ಕಾಲ್ ರಾತಿಂ ಪರ್ತ್ಯಾನ್ ಏಕ್ ಪಾವ್ಟಿಂ ಟೆಲಿವಿಶನಾರ್ ಪ್ರಸಾರ್ ಜಾಂವ್ಚೆಂ ಮುತ್ಸದ್ದಿ ಚಲಾ ಒಫಿಸ್ ಓಫಿಸ್ ಫಿಲ್ಮ್ ಪಳೆವ್ನ್ ಬಸ್ಲೊಂ. ಆದ್ಲ್ಯಾ ವರ್ಸಾ ಜಾಲ್ಲೆಂ  ಹೆಂ ಫಿಲ್ಮ್ ಥೊಡ್ಯಾ ತೇಂಪಾ ಆಧಿಂ ಹಾಂವೆ ಪಳಯಿಲ್ಲೆಂ.  ಪಂಕಜ್ ಕಪೂರ್ ( ಶಾಹೀದ್ ಕಪೂರಾಚೊ ಡ್ಯಾಡಿ ) ಹ್ಯಾ ಪಿಂತುರಾಂತ್ ಮುಕೆಲ್ ಪಾತ್ರ್ ಖೆಳ್ಳಾ, ಮುತ್ಸದ್ಧಿ ಲಾಲ್.  ಹಾಂವ್ ಮುಂಬಯ್ ಆಸ್ತಾನಾ, ಚಡುಣೆಂ ಸಾತ್ ಆಟ್ ವರ್ಸಾಂ ಆದಿಂ  ಸಬ್ ಟೀವಿಚೆರ್ ( ಆತಾಂ ಬೋವ್‌ಶಾ ಹೆಂ ಚಾನೆಲ್ ಸೋನಿ ಕಡೆ ಆಸಾ ) ಒಫಿಸ್ ಒಫಿಸ್ ನಾಂವಾಚೆಂ ಸೀರಿಯಲ್ ಫಾಯ್ಸ್ ಜಾತಾಲೆಂ ಆನಿ ಹಾಂತೂಯ್ ಹೋಚ್ ಪಂಕಜ್ ಕಪೂರ್ ಮುಕೆಲ್ ಪಾತ್ರ್ ಖೆಳ್ಟಾಲೊ. ತ್ಯಾ ಸೀರಿಯಲಾಂತ್ ತಾಚೇ ಸಾಂಗಾತಾ ಆಸ್‌ಲ್ಲೆ ಚಡಾವತ್ ಸರ್ವ್ ಕಿರ್‌ದಾರ್, ಪಟೇಲ್, ಪಾಂಡೆ,  ಶುಕ್ಲಾ ,  ಉಶಾಜೀ ಆನಿ ಕೆದಾಳಾ ಪಳಯ್ಲ್ಯಾರೀ ಸಮೋಸಾ ಖಾಂವ್ಚೊ ಭಾಟಿಯಾ ಸಗ್ಳೆ  ಹ್ಯಾ ಫಿಲ್ಮಾಂತೀ ಆಸಾತ್. ಆನಿ ಡಾಯ್ಲೊಗ್ ಸಯ್ತ್ ಚಡುಣೆ ತೇಚ್ ಆಸಾತ್. ಉಶಾಜೀ ಮ್ಹಣ್ಚೆಂ -  ವಹೀ ತೋ.....  ಶುಕ್ಲಾನ್ ಮ್ಹಣ್ಚೆಂ -  ದೋ ಭಾತೆಂ ಹೋ ಸಕ್ತೀ ಹೈ    

ಸಬ್ ಟೀವಿಚೆರ್ ಒಫಿಸ್ ಒಫಿಸ್ ಸೀರಿಯಲ್ ಚಲೊನ್ ಆಸ್ತಾನಾ ಎಕೆಕಾ ಇಪಿಸೋಡಾಕ್ ಎಕೇಕ್ ವಿಶಯ್ ಘೆತಾಲೆ ತರ್ ,  ಹ್ಯಾ  ಫಿಲ್ಮಾಂತ್ ಎಕಾ ಪ್ರಾಯ್ಮರಿ ಇಸ್ಕೊಲಾಚಾ ನಿವೃತ್ತ್ ಮೇಸ್ತ್ರಿನ್ ಆಪ್ಲ್ಯಾ ಪಿಡೇಸ್ತ್ ಭಾಯ್ಲೆಕ್ ಸರ್ಕಾರಿ ಆಸ್ಪತ್ರೆಕ್ ಭರ್ತಿ ಕರ್ಚೆಂ, ಆಸ್ಪತ್ರೆಚಾ ಬೆಪಾರ್ವ್ಯಾವರ್ವಿಂ ತಿಚೆಂ ಮರಣ್, ತಿಚೆಂ ಮೋರ್ನ್ ಆನಿ ಮೊರ್ನಾ ಉಪ್ರಾಂತ್ಲ್ಯಾ ಧರ್ಮಿಕ್ ರಿವಾಜಿಂಕ್ ಪವಿತ್ ಜಾಗ್ಯಾಂಕ್ ಮುತ್ಸದ್ಧಿಚೆಂ ಪಯ್ಣ್, ಆನಿ ಹ್ಯಾಚ್ ವೆಳಾ ತಾಚೆಂ ಘರ್ ಸೊಧುನ್ ಆಯಿಲ್ಲ್ಯಾ ಪೆನ್ಶನ್ ಅಧಿಕಾರಿನ್ ಸೆಜಾರ‍್ಚ್ಯಾ ಗುಪ್ತಾನ್ ಮುತ್ಸದ್ಧಿ ಪಯ್ಶಿಲ್ಯಾ ಗಾಂವಾಂಕ್ ಗೆಲಾ ಮ್ಹಳ್ಳೆಂ ಅಪಾರ್ಥ್ ಕರ್ನ್ ಘೆವ್ನ್ ಮುತ್ಸದ್ಧಿ ಮೆಲಾ ಮ್ಹಣ್ ದಿಂವ್ಚೊ ರಿಪೋರ್ಟ್ ,  ಪೆನ್ಶನ್ ಒಫಿಸಾಂತ್ ಆಪುಣ್ ಮೊರೊಂಕ್ ನಾ, ಜೀವ್ ಆಸಾಂ ಮ್ಹಣ್ ರುಜು ಕರುಂಕ್ ಮುತ್ಸದ್ಧಿನ್ ಭೊಗ್ಚೆ ವಳ್ವಳೆ ಆಸಾತ್. ಭೃಶ್ಟ್ ವೆವಸ್ಥಾ ಕಶೆಂ ಮೆಟಾ ಮೆಟಾಕ್ ಲೋಂಚ್ ಮಾಗೊನ್ ಎಕಾ ಸಾದ್ಯಾ ಮನ್ಶ್ಯಾಚೊ ಜೀವ್ ಪಿಳ್ಟಾ ಮ್ಹಳ್ಳೆಂ ಆಪುರ್ಬಾಯೆಚೆಂ ಚಿತ್ರಣ್ ಆಸಾ. ಕಿತ್ತೂನ್ ಮ್ಹಳ್ಯಾರ್ ಪವಿತ್ ನಂಯ್ಚಾ ತಡಿರ್ ಬಾಯ್ಲೆಚೆಂ ಕರ್ಮ್ ಕರ್ತಾನಾ ಪಂಡಿತ್ ಪಯ್ಶೆ ಪಿಳ್ಚೆ ಪಿಳುನ್, ಮುತ್ಸದ್ಧಿ ಆನಿ ತಾಚೊ ಪೂತ್ ನಂಯ್ತ್ ಬುಡೊಂಕ್ ಗೆಲ್ಲೆ ತವಳ್,  ತಡಿರ್ ದವರಿಲ್ಲೆಂ ತಾಂಚೆ  ವಸ್ತುರ್ ಸಯ್ತ್ ಚೋರ್ನ್ ವರ್ತಾತ್. 

ಬಾಯ್ಲೆಚೆಂ ಕರ್ಮ್ ಮುಗ್ಧುನ್ ಮುತ್ಸದ್ಧಿಲಾಲ್ ಘರಾ ಯೆತಾನಾ ಘರಾಂತ್ ವೀಜ್ ನಾ. ಆನಿ ಜೆನ್ನಾಂ ಮುತ್ಸದ್ಧಿ ಆಪ್ಲೆಂ ಪೆನ್ಶನ್ ಘೆಂವ್ಕ್ ಪೆನ್ಶನ್ ಧಫ್ತರಾಕ್ ವೆತಾ , ಭಾಟಿಯಾ ಥಾವ್ನ್ ಶುಕ್ಲಾ , ಉಶಾಜೀ ಥಾವ್ನ್ ಪಾಂಡೆ ಪರ್ಯಾಂತ್ , ಧಪ್ತರಾಂತ್ಲೆ  ಸಗ್ಳೆ  ಮುತ್ಸದ್ಧಿ ಮೆಲಾ ದೆಕುನ್  ಪೆನ್ಶನ್ ದೀಂವ್ಕ್ ಜಾಯ್ನಾ ಮ್ಹಣ್ ಸತಾಂವ್ಕ್ ಸುರು ಕರ್ತಾತ್. ಪೆನ್ಶನ್ ದೀಜೆ ತರ್ ಮುತ್ಸದ್ಧಿಕ್ ತೋ ಜೀವ್ ಆಸಾ ಮ್ಹಳ್ಳೊ ದಾಕ್ಲೊ , ಸಾಕ್ಸ್ ಹಾಡುಂಕ್ ಸಾಂಗ್ತಾತ್.  