ಕೊಂಕ್ಣಿ ಸರ್ಕಸ್

54

ಆನಿ ಕಿತೆಂ ಆಯ್ಚ್ಯಾ ದಿಸಾಚೊ ಆವ್ಕಾಸ್ ಪಳೆವ್ನ್ ಬಾಯ್ಲೆಕ್ ಪೊಟ್ಲುನ್ ಧರ‍್ನ್, ಪೊಲ್ಯಾರ್ ದೋನ್ ಕೀಸ್ ವೋಡ್ನ್ ‘ಹ್ಯಾಪ್ಪಿ ಕ್ರಿಸ್ಮಸ್ ಡಾರ‍್ಲಿಂಗ್’ ಮ್ಹಳ್ಳೆಂಚ್ ಬಾಯ್ಲ್ ಎಕ್ದಮ್‌ಶೆಂ ರಾಗಾನ್ ಸಣ್ಸಣ್ಲಿ.

“ಹಾಂಗಾ ಕೊಂಕ್ಣಿ ಮೊರ‍್ತಾ, ಕೊಂಕ್ಣಿ ಮೊರ‍್ತಾ ಮ್ಹಣ್ ಸಕ್ಕಡ್ ಬೋಬ್ ಮಾರುನ್ ಆಸಾತ್ ಆನಿ ತುಂ, ನಾಂವಾಡ್ದಿಕ್ ಕೊಂಕ್ಣಿ ಬರವ್ಪಿ ಮ್ಹಾಕಾ ಇಂಗ್ಲಿಷಾಂತ್ ಉಲ್ಲಾಸ್ ಪಾಟಯ್ತಾಯ್. ತುಕಾ ಕಿತೆಂ ಭಾಗಿ ನತಲಾಂ ಫೆಸ್ತ್ ಮ್ಹಣೊಂಕ್ ಜಾಯ್ನಾಂಗೀ.”

ಅತಾಂ ಬಾಯ್ಲೆಕ್ ಕಶೆಂ ಸಮ್ಜೊಂವ್ಚೆಂ ಜೆಜುಕ್ ಭಾಸ್ ನಾತ್‌ಲ್ಲಿ ಮ್ಹಣೊನ್, ಮ್ಹಣ್ಜೆ ಜೆಜುಕ್ ಖಂಚಿಯ್ ಭಾಸ್ ಜಾತಾ ಮ್ಹಣೊನ್. ತಶೆಂ ಪಳೆಂವ್ಕ್ ಗೆಲ್ಯಾರ್ ಜೆಜುಚಿ ಮಾಂಯ್ ಭಾಸ್ ಆರಾಮಾಯಿಕ್ ಖಂಯ್. ಹಾಂವ್ ಆತಾಂ ಆರಾಮಾಯಿಕ್ ಭಾಶೆಂತ್ ಹಿಕಾ ‘ವಿಶ್’ ಕರುಂಕ್ ಗೆಲ್ಯಾರ್ ಹಿ ಘುಸ್ಪೊಡುನ್ ಹಾಂವ್ ಸೊರೊ ಪಿಯೆವ್ನ್ ಉಲಯ್ತಾಂ ಮ್ಹಣ್ ಚಿಂತುಂಕ್ ಆಸಾ. ತರ್ ಹಿಕಾ ಭಾಶೆಂತ್ ಮಾತ್ರ್ ಸಮಸ್ಸೆ, ಹಾಂವೆಂ ದಿಂವ್ಚ್ಯಾ ಕಿಸಾಂತ್ ನ್ಹಯ್ ಮ್ಹಣ್ ಪರತ್ ಪೊಟ್ಲುನ್ ಧರ‍್ನ್ ಕೀಸ್ ದಿಯಾಂ ಮ್ಹಣ್ತಾನಾ ಹಿ ಕಬಡ್ಡಿ ರೈಡರ್ ಪುಸ್ಕಾ ನಿಸರ‍್ನ್ ಧಾಂವ್ಚ್ಯಾಬರಿಂ ಚುಕೊನ್ ಧಾಂವ್ಲಿ. ಪರಿಣಾಮ್ ಹಾಂವ್ ವಚೊನ್ ಶೀದಾ ವೊಣದಿಕ್ ಆಪ್ಟಾಲೊ ಆನಿ ಮ್ಹಜಿ ತಕ್ಲಿ ಗಿರ್ರ್ ಜಾಲಿ. ತೆದಾಳಾ ಮ್ಹಜೊ ಟ್ಯೂಬ್ ಲಾಯ್ಟ್ ಪೆಟ್ಲೊ. ಹಿಕಾ ಕಶೆಂ ಕಬಡ್ಡಿ ಪಳೆವ್ನ್ ಕೊಂಕ್ಣೆಚೆರ್ ಮೋಗ್ ಉದೆಲೊ ಮ್ಹಣೊನ್. ತೆಂ ಕಶೆಂ ಮ್ಹಳ್ಯಾರ್ ತ್ಯಾ ಕಬಡ್ಡಿ ಖೆಳಾಂತ್‌ಯೀ ಆಸ್ಚೆ ಪಾಂಯ್ ವೊಡ್ಚೆಚ್. ದೆವಾ ಮ್ಹಜ್ಯಾ ಹಿಣೆಂ ಕಬಡ್ಡಿ ಖೆಳಾಕ್ ಆನಿ ಕೊಂಕ್ಣೆಕ್ ಅಶಿ ಸಯ್ರಿಕ್ ಕೆಲಿ ಮ್ಹಣ್ತಾನಾ ಎದೊ ವ್ಹಡ್ ಬರವ್ಪಿ ಜಾಲ್ಯಾ ಉಪ್ರಾಂತ್ ಕೊಂಕ್ಣಿ ಮೊರಾನಾ ತರೀ ‘ಕೊಂಕ್ಣಿ ಮೊರ‍್ತಾ’ ಮ್ಹಣ್ ಗಾಬ್ ಉಟ್‌ಲ್ಲ್ಯಾಕ್ ಕಾಂಯ್ ಪುಣೀ ಕರಿಜೆ ಮ್ಹಣ್ ನಿರ‍್ಧಾರ್ ಕೆಲೊ.

ಪೂಣ್ ಕರ‍್ಚೆಂ ಕಿತೆಂ? ಕೊಂಕ್ಣಿ ಭಾಸ್ ಬ್ಯಾಂಕಾಂತ್ ಪುಣೀ ‘ಇನ್ವೆಸ್ಟ್’ ಕರ‍್ಯಾಂ ಮ್ಹಳ್ಯಾರ್ ತಾಣಿಂ ದಿಂವ್ಚಿ ಪಾಂಚ್, ಸಾಡೆಪಾಂಚ್ ರೆಟಿಚಿ ವಾಡ್. ಪಾವಾನಾತ್‌ಲ್ಲ್ಯಾಕ್ ಆಜ್‌ಕಾಲ್ಚಿಂ ಬೆಂಕಾಂ ಹೆರ್ ಬೆಂಕಾಂ ಸಂಗಿಂ ವಿಲೀನ್ ಜಾಂವ್ಚಿಂ ಪಳಯ್ತಾನಾ, ಮಾಗಿರ್ ಆಮ್ಚಿಯೀ ಭಾಸ್ ಬೆಂಕಾಂತ್ ಫಿಕ್ಸಾಡಾರ್ ದವರ‍್ಲಿ ತರ್ ಚಾರ್ ವರ್ಸಾಂ ನಂತರ್ ಖಂಚ್ಯಾಗೀ ಗುಜರಾತಿ, ಮರಾಠಿ, ಪಂಜಾಬಿ ವಾ ಮಲಯಾಳಿ ಭಾಶೆಂತ್ ವಿಲೀನ್ ಜಾಲಿ ತರ್ ಮಾಗಿರ್ ಸೊಧುನ್ ಕಾಡುಂಕ್ ವಾ ತಾಚೆರ್ ಸಂಶೋಧ್ ಕರುಂಕ್ ವರ್ಸಾಂ ಲಾಗ್ತಿತ್. ವರ್ಸಾಂ ಲಾಗ್ಲ್ಯಾರ್‌ಯೀ ವ್ಹಡ್‌ನಾ ಮೂ, ಪೂಣ್ ತಶಿ ಮೆಳ್‌ಲ್ಲಿ ತಿ ಆಮ್ಚಿ ಕೊಂಕ್ಣಿ ಭಾಸ್ ತಿ ಕೊಂಕ್ಣಿ ನ್ಹಯ್ ಬಗಾರ್ ಆಮ್ಚ್ಯಾಚ್ ಭಾಶೆಚಿ ಏಕ್ ಭಯ್ಣ್-ಭಾಸ್ ಮ್ಹಣ್ ಆಮ್ಚ್ಯಾ ಮಾಂಯ್ಕ್ ಲಿಪಯ್ತಿತ್ ತರ್ ಆಮ್ಕಾಂ ‘ಮಾಂಯ್ ಭಾಸ್’ ಮೆಳ್ಚಿನಾ. ಆನಿ ತೆ ತಾಂಚ್ಯಾ ಭಯ್ಣಿಕ್ ಖಂಡಿತ್ ಸೊಡ್ಚೆನಾಂತ್.

