ಹಾಸೊ , ತಮಾಸೊ ಮನ್ಶಾಚ್ಯಾ ಜಿವಿತಾಂತ್ , ಭಲಾಯ್ಕೆಂತ್ ಮಹತ್ವಾಚೊ ಪಾತ್ರ್ ಘೆತಾತ್. ಹಾಸೊನ್ ಸಂತೊಸಾನ್ ಆಸ್‍ಲ್ಲ್ಯಾ ಮನ್ಶ್ಯಾಂಕ್ ಪಿಡಾ ಲಾಗಿಂ ಯೆನಾ ಮ್ಹಣ್ಚ್ಯಾಕ್ ಜಾಯ್ತೆ ದಾಕ್ಲೆ ಆಸಾತ್. ಹ್ಯಾ ದಿಶೆನ್ ಆಮ್ಚೆ ನಾಟಕ್, ಆಮ್ಚಿಂ ಪಿಂತುರಾಂ , ಆಮ್ಚಿಂ ಟಿ.ವಿ ಕಾರ್ಯಿಂ ಹಾಸ್ಯಾಂಚ್ಯಾ ಭೊಂವಾರಿಚ್ ರುತಾ ಜಾತಾತ್. ಬೆಜಾರಾಯೆಚಿ ಗಜಾಲ್ ಮ್ಹಳ್ಯಾರ್, ಆಜ್ ಕಾಲ್ ಹಾಸ್ಯ್ ಆತಿರೇಕಾಕ್ ಪಾವ್ಲಾಂಶೆಂ ಭೊಗ್ತಾ. ಜಶೆಂ ಲೇಖಾವರ್ತೆಂ ಜೆವಾಣ್ ಜೆವ್ಲ್ಯಾರ್ ಭಲಾಯ್ಕೆಕ್ ಪಾಡ್‍ಗೀ ತಶೆಂಚ್ ಮೀತ್ ಮಿರ್ವಾಲ್ಲೆಂ ಆನಿ ಗಡಿ ಬಾಯ್ಲೆಂ ಹಾಸ್ಯ್ ಕಾಣಿಯೆಚ್ಯಾ ಸಾಹಿತ್ಯಾಕ್ ಮಾರೆಕಾರ್ ಮ್ಹಳ್ಳೆಂ ಸಯ್ತ್ ಸತ್ ಜಾವ್ನಾಸಾ.
ಕೊಂಕ್ಣಿ ಲೊಕಾಕ್ / ಕೊಂಕ್ಣಿ ಟಿ.ವಿ. ವೀಕ್ಷಕಾಂಕ್ ಬೊರಿಂ ಹಾಸ್ಯ್ ಕಾರ್ಯಕ್ರಮಾಂ ದಿಂವ್ಕ್ ಜಾಯ್ , ಕೊಂಕ್ಣಿ ಕಲಾಕಾರಾಂ ಥಂಯ್ ಆಸ್‍ಲ್ಲೆಂ ನಟನಾಚೆಂ ದೆಣೆಂ ಸಂಸಾರಾಕ್ ದಾಕೊಂವ್ಕ್ ಜಾಯ್ ಮ್ಹಳ್ಳ್ಯಾ ಉದ್ದೇಶಾನ್ ಕರ್ನಾಟಕ ಕೊಂಕಣಿ ಸಾಹಿತ್ಯ್ ಆಕಾಡೆಮಿ ಹಾಂಚ್ಯಾ ಆಶ್ರಯಾಖಾಲ್ ಥೊಡ್ಯಾ ಮಹಿನ್ಯಾಂ ಆದಿಂ “ಯೆಯಾ ಹಾಸಯಾ” ಮ್ಹಳ್ಳೊ ಕೊಂಕ್ಣಿ ಕೊಮೆಡಿ ಸ್ಪರ್ಧೊ ಚಲ್‍ಲ್ಲೊ ತರ್, ಆಮ್ಚ್ಯಾ ಮೊಗಾಚ್ಯಾ ದಾಯ್ಜಿವಲ್ಡ್ 24X7 ಹಾಣಿಂ ಅಸಲೊಚ್ ಬೊರೊ ಉದ್ದೇಶ್ ದವರುನ್ ಆಮ್ಚ್ಯಾ ಸಮಾಜೆಚ್ಯಾ ತಾಲೆಂತಾಂಕ್ ಮುಕಾರ್ ಹಾಡುಂಕ್ ಜಾಯ್ ಆನಿ ತಾಂಕಾಂ ಏಕ್ ಬೊರಿ ವೇದಿ ಆಸಾ ಕರುನ್ ದೀಂವ್ಕ್ ಜಾಯ್ ಮ್ಹಳ್ಳ್ಯಾ ಉದ್ದೇಶಾನ್ ಸುರು ಕರುನ್, ಥೊಡ್ಯಾಚ್ ದಿಸಾಂ ಆದಿಂ ಆಖೇರ್ ಕೆಲ್ಲೊ “ಕೊಂಕಣಿ ಕೊಮೆಡಿ ಚಾಂಪಿಯನ್ಸ್” ಸ್ಪರ್ದೊ, ಮ್ಹಾಕಾ ಭೊಗ್ತಾ, ಆಯಿಲ್ಲ್ಯಾ ಪಂಗ್ಡಾಂಚಿ ಸಾಮರ್ಥಿ ಪಳೆವ್ನ್ ಆಯೋಜಕಾಂನಿ ಹ್ಯಾ ಸ್ಪರ್ದ್ಯಾಕ್ ‘ದಯೆಮರಣ್’ ದಿಲೆಂ ಕೊಣ್ಣಾ.
