ಮಾಣಿಕ್ ಪಾದ್ರ್ಯಾಬ್ – ಆಮ್ಚೊ ವಿಗಾರ್ ಮಾ| ಬಾ| ಫ್ರಾನ್ಸಿಸ್ ಕರ್ನೆಲಿಯೊ.

23

ಮ್ಹಜ್ಯಾ ಜಿಣಿಯೆಂತ್ ಮ್ಹಜೆರ್ ಪ್ರಭಾವ್ ಘಾಲ್ಲ್ಯಾ ಮ್ಹಜ್ಯಾ ಇಷ್ಟಾಂ ಪಯ್ಕಿ ಥೊಡೆ ಪಾದ್ರ್ಯಾಬ್ ಆಗ್ರ್ ಪಂಕ್ತಿರ್ ಸೊಭ್ತಾತ್. ತಾಂತ್ಲೊ ಎಕ್ಲೊ ಜಾವ್ನಾಸಾ ಆಮ್ಚ್ಯಾ ತೊಟ್ಟಾಮ್ ಸಾಂತ್ ಆನ್ನಾ ಮಾಯ್ ಫಿರ್ಗಜೆಚೊ ಪ್ರಸ್ತುತ್ ಯಾಜಕ್ ಮಾನಾಧಿಕ್ ಬಾಪ್ ಫ್ರಾನ್ಸಿಸ್ ಕರ್ನೆಲಿಯೊ.

21 ಜ್ಯೂನ್ 1954 ವೆರ್ ಸೆಜಾರ್ಚ್ಯಾ ಕೆಮ್ಮಾಣ್ ಫಿರ್ಗಜೆಚ್ಯಾ ದೆ| ನೊರ್ಬರ್ಟ್ ಕರ್ನೆಲಿಯೊ ಆನಿ ದೆ| ತೆರೆಜಾ ಕರ್ನೆಲಿಯೊ ಜೊಡ್ಯಾಚೆಂ  ಬಾಳ್ ಜಾವ್ನ್ ಜಲ್ಮಾಲ್ಲೆ  ಬಾಪ್ ಫ್ರಾನ್ಸಿಸ್ ಕರ್ನೆಲಿಯೊ ದೆವಾಚೆಂ ಶೆತ್  ಆಪ್ಲ್ಯಾ ಜಿಣಿಯೆ ಪಯ್ಣಾಚಿ ವಾಟ್ ಕರುನ್ ಘೆವ್ನ್ , 1982 ವ್ಯಾ  ವರ್ಸಾ ಮೇ 1 ತಾರಿಕೆರ್ ಯಾಜಕೀ  ಒಡ್ದ್ ಆಪ್ಣಾವ್ನ್ ಉಡುಪಿ , ಫೆರ್ಮನ್ನೂರ್ , ತಲ್ಲೂರ್ , ನಾರಾವಿ , ಆತ್ತೂರ್ ,ಬೈಂದೂರ್,ಕಲತ್ತೂರ್ ಫಿರ್ಗಜಾಂನಿ ಸೆವಾ ದೀವ್ನ್ ಪ್ರಸ್ತುತ್ 2016 ವ್ಯಾ ವರ್ಸಾ ಪಾಸುನ್, ವಿಗಾರ್ ಜಾವ್ನ್ ಆಮ್ಚ್ಯಾ ತೊಟ್ಟಾಮ್ ಫಿರ್ಗಜೆಕ್ ಪಾವ್‍ಲ್ಲೆ , ಆತಾಂ ತೊಟ್ಟಾಮ್ ಫಿರ್ಗಜ್‍ಗಾರಾಂಕ್ ಆದೇವ್ಸ್ ಮಾಗ್ಚ್ಯಾ ಹುಂಬ್ರಾರ್ ಆಸ್ತಾನಾ ತಾಂಚ್ಯಾ ಯಾಜಕೀ ಜಿವಿತಾಚೊ ಮಾಣಿಕ್ ಮಹೋತ್ಸವ್ (Saserdotal Ruby Jubilee) ಆಚರಣ್ ಕರ್ಚೆಂ ಭಾಗ್ ಆಮ್ಕಾಂ ತೊಟ್ಟಾಮ್ ಫಿರ್ಗಜ್‍ಗಾರಾಂಕ್ ಫಾವೊ ಜಾಲಾಂ ತೆಂ ಆಮ್ಚೆಂ ವರ್ತೆಂ ಭಾಗ್ ಮ್ಹಣ್ ಮ್ಹಜಿ ಪಾತ್ಯೆಣಿ. ಹೆಂ ಆಚರಣ್ ಉಗ್ಡಾಸ್‍ಭರಿತ್ ಕರುಂಕ್ ಫಿರ್ಗಜ್ ಉಪಾಧ್ಯಕ್ಷ್ ಸುನಿಲ್ ಫೆರ್ನಾಂಡಿಸ್ , ಕಾರ್ಯದರ್ಶಿ ಪ್ರಿಯಾ ರೊಡ್ರಿಗಸ್ , ಆಯೋಗಾಂಚಿ ಸಂಚಾಲಕಿ ಶಾಂತಿ ಫೆರ್ನಾಂಡಿಸ್ ಆನಿ ಹೆರ್ ಫಿರ್ಗಜ್‍ಗಾರಾಂ ಸಾಂಗಾತಾ ಮೆಳೊನ್ ಸರ್ವ್ ಥರಾಚಿ ತಯಾರಾಯ್ ಕರುನ್ ಆಸಾತ್.