ಹಾಂವೆಂ ಆಯ್ಕಾಲಾಂ ಅತಾಂ ರಿಯಲ್ ಎಸ್ಟೇಟ್ ಭಾರಿಚ್ ವೆಗಾನ್ ವಾಡೊನ್ ಆಸಾ ಮ್ಹಣೊನ್. ಜರ್ ಆಮ್ಚಿ ಕೊಂಕ್ಣಿ ಭಾಸ್ ಹ್ಯಾ ರಿಯಲ್ ಎಸ್ಟೇಟಾಂತ್ ‘ಇನ್ವೆಸ್ಟ್’ ಕೆಲಿ ತರ್ ಫಕತ್ ತೀನ್ ವರ್ಸಾನಿಂ ಡಬಲ್ ಜಾತಾ. ಹಿ ಬರೀ ಐಡಿಯಾ. ಪೂಣ್ ವಿಶಯ್ ಕಿತೆಂ ಮ್ಹಳ್ಯಾರ್ ಆಜ್‌ಕಾಲ್ ಜಾಗ್ಯಾಚೆ ಜಾಯ್ತೆ ತೊಂದ್ರೆ ಆಸಾತ್. ಹ್ಯಾ ಜಾಗ್ಯಾ ಖಾತಿರ್‌ಚ್ ಭಾಭಾವಾಂ ಮಧೆಂ ಲಡಾಯ್ ಝಗ್ಡಿಂ ಚಲ್ತಾತ್. ಅಶೆಂ ಮ್ಹಣ್ತಾನಾ ಮಾಗಿರ್ ಆಮ್ಚ್ಯಾ ಕೊಂಕ್ಣಿ ಭಾಶೆ ಖಾತಿರ್ ಹಾಂವೆಂ ಸದಾಂನೀತ್ ಕೊಡ್ತಿಕ್ ನಾಚಾಜೆ ಪಡಾತ್. ಜರ್ ಹಾಂವೆಂ ಜಾಗ್ಯಾಂತ್ ‘ಇನ್ವೆಸ್ಟ್’ ಕರ‍್ನ್ ಉಪ್ರಾಂತ್ ಫಾಯ್ದೊ ಜೊಡ್ತಾನಾ ವಾಂಟ್ಯಾ ಖಾತಿರ್ ಹಜಾರ್ ಕೊಂಕ್ಣಿ ವಾವ್ರಾಡಿ ಮ್ಹಾಕಾಯ್ ವಾಂಟೊ ದೀ ಮ್ಹಣ್ ಮ್ಹಜೆರ್ ಉಪ್ರಾಟ್ತಿತ್ ತರ್ ವಾ ವಾಂಟ್ಯಾಚ್ಯಾ ದುರಾಶೆನ್ ಮ್ಹಜಿಚ್ ಖುನ್ ಕೆಲಿ ತರ್?

ಅಶೆಂ ಜೆಜು ಜಲ್ಮಾಲ್ಲ್ಯಾ ಹ್ಯಾ ನತಲಾಂ ಕಾಳಾರ್‌ಯೀ ದೀಸ್ ರಾತ್ ಮ್ಹಜ್ಯಾ ಮತಿಂತ್ ಕೊಂಕ್ಣೆಚಿಂಚ್ ಚಿಂತ್ನಾಂ ಇತ್ಲಿಂ ಘುಂವ್ತಾಲಿ ಮ್ಹಳ್ಯಾರ್ ಜರ್ ಜೆಜು ಅನ್ಯೇಕ್ ಪಾವ್ಟಿಂ ಜಲ್ಮೊನ್ ಆಯ್ಲೊ ತರ್ ಹ್ಯಾ ಸಂಸಾರಾರ್ ಫಕತ್ ಕೊಂಕ್ಣಿ ಭಾಸ್ ಮಾತ್ರ್ ಆಸೊಂದಿ ಮ್ಹಣ್ ನಿಯಮ್ ಹಾಡ್ತೊ ಕೊಣ್ಣಾ. ಹ್ಯಾ ‘ಕೊಂಕ್ಣಿ ‘ ಖಾತಿರ್ ಕಾಂಯ್ ತರೀ ಕರಿಜೆ ಮ್ಹಣ್ ‘ನಿರಂತರಿ’ ಎಕ್‌ಚ್ ಆಲೋಚನ್ ಮ್ಹಜ್ಯಾ ಮತಿಂತ್ ಖೆಳ್ತಾಲಿ. ಅಶೆಂ ವಾಟೆರ್ ಏಕ್ ದೀಸ್ ಚಲೊನ್ ವೆತಾನಾ ಮ್ಹಜಿ ದೀಷ್ಟ್ ಎಕಾ ಪೋಸ್ಟರಾಚೆರ್ ಪಡ್ಲಿ. ತೆಂ ಎಕಾ ಸರ್ಕಸಾಚೆಂ ಪೋಸ್ಟರ್ ಜಾವ್ನಾಸ್‌ಲ್ಲೆಂ. ತೆದ್ನಾಂಚ್ ಮ್ಹಜ್ಯಾ ಮತಿಕ್ ಏಕ್ ನವಿಚ್ ಐಡಿಯಾ ಆಯ್ಲಿ.

ವ್ಹಯ್! ಕೊಂಕ್ಣಿ ಉರಂವ್ಚ್ಯಾಕ್ ಕೊಂಕ್ಣಿ ಸರ್ಕಸ್ ಕರ‍್ಚೆಂ. ಹ್ಯಾ ಮಾರಿಫಾತ್ ಹೆಂ ಸರ್ಕಸ್ ನಿರಂತರಿ ಲೊಕಾಂಚ್ಯಾ ಮತಿಂತ್ ಉರ‍್ತೆಲೆಂ. ಕೊಂಕ್ಣೆಂತ್ ಫಿಲ್ಮಾಂ ಆಯ್ಲ್ಯಾಂತ್, ನಾಟಕ್ ಆಯ್ಲ್ಯಾತ್, ಪದಾಂ ಆಯ್ಲಾಂತ್, ಕಾಣ್ಯೊ ಕಾದಂಬರಿ ಆಯ್ಲ್ಯಾತ್. ಪೂಣ್ ಆಜ್ ವರೇಗ್ ಕೊಂಕ್ಣಿಂತ್ ಸರ್ಕಸ್ ಯೇಂವ್ಕ್ ನಾ. ಕೊಂಕ್ಣಿಂತ್ ಸರ್ಕಸ್ ಹಾಡ್ಲೆಂ ತರ್ ಪಯ್ಲೆಪಾವ್ಟಿಂ ಹಾಚಿ ಕೀರ್ತ್ ಮ್ಹಾಕಾ ಮೆಳ್ತೆಲಿ.

ಹಿ ಐಡಿಯಾ ಮ್ಹಜಿ ಮತಿಂತ್ ಆಯಿಲ್ಲಿಚ್ ಹಿ ಖಬರ್ ವಚೊನ್ ಪಯ್ಲೆಂ ಹಾಂವೆಂ ಮ್ಹಜ್ಯಾ ಬಾಯ್ಲೆಕ್ ಸಾಂಗ್ಲಿ. ಅಶೆಂ ಸಕ್ಕಡ್ ತಯಾರ್ ಕರ‍್ನ್ ಅಖ್ರೇಚ್ಯಾ ಘಡಿಯೆ ತಿಕಾ ಸಾಂಗಾನಾಸ್ತಾಂ ಪಯ್ಲೆಂಚ್ ಸಾಂಗೊನ್ ಹಾಂವೆಂ ಚಿಕ್ಕೆ ಅಮ್ಸೊರ್ ಕೆಲೊಗೀ ಮ್ಹಣ್. ಸರ್ಕಸಾಚಿ ಐಡಿಯಾ ಆಯ್ಕೊನ್ ತಿಕಾ ಖುಶಿ ಕಶಿಯೀ ಜಾಲಿ ಪೂಣ್ ತ್ಯಾ ಸರ್ಕಸಾಚಿ ‘ರಿಂಗ್ ಮಾಸ್ಟರ್’ ಅಪ್ಣಾಕ್‌ಚ್ ಕರಿಜೆ ಮ್ಹಣಾಲಿ. ಅಶೆಂ ಸರ್ಕಸ್ ಸುರು ಕರ‍್ಚ್ಯಾ ಆದಿಂಚ್ ತಾಚೆಂ ಲಗಾಮ್ ಮ್ಹಜ್ಯಾ ಹಾತಾಥಾವ್ನ್ ಸುಟೊನ್ ಗೆಲೆಂ. ವ್ಹಡ್ ನಾ, ತೆಂ ಮ್ಹಜ್ಯಾ ಬಾಯ್ಲೆಚ್ಯಾಚ್ ಹಾತಾಂತ್ ಆಸಾ ಮ್ಹಣ್ಯಾಂ, ತಾಂತುನ್ ಅಜ್ಯಾಪ್ ಪಾಂವ್ಚೆಂ ಕಾಂಯ್ಚ್ ನಾ. ಲಗಾಮ್ ತಿಕಾ ದಿಲ್ಯಾರೀ ಸರ್ಕಸ್ ಕರ‍್ಚೆಂ ಹಾಂವೆಂ ನೆಂ?

