ಸ್ತ್ರೀ-ಪುರುಷ್ ಸಮಾನತಾ – ಏಕ್ ಷಡ್ಯಂತ್ರ್

48

ಸ್ತ್ರೀ ಪುರುಷಾಕ್ ಸಮಾನ್‍ಗೀ? ಕೋಣ್ ಊಂಚ್ ಯಾ ಕೋಣ್ ಕೀಳ್? ಕೊಣಾಕ್ ಆಸಾ ಚಡ್ ಮಹತ್ವ್? ಅಸಲ್ಯಾ ಸವಾಲಾಂಚಿ ವಿವಿಧ್ ಮಾಧ್ಯಮಾಂನಿ ಸಬಾರ್ ಪಾವ್ಟಿಂ ಚರ್ಚಾ ಜಾಲ್ಯಾ ಆನಿ ಜಾತೆಚ್ ಆಸಾ.  ಕೊಣಾಕ್ ಚಡ್ ಮಹತ್ವ್ ಮ್ಹಳ್ಳೆಂ ಸೊಡ್ಯಾಂ; ಸಾರ್ಕೆಂ ಸಮ್ಜಾಲ್ಯಾರ್ ಅಸಲ್ಯಾ ಸವಾಲಾಂಕ್‍ಚ್ ಕಾಂಯ್ಚ್ ಮಹತ್ವ್ ನಾ.  ಕೇವಲ್ ಎಕಾ ಮೆಕಾಕ್ ಚಾಳವ್ನ್ ಘಾಲುಂಕ್ ಆನಿ ಝಗ್ಡಿಂ ಕರಂವ್ಕ್ ಹೊ ವಿಷಯ್ ವೆಳಾನ್ ವೆಳಾ ಥಂಯ್-ಹಾಂಗಾ ವಯ್ರ್ ಪಡ್ತಾ ದೆಕುನ್ ತಿಂ ಪರತ್ ಪರತ್ ಉದೆನಾ ಜಾಂವ್ಚಾಕ್ ಆನಿ ಕಲಹ್-ಕ್ಲೇಷ್ ಉಬ್ಜಾನಾ ಜಾಂವ್ಚಾಕ್ ಕಿತೆಂ ಪುಣ್‍ಯೀ ಕರಿಜಯ್ ನ್ಹಯ್‍ಗೀ? ಕರಿಜಯ್‍ಚ್; ನ್ಹಯ್ ತರ್ ಕ್ರಮೇಣ್ ಕುಟ್ಮಾಂಚೊ ಸತ್ತ್ಯಾನಾಸ್ ನಿಶ್ಚಿತ್. ಕಿತ್ಲೆಶಾ ಕುಟ್ಮಾಂಚೆರ್ ಯೆದೊಳ್‍ಚ್ ಹಾಚೊ ದುಷ್ಪ್ರಭಾವ್ ಜಾಲಾ. ಹಿಂ ಸವಾಲಾಂ ಆಸಾ ಕರ್ತೆಲ್ಯಾಂಚೊ ಪ್ರಮುಖ್ ಉದ್ಧೇಶ್‍ಯೀ ತೊಚ್.

“ಸ್ತ್ರೀ ಪುರುಷಾಕ್ ಸಮಾನ್‍ಗೀ?” ಮ್ಹಳ್ಳೆಂ ಸವಾಲ್ ಕರ್ತಾನಾ, ಸವಾಲಾಂತ್‍ಚ್ ಜವಾಬ್ ಜಾವ್ನ್ ಪುರುಷ್ ಸ್ತೀಯೆಚ್ಯಾಕ್‍ಯೀ ಊಂಚ್ಲೊ ಮ್ಹಳ್ಳೊ ಭಾಸ್ ಜಾತಾ ತರ್ “ಪುರುಷ್ ಸ್ತ್ರೀಯೆಕ್ ಸಮಾನ್‍ಗೀ?” ಮ್ಹಣ್ ಸವಾಲ್ ಕೆಲ್ಯಾರ್ ಹಿ ಘುಸ್ಪಡ್ ಜಾಯ್ನಾಂಗೀ?  ಪಯ್ಲ್ಯಾನ್ ಪಯ್ಲೆಂ, ಹಿಂ ಸವಾಲಾಂಚ್ ಕಿತ್ಯಾಕ್ ಉಬ್ಜಾತಾತ್ ಯಾ ಉಬ್ಜಯ್ತಾತ್? ತಿಂ ಉಬ್ಜನಾಂತ್; ತಾಂಕಾಂ ಉಬ್ಜಯ್ತಾತ್!

