ಎಕಾಚ್ ವಾಲಿಚಿಂ ಫುಲಾಂ

41

ಸಬಾರ್ ವರ್ಸಾಂ ಉಪ್ತಾಂತ್ ತೆಂ ಗೀತ್ ಆಯ್ಕಾತಾನಾ ಏಕ್ ಪಾವ್ಟಿಂ ಮ್ಹಜಿ ಲೋಂವ್ ಉಬಿ ಜಾಲಿ. ಮ್ಹಜ್ಯಾ ಕೊಲೆಜಿಚಾ ದಿಸಾಂನಿ ಹಾವೆಂ ಮೊಸ್ತು ಪಸಂದ್ ಕೆಲ್ಲೆಂ ಗೀತ್ ತೆಂ.

ಪ್ಯಾರ್ ಕೆ ಇನ್ ಧಾಗೊಂ ಸೆ ಬಂಧಾ ಹೆ ಎ ಸಾರಾ ಸಂಸಾರ್,
ಬಿಚ್‌ಡೇ ಹುವೋಂ ಕೊ ಫಿರ್‌ಸೆ ಮಿಲಾಯೆ ರಾಖಿ ಕಾ ತ್ಯೋಹಾರ್,
ರಾಖಿಕೆ ದಿನ್ ಕಿಸೀ ಬೆಹೆನ್ ಸೆ ಭಾಯ್‌ನಾ ಉನ್‌ಕಾ ಚೂಟೇ… … …
ದೇಖೊ ದಿಲ್ ನ ಕಿಸೀಕಾ ಟೂಟೇ……!

ಹಿಂದಿ ಕವಿ ಇಂದೀವರ್ ಹಾಣೆ ಅರ್ಥಾಭರಿತ್ ಉತ್ರಾಂನಿ ವಿಣುನ್ ಸಾದರ್ ಕೆಲ್ಲೆಂ ಹೆಂ ಗೀತ್ ಆಯ್ಕಾತಾನಾ ಮನ್ಶಾಂಚಾ ಕಾಳ್ಜಾಂತ್ ಆನಿ ಮನಾಂತ್ ಏಕ್ ವಿಭಿನ್ನ್ ಬಾವನಾಂಚೆಂ ಕೊಟೆಂ ಉಬೆಂ ಜಾತಾ. ’ಮೊಗಾಚಾ ಹ್ಯಾ ಸುತಾಂನಿ ಹೊ ಸಗ್ಳೊ ಸಂಸಾರ್ ಭಾಂದುನ್ ಆಸಾ. ಹೊಗ್ಡಾವ್ನ್ ಗೆಲ್ಲ್ಯಾ ಸಬಾರಾಂಕ್ ಪುನರ್ ಮಿಲನ್ ಕರ್ಚೊ ಹೊ ಏಕ್ ಪವಿತ್ರ್ ಸಂಸ್ಕಾರ್ ಜಾವ್ನ್ ಆಸಾ. ಹ್ಯಾ ಬಾಂದಾಚ್ಯಾ ದಿಸಾ ಖಂಯ್ಚ್ಯಾಯ್ ಭಯ್ಣಿಥಾವ್ನ್ ಆಪ್ಲೊ ಭಾವ್ ಪಯ್ಸ್ ಉರ್ಚೊ ನಾಕಾ. ಕೊಣಾಚೆಂಯೀ ಕಾಳಿಜ್ ಎಕಾಮೆಕಾ ಥಾವ್ನ್ ಮೆಕ್ಳೆಂ ಜಾಂವ್ಚೆಂ ನಾಕಾ’