ತ್ಯಾ ಉಪ್ರಾಂತ್ ಮ್ಹಾಕಾ ಕಳ್ಳೆಂ ಕೀ ಖಂಚ್ಯಾಯ್ ಕಾಮಾಕ್ ಆಮ್ಸೊರುಂಕ್ ನಜೊ ಮ್ಹಣ್. ಅಶೆಂ ಹಾಂವ್ ಹಳ್ತಾರ್ ಬಸೊನ್ ಸದಾಂನೀತ್ ಸರ್ಕಸಾಚೆಂಚ್ ಯೋಜನ್ ರೂಪಿತ್ ಕರ‍್ನ್ ಆಸ್‌ಲ್ಲೊಂ. ಪೂಣ್ ಏಕ್‌ದೀಸ್ ಕಿತೆಂ ಘಡ್ಲೆಂಗೀ ಮ್ಹಳ್ಯಾರ್ ಹಾಂವ್ ಆಮ್ಚ್ಯಾ ಸೆಜಾರಾ ಎಕಾ ರೋಸಾಕ್ ಗೆಲ್ಲೊಂ. ಥಂಯ್ಸರ್ ನೊವ್ರ್ಯಾಕ್ ರೋಸ್ ಪುಸ್ತಾನಾ ಎಕಾ ಮಾನೆಸ್ತಿಣೆನ್ ಅಶಿ ಏಕ್ ವೊವಿ ಮ್ಹಳಿ.

‘ಪೊರ‍್ವಾಂ ಕರ‍್ತಾ ಸರ್ಕಸ್ ಆಮ್ಚೊ ವೊರೆತ್ ಬಾಬ್’

ಏ ದೆವಾ ಮ್ಹಜ್ಯಾ, ಅತಾಂ ಹಾಂವೆಂ ಸರ್ಕಸ್ ಕರ‍್ಚ್ಯಾ ಪಯ್ಲೆಂ ಹೊ ಹೊರೆತ್ ಬಾಬ್ ಸರ್ಕಸ್ ಕರ‍್ತಾಗೀ, ಮ್ಹಜಿ ಜಾಲಿ ಗತ್. ಇತ್ಲ್ಯಾ ದಿಸಾಂಥಾವ್ನ್ ಹಾಂವೆಂ ಕೆಲ್ಲೆಂ ಯೋಜನ್ ನಿರ್ಫಳ್ ಜಾಯ್ತ್. ಆನಿ ಘಳಾಯ್ ಕೆಲ್ಯಾರ್ ಜಾಯ್ನಾಂ ಮ್ಹಣ್ ರೋಸ್ ಅರ್ಧ್ಯಾರ್‌ಚ್ ಸೊಡ್ನ್ ಘರಾ ಆಯ್ಲೊಂ. ವಾಟೆರ್ ಯೆತಾನಾ ವಾಡ್ಯಾಚ್ಯಾ ಗುರ್ಕಾರಾನ್ ರೋಸ್ ಅರ್ಧ್ಯಾರ್ ಸೊಡ್ನ್ ಘರಾ ಆಮ್ಸೊರಾನ್ ಧಾಂವ್ತಾನಾ ವಿಚಾರ‍್ಲೆಂ

“ಕಿತೆಂ ಸಿಕೇರಾಮಾ ಅರ್ಜೆಂಟ್ ಘರಾ ಧಾಂವ್ತಾಯ್?”

ಮ್ಹಜ್ಯಾ ಮತಿಂತ್ ಸರ್ಕಸ್‌ಚ್ ಆಸ್‌ಲ್ಲ್ಯಾನ್ ಹಾಂವೆಂ ಮ್ಹಳೆಂ “ಮ್ಹಾಕಾ ಅರ್ಜೆಂಟ್ ಸರ್ಕಸ್ ಕರುಂಕ್ ಆಸಾ ತಶೆಂ ಘರಾ ವೆತಾಂ.”

ಹೆಂ ಮ್ಹಜೆಂ ಸ್ಲಿಪ್ ಆಫ್ ಟಂಗ್ ನ್ಹಯ್ ಬಗಾರ್ ಸ್ಲಿಪ್ ಆಫ್ ಮೈಂಡ್. ಮ್ಹಾಕಾ ಕಳಿತ್ ನಾಸ್ತಾನಾಂಚ್ ಮ್ಹಜ್ಯಾ ತೊಂಡಾಥಾವ್ನ್ ಭಾಯ್ರ್ ಪಡ್ಲೆಂ.  ಅರೇ, ಹೆಂ ಕಿತೆಂ ಜಾಲೆಂ. ಮ್ಹಾಕಾ ಮ್ಹಜಿ ಚೂಕ್ ಕಳ್ಳಿ. ಗುರ್ಕಾರಾಮ್ ಅತಾಂ ವಚೊನ್ ಖಂಡಿತ್ ರೋಸಾಚ್ಯಾ ಮಾಟ್ವಾಂತ್ ಸಾಂಗೊಂಕ್ ಆಸಾ. ಮಾಗಿರ್ ಬಾಕಿಚ್ಯಾಂಕ್ ಕಳ್ಳ್ಯಾರ್ ಹಿ ಐಡಿಯಾ ಬರೀ ಆಸಾ ಮ್ಹಣೊನ್ ಮ್ಹಜ್ಯಾ ಪಯ್ಲೆಂ ತೆ ಸರ್ಕಸ್ ಸುರು ಕರುಂಕ್ ಆಸಾತ್. ದೆಕುನ್ ಹಾಂವೆಂ ಗುರ್ಕಾರಾಮಾಕ್ ಕುಶಿಕ್ ಆಪವ್ನ್ ಮ್ಹಳೆಂ.

“ಪಳೆ ಗುರ್ಕಾರಾಮಾ, ಹ್ಯಾ ವಿಶಿಂ ಕೊಣಾಯ್ಕಿ ಸಾಂಗಿನಾಕಾ, ಪ್ಲೀಜ್. ಮ್ಹಜ್ಯಾ ಸರ್ಕಸಾಂತ್ ತುಕಾಯ್ ಕಾಮ್ ದಿತಾಂ. ಏಕ್‌ಪಾವ್ಟಿಂ ಮ್ಹಜೆಂ ಸರ್ಕಸ್ ಜಾಂವ್ದಿ, ಮಾಗಿರ್ ತುಂ ಘಡ್ಯೆ ಘಡ್ಯೆ, ಘಡ್ಯೆ ಘಡ್ಯೆ ಮ್ಹಜೆಂ ಸರ್ಕಸ್ ಪಳೆಂವ್ಕ್ ಯೆತೊಲೊಯ್ಗೀ ನಾಂ ಪಳೆ.”  ಇತ್ಲೆಂ ಸಾಂಗೊನ್ ಹಾಂವ್ ಥಂಯ್ಚೊಂ ನಿಕಳ್ಳೊಂ.

ಗುರ್ಕಾರಾಮಾನ್ ಕೊಣಾಯ್ಕಿ ಸಾಂಗಿನಾ ಮ್ಹಣ್ ಭಾಸ್ ದಿಲ್ಲಿ ತರೀ ಉಪ್ರಾಂತ್ ತೀನ್ ಪೆಗ್ಗ್ ಮಾರ್‌ಲ್ಲ್ಯಾನ್ ಮ್ಹಜ್ಯಾ ಸರ್ಕಸಾಚಿ ಖಬರ್ ತಾಣೆಂ ಮಾಯ್ಕಾರ್ ಎನಾಂವ್ಸ್ ಕೆಲೆಂ ಖಂಯ್. ಹಿ ಖಬರ್ ಆಯ್ಕೊನ್ ವಾಡ್ಯಾಂತ್ಲೊ ಲೋಕ್ ಮ್ಹಜೆಂ ಸರ್ಕಸ್ ಪಳೆಂವ್ಕ್ ಘರಾ ಯೇಂವ್ಕ್ ತಯಾರ್ ಜಾಲೊ ಖಂಯ್.