ಹೆ ದೊನಿ ಸ್ಪರ್ದೆ ಆಖ್ರೇಕ್ ಪರ್ಯಾಂತ್ ಚುಕಾನಾಸ್ತಾನಾ ವಿಕ್ಷಣ್ ಕೆಲ್ಲ್ಯಾ ಮ್ಹಾಕಾ ಏಕ್ ಸವಾಲ್ ಉದೆತಾ ಕೀ – ಕೊಂಕ್ಣಿ ಹಾಸ್ಯ್ ಸಂಸಾರಾಂತ್ ಆಮಿಂ ಖಂಯ್ ಆಸಾಂವ್ ? ಆನಿ ಖಂಡಿತ್ ಜಾವ್ನ್ ಮ್ಹಾಕಾ ಮಾತ್ರ್ ನಂಯ್, ಮ್ಹಜೆ ತಸಲ್ಯಾ ಸಭಾರಾಂಕ್ ಹೆಂ ಸವಾಲ್ ಕಾಂತಾವ್ನ್ ಆಸಾ ಮ್ಹಳ್ಯಾರ್ ಮ್ಹಜಿ ಚೂಕ್ ಜಾಂವ್ಚಿ ನಾ. ಭೊವ್‍ಚ್ ಬೆಜಾರಾಯೆನ್ ಹಾಂಗಾ ಮ್ಹಾಕಾ ಸಾಂಗಾಜೆ ಪಡ್ತಾ ಆಮಿಂ ಪ್ರತ್ಯೇಕ್ ಜಾವ್ನ್ ಮಂಗ್ಳೂರಿ ಕ್ರೀಸ್ತಾಂವಾಂ ಹಾಸ್ಯ್ ಪ್ರಕಾರಾಂತ್ ಆನೀಕಿ 20 -30 ವರ್ಸಾಂ ಪಾಟಿಂ ಆಸಾಂವ್. ಆಮ್ಚೆಂ ಹಾಸ್ಯ್ ಮ್ಹಳ್ಯಾರ್ ವೊಂಟಾ ವಯ್ರ್ ಮಟ್ವ್ಯೊ ಮಿಶಿಯೊ , ಲುಂಗೆ ಥಾವ್ನ್ ಭಾಯ್ರ್ ಪಡ್ಚ್ಯೊ ಚಡ್ಡ್ಯೊ , ಭಾಯ್ರ್ ಉಮ್ಕಾಳ್ಚೊ ನಾಡೊ , ಸಂಭಾಷಣಾಂ ದಿತಾನಾ ಪೆಂಕ್ಟಾಕ್ ಬಳ್ ನಾತ್ಲ್ಲ್ಯಾ ಬರಿ ಚಿವ್ಳೊಂಚೆಂ, ಉಮ್ಕಾಳ್ಚೊ ಮುತಾ ಥೊಟೊ ಆನಿ ಲೊಕಾಂನಿ ಪೊರ್ವರ್ಡ್ ಕರುನ್ ಕರುನ್ ಪುರೊ ಜಾಲ್ಲೆ ಜೋಕ್ಸ್ , ಸಂಭಾಷಣಾಂ ಮ್ಹಳ್ಯಾರ್ ರೆಡೊ ಮುತೊನ್ ಗೆಲ್ಲ್ಯಾಬರಿ ಸಾಂಗೊನ್ಂಚ್ಚ್ ವೆಚೆಂ, ಎಕಾಮೆಕಾಕ್ ತಾಂಚ್ಯಾ ಪಾತ್ರಾಂನಿ ಮೆತೆರ್ಪಣ್ ನಾಸ್ತಾನಾ ಎಕ್ಲ್ಯಾನ್ಂಚ್ಚ್ ತಾಚಿ ಸರ್ತಿ ಯೆತಾನಾ ವಾಚಪ್ ವಾಚ್‍ಲ್ಲ್ಯಾ ಬರಿ ಸಂಭಾಷಣಾಂ ದಿಂವ್ಚಿಂ ಇತ್ಲ್ಯಾಕ್‍‌ಚ್ ಸ್ಥಿಮಿತ್ ಜಾವ್ನ್ ಗೆಲಾಂ.
