ಪ್ರೇಕ್ಷಕಾಂಕ್ ಮೋಸ್ ಕರಿನಾ ತಸಲೆಂ ಫಿಲ್ಮ್ ‘ಲಕ್ಕಿ ಡ್ರಾ 777’

434

ಸಪ್ಣಾಂ ಆಸ್ಲ್ಯಾರ್ ಪಾವಾನಾ. ಬಗಾರ್ ತಿಂ ಜ್ಯಾರಿ ಕರ‍್ಚ್ಯಾ ವಾಟೆನ್ ಮ್ಹಿನತ್ ಆನಿ ಹಟ್ಟ್ ಭೋವ್ ಗರ್ಜೆಚೆಂ. ಹೆಂಚ್ ಹಟ್ಟ್ ಆನಿ ಮ್ಹಿನತ್ ಘೆವ್ನ್ ಚೆಡೊ ಕಿರ‍್ಯಾಂತ್ಲೊ, ಯುವ ತರ್ನಾಟೊ ರಾಯನ್ ಮ್ಯಾಗ್ನಿಟೊ ಹಾಣೆಂ ಸಪ್ಣೆಲ್ಲೆಂ ಕೊಂಕ್ಣಿ ಫಿಲ್ಮ್- ಸನ್ವಾರಾ 2 ಸಪ್ತೆಂಬರ್ ದಿಸಾ,  ಫಕತ್ ಎಕಾ ಶೋದ್ವಾರಿಂ ಮಂಗ್ಳುರ‍್ಚ್ಯಾ ಬಿಗ್ ಸಿನೆಮಾಂತ್ ಪ್ರೀಮಿಯರ್ ಜಾಲೆಂ. ಹ್ಯಾ ಫಿಲ್ಮಾಚ್ಯಾ ಪ್ರದರ್ಶನಾಕ್ ಮ್ಹಾಕಾಯ್ ರಾಯನಾನ್ ಫೋನ್ ಕರ‍್ನ್ ಒತ್ತಾಯ್ ಕೆಲ್ಲಿ. ಸತ್ತ್ ಸಾಂಗ್ಚೆಂ ತರ್ ಹಾಂವ್ ಹೆಂ ಫಿಲ್ಮ್ ಪಳೆಂವ್ಕ್ ತಿತ್ಲೊ ಉತ್ಸುಕ್ ನಾತ್‌ಲ್ಲೊಂ. ಕಾರಣ್ ತೀನ್ ವರ್ಸಾಂ ಆದಿಂ ಹ್ಯಾ ಫಿಲ್ಮಾಚೆಂ ಸ್ಕ್ರಿಪ್ಟ್ ರಾಯನಾನ್ ಮ್ಹಾಕಾ ಅಭಿಪ್ರಾಯ್ ಜೊಡ್ಚ್ಯಾಕ್ ವಾಚುಂಕ್ ದಿಲ್ಲೊ. ಹಾಂವ್ ಕವಿ ಸಾಂಗಾತಾ ಏಕ್ ಹಾಸ್ಯ್ ಬರವ್ಪಿ ಜಾಲ್ಲ್ಯಾನ್ ಆನಿ ಹೆಂ ಫಿಲ್ಮ್ ಹಾಸ್ಯ್ ಫಿಲ್ಮ್ ಜಾಲ್ಲ್ಯಾನ್ ರಾಯನಾನ್ ತೆಂ ಮ್ಹಾಕಾ ವಾಚುಂಕ್ ದಿಲ್ಲೆಂ. ಹಾಂವೆಂ ವಾಚುನ್ ರಾಯನಾಕ್ ಅಶಿ ಅಭಿಪ್ರಾಯ್ ದಿಲ್ಲಿ.