ಸರ್ಕಸಾಚಿ ತಯಾರಾಯ್ ಕರ‍್ಚ್ಯಾಕ್ ದುಸ್ರ್ಯಾ ದಿಸಾ ಸಕಾಳಿಂ ಹಾಂವ್ ವೆಗ್ಗಿಂ ಉಟ್ಲೊಂ. ಸರ್ಕಸಾಕ್ ಪಯ್ಲೆಂ ಜಾಯ್ ಮೊನ್ಜಾತಿ. ಆನಿ ಹೆಂ ಮ್ಹಜೆಂ ‘ಕೊಂಕ್ಣಿ ಸರ್ಕಸ್’ ಜಾಲ್ಲ್ಯಾನ್ ಹ್ಯಾ ಖಾತಿರ್ ಫಕತ್ ಕೊಂಕ್ಣಿ ಭಾಸ್ ಜಾಣಾ ಆಸ್ಚ್ಯೊ ಮೊನ್ಜಾತಿ ಮಾತ್ರ್ ಘೆಂವ್ಚ್ಯಾಕ್ ನಿರ‍್ಧಾರ್ ಕೆಲೊ. ಪಯ್ಲೆಂ ಸುರು ಕೆಲೆಂ ವಡ್ಲ್ಯಾ ಮೊನ್ಜಾತಿ ಥಾವ್ನ್. ಅತಾಂ ಮ್ಹಜ್ಯಾ ಸರ್ಕಸಾಕ್ ಏಕ್ ಹಸ್ತ್ ಜಾಯ್. ಅತಾಂ ಕೊಂಕ್ಣಿ ಹಸ್ತ್ ಖಂಯ್ ಮೆಳಾತ್ ಮ್ಹಣ್ ಚಿಂತುನ್ ಆಸ್ತಾಂ ಮ್ಹಾಕಾ ಉಡಾಸ್ ಆಯ್ಲೊ ಆಮ್ಚೊ ಏಕ್ ನಾಂವಾಡ್ದಿಕ್ ಲೇಖಕ್. ತಾಕಾ ಹಾಂವ್ ಎದೊಳ್ ವರೇಗ್ ಭೆಟೊಂಕ್ ನಾ. ಪೂಣ್ ತೊ ಎಕಾ ಹಸ್ತಿಕ್ ಪೊಸುನ್ ಆಸಾ ಮ್ಹಳ್ಳೆಂ ಸಬಾರಾನಿಂ ಸಾಂಗ್ತಾನಾ ಆಯ್ಕಾಲಾಂ. ಹಾಚಿ ಹಸ್ತ್ ಭಾಡ್ಯಾಕ್ ಘೆತ್ಲ್ಯಾರ್ ಸುಲಭ್ ಜಾಯ್ತ್ ಆನಿ ಕೊಂಕ್ಣಿ ಖಾತಿರ್ ಮ್ಹಣ್ತಾನಾ ತೊ ನಾ ಮ್ಹಣ್ಚೊನಾ. ದೆಕುನ್ ವಾಟ್ಸಾಪ್ ಗ್ರೂಪಾಚೆರ್ ತಾಚೆಂ ನಂಬರ್ ಪಳೆವ್ನ್ ತಾಕಾ ಕೋಲ್ ಕೆಲೆಂ.

“ಹಲೋ ಫೆರ್ನಂದಾಮ್‌ಗೀ, ಹಾಂವ್ ಸಿಕೇರ್ ಉಲಯ್ತಾಂ. ಹಾಂವೆಂ ಕೊಂಕ್ಣಿಂತ್ ಏಕ್ ಸರ್ಕಸ್ ಕರುಂಕ್ ಚಿಂತ್ಲಾಂ. ತಾಕಾ ಥೊಡ್ಯೊ ಕೊಂಕ್ಣಿ ಜಾಣಾ ಆಸ್ಚ್ಯೊ ಮೊನ್ಜಾತಿ ಜಾಯ್ ಆಸ್‌ಲ್ಲ್ಯೊ. ತುಮಿಂ ಸಬಾರ್ ವರ್ಸಾಂಥಾವ್ನ್ ಎಕಾ ಹಸ್ತಿಕ್ ಪೊಸುನ್ ಆಸಾತ್ ಮ್ಹಣ್ ಆಯ್ಕಾಲ್ಲೆಂ. ತುಮ್ಚಿ ಹಸ್ತ್ ಆಮ್ಚ್ಯಾ ಸರ್ಕಸಾಕ್ ದಿವ್ಯೆತ್‌ವೇ?”

“ಹೆತ್ತ್ ಪಡ್ಪಶ್ಯಾ . . . ” ಫೆರ್ನಾಂದ್ ಹಸ್ತಿಚೆಂ ನಾಂವ್ ಆಯ್ಕೊನ್ ಹಸ್ತಿಬರಿಂಚ್ ತುರ್ಬೆಂತ್ ವಾಜಯ್ಲಾಗ್ಲೊ.

“ಕಿತೆಂರೇ, ಕೋಣ್ ಸಿಕೇರ್ ರೇ ತುಂ? ತುಜಿ ಪ್ರಾಯ್ ಕಿತ್ಲೆ ರೇ, ವೊಂಟಾರ್ ಮಿಶಿಯೊ ಆಯ್ಲ್ಯಾತ್‌ಯೆರೇ. ಕಿತೆಂ? ಮ್ಹಜಿ ಬಾಯ್ಲ್ ಜಿವಾಂತ್ ಇಲ್ಲಿಶಿ ಮೊಟಿ ಆಸಾ, ಸಗ್ಳೊ ಗಾಂವ್ ತಿಕಾ ಪಾಟ್ಲ್ಯಾನ್ ಹಸ್ತ್ ಮ್ಹಣ್ ಚಿಡಾತಯ್ತಾನಾ, ತುಕಾ ಕಿತ್ಲೆಂ ಧಯ್ರ್‌ರೇ, ತಿಕಾ ಮ್ಹಜೆ ಮುಕಾರ್‌ಚ್ ಹಸ್ತ್ ಮ್ಹಣ್ ಆಪಂವ್ಕ್. ಖಂಯ್‌ರೇ ತುಜೆಂ ಸರ್ಕಸ್. ತುಜೆಂ ಸರ್ಕಸ್‌ಚ್ ಬರ್ಕಾಸ್ ಕರ‍್ತಾಂ . . .”

ಫೆರ್ನಾಂದ್ ಗರ್ಜೆಲ್ಲೊ ಪಳೆವ್ನ್ ಮ್ಹಾಕಾ ಭಿಂಯಾನ್ ಕಾಂಪ್ ಸುಟ್ಲಿ. ಹಾಂವೆಂ ಫೋನ್ ಕಟ್ಟ್ ಕೆಲೆಂ. ಮ್ಹಾಕಾ ಕಿತೆಂ ಗೊತ್ತು ಹಸ್ತ್ ಮ್ಹಣ್ ಹಾಚ್ಯಾ ಬಾಯ್ಲೆಕ್ ತುಕ್ಲಾಯ್ತಾತ್ ಮ್ಹಣೊನ್. ಹಾಂವೆಂ ತಕ್ಷಣ್ಂಚ್ ಹಸ್ತಿಕ್ ಸರ್ಕಾಸಾಥಾವ್ನ್ ಭಾಯ್ರ್ ದವರ‍್ಲೆಂ. ಕೊಂಕ್ಣಿ ಉಲಯ್ತೆಲ್ಯಾ ಆಮ್ಕಾಂ ಮೈನಾರಿಟಿ ಮ್ಹಣ್ ಸರ್ಕಾರ್ ಸರ್ಕಾಸಾಕ್ ಜಾಗೊ ಕಿತ್ಲೊ ದೀತ್? ಎದಿ ವ್ಹಡ್ ಹಸ್ತ್ ಸರ್ಕಾಸಾ ಭಿತರ್ ಹಾಡ್ಲಿ ತರ್ ಮಾಗಿರ್ ಆಮಿಂ ಸರ್ಕಾಸಾಥಾವ್ನ್ ಭಾಯ್ರ್ ರಾವಾಜೆ ಪಡಾತ್. ಮಾಗಿರ್ ಆಮ್ಚೆಂ ಸರ್ಕಸ್ ಫ್ಲಾಪ್ ಜಾವ್ನ್ ಹಸ್ತ್ ಮೊರಾತ್ ಜಾಲ್ಯಾರ್ ಜಿಣಿಭರ್ ಹಾಂವೆಂ ಹಸ್ತಿಕ್ ಫೊಂಡ್ ಕಾಡ್ನ್ ರಾವಾಜೆ ಪಡಾತ್. ಚಾಫ್ರಾನ್ ತೆದಾಳಾ ಸಾಂಗ್‌ಲ್ಲೆಂ ಫಟ್ ನ್ಹಯ್, ‘ಹಸ್ತ್ ಮೊರುಂಕ್ ಸುಲಭ್ ಪೂಣ್ ಪುರೊಂಕ್ ಕಷ್ಟ್.’