 

ಖಂಚೆಂಯ್ ಏಕ್ ಕುಟಾಮ್ , ಸಂಸ್ಥೊ ಬರ‍್ಯಾನ್ ಚಲಾಜಾಯ್ ತರ್ ತ್ಯಾ ಘರ್ಚೊ / ಕುಟ್ಮಾಚೊ ವ್ಹಡಿಲ್ ಮಹತ್ವಾಚೊ ಪಾತ್ರ್ ಖೆಳ್ತಾ. ತಾಚೆಂ ಜೊಕ್ತೆಂ ಮಾರ್ಗದರ್ಶನ್ ಆನಿ ಅನ್ಭೊಗ್ ಕುಟ್ಮಾಚ್ಯಾ / ಸಂಸ್ಥ್ಯಾಚ್ಯಾ ಯಶಸ್ವೆಕ್ ಕಾರಣ್ ಜಾತಾ. ಆಮ್ಚ್ಯಾ ಫಿರ್ಗಜೆಂತ್ ತರೀ ತೆಂಚ್ ಘಡ್ಲಾಂ. ಮಾನಾಧಿಕ್ ಬಾಪ್ ಫ್ರಾನ್ಸಿಸ್ ಕರ್ನೆಲಿಯೊ ರುಪಿಂ ಆಮ್ಕಾಂ/ಆಮ್ಚ್ಯಾ ಫಿರ್ಗಜೆಕ್ ಏಕ್ ದಕ್ಷ್ ಮುಖೆಲಿ ಫಾವೊ ಜಾಲಾ. ಹಾಂಕಾಂ ಹಾಂವ್ ಶೀದಾ ವ್ಹಳ್ಕಾನಾತ್‌ಲ್ಲೊಂ ತರೀ ಕಾಂಯ್ 2002 ವ್ಯಾ ವರ್ಸಾ ಥಾವ್ನ್ ಜೆದ್ನಾಂ ತೆ ಕಾರ್ಕಳ್  ಆತ್ತೂರ್ ಫಿರ್ಗಜೆಚೆ ಯಾಜಕ್ ಜಾವ್ನಾಸ್‌ಲ್ಲೆ ತೆದಾಳಾ ಥಾವ್ನ್ ಹಾಂಚ್ಯಾ ವಿಶಿಂ ಜಾಣಾಂ. ಮಾಗ್ಣ್ಯಾಚೊ ಪಾದ್ರ್ಯಾಬ್ ಮ್ಹಳ್ಳೊ ಏಕ್ ಬಿಲ್ಲೊ ಸೊಡ್ಲ್ಯಾರ್ ಹಾಂಚ್ಯಾ ಕಾರ್ಭಾರಾ ವಿಶಿಂ ವಿಶೇಷ್ ಕಾಂಯ್ ನೆಣಾಸ್ಲೊಂ. ಪ್ರಖ್ಯಾತ್ ಪದಾಂ ಘಡ್ಣಾರ್/ಗಾವ್ಪಿ ಮೆಲ್ವಿನ್ ಪೆರಿಸಾ ಸಂಗಿಂ ಸ್ವಂತ್ ಗಿತಾಂ ಘಡುನ್ ಕಂತಾರಾಂಚ್ಯೊ ಸಿ.