ರಕ್ಷಾ ಬಂದನಚ್ಯಾ ಪವಿತ್ರ್ ಸಂಸ್ಕಾರಾ ವಯ್ರ್ ಬಾಂದುನ್ ಹಾಡ್‌ಲ್ಲೆ ಸಬಾರ್ ವಿಚಾರ್ ಆಮ್ಚ್ಯಾ ಸಮಾಜಿಕ್, ವಯಕ್ತಿಕ್ ಆನಿ ಕುಟ್ಮಾ ಜೀವನಾಂತ್ಲ್ಯಾ ಸಂಬಂಧಾಂಕ್ ಏಕ್ ಮಜ್ಬೂತ್ ರೂಪ್ ದಿತಾತ್. ಹ್ಯಾ ಆಚರಣಾ ದೀಸ್ ಭಯ್ಣ್ ಆಪ್ಲ್ಯಾ ಭಾವಾಚಿ ಪುಜಾ ಕರುನ್ ತಾಚ್ಯಾ ಹಾತಾಕ್ ಏಕ್ ಸುತ್ ವ ರಾಖಿ (ಚಡ್ ಕರುನ್ ರಸ್ಮಾಚೆಂ) ಬಾಂದ್ತಾನಾ, ಭಾವ್ ಭಯ್ಣಿಚಾ ತೊಂಡಾಂತ್ ಮಿಟಾಯ್ ಘಾಲ್ತಾ ಆನಿ ಥೊಡೆ ಪಾವ್ಟಿಂ ಪಯ್ಶೆಯೀ ದಿತಾ. ಅಪ್ಲ್ಯಾ ಭಯ್ಣಿಕ್ ಭಾವಾನ್ ದಿಂವ್ಚಾ ರಕ್ಶಾಣಾಚೊ ಆನಿ ಭದ್ರತೆಚೊ ಏಕ್ ಗುರ್ತ್ ಹೊ. ಹೊ ಸಂಬಂದ್ ಭಯ್ಣಿ ಥಂಯ್ ಬಾಂದ್, ಭದ್ರತಾ ಆನಿ ಬದ್ದತಾ ದಾಕಂವ್ಚೊ ಏಕ್ ಗಾಂಚ್, ಮೊಲಾದೀಕ್ ಆನಿ ಅಖಂಡ್ ಆನಿ ಕೆದಾಳಾಯ್ ತುಟಾನಾ ಜಾಂವ್ಚೊ. ’ಕಿತೆಂಯ್ ಜಾಂವ್, ಹಾಂವ್ ತುಕಾ ರಕ್ಷಣ್ ದಿತೊಲೊಂ’ ಮ್ಹಳ್ಳೊ ಏಕ್ ಸೊಲ್ಲೊ ಘಡ್ಚೊ ಆನಿ ವರ್ಸಾನ್ ವರಸ್ ತೊ ನವೀಕರಣ್ ಕರ್ಚೊ ದೀಸ್.

ಕವಿ ವರ್ಮಾ ಮಲಿಕ್‌ಚಾ ಉತ್ರಾಂನಿ ಸಾಂಗ್ಚೆಂ ತರ್ ಹೊ ಸಂಬಂದ್ ಮೋಡ್ ಆನಿ ಚಂದ್ರೆಮಾ ಪರಿಂ, ಜಗ್ಲಾಣೆ ಆನಿ ವಾರ‍್ಯಾ ಪರಿಂ, ಧರ್ತಿ ಆನಿ ಆಕಾಸಾ ಪರಿಂ, ತಾಳ್ ಆನಿ ನಾಟ್ಯಾ ಪರಿಂ, ಸಾಜ್ ಆನಿ ಆವಾಜಾ ಪರಿಂ ಎಕಾಮೆಕಾ ವೆಗ್ಳೊ ಕರುಂಕ್ ಜಾಯ್ನಾತ್‌ಲ್ಲ್ಯಾ ತಸಲೊ. ಭಯ್ಣಿ ಥಂಯ್ ವಿಶ್ವಾಸ್ ಆನಿ ಮೋಗ್ ದಾಕಂವ್ಚ್ಯಾ ತಸಲೊ, ಭಯ್ಣ್ ನಾತ್‌ಲ್ಲ್ಯಾ ಬಾವಾಂನಿ ಭಯ್ಣಿಕ್ ಆಶೆಂವ್ಚೆ ತಸಲೊ, ಆನಿ ಭಯ್ಣಿಂನಿ ಭಾವಾಚಿ ಪ್ರಾಮುಖ್ಯತಾ ಸಮ್ಜೊನ್ ಘೆಂವ್ಚೆ ತಸಲೊ. ಭಾವಾಚಿ ಮಜ್ಬೂತಾಯ್ ಆನಿ ಭಯ್ಣಿಚಿ ನಾಜೂಕಾಯ್ ಸಾಂಗಾತಾ ಹಾಡ್ಚೆ ತಸಲೊ. ದಿಗಂತ್ ಆನಿ ತಾಂಬ್ಡ್ಯಾ ವರ್ಣಾ ಪರಿಂ, ಸುರ್ಯೊ ಆನಿ ಕಿರ್ಣಾಂ ಪರಿಂ, ಮನಾ ಆನಿ ಭಾವನಾ ಪರಿಂ ಮಿಸ್ಳುನ್ ಆಸ್ಚೊ.