ಹಸ್ತಿಚ್ಯಾ ವಿಶಯಾಕ್ ವಚೊನ್ ಹಾಂವ್ ಮುಯೆತೆದೊ ಜಾಲೊಂ. ಹಸ್ತಿಕ್ ಸೊಡ್ನ್ ಸುಕ್ಣ್ಯಾಂಚಿ ಸೊಧ್ನಾಂ ಕೆಲಿಂ. ಪಯ್ಲೆಂ ಲವ್ ಬರ್ಡ್ಸ್ ಸೊಧಿಜೆ. ಮ್ಹಜೊ ಎಕ್ಲೊ ಮಿತ್ರ್ ಕೆದ್ನಾಂಯ್ ಮೊಗಾಚ್ಯಾ ಸುಕ್ಣ್ಯಾವಿಶಿಂಚ್ ಕವಿತಾ ಬರಯ್ತಾಲೊ. ತಾಚೆಲಾಗಿಂ ಭೋವ್‌ಶಾ ಲವ್ ಬರ್ಡ್ಸ್ ಆಸಾಜೆ. ಹಾಂವೆಂ ತಾಕಾ ಫೋನ್ ಕರ‍್ನ್ ಸರ್ಕಾಸಾಚೊ ವಿಶಯ್ ಸಾಂಗಾನಾಸ್ತಾಂ ‘ಲವ್ ಬರ್ಡ್ಸ್ ಖಂಯ್ ಮೆಳಾತ್?’ ಮ್ಹಣ್ ವಿಚಾರ‍್ಲೆಂ. ತೊ ಮ್ಹಣಾಲೊ :

“ಅತಾಂ ಲವ್ ಬರ್ಡ್ಸ್ ಮೆಳ್ಚಿಂ ಫಕತ್ ಕದ್ರಿ ಪಾರ್ಕಾಂತ್ ಮಾತ್ರ್”

“ಪೂಣ್ ತಾಂಕಾಂ ಧರ‍್ಚೆಂ ಕಶೆಂ?”

“ಎಕ್ದಮ್ ಸಿಂಪಲ್. ದಾನಿ ಉಡಯ್ಲ್ಯಾರ್ ಜಾಲೆಂ, ಅಪ್ಶಿಂ ಘರಾ ಮ್ಹಣಾಸರ್ ಯೆತಾತ್.”

“ವ್ಹಯ್‌ಗೀ ಕಿತೆಂ, ಖಂಚಿ ದಾನಿ ಉಡಯ್ಜೆ”

“ಆನಿ ಖಂಚಿ ದಾನಿ ಸಿಕೇರಾಮಾ, ಪಯ್ಶಾಂಚಿ ದಾನಿ ಉಡಯ್, ಸೊಭಿತ್ ಸೊಭಿತ್ ಬರ್ಡ್ಸ್ ತುಜ್ಯಾ ಪಾಸ್ಳೆಂತ್. ಪೂಣ್ ಭರ‍್ತಿ ಸಾತ್ ವೊರಾ ಉಪ್ರಾಂತ್ ವಚ್. ಬಾಯ್ಲೆಥಾವ್ನ್ ಮಾತ್ರ್ ಚಿಕ್ಕೆ ಜಾಗ್ರುತ್ ರಾವ್.”

“ಹೇಯ್ ಕವಿಮಾಮ್, ಹಾಂವ್ ತ್ಯಾ ಲವ್ ಬರ್ಡ್ಸಾವಿಶಿಂ ಉಲವ್ನ್ ನಾ. ಹಾಂವೆಂ ಸರ್ಕಸ್ ಕರುಂಕ್ ಯೆವ್ಜಿಲಾಂ. ತ್ಯಾ ಸರ್ಕಸಾಂತ್ ಕೊಂಕ್ಣಿ ಕಳಿತ್ ಆಸ್ಚಿಂ ಲವ್ ಬರ್ಡ್ಸ್ ಜಾಯ್”

“ತುವೆಂ ಕಿತ್ಲೆಂಯ್ ಸರ್ಕಸ್ ಕೆಲ್ಯಾರೀ ತಸಲಿಂ ಲವ್ ಬರ್ಡ್ಸ್ ಧರುಂಕ್ ತುಕಾ ಜಾಂವ್ಚೆಂನಾ. ಆನಿ ಎಕಾದಾವೆಳಾ ತುವೆಂ ಲವ್ ಬರ್ಡ್ಸ್ ಧರ‍್ಲಿಂಯ್ಂಚ್ ಮ್ಹಣ್ ಚಿಂತ್ಯಾಂ, ತಾಂಕಾಂ ಕೊಂಕ್ಣಿ ಶಿಕಂವ್ಚ್ಯಾ ಪಯ್ಲೆಂ ತಿಂ ತುಕಾ ಉಬ್ಚೆಂ ಶಿಕೊಂಕ್ ಆಸಾತ್”

ಕವಿಚಿಂ ಉತ್ರಾಂ ಆಯ್ಕೊನ್ ಹಾಂವ್ ತಾಚ್ಯಾ ಕವಿತೆಬರಿಂಚ್ ನಿರಾಸ್ ಜಾಂವ್ಕ್ ನಾ. ಬಗಾರ್ ಮ್ಹಜಿ ಸ್ಪೂರ್ತಿ ಆನಿಕೀ ಚಡ್ಲಿ. ತಿ ಹಿ ಮೊನ್ಜಾತ್ ಸೊಧ್ಚ್ಯಾ ಬದ್ಲಾಕ್ ಎಕಾ ವಾಗಾಕ್ ಸರ್ಕಾಸಾಂತ್ ಘೆತ್ಲೆಂ ತರ್ ಖಂಡಿತ್ ಲೋಕ್ ಜಮ್ತಲೊ. ಪೂಣ್ ವಾಗಾಕ್ ಸೊಧುನ್ ವೆಚೆಂ ಖಂಯ್. ತಿತ್ಲ್ಯಾರ್ ಮ್ಹಾಕಾ ಉಡಾಸ್ ಆಯ್ಲೊ ಪೆಡ್ಡಿಚೊ. ಎಕಾ ಕಾಳಾರ್ ತಾಚೆಲಾಗಿಂ ಏಕ್ ಬಂದೂಕ್ ಆಸ್‌ಲ್ಲಿ. ತೊ ಕಂಡಾಪಟ್ಟೆ ಶಿಕಾರಿ ಕರ‍್ತಲೊ ಖಂಯ್. ಗಾಂವಾರ್ ತಾಕಾ ಬೆಡಿ ಪೆಡ್ಡಿ ಮ್ಹಣ್ಂಚ್ ನಾಂವ್. ಹಾಂವೆಂ ತಾಕಾ ಫೋನ್ ಕೆಲೆಂ.

“ಹಲೋ, ಪೆಡ್ಡಿಯಾಮ್, ಹಾಂವ್ ಸಿಕೇರ್, ಉಡಾಸ್ ಆಯ್ಲೊ ಗೀ? ಲ್ಹಾನ್ ಆಸ್ತಾನಾ ತುಜ್ಯಾ ವಾಗಾಚ್ಯೊ ಕಾಣ್ಯೊ ಆಯ್ಕೊನ್ ಅತಾಂ ಕೊಂಕ್ಣಿ ಪತ್ರಾನಿಂ ಕಾಣ್ಯೊ ಬರಂವ್ಕ್ ಧರ‍್ಲಾಂ. ತುಜ್ಯಾ ಪ್ರಭಾವಾನ್ ಮ್ಹಜ್ಯೊ ಕಾಣ್ಯೊ ಮ್ಹಣ್ತಾನಾಂಚ್ ಲೋಕ್ ಭಿಂಯಾನ್ ಕಾಂಪ್ತಾ.”

“ಹಾಂ ಹಾಂ ಸಿಕೇರಿ. ಕರ‍್ಯಾಂಗೀ ಸಾಂಗಾತಾ ಮೆಳೊನ್ ಶಿಕಾರಿ.”

“ನಾಕಾ ಸಾಯ್ಬಾ, ಶಿಕಾರಿ ನಾಕಾ. ಪೂಣ್ ಹಾಂವೆಂ ಏಕ್ ಸರ್ಕಸ್ ಕರುಂಕ್ ಚಿಂತ್ಲಾಂ, ತಾಕಾ ಏಕ್ ವಾಗ್ ಜಾಯ್ ಆಸ್‌ಲ್ಲೊ. .  . “

“ಹ..ಹ..ಹ.. ಕಿತೆಂ ಸಿಕೇರಿ ವಾಗಾ ಸಾಂಗಾತಾ ಸರ್ಕಸ್? ಹ..ಹ..ಹ..”

“ತಶೆಂ ನ್ಹಯ್ ಪೆಡ್ಡಿಯಾಮಾ, ಹಾಂವೆಂ ಏಕ್ ಕೊಂಕ್ಣಿ ಸರ್ಕಸ್ ಕರುಂಕ್ ಯೆವ್ಜಿಲಾಂ. ತಾಕಾ ಕೊಂಕ್ಣಿ ಜಾಣಾಂ ಆಸ್ಚೊ ಏಕ್ ವಾಗ್ ಜಾಯ್.”

