಮ್ಹಳ್ಳೊ ಬಿಲ್ಲೊ, ಬೆಷ್ಟೆಂ ತರ್ಯ್ ದಿಲ್ಲೊ ಪಕತ್ತ್ ‘ಒವರ್ ಟಾಯ್ಮ್’ ದಿಂವ್ಕ್ ನಜೊ ಮ್ಹಳ್ಳ್ಯಾ ಖಾತಿರ್.
ಘರಾಂತ್ ಕಾಮಾಕ್ ಬಾಯ್ಲ್ಯಾ ಕಾಮಾಚ್ಯಾ ಮನ್ಶಾಕ್ ದವರ್ಲ್ಲ್ಯಾ ವೆಳಾರ್ ಸಿಂತಿಯಾ ತಿತ್ಲೆಂ ಕಾತ್ತ್ಯಾಬರಿ ಕಾಮ್ ಕರ್ಚೆಂ ಕೋಣ್ ಮೆಳಾತ್ ? ಹಾಂಚ್ಯಾ ಕಾಮಾಂಚ್ಯಾ ಅಡ್ಚಣೆಂತ್ ಮಹಿನ್ಯಾಕ್ ಏಕ್ ಕಾಮಾಚೆಂ ಮನಿಸ್ ಬದ್ಲಾಲ್ಲೆಂಯ್ ಆಸಾ… ಆಮಿಂ ಆಯ್ಲ್ಯಾ ಉಪ್ರಾಂತ್ ಮಾತ್ರ್ ದೋನ್ ವರ್ಸಾಂ ತಾಂಕಾ ಕಾಮಾಚಿ ಬಿಲ್ಕುಲ್ ಖಂತ್ ನಾತ್‌ಲ್ಲಿಚ್ಚ್…
“ಮ್ಹಾಕಾ ಆನಿ ಚಡ್ ಕಾಮ್ ಕರುಂಕ್ ಜಾಂವ್ಚೆಂ ನಾ…. ಹ್ಯಾ ಬಾವೊಜಿನ್ ಆಮ್ಕಾಂ ಹಾಂಗಾಸರ್ ಗುಲಾಮ್‌ಂಚ್ಚ್ ಕೆಲಾಂ… ತುಂ ಎಕ್‌ಚ್ಚ್ ದುಸ್ರ್ಯಾ ಕಡೆ ಕಾಮ್ ಸೊದ್ ಯಾ ವರಸ್ ಆಖೇರ್ ಜಾತಾನಾ ಆಮಿಂ ಪಾಟಿಂ ಗಾವಾಕ್ ಯಾ…”
ಸಿಂತಿಯಾಚೆಂ ದೂಕ್ ಆನಿ ಸಿಂತಿಮೆಂತಾಂ ಮ್ಹಾಕಾ ಖಂಡಿತ್ ಜಾವ್ನ್ ಸಮ್ಜತಾಲೆಂ.
ಪುಣ್, ಆಮ್ಚೆಂಚ್ಚ್ ಘರ್ ಜಾಯ್ಜಯ್ ಮ್ಹಣ್ ಆಮ್ಚೆ ಥಂಯ್ ಆಸ್ಲ್ಲಿ ಆಶಾ ಆನಿಕ್ಯ್ ಸುಫಳ್ ಜಾಂವ್ಕ್ ನಾತ್ಲ್ಲಿ.
ಬಾವೊಜಿನ್ ಆಮ್ಕಾಂ ರಾವೊಂಕ್ ಘರ್ ದಿಲ್ಲೆಂ ವ್ಹಯ್!! ಬಾಡ್ಯಾಚೆಂ ಐವಜ್ ಕಳ್ವಿತಾಲೊ. ಜೆವ್ಣಾಚೊ ಖರ್ಚ್ ನಾತ್ಲ್ಲೊ ಪುಣ್, ವೀಜ್ ಸಕ್ತೆಚೆಂ ಆನಿ ಉದ್ಕಾಚೊ ವಾಂಟೊ ಮ್ಹಣ್ ಸಾರ್ಕೊ ಕಳ್ವಿತಾಲೊ. ಹರ‍್ಯೆಕಾಕ್ ಬಾವೊಜಿನ್ ಉಲಂವ್ಚೆಂ ಕ್ರಿಸ್ತಾಕ್ ಸಾಕ್ಸ್ ದೀವ್ನ್!! ಮೊಸ್ತು ನ್ಹಯ್ ಇಲ್ಲೆಂ ತರ್ಯ್ ದೀಜಾಯ್ ಮ್ಹಣ್!!
ಆಮಿ ಆಯಿಲ್ಲ್ಯಾ ಎಕಾ ವೊರ‍್ಸಾನ್ ಗಾವಾಕ್ ವಚೊಂಕ್ ಸೊಡ್ಲೆಂ ಪುಣ್, ವಿಮಾನಾಚ್ಯಾ ಟಿಕೆಟಿಚೊ ಖರ್ಚ್ ಆಮಿಂಚ್ಚ್ ದೀಂವ್ಕ್. ತ್ಯಾ ರಜೆಚ್ಯಾ ವೆಳಾರ್ ಸಿಂತಿಯಾಕ್ ಸಾಂಬಾಳ್ ನಾತ್ಲ್ಲೊ.
ಆಮ್ಕಾಂ ಉರ‍್ಚೆ ಪಕತ್ತ್ ಮ್ಹಜೊ ಮಾತ್ರ್ ಸಾಂಬಾಳ್. ಸಿಂತಿಯಾಚ್ಯಾ ಸಾಂಬಾಳಾಂತ್ ಘರಾಚ್ಯಾ ಭಾಡ್ಯಾಚೊ ವಾಂಟೊ, ಭುರ‍್ಗ್ಯಾಂಚ್ಯಾ ಇಸ್ಕೊಲಾಚೆ ಫೀಜ್ ಮ್ಹಣ್ ಹಾತಾಕ್ ಕಾಂಯ್ಚ್ಚ್ ಮೆಳಾನಾತ್‌ಲ್ಲೆ
ಇತ್ಲ್ಯಾ ಕಾಮಾಂತ್ ಆಡ್ಚಣೆಂತ್ ಆಮ್ಚಿ ಭಲಾಯ್ಕಿ ಪಾಡ್ ಜಾಲಿಚ್ಚ್….. ದೆಕುನ್, ಹಾಂವ್ ದುಸ್ರ್ಯಾ ಕಂಪ್ಣೆಂತ್ ಕಾಮ್ ಸೊದ್ತಾಂ ಮ್ಹಣ್ ಪ್ರಸ್ತಾಪ್ ಬಾವೊಜಿಲಾಗಿಂ ಘಾಲ್ಲೊಚ್ಚ್ ಆಮ್ಕಾಂ ಕಟಿಣ್ ತ್ರಾಸಾಕ್ ಕಾರಣ್ ಜಾಲೆಂ.
“ಪಳೆಯಾ… ತುಮಿಂ ಬರೆಂ ಜಾಯ್ಜಯ್ ಆನಿ ತುಮ್ಚ್ಯಾ ಭುರ‍್ಗ್ಯಾಂಕ್ ಬರೆಂ ಜಾಯ್ಜಯ್ ಮ್ಹಣ್ ತುಮ್ಕಾಂ ಹಾಂಗಾ ಹಾಡ್‌ಲ್ಲೆಂ… ತುಮ್ಕಾಂ ಮ್ಹಿನತ್ ಕಾಡ್ನ್ ಕಾಮ್ ಕರುಂಕ್ ನಾಕಾ… ಧರ‍್ಮಾಕ್ ಕೋಣ್ ಸಾಂಬಾಳ್ ದಿತಾ? ಕೊಣ್ಂಚ್ಚ್ ದೀನಾ… ಆನಿ … ಆಮ್ಚ್ಯಾ ಕಂಪ್ಣೆಚ್ಯೊ ಥೊಡ್ಯೊ ರೆಗ್ರೊ ಆಸಾತ್ ಆನಿ ತುಕಾ ಕಳಿತ್ ಆಸಾ… ತ್ಯೊ ರೆಗ್ರೊ ತುಕಾ ಮ್ಹಣ್ ನ್ಹಯ್ ಪುಣ್ ಕಂಪ್ಣೆಂತ್ ಕಾಮ್ ಕರ‍್ಚ್ಯಾಕ್ ಸರ್ವಾಂಕ್ ಎಕ್‌ಚ್ಚ್. ಆಮ್ಚ್ಯಾ ಕಂಪ್ಣೆಂತ್ ಆಯ್ಲ್ಯಾ ಉಪ್ರಾಂತ್ ಕಾಮ್ ಸೊಡ್ಚೆಂ ತರ್ ‘ಎನ್.ಒ.ಸಿ’ ಮ್ಹಳ್ಯಾರ್ ದುಸ್ರ್ಯಾ ಕಂಪ್ಣೆಂತ್ ಕಾಮ್ ಕರ‍್ಚ್ಯಾಕ್ ಜಾಯ್ ಜಾಲ್ಲೆಂ ‘ಒಪ್ಪಿಗೆ ಪತ್ರ್’ ಮಾತ್ರ್ ಮೆಳ್ಚೆಂ ನಾ… ತುಮಿಂ ಪಾಟಿಂ ಗಾವಾಕ್‌ಚ್ಚ್ ವಚಾಜಯ್…”
ಭಾಗೆವಂತ್ ಮನಿಸ್… ಕ್ರಿಸ್ತಾಚೊ ಪಾಟ್ಲಾವ್ದಾರಿ… ಆಮ್ಚೆರ್ ದಯಾ ದವರ‍್ತಲೊ ಮ್ಹಣ್ ಆಮಿಂ ಚಿಂತುನ್ ಆಸ್‌ಲ್ಲ್ಯಾಂವ್… ಆಮಿಂ ಜಿಣಿ ನಂದನ್ ಜಾಂವ್ಚ್ಯಾ ಖಾತಿರ್ ದುಸ್ರ್ಯಾ ಕಂಪ್ಣೆಂತ್ ಕಾಮ್ ಕರ್ಚ್ಯಾ ಖಾತಿರ್ ಸಮ್ಮತಿ ಪತ್ರ್ ‘ಎನ್.ಒ.ಸಿ.’ ಖಂಡಿತ್ ಜಾವ್ನ್ ದಿತಲೊ ಮ್ಹಣ್ ಆಮಿಂ ಚಿಂತುನ್ ಆಸ್‌ಲ್ಲ್ಯಾಂವ್. ಪುಣ್, ಆಮ್ಚ್ಯಾ ಭರ‍್ವಸ್ಯಾಚ್ಯಾ ಚಿಂತ್ಪಾಕ್ ಉಜ್ಯಾರ್ ಲಾಸ್‌ಲ್ಲ್ಯಾಬರಿ ಜಾಲೆಂ. ಆಮಿಂ ಬಾವೊಜಿಚೆ ಪಾಯ್ ಧರುನ್ ಸಲ್ವಾಲ್ಲ್ಯಾಂವ್…
ತೊ ಒಪ್ಪಾಲೊಚ್ಚ್ ನಾ… ತಾಚೆಂ ಮನ್ ಕಳ್ವಳ್ಳೆಂ ನಾ…
ಆಮಿಂ ಪಾಟಿಂ ಗಾವಾಕ್‌ಚ್ಚ್ ವಚೊಂಕ್ ನಿರ್ಧಾರ್ ಕೆಲೊ…
***
ಪಾಟ್ಲ್ಯಾ ತೀನ್ ಹಫ್ತ್ಯಾಂನಿ ಆಮ್ಚೆಂ, ಮ್ಹಳ್ಯಾರ್ ಆಮ್ಚ್ಯಾ ಕುಟ್ಮಾ ಮಧ್ಲೆಂ ಆನಿ ಬಾವೊಜಿಚ್ಯಾ ಕುಟ್ಮಾ ಮಧ್ಲೆಂ, ಉಲವ್ಣೆಂ ಬಂಧ್ ಜಾಲ್ಲೆಂ.
ಆಮಿಂ ಪಾಟಿಂ ಗಾಂವಾಕ್ ವೆತಾಂ ಮ್ಹಳ್ಳ್ಯಾಕ್ ಬಾವೊಜಿ ದೆದೆಸ್ಪಾರ್ ಜಾಲ್ಲೊ. ತಾಚೆಂ ಕಾಮ್ ಕರ‍್ಚ್ಯಾಕ್ ಆಮ್ಚ್ಯಾ ತಸಲಿಂ ಹೆರಾಂ ಮನ್ಶಾಂ ಮೆಳ್ಚಿಂ ನಾಂತ್ ತೊ ಜಾಣಾಂಯ್ ಆಸ್ಲ್ಲೊ…
“ತುಮ್ಚೆಂ ಜಿವಿತ್ ಬರೆಂ ಜಾಯ್ಜಯ್ ಮ್ಹಣ್ ಇತ್ಲೊ ಖರ್ಚ್ ಕರ್ನ್ ತುಮ್ಕಾಂ ಹಾಡ್ಲೆಂ… ಏಕ್ ಮನ್ಶಾಕ್ ಹಾಂಗಾಸರ್ ಹಾಡಿಜಯ್ ತರ್ ಕಿತ್ಲೊ ಖರ್ಚ್ ಆಸಾ ತೆಂ ತುಂಮಿ ಬಿಲ್ಕುಲ್ ನೆಣಾಂತ್ ತರ್ಯ್ ಹಾಡ್ಲೆಂ… ತುಮಿಂ ಮಾತ್ರ್ ಅನುಪ್ಕಾರಿ ಮನ್ಶಾಂ… ಆತಾಂ ಮ್ಹಾಕಾ ಕಟಿಣಾಯೆನ್ ಲುಕ್ಸಾಣ್… ಪುಣ್ ಜೆಜುಚ್ಯಾ ನಾಂವಾನ್ ಹಾಂವ್ ತೆಂ ಸ್ವೀಕಾರ್ ಕರ್ತಾಂ…” ಬಾವೊಜಿ ಉಂಚಾಬಳ್ ಜಾಲೊ. ತಾಚ್ಯಾ ಸಾಂಗಾತಾ ವಿಲ್ಮಾಂಯ್…
“ತುಂವೆ ಆಮ್ಕಾಂ ಉದ್ದಾರ್ ಕರುಂಕ್ ಹಾಡ್‌ಲ್ಲೆಂಯ್ ನ್ಹಯ್ ಬಾವೊಜೆ…” ಹಾಂವ್ ಕಟಿಣಾಯೆನ್ ಉಲಯ್ಲೊಂ. “ತುಜೆಂ ಬಿಸ್‌ನೆಸ್ ವಾಡಯ್ಜಯ್… ತುಜ್ಯಾ ಕುಟ್ಮಾನ್ ಸುಖಾನ್ ಆಸಾಜಯ್ ಮ್ಹಣ್ ಆಮ್ಕಾಂ ಹಾಂಗಾಸರ್ ಹಾಡ್‌ಲ್ಲೆಂಯ್… ಕಸಲೆಂ ಚಿಂತಾಪ್ ತುಮ್ಚೆಂ??? ತುಮ್ಕಾಂ ಸದಾಂಯ್ ಮಾಗಾಜಯ್… ಕ್ರಿಸ್ತಾಕ್ ತುಮ್ಚ್ಯಾ ಖಾಕೆಂತ್ ದವರ‍್ಲಾ… ಕ್ರೀಸ್ತ್ ತುಮ್ಚೊ ಮಾತ್ರ್… ಆಮ್ಕಾಂ ಸುಕ್ರಾರಾ ಎಕಾ ಮಿಸಾಕ್ ವಚೊಂಕ್‌ಯ್ ಪುರ‍್ಸತ್ ನಾ… ಕಿತ್ಯಾಕ್ ತುಮ್ಚೆಂ ಮೊಡೆಂ ಆಮಿಂ ರಾಕೊಂಕ್ ಆಸಾ…”
ಉಲವ್ಣೆಂ ಬಳ್ವಂತ್ ಜಾತಾನಾ ಸಂಬಂಧಾಚೊ ಖಾಟ್ ತುಟ್‌ಲ್ಲೊ… ಆಮಿಂ ದುಸ್ಮಾನ್ ಜಾಲ್ಲ್ಯಾಂವ್… ಎಕಾಚ್ಚ್ ಪಾಕ್ಯಾ ಪಂದಾ ಜಿಯೆಂವ್ಚಿಂ ದೋನ್ ದುಸ್ಮಾನಾಂ ಸಾರ‍್ಕಿಂ ಕುಟ್ಮಾಂ…
“ತುಮಿಂ ಪಾಟಿಂ ವಚ್ಯೆತ್… ತುಮಿಂ ಮ್ಹಜ್ಯಾ ಖಾತಿರ್ ಯಾ ಆಮ್ಚ್ಯಾ ಕುಟ್ಮಾ ಖಾತಿರ್ ಮಸ್ಕತಾಕ್ ಆಯಿಲ್ಲ್ಯಾತ್ ನ್ಹಯ್… ಪುಣ್, ತುಮ್ಚ್ಯಾಚ್ಚ್ ಖಾತಿರ್…” ಬಾವೊಜಿನ್ ಸಾಂಗ್ತಾನಾ ಆಮ್ಚೆಂ ಮಸ್ಕತಾಂತ್ಲೆಂ ಜಿವಿತ್ ತುಟೊನ್ ಗೆಲೆಂ ತೆಂ ಖರೆಂ
ಆನಿ ಖರೆಂಚ್ಚ್ ಜಾವ್ನ್ ಆಮ್ಕಾಂ ಕಳಿತ್ ಆಸ್ಲ್ಲೆಂ…
ಬಾವೊಜಿನ್ ತಾಚ್ಯಾ ಕಂಪ್ಣೆಂತ್ ಹೆರಾಂ ಕಾಮೆಲ್ಯಾಂಕ್ ಕೆಲ್ಲ್ಯಾ ಬರಿಚ್ಚ್ ಆಮ್ಕಾಂ ಕರ‍್ತಲೊ ಮ್ಹಣ್… ಆನಿ ತಸೆಂಚ್ಚ್ ಕೆಲೆಂ…
ಆಮಿಂ ಪಾಟಿಂ ವೆತಾಂ ಮ್ಹಣಾಸರ್ ಆಮ್ಕಾಂ ಜಾತಾ ತಿತ್ಲಿ ಇಜಾ ತಾಣೆ ದಿಲಿ… ಚವ್ಗಾಂ ಜಣಾಂಕ್ ಎಕಾ ಕುಡಾಂತ್‌ಚ್ಚ್ ದವರ‍್ಲೆಂ… ಜೆವಾಣ್ ಸಯ್ತ್ ತಯಾರ್ ಕರುಂಕ್ ಆವ್ಕಾಸ್ ನಾ ಜಾಲೊ… ಆಮಿಂ ಸೊಸ್ಲೆಂ… ಕಿತ್ಯಾಕ್ ಆಮ್ಕಾಂ ಏಕ್ ಪಾವ್ಟಿಂ ಹಾಂಗಾ ಥಾವ್ನ್ ವಚಾಜಯ್ ಆಸ್ಲ್ಲೆಂ… ಸುಟ್ಕಾ ಜಾಯ್ ಆಸ್ಲ್ಲಿ… ಭುರ್ಗಿಂ ರಡ್ತಾಲಿಂ ಪುಣ್, ಆಮಿಂ ಸಮಧಾನೆನ್ ಜಿಯೆಲ್ಯಾಂವ್…
ಆಮ್ಚೆ ಪಯ್ಶೆ ಸಯ್ತ್ ಸಾರ‍್ಕೆ ದಿಲೆ ನಾಂತ್… ತಾಚೆಂ ಹಣೆಬರಫ್ ಹೆರಾಂ ಕಾಮೆಲ್ಯಾಂಕ್ ದಾಕಯಿಲ್ಲೆಂ ಆಮ್ಕಾಂಯ್ ಉಗ್ತ್ಯಾನ್ ದಾಕಯ್ಲೆಂ…
ಆನಿ ಆಮಿಂ ಮಸ್ಕತ್ ಸಾಂಡುನ್ ಪಾಟಿಂ ವೆತಾನಾ, ತಾಣೆ ಆಮ್ಕಾಂ ಪೊಟ್ಲುನ್ ಧರ್ಲೆಂ ನಾ… ಬಗರ್ ಉಲಯ್ಲೊ… ತೊಚ್ಚ್ ಸಾದೊ ಜಿನೊಸ್… ತಿಚ್ಚ್ ಸಾದಿ ಉಲವ್ಣ್ಯಾ ರೀತ್…
“ಕ್ರಿಸ್ತಾಚ್ಯಾಚ್ಚ್ ನಾಂವಾನ್ ಹಾಂವ್ ತುಮ್ಕಾಂ ಆದೇವ್ಸ್ ಮಾಗ್ತಾಂ… ಮ್ಹಜ್ಯಾ ಕಾಳ್ಜಾಂತ್ ತುಮ್ಚ್ಯಾ ವಿಶ್ಯಾಂತ್ ಕಾಂಯಿಂಚ್ಚ್ ಪಾಡ್ ನಾ… ದುಸ್ಮಾನ್ಕಾಯ್ ನಾ… ಆಮಿಂ ದುಸ್ರ್ಯಾಂಕ್ ಭಗ್ಸಿಜಯ್ ಮ್ಹಣ್ಂಚ್ಚ್ ಕ್ರಿಸ್ತಾನ್ ಶಿಕಯ್ಲಾಂ… ತುಮ್ಕಾಂ ಹಾಂವೆ ಭಗ್ಸಿಲಾಂ… ತುಮಿಂ ಬರೆ ಜಾಯಾ ಮ್ಹಣ್ ಆಮಿಂ ಆಶೆಂವ್ಚೆಂ…”
ಪಯ್ಸ್ ರಾವೊನ್ ಆಮ್ಚ್ಯಾ ಲಾಗಿಂ ಉಚಾರ್‌ಲ್ಲ್ಯಾ ಬಾವೊಜಿಚ್ಯಾ ಆಖ್ರೇಚ್ಯಾ ಉತ್ರಾಂಕ್ ಆಯ್ಕೊನ್ ಆಮ್ಚಿಂ ಕಾಳ್ಜಾಂ ಹಿವಾಳೊನ್ ಗೆಲಿಂ… ತ್ಯಾ ಉತ್ರಾಂನಿ ಹಿಮ್ಸಾಣ್ ಆಸ್‌ಲ್ಲಿಚ್ಚ್… ಗಲೀಜ್ ಹಿಮ್ಸಾಣ್…
” ಫೂಣ್, ಹಾಂವ್ ತುಕಾ ಭಗ್ಸಿನಾ… ಮಾನೆಸ್ತ್ ಲಾಜರಸ್ ಮೆಂಡೊನ್ಸಾ… ಆನಿ ಕ್ರಿಸ್ತ್‌ಯ್ ತುಕಾ ಭಗ್ಸಿನಾ ಜಾಂವ್… ” ಹಾಂವೆ ಪಯ್ಲೆ ಪಾವ್ಟಿಂ ತಾಚೆಂ ನಾಂವ್ ಕಾಡ್ಲೆಂ. ಕೊಡ್ಸಾಣೆನ್ ಆನಿ ಕಾಳ್ಜಾಂತ್ ಭರ್ಲ್ಲಿ ದೂಕ್ ಸೊಸುಂಕ್ ತಾಂಕಾ ನಾಸ್ತಾನಾ…
ಆನಿ ಆಮಿಂ ಮಸ್ಕತ್ ಥಾವ್ನ್ ಪಾಟಿಂ ವಚೊಂಕ್ ಭಾಯ್ರ್ ಸರ‍್ಲ್ಯಾಂವ್…..
► ಕ್ಲೆರೆನ್ಸ್, ಕೈಕಂಬ
]]>ಮಾಡಾಕಡೆ ಗಿಮಾಂತ್ ಆಸಾ ಕೆಲ್ಲ್ಯಾ ನಾಣ್ಯೆಂತ್ ತಾಂಬ್ಯಾಂಚ್ಯಾ ಮಾಂಡ್ಯಾಂತ್ಲೆ ಉದಕ್ ಚೆಂಬಾಂತ್ ಕಾಡ್ನ್, ಎಕೊಡೆಂ ತೊಂಡ್ ಧುವ್ನ್ ಮೊಡ್ಲಾಂಚ್ಯಾ ತಟ್ಟೆರ್ ಆಸ್ಲ್ಲೊ ಮುಂಡು ಕಾಡ್ನ್, ಪೆಂಕ್ಡಾಕ್ ಬಾಂಧುನ್ ಖೊಮಿಸ್ ಶಿರ‍್ಕಾವ್ನ್ ಸಕಾಳಿಂಚ್ಯಾ ಮಿಸಾಕ್ ಅಮ್ಸೊರಾನ್ ಭಾಯ್ರ್ ಸರ‍್ಚೊ ರುಜಾರ್ ಮೆಂದೊಸ್ ಆಪ್ಲ್ಯಾ ನಾತಿಲಾಗಿಂ ಬೊಬಾಟೊನ್ ವಿಚಾರಿಲಾಗ್ಲೊ.
ಘರಾ ಭಿತರ್ ಥಾವ್ನ್ ಕೊಣೆಂಯ್ ಜವಾಬ್ ದಿಲಿ ನಾ.
ಸೊಪ್ಯಾ ವಯ್ಲ್ಯಾ ವೊಣದಿಚೆರ್ ಉಮ್ಕಾಳ್ಚ್ಯಾ ಗಡಿಯಾಳಾರ್ ವೊರಾಂ ಸಾಡೆ ಸ ಜಾಲ್ಲಿಂ. ಸದಾಂಚ್ಯಾ ಮಿಸಾಕ್ ವೇಳ್ ಜಾಲ್ಲೊ.
ನಳ್ಯಾಂಚೆಂ ಘರ್ ತಾಂಚೆ. ಝಾಲ್ ಉತರ‍್ಲ್ಯಾರ್ ಮಾಡಿಯಾಂಚೆ ಲ್ಹಾನ್‌ಶೆಂ ತೋಟ್. ತೊಟಾಚಿ ಗೇಟ್ ಉತರ‍್ಲ್ಯಾರ್ ಮಾರೊಗ್. ಮಾರ್ಗಾರ್ ಸಾತ್ – ಆಟ್ ಮಿನುಟಾಂ ಸರಾರಾಂ ಚಲ್ಲ್ಯಾರ್ ಇಗರ‍್ಜ್ ಮೆಳ್ತಾ.
ಘರಾಂತ್ ಮುಖ್ಲ್ಯಾ ಸೊಪ್ಯಾಚ್ಯಾ ದೆಗೆನ್ ಆಸ್ಚ್ಯಾ ಕುಡಾಂತ್ ರುಜಾರ್ ಮೆಂದೊಸಾನ್ ನಿದ್ಚೆಂ. ಸದಾಂಯ್ ಮಿಸಾಚಿ ಘಾಂಟ್ ಜಾಂವ್ಚ್ಯಾ ಪಯ್ಲೆಂ ಉಟೊನ್ ತಾಚಿ ಸಕಾಳಿಂಚಿ ಆಮೊರಿ ಜಾತಾ. ಪಾನ್ಪೊಡ್ ಖಾಂವ್ಚಿ ಸವಯ್ ಆಸ್ಲ್ಲ್ಯಾನ್ ರಾತಿಕ್ ನಿದ್ಚ್ಯಾ ಪಯ್ಲೆಂ ಖಾಂವ್ಚ್ಯಾ ಪಾನ್ಪೊಡಿಚಿ ಪೀಕ್ ಘಾಲುಂಕ್ ಪಿಕ್ತಾಂಡಿ ಖಟ್ಲ್ಯಾ ಲಾಗಿಂಚ್ಚ್ ದವರ‍್ತಾ. ಸಕಾಳಿಂ ಪಿಕ್ತಾಂಡೆಂತ್ಲಿ ಪೀಕ್ ಮಾಡಾ ಮುಳಾಕ್ ಉಡವ್ನ್, ತಿ ಧುವ್ನ್ ಝಲಾಚ್ಯಾ ಪೊಂತಾರ್ ಚಿರ‍್ಯಾ ಫಾತ್ರಾರ್ ವೊಮ್ತಿ ಸುಕಾತ್ ಘಾಲ್ತಾ. ಕಾಕುಸ್ ಘರ‍್ಚ್ಯಾ ಬಾಯ್ಲ್ಯಾನ್ ಆಸ್ಲ್ಲ್ಯಾನ್ ಆತಾಂಯ್ ರಾತಿಂಚೆ ತೊ ತಸ್ತ್ ಖಟ್ಲ್ಯಾ ಲಾಗಿಂಚ್ಚ್ ದವರ‍್ತಾಲೊ ಆನಿ ರಾತಿಂ ಮುತೊಂಕ್ ಜಾಲೆಂ ತರ್ ತಾಂತುಂಚ್ಚ್ ಕರ‍್ತಾಲೊ. ತಸ್ತಾಂತ್ಲೆಂ ಮೂತ್ ತೊಟಾ ಬಗ್ಲೆನ್ ಮಾತಿಯೆಂತ್ ಪೂರ್ನ್ ದವರ್ಲ್ಲ್ಯಾ ಮೊಟ್ಕ್ಯಾಂತ್ ವೊತುನ್ ತಾಕಾ ಪರ‍್ನೆಂ ಆಯ್ದಾನ್ ತೊ ದಾಂಪ್ತಾಲೊ. ಸಾದಾರ‍್ನ್ ತ್ಯಾ ವೆಳಾರ್ ಮಿಸಾಚಿ ಘಾಂಟ್ ಜಾತಾಲಿ.
ಘಾಂಟ್ ಆಯ್ಕಾಲ್ಯಾ ಉಪ್ರಾಂತ್ ಮಾಂಡ್ಯಾ ಪಂದ್ಲಿ ಕರಿ ಬೊಟಾನ್ ವೋಡ್ನ್, ಆಮ್ಸೊರಾನ್ ದಾಂತ್ ಘಾಸುನ್, ತೊಂಡ್ ಧುವ್ನ್, ಖೊಮಿಸ್ ಶಿರ‍್ಕಾವ್ನ್, ಮುಂಡು ಬಾಂದುನ್ ತಾಣೆ ಇಗರ‍್ಜೆಕ್ ವೆಚೆಂ. ಇಗರ‍್ಜೆಕ್ ಪಾವ್ತಾನಾ ಸಾಡೆ ಸ ವೊರಾರ್ ಸುರು ಜಾಂವ್ಚಿ ಆಮೊರಿ ಆಕೇರ್ ಜಾತಾ. ತೊ ಪಾವ್ಲ್ಯಾ ಉಪ್ರಾಂತ್‌ಚ್ಚ್ ಮಿಸಾಚೆಂ ಕಾಂತಾರ್ ಮಿರೊಣ್ ಸುರು ಕರ್ತಾ ಮ್ಹಣ್ ತಾಣೆ ಕೆದ್ನಾಂಯ್ ಚಿಂತ್ಚೆಂ.
ಪುಣ್, ಆಜ್ ವೇಳ್ ಜಾಲ್ಲೊ. ಹ್ಯಾ ಮಿರ‍್ಣಿಚ್ಯಾ ಘಾಂಟಿಚ್ಯಾ ಆವಾಜಾಕ್ ರಾಕೊನ್ ರಾವೊಂಕ್ ನಜೊ ಮ್ಹಣ್ ತಾಣೆ ಕಿತ್ಲೆಶ್ಯಾ ಪಾವ್ಟಿಂ ಚಿಂತ್‌ಲ್ಲೆಂ ಆಸಾ. ವೊಣದಿರ್ ವೊಚ್ ಆಸಾ ಆನಿ ತಾಚೆರ್ ವೇಳ್ ಪಳವ್ನ್ ಭಾಯ್ರ್ ಸರಾಜಯ್ ಮ್ಹಣ್ ಚಿಂತ್ತಾಲೊ. ಪುಣ್, ತಸೆಂ ಕೆದಾಳಾಯ್ ಜಾಯ್ನಾತ್ಲ್ಲೆಂ. ಮಿಸಾಚ್ಯಾ ಘಾಂಟಿಕ್ ರಾಕೊನ್ ರಾಂವ್ಚಿ ಜಲ್ಮಾಚಿ ಸವಯ್ ಜಾಲ್ಲಿ … ಆನಿ ತ್ಯಾಚ್ಚ್ ಮಾರಿಚ್ಯಾ ಸವಯೆನ್ ಆಜ್ ಮಿಸಾಕ್ ವೇಳ್ ಜಾಲ್ಲೊಚ್ಚ್.
ಮಿಸಾಕ್ ವೇಳ್ ಜಾಲೊ ತರ್ ತೊ ದಿಸ್‌ಚ್ಚ್ ಪಾಡ್ ಜಾಲ್ಲ್ಯಾ ಬರಿಂ. ದೆವಾಚೆಂ ಬೆಸಾಂವ್ ನಾ ತರ್ ದೀಸ್ ಉದ್ದಾರ್ ಜಾತಾವೇ? ಆನಿ ಆಯ್ಚೊ ದೀಸ್ ಖಂಡಿತ್ ಜಾವ್ನ್ ಪಾಡ್‍ಚ್ಚ್…
ಆಜ್ ಕಾಂಯ್ ಮಿರೊಣ್ ಸಕಾಳಿಂ ಉಟೊಕ್‌ಚ್ಚ್ ನಾ ಆಸ್ತಲೊ … ಕಾಲ್ ಸಾಂಜೆರ್ ಪಿಯೆಲ್ಲೆಂ ಚಡ್ ಜಾಲ್ಲೆಂ ಆಸ್ತೆಲೆಂ ಕೊಣ್ಣಾ … ಪುಣ್, ಆಮ್ಚೊ ಮಿರೊಣ್ ಘಾಲ್ಚೊ ಮನಿಸ್ ನ್ಹಯ್. ಆಜ್ ಕಿತೆಂ ಜಾಲೆಂ …. ಹುಶಾರ್ ನಾ ಗಾಯ್? ಬಾಯ್ಲ್ ಹುಶಾರ್ ನಾಂಗೀ? ಘರಾಂತ್ ಕೋಣ್‌ಯ್ ಹುಶಾರ್ ನಾ ತರ್ಯ್ ಇಗರ‍್ಜೆಚೆ ಕಾಯ್ದೆ ತೊ ಬಿಲ್ಕುಲ್ ಚುಕಾನಾತ್‌ಲ್ಲೊ ತಸಲೊ ಮನಿಸ್.
ಬಾಗ್ಲಾ ಭಾಯ್ರ್ ವ್ಹಾಣೊ ದವರ್ನ್ ಇಗರ‍್ಜೆ ಭಿತರ್ ವೆತಾನಾ ವಾಚಪ್ ಕಾಬಾರ್ ಜಾವ್ನ್, ಪಾದ್ರ್ಯಾಬಾನ್ ವಾಂಜೆಲ್ ಸುರು ಕೆಲ್ಲೊ.
ತಾಚ್ಯಾ ಜಿಣ್ಯೆಂತ್ ಪಯ್ಲೆಪಾವ್ಟಿಂ ಆಸ್ತೆಲೆಂ, ತೊ ಮಿಸಾಕ್ ಇತ್ಲೊ ವೇಳ್ ಕರ್ನ್ ಯೆಂವ್ಚೊ.
ಮೀಸ್ ಮುಂದರ‍್ಸುನ್ ಗೆಲೆಂ. ಮಿರ‍್ಣಿಚೊ ತಾಳೊ ಆಯ್ಕಾನಾತ್‌ಲ್ಲೊ. ಮಿರೊಣ್ ಅಪ್ಪು ಮಿರಾಂದ್ ಯೆಂವ್ಕ್ ನಾ. ವಿಗಾರಾನ್‌ಂಚ್ಚ್ ಕಾಂತಾರ್ ಗಾಯ್ಲೆಂ. ಭಕ್ತಿಕಾಂನಿ ತಾಳೊ ಮೆಳಯ್ಲೊ. ರುಜಾರ್ ಮೆಂದೊಸಾಚಿ ಮತ್ ಮಿಸಾರ್ ನಾತ್ಲ್ಲಿ. ಮಿರ‍್ಣಿಚೊಚ್ಚ್ ಉಡಾಸ್.
ಮಿಸಾಕ್ ವೇಳ್ ಕರ್ನ್ ಆಯಿಲ್ಲ್ಯಾನ್ ಕುಮ್ಗಾರ್ ಸೆಂವ್ಕ್ ವೆಚ್ಯಾಕ್ ತಾಚೆಂ ಕೊಶೆಡ್ದ್ ಆಯ್ಕಾಲೆಂನಾ. ಬಸ್‌ಲ್ಲ್ಯಾ ಕಡೆಚ್ಚ್ ಮಾಗ್ಣೆಂ ಮ್ಹಣೊನ್ ಕ್ರಿಸ್ತಾಕ್ ಆರ‍್ಗಾಂ ದಿಲಿಂ ತಾಣೆ.
ಮಿಸಾಚೆಂ ಆಕ್ರೆಚೆಂ ಬೆಸಾಂವ್ ದಿಂವ್ಚ್ಯಾ ಪಯ್ಲೆಂ, ವಿಗಾರ್ ಏಕ್ ಘಡಿ ಮೌನ್ ಜಾಲೊ. ” ಆಜ್ ತುಮಿ ಮಿಸಾಚಿ ಘಾಂಟ್ ಆಯ್ಕೊಂಕ್ ನಾ ಜಾಂವ್ಕ್ ಪುರೊ…”
ಇಗರ‍್ಜೆಂತ್ ಆಸ್ಲ್ಲ್ಯಾ ಹೆರಾಂ ಜಾಯ್ತ್ಯಾಂನಿ ಸಾಂಗಾತಾ ತಕ್ಲಿ ಹಾಲಯ್ಲಿ ಆನಿ ಎಕಾಮೆಕಾಕ್ ಪಳಯ್ಲೆಂ.
“ಆಮ್ಚೊ ಮಿರೊಣ್ ಆಪ್ಪು ಮಿರಾಂದ್ ಕಾಲ್ ರಾತಿ ಮರಣ್ ಪಾವ್ಲಾ … ಭಾರಿಚ್ಚ್ ದುಕಾಚಿ ಗಜಾಲ್… ಆಮಿಂ ಉಬಿ ರಾವ್ಯಾಂ ಆನಿ ತಾಚ್ಯಾ ಅತ್ಮ್ಯಾಖಾತಿರ್ ಮಾಗ್ಯಾಂ…” ಏಕ್ ಆಮ್ಚ್ಯಾ ಬಾಪಾ, ತೀನ್ ನಮಾನ್ ಮರಿಯೆ, ಆನಂದ್ ಬಾಪಾ, ಸಾಸ್ಣಾಚೊ ವಿಶೆವ್ ಆನಿ ಸರ್‌ಲ್ಲ್ಯಾ ಭಾವಾಡ್ತ್ಯಾಂಚೆ ಮಾಗ್ಣೆಂ ಬೆಟವ್ನ್ ವಿಗಾರಾನ್ ಅಂತಿಮ್ ಆಶೀರ‍್ವಾದ್ ದಿಲೆಂ.
ಮೀಸ್ ಜಾಲ್ಲೆಂಚ್ಚ್, ರುಜಾರ್ ಮೆಂದೊಸ್ ಸದಾಂಚ್ಯಾ ಸವಯೆ ಪ್ರಮಾಣೆ ತಾಚೆಂ ಹೆರ್ ಮಾಗ್ಣೆಂ ಕರ‍್ಚ್ಯಾಕ್ ಇಗರ‍್ಜೆ ಭಿತರ್ ರಾವ್ಲೊ ನಾ. ಮಿಸಾ ಉಪ್ರಾಂತ್ ತಾಕಾ ಜಾಯ್ತೆಂ ಮಾಗೊಂಕ್ ಆಸ್ತಾಲೆಂ. ಮೆಲ್ಲ್ಯಾ ಘರ‍್ಚ್ಯಾ ಅಲ್ಮಾಂವಾಂ ಥಾವ್ನ್ ಗರ‍್ಜೆವಂತಾಂಕ್ ಆನಿ ಆಖ್ರೇಕ್ ಸಗ್ಳ್ಯಾ ಸಂಸಾರಾ ಖಾತಿರ್ ತೊ ಮಾಗ್ತಾಲೊ. ಪುಣ್ ಆಜ್ ನ್ಹಯ್.
ತೊ ಭಾಯ್ರ್ ಯೆತಾನಾ, ಸದಾಂಚ್ಯಾ ಮಿಸಾಕ್ ಯೆಂವ್ಚೊ ಲೋಕ್ ಆಂಗ್ಣಾಂತ್ ಉಬೊ ಆಸ್ಲ್ಲೊ. ಮಿರ‍್ಣಿಕ್ ಕಿತೆಂ ಜಾಲೆಂ ? ಹುಶಾರ್ ನಾತ್‌ಲ್ಲೊಗೀ ? ಕೊಣೆ ಸವಾಲಾಂ ಕರ್ತಾನಾ ಥೊಡ್ಯಾಂನಿ ತಾಕಾ ಕಾಳ್ಜಾಚಿ ಪಿಡಾ ಆಸ್ಲ್ಲಿ; ಥೊಡೆ ಪಾವ್ಟಿಂ ಖರ‍್ಶೆತಾಲೊ… ಜಿವಾನ್ ಬಾರಿಕ್ ಜಾಲ್ಲೊ… ಗೋಡ್ ಮುತಾಚಿ ಪಿಡಾ ಆಸ್ಲ್ಲಿ ಮ್ಹಣ್ ಕೋಣ್ ಸಾಂಗ್ತಾಲೆ… ಅಶೆಂ ಉಲಂವ್ಕ್ ಸುರು ಕೆಲೆಂ ಪುಣ್ ಸಾರ್ಕೆಂ ಕಿತೆಂಯ್ ಕೊಣಾಯ್ಕಿ ಕಳಿತ್ ನಾತ್ಲ್ಲೆಂ….
ಮಿಸಾಚೆಂ ನ್ಹೆಸಣ್ ಬದ್ಲುನ್ ವಿಗಾರ್ ಥಂಯ್ಸರ್ ಪಾವ್ಲೊಚ್ಚ್… ಆನಿ ಮೀಸ್ ಜಾವ್ನ್ ಬಾಯ್ಲ್ಯಾ ಆಂಗ್ಣಾಂತ್ ಜಮ್‌ಲ್ಲ್ಯಾ ಲೊಕಾಚೆಂ ಗುಜು ಗುಜು ಉಲವ್ಣೆಂ ಬಂಧ್ ಜಾಲೆಂ.
” ಆಯ್ಕಾ … ಕೋಣ್ ಘಾಂಟ್ ಮಾರ‍್ತಾ … ಮಿರ‍್ಣಿ ಸರ‍್ಲಾ ಆನಿ ತಾಚ್ಯಾ ಮೊರ‍್ಣಾಕ್ ಘಾಂಟ್ ಕೋಣ್‌ಂಯ್ ಮಾರುಂಕ್ ಸಕ್ತಾ?”
ವಿಗಾರಾನ್ ತಾಳೊ ಉಬಾರುನ್ ವಿಚಾರ್ಲ್ಲೆಂ ಸರ್ವಾಂಕ್ ಆಯ್ಕಾಲೆಂ. ಸರ್ವ್ ಮ್ಹಳ್ಯಾರ್ ಕೋಣ್? ಸದಾಂ ಮಿಸಾಕ್ ಯೆಂವ್ಚಿ ಪ್ರಾಯೆಸ್ತ್ ಮಾತ್ರ್. ಹ್ಯಾ ಹಳ್ಳೆಚ್ಯಾ ಇಗರ‍್ಜೆಂತ್ ತರ‍್ನಾಟಿಂ ಯಾ ತರ‍್ನಾಟೆ ಝಳ್ಕೊನ್‌ಂಯ್ ಸದಾಂಚ್ಯಾ ಮಿಸಾಕ್ ಯೆನಾತ್‌ಲ್ಲೆ. ಮಿಸಾಕ್ ಯೆತಾಲಿಂ ತರ್ಯ್ ಜಿವಿತಾಚ್ಯಾ ಸಾಂಜೆಚ್ಯಾ ಪಂಗ್ತೆಕ್ ಪಾವ್ಲ್ಲಿಂ ಮಾತ್ರ್…ಕೊಣ್ಂಯ್ ಮುಕಾರ್ ಆಯ್ಲೆ ನಾಂತ್. ಘಾಂಟ್ ಮಾರ‍್ಚಿ ಭಾರಿಚ್ಚ್ ಸುಲಭ್ ಜಾಯ್ತ್ಯಾಂನಿ ಚಿಂತ್ಚೆಂ ಆಸ್ಲ್ಲೆಂ ತರ್ಯ್ ತಿ ಮಾರುಂಕ್ ಕಳಿತ್ ನಾತ್‌ಲ್ಲ್ಯಾಂಕ್ ಭಾರಿ ಕಷ್ಟಾಂಚಿ ಗಜಾಲ್‌ಚ್ಚ್ ನ್ಹಯ್‌ಗೀ?
“ಕೋಣ್‌ಂಯ್ ನಾಂತ್…..?” ಥೊಡೊ ವೇಳ್ ಲೊಕಾಕ್‌ಚ್ಚ್ ಪಳೆವ್ನ್ ಉಬೊ ಆಸ್ಲ್ಲೊ ವಿಗಾರ್ ಚಿಕ್ಕೆ ವ್ಹಡ್ಲ್ಯಾ ತಾಳ್ಯಾನ್‌ಚ್ ಮ್ಹಣಾಲೊ.” ಪಂಚ್ವೀಸ್ ವರ್ಸಾಂ ಥಾವ್ನ್ ಮಿರೊಣ್ ಅಪ್ಪು ಮಿರಾಂದಾನ್ ಆಮ್ಚ್ಯೊ, ಮ್ಹಳ್ಯಾರ್ ಆಮ್ಚ್ಯಾ ಫಿರ‍್ಗಜೆಂತ್ ಮೆಲ್ಲ್ಯಾಂ ಖಾತಿರ್ ಘಾಂಟಿ ಮಾರ‍್ಲ್ಯಾತ್ ಆನಿ ಆಜ್ ತೊ ನಾ …. ತಾಚ್ಯಾ ಮೊರ‍್ಣಾಚ್ಯೊ ಘಾಂಟಿ ಮಾರ‍್ತಲೊ ಆಮ್ಚ್ಯಾ ಮಧೆಂ ಎಕ್ಲೊ ಪುಣಿ ನಾಂಚ್ಚ್ ನ್ಹಯ್‌ಂಗೀ ?”
ವಿಗಾರ್ ದೆದೆಸ್ಪಾರ್ ಜಾಲ್ಲೊ ಪಳವ್ನ್, ರುಜಾರ್ ಮೆಂದೊಸಾಚ್ಯಾ ಕಾಳ್ಜಾಕ್ ಭಾಲಿ ತೊಪ್‌ಲ್ಲ್ಯಾ ಬರಿ ಜಾಲೆಂ. ತೊ ಮುಕಾರ್ ಆಯ್ಲೊ. ಧೈರ್ ಆರಾಯ್ಲೆಂ. ಮಿರ‍್ಣಿಚ್ಯಾ ಮೊರ‍್ಣಾಚಿ ಘಾಂಟ್ ಮಾರುಂಕ್. ಥೊರಿಚ್ಯಾ ಉಗ್ತ್ಯಾ ಬಾಗ್ಲಾಂತ್ಲ್ಯಾನ್ ಭಿತರ್ ವಚೊನ್ ವೊಣದಿಕ್ ಬಸಯಿಲ್ಲ್ಯಾ ಲೊಂಕ್ಡಾಚ್ಯಾ ಕೊಕ್ಕ್ಯಾಕ್ ಶಿರ‍್ಕಾಯಿಲ್ಲಿ ದೊರಿ ತಾಣೆ ಸುಟಯ್ಲಿ. ದೊನೀ ಹಾತಾಂನಿ ಬಳಾನ್ ಧರ‍್ನ್ ತಿ ವೊಡ್ಲಿಚ್ಚ್. ಏಕ್ ನ್ಹಯ್ ದೋನ್ ನ್ಹಯ್… ಪಾಟಾಪಟ್ ಪಾಂಚ್… ಸ ಆನಿ ಸಾತ್… ಫೆಸ್ತ್ ಮಿಸಾಕ್ ಘಾಂಟಿ ಮಾರ‍್ಚ್ಯಾ ಬರಿ…
ವಿಗಾರ್ ಪರತ್ ದೆದೆಸ್ಪಾರ್ ಜಾಲೊ. ರಾಗಾನ್ ಉಂಚಾಂಬಳ್ ಜಾಲೊ.
“ಹಿ ಕಸಲಿ ಘಾಂಟ್ ಮಾರ‍್ತಾಯ್ ತುಂ ರುಜಾರಿ… ಬಂಧ್ ಕರ್… ಬಂಧ್ ಕರ್… “
ರುಜಾರ್ ಮೆಂದೊಸಾಚೆ ಹಾತ್ ಪಾಯ್ ಕಾಂಪ್ಲೆಂಚ್ಚ್… ತೊ ಥಂಡ್ಚ್ಚ್ ಜಾಲೊ.. ದೊರಿ ತಾಣೆ ಸೊಡ್ನ್ ಸೊಡ್ಲಿ….
“ಆತಾಂ ತುಂಚ್ಚ್ ವಚ್…. ಮಿರ‍್ಣಿಚೊ ಪೂತ್ ಘರಾಚ್ಚ್ ಆಸ್ತಲೊ….” ಪರತ್ ವಿಗಾರ್ ಬೊಬಾಟ್ಲೊ. ” ತಾಕಾಚ್ಚ್ ಆಪಯ್….. ಪುತಾಕ್ ಘಾಂಟ್ ಮಾರುಂಕ್ ಶಿಕಯ್ಲಾಂ ಮಿರ‍್ಣಿನ್… ಆತಾಂ ಘಾಂಟ್ ಮಾರಿಜಯ್‌ಚ್ಚ್ ನ್ಹಯ್ ? ದೆವಾಧಿನ್ ಜಾಲ್ಲ್ಯಾ ಮಿರ‍್ಣಿಕ್ ಘಾಂಟ್ ಮಾರಿನಾ ತರ್ ಕಿತ್ಲಿ ಲಜ್ ಆಮ್ಕಾಂ…. ಕಸಲೆಂ ಉಣೆಂಪಣ್ ಪಳೆಯಾ….”
ರುಜಾರ್ ಮೆಂದೊಸ್ ಆಪ್ಲೊ ಮುಂಡು ವಯ್ರ್ ಬಾಂಧುನ್ ಮಿರ‍್ಣಿಚ್ಯಾ ಘರಾ ತೆವ್ಶಿನ್ ದಾವ್ಲೊಚ್ಚ್.
***
ಮಿರೊಣ್ ಅಪ್ಪು ಮಿರಾಂದ್ ಸರೊನ್ ದುಸ್ರ್ಯಾಚ್ಚ್ ಆಯ್ತಾರಾ ವಿಗಾರಾನ್ ಫಿರ‍್ಗಜೆಚ್ಯಾ ಲೊಕಾಚಿ ಜಮಾತ್ ಆಪಯಿಲ್ಲಿ. ತುರ‍್ತ್ ಜಮಾತ್. ಆಡಳ್ತ್ಯಾ ಸಮಿತಿಚಿ ಜಮಾತ್ ಜಾವ್ನ್ ಲೊಕಾಚಿ ಜಮಾತ್ ಆಪಂವ್ಚಿ ರಿವಾಜ್ ಆಜ್ ತಾಣೆ ಮೊಡ್‌ಲ್ಲಿ.
ಪಾಟ್ಲ್ಯಾ ಹಫ್ತ್ಯಾಂತ್ ಸಕಾಳಿಂ ಸಾಂಜೆರ್ ಭಾರಿಚ್ಚ್ ಕಷ್ಟಾಂನಿ ಘಾಂಟಿ ವಾಜ್‌ಲ್ಲ್ಯೊ. ಮಿರ‍್ಣಿಚ್ಯಾ ಪುತಾನ್‌‌ಚ್ ತಿ ಜವಾಬ್ದಾರಿ ಸಾಂಬಾಳ್‌ಲ್ಲಿ. ಮಿಸಾಚ್ಯಾ ಪವಿತ್ರ್ ವಸ್ತುರಾಚಿ ತಯಾರಾಯ್, ಆಲ್ತಾರಿಚಿ ತಯರಾಯ್ ಸಾಂ. ಮಿಂಗೆಲ್ ವಾಡ್ಯಾಚಿ ಅರ‍್ಧಿ ಮಾದ್ರ್ ಜೆನೆಟ್ ಮಿನೆಜಾನ್ ಕೆಲ್ಲಿ. ಕಾಲ್, ಇಗರ‍್ಜ್ ಝಾಡ್ಚೆಂ ಆನಿ ಬಾಂಕ್ ಪುಸ್ಚೆಂ ಕಾಮ್ ರುಜಾರ್ ಮೆಂದೊಸ್ ಆನಿ ಸಾಲು ಮಾಡ್ತಿಸಾನ್ ಕೆಲ್ಲೆಂ.
ಆಜ್, ಜಮಾತೆಂತ್ ರುಜಾರ್ ಮೆಂದೊಸ್ ಮುಖ್ಲ್ಯಾ ಸಾಲಿಂತ್ ಬಸ್‌ಲ್ಲೊ. ತಾಚ್ಯಾ ಬಗ್ಲೆನ್ ಸಾಲು ಮಾಡ್ತಿಸ್. ಮಿರೊಣ್ ನಾಸ್ತಾನಾ ಕಾಲ್ಚ್ಯಾ ದಿಸಾ ತಾಣಿ ಕೆಲ್ಲ್ಯಾ ಸೆವೆಕ್ ವಿಗಾರಾ ಥಾವ್ನ್ ಶಾಬಾಸ್ಕೆಚಿಂ ಉತ್ರಾಂ ಮೆಳ್ತೆಲಿಂ ಮ್ಹಣ್ ತಾಣಿ ಚಿಂತ್‌ಲ್ಲೆಂಚ್ಚ್.
ಪುಣ್, ವಿಗಾರಾನ್ ತ್ಯಾ ವಿಶ್ಯಾಂತ್ ದಂಬು-ಉಸ್ಕು ಕಾಡ್ಲೊನಾ.
“ಪಂಚ್ವೀಸ್ ವರ್ಸಾಂ ಆಮ್ಚ್ಯಾ ಇಗರ‍್ಜೆಂತ್ ಸೆವಾ ದಿಲ್ಲೊ ಮಿರೊಣ್ ಅಪ್ಪು ಮಿರಾಂದ್ ದೆವಾಧಿನ್ ಜಾಲಾ. ಸರ‍್ಗಾರ್ ಜೆಜುಚ್ಯಾ ಬಗ್ಲೆಕ್ ಬಸ್ಲಾ ತೆಂ ಖರೆಂ… ಭಾಗೆವಂತ್ ಮನಿಸ್ ತೊ….ತಾಚ್ಯಾ ಅತ್ಮ್ಯಾ ಖಾತಿರ್ ಉಬೆ ರಾವೊನ್ ಮಾಗ್ಯಾಂ…”
ಸರ್ವ್ ಉಬೆ ರಾವ್ಲೆ. ಭಾಗೆವಂತ್ ಮನ್ಶಾಚ್ಯಾ ಅತ್ಮ್ಯಾಕ್ ಮಾಗಾಜಯ್ ಮ್ಹಣ್ ನಾ ಮ್ಹಣ್ ಥೊಡ್ಯಾಂನಿ ಚಿಂತ್ಚೆಂಯ್ ಆಸ್ಲ್ಲೆಂ. ಪುಣ್, ಸರ‍್ವಾಂನಿ ಮಾಗ್ಲೆಂ.
ಪಾದ್ರ್ಯಾಬಾನ್ ಏಕ್ ಆಮ್ಚ್ಯಾ ಬಾಪಾ, ತೀನ್ ನಮಾನ್ ಮರಿಯೆ ಆನಿ ಏಕ್ ಅನಂದ್ ಬಾಪಾ ಶಿಕಯ್ಲೆಂ. ಸಾಸ್ಣಾಚೊ ವಿಶೆವ್ ಆನಿ ಸರ್‌ಲ್ಲ್ಯಾ ಭಾವಾಡ್ತ್ಯಾಂಚೆ ಮಾಗ್ಣೆಂಯ್ ಮ್ಹಳೆಂ. ಹೆಂ ಜಾತಚ್ಚ್ ಸರ್ವ್ ಬಸ್ಲೆ.
ವಿಗಾರಾನ್ ಮಿರೊಣ್ ಅಪ್ಪು ಮಿರಾಂದಾನ್ ಪಂಚ್ವೀಸ್ ವರ್ಸಾಂನಿ ಇಗರ‍್ಜೆಂತ್ ಕೆಲ್ಲಿ ಸೆವಾ ವಿವರುನ್ ಸಾಂಗ್ಲಿ.
ತಿನ್ಶಿಂ ಸಾಟ್ ಆನಿ ಪಾಂಚ್ ದೀಸ್ ಸೆವಾ ದಿಲ್ಲೊ ಮನಿಸ್ ಅಪ್ಪು ಮಿರಾಂದ್.
ದಿಸಾಚ್ಯೊ ಘಾಂಟಿ, ಮೊರ‍್ಣಾಚ್ಯೊ ಜಾಂವ್ ಮಿಸಾಚ್ಯೊ, ದೊನ್ಪಾರಾಂಚ್ಯಾ ಬಾರಾಂಚಿ ಯಾ ಸಾಂಜೆಚ್ಯಾ ಆಮೊರಿಚಿ ಆನಿ ಆಟ್ ವೊರಾಂಚಿ, ಗಿಮಾಂತ್ ಯಾ ಶಿರಾಂದಾರಿಂಚೊ ಪಾವ್ಸ್ ಯೆತಾನಾ ತೊ ಸಾರ‍್ಕೆಂಚ್ಚ್ ಮಾರ‍್ತಾಲೊ. ತ್ಯಾ ಫಿರ‍್ಗಜೆಂತ್ ಕೊವೆಂತ್ ಲಾಗಿಂ ನಾತ್‌ಲ್ಲ್ಯಾನ್ ಮಾದ್ರಿಂಚೊ ಗೊಂದೊಳ್ ನಾತ್ಲ್ಲೊ. ಸನ್ವಾರಾ ಆಲ್ತಾರ್ ಸೊಬಂವ್ಚಿ; ಆಯ್ತಾರಾಚ್ಯಾ ಮಿಸಾಕ್ ಜಾಯ್ ಜಾಲ್ಲಿ ಸಾರ‍್ಕ್ಯಾ ರಂಗಾಚಿ ಮುಸ್ತಾಯ್ಕಿ ಮಿಸಾ-ಗ್ರಂಥ್ ಪಳವ್ನ್ ತಯಾರ್ ದವರ‍್ಚಿ; ಆಲ್ತಾರ್ ಭುರ‍್ಗ್ಯಾಂಕ್ ತಯಾರ್ ಕರ್ಚೆಂ; ಆಲ್ತಾರ್ ಭುರ‍್ಗೆ ಯೆನಾಂತ್ ತರ್ ತಾಂಚೊ ಕಾಯ್ದೊ ತಾಣೆಂಚ್ಚ್ ಕರ್ಚೊ, ಆಲ್ತಾರ್ ಭುರ‍್ಗ್ಯಾಂಚೆ ಕಾಮ್ ಕರ್ತಾನಾ ಕಾಂತಾರ್ ಸುಡಾಳ್ ಆನಿ ಸಾರ್ಕೆಂ ಗಾಯನ್ ಕರ‍್ತಾಲೊ. ಸನ್ವಾರಾ ದೀಸ್ ಇಗರ‍್ಜ್ ಝಾಡುನ್ ಬಾಂಕ್ ಪುಸುನ್ ಸಾಂಜೆಚ್ಯಾ ಆನಿ ದುಸ್ರ್ಯಾ ದಿಸಾಚ್ಯಾ ಮಿಸಾಕ್ ತಯಾರಾಯ್ ಕರ‍್ಚಿ; ಕೊಯರ್ ಆಯ್ಲೆಂ ತರ್ ಮಿರ‍್ನ್ಯಾಮ್ ಥಂಡ್; ನಾ ತರ್ ತಾಚ್ಯಾ ಕಿಂದ್ರಿ ತಾಳ್ಯಾನ್ ಮಿಸಾಚಿಂ ಕಾಂತಾರಾಂ ಗಾವ್ನ್ ಲೊಕಾಚ್ಯಾ ಭಕ್ತಿಕ್ ವಾಡಂವ್ಚೆಂ ತಾಣೆ; ವೋಲ್ ಆಸೊಂದಿ ಯಾ ರೆಸ್ಪೆರ್, ಮೋರ್ನ್ ಯಾ ಕೊಣಾಯ್ಕಿ ಸಾಂತೆಸಾಂವ್ ಲಾಂವ್ಚೆಂ, ಗರ‍್ಜೆ ಪ್ರಮಾಣೆ ಮಿರ‍್ಣ್ಯಾಮ್ ಆಸಾಜಯ್ ಆನಿ ಅಪ್ಪು ಮಿರಾಂದ್ ಆಸ್ತಾಲೊಚ್ಚ್….
ಸಬಾರ್ ಕಾಳಾ ಪಯ್ಲೆಂ ಮೊರ‍್ಣಾಚ್ಯಾ ಮಿಸಾಂಕ್ ಒಫಿಸ್ ಮೀಸ್ ಆಸ್ತಾಲೆಂ. ಲಾತಿನ್ ಬಾಶೆನ್. ವ್ಹಡ್ಲ್ಯಾ ಫೆಸ್ತಾಚ್ಯಾ ಬೆಸ್ಪಾಕ್ ಲಾತಿನ್ ಬಾಶೆನ್ ಮಾಂಡಾವಳ್. ಖಂಚಾಯ್ ಲಾತಿನ್ ಉತ್ರಾಂಚೊ ಅರ‍್ತ್ ಕಳಿತ್ ಆಸ್ಲ್ಲೊ ವ ನಾ; ಜೆಂ ಪ್ರದಾನ್ ಯಾಜಕಾನ್ ಉಚಾರ್‌ಲ್ಲ್ಯಾ ಮಾಗ್ಣ್ಯಾಂವಿಧಿಂಕ್ ಮಿರ‍್ಣಿ ಮಾತ್ರ್ ಸುಡಾಳ್ ಜವಾಬ್ ದಿತಾಲೊ ಆನಿ ಲಾತಿನ್ ಬಾಶೆನ್ ಗಾಯನ್ ಕರ‍್ತಾಲೊ.
ಅಪ್ಪು ಮಿರಾಂದ್ ತರ್ನಾಟೊ ಆಸ್ತಾನಾ ಮಿರೊಣ್ ಜಾವ್ನ್ ಇಗರ‍್ಜೆಚಿ ಸೆವಾ ದೀಂವ್ಕ್ ಆಯಿಲ್ಲೊ. ಕಿತ್ಲೊ ಸಾಂಬಾಳ್…? ಮಹಿನ್ಯಾಕ್ ಪಾಂಯ್ಶಿ ರುಪಯ್… ತೊ ಬಿಲ್ಕುಲ್ ದುರ‍್ಸಾಲ್ಲೊ ನಾ…
ಮೆಲ್ಲ್ಯಾ ಮೊಶಿಕ್ ಬಾರಾ ಕುಟ್ಟಿಂ ದೂದ್ ಕಂಯ್…. ಗಾದ್ ರುಜಾರ್ ಮೆಂದೊಸಾಕ್ ಉಡಾಸಾಂತ್ ಆಯ್ಲಿ.