ಡಿ. ಭಾಯ್ರ್ ಕಾಡ್‌ಲ್ಲ್ಯೊ ಮ್ಹಾಕಾ ಕಳಿತ್ ಆಸ್‌ಲ್ಲಿಂ ತಾಚಿಂ ಹೆರ್ ವಿಶೇಷ್ ಕಾರ್ಬಾರಾಂ. ಹೆಂ ಸೊಡ್ಲ್ಯಾರ್ ತೆ ಆಮ್ಚ್ಯಾ ಫಿರ್ಗಜೆಕ್ ವರ್ಗ್ ಜಾವ್ನ್ ಆಯಿಲ್ಲ್ಯಾ  ಉಪ್ರಾಂತ್ ತಾಣಿ ಆದಿಂ ಸೆವಾ ದಿಲ್ಲ್ಯಾ ಬೈಂದೂರ್ ಫಿರ್ಗಜೆಚ್ಯಾ,  ಮ್ಹಜೊ ಮಿತ್ರ್ ಆನಿಲ್ ಬೈಂದೂರ್ ಹಾಣೆ ತಾಂಚ್ಯಾ ವಾವ್ರಾ ವಿಶಿಂ ಆನಿ  ಮುಖೆಲ್ಪಣಾವಿಶಿಂ ಫೆಸ್‌ಬುಕಾರ್ ಬರಯಿಲ್ಲಿ ಅಭಿಪ್ರಾಯ್ ಮ್ಹಾಕಾ ದಾಡುನ್ ದಿಲ್ಲಿ. ತೊ ಸಂಪೂರ್ಣ್ ವಾಚುನ್ ಜಾಲ್ಲ್ಯಾ ಉಪ್ರಾಂತ್ ಕಿತ್ಯಾಕ್‌ಗೀ ಬಾಪ್ ಕರ್ನೆಲಿಯೊ ವಯ್ರ್ ಮ್ಹಜೊ ಗೌರವ್ ದೊಡ್ತೊ ಜಾವ್ನ್ ತಾಚ್ಯಾ ವಯ್ರ್ ಮ್ಹಾಕಾ ವಿಶೇಸ್ ಆಭಿಮಾನ್ ಭಗ್ಲೊ.

ಆಯ್ಲೆವಾರ್ ದುರಸ್ತಿ ಜಾಲ್ಲ್ಯಾ ಇಗರ್ಜ್ ಉಗ್ತಾವಣಾಕ್ ಗಾವಾಂಕ್ ಪಾವ್‌ಲ್ಲ್ಯಾ ಮ್ಹಾಕಾ ಇಗರ್ಜೆಚ್ಯಾ ಗೇಟಿ ಭಿತರ್ ಪಾಂಯ್ ದವರ್ತಾನಾಂಚ್  ಹಾಂವ್ ಆಮ್ಚ್ಯಾ ತೊಟ್ಟಾಮ್‌ಚ್ಯಾ ಹಳ್ಳೆಂತ್ ನಾ ಬಗಾರ್ ಖಂಯ್‌ಗೀ ಯುರೊಪಾಂತ್ ಆಸಾಂ ಮ್ಹನ್ ಭಗ್ಲೆಂ. ನಿತಳ್ ಕರುನ್ ಸುಂರ್ಗಾರಾಯಿಲ್ಲ್ಯಾ  ಸಿಮೆಸ್ತ್ರೆ ಭಿತರ್ ಏಕ್ ಘುಂವ್ಡಿ ಕಾಡ್ತಾನಾ ಫೊಂಡಾ ಭಿತರ್ ನಿದೊನ್ ಆಸ್‌ಲ್ಲೆ ಮ್ಹಜ್ಯಾ ಕುಟ್ಮಾಚೆ , ಮ್ಹಜೊ  ಪಪ್ಪಾ , ಆಮ್ಚೆ ಮಾಲ್ಘಡೆ ಮ್ಹಜೆ ಲಾಗಿಂ ಸಂತೊಸಾನ್ ಉಲೊವ್ನ್  ಆಸಾತ್ ತಸಲೊ ಆನ್ಭೊಗ್ ಮ್ಹಾಕಾ ಜಾಲೊ.