“ಹೆಂ ಬರೆಂ ಜಾಲೆಂ ನೇ ಸಿಕೇರಾಮಾ, ತುವೆಂ ವಾಗ್ ಜಾಯ್ ಮ್ಹಣ್ ಕೊಂಕ್ಣಿ ಪತ್ರಾರ್ ಜಾಹೀರಾತ್ ದಿಲ್ಲ್ಯಾಬರಿಂ ಜಾಲೆಂ. ವಾಗಾಕ್ ವಾಚುಂಕ್ ಯೆತಾವೇ. ಆಯ್ಕ್, ಮ್ಹಜೆಲಾಗಿಂ ವಾಗ್ ನಾ. ಅತಾತಾಂ ಘರಾಂತ್ ಕೊಂಕ್ಣಿ ಕೋಣ್ ಉಲಯ್ತಾ? ಕಾಮಾಚೆಂ ಸೊಡ್ಯಾಂ ಗರ‍್ಚೆ ಪೆಟೆ ಸಯ್ತ್ ‘ಕಮ್‌ಯಾ, ಗೋಯಾ’ ಮ್ಹಳ್ಯಾರ್ ಮಾತ್ರ್ ಹಾಲ್ತಾತ್. ತಶೆಂ ಜಾಲ್ಲ್ಯಾನ್ ಮ್ಹಜೆಲಾಗಿಂ ವಾಗ್ ನಾ ಬಗಾರ್ ಟೈಗರ್ ಆಸಾ.

“ತುಜೊ ಟೈಗರ್ ಮ್ಹಾಕಾ ವಾಗ್‌ಚ್. ಕೊಂಕ್ಣಿ ಜಾಂವ್ ವಾ ಇಂಗ್ಲಿಶ್, ಸರ್ಕಸಾಂತ್ ತಾಚೆಕರ‍್ನಾ ಮ್ಹಾಕಾ ಕಾಂಯ್ ಭಲಾಯ್ಕಿ ಮಾಗೊಂಕ್ ಆಸಾವೇ, ತಾಣೆ ಸರ್ಕಸಾಂತ್ ಕಸ್ರತ್ ಕೆಲ್ಯಾರ್ ಜಾಲೆಂ. ತರ್ ಹಾಡುಂಕ್ ಯೇಜೇವೇ?”

“ಖಂಡಿತ್ ಯೇ ಸಿಕೇರಾಮಾ, ಹಾಂವ್ ಟೈಗರಾಚಿ ಬಂದಬಸ್ತ್ ಕರ‍್ತಾಂ.”

“ಬೆಡಿಪೆಡ್ಡಿಚಿಂ ಉತ್ರಾಂ ಆಯ್ಕೊನ್ ಮ್ಹಜೆಂ ಸರ್ಕಸ್ ಅರ್ಧೆಂ ತಯಾರ್ ಜಾಲ್ಲೆಬರಿಂ ಭೊಗ್ಲೆಂ. ಏಕ್ ಟೈಗರ್ ಮೆಳ್ಳೊ ತರ್ ಮಾಗಿರ್ ಮ್ಹಜ್ಯಾ ಕೊಂಕ್ಣಿ ಸರ್ಕಸಾವಿಶಿಂ ಕೊಣಾಯ್ಕಿ ಖೊಂಕ್ಲಿ ಸೊಡ್ಯಾಂ ಉಲಂವ್ಕ್ ಸಯ್ತ್ ಧಂಬು ಆಸ್ಚೊನಾಂ. ಹಾಂವ್ ವ್ಹಡ್ ಏಕ್ ಟೆಂಪೊ ಕರ‍್ನ್ ಶಿದಾ ಬೆಡಿಪೆಡ್ಡಿಗೆರ್ ಪಾವ್ಲೊಂ. ಮ್ಹಾಕಾ ಪಳೆವ್ನ್ ಪೆಡ್ಡಿನ್ ವಾರ‍್ಯಾರ್ ಏಕ್ ಫಾರ್ ಸೊಡ್ಲೊ. ತಾಚ್ಯಾ ತ್ಯಾ ಫಾರಾಕ್ ಉಬೊನ್ ವೆಚೊ ಏಕ್ ಕಾವ್ಳೊ ಮ್ಹಜ್ಯಾ ಮಾತ್ಯಾರ್‌ಚ್ ಹಾಗ್ಲೊ. ವಾಗಾಚೊ ಯಾರ್ ಕರುಂಕ್ ಆಯಿಲ್ಲ್ಯಾ ಮ್ಹಾಕಾ ಹೆಂ ಏಕ್ ಬರೆಂ ಲಕ್ಷಣ್ ನ್ಹಯ್ ಮ್ಹಣ್ ಭೊಗ್ಲೆಂ ತರೀ ಹಾಂವ್ ಸಾಸ್ತಿರಾಂಕ್ ಪಾತ್ಯೆಂವ್ಚೊ ಮನಿಸ್ ನ್ಹಯ್. ಹಾಂವೆಂ ಪೆಡ್ಡಿಚೆಂ ಬೆಸಾಂವ್ ಘೆತ್ಲೆಂ. ತಾಕಾ ಪೊಟ್ಲುನ್ ಧರ‍್ಲೆಂ. ಉಪ್ರಾಂತ್ ತಾಣೆಂ ಮ್ಹಾಕಾ ಟೈಗರಾಚ್ಯೊ ಜಾಯ್ತ್ಯೊ ಕಾಣ್ಯೊ ಸಾಂಗ್ಲ್ಯೊ.”

“ಯೇ ತುಕಾ ಹಾಂವ್ ಟೈಗರಾಚಿ ಭೆಟ್ ಕರ‍್ತಾಂ. ಪೋರ್‌ಚ್ ತಾಣೆಂ ತೀನ್ ಪಿಲಾಂ ಕಾಡ್ಲ್ಯಾಂತ್.”

“ಅರೇವಾ, ವ್ಹಯ್‌ಗೀ ಕಿತೆಂ. ಪೆಡ್ಡಿಚಿಂ ಉತ್ರಾಂ ಆಯ್ಕೊನ್ ಕೊಂಕ್ಣಿಕ್ ಫುಡಾರ್ ಆಸಾ ವಾ ನಾ ಕಳಿತ್ ನಾ ಪೂಣ್ ಮ್ಹಜ್ಯಾ ಸರ್ಕಸಾಕ್ ಖಂಡಿತ್ ಫುಡಾರ್ ಸೊರ್ರಿ ಫ್ಯೂಚರ್ ಆಸಾ ಮ್ಹಣ್ ಭೊಗ್ಲೆಂ. ತಾಚೆಂ ಸ್ಟೇಟಸ್ ದವರ‍್ಚ್ಯಾಕ್ ಹಾಂವೆಂಯೀ ವಾಗಾ ಬದ್ಲಾಕ್ ಟೈಗರ್‌ಚ್ ಮ್ಹಳೆಂ. ಉಪ್ರಾಂತ್ ಆಮಿಂ ದೊಗೀ ಟೈಗರಾಚ್ಯಾ ಗುಡಾಕ್ ಗೆಲ್ಯಾಂವ್. ಮ್ಹಜೆಂ ಕಾಳಿಜ್ ಭಿಂಯಾನ್‌ಶೆಂ ಢಬ್ ಢಬ್ ಕರ‍್ನ್ ಜೋರಾನ್ ಆವಾಜ್ ಕರ‍್ತಾಲೆಂ. ತಿತ್ಲ್ಯಾರ್ ತಾಣೆಂ ಮ್ಹಾಕಾ ಟೈಗರಾಕ್ ದಾಕಯ್ಲೊ.

ತಾಕಾ ಪಳೆವ್ನ್ ಢಬ್ ಢಬ್ ಕರ‍್ಚೆಂ ಮ್ಹಜೆಂ ಕಾಳಿಜ್ ತೋಂಡಾಂತ್‌ಚ್ ಆಯ್ಲೆಂ. ಆನಿಂ ತೊಂಡಾಂತ್ಲೆಂ ದಾಂತ್ ಹಾತಾಂತ್ ಆಯ್ಲೆ.

“ಪೆಡ್ಡಿಯಾಮಾ ಹೆಂ ಕಿತೆಂ, ತುಂ ಮ್ಹಾಕಾ ಟೈಗರ್ ಮ್ಹಣೊನ್ ಪೆಟ್ಯಾಕ್ ದಾಕಯ್ತಾಯ್‌ಮೂ. ಮ್ಹಾಕಾ ಟೈಗರ್ ದಾಕಯ್.”

“ತಾಣೆಂ ರಪ್ಪ್ ಕರ‍್ನ್ ಮ್ಹಜ್ಯಾ ಕಾನ್ಸುಲಾಕ್ ಏಕ್ ವಾಜಯ್ಲೊ ಆನಿ ಮ್ಹಣಾಲೊ ಹೊ ಪೆಟೊ ನ್ಹಯ್ ಕೊಲ್ಗೆಂ. ಆನಿ ಮ್ಹಜ್ಯಾ ಕೊಲ್ಗ್ಯಾಚೆಂ ನಾಂವ್ ಟೈಗರ್.”