ವಿಗಾರಾನ್ ಸಾಂಗ್ಲ್ಲೆಂ ಆಯ್ಕಾಲ್ಲೆ ಹೆಚ್ಚ್ ಫಿರ‍್ಗಜ್‌ಗಾರ್ ಮಿರ‍್ಣ್ಯಾಮಾಕ್ ಕಿತ್ಲೆ ಪಾವ್ಟಿಂ ದುರ‍್ಸಾಲ್ಲೆ ನಾಂತ್? ಮಿಸಾಕ್ ಆಯಿಲ್ಲ್ಯೊ ಕಾಣಿಕೊ ತೆಂಯ್ ರಾಂದಯ್, ದೂದ್, ನಾರ‍್ಲ್ ಆನಿ ತಾಂದುಳ್ ಆಪ್ಲ್ಯಾ ಘರಾಚ್ಚ್ ವೊರ‍್ತಾ ಮ್ಹಣ್ ಸಾಂಗ್‌ಲ್ಲೆನಾಂತ್? ಇಗರ್ಜೆಚೊ ಪೊಂತಾಚೊ ಜಾಗೊ ತಾಕಾ ದೀವ್ನ್ ಫಿರ‍್ಗಜ್‌ಗಾರಾಂಚ್ಯಾ ಖರ‍್ಚಾರ್ ಘರ್ ಬಾಂಧುನ್ ದಿತಾನಾ ಉಂಚಾಬಳ್ ಜಾಲ್ಲೆ ಮನಿಸ್ ಆತಾಂ ಥಂಡ್ ಜಾಲ್ಲೆಚ್ಚ್. ಮಿರ‍್ಣ್ಯಾಮಾನ್ ಡಿಕ್ಲರೇಶನ್ ದೀವ್ನ್ ಕಾಲ್ದೊ ಎಕ್ರೊ ಜಾಗೊ ಭಿತರ್ ಘಾಲ್ಲ್ಯಾ ವೆಳಿಂ ಫಿರ‍್ಗಜ್‌ಚ್ಚ್ ಉಂಚಾಂಬಳ್ ಜಾಲ್ಲಿ. ಮಿರ‍್ಣಿಕ್ ಕಾಮಾಂತ್ಲೆ ಕಾಡಿಜಾಯ್ ಮ್ಹಣ್ ವಿಗಾರಾಕ್ ಆನಿ ಉಪ್ರಾಂತ್ ಭಿಸ್ಪಾಕ್ ದೂರ್ ಗೆಲ್ಲೆಂ. ಪುಣ್, ಮಿರ‍್ಣ್ಯಾಮಾಕ್ ಕೊಣಾಯ್ಕಿ ಹಾಲಂವ್ಕ್ ಜಾಂವ್ಕ್ ನಾ. ಹಾಲಯಿಲ್ಲೆಂಯ್ ನಾ….
ಮಾರ‍್ಗಾಯ್ ಚಡ್‍ಲ್ಲಿ ಆನಿ ಸಾಂಬಾಳ್ ಮಾತ್ರ್ ಚಡವ್ಯಾಂ ಮ್ಹಳ್ಯಾರ್ ಫಿರ‍್ಗಜೆಚೊ ಲೋಕ್ ಭಾರಿಚ್ಚ್ ಸುರಾತಿ ಮ್ಹಳ್ಳ್ಯಾ ಬರಿ ಕರ‍್ತಾಲೆ. ಆತಾಂ ತಾಚೊ ಸಾಂಬಾಳ್ ತರ್ಯ್ ಕಿತ್ಲೊ ? ಪೆಂಟೆಂತ್ ಪೊಸ್ಟ್ ಆಫಿಸಾಂತ್ ಝಡ್ಚ್ಯಾ ಚೆಡ್ಯಾಕ್ ಕಾಂಯ್ ತಾಚ್ಯಾಕೀ ಚಡ್ ಮೆಳ್ತಾ ಆಸ್ತಲೊ… ಪುಣ್, ಮಿರ‍್ಣ್ಯಾಮ್ ಮಾತ್ರ್ ಕಿತೆಂಚ್ಚ್ ಉಲಯಿಲ್ಲೊ ನಾ.
ತಾಚೆ ಭುರ‍್ಗೆ ಶಿಕ್‌ಲ್ಲೆ. ಇಂಜಿನಿಯರಿಂಗ್ ಕರ್ನ್ ಎಕ್ಲೊ ಪರ‍್ಧೆಶಾಕ್ ಗೆಲ್ಲೊ ತರ್ ಆನ್ಯೆಕ್ಲೊ ಆಖ್ರೆಚೆಂ ವರಸ್ ಶಿಕೊನ್ ಆಸ್ಲ್ಲೊ. ಪುತಾಂಕ್ ಇತ್ಲೆಂ ಶಿಕಯ್ಜಾಯ್ ತರ್ ಹಾಚ್ಯಾಲಾಗಿಂ ಪಯ್ಶೆ ಖಂಚೆ? ಲೋಕ್ ಉಲಯ್ತಾಲೊ ಆನಿ ಕಾಣಿಕಾಚ್ಯಾ ವಾಟ್ಲೆಕ್ ಕಿತ್ಲ್ಯಾ ಜಣಾಂನಿ ಬೋಟ್ ಜೊಕ್‌ಲ್ಲೆಂ ನಾ? ಭಿಸ್ಪಾಚಿ ಕುಮಕ್ ಯೆತಾ ಮ್ಹಣ್ ಕಿತ್ಲೆ ಜಣ್ ಉಲಯ್ನಾತ್‌ಲ್ಲೆ? ಪುಣ್, ಮಿರೊಣ್ ಕಿತೆಂಚ್ಚ್ ಜಾಯ್ನಾತ್‌ಲ್ಲ್ಯಾ ಬರಿಚ್ಚ್ ಜಿಯೆಲ್ಲೊ. ಸುಖಾನ್ ಜಿಯೆಲ್ಲೊ…
“ಆಮ್ಕಾಂ ಆತಾಂ ಮಿರ‍್ನ್ಯಾಮ್ ಜಾಯ್…” ವಿಗಾರ್ ಉಬ್ಯಾ ರಾವೊನ್ ಉಲಯ್ಲೊ. “ಆಮ್ಚ್ಯಾ ಭಿತರ್, ಹ್ಯಾ ಫಿರ‍್ಗಜೆಂತ್ ಕೋಣ್‌ಂಯ್ ಆಸಾ…”
ಮಿರ‍್ಣಿಚೆಂ ಕಾಮ್ ಕರುಂಕ್ ಕೋಣ್ ಆಸಾ ? ಇಗರ‍್ಜೆ ವಾಡ್ಯಾಚೊ ಅಬುಟ್ ಪಾಯ್ಸ್ ಜಾಯ್ತ್. ಪುಣ್ ದೊನ್ಪಾರಾಂಚಿ ಆನಿ ಸಾಂಜೆಚಿ ಘಾಂಟ್ ಮಾರುಂಕ್ ಜಾಂವ್ಚಿ ನಾ. ತಾಕಾ ಗಾದೆ ಬೆಸಾಯ್ ಆಸಾ. ದುಕ್ರಾಂಚೆ ಫಾರ‍್ಮ್ ಆಸಾ. ರುಜಾರ್ ಮೆಂದೊಸಾಕ್ ಗಿಮಾಂತ್ ಜಾಯ್ತ್ ಪುಣ್, ಪಾವ್ಸಾಂತ್ ಶೆಳಿಚಿ ಪೊವ್ಲಿಚ್ಚ್ ತೊ. ಟೀಚರ್ ಸೆಲ್ಲಿಚೊ ನೊವ್ರೊ ಜೋನ್ ಪಾಯ್ಸ್ ಜಾಯ್ತ್ ಮ್ಹಳ್ಯಾರ್ ತಾಕಾ ಪಿಯೆಂವ್ಚಿ ಸವಯ್ ಆಸಾ. ಜುಜೆ ಮೊರಾಸ್ ಜಾಯ್ತ್ ಮ್ಹಳ್ಯಾರ್ ಹಫ್ತ್ಯಾ ಮಧೆಂ ಕೋಣ್‌ಂಯ್ ಸರ್ಲೊ ತರ್ ತಾಕಾ ಹಿತ್ಲಾಚೆಂ ಕಾಮ್ ಸೊಡ್ನ್ ಯೇಂವ್ಕ್ ಜಾಂವ್ಚೆಂಚ್ಚ್ ನಾ.
ಆನಿಕ್ಯ್ ಸಬಾರಾಂಚಿ ನಾಂವಾಂ ಮುಖಾರ್ ಆಯ್ಲಿಂ. ಪುಣ್ ಎಕ್ಲೊಯ್ ಸಮಾಕಟ್ಟ್ ಮಿರ‍್ಣಿಚ್ಯಾ ಕಾಮಾಕ್ ಜಾಲೆಂಚ್ಚ್ ನಾ… ಕೊಣ್ಂಯ್ ಮುಖಾರ್ ಆಯ್ಲೆಚ್ಚ್ ನಾಂತ್…
ಫಿರ‍್ಗಜೆನ್ ದಿಂವ್ಚ್ಯಾ ಬಿಕಾಡ್ಡ್ಯಾ ಸಾಂಬಾಳಾಕ್ ತರ‍್ನಾಟೆ ಬಿಲ್ಕುಲ್ ಯೆಂವ್ಚೆ ನಾಂತ್ ಮ್ಹಣ್ ಸರ‍್ವಾಂನಿ ಸಾಂಗ್ಲೆಂಚ್ಚ್…
ಎಕಾ ಘಂಟ್ಯಾಚಿ ಚರ‍್ಚಾ ಆನಿ ತರ‍್ಕ್….
ಪುಣ್, ಫಿರ‍್ಗಜೆಂತ್ ಮಿರ‍್ನ್ಯಾಮ್ ಮೆಳ್ಳೊಚ್ಚ್ ನಾ…
ಜಮಾತ್ ಆಕೇರ್ ಜಾಲಿ…
***
ಎಕಾ ಮಹಿನ್ಯಾನ್ ವಿಗಾರಾನ್ ಪರತ್ ಫಿರ‍್ಗಜ್‌ಗಾರಾಂಚಿ ಜಮಾತ್ ಆಪಯ್ಲಿ.
ಫಿರ‍್ಗಜೆಂತ್ಲೊ ಲೋಕ್ ಮಿಸಾಕ್ ಆಯಿಲ್ಲೊ ಪುಣ್ ಜಮಾತೆಂತ್ ಕೊಣ್‌ಚ್ ನಾತ್ಲ್ಲಿಂ.
ಆಸ್ಲ್ಲ್ಯಾ ಚಾರ್ ಮಾಂಡ್ಡ್ಯಾಂಲಾಗಿಂ ವಿಗಾರ್ ಉಲಯ್ಲೊ…
ಸುರ‍್ವಿಲ್ಲೆಂ ಮಾಗ್ಣೆಂ ಜಾತಚ್ಚ್ ವಿಗಾರಾನ್ ಸಾಂಗ್ಲೆಂ. ” ಆಮ್ಕಾಂ ಮಿರ‍್ನ್ಯಾಮ್ ಜಾಯ್ ಆನಿ ಆಮ್ಚ್ಯಾ ಫಿರ‍್ಗಜೆಂತ್ ಎಕ್ಲೊ ಸಯ್ತ್ ಮುಕಾರ್ ಯೇನಾ… ಹಾಂವೆ ಹರ‍್ಯೇಕಾ ಕುಟ್ಮಾಕ್ ಫೋನ್ ಕರ್ನ್ ವಿಚಾರ‍್ಲೆಂ ಆನಿ ಹರ್‌ಎಕ್ಲ್ಯಾಚಿ ಎಕೇಕ್ ಕಥಾ… ತರ್… ತರ್ ಮಿರ‍್ಣಿ ನಾಸ್ತಾನಾ ಇಗರ‍್ಜ್ ಚಲ್ತಾ…? ಚಲಾನಾ…”
ಆಸ್ಲ್ಲೆ ಚಾರ್ ಜಣ್ ಥಂಡ್ಚ್ಚ್ ಆಸ್ಲ್ಲೆ…
“ಆತಾಂ ಮಿರ‍್ಣ್ಯಾಮಾಚಿ ಬಂದೊ‌ಬಸ್ತ್ ಜಾಲ್ಯಾ… ಆಜ್ ಸಕಾಳಿಂಚ್ಯಾ ಮಿಸಾಕ್ ಜಾಲ್ಲಿ ಘಾಂಟ್ ತುಮ್ಕಾಂ ಆಯ್ಕಾಲ್ಲಿಮೂ ? ಸಾರ‍್ಕಿ ಜಾಲ್ಯಾ ನ್ಹಯ್ …? ಬೀದರ‍್ಚೆಂ ನವೆಂ ಕ್ರಿಸ್ತಾಂವ್ ಕುಟಾಮ್ ಮೆಳ್ಳಾಂ… ನವೀನ್ ಕುಟ್ಟಿ ಆನಿ ತಾಚಿ ಬಾಯ್ಲ್ ಜ್ಯೋತಿ… ಯೆದೊಳ್ ತಾಂಕಾ ದೊಗಾಂ ಭುರ್ಗಿಂ ಆಸಾತ್… ಮಿರ‍್ಣ್ಯಾಮಾಚ್ಯಾ ಘರಾ ದೆಗೆನ್‌‌ಚ್ ಕಾಲ್ದ್ಯಾ ಎಕ್ರ್ಯಾ ಜಾಗ್ಯಾರ್ ಲ್ಹಾನ್ ಘರ್ ಬಾಂಧುನ್ ತಾಂಕಾ ರಾವೊಂಕ್ ದಿಂವ್ಚೆಂ ಮ್ಹಣ್ ಆಮಿಂ ಚಿಂತ್ಲಾಂ ಆನಿ ಭಿಸ್ಪಾನ್ ಜಾಯ್ತ್ ಮ್ಹಳಾಂ……. ಘಾಂಟ್ ಮಾರುಂಕ್ ಮಾತ್ರ್ ನ್ಹಯ್…. ಇಗರ‍್ಜೆಚೆಂ ಸರ್ವ್ ಕಾಮ್ ತೆ ಕರ‍್ತಾತ್…. ಬೊಟ್ಲೆರಾಚೆಂ ಕಾಮ್ ತಾಂಚ್ಯಾಚ್ಚ್ ಕರ‍್ನಾ ಕರಂವ್ಚೆಂ…. ಸಾಂಬಾಳ್ಯ್ ವಿಶೇಸ್ ನಾ…”
ಆಸ್ಲ್ಲೊ ಲೋಕ್ ಥಂಡ್ ಜಾಲೊ….
ಹಜಾರ್ ಫಿರ‍್ಗಜ್‌ಗಾರಾಂ ಮಧೆಂ ಎಕ್ಲೊ ಮಿರ‍್ಣ್ಯಾಮ್ ಜಾವ್ನ್ ಕಾಮ್ ಕರುಂಕ್ ಮೆಳೊಂಕ್ ನಾ ಮ್ಹಣ್ ತಾಂಕಾ ವಿರಾರಾಯ್ ಜಾಲ್ಲಿ ತೆಂ ಖರೆಂ…
ಪುಣ್, ಸತ್ ಗಜಾಲ್ ಲಿಪಂವ್ಕ್ ಜಾತಾ… ಮಿರ‍್ಣ್ಯಾಮ್ ಆಸ್ತಾನಾ ಉಲಂವ್ಕ್ ಸಕ್ಕಡ್ ಆಸಾತ್ ಪುಣ್, ಕಾಮ್ ಕರುಂಕ್ ನ್ಹಯ್…
ವಿಗಾರಾನ್ ಅಂತಿಮ್ ಬೆಸಾಂವ್ ದಿಲೆಂ…
ತೆದ್ನಾಂ, ಭುರ‍್ಗ್ಯಾಂಚ್ಯಾ ಮಿಸಾಚಿ ಘಾಂಟ್ ಜಾಲ್ಲಿ ಆಯ್ಕಾಲಿ…
ವಿಗಾರಾನ್ ಕಿತೆಂಚ್ಚ್ ಸಾಂಗ್ಚ್ಯಾ ಪಯ್ಲೆಂ, ಜಮ್‌ಲ್ಲೆ ಫಿರ‍್ಗಜ್‌ಗಾರ್ ಪುಸ್ಪುಸ್ಲೆ…
“ನವೀನ್ ಕುಟ್ಟಿ… ನವೊ ಮಿರ‍್ಣ್ಯಾಮ್…”
► ಕ್ಲೆರೆನ್ಸ್, ಕೈಕಂಬ
]]>
ಥೊಡ್ಯಾ ದಿಸಾ ಪಯ್ಲೆಂ, ಮ್ಹಜೊ ಸಹ-ವಾವ್ರಾಡಿ, ಕೊಂಕ್ಣೆಂತ್ಲೊ ಫಾಂಕಿವಂತ್ ಕವಿ, ಹುಮೆದ್ವಂತ್ ವಾವ್ರಾಡಿ ವಿಲ್ಸನ್, ಕಿನ್ನಿಗೋಳಿ ಹಾಚ್ಯಾ ಲಾಗಿಂ ಕೊಂಕ್ಣಿ ಸಾಹಿತ್ಯಾ ವಿಶಿಂ ಉಲವ್ನ್ ಆಸ್ತಾನಾ, ಮ್ಹಜ್ಯಾ ಲಾಗಿಂ ಆಸ್ಲ್ಲೊ ಅಂಜೆಲಸ್ ಪ್ರಾನ್ಸಿಸ್ ಮಾಫೆ ಹಾಣಿಂ ಘಡ್‌ಲ್ಲೊ 1883 ವರ್ಸಾಂತ್ ಛಾಪ್‌ಲ್ಲೊ ಇಂಗ್ಲೀಷ್ – ಕೊಂಕಣಿ ಸಬ್ದಾವಳ್ ಗ್ರಂಥ್ ತಾಕಾ ದಾಕಯ್ಲೊ. ತೊ ಗ್ರಂಥ್ ಮ್ಹಜ್ಯಾ ಪಪ್ಪಾಚ್ಯಾ ಕಾಳಾಚೊ ಆನಿ ಇತ್ಲೊ ಪರ್ನೊ ಜಾವ್ನ್ ಮ್ಹಜ್ಯಾ ಲಾಗಿಂ ಆಸ್ಲ್ಲೊ ಪಳವ್ನ್ ತಾಕಾ ಭಾರಿಚ್ಚ್ ಖುಶಿ ಜಾಲಿ ಆನಿ ಇಲ್ಲೆಶೆಂ ಆಜಾಪ್‌ಯ್ ಜಾಲೆಂ ಮ್ಹಣ್ಯೆತ್. ಪಪ್ಪ ವಿಶ್ಯಾಂತ್ ಚಡ್ತಿಕ್ ಗಜಾಲಿ ತಾಣೆ ವಿಚಾರ್ಲ್ಯೊ. ಥೊಡ್ಯೊ ಗಜಾಲಿ ಸಾಂಗ್ತಾನಾ, ತಾಕಾ ಪಪ್ಪ ವಿಶ್ಯಾಂತ್ ಚಡ್ತಿಕ್ ಆತುರಾಯ್ ಜಾಲಿ. ಪ್ರತ್ಯೇಕ್ ಜಾವ್ನ್ ಪಪ್ಪಾಚ್ಯಾ ಗ್ರಂಥಾಲಯಾವಿಶಿಂ ಆನಿ ಫುಲಾಂ ಝಡಾಂ ವಿಶಿಂ ತಾಕಾ ಭಾರಿಚ್ ಆತುರಾಯ್ ಜಾಲ್ಲಿ ಮ್ಹಣ್ಯೆತ್. ತೊ ಮ್ಹಣಾಲೊ – ತುಮ್ಚ್ಯಾ ಪಪ್ಪ ವಿಶ್ಯಾಂತ್ ಆಯ್ಕೊನ್ ಭಾರಿಚ್ ಖುಶಿ ಜಾಲಿ. ತಾಂಚ್ಯಾ ವಿಶ್ಯಾಂತ್ ತುಮಿ ಲೇಖನ್ ಯಾ ಬೂಕ್‌ಚ್ಚ್ ಬರವ್ಯೆತ್ ಆಸ್ಲ್ಲೆಂ. ವಿಲ್ಸನಾಚ್ಯಾ ಉತ್ರಾಂನಿ ಮ್ಹಜ್ಯಾ ಥಂಯ್ ಏಕಾ ರಿತಿಚೆಂ ಪ್ರೇರಣ್ ಜಳೊನ್ ಆಯಿಲ್ಲೆಂ ಆನಿ ತ್ಯಾ ವರ್ವಿಂಚ್ ಜಾವ್ಯೆತ್ ಹೆಂ ಲೇಖನ್ ಬರಂವ್ಕ್ ಬಸ್ಲೊಂ. ಅಂತರಾಷ್ಟ್ರೀಯ್ ಬಾಪಾಯಾಂಚೊ ದೀಸ್ ಲಾಗಿಂ ಯೆತಾನಾ ಎಕಾ ಸಾದ್ಯಾ ಆನಿ ಭಾರಿಚ್ ನಿತಳ್ ಮನಾಚ್ಯಾ ಬಾಪಯ್ ವಿಶ್ಯಾಂತ್ ಬರವ್ಯಾಂ ಆನಿ ‘ಕಿಟಾಳ್’ ವಾಚ್ಪ್ಯಾಂಕ್ ಪ್ರಸ್ತುತ್ ಕರ್ಯಾಂ ಮ್ಹಣ್ ಚಿಂತ್ಲೆಂ.
ಆಮ್ಚೊ ಪಪ್ಪ ಜಾಯ್ತ್ಯಾ ಕಾರ‍್ಬಾರಾಂಚೊ ಮನಿಸ್ ಬಿಲ್ಕುಲ್ ನಯ್ ಯಾ ಸಮಾಜೆಂತ್ ಕ್ರಾಂತಿ ಉಬ್ಜಯಿಲ್ಲೊಯ್ ನಯ್. ಬಳ್ವಂತ್ ಯಾ ಲೊಕಾ ಮೊಗಾಳ್ ಸಾಹಿತ್ಯ್ ರಚುನ್ ಯಾ ಪ್ರೆರಣಾಚೆ ಪ್ರಸಂಗ್ ದೀವ್ನ್ ಪಾಮಾಧ್ ಜಾಲ್ಲೊ ವ್ಯಕ್ತಿಯ್ ನಯ್. ಫಿರ‍್ಗಜೆಚೊ ಉಪಾಧ್ಯಕ್ಷ್ ಯಾ ವಾಡ್ಯಾಚೊ ಗುರ‍್ಕಾರ್ ಜಾವ್ನ್ ಸಮಾಜ್ ಸೆವಾ ದಿಲ್ಲೊ ಸಂಪನ್ಮೂಲ್ ವ್ಯಕ್ತಿಯ್ ನಯ್ ಬಗರ್ ಏಕ್ ಸಾದೊ ಶಿಕ್ಷಕ್ ಜಾವ್ನ್ ಜಾಯ್ತ್ಯಾಂಕ್, ಜಾಯ್ತ್ಯಾ ಭುರ‍್ಗ್ಯಾಂಕ್, ಜಾತ್ ಭೇದ್ ನಾಸ್ತಾನಾ ತಾಂಚ್ಯಾ ಜಿವಿತಾಂತ್ ಏಕ್ ಮಾರ್ಗದರ್ಶಕ್ ಜಾಲ್ಲೊ ಸಾದೊ ಮನಿಸ್ ಜಾವ್ನಾಸಾ. ತಾಚ್ಯಾ ಜಿವಿತಾಂತ್ ಎಕಾನ್‌ ಏಕ್ ಧರ‍್ಮಾಕ್, ಧಾರ‍್ಮಿಕ್ ಚಿಂತ್ಪಾಕ್ ಚಡ್ ಅದ್ಯತಾ ದೀಂವ್ಕ್ ನಾತ್ಲ್ಲಿ ತರ್ಯ್ ಗಾಂಧಿವಾದ್‌ಚ್ ತಾಚ್ಯಾ ಆದರ್ಶ‌‌ಪಣಾಕ್ ಸಾಕ್ಸ್ ಜಾಲೊ. ಭಾರಿಚ್ಚ್ ಸಾದೆಂ ಜೀವನ್ ಆನಿ ಬಿಲ್ಕುಲ್ ಹೆರಾಂಚ್ಯಾ ಮ್ಹಳ್ಯಾರ್ ಬಾಯ್ಲ್ಯಾ ಲೊಕಾಚ್ಯಾ ಜಿವಿತಾಂತ್ ಮೆತೆರ್ ಜಾಯ್ನಾಸ್ತಾನಾ ಸುಗಮಾಯೆನ್ ಜಿಯೆಲ್ಲೆಂ ಜಿವಿತ್ ತಾಚೆಂ ಜಾವ್ನಾಸ್ಲ್ಲೆಂ.
ಆಮ್ಚ್ಯಾ ಪಪ್ಪ ವಿಶ್ಯಾಂತ್ಲೆಂ ಲೇಖನ್ ವಾಚ್ಪ್ಯಾಂಕ್ ರುಚ್ತೆಲೆಂ ಮ್ಹಣ್ ಹಾಂವ್ ಭರ್ವಸ್ತಾಂ.
► ಲೇಖಕ್
ಆಮ್ಚ್ಯಾ ಪಪ್ಪಾಚೆಂ ಪುರ್ತೆಂ ನಾಂವ್ – ಡೆನಿಸ್ ಪ್ರಾನ್ಸಿಸ್ ಪೀಂತ್. ಲಾಂಬ್ ಆನಿ ಬಾರಿಕ್ ಜಿವಾಚೊ ಮನಿಸ್ ತೊ. ಚುರುಕ್ ಮತಿಚೊ ಸುಡ್ಸುಡಿತ್ ಕಾಲೆತಿಚೊ. ಆಪ್ಣಾಕ್ ಜಾಯ್ ಜಾಲ್ಲೆಂ, ಜಿವಾಕ್ ಬರೆಂ ಮ್ಹಣ್ ದಿಸ್‌ಲ್ಲೆಂ ಸರ್ವ್ ಖಾಣ್ ಹರ‍್ಯೆಕ್ ನಿಯಮಿತ್ ರಿತಿನ್ ಖಾಂವ್ಚೊ ಮನಿಸ್. 1907 ವರ್ಸಾಂತ್ ದಸೆಂಬರ್ ಪಂದ್ರಾ ತಾರಿಕೆರ್ ದೆವಾಧಿನ್ ಜುವಾಂವ್ ಬಾಪ್ಟಿಸ್ಟ್ ಪಿಂಟೊ ಆನಿ ದೆವಾಧಿನ್ ಪ್ಲೊರಿನ್ ನೊರೊನ್ಹಾ ಹಾಂಚೊ ಮಾಲ್ಘಡೊ ಆನಿ ಎಕ್ಲೊಚ್ ಪೂತ್ ಜಾವ್ನ್ ತೊ ಜಲ್ಮಾಲ್ಲೊ. ತ್ಯಾ ವೆಳಾರ್ ಎಕ್ಲೊಚ್ ಪೂತ್ ಎಕಾ ಕಾಜಾರಿ ಜೊಡ್ಯಾಕ್ ಆಸ್ಚೆಂ ಮ್ಹಳ್ಯಾರ್ ಭಾರಿಚ್ ಅಪ್ರೂಪ್ ತರ್ಯ್ ಪಪ್ಪ ಎಕ್ಲೊಚ್.
ಎಕ್ಕಾರ್ ತಾಚೊ ಜಲ್ಮಾ ಗಾಂವ್. 1937 ವರ್ಸಾಂತ್ ಎಕ್ಕಾರ್ ಸಾಂಡುನ್ ಕೈಕಂಬ ಪದ್ವಾರ್ ಇಗರ‍್ಜೆ ಲಾಗ್ಸಾರ್ ಯೇವ್ನ್ ಥಂಯ್ಸರ್ ಲ್ಹಾನ್ ಜಾಗೊ ಮೊಲಾಕ್ ಘೆವ್ನ್ ವಸ್ತಿ ಕರುಂಕ್ ಸುರು ಕೆಲ್ಲೆಂ. ಜಾಗೊ ಕಾಣ್ಘೆತಾನಾ ಆಸ್ಲ್ಲೆಂ ಪಯ್ಲೆಂಚೆಂಚ್ಚ್ ಘರ್ ಪಪ್ಪಾನ್ ಆನಿ ಪಪ್ಪಾಚ್ಯಾ ಮಾಂಯ್ನ್ ಆಪ್ಲೆಂ ಬಿಡಾರ್ ಜಾವ್ನ್ ವಾಪಾರ‍್ಲೆಂ. ಸಾಂತ್ ಆಲೋಶಿಯಸ್ ಕೊಲೆಜಿಂತ್ ಇಂಟರ್ ಶಿಕಾಪ್ (ಆತಾಂಚಿ ಪಿ ಯು ಸಿ) ಕೆಲ್ಯಾ ಉಪ್ರಾಂತ್ ತಾಣೆ ಶಿಕ್ಷಕ್ ಜಾವ್ನ್ ವೃತ್ತಿ ಧರ‍್ಲಿ.
ಶಿಕಪ್ ಜಾಲ್ಯಾ ಉಪ್ರಾಂತ್ ಥೊಡೊ ತೇಂಪ್ ಬೊಂಬಯಾಂತ್ ತೊ ಜಿಯೆಲ್ಲೊ. ಥಂಯ್ಸರ್ ಕಸಲೆಂ ಕಾಮ್ ಕೆಲ್ಲೆಂ ತ್ಯಾ ವಿಶಿಂ ಪಪ್ಪಾನ್ ಆಮ್ಕಾಂ ಕಳಯಿಲ್ಲೆಂ ನಾ ಯಾ ಆಮಿಂಯ್ ವಿಚಾರ್ಲ್ಲೆಂ ನಾ. ಬೊಂಬಯ್ಚ್ಯಾ ವಿವಿಧ್ ಜಾಗ್ಯಾಂಚಿ ಆನಿ ಪರ‍್ನ್ಯಾ ಬಾಂದ್ಪಾಚಿಂ ವಳಕ್ ತಾಕಾ ಬರಿಚ್ಚ್ ಆಸ್ಲ್ಲಿ. ನಿವೃತ್ತ್ ಜಾಲ್ಲ್ಯಾ ಉಪ್ರಾಂತ್ ಬೊಂಬಯ್ ಭೆಟ್ ಕರ‍್ಚಿ ಭಾರಿಚ್ಚ್ ಆಶಾ ತಾಕಾ ಆಸ್ಲ್ಲಿ ಆನಿ ತ್ಯಾ ಖಾತಿರ್ ಮ್ಹಜ್ಯಾ ಭಯ್ಣಿನ್, ಹಿಲ್ಡಾ ಬಾಯೆನ್ ತಾಕಾ ಬೊಂಬಯ್ ಆಪವ್ನ್ ವರ್ನ್ ಸಗ್ಳ್ಯಾ ಶ್ಹೆರಾಂತ್ ಭಂವ್ಡಾಯಿಲ್ಲೆಂ. ಸರ್ವ್ ಜಾಗ್ಯಾಂನಿ ಪಯ್ಲೆಂಚೊ ಉಡಾಸ್ ಕಾಡ್ನ್ ತೊ ಖುಶ್ ಜಾಲ್ಲೊ.
ಕೈಕಂಬ ಯೇವ್ನ್ ರಾವೊಂಕ್ ಸುರು ಕೆಲ್ಯಾ ದೋನ್ ವರ್ಸಾಂ ಉಪ್ರಾಂತ್ ಮ್ಹಣ್ಜೆ 1939 ಇಸ್ವೆಂತ್ ಪೆಭ್ರೆರ್ ಸಾತ್ ತಾರಿಕೆರ್ ತಾಚೆಂ ಲಗ್ನ್ ಕಾವೂರ‍್ಚ್ಯಾ ಆಲಿಸ್ ಪಿರೇರ್ ಹಿಚ್ಯಾ ಲಾಗಿಂ, ಮ್ಹಳ್ಯಾರ್ ಮ್ಹಜ್ಯಾ ಮಮ್ಮಲಾಗಿಂ ಜಾಲ್ಲೆಂ. ರೆಸ್ಪೆರ್ ಬೊಂದೆಲ್ ಇಗರ‍್ಜಿಂತ್ ಜಾಲ್ಲೆಂ. ರೆಸ್ಪೆರ್ ಜಾವ್ನ್ ಕಾಜಾರಾಚಿ ಸೆರೆಮನಿ ಜಾಲ್ಯಾ ಉಪ್ರಾಂತ್ ದುಸ್ರ್ಯಾ ದಿಸಾ ಹೊಕ್ಲೆಕ್ ಪಾಂವ್ಕ್ ಪಾಯ್-ವಾಟೆನ್ ಚಲೊನ್‌ಂಚ್ಚ್ ತಿಂ, ಹೊಕಲ್ ನೊವ್ರೊ ಆನಿ ದೊನಿಂ ಪಾಡ್ತಿಚಿಂ ಸಯ್ರಿಂ ಕಾವೂರ್ ಥಾವ್ನ್ ಕೈಕಂಬ ಪದ್ವಾ ಮ್ಹಣಾಸರ್ ಆಯಿಲ್ಲಿಂ ಕಂಯ್. ಗುರ‍್ಪುರ‍್ಚಿ ಫಾಲ್ಘುಣಿ ನ್ಹಂಯ್ ಉತರ‍್ತಾನಾ ಹೊಕ್ಲೆಚೆ, ಮ್ಹಜ್ಯಾ ಮಮ್ಮಚೆ, ಪಾಯ್ ಉದ್ಕಾಂತ್ ಪಡೊಂಕ್ ನಜೊ ಮ್ಹಣ್ ಆಮ್ಚ್ಯಾ ಆಬಾನ್ ತಿಕಾ ಉಕ್ಲುನ್ ಸಗ್ಳಿ ನ್ಹಂಯ್ ಉತ್ರಾಲ್ಲೊ ಕಂಯ್.
ಪಪ್ಪ- ಮಮ್ಮಕ್ ಆಮಿ ಪಾಂಚ್ ಜಣಾಂ ಭುರ್ಗಿಂ – ಜೆರಾರ್ಡ್ ಜೊಸೆಫ್, ಲಿಜಿ ಹೆಲೆನ್, ಗ್ರೇಸಿ ಲಿಲ್ಲಿ, ಹಿಲ್ಡಾ ಎಲಿಜಾಬೆತ್ ಆನಿ ಹಾಂವ್ ಕ್ಲೆರೆನ್ಸ್ ಡೊನಾಲ್ಡ್.
ಕುಟ್ಮಾಚಿ ತಸ್ವೀರ್
ಪಪ್ಪ ವೃತ್ತೆನ್ ಶಿಕ್ಷಕ್. ಬಜ್ಪ್ಯಾಂ ಇಗರ‍್ಜೆ ಇಸ್ಕೊಲಾಂತ್ ತಾಕಾ ಶಿಕ್ಷಕ್ ಜಾವ್ನ್ ಕಾಮ್ ಮೆಳ್ಲ್ಲೆಂ ತರ್ಯ್ ಥಂಯ್ಸರ್ ಆಮ್ಚ್ಯಾಚ್ಚ್ ಧಾರ‍್ಮಿಕ್ ಮುಖೆಲ್ಯಾಂ ಸವೆಂ, ತಾಂಚ್ಯಾ ಆಡಳ್ತ್ಯಾಂತ್ ಕಾಮ್ ಕರುಂಕ್ ಖುಶಿ ವರಾನಾಸ್ತಾನಾ ಪಯ್ಸಿಲ್ಯಾ ನಿಡ್ಡೋಡಿ ಶ್ರೀ ಸತ್ಯನಾರಾಯಣ ಪ್ರಾಥಮಿಕ್ ಇಸ್ಕಾಲಾಚೊ ಶಿಕ್ಷಕ್ ಜಾವ್ನ್ ಸೆರ್ವೊನ್, ಮುಖೆಲ್ ಮೆಸ್ತ್ರಿ ಜಾವ್ನ್ ವಾವುರ್ನ್ ತೊ ನಿವೃತ್ತ್ ಜಾಲ್ಲೊ. ಮುಖೆಲ್ ಮೆಸ್ತ್ರಿ ಜಾವ್ನಾಸೊನ್ ಭುರ‍್ಗ್ಯಾಂಕ್ ಗಣಿತ್ ಪಾಠ್ ತೊ ಶಿಕಯ್ತಾಲೊ. ಕಿನ್ನಿಗೋಳಿ ವಟಾರಾಚ್ಯಾ ಶಿಕ್ಷಕ್ ಮಂಡಳೆಚ್ಯಾ ಜಮತೆಚೊ ಕಾರ್ಯದರ್ಶಿ ಜಾವ್ನ್ ಜಾಯ್ತಿಂ ವರ್ಸಾಂ ತಾಣೆ ಸೆವಾ ದಿಲ್ಯಾ.
ಆಮ್ಚ್ಯಾ ಕೈಕಂಬ ಘರಾ ಥಾವ್ನ್ ಗಂಜಿಮಠ ಪೆಂಟೆತ್ಲ್ಯಾನ್ ತಾಚ್ಯಾ ಇಸ್ಕಾಲಾಕ್ ಪಾವೊಂಕ್ ಬಾರಾ ಮಯ್ಲಾಂ ಮ್ಹಳ್ಯಾರ್ ಎಕ್ಣೀಸ್ ಕಿಲೋ ಮೀಟರ್ ತಿತ್ಲಿ ವಾಟ್ ಆಸಾ ತರ್ಯ್ ಹರ‍್ಯೆಕ್ ದೀಸ್ ತೊ ಸಾಯ್ಕಲಾರ್ ಇಸ್ಕೊಲಾಕ್ ವೆತಾಲೊ ಆನಿ ತಸೆಂ ಸಾಂಜೆರ್ ಪಾಟಿಂ ಯೆತಾಲೊ. ಗಿಮಾಂತ್ ತಸೆಂ ಪಾವ್ಸಾಕ್ ತಾಚೆಂ ಇಸ್ಕಾಲಾಕ್ ವೆಚೆಂ ಆನಿ ಪಾಟಿಂ ಯೆಂವ್ಚೆ ಪಯ್ಣ್ ಸದಾಂಚೆಂ ಜಾವ್ನಾಸ್ಲ್ಲೆಂ. ಸಕಾಳಿಂ ಸಾಡೆ ಸಾತ್ ವೊರಾರ್ ಘರಾ ಥಾವ್ನ್ ಪೇಜ್ ಜೇವ್ನ್ ಭಾಯ್ರ್ ಸರ್ಲೊ ತರ್ ರಾತಿಂ ಯೆತಾನಾ ಸಾತ್ ಯಾ ಆಟ್ ಜಾತಾಲಿಂ. ಪಾವ್ಸಿಲ್ಯಾ ದಿಸಾನಿಂ ರಾತಿಂ ಯೆತಾನಾ ನೋವ್ ಸಾಡೆ ನೋವ್ ಜಾಲ್ಲಿಂಯ್ ಆಸ್ತಾಲಿಂ. ಸಕಾಳಿಂ ಇಸ್ಕಾಲಾಕ್ ವೆತಾನಾ ಲ್ಹಾನ್ ಎಕಾ ಬೊತ್ಲಿಂತ್ ಘರಾ ಮಮ್ಮನ್ ತಯರ್ ಕೆಲ್ಲೆಂ ತಾಕ್ ಆನಿ ಕಿತೆಂಯ್ ಇಲ್ಲೆಂ ಗೊಡ್ಶೆಂ ವಾಟೆರ್ ಖಾಂವ್ಚ್ಯಾ ಖಾತಿರ್ ವೊರ‍್ತಾಲೊ. ಪಾಟಿಂ ಯೆತಾನಾ ಗಂಜಿಮಠ ಥಾವ್ನ್ ಬೆಣ್ಣೆ ಬಟ್ಟರ್ ಆಮ್ಕಾಂ ಭುರ‍್ಗ್ಯಾಂ ಖಾತಿರ್ ಹಾಡ್ನ್ ಯೆತಾಲೊ. ಆಮಿ ಬೆಣ್ಣೆ ಬಟ್ಟರಾಂ ಖಾತಿರ್ ರಾಕೊನ್ ರಾವ್ತೆಲ್ಯಾಂವ್. ತೆದ್ನಾಂ, ಪಪ್ಪಾನ್ ಭಾರಿಚ್ಚ್ ಮೊಗಾನ್ ಆನಿ ಶಿಸ್ತೆನ್ ಪೊಸ್ಲ್ಲೊ ಪೆಟೊ ಆಸ್ಲ್ಲೊ. ತಾಕಾ ‘ಪೊಕ್ಸರ್’ ಮ್ಹಣ್ ನಾಂವ್ ಪಪ್ಪಾನ್‌ಂಚ್ ದವರ್‌ಲ್ಲೆಂ. ಸದಾಂಯ್ ಸಾಂಜೆರ್ ಪಪ್ಪಾ ಯೆಂವ್ಚ್ಯಾ ವೆಳಾರ್ ಕಂಪೌಡಾಚ್ಯಾ ಗೇಟಿ ಲಾಗಿಂ ಪಪ್ಪಾಚ್ಯಾ ಯೆಣ್ಯಾಕ್ ಪೊಕ್ಸರ್ ರಾಕೊನ್ ಬಸ್ತಾಲೊ. ಪಪ್ಪ ಆಯ್ಲ್ಯಾ ಉಪ್ರಾಂತ್ ಆಮ್ಕಾಂ ಬೆಣ್ಣೆ ಬಟ್ಟರ್ ದಿಂವ್ಚ್ಯಾ ಪಯ್ಲೆಂ ಪೊಕ್ಸರಾಕ್ ವಾರ‍್ಯಾರ್ ಬೆಣ್ಣೆ ಬಟ್ಟರ್ ಉಡಯ್ಲೊ ತರ್ ತೊ ಬೆಣ್ಣೆ ಬಟ್ಟರ್ ಪೊಕ್ಸರ್ ದರ್ನ್ ಖಾತಾಲೊ. ಬೆಣ್ಣೆ ಬಟ್ಟರ್ ಖೆಲ್ಯಾ ಉಪ್ರಾಂತ್ ಪೊಕ್ಸರ್ ಖುಶೆನ್ ಝಾಲಾಂತ್ ನಾಚ್ತಾಲೊ ತೆಂ ಪಳಂವ್ಚಿ ಮಜಾಚ್ಚ್ ವಿಂಗಡ್.
ಶಿಕ್ಷಕಾಂಚಿ ಜಮಾತ್ ನಿಡ್ಡೊಡಿ – 1951
ಸತ್ಯ ನಾರಾಯಣ ಹಾಯರ್ ಪ್ರೈಮರಿ ಇಸ್ಕೊಲ್ – 1945
ಅಲೊಶಿಯಸ್ ಕೊಲೆಜ್ – 1937
ಹಾಂವ್ ವ್ಹಡ್ ಜಾಲ್ಯಾ ಉಪ್ರಾಂತ್ ಜಾಯ್ತೆ ಪಾವ್ಟಿಂ ತ್ಯಾ ವಾಟೆರ್ ನಿರುಡೆ / ನಿಡ್ಡೋಡಿ ಬಸ್ಸಾರ್ ಗೆಲಾಂ ಆನಿ ಚಿಂತುಕ್‍ಂಯ್ ಪಡ್ಲ್ಲೊಂ – ಪಪ್ಪ ಕಸೊ ಹ್ಯಾ ವಾಟೆರ್ ಹರ‍್ಯೆಕ್ ದೀಸ್ ಸಾಯ್ಕಲಾರ್ ವೆತಾಲೊಗೀ ಮ್ಹಣ್? ಪುಣ್, ಜವಾಬ್ ಮಾತ್ರ್ ಕೆದ್ನಾಂಯ್ ಮೆಳೊಂಕ್ ನಾತ್ಲ್ಲಿ.
ಪಪ್ಪ ಇಸ್ಕಾಲಾಕ್ ವೆಚ್ಯಾ ಕಾಳಾರ್ ಕೈಕಂಬಾಂತ್ ಜೀನ್ಸಾಚ್ಯೊ ಆಂಗ್ಡಿ ಚಡ್ ಜಾವ್ನ್ ನಾತ್‌ಲ್ಲ್ಯೊ ಜಾಲ್ಲ್ಯಾನ್ ಗಂಜಿಮಠಾಂತ್ ಆಸ್ಲ್ಲ್ಯಾ ಕೊಂಕ್ಣ್ಯಾಚ್ಯಾ ಆಂಗ್ಡಿ ಥಾವ್ನ್ ಘರಾಕ್ ಜಾಯ್ ಜಾಲ್ಲೊ ಸಾಮಾನ್ ತಾಣೆ ಹಾಡ್ಚೊ ಆಸ್ಲ್ಲೊ.
ಪಪ್ಪಾಚಿ ಹೋಮ್ ಲೈಬ್ರೆರಿ
ಪಪ್ಪ ವೀಸ್ – ಬಾವೀಸ್ ವರ್ಸಾಂಚೊ ಆಸ್ತಾನಾಂಚ್ಚ್ ತಾಣೆ ತಾಚೊಚ್ಚ್ ಮ್ಹಳ್ಳೊ ಘರ್ಚೊ ಗ್ರಂಥಾಲಯ್ ಆಸಾ ಕೆಲ್ಲೊ. ತಾಕಾ ಮ್ಹಣ್ ಮ್ಹೊರ್ ಆಸಾ ಕೆಲ್ಲಿ. ನೊಂದವ್ಣಿ ಬೂಕ್ ಆಸ್ಲ್ಲೊ ಆನಿ ಹರ‍್ಯೆಕಾ ಬುಕಾಕ್ ಸಂಕೊ ಆಸ್ಲ್ಲೊ. ತ್ಯಾ ಬುಕಾಂಕ್ ಸಂಖ್ಯಾ ಪ್ರಮಾಣೆ ಮಾಂಡುನ್ ದವರ‍್ಚಿ ಮಾಂಡಾವಳ್ ತಾಣೆ ಕೆಲ್ಲಿ. ಪಪ್ಪಾಕ್ ಬೂಕ್ ಮೊಲಾಕ್ ಘೆಂವ್ಚೆಂ ಆನಿ ತೆ ವಾಚ್ಚೆಂ ಮ್ಹಳ್ಯಾರ್ ಭಾರಿಚ್ಚ್ ಪಿಶೆಂ ಆಸ್ಲ್ಲೆಂ. ತಾಚ್ಯಾ ಲೈಬ್ರೆರಿಂತ್ ಶೆಕ್ಸ್‌ಫಿಯರಾ ಥಾವ್ನ್ ಧರ್‌ಲ್ಲೆ ವಿವಿಧ್ ಕಾನಡಿ, ಕೊಂಕ್ಣಿ ಬೂಕ್ ಆಸ್ಲ್ಲೆ.
ಇಂಗ್ಲೀಷ್ – ಕೊಂಕಣಿ ಸಬ್ದಾವಳ್ – 1883 ಛಾಪೊ
ಇಂಪ್ರಿಮಾತೊರ್
ಇಂಗ್ಲಿಷ್ ಬೂಕ್
ಗ್ರಂಥಾಲಯ್ ಮ್ಹೊರ್ ಆನಿ ಇಂಡೆಕ್ಸ್
ಇಂಗ್ಲೀಷ್ – ಕೊಂಕಣಿ ಸಬ್ದಾವಳ್, ಇಂಗ್ಲಿಷ್ – ತುಳು ಸಬ್ದಾವಳ್ ಆಸ್ಲ್ಲೆ. ವಿವಿಧ್ ರಜಿಸ್ತ್ರ್ಯಾಂಕ್ ತಾಣೆಂ ಬೂಕಾಂನಿ ಚಿಡ್ಕಾವ್ನ್ ತಾಚೆ ಅಲ್ಬಮ್ ಕೆಲ್ಲೆ. ನಿವೃತ್ತ್ ಜಾಲ್ಯಾ ಉಪ್ರಾಂತ್ ತಾಣೆ ಆಮ್ಚ್ಯಾ ಆಂಗ್ಡಿಚ್ಯಾ ಬಾಂದ್ಪಾಂತ್ ಭುರ‍್ಗ್ಯಾಂಚ್ಯಾ ಖಾಣಾಚಿ ಲ್ಹಾನ್ ಆಂಗಡ್ ಸುರು ಕೆಲ್ಲಿ ಆನಿ ಥಂಯ್ಸರ್ ಬಸೊನ್ ಆಸ್ತಾನಾ, ಏಕೇಕ್‌ಚ್ಚ್ ಬೂಕ್ ತೊ ವಾಚ್ತಾಲೊ ತೆಂ ಹಾಂವೆಂ ಪಳಯ್ಲಾಂ. ತೆದಾಳಾ ತರ್ಯ್ ಶೆಕ್ಸ್‌ಫಿಯರ್, ಮಿಲ್ಟನ್ ಯಾ ಡಿ. ಎಚ್. ಲೊರೆನ್ಸಾ ವಿಶ್ಯಾಂತ್ ಆನಿ ತಾಂಚ್ಯಾ ಸಾಹಿತ್ಯಾ ವಿಶ್ಯಾಂತ್ ವಿಚಾರ‍್ಲ್ಯಾರ್ ಸವಿಸ್ತಾರ್ ಜಾವ್ನ್ ತೊ ಸಾಂಗ್ತಾಲೊ.
ರಾಜಕೀಯ್ ವಿಷಯಾಂಚೆರ್ ತಾಕಾ ಜಾಯ್ತಿ ಅಭಿರೂಚ್ ಆಸ್ಲ್ಲಿ. ಕೊಂಗ್ರೆಸಾಚೊ ಮೋಗ್ ತಾಚ್ಯಾ ರಗ್ತಾಂತ್‌ಚ್ಚ್ ಆಸ್ಲ್ಲೊ ಮ್ಹಣ್ಯೆತ್. ಆರ್. ಕೆ. ಕರಾಂಜಿಯಾಚೆಂ ‘ಬ್ಲಿಟ್ಜ್’ ಇಂಗ್ಲೀಷ್ ಹಫ್ಯಾಳೆಂ ತೊ ಚಡಾವತ್ ಜಾವ್ನ್ ಹಾಡ್ತಾಲೊ. ತಾಂತು ಭಾರತಾಚ್ಯೊ ರಾಜಕೀಯ್ ಗಜಾಲಿ ಜಾಯ್ತ್ಯೊ ಆಸ್ಲ್ಲ್ಯೊ ಜಾಲ್ಲ್ಯಾನ್ ಪಪ್ಪಾಕ್ ತೆಂ ಹಫ್ಯಾಳೆಂ ಭಾರಿಚ್ಚ್ ಪಸಂದಾಯೆಚೆಂ. The Illustrated Weekly of India ಹಫ್ತ್ಯಾಳೆಂಯ್ ತಾಚ್ಯಾ ಪಸಂದಾಯೆಚೆಂ ಜಾಲ್ಲೆಂ ತರ್ಯ್ ತೊ ತೆಂ ಚಡಾವತ್ ಹಾಡಿನಾತ್‌ಲ್ಲೊ ಕಿತ್ಯಾಕ್ ತೆಂ ಮ್ಹಾರಗ್ ಮ್ಹಣ್ ತಾಚೆಂ ಚಿಂತಾಪ್ ಆಸ್ಲ್ಲೆಂ ಜಾಂವ್ಕ್ ಪುರೊ.
ನವಭಾರತ ಕನ್ನಡ ದಿಸಾಳೆಂ ತೊ ಕಾಯಮ್ ಹಾಡಯ್ತಾಲೊ. ತೆಂ ದಿಸಾಳೆಂ ಯೆಂವ್ಚೆಂ ಕೈಕಂಬ ಪೆಂಟೆಂತ್ಲ್ಯಾ ಶ್ರೀನಿವಾಸಾಚ್ಯಾ ಆಂಗ್ಡಿಂತ್ ಆನಿ ಸಕಾಳಿಂ ಸಾಡೆ ಆಟ್ ವೊರಾಂಕ್ ಸಿ.ಪಿ.ಸಿ. ಬಸ್ಸಾರ್ ಯೆತಾಲೆಂ. ಚಡಾವತ್ ಜಾವ್ನ್ ಸಕಾಳಿಂ ವಚೊನ್ ಪೇಪರ್ ಹಾಡ್ಚೆಂ ಕಾಮ್ ಮ್ಹಾಕಾ ಆಸ್ಲ್ಲೆಂ. ಪೇಪರ್ ಹಾಡ್ಚೆಂ ಕಾಮ್ ಹಾಂವ್ ಕರ‍್ತಾಲೊಂಚ್ಚ್ ಕಿತ್ಯಾಕ್ ಮ್ಹಾಕಾಯ್ ಪೇಪರ್ ವಾಚುಂಕ್ ಮೆಳ್ತಾಲೆಂ. ಚಾರ್ ಪಾನಾಚೆಂ ಪೇಪರ್ ತೆಂ. ಪಯ್ಲ್ಯಾ ಪಾನಾರ್ ರಾಜಕೀಯ್ ಖಬ್ರೊ ತರ್ ಚವ್ತ್ಯಾ ಪಾನಾರ್ ಖೆಳ್ ಪಂದ್ಯಾಟ್. ದುಸ್ರ್ಯಾ ಪಾನಾರ್ ಯೆಂವ್ಚೆಂ ಸಂಪಾದಕೀಯ್ ಪಪ್ಪ ಚುಕಾನಾಸ್ತಾನಾ ವಾಚ್ತಾಲೊ. ನವಭಾರತಾಚೆರ್ ತೆದ್ನಾಂ ದೈನಿಕ ಕಾದಂಬರಿ ಯೆತಾಲಿ. ತಿ ವಾಚ್ಚಿ ಮ್ಹಳ್ಯಾರ್ ಪಪ್ಪಾಕ್ ಭಾರಿ ಖುಶಿ. ತಸೆಂ ಮ್ಹಳ್ಯಾರ್ ಸಗ್ಳೆಂ ನವಭಾರತ ಪೇಪರ್ – ಚಾರ್ ಪಾನಾಂ – ತೊ ವಾಚ್ತಾಲೊ. ಉದಯವಾಣಿ ಯೇಂವ್ಕ್ ಸುರು ಜಾಲ್ಯಾ ಉಪ್ರಾಂತ್ ನವಭಾರತಾಚೊ ಖಾಯ್ಸ್ ಉಣೊ ಜಾಲೊ. ಉದಯವಾಣಿ ತೆದ್ನಾಂ ಸ ಪಾನಾಂನಿ ಯೇಂವ್ಕ್ ಸುರು ಜಾಲ್ಲೆಂ. ಖೆಳಾ ಪಂದ್ಯಾಟಾಚೆ ವಿಷಯ್, ಪ್ರತ್ಯೇಕ್ ಜಾವ್ನ್ ಕ್ರಿಕೆಟಾಚೆ ವಿವರ್ ಚಡ್ ಯೇಂವ್ಕ್ ಸುರು ಜಾಲೆ ಆನಿ ತೆ ತಿಸ್ರ್ಯಾ ಪಾನಾರ್ ಯೆತಾಲೆ ಆನಿ ಆಮಿಂಯ್ ಉದಯವಾಣಿ ಹಾಡುಂಕ್ ಸುರು ಕೆಲೆಂ.
ಪಪ್ಪಾಚೊ ಗ್ರಾಮಾಪೋನ್ ಆನಿ ರೇಡಿಯೊ
ಆಮ್ಗೆರ್ ಪಪ್ಪಾಚೆಂ ಏಕ್ ಗ್ರಾಮಾಫೋನ್ ಆಸ್ಲ್ಲೆಂ. ಆತಾಂಚ್ಯಾ ನವೀನ್ ರಿತಿಚ್ಯಾ ಟಿ.ವಿ. ಬರಿ ತೆದ್ನಾಂ ತೆಂ ಗ್ರಾಮಾಫೋನ್ ಏಕ್ ಆಡಂಅಬರಾಯೆಚೆಂ ಸಂಕೇತ್ ತಸೆಂ ಜಾವ್ನಾಸ್ಲ್ಲೆಂ ಜಾಂವ್ಕ್ ಪುರೊ. ಪುಣ್, ಆಮ್ಕಾಂ ಭುರ‍್ಗ್ಯಾಂಕ್ ತೆಂ ಅಪ್ಡುಂಕ್ ನಾತ್ಲ್ಲೆಂ. ಆಯ್ತಾರಾ ದೀಸ್ ತೆಂ ಗ್ರಾಮಾಫೋನ್ ಭಾಯ್ರ್ ಮಾರ‍್ಬಲ್ ಮೆಜಾರ್ ದವರ್ನ್ ತಾಂತು ತೊ ಪದಾಂ ಘಾಲ್ತಾಲೊ. ಸಕ್ಡಾಚ್ಯಾಕೀ ಪಯ್ಲೆಂ, ಗ್ರಾಮಾಫೋನಾಕ್ ಚಾವಿ ದೀಂವ್ಕ್ ಆಸ್ಲ್ಲಿ. ಲೊಂಕ್ಡಾಚಿ ಲಾಂಬ್ ಕೊಕ್ಕ್ಯಾಚಿ ಚಾವಿ, ಆತಾಂ ಕಾರಾಂಚಿ ಟಯರಾಂ ಬಸಂವ್ಕ್ ವಾಪಾರ‍್ಚ್ಯಾ ಸಾದನಾಂ ಬರಿ, ದೆಗೆನ್ ಆಸ್ಚ್ಯಾ ದೊಂಪ್ಳ್ಯಾಂತ್ ಘಾಲ್ನ್ ಘುಂವ್ಡಾವ್ನ್ ಗ್ರಾಮಾಫೋನ್ ವಾಜಂವ್ಕ್ ತಯಾರ್ ಕರ್ಚೊ. ಗ್ರಾಮಾಫೊನಾಂತ್ ಎಕಾ ಪುಟ್ ರುಂದಾಯೆಚ್ಯೊ ಪದಾಂ ಬೊಶಿಯ್ಯೊ ಆಸ್ಲ್ಲ್ಯೊ. ಎಕಾ ಬೊಶಿಯೆಂತ್ ದೋನ್ ಯಾ ತೀನ್ ಪದಾಂ ಆಸ್ತಾಲಿಂ. ತ್ಯಾ ಕಾಳಾಚಿಂ ಭಾರಿಚ್ಚ್ ರಂಗೀನ್ ಪದಾಂ. ತಿ ಬೊಶಿ ವಾಜಂವ್ಕ್, ಗ್ರಾಮಾಫೊನಾ ಮಧ್ಲ್ಯಾ ಖಿಳ್ಯಾಂತ್ ಬಸಯ್ಲ್ಯಾ ಉಪ್ರಾಂತ್ ಚಿಮ್ಟೆ ತೆಲಾಂತ್ ಬುಡಯಿಲ್ಲೆಂ ಲ್ಹಾನ್ ವಸ್ತುರ್ ತಾಚೆರ್ ಹಾಳ್ವಾಯೆನ್ ಘಸ್ಟುಂಕ್ ಆಸ್ಲ್ಲೆಂ. ತೇಲ್ ಸಾರಂವ್ಚೆಂ ಕಿತ್ಯಾಕ್ ಖಾತಿರ್ ಮ್ಹಣ್ ಮ್ಹಾಕಾ ಆಜೂನ್ ಕಳಿತ್ ನಾ. ತೆಂ ಘಸ್ಟಿಲ್ಯಾ ಉಪ್ರಾಂತ್ ಸುವಿ ಆಸ್ಲ್ಲಿ ನಳಿಯೆ ಸಾರ್ಕೆಂ ವಾಜ್ಪಾ ಆಯ್ದ್ ತ್ಯಾ ಬೊಶಿಯೆಚ್ಯಾ ಪೊಂತಾರ್ ದವರ‍್ಚೆಂ. ಪದಾಂ ವಾಜೊಂಕ್ ಸುರು ಜಾತಾನಾ ಪಪ್ಪಾಚ್ಯಾ ತೊಂಡಾರ್ ವಿಶೇಸ್ ಹಾಸೊ ಉದೆತಾಲೊ. ಆಮ್ಕಾಂ ಭುರ‍್ರ‍್ಗ್ಯಾಂಕ್ ಖುಶಿ ಜಾತಾಲಿ. ಘರಾ ಮುಖಾರ್ ಆಸ್ಚ್ಯಾ ವಾಟೆಂತ್ಲ್ಯಾನ್ ವೆಚೊ ಲೋಕ್ ಆಮ್ಚ್ಯಾ ಘರಾ ಕುಸಿನ್ ಪಳಯ್ತಾಲೊ. ಆಮ್ಚ್ಯಾ ಘರಾ ಗ್ರಾಮಾಫೋನ್ ವಾಜ್ಚೆಂ ಆಮ್ಕಾಂ ಎಕಾ ಹೆಮ್ಮ್ಯಾಚಿ ಗಜಾಲ್ ತಸಿ ಜಾವ್ನಾಸ್‌ಲ್ಲಿ.
ಗ್ರಾಮಾಫೋನ್ ರೆಕೊರ್ಡ್
ಗ್ರಾಮಾಪೋನ್
ಕ್ರಿಕೆಟಾಚಿ ಕಮೆಂಟರಿ ರೆಡಿಯೊರ್ ಯೇಂವ್ಕ್ ಸುರು ಜಾತಾನಾ ಪಪ್ಪಾನ್ ಫಿಲಿಪ್ಸ್ ರೆಡಿಯೊ ಹಾಡ್ಲ್ಲೊ. ತ್ಯಾ ರೆಡಿಯೊಕ್ ಕೊಣೆಂಚ್ಚ್ ಆಪ್ಡುಂಕ್ ನಾತ್ಲ್ಲೆಂ. ಪರ‍್ನಿ ಲುಂಗಿ ವಾಪಾರ್ನ್, ರೆಡಿಯೊಕ್ ಪಾಂಗ್ರುಚೆಂ ಲುಗಾಟ್ ಪಪ್ಪಾನ್ ಕೆಲ್ಲೆಂ ಆನಿ ಜೊಗಾಸಣೆನ್ ತೆಂ ಪಾಂಗ್ರುನ್ ರೆಡಿಯೊ ಆಪ್ಲ್ಯಾ ಕುಡಾಂತ್ ತೊ ದವರ‍್ತಾಲೊ. ಕಮೆಂಟರಿ ಸುರು ಜಾತಾನಾ ರೆಡಿಯೊ ಭಾಯ್ರ್ ಹಾಡ್ತಾಲೊ. ತ್ಯಾಚ್ಚ್ ಖಾತಿರ್ ಏಕ್ ಮೇಜ್ ಆಸ್ಲ್ಲೆಂ. ಕ್ರಿಕೆಟ್ ಮ್ಯಾಚ್ ಜಾತಾನಾ ಚಡಾವತ್ ಜಾವ್ನ್ ರೆಡಿಯೊ ಮುಕಾರ್ ಮ್ಹಜೆಂ ಬಾಯ್, ಲಿಜಿ ಬಾಯ್ ಆನಿ ಪಪ್ಪಾ ಬಸ್ತಾಲಿಂ. ದೊನ್ಪಾರಾಂ ಆಲ್ ಇಂಡಿಯಾ ರೆಡಿಯೊಚಿ ‘ದೇಶ್-ವಿದೇಶ್’ ಖಬರ್ ಪ್ರಸಾರ್ ಜಾತಾನಾ, ತಾಣಿಂ ದೊಗಾಂಯ್ನಿ ಜೆಂವ್ಚೆಂ ಆಸ್ಲ್ಲೆಂ. ಖಬರ್ ಆಖೇರ್ ಜಾತಾನಾ ಕಮೆಂಟರಿ ಪರತ್ ಸುರು ಜಾತಾಲಿ ಆನಿ ತಿಂ ದೊಗಾಂಯ್ ಪರತ್ ಯೇವ್ನ್ ಬಸ್ತಾಲಿಂ.