ಆಮ್ಚ್ಯಾ ಸಂಸಾರಾ ಭಂವ್ತಿ ಇತ್ಲೆ ಚಾಲ್ತಿ ವಿಷಯ್ ಘಡುನ್ ಆಸಾತ್, ಸಮಾಜೆಂತ್ ಬದ್ಲಾವಣ್ ಹಾಡುಂಕ್, ಸಮಾಜೆಕ್ ಜಾಗ್ರತ್ ಕರುಂಕ್, ಪ್ರಜಾಪ್ರಭುತ್ವಾಂತ್ ಆಮ್ಚಿಂ ಹಕ್ಕಾಂ ಕಿತೆಂ ಮ್ಹಣೊನ್ ಕಳಿತ್ ಕರುಂಕ್ ಮ್ಹಾಕಾ ದಿಸ್ತಾ – ಹಾಸ್ಯ್ ಮಾಧ್ಯಮಾಚ್ಯಾಕೀ ವರ್ತೆಂ ಮಾದ್ಯಮ್ ದುಸ್ರೆಂ ನಾ. ಮುಕೆಲ್ ವ್ಹಾಳ್ಯಾಚಿಂ ಸರ್ವ್ ಮಾದ್ಯಮಾಂ ಸತ್ತಾಪಾಡ್ತಿಚಿಂ ಪೊಸ್ಕಿಂ ಜಾತಾನಾ, ಲೋಕ್‌ಶಾಹಿಂತ್ ವಿರೋದ್ ಪಾಡ್ತಿಚೆ ತಾಂಚಿ ಜವಾಬ್ದಾರಿ ವಿಸ್ರೊನ್ ವೊಗೆ ಬಸ್ತಾನಾ – ವಿರೋದ್ ಪಾಡ್ತಿಚೆಂ ಕಾಮ್ ಕೆಲ್ಲೆಂ ಕೊಮೆಡಿಯನಾಂನಿ ಆನಿ ಕಾರ್ಟೂನಿಸ್ಟಾಂನಿ! ಪುಣ್ ಕೊಂಕ್ಣೆಂತ್ ಹ್ಯಾ ದಿಶೆನ್ ಕೊಣಿಂ ಆಪ್ಲೊ ಹಾತ್ ಭಂವ್ಡಾಯಿಲ್ಲೊಚ್ ದಿಸಾನಾ.