“ತೆಂ ಟೈಗರ್ ಕಶೆಂ ಜಾಂವ್ಚೆಂ, ಟೈಗ್ರೆಸ್ ಜಾಯ್ಜೆ ನೇ ಪೆಡ್ಡಿಯಾಮಾ” ಎಕಾ ಕೊಂಕ್ಣಿ ಪಂಡಿತಾಥಾವ್ನ್ ಶಿಕ್‌ಲ್ಲಿ ಕೊಂಕ್ಣಿ ವ್ಯಾಕರಣ್ ಹಾಂವೆಂ ಹಾಂಗಾಸರ್ ಚೂಕ್ ಸಂದರ್ಭಾರ್ ಪ್ರಯೋಗ್ ಕೆಲಿ. ತರ್ ಹ್ಯಾಚ್ ಟೈಗರಾನ್‌ಗೀ ಪೋರ್ ಪಿಲಾಂ ಕಾಡ್‌ಲ್ಲಿಂ. ಮ್ಹಜೊ ತಾಳೊ ಅಪ್ಶೆಂಚ್ ಕುಕುರಾಬರಿಂ ‘ಕುಂಯ್ ಕುಂಯ್’ ಜಾಲೊ.

“ವ್ಹಯ್ ಟೈಗರ್ ಆನಿ ಪಿಲಾಂ ಮ್ಹಣ್ ಪಂದ್ರಾ ಹಜಾರ್ ಜಾತಾ, ವರ್ ಆನಿ ಸರ್ಕಸ್ ಕರ್”

“ಹಾಚ್ಯಾಕೀ ವ್ಹಡ್ ಸರ್ಕಸ್ ಆಸಾಗೀ ಪೆಡ್ಡಿಯಾಮಾ, ಮ್ಹಾಕಾ ‘ಹೊ’ ಮ್ಹಣ್ಜೆ ‘ಹೆಂ’ ಟೈಗರ್ ನಾಕಾ.”

“ಪಂದ್ರಾ ನ್ಹಯ್ ತರ್ ಧಾ ದೀ, ಆಮಿಂ ಅಡ್ಜೆಸ್ಟ್ ಕರ‍್ಯಾಂ.”

“ಧಾಯೀ ಜಾಯ್ನಾಂ ಪೆಡ್ಡಿಯಾಮಾ.”

“ತರ್ ಆಸೊಂದಿ, ತೀನ್ ಪುಣೀ ದೀ.”

“ಪೆಡ್ಡಿಯಾಮಾ ತುಂಚ್ ಮ್ಹಾಕಾ ಚಾರ್ ಹಜಾರ್ ದೀ, ಹಾಂವ್ ತುಜ್ಯಾ ಟೈಗರಾಕ್ ವರೊಂಕ್ ಮ್ಹಣ್ ಟೆಂಪೊ ಕರ‍್ನ್ ಆಯಿಲ್ಲೊಂ. ವಯ್ಲ್ಯಾನ್ ತ್ಯಾ ಟೈಗರಾಕ್ ದರ‍್ಚ್ಯಾಕ್ ಪಿಲಿಕುಳಾಥಾವ್ನ್ ದೊಗಾಂ ಕುಲ್ಕಾರಾಂಕ್ ಭಾಡ್ಯಾಕ್ ಹಾಡ್‌ಲ್ಲೆಂ.”

ಹಾಂವೆಂ ಸಾಂಗೊನ್ ಮುಗ್ದಾಜೆ ತರ್ ಪೆಡ್ಡಿಯಾಮಾನ್ ಪರತ್ ವಾರ‍್ಯಾರ್ ಫಾರ್ ಸೊಡ್ಲೊ. ಪರತ್ ಏಕ್ ಕಾವ್ಳೊ ಮ್ಹಜ್ಯಾ ಆಂಗಾರ್ ಮ್ಹೆಳೆಂ ಕರ‍್ಚೆಂ ನಾಕಾ ಮ್ಹಣ್ ಹಾಂವ್ ಖಿಣಾನ್ ಥಂಯ್‌ಥಾವ್ನ್ ಟೆಂಪೊ ಆನಿ ಜಣಾಂಕ್ ಘೆವ್ನ್ ಪದ್ರಾಡ್ ಜಾಲೊಂ.

ಘರಾ ಯೇವ್ನ್ ಟೈಗರಾಚೆಂ ದುಖಿಚೆಂ ವಿಧಾನ್ ಹಾಂವೆಂ ಬಾಯ್ಲೆಕ್ ಸಾಂಗ್ಲೆಂ. ತಾಕಾ ತಿ ಮ್ಹಣಾಲಿ “ತುಂ ಕೊಂಕ್ಣಿ ಮೊನ್ಜಾತಿ ಮ್ಹಣ್ ತಾಂಚ್ಯಾ ಹಾಂಚ್ಯಾ ಪಾಟ್ಲ್ಯಾನ್ ಧಾಂವ್ಚೆಂ ಸೊಡ್ನ್ ಸೊಡ್. ಕೊಂಕ್ಣಿಂತ್ ಉಲಂವ್ಚಿ ಮೊನ್ಜಾತ್ ಏಕ್ ಮಾತ್ರ್ . . . “

“ವ್ಹಯ್‌ಗೀ,ಖಂಯ್ಚಿ ತಿ? ಪೆಟೊಗೀ?”

“ಪೆಟೊಯೀ ಅತಾಂ ಇಂಗ್ಲಿಸ್ ಜಾಲಾ ಸಾಯ್ಬಾ. ತಾಕಾಯೀ ಟೊಮಿ, ರೊಕಿ ವಾ ಜೂಲಿ ಮ್ಹಣ್ ಆಪಯ್ತಾತ್. ಖಂಚ್ಯಾಯ್ ಪೆಟ್ಯಾಕ್ ಪೆದ್ರು, ಲೊರೆಸ್ ವಾ ರುಜಾರಿ ಮ್ಹಣ್ ನಾಂವಾಂ ದವರ್‌ಲ್ಲೆಂ ಆಯ್ಕಾಲಾಂಯೇ? ಆಮ್ಚೊ ಕೊಂಕ್ಣಿ ಉಲಂವ್ಚೊ, ಕೊಂಕ್ಣೆಂತ್‌ಚ್ ಖಾಂವ್ಚೊ ಆನಿ ಪಿಯೆಂವ್ಚೊ, ಕೊಂಕ್ಣೆಂತ್‌ಚ್ ನಾಂವ್ಚೊ, ಕೊಂಕ್ಣೆಚೊ ಸುಪುತ್ರ್ ಮ್ಹಳ್ಯಾರ್ ಆಮ್ಚೊ ದುಕೊರ್. ತುವೆಂ ಕಿತ್ಯಾಕ್ ದುಕ್ರಾಕ್ ಸರ್ಕಾಸಾಂತ್ ಘೆಂವ್ಕ್ ನಜೊ. ದುಕೊರ್ ಮ್ಹಳ್ಯಾರ್ ಆಮ್ಚೊ ಲೋಕ್ ಜೀವ್ ಸೊಡ್ತಾ. ಮಾಗಿರ್ ಜೀಬ್ ಸೊಡ್ಚೊ ನಾಂಗೀ?”

‘ವ್ಹಯ್‌ಮೂ ಸಾಂಗ್‌ಲ್ಲೆಬರಿಂ. ದುಕ್ರಾವಿಣೆಂ ಆಮ್ಚಿಂ ಖಂಯ್ಚೀಯೀ ಕಾರ್ಯಿಂ ಸುಫಳ್ ಜಾಯ್ನಾಂತ್. ಮಾಗಿರ್ ಸರ್ಕಸ್ ಬಾಕಿಗೀ’

ತಿತ್ಲೆಂ ಮ್ಹಣ್ತಾನಾ ಏಕ್ ದುಕೊರ್ ಆಮ್ಚ್ಯಾ ಹಿತ್ಲಾಂತ್ ಉಡೊನ್ ಆಯ್ಲೊಚ್. ಭೊವ್‌ಶಾ ಸರ್ಕಾಸಾಂತ್ ದುಕ್ರಾಕ್ ಘೆತಾಂ ಮ್ಹಣ್ ಹಾಕಾ ತಿತ್ಲೆ ವೆಗ್ಗಿಂ ಖಬರ್ ಮೆಳ್ಳಿಗೀ ಮ್ಹಣ್. ಮ್ಹಜಿ ಬಾಯ್ಲ್ ಮ್ಹಣಾಲಿ ಅಳೆ ಅತಾಂಚ್ ತ್ಯಾ ದುಕ್ರಾಕ್ ಧರ್ ಆನಿ ತಾಕಾ ಆಮಿ ತರ್ಬೆತಿ ದೀವ್ನ್ ಸರ್ಕಸಾಂತ್ ಘೆವ್ಯಾಂ.

