ಹ್ಯಾಪಾವ್ಟಿಂಚ್ಯಾ ನತಲಾಂ ಫೆಸ್ತಾ ವೆಳಾರ್ ಸಗ್ಳೊ ಸಂಸಾರ್ ಒಮಿಕ್ರಾನ್ ಮ್ಹಣ್ ದುಖಾಂ ಗಳಯ್ತಾನಾ ಪಿಚ್ಚಾ ಮಾತ್ರ್ ಮಿಶ್ಯಾಂ ಭಿತರ್ ಆನಿ ಭಾಯ್ರ್‌ಯೀ ಹಾಸ್ತಾಲೊ, ಸಂತೊಸಾನ್ ನಾಚ್ತಾಲೊ, ಘಡ್ಯೆ ಘಡ್ಯೆ ಜಿಂಗಲ್ ಬೆಲ್ಸ್ ಜಿಂಗಲ್ ಬೆಲ್ಸ್ ಮ್ಹಣ್ತಾಲೊ. ಕಾರಣ್ ಇತ್ಲಿಂ ವರ್ಸಾಂಚ್ಯಾ ಕಾಜಾರಿ ಜಿವಿತಾಂತ್ ಅನಾಥ್ ಪಡ್‌ಲ್ಲ್ಯಾ ತಾಚ್ಯಾ ಗೊಟ್ಯಾಂತ್ ಹ್ಯಾ ಪಾವ್ಟಿಂ ಏಕ್ ಬಾಳ್ ಜಲ್ಮಾಲ್ಲೊ. ಪಿಚ್ಚಾ ಬಾಪಯ್ ಜಾಲ್ಲೊ. ತೊಮಾಸಾಚೊ ಪೂತ್ ತೋಮ್ಸನ್ ಆಸ್‌ಲ್ಲ್ಯಾಬರಿಂ, ಜೊನಾಚೊ ಪೂತ್ ಜೋನ್ಸನ್ ಆಸ್‌ಲ್ಲ್ಯಾಬರಿಂ ಪಿಚ್ಚಾಕ್‌ಯೀ ಏಕ್ ಫೆಲಿಸನ್ ಜಲ್ಮಾಲ್ಲೊ. ತಾಚ್ಯಾ ಬಾಯ್ಲೆಕ್ ಅಪ್ಣೆಂ ಕಾಮ್ ಕರ‍್ಚ್ಯಾ ಆಂಗ್ಡಿಚ್ಯಾ ಧನಿಯಾಸಂಗಿಂ ಚಂಗಯ್ ಆಸ್‌ಲ್ಲಿ ತರೀ ನತಲಾಂ ಫೆಸ್ತಾಕ್ ತಯಾರಾಯ್ ಜಾವ್ನ್ ಆಸಾ ಕೆಲ್ಲ್ಯಾ ಕುಮ್ಸಾರಾಂತ್ ತಾಣೆಂ ಅಪ್ಣಾಚ್ಯಾ ಬಾಯ್ಲೆಕ್ ಆನಿ ಅಪ್ಣಾಚ್ಯಾ ಧನಿಯಾಕ್ ಭೊಗ್ಶಿಲ್ಲೆಂ. ತರೀ ಲೋಕ್ ಗುಸುಗುಸು ಉಲಯ್ತಾಲೊ, ಪುಸುಪುಸು ಪುಸ್ಪುಸ್ತಾಲೊ. ಗರ್ದಾನಾ ಗೊಟ್ಯಾಂತ್ಲ್ಯಾ ಸಾಂ ಜುಜೆಬರಿಂ ಫೆಲಿಸ್‌ಯೀ ಅಪ್ಣಾಚ್ಯಾ ಪುತಾಚೊ ಪೊಸ್ಕೊ ಬಾಪಯ್ ಮ್ಹಣ್ ಹೆಡಾಯ್ತಾಲೊ.
ಹ್ಯಾ ವರ್ವಿಂ ಪಿಚ್ಚಾಚೆಂ ಸಮಾಧಾನ್ ಬಿಗಡ್ಲೆಂ. ತರೀ ದೀಸ್ ವಚಾಜೆ ನೇ. ಕೊರೋನಾವರ್ವಿಂ ಪಾಟ್ಲ್ಯಾ ದೋನ್ ವರ್ಸಾಂಥಾವ್ನ್ ಥಂಡ್ ಪಡ್‌ಲ್ಲೆಂ ನತಾಲಾಂ ಫೆಸ್ತಾಕ್ ಹ್ಯಾ ಪಾವ್ಟಿಂ ಜೋಶ್ ಭರ್‌ಲ್ಲೊ. ಗಲ್ಫಾಥಾವ್ನ್, ಕೆನಡಾ, ಅಮೇರಿಕಾಥಾವ್ನ್ ಜಾಯ್ತೆ ಗಾಂವಾಕ್ ದೆಂವ್‌ಲ್ಲೆ, ತಶೆಂ ಜಾಲ್ಲ್ಯಾನ್ ಆಂಗ್ಡಿ ಜಾಯ್ತೊ ಸಾಮಾನ್ ಪಡ್‌ಲ್ಲೊ ಆನಿ ಯಾರ್‌ಯೀ ಬರೊ ಚಲ್ತಾಲೊ. ಹ್ಯಾ ವರ್ಸಾಯೀ ಸಬಾರ್ ಗರ್ದನಾ ಗೊಟ್ಯಾಚೆ ಸೆಟ್ಟ್ ಆಸ್‌ಲ್ಲೆ. ತಶೆಂ ಜಾಲ್ಲ್ಯಾನ್ ಫಿಚ್ಚಾಚೆಂ ಭೋವ್ ಗರ್ಜೆಚೆಂ ಆನಿ ಗಿದಾ ನದ್ರೆಚೆಂ ಕಾಮ್ ಮ್ಹಳ್ಯಾರ್ ಜುಜೆಕ್ ಕೊಣೀ ಆದ್ಲಿ ಬದ್ಲಿ ಕರ‍್ನಾತ್ಲ್ಯಾರ್ ಪುರೊ ಮ್ಹಣ್ ಪಳೆಂವ್ಚೆಂ. ಬದ್ಲಿ ಕೆಲೆಂ ತರೀ ಕಾಂಯ್ ಫರಕ್ ಪಡಾನಾ ಪೂಣ್ ಬಾಳ್ಕಾಚೊ ಆನಿ ಜುಜೆಚೊ ಆಕಾರ್ ತಾಳ್ ಪಡಾಜೆ, ಮಾತ್ರ್ ನ್ಹಯ್ ದೊಗಾಂಯ್ಚೊ ಕಲರ್ ಸಯ್ತ್ ಏಕ್ ಸಾರ್ಕೊ ಆಸಾಜೆ. ನಾಂ ತರ್ ಲೋಕ್ ದುಬಾವ್ ಉಚಾರ‍್ತಾ ಆನಿ ಘೆನಾಸ್ತಾನಾ ಪಾಟಿಂ ಸರ‍್ತಾ. ಲುಕ್ಸಾಣ್ ಪಿಚ್ಚಾಚ್ಯಾ ಧನಿಯಾಕ್. ಆನಿ ಪಿಚ್ಚಾಚ್ಯಾ ಧನಿಯಾಕ್ ಲುಕ್ಸಾಣ್ ಜಾಲ್ಯಾರ್ ಪಿಚ್ಚಾಕ್‌ಯೀ ಲುಕ್ಸಾಣ್. ಕಾರಣ್ ಯಾರ್ ಜಾಯ್ನಾಂ ಜಾಲ್ಯಾರ್ ಪಿಚ್ಚಾಕ್‌ಯೀ ಸಾಂಬಾಳ್ ನಾ ವಾ ಸಾಂಬಾಳ್ ಮೆಳ್ಳ್ಯಾರ್ ಬೋನಸ್ ನಾ.