“ಸ್ಕ್ರಿಪ್ಟ್ ಸಾದೊ ಆಸಾ. ನವೆಂಸಾಂವ್ ಕಿತೆಂಚ್ ಝಳ್ಕೊಂಕ್ ನಾ. ಹಾಂತುನ್ ಕಸಲಿಯ್ ಸ್ಟೋರಿ ವಾ ಪಂಚಸ್ ವಾ ಆನಿಕೀ ಥೊಡಿ ಬದ್ಲಾವಣ್ ಕೆಲಿ ತರ್ ಪಳೆವ್ಯೆತ್. ತರೀ ಹೆಂ ಫಕತ್ ಸ್ಕ್ರಿಪ್ಟ್ ವಾಚುನ್ ಸಾಂಗ್ಚೆಂ. ಹೊ ಸ್ಕ್ರಿಪ್ಟ್ ಘೆವ್ನ್ ತುಮಿಂ ಫಿಲ್ಮ್ ಕಾಡುಂಕ್ ಭಾಯ್ರ್ ಸರ‍್ಲ್ಯಾತ್ ತರ್ ತೆಂ ಫಿಲ್ಮ್ ವಯ್ರ್ ಘಾಲ್ಚೆಂ ಸಕ್ಕಡ್ ತುಮ್ಚ್ಯಾ ನಟನಾ ವಯ್ರ್ ಹೊಂದ್ವೊನ್ ಆಸಾ”.

ರಾಯನ್ ಭೋವ್ ಸಾದ್ಯಾ ಸ್ವಭಾವಾಚೊ. ಕಿತೆಂಯ್ ಸಾಂಗ್ಲ್ಯಾರ್ ಮಾನುನ್ ಘೆಂವ್ಚೊ ಸಾದೊ ತರ್ನಾಟೊ. ಅಸಲ್ಯಾಂಕ್ ಕೊಂಕ್ಣೆಂತ್ ವಿಶಾಲ್ ಫುಡಾರ್ ಆಸಾ. ಕಿತ್ಯಾಕ್ ಮ್ಹಳ್ಯಾರ್ ಕೊಂಕ್ಣೆಂತ್ ಚಡ್ತಾವ್ ಕಿತೆಂಯ್ ತಿದ್ವಣ್ ವಾ ವಿಮರ್ಸೊ ಕೆಲೊ ತರ್ ಜಾಯ್ತ್ಯಾಂಕ್ ತೆಂ ಬರೆಂ ಲಾಗಾನಾ ಆನಿ ತೆಂ ಉಪ್ರಾಂತ್ ಸಂಬಂಧ್‌ಚ್ ತುಟಯ್ತಾತ್. ಪೂಣ್ ರಾಯನಾನ್ ಖುದ್ಧ್ ಮ್ಹಾಕಾ ಫೋನ್ ಕರ‍್ನ್ “ವ್ಹಯ್ ತುವೆಂ ಸಾಂಗ್ಚೆಂ ಸಾರ್ಕೆಂ ದಿಸ್ತಾ. ಹಾಂವ್ ಇಲ್ಲೆಂ ಚಿಂತುನ್ ಬದ್ಲಾವಣ್ ಕರ‍್ತಾಂ” ಮ್ಹಣ್ ಸಾಂಗೊನ್ ಫೋನ್ ದವರ‍್ಲೆಂ. ಉಪ್ರಾಂತ್ ತಾಚಿ ಕಿತೆಂಚ್ ಖಬರ್ ನಾತ್‌ಲ್ಲಿ. ಥಂಯ್ ಹಾಂಗಾ ಥೊಡೆ ವಿಡಿಯೋ ತಾಣೆಂ ಘಾಲ್ಲೆ ಆಸಾತ್.

