ಗೂಣ್ ಕರ್ಚೆಂಯೀ ಗುನ್ಯಾಂವ್ ಜಾತಾನಾ!

348

“ಹೊ ದೆವಾಚೊ ಮನಿಸ್ ನ್ಹಯ್, ಕಿತ್ಯಾಕ್ ತೊ ಸಾಬ್ಬಾತ್ ಪಾಳಿನಾ. …” (ಜು. 9:16). ಎಕಾ ಜಲ್ಮಾಥಾವ್ನ್ ಕುರ್ಡ್ಯಾಕ್ ಸಾಬ್ಬಾತಾ ದಿಸಾ ಗೂಣ್ ಕರುನ್ ದೀಷ್ಟ್ ಪಾಟಿಂ ದಿಲ್ಲ್ಯಾಕ್ ಫಾರಿಜೆವಾಂನಿ ಜೆಜು ವಿಶ್ಯಾಂತ್ ಅಶೆಂ ಫೈಸಲ್ ದಿಲ್ಲೆಂ ಜಾವ್ನಾಸಾ! ಆಯ್ತಾರ್ ಯಾ ಹೆರ್ ಸೊಂತಾಂಚಾ ದಿಸಾ ವಾವ್ರ್ ಕರ್ಚಾಕ್ ಆಡ್ವಾರ್ಲಾಂ ತರ್‌ಯೀ ಹೆರಾಂ ಖಾತಿರ್ ಬರಿಂ ಕಾಮಾಂ ಕರ್ಚಾಕ್ ಹೊ ನಿರ್ಬಂಧ್ ಲಾಗು ಜಾಯ್ನಾ ಮ್ಹಳ್ಳೆಂ ಸೊಮ್ಯಾಚಾ ಶಿಖವ್ಣೆ ಥಾವ್ನ್ ಸ್ಪಷ್ಟ್ ಜಾತಾ. ಪೂಣ್ ಫಾರಿಜೆವಾಂಕ್ ಜಾಯ್ ಆಸ್‍ಲ್ಲೆಂ ಜೆಜುಕ್ ಶಿರ್ಕಾವ್ನ್ ಘಾಲುನ್ ತಾಚೊ ಜೀವ್ ಕಾಡುಂಕ್. ಕಾನೂನಾಂಚಿ ಪಟ್ಟಿ ಬಾಂಧುನ್ ಕುಡ್ಡೆ ಜಾಲ್ಲ್ಯಾ ತಾಂಕಾಂ ಪೆಲ್ಯಾಕ್ ಬರೆಂ ಕೆಲ್ಲ್ಯಾಂತ್‍ಯೀ ಪಾತಕ್ ದಿಸ್ತಾಲೆಂ. ಕಾನೂನಾಂ ಯಾ ಉಪದೆಸ್ ಮನ್ಶಾಖಾತಿರ್ ಕೆಲ್ಯಾತ್, ಪೂಣ್ ಮನಿಸ್ ಕಾನೂನಾಂ ಖಾತಿರ್ ನ್ಹಯ್ ಮ್ಹಳ್ಳೆಂ ತೆ ವಿಸರ್‌ಲ್ಲೆ. ದೆಕುನ್ ಸಾಬ್ಬಾತಾ ದಿಸಾ ಎಕಾ ಕುರ್ಡ್ಯಾಕ್ ಗೂಣ್ ಕೆಲೊ ಮ್ಹಣ್ ಜೆಜುಚೆರ್ ತೆ ಗುನ್ಯಾಂವ್ ಮಾಂಡಿಲಾಗ್ಲೆ.

