ಪಾಶಾರ್ ಜಾಲ್ಲ್ಯಾ ದಿಸಾಂನಿ ಕೊಂಕ್ಣಿ ಪರ್ಜೆಕ್ ಆರ್ಪಿತ್ ಜಾಲ್ಲೆಂ ಆನ್ಯೇಕ್ ಕೊಂಕ್ಣಿ ವಿಡಿಯೊ ಪದ್ “ಜಿವಾ ಮ್ಹಜ್ಯಾ” ಪ್ರವಿಣ್ ಫೆರ್ನಾಂಡಿಸ್ ಹಾಚ್ಯಾ ಸೊಭಿತ್ ಉತ್ರಾಂಕ್ ಲಾಗೊನ್ ಕಾಳ್ಜಾಕ್ ನಾಟ್ವೊನ್ ಸಬಾರ್ ಪಾವ್ಟಿಂ ಆಯ್ಕೊಂಕ್ ಕಾರಣ್ ಜಾಲೆಂ. ಪದಾ ಸಾಂಗಾತಾ ಏಕ್ ಸುಂದರ್ ಕಾಣಿ ಗುಂತುನ್ ಹಾಡ್ಲ್ಯಾ. ಕಾಣಿಯೆಕ್ ವಿಂಚ್ಲಲೊ ವಿಶಯ್ ಅಲಗ್ ಆನಿ ಉಟೊನ್ ದಿಸ್ತಾ. ಕೊಂಕ್ಣೆಂತ್ ಇತ್ಲೆ ವಿಡಿಯೊ ಆಲ್ಭಮ್ ಆಯಿಲ್ಲೆ ತರೀ ಕೊಣೆಂಯ್ ಹ್ಯಾ ವಿಶಯಾಚೆರ್ ಉಜ್ವಾಡ್ ಪಾಂಕೊಂವ್ಕ್ ನಾ ಮ್ಹಣ್ ಧಯ್ರಾನ್ ಸಾಂಗ್ಯೆತ್ ಮ್ಹಣ್ ದಿಸ್ತಾ.
ತರ್ನ್ಯಾ ಕಾಜಾರಿ ಜೊಡ್ಯಾಂ ಥಂಯ್ ನಾಸಮ್ಜಣಿ ಆಮ್ಚ್ಯಾ ಆನಿ ಹೆರ್ ಸಮಾಜೆಂತ್ ದಾಟ್ ರಿತಿನ್ ಮಾಂಡುನ್ ಗೆಲ್ಯಾ. ಸಂಸಾರಿ ಆಡಂಬರಾಚ್ಯಾ ಜೀವನಾ ಸಾಂಗಾತಾ ಆಮೇರಿಕಾ, ಕೆನಡಾ ತಸಲ್ಯಾ ವಿದೇಶಿ ಗಾಂವಾಂನಿ ಶಿಕೊನ್ ಚಡಾವತ್ ಆಯ್ಚೆಂ ತರ್ನೆಂ ಜನಾಂಗ್ ಫಕತ್ ಶಿಕ್ಪಾ ಡಿಗ್ರ್ಯೊ ಮಾತ್ರ್ ಆಪ್ಣಾಯ್ತಾತ್ ಸೊಡ್ಲ್ಯಾರ್ ಸಂಸಾರಿ ಆನಿ ಸಾಮಾಜಿಕ್ ಜೀವನಾಂಚ್ಯಾ ಜ್ಞಾನಾಂತ್ ತಾಂಚಿ ತಕ್ಲಿ “ಬರಿ ಹೊಳು”. (ಹೆಂ ವಿದೇಶಾಂನಿ ಶಿಕ್‍ಲ್ಲ್ಯಾಂಕ್ ದುರ್ಸೊಣೆ ಖಂಡಿತ್ ನಂಯ್). ಲ್ಹಾನ್ ಗಜಾಲಿಂಚೆರ್ ಉಬ್ಜೊಂಚಿ ನಾ ಸಮ್ಜೊಣಿ ಮುಕಾರ್ ಜಿವಿತಾಂತ್ ಕಸ್ಲ್ಯೊ ಘುಂವ್ಡ್ಯೊ ಘೆತಾ ಆನಿ ಕಿತ್ತೂನ್ ಪರ್ಯಾಂತ್ ಪಾವ್ತಾ – ತೆಂ ಆಧುನಿಕ್ ಕಾಳಾಚೆಂ ದುರಂತ್ ಮ್ಹಣ್ಯೆತ್.