ಬುದ್ವಾರಾ ದೀಸ್ ಶ್ರಿಲಂಕಾ ಬ್ರೊಡ್‌ಕಾಸ್ಟಿಂಗ್ ಕೊರ‍್ಪೊರೇಶನ್ ಹಾಂಚ್ಯಾ ಥಾವ್ನ್ ವಾಳೊನ್ ಯೆಂವ್ಚೆ ‘ಬಿನಾಕಾ ಗೀತ್ ಮಾಲಾ’ ಹಾಂತ್ಲಿ ಹಿಂದಿ ಪದಾಂ ಆಯ್ಕೊಂಚೆಂ ಮ್ಹಳ್ಯಾರ್‌ಯ್ ಪಪ್ಪಾಕ್ ಭಾರಿ ಪಿಶೆಂ.
ಗಾಂಧಿವಾದಿ ಪಪ್ಪಾ
ಪಪ್ಪ ಏಕ್ ಕಟಿಣ್ ಗಾಂಧಿವಾದಿ. ಗಾಂಧಿಚಿ ಧವಿ ತೊಪಿ ತೊ ಘಾಲ್ತಾಲೊ. ಖಾಕಿ ಇಜಾರ್ ಘಾಲ್ಚಿ ತಾಚಿ ಸವಯ್. ಕ್ರಿಸ್ತಾಂವ್ ಮ್ಹಣ್ ಉಲೊ ಕರ‍್ಚ್ಯಾಕೀ ಗಾಂಧಿವಾದಿ ಮ್ಹಳ್ಳ್ಯಾಂತ್ ಚಡ್ ಭರ್ಮ್ ಆಸಾ ಮ್ಹಳ್ಳ್ಯಾ ಬರಿ ಜಿವಿತಾಚಿಂ ಮೌಲ್ಯಾಂ ಆಪ್ಣಾಥಂಯ್ ಆಟಾಪುನ್ ಜಿಯೆಲ್ಲೊ. ದೇಶ್‌ಭಕ್ತ್ ತಾಕಾ ಭಾರಿಚ್ಚ್ ವಿಶೇಸ್. ಲೋಂಚ್ ದಿಂವ್ಚ್ಯಾ ವಿಶ್ಯಾಂತ್ ಕಟ್ಟಾ ವಿರೋಧಿ ಆನಿ ಕೊಣೆಂಯ್ ವಿಚಾರ‍್ಲೆಂ ತರ್ ಕಟಿಣಾಯೆನ್ ಉಂಚಾಬಳ್ ಜಾತಾಲೊ.
ಆಮ್ಚೆಂ ಘರ್ ಹುಲ್ಪಾಲ್ಲ್ಯಾ ವೆಳಿಂ, ರುಜು ಪತ್ರ್ ದಿಂವ್ಚ್ಯಾ ಖಾತಿರ್ ಹಾಂವೆಂಚ್ಚ್ ಗುರ‍್ಪುರ್ ಥಾವ್ನ್ ಮೊಣೆಗಾರಾಕ್ ಆಪವ್ನ್ ಹಾಡ್ಲ್ಲೊ. ಮೊಣೆಗಾರಾಕ್ ತೆದ್ನಾಂ ರಾವೊಂಕ್ ಘರ್ ಗುರ‍್ಪುರ‍್ಚಿ ಘಾಟಿ ಚಡೊನ್ ಆಸ್ಚ್ಯಾ ಬೊಂಗ್ಲ್ಯಾ ಕುಶಿನ್ ಆಸ್ಲ್ಲ್ಯಾ ಸರ್ಕಾರಿ ಘರಾಂತ್ ಆಸ್ಲ್ಲೆಂ. ಮೊಣೆಗಾರ್ ಕಾಮ್ ಜಾಲ್ಯಾ ಉಪ್ರಾಂತ್ ಚಲೊನ್‌ಂಚ್ ತಾಚ್ಯಾ ಘರಾ ವೆತಾಲೊ ತರ್ಯ್ ತ್ಯಾ ದೀಸ್ ಹಾಂವ್ ತಾಕಾ ಹುಲ್ಪಾಲ್ಲೆಂ ಘರ್ ಪಳಂವ್ಕ್ ಕಾರ್ ಕರಿಜಾಯ್ ಮ್ಹಣಾಲೊ. ಹುಲ್ಪಾಲ್ಲೆಂ ಘರ್ ಪಳಂವ್ಕ್ ವೆಚ್ಯಾ ಪಯ್ಲೆಂ ತಾಚ್ಯಾ ದಫ್ತರಾಂತ್ ಥೊಡೆ ಜಣ್ ಬಸೊನ್ ಆಸ್ಲ್ಲೆ. ತಾಂಕಾ ಸರ್ವಾಂಕ್ ಚಾ ಆನಿ ಖಾಂವ್ಕ್ ತಾಣೆ ಮ್ಹಜ್ಯಾ ಕರ‍್ನಾ ಹಾಡಯ್ಲೆಂ ಆನಿ ತಾಚೆ ಪಯ್ಶೆ ಹಾಂವೆಂಚ್ಚ್ ದೀಜೆ ಪಡ್ಲೆ. ಕಾರಾರ್ ಆಯಿಲ್ಲ್ಯಾ ತ್ಯಾ ಮೊಣೆಗಾರಾನ್ ಹುಲ್ಪಾಲ್ಲ್ಯಾ ಘರಾ ಭಂವಾರಿಂ ಭಂವ್ಡಿ ಮಾರ‍್ಲಿ. ಪಪ್ಪಾ ಮೊಣೆಗಾರಾನ್ ಉಲಯ್ತಾನಾ ರಡ್ಲೊ. ಹ್ಯಾ ವೆಳಾರ್ ಅಶೆಂ ಜಾಲೆಂ ಮ್ಹಣ್ ಹುಸ್ಕಾರ್ಲೊ. ಭಾಗೆವಂತ್ ಮೊಣೆಗಾರಾನ್ ಪಪ್ಪಾಕ್ ಸಾಂಗ್ಲೆಂ – ಕಿತೆಂ ಕರ್ಚೆಂ ಮಾಸ್ಟ್ರಮಾ… ಜಾಂವ್ಚೆಂ ಆಡಾಂವ್ಕ್ ಜಾತಾವೆ? ತುಜೆಂ ರುಜು ಪತ್ರ್ ಫಾಲ್ಯಾಂ ಗುರ‍್ಪುರ್ ಮ್ಹಜ್ಯಾ ದಫ್ತರಾ ಥಾವ್ನ್ ವೊರ್ನ್ ವಚಾ. ಪೂತ್ ಯೆಂವ್ದಿ. ತೊ ಯೆತಾನಾ ಮಾತ್ರ್ ದೆಡ್ಶೆಂ ರುಪಯ್ ದಾಡುನ್ ದಿ.
ಹ್ಯಾ ಉತ್ರಾಂನಿ ಪಪ್ಪಾ ಸಗ್ಳೊ ಕಾಣ್ಸಿರ‍್ಲೊ. ಅಪುಣ್ ಕ್ರಿಸ್ತಾಂವ್… ಲೋಂಚ್ ದಿಂವ್ಚೆಂ ಕಾಮ್ ಕರಿನಾ ಮ್ಹಣ್ ತಾಣೆ ಮ್ಹಳೆಂ ನಾ. ಅಪುಣ್ ಗಾಂಧಿವಾದಿ ; ಧವಿ ತೊಪಿ ಘಾಲ್ಚೊ ಮನಿಸ್. ಹ್ಯಾ ದೆಶಾಂತ್ ಲೋಂಚ್ ದಿಂವ್ಚೆಂ ಯಾ ಘೆಂವ್ಚೆ ದೇಶ್‌ದ್ರೊಹಾಚೆಂ ಕಾಮ್ ಮ್ಹಣಾಲೊ. ಉಜೊ ಪೆಟ್‍ಲ್ಲೆಂ ತುಕಾ ದಿಸ್ತಾ ನಯ್? ತಾಂತು ಫಟಿ ಕಿತೆಂ ಆಸಾತ್?
ಮೊಣೆಗಾರ್ ವಿದ್ರೂಪ್ ಹಾಸೊ ಹಾಸೊನ್ ಮ್ಹಣಾಲೊ – ಉಜೊ ಪೆಟ್ಲಾ ವ್ಹಯ್… ಕೋಣ್ ಜಾಣಾ ತುಮಿಂಚ್ಚ್ ಜಾಯ್ ಜಾಯ್ ಮ್ಹಣ್ ದಿಲಾ ಜಾಂವ್ಕ್‌ಯ್ ಪುರೊ. ಹಾಂವ್ ಕಿತೆಂಚ್ಚ್ ಸಾಂಗೊಂಕ್ ಸಕ್ಚೊ ನಾ. ತುಮ್ಕಾಂ ದೆಡ್ಶೆಂ ರುಪಯ್ ದಿಂವ್ಕ್ ತಾಂಕ್ ನಾ, ತರ್ ರುಜು ಪತ್ರ್‌ಯ್ ಮೆಳ್ಚೆಂ ನಾ.
ದುಸ್ರ್ಯಾ ದಿಸಾ, ಲೋಂಚ್ ದಿಂವ್ಚೆ ಪಯ್ಶೆ ವೊರ್ನ್ ಹಾಂವ್ ಗೆಲೊಂ ಆನಿ ರುಜು ಪತ್ರ್ ಮೆಳ್ಳೆಂ.
ಅನ್ಯೇಕ್ ಪಾವ್ಟಿಂ ಮ್ಹಜ್ಯಾ ಭಯ್ಣಿನ್, ಗ್ರೆಸಿ ಬಾಯೆನ್ ತಾಂಚೆ ಘರ್ ಬಾಂದ್ತಾನಾ, ಸರ್ವೆ ಕರುಂಕ್ ಹಾಡ್‌ಲ್ಲ್ಯಾ ಮನ್ಶಾನ್ ‘ಚಾ ಪಿಯೆಂವ್ಕ್’ ಪಯ್ಶೆ ವಿಚಾರ್ಲ್ಲ್ಯಾ ವೆಳಿಂ, ಪಪ್ಪಾನ್ ಲೋಂಚ್ ದಿಂವ್ಕ್ ಸೊಡ್ಲೆಂ ನಾ. ಆಮ್ಚಿಂ ದಸ್ತಾವೆಜಾಂ ಸರ್ವ್ ಸಾರ‍್ಕಿಂ ಆಸ್ತಾನಾ ಲೋಂಚ್ ಕಿತ್ಯಾಕ್ ದೀಜಾಯ್? ಚಾ ಪಿಯೆಂವ್ಕ್ ಪಯ್ಶೆ ವಿಚಾರ್‌ಲ್ಲ್ಯಾಕ್ ಪಾಂಚ್ ರುಪಯ್ ದಿಲ್ಲೆ ಕಂಯ್. ತೆ ಪಯ್ಶೆ ಪಳವ್ನ್ ಸರ್ವೆ ಕರುಂಕ್ ಆಯಿಲ್ಲೊ ಮನಿಸ್ ಕಟಿಣ್ ತಾಪ್ಲೊ. ತ್ಯಾ ವರ್ವಿಂ, ತ್ಯಾ ಸರ‍್ವೆಗಾರಾನ್ ದಾಖ್ಲೊ ಪತ್ರ್ ದಿಲೆಂನಾ. ಉಪ್ರಾಂತ್ ಕೊಡ್ಯಾಳ್ ತಾಶಿಲ್ದಾರಾಚ್ಯಾ ದಫ್ತರಾ ಥಾವ್ನ್ ಜಾಯ್ತ್ಯಾ ಕಷ್ಟಾಂನಿ ತೆಂ ದಸ್ತಾವೆಜ್ ಮೆಳ್ಲ್ಲೆಂ ಮ್ಹಣ್ ಮ್ಹಜಿ ಭಯ್ಣ್, ಗ್ರೇಸಿ ಬಾಯ್ ಆತಾಂಯ್ ಮ್ಹಣ್ತಾ.
ಪಪ್ಪಾಚೆಂ ವೋಡ್ತ್
ಪಪ್ಪಾಕ್ ವೊಡ್ತಾಚೆಂ ಆನಿ ಫುಲಾಂ ಝಾಡಾಚೆಂ ಭಾರಿಚ್ಚ್ ಪಿಶೆಂ. ಕ್ರೊಟನಾಚಿಂ ಝಾಡಾಂ ಆಮ್ಚ್ಯಾ ಘರಾ ಮುಕಾರ್ ಚಾಲಿರ್ ಪಪ್ಪಾನ್ ಲಾಯಿಲ್ಲಿಂ. ಖಂಯ್ ಗೆಲೊ ತರ್ ಪಾಟಿಂ ಯೆತಾನಾ ಏಕ್ ದೋನ್ ನವಿಂ ಝಡಾಂ ಹಾಡ್ನ್ ಯೆತಾಲೊ ಆನಿ ತಿಂ ಲಾವ್ನ್ ತಾಂಚೊ ಪೋಸ್ ಕರ‍್ತಾಲೊ. ಹಾಂವೆ ಮ್ಹಣ್ಚೆಂ ತರ್ ಆಮ್ಚ್ಯಾ ಘರಾ ಆಂಗ್ಣಾಂತ್ ಆಸ್ಲ್ಲ್ಯಾ ತಿತ್ಲಿಂ ಕ್ರೊಟನಾಚಿಂ ಝಾಡಾಂ ಕೈಕಂಬಾಚ್ಯಾ ಪದ್ವಾರ್ ಕೊಣಾಯ್ಚ್ಯಾ ಘರ‍್ಚ್ಯಾ ವೊಡ್ತಾಂತ್ ನಾತ್ಲ್ಲಿಂ ಜಾಂವ್ಕ್‌ಯ್ ಪುರೊ.
ಕೊಣೆಂಯ್ ಮ್ಹಣ್ಚೆ ಆಸ್ಲ್ಲೆಂ – ‘ಹಿಂ ಕ್ರೊಟನಾಚಿಂ ಝಡಾಂ ಕಾಂಯಿಂಚ್ಚ್ ಪಯ್ಶಾಂಕ್ ಫಾಯ್ದೊ ನಾಸ್ತಾನಾ ಕಿತ್ಯಾಕ್ ಉದಾಕ್ ವೊತುನ್ ಪೊಸ್ಚೆಂ ಮಾಸ್ಟೆರಾಮಾ ?’ ಪಪ್ಪ ತಾಂಕಾ ಕಿತೆಂ ಜವಾಬ್ ದಿತಾಲೊ ತೆಂ ಹಾಂವ್ ನೆಣಾ ಪುಣ್ ಪಪ್ಪಾಚಿಂ ಕ್ರೊಟನಾಚಿಂ ಆನಿ ಫುಲಾಂ ಝಡಾಂ ಚಡ್ ಜಾವ್ನ್‌ಂಚ್ಚ್ ಆಯಿಲ್ಲಿಂ. ಥರಾವಳ್ ರಂಗಾಚಿ, ಥರಾವಳ್ ನಮ್ಯೂನಾಚಿಂ ಆನಿಂ ಥರಾವಳ್ ಜಾತಿಚಿಂ. ಪಪ್ಪಾನ್ ತಿಂ ಝಡಾಂ ಹೆಣೆಂ ತೆಣೆಂ ಗೆಲ್ಲ್ಯಾ ವೆಳಿಂ ಪಳವ್ನ್, ಆರಾವ್ನ್ ಹಾಡ್ನ್ ಪುರುಲ್ಲಿಂ ಆನಿ ವಾಡಯಿಲ್ಲಿಂ. ಗಿಮಾಂತ್ ಪಪ್ಪಾ ತಾಂಕಾ ಉದಾಕ್ ಘಾಲ್ತಾಲೊ.
ಪಪ್ಪಾನ್ ಪೊಸುಲ್ಲಿಂ ಕ್ರೊಟನ್ ಝಾಡಾಂ
ಫುಲಾಂ ಝಡಾಂ ಲಾಂವ್ಚೆ ವಿಶ್ಯಾಂತ್ ಮ್ಹಜ್ಯಾ ಭಯ್ಣಿಕ್, ಹಿಲ್ಡಾ ಬಾಯೆಕ್, ಆನಿ ಪಪ್ಪಾಕ್ ಥೊಡ್ಯಾ ಪಾವ್ಟಿಂ ಪೋಂತ್ ಆಸ್ತಾಲೆಂ. ದೊಗಾಂಯ್ನಿ ಫುಲಾಂ ಝಡಾಂ ಲಾವ್ನ್ ಕೊಣಾಚೆಂ ಝ್ಡಾ ವೆಗ್ಗಿಂ ವಾಡೊನ್ ಯೆತಾಗೀ ಮ್ಹಣ್ ಪಂತಾಟ್ ಕರ‍್ತಾಲಿಂ.
ಜಾಯ್ತ್ಯಾ ಲ್ಹಾನ್ ಚಟ್ಟ್ಯಾಂನಿ ಪಪ್ಪಾನ್ ಕ್ರೊಟನ್ ಆನಿ ಫುಲಾಂಚಿ ಝಡಾಂ ಲಾಯಿಲ್ಲಿಂ ಆನಿ ವಾಡಯಿಲ್ಲಿಂ. ಆಯ್ತಾರಾ ರಜೆಚೊ ದೀಸ್ ಜಾಲ್ಲ್ಯಾನ್ ತ್ಯಾ ದೀಸ್, ತ್ಯೊ ಚಟ್ಟ್ಯೊ ತೊ ವಿಂಗಡ್ ವಿಂಗಡ್ ರಿತಿನ್ ಜಾಲಾಂತ್ ಮಾಂಡುನ್ ದವರ‍್ತಾಲೊ. ಏಕ್ ದೀಸ್ ವೃತ್ತಾಕಾರಾನ್ ಜಾಲ್ಯಾರ್ ದುಸ್ರ್ಯಾ ಹಫ್ತ್ಯಾಂತ್ ಚೌಕ್ ಆಕಾರಾರ್ ತೊ ತ್ಯೊ ಚಟ್ಟ್ಯೊ ದವರ‍್ತಾಲೊ.
ಪಪ್ಪಾಚಿ ಬಾಂಯ್
ಬಾಂಯ್ಚ್ಯಾ ವಾಟೆರ್ ಕ್ರೊಟನಾಚಿಂ ಝಾಡಾಂ
ಆಮ್ಕಾಂ ಪರ‍್ನಿ ಬಾಂಯ್ ಆಸ್ಲ್ಲಿ. ಲಿಜಿ ಬಾಯೆನ್ ನವಿ ಬಾಂಯ್ ಖೊಂಡ್ಲ್ಯಾ ಉಪ್ರಾಂತ್ ಪಯ್ಲೆಂಚ್ಯಾ ಬಾಂಯ್ಕ್ ಆಮಿ ಪರ‍್ನಿ ಬಾಂಯ್ ಮ್ಹಣ್ಚೆಂ ಆಸ್ಲ್ಲೆಂ. ಪರ‍್ನ್ಯಾ ಬಾಂಯ್ ಥಾವ್ನ್ ಆಮ್ಚ್ಯಾ ಝಾಲಾಕ್ ಯೇಂವ್ಕ್ ಪಪ್ಪಾನ್ ಏಕ್ ಸೊಭಿತ್ ವಾಟ್ ಕೆಲ್ಲಿ. ತ್ಯಾ ವಾಟೆಚ್ಯಾ ದೊನೂಯ್ ಕುಶಿಂನಿ ವೊಡ್ತಾಚಿಂ, ಫುಲಾಂಚಿಂ ಆನಿಂ ಕ್ರೊಟನಾಚಿಂ ಝಾಡಾಂ ಲಾಯಿಲ್ಲಿಂ. ಆಮ್ಕಾಂ ತ್ಯಾಚ್ ವಾಟೆನ್ ಉದಾಕ್ ಹಾಡ್ಚ್ಯಾ ಖಾತಿರ್ ವಚೊಂಕ್ ರಾಜ್ ರಸ್ತೊ ಆಸ್ಲ್ಲ್ಯಾ ಬರಿ. ಪುಣ್, ಥೊಡ್ಯಾ ಕಾಳಾ ಉಪ್ರಾಂತ್, ತಿ ವಾಟ್ ಆಮಿ ವಾಪಾರಿನಾತ್‍ಲ್ಲ್ಯಾಂವ್. ಚಿಕ್ಕೆ ಕುಶಿನ್ ಲಾಗ್ಸಿಲಿ ವಾಟ್ ಆಸಾ ಕೆಲಿ ಆನಿ ಪಪ್ಪಾನ್ ಆಸಾ ಕೆಲ್ಲೊ ರಾಜ್ ರಸ್ತೊ ಆಮಿ ಸಾಂಡ್ಲೊ. ಪುಣ್, ಫುಲಾಂ ಝಡಾಂ ಆನಿ ಕ್ರೊಟನಾಚಿಂ ಝಡಾಂ ಆತಾಂಯ್ ಆಸಾತ್ ಪಪ್ಪಾಚ್ಯಾ ಉಡಾಸಾಕ್.
ಪಪ್ಪಾಚೆಂ ತೋಟ್
ಆಮ್ಚ್ಯಾ ಕಂಪೌಂಡಾಂತ್ ವೆವೆಗ್ಳ್ಯಾ ಫಳ್ ವಸ್ತುಂಚೆ ರೂಕ್ ಆಸ್ಲ್ಲೆ. ಪೂರಾಯ್ ಪಪ್ಪಾಚ್ಯಾ ಆಶೆಚೆ ಆನಿ ವಾಂವ್ಟಿಚೆ ರೂಕ್ ಆನಿ ಝಡಾಂ. ಆಮ್ಚ್ಯಾ ಪದ್ವಾರ್ ತಿತ್ಲ್ಯಾ ನಮೂನ್ಯಾಚೆ ರೂಕ್ ಕಾಂಯ್ ತ್ಯಾ ವೆಳಾರ್ ಕೊಣಾಯ್‌ಕರ್ ನಾತ್ಲ್ಲೆ ಜಾಂವ್ಕ್‌ಯ್ ಪುರೊ. ವಿವಿಧ್ ರಿತಿಚೆ, ಜಾತಿಚೆ, ಫಳಾಂಚೆ ರೂಕ್-ಝಡಾಂ ಹಾಡ್ನ್ ತೊ ಲಾಯ್ತಾಲೊ ಆನಿ ತಾಂಚೊ ಪೋಸ್ ಕರ‍್ತಾಲೊ. ಆಮ್ಚ್ಯಾ ಘರಾ ಮುಖಾರ್‌ಚ್ಚ್ ಆಸ್ಚೊ ತೊತಪುರಿ ರೂಕ್ ಪೊಂಪೈ ಇಸ್ಕಾಲಾಕ್ ವೆಚ್ಯಾ ಕಂದಾರ‍್ಚ್ಯಾ ಆನಿ ಗುರ‍್ಪುರ‍್ಚ್ಯಾ ಭುರ‍್ಗ್ಯಾಂಕ್ ಭಾರಿಚ್ಚ್ ಆಕರ‍್ಷಣಾಚೊ. ಎಪ್ರಿಲ್ ಮೆಯ್ ಮಹಿನೊ ಆಯ್ಲೆ ಮ್ಹಣ್ತಾನಾ ತ್ಯಾ ತೊತಪುರಿ ರೂಕಾರ್ ಬೊರ್ನ್ ಫುಲಾಂ ಜಾತಾಲಿಂ ಆನಿ ಉಪ್ರಾಂತ್ ಗಣ್ಣ್ ಜಾವ್ನ್ ತೊರಾಂ.
ಆವಾಳ್ಯಾಚೊ ರೂಕ್
ತೋತಪುರಿ ಆಂಬ್ಯಾರೂಕ್
ಸೆಜಾರ‍್ಚ್ಯಾ ಭುರ‍್ಗ್ಯಾಂಕ್ ತೊತಪುರಿಚಿಂ ತರ‍್ನಿಂ ತೊರಾಂ ಖಾಂವ್ಚ್ಯಾಂತ್ ಭಾರಿಚ್ಚ್ ಮಜಾ. ಆಮ್ಚ್ಯಾ ಕಂಪೌಂಡಾಕ್ ತೆದ್ನಾಂ ಲ್ಹಾನ್ ಗೇಟ್ ಆಸ್ಲ್ಲಿ. ಮಾಯ್ ಯಾ ಜೂನಾಂತ್ ಪಡ್ಲ್ಲಿಂ ತೊರಾಂ ವಿಂಚುಂಕ್ ಪಪ್ಪಾಚೆ ದೊಳೆ ಚುಕವ್ನ್ ಜಾಯ್ತಿಂ ಭುರ್ಗಿಂ ಆಮ್ಚ್ಯಾ ಕಂಪೌಂಡಾಕ್ ಯೆತಾಲಿಂ ಆನಿ ತೊತಪುರಿಚಿಂ ತೊರಾಂ ವಿಂಚುನ್ ದಾಂವ್ತಾಲಿಂ. ಆತಾಂಯ್ ಜಾಯ್ತ್ಯಾಂ ಜಣಾಂಕ್ ತೊತಪುರಿ ರೂಕಾಚಿಂ ತೊರಾಂ ಖೆಲ್ಲೊ ಉಡಾಸ್ ಆಸ್ತಲೊಚ್ಚ್. ಆಂಗ್ಡಿ ಲಾಗ್ಸಿಲೊ ಬಾದಾಮಿ, ಘರಾ ಮುಖ್ಲೊ ಪೈರಿ, ಬಾಂಯ್ ಲಾಗ್ಸಿಲೊ ಕೆಳ್ಯಾಚೊ (ಹೆಂ ನಾಂವ್ ಕಿತ್ಯಾಕ್ ಹಾಂವ್ ನೆಣಾ), ಕಲ್ಪಣ್ಯಾ ಲಾಗಿಂ ಆಸ್ಚೊ ಮುಂಡಾಪ್ಪ ಆಂಬ್ಯಾ ರೂಕ್ ಜಾಯ್ತ್ಯಾ ರೂಕಾಂ ಪಯ್ಕಿ ಥೊಡೆ.
ಪಾವ್ಸ್ ಯೇವ್ನ್, ಝಡ್ ವಾರೆಂ ಆಯಿಲ್ಲ್ಯಾ ಫಾಂತ್ಯಾರ್ ಮ್ಹಜ್ಯಾ ಭಯ್ಣಿಕ್, ಗ್ರೇಸಿ ಬಾಯೆಕ್ ಆನಿ ಪಪ್ಪಾಕ್ ಸಕಾಳಿಂ ಉಟೊನ್ ಆಂಬೆ ವಿಂಚ್ಚೆ ಏಕ್ ಪಂಥಾಹ್ವಾನ್‌ಂಚ್ಚ್ ಆಸ್ಲ್ಲೆಂ ಮ್ಹಣ್ಯೆತ್. ಫಾಂತ್ಯಾರ್ ವೆಗ್ಗಿಂ ಉಟೊನ್ ದೊಗಾಂಯ್ ಆಂಬೆ ವಿಂಚ್ತಾಲಿಂ ಆನಿ ಆಆಪ್ಲ್ಯಾ ತಾಬೆಂತ್ ಕುರ‍್ಪಣ್ಯಾಂನಿ ದವರ‍್ತಾಲಿಂ. ಪಪ್ಪಾನ್ ಆಸಾ ಕೆಲ್ಲ್ಯಾ ರೂಕಾ ಪಯ್ಕಿ ಆವಾಳ್ಯಾಚೊ ಆನಿ ಚಿಕ್ಕು ಫಳಾಂಚೆ ರೂಕ್ ಭಾರಿಚ್ಚ್ ಲೊಕಾ ಮೊಗಾಳ್. ಆವಾಳ್ಯಾಚ್ಯಾ ರೂಕಾರ್ ತೆದ್ನಾಂ ವ್ಹಡ್ ಆವಾಳೆ ಜಾಂವ್ಚೆ ಆನಿ ಚಿಕುಚ್ಯಾ ರೂಕಾರ್ ರೊಸಾಳ್ ದರಬಸ್ತ್ ಚಿಕ್ಕು. ಚಿಕ್ಕುಚೊ ರೂಕ್ ಧರ್ಣಿಕ್ ಲಾಗೊನ್ಂಚ್ಚ್ ಆಸ್ಲ್ಲೊ ಜಾಲ್ಲ್ಯಾನ್ ರುಕಾರ್ ಚಡಾನಾಸ್ತಾನಾಂಯ್ ಚಿಕ್ಕು ಫಳಾಂ ಕಾಡ್ಯೆತಾಲಿಂ. ಪಪ್ಪಾನ್ ಚಿಕ್ಕು ಕಾಡ್ನ್, ಲ್ಹಾನ್ಶ್ಯಾ ಕುರ‍್ಪಾಣ್ಯಾಂತ್ ಘಾಲ್ನ್, ಪಿಕ್ಲ್ಯಾ ಉಪ್ರಾಂತ್ ಆಮ್ಕಾಂ ದಿಂವ್ಚಿ ಆಸ್ಲ್ಲಿಂ. ತ್ಯಾ ಎಕಾ ಯಾ ಅರ್ಧ್ಯಾ ಚಿಕ್ಕುಚಿ ರೂಚ್ ಆತಾಂ ಉತ್ರಾಂನಿ ವರ‍್ಣುಂಕ್ ಸಾಧ್ಯ್ ನಾ. ಪಪ್ಪಾನ್ ಲಾಯಿಲ್ಲೆಂ ಹಾತಾಚೆಂ (Sugar apple) ಝಡ್ ಭಾರಿಚ್ಚ್ ಬರೆಂ. ತಾಚೆರ್ ಜಾಲ್ಲಿಂ ಕಸೆಚಿಂ ಹಾತಾಂ ವ್ಹಡ್ಲಿಂ ಜಯ್ತ್ ಜಾತಾಲಿಂ.
ಪಪ್ಪಾಚಿ ಮೊಗಾಚಿ ಆನಿ ಎಕ್ಲಿಚ್ಚ್ ಸುನ್, ಜೇನ್ ಐಡ (ಮ್ಹಜಿ ಪತಿಣ್). ಆಮಿ ಬಾಹ್ರೇನ್ ಥಾವ್ನ್ ಗಾಂವಾಕ್ ಗೆಲ್ಲ್ಯಾ ವೆಳಾರ್ ಪಪ್ಪಾನ್ ಬರ‍್ಯಾಂತ್ಲೆ ಬರೆ ತೊತಪುರಿ ಯಾ ಮುಂಡಪ್ಪ ಆಂಬೆ ಯಾ ಬರೆ ಪಿಕ್‌ಲ್ಲೆ ಚಿಕ್ಕು ವಿಂಚುನ್ ವ್ಹಳೂ ಸುನೆಕ್ ಆನಿ ನಾತ್ವಾಕ್, ಆಲಿಸ್ಟರಾಕ್ ದಿಂವ್ಚೆ ಆಸ್ಲ್ಲೆಂ.
ಪಪ್ಪಾಚೆ ವಿಚಾರ್ ಆನಿ ರುಚಿ
ಪಪ್ಪಾ ನಿವೃತ್ತ್ ಜಾಲ್ಯಾ ಉಪ್ರಾಂತ್ ತಾಕಾ ನಿವೃತ್ತ್ ವೇತನ್ ಮೆಳ್ತಾಲೆಂ. ತೆಂ ಹಾಡ್ಚ್ಯಾ ಖಾತಿರ್ ತಾಕಾ ಕಾರ‍್ಕೊಳ್ ಸರ್ಕಾರಿ ದಫ್ತರಾಕ್ ವಚಾಜಯ್ ಪಡ್ತಾಲೆಂ. ಹರ‍್ಯೇಕಾ ತೀನ್ ಮಹಿನ್ಯಾಂಕ್ ಏಕ್ ಪಾವ್ಟಿಂ ತೊ ಕಾರ‍್ಕೊಳ್ ವೆತಾಲೊ ತಾಚೆ ವೇತನಾಚೆ ಪಯ್ಶೆ ಘೆಂವ್ಕ್. ಥಂಯ್ಸರ್ ವೆಚ್ಯಾ ದೀಸ್ ತಾಚಿ ಆಂಗಡ್ ಬಂಧ್. ತ್ಯಾ ದೀಸ್ ದೊನ್ಪಾರಾಂ ತೊ ಘರಾ ಜೆಂವ್ಕ್ ಯೆನಾತ್ಲ್ಲೊ. ಕಾರ‍್ಕೊಳ್ಚ್ಯಾ ಕೊಂಕ್ಣ್ಯಾಚ್ಯಾ ಹೊಟೆಲಾಂತ್ ತಾಣೆಂ ಜೆಂವ್ಚೆಂ. ಪಾಟಿಂ ಯೆತಾನಾ, ಪೂರ್ಣಿಮಾ ಕ್ಲೊತ್ ಸ್ಟೊರಾಂತ್ಲೆಂ ಮಮ್ಮಕ್ ಏಕ್ ಕಾಪಾಡ್ ಹಾಡ್ಚೆಂ. ತೆಂ ಕಾಪಾಡ್ ಮಮ್ಮಕ್ ದಿತಾನಾ, ಪಪ್ಪಾಚೆಂ ಸದಾಂಚಿ ಉತ್ರಾಂ ” ಅಲ್ಲೆ (ಮಮ್ಮಚೆಂ ನಾಂವ್ ಆಲಿಸ್) ಅಳೆ ತುಕಾ ಕಾಪಾಡ್ ಹಾಡ್ಲಾಂ” ಮ್ಹಣ್ ಜೆವ್ಣಾಚ್ಯಾ ಮೆಜಾರ್ ದವರ‍್ಚೆಂ. ತಿ ಕಾಪ್ಡಾಚಿ ಪೊಟ್ಲಿ ಉಗ್ತಿ ಕೆಲ್ಯಾ ಉಪ್ರಾಂತ್ ಮಮ್ಮ ಖುಶಿ ಜಾತಾಲಿಚ್ಚ್. ತಸೆಂ ತೀನ್ ಮಹಿನ್ಯಾಂಕ್ ಏಕ್ ಪಾವ್ಟಿಂ, ಮಮ್ಮಕ್ ಏಕ್ ನವೆಂ ಕಾಪಾಡ್ ಕಾರ‍್ಕೊಳ್ ಥಾವ್ನ್ ಯೆತಾಲೆಂಚ್.
ಸಂತೃಪ್ತ್ ಜೊಡೆಂ
ತ್ಯಾ ವೆಳಾರ್ ಕ್ಯಾಲೆಂಡರಾಂ ಭಾರಿಚ್ಚ್ ಉಣಿಂ. ತಸೆಂ ದಿಸೆಂಬರ್ ಎಕ್ತೀಸ್ ತಾರಿಕೆರ್ ಆಮಿ ಸರ‍್ವಾಂ ವೆಗ್ಗಿಂಚ್ಚ್ ನಿದ್ತೆಲ್ಯಾಂವ್ ಜಾಲ್ಯಾರ್‌ಯ್ ಪಪ್ಪಾ ನವೆಂ ವರಸ್ ಸುರು ಜಾಲ್ಯಾ ಶಿವಾಯ್ ನಿದಾನಾತ್‍ಲ್ಲೊ. ಆಮ್ಗೆರ್ ಲ್ಹಾನ್ ಉರುಟ್ ಆಕಾರಾಚೊ ತಾರಿಕೆ ಪಕ್ಟೊ ಆಸ್ಲ್ಲೊ. ತ್ಯಾ ಪಟ್ಟ್ಯಾಚೆರ್ ವರಸ್ ಬದ್ಲುಂಚ್ಯಾ ಖಾತಿರ್ ವರಸ್ ತಯರ್ ಕರ್ನ್ ಮಧ್ಯಾನೆಚ್ಯಾ ಬಾರಾಂಕ್ ಪಾಂಚ್ ಮಿನುಟಾಂ ಆಸ್ತಾನಾ ನವ್ಯಾ ವರ್ಸಾಚೊ ಸಂಖೊ ಗೊಂದಾನ್ ಆಂಟುನ್, ಉಪ್ರಾಂತ್ ತೊ ನಿದ್ತಾಲೊ. ಸಾಂಜೆರ್ ಯಾ ದುಸ್ರ್ಯಾ ಸಕಾಳಿಂ ತೆಂ ನವೆಂ ವರಸ್ ಬದ್ಲಿಯೆತ್ ಆಸ್ಲ್ಲೆಂ ತರ್ಯ್ ತೊ ತಸೆಂ ಕರಿನಾತ್‌ಲ್ಲೊ.
ಪಪ್ಪ ನಿವೃತ್ತ್ ಜಾತಾನಾ ತಾಕಾ ಏಕ್ ಸೊಭಿತ್ ವೊಣದಿಚೆಂ ಘಡಿಯಾಳ್ ಇನಾಮ್ ಜಾವ್ನ್ ಮೆಳ್ಲ್ಲೆಂ. ತ್ಯಾ ಘಡಿಯಾಳಾಕ್ ಚಾವಿ ದಿಂವ್ಚೆಂ ಕಾಮ್ ಪಪ್ಪಾಕ್‍ಚ್ಚ್. ಹರ‍್ಯೆಕಾ ಸನ್ವಾರಾ ತೊ ತ್ಯಾ ಗಡಿಯಾಳಾಕ್ ಚಾವಿ ದಿತಾಲೊ ಆನಿ ಲ್ಹಾನ್ ಎಕಾ ಆಯ್ದಾನಾಂತ್ ಚಿಮ್ಣೆ ತೇಲ್ ತಾಚ್ಯಾ ಭಿತರ್ ದವರ‍್ತಾಲೊ. ಚಿಮ್ಣೆ ತೆಲಾ ವೊರ‍್ವಿಂ ಗಡಿಯಾಳಾಕ್ ಲಾಂಬ್ ಆವ್ದಿ ಮೆಳ್ತಾ ಮ್ಹಣ್ ತಾಚೆಂ ಚಿಂತಾಪ್ ಜಾವ್ನಾಸ್ಲ್ಲೆಂ ಜಾಂವ್ಕ್ ಪುರೊ.
ಕರೆಜ್ಮಾಚ್ಯಾ ದಿಸಾನಿಂ ಹರ‍್ಯೇಕಾ ಸಾಂಜೆರ್, ತೇರ್ಸ್ ಜಾಲ್ಯಾ ಉಪ್ರಾಂತ್ ತೊ ಜೆಜುಚ್ಯಾ ಪಾಶಾಂವಾಂಚ್ಯೊ ಕಂತಿಗ್ಯೊ ವ್ಹಡ್ಲ್ಯಾನ್ ಗಾಯ್ತಾಲೊ. ಮಮ್ಮ ತಾಚ್ಯಾ ಸಾಂಗಾತಾ ಬಸ್ತಾಲಿ ಆನಿ ದೊಗಾಂಯ್ ಸಾಂಗಾತಾ ಮೆಳೊನ್ ಗಾಯನಾಂ ಗಾಯ್ತಾಲಿಂ. ಸೆಜಾರ‍್ಚ್ಯಾ ಹಿಂದು ಮುಸ್ಲಿಮ್ ಭಾವಾ ಭಯ್ಣಿಂಕ್ ತೆದ್ನಾಂ ಆಮ್ಚೆಂ ಕರೆಜ್ಮ್ ಆಯ್ಲಾಂ ಮ್ಹಣ್ ಸ್ವಷ್ಟ್ ಕಳ್ತಾಲೆಂ.
ಪಪ್ಪ ಇಗರ‍್ಜೆಂತ್ ಮಿಸಾ ವೆಳಾರ್ ಇಗರ‍್ಜೆ ಭಿತರ್ ಬಸ್‌ಲ್ಲೊ ನಾ. ಉಜ್ವ್ಯಾ ಕುಸಿನ್ ಬೊಲ್ಕಾಂವಾಚ್ಯಾ ಗ್ರಾದಿರ್ ತಾಣೆಂ ಬಸ್ಚೆಂ ಆನಿ ಬಾಗ್ಲಾ ಭಾಯ್ರ್ ರಾವೊನ್ ಮೀಸ್ ಆಯ್ಕೊಂಚೆಂ.
ಪಪ್ಪಾಕ್ ವೆಲಂಕಣಿ ಮಾಯೆಚಿ ಭಾರಿಚ್ಚ್ ಭಕ್ತ್ ಆಸ್ಲ್ಲಿ. ತಿಚ್ಯಾ ಪೂನ್ ಶೆತಾಕ್ ವಚೊಂಕ್ ತಾಕಾ ಭಾರಿಚ್ಚ್ ಮನ್ ಆಸ್ಲ್ಲೆಂ. ದೆಕುನ್, ಮ್ಹಜ್ಯಾ ಭಯ್ಣಿನ್, ಹಿಲ್ಡಾ ಬಾಯೆನ್ ತಾಕಾ ವೆಲಂಕಣಿ ಮಾಯೆಚ್ಯಾ ಪೂನ್‌ಶೆತಾಕ್ ಆಪವ್ನ್ ವೆಲ್ಲೆಂ.
ಪಪ್ಪ ನಿವೃತ್ತ್ ಜಾಲ್ಯಾ ಉಪ್ರಾಂತ್ ತಾಕಾ ಗಲ್ಫಾಚೊ ಖವೊ (ಚೀಸ್) ಭಾರಿಚ್ಚ್ ಪಸಂದಾಯೆಚಿ ಜಾಲ್ಲಿ. ಮ್ಹಜ್ಯಾ ಭಯ್ಣಿನ್ ಚೀಸ್ ವೆಲಿ ತರ್ ಭಾರಿಚ್ಚ್ ರುಚಿನ್ ತೊ ಖಾತಾಲೊ.
ಪಪ್ಪಾಚ್ಯಾ ಜಿಣಿಯೆಚ್ಯಾ ಆಖ್ರೇಚ್ಯಾ ದಿಸಾಂ ಪಯ್ಲೆಂ ತಾಣೆಂ ಇಗರ‍್ಜೆಕ್ ಪಾಂಚ್ ಹಜಾರಾಂಚೆ ದೆವೆಂ ಫಾರಿಕ್ ಕರುನ್ ಆಪುಣ್ ಅಂತರ‍್ಲ್ಯಾ ಉಪ್ರಾಂತ್ ಆಪ್ಲ್ಯಾ ಆತ್ಮ್ಯಾಕ್ ವರ್ಸಾಕ್ ಏಕ್ ಮೀಸ್ ದೀಜಾಯ್ ಮ್ಹಳ್ಳಿ ತಯರಾಯ್ ತಾಣೆಂ ಕೆಲ್ಲಿ ಕಂಯ್. ಆಪ್ಣಾ ಖಾತಿರ್ ಆಪ್ಲ್ಯಾ ಮರ‍್ಣಾ ಉಪ್ರಾಂತ್ ಆಪ್ಲ್ಯಾ ಬಾಯ್ಲೆ – ಭುರ‍್ಗ್ಯಾಂನಿ ಆಪ್ಲ್ಯಾ ಅತ್ಮ್ಯಾ ಖಾತಿರ್ ಕಾಂಯ್ ತ್ರಾಸ್ ಕಾಣ್ಘೆಂವ್ಚೆ ನಾಕಾತ್ ಮ್ಹಳ್ಳಿ ಆಶಾ ತಾಚಿ ಜಾವ್ನಾಸ್‌ಲ್ಲಿ.
ಹಾಂಗಾಸರ್ ವಿಶೆವ್ ಘೆತಾ ಆಮ್ಚೊ ಪಪ್ಪಾ
ತೊ ಮರಣ್ ಪಾಂವ್ಚ್ಯಾ ಪಯ್ಲೆಂ, ಆಮ್ಚ್ಯಾ ಕುಟ್ಮಾ ಖಾತಿರ್ ಆಮ್ಚ್ಯಾ ಪೊಂಪೈ ಇಗರ‍್ಜೆಚ್ಯಾ ಸಿಮಿಸ್ತ್ರೆಂತ್ ‘ಕುಟ್ಮಾ ಫೊಂಡ್’ ಖಾತಿರ್ ಜಾಗೊ ತಾಣೆ ಅಮಾನತ್ ಕೆಲ್ಲೊ. ತ್ಯಾ ವಿಶಿಂ ಆಮ್ಕಾಂ ಕೊಣಾಯ್ಕಿ ತಾಣೆ ಸಾಂಗೊಂಕ್ ನಾತ್ಲ್ಲೆಂ. ತೊ ಮೆಲ್ಯಾ ಉಪ್ರಾಂತ್ ತ್ಯಾ ವಿಶಿಂ ಆಮ್ಕಾಂ ಕಳಿತ್ ಜಾಲ್ಲೆಂ. ತ್ಯಾಚ್ಚ್ ಫೊಂಡಾಂತ್ ಆಮ್ಚ್ಯಾ ಮಾಲ್ಘಡ್ಯಾ ಭಾವಾಕ್, ಜೆರಿ ದಾಟ್ಟುಕ್, ಮಾತಿಯೆಕ್ ಪಾಯಿಲ್ಲೆಂ. ಜಾಂವ್ಕ್ ಪುರೊ ಮೆಲ್ಯಾ ಉಪ್ರಾಂತ್‌ಯ್ ಆಮ್ಚ್ಯಾ ಕುಟ್ಮಾನ್ ಸಾಂಗಾತಾಚ್ಚ್ ಆಸಾಜಯ್ ಮ್ಹಳ್ಳಿ ತಾಚಿ ಆಶಾ ಜಾವ್ನಾಸ್‌ಲ್ಲಿ.
ಪಪ್ಪ ಜೀವಂತ್ ಆಸ್ತಾನಾಂಚ್ ಮಮ್ಮ ಖಾತಿರ್ ಆರ‍್ತಿಕ್ ಭದ್ರತಿ ಜಾವ್ನ್ ಥೊಡೆಂ ಐವಜ್ ಬ್ಯಾಂಕಾಂತ್ ತಾಣೆಂ ದವರ್‌ಲ್ಲೆಂ. ತಾಚ್ಯಾ ಮರ‍್ಣಾ ಉಪ್ರಾಂತ್ ಆಪ್ಲ್ಯಾ ಬಾಯ್ಲೆಕ್ ಪಯ್ಶಾಂಚೆ ತ್ರಾಸ್ ಜಾಂವ್ಕ್ ನಜೊ ಮ್ಹಣ್.
ಪಪ್ಪ ಸರೊನ್ ಸವೀಸ್ ವರ್ಸಾಂ ಜಾತಾತ್ ತರ್ಯ್ ಪಪ್ಪಾಚೆಂ ನಿವೃತ್ತ್ ವೇತನ್ (ಪೆನ್ಶನ್) ಆತಾಂಯ್ ಮಮ್ಮಚ್ಯಾ ಬ್ಯಾಂಕ್ ಖಾತ್ಯಾಕ್ ಯೆತಾ. ಖಂಡಿತ್ ಜಾವ್ನ್ ಮಮ್ಮಕ್ ಹೊ ಏಕ್ ವರ್ತೊ ಆರ್ಥಿಕ್ ಆಧಾರ್.
ಪಪ್ಪ ಸರ‍್ಚ್ಯಾ ಥೊಡ್ಯಾಚ್ಚ್ ಘಂಟ್ಯಾ ಪಯ್ಲೆಂ, ಆಪ್ಲೆಂ ಮರಣ್ ಲಾಗಿಂ ಪಾವ್ಲಾಂ ಮ್ಹಣ್ ಕಳಿತ್ ಜಾವ್ನ್, ತಾಣೆ ತಾಚ್ಯಾ ಮೊಗಾಚ್ಯಾ ಜಾಂವ್ಯಾಕ್, ರೊಬರ್ಟ್ ಲೊಬೊಕ್ ಪಾಣೆರ್ ಥಾವ್ನ್ ಸೆಜಾರ‍್ಚ್ಯಾ ವಾಲ್ಟಿ ನಜ್ರೆತ್ ಆನಿ ಕಾರಾಚ್ಯಾ ವಿಲ್ಲಿ ಪೆರಿಸಾಕ್ ದಾಡ್ನ್ ಆಪಂವ್ಕ್ ದಾಡ್ಲೆಂ. ಬಾವೊಜಿ ಆಯ್ಲ್ಯಾ ಉಪ್ರಾಂತ್ ತಾಣೆ ನಿಮಾಣೊ ಸ್ವಾಸ್ ಸೊಡ್‍ಲ್ಲೊ.
ಪಪ್ಪಚ್ಯಾ ಆಕ್ರೇಚ್ಯಾ ದಿಸಾನಿಂ, ಮಮ್ಮನ್ ಆನಿ ಮ್ಹಜ್ಯಾ ವ್ಹಡ್ಲ್ಯಾ ಭಯ್ಣಿನ್, ಲಿಜಿ ಬಾಯೆನ್ ತಾಚಿ ಜಾಯ್ತಿ ಜತನ್ ಕಾಣ್ಘೆಲಿ. ತಾಕಾ ಜಾಯ್ ಜಾಲ್ಲೆಂ ಸರ್ವ್ ದಿಲೆಂ. ಜನೆರ್ ಪಾಂಚ್ 1994 ವರ್ಸಾ ಪಪ್ಪ ದೆವಾಧಿನ್ ಜಾಲೊ.
ಪಪ್ಪಾಚ್ಯಾ ಉಡಾಸಾಕ್ ಮ್ಹಜ್ಯಾ ಭಯ್ಣಿನ್, ಹಿಲ್ಡಾ ಬಾಯೆನ್ ತಾಂಚ್ಯಾ ನಿಮಾಣ್ಯಾ ಪುತಾಕ್ ಕೊಲಿನಾಕ್ ದುಸ್ರೆಂ ನಾಂವ್ ‘ಡೆನಿಸ್’ ಮ್ಹಣ್ ದಿಲಾಂ.
ಪಪ್ಪಾಚೊ ಉಡಾಸ್ ಆಮ್ಕಾಂ ಆನಿಕ್ಯ್ ಜೀವಂತ್ ಆಸಾ. ತಾಚಿ ನಿತಳ್ ಆನಿ ಸಾಧಿ ಜೀಣ್ ಜಾಯ್ತ್ಯಾಂಕ್ ಪ್ರೇರಣ್ ಜಾವ್ನಾಸಾ ತೆಂ ಖರೆಂ.
► ಕ್ಲೆರೆನ್ಸ್, ಕೈಕಂಬ
]]>ಸತಾಚೊ ಮೂಳ್‌ವಾದಿ ಪಪ್ಪಾ ಸರ್‌ಲ್ಲ್ಯಾ ಕಾಳಾಚೊ ಪ್ರತಿನಿಧಿ ಜಾವ್ನ್ ಕವಿತೆಂತ್ ದಿಸುನ್ ಯೆತಾ ತರ್ ಕವಿತೆಚೊ ಪ್ರತಿಪಾದಕ್ ‘ಪೂತ್’ ವರ್ತಮಾನ್ ಕಾಳಾಚೊ ಪ್ರತಿನಿಧಿ ಜಾವ್ನ್ ವಾಚ್ಪ್ಯಾಸಮೊರ್ ಯೆತಾ. ಗಾಂದಿ ತೊಪಿಯೆಕ್ ಸಮಾಜಿಕ್ ಮೊಲಾಂಚೊ ಸಂಕೇತ್ ಜಾವ್ನ್ ಕವಿತೆಂತ್ ವಾಪಾರ್‌ಲ್ಲೆಂ ದಿಸುನ್ ಯೆತಾ ಮಾತ್ ನಯ್, ಕವಿತೆಂತ್ ಗಾಂದಿನ್ ನೆಸ್‌ಲ್ಲ್ಯಾ ತೊಪಿಯೆಂತ್ ಗಾಂದಿನ್ ಪಾಚಾರ್‌ಲ್ಲಿಂ ಆನಿ ಪಾಳ್‌ಲ್ಲಿಂ ಸಮಾಜಿಕ್ ಮೊಲಾಂ ಪಿಂತ್ರಾಂವ್ಚೆಂ ಪ್ರಾಮಾಣಿಕ್ ಪ್ರೇತನ್ ಕೆಲ್ಲೆಂಯ್ ದಿಸುನ್ ಯೆತಾ.
ಹ್ಯಾ ಕವಿತೆಂತ್ ಯೆಂವ್ಚೊ ಮಣೆಗಾರ್, ಫಕತ್ ದೆಡ್ಶೆಂ ರುಪಿಯಾಂಕ್ ಸರ್ಕಾರಿ ಮ್ಹೊರಿಚೆಂ ಮೋಲ್ ಮಾತ್ ಬಾಂದಿನಾ ಬಗಾರ್ ಗಾಂದಿ ಅಪ್ರಸ್ತುತ್ ಜಾಲ್ಲ್ಯಾ ದೆಶಾಂತ್ ಗಾಂದಿ ತಿತ್ಲಿಂಚ್ ಗಾಂದಿನ್ ಪಾಚಾರ್‌ಲ್ಲಿಂ ಸತಾ ನಿತಿಚಿಂ ಮೊಲಾಂಯ್ ಅಪ್ರಸ್ತುತ್ ಮ್ಹಳ್ಳಿ ವಸ್ತುಸ್ಥಿತಿ ಉಗ್ಡಾಪಿ ಕರ್ಚೆಂ ರೂಪಕ್ ಜಾವ್ನ್ ಉಗ್ಡಾಪೊ ರಾವ್ತಾ. ನಳ್ಯಾಂಚೆಂ ಘರ್ ಹುಲ್ಪಾಲ್ಲೆಂ ಘಡಿತ್ ಹ್ಯಾ ಉಗ್ಡಾಪಣಾಕ್ ಪೂರಕ್ ಜಾವ್ನ್ ಕವಿತೆಂತ್ ವಾಪಾರ್ಲಾಂ ಮಾತ್ ನಯ್ ಕಾಳಾಚ್ಯಾ ಬದಲ್ಲೆಲ್ಯಾ ಪರಿಗತೆಂತ್ ಸತಾ ನಿತಿಚಿ ಸಮಾಜಿಕ್ ಮೊಲಾಂಯ್ ಸರೊನ್ ಗೆಲ್ಯಾಂತ್ ಮ್ಹಳ್ಳೆಂ ದರ್ಶಾಂವ್ಕ್ ಸತಾ ನಿತಿಚೊ ಸಂಕೇತ್ ಜಾವ್ನಾಸ್ಚಿ ಗಾಂದಿ ತೊಪಿ ಖುದ್ ಕಾಳಾನ್ ಮ್ಹಣ್ಜೇ ಪಪ್ಪಾನ್ ರಾಂದ್ಣಿಉಜ್ಯಾಕ್ ಉಡವ್ನ್ ಅಸಯಾಕತೆನ್ ಲಾಸ್ಚೆಂಯ್ ದಿಸ್ತಾ.
ಸರ್‌ಲ್ಲ್ಯಾ ಕಾಳಾಚ್ಯಾ ಆಟೆವಿಟ್ಯಾಂಕ್ ಆನಿ ಭ್ರಶ್ಟ್ ವೆವಸ್ಥೆ ಮುಕಾರ್ ಶರಣಾಗತ್ ಜಾಂವ್ಚ್ಯಾಅಸಹಾಯಕತೆಕ್ ಸಾಕ್ಸ್ ಜಾಲ್ಲೊ ವರ್ತಮಾನ್ ಕಾಳ್ ಮ್ಹಳ್ಯಾರ್ ಕವಿತೆಂತ್ಲೊ ಪೂತ್ ಇತ್ಲೊ ಆಕಾಂತಾನ್ ಬುಡ್ಲಾಗೀ, ಪಪ್ಪಾಚಿ ಉರ್‌ಲ್ಲಿ ಏಕ್ ತೊಪಿ ಉಡಾಸಾಕ್ ಮ್ಹಣ್ ಜೊಗಾಸಾಣೆನ್ ಸಾಂಬಾಳ್ನ್ ದವರ್ಲ್ಯಾ ತರೀ, ತಿ ನ್ಹೆಸ್ಚೆಂ ಧಯ್ರ್ ಮಾತ್ ತಾಚೆಥಂಯ್ ನಾ.
ಸತ್ ಸಂಭ್ರಮ್ಚ್ಯಾ ಪೂಣ್ ಸತ್ ಪಾಳುಂಕ್ ಅಸಹಾಯಕ್ ಜಾಲ್ಲ್ಯಾ ಸಂದಿಗ್ದ್ ವರ್ತಮಾನಾಂತ್ ಆಯ್ಚೊ ಮನಿಸ್ ಕಸೊ ಶಿರ್ಕಾಲಾ ಮ್ಹಣ್ ದರ್ಶಾಂವ್ಚಿ, ಸಂಕೇತಾಂಚೊಂ ವಾಪರ್ ಪರಿಣಾಮ್‌ಕಾರಿ ಜಾವ್ನ್ ರಚ್‌ಲ್ಲಿ ಪ್ರಸ್ತುತ್ ಕವಿತಾ ಕಾವ್ಯಾಸಕ್ತಾಂಚ್ಯಾ ಅಧ್ಯಯನಾಕ್ ಉಪ್ಕಾರಾಕ್ ಪಡ್ತಲಿ ಮ್ಹಣ್ ಮ್ಹಾಕಾ ಭೊಗ್ತಾ.
ಹ್ಯಾ ಕವಿತೆ ಸಂಗಿ ಕಿಟಾಳಾರ್ ಕವಿತಾ ಹಪ್ತೊ ಸುರು ಜಾತಾ, ಸೊಮಾರ್ ತೆ ಸನ್ವಾರ್ ದಿಸಾಕ್ ಏಕ್ ಕವಿತಾ ಹಾಂಗಾಸರ್ ಫಾಯ್ಸ್ ಜಾತೆಲಿ.
ತುಮ್ಚ್ಯೊ ವಿಂಚ್ಣಾರ್ ಕವಿತಾ ಆನಿ ಹಾಂಗಾಸರ್ ಫಾಯ್ಸ್ ಜಾಲ್ಲ್ಯಾ ಕವಿತೆ ವಿಶ್ಯಾಂತ್ ತುಮ್ಚಿ ಅಭಿಪ್ರಾಯ್ [email protected] ಹಾಂಗಾಸರ್ ಧಾಡುನ್ ದಿಯಾ.
► ಎಚ್ಚೆಮ್
ಪಪ್ಪಾ ಆಮ್ಚೊ ಘಾಲ್ತಾಲೊ
ಗಾಂಧಿಚಿ ಧವಿ ತೊಪಿ
ಸತಾಚೊ ಮೂಳ್‌ವಾದಿ
ಕಸಲೊ ಘಮಂಡ್
ವರ್ತೊ ಅಭಿಮಾನ್
ಧವಿ ತಿ ತೊಪಿ ತಕ್ಲೆರ್ ದವರ್ಚೊ
ಪಪ್ಪಾಚಿ ಧವಿ ತೊಪಿ
ಪಾವ್ಸಾಕ್ ಬಿಜ್ಲ್ಯಾರ್
ಘಾಮಾನ್ ಥಂಡ್ ಜಾಲ್ಯಾರ್
ಚಿಮ್ಟ್ಯಾನ್ ಚಾಬೊವ್ನ್
ಸುಕ್ತಾಲಿ ವಸ್ತುರಾಂ ಸುಕಂವ್ಚ್ಯಾ ಸರಿಯೆರ್
ತೊಪಿ ಮಾಂಡ್ಡ್ಯಾಕ್ ಬಸ್ಚ್ಯಾ ಕಡೆ
ಉರುಟಾಕ್ ಭರ್‌ಲ್ಲಿಂ
ಮಾತ್ಶಿಂ ಮಾತ್ಯೆ ರಂಗಾಚಿ ಘಾಮಾಂ ಚಾಕಾಂ
ಪುಣ್,
ಪಪ್ಪಾಚ್ಯಾ ಸಾಂಗ್ಣ್ಯಾ ಪ್ರಮಾಣೆ
ತಿ ತೊಪಿ ಕೆದ್ನಾಂಚ್ಚ್ ಮ್ಹೆಳ್‌ಲ್ಲಿ ನಾ
ತೊಪಿಯೆಚ್ಯಾ ದೊವ್ಯಾ ಲುಗ್ಟಾಕ್
ಮಾಜ್ವಣ್ ಆಯಿಲ್ಲಿ ನಾ
ದೇಶ್‌ಭಕ್ತಿಚೆಂ ಪ್ರತೀಕ್
ಮನ್ಶಾಪಣಾಚೊ ಆರ್ಸೊ
ಜೀವ್ ವಚ್ಯೆತ್; ಉತ್ರಾಂ ಮೊರ್ಚಿಂನಾಂತ್
ಸತ್‌ಚ್ ದೂದ್; ಫಟಿಚಿ ಸಾಯ್ ಸಯ್ತ್ ನಿಶೆಂವ್ಕ್ ನಾತ್ಲ್ಲಿ
ತ್ಯಾಚ್ಚ್ ಖಾತಿರ್
ತ್ಯಾ ತೊಪಿಯೆಚ್ಯಾ ಮಾನಾಕ್ ಮೆಜಾಪ್ ನಾತ್ಲ್ಲೆಂ.
ಲೊಕಾಚ್ಯಾ ಸನ್ಮಾನಾಕ್ ಗಡ್ ನಾತ್ಲ್ಲಿ
ಸತ್ ಉಲಂವ್ಚಿ ಸಾಕ್ಸ್
ತಿ ಧವಿ ತೊಪಿ !
ಘಡಿತ್ ಏಕ್ ಅಸ್ಲೆಂ
ಆಮ್ಚೆಂ ನಳ್ಯಾಂಚೆಂ ಘರ್ ಅಚಾನಕ್ ಹುಲ್ಪಾಲ್ಲೆಂ
ರುಜು ಪತ್ರ್ ಘೆಂವ್ಚ್ಯಾಕ್ ಮಣೆಗಾರಾಕ್ ಹಾಡ್ಲ್ಲೊ
ತ್ಯಾ ಮನ್ಶಾನ್ ಲಜೆವಿಣೆ ಹಾತ್ ವೊಡ್ಡಾಯ್ಲೆ
ದೆಡ್ಶೆಂ ರುಪಿಯಾಂಕ್ ಸರ್ಕಾರಿ ಮ್ಹೊರಿಚೆಂ ಮೋಲ್ ಬಾಂದ್ಲೆಂ
ಪಪ್ಪಾನ್ ‘ತೊಪಿ’ಯೆಚಿ ಸಾಕ್ಸ್ ಸಾಂಗ್ಲಿ
ಗಾಂಧಿವಾದಿ ಲೋಂಚ್ ದಿನಾಂತ್ ಮ್ಹಳೆಂ
ಪುಣ್, ಮಣೆಗಾರ್ ಆಯ್ಕಾಲೊಚ್ಚ್ ನಾ…
ದೇಶ್ ಬದಾಲ್ಲಾ ಮಾಸ್ಟ್ರಾ… ತುಂವೆಂಯ್ ಬದ್ಲಾಜಯ್ –
ಸಕಾಲಿಕ್ (ಅ)ಸತ್ತ್ – ಉತ್ರಾಂಚಿ ಜುಗಲ್ ಬಂಧಿ ಖೆಳಾಲಾಗ್ಲೊ
ಪೆಟ್ಯಾಕ್ ಉಸ್ಟ್ಯಾಚೆಂ ಹಾಡ್ ಉಡಯ್ಲೆಂ
ಲೊಂಚ್ ದಿಲ್ಲೆಂಚ್ಚ್ ಪತ್ರ್ ಮೆಳ್ಳೆಂ
ಪಪ್ಪಾ ರಡ್ಲೊ; ಕಳ್ವಳ್ಳೊ
ತಾಚೊ ಮಾನ್-ಅಭಿಮಾನ್ ದುಖಾಂತ್ ಇರೊನ್ ಗೆಲೊ
ಮಾತ್ಯಾ ವಯ್ಲಿ ತೊಪಿ ಮೆಕ್ಳಿ ಕೆಲಿ
ನಾಣ್ಯೆ ರಾಂದ್ಣಿಂತ್
ಗೊಬ್ರಾ ರಾಸಿಂತ್ ಪೂರ್ನ್ ತೊ ಹುಸ್ಕಾರ್ಲೊ
“ಹಿ ಘಾಲುಂಕ್ ಹಾಂವ್ ಫಾವೊ ನಂಯ್, ಪುತಾ
ಮಾನಾಚ್ಯಾ ತೊಪಿಯೆಕ್ ಆವ್ಮಾನ್ ಜಾಲೊ ….”