ಕೋಣ್ ಉಬ್ಜಯ್ತಾತ್ ಹಿಂ ಸವಾಲಾಂ? ಸ್ತ್ರೀಯೊಗೀ ಯಾ ಪುರುಷ್?  ದೊನ್‍ಯೀ ನ್ಹಯ್; ತಿಂ ಥೊಡಿಂ ಅಸಮಾಜಿಕ್ ತತ್ವಾಂ;  ಸಮಾಜೆಚೊ ನಾಸ್ ಕರುಂಕ್ ಏಕ್ ಷಡ್ಯಂತ್ರ್ ಚಲಂವ್ಚಿಂ ತತ್ವಾಂ ತಿಂ. ತಿಂ ಸ್ತ್ರೀಯೊಚ್ ಯಾ ಪುರುಷ್‍ಚ್ ಮ್ಹಣ್ ಸಾಂಗೊಂಕ್ ಜಾಯ್ನಾ. ತಸಲ್ಯಾಂಚ್ಯಾ ಮೆಳಿಂತ್ ಸ್ತ್ರೀಯೊಯೀ ಆಸಾತ್, ಪುರುಷ್‍ಯೀ ಆಸಾತ್ ದೆಕುನ್ ಅಕ್ಕಲಾಚೊ ಸಾರ್ಕೊ ವಾಪಾರ್ ಕರುಂಕ್ ನೆಣಾಸ್‍ಲ್ಲ್ಯಾ ಥೊಡ್ಯಾಂಕ್ ತಿಂ ಕಿತೆಂ ಸಾಂಗ್ತಾತ್ ತೆಂ ಸಾರ್ಕೆಂಚ್ ಮ್ಹಣ್ ದಿಸ್ತಾ; ಪೂಣ್ ಸತ್ ವೆಗ್ಳೆಂಚ್ ಆಸ್ತಾ.

ಸ್ತ್ರೀಯೊ ಪುರುಷಾಂಕ್ ಸಮಾನ್ ಮ್ಹಳ್ಳ್ಯಾ ತಕ್ಷಣ್ ಸ್ತ್ರೀಯಾಂಚ್ಯೊ ಸಮಸ್ಸೆ ಪರಿಹಾರ್ ಜಾತಾತ್‍ಗೀ?  ಯಾ ಸ್ತ್ರೀಯೊ ಪುರುಷಾಂ ವರ್ನಿ ಏಕ್ ಮೇಟ್ ಮುಕಾರ್ ಮ್ಹಣ್ ಒಪ್ವಾಲ್ಯಾರ್ ಪುರುಷಾಂಕ್ ಕಾಂಯ್ ಸಮಸ್ಸೆ ಉಬ್ಜಾತಿತ್? ಆಮ್ಕಾಂ ಕ್ರಿಸ್ತಾವಾಂಕ್, ಬೈಬಲ್ ದೆವಾಚೆಂಚ್ ಉತರ್ ಮ್ಹಣ್ ಮಾನುನ್ ಘೆತ್‍ಲ್ಲ್ಯಾಂಕ್ ಹೆ ಸಮಸ್ಸೆ ಬಿಲ್ಕುಲ್ ಉಬ್ಜೊಂಕ್ ನಜೊ. ಆನಿ ತಶೆಂ ಜಾಲೆಂ ತರ್ ಅಸಲೊ ವಿವಾದ್‍ಚ್ ಉಬ್ಜಾನಾ ತಶೆಂ ಇತರಾಂಕ್ ಆಮಿ ಏಕ್ ಆದರ್ಶ್ ಕಿತ್ಯಾಕ್ ಜಾಂವ್ಕ್ ನಜೊ?