ಪಿಚ್ಚಾ ಗರ್ದಾನಾಚೆ ಗೊಟೆ, ನೆಕೆತ್ರಾಂ, ಬೊಕ್ರೆ, ಗೊವ್ಳಿ ಹೆಂಚ್ ವಿಕ್ಚ್ಯಾಂತ್ ಬಿಝಿ ಜಾಲೊ. ಪಿಚ್ಚಾಚ್ಯಾ ಬಾಯ್ಲೆಸಂಗಿಂ ಅಪ್ಣಾಚೆಂ ಚಕ್ಕರ್ ಚಲ್ತಾಲೆಂ ಮ್ಹಣ್ ಲೋಕಾಂಕ್ ಕಳಿತ್ ಜಾಲ್ಯಾ ನಂತರ್ ಅಪ್ಣಾಚಿ ಮರ‍್ಯಾದ್ ರಾಕ್ಚ್ಯಾಕ್ ಸಾಂತಾಕ್ಲೋಸಾಚೊ ವೇಸ್ ಘಾಲ್ನ್ ಅಂಗ್ಡಿಂತ್ ಬಸ್ಚ್ಯಾ ಧನಿಯಾಕ್ ತುಂ ಆಂಗ್ಡಿ ಬಸೊನ್ ಕಿತ್ಯಾಕ್ ವೇಳ್ ಪಾಡ್ ಕರ‍್ತಾಯ್, ಯೇ ಆಮ್ಚೆಸಂಗಿಂ ಕ್ಯಾರಲ್ಸ್ ಗಾಂವ್ಕ್ ಮ್ಹಣ್ ಥೊಡ್ಯಾ ಚಲಿಯಾಂಚ್ಯಾ ಪಂಗ್ಡಾಚ್ಯಾನಿಂ ವೋಡ್ನ್ಂಚ್ ವೆಲೊ ಕಂಯ್. ಅಶೆಂ ಗೆಲ್ಲೊ ತೊ ಗೆಲ್ಲ್ಯಾ ಗೆಲ್ಲ್ಯಾ ಘರಾನಿಂ ‘ಬಾಳ್ ಜಲ್ಮಾಲಾ ಸಂತೊಸ್ ಪಾವ್ಯಾಂ’ ಮ್ಹಳ್ಳೆಂ ಎಕ್‌ಚ್ ಕ್ಯಾರಲ್ ಗಾಯ್ತಾಲೊ ಖಂಯ್. ತುಜೊ ಧನಿ ಫಕತ್ ಹೆಂಚ್ ಕ್ಯಾರಲ್ ಗಾಯ್ತಾ ಆನಿ ಸಂತೊಸಾನ್ ನಾಚ್ತಾ ಮ್ಹಣ್ ಪಿಚ್ಚಾಕ್ ಜಾಯ್ತ್ಯಾಂನಿ ಖಬರ್ ದಿಲಿ. ತಶೆಂ ಜಾಲ್ಲ್ಯಾನ್ ಪಿಚ್ಚಾಚೆಂ ಸಮಾದಾನ್ ಆನಿಕೀ ಬಿಗ್ಡಾಲೆಂ. ಆಂಗ್ಡಿ ಅಯಿಲ್ಲ್ಯಾ ಜಾಯ್ತ್ಯಾನಿಂ ‘ಹ್ಯಾ ಪಾವ್ಟಿಂಚೆಂ ನತಾಲಾಂ ಫೆಸ್ತ್ ತುಕಾ ಸುಖ್-ಸಮಾದಾನ್ ಹಾಡ್ನ್ ಯೇಂವ್’ ಮ್ಹಣ್ ಕಶೆಂ ಕಶೆಂ ಮಾಗ್ಲ್ಯಾರೀ ಪಿಚ್ಚಾಚ್ಯಾ ಮತಿಂತ್ ಮಾತ್ರ್ ದುಖಿಚೆಂ ವಿದಾನ್ ಚಲೊನ್ ಅಸ್‌ಲ್ಲೆಂ. ಅಶೆಂ ದುಖಾನ್ ಬುಡೊನ್ ಅಸ್ಚ್ಯಾ ತಾಕಾ ಸಾಂ ಜುಜೆಕ್ ಪಳಯ್ತಾನಾ ಇಲ್ಲೆಂ ಸಮಾದಾನ್ ಭೊಗ್ತಾಲೆಂ.
ತ್ಯಾ ದೀಸ್ ದೊನ್ಪಾರ್ ಮ್ಹಣಾಸರ್ ಆಂಗ್ಡಿಂತ್ ಲೋಕಾಂಚಿ ಖೆಟ್. ವಿಕ್ರೊ ಬರೊ ಚಲ್ತಾಲೊ. ಪೂಣ್ ಆಯಿಲ್ಲೆ ಗಿರಾಯ್ಕ್ ಸಕ್ಕಡ್ ಗಲ್ಫಾಗಾರ್, ಫೋರೆನ್‌ಗಾರ್ ಜಾಲ್ಲ್ಯಾನ್ ಕೊಣ್ಣಾ, ಜೆವ್ಣಾಚೊ ವೇಳ್ ಜಾತಾನಾಂ ಥೊಡೆ ಇನಾಸಾಮಾಚ್ಯಾ ಹೊಟ್ಲಾಂತ್, ಥೊಡೆ ಮಂಗಳಾಂತ್ ಆನಿ ಥೊಡೆ ಮಧುವನಾಂತ್ ಮ್ಹಣ್ ಕೊಂಬಿಯಾಂಕ್ ಘೆವ್ನ್ ಕೊಂಬ್ಲೆ ರಿಗ್‌ಲ್ಲ್ಯಾಬರಿಂ ರಿಗ್ಲೆ. ತ್ಯಾಚ್ ವೆಳಾರ್ ದೊನ್ಪಾರಾಂಚಿ ಕುಂಕ್ಡಾಚಿ ನೀದ್ ಕಾಡಿಜಾಯ್ ಆಸ್‌ಲ್ಲೊ ಫಿರ್ಗಜ್ ವಿಗಾರ್ ಎಕಾಚ್ಚಾಣೆ ಇನ್‌ಕಾಮ್ ಟ್ಯಾಕ್ಸ್ ಆಫಿಸರ್ ರಿಗ್‌ಲ್ಲ್ಯಾಬರಿಂ ಆಂಗ್ಡಿ ಭಿತರ್ ರಿಗ್ಲೊ. ವಿಗಾರಾಕ್ ಪಳೆವ್ನ್ ಅಪ್ಣಾಚೆಂ ನಾಸಮಾಧಾನ್ ತಾಂಕಾಂ ಸಾಂಗ್ಯಾಂ ಮ್ಹಣ್ ಭೊಗ್ಲೆಂ ತರೀ ಬೊಕ್ರೆ ಮೊಲಾಂವ್ಕ್ ಆಯಿಲ್ಲ್ಯಾ ಹ್ಯಾ ಸನ್ನಿವೇಶಾಂತ್ ಅಪ್ಣಾಚೆ ಹಾಲ್ ಸಾಂಗ್ಚೆ ಸಾರ್ಕೆ ನ್ಹಯ್ ಮ್ಹಣ್ ತಾಚ್ಯಾ ಅಂತಸ್ಕರ್ನಾನ್ ತಾಕಾ ಜಾಗಯ್ಲೆಂ.