ಸಾಕ್ಶೆಚೆಂ ಕಾಗತ್  ಹಾಡುಂಕ್ ಮ್ಹಣ್  ಮುತ್ಸದ್ಧಿ ಜೆನ್ನಾಂ ತಾಣೆ ಸಬಾರ್ ವರ್ಸಾಂ ಶಿಕವ್ನ್ ನಿವೃತ್ತ್ ಜಾಲ್ಲ್ಯಾ ಇಸ್ಕೊಲಾಕ್ ವೆತಾ , ಥಂಯ್ ಮುತ್ಸದ್ಧಿ ಮೆಲಾ ಮ್ಹಣ್ ತಾಚೊ ಪುತ್ಳೊ ಕರ್ನ್ ಝೆಲೊ ಘಾಲ್ತೇ ಆಸ್ತಾತ್. ಮುತ್ಸದ್ಧಿ ಜೆನ್ನಾ ಮುಕೆಲ್ ಮೇಸ್ತ್ರಿಕಡೆ ಏಕ್ ಕಾಗತ್ ಬರವ್ನ್ ದೀಂವ್ಕ್ ವಿನತಿ ಕರ್ತಾ , ತೋ  ಮುತ್ಸದ್ಧಿಕ್ ಇತ್ಲಿಂ ವರ್ಸಾಂ ಏಕ್ ಮೇಸ್ತ್ರಿ ಜಾವ್ನಾಸ್ಲ್ಯಾರೀ ಭೂತ್ ಆನಿ ವರ್ತಮಾನ್ ಕಾಳಾಚಿಂ ವಾಕ್ಯಾಂ ಬರಂವ್ಕ್  ಕಳಾನಾಂತ್ ಮ್ಹಣ್ ತಾಚಿಂ ಖೆಳ್ಕುಳಾಂ ಕರ್ತಾ.  ಡೀಸಿ ಜಾಲ್ಲ್ಯಾ ತಾಚ್ಯಾ ವಿದ್ಯಾರ್ಥಿಕಡೆಚ್ ಗೆಲ್ಯಾರೀ ತಾಕಾ ನ್ಯಾಯ್ ಮೆಳಾನಾ ಮಾತ್ ನ್ಹಯ್, ಅಫಿದಾವಿತಾಚೆರ್ ರುಜು ಕರುಂಕ್ ತಾಚೋಚ್ ವಿದ್ಯಾರ್ಥಿ ಡೀಸಿ,  ಮುತ್ಸದ್ದಿಕಡೆ ಲೋಂಚ್ ಘೆತಾ. ಇತ್ಲೆಂ ಕೆಲ್ಯಾರೀ ಪೆನ್ಶನ್ ಧಪ್ತರಾಂತ್ಲೆಂ ತಾಚೆಂ ಪೆನ್ಶನ್ ದೀನಾಂತ್. ಮುತ್ಸದ್ಧಿ ಜೀವ್ ಆಸಾ ಮ್ಹಣ್ ರುಜ್ವಾತ್ ಕಿತೆಂ ? ಕೆದಾಳಾ ತರೀ ಆರ್ವಿಲ್ಯಾ ದಿಸಾಂನಿ ತುಜೇರ್ ಪೊಲಿಸ್ ಕೇಸ್ ಜಾಲ್ಯಾ ? ಕೋಡ್ತಿಕ್ ಧಂಡ್ ಭರ್‌ಲ್ಲಿ ರಸೀತ್ ಆಸಾ ? ಆಸ್ಲ್ಯಾರ್ ಹಾಡ್ ಪೆನ್ಶನ್ ದಿತಾಂವ್ ಮ್ಹಣ್ ಚಿಡಾಯ್ತಾತ್.  ಹ್ಯಾ ಸಗ್ಳ್ಯಾ ಗಜಾಲಿಂಚೇರ್ ಹೈರಾಣ್ ಜಾವ್ನ್ ಮುತ್ಸದ್ಧಿ ಏಕ್ ಯೆವ್ಜಣ್ ಕರ್ತಾ. ಪೆನ್ಶನ್ ಧಪ್ತರಾಂತ್ಲ್ಯಾ ಸಗ್ಳ್ಯಾಂಕ್ ಇಂಡಿಯಾ ಗೇಟ್ ಆಪಯ್ತಾ, ಪಬ್ಲಿಕಾಕ್ ಜಮಯ್ತಾ, ಎಕೆಕ್ಲ್ಯಾಕ್‌ಚ್ ನಾಗ್ಡೆಂ ಕರ್ತಾ ಆನಿ ಕಾನ್ಸುಲಾಕ್ ವಾಜಯ್ತಾ. ತಿತ್ಲ್ಯಾರ್ ಪುಲಿಸ್ ಯೇವ್ನ್ ಮುತ್ಸದ್ದಿಕ್ ಕಯ್ದ್ ಕರ್ತಾತ್ ಆನಿ  ಕೇಜ್ ಜಾತಾ.  ಸಗ್ಳ್ಯಾಕ್ ಸಗ್ಳೆಂ ಪೆನ್ಶನ್ ಧಪ್ತರ್‌ಚ್ ಮುತ್ಸದ್ಧಿಕ್ ಮುಗ್ಧುನ್ ಸೊಡುಂಕ್ ಕಮರ್ ಭಾಂದ್ತಾ.