ಇಗರ್ಜೆಚ್ಯಾ ಥಳಾಕ್ ಪಾಂಯ್ ದವರ್ತಾನಾಂಚ್ ಉಬ್ಜಾಲ್ಲೊ ಭಕ್ತಿಪಣಾಚೊ ಆನ್ಭೊಗ್ ಮುಖಾರ್ ವೆತಾ ವೆತಾನಾ ವಾಡೊನ್ಂಚ್ ಗೆಲೊ. ಖಂಡಿತ್ ಜಾವ್ನ್  ಆಮ್ಚೊ ಪಾದ್ರ್ಯಾಬ್ ಭಕ್ತಿಪಣಾಕ್ ಸಾಂಗಾತಾ ಕಾಣ್ಘೇವ್ನ್ ಫಿರ್ಗಜ್ ಕುಟಾಮ್ ಬಾಂದ್ಚೊ ಪಾದ್ರ್ಯಾಬ್. ತಸಲೆಂ ಏಕ್ ವಾತಾವರಣ್ ಆಸಾ ಕರುನ್ ತಾಣೆಂ ಫಿರ್ಗಜ್ ವಠಾರಾಂತ್ ಆಪ್ಲೆ  ಸೈನಿಕ್ ಜಾವ್ನಾಸ್ಚ್ಯಾ ಫಿರ್ಗಜ್ ಗೊವ್ಳಿಕ್ ಪರಿಷದೆಚೊ ಉಪಾಧ್ಯಕ್ಷ್ ಸುನಿಲ್ ಫೆರ್ನಾಂಡಿಸ್ ಆನಿ ಫಿರ್ಗಜ್‍ಗಾರಾಂಕ್ ಸಾಂಗಾತಾ ಕಾಣ್ಘೆವ್ನ್  ಆಮ್ಚ್ಯಾ ಪಾದ್ರ್ಯಾಬಾನ್ ಆಮ್ಚೆಂ ಯೋಜನ್ ಪೊಂತಾಕ್ ಪಾವಯ್ಲಾಂ. ಇಗರ್ಜ್ ದುರಸ್ಥಿ ಜಾತಾನಾ ಆಸ್‌ಲ್ಲೊ ರೆಂವೆಂಚೊ ತಾತ್ವರ್ ಆಮ್ಕಾಂ ಮಾತ್ರ್ ನಂಯ್ ಆಸ್ತಾಂ ಸಗ್ಳ್ಯಾ ಆಮ್ಚ್ಯಾ ಜಿಲ್ಲ್ಯಾಕ್ ಏಕ್ ಸವಾಕ್ ಕಶೆಂ ಉಬೆಂ ಜಾವ್ನ್ ಹರ್ಯೆಕ್ಲ್ಯಾಚೆಂ ಬಾಂದ್ಪಾಚೆಂ ಕಾಮ್ ಸ್ಥಗಿತ್ ಜಾಲ್ಲೆಂ. ಪುಣ್ ಆಮ್ಚ್ಯಾ ಪಾದ್ರ್ಯಾಬಾಚ್ಯಾ ಮಾಗ್ಣ್ಯಾಚೊ ಪ್ರಭಾವ್ , ಲೊಕಾಚೊ ಸಹಕಾರ್ ಹಾಚ್ಯಾ ವರ್ವಿಂ ಆಜ್ಯಾಪಾಂನಿ ಮ್ಹಳ್ಳ್ಯಾಬರಿ ರೆಂವೆಂಚೊ ಸಮಸ್ಸೊ ಪಯ್ಸ್ ಜಾವ್ನ್ ದರಬಸ್ತ್ ರೆಂವ್ ಆಮ್ಚ್ಯಾ ಇಗರ್ಜೆಚ್ಯಾ ಬಾಂದ್ಪಾಕ್ ಫಾವೊ ಜಾಲಿ.