ಆಮ್ಚ್ಯಾ ಫಿರ್ಗಜೆಚ್ಯಾ ಗರ್ದಾನಾ ಗೊಟ್ಯಾಕ್ ಥೊಡ್ಯೊ ವಸ್ತು ಜಾಯ್ ಆಸ್‌ಲ್ಲ್ಯೊ ಮ್ಹಣ್ ವಿಗಾರಾನ್ ಪಟ್ಟಿ ಕಾಡ್ನ್ ಪಿಚ್ಚಾಕ್ ದಿಲಿ. ಪಿಚ್ಚಾ ಎಕ್‌ಚ್‌ಪಾವ್ಟಿಂ ವ್ಹಡ್ ತಾಳ್ಯಾನ್ ವಾಚುಂಕ್ ಲಾಗ್ಲೊ
ಧಾ ಕಿಲೋ ದುಕ್ರಾಮಾಸ್, ಆಟ್ ಕಿಲೋ ಕುಂಕ್ಡಾ ಮಾಸ್, ದೋನ್ ಬೊತ್ಲಿ ಚಿವಸ್ ರೀಗಲ್, ಏಕ್ ಕ್ರೇಟ್ ಸೊಡಾ, ಪಂದ್ರಾ ಬೊತ್ಲಿ ಕಿಂಗ್‌ಫಿಶರ್, ತೀನ್ ಡಜನ್ ……. ತೆದ್ನಾಂ ಆಂಗ್ಡಿ ಆಸ್‌ಲ್ಲೊ ಲೋಕ್ ಸಕ್ಕಡ್ ಪಿಚ್ಚಾಕ್ ಆನಿ ವಿಗಾರಾಕ್‌ಚ್ ಪಳೆಂವ್ಚ್ಯಾರ್ ಪಡ್ಲೊ. ಅಶೆಂ ವಾಚ್ತಾನಾ ವಿಗಾರಾನ್ ಪಟ್ಟಿ ವೋಡ್ನ್ ಕಾಣ್ಘೆಲಿ ಆನಿ ವ್ಹಡ್ಲ್ಯಾ ತಾಳ್ಯಾನ್ ಮ್ಹಣಾಲೊ.
“ಆಮ್ಚ್ಯಾ ಇಗರ್ಜೆಂತ್ ನತಾಲಾಂ ಫೆಸ್ತಾ ದಿಸಾ ಏಕ್ ನಾಟ್ಕುಳೊ ಆಸಾ. ತಶೆಂ ಪಿಚ್ಚಾಕ್ ಹಾಂವ್ ಪ್ರ್ಯಾಕ್ಟೀಸ್ ದೀವ್ನ್ ಆಸ್‌ಲ್ಲೊಂ.” ಅಶೆಂ ಹಾಸೊನ್‌ಶೆಂ ಪಿಚ್ಚಾಚ್ಯಾ ಕಾನಾಂತ್ ತಾಣೆಂ ವಳೂ ಮ್ಹಳೆಂ “ತಿ ಪಟ್ಟಿ ಆಮ್ಚ್ಯಾ ಬೊಟ್ಲೆರಾನ್ ದಿಲ್ಲಿ, ಫೆಸ್ತಾಚ್ಯಾ ಜೆವ್ಣಾಚಿ, ತಾಚೆ ಕೋಣ್‌ಗೀ ಸಯ್ರೆ ಯೆತಾತ್ ಖಂಯ್, ವಯ್ಲ್ಯಾನ್ ಹಾಂವ್ ಖಂಯ್ ಪಿಯೆತಾಂ, ಹಾಂವೆಂ ಮಿಸಾ ವೆಳಾರ್ ವಾಯ್ನ್ ಸಯ್ತ್ ಲೆಕಾಚೊ ಘಾಲ್ಚೊ. ತುಕಾ ಹಾಂವೆಂ ಚುಕೊನ್ ದುಸ್ರಿ ಚೀಟ್ ದಿಲಿ.” ಅಶೆಂ ಮ್ಹಣೊನ್ ತಾಣೆಂ ಅನ್ಯೇಕ್ ಚೀಟ್ ಕಾಡ್ನ್, ಪಯ್ಲೆಂ ವಾಚುನ್, ನಖ್ಖಿ ಕರ‍್ನ್ ಉಪ್ರಾಂತ್ ಪಿಚ್ಚಾಕ್ ದಿಲಿ. ಪಿಚ್ಚಾನ್ ಬಕ್ರ್ಯಾಂಕ್ ಆನಿ ಗೊವ್ಳ್ಯಾಂಕ್ ಎಕಾ ಥಯ್ಲೆಂತ್ ಘಾಲೆಂ. ತಶೆಂಚ್ ಬಾಳೊಕ್, ಮರ‍್ಯೆಕ್ ಆನಿ ಜುಜೆಕ್ ಅನ್ಯೇಕಾ ಥಯ್ಲೆಂತ್ ಘಾಲೆಂ ಆನಿ ವಿಗಾರಾಕ್ ದಿಲೆಂ.
ನಾಟ್ಕುಳ್ಯಾಚೊ ಉಗ್ಡಾಸ್ ಕಾಡ್‌ಲ್ಲ್ಯಾನ್ ವಿಗಾರಾಕ್ ತಕ್ಷಣ್ ಮತಿಕ್ ಆಯ್ಲೆಂ ಆನಿ ತೊ ಪಿಚ್ಚಾಕ್ ಮ್ಹಣಾಲೊ.