ಗುನ್ಯಾಂವ್ ನಿರ್ಧಾರ್ ಕರ್ಚೊ ಕಾನೂನಾನ್. ಪೂಣ್ ತೆಂಚ್ ಕಾನೂನ್ ಸರ್ವಾಂನಿ ಸಾಂಗಾತಾ ಮೆಳೊನ್ ಸರ್ವಾಂಚ್ಯಾ ಹಿತಾಖಾತಿರ್ ಮ್ಹಣ್ ಜ್ಯಾರಿಯೆಕ್ ಹಾಡ್‍ಲ್ಲೆಂ ಜಾವ್ನಾಸಾ. ಕಾನೂನಾಚೊ ಗೂಡ್ ಅರ್ಥ್ ಯಾ ಮತ್ಲಬ್ ಸಾರ್ಕೆಂ ಸಮ್ಜಾನಾಸ್ತಾಂ ಫಾಯ್ದೊ ಜೊಡ್ಚೊ ಅಧಿಕಾರಾರ್ ಆಸ್‍ಲ್ಲ್ಯಾ ಮನ್ಶಾಂನಿ ಆನಿ ತೆಂಯೀ ಕಾನೂನಾಕ್ ಸಹಮತಿ ದಿಲ್ಲ್ಯಾ ತ್ಯಾಚ್ ಮನ್ಶಾಂಚೆರ್ ಅತ್ಯಾಚಾರ್ ಚಲವ್ನ್! ಕೇವಲ್ ಅಧಿಕಾರಾರ್ ಆಸ್‍ಲ್ಲ್ಯಾಂನಿ ಅಧಿಕಾರಾಚಾ ಹಾಂಕಾರಾನ್ ಇತರಾಂಚಿ ಸಹಮತಿ ನಾಸ್ತಾನಾ ಜರ್ ಕಾನೂನ್ ಜ್ಯಾರಿಯೆಕ್ ಹಾಡ್ಲೆಂ ತರ್ ತೆಂ ಜಾವ್ನಾಸಾ ಅಧಿಕಾರಾಚೊ ದುರುಪಯೋಗ್! ಪಾಟ್ಲ್ಯಾ ಥೊಡ್ಯಾ ವರ್ಸಾಂ ಥಾವ್ನ್ ಆದ್ಯಾದೇಶಾಂ ವಯ್ರ್ ಆಧ್ಯಾದೇಶ್ ಹಾಡುನ್ ಉಪ್ರಾಂತ್ ಸ ಮಹಿನ್ಯಾಂಭಿತರ್ ಪಾರ್ಲಿಮೆಂಟಾಂತ್ ಘುಸ್ಪಡ್-ಗೊಂದೊಳಾ ಮಧೆಂ ತಿಂ ಶಾಶ್ವತ್‍ಪಣಿ ಜ್ಯಾರಿಯೆಕ್ ಹಾಡ್ಚೆಂ ಅದಿಕಾರಾಚೊ ದುರುಪಯೋಗ್‍ಚ್ ದಾಕಯ್ತಾ. ರೈತಾಂನಿ ಕೆಲ್ಲ್ಯಾ ತೀವ್ರ್ ಪ್ರತಿಭಟನಾವರ್ವಿಂ ಮಾತ್ರ್ ತೀನ್ ಕೃಷಿ ಕಾನೂನಾಂ ಪಾಟಿಂ ಕಾಡಿಜಯ್ ಪಡ್ಲಿಂ. ಪೂಣ್ ಕೊರೊನಾ ಸುರ್ವಾತ್‍ಲ್ಲ್ಯಾ ವೆಳಾರ್ ತೆ-ಹೆ ನಿರ್ಬಂಧ್ ಮ್ಹಣ್ ಸಾಂಗೊನ್ ಪ್ರತಿಭಟನಾಂಕ್ ಆವ್ಕಾಸ್‍ಚ್ ನಾತ್‍ಲ್ಲ್ಯಾ ವರ್ವಿಂ ಆನಿ ಲೊಕಾಕ್ ಪಿಡೆವಿಶಿಂ ಭೆಷ್ಟಾವ್ನ್ ಭಿಂಯಾಡ್ಡೆ ಕೆಲ್ಲ್ಯಾವರ್ವಿಂ ಥೊಡೆ ಅರ್ಥಾಹೀನ್ ನಿರ್ಬಂಧ್‍ಯೀ ಪಾಳಿಜಯ್ ಪಡ್ಲೆ; ತೆ ಪಾಳ್ಳ್ಯಾಶಿವಾಯ್ ದುಸ್ರಿ ವಾಟ್‍ಚ್ ನಾ ಜಾಲಿ.