ಆಮ್ಚಿ ಫಿರ್ಗಜ್ ದುರುಸ್ತಿ ವೆಳಾರ್  90 ಲಾಖಾಂಚೊ ಆಂದಾಜ್ ದವರುನ್ ಆರಂಭ್ ಜಾಲ್ಲೆಂ ಯೋಜನ್ ತರೀ  ಹೆರ್ ಸಭಾರ್ ಗರ್ಜೆಚ್ಯೊ ಬದ್ಲಾವಣ್ಯೊ ಹಾಡುನ್ 2 ಕರೋಡಾಂಕ್ ಪಾವ್ಲೆಂ ತರೀ ಆಮ್ಚೊ ಪಾದ್ರ್ಯಾಬ್ ದಾನ್ ಜಮೊಂವ್ಕ್ ಫಿರ್ಗಜ್ ಸೊಡ್ನ್ ಭಾಯ್ರ್ ವಚೊಂಕ್ ನಾ. ಸರ್ಕಾರಾಚೆಂ ಆನುಧಾನ್ ತಶೆಂ ಫಿರ್ಗಜ್‍ಗಾರಾಂಚ್ಯಾ ಸಹಕಾರಾನ್ಂಚ್ ಎದೆಂ ವ್ಹಡ್ಲೆಂ ಯೋಜನ್ ಪೊಂತಾಕ್ ಪಾವ್ಲಾಂ ತರ್ ಲೊಕಾಂಕ್ ಪಾದ್ರ್ಯಾಬಾ ವಯ್ರ್ ಆಸ್ಚೊ ಭರ್ವಸೊ, ವಿಶ್ವಾಸ್ , ಮೋಗ್ ತಶೆಂಚ್ ಪಾದ್ರ್ಯಾಬಾಚೆಂ ಮರಿಯೆ ಮಾಯೆ ಥಂಯ್ ಆಸ್ಚೆಂ ವಿಶೇಷ್ ಭಕ್ತಿಪಣ್‍ಚ್ ಕಾರಣ್ ಜಾವ್ನಾಸಾ.

ಫಿರ್ಗಜೆಚ್ಯಾ ಹ್ಯಾ ಬ್ರಹತ್ ಯೋಜನಾಕ್ ಆರ್ಥಿಕ್ ಮಜತ್ ತಶೆಂಚ್ ಹೆರ್ ಮಜತ್ ಕೆಲ್ಲ್ಯಾ ಸರ್ವಾಂಚೊ ಉಪ್ಕಾರ್ ಬಾವುಡ್ನ್ , ಪಾದ್ರ್ಯಾಬಾನ್ ಕೊಣಾಯ್ಕೀ ಸೊಡಿನಾಸ್ತಾನಾ ಸ್ಮರಣಿಕಾ ದೀವ್ನ್ ಸಾರ್ವಜನಿಕ್ ಮ್ಹಾನ್ ಕೆಲಾ. ಪುಣ್ ಮೊಜ್ಯಾ ಕಾಳ್ಜಾಕ್ ಲಾಗ್‌ಲ್ಲಿ ಆಪುರ್ಬಾಯೆಚಿ ಗಜಾಲ್ ಮ್ಹಳ್ಯಾರ್ ಆಮ್ಚ್ಯಾ ಫಿರ್ಗಜೆಚ್ಯಾ ಹರ್ಯೇಕ್ ಕುಟ್ಮಾಕ್ ತಾಣಿಂ ದಿಲ್ಲೊ / ದಿನಾತ್‌ಲ್ಲೊ ಐವಜ್ ಪಳೆನಾಸ್ತಾನಾ ಪಾದ್ರ್ಯಾಬಾನ್ ತಾಂಕಾಂ ಸ್ಮರಣಿಕಾ ದೀವ್ನ್ ಮಾನ್ ಕರ್ಚೆಂ ಉದಾರ್ ಮ್ಹನ್ ದಾಕಯ್ಲೆಂ.  ಹೆಂ ಆಮ್ಚ್ಯಾ ಸಮಾಜೆಂತ್ ಹರ್ಯೆಕಾ ಫಿರ್ಗಜಾಂಕ್ ಏಕ್ ಆದರ್ಶ್ ಜಾಂವ್ಕ್ ಪಾವ್ತೆಲೆಂ ಮ್ಹಣ್ಚ್ಯಾಕ್ ಕಿತೆಂಚ್ ದುಬಾವ್ ನಾ.