“ಅಳೆ ಪಿಚ್ಚಾ, ಪೊರ್ವಾಂ ಜೆಜುಚ್ಯಾ ಜನನಾಚೆರ್ ಏಕ್ ನಾಟ್ಕುಳೊ ಆಮ್ಚ್ಯಾ ಇಗರ್ಜೆಂತ್ ಖೆಳೊನ್ ದಾಕಂವ್ಕ್ ಆಸಾ. ಆಮ್ಚ್ಯಾ ಫಿರ್ಗಜೆಂತ್ ನವೆಂಚ್ ಜಲ್ಮಾಲ್ಲೆಂ ಬಾಳ್ ಆಸ್ಚೆಂ ಮ್ಹಳ್ಯಾರ್ ಅತಾಂ ಸದ್ದ್ಯಾಕ್ ತುಜೆಂಚ್. ದೆಕುನ್ ತುಜ್ಯಾ ಪತಿಣೆಕ್ ಮರ‍್ಯೆಚೊ ವೇಸ್ ಘಾಲ್ನ್, ತುಜ್ಯಾ ಬಾಳಾಕ್‌ಚ್ ಬಾಳೊಕ್ ಕರ‍್ಚೊ. ಆನಿ ತುವೆಂಚ್ ಸಾಂ ಜುಜೆ ಜಾಂವ್ಚೆಂ, ಕಿತೆಂ ಮ್ಹಣ್ತಾಯ್ ತುಂ?”.
ಪರತ್ ಸಾಂ ಜುಜೆಚೊಚ್ ಪಾತ್ರ್ ಮೆಳ್ಳೊ ಮ್ಹಣ್ ಪಿಚ್ಚಾಚೆಂ ಸಮಾದಾನ್ ಮಾತ್ಶೆಂ ಬಿಗ್ಡಾಲೆಂ.
“ಪೂಣ್ ಫಾದರ್, ನತಲಾಂಚೊ ಕಾಳ್ ಜಾಲ್ಲ್ಯಾನ್ ಮ್ಹಾಕಾ ಆಂಗ್ಡಿ ರಾವಾಜೆ. ವಯ್ಲ್ಯಾನ್ ಧನಿ ಸಾಂತಾಕ್ಲೋಸಾಚೊ ವೇಸ್ ಘಾಲ್ನ್ ಕ್ಯಾರಲ್ಸ್ ಗಾಂವ್ಕ್ ವೆತಾ. ಮ್ಹಾಕಾ ಜಾಂವ್ಚೆಂ ನಾ ಫಾದರ್” ಮ್ಹಣ್ ಹ್ಯಾ ಸಾಂ. ಜುಜೆಥಾವ್ನ್ ಸುಟ್ಕಾ ಜೊಡುಂಕ್ ಪಿಚ್ಚಾನ್ ಪ್ರಯತನ್ ಕೆಲೆಂ.
“ಅರೆ, ತುಕಾ ಜಾಯ್ನಾ ತರ್ ವ್ಹಡ್ ನಾ, ತುಜೊ ಧನಿ ಆಸಾನೇ, ತಾಕಾಚ್ ಸಾಂ ಜುಜೆ ಕರ‍್ಯಾಂ. ಕ್ಯಾರಲ್ಸ್ ಗಾಂವ್ಕ್ ಪುರ್ಸತ್ ಆಸಾ ಖಂಯ್, ನಾಟ್ಕುಳೊ ಕರುಂಕ್ ಯೆಂವ್ಚೊನಾಂಗೀ. ಹಾಂವ್ ಇಗರ್ಜೆಕ್ ಪಾವ್‌ಲ್ಲೆಂಚ್ ತಾಕಾ ಫೋನ್ ಕರ‍್ತಾಂ.”
ಪಿಚ್ಚಾ ಕಾತ್ರಿಂತ್ ಸಾಂಪಡ್ಲೊ. ವಿಗಾರಾಕ್ ಜಾಂವ್, ಧನಿಯಾಕ್ ಜಾಂವ್ ಆಡ್ ವಚೊಂಕ್ ತಾಚ್ಯಾನ್ ಜಾಲೆಂ ನಾ. ಎದೊಳ್ ಮ್ಹಣಾಸರ್ ಲೋಕ್ ಉಲಯ್ತಾಲೊ ಮಾತ್ರ್. ಆನಿ ಮುಕಾರ್ ಮ್ಹಜ್ಯಾ ಬಾಯ್ಲೆ ಸಾಂಗಾತಾ ಮ್ಹಜ್ಯಾ ಧನಿಯಾಕ್ ಪಳೆವ್ನ್ ಆನಿ ಕಿತೆಂ ಖಬರ್ ಕರಿತ್‌ಗಾಯ್ ಮ್ಹಣ್ ಚಿಂತಾನಾಂಚ್ ಭಿಯೆಲೊ.
ಸಾಂಜ್ ಜಾತಾನಾ ಪಿಚ್ಚಾಚೊ ಆಪ್ತ್ ಮಿತ್ರ್ ರಿಚ್ಚಾ ಆಂಗ್ಡಿ ರಿಗ್ಲೊ.
“ಅರೇ ಪಿಚ್ಚಾ ಮ್ಹಾಕಾ ಏಕ್ ಭಡ್ವ್ಯಾಚಿ ಮುಸ್ತಾಯ್ಕಿ ಆಸ್ಲ್ಯಾರ್ ದಾಕಯ್.”
“ಅರೇ ರಿಚ್ಚಾ, ಅತಾಂ ಭಡ್ವ್ಯಾಚಿ ಮುಸ್ತಾಯ್ಕಿ ನೆಚೊನ್ ಖಂಚ್ಯಾ ಮರ‍್ಯೆಕ್ ಬರಿ ಖಬರ್ ದೀಂವ್ಕ್ ವೆತಾಯ್. ಜಾಯ್ ತರ್ ಸಾಂ ಜುಜೆಚಿ ಮುಸ್ತಾಯ್ಕಿ ದಿತಾಂ. ಬಾರಿಚ್ ಡಿಮಾಂಡ್ ಆಸಾ.” ಅಶೆಂ ಮ್ಹಣ್ ಅಪ್ಣಾಚೆ ಕಷ್ಟ್ ತಾಚೆಲಾಗಿಂ ಸಾಂಗೊಂಕ್ ಮ್ಹಣ್ ದರ್ವಡ್ತಾನಾ,
“ಅರೆ ಪಿಚ್ಚಾ ಸಾಂ ಜುಜೆ ಮ್ಹಾಕಾ ನಾಕಾ, ಸಾಂ ಜುಜೆಕ್ ತುಜೊ ಧನಿ ಆಸಾ. ತೆಂ ಕಾಲೆಂ ಮ್ಹಳ್ಯಾರ್ ಪೊರ್ವಾಂ ಇಗರ್ಜೆಂತ್ ಏಕ್ ನಾಟ್ಕುಳೊ ಆಸಾ. ಆನಿ ತ್ಯಾ ನಾಟ್ಕುಳ್ಯಾಂತ್ ಮ್ಹಾಕಾ ಭಡ್ವ್ಯಾಚೊ ಪಾತ್ರ್.”
ಭಡ್ವೊ ಮರ‍್ಯೆಕ್ ಬರಿ ಖಬರ್ ದೀತ್‌ಗೀ ಮ್ಹಣ್ ಸಾಂಗೊಂಕ್ ಜಾಯ್ನಾಂ, ಪೂಣ್ ಹೊ ರಿಚ್ಚಾ ಮ್ಹಳ್ಳೊ ಭಡ್ವೊ ಮಾತ್ರ್ ಪಿಚ್ಚಾಕ್ ಬರಿ ಖಬರ್ ಹಾಡ್ನ್ ಆಯಿಲ್ಲೊ. ಪಿಚ್ಚಾಚ್ಯಾ ಮತಿಂತ್ ತಕ್ಷಣ್ಂಚ್ ಏಕ್ ಸೊಪಾಣ್ ಉದೆಲೆಂ.