ಭಾರತಾಕ್ ಸ್ವಾತಂತ್ರ್ಯ್ ಮೆಳ್ಚಾ ಪಯ್ಲೆಂ ಬ್ರಿಟಿಷಾಂಚಾ ರಾಜ್ಯಾಂತ್ “ವಂದೇ ಮಾತರಂ” ಮ್ಹಣ್ಚೆಂಯೀ ದೇಶ್‍ದ್ರೋಹ್ ಜಾವ್ನಾಸ್‍ಲ್ಲೊ; ಪೂಣ್ ಸ್ವಾತಂತ್ರ್ಯ್ ಮೆಳ್‍ಲ್ಲ್ಯಾ ಉಪ್ರಾಂತ್ ತೆಂ ಗಾಂವ್ಚೆಂ ಯಾ ತೆಂ ಗಾಂವ್ಕ್ ಹೆರಾಂಕ್ ಪ್ರೋತ್ಸಾಹಿತ್ ಕರ್ಚೆಂ ದೇಶ್‍ಪ್ರೇಮ್ ಜಾಲೊ. ತಶೆಂಚ್ ಆಜ್ ಜರ್ ಕಿಡ್ನಿಫೇಯ್ಲ್ಯರ್, ಡಯಾಬಿಟಿಸ್, ತಲಸ್ಸೇಮಿಯಾ, ಕ್ಯಾನ್ಸರ್ ಆನಿ ಹೃದಯ್‍ರೋಗ್ ಗೂಣ್ ಕರುಂಕ್ ಸಾಧ್ಯ್ ಯಾ ಗೂಣ್ ಜಾತಾತ್ ಮ್ಹಣ್ ಕೋಣ್‍ಯೀ ದಾವೊ ಕರಿತ್ ಮಾಂಡಿತ್ ತರ್ ತೆಂ Drug & Magical Remedies Act-1954 ಪ್ರಮಾಣೆ ಆಪ್ರಾದ್ ಜಾವ್ನಾಸಾ. ಬ್ರಿಟಿಷಾಂಚಾ Drug Act-1840 ಕಾನೂನಾಂತ್ ಥೊಡೆಂ ಸಂಶೊಧನ್ ಕರುನ್ ಸ್ವತಂತ್ರ್ ಭಾರತಾಂತ್ ಅಧಿಕಾರಾರ್ ಆಸ್‍ಲ್ಲ್ಯಾಂನಿ ಸ್ವತಂತ್ರ್ ಭಾರತೀಯಾಂಕ್ ಭಲಾಯ್ಕೆಚಾ ಯಾ ಪಿಡೆಚಾ ನಿಬಾನ್ ತಾಂಕಾಂ ನಿಯಂತ್ರಣಾಕ್ ಹಾಡುನ್ ವೊಕ್ತಾಂಚೆ ಗುಲಾಮ್ ಕರುಂಕ್ ಜ್ಯಾರಿಯೆಕ್ ಹಾಡ್‍ಲ್ಲೆಂ ಕಾನೂನ್ ಹೆಂ ಜಾವ್ನಾಸಾ. ಭಾರತ್ ಸ್ವತಂತ್ರ್ ಜಾಲೊ ಪೂಣ್ ಬ್ರಿಟಿಷಾಂಚಿಂ ತಿಂಚ್ ಕಾನೂನಾಂ, ಪ್ರತ್ಯೇಕ್ ಜಾವ್ನ್ ಭಲಾಯ್ಕೆ ಕ್ಷೇತ್ರಾಂತ್, ಆಜ್‍ಯೀ ಅಸ್ಥಿತ್ವಾರ್ ಆಸಾತ್ ದೆಕುನ್ ಆಜ್‍ಯೀ ಆಮಿ ಎಕಾ ಥರಾನ್ ತ್ಯಾಚ್ ಕಾನೂನಾಂಚೆ ಗುಲಾಮ್ ಜಾವ್ನಾಸಾಂವ್. ಪುರಾತನ್ ಕಾಳಾಥಾವ್ನ್ ಆಮಿ ಪಾಳುನ್ ಆಯಿಲ್ಲಿಂ ಕಿತ್ಲಿಶಿಂ ಆಮ್ಚಿಂ ಭಲಾಯ್ಕೆಚಿ ಸೂತ್ರಾಂ ಕೇವಲ್ ಹ್ಯಾ ಕಾನೂನಾ ವರ್ವಿಂ ಫಿತಿಸ್ಪಣಾಂ ಜಾಂವ್ಕ್ ಪಾವ್ಲ್ಯಾಂತ್ ಆನಿ ತಸಲಿಂ ಫಿತಿಸ್ಪಣಾಂ ಆಧಾರ್ತೆಲ್ಯಾಂಕ್ ದಂಡ್ ಮಾತ್ರ್ ನ್ಹಯ್ ಜಯ್ಲಾಚಿ ಶಿಕ್ಷಾ ಸಯ್ತ್ ಜಾಲ್ಯಾ. ಪುರಾತನ್ ಕಾಳಾ ಥಾವ್ನ್ ಆಯಿಲ್ಲ್ಯಾ ದೇಶೀಯ್ ಚಿಕಿತ್ಸೆಚೊ ವಾಪಾರ್ ಆನಿ ಪ್ರಚಾರ್ ಕರ್ತೆಲ್ಯಾಂಚೊ ಸಂಶಯಾಸ್ಪದ್ ಜೀವ್ ಸಯ್ತ್ ಗೆಲಾ!