ಫಿರ್ಗಜೆಚ್ಯಾ ಬರ‍್ಯಾಪಣಾಖಾತಿರ್ ದೀಸ್ ರಾತ್ ಪಳೆನಾಸ್ತಾನಾ ವಾವುರ್ಚೊ ಆಮ್ಚೊ ಪಾದ್ರ್ಯಾಬ್, ಕಿತೆಂ ಸರ್ಕಾರಾ ಥಾವ್ನ್ ಕಿತ್ಲಿಂ ಸರ್ವ್ ಆನುದಾನಾಂ ಮೆಳ್ತಾತ್‍ಗಿ ತಿಂ ಹಾಡೊಂವ್ಚ್ಯಾಂತ್ ಯಶಸ್ವಿ ಜಾಲಾ. ಆತಾಂ ವರ್ಗಾವಣೆಕ್ ಥೊಡೆಚ್ ಮಹಿನೆ ಆಸ್ತಾನಾ ಸರ್ಕಾರಾ ಥಾವ್ನ್ ಕುಮೊಕ್ ಹಾಡೊವ್ನ್ ಆಮ್ಚಿ ಸಿಮೆಸ್ತ್ರಿ ದುರುಸ್ಥಿ ಕರ್ಚೆಂ ಕಾರ್ಯೆಂ ತಾಣಿಂ ಹಾತಿಂ ಘೆತ್ಲಾಂ ಆನಿ ಮರಿಯೆಚ್ಯಾ ಆದಾರಾನ್ ಆನಿ ಲೊಕಾಚ್ಯಾ ಸಹಕಾರಾನ್ ಹೆಂ ಕಾರ್ಯೆಂಯ್ ವೆಗಿಂಚ್ ಪೊಂತಾಕ್ ಪಾವ್ತೆಲೆಂ ಮ್ಹಳ್ಳೊ  ಭರ್ವಸೊ ತಾಕಾ ಆಸಾ.