ಮನಿಸ್ ಜಾವ್ನಾಸಾ ದೆವಾನ್ ಕೆಲ್ಲಿ ಅಕ್ರೇಚಿ ರಚ್ನಾ; ರಚನೆಚೆಂ ಶಿಖರ್ ಜಾವ್ನಾಸಾ ಹಿ ರಚ್ನಾ. ದೆವಾನ್ ಪಯ್ಲೆಂ ಅದಾಂವ್ಕ್ ರಚ್ಲೊ, ಉಪ್ರಾಂತ್ ಏವೆಕ್.  ದೆವಾಕ್ ಕಿತೆಂ ಸಗ್ಳೊ ಸಂಸಾರ್ ಎಕ್‍ಚ್ ಪಾವ್ಟಿಂ ರಚುಂಕ್ ಜಾತೆಂನಾಂಗಿ?  ಹೆರ್ ಜೀವಿಂಕ್ ರಚ್‍ಲ್ಲ್ಯಾಪರಿಂ ದಾದ್ಲೊ ಆನಿ ಸ್ತ್ರೀಯೆಕ್‍ಯೀ ಸಾಂಗಾತಾಚ್ ರಚುಂಕ್ ಜಾತೆಂನಾಂಗಿ?  ಖಂಡಿತ್ ಜಾತೆಂ!  ಪೂಣ್ ದೇವ್ ತಶೆಂ ಕರಿನಾ. ರಚನೆಚೆಂ ಶಿಖರ್ ಜಾವ್ನಾಸ್‍ಲ್ಲ್ಯಾ ಮನ್ಶಾ ಕುಳಾಂತ್‍ಯೀ ಸ್ತ್ರೀಯೆಕ್ ಪುರುಷಾ ಉಪ್ರಾಂತ್ ರಚುನ್ ಸ್ತ್ರೀ ಪುರುಷಾ ವರ್ನಿಯೀ ಊಂಚ್ಲಿ ರಚ್ನಾ ಮ್ಹಣ್ ದೇವ್‍ಚ್ ದಾಖಯ್ತಾ.

ದೆವಾನ್ ಕಿತೆಂ ಜೊಡಿಲಾಂ ತೆಂ ಮನಿಸ್ ಮೊಡಿನಾ ಜಾಂವ್. ಸ್ತ್ರೀಯಾಂಕ್ ಊಂಚ್ಲೆಂ ಸ್ಥಾನ್ ದಿಂವ್ಚಾಂತ್ ಪುರುಷಾಂಕ್ ಕಾಂಯ್ ಉಣೆಪಣ್ ಜಾಯ್ನಾ, ಬದ್ಲಾಕ್ ಪುರುಷಾಂಕ್ ತಿ ಏಕ್ ಗೌರವಾಚಿ ಗಜಾಲ್ ಜಾವ್ನಾಸಾ. ಸ್ತ್ರೀಯಾಂನಿಯೀ ಹೊ ತಾಂಕಾಂ ಮೆಳ್ಚೊ ಮಾನ್ ಆನಿ ಗೌರವ್ ಸ್ವೀಕಾರ್ ಕರುನ್ ಪುರುಷಾಂಕ್‍ಯೀ ಮಾನಾನ್ ಆನಿ ಗೌರವಾನ್ ಲೆಕ್ಲ್ಯಾರ್ ಬಳಾದಿಕ್ ಕುಟ್ಮಾಂಚೆಂ ರಚನ್ ಜಾತಾ.