ಜೆನ್ನಾಂ ಮುತ್ಸದ್ಧಿಲಾಲಾಕ್ ನಿತಿದಾರಾ ಸಮೊರ್ ಉಭೆಂ ಕರ್ತಾತ್, ಮುತ್ಸದ್ಧಿ ಆಪ್ಣೆಂ ಕೊಣಾಕೀ ಥಾಪಡ್ ಮಾರುಂಕ್ ನಾ ಮ್ಹಣ್ಟಾ. ಪೆನ್ಶನ್ ಧಫ್ತರಾಂತ್ಲೆ ಭಾಟಿಯಾ ಥಾವ್ನ್ ಶುಕ್ಲಾ ಪರ್ಯಾಂತ್ ಭಾಸ್ತಾತ್ ಮುತ್ಸದ್ಧಿನ್ ಥಾಪಡ್  ಮಾರ್ಲಾಂ, ಮುತ್ಸದ್ಧಿನ್ ಥಾಪಡ್ ಮಾರ್ಲಾಂ !  ಮುತ್ಸದ್ಧಿ ಶಾಂತ್‌ಪಣಿ ಮ್ಹಣ್ತಾ - ಜರ್ ಮುತ್ಸದ್ಧಿ ಲಾಲ್ ತುಮ್ಚ್ಯಾ ಬುಕಾಂನಿ ಮೆಲಾಂ ತರ್ ಮೆಲ್ಲ್ಯಾ ಮನ್ಶ್ಯಾನ್  ಕಶೆಂ ತುಮ್ಕಾಂ ಥಾಪಡ್ ಮಾರ್ಚೆಂ ?  ಸಗ್ಳಿ ಕೇಜ್ ಪೆನ್ಶನ್ ಧಪ್ತರಾಂತ್ಲ್ಯಾಚೇರ್ ಘುಂವೊನ್ ರಾವ್ತಾ. ನಿತಿದಾರ್ ತ್ಯಾಚ್ ಇಂಡಿಯಾ ಗೇಟ್ ಜಾಗ್ಯಾರ್ ಪಬ್ಲಿಕ್ ಅದಾಲತ್ ಲಾಯ್ತಾ. ಥಂಯ್ಸರೀ ಭೃಶ್ಟ್ ಅಧಿಕಾರಿ ಖೆಳ್ ಖೆಳೊಂಕ್ ವಚೊನ್ ತಾಣಿಂಚ್ ವಿಣ್ಲೆಲ್ಯಾ ಜಾಳಾಂತ್ ಸಾಂಪಾಡ್ಟಾತ್. ಆಪುಣ್ ಜೀವ್ ಆಸಾಂ ಮ್ಹಣ್ ರುಜು ಕರುಂಕ್ ಮುತ್ಸದ್ಧಿ ಕೋಡ್ತಿಕ್ ಏಕ್ ರುಪಯ್ ಧಂಡ್ ಭರ್ನ್ ರಶೀತ್ ಘೆತಾ.

ಹೆಂ ಪಿಂತುರ್ ಆದ್ಲ್ಯಾ ಮ್ಹಣ್ಜೇ ೨೦೧೧ ವ್ಯಾ  ವರ್ಸಾಚೆಂ. ಸೀರಿಯಲ್ ಕಾಂಯ್ ಸಾತಾಟ್ ವರ್ಸಾಂ ಥಾವ್ನ್ ಚಾಲು ಆಸಾ.