ಏಕ್ ಉತ್ತೀಮ್ ಸಂಗೀತ್ಗಾರ್ ಜಾವ್ನಾಸ್ಚೊ ಆಮ್ಚೊ ಪಾದ್ರ್ಯಾಬ್ ಸಭಾರ್ ನಾಂವಾಡ್ದಿಕ್ ಕಂತಾರಾಂಚೊ ಘಡ್ಣಾರ್ ಜಾವ್ನಾಸಾ. ಆತಾಂಯ್ ಲೊಕಾಮೊಗಾಳೆಯೆಚ್ಯಾ ಶಿಖರಾರ್ ಆಸ್ಚಿಂ ಕಂತಾರಾಂ  ಸರ್ವಸ್ವ್ ಬಾಪಾ ಹಾಡ್ನ್ ಆಯ್ಲ್ಯಾಂವ್, ಹಾಡುನ್ ಆಯ್ಲ್ಯಾಂವ್ ಕಾಣಿಕೊ,  ಮರಿಯೆ ಕ್ರೀಸ್ತಾ ಮಾಯೆ, ಕಾಳ್ಜಾ ದಾರಾರ್ ಸೊಮಿಯಾ, ಸಂತೊಸಾನ್ , ವ್ಹಡ್ ಉಲ್ಲಾಸಾನ್ … ಸೊಮ್ಯಾ ತುಜೆ ಸಮೊರ್ ಯೆತಾಂವ್ ಆನಿ ಸಭಾರ್ ನಾಂವಾಡ್ದಿಕ್ ಕಂತಾರಾಂಚೆಂ ಘಡ್ಣಾರ್ ಆಮ್ಚೊ ಪಾದ್ರ್ಯಾಬ್ ಮ್ಹಣೊನ್ ಸಬಾರ್ ಲೊಕಾಕ್ ಯೆದೊಳ್ ಕಳಿತ್ ಆಸ್ಚೆಂ ನಾ. ಲೊಕಾಮೊಗಾಳ್ ಗಾವ್ಪಿ ಮೆಲ್ವಿನ್ ಪೆರಿಸ್ ಹಾಚ್ಯಾ ಸಂಗಿಂ ಮೆಳೊನ್ ಆಮ್ಚ್ಯಾ ಪಾದ್ರ್ಯಾಬಾನ್  9 ಕಾಂತಾರಾಂಚ್ಯೊ ಕೊವ್ಳ್ಯೊ ಉಜ್ವಾಡಾಕ್ ಹಾಡ್ಲ್ಯಾತ್.

ಭಕ್ತಿಪಣಾಕ್ ವಿಸೇಸ್ ಆದ್ಯತಾ ದಿಂವ್ಚೊ ಆಮ್ಚೊ ಪಾದ್ರ್ಯಾಬ್ ಹರ್ಯೆಕಾ ಆಯ್ತಾರಾ ದಿಸಾ ಇಗರ್ಜೆಚ್ಯಾ ವಾಡ್ಯಾಂನಿ ಲ್ಹಾನ್ ಕ್ರಿಸ್ತಿ ಸಮುದಾಯ್ ಜಮಾತ್ಯೊ ಆಸಾ ಕರುಂಕ್ ಉತ್ತೇಜಿತ್ ಕರ್ತಾ ಮಾತ್ರ್ ನಹಿಂ ಆಸ್ತಾಂ ಹರ್ಯೆಕಾ ಜಮಾತ್ಯಾಂನಿ ಖುದ್ದ್ ಹಾಜರ್ ಜಾವ್ನ್ ಭಕ್ತಿಪಣ್ ಚಡಯ್ತಾ. ಕುಟ್ಮಾಂನಿ ಕಾರ್ಯಿಂ ಆಸ್ಲ್ಯಾರ್ ಚುಕಾನಾಸ್ತಾನಾ ಆಮ್ಚೊ ಪಾದ್ರ್ಯಾಬ್ ಪಯ್ಲೊ ಪಾವೊನ್ ಆಪುಣ್ ಕುಟ್ಮಾಚೊ ಧಾರ್ಮಿಕ್ ವ್ಹಡಿಲ್ ಮ್ಹಳ್ಳೆಂ ಪರ್ತುನ್ ಪರ್ತುನ್ ರುಜು ಕರ್ತೆ ಆಸಾ. ಫಿರ್ಗಜೆಚ್ಯಾ ಹರ್ಯೆಕಾ ಮಾಲ್ಘಡ್ಯಾಂಚಿ , ಪ್ರಾಯೆಸ್ತಾಂಚಿ ಜತನ್ ಘೆತಾ. ತಾಂಚಿ ಖಬರ್ , ತಾಂಚ್ಯಾ ಬರ‍್ಯಾ ಭಲಾಯ್ಕೆ ವಿಶಿಂ ತಾಂಚ್ಯಾ ಮೊಗಾಚ್ಯಾ ಮನ್ಶಾಂ ಲಾಗಿಂ ಉಲಯ್ತಾನಾ ತಾಂಕಾಂ ಕಳಯ್ತಾ.