ಆತಾಂ,
ಪಪ್ಪಾಚಿ ಧವಿ ತೊಪಿ ಏಕ್ ಮ್ಹಜೆಲಾಗಿಂಯ್ ಆಸಾ
ತಿ ಮಾತ್ಯಾರ್ ಘಾಲುಂಕ್ ಹಾಂವ್‌ಯೀ ಭಿಯೆತಾಂ
ತಿ ತೊಪಿ ಘಾಲ್ನ್ ವಾಟೆರ್ ಏಕ್ ಮೇಟ್ ಕಾಡುಂಕ್ ಸಕ್ಚೊಂ ನಾ
ಕಿತ್ಯಾಕ್
ಆತಾಂಚ್ಯಾ ಸಂಸ್ರಾಂತ್ ಸತೆವಂತ್ ಕೋಣ್ ಆಸಾ?
‘ಹಾಂವ್‌ಯೀ ನಾ….’
► ಕ್ಲೆರೆನ್ಸ್ , ಕೈಕಂಬ
]]>
” ಹೆಂ ದಫ್ತರ್ ಪವಿತ್ರ್ ಜಾಗೊ… ಭಾರಿಚ್ಚ್ ಪವಿತ್ರ್ ಜಾಗೊ… ಆಮ್ಚ್ಯಾ ಪೊಟಾಚ್ಯಾ ಗ್ರಾಸಾಕ್, ಇತ್ಲ್ಯಾ ಕಾಮೆಲ್ಯಾಂಚ್ಯಾ ಕುಟ್ಮಾಂಚ್ಯಾ ಬರ್ಯಾ ಜಿವಿತಾಕ್ ವಾಟ್ ದಾಕಂವ್ಚೊ ಠಿಕಾಣೊ…..” ರೀಟಾ ಆಜ್ ಸಕಾಳಿಂಚ್ಚ್, ಸದಾಂಚ್ಯಾ ಸವಯೆ ಪ್ರಮಾಣೆಂ ಮ್ಹಜ್ಯಾ ಖಾಸ್ಗಿ ದಫ್ತರಾಕ್ ಯೇವ್ನ್ ಬೊಬಾಟೊನ್ ಉಲಯಿಲ್ಲೆಂ ಆನಿ ಸದಾಂಚೆ ಸವಯೆ ಪ್ರಮಾಣೆ ಪಾಟಿಂ ಕಿತೆಂಚ್ಚ್ ವಿಚಾರಿನಾಸ್ತಾನಾ ಹಾಂವೆ ಆಯ್ಕಾಲ್ಲೆಂಯ್! ” ಇತ್ಲ್ಯಾ ಕಾಮೆಲ್ಯಾಂಕ್ ಆನಿ ತಾಂಚ್ಯಾ ಕುಟ್ಮಾಂಕ್ ಪೊಸುಂಕ್ ವಾಪರುನ್ ಆಸ್ಚೊ ಹೊ ಜಾಗೊ ಭಾರಿಚ್ಚ್ ಪವಿತ್ರ್ ಆನಿ ಹ್ಯಾ ಜಾಗ್ಯಾರ್ ಕಿತೆಂಚ್ಚ್ ಭುರ‍್ಶೆಂ ಕೆಲ್ಲ್ಯಾಕ್ ಹಾಂವ್ ಪುಣೀ ಸೊಡ್ಚಿಂ ನಾ…. ಬೊಗ್ಸುಂಚಿಂಯ್ ನಾ…… ಹ್ಯಾ ಆತಾಂಚ್ಯಾ ಕಾಳಾಚ್ಯಾ ಶಿಕ್ಪಿ ತರ್ನಾಟ್ಯಾಂಕ್ ಬಿಲ್ಕುಲ್ ಅಕ್ಕಲ್ ನಾ…. ಭಾಗೆವಂತ್ ಬಾಪಾಚಿ ಭಿರಾಂತ್ ಕಸಿಯ್ ನಾ….ಹಾಂಚ್ಯಾ ರಗ್ತಾಂತ್‌ಚ್ಚ್ ಮಿಲಾವಟ್ ಆಸಾ ತಸೆಂಚ್ಚ್ ಭಗ್ಚೆಂ ಮ್ಹಾಕಾ……ಸಯ್ತಾನಾಚಿ ಮಿಲಾವಟ್…. ಭುರ‍್ಶೆ ಕಂಚೆ….. “
ಜೊನಾಥನಾನ್ ಕೆಲ್ಲ್ಯಾ ಭುರ‍್ಶ್ಯಾ ಕರ‍್ತುಬಾ ವಿಶಿಂ ಸವಿಸ್ತಾರ್ ಜಾವ್ನ್ ಕಾಲ್ಚ್ಯಾ ಸಾಂಜೆರ್ ತಾಣೆ ಮ್ಹಾಕಾ ಕಳಯಿಲ್ಲೆಂ. ತಾಕಾ ಕಾಮಾಂತ್ಲೊ ಕಾಡ್ಚ್ಯಾ ವಿಶಿಂಯ್ ತಾಚೆಂ ಚಿಂತಾಪ್ ಮ್ಹಾಕಾ ಸಾಂಗ್ಲ್ಲೆಂ.
ಆಮ್ಚಿ ಕಂಪ್ಣಿ ಸಾಧಾರ‍್ನ್ ಮಧ್ಯಮ್ ವರ‍್ಗಾಚಿ ಆನಿ ಪಾಟ್ಲ್ಯಾ ಪಂದ್ರಾ ವೊರ‍್ಸಾಂ ಥಾವ್ನ್ ಬಾಂದ್ಪಾಂ ಬಾಂಧ್ಚ್ಯಾ ವರ‍್ಗಾಂತ್ ಜೊಕ್ತಿಂ ಕಾಮಾಂ ಜೊಕ್ತ್ಯಾ ಮೊಲಾಕ್ ಘೆವ್ನ್, ವೆಳಾರ್ ಕಾಬಾರ್ ಕರ್ನ್ ಮಾರ‍್ಕೆಟಿಂತ್ ಬರೆಂಚ್ಚ್ ನಾಂವ್ ಆಪ್ಣಾವ್ನ್ ಜಯ್ತಾಚ್ಯಾ ಪಾಂವ್ಡ್ಯಾರ್ ಪಾವ್‌ಲ್ಲಿ. ಸುರ‍್ವೆರ್ ಬಾಂದ್ಪಾಚ್ಯಾ ದುರಸ್ತೆಚ್ಯಾ ಕಾಮಾಂತ್ ಬರಿ ಕಂಪ್ಣಿ ಮ್ಹಣ್ ನಾಂವಾಡ್‌ಲ್ಲಿ ತರ್ ಆಯ್ಲೆವಾರ‍್ಚ್ಯಾ ವೊರ‍್ಸಾಂನಿ ಬಾಂದ್ಪಾಂ ಬಾಂದ್ಚ್ಯಾ ಕಾಮಾಂತ್ ಉತ್ತೀಮ್ ಕಂಪ್ಣಿ ಮ್ಹಣ್ ನಾಂವ್ ವೆಲ್ಲಿ. ಕಂಪ್ಣೆಂತ್ ವಿವಿಧ್ ಹಂತಾನಿಂ ವಿವಿಧ್ ವರ‍್ಗಾಚೆ ಉಣ್ಯಾರ್ ಉಣೆಂ ತಿನ್ಶಿಂ ಜಣ್ ಕಾಮ್ ಕರ‍್ತಾಲೆ. ಮಸ್ಕತ್ ಶ್ಹೆರಾಂತ್ ಆಮ್ಚೆಂ ದಫ್ತರ್ ಆಸ್ಲ್ಲೆಂ ತರ್ ಆಮ್ಚಿಂ ಕಾಮಾಂ ಮ್ಹಳ್ಯಾರ್ ಪ್ರೊಜೆಕ್ಟಾಂ ಮಸ್ಕತಾ ಥಾವ್ನ್ ಪಯ್ಸ್ ಭಿತರ‍್ಲ್ಯಾ ಗಾವಾನಿಂ ಆನಿ ಶ್ಹೆರಾನಿಂ ಆಸ್ತಾಲಿಂ. ಚಲ್ತಾಲಿಂ.
ಕಂಪ್ಣೆಚ್ಯಾ ದಂದ್ಯಾಚಿ ಮ್ಹಳ್ಯಾರ್ ನವ್ಯಾ ಕಾಮಾಚೆಂ ಮೊಲಾಂ ನಿರ್ಧಾರ್ ಕರ್ಚೆಂ, ನವಿಂ ಕಾಮಾಂ ಘೆಂವ್ಚಿ, ತಿಂ ಜೊಕ್ತ್ಯಾ ರಿತಿನ್ ಚಲವ್ನ್ ವೊರ‍್ಚಿಂ ಆನಿ ಕಾಮೆಲ್ಯಾಂಕ್ ಕಾಮಾ ಥಳಾರ್ ಸಾಂಬಾಳುನ್ ವೊರ್ರ್ಚಿ ಜವಾಬ್ದಾರಿ ಮ್ಹಜಿ ಜಾವ್ನಾಸ್‌ಲ್ಲಿ. ಆಮ್ಚ್ಯಾ ಕಂಪ್ಣೆಂಚ್ಯಾ ಗಿರಾಯ್ಕಾಂ ಥಾವ್ನ್ ಪಯ್ಶೆ ಯೆಂಕ್ಟಾಂಯ್ ಕರ‍್ಚೆ ಆನಿ ಪ್ರೊಜೆಕ್ಟಾಂಕ್ ಸಾಮಾಗ್ರಿ ದಿಂವ್ಚ್ಯಾಂಕ್ ವೆಳಾರ್ ಪಯ್ಶೆ ಫಾರಿಕ್ ಕರ್ಚೆಂ ಕಾಮ್ ಮ್ಹಜೆಂಚ್ಚ್ ಜಾವ್ನಾಸ್ಲ್ಲೆಂ.
ಆಮ್ಚ್ಯಾ ಕಂಪ್ಣೆಂತ್ ಆಡಳಿತ್ ಮಟ್ಟಾಚೆಂ ಕಾಮ್ ರೀಟಾ ಸಾಂಬಾಳ್ತಾಲೆಂ. ಕಂಪ್ಣೆಂತ್ ನವ್ಯಾ ಕಾಮೆಲ್ಯಾಂಕ್ ಹಾಡ್ಚೆಂ, ತಾಂಕಾ ಸಾಂಬಾಳಾಚೊ ನಿರ್ಧಾರ್ ಕರ್ಚೊ ತಾಣೆಂಚ್ಚ್ ಆಸ್ಲ್ಲೊ. ದಫ್ತರಾಂತ್ ಕಿತೆಂ ಪುರಾ ಜಾಯ್, ಲ್ಹಾನ್ ವ್ಹಡ್ ಗರ‍್ಜೊ ತೆಂ ಸಾಂಬಾಳ್ತಾಲೆಂ. ಕಂಪ್ಣೆಂತ್ ಆಸ್ಚ್ಯಾ ಓಮಾನಿ ಕಾಮೆಲ್ಯಾಂಕ್ ಸಾಂಬಾಳುಂಕ್ ರೀಟಾಕ್ ಸಾರ್ಕೆಂ ಜಾತಾಲೆಂ. ಪುಣ್, ಹರ‍್ಯೇಕಾ ದಸ್ತವೆಜಾಕ್ ಯಾ ಕಂಪ್ಣೆಂಚ್ಯಾ ಪತ್ರಾಂಕ್ ಮ್ಹಜಿ ದಸ್ಕತ್ ಯಾ ಆಮ್ಚ್ಯಾ ಓಮಾನಿ ಪೊಷಕಾಚಿ ದಸ್ಕತ್ ಮಾತ್ರ್ ಚಲ್ತಾಲಿ. ಓಮಾನಿ ಪೋಷಕ್ ಮಾತ್ರ್ ದಫ್ತರಾಕ್ ಯೆನಾತ್ಲ್ಲೊ ಜಾಲ್ಲ್ಯಾನ್ ದಸ್ಕತ್ ಘಾಲ್ಚೆಂ ಜವಾಬ್ದಾರೆಚೆಂ ಕಾಮ್ ಹಾಂವ್ಂಚ್ಚ್ ಕರ‍್ತಾಲೊಂ. ರಿಟಾನ್ ಜಾಯ್ತ್ಯಾ ಪಾವ್ಟಿಂ ದಸ್ಕತ್ ಘಾಲ್ಚೆಂ ಹಕ್ಕ್ ತಾಕಾಯ್ ಜಾಯ್ ಮ್ಹಣ್ ವಿಚಾರ್ಲ್ಲೆಂ ತರ್ಯ್ ಹಾಂವೆ ತೆಂ ತಾಕಾ ದೀಂವ್ಕ್ ನಾತ್ಲ್ಲೆಂ.
ರೀಟಾ ಮಾತ್ರ್ ಮಾಗ್ಣ್ಯಾಂತ್ ಭಾರಿಚ್ಚ್ ಮುಕಾರ್ ಆಸ್ಲ್ಲೆಂ. ಸದಾಂ ಸಕಾಳಿಂಚೆಂ ಮೀಸ್, ಮಂಗ್ಳಾರಾ, ಬುದ್ವಾರಾ ದಿಸಾನಿಂ ಖಳ್ಮಿತ್ ನಾಸ್ತಾನಾ ನೊವೆನಾಂ, ಹಫ್ತ್ಯಾ ಮಧೆಂ ದೋನ್ ದೀಸ್ ಮಾಗ್ಣ್ಯಾ ಜಮತ್ ಮ್ಹಣ್ ತಾಚಿ ಜೀಣ್ ಭಾರಿಚ್ಚ್ ದೆವಾಸ್ಪಣಾಚಿ ಜಾವ್ನಾಸ್‌ಲ್ಲಿ. ಕಾರ್ ಚಲಂವ್ಚೆಂ ಲೈಸನ್ಸ್ ಆನಿ ತಾಚೆಂಚ್ಚ್ ಕಾರ್‌ಯ್ ತಾಚ್ಯಾ ಲಾಗಿಂ ಆಸ್ಲ್ಲ್ಯಾನ್ ಖಂಯ್ ವಚೊಂಕ್‌ಯ್ ತಾಕಾ ತ್ರಾಸ್ ಜಾಯ್ನಾತ್‌ಲ್ಲೆ. ಬುದ್ವಾರಾ ದೀಸ್ ತಾಚೊ ಜಿಂಜ್ವಾರ್ ಆಸ್ಲ್ಲೊಚ್ಚ್. ಅಸಿ ತಾಚಿ ಜಿಣಿ ಭಾಗೆವಂತ್ಪಣಾಚಿ ಜಾಲ್ಲ್ಯಾನ್ ಜಾಯ್ತ್ಯಾ ಪಾವ್ಟಿಂ ತೆಂ ಆಮ್ಚ್ಯಾ ಲಾಗಿಂ ಮ್ಹಣೊನ್ಂಯ್ ಆಸ್ಲ್ಲೆಂ – ” ಮ್ಹಜ್ಯಾ ಭಕ್ತಿಪಣಾ ವೊರ‍್ವಿಂಚ್ಚ್ ಆಮ್ಚ್ಯಾ ಕಂಪ್ಣೆಕ್ ಇತ್ಲಿ ಉದರ‍್ಗತಿ ಜಾಲ್ಯಾ. ಮ್ಹಜ್ಯಾ ಮಾಗ್ಣ್ಯಾ ವೊರೆಂಸಾಂವಾ ವೊರ‍್ವಿಂ ಆಮ್ಕಾಂ ಸರ್ವ್ ವಿಘ್ನಾಂತ್ಲೆಂ ದೇವ್ ರಾಕೊನ್ ವೊರ‍್ತಾ ಮ್ಹಳ್ಳೊ ಮ್ಹಾಕಾ ಖರೊಚ್ಚ್ ಭರ‍್ವಾಸೊ ಆಸಾ. ಪ್ರೇಜ್ ದ ಲೋರ್ರ್ಡ್…”
ಜೊನಾಥನ್, ಆಮ್ಚ್ಯಾಚ್ಚ್ ಗಾಂವ್ಚೊ, ಆಮ್ಚ್ಯಾಚ್ಚ್ ಫಿರ‍್ಗಜೆಚೊ. ಭಾರಿಚ್ಚ್ ದುಬ್ಳ್ಯಾ ಕುಟ್ಮಾಂತ್ಲೊ ಪುಣ್ ಶಿಕ್ಚ್ಯಾಂತ್ ಭಾರಿಚ್ಚ್ ಹುಶಾರ್. ಆವಯ್ ಬಾಪೊಯ್ ಭಾಡ್ಯಾಚ್ಯಾ ಘರಾಂತ್ ಆಸೊನ್ ತರ್ಯ್ ಭಾರಿಚ್ಚ್ ಕಷ್ಟಾಂನಿ ಇಗರ‍್ಜೆ ಥಾವ್ನ್ ಕುಮಕ್ ಘೆವ್ನ್ ಆನಿ ಥೊಡ್ಯಾ ಸಂಘ್-ಸಂಸ್ಥ್ಯಾಂಚಿ ಮಜತ್ ವಿಚಾರ‍್ನ್ ತಾಣೆಂ ಇಜ್ನೆರಾಚಿ ಸನದ್ ಬಾಂದ್ಪಾಂ ಬಾಂದ್ಚ್ಯಾ ಶಿಕ್ಪಾಂತ್ ಕೆಲ್ಲಿ. ಸನದೆಚೆ ಶಿಕಾಪ್ ಜೊಡ್ಲ್ಯಾ ಉಪ್ರಾಂತ್ ಗಾವಾಂತ್ ಹೆಣೆಂ ತೆಣೆಂ ಜಾಯ್ತ್ಯಾ ಕಡೆನ್ ಕಾಮಾಂಚಿ ಸೊದ್ನಾಂ ತಾಣೆಂ ಕೆಲ್ಲಿಂ. ಲ್ಹಾನ್ ಲ್ಹಾನ್ ಕಾಮಾಂ ಗಾಂವ್ಚ್ಯಾ ಕಂಪ್ಣ್ಯಾಂನಿ ತಾಕಾ ಮೆಳ್‌ಲ್ಲಿಂ ತರ್ಯ್ ತಾಂತು ತಾಚ್ಯಾ ಫುಡಾರಾಕ್ ಯಾ ಘರ್ರ್ಚ್ಯಾಂಕ್ ಕುಮಕ್ ಜಾಂವ್ಚೆಂ ಕಿತೆಂಚ್ಚ್ ಉರಾನಾತ್‌ಲ್ಲೆಂ. ಬಾಪಾಯ್ನ್ ಚಲಂವ್ಚ್ಯಾ ರಿಕ್ಷಾಂತ್ ಆತಾಂ ಕಾಂಯ್ ಹುಟ್ವಳ್ ಜಾಯ್ನಾತ್‌ಲ್ಲಿ. ಕಾಂಯ್ ಇಲ್ಲಿ ಜಾಲಿ ತರ್ ತೆದ್ನಾಂ ತೆದ್ನಾಂ ಯೆಂವ್ಚ್ಯಾ ರಿಪೇರಿಚ್ಯಾ ಕಾಮಾಕ್ ಖರ‍್ಚಾತಾಲೆ. ಜೊನಾಥನಾಚ್ಯಾ ಪಾಟ್ಲ್ಯಾನ್ ಆಸ್ಲ್ಲ್ಯಾ ತೆಗಾಂ ಭಯ್ಣ್ಯಾಂಕ್ ಬರೆಂ ಶಿಕಾಪ್ ಆನಿ ಬರೊ ಫುಡಾರ್ ದಿಂವ್ಚಿ ಜವಾಬ್ದಾರಿಯ್ ತಾಚೆರ್ ಆಸ್ಲ್ಲಿ. ತ್ಯಾ ವೆಳಿಂ, ತಾಚ್ಯಾ ಆವಯ್ ಬಾಪಾಯ್ನ್ ಆಮ್ಚ್ಯಾ ಫಿರ‍್ಗಜೆಚ್ಯಾ ವಿಗಾರಾ ಮುಕಾಂತ್ರ್ ವೊತ್ತಾಯ್ ಕೆಲ್ಲ್ಯಾ ವೊರ‍್ವಿಂ ಆಮಿ ತಾಕಾ ಆಮ್ಚ್ಯಾ ಕಂಪ್ಣೆಂತ್ ಕಾಮ್ ದಿಲ್ಲೆಂ. ತೊ ಒಮಾನಾಕ್ ನವೊಚ್ಚ್ ಆನಿ ಕಾಮಾಂತ್‌ಯ್ ನವೊಚ್ಚ್ ತರ್ಯ್ ತಕ್ಲೆಂತ್ ಭಾರಿಚ್ಚ್ ಹುಶಾರ್ ಜಾಲ್ಲ್ಯಾನ್ ತಾಚೆಂ ಕಾಮ್ ವೆಗ್ಗಿಂಚ್ಚ್ ಶಿಕೊನ್ ಸಕ್ಡಾಂಚ್ಯಾ ಪಾತಿಯೆಣೆಕ್ ಕಾರಣ್ ಜಾಲ್ಲೊ. ಏಕ್ ಪಾವ್ಟಿಂ ತಾಚ್ಯಾ ಕಾಮಾಚೊ ವಿವರ್ ತಾಕಾ ದಿಲೊ ತರ್ ಉಪ್ರಾಂತ್ ಪರತ್ ಸಾಂಗಾಜಯ್ ಮ್ಹಣ್ಂಚ್ಚ್ ನಾತ್ಲ್ಲೆಂ. ಪಾಟ್ಲ್ಯಾ ತೀನ್ ವೊರ‍್ಸಾಂನಿ ತಾಚ್ಯಾ ಸಾಂಗಾತ್ಯಾಂ ಸಾಂಗಾತಾ ಮೆಳೊನ್ ತಾಚ್ಯಾ ಡಿಪಾರ‍್ಟ್‌ಮೆಂಟಾಚೆಂ ಕಾಮ್ ಭಾರಿಚ್ಚ್ ನಾಜೂಕಾಯೆನ್ ತೊ ಕರ‍್ತಾಲೊ.
ಆನಿ ಅಸಲ್ಯಾ ವೊರ‍್ತ್ಯಾ ಇಮಾನ್‌ದಾರೆನ್ ಕಾಮ್ ಕರ್ಚೊ ಜೊನಾಥನ್ ರೀಟಾಚ್ಯಾ ಕಟಿನ್ ಹಾತಾಂಕ್ ಆತಾಂ ಸಾಂಪಾಡ್‌ಲ್ಲೊ. ಸಾಂಪಾಡ್‌ಲ್ಲೊ ಕಾಮೆಲಿ ಕಿತ್ಲೊ ಬರೊ ತರ್ಯ್ ತಾಕಾ ಶಿಕ್ಷಾ ದಿಂವ್ಕ್ ರೀಟಾ ಮಾತ್ರ್ ಪಾಟಿಂ ಪುಡೆಂ ಪಳಯ್‌ನಾತ್‌ಲ್ಲೆಂ. ತಾಕಾ ಕಾಮಾಂತ್ಲೆಂ ಕಾಡ್ನ್ ಪಾಟಿಂ ಭಾರತಾಕ್ ದಾಡ್ಚೆಂಚ್ಚ್ ತಾಚ್ಯಾ ಥಂಯ್ ಆಸ್ಲ್ಲೆಂ ವ್ಹಡ್ಪಣ್. ತ್ಯಾಚ್ಚ್ ವೊರ‍್ವಿಂ ಚಡ್ ಜಾವ್ನ್ ಕಾಮೆಲಿ ಮ್ಹಜ್ಯಾ ವೊರ‍್ನಿ ತಾಕಾ ಚಡ್ ಭಿಯೆತಾಲೆ. ” ಹಾಂವ್ ಕಾಮೆಲ್ಯಾಂ ಥಂಯ್ ಕಾಂಯ್ಚ್ಚ್ ದಯ-ದಾಕ್ಷೆಣ್ ಬಿಲ್ಕುಲ್ ದಾಕಯ್ನಾ. ದಾಕ್ಷೆಣ್ ದಾಕಯ್ಲಿ ತರ್ ತೆ ಆಮ್ಚ್ಯಾ ಮಾತ್ಯಾರ್ ಬಸ್ತಾತ್. ಆಮ್ಚೆಂ ಕಾಮ್ ಬಿಲ್ಕುಲ್ ಚಲ್ಚೆಂ ನಾ.” ತಾಣೆಂ ಕೆದ್ನಾಂಯ್ ಮ್ಹಣ್ಚೆಂ ಆಸ್ಲ್ಲೆಂ.
ತರ್ ಜೊನಾಥನಾಚೊ ಅಪ್ರಾಧ್ ಕಸಲೊ ?
ಕಾಲ್ಚ್ಯಾ ಸಾಂಜೆರ್ ರಿಟಾನ್ ಸಾಂಗ್ಲ್ಲ್ಯಾ ಪ್ರಕಾರ್ ಜೊನಾಥನ್ ದಫ್ತರಾಂತ್ ಬಸೊನ್, ಕಾಮಾಚ್ಯಾ ವೆಳಾರ್ ಆಪ್ಲ್ಯಾ ಕಂಪ್ಣೆಚ್ಯಾ ಕಂಪ್ಯೂಟರಾಚೆರ್ ಕಂಪ್ಣೆಚೆಂ ಇಂಟರ್‌ನೆಟ್ ವಾಪರುನ್ ಭುರ‍್ಶಿಂ ಪಿಂತುರಾಂ ಪಳಯ್ತಾಲೊ. ಅಸಲಿಂ ಭುರ‍್ಶಿಂ ಪಿಂತುರಾಂ ಪಳಂವ್ಚೆಂ ವ್ಹಡ್ ನಂಯ್ ಬಗರ್ ಮ್ಹಾ-ಪಾತಕ್ ಮ್ಹಣ್ ರೀಟಾ ಅಪ್ಲೆಂ ಹರ‍್ಧೆಂ ಪುಟೊನ್ ಮ್ಹಳ್ಳ್ಯಾಬರಿ ಸಾಂಗಾಲಾಗ್ಲೆಂ. ಆತಾಂಚ್ಯಾ ತರ‍್ನ್ಯಾ ಜನಾಂಗಾಕ್ ತಸಲೆ ಭುರ‍್ಶೆ ಆವ್ಕಾಸ್ ದರಬಸ್ತ್ ಆಸ್ಲ್ಲೆ ತರ್ಯ್ ತಸೆಂ ದಫ್ತರಾಂತ್ ಬಿಲ್ಕುಲ್ ಕರುಂಕ್ ನಾ ಮ್ಹಣ್ ರಿಟಾನ್ ಪಯ್ಲೆಂಚ್ಚ್ ಸರ್ವಾಂಕ್ ಕಳಯಿಲ್ಲೆಂ. ಗಲ್ಫಾಚೊ ಗಾಂವ್ ಆನಿ ತ್ಯಾ ಗಾವಾಂತ್ಲಿ ನಿಯಮಾಂ ಆನಿ ರೆಗ್ರೊ ಕಟಿನಾಯೆನ್ ಸಾಂಬಾಳಿಜಯ್ ಮ್ಹಣ್ ತಾಚಿ ಕಟಿಣ್ ತಾಕಿದ್ ಆಸ್‌ಲ್ಲಿಚ್ಚ್. ತಸಲಿ ಕಟಿಣಾಯೆಚಿ ರೆಗ್ರ್ ಆಮ್ಚ್ಯಾ ಕಂಪ್ಣೆಂತ್ ಆಸ್ತಾನಾ, ಕೊಣ್ಂಚ್ಚ್ ಕಾಮೆಲಿ ಹೆಣೆ ತೆಣೆ ಕಿತೆಂಚ್ಚ್ ಕರಿನಾತ್‌ಲ್ಲೆ.
ಗಲ್ಫಾಂತ್ ಚಡಾವತ್ ಕಂಪ್ಣ್ಯಾಂನಿ ಸುಕ್ರಾರಾ ಆನಿ ಸನ್ವಾರಾ ರಜಾ ಆಸ್ತಾಲಿ ಆನಿ ಆಮ್ಚ್ಯಾ ಕಂಪ್ಣೆಕೀ ತ್ಯಾಚ್ಚ್ ಪ್ರಮಾಣೆಂ ರಜಾ. ಸನ್ವಾರಾ ದೀಸ್ ದಫ್ತರಾಚ್ಯಾ ಕಾಮೆಲ್ಯಾಂಕ್ ಆನಿ ಕಾಮಾಚ್ಯಾ ಜಾಗ್ಯಾರ್ ಕಾಮ್ ಕರ್ಚ್ಯಾ ಇಜ್ನೆರಾಂಕ್ ಆನಿ ಹೆರ್ ತಾಂತ್ರಿಕ್ ಮನ್ಶಾಂಕ್ ಜಮತ್ ಆಸ್ತಾಲಿ ಆನಿ ಹ್ಯಾ ಹಫ್ತ್ಯಾಂತೀ ತಸೆಂಚ್ಚ್ ಜಾಲ್ಲೆಂ. ಜಮತ್ ಜಾಲ್ಯಾ ಉಪ್ರಾಂತ್ ಚಡಾವತ್ ಕಾಮೆಲಿ ಏಕೆಕ್ಲೆಚ್ಚ್ ಘರಾ ವೆತಾಲೆ.
ಸನ್ವಾರಾಂಚೆಂ ಹಾಂವ್ ಕಾಮಾಕ್ ಯೆತಾಲೊಂ ತರ್ಯ್ ರೀಟಾ ಮಾತ್ರ್ ಚಡಾವತ್ ಯೆನಾತ್‌ಲ್ಲೆಂ. ಸನ್ವಾರಾಂಚ್ಯಾ ದಿಸಾನಿಂ ತೆಂ ಆಮ್ಚ್ಯಾ ಭುರ‍್ಗ್ಯಾಂಚೆಂ ಇಸ್ಕಾಲಾಚೆಂ ಶಿಕಾಪ್ ಪಳವ್ನ್ಂಗೀ ಯಾ ತಾಂಕಾ ಜಾಯ್ ಜಾಲ್ಲೆಂ ಕಿತೆಂಯ್ ಸುಪರ್‌ಮಾರ‍್ಕೆಟಿ ಥಾವ್ನ್ ಹಾಡ್ನ್ ಯೆಂವ್ಚ್ಯಾ ಕಾಮಾಂತ್ ವ್ಯಸ್ತ್ ಆಸ್ತಾಲೆಂ. ಘರಾಕ್ ಜಾಯ್ ಜಾಲ್ಲೊ ಜಿನ್ಸಾಚೊ ಸಾಮಾನ್ ಹಾಡ್ಚೊ ಸನ್ವಾರಾ ದೀಸ್‌ಚ್ಚ್. ಪುಣ್, ಹ್ಯಾ ಹಫ್ತ್ಯಾಂತ್ ಜಾಲ್ಲೆಂ ವೆಗ್ಳೆಂಚ್ಚ್. ಹಫ್ತ್ಯಾಚ್ಯೊ ಜಮತಿ ಜಾಲ್ಯಾ ಉಪ್ರಾಂತ್ ದಫ್ತರಾಚೆ ಕಾಮೆಲಿ ಏಕೇಕ್ಲೆಚ್ಚ್ ಘರಾ ಗೆಲ್ಲೆ ತರ್ಯ್ ಜೊನಾಥನ್ ಗೆಲ್ಲೊ ನಾ. ಅಪ್ಲ್ಯಾ ಕಂಪ್ಯೂಟರಾಚೆರ್ ಕಾಮ್ ಕರ್ಚ್ಯಾ ಬರಿ ದಫ್ತರಾಚ್ಯಾ ಕೂಡಾಕ್ ಭಿತರ‍್ಲ್ಯಾನ್ ಬೀಗ್ ಘಾಲ್ನ್ ಬಸೊನ್ ಆಸ್ಲ್ಲೊ. ತ್ಯಾಚ್ಚ್ ವೆಳಾರ್ ರೀಟಾ ಆಪ್ಲ್ಯಾ ಕಸಲ್ಯಾಗೀ ಕಾಮಾನ್ ದಫ್ತರಾಕ್ ಆಯಿಲ್ಲೆಂ. ಆಯಿಲ್ಲೆಂ, ಆಪ್ಣಾ ಲಾಗಿಂ ಆಸ್ಲ್ಲಿ ಚಾವಿ ವಾಪಾರುನ್, ಜೊನಾಥನ್ ಆಸ್ಲ್ಲ್ಯಾ ಕೂಡಾಕ್ ರಿಗ್‌ಲ್ಲೆಂ. ಶೀದಾ ಜೊನಾಥನ್ ಕಾಮ್ ಕರ್ರ್ಚ್ಯಾ ಜಾಗ್ಯಾರ್ ಆಯಿಲ್ಲೆಂ ಆನಿ ತಾಣೆಂ ಜೊನಾಥನಾಕ್ ಧರ್‌ಲ್ಲೊ.
ರಿಟಾನ್ ಸಾಂಗ್ಚ್ಯಾ ಪ್ರಮಾಣೆಂ ಜೊನಾಥನ್ ಪಿಂತುರ್ ಪಳಯ್ತಾಲೊ. ತೆಂಯ್ ’ಭುರ‍್ಶೆಂ ನಿಳ್ಶೆಂ’ ಪಿಂತುರ್. ಭುರ‍್ಶೆಂ; ಹಳ್ಶಿಕ್ ಯಾ ಸಾದಾರ‍್ನ್ ಮನ್ಶಾಂನಿ ಪಳಂವ್ಕ್ ನಜೊ ಆಸ್ಲ್ಲೆಂ ತಸಲೆಂ. ರಿಟಾಕ್, ತಾಚ್ಯಾ ಭಾಗೆವಂತ್ಪಣಾಂತ್ ಆನಿ ಪವಿತ್ರ್ ಜಿಣಿಯೆಂತ್ ತಸಲ್ಯಾ ಭುರ‍್ಶ್ಯಾ ಪಿಂತುರಾಂತ್ ದೀಷ್ಟ್ ಘಾಲ್ಲಿಚ್ಚ್ ಪಾತ್ಕಾಚೊ ಬೊರೊಚ್ಚ್ ಆತ್ಮ್ಯಾಂತ್ ಭರ್‌ಲ್ಲ್ಯಾ ಬರಿ ಜಾಲ್ಲೊ. ತಾಚ್ಯಾ ಪವಿತ್ರ್‌ಪಣಾಚ್ಯಾ ಜಿಣಿಯೆಂತ್ ಅಸಲೆಂ ಕೆದ್ನಾಂಯ್ ತಾಣೆ ದೆಖೊಂಕ್ ನಾತ್ಲ್ಲೆಂ. ತಾಚ್ಯಾ ಪೊಟಾಂತ್ ಅಡ್ವಳೊನ್ ಆಯ್ಲೆಂ ಆನಿ ತೆಂ ಬೊಬಾಟೊನ್ ಮ್ಹಣಾಲೆಂ – ” ಬಂಧ್ ಕರ್ ತೆಂ ಭುರ‍್ಶೆಂಪಣ್ ಆನಿ ಹಾಂಗಾಥಾವ್ನ್ ಆತಾಂಚ್ಚ್ ಭಾಯ್ರ್ ವಚ್….. ತುಜ್ಯಾ ತಸಲ್ಯಾ ಮನ್ಶಾಕ್ ಹ್ಯಾ ಆಫಿಸಾಂತ್ ಬಿಲ್ಕುಲ್ ಜಾಗೊ ಆಸ್ಚೊ ನಾ…. ತುಜ್ಯಾ ತಸಲೊ ಮನಿಸ್ ಮ್ಹಾಕಾ ನಾಕಾ….. ಕಟಿಣ್ ಭುರ್ರ್ಶೊ ಮನಿಸ್ ತುಂ…..”
ಜೊನಾಥನ್ ಸಗ್ಳೊಚ್ಚ್ ಕಾಲುಬುಲೊ ಜಾಲ್ಲೊ. ತಾಕಾ ಏಕಾ ರೀತಿಚಿ ಲಜ್‌ಯ್ ದಿಸ್‌ಲ್ಲಿ ಆನಿ ತಾಚ್ಯಾಕೀ ವೊರ‍್ತ್ಯಾನ್ ಭ್ಯೆಂ. ಭ್ಯೆಂ ಅಪ್ಣಾಕ್ ಕಾಮಾಂತ್ಲೆಂ ಕಾಡ್ನ್ ಪಾಟಿಂ ಗಾವಾಕ್ ದಾಡ್ತಾತ್ ಮ್ಹಳ್ಳೆಂ. ಮುಖ್ಲ್ಯಾ ಜಿವಿತಾಚಿ ಅಸ್ತಿರತಾ ಮತಿಂತ್ ಯೇವ್ನ್ ತಾಕಾ ಕಾಣ್ಸಿರಾಶಿ ಕರಿಲಾಗ್ಲಿ. ತೊ ವ್ಹಡಾ ಆವಾಜಾನ್ ರಡ್ಚೊ ಮಾತ್ರ್ ಬಾಕಿ…. “ಸೊರ್ರಿ ಮೆಡಮ್…. ಮ್ಹಜಿ ಚೂಕ್ ಜಾಲಿ….. ಮ್ಹಾಕಾ ಮಾಫ್ ಕರ್….” ಭಾರಿಚ್ಚ್ ಕಷ್ಟಾಂನಿ ತೊ ಉಲಯಿಲ್ಲೊ. ಪರಾತ್ತಿಲಾಗ್‌ಲ್ಲೊ.
“ಚೂಕ್ ನಂಯ್…. ಬೆಕೂಫಾ….. ತುಂವೆ ಅಫ್ರಾದ್ ಕೆಲಾಯ್…..ಬಿರಾಂಕೂಳ್ ಅಫ್ರಾದ್….. ತುಂ ದುಬ್ಳೊ ಮ್ಹಣ್ ವಿಗಾರಾಂನಿ ಆನಿ ಲೊಕಾನಿಂ ಸಾಂಗ್ಲ್ಲೆಂ…… ತುಜ್ಯಾ ವಿಶಿಂ ಬರೆಂಚ್ಚ್ ಸಾಂಗ್ಲ್ಲೆಂ……. ಪುಣ್, ತುಂ ದೆಂವ್ಚಾರ್ ಮ್ಹಣ್ ಆತಾಂ ಕಳ್ಳೆಂ…… ಹಾಂವ್ ಕಿತ್ಲಿಂ ಪವಿತ್ರ್ ಆನಿ ಕಿತ್ಲಿಂ ಇಗರ‍್ಜೆಂತ್ ಭಾಗೆವಂತ್ಪಣಿ ಜಿಯೆತಾಂ ಮ್ಹಣ್ ಕಳೊನ್ಂಯ್ ಮ್ಹಜ್ಯಾ ದಫ್ತರಾಂತ್ ತುಂವೆಂ ಅಸೆಂ ಕರ್ಚೆಂ? ದೋನ್ಂಚ್ಚ್ ಘಡಿಯಾಂಚ್ಯಾ ವೆಳಾಕ್ ಹಾಂವೆ ತೆಂ ಪಿಂತುರ್ ಪಳಯ್ಲೆಂ ಆನಿ ಖಂಡಿತ್ ಜಾವ್ನ್ ಮ್ಹಾಕಾ ಕಿತ್ಲ್ಯಾ ಪಾವ್ಟಿಂ ಕುಮ್ಸಾರ್ ಜಾಯ್ಜಯ್ ಮ್ಹಣ್ ಕಳಾನಾ; ಕಿತ್ಲೆ ದೀಸ್ ಜಿಂಜ್ವಾರ್ ಕರ್ನ್ ಹೆಂ ಪಾತಕ್ ರಡಾಜಯ್ ಮ್ಹಣ್ಂಯ್ ಮ್ಹಾಕಾ ಕಳಾನಾ…. ಪುಣ್, ತುಕಾ ಮಾತ್ರ್ ಭಗ್ಸಾಣೆಂ ಬಿಲ್ಕುಲ್ ನಾ…. ತುಕಾ ಭಗ್ಸಾಣೆಂ ಮೆಳೊಂಕ್ಯ್ ನಜೊ… ತುಂ ಖಂಡಿತ್ ಜಾವ್ನ್ ಪಾತ್ಕಿ ಆನಿ ಗುನ್ಯಾಂವ್‌ಕಾರ್ …. ವ್ಹಡ್ಲೊ ಗುನ್ಯಾಂವ್‌ಕಾರ್…. ಮ್ಹಜ್ಯಾ ತಸಲಿ ಭಾಗೆವಂತ್ ಆನಿ ಮಾಗ್ಣ್ಯಾಚಿ ಮನಿಸ್ ಕಾಮ್ ಕರ್ಚ್ಯಾ ಕಂಪ್ಣೆಂತ್ ಅಸಲೆಂ ಕಾಮ್ ಕರುಂಕ್ ತುಕಾ ಧೈರ್ ತರ್ಯ್ ಕಸೆಂ ಮೆಳ್ಳೆಂ ?”
ಜೊನಾಥನ್ ಅಪ್ಲಿ ಚೂಕ್ ವೊಳ್ಕೊನ್ ಜಾಯ್ತ್ಯಾ ರಿತಿನ್ ಮಾಫ್ ಮಾಗೊಂಕ್ ಲಾಗ್ಲೊ ತರ್ಯ್ ರಿಟಾಚ್ಯಾ ಕಟಿಣಾಯೆಚ್ಯಾ ನಿರ್ಧಾರಾಂತ್ ಬದ್ಲಾವಣ್ ಜಾಲಿಚ್ಚ್ ನಾ. ರಿಟಾನ್ ಜೊನಾಥನಾಕ್ ಕಾಮಾಂತ್ಲೆಂ ಕಾಡ್ಚ್ಯಾ ವಿಶಿಂ ನಿರ್ಧಾರ್ ಘೆವ್ನ್ ಜಾಲ್ಲೊ ಆನಿ ತಸೆಂಚ್ಚ್, ದುಸ್ರ್ಯಾ ದಿಸಾಚ್ಚ್, ಮ್ಹಣ್ಜೆ ಆಜ್ ಸಕಾಳಿಂ, ತಾಕಾ ಕಾಮಾಂತ್ಲೆಂ ಕಾಡ್ಚೆಂ ಪತ್ರ್ ಮ್ಹಜ್ಯಾ ಮೆಜಾರ್ ಆಯಿಲ್ಲೆಂ.
ತಾ ದಿಸಾಚಿ ಸಾಂಜ್ ಜಾಲ್ಲಿ.
ದಫ್ತರಾಂತ್ ಬಸೊನ್ ಹಾಂವ್ ಮಾತ್ರ್ ಕಟಿಣಾಯೆನ್ ಚಿಂತುನ್ ಆಸ್‌ಲ್ಲೊಂ. ಆಜ್ ಸಕಾಳಿಂ ಥಾವ್ನ್ ಖಂಚಾಯ್ ಮಿಟಿಂಗಾಂಕ್ ಜಾಂವ್ದಿ ಯಾ ಪ್ರೊಜೆಕ್ಟ್ ಸಾಯ್ಟಾಂಕ್ ಜಾಂವ್ದಿ ಹಾಂವ್ ಗೆಲ್ಲೊಂ ನಾ. ಕಿತ್ಯಾಕ್‌ಗೀ ವೆಚೆಂ ಮನ್ಂಯ್ ಆಯ್ಲೆಂ ನಾ. ಚಿಂತ್ನಾ ಗೊಪಾಂತ್ಲ್ಯಾ ದಾಟ್ ಜಾಳಾಕ್ ಹಾಳ್ವಾಯೆನ್ ಸೊಡಯ್ತಾಲೊಂ… ಮ್ಹಜ್ಯಾಚ್ಚ್ ವಿಶ್ಯಾಂತ್ ಆನಿ ಮ್ಹಜ್ಯಾಚ್ಚ್ ತರ‍್ನಾಟ್‌ಪಣಾಕ್ ಮೇಟ್ ದವರ್ಲ್ಲ್ಯಾ ವೆಳಾರ್ ಜಾಲ್ಲ್ಯಾ ಘಡಿತಾಂ ವಿಶ್ಯಾಂತ್ ಹಾಂವೆ ಚಿಂತುಂಕ್ ಸುರು ಕೆಲೆಂ …. ಜೊನಾಥನಾಚ್ಯಾ ಘಡಿತಾಕ್ ಆನಿ ಮ್ಹಜ್ಯಾ ಘಡಿತಾಕ್ ತಾಳ್ ಆಸ್ಲ್ಲೆಂ ತಸೆಂಯ್ ಮ್ಹಾಕಾ ಭಗ್ಲೆಂ.
ಜೊನಾಥನಾಕ್ ಕಾಮಾಂತ್ಲೆ ಕಾಡಿಜಯ್ ಆನಿ ಆಸಾ ತಶೆಂ ಪಾಟಿಂ ಭಾರತಾಕ್, ಮ್ಹಣ್ಜೆ ಕೊಡ್ಯಾಳಾಕ್ ದಾಡಿಜಯ್ ಮ್ಹಳ್ಳ್ಯಾ ಇರಾದ್ಯಾಚೆಂ ದಸ್ತಾವೆಜ್ ಮುಕಾರ್‌ಚ್ಚ್ ಆಸ್ಲ್ಲೆಂ. ಸತ್‌ಚ್ಚ್ ಸಾಂಗ್ಚೆಂ ತರ್ ತೆಂಚ್ಚ್ ದಸ್ತಾವೇಜ್ ಮ್ಹಜ್ಯಾ ಚಿಂತ್ಪಾಕ್, ಚಿಂತ್ಪಾ ರಾಶಿಕ್, ಪಾಟ್ಲ್ಯಾ ಜಿಣಿಯೆಕ್ ಉಸ್ತುಂಕ್ ಕಾರಣ್ ಜಾಲ್ಲೆಂ.
ಆಮ್ಚ್ಯಾ ದಫ್ತರಾಂತ್ ಕಾಮ್ ಕರ್ಚ್ಯಾ ಜೊನಾಥನಾನ್ ಚೂಕ್ ಕೆಲ್ಯಾ ಯಾ ಗುನ್ಯಾಂವ್ ….? ಕೆಲ್ಯಾ ತರ್ ಕಸಲಿ ??? ಕೆದಿ ವ್ಹಡ್ ??? ಮ್ಹಜ್ಯಾ ಮತಿಂತ್ ಜವಾಬ್ ಬಿಲ್ಕುಲ್ ಮೆಳ್ಳಿ ನಾ.
ರಿಟಾನ್ ಸಾಂಗ್ಚ್ಯಾ ಪ್ರಮಾಣೆಂ ತಾಣೆಂ ವ್ಹಡ್ಲೊ ಗುನ್ಯಾಂವ್ ಕೆಲಾ ಆನಿ ಹಾಂವೆಂ ಚಿಂತ್ಚ್ಯಾ ಪ್ರಮಾಣೆಂ ತಾಚ್ಯಾ ಕುಡಿಂತ್ಲ್ಯಾ ಮುಳಾವ್ಯಾ ಸೈಂಭಿಕ್ ಆನಿ ಸ್ವಾಭಾವಿಕ್ ವೊಡ್ಣ್ಯಾಂಚ್ಯಾ ಉಲ್ಯಾಕ್ ಆಕಸ್ಮತ್ ತಾಣೆ ದೊಳೆ ಉಗ್ತೆ ಕೆಲ್ಯಾತ್…. ಮತ್ ಉಘಡ್ಲ್ಯಾ….
ರಿಟಾನ್ ತಾಚೆರ್ ಅಫ್ರಾದ್ ಮಾಂಡ್ಚ್ಯಾ ಪ್ರಮಾಣೆಂ, ತಾಣೆಂ ಮ್ಹಾ-ಪಾತಕ್ ಕೆಲಾಂ ಆನಿ ತೆಂಯ್ ಆಮ್ಚ್ಯಾಚ್ಚ್ ದಫ್ತರಾಂತ್ ಬಸೊನ್ ಆನಿ ತ್ಯಾ ವೊರ‍್ವಿಂಚ್ಚ್ ಜೆಜು ಪರತ್ ಪರತ್ ಖುರ‍್ಸಾರ್ ಮೆಲೊ…ಆನಿ ಹಾಂವೆ ಮ್ಹಣ್ಚೆಂ ಜೊನಾಥನ್ ಜಿವಿತಾಚ್ಯಾ ಸ್ವಾಭಾವಿಕ್ ಸಂಘರ್ಷಾಕ್ ಶಿರ್ಕೊನ್, ರಗ್ತಾಚ್ಯಾ ವೊಡ್ಣ್ಯಾಂಚಿ ಜವಾಬ್ ದೀಂವ್ಕ್ ಆಸ್ಲ್ಲ್ಯಾ ಬೋವ್ ಸುಲಬ್ ಸಾಧನಾಂಚೆರ್ ಗೆಲಾ. ತೊ ಗುನ್ಯಾಂವ್ ನಂಯ್…. ಜಾಂವ್ಕ್ ಪುರೊ, ಆತಾಂಚ್ಯಾ ಕಾಲಾರ್, ಸರ್ವ್ ತರ‍್ನಾಟ್ಯಾನಿಂ ಪಳಂವ್ಚೆಂ ತೆಂಚ್ಚ್ ತಾಣೆಂಯ್ ಪಳಯ್ಲಾಂ…. ತಸೆಂ ಕೆಲ್ಲೊ ಜಾಗೊ ಮಾತ್ರ್ ಸಾರ್ಕೊ ನಂಯ್ ಆಸ್ತಲೊ…..
ಪರತ್ ಸವಾಲ್ ಉದೆಲೆಂ…. ಕಟಿಣಾಯೆಚೆಂ ಸವಾಲ್….ಮ್ಹಜ್ಯಾಚ್ಚ್ ವಿಶ್ಯಾಂತ್ಲೆಂ…. ಮ್ಹಜ್ಯಾಚ್ಚ್ ಕಾಳ್ಜಾ ಗೊಪಾಂತ್ ಚಲೊನ್, ಪಾಟ್ಲ್ಯಾ ಮ್ಹಜ್ಯಾ ಜಿಣಿಯೆಕ್ ಉಸ್ತುಂಚೆಂ ಪ್ರೇತನ್….
ಹಾಂವೆ…. ಹಾಂವೆಂಚ್ಚ್ ತರ್ನಾಟ್ಪಣಾಚ್ಯಾ ಹುಂಬ್ರಾರ್ ಆಸ್ತಾನಾ ಕೆಲ್ಲೆಂ ತರ್ಯ್ ಕಿತೆಂ ? ಹಾಂವೆಂಯ್ ತಸಲ್ಯಾ ಭುರ‍್ಶ್ಯಾಪಣಾಕ್ ಪಳಂವ್ಕ್ ನಾ ? ಪಳಯ್ಲಾಂ….. ಜಾಯ್ತೆಂ ಪಳಯ್ಲಾಂ…..
ತೆದ್ನಾಂ, ಹಾಂವ್ ತರ್ನಾಟೊ ಜಾವ್ನ್ ಭುರ‍್ಗ್ಯಾಪಣಾರ್ ಉತ್ರೊನ್ ವೆತಾನಾ ಇಂಟರ್‌ನೆಟ್ ಮ್ಹಳ್ಳೆಂ ತಾಂತ್ರಿಕ್ ಸೌಲತಾ ಆಮ್ಚ್ಯಾ ತೆದ್ನಾಂಚ್ಯಾ ಜನಾಂಗಾಕ್ ಲಾಗೊಂಕ್ ನಾತ್ಲ್ಲಿ ಜಾಂವ್ಕ್ ಪುರೊ; ಪುಣ್, ತ್ಯಾ ಕಾಳಾಚ್ಯಾ ತ್ಯಾ ಜನಾಂಗಾಕ್ ಸರಿ ಜಾಂವ್ಚೆಂ ಸರ್ವ್ ಆಸ್ಲ್ಲೆಂ…. ತಾಂಬ್ಡ್ಯಾ ರಗ್ತಾಂತ್ ಆಸಾಜಯ್ ಜಾಲ್ಲ್ಯಾ ಕಾಳ್ಯಾ ಆವ್ಗುಣಾಕ್ ಪೂರಕ್ ಜಾಂವ್ಚೆಂ ತೆದ್ನಾಂಯ್ ತೆದ್ನಾಂಚ್ಯಾ ತರ‍್ನ್ಯಾಂಕ್ ಮೆಳ್ತಾಲೆಂ.
ಪಯ್ಲೆಂ, ಆಮ್ಚ್ಯಾಚ್ಚ್ ವಿಶ್ಯಾಂತ್ ಸುಡಾಳ್ ಸಾಂಗ್ಚೆಂ ತರ್ …. ಆಮಿಂ ಮ್ಹಳ್ಯಾರ್ ಆಮ್ಚೆಂ ಕುಟಾಂಬ್ ಭಾರಿಚ್ಚ್ ದುಬ್ಳೆ ಜಾವ್ನಾಸ್‌ಲ್ಲ್ಯಾಂವ್…. . ಜೊನಾಥನ್ ಆನಿ ತಾಚ್ಯಾ ಕುಟ್ಮಾಕ್ ಆಮಿಂ ’ದುಬ್ಳೆ’ ಮ್ಹಣ್ತಾಂವ್. ತಾಚೆಂ ಕುಟಾಂಬ್ ’ದುಬ್ಳೆಂ’ ಮ್ಹಣ್ ಸಾಂಗ್ಲ್ಲ್ಯಾ ವೊರ‍್ವಿಂ ಆಮಿಂ ತಾಕಾ ಕಾಮಾಕ್ ಘೆತ್‌ಲ್ಲೊ. ಪುಣ್, ಆಮ್ಚೆಂ, ಆಮ್ಚ್ಯಾ ಆವಯ್ ಬಾಪಾಯ್ಚೆಂ ದುಬ್ಳೆಂಪಣ್ ಪುಣೀ ಚಿಂತ್ಲ್ಯಾರ್ ಆತಾಂಯ್ ಮ್ಹಜ್ಯಾ ಕಾಳ್ಜಾಂತ್ ಮಿರ್ಮಿರೆ ಉದೆತಾತ್. ಕಿತ್ಲೆಶ್ಯಾ ಪಾವ್ಟಿಂ ಆಮ್ಕಾಂ ದಿಸಾಕ್ ದೋನ್ ಪಾವ್ಟಿಂ ಪೇಜ್ ಜೆಂವ್ಚ್ಯಾ ತಿತ್ಲಿಯ್ ತಾಂಕ್ ನಾತ್ಲ್ಲಿ. ಪೆಜೆ ಸಾಂಗಾತಾ ಇಲ್ಲೆಂ ಬರೆಂ ನಿಸ್ತೆಂ ಆಸ್ಲ್ಯಾರ್ ಭಾರಿಚ್ಚ್ ವೊರ‍್ತೆಂ. ಮಾಂಯ್ ಆನಿ ಬಾಬ್ ಹೆಣೆಂ ತೆಣೆಂ ಮೆಳ್ಲ್ಲೆಂ ಕೂಲಿಚೆಂ ಕಾಮ್ ಕರ‍್ತಾಲಿಂ. ಸದಾಂಯ್ ಕಾಮ್ಂಯ್ ತಾಂಕಾ ಮೆಳಾನಾತ್‌ಲ್ಲೆಂ. ಮಾಂಯ್ ಥೊಡ್ಯಾ ಪಾವ್ಟಿಂ ಕಾಜುಚ್ಯಾ ಬಿಯಾಂಚ್ಯಾ ಕಂಪ್ಣೆಕ್ ವಚೊನ್ ಬಿಯೊ ಸೊಲ್ಚೆಂ ಕಾಮ್ಂಯ್ ಕರ‍್ತಾಲಿ. ತೆಂ ಕಾಮ್ಂಯ್ ಖಯಾಮ್ ನಾತ್ಲ್ಲೆಂ. ಪುಣ್ ಕಿತ್ಲೆಂ ಜೊಡ್ಲ್ಯಾರೀ ತೆಂ ಭಾರಿಚ್ಚ್ ಉಣೆಂ ಜಾವ್ನಾಸ್ತಾಲೆಂ. ಘರಾಚೆಂ ಭಾಡೆಂ ಆನಿ ಹೆರ್ ಖರ್ಚ್ ಮ್ಹಣ್ತಾನಾ ಭಾರಿಚ್ಚ್ ಕಷ್ಟ್ ಜಾತಾಲೆ. ತ್ಯಾ ಭಾಯ್ರ್ ಬಾಬಾಕ್ ಸಾಂಜೆರ್ ಇಲ್ಲೆಂ ಪಿಯೆಂವ್ಚಿಂ ಸವಯ್‌ಯ್ ಆಸ್ಲ್ಲಿ. ತಸಲ್ಯಾ ದುಬ್ಳಿಕಾಯೆಂತೀ ತೊ ಪಿಯೆತಾಲೊ ಮ್ಹಣ್ಚೆಂ ಭಾರಿಚ್ಚ್ ವಿಚಿತ್ರ್ !!
ಆಮಿ ಆಟ್ ಜಣಾಂ ಭುರ್ಗಿಂ. ತ್ಯಾ ಆಟ್ ಜಣಾಂಕ್ ಪೊಸುಂಕ್ ಆಮ್ಚ್ಯಾ ಬಾಬಾ ಮಾಂಯ್ನ್ ಕರ‍್ಚಿ ಉರ‍್ಡೊಣಿ ವಿಶೇಸ್ ಜಾವ್ನಾಸ್‌ಲ್ಲಿ. ಗೀಮಾಂತ್ ಬಾಬಾ ಮಾಂಯ್ಕ್ ಕಾಮ್ ಆಸಾನಾತ್‌ಲ್ಲೆಂ ಆನಿ ತ್ಯಾ ಸಾಂಗಾತಾಚ್ಚ್ ಜಾಯ್ತ್ಯಾ ಪಾವ್ಟಿಂ ಆಮ್ಕಾಂ ಜೆವಾಣ್ಂಯ್ ಮೆಳಾನಾತ್‌ಲ್ಲೆಂ.
ಮ್ಹಜೆಂ ಹಾಯ್‌ಸ್ಕೂಲ್ ಶಿಕಾಪ್ ಜಾಲ್ಯಾ ಉಪ್ರಾಂತ್ ಶಿಕಾಪ್ ಪುರೊ ಮ್ಹಣ್ ಬಾಬಾ ಮಾಂಯ್ನ್ ಚಿಂತ್ಲೆಂ ಆನಿ ಮ್ಹಾಕಾ ಸಾಂಗ್ಲೆಂ ತರ್ಯ್ ಭಯ್ಣ್ಯಾಂನಿ ತಸೆಂ ಜಾಂವ್ಕ್ ಸೊಡ್ಲೆಂ ನಾ. ಆಮ್ಚ್ಯಾ ಪಾದ್ರಿ ಬಾಪ್ಪುಚಿ ಕುಮಕ್ ತಾಣಿಂಚ್ಚ್ ವಿಚಾರ‍್ಲಿ ಆನಿ ತಾಣೆ ಭಾಸಾಯ್ಲಿ. ಜಾಂವ್ಚೆ ಫೀಸ್ ಆನಿ ಬಸ್ಸಾಚೆ ಪಯ್ಶೆ ದಿತಾಂ ಮ್ಹಣ್ ತಾಣೆ ಭಾಸಾಯ್ಲೆಂ. ಶ್ಹೆರಾಂತ್ಲ್ಯಾ ಸರ್ಕಾರಿ ಪೊಲಿಟೆಕ್ನಿಟ್ ಶಿಕ್ಪಾ ಸಂಸ್ಥ್ಯಾಂತ್ ಮ್ಹಾಕಾ ಬಾಂದ್ಪಾ ಬಾಂದ್ಚ್ಯಾ ಶಿಸ್ತೆಂತ್ ಶಿಕೊಂಕ್ ಭರ್ತಿ ಕೆಲ್ಲೊ. ಸರ್ಕಾರಿ ಶಿಕ್ಪಾ ಸಂಸ್ಥೊ ಜಾಲ್ಲ್ಯಾನ್ ಥಂಯ್ಸರ್ ಶಿಕ್ಚ್ಯಾ ಭುರ‍್ಗ್ಯಾಂಕ್ ಖರ್ಚ್ ಭಾರಿಚ್ಚ್ ಉಣೊ. ದೊನ್ಪಾರಾಂ ದೂದ್ ಆನಿ ರುಲಾಂವ್ ಯಾ ಗೊಂವಾಚೆ ಪೊಳೆ ಚೆಟ್ಣಿ ಯಾ ಹುನ್ ಶಿತಾಚೆಂ ಜೆವಾಣ್ ಮೆಳ್ತಾಲೆಂ. ಸರ್ಕಾರಿ ಬಸ್ಸಾರ್ ಪಯ್ಣ್ ಕರುಂಕ್ ಆಸ್ಲ್ಲೆಂ. ದುಸ್ರ್ಯಾ ವೊರ‍್ಸಾಚ್ಯಾ ಶಿಕ್ಪಾಂತ್ ಆಸ್ತಾನಾ ತಿಂ ಘಡಿತಾಂ ಮ್ಹಜ್ಯಾ ಜಿವಿತಾಂತ್ ಘಡೊಂಕ್ ಸುರು ಜಾಲಿಂ. ಹಾಂವೆ ಚಿಂತ್ಚ್ಯಾ ಪ್ರಕಾರ್, ಭುರ‍್ಗ್ಯಾಪಣಾ ಥಾವ್ನ್ ತರ‍್ನಾಟ್‌ಪಣಾಕ್ ಸವ್ಕಾಸ್ ಪಾಂಯ್ ದವರ್‌ಲ್ಲೊ ವೇಳ್ ತೊ. ಏಕ್ ದೀಸ್, ಬಸ್ಸ್ ಯೇಂವ್ಕ್ ತಡವ್ ಜಾಲ್ಲ್ಯಾನ್, ದೆಗೆನ್ ಬಸ್ಸ್‌ಸ್ಟಾಂಡಾಂತ್ ಆಸ್ಲ್ಲ್ಯಾ ತಮ್ಳಾಚ್ಯಾ ಮನ್ಶಾಂನಿಂ ಚಲಂವ್ಚ್ಯಾ ಬುಕಾಂ ವಿಕ್ರ್ಯಾಂಚ್ಯಾ ಆಂಗ್ಡಿಚೆರ್ ಮ್ಹಾಕಾ ದೀಷ್ಟ್ ಪಡ್ಲಿ. ವೊಡ್ಣ್ಯಾ ಫಾತ್ರಾ ಬರಿ ಮ್ಹಜೆ ಪಾಯ್ ತ್ಯಾ ಕುಶಿನ್ ಗೆಲೆಚ್ಚ್. ಹಾಂವ್ ಉಬ್ಯಾ ರಾವೊನ್ ಪಳಯ್ತಾನಾ ಪಯ್ಲೆಂ ದಿಷ್ಟಿಕ್ ಪಡ್‌ಲ್ಲೆ ಬೂಕ್, ವಿಣ್ಗ್ಯಾ ಚಲಿಯಾಂಚಿ ಪಿಂತುರಾಂ ಆಸ್ಚೆ. ಕಿತ್ಯಾಕ್‌ಗೀ ಮ್ಹಣ್ ತೆದ್ನಾ ಸಮ್ಜೊಂಕ್‌ನಾ, ತೆ ಬೂಕ್ ಪಳಯ್ತಾಂ ಪಳಯ್ತಾಂ ಮ್ಹಜ್ಯಾ ಕಾಳ್ಜಾಚೊ ಉಡಿಯೊ ಚಡ್ಲ್ಯೊ. ತಿಂಚ್ಚ್ ಪಿಂತುರಾಂ ಪರತ್ ಆನಿ ಪರತ್ ಪಳಯಾಂ ಮ್ಹಣ್ ಭಗ್ಲೆಂ ಆನಿ ಪಳವ್ನ್ಂಚ್ಚ್ ರಾವ್ಲೊಂ. ತ್ಯಾ ದೀಸ್ ಬಸ್ಸಾರ್ ಬಸ್ಲೊಂ ತರ್ ತಿಂ ಪಿಂತುರಾಂ ಮ್ಹಜ್ಯಾ ಮತಿಂತ್ಲಿ ಮಾಜ್ವೊನ್ ಗೆಲಿಂನಾಂತ್. ತೆ ಬೂಕ್ ಹಾತಿಂ ಧರುನ್ ಪರತ್ ಪಳಂವ್ಚಿ ಆಶಾ ಬಳ್ ಜಾವ್ನ್ ಯೆತಾಲಿ.