ಎಕಾ ಸಮೀಕ್ಷೆ ಪರ್ಮಾಣೆ, ಬಾವ್ ಭಯ್ಣಿಚಾ ಸಂಬಂಧಾನಿ ಮಾನವ್ ಸಹಜ್ ದ್ವೇಷ್, ಸ್ವಾರ್ಥ್, ರಾಗ್ ಆನಿ ಮೊಸೊರ್ ಅಸಲ್ಯಾ ಗುಣಾಂಚೊ ಪ್ರಭಾವ್ ಬೋವ್ ಉಣ್ಯಾ ಮಟ್ಟಾರ್ ಆಸ್ತಾ ಆನಿ ಚಡ್ತಾವ್ ಸಂದರ್ಬಾಂನಿ ತೋ ನಗಣ್ಯ್ ಜಾವ್ನ್‌ಯೀ ಆಸ್ತಾ. ಏಕ್ ಭಾವ್ ಆಪ್ಲ್ಯಾ ಭಯ್ಣಿಕ್ ಕೆದಾಳಾಯ್ ಸೊಡುನ್ ದೀನಾ ತಸೆಂಚ್ ಭಯ್ಣ್ ಆಪ್ಲ್ಯಾ ಭಾವಾಕ್ ಲ್ಹಾನ್ ಜಾಂವ್ಕ್ ಸೊಡಿನಾ. ಭಾವ್ ಭಯ್ಣಿಂ ಮಧೆಂ ಚಿಂತ್ನಾಂನಿ ತಫಾವತ್, ವಿಭಿನ್ನ್ ಮಾನಸಿಕತಾ, ಸಂದರ್ಬಾನುಸಾರ್ ಬದ್ಲೊನ್ ಆಸ್ಚೆ ವಿಚಾರ್ ಮನಾಂತ್ ರಾಜ್ ಕರುನ್ ಆಸ್ಲ್ಯಾರೀ ಕುಟ್ಮಾ ಭಿತರ್ ವ ಭಾಯ್ರ್ ಆಮಿ ಏಕ್ ಜಾವ್ನಾಸಾಂವ್ ಮ್ಹಳ್ಳೆಂ ಸಾದರ್ಪಣ್ ತಿಂ ಪ್ರಸ್ತುತ್ ಕರ್ತಾತ್. ಭಾವಾಚಾ ಹರ್ ಜಯ್ತಾಂತ್ ಭಯ್ಣ್ ಸಂತೊಸ್ ಪಾವ್ತಾ. ಭಾವ್ ಭಯ್ಣಿಚ್ಯಾ ಹರ್ ಸಂತ್ರಪ್ತೆಂತ್ ಭಾಗಿದಾರ್ ಜಾತಾ.

ಹಿಂದು ಸಂಸ್ಕೃತೆಂತ್ ಏಕ್ ಪರಬ್ ಜಾವ್ನ್ ಆಚರಣ್ ಕರ್ಚ್ಯಾ ಹ್ಯಾ ಸಂಸ್ಕಾರಾಕ್ ’ಭದ್ರೆತೆಚೊ ಸಂಸ್ಕಾರ್’ ಮ್ಹಳ್ಳ್ಯಾ ನಾಂವಾನ್‌ಯೀ ವೊಳ್ಕಾತಾತ್. ದೆಕುನ್ಂಚ್ ಜಾವ್ಯೆತ್ ‘ಭಯ್ಣಿಚೊ ಭಾವ್ ಮೊಡ್ಕೆಂತ್ಲೊ ಸಯ್ರೊ’ ಮ್ಹಳ್ಳಿ ಗಾದ್ ಆಮ್ಚಾ ಕೊಂಕ್ಣೆಂತ್ ಆಯ್ಕೊಂಕ್ ಮೆಳ್ತಾ. ಭಾವಾಭಯ್ಣಿಕ್ ಎಕಾಮೆಕಾಥಂಯ್ ಆಸ್ಚ್ಯಾ ಭಾಂದವ್ಪಣಾಚಿ ಗುಂಡಾಯ್ ಹಿ ಗಾದ್ ದಾಕವ್ನ್ ದಿತಾ.