ಹಾಂಗಾ ಫಕತ್ ತರ್ನ್ಯಾಂಕ್ ಮಾತ್ರ್ ದುರ್ಸೊಂಕ್ ಜಾಯ್ನಾ. ಹ್ಯಾ ಸಮಸ್ಯಾಂಕ್ ವ್ಹಡಿಲಾಂಯ್ ಸಮಾಸಮ್ ಜವಾಬ್ದಾರ್ ಜಾವ್ನಾಸಾತ್. ಹ್ಯಾಚ್ ವಿಡಿಯೊಂತ್ ಪಳಯ್ಲ್ಯಾರ್ – ತರ್ನ್ಯಾ ಜೊಡ್ಯಾ ಸಾಂಗಾತಾ ಬಸೊನ್ ತಾಂಚೆ ಸಮಸ್ಯೆ ಆರ್ಥ್ ಕರುನ್ , ತಾಂಕಾಂ ಸಮ್ಜಣಿ ದೀವ್ನ್ ತಾಂಚೆಂ ಜೀವನ್ ಸಮಧಾನೆಚೆಂ ಆನಿ ಸಮ್ಜೊಣೆಚೆಂ ಜಾಂವ್ಚ್ಯಾಬರಿ ಪ್ರಯತ್ನ್ ಕರಿಜೆ ಆಸ್‍ಲ್ಲಿಂ ವ್ಹಡಿಲಾಂ, ಉಜ್ಯಾ ವಯ್ರ್ ತೂಪ್ ಘಾಲ್ಚೆಂ ಕಾಮ್ ಕೆಲ್ಲೆಪರಿಮ್ ದಿಸ್ತಾ. ಹ್ಯಾ ವಿಡಿಯೊಂತ್ ಡೈವೊರ್ಸ್ ಪೇಪರಾಂಚೆರ್ ದಸ್ಕತ್ ಘಾಲ್ನ್ ಜಾಲ್ಲ್ಯಾ ನಂತರ್ ಬೆಜಾರಾಯ್ ನಾತ್ಲ್ಲ್ಯಾ ಆವಯ್ಚೆಂ ( ಹಾವೆಂ ಚಿಂತ್‍ಲ್ಲ್ಯಾ ಪರ್ಮಾಣೆ ) ಸನ್ನಿವೇಶ್ ನಿರ್ಮಾಣ್ ಕೆಲ್ಲೆಂ ನಿರ್ದೇಶಕಾಚ್ಯಾ ಜಾಣ್ವಾಯೆಕ್ ಸಾಕ್ಸ್ ಜಾವ್ನಾಸಾ. ಆಸಲಿಂ ಸನ್ನಿವೇಶಾಂ ಆಡಾಂವ್ಕ್ ಮಾಲ್ಘಡ್ಯಾಂನಿ, ವ್ಹಡಿಲಾಂನಿ ಆತಾಂಚ್ಯಾ ಯುವಜನಾಂಗಾಕ್ ಸಾರ್ಕೆಂ ಮಾರ್ಗದರ್ಶನ್ ದಿಂವ್ಚೆಂ ಗರ್ಜೆಚೆಂ ಜಾವ್ನಾಸಾ.