ತ್ಯಾ ಪರ್ಮಾಣೆಂ ತಾಣೆಂ ರಿಚ್ಚಾಕ್ ಅಶೆಂ ಮ್ಹಳೆಂ “ಆಯ್ಕ್ ರಿಚ್ಚಾ, ತುಕಾ ಭಡ್ವೊ ಜಾವ್ನ್ ಗೆಲ್ಯಾರ್ ಕಾಂಯ್ ಮೆಳಾನಾ. ತುಂ ಏಕ್ ಕಾಮ್ ಕರ್. ಹಾಂವ್ ತ್ಯಾ ಭಡ್ವ್ಯಾಚೊ ಪಾತ್ರ್ ಖೆಳ್ತಾಂ. ಸಾಂಜೆರ್ ಪ್ರ್ಯಾಕ್ಟಿಸಾಕ್ ಹಾಂವ್ ವೆತಾಂ. ತ್ಯಾ ವೆಳಾರ್ ತುವೆಂ ಹಿ ಆಂಗಡ್ ಸಾಂಬಾಳಿಜೆ. ತುಕಾ ಹಾಂವ್ ಇತ್ಲೆಚ್ ಪಯ್ಶೆ ಮ್ಹಣ್ ದಿತಾಂ.”
ಆಯ್ಕೊನ್ ರಿಚ್ಚಾಕ್ ಖುಶಿ ಜಾಲಿ. ಭಡ್ವ್ಯಾಚಿ ಮುಸ್ತಾಯ್ಕಿ ಮೊಲಾಂವ್ಕ್ ಆಯಿಲ್ಲ್ಯಾಕ್‌ಚ್ ಬರಿ ಖಬರ್ ಮೆಳಾಜೆ ತರ್ ಮುಕಾರ್ ಆನಿಕೀ ಬರೆಂ-ಬರೆಂ ಆಸ್ತೆಲೆಂ ಮ್ಹಣ್ ತಾಣೆಂ ಘಡ್ಯೆನ್ ಸಯ್ ಘಾಲಿ.
ಅಶೆಂ ಸಾಂಜೆರ್ ಆಂಗಡ್ ರಿಚ್ಚಾಚ್ಯಾ ಹಾತಿಂ ಆಂಗಡ್ ದೀವ್ನ್ ಪಿಚ್ಚಾ ಆಂಗ್ಡಿಥಾವ್ನ್ಂಚ್ ಭಡ್ವ್ಯಾಚೊ ವೇಸ್ ಘಾಲ್ನ್ ಪ್ರ್ಯಾಕ್ಟಿಸಾಕ್ ವಚೊಂಕ್ ಆಯ್ತೊ ಜಾಲೊ. ಅಶೆಂ ಥೊಡಿಂ ಉಳ್ಟಿಂ ಸವಾಲಾಂ ವಿಚಾರ‍್ನ್ ಅಪ್ಣಾಚ್ಯಾ ಪುತಾಚೊ ನೀಜ್ ಬಾಪಯ್ ಕೋಣ್ ಮ್ಹಣ್ ಸೊಧುನ್ ಕಾಡ್ಚಿ ತಾಚಿ ಐಡಿಯಾ ಜಾವ್ನ್ ಆಸ್‌ಲ್ಲಿ. ಭಡ್ವ್ಯಾಚೊ ವೇಸ್ ಘಾಲ್ಲ್ಯಾನ್ ತೊ ಪಿಚ್ಚಾ ಮ್ಹಣ್ ಕೊಣಾಕ್‌ಚ್ ಒಳೊಕ್ ಮೆಳ್ಚ್ಯಾಬರಿಂ ನಾತ್‌ಲ್ಲಿ. ಉಪ್ರಾಂತ್ ತಾಳ್ಯಾಂತ್ ಸಯ್ತ್ ತಾಣೆಂ ಇಲ್ಲಿ ಬದ್ಲಾವಣ್ ಕೆಲ್ಲಿ.
ಪ್ರ್ಯಾಕ್ಟಿಸಾಚ್ಯಾ ಪಯ್ಲೆಂಚ್ಯಾ ದಿಸಾ ಧನಿ ಚಾರ‍್ಲಿ ಅಪ್ಣಾಚ್ಯಾ ಮ್ಹಣ್ಜೆ ಪಿಚ್ಚಾಚ್ಯಾ ಬಾಯ್ಲೆಕ್ ಘೆವ್ನ್ ನೀಜ್ ಸಾಂ ಜುಜೆಬರಿಂಚ್ ಪ್ರ್ಯಾಕ್ಟಿಸ್ ಹೊಲಾಂತ್ ಭರ‍್ತಿ ಸಾತ್ ವೊರಾರ್ ಭಿತರ್ ರಿಗ್ಲೊ. ಹಾಂಚ್ಯಾ ಪಾಟ್ಲ್ಯಾನ್ಂಚ್ ಆಯಿಲ್ಲ್ಯಾ ಭಡ್ವ್ಯಾ ಪಿಚ್ಚಾನ್ ಅಪ್ಲೊ ಪಾಕಾಟೊ ಹಾಲೊವ್ನ್ ಆನಿ ಉಸವ್ನ್ ಧನ್ಯಾ ಚಾರ‍್ಲಿಕ್ ಏಕ್ ಖೊಟ್ ಘಾಲಿ. ತೊ ಧರ‍್ಣಿರ್‌ಚ್ ವೊಮ್ತೊ ಪಡ್ಲೊ. ತೆದ್ನಾಂ ಪಿಚ್ಚಾಚ್ಯಾ ಬಾಯ್ಲೆನ್ ತಾಕಾ ಅಸೊ ಉಕಲ್ಲೊ ಗೀ ತೊ ಸಗ್ಳೊಚ್ ತಿಚ್ಯಾ ಗೊಪಾಂತ್ ಅಂರ್ದಾಲೊಂ. ಹೆಂ ಪಳೆವ್ನ್ ಆನಿ ಮುಕಾರ್ ಧನಿಯಾಕ್ ಖೊಟ್ ಘಾಲ್ನ್ ಲೊಟುನ್ ಘಾಲ್ಚಿ ಐಡಿಯಾ ಪಿಚ್ಚಾನ್ ಸೊಡ್ನ್ ಸೊಡ್ಲಿ.