ತಿಣೆಂ ಸಾಂಗ್‌ಲ್ಲ್ಯಾ ಎಕಾಚ್ ಉತ್ರಾಕ್ ಹಾಂವೀ ದುಕ್ರಾಕ್ ಧರುಂಕ್ ಅಂಗ್ಣಾಂತ್ ಉಡ್ಲೊಂ. ಮ್ಹಾಕಾ ಪಳೆವ್ನ್ ದುಕೊರ್ ಆನಿಕೀ ವೇಗಾನ್ ಧಾಂವ್ಲೊಂ. ಹಾಂವೀಂ ಧಾಂವ್ಲೊಂ. ಫಿಲ್ಮಾಂನಿ ವಿಲನಾಥಾವ್ನ್ ಬಚಾವಿ ಜೊಡ್ಚೆಖಾತಿರ್ ಹಿರೋಯಿನ್ ನಂಯ್ತ್ ಉಡ್ಚೆಬರಿಂ ಮ್ಹಜೆಥಾವ್ನ್ ಬಚಾವಿ ಜೊಡ್ಚ್ಯಾಖಾತಿರ್ ದುಕೊರ್ ಎಕಾ ಕೇದಾಂತ್ ಉಡ್ಲೊ. ತೊ ಕೇದಾಂತ್ ಉಡ್ಲೊ ಮ್ಹಣ್ ಹಾಂವ್ ಸೊಡ್ತಾಂವೇ, ಹಾಂವೀ ಕೇದಾಂತ್ ಉಡ್ಲೊಂ. ಮ್ಹಜಿ ಆನಿ ದುಕ್ರಾಚಿ ಜಬರ್‌ದಸ್ತ್ ಕುಸ್ತಿ ಚಲ್ಲಿ.

ತಿತ್ಲ್ಯಾರ್ ಸಾತ್ ಆಟ್ ಜಣ್ ದುಕ್ರಾಕ್ ಸೊಧುನ್ ಆಮ್ಗೆರ್ ಆಯ್ಲೆ. ಮ್ಹಜ್ಯಾ ಬಾಯ್ಲೆಲಾಗಿಂ ದುಕ್ರಾವಿಶ್ಯಾಂತ್ ವಿಚಾರಿಲಾಗ್ಲೆ.

“ಅಳೆ ಬಾಯೆ, ತೊ ಆಮ್ಚೊ ಕೇಟರಿಂಗಾಚೊ ದುಕೊರ್, ಆಜ್ ಮಾರುಂಕ್ ಆಸಾ, ಚುರಿ ಘಾಲ್ತಾಂ ಮ್ಹಣ್ತಾನಾ ಧಾಂವ್ಲೊ.”

ತಿತ್ಲ್ಯಾರ್ ಪಾಟ್ಲ್ಯಾನ್ ಆಮ್ಚೊ ಗಲಾಟೊ ಪಳೆವ್ನ್ ತೆ ಥಂಯ್ಸರ್ ಆಯ್ಲೆ. ಹಾಂವ್ ಅನಿ ದುಕೊರ್ ಕೇದಾಂತ್ ಲೊಳುನ್ ಆಸ್‌ಲ್ಲ್ಯಾಂವ್. ಮ್ಹಜೆಂ ಸರ್ಕಸ್ ಪಳೆಂವ್ಕ್ ಮ್ಹಣ್ ಪೋರ್ ರೊಸಾ ದೀಸ್ ಆತುರಾಯೆನ್ ರಾಕೊನ್ ಅಸ್‌ಲ್ಲೊ ಲೋಕ್ ಸಯ್ತ್ ಥಂಯ್ಸರ್ ಜಮ್ಲೊ. ಮ್ಹಜ್ಯಾ ಆಂಗಾಪಾಂಗಾರ್, ದೊಳ್ಯಾಂಕ್ ಸಗ್ಳ್ಯಾನ್ ಕೇದ್ ರಿಗ್‌ಲ್ಲ್ಯಾನ್ ಮ್ಹಾಕಾ ದುಕೊರ್ ಮಾತ್ರ್ ದಿಸ್ತಾಲೊ ಶಿವಾಯ್ ಭಾಯ್ರ್ ಕೋಣ್ ಆಸಾತ್ ಮ್ಹಣ್ ಖಬರ್ ನಾತ್‌ಲ್ಲಿ. ಸುಮಾರ್ ಅರ್ಧೊ ಘಾಂಟೊ ಜಾಲ್ಲೊ. ಸಕ್ಡಾಂನಿಂ ಚಿಂತ್ಲೆಂ ಹಾಂವೆಂ ಆರಂಭ್ ಕೆಲ್ಲೆಂ ಸರ್ಕಸ್ ಹೆಂಚ್ ಮ್ಹಣೊನ್. ದೆಕುನ್ ಅಪ್ಲಿಂ ಮೊಬಾಯ್ಲಾಂ ಘೆವ್ನ್ ತಾಣಿಂ ಆನಿಕೀ ಹೆರಾಂಕ್ ಹಿ ಖಬರ್ ವಿಡಿಯೋ ಸಮೇತ್ ಧಾಡ್ಲಿ. ಅಶೆಂ ದುಕ್ರಾ ಸಾಂಗಾತಾ ಮ್ಹಜೆಂ ಸರ್ಕಸ್ ಪಳೆಂವ್ಕ್ ಹಾರಿಹಾರಿನಿಂ ಲೋಕ್ ಜಮ್ಲೊ. ಥೊಡ್ಯಾನಿಂ ಫೇಸ್ಬುಕ್ ಲೈವ್ ಸಯ್ತ್ ಕೆಲೆಂ.

ಇತ್ಲೆಂ ಪೂರಾ ಜಾತಾನಾ ಮ್ಹಜ್ಯಾ ಬಾಯ್ಲೆಕ್ ತಡ್ವಲೆಂನಾ. ತಿಣೆಂ ತಕ್ಷಣಾ ಪೈಪ್ ಹಾಡ್ನ್ ಮ್ಹಜೆರ್ ಆನಿ ದುಕ್ರಾಚೆರ್ ಉದಾಕ್ ಉಸ್ಳಾಯ್ಲೆಂ. ಮೆಳ್ಯಾಂತ್‌ಚ್ ನಾಂವ್ಚೊ ದುಕೊರ್ ನಿತಳ್ ಉದಕ್ ಪಳೆವ್ನ್ ಎಕ್ದಾಮ್‌ಶೆಂ ಧಾಂವ್ತಾನಾ ದುಕ್ರಾಕ್ ಧರುಂಕ್ ಆಯಿಲ್ಲ್ಯಾನಿಂ ತಾಕಾ ಗೊಣಿಯೆಂತ್ ಘಾಲ್ನ್ ವೆಲೊ. ಮ್ಹಜ್ಯಾ ದೊಳ್ಯಾಂಕ್ ಉದಾಕ್ ಉಸ್ಳಾಲ್ಲೆಂಚ್ ದೊಳೆ ಉಗಡ್ತಾನಾ ಭೊಂವ್ತಿ ಸಗ್ಳ್ಯಾ ಗಾಂವ್ಚೊ ಲೋಕ್ ಮ್ಹಾಕಾ ಪಳೆವ್ನ್ ತಮಾಶೆ ಕರ‍್ನ್ ಆಸ್‌ಲ್ಲೊ. ಕೇದಾಂತ್ ಅಸ್‌ಲ್ಲ್ಯಾ ಮ್ಹಾಕಾ ಪಳೆವ್ನ್ ತಾಂಕಾಂ ಎಕಾ ಘಡ್ಯೆ ಮ್ಹಜೆವರ್ನಿ ದುಕೊರ್ ಚಡ್ ಸೊಭಿತ್ ದಿಸ್ಲೊ ಜಾಯ್ಜಯ್, ದೆಕುನ್ ಸಕ್ಡಾನಿಂ ‘ಎಬ್ಯಾಕ್, ಛೀ’ ಮ್ಹಳೆಂ. ದುಕ್ರಾಸಂಗಿಂ ಸುಟೊನ್ ತ್ಯಾ ಕೆದಾಥಾವ್ನ್ ಹಾಂವ್ ಭಾಯ್ರ್ ಯೆತಾನಾ ಸಕ್ಕಡ್ ಲೋಕಾನಿಂ ವ್ಹಡಾ ತಾಳ್ಯಾನ್ ಬೊಬೊ ಘಾಲ್ಯೊ. ಜೈ ಕೊಂಕ್ಣಿ ಸರ್ಕಸ್, ಜೈ ಕೊಂಕ್ಣಿ ಸರ್ಕಸ್, ಜೈ ಕೊಂಕ್ಣಿ ಸರ್ಕಸ್.

► ರೋಶು, ಬಜ್ಪೆ