ಪೂಣ್ ಎಕಾ ಹಫ್ತ್ಯಾ ಆದಿಂ “ತುವೆಂ ಆಮ್ಚೆಂ ಕೊಂಕ್ಣಿ ಪಿಂತುರ್ ಪಳೆಂವ್ಕ್ ಯೇಜೆ, ಹಾಂವೆಂ ಕಾಣ್ಯೆಂತ್ ಜಾಯ್ತಿ ಬದ್ಲಾವಣ್ ಕೆಲ್ಯಾ” ಮ್ಹಣ್ತಾನಾ ರಾಯನ್ ತಸಲ್ಯಾ ಚೆಡ್ಯಾಕ್ ಪಾಟಿಂಬೊ ದೀನಾಸ್ತಾಂ ರಾವೊಂಕ್ ಮ್ಹಜ್ಯಾನ್ ಜಾಲೆಂನಾ. ಮ್ಹಾಕಾ ವಿಶೇಸ್ ಆಸಕ್ತ್ ನಾತ್ಲ್ಯಾರೀ ಹಾಂವ್ ಸಪ್ತೆಂಬರಾಚಾ ೨ ತಾರಿಕೆರ್ ಫಿಲ್ಮ್ ಪಳೆಂವ್ಕ್ ಭಾರತ್ ಮಾಲ್ ಗೆಲೊಂ. ಮಟ್ವ್ಯಾ ವೆದಿ ಕಾರ್ಯಾ ಉಪ್ರಾಂತ್ ಲಕ್ಕಿ ಡ್ರಾ 777 ಆರಂಭ್ ಜಾಲೆಂ.

ಆಮ್ಚ್ಯಾ ಸಮಾಜೆಕ್ ಏಕ್ ಬರೊ ಸಂದೇಶ್ ದಿಂವ್ಚ್ಯಾ ಘಡಿತಾ ವರ್ವಿಂ ಹೆಂ ಫಿಲ್ಮ್ ಆರಂಭ್ ಜಾತಾ. ಉಪ್ರಾಂತ್ ತೇಗ್ ಗಾಂವ್ಚ್ಯಾ ಮಾನೆಸ್ತಾಂಕ್ ಲಕ್ಕಿ ಡ್ರಾ ಉಟ್ಚ್ಯಾವಿಶಿಂ ಆನಿ ಹಾಂತುನ್ ಮೆಳ್ಚ್ಯಾ ರುಪಯ್ ಪಾಂಚ್ ಲಾಖಾ ಭೊಂವ್ತಿ ಹೆಂ ಫಿಲ್ಮ್ ಪ್ರೇಕ್ಷಕಾಂಕ್ ಹಾಸೊಂಕ್ ಸುರು ಕರ‍್ನ್ ಮುಕಾರುನ್ ವೆತಾ. ಎಕಾ ಹಳ್ಳೆಚೆಂ ಚಿತ್ರಣ್, ಗಾಂವ್ಚೊ ಲೋಕ್, ತಾಂಚಿ ಜಿಣಿ, ಸಾದೆಂ ನೆಸಣ್, ತಿಚ್ ಸದಾಂಚಿ ಕರಂದಾಯ್ ಹಾಚೆಸಂವೆಂ ಫಿಲ್ಮ್ ವಾಡೊನ್ ಯೆತಾನಾ ಹ್ಯಾ ಪಾಂಚ್ ಲಾಖಾಂಕ್ ಹರ‍್ಯೇಕ್ಲೊ ಜೀವ್ ಸೊಡ್ನ್ ವಾಂಟ್ಯಾಕ್ ಮೆಳ್ತಾನಾ ಪಳಯ್ತೆಲ್ಯಾ ಪ್ರೇಕ್ಷಕಾಂಚಾ ದೊಳ್ಯಾಂಕ್ ಫೆಸ್ತ್ ದೀಂವ್ಕ್ ಪಾವ್ತಾ. ತವಳ್ ತವಳ್ ಡಯಾಲೊಗಾ ನಂತರ್ ಯೆಂವ್ಚೆಂ ಪಂಚ್, ಸಾದಿಂ ಉತ್ರಾಂ ತರೀ ತೆಗಾಂ ಮಾನೆಸ್ತಾಂಚೆಂ ಪಯ್ಶಾಂ ಖಾತಿರ್ ಝಗ್ಡೆಂ, ಪಯ್ಶಾಂ ಪಾಟ್ಲ್ಯಾನ್ ಧಾಂವ್ಣಿ ಉಪ್ರಾಂತ್ ತ್ಯಾ ತ್ಯಾ ಸನ್ನಿವೇಶಾ ಫರ್ಮಾಣೆಂ ಕಾಮೆಡಿ ಸಜಯಿಲ್ಲಿ ಪಳಯ್ತಾನಾ ಹೆಂ ಫಿಲ್ಮ್ ಪ್ರೇಕ್ಷಕಾಂಕ್ ಬಿಲ್ಕುಲ್ ಮೋಸ್ ಕರಿನಾ. ಫಿಲ್ಮ್ ಆರಂಭ್ ಜಾಲ್ಲ್ಯಾಥಾವ್ನ್ ಅಖೇರ್ ಪರ್ಯಾಂತ್ ಪ್ರೇಕ್ಷಕಾಂಕ್ ಧರ‍್ನ್ ದವ್ರುಂಕ್ ಸಕ್ಲಾಂ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ.