ದುಸ್ರ್ಯಾ ದೀಸ್, ಕ್ಲಾಸ್ ಜಾಲ್ಲಿಚ್ಚ್ ಹಾಂವ್ ತ್ಯಾಚ್ಚ್ ಬುಕಾಂಚ್ಯಾ ಸ್ಟೊಲಾಕ್ ಪರತ್ ದಾವ್ಲೊಂ. ಪರತ್ ಥಂಯ್ಚ್ ಉಬೊ ಜಾಲೊಂ. ಪರತ್ ತೆಚ್ಚ್ ಬೂಕ್…. ಪರತ್ ತಿಂಚ್ಚ್ ಪಿಂತುರಾಂ….. ಆತಾಂ ಆಶಾ ಚಡಾತ್ತ್ ಆಯ್ಲಿ, ತ್ಯಾ ಬೂಕಾಕ್ ಹಾತಿಂ ಘೆವ್ನ್ ಉಗ್ತೆ ಕರುನ್ ಪಳಂವ್ಚಿ….. ಪುಣ್ ತ್ಯಾ ದೀಸ್ ಜಾಲೆಂ ನಾ. ಧೈರ್ ಪಾವ್ಲೆಂ ನಾ. ತೊ ಕಾಳೊ ತಮ್ಳಾಂಚೊ ಆಯಿಲ್ಲ್ಯಾಂಕ್ ಗೆಲ್ಲ್ಯಾಂಕ್ ಪಳವ್ನ್ಂಚ್ಚ್ ಆಸ್ಲ್ಲೊ ಆನಿ ಮ್ಹಾಕಾಯ್ ಪಳಯ್ತಾಲೊ ಮ್ಹಣ್ ಮ್ಹಾಕಾ ಭಗ್‌ಲ್ಲೆಂ. ಸುಮಾರ್ ದೋನ್ ಹಫ್ತ್ಯಾಂ ಉಪ್ರಾಂತ್ ಸದಾಂಚ್ಯಾ ಬರಿಚ್ಚ್ ಸಾಂಜೆರ್ ಹಾಂವ್ ಪರತ್ ಗೆಲೊಂ…. ಆನಿ ಉಬೊ ಜಾಲೊಂ…. ಹೆಣೆ ತೆಣೆ ಪಳಯ್ಲೆಂ ಆನಿ ವಳ್ಕಿಚೆ ಕೋಣ್ಂಚ್ಚ್ ನಾತ್ಲ್ಲೆ ಪಳವ್ನ್ ತ್ಯಾ ಬುಕಾಚೆರ್ ಹಾತ್ ದವರ‍್ಲೊ ಆನಿ ಹಾತಿಂ ಧರುನ್ ಉಗ್ತೊ ಕರ್ತಾಂ ಮ್ಹಣ್ತಾನಾ, ತಮ್ಳಾಚ್ಯಾನ್ ಮ್ಹಜೊ ಹಾತ್ ಧರ‍್ಲೊ ಆನಿ ಕಾನಡಿ ಭಾಶೆನ್ ಮ್ಹಣಾಲೊ – “ಪಾಂಚ್ ರುಪಯ್….. ಹ್ಯಾ ಬುಕಾಚೆಂ ಮೋಲ್ ಪಕತ್ತ್ ಪಾಂಚ್ ರುಪಯ್….. ತುಜ್ಯಾ ರಗ್ತಾಂತ್ ಉಜೊ ಪೆಟಂವ್ಚೆಂ ಕಂಪ್ಲೀಟ್ ಮಸಾಲಾ ಆಸಾ ಹಾಂತುಂ…. ಟೊಮೆಟೊ ಬರಿ ಪಿಕ್‌ಲ್ಲಿಂ ಚೆಡ್ವಾಂ….. ಹಲ್ವಾ ಬರಿ ತುಜ್ಯಾ ಕಾಳ್ಜಾಕ್ ಗೋಡ್ ಕರುಂಕ್ ಆಸಾತ್……” ಹಾಂವೆ ತಾಚ್ಯಾ ತೊಂಡಾಕ್ ಪಳಯ್ಲೆಂ. ತೊ ಕಿತೆಂಗೀ ವಿಶೇಸ್ ಪಕ್ವನ್ ಚಾಕ್‌ಲ್ಲ್ಯಾ ಬರಿ ಉಲಯ್ತಾಲೊ. ತಾಚ್ಯಾ ತೊಂಡಾರ್ ಆಸ್ಲ್ಲಿ ವಿಶೇಸ್ ಖುಶಿ ಮ್ಹಾಕಾಯ್ ಆಪ್ಣಾಯ್ಜಯ್ ತಸೆಂ ಭಗ್ಲೆಂ.
ಆತಾಂ ಮ್ಹಾಕಾ ಕಳಿತ್ ಆಸ್ಲ್ಲೆಂ – ತೊ ಬೂಕ್ ಮೊಲಾಕ್ ಘೆಜಯ್ ತರ್ ಪಯ್ಶೆ ಜಾಯ್ ಆಸ್ಲ್ಲೆ ಆನಿ ಬೊಲ್ಸಾಂತ್ ದಮ್ಡಿ ನಾತ್ಲ್ಲಿ. ಆಮ್ಚ್ಯಾ ತಸಲ್ಯಾ ದುಬ್ಳ್ಯಾಂ ಲಾಗಿಂ ತಿತ್ಲೆ ಪಯ್ಶೆ ತರ್ಯ್ ಆಸ್ಚೆ ಕಸೆ ?? ತೊ ಪಾಂಚ್ ರುಪಯ್ ವಿಚಾರ‍್ತಾಲೊ…!!!! ಹಾಂವೆಂ ಪಯ್ಶೆ ನಾಂತ್ ಮ್ಹಳ್ಳೆಂ. ’ಪಾಂಚ್ ರುಪಿಯಾಂನಿ ತುಜ್ಯಾ ಕುಡಿಂತ್ ಉಜೊ ಹಾಡ್ಚೊ ಬೂಕ್ ಹೊ…. ಧರ‍್ಮಾಕ್ ಕಾಂಯ್ಂಚ್ಚ್ ಮೆಳಾನಾ…. ಪಯ್ಲೆಂ ಪಯ್ಶೆ ಹಾಡ್…… ಮಾಗಿರ್ ಹಾಂಗಾ ಯೆ….. “
ಬೂಕ್ ತಾಣೆಂ ವೊಡ್ನ್ ಪಾಟಿಂ ಘೆತ್ಲೊ ಆನಿ ರಾಶಿಂತ್ ಮಾಂಡುನ್ ದವರ‍್ಲೊ.
ಪಾಂಚ್ ರುಪಯ್, ವ್ಹಡ್ಲೆಂ ಮೋಲ್…. ಪುಣ್, ತ್ಯಾ ಪಾಂಚ್ ರುಪಿಯಾಂಕ್ ಕುಡಿಂತ್ ಉಜೊ…. ಖಂಡಿತ್ ಜಾವ್ನ್ ಪೆಟೊಂಕ್ ಆಸಾಚ್ಚ್ ಮ್ಹಣ್ ಮ್ಹಾಕಾ ಭಗ್‌ಲ್ಲೆಂ. ತ್ಯಾ ಮುಕ್ಲ್ಯಾ ಪಾನಾಚೆರ್ ಆಸ್ಲ್ಲಿ ತಸ್ವೀರ್ ದೆಖ್ತಾನಾಂಚ್ಚ್ ಕಾಳ್ಜಾಂತ್ ಇತ್ಲೊ ಉಜೊ ಪೆಟ್ತಾ ತರ್ ಭಿತರ‍್ಲ್ಯಾ ಪಾನಾನಿಂ ಕಿತೆಂ ಪೂರಾ ಆಸೊಂಕ್ ಆಸಾ. ಹಾಂವೆಂಯ್ ಚಿಂತ್ಲೆ.
ಆತಾಂ, ಪಾಂಚ್ ರುಪಿಯಾಂಚಿ ಬಂದೋಬಸ್ತ್ ಕರುಂಕ್ ಆಸ್ಲ್ಲಿ. ಪಾದ್ರಿ ಬಾಪ್ಪುನ್ ದಿಂವ್ಚೆ ಪಯ್ಶೆ ಬಾಬಾ ಥಾವ್ನ್ ಮ್ಹಾಕಾ ಮೆಳ್ತಾಲೆ. ಭಾರಿಚ್ಚ್ ಲೆಕಾಚೆ – ಜಾಯ್ ಪುರ‍್ತೆ. ಸರ್ಕಾರಿ ಬಸ್ಸಾಚೊ ಪಾಸ್ ಆನಿ ಸರ್ಕಾರಿ ಶಿಕ್ಪಾ ಸಂಸ್ಥ್ಯಾಂತ್ ಜೆವಾಣ್, ತಾಕಾ ಮ್ಹಣ್ ಮಹಿನ್ಯಾಚ್ಯಾ ಸುರ‍್ವೆರ್ ದಿಂವ್ಚೆ ಲೆಕಾ ತೆಕಿದ್ ಪಯ್ಶೆ….ಹಾತಾಂತ್ ಚಡ್ತಿಕ್ ಬಿಲ್ಕುಲ್ ಪಯ್ಶೆ ಮೆಳಾನಾಂತ್….. ಮೆಳೊಂಕ್ ಸಾಧ್ಯ್‌ಯ್ ನಾ… ತರ್ ಆತಾಂ ಪಾಂಚ್ ರುಪಯ್ ಜೊಡುಂಕ್, ಚೊರಿಚ್ಚ್ ಕರಿಜಯ್….. ಚೊರಿ ಕರ‍್ಚಿ …. ಆನಿ ತಿಯ್ ಬಾಬಾಚ್ಯಾ ಬೊಲ್ಸಾಂತ್ಲಿ….
ಹೆಂ ಘಡಿತ್ ಜಾಲ್ಲ್ಯಾ ದುಸ್ರ್ಯಾ ದಿಸಾತ್ತ್ ಹಾಂವ್ ಪರತ್ ಬುಕ್ ಸ್ಟಾಲಾಕ್ ಗೆಲೊಂ. ಆಜ್ ನವೆ ಬೂಕ್ ಮಾಂಡುನ್ ದವರ್‌ಲ್ಲೆ. ನವಿಂಚ್ಚ್ ಚಿತ್ರಾಂ… ನವಿಂಚ್ಚ್ ಪುಡ್ಪುಡಿತ್ ಚೆಡ್ವಾಂ….. ಆನಿ ತಾಂಕಾ ಪಳಯ್ತಾನಾ ಪರತ್ ಆಂಗಾಂತ್ ಉಜೊ ಪೆಟ್ಲೊ.
ಆತಾಂ ಬಾಬಾಚ್ಯಾ ಬೊಲ್ಸಾಂನಿ ಕೆದ್ನಾ ಪಯ್ಶೆ ಆಸ್ತೆಲೆ ಮ್ಹಣ್ ಜೊಗಾಸಾಣೆನ್ ಹಾಂವ್ ರಾಕೊನ್ ರಾವ್ಲೊಂ.
ಥೊಡ್ಯಾಚ್ಚ್ ದಿಸಾಂ ಉಪ್ರಾಂತ್ ಎಕಾ ಸಾಂಜೆರ್, ಕಸಲ್ಯಾಗೀ ಗರ‍್ಜೆಚ್ಯಾ ಕಾಮಾಕ್ ಮ್ಹಣ್ ಬಾಬಾನ್ ಪಯ್ಶೆ ಹಾಡ್‌ಲ್ಲೆ ಆನಿ ಬೊಲ್ಸಾಂತ್ ದವರ್ನ್ ನಾಂವ್ಕ್ ಗೆಲ್ಲೊ; ನಾಣ್ಯೆ ಥಾವ್ನ್ ಪಾಟಿಂ ಯೆಂವ್ಚ್ಯಾ ಪಯ್ಲೆಂ, ದುಸ್ರಿಂ ಕೊಣ್ಂಯ್ ಥಂಯ್ಸರ್ ಪಾಂವ್ಚ್ಯಾ ಪಯ್ಲೆಂ, ಹಾಂವೆ ಬಾಬಾಚ್ಯಾ ಬೊಲ್ಸಾಂತ್ಲೆ ಪಾಂಚ್ ರುಪಯ್ ಕಾಡ್ಲೆ ಆನಿ ಬುಕಾಂ ಮಧೆಂ ಲಿಪೊನ್ ದವರ‍್ಲೆ.
ದುಸ್ರ್ಯಾ ದಿಸಾ, ಹಾಂವೆ ತೊ ಬೂಕ್ ಘೆತ್ಲೊಚ್ಚ್. ಪಾಂಚ್ ರುಪಿಯಾಂಕ್ ದಾಯ್ಜ್‌ಚ್ಚ್ ಹಾತಿಂ ಮೆಳ್‌ಲ್ಲ್ಯಾ ಬರಿ ಕಾಳಿಜ್ ಉಡೊಂಕ್ ಲಾಗ್ಲೆಂ. ಬಸ್‌ಸ್ಟ್ಯಾಂಡಾಂತ್ ಯಾ ಬಸ್ಸಾರ್ ತೊ ಬೂಕ್ ಉಗ್ತೊ ಕರ್ನ್ ಪಳಂವ್ಚೆಂ ಧೈರ್ ಮ್ಹಜ್ಯಾ ಥಂಯ್ ನಾತ್ಲ್ಲೆಂ. ಆಮ್ಚ್ಯಾ ಗಾವಾ ಲಾಗ್ಸಾರ್ ಬಸ್ಸಾರ್ ಥಾವ್ನ್ ದೆವ್ಲ್ಯಾ ಉಪ್ರಾಂತ್ ಆಮ್ಚ್ಯಾ ಘರಾಕ್ ವಚೊನ್ ಪಾವೊಂಕ್ ಸುಮಾರ್ ಏಕ್ ಮಯ್ಲಾಚಿ ವಾಟ್ ಆಸಾ ಆನಿ ತ್ಯಾ ವಾಟೆರ್ ಉಜ್ವ್ಯಾಕ್ ಏಕ್ ಗುಡೊ ಮೆಳ್ತಾ. ತ್ಯಾ ಗುಡ್ಯಾರ್ ವಚೊನ್ ತೊ ಬೂಕ್ ಹಾಂವೆ ಉಗ್ತೊ ಕೆಲೊ.
ಪಯ್ಲೆಂ ಪಾನ್ ಉಗ್ತೆಂ ಕರ‍್ತಾನಾಂಚ್ಚ್ ಜಿವಾಂತ್ ಉಜೊ ಪೆಟ್ಲೊ. ತಾಂತ್ಲೆಂ ವಾಚ್ತಾನಾ, ಆನಿ ಪಾನಾಂ ಪರ‍್ತಿತಾನಾ ಜಿವಾಂತ್ ಯೆದೊಳ್ ಕೆದ್ನಾಂಯ್ ಜಾಯ್ನಾತ್ಲ್ಲೆಂ ವಾದಾಳ್ ಉಟ್ಲೆಂ. ಹಾಂವ್ ಉಂಚಾಂಬಳ್‌ಚ್ಚ್ ಜಾಲೊಂ. ವಿಶ್ವೆಯ್ ಉಂಚಾಂಬಳ್….. ಹಾತ್ ಖಂಯ್ ಪೂರಾ ಗೆಲೆ ತೆ ಮ್ಹಾಕಾ ಕಳಿತ್ ಜಾಲೆಂನಾ…..
ಘರಾ ಪಾವ್ತಾನಾ, ರಾತ್‌ಶಿ ಜಾಂವ್ಕ್ ಜಾಲ್ಲಿ. ಮಾಗ್ಣೆಂ ಮ್ಹಣೊನ್, ಬಾಬ್ ಆನಿ ಮಾಂಯ್ ಮ್ಹಾಕಾ ರಾಕೊನ್ ರಾವ್‌ಲ್ಲಿಂ. ಹಾಂವೆ ಪಾಂಚ್ ರುಪಯ್ ಚೊರ್‌ಲ್ಲ್ಯಾ ವಿಶ್ಯಾಂತ್ ಬಾಬಾಕ್ ಕಳಿತ್ ಜಾಲ್ಲೆಂ; ಕಸೆಂ ಆನಿ ಕೊಣೆ ಸಾಂಗ್ಲೆಂ ತೆಂ ಮ್ಹಾಕಾ ಕಳಿತ್ ಜಾಲೆಂ ನಾ. ಮ್ಹಾಕಾ ಸರ‍್ಸರಿತ್ ಮಾರ್ ಪಡ್ಲೆ. ಸತ್ ಉಲಂವ್ಕ್ ಸಾಂಗ್ಲೆಂ. ಬಾಬಾನ್ ತರ‍್ನಿ ಮಿರ‍್ಸಾಂಗ್ ಹಾಡ್ನ್ ಮ್ಹಜ್ಯಾ ದೊಳ್ಯಾಂಕ್ ಚಿರ‍್ಡಿತಾಂ ಮ್ಹಣ್ತಾನಾ ಹಾಂವೆಂ ಸತ್ ಸಾಂಗ್ಲೆಂಚ್ಚ್. ಶಿಕ್ಪಾ ಬೂಕಾ ಭಿತರ್ ಲಿಪವ್ನ್ ದವರ್‌ಲ್ಲೊ ’ತೊ’ ಬೂಕ್ ಬಾಬಾ ಮುಕಾರ್ ದವರ‍್ಲೊ.
ಬಾಬಾನ್ ಬೂಕ್ ಹಾತಿಂ ಧರ‍್ಲೊ. ತಾಣೆಂಯ್ ಪಾನಾಂ ಪರ‍್ತಿಲಿಂ. ತಾಚೆ ದೊಳೆಯ್ ರುಂದಾಲೆ. ತೊಯ್ ಉಂಚಾಂಬಳ್ ಜಾಲೊ ತಸೆಂ ಭಗ್ಲೆಂ. ಮಾಂಯ್ ಬೊಬಾಟ್ಲಿ – ” ಹ್ಯಾ ಚೆಡ್ಯಾಕ್ ಶಿಕೊಂಕ್ ಮ್ಹಣ್ ಇತ್ಲ್ಯಾ ಕಷ್ಟಾಂನಿ, ಕೊಣಾ ಕೊಣಾಚೆ ಪಾಯ್ ಧರ‍್ನ್, ತಾಂಚಿ ಕುಮಕ್ ಘೆವ್ನ್ ದಾಡ್ಲಾಂ ಆನಿ ಹಾಕಾ ಚರಬ್ ಮಾಂಡ್ಲ್ಯಾ…. ನಾ ತರ್ ಹೊ ಅಸೆಂ ಕರಿನಾ…… ಫಾಲ್ಯಾಂ ಹ್ಯಾ ಚೆಡ್ಯಾಕ್ ಪಾದ್ರ್ಯಾಬಾ ಸರ್ಸಿನ್ ವೊರಾಜಯ್ ಆನಿ ಸುಟಾವೆಂ ಕುಮ್ಸಾರ್ ಜಾಯ್ಜಯ್…. ಪಾದ್ರ್ಯಾಬಾನ್ಂಚ್ಚ್ ಹಾಚೆರ್ ಬೆಸಾಂವ್ ಘಾಲ್ನ್ ಹಾಚಿ ಮತ್ ಬದ್ಲಿಜಯ್…..”
ತ್ಯಾ ರಾತಿಂ ಮ್ಹಾಕಾ ಜೆವಾಣ್ ಮೆಳ್ಳೆಂ ನಾ. ಮ್ಹೆಳ್ಯಾ ವಸ್ತುರಾರ್‌ಚ್ಚ್ ನಿದೊಂಕ್ ಮ್ಹಾಕಾ ಮಾಂಯ್ನ್ ಫರ್ಮಾಯ್ಲೆಂ.
ಬಾಯ್ಲ್ಯಾ ಸೊಪ್ಯಾರ್ ಬಸ್‌ಲ್ಲ್ಯಾ ಕಡೆಚ್ಚ್ ಖಾಲಿ ಧರ‍್ಣಿರ್ ಹಾಂವ್ ಆಡ್ ಪಡ್ಲೊಂ… ಆನಿ ಥಂಯ್ಚ್ ನಿದ್ಲೊಂ……ಬಾಬಾಚೆ ತಿತ್ಲೆ ಮಾರ್ ಖೆಲ್ಲೆ ತರ್ಯ್ ತ್ಯಾ ಬೂಕಾಚ್ಯಾ ಪಾನಾಂನಿ ಚಾಕ್‌ಲ್ಲಿ ವಿಶೇಸ್ ಆಕರ್ಶಣ್ ಜಿವಾಂತ್ ಜಿವೆಂಚ್ಚ್ ಆಸ್ಲ್ಲೆಂ.
ಕಾಂಯ್ ಮಧ್ಯಾನೆ ಉಪ್ರಾಂತ್ ಮ್ಹಾಕಾ ಜಾಗ್ ಜಾಲಿ. ಬಾಬಾಚೆ ಮಾರ್ ಖಾವ್ನ್ ಆಂಗ್ ದುಖ್ತಾಲೆಂ. ದೊಳೆ ಘಸ್ಟಿಲೆ. ಸೊಪ್ಯಾಚ್ಯಾ ಪೊಂತಾರ್ ಪಾತಳ್ ಉಜ್ವಾಡ್ ಆಸ್ಚೊ ದಿಸ್ಲೊ ಮ್ಹಾಕಾ ….
ಆವಾಜಾ ವಿಣೆಂ ಬಸೊನ್ ಹಾಂವೆಂ ತೆವ್ಶಿನ್ ಪಳಯ್ಲೆಂ…
ಬಾಬ್ ತ್ಯಾ ಮಿಣ್ಕುಳ್ಯಾ ಉಜ್ವಾಡಾಂತ್ ಬಸೊನ್ ಆಸ್ಲ್ಲೊ…
ನಿದೆಚ್ಯಾ ದೊಳ್ಯಾಂಕ್ ಆತಾಂ ಸುಡ್ಸುಡಾಯ್ ಆಯ್ಲಿ….. ದೊಳೆ ರುಂದಾಲೆ….
ದಿಂಬಿಯಾಂನಿ ಪಡೊನ್ ಹಾಂವ್ ಕುಸ್ಕುಟ್ ಮುಕಾರ್ ಗೆಲೊಂ
ಮ್ಹಾಕಾ ವಿಶೇಸ್ ಅಜಾಪ್ ರಾಕೊನ್ ಆಸ್ಲ್ಲೆಂ…
ಬಾಬ್ ಹಾಂವೆಂ ಹಾಡ್ಲ್ಲೊ ಬೂಕ್, ತ್ಯಾ ಮಿಣ್ಕುಳ್ಯಾ ಉಜ್ವಾಡಾಂತ್, ಲಿಪೊನ್ ಪಳಯ್ತಾಲೊ…… ಆನಿಂ…
ದುಸ್ರ್ಯಾ ದಿಸಾ ಹಾಂವ್ ಮ್ಹಾಕಾ ಶಿಕ್ಪಾ ಸಂಸ್ಥ್ಯಾಕ್ ವಚೊಂಕ್ ದಿಲೆಂನಾ. ಮಾಂಯ್ನ್ ಮ್ಹಾಕಾ ಇಗರ‍್ಜೆಕ್ ಆಪವ್ನ್ ವೆಲೊ…… ಬಾಬಾಕ್ ತಿಣೆಂ ಆಪಯ್ಲೆಂ ತರ್ಯ್ ತೊ ಆಯ್ಲೊ ನಾ.
ತಿಚ್ಯಾ ಭೆಟೆಚೊ ಉದ್ದೇಶ್ ಭಾರಿಚ್ಚ್ ಸಂಪೊ …..ಪಯ್ಲೆಂ, ಹಾಂವೆ ಸುಟಾವೆಂ ಕುಮ್ಸಾರ್ ಜಾಂವ್ಚೆಂ; ಉಪ್ರಾಂತ್ ಪಾದ್ರ್ಯಾಬಾನ್ ಮ್ಹಾಕಾ ಸಾರ‍್ಕಿ ಬೂದ್ ಸಾಂಗ್ಚಿ…. ಮತ್ ಉಜ್ವಾಡಾಂವ್ಕ್ ಬೆಸಾಂವ್ ದಿಂವ್ಚೆಂ ಆನಿ ಮುಖಾರ್ ತಸೆಂ ಕರಿನಾಸ್ತಾನಾ ರಾಂವ್ಚ್ಯಾಕ್ ರಾಕೊಣ್ ಭಡ್ವ್ಯಾನ್ ಸಾಂಬಾಳ್ಚ್ಯಾಕ್ ಮ್ಹಜ್ಯಾ ತಕ್ಲೆರ್ ಹಾತ್ ದವರ್ನ್ ವಿಶೇಸ್ ಮಾಗ್ಣೆಂ ಕರ್ಚೆಂ….
ದಾಕ್ಟೊ ಪಾದ್ರ್ಯಾಬ್ ಆಸ್ಲ್ಲೊ ಆನಿ ತೊಚ್ಚ್ ಮೆಳ್ಳೊ. ಆಮಿಂ ದುಬ್ಳ್ಯಾ ವರ‍್ಗಾಂಚಿ ಜಾಲ್ಲ್ಯಾನ್ ವ್ಹಡ್ಲೊ ಪಾದ್ರ್ಯಾಬ್ ಆಸ್ಲ್ಯಾರ್‌ಯ್ ಆಮ್ಕಾಂ ಮೆಳ್ಚ್ಯಾರ್ ನಾತ್ಲ್ಲೊ.
ತರ್ನಾಟೊ ಕಾಜಿತೊರ್ ಆಮ್ಚೊ. ವೊಡ್ದ್ ಮೆಳೊನ್ ಕಾಂಯ್ ಚಾರ್ ವೊರ‍್ಸಾಂ ಜಾಲ್ಲಿಂ ಕೊಣ್ಣಾ ಆನಿ ಆಮ್ಚ್ಯಾ ಫಿರ‍್ಗಜೆಕ್ ತೀನ್ ವೊರ‍್ಸಾಂ ಥಾವ್ನ್ ಕಾಜಿತೊರ್ ಜಾವ್ನಾಸ್ಲ್ಲೊ. ತತ್ವ್‌ಶಾಸ್ತ್ರ್ ಶಿಕೊನ್ ಜಾಣ್ತೊ ಜಾಣಾರಿ ಆನಿ ಬುದ್ವಂತ್ ಮ್ಹಣ್ ಲೊಕಾ ಮಧೆಂ ನಾಂವಾಡ್‌ಲ್ಲೊ.
ಹಾಂವೆ ಕೆಲ್ಲ್ಯಾ ಪಯ್ಶಾಂಚ್ಯಾ ಚೊರ‍್ಯೆ ವಿಶ್ಯಾಂತ್, ಭುರ‍್ಶ್ಯಾ ಬೂಕಾ ವಿಶ್ಯಾಂತ್, ಮ್ಹಜ್ಯಾ ಭುರ‍್ಶ್ಯಾಪಣಾ ವಿಶ್ಯಾಂತ್ ಮಾಂಯ್ನ್ ತಪ್ಶೀಲ್ ವಿವರ್ ಪಾದ್ರ್ಯಾಬಾಕ್ ದಿಲೊ ಆನಿ ಮ್ಹಜೆಂ ಕುಮ್ಸಾರ್ ಆಯ್ಕೊನ್, ಭಗ್ಸಾಣೆಂ ದಿಜಯ್ ಆನಿ ಮುಕಾರ್ ತಸೆಂ ಕರುಂಕ್ ನಜೊ ಮ್ಹಳ್ಳ್ಯಾ ವಿಶ್ಯಾಂತ್ ಜಾಗ್ರುತ್ಕಾಯ್ ದಿಜಯ್ ಮ್ಹಣ್ ತಿಳ್ಸಿಲೆಂ. ಮ್ಹಜ್ಯಾ ತಕ್ಲೆರ್ ಹಾತ್ ದವರ್ನ್ ಮಾಗ್ಣೆಂ ಕರಿಜಯ್ ಮ್ಹಣ್ ಪರಾತ್ತಿಲಾಗ್ಲಿ. ಉಪ್ರಾಂತ್ ಪಾದ್ರ್ಯಾಬಾಚ್ಯಾ ಕೂಡಾಚೆಂ ಬಾಗಿಲ್ ಆಡ್ ಕರ್ನ್ ತಿ ಭಾಯ್ರ್ ಗೆಲಿ.
ಪಾದ್ರ್ಯಾಬಾಚ್ಯಾ ತೊಂಡಾರ್ ಕಾಂಯ್ ಬದ್ಲಾವಣ್ ಜಾಲಿ ನಾ. ಹಾಂವೆಂ ಕಾಂಯ್ ವ್ಹಡ್ ಗುನ್ಯಾಂವ್ ಕೆಲಾ ಮ್ಹಣ್ಂಚ್ಚ್ ತಾಕಾ ಭಗಾನಾ ತಸೆಂ ಯಾ ಅಸಲಿಂ ಘಡಿತಾಂ ಕಾಂಯ್ ತಾಕಾ ಸದಾಂಚಿ ತಸೆಂ…..
ತಾಣೆ ಮ್ಹಜ್ಯಾ ಹಾತಿಂ ಚಾಲ್ತಿಂ ಮಾಗ್ಣಿಂ ಬೂಕ್ ದೀವ್ನ್, ಕುಮ್ಸಾರಾಚಿ ಖರಿ ತಯರಾಯ್ ಕರುಂಕ್ ಸಾಂಗ್ಲೆಂ. ಲ್ಹಾನ್ಪಣಾಥಾವ್ನ್ ತ್ಯಾ ಬೂಕಾನ್ ಕುಮ್ಸಾರ್ ಜಾಂವ್ಕ್ ಮ್ಹಾಕಾ ಕುಮಕ್ ಕೆಲ್ಲಿ ಆನಿ ಆಜ್‌ಯ್ ತಾಂತು ಆಸ್ಲ್ಲಿ ಕುಮ್ಸಾರಾಚಿ ತಯರಾಯ್ ಹಾಂವೆ ವಾಚ್ಲಿ. ಆಜ್ ಮ್ಹಜ್ಯಾ ಥಂಯ್ ಸದಾಂಚ್ಯಾಕೀ ಚಡ್ತಿಕ್ ಪಾತ್ಕಾಂ ಆಸ್ಲ್ಲ್ಯಾ ಬರಿ ಮ್ಹಾಕಾ ಭಗ್ಲೆಂ….. ಜ್ಯಾ ಪಾತ್ಕಾಂಚ್ಯಾ ಪಟ್ಟೆಚೆರ್ ಯೆದೊಳ್ ವಚಾನಾತ್‌ಲ್ಲಿ ದೀಷ್ಟ್ ಆಜ್ ಥಂಯ್ ಗೆಲಿ. ಮ್ಹಜಿಂ ಚಡ್ತಿಕ್ ಪಾತ್ಕಾಂ ಪಾದ್ರ್ಯಾಬಾಲಾಗಿಂ ತೊಂಡ್ಪಾಶಿಂ ಉಚಾರ‍್ಚ್ಯಾಕ್ ಥೊಡೆ ಪಾವ್ಟಿಂ ಮತಿಂತ್‌ಚ್ಚ್ ಅಭ್ಯಾಸ್ ಕೆಲೆಂ. ಪಾತ್ಕಾಂ ವಿಶ್ಯಾಂತ್ ಥಿರ್ ಜಾಲೊಂ.
ಪಾದ್ರ್ಯಾಬಾಚ್ಯಾ ಕೂಡಾಂತ್‌ಚ್ಚ್ ಮ್ಹಜೆಂ ಕುಮ್ಸಾರ್ ಆಯ್ಕೊಂಚ್ಯಾಕ್ ಪಾದ್ರ್ಯಾಬ್ ಬಸ್ಲೊ.
ಹಾಂವೆ ದಿಂಬಿ ಘಾಲಿ. ಹಾತ್ ಜೊಡುನ್ ಹರ‍್ಧ್ಯಾರ್ ಖಂಚಯ್ಲೆ. ಜಿವಿತಾಂತ್ ಪಯ್ಲ್ಯಾ ಪಾವ್ಟಿಂ ಕುಮ್ಸಾರಾಂತ್ ಮ್ಹಾಕಾ ಕಟಿಣಾಯೆಚೆಂ ಭ್ಯೆಂ ದಿಸ್ಲೆಂ. ಕುಮ್ಸಾರ್ ಸುರು ಜಾಲೆಂ. ಸುರ‍್ವಿಲ್ಲಿ ಉಚಾರ‍್ಣಿ ಜಾಲಿ.
“ಹಳ್ಶಿಕ್ ವಾಚ್ಲಾಂ……… ” ಹಾಂವೆಂ ಕಾಂಪೊನ್ ಸಾಂಗ್ಲೆಂ. ಹಾಂವ್ ಭಿಯೆಲ್ಲೊಂ. ಜಿವಿತಾಂತ್ ಪಯ್ಲೆಂ ಪಾವ್ಟಿಂ ತಸಲಿಂ ಪಾತ್ಕಾಂ ಕರ‍್ಚಿಂ ಜಾಲ್ಲ್ಯಾನ್ ಕೊಣ್ಣಾ ಜೀಬ್ ಬರ‍್ಫಾಂತ್ ಬುಡಯಿಲ್ಲ್ಯಾ ಥಂಡ್ ಜಾಲ್ಲಿ.
“ಪಯ್ಲೆಂ ಚೊರ‍್ಲಾಂಯ್…..” ಪಾದ್ರ್ಯಾಬಾನ್ ಮ್ಹಾಕಾ ತಿದ್ವಿಲೆಂ.
ಹಾಂವ್ ಪಾತ್ಕಾಂ ಸಾಂಗ್ಚ್ಯಾಂತ್ ಚುಕ್‌ಲ್ಲೊಂ.
“ಹಾಂ ! ಪಾದರ್ …..ಹಾಂವೆ ಚೊರ‍್ಲಾಂ…..ವ್ಹಯ್ …ಚೊರ‍್ಲಾಂ…. ಪಯ್ಶೆ….. ಪಾಂಚ್ ರುಪಯ್….! ಆನಿಂ ತ್ಯಾ ಪಯ್ಶಾಂನಿ ಹಳ್ಶಿಕ್ ಬೂಕ್ ಮೊಲಾಕ್ ಘೆತ್ಲಾ….. ಆನಿ ತಾಂತ್ಲೆ ಹಳ್ಶಿಕ್ ವಾಚ್ಲಾಂ …. ಹಳ್ಶಿಕ್ ಪಳಯ್ಲಾಂ….. ” ಮ್ಹಜೊ ತಾಳೊ ನಿಜಾಯ್ಕಿ ಕಾಂಪ್ತಾಲೊ.
“ಆನಿಂ ಹಳ್ಶಿಕ್ ಕರ‍್ನಿ ಕೆಲ್ಲಿಯ್…. ತುಜ್ಯಾ ಇತ್ಲ್ಯಾಕ್….???” ಹಾಂವೆಂ ಕಿತೆಂಚ್ಚ್ ದುಸ್ರೆಂ ಕಿತೆಂಚ್ಚ್ ಸಾಂಗ್ಚ್ಯಾ ಪಯ್ಲೆಂ ಪಾದ್ರ್ಯಾಬಾನ್ ಮುಖಾರ್ಸುನ್ ವಿಚಾರ‍್ಲೆಂ…..
ಹಾಂವ್ ಸಂಪೂರ್ಣ್ ಥಂಡ್ ಜಾಲೊಂ. ಮ್ಹಜೆಂ ಪಾತಕ್ ಪಾದ್ರ್ಯಾಬಾಕ್ ಕಳಿತ್ ಆಸ್ಲ್ಲೆಂ. ಹಾಂವೆ ಪಾದ್ರ್ಯಾಬಾಚ್ಯಾ ದೊಳ್ಯಾಂಕ್ ದೊಳೆ ಮೆಳಯ್ಲೆ. ’ವ್ಹಯ್..’ ಭಾರಿಚ್ಚ್ ಥಂಡಾಯೆನ್ ಹಾಂವೆ ಮ್ಹಳೆಂ
ಪಾದ್ರ್ಯಾಬಾಚಿಯ್ ಜವಾಬ್ ನಾ ಜಾಲಿ…. ತಾಣೆಂ ಲಾಂಬ್ ಸ್ವಾಸ್ ಸೆವ್ಲೊ…..
ಹೆರ್ ಲ್ಹಾನ್ ಪಾತ್ಕಾಂ, ಸದಾಂಚಿ, ಭುರ‍್ಗ್ಯಾಪಣಾರ್ ಥಾವ್ನ್ ಉಚಾರ್‌ಲ್ಲ್ಯಾ ಬರಿಚ್ಚ್, ಆತಾಂ ಸಾಂಗೊಂಕ್ ಸುರು ಕೆಲಿಂ. ಹಾಂವೆ ತಿಂ ಪಾತ್ಕಾಂ ನಿಜಾಯ್ಕಿ ಕೆಲ್ಲಿಂ ವ ನಾ ತೆಂ ಮ್ಹಾಕಾ ಕಳಿತ್ ನಾತ್ಲ್ಲೆಂ. ಸವಯೆ ಪ್ರಮಾಣೆಂಚ್ಚ್ ಹಾಂವೆ ಉಚಾರ‍್ಲೆಂ. ತಿಂ ಪಾತ್ಕಾಂ ಪಾದ್ರ್ಯಾಬಾನ್ ಆಯ್ಕಾಲಿಂ ವ ನಾ ತೆಂಯ್ ಮ್ಹಾಕಾ ಕಳಿತ್ ನಾ….. ಪುಣ್ ಹಾಂವ್ ಸಾಂಗೊನ್ಂಚ್ಚ್ ಗೆಲೊಂ….. ಆನಿ ಹಾಂವ್ ಮೌನ್ ಜಾತಾನಾ, ಪಾದ್ರ್ಯಾಬಾನ್ ಮ್ಹಾಕಾ ಅಬ್ಸುಲುಸಾಂವ್ ದಿಲೆಂ ಆನಿ ಮ್ಹಜ್ಯಾ ತಕ್ಲೆರ್ ಹಾತ್ ದವರ್ನ್ ಮಾಗ್ಣೆಂ ಕೆಲೆಂ. ಹಾಂವೆ ದೊಳೆ ದಾಂಪುನ್ ತಾಣೆಂ ಕೆಲ್ಲ್ಯಾ ಮಾಗ್ಣ್ಯಾಚಿ ಕುರ‍್ಪಾ ಸ್ವೀಕಾರ್ ಕರ್ಚೆಂ ಪ್ರೇತನ್ ಕೆಲೆಂ. ಪ್ರಾಜಿತ್ ಜಾವ್ನ್ ಲಾಂಬ್ ಮಾಗ್ಣೆಂ ತಾಣೆ ದಿಲೆಂ ನಾ. ಕುಮ್ಸಾರಾ ಉಪ್ರಾಂತ್ಲೆ ಆನಿ ಪ್ರಾಜಿತಾಚೆಂ ಮಾಗ್ಣಿಂ ಇಗರ‍್ಜೆಕ್ ವಚೊನ್ ಮುಗ್ದುನ್ ಪಾಟಿಂ ಯೇವ್ನ್ ಆಪ್ಣಾಕ್ ಮೆಳೊಂಕ್ ಪಾದ್ರ್ಯಾಬಾನ್ ಮ್ಹಾಕಾ ಸಾಂಗ್ಲೆಂ.
ಇಗರ‍್ಜೆಚಿ ಭೆಟ್ ಕರ್ನ್ ಮಾಗ್ಣಿಂ ಜಾತಚ್ಚ್ ಹಾಂವ್ ಪಾಟಿಂ ಪಾದ್ರ್ಯಾಬಾ ಸರ್ಸಿನ್ ಆಯ್ಲೊಂ.
ತೊ ಕಿತೆಂಗೀ ಗೂಂಡಾಯೆನ್ ಚಿಂತುನ್ ಆಸ್ಲ್ಲೊ. ಹಾಂವ್ ಆಯಿಲ್ಲೊಂಚ್ಚ್ ತೊ ಚಿಂತ್ನಾಂತ್ಲೊ ಜಾಗೊ ಜಾಲೊ.
” ಆತಾಂ ಹಾಂವೆ ಸಾಂಗ್ಚೆಂ ತುಂವೆ ಚೀತ್ ದೀವ್ನ್ ಆಯ್ಕಾಜಯ್….” ಮುಖ್ಲ್ಯಾ ಬಾಂಕಾಚೆರ್ ಬಸೊಂಕ್ ಸಾಂಗೊನ್ ಪಾದ್ರ್ಯಾಬಾನ್ ಉಲಂವ್ಕ್ ಸುರು ಕೆಲೆಂ. ಹಾಂವ್ ಬಾಂಕಾಚೆರ್ ಬಸ್ಲೊಂ.
“ಮನ್ಶಾ ಜಿವಿತಾಂತ್ಲಿ ಸೈಂಭಿಕ್ ವೊಡ್ಣಿ ಮಾತಿಯೆಂತ್ ಪುರುನ್ ದವರ್‌ಲ್ಲೆಂ ಉಜ್ಯಾಚೆಂ ಕೆಂಡ್ ಮ್ಹಣ್ ಹಾಂವೆ ಮ್ಹಣ್ಚೆಂ ಆನಿ ಜಾಯ್ತ್ಯಾ ತತ್ವ್‌ಶಾಸ್ತ್ರಿಂನಿಂಯ್ ಉಚಾರ್ಚೆಂ. ಸೈಂಭಿಕ್ ವೊಡ್ಣಿ ಮನ್ಶಾ ಸಹಜ್ ಗೂಣ್. ಜೆದ್ನಾಂ ಮನಿಸ್ ಭುರ‍್ಗ್ಯಾಪಣಾ ಥಾವ್ನ್ ತರ್ನಾಟ್ಪಣಾಚ್ಯಾ ಮೆಳಿಂತ್ ಮೆತೆರ್ ಜಾಂವ್ಕ್ ಮೆಟಾಂ ಕಾಡ್ತಾ, ತೆದ್ನಾಂ ಅಸಲಿಂ ಚಿಂತ್ನಾಂ ಯೆಂವ್ಚಿಂ ಆನಿ ಕರ‍್ಚ್ಯೊ ಕರ‍್ನ್ಯೊ ಸಹಜ್…….. ಪುಣ್, ಆಮ್ಚ್ಯಾ ಭಾವಾಡ್ತಾ ಪ್ರಮಾಣೆ, ತುಂವೆ ಕೆಲ್ಲಿ ತಿ ಚೂಕ್…. ಪಾತಕ್…. ಆತಾಂ ತುಂ ಕುಮ್ಸಾರ್ ಜಾಲಾಯ್ ಆನಿ ಜೆಜುನ್ ತುಕಾ ಭಗ್ಸಿಲಾಂ…… ಸಮಧಾನೆನ್ ತುಂವೆ ಘರಾ ವಚಾಜಯ್ ಆನಿ ಮುಕಾರ್ ತಸಲಿಂ ಪಾತ್ಕಾಂ ಕರಿನಾ ಮ್ಹಣ್ ನಿಚೆವ್ ಕರಿಜಯ್…. ದೇವ್ ತುಕಾ ಸಾಂಬಾಳ್ತಾ…..”
ಖಂಯ್‌ಗೀ ಶಿಕ್‌ಲ್ಲಿಂ ಬೂದ್‌ಬಾಳಿಚಿಂ ಉತ್ರಾಂ ತೊ ಮ್ಹಾಕಾ ಸಾಂಗ್ತಾಲೊ ತಸೆಂ ಮ್ಹಾಕಾ ಭಗ್ಲೆಂ.
ತರ್ಯ್ ಹಾಂವ್ ರಡ್ತಾಲೊಂ. ಮ್ಹಜಿ ಚೂಕ್ ಮ್ಹಾಕಾ ಸಮ್ಜಲಿ ತಸೆಂ ಹಾಂವ್ ಸುಸ್ಕಾರ‍್ತಾಲೊಂ….. ಜೆಜುನ್ ಮ್ಹಾಕಾ ಭಗ್ಸಿಲಾಂ ಮ್ಹಳ್ಳೆಂ ಸಮಧಾನ್ಂಯ್ ಮ್ಹಜ್ಯಾ ಥಂಯ್ ಆಸ್ಲ್ಲೆಂ.
“ಫಾದರ್ … ” ರಡ್ಣ್ಯಾಂ ಮಧೆಂ ಹಾಂವ್ ಕಾಂಪೊನ್ ಉಲಯ್ಲೊಂ. ” ಹಾಂವೆ ಚೊರಿ ಕೆಲ್ಲಿ ಚೂಕ್….. ಹೊ ಬೂಕ್ ಹಾಡ್ಲ್ಲೊ ಚೂಕ್….. ಹಾಂವ್ ವಳ್ಕಾತಾಂ…. ಪುಣ್, ಬಾಬಾನ್ಂಯ್ ತೊ ಬೂಕ್ ವಾಚ್ಲಾ….. ಆನಿಂ….”
ಪಾದ್ರ್ಯಾಬಾನ್ ಹಾತ್ ಉಬಾರ‍್ಲೊ ಆನಿ ಮ್ಹಜಿಂ ಉತ್ರಾಂ ರಾವಯ್ಲಿಂ ಮುಖ್ಲಿಂ ಮ್ಹಜಿಂ ಉತ್ರಾಂ ಆಯ್ಕೊಂಕ್ ತಾಕಾ ಬಿಲ್ಕುಲ್ ಮನ್ ನಾತ್ಲ್ಲ್ಯಾ ಬರಿ.
“ಮನ್ಶಾ ಥಂಯ್ ಆಸ್ಚೊ ಹೊ ಏಕ್ ಗೂಣ್ ಮ್ಹಣ್ ಹಾಂವೆ ಮ್ಹಳೆಂ, ಯಾ ತಾಂಬ್ಡ್ಯಾ ತಾಚ್ಯಾ ರಗ್ತಾಚೊ ಕಾಳೊ ಅವ್ಗುಣ್ …. ಸೈಂಭಿಕ್ ಗೂಣ್ ಯಾ ಅವ್ಗುಣ್ ಮ್ಹಣ್ ಸಾಂಗೊಂಕ್ ಕಷ್ಟ್…. ತರ್ನಾಟೊ ಜಾಲ್ಯಾ ಉಪ್ರಾಂತ್ ಹ್ಯಾ ಚಿಂತ್ಪಾಕ್, ಕರುಂಕ್ ಆಶೆಂವ್ಚ್ಯಾ ಕರ‍್ನೆಕ್ ಕಾಂಯ್ ಪ್ರಾಯೆಚಿ ಗಡ್ ನಾ….. ಮ್ಹಾತಾರೊ ಜಾತಾ ವರೇಗ್ ತೊ ಆಸ್ತಾ …. ಸೈಂಭಿಕ್ ಗೂಣ್ ಹಾಂಗಾಸರ್ ಉಗ್ತೊ ಜಾತಾ…… ಆಮ್ಚೊ ಭಾವಾಡ್ತ್ ಹೆಂ ಏಕ್ ಪಾತಕ್ ಮ್ಹಣ್ ಕಳಯ್ತಾ ತೆಂ ಖರೆಂ….. … ತುಜ್ಯಾ ಬಾಬಾನ್ ಹೆಂ ಪಳಯ್ಲಾಂ ಆನಿ ಕಿತೆಂಯ್ ಕೆಲಾಂ ತರ್ ತೆಂ ಕಾಂಯ್ ಚಡ್ತಿಕ್ ನಂಯ್…… ಸೈಂಭಿಕ್ ವಾದಾಳಾಕ್ ಜಾಯ್ತೊ ಲೋಕ್ ಯಾ ಹರ್ಯೇಕ್ ಮನಿಸ್ ಬಾಂಧುನ್ ದವರುಂಕ್ ಸಕಾನಾ…..ಪಡ್ತಾ…. ಬಾಬಾಚ್ಯಾ ಪಾತ್ಕಾಚೆಂ ಲೇಕ್ ತೊ ದಿತಲೊ….. “
ಹಾಂವೆ ಪ್ರತಿಕ್ರಿಯಾ ದಾಕಯ್ಲಿನಾ. ದೊಳ್ಯಾಂತ್ಲಿ ದುಖಾಂ ಸುಕ್‌ಲ್ಲಿಂ. ದೊಳೆ ಉಗ್ತೆ ಕರುನ್ ಹಾಂವ್ ಪಾದ್ರ್ಯಾಬಾಕ್‌ಚ್ಚ್ ಪಳಯ್ತಾಲೊಂ.
“ಮನಿಸ್‌ಯ್ ಏಕ್ ಮನ್ಜಾತ್ ….” ಪಾದ್ರ್ಯಾಬ್‌ಚ್ಚ್ ಮುಖಾರ್ಸುನ್ ಉಲಯ್ಲೊ. ” ಹೊ ಸೈಂಭಿಕ್ ಗೂಣ್ ಮನ್ಜಾತಿಚ್ಯಾ ಆನಿ ಮನ್ಶಾಚ್ಯಾ ರಗ್ತಾತ್ಂಚ್ಚ್ ಆಸಾ….. ದೆವಾನ್ ತೊ ಘಾಲಾ ಯಾ ಸ್ರಷ್ಟೆನ್ ತೊ ವಾಂಟ್ಲಾ ತೆಂ ಹಾಂವ್ ನೆಣಾ…. ಸ್ವಾಭಾವಿಕ್ ಗೂಣ್ ತೊ ……..ಮೀಟ್ ಮಿರ‍್ಸಾಂಗ್ ಖೆಲ್ಲ್ಯಾ ಹರ‍್ಯೆಕ್ಲ್ಯಾ ಥಂಯ್ ….. ಹರ‍್ಯೇಕಾ ಮನ್ಶಾಥಂಯ್ ಹೊ ಆಸಾಜಯ್ ಜಾಲ್ಲೊ ಮನ್ಶಾ ಸೈಂಬಾಚೊ ಗೂಣ್ ತೊ….. ಮನ್ಶಾಂ ಥಾವ್ನ್ ಕೊಣೆಂಯ್ ಸುಟೊಂಕ್ ಸಾಧ್ಯ್ ನಾ…….ಚಿಂತ್ನಾಂನಿ ಹಿ ಬದ್ಲಾವಣ್ ಜಾತಾನಾ ಮನಿಸ್ ಚಿಂತ್ಪಾಚ್ಯಾ ಪರಿಪಿಕಾಯೆಕ್ ಪಾವ್ಲೊ ಮ್ಹಣ್ ಅರ‍್ತ್….. ಹರ್ಯೇಕ್ ಮನಿಸ್ ಹ್ಯಾ ಸೈಂಭಿಕ್ ವೊಡ್ಣ್ಯಾಚೊ ಅನ್ಭೋಗ್ ಕರ್ತಾ ಆನಿ ಕರಿಜಯ್‌ಚ್ಚ್……… ದೆಕುನ್ ತುಂವೆ ಕಾಂಯ್ ಖಂತ್ ಕರಿಜಯ್ ಮ್ಹಣ್ ನಾ…”
ಪಾದ್ರ್ಯಾಬಾಚಿಂ ಉತ್ರಾಂ ಮ್ಹಜ್ಯಾ ಮತಿಕ್ ಕಟಿಣಾಯೆನ್ ಖಂಚ್ಲಿಂ….. ತಾಚ್ಯಾ ಉತ್ರಾಂನಿ ಆಸ್ಲ್ಲೆಂ ’ಹರ್ಯೇಕ್ ಮನಿಸ್’ ಮ್ಹಳ್ಳೆಂ ಉತರ್ ಮ್ಹಜ್ಯಾ ಮತಿಂತ್ ಖಂಚೊನ್ ಬಸ್ಲೆಂ….. ’ಹರ್ಯೇಕ್ ಮನಿಸ್…….!!!!’ ಮತಿ ಗೊಪಾಂತ್ ಹಜಾರ್ ಪಾವ್ಟಿಂ ಪ್ರತಿದ್ವನಿತ್ ಜಾತಾನಾ ಹಾಂವೆ ತಾಚ್ಯಾಚ್ಚ್ ತೊಂಡಾಕ್ ಪಳಯ್ಲೆಂ….. ಮ್ಹಜ್ಯಾ ಮತಿಂತ್ ಹಜಾರ್ ಸವಾಲಾಂ ಉದೆಲಿಂ ಪುಣ್ ಎಕಾಯ್ ಸವಾಲಾಕ್ ವಿಚಾರ‍್ಚೆಂ ಧೈರ್ ಮಾತ್ರ್ ಮ್ಹಜ್ಯಾ ಥಂಯ್ ಆಯ್ಲೆಂ ನಾ.
ಹಾಂವ್ ಪಾಟಿಂ ಘರಾ ವಚೊಂಕ್ ಭಾಯ್ರ್ ಸರ‍್ಲೊಂ. ಉಬೊ ಜಾಲೊಂ.
ಪಾದ್ರ್ಯಾಬಾನ್ ಮ್ಹಾಕಾ ರಾವಯ್ಲೆಂ. ಪರತ್ ಬಾಂಕಾಚೆರ್ ಬಸಯ್ಲೆಂ.
“ಆಯ್ಕ್….. ಹ್ಯಾ ವೆಳಾರ್ ತುಜ್ಯಾ ಮತಿಂತ್ ಜಾಯ್ತಿಂ ಸವಾಲಾಂ ಆಸಾತ್ ತೆಂ ಮ್ಹಾಕಾ ಕಳಿತ್ ಜಾತಾ…. ತ್ಯಾ ಸವಾಲಾಂಕ್ ಮ್ಹಜ್ಯಾ ಜಾಣ್ವಾಯೆ ಪ್ರಕಾರ್ ತುಜಿ ಪ್ರಾಯ್ ಮತಿಂತ್ ಧರುನ್ ಜವಾಬ್ ದಿಜಯ್‌ಚ್ಚ್ ಮ್ಹಣ್ಂಯ್ ಮ್ಹಾಕಾ ಭಗ್ತಾ.. “
ಹಾಂವ್ ಬಸ್ಲೊಂ. ದೊಳ್ಯಾಂ ಖಾಂಚಿನಿ ಆಸ್ಲ್ಲಿಂ ದುಖಾಂ ಹಾತಾನ್ಂಚ್ಚ್ ಪುಸ್ಲಿಂ. ಕಾನ್ ಆನಿ ಮತ್ ಉಗ್ತಿಂ ಕರುನ್ ಹಾಂವೆ ಆಯ್ಕೊಂಚೆಂ ಪ್ರೇತನ್ ಕೆಲೆಂ.
” ದಾದ್ಲ್ಯಾಕ್ ಸ್ತ್ರಿಯೆ ಥಂಯ್ ಆನಿಂ ಸ್ತ್ರಿಯೆಕ್ ದಾದ್ಲ್ಯಾ ಥಂಯ್ ಆಕರ‍್ಷಣ್ …ಹೊ ಸೈಂಭಿಕ್ ಗೂಣ್ … ಸ್ವಾಭಾವಿಕ್ ಗೂಣ್ ….ಸರ‍್ವಾಂ ಥಂಯ್ ಆಸಾ… ಆಸಾಜಯ್‌ಚ್ಚ್…. ಮನ್ಜಾತಿ ಥಂಯ್ ಆನಿಂ ಮನ್ಶಾಂ ಥಂಯ್ ಆಸಾ ….. ಹೊ ಗೂಣ್ ದೆವಾಚ್ಯಾ ರಚ್ನೆಚೊ ವಾಂಟೊಗೀ???…. ತಾಚ್ಯಾ ರಚ್ನೆಚೊ ವಾಂಟೊ ತರ್ ತೊ ಪಾಡ್ ನಂಯ್….. ಭಾವಾಡ್ತ್ಯಾನಿಂ ಸಾಂಗ್ಚ್ಯಾ ಪ್ರಮಾಣೆ ದೆಂವ್ಚಾರಾನ್ ಮನ್ಶಾಂಕ್ ಪಾಡ್ ಕರುಂಕ್ ತಾಚ್ಯಾ ಥಂಯ್ ಘಾಲ್ಚೊ ಅವ್ಗುಣ್ಂಗೀ ? ಹಾಂವ್ ನೆಣಾ… ಯಾ ಸ್ರಷ್ಟೆಚೆಂ ಮುಳಾವೆಂ ರಚನ್ಂಗೀ?….. ಹಾಂವ್ ಕಿತೆಂಚ್ಚ್ ಸಾಂಗೊಂಕ್ ಸಕಾನಾ…. ಪರಕ್ ಇತ್ಲೆಂಚ್ಚ್…. ಮನಿಸ್ ತ್ಯಾ ಗೂಣಾಚೆರ್ ಖಾಡುಂ ಘಾಲುಂಕ್ ಸಕ್ತಾ… ಮನ್ಜಾತ್ ನಂಯ್…. ಮನ್ಜಾತ್ ಆಪ್ಣಾಕ್ ಆಕರ್ಶಣ್ ಭಗ್‌ಲ್ಲ್ಯಾ ಲಾಗಿಂ ಕೆದ್ನಾಂಯ್ ವೆತಾ ಕಸೆಂಯ್ ವೆತಾ… ಸೈಂಭಿಕ್ ವೊಡ್ಣಿ ಸಂಪಂವ್ಚೊ ಮಾತ್ರ್ ಮನ್ಜಾತೆಚೊ ಉದ್ದೇಶ್… ಪುಣ್, ಮನ್ಶಾನ್ ಥೊಡ್ಯೊ ರೆಗ್ರೊ ಪಾಳುಂಕ್ ಆಸಾತ್… ತಾಕಾ ಸಮಾಜಿಕ್ ನೇಮಾಂಚಿ ಗಡ್ ಆಸಾ….ನಿಮಮಾಂಚಿ ನಿಯಂತ್ರಣ್ ಆಸಾ ನಿರ‍್ಬಂಧನ್ ಆಸಾ….. ತೆಂಚ್ಚ್ ಪರಕ್….. ಜೆದ್ನಾಂ, ಮನಿಸ್ ಆಪ್ಲಿ ಪ್ರಾಯ್, ಆಪ್ಣಾಚೆಂ ಸ್ಥಾನ್, ಗರ್ಜ್ ಸಮ್ಜನಾಸ್ತಾನಾ ಆಪ್ಣಾ ಥಂಯ್ ಆಸ್ಲ್ಲ್ಯಾ ಸೈಂಭಿಕ್ ಗೂಣಾಕ್ ಖಾಡುಂ ಘಾಲಿನಾಸ್ತಾನಾ ಸೊಡಿತ್ ತರ್, ತೆದ್ನಾಂ ತೊ ಪಡ್ತಾ…. ದೆವಾಚ್ಯಾ ನದ್ರೆಂತ್ ಪಡ್ತಾ….ಸಮಾಜೆಚ್ಯಾ ನದ್ರೆಂತ್ ಕುಸ್ಕಾತಾ….. ಆಪ್ಣಾಚ್ಯಾ ಅಂತಸ್ಕ್ರನಾಂತ್‌ಯ್ ಸಲ್ವಾತಾ….ಆನಿ ಆಪ್ಣಾಚ್ಯಾಚ್ಚ್ ನದ್ರೆಂತ್ ಪಡ್ತಾ…. ಆನಿ ಆಪ್ಣಾ ಥಂಯ್ ಆಸ್ಲ್ಲ್ಯಾ ಮನ್ಶಾಪಣಾಕ್ ಉಗ್ತ್ಯಾನ್ ವಿಕುನ್ ಮನ್ಜಾತ್ ಜಾತಾ….. ಹಾಂವ್, ಪಾದ್ರಿ ಜಾವ್ನ್ಂಯ್ ತ್ಯಾ ಸೈಂಭಿಕ್ ವಾದಾಳಾಂತ್ ಸಾಂಪಾಡ್ತಾಂ ಯಾ ಸಾಂಪಾಡ್ಲಾಂ…. ತೆಂ ಸಂಪೂರ್ರ್ಣ್ ಸಹಜ್ ಆನಿ ಸತ್…. ಪುಣ್, ತಾಂತು ಸಲ್ವೊನ್ ಪಡೊಂಕ್ ನಾ…..ಸಾಂಪ್ಡೊನ್ ಪಡೊಂಕ್ ನಾ…. ತ್ಯಾ ಸಂಘರ್ಷಾಚೆಂ ಸುಂಕಾಣ್ ಮ್ಹಜ್ಯಾಚ್ಚ್ ಹಾತಾಂತ್ ಆಸ್ಲ್ಲೆಂ ಆನಿ ಆಸಾ…. ತ್ಯಾ ವೊರ‍್ವಿಂ ತಕ್ಲಿ ಉಕಲ್ನ್ ತುಜ್ಯಾ ಲಾಗಿಂ ಉಲಂವ್ಚೆಂ ಧೈರ್‌ಯ್ ಮ್ಹಾಕಾ ಆಸಾ…. ಹ್ಯಾ ವೆಳಿಂ ತುಜೆಂ ಕಾಮ್ ಶಿಕ್ಚೆಂ….. ಹ್ಯಾ ಸೈಂಭಿಕ್ ಗೂಣಾಚ್ಯಾ ಪಿಡೆಂತ್ ತುಂ ಏಕ್ ಪಾವ್ಟಿಂ ಸಾಂಪಡ್ಲೊಯ್ ತರ್ ತುಜ್ಯಾ ಮತಿಂತ್ ಶಿಕಾಪ್ ವೆಚೆಂ ನಾ….. ಜಿವಿತಾಂತ್ ದಿಂವ್ಚ್ಯಾ ಪ್ರಾಮುಖ್ಯತೆಚೊ ವಿಸರ್ ಪಡ್ತಲೊ…. ತುಜಿಂ ಆವಯ್ ಬಾಪೊಯ್ ಭಾರಿಚ್ಚ್ ಕಷ್ಟಾಂನಿ ತುಕಾ ಶಿಕಯ್ತಾತ್…..ದೆಕುನ್, ಆತಾಂ ತುಂವೆ ಚಡ್ ತುಜ್ಯಾ ಶಿಕ್ಪಾಚೆರ್ ಧ್ಯಾನ್ ದವರಿಜಯ್….. ವೇಳ್ ಪಾಶಾರ್ ಜಾತಾನಾ, ಹ್ಯಾ ಚಿಂತ್ನಾಂ ವಿಶಿಂ ಕಿತೆಂ ಕರಿಜಯ್, ಹ್ಯಾ ಸೈಂಭಿಕ್ ಗೂಣ್ ಅವ್ಗುಣಾಕ್ ಕಸೆಂ ಸಾಂಬಾಳಿಜಯ್ ಮ್ಹಣ್ ತುಕಾ ತುಜೆಸ್ತಕಿಂ ಕಳೊನ್ ಯೆತೆಲೆಂ…. ಸಾರ‍್ಕ್ಯಾ ವೆಳಾರ್ ತ್ಯಾ ಸೈಂಭಿಕ್ ವೊಡ್ಣ್ಯಾಂಕ್ ಪೂರಕ್ ಜಾವ್ನ್ಂಯ್ ತುಂ ಜಿಯೆತಲೊಯ್…. ಕಸೆಂ ಮ್ಹಣ್ ಹಾಂವ್ ಸಾಂಗಾನಾ ಕಿತ್ಯಾಕ್ ಮನ್ಶಾಸ್ತಕಿ ತೆಂ ತುಕಾ
ಉಗ್ಡಾಪೆಂ ಜಾತೆಲೆಂ…. ಮನ್ಶಾ ಸಹಜ್ ಮನ್ಜಾತಿ ಗೂಣ್ ತುಕಾ ವಾಟ್ ದಾಕಯ್ತಲೊ….”