ದೈವಿಕ್ ದೃಷ್ಟೆನ್ ರಚ್ನಾಂ ಪಯ್ಕಿ ಸ್ತ್ರೀ ಅತಿ ಊಂಚ್ ತರ್‌ಯೀ ಸಂಸಾರಿ ದೃಷ್ಟೆನ್ ತಿಂ ಎಕಾಮೆಕಾಕ್ ಸಮಾನ್‍ಗೀ? ಹ್ಯಾ ಸವಾಲಾಕ್ ಜವಾಬ್ ಸೊದ್ಚಾ ಪಯ್ಲೆಂ ಸಮಾನತಾ ಮ್ಹಳ್ಯಾರ್ ಕಿತೆಂ ಆನಿ ಖಂಯ್ಚಾ ಸಂಗ್ತಿಂನಿ ಸಮಾನತಾ ಮ್ಹಳ್ಳೆ ಸಮ್ಜೊನ್ ಘೆತ್ಲ್ಯಾರ್ ಬರೆಂ. ದೋನ್ ವಸ್ತು ಯಾ ದೋನ್ ಮನ್ಶ್ಯಾಂ ಸಮಾನ್ ಮ್ಹಳ್ಳ್ಯಾ ತಕ್ಷಣ್ ತಾಂಚೆ ಥಂಯ್ ಕಸಲೊಚ್ ಫರಕ್ ನಾ ಮ್ಹಣ್ ಜಾತಾ.  ವಸ್ತುಂ ಥಂಯ್ ಹಿ ಸಮಾನತಾ ಆಸ್ತಾ ವ್ಹಯ್ ಪೂಣ್ ಜೀವಿಂ ಥಂಯ್ ಖಂಡಿತ್ ನ್ಹಯ್; ಭೌತಿಕ್ ರುಪಾನ್ ಪಳೆಂವ್ಕ್ ಗೆಲ್ಯಾರ್ ಖಂಯ್ಚಾಯ್ ದಾದ್ಲ್ಯಾ ಆನಿ ಸ್ತ್ರೀ ಜೀವಿಂ ಮಧೆಂ ಹಿ ಸಮಾನತಾ ನಾ; ತಶೆಂ ಮ್ಹಳ್ಯಾರ್ ಮನ್ಶಾ ಥಂಯ್‍ಯೀ ತಿ ಖಂಡಿತ್ ನಾ.  ದೆಕುನ್ ಭೌತಿಕ್ ರಿತಿನ್ ಸ್ತ್ರೀ ಆನಿ ಪುರುಷಾಚಾ ಸಮಾನತೆಚೆಂ ಸವಾಲ್‍ಚ್ ನಾ.

ಸಮಾನತಾ ಕೇವಲ್ ಆಮ್ಕಾಂ ಬುದ್ಧಿ ಜೀವಿಂಕ್ ಮಾತ್ರ್ ಶಿವಾಯ್ ಮನ್ಜಾತಿಂಕ್ ತೆಂ ಪಡೊನ್ ವಚೊಂಕ್ ನಾ. ಆಮ್ಕಾಂ ಸಮಾನತಾ ಜಾಯ್ ಮಾನ್, ಗೌರವ್ ಆನಿ ಹಕ್ಕಾಂಚೆಂ ಸವಾಲ್ ಉದೆತಾನಾ. ಕಾನೂನಾ ಪ್ರಮಾಣೆ ಆನಿ ದೇಶಾಂಚಾ ಸಂವಿಧಾನಾಂ ಪ್ರಮಾಣೆ ದಾದ್ಲ್ಯಾ ಆನಿ ಸ್ತ್ರೀಯೆಂಕ್ ತೆಂ ಫಾವೊ ಜಾಲಾಂ. ಇತ್ಲೆಂ ಸರ್ವ್ ಆಸ್ಲ್ಯಾರ್‌ಯೀ ಆಯ್ಚಾ ದಿಸಾಂನಿ ಪರತ್ ಪರತ್ ಸಮಾನತೆಚೆಂ ಸವಾಲ್ ಥಂಯ್ ಹಾಂಗಾ ಉದೆತಾಚ್ಚ್! ಕಿತ್ಯಾಕ್?