ಚಲನ್ ಚಿತ್ರ್ ಕ್ಷೇತ್ರಾಂತ್ ಆನ್ಭೊಗ್ ಆಸ್‍ಲ್ಲ್ಯಾ ನೊರ್ಬರ್ಟ್ ಜೋನ್ ಹಾಣೆ ಆಪ್ಲ್ಯಾ ಆನ್ಭೊಗಾಚೊ ಬರೊಚ್ ಉಪಯೋಗ್ ಕರ್ನ್ ಆಪುರ್ಬಾಯೆನ್ ಏಕ್ ಬರೊ ಸಂದೇಶ್ ಲೊಕಾಕ್ ಪಾವಂವ್ಚೆಂ ಕಾಮ್ ಕೆಲಾಂ. ಪೊಟೊಗ್ರಾಫಿ ಕೆಲ್ಲೊ ಡೆನಲ್ ಜೈಸನ್ ದೀಸ್ ವೆತಾಂ ವೆತಾಂ ಭರ್ವಸೊ ಬಾಂದುನ್ ಹಾಡ್ತೇ ಆಸಾ. ಚೊಕ್ಲೆಟ್ ಬೊಯ್ ಮುಣೊನ್ ನಾಂವ್ ವೆಲ್ಲ್ಯಾ ಆಶ್ವಿನ್ ಡಿ’ಕೊಸ್ಟಾನ್ ಆಪ್ಲ್ಯಾ ಮಧುರ್ ತಾಳ್ಯಾನ್ ಪ್ರವೀಣ್ ಫೆರ್ನಾಂಡಿಸ್ ಹಾಚ್ಯಾ ಚಿಂತ್ನಾಂಕ್ ಸಂಪೂರ್ಣ್ ಜೀವ್ ದಿಲಾ. ಸ್ಟೀಫನ್ ಫ್ರ್ಯಾಂಕ್ ಹಾಚೆಂ ಉಲ್ಲಾಸ್‍ಮಯ್ ಸಂಗೀತ್ ಪದಾಚಿ ಸೊಬಾಯ್ ವಾಡಯ್ತಾ.
ಪುಣ್ , ಪದಾಚ್ಯಾ ವಿಡಿಯೊ ನಿರ್ಮಾಣಾಂತ್ ಅನಿಕೀ ಥೊಡ್ಯಾ ಸುಧ್ರಾಪಾಕ್ ಅವ್ಕಾಸ್ ಆಸ್ಲೊ ಮ್ಹಣ್ ಮ್ಹಾಕಾ ಭೊಗ್ತಾ.
1. ದಾರ್ ಉಗ್ತೆಂ ಜಾಲ್ಲೆಂಚ್ ಪತ್ರಕರ್ತ್ ನಾಯಕಾಕ್ ಆಪ್ಲಿ ಒಳೊಕ್ ಸಾಂಗ್ತಾ. ನಾಯಕ್ ತಾಕಾ ಎದೊಳ್‍ಚ್ ಜಾಣಾ ಆಸ್‍ಲ್ಲ್ಯಾನ್ ( ನಾಯಕ್ ತುಕಾ ಕೋಣ್ ಓಳ್ಕನಾಂತ್ ಮುಣೊನ್ ಪತ್ರ್‌ಕರ್ತಾಕ್ ಸಾಂಗ್ತಾ ) ಪರ್ತುನ್ ಪತ್ರ್‌ಕರ್ತಾನ್ ಆಪ್ಲಿ ಒಳೊಕ್ ಸಾಂಗೊಂಕ್ ನಾಯಕ್ ಕಿತ್ಯಾಕ್ ಅವ್ಕಾಸ್ ದಿತಾ ?
2. ಪದ್ ಲೊಕಾನ್ ಎದೊಳ್‍ಚ್ ಆಯ್ಕೊನ್ ಫಾಮಾದ್ ಜಾಲ್ಲ್ಯಾನ್ ತ್ಯಾ ಪದಾಕ್ “Best Lyric Award” ಮೆಳ್‍ಲ್ಲೆಂ ಆಸ್ತಾ ಆನಿ ಪತ್ರ್‌ಕರ್ತ್ ತಾಕಾ ಉಲ್ಲಾಸ್ ಪಾಟವ್ನ್ ಕವಿತಾ ಪಸಂದ್ ಜಾಲಿ. ದು:ಖಾಭರಿತ್ ಆನಿ ಆರ್ಥಾಭರಿತ್ ಉತ್ರಾಂ ಮ್ಹಣ್ ಆಪ್ಲೆಂ ಫೈಸಲ್ ದಿಲ್ಲ್ಯಾ ಉಪ್ರಾಂತ್ ಪರ್ತ್ಯಾನ್ ತೀಚ್ ಕವಿತಾ ಕಿತ್ಯಾಕ್ ಲಾಗೊನ್ ವಾಚುಂಕ್ ದಿತಾ?