ರಾಜೀವ್ ಮೆಹ್ರಾ ನಿರ್ದೇಶನಾಚೆಂ ಹೆಂ ಪಿಂತುರ್ ಕಾಲ್ ರಾತಿಂ,  ಪರ್ತ್ಯಾನ್ ಪಳೆವ್ನ್ ಉಟ್ತಾನಾ ಧುತ್ತ್ ಕರ್ನ್ ಮ್ಹಜ್ಯಾ ಮತಿಕ್ ಆಯಿಲ್ಲೊ ಕೆ ಪಿ ಪೂರ್ಣಚಂದ್ರ ತೇಜಸ್ವಿಚೊ ತಬರ ಶೆಟ್ಟಿ [ ಆದ್ಲ್ಯಾಚ್  ಹಫ್ತ್ಯಾಂತ್  ಹಾಂವ್,  ಅಬುದಾಬಿ ಥಾವ್ನ್ ಗಾಂವಾಂಕ್ ಆಯಿಲ್ಲೊ ಅಲ್ಪೋನ್ಸ್ ದಾಟ್ಟು ಆನಿ ಮಾಲ್ಘಡೊ ಕೊಂಕ್ಣಿ ಲೇಕಕ್ ಮನು ಬಾಹ್ರೆಯ್ನ್ ಹಾಂಚಾ ಸಾಂಗಾತಾ ತೀರ್ಥಹಳ್ಳಿ ರಾಶ್ಟ್ರ್ ಕವಿ ಕುವೆಂಪುಚಿ ಸಮಾಧಿ , ಕವಿಶೈಲ, ಕುವೆಂಪು ಜಲ್ಮಾಲ್ಲೆಂ ಘರ್ ಆನಿ ತೇಜಸ್ವಿ ಸ್ಮಾರಕ್ ಹಾಂಗಾ ವಚೊನ್ ಆಯಿಲ್ಲ್ಯಾಂವ್ ]  

ತಬರ ಶೆಟ್ಟಿಚಿ ಆನಿ ಮುತ್ಸದ್ಧಿ ಲಾಲ್ ಹಾಂಚಿ ಕಾಣಿ ಚಡುಣೆ ಏಕ್‌ಚ್. ದೊಗಾಂಕೀ ವೆವಸ್ಥೆನ್ ಪೆನ್ಶನಾ ಖಾತಿರ್ ದಿಂವ್ಚೆ ವಳ್ವಳೆ ಆನಿ ಕಶ್ಟ್. ತಬರಾಚಿ ಕಾಣಿ ಫಿಲ್ಮ್ ಆಯಿಲ್ಲೆಂ ೧೯೮೬ - ೮೭ ವ್ಯಾ ವರ್ಸಾ. ತೇಜಸ್ವಿನ್ ತಿ ಕಾಣಿ ಕಾಂಯ್ ಥೊಡ್ಯಾ ವರ್ಸಾಂ ಆದಿಂ ಬರಯಿಲ್ಲಿ ಜಾಂವ್ಕ್ ಪುರೊ.

ತಬರ ಶೆಟ್ಟಿಕ್ ಭುರ್ಗಿಂ ನಾತ್ಲಿಂ. ತಾಕಾ ಆಸುಲ್ಲೊ ಏಕ್‌ಚ್ ಸಾಂಗಾತ್ ಆನಿ ಆಸ್ರೊ ಮ್ಹಳ್ಯಾರ್ ತಾಚಿ ಭಾಯ್ಲ್ ಮಾತ್.  ಪೆನ್ಶನ್ ಮೆಳಾನಾಸ್ತಾನಾ , ವೆಳಾರ್ ತಿಕಾ ಚಿಕಿತ್ಸಾ ದೀಂವ್ಕ್ ಸಕಾನಾಸ್ತಾನಾ, ತಿಕಾ ಗೋಡ್ ಮುತಾಚಿ ಪಿಡಾ ಗಡೀಸ್ ಜಾವ್ನ್ , ತಿಚೊ ಪಾಯ್ ಕುಸೊನ್ ವಚೊನ್, ಗ್ಯಾಂಗ್ರೀನ್ ಜಾವ್ನ್ ತಿ ಮೊರ್ತಾ. ತಿ ಪಿಡೆನ್ ವೊಳ್ವೊಳ್ತಾನಾ ತಿಚೆ ಕಶ್ಟ್ ಪಳೆಂವ್ಕ್ ತಾಂಕಾನಾಸ್ತಾನಾ ತಬರ ಕಸಾಪ್ಪ್ಯಾಲಾಗಿಂ ವಚೊನ್ ಮಾಸ್ ಚಾಚಾಂವ್ಚ್ಯಾ ಕೊಯ್ತ್ಯಾಂತ್ ತಿಚೊ ಪಾಯ್ ಕಾತ್ರುನ್ ಕಾಡ್ಯೆತ್‌ಗೀ ಮ್ಹಣ್ ಸಯ್ತ್ ವಿಚಾರ್ತಾ. [ ಪಿಂತುರಾಂತ್ ಹೆಂ ದೃಶ್ಯ್ ಗಿರೀಶ್ ಕಾಸರವಳ್ಳಿನ್ ಬೋವ್ ಮಾರ್ಮಿಕ್ ಥರಾನ್ ಪಿಂತ್ರಾಯ್ಲಾಂ ] ಜೆನ್ನಾಂ ತಬರ ಶೆಟ್ಟಿಕ್ ತಾಚೆಂ ಪೆನ್ಶನ್ ಮೆಳ್ಟಾ ತವಳ್ ತಾಚ್ಯಾ ಜಿಣ್ಯೆಚೆಂ ಸರ್ವ್ ಸಂಪ್ಲೆಲೆಂ ಆಸ್ತಾ ಆನಿ ತಾಣೆ ನಿವೃತ್ತೆ ಪರ್ಯಾಂತ್ ಸೆವಾ ದಿಲ್ಲ್ಯಾ ಧಪ್ತರಾ ಮುಕಾರ್ ರಾವೊನ್ ತೋ ಕಿಂಕ್ರ‍ಾಟ್ತಾ. ಪೇಂಟ್ ಉಲಯ್ತಾ - ತಬರ ಶೆಟ್ಟಿ ಪಿಸೊ ಜಾಲಾ.