ವಿಗಾರ್ ಆಯ್ಲೊ, ಪ್ರ್ಯಾಕ್ಟೀಸ್ ಸುರು ಜಾಲೆಂ. ಘಡ್ಯೆ ಘಡ್ಯೆ ಚೆರ್ಕೊ ರಡ್ತಾನಾ ಪಿಚ್ಚಾಚಿ ಬಾಯ್ಲ್ ತಾಕಾ ದೂದ್ ದೀಂವ್ಕ್ ಮ್ಹಣ್ ಕೊನ್ಶಾಕ್ ವೆತಾಲಿ. ತಿ ಕೊನ್ಶಾಕ್ ಗೆಲ್ಯಾರೀ ವ್ಹಡ್ ನ್ಹಯ್ ಪೂಣ್ ಹೊ ಚಾರ‍್ಲಿಯೀ ತಿಚ್ಯಾ ಪಾಟ್ಲ್ಯಾನ್ ಕಿತ್ಯಾಕ್ ವೆತಾಲೊ ಮ್ಹಣ್ ಪಿಚ್ಚಾಕ್ ರಾಗ್ ಆಯ್ಲೊ. ವಿಗಾರಾಕ್ ಆನಿ ಹೆರಾಂಕ್ ಮುಖ್ಯ್ ಜಾವ್ನ್ ಅಪ್ಲ್ಯಾ ಧನಿಯಾಕ್ ಅಪುಣ್ ಪಿಚ್ಚಾ ಮ್ಹಣ್ ಕಳಿತ್ ಜಾಂವ್ಚೆಂ ನಾಕಾ ಆಸ್‌ಲ್ಲ್ಯಾನ್ ಪಿಚ್ಚಾ ಮಜ್ಬೂರ್ ಜಾಲ್ಲೊ. ಪಿಚ್ಚಾಚ್ಯಾ ಬಾಯ್ಲೆ ಪಾಟ್ಲ್ಯಾನ್ ಧನಿ ಚಾರ‍್ಲಿ ಸಾಂ. ಜುಜೆಚೊ ವೇಸ್ ಘಾಲ್ನ್ ವೆತಾಲೊ ಜಾಲ್ಲ್ಯಾನ್ ವಿಗಾರಾಕ್ ತೊ ಚಾರ‍್ಲಿ ಮ್ಹಣ್ ಉಡಾಸ್ ವಿಸ್ರೊನ್ ಖುದ್ದ್ ಜುಜೆಚ್ ಮರ‍್ಯೆ ಪಾಟ್ಲ್ಯಾನ್ ವೆತಾ ಮ್ಹಣ್ ಚಿಂತುನ್ ತಾಣೆಂ ಕಾಂಯ್ ಅಡ್ಡಿ ದಾಕಯ್ಲಿ ನಾ. ಖಾಸ್ ಕರ‍್ನ್ ಬಾಳ್ಶಾಚ್ಯಾ ಭಲಾಯ್ಕೆ ನಿಮ್ತಿಂ ಕೊಣೆಂಯ್ ತಕರಾರ್ ಉಟಂವ್ಕ್ ನಾಂತ್.
ವಿಗಾರಾನ್ ಮರ‍್ಯೆಚೆ, ಜುಜೆಚೆ, ಭಡ್ವ್ಯಾಚೆ ತಶೆಂಚ್ ಹೆರ್ ಪಾತ್ರ್‌ಧಾರಿಂಚೆ ಡಯಲೋಗ್ ಸಾಂಗೊನ್ ದಿಲ್ಲೆ. ಪೂಣ್ ಪಿಚ್ಚಾಚ್ಯಾ ಮತಿಂತ್ ಮಾತ್ರ್ ದುಸ್ರೆಚ್ ಡಯಲೋಗ್ ಖೆಳ್ತಾಲೆ. ತೆ ಡಯಲೋಗ್ ಅಪುಣ್ ನತಾಲಾಂ ಫೆಸ್ತಾ ದಿಸಾಚ್ ವಿಚಾರ‍್ನ್ ಸಕ್ಕಡ್ ಲೋಕಾಂ ಮುಕಾರ್ ಧನಿ ಚಾರ‍್ಲಿಕ್ ವಿಣ್ಗೊ ಕರ‍್ತಲೊಂ ಆನಿ ಅಪ್ಣಾಚೊ ಪಾತ್ರ್ ಜಾಲ್ಲೊಚ್ ವಳೂ ವಚುನ್ ಆಂಗ್ಡಿ ಬಸ್ತಲೊಂ ಆನಿ ಯಾರ್ ಚಡ್ ಆಸ್‌ಲ್ಲ್ಯಾನ್ ಅಪುಣ್ ತ್ಯಾ ದೀಸ್ ಆಂಗ್ಡಿಚ್ ನಿದ್ಲೊಂ ಅಶೆಂ ಸಾಂಗ್ತಲೊಂ ಮ್ಹಣ್ ತಾಣೆಂ ಪಯ್ಲೆಂಚ್ ನಿರ್ಧಾರ್ ಕರ‍್ನ್ ಜಾಲ್ಲೊ.
ನತಾಲಾಂಚಿ ಸಾಂಜ್ ಉದೆಲ್ಲಿ.
ಜೆಜುಚ್ಯಾ ಜನಾನಾಚೊ ನಾಟ್ಕುಳೊ ಪ್ರಾರಂಭ್ ಜಾಂವ್ಚ್ಯಾರ್ ಆಸ್‌ಲ್ಲೊ. ರಿಚ್ಚಾಕ್ ಮುಕ್ಡೆಂ ನೆಸೊನ್ಂಚ್ ಹೊ ನಾಟ್ಕುಳೊ ಪಳೆಂವ್ಕ್ ಪಿಚ್ಚಾನ್ ಖಡಕ್ ತಾಕಿದ್ ದಿಲ್ಲಿ. ನಾಂ ತರ್ ಅಪುಣ್ ಪಯ್ಶೆ ದಿಂವ್ಚೊನಾ ಮ್ಹಣ್ ಶರ್ತ್‌ಯೀ ಘಾಲ್ಲೆಂ. ಲೋಕ್ ಭರೊನ್ ವೊಮ್ತಾತಾಲೊ. ನಾಟ್ಕುಳ್ಯಾಚೊ ಪಯ್ಲೊ ಅರ್ಧೊ ಭಾಗ್ ಬರ‍್ಯಾನ್ ಸಂಪ್ಲೊ. ಮರ‍್ಯೆಕ್ ಥೊಡಿಂ ಅತ್ವಿಂ ಸವಾಲಾಂ ವಿಚಾರ‍್ನ್ ಸತ್ ಭಾಯ್ರ್ ಘಾಲ್ಯಾಂ ಮ್ಹಣ್ ಪಿಚ್ಚಾಕ್ ತಾಳ್ಣಿ ಆಯ್ಲಿ ತರೀ ಸಗ್ಳ್ಯಾ ಲೋಕಾಂ ಮುಖಾರ್ ಬಾಯ್ಲೆಕ್ ದುಖಯ್ಲೆಂ ತರ್ ದೆವಾನ್ ಲುಸಿಫೆರಾಕ್ ಸರ್ಗಾರ್‌ಥಾವ್ನ್ ಯೆಮ್ಕೊಂಡಾಕ್ ಲೊಟುನ್ ಘಾಲ್ಲೆಬರಿಂ ಮ್ಹಜೆಂ ಮುಕ್ಲೆಂ ಜಿವಿತ್ ಯೆಂವ್ಕೊಂಡಾ ಸಾರ್ಕೆಂ ಜಾತೆಲೆಂ ಮ್ಹಳ್ಳ್ಯಾ ಭಿಯಾನ್ ವೊಗೆಚ್ ರಾವ್ಲೊ.