3. Appointment ವ ಪೂರ್ವ್ ತಯಾರಿ ನಾಸ್ತಾನಾ Interview ಕೋಣ್ ಘೆತಾತ್ ಯ್ಯಾ ದಿತಾತ್ ? – ತೆಂ ಸಮ್ಜೊಂಕ್ ನಾ!
4. ಪಯ್ಲ್ಯಾ ಫ್ರೆಮಾಂತ್ ನಾಯಕಿಚೆಂ ಹಾಸ್ಕುರೆಂ ಆನಿ ಉಲ್ಲಾಸ್‍ಭರಿತ್ ಮುಖಮಳ್ ದುಖಾಂಚ್ಯಾ ಸನ್ನಿವೇಶಾ ಥಾವ್ನ್ ಬೋವ್ ಪಯ್ಸ್ ದಿಸ್ತಾಲೆಂ.
5. ಬಾಯ್ಲ್ ಭರ್‌ಲ್ಲಿ ಗುರ್ವಾರ್. ಕಾಮಾಚೊ ಕಿತ್ಲೊ ಒತ್ತಡ್ ಆಸ್ಲ್ಯಾರೀ ಬಾಯ್ಲೆಚ್ಯಾ ಆಸಲ್ಯಾ ಪರಿಸ್ಥಿತೆಂತ್ ತಿಚೆಂ ಫೋನ್ ಕಾಣ್ಘೆನಾಸ್ತಾನಾ ರಾಂವ್ಚೆಂ ಆಸ್ವಭಾವಿಕ್ .ಕಿತ್ಲ್ಯಾ ವ್ಹಡ್ಲ್ಯಾ ಬೊರ್ಡ್ ಮೀಟಿಂಗಾಂತ್ ಜಾಲ್ಯಾರಿ ವ ಖಂಯ್ಚ್ಯಾಯ್ Very Important ಪ್ರಸಂಟೇಶನಾಂತ್ ಜಾಲ್ಯಾರೀ ಆಸಲ್ಯಾ ಪರಿಸ್ಥಿತೆಂತ್ Call Attend ಕರುಂಕ್ ಭಿತರ್ ನಂಯ್ ಜಾಲ್ಯಾರೀ ಥೊಡ್ಯಾ ಘಡಿಯಾಂಕ್ ಭಾಯ್ರ್ ಯೇಂವ್ಕ್ ಆವ್ಕಾಸ್ ದಿತಾತ್‌ಚ್!
6. ಆವಯ್ ( ತಶೆಂ ಹಾಂವ್ ಚಿಂತ್ತಾಂ ) ಧುವೆಕ್ ಆಸ್ಪತ್ರೆಕ್ ರಿಕ್ಷಾರ್ ಆಪೊವ್ನ್ ವರ್ತಾ ಆನಿ ಖಂಡಿತ್ ಜಾವ್ನ್ ಆವಯ್ ಲಾಗಿಂ ಧುವೆನ್ ಆಪ್ಲಿ ಪರಿಸ್ಥಿತಿ ಸಾಂಗ್ಲ್ಯಾ ಆಸ್ತಾಂ ಹೆಂ ಖಂಡಿತ್ ಜಾವ್ನ್ ಆಸಹಜ್ ದಿಸ್ತಾ ಮಾತ್ರ್ ನಂಯ್ ಆಸ್ತಾಂ ಧುವೆಕ್ ಪಾಟಿಂ ಘರಾ ಆಪೊವ್ನ್ ವ್ಹರುಂಕ್ ತಿಚ್ಚ್ ಆವಯ್ ಕಾರಾರ್ ಆಯಿಲ್ಲಿ.