ಚಡಾವತ್ ದುಬ್ಳಿಕಾಯೆಂತ್ ಬುಡೊನ್ ಗೆಲ್ಲ್ಯಾ ಉತ್ತರ್ ಭಾರಾತಾಂತ್ ಕಾಜಾರ್ ಜಾಲ್ಲೆಂ ಚೆಡುಂ ಸೆಜಾರ್ಚ್ಯಾ ಹಳ್ಳೆಂತ್ ವ ಗಾಂವಾಂತ್ ಆಸಾ ತರ್, ತ್ಯೊ ಭಯ್ಣಿ ಹ್ಯಾ ಸಂಭ್ರಮಾಂತ್ ವಾಂಟೊ ಘೆಂವ್ಕ್ ಪಯ್ಣ್ ಕರುನ್ ಭಾಂವಾಂಚಾ ವ ಮಾಲ್ಘಡ್ಯಾ ಘರಾ ಪಾವ್ತಾಲ್ಯೊ. ಸಬಾರ್ ಪಾವ್ಟಿಂ ಭಾವ್‌ಯೀ ಆಪ್ಲ್ಯಾ ಭಯ್ಣಿಚಾ ಘರಾ ಪಯ್ಣ್ ಕರುನ್ ವೆತಾಲೆ. ಸ್ತ್ರೀ ಶೋಷಣ್ ಚಲೊನ್ ಆಸ್ಚಾ ತ್ಯಾ ಕಾಳಾರ್ ಎಕಾ ಭಾವಾಚೊ ಪಾಟಿಂಬೊ ಜರ್ ತರ್ ಆಸಾ ಕಾಜಾರಿ ಸ್ತ್ರಿಯೆಕ್ ಕುಟ್ಮಾಂತ್ ಆಪ್ಲೆಂಚ್ ವಡ್ಪಣಾಚೆಂ ಸ್ಥಾನ್ ಆಸ್ತಾಲೆಂ ಆನಿ ತಿಚೆ ವಯ್ರ್ ಜಾಂವ್ಚ್ಯಾ ಶೋಷಣಾಚೆಂ ಪ್ರಮಾಣ್‌ಯೀ ಸೀಮಿತ್ ಆಸ್ತಾಲೆಂ. ಅಜೂನ್ ತರಿ ಅಸಲಿ ಪರಿಸ್ತಿತಿ ಅಶಿಕ್ಪಿ ಲೊಕಾ ಮದೆಂ ಪ್ರಚಲಿತ್ ಆಸ್ಚಿ ಆಮಿ ದೆಖ್ತಾಂವ್.

ಭಾರತೀಯ್ ಚಂದ್ರಮಾನ್ ಕೆಲೆಂಡರಾ ಪರ್ಮಾಣೆ ಶ್ರಾವಣ್ ಮಯ್ನ್ಯಾಚ್ಯಾ ನಿಮಾಣ್ಯಾ ವ ಪುನ್ವೆಚಾ ದಿಸಾ ಆಚರಣ್ ಕರ್ಚಿ ಹಿ ಪರಬ್ ಸನಾತನ್ ಸಂಸ್ಕ್ರತಿಚಾ ಮಹಾತ್ವಾಚಾ ಉತ್ಸವಾಂ ಪಯ್ಕಿ ಏಕ್. ಹೆಂ ಆಚರಣ್ ಹರ್ಯೆಕಾ ವರ್ಸಾ ಆಗೊಸ್ತ್ ಮಹಿನ್ಯಾಂತ್ ಯೆತಾ. ಹಾಚೆಂ ಆಚರಣ್ ಕೆದಾಳಾ ಆನಿ ಕೊಣೆಂ ಸುರು ಕೆಲೆಂ ಮ್ಹಳ್ಳೊ ಉಲ್ಲೇಖ್ ಖಂಯ್ಸರೀ ಆಮ್ಕಾಂ ಮೆಳಾನಾ ತರೀ ಭಾರತಾಚಾ ಪುರಾಣಾಂನಿ ಆನಿ ರಾಯ್ ಮಹಾರಾಯಾಂಚ್ಯಾ ಕಾಲಾರ್ ಹೊ ಉತ್ಸವ್ ಪವಿತ್ರ್ ಥರಾನ್ ಆಚರಣ್ ಕರ್ತಾಲೆ ತೊ ಉಲ್ಲೇಖ್ ಆಸಾ. ಹಿಂದೂ ಧರ್ಮ್ ಪ್ರಸಾರುನ್ ಆಸ್ಚಾ ಚಡ್ ಕರುನ್ ಮಧ್ಲ್ಯಾ ಆನಿ ದಕ್ಶಿಣ್ ಅಸಿಯಾ ಖಂಡಾಚ್ಯಾ ದೇಶಾಂನಿ ಆನಿ ಸಿಂಗಾಪುರ್, ಮಲೆಶಿಯಾ, ಪಾಕಿಸ್ತಾನ್, ನೇಪಾಲ್, ಥೈವಾನ್ ಅಸಲ್ಯಾ ಗಾಂವ್ಚಾ ಲೊಕಾನ್ ಹೊ ಸಂಸ್ಕಾರ್ ಜೀವ್ ದವರ್ಲಾ. ವಿವಿದ್ ಜಾಗ್ಯಾಂನಿ ರಾಕ್ರಿ, ಸಲೂನೊ, ಸಿಲಾನೊ ತಸಲ್ಯಾ ವಿಂಗಡ್ ಸಬ್ದಾಂನಿ ಆಪಂವ್ಚ್ಯಾ ಹ್ಯಾ ಸಬ್ದಾಂಚೆಂ ಮೂಳ್ ಸಂಸ್ಕ್ರತ್ ಭಾಶೆ ಥಾವ್ನ್ ಆಯ್ಲಾಂ ಮ್ಹಳ್ಳೆಂ ಸಮ್ಜೊನ್ ಘೆವ್ಯೆತ್.