ಉಪ್ರಾಂತ್ಲೊ ಭಾಗ್ ಭಡ್ವೊ ಜುಜೆಕ್ ಸೊಪ್ಣಾಂತ್ ದಿಷ್ಟಿಕ್ ಪಡ್ಚೊ. ಹ್ಯಾ ವಗ್ತಾ ಪಿಚ್ಚಾಕ್ ಭಡ್ವೊ ಜಾವ್ನ್ ವಯ್ರ್ ರಾವೊಂಕ್ ಆಸ್‌ಲ್ಲೆಂ. ಆನಿ ಚಾರ‍್ಲಿ ಜುಜೆ ಜಾವ್ನ್ ನಿದ್‌ಲ್ಲೊ. ಏಕ್‌ಪಾವ್ಟಿಂ ತಾಚ್ಯಾ ಆಂಗಾರ್ ಉಡೊನ್ ತಾಚೆಂ ಆಂತ್-ಪೀಂತ್ ಭಾಯ್ರ್ ಘಾಲ್ಯಾಂ ಮ್ಹಣ್ ಪಿಚ್ಚಾಕ್ ವೊಡ್ಣಿ ಆಯ್ಲಿ ತರೀ ತಾಣೆಂ ಶಿಂತಿದ್ ಸಾಂಬಾಳ್ಳೆಂ. ಪಯ್ಲೆಂಚ್ ಸಾಂಗ್‌ಲ್ಲ್ಯಾಬರಿಂ ತೆಂ ದೃಶ್ಶ್ಯ್ ಆರಂಭ್ ಜಾತಾನಾ ರಿಚ್ಚಾನ್ ಚಾರ್ ಪಾಂಚ್ ವ್ಹಡ್ ಗರ್ನಾಳಿ ಮಾರ‍್ಲ್ಯೊ. ಭಾಯ್ಲೆ ದಿವೆ ಸಕ್ಕಡ್ ಪಾಲ್ವಯ್ಲೆ. ಆನಿ ಅಂತ್ರಳಾರ್ ಕಿತೆಂಗೀ ಸೊಡ್ಲೆಂ, ತ್ಯಾ ಮಾರಿಫಾತ್ ದೋನ್ ತೀನ್ ಝಗ್ಲಾಣೆಂ ಆಯಿಲ್ಲ್ಯಾಬರಿಂ ಜಾಲೆಂ. ಹ್ಯಾಚ್ ವಗ್ತಾ ಭಡ್ವೊ ಪಿಚ್ಚಾ ಜಾಗೊ ಜಾಲೊ. ತಾಣೆಂ ಅಪ್ಣಾಚೆಂ ಸಕ್ಕಡ್ ಧಯ್ರ್ ಆರಾವ್ನ್ ಜುಜೆಕ್ ವಿಚಾರಿಲಾಗ್ಲೊ.
ಜುಜೆ, ಏಯ್ ನಕ್ಲಿ ಜುಜೆ, ಜುಜೆಚ್ಯಾ ವೆಸಾ ಭಿತರ್ ರಿಗ್‌ಲ್ಲ್ಯಾ ಪ್ರದ್ವಾರಿ ಚಾರ‍್ಲೇ, ಹಾಂವ್ ಹಾಂಗಾಸರ್ ಉಬೊಂ ಆಸ್ಚೊಂ ವೇಸ್ ಘಾಲ್ಲೊ ಭಡ್ವೊ ನ್ಹಯ್ ಬಗಾರ್ ಸರ್ಗಾರ್‌ಥಾವ್ನ್ ದೆಂವ್‌ಲ್ಲೊ ನೀಜ್ ಭಡ್ವೊ. ಸತ್ತ್ ಸಾಂಗ್, ತುಂ ಏಕ್ ಪ್ರದ್ವಾರೀ? ತುಜಿಂ ಪಾತ್ಕಾಂ ಚಡ್ ಜಾಲ್ಯಾಂತ್. ಹೆರಾಂಚ್ಯಾ ಬಾಯ್ಲಾಂಕ್ ಘೆವ್ನ್ ಭೊಂವ್ತಾಯ್. ತಾಂಚೆ ಸಾಂಗಾತಾ ಸಯ್ಲಾಪ್ ಕರ‍್ತಾಯ್, ಪ್ರದ್ವಾರ್ ಆಧಾರ‍್ತಾಯ್. ತುಂ ಪಿಚ್ಚಾಚ್ಯಾ ಬಾಯ್ಲೆ ಸಾಂಗಾತಾ ಕಿತ್ಲೆಪಾವ್ಟಿಂ ಭೊಂವ್ಲಾಯ್. ಸತ್ತ್ ಸಾಂಗ್ ಪಡ್ಪಶ್ಯಾ. ಪಿಚ್ಚಾಕ್ ಜಲ್ಮಾಲ್ಲ್ಯಾ ಭುರ್ಗ್ಯಾಚೊ ನೀಜ್ ಬಾಪಯ್ ಕೋಣ್?.