ಆನ್ಯೇಕ್ ಗಜಾಲ್ ಮ್ಹಾಕಾ ಹಾಂಗಾ ಸಾಂಗಾಜೆಚ್ಚ್ ಪಡ್ತಾ. ನಿರ್ಮಾಪಕಾಂನಿ ಪದಾಚಿಂ ಉತ್ರಾಂ ಫಾಯ್ಸ್ ಕೆಲ್ಯಾಂತ್. ತಿಂ ಬರಂವ್ಚ್ಯಾ ಪಯ್ಲೆಂ ಕೊಣಿ ತರೀ ಕೊಂಕ್ಣಿ ಸಮ್ಜತೆಲ್ಯಾಕ್ , ಕೊಂಕ್ಣಿ ಉತ್ರಾಂಚೆಂ ಜ್ಞಾನ್ ಆಸ್‍ಲ್ಲ್ಯಾಂಕ್ ದಾಕಯ್ಲ್ಯಾರ್ ಬೊರೆಂ ಆಸ್‍ಲ್ಲೆಂ. ಉತ್ರಾಂನಿ ಜಾಯ್ತ್ಯೊ ಬರ್ಪಾ ಚುಕಿ ಆನಿ ಘುಸ್ಪೊಡಿ ಆಸೊನ್ ವಾಚ್ತಾನಾ ವೆಗ್ಳೊಚ್ ಅರ್ಥ್ ದಿತಾತ್. ದಾಕ್ಲ್ಯಾರ್ – “ಕೆಲ್ಲೊಯ್ ಕಾರಾರ್ ಬಂಗ್ರಾ ಮುದಿಯೆಚೆರ್” ಹಾಂತುಂ ಜಾಗ್ರುತ್ ಘೆಂವ್ಚಿ ಚಡ್ ಗರ್ಜ್ ಆಸಾ. ಹೆಂ ಹಾಂವ್ ಕಿತ್ಯಾಕ್ ಸಾಂಗ್ತಾಂ ಮ್ಹಳ್ಯಾರ್ ಆಶೆಂ ಪಾಯ್ಸ್ ಜಾಲ್ಲೆಂ ಸಾಹಿತ್ಯ್ ಏಕ್ ದಸ್ತಾವೆಜ್ ಜಾವ್ನ್ ಉರ್ತಾ. ವರ್ಸಾಂ ಉಪ್ರಾಂತ್ ಕೊಣಿ ತೆಂ ಸಾಹಿತ್ಯ್ ಕಾಡುನ್ ಪದ್ ಗಾಯ್ಲ್ಯಾರ್ ತ್ಯಾ ಪದಾಚೊ ಆರ್ಥ್ ದುಸ್ರೊಚ್ ಜಾಂವ್ಚಿ ಸಾಧ್ಯತಾ ಆಸಾ. ತ್ಯಾ ದೆಕುನ್ ಆಸಲ್ಯಾ ಸಂಗ್ತಿಂನಿಂ ಹರ್ಯೆಕಾ ನಿರ್ಮಾಪಕಾಂನಿ ಜಾಗ್ರುತ್ಕಾಯ್ ಘೆಂವ್ಚಿ ಚಡ್ ಗರ್ಜ್ ಆಸಾ.
ಲ್ಹಾನ್ ಲ್ಹಾನ್ ಚೂಕ್ ಸಮ್ಜಣೆಂನಿ ಜಶೆಂ ಕಾಜಾರಾಂ ತುಟೊನ್ ಪಡ್ತಾತ್, ತಶೆಂ ನಿರ್ಮಾಣಾಂತ್ಲ್ಯಾ ಲ್ಹಾನ್ ಲ್ಹಾನ್ ಚುಕಿಂನಿ ಪದಾಂಯ್ ಪಾಡೊನ್ ವೆತಾಾತ್ ಮ್ಹಳ್ಳೆಂ ಉಡಾಸಾಂತ್ ದವರ‍್ಲ್ಯಾರ್, ಏಕ್ ಬರೊ ಸಂದೇಶ್ ಆಟಾಪ್ಚೆಂ ಪದ್ ಆಯ್ಕೊಂಕ್ ಆನಿ ಭಗುಂಕ್ ದಿಲ್ಲ್ಯಾ ಪ್ರವೀಣ್ ಫೆರ್ನಾಂಡಿಸ್ ಆನಿ ಪಂಗ್ಡಾಕ್ ಉಲ್ಲಾಸ್ ಪಾಟಯ್ತಾಂ. ಬರೆಂ ಜಾಂವ್.
► ನಾನು ಮರೋಲ್, ತೊಟ್ಟಾಮ್
0 comments
Jeeva Moja is one of the unique, original, and practical concepts of recent times. Danel Jaison proved that he is best behind the lenses and we can see an aspiring shutterbug for our community in the days to come. Ashwin D’costa’s spellbinding voice echoes in ears for longer. Thanks to the producers and director for blending beautiful lyrics with melodious composition. Though appreciable hard work is seen in the entire video, storyline could have had additional touch and bit tighter. instead of showing only a simple misunderstanding as concept, arguments, discussions, interfering of the families to correct the misunderstanding would have made the theme much more realistic and pragmatic.