ಸಂಸಾರ್ ಆತಾಂ ಉಗ್ತೊ ಜಾಲಾ. ವ್ಹಯ್ ಪಯ್ಲೆಂ ಆಮ್ಚ್ಯಾ ಲಾಗಿಂ ಸಾಮಾಜಿಕ್ ಮಾಧ್ಯಮಾಂ ನಾತ್‍ಲ್ಲಿಂ. ಉಂಚ್ಲೆಂ ಶಿಕಾಪ್ ನಾತ್‍ಲ್ಲೆಂ. ತ್ಯಾ ದೆಕುನ್ ಆಮ್ಚೆ ಸ್ಕ್ರಿಪ್ಟ್ ಜಾಲ್ಯಾರೀ ಆಮ್ಚ್ಯಾ ಸುತ್ತುರಾಂತ್ ಆನಿ ಶಿಕ್‍ಲ್ಲ್ಯಾ ಸೀಮಿತ್ ಶಿಕ್ಪಾಚ್ಯಾ ಜ್ಞಾನಾಚ್ಯಾ ಭಂವಾರಿಚ್ಚ್ ಘುಂವೊನ್ ಆಸ್‍ಲ್ಲೆ. ಪುಣ್ ಆಜ್ ಪರಿಸ್ಥಿತಿ ತಿಚ್ಚ್ ಆದ್ಲಿ ಜಾವ್ನ್ ಉರೊಂವ್ಕ್ ನಾ. ಜಾಯ್ತಿಂ ಮಾಧ್ಯಮಾಂ ಆಮ್ಕಾಂ ಮೆಳ್ತಾತ್, ಶಿಕ್ಪಾಂತ್ ಪ್ರಗತಿ ಜಾಲ್ಯಾ. ಇಲ್ಲಿ ತಕ್ಲಿ ಖರ್ಚುನ್ ಕಶೆಂ ಆಮ್ಚ್ಯಾ ಸಮಾಜೆಕ್ ಕಿತೆಂ ಬೊರೆಂ ಪಡ್ತಾ ಮ್ಹಣ್ಚ್ಯಾ ಚಿಂತ್ಪಾ ಸಕ್ತೆ ವಯ್ರ್ ಆಟೊವ್ ಕರುಂಕ್ ಜಾಯ್. ಬೆಜಾರಾಯೆನ್ ಸಾಂಗಾಜೆ ಪಡ್ತಾಕಿ ಆಜ್ ಹೆಂಚ್ ಘಡೊನ್ ನಾ. ಸೆಜಾರ್ಚ್ಯಾ ಹೆರ್ ಭಾಸಾಂನಿ ಮಲಯಾಳಮ್, ತಮಿಳ್, ತೆಲುಗು, ಮರಾಠಿ … ಸಗ್ಳ್ಯಾಂನಿ ನವೆಂಪಣ್ ಆಪ್ಣಾಯ್ಲಾಂ. ತರ್ ಆಮ್ಚ್ಯಾ ಸುತ್ತೂರಾಂತ್ ಮಾತ್ ಹಾಸ್ಯ್ ಪಾಟಿಂ ಉರೊಂಕ್ ಕಾರಣ್ ತರೀ ಕಿತೆಂ ?
ಹಾವೆಂ ಸಮ್ಜಾಲ್ಲ್ಯಾ ಪರ್ಮಾಣೆಂ ಆಮಿ ಆಮ್ಚ್ಯಾ ಭುರ್ಗ್ಯಾಂಕ್ ತಾಂಚ್ಯಾ ಶಿಕ್ಪಾ ಭಾಯ್ರ್ ಕಿತೆಂಚ್ ಚಿಂತುಂಕ್ ಅವ್ಕಾಸ್ ದೀನಾಂವ್. ಆಮ್ಕಾಂ ಆಮ್ಚ್ಯಾ ಭುರ್ಗ್ಯಾಂನಿ 90 , 95 , 97 , 99 ಚ್ಯಾಕಿ ಉಣೆ ಮಾರ್ಕ್ಸ್ ಹಾಡುಂಕ್ ನಜೊ. ಭುರ್ಗ್ಯಾಂಚ್ಯಾಕೀ ಚಡ್ ವ್ಹಡಿಲಾಂ ಟಾರ್ಗೆಟ್ ಚೇಸ್ ಕರ್ಚ್ಯಾ ರೇಸಾಂತ್ ಭುರ್ಗ್ಯಾಂಚ್ಯಾ ಸಾಮಾಜಿಕ್ ವಾಡವಳಿಕ್ ಬಿಲ್ಕುಲ್ ಅವ್ಕಾಸ್ ದೀನಾಂತ್. ಕೊಮೆಡಿ ಸ್ಕ್ರಿಪ್ಟಾಚೆಂ ಸೊಡ್ಯಾಂ , ಆಜ್ ಆಮ್ಚ್ಯಾ ಭುರ್ಗ್ಯಾಂಕ್ ಆಮ್ಚ್ಯಾ ಶಹರಾಂತ್ಲ್ಯಾ, ರಾಜ್ಯಾಂತ್ಲ್ಯಾ ತಶೆಂಚ್ ದೇಶಾಂತ್ಲ್ಯಾ ರಾಜಕೀಯ್ ಯಾ ಹೆರ್ ಸಮಾಜಿಕ್ ವಾಡಾವಳಿಂ ವಿಷಯಾಂತ್‍ ಖಬರ್‌ಚ್ ನಾ. ತ್ಯಾ ಮಟ್ಟಾಕ್ ಆಮ್ಚಿಂ ಭುರ್ಗಿಂ ಸಮಾಜೆ ಥಾವ್ನ್ ಭಾಯ್ರ್ ಪಡ್ಲ್ಯಾಂತ್.