ಕುಟ್ಮಾಂತ್ ತಶೆಂ ಸಮಾಜೆಂತ್ ಸ್ತ್ರೀ ಆನಿ ಪುರುಷ್ ಎಕಾಮೆಕಾ ಥಂಯ್ ಪೂರಕ್ ಶಿವಾಯ್ ಸಮಾನ್ ನ್ಹಯ್; ಸ್ತ್ರೀಯೆವಿಣೆ ಪುರುಷಾಕ್ ಆನಿ ಪುರುಷಾವಿಣೆ ಸ್ತ್ರೀಯೆಕ್ ಅಸ್ಥಿತ್ವ್‌ಚ್ ನಾ. ಕುಟ್ಮಾಂತ್ ತಶೆಂ ಸಮಾಜೆಂತ್ ತಾಂಚೊ ಪಾತ್ರ್ ಕಿತೆಂ ಮ್ಹಣ್ ಸಮ್ಜೊನ್ ಚಲ್ಚಾಂತ್‍ಚ್ ಆಸಾ ಸರ್ವ್.  ಸಕ್ಕಡ್ ನ್ಹಯ್ ತರ್‌ಯೀ ಥೊಡ್ಯಾ ಪುಣೀ ಸಂಗ್ತಿಂನಿ ಸ್ತೀಯೆಕ್‍ಚ್ ಯಾ ದಾದ್ಲ್ಯಾಕ್‍ಚ್ ಸಹಜ್‍ಲ್ಲೊ ಪಾತ್ರ್ ಆಸ್ತಾಚ್ಚ್ ಆನಿ ತೊ ಆಸಾ; ತೊ ಆದ್ಲಿ ಬದ್ಲಿ ಕರುಂಕ್ ಜಾಯ್ನಾ;  ಆನಿ ಕೆದಾಳಾ ತೆಂ ಆದ್ಲಿ ಬದ್ಲಿ ಕರುಂಕ್ ಜಾತಾ ಮ್ಹಳ್ಳೆಂ ತೆಂ ಚಿಂತಾಪ್ ಮತಿಂತ್ ಘುಸ್ತಾನಾ ಸಮಸ್ಯಾ ಉಬಿ ಜಾತಾ.  ಸಮ್ಜಣಿ ಆಸ್‍ಲ್ಲ್ಯಾಂಕ್ ತೆ ಪಾತ್ರ್ ಕಸಲೆ ಮ್ಹಣ್ ಸಮ್ಜತಾತ್ ಆನಿ ಬರೆಂ ಕುಟಾಮ್ ಬಾಂದುನ್ ಹಾಡುಂಕ್ ಸಕ್ತಾತ್; ಪೂಣ್ ಸಮ್ಜಣಿ ವಾಪಾರಿನಾತ್‍ಲ್ಲ್ಯಾಂಕ್ ತೆಂ ಸಮ್ಜಾನಾ ದೆಕುನ್ ಆಪ್ಲೆಂ ಕುಟಾಮ್ ದೆಸ್ವಾಟ್ತಾತ್ ಆನಿ ತಸಲ್ಯಾಂಕ್ ಸಮ್ಜಾಂವ್ಚೆಂಯೀ ವ್ಯರ್ಥ್.

ಹ್ಯಾ ಸಮಸ್ಯೆಕ್ ಕಾರಾಣಾಂ ಕೇವಲ್ ಥೊಡಿಂ ಮಾತ್ರ್ ಪ್ರಮುಖ್ ಮ್ಹಣ್ ಸಾಂಗ್ಯೆತ್. ಆಯ್ಚಾ ಹ್ಯಾ ತಾಂತ್ರಿಕ್ ಸಂಸಾರಾಂತ್ ಹೆರ್ ಕಾರಾಣಾಂಕ್ ದೆಗೆರ್ ದವರ್ಯೆತ್. ಸಂಕ್ಷಿಪ್ತ್ ರಿತಿನ್ ಸಾಂಗ್ಚೆಣ್ ತರ್,