ಹಾಂವ್ ಆತಾಂ ಉಟ್ಲೊಂ ಆನಿಂ ಘರಾ ವಚೊಂಕ್ ಮೆಟಾಂ ಕಾಡ್ಲಿಂ. ಪಾದ್ರ್ಯಾಬಾನ್ ಮ್ಹಾಕಾ ರಾವಯ್ಲೆಂ ನಾ.
ಜೊನಾಥನ್, ಮ್ಹಜ್ಯಾ ದಫ್ತರಾಂತ್ ಮ್ಹಜ್ಯಾ ಮುಖಾರ್ ಉಬೊ ಆಸ್ಲ್ಲೊ.
ತಾಕಾ ಕಾಮಾತ್ಲೆಂ ಕಾಡಿಜಯ್ ಮ್ಹಣ್ ರಿಟಾನ್ ಸಾಂಗೊನ್ ಆಜಿಕ್ ದೋನ್ ದೀಸ್ ಜಾಲ್ಲೆ. ಜೊನಾಥನಾಕ್ ಕಾಮಾಕ್ ಹಾಜರ್ ಜಾಂವ್ಕ್ ರೀಟಾನ್ ಸೊಡುಂಕ್ ನಾತ್ಲ್ಲೆಂ ಆನಿ ತೊ ದಫ್ತರಾಕ್ ಯೇಂವ್ಕ್‌ಯ್ ನಾತ್ಲ್ಲೊ.
ರಿಟಾಚ್ಯಾ ಭಾಗೆವಂತ್ಪಣಾಚ್ಯಾ ಮತಿಂತ್ ಎಕ್‌ಚ್ಚ್ ಚಿಂತಾಪ್. ಜೊನಾಥನಾನ್ ಕೆಲ್ಲೆಂ ವೊರ‍್ತೆಂ ಆನಿ ಭುರ‍್ಶೆಂ ಪಾತಕ್. ತ್ಯಾ ಪಾತ್ಕಾಕ್ ಭಗ್ಸಾಣೆಂಚ್ಚ್ ನಾ. ಜೆಜುನ್ ಖುರ‍್ಸಾರ್ ಉಮ್ಕಾಳೊಂಕ್ ಅಸಲ್ಯಾಂಚಿ ಅಸಲಿಂ ವಿಶೇಸ್ ಪಾತ್ಕಾಂಚ್ಚ್ ಚಡ್ತಿಕ್ ಜಾವ್ನ್ ಕಾರಣ್ ಮ್ಹಣ್ ತಕ್ಲಿ ಬಡವ್ನ್ ತೆಂ ಉಚಾರ‍್ತಾಲೆಂ. ತಸಲ್ಯಾ ಭುರ‍್ಶ್ಯಾ ಸ್ವಭಾವಾಚ್ಯಾ ಮನ್ಶಾನ್ ಆಮ್ಚ್ಯಾ ಕಂಪ್ಣೆಂತ್ ಕಾಮಾಕ್ ಆಸ್ಚೆಂ ಸಮಾ ನಂಯ್ ಆನಿ ತಾಣೆಂ ಪಾಟಿಂ ಗಾವಾಕ್ ವಚಾಜಯ್‌ಚ್ಚ್ ತಾಚೆಂ ತಿರ‍್ಮಾನ್ ಜಾಲ್ಲೆಂ..
ಆಮ್ಚ್ಯಾ ಘರಾಂತ್ ಚಡಾವತ್ ದಫ್ತರಾಂತ್ ಕಿತೆಂಯ್ ಜಾಂವ್ಚ್ಯಾ ವಿಶಿಂ ಆಮಿಂ ಉಲಯ್‌ನಾತ್‌ಲ್ಲ್ಯಾಂವ್ ಪುಣ್, ಜೊನಾಥನಾಚೆಂ ಘಡಿತ್ ಜಾಲ್ಯಾ ಉಪ್ರಾಂತ್ ಹಾಂವ್ ಆನಿ ರೀಟಾ ಜಾಯ್ತೆಂ ಝಗಡ್‌ಲ್ಲ್ಯಾಂವ್…. ಉಪ್ರಾಂತ್ ಆಮಿಂ ಎಕಾಮೆಕಾ ಉಲವ್ಚೆಂಯ್ ಸೊಡ್‌ಲ್ಲೆಂ…. ಕಾರಣ್ ಇತ್ಲೆಂಚ್ಚ್….. ರೀಟಾನ್ ಮ್ಹಣ್ಚೆಂ – ಜೊನಾಥನಾನ್ ದಫ್ತರಾಂತ್ ಬಸೊನ್ ತಸಲಿಂ ಪಿಂತುರಾಂ ಪಳವ್ನ್ ಭಾರಿಚ್ಚ್ ಗಂಭೀರ್ ರಿತಿಚೊ ಅಪ್ರಾಧ್ ಕೆಲಾ ಮ್ಹಣ್ ತರ್ ಹಾಂವೆಂ ಮ್ಹಣ್ಚೆಂ ತರ‍್ನಾಟ್ಯಾನಿಂ ತಸೆಂ ಕರ್ಚೆಂ ಭಾರಿಚ್ಚ್ ಸ್ವಾಭಾವಿಕ್ ಮ್ಹಣ್…. ತಿ ಏಕ್ ಚೂಕ್ ಜಾಂವ್ಕ್ ಪುರೊ ಪುಣ್ ಗುನ್ಯಾಂವ್ ನಂಯ್…. ಮ್ಹಜ್ಯಾ ತರ‍್ಕಾಕ್ ಪೂರಕ್ ಜಾವ್ನ್ ಕಿತೆಂಚ್ಚ್ ಸಾಂಗೊಂಕ್ ಹಾಂವೆಂ ಪ್ರೇತನ್ ಕೆಲೆಂನಾ….. ತೆಂಯ್ ರೀಟಾ ಹುಜಿರ್ ಕಿತೆಂಚ್ಚ್ ಉಲಂವ್ಚಿ ತಾಂಕ್‌ಯ್ ಮ್ಹಾಕಾ ನಾತ್ಲ್ಲಿ.
” ತುಂ ಕಸೆಂಯ್ ಮಾಗ್ಣ್ಯಾ ರಜಾರಾಕ್ ವಚಾನಾಂಯ್…. ಸಾಂಜೆಚೊ ಆಮೊರಿ ತೇರ್ಸ್ ತುಕಾ ನಾಕಾಚ್ಚ್….. ದೇವ್ ತುಕಾ ಪಯ್ಸ್…. ಆನಿ ದೆಂವ್ಚಾರಾಂಚೊ ಸಾಂಗಾತ್ ತುಕಾ ಜಾಯ್…. ತುಂಯ್ ತಾಚ್ಯಾ ಬರಿಚ್ಚ್ ಭುರ‍್ಶೊ ಮನಿಸ್ ಆಸ್ತಲೊ…..” ತಾಚಿಂ ಆಖ್ರೇಚಿಂ ಉತ್ರಾಂ.
ದೆವಾಕ್ ಭಾರಿಚ್ಚ್ ಲಾಗ್ಸಿಲ್ಯಾನ್ ಪಾಟ್ಲಾವ್ ಕರ್ಚೆಂ ರೀಟಾ ಹ್ಯಾ ಘಡಿತಾಂ ಉಪ್ರಾಂತ್ ಮ್ಹಜ್ಯಾ ಥಾವ್ನ್ ಚಿಕ್ಕೆ ಪಯ್ಸ್ ಗೆಲ್ಲೆಂ….
ಆನಿಂ ಆತಾಂ ಹ್ಯಾ ಘಡ್ಯೆ, ಮ್ಹಜ್ಯಾ ಮುಖಾರ್ ಜೊನಾಥನ್ ಉಬೊ ಆಸ್ಲ್ಲೊ.
“ಸರ್ …. ಹಾಂವೆಂ ಚೂಕ್ ಕೆಲ್ಯಾ….????” ಥೊಡ್ಯಾ ವೆಳಾಚ್ಯಾ ಮೌನ್‌ಪಣಾ ಉಪ್ರಾಂತ್ ದುಬಾವ್ ಆಸ್ಲ್ಲ್ಯಾ ಮತಿಂತ್ ಕಾಂಪ್ಯೆರ‍್ಯಾ ತಾಳ್ಯಾನ್ ಜೊನಾಥನ್ ಉಲಯ್ಲೊ. ತೊ ಚಿಂತುನ್ಂಚ್ಚ್ ಆಯಿಲ್ಲೊ ಆಸ್ತಲೊ, ತಾಕಾ ಪಾಟಿಂ ಗಾವಾಕ್ ವಚೊಂಕ್‌ಚ್ಚ್ ಮ್ಹಣ್. ” ಹಾಂವ್ ನೆಣಾ….. ಹಾಂವೆಂ ಉಲಂವ್ಚೆಂ ಸಾರ್ಕೆಂ ವ್ಹಯ್ ವ ನಂಯ್ ಮ್ಹಣ್….. ಹಾಂವೆ ಕೆಲ್ಲೆಂ ಚೂಕ್ ಜಾಂವ್ಕ್ ಪುರೊ ಪುಣ್ ಗುನ್ಯಾಂವ್ ನಂಯ್….. ಹ್ಯಾ ಕಾಳಾರ್ ಹರ‍್ಯೆಕ್ ತರ್ನಾಟೊ ತಸೆಂ ಕರ್ತಾ….. ಆನಿ ತೆಂ ಸೈಂಭಿಕ್ ಚಿಂತ್ಪಾಚಿ ಸ್ವಾಭಾವಿಕ್ ಕರ‍್ನಿ ಮ್ಹಣ್ ಹಾಂವೆ ಚಿಂತ್ಚೆಂ….”
ಹಾಂವೆ ಲಾಂಬ್ ಉಸ್ವಾಸ್ ಸೊಡ್ಲೊ. “ಹರ‍್ಯೇಕಾ ಮನ್ಶಾ ಥಂಯ್ ಆಸ್ಚೊ ಸೈಂಭಿಕ್ ಗೂಣ್; ಮನ್ಶಾ ವೊಡ್ಣಿ; ತಾಕಾ ಸಂಬಂಧಿತ್ ಹರ್ಯೇಕ್ ಕರ‍್ನಿ ಸ್ವಾಭಾವಿಕ್…. ಪುಣ್, ಖಂಚ್ಯಾ ವೆಳಾರ್ ತೆಂ ಆಧಾರಿಜಯ್ ಮ್ಹಣ್ ಮಾತ್ರ್ ಆಮಿಂ ನಿರ್ಧಾರ್ ಘೆಜಯ್… ” ಹಾಂವೆ ಮ್ಹಳೆಂ. ಆನಿಕ್ಯ್ ಉಲಂವ್ಕ್ ಮ್ಹಜ್ಯಾ ಲಾಗಿಂ ಜಾಯ್ತೆಂ ಆಸ್ಲ್ಲೆಂ….
ಚೂಕ್.. ಅಪ್ರಾಧ್….. ಭಾಗೆವಂತ್ಪಣ್….. ಪಾತಕ್… ಆನಿ ಸ್ವಾಭಾವಿಕ್ ಚಿಂತ್ಪಾ ಕರ‍್ನಿ…. ಆನಿ ಸೈಂಭಿಕ್ ವೊಡ್ಣಿ ಹಾಂಚ್ಯಾ ಸರ‍್ವಾ ಮಧೆಂ ತಫಾವತ್ ಸೊಧುನ್ ಕಾಡುಂಕ್ ಹಾಂವ್ ಸಕಾನಾತ್‌ಲ್ಲೊಂ…. ಮನ್ಶಾ ಥಂಯ್ ಆಸ್ಲ್ಲ್ಯಾ ಸೈಂಭಿಕ್ ಗೂಣಾಚ್ಯಾ ಸಂಘರ್ಷಾಂತ್ ಸಾಂಪಾಡ್‌ಲ್ಲೊಂ ಮನಿಸ್ ಹಾಂವ್…. ಹ್ಯಾಚ್ಚ್ ಸಂಘರ್ಷಾಂತ್ ಪಡೊನ್ ಉಟೊನ್ ಆಯಿಲ್ಲೊಂ ಮನಿಸ್ ಹಾಂವ್….. ಆತಾಂಯ್, ಹ್ಯಾ ಪ್ರಾಯೆರ್‌ಯ್ ಥೊಡ್ಯಾ ಪಾವ್ಟಿಂ ಅಸಲ್ಯಾ ಸಂಘರ್ಷಾಂತ್ ಸಲ್ವೊನ್ ಪಡ್ತಾಂ ಮ್ಹಣ್ ಮ್ಹಾಕಾ ಆನಿ ಮ್ಹಜ್ಯಾ ಅಂತಸ್ಕರ‍್ನಾಕ್ ಮಾತ್ರ್ ಕಳಿತ್…
“ಜೊನಾಥನ್…. ಮನ್ಶಾ ರಗ್ತಾಂತ್ ಆಸ್ಚ್ಯಾ ಸೈಂಭಿಕ್ ವೊಡ್ಣ್ಯಾಂಕ್ ಕೆದ್ನಾಂ ಉಜೊ ಪೆಟ್ತಾ ತೆಂ ಆಮ್ಕಾಂಚ್ಚ್ ಕಳಾನಾ…. ಸೈಂಭಿಕ್ ವೊಡ್ಣಿ ಮನ್ಶಾಂ ಥಂಯ್ ಆನಿಂ ಮನ್ಜಾತಿ ಥಂಯ್ ಆಸಾಚ್ಚ್….. ಪುಣ್, ಮನ್ಶಾಕ್ ತ್ಯಾ ವೊಡ್ಣೆಂ ಥಂಯ್ ಖಾಡುಂ ಘಾಲುಂಕ್ ಜಾತಾ ಜಾಲ್ಲ್ಯಾನ್ ತ್ಯಾ ವಿಶಿಂ ಜಾಗ್ರುತ್ಕಾಯೆನ್ ವಿಂಚವ್ಣ್ ಕರಿಜಯ್ ಪಡ್ತಾ…. “
ಕಿತ್ಲೆಶ್ಯಾ ವೊರ‍್ಸಾಂ ಪಯ್ಲೆಂ ಕಾಜಿತೊರಾನ್ ಮ್ಹಾಕಾ ದಿಲ್ಲಿ ಶಿಕವ್ಣ್, ಹಾಂವೆ ಜೊನಾಥನಾಕ್ ದಿಲಿ.
ತಾಕಾ ಅರ‍್ತ್ ಜಾಲೆಂ ಮ್ಹಣ್ ಹಾಂವೆ ಚಿಂತ್ಲೆಂ
” ಆನಿ ದಫ್ತರಾಂತ್ ತುಂವೆಂ ತಸೆಂ ಕೆಲ್ಲೆಂ, ಆಮ್ಚ್ಯಾ ದಫ್ತರಾಂಚ್ಯಾ ರೆಗ್ರಾಂಕ್ ವಿರೋಧ್…. ಆನಿ ಮುಕಾರ್ ತುಂವೆಂ ದಫ್ತರಾಂತ್ ತಸೆಂ ಕರುಂಕ್ ನಜೊ …..” ಹಾಂವ್ ಉಲವ್ನ್ಂಚ್ಚ್ ಗೆಲೊಂ
ಜೊನಾಥನ್ ಮ್ಹಾಕಾಚ್ಚ್ ಪಳಯ್ತಾಲೊ….
” ಆನಿ ಆಖ್ರೇಕ್ ಹಾಂವ್ ತುಕಾ ಕಾಮಾಂತ್ಲೆಂ ಕಾಡಿನಾ….. ಬಗಾರ್ ಹ್ಯಾ ದಫ್ತರಾಂತ್ ನಂಯ್ ಆಮ್ಚ್ಯಾ ’ಪ್ರೊಜೆಕ್ಟ್ ಸಾಯ್ಟಾರ್’ ತುಕಾ ’ಪ್ರೊಜೆಕ್ಟ್ ಇಂಜಿನಿಯರ್’ ಜಾವ್ನ್ ನೇಮಕ್ ಕರ್ತಾಂ… ತುಂವೆಂ ಥಂಯ್ಸರ್ ಕಾಮ್ ಕರ‍್ಚ್ಯಾಕ್ ದಾಡ್ತಾಂ….”
ಜೊನಾಥನಾಚ್ಯಾ ದೊಳ್ಯಾಂನಿ ದುಖಾಂ ಭರ‍್ಲಿಂ…. ಮ್ಹಜ್ಯಾ ಉತ್ರಾಂಕ್ ತೊ ಪಾತ್ಯೆಲೊನಾ ಜಾಯ್ಜಯ್….
ಆನಿ ತೆದ್ನಾಂಚ್ಚ್ ರೀಟಾ ಮ್ಹಜ್ಯಾ ದಫ್ತರಾಕ್ ಭಿತರ್ ರಿಗ್ಲೆಂ….
ತೆಂ ಆಯಿಲ್ಲೆಂಚ್ಚ್ ಹಾಂವೆ ಮ್ಹಳೆಂ – “ಆಜ್ ಇಗರ‍್ಜೆಕ್ ವಚೊನ್, ತುಜೆಂ ಪಾತಕ್ ರಡಾಜಯ್…. ಸುಟಾವೆಂ ಕುಮ್ಸಾರ್ ಜಾಯ್ಜಯ್ ಆನಿ ಭಕ್ತಿಪಣಿ ಕುಮ್ಗಾರ್ ಕಾಣ್ಘೆಜಯ್….. ತುಜಿ ಜೀಣ್ ಬದ್ಲಿಜಯ್……ಖರೊ ಕ್ರಿಸ್ತಾಂವ್ ಜಾವ್ನ್ ಜಿಯೆಜಯ್…..”
ರಿಟಾನ್ ಮ್ಹಜಿಂ ಉತ್ರಾಂ ಆಯ್ಕಾಲಿಂ.
ತ್ಯಾ ಉಪ್ರಾಂತ್, ಜೊನಾಥನಾಕ್ ಕಾಮಾಕ್ ದವರ್ಚೊ ಮ್ಹಜೊ ನಿರ್ಧಾರ್ ರಿಟಾಕ್ ಸಾಂಗ್ತಾನಾ ಕೂಡಾ ಭಿತರ್ ಮಾತ್ರ್ ಘಡ್ಘಡೊ ಪುಟ್ಲೊ …….
ಜೊನಾಥನಾಕ್ ಕೂಡಾಂತ್ಲೆಂ ಭಾಯ್ರ್ ವಚೊಂಕ್ ಹಾಂವೆ ಹಾತ್ ಭಾಸ್ ಕರ್ನ್ ಸಾಂಗ್ಲೆಂ…
► ಕ್ಲೆರೆನ್ಸ್ ಕೈಕಂಬ
]]>
“ಏಕ್ ಬರೊ ಮನಿಸ್ ಮೆಲೊ.” – ಹ್ಯಾ ಪರಿಂ ಗಾವಾರ್ ಲೋಕ್ ಉಲಯ್ಲೊ.
“ಘೊವ್ ಬಾಯ್ಲೆಕ್ ಆನಿ ಬಾಪೊಯ್ ಭುರ‍್ಗ್ಯಾಂಕ್ ನಾ ಜಾಲೊ. ಕುಟಾಮ್ ಕಷ್ಟಾರ್ ಪಡ್ಲೆಂ… ಭಾರಿಚ್ಚ್ ದುಖಾಚಿ ಗಜಾಲ್…” ಲಾಗ್ಸಿಲಿಂ ತಶೆಂ ಕುಟ್ಮಾಚಿಂ ಮ್ಹಣಾಲಿಂ.
“ಮೆಲ್ಲೊ ತೊ ಗೆಲೊ ಆನಿ ಸಾಸ್ಣಾಚೊ ವಿಶೆವ್ ತಾಕಾ ಮೆಳ್ತಲೊ… ಹಾಂಗಾಸರ್ ಆಸ್ಲ್ಲ್ಯಾ ಬಾಯ್ಲೆಚೆ ಆನಿ ಭುರ‍್ಗ್ಯಾಂಚೆ ಕಷ್ಟ್ ಜಾಲೆ… ಪುಣ್, ಬರ್ಯಾ ಕಂಪ್ಣೆಂತ್ ಬರ್ಯಾ ಕಾಮಾರ್ ಆಸ್ಲ್ಲ್ಯಾನ್ ಬರೆಂಚ್ಚ್ ಪುಂಜವ್ನ್ ದವರ‍್ಲಾಂಯ್ ಆಸ್ತೆಲೆಂ… ಬಾಯ್ಲೆ ಭುರ‍್ಗ್ಯಾಂಕ್ ಜೆಂವ್ಕ್ ಖಾಂವ್ಕ್ ಉಣೆಂ ಜಾಂವ್ಚೆಂ ನಾ……” ಗಾಂವಾರ್ ಹೆರ್ ಥೊಡೆ ಮ್ಹಣಾಲೆ…
ಗಾಂವ್ ಯಾ ಲೋಕ್ ಕಿತೆಂ ಉಲಯ್ಲ್ಯಾರ‍್‍ಯ್ ರಾಫಾಯೆಲಾಚೆಂ ಆಚಾನಕ್ ಮರಣ್ ಮಾತ್ರ್ ಇಜಾಬೆಲಾಕ್ ಕಳ್ವಳ್ಯಾಂಚೆಂ ಶಿಂವೊರ್ ಹಾಡುಂಕ್ ಸಕ್‍ಲ್ಲೆಂ… ದೊಗಾಂ ಭುರ‍್ಗ್ಯಾಂಕ್ ಕಾಣ್ಘೆವ್ನ್, ಅನಾಥ್ ಜಾವ್ನ್, ಎಕ್ಸುರೆಂಚ್ ಜಾವ್ನ್ ಕಿತೆಂ ಕರ್ಚೆಂ ಕೊಣ್ಣಾ ಮ್ಹಳ್ಳ್ಯಾ ಸ್ತಿತೆರ್ ತೆಂ ಆಸ್ಲ್ಲೆಂ.
ರಾಫಾಯೆಲ್ ಆನಿ ಇಜಾಬೆಲಾಚೆಂ ಕಾಜಾರ್ ಜಾವ್ನ್ ಸುಮಾರ್ ಪಂದ್ರಾ ವರ್ಸಾಂ ಜಾಲ್ಲಿಂ. ದೊಗಾಂ ಭುರ್ಗಿಂ ತಾಂಕಾ ದೆವಾನ್ ಫಾವೊ ಕೆಲ್ಲಿಂ ಆನಿಂ ತಿಂ ದೊಗಾಂಯ್ ಇಸ್ಕೊಲಾಂತ್ ಶಿಕೊನ್ ಆಸ್ಲ್ಲಿಂ.
ಮೊಗಾರ್ ಪಡೊನ್ ತಿಂ ಕಾಜಾರ್ ಜಾಲ್ಲಿಂ. ಆತಾಂ ರಾಫಾಯೆಲ್ ಬರ‍್ಯಾಚ್ಚ್ ಏಕಾ ಕಂಪ್ಣೆಂತ್ ಬರ್ಯಾ ಹುದ್ದ್ಯಾರ್ ಮ್ಹಳ್ಯಾರ್ ಮಾರ‍್ಕೆಟಿಂಗ್ ಮೆನೆಜರ್ ಜಾವ್ನ್ ಕಾಮ್ ಕರ‍್ತಾಲೊ. ಇಜಾಬೆಲಾ ಕಾಮಾಕ್ ವಚಾನಾಸ್ತಾನಾ ಘರಾಚ್ಚ್ ಭುರ‍್ಗ್ಯಾಂಚಿ ಜತನ್ ಘೆತಾಲೆಂ. ಘರ್, ಭುರ‍್ಗ್ಯಾಂಕ್ ಆನಿ ರಾಫಾಯೆಲಾಕ್ ಬರ್ಯಾ ಥರಾನ್ ಸಾಂಬಾಳ್ತಾಲೆಂ.
ರಾಫಾಯೆಲ್ ತರ್ಯ್ ಇಜಾಬೆಲ್ ಆನಿ ಭುರ್ಗಿಂ ಮ್ಹಳ್ಯಾರ್ ಜಿವಾಕ್ ಜೀವ್ ದಿತಾಲೊ. ವ್ಹರ‍್ತೊ ಮೋಗ್ ಕರ‍್ತಾಲೊ. ಭುರ‍್ಗ್ಯಾಂಕ್ ತಸೆಂ ಇಜಾಬೆಲಾಕ್ ಜಾಯ್ ಜಾಲ್ಲೆಂ ಹರ್ಯೇಕ್ ತೊ ಹಾಡುನ್ ದಿತಾಲೊ. ಭುರ‍್ಗ್ಯಾಂಕ್ ಇಸ್ಕಾಲಾಚೆಂ ಫೀಜ್ ಆನಿ ದಿಸ್ಪಡ್ತೊ ಗ್ರಾಸ್ ಮ್ಹಣ್ ಖರ್ಚ್ ಆಸ್ಲ್ಲ್ಯಾನ್ ಪಯ್ಶೆ ಜಮಂವ್ಕ್ ಜಾಯ್ನಾತ್ಲ್ಲೆಂ ತರ್ಯ್ ಕುಟ್ಮಾ ಜಿವಿತಾಂತ್ ಸರ್ವ್ ಬರ್ಯಾ ಥರಾನ್ ವೆತಾಲೆಂ.
ಆಜ್ ದೊನ್ಪಾರಾಂಚ್ಯಾ ವೆಳಾರ್ ರಾಫಾಯೆಲ್ ಕಾಮ್ ಕರ್ಚ್ಯಾ ದಪ್ತರಾ ಥಾವ್ನ್ ಆಚಾನಕ್ ಪೊನಾರ್ ಇಜಾಬೆಲಾಕ್ ಖಬರ್ ಆಯಿಲ್ಲಿ. ರಾಫಾಯೆಲಾಚ್ಯಾ ಕಾರಾಚೆಂ ಆವ್ಘಡ್ ಜಾಲ್ಲೆಂ ಮ್ಹಣ್ ಕಳಯಿಲ್ಲೆಂ. ಫಲಾಣ್ಯಾ ಆಸ್ಪತ್ರೆಕ್ ತಾಕಾ ಹಾಡ್ತೆಲೆ ಮ್ಹಣ್ಂಯ್ ಕಳಯಿಲ್ಲೆಂ. ಘರಾ ಥಾವ್ನ್ ಭಾಯ್ರ್ ಸರ‍್ಚ್ಯಾ ಪಯ್ಲೆಂ ಇಸ್ಕೊಲಾ ಥಾವ್ನ್ ಭುರ‍್ಗ್ಯಾಂಕ್ ಹಾಡುಂಕ್ ಸೆಜಾರ‍್ಯಾಂಕ್ ಸಾಂಗೊನ್, ಮಾರ್ಗಾರ್ ಮೆಳ್‍ಲ್ಲಿ ರಿಕ್ಷಾ ಧರುನ್ ತೆಂ ಆಸ್ಪತ್ರೆಕ್ ಪಾವ್ಲ್ಲೆಂ. ಆಸ್ಪತ್ರೆಚ್ಯಾ ಗೆಟಿಲಾಗಿಂ ಪಾವ್ತಾನಾಂಚ್ಚ್ ರಾಫಾಯೆಲಾಚ್ಯಾ ದಪ್ತರಾಂತ್ ಕಾಮ್ ಕರ್ಚೊ ರಂಗನಾಥ್ ಮೆಳ್ಲ್ಲೊ. ರಂಗನಾಥ್ ಕಾಂಯ್ ಇಜಾಬೆಲಾಚ್ಯಾ ಯೆಣ್ಯಾಕ್‍ಚ್ಚ್ ಗೆಟಿಲಾಗಿಂ ರಾಕೊನ್ ರಾವ್‍ಲ್ಲೊ ಕೊಣ್ಣಾ…ತಾಣೆಂ ರಾಫಾಯೆಲಾಚ್ಯಾ ಮೊರ್ನಾಚಿ ಖಬರ್ ಇಜಾಬೆಲಾಕ್ ದಿಲ್ಲಿ.
ಯೆದೊಳ್ಚ್ಚ್ ರಡೊನ್ ಆಸ್ಲ್ಲೆಂ ಆತಾಂ ಕಳ್ವಳೊನ್ ರಡ್‍ಲ್ಲೆಂ. ಮೊಳಾಬ್ ಕೊಸ್ಳೊನ್ ಪಾವ್ಸಾಚಿ ಧಾರ್ ವೊತೊನ್ ಜಿವಿತಾಚೆಂ ನಿಸ್ಸಂತಾನ್ ಜಾಲ್ಲ್ಯಾ ಬರಿ ತೆಂ ಕಂಗಾಲ್ ಜಾಲೆಂ.
“ಸರ್ ಆವ್ಘಡ್ ಜಾಲ್ಲ್ಯಾ ಜಾಗ್ಯಾರ್‌‍ಚ್ಚ್ ಮೆಲೊ… ಭಾರಿಚ್ಚ್ ಬಿರಾಂಕೂಳ್ ಖಾಸ್ತಾಚೆಂ ಆವ್ಘಡ್ ತೆಂ… ಪುಣ್, ಆವ್ಘಡ್ ಜಾತಾನಾ ಸರ್ ಏಕ್ಲೊಚ್ಚ್ ನಾತ್ಲ್ಲೊ ಬಗರ್ ಮೆಡಮ್…” ರಂಗನಾಥ್ ಮುಕಾರ‍್ಸುನ್ ಉಲಯ್ಲೊ. “ತಾಚೆಂ ಸೆಕ್ರೆಟರಿ ಸಿಲ್ವಿಯಾ ತಾಚ್ಯಾ ಸಾಂಗಾತಾಂತ್ ಆಸ್ಲ್ಲೆಂ. ಸಿಲ್ವಿಯಾಕ್ ಕಟೀಣ್ ಮಾರ್ ಜಾವ್ನ್ ತೆಂಯ್ ಮೆಲಾಂ… “
ಕಾಮಾಕ್ ಲಾಗೊನ್ ಆನ್ಯೇಕಾ ಶ್ಹೆರಾಕ್ ವೆತಾಂ ಮ್ಹಣ್ ರಾಫಾಯೆಲಾನ್ ಸಾಂಗ್ಲ್ಲೆಂ ತೆಂ ಇಜಾಬೆಲಾಕ್ ಕಳಿತ್. ತಾಚ್ಯಾ ಸಾಂಗಾತಾ ಸಿಲ್ವಿಯಾಯ್ ವೆತಾ ಮ್ಹಣ್ ತಾಣೆಂ ಕಳಯಿಲ್ಲೆಂ ನಾ. ಜಾಲ್ಲ್ಯಾ ಆಕಾಂತಾಂಚ್ಯಾ ಸನ್ನಿವೇಶಾಂತ್ ಸಿಲ್ವಿಯಾ ವಿಶ್ಯಾಂತ್ ಚಿಂತ್ಚೆಂ ತಿತ್ಲೆಂ ಸ್ತಿಮಿತ್ ತಾಚ್ಯಾ ಥಂಯ್ ಉದೆಲೆಂ ನಾ. ಕಳ್ವಳೊನ್ ರಡೊನ್‍ಂಚ್ಚ್ ತೆಂ ಮುಕಾರ‍್ಸುನ್ ಚಲೊನ್ ಗೆಲೆಂ.
ಪುಣ್ ರಂಗನಾಥ್ ವೊಗೊಚ್ಚ್ ರಾವ್ಲೊ ನಾ. ಇಜಾಬೆಲಾಚ್ಯಾ ಸಾಂಗಾತಾಂತ್ ಚಲೊನ್ ಗೆಲೊ. ಅಸಲ್ಯಾ ಕಟಿಣಾಯೆಚ್ಯಾ ಪರಿಸ್ಥಿತೆಂಯ್‍ಯ್ ತೊ ಸದಾಂಚ್ಯಾ ಸವಯೆ ಪ್ರಮಾಣೆಂ ಉಲಯ್ಲೊಚ್ಚ್. ” ಮ್ಹಜ್ಯಾ ಉತ್ರಾಂಚೊ ಪಾಡ್ ಅರ್ಥ್ ಕರಿನಾಕಾ ಮೆಡಮ್… ಸರ್ ಆನಿ ತೆಂ ಸೆಕ್ರೆಟರಿ ಸಿಲ್ವಿಯಾ ಕೆದ್ನಾಂಯ್ ಸಾಂಗಾತಾಚ್ ಭಾಯ್ರ್ ವೆತಾಲಿಂ… ಭಂವ್ತಾಲಿಂ… ಭಾರಿಚ್ಚ್ ಪಾಡ್ ಜಾವ್ನ್ ಜಿಯೆತಾಲಿಂ ತೆಂ ಹಾಂವ್‍ಂಯ್ ಜಾಣಾ… ದೆವಾಕ್‍ಯ್ ಹೆಂ ಬರೆಂ ದಿಸೊಂಕ್ ನಾ ಆಸ್ತೆಲೆಂ ಆನಿ ದೊಗಾಂಯ್ಕಿ ಕಶಿ ಶಿಕ್ಶಾ ದಿಲಿ ಪಳೆ…ತುಂ ಮಾತ್ರ್ ಮ್ಹಜ್ಯಾ ಉತ್ರಾಂಚೊ ಪಾಡ್ ಅರ್ಥ್ ಕರಿನಾಕಾ ಮೆಡಮ್…”
ಇಜಾಬೆಲಾ ಏಕ್ ಪಾವ್ಟಿಂ ಉಬೆ ರಾವ್ಲೆಂ ಆನಿ ರಂಗನಾಥಚ್ಯಾ ತೊಂಡಾಕ್ ಪಳೈಲಾಗ್ಲೆಂ… ದೂಕ್ ಆನಿ ರಡ್ಣ್ಯಾಂ ಮಧೆಂಯ್ ರಂಗನಾಥಾಚ್ಯಾ ಅರ್ಥ್ ನಾತ್ಲ್ಲ್ಯಾ ಉಲವ್ಣ್ಯಾಚೆರ್ ತಾಚೆಂ ಧ್ಯಾನ್ ಖಂಡಿತ್ ಜಾವ್ನ್ ಗೆಲೆಂ. ಇಜಾಬೆಲಾಚ್ಯಾ ಮತಿಂತ್ ಬದ್ಲಾವಣ್ ಜಾಲಿ ನಾ ತರ್ಯ್ ಕಾಳ್ಜಾಕ್ ಹಾಳ್ವಾಯೆಚಿ ಕಾತರ್ ಪಡ್‍ಲ್ಲ್ಯಾ ಬರಿ ಜಾಲೆಂ.
” ಮ್ಹಾಕಾ ಕಾಮಾಕ್ ವಚಾಜಯ್ ರಾಫಾಯೆಲ್. ಆಮ್ಚೆಂ ಕುಟಾಮ್ ಆನಿ ಮುಕಾರ್ ವಾಡೊನ್ ವೆತೆಲೆಂ. ಆಮ್ಕಾಂ ಭುರ್ಗಿಂ ಜಾತೆಲಿಂ. ಖರ್ಚ್ ಚಡ್ತಲೊ ಆನಿ ಆಮ್ಚ್ಯಾ ಕುಟ್ಮಾಕ್ ಬರ್ಯಾ ಥರಾನ್ ಸಾಂಬಾಳಿಜಾಯ್ ತರ್ ಆಮ್ಕಾಂ ಚಡ್ ಪಯ್ಶೆ ಜಾಯ್ ಪಡ್ತೆಲೆಚ್ಚ್… ಹಾಂವೆ ಕಾಮ್ ಕೆಲ್ಯಾರ‍್‍ಚ್ಚ್ ಬರೆಂ… ತ್ಯಾ ಶಿವಾಯ್ ಹಾಂವ್ ಶಿಕ್ಲ್ಯಾಂ. ಹ್ಯಾ ಶ್ಹೆರಾಂತ್ ಮ್ಹಾಕಾ ಬರೆಂಚ್ಚ್ ಕಾಮ್ ಮೆಳೊಂಕ್ಯ್ ಆಸಾ… ” ಕಾಜಾರ್ ಜಾವ್ನ್ ದೋನ್ ಮ್ಹಹಿನ್ಯಾಂನಿಂಚ್ಚ್ ಇಜಾಬೆಲಾನ್ ರಾಫಾಯೆಲಾಲಾಗಿಂ ಸಾಂಗ್ಲ್ಲೆಂ ತರ್ ತಾಣೆಂ ಕಾಂಯ್ ಕಾನ್ ಹಾಲಯಿಲ್ಲೆ ನಾಂತ್.
ಇಜಾಬೆಲಾನ್ ಜಾಯ್ತ್ಯಾ ಪಾವ್ಟಿಂ ವಿಚಾರ್ಲ್ಲೆಂ. ಇಜಾಬೆಲಾನ್ ಪರ್ತುನ್ ಪರ್ತುನ್ ವಿಚಾರ್ಲ್ಲ್ಯಾ ವೆಳಿಂ, ರಾಫಾಯೆಲಾನ್ ಖಡಾಕಡ್ ಸಾಂಗ್ಲ್ಲೆಂ – “ನಾ ಬೆಲಾ ತುಂವೆಂ ಕಾಮ್ ಕರ್ನ್ ಆಮ್ಚ್ಯಾ ಕುಟ್ಮಾಕ್ ಪೊಸ್ಚೆಂ ನಾಕಾ… ಹಾಂವ್ ಜಿವಂತ್ ಆಸಾಂ ನಂಯ್… ತ್ಯಾ ಶಿವಾಯ್ ಮ್ಹಾಕಾ ಬರೆಂ ಕಾಮ್ ಆಸಾ… ಯೆಂವ್ಚ್ಯಾ ವರ್ಸಾಂನಿ ಮ್ಹಾಕಾ ಭಡ್ತಿ ಮೆಳ್ತೆಲಿ… ಸಾಂಬಾಳ್ಯ್ ವಾಡ್ತಲೊ… ಆನಿ ತ್ಯಾ ವರ್ವಿಂ ಆಮ್ಚ್ಯಾ ಕುಟ್ಮಾಕ್ ಪೊಸುಂಕ್ ಕಾಂಯ್ ಕಷ್ಟ್ ಜಾಂವ್ಚೆ ನಾಂತ್. ಜೆದ್ನಾಂ ಮ್ಹಜ್ಯಾ ಏಕ್ಲ್ಯಾಚ್ಯಾ ಸಾಂಬಾಳಾ ವರ್ವಿಂ ಆಮ್ಚ್ಯಾ ಕುಟ್ಮಾಕ್ ಪೊಸುಂಕ್ ಸಾಧ್ಯ್‌ಚ್ ಜಾಯ್ನಾ ತೆದ್ನಾಂ ಪಳಂವ್ಯಾಂ….”
ರಾಫಾಯೆಲಾಚೆಂ ರಾಜಾಂವ್ ತಾಕಾ ಪಸಂಧ್ ಜಾಲ್ಲೆಂ ನಾ ತರ್ಯ್ ತ್ಯಾ ವೆಳಾಕ್ ವೊಗೆಚ್ಚ್ ರಾವ್‍ಲ್ಲೆಂ. ಪಯ್ಲ್ಯಾ ಬಾಳ್ಶ್ಯಾಕ್ ಬಾಳಾಂತ್ ಜಾತಾನಾ ಉಪ್ರಾಂತ್ ದುಸ್ರ್ಯಾಕ್ ಮ್ಹಣೊನ್ ಇಜಾಬೆಲಾಚೆಂ ಚಿಂತಾಪ್ ಕಾಮ್ ಕರ್ಚ್ಯಾ ವಿಶ್ಯಾಂತ್ ಥಾವ್ನ್ ಪಯ್ಸ್ ಗೆಲೆಂ.
ದೊಗಾಂ ಭುರ್ಗಿಂ ಇಸ್ಕಾಲಾಕ್ ವಚೊಂಕ್ ಸುರು ಜಾವ್ನ್ ಘರಾಂತ್ ಕೆದಾಳಾ ಕೆದಾಳಾ ಪಯ್ಶಾಂಚಿ ಅಡ್ಚಣ್ ಯೆತಾನಾ ತಾಣೆಂ ಪರತ್ ರಾಫಾಯೆಲಾ ಲಾಗಿಂ ಮಂತ್ರಾಂ ಘಾಲುಂಕ್ ಸುರು ಕೆಲ್ಲಿಂ. ಭುರ‍್ಗ್ಯಾಂ ಖಾತಿರ್ ಕಾಮಾಚಿ ಬಾಯ್ಲ್‌ಗೀ ಯಾ ಬೇಬಿ ಸಿಟ್ಟರಾಂ ಲಾಗಿಂ ದವರುನ್ ಆಪುಣ್ ಕಾಮಾಕ್ ವೆತಾಂ ಮ್ಹಣ್ ತಾಣೆಂ ರಾಫಾಯೆಲಾ ಲಾಗಿಂ ಸಾಂಗ್ಲ್ಲ್ಯಾ ವೆಳಿಂ ರಾಫಾಯೆಲ್ ಖಡಾಖಡ್ ಮ್ಹಣಾಲೊ – “ನಾ ಬೆಲಾ……ಮ್ಹಾಕಾ ಸಾಂಬಾಳ್ ಬರೊ ಆಸಾ ಆನಿ ತುಂವೆಂ ಕಾಮಾಕ್ ವೆಚಿ ಕಾಂಯ್ಚ್ಚ್ ಗರ್ಜ್ ನಾ…. ತುಂವೆಂ ಭುರ‍್ಗ್ಯಾಂಕ್ ಪಳಯ್ಲ್ಯಾರ್ ಪುರೊ….”
“ರಾಫಾಯೆಲ್….. ತುಕಾ ಪಯ್ಶಾಂಚಿ ಗರ್ಜ್ ನಾ ಜಾಂವ್ಕ್ ಪುರೊ…. ಪುಣ್ ಮ್ಹಾಕಾ ಕಿತೆಂಯ್ ಜಾಯ್, ಹರ್ಯೇಕ್ ಪಾವ್ಟಿಂ ಹಾಂವೆಂ ತುಜ್ಯಾ ಲಾಗಿಂಚ್ಚ್ ವಿಚಾರಿಜಾಯ್, ಪರಾತ್ತಿಜಯ್ ಆನಿ ತೆಂ ಮ್ಹಾಕಾ ಬರೆಂ ಲಾಗಾನಾ….. ಹಾಂವ್ ಶಿಕ್ಲ್ಯಾಂ; ಮ್ಹಾಕಾ ಬರೆಂ ಕಾಮ್ ಮೆಳೊಂಕ್ ಆಸಾ ಆನಿಂ ಹಾಂವೆಂ ಕಾಮ್ ಕೆಲೆಂ ತರ್ ಮ್ಹಾಕಾಚ್ಚ್ ನಂಯ್ ಬಗಾರ್ ಆಮ್ಚ್ಯಾ ಕುಟ್ಮಾಕ್‍ಯ್ ಬರೆಂ….”
ಹ್ಯಾ ವೆಳಿಂ ರಾಫಾಯೆಲ್ ರಾಗಾರ್ ಜಾಲ್ಲೊ. ” ಆತಾಂಚ್ಯಾ ದಿಸಾನಿಂ ಆಫಿಸಾನಿಂ ಕಿತೆಂ ಜಾತಾ ತೆಂ ತುಕಾ ಕಳನಾ ಬೆಲಾ…..” ತಾಣೆಂ ಮ್ಹಳ್ಳೆಂ. ” ಆಮ್ಚೆಂ ಕುಟಾಮ್, ತುಂ, ಹಾಂವ್ ಆನಿ ಆಮ್ಚ್ಯಾ ದೊಗಾಂ ಭುರ‍್ಗ್ಯಾಂ ಸಾಂಗಾತಾ ಭಾರಿಚ್ಚ್ ಬರ‍್ಯಾನ್ ಆಸಾಂವ್… ಮೊಗಾನ್ ಆಸಾಂವ್…. ತುಂ ಕಾಮಾಕ್ ಗೆಲೆಂಯ್…. ತುಜೆಂ ಧ್ಯಾನ್ ಭುರ‍್ಗ್ಯಾಂಚೆರ್ ಆಸ್ಚೆಂ ನಾ ಬಗರ್ ತುಜ್ಯಾ ಆಫಿಸಾಚ್ಯಾ ಕಾಮಾಚೆರ್ ಆಸ್ತೆಲೆಂ…ಆನಿಂ ಏಕ್ ವಿಶಯ್ ತುಂ ಜಾಣಾಂಯ್ ? ಆತಾಂಚ್ಯಾ ಕಾಲಾರ್ ಏಕಾ ಬಾಯ್ಲೆಕ್ ಘರಾ ಏಕ್ಲೊ ನೊವ್ರೊ ಆನಿ ಆಫಿಸಾಂತ್ ಎಕ್ಲೊ ದಾದ್ಲೊ ಆಸ್ತಾ… ಆನಿ ತ್ಯಾ ವರ್ವಿಂ ತಸಲ್ಯಾ ಕುಟ್ಮಾಂಚೆಂ ಸತ್ತ್ಯಾನಾಸ್ ಜಾತಾ…. ಆಮ್ಚ್ಯಾ ಭಾಂಗ್ರಾಳ್ಯಾ ಕುಟ್ಮಾಕ್ ತಶೆಂ ಕಾಂಯಿಂಚ್ಚ್ ಜಾಂವ್ಚೆಂ ನಾಕಾ ಮ್ಹಣ್ ಮ್ಹಜಿ ಆಶಾ…”
ಸ್ವಾರ್ಥಿ ದಾದ್ಲೊ ಆನಿ ದುಬಾವಿ ದಾದ್ಲೊ…. ದಾದ್ಲ್ಯಾಂಚೆಂ ಸಂತಾನ್‍ಂಚ್ಚ್ ಹೆಂ ಆನಿಂ ರಾಫಾಯೆಲ್ ತಾಕಾ ಏಕ್ಲೊ ಬರೊಚ್ಚ್ ದಾಖ್ಲೊ ಮ್ಹಣ್ ಇಜಾಬೆಲಾ ಮತಿಂತ್ ಚಿಂತುಂಕ್ ಲಾಗ್ಲೆಂ…
“ತರ್ …. ತುಂ ಮ್ಹಾಕಾ ಪಾತ್ಯೆನಾಂಯ್? ಹಾಂವೆಂ ತುಕಾ ಪಾತ್ಯೆವ್ಯೆತ್? ಹೆಂ ಕಸಲೆಂ ರಾಜಾಂವ್ ರಾಫಾಯೆಲ್…” ತಾಣೆಂ ರಾಗಾನ್ ತಾಚ್ಯಾ ಲಾಗಿಂ ವಿಚಾರ್ಲ್ಲೆಂ.
ರಾಫಾಯೆಲಾಕ್ ಬೆಲಾಚ್ಯಾ ತ್ಯಾ ಸವಾಲಾಕ್ ಜಾಪ್ ದೀಂವ್ಕ್ ಕಷ್ಟ್ ಜಾಲ್ಲೆ. ತೊ ಬರೆಂಚ್ಚ್ ಚಿಂತುನ್ ಮ್ಹಣಾಲೊ – ” ಬೆಲಾ, ತುಕಾ ಆನಿ ಆಮ್ಚ್ಯಾ ಕುಟ್ಮಾಕ್ ಜಿವಾಕ್ ಜೀವ್ ದಿಂವ್ಚೊ ಮ್ಹಜೆ ತಸಲೊ ಮನಿಸ್ ತುಕಾ ಮೆಳ್ಚೊಚ್ಚ್ ನಾ… ಹಾಂವೆಂ ಹೆಂ ಕರ್ಚೆಂ ಆಮ್ಚ್ಯಾ ಕುಟ್ಮಾಚ್ಯಾ ಬರ‍್ಯಾಪಣಾಕ್… ಸಂಸಾರಾಂತ್ ಕಿತೆಂ ಜಾತಾ ತೆಂ ಪಳವ್ನ್ ಹಾಂವೆಂ ಸಾಂಗ್ಚೆಂ ಆನಿ ಕರ್ಚೆಂ ಆಮ್ಚ್ಯಾ ಕುಟ್ಮಾಚ್ಯಾ ಬರ‍್ಯಾಪಣಾಕ್…. ಆಮ್ಚ್ಯಾ ಭುರ‍್ಗ್ಯಾಂಕ್ ಪಳಂವ್ಕ್ ತುಜಿ ಭಾರಿಚ್ಚ್ ಗರ್ಜ್ ಆಸಾ … ತಾಂಚ್ಯಾ ಥಾವ್ನ್ ಆಮಿ ದೊಗಾಂಯ್ ಪಯ್ಸ್ ಗೆಲ್ಯಾಂವ್ ತರ್ ತಿಂ ಸಾರ‍್ಕ್ಯಾ ರಿತಿನ್ ವಾಡ್ಚಿಂನಾಂತ್ … ದೆಕುನ್ ಹಾಚ್ಯಾ ಪುಡೆಂ ತುಂ ಕಾಮಾಕ್ ವೆಚೊ ವಿಶಯ್ ಕಾಡಿನಾಕಾ…”
ತೊ ಪ್ರಸ್ತಾಪ್ ಬಂಧ್ ಜಾಲ್ಲೊ ಆನಿ ಪುಡೆಂ ತಿಂ ತ್ಯಾ ವಿಶಿಂ ಉಲಯಿಲ್ಲಿಂ ನಾಂತ್.
ಆಸ್ಪತ್ರೆಚ್ಯಾ ತ್ಯಾ ಕೂಡಾಚೆಂ ಬಾಗಿಲ್ ಬಂಧ್ ಆಸ್ಲ್ಲೆಂ. ಬಾಗ್ಲಾ ಭಾಯ್ರ್ ಜಾಯ್ತೊ ಲೋಕ್ ಉಬೊ ಆಸ್ಲ್ಲೊ.
ಬಂಧ್ ಬಾಗ್ಲಾಚ್ಯಾ ಭಾಯ್ರ್ ಉಬ್ಯಾ ರಾವ್‍ಲ್ಲ್ಯಾ ತಾಚೆ ಪಾಯ್ ಬರ‍್ಫಾ ಬರಿ ಘಟ್ ಜಾಲೆ. ತೆಂ ಹಾಲ್ಲೆಂ ನಾ.
ಬಾವ್ಳ್ಯಾಂಕ್ ಧರುನ್ ಕೊಣೆಂಗೀ ತಾಕಾ ಮುಕಾರ್ ವೆಚ್ಯಾಕ್ ಬಳ್ ಕೆಲೆಂ. ಕೂಡಾ ಭಿತರ್ ವಚೊಂಕ್ ತೆಂ ಕಟಿಣಾಯೆನ್ ಭಿಯೆಲೆಂಚ್ಚ್. ರಾಫಾಯೆಲಾಚ್ಯಾ ಘರ್ಚಿಂ ಯೆದೊಳ್ಚ್ಚ್ ಯೇವ್ನ್ ಥಂಯ್ಸರ್ ಪಾವ್ಲ್ಲಿಂ. ನರ್ಸಾಂ ಆನಿ ಆಸ್ಪತೆಚ್ಯಾ ಕಾಮಾಚಿಂ ತಾಂಕಾ ಸಾಂಗ್ತಾಲಿಂ ತರ್ಯ್ ತಾಂಚಿ ಹಾಕ್ ಬೋಬ್ ಸಗ್ಳ್ಯಾನ್ ಭರೊನ್ ಗೆಲ್ಲಿ.
ಪಂದ್ರಾ ವರ್ಸಾಂಥಾವ್ನ್ ಕಾಳ್ಜಾಚ್ಯಾ ಗೂಂಡಾಯೆ ಥಾವ್ನ್ ಮೋಗ್ ಕೆಲ್ಲ್ಯಾ ಆಪ್ಲ್ಯಾ ನೊವ್ರ್ಯಾಕ್ ಹ್ಯಾ ವೆಳಿಂ ನಿರ‍್ಜೀವ್ ಕೂಡ್ ಜಾವ್ನ್ ಕಶೆಂ ಪಳಂವ್ಚೆಂ ತೆಂ ತಾಕಾ ಕಳ್ಳೆಂಚ್ಚ್ ನಾ ಜಾಲೆಂ. ಹ್ಯಾಚ್ಚ್ ವೆಳಿಂ ದೊಳ್ಯಾಂಕ್ ಕಾಳೊಕ್‍ಯ್ ಆಯ್ಲೊ.
ಕೊಣೆಂಗೀ ಬಲಾತ್ಕಾರಾನ್ ತಾಕಾ ಭಿತರ್ ವೆಲೆಂ. ಥೊಡ್ಯಾ ಘಡಿಯಾಂಕ್ ತಾಕಾ ಮುಕಾರ್ ಕಿತೆಂಚ್ಚ್ ದಿಸಾನಾ ಜಾಲೆಂ… ಪರತ್ ಸಗ್ಳ್ಯಾಂನಿ ಕಾಳೊಕ್‍ಚ್ಚ್… ತೊ ಕಾಳೊಕ್ ಸವ್ಕಾಸ್ ಪಯ್ಸ್ ವೆತಾನಾ ತಾಚೆ ದೊಳೆ ಉಗ್ತೆ ಜಾಲೆ.
ನಿಟಾಯೆನ್ ದವರ್ಲ್ಲ್ಯಾ ದೋನ್ ಲಾಂಬ್ ಮೆಜಾಂಚೆರ್ ದೋನ್ ನಿರ‍್ಜೀವ್ ಕುಡಿ ದವರ್ಲ್ಲ್ಯೊ. ರಾಫಾಯೆಲ್ ಆನಿ ಏಕಾ ಸ್ತ್ರಿಯೆಚಿ. ರಂಗನಾಥಾನ್ ಸಾಂಗ್ಲ್ಲ್ಯಾ ಪ್ರಮಾಣೆ ತೆಂ ಸಿಲ್ವಿಯಾಚೆಂ ಮೊಡೆಂ ಮ್ಹಣ್ ತಾಣೆಂ ಚಿಂತ್ಲೆಂ. ದೊನೀಂ ಕುಡಿ ರಗ್ತಾನ್ ಭರೊನ್ ಗೆಲ್ಲ್ಯೊ. ಇಜಾಬೆಲಾ ಮುಕಾರ್ ವಚೊನ್ ರಾಫಾಯೆಲಾಕ್ ಆರಾವ್ನ್ ಕಾಳಿಜ್ ಪುಟ್ತಾ ಮ್ಹಳ್ಳ್ಯಾ ಬರಿ ರಡ್ಲೆಂ.
ಜಾಯ್ತೊ ವೇಳ್ ಪಾಶಾರ್ ಜಾಲೊ.
ಉಪ್ರಾಂತ್ ಇಜಾಬೆಲಾಕ್ ಕೊಣೆಂಗೀ ತಾಚ್ಯಾ ಭುಜಾಂಕ್ ಧರುನ್ ಕದೆಲಾರ್ ಬಸಯ್ಲೆಂ.
ತ್ಯಾಚ್ಚ್ ವೆಳಾರ್ ಏಕ್ಲೊ ದಾದ್ಲೊ ತಾಚ್ಯಾ ಉಜ್ವ್ಯಾ ಕುಸಿನ್ ಸರ್ಶಿನ್ ಆಯ್ಲೊ. ಬಾಗೊನ್ ಇಜಾಬೆಲಾಚ್ಯಾ ಕಾನಾಂತ್ ತೊ ಮ್ಹಣಾಲೊ. “ಹಾಂವ್ ಡೆಸ್ಮಂಡ್ … ಡೆಸ್ಮಂಡ್ ವೇಗಸ್… ಸಿಲ್ವಿಯಾಚೊ ನೊವ್ರೊ… “
ಇಜಾಬೆಲಾನ್ ದೊಳೆ ಉಬಾರುನ್ ಡೆಸ್ಮಂಡಾಕ್ ಪಳಯ್ಲೆಂ. ಡೆಸ್ಮಂಡಾಚ್ಯಾ ತೊಂಡಾರ್ ದೂಕ್ ಜಾಂವ್ ರಡ್ಣ್ಯಾಚಿ ಛಾಯಾ ಜಾಂವ್ ಬಿಲ್ಕುಲ್ ನಾತ್ಲ್ಲಿ. ಪೂಣ್ ಏಕಾ ವಿಶೇಸ್ ರಿತಿಚೊ ತಾತ್ಸಾರ್ ಖಂಡಿತ್ ಜಾವ್ನ್ ಭರೊನ್ ಗೆಲ್ಲೊ.
“ಬಾಯೆ ಇಜಾಬೆಲಾ ತುಜ್ಯಾ ದುಖಾಂತ್ ಹಾಂವ್ ಭಾಗಿದಾರ್ …. ಮ್ಹಜೆಂ ಸಿಲ್ವಿಯಾಯ್ ಆಜ್ ಮರಣ್ ಪಾವ್ಲಾಂ… ಮ್ಹಾಕಾ ಆನಿ ಮ್ಹಜ್ಯಾ ಭುರ‍್ಗ್ಯಾಂಕ್ ಅಸೆಂ ಜಾಂವ್ಕ್ ನಜೊ ಆಸ್ಲ್ಲೆಂ….” ಬಾಗೊನ್ಂಚ್ಚ್ ತೊ ಮುಕಾರ‍್ಸುನ್ ಉಲಯ್ಲೊ. “ಹ್ಯಾ ವೆಳಿಂ ತುಜ್ಯಾ ಲಾಗಿಂ ಮ್ಹಾಕಾ ಉಲಂವ್ಕ್ ಆಸಾ… ಏಕ್ಸುರೆಂಚ್ಚ್….ದಯಾಕರುನ್ ದೊನ್‍ಂಚ್ಚ್ ಮಿನುಟಾಂಚೊ ವೇಳ್ … ಹ್ಯಾ ವಿನವ್ಣೆಕ್ ತುಂ ನಾ ಮ್ಹಣಾನಾಕಾ….”
ಇಜಾಬೆಲಾನ್ ಏಕ್ ಘಡಿಭರ್ ಕಿತೆಂಗೀ ಚಿಂತ್ಲೆಂ…. ತಾಚ್ಯಾ ಮತಿಂತ್ ಕಿತೆಂ ಉದೆಲೆಂ ತೆಂ ತಾಕಾ ಸಾಂಗೊಂಕ್ ಕಳೊಂಕ್ ನಾ… ತಾಣೆಂ ’ಜಾಯ್ತ್’ ಮ್ಹಣ್ಚ್ಯಾ ಬರಿ ತಕ್ಲಿ ಹಾಲಯ್ಲಿ.
ಡೆಸ್ಮಂಡಾನ್‍ಂಚ್ಚ್ ಕುಡಾಂತ್ ಆಸ್ಲ್ಲ್ಯಾ ಸರ್ವಾಂಕ್ ಭಾಯ್ರ್ ವೆಚ್ಯಾಕ್ ನಮ್ರತಾಯೆನ್ ವಿಚಾರ‍್ಲೆಂ. ಸರ‍್ವಾಂ ಭಾಯ್ರ್ ಗೆಲಿಂ. ಆಸ್ಪತ್ರೆಚಿಂ ನರ್ಸಾಂ ಆನಿ ಕಾಮಾಚಿಂ ಮನ್ಶಾಂ ಸಯ್ತ್.
ಸರ‍್ವಾಂ ಭಾಯ್ರ್ ಗೆಲ್ಯಾ ಉಪ್ರಾಂತ್ ಡೆಸ್ಮಂಡಾನ್ ಕೂಡಾಚೆಂ ಬಾಗಿಲ್ ಬಂಧ್ ಕೆಲೆಂ. ಇಜಾಬೆಲಾಚ್ಯಾ ಲಾಗಿಂ ಯೇವ್ನ್ ಉಬೊ ಜಾಲೊ ಆನಿ ಭಾರಿಚ್ಚ್ ಲಾಂಬ್ ಸ್ವಾಸ್ ಸೆವ್ಲೊ.
“ಇಜಾಬೆಲಾ … ಹ್ಯಾವೆಳಿಂ ತುಜೊ ರಾಫಾಯೆಲ್ ಆನಿ ಮ್ಹಜೆಂ ಸಿಲ್ವಿಯಾ ಮರಣ್ ಪಾವ್‍ಲ್ಲ್ಯಾ ಹ್ಯಾ ದುಖಾಚ್ಯಾ ಘಡಿಯೆ ಹ್ಯಾ ವಿಶ್ಯಾಂತ್ ಸಾಂಗ್ಚೆಂ ಕಿತ್ಲೆಂ ವಾಜ್ಭಿ ತೆಂ ಮ್ಹಾಕಾ ಕಳಿತ್ ನಾ… ಪುಣ್ ಸಾಂಗ್ಚೆಂ ಸರ್ವ್ ಸತ್… ಪುಣ್, ಮ್ಹಾಕಾ ಭಗ್ತಾ ಕೀ ಹಾಂವೆಂ ತೆಂ ತುಕಾ ಸಾಂಗಾಜಯ್‍ಚ್ಚ್ ಮ್ಹಣ್ … ಆನಿ ಹಾಂವ್ ಹ್ಯಾ ವೆಳಿಂ ಕಿತೆಂ ಸಾಂಗ್ತಾಂ ತೆಂ ಜಾಯ್ತ್ಯಾ ತೆಂಪಾ ಪಯ್ಲೆಂ ಹಾಂವೆಂ ತುಕಾ ಕಳಯ್ಜಯ್ ಆಸ್ಲ್ಲೆಂ ಕೊಣ್ಣಾ… ಆನಿ ತಸೆಂ ಕೆಲ್ಲೆಂ ತರ್ ಆಜ್ ಹಿಂ ದೋನ್ ಮೊರ್ಣಾಂ ಆಮ್ಕಾಂ ಪಳಂವ್ಕ್ ಮೆಳ್ತಿಂ ನಾಂತ್ ಕೊಣ್ಣಾ ಮ್ಹಣ್ಂಯ್ ಮ್ಹಾಕಾ ಭಗ್ತಾ!!!”
ಥೊಡೊ ವೇಳ್ ಮೌನ್… ಭಾರಿಚ್ಚ್ ಕಟಿಣಾಯೆಚೆಂ ಮೌನ್… ಇಜಾಬೆಲಾ ಆನಿಕ್ಯ್ ರಾಫಾಯೆಲಾಚ್ಯಾ ತೊಂಡಾಕ್‍ಚ್ಚ್ ಪಳವ್ನ್ ಆಸ್ಲ್ಲೆಂ.