ಮುತ್ಸದ್ದಿಲಾಲ್ ಹಾಚಿ ಕಾಣಿ ಆರ್ವಿಲಿ. ೨೦೦೦ ವ್ಯಾ ವರ್ಸಾಂ ಉಪ್ರಾಂತ್ಲಿ. ಚಡ್ ಮ್ಹಳ್ಯಾರ್ ಹ್ಯೊ ದೋನ್ ಕಾಣಿಯೊ ಬರಂವ್ಚ್ಯಾ ಕಾಳಾಂತ್ ಚಡುಣೆಂ ವೀಸ್ ತೆ ಪಂಚ್ವೀಸ್ ವರ್ಸಾಂಚೊ ಅಂತರ್ ಆಸೊಂಕ್ ಪುರೊ. ಹೊ ಪಂಚ್ವೀಸ್ ವರ್ಸಾಂಚೊ ಅಂತರ್ ಮ್ಹಳ್ಯಾರ್ , ಸ್ವತಂತ್ರ್ ಭಾರತಾಕ್  ತೀಸ್ ತೆ ಪಾಂತೀಸ್ ವರ್ಸಾಂ ಪಿರಾಯ್ ಭರ್ತಾನಾ ವಾ ಭರ್ಲ್ಯಾ ಉಪ್ರಾಂತ್ ಹ್ಯೊ ದೊನೀ ಕಾಣಿಯೊ ಬರಯ್ಲ್ಯಾತ್. ಆನಿ ಆಜ್ ೨೦೧೨ ವರಸ್ ಧಾಂವ್ತೇ ಆಸಾ ಆನಿ ಲೋಂಚ್ ಆನಿ ಭೃಶ್ಟಾಚಾರಾ ವಿರೋದ್ ಅಣ್ಣಾ ಹಜಾರೆ, ಅರವಿಂದ ಕೇಜ್ರಿವಾಲ್, ಕಿರಣ್ ಬೇಡಿ, ಪ್ರಶಾಂತ್ ಭೂಶಣ್ ತಸಲೆ ಝುಜ್ತೇ ಆಸಾತ್. ಇಂಡಿಯಾ ಎಗೆನೆಸ್ಟ್ ಕರಪ್ಶನ್.  ಎಕೆಕಾ ದಿಸಾ ಕೇಜ್ರಿವಾಲ್ ಎಕೇಕ್ ನವಿ ಗಜಾಲ್ ಲೊಕಾ ಮುಕಾರ್ ದವರ್ತೇ ಆಸಾ, ಭೃಶ್ಟ್ ವೆವಸ್ಥೆಕ್ ನಾಗ್ಡೊ ಕರ್ತೇಂ ಆಸಾಂ ಮ್ಹಣ್ ತೋ ಮ್ಹಣ್ಟಾ.

ಹಾಂವ್ ಹ್ಯೊ ಗಜಾಲಿ ಕಿತ್ಯಾಕ್ ಬರಯ್ತೇ ಆಸಾಂ ಮ್ಹಳ್ಯಾರ್ - ೧೯೮೦ ಹ್ಯಾ ಧಾಕ್ಡ್ಯಾಚೊ ತಬರ ಶೆಟ್ಟಿ - ೨೦೦೦ ಹ್ಯಾ ಧಾಕ್ಡ್ಯಾಚೊ ಮುತ್ಸದ್ಧಿ ಲಾಲ್ ಆನಿ ೨೦೧೦ ವ್ಯಾ ಧಾಕ್ಡ್ಯಾಚೊ ಅರವಿಂದ ಕೇಜ್ರಿವಾಲ್ ಹಾಂಚಿ ಮನಾಸ್ಥಿತಿ, ವೇಗ್ ಆನಿ ಕೊಮನ್ ಮ್ಯಾನ್ ಒಫ್ ಇಂಡಿಯಾ ಹಾಕಾ ತಾಣಿ ಪ್ರತಿನಿಧಿತ್ವ್ ಕರ್ಚಿ ರೀತ್ , ಪ್ರಖರತಾ ದಾಕಲ್ ಕರುಂಕ್ ವರವ್ನ್ ಪಳೆಂವ್ಕ್.  ಇಲ್ಲೆಂ ಸುಕ್ಶಿಮಾಯೆನ್ ಪಳೆಯ್ಲ್ಯಾರ್ , ತಬರ ಶೆಟ್ಟಿಚೆಂ ೧೯೮೦ ವ್ಯಾ ಧಾಕ್ಡ್ಯಾಚೆಂ ಅಸಹಾಯಕ್‌ಪಣ್ ಕಶೆಂ ೨೦೦೦ ವ್ಯಾ ಧಾಕ್ಡ್ಯಾಂತ್ ಮುತ್ಸದ್ಧಿಲಾಲ್ ಥಂಯ್ ಮಾಯಾಗ್ ಜಾಲೆಂ ಆನಿ ಕಾನೂನೀ ಚವ್ಕಟಾ ಭಿತರ್ ತಾಣೆ ಬೋವ್ ಶಾಂತ್‌ಪಣಿ ಆನಿ ಶಾಣೆಪಣಾನ್ ಲೊಕಾಕ್ ಆಪ್ಲ್ಯಾ ಸಾಂಗಾತಾ ಘೆವ್ನ್ ಪರ್ಯಾಯ್ ಸೊಧ್ಲೊ ?  ಆನಿ ಆಜ್ ೨೦೧೦ ವ್ಯಾ ಧಾಕ್ಡ್ಯಾಂತ್ ಮಾಹೆತ್ ಹಕ್ಕ್ ಕಾಯ್ದೊ ಆನಿ ಹೆರ್ ಸಾಧನಾಂ ವಾಪರ್ನ್ ಅರವಿಂದ ಕೇಜ್ರಿವಾಲ್ ಕಿತ್ಲ್ಯಾ ಎಗ್ರೆಸಿವ್ ಥರಾನ್ ವೆವಸ್ಥೆಕ್ ಧರ್ನ್ ಹಾಲಯ್ತಾ ? ಮ್ಹಳ್ಳೆಂ ಕಳ್ಟಾ. ಹಿ ವಾಡಾವಳ್ ಕಾಂಯ್ ಎಕಾ ದಿಸಾಚಿ ನಂಯ್.

ತೇಜಸ್ವಿಚಾ ತಬರಾಚಾ ಕಾಣಿಯೆಂತ್ ಅಸಹಾಯಕ್ ತಬರ ಶೆಟ್ಟಿ ಎಕಾ ಪಾಂವ್ಡ್ಯಾರ್ ಮ್ಹಣ್ಟಾ - ಹ್ಯಾ ಭೃಶ್ಟ್ ಸ್ವತಂತ್ರಾ ಪ್ರಾಸ್ ಬ್ರಿಟಿಶ್ ರಾಜ್ವಟ್ಕಿ ಕಿತ್ಲಿಗೀ ಬರಿ ಆಸ್ಲಿ. ಅಕೇರಿಕ್ ತೋ ಪಿಸೊ ಜಾತಾ. ಪೂಣ್ ಒಫಿಸ್ ಒಫಿಸ್ ಹಾಂತ್ಲೊ ಮುತ್ಸದ್ಧಿಲಾಲ್ ಪಿಸೊ ಜಾಯ್ನಾ, ಸ್ವತ್ರಂತ್ರ್ ದೇಸಾ ಪ್ರಾಸ್ ಬ್ರಿಟಿಶಾಂಚೆಂ ಗುಲಾಮ್‌ಪಣ್ ಬರೆಂ ಆಸ್ಲೆಂ ಮ್ಹಣ್‌ಯೀ ಚಿಂತಿನಾ. ಶಾಂತ್‌ಪಣಿ ಚಿಂತೂನ್ , ಶಾಣೆಪಣಾನ್ ವೆವಸ್ಥೆ ಭಿತರ್‌ಚ್ ರಾವೊನ್ ಪರ್ಯಾಯ್ ವಾಟ್ ಸೊಧ್ತಾ ಮಾತ್ ನಯ್, ಭೃಶ್ಟ್ ಅಧಿಕಾರಿಂಕ್ ಬೂದ್ ಶಿಕಯ್ತಾ.