ಚರಿತ್ರೆಚಾ ಪಾನಾಂನಿ ಆಮಿ ಪಳೆಂವ್ ತರ್ ಆಪ್ಲೊ ಪತಿ ಝುಜಾಕ್ ವೆಚ್ಯಾ ಪಯ್ಲೆಂ ರಾಣಿಯೆನ್ ದುಸ್ಮಾನ್ ರಾಯಾಕ್ ವ ತಾಚ್ಯಾ ಸೆನಾಧಿಪತಿಕ್ ರಾಖಿ ಧಾಡುನ್ ದೀವ್ನ್ ಆಪ್ಲೊ ಪತಿ ಜರ್ ಝುಜಾಂತ್ ಸಲ್ವಾತ್ ತಾಚೊ ಜೀವ್ ತುವೆಂ ಉರಯ್ಜೆ ಮ್ಹಣ್ ವಿನೊವ್ಣಿ ಕೆಲ್ಲೆ ದಾಖ್ಲೆಯೀ ಆಮ್ಕಾಂ ಮೆಳ್ತಾತ್. ಆನಿ ಆಪ್ಲೊ ದುಸ್ಮಾನ್ ಸಲ್ವಾಲೊ ತರ್ ತ್ಯಾ ರಾಯಾನ್ ರಾಖಿಕ್ ಗೌರವ್ ದೀವ್ನ್ ಜೀವ್ ಉರಯಿಲ್ಲೆ ದಾಖ್ಲೆಯಿ ತಿತ್ಲೆಚ್ ಆಸಾತ್. ರಾಣಿ ಕರ್ಣಾವತಿ ಆನಿ ಮುಗಲ್ ರಾಯ್ ಹುಮಾಯೂನಾಚಿ ಚಾರಿತ್ರಿಕ್ ಕಾಣಿ ಹಾಂಗಾ ಬೋವ್ ಪ್ರಸ್ತುತ್. ಕ್ರಿಸ್ತ್ ಪೂರ್ವ್ 300 ವರ್ಸಾಂ ಆದಿಂ ರಾಯ್ ಅಲೆಕ್ಸಾಂಡರಾಚಾ ಪತಿಣೆನ್ ಎಕಾ ಭಾರತೀಯ್ ರಾಯಾಕ್ ರಾಖಿ ದ್ವಾರಿಂ ಭಾವ್ ಮ್ಹಣ್ ಮಾನುನ್ ಘೆವ್ನ್ ಅಪ್ಲ್ಯಾ ಪತಿ ಥಾವ್ನ್ ಝುಜ್ ಕರಿನಾಶೆಂ ಕೆಲ್ಲೆಂ ಪ್ರಯತನ್‌ಯೀ ಹಾಂಗಾ ಉಲ್ಲೇಖನೀಯ್.