ಫಿಲ್ಮಾಚಿ ವಾಡಾವಳ್, ಕ್ಲೈಮಾಕ್ಸ್ ತಶೆಂಚ್ ಸಂಪ್ಣಿ ಪಳಯ್ತಾನಾ, ಮ್ಹಾಕಾ ದಿಲ್ಲ್ಯಾ ಸುರ್ವೆಚ್ಯಾ ಸ್ಕ್ರಿಪ್ಟಾಥಾವ್ನ್ ಅತಾಂಚ್ಯಾ ನವ್ಯಾ ಸ್ಕ್ರಿಪ್ಟಾಕ್ ಪಳಯ್ತಾನಾ, ರಾಯನಾನ್ ಮೊಸ್ತ್ ಬದ್ಲಾವಣ್ ಕೆಲ್ಲಿ ದಿಸೊನ್ ಯೆತಾ. ತ್ಯಾ ಬರಾಬರ್ ಹಾಂವೆಂ ರಾಯನಾಕ್ ಸಾಂಗ್‌ಲ್ಲಿಂ ತಿಂ ಉತ್ರಾಂ “ಫಿಲ್ಮ್ ನಿದಾಂವ್ಚೆಂ ವಾ ಉಟಂವ್ಚೆಂ ಹೆಂ ಸಕ್ಕಡ್ ತುಮ್ಚ್ಯಾ ನಟನಾ ವಯ್ರ್ ಆನಿ ತುಮಿ ತಯಾರ್ ಕರ‍್ಚ್ಯಾ ಫಿಲ್ಮಾ ವಯ್ರ್ ಹೊಂದ್ವೊನ್ ಆಸಾ – ಮ್ಹಣ್ಚ್ಯಾಕ್ ರಾಯನಾನ್ ಸಾರ್ಕಿ ನೀತ್ ದಿಲ್ಯಾ ಮ್ಹಣ್ಯೆತ್.

ಸುರ್ವೆರ್ ದಿಲ್ಲೊ ಸಂದೇಶ್ ಫಿಲ್ಮಾಂತ್ ಮಧೆಂ ಆನಿ ಸಂಪ್ಣೆ ವೆಳಾರ್ ಪರತ್ ಆಮ್ಕಾಂ ಜಾಗಯ್ತಾನಾ ಪ್ರೇಕ್ಷಕಾಂಕ್ ಇಲ್ಲೊ ಪುಣೀ ಭಾವುಕ್ ಕರುಂಕ್ ಸಕ್ಲಾ. ಲಕ್ಕಿ ಡ್ರಾಂತ್ ಮೆಳ್‌ಲ್ಲೆ ಪಾಂಚ್ ಲಾಖ್ ಎಕ್ಲ್ಯಾಥಾವ್ನ್ ತೆಗಾಂಕ್, ತೆಗಾಂಥಾವ್ನ್ ಆನಿ ಕಿತ್ಲ್ಯಾ ಜಣಾಂ ಮ್ಹಣಾಸರ್ ಪಾವ್ತಾತ್?ಕೊಣಾಕ್ ಕಿತ್ಲೊ ವಾಂಟೊ ಮೆಳ್ತಾ? ನಿಮಾಣೆಂ ತಾಂಕಾಂ ಪೆರ್ಗೊ ಮೆಳ್ತಾ ವಾ ನಾ ಮ್ಹಳ್ಳೆಂ ಮಜೆದಾರ್ ಖೆಳ್ ಪಳೆಂವ್ಕ್ ಪ್ರೇಕ್ಷಕಾನಿಂ ಜರೂರ್ ಹೆಂ ಫಿಲ್ಮ್ ಪಳಯ್ಜೆ.