◘ ಪಯ್ಲೆಂ – ಫುಡಾರ್ (Career): ಆಜ್ ಶಿಕಾಪ್ ಚಡ್ಲಾಂ ಆನಿ ಶಿಕ್ಪಾಂತ್ ಸ್ತ್ರೀಯೊ ಕಾಂಯ್ ಉಣೆಂ ನಾಂತ್; ಆಜ್ ತಿಂ ಏಕ್ ಮೇಟ್ ಮುಕಾರ್‌ಚ್ ಆಸಾತ್ ಮ್ಹಣ್ಯೆತ್.  ನವ್ಕರಿಚ್ ಸರ್ವಸ್ವ್ ಮ್ಹಣ್ ಮಾಂದ್ಚಾ ಆಯ್ಚಾ ಸಂಸಾರಾಂತ್ ಶಿಕ್‍ಲ್ಲ್ಯಾಂಕ್ ಏಕ್ ಬರಿ ನವ್ಕರಿ ಮೆಳ್ಚಾ ಖಾತಿರ್ ಕಿತೆಂ ಸರ್ವ್ ಕರಿಜಯ್ ಪಡ್ತಾ ಮ್ಹಣ್ ಆಮಿ ಸರ್ವ್ ಜಾಣಾಂವ್ ಆನಿ ತಾಚ್ಯಾ ದುಷ್ಪರಿಣಾಮಾವಿಶಿಂಯೀ ಕೋಣ್‍ಯೀ ಕಾಂಯ್ ನೆಣಾರಿ ನ್ಹಯ್ ; ಆಪ್ಲ್ಯಾ ಗಾಂವಾಥಾವ್ನ್ ಪಯ್ಸ್ ಯಾ ವಿದೇಶಾಕ್‍ಯೀ ವಚಾಜಯ್ ಪಡ್ತಾ. ಏಕ್ ಬರೆಂ ಕುಟಾಮ್ ಬಾಂಧುನ್ ಹಾಡುಂಕ್ ಆಶೆಂವ್ಚಾ ಜೊಡ್ಯಾಕ್ ಫುಡಾರ್ ಆನಿ ಕುಟಾಮ್ ದೋನ್‍ಯೀ ಯಶಸ್ವಿ ಥರಾನ್ ರುತಾ ಕರುಂಕ್ ಬೋವ್ ಕಷ್ಟಾಂಚೆಂ ಜಾತಾ. ಥೊಡೆ ಪಾವ್ಟಿಂ ಕುಟ್ಮಾಖಾತಿರ್ ಕೊಣೆಂಯ್ ಎಕ್ಲ್ಯಾನ್ ಆಪ್ಲ್ಯಾ ಫುಡಾರಾಚೊ ಸಾಕ್ರಿಫಿಸ್ ಕರಿಜಯ್ ಪಡ್ತಾ ಆನಿ ತೊ ಸಾಕ್ರಿಫಿಸ್ ದಾದ್ಲ್ಯಾನ್ಂಚ್ ಕರಿಜಯ್ ಜಾಲ್ಲೊ ಸಂದರ್ಭ್ ಯೆತಾನಾ ಚಡಾವತ್ ಜಾವ್ನ್ ಪರಿಸ್ಥಿತಿ ಇಲ್ಲಿ ಚಡ್ ಗಂಭೀರ್ ಜಾತಾ ಕಿತ್ಯಾಕ್ ದಾದ್ಲ್ಯಾ ಆನಿ ಸ್ತ್ರೀಯೆಚೊ ಪಾತ್ರ್ ಸಬಾರ್ ಥರಾಂನಿ ಅದ್ಲಿ ಬದ್ಲಿ ಜಾತಾ.

◘ ದುಸ್ರೆಂ – ಸ್ವಾತಂತ್ರ್ಯಾಚೊ ದುರುಪಯೋಗ್: ಸ್ವಾತಂತ್ರ್ಯ್ ಮ್ಹಳ್ಯಾರ್ ಕೇವಲ್ ಹಕ್ಕಾಂ ಮ್ಹಣ್ ಸಮ್ಜಂವ್ಚ್ಯಾಂ ಥಂಯ್ ಹೆಂ ಘಡ್ತಾ; ಹಕ್ಕಾಂ ಸವೆಂ ಆಪ್ಲ್ಯಾ ಕರ್ತವ್ಯಾಂಯ್ಚೆಂಯೀ ಪಾಲನ್ ಕರುಂಕ್ ಆಸಾ ಮ್ಹಳ್ಳೆಂ ಥೊಡಿಂ ವಿಸರ್ತಾತ್. ಹಾಂತುಂ ಕೊಣ್‍ಯೀ ಎಕ್ಲ್ಯಾಕ್ ಜವಾಬ್ದಾರ್ ಕರುಂಕ್ ಜಾಯ್ನಾ; ಏಕ್ ಬರೆಂ ಕುಟಾಮ್ ರುತಾ ಕರುಂಕ್ ಆಶೆಂವ್ಚಾ ಸ್ತ್ರೀ ಆನಿ ಪುರುಷ್, ದೊಗಾಂಯ್ನಿ ಸಾಂಗಾತಾ ಬಸೊನ್, ಚರ್ಚಾ ಕರುನ್, ಸಾರ್ಕೆಂ ಸಮ್ಜೊನ್ ಏಕ್ ಬರೆಂ ಕುಟಾಮ್ ಬಾಂದುನ್ ಹಾಡುಂಕ್ ಫಾಯ್ದ್ಯಾಭರಿತ್ ಏಕ್ ನಿರ್ಧಾರ್ ಘೆಂವ್ಚಾಂತ್‍ಚ್ ಜಾಣ್ವಾಯ್ ಆಟಾಪುನ್ ಆಸಾ.