ಥೊಡ್ಯಾ ವರ್ಸಾಂದಿಂ ಹಾವೆಂ ದೆಕ್‌ಲ್ಲೆಂ ಏಕ್ ದಾಕ್ಟೆಂ ಘಡಿತ್ ಮ್ಹಾಕಾ ಕೆದಾಳಾಯ್ ಉಗ್ಡಾಸಾಕ್ ಯೆತಾ. ದೊಗಾಂ ಭುರ್ಗಿಂ ಭಾವ್ ಭಯ್ಣಿಂ ಎಕಾ ಮೆಜಾ ಭೊವಾರಿಂ ಧಾಂವೊನ್ ಎಕಾ ಮೆಕಾಕ್ ಆಪಡ್ಚೊ ಖೆಳ್ ಖೆಳ್ತಾಲಿಂ. ತಾಣಿ ಕಿಂಕ್ರಾಟ್ಯೊ ಘಾಲುನ್ ಹಾಸ್ತಾನಾ ಮನ್ ಸಂತುಷ್ಟ್ ಜಾತಾಲೆಂ. ಎಕಾಚ್ಚಾಣೆ ಭಯ್ಣ್ ಪಡ್ಲೆಂ ಆನಿ ರಡೊಂಕ್ ಲಾಗ್ಲೆಂ. ಭಾವ್ ತಿತ್ಲ್ಯಾಚ್ ಬಿಯಾನ್ ರಡೊಂಕ್ ಲಾಗ್ಲೊ. ’ಮಮ್ಮಿ ಹಾವೆಂ ತಾಕಾ ಲೊಟುನ್ ಘಾಲುಂಕ್ ನಾ. ತೆಂ ಪಡ್ಲೆಂ ಮಾಮ್ಮಿ’ ಅಶೆಂ ಮ್ಹಣೊನ್ ಧಾಂವೊನ್ ಭಯ್ಣಿಕ್ ಉಕ್ಲುಂಕ್ ಪ್ರಯತ್ನ್ ಕರಿಲಾಗ್ಲೊ. ಪರತ್ ತಾಕಾ ಥಂಯ್ಚ್ ಸೊಡುನ್ ಹೆಣೆ ತೆಣೆ ಧಾಂವೊಂಕ್ ಲಾಗ್ಲೊ. ಆಪ್ಲೆ ಇತ್ಲ್ಯಾಕ್ ಉಟೊನ್ ಬಸ್‌ಲ್ಲ್ಯಾ ಭಯ್ಣಿಕ್ ಆರಾವ್ನ್ ಧರುನ್ “ತುಕಾ ದುಕ್ಲೆಂಗಿ?” ಮ್ಹಣ್ ವಿಚಾರುಂಕ್ ಲಾಗ್ಲೊ. ಖಂಯ್‌ಗಿ ಕಾಮಾರ್ ಆಸ್‌ಲ್ಲಿ ಆವಯ್ ಧಾವೊನ್ ಯೆಂವ್ಚ್ಯಾ ಫುಡೆ ಭುರ್ಗ್ಯಾಂಚೆಂ ರಡ್ಣೆ ರಾವೊನ್ ಪರತ್ ತಿಂ ಖೆಳೊಂಕ್ ಲಾಗ್‌ಲ್ಲಿಂ.

ಹೆಂ ಏಕ್ ಸಾಮಾನ್ಯ್ ದೃಶ್ಯ್. ತೆಂ ಕಯ್ದ್ ಕರುಂಕ್ ಮ್ಹಜೆಲಾಗಿಂ ತ್ಯಾ ಆಯಿನ್ನ್ ವೆಳಾರ್ ಕ್ಯಾಮೆರಾ ನಾತ್‌ಲ್ಲೊ ತರೀ ಮತಿ ಭಿತರ್‌ಲ್ಯಾ ಕ್ಯಾಮೆರಾಂತ್ ಆಜಿಕೀ ತೆಂ ದೃಶ್ಯ್ ಜೀವ್ ಆಸಾ. ವಾಚ್ತಾನಾ ಸಾಮಾನ್ಯ್ ಮ್ಹಣ್ ಭೊಗ್ತಾ ತರೀ, ತ್ಯಾ ಭಾವ್ ಭಯ್ಣಿಂಚಾ ಎಕಾಮೆಕಾ ಥಂಯ್ ಆಸ್‌ಲ್ಲ್ಯಾ ಬಾಂದಾಚ್ಯಾ ಹಾವ್ ಭಾವಾಕ್ ಆನಿ ಪ್ರತಿಕ್ರಿಯಾಂಕ್ ಸೂಕ್ತ್ ವಿವರಣ್ ಖಂಡಿತ್ ಜಾವ್ನ್ ಮ್ಹಾಕಾ ಮೆಳಾನಾ. ಭಾವಾನ್ ಭಯ್ಣಿಕ್ ಪೊಟ್ಲುನ್ ಧರ್‌ಲ್ಲಿ ರೀತ್ ಆನಿ ತ್ಯಾ ವೆಂಗೆಂತ್ ಭಯ್ಣಿನ್ ದಾಕಯಿಲ್ಲೆಂ ನಿರಾಳ್‌ಪಣ್ ವರ್ಣಾನಾತೀತ್.

’ಫೂಲೊಂ ಕಾ ತಾರೊಂ ಕಾ ಸಬ್ ಕಾ ಕಹ್‌ನಾ ಹೈ, ಏಕ್ ಹಜ಼ಾರೊಂ ಮೆ ಮೆರಿ ಬೆಹೆನಾ ಹೈ, ಸಾರಿ ಉಮರ್ ಹಮೆಂ ಸಂಗ್ ರೆಹೆನಾ ಹೈ’ ಆಮಿ ಸಬಾರ್ ಪಾವ್ಟಿಂ ಆಯ್ಕಾಲಾಂ ಜಾವ್ಯೆತ್ ಹೆಂ ಹಿಂದಿ ಗೀತ್. ಹಾಂಗಾ ಭಾವಾನ್ ಭಯ್ಣಿಚೆಂ ಕರ್ಚೆಂ ವರ್ಣನ್ ಕಾಳ್ಜಾಕ್ ಲಾಗ್ಚೆ ತಸಲೆಂ.