ಕೊಂಕ್ಣಿ ಕಥೊಲಿಕ್ ಸಮುದಾಯಾಚ್ಯಾ ಸಂದರ್ಭಾರ್ – ಆನ್ಯೇಕ್ ಕಾರಣ್ ಜಾವ್ನಾಸಾ – ಆಮ್ಚ್ಯಾ ಫಿರ್ಗಜೆಂತ್ಲಿಂ ಯುವ ಸಂಘಟನಾಂ ಮ್ಹಳ್ಯಾರ್ ಚೂಕ್ ಜಾಂವ್ಚಿ ನಾ. ಆಮ್ಚ್ಯಾ ಫಿರ್ಗಜ್ ಸಂಘಟನಾಂನಿ ತರ್ನಾಟ್ಯಾಂಕ್ ಕಲೆ ವಿಶಿಂ ಕಿತೆಂಯ್ ಜಾಣ್ವಾಯ್ ಯ್ಯಾ ತರ್ಭೆತಿ ದಿಂವ್ಚೆಂ ಪ್ರಯತ್ನ್ ಜಾಯ್ನಾ. ಇಗರ್ಜೆಚ್ಯಾ ದೊರ‍್ಯಾಂ ಭಾಯ್ರ್ ಕಿತೆಂ ಚಲ್ತಾ ತೆಂ ದಾಕಂವ್ಚೆಂ ಕಾಮ್ ಜಾತೇ ನಾ. ಆಭಿನಯ್, ಸಂಗೀತ್ ಆಸಲ್ಯಾ ಕ್ಷೇತ್ರಾಂನಿ ಫಿರ್ಗಜೆ ಹಂತಾರ್ ಆಮ್ಚ್ಯಾ ಯುವಜಣಾಂಕ್ ಮೆಳ್ಚಿ ತರ್ಭೆತಿ ಬೋವ್ ಉಣಿ. ಆಮಿ ಚುಕಾನಾಸ್ತಾನಾ ಹರ್ಯೆಕಾ ವರ್ಸಾ ಕರ್ಚೆಂ ಕಾರ್ಯಕ್ರಮ್ ಮ್ಹಳ್ಯಾರ್ – ವನ ಮಹೋತ್ಸವ. ತಯಾರ್ ಫೊಂಡಾಂತ್ ಝಡಾಂ ಲಾಯ್ತಾಂವ್ ಆನಿ ಯೆಂವ್ಚ್ಯಾ ವರ್ಸಾಚ್ಯಾ ವನ ಮಹೋತ್ಸವಾಕ್ ಪರ್ತ್ಯಾನ್ ತ್ಯಾಚ್ ಪೊಂಡಾಂತ್ ನವೆಂ ಝಡ್ ಲಾಯ್ತಾಂವ್, ಕಾರಣ್ ಆದ್ಲ್ಯಾ ವರ್ಸಾ ಲಾಯಿಲ್ಲೆಂ ಝಾಡ್ ಮರೊನ್ ಆಸ್ತಾ. ದಾಕ್ಶೆಣೆವಿಣೆ ಸಾಂಗ್ಚೆಂ ತರ್ – ಆಮ್ಚ್ಯಾ ಯುವಜಣಾಂಚ್ಯಾ ಸಮಗ್ರ್ ವಾಡಾವಳಿಕ್ ಆನಿ ಹರ್ಯೇಕಾ ಕ್ಷೇತ್ರಾಂತ್ ತಾಂಚಿ ಆಸಕ್ತ್ ವಾಡಂವ್ಚ್ಯಾ ದಿಶೆನ್ ಫಿರ್ಗಜ್ ಕುಟ್ಮಾಕ್ ವ್ಹಡ್ ಜವಾಬ್ದಾರಿ ಆಸಾ.