◘ ತಿಸ್ರೆಂ – ಕಾನೂನಾಂಚೊ ದುರುಪಯೋಗ್: ಸ್ತ್ರೀ-ಪುರುಷಾಂ ಮಧೆಂ ರಚನೆಚ್ಯಾ ಸುರ್ವೆರ್ ಥಾವ್ನ್ಂಚ್ ಸಮಾನತಾ ಆಸಾ; ಅಪ್ವಾದ್ ಆಸ್‍ಲ್ಲೆ ಜಾವ್ಯೆತ್ ಪೂಣ್ ಸಾರ್ಕೆಂ ಸಮ್ಜಾವ್ನ್, ಶಿಕ್ಷಣಾದ್ವಾರಿಂ ತೆ ನಿವಾರ್ಯೆತೆ ಆಸ್‍ಲ್ಲೆ. ಪೂಣ್ ಕುಟ್ಮಾಚೊ ನಾಸ್ ಕರುಂಕ್ ಆಶೆತೆಲ್ಯಾ ಧುಷ್ಟ್ ಸಕ್ತಿಂನಿ ಸಮಾನತೆ ವಯ್ರ್ ಕಾನೂನಾಂ ಕರುನ್, ಎಕಾಮೆಕಾಕ್ ಭಡ್ಕಾವ್ನ್ ಆಪ್ರಾದ್ ಚಡ್ಲೆ.  ಕಾನೂನಾಂ ಚುಕಿಚಿಂ ನ್ಹಯ್; ತಿಂ ಜ್ಯಾರಿಯೆಕ್ ಹಾಡ್ತೆಲ್ಯಾ ಸರ್ಕಾರಾಂಚೊ ಇರಾದೊ ದುಸ್ರೊಚ್! ಏಕ್ ಆದರ್ಶ್ ಕುಟ್ಮಾಚೆರ್ ಬಾಂದುನ್ ಹಾಡ್‍ಲ್ಲಿ ಸಮಾಜ್ ಧ್ವಸ್ಥ್ ಕರುನ್ ಕುಟಾಮ್‍ರಹಿತ್ ಸಮಾಜ್(?) ರಚುನ್ ನವಿ ವೈಶ್ವಿಕ್ ವ್ಯವಸ್ಥಾ ಸ್ಥಾಪನ್ ಕರ್ಚಿಚ್ ತ್ಯಾ ಧುಷ್ಟ್ ಸಕ್ತಿಂಚೊ ಇರಾದೊ.

ತಿಸ್ರೊ ಲಿಂಗ್ ಆಸಾ ಮ್ಹಣೊನ್ ಕಾನೂನಿ ಮಾನ್ಯತಾ ಮೆಳ್‍ಲ್ಲ್ಯಾ ಉಪ್ರಾಂತ್ ಆತಾಂ ತೆ ಧುಷ್ಟ್ ಸಕ್ತ್ಯೊ ಲಿಂಗ್ ಸಬಾರ್ ಆಸಾತ್ ಮ್ಹಣ್ ಸಾಂಗೊನ್ LGBTQIA+ ಸಮುದಾಯಾಂತ್ ಆಸ್‍ಲ್ಲ್ಯಾ ಎಕೇಕ್ ಅಕ್ಷರಾಂಕ್ ಎಕೇಕ್ ಲಿಂಗಾ ಸವೆಂ ಜೊಡ್ತಾನಾ, ಆನಿ ಥೊಡ್ಯಾ ದೇಶಾಂನಿ ತಾಕಾ ಕಾನೂನಿ ಮಾನ್ಯತಾಯೀ ಮೆಳ್ತಾನಾ, ಸಮಾನತೆ ಖಾತಿರ್ ಝುಜ್ತೆಲ್ಯಾಂಕ್ ಆಪುಣ್ ಖಂಯ್ ಚುಕ್ಲ್ಯಾಂವ್ ಯಾ ಶಿರ್ಕಾಲ್ಯಾಂವ್ ಮ್ಹಳೆಂ ಸಮ್ಜಲೆಂಚ್ ನಾ ಆನಿ ತಾಂಚೆಂ ತೆಂ ಝುಜ್ ವ್ಯರ್ಥ್ ಮ್ಹಳ್ಳೆಂ ಆತಾಂ ತಾಂಕಾಂ ಖಂಡಿತ್ ಸುಸ್ತಾಲಾಂ.