’ಸಗ್ಳಿ ಜಿಣಿಂಚ್ ವಾಂಟುನ್ ಘೆಂವ್ಚಿ ಮ್ಹಜಿ ಭಯ್ಣ್ ಹಜಾರಾಂನಿ ಏಕ್ ಮ್ಹಣ್ ಧರ್ತೆ ವಯ್ಲಿಂ ಫುಲಾಂ ತಶೆಂಚ್ ಮೊಳ್ಬಾ ವಯ್ಲಿಂ ನೆಕೆತ್ರಾಂಯೀ ಸಾಂಗ್ತಾತ್’ ಆನಂದ್ ಭಕ್ಷಿ ನಾಂವಾಚಾ ಉರ್ದು ಕವಿನ್ ಬರಯಿಲ್ಲೆಂ ಹೆಂ ಗೀತ್ ಮುಕ್ಲ್ಯಾ ವೊಳಿಂನಿ ಸಂಬಂದಾಂತ್ಲಿಂ ರೂಪಾಂ ಅನಿಕೀ ರಂಗಾಳ್ ಆನಿ ಮಜ್ಬೂತ್ ಕರುನ್ ದಾಕಯ್ತಾ. ’ಮ್ಹಜ್ಯಾ ದೊಳ್ಯಾಂಚಿ ನೀದ್ ಆನಿ ಮತಿಂತ್ಲೆಂ ಸಮಾದಾನ್ ಘೆವ್ನ್ ಕೆದಾಳಾ ತುಂ ಮ್ಹಜೆ ಥಾವ್ನ್ ಪಯ್ಸ್ ಜಾಲೆಂಯ್, ಮ್ಹಜ್ಯಾ ಜಿಣಿಯೆಚಿಂ ಸರ್ವ್ ಸಪ್ಣಾಂ ಕೊಸ್ಳೊನ್ ಪಡ್ಲಿಂ, ಉಡಾಸ್ ಕರುನ್ ಘೆ ಆಮಿ ದೊಗಾಂಯ್ ಎಕಾಚ್ ವಾಲಿಚಿಂ ಫುಲಾಂ, ಹಾಂವ್ ತುಕಾ ವಿಸ್ರಾನಾ ತರಿ ತುಂ ಮಾಕಾ ಕಶೆಂ ವಿಸ್ರಾಲೆಂಯ್. ಯೆ ಮ್ಹಜೆಲಾಗಿಂ, ಸಾಂಗೊಂಕ್ ಆಸಾ ತೆಂ ಸಾಂಗ್…’ ಜಡಾಯೆನ್ ಭರ್ಲೆಲ್ಯಾ ಭಾವನಾಂಕ್ ಆಮ್ಶೆ ತಿಕ್ಶೆ ಕಡಿಯೆಚೊ ಸ್ವಾದ್ ದಿಂವ್ಚಿಂ ಹಿಂ ಉತ್ರಾಂ ಚಿಂತ್ಪಾಚಾ ಅಧೂರ್ ಗುಂಡಾಯೆಕ್ ಆಮ್ಕಾಂ ವರುನ್ ಪಾವಯ್ತಾತ್.

ಹಿಂದಿ ಆನಿ ಉರ್ದು ಸಾಹಿತ್ಯ್ ಸಂಸಾರಾಚಾ ಪರಿಸರಾಕ್ ಆಮಿ ಪಾವ್ಲ್ಯಾರ್ ಅಸಲ್ಯಾ ಸಬಾರ್ ಸಾದರ್ಪಣಾಂಚಿಂ ಒಳೊಕ್ ಆಮಿ ಕರ್ಯೆತಾ. ರಕ್ಶಾ ಬಂದನಾಚೊ ಮಹತ್ವ್ ದಾಕಂವ್ಚೆ ತಸಲಿಂ ಸಬಾರ್ ಫಿಲ್ಮಾಂಯ್ ಆಮ್ಕಾ ಪಳೆಂವ್ಕ್ ಮೆಳ್ತಾತ್. ಸಬಾರ್ ಕವಿಂನಿ ಬರಯಿಲ್ಲಿಂ ಕವನಾಂ, ರಾಷ್ಟ್ರೀಯ್ ಆನಿ ಅಂತರಾಷ್ತ್ರಿಯ್ ಬರಯ್ಣಾರಾಂನಿ ವ್ಹಡ್ ಮಾಪಾನ್ ಬೂಕ್ ಬರವ್ನ್ ಪ್ರಸಾರ್ ಕೆಲ್ಯಾತ್. ಹೆ ಬೂಕ್ ಗುಂಡಾಯೆನ್ ಕೆಲ್ಲ್ಯಾ ಅದ್ಯಯನಾ ಉಪ್ರಾಂತ್ ಬರಯಿಲ್ಲೆ ತಸಲೆ ಜಾವ್ನ್ ಆಸೊನ್, ರಕ್ಷಾ ಬಂದನ್ ಮ್ಹಳ್ಳ್ಯಾ ಭಾರತೀಯ್ ಸಂಸ್ಕಾರಾಚೊ ಮಹತ್ವ್ ಉಕಲ್ನ್ ಧರ್ತಾತ್. ನಜ಼ೀರ್ ಅಕ್ಬರಾಬಾದಿ ಮ್ಹಳ್ಳ್ಯಾ ಕವಿನ್ 1735 ಇಸವೆಂತ್ ಬರಯೆಲ್ಲೆಂ ಏಕ್ ಉರ್ದು ಕವನ್ ರಕ್ಶಾ ಬಂದನಾ ವಯ್ರ್ ಬರಯಿಲ್ಲೆಂ ಪಯ್ಲೆಂ ಕವನ್ ಮ್ಹಣ್ ಸಾಹಿತ್ಯ್ ಸಂಸಾರಾನ್ ಮಾನುನ್ ಘೆತ್ಲಾಂ.