ಹ್ಯಾ ದೋನ್ ಗಜಾಲಿಂನಿ ಬಾರಿಕ್ಸಾಣೆಬ್ ಸಮಾಜ್ ಕಶಿ ಚಲ್ತಾ ಮ್ಹಣ್ ತಪಾಸುನ್ ಪಳಯ್ಲ್ಯಾರ್ - 

ಅಸಹಾಯಕ್ ಜಾವ್ನ್ , ಧಯ್ರ್ ಸಾಂಡುನ್,  ದೆಧೆಸ್ಪೊರ್ ಜಾವ್ನ್ , ಪಿಸಾಂತೂರ್ ಜಾಲ್ಲ್ಯಾ ತಬರ ಶೆಟ್ಟಿ ವಿಶ್ಯಾಂತ್ ಲೋಕ್ ಫಕತ್ ಪೆಂಟೆಂತ್ ಉಲಯ್ಲೊ, ಹಾಸ್ಲೊ ತರ್, ಧಯ್ರ್ ಘೆವ್ನ್ , ಬುದ್ವಂತ್ಕಾಯ್ ವಾಪರುನ್,  ಝುಜೊನ್, ಭೃಶ್ಟಾಂಕ್ ಜಯ್ಲಾಕ್ ಧಾಡ್ನ್ ಬೂದ್ ಶಿಕಯಿಲ್ಲ್ಯಾ ಮುತ್ಸದ್ಧಿಕ್ ಇಂಡಿಯಾ ಗೆಟಿರ್ ಮಾತ್ಯಾರ್ ಘೆವ್ನ್ ನಾಚ್ಲೊ.

ಆಯ್ಚಿ ಗಜಾಲ್ ಪಳಯ್ಲ್ಯಾರ್ - ಕೇಜ್ರಿವಾಲಾಚ್ಯಾ ಭಿತರ್ ಖರೆಂಪಣ್ ಆಸ್ಲ್ಯಾರೀ, ಇಂಡಿಯಾ ಗೇಟಿರ್ ಪಬ್ಲಿಕ್ ಅದಾಲತ್ ಚಲಯ್ತಾನಾ ಮುತ್ಸದ್ಧಿಲಾಲಾಕ್ ನಿರ್ನಾಮ್ ಕರುಂಕ್ ಸರ್ವ್ ಭೃಶ್ಟ್ ಸಾಂಗಾತಾ ಮೆಳ್‌ಲ್ಲೇ‌ಪರಿಂ [ ಪಿಂತುರಾಚೆಂ ಕ್ಲೈಮ್ಯಾಕ್ಸ್ ಪಳೆಯಾ ] ಭೃಶ್ಟ್ ಸಗ್ಳೆ ಸಾಂಗಾತಾ ಮೆಳ್ಳ್ಯಾತ್ ತಸೆಂ ದಿಸ್ತಾ. ಆಯ್ಲೆವಾರ್ ಎನ್‍ಡಿಟಿವಿ ಹ್ಯಾ ಚಾನೆಲಾಕ್ ಅಣ್ಣಾ ಹಜಾರೆನ್ ದಿಲ್ಲ್ಯಾ ಸಂದರ್ಶನಾಂತ್ ಅಣ್ಣಾನ್ ಮ್ಹಳಾಂ - ಹಾಂವೆ ಫಕತ್ ಎಕೆಕಾಚ್ ಮಂತ್ರಿಕ್  ವಿಂಚುನ್ ತಾಂಚೆ ಘೊಟಾಳೆ ಭಾಯ್ರ್ ಘಾಲ್ನ್ ಸಾತಾಟ್ ಜಣಾಂಕ್ ಘರಾ ಧಾಡ್ಲೆಂ, ಪೂಣ್ ಕೇಜ್ರಿವಾಲ್ ಏಕ್‌ಚ್ ಪಾವ್ಟಿಂ ಸಗ್ಳ್ಯಾಂಕ್ ನಾಗ್ಡೆಂ ಕರುಂಕ್ ವೆತಾ ಜಾಲ್ಲ್ಯಾನ್,  ತೆ ಸಗ್ಳೆ ಸಾಂಗಾತಾ ಮೆಳ್ಟಾತ್. ಕೇಜ್ರಿವಾಲಾಕ್ ಕಶ್ಟ್ ಆಸಾತ್. 

ಏಕ್ ಘಡಿ ಹ್ಯೊ ಸಗ್ಳೆ ಗಜಾಲಿ ವರವ್ನ್ ಪಳೆಯ್ತಾನಾ ಮ್ಹಾಕಾ ಭೊಗ್ತಾ , ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ಹೊ ದೇಸ್ , ವೆವಸ್ಥಾ , ಮನಿಸ್ ಆನಿ ಸಮಾಜಿಕ್ ಮನಾತಿತಿ ಕಿತ್ಲ್ಯಾ ವೇಗಾನ್ ಬದಲ್ತೇ ಆಸಾ ನಂಯ್‌ಗೀ ?