ಇಜಾಬೆಲಾ ಥಾವ್ನ್ ಕಾಂಯಿಂಚ್ಚ್ ಪ್ರತಿಕ್ರಿಯಾ ನಾತ್ಲ್ಲಿ ಪಳವ್ನ್ ಡೆಸ್ಮಂಡ್ ಮುಕಾರ‍್ಸುನ್ ಉಲಯ್ಲೊ. “ರಾಫಾಯೆಲ್ ಆನಿ ಸಿಲ್ವಿಯಾಚ್ಯಾ ಸಂಬಂಧಾವಿಶಿಂ ಜಾಯ್ತ್ಯಾ ತೆಂಪಾ ಆದಿಂ ಮ್ಹಾಕಾ ಕಳಿತ್ ಆಸ್ಲ್ಲೆಂ. ಹಾಂವೆಂ ತಾಕಾ ಸಾಂಗೊಂಕ್ ಆನಿ ತಿದ್ವುಂಕ್ ಪ್ರೆತನ್ ಕೆಲ್ಲೆಂ ತರ್ಯ್ ತೆಂ ಆಯ್ಕಾಲ್ಲೆಂಚ್ಚ್ ನಾ… ಆಯ್ಕೊಂಕ್ ತಯಾರ್‌‍ಚ್ಚ್ ನಾತ್ಲ್ಲೆಂ… ತಾಂಚ್ಯಾ ದೊಗಾಂಯ್ ಮಧೆಂ ಕಿತೆಂಚ್ಚ್ ನಾ ಮ್ಹಣ್ ತಾಣೆಂ ಮ್ಹಜ್ಯಾ ಲಾಗಿಂ ವ್ಯಾಜ್ ಬಾಂದಿಲಾಗ್ಲೆಂ. ಘರಾಂತ್ ಲಡಾಯ್ ಕೆಲಿ…. ಭುರ‍್ಗ್ಯಾಂ ಮುಕಾರ್ ಚಡ್ ಕಾಂಯ್ ಜಾಂವ್ಚೆಂ ನಾಕಾ ಮ್ಹಣ್ ಹಾಂವ್ ವೊಗೆಚ್ಚ್ ರಾವ್ಲೊಂ … ಸಿಲ್ವಿಯಾನ್ ಏಕ್‍ಚ್ಚ್ ಮ್ಹಣ್ಚೆಂ ಆಸ್ಲ್ಲೆಂ ’ ಹಾಂವ್ ದುಬಾವಿ ಮ್ಹಣ್… ತೆಂ ಆನಿ ರಾಫಾಯೆಲ್ ಬರ್ಯಾ ಇಷ್ಟಾಗತೆಂತ್ ಆಸಾತ್’ ಮ್ಹಣ್ಂಚ್ಚ್ ತೆಂ ಮ್ಹಣ್ತಾಲೆಂ… ಪುಣ್, ಮ್ಹಾಕಾ ಕಳಿತ್ ಆಸ್ಲ್ಲೆಂ…”
“ತುಜೊ ದುಬಾವ್ ಸಾರ್ಕೊ ನಂಯ್… ” ಇಜಾಬೆಲಾನ್ ಡೆಸ್ಮಂಡಾಚಿಂ ಉತ್ರಾಂ ಆರ‍್ಧ್ಯಾರ್ ತುಟಯ್ಲಿಂ. ” ಹಾಂವೀ ರಾಫಾಯೆಲಾಕ್ ಪಾತ್ಯೆತಾಂ….. ಖರೊಖರ್ ಪಾತ್ಯೆತಾಂ….ಮ್ಹಾಕಾ ರಾಫಾಯೆಲಾಚೆರ್ ಕಾಂಯ್ಚ್ಚ್ ದುಬಾವ್ ನಾ… ತೊ ಹಾಂಗಾಸರ್ ಆಸಾ… ಮೊರ‍್ಣಾಂತ್ ಆಸಾ… ತಾಕಾ ಸಾಕ್ಸ್ ಜಾವ್ನ್ ಹಾಂವ್ ಮ್ಹಣ್ತಾಂ ತೊ ಮ್ಹಾಕಾ ಕೆದಿಂಚ್ಚ್ ಘಾತ್ ಕರ್ಚೊ ನಾ… ತೊ ತುಜ್ಯಾ ಬಾಯ್ಲೆ ಲಾಗಿಂ ಬರ್ಯಾ ಇಷ್ಟಿಣೆಂ ಬರಿ ಆಸ್ಲ್ಲೊಚ್ಚ್ ಜಾವ್ಯೆತ್… ದೆಕುನ್, ದಯಾಕರುನ್ ತುಂ ಮುಕಾರ‍್ಸುನ್ ಉಲಯ್ನಾಕಾ…”
ಇಜಾಬೆಲಾಕ್ ರಾಫಾಯೆಲಾಚೆರ್ ಕಠಿಣ್ ಭರ‍್ವಾಸೊ ಆಸ್ಲ್ಲೊ ಆನಿ ತ್ಯಾಚ್ಚ್ ಭರ‍್ವಾಸ್ಯಾಚ್ಯಾ ಬಳಾನ್ ತೆಂ ಅಸೆಂ ಮ್ಹಣಾಲೆಂ.
“ತಸೆಂಚ್ಚ್ ಜಾಲ್ಲೆಂ ತರ್ ಬರೆಂ ಆಸ್ಲ್ಲೆಂ ಮ್ಹಣ್ ಹಾಂವ್ ಆಶೆತಾಂ…ಮೊರ‍್ಣಾಂತ್ ತಾಂಚ್ಯಾ ಆತ್ಮ್ಯಾಕ್ ಸಾಲ್ವಾಸಾಂವ್ ಮೆಳ್ತೆಂ… ಪುಣ್ ತಸೆಂ ನಂಯ್ ಇಜಾಬೆಲಾ…ಆತಾಂ ಆಯ್ಕ್ … ಆವ್ಘಡ್ ಜಾಲ್ಲ್ಯಾ ಜಾಗ್ಯಾರ್ ಮ್ಹಾಕಾ ರಾಫಾಯೆಲಾಚೆಂ ಹೆಂ ಟೆಲಿಫೊನ್ ಮೆಳ್ಳಾಂ. ಪೊಲಿಸಾಂಕ್ ಕಳನಾತ್‍ಲ್ಲ್ಯಾ ಬರಿ ತೆಂ ಹಾಂವೆಂ ಸ್ವಾದಿನ್ ಕೆಲೆಂ. ತೆಂ ಆತಾಂ ಉಗ್ತೆಂ ಜಾಯ್ನಾ… ಜರ್ತರ್ ತಾಚೆಂ ಉಗ್ತೆಂ ಕರ್ಚೊ ಸಂಕೊ ತುಕಾ ಕಳಿತ್ ತರ್ ತೆಂ ಉಗ್ತೆಂ ಜಾತೆಲೆಂಚ್ಚ್…”
ಇಜಾಬೆಲಾನ್ ಟೆಲಿಫೊನ್ ಹಾತಿಂ ಘೆತ್ಲೆಂ. ತಾಚೆರ್ ಪಿಡ್ಕಿ ದಾಂಬ್ಲಿ ತರ್ ಟೆಲಿಪೊನಾಚ್ಯಾ ಪಡ್ದ್ಯಾರ್ ಉಜ್ವಾಡ್ ಆಯ್ಲೊ ಕಿತೆಂಚ್ಚ್ ಉದೆಲೆಂ ನಾ. ” ಟೆಲಿಫೊನ್ ಬಂಧ್ ಆಸಾ. ತೆಂ ಉಗ್ತೆಂ ಕರ್ಚೆಂ ಕಸೆಂ ತೆಂ ಹಾಂವ್ ನೆಣಾ… ತಾಚೊ ಸಂಕೊ ಮ್ಹಾಕಾ ಕಳಿತ್ ನಾ….”
“ತೊ ಕಸೆಂ ಉಗ್ತೆಂ ಕರ‍್ತಾಲೊ ತೆಂ ಜಾಣಾಂಯ್ ? ಕಸೆಂ ಪುಣೀ ತೊ ಉಗ್ತೆಂ ಕರ‍್ತಾಲೊ….”
ಇಜಾಬೆಲಾನ್ ಚಿಂತ್ಲೆಂ. “ಹಾಂ… ತಾಚೆಂ ಉಜ್ವ್ಯಾ ಹಾತಾಚೆಂ ಉಂಗುಶ್ಟ್ ಬೋಟ್ ತೊ ವಾಪಾರ‍್ತಾಲೊ….”
ಡೆಸ್ಮಂಡಾನ್ ಟೆಲಿಫೊನ್ ಘೆತ್ಲೆಂ. ರಾಫಾಯೆಲಾಚ್ಯಾ ನಿರ‍್ಜೀವ್ ಕೂಡಿ ಸರ್ಶಿನ್ ಗೆಲೊ ಆನಿ ತಾಚ್ಯಾ ಉಜ್ವ್ಯಾ ಹಾತಾಚೆಂ ಉಂಗುಶ್ಟ್ ಬೋಟ್ ಘೆವ್ನ್ ಬುತಾಂವ್ ದಾಂಬ್ಲೊ.
ಟೆಲಿಫೊನ್ ಉಗ್ತೆಂ ಜಾಲೆಂ.
“ಟೆಲಿಫೊನ್ ಉಗ್ತೆಂ ಜಾಲೆಂ. ಆತಾಂ ತಾಚೊ ’ಕೋಡ್’ ಪುಸುನ್ ಆಳ್ವಿತಾಂ. ಹಾಚ್ಯಾ ಉಪ್ರಾಂತ್ ಟೆಲಿಫೊನ್ ಬಂಧ್ ಪಡ್ಚೆಂನಾ. ಉಪ್ರಾಂತ್ ರಾಫಾಯೆಲಾಚ್ಯಾ ’ವಾಟ್ಸಪ್’ ಎಕೌಂಟಾಕ್ ವಚ್.. ಸಿಲ್ವಿಯಾಕ್ ದಾಡ್‍ಲ್ಲೆ ಆನಿ ಸಿಲ್ವಿಯಾ ಥಾವ್ನ್ ಆಯಿಲ್ಲೆ ಸಂದೇಶ್ ತಾಂತು ಆಸ್ತೆಲೆಚ್ಚ್ … ತ್ಯಾ ವರ್ವಿಂ ತುಕಾ ಪೂರಾ ಸತ್ ಕಳ್ತೆಲೆಂ…”
ಇಜಾಬೆಲಾಚೆ ಹಾತ್ ಆತಾಂ ಕಾಂಪ್ತಾಲೆ. ತಾಣೆ ಆಪ್ಣಾಕ್‍ಚ್ಚ್ ಸಾಂಬಾಳ್ಳೆಂ. ಥೊಡ್ಯಾಚ್ಚ್ ಘಡಿಯಾಂನಿ ಹಾತಾಂತ್ ಧರ‍್‍ಲ್ಲ್ಯಾ ಫೊನಾಂತ್ ತಾಣೆಂ ವಾಟ್ಸಪ್ ಉಗ್ತೆಂ ಕೆಲೆಂ.
’ಸಿಲ್ವಿಯಾ’ ನಾಂವ್ ಕಾಣ್ಸಿತಾನಾ ಸಿಲ್ವಿಯಾಚೆಂ ಏಕೌಂಟ್ ಉದೆಲೆಂ. ಸಿಲ್ವಿಯಾ ಥಾವ್ನ್ ಆಯಿಲ್ಲೆ ಆನಿ ರಾಫಾಯೆಲಾನ್ ಸಿಲ್ವಿಯಾಕ್ ದಾಡ್‍ಲ್ಲೆ ಸಂದೇಶ್ ಸರ್ವ್ ತಾಕಾ ದಿಸೊಂಕ್ ಲಾಗ್ಲೆ. ಆಧುನಿಕ್ ಯಾಂತ್ರಿಕ್ ಕಾಳಾರ್ ಗುಪ್ತಿಂ ದವರ್ಲ್ಲ್ಯೊ ಸಂಗ್ತಿ ಆತಾಂ ಉಗ್ತ್ಯೊ ಜಾಲ್ಯೊ. ಹರ್ಯೇಕ್ ಸಂದೇಶ್ ವಾಚ್ತಾನಾ ಇಜಬೆಲಾಚಿ ಮತ್ ನಿಜಾಯ್ಕಿ ಪಿಸಾಂತೂರ್ ಜಾಲಿ. ಹರ‍್ಯೆಕ್ ಭುರ‍್ಶೆಂಪಣ್… ಸಂಬಂಧಾಚಿ ನಾಲಿಸಾಯ್ ಆನಿ ಸರ‍್ವಾಚ್ಯಾಕೀ ಚಡ್ ಕರುನ್ ಆಪ್ಣಾಚ್ಯಾ ಮೊಗಾಕ್ ರಾಫಾಯೆಲಾನ್ ಕೆಲ್ಲೊ ಘಾತ್ ತಾಂತು ಉಗ್ತೊ ದಿಸ್ತಾಲೊ.
ಹ್ಯಾ ವೆಳಿಂ ಇಜಾಬೆಲಾಚ್ಯಾ ಮತಿಂತ್ಲೆಂ ದೂಕ್ ಮಾಯಗ್ ಜಾಲೆಂ. ದೊಳ್ಯಾಂತ್ಲಿ ದುಖಾಂ ಮಾಜ್ವಾಲಿಂ. ಮತಿಂಚ್ಯಾ ಗೊಪಾಂತ್ ರಾಗಾಚಿ ಜ್ವಾಲಾಮುಖಿ ಪುಟ್ಲಿ. ಶಿರಾಂನಿ ವಾಳ್ಚ್ಯಾ ರಗ್ತಾಚ್ಯಾ ವಾಳ್ಯಾಂತ್ ತಾತ್ಸಾರಾಚೊ ಶಿಣ್… ತೊಚ್ಚ್ ತಾತ್ಸಾರ್ ತಾಣೆಂ ಥೊಡ್ಯಾ ಘಡಿಯಾಂ ಪಯ್ಲೆಂ ಡೆಸ್ಮಂಡಾಚ್ಯಾ ವದನಾರ್ ದೆಖ್‍ಲ್ಲೊ.
ತೆಂ ಉಬೆ ರಾವ್ಲೆಂ. ತಾಚ್ಯಾ ಹಾತಿಂ ಆಸ್ಲ್ಲೆಂ ರಾಫಾಯೆಲಾಚೆಂ ಫೋನ್ ಧರ್ಣಿಚೆರ್ ಪಡ್ಲೆಂ. ರಾಫಾಯೆಲಾಚ್ಯಾ ನಿರ‍್ಜೀವ್ ಕೂಡಿ ಸರ್ಶಿನ್ ತೆಂ ಆಯ್ಲೆಂ.
ಡೆಸ್ಮಂಡ್ ಪಳವ್ನ್ ಆಸ್ಚ್ಯಾ ಬರಿಚ್ಚ್ ಇಜಾಬೆಲಾನ್ ಬಳಾಚೆಂ ಥಾಪಡ್ ಮೆಲ್ಲ್ಯಾ ರಾಫಾಯೆಲಾಚ್ಯಾ ಕಾನ್ಸುಲಾರ್ ಬಸಯ್ಲೆಂ.
ತ್ಯಾ ಥಾಪ್ಡಾಚಿ ದೂಕ್ ರಾಫಾಯೆಲಾಚ್ಯಾ ನಿರ‍್ಜೀವ್ ಕುಡಿಕ್ ಲಾಗ್ಲಿ ನಾ ಜಾಂವ್ಕ್ ಪುರೊ ಪುಣ್, ತಾಚ್ಯಾ ತೊಂಡಾರ್ ಜಾಲ್ಲ್ಯಾ ಘಾಯಾಂಕ್ ಪರತ್ ಜೀವ್ ಕರಿಲಾಗ್ಲಿ. ಸುಕ್‍ಲ್ಲ್ಯಾ ರಗ್ತಾಂತ್ ಪರತ್ ಜಿವ್ಸಾಣ್ ಆಯ್ಲಿ. ಆನಿ ಥೊಡೆ ಥೆಂಬೆ ರಗಾತ್ ವಾಳೊನ್ ದೊವ್ಯಾ ಲುಗ್ಟಾಚೆರ್ ಪಡೊಂಕ್ ಲಾಗ್ಲೆಂ.
ಆನಿ ತ್ಯಾಚ್ಚ್ ವೆಳಿಂ ರಾಫಾಯೆಲಾಚ್ಯಾ ಆತ್ಮ್ಯಾಕ್ ಥಾಪ್ಡಾಚಿ ದಾವ್ ಲಾಗ್ಲಿ ತಸೆಂ ಇಜಾಬೆಲಾಕ್ ಭಗ್ಲೆಂ.
ಸ ಫುಟಿ ಗೂಂಡಾಯೆಚ್ಯಾ ದೋನ್ ವಿಂಗಡ್ ವಿಂಗಡ್ ಫೊಂಡಾಚ್ಯಾ ಕುಶಿಂನಿ ಉಬಾರುನ್ ಪಡ್‍ಲ್ಲ್ಯಾ ತಾಂಬ್ಡ್ಯಾ ಮಾತಿಯೆಚೆರ್ ದೋನ್ ಮೊರ್ಣಾಂ ಪೆಟೊ ದವರ್ಲ್ಲ್ಯೊ. ದೊನೀ ಪೆಟಾಂ ಭೊಂವಾರಿಂ ಪುಲಾಂಚಿಂ ರಾಸ್ ಭರ್ಲ್ಲಿ.
ಪಿರ್ಗಜೆಚೊ ವಿಗಾರ್ ಆಯ್ಲೊ ಆನಿ ತಾಣೆಂ ತಿಂ ದೊನ್ಂಯ್ ಮೊರ್ಣಾಂ ಬೆಂಜಾರ್ ಕೆಲಿಂ. ಮಾಗ್ಣೆಂ ಜಾಲೆಂ. ಪೆಟಾಂಚೆಂ ದಾಂಕ್ಣೆಂ ದಾಂಕ್ಚ್ಯಾ ಪಯ್ಲೆಂ ಆದೇವ್ಸ್ ಮ್ಹಣ್ಚ್ಯಾ ಖಾತಿರ್ ಇಜಾಬೆಲಾಕ್ ಕೊಣೆಂಗಿ ಮುಕಾರ್ ವಚೊಂಕ್ ಹಾತಾಂಕ್ ಧರುನ್ ವೊಡ್ಲೆಂ. ಇಜಾಬೆಲಾಚಿಂ ದೊಗಾಂ ಭುರ್ಗಿಂ, ಏಕ್‍ಏಕ್ಲೆಂ ತಾಚ್ಯಾ ಉಜ್ವ್ಯಾಕ್ ಆನಿ ದಾವ್ಯಾಕ್ ಆಸ್ಲ್ಲಿಂ. ಲೋಕ್ ಪಳವ್ನ್ ಆಸ್ಲ್ಲೊ ತರ್ಯ್ ಇಜಾಬೆಲಾ ಮುಕಾರ್ ಗೆಲೆಂಚ್ಚ್ ನಾ. ಭುರ್ಗಿಂ ಮುಕಾರ್ ವಚೊಂಕ್ ಉರ‍್ಡಾಲಿಂ ತರ್ಯ್ ತಾಂಕಾ ತಾಣೆಂ ಸೊಡ್ಲೆಂ ನಾ.
ಭರೊನ್ ಗೆಲ್ಲೊ ಲೋಕ್ ಇಜಾಬೆಲಾಚ್ಯಾ ಹ್ಯಾ ಕರ‍್ತುಬಾಕ್ ಪಳವ್ನ್ ಆಜಾಪ್ಲೊ. ಮೌನ್ಪಣ್ ಭರ್ಲ್ಲೆಂ ಶಿವಾಯ್ ಕೊಣ್ಂಚ್ಚ್ ಕಿತೆಂಚ್ಚ್ ಉಲಯ್ಲಿಂ ನಾಂತ್. ರಾಫಾಯೆಲಾಚ್ಯಾ ಘರ್ಚಿಂ, ತಾಚಿಂ ಆವಯ್ ಬಾಪೊಯ್, ಭಾವ್ ಭಯ್ಣಿನ್ ತಾಕಾ ಉಮೊ ದೀವ್ನ್ ಆದೇವ್ಸ್ ಮಾಗ್ಲೊ. ತೆವ್ಶಿಲ್ಯಾನ್ ಸಿಲ್ವಿಯಾಚ್ಯಾ ಘರ್ಚಿಂ ತಾಕಾ ಅದೇವ್ಸ್ ಮಾಗ್ತಾಲಿಂ. ರಡ್ಣೆಂ ವಿಳಾಪ್ ಥಂಯ್ಸರ್ ಭರೊನ್ ಗೆಲ್ಲೆಂ.
“ಬೆಲಾ…. ” ವಿಗಾರ್ ಬಾಪ್ ಭಾರಿಚ್ಚ್ ನಮ್ರತಾಯೆನ್ ಮ್ಹಣಾಲೊ. ” ರಾಫಾಯೆಲಾಕ್ ಆಖ್ರ‍ೆಚ್ಯಾ ಪಾವ್ಟಿಂ ಉಮೊ ದೀವ್ನ್ ಆದೇವ್ಸ್ ಮ್ಹಣೊಂಕ್ ತುವೆಂ ಮುಕಾರ್ ವಚಾಜಯ್… ಆದೇವ್ಸಾಚೊ ಉಮೊ ದಿ ಆನಿ ತುಜ್ಯಾ ಘೊವಾಕ್ ಸಾಸ್ಣಾಚೊ ಆದೇವ್ಸ್ ಮಾಗ್…”
ಉತ್ರಾಂ ಆಕೇರ್ ಜಾವ್ನ್ ವಿಗಾರ್ ಬಾಪ್ ಥೊಡಿಂ ಮಿನುಟಾಂ ರಾವ್ಲೊ. ಇಜಾಬೆಲಾ ಉಬ್ಯಾ ರಾವ್‍ಲ್ಲ್ಯಾ ಕಡ್ಚೆಂ ಹಾಲ್ಲೆಂ ನಾ. ದೆಗೆನ್ ಆಸ್ಲ್ಲ್ಯಾ ಭುರ‍್ಗ್ಯಾಂಕ್ ಮುಕಾರ್ ವಚೊಂಕ್ ವಿಗಾರಾನ್ ಹಾಳ್ವಾಯೆನ್ ಲೊಟ್ಲೆಂ ತರ್ ತಾಣೆಂ ತಾಂಚ್ಯಾ ಹಾತಾಂಕ್ ಧರುನ್ ಮುಕಾರ್ ವೆಚ್ಯಾಕ್ ಆಡಾಯ್ಲೆಂ.
ವಿಗಾರ್ ಬಾಪಾನೀ ಚಡ್ ವೇಳ್ ಪಾಡ್ ಕೆಲೊ ನಾ.
ಪೇಟ್ ದಾಂಪುನ್, ಫೊಂಡಾ ಭಿತರ್ ದೆಂವಂವ್ಚ್ಯಾಕ್ ಹಾತ್ ಭಾಸ್ ಕೆಲಿ.
ಧಾಂಕ್ಣೆಂ ದಾಂಪುನ್, ಪೇಟ್ ಫೊಂಡಾಂತ್ ದವರ‍್ಲಿ.
ವಿಗಾರ್ ಬಾಪಾನಿಂ ಖೊರೆಂ ಘೆವ್ನ್ ತೀನ್ ಪಾವ್ಟಿಂ ಮಾತಿ ಫೊಂಡಾಂತ್ ಉಡಯ್ಲಿ.
ಪರತ್ ತೊ ಇಜಾಬೆಲಾಚ್ಯಾ ಕುಸಿನ್ ಘುವ್ಲೊ. “ಪೊಂಡಾಕ್ ತೀನ್ ಮುಟಿ ಮಾತಿ ಘಾಲ್ ಬೆಲಾ….”
ಪರತ್ ಮೌನ್….. ತೆಂ ಖಡ್ಪಾ ಫಾತ್ರಾ ಬರಿ ಉಬೆಂ ಆಸ್ಲ್ಲೆಂ ಆನಿ ಹಾಲ್ಲೆಂಚ್ಚ್ ನಾ.
“ಹಾಂವ್ ತಾಕಾ ಮಾತಿ ಘಾಲ್ಚಿಂ ನಾ…” ಮೌನ್‍ಪಣಾಚ್ಯಾ ಗೊಪಾಂತ್ ತಾಚ್ಯಾ ಮತಿಂತ್‍ಂಚ್ಚ್ ತೆಂ ವ್ಹಡ್ಲ್ಯಾನ್ ಉಲಯ್ಲೆಂ. ” ಮ್ಹಜಿಂ ಭುರ‍್ಗಿಂಯ್ ತಾಕಾ ಮಾತಿ ಘಾಲ್ಚಿಂನಾಂತ್… ತಾಚ್ಯಾ ಮೆಲ್ಲ್ಯಾ ಕುಡಿಕ್ ಬಿಲ್ಕುಲ್ ಮಾತಿ ಲಾಗೊಂಕ್ ನಜೊ… ಜಿವೆಂಚ್ಚ್ ತಾಣೆಂ ಯೆಮ್ಕೊಡಾಕ್ ವಚಾಜಯ್…”
ಲೋಕ್ ಫೊಂಡಾ ಸರ್ಶಿಲೊ ಭಾಯ್ರ್ ಸರ್ಚ್ಯಾಪಯ್ಲೆಂಚ್ಚ್ ಇಜಾಬೆಲಾ ಥಂಯ್ ಥಾವ್ನ್ ಘುವ್ಲೆಂ ಆನಿ ಪಾಟಿಂ ಘರಾ ವೆಚ್ಯಾ ಖಾತಿರ್ ಭುರ‍್ಗ್ಯಾಂ ಸಾಂಗಾತಾ ಮೆಟಾಂ ಕಾಡಿಲಾಗ್ಲೆಂ.
► ಕ್ಲೆರೆನ್ಸ್, ಕೈಕಂಬ
]]>
ರೂಸ್‌ವೆಲ್ಟಾಚ್ಯಾ ಹಳ್ಕೆವಿಣೆಂ ವಾ ಆಶೆವಿಣೆಂ ಪ್ಯಾಟ್ರಿಕ್ ಹೆಗ್ರೆನಸಾನ್ ತಾಚೊ ದಫ್ತರಾಂತ್ಲೊ ಜಾಗೊ ಬದ್ಲುಂಕ್ ತಾಕಿದ್ ದಿಲ್ಲಿ ಆನಿ ತ್ಯಾ ಪರ್ಮಾಣೆಂ ಪ್ಯಾಟ್ರಿಕ್ ಹೆಗ್ರೆನಸಾಚ್ಯಾ ಕೆಬಿನಾಭಾಯ್ರ್‌ಚ್ ಆರ್ಶ್ಯಾಂತ್ ತಾಕಾ ದಿಸ್ಚೆಕಡೆಚ್ ಮೇಜ್ ಮಾಂಡುನ್ ಜಾಲ್ಯಾ ಉಪ್ರಾಂತ್ ರೂಸ್‌ವೆಲ್ಟ್ ಥಂಯ್ಸರ್ ಆಪ್ಲ್ಯಾ ಕಾಮಾಖಾತಿರ್ ಬಸ್ಲೊ ಆನಿ ಅಪ್ಲೆಂ ಸದಾಂಚೆಂ ಕಾಮ್ ಕರುಂಕ್ ಲಾಗ್ಲೊ.
ತೆಂ ಏಕ್ ನಿರ್ಮೊಣೆಂ. ಜಿವಿತಾಚ್ಯೆ ಪರಿಗತೆಂತ್ ವಿಚಾರಿನಾಸ್ತಾನಾ ಯೆಂವ್ಚೆಂ ಘಡಿತ್. ಆಶೆನಾಸ್ತಾನಾ ಖೆಳ್‌ಲ್ಲೊ ಚದುರಂಗಾಂಚಿ ಚಾಲ್.
ಸುಮಾರ್ ಚಾರ್ ಮ್ಹಯ್ನ್ಯಾಂಪಯ್ಲೆಂ, ದುಬಾಯ್ಚಿ ತೀನ್ ಮ್ಹಯ್ನ್ಯಾಂಚಿ ಭೆಟೆ ವಿಸಾ ಆವ್ದಿ ಮುಗ್ದೊಂಚ್ಯಾ ದಿಸಾಚ್ ಸಾಂಜೆರ್ ‘ಓರಿಯಂಟ್ ಇಂಜಿನಿಯರ್ಸ್ ಏಂಡ್ ಕನ್ಸಲ್ಟೆಂಟ್ಸ್’ ಮ್ಹಳ್ಳ್ಯಾ ಅಂತರಾಶ್ಟ್ರೀಯ್ ಯೋಜನ್ ಸಲಹಾದಾರ್ ಕಂಪ್ಣೆಂತ್ ಕಾಮಾ-ಸಂದರ್ಶನಾಕ್ ರೂಸ್‌ವೆಲ್ಟಾಕ್ ಆಪವ್ಣೆಂ ಆಯಿಲ್ಲೆಂ ಆನಿ ಥಂಯ್ಸರ್ ತೊ ಗೆಲ್ಲೊ. ಸಂಯುಕ್ತ್ ಅರಬ್ ಎಮಿರೆತಾಚಿ ಮ್ಹಣ್ಜೆ ದುಬಾಯ್ ಶ್ಹೆರಾಚಿ ಬೆಟೆ ವಿಸಾ ದಿಲ್ಲಿ ತಾಚ್ಯಾ ಬಾಪ್ಪುನ್ ಆನಿ ಕಾಮ್ ಮೆಳೊಂಕ್ ಬಾಪ್ಪುನ್‌ಯೀ ಜಾಯ್ತಿ ಮ್ಹಿನತ್ ಕಾಡ್‌ಲ್ಲಿ. ಜಾಯ್ತ್ಯಾಂಕ್ ಪರಾತ್ತುಂಚೆ ಟೆಲಿಫೊನ್ ಉಲೆ, ಹೆಣೆಂ ತೆಣೆಂ ಧಾಂವ್, ಗಾಂವ್ಚ್ಯಾ ಮನ್ಶ್ಯಾಂಲಾಗಿಂ ಪರಾತ್ತುಂಚ್ಯೊ ಭೆಟೊ, ಥೊಡಿಂಚ್ ಸಂದರ್ಶನಾಂ ಆನಿ ಆಖೇರಿಕ್ ಫಾಯ್ದೊ ಜಾಯ್ನಾಸ್ತಾನಾ ಪಾಟಿಂ ಗಾಂವಾಕ್ ವೆಚೊ ದೀಸ್ ಯೆತಾನಾ ತ್ಯಾ ಸಂದರ್ಶನಾಕ್ ಉಲೊ ಆಯಿಲ್ಲೊ. ಇತ್ಲ್ಯಾ ದಿಸಾಂಚ್ಯಾ ಪ್ರೇತನಾನ್ ಕಾಮಾಚೆಂ ಕಾಂಯ್ ಜಾಯ್ನಾತ್ಲ್ಲೆಂ. ಆಜ್‌ಯೀ ಕಾಂಯ್ ಜಾಂವ್ಚೆಂ ನಾ ಮ್ಹಣ್ ರೂಸ್‌ವೆಲ್ಟಾನ್ ಚಿಂತ್‌ಲ್ಲೆಂ. ಸಂದರ್ಶನಾಕ್ ವಚೊನ್ ಉಪ್ರಾಂತ್ ಶೀದಾ ಏರ್‌ಪೊರ್ಟಾಕ್ ವೆಚೆಂ ಮ್ಹಳ್ಳ್ಯಾ ಚಿಂತ್ಪಾನ್ ರೂಸ್‌ವೆಲ್ಟ್ ತ್ಯಾ ಸಂದರ್ಶನಾಕ್ ಗೆಲ್ಲೊ ಮ್ಹಣ್ಯೆತ್.
ಸಂದರ್ಶನಾಕ್ ವೆತಾಸ್ತಾನಾ ರೂಸ್‌ವೆಲ್ಟಾನ್ ಖರೆಂಚ್ ಚಿಂತ್‌ಲ್ಲೆಂ- ಆಖೇರಿಚೆಂ ಏಕ್ ಪ್ರೇತನ್ ಸುಫಳ್ ಜಾಲೆಂ ತರ್ ಹ್ಯಾ ಭಾಂಗ್ರಾಳ್ಯಾ ಗಾಂವಾಂತ್ ರಾವೊಂಕ್, ಜಿಯೆಂವ್ಕ್, ಪೊಸೊಭರ್ ಪಯ್ಶೆ ಜೊಡುಂಕ್. ಕಾಮ್ ನಾ ಜಾಲೆಂ ತರ್ ಬಾಪ್ಪುಕ್ ಆನಿ ತಾಚ್ಯಾ ಉದಾರ್ ಮನಾಕ್ ರುಣಿ ಮ್ಹಣೊನ್ ಪಾಟಿಂ ಬೆಂಗ್ಳುರಾಕ್ ವಚೊಂಕ್. ಪರತ್ ತ್ಯಾಚ್ ಭಾಡ್ಯಾಚ್ಯಾ ಕುಡಾಂತ್ ರಾವೊನ್ ಭಿಕೆಚ್ಯಾ ಸಾಂಬಾಳಾಚೆಂ ಕಾಮ್ ಕರುಂಕ್. ಮೆಳ್‌ಲ್ಲ್ಯಾ ಸಾಂಬಾಳಾಂತ್ಲೊ ಥೊಡೊ ವಾಂಟೊ ಗಾಂವಾಂತ್ ಘರಾ ಪಪ್ಪಾ ಮಮ್ಮಾಕ್ ಧಾಡುನ್ ಕಶ್ಟಾಂನಿ ಜಿಯೆಂವ್ಕ್. ತ್ಯಾಚ್ ಸಾಂಬಾಳಾನ್ ಪಾಟ್ಲ್ಯಾನ್ ಆಸ್ಚ್ಯಾ ತೆಗಾಂ ಭಯ್ಣಿಂಚಿಂ ಸಪ್ಣಾಂ ಬಾಂದುಂಕ್ ಪ್ರೇತನ್ ಕರುಂಕ್.
ರೂಸ್‌ವೆಲ್ಟಾಚೆಂ ಸಂದರ್ಶನ್ ಘೆತ್‌ಲ್ಲೊ ಜಾವ್ನಾಸ್ಲ್ಲೊ ಪ್ಯಾಟ್ರಿಕ್ ಹೆಗ್ರೆನಸ್; ನೊವೆಜಿಯನ್ ಮುಳಾಚೊ ತ್ಯೆ ಕಂಪ್ಣೆಚೊ ಮ್ಹಾಲಕ್. ಭಾರಿಚ್ ಉಣೆಂ, ಪುಣ್ ಮೊಲಾಧಿಕ್ ಉಲವ್ಣೆಂ ಉಲಂವ್ಚೊ ಮನಿಸ್. ಲಾಂಬ್ ದೀಗ್ ದಾಟೊ ಮೊಟೊ ಆಕರ್ಶಿತ್ ಜಿನೊಸಾಚೊ ಮಧ್ಯ್‌ಪ್ರಾಯೆಚೊ. ತ್ಯಾ ಬಾಂದ್ಪಾಚ್ಯಾ ಪಂಚ್ವಿಸಾವ್ಯಾ ಮಾಳಿಯೆರ್ ತೆಂ ದಫ್ತರ್. ಇಂಜಿನಿಯರಿಂಗ್ ಯೋಜನಾಂಕ್ ಮ್ಹಣ್ಜೆ, ಪ್ರೋಜೆಕ್ಟ್ಸಾಂಕ್ ಸಲಹಾ ದಿಂವ್ಚಿ ತಾಚ್ಯೆ ಕಂಪ್ಣೆಚ್ಯೊ ಪ್ರಮುಖ್ ವಿಕ್ರ್ಯಾಸಾದನ್.
ತ್ಯಾ ದೀಸ್ ತ್ಯಾ ಸಂದರ್ಶನಾಂತ್ ರೂಸ್‌ವೆಲ್ಟಾಕ್ ಭಾರಿಚ್ ಸುಲಭಾಯೆನ್ ಕಾಮ್ ಮೆಳ್ಲ್ಲೆಂ. ಜಿವಿತಾಚ್ಯಾ ಚದುರಂಗ್ ಖೆಳಾಂತ್ ಭಾರಿಚ್ ಸುಲಭಾಯೆಚಿ ಚಾಲ್ ಜಾಲ್ಲಿ ಆನಿ ತ್ಯಾ ಸಾಂಗಾತಾ ಪ್ಯಾಟ್ರಿಕ್ ಹೆಗ್ರೆನಸಾಚಿ ಭೆಟ್ ಜಾಲ್ಲಿ. ಸಾಂಬಾಳ್ ರೂಸ್‌ವೆಲ್ಟಾನ್ ಚಿಂತ್‌ಲ್ಲ್ಯಾಚ್ಯಾಕ್‌ಯೀ ಚಡ್‌ಚ್ ತಾಣೆಂ ಭಾಸಾಯಿಲ್ಲೊ. ತೊ ಖುಶ್ ಜಾಲ್ಲೊ.
ಸಂದರ್ಶನ್ ಜಾವ್ನ್ ಆನಿ ಕಾಮ್ ಸ್ವೀಕಾರ್ ಕರ್ಚೆಂ ಪತ್ರ್ ಹಾತಿಂ ಘೆವ್ನ್, ಗಾಂವಾಕ್ ಗೆಲ್ಲೊ ರೂಸ್‌ವೆಲ್ಟ್ ದೋನ್ ಹಫ್ತ್ಯಾಂನಿ ಪಾಟಿಂ ದುಬಾಯ್ ಆಯಿಲ್ಲೊ- ಕಾಮಾಚ್ಯಾ ವಿಸಾಚೆರ್ ಆನಿ ತಾಣೆಂ ಕಾಮ್ ಸುರು ಕೆಲ್ಲೆಂ.
ಇಂಜಿನಿಯರ್ ಜಾವ್ನ್ ಸನದ್ ಜೊಡ್‌ಲ್ಲ್ಯಾ ರೂಸ್‌ವೆಲ್ಟಾಥಂಯ್ ತ್ಯೆ ಕಂಪ್ಣೆಂತ್ ಕಾಮ್ ಕರುಂಕ್ ಸುರು ಕರ್ತಾನಾ ಜಿವಿತಾಂತ್ ನವಿಂ ಸಪ್ಣಾಂ ಘೆವ್ನ್ ನವ್ಯೆ ದಿಶೆರ್ ಚಮ್ಕೊಂಕ್ ನವಿ ಆಶಾ ಆನಿ ನವಿ ಹುಮೆದ್ ಆಸ್ಲ್ಲಿ.
ಆನಿ, ಆಜ್ ತಾಚಿ ಬಸ್ಕಾ ಬದ್ಲಿ ಜಾಲ್ಲಿ. ತಾಚ್ಯಾ ಹಳ್ಕೆವಿಣೆಂ, ತಾಚ್ಯಾ ಆಶೆವಿಣೆಂ. ಪ್ಯಾಟ್ರಿಕ್ ಹೆಗ್ರೆನಸಾಚ್ಯಾ ಕೆಬಿನಾಭಾಯ್ರ್‌ಚ್ ಬಸೊಂಕ್ ತಾಕಿದ್ ದಿಲ್ಲಿ.
ಪ್ಯಾಟ್ರಿಕ್ ಹೆಗ್ರೆನಸಾಚ್ಯಾ ದಫ್ತರಾಚ್ಯಾ ಭಾಯ್ಲ್ಯಾನ್ ತಾಚಿ ಬಸ್ಕಾ ಮಾಂಡ್‌ಲ್ಲ್ಯಾ ಉಪ್ರಾಂತ್ಲ್ಯಾ ಬ್ರೇಸ್ತಾರಾ ಸಾಂಜೆರ್ ಕಾಮ್ ಆಖೇರ್ ಜಾಂವ್ಚೆಫುಡೆ, ಪ್ಯಾಟ್ರಿಕ್ ಹೆಗ್ರೆನಸಾನ್ ರೂಸ್‌ವೆಲ್ಟಾಕ್ ಕೆಬಿನಾಕ್ ಆಪಯ್ಲೆಂ. ಪ್ಯಾಟ್ರಿಕ್ ಹೆಗ್ರೆನಸಾಚ್ಯಾ ಮೆಜಾಮುಕ್ಲ್ಯಾನ್ ಬಸ್ಕೆಚೆರ್ ಬಸೊಂಕ್ ತಾಕಾ ಆಪವ್ಣೆಂ ಮೆಳ್ಳೆಂ ಆನಿ ತೊ ಬಸ್ಲೊ.
ರೂಸ್‌ವೆಲ್ಟ್…. ಆಜ್ ಹಾಂವ್ ತುಕಾ ಏಕ್ ವಿಶೇಸ್ ಆಪವ್ಣೆಂ ದೀಂವ್ಕ್ ಆಶೆತಾಂ. ಮ್ಹಜ್ಯಾ ಘರಾ ಯೇಂವ್ಕ್.. ಪ್ಯಾಟ್ರಿಕ್ ಹೆಗ್ರೆನಸಾನ್ ಉತ್ರಾಂ ಭಾರಿಚ್ ಹಾಳ್ವಾಯೆನ್ ವಿಂಚ್ಲಿಂ, ಆಯ್ಚಿ ಸಾಂಜ್, ಆಯ್ಚಿ ರಾತ್ ತುವೆಂ ಮ್ಹಜ್ಯಾ ಘರಾಂತ್ ಖರ್ಚುಂಚ್ಯಾಕ್ ಆನಿ ಹೆಂ ಆಪವ್ಣೆಂ ತುಂ ಸ್ವೀಕಾರ್ ಕರ್‍ತಲೊಯ್ ಮ್ಹಣ್‌ಯೀ ಪಾತ್ಯೆತಾಂ. ಹೆಂ ತುವೆಂ ಕಾಮ್ ಕರ್ಚ್ಯಾ ಸಂಸ್ಥ್ಯಾಚ್ಯಾ ಮ್ಹಾಲಕಾಚೆಂ ಆಪವ್ಣೆಂ ನ್ಹಯ್ ಬಗಾರ್ ಎಕಾ ಖರ್‍ಯಾ ಮಿತ್ರಾಚೆಂ ಆಪವ್ಣೆಂ ಮ್ಹಣ್ ಚೀಂತ್ ಆನಿ ಸ್ವೀಕಾರ್ ಕರ್. ಬರ್‍ಯಾಂತ್ಲಿ ಬರಿ ಶಾಂಪೇನ್ ಹಾಂವೆಂ ಹಾಡ್ಲ್ಯಾ. ನೊರ್ವೆಜಿಯನ್ ಜೆವಣ್ ಹಾಂವೆಂ ತಯಾರ್ ಕೆಲಾಂ. ತುಕಾ ಪಸಂದ್ ಜಾತೆಲೆಂ ಮ್ಹಣ್ ಪಾತ್ಯೆತಾಂ. ಪ್ಯಾಟ್ರಿಕ್ ಹೆಗ್ರೆನಸಾಚ್ಯಾ ವದನಾರ್ ತಸಲೊ ಅಮೃಕೊ ಹಾಸೊ ರೂಸ್‌ವೆಲ್ಟಾನ್ ಪಾಟ್ಲ್ಯಾ ಮ್ಹಯ್ನ್ಯಾಂನಿ ಕೆದ್ನಾಂಯ್ ಪಳಯಿಲ್ಲೊ ನಾ. ತ್ಯಾ ಹಾಸ್ಯಾಂತ್ ಕಸಲೆಂಗೀ ವಿಚಿತ್ರ್ ಆನಿ ವಿವರುಂಕ್ ಜಾಯ್ನಾತ್ಲ್ಲೆಂ ತಸಲೆಂ ಮಾದಕ್‌ಪಣ್‌ಯೀ ಆಸ್ಲ್ಲೆಂ.
ರೂಸ್‌ವೆಲ್ಟಾಚ್ಯೆ ಜವಾಬೆಕ್ ರಾಕನಾಸ್ತಾನಾ ಪ್ಯಾಟ್ರಿಕ್ ಹೆಗ್ರೆನಸ್ ಮುಕಾರುನ್ ಮ್ಹಣಾಲೊ- ಆಜ್ ಸಾಂಜೆರ್ ಆಟ್ ವೊರಾಂಚೆರ್ ತುಜ್ಯಾ ಬಾಂದ್ಪಾಕಡೆ ಥಾವ್ನ್ ಹಾಂವ್ ತುಕಾ ಆಪವ್ನ್ ವ್ಹರುಂಕ್ ಯೆತೊಲೊಂ…
ಉತ್ರಾಂ ಆಖೇರ್ ಕರುನ್ ಪ್ಯಾಟ್ರಿಕ್ ಹೆಗ್ರೆನಸ್ ಕೆಬಿನಾಥಾವ್ನ್ ಭಾಯ್ರ್ ಗೆಲೊ. ರೂಸ್‌ವೆಲ್ಟ್ ಥೊಡ್ಯೊ ಘಡಿಯೊ ಥಂಯ್ಸ್ ರಾವೊನ್ ಉಪ್ರಾಂತ್ ಕೆಬಿನ್ ಸೊಡುನ್ ಆಪ್ಲ್ಯೆ ಬಸ್ಕೆಚೆರ್ ಯೇವ್ನ್ ಬಸ್ಲೊ. ದಿಸಾಚ್ಯಾ ಕಾಮಾಚೊ ವೇಳ್ ಆಖೇರ್ ಜಾತಾನಾ ಘರಾ ವಚೊನ್ ನ್ಹಾಣ್ ತಿರ್‍ಸುನ್ ಬರ್‍ಯಾಂತ್ಲೆಂ ಬರೆಂ ವಸ್ತುರ್ ನ್ಹೆಸೊನ್ ಪ್ಯಾಟ್ರಿಕ್ ಹೆಗ್ರೆನಸಾಚ್ಯಾ ಆಪವ್ಣ್ಯಾಕ್ ರಾಕೊನ್ ರಾವ್ಲೊ.
ಭರ್ತಿ ಆಟ್ ವೊರಾಂಚೆರ್ ಪ್ಯಾಟ್ರಿಕ್ ಹೆಗ್ರೆನಸ್ ರೂಸ್‌ವೆಲ್ಟ್ ರಾಂವ್ಚ್ಯಾ ಬಾಂದ್ಪಾಸಕಯ್ಲ್ ಆಸ್ಲ್ಲೊ ಆನಿ ಮೊಬಾಯ್ಲ್ ಫೊನಾಚೆರ್ ಸಕಯ್ಲ್ ಯೆಂವ್ಚ್ಯಾಕ್ ಆಪವ್ಣೆಂ ದಿಲೆಂ. ಕಾಳೆಂ ಆಧುನಿಕ್ ಖಾಸ್ತಾಚೆಂ ಮರ್ಸಿಡಿಸ್ ಕಾರ್ ಘೆವ್ನ್ ಪ್ಯಾಟ್ರಿಕ್ ಹೆಗ್ರೆನಸ್ ಆಯಿಲ್ಲೊ. ತಾಚೆರ್ ಮುಕ್ಲ್ಯೆ ಬಸ್ಕೆರ್ ರೂಸ್‌ವೆಲ್ಟ್ ಬಸ್ಲೊ. ಪ್ಯಾಟ್ರಿಕ್ ಹೆಗ್ರೆನಸಾನ್ ರೂಸ್‌ವೆಲ್ಟಾಖಾತಿರ್ ಫುಲಾಂಚೊ ತುರೊ ಹಾಡ್ಲ್ಲೊ. ಸುಗಂಧ್ ದ್ರವ್ಯಾಚಿ ಬೋತ್ಲ್ ಇನಾಮ್ ಜಾವ್ನ್ ಹಾಡ್‌ಲ್ಲಿ. ಹೆಂ ಆಮ್ಚ್ಯೆ ಮಿಲಾಗತೆಕ್ ಒಳೊಕ್ ದಿಂವ್ಚ್ಯಾಕ್ ಹಾಡ್ಲಾಂ. ನೊವೆಚಿಂ ಫುಲಾಂ ಹಾಂಗಾ ದುಬಾಯ್ ಶ್ಹೆರಾಂತ್ ಮೆಳೊಂಕ್ ಭಾರಿಚ್ ಕಶ್ಟ್. ಜಾಯ್ತಿಂ ಸೊಧುನ್ ಹಾಂವೆಂ ತಿಂ ಹಾಡ್ಲ್ಯಾಂತ್ ಆನಿ ಇನಾಮ್, ಪರ್ಫ್ಯೂಮ್, ಸುಗಂಧ್ ದ್ರವ್ಯ್, ಪಾಮಾದ್ ಗಾವ್ಪಿ ರಿಕಿ ಮಾರ್ಟಿನ್ ಹಾಚ್ಯಾ ಪಸಂದೆಚೆಂ. ದಯಾ ಕರುನ್ ಸ್ವೀಕಾರ್ ಕರ್.
ರೂಸ್‌ವೆಲ್ಟಾನ್ ಫುಲಾಂ ಆನಿ ಇನಾಮಾಚಿ ಪೊಟ್ಲಿ ಘೆತ್ಲಿ. ಪ್ಯಾಟ್ರಿಕ್ ಹೆಗ್ರೆನಸಾನ್ ಆಪ್ಲ್ಯೆ ಬಸ್ಕೆರ್ ಬಸೊನ್ಂಚ್ ರೂಸ್‌ವೆಲ್ಟಾಕ್ ಆರಾಯ್ಲೆಂ; ಪೊಟ್ಲುನ್ ಧರ್ಲೆಂ ಆನಿ ಪೊಲ್ಯಾರ್ ಉಮೊ ದಿಲೊ. ಪ್ಯಾಟ್ರಿಕ್ ಹೆಗ್ರೆನಸಾಚ್ಯಾ ಘರಾ ಪಾವೊಂಕ್ ಅರ್ಧೊ ಘಂಟೊ ಲಾಗ್ಲೊ. ತ್ಯಾ ಅರ್ಧ್ಯಾ ಘಂಟ್ಯಾಚ್ಯೆ ವಾಟೆರ್ ತೆ ಕಿತೆಂಚ್ ಉಲಯ್ಲೆನಾಂತ್; ಫಕತ್ ಮಾರ್ಗಾರ್ ಆಸ್ಚ್ಯಾ ಜಳ್ಚ್ಯಾ ದಿವ್ಯಾಂಕ್ ಆನಿ ಪಾಶಾರ್ ಜಾವ್ನ್ ವೆಚ್ಯಾ ವಾಹನಾಂಕ್ ಪಳವ್ನ್ ವೇಳ್ ಪಾಶಾರ್ ಜಾಲೊ. ರೂಸ್‌ವೆಲ್ಟಾಚ್ಯಾ ಕಾಳ್ಜಾಂತ್ ವಿಚಿತ್ರ್ ಭೊಗ್ಣಾಂಚೆಂ ತುಫಾನ್ ಆಸ್ಲ್ಲೆಂ ತರ್ ಪ್ಯಾಟ್ರಿಕ್ ಹೆಗ್ರೆನಸ್ ಕಿತೆಂ ಚಿಂತ್ತಾಲೊ ತೆಂ ರೂಸ್‌ವೆಲ್ಟಾಕ್ ಕಳಿತ್ ನಾತ್ಲ್ಲೆಂ.
ದುಬಾಯ್ ಶ್ಹೆರಾಂತ್ ಗ್ರೇಸ್ತ್ ವರ್ಗಾಚ್ಯಾಂನಿ ವಸ್ತಿ ಕರ್ಚ್ಯಾ ಲಾಂಬ್ ದೀಗ್ ವಸ್ತೆಬಾಂದ್ಪಾಮದೆಂ ಏಕ್ ಬಾಂದಪ್ ತೆಂ. ಧರ್‍ಣಿಪಂದ್ಲ್ಯಾ ಕಾರ್ ರಾವಂವ್ಚ್ಯಾ ಜಾಗ್ಯಾಂತ್ ಕಾರ್ ಉಬೆಂ ಕರುನ್ ಲಿಫ್ಟಾಂತ್ಲ್ಯಾನ್ ತೆ ದೊಗ್‌ಯೀ ವಯ್ರ್ ಆಯ್ಲೆ. ಪಂದ್ರಾವ್ಯಾ ಮಾಳಿಯೆವಯ್ಲ್ಯಾ ಆಧುನಿಕ್ ರಿತಿಚ್ಯಾ ಆನಿ ಸೊಭಾಯೆಚ್ಯಾ ಘರಾಂತ್ ರಿಗ್ತಾನಾ ಥಂಯ್ಸರ್ ಪಾತಳ್ ಉಜ್ವಾಡ್ ಆಸ್ಲ್ಲೊ. ಹವಾ ನಿಯಂತ್ರಿತ್ ಸವ್ಲತಾಯ್ ಚಾಲುಚ್ ಆಸ್ಲ್ಲ್ಯಾನ್ ಥಂಡ್ ಆಸ್ಲ್ಲೆಂ.
ಘರಾಭಿತರ್ ವಿಸ್ತಾರ್ ಸಾಲಾಂತ್ ತಾಂಬ್ಡ್ಯಾ ರಂಗಾಚ್ಯೊ ಬಸ್ಕಾ ಆಸ್ಲ್ಲ್ಯೊ. ಭೊಂವ್ತಣಿ ತಾಂಬ್ಡ್ಯಾ ಗುಲೊಬಾಸವೆಂ ಜಿವ್ಯಾ ಫುಲಾಂಚಿಂ ವ್ಹಾಜಾಂ ಮಾಂಡ್‌ಲ್ಲಿಂ. ತ್ಯಾ ಫುಲಾಂಚೊ ಪರ್ಮಳ್ ಥಂಯ್ಸರ್ ಭರೊನ್ ಗೆಲ್ಲೊ. ರಾಯಾಳ್ ರಿತಿಚ್ಯಾ ಘರಾಂತ್ ರಿಗ್ತಾನಾ ರೂಸ್‌ವೆಲ್ಟಾಚ್ಯಾ ಆಂಗಾಂತ್ ಮಿರ್ಮಿರೆ ಭರ್ಲೆ. ಮನ್ ಪುಳಕಿತ್ ಜಾಲೆಂ. ಆಪ್ಣಾಖಾತಿರ್ ಅಸಲಿ ತಯಾರಾಯ್ ಕಿತ್ಯಾಕ್ ಪ್ಯಾಟ್ರಿಕ್ ಹೆಗ್ರೆನಸಾನ್ ಕೆಲ್ಯಾ ತೆಂ ತಾಕಾ ಖಂಡಿತ್ ಜಾವ್ನ್ ಸಮ್ಜಲ್ನಾ. ಕಾಳ್ಜಾಂತ್ ದಡ್ದಡೆ ಭರ್‍ಲೆಚ್. ತೊ ಬಾರಿಕಾಯೆನ್ ಕಾಂಪೊಂಕ್ ಲಾಗ್ಲೊ…
ಮುಕ್ಲ್ಯಾ ಸೊಫಾಚೆರ್ ದೊಗ್‌ಯೀ ಬಸ್ಲೆ.
ಮ್ಹಜ್ಯಾ ಘರಾಂತ್… ಮ್ಹಜ್ಯಾ ಬಿಡಾರಾಕ್ ಸ್ವಾಗತ್ ತುಕಾ ರೂಸ್‌ವೆಲ್ಟ್. ಹಾಂಗಾಸರ್ ಹಾಂವ್ ಎಕ್ಲೊಂಚ್ ವಸ್ತಿ ಕರ್ತಾಂ ಆನಿ ತಶೆಂ ಆಜ್ ಹ್ಯಾ ಘರಾಂತ್ಲಿ ಇತ್ಲಿ ಮಾಂಡಾವಳ್ ಕರುಂಕ್ ಭಾಯ್ಲೆ ಮನಿಸ್ ಆಯಿಲ್ಲೆ. ಹಿ ಮಾಂಡಾವಳ್ ತುಕಾ ಪಸಂದ್ ಜಾಲಿ ಮ್ಹಣ್ ಪಾತ್ಯೆತಾಂ.
ರೂಸ್‌ವೆಲ್ಟಾನ್ ಪರತ್ ಭೊಂವಾರಿಂ ದೀಶ್ಟ್ ಭೊಂವ್ಡಾಯ್ಲಿ. ಸೊಭಾಯೆಕ್ ವಾಖಣ್ತಾಂ ಮ್ಹಣ್ ಕುಸ್ಕುಟ್ ಹಾಸ್ಲೊ ಮಾತ್ರ್. ಸಾಲಾಂತ್ ಕೊನ್ಶ್ಯಾರ್ ಸೊರ್‍ಯಾಚೆಂ ಬಾರ್ ಆಸ್ಲ್ಲೆಂ. ತಾಂತುಂ ವಿವಿಧ್ ಖಾಸ್ತಾಚ್ಯೊ ವಿವಿಧ್ ನಾಂವಾಂಚ್ಯೊ ಸೊರ್‍ಯಾಚ್ಯೊ ಬೊತ್ಲಿ ಭರೊನ್ ಗೆಲ್ಲ್ಯೊ. ತಾಂತ್ಲಿ ಏಕ್ ಶಾಂಪೇನಾಚಿ ಬೋತ್ಲ್ ಪ್ಯಾಟ್ರಿಕ್ ಹೆಗ್ರೆನಸಾನ್ ವಿಂಚ್ಲಿ. ಉಜ್ವಳ್ಚೆ ಲಾಂಬ್ ಶಾಂಪೇನಾಚೆ ದೋನ್ ಗ್ಲಾಸ್‌ಯೀ ವಿಂಚ್ಲೆ. ಮುಕ್ಲ್ಯಾ ಟಿಪೊಯ್‌ಚೆರ್ ತೆ ದವರುನ್ ತೊ ಮ್ಹಣಾಲೊ ಭಾರಿಚ್ ವಿಂಚ್ಣಾರ್ ಶಾಂಪೇನ್ ಹಿ…. ಆಮ್ಚ್ಯಾ ನೊರ್ವೆಂತ್ ಆಮಿ ವ್ಹಡಾ ಫೆಸ್ತಾವೆಳಿಂ ವಾ ಕಾಜಾರಾಚ್ಯಾ ಸಂಭ್ರಮಾಂತ್ ವಾಪಾರ್‍ತಾಂವ್. ಪ್ರತ್ಯೇಕ್ ಜಾವ್ನ್ ಏಕ್ ಆಪ್ತ್ ಮಿತ್ರ್ ಘರಾಂತ್ ಆಯ್ಲ್ಯಾರ್ ತಾಕಾ ಮಾನ್ ಕರ್‍ಚ್ಯಾಕ್‌ಯೀ ಆಮಿ ಅಸಲಿ ಬೋತ್ಲ್ ಉಗ್ತಿ ಕರ್ತಾಂವ್. ಆನಿ ಆಜ್, ಹ್ಯಾ ಘರಾಂತ್ ತುಜ್ಯಾ ಯೆಣ್ಯಾಕ್ ಆಚರಣ್ ಕರುಂಕ್ ಹಿ ಶಾಂಪೇನ್… ಆವಾಜಾನ್ ತಿ ಬೋತ್ಲ್ ಪ್ಯಾಟ್ರಿಕ್ ಹೆಗ್ರೆನಸಾನ್ ಉಗ್ತಿ ಕೆಲಿ. ಪಾತಳ್ ಧುಂವರ್‌ಸೊ ತಾಂತ್ಲ್ಯಾನ್ ಭಾಯ್ರ್ ಆಯ್ಲೊ. ದೋನ್ ಗ್ಲಾಸಾಂನಿ ತಾಣೆಂ ಶಾಂಪೇನ್ ವೊತ್ಲಿ ಆನಿ ಏಕ್ ಗ್ಲಾಸ್ ರೂಸ್‌ವೆಲ್ಟಾಕ್ ದೀವ್ನ್ ಮ್ಹಣಾಲೊ- ಹಿ ಮ್ಹಜ್ಯಾ ಕಾಳ್ಜಾಂತ್ಲಿ ಆಶಾ… ಆಮ್ಚಿ ಆಯ್ಚಿ ಮಿಲಾಗತ್ ಜಾಯ್ತ್ಯಾ ವರ್‍ಸಾಂಚ್ಯೆ ಇಶ್ಟಾಗಾತೆಕ್ ಬಳ್ವಂತ್ ಬುನ್ಯಾದ್ ಘಾಲುಂ. ತಶೆಂಚ್ ಜಾಂವ್…
ರೂಸ್‌ವೆಲ್ಟಾಕ್ ತ್ಯಾ ಉತ್ರಾಂಥಂಯ್ ಆಸ್ಯೆತ್ ಜಾಲ್ಲ್ಯಾ ಗೂಂಡ್ ಅರ್ಥಾಕ್ ಸಮ್ಜಲೆಂ ನಾ. ಗ್ಲಾಸ್ ಘೆವ್ನ್ ಪ್ಯಾಟ್ರಿಕ್ ಹೆಗ್ರೆನಸಾಚ್ಯಾ ಗ್ಲಾಸಾಕ್ ಆದ್ಳಾಯ್ಲೊ. ಬರೆಂ ಮಾಗ್ಲೆಂ. ಮೊಲಾಧಿಕ್ ಆನಿ ರುಚಿಕ್ ಶಾಂಪೇನ್ ರುಚಿನ್ ಸೆವ್ತಾನಾ ಗ್ರೇಸ್ತ್‌ಕಾಯೆಚ್ಯಾ ಕಾಂಬ್ಳಿಕ್ ಪಾಂಗುರ್‌ಲ್ಲೆಬರಿ ತಾಕಾ ಜಾಲೆಂ.
ನೊರ್ವೆಚೆಂ ಜೆವಣ್ ತಯಾರ್ ಆಸ್ಲ್ಲೆಂ. ಮೊಲಾಧಿಕ್ ಸಾಲ್ಮೊನ್ ಮಾಸ್ಳೆಚೆಂ ನೊರ್ವೆಜಿಯನ್ ರುಪಾಚೆಂ ರಾಂದಪ್- ಸ್ಮೊಕ್ಡ್ ಸಾಲ್ಮೊನ್, ಥಂಯ್ಚ್ಯಾಚ್ ಬೊಕ್ರ್ಯಾಚೆಂ ಸ್ಟು ಆನಿ ತಶೆಂ ರಶಿಯನ್ ಸಾಲಾದ್. ಉಂಡ್ಯಾಚಿಂ ಕಾಪಾಂ ಆನಿ ತಾಚೆರ್ ಮಾಖುಂಕ್ ಪಾಂಚ್ ನಮುನ್ಯಾಚಿಂ ಚೀಸ್ ಆನಿ ಲೊಣಿ. ಗಾರ್ಫ್, ಕುಲೆರ್ ಆನಿ ಜೆವ್ಣಾಸುರಿಯೆಕ್ ಹಾತಿಂ ಧರುನ್ ತೊ ಪಯ್ಲೆಪಾವ್ಟಿಂ ಜೆವ್ಲೊ ಯಾ ಜೇಂವ್ಕ್ ಉರ್ಡಾಲೊ.
ಜೆವಣ್ ಜಾಲೆಂ. ಪ್ಯಾಟ್ರಿಕ್ ಹೆಗ್ರೆನಸಾನ್ಂಚ್ ಮೇಜ್ ನಿತಳ್ ಕೆಲೆಂ. ಸ್ಟ್ರೊಬೆರಿ ಆನಿ ರಾಸ್‌ಬೆರಿ ಭರೊನ್ ಆಸ್ಲ್ಲೆಂ ಫಳಾಂತಾಟ್ ಟಿಪೊಯ್ ವಯ್ರ್ ದವರುನ್ ತೊ ಮ್ಹಣಾಲೊ- ನೊರ್ವೆಂತ್ ಹಿಂ ಫಳಾಂ ಭಾರಿಚ್ ಪಾಮಾಧ್. ಭಾರಿಚ್ ರುಚಿಕ್. ತುಜೆಖಾತಿರ್ ಹಾಂವೆಂ ಹಾಡಯ್ಲ್ಯಾಂತ್ ಆನಿ ಉಪ್ರಾಂತ್ ಯೇವ್ನ್ ರೂಸ್‌ವೆಲ್ಟಾಲಾಗಿಂ ತೊ ಬಸ್ಲೊ.
ಪರತ್ ಲಾಂಬ್ ಆನಿ ಶೀತಳ್ ಮಾವ್ನ್‌ಪಣ್.