ಎಕಾ ಉತ್ರಾನ್ ಸಾಂಗೊಂ ತರ್ –  ಆಮ್ಚ್ಯಾ ಪಾದ್ರ್ಯಾಬಾನ್ ಪಯ್ಲೆಂ ಲೊಕಾಚ್ಯಾ ಕಾಳ್ಜಾಂನಿ ಎಕ್ವೊಟಾಚೆಂ, ಮಾಯಾ ಮೊಗಾಚೆಂ ತೇಂಪ್ಲ್ ಬಾಂದ್ಲೆಂ ಅನಿ ತ್ಯಾ ಬುನ್ಯಾದಿಚೆರ್ ಇಗರ್ಜೆಚ್ಯಾ ಬಾಂದ್ಪಾಚೆಂ ನವೀಕರಣ್ ಕೆಲೆಂ. ಎಕ್ ಫಿರ್ಗಜ್ ಕುಟಮ್ ಕಶೆಂ ಬಾಂದುನ್ ಹಾಡ್ಯೆತ್ ಆನಿ ಏಕ್ ಫಿರ್ಗಜ್ ಕಶಿ ರುತಾ ಕರ್ಯೆತ್ ಮ್ಹಣ್ಚ್ಯಾಕ್ ಜಿವಿ ಸಾಕ್ಸ್  – ಆಮ್ಚೊ ಪಾದ್ರ್ಯಾಬ್ ಮಾ| ಬಾ| ಫ್ರಾನ್ಸಿಸ್ ಕರ್ನೆಲಿಯೊ.

ಆಸಲೊ ಏಕ್ ಉತ್ತೀಮ್ ಆನಿ ಲೊಕಾಮೊಗಾಳ್ ಪಾದ್ರ್ಯಾಬ್ ಆಪ್ಲ್ಯಾ ಯಾಜಕೀ ದೀಕ್ಶೆಚಿಂ ಯಶಸ್ವಿ 40 ವರ್ಸಾಂ ಆಮ್ಚ್ಯಾ ಫಿರ್ಗಜೆಂತ್ ಸಂಪಯ್ತಾ ತಿ ಗಜಾಲ್ ಆಮ್ಕಾಂ ತೊಟ್ಟಾಮ್‌ಗಾರಾಂಕ್ ವರ್ತ್ಯಾ ಆಭಿಮಾನಾಚಿ ಆನಿ ದಾದೊಸ್ಕಾಯೆಚಿ. ಆನಿ ಹೊ ಸಂತೊಸ್ ದೊಡ್ತೊ ಕರುಂಕ್ ಆಮ್ಚೆಂ ಫಿರ್ಗಜ್ ಕುಟಾಮ್ ಬರಿ ತಯಾರಾಯ್ ಕರುನ್ ಆಸಾ. ಆಮ್ಚ್ಯಾ ಪಾದ್ರ್ಯಾಬಾಚ್ಯಾ ಮಾಣಿಕ್ಯ್ ಮಹೋತ್ಸವಾಚಾ ಸಂದರ್ಭಿಂ ಹಾಂವ್ ತಾಂಕಾಂ ಬರಿ ಭಲಾಯ್ಕಿ , ಲಾಂಬ್ ಆವ್ಕ್ ಮಾಗ್ತಾಂ. ಆಮ್ಚ್ಯಾ ಆನಿ ಹೆರ್ ಫಿರ್ಗಜಾಂಕ್ ತಾಂಚಿ ದೆವಾಸ್ಪಣಾಚಿ ಸೆವಾ ಮೆಳ್‍ಲ್ಲ್ಯಾ ಪರಿಂ ಅನಿಕೀ ಸಭಾರ್ ಫಿರ್ಗಜಾಂಕ್ ಮೆಳೊನ್ ಕ್ರೀಸ್ತಾಚಿ ಖರಿ ವ್ಹಳೊಕ್ ತಾಂಚ್ಯಾ ಮುಖಾಂತ್ರ್ ಮೆಳೊಂದಿ ಮ್ಹಳ್ಳೆಂ ಮ್ಹಜೆಂ ಮಾಗ್ಣೆಂ ಜಾವ್ನಾಸಾ.

► ನಾನು ಮರೋಲ್, ತೊಟ್ಟಾಮ್