ಹಾಚಿಂ ಸವಾಲಾಂ ಆಯ್ಕೊನ್ ಲೋಕ್ ಸಕ್ಕಡ್ ಕಾಲುಬುಲೊ ಜಾಲೊ. ವಿಗಾರ್ ಆಕಾಂತ್ಲೊ. ಚಡ್ ಕರ‍್ನ್ ರಿಚ್ಚಾ ಭಿಯಾನ್ ಕಾಂಪುಂಕ್ ಲಾಗ್ಲೊ. ಕಿತ್ಯಾಕ್ ಮ್ಹಳ್ಯಾರ್ ವಿಗಾರಾನ್ ಭಡ್ವ್ಯಾಚೊ ಪಾತ್ರ್ ರಿಚ್ಚಾಕ್ ದಿಲ್ಲೊ. ಆನಿ ಆತಾಂ ಥಂಯ್ಸರ್ ಸಯ್ತಾನಾಬರಿಂ ಉಲಂವ್ಚೊ ಭಡ್ವೊ ಲೋಕಾಂಚ್ಯಾ ನದ್ರೆಂತ್ ರಿಚ್ಚಾ ಜಾವ್ನಾಸ್‌ಲ್ಲೊ. ಪಿಚ್ಚಾ ಅಸಲಿಂ ಸವಾಲಾಂ ಕರಿತ್ ಮ್ಹಣ್ ರಿಚ್ಚಾಕ್ ಕಿತೆಂಚ್ ಖಬರ್ ನಾತ್‌ಲ್ಲಿ. ಭಡ್ವ್ಯಾಚಿಂ ಸವಾಲಾಂ ಆಯ್ಕೊನ್ ಚಾರ‍್ಲಿ ಜುಜೆಕ್ ಸ್ಟೇಜ್ ಸೊಡ್ನ್ ಹಾಂಗಾಥಾವ್ನ್ ಧಾಂವ್ಚೆಂಗೀ, ಕಾಂಯ್ ಆಯ್ಕಾನಾತ್‌ಲ್ಲ್ಯಾಬರಿಂ ವೊಗೆಚ್ ನಿದ್ಚೆಂಗೀ ವಾ ಉಟೊನ್ ಭಡ್ವ್ಯಾಕ್ ದೋನ್ ಸೊಡ್ಚೆಂಗೀ ಮ್ಹಣ್ ಏಕ್‌ಯೀ ಕಳೊಂಕ್ ನಾ. ಚಾರ‍್ಲಿಥಾವ್ನ್ ಎದೊಳ್‌ವರೇಗ್ ಜಾಪ್ ಯೇವ್ನಾತ್‌ಲ್ಲಿ ಪಳೆವ್ನ್ ಪಿಚ್ಚಾ ಮಾತ್ರ್ ತಾಳೊ ಪಿಂಜುನ್ ಪಿಂಜುನ್ “ಸಾಂಗ್ ಪಡ್ಪಶ್ಯಾ, ಜಾಪ್ ದೀ” ಮ್ಹಣ್ ಭಡ್ವ್ಯಾಚ್ಯಾ ವೆಸಾರ್ ಸಯ್ತಾನಾಬರಿಂ ಬೊಗೊಳ್ನ್ ಆಸ್‌ಲ್ಲೊ. ಪಿಚ್ಚಾಚಿ ಬಾಯ್ಲ್ ಮಾತ್ರ್ ಮ್ಹಜೊ ನಾಟ್ಕುಳೊ ಹಾಂಗಾಸರ್ ಸಂಪ್ಲೊ ಮ್ಹಣೊನ್ ಕಾತ್ತ್ಯಾಚ್ಯಾ ಪಾಟಿರ್ ನ್ಹಯ್ ತರೀ ಕಾತ್ತ್ಯಾಬರಿಂ ತಕ್ಲಿ ಆಡ್ ಘಾಲ್ನ್ ಘರಾ ಚಲ್ತಚ್ ರಾವ್ಲಿ. ಆನಿ ಅಪ್ಣೆಂ ವೊಗೆಚ್ ರಾವ್ಲ್ಯಾರ್ ಮುಕ್ಲಿ ಗತ್ ಪಾಡ್ ಜಾಯ್ತ್ ಮ್ಹಣ್ ರಿಚ್ಚಾ ಸ್ಟೇಜಿರ್ ಚಡೊನ್ ಅಪ್ಣಾಚೆಂ ಮುಕ್ಡೆ ಕಾಡ್ನ್ ಉಡವ್ನ್, ಲೋಕಾಕ್ ಅಪ್ಣಾಚಿ ಒಳಕ್ ದೀವ್ನ್ ಸಾಂ ಜುಜೆಚ್ಯಾ ಪಾಂಯಾಕ್ ಪಡ್ಲೊ.
ರಿಚ್ಚಾಕ್ ಪಳೆವ್ನ್ ನಿದೆಂತ್ಲೊ ಉಟ್‌ಲ್ಲೊ ಜುಜೆ ಚಾರ‍್ಲಿ ಆನಿ ಕಿತೆಂ ಭಡ್ವ್ಯಾಕ್ ಧರ‍್ಯಾಂ ಮ್ಹಣ್ತಾನಾ ಭಡ್ವೊ ಪಿಚ್ಚಾ ಅಪ್ಣಾಚಿ ಒಳೊಕ್ ಕೊಣಾಯ್ಕಿ ಮೆಳಾನಾ ಜಾಂವ್ಚ್ಯಾಕ್ ರಿಚ್ಚಾನ್ ಸ್ಟೇಜಿರ್ ಉಡಯಿಲ್ಲೆಂ ಮುಕ್ಡೆಂ ನೆಸೊನ್, ಭಡ್ವ್ಯಾಚಿ ಜಡ್ ಮುಸ್ತಾಯ್ಕಿ ಉಡೊನ್ ಧಾಂವಾಧಾಂವಿ ಆಂಗ್ಡಿ ಧಾಂವ್ಲೊ.
ದುಸ್ರ್ಯಾ ದಿಸಾ ಪಿಚ್ಚಾನ್ ಪಯ್ಶೆ ದೀವ್ನ್ ರಿಚ್ಚಾಚೆಂ ತೋಂಡ್ ಧಾಂಪಯ್ಲೆಂ ತರ್ ನಾಟ್ಕುಳೊ ಜಾತಾನಾ ಪಿಚ್ಚಾ ಆಂಗ್ಡಿಂತ್‌ಚ್ ಅಸ್‌ಲ್ಲೊ ಆನಿ ತೊ ರಾತಿಕ್ ಆಂಗ್ಡಿಂತ್‌ಚ್ ನಿದ್‌ಲ್ಲೊ ಮ್ಹಣ್ ಪಿಚ್ಚಾನ್ ಸಾಂಗ್ತಾನಾ ನಾಟ್ಕುಳ್ಯಾಂತ್ ಕಿತೆಂ ಸಕ್ಕಡ್ ಘಡ್ಲೆಂ ತಾಚಿ ಖಬರ್ ಪಿಚ್ಚಾಕ್ ಮೆಳೊಂಕ್ ನಾ ಮ್ಹಳ್ಳೆಂ ಚಿಂತುನ್ ಧನಿ ಚಾರ‍್ಲಿ ಸಮಾದಾನ್ ಪಾವ್ಲೊ. ಪಿಚ್ಚಾಚ್ಯಾ ಬಾಯ್ಲೆನ್ ಮರ‍್ಯಾದ್ ಉರಂವ್ಚ್ಯಾಕ್ ತ್ಯಾ ನಾಟ್ಕುಳ್ಯಾ ದೀಸ್ ಪಾಂಗೊರ್‌ಲ್ಲೊ ಮರ‍್ಯೆಚೊ ವೇಸ್ ಮುಂದರ‍್ಸಿಲೊ ಆನಿ ಹ್ಯೊ ಸರ್ವ್ ಸಂಗ್ತಿ ತಿಣೆಂ ತಿಚ್ಯಾ ಕಾಳ್ಜಾಂತ್ ಜಗವ್ನ್ ದವರ‍್ಲ್ಯೊ. ಪಿಚ್ಚಾ ಮಾತ್ರ್ ತಾಚ್ಯಾ ಸವಾಲಾಂಕ್ ಜಾಪಿ ಮೆಳ್ನಾಸ್ತಾನಾ ಜಲ್ಮಾಲ್ಲ್ಯಾ ಪುತಾಕ್ ಪೊಸಿಜಾಯಿಚ್ ಮ್ಹಳ್ಳ್ಯಾನ್ ಸಾಂ ಜುಜೆಬರಿಂ ಅಪ್ಲ್ಯಾ ಪುತಾ ಫೆಲಿಸನಾಚೊ ಪೊಸ್ಕೊ ಬಾಪಯ್ ಜಾವ್ನ್ಂಚ್ ಉರ‍್ಲೊ.
► ರೋಶು, ಬಜ್ಪೆ