ಗುಲಾಮ್‍ಗಿರಿ ಮ್ಹಳ್ಯಾರ್ ಕಿತೆಂ ಮ್ಹಣ್ ಕೇವಲ್ ಸ್ವಾತಂತ್ರ್ಯಾಚೊ ಸಂಪೂರ್ಣ್ ಅನುಭವ್ ಕೆಲ್ಲ್ಯಾನ್ ಮಾತ್ರ್ ಸಾರ್ಕೆಂ ವರ್ಣುಂಕ್ ಸಾಧ್ಯ್. ಎಕಾ ಮೃಗಾಲಯಾಂತ್ ಆಸ್‍ಲ್ಲ್ಯಾ, ಪಿಂಜ್ರ್ಯಾಭಿತರ್‌ಚ್ ಜಲ್ಮ್ ಘೆತ್‍ಲ್ಲ್ಯಾ ಎಕಾ ಸುಕ್ಣ್ಯಾಚಾ ಪಿಲಾಕ್ ಭಾಯ್ಲೊ ಸಂಸಾರ್ ಆನಿ ಸ್ವಾತಂತ್ರ್ಯ್ ಕಿತೆಂ ಮ್ಹಳ್ಳೆಂ ಕಶೆಂ ಸಮ್ಜಾತ್? ಆಜ್ ಭಾರತಾಂತ್ ಆಸ್ಚೆ ಆಮಿ ಚಡಾವತ್ ನಾಗರಿಕ್ ತಸಲ್ಯಾಚ್ ಪರಿಗತೆಂತ್ ಆಸಾಂವ್. ಪಿಡೆಕ್ ವೊಕಾತ್ ಜಾಯ್‍ಚ್ಚ್ ಆನಿ ತೆಂ ಸಾರ್ಕೆಂ. ಪೂಣ್ ಬರೆಂ ಆನಿ ಪರಿಣಾಮ್‍ಕಾರಿ ವೊಕಾತ್ ಮ್ಹಳ್ಯಾರ್ ಕೇವಲ್ ತೆಂ ಮೋಡರ್ನ್ ಮೆಡಿಸಿನ್ ಯಾ ಅಲ್ಲೊಪಥಿಕ್ ಪದ್ಧತ್ ಏಕ್ ಮಾತ್ರ್ ಮ್ಹಣ್ ಚಡಾವತಾಂಚಿ ಸಮ್ಜಣಿ ಜಾವ್ನಾಸಾ; ಹಾಚೆ ಭಾಯ್ರ್ ಕೊಣೆಂಯ್ ಕಿತೆಂಯ್ ಉಲಯ್ಲ್ಯಾರ್ ಯಾ ಕೆಲ್ಯಾರ್ ತಾಚೆ ವಯ್ರ್ ದುಬಾವಾಚಿ ದೀಷ್ಟ್ ಚರ್ತಾ ಆನಿ ತೊ/ತೆಂ/ತಿ ಕಿತೆಂ ಸಾಂಗ್ತಾ ತಾಚಾ ಬರ‍್ಯಾ ಪರಿಣಾಮಾಂಚೆರ್ ದೀಷ್ಟ್ ಧಾಂಪುನ್ ತೆಂ ಏಕ್ ಫಿತಿಸ್ಪಣ್ಂಚ್ ಮ್ಹಣ್ ಲೆಕ್ತಾತ್!

ಭಾರತಾಂತ್ ಭಲಾಯ್ಕೆ ಕ್ಶೇತ್ರಾಚಿ ಖರಿ ಗಜಾಲ್ ಕಿತೆಂ ಮ್ಹಣ್ ಸಾರ್ಕೆಂ ಸಮ್ಜಜಯ್ ತರ್ ಹ್ಯಾ ವರ್ಸಾ (2023) ಥಾವ್ನ್ ದೊನ್ಶಿ ವರ್ಸಾಂ ಪಾಟಿಂ ವಚೊನ್ ಆಮ್ಚಾ ಚರಿತ್ರೆಚೆರ್ ಏಕ್ ದೀಷ್ಟ್ ಘಾಲಿಜಯ್ ಪಡ್ತಾ. ಭ್ರಿಟಿಷಾಂನಿ ಭಾರತಾಕ್ ಗುಲಾಮ್ ಕರ್ಚಾಕ್ ಬುನ್ಯಾದ್ ಘಾಲ್ಲಿಚ್ 1823-ಂತ್. ತ್ಯಾ ಬುನ್ಯಾದಿಚೆಂ ನಾಂವ್ ಆಸ್‍ಲ್ಲೆಂ Native Medical Institution, Calcutta. ಯುರೋಪಾಚಾ ಆನಿ ಭಾರತೀಯ್ ವೊಕ್ತಾಂ ಪದ್ಧತಿಂಕ್ ಸಾಂಗಾತಾ ಮೆಳವ್ನ್ ಏಕ್ ಬರ‍್ಯಾ ನವ್ಯಾಚ್ ಪದ್ಧತಿಚಿ ಸುರ್ವಾತ್ ಜಾತೆಲಿ ಆನಿ ಹಿ ಪದ್ಧತ್ ಪಿಡೆಸ್ತ್ ಲೊಕಾಚಾ ಬರೆಪಣಾ ಖಾತಿರ್ ಕಾಮ್ ಕರ್ತೆಲಿ ಮ್ಹಣ್ ತಾಣಿಂ ಲೊಕಾಕ್ ಭರ್ವಸೊ ದಿಲೊ. ಅಶೆಂ ಇಲ್ಲೆಂ ಕಾಮ್ ಚಲೊನ್ ಆಸ್ತಾನಾ ಬ್ರಿಟಿಷಾಂಚಾ ವೊಕ್ತಾಂ ಪದ್ಧತಿಚಾಕ್‍ಯೀ ಆಯುರ್ವೇದ್ ಆನಿ ಇತರ್ ಭಾರತೀಯ್ ಪದ್ಧತಿ ಬೋವ್ ಉಂಚ್ಲೆ ಮ್ಹಣ್ ತಾಂಕಾಂ ಸಮ್ಜಲೆಂ. ತಿತ್ಲ್ಯಾರ್ ತಾಣಿಂ Anitiquity of Hindu Medicine ಮ್ಹಣ್ ಏಕ್ ಪುಸ್ತಕ್ ಪಾಯ್ಸ್ ಕರುನ್ ಕಶೆಂ ಪುಣ್‍ಯೀ ಭಾರತೀಯ್ ಪದ್ಧತಿಂಕ್ ಕಾಡ್ನ್ ಉಡವ್ನ್ ಇಂಗ್ಲಿಷ್ ವೊಕ್ತಾಂಕ್ ಮಾತ್ರ್ ಹಾಂಗಾ ಸ್ಥಾಪಿತ್ ಕರ್ಚೊ ನಿರ್ಧಾರ್ ಘೆತ್ಲೊ. 1835-ಂತ್ ತಾಣಿಂ Native Medical Institution ನಾಂವ್ ಆಸ್‍ಲ್ಲೆಂ ತೆಂ ಬದ್ಲುನ್ New Medical College, Calcutta ಕೆಲೆಂ. ಭಾರತಾಂತ್ ಹಿ ಪಯ್ಲಿ ಇಂಗ್ಲಿಷ್ ಮೆಡಿಕಲ್ ಕೊಲೆಜ್ ಜಾವ್ನಾಸ್‍ಲ್ಲಿ. 1840 ಭಿತರ್ ತಾಣಿ ಆಯುರ್ವೇದಾಚಾ ಆನಿ ಇತರ್ ಸರ್ವ್ ಭಾರತೀಯ್ ಪದ್ಧತಿಚಾ ವಯ್ಜಾಂಕ್ ತಾಂಚಿ ವೃತ್ತಿ ಸಾಂಡುಂಕ್ ಯಾ ಇಂಗ್ಲಿಷ್ ಪದ್ಧತ್ ಆಪ್ಣಾಂವ್ಕ್ ಮಜ್ಬೂರ್ ಕೆಲೆಂ.

ಸಂಸಾರ್‌ಭರ್ ಆಮಿ ಪಳೆಂವ್ಕ್ ಗೆಲ್ಯಾರ್ ಥಂಯ್-ಹಾಂಗಾ ಅಮ್ಕಾಂ ಸ್ವಾತಂತ್ರ್ಯ್-ಗುಲಾಮಿಚೆ ಥೊಡೆ ನಿಶಾಣಿ ಆಸಾತ್. ಝುಜಾ ಮಯ್ದಾನಾರ್ ದುಸ್ಮಾನ್ ಧವೊ ಬಾವ್ಟೊ ದಾಖಯ್ತ್ ತರ್ ಸಮ್ಜೊಂಚೆಂ ಕೀ ತೊ ಸಲ್ವಣಿ ಒಪ್ಲಾ ಆನಿ ಶರಣಾಗತ್ ಜಾಂವ್ಕ್ ಆಶೆತಾ. ಕುಸ್ತಿ ಪಂದ್ಯಾಟಾಂತ್ ಕೋಣ್ ಪ್ರತಿಸ್ಪರ್ಧಿಚೊ ಬಾವ್ಳೊ ಧರುನ್ ಧರ್ಣಿ ಪರ್ಯಾಂತ್ ಬಾಗಾಯ್ತಾ ತೊ ಜಿಕ್ಲೊ ಮ್ಹಣ್ ಸಮ್ಜೊಂಚೆಂ. ಖಂಯ್ಚೋಯ್ ಏಕ್ ದೇಶ್ ಆಪ್ಲೊ ಬಾವ್ಟೊ ಇತರ್ ಪ್ರದೇಶಾಂನಿ ಉಬಯ್ತಾ ತರ್ ತೊ ಪ್ರದೇಶ್ ತ್ಯಾ ದೇಶಾಚೊ ಮ್ಹಣ್ ಲೆಕ್ಚೆಂ. ತಶೆಂಚ್ ಖಂಯ್ಚೋಯ್ ಏಕ್ ದೇಶ್ ದುಸ್ರ್ಯಾ ದೇಶಾಚಿ ಸ್ವಾಸ್ಥ್ಯ್ ಪದ್ಧತ್ ಕಾಡುನ್ ಉಡವ್ನ್ ಆಪ್ಲಿ ಪದ್ಧತ್ ಥಂಯ್ಸರ್ ಥಾಪ್ತಾ ತರ್ ಆಪ್ಣಾಚಿ ವಸಾಹತ್ ಶಾಹಿ ಥಂಯ್ಸರ್ ಸ್ಥಾಪಿತ್ ಕೆಲಿಚ್ ಮ್ಹಣ್ ಜಾಲೆಂ. ತ್ಯಾಚ್ ದೆಕುನ್ 1840-ಂತ್ ಥಾವ್ನ್ಂಚ್ ಜ್ಯಾರಿಯೆರ್ ಆಸ್‍ಲ್ಲ್ಯಾ Drug Act ವರ್ವಿಂ ಭಾರತ್ ಸಂಪೂರ್ಣ್ ಥರಾನ್ ಗುಲಾಮ್ ಜಾತಾ ಆನಿ ತ್ಯಾ ಭಾರತಾಂತ್ ದೇಶೀಯ್ ಪದ್ಧತಿಂನಿ ಪಿಡಾ ಗೂಣ್ ಕರ್ಚೆಂ ಶಿಕ್ಷಾರ್ಹ್ ತಸಲೊ ಆಪ್ರಾದ್ ಜಾತಾ!

ಹರ್ಯೇಕ್ ದೇಶಾಂತ್ ಹರ್ಯೇಕ್ ಪಿಡೆಕ್ ತಾಂಚಿಚ್ ಮ್ಹಳ್ಳೆ ಗಾಂವ್ಟಿ ಯಾ ನೈಸರ್ಗಿಕ್ ಉಪಚಾರ್ ಆಸ್ತಾತ್ ಆನಿ ತ್ಯಾ ಪಯ್ಕಿ ಭಾರತಾಂತ್ ಆಯುರ್ವೇದ್ ಪ್ರಮುಖ್ ಜಾವ್ನಾಸಾ. ಅಸಲೆ ಗಾಂವ್ಟಿ ಯಾ ನೈಸರ್ಗಿಕ್ ಉಪಚಾರ್ ಇಂಗ್ಲಿಷ್ ವೊಕ್ತಾಂಚಾಕ್‍ಯೀ ಕಿತ್ಲೆಶಾ ಚಡ್ ವಾಂಟ್ಯಾಂನಿ ಅಭಿವೃದ್ಧಿತ್ ಜಾವ್ನಾಸಾತ್ ಆನಿ ತಾಂಚೆ ಥಾವ್ನ್ ಬರೊ ಪರಿಣಾಮ್ ವೆಗಿಂಚ್ ಲಾಭ್ತಾ. ಪೂಣ್ ತಸಲೆ ಸರ್ವ್ ಉಪಚಾರ್ ಆಜ್ ನಪಂಯ್ಚ್ ಜಾತೆಚ್ ಆಸಾತ್. ಹ್ಯಾ ದಿಸಾಂನಿ, ಕೊವಿಡ್ ಕಾಳ್ ಸುರ್ವಾತ್‍ಲ್ಲ್ಯಾ ಥಾವ್ನ್ಂಚ್, ಥೊಡೆ ಜಾಗರೂಕ್ ವ್ಯಕ್ತಿ-ವಯ್ಜ್ ಅಸಲೆ ಮುಳಾವೆ ಉಪಚಾರ್ ಪರ್ತ್ಯಾನ್ ಜಿವೆ ಕರ್ಚಾಕ್ ವ್ಹಡ್ ಪ್ರಯತ್ನ್ ಕರ್ತೆಚ್ ಆಸಾತ್ ಆನಿ ತಾಚೊ ಪ್ರಭಾವ್ ಲೊಕಾಕ್ ಖುದ್ದ್ ದಿಸ್ತಾ ದೆಕುನ್ ಲೊಕಾ ಥಾವ್ನ್ಂಚ್ ಹಾಚೊ ಪ್ರಚಾರ್‌ಯೀ ಜಾತೆಚ್ ಆಸಾ. ತಸಲ್ಯಾ ಥೊಡ್ಯಾ ವ್ಯಕ್ತಿ-ವಯ್ಜಾಂಚೆರ್ Drug & Magical Remedies Act-1954-ಖಾಲ್ ಸರ್ಕಾರಾನ್ ತಾಂಚ್ಯಾ ವಿರೋಧ್ ಕಾನೂನಿ ಕ್ರಮಾಂ ಘೆವ್ನ್ ತಾಂಚಾ ಹ್ಯಾ ವಾವ್ರಾಂತ್ ಅಡ್ಕಳ್ ಘಾಲುಂಕ್ ಪ್ರಯತ್ನ್ ಕೆಲಾಂ ಆನಿ ಕರ್ತೆಚ್ ಆಸಾತ್. ಪೂಣ್ ಲೊಕಾಥಂಯ್ ತ್ಯಾ ವಿಶಿಂ ಜಾಗರೂಕತಾ ಆಯ್ಲ್ಯಾ ದೆಕುನ್ ಸರ್ಕಾರಾಂಕ್‍ಯೀ ಏಕ್ ಮೇಟ್ ಪಾಟಿಂ ಕಾಡಿಜಯ್ ಪಡ್ಲಾಂ. ಗೂಣ್ ಕರ್ಚೆಂಯೀ ಗುನ್ಯಾಂವಾಚಾ ಶ್ರೇಣಿಂತ್ ಘಾಲ್ಚೆಂ ತೆಂ ಕಾನೂನ್ ರದ್ಧ್ ಕರಿಜಯ್ ಮ್ಹಣ್ ಥಂಯ್-ಹಾಂಗಾ ಆವಾಜ್ ಉಠೊಂಕ್ ಲಾಗ್ಲಾ.

ಪಿಡೆಕ್ ವೊಕಾತ್ ಗರ್ಜೆಚೆಂ. ಪೂಣ್ ದಿಲ್ಲ್ಯಾ ವೊಕ್ತಾನ್ ಪಿಡಾ ಗೂಣ್ ಜಾಂವ್ಚೆಂಯೀ ಅತಿ ಗರ್ಜೆಚೆಂ. ಕೇವಲ್ ಪಿಡಾ ನಿಯಂತ್ರಣಾರ್ ದವರುಂಕ್ ಸಕ್ಚಿಂ ವೊಕ್ತಾಂ ಜೀಣ್‍ಭರ್ ಗಿಳುಂಕ್ ಲಾಯ್ಲ್ಯಾರ್ ವೊಕಾತ್ ಆಸ್‍ಲ್ಲೆಂ ತೆಂ ವೀಕ್ ಜಾತಾ. ವೊಕ್ತಾಂಚ್ ಗಿಳುನ್ ಆಪ್ಲೆಂ ಡಯಾಬಿಟಿಸ್ ಗೂಣ್ ಕರವ್ನ್ ಘೆತ್‍ಲ್ಲೊ ಕೋಣ್‍ಯೀ ಆಸಾಗೀ ಯಾ ಡಯಾಲಿಸಿಸ್‍ಚ್ ಕರವ್ನ್ ಕೊಣಾಯ್ಚಿ ಕಿಡ್ನಿ ಸಮಾ ಜಾಲ್ಯಾಗೀ? ತಸಲ್ಯೊ ಚಿಕಿತ್ಸಾ ಪಿಡೆಸ್ತಾಕ್ ಆನಿಕ್‍ಯೀ ಚಡ್ ಪಿಡಾಚ್ ದಿತಾತ್ ಆನಿ ಖರ್ಚ್ ವಾಡಯ್ತಾತ್ ಶಿವಾಯ್ ಶಾಶ್ವತ್ಪಣಿಂ ಕಸಲೊಯ್ ಬರೊ ಪರಿಣಾಮ್ ಲಾಭಾನಾ. ತಶೆಂ ಆಸ್ತಾ ನೈಸರ್ಗಿಕ್ ಪದ್ಧತಿ ಯಾ ಆಯುರ್ವೇದ್ ಆಪ್ಣಾವ್ನ್ ಗೂಣ್ ಜಾಲ್ಲ್ಯಾಂತ್ ಕೊಣೆಂಯ್ ಕಸಲೀಯ್ ಅಡ್ಕಳ್ ಹಾಡಿಜಯ್ ಕಿತ್ಯಾಕ್? ತಾಂಚಿಂ ವೊಕ್ತಾಂ ಕೇವಲ್ ಪಿಡಾ ನಿಯಂತ್ರಣಾರ್ ದವರ್ತಾತ್ ಮ್ಹಣ್ ಸರ್ವ್ ಅಲ್ಲೊಪಥಿಕ್ ವಯ್ಜಾಂಕ್ ಕಳಿತ್ ಆಸಾ; ಪೂಣ್ ಗೂಣ್ ಕರ್ಚಾ ಇತರ್ ವಿದಾನಾಂನಿ ತಾಂಕಾ ಚಡ್ ಉತ್ಸುಕತಾ ನಾಂಚ್ ಮ್ಹಳ್ಳ್ಯಾಪರಿಂ ದಿಸ್ತಾ ಯಾ ಥೊಡೆ ಕಾನೂನಿ ನಿರ್ಬಂಧ್ ತಾಂಚಿ ತಿ ಉತ್ಸುಕತಾ ನಿವವ್ನ್ ಸೊಡ್ತಾತ್! ಪಿಡಾ ಕೇವಲ್ ನಿಯಂತ್ರಣಾಚೆರ್‌ಚ್ ದವರುನ್ ಪಿಡೆಸ್ತಾಕ್ ಜೀಣ್‍ಭರ್ ಪಿಡೆಸ್ತ್‌ಚ್ ದವರ್ಚ್ಯಾಂತ್ ವಯ್ಜಾಂಕ್ ಆನಿ ವೊಕ್ತಾಂಚಾ ಕಂಪ್ಣ್ಯಾಂಕ್ ಚಡ್ ಫಾಯ್ದೊ ಆಸಾ ನ್ಹಯ್ಗೀ? ಪಿಡೆಸ್ತಾಂ ಥಾವ್ನ್‌ಯೀ ಆಪ್ಲೊ ಫಾಯ್ದೊ ಆನಿ ಕಮಿಷನ್ಂಚ್ ಪಳಯ್ಲ್ಯಾರ್ ಗೂಣ್ ಕರ್ಚೆಂ ಯಾ ಗೂಣ್ ಜಾಂವ್ಚೆಂ ಏಕ್ ಕಲ್ಪನಾ ಮಾತ್ರ್ ಜಾತಾ ನ್ಹಯ್‍ಗೀ?

ಕಶೆಂ ಸ್ವರಾಜ್ ಆಮ್ಚೆಂ ಜಲ್ಮಾಸಿದ್ದ್ ಹಕ್ಕ್ ಮ್ಹಣ್ ಆಮಿ ಸರ್ವ್ ಮಾನ್ತಾಂವ್ ತಶೆಂಚ್ ಆಮ್ಚಿ ಭಲಾಯ್ಕಿಯೀ ಆಮ್ಚೆಂ ಜಲ್ಮಾಸಿದ್ದ್ ಹಕ್ಕ್ ಆನಿ ಆಮಿ ತೆಂ ಪ್ರಾಪ್ತ್ ಕರಿಜಯ್‍ಚ್ಚ್. ಭಲಾಯ್ಕೆಚಾ ಸಂಗ್ತಿಂನಿ ಸರ್ಕಾರಾನ್ ಬಿಲ್ಕುಲ್ ದಾಯ್ ಘಾಲ್ಚಿ ನ್ಹಯ್ ಆನಿ ಸರ್ಕಾರಾನ್ ಲೊಕಾಚಾ ಭಲಾಯ್ಕೆಚಿ ಫಿಕಿರ್ ಆಸಾ ಮ್ಹಣ್ ದಾಖಂವ್ಕ್ ನಿಸರ್ಗಾ ಥಾವ್ನ್ ಲಾಭ್‍ಲ್ಲೊ ತಾಂದುಳ್ ಫೊರ್ಟಿಫೈಡ್ ಕರುನ್ ತಸಲೆಂ ವಿಷ್ ಲೊಕಾಕ್ ಖಾವಂವ್ಚೆಂಯೀ ನ್ಹಯ್ ಯಾ ಜಬರ್ದಸ್ತಿ ವ್ಯಾಕ್ಸೀನಾಂ ತೊಪ್ಚಿಂಯೀ ನ್ಹಯ್. ಸ್ವತಂತ್ರ್ ಭಾರತಾಂತ್ ಆಸ್ತಾನಾ, ನೈಸರ್ಗಿಕ್ ಪದ್ಧತೆಂನಿ ಗೂಣ್ ಕರ್ಚೆಂಯೀ ಏಕ್ ಆಪ್ರಾದ್ ಮ್ಹಣ್ ಲೆಕ್ಚಾ ತ್ಯಾ ಕಾನೂನಾಚೆಂ ವೆಗಿಂಚ್ ಅಂತ್ ಜಾಯ್ಶೆಂ ಜಾಗರೂಕತಾ ಹಾಡ್ಚಿ ಆನಿ ತ್ಯಾ ದಿಶೆನ್ ಆಮಿ ಸರ್ವಾಂನಿ ಪ್ರಯತ್ನ್ ಕರ್ಚೆಂ ಅತಿ ಗರ್ಜೆಚೆಂ ಜಾವ್ನಾಸಾ.

 ■  ವಿನ್ಸೆಂಟ್ ಬಿ. ಡಿಮೆಲ್ಲೊ, ತಾಕೊಡೆ.