ಜಿವಿತ್ ಎಕಾ ಹುಂಬ್ರಾರ್ ಸುರು ಜಾತಾ ರೂಸ್‌ವೆಲ್ಟ್ ಪ್ಯಾಟ್ರಿಕ್ ಹೆಗ್ರೆನಸಾನ್ ಉಲವ್ಣ್ಯಾಕ್ ಬುನ್ಯಾದ್ ಘಾಲಿ. ಹಾಂವ್ ಆತಾಂ ಉಲಯ್ತಾಂ ತೆಂ ಸಾರ್ಕೆಂ ಯಾ ಚೂಕ್ ತೆಂ ಹಾಂವ್ ನೆಣಾಂ ಪುಣ್ ಮ್ಹಾಕಾ… ಮ್ಹಜ್ಯೆ ಮತಿಕ್ ತೆಂ ಸಾರ್ಕೆಂ ಮ್ಹಣ್ ದಿಸ್ತಾ ಆನಿ ಮ್ಹಾಕಾ ತೆಂ ಖುಶ್ ಕರ್ತಾ ಆನಿ ಮ್ಹಾಕಾ ಬರೊ ಅನ್ಭೋಗ್ ದಿತೆಲೆಂ ಮ್ಹಣ್ ಭರ್‍ವಸೊ ಆಸಾ ಆನಿ ತ್ಯಾ ಖಾತಿರ್ ಹಾಂವ್ ಉಲಯ್ತಾಂ…
ಸರ್… ರೂಸ್‌ವೆಲ್ಟ್ ದಫ್ತರಾಂತ್ ತಾಕಾ ಉಲ್ಲೇಖ್ ಕರ್‍ಚೆಬರಿಚ್ ಉಲಯ್ಲೊ, ಹಾಂವ್ ಆತಾಂ ಪಾಟಿಂ ಘರಾ ವಚೊಂಕ್ ಆಶೆತಾಂ.
ಪ್ಯಾಟ್… ಪ್ಯಾಟ್ರಿಕ್ ಹೆಗ್ರೆನಸನ್ ರೂಸ್‌ವೆಲ್ಟಾಕ್ ತಕ್ಶಣ್ ತಿದ್ವಿಲ್ಲೆಬರಿ ಮ್ಹಣಾಲೊ, ಮ್ಹಾಕಾ ಚಡಾವತ್ ಜಾವ್ನ್ ಮ್ಹಜ್ಯಾ ಕುಟ್ಮಾಚಿಂ ಮೊಗಾನ್ ‘ಪ್ಯಾಟ್’ ಮ್ಹಣ್ತಾತ್ ಆನಿ ತುಂವೆಂಯ್ ತ್ಯಾಚ್ ನಾಂವಾನ್ ಆಪಯ್ಲ್ಯಾರ್ ಬರೆಂ. ತುವೆಂ ಘರಾ ವಚ್ಯೆತ್ ಪುಣ್ ಹಾಂವೆಂ ಉಚಾರ್ಚೆಂ ಸರ್ವ್ ಸಂಪೂರ್ಣ್ ಜಾವ್ನ್ ಆಯ್ಕೊನ್ ಉಪ್ರಾಂತ್ ತುವೆಂ ವಚ್ಯೆತ್ ಆನಿ ತ್ಯಾ ಖಾತಿರ್ ಮ್ಹಜಿ ಕಾಂಯ್ಂಚ್ ಅಡ್ಡಿ ನಾ…
ಥೊಡ್ಯಾ ಘಡಿಯಾಂಚೆಂ ಪರತ್ ಮಾವ್ನ್‌ಪಣ್.
ಥೊಡ್ಯಾ ಮ್ಹಯ್ನ್ಯಾಂಪಯ್ಲೆಂ ತುಂ ಕಾಮಾಚ್ಯಾ ಸೊಧ್ನೆರ್ ಸಂದರ್ಶನಾಕ್ ಆಮ್ಚ್ಯಾ ದಫ್ತರಾಕ್ ಯೆತಾನಾ, ತುಕಾ ದೆಕ್‌ಲ್ಲೆಂಚ್ ಮ್ಹಜ್ಯಾ ಕಾಳ್ಜಾಂತ್ ಉಮಾಳೆ ಉಟ್‌ಲ್ಲೆ. ತುಜೆಂ ರೂಪ್… ತುಜ್ಯಾ ಜಿವಾಂತ್ ದಿಸ್ಚೆಂ ತರ್ನಾಟ್‌ಪಣ್… ಕೊಣಾಯ್ಕೀ ಪಿಶ್ಯಾರ್ ಘಾಲ್ಚೊ ತುಜೊ ಹಾಸೊ… ತೆಂ ದೆಕೊನ್ ಹಾಂವ್ ಪಿಸೊಚ್ ಜಾಲ್ಲೊಂ… ತುಜ್ಯಾ ಕಾಮಾಚ್ಯಾ ತಾಲೆಂತಾಕ್ ನ್ಹಯ್ ಬಗಾರ್ ತುಜ್ಯಾ ಭುಲ್ಚ್ಯಾ ವೆಕ್ತಿತ್ವಾಕ್ ಪಳವ್ನ್ ಹಾಂವೆಂ ತುಕಾ ವಿಂಚ್‌ಲ್ಲೊ. ಮ್ಹಜ್ಯಾ ಸ್ವಾರ್ಥಾಕ್ ಮ್ಹಳ್ಳೆಬರಿ ತುಕಾ ಹಾಂವೆಂ ಕಾಮಾಕ್ ವಿಂಚ್ಲೊ… ಪ್ಯಾಟ್ರಿಕ್ ಹೆಗ್ರೆನಸ್ ಮುಕಾರುನ್ ಉಲಂವ್ಚ್ಯಾಕ್ ಭಾರಿಚ್ ಜಾಗ್ರುತ್ಕಾಯೆನ್ ಉತ್ರಾಂ ವಿಂಚುಂಕ್ ಲಾಗ್ಲೊ. ಮ್ಹಜ್ಯಾ ಕುಡಿಚ್ಯಾ ಶಿರಾಂನಿ ವ್ಹಾಳ್ಚ್ಯಾ ರಗ್ತಾಂತ್ ಚಲಿಯಾಂಕ್ ಆಶೆಂವ್ಚೆ ಉಮಾಳೆ ನಾಂತ್. ಹಾಂವ್ ದಾದ್ಲ್ಯಾಂಕ್ ಆಶೆಂವ್ಚೊ ಮನಿಸ್… ತುಕಾ ಕಾಮಾಕ್ ವಿಂಚ್ತಾನಾ ಮ್ಹಜ್ಯಾ ಸಾಂಗಾತಾ ಆಸ್ಲ್ಲೊ ಎಕ್ಲೊ ಚಲೊ ಮ್ಹಾಕಾ ಸೊಡುನ್ ಗೆಲ್ಲೊ. ತ್ಯಾ ಖಾತಿರ್‌ಚ್ ಕೊಣ್ಣಾ ತುಂ ಮ್ಹಜೆಸಮೊರ್ ಉದೆಲೊಯ್…
ಪ್ಯಾಟ್ರಿಕ್ ಹೆಗ್ರೆನಸ್ ಆತಾಂ ರೂಸ್‌ವೆಲ್ಟಾಚ್ಯಾ ಲಾಗಿಂ… ಬೋವ್ ಲಾಗಿಂ ಬಸ್ಲೊ. ರೂಸ್‌ವೆಲ್ಟಾಚೊ ಹಾತ್ ಆಪ್ಲ್ಯಾ ದೊನ್‌ಯೀ ಹಾತಿಂ ಘೆತ್ಲೊ.
ಆನಿ ತುಕಾ ಪಳಯ್ಲ್ಯಾ ಉಪ್ರಾಂತ್ ಮ್ಹಾಕಾ ತುಜೆರ್ ಸಂಪೂರ್ಣ್ ಮನ್ ಪಡ್ಲಾಂ. ಹರ್ಯೇಕ್ ದೀಸ್… ಹರ್ಯೇಕ್ ದೀಸ್… ತುಕಾ ಪಳಯ್ತಾನಾ ಹಾಂವ್ ತುಜೆರ್ ಪಿಸೊಂ ಜಾತಾಂ ತಶೆಂ ಭೊಗ್ತಾ…
ರೂಸ್‌ವೆಲ್ಟಾಚೆಂ ಆಂಗ್ ಹಿಂವಾಳ್ಳೆಂ… ಎಕೆ ರಿತಿಚ್ಯೆ ಹಳ್ಶಿಕಾಯೆನ್. ಪ್ಯಾಟ್ರಿಕ್ ಹೆಗ್ರೆನಸಾಥಾವ್ನ್ ಹೆಂ ವರ್ತನ್ ತೊ ಆಶೆನಾತ್‌ಲ್ಲೊ. ಆಪ್ಲ್ಯೆ ಬಸ್ಕೆರ್ ಥಾವ್ನ್ಂಚ್ ಪಯ್ಸ್ ವಚೊಂಕ್ ಆಶೆಲೊ ತರ್ ಪ್ಯಾಟ್ರಿಕ್ ಹೆಗ್ರೆನಸಾನ್ ತಾಕಾ ಆರಾಯ್ಲೊ.
ತುಂ ಮ್ಹಜ್ಯಾ ಸಾಂಗಾತಾ ಜಿಯೆಲ್ಲೆವರ್ವಿಂ ತುಜೆಂ ಜಿವಿತ್ ಬದಲ್ತೆಲೆಂ, ತುಂ ಬದಲ್ತೊಲೊಯ್… ಹಾಂವ್ ತುಜೆಲಾಗಿಂ ಪರಾತ್ತಾಂ ರೂಸ್‌ವೆಲ್ಟ್ ಮ್ಹಜೆಥಾವ್ನ್ ಪಯ್ಸ್ ವಚಾನಾಕಾ… ಗೆಲೊಯ್ ತರ್ ಹಾಂವ್ ಜಿಯೆಂವ್ಕ್ ಸಕ್ಚೊಂ ನಾ…
ರೂಸ್‌ವೆಲ್ಟಾನ್ ಪ್ಯಾಟ್ರಿಕ್ ಹೆಗ್ರೆನಸಾಚ್ಯಾ ದೊಳ್ಯಾಂಕ್ ಪಳಯ್ಲೆಂ. ತಾಂತು ಮೊಗಾಚೊ ಛಾರೊ ಆಸ್ಲ್ಲೊ. ಅಸ್ವಾಭಾವಿಕ್ ಜಳ್ತೆಂ ಕಾಮುಕ್‌ಪಣ್ ವಿಶೇಸ್ ಮಾಪಾನ್ ಆಸ್ಲ್ಲೆಂ.
ಜಿವಿತಾಂತ್ಲಿ ಬದ್ಲಾವಣ್… ಹರ್ಯೇಕ್ ಬದ್ಲಾವಣ್… ಹಿಯ್ ಏಕ್ ಬದ್ಲಾವಣ್… ಆಪ್ಲ್ಯಾ ಆನಿ ಆಪ್ಲ್ಯಾಂಚ್ಯಾ ಬರೆಪಣಾಕ್ ಹೆಂ ಆಪವ್ಣೆಂ ಸ್ವೀಕಾರ್ ಕೆಲೆಂ ತರ್? ತ್ಯಾಚ್ ವೆಳಿಂ ಬಲಾತ್ಕಾರಾನ್ ಆಪ್ಲ್ಯಾ ಕಾಳ್ಜಾಚ್ಯೆ ಗುಂಡಾಯೆಂತ್ ಉಮಾಳ್ಯಾಂಚಿ ಬದ್ಲಾವಣ್ ಹಾಡ್ಲಿ ರೂಸ್‌ವೆಲ್ಟಾನ್ ಆನಿ ತ್ಯೆ ಬದ್ಲಾವಣೆನ್ ನವ್ಯಾ ಜಿವಿತಾಚಿ ಬುನ್ಯಾದ್ ಘಾಲಿಚ್…
ಪ್ಯಾಟ್ರಿಕ್ ಹೆಗ್ರೆನಸಾನ್ ಆಪ್ಲೆಂ ವದನ್ ಮುಕಾರ್ ಹಾಡ್ಲೆಂ… ವೋಂಟ್ ಆನಿಕ್‌ಯೀ ಮುಕಾರ್… ರೂಸ್‌ವೆಲ್ಟಾನ್ ಹೆಳ್ಕೆಭಾಯ್ರ್ ತ್ಯಾ ವೊಂಟಾಂಕ್ ಆಪ್ಲೆ ವೋಂಟ್ ಮೆಳಯ್ಲೆ…
ಆನಿ ತೆದ್ನಾಂ ಸುಕ್ಯಾ ದೊಂಗ್ರಾರ್ ಜಿವ್ಯೊ ಆಂಕ್ರ್ಯೊ ಫುಟ್‌ಲ್ಲೊ ಅನ್ಭೋಗ್ ದೊಗಾಂಯ್ಕೀ ಜಾಲೊ…
ಜಿವ್ಯೆ ಆಂಕ್ರೆಂತ್ ನವೆಂ ಫಳ್
ಆಯ್ತಾರಾಚೊ ದೀಸ್. ಗಲ್ಫಾಂತ್ ಹಫ್ತ್ಯಾಚೊ ಪಯ್ಲೊ ದೀಸ್. ರೂಸ್‌ವೆಲ್ಟ್ ಆಪ್ಲ್ಯಾ ಘರಾಥಾವ್ನ್ ಭಾಯ್ರ್ ಸರೊನ್ ಆಫಿಸಾಕ್ ವೆತಾನಾ ಇಲ್ಲೊ ತಡವ್ ಜಾಲ್ಲೊ ಆನಿ ಖರೆಂಚ್ ಸಾಂಗ್ಚೆಂ ತರ್ ಆಯ್ಚ್ಯಾ ದಿಸಾ ತಾಕಾ ಅಜ್ಯಾಪ್ ರಾಕೊನ್ ಆಸ್ಲ್ಲೆಂ.
ಪಯ್ಲೆಂ- ತಾಚಿ ಭಡ್ತಿ ಜಾಲ್ಲಿ. ಏಕ್ ಸಾದೊ ಆನಿ ನವೊಚ್ ಇಂಜಿನಿಯರ್ ಜಾವ್ನ್ ಸೆರ್ವೊನ್ ಥೊಡೆಚ್ ಮ್ಹಯ್ನೆ ಜಾಲ್ಲ್ಯಾಕ್ ಆಜ್ ಪ್ಯಾಟ್ರಿಕ್ ಹೆಗ್ರೆನಸಾನ್ ಸಕಾಳಿಂಫುಡೆಚ್ ಭಡ್ತೆಚೆಂ ಪತ್ರ್ ತಯಾರ್ ಕೆಲ್ಲೆಂ ಆನಿ ದಸ್ಕತ್ ಘಾಲ್ಲಿ. ಕಂಪ್ಣೆಚೊ ಪಬ್ಲಿಕ್ ರಿಲೇಶನ್ ಒಫಿಸರ್ ತೆಂ ಪತ್ರ್ ಘೆವ್ನ್ ರೂಸ್‌ವೆಲ್ಟಾಚ್ಯಾ ಯೆಣ್ಯಾಕ್ ರಾಕೊನ್ ಆಸ್ಲ್ಲೊ. ತಾಂತ್ರಿಕ್ ವಿಭಾಗಾಚೊ ಮೆನೆಜರ್ ತೊ ಜಾಲ್ಲೊ. ಪ್ಯಾಟ್ರಿಕ್ ಹೆಗ್ರೆನಸಾಚ್ಯಾ ಕೆಬಿನಾಚ್ಯೆ ಬಗ್ಲೆನ್ ಆನ್ಯೇಕ್ ಕೆಬಿನ್ ತಯಾರ್ ಜಾಲ್ಲೆಂ.
ದುಸ್ರೆಂ- ತಾಕಾ ದುಬಾಯ್ ಶ್ಹೆರಾಚೆಂ ಕಾರಾಚೆಂ ಲೈಸನ್ಸ್ ಕಾಡ್ಚ್ಯಾಕ್ ತರ್‍ಬೆತಿ ದಿಂವ್ಚೊ ಮನಿಸ್ ತಯಾರ್ ಆಸ್ಲ್ಲೊ. ದುಸ್ರ್ಯಾ ದಿಸಾ ತಾಕಾ ತರ್‍ಬೆತಿ ಲೈಸನ್ಸ್ ಕಾಡುಂಕ್ ಆಸ್ಲ್ಲೆಂ.
ತಿಸ್ರೆಂ- ಸರ್ವಾಂಚ್ಯಾಕ್‌ಯೀ ಚಡ್ತಿಕ್ ಜಾವ್ನ್ ತಾಚೊ ಸಾಂಬಾಳ್ ತೀನ್ ವಾಂಟ್ಯಾಂನಿ ಚಡ್ ಜಾಲ್ಲೊ. ಪಯ್ಶ್ಯಾಂಚೊ ಫೆರ್ಗೊ ಮೆಳ್‌ಲ್ಲೆಬರಿ.
ಸರ್… ಹೆಂ ಸರ್ವ್ ದೆಕೊನ್ ಸಗ್ಳೊಚ್ ಘಾಬರೊನ್ ಪ್ಯಾಟ್ರಿಕ್ ಹೆಗ್ರೆನಸಾಚ್ಯಾ ಕೆಬಿನಾಕ್ ರೂಸ್‌ವೆಲ್ಟ್ ಗೆಲೊ ಆನಿ ಮ್ಹಣಾಲೊ, ಹೆಂ ಮ್ಹಜ್ಯಾನ್ ಜಾಂವ್ಚೆಂ ನಾ…. ಯೆದೊ ವ್ಹಡ್ ಹುದ್ದೊ ಹಾಂವ್ ಸಾಂಬಾಳುಂಕ್ ಸಕ್ಚೊಂ ನಾ…
ಪ್ಯಾಟ್ರಿಕ್ ಹೆಗ್ರೆನಸ್ ಸದಾಂಚ್ಯೆ ಗಂಭೀರಾಯೆನ್ ಆಸ್ಲ್ಲೊ. ಹ್ಯಾ ವಿಶ್ಯಾಂತ್ ಆತಾಂ ಉಲಂವ್ಕ್ ಜಾಯ್ನಾ. ತುಕಾ ಹಾಂವೆಂ ಹ್ಯಾ ಹುದ್ದ್ಯಾಕ್ ವಿಂಚ್ಲಾ ಆನಿ ತ್ಯಾ ಹುದ್ದ್ಯಾರ್ ತುವೆಂ ಆಸಜೆ. ಕಶೆಂ ತೊ ಹುದ್ದೊ ಸಾಂಬಾಳ್ಚೊ ತೆಂ ತುವೆಂ ಚಿಂತಿಜೆ. ತುಕಾ ಶಿಕಪ್ ಆಸಾ, ಬುದ್ವಂತ್ಕಾಯ್ ಆಸಾ. ಚಡ್ ಜಾವ್ನ್ ಹಾಂವ್ ತುಜ್ಯಾ ಸಾಂಗಾತಾಂತ್ ಆಸಾಂ. ತುಕಾ ಕುಮಕ್ ಜಾಯ್ ತರ್ ಮ್ಹಾಕಾ ವಿಚಾರ್….
ನವೊ ಅವಸ್ವರ್ ರೂಸ್‌ವೆಲ್ಟಾನ್ ಸ್ವೀಕಾರ್ ಕೆಲ್ಲೊ. ತ್ಯಾ ಹಫ್ತ್ಯಾಂತ್ ರೂಸ್‌ವೆಲ್ಟಾಚ್ಯಾ ಜಿವಿತಾಂತ್ ಆನಿಕ್‌ಯೀ ಚಡ್ ಬದ್ಲಾವಣ್ ಆಯಿಲ್ಲಿ. ಜಿವಿತಾಂತ್ ಅಶೆಂ ಜಾಯ್ತ್ ಮ್ಹಣ್ ಚಿಂತಿನಾತ್‌ಲ್ಲ್ಯಾ ತಸಲಿ ಬದ್ಲಾವಣ್. ಪ್ಯಾಟ್ರಿಕ್ ಹೆಗ್ರೆನಸಾನ್ ತಾಕಾ ವೃತ್ತಿಪರ್ ಜಿವಿತಾಂತ್ ಆಕಾಸಾರ್ ಉಬೊಂಕ್ ಆವ್ಕಾಸ್ ದಿಲ್ಲೊ. ತ್ಯಾ ಹಫ್ತ್ಯಾಂತ್ ಕಂಪ್ಣೆಚ್ಯಾ ಉಂಚ್ಲ್ಯಾ ಸಿಬಂಧೆಕ್ ಮಾತ್ರ್ ನ್ಹಯ್, ಉಂಚ್ಲ್ಯಾ ಗಿರಾಯ್ಕಿ ಕಂಪ್ಣ್ಯಾಂಕ್ ತಾಚ್ಯೊ ಭೆಟೊ ಜಾಲ್ಯೊ.
ತ್ಯಾ ಹಫ್ತ್ಯಾಂತ್ ಪ್ಯಾಟ್ರಿಕ್ ಹೆಗ್ರೆನಸಾನ್ ದುಬಾಯ್ ಶ್ಹೆರಾಂತ್ಲ್ಯಾ ಊಂಚಿ ವಿಕ್ರ್ಯಾ ಮಾಳಿಯಾಂನಿ ರೂಸ್‌ವೆಲ್ಟಾಕ್ ವ್ಹರ್ನ್ ಮೊಲಾಧಿಕ್ ವಸ್ತುರ್ ಆನಿ ತಾಚೊ ಜಿನೊಸ್ ಬದ್ಲುಂಚೊ ವಸ್ತು ಘೆತ್ಲ್ಯೊ. ಪಯ್ಲೊಚ್ ಗೊರೊ ಆನಿ ದಾಟೊ ಮೊಟೊ ಆಸ್ಚೊ ರೂಸ್‌ವೆಲ್ಟ್ ಆತಾಂ ಆನಿಕ್‌ಯೀ ಬರೊ ದಿಸ್ತಾಲೊ.
ಹಫ್ತ್ಯಾಚ್ಯಾ ಬುದ್ವಾರಾ ಬರ್ಯಾ ಸೆಲೂನಾಕ್ ವಚೊನ್ ಕೇಸ್ ಆನಿ ಖಾಡ್ ಕಾಡವ್ನ್ ತೊಂಡಾಕ್ ಮಾಲಿಶ್ ಕರವ್ನ್ ಭಾಯ್ರ್ ಯೆತಾನಾ, ರೂಸ್‌ವೆಲ್ಟ್ ನಿಜಾಯ್ಕಿ ಫಿಲ್ಮಾಂತ್ಲ್ಯಾ ಹೀರೊಬರಿ ದಿಸ್ತಾಲೊ.
ಪ್ಯಾಟ್ರಿಕ್ ಹೆಗ್ರೆನಸ್ ತಾಕಾ ಪಳಯಿತ್ತ್ ಮ್ಹಣಾಲೊ- ಹೊಲಿವುಡಾಚ್ಯಾ ಪಾಮಾದ್ ನಟಾಬರಿ ತುಜೆಂ ವೆಕ್ತಿತ್ವ್ ಆನಿ ತುಂ ನಿಜಾಯ್ಕಿ ಬರೊ ದಿಸ್ತಾಯ್… ದಡಂಗ್ ಆನಿ ಬಳ್ವಂತ್
ರೂಸ್‌ವೆಲ್ಟ್ ಹಾಸ್ಲೊ, ಸರ್… ಹೆಂ ಸರ್ವ್ ತುಜ್ಯಾ..
ಪ್ಯಾಟ್… ತುವೆಂ ಮ್ಹಾಕಾ ಪ್ಯಾಟ್ ಮ್ಹಣಜೆ ಮ್ಹಣ್ ಹಾಂವೆಂ ತುಕಾ ಸಾಂಗ್ಲಾಂ. ರೂಸ್‌ವೆಲ್ಟ್ ಹಾಸ್ಲೊ.
ತುಜಿ ಸೊಭಾಯ್ ಆನಿ ದಡಂಗ್ ಜಿವಾವರ್ವಿಂ ತುವೆಂ ಜಾಗ್ರುತ್ ರಾವಜೆ. ಚೆಡ್ವಾಂ ತುಜೆರ್ ಭುಲೊಂಕ್ ಪುರೊ. ಪುಣ್, ಸ್ವಾಭಾವಿಕ್ ಜಾವ್ನ್ ತುವೆಂ ಚೆಡ್ವಾಂಚೆರ್ ಭುಲೊಂಕ್ ನಜೊ. ಕಿತ್ಯಾಕ್ ತುಂ ಮ್ಹಜೊ ಜಾಲಾಯ್…. ದೊಗ್‌ಯೀ ಮಾದಕ್‌ಪಣಿ ಹಾಸ್ಲೆ.
ದುಸ್ರೊ ದೀಸ್… ಬ್ರೇಸ್ತಾರಾ ದಿಸಾಚಿ ಸಾಂಜ್ ಜಾವ್ನ್ ಯೆತಾಲಿ. ಕಾಮ್ ಆಖೇರ್ ಜಾಂವ್ಕ್ ಆನಿ ಥೊಡೊ ವೇಳ್ ಆಸ್ಲ್ಲೊ.
ರೂಸ್‌ವೆಲ್ಟ್ ಪ್ಯಾಟ್ರಿಕ್ ಹೆಗ್ರೆನಸಾಚ್ಯಾ ಕೆಬಿನಾಕ್ ಆಯ್ಲೊ.
ಪ್ಯಾಟ್… ತಾಣೆಂ ಮ್ಹಳ್ಳೆಂ ಆಯ್ಕೊನ್ ಪ್ಯಾಟ್ರಿಕ್ ಹೆಗ್ರೆನಸಾನ್ ಅಜ್ಯಾಪೊನ್ ತಕ್ಲಿ ಉಬಾರ್‍ಲಿ.
ಆಯ್ಚಿ ರಾತ್ ಹಾಂವ್ ತುಜೆಸಾಂಗಾತಾ ಖರ್ಚುಂಕ್ ಆಶೆತಾಂ…
ಪ್ಯಾಟ್ರಿಕ್ ಹೆಗ್ರೆನಸಾಕ್ ಅಜ್ಯಾಪ್ ಜಾಲ್ಲೆಂಚ್.
ತುವೆಂ ಆತಾಂ ರಾಂವ್ಚೆಂ ಘರ್ ತುವೆಂ ಸೊಡ್ಯೆತ್… ಪ್ಯಾಟ್ರಿಕ್ ಹೆಗ್ರೆನಸ್ ಖಡಕ್ಕ್ ಜಾವ್ನ್ ಮ್ಹಣಾಲೊ, ಆನಿ ಮ್ಹಜ್ಯಾಚ್ ಘರಾಂತ್ ಮ್ಹಜೆಸಾಂಗಾತಾ ಮ್ಹಜೊ ಜಾವ್ನ್ ರಾವ್ಯೆತ್… ಆಜ್ ಮ್ಹಜ್ಯೆ ಜಿಣಿಯೆಂತ್ ತುಕಾ ಸ್ವಾಗತ್
ಹ್ಯಾ ವೆಳಿಂ ದೊಗ್‌ಯೀ ಸಂತೊಸಾನ್ ಹಾಸ್ಲೆ.
ಜಿವ್ಯಾ ಆಂಕ್ರೆಂತ್ ನವೆಂ ಫಳ್ ಜಾಲ್ಲೆಂ…
ಎಕೆ ಕುಡಿಂತ್ ಮಿಸ್ಳಾಲ್ಲೆ ದೋನ್ ಉಸ್ವಾಸ್
ತ್ಯೆ ರಾತಿಚೆಂ ಫಾಂತೆಂ ಜಾತಾನಾಂಯ್ ಘರಾಭಾಯ್ಲ್ಯಾ ವೊಣಿಚ್ಯಾ ಖಾಲಿ ರಸ್ತ್ಯಾರ್ ರೂಸ್‌ವೆಲ್ಟ್ ಉಬೊ ಆಸ್ಲ್ಲೊ. ಸಗ್ಳಿ ವೋಣ್ ವೀಜ್ ದಿವ್ಯಾಂನಿ ಭರೊನ್ ಉಜ್ವಾಳ್ತಾಲಿ. ತಿಸ್ರ್ಯೆ, ಆಖೇರಿಚ್ಯೆ ಭಯ್ಣಿಚೆಂ ರೊಸಾಚೆಂ ಸಂಭ್ರಮಿಕ್ ಕಾರ್ಯೆಂ ಆಖೇರ್ ಜಾಲ್ಲೆಂ. ಕಾರ್ಯೆಂ ಆಖೇರ್ ಜಾತಾನಾ ಮದ್ಯಾನ್ ಜಾಲ್ಲಿ. ಹ್ಯಾ ವಾಡ್ಯಾಚ್ಯಾ ಮಾತ್ರ್ ಕಿತ್ಯಾಕ್ ಪಿರ್ಗಜೆಚ್ಯೆ ಚರಿತ್ರೆಂತ್ ಪಯ್ಲೆಪಾವ್ಟಿಂ ತಸಲೊ ದಬಾಜೊ ಜಾಲ್ಲೊ ಮ್ಹಣ್ ಆಯಿಲ್ಲೊ ಲೋಕ್ ಉಚಾರುನ್ ಸಾಂಗಾಲಾಗ್‌ಲ್ಲೊ.
ಪಾಟ್ಲ್ಯಾ ಪಾಂಚ್ ವರ್ಸಾಂನಿ ಹ್ಯೆ ವೊಣಿಂತ್ ಜಾಯ್ತಿ ಬದ್ಲಾವಣ್ ಆಯಿಲ್ಲಿ; ರೂಸ್‌ವೆಲ್ಟಾವರ್ವಿಂ. ವೊಣಿಚ್ಯೆ ಲಾಂಬಾಯೆಕ್ ಆಸ್ಚೊ ಪಂದ್ರಾ ಎಕ್ರೆ ಜಾಗೊ ರೂಸ್‌ವೆಲ್ಟಾನ್ ಮೊಲಾಕ್ ಘೆತ್‌ಲ್ಲೊ ಆನಿ ಆಪ್ಣಾಚ್ಯಾ ನಾಂವಾರ್ ಕರಿನಾಸ್ತಾನಾ ಬಾಪಾಯ್ಚ್ಯಾ ನಾಂವಾರ್ ಕರುನ್ ತಾಕಾ ಬಾಪಾಯ್ಚೆಂ ನಾಂವ್ ದಿಲ್ಲೆಂ. ಅಖ್ಖ್ಯಾ ಜಾಗ್ಯಾರ್ ಕೃಶಿ ಕೆಲ್ಲಿ. ಸಗ್ಳೊ ಜಾಗೊ ಪಾಚ್ವೊ ಕರುನ್ ಭಾಂಗ್ರಾಳೊ ಕೆಲ್ಲೊ.
ರೂಸ್‌ವೆಲ್ಟಾಚ್ಯಾ ವ್ಹಡ್ಲ್ಯಾ ದೊಗಾಂ ಭಯ್ಣಿಂಚೆಂ ದೋನ್ – ತೀನ್ ವರ್ಸಾಂ ಪಯ್ಲೆಂ ಕಾಜಾರ್ ಜಾಲ್ಲೆಂ. ತಿಂ ಕಾಜಾರಾಂಯ್ ಭಾರಿಚ್ ಗಡ್ದ್ ಜಾಲ್ಲಿಂ. ಲೊಕಾನ್ ಜಾಯ್ತಿ ಹೊಗ್ಳಿಕ್ ಪಾಚಾರ್‌ಲ್ಲಿ. ಕಾಜಾರ್ ಜಾಲ್ಯಾ ಉಪ್ರಾಂತ್ ಭಯ್ಣಿಂಚ್ಯಾ ಘೊವಾಂಕ್ ದುಬಾಯ್ ಹಾಡವ್ನ್ ತಾಂಕಾಂ ಬರ್ಯಾ ಕಂಪ್ಣೆಂನಿ ಕಾಮ್ ಆನಿ ತಶೆಂ ಕುಟ್ಮಾಸಮೇತ್ ಜಿಯೆಂವ್ಕ್ ರೂಸ್‌ವೆಲ್ಟಾನ್ ಕರ್ನ್ ದಿಲ್ಲೆಂ. ತಿಸ್ರ್ಯೆ ಭಯ್ಣಿಚ್ಯಾ ಕಾಜಾರಾಕ್ ರೂಸ್‌ವೆಲ್ಟ್ ಪ್ಯಾಟ್ರಿಕ್ ಹೆಗ್ರೆನಸ್ ಸಾಂಗಾತಾ ಗಾಂವಾಕ್ ಆಯಿಲ್ಲೊ.
ಪೆಂಟೆಲಾಗಿಂ ಆಸ್ಚ್ಯಾ ರಾಜ್ ರಸ್ತ್ಯಾಚೆರ್ ಆಸ್ಚ್ಯೆ ಇಗರ್ಜೆದ್ವಾರಾಥಾವ್ನ್ ಘರಾಕಡೆ ಮ್ಹಣಾಸರ್ ವಾಟ್ ಸಗ್ಳಿ ವೀಜ್ ದಿವ್ಯಾಂನಿ ಸುಂರ್ಗಾರಾಯಿಲ್ಲಿ. ರೊಸಾಕ್ ಸೊರ್ಯಾಚೊ ವ್ಹಾಳೊಚ್ ವ್ಹಾಳ್‌ಲ್ಲೊ. ಸನ್ನಾಂ – ಆಪಾಂಸವೆಂ ಮಾಸಾಚೆಂ ಜೆವಣ್ ನ್ಹಯ್ ಆಸ್ತಾಂ, ಹೆರ್ ಪಕ್ವಾನಾಂಚೆಂ ಗಮ್ಮತ್ ದರಬಸ್ತ್ ಆಸ್ಲ್ಲೆಂ. ವಿಂಗಡ್ ವಿಂಗಡ್ ಜೆವ್ಣಾಂಕ್ ವಿಂಗಡ್ ಮೆಜಾಂ. ಭಾಜ್ಚಿಂ ಖಾಣಾಂ ಥಂಯ್ಚ್ ಭಾಜುನ್ ದಿತಾಲೆ. ನಾಂವಾಡ್ದಿಕ್ ಬ್ಯಾಂಡ್ ಆಸ್ಲ್ಲೆಂ. ಪಾಮಾದ್ ಕಲಾಕಾರಾಂನಿ ಸಂಗೀತ್ ಪ್ರದರ್ಶನಾಂ ಕೆಲ್ಲಿಂ.
ಗೊರೊ ಮನಿಸ್ ಗಾಂವಾಕ್ ಆಯಿಲ್ಲಿ ಗಜಾಲ್ ಸರ್ವಾಂಕ್ ಆತುರಾಯ್ ಜಾಲ್ಲಿ. ರೋಸ್ ಜಾವ್ನ್ ಗಮ್ಮತ್ ಕರ್ನ್ ಸೊರ್‍ಯಾಂತ್ ನ್ಹಾವ್ನ್ಂಚ್ ಮ್ಹಳ್ಳೆಬರಿ ಜಾಲ್ಲೊ ಪಾಟಿಂ ವೆಚೊ ಲೋಕ್ ತಕ್ಲಿ ಸಮಾ ನಾತ್‌ಲ್ಲೆಬರಿ ಉಲಂವ್ಚೆಂ ತಾಣೆಂ ಆಯ್ಕಾಲ್ಲೆಂ – ಹೊ ಗಸ್ಪಾರಾಚೊ ಪೂತ್, ರೂಸ್‌ವೆಲ್ಟ್ ತ್ಯಾ ಗೊರ್‍ಯಾಚೊ ಚೆಡಿಯಾಳೊ ಜಾವ್ನ್ ಜಾಲ್ಯಾರ್‌ಯೀ ದುಡು ಜಾಯ್ತೊ ಕೆಲೊ. ಹೆಂ ಘರ್ ರಾವ್ಳೆರ್ ಜಾಲಾಂ. ಜಾಗ್ಯಾರ್ ಭಾಂಗಾರ್ ಪಿಕಯ್ತಾ. ಆಜ್ ರಾಯಾಂಚೆಂ ಜೆವಣ್ ದಿಲಾಂ. ಗೊರ್‍ಯಾಚೊ ದುಡು ಬರೊಚ್ ಲುಟ್ಲಾ ಆಸ್ತೊಲೊ…
ಹಿಂ ಉತ್ರಾಂ ರೂಸ್‌ವೆಲ್ಟಾಚ್ಯಾ ಕಾನಾಂಕ್ ಪಡ್ಲ್ಲಿಂ. ಮತ್ ವಿರಾರ್ ಜಾಲ್ಲಿ. ಹ್ಯಾ ಘಾಣೆಡ್ಡ್ಯಾ ಲೊಕಾಥಾವ್ನ್ ಪಯ್ಸ್‌ಚ್ ಧಾವೊಂಕ್‌ಯೀ ಆಶೆಲ್ಲೊ ಆನಿ ತಶೆಂಚ್ ವೆಗಿಂಚ್ ಜಾತೆಲೆಂ ಮ್ಹಣ್ ತಾಕಾ ಕಳಿತ್ ಆಸ್ಲ್ಲೆಂ.
ಕಾಜಾರಾಚಿ ತಯಾರಾಯ್ ಜಾತಾಸ್ತಾನಾ, ರೂಸ್‌ವೆಲ್ಟಾಚ್ಯಾ ಬಾಪಾಯ್ನ್ ರೂಸ್‌ವೆಲ್ಟಾಕ್ ಆಪವ್ನ್ ವಿಚಾಲ್ಲೆಂ, ಪುತಾ ತುವೆಂ ಆಮ್ಚೆಖಾತಿರ್, ತುಜ್ಯಾ ಕುಟ್ಮಾಖಾತಿರ್ ಇತ್ಲೆಂ ಪೂರಾ ಕೆಲೆಂಯ್. ಜಾಗೊ ಘೆತ್ಲೊಯ್, ಘರ್ ಬಾಂದ್ಲೆಂಯ್, ಭಯ್ಣಿಂಕ್ ಕಾಜಾರ್ ಕೆಲೆಂಯ್, ತಾಂಕಾಂಯ್ ದುಬಾಯ್ ವ್ಹರ್ನ್ ಬರೊ ಫುಡಾರ್ ದಾಕಯ್ಲೊಯ್… ಆನಿ ಆತಾಂ ನಿಮಾಣ್ಯೆ ಭಯ್ಣಿಚೆಂ ಕಾಜಾರ್ ಜಾತಾ ಆನಿ ಹೆಂ ಸರ್ವ್ ಜಾಲ್ಯಾ ಉಪ್ರಾಂತ್‌ಯೀ ತುವೆಂ ಕಾಜಾರ್ ಜಾಂವ್ಚಿ ಆಲೋಚನ್ ಕೆಲಿನಾಂಯ್ ವಾ ಕರಿನಾಂಯ್… ಹಾಂಗಾಸರ್ ಜಾಯ್ತ್ಯೊ ಬರ್‍ಯೊ ಬರ್‍ಯೊ ಸಯ್ರಿಕೊ ಯೆತಾತ್ ಪುತಾ… ಕಿತ್ಯಾಕ್ ತುಂ ಮನ್ ಕರಿನಾಂಯ್…
ರೂಸ್‌ವೆಲ್ಟಾನ್ ಸಂಭಾಶಣ್ ಅರ್ಧ್ಯಾರ್ ರಾವಯಿಲ್ಲೆಂ, ಪಪ್ಪಾ ಹ್ಯಾ ವಿಶ್ಯಾಂತ್ ಹಾಂವ್ ಆತಾಂ ಉಲಂವ್ಕ್ ಖುಶಿ ವ್ಹರಿನಾ. ತಿಸ್ರ್ಯಾಚೆಂ ಕಾಜಾರ್ ಜಾಂವ್ದಿ. ಉಪ್ರಾಂತ್ ಹಾಂವ್ ಉಲಯ್ತಾಂ
ಫಾಂತೆಂ ಜಾಲ್ಲೆಂ. ರೋಸ್ ಜಾವ್ನ್ ವೊಣಿಂತ್ ಎಕ್ಸುರೊಚ್ ಉಬೊ ಆಸ್ಲ್ಲ್ಯಾ ರೂಸ್‌ವೆಲ್ಟಾಚ್ಯೆ ಮತಿಂತ್ ವಾದಾಳ್ ಆಸ್ಲ್ಲೆಂ. ವೆಗಿಂಚ್ ಆಪ್ಲ್ಯಾ ಜಿವಿತಾವಿಶ್ಯಾಂತ್ ಬಾಪಾಯ್ಕ್ ಸಾಂಗೊಂಕ್ ತಾಕಾ ಆಸ್ಲ್ಲೆಂ. ಆಪ್ಲೊ ಆನಿ ಪ್ಯಾಟ್ರಿಕ್ ಹೆಗ್ರೆನಸಾಚೊ ಸಂಬಂಧ್ ಅಧುರೊ ತರ್‌ಯೀ ಬಳ್ವಂತ್ ಆಸ್ಚೊ ಬಾಂದ್… ಮುಕ್ಲ್ಯಾ ಜಿವಿತಾಂಚಿ ಸಪ್ಣಾಂ…
ರೂಸ್‌ವೆಲ್ಟಾಚ್ಯೆ ತಿಸ್ರ್ಯೆ ಭಯ್ಣಿಚೆಂ ಕಾಜಾರ್ ಜಾಲೆಂ, ಚಿಂತ್‌ಲ್ಯಾಚ್ಯಾಕ್‌ಯೀ ಚಡ್ ಗದ್ದಳಾಯೆನ್.
ರೂಸ್‌ವೆಲ್ಟ್ ಪಾಟಿಂ ದುಬಾಯ್ ವಚೊಂಕ್ ಭಾಯ್ರ್ ಸರ್ಲೊ. ಏರ್‌ಪೊರ್ಟಾಕ್ ವೆಚೆಪಯ್ಲೆಂ, ಪಯ್ಣಾಚ್ಯೆ ಆಖ್ರೇಚ್ಯೆ ಘಡಿಯೆ, ರೂಸ್‌ವೆಲ್ಟಾಚೊ ಬಾಪಯ್ ಪರತ್ ಉಲವ್ಣ್ಯಾಕ್ ತಯಾರ್ ಜಾಲ್ಲೊ. ತೆ ದೊಗ್‌ಚ್ ಕುಡಾಂತ್ ಆಸ್ಲ್ಲೆ. ಬಾಪಾಯ್‌ಲಾಗಿಂ ಸಬಾರ್ ಫೊಟೊ ಆಸ್ಲ್ಲ್ಯೊ- ಸೊಭಿತ್ ಚಲಿಯಾಂಚೊ.
ಪುತಾ… ಇತ್ಲೊ ಬರೊ ಚೆರ್ಕೊ ತುಂ. ತುಜೆಖಾತಿರ್ ಬರ್‍ಯಾಂತ್ಲಿ ಬರಿ ಸಯ್ರಿಕ್ ಯೆತಾ. ತುಜೆಂ ಕಾಜಾರ್ ಜಾಯ್ಜೆ ಮ್ಹಣ್ ವಿಚಾರ್‍ತಾಂ… ಬಾಪಾಯ್ನ್ ಉಲವ್ಣ್ಯಾಕ್ ಬುನ್ಯಾದ್ ಘಾಲಿ.
ಪಪ್ಪಾ… ಹಾಂವ್ ಕಾಜಾರ್ ಜಾಂವ್ಕ್ ಆಶೆನಾ. ಮ್ಹಾಕಾ ಕಾಜಾರ್ ನಾಕಾ ರೂಸ್‌ವೆಲ್ಟಾನ್ ನಾಜೂಕಾಯೆನ್ ತರ್‌ಯೀ ಖಡಾಕಡ್ ಮ್ಹಳೆಂ.
ಪುಣ್ ಕಿತ್ಯಾಕ್? ಕಿತ್ಯಾಕ್ ಪುತಾ… ತುಂ ತರ್ನಾಟೊ. ಆನಿಕ್‌ಯೀ ತರ್ನಾಟೊ. ಮನ್ಶ್ಯಾಂನಿ ದೊಳ್ಯಾಂತ್ ಕಾಜಳ್ ಘಾಲುನ್ ತುಕಾ ಪಳಯ್ಜೆ ತಸಲೊ, ಅಪ್ವಂತ್ ಚೆರ್ಕೊ ತುಂ
ರೂಸ್‌ವೆಲ್ಟ್ ಉಬೊ ಜಾಲೊ, ಪಪ್ಪಾ ಹೆಂ ಬಾಗಿಲ್ ಬಂದ್ ಕರುಂಕ್ ಆಶೆತಾಂ. ಮುಕಾರುನ್ ಉಲಂವ್ಚೆಪಯ್ಲೆಂ ಹೆಂ ಬಾಗಿಲ್ ಘಾಲ್ನ್ ಮ್ಹಾಕಾ ಉಲಯ್ಜೆ.
ರೂಸ್‌ವೆಲ್ಟಾನ್ ಬಾಗಿಲ್ ಘಾಲೆಂ. ಪಾಟಿಂ ಯೇವ್ನ್ ಬಾಪಯ್‌ಸರ್ಶಿನ್ ಬಸ್ಲೊ’ ಪಪ್ಪಾ… ಹಾಂವ್ ಕಾಜಾರ್ ಜಾಂವ್ಕ್ ಸಕನಾ
ಕಿತ್ಯಾಕ್? ಕಿತ್ಯಾಕ್ ಪುತಾ…
ಮ್ಹಜೆಂ ಜಿಣೆಂ ಬದಾಲ್ಲಾಂ… ಹೆಂ ಜಿಣೆಂ ಅಶೆಂ ಜಾಂವ್ಕ್ ನಜೊ ಆಸ್ಲ್ಲೆಂ ತರ್‌ಯೀ ಜಾಲಾಂ
ಕಿತ್ಯಾಕ್ ಪುತಾ… ಲೋಕ್ ಕಿತೆಂ ಕಿತೆಂ ಉಲಯ್ತಾ. ತುಜೆವಿಶ್ಯಾಂತ್ ಕಿತೆಂ ಉಲಯ್ತಾ ತೆಂ ಆಯ್ಕೊಂಕ್ ಮ್ಹಾಕಾ ನಾಕಾ. ತೆಂ ಸತ್ ನ್ಹಯ್ ಮ್ಹಣ್ ತುವೆಂ ಮ್ಹಾಕಾ ಸಾಂಗಜೆ. ಹೆಂ ಎಕಾ ಬಾಪಾಯ್ಚೆಂ ಕಾಳಿಜ್… ಹೆಂ ಕಾಳಿಜ್ ತುಜ್ಯಾ ನಾಲಿಸಾಯೆಚ್ಯಾ ಜಿವಿತಾವಿಶ್ಯಾಂತ್ ಆಯ್ಕೊಂಕ್ ತಯಾರ್ ನಾ…
ಆತಾಂ ರೂಸ್‌ವೆಲ್ಟ್ ರಡ್ಲೊ… ಬರೊಚ್ ರಡ್ಲೊ. ಬಾಪಯ್ ಮಾವ್ನ್ಂಚ್ ರಾವ್ಲೊ ಆನಿ ಪುತಾಕ್ ಪಳೆಂವ್ಕ್ ಪಡ್ಲೊ.
ಹೆಂ ಜಿವಿತ್ ಮ್ಹಜೆಂ… ಮ್ಹಜ್ಯೆ ಖುಶೆಪರ್ಮಾಣೆಂ ಜಿಯೆಂವ್ಚೆಂ ಹಕ್ಕ್ ಮ್ಹಾಕಾ ಮಾತ್ರ್ ಆಸಾ. ತ್ಯಾ ವಿಶ್ಯಾಂತ್ ಲೋಕ್ ಕಿತೆಂ ಉಲಯ್ಲ್ಯಾರ್ ಮ್ಹಾಕಾ ಪರ್ವಾ ನಾ… ರಡ್ಣ್ಯಾಂಮದೆಂ ತೊ ಉಲಯ್ಲೊ.
ಪುಣ್, ಥೊಡ್ಯೊ ಸತಾಚ್ಯೊ ಗಜಾಲಿ ಲಿಪಂವ್ಕ್ ಮ್ಹಾಕಾ ಖುಶಿ ನಾ…..ಹೆಂ ಜಿವಿತ್ ಎಕೆಚ್ ಕುಶಿನ್ ವೊಡುನ್ ವೆತಾನಾ ತ್ಯಾ ಆವ್ರಾಂತ್ ಶಿರ್ಕೊನ್ ಹಾಂವ್ ಸಲ್ವಾಲ್ಲೊಂ. ತುಜೆಲಾಗಿಂ ಸಾಂಗೊಂಕ್ ಮ್ಹಾಕಾ ಲಜ್ ಭೊಗನಾ ತರ್‌ಯೀ, ಗಾಂವಾಂತ್ ಸುಣೆಂ ಮಾಜಾರ್ ಹೆಂ ಉಲಯ್ತಾ ಮ್ಹಣ್‌ಯೀ ಹಾಂವ್ ಜಾಣಾ. ಪುಣ್, ಮ್ಹಾಕಾ ತಾಚಿ ಪರ್ವಾ ನಾ…
ಸಾಂಗ್ ಪುತಾ… ಕಿತೆಂ ತೆಂ ಸಾಂಗ್. ಲೋಕ್ ಕಿತೆಂಯ್ ಉಲಯ್ತಾ ತೆಂ ಫಟ್ ಮ್ಹಣ್ ಸಾಂಗ್… ಬಾಪಯ್ ದೀನ್‌ಪಣಿ ಪರಾತ್ತಿಲಾಗ್ಲೊ.
ರೂಸ್‌ವೆಲ್ಟಾನ್ ದುಕಾಂ ಪುಸ್ಲಿಂ. ಬಾಪಯ್ ತಾಚಿಂ ಉತ್ರಾಂ ಆಯ್ಕೊಂಕ್ ತಯಾರ್ ಜಾಲ್ಲೊ.
ಮ್ಹಜ್ಯಾ ಜಿವಿತಾಂತ್ ಘಡ್ಗಡ್ಯಾ ಆವಾಜ್ ನಾಸ್ತಾಂ ಮೊಳಬ್ ಕೊಸ್ಳೊನ್ ಪಾವ್ಸ್ ವೊತ್‌ಲ್ಲೊ ಅನ್ಭೋಗ್ ತೊ… ವಾ ದುಕಾಥೆಂಬೊ ಶಿಂಪ್ಡಾನಾಸ್ತಾನಾ ಕಾಳ್ಜಾಕಾಟ್ ಫುಟ್‌ಲ್ಲೆಂ ಭೊಗಪ್. ಹೆಂ ಸರ್ವ್ ಅಸ್ವಾಭಾವಿಕ್, ಅಚಾನಕ್. ಪುಣ್ ತೆಂ ಜಾಲೆಂ ತೆಂ ಜಾಲೆಂಚ್. ಎಕೆ ಸಾರ್ಕ್ಯೆ ಆನಿ ನಿರ್ದಿಶ್ಟ್ ಬಳ್ವಂತ್ ಸಕ್ತೆಚ್ಯಾ ಮಾಂಡಾವಳಿಪರ್ಮಾಣೆಂ. ತಾಂತುಂ ದುಬಾವ್ ನಾ.
ಪ್ಯಾಟ್ರಿಕ್ ಹೆಗ್ರೆನಸ್ ಮ್ಹಾಕಾ ಮೆಳ್ಳೊ. ಮ್ಹಜ್ಯಾ ಜಿವಿತಾಕ್ ನವೆಂ ರೂಪ್ ತಾಣೆಂ ದಿಲೆಂ. ತೆದ್ನಾಂ ತೊ ಮ್ಹಾಕಾ ಮೆಳ್ತಾನಾ ಹಾಂವ್ ಎಕ್‌ಚ್ ಆಶೆಲ್ಲೊಂ. ಮ್ಹಜೆಂ ಕುಟಮ್, ಮ್ಹಜ್ಯಾ ಕುಟ್ಮಾಚೆಂ ಉದ್ದಾರ್ ಆನಿ ತ್ಯಾಚ್ ಖಾತಿರ್ ಹಾಂವೆಂ ಮ್ಹಾಕಾಚ್ ವಿಕ್‌ಲ್ಲೆಂ. ದಾದ್ಲ್ಯಾನ್ ದಾದ್ಲ್ಯಾಚೊ ಮೋಗ್ ಕರ್ಚೊ ತುವೆಂ ಆಯ್ಕಾಲಾಂಯ್ ಜಾಂವ್ಕ್ ಪುರೊ. ಹೆಂ ಏಕ್ ಅತ್ತ್ಯಾಚಾರ್ ನ್ಹಯ್ ಬಗಾರ್, ದೊಗಾಂ ಮನ್ಶ್ಯಾಂನಿ ತಾಂಚ್ಯೆಚ್ ಸ್ವಂತ್ ಖುಶೆನ್ ಎಕಾ ಬಾಂದಾಕ್ ಒಳ್ಕೊನ್ ಎಕಾ ಸಂಬಂಧಾಂತ್ ಜಿಯೆಂವ್ಚೆಂ. ಸಶ್ಟೆಚ್ಯಾ ವಿರೋಧ್… ಅಸ್ವಾಭಾವಿಕ್ ರೀತ್… ದೆವಾಚ್ಯೆ ಮಾಂಡಾವಳೆ ವಿರೋಧ್. ಹ್ಯಾ ಆಮ್ಚ್ಯಾ ಗಾಂವಾಂತ್‌ಯೀ ತೆಂ ಆಸೊಂಕ್ ಪುರೊ. ಪುಣ್ ಲೋಕ್ ಸಾಂಗನಾ. ಹಾಂವ್ ಪ್ಯಾಟ್ರಿಕ್ ಹೆಗ್ರೆನಸಾಬರಾಬರ್ ಕುಟಮ್ ಕರ್ನ್ ಜಿಯೆತಾಂ. ಹ್ಯೆ ಜಿಣಿಯೆಥಾವ್ನ್ ಭಾಯ್ರ್ ಯೇಂವ್ಕ್ ಮ್ಹಾಕಾ ಸಾಧ್ಯ್ ನಾ. ಹಾಂವ್ ಚಲಿಯಾಂಕ್ ಲಾಗಿಂ ಕರುಂಕ್ ಸಕ್ಚೊಂನಾ. ಕೆಲ್ಯಾರ್‌ಯೀ ಹಾಂವ್ ಚಲಿಯೆಕ್ ಆನಿ ತಶೆಂ ಪ್ಯಾಟ್ರಿಕ್ ಹೆಗ್ರೆನಸಾಕ್ ಧೊಖೊ ದಿತೊಲೊಂ ಆನಿ ಆತಾಂ ಪ್ಯಾಟ್ರಿಕ್ ಹೆಗ್ರೆನಸ್ ಮ್ಹಜೊ ಸಾಂಗಾತಿ, ಮ್ಹಜೊ ಜಿಣಿಯೆಸಾಂಗಾತಿ…
ಪಪ್ಪಾ…. ಸುರ್‍ವೇರ್ ಪ್ಯಾಟ್ರಿಕ್ ಹೆಗ್ರೆನಸಾಚ್ಯೆ ವೆಂಗೆಂತ್ ಸಾಂಪಡ್ತಾನಾ, ಹಾಂವೆಂ ಫಕತ್ ಮ್ಹಜ್ಯಾ ಕುಟ್ಮಾಂಚೆಂ ಚಿಂತ್ಲೆಂ. ಜರ್ತರ್ ತಾಚೆಂ ಆಪವ್ಣೆಂ ಸ್ವೀಕಾರ್ ಕರಿನಾ ತರ್ ಮ್ಹಜ್ಯಾ ಕುಟ್ಮಾಕ್, ತೆಗಾಂ ಭಯ್ಣಿಂಕ್ ಬರೊ ಫುಡಾರ್ ದೀಂವ್ಕ್ ಸಕ್ತೊಂ ನಾ. ಪಕತ್ ಮ್ಹಜ್ಯಾ ಸ್ವತಾಖಾತಿರ್ ಹಾಂವೆಂ ಮ್ಹಾಕಾ ವಿಕ್ಲೆಂ. ಪುಣ್ ದೀಸ್ ವೆತಾಂ ವೆತಾಂ ಪ್ಯಾಟ್ರಿಕ್ ಹೆಗ್ರೆನಸಾನ್ ಮ್ಹಜೆರ್ ದವರ್‌ಲ್ಲೊ ಭರ್‍ವಸೊ, ಮ್ಹಜ್ಯೆ ಜಿಣಿಯೆಖಾತಿರ್ ತಾಣೆಂ ಕೆಲ್ಲೆಂ ಸರ್ವ್… ಮ್ಹಾಕಾ ತಾಚೆಥಾವ್ನ್ ಪಯ್ಸ್ ವಚೊಂಕ್ ದಿಲೆಂನಾ
ಕಿತ್ಯಾಕ್ ಪುತಾ ತುಕಾ ಅಶೆಂ ಜಾಲೆಂ? ಕಿತ್ಯಾಕ್ ತುವೆಂ ಅಶೆಂ ಕೆಲೆಂಯ್… ಆಮ್ಕಾಂ ಆತಾಂ ಹ್ಯಾ ಗಾಂವಾಂತ್ ಹ್ಯಾ ಲೊಕಾಮದೆಂ ಕಿತ್ಲಿ ಲಜ್… ತುಜೆಕಡೆ ಇತ್ಲೊ ದುಡು ನಾತ್ಲ್ಲೊ ತರ್ ತುಜ್ಯಾ ಭಯ್ಣಿಂಕ್ ಸಯ್ರಿಕ್ ಮೆಳೊಂಕ್‌ಯೀ ಕಶ್ಟ್ ಜಾತೆ. ಮ್ಹಾಕಾ ಸಮ್ಜನಾ ತುವೆಂ ಕಿತ್ಯಾಕ್ ಅಶೆಂ ಕೆಲೆಂಯ್
ರೂಸ್‌ವೆಲ್ಟ್ ಉಬೊ ಜಾಲೊ.
ದುಡ್ವಾನ್ ಮನ್ಶ್ಯಾಚಿಂ ತತ್ವಾಂ ಮೊಲಾಕ್ ಘೆಂವ್ಚಿ ಸಮಾಜ್ ಹಿ. ದುಡು ಆಸ್ಲ್ಯಾರ್ ಮಾತ್ರ್ ಆಮ್ಕಾಂ ಜಿವಿತ್ ಆಸಾ. ದುಡು ಆಸ್ಲ್ಯಾರ್ ಮಾತ್ರ್ ಮನ್ಶ್ಯಾಥಂಯ್ ಕಿತೆಂ ಅವ್ಗುಣ್ ಆಸ್ಲ್ಯಾರ್‌ಯೀ ಹಿ ಆಮ್ಚಿ ಸಮಾಜ್ ಸುದಾರ್ಸುನ್ ವ್ಹರ್‍ತಾ. ಆನಿ ಆಜ್, ತೆಂಚ್ ಜಾಲಾಂ. ಮ್ಹಜ್ಯಾ ಪಯ್ಶ್ಯಾಂವರ್ವಿಂ ಮ್ಹಜ್ಯಾ ಭಯ್ಣಿಂಚೆಂ ಜಿವಿತ್ ನಂದನ್ ಜಾಲೆಂ.
ಪಪ್ಪಾ… ಮ್ಹಜ್ಯಾ ಜಿವಿತಾಚಿ ಹರ್ಯೇಕ್ ಘಡಿ ಸೂಕ್ಶಿಮಾಯೆನ್ ಹಾಂವ್ ದೆಕ್ತಾನಾ ಮ್ಹಾಕಾ ಭೊಗ್ತಾ, ಹೆಂ ಸರ್ವ್ ಹಾಂವೆಂ ಕೆಲ್ಲೆಂಚ್ ನ್ಹಯ್, ಮ್ಹಜ್ಯೆ ಖುಶೆನ್ ಜಾಲ್ಲೆಂಚ್ ನ್ಹಯ್. ಬಗಾರ್, ಕೊಣೆಂಗೀ ಮ್ಹಾಕಾ ಥಂಯ್ಸರ್ ವ್ಹೆಲ್ಲೆಬರಿ ಮ್ಹಾಕಾ ಭೊಗ್ತಾ. ಮ್ಹಾಕಾ ಹಾತ್ ಧರುನ್ ವ್ಹೆಲ್ಲೆಬರಿ… ಮ್ಹಜ್ಯೆ ವಿಧಿನ್… ಮ್ಹಜ್ಯಾ ನಶೀಬಾನ್ ವಾ ತುವೆಂ ಮ್ಹಣ್ಯೆತ್. ರಚ್ನಾರಾನ್ಂಚ್ ಮಾಂಡುನ್ ದವರ್ಲ್ಲ್ಯಾ ಜಿವಿತಾಚ್ಯೆ ಪರಿಗತೆಚ್ಯಾ ಪರಿಮಿತೆಂತ್ಲ್ಯಾ ಪಾಸಾಕ್ ಮ್ಹಾಕಾ ಲೊಟ್‌ಲ್ಲೆಂ. ಕೊಣೆಂಗೀ ಮ್ಹಜ್ಯೆ ಹೆಳ್ಕೆಭಾಯ್ರ್… ಮ್ಹಜ್ಯೆ ಕಬ್ಲಾತೆಭಾಯ್ರ್…. ಮ್ಹಾಕಾ ನಾಕಾ ಆಸೊನ್ ಹೊ ಪಾಸ್ ಮಾಂಡ್‌ಲ್ಲೊ ಆನಿ ಹಾಂವ್ ಪಡ್ಲ್ಲೊಂ… ಸಾಂಪಡ್‌ಲ್ಲೊಂ. ಆನಿ ಆತಾಂ, ತ್ಯಾ ಜಿವಿತಾಂತ್ ಹಾಂವ್ ಖುಶ್ ಆಸಾಂ. ಪ್ಯಾಟ್ರಿಕ್ ಹೆಗ್ರೆನಸಾಸವೆಂ ಹಾಂವ್ ಖುಶ್ ಆಸಾಂ. ವೆಗಿಂಚ್ ಆಮಿ ನೊರ್ವೆಕ್ ವೆತೆಲ್ಯಾಂವ್ ಆನಿ ಥಂಯ್ಸರ್ ಆಮ್ಚಿ ಜಿಣಿ ಮುಕಾರುನ್ ವ್ಹರ್‍ತೆಲ್ಯಾಂವ್. ಹಾಂವ್ ಪಾಟಿಂ ಗಾಂವಾಕ್ ಯೆಂವ್ಚೊಂ ನಾ. ಮ್ಹಜೆವರ್ವಿಂ ತುಮ್ಕಾಂ ಲಜೆರ್ ಘಾಲ್ಚೊಂ ನಾ. ಆದೇವ್ಸ್ ಡ್ಯಾಡ್…
ರೂಸ್‌ವೆಲ್ಟಾನ್ ಉತ್ರಾಂ ಆಖೇರ್ ಕೆಲಿಂ. ಸಾಂಗೊಂಕ್ ಆಸ್ಲ್ಲೆಂ ಸಾಂಗೊನ್ ಜಾಲ್ಲೆಂ. ತೊ ಉಬೊ ಜಾಲೊ…
ಮುಕಾರ್ ವಚೊನ್ ಕುಡಾಚೆಂ ಬಾಗಿಲ್ ಕಾಡ್ಲೆಂ ಆನಿ ಬಾಗ್ಲಾಭಾಯ್ರ್ ಆಯ್ಲೊ. ಪ್ಯಾಟ್ರಿಕ್ ಹೆಗ್ರೆನಸ್ ತಾಚೆಖಾತಿರ್ ರಾಕೊನ್ ಆಸ್ಲ್ಲೊ.
ತ್ಯಾ ವೆಳಿಂ, ಪಾಟ್ಲ್ಯಾನ್ ಬಸೊನ್ ಆಸ್ಲ್ಲೊ ಬಾಪಯ್ ಮಾತ್ರ್ ಗಳ್ಗಳ್ಯಾಂ ರಡ್ಚೊ ರೂಸ್‌ವೆಲ್ಟಾಕ್ ಆಯ್ಕಾಲೆಂ…
► ಕ್ಲೆರೆನ್ಸ್, ಕೈಕಂಬ
]]>