ಆಮಿಂ ಲ್ಹಾನ್ ಆಸ್ತಾನಾ ಆಮ್ಚ್ಯಾ ಫಿರ್ಗಜಾಂನಿ ಚುಕಾನಾಸ್ತಾನಾ ಕೊಂಕ್ಣಿ ನಾಟಕ್ , ನಾಟ್ಕುಳೆ ಆಶೆಂ ಚುಕಾನಾಸ್ತಾನಾ ಕೊಂಕ್ಣಿ ಕಾರ್ಯಿಂ ಜಾತಾಲಿಂ. ತಾಂತುಂ ಮ್ಹಜೆ ತಸಲ್ಯಾ ಭುರ್ಗ್ಯಾಂಕ್ ಜಾಯ್ತಿ ಸ್ಪೂರ್ತಿ ಮೆಳ್‍ಲ್ಲಿ. ಹ್ಯಾಚ್ ಸ್ಫೂರ್ತೆಂತ್ ಕೊಂಕ್ಣೆಂತ್ ಬರ‍್ಯಾಂತ್ಲೆಂ ಬರೆ ಕಲಾಕರ್, ಬರಯ್ಣಾರ್ ಉದೆಲ್ಲೆ. ಏಕ್ ಬರೆಂ ಸ್ಫುರ್ತಿದಾಯಕ್ ವಾತಾವರಣ್ ರೂಪಿತ್ ಜಾಲ್ಲೆಂ. ಪುಣ್ ಕೆದಾಳಾ ಆಮ್ಚ್ಯಾ ಇಗರ್ಜಾಂ ಬಾಗ್ಲಾಂನಿ ಕೊಂಕ್ಣಿ ನಾಟಕ್ ಪಯ್ಸ್ ವಚೊನ್, ತುಳು ನಾಟಕ್ ಪ್ರವೇಸ್ ಜಾಲೆಗೀ ತೆದಾಳಾ ಥಾವ್ನ್ ಆವನತಿ ಸುರು ಜಾಲಿ ಮ್ಹಣ್ಯೆತ್. ಏಕ್, ಚುಕ್ಲ್ಯಾರ್ ದೋನ್ – ಆತಾಂ ಫಿರ್ಗಜೆ ಹಂತಾರ್ ನಾಟಕ್ ಪಂಗಡ್ ದಿಸಾನಾಂತ್.
ಕೊಂಕ್ಣೆಂತ್ ಪ್ರಸ್ತುತ್ ನವೆ ಕಲಾಕಾರ್ ಕಿತ್ಯಾಕ್ ಉದೆತೆ ನಾಂತ್ ? ಮ್ಹಳ್ಳ್ಯಾ ನಿಯಾಳಾ ಉಪ್ರಾಂತ್ ಆತಾಂ, ಪ್ರಸ್ತುತ್ ಆಸ್ಚ್ಯಾ ಕಲಾಕಾರಾಂಚೆರ್ ಏಕ್ ನದರ್ ಮಾರ‍್ಯಾಂ. ಆಜ್ ಥೊಡೆ ಕಲಾಕಾರ್ ಕಿತೆಂ ತೆ ಉಲಯ್ತಾತ್ ತೆಂಚ್ಚ್ ಕೊಮೆಡಿ ಮ್ಹಣ್ ಚಿಂತುನ್ ಆಸಾತ್. ನಾ ತಾಂತುಂ ಏಕ್ ಸ್ಕ್ರೀಪ್ಟ್ , ನಾ ಎಕಾ ಸಂಭಾಷಣಾಥಾವ್ನ್ ಅನ್ಯೇಕಾಕ್ ಸಾರ್ಕೊ ಗಾಂಚ್! ಸಾಂಗೊಂಕ್ ಗೆಲ್ಯಾರ್ “ನಾ ಸಾಯ್ಭಾ … ಲೊಕಾಕ್ ಕೊಮೆಡಿ ಜಾಯ್ಜೆ , ಸ್ಕ್ರಿಫ್ಟ್ ಗರ್ಜ್ ನಾ ಮ್ಹಳ್ಳಿ ರೆಡಿಮೆಡ್ ಜಾಪ್! ಚಡಾವತ್ ಜಣಾಂಕ್ ಸಾಮಾಜಿಕ್ ಮಾದ್ಯಮಾಂನಿ ಮೆಳ್ಚೆ Views ಆನಿ Likes ಹಾಚ್ಯಾ ವಯ್ರ್ ಜಿಯೆಂವ್ಚೆಂ ಸವಯ್ ಜಾವ್ನ್ ಗೆಲಾಂ. ಕಿತೆಂಯ್ ಕೆಲ್ಯಾರೀ ಚಲ್ತಾ ಮ್ಹಳ್ಳ್ಯಾ ಭ್ರಮಿದೆಂತ್ ತೆ ಆಸಾತ್. ಯೂ-ಟ್ಯೂಬಾರ್ ದಾಕಯ್ಲೆಂ, ಮೊನೆಟಾಯ್ಜ್ ಜಾಲೆಂ ಆನಿ ಚಾರ್ ಕಾಸ್ ಆಯ್ಲೆ ಜಾಲ್ಯಾರ್ – ಸ್ಕ್ರಿಫ್ಟಾವಿಶಿಂ ಕೊಣಾಕ್ ಪಡೊನ್ ಗೆಲಾಂ ?