ಆಧುನಿಕ್ ಸಂಸಾರಾಂತ್ ಆಪ್ಲ್ಯಾ ಸ್ವಾರ್ಥಾಕ್ ಲಾಗೊನ್ ಎಕಾಮೆಕಾ ಥಾವ್ನ್ ಪಯ್ಸ್ ಉರ್ಚ್ಯಾ ಭಾವ್ ಭಯ್ಣಿಂಕ್ ಹೊ ಏಕ್ ಮಜ್ಬೂತ್ ಸಂದೇಶ್ ಜಾವ್ನ್ ಆಸಾ. ಸಬಾರ್ ಪಾವ್ಟಿಂ ಆಮಿ ಅಸಲೆಂ ಸಂಬಂದ್ ಮೊಡುನ್ ಘೆವ್ನ್ ಕಿತೆಂ ಸರ್ವ್ ಹೊಗ್ಡಾವ್ನ್ ಘೆತಾಂವ್ ತೆಂ ಆಮ್ಕಾಂಚ್ ಕಳಾನಾ. ಉತ್ರೊನ್ ಗೆಲ್ಲೊ ವೇಳ್ ಕೆದಿಂಚ್ ಪಾಟಿಂ ಯೇನಾ. ಹೊಗ್ಡಾವ್ನ್ ಘೆತ್‌ಲ್ಲೆ ಸಂಧರ್ಬ್ ಪರತ್ ಮೆಳ್ತಾತ್ ತಿ ಖಾತ್ರಿ ನಾ. ಖಂಯ್ಚ್ಯಾಗೀ ಥರಾಚಾ ಏಕ್ ಮಾನಸಿಕ್ ಬಂಧನಾಕ್ ವಳಗ್ ಜಾವ್ನ್ ಆಮಿ ಸಂಬಂದ್ ಹೊಗ್ಡಾವ್ನ್ ಘೆತಾಂವ್. ಭಾವ್ ಭಯ್ಣಿಂ ಮಧೆಂ ಉಲೊಣೆಂ ಆಸಾನಾ. ಮೋಗ್ ಮಯ್ಪಾಸ್ ಪಯ್ಸ್ ಜಾತಾ. ಹಾಚಾ ದ್ವಾರಿಂ ಆಮಿ ಕಿತೆಂ ಸಾಧನ್ ಕರ್ತಾಂವ್ ತೆಂ ಆಮಿಂಚ್ ನೆಣಾ ಜಾತಾಂವ್.

ಹ್ಯಾ ವರ್ಸಾ ಆಗೊಸ್ತಾಚಾ ಇಕ್ರಾ ತಾರಿಕೆರ್ ಹೆಂ ಆಚರಣ್ ಚಲವ್ನ್ ವರ್ತಾತ್. ಆಮ್ಚಾ ಭೊಂವಾರಾಂತ್ ಹ್ಯಾ ಸಂದರ್ಭಾರ್ ಕೊಣಿ ಭಾವ್ ಆಪ್ಲ್ಯಾ ಭಯ್ಣಿ ಥಾವ್ನ್ ಆನಿ ಭಯ್ಣ್ ಆಪ್ಲ್ಯಾ ಭಾವಾ ಥಾವ್ನ್ ಪಯ್ಸ್ ಜಾಯ್ನಾ ಜಾಂವ್ದಿ.

► ಶಿಕೆರಾಮ್ ಸುರತ್ಕಲ್