◘ ಚೊವ್ತೆಂ – ವೈಜಾನಿಕ್ ಸಂಶೋಧನಾ : ಆಧುನಿಕ್ ಸಂಸಾರಾಂತ್ಲ್ಯಾ ಥೊಡ್ಯಾ ವೈಜ್ಞಾನಿಕ್ ಸಂಶೋಧನಾಂನಿ ಚಡಾವತಾಂಚೆಂ  ಚಿಂತಾಪ್‍ಚ್ ಬದ್ಲಿಲಾಂ.  ಕಾಜರ್ ಮ್ಹಳ್ಯಾರ್ ಏಕ್ ಕುಟಾಮ್ ಬಾಂದುನ್ ಹಾಡುಂಕ್ ಆಸ್ಚೊ ಸಾಕ್ರಾಮೆಂತ್ ಮ್ಹಳ್ಳೆಂ ವಿಸ್ರೊನ್ ಕೇವಲ್ ಲೈಂಗಿಕ್ ತೃಪ್ತಿ ಜೊಡ್ಚಾ ಖಾತಿರ್ ಆಸ್ಚಿ ವ್ಯವಸ್ಥಾ ಮ್ಹಣ್ ಸಮ್ಜಂವ್ಚಾ ಥೊಡ್ಯಾಂಚಿ ಸಮ್ಜಣಿ.

Live-in-Relationship ತಸಲ್ಯಾ ಸಂಬಂದಾಂಕ್ ಕಾನೂನಿ ಆಸ್ರೊ ದಿತಾನಾ ಆನಿ ತಾಚೊ ದುರುಪಯೋಗ್ ಜಾತಾನಾ ಸಮಾಜ್ ಕಿತೆಂಚ್ ಕರುಂಕ್ ಸಕಾನಾ. ಭುರ್ಗಿಂಚ್ ನಾಕಾತ್ ಆನಿ ಜಾಯ್ ತರ್ ತಿಂ ಪೊಸ್ಕಿಂ ಘೆವ್ಯೆತ್  ಮ್ಹಳ್ಳೊ ನಿರ್ಧಾರ್ ಘೆವ್ನ್ ಕಾಜರ್ ಜಾಂವ್ಚಿಂಯೀ ಆಸಾತ್. ಆನಿ ಹಾಕಾ ಪುರ್ತೊ ಪಾಟಿಂಬೊ ಜಾವ್ನ್ ಆಜ್ ಪ್ರಯೋಗ್ ಶಾಳೆಂತ್‍ಚ್ ಭುರ್ಗ್ಯಾಂಚೆಂ ಉತ್ಪಾದನ್ ಜಾತಾ ಮ್ಹಳ್ಳೆಂಯೀ ಥಂಯ್-ಹಾಂಗಾ ಆಯ್ಕೊಂಕ್ ಮೆಳ್ತಾ. ಭುರ್ಗಿಂ ಜಾಯ್ನಾ ತಶೆಂ ಆಡಾಂವ್ಕ್ ವೊಕ್ತಾಂ, ಸಾಧನಾಂ ಆನಿ ಶಸ್ತ್ರ್‌ಕ್ರಿಯಾ – ಹಿ ಏಕ್ ಪರ್ನಿ ಗಜಾಲ್.

ಸ್ತ್ರೀ-ಪುರುಷ್ ಸಮಾನತೆಚೊ ಪ್ರಚಾರ್ ಕೇವಲ್ ಕುಟಾಮ್ ತಶೆಂಚ್ ಸಮಾಜ್ ವಿಬಾಡ್ಚಾ ಖಾತಿರ್ ಕುತಂತ್ರಿಂನಿ ರಚ್‍ಲ್ಲೆಂ ಏಕ್ ಷಡ್ಯಂತ್ರ್ ಮ್ಹಣ್ ಸಮ್ಜಣಿ ಆಸ್‍ಲ್ಲ್ಯಾಂಕ್ ಆತಾಂ ಖಂಡಿತ್ ಸಮ್ಜತೆಲೆಂ.

■ ವಿನ್ಸೆಂಟ್ ಬಿ ಡಿಮೆಲ್ಲೊ, ತಾಕೊಡೆ.