ತಶೆಂ ಮ್ಹಣೊನ್ ಕೊಂಕ್ಣೆಂತ್ ಹಾಸ್ಯಾ ಪಾಟ್ಲ್ಯಾನ್ ಕಾಮ್ ಜಾಂವ್ಕ್‌ಚ್ ನಾ ಮ್ಹಣ್ ನಂಯ್. ಪೆರ್ಮನ್ನೂರ್ಚ್ಯಾ ನೆಲ್ಲುಚೊ ಪಂಗಡ್, ಪೆರ್ನಾಲ್ಚೊ ಬಿಂದಾಸ್ ಕಲಾಕಾರ್ ಪಂಗಡ್, ಬಾರ್ಕೂರ್ಚೊ ಎಕ್ಸ್‌ಪ್ರೆಶನ್ಸ್ ಪಂಗ್ಡಾಂನಿ ಆನಿ ಥೊಡ್ಯಾಂನಿ ಕೊಮೆಡಿಂತ್ ವಾವ್ರ್ ಕೆಲಾ. ಪೂಣ್ ತಾಂಚ್ಯಾ ವಾವ್ರಾಚಿ ದೇಕ್ ಘೆವ್ನ್ ತರ್ನಾಟೆ ತಯಾರ್ ಜಾತೇ ನಾಂತ್ ತಶೆಂ ಭಗ್ತಾ. ಆತಾಂಚ್ಯಾ ಯುವಜಣಾಂಕ್ ಫಾವೊತೆಂ ಮಾರ್ಗದರ್ಶನ್, ಆಲೋಚನ್ಯೊ ಮೆಳ್ಳ್ಯಾರ್ ಕಾಂಯ್ ನವೆಸಾಂವ್ ಯೇಂವ್ಕ್ ಆಸಾ ಮ್ಹಳ್ಳೊ ಭರ್ವಸೊ ಮ್ಹಜೊ.
ದೆಕುನ್ ಆಮ್ಚ್ಯಾ ಯುವಜಣಾಂಕ್ ಹ್ಯಾ ದಿಶೆನ್ ಆಮಿ ತಯಾರ್ ಕರುಂಕ್ ಜಾಯ್. ಆಮ್ಚ್ಯಾ ಇಗರ್ಜಾಂನಿ ಆತ್ಮೀಕ್ ಸಂಗ್ರಿಂ ಸಾಂಗಾತಾ ಸಾಂಸ್ಕೃತಿಕ್ ಸಂಗ್ತ್ಯಾಂನಿ ಸಯ್ತ್ ಗುಮಾನ್ ದಿಂವ್ಚೆಂ ಕಾಮ್ ಜಾಂವ್ಕ್ ಜಾಯ್. ಪೂಣ್ ಏಕ್ ಮಾತ್ ಸತ್ – ಸ್ಕ್ರಿಫ್ಟ್ ಬರಂವ್ಚೆಂ ಮ್ಹಳ್ಯಾರ್ ಎಕಾ ದಿಸಾಚೆಂ ಪ್ರಯತ್ನ್ ನಂಯ್. ಜಾಯ್ತಿ ಗುಮಾನ್ ದಿಂವ್ಚಿ ಪ್ರಕ್ರಿಯಾ ಚಲೊಂಕ್ ಆಸಾ. ಹಾಂತುಂ ಲುಕ್ಸಾಣ್ ಕೊಣಾಕೀ ನಾ. ಭುರ್ಗಿಂ ಆಪ್ಲೆಂ ಶಿಕಾಪ್ ಶಿಕ್ತಾನಾ ಭಾಯ್ಲ್ಯಾ ಸಂಸಾರಾ ಸಂಗಿಂ ಸಯ್ತ್ ಆಪ್ಲ್ಯಾ ಸಂಬಂದಾಚೊ ಗಾಂಚ್ ಹ್ಯಾ ಮಾರಿಫಾತ್ ಘಡ್ಸುನ್ ಘೆಂವ್ಕ್ ಸಕ್ತಾತ್.