ಫಿಲ್ಮಾಂತ್ ಗರ್ಜೆ ತೆಕಿದ್ ಪಾತ್ರ್ ಆಸ್‌ಲ್ಲೆ ಹ್ಯಾ ಫಿಲ್ಮಾಚಿ ಅನ್ಯೇಕ್ ತಾಂಕ್ ಮ್ಹಣ್ಯೆತ್. ಕೆಲ್ಲಮ್ ಹ್ಯಾ ಫಿಲ್ಮಾಂತ್ ಪ್ರಮುಖ್ ಪಾತ್ರ್‌ದಾರಿ ಆಸೊನ್ ತಾಚೆಂ ನಟನ್ ಪಳೆಂವ್ಕ್‌ಚ್ ಮ್ಹಣ್ ಏಕ್ ಪ್ರೇಕ್ಷಕ್ ವರ್ಗ್ ಜಮೊಂಕ್ ಆಯ್ತೊ ಆಸಾ. ತಾಚೆ ಬರಾಬರ್ ರಾಯನ್, ಲೆಸ್ಟು, ಲೂಸಿ ಲೋಬೊ, ರೀಶಲ್ ಪೆರ್ಮನ್ನೂರ್, ಜೋಯ್ಲಿನ್ ನಿಡ್ಡೋಡಿ, ಮೆಲ್ವಿನ್ ಪೆರ್ನಾಲ್, ಆಲ್ವಿನ್ ದಾಂತಿ, ಪೆರ್ನಾಲ್, ಪ್ರೀತಮ್, ಫಜೀರ್ ಹಾಣಿಂ ಫಿಲ್ಮಾಕ್ ಬರೊಚ್ ಜೀವ್ ದಿಲಾ. ಹಾಂಚೆ ಸಾಂಗಾತಾ ಕಾರ್ಮಿಣ್ ಸಿಕ್ವೇರಾ, ಪ್ರೀತಿ ಮಥಾಯಸ್, ವೆಲಿಟಾ ಲೋಬೊ, ವಿನ್ಸನ್ ಮಥಾಯಸ್, ಲೂಯಿಸಾಮ್ ಕಟೀಲ್ ಹಾಣಿಂಯ್ ಬರೊ ಸಾಂಗಾತ್ ದಿಲಾ. ಕಾರ್ಮಿಣ್ ಬಾಯೆಚೊ ಮಟ್ವೊ ಪಾತ್ರ್ ತರೀ ಕಾಳಿಜ್ ಜಿಕ್ತಾ.

ಫಿಲ್ಮ್ ಆರಂಭ್ ಜಾಂವ್ಚ್ಯಾ ಆದಿಂ ಹ್ಯಾ ಫಿಲ್ಮಾಚೆಂ ಸಗ್ಳೆಂ ಡಬ್ಬಿಂಗ್ ಕೆಲ್ಲೊ, ಡೆನ್ನಾನಾ ಸ್ಟುಡಿಯೋಚೊ ಕಾರ್ಭಾರಿ, ಕೊಂಕ್ಣಿ ಕವಿ ಆನಿ ಗಾವ್ಪಿ ಜೇಸನ್ ಸಿಕ್ವೇರಾನ್ ರಾಯನಾಚಾ ಮ್ಹಿನತೆವಿಶಿಂ ಖೂಬ್ ಹೊಗ್ಳಿಕ್ ಉಚಾರ‍್ಲಿ. ತ್ಯಾ ನಂತರ್ ಹ್ಯಾ ಫಿಲ್ಮಾಕ್ ರಾಯನ್ ಆನಿ ತಾಚೆ ಸಾಂಗಾತಿ ಮೆಳೊನ್ ಭೋವ್ ಥೊಡ್ಯಾಚ್ ಜಣಾಂನಿ ಕಾಮ್ ಕೆಲಾಂ, ಭೋವ್ ಥೊಡೆಚ್ ಕಡೆಂ ಹ್ಯಾ ಫಿಲ್ಮಾಚೆಂ ಪ್ರಮೋಶನ್ ಚಲ್ಲಾಂ ಮ್ಹಣ್ತಾಸ್ತಾನಾ ಹೆಂ ಫಿಲ್ಮ್ ಖಂಡಿತ್ ಪ್ರೇಕ್ಷಕಾಚಿಂ ಮನಾಂ ಜಿಕೊಂಕ್ ಸಕ್ಲಾಂ ಮ್ಹಣ್ಯೆತ್. ಭೋವ್ ವಿಶೇಸ್ ಆನಿ ಗರ್ಜೆಚಿ ಗಜಾಲ್ ಮ್ಹಳ್ಯಾರ್ ಹೆಂ ಫಿಲ್ಮ್ ಭೋವ್ ಉಣ್ಯಾ ಬಜೆಟೆರ್ ಚಲ್ಲಾಂ ಮ್ಹಳ್ಳಿ ಖಬರ್. ತಶೆಂ ಮ್ಹಣ್ತಾಸ್ತಾನಾ ಭೋವ್ ಉಣ್ಯಾ ದರಿರ್ ಹ್ಯಾ ಫಿಲ್ಮಾನ್ ಲೊಕಾಂಕ್ ಜಾಯ್ತೆಂ ಹಾಸಯ್ಲಾಂ ಮ್ಹಣ್ ಜಾಲೆಂ. ಎಕಾಚ್ ಉತ್ರಾನ್ ಸಾಂಗ್ಚೆಂ ತರ್ ಚಡ್ ಪ್ರಚಾರ್ ನಾಸ್ತಾಂ, ಚಡ್ ಖರ್ಚ್ ನಾಸ್ತಾಂ ಪ್ರೇಕ್ಷಕಾಂಕ್ ಧಾದೊಶಿ ಕೆಲಾಂ ಮ್ಹಣ್ ಜಾಲೆಂ. ಅಸಲಿಂ ಫಿಲ್ಮಾಂ ಕೊಂಕ್ಣೆಂತ್ ಯೆತಿತ್ ತರ್ ಲೋಕ್ ನಿರಾಸ್ ಜಾಂವ್ಚೊನಾ ಬಗಾರ್ ಕೊಂಕ್ಣಿ ಫಿಲ್ಮಾ ತೆವ್ಶಿನ್ ಮೆಟಾಂ ಕಾಡ್ತಲೊ.

ಇತ್ಲೆಂ ಪೂರಾ ಬರೆಂಚ್ ಸಾಂಗ್ತಾಸ್ತಾನಾ ಫಿಲ್ಮಾಂತ್ ಕಾಂಯ್ ಉಣೆಪಣ್ ನಾತ್‌ಲ್ಲೆಂ ಮ್ಹಣ್ ನ್ಹಯ್. ಫಿಲ್ಮಾಂತ್ ಉಣ್ಯಾರ್ ಏಕ್ ಪದ್ ಆಸ್‌ಲ್ಲೆಂ ತರ್ ಫಿಲ್ಮಾಚಿ ಸೊಭಾಯ್ ಚಡ್ತಿ. ನಟನಾಚೆಂ ಮಟ್ಟ್ ಅನಿಕೀ ಸುಧ್ರಾವ್ಯೆತೆಂ. ಫಿಲ್ಮಾಚ್ಯಾ ಸುರ್ವೆರ್ ಲಕ್ಕಿ ಡ್ರಾಂತ್ ಪಾಂಚ್ ಲಾಖ್ ರುಪಯ್ ಉಟ್ಲೆ ಮ್ಹಳ್ಳಿ ಸೀನ್ ಆನಿಕೀ ಜಬರ್‌ದಸ್ತ್ ಆಸ್‌ಲ್ಲಿ ತರ್ ಆನಿಕೀ ಚಡ್ ಭರಮ್ ಯೆತೊ. ಫಿಲ್ಮ್ ನಿಮಾಣೆಂ ಹಾಂಗಾಚ್ ಅಖೇರ್‌ಗೀ ಮ್ಹಣ್ ದೋನ್ ತೀನ್ ಕಡೆನ್ ಘುಸ್ಪುಡ್ ಜಾಲ್ಲೆಬರಿಂ ಭೊಗ್ಲೆಂ. ಹ್ಯಾ ವಿಶಿಂ ಇಲ್ಲಿ ಚತ್ರಾಯ್ ಸಾಂಬಾಳ್ಚಿ ಗರ್ಜ್. ಥೊಡ್ಯೊ ಚುಕಿ ಘಡ್ಚೆಂ ಸಹಜ್. ಚುಕಿ ಕರ‍್ನ್ಂಚ್ ಶಿಕ್ಚೆಂ. ತಶೆಂ ಜಾಲ್ಲ್ಯಾನ್ ರಾಯನ್ ಮ್ಯಾಗ್ನೆಟೊಕ್ ಜಾಯ್ತೆಂ ಶಿಕೊಂಕ್ ಆಸಾ ಆನಿ ವ್ಹಡ್ಲೊ ಫುಡಾರ್‌ಯೀ ರಾಕೊನ್ ಆಸಾ ಮ್ಹಣ್ ಸಾಂಗ್ಯೆತ್.

ಹೆಂ ಫಿಲ್ಮ್ ಫಕತ್ ಎಕಾ ಶೋದ್ವಾರಿಂ ಸಿನೆಮಾ ಥಿಯೆಟಾಂತ್ ಸಂಪ್ಲೆಂ. ಚಡ್ತಿಕ್ ದೀಸ್ ಚಲಂವ್ಚ್ಯಾ ಖಾತಿರ್ ದುಡ್ವಾ ಕುಮ್ಕೆಚಿ ಗರ್ಜ್ ಆಸಾ. ಪೂಣ್ ಲೋಕಾನಿಂ ನಿರಾಸ್ ಜಾಂವ್ಚೆಂ ನಾಕಾ. ಹೆಂ ಫಿಲ್ಮ್ ಆಮ್ಚ್ಯಾ ಫಿರ್ಗಜಾನಿಂ ಎಕೇಕ್ ಶೋ ಆಸಾ ಕೆಲೊ ತರ್ ರಾಯನ್ ಮ್ಹಳ್ಳ್ಯಾ ತರ್ನ್ಯಾ ಕಲಾಕರಾಕ್ ಏಕ್ ತೆಂಕೊ ದಿಲ್ಲೆಬರಿಂ ಜಾತಲೊ ಆನಿ ಆಮ್ಚ್ಯಾ ಕೊಂಕ್ಣಿ ಫಿಲ್ಮಾಕ್ ಆಧಾರ್ ಜಾತಲೊ. ಹೆಂ ಫಿಲ್ಮ್ ಐಸಿವೈಎಮ್ ವಾ ಫಿರ್ಗಜೆಚಾ ಇತರ್ ಸಂಘ್ ಸಂಸ್ಥ್ಯಾಂಚಾ ಆಧಾರಾನ್ ಲೋಕಾಂ ಖಾತಿರ್ ಪ್ರದರ್ಶಿತ್ ಕೆಲೆಂ ತರ್ ಹೆಂ ಫಿಲ್ಮ್ ಖಂಡಿತ್ ಲೋಕಾಂಕ್ ನಿರಾಸ್ ಕರ‍್ಚೆಂ ನಾ. ಲಕ್ಕಿ ಡ್ರಾ ಫಿಲ್ಮ್ ರಾಯನ್ ಆನಿ ಕೊಂಕ್ಣಿ ಶೆತಾಕ್ ಲಕ್ಕಿ ಜಾಂವ್ ಮ್ಹಣ್ ತಾಂಕಾಂ ಸರ್ವ್ ಬರೆಂ ಆಶೆತಾಂ.

■ ರೋಶು, ಬಜ್ಪೆ