ಹಾಂಗಾ ಆನ್ಯೇಕ್ ಗರ್ಜೆಚಿ ಗಜಾಲ್ ಹಾವೆಂ ಸಾಂಗಾಜೆಚ್ ಪಡ್ತಾ. ಸ್ಪರ್ದ್ಯಾಚ್ಯಾ ತೀರ್ಪ್‍ದಾರಾಂ ವಿಶಿಂ. ಚಡ್ತಿಕ್ ತೀರ್ಪ್‍ದಾರ್ ಚಡಿತ್‍ಚ್ಚ್ ಸ್ಪರ್ದಿಕಾಂ ಥಂಯ್ ಉದಾರಿ ಜಾವ್ನಾಸ್ತಾತ್. ಆಸ್‍ಲ್ಲೆಂ ಆಸ್‍ಲ್ಲ್ಯಾ ಬರಿ ಸಾಂಗ್ಲ್ಯಾರ್, ಖಂಯ್ ಆಸ್‍ಲ್ಲೆ ಥೊಡೆ ಪಂಗಡ್‌ಯ್ ಸ್ಪರ್ದ್ಯಾ ಥಾವ್ನ್ ಪಾಟಿಂ ಸರ್ತಿತ್ ಮ್ಹಳ್ಳ್ಯಾ ಚಿಂತ್ಪಾನ್ ಜಾಂವ್ಕ್ ಪುರೊ, ಸಗ್ಳ್ಯಾಂಕೀ ಬರೆಂಚ್ ಸಾಂಗ್ತಾತ್. ದಾಯ್ಜಿ ಟಿ.ವಿ,ರ್ ಪ್ರಸಾರ್ ಜಾಲ್ಲೆಂ “ಕೊಂಕಣಿ ಕೊಮೆಡಿ ಚಾಂಪಿಯನ್ಸ್” ಹಾಕಾ ಎಕ್ ಜೊಕ್ತೆಂ ಉದಾಹರಣ್ ಜಾವ್ನಾಸಾ. ಸ್ಪರ್ದಿಕಾಂಚ್ಯೊ ಚೂಕಿ ದಾಕವ್ನ್ ದಿಂವ್ಕ್ , ತಾಂಚ್ಯಾ ಥಂಯ್ ಸುದ್ರಾಪ್ ಹಾಡಂವ್ಕ್ ಸ್ಪೂರ್ತಿ ದಿಂವ್ಚೊ ವ್ಹಡ್ಲೊ ವಾವ್ರ್ ತಾಂಚೆ ಥಾವ್ನ್ ಜಾಂವ್ನ್ ನಾ.
ಆಕೇರ್ ಕರ್ಚೆ ಪಯ್ಲೆಂ – ಹ್ಯಾ ಪ್ರಕ್ರಿಯೆಕ್ ವೇಳ್ ಲಾಗ್ತಾಲೊ, ಪುಣ್ ಖಂಡಿತ್ ಆಸಾಧ್ಯ್ ನಂಯ್. ತಶೆಂ ಮ್ಹಣೊನ್ ಹಾವೆಂ ಜೆಂ ಬರಯ್ಲಾಂ ಆನಿ ಮ್ಹಜ್ಯಾ ಮತಿಂತ್ ಜೆಂ ಕಿತೆಂ ಆಸಾ ತೆಂ ಕಾರ್ಯಗತ್ ಕರುಂಕ್ ಮ್ಹಾಕಾ ಜಾಲ್ಯಾರೀ ಹಾವೆಂ ಚಿಂತ್‍ಲ್ಲ್ಯಾ ತಿತ್ಲೆಂ ಸಲಿಸ್ ನಂಯ್. ಹಾಸ್ಯ್ ಗಜಾಲಿ , ವಿಡಂಬನಾಂ , ಸಾಹಿತ್ಯ್ , ಪೊಕಣಾಂ ಕೊಣೆಂಯ್ ನಕಲ್ ಕರ್ಯೆತಾ ಪುಣ್ ರಚುಂಕ್ ಜಾಯ್ತಿ ಮ್ಹಿನತ್ ಆನಿ ತಯಾರಾಯ್ ಕರುಂಕ್ ಪಡ್ತಾ.
► ನಾನು ಮರೋಲ್ , ತೊಟ್